ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ- ᠮᠥᠴᠡᠯᠭᠡ ᠰᠢᠯᠦᠭ- ᠨᠠ ᠂ ᠬᠦᠬᠡᠰᠢᠭᠤᠢӨчигдөр шөнийн зүүд-мөчлөг шүлэг-На ,Хийшугуй
41ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ
( ᠮᠥᠴᠡᠯᠭᠡ ᠰᠢᠯᠦᠭ )
ᠵᠣᠬᠢᠶᠠᠭᠴᠢ᠄ ᠨᠠ ᠂ ᠬᠦᠬᠡᠰᠢᠭᠤᠢ
ᠲᠠᠭᠠᠮᠠᠭᠯᠠᠯ
ᠮᠥᠰᠥ ᠪᠣᠯᠵᠤ ᠬᠥᠯᠳᠡᠬᠦ ᠳ᠋ᠦ᠍
ᠤᠰᠤ ᠬᠡᠴᠢᠨᠡᠭᠡᠨ ᠲᠠᠭᠠᠷᠠᠭᠰᠠᠨ ᠪᠣᠯ
ᠮᠥᠩᠭᠥ ᠪᠣᠯᠵᠤ ᠬᠠᠢᠯᠠᠬᠤ ᠳ᠋ᠤ᠌
ᠬᠦᠳᠡᠷ ᠬᠡᠴᠢᠨᠡᠭᠡᠨ ᠬᠠᠯᠠᠭᠰᠠᠨ ᠪᠣᠯ
ᠮᠥᠷᠥᠭᠡᠳᠦᠯ ᠪᠣᠯᠵᠤ ᠵᠤᠵᠠᠭᠠᠷᠠᠬᠤ ᠳ᠋ᠤ᠌
ᠰᠡᠳᠬᠢᠯ ᠬᠡᠴᠢᠨᠡᠭᠡᠨ ᠡᠮᠵᠡᠭᠯᠡᠭᠰᠡᠨ ᠪᠣᠯ
ᠮᠦᠮᠢ ᠪᠣᠯᠵᠤ ᠦᠯᠡᠳᠡᠬᠦ ᠳ᠋ᠦ᠍
ᠬᠡᠭᠦᠷ ᠬᠡᠴᠢᠨᠡᠭᠡᠨ ᠤᠳᠠᠭᠰᠠᠨ ᠪᠣᠯ
ᠠᠷᠢᠬᠢ ᠪᠣᠯᠵᠤ ᠢᠰᠬᠦ ᠳ᠋ᠦ᠍
ᠠᠢᠷᠠᠭ ᠬᠡᠳᠦᠢ ᠰᠢᠨᠠᠯᠤᠭᠰᠠᠨ ᠪᠣᠯ
ᠡᠯᠡᠰᠦ ᠪᠣᠯᠵᠤ ᠬᠡᠢᠰᠬᠦ ᠳ᠋ᠦ᠍
ᠬᠦᠷᠦᠰᠦ ᠬᠡᠳᠦᠢ ᠵᠣᠪᠠᠭᠰᠠᠨ ᠪᠣᠯ
ᠨᠠᠮᠤᠷ ᠪᠣᠯᠵᠤ ᠰᠢᠷᠠᠯᠠᠬᠤ ᠳ᠋ᠤ᠌
ᠨᠠᠪᠴᠢ ᠬᠡᠳᠦᠢ ᠤᠬᠢᠯᠠᠭᠰᠠᠨ ᠪᠣᠯ
ᠨᠠᠭᠤᠷ ᠪᠣᠯᠵᠤ ᠰᠢᠷᠭᠢᠬᠦ ᠳ᠋ᠦ᠍
ᠨᠤᠭᠤᠰᠤ ᠬᠡᠳᠦᠢ ᠤᠶᠠᠷᠠᠭᠰᠠᠨ ᠪᠣᠯ
ᠨᠡᠭᠦᠷᠡᠰᠦ ᠪᠣᠯᠵᠤ ᠪᠤᠯᠠᠭᠳᠠᠬᠤ ᠳ᠋ᠤ᠌
ᠮᠣᠳᠣ ᠬᠡᠳᠦᠢ ᠰᠣᠴᠢᠭᠰᠠᠨ ᠪᠣᠯ
ᠨᠡᠭᠦᠳᠡᠯ ᠪᠣᠯᠵᠤ ᠬᠥᠳᠡᠯᠬᠦ ᠳ᠋ᠦ᠍
ᠨᠢᠯᠪᠤᠰᠤ ᠬᠡᠳᠦᠢ ᠪᠥᠮᠪᠥᠷᠢᠭᠰᠡᠨ ᠪᠣᠯ
ᠤᠬᠠᠭᠠᠷᠠᠯ
ᠵᠡᠷᠭᠡᠯᠭᠡᠨ ᠲᠠᠭᠤᠭᠰᠠᠨ ᠪᠠᠭᠠ ᠨᠠᠰᠤ
ᠵᠡᠭᠦᠨ ᠮᠠᠩᠬᠠᠨ ᠤ᠋ ᠴᠠᠭᠠᠨᠠ ᠪᠠᠯᠠᠷᠠᠪᠠ
ᠵᠡᠭᠦᠳᠦ ᠮᠠᠨᠠᠭᠰᠠᠨ ᠵᠠᠯᠠᠭᠤ ᠨᠠᠰᠤ
ᠡᠮᠦᠨᠡ ᠠᠢᠯ ᠤ᠋ᠨ ᠨᠠᠭᠠᠨᠠ ᠵᠠᠮᠬᠠᠷᠠᠪᠠ
ᠠᠮᠢᠳᠤᠷᠠᠯ ᠠᠴᠢᠶᠠᠯᠠᠭᠰᠠᠨ ᠢᠳᠡᠷ ᠨᠠᠰᠤ
ᠠᠯᠳᠠᠷ ᠭᠠᠪᠢᠶᠠ ᠬᠥᠪᠡᠭᠡᠳᠡᠭᠡᠳ ᠵᠣᠭᠰᠣᠪᠠ
ᠡᠷᠭᠢᠴᠡᠭᠦᠯᠦᠯ ᠳ᠋ᠦ᠍ ᠤᠨᠠᠭᠰᠠᠨ ᠥᠲᠡᠯᠦᠭᠡ ᠨᠠᠰᠤ
ᠡᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠬᠣᠭᠣᠰᠣᠨ ᠢ᠋ ᠤᠬᠠᠭᠠᠷᠠᠪᠠ
ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ
ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ
ᠣᠯᠣᠰᠣᠨ ᠤᠲᠠᠰᠤ ᠰᠢᠭ᠋ ᠰᠢᠷᠢᠯᠳᠦᠭᠡᠳ
ᠡᠷᠦᠢ ᠬᠤᠷᠤᠢ ᠦᠭᠡᠢ ᠬᠥᠭᠯᠡᠷᠡᠨᠡ
ᠥᠨᠥ ᠥᠷᠯᠥᠭᠡ ᠡᠷᠭᠢᠴᠡᠭᠦᠯᠬᠦ ᠳ᠋ᠦ᠍
ᠣᠯᠤᠭᠰᠠᠨ ᠠᠯᠳᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠭᠠᠳ
ᠡᠬᠢ ᠠᠳᠠᠭ ᠦᠭᠡᠢ ᠦᠷᠭᠦᠯᠵᠢᠯᠡᠨᠡ
ᠪᠣᠯᠳᠠᠭ ᠪᠣᠯ ᠦᠦ
ᠮᠣᠳᠤᠨ ᠦᠨᠳᠦᠰᠦ ᠶ᠋ᠢ
ᠲᠡᠭᠷᠢ ᠳ᠋ᠦ᠍ ᠡᠯᠭᠦᠪᠡᠯ
ᠠᠶᠤᠩᠭᠠ ᠪᠣᠯᠳᠠᠭ ᠪᠣᠯ ᠦᠦ
ᠮᠣᠷᠢᠨ ᠬᠢᠯᠭᠠᠰᠤ ᠶ᠋ᠢ
ᠭᠠᠵᠠᠷ ᠲᠤ᠌ ᠵᠠᠯᠭᠠᠪᠠᠯ
ᠤᠶᠠᠩᠭᠠ ᠪᠣᠯᠳᠠᠭ ᠪᠣᠯ ᠦᠦ
ᠮᠥᠰᠥᠨ ᠰᠢᠯ ᠢ᠋
ᠴᠣᠩᠬᠣᠨ ᠳ᠋ᠤ᠌ ᠳᠠᠭᠠᠷᠠᠭᠤᠯᠪᠠᠯ
ᠡᠪᠦᠯ ᠪᠣᠯᠳᠠᠭ ᠪᠣᠯ ᠦᠦ
ᠮᠥᠷᠥᠭᠡᠳᠦᠯ ᠬᠠᠢᠷᠠ ᠶ᠋ᠢ
ᠴᠢᠮᠠ ᠳ᠋ᠤ᠌ ᠢᠯᠡᠭᠡᠪᠡᠯ
ᠬᠠᠪᠤᠷ ᠪᠣᠯᠳᠠᠭ ᠪᠣᠯ ᠦᠦ
ᠬᠠᠪᠤᠷ
ᠬᠠᠭᠳᠠ ᠶ᠋ᠢᠨ ᠳᠣᠣᠷᠠ
ᠬᠡᠳᠦᠢ ᠤᠨᠲᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ
ᠬᠠᠰᠢᠶᠠᠨ ᠳ᠋ᠤ᠌ ᠮᠠᠢᠯᠠᠬᠤ
ᠲᠦᠯ ᠦ᠋ᠨ ᠳᠠᠭᠤ ᠪᠠᠷ
ᠨᠢᠯᠬᠠ ᠨᠣᠭᠣᠭᠠ ᠰᠡᠷᠡᠪᠡ
ᠮᠥᠰᠥᠨ ᠦ᠌ ᠳᠣᠣᠷᠠ
ᠬᠡᠳᠦᠢ ᠤᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ
ᠮᠡᠯᠮᠡᠷᠡᠨ ᠤᠷᠤᠰᠬᠤ
ᠬᠠᠢᠯ ᠤ᠋ᠨ ᠴᠢᠮᠡᠭᠡ ᠪᠡᠷ
ᠮᠥᠷᠭᠥ ᠵᠢᠭᠠᠰᠤ ᠵᠢᠷᠪᠢᠯᠵᠡᠪᠡ
ᠡᠭᠦᠯᠡᠨ ᠦ᠌ ᠳᠣᠣᠷᠠ
ᠬᠡᠳᠦᠢ ᠬᠡᠪᠲᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ
ᠥᠷᠪᠥᠯᠵᠡᠨ ᠬᠡᠢᠰᠬᠦ ᠬᠣᠩᠭᠣᠷ ᠰᠠᠯᠬᠢᠨ ᠢ᠋ᠶ᠋ᠠᠷ
ᠲᠠᠯᠠ ᠶ᠋ᠢᠨ ᠵᠡᠷᠭᠡᠯᠭᠡᠨ ᠲᠣᠭᠯᠠᠪᠠ
ᠠᠭᠤᠯᠠᠨ ᠤ᠋ ᠳᠣᠣᠷᠠ
ᠬᠡᠳᠦᠢ ᠳᠤᠭᠵᠢᠷᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ
ᠤᠶᠠᠰᠤᠨ ᠪᠥᠵᠢᠭᠯᠡᠬᠦ
ᠤᠳᠠᠨ ᠤ᠋ ᠨᠠᠮᠠᠭᠠ ᠪᠠᠷ
ᠤᠶᠠᠬᠠᠨ ᠬᠥᠬᠥᠭᠡ ᠳᠣᠩᠭᠣᠳᠪᠠ
ᠡᠪᠦᠯ ᠦ᠋ᠨ ᠲᠤᠢᠯ
ᠪᠡᠭᠡᠷᠡᠭᠰᠡᠨ ᠮᠣᠳᠤᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌
ᠲᠥᠭᠡᠷᠢᠭᠰᠡᠨ ᠰᠢᠪᠠᠭᠤ ᠰᠠᠭᠤᠨᠠ
ᠪᠡᠷᠪᠡᠢᠭᠰᠡᠨ ᠦᠬᠡᠷ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌
ᠳᠡᠷᠪᠡᠭᠰᠡᠨ ᠪᠣᠯᠵᠣᠮᠣᠷ ᠨᠠᠭᠠᠳᠤᠨᠠ
ᠲᠤᠢᠯ ᠳ᠋ᠤ᠌ ᠪᠠᠨ ᠲᠤᠯᠤᠭᠰᠠᠨ ᠡᠪᠦᠯ
ᠲᠦᠯ ᠦ᠋ᠨ ᠮᠠᠢᠯᠠᠭᠠᠨ ᠳ᠋ᠤ᠌ ᠤᠶᠠᠰᠤᠨᠠ
ᠳᠡᠰ ᠬᠥᠯᠳᠡᠭᠰᠡᠨ ᠭᠣᠣᠯ
ᠲᠣᠢᠭ ᠤ᠋ᠨ ᠳᠠᠭᠤᠤ ᠳ᠋ᠤ᠌ ᠬᠠᠢᠯᠤᠨᠠ
ᠴᠠᠭ ᠤ᠋ᠨ ᠵᠡᠭᠦᠦ
ᠪᠠᠭᠠ ᠳ᠋ᠤ᠌ ᠪᠠᠨ ᠪᠢ
ᠭᠠᠷ ᠤ᠋ᠨ ᠪᠠᠭᠤᠤ ᠳ᠋ᠤ᠌ ᠪᠠᠨ
ᠴᠠᠭ ᠵᠢᠷᠤᠭᠠᠳ 《 ᠵᠡᠭᠦᠳᠡᠭ 》 ᠪᠠᠢᠯᠠ
ᠪᠠᠷᠠᠭᠤᠨ ᠠᠢᠯ ᠤ᠋ᠨ ᠨᠢᠰᠤᠩᠬᠠᠢ ᠬᠡᠦᠬᠡᠨ ᠳ᠋ᠦ᠍
《 ᠦᠵᠡ ᠡ 》 ᠭᠡᠳ ᠭᠠᠢᠬᠠᠭᠤᠯᠳᠠᠭ ᠪᠠᠢᠯᠠ
ᠪᠠᠯ ᠮᠡᠲᠦ ᠡᠷᠭᠢᠴᠡᠭᠦᠯᠦᠯ ᠳ᠋ᠦ᠍
ᠴᠠᠭ ᠤ᠋ᠨ ᠵᠡᠭᠦᠦ ᠨᠢ
ᠣᠷᠣᠨ ᠠ᠋ᠴᠠ ᠪᠡᠨ ᠶᠡᠷᠦ
ᠬᠥᠳᠡᠯᠳᠡᠭ ᠦᠭᠡᠢ ᠪᠠᠢᠯᠠ
ᠪᠠᠯᠠᠯᠵᠤ ᠬᠠᠶᠠᠭᠠᠳ ᠮᠠᠷᠭᠠᠰᠢ ᠨᠢ ᠪᠢ
ᠪᠠᠰᠠ ᠯᠠ ᠳᠠᠬᠢᠭᠠᠳ ᠵᠢᠷᠤᠳᠠᠭ ᠪᠠᠢᠯᠠ
ᠭᠠᠷ ᠲᠤ᠌ ᠵᠡᠭᠦᠭᠰᠡᠨ ᠦᠨᠡᠨ ᠴᠠᠭ ᠢ᠋ᠶ᠋ᠠᠨ
ᠪᠢ ᠬᠡᠳᠦᠢᠨ ᠦ᠌ ᠦᠵᠡᠬᠦ ᠪᠡᠨ ᠪᠠᠢᠵᠠᠢ
ᠭᠠᠷ ᠤᠲᠠᠰᠤ ᠳ᠋ᠤ᠌ ᠢᠯᠡᠷᠡᠬᠦ ᠴᠠᠭ
ᠠᠯᠢᠪᠠ ᠪᠦᠬᠦᠨ ᠢ᠋ ᠣᠷᠣᠯᠠᠬᠤ ᠪᠣᠯᠵᠠᠢ
ᠣᠳᠣ ᠪᠣᠳᠣᠬᠣ ᠳ᠋ᠤ᠌
ᠮᠢᠨᠦ ᠵᠢᠷᠤᠭᠰᠠᠨ ᠴᠠᠭ
ᠡᠳᠦᠢ ᠪᠣᠯᠲᠠᠯᠠ ᠶᠠᠪᠤᠭᠠᠳ ᠪᠠᠢᠵᠠᠢ
ᠤᠩᠭᠤᠨ ᠪᠠᠭᠠ ᠨᠠᠰᠤ ᠶ᠋ᠢ ᠠᠪᠤᠭᠠᠳ
ᠡᠷᠭᠢᠯᠲᠡ ᠦᠭᠡᠢ ᠴᠠᠭᠠᠰᠢ ᠪᠠᠨ ᠣᠳᠴᠠᠢ᠁
ᠵᠥᠷᠢᠴᠡᠯ
ᠬᠠᠶᠠ ᠨᠢᠭᠡ
ᠰᠢᠯᠦᠭ ᠪᠢᠴᠢᠶᠡ ᠭᠡᠵᠦ ᠰᠠᠨᠠᠨᠠ
ᠬᠠᠯᠠᠭᠤᠨ ᠵᠠᠯᠠᠭᠤ ᠨᠠᠰᠤ ᠪᠠᠨ
ᠳᠤᠷᠠᠰᠤᠶᠠ ᠭᠡᠵᠦ ᠪᠤᠳᠤᠨᠠ
ᠭᠡᠨᠡᠳᠲᠡ ᠪᠠᠰᠠ ᠪᠢᠷ ᠢ᠋ᠶ᠋ᠡᠨ
ᠬᠤᠷᠢᠶᠠᠶᠠ ᠭᠡᠵᠦ ᠰᠠᠨᠠᠨᠠ
ᠭᠡᠮᠰᠢᠯ ᠬᠠᠷᠠᠮᠰᠠᠯ ᠢ᠋ᠶ᠋ᠠᠨ ᠲᠠᠬᠢᠵᠤ
ᠬᠦᠨᠳᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠤᠨᠠ
ᠬᠠᠶᠠ ᠨᠢᠭᠡ
ᠠᠷᠢᠬᠢ ᠤᠤᠭᠤᠶᠠ ᠭᠡᠵᠦ ᠰᠠᠨᠠᠨᠠ
ᠬᠠᠯᠠᠰᠠᠭᠤ ᠰᠣᠭᠲᠣᠭᠤ ᠪᠠᠷ
ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ ᠭᠡᠵᠦ ᠪᠣᠳᠣᠨᠠ
ᠭᠡᠨᠡᠳᠲᠡ ᠪᠠᠰᠠ ᠰᠡᠳᠬᠢᠯ ᠢ᠋ᠶ᠋ᠡᠨ
ᠪᠠᠷᠢᠶᠠ ᠭᠡᠵᠦ ᠰᠠᠨᠠᠨᠠ
ᠬᠠᠮᠤᠭ ᠪᠦᠬᠦᠨ ᠢ᠋ ᠠᠭᠤᠴᠢᠯᠠᠵᠤ
ᠶᠠᠪᠤᠶᠠ ᠭᠡᠵᠦ ᠪᠤᠳᠤᠨᠠ
ᠬᠠᠶᠠ ᠨᠢᠭᠡ
ᠳᠠᠭᠤᠤ ᠳᠠᠭᠤᠯᠠᠶᠠ ᠭᠡᠵᠦ ᠰᠠᠨᠠᠨᠠ
ᠬᠠᠮᠢᠭᠠ ᠨᠢᠭᠡ ᠣᠴᠢᠭᠠᠳ
ᠬᠡᠨ ᠨᠢᠭᠡᠨ ᠲᠡᠢ ᠨᠠᠢᠷᠯᠠᠶᠠ ᠭᠡᠵᠦ ᠪᠤᠳᠤᠨᠠ
ᠭᠡᠨᠡᠳᠲᠡ ᠪᠠᠰᠠ
ᠨᠠᠮ ᠵᠢᠮ ᠠᠮᠢᠳᠤᠷᠠᠶᠠ ᠭᠡᠵᠦ ᠰᠠᠨᠠᠨᠠ
ᠬᠠᠨ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠶ᠋ᠢ
ᠠᠶᠠᠯᠳᠤᠶᠠ ᠭᠡᠵᠦ ᠪᠤᠳᠤᠨᠠ
ᠬᠠᠶᠠ ᠨᠢᠭᠡ
ᠬᠠᠨᠲᠠᠯᠠ ᠤᠨᠲᠠᠶᠠ ᠭᠡᠵᠦ ᠪᠤᠳᠤᠨᠠ
ᠬᠠᠪᠤᠷ ᠤ᠋ᠨ ᠨᠣᠢᠷ ᠢ᠋ᠶ᠋ᠠᠨ
ᠬᠠᠷᠠᠮᠯᠠᠶᠠ ᠭᠡᠵᠦ ᠰᠠᠨᠠᠨᠠ
ᠭᠡᠨᠡᠳᠲᠡ ᠪᠠᠰᠠ
ᠡᠷᠲᠡ ᠪᠣᠰᠤᠶᠠ ᠭᠡᠵᠦ ᠪᠤᠳᠤᠨᠠ
ᠬᠠᠰᠢᠶᠠᠨ ᠤ᠋ ᠨᠣᠭᠣᠭᠠ ᠪᠠᠨ
ᠤᠰᠤᠯᠠᠶᠠ ᠭᠡᠵᠦ ᠰᠠᠨᠠᠨᠠ
ᠬᠠᠶᠠᠭ: ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ
ᠢᠷᠡᠯᠲᠡ᠄ ᠰᠦᠯᠵᠢᠶᠡ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ