ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠵᠢᠷᠭᠤᠳᠤᠭᠠᠷ ᠪᠦᠯᠦᠭ -3 >᠂ ᠰᠦᠩ ᠲᠦᠷᠢᠯᠡ Бүргэд харьд үүрэлдэггүй – Ж᠂ Пүрэв <6-р бүлэг ~3>. сөн түрлээ
9ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ ᠡᠭᠦᠷ ᠡᠴᠡ ᠪᠡᠨ ᠬᠠᠭᠠᠴᠠᠭᠰᠠᠨ ᠪᠦᠷᠭᠦᠳ ᠦᠨ ᠵᠤᠯᠵᠠᠭᠠ
ᠭᠤᠷᠪᠠ - ᠰᠦᠩ ᠲᠦᠷᠢᠯᠡ
ᠪᠠᠰᠠ ᠬᠠᠭᠤᠴᠢᠨ ᠥᠪᠡᠷ ᠦ᠋ᠨ ᠬᠠᠷᠢᠶᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠴᠡᠷᠢᠭ᠂ ᠲᠦᠰᠢᠮᠡᠳ ᠨᠠᠷ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠤᠨ ᠡᠮᠬᠢᠯᠡᠬᠦ ᠳ᠋ᠦ᠍ ᠪᠡᠨ《ᠬᠠᠮᠢᠭᠠ ᠴᠦ᠍ ᠣᠴᠢᠭᠰᠠᠨ ᠪᠠᠢᠭᠰᠠᠨ ᠲᠡᠳᠡᠨ ᠳ᠋ᠦ᠍ ᠶᠠᠯᠠ ᠵᠢᠮᠡᠯᠡᠯ ᠨᠣᠭᠳᠠᠭᠤᠯᠬᠤ ᠦᠭᠡᠢ》 ᠭᠡᠵᠦ ᠠᠮᠠ ᠥᠭᠴᠦ᠂《ᠮᠣᠩᠭᠣᠯ ᠤ᠋ᠨ ᠢ᠋ᠶ᠋ᠠᠨ ᠡᠬᠡ ᠭᠠᠯ ᠭᠣᠯᠣᠮᠲᠠ ᠪᠠᠨ ᠪᠢᠳᠡ ᠠᠮᠢ ᠪᠡᠶᠡ ᠶ᠋ᠢ ᠡᠰᠡ ᠬᠠᠢᠷᠠᠯᠠᠨ ᠶᠠᠪᠤᠵᠤ ᠬᠠᠮᠠᠭᠠᠯᠠᠬᠤ ᠨᠢ ᠠᠷᠢᠭᠤᠨ ᠨᠡᠷᠡ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠪᠥᠭᠡᠳ ᠤᠷᠪᠠᠭᠴᠢ ᠡᠲᠡᠭᠡᠳ ᠲᠡᠢ ᠲᠡᠮᠡᠴᠡᠯᠳᠦᠬᠦ ᠨᠢ ᠡᠵᠡᠨ ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠠᠯᠳᠠᠷ ᠢ᠋ ᠰᠠᠬᠢᠭᠰᠠᠨ ᠰᠢᠳᠤᠷᠭᠤ ᠦᠢᠯᠡ ᠮᠥᠨ》 ᠭᠡᠮᠡᠨ ᠢᠳᠬᠠᠭᠰᠠᠨ ᠪᠠᠢᠨᠠ᠃ ᠡᠨᠡ ᠦᠭᠡ ᠶ᠋ᠢ ᠨᠢ ᠲᠡᠭᠦᠨ ᠦ᠌ ᠬᠠᠭᠤᠴᠢᠨ ᠳᠠᠭᠠᠭᠠᠮᠠᠯ ᠲᠦᠰᠢᠮᠡᠳ᠂ ᠴᠡᠷᠢᠭ ᠦ᠋ᠳ ᠰᠣᠨᠣᠰᠤᠨ ᠬᠦᠯᠢᠶᠡᠨ ᠠᠪᠴᠤ ᠨᠡᠯᠢᠶᠡᠳ ᠲᠣᠭᠠ ᠪᠠᠷ ᠪᠠᠢᠳᠠᠷᠠᠭ ᠤ᠋ᠨ ᠭᠣᠣᠯ ᠤ᠋ᠨ ᠰᠠᠪᠠ᠂ ᠬᠠᠩᠭᠠᠢ ᠨᠢᠷᠤᠭᠤᠨ ᠤ᠋ ᠪᠠᠷᠠᠭᠤᠨ ᠰᠤᠭᠤ ᠳ᠋ᠤ᠌ ᠢᠷᠡᠵᠦ ᠬᠤᠷᠠᠬᠤ ᠪᠣᠯᠪᠠ᠃ ᠬᠣᠨᠣᠭ ᠥᠩᠭᠡᠷᠡᠬᠦ ᠪᠦᠷᠢ ᠴᠡᠷᠢᠭ ᠦ᠋ᠨ ᠲᠣᠭᠠ ᠨᠡᠮᠡᠭᠳᠡᠨ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠠᠷᠢᠬᠪᠦ᠋ᠬᠡ ᠪᠡᠶᠡᠰᠦᠨ《ᠮᠢᠨᠦ ᠰᠠᠨᠠᠭᠠ ᠮᠣᠩᠭᠣᠯ ᠲᠦᠮᠡᠨ ᠳ᠋ᠦ᠍ ᠲᠠᠭᠠᠰᠢᠶᠠᠭᠳᠠᠵᠤ ᠪᠠᠢᠭᠠ ᠰᠢᠪ᠃ ᠨᠠᠮᠠᠶ᠋ᠢ ᠣᠯᠠᠨ ᠮᠠᠨᠢ ᠶᠡᠬᠡ ᠬᠠᠭᠠᠨ ᠭᠡᠵᠦ ᠡᠷᠭᠦᠮᠵᠢᠯᠡᠭᠰᠡᠨ ᠰᠠᠨᠠᠭᠠ ᠪᠠᠨ ᠬᠡᠪ ᠢ᠋ᠶ᠋ᠡᠷ ᠬᠠᠳᠠᠭᠠᠯᠠᠨ ᠪᠣᠢ ᠨᠢ ᠡᠨᠡ ᠪᠢᠵᠡ》᠃《ᠪᠢ ᠶᠠᠭᠠᠬᠢᠪᠠᠯ ᠲᠦᠮᠡᠨ ᠦ᠌ ᠪᠡᠨ ᠢᠲᠡᠭᠡᠯ ᠬᠦᠨᠳᠦᠳᠬᠡᠯ ᠢ᠋ ᠪᠤᠵᠠᠷᠳᠠᠭᠤᠯᠬᠤ ᠦᠭᠡᠢ ᠶᠠᠪᠤᠬᠤ ᠪᠣᠢ?》 ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃ ᠠᠷᠢᠬᠪᠦ᠋ᠬᠡ ᠤᠭ ᠨᠢ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠭᠦᠢᠴᠡᠭᠡᠬᠦ ᠵᠣᠷᠢᠭ ᠰᠡᠳᠬᠢᠯ ᠦ᠋ᠨ ᠲᠡᠩᠬᠡᠭᠡ ᠲᠡᠢ᠂ ᠲᠡᠷᠡ ᠬᠦᠴᠦ ᠪᠡᠨ ᠪᠡᠶᠡ ᠳ᠋ᠦ᠍ ᠪᠡᠨ ᠬᠠᠳᠠᠭᠠᠯᠠᠨ ᠶᠠᠪᠤᠭᠠ ᠪᠢᠯᠡ᠃
ᠠᠷᠢᠬᠪᠦ᠋ᠬᠡ ᠬᠠᠭᠠᠨ ᠭᠡᠳᠡᠭ ᠨᠡᠷᠡ ᠪᠡᠨ ᠦᠨᠡᠬᠡᠷ ᠠᠯᠳᠠᠭᠠ ᠦᠭᠡᠢ ᠪᠠᠢᠭᠠ ᠴᠠᠭ᠃ ᠬᠠᠭᠠᠨ ᠤ᠋ ᠬᠢ ᠪᠠᠢᠳᠠᠷᠠᠭ ᠤ᠋ᠨ ᠭᠣᠣᠯ ᠤ᠋ᠨ ᠨᠢᠭᠡ ᠰᠠᠯᠠᠭᠠ ᠠᠮᠠᠨ ᠳ᠋ᠤ᠌ ᠬᠣᠷᠢ ᠣᠷᠴᠢᠮ ᠭᠡᠷ ᠪᠠᠷᠢᠨ ᠡᠪᠦᠯᠵᠢᠭᠡᠳ᠂ ᠲᠡᠨᠳᠡ ᠪᠡᠨ ᠴᠠᠭᠠᠯᠠᠯᠠ᠃ ᠰᠠᠷᠠ ᠰᠢᠨᠡ ᠶ᠋ᠢᠨ ᠪᠠᠶᠠᠷ ᠤ᠋ᠨ ᠡᠳᠦᠷ ᠨᠣᠶᠠᠳ ᠲᠠᠢᠵᠢ ᠨᠠᠷ ᠨᠢ ᠶᠣᠰᠣᠯᠠᠯ ᠤ᠋ᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ᠂ ᠬᠥᠬᠡ ᠬᠥᠯᠲᠥᠷᠭᠡᠲᠦ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠬᠠᠭᠠᠨ ᠲᠠᠢ ᠪᠠᠨ ᠵᠣᠯᠭᠠᠪᠠ᠃ ᠲᠡᠳᠡ ᠬᠥᠯᠳᠡᠭᠡᠭᠰᠡᠨ ᠠᠢᠷᠠᠭ ᠭᠡᠰᠬᠡᠭᠡᠭᠰᠡᠨ᠂ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ ᠠ᠋ᠴᠠ ᠠᠴᠢᠵᠤ ᠢᠷᠡᠭᠰᠡᠨ《ᠬᠦᠷᠡᠩ》 ᠳᠠᠷᠠᠰᠤ ᠰᠡᠯᠲᠡ ᠶ᠋ᠢ ᠬᠤᠨᠳᠠᠭᠠᠯᠠᠵᠤ᠂ ᠪᠡᠯᠭᠡ ᠲᠡᠢ ᠰᠠᠢᠨ ᠦᠭᠡ ᠬᠡᠯᠡᠯᠴᠡᠨ ᠪᠠᠢᠯᠠ᠃
— ᠪᠢ ᠨᠣᠬᠠᠢ ᠶ᠋ᠢᠨ ᠭᠥᠯᠥᠭᠡ ᠪᠣᠯᠤᠭᠠ ᠦᠭᠡᠢ ᠶᠠᠪᠤᠨᠠ᠃ ᠡᠷᠡ ᠮᠣᠷᠢ᠂ ᠡᠷᠴᠢᠲᠦ ᠰᠤᠮᠤ ᠬᠣᠶᠠᠷ ᠪᠢᠳᠡᠨ ᠢ᠋ ᠣᠷᠬᠢᠭᠠ ᠦᠭᠡᠢ ᠪᠠᠢᠭᠠ ᠨᠢ ᠯᠠᠪᠲᠠᠢ ᠭᠡᠵᠦ ᠠᠷᠢᠬᠪᠦ᠋ᠬᠡ ᠬᠡᠯᠡᠭᠡᠳ᠂ ᠵᠢᠷᠣᠭᠠ ᠶᠠᠪᠤᠳᠠᠯ ᠲᠠᠢ ᠬᠡᠭᠡᠷ ᠵᠢᠰᠦᠮ ᠦ᠋ᠨ ᠮᠣᠷᠢ ᠤᠨᠤᠵᠤ ᠳᠠᠪᠬᠢᠨ ᠵᠦᠭ ᠢ᠋ᠶ᠋ᠡᠨ ᠭᠠᠷᠭᠠᠭᠠᠳ᠂ ᠳᠠᠷᠠᠭᠠ ᠨᠢ ᠬᠣᠷᠢᠨ ᠳᠠᠭᠠᠭᠤᠯ ᠳᠠᠭᠠᠭᠤᠯᠤᠭᠰᠠᠭᠠᠷ ᠴᠡᠷᠢᠭ ᠦ᠋ᠨ ᠠᠩᠭᠢ ᠶ᠋ᠢᠨ ᠪᠠᠢᠷᠢ ᠨᠤᠭᠤᠳ ᠢ᠋ᠶ᠋ᠠᠷ ᠶᠠᠪᠤᠵᠤ ᠳᠠᠭᠠᠭᠠᠮᠠᠯ ᠨᠤᠭᠤᠳ ᠲᠠᠢ ᠪᠠᠨ ᠵᠣᠯᠭᠠᠨ᠂ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠢ᠋ ᠡᠷᠭᠢᠯᠲᠡ ᠶ᠋ᠢᠨ ᠣᠨ ᠪᠣᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠨᠠ ᠭᠡᠵᠦ ᠬᠡᠯᠡᠵᠦ ᠪᠠᠢᠪᠠ᠃《ᠪᠢᠳᠡ ᠤᠳᠠᠬᠤ ᠦᠭᠡᠢ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠮᠡᠭᠡ ᠶ᠋ᠢ ᠭᠠᠷᠭᠠᠨᠠ》 ᠭᠡᠵᠦ ᠲᠡᠷᠡ ᠪᠡᠷ ᠬᠡᠯᠡᠵᠦ ᠴᠡᠷᠢᠭ ᠦ᠋ᠳ ᠢ᠋ ᠬᠥᠭᠵᠢᠭᠡᠵᠦ ᠶᠠᠪᠤᠯᠠ᠃
ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠡᠨᠡ ᠡᠳᠦᠷ ᠪᠥᠬᠡ ᠪᠠᠷᠢᠯᠳᠤᠨ᠂ ᠬᠤᠷᠳᠤᠨ ᠮᠣᠷᠢ ᠤᠷᠤᠯᠳᠤᠭᠤᠯᠵᠤ᠂ ᠲᠡᠭᠦᠨ ᠢ᠋ ᠨᠢ ᠣᠯᠠᠨ ᠬᠥᠮᠦᠨ ᠬᠠᠷᠠᠵᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠭᠣᠭᠠᠵᠤ ᠪᠢᠯᠡ᠃ ᠡᠨᠡ ᠡᠳᠦᠷ ᠶᠠᠭᠤᠮᠠ ᠶᠠᠭᠤᠮᠠ ᠠᠶᠠᠲᠠᠢᠬᠠᠨ ᠪᠠᠢᠭᠠ᠃ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠬᠣᠶᠠᠷ ᠬᠠᠲᠤᠨ ᠳ᠋ᠤ᠌ ᠮᠣᠷᠢᠨᠱᠠᠭᠠᠢ ᠦᠢᠯᠡᠴᠢᠯᠡᠨ᠂ ᠲᠡᠳᠡᠨ ᠢ᠋ ᠪᠠᠰᠠ ᠵᠤᠭᠠᠴᠠᠭᠤᠯᠵᠠᠢ᠃ ᠪᠢᠯᠢᠭᠦᠨ ᠦ᠌ ᠡᠬᠡᠨᠡᠷ ᠬᠡᠦᠬᠡᠳ ᠨᠡᠯᠢᠶᠡᠳ ᠲᠦᠷᠦᠭᠦᠨ ᠪᠠᠢᠳᠠᠷᠠᠭ ᠲᠤ ᠢᠷᠡᠭᠡᠳ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠮᠣᠷᠢᠨᠱᠠᠭᠠᠢ ᠲᠠᠢ ᠬᠠᠮᠲᠤ ᠪᠠᠷ ᠬᠤᠨᠳᠠᠭᠠᠴᠢᠨ ᠬᠢᠳᠡᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠬᠠᠪᠤᠷ ᠤ᠋ᠨ ᠰᠠᠷᠠ ᠯᠠᠪᠬᠠᠨ ᠭᠠᠷᠤᠭᠠᠳ ᠢᠷᠡᠬᠦ ᠲᠡᠢ ᠵᠡᠷᠭᠡ ᠠᠷᠢᠬᠪᠦ᠋ᠬᠡ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠬᠢᠯᠭᠡᠵᠦ᠂ ᠢᠯᠠᠩᠭᠤᠶᠠ ᠰᠢᠨᠡ ᠪᠡᠷ ᠲᠠᠲᠠᠭᠳᠠᠭᠰᠠᠨ ᠡᠷᠡᠴᠦᠳ ᠢ᠋ ᠭᠣᠣᠯᠯᠠᠨ ᠬᠠᠷᠪᠤᠵᠤ ᠨᠠᠮᠨᠠᠬᠤ᠂ ᠴᠠᠪᠴᠢᠯᠳᠤᠨ ᠲᠤᠯᠤᠯᠳᠤᠬᠤ ᠪᠡᠯᠡᠳᠬᠡᠯ ᠬᠢᠯᠭᠡᠨ᠂ ᠳᠠᠭᠠᠭᠠᠮᠠᠯ ᠲᠦᠰᠢᠮᠡᠳ ᠨᠠᠷ ᠢ᠋ ᠠᠭᠱᠠᠨ ᠵᠠᠭᠤᠷᠠ ᠴᠦ᠍ ᠵᠦᠭᠡᠷ ᠪᠠᠢᠯᠭᠠᠬᠤ ᠦᠭᠡᠢ᠂ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠶᠠᠪᠤᠭᠤᠯᠤᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ
— ᠪᠢ ᠬᠥᠯᠥᠰᠥ ᠪᠡᠨ ᠠᠰᠬᠠᠷᠠᠭᠤᠯᠵᠤ ᠪᠡᠶᠡ ᠪᠡᠨ ᠶᠠᠳᠠᠷᠠᠭᠠᠵᠤ ᠪᠠᠢᠵᠤ ᠯᠠ ᠳᠠᠢᠰᠤᠨ ᠢ᠋ ᠨᠣᠮᠣᠬᠠᠳᠬᠠᠨᠠ ᠭᠡᠵᠦ ᠰᠤᠷᠭᠠᠮᠵᠢᠯᠠᠨ᠂ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠳᠠᠭᠠᠷᠢᠬᠤ᠂ ᠬᠠᠷᠪᠤᠬᠤ᠂ ᠴᠠᠪᠴᠢᠯᠳᠤᠬᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠶᠡ ᠪᠡᠨ ᠤᠯᠠᠮ ᠪᠣᠯᠪᠠᠰᠤᠷᠠᠭᠤᠯᠤᠨᠠ᠃ ᠤᠷᠢᠳ ᠨᠢ ᠴᠦ᠍ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠵᠡᠬᠡᠭᠰᠡᠨ ᠲᠡᠢ ᠡᠷᠡ ᠪᠢᠯᠡ᠃
ᠬᠠᠪᠤᠷ ᠤ᠋ᠨ ᠴᠠᠭᠠᠨ ᠨᠠᠷᠠᠨ ᠨᠢᠭᠤᠷ ᠳᠤᠯᠠᠭᠠᠴᠠᠭᠤᠯᠤᠭᠰᠠᠨ ᠨᠢᠭᠡ ᠡᠳᠦᠷ ᠠᠷᠢᠬᠪᠥ᠋ᠬᠡ ᠬᠠᠷᠢᠶᠠ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ ᠨᠣᠶᠠᠳ᠂ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠦᠰᠢᠮᠡᠳ ᠨᠠᠷ ᠢ᠋ ᠶᠡᠬᠡ ᠭᠡᠷ ᠲᠦ᠍ ᠴᠤᠭᠯᠠᠭᠤᠯᠤᠨ᠂ ᠴᠠᠭ ᠦᠶᠡ ᠶ᠋ᠢᠨ ᠬᠡᠷᠡᠭ ᠶᠠᠪᠤᠳᠠᠯ ᠭᠡᠰᠡᠨ ᠵᠦᠢᠯ ᠢ᠋ ᠬᠡᠯᠡᠯᠴᠡᠬᠦ ᠬᠤᠷᠠᠯᠲᠠᠢ ᠬᠢᠯᠭᠡᠯᠡ᠃ ᠬᠣᠷᠢᠭᠠᠳ ᠨᠣᠶᠠᠳ ᠡᠨᠳᠡ ᠬᠤᠷᠠᠵᠤ᠂ ᠴᠢᠨᠠᠭᠰᠠᠨ ᠲᠠᠷᠭᠤᠨ ᠮᠢᠬᠠ᠂ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ ᠤ᠋ ᠠᠮᠲᠠᠲᠤ ᠳᠠᠷᠠᠰᠤ ᠵᠣᠭᠣᠭᠯᠠᠨ᠂ ᠰᠡᠳᠬᠢᠯ ᠬᠠᠩᠬᠤᠯᠤᠭᠠᠳ ᠶᠠᠩᠵᠤ ᠪᠠᠷ ᠤᠭ ᠬᠡᠷᠡᠭ ᠢ᠋ ᠬᠡᠯᠡᠯᠴᠡᠪᠡ᠃ ᠠᠷᠢᠬᠪᠥ᠋ᠬᠡ ᠥᠷᠭᠡᠨ ᠬᠠᠷᠠ ᠬᠥᠮᠥᠰᠬᠡ ᠳᠣᠣᠷᠠᠬᠢ ᠬᠤᠷᠴᠠ ᠬᠠᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠣᠯᠠᠨ ᠢ᠋ ᠬᠠᠷᠠᠵᠤ᠂ ᠲᠠᠢᠪᠤᠩ ᠠᠭᠠᠳ ᠬᠤᠷᠴᠠ ᠬᠡᠯᠡᠯᠭᠡ ᠲᠡᠢ ᠦᠭᠡ ᠪᠡᠷ ᠶᠠᠷᠢᠬᠤ ᠳ᠋ᠤ᠌ ᠪᠠᠨ᠄
— ᠪᠢᠳᠡ ᠵᠣᠪᠠᠯᠠᠩ ᠦᠵᠡᠭᠰᠡᠨ᠂ ᠬᠠᠭᠠᠴᠠᠯ ᠦᠵᠡᠭᠰᠡᠨ᠂ ᠣᠳᠣ ᠣᠷᠣᠬᠤ ᠣᠷᠣᠨ ᠣᠯᠵᠤ ᠶᠠᠳᠠᠭᠰᠠᠨ ᠪᠠᠢᠳᠠᠯᠲᠠᠢ ᠲᠥᠷᠥᠯᠬᠢ ᠬᠣᠲᠠ ᠠ᠋ᠴᠠ ᠪᠠᠨ ᠬᠥᠨᠳᠡᠢ ᠬᠣᠯᠠ ᠭᠠᠵᠠᠷ ᠲᠤ ᠠᠮᠢ ᠬᠣᠷᠣᠭᠠᠵᠤ ᠰᠠᠭᠤᠨᠠ᠃ ᠡᠨᠡ ᠪᠣᠯ ᠨᠢᠭᠡ ᠪᠣᠳᠣᠯ ᠤ᠋ᠨ ᠲᠡᠢᠮᠦ ᠴᠦ᠍ ᠶᠡᠬᠡ ᠵᠣᠪᠠᠯᠠᠩ ᠪᠢᠰᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠬᠠᠮᠤᠭ ᠤ᠋ᠨ ᠠᠶᠤᠯᠲᠠᠢ ᠨᠢ ᠥᠪᠡᠷᠰᠡᠳ ᠦ᠋ᠨ ᠥᠷᠭᠥᠭᠡ ᠭᠡᠷ ᠪᠣᠯᠤᠭᠰᠠᠨ ᠨᠡᠢᠰᠯᠡᠯ ᠬᠣᠲᠠ ᠪᠠᠨ ᠬᠦᠢᠲᠡᠨ ᠰᠡᠳᠬᠢᠯᠲᠡᠨ ᠦ᠌ ᠭᠠᠷ ᠲᠤ ᠪᠤᠯᠢᠶᠠᠯᠭᠠᠵᠤ ᠣᠷᠬᠢᠭᠠᠳ ᠪᠠᠢᠨᠠ᠃ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠮᠢᠨᠢ ᠪᠣᠰᠬᠠᠵᠤ ᠪᠠᠢᠭᠤᠯᠤᠭᠰᠠᠨ ᠲᠡᠷᠡ ᠥᠯᠥᠭᠡᠢ ᠬᠠᠷᠠ ᠰᠠᠨᠠᠭᠠᠲᠤ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠤᠴᠠ ᠨᠠᠷ ᠴᠢᠨᠣᠠ ᠡᠭᠦᠷᠯᠡᠭᠦᠯᠵᠦ ᠰᠠᠭᠤᠨᠠ᠃ ᠪᠢᠳᠡ ᠲᠡᠷᠡ ᠬᠥᠨᠥᠭᠡᠯᠲᠦ ᠠᠮᠢᠲᠠᠳ ᠢ᠋ ᠰᠢᠪᠬᠠᠨ ᠬᠥᠭᠡᠭᠡᠵᠦ ᠵᠠᠢᠯᠠᠭᠤᠯᠬᠤ ᠶᠣᠰᠣᠲᠠᠢ ᠪᠣᠯᠪᠠ᠁ ᠭᠡᠯᠡ᠃
ᠡᠨᠳᠡ ᠬᠤᠷᠠᠭᠰᠠᠨ ᠪᠤᠰᠤᠳ ᠨᠣᠶᠠᠳ᠂ ᠳᠠᠭᠠᠭᠠᠮᠠᠯ ᠤ᠋ᠳ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠭᠴᠢ ᠨᠠᠷ ᠰᠠᠨᠠᠭᠠ ᠪᠣᠳᠣᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠨ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠣᠯᠪᠠ᠃ ᠲᠦᠮᠡᠲᠦ ᠶ᠋ᠢᠨ ᠳᠠᠭᠠᠭᠠᠮᠠᠯ ᠨᠣᠶᠠᠳ ᠬᠠᠨ ᠭᠡᠭᠴᠢ ᠡᠬᠢᠯᠡᠨ ᠠᠷᠢᠬᠪᠥ᠋ᠬᠡ ᠳ᠋ᠦ᠍ ᠬᠠᠨᠳᠤᠵᠤ ᠶᠣᠰᠣ ᠬᠢᠨ ᠪᠥᠬᠥᠢᠭᠡᠳ᠄
— ᠪᠣᠭᠣᠯ ᠪᠢ ᠥᠪᠡᠷ ᠢ᠋ ᠪᠡᠨ ᠴᠢᠨᠣᠠ ᠶ᠋ᠢᠨ ᠡᠭᠦᠷ ᠲᠦ᠍ ᠰᠢᠭᠢᠳᠦᠭᠡ ᠦᠭᠡᠢ᠂ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠪᠠᠨ ᠰᠢᠳᠠᠷᠯᠠᠨ ᠵᠢᠳᠬᠦᠵᠦ ᠶᠠᠪᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠪᠢᠳᠡᠨ ᠢ᠋ ᠮᠥᠩᠬᠡ ᠲᠩᠷᠢ᠂ ᠡᠵᠡᠨ ᠳᠡᠭᠡᠳᠦ ᠶᠡᠬᠡ ᠪᠣᠭᠳᠠ ᠶ᠋ᠢᠨ ᠰᠦᠯᠳᠡ ᠥᠷᠥᠰᠢᠶᠡᠬᠦ ᠶᠣᠰᠣᠲᠠᠢ᠃ ᠪᠢᠳᠡ ᠨᠡᠩ ᠳᠠᠷᠤᠢ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠤᠴᠠ᠂ ᠶᠢᠰᠦᠩᠬᠡ ᠨᠣᠶᠠᠨ ᠤ᠋ ᠲᠡᠵᠢᠭᠡᠵᠦ ᠪᠠᠢᠭᠠ ᠪᠡᠯᠲᠡᠷᠭᠡ ᠨᠦ᠍ᠭᠦᠳ ᠢ᠋ ᠠᠷᠢᠭᠤᠨ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠦᠯᠳᠡᠨ ᠬᠥᠭᠡᠭᠡᠵᠦ ᠵᠠᠢᠯᠠᠭᠤᠯᠬᠤ ᠶᠣᠰᠣᠲᠠᠢ ᠪᠣᠯᠵᠠᠢ᠃ ᠪᠢᠳᠡ ᠡᠷᠡᠴᠦᠳ ᠮᠥᠨ ᠶᠦᠮ ᠪᠣᠯ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠪᠤᠰᠬᠠᠵᠤ ᠪᠦᠲᠦᠭᠡᠭᠰᠡᠨ ᠠᠷᠢᠭᠤᠨ ᠤᠷᠲᠤ ᠬᠠᠷᠰᠢ ᠶ᠋ᠢ ᠬᠠᠷᠠ ᠳᠣᠳᠤᠷᠲᠠᠨ ᠨᠤᠭᠤᠳ ᠤ᠋ᠨ ᠭᠠᠷ ᠲᠤ ᠤᠳᠠᠭᠠᠨ ᠪᠤᠵᠠᠷᠯᠠᠭᠤᠯᠵᠤ ᠪᠠᠢᠬᠤ ᠤᠴᠢᠷ ᠦᠭᠡᠢ᠁ ᠭᠡᠯᠡ᠃ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠰᠤ ᠭᠡᠭᠴᠢ ᠰᠢᠷᠦᠭᠦᠨ ᠬᠠᠷᠠᠴᠠ ᠲᠠᠢ᠂ ᠪᠣᠰᠤᠭᠠ ᠰᠠᠬᠠᠯ ᠢ᠋ᠶ᠋ᠠᠨ ᠭᠣᠵᠤᠭᠤᠨᠤᠯᠤᠭᠰᠠᠨ ᠡᠷᠡ ᠶᠣᠰᠣ ᠬᠢᠵᠦ᠄
— ᠬᠠᠭᠠᠨᠲᠠᠨ ᠮᠢᠨᠢ ᠠ᠋? ᠪᠣᠭᠣᠯ ᠪᠢᠳᠡ ᠠᠷᠢᠭᠤᠨ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠰᠢᠩᠭᠡᠭᠡᠵᠦ ᠬᠠᠢᠷᠠᠯᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠠᠨ ᠳ᠋ᠤ᠌ ᠰᠥᠭᠥᠳᠦᠨ ᠮᠥᠷᠭᠥᠵᠦ ᠪᠠᠢᠨᠠ᠃ ᠲᠠ ᠪᠣᠯ ᠡᠷᠡ ᠵᠣᠷᠢᠭ ᠢ᠋ᠶ᠋ᠠᠨ ᠪᠠᠳᠠᠷᠷᠭᠠᠭᠰᠡᠨ ᠳᠡᠭᠡᠳᠦ ᠬᠠᠭᠠᠨ ᠪᠢᠯᠡ᠃ ᠪᠣᠭᠣᠯ ᠪᠢᠳᠡ ᠲᠠᠨ ᠤ᠋ ᠵᠠᠷᠯᠢᠭ ᠲᠤ ᠰᠥᠭᠥᠳᠦᠨ ᠮᠥᠷᠭᠥᠨᠡ! ᠬᠤᠪᠢᠯᠠᠢ ᠪᠣᠯ ᠬᠠᠷᠠ ᠰᠠᠨᠠᠭᠠᠲᠠᠨ ᠬᠢᠲᠠᠳ ᠨᠣᠶᠠᠳ ᠢ᠋ᠶ᠋ᠠᠷ ᠲᠡᠵᠢᠭᠡᠯᠭᠡᠭᠰᠡᠨ ᠪᠣᠯᠠᠢ ᠮᠠᠭᠤ ᠰᠠᠨᠠᠭᠠᠲᠤ ᠤᠷᠪᠠᠭᠴᠢ ᠪᠣᠯᠬᠤ ᠪᠠᠨ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠬᠤᠪᠢᠯᠠᠢ ᠴᠠᠭᠠᠵᠠ ᠵᠢᠷᠤᠮ ᠶᠣᠰᠣ ᠪᠠᠷ ᠰᠠᠭᠤᠭᠰᠠᠨ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠢ᠋ ᠬᠦᠴᠦ ᠪᠡᠷ ᠪᠤᠯᠢᠶᠠᠵᠤ ᠠᠪᠬᠤ ᠪᠠᠷ ᠤᠯᠠᠩᠭᠠᠰᠤᠭᠰᠠᠨ ᠴᠢᠰᠤᠲᠤ ᠲᠡᠮᠡᠴᠡᠯ ᠢ᠋ ᠦᠢᠯᠡᠳᠦᠯᠡ᠃ ᠪᠢᠳᠡ ᠲᠡᠭᠦᠨ ᠢ᠋ ᠵᠢᠭᠰᠢᠨ ᠵᠠᠨᠤᠵᠤ ᠪᠠᠢᠨᠠ᠃ ᠴᠡᠷᠢᠭ ᠡᠷᠡᠴᠦᠳ ᠪᠢᠳᠡ ᠵᠥᠪᠬᠡᠨ ᠨᠡᠢᠰᠯᠡᠯ ᠬᠠᠷᠠ ᠬᠣᠷᠣᠮ ᠢ᠋ᠶ᠋ᠠᠨ ᠴᠢᠯᠥᠭᠡᠯᠡᠬᠦ ᠲᠡᠳᠦᠢ ᠦᠭᠡᠢ᠂ ᠬᠤᠪᠢᠯᠠᠢ ᠶ᠋ᠢᠨ ᠨᠡᠢᠰᠯᠡᠯ ᠪᠣᠯᠭᠠᠬᠤ ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠭᠠ ᠲᠡᠷᠡ ᠬᠡᠷᠢᠶᠡᠨ ᠦ᠌ ᠡᠭᠦᠷ ᠢ᠋ ᠦᠨᠡᠰᠦ ᠨᠡᠭᠦᠷᠡᠰᠦ ᠪᠣᠯᠭᠠᠬᠤ ᠶᠣᠰᠣᠲᠠᠢ᠃ ᠲᠡᠢᠮᠦ ᠬᠦᠴᠦᠨ ᠮᠣᠩᠭᠣᠯ ᠪᠢᠳᠡᠨ ᠳ᠋ᠦ᠍ ᠪᠣᠢ ᠭᠡᠵᠦ ᠬᠡᠯᠡᠪᠡ᠃ ᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠦᠭᠡᠨ ᠳ᠋ᠦ᠍ ᠠᠷᠢᠬᠪᠥ᠋ᠬᠡ ᠶ᠋ᠢᠨ ᠰᠡᠳᠬᠢᠯ ᠬᠥᠭᠡᠷᠦᠨ ᠵᠣᠷᠢᠭᠵᠢᠵᠤ ᠰᠠᠭᠤᠯᠠ᠃
ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠶᠡᠬᠡ ᠴᠢᠩᠰᠠᠩ ᠳᠣᠷᠭᠣᠨ ᠭᠡᠭᠴᠢ ᠡᠪᠦᠭᠡᠵᠢᠶᠡᠷ ᠨᠣᠶᠠᠨ ᠶᠣᠰᠣ ᠬᠢᠨ ᠠᠢᠯᠠᠳᠬᠠᠯ ᠬᠢᠬᠦ ᠵᠥᠪᠰᠢᠶᠡᠷᠡᠯ ᠠᠪᠤᠭᠠᠳ᠂ ᠰᠥᠭᠡᠩᠭᠢᠳᠡᠭᠦᠦ ᠳᠠᠭᠤ ᠪᠠᠷ ᠠᠭᠠᠵᠢᠭᠤᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠪᠡᠨ᠄
— ᠨᠣᠶᠠᠳ ᠳᠡᠭᠡᠳᠦᠰ ᠦ᠋ᠳ ᠶᠡᠬᠡ ᠵᠣᠷᠢᠮᠠᠭ ᠰᠠᠢᠬᠠᠨ ᠦᠭᠡ ᠠᠢᠯᠠᠳᠴᠤ ᠪᠠᠢᠭᠠ ᠨᠢ ᠰᠡᠳᠬᠢᠯ ᠬᠥᠭᠵᠢᠭᠡᠵᠦ᠂ ᠤᠷᠮᠠ ᠵᠣᠷᠢᠭ ᠢ᠋ ᠪᠠᠳᠠᠷᠠᠭᠠᠵᠤ ᠪᠠᠢᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠤᠭ ᠬᠡᠷᠡᠭ ᠢ᠋ ᠪᠢᠳᠡ ᠬᠥᠭᠡᠷᠦᠭᠰᠡᠨ ᠰᠡᠳᠬᠢᠯ ᠦ᠋ᠨ ᠬᠦᠴᠦ ᠪᠡᠷ ᠬᠢᠬᠦ ᠪᠤᠰᠤ᠂ ᠬᠢᠨᠠᠭᠤᠷ ᠪᠣᠯᠭᠣᠮᠵᠢᠲᠠᠢ᠂ ᠶᠡᠬᠡ ᠪᠡᠯᠡᠳᠬᠡᠯᠲᠡᠢ᠂ ᠨᠠᠷᠢᠨ ᠤᠬᠠᠭᠠᠨ ᠵᠠᠷᠤᠵᠤ ᠬᠢᠪᠡᠯ ᠵᠣᠬᠢᠬᠤ ᠪᠢᠵᠡ ᠠ᠋᠃ ᠪᠢᠳᠡ ᠣᠳᠣ ᠲᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠬᠦᠷᠴᠦ ᠬᠠᠷᠠᠬᠠᠨ ᠴᠢᠳᠠᠭᠠ ᠦᠭᠡᠢ ᠪᠠᠢᠨᠠ᠃ ᠮᠤᠩᠬᠠᠭ ᠪᠢ ᠰᠠᠨᠠᠪᠠᠯ ᠤᠴᠢᠷ ᠵᠦᠭ ᠦᠭᠡᠢ ᠳᠠᠢᠳᠤᠬᠤ ᠪᠠᠷ ᠪᠢᠳᠡ ᠴᠡᠷᠢᠭᠵᠢᠵᠦ ᠵᠠᠪᠳᠤᠭᠠ ᠦᠭᠡᠢ ᠪᠢᠰᠢ ᠪᠢᠵᠡ? ᠭᠡᠪᠡᠯ ᠪᠤᠰᠤᠳ ᠨᠣᠶᠠᠳ ᠳᠠᠭᠤ ᠲᠠᠯᠪᠢᠨ᠄
— ᠨᠠᠭᠠᠳᠤ ᠬᠥᠭᠰᠢᠨ ᠲᠣᠯᠣᠭᠠᠢ ᠪᠢᠳᠡᠨ ᠢ᠋ ᠪᠠᠰᠤᠵᠤ ᠪᠠᠢᠨᠠ᠃ ᠡᠭᠦᠨ ᠢ᠋ ᠵᠠᠢᠯᠠᠭᠤᠯ!
— ᠴᠢ ᠬᠤᠪᠢᠯᠠᠢ ᠳ᠋ᠤ᠌ ᠤᠷᠪᠠᠭᠰᠠᠨ ᠵᠥᠨᠥᠭ ᠪᠠᠢᠬᠤ ᠠ᠋ᠴᠠ ᠡᠰᠡ ᠵᠠᠢᠯᠠᠯᠠ ᠭᠡᠵᠢ ᠤᠤ?
— ᠴᠢ ᠨᠠᠭᠠᠳᠤ ᠦᠭᠡ ᠪᠡᠨ ᠬᠢᠲᠠᠳ ᠨᠣᠶᠠᠳ ᠲᠠᠢ ᠰᠦᠯᠪᠡᠭᠡᠯᠳᠦᠭᠰᠡᠨ ᠬᠤᠪᠢᠯᠠᠢ ᠶ᠋ᠢᠨ ᠬᠢᠨ ᠳ᠋ᠦ᠍ ᠣᠴᠢᠵᠤ ᠬᠡᠯᠡ! ᠭᠡᠵᠦ ᠱᠤᠤᠭᠢᠯᠳᠤᠪᠠ᠃ ᠠᠷᠢᠬᠪᠥ᠋ᠬᠡ ᠪᠣᠰᠴᠤ ᠵᠠᠩᠳᠤᠷᠤᠨ ᠴᠢᠮᠡᠭᠡ ᠳᠠᠷᠤᠭᠠᠳ᠄
— ᠲᠠ ᠮᠢᠨᠢ ᠠ᠋⁈ ᠪᠢᠳᠡ ᠪᠡᠶᠡ ᠪᠠᠶᠠᠨ ᠤ᠋ ᠪᠠᠨ ᠦᠭᠡ ᠶ᠋ᠢ ᠵᠥᠪ ᠢ᠋ᠶ᠋ᠡᠷ ᠲᠤᠩᠭᠠᠭᠠᠵᠤ ᠪᠣᠳᠣᠵᠤ ᠣᠢᠯᠠᠭᠠᠵᠤ ᠠᠪᠬᠤ ᠶᠣᠰᠣᠲᠠᠢ᠃ ᠲᠣ᠊ ᠠᠬᠠ ᠪᠤᠷᠤᠭᠤ ᠶ᠋ᠢ ᠥᠭᠦᠯᠡᠭᠡ ᠦᠭᠡᠢ ᠪᠠᠢᠬᠤ᠃ ᠠᠬᠠ ᠨᠢ ᠰᠤᠷᠭᠠᠵᠤ᠂ ᠳᠡᠭᠦᠦ ᠨᠢ ᠰᠣᠨᠣᠰᠬᠤ ᠤᠴᠢᠷ《ᠬᠠᠰᠢᠷ ᠠ᠋ᠴᠠ ᠭᠠᠰᠢᠭᠤᠨ ᠭᠠᠷᠬᠤ ᠦᠭᠡᠢ》 ᠭᠡᠳᠡᠭ ᠦᠭᠡ ᠶ᠋ᠢ ᠪᠣᠯᠭᠤᠭᠠᠵᠠᠭᠠ᠃ ᠲᠣ᠊ ᠨᠣᠶᠠᠨᠲᠠᠨ ᠪᠢᠳᠡᠨ ᠢ᠋ ᠬᠥᠭᠡᠷᠦᠭᠰᠡᠨ ᠰᠡᠳᠬᠢᠯ ᠦ᠋ᠨ ᠡᠷᠬᠡ ᠪᠡᠷ ᠬᠡᠷᠡᠭ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠮᠡᠨ ᠰᠤᠷᠭᠠᠯᠠ᠃ ᠡᠨᠡ ᠵᠥᠪ ᠰᠢᠦ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠳ᠋ᠦ᠍ ᠨᠣᠶᠠᠨ ᠬᠠᠷᠠ ᠬᠣᠷᠣᠮ ᠢ᠋ ᠡᠷᠭᠢᠭᠦᠯᠵᠦ ᠠᠪᠬᠤ ᠭᠡᠵᠦ ᠪᠤᠤ ᠮᠠᠬᠠᠷᠠᠨ ᠤᠷᠤᠯᠳᠤ ᠭᠡᠵᠦ ᠬᠡᠯᠡᠭᠡ ᠦᠭᠡᠢ᠃ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠪᠠᠨ ᠰᠠᠢᠨ ᠪᠡᠯᠡᠳᠭᠡ ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ᠃ ᠡᠨᠡ ᠦᠭᠡ ᠵᠥᠪ ᠰᠢᠦ᠁ ᠭᠡᠯᠡ᠃ ᠪᠤᠰᠤᠳ ᠨᠣᠶᠠᠳ ᠬᠠᠭᠠᠨ ᠤ᠋ ᠪᠠᠨ ᠦᠭᠡ ᠶ᠋ᠢ ᠳᠠᠭᠠᠳᠠᠭ ᠨᠢ ᠮᠡᠳᠡᠭᠡᠵᠢ᠃
ᠪᠦᠬᠦ ᠨᠣᠶᠠᠳ ᠪᠠᠷᠤᠭ ᠲᠣᠯᠣᠭᠠᠢ ᠳᠠᠷᠠᠭᠠᠯᠠᠨ ᠪᠣᠰᠴᠤ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠪᠡᠨ ᠬᠤᠪᠢᠯᠠᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠨᠡᠢᠰᠯᠡᠯ ᠬᠣᠲᠠ ᠪᠠᠨ ᠴᠢᠯᠥᠭᠡᠯᠡᠵᠦ ᠠᠪᠤᠨᠠ᠃ ᠲᠡᠭᠦᠨ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠡᠵᠡᠩᠨᠡᠵᠦ ᠰᠠᠭᠤᠭᠠ ᠴᠥᠳᠦᠭᠡᠷ ᠶᠢᠰᠦᠩᠬᠡ ᠨᠣᠶᠠᠨ ᠢ᠋ ᠨᠢ ᠴᠠᠭᠠᠵᠠ ᠪᠠᠷ ᠠᠪᠴᠤ᠂ ᠵᠢᠷᠤᠮ ᠤ᠋ᠨ ᠣᠯᠠᠨ ᠴᠡᠷᠢᠭ ᠢ᠋ ᠥᠪᠡᠷ ᠲᠦ᠍ ᠪᠡᠨ ᠨᠢᠭᠡᠳᠬᠡᠨ᠂ ᠤᠯᠠᠮ ᠢ᠋ᠶ᠋ᠠᠷ ᠱᠠᠩᠳᠤ ᠭᠡᠳᠡᠭ ᠬᠢᠲᠠᠳ ᠬᠣᠲᠠ ᠶ᠋ᠢ ᠪᠠᠢᠯᠳᠤᠨᠠ᠃ ᠰᠡᠷᠢᠭᠦᠨ ᠤᠯᠠᠷᠢᠯ ᠳ᠋ᠤ᠌ ᠳᠠᠢᠰᠤᠨ ᠤ᠋ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠴᠠᠭ ᠢ᠋ᠶ᠋ᠠᠷ ᠨᠡᠢᠰᠯᠡᠯ ᠢ᠋ ᠳᠣᠪᠲᠣᠯᠤᠨᠠ᠃ ᠣᠷᠣᠢᠲᠠᠪᠠᠯ ᠮᠠᠭᠤ ᠪᠣᠯᠤᠨᠠ ᠭᠡᠵᠦ ᠥᠭᠦᠯᠡᠵᠦ ᠪᠠᠢᠯᠠ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠠᠷᠢᠬᠪᠥ᠋ᠬᠡ ᠥᠪᠡᠷ ᠦ᠋ᠨ ᠰᠢᠳᠠᠷ ᠵᠠᠩᠵᠤᠨ ᠲᠠᠢ ᠪᠠᠨ ᠬᠠᠮᠲᠤ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠦᠵᠡᠭᠡᠳ ᠨᠢᠭᠡ ᠰᠠᠷᠠ ᠬᠠᠭᠠᠰ ᠤ᠋ᠨ ᠳᠠᠷᠠᠭᠠ ᠳᠠᠢᠳᠤᠬᠤ᠂ ᠨᠠᠭᠠᠨᠠ ᠨᠢ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠠᠮᠠᠷᠠᠭᠠᠬᠤ᠂ ᠴᠡᠷᠢᠭ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢᠯᠠᠬᠤ ᠶᠣᠰᠣᠲᠠᠢ ᠪᠠᠢᠨᠠ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠲᠡᠭᠦᠨ ᠦ᠌ ᠡᠰᠡᠷᠭᠦ ᠵᠣᠭᠰᠣᠬᠤ ᠬᠡᠨ ᠪᠠᠢᠬᠤ ᠪᠢᠯᠡ᠃
ᠠᠷᠢᠬᠪᠥᠶ᠋ᠬᠡ ᠵᠠᠩᠵᠤᠨ ᠤ᠋ ᠪᠠᠨ ᠬᠠᠮᠲᠤ ᠪᠠᠢᠵᠤ ᠪᠢᠯᠢᠭᠦᠨ ᠲᠦᠰᠢᠮᠡᠯ ᠲᠡᠢ ᠵᠣᠷᠢᠭᠤᠳᠠ ᠠᠭᠤᠯᠵᠠᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠶᠠᠮᠠᠷ ᠰᠢᠦ ᠪᠠᠢᠭᠤᠯᠤᠯᠲᠠ ᠲᠠᠢ᠂ ᠬᠠᠮᠢᠭᠠ ᠣᠷᠣᠰᠢᠨ ᠪᠠᠢᠭᠠ᠂ ᠶᠢᠰᠦᠩᠭᠡ ᠨᠣᠶᠠᠨ ᠶᠠᠮᠠᠷ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠶᠠᠪᠤᠵᠤ ᠪᠠᠢᠭᠠ ᠵᠡᠷᠭᠡ ᠶ᠋ᠢ ᠳᠠᠬᠢᠨ ᠨᠠᠷᠢᠨ ᠲᠠᠨᠢᠯᠴᠠᠭᠠᠳ᠂ ᠴᠡᠷᠢᠭ ᠦ᠋ᠨ ᠪᠠᠢᠷᠢᠯᠠᠯ ᠤ᠋ᠨ ᠪᠠᠢᠳᠠᠯ ᠢ᠋ ᠵᠢᠷᠤᠭᠯᠠᠨ᠂ ᠲᠡᠨᠳᠡ ᠬᠡᠷᠬᠢᠨ ᠳᠣᠪᠲᠣᠯᠬᠤ ᠲᠤᠬᠠᠢ ᠪᠣᠳᠣᠯ ᠢ᠋ᠶ᠋ᠠᠨ ᠲᠥᠯᠥᠪᠯᠡᠵᠦ ᠠᠪᠤᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠴᠥᠭᠡᠨ ᠬᠥᠮᠦᠨ ᠲᠡᠢ ᠪᠡᠷ ᠰᠠᠮ ᠣᠷᠣᠵᠤ ᠬᠣᠲᠠ ᠶ᠋ᠢᠨ ᠵᠠᠬᠢᠷᠤᠭᠴᠢ ᠶ᠋ᠢ ᠪᠠᠷᠢᠪᠴᠢᠯᠠᠨ ᠠᠪᠬᠤ ᠤᠴᠢᠷᠲᠠᠢ ᠪᠠᠢᠭᠠ ᠶ᠋ᠢ ᠬᠡᠯᠡᠯᠴᠡᠨ᠂ ᠡᠨᠡ ᠬᠡᠷᠡᠭ ᠢ᠋ ᠪᠢᠯᠢᠭᠦᠨ ᠢ᠋ ᠲᠡᠷᠢᠭᠦᠯᠡᠨ ᠬᠢ ᠭᠡᠯᠡ᠃ ᠲᠦᠰᠢᠮᠡᠯ ᠳ᠋ᠦ᠍ ᠦᠭᠡᠢ ᠭᠡᠬᠦ ᠶ᠋ᠢᠨ ᠠᠷᠭᠠ ᠪᠠᠢᠬᠤ ᠦᠭᠡᠢ᠂ ᠪᠠᠰᠠ ᠴᠦ᠍ ᠳᠠᠢᠰᠤᠨ ᠤ᠋ ᠪᠠᠢᠷᠢᠯᠠᠯ ᠢ᠋ ᠪᠡᠶᠡ ᠪᠡᠷ ᠶᠠᠪᠤᠵᠤ ᠮᠡᠳᠡᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠢᠩᠭᠢᠬᠦ ᠨᠢ ᠵᠦᠢ ᠪᠣᠯᠵᠤ ᠪᠠᠢᠯᠠ᠃
ᠬᠠᠪᠤᠷ ᠤ᠋ᠨ ᠴᠠᠰᠤ ᠪᠤᠲᠠᠷᠠᠨ᠂ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠠᠪᠰᠠᠷᠭᠠ ᠨᠦᠳᠦᠵᠦ ᠮᠠᠯ ᠰᠢᠷᠪᠠᠭᠤᠯᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠳᠠᠢᠳᠤᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠬᠢᠭᠰᠡᠭᠡᠷ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠰᠠᠬᠤᠯᠢᠭ ᠡᠪᠡᠰᠦᠨ ᠳ᠋ᠦ᠍ ᠠᠳᠤᠭᠤ ᠪᠠᠨ ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠲᠡᠩᠬᠡᠷᠡᠭᠦᠯᠵᠦ ᠪᠠᠢᠪᠠ᠃ ᠡᠨᠡ ᠵᠢᠯ ᠬᠠᠪᠤᠷ ᠤ᠋ᠨ ᠤᠷᠢ ᠡᠷᠲᠡ ᠣᠷᠣᠵᠤ᠂ ᠭᠣᠣᠯ ᠭᠣᠷᠣᠬᠠᠨ ᠤ᠋ ᠮᠥᠰᠥ ᠵᠠᠬᠠ ᠪᠠᠷ ᠢ᠋ᠶ᠋ᠠᠨ ᠬᠠᠢᠯᠤᠨ᠂ ᠬᠣᠨᠣᠭ ᠥᠩᠭᠡᠷᠡᠬᠦ ᠲᠣᠰᠤᠮ ᠴᠠᠭ ᠲᠤᠯᠭᠠᠷᠠᠵᠤ ᠪᠠᠢᠯᠠ᠃
ᠡᠢᠮᠦ ᠴᠠᠭ ᠢ᠋ᠶ᠋ᠠᠷ ᠠᠷᠢᠬᠪᠥᠶ᠋ᠬᠡ ᠬᠠᠭᠠᠨ ᠤ᠋ ᠴᠡᠷᠢᠭ ᠣᠷᠬᠣᠨ ᠤᠷᠤᠭᠤ ᠬᠥᠳᠡᠯᠬᠦ ᠪᠣᠯᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠠᠷᠢᠬᠪᠥᠶ᠋ᠬᠡ ᠥᠪᠡᠷ ᠦ᠋ᠨ ᠲᠦᠮᠡᠲᠦ ᠶ᠋ᠢ ᠭᠤᠷᠪᠠ ᠬᠤᠪᠢᠶᠠᠵᠤ ᠬᠠᠩᠭᠠᠢ ᠶ᠋ᠢᠨ ᠨᠢᠷᠤᠭᠤ ᠶ᠋ᠢ ᠳᠠᠪᠠᠭᠤᠯᠬᠤ ᠡᠭᠦᠨ ᠦ᠌ ᠨᠢᠭᠡ ᠬᠡᠰᠡᠭ ᠢ᠋ ᠠᠭᠤᠯᠠ ᠶ᠋ᠢᠨ ᠠᠷᠤ ᠪᠠᠷ ᠶᠠᠪᠤᠭᠤᠯᠵᠤ ᠬᠠᠷᠠᠬᠣᠷᠣᠮ ᠤ᠋ᠨ ᠬᠣᠢᠲᠤ ᠲᠠᠯᠠ ᠪᠠᠷ ᠳᠣᠪᠲᠣᠯᠤᠨ ᠣᠷᠣᠭᠤᠯᠵᠤ᠂ ᠬᠣᠶᠠᠳᠠᠬᠢ ᠬᠡᠰᠡᠭ ᠢ᠋ ᠡᠭ ᠦ᠋ᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠭᠤᠯᠤᠨ ᠣᠷᠬᠣᠨ ᠢ᠋ ᠤᠷᠤᠭᠤᠳᠠᠭᠤᠯᠤᠨ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠣᠷᠣᠭᠤᠯᠵᠤ᠂ ᠭᠤᠷᠪᠠᠳᠠᠬᠢ ᠬᠡᠰᠡᠭ ᠢ᠋ ᠬᠠᠩᠭᠠᠢ ᠨᠢᠷᠤᠭᠤᠨ ᠤ᠋ ᠥᠪᠥᠷ ᠢ᠋ᠶ᠋ᠡᠷ ᠣᠷᠢᠶᠠᠯᠭᠠᠨ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠤᠷᠲᠤ ᠠ᠋ᠴᠠ ᠳᠣᠪᠲᠣᠯᠤᠭᠤᠯᠬᠤ᠂ ᠡᠨᠡ ᠠᠩᠭᠢ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠲᠦᠰᠢᠮᠡᠳ ᠨᠠᠷ ᠤ᠋ᠨ ᠤᠷᠤᠭᠰᠢ ᠵᠢᠭᠤᠲᠠᠬᠤ ᠵᠠᠮ ᠢ᠋ ᠲᠠᠰᠤᠯᠤᠨ ᠬᠠᠭᠠᠵᠤ ᠴᠣᠬᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠰᠢᠢᠳᠦᠯᠡ᠃ ᠡᠨᠡ ᠲᠥᠯᠥᠪᠯᠡᠯᠭᠡ ᠶ᠋ᠢ ᠳᠣᠷᠭᠣᠨ ᠲᠦᠰᠢᠮᠡᠯ ᠭᠣᠣᠯᠯᠠᠨ ᠵᠣᠬᠢᠶᠠᠪᠠ᠃ ᠪᠢᠯᠢᠭᠦᠨ ᠳ᠋ᠦ᠍ ᠭᠤᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠥᠭᠴᠦ᠂ ᠲᠡᠭᠦᠨ ᠢ᠋ ᠪᠡᠨ ᠵᠠᠭᠤᠲᠤ ᠵᠠᠭᠤᠲᠤ ᠪᠠᠷ ᠨᠢ ᠬᠤᠪᠢᠶᠠᠨ ᠬᠣᠲᠠ ᠳ᠋ᠤ᠌ ᠰᠠᠮ ᠣᠷᠣᠭᠤᠯᠵᠤ ᠶᠢᠰᠦᠩᠭᠡ ᠶ᠋ᠢᠨ ᠣᠷᠣᠨ ᠭᠡᠷ ᠢ᠋ ᠪᠦᠰᠡᠯᠡᠨ ᠠᠪᠴᠤ᠂ ᠲᠡᠷᠡ ᠨᠣᠶᠠᠨ ᠢ᠋ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠪᠴᠢᠯᠠᠨ ᠬᠠᠭᠠᠨ ᠳ᠋ᠤ᠌ ᠲᠤᠰᠢᠶᠠᠬᠤ ᠡᠭᠦᠷᠭᠡ ᠶ᠋ᠢ ᠲᠦᠰᠢᠮᠡᠳ ᠲᠦ᠍ ᠬᠦᠯᠢᠶᠡᠯᠭᠡᠪᠡ᠃
ᠬᠠᠪᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ ᠬᠡᠩᠭᠡᠷᠭᠡ ᠳᠡᠯᠡᠳᠦᠯᠡ᠃ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠭᠤᠷᠪᠠᠨ ᠵᠠᠮ ᠢ᠋ᠶ᠋ᠠᠷ ᠬᠠᠷᠠᠬᠣᠷᠣᠮ ᠤ᠋ᠨ ᠵᠦᠭ ᠬᠥᠳᠡᠯᠪᠡ᠃ ᠪᠢᠯᠢᠭᠦᠨ ᠲᠣᠭᠲᠠᠭᠠᠵᠤ ᠥᠭᠭᠦᠭᠰᠡᠨ ᠲᠣᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠲᠡᠷᠢᠭᠦᠨ ᠦ᠌ ᠠᠩᠭᠢ ᠪᠣᠯᠤᠨ ᠤᠷᠢᠲᠠᠵᠤ ᠬᠥᠳᠡᠯᠦᠯᠡ᠃ ᠪᠦᠬᠦ ᠵᠠᠮ ᠤ᠋ᠨ ᠴᠡᠷᠢᠭ ᠭᠤᠷᠪᠠ ᠠ᠋ᠴᠠ ᠲᠠᠪᠤ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠬᠠᠩᠭᠠᠢ ᠶ᠋ᠢᠨ ᠨᠢᠷᠤᠭᠤ ᠶ᠋ᠢ ᠳᠠᠪᠠᠵᠤ᠂ ᠣᠷᠬᠣᠨ ᠭᠣᠣᠯ ᠤ᠋ᠨ ᠰᠠᠪᠠ ᠳ᠋ᠤ᠌ ᠣᠷᠣᠭᠠᠳ᠂ ᠳᠠᠢᠰᠤᠨ ᠤ᠋ ᠬᠡᠭᠡᠷᠡ ᠶ᠋ᠢᠨ ᠬᠠᠷᠠᠭᠤᠯ ᠤ᠋ᠨ ᠠᠷᠪᠠᠲᠤ ᠴᠡᠷᠢᠭ ᠦ᠋ᠳ ᠢ᠋ ᠬᠡᠳᠦᠨ ᠭᠠᠵᠠᠷ ᠤᠰᠠᠳᠬᠠᠨ᠂ ᠮᠠᠰᠢ ᠰᠡᠮᠡᠭᠡᠷᠬᠡᠨ ᠢ᠋ᠶ᠋ᠡᠷ ᠤᠷᠤᠭᠰᠢ ᠠᠭᠢᠭᠰᠠᠭᠠᠷ ᠪᠠᠢᠪᠠ᠃ ᠪᠢᠯᠢᠭᠦᠨ ᠦ᠌ ᠲᠡᠷᠢᠭᠦᠯᠡᠭᠰᠡᠨ ᠠᠩᠭᠢ ᠴᠢᠮᠡᠭᠡ ᠦᠭᠡᠢ ᠳᠣᠪᠲᠣᠯᠤᠭᠰᠠᠭᠠᠷ ᠦᠦᠷ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠰᠢᠩᠬᠤ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ᠂ ᠵᠡᠭᠦᠨ ᠲᠠᠯᠠ ᠪᠠᠷ ᠲᠥᠯᠥᠪᠯᠡᠭᠰᠡᠨ ᠶᠣᠰᠣ ᠪᠠᠷ ᠬᠣᠲᠠ ᠳ᠋ᠤ᠌ ᠣᠷᠣᠵᠤ ᠶᠡᠬᠡ ᠬᠡᠷᠡᠮ ᠳ᠋ᠦ᠍ ᠲᠤᠯᠤᠨ ᠣᠴᠢᠯᠠ᠃ ᠬᠠᠮᠤᠭ ᠲᠡᠷᠢᠭᠦᠨ ᠳ᠋ᠦ᠍ ᠬᠡᠷᠡᠮ ᠦ᠋ᠨ ᠳᠥᠷᠪᠡᠨ ᠬᠠᠭᠠᠯᠭᠠ ᠶ᠋ᠢ ᠡᠵᠡᠯᠡᠨ ᠠᠪᠬᠤ ᠦᠶᠡ ᠳ᠋ᠦ᠍ ᠴᠥᠭᠡᠨ ᠴᠡᠷᠢᠭ ᠦ᠋ᠳ ᠲᠡᠢ ᠲᠤᠯᠤᠯᠳᠤᠭᠠᠨ ᠬᠢᠵᠦ ᠡᠬᠢᠯᠡᠪᠡ᠃ ᠡᠨᠡ ᠨᠢ ᠳᠣᠲᠣᠭᠰᠢ ᠪᠠᠨ ᠬᠡᠯᠡ ᠠᠪᠤᠯᠴᠠᠨ᠂ ᠶᠢᠰᠦᠩᠭᠡ ᠨᠣᠶᠠᠨ ᠤ᠋ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠲᠡᠢ ᠦᠦᠷ ᠦ᠋ᠨ ᠭᠡᠭᠡᠨ ᠢ᠋ᠶ᠋ᠡᠷ ᠬᠠᠷᠪᠤᠯᠳᠤᠭᠰᠠᠨ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠶᠡᠬᠡ ᠬᠡᠷᠡᠮ ᠦ᠋ᠨ ᠬᠠᠭᠠᠯᠭᠠ ᠨᠤᠭᠤᠳ ᠢ᠋ ᠪᠢᠯᠢᠭᠦᠨ ᠡᠵᠡᠯᠡᠨ ᠠᠪᠤᠭᠰᠠᠨ ᠪᠣᠯᠬᠣᠷ ᠭᠠᠳᠠᠭᠰᠢ ᠭᠠᠷᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠪᠦᠬᠦᠨ ᠢ᠋ ᠲᠣᠨᠢᠯᠭᠠᠵᠤ᠂ ᠳᠠᠢᠰᠤᠨ ᠤ᠋ ᠭᠣᠣᠯ ᠬᠦᠴᠦᠨ ᠶᠡᠬᠡ ᠴᠡᠷᠢᠭ ᠲᠦ᠍ ᠬᠡᠯᠡ ᠵᠠᠯᠭᠠᠭᠤᠯᠬᠤ ᠦᠭᠡᠢ ᠪᠡᠷ ᠵᠠᠮ ᠢ᠋ ᠨᠢ ᠲᠠᠰᠤᠯᠵᠤ ᠪᠠᠢᠪᠠ᠃ ᠨᠢᠭᠡᠨ ᠵᠠᠭᠤ ᠢᠯᠡᠭᠦᠦ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠭᠠᠷᠴᠤ ᠢᠷᠡᠭᠡᠳ ᠬᠠᠷᠪᠤᠯᠳᠤᠵᠤ ᠡᠬᠢᠯᠡᠯᠡ᠃ ᠨᠠᠷᠠᠨ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠥᠷᠭᠡᠨ ᠬᠥᠨᠳᠡᠢ ᠶ᠋ᠢ ᠳᠦᠭᠦᠷᠡᠩ ᠲᠤᠶᠠᠭᠠᠷᠠᠭᠤᠯᠵᠤ᠂ ᠤᠯᠠᠮ ᠢ᠋ᠶ᠋ᠠᠷ ᠳᠡᠯᠡᠬᠡᠢ ᠶ᠋ᠢ ᠪᠦᠬᠦᠯᠢ ᠳ᠋ᠦ᠍ ᠨᠢ ᠭᠡᠢᠭᠦᠯᠦᠯᠡ᠃ ᠴᠥᠭᠡᠬᠡᠨ ᠪᠣᠯᠪᠠᠴᠤ ᠡᠨᠳᠡ ᠲᠡᠢ ᠴᠡᠷᠢᠭ ᠳᠠᠢᠰᠤᠨ ᠲᠠᠢ ᠬᠠᠭᠠᠰ ᠴᠠᠭ ᠣᠷᠴᠢᠮ ᠬᠠᠷᠪᠤᠯᠳᠤᠭᠰᠠᠨ ᠳ᠋ᠤ᠌ ᠪᠢᠯᠢᠭᠦᠨ ᠥᠷᠥᠭᠡᠰᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠪᠤᠭᠤᠯᠠᠭᠠ ᠪᠠᠷ ᠬᠠᠷᠪᠤᠭᠤᠯᠤᠨ ᠰᠢᠷᠬᠠᠳᠤᠯᠠ᠃ ᠶᠢᠰᠦᠩᠭᠡ ᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠪᠴᠢᠯᠠᠬᠤ ᠲᠤᠰᠢᠶᠠᠯ ᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠨᠣᠶᠠᠨ ᠪᠤᠰᠤᠳ ᠠ᠋ᠴᠠ ᠢᠯᠭᠠᠷᠠᠬᠤ ᠦᠭᠡᠢ ᠭᠡᠷ ᠦ᠋ᠨ ᠬᠣᠪᠴᠠᠰᠤᠲᠠᠢ ᠬᠠᠷᠪᠤᠯᠳᠤᠵᠤ ᠶᠠᠪᠤᠭᠠᠳ ᠪᠠᠰᠠ ᠡᠯᠢᠭᠡ ᠤᠷᠤᠭᠤ ᠪᠠᠨ ᠰᠤᠮᠤ ᠰᠢᠭᠠᠯᠭᠠᠨ ᠭᠠᠵᠠᠷ ᠲᠤ ᠤᠨᠠᠵᠠᠢ᠃
ᠶᠡᠬᠡ ᠴᠡᠷᠢᠭ ᠬᠣᠲᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠨ᠂ ᠰᠤᠮᠤ ᠢᠰᠬᠡᠷᠴᠦ᠂ ᠴᠢᠮᠡᠭᠡ ᠱᠤᠤᠭᠢᠶᠠᠨ ᠳᠡᠭᠳᠡᠨ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠡᠬᠢᠯᠡᠭᠡᠳ᠂ ᠪᠥᠭᠡᠮ ᠪᠤᠵᠢᠭᠢᠨᠠᠭᠠᠨ ᠪᠣᠯᠪᠠ᠃ ᠨᠢᠭᠡᠨᠲᠡ ᠲᠡᠷᠢᠭᠦᠨ ᠨᠣᠶᠠᠨ ᠢ᠋ᠶ᠋ᠠᠨ ᠠᠯᠠᠭᠤᠯᠤᠭᠰᠠᠨ ᠬᠤᠪᠢᠯᠠᠢ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠨᠢᠭᠡᠳᠦᠭᠰᠡᠨ ᠤᠳᠤᠷᠢᠳᠤᠯᠭᠠ ᠦᠭᠡᠢ ᠪᠣᠯᠵᠤ ᠡᠮᠬᠢ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠲᠠᠨ᠂ ᠳᠣᠣᠷᠠ ᠪᠦᠷᠢᠨᠡ ᠬᠡᠰᠡᠭ ᠵᠠᠭᠤᠷᠠ ᠪᠠᠢᠯᠳᠤᠭᠠᠳ᠂ ᠡᠴᠦᠰ ᠲᠦ᠍ ᠨᠢ ᠭᠠᠵᠠᠷ ᠪᠦᠷᠢ ᠳ᠋ᠦ᠍ ᠪᠠᠭᠤᠨ ᠥᠭᠴᠦ᠂ ᠲᠤᠯᠤᠯᠳᠤᠭᠠᠨ ᠰᠢᠪᠲᠤᠷᠠᠬᠤ ᠲᠡᠢᠰᠢ ᠪᠡᠨ ᠬᠠᠨᠳᠤᠯᠠ᠃
ᠨᠡᠢᠰᠯᠡᠯ ᠢ᠋ ᠪᠤᠯᠢᠶᠠᠯᠳᠤᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠬᠣᠭᠣᠷᠣᠨᠳᠣ ᠪᠠᠨ ᠴᠦ᠍ ᠤᠯᠠᠢᠷᠠᠨ ᠲᠤᠯᠤᠯᠳᠤᠬᠤ ᠬᠦᠰᠡᠯᠡᠩ ᠪᠠᠭᠠᠲᠠᠢ ᠪᠠᠢᠵᠠᠢ᠃ ᠬᠠᠭᠠᠨ ᠤ᠋ ᠴᠡᠷᠢᠭ ᠢ᠋《ᠪᠢᠳᠡ ᠠᠬᠠ ᠳᠡᠭᠦᠦ ᠨᠠᠷ ᠮᠥᠨ ᠰᠢᠦ》 ᠭᠡᠵᠦ ᠬᠠᠰᠬᠢᠷᠤᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠠᠵᠢ᠃ ᠪᠢᠯᠢᠭᠦᠨ ᠥᠷᠥᠭᠡᠰᠦᠨ ᠭᠠᠷ ᠪᠣᠭᠣᠯᠲᠠ ᠲᠠᠢ ᠪᠠᠷ ᠬᠠᠭᠠᠨ ᠢ᠋ ᠶᠡᠬᠡ ᠬᠡᠷᠡᠮ ᠦ᠋ᠨ ᠭᠣᠣᠯ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠤᠭᠲᠤᠨ ᠶᠢᠰᠦᠩᠭᠡ ᠨᠣᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠪᠤᠯᠳᠤᠵᠤ ᠶᠠᠪᠤᠭᠠᠳ ᠠᠯᠠᠭᠳᠠᠭᠰᠠᠨ ᠤᠴᠢᠷ ᠢ᠋ ᠠᠢᠯᠠᠳᠬᠠᠵᠤ᠂ ᠲᠡᠭᠦᠨ ᠡᠴᠡ ᠶᠠᠯᠠ ᠠᠰᠠᠭᠤᠬᠤ ᠵᠠᠷᠯᠢᠭ ᠢ᠋ ᠭᠦᠢᠴᠡᠯᠳᠦᠭᠦᠯᠵᠦ ᠪᠣᠯᠤᠭᠰᠠᠨ ᠦᠭᠡᠢ ᠤᠴᠢᠷ ᠢ᠋ ᠥᠭᠦᠯᠡᠪᠡ᠃ ᠠᠷᠢᠬᠪᠥᠶ᠋ᠬᠡ ᠲᠡᠭᠦᠨ ᠳ᠋ᠦ᠍ ᠶᠠᠭᠤᠨ ᠬᠠᠷᠠᠮᠰᠠᠬᠤ ᠪᠣᠢ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠵᠦᠢ ᠨᠢ ᠲᠡᠷᠡ ᠴᠦᠲᠦᠬᠡᠷ ᠨᠣᠶᠠᠨ ᠢ᠋ ᠶᠠᠯᠠᠲᠠᠨ ᠤ᠋ ᠶᠣᠰᠣ ᠪᠠᠷ ᠠᠰᠠᠭᠤᠯᠭᠠ ᠶᠠᠪᠤᠭᠤᠯᠵᠤ ᠣᠷᠬᠣᠨ ᠤ᠋ ᠪᠣᠷᠣ ᠬᠤᠰᠢᠭᠤᠨ ᠳ᠋ᠤ᠌ ᠠᠪᠠᠴᠢᠨ ᠬᠠᠤᠯᠢ ᠵᠢᠷᠤᠮ ᠤ᠋ᠨ ᠳᠠᠭᠠᠤ ᠬᠣᠷᠣᠭᠠᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠰᠠᠨ᠃ ᠪᠢᠯᠢᠭᠦᠨ ᠠᠷᠢᠬᠪᠥᠶ᠋ᠬᠡ ᠳ᠋ᠦ᠍ ᠬᠠᠨᠳᠤᠨ᠄
— ᠶᠢᠰᠦᠩᠭᠡ ᠨᠣᠶᠠᠨ ᠤ᠋ ᠬᠡᠭᠦᠷ ᠢ᠋ ᠲᠠ ᠪᠣᠯᠭᠣᠭᠠᠨ ᠦᠵᠡᠭᠰᠡᠨ ᠪᠣᠯᠪᠠ ᠤᠤ? ᠭᠡᠪᠡᠯ ᠬᠠᠭᠠᠨ ᠵᠢᠪᠡᠭᠦᠴᠡᠯᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠷᠠᠨ᠄
— ᠪᠢ ᠲᠡᠷᠡ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠤᠴᠠ ᠨᠣᠶᠠᠨ ᠤ᠋ ᠬᠡᠭᠦᠷ ᠢ᠋ ᠦᠵᠡᠵᠦ᠂ ᠲᠡᠭᠦᠨ ᠢ᠋ᠶ᠋ᠡᠷ ᠪᠠᠬᠠ ᠪᠠᠨ ᠬᠠᠩᠭᠠᠬᠤ ᠭᠡᠵᠦ ᠶᠠᠪᠤᠭᠠ ᠪᠢᠰᠢ᠃ ᠪᠢᠯᠢᠭᠦᠨ ᠴᠢ ᠨᠠᠭᠠᠳᠤ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠰᠢᠷᠬᠠ ᠶ᠋ᠢ ᠲᠡᠮᠦᠷ ᠲᠣᠭᠣᠭᠠᠨ ᠤ᠋ ᠬᠦ ᠪᠤᠴᠠᠯᠭᠠᠨ ᠱᠠᠪᠰᠢᠭᠠᠳ ᠲᠦᠷᠭᠡᠨ ᠢᠯᠠᠷᠢᠰᠢᠭᠦᠯᠦᠭᠡᠴᠢ ᠭᠡᠵᠦ ᠬᠡᠯᠡᠯᠡ᠃ ᠬᠠᠷᠠᠬᠣᠷᠣᠮ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠠᠳᠤᠭᠤᠴᠢᠨ ᠡᠵᠡᠨ ᠦ᠌ ᠪᠡᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠣᠷᠣᠪᠠ᠃
ᠠᠷᠢᠬᠪᠥᠶ᠋ᠬᠡ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠴᠡᠪᠡᠷᠯᠡᠭᠦᠯᠦᠨ᠂ ᠥᠪᠡᠷ ᠦ᠋ᠨ ᠬᠠᠭᠤᠴᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠡᠨ ᠣᠷᠣᠵᠤ ᠪᠠᠭᠤᠭᠠᠳ ᠳᠡᠷᠭᠡᠳᠡ ᠪᠡᠨ ᠠᠪᠴᠤ ᠶᠠᠪᠤᠭᠰᠠᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠷᠳᠡᠨᠢ ᠶ᠋ᠢᠨ ᠲᠠᠮᠠᠭᠠ ᠶ᠋ᠢ ᠪᠠᠢᠷᠢᠨ ᠳ᠋ᠤ᠌ ᠨᠢ ᠵᠠᠯᠠᠪᠠ᠃ ᠡᠨᠡ ᠨᠢ ᠠᠷᠢᠬᠪᠥᠶ᠋ᠬᠡ ᠤᠯᠤᠰ ᠭᠦᠷᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠠ ᠶ᠋ᠢ ᠨᠤᠲᠠᠯᠠᠬᠤ ᠵᠦᠢᠯ ᠪᠢᠯᠡ᠃
ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠠᠢᠭᠠ ᠬᠤᠪᠢᠯᠠᠢ ᠶ᠋ᠢᠨ ᠲᠦᠮᠡᠲᠦ ᠶ᠋ᠢᠨ ᠨᠡᠯᠢᠶᠡᠳ ᠳᠠᠭᠠᠭᠠᠮᠠᠯ ᠨᠣᠶᠠᠳ᠂ ᠣᠯᠠᠩᠬᠢ ᠴᠡᠷᠢᠭ ᠬᠠᠭᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠣᠷᠣᠵᠤ᠂ ᠲᠡᠭᠦᠨ ᠦ᠌ ᠵᠠᠷᠯᠢᠭ ᠢ᠋ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡᠨᠡ ᠵᠢᠳᠬᠦᠨᠡ ᠭᠡᠵᠦ ᠠᠮᠠᠯᠠᠵᠤ ᠪᠠᠢᠯᠠ᠃ ᠪᠠᠰᠠ ᠨᠡᠯᠢᠶᠡᠳ ᠲᠣᠭᠠ ᠲᠠᠢ ᠴᠡᠷᠢᠭ ᠳᠠᠭᠠᠭᠠᠮᠠᠯ ᠤ᠋ᠳ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠦᠢᠮᠡᠭᠡᠨ ᠳᠤᠮᠳᠠ ᠠᠮᠢ ᠲᠦᠦᠰ ᠪᠤᠲᠠᠷᠠᠨ ᠰᠠᠷᠨᠢᠵᠤ ᠠᠯᠠᠭᠠ ᠪᠣᠯᠤᠭᠰᠠᠨ ᠠᠵᠢ᠃ ᠣᠨ ᠵᠢᠯ ᠢ᠋ᠶ᠋ᠡᠷ ᠣᠷᠣᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠷᠠ ᠶ᠋ᠢ ᠬᠠᠷᠠᠭᠠ ᠦᠭᠡᠢ ᠶᠠᠪᠤᠭᠰᠠᠨ ᠲᠡᠷᠡ ᠬᠥᠮᠦᠰ ᠢ᠋ ᠪᠤᠷᠤᠭᠤᠳᠬᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠮᠡᠨ ᠠᠷᠢᠬᠪᠥᠶ᠋ᠬᠡ ᠬᠠᠭᠠᠨ ᠬᠡᠯᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠦᠭᠡ ᠶᠠᠪᠤᠭᠰᠠᠨ ᠪᠣᠯᠤᠨ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠰᠡᠳᠬᠢᠯ ᠢ᠋ ᠪᠠᠶᠠᠰᠬᠠᠵᠠᠢ᠃
ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠠᠰᠤᠷᠤ ᠶᠡᠬᠡ ᠰᠦᠢᠷᠡᠭᠡ ᠦᠭᠡᠢ ᠬᠠᠷᠠᠬᠣᠷᠣᠮ ᠬᠣᠲᠠ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠡᠮᠬᠢ ᠵᠢᠷᠤᠮ ᠳ᠋ᠤ᠌ ᠪᠠᠨ ᠣᠷᠣᠵᠤ᠂ ᠣᠷᠣᠰᠢᠨ ᠰᠠᠭᠤᠭᠴᠢ ᠣᠯᠠᠨ ᠬᠥᠮᠦᠨ ᠬᠠᠭᠠᠨ ᠳ᠋ᠤ᠌ ᠪᠠᠨ ᠬᠠᠨᠳᠤᠨ ᠢᠳᠡᠭᠡ ᠴᠠᠭᠠᠨ ᠤ᠋ ᠪᠠᠨ ᠳᠡᠭᠡᠵᠢ ᠶ᠋ᠢ ᠡᠷᠭᠦᠵᠦ᠂ ᠥᠯᠵᠡᠢ ᠬᠤᠲᠤᠭ ᠣᠷᠣᠰᠢᠬᠤ ᠶ᠋ᠢ ᠢᠷᠦᠭᠡᠵᠦ ᠪᠠᠢᠯᠠ᠃
ᠠᠭᠤᠳᠠᠮ ᠬᠥᠨᠳᠡᠢ ᠳ᠋ᠦ᠍ ᠨᠣᠭᠣᠭᠠ ᠰᠣᠶᠣᠭᠠᠯᠠᠨ᠂ ᠠᠭᠤᠯᠠ ᠶ᠋ᠢᠨ ᠮᠣᠳᠣ ᠬᠠᠶᠠᠭᠠᠨ ᠠ᠋ᠴᠠ ᠪᠠᠨ ᠨᠣᠭᠣᠭᠠᠷᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠭᠣᠣᠯ ᠤ᠋ᠨ ᠵᠠᠬᠠ ᠪᠠᠷ ᠬᠤᠷᠠᠭᠠ ᠬᠠᠷᠢᠭᠤᠯᠤᠭᠰᠠᠨ ᠬᠡᠦᠬᠡᠳ ᠦ᠋ᠳ ᠭᠦᠶᠦᠯᠳᠦᠵᠦ᠂ ᠬᠣᠨᠢᠨ ᠤ᠋ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠴᠤᠤᠷᠢᠶᠠᠳᠤᠭᠤᠯᠤᠭᠰᠠ ᠭᠤᠸᠠ ᠪᠦᠰᠡᠭᠦᠢ ᠶ᠋ᠢᠨ ᠬᠣᠭᠣᠯᠠᠢ ᠴᠠᠩᠭᠢᠨᠠᠨ ᠰᠣᠨᠣᠰᠤᠭᠳᠠᠵᠤ ᠪᠠᠢᠪᠠ᠃ ᠭᠣᠣᠯ ᠤ᠋ᠨ ᠤᠰᠤ ᠰᠠᠷᠬᠢᠷᠠᠭᠠᠳᠠᠨ ᠤᠷᠤᠰᠤᠭᠰᠠᠭᠠᠷ ᠭᠠᠭᠴᠠ ᠰᠥᠨᠢ ᠣᠷᠬᠣᠨ ᠤ᠋ ᠰᠥᠩ ᠲᠦᠷᠢᠵᠦ᠂ ᠶᠡᠬᠡ ᠭᠣᠣᠯ ᠪᠠᠷᠢᠨᠲᠠᠭ ᠢ᠋ᠶ᠋ᠠᠨ ᠲᠠᠢᠯᠤᠭᠰᠠᠨ ᠨᠢ ᠣᠯᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠬᠤᠷᠠᠭᠰᠠᠨ ᠭᠤᠨᠢᠭᠲᠤ ᠰᠡᠳᠬᠢᠯ ᠲᠡᠷᠡ ᠰᠥᠩ ᠯᠦ᠍ᠭᠡ ᠪᠡᠨ ᠠᠳᠠᠯᠢ ᠲᠦᠷᠢᠭᠳᠡᠨ ᠠᠷᠢᠯᠬᠤ ᠮᠡᠲᠦ ᠰᠠᠨᠠᠭᠠ ᠲᠥᠷᠥᠭᠦᠯᠵᠦ ᠪᠠᠢᠯᠠ᠃ ᠶᠠᠮᠠᠷ ᠴᠦ᠍ ᠪᠣᠯᠤᠭᠰᠠᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠡᠪᠦᠭᠡᠨ ᠳᠡᠭᠡᠳᠦ ᠪᠣᠭᠳᠠ ᠶ᠋ᠢᠨ ᠦᠶᠡ ᠡᠴᠡ ᠵᠠᠯᠭᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠲᠥᠷᠥ ᠵᠠᠰᠠᠭ ᠡᠷᠭᠢᠨ ᠲᠣᠭᠲᠠᠵᠤ᠂ ᠶᠠᠭᠤᠮᠠ ᠶᠠᠭᠤᠮᠠ ᠬᠡᠪ ᠦ᠋ᠨ ᠪᠠᠢᠳᠠᠯᠲᠠᠢ ᠪᠣᠯᠤᠯᠠ ᠭᠡᠳᠡᠭ ᠰᠡᠳᠬᠢᠯ ᠢ᠋ ᠡᠪᠦᠭᠡᠳ᠂ ᠡᠮᠡᠭᠡᠳ ᠦ᠋ᠨ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠤᠯᠭᠠᠵᠤ ᠪᠠᠢᠪᠠ᠃ ᠡᠢᠮᠦ ᠴᠠᠭ ᠬᠢᠷᠢ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠬᠦ ᠶ᠋ᠢ ᠬᠡᠯᠡᠵᠦ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ ᠠᠵᠢ᠃ ᠣᠯᠠᠨ ᠤ᠋ ᠠᠮᠠ ᠪᠠᠷ ᠪᠣᠯ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠢᠷᠡᠭᠡᠳ᠂ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠠᠮᠤᠭ ᠨᠠᠨᠳᠢᠨ ᠪᠦᠬᠦᠨ ᠢ᠋ ᠬᠤᠷᠢᠶᠠᠵᠤ ᠠᠪᠤᠭᠠᠳ ᠶᠠᠪᠤᠭᠰᠠᠨ ᠤᠴᠢᠷ ᠠᠷᠢᠬᠪᠥᠶ᠋ᠬᠡ ᠲᠡᠷᠡ ᠪᠦᠬᠦᠨ ᠢ᠋ ᠪᠡᠨ ᠨᠡᠬᠡᠬᠦ ᠨᠢ ᠵᠠᠢᠯᠠᠰᠢ ᠦᠭᠡᠢ᠃ ᠲᠡᠷᠡ ᠬᠡᠷᠡᠭ ᠳᠠᠭᠠᠮᠵᠢᠷᠠᠨ ᠳᠠᠬᠢᠨ ᠠᠬᠠᠨ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠪᠣᠯᠤᠨᠠ ᠭᠡᠯᠴᠡᠨᠡ᠃ ᠡᠨᠡ ᠦᠭᠡ ᠵᠠᠢᠯᠠᠰᠢ ᠦᠭᠡᠢ ᠶ᠋ᠢ ᠥᠭᠦᠯᠡᠬᠦ ᠶᠠᠭᠤᠨ ᠪᠣᠢ᠃