ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠨᠠᠢ᠍ᠮᠠ> Элсэнд булагдсан сувдаа – П.Оюунгэрэл <8>
7ᠨᠠᠢ᠍ᠮᠠ
— ᠰᠦ ᠠᠪᠤᠶᠠ᠃
— ᠬᠡᠳᠦᠢ ᠠᠪᠬᠤ ᠪᠣᠢ?
— ᠳᠦᠭᠦᠷᠭᠡᠴᠢᠬᠡ ᠳᠡ᠂ ᠴᠠᠯᠢᠩ ᠢ᠋ᠶ᠋ᠠᠨ ᠢᠷᠡᠬᠦᠯᠡᠷ ᠪᠦᠬᠦᠨ ᠢ᠋ ᠪᠣᠳᠣᠶᠠ᠃
— ᠴᠢᠨᠦ ᠳᠠᠩᠰᠠ ᠴᠦ᠍ ᠨᠡᠯᠢᠶᠡᠳ ᠪᠣᠯᠴᠢᠬᠠᠯᠠ ᠰᠢᠦ᠂ ᠨᠢᠭᠡ ᠴᠠᠢᠷᠠᠭᠤᠯᠵᠤ ᠥᠭᠭᠦᠮᠡᠷ ᠰᠠᠨ ᠳᠠ ᠭᠡᠵᠦ ᠱᠠᠯᠬᠠᠭᠠᠷ ᠲᠠᠷᠭᠤᠨ ᠬᠢᠲᠠᠳ ᠠᠪᠠᠭᠠᠢ ᠪᠠᠬᠠᠨ ᠲᠠᠭᠠᠯᠠᠮᠵᠢ ᠦᠭᠡᠢ ᠥᠭᠦᠯᠡᠭᠡᠳ
— ᠰᠦ ᠬᠤᠳᠠᠯᠳᠤᠨ ᠠᠪᠬᠤ ᠮᠥᠩᠭᠥ ᠬᠦᠷᠬᠦ ᠦᠭᠡᠢ ᠶᠦᠮ ᠭᠡᠵᠦ ᠳᠠᠪᠲᠠᠪᠠ᠃
— ᠲᠡᠢᠮᠦ ᠠ᠋᠂ ᠲᠡᠢᠮᠦ᠂ ᠤᠳᠠᠬᠤ ᠦᠭᠡᠢ ᠠᠷᠭᠠᠯᠠᠵᠤ ᠥᠭᠭᠦᠶᠡ ᠭᠡᠵᠦ ᠭᠠᠪᠢᠷᠠ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠨ ᠥᠭᠦᠯᠡᠪᠡ᠃ ᠯᠣᠩᠬᠣ ᠲᠠᠢ ᠰᠦ ᠪᠡᠨ ᠲᠡᠪᠡᠷᠢᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠰᠦ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠬᠦᠨᠳᠦᠷᠡᠵᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠭᠡᠷ ᠲᠡᠭᠡᠨ ᠣᠷᠣᠵᠤ ᠬᠡᠳᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠪᠣᠰᠬᠠᠵᠤ ᠤᠬᠢᠶᠠᠵᠤ ᠴᠡᠪᠡᠷᠯᠡᠨ ᠨᠡᠯᠢᠶᠡᠳ ᠶᠠᠭᠠᠷᠠᠭᠠᠳ ᠬᠣᠭᠣᠯᠠᠨ ᠤ᠋ ᠪᠠᠨ ᠳᠤᠭᠤᠷᠠᠭ ᠮᠣᠳᠣᠨ ᠰᠢᠷᠡᠭᠡ ᠲᠠᠯᠪᠢᠨ᠂ ᠬᠡᠦᠬᠡᠳ ᠲᠡᠭᠡᠨ ᠬᠠᠯᠠᠭᠤᠨ ᠪᠤᠳᠠᠭᠠᠨ ᠳᠡᠭᠡᠷᠡ ᠨᠢ ᠬᠦᠢᠲᠡᠨ ᠰᠦ ᠬᠢᠵᠦ ᠢᠳᠡᠭᠦᠯᠪᠡ᠃ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠬᠣᠳᠣᠭᠣᠳᠣ ᠮᠠᠭᠤ ᠪᠣᠯᠬᠣᠷ ᠰᠦ ᠳᠡᠮᠡᠢ ᠵᠣᠬᠢᠷᠠᠳᠠᠭ ᠦᠭᠡᠢ᠂ ᠬᠠᠭᠠᠰ ᠠᠶᠠᠭᠠ ᠪᠤᠳᠠᠭᠠᠨ ᠳᠡᠭᠡᠷᠡ ᠬᠠᠯᠠᠭᠤᠨ ᠤᠰᠤ ᠬᠢᠵᠦ ᠳᠠᠪᠤᠰᠤ ᠲᠠᠢ ᠨᠣᠭᠣᠭᠠ ᠵᠠᠭᠤᠵᠤ ᠢᠳᠡᠨᠡ᠃ ᠠᠯᠢᠶᠠ ᠦᠭᠡᠨᠴᠢᠷ ᠬᠣᠶᠠᠳᠤᠭᠠᠷ ᠥᠬᠢᠨ ᠨᠢ
— ᠪᠢ ᠡᠮᠧ ᠶ᠋ᠢᠨ ᠬᠢᠭᠰᠡᠨ ᠰᠢᠷᠠᠭᠰᠠᠨ ᠲᠠᠬᠢᠶᠠ ᠵᠢᠭᠠᠰᠤ ᠶ᠋ᠢ ᠢᠳᠡᠶᠡ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ᠃ ᠴᠢ ᠢᠳᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠥᠬᠢᠨ ᠳᠡᠭᠦᠦ ᠡᠴᠡ ᠪᠡᠨ ᠠᠰᠠᠭᠤᠨᠠ᠃
— ᠪᠣᠳᠣᠬᠤ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠪᠦᠷ ᠢᠳᠡᠵᠦ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠰᠢᠦ ᠭᠡᠳ ᠳᠡᠭᠦᠦ ᠨᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠲᠠᠮᠰᠢᠶᠠᠯᠠᠪᠠ᠃
— ᠪᠢ ᠡᠮᠧ ᠶ᠋ᠢᠨ ᠬᠢᠭᠰᠡᠨ ᠭᠣᠶᠣ ᠱᠥᠯᠥ ᠲᠡᠢ ᠪᠤᠤᠰᠠ ᠶ᠋ᠢ ᠢᠳᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠳ ᠵᠢᠭᠠᠯ ᠬᠦᠦ ᠨᠢ ᠰᠢᠯᠦᠰᠦ ᠪᠡᠨ ᠭᠤᠷᠳ᠋ ᠬᠢᠲᠡᠯᠡ ᠵᠠᠯᠭᠢᠪᠠ᠃ ᠠᠷᠪᠠ ᠬᠦᠷᠴᠦ ᠤᠬᠠᠭᠠᠨ ᠣᠷᠣᠵᠤ ᠪᠠᠢᠭᠠ ᠶᠡᠬᠡ ᠥᠬᠢᠨ ᠨᠢ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠭᠢᠯᠤᠢᠨ ᠬᠠᠷᠠᠵᠤ
— ᠬᠣᠪᠳᠣᠭ ᠶᠠᠭᠤᠮᠠᠰ ᠢ᠋ ᠬᠠᠷᠠ ᠯᠠ ᠳᠠ᠂ ᠡᠮᠧ ᠶ᠋ᠢᠨ ᠴᠠᠯᠢᠩ ᠪᠠᠭᠤᠬᠤ ᠦᠭᠡᠢ ᠪᠣᠯ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠲᠠᠨᠠᠷ ᠲᠤ᠌ ᠢᠳᠡᠭᠦᠯᠬᠦ ᠶᠦᠮ ᠪᠣᠢ? ᠭᠡᠨᠡ᠃ ᠭᠠᠪᠢᠷᠠ᠂ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠦᠷᠦ ᠡᠪᠡᠳᠦᠩᠭᠦᠢ ᠬᠠᠷᠠᠵᠤ
— ᠴᠠᠯᠢᠩ ᠢ᠋ᠶ᠋ᠠᠨ ᠪᠠᠭᠤᠮᠠᠭᠴᠠ ᠡᠮᠧ ᠨᠢ ᠲᠠᠨᠠᠷ ᠲᠤ᠌ ᠰᠠᠨᠠᠭᠰᠠᠨ ᠪᠦᠬᠦᠨ ᠢ᠋ ᠴᠢᠨᠢ ᠬᠢᠵᠦ ᠢᠳᠡᠭᠦᠯᠦᠶᠡ ᠭᠡᠵᠦ ᠠᠷᠭᠠᠳᠠᠪᠠ᠃ ᠦᠨᠡᠨᠳᠡᠭᠡᠨ ᠡᠨᠡ ᠨᠢ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠬᠠᠭᠤᠷᠴᠤ ᠪᠠᠢᠭᠠ ᠲᠡᠳᠦᠢ᠃ ᠬᠡᠳᠦᠨ ᠰᠠᠷᠠ ᠪᠣᠯᠤᠭᠠᠳ ᠨᠢᠭᠡ ᠤᠳᠠᠭᠠ ᠲᠠᠯᠪᠢᠳᠠᠭ ᠴᠠᠯᠢᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠢᠳ ᠢ᠋ᠶ᠋ᠠᠷ ᠵᠢᠭᠡᠯᠡᠵᠦ ᠤᠷᠢᠳᠴᠢᠯᠠᠭᠰᠠᠨ ᠥᠷᠢ ᠪᠡᠨ ᠪᠤᠴᠠᠭᠠᠨᠠ᠃ ᠦᠯᠡᠳᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠠᠷᠭᠠᠯ ᠲᠦᠯᠡᠰᠢ ᠪᠠᠵᠠᠭᠠᠵᠤ᠂ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠢ᠋ᠶ᠋ᠡᠨ ᠨᠢᠴᠦᠭᠦᠨ ᠬᠥᠯ ᠢ᠋ ᠪᠥᠭᠯᠡᠬᠦ ᠬᠡᠷᠡᠭᠲᠡᠢ᠃ ᠬᠤᠪᠴᠠᠰᠤ ᠬᠤᠨᠠᠷ ᠪᠣᠯ ᠭᠠᠢᠭᠤᠢ᠂ ᠶᠡᠬᠡ ᠶ᠋ᠢᠨ ᠬᠢ ᠶ᠋ᠢ ᠨᠢ ᠪᠠᠭᠠ ᠳ᠋ᠤᠨᠢ ᠵᠠᠰᠠᠭᠠᠳ ᠥᠭᠴᠢᠬᠡᠨᠡ᠃ ᠶᠡᠬᠡ ᠳ᠋ᠦ᠍ᠨᠢ ᠥᠪᠡᠷ ᠦ᠋ᠨ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠪᠠᠨ ᠵᠠᠰᠠᠭᠠᠳ ᠡᠮᠦᠰᠬᠡᠴᠢᠬᠡᠨᠡ᠃ ᠬᠡᠦᠬᠡᠳ ᠦ᠋ᠳ ᠡᠳᠦᠷᠵᠢᠨ ᠭᠦᠶᠦᠬᠦ ᠪᠣᠯᠬᠣᠷ ᠠᠷᠪᠠ ᠬᠣᠨᠣᠬᠤ ᠦᠭᠡᠢ ᠨᠢᠭᠡ ᠱᠠᠬᠠᠢ ᠤᠷᠠᠵᠤ ᠬᠠᠶᠠᠨᠠ᠃ ᠲᠡᠭᠡᠬᠦᠯᠡᠷ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠱᠠᠬᠠᠢ ᠢᠯᠡᠭᠦᠦ ᠬᠡᠳᠦ ᠶ᠋ᠢ ᠪᠡᠯᠡᠳᠬᠡᠵᠦ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ ᠪᠠᠢᠳᠠᠭ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠭᠠᠭᠴᠠ ᠭᠠᠪᠢᠷᠠ ᠶ᠋ᠢᠨ ᠬᠢ ᠡᠢᠮᠦ ᠪᠢᠰᠢ᠂ ᠠᠮᠢᠳᠤᠷᠠᠯ ᠬᠦᠴᠢᠷ ᠲᠡᠢ ᠣᠯᠠᠨ ᠬᠡᠦᠬᠡᠳ ᠲᠡᠢ ᠠᠢᠯ ᠤ᠋ᠳ ᠶᠡᠷᠦ ᠳ᠋ᠡᠭᠡᠨ ᠯᠡ ᠡᠢᠮᠦ ᠪᠠᠢᠳᠠᠭ ᠠᠵᠢ᠃
ᠡᠯᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠠᠯᠢ ᠪᠣᠯᠬᠣᠷ ᠪᠠᠭᠰᠢᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠦᠴᠢᠷᠳᠡᠯ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠭᠡᠵᠦ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠬᠡᠮᠵᠢᠶᠡ ᠠᠪᠴᠤ ᠪᠠᠢᠯᠠ᠃ ᠬᠤᠪᠢ ᠬᠥᠮᠦᠨ ᠦ᠌ ᠠᠮᠤ ᠬᠦᠨᠡᠰᠦᠨ ᠦ᠌ ᠳᠡᠯᠭᠡᠭᠦᠷ ᠲᠡᠢ ᠬᠠᠷᠢᠯᠴᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠮᠠᠭᠠ ᠲᠠᠢ ᠴᠠᠭᠠᠨ ᠪᠠᠷᠢᠮᠲᠠ ᠪᠠᠷ ᠪᠤᠳᠠᠭᠠ ᠭᠤᠯᠢᠷ᠂ ᠮᠢᠬᠠ ᠲᠣᠰᠣ᠂ ᠥᠨᠳᠡᠭᠡ ᠵᠢᠮᠢᠰ ᠵᠡᠷᠭᠡ ᠶ᠋ᠢ ᠵᠢᠭᠡᠯᠡᠭᠡ ᠪᠡᠷ ᠠᠪᠴᠤ ᠥᠭᠭᠦᠨ ᠴᠠᠯᠢᠩ ᠨᠢ ᠢᠷᠡᠬᠦᠯᠡᠷ ᠰᠠᠭᠤᠯᠭᠠᠨ ᠪᠣᠳᠣᠵᠤ ᠠᠪᠤᠨᠠ᠃ ᠨᠡᠭᠦᠷᠡᠰᠦ ᠲᠦᠯᠡᠰᠢᠨ ᠳ᠋ᠡᠭᠡᠨ ᠵᠥᠪ ᠦᠭᠡᠢ ᠪᠣᠯᠤᠭᠰᠠᠨ ᠵᠠᠷᠢᠮ ᠤ᠋ᠳ ᠲᠤᠨᠢ ᠮᠥᠨ ᠡᠢᠮᠦᠷᠬᠦᠦ ᠠᠷᠭᠠ ᠪᠠᠷ ᠲᠦᠷ ᠴᠠᠭ ᠤ᠋ᠨ ᠠᠰᠠᠭᠤᠳᠠᠯ ᠤ᠋ᠳ ᠢ᠋ ᠰᠢᠢᠳᠪᠦᠷᠢᠯᠡᠵᠦ ᠥᠭᠳᠡᠭ ᠪᠠᠢᠭᠰᠠᠨ ᠨᠢ ᠭᠠᠴᠢᠭᠳᠠᠭᠰᠠᠨ ᠬᠥᠮᠦᠰ ᠲᠦ᠍ ᠵᠥᠩᠳᠡᠭᠡᠨ ᠲᠤᠰᠠ ᠳᠠᠮ ᠪᠣᠯᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠡᠢᠮᠦ ᠶᠦᠮ ᠴᠢᠨᠢ ᠭᠠᠪᠢᠷᠠ ᠳ᠋ᠤ᠌ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠬᠠᠮᠢᠭᠠᠠ᠋ᠴᠠ ᠰᠢᠷᠠᠭᠰᠠᠨ ᠲᠠᠬᠢᠶᠠ ᠵᠢᠭᠠᠰᠤ ᠢᠳᠡᠭᠦᠯᠬᠦ ᠮᠥᠩᠭᠥ ᠦᠯᠡᠳᠡᠬᠦ ᠪᠢᠯᠡ᠃ ᠠᠮᠠᠯᠠᠯᠲᠠ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠭᠡᠵᠦ ᠴᠢᠷᠮᠠᠢᠨ ᠨᠣᠭᠣᠭᠠ ᠭᠣᠣᠯᠳᠠᠭᠤ ᠱᠥᠯᠦᠨ ᠲᠣᠰᠣ ᠪᠠᠷ ᠠᠮᠲᠠᠯᠠᠭᠰᠠᠨ ᠪᠤᠤᠰᠠ ᠪᠠᠩᠰᠢ ᠬᠢᠵᠦ ᠰᠠᠢᠨ ᠨᠢᠭᠡ ᠴᠠᠳᠬᠠᠭᠠᠳ ᠳᠠᠬᠢᠭᠠᠳ ᠯᠠ ᠳᠠᠷᠠᠭᠠᠴᠢ ᠶ᠋ᠢᠨ ᠢᠷᠡᠬᠦ ᠴᠠᠯᠢᠩ ᠢ᠋ᠶ᠋ᠠᠨ ᠬᠦᠯᠢᠶᠡᠬᠦ ᠤᠷᠲᠤ ᠡᠳᠦᠷ ᠦ᠋ᠳ ᠡᠬᠢᠯᠡᠨᠡ᠃
ᠲᠩᠷᠢ ᠨᠡᠲᠦᠢᠨ ᠪᠣᠷᠣᠭᠠᠨ ᠮᠥᠨ ᠬᠦ᠌ ᠰᠢᠪᠡᠷᠡᠭᠰᠡᠭᠡᠷ᠃ ᠭᠠᠪᠢᠷᠠ᠂ ᠭᠤᠷᠪᠠᠨ ᠥᠬᠢᠨ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠳ᠋ᠤᠨᠢ ᠶᠠᠪᠤᠭᠤᠯᠤᠭᠠᠳ᠂ ᠬᠦᠦ ᠪᠡᠨ ᠪᠤᠯᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠳ᠋ᠤ᠌ ᠰᠤᠨᠳᠠᠯᠠᠨ ᠰᠤᠷᠭᠠᠭᠤᠯᠢ ᠵᠦᠭ ᠢ᠋ᠶ᠋ᠡᠨ ᠵᠢᠷᠢᠢᠯᠭᠡᠵᠦ ᠭᠠᠷᠤᠯᠠ᠃ ᠰᠥᠨᠢᠵᠢᠨ ᠤᠨᠲᠠᠭᠰᠠᠨ ᠦᠭᠡᠢ ᠡᠴᠡ ᠴᠢᠷᠠᠢ ᠨᠢ ᠬᠤᠵᠢᠢᠵᠤ᠂ ᠨᠢᠳᠦ ᠨᠢ ᠰᠦᠮᠡᠢᠵᠦ᠂ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠢ ᠶ᠋ᠢ ᠶᠠᠭᠠᠬᠢᠵᠤ ᠪᠥᠭᠯᠡᠬᠦ ᠪᠢᠯᠡ ᠭᠡᠮᠡᠨ ᠪᠣᠳᠣᠵᠤ ᠶᠠᠪᠤᠨᠠ᠃
ᠥᠷᠯᠥᠭᠡᠨ ᠦ᠌ ᠬᠣᠰᠢᠭᠤ ᠷᠠᠳᠢᠣ᠋ ᠲᠧᠯᠸᠢᠰ ᠬᠣᠷᠢᠶᠠᠨ ᠤ᠋ ᠡᠷᠲᠡ ᠶ᠋ᠢᠨ ᠮᠡᠳᠡᠭᠡᠨ ᠳ᠋ᠦ᠍ ᠬᠤᠰᠢᠭᠤᠨ ᠤ᠋ ᠵᠢᠷᠭᠤᠭᠠᠨ ᠪᠠᠭ ᠤ᠋ᠨ ᠳᠠᠷᠤᠭᠠ ᠨᠠᠷ ᠪᠣᠷᠣᠭᠠᠨ ᠤ᠋ ᠳᠤᠮᠳᠠᠭᠤᠷ ᠴᠤᠪᠠ ᠤᠰᠤᠨ ᠭᠤᠲᠤᠯ ᠡᠮᠦᠰᠴᠢᠬᠡᠭᠰᠡᠨ ᠦᠶᠡᠷ ᠤᠰᠤᠨ ᠤ᠋ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠨ ᠠᠢᠯ ᠡᠷᠦᠬᠡ ᠪᠡᠷ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠣᠯᠭᠠᠨ ᠮᠡᠳᠡᠭᠡᠯᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠭᠡᠷ ᠨᠢ ᠭᠣᠭᠣᠵᠢᠵᠤ ᠣᠷᠣᠢ ᠨᠢ ᠴᠥᠮᠥᠷᠡᠨ ᠣᠷᠣᠭᠰᠠᠨ ᠨᠡᠯᠢᠶᠡᠳ ᠠᠢᠯ ᠤ᠋ᠳ ᠪᠠᠢᠭᠰᠠᠨ ᠤ᠋ ᠠᠯᠢᠨ ᠳ᠋ᠤᠨᠢ ᠴᠤ᠌ ᠲᠠᠭᠠᠷᠠᠵᠤ ᠣᠷᠣᠭᠠ ᠦᠭᠡᠢ ᠨᠢ ᠶᠡᠬᠡ ᠰᠣᠨᠢᠨ᠃ ᠨᠡᠩ ᠴᠦ᠍ ᠭᠠᠪᠢᠷᠠ ᠪᠣᠯ ᠪᠠᠯᠭᠠᠰᠤᠨ ᠤ᠋ ᠪᠠᠨ ᠪᠠᠷᠠᠭᠤᠨ ᠬᠣᠢᠨᠠ ᠬᠣᠰᠢᠭᠤ ᠳᠠᠷᠤᠭᠠ ᠨᠠᠷ ᠤ᠋ᠨ ᠰᠠᠯᠬᠢᠨ ᠳᠣᠣᠷᠠ ᠰᠠᠭᠤᠳᠠᠭ ᠪᠥᠭᠡᠳ ᠲᠡᠳᠡᠨ ᠦ᠌ ᠬᠣᠢᠰᠢ ᠤᠷᠤᠭᠰᠢ ᠶᠠᠪᠤᠳᠠᠭ ᠶᠡᠬᠡ ᠵᠡᠭᠡᠯᠢ ᠶ᠋ᠢᠨ ᠬᠠᠵᠠᠭᠤᠬᠠᠨ ᠲᠠᠯᠠ ᠳ᠋ᠤ᠌ ᠪᠠᠭᠰᠢᠨᠠᠷ ᠤ᠋ᠨ ᠲᠥᠪᠯᠡᠷᠡᠭᠰᠡᠨ ᠰᠠᠭᠤᠴᠠ ᠳ᠋ᠤ᠌ ᠪᠠᠢᠳᠠᠭ ᠠᠵᠢ᠃ ᠨᠢᠯᠬᠠ ᠬᠡᠦᠬᠡᠳ ᠦ᠋ᠳ ᠲᠡᠢ ᠪᠡᠨ ᠰᠥᠨᠢᠵᠢᠨ ᠰᠠᠪᠠ ᠰᠠᠭᠤᠯᠠᠭᠠ ᠪᠠᠷ ᠭᠠᠳᠠᠭᠰᠢ ᠪᠠᠨ ᠤᠰᠤ ᠵᠥᠭᠡᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠳᠠᠷᠤᠭᠠ ᠨᠠᠷ ᠮᠢᠨᠢ ᠬᠠᠮᠢᠭᠠᠭᠤᠷ ᠨᠢ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ ᠳᠠ ᠭᠡᠵᠦ ᠪᠣᠳᠣᠭᠠᠳ ᠭᠠᠪᠢᠷᠠ ᠶ᠋ᠢᠨ ᠢᠨᠢᠶᠡᠳᠦ ᠬᠦᠷᠪᠡ᠃
ᠲᠡᠷᠡ᠂ ᠠᠯᠪᠠᠨ ᠳ᠋ᠠᠭᠠᠨ ᠣᠴᠢᠭᠠᠳ ᠬᠠᠮᠲᠤ ᠠᠵᠢᠯᠯᠠᠭᠰᠠᠳ ᠲᠠᠭᠠᠨ ᠥᠩᠭᠡᠷᠡᠭᠴᠢ ᠰᠥᠨᠢ ᠪᠣᠷᠣᠭᠠᠨ ᠭᠣᠭᠣᠵᠢᠵᠤ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ᠂ ᠭᠡᠷ ᠦ᠋ᠨ ᠬᠠᠮᠤᠭ ᠶᠠᠭᠤᠮᠠ ᠨᠢ ᠨᠣᠷᠴᠤ ᠴᠢᠭᠢᠭᠲᠦᠭᠰᠡᠨ᠂ ᠭᠠᠯ ᠨᠣᠴᠣᠭᠠᠬᠤ ᠠᠷᠭᠠᠯ ᠴᠤ᠌ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠬᠤ ᠳ᠋ᠤ᠌᠂ ᠠᠬᠠᠮᠠᠳ ᠪᠠᠭᠰᠢ ᠭᠠᠵᠢᠳ ᠭᠤᠸᠠᠢ᠂ ᠰᠠᠢᠨ ᠨᠠᠢᠵᠠ ᠰᠢᠯᠢᠩᠬᠤᠸᠠ᠂ ᠦᠷᠴᠠᠢᠬᠤ ᠵᠡᠷᠭᠡ ᠠᠷᠪᠠᠭᠠᠳ ᠪᠠᠭᠰᠢ ᠮᠥᠩᠭᠥ ᠵᠣᠭᠣᠰ ᠢ᠋ᠶ᠋ᠠᠨ ᠢᠯᠡᠭᠦᠴᠢᠯᠡᠨ ᠭᠠᠷᠭᠠᠵᠤ ᠭᠡᠷ ᠦ᠋ᠨ ᠣᠷᠣᠢ ᠶ᠋ᠢ ᠨᠢ ᠸᠠᠭᠠᠷᠯᠠᠵᠤ ᠥᠭᠬᠦ ᠪᠡᠷ ᠪᠣᠯᠪᠠ᠃ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠡᠳᠡᠭᠡᠷ ᠪᠠᠭᠰᠢᠨᠠᠷ ᠨᠢ ᠥᠨᠥᠴᠢᠨ ᠪᠡᠯᠪᠡᠰᠦᠨ ᠣᠯᠠᠨ ᠬᠡᠦᠬᠡᠳ ᠲᠡᠢ ᠭᠠᠪᠢᠷᠠ ᠶ᠋ᠢ ᠭᠠᠴᠢᠭᠳᠠᠵᠤ ᠶᠠᠳᠠᠷᠠᠬᠤ ᠦᠶᠡ ᠳ᠋ᠦ᠍ᠨᠢ ᠬᠡᠵᠢᠶᠡᠳᠡ ᠬᠠᠯᠠᠮᠵᠢ ᠶ᠋ᠢᠨ ᠬᠠᠯᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ᠂ ᠡᠳ᠋ ᠪᠣᠳᠠᠰ ᠵᠣᠭᠣᠰ ᠢ᠋ᠶ᠋ᠠᠷ ᠲᠤᠰᠠᠯᠠᠨ ᠳᠡᠮᠵᠢᠳᠡᠭ ᠠᠵᠢ᠃ ᠬᠡᠦᠬᠡᠳ ᠪᠣᠯᠤᠨ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠡᠪᠡᠳᠴᠦ ᠨᠢᠭᠡ ᠦᠶᠡ ᠲᠤᠢᠯ ᠢ᠋ᠶ᠋ᠠᠷ ᠭᠠᠴᠢᠭᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠮᠥᠨ ᠬᠦ᠌ ᠡᠳᠡᠭᠡᠷ ᠪᠠᠭᠰᠢᠨᠠᠷ ᠣᠯᠠᠨ ᠢ᠋ ᠳᠠᠢᠴᠢᠯᠠᠨ ᠪᠡᠯᠡ ᠮᠥᠩᠭᠥ ᠬᠤᠷᠠᠮᠳᠤᠭᠤᠯᠵᠤ ᠲᠤᠰᠠᠯᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠭᠡᠬᠦᠯᠡᠷ ᠭᠠᠪᠢᠷᠠ ᠬᠠᠮᠲᠤ ᠠᠵᠢᠯᠯᠠᠭᠰᠠᠳ ᠪᠣᠯᠤᠨ ᠨᠠᠢᠵᠠ ᠨᠠᠷ ᠲᠠᠭᠠᠨ《ᠣᠯᠠᠨ ᠤ᠋ ᠮᠢᠨᠢ ᠬᠠᠯᠠᠮᠵᠢ ᠳᠡᠮᠵᠢᠯᠭᠡ ᠪᠠᠢᠭᠰᠠᠨ ᠦᠭᠡᠢ ᠪᠣᠯ ᠮᠢᠨᠦ ᠥᠨᠥᠳᠥᠷ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠨᠢᠭᠡ ᠬᠥᠮᠦᠨ ᠬᠡᠴᠢᠨᠡᠨ ᠴᠢᠳᠠᠯ ᠲᠠᠢ ᠪᠠᠢᠯᠠ ᠴᠤ᠌ ᠬᠠᠮᠢᠭᠠ ᠬᠦᠷᠬᠦ ᠪᠣᠢ᠂ ᠬᠠᠷᠢᠨ ᠣᠯᠠᠨ ᠲᠠᠢ ᠪᠠᠨ ᠪᠠᠢᠬᠤ ᠰᠠᠢᠬᠠᠨ ᠠ᠋》 ᠭᠡᠮᠡᠨ ᠦᠷᠭᠦᠯᠵᠢ ᠶᠠᠷᠢᠳᠠᠭ ᠪᠠᠢᠯᠠ᠃ ᠬᠣᠵᠢᠮ ᠨᠢ ᠲᠡᠷᠡ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠴᠦ᠍《ᠶᠠᠳᠠᠬᠤ ᠦᠶᠡ ᠳ᠋ᠦ᠍ ᠬᠥᠮᠦᠨ ᠦ᠌ ᠲᠤᠰᠠ ᠪᠠᠭᠠ ᠴᠤ᠌ ᠪᠠᠭᠠᠳᠠᠬᠤ ᠦᠭᠡᠢ᠂ ᠬᠠᠮᠤᠭ ᠤ᠋ᠨ ᠬᠦᠴᠢᠷ ᠵᠣᠪᠠᠭᠤᠷᠢ ᠲᠠᠢ ᠦᠶᠡ ᠳ᠋ᠦ᠍ ᠴᠢᠨᠢ ᠬᠠᠯᠠᠮᠵᠢ ᠶ᠋ᠢᠨ ᠬᠠᠯᠠᠭᠤᠨ ᠭᠠᠷ ᠰᠤᠩᠭᠠᠭᠰᠠᠨ ᠬᠥᠮᠦᠨ ᠦ᠌ ᠰᠠᠢᠬᠠᠨ ᠰᠡᠳᠬᠢᠯ ᠦ᠋ᠨ ᠬᠠᠷᠢᠭᠤ ᠶ᠋ᠢ ᠬᠡᠵᠢᠶᠡᠳᠡ ᠬᠠᠷᠢᠭᠤᠯᠠᠬᠤ ᠶ᠋ᠢ ᠰᠠᠨᠠᠵᠤ ᠶᠠᠪᠤᠭᠠᠷᠠᠢ》 ᠭᠡᠮᠡᠨ ᠰᠤᠷᠭᠠᠳᠠᠭ ᠪᠠᠢᠯᠠ᠃
ᠬᠡᠳᠦᠨ ᠡᠳᠦᠷ ᠦᠷᠭᠦᠯᠵᠢᠯᠡᠭᠰᠡᠨ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠳᠥᠩᠭᠡᠵᠦ ᠨᠢᠭᠡ ᠵᠣᠭᠰᠣᠵᠤ ᠹᠦ ᠶ᠋ᠢᠨ ᠬᠠᠯᠠᠭᠤᠨ ᠨᠠᠷᠠ ᠰᠢᠷᠠᠵᠤ ᠪᠠᠢᠭᠰᠠᠨ ᠴᠤ᠌ ᠡᠪᠡᠰᠦ ᠤᠷᠭᠤᠮᠠᠯ ᠴᠡᠯᠭᠡᠷᠡᠨ ᠨᠣᠭᠣᠭᠠᠷᠠᠵᠤ ᠠᠭᠤᠷ ᠠᠮᠢᠰᠬᠤᠯ ᠴᠢᠭᠢᠭᠯᠢᠭ ᠰᠠᠢᠬᠠᠨ᠃ ᠥᠨᠥᠳᠥᠷ ᠪᠦᠲᠦᠨ ᠰᠠᠢᠨ ᠡᠳᠦᠷ ᠲᠤᠯᠠ ᠭᠠᠪᠢᠷᠠ ᠰᠢᠪᠠᠷᠴᠢᠨ ᠣᠯᠵᠤ ᠭᠡᠷ ᠦ᠋ᠨ ᠣᠷᠣᠢ ᠪᠠᠨ ᠸᠠᠭᠠᠷᠯᠠᠵᠤ ᠢᠯᠢᠭᠦᠯᠪᠡ᠃ ᠲᠡᠭᠡᠭᠡᠳ ᠨᠤᠷᠠᠵᠤ ᠴᠢᠭᠢᠭᠲᠦᠭᠰᠡᠨ ᠶᠠᠭᠤᠮᠠᠰ ᠢ᠋ᠶ᠋ᠠᠨ ᠨᠠᠷᠠᠨ ᠳ᠋ᠤ᠌ ᠭᠠᠷᠭᠠᠨ ᠳᠡᠯᠭᠡᠵᠦ ᠬᠠᠲᠠᠭᠠᠨᠠ᠃ ᠨᠣᠢᠲᠠᠨ ᠠᠷᠭᠠᠯ ᠢ᠋ᠶ᠋ᠠᠨ ᠭᠠᠷᠭᠠᠨ ᠨᠠᠷᠠᠨ ᠳ᠋ᠤ᠌ ᠳᠡᠯᠭᠡᠭᠰᠡᠨ ᠳ᠋ᠦ᠍ ᠬᠠᠭᠠᠰ ᠡᠳᠦᠷ ᠪᠣᠯᠤᠯ ᠦᠭᠡᠢ ᠬᠠᠯᠠᠭᠤᠨ ᠨᠠᠷᠠᠨ ᠤ᠋ ᠢᠯᠴᠢᠨ ᠳ᠋ᠦ᠍ ᠡᠭᠡᠭᠡᠵᠦ ᠬᠠᠲᠠᠴᠢᠬᠠᠭᠰᠠᠨ ᠪᠣᠯᠬᠣᠷ ᠲᠡᠷᠡ ᠵᠤᠤᠬᠠ ᠪᠠᠨ ᠠᠰᠠᠭᠠᠵᠤ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠡᠯᠡᠳᠬᠡᠨᠡ᠃ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠢ᠋ᠶ᠋ᠡᠨ ᠸᠠᠭᠠᠷᠯᠠᠭᠠᠳ ᠪᠠᠰᠠ ᠠᠷᠪᠠᠨ ᠬᠡᠳᠦᠨ ᠲᠥᠭᠥᠷᠢᠭ ᠦᠯᠡᠳᠡᠭᠰᠡᠨ ᠲᠤᠯᠠ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠮᠢᠬᠠ ᠲᠠᠢ ᠵᠠᠭᠤᠰᠢ ᠢᠳᠡᠭᠦᠯᠬᠦ ᠭᠡᠵᠦ ᠶᠠᠭᠠᠷᠠᠵᠤ ᠠᠵᠢᠯᠯᠠᠨᠠ᠃ ᠥᠨᠥᠳᠥᠷ ᠲᠡᠷᠡ ᠮᠠᠰᠢ ᠪᠠᠶᠠᠷᠲᠠᠢ ᠪᠠᠢᠵᠤ ᠡᠴᠡᠵᠦ ᠶᠠᠳᠠᠷᠠᠭᠰᠠᠨ ᠴᠣᠩᠬᠢᠭᠠᠷ ᠴᠢᠷᠠᠢ ᠨᠢ ᠥᠩᠭᠡ ᠲᠡᠳᠡᠨ ᠭᠢᠯᠠᠯᠵᠠᠵᠤ ᠳᠠᠭᠤᠤ ᠠᠶᠠᠯᠴᠢᠬᠠᠭᠰᠠᠨ ᠨᠣᠭᠣᠭᠠ ᠤᠬᠢᠶᠠᠨᠠ᠃ ᠬᠡᠦᠬᠡᠳ ᠦ᠋ᠳ ᠨᠢ ᠬᠦᠷᠢᠶᠡᠨ ᠳ᠋ᠡᠭᠡᠨ ᠡᠯᠡᠰᠦ ᠰᠢᠪᠡᠷ ᠨᠤᠬᠤᠨ ᠬᠥᠭᠵᠢᠯᠲᠡᠢ ᠲᠣᠭᠯᠠᠵᠤ ᠪᠠᠢᠯᠠ᠃ ᠶᠡᠬᠡ ᠥᠬᠢᠨ ᠨᠢ ᠨᠢᠭ ᠰᠢᠪᠠᠷ ᠢ᠋ᠶ᠋ᠠᠷ ᠡᠯᠳᠡᠪ ᠦ᠋ᠨ ᠳᠦᠷᠰᠦ ᠲᠡᠢ ᠶᠠᠭᠤᠮᠠ ᠶ᠋ᠢ ᠶᠡᠬᠡ ᠯᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠥᠪᠯᠡᠷᠡᠭᠦᠯᠦᠨ ᠪᠠᠷᠢᠵᠤ ᠰᠠᠭᠤᠨᠠ᠃ ᠬᠣᠶᠠᠳᠤᠭᠠᠷ ᠥᠬᠢᠨ ᠨᠢ ᠥᠬᠢᠨ ᠳᠡᠭᠦᠦ ᠲᠡᠢ ᠪᠡᠨ《ᠬᠣᠲᠠ ᠬᠦᠷᠢᠶᠡ》 ᠮᠠᠶᠢᠭ ᠲᠠᠢ ᠶᠠᠭᠤᠮᠠ ᠶ᠋ᠢ ᠪᠣᠨᠴᠣᠭᠣᠷ ᠲᠠᠷᠭᠤᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠰᠢᠪᠠᠷ ᠲᠤ᠌ ᠪᠢᠯᠳᠠᠨ ᠪᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠢᠵᠢᠭᠬᠡᠨ ᠪᠣᠰᠤᠭᠠ ᠬᠠᠮᠠᠷ ᠢ᠋ᠶ᠋ᠠᠨ ᠰᠠᠷᠬᠠᠯᠵᠠᠭᠤᠯᠤᠨ ᠦᠨᠦᠷᠯᠡᠭᠡᠳ
— ᠸᠠ᠂ ᠰᠠᠢᠬᠠᠨ ᠦᠨᠦᠷ ᠭᠠᠷᠴᠤ ᠪᠠᠢᠨᠠ᠂ ᠥᠨᠥᠳᠥᠷ ᠡᠮᠧ ᠭᠣᠶᠣ ᠮᠢᠬᠠ ᠲᠠᠢ ᠵᠠᠭᠤᠰᠢ ᠬᠢᠵᠦ ᠪᠠᠢᠨᠠ ᠭᠡᠰᠡᠨ ᠳ᠋ᠦ᠍ ᠥᠬᠢᠨ ᠳᠡᠭᠦᠦ ᠨᠢ ᠲᠣᠯᠣᠭᠠᠢ ᠪᠠᠨ ᠭᠢᠯᠵᠢᠢᠯᠭᠡᠨ ᠬᠠᠮᠠᠷ ᠢ᠋ᠶ᠋ᠠᠨ ᠰᠠᠷᠲᠠᠢᠯᠭᠠᠨ ᠭᠦᠨ ᠠᠮᠢᠰᠬᠤᠨ ᠦᠨᠦᠷᠯᠡᠭᠡᠳ
— ᠲᠡᠢᠮᠦ ᠪᠠᠢᠨᠠ᠃ ᠭᠣᠶᠣ ᠦᠨᠦᠷ ᠭᠠᠷᠴᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠪᠢᠴᠢᠬᠠᠨ ᠬᠣᠳᠣᠭᠣᠳᠣ ᠨᠢ ᠬᠤᠷᠴᠢᠭᠢᠨᠠᠨ ᠳᠤᠤᠭᠠᠷᠪᠠ᠃ ᠣᠪᠣᠭᠠᠯᠠᠵᠤ ᠲᠠᠯᠪᠢᠭᠰᠠᠨ ᠡᠯᠡᠰᠦᠨ ᠳ᠋ᠦ᠍ ᠣᠷᠣᠵᠤ ᠰᠠᠭᠤᠭᠠᠳ ᠮᠣᠨᠴᠣᠭᠣᠷ ᠲᠠᠷᠭᠤᠨ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠬᠤᠷᠤᠭᠤᠨ ᠤ᠋ ᠰᠠᠯᠠᠭᠠ ᠪᠠᠷ ᠡᠯᠡᠰᠦ ᠭᠣᠭᠣᠵᠢᠭᠤᠯᠤᠨ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠬᠦᠦ ᠳᠡᠭᠦᠦ ᠨᠢ《ᠣᠳᠣ ᠨᠠᠭᠠᠳᠬᠤ ᠪᠠᠨ ᠪᠣᠯᠢᠶᠠ᠃ ᠭᠡᠷ ᠲᠦ᠍ ᠪᠡᠨ ᠣᠷᠣᠶᠠ》 ᠭᠡᠪᠡᠯ᠂ ᠲᠣᠮᠣ ᠡᠭᠡᠴᠢ ᠨᠢ《ᠡᠵᠢ ᠳᠠᠭᠤᠳᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠴᠢᠨᠢ》 ᠭᠡᠳ ᠭᠠᠷ ᠳᠠᠬᠢ ᠪᠠᠷᠢᠮᠠᠯ ᠢ᠋ᠶ᠋ᠠᠨ ᠤᠷᠤᠯᠳᠤᠵᠤ ᠰᠠᠭᠤᠨᠠ᠃ ᠡᠵᠢ ᠨᠢ ᠲᠡᠳᠡᠨ ᠢ᠋ ᠪᠠᠭᠠ ᠠ᠋ᠴᠠ ᠨᠢ ᠵᠣᠴᠢᠨ ᠭᠡᠢᠴᠢᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠵᠡᠷᠭᠡᠴᠡᠨ ᠠᠶᠠᠭᠠ ᠫᠢᠯᠠᠠ᠋ᠴᠠ ᠰᠢᠭᠦᠷᠡᠵᠦ ᠢᠳᠡᠬᠦ ᠪᠤᠶᠤ ᠠᠬᠠᠮᠠᠳ ᠡᠴᠡ ᠪᠡᠨ ᠤᠷᠢᠳᠴᠢᠯᠠᠨ ᠠᠶᠠᠭᠠ ᠰᠠᠪᠬᠠ ᠪᠠᠷᠢᠬᠤ᠂ ᠭᠡᠢᠴᠢᠨ ᠵᠣᠴᠢᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠦᠢᠮᠡᠭᠦᠯᠵᠦ ᠳᠡᠪᠵᠢᠶᠡᠷᠡᠬᠦ᠂ ᠢᠳᠡᠬᠦ ᠳ᠋ᠡᠭᠡᠨ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠨ ᠱᠠᠯᠴᠢᠭᠢᠨᠠᠭᠤᠯᠬᠤ ᠶ᠋ᠢ ᠴᠢᠩᠭᠠ ᠬᠣᠷᠢᠭᠯᠠᠳᠠᠭ᠃ ᠲᠡᠭᠡᠬᠦᠯᠡᠷ ᠡᠨᠡ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠲᠡᠳᠡᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠪᠰᠢᠭᠰᠡᠨ ᠵᠠᠩᠰᠢᠯ ᠪᠣᠯᠴᠢᠬᠠᠵᠠᠢ᠃
ᠡᠳᠡᠨ ᠦ᠌ ᠬᠢ ᠬᠡᠳᠦᠢᠪᠡᠷ ᠣᠷᠴᠢᠮ ᠤ᠋ᠨ ᠬᠡᠳᠦᠨ ᠵᠢᠯ ᠳ᠋ᠦ᠍ ᠠᠮᠢᠳᠤᠷᠠᠯ ᠨᠢ ᠬᠦᠴᠢᠷ ᠲᠡᠢ ᠴᠦ᠍ ᠡᠳᠡᠨ ᠦ᠌ ᠳ᠋ᠦ᠍ ᠰᠠᠳᠤᠨ ᠲᠥᠷᠥᠯ ᠦ᠋ᠳ ᠨᠢ᠂ ᠨᠠᠢᠵᠠ ᠨᠥᠬᠥᠳ᠂ ᠬᠠᠮᠲᠤ ᠠᠵᠢᠯᠯᠠᠭᠰᠠᠳ ᠨᠢ ᠴᠤᠭᠯᠠᠷᠠᠬᠤ ᠳᠤᠷᠠᠲᠠᠢ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠰᠢᠷᠭᠠᠯ ᠴᠠᠢ᠂ ᠠᠮᠲᠠᠲᠤ ᠨᠣᠭᠣᠭᠠ ᠵᠠᠭᠤᠰᠢ ᠶ᠋ᠢ ᠢᠳᠡᠨ ᠵᠣᠴᠢᠨᠰᠠᠭ ᠵᠠᠩ ᠢ᠋ ᠲᠠᠭᠠᠯᠠᠨ᠂ ᠤᠬᠠᠭᠠᠯᠢᠭ ᠰᠠᠢᠬᠠᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠬᠤ ᠳᠤᠷᠠᠲᠠᠢ᠃ ᠲᠡᠷᠡ ᠬᠣᠭᠣᠯᠠ ᠵᠠᠭᠤᠰᠢ ᠶ᠋ᠢᠨ ᠥᠩᠭᠡ ᠦᠨᠦᠷ ᠠᠮᠲᠠ ᠶ᠋ᠢ ᠵᠣᠬᠢᠴᠠᠭᠤᠯᠤᠨ ᠭᠣᠴᠣ ᠰᠠᠢᠬᠠᠨ ᠬᠢᠨᠡ᠃ ᠭᠠᠭᠴᠠᠬᠠᠨ ᠲᠥᠮᠥᠰᠥ ᠪᠠᠢᠬᠤ ᠳ᠋ᠤ᠌ ᠯᠠ ᠬᠠᠯᠠᠭᠤᠨ ᠬᠦᠢᠲᠡᠨ ᠵᠢᠷᠭᠤᠭᠠᠨ ᠨᠣᠭᠣᠭᠠ ᠭᠠᠷᠭᠠᠴᠢᠬᠠᠨᠠ᠃ ᠵᠢᠵᠢᠭ ᠪᠣᠳᠣᠩ ᠳ᠋ᠤ᠌ ᠨᠣᠭᠣᠭᠠ ᠳᠠᠷᠤᠳᠠᠭᠠ᠋ᠴᠠ ᠵᠠᠷᠢᠮ ᠳ᠋ᠠᠭᠠᠨ ᠭᠡᠢᠴᠢᠨ ᠢᠷᠡᠵᠦ ᠭᠠᠴᠢᠭᠳᠠᠪᠠᠯ ᠨᠠᠢ᠍ᠮᠠᠨ ᠳᠠᠪᠤᠰᠤᠯᠠᠭᠰᠠᠨ ᠨᠣᠭᠣᠭᠠ ᠪᠠᠷ ᠰᠢᠷᠡᠭᠡ ᠵᠠᠰᠠᠵᠤ ᠪᠠᠢᠭᠰᠠᠨ ᠴᠤ᠌ ᠤᠳᠠᠭᠠ ᠲᠠᠢ᠃ ᠬᠣᠪᠣᠷ ᠳᠤᠲᠠᠮᠠᠭ ᠴᠤ᠌ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠡᠪᠲᠡᠢᠬᠡᠨ ᠵᠣᠬᠢᠴᠠᠭᠤᠯᠤᠨ ᠪᠤᠰᠤᠳ ᠢ᠋ ᠰᠡᠳᠬᠢᠯ ᠬᠠᠩᠭᠠᠮᠵᠢᠲᠠᠢ ᠠᠶᠠᠲᠠᠢᠬᠠᠨ ᠳᠠᠢᠯᠠᠭᠠᠳ ᠶᠠᠪᠤᠭᠤᠯᠴᠢᠬᠠᠳᠠᠭ ᠨᠢ ᠲᠡᠭᠦᠨ ᠦ᠌ ᠪᠠᠰᠠ ᠨᠢᠭᠡᠨ ᠭᠠᠷᠮᠠᠭᠠᠢ ᠲᠠᠯᠠ ᠪᠣᠯᠬᠤ ᠶᠤᠮ᠃ ᠡᠵᠢ ᠨᠢ ᠭᠡᠷ ᠡᠴᠡ
— ᠬᠡᠦᠬᠡᠳ ᠦ᠋ᠳ ᠠ᠋᠂ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠣᠷᠣᠵᠤ ᠬᠣᠭᠣᠯᠠ ᠪᠠᠨ ᠢᠳᠡ ᠭᠡᠵᠦ ᠳᠠᠭᠤᠳᠠᠪᠠ᠃
ᠶᠡᠬᠡ ᠡᠭᠡᠴᠢ ᠨᠢ ᠳᠡᠭᠦᠦ ᠨᠠᠷ ᠲᠠᠭᠠᠨ ᠳᠠᠷᠤᠭᠤᠯ ᠬᠤᠳᠳᠤᠭᠠ᠋ᠴᠠ ᠤᠰᠤ ᠳᠠᠷᠤᠨ ᠥᠭᠴᠦ ᠭᠠᠷ ᠨᠢᠭᠤᠷ ᠢ᠋ ᠨᠢ ᠤᠬᠢᠶᠠᠯᠭᠠᠵᠤ᠂ ᠬᠠᠮᠤᠭ ᠪᠡᠶᠡ ᠡᠴᠡ ᠨᠢ ᠡᠯᠡᠰᠦ ᠭᠣᠭᠣᠵᠢᠬᠤ ᠪᠠᠯᠴᠢᠷ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠪᠴᠠᠰᠤ ᠶ᠋ᠢ ᠲᠠᠢᠯᠤᠨ ᠭᠦᠪᠢᠵᠦ ᠰᠡᠭᠰᠦᠷᠦᠨ᠂ ᠬᠤᠳᠳᠤᠭ ᠤ᠋ᠨ ᠬᠦᠢᠲᠡᠨ ᠤᠰᠤ ᠪᠠᠷ ᠦᠰᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠤᠬᠢᠶᠠᠨ ᠴᠡᠪᠡᠷᠯᠡᠨᠡ᠃ ᠠᠪᠤ ᠨᠢ ᠨᠠᠰᠤ ᠪᠠᠷᠠᠬᠤ ᠦᠶᠡ ᠳ᠋ᠦ᠍ ᠳᠣᠯᠣᠭᠠᠲᠠᠢ ᠪᠠᠢᠭᠰᠠᠨ ᠡᠨᠡ ᠥᠬᠢᠨ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠬᠡᠦᠬᠡᠳ ᠡᠷᠬᠡ ᠪᠡᠨ ᠬᠠᠰᠤᠭᠳᠠᠵᠤ ᠶᠡᠬᠡ ᠨᠢ ᠭᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠵᠢ ᠪᠡᠨ ᠬᠠᠮᠵᠢᠨ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠠᠷᠠᠴᠢᠯᠠᠨ ᠬᠠᠷᠠᠭᠠᠯᠵᠠᠬᠤ ᠪᠣᠯᠵᠠᠢ᠃ ᠭᠡᠷ ᠵᠠᠭᠤᠷᠠ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠡᠵᠢ ᠳ᠋ᠡᠭᠡᠨ ᠵᠥᠩᠳᠡᠭᠡᠨ ᠲᠤᠰᠠ ᠨᠡᠮᠡᠷᠢ ᠪᠣᠯᠳᠠᠭ ᠪᠠᠢᠯᠠ᠃ ᠳᠥᠩᠭᠡᠵᠦ ᠠᠷᠪᠠ ᠬᠦᠷᠴᠦ ᠪᠠᠢᠭᠠ ᠪᠣᠯᠪᠠᠴᠤ ᠲᠡᠷᠡ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠯᠤᠨ ᠳᠡᠭᠦᠦ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠴᠠᠰᠤ ᠶ᠋ᠢ ᠤᠬᠢᠶᠠᠬᠤ᠂ ᠪᠤᠳᠠᠭᠠ ᠠᠭᠰᠢᠭᠠᠬᠤ᠂ ᠳᠥᠭᠥᠮ ᠨᠣᠭᠣᠭᠠ ᠵᠠᠭᠤᠰᠢ ᠬᠢᠬᠦ ᠶ᠋ᠢ ᠴᠦ᠍ ᠰᠤᠷᠴᠢᠬᠠᠭᠰᠠᠨ ᠠᠵᠢ᠃ ᠡᠵᠢ ᠨᠢ ᠦᠷᠭᠦᠯᠵᠢ《ᠴᠢ ᠪᠣᠯ ᠶᠡᠬᠡ ᠨᠢ ᠰᠢᠦ》 ᠭᠡᠵᠦ ᠬᠡᠯᠡᠳᠡᠭ ᠦᠭᠡ ᠲᠡᠭᠦᠨ ᠢ᠋《ᠬᠡᠦᠬᠡᠳ ᠪᠢᠰᠢ ᠬᠠᠷᠢᠨ ᠲᠣᠮᠣ ᠬᠥᠮᠦᠨ ᠪᠠᠢᠬᠤ ᠶᠣᠰᠣᠲᠠᠢ 》ᠭᠡᠳᠡᠭ ᠢ᠋ ᠨᠢᠯᠬᠠ ᠪᠠᠯᠴᠢᠷ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠢᠯᠠᠭᠠᠨ ᠮᠡᠳᠡᠷᠡᠭᠦᠯᠵᠦ ᠥᠪᠡᠷ ᠲᠤᠨᠢ ᠣᠨᠣᠭᠳᠠᠭᠰᠠᠨ《ᠬᠦᠨᠳᠦ ᠬᠠᠷᠢᠭᠤᠴᠠᠯᠭᠠ》 ᠪᠠᠨ ᠳᠤᠷᠠᠲᠠᠶᠠ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠷᠮᠠᠢᠨᠠ᠃ ᠭᠡᠪᠡᠴᠦ ᠬᠡᠦᠬᠡᠳ ᠪᠣᠯ ᠬᠠᠰᠢᠯᠠ ᠬᠡᠦᠬᠡᠳ ᠪᠣᠯᠬᠣᠷ ᠠᠯᠳᠠᠭᠳᠠᠯ ᠳᠤᠲᠠᠭᠳᠠᠯ ᠲᠠᠢ ᠵᠦᠢᠯ ᠦᠷᠭᠦᠯᠵᠢ ᠭᠠᠷᠴᠤ ᠡᠵᠢ ᠪᠡᠷ ᠢ᠋ᠶ᠋ᠡᠨ ᠴᠢᠩᠭᠠ ᠵᠢᠮᠡᠯᠡᠭᠦᠯᠦᠨᠡ᠃ ᠲᠡᠭᠡᠭᠡᠳ ᠡᠵᠢ ᠡᠴᠡ ᠪᠡᠨ ᠨᠢᠭᠤᠨ ᠭᠣᠮᠣᠳᠠᠯ ᠤ᠋ᠨ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠳᠡᠭ ᠴᠦ᠍ ᠠᠯᠳᠠᠭᠠ ᠪᠠᠨ ᠳᠠᠪᠲᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠦᠷᠭᠦᠯᠵᠢᠯᠡᠨ ᠴᠢᠷᠮᠠᠢᠨᠠ᠃ ᠨᠢᠭᠡᠨ ᠥᠰᠪᠥᠷᠢ ᠶ᠋ᠢᠨ ᠪᠠᠭᠠ ᠬᠡᠦᠬᠡᠳ ᠲᠦ᠍ ᠠᠪᠴᠤ ᠬᠡᠯᠡᠪᠡᠯ ᠡᠨᠡ ᠨᠢ ᠳᠡᠩᠳᠡᠭᠦᠦ ᠭᠣᠣᠯᠴᠢ ᠪᠤᠰᠤ ᠤᠴᠠᠷᠠᠯ ᠴᠤ᠌ ᠶᠤᠮ ᠤᠤ᠃
ᠨᠢᠭᠡ ᠭᠡᠷ ᠦ᠋ᠨ ᠬᠠᠯᠠᠭᠤᠨ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠳᠤᠭᠤᠢ ᠰᠢᠷᠡᠭᠡ ᠪᠡᠨ ᠲᠣᠭᠣᠷᠢᠨ ᠰᠠᠭᠤᠵᠤ ᠳᠠᠭᠤ ᠴᠢᠮᠡᠭᠡ ᠦᠭᠡᠢ ᠬᠣᠭᠣᠯᠠ ᠪᠠᠨ ᠢᠳᠡᠨᠡ᠃ ᠭᠠᠪᠢᠷᠠ᠂ ᠨᠣᠭᠣᠭᠠ ᠵᠠᠭᠤᠰᠢ ᠶ᠋ᠢ ᠠᠮᠠ ᠪᠠᠨ ᠣᠯᠵᠤ ᠶᠠᠳᠠᠨ ᠡᠮᠬᠦᠯᠡᠬᠦ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠵᠠᠯᠭᠢᠭᠰᠠᠨ ᠨᠢᠭᠡ ᠡᠮᠬᠦ ᠪᠤᠳᠠᠭᠠ ᠨᠢ ᠬᠣᠭᠣᠯᠠᠢ ᠳ᠋ᠤᠨᠢ ᠵᠠᠩᠭᠢᠷᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠪᠡ᠃ ᠦᠨᠡᠨ ᠳ᠋ᠡᠭᠡᠨ ᠭᠠᠪᠢᠷᠠ ᠡᠳᠦᠷ ᠪᠦᠷᠢ ᠳ᠋ᠡᠭᠡᠨ ᠭᠤᠴᠢᠨ ᠲᠥᠭᠥᠷᠢᠭ ᠦ᠋ᠨ ᠪᠡᠯᠡ ᠮᠥᠩᠭᠥ ᠪᠠᠢᠬᠤ ᠳ᠋ᠤ᠌ ᠬᠦᠷᠪᠡᠯ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠢ᠋ᠶ᠋ᠡᠨ ᠭᠤᠷᠪᠠᠨ ᠡᠷᠢᠨ ᠦ᠌ ᠬᠣᠭᠣᠯᠠ ᠶ᠋ᠢ ᠡᠯᠪᠡᠭ ᠰᠠᠢᠬᠠᠨ ᠢᠳᠡᠭᠦᠯᠴᠢᠬᠡᠬᠦ ᠪᠠᠢᠯᠠ᠃ ᠭᠡᠪᠡᠴᠦ ᠣᠷᠴᠢᠮ ᠤ᠋ᠨ ᠬᠡᠳᠦᠨ ᠰᠠᠷᠠ ᠳ᠋ᠤ᠌ ᠬᠠᠷᠮᠠᠨ ᠳ᠋ᠤᠨᠢ ᠭᠤᠷᠪᠠᠨ ᠮᠥᠩᠭᠥ ᠴᠦ᠍ ᠦᠭᠡᠢ ᠶᠠᠪᠤᠬᠤ ᠨᠢ ᠣᠯᠠᠨᠲᠠᠢ᠃ ᠤᠭᠠ᠋ᠴᠠ ᠠᠭᠤᠵᠢᠮ ᠲᠡᠨᠢᠭᠦᠬᠡᠨ ᠠᠷᠠᠨᠰᠢᠨ ᠲᠠᠢ ᠲᠡᠷᠡ《ᠭᠠᠭᠴᠠ ᠨᠠᠳᠠᠳᠤ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠴᠤ᠌ ᠤᠴᠢᠷ ᠪᠢᠰᠢ᠂ ᠤᠬᠠᠭᠠᠨ ᠨᠢ ᠣᠯᠳᠠᠬᠤ ᠪᠠᠢᠯᠭᠦᠢ》᠂ 《ᠮᠠᠷᠭᠠᠰᠢ ᠪᠣᠯᠬᠤ ᠳ᠋ᠤ᠌ ᠡᠪ ᠨᠢ ᠣᠯᠳᠠᠬᠤ ᠪᠢᠵᠡ》 ᠭᠡᠮᠡᠨ ᠥᠪᠡᠷ ᠢ ᠪᠡᠨ ᠲᠠᠢᠳᠬᠤᠷᠠᠭᠤᠯᠵᠤ᠂ ᠪᠠᠷᠠᠭᠳᠠᠰᠢ ᠦᠭᠡᠢ ᠣᠯᠠᠨ ᠮᠠᠷᠭᠠᠰᠢ ᠳ᠋ᠠᠭᠠᠨ ᠢᠲᠡᠭᠡᠯ ᠲᠡᠭᠦᠯᠳᠡᠷ ᠢ᠋ᠶ᠋ᠡᠷ ᠡᠳᠦᠷ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠡᠬᠢᠯᠡᠭᠦᠯᠦᠨᠡ᠃《ᠠᠮᠠᠨ ᠪᠡᠯᠭᠡ ᠬᠠᠮᠢᠭᠠᠰᠢ ᠪᠠᠨ ᠪᠣᠯ ᠠᠰᠢᠳᠠ ᠶ᠋ᠢᠨ ᠪᠡᠯᠭᠡ ᠲᠠᠰᠢ ᠪᠠᠨ》 ᠭᠡᠳᠡᠭᠴᠢᠯᠡᠨ ᠠᠷᠭᠠ ᠪᠠᠷᠠᠭᠳᠠᠭᠤᠯᠤᠭᠰᠠᠨ ᠬᠣᠨᠣᠭ ᠡᠳᠦᠷ ᠦ᠋ᠳ ᠨᠢ ᠠᠷᠤ ᠬᠣᠢᠨᠠ ᠨᠢ ᠡᠨᠡ ᠮᠡᠲᠦᠴᠢᠯᠡᠨ ᠬᠣᠴᠣᠷᠤᠨ ᠦᠯᠡᠳᠡᠭᠰᠡᠭᠡᠷ ᠴᠣ ᠰᠢᠨᠡ ᠮᠠᠷᠭᠠᠰᠢ ᠨᠤᠭᠤᠳ ᠢ᠋ ᠤᠭᠲᠤᠭᠰᠠᠭᠠᠷ ᠪᠠᠢᠯᠠ᠃