ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠵᠢᠷᠭᠤᠳᠤᠭᠠᠷ ᠪᠦᠯᠦᠭ -4 >᠂ ᠶᠡᠬᠡ ᠡᠯᠡᠰᠦᠨ ᠰᠢᠭᠤᠷᠭᠠ Бүргэд харьд үүрэлдэггүй – Ж᠂ Пүрэв <6-р бүлэг ~4>. их элсэн шуурга
11ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ ᠡᠭᠦᠷ ᠡᠴᠡ ᠪᠡᠨ ᠬᠠᠭᠠᠴᠠᠭᠰᠠᠨ ᠪᠦᠷᠭᠦᠳ ᠦᠨ ᠵᠤᠯᠵᠠᠭᠠ
ᠳᠥᠷᠪᠡ - ᠶᠡᠬᠡ ᠡᠯᠡᠰᠦᠨ ᠰᠢᠭᠤᠷᠭᠠ
ᠬᠠᠷᠠᠬᠣᠷᠣᠮ ᠳ᠋ᠤ᠌ ᠲᠠᠢᠪᠤᠩ ᠪᠠᠢᠳᠠᠯ ᠲᠣᠭᠲᠠᠵᠤ᠂ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠰᠡᠷᠭᠦᠨ᠂ ᠬᠡᠳᠦᠨ ᠰᠠᠷᠠ ᠪᠠᠷ ᠪᠣᠭᠣᠭᠳᠠᠵᠤ ᠪᠠᠢᠭᠰᠠᠨ ᠬᠠᠷᠢ ᠶ᠋ᠢᠨ ᠭᠡᠢᠴᠢᠳ᠂ ᠵᠢᠭᠤᠯᠴᠢᠳ ᠴᠥᠭᠡᠪᠲᠦᠷ ᠴᠦ᠍ ᠭᠡᠰᠡᠨ ᠢᠷᠡᠵᠦ ᠡᠬᠢᠯᠡᠪᠡ᠃
ᠬᠤᠪᠢᠯᠠᠢ ᠶ᠋ᠢ《ᠨᠡᠢᠰᠯᠡᠯ ᠢ᠋ ᠱᠠᠩᠳᠤ ᠬᠣᠲᠠ ᠳ᠋ᠤ᠌ ᠠᠪᠠᠴᠢᠭᠰᠠᠨ》 ᠭᠡᠵᠦ ᠵᠠᠷᠯᠠᠭᠰᠠᠨ ᠴᠠᠭ ᠠ᠋ᠴᠠ ᠡᠬᠢᠯᠡᠭᠡᠳ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠳ᠋ᠤ᠌《ᠤᠯᠤᠰ ᠤ᠋ᠨ ᠲᠥᠪ ᠠᠯᠠᠭᠠ ᠪᠣᠯᠭᠠᠭᠰᠠᠨ》᠂《ᠲᠡᠨᠳᠡ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠠᠮᠢᠨ ᠤ᠋ ᠬᠡᠷᠡᠭ ᠲᠠᠰᠤᠷᠠᠬᠤ ᠪᠠᠨ ᠪᠠᠢᠭᠰᠠᠨ》᠂《ᠬᠤᠪᠢᠯᠠᠢ᠂ ᠠᠬᠠ ᠮᠥᠩᠬᠡ ᠬᠠᠭᠠᠨ ᠤ᠋ ᠣᠷᠣ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠬᠤ ᠭᠡᠵᠦ ᠤᠯᠠᠢᠷᠠᠭᠰᠠᠨ ᠳᠠᠭᠠᠷᠢᠯᠲᠠ ᠬᠢᠨ᠂ ᠬᠢᠲᠠᠳ ᠣᠯᠠᠨ ᠲᠦᠮᠡᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ ᠲᠥᠷᠥᠭᠰᠡᠨ ᠳᠡᠭᠦᠦ ᠪᠡᠨ ᠪᠠᠭᠠᠯᠵᠠᠭᠤᠷᠳᠠᠨ ᠠᠯᠠᠬᠤ ᠭᠡᠵᠦ ᠨᠡᠢᠰᠯᠡᠯ ᠡᠴᠡ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠵᠤ ᠶᠠᠪᠤᠭᠤᠯᠤᠭᠰᠠᠨ》 ᠭᠡᠬᠦᠴᠢᠯᠡᠨ ᠦᠭᠡ ᠲᠠᠷᠬᠠᠵᠤ᠂ ᠦᠨᠡᠨ ᠬᠤᠳᠠᠯ ᠨᠢ ᠡᠰᠡ ᠮᠡᠳᠡᠭᠳᠡᠬᠦ ᠵᠦᠢᠯ ᠢ᠋ᠶ᠋ᠡᠷ ᠠᠪᠤᠮᠠᠭᠴᠠ ᠣᠯᠠᠨ ᠤ᠋ ᠳᠣᠲᠣᠷᠠ ᠪᠠᠰᠠ ᠲᠪᠨᠭᠡᠷᠡ ᠶᠠᠷᠢᠶᠠ ᠳᠡᠯᠭᠡᠷᠡᠭᠰᠡᠨ ᠪᠠᠢᠨᠠ᠃
ᠲᠤᠬᠠᠢᠯᠠᠪᠠᠯ᠄《ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠶᠢᠰᠦᠨ ᠬᠥᠯᠲᠦ ᠲᠤᠭ ᠢ᠋ ᠡᠷᠭᠦᠨ ᠦᠢ ᠲᠦᠮᠡᠨ ᠴᠡᠷᠢᠭ ᠲᠡᠢ ᠢᠷᠡᠵᠦ ᠨᠡᠢᠰᠯᠡᠯ ᠢ᠋ ᠡᠷᠭᠢᠭᠦᠯᠦᠨ ᠠᠪᠤᠭᠠᠳ ᠲᠦᠮᠡᠨ ᠣᠯᠠᠨ ᠮᠢᠨᠢ ᠠᠮᠤᠷ ᠲᠦᠪᠰᠢᠨ ᠰᠠᠭᠤᠵᠤ ᠪᠣᠢ ᠭᠡᠵᠦ ᠤᠷᠢᠶᠠᠯᠠᠨ ᠳᠠᠭᠤᠳᠠᠵᠤ ᠭᠡᠨᠡ》᠂《ᠣᠳᠣ ᠴᠠᠭ ᠲᠠᠢᠪᠤᠩ ᠪᠣᠯᠬᠤ ᠶᠤᠮ ᠪᠠᠢᠬᠤ᠂ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠤ᠋ ᠴᠡᠷᠢᠭ ᠨᠢ ᠲᠣᠯᠣᠭᠠᠢ ᠲᠠᠢ ᠦᠰᠦᠨ ᠡᠴᠡ ᠣᠯᠠᠨ ᠶᠤᠮ ᠪᠠᠢᠵᠠᠢ》᠂《ᠬᠤᠪᠢᠯᠠᠢ ᠶ᠋ᠢᠨ ᠰᠢᠳᠠᠷ ᠨᠣᠶᠠᠨ ᠶᠢᠰᠥᠩᠭᠡ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠳ᠋ᠤ᠌ ᠴᠢᠭᠴᠢ ᠪᠡᠷ ᠢ᠋ᠶ᠋ᠡᠨ ᠳᠣᠯᠣᠭᠠ ᠨᠡᠪᠲᠡ ᠬᠠᠷᠪᠤᠭᠤᠯᠤᠨ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠡᠮᠬᠦᠵᠦ ᠦᠬᠦᠭᠰᠡᠨ ᠭᠡᠨᠡ》᠂《ᠲᠡᠷᠡ ᠶᠢᠰᠥᠩᠭᠡ ᠨᠣᠶᠠᠨ ᠬᠤᠪᠢᠯᠠᠢ ᠠ᠋ᠴᠠ ᠰᠠᠷᠠ ᠪᠦᠷᠢ ᠲᠦᠮᠡᠨ ᠯᠠᠩ ᠮᠥᠩᠭᠥᠨ ᠦ᠌ ᠫᠦᠩᠯᠦ ᠠᠪᠳᠠᠭ᠂ ᠲᠡᠭᠦᠨ ᠦ᠌ ᠪᠡᠨ ᠣᠷᠣᠨ ᠳ᠋ᠤ᠌ ᠮᠣᠩᠭᠣᠯ ᠭᠠᠵᠠᠷ ᠠ᠋ᠴᠠ ᠭᠤᠸᠠ ᠰᠠᠢᠬᠠᠨ ᠠᠷᠪᠠᠨ ᠪᠦᠰᠡᠭᠦᠢ ᠶ᠋ᠢ ᠠᠩᠨᠠᠨ ᠣᠯᠵᠤ ᠯᠣᠯᠣᠢ ᠭᠡᠳᠡᠭ ᠶᠠᠩᠬᠠᠨ ᠡᠮᠡ ᠪᠡᠷ ᠳᠠᠮᠵᠢᠭᠤᠯᠤᠨ ᠬᠤᠪᠢᠯᠠᠢ ᠳ᠋ᠤ᠌ ᠥᠭᠳᠡᠭ ᠪᠠᠢᠭᠰᠠᠨ᠃ ᠲᠡᠢᠮᠦ ᠪᠣᠯᠬᠣᠷ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠰᠠᠭᠤᠳᠠᠭ ᠪᠦᠬᠦ ᠥᠬᠢᠳ ᠣᠯᠵᠢᠯᠠᠭᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠨᠢᠭᠤᠷ ᠢ᠋ᠶ᠋ᠠᠨ ᠬᠦ ᠪᠡᠷ ᠪᠣᠳᠣᠨ ᠬᠠᠷᠠᠯᠠᠭᠤᠯᠵᠤ ᠭᠠᠳᠠᠭᠤᠷ ᠭᠠᠷᠳᠠᠭ ᠪᠠᠢᠭᠰᠠᠨ》᠂《ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠨᠡᠢᠰᠯᠡᠯ ᠳ᠋ᠦ᠍ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ〈 ᠥᠬᠢᠳ ᠦ᠋ᠳ ᠮᠢᠨᠢ ᠭᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠ!〉 ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡ ᠲᠠᠷᠬᠠᠵᠠᠢ᠃ ᠡᠨᠡ ᠶᠠᠷᠢᠶᠠᠨ ᠤ᠋ ᠠᠯᠢ ᠨᠢ ᠦᠨᠡᠨ᠂ ᠶᠠᠮᠠᠷ ᠨᠢ ᠬᠤᠳᠠᠯ ᠪᠣᠯᠬᠤ ᠶ᠋ᠢ ᠬᠡᠨ ᠬᠥᠭᠡᠭᠡᠵᠦ ᠰᠢᠯᠭᠠᠬᠤ ᠪᠣᠢ᠃ ᠬᠠᠷᠢᠨ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠨᠡᠢᠰᠯᠡᠯ ᠳ᠋ᠦ᠍ ᠢᠷᠡᠭᠡᠳ ᠦᠢᠮᠡᠭᠡᠨ ᠬᠥᠭᠡᠭᠡᠭᠰᠡᠨ ᠦᠭᠡᠢ ᠪᠡᠷ ᠭᠡᠭᠦᠦ ᠮᠠᠯ ᠢ᠋ᠶ᠋ᠠᠨ ᠤᠶᠠᠨ᠂ ᠦᠨᠢᠶᠡ ᠮᠠᠯ ᠢ᠋ᠶ᠋ᠠᠨ ᠰᠠᠭᠠᠵᠤ ᠴᠠᠭᠠᠨ ᠢᠳᠡᠭᠡ ᠠᠷᠪᠢᠨ ᠠᠪᠴᠤ ᠠᠮᠤᠷ ᠵᠢᠮᠦᠷ ᠵᠤᠰᠠᠬᠤ ᠶ᠋ᠢ ᠬᠢᠴᠢᠶᠡ! ᠬᠠᠷᠠᠬᠣᠷᠣᠮ ᠤᠯᠤᠰ ᠤ᠋ᠨ ᠲᠥᠪ ᠨᠡᠢᠰᠯᠡᠯ ᠬᠡᠪ ᠢ᠋ᠶ᠋ᠡᠷ ᠪᠠᠢᠬᠤ ᠪᠣᠯᠤᠨᠠ᠃
ᠪᠢ ᠡᠪᠦᠭᠡᠳ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠮᠢᠨᠢ ᠪᠠᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠡᠨᠡ ᠲᠥᠷᠥᠯᠬᠢ ᠬᠣᠲᠠ ᠪᠠᠨ ᠬᠠᠷᠠ ᠰᠠᠨᠠᠭᠠᠲᠠᠨ ᠳ᠋ᠤ᠌ ᠪᠤᠵᠠᠷᠯᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠵᠣᠷᠢᠨᠠ ᠭᠡᠵᠦ ᠶᠡᠬᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠵᠠᠷᠯᠢᠭᠯᠠᠨ ᠬᠡᠯᠡᠭᠰᠡᠨ ᠨᠢ ᠦᠨᠡᠨ ᠲᠡᠢ ᠠᠵᠢ᠃
4 ᠳ᠋ᠦ᠍ᠭᠡᠷ ᠵᠢᠷᠠᠨ ᠤ᠋ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠦ᠋ᠨ ᠵᠤᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠡᠯᠳᠡᠪ ᠭᠠᠵᠢᠭᠤ ᠬᠥᠯ ᠬᠥᠰᠬᠡᠨ ᠦᠭᠡᠢ᠂ ᠲᠠᠢᠪᠤᠩ ᠰᠢᠨᠵᠢᠲᠡᠢ᠂ ᠬᠣᠲᠠ ᠶ᠋ᠢᠨ ᠶᠡᠬᠡ ᠬᠡᠷᠡᠮ ᠦ᠋ᠨ ᠬᠠᠭᠠᠯᠭᠠᠨ ᠤ᠋ ᠭᠠᠳᠠᠨᠠ ᠬᠤᠳᠠᠯᠳᠤᠭᠠᠨ ᠤ᠋ ᠵᠠᠬᠠ ᠰᠡᠷᠭᠦᠨ ᠳᠡᠯᠭᠡᠷᠡᠵᠦ᠂ ᠬᠥᠭᠵᠢᠶᠡᠨ ᠲᠡᠢ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠬᠥᠮᠦᠰ ᠦ᠋ᠨ ᠠᠮᠠᠨ ᠠ᠋ᠴᠠ ᠰᠣᠨᠣᠰᠤᠭᠳᠠᠵᠤ ᠪᠠᠢᠪᠠ᠃
ᠶᠡᠬᠡ ᠬᠣᠲᠠ ᠶᠢᠨ ᠭᠤᠲᠤᠮᠵᠢ ᠪᠠᠷ ᠥᠩᠭᠡ ᠲᠠᠢ ᠳᠡᠪᠡᠯ ᠢᠶᠡᠨ ᠡᠮᠦᠰᠦᠭᠰᠡᠨ ᠪᠦᠰᠡᠭᠦᠢᠴᠦᠦᠯ ᠨᠠᠷᠭᠢᠶᠠᠨ ᠱᠤᠤᠭᠢᠶᠠᠨ ᠢᠶᠠᠷ ᠭᠦᠶᠦᠯᠳᠦᠵᠦ ᠶᠠᠪᠤᠨᠠ᠃
ᠭᠡᠬᠦ ᠳ᠋ᠦ᠍ ᠪᠡᠨ ᠠᠷᠢᠬᠪᠦᠢ᠍ᠬᠡ ᠨᠤᠲᠤᠭ ᠳᠠᠶᠠᠭᠠᠷ ᠴᠡᠷᠢᠭ ᠦ᠋ᠨ ᠰᠢᠨᠡ ᠳᠠᠢᠴᠢᠯᠠᠭᠠ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠪᠠᠨ ᠬᠡᠨ ᠡᠴᠡ ᠴᠦ᠍ ᠨᠢᠭᠤᠭᠰᠠᠨ ᠦᠭᠡᠢ᠃
ᠣᠷᠬᠣᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠪᠣᠯᠤᠨ ᠰᠢᠩᠬᠤ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠴᠠᠪᠴᠢᠯᠳᠤᠬᠤ ᠳᠠᠳᠤᠯᠭᠠ ᠦᠢᠯᠡᠳᠦᠭᠰᠡᠭᠡᠷ ᠪᠠᠢᠯᠠ᠃
ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠶᠡ ᠪᠡᠷ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠣᠷᠣᠯᠴᠠᠨ《ᠨᠡᠢᠰᠯᠡᠯ ᠶᠠᠭᠤ ᠪᠠᠨ ᠬᠠᠮᠠᠭᠠᠯᠠᠬᠤ᠂ ᠮᠣᠩᠭᠣᠯ ᠤᠯᠤᠰ ᠢ᠋ᠶ᠋ᠠᠨ ᠬᠢᠲᠠᠳᠴᠢᠯᠠᠭᠳᠠᠭᠰᠨ ᠬᠤᠪᠢᠯᠠᠢ ᠠ᠋ᠴᠠ ᠭᠠᠭᠴᠠᠢᠯᠠᠬᠤ ᠴᠢᠳᠠᠪᠤᠷᠢ ᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠨᠠ᠃
ᠡᠨᠡ ᠦᠭᠡ ᠪᠠᠰᠠ ᠯᠠ ᠰᠤᠨᠵᠢᠷᠠᠨ《ᠬᠤᠪᠢᠯᠠᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠯᠠᠨ ᠵᠠᠮ ᠤ᠋ᠨ ᠠᠭᠤᠯᠵᠠᠪᠤᠷᠢ ᠳ᠋ᠤ᠌ ᠮᠣᠳᠣᠨ ᠱᠣᠩ ᠳ᠋ᠤ᠌ ᠬᠠᠲᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠬᠠᠭᠠᠨ ᠵᠠᠷᠯᠢᠭᠯᠠᠪᠠ》 ᠭᠡᠰᠡᠨ ᠴᠤᠤ ᠪᠣᠯᠤᠨ ᠨᠢᠭᠡᠨ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠰᠢᠯᠵᠢᠵᠦ ᠪᠠᠢᠯᠠ᠃ ᠤᠭ ᠦᠭᠡᠨ ᠦ᠌ ᠴᠠᠭᠠᠨᠠ ᠪᠠᠰᠠ ᠤᠴᠢᠷ ᠪᠠᠢᠵᠠᠢ᠃
ᠠᠷᠢᠬᠪᠦᠢ᠍ᠬᠡ ᠳ᠋ᠦ᠍ ᠬᠡᠳᠦ ᠬᠡᠳᠦᠨ ᠡᠷᠭᠦᠬᠦ ᠪᠢᠴᠢᠭ ᠢᠷᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠪᠢᠴᠢᠭ ᠦ᠋ᠳ ᠢ᠋ ᠲᠦᠮᠡᠲᠦ ᠶ᠋ᠢᠨ ᠵᠠᠬᠢᠷᠤᠭᠴᠢ ᠨᠣᠶᠠᠳ᠂ ᠵᠠᠷᠢᠮ ᠤᠭᠰᠠᠭᠠ ᠵᠠᠯᠭᠠᠮᠵᠢᠯᠠᠭᠰᠠᠨ ᠲᠠᠢᠵᠢ᠂ ᠲᠦᠰᠢᠮᠡᠳ ᠨᠠᠷ ᠦᠢᠯᠡᠳᠦᠨ᠂ ᠨᠡᠷᠡ ᠬᠠᠶᠢᠭ ᠢ᠋ᠶ᠋ᠠᠨ ᠪᠢᠴᠢᠭᠰᠡᠨ ᠪᠠᠢᠪᠠ᠃ ᠤᠭ ᠪᠢᠴᠢᠭ ᠲᠦ᠍ ᠥᠭᠦᠯᠡᠭᠰᠡᠨ ᠨᠢ᠄《ᠶᠡᠬᠡ ᠬᠠᠭᠠᠨᠲᠠᠨ ᠮᠢᠨᠢ ᠲᠠᠭᠠᠯᠠᠵᠤ ᠪᠣᠯᠭᠣᠭᠠᠨ ᠥᠷᠥᠰᠢᠶᠡ! ᠪᠢᠳᠡ ᠬᠢᠲᠠᠳ ᠪᠣᠯᠤᠨ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠰᠣᠨᠣᠰᠴᠤ ᠰᠠᠭᠤᠬᠤ ᠬᠦᠰᠡᠯᠡᠩ ᠦᠭᠡᠢ ᠪᠠᠢᠨᠠ᠃ ᠪᠢᠳᠡ ᠡᠪᠦᠭᠡᠨ ᠪᠣᠭᠳᠠ ᠶ᠋ᠢᠨ ᠡᠭᠦᠰᠬᠡᠨ ᠪᠠᠢᠭᠤᠯᠤᠭᠰᠠᠨ ᠨᠡᠢᠰᠯᠡᠯ ᠬᠣᠲᠠ ᠪᠠᠨ ᠬᠠᠮᠢᠭᠠᠰᠢ ᠨᠢ ᠴᠦ᠍ ᠨᠡᠭᠦᠯᠭᠡᠬᠦ ᠬᠦᠰᠡᠯ ᠦᠭᠡᠢ ᠪᠢᠯᠡ᠃ ᠪᠢᠳᠡ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠤ᠋ ᠠᠯᠳᠠᠷ ᠢ᠋ ᠠᠷᠢᠭᠤᠨ ᠪᠠᠢᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠨᠡ᠁》᠂《ᠥᠷᠥᠰᠢᠶᠡᠵᠦ ᠳᠠᠭᠠᠯᠠᠬᠤ ᠠᠵᠢᠶᠠᠮᠤ᠂ ᠬᠠᠭᠠᠨᠲᠠᠨ ᠮᠢᠨᠢ! ᠬᠠᠷᠠ ᠰᠠᠨᠠᠭᠠᠲᠤ ᠬᠤᠪᠢᠯᠠᠢ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠢ᠋ᠶ᠋ᠠᠷ ᠰᠢᠲᠦᠭᠡᠨ ᠬᠢᠵᠦ᠂ ᠬᠢᠲᠠᠳ ᠶᠠᠩᠬᠠᠨ ᠢ᠋ᠶ᠋ᠠᠷ ᠬᠥᠨᠵᠢᠯᠡ ᠪᠡᠨ ᠳᠦᠭᠦᠷᠭᠡᠨ ᠬᠡᠪᠲᠡᠵᠦ ᠪᠠᠢᠭᠠ ᠡᠨᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠢ᠋ ᠴᠠᠭᠠᠵᠠᠯᠠᠬᠤ ᠶᠣᠰᠣᠲᠠᠢ᠃ ᠡᠭᠦᠨ ᠢ᠋ ᠲᠩᠷᠢ ᠲᠠᠭᠠᠯᠠᠬᠤ ᠪᠢᠵᠡ ᠠ᠋᠃ ᠡᠢᠮᠦ ᠳ᠋ᠦ᠍ ᠰᠠᠬᠢᠭᠤᠰᠤ ᠪᠠᠨ ᠪᠠᠭᠤᠯᠭᠠᠨ ᠳᠠᠭᠠᠳᠬᠠᠯ ᠬᠢᠭᠡᠳ ᠪᠢᠳᠡ ᠴᠡᠷᠢᠭᠯᠡᠨ ᠮᠣᠷᠳᠠᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ ᠭᠡᠵᠦ ᠪᠣᠭᠣᠯ ᠪᠢ ᠮᠤᠩᠬᠠᠭᠯᠠᠨᠠ᠃ ᠬᠠᠭᠠᠨᠲᠠᠨ ᠮᠢᠨᠢ ᠡᠭᠦᠨ ᠢ᠋ ᠲᠠᠭᠠᠯᠠᠨ ᠰᠣᠶᠣᠷᠬᠠᠵᠤ ᠪᠣᠯᠭᠣᠭᠠᠴᠢ!᠁》᠂《ᠮᠥᠩᠬᠡ ᠲᠩᠷᠢ ᠥᠷᠥᠰᠢᠶᠡᠲᠦᠭᠡᠢ! ᠪᠢᠳᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠣᠳᠣ ᠤᠶᠠᠭᠠ ᠨᠢ ᠲᠠᠭᠠᠷᠠᠭᠰᠠᠨ ᠮᠣᠷᠢ ᠲᠠᠢ ᠪᠠᠨ ᠬᠠᠮᠲᠤ ᠵᠢᠪᠬᠤᠷᠠᠵᠦ ᠪᠠᠢᠨᠠ᠃ ᠪᠢᠳᠡ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠡᠴᠡ ᠠᠶᠤᠬᠤ ᠦᠭᠡᠢ ᠪᠣᠯᠪᠠ᠃ ᠣᠳᠣ ᠪᠢᠳᠡᠨ ᠳ᠋ᠦ᠍ ᠬᠣᠶᠠᠷ ᠲᠦᠮᠡ ᠢᠯᠡᠭᠦᠦ ᠴᠡᠷᠢᠭ᠂ ᠭᠤᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠰᠢᠯᠢᠳᠡᠭ ᠮᠣᠷᠢᠳ ᠪᠠᠢᠨᠠ᠃ ᠣᠳᠣ ᠳᠠᠷᠤᠢ ᠬᠥᠳᠡᠯᠵᠦ ᠱᠠᠩᠳᠤ ᠬᠣᠲᠠ ᠶ᠋ᠢ ᠰᠠᠶᠢ ᠬᠤᠪᠢᠯᠠᠢ ᠶᠠᠭᠠᠬᠢᠵᠤ ᠬᠠᠷᠠᠬᠣᠷᠣᠮ ᠢ᠋ ᠳᠠᠭᠠᠷᠢᠭᠰᠠᠨ ᠠᠳᠠᠯᠢ ᠪᠠᠷ ᠭᠡᠨᠡᠳᠡᠭᠦᠯᠦᠨ ᠳᠠᠭᠠᠷᠢᠶᠠ᠃ ᠬᠠᠭᠠᠨᠲᠠᠨ ᠮᠢᠨᠢ ᠪᠣᠯᠭᠣᠭᠠᠵᠤ ᠰᠣᠶᠣᠷᠬᠠ᠁》᠂《ᠬᠢᠲᠠᠳ ᠪᠣᠯᠵᠤ ᠤᠷᠪᠠᠭᠰᠠᠨ ᠬᠤᠪᠢᠯᠠᠢ ᠨᠣᠶᠠᠨ ᠢ᠋ ᠢᠯᠠᠨ ᠲᠠᠢᠯᠵᠤ ᠶᠠᠯᠠ ᠠᠰᠠᠭᠤᠬᠤ ᠦᠭᠡᠢ ᠪᠣᠯ ᠮᠣᠩᠭᠣᠯ ᠲᠦᠮᠡᠨ ᠠᠮᠤᠷ ᠵᠠᠶᠠᠭᠠ ᠦᠵᠡᠬᠦ ᠦᠭᠡᠢ ᠰᠢᠨᠵᠢᠲᠡᠢ ᠪᠣᠯᠤᠯᠠ᠃ ᠡᠨᠡ ᠠᠢᠯᠠᠳᠬᠠᠯ ᠡᠨᠳᠡᠭᠦᠷᠡᠯ ᠪᠢᠰᠢ ᠭᠡᠵᠦ ᠪᠢ ᠮᠤᠩᠬᠠᠭᠯᠠᠨᠠ᠃ ᠪᠣᠯᠣᠮᠵᠢᠲᠠᠢ ᠴᠠᠭ ᠢ᠋ ᠠᠯᠳᠠᠪᠠᠯ ᠬᠠᠷᠠᠮᠰᠠᠵᠤ ᠪᠠᠷᠠᠰᠢ ᠦᠭᠡᠢ ᠮᠠᠭᠤ ᠬᠡᠷᠡᠭ ᠲᠤᠯᠭᠠᠷᠠᠵᠤ ᠮᠡᠳᠡᠨᠡ᠃ ᠡᠵᠡᠨᠲᠡᠨ ᠮᠢᠨᠢ! ᠲᠠ ᠬᠠᠭᠠᠨ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠬᠦ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠰᠣᠶᠣᠷᠬᠠᠵᠤ ᠪᠣᠯᠭᠣᠭᠠᠨᠠ ᠤᠤ! ᠪᠢᠳᠡ ᠬᠦ ᠬᠤᠶᠠᠭ ᠢ᠋ᠶ᠋ᠠᠨ ᠪᠡᠶᠡ ᠡᠴᠡ ᠪᠡᠨ ᠰᠠᠯᠭᠠᠬᠤ ᠦᠭᠡᠢ ᠶᠠᠪᠤᠭᠠ ᠶ᠋ᠢ ᠬᠠᠷᠠᠵᠤ ᠪᠣᠯᠭᠣᠭᠠ!》 ᠭᠡᠬᠦᠴᠢᠯᠡᠨ ᠪᠢᠴᠢᠭ ᠦ᠋ᠳ ᠪᠠᠢᠯᠠ᠃ ᠠᠷᠢᠬᠪᠦᠢ᠍ᠬᠡ ᠲᠡᠷᠡ ᠪᠦᠬᠦᠨ ᠢ᠋ ᠳᠠᠷᠠᠭᠠᠯᠠᠨ ᠦᠵᠡᠵᠦ᠂ ᠣᠷᠳᠣᠨ ᠳ᠋ᠤ᠌ ᠪᠠᠨ ᠬᠦᠢᠲᠡᠨ ᠠᠢᠷᠠᠭ ᠵᠠᠯᠭᠢᠯᠠᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠨᠣᠢᠷ ᠢ᠋ᠶ᠋ᠠᠨ ᠠᠯᠳᠠᠵᠤ ᠪᠠᠢᠪᠠ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ ᠪᠦᠬᠦ ᠬᠡᠷᠡᠭ ᠢ᠋ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠲᠡᠨ ᠬᠠᠷᠠᠵᠤ᠂ ᠲᠡᠷᠡ ᠪᠦᠬᠦᠨ ᠢ᠋ ᠱᠠᠩᠳᠤ ᠬᠣᠲᠠ ᠤᠷᠤᠭᠤ ᠳᠠᠮᠵᠢᠭᠤᠯᠤᠨ ᠪᠠᠢᠭᠠ ᠬᠥᠮᠦᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠰᠢᠭᠢᠳᠦᠨ ᠪᠣᠢ ᠶ᠋ᠢ ᠬᠡᠨ ᠶᠠᠭᠠᠬᠢᠨ ᠲᠠᠨᠢᠵᠤ ᠮᠡᠳᠡᠬᠦ ᠪᠢᠯᠡ᠃ ᠲᠡᠢᠮᠦ ᠡᠲᠡᠭᠡᠳ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠴᠤ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠬᠤᠪᠢᠯᠠᠢ ᠳ᠋ᠤ᠌ ᠬᠦᠷᠭᠡᠬᠦ ᠳ᠋ᠦ᠍ ᠳᠣᠣᠷᠠ ᠬᠠᠶᠠᠭᠠᠳ ᠲᠠᠪᠢᠨ ᠡᠷᠦᠬᠡ ᠬᠠᠮᠵᠢᠯᠴᠠᠭᠠ ᠪᠠᠷ ᠱᠠᠩᠨᠠᠭᠤᠯᠤᠨᠠ ᠭᠡᠳᠡᠭ ᠢ᠋ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠯᠠᠵᠤ ᠰᠠᠭᠤᠭᠠ ᠪᠢᠵᠡ ᠠ᠋᠃ ᠲᠡᠷᠡ ᠡᠲᠡᠭᠡᠳ ᠠᠷᠢᠬᠪᠦᠢ᠍ᠬᠡ ᠳ᠋ᠦ᠍ ᠬᠡᠨ ᠬᠡᠨ ᠰᠢᠳᠠᠷ ᠪᠠᠢᠨᠠ᠃ ᠶᠠᠮᠠᠷ ᠨᠣᠶᠠᠨ ᠶᠠᠭᠤ ᠶ᠋ᠢ ᠰᠠᠨᠠᠯ ᠪᠣᠯᠭᠠᠵᠤ ᠪᠠᠢᠨᠠ ᠪᠣᠢ ᠭᠡᠳᠡᠭ ᠢ᠋ ᠪᠠᠰᠠ ᠳᠠᠩᠰᠠᠯᠠᠨ᠂ ᠤᠭ ᠪᠢᠴᠢᠭ ᠢ᠋ᠶ᠋ᠡᠨ ᠱᠠᠩᠳᠤ ᠤᠷᠤᠭᠤ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠶ᠋ᠢ ᠨᠡᠪᠲᠡᠷᠬᠡᠢ ᠠᠵᠢᠭᠴᠢ ᠪᠠᠷ ᠢ᠋ᠶ᠋ᠠᠨ ᠪᠢᠯᠢᠭᠦᠨ ᠭᠠᠳᠠᠷᠯᠠᠵᠤ ᠪᠠᠢᠪᠠ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠬᠥᠮᠦᠨ ᠦ᠌ ᠳᠣᠲᠣᠭᠠᠳᠤ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠪᠠᠷ ᠪᠠᠷᠤᠭ ᠨᠡᠪᠲᠡ ᠬᠠᠷᠠᠳᠠᠭ ᠲᠡᠷᠡ ᠡᠷᠡ ᠵᠤᠨᠵᠢᠨ ᠪᠡᠶᠡ ᠰᠢᠷᠬᠠ ᠲᠠᠢ ᠶ᠋ᠢᠨ ᠤᠴᠢᠷ ᠭᠡᠷ ᠲᠦ᠍ ᠪᠡᠨ ᠬᠡᠪᠲᠡᠵᠡᠢ᠃ ᠱᠠᠩᠳᠤ— ᠬᠠᠷᠠᠬᠣᠷᠣᠮ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠵᠠᠮ ᠬᠠᠷᠢᠯᠴᠠᠭᠠ ᠨᠡᠭᠡᠭᠡᠯᠲᠡ ᠲᠡᠢ ᠤᠴᠢᠷ ᠠᠶᠠᠨ ᠵᠢᠩ ᠦ᠋ᠨ ᠪᠣᠯᠤᠨ ᠠᠯᠪᠠᠨ ᠠᠮᠢᠨ ᠬᠡᠷᠡᠭ ᠢ᠋ᠶ᠋ᠡᠷ ᠭᠠᠳᠠᠭᠠᠳᠤ᠂ ᠳᠣᠲᠣᠭᠠᠳᠤ ᠶ᠋ᠢᠨ ᠬᠥᠮᠦᠰ ᠵᠣᠷᠴᠢᠭᠰᠠᠭᠠᠷ ᠪᠠᠢᠭᠠ᠂ ᠲᠡᠷᠡ ᠪᠦᠬᠦᠨ ᠢ᠋ ᠠᠯᠢ ᠴᠦ᠍ ᠲᠠᠯᠠ ᠴᠠᠭᠳᠠᠬᠤ ᠠᠷᠭᠠ ᠦᠭᠡᠢ ᠪᠠᠢᠪᠠ᠃ ᠪᠠᠰᠠ ᠶᠢᠰᠥᠩᠭᠡ ᠨᠣᠶᠠᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ᠂ ᠲᠡᠭᠦᠨ ᠦ᠌ ᠳᠣᠲᠣᠨᠣ ᠶ᠋ᠢᠨ ᠵᠠᠷᠢᠮ ᠴᠥᠭᠡᠨ ᠲᠦᠰᠢᠮᠡᠳ ᠪᠡᠶᠡ ᠪᠡᠨ ᠨᠢᠭᠤᠨ ᠶᠠᠪᠤᠵᠤ ᠬᠠᠷᠢᠭᠤ ᠶ᠋ᠢ ᠠᠪᠤᠨᠠ ᠭᠡᠮᠡᠨ ᠳᠣᠲᠣᠷᠠ ᠪᠠᠨ ᠬᠠᠷᠠ ᠰᠠᠨᠠᠭᠠ ᠡᠭᠦᠷᠯᠡᠭᠦᠯᠦᠨ ᠪᠣᠢ ᠨᠢ ᠮᠡᠳᠡᠭᠡᠵᠢ᠃
ᠥᠷᠯᠥᠭᠡ ᠡᠷᠲᠡ ᠬᠠᠷᠠ ᠬᠣᠷᠣᠮ ᠤ᠋ᠨ ᠲᠥᠪ ᠲᠦ᠍ ᠮᠥᠩᠭᠥᠨ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠵᠣᠭᠤᠯᠲᠠᠲᠠᠢ ᠪᠠᠢᠳᠠᠭ ᠶᠡᠬᠡ ᠬᠡᠩᠭᠡᠷᠭᠡ ᠫᠢᠵᠢᠭᠢᠨᠡᠨ᠂ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠳ᠋ᠤ᠌ ᠵᠡᠰ ᠪᠦᠷᠢᠶᠡᠨ ᠦ᠌ ᠳᠠᠭᠤ ᠶᠠᠩ ᠶᠠᠩ ᠬᠢᠯᠡ᠃ ᠡᠵᠡᠨ ᠬᠠᠭᠠᠨ ᠤ᠋ ᠬᠡᠪᠲᠡᠭᠦᠯ ᠴᠡᠷᠢᠭ᠂《ᠣᠷᠬᠣᠨ》 ᠲᠦᠮᠡᠲᠦ᠂ ᠰᠠᠶᠢ ᠲᠠᠲᠠᠭᠳᠠᠭᠰᠠᠨ ᠰᠢᠨᠡ ᠲᠦᠮᠡᠲᠦ ᠪᠦᠭᠦᠳᠡ ᠨᠡᠢᠯᠡᠨ ᠡᠮᠦᠨᠡ ᠵᠦᠭ ᠵᠣᠷᠢᠵᠤ ᠬᠥᠳᠡᠯᠬᠦ ᠨᠢ ᠶᠠᠭᠤ ᠶ᠋ᠢ ᠵᠣᠷᠢᠨ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠠᠷᠢᠬᠪᠥ᠋ᠬᠡ ᠬᠠᠭᠠᠨ ᠳᠡᠷᠭᠡᠳᠡ ᠪᠡᠨ ᠡᠪᠦᠭᠡᠨ ᠪᠣᠭᠳᠠ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠲᠠᠮᠠᠭᠠ᠂ ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠲᠤᠭ ᠢ᠋ ᠵᠠᠯᠠᠨ᠂ ᠰᠡᠦᠬᠡ ᠲᠡᠷᠭᠡ ᠪᠡᠨ ᠰᠤᠯᠠ ᠶᠠᠪᠤᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠠᠭᠠᠨ ᠵᠢᠰᠦᠮ ᠦ᠋ᠨ ᠬᠤᠷᠳᠤᠨ ᠮᠣᠷᠢ ᠬᠥᠯᠦᠭᠯᠡᠵᠠᠢ᠃ ᠬᠠᠭᠠᠨ ᠤ᠋ ᠪᠢᠯᠳᠠᠯᠢᠭ ᠰᠠᠢᠬᠠᠨ ᠪᠡᠶᠡ ᠶ᠋ᠢᠨ ᠦᠵᠡᠰᠬᠦᠯᠡᠩ ᠭᠤᠸᠠ ᠨᠢ ᠲᠣᠳᠣᠷᠠᠵᠤ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠳᠣᠣᠷᠠ ᠡᠷᠭᠢᠯᠳᠦᠬᠦ ᠬᠤᠷᠴᠠ ᠬᠠᠷᠠᠴᠠ ᠲᠠᠢ ᠨᠢᠳᠦᠨ ᠦ᠌ ᠬᠢᠨᠢ ᠭᠠᠯ ᠬᠣᠯᠠ ᠶ᠋ᠢ ᠪᠣᠯᠭᠣᠭᠠᠨ ᠬᠠᠷᠠᠵᠤ ᠶᠠᠪᠤᠯᠠ᠃
ᠶᠡᠬᠡ ᠴᠡᠷᠢᠭ ᠠᠨᠠᠢ ᠯᠠ ᠭᠤᠷᠪᠠ ᠳᠥᠷᠪᠡ ᠬᠣᠨᠣᠭ ᠠᠶᠠᠯᠠᠭᠠᠳ ᠭᠣᠪᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ᠃ ᠨᠠᠮᠤᠷ ᠴᠠᠭ ᠲᠤ ᠣᠷᠣᠢᠲᠠᠵᠤ ᠣᠷᠣᠭᠰᠠᠨ ᠪᠣᠷᠣᠭᠠᠨ ᠤ᠋ ᠳᠠᠷᠠᠭᠠ ᠬᠡᠨᠵᠡᠯᠡᠭᠰᠡᠨ ᠳᠠᠭᠠᠨᠠ ᠶ᠋ᠢᠨ ᠦᠨᠦᠷ ᠬᠠᠮᠠᠷ ᠱᠠᠷᠬᠢᠷᠠᠭᠤᠯᠤᠨ᠂ ᠬᠠᠷᠠᠭᠰᠠᠨ ᠵᠦᠭ ᠪᠦᠷᠢ ᠳ᠋ᠦ᠍ ᠪᠣᠰᠤᠭᠠ ᠵᠡᠷᠭᠡᠯᠡᠭᠡ ᠪᠠᠷᠠᠯᠵᠠᠭᠠᠳ᠂ ᠪᠠᠢᠨ ᠪᠠᠢᠨ ᠨᠣᠭᠣᠭᠠᠷᠠᠵᠤ ᠬᠠᠷᠠᠭᠳᠠᠬᠤ ᠵᠠᠭ ᠤ᠋ᠨ ᠲᠥᠭᠦᠯ ᠨᠢᠳᠦ ᠪᠤᠯᠢᠶᠠᠨ᠂ ᠲᠣᠭᠣᠷᠢᠮ ᠪᠦᠷᠢᠳᠦ ᠨᠦ᠍ᠭᠦᠳ ᠲᠦ᠍ ᠰᠢᠪᠠᠭᠤᠬᠠᠢᠳ ᠭᠠᠩᠭᠠᠨᠠ ᠬᠤᠷᠠᠵᠤ᠂ ᠶᠠᠭᠤᠲᠠᠢ ᠦᠵᠡᠰᠬᠦᠯᠡᠩ ᠲᠡᠢ᠂ ᠶᠠᠮᠠᠷ ᠴᠡᠩᠭᠡᠭ ᠪᠠᠢᠨᠠᠮ ᠪᠣᠢ᠃ ᠠᠷᠢᠬᠪᠥ᠋ᠬᠡ ᠬᠠᠭᠠᠨ ᠬᠥᠪᠡᠭᠡ ᠲᠤᠯᠤᠭᠠᠳ ᠳᠠᠮᠵᠢᠨ ᠶᠠᠪᠤᠵᠤ ᠭᠣᠪᠢ ᠶ᠋ᠢᠨ ᠦᠵᠡᠰᠬᠦᠯᠡᠩ ᠢ᠋ ᠬᠠᠷᠠᠵᠤ ᠲᠠᠭᠠᠯᠠᠨ᠂ ᠠᠯᠤᠰ ᠤ᠋ᠨ ᠪᠠᠷᠠ ᠶ᠋ᠢ ᠰᠠᠷᠠᠪᠴᠢᠯᠠᠨ ᠬᠠᠷᠠᠵᠤ᠂ ᠴᠡᠩᠬᠡᠷ ᠮᠠᠨᠠᠨ ᠳ᠋ᠤ᠌ ᠬᠤᠴᠢᠭᠳᠠᠭᠰᠠᠨ ᠥᠷᠭᠡᠨ ᠭᠣᠪᠢ ᠶ᠋ᠢ ᠰᠢᠷᠳᠡᠨᠡ᠃ ᠠᠷᠢᠬᠪᠥ᠋ᠬᠡ ᠰᠦᠷᠦᠭ ᠭᠠᠯᠠᠭᠤ ᠰᠠᠭᠤᠭᠰᠠᠨ ᠪᠢᠴᠢᠬᠠᠨ ᠲᠣᠭᠣᠷᠢᠮ ᠢ᠋ ᠳᠠᠭᠠᠷᠢᠵᠤ ᠰᠢᠪᠠᠭᠤ ᠶ᠋ᠢ ᠬᠠᠷᠪᠤᠭᠰᠠᠨ ᠬᠡᠳᠦᠨ ᠴᠡᠷᠢᠭ ᠢ᠋ ᠬᠠᠷᠠᠭᠠᠳ᠂ ᠲᠡᠳᠡᠨ ᠢ᠋ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠄
— ᠲᠠ ᠨᠠᠷ ᠥᠯᠥᠰᠦᠭᠡᠳ ᠪᠠᠢᠨᠠ ᠤᠤ? ᠭᠡᠮ ᠦᠭᠡᠢ ᠠᠮᠢᠲᠠᠳ ᠢ᠋ ᠶᠠᠭᠤᠨ ᠤ᠋ ᠤᠴᠢᠷ ᠥᠰᠢᠶᠡᠲᠡᠨ ᠮᠡᠲᠦ ᠠᠯᠠᠨᠠ ᠪᠣᠢ? ᠭᠡᠮᠡᠨ ᠬᠢᠯᠢᠩᠲᠡᠢ ᠪᠡᠷ ᠠᠰᠠᠭᠤᠭᠠᠳ
— ᠳᠠᠬᠢᠨ ᠢᠩᠭᠢᠵᠦ ᠭᠡᠮ ᠵᠢᠮ ᠦᠭᠡᠢ ᠠᠮᠢᠲᠠᠳ ᠢ᠋ ᠬᠥᠨᠥᠭᠡᠬᠦ ᠠᠬᠤᠯᠠ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠷ ᠲᠡᠳᠡᠨ ᠦ᠌ ᠠᠮᠢ ᠶ᠋ᠢ ᠲᠥᠯᠥᠨᠡ ᠭᠡᠵᠦ ᠮᠡᠳᠡᠭᠡᠷᠡᠢ! ᠪᠢᠳᠡ ᠨᠤᠲᠤᠭ ᠤᠰᠤ ᠪᠠᠨ ᠬᠠᠢᠷᠠᠯᠠᠨ ᠪᠠᠢᠶᠠ ᠭᠡᠪᠡᠯ ᠭᠠᠵᠠᠷ ᠣᠷᠣᠨ ᠳ᠋ᠤ᠌ ᠢᠳᠡᠭᠡᠰᠢᠨ ᠨᠤᠲᠤᠭᠯᠠᠵᠤ ᠪᠠᠢᠭᠠ ᠠᠮᠢᠲᠠᠳ ᠨᠢᠭᠡᠨ ᠠᠳᠠᠯᠢ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ᠃《ᠰᠢᠪᠠᠭᠤ ᠬᠥᠨᠥᠭᠡᠬᠦ ᠪᠣᠯ ᠬᠠᠷᠢᠶᠠᠯ ᠢᠷᠡᠳᠡᠭ》 ᠭᠡᠳᠡᠭ ᠭᠡᠵᠦ ᠥᠭᠦᠯᠡᠨ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠠᠶᠠᠯᠠᠯ ᠳ᠋ᠤ᠌ ᠬᠠᠭᠠᠨ ᠤ᠋ ᠵᠠᠩ ᠨᠢ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠠᠢᠳᠠᠯᠲᠠᠢ ᠭᠡᠬᠦ ᠤᠤ᠂ ᠬᠢᠯᠢᠩᠨᠡᠩᠭᠦᠢ ᠴᠢᠷᠠᠢ ᠭᠠᠷᠭᠠᠨ ᠠᠭᠠᠰᠢ ᠨᠢ ᠢᠯᠡᠷᠬᠡᠢ ᠬᠤᠪᠢᠷᠠᠭᠰᠠᠨ ᠰᠢᠨᠵᠢᠲᠡᠢ ᠪᠠᠢᠭᠠ ᠶ᠋ᠢ ᠰᠢᠳᠠᠷ ᠤ᠋ᠳ ᠨᠢ ᠠᠵᠢᠭᠯᠠᠨ《ᠰᠠᠢᠨ ᠢᠷᠣᠠ ᠪᠢᠰᠢ》 ᠭᠡᠵᠡᠭᠡᠵᠦ ᠪᠠᠢᠯᠠ᠃
ᠨᠢᠭᠡᠨ ᠦᠳᠡᠯᠡᠭᠡ ᠳᠡᠭᠡᠷᠡ ᠡᠪᠦᠭᠡᠨ ᠳᠣᠷᠭᠣᠨ ᠲᠦᠰᠢᠮᠡᠯ ᠢᠷᠡᠵᠦ ᠬᠠᠭᠠᠨ ᠳ᠋ᠤ᠌ ᠪᠠᠨ ᠪᠠᠷᠠᠯᠬᠠᠨ᠂ ᠠᠶᠠᠨ ᠵᠠᠮ ᠤ᠋ᠨ ᠪᠠᠢᠳᠠᠯ ᠢ᠋ ᠶᠠᠷᠢᠯᠴᠠᠭᠠᠳ ᠭᠣᠢᠳᠠ ᠶᠠᠭᠤᠮᠠ ᠶᠠᠭᠤ ᠪᠠᠢᠬᠤ ᠪᠣᠢ? ᠦᠨᠳᠦᠰᠦᠨ ᠴᠡᠷᠢᠭ ᠳᠠᠭᠠᠭᠠᠮᠠᠯ ᠤ᠋ᠳ ᠮᠠᠨᠢ ᠡᠢᠮᠦ ᠠᠶᠠᠨ ᠳ᠋ᠤ᠌ ᠳᠠᠳᠴᠤ᠂ ᠬᠠᠲᠠᠭᠤ ᠵᠥᠭᠡᠯᠡᠨ ᠢ᠋ ᠳᠠᠪᠠᠵᠤ ᠴᠢᠳᠠᠳᠠᠭ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠲᠡᠳᠡ ᠮᠠᠨᠢ ᠲᠡᠮᠦᠷ ᠨᠢᠳᠤᠷᠭᠠ ᠪᠣᠯᠬᠤ ᠪᠢᠵᠡ᠃ ᠡᠨᠡ ᠵᠤᠨ ᠲᠠᠲᠠᠭᠳᠠᠨ ᠢᠷᠡᠭᠰᠡᠨ ᠰᠢᠨᠡ ᠴᠡᠷᠢᠭ ᠦ᠋ᠳ ᠡᠴᠡ ᠯᠡ ᠪᠢ ᠰᠡᠳᠬᠢᠯ ᠵᠣᠪᠠᠨᠢᠵᠤ ᠶᠠᠪᠤᠨᠠ ᠭᠡᠵᠦ ᠡᠨᠡ ᠲᠦᠰᠢᠮᠡᠯ ᠠᠢᠯᠠᠳᠬᠠᠯ ᠬᠢᠵᠦ ᠬᠡᠯᠡᠯᠡ᠃ ᠠᠷᠢᠬᠪᠥ᠋ᠬᠡ ᠡᠨᠡ ᠨᠣᠶᠠᠨ ᠳ᠋ᠤ᠌ ᠬᠡᠵᠢᠶᠡᠨ ᠦ᠌ ᠳᠠᠭᠠᠯᠠᠳᠠᠭ᠂ ᠪᠤᠰᠤᠳ ᠢ᠋ᠶ᠋ᠠᠷ ᠬᠥᠭᠰᠢᠨ ᠭᠡᠵᠦ ᠬᠡᠯᠡᠭᠦᠯᠬᠦ ᠳᠤᠷᠠ ᠦᠭᠡᠢ ᠪᠠᠢᠳᠠᠭ᠃ ᠲᠡᠳᠡ ᠬᠡᠭᠡᠷᠡ ᠭᠠᠨᠵᠤᠭᠠᠨ ᠤ᠋ ᠠᠢᠷᠠᠭ ᠵᠠᠯᠭᠢᠯᠠᠨ ᠰᠠᠭᠤᠪᠠ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠶᠠ ᠭᠡᠵᠦ ᠲᠠ ᠪᠣᠳᠣᠵᠤ ᠪᠠᠢᠨᠠ ᠪᠣᠢ? ᠪᠢᠳᠡᠨ ᠢ᠋ ᠴᠠᠭ ᠪᠣᠯᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠭᠰᠠᠨ ᠭᠡᠵᠦ ᠲᠠ ᠵᠢᠮᠡᠯᠡᠵᠦ ᠪᠠᠢᠨᠠ ᠤᠤ? ᠭᠡᠮᠡᠨ ᠬᠠᠭᠠᠨ ᠠᠰᠠᠭᠤᠪᠠ᠃ ᠲᠣ᠊ ᠲᠦᠰᠢᠮᠡᠯ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠴᠢᠨ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠵᠤ᠄
— ᠳᠠᠭᠠᠷᠢᠯᠲᠠ ᠬᠢᠬᠦ ᠦᠶᠡ ᠳ᠋ᠦ᠍ ᠰᠢᠨᠡ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠤᠷᠲᠤ ᠲᠠᠯᠠ ᠳ᠋ᠤ᠌ ᠪᠠᠨ ᠠᠪᠤᠪᠠᠯ ᠡᠩᠨᠡᠭᠡ ᠠᠮᠠᠷᠬᠠᠨ ᠡᠪᠳᠡᠷᠡᠬᠦ ᠪᠣᠯᠪᠠ ᠤᠤ᠃ ᠠᠷᠤ ᠳ᠋ᠤ᠌ ᠪᠠᠨ ᠠᠪᠤᠶᠠ ᠭᠡᠬᠦ ᠪᠡᠷ ᠲᠤᠯᠭᠠᠭᠤᠷᠢ ᠬᠦᠴᠦᠨ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠢᠵᠡ᠃ ᠶᠡᠷᠦ ᠨᠢ ᠴᠡᠷᠢᠭ ᠦ᠋ᠨ ᠲᠣᠭᠠᠨ ᠠ᠋ᠴᠠ ᠴᠢᠨᠠᠷ ᠨᠢ ᠳᠤᠲᠠᠭᠠᠳ ᠪᠠᠢᠭᠠ ᠶᠠᠩᠵᠤᠲᠠᠢ᠃ ᠶᠠᠮᠠᠷ ᠴᠦ᠍ ᠪᠣᠯᠤᠭᠰᠠᠨ ᠰᠢᠨᠡ ᠬᠥᠮᠦᠰ ᠢ᠋ᠶ᠋ᠡᠨ ᠬᠠᠢᠷᠠᠯᠠ ᠭᠡᠵᠦ ᠳᠠᠭᠠᠭᠠᠮᠠᠯ ᠤ᠋ᠳ ᠲᠤ᠌ ᠲᠠ ᠵᠠᠷᠯᠢᠭᠯᠠᠬᠤ ᠪᠢᠵᠡ᠃ ᠴᠠᠭ ᠬᠤᠭᠤᠴᠠᠭᠠᠨ ᠬᠤᠪᠢ ᠳ᠋ᠤ᠌ ᠮᠠᠨ ᠳᠣᠪᠲᠣᠯᠤᠭᠠᠳ ᠠᠷᠠᠢ ᠡᠷᠲᠡᠳᠡᠯᠡ ᠪᠣᠯᠤᠯᠲᠠᠢ᠃ ᠤᠭ ᠨᠢ ᠠᠩᠬᠠᠨ ᠤ᠋ ᠶᠡᠬᠡ ᠵᠢᠪᠠᠷ ᠢ᠋ᠶ᠋ᠠᠷ ᠯᠠ ᠱᠠᠩᠳᠤ ᠶ᠋ᠢ ᠳᠠᠭᠠᠷᠢᠭᠰᠠᠨ ᠪᠣᠯ ᠬᠢᠲᠠᠳ ᠴᠡᠷᠢᠭ ᠪᠡᠭᠡᠷᠡᠭᠡᠳ ᠬᠦᠴᠦᠲᠡᠢ ᠡᠰᠡᠷᠭᠦᠴᠡᠯ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠳᠠ ᠭᠡᠵᠦ ᠬᠡᠯᠡᠪᠡ᠃ ᠡᠢᠮᠦ ᠶᠠᠩᠵᠤ ᠶ᠋ᠢᠨ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠵᠠᠮ ᠤ᠋ᠨ ᠲᠤᠷᠰᠢᠲᠠ ᠪᠣᠯᠤᠭᠰᠠᠭᠠᠷ ᠪᠠᠢᠯᠠ᠃
ᠪᠠᠢᠳᠠᠯ ᠲᠦᠪᠡᠭᠲᠡᠢ ᠪᠣᠯᠵᠠᠢ᠂ ᠣᠳᠣ ᠴᠠᠭ ᠬᠠᠷᠢᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠲᠡᠰᠬᠢᠮᠡ ᠬᠦᠢᠲᠡᠨ ᠢᠷᠡᠬᠦ ᠠᠷᠠᠢ ᠪᠣᠯᠤᠭᠠ ᠦᠭᠡᠢ᠂ ᠲᠡᠭᠦᠨ ᠢ᠋ ᠬᠦᠯᠢᠶᠡᠨᠡ ᠭᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠲᠤᠯᠤᠯᠳᠤᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠬᠢᠵᠦ ᠣᠷᠬᠢᠬᠤ ᠪᠠᠢᠳᠠᠯᠲᠠᠢ ᠨᠢᠭᠡᠨᠲᠡ ᠡᠬᠢᠯᠡᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠳᠠᠭᠤᠰᠬᠠᠬᠤ ᠶᠣᠰᠣᠲᠠᠢ ᠨᠢ ᠭᠠᠷᠴᠠᠭᠠ ᠦᠭᠡᠢ ᠪᠣᠯᠵᠠᠢ᠃ ᠨᠠᠷᠠᠨ ᠳ᠋ᠤ᠌ ᠲᠥᠯᠭᠡᠳᠡᠭᠰᠡᠨ ᠬᠠᠲᠤᠳ ᠬᠠᠷᠠ ᠠᠭᠤᠯᠠᠰ ᠤ᠋ᠳ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠠᠷᠵᠠᠢᠨ᠂ ᠥᠩᠭᠡ ᠥᠩᠭᠡ ᠶ᠋ᠢᠨ ᠪᠤᠲᠠᠯᠢᠭ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠥᠪᠡᠷ ᠢ᠋ ᠪᠡᠨ ᠬᠤᠴᠢᠭᠰᠠᠨ ᠭᠣᠪᠢ ᠲᠠᠯᠠ ᠨᠤᠲᠤᠭ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠰᠢᠷᠭᠠᠯᠲᠤᠨ ᠬᠦᠷᠡᠩᠳᠡᠵᠦ᠂ ᠴᠠᠭᠠᠨᠠ ᠪᠠᠨ ᠨᠢᠭᠡ ᠤᠢᠳᠬᠠᠷ ᠲᠠᠢ ᠮᠡᠲᠦ ᠠᠵᠢ᠃ ᠡᠨᠡ ᠪᠠᠢᠳᠠᠯ ᠶᠠᠭᠤ ᠶ᠋ᠢ ᠥᠭᠦᠯᠡᠨᠡᠮ ᠪᠣᠢ ᠭᠡᠪᠡᠯ ᠠᠯᠲᠠᠨ ᠰᠢᠷᠭᠠᠯ ᠶᠡᠬᠡ ᠭᠣᠪᠢ ᠮᠠᠨᠢ ᠬᠠᠮᠢᠭᠠ ᠴᠦ᠍ ᠢᠯᠭᠠᠭᠠ ᠦᠭᠡᠢ ᠢᠳᠡᠭᠡᠰᠢᠯᠡᠭ ᠲᠡᠢ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠥᠷᠥᠰᠥ ᠶ᠋ᠢ ᠬᠥᠮᠦᠨ᠂ ᠮᠠᠯ ᠤ᠋ᠨ ᠴᠢᠰᠤ ᠪᠠᠷ ᠳᠠᠬᠢᠨ ᠪᠤᠤ ᠪᠤᠳᠤᠭᠠᠰᠠᠢ ᠭᠡᠵᠦ ᠪᠣᠢ ᠮᠡᠲᠦ ᠤᠭ ᠬᠡᠷᠡᠭ ᠡᠴᠡ ᠵᠠᠢᠯᠠᠰᠬᠢᠬᠦ ᠴᠠᠭ ᠨᠢᠭᠡᠨᠲᠡ ᠥᠩᠭᠡᠷᠡᠵᠡᠢ᠃
ᠰᠠᠢᠨ ᠤᠰᠤᠨ ᠤ᠋ ᠬᠥᠨᠳᠡᠢ ᠶ᠋ᠢ ᠳᠤᠭᠤᠯᠤᠭᠠᠳ᠂ ᠲᠣᠭᠣᠰ ᠬᠠᠢᠷᠬᠠᠨ ᠢ᠋ ᠥᠩᠭᠡᠷᠡᠵᠦ᠂ ᠬᠥᠰᠢᠭᠡ ᠠᠭᠤᠯᠠ ᠶ᠋ᠢᠨ ᠰᠢᠯᠢ ᠪᠡᠷ ᠳᠠᠪᠠᠲᠠᠯᠠ ᠲᠡᠷᠲᠡᠭᠡ ᠡᠮᠦᠨᠡ ᠵᠦᠭ ᠲᠦ᠍ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠮᠠᠨᠠᠨᠲᠠᠭᠤᠯᠤᠭᠰᠡᠨ ᠶᠡᠬᠡ ᠲᠣᠭᠣᠰᠣ ᠬᠠᠲᠠᠵᠤ ᠪᠣᠢ ᠨᠢ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠲᠦ᠍ ᠲᠣᠳᠣᠷᠠᠯᠠ᠃ ᠠᠷᠢᠬᠪᠥ᠋ᠬᠡ ᠬᠠᠭᠠᠨ ᠲᠡᠭᠦᠨ ᠢ᠋ ᠳᠤᠷᠠᠨ ᠰᠤᠩᠭᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠲᠡᠷᠡ ᠶᠠᠭᠤ ᠪᠣᠢ? ᠰᠡᠵᠢᠭ ᠲᠥᠷᠥᠭᠦᠯᠦᠭᠰᠡᠨ ᠮᠠᠭᠤᠬᠠᠢ ᠲᠣᠭᠣᠰᠣ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠯᠠ ᠭᠡᠵᠦ ᠳᠡᠷᠭᠡᠳᠡ ᠪᠡᠨ ᠶᠠᠪᠤᠭᠠ ᠳ᠋ᠤ᠌ ᠡᠪᠦᠭᠡᠨ ᠳ᠋ᠦ᠍ ᠬᠠᠨᠳᠤᠪᠠ᠃ ᠲᠣ᠊ ᠲᠦᠰᠢᠮᠡᠯ ᠳᠤᠷᠠᠨ ᠠᠪᠴᠤ ᠪᠠᠰᠠ ᠠᠯᠤᠰ ᠢ᠋ ᠰᠢᠷᠳᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠴᠢᠷᠠᠢ ᠬᠤᠪᠢᠷᠠᠭᠠᠨ᠄
— ᠬᠠᠭᠠᠨᠲᠠᠨ ᠮᠢᠨᠢ ᠰᠣᠶᠣᠷᠬᠠᠵᠤ ᠪᠣᠯᠭᠣᠭᠠ! ᠬᠤᠪᠢᠯᠠᠢ ᠶ᠋ᠢ ᠪᠢᠳᠡ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠪᠢᠰᠢ᠃ ᠲᠡᠭᠦᠨ ᠦ᠌ ᠲᠤᠷᠰᠢᠭᠤᠯ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠢᠵᠤ᠂ ᠮᠠᠨ ᠤ᠋ ᠴᠡᠷᠢᠭ ᠬᠥᠳᠡᠯᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠶᠡᠬᠡ ᠲᠣᠭᠣᠰᠣ ᠪᠣᠯ ᠵᠢᠷ ᠦ᠋ᠨ ᠰᠠᠯᠬᠢᠨ ᠤ᠋ ᠦᠯᠢᠶᠡᠯᠭᠡ ᠪᠢᠰᠢ᠂ ᠣᠯᠠᠨ ᠠᠮᠢᠲᠠᠨ ᠤ᠋ ᠬᠥᠯ ᠦ᠋ᠨ ᠰᠢᠷᠣᠢ ᠰᠢᠪ᠃ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠢᠷᠡᠵᠦ ᠶᠠᠪᠤᠨᠠ᠃ ᠲᠡᠢᠨ ᠳ᠋ᠦ᠍ ᠣᠷᠣᠬᠤ ᠴᠠᠭ ᠪᠣᠯᠵᠠᠢ ᠭᠡᠵᠦ ᠬᠡᠯᠡᠯᠡ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠤᠷᠲᠤ ᠵᠦᠭ ᠲᠦ᠍ ᠭᠠᠷᠭᠠᠭᠰᠠᠨ ᠬᠣᠰᠢᠭᠤᠴᠢ ᠴᠡᠷᠢᠭ ᠡᠴᠡ ᠮᠣᠷᠢᠨ ᠵᠠᠷᠤᠯᠭᠠ ᠳᠠᠪᠬᠢᠨ ᠢᠷᠡᠵᠦ ᠬᠠᠭᠠᠨ ᠳ᠋ᠤ᠌ ᠣᠢᠷᠠᠲᠤᠨ ᠰᠥᠭᠥᠳᠦᠭᠡᠳ᠄
— ᠳᠠᠢᠰᠤᠨ ᠤ᠋ ᠴᠡᠷᠢᠭ ᠪᠣᠯᠤᠯᠲᠠᠢ᠃ ᠮᠠᠰᠢ ᠣᠯᠠᠨ ᠮᠣᠷᠢᠲᠠᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠨ ᠢᠷᠡᠵᠦ ᠶᠠᠪᠤᠨᠠ ᠭᠡᠵᠦ ᠠᠢᠯᠠᠳᠬᠠᠪᠠ᠃
ᠠᠷᠢᠬᠪᠥ᠋ᠬᠡ ᠵᠡᠰ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠯᠭᠡᠨ᠂ ᠬᠣᠯᠠ ᠶᠠᠪᠤᠭᠠ ᠳ᠋ᠤ᠌ ᠨᠢ ᠵᠠᠷᠤᠯᠭᠠ ᠳᠠᠪᠬᠢᠭᠤᠯᠵᠤ ᠵᠠᠬᠢᠷᠤᠭᠴᠢ᠂ ᠳᠠᠭᠠᠭᠠᠮᠠᠯ ᠤ᠋ᠳ ᠢ᠋ᠶ᠋ᠠᠨ ᠳᠠᠭᠤᠳᠠᠭᠤᠯᠪᠠ᠃ ᠣᠯᠠᠨ ᠨᠣᠶᠠᠳ ᠲᠡᠷᠡ ᠳᠣᠣᠷᠠ ᠪᠠᠨ ᠴᠤᠭᠯᠠᠷᠠᠯᠠ᠃ ᠠᠷᠢᠬᠪᠥ᠋ᠬᠡ ᠪᠠᠢᠳᠠᠯ ᠢ᠋ ᠬᠥᠮᠦᠰ ᠲᠦ᠍ ᠪᠡᠨ ᠬᠡᠯᠡᠵᠦ᠂ ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠪᠠᠯ ᠢ᠋ᠶ᠋ᠠᠷ ᠠᠰᠢᠭᠲᠠᠢ ᠭᠠᠵᠠᠷ ᠡᠵᠡᠯᠡᠨ ᠪᠡᠶᠡ ᠳᠠᠯᠳᠠᠯᠠᠵᠤ᠂ ᠳᠠᠢᠰᠤᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠪᠦᠷ ᠣᠢᠷᠠᠲᠤᠨ ᠢᠷᠡᠬᠦ ᠪᠡᠷ ᠨᠢ ᠤᠷᠲᠤ ᠠ᠋ᠴᠠ ᠨᠢ ᠭᠡᠨᠡᠳᠲᠡ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠴᠣᠬᠢᠬᠤ ᠰᠢᠢᠳ ᠥᠭᠪᠡ᠃ ᠪᠠᠭᠠ ᠦᠳᠡ ᠥᠩᠭᠡᠷᠡᠵᠦ ᠪᠠᠢᠯᠠ᠃ ᠨᠠᠷᠠᠨ ᠳᠣᠣᠭᠤᠷ ᠶᠡᠬᠡ ᠲᠣᠭᠣᠰᠣ ᠮᠠᠨᠠᠷᠠᠨ᠂ ᠠᠯᠤᠰ ᠤ᠋ᠨ ᠪᠠᠷᠠ ᠶ᠋ᠢ ᠬᠠᠭᠠᠵᠤ ᠰᠦᠮᠡᠢᠯᠭᠡᠨᠡ᠃
ᠮᠣᠷᠢᠨ ᠴᠠᠭ ᠥᠩᠭᠡᠷᠡᠵᠦ ᠪᠠᠢᠬᠤ ᠦᠶᠡ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠶᠡᠬᠡ ᠴᠡᠷᠢᠭ ᠣᠢᠷᠠᠲᠤᠨ ᠢᠷᠡᠯᠡ᠃ ᠡᠨᠡ ᠡᠳᠦᠷ ᠶᠠᠭᠤ ᠪᠣᠯᠤᠭᠠ ᠪᠣᠢ ᠭᠡᠮᠡᠷ ᠬᠠᠯᠠᠭᠤᠨ ᠠᠭᠠᠷ ᠪᠦᠬᠦᠨ ᠢ᠋ ᠪᠤᠬᠢᠨᠢᠳᠤᠭᠤᠯᠤᠨᠠ᠃
ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠤᠷᠰᠢᠭᠤᠯ ᠠᠩᠭᠢ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠭᠠᠵᠠᠷ ᠤ᠋ᠨ ᠪᠠᠷᠲᠠᠭᠠ ᠶ᠋ᠢ ᠡᠵᠡᠯᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠣᠯᠤᠯᠲᠠᠢ᠂ ᠨᠢᠭᠡ ᠣᠢᠷᠠᠲᠤᠨ ᠲᠤᠯᠵᠤ ᠢᠷᠡᠭᠡᠳ᠂ ᠡᠷᠭᠢᠵᠦ ᠪᠤᠴᠠᠨ᠂ ᠬᠠᠭᠤᠷᠬᠤ ᠠᠷᠭᠠ ᠬᠡᠷᠡᠭᠯᠡᠨ ᠪᠣᠢ ᠨᠢ ᠠᠵᠢᠭᠯᠠᠭᠳᠠᠪᠠ᠃ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠨᠢᠭᠡ ᠳᠠᠭᠠᠭᠠᠮᠠᠯ ᠳᠠᠯᠳᠠᠯᠠᠭᠰᠠᠨ ᠭᠠᠩᠭᠠᠨ ᠠ᠋ᠴᠠ ᠪᠠᠨ ᠲᠤᠰᠢᠶᠠᠯ ᠦᠭᠡᠢ ᠪᠡᠷ ᠭᠠᠷᠴᠤ ᠳᠠᠪᠬᠢᠨ ᠳᠠᠢᠰᠤᠨ ᠢ᠋ ᠬᠥᠭᠡᠭᠡᠵᠦ ᠪᠠᠢᠳᠠᠯ ᠢ᠋ᠶ᠋ᠠᠨ ᠢᠯᠡ ᠪᠣᠯᠭᠠᠪᠠ᠃ ᠤᠭ ᠨᠢ ᠳᠠᠢᠰᠤᠨ ᠤ᠋ ᠪᠥᠭᠡᠮ ᠬᠦᠴᠦᠨ ᠢ᠋ ᠲᠤᠯᠵᠤ ᠢᠷᠡᠬᠦ ᠪᠡᠷ《 ᠰᠠᠷᠠᠨ ᠪᠦᠰᠡᠯᠡᠭᠦᠷ ᠲᠦ᠍》 ᠪᠠᠢᠭᠰᠠᠨ ᠠᠷᠢᠬᠪᠥᠶ᠋ᠬᠡ ᠬᠠᠭᠠᠨ ᠤ᠋ ᠴᠡᠷᠢᠭ ᠬᠠᠷᠢᠭᠤ ᠭᠡᠨᠡᠳᠲᠡ ᠳᠣᠪᠲᠣᠯᠤᠨ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠲᠡᠷᠢᠭᠦᠨ ᠠᠩᠭᠢ ᠶ᠋ᠢ ᠪᠤᠲᠠ ᠨᠢᠷᠭᠡᠬᠦ ᠪᠣᠯᠣᠮᠵᠢᠲᠠᠢ ᠪᠠᠢᠯᠠ᠃ ᠭᠡᠲᠡᠯᠡ ᠡᠨᠡ ᠠᠷᠭᠠ ᠨᠢᠭᠡᠨᠲᠡ ᠮᠡᠳᠡᠭᠳᠡᠭᠰᠡᠨ ᠤᠴᠢᠷ ᠲᠡᠷᠡ ᠵᠦᠭ ᠡᠴᠡ ᠳᠠᠢᠰᠤᠨ ᠳᠡᠯᠭᠡᠭᠡ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠰᠢᠵᠦ᠂ ᠥᠷᠭᠡᠨ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠮᠣᠷᠢᠨ ᠴᠡᠷᠢᠭ ᠲᠦᠷᠦᠭᠦᠴᠢ ᠶ᠋ᠢᠨ ᠡᠩᠨᠡᠭᠡᠨ ᠳ᠋ᠦ᠍ ᠳᠠᠪᠰᠢᠵᠤ᠂ ᠠᠷᠤ ᠠ᠋ᠴᠠ ᠨᠢ ᠶᠠᠪᠠᠭᠠᠨ ᠬᠢᠲᠠᠳ ᠴᠡᠷᠢᠭ ᠡᠩᠨᠡᠭᠡ ᠡᠩᠨᠡᠭᠡ ᠪᠡᠷ ᠢᠷᠡᠵᠦ ᠪᠠᠢᠵᠤ ᠬᠠᠷᠠᠭᠳᠠᠪᠠ᠃ ᠡᠨᠡ ᠠᠷᠤ ᠶ᠋ᠢᠨ ᠡᠩᠨᠡᠭᠡ ᠨᠢ ᠪᠠᠰᠠ ᠬᠤᠯᠤᠰᠤᠨ ᠰᠤᠮᠤᠲᠤ ᠬᠢᠲᠠᠳ ᠴᠡᠷᠢᠭ ᠪᠣᠯᠬᠤ ᠨᠢ ᠢᠯᠡᠷᠬᠡᠢ᠃ ᠢᠩᠭᠢᠭᠡᠳ ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠲᠦ᠍ ᠬᠣᠶᠠᠷ ᠲᠠᠯᠠ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠥᠷᠭᠡᠨ ᠡᠩᠨᠡᠭᠡ ᠪᠡᠷ ᠳᠠᠭᠠᠷᠢᠨ ᠣᠷᠣᠯᠠ᠃ ᠡᠭᠦᠨ ᠡᠴᠡ ᠥᠭᠡᠷᠡ ᠵᠠᠮ ᠪᠠᠢᠭᠰᠠᠨ ᠦᠭᠡᠢ᠃ ᠠᠭᠠᠷ ᠪᠦᠭᠴᠢᠮ ᠬᠠᠯᠠᠭᠤᠨ ᠪᠠᠢᠭᠠ ᠨᠢ ᠲᠤᠯᠤᠯᠳᠤᠵᠤ ᠪᠠᠢᠭᠠ ᠴᠡᠷᠢᠭ ᠮᠣᠷᠢᠨ ᠤ᠋ ᠠᠯᠢ ᠠᠯᠢᠨ ᠳ᠋ᠤ᠌ ᠳᠠᠭᠠ ᠦᠭᠡᠢ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ᠃ ᠠᠷᠢᠬᠪᠥᠶ᠋ᠬᠡ ᠬᠠᠭᠠᠨ ᠨᠢᠭᠡᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠭᠠᠷᠴᠤ ᠳᠤᠷᠠᠨᠳᠠᠨ᠂ ᠲᠤᠯᠤᠯᠳᠤᠭᠠᠨ ᠢ᠋ ᠬᠢᠨᠠᠭᠰᠠᠭᠠᠷ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠮᠣᠷᠢᠨ ᠴᠡᠷᠢᠭ ᠠᠪᠴᠤ ᠳᠠᠭᠠᠷᠢᠯᠳᠤᠨ ᠣᠷᠣᠬᠤ ᠭᠡᠬᠦ ᠳ᠋ᠦ᠍ ᠨᠢ ᠪᠡᠶᠡ ᠬᠠᠮᠠᠭᠠᠯᠠᠭᠰᠠᠨ ᠬᠥᠮᠦᠰ ᠨᠢ ᠬᠣᠷᠢᠭᠯᠠᠨ᠂ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠶ᠋ᠢ ᠳᠤ ᠴᠢᠩᠰᠠᠩ ᠤ᠋ᠨ ᠵᠢᠭᠠᠪᠤᠷᠢ ᠶᠣᠰᠣ ᠪᠠᠷ ᠥᠪᠡᠷ ᠲᠦ᠍ ᠨᠢ ᠥᠭᠬᠦ ᠦᠭᠡᠢ ᠪᠠᠢᠯᠠ᠃ ᠠᠷᠢᠬᠪᠥᠶ᠋ᠬᠡ ᠬᠢᠯᠢᠩᠨᠡᠵᠦ᠄
— ᠲᠠ ᠨᠠᠮᠠᠶ᠋ᠢ ᠶᠠᠭᠠᠬᠢᠬᠤ ᠭᠡᠵᠦ ᠡᠨᠡ ᠬᠠᠳᠠᠨ ᠠᠭᠤᠯᠠᠨ ᠳᠡᠭᠡᠷᠡ ᠬᠣᠷᠭᠣᠭᠣᠵᠤ ᠪᠠᠢᠨᠠ ᠪᠣᠢ? ᠭᠡᠮᠡᠨ ᠳᠤ ᠶ᠋ᠢ ᠵᠠᠩᠨᠠᠪᠠ᠃ ᠡᠪᠦᠭᠡᠨ ᠴᠢᠷᠠᠢ ᠭᠦᠯᠢᠢᠯᠭᠡᠳ᠄
— ᠪᠣᠭᠣᠯ ᠪᠢ ᠲᠠᠨ ᠤ᠋ ᠤᠷᠤᠭ ᠰᠠᠳᠤᠨ ᠤ᠋ ᠵᠠᠬᠢᠶᠠ ᠶᠣᠰᠣ ᠪᠠᠷ ᠠᠮᠢ ᠪᠡᠶᠡ ᠶ᠋ᠢ ᠲᠠᠨᠢ ᠬᠠᠮᠠᠭᠠᠯᠠᠬᠤ ᠶᠣᠰᠣᠲᠠᠢ ᠪᠢᠯᠡ ᠭᠡᠳ ᠬᠥᠳᠡᠯᠬᠦ ᠦᠭᠡᠢ ᠪᠠᠢᠪᠠ᠃
ᠠᠭᠤᠯᠠ ᠶ᠋ᠢᠨ ᠪᠠᠯ᠂ ᠡᠯᠡᠰᠦᠷᠬᠡᠭ ᠬᠥᠷᠥᠰᠥᠲᠡᠢ ᠠᠭᠤᠵᠢᠮ ᠬᠥᠨᠳᠡᠢ ᠳ᠋ᠦ᠍ ᠶᠡᠬᠡ ᠴᠡᠷᠢᠭ ᠵᠢᠭᠤᠷᠠᠯᠳᠤᠨ ᠲᠤᠯᠤᠯᠳᠤᠭᠰᠠᠭᠠᠷ᠂ ᠮᠣᠷᠢ ᠢᠨᠴᠠᠭᠠᠨ ᠴᠢᠷᠠᠯᠠᠵᠤ᠂ ᠬᠥᠮᠦᠨ ᠬᠠᠰᠬᠢᠷᠤᠯᠳᠤᠨ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠤᠲᠤᠭᠠ ᠮᠠᠨᠠᠨ ᠪᠠᠭᠰᠢᠷᠠᠵᠤ᠂ ᠬᠥᠨᠳᠡᠯᠡᠨ ᠭᠤᠯᠳᠤ ᠤᠨᠠᠵᠤ ᠪᠠᠢᠭᠠ ᠴᠡᠷᠢᠭ ᠲᠣᠭᠠ ᠦᠭᠡᠢ ᠣᠯᠠᠨ ᠪᠣᠯᠵᠤ ᠪᠠᠢᠯᠠ᠃ ᠬᠡᠨ ᠴᠦ᠍ ᠬᠠᠷᠠᠭᠰᠠᠨ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠨ ᠲᠠᠭᠠᠰᠢᠶᠠᠮᠠ ᠦᠭᠡᠢ ᠠᠵᠢ᠃ ᠢᠯᠳᠦ ᠪᠠᠮᠪᠠᠢ ᠳᠡᠰ ᠨᠢᠰ ᠪᠠᠭᠤᠬᠤ ᠨᠢ ᠴᠢᠬᠢᠨ ᠳ᠋ᠦ᠍ ᠴᠢᠬᠢᠷᠡ ᠬᠥᠮᠦᠰ ᠦ᠋ᠨ ᠭᠢᠩᠭᠢᠨᠡᠨ ᠬᠠᠢᠯᠠᠬᠤ ᠳᠠᠭᠤ᠂ ᠴᠢᠰᠤᠨ ᠤ᠋ ᠡᠬᠡᠭᠦᠨ ᠦᠨᠦᠷ ᠬᠣᠶᠠᠷ ᠵᠢᠷᠦᠬᠡ ᠰᠢᠮᠰᠢᠷᠡᠭᠦᠯᠬᠦ ᠪᠣᠯᠪᠠ᠃ ᠠᠷᠢᠬᠪᠥᠶ᠋ᠬᠡ ᠳᠤᠷᠠᠨᠳᠠᠭᠰᠠᠭᠠᠷ ᠳᠠᠭᠠᠷᠢᠨ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠠᠷᠤ ᠲᠠᠯᠠ ᠳ᠋ᠤ᠌ ᠬᠤᠪᠢᠯᠠᠢ᠂ ᠲᠡᠭᠦᠨ ᠦ᠌ ᠰᠢᠳᠠᠷ ᠵᠠᠩᠵᠤᠨ ᠴᠠᠭᠠᠨ᠂ ᠬᠠᠳᠠᠨ ᠨᠠᠷ ᠶᠠᠪᠤᠭᠠ ᠶ᠋ᠢ ᠲᠠᠨᠢᠵᠤ ᠮᠡᠳᠡᠭᠡᠳ᠄
— ᠮᠢᠨᠦ ᠳᠠᠢᠰᠤᠨ ᠨᠤᠭᠤᠳ ᠬᠠᠮᠤᠭ ᠬᠦᠴᠦ ᠪᠡᠨ ᠰᠢᠪᠬᠠᠨ᠂ ᠠᠷᠪᠠᠢᠬᠤ ᠳᠠᠷᠪᠠᠢᠬᠤ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠰᠢ ᠬᠥᠳᠡᠯᠦᠯᠡ ᠰᠢᠪ᠃ ᠲᠡᠳᠡ ᠠᠶᠤᠨ ᠰᠠᠨᠳᠤᠷᠴᠤ ᠳᠠᠭᠵᠢᠨ ᠴᠡᠴᠡᠷᠡᠵᠡᠢ ᠭᠡᠵᠦ ᠬᠡᠯᠡᠯᠡ᠃ ᠠᠩᠬᠠᠨ ᠡᠳᠦᠷ ᠦ᠋ᠨ ᠲᠤᠯᠤᠯᠳᠤᠭᠠᠨ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠭᠡᠳ ᠪᠡᠶᠡ ᠪᠡᠶᠡ ᠪᠡᠨ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠵᠠᠪᠰᠠᠷᠯᠠᠨ᠂ ᠬᠣᠶᠠᠷ ᠲᠠᠯᠠ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠠ᠃ ᠬᠡᠨ ᠨᠢ ᠴᠦ᠍ ᠳᠠᠪᠠᠭᠤ ᠲᠠᠢ ᠠᠮᠵᠢᠯᠲᠠ ᠣᠯᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠲᠣᠭᠠ ᠪᠠᠷ ᠢᠯᠡᠭᠦᠦ ᠪᠠᠢᠭᠠ ᠨᠢ ᠠᠵᠢᠭᠯᠠᠭᠳᠠᠪᠠ᠃ ᠡᠨᠡ ᠰᠥᠨᠢ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠵᠣᠪᠠᠨᠢᠨ᠂ ᠨᠣᠢᠷ ᠲᠠᠢ ᠬᠥᠮᠦᠨ ᠪᠠᠷᠤᠭ ᠦᠭᠡᠢ᠃ ᠥᠷᠯᠥᠭᠡ ᠡᠷᠲᠡ ᠮᠣᠷᠢᠳ ᠢ᠋ᠶ᠋ᠠᠨ ᠡᠮᠡᠭᠡᠯᠯᠡᠪᠡ᠃
ᠵᠡᠭᠦᠨ ᠡᠴᠡ ᠨᠠᠷᠠ ᠴᠢᠰᠤᠨ ᠳ᠋ᠤ᠌ ᠪᠣᠳᠣᠭᠳᠠᠭᠰᠠᠨ ᠶᠤᠮ ᠰᠢᠭ᠋ ᠤᠪ ᠤᠯᠠᠭᠠᠨ ᠥᠩᠭᠡᠲᠡᠢ ᠭᠠᠷᠴᠤ ᠢᠷᠡᠯᠡ᠃ ᠨᠠᠷᠠᠨ ᠳᠣᠣᠭᠤᠷ ᠤᠲᠤᠭᠠ ᠮᠠᠨᠠᠨ ᠬᠣᠯᠢᠯᠳᠤᠨ ᠵᠢᠪᠡᠬᠡᠢ ᠰᠠᠭᠠᠷᠠᠯ ᠲᠣᠭᠣᠰᠣ ᠮᠠᠨᠠᠷᠠᠵᠤ ᠦᠵᠡᠭᠳᠡᠪᠡ᠃ ᠥᠴᠥᠭᠡᠳᠦᠷ ᠦ᠋ᠨ ᠬᠠᠯᠠᠭᠤᠨ ᠬᠠᠮᠢᠭᠠ ᠡᠴᠢᠪᠡ ᠭᠡᠮᠡᠷ ᠰᠤᠷᠠᠭ ᠦᠭᠡᠢ ᠪᠣᠯᠵᠤ᠂ ᠵᠡᠭᠦᠨ ᠡᠮᠦᠨᠡ ᠡᠴᠡ ᠬᠦᠢᠲᠡᠨ ᠵᠢᠪᠡᠬᠡᠢ ᠠᠭᠠᠷ ᠦᠯᠢᠶᠡᠵᠦ ᠡᠬᠢᠯᠡᠯᠡ᠃ ᠠᠷᠢᠬᠪᠥᠶ᠋ᠬᠡ ᠬᠠᠭᠠᠨ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠵᠠᠷᠤᠴᠠᠨ ᠤ᠋ ᠪᠠᠨ ᠡᠮᠦᠨᠡ ᠵᠣᠭᠰᠣᠵᠤ ᠳᠤᠷᠠᠨ ᠰᠤᠩᠭᠠᠨ ᠠᠯᠤᠰ ᠢ᠋ ᠬᠠᠷᠠᠭᠰᠠᠭᠠᠷ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠬᠤᠪᠢᠯᠠᠢ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠮᠣᠷᠢᠲᠠᠢ ᠲᠠᠪᠤᠨ ᠬᠥᠮᠦᠨ ᠨᠠᠪᠰᠠᠭᠠᠨᠠᠨ ᠳᠠᠪᠬᠢᠵᠤ ᠢᠷᠡᠭᠡᠳ ᠨᠢᠭᠡᠨ ᠪᠢᠴᠢᠭ ᠢ᠋ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠭᠴᠢ ᠲᠦᠰᠢᠮᠡᠯ ᠳ᠋ᠦ᠍ ᠥᠭᠪᠡ᠃ ᠲᠡᠷᠡ ᠨᠢ ᠠᠷᠢᠬᠪᠥᠶ᠋ᠬᠡ ᠳ᠋ᠦ᠍ ᠭᠡᠰᠡᠨ ᠬᠠᠶᠢᠭ ᠲᠠᠢ ᠪᠠᠢᠯᠠ᠃
ᠬᠠᠭᠠᠨ ᠤᠭ ᠪᠢᠴᠢᠭ ᠢ᠋ ᠳᠡᠷᠭᠡᠳᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠦᠰᠢᠮᠡᠯ ᠢ᠋ᠶ᠋ᠡᠷ ᠤᠩᠰᠢᠭᠤᠯᠪᠠᠯ ᠰᠢᠨᠡ ᠰᠣᠨᠢᠨ ᠶᠠᠭᠤᠮᠠ ᠠᠯᠠᠭᠠ᠃ ᠥᠭᠦᠯᠡᠭᠰᠡᠨ ᠨᠢ᠄《᠁ ᠠᠷᠢᠬᠪᠥᠶ᠋ᠬᠡ ᠠ᠋! ᠴᠢ ᠪᠦᠲᠦᠯ ᠦᠭᠡᠢ ᠵᠦᠢᠯ ᠳᠠᠬᠢᠨ ᠦᠢᠯᠡᠳᠴᠦ ᠶᠠᠪᠤᠭᠠ ᠪᠠᠨ ᠣᠢᠯᠠᠭᠠᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠵᠤ ᠪᠠᠭᠤᠨ ᠥᠭᠪᠡᠯ ᠪᠢ ᠴᠢᠨᠦ ᠪᠡᠶᠡ ᠪᠣᠯᠤᠨ ᠪᠤᠰᠤᠳ ᠴᠡᠷᠢᠭ᠂ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠴᠢᠨᠢ ᠠᠮᠢ ᠶ᠋ᠢ ᠠᠭᠤᠴᠢᠯᠠᠨᠠ᠃ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠴᠢᠨᠦ ᠴᠡᠷᠢᠭ ᠡᠴᠡ ᠮᠢᠨᠦ ᠴᠡᠷᠢᠭ ᠳᠠᠪᠠᠭᠤ ᠣᠯᠠᠨ ᠲᠣᠭᠠ ᠲᠠᠢ᠂ ᠪᠠᠢᠯᠳᠤᠬᠤ ᠬᠦᠴᠦ ᠪᠡᠷ ᠢᠯᠡᠭᠦᠦ ᠪᠠᠢᠨᠠ᠃ ᠴᠢ ᠶᠠᠭᠠᠬᠢᠪᠠᠴᠤ ᠢᠯᠠᠬᠤ ᠦᠭᠡᠢ᠃ ᠴᠢ ᠨᠠᠳᠠᠳᠤ ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠲᠠᠮᠠᠭᠠ ᠶ᠋ᠢ ᠠᠪᠴᠢᠷᠠᠵᠤ ᠲᠤᠰᠢᠶᠠᠪᠠᠯ ᠪᠢ ᠵᠡᠷᠭᠡ ᠶ᠋ᠢ ᠴᠢᠨᠢ ᠴᠢᠮᠠᠲᠤ ᠬᠡᠪ ᠢ᠋ᠶ᠋ᠡᠷ ᠡᠳ᠋ᠯᠡᠭᠦᠯᠦᠨᠡ᠁》 ᠭᠡᠵᠡᠢ᠃ ᠠᠷᠢᠬᠪᠥᠶ᠋ᠬᠡ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠴᠢᠷᠠᠢ ᠪᠠᠨ ᠵᠢᠪᠡᠬᠡᠢᠯᠭᠡᠨ᠄
— ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠡᠳᠡᠵᠦ ᠪᠠᠢᠨᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠰᠦᠷᠳᠡᠭᠦᠯᠭᠡ ᠨᠠᠮᠠᠶ᠋ᠢ ᠰᠥᠬᠥᠷᠡᠭᠦᠯᠬᠦ ᠦᠭᠡᠢ᠃ ᠪᠢᠴᠢᠭ ᠪᠠᠷᠢᠵᠤ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠪᠠᠷᠢᠵᠤ ᠠᠪᠴᠤ ᠠᠷᠤ ᠲᠠᠯᠠ ᠳ᠋ᠤ᠌ ᠬᠣᠷᠢᠭᠠᠨ ᠳ᠋ᠤ᠌ ᠪᠠᠢᠯᠭᠠ᠃ ᠪᠠᠢᠯᠳᠤᠬᠤ ᠪᠦᠷᠢᠶᠡ ᠲᠡᠳᠡ! ᠭᠡᠵᠦ ᠲᠤᠰᠢᠶᠠᠯᠠ᠃
ᠲᠤᠯᠤᠯᠳᠤᠭᠠᠨ ᠥᠷᠯᠥᠭᠡᠭᠦᠷ ᠡᠬᠢᠯᠡᠪᠡ᠃ ᠬᠣᠶᠠᠷ ᠲᠠᠯᠠ ᠠᠯᠢ ᠠᠯᠢ ᠨᠢ ᠪᠦᠬᠦ ᠴᠡᠷᠢᠭ ᠢ᠋ᠶ᠋ᠡᠨ ᠬᠠᠰᠢᠵᠤ᠂ ᠳᠠᠪᠬᠤᠷ ᠡᠩᠨᠡᠭᠡ ᠪᠡᠷ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠳᠣᠪᠲᠣᠯᠤᠯᠠ᠃ ᠠᠯᠢ ᠠᠯᠢ ᠲᠠᠯᠠ ᠶ᠋ᠢᠨ ᠡᠩᠨᠡᠭᠡ ᠨᠢᠭᠡ ᠰᠡᠲᠡᠷᠡᠵᠦ᠂ ᠨᠢᠭᠡ ᠵᠠᠯᠭᠠᠯᠳᠤᠨ᠂ ᠨᠠᠪᠰᠠ ᠪᠤᠯᠤᠳᠠᠯᠠ ᠨᠦᠳᠦᠯᠴᠡᠵᠦ ᠪᠠᠢᠪᠠ᠃ ᠠᠷᠢᠬᠪᠥᠶ᠋ᠬᠡ ᠠᠭᠤᠯᠠᠨ ᠳᠡᠭᠡᠷᠡ ᠡᠴᠡ ᠳᠤᠷᠠᠨᠳᠠᠨ ᠬᠠᠷᠠᠬᠤ ᠳ᠋ᠤ᠌ ᠬᠥᠰᠢᠭᠡ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠪᠠᠯ ᠠᠭᠤᠳᠠᠮ ᠬᠥᠨᠳᠡᠢ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠬᠥᠯ ᠦᠭᠡᠢ ᠨᠠᠮᠤᠭ ᠪᠣᠯᠤᠭᠰᠠᠨ ᠮᠡᠲᠦ ᠪᠡᠮᠪᠡᠯᠵᠡᠨ ᠬᠤᠢᠯᠠᠷᠠᠵᠤ᠂ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠨ ᠪᠠᠢᠬᠤ ᠰᠢᠭ᠋ ᠨᠢᠳᠦ ᠶ᠋ᠢ ᠨᠢ ᠡᠷᠢᠶᠡᠯᠵᠡᠭᠦᠯᠵᠦ ᠪᠠᠢᠪᠠ᠃ ᠲᠩᠷᠢ ᠳ᠋ᠦ᠍ ᠬᠠᠲᠠᠭᠰᠠᠨ ᠮᠠᠭᠤᠬᠠᠢ ᠳᠠᠭᠤᠨ ᠴᠢᠬᠢᠨ ᠳ᠋ᠦ᠍ ᠴᠢᠬᠢᠷᠡ ᠪᠣᠯᠵᠤ ᠪᠠᠢᠯᠠ᠃ ᠯᠤᠤ ᠴᠠᠭ ᠲᠤ ᠡᠬᠢᠯᠡᠭᠰᠡᠨ ᠲᠤᠯᠤᠯᠳᠤᠭᠠᠨ ᠮᠣᠷᠢᠨ ᠴᠠᠭ ᠪᠣᠯᠬᠤ ᠳ᠋ᠤ᠌ ᠢᠳᠡ ᠡᠷᠴᠢ ᠪᠡᠨ ᠠᠪᠴᠤ ᠣᠪᠣᠯᠵᠠᠨᠠ᠃
ᠲᠩᠷᠢ ᠶ᠋ᠢᠨ ᠴᠢᠷᠠᠢ ᠮᠠᠭᠤᠬᠠᠢᠷᠠᠵᠤ᠂ ᠳᠣᠷᠣᠨᠠ ᠠ᠋ᠴᠠ ᠦᠯᠢᠶᠡᠭᠰᠡᠨ ᠰᠠᠯᠬᠢ ᠰᠢᠷᠦᠭᠦᠰᠦᠨ ᠭᠠᠵᠠᠷ ᠲᠩᠷᠢ ᠬᠣᠶᠠᠷ ᠢ᠋ ᠨᠡᠢᠯᠡᠭᠦᠯᠦᠭᠰᠡᠨ ᠤᠯᠠᠭᠠᠨ ᠲᠣᠭᠣᠰᠣ ᠮᠠᠨᠠᠷᠠᠵᠤ ᠡᠬᠢᠯᠡᠯᠡ᠃ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠤᠯᠠᠭᠠᠨ ᠨᠢᠭᠤᠷ ᠤᠷᠤᠭᠤ ᠨᠢ ᠦᠯᠢᠶᠡᠭᠰᠡᠨ ᠡᠯᠡᠰᠦᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠬᠦᠴᠦ ᠬᠠᠷᠢᠨ ᠲᠦᠷᠢᠭᠳᠡᠵᠦ ᠪᠠᠢᠪᠠ᠃
ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠣᠷᠢᠭ ᠢ᠋ ᠡᠰᠡ ᠠᠩᠵᠠᠭᠠᠷᠠᠨ ᠳᠠᠭᠠᠷᠢᠨ ᠴᠣᠬᠢᠬᠤ ᠮᠣᠷᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠲᠡᠷᠡ ᠨᠢᠭᠤᠷ ᠨᠢᠳᠦ ᠦᠭᠡᠢ ᠡᠯᠡᠰᠦᠨ ᠰᠢᠭᠤᠷᠭᠠᠨ ᠳᠤᠮᠳᠠᠭᠤᠷ ᠳᠠᠢᠰᠤᠨ ᠳ᠋ᠤ᠌ ᠳᠣᠪᠲᠣᠯᠤᠨ ᠣᠷᠣᠯᠠ᠃ ᠲᠡᠷᠡ ᠪᠡᠷ ᠴᠠᠪᠴᠢᠯᠳᠤᠨ ᠲᠠᠭᠠᠷᠢᠭᠰᠠᠭᠠᠷ ᠳᠠᠢᠰᠤᠨ ᠤ᠋ ᠨᠢᠭᠡ ᠬᠣᠶᠠᠳᠤᠭᠠᠷ ᠡᠩᠨᠡᠭᠡ ᠶ᠋ᠢ ᠳᠠᠪᠠᠭᠰᠠᠨ ᠪᠣᠯᠪᠠᠴᠤ ᠬᠥᠮᠦᠨ ᠦ᠌ ᠥᠪᠡᠷ ᠢ᠋ ᠨᠢ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠨᠢ ᠨᠢᠳᠦ ᠰᠣᠬᠣᠯᠠᠭᠰᠠᠨ ᠰᠢᠷᠤᠢᠨ ᠳᠤᠮᠳᠠ ᠴᠠᠭᠠᠰᠢ ᠶᠠᠪᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠤᠭᠠᠳ ᠡᠷᠭᠢᠵᠡᠢ᠃ ᠴᠡᠷᠢᠭ ᠨᠢ ᠴᠦ᠍ ᠵᠠᠩᠵᠤᠨ ᠢ᠋ᠶ᠋ᠠᠨ ᠣᠯᠵᠤ ᠬᠠᠷᠠᠬᠤ ᠦᠭᠡᠢ ᠪᠣᠯᠪᠠ᠃
ᠠᠷᠢᠬᠪᠥᠶ᠋ᠬᠡ ᠭᠤᠷᠪᠠ ᠳᠠᠬᠢᠨ ᠳᠠᠭᠠᠷᠢᠭᠠᠳ ᠠᠷᠭᠠ ᠦᠭᠡᠢ ᠬᠦᠴᠦᠨ ᠳ᠋ᠦ᠍ ᠳᠠᠷᠤᠭᠳᠠᠨ ᠤᠬᠤᠷᠢᠯᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠨᠢ ᠴᠦ᠍ ᠪᠠᠰᠠ ᠰᠣᠬᠣᠷᠠᠭᠰᠠᠨ ᠪᠣᠯᠪᠠᠴᠤ ᠡᠩᠨᠡᠭᠡ ᠪᠡᠨ ᠵᠠᠳᠠᠯᠬᠤ ᠥᠬᠡᠢ᠂ ᠳᠠᠪᠬᠤᠷ ᠳᠠᠪᠬᠤᠷ ᠬᠦᠷᠢᠶᠡ ᠪᠤᠰᠬᠠᠨ ᠣᠷᠢᠯᠠᠯᠳᠤᠵᠤ᠂ ᠪᠡᠶᠡ ᠪᠡᠶᠡ ᠪᠡᠨ ᠳᠠᠭᠤᠳᠠᠵᠤ ᠣᠯᠤᠭᠠᠳ ᠲᠤᠯᠤᠯᠳᠤᠨᠠ᠃ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠨᠡᠯᠢᠶᠡᠳ ᠬᠡᠰᠡᠭ ᠨᠢ ᠬᠢᠲᠠᠳ ᠪᠣᠯᠬᠤ ᠨᠢ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ ᠲᠠᠨᠢᠭᠳᠠᠵᠤ ᠪᠠᠢᠪᠠ᠃
ᠲᠤᠯᠤᠯᠳᠤᠭᠠᠨ ᠦᠳᠡᠰᠢ ᠪᠦᠷᠦᠢ ᠪᠣᠯᠲᠠᠯᠠ ᠦᠷᠭᠦᠯᠵᠢᠯᠡᠭᠡᠳ᠂ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠰᠠᠷᠨᠢᠨ ᠤᠬᠤᠷᠢᠵᠤ ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠵᠡᠭᠦᠨ ᠰᠤᠭᠤ ᠪᠠᠷ ᠭᠡᠳᠡᠷᠭᠦ ᠪᠤᠴᠠᠬᠤ ᠵᠠᠮ ᠳ᠋ᠤ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠣᠷᠣᠯᠠ᠃ ᠦᠯᠡᠮᠵᠢ ᠬᠡᠰᠡᠭ ᠨᠢ ᠠᠯᠠᠭᠳᠠᠭᠰᠠᠨ ᠪᠣᠯᠤᠯᠲᠠᠢ᠃ ᠳᠠᠢᠰᠤᠨ ᠤ᠋ ᠲᠠᠯᠠ ᠴᠦ᠍ ᠶᠡᠬᠡᠬᠡᠨ ᠬᠣᠬᠢᠷᠠᠯ ᠬᠦᠯᠢᠶᠡᠭᠰᠡᠨ ᠪᠣᠯᠪᠠᠴᠤ ᠬᠥᠮᠦᠨ ᠦ᠌ ᠲᠣᠭᠠ ᠪᠠᠷ ᠬᠣᠯᠠ ᠢᠯᠡᠭᠦᠦ ᠤᠴᠢᠷ ᠦᠯᠡᠳᠡᠭᠰᠡᠳ ᠨᠢ ᠳᠠᠪᠠᠭᠤ ᠪᠠᠢᠳᠠᠯᠲᠠᠢ ᠪᠠᠢᠪᠠ᠃ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ ᠤ᠋ᠳ ᠠ᠋ᠴᠠ ᠨᠡᠯᠢᠶᠡᠳ ᠨᠢ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠨᠢ ᠡᠯᠡᠰᠦᠨ ᠰᠢᠭᠤᠷᠭᠠ ᠪᠠᠷ ᠡᠨᠳᠡᠭᠰᠡᠨ ᠪᠣᠯᠤᠯᠲᠠᠢ᠃
ᠠᠷᠢᠬᠪᠥᠶ᠋ᠬᠡ ᠨᠢᠳᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠰᠢᠷᠣᠢ ᠪᠠᠨ ᠠᠷᠴᠢᠭᠠᠳ᠂ ᠮᠡᠬᠡ ᠪᠠᠷᠠᠳᠠᠭᠰᠠᠨ ᠶᠠᠩᠵᠤᠲᠠᠢ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠬᠥᠭᠰᠢᠨ ᠳᠣᠷᠭᠣᠨ ᠴᠢᠩᠰᠠᠩ ᠳᠠᠪᠬᠢᠨ ᠢᠷᠡᠵᠦ ᠶᠠᠪᠠᠭᠠᠯᠠᠨ ᠠᠭᠤᠯᠵᠠᠭᠠᠳ᠄
— ᠪᠤᠤ ᠭᠤᠳᠤᠷᠠᠭᠠᠷᠠᠢ! ᠳᠣᠯᠣᠭᠠ ᠳᠣᠣᠷᠠᠳᠠᠵᠤ ᠨᠠᠢ᠍ᠮᠠ ᠰᠡᠭᠡᠳᠡᠭ ᠤᠴᠢᠷ ᠴᠦ᠍ ᠪᠣᠢ᠃ ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ ᠭᠡᠵᠦ ᠬᠡᠯᠡᠭᠡᠳ᠂ ᠥᠷᠦᠪᠴᠢᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠡᠪᠡᠷᠢᠨ ᠠᠪᠴᠤ ᠦᠨᠦᠰᠴᠡᠢ᠃ ᠬᠠᠷᠠᠬᠣᠷᠣᠮ ᠤ᠋ᠨ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠠᠮᠢ ᠲᠡᠭᠦᠰ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠦᠭ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠤᠬᠤᠷᠢᠨ ᠴᠤᠪᠤᠪᠠ᠃ ᠲᠡᠳᠡᠨ ᠢ᠋ ᠬᠡᠨ ᠴᠦ᠍ ᠬᠣᠷᠢᠭᠯᠠᠨ ᠰᠠᠭᠠᠲᠠᠭᠤᠯᠤᠭᠰᠠᠨ ᠦᠭᠡᠢ᠃
ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠠᠷᠤ ᠠ᠋ᠴᠠ ᠨᠢ ᠬᠥᠭᠡᠭᠡᠬᠦ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠤᠴᠢᠷ ᠲᠡᠨᠳᠡ ᠪᠡᠨ ᠤᠲᠤᠭᠠ ᠲᠠᠯᠪᠢᠨ ᠬᠣᠴᠣᠷᠤᠯᠠ᠃ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠲᠡᠩᠴᠡᠭᠦᠷᠢ ᠦᠭᠡᠢ᠂ ᠬᠠᠷᠠᠬᠣᠷᠣᠮ ᠤ᠋ᠨ ᠲᠠᠯᠠ ᠡᠯᠡᠰᠦᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠨᠡᠷᠪᠡᠭᠳᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠲᠠᠢᠯᠵᠤ᠂ ᠲᠡᠭᠦᠨ ᠢ᠋ ᠪᠡᠨ《ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ》 ᠭᠡᠵᠦ ᠬᠥᠭᠡᠷᠦᠨ ᠴᠣᠬᠢᠭᠤᠯᠵᠠᠢ᠃ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠨᠢᠭᠡᠨ ᠲᠦᠮᠡᠲᠦ ᠣᠷᠴᠢᠮ ᠴᠡᠷᠢᠭ ᠨᠢ ᠵᠠᠮ ᠳ᠋ᠤ᠌ ᠳᠣᠯᠣᠭᠠ ᠬᠣᠨᠣᠭ ᠠᠶᠠᠯᠠᠨ ᠶᠠᠪᠤᠭᠰᠠᠭᠠᠷ ᠨᠡᠢᠰᠯᠡᠯ ᠳ᠋ᠦ᠍ ᠪᠡᠨ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ ᠬᠤᠪᠢᠯᠠᠢ ᠠ᠋ᠴᠠ ᠰᠡᠷᠡᠮᠵᠢᠯᠡᠨ ᠬᠠᠭᠠᠯᠲᠠ ᠬᠠᠮᠠᠭᠠᠯᠠᠯᠲᠠ ᠶ᠋ᠢ ᠬᠣᠲᠠ ᠶ᠋ᠢᠨ ᠵᠠᠬᠠ ᠪᠠᠷ ᠪᠠᠢᠭᠤᠯᠵᠤ ᠡᠬᠢᠯᠡᠭᠰᠡᠨ ᠠᠵᠢ᠃
ᠥᠩᠭᠡᠷᠡᠭᠡᠭᠰᠡᠨ ᠲᠤᠯᠤᠯᠳᠤᠭᠠᠨ ᠤ᠋ ᠦᠶᠡ ᠪᠡᠷ ᠬᠣᠶᠠᠷ ᠲᠠᠯᠠ ᠪᠠᠷ ᠪᠡᠶᠡ ᠪᠠᠶᠠᠨ ᠠ᠋ᠴᠠ ᠪᠠᠨ ᠵᠠᠷᠢᠮ ᠴᠥᠭᠡᠨ ᠴᠡᠷᠢᠭ ᠳᠠᠭᠠᠭᠠᠮᠠᠯ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠨᠢ ᠶᠠᠮᠠᠷ ᠴᠦ᠍ ᠲᠡᠢᠨ ᠦ᠌ ᠶᠠᠪᠤᠴᠠ ᠳ᠋ᠤ᠌ ᠭᠠᠷᠳᠠᠭ ᠵᠦᠢᠯ ᠪᠢᠯᠡ᠃ ᠪᠠᠷᠢᠭᠳᠠᠵᠤ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠲᠠᠭᠤᠭᠳᠠᠨ ᠢᠷᠡᠭᠰᠡᠨ ᠬᠢᠲᠠᠳ ᠨᠢᠭᠡ ᠳᠠᠭᠠᠭᠠᠮᠠᠯ ᠢ᠋ ᠪᠠᠢᠴᠠᠭᠠᠪᠠᠯ ᠥᠴᠢᠭ ᠨᠢ ᠰᠣᠨᠢᠨ᠄
— ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠴᠡᠷᠢᠭ ᠲᠦ᠍ ᠬᠢᠲᠠᠳ ᠴᠡᠷᠢᠭ ᠬᠣᠶᠠᠷ ᠲᠦᠮᠡ ᠢᠯᠡᠭᠦᠦ ᠶᠠᠪᠤᠵᠤ ᠪᠠᠢᠭᠠ᠃ ᠪᠢᠳᠡ ᠥᠪᠡᠷ ᠦ᠋ᠨ ᠳᠠᠭᠠᠭᠠᠮᠠᠯ ᠠ᠋ᠴᠠ ᠨᠢᠭᠤᠴᠠ ᠪᠠᠷ ᠠᠪᠤᠭᠰᠠᠨ ᠲᠤᠰᠢᠶᠠᠯ ᠳ᠋ᠤ᠌ ᠪᠠᠨ《ᠬᠢᠲᠠᠳ ᠴᠡᠷᠢᠭ ᠠᠮᠢ ᠬᠠᠢᠷᠠ ᠦᠭᠡᠢ ᠪᠠᠢᠯᠳᠤᠵᠤ ᠪᠠᠢᠭᠠ ᠪᠠᠢᠳᠠᠯ ᠢ᠋ ᠢᠯᠡᠳᠲᠡ ᠦᠵᠡᠭᠦᠯᠦᠨ᠂ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠭᠠᠷᠴᠤ ᠵᠥᠷᠢᠯᠳᠦᠨ ᠪᠠᠢᠭᠠ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠳᠠᠢᠰᠤᠨ ᠤ᠋ ᠲᠠᠯᠠ᠂ ᠮᠠᠨ ᠤ᠋ ᠲᠠᠯᠠ ᠭᠡᠵᠦ ᠢᠯᠭᠠᠯ ᠦᠭᠡᠢ ᠣᠯᠠᠨ ᠢ᠋ᠶ᠋ᠠᠷ ᠦᠬᠦᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ》 ᠭᠡᠰᠡᠨ ᠭᠡᠪᠡ᠃
— ᠶᠠᠭᠠᠬᠢᠭᠠᠳ ᠲᠠ ᠨᠠᠷ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠮᠢ ᠶ᠋ᠢ ᠬᠠᠢᠷᠠᠯᠠᠬᠤ ᠦᠭᠡᠢ ᠶᠠᠪᠤᠵᠤ ᠮᠣᠩᠭᠣᠯ ᠬᠠᠭᠠᠨ ᠬᠡᠮᠡᠬᠦ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠥᠯᠥᠭᠡ ᠦᠬᠦᠨ ᠲᠤᠯᠤᠯᠳᠤᠳᠠᠭ ᠪᠢᠯᠡ? ᠡᠨᠡ ᠶᠠᠮᠠᠷ ᠤᠴᠢᠷ ᠲᠠᠢ ᠪᠣᠢ?
— ᠠᠢ᠂ ᠪᠢᠳᠡᠨ ᠦ᠌ ᠬᠢᠲᠠᠳ ᠴᠡᠷᠢᠭ ᠶᠡᠬᠡ ᠰᠠᠢᠨ ᠲᠤᠯᠤᠯᠳᠤᠪᠠᠯ ᠮᠣᠩᠭᠣᠯ ᠮᠣᠩᠭᠣᠯ ᠢ᠋ ᠪᠡᠨ ᠣᠯᠠᠨ ᠢ᠋ᠶ᠋ᠠᠷ ᠬᠢᠳᠤᠨᠠ᠃ ᠪᠢᠳᠡ ᠬᠢᠲᠠᠳ ᠢ᠋ ᠪᠢᠰᠢ ᠮᠣᠩᠭᠣᠯ ᠢ᠋ ᠬᠣᠷᠣᠭᠠᠵᠤ ᠶᠠᠪᠤᠭᠠ ᠪᠣᠯᠬᠣᠷ ᠶᠠᠭᠤ ᠶ᠋ᠢ ᠨᠢ ᠬᠠᠢᠷᠠᠯᠠᠬᠤ ᠪᠣᠢ? ᠮᠠᠨ ᠤ᠋ ᠬᠢᠲᠠᠳ ᠴᠡᠷᠢᠭ ᠬᠡᠳᠦ ᠦᠬᠦᠵᠦ᠂ ᠮᠣᠩᠭᠣᠯ ᠨᠢᠭᠡ ᠠᠯᠠᠭᠳᠠᠵᠤ ᠪᠠᠢᠯᠠ ᠭᠡᠬᠦ ᠳ᠋ᠦ᠍ ᠡᠴᠦᠰ ᠲᠦ᠍ ᠪᠡᠨ ᠪᠢᠳᠡᠨ ᠳ᠋ᠦ᠍ ᠠᠰᠢᠭᠲᠠᠢ ᠪᠣᠯᠤᠨᠠ᠃ ᠤᠴᠢᠷ ᠨᠢ ᠮᠣᠩᠭᠣᠯ ᠴᠥᠭᠡᠬᠡᠨ ᠪᠢᠳᠡ ᠣᠯᠠᠨ ᠭᠡᠵᠦ ᠶᠡᠬᠡ ᠳᠠᠭᠠᠭᠠᠮᠠᠯ ᠬᠡᠯᠡᠳᠡᠭ ᠭᠡᠵᠦ ᠮᠠᠨ ᠤ᠋ ᠳᠠᠭᠠᠭᠠᠮᠠᠯ ᠪᠠᠰᠠ ᠬᠡᠯᠡᠳᠡᠭ ᠭᠡᠨᠡ ᠪᠢᠯᠡ᠃ ᠪᠢᠳᠡ ᠲᠡᠷᠡ ᠦᠭᠡ ᠶ᠋ᠢ ᠳᠠᠭᠠᠳᠠᠭ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠳᠠᠪᠰᠢᠯᠲᠦ