ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠳᠣᠯᠣᠭ᠎ᠠ> Элсэнд булагдсан сувдаа – П.Оюунгэрэл <7> ᠲᠤᠭᠤᠵᠢ ᠷᠣᠮᠠᠨ ᠮᠣᠩᠭᠣᠯ ᠬᠡᠢᠮᠣᠷᠢ ᠰᠦᠯᠵᠢᠶ᠎ᠡHIIMORI

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠳᠣᠯᠣᠭ᠎ᠠ> Элсэнд булагдсан сувдаа – П.Оюунгэрэл <7>

2026-09-11

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ –<ᠳᠣᠯᠣᠭ᠎ᠠ>

ᠳᠣᠯᠣᠭ᠎ᠠ

ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠵᠤ ᠬᠣᠷᠢᠳ ᠤ᠋ᠨ ᠰᠠᠷᠠ ᠭᠡᠭᠡᠪᠴᠢ ᠪᠡᠷ ᠲᠣᠰᠴᠤ ᠪᠦᠳᠡᠩᠭᠢ ᠴᠠᠢᠪᠤᠷ ᠭᠡᠷᠡᠯ ᠳ᠋ᠦ᠍ᠨᠢ ᠶᠠᠭᠤᠮ᠎ᠠ ᠪᠦᠬᠦᠨ ᠤᠢᠳᠬᠠᠷ ᠲᠥᠷᠥᠭᠳᠡᠮ᠎ᠡ᠃

ᠭᠠᠪᠢᠷ᠎ᠠ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡᠨ ᠦ᠌ ᠪᠡᠨ ᠡᠮᠦᠨ᠎ᠡ ᠰᠠᠨᠳᠠᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠦᠰᠢᠯᠭᠡ ᠨᠠᠯᠠᠨ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠬᠡᠰᠡᠭ ᠰᠠᠭᠤᠯ᠎ᠠ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠨᠠᠰᠤ ᠪᠠᠷᠠᠭᠰᠠᠨ᠎ ᠠᠴᠠ ᠬᠣᠢᠰᠢ ᠠᠮᠵᠢᠯ ᠴᠢᠯᠥᠭᠡ ᠦᠭᠡᠢ ᠠᠵᠢᠯᠯᠠᠵᠤ ᠰᠥᠨᠢ ᠨᠢ ᠪᠠᠷᠤᠭ ᠬᠣᠶᠠᠷ ᠴᠠᠭ᠎ ᠠᠴᠠ ᠢᠯᠡᠭᠦᠦ ᠤᠨᠲᠠᠳᠠᠭ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠬᠢᠭᠡᠳ ᠪᠠᠷᠠᠬᠤ ᠦᠭᠡᠢ ᠣᠯᠠᠨ ᠠᠵᠢᠯ ᠬᠢᠳᠡᠯ ᠲᠡᠢ᠃ ᠡᠳᠦᠷ ᠨᠢ ᠠᠯᠪᠠᠨ ᠤ᠋ ᠪᠠᠨ ᠠᠵᠢᠯ ᠳ᠋ᠤ᠌ ᠶᠠᠭᠠᠷᠠᠨ᠎ᠠ᠂ ᠦᠳᠡᠰᠢ ᠣᠷᠣᠢ ᠨᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠷᠠᠭᠳᠠᠳᠠᠭ ᠦᠭᠡᠢ ᠣᠯᠠᠨ ᠠᠵᠢᠯ ᠢ᠋ ᠠᠮᠵᠢᠭᠤᠯᠤᠨ ᠬᠢᠬᠦ ᠬᠡᠷᠡᠭᠲᠡᠢ᠃ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠤᠬᠢᠶᠠᠵᠤ ᠰᠢᠯᠡᠭᠡᠵᠦ᠂ ᠨᠡᠬᠡᠵᠦ ᠰᠦᠯᠵᠢᠨ᠎ᠡ᠃ ᠨᠣᠮ ᠵᠣᠬᠢᠶᠠᠯ ᠤᠩᠰᠢᠵᠤ ᠨᠠᠢᠷᠠᠭᠤᠯᠤᠨ᠎ᠠ᠂ ᠰᠤᠷᠤᠭᠴᠢᠳ ᠤ᠋ᠨ ᠳᠠᠰᠬᠠᠯ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠵᠠᠰᠠᠵᠤ᠂ ᠳᠠᠷᠠᠭ᠎ᠠ ᠡᠳᠦᠷ ᠦ᠋ᠨ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠪᠡᠯᠡᠳᠬᠡᠵᠦ ᠶᠠᠭᠠᠷᠠᠭᠰᠠᠭᠠᠷ ᠪᠠᠢᠵᠤ ᠣᠷᠣᠢ ᠪᠣᠯᠭᠠᠨ ᠰᠥᠨᠢ ᠶ᠋ᠢᠨ ᠨᠢᠭᠡ ᠬᠣᠶᠠᠷ ᠴᠠᠭ ᠲᠤ᠌ ᠤᠨᠲᠠᠵᠤ ᠡᠷᠲᠡ ᠶ᠋ᠢᠨ ᠳᠥᠷᠪᠡᠨ ᠴᠠᠭ ᠢ᠋ᠶ᠋ᠠᠷ ᠪᠣᠰᠴᠢᠬᠠᠳᠠᠭ᠃ ᠲᠡᠭᠡᠭᠡᠳ ᠡᠨᠡᠬᠦ ᠵᠢᠵᠢᠭ ᠪᠠᠯᠭᠠᠰᠤᠨ ᠳ᠋ᠤ᠌ ᠬᠠᠮᠤᠭ᠎ᠠ᠋ᠴᠠ ᠣᠷᠣᠢ ᠤᠨᠲᠠᠵᠤ ᠬᠠᠮᠤᠭ ᠤ᠋ᠨ ᠡᠷᠲᠡ ᠪᠣᠰᠳᠠᠭ ᠨᠢᠭᠡᠨ ᠪᠣᠯᠵᠠᠢ᠃

ᠥᠪᠡᠷ ᠲᠦ᠍ ᠨᠢ ᠠᠰᠤᠷᠤ ᠶᠡᠬᠡ ᠬᠠᠯᠠᠮᠵᠢ ᠬᠠᠢᠷ᠎ᠠ ᠲᠠᠢ ᠨᠥᠬᠥᠷ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ᠎ ᠠᠴᠠ ᠬᠣᠢᠰᠢ ᠨᠢᠭᠡᠨ ᠦᠶ᠎ᠡ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠲᠤᠩ ᠴᠤ᠌ ᠲᠤᠯᠭᠠᠮᠳᠠᠨ ᠵᠦᠳᠡᠷᠡᠵᠡᠢ᠃《ᠳᠠᠩ ᠢ᠋ᠶ᠋ᠠᠷ ᠢᠷᠡᠬᠦ ᠵᠣᠪᠠᠯᠠᠩ ᠦᠭᠡᠢ᠂ ᠳᠠᠪᠬᠤᠷ ᠢᠷᠡᠬᠦ ᠵᠢᠷᠭᠠᠯ ᠦᠭᠡᠢ》 ᠭᠡᠳᠡᠭᠴᠢᠯᠡᠨ ᠬᠡᠦᠬᠡᠳ ᠦ᠋ᠳ ᠨᠢ ᠴᠦ᠍ ᠵᠠᠯᠭᠠᠭ᠎ᠠ ᠵᠠᠯᠭᠠᠭ᠎ᠠ ᠪᠠᠷ ᠡᠪᠡᠳᠴᠦ ᠲᠡᠭᠦᠨ ᠢ᠋ ᠰᠠᠨᠳᠤᠷᠭᠠᠨ ᠵᠣᠪᠠᠭᠠᠨ᠎ᠠ᠃

ᠲᠡᠷᠡ ᠪᠣᠰᠴᠤ ᠬᠦᠵᠦᠭᠦᠦ ᠰᠡᠭᠡᠷ ᠢ᠋ᠶ᠋ᠡᠨ ᠬᠥᠳᠡᠯᠭᠡᠨ ᠭᠠᠷ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠴᠢᠯᠡᠭᠡ ᠶ᠋ᠢ ᠭᠠᠷᠭᠠᠭᠠᠳ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠤᠨᠲᠠᠬᠤ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠬᠠᠨᠵᠤ ᠪᠠᠷ ᠬᠥᠯᠪᠡᠷᠢᠵᠦ ᠤᠨᠲᠠᠬᠤ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠥᠨᠵᠢᠯᠡ ᠶ᠋ᠢ ᠨᠢ ᠵᠠᠰᠠᠨ ᠬᠤᠴᠢᠵᠤ ᠥᠭᠭᠦᠭᠡᠳ᠂ ᠣᠷᠴᠢᠮ ᠶᠡᠬᠡᠪᠡᠷ ᠬᠠᠯᠠᠭᠤᠷᠠᠵᠤ ᠪᠦᠯᠢᠶᠡᠷᠡᠨ ᠵᠣᠪᠠᠨᠢᠭᠰᠠᠨ᠎ᠠ᠋ᠴᠠ ᠬᠤᠵᠢᠭᠠᠷ ᠴᠣᠩᠬᠢᠭᠠᠷ ᠴᠢᠷᠠᠢ ᠲᠠᠢ ᠶᠡᠬᠡ ᠥᠬᠢᠨ ᠦ᠌ ᠪᠡᠨ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠭᠢᠭᠯᠡᠭᠰᠡᠨ ᠵᠥᠭᠡᠯᠡᠨ ᠰᠢᠷ᠎ᠠ ᠦᠰᠦ ᠶ᠋ᠢ ᠢᠯᠪᠢᠨ ᠮᠠᠩᠨᠠᠢ ᠪᠠᠨ ᠴᠣᠬᠣᠨ ᠳ᠋ᠤᠨᠢ ᠬᠦᠷᠭᠡᠨ ᠦᠵᠡᠭᠡᠳ ᠬᠠᠯᠠᠭᠤᠨ ᠪᠢᠰᠢ ᠪᠣᠯᠬᠣᠷ ᠪᠠᠬᠠᠨ ᠰᠠᠨᠠᠭ᠎ᠠ ᠠᠮᠠᠷᠠᠭᠰᠠᠨ ᠪᠣᠯᠤᠯᠲᠠᠢ ᠪᠣᠰᠴᠤ ᠬᠣᠶᠠᠷ ᠡᠭᠡᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠭᠣᠷᠣᠨᠳᠣ ᠬᠥᠨᠵᠢᠯᠡ ᠪᠡᠨ ᠢᠰᠬᠦᠯᠦᠨ ᠢᠷᠠᠭᠠᠳ ᠮᠠᠷᠢᠶᠠᠯᠢᠭ ᠴᠠᠭᠠᠨ ᠭᠡᠳᠡᠰᠦ ᠪᠡᠨ ᠢᠯᠡ ᠭᠠᠷᠭᠠᠨ ᠲᠡᠨᠢᠢᠵᠦ ᠤᠨᠲᠠᠬᠤ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠴᠢᠯᠭ᠎ᠠ ᠶ᠋ᠢ ᠵᠠᠰᠠᠵᠤ ᠥᠭᠭᠦᠭᠡᠳ ᠨᠢᠯᠬ᠎ᠠ ᠨᠢᠯᠵᠠᠷᠠᠢ ᠬᠥᠷᠥᠰᠥ ᠲᠡᠢ ᠪᠣᠨᠲᠣᠭᠣᠷ ᠬᠠᠴᠠᠷ ᠢ᠋ ᠥᠬᠥᠭᠡᠷᠳᠡᠨ ᠦᠨᠦᠰᠦᠭᠡᠳ ᠬᠠᠨᠵᠤᠨ ᠤ᠋ ᠢᠷᠮᠡᠭ ᠲᠦ᠍ ᠰᠠᠨᠳᠠᠢᠯᠠᠨ ᠰᠠᠭᠤᠵᠤ ᠳᠥᠷᠪᠡᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠨᠢᠯᠬ᠎ᠠ ᠬᠣᠩᠭᠣᠷ ᠴᠢᠷᠠᠢ ᠶ᠋ᠢ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ᠄《ᠬᠥᠭᠡᠷᠦᠬᠦᠢ ᠨᠢᠯᠬ᠎ᠠ ᠪᠠᠯᠴᠢᠷ ᠠᠮᠢᠲᠠᠳ ᠮᠢᠨᠢ ᠳᠡ᠂ ᠬᠡᠵᠢᠶ᠎ᠡ ᠴᠦ᠍ ᠥᠰᠴᠦ ᠲᠣᠮᠣ ᠪᠣᠯᠤᠶ᠎ᠠ ᠳᠠ᠃ ᠮᠥᠨ ᠴᠦ᠍ ᠬᠣᠯᠠ ᠪᠠᠢᠨ᠎ᠠ ᠠ᠋》 ᠭᠡᠮᠡᠨ ᠪᠣᠳᠣᠭᠠᠳ ᠨᠢᠳᠦᠨ ᠦ᠌ ᠬᠢᠨᠢ ᠠᠶᠠᠭᠠᠨ ᠳ᠋ᠤ᠌ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠨ ᠳᠦᠭᠦᠷᠪᠡ᠃ ᠲᠡᠷᠡ ᠠᠵᠢᠯ ᠬᠢᠳᠡᠯ ᠢ᠋ᠶ᠋ᠡᠨ ᠪᠠᠷᠠᠭᠠᠳ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠠᠮᠲᠠᠲᠤ ᠨᠣᠢᠷ ᠲᠠᠭᠠᠨ ᠳᠤᠭᠵᠢᠷᠠᠨ ᠡᠷᠢᠶᠡᠨ ᠬᠣᠷᠸ᠎ᠠ ᠶ᠋ᠢᠨ ᠡᠯᠡ ᠬᠠᠯᠠ ᠶ᠋ᠢ ᠳᠠᠩᠴᠤ ᠨᠢᠭᠡ ᠤᠬᠠᠭᠠᠷᠠᠬᠤ ᠪᠣᠯᠤᠭ᠎ᠠ ᠦᠭᠡᠢ ᠪᠠᠯᠴᠢᠷ ᠦᠷ᠎ᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠤᠳᠠᠲᠠᠯ᠎ᠠ ᠮᠡᠯᠡᠷᠡᠨ ᠰᠠᠭᠤᠳᠠᠭ ᠪᠠᠢᠯ᠎ᠠ᠃ ᠲᠡᠷᠡ ᠣᠯᠠᠨ ᠬᠣᠨᠣᠭ ᠢ᠋ ᠳᠡᠷ᠎ᠡ ᠪᠡᠨ ᠳᠡᠪᠲᠦᠲᠡᠯ᠎ᠡ ᠤᠬᠢᠯᠠᠵᠤ ᠬᠣᠨᠣᠳᠠᠭ ᠴᠤ᠌ ᠮᠠᠷᠭᠠᠰᠢ ᠨᠢ ᠠᠵᠢᠯ ᠳ᠋ᠠᠭᠠᠨ ᠭᠠᠷᠬᠤ ᠳ᠋ᠤ᠌ ᠴᠡᠪᠡᠷ ᠴᠡᠮᠴᠡᠭᠡᠷ ᠡᠮᠦᠰᠴᠦ ᠵᠡᠭᠦᠭᠡᠳ ᠶᠠᠮᠠᠷ ᠴᠤ᠌ ᠶᠠᠭᠤᠮ᠎ᠠ ᠪᠣᠯᠤᠭ᠎ᠠ ᠦᠭᠡᠢ ᠶᠦᠮ ᠰᠢᠭ ᠰᠤᠷᠤᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨ᠎ᠡ ᠭᠠᠷᠤᠨ᠎ᠠ᠃

ᠮᠥᠨ ᠡᠢᠮᠦᠷᠬᠦᠦ ᠵᠦᠳᠡᠷᠡᠯ ᠡᠴᠡ ᠪᠣᠯᠵᠤ ᠡᠴᠡᠵᠦ ᠲᠤᠷᠠᠭᠠᠳ ᠪᠡᠶ᠎ᠡ ᠶ᠋ᠢᠨ ᠬᠦᠨᠳᠦ ᠨᠢ ᠶᠡᠷᠡᠨ ᠲᠠᠪᠤᠬᠠᠨ ᠵᠢᠩ ᠪᠣᠯᠴᠢᠬᠠᠵᠠᠢ᠃ ᠵᠢᠯ ᠢᠯᠡᠭᠦᠦ ᠶ᠋ᠢᠨ ᠬᠤᠭᠤᠴᠠᠭᠠᠨ᠎ᠠ ᠲᠡᠷᠡ ᠥᠨᠥᠴᠢᠨ ᠭᠠᠭᠴᠠᠭᠠᠷᠳᠠᠮᠠᠯ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠳᠠᠰᠬᠤ ᠶ᠋ᠢ ᠬᠢᠴᠢᠶᠡᠵᠦ ᠮᠡᠷᠡᠢᠨ ᠠᠵᠢᠯᠯᠠᠬᠤ ᠪᠠᠷ ᠥᠪᠡᠷ ᠦ᠋ᠨ ᠭᠤᠨᠢᠭ ᠤᠢᠳᠬᠠᠷ ᠢ᠋ᠶ᠋ᠠᠨ ᠣᠷᠣᠯᠠᠭᠤᠯᠤᠨ ᠠᠯᠢ ᠪᠣᠯᠬᠤ ᠪᠠᠷ ᠪᠠᠶᠠᠷ ᠬᠥᠭᠵᠢᠯ ᠲᠡᠢ ᠶᠠᠪᠤᠬᠤ ᠶ᠋ᠢ ᠬᠢᠴᠢᠶᠡᠳᠡᠭ ᠪᠠᠢᠯ᠎ᠠ᠃ ᠬᠠᠲᠠᠭᠤᠬᠠᠨ ᠵᠢᠮ᠎ᠡ ᠲᠡᠢ ᠴᠦ᠍ ᠠᠮᠢᠳᠤᠷᠠᠯ ᠮᠥᠨ ᠬᠦ᠌ ᠦᠷᠭᠦᠯᠵᠢᠯᠡᠬᠦ ᠪᠡᠷ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠨ᠎ᠡ᠃ ᠲᠡᠭᠦᠨ ᠦ᠌ ᠰᠠᠷᠠᠭᠤᠯ ᠤᠬᠠᠭᠠᠨ ᠬᠠᠲᠠᠭᠤ ᠵᠣᠷᠢᠭ ᠨᠢ ᠲᠡᠭᠦᠨ ᠢ᠋ ᠠᠬᠤᠢ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠦᠯᠢᠶᠡᠨ ᠮᠡᠳᠡᠷᠡᠵᠦ ᠲᠡᠭᠦᠨ ᠳ᠋ᠡᠭᠡᠨ ᠵᠣᠬᠢᠴᠠᠨ ᠠᠮᠢᠳᠤᠷᠠᠬᠤ ᠶ᠋ᠢ ᠴᠢᠩᠭ᠎ᠠ ᠱᠠᠭᠠᠷᠳᠠᠳᠠᠭ᠎ᠠ᠋ᠴᠠ ᠳᠥᠩᠭᠡᠵᠦ ᠭᠤᠴᠢ ᠪᠠᠨ ᠭᠠᠷᠴᠤ ᠶᠠᠪᠤᠭ᠎ᠠ ᠢᠳᠡ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠬᠢᠨᠢ ᠠᠮᠢᠳᠤᠷᠠᠯ ᠨᠡᠢᠭᠡᠮ ᠳ᠋ᠦ᠍ ᠬᠠᠨᠳᠤᠬᠤ ᠣᠷᠭᠢᠯᠤᠮ᠎ᠠ ᠬᠠᠯᠠᠭᠤᠨ ᠰᠡᠳᠬᠢᠯᠭᠡ ᠶ᠋ᠢᠨ ᠢᠯᠴᠢ ᠬᠡᠢᠮᠣᠷᠢ ᠥᠪᠡᠷ ᠢ᠋ ᠨᠢ ᠥᠭᠡᠳᠡ ᠲᠡᠳᠡᠨ ᠤᠷᠠᠢᠯᠠᠭᠰᠠᠭᠠᠷ᠃

ᠲᠡᠭᠦᠨ ᠦ᠌ ᠮᠡᠷᠡᠢᠯᠲᠡ ᠴᠢᠷᠮᠠᠢᠯᠲᠠ ᠨᠢ ᠪᠤᠰᠤᠳ ᠤ᠋ᠨ ᠠᠲᠠᠭ᠎ᠠ ᠵᠢᠲᠥᠭᠡᠨ ᠳ᠋ᠦ᠍ ᠮᠡᠰᠡ ᠮᠡᠲᠦ ᠬᠠᠳᠬᠤᠭᠳᠠᠨ᠎ᠠ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠰᠤᠷᠭᠠᠭᠤᠯᠢ ᠳ᠋ᠤᠨᠢ ᠡᠮᠡᠭᠲᠡᠢ ᠪᠠᠭᠰᠢ ᠭᠣᠣᠯ ᠬᠦᠴᠦᠨ ᠪᠣᠯᠤᠭᠰᠠᠨ ᠲᠤᠯᠠ ᠪᠦᠰᠡᠭᠦᠢᠴᠦᠦᠯ ᠦ᠋ᠨ ᠬᠣᠭᠣᠷᠣᠨᠳᠣᠬᠢ᠂ ᠥᠷᠢᠰᠦᠯᠳᠦᠭᠡᠨ ᠮᠠᠰᠢ ᠴᠢᠩᠭ᠎ᠠ᠃ ᠶᠡᠷᠦᠨᠢ ᠡᠮᠡᠭᠲᠡᠢᠴᠦᠳ ᠥᠩᠭᠡ ᠵᠢᠰᠦ᠂ ᠡᠮᠦᠰᠴᠦ ᠵᠡᠭᠦᠬᠦ ᠪᠠ ᠡᠷᠬᠡ ᠵᠡᠷᠭᠡ᠂ ᠠᠯᠳᠠᠷ ᠨᠡᠷ᠎ᠡ᠂ ᠠᠰᠢᠭ ᠬᠣᠨᠵᠢᠶ᠎ᠠ ᠠᠯᠢ ᠪᠦᠬᠦᠨ ᠦ᠌ ᠲᠥᠯᠥᠭᠡ ᠥᠷᠢᠰᠦᠯᠳᠦᠵᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠴᠦ᠍ ᠳᠠᠪᠠᠭᠤᠷᠠᠵᠤ ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠴᠤ᠌ ᠵᠥᠩᠳᠡᠭᠡᠨ ᠭᠠᠷᠤᠨ᠎ᠠ᠃

ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢᠨᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠥᠷᠢᠰᠦᠯᠳᠦᠵᠦ ᠲᠡᠮᠡᠴᠡᠯᠳᠦᠳᠡᠭ ᠶᠠᠭᠤᠮ᠎ᠠ ᠭᠡᠪᠡᠯ ᠲᠤᠩ ᠴᠤ᠌ ᠶᠠᠯᠢᠮ ᠦᠭᠡᠢ ᠥᠴᠦᠬᠡᠨ ᠵᠦᠢᠯᠡᠰ ᠪᠣᠯᠬᠤ ᠶᠤᠮ᠃ ᠪᠠᠭᠰᠢᠨᠠᠷ ᠠ᠋ᠴᠠ ᠶᠡᠬᠡ ᠦᠰᠦᠷᠬᠦ ᠳ᠋ᠡᠭᠡᠨ ᠯᠡ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠳᠠᠷᠤᠭ᠎ᠠ ᠪᠤᠶᠤ ᠳᠤᠮᠳᠠᠳᠤ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠢ᠋ᠶ᠋ᠠᠷ ᠳᠠᠪᠰᠢᠨ᠎ᠠ᠃ ᠵᠠᠰᠠᠭ ᠤ᠋ᠨ ᠲᠤᠰᠢᠶᠠᠯ ᠳ᠋ᠤ᠌ ᠳᠡᠪᠰᠢᠳᠡᠭ ᠨᠢ ᠡᠳᠦᠷ ᠦ᠋ᠨ ᠣᠳᠣ ᠰᠢᠭ᠋ ᠴᠥᠭᠡᠨ᠃ ᠪᠠᠭᠰᠢ ᠬᠥᠮᠦᠨ ᠦ᠌ ᠨᠠᠰᠤᠨ ᠲᠤᠷᠰᠢᠳᠠ ᠶ᠋ᠢᠨ ᠬᠦᠰᠡᠯ ᠬᠥᠭᠡᠭᠡᠴᠡᠯᠳᠦᠯ ᠭᠡᠪᠡᠯ ᠰᠢᠯᠢᠳᠡᠭ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠣᠯᠬᠤ᠂ ᠬᠣᠰᠢᠭᠤᠴᠢ ᠠᠩᠭᠢ ᠶ᠋ᠢᠨ ᠶᠡᠬᠡ ᠠᠩᠭᠢ ᠶ᠋ᠢᠨ ᠳᠠᠭᠠᠭᠤᠯᠤᠭᠴᠢ ᠪᠠᠭᠰᠢ ᠪᠤᠶᠤ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠰᠢᠯᠢᠳᠡᠭ ᠪᠦᠲᠦᠮᠵᠢ ᠣᠯᠵᠤ ᠨᠥᠬᠥᠪᠥᠷᠢ ᠣᠯᠬᠤ᠂ ᠡᠯ᠎ᠡ ᠱᠠᠲᠤᠨ ᠤ᠋ ᠵᠢᠱ᠌ᠢᠶᠡᠴᠢ ᠪᠠᠭᠰᠢ ᠪᠠᠷ ᠦᠨᠡᠯᠡᠭᠳᠡᠬᠦ ᠵᠡᠷᠭᠡ ᠢᠷᠠᠭᠤ ᠠᠯᠳᠠᠷ ᠤ᠋ᠨ ᠲᠥᠯᠥᠭᠡ ᠥᠷᠢᠰᠦᠯᠳᠦᠬᠦ ᠨᠢ ᠵᠣᠩᠬᠢᠯᠠᠬᠤ ᠲᠣᠭ᠎ᠠ ᠶ᠋ᠢ ᠡᠵᠡᠯᠡᠳᠡᠭ᠃ ᠰᠡᠵᠢᠮ᠎ᠡ ᠳᠡᠳ᠋ ᠵᠠᠬᠢᠷᠤᠯ ᠭᠠᠪᠢᠷ᠎ᠠ ᠶ᠋ᠢ ᠪᠢᠴᠢᠵᠦ ᠨᠠᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠰᠠᠢᠨ᠂ ᠭᠠᠷ ᠤ᠋ᠨ ᠲᠢᠭ ᠰᠠᠢᠬᠠᠨ᠂ ᠬᠡᠯᠡᠵᠦ ᠢᠯᠡᠳᠬᠡᠬᠦ ᠨᠢ ᠲᠣᠳᠣ ᠳᠣᠪᠣᠭᠣᠷ ᠭᠡᠵᠦ ᠶᠡᠬᠡ ᠲᠣᠭᠣᠳᠠᠭ ᠠ᠋ᠴᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠢᠴᠢᠵᠦ ᠨᠠᠢᠷᠠᠭᠤᠯᠬᠤ ᠠᠵᠢᠯ ᠪᠤᠶᠤ ᠰᠢᠯᠭᠠᠯᠲᠠ ᠶ᠋ᠢᠨ ᠰᠡᠳᠦᠪ ᠭᠠᠷᠭᠠᠬᠤ᠂ ᠪᠢᠴᠢᠵᠦ ᠳᠠᠷᠤᠮᠠᠯᠯᠠᠬᠤ ᠠᠵᠢᠯ ᠳ᠋ᠤ᠌ ᠦᠷᠭᠦᠯᠵᠢ ᠵᠠᠷᠤᠳᠠᠭ᠃ ᠣᠳᠣᠬᠢᠴᠢᠯᠠᠭᠰᠠᠨ ᠮᠠᠰᠢᠨ ᠲᠥᠬᠥᠭᠡᠷᠦᠮᠵᠢ ᠭᠡᠵᠦ ᠦᠭᠡᠢ ᠲᠤᠯᠠ ᠪᠣᠯᠣᠳ ᠬᠠᠪᠲᠠᠰᠤᠨ ᠳ᠋ᠤ᠌ ᠯᠠᠳᠠᠭᠰᠠᠨ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠲᠡᠮᠦᠷ ᠦᠵᠦᠭ ᠢ᠋ᠶ᠋ᠡᠷ ᠪᠢᠴᠢᠳᠡᠭ ᠡᠴᠡ ᠨᠢᠳᠦ ᠭᠠᠷ ᠬᠣᠶᠠᠷ ᠲᠤ᠌ ᠶᠡᠬᠡᠬᠡᠨ ᠬᠠᠯᠠ ᠲᠠᠢ᠂ ᠤᠳᠠᠭᠠᠨ ᠪᠢᠴᠢᠭᠡᠳ ᠢᠷᠡᠬᠦᠯᠡᠷ ᠭᠠᠷ ᠤ᠋ᠨ ᠬᠤᠷᠤᠭᠤ ᠴᠥᠪᠥᠷᠢᠭᠦᠦ ᠭᠠᠷᠴᠤ ᠡᠪᠡᠷᠰᠢᠳᠡᠭ ᠪᠠᠢᠯ᠎ᠠ᠃ ᠭᠠᠪᠢᠷ᠎ᠠ ᠳ᠋ᠤ᠌ ᠶᠠᠮᠠᠷ ᠠᠵᠢᠯ ᠥᠭᠭᠦᠭᠰᠡᠨ ᠴᠦ᠍ ᠲᠡᠷᠡ ᠬᠡᠵᠢᠶᠡᠳᠡ ᠰᠢᠯᠲᠠᠭᠠᠨ ᠨᠥᠬᠥᠴᠡᠯ ᠳᠤᠷᠠᠳᠬᠤ ᠦᠭᠡᠢ ᠪᠡᠷ ᠬᠦᠯᠢᠶᠡᠨ ᠠᠪᠴᠤ ᠦᠨᠡᠨᠴᠢ ᠬᠢᠨᠠᠮᠠᠭᠠᠢ ᠪᠠᠷ ᠬᠢᠵᠦ ᠪᠡᠶᠡᠯᠡᠭᠦᠯᠬᠦ ᠳ᠋ᠦ᠍ᠨᠢ ᠵᠠᠬᠢᠷᠤᠯ ᠨᠢ ᠲᠤᠩ ᠪᠠᠶᠠᠷᠯᠠᠳᠠᠭ᠃ ᠣᠨᠳᠣᠣ ᠪᠠᠭᠰᠢᠨᠠᠷ ᠨᠢ ᠴᠦ᠍ ᠪᠢᠴᠢᠵᠦ ᠨᠠᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠪᠠᠷᠤᠭᠲᠠᠢ ᠨᠢᠭᠡᠨ ᠰᠤᠷᠤᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠵᠣᠬᠢᠶᠠᠯ ᠢ᠋ ᠵᠠᠰᠠᠭᠤᠯᠬᠤ᠂ ᠠᠵᠢᠯ ᠤ᠋ᠨ ᠳ᠋ᠦᠩᠨᠡᠯᠲᠡ᠂ ᠮᠠᠲ᠋ᠧᠷᠢᠶᠠᠯ ᠡᠨᠡ ᠲᠡᠷᠡ ᠪᠢᠴᠢᠭᠦᠯᠦᠨ᠎ᠡ ᠭᠡᠳ ᠪᠠᠷᠢᠭᠠᠳ ᠢᠷᠡᠨ᠎ᠡ᠃ ᠭᠠᠪᠢᠷ᠎ᠠ ᠬᠡᠨ ᠳ᠋ᠦ᠍ ᠴᠦ᠍ 《ᠦᠭᠡᠢ》 ᠭᠡᠳᠡᠭ ᠦᠭᠡᠢ᠂ ᠬᠡᠴᠢᠨᠡᠨ ᠶᠠᠭᠠᠷᠠᠤ ᠪᠠᠢᠭᠰᠠᠨ ᠴᠤ᠌ ᠵᠠᠪ ᠵᠠᠢ ᠭᠠᠷᠭᠠᠵᠤ ᠪᠠᠢᠭᠠᠳ ᠪᠢᠴᠢᠭᠡᠳ ᠥᠭᠴᠢᠬᠡᠨ᠎ᠡ᠃ ᠲᠡᠭᠡᠭᠡᠳ ᠡᠳᠦᠷ ᠤᠳᠠᠭᠠᠨ ᠳ᠋ᠠᠭᠠᠨ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠣᠯᠠᠨ ᠤ᠋ 《ᠨᠠᠷᠢᠨ ᠪᠢᠴᠢᠭᠡᠴᠢ》 ᠴᠣᠯᠠ ᠲᠠᠢ ᠪᠣᠯᠴᠢᠬᠠᠵᠠᠢ᠃ ᠡᠨᠡ ᠦᠶ᠎ᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠬᠢᠨᠢ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠴᠦ᠍ ᠡᠨᠡ ᠲᠡᠷᠡ ᠰᠡᠳᠬᠦᠯ ᠦ᠋ᠳ ᠲᠦ᠍ ᠨᠡᠢᠲᠡᠯᠡᠭᠳᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠨᠢᠭᠡ ᠪᠦᠯᠦᠭ ᠬᠥᠮᠦᠰ ᠦ᠋ᠨ ᠠᠲᠠᠭ᠎ᠠ ᠵᠢᠲᠥᠭᠡ ᠶ᠋ᠢ ᠬᠦᠷᠭᠡᠵᠡᠢ᠃ ᠭᠡᠪᠡᠴᠦ ᠭᠠᠪᠢᠷ᠎ᠠ ᠠᠮᠢ ᠬᠣᠪᠢᠨ ᠤ᠋ ᠪᠠᠨ ᠠᠰᠢᠭ ᠨᠡᠷ᠎ᠡ ᠶ᠋ᠢᠨ ᠲᠥᠯᠥᠭᠡ ᠪᠤᠰᠤᠳ ᠲᠠᠢ ᠲᠡᠮᠡᠴᠡᠯᠳᠦᠳᠡᠭ ᠬᠥᠮᠦᠨ ᠪᠢᠰᠢ᠂ ᠲᠡᠷᠡ ᠬᠠᠮᠲᠤ ᠣᠯᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠲᠥᠪ ᠭᠣᠣᠯᠴᠢ ᠶ᠋ᠢ ᠡᠷᠬᠢᠮᠯᠡᠨ ᠬᠡᠯᠡᠬᠦ ᠦᠭᠡ ᠪᠡᠨ ᠢᠯᠡ ᠬᠡᠯᠡᠵᠦ ᠬᠢᠬᠦ ᠦᠢᠯᠡ ᠪᠡᠨ ᠦᠨᠡᠨᠴᠢ ᠪᠡᠷ ᠪᠡᠶᠡᠯᠡᠭᠦᠯᠬᠦ ᠶ᠋ᠢ ᠪᠣᠳᠣᠵᠤ᠂ ᠬᠡᠨ ᠲᠡᠢ ᠴᠦ᠍ ᠡᠪ ᠵᠦᠢ ᠲᠡᠢ ᠬᠠᠷᠢᠴᠠᠵᠤ ᠬᠢᠴᠢᠶᠡᠵᠦ ᠶᠠᠪᠤᠳᠠᠭ᠃ ᠲᠡᠭᠡᠬᠦᠯᠡᠷ ᠣᠯᠠᠩᠬᠢ ᠬᠠᠮᠲᠤ ᠠᠵᠢᠯᠯᠠᠭᠰᠠᠳ ᠨᠢ ᠭᠠᠪᠢᠷ᠎ᠠ ᠳ᠋ᠤ᠌ ᠲᠤᠩ ᠰᠠᠢᠨ᠂ ᠶᠠᠭᠤ ᠪᠦᠬᠦᠨ ᠳ᠋ᠦ᠍ᠨᠢ ᠤᠷᠮ᠎ᠠ ᠬᠠᠢᠷᠠᠯᠠᠵᠤ᠂ ᠬᠦᠴᠢᠷ ᠪᠡᠷᠬᠡᠰᠢᠶᠡᠯ ᠲᠡᠢ ᠦᠶ᠎ᠡ ᠳ᠋ᠦ᠍ᠨᠢ ᠠᠯᠢ ᠪᠣᠯᠬᠤ ᠪᠠᠷ ᠲᠤᠰᠠ ᠳᠠᠮ ᠪᠣᠯᠬᠤ ᠭᠡᠵᠦ ᠴᠢᠷᠮᠠᠢᠳᠠᠭ ᠠᠵᠠᠢ᠃ ᠲᠡᠢᠮᠦ ᠪᠣᠯᠬᠣᠷ ᠭᠠᠪᠢᠷ᠎ᠠ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠲᠠᠯ᠎ᠠ ᠪᠠᠷ ᠥᠶᠥᠭ ᠴᠠᠳᠬᠤᠯᠠᠩ ᠶᠠᠪᠤᠳᠠᠭ ᠨᠢᠭᠡ ᠨᠢ ᠪᠣᠯᠬᠤ ᠶᠤᠮ᠃ ᠭᠡᠪᠡᠴᠦ ᠡᠭᠦᠨ ᠦ᠌ ᠡᠰᠡᠷᠭᠦ ᠪᠡᠷ ᠬᠣᠷᠣ ᠬᠣᠨᠵᠢᠩ ᠲᠠᠢ ᠬᠥᠮᠦᠰ ᠴᠦ᠍ ᠪᠣᠢ᠃ ᠳᠤᠯᠢᠬᠠᠨ ᠢᠪᠴᠤᠤ ᠤᠬᠠᠭᠠᠨ ᠲᠠᠢ ᠬᠢᠷᠢ ᠨᠢ ᠬᠣᠪᠴᠢ ᠬᠤᠢᠬᠤᠷ᠂ ᠵᠥᠩᠳᠡᠭᠡᠨ ᠠᠮᠢᠨᠴᠢᠷ ᠪᠣᠳᠣᠯᠭ᠎ᠠ ᠲᠠᠢ ᠣᠷᠣᠨ ᠲᠣᠷᠤᠨ ᠦᠭᠡᠢ ᠴᠠᠪᠴᠢᠯᠠᠨ ᠭᠢᠯᠠᠯᠵᠠᠳᠠᠭ ᠰᠢᠷᠦᠭᠦᠨ ᠬᠠᠷ᠎ᠠ ᠨᠢᠳᠦ ᠲᠡᠢ ᠯᠦᠩᠲᠠᠩ ᠭᠡᠳᠡᠭ ᠪᠦᠰᠡᠭᠦᠢ᠂ ᠠᠮᠠᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠦᠭᠡ ᠪᠣᠯᠭᠠᠨ ᠢ᠋ ᠦᠯᠡᠳᠡᠭᠡᠯ ᠦᠭᠡᠢ ᠳᠠᠮᠵᠢᠭᠤᠯᠵᠤ ᠶᠠᠪᠤᠳᠠᠭ《ᠬᠠᠭᠠᠷᠬᠠᠢ》 ᠴᠣᠯᠠ ᠲᠠᠢ ᠬᠠᠩᠳᠠᠮ᠎ᠠ᠂ ᠳᠡᠭᠡᠷᠡᠩᠭᠦᠢ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠡᠷ᠎ᠡ ᠭᠠᠷᠴᠤ ᠬᠣᠯᠬᠢᠶ᠎ᠠ ᠤᠩᠭᠢᠷᠠᠭ᠎ᠠ ᠪᠠᠷ ᠢ᠋ᠶ᠋ᠠᠨ ᠣᠨᠴᠠᠭᠠᠢᠷᠠᠭᠰᠠᠨ ᠮᠧᠳᠠᠩᠮ᠎ᠠ᠂ ᠢᠯᠡ ᠢᠨᠢᠶᠡᠵᠦ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠠᠪᠤᠷᠢᠯᠠᠳᠠᠭ ᠴᠤ᠌ ᠳᠠᠯᠳᠠᠭᠤᠷ ᠲᠠᠩᠳᠠ ᠪᠤᠰᠤᠳ ᠲᠤ᠌ ᠨᠠᠷᠢᠨ ᠬᠣᠷᠣ ᠭᠦᠶᠦᠯᠭᠡᠵᠦ ᠪᠠᠢᠳᠠᠭ ᠬᠣᠷᠯᠣᠮ᠎ᠠ᠂ ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ ᠥᠭᠦᠯᠡᠭᠡᠳ ᠠᠭᠤᠰᠬᠢ ᠶ᠋ᠢᠨ ᠴᠢᠨᠡᠭᠡ ᠶ᠋ᠢ ᠴᠦ᠍ ᠪᠦᠲᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠬᠢᠷᠢ ᠨᠢ ᠣᠯᠵᠤ ᠠᠯᠳᠠᠬᠤ ᠶ᠋ᠢᠨ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠥᠯᠥᠨ ᠪᠠᠷᠰ ᠰᠢᠭ᠋ ᠰᠤᠮᠤᠳᠠᠨ ᠣᠷᠣᠳᠠᠭ ᠬᠣᠩᠭᠢᠯᠳᠠᠭ ᠪᠠᠳᠮ᠎ᠠ᠂ ᠥᠪᠡᠷ ᠢ᠋ ᠪᠡᠨ ᠮᠠᠵᠤᠤᠯᠠᠨ ᠥᠷᠥᠭᠡᠯ ᠢ᠋ ᠭᠤᠲᠤᠭᠠᠵᠤ ᠬᠣᠷᠣ ᠰᠢᠷ᠎ᠠ ᠲᠠᠢ ᠦᠭᠡᠰ ᠢ᠋ᠶ᠋ᠡᠷ ᠬᠡᠨ ᠢ᠋ ᠴᠦ᠍ ᠭᠣᠮᠣᠳᠠᠭᠠᠬᠤ ᠠ᠋ᠴᠠ ᠪᠤᠴᠠᠳᠠᠭ ᠦᠭᠡᠢ 《ᠮᠢᠬᠠᠨ ᠮᠢᠨ᠎ᠠ》 ᠴᠣᠯᠠ ᠲᠠᠢ ᠰᠡᠴᠡᠨᠳᠦᠯᠮ᠎ᠡ ᠁ ᠨᠠᠷ ᠲᠤ᠌ ᠠᠪᠴᠤ ᠬᠡᠯᠡᠪᠡᠯ ᠭᠠᠪᠢᠷ᠎ᠠ ᠪᠣᠯ ᠶᠣᠰᠣᠲᠠᠢ ᠲᠡᠳᠡᠨ ᠦ᠌ 《ᠨᠢᠳᠦᠨ ᠦ᠌ ᠬᠢᠨᠢ ᠬᠣᠭ ᠰᠢᠲᠦᠨ ᠦ᠌ ᠬᠢᠨᠢ ᠮᠢᠬ᠎ᠠ》 ᠪᠣᠯᠬᠤ ᠤᠴᠢᠷ ᠶᠠᠮᠠᠷ ᠨᠢᠭᠡᠨ ᠠᠷᠭ᠎ᠠ ᠪᠠᠷ ᠴᠢᠳᠠᠵᠤ ᠣᠷᠬᠢᠨ᠎ᠠ ᠳᠠ ᠭᠡᠵᠦ ᠵᠠᠨᠤᠨ᠎ᠠ᠃ ᠡᠳᠡᠨᠥᠰ ᠢ᠋ ᠬᠡᠳᠦᠬᠡᠨ ᠬᠥᠮᠦᠨ ᠭᠡᠵᠦ ᠪᠦᠦ ᠪᠠᠰᠤᠮᠵᠢᠯᠠ᠂ ᠲᠡᠳᠡ ᠭᠠᠪᠢᠶ᠎ᠠ ᠶ᠋ᠢ ᠪᠦᠦ ᠬᠡᠯᠡ ᠲᠡᠭᠦᠨ ᠡᠴᠡ ᠬᠣᠯᠠ ᠴᠢᠳᠠᠯ ᠰᠦᠷ ᠲᠡᠢ ᠴᠦ᠍ ᠠᠪᠤᠭᠠᠳ ᠤᠨᠠᠭᠠᠴᠢᠬᠠᠬᠤ ᠤᠬᠠᠭᠠᠨ ᠪᠦᠷᠢᠨ ᠪᠠᠢᠨ᠎ᠠ᠃ ᠵᠠᠬᠢᠷᠤᠯ ᠤᠳᠤᠷᠢᠳᠤᠯᠭ᠎ᠠ ᠳ᠋ᠠᠭᠠᠨ ᠪᠠᠭ᠎ᠠ ᠯᠠ ᠳᠠᠭ᠎ᠠ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠬᠦᠷᠪᠡᠯ ᠨᠡᠷ᠎ᠡ ᠬᠣᠯᠪᠣᠨ ᠨᠢᠭᠤᠴᠠ ᠪᠠᠷ ᠵᠠᠭᠠᠯᠳᠤᠵᠤ ᠥᠴᠦᠬᠡᠨ ᠵᠠᠬᠢᠷᠤᠯ ᠤ᠋ᠨ ᠬᠢᠨᠢ ᠲᠤᠰᠢᠶᠠᠯ ᠢ᠋ ᠬᠤᠰᠤᠵᠤ ᠬᠠᠶᠠᠨ᠎ᠠ᠃ ᠦ᠋ ᠰᠡᠪ ᠦᠭᠡᠢ ᠠᠯᠳᠠᠯ ᠳᠤᠲᠠᠭᠳᠠᠯ ᠦᠭᠡᠢ ᠬᠥᠮᠦᠨ ᠭᠡᠵᠦ ᠦᠭᠡᠢ ᠪᠣᠯᠬᠣᠷ ᠠᠯᠢ ᠨᠢᠭᠡᠨ ᠲᠠᠯ᠎ᠠ ᠪᠠᠷ ᠢ᠋ᠶ᠋ᠠᠨ ᠥ ᠰᠡᠪ ᠢ᠋ᠶ᠋ᠡᠨ ᠮᠡᠳᠡᠭᠳᠡᠴᠢᠬᠡᠬᠦ ᠶᠦᠮ ᠪᠣᠯ ᠡᠳᠡᠭᠡᠷ ᠬᠥᠮᠦᠰ ᠲᠡᠭᠦᠨ ᠢ᠋ ᠴᠢᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠳᠡᠯ ᠰᠡᠭᠦᠯ ᠤᠷᠭᠤᠭᠤᠯᠵᠤ ᠪᠠᠢᠭᠠᠳ ᠴᠢᠮ᠎ᠠ ᠶ᠋ᠢ ᠭᠠᠭᠴᠠᠬᠠᠨ ᠨᠢᠳᠤᠷᠴᠤ ᠣᠷᠬᠢᠨ᠎ᠠ ᠭᠡᠵᠦ ᠮᠡᠳᠡ᠃

ᠲᠡᠭᠡᠵᠦ ᠪᠠᠢᠲᠠᠯ᠎ᠠ ᠭᠠᠪᠢᠷ᠎ᠠ ᠳ᠋ᠤ᠌ ᠲᠠᠭᠠᠷᠠᠤᠬᠠᠨ ᠤᠴᠢᠷ ᠲᠣᠬᠢᠶᠠᠯᠳᠤᠯ᠎ᠠ᠃ ᠶᠡᠬᠡ ᠥᠬᠢᠨ ᠨᠢ ᠳᠣᠲᠣᠷ᠎ᠠ ᠪᠥᠭᠡᠷᠡᠨ ᠦ᠌ ᠦᠷᠪᠢᠰᠦᠯ ᠣᠯᠵᠤ ᠬᠡᠳᠦ ᠬᠣᠨᠣᠬᠤ ᠦᠭᠡᠢ ᠨᠢᠭᠡ ᠤᠳᠠᠭ᠎ᠠ ᠶᠡᠬᠡᠪᠡᠷ ᠬᠠᠯᠠᠭᠤᠷᠠᠨ ᠬᠡᠪᠲᠡᠯᠭᠡ ᠳ᠋ᠦ᠍ ᠣᠷᠣᠳᠠᠭ ᠠ᠋ᠴᠠ ᠲᠡᠷᠡ ᠠᠷᠭ᠎ᠠ ᠪᠤᠶᠤ ᠴᠢᠯᠥᠭᠡ ᠭᠤᠶᠤᠵᠤ ᠡᠪᠡᠳᠴᠢᠲᠡᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠰᠠᠷᠠᠨ᠎ᠠ᠃ ᠴᠢᠯᠥᠭᠡ ᠬᠡᠯᠡᠪᠡᠯ ᠬᠠᠮᠤᠭ ᠠᠵᠢᠯ ᠶᠠᠪᠤᠳᠠᠯ ᠨᠢ ᠬᠠᠶᠠᠭᠳᠠᠵᠤ ᠠᠩᠭᠢ ᠨᠢᠭᠡᠴᠡ ᠨᠢ ᠴᠦ᠍ ᠣᠷᠬᠢᠭᠳᠠᠨ᠎ᠠ᠃

ᠲᠡᠷᠡ ᠬᠡᠳᠦᠢᠪᠡᠷ ᠡᠷᠲᠡᠯᠡᠵᠦ ᠣᠷᠣᠢᠯᠠᠨ ᠠᠵᠢᠯ ᠬᠢᠳᠡᠯ ᠢ᠋ᠶ᠋ᠡᠨ ᠠᠮᠵᠢᠭᠤᠯᠬᠤ ᠭᠡᠵᠦ ᠴᠢᠷᠮᠠᠢᠳᠠᠭ ᠴᠦ᠍ ᠪᠦᠷ ᠴᠦ᠍ ᠶᠠᠭᠠᠷᠠᠴᠢᠬᠠᠪᠠᠯ ᠶᠠᠭᠤ ᠶᠠᠭᠤᠨ ᠳ᠋ᠠᠭᠠᠨ ᠵᠠᠪᠳᠤᠭ᠎ᠠ ᠮᠠᠭᠤᠲᠠᠢ ᠪᠣᠯᠴᠢᠬᠠᠨ᠎ᠠ᠃ ᠢᠩᠭᠢᠵᠦ ᠣᠯᠠᠨ ᠬᠣᠨᠣᠭ ᠡᠳᠦᠷ ᠪᠣᠯᠬᠤ ᠳ᠋ᠤ᠌ ᠲᠡᠷᠡ ᠰᠥᠰᠥᠨ ᠦ᠌ ᠦᠷᠪᠢᠰᠦᠯ ᠲᠡᠢ ᠪᠣᠯᠵᠤ ᠬᠣᠳᠣᠭᠣᠳᠣ ᠨᠢ ᠴᠦ᠍ ᠭᠡᠮᠲᠦᠵᠦ ᠡᠪᠡᠳᠬᠦ ᠪᠣᠯᠤᠭᠠᠳ ᠤᠯᠠᠮ ᠢ᠋ᠶ᠋ᠠᠷ ᠡᠴᠡᠵᠦ ᠲᠤᠷᠠᠵᠤ ᠡᠬᠢᠯᠡᠵᠡᠢ᠃ ᠲᠡᠭᠡᠭᠡᠳ ᠶᠠᠭᠠᠷᠠᠤ ᠮᠡᠩᠳᠡᠭᠦᠦ ᠭᠡᠷ ᠣᠷᠣᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠲᠥᠪᠬᠢᠨᠡᠭᠦᠯᠦᠭᠡᠳ ᠬᠣᠶᠠᠷ ᠶᠡᠬᠡ ᠶ᠋ᠢ ᠪᠡᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠨᠢ ᠶᠠᠪᠤᠭᠤᠯᠵᠤ ᠬᠣᠶᠠᠷ ᠪᠠᠭ᠎ᠠ ᠶ᠋ᠢ ᠪᠡᠨ ᠴᠡᠴᠡᠷᠯᠢᠭ ᠲᠤᠨᠢ ᠬᠦᠷᠭᠡᠭᠡᠳ ᠠᠵᠢᠯ ᠳᠡᠭᠡᠷ᠎ᠡ ᠪᠡᠨ ᠣᠴᠢᠲᠠᠯ᠎ᠠ ᠡᠷᠲᠡ ᠶ᠋ᠢᠨ ᠨᠠᠢ᠍ᠮᠠᠨ ᠴᠠᠭ ᠪᠣᠯᠴᠢᠬᠠᠨ᠎ᠠ᠃

ᠰᠤᠷᠭᠠᠭᠤᠯᠢ ᠶ᠋ᠢᠨ ᠭᠡᠷ ᠪᠠᠷᠢᠯᠭ᠎ᠠ ᠭᠡᠵᠦ ᠴᠥᠮ ᠪᠠᠢᠰᠢᠩ ᠪᠣᠯᠬᠤ ᠲᠤᠯᠠ ᠡᠪᠦᠯ ᠦ᠋ᠨ ᠳᠤᠯᠠᠭᠠᠯᠠᠭ᠎ᠠ ᠭᠡᠪᠡᠯ ᠲᠡᠮᠦᠷ ᠵᠤᠤᠬᠠᠨ ᠳ᠋ᠤ᠌ ᠠᠷᠭᠠᠯ ᠨᠡᠭᠦᠷᠡᠰᠦ ᠲᠦᠯᠡᠳᠡᠭ ᠪᠣᠯᠬᠣᠷ ᠠᠩᠭᠢ ᠡᠷᠬᠢᠯᠡᠵᠦ ᠪᠠᠢᠭ᠎ᠠ ᠪᠠᠭᠰᠢᠨᠠᠷ ᠡᠷᠲᠡ ᠶ᠋ᠢᠨ ᠳᠣᠯᠣᠭᠠᠨ ᠴᠠᠭ ᠤ᠋ᠨ ᠪᠠᠷᠤᠭ ᠢ᠋ᠶ᠋ᠠᠷ ᠠᠩᠭᠢ ᠳ᠋ᠠᠭᠠᠨ ᠢᠷᠡᠵᠦ ᠵᠤᠤᠬᠠᠨ ᠤ᠋ ᠭᠠᠯ ᠬᠥᠭᠵᠢᠭᠡᠵᠦ ᠨᠡᠭᠦᠷᠡᠰᠦ ᠲᠦᠯᠡᠵᠦ ᠠᠩᠭᠢ ᠶ᠋ᠢᠨ ᠭᠡᠷ ᠢ᠋ᠶ᠋ᠡᠨ ᠴᠡᠪᠡᠷ ᠳᠤᠯᠠᠭᠠᠨ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ᠃ ᠨᠠᠢ᠍ᠮᠠᠨ ᠴᠠᠭ ᠠᠷᠪᠠ ᠭᠡᠬᠦ ᠳ᠋ᠦ᠍ ᠵᠠᠬᠢᠷᠤᠯ ᠪᠣᠯᠤᠨ ᠵᠢᠵᠢᠭᠦᠷ ᠪᠠᠭᠰᠢ ᠰᠤᠷᠤᠭᠴᠢᠳ ᠡᠯ᠎ᠡ ᠠᠩᠭᠢ ᠨᠢᠭᠡᠴᠡ ᠶ᠋ᠢ ᠲᠣᠭᠣᠷᠢᠨ ᠪᠠᠢᠴᠠᠭᠠᠵᠤ᠂ ᠠᠩᠭᠢ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ᠂ ᠶᠣᠰᠣ ᠲᠢᠭᠯᠡᠮ᠂ ᠳᠤᠯᠠᠭᠠᠯᠠᠭ᠎ᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠬᠢᠨᠠᠨ ᠠᠳᠠᠯᠢᠳᠬᠠᠵᠤ ᠭᠠᠷᠠᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠳ᠋ᠦᠩᠨᠡᠵᠦ ᠣᠨᠴᠠ᠂ ᠰᠢᠯᠢᠳᠡᠭ᠂ ᠰᠠᠢᠨ ᠭᠡᠬᠦ ᠳ᠋ᠦᠩ ᠥᠭᠴᠦ ᠣᠨᠴᠠ ᠰᠠᠢᠨ ᠳ᠋ᠤᠨᠢ ᠵᠢᠵᠢᠭᠬᠡᠨ ᠤᠯᠠᠭᠠᠨ ᠲᠤᠭ ᠣᠯᠭᠣᠳᠠᠭ᠃ ᠲᠡᠷᠡ ᠬᠦ᠌ ᠵᠢᠵᠢᠭᠬᠡᠨ ᠲᠤᠭ ᠢ᠋ ᠣᠯᠠᠨ ᠣᠯᠤᠭᠰᠠᠨ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢᠳ ᠵᠢᠯ ᠦ᠋ᠨ ᠡᠴᠦᠰ ᠦ᠋ᠨ ᠬᠢᠨᠠᠨ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠰᠢᠯᠢᠳᠡᠭ ᠳ᠋ᠦᠩ ᠣᠯᠬᠤ ᠳ᠋ᠤ᠌ ᠬᠦᠷᠪᠡᠯ ᠵᠠᠭᠤᠨ ᠤ᠋ ᠭᠤᠴᠢ ᠶ᠋ᠢᠨ ᠨᠥᠬᠥᠪᠥᠷᠢ ᠪᠤᠶᠤ ᠰᠢᠯᠢᠳᠡᠭ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ᠂ ᠲᠡᠷᠢᠭᠦᠨ ᠦ᠌ ᠠᠵᠢᠯᠲᠠᠨ ᠪᠣᠯᠬᠤ ᠪᠣᠯᠤᠯᠴᠠᠭ᠎ᠠ ᠲᠠᠢ ᠶᠤᠮ᠂ ᠲᠡᠭᠡᠬᠦᠯᠡᠷ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠠᠭᠰᠢᠨᠠᠷ ᠲᠡᠷᠡ ᠬᠦ᠌ ᠵᠢᠵᠢᠭ ᠲᠤᠭ ᠢ᠋ ᠣᠯᠬᠤ ᠭᠡᠵᠦ ᠥᠷᠢᠰᠦᠯᠳᠦᠨ ᠬᠡᠨ ᠠᠯᠢᠨ᠎ ᠠᠴᠠ ᠪᠠᠨ ᠲᠦᠷᠦᠭᠦᠯᠡᠵᠦ ᠠᠯᠪᠠᠨ ᠳ᠋ᠠᠭᠠᠨ ᠢᠷᠡᠵᠦ ᠠᠩᠭᠢ ᠨᠢᠭᠡᠴᠡ ᠶ᠋ᠢᠨ ᠠᠵᠢᠯ ᠢ᠋ᠶ᠋ᠠᠨ ᠠᠮᠵᠢᠭᠤᠯᠤᠨ ᠬᠢᠵᠡᠭᠡᠨ᠎ᠡ᠃ ᠭᠠᠪᠢᠷ᠎ᠠ ᠶᠠᠭᠠᠬᠢᠵᠤ ᠴᠢᠷᠮᠠᠢᠭᠰᠠᠨ ᠴᠤ᠌ ᠪᠤᠰᠤᠳ ᠠᠩᠭᠢ ᠶ᠋ᠢᠨ ᠪᠠᠭᠰᠢᠨᠠᠷ᠎ ᠠᠴᠠ ᠪᠠᠬᠠᠨ ᠣᠷᠣᠢᠲᠠᠵᠤ ᠢᠷᠡᠨ᠎ᠡ᠃ ᠲᠡᠭᠡᠭᠡᠳ ᠠᠩᠭᠢ ᠶ᠋ᠢᠨ ᠭᠡᠷ ᠢ᠋ᠶ᠋ᠡᠨ ᠴᠡᠪᠡᠷᠯᠡᠵᠦ ᠳᠢᠭᠯᠡᠨ ᠵᠤᠤᠬ᠎ᠠ ᠬᠢᠰᠠ ᠪᠠᠨ ᠨᠣᠴᠣᠭᠠᠵᠤ ᠶᠠᠭᠠᠷᠠᠵᠤ ᠪᠠᠢᠲᠠᠯ᠎ᠠ ᠥᠷᠯᠥᠭᠡᠨ ᠦ᠌ ᠪᠠᠢᠴᠠᠭᠠᠯᠲᠠ ᠪᠣᠯᠴᠢᠬᠠᠨ᠎ᠠ᠃ ᠠᠩᠭᠢ ᠶ᠋ᠢᠨ ᠭᠡᠷ ᠨᠢ ᠬᠠᠯᠠᠵᠤ ᠪᠦᠯᠢᠶᠡᠰᠴᠦ ᠠᠮᠵᠢᠳᠠᠭ ᠦᠭᠡᠢ ᠡᠴᠡ ᠪᠤᠰᠤᠳ ᠠᠩᠭᠢ ᠨᠢᠭᠡᠴᠡ ᠶ᠋ᠢ ᠪᠣᠳᠣᠪᠠᠯ ᠪᠠᠬᠠᠨ ᠵᠢᠪᠡᠬᠡᠢ ᠬᠦᠢᠲᠡᠨ ᠪᠠᠢᠳᠠᠯ ᠲᠠᠢ ᠪᠠᠢᠳᠠᠭ᠃ ᠲᠡᠭᠡᠭᠡᠳ ᠣᠯᠠᠩᠬᠢ ᠪᠠᠭᠰᠢᠨᠠᠷ ᠪᠣᠯ ᠭᠠᠪᠢᠷ᠎ᠠ ᠶ᠋ᠢᠨ ᠭᠡᠷ ᠪᠦᠯᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠰᠠᠢᠨ ᠣᠢᠯᠠᠭᠠᠳᠠᠭ᠎ ᠠᠴᠠ ᠡᠳᠡᠭᠡᠷ ᠢ᠋ ᠨᠢᠭᠡ ᠶᠡᠬᠡ ᠶᠠᠭᠤᠮ᠎ᠠ ᠪᠣᠯᠭᠠᠳᠠᠭ ᠦᠭᠡᠢ ᠬᠢᠷᠢ ᠲᠡᠩᠴᠡᠭᠦᠯᠬᠦ ᠳ᠋ᠡᠭᠡᠨ ᠲᠡᠩᠴᠡᠭᠦᠯᠦᠨ᠎ᠡ᠃ ᠵᠠᠷᠢᠮ ᠰᠠᠢᠨ ᠰᠠᠨᠠᠭ᠎ᠠ ᠲᠠᠢ ᠵᠡᠷᠭᠡᠯᠡᠳᠡᠭᠡ ᠠᠩᠭᠢ ᠶ᠋ᠢᠨ ᠪᠠᠭᠰᠢᠨᠠᠷ ᠭᠠᠪᠢᠷ᠎ᠠ ᠶ᠋ᠢᠨ ᠠᠩᠭᠢ ᠶ᠋ᠢᠨ ᠭᠡᠷ ᠢ᠋ ᠴᠡᠪᠡᠷᠯᠡᠵᠦ ᠭᠠᠯ ᠵᠤᠤᠬ᠎ᠠ ᠶ᠋ᠢ ᠨᠢ ᠨᠣᠴᠣᠭᠠᠭᠠᠳ ᠥᠭᠴᠢᠭᠰᠡᠨ ᠴᠦ᠍ ᠪᠠᠢᠳᠠᠭ ᠤᠳᠠᠭ᠎ᠠ ᠲᠠᠢ᠃ ᠭᠡᠪᠡᠴᠦ ᠯᠦᠩᠲᠠᠩ᠂ ᠮᠧᠳᠡᠭᠮ᠎ᠡ᠂ ᠬᠣᠷᠯᠣᠮ᠎ᠠ ᠮᠡᠲᠦ ᠶ᠋ᠢᠨ ᠪᠠᠭᠰᠢᠨᠠᠷ ᠤ᠋ᠨ ᠵᠢᠵᠢᠭᠦᠷ ᠬᠠᠷᠭᠤᠬᠤ ᠭᠠᠷᠠᠭ ᠲᠤ᠌ ᠪᠣᠯ ᠭᠠᠪᠢᠷ᠎ᠠ ᠶ᠋ᠢᠨ ᠠᠩᠭᠢ ᠨᠢᠭᠡᠴᠡ ᠶ᠋ᠢᠨ ᠶᠠᠭᠤ ᠨᠢ ᠴᠦ᠍ ᠬᠢᠷᠢ ᠲᠡᠩᠴᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠨᠡᠩ ᠴᠦ᠍ ᠲᠡᠷᠡ ᠬᠦ᠌ ᠮᠠᠰᠢ ᠤᠴᠢᠷ ᠤᠳᠬ᠎ᠠ ᠪᠦᠬᠦᠢ ᠷᠢᠳᠢ ᠰᠢᠳᠢᠲᠦ ᠵᠢᠵᠢᠭᠬᠡᠨ ᠤᠯᠠᠭᠠᠨ ᠲᠤᠭ ᠢ᠋ ᠣᠯᠬᠤ ᠶ᠋ᠢ ᠰᠠᠨᠠᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠦᠭᠡᠢ᠃ ᠲᠡᠭᠡᠭᠡᠳ ᠴᠦ᠍ ᠵᠣᠭᠰᠣᠬᠤ ᠦᠭᠡᠢ᠂ ᠳᠠᠷᠤᠭ᠎ᠠ ᠵᠠᠬᠢᠷᠤᠯ ᠤ᠋ᠨ ᠴᠢᠬᠢᠨ ᠳ᠋ᠦ᠍《ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠣᠯᠬᠤ ᠳ᠋ᠤ᠌ ᠵᠣᠬᠢᠷᠠᠬᠤ ᠦᠭᠡᠢ》 ᠭᠡᠬᠦ ᠪᠤᠶᠤ《ᠠᠵᠢᠯ ᠳ᠋ᠠᠭᠠᠨ ᠠᠯᠠᠩ ᠰᠠᠯᠠᠩ᠂ ᠬᠠᠷᠢᠭᠤᠴᠠᠯᠭ᠎ᠠ ᠦᠭᠡᠢ》᠂《ᠶᠡᠷᠦᠨᠢ ᠭᠠᠪᠢᠷ᠎ᠠ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠣᠯ ᠠᠩᠭᠢ ᠡᠷᠬᠢᠯᠡᠬᠦ ᠶ᠋ᠢ ᠪᠤᠤ ᠬᠡᠯᠡ᠂ ᠭᠣᠣᠯ ᠬᠢᠴᠢᠶᠡᠯ ᠦ᠋ᠨ ᠪᠠᠭᠰᠢ ᠪᠣᠯᠬᠤ ᠳ᠋ᠤ᠌ ᠴᠤ᠌ ᠲᠣᠬᠢᠷᠠᠬᠤ ᠦᠭᠡᠢ》 ᠭᠡᠬᠦ ᠮᠡᠲᠦ ᠪᠡᠷ ᠠᠯᠲᠠᠨ ᠬᠣᠰᠢᠭᠤ ᠡᠷᠭᠦᠵᠡᠢ᠃

ᠭᠠᠪᠢᠷ᠎ᠠ ᠶ᠋ᠢᠨ ᠶᠡᠬᠡ ᠥᠬᠢᠨ ᠨᠢ ᠡᠪᠡᠳᠦᠭᠡᠳ ᠵᠣᠪᠠᠵᠤ ᠶᠠᠪᠤᠲᠠᠯ᠎ᠠ ᠥᠪᠡᠷ ᠦ᠋ᠨ ᠬᠢᠨᠢ ᠬᠣᠳᠣᠭᠣᠳᠣ ᠰᠥᠰᠥᠨ ᠦ᠌ ᠦᠷᠪᠢᠰᠦᠯ ᠬᠦᠨᠳᠦᠷᠡᠵᠦ ᠭᠤᠷᠪᠠᠨ ᠭᠠᠷᠠᠭ ᠡᠮᠨᠡᠯᠭᠡ ᠳ᠋ᠦ᠍ ᠬᠡᠪᠲᠡᠭᠡᠳ ᠠᠯᠪᠠᠨ ᠳ᠋ᠠᠭᠠᠨ ᠢᠷᠡᠵᠦ ᠠᠵᠢᠯᠯᠠᠳᠠᠭ ᠡᠳᠦᠷ ᠲᠦ᠋ᠨᠢ ᠠᠢᠮᠠᠭ ᠤ᠋ᠨ ᠵᠢᠭᠠᠬᠤ ᠶ᠋ᠢ ᠰᠤᠳᠤᠯᠬᠤ ᠭᠠᠵᠠᠷ ᠪᠣᠯᠤᠨ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭ᠎ᠠ ᠵᠠᠬᠢᠷᠤᠯ ᠨᠠᠷ ᠡᠯ᠎ᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠦᠷᠴᠦ ᠬᠢᠴᠢᠶᠡᠯ ᠰᠣᠨᠣᠰᠬᠤ ᠪᠣᠯᠵᠤ ᠬᠠᠮᠤᠭ ᠲᠡᠷᠢᠭᠦᠨ ᠳ᠋ᠦ᠍ ᠬᠣᠰᠢᠭᠤ ᠮᠣᠩᠭᠣᠯ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠢᠷᠡᠵᠦ ᠬᠢᠴᠢᠶᠡᠯ ᠰᠣᠨᠣᠰᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠣᠨ ᠤ᠋ ᠬᠡᠯᠡᠨ ᠦ᠌ ᠬᠢᠴᠢᠶᠡᠯ ᠳ᠋ᠦ᠍ ᠭᠠᠪᠢᠷ᠎ᠠ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠲᠣᠬᠢᠷᠠᠭᠤᠯᠵᠠᠢ᠃ ᠭᠠᠪᠢᠷ᠎ᠠ ᠰᠠᠶᠢᠬᠠᠨ ᠡᠮᠨᠡᠯᠭᠡ ᠡᠴᠡ ᠭᠠᠷᠴᠤ ᠪᠡᠶ᠎ᠡ ᠨᠢ ᠲᠤᠩ ᠰᠤᠯᠠ ᠳᠣᠷᠣᠢ ᠪᠠᠢᠭᠰᠠᠨ ᠤ᠋ ᠳᠡᠭᠡᠷ᠎ᠡ ᠳᠠᠩᠴᠤ ᠭᠡᠨᠡᠳᠲᠡ ᠶ᠋ᠢᠨ ᠪᠣᠯᠵᠤ ᠪᠡᠯᠡᠳᠬᠡᠯ ᠴᠦ᠍ ᠰᠠᠢᠲᠤᠷ ᠬᠢᠵᠦ ᠠᠮᠵᠢᠭ᠎ᠠ ᠦᠭᠡᠢ ᠪᠡᠷ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠬᠢᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠬᠠᠨ ᠲᠤᠯᠭᠠᠮᠳᠠᠨ ᠰᠠᠨᠳᠤᠷᠤᠭᠰᠠᠨ ᠪᠣᠯᠪᠠᠴᠤ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠴᠠᠭ ᠲᠤᠨᠢ ᠲᠣᠬᠢᠷᠠᠭᠤᠯᠤᠨ ᠰᠠᠢᠬᠠᠨ ᠣᠷᠣᠵᠠᠢ᠃ ᠭᠡᠪᠡᠴᠦ ᠶᠠᠭ ᠬᠢᠴᠢᠶᠡᠯ ᠪᠠᠭᠤᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠭᠡᠨᠡᠳᠲᠡ ᠪᠡᠶ᠎ᠡ ᠡᠴᠡ ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠳᠬᠤᠨ ᠴᠢᠷᠠᠢ ᠨᠢ ᠵᠢᠪᠡᠬᠡᠢ ᠴᠠᠭᠠᠨ ᠪᠣᠯᠵᠤ ᠮᠠᠨᠠᠷᠠᠨ ᠤᠨᠠᠵᠠᠢ᠃ ᠣᠢᠷ᠎ᠠ ᠪᠠᠢᠭᠰᠠᠨ ᠪᠠᠭᠰᠢᠨᠠᠷ ᠰᠠᠨᠳᠤᠷᠤᠨ ᠳᠥᠰᠢᠨ ᠠᠪᠴᠤ ᠬᠥᠮᠦᠨ ᠪᠠᠯᠴᠢᠷ ᠢ᠋ ᠨᠢ ᠬᠢᠮᠤᠰᠤᠯᠠᠨ ᠳᠠᠷᠤᠭᠰᠠᠨ ᠪᠣᠯᠪᠠᠴᠤ ᠰᠡᠷᠭᠦᠬᠦ ᠮᠠᠶᠢᠭ ᠦᠭᠡᠢ ᠲᠤᠯᠠ ᠡᠮᠨᠡᠯᠭᠡ ᠳ᠋ᠦ᠍ ᠬᠦᠷᠭᠡᠵᠦ ᠲᠦᠷᠭᠡᠨ ᠠᠪᠤᠷᠠᠯᠲᠠ ᠬᠢᠵᠦ ᠪᠠᠢᠮᠠᠨ ᠰᠡᠷᠭᠦᠭᠡᠵᠡᠢ᠃ ᠡᠮᠴᠢ ᠶ᠋ᠢᠨ ᠣᠨᠣᠰᠢᠯᠠᠭᠰᠠᠨ ᠢ᠋ᠶ᠋ᠠᠷ ᠶᠡᠬᠡᠪᠡᠷ ᠴᠢᠰᠤ ᠳᠤᠲᠠᠭᠰᠠᠨ᠂ ᠵᠢᠷᠦᠬᠡᠨ ᠦ᠌ ᠴᠢᠰᠤᠨ ᠬᠠᠩᠭᠠᠯᠲᠠ ᠬᠦᠷᠦᠯᠴᠡᠬᠦ ᠦᠭᠡᠢ᠂ ᠪᠠᠰᠠ ᠬᠣᠳᠣᠭᠣᠳᠣ ᠰᠥᠰᠥᠨ ᠦ᠌ ᠦᠷᠪᠢᠰᠦᠯ ᠣᠯᠤᠭᠠᠳ ᠤᠳᠠᠵᠤ ᠬᠣᠭᠣᠯᠠ ᠢᠳᠡᠭᠡᠨ ᠦ᠌ ᠰᠢᠮ᠎ᠡ ᠲᠡᠵᠢᠭᠡᠯ ᠶᠡᠬᠡᠳᠡ ᠳᠤᠲᠠᠭᠰᠠᠨ᠎ ᠠᠴᠠ ᠪᠣᠯᠤᠭᠰᠠᠨ ᠭᠡᠵᠡᠢ᠃

ᠰᠡᠵᠢᠮ᠎ᠡ ᠳᠡᠳ᠋ ᠵᠠᠬᠢᠷᠤᠯ ᠪᠣᠯᠤᠨ ᠬᠡᠳᠦᠨ ᠪᠠᠭᠰᠢ ᠭᠠᠪᠢᠷ᠎ᠠ ᠶ᠋ᠢ ᠡᠭᠡᠯᠵᠢᠯᠡᠨ ᠰᠤᠪᠢᠯᠠᠵᠤ᠂ ᠬᠡᠳᠦᠨ ᠬᠡᠦᠬᠡᠳ ᠢ᠋ ᠨᠢ ᠬᠥᠳᠡᠭᠡ ᠡᠴᠡ ᠠᠪᠠᠭ᠎ᠠ ᠡᠵᠢ ᠶ᠋ᠢ ᠨᠢ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ ᠬᠠᠷᠠᠭᠠᠯᠵᠠᠭᠤᠯᠪᠠ᠃ ᠭᠠᠪᠢᠷ᠎ᠠ ᠳᠠᠬᠢᠭᠠᠳ ᠬᠣᠶᠠᠷ ᠭᠠᠷᠠᠭ ᠡᠮᠨᠡᠯᠭᠡ ᠳ᠋ᠦ᠍ ᠬᠡᠪᠲᠡᠭᠡᠳ ᠠᠯᠪᠠᠨ ᠳ᠋ᠠᠭᠠᠨ ᠢᠷᠡᠵᠦ ᠬᠠᠲᠠᠭᠤᠵᠢᠨ ᠠᠵᠢᠯᠯᠠᠪᠠ᠃ ᠵᠢᠷᠦᠬᠡᠨ ᠲᠠᠮᠢᠷ ᠳᠣᠷᠣᠢ ᠎ᠠ᠋ᠴᠠ ᠪᠡᠶ᠎ᠡ ᠨᠢ ᠴᠦ᠍ ᠲᠤᠩ ᠲᠠᠮᠢᠷ ᠦᠭᠡᠢ ᠪᠠᠢᠯ᠎ᠠ᠃ ᠲᠡᠷᠡ ᠠᠯᠢ ᠪᠣᠯᠬᠤ ᠪᠠᠷ ᠢᠳᠡᠵᠦ ᠤᠤᠭᠤᠬᠤ ᠪᠠᠨ ᠲᠣᠬᠢᠷᠠᠭᠤᠯᠤᠨ ᠲᠠᠮᠢᠷ ᠲᠡᠩᠬᠡᠭᠡ ᠪᠡᠨ ᠰᠠᠢᠵᠢᠷᠠᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠨ᠎ᠡ᠃ ᠲᠡᠷᠡ ᠶᠠᠭᠠᠬᠢᠭᠰᠠᠨ ᠴᠤ᠌ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠢᠶᠠᠭᠳᠠᠨ ᠣᠢᠴᠢᠵᠤ ᠪᠣᠯᠬᠤ ᠦᠭᠡᠢ᠂ ᠲᠡᠷᠡ ᠪᠣᠯ ᠥᠨᠥᠴᠢᠨ ᠳᠥᠷᠪᠡᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠴᠣᠷ ᠤ᠋ᠨ ᠭᠠᠭᠴᠠ ᠠᠭᠤᠯᠠ ᠮᠡᠲᠦ ᠲᠦᠰᠢᠭ ᠪᠣᠯᠬᠤ ᠶᠤᠮ᠃ ᠣᠳᠣᠬᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠠᠬᠤᠢ ᠶᠠᠭ ᠯᠠ ᠲᠠᠲᠠᠯᠭ᠎ᠠ ᠨᠢ ᠰᠤᠯᠠᠷᠠᠭᠰᠠᠨ ᠠᠴᠢᠶ᠎ᠠ ᠲᠠᠢ ᠲᠡᠷᠭᠡ ᠰᠢᠭ ᠭᠠᠭᠴᠠ ᠰᠢᠷᠦᠭᠦᠨ ᠳᠣᠩᠰᠣᠯᠬᠤ ᠶ᠋ᠢ ᠳᠠᠭᠠᠭᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠲᠡᠭᠡᠬᠦᠯᠡᠷ ᠲᠡᠷᠡ ᠵᠠᠪᠠᠯ ᠡᠷᠡᠭᠦᠯ ᠴᠢᠭᠢᠷᠠᠭ ᠪᠡᠶ᠎ᠡ ᠲᠡᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠲᠡᠢᠮᠦ ᠡᠴᠡ ᠲᠡᠷᠡ ᠮᠣᠩᠭᠣᠯ ᠧᠦ᠋ᠷᠣᠫᠠ ᠡᠮ ᠢ᠋ ᠬᠣᠣᠰᠯᠠᠭᠤᠯᠤᠨ ᠤᠤᠭᠤᠵᠤ ᠬᠡᠳᠦᠢᠪᠡᠷ ᠠᠮᠢᠳᠤᠷᠠᠯ ᠨᠢ ᠬᠦᠷᠦᠯᠴᠡᠭᠡ ᠮᠠᠭᠤᠲᠠᠢ ᠴᠤ᠌ ᠡᠨᠡ ᠦᠶ᠎ᠡ ᠡᠴᠡ ᠡᠬᠢᠯᠡᠨ ᠤᠨᠲᠠᠵᠤ ᠠᠮᠠᠷᠠᠬᠤ ᠢᠳᠡᠭᠡᠨ ᠦ᠌ ᠰᠢᠮ᠎ᠡ ᠲᠡᠵᠢᠭᠡᠯ ᠢ᠋ ᠲᠣᠬᠢᠷᠠᠭᠤᠯᠬᠤ ᠶ᠋ᠢ ᠶᠡᠬᠡᠳᠡ ᠠᠩᠬᠠᠷᠬᠤ ᠪᠣᠯᠤᠭᠰᠠᠨ ᠪᠠᠢᠯ᠎ᠠ᠃

ᠭᠠᠪᠢᠷ᠎ᠠ ᠶ᠋ᠢᠨ ᠪᠡᠶ᠎ᠡ ᠠᠭᠠᠵᠢᠮ ᠢ᠋ᠶ᠋ᠠᠷ ᠰᠠᠢᠵᠢᠷᠠᠵᠤ ᠮᠥᠨ ᠬᠦ᠌ ᠠᠯᠪᠠᠨ ᠠᠵᠢᠯ ᠪᠣᠯᠤᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠵᠣᠬᠢᠴᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠵᠦᠳᠡᠷᠡᠨ ᠵᠢᠳᠬᠦᠭᠰᠡᠭᠡᠷ ᠶᠠᠪᠤᠨ᠎ᠠ᠃ ᠬᠡᠳᠦᠨ ᠰᠠᠷ᠎ᠠ ᠶ᠋ᠢᠨ ᠬᠢᠨᠢ ᠳᠠᠷᠠᠭ᠎ᠠ ᠨᠢᠭᠡᠨ ᠤᠳᠠᠭᠠᠨ ᠤ᠋ ᠪᠠᠭᠰᠢ ᠠᠵᠢᠯᠲᠠᠨ ᠤ᠋ ᠬᠤᠷᠠᠯ ᠪᠣᠯᠵᠤ ᠪᠠᠢᠯ᠎ᠠ᠃ 《ᠮᠢᠬᠠᠨ ᠮᠢᠨ᠎ᠠ》 ᠴᠣᠯᠠ ᠲᠠᠢ ᠰᠡᠴᠡᠨᠳᠤᠯᠮ᠎ᠠ ᠤᠬᠤᠷᠬᠠᠢ ᠳ᠋ᠠᠭᠠᠨ ᠪᠠᠭᠲᠠᠵᠤ ᠶᠠᠳᠠᠨ ᠡᠷᠭᠢᠯᠳᠦᠬᠦ ᠬᠤᠪᠠᠨ ᠰᠢᠷ᠎ᠠ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠣᠮᠣᠭᠣᠷ ᠤᠷᠤᠭᠤᠯ ᠢ᠋ᠶ᠋ᠠᠨ ᠱᠣᠪᠣᠯᠵᠠᠭᠤᠯᠤᠨ ᠲᠤᠰ ᠭᠠᠷᠠᠭ ᠤ᠋ᠨ ᠵᠢᠵᠢᠭᠦᠷ ᠦ᠋ᠨ ᠪᠠᠢᠳᠠᠯ ᠢ᠋ ᠳ᠋ᠦᠩᠨᠡᠨ ᠶᠠᠷᠢᠵᠤ ᠭᠠᠪᠢᠷ᠎ᠠ ᠳ᠋ᠤ᠌ ᠵᠥᠩᠳᠡᠭᠡᠨ ᠣᠯᠠᠨ ᠰᠠᠨᠠᠯ ᠳᠤᠷᠠᠳᠴᠠᠢ᠃ ᠠᠩᠭᠢ ᠨᠢᠭᠡᠴᠡ ᠪᠡᠨ ᠬᠠᠮᠢᠶᠠᠷᠴᠤ ᠳᠣᠳᠣᠮᠳᠠᠬᠤ ᠲᠠᠯ᠎ᠠ ᠪᠠᠷ ᠬᠦᠷᠦᠯᠴᠡᠬᠦ ᠦᠭᠡᠢ ᠴᠦ᠍ ᠭᠡᠬᠦ ᠰᠢᠭ᠂ ᠠᠷᠪᠠ ᠭᠠᠷᠤᠢ ᠵᠢᠯ ᠪᠠᠭᠰᠢᠯᠠᠭᠰᠠᠨ ᠬᠠᠭᠤᠴᠢᠨ ᠪᠠᠭᠰᠢ ᠪᠠᠢᠭᠠᠳ ᠬᠢᠴᠢᠶᠡᠯ ᠢ᠋ ᠨᠢ ᠣᠯᠠᠨ ᠬᠥᠮᠦᠰ ᠰᠣᠨᠣᠰᠬᠤ ᠪᠣᠯᠬᠤ ᠳ᠋ᠤ᠌ ᠶᠠᠭᠠᠷᠠᠵᠤ ᠰᠠᠨᠳᠤᠷᠤᠨ ᠮᠠᠨᠠᠷᠠᠵᠤ ᠤᠨᠠᠭᠠᠳ ᠣᠯᠠᠨ ᠤ᠋ ᠠᠵᠢᠯ ᠳ᠋ᠤ᠌ ᠰᠠᠭᠠᠳ ᠲᠣᠳᠬᠠᠷ ᠤᠴᠠᠷᠠᠭᠤᠯᠤᠭᠰᠠᠨ ᠴᠤ᠌ ᠭᠡᠬᠦ ᠰᠢᠭ᠂ ᠠᠩᠭᠢ ᠡᠷᠬᠢᠯᠡᠵᠦ ᠭᠣᠣᠯ ᠬᠢᠴᠢᠶᠡᠯ ᠵᠢᠭᠠᠬᠤ ᠳ᠋ᠤ᠌ ᠡᠢᠮᠦᠷᠬᠦᠦ ᠪᠠᠭᠰᠢ ᠲᠣᠬᠢᠷᠠᠬᠤ ᠦᠭᠡᠢ ᠭᠡᠬᠦ ᠮᠡᠲᠦ ᠪᠡᠷ ᠶᠠᠷᠢᠵᠤ ᠭᠠᠷᠤᠯ᠎ᠠ᠃ ᠳᠡᠳ᠋ ᠵᠠᠬᠢᠷᠤᠯ ᠰᠠᠵᠢᠮ᠎ᠠ᠄

— ᠭᠠᠪᠢᠷ᠎ᠠ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠳᠡᠭᠡᠷ᠎ᠡ ᠠᠶᠤᠵᠤ ᠰᠠᠨᠳᠤᠷᠤᠭᠰᠠᠨ᠎ ᠠᠴᠠ ᠪᠣᠯᠤᠭᠠᠳ ᠮᠠᠨᠠᠷᠠᠭᠰᠠᠨ ᠪᠢᠰᠢ᠂ ᠦᠨᠡᠬᠡᠷ ᠪᠡᠶ᠎ᠡ ᠨᠢ ᠲᠤᠩ ᠮᠠᠭᠤ ᠪᠠᠢᠭᠰᠠᠨ ᠶᠤᠮ᠃ ᠦᠨᠡᠨᠳᠡᠭᠡᠨ ᠪᠢ ᠲᠡᠷᠡ ᠤᠳᠠᠭ᠎ᠠ ᠭᠠᠪᠢᠷ᠎ᠠ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠲᠣᠬᠢᠷᠠᠭᠤᠯᠬᠤ ᠦᠭᠡᠢ ᠪᠣᠯ ᠲᠠᠭᠠᠷᠠᠬᠤ ᠪᠠᠢᠭᠰᠠᠨ ᠶᠤᠮ᠂ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠬᠡᠨ ᠳ᠋ᠦ᠍ ᠴᠦ᠍ ᠲᠣᠬᠢᠶᠠᠯᠳᠤᠵᠤ ᠮᠡᠳᠡᠨ᠎ᠡ᠃ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠢᠯᠠᠭᠠᠬᠤ ᠶ᠋ᠢ ᠬᠦᠰᠡᠨ᠎ᠡ ᠭᠡᠵᠦ ᠰᠡᠴᠨᠨᠳᠤᠯᠮ᠎ᠠ ᠳ᠋ᠤ᠌ ᠳᠤᠷ᠎ᠠ ᠦᠭᠡᠢᠴᠡᠨ ᠭᠠᠪᠢᠷ᠎ᠠ ᠶ᠋ᠢ ᠥᠮᠥᠭᠯᠡᠪᠡ᠃ ᠲᠡᠭᠡᠲᠡᠯ᠎ᠡ ᠵᠠᠬᠢᠷᠤᠯ ᠡᠯᠪᠡᠭ ᠭᠤᠸᠠᠢ ᠣᠷᠣᠢ᠎ ᠠ᠋ᠴᠠ ᠪᠠᠨ ᠰᠢᠩᠭᠡᠷᠡᠨ ᠬᠠᠯᠴᠠᠷᠠᠭᠰᠠᠨ ᠰᠢᠩᠭᠡᠨ ᠬᠠᠯᠢᠮᠠᠭ ᠦᠰᠦ ᠪᠡᠨ ᠠᠷᠤᠨᠰᠢ ᠨᠠᠮᠪᠠᠲᠠᠢᠬᠠᠨ ᠢᠯᠢᠭᠡᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠨ ᠦᠨᠡᠬᠡᠷ ᠴᠦ᠍ ᠲᠡᠷᠡ ᠥᠷᠯᠥᠭᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠢᠯᠠᠭᠰᠠᠨ᠂ ᠢᠯᠠᠭᠳᠠᠭᠰᠠᠨ ᠬᠡᠨ ᠬᠡᠨ ᠨᠢ ᠲᠡᠷᠡ ᠲᠤᠬᠠᠢ ᠪᠠᠨ ᠡᠷᠭᠢᠴᠡᠭᠦᠯᠬᠦ ᠵᠠᠪ ᠦᠭᠡᠢ ᠬᠥᠳᠡᠯᠴᠡᠭᠡᠯ᠎ᠡ᠃

— ᠭᠠᠪᠢᠷ᠎ᠠ ᠶ᠋ᠢᠨ ᠣᠳᠣ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠩᠭᠢ ᠡᠷᠬᠢᠯᠡᠵᠦ ᠭᠣᠣᠯ ᠬᠢᠴᠢᠶᠡᠯ ᠢ᠋ ᠣᠷᠣᠬᠤ ᠳ᠋ᠤ᠌ ᠨᠡᠭᠡᠷᠡᠨ ᠪᠠᠬᠠᠨ ᠲᠣᠬᠢᠷᠠᠮᠵᠢ ᠦᠭᠡᠢ᠃ ᠪᠢ ᠢᠩᠭᠢᠵᠦ ᠪᠣᠳᠣᠵᠤ ᠪᠠᠢᠨ᠎ᠠ᠂ ᠰᠠᠶᠢᠬᠠᠨ ᠰᠢᠯᠵᠢᠵᠦ ᠢᠷᠡᠭᠰᠡᠨ ᠰᠠᠮᠠᠭ᠎ᠠ ᠪᠠᠭᠰᠢ ᠳ᠋ᠤ᠌ ᠭᠠᠪᠢᠷ᠎ᠠ ᠶ᠋ᠢᠨ ᠠᠩᠭᠢ ᠶ᠋ᠢ ᠥᠭᠭᠦᠶ᠎ᠡ᠃ ᠰᠠ᠊· ᠪᠠᠭᠰᠢ ᠲᠣᠭ᠎ᠠ ᠵᠢᠭᠠᠨ᠎ᠠ᠂ ᠮᠦᠳᠠᠨ ᠪᠠᠭᠰᠢ ᠬᠡᠯᠡ ᠪᠢᠴᠢᠭ ᠣᠷᠣᠨ᠎ᠠ᠃ ᠪᠠᠢᠭᠠᠯᠢ ᠵᠢᠭᠠᠳᠠᠭ(ᠪᠠᠢᠭᠠᠯᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠬᠡᠯᠡᠵᠦ ᠪᠣᠢ) ᠤᠷᠠᠨ ᠪᠠᠭᠰᠢ ᠡᠪᠡᠳᠴᠢᠨ ᠦ᠌ ᠴᠢᠯᠥᠭᠡ ᠬᠡᠯᠡᠭᠡᠳ ᠪᠠᠢᠭ᠎ᠠ ᠪᠣᠯᠬᠣᠷ ᠪᠠᠢᠭᠠᠯᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠭᠠᠪᠢᠷ᠎ᠠ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠶ᠎ᠠ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠵᠡᠪᠡᠯ ᠶᠠᠮᠠᠷ ᠪᠣᠢ? ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠰᠡᠭ ᠦᠢᠮᠡᠯᠳᠦᠵᠦ

— ᠡᠢᠮᠦ ᠰᠠᠢᠨ ᠬᠡᠯᠡᠨ ᠦ᠌ ᠪᠠᠭᠰᠢ ᠶ᠋ᠢ ᠰᠤᠯᠠ ᠬᠢᠴᠢᠶᠡᠯ ᠦ᠋ᠨ ᠪᠠᠭᠰᠢ ᠪᠣᠯᠭᠠᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠡᠪᠡ᠃

一 ᠭᠠ‍· ᠪᠠᠭᠰᠢ ᠶ᠋ᠢᠨ ᠠᠮᠢᠳᠤᠷᠠᠯ ᠨᠢ ᠬᠦᠴᠢᠷᠲᠡᠢ ᠭᠡᠬᠦ ᠡᠴᠡ ᠠᠵᠢᠯ ᠳ᠋ᠠᠭᠠᠨ ᠬᠠᠷᠢᠭᠤᠴᠠᠯᠭ᠎ᠠ ᠦᠭᠡᠢ ᠬᠥᠮᠦᠨ ᠣᠭᠲᠣ ᠪᠢᠰᠢ᠂ ᠪᠢᠳᠡ ᠬᠦᠴᠢᠷ ᠲᠡᠢ ᠨᠢᠭᠡᠨ ᠢ᠋ᠶ᠋ᠡᠨ ᠣᠢᠯᠠᠭᠠᠵᠤ ᠬᠠᠯᠠᠮᠵᠢᠯᠠᠪᠠᠯ ᠵᠣᠬᠢᠬᠤ ᠪᠢᠰᠢ ᠤᠤ?

一 ᠮᠠᠨ ᠤ᠋ ᠳᠣᠲᠣᠷ᠎ᠠ ᠭᠠᠪᠢᠷ᠎ᠠ ᠰᠢᠭ᠋ ᠬᠡᠯᠡ ᠤᠷᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠡᠢᠮᠦ ᠠᠪᠢᠶᠠᠰ ᠲᠠᠢ ᠬᠥᠮᠦᠨ ᠬᠡᠳᠦ ᠪᠠᠢᠨ᠎ᠠ ᠪᠣᠢ?

一 ᠪᠢ ᠦᠵᠡᠪᠡᠯ ᠠ᠋ ·ᠪᠠᠭᠰᠢ ᠶ᠋ᠢᠨ ᠲᠣᠬᠢᠷᠠᠭᠤᠯᠤᠭᠰᠠᠨ ᠢ᠋ ᠲᠠᠭᠠᠷᠠᠨ᠎ᠠ ᠭᠡᠵᠦ ᠦᠵᠡᠨ᠎ᠡ᠃ ᠠᠵᠢᠯ ᠤ᠋ᠨ ᠬᠡᠷᠡᠭᠴᠡᠭᠡ ᠡᠴᠡ ᠢᠩᠭᠢᠵᠦ ᠪᠠᠢᠭ᠎ᠠ ᠰᠢᠲᠠ᠃

一 ᠲᠡᠢᠮᠦ ᠯᠡ ᠰᠠᠢᠨ ᠪᠠᠭᠰᠢ ᠪᠣᠯ ᠠᠯᠢ ᠴᠤ᠌ ᠲᠥᠷᠥᠯ ᠦ᠋ᠨ ᠬᠢᠴᠢᠶᠡᠯ ᠢ᠋ ᠴᠥᠮ ᠵᠢᠭᠠᠵᠤ ᠴᠢᠳᠠᠬᠤ ᠪᠠᠢᠯᠭᠦᠢ ᠭᠡᠬᠦ ᠵᠡᠷᠭᠡ ᠪᠡᠷ ᠮᠠᠷᠭᠤᠯᠳᠤᠪᠠ᠃ ᠭᠠᠪᠢᠷ᠎ᠠ ᠶ᠋ᠢᠨ ᠳᠣᠲᠣᠷ᠎ᠠ ᠪᠡᠭᠲᠡᠷᠡᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠵᠠᠢᠷᠲᠤᠨ ᠲᠡᠭᠦᠨ ᠢ᠋ᠶ᠋ᠡᠨ ᠤᠨᠠᠭᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠪᠠᠢᠵᠤ

一 ᠠᠩᠭᠢ ᠪᠠᠨ ᠥᠭᠴᠦ ᠪᠣᠯᠤᠨ᠎ᠠ᠂ ᠭᠡᠪᠡᠴᠦ ᠮᠢᠨᠦ ᠰᠤᠷᠤᠭᠰᠠᠨ ᠮᠡᠷᠭᠡᠵᠢᠯ ᠪᠣᠯ ᠬᠡᠯᠡᠨ ᠦ᠌ ᠮᠡᠷᠭᠡᠵᠢᠯ ᠪᠣᠯᠬᠣᠷ ᠬᠡᠯᠡ ᠪᠢᠴᠢᠭ ᠢ᠋ᠶ᠋ᠡᠨ ᠵᠢᠭᠠᠬᠤ ᠶ᠋ᠢ ᠬᠦᠰᠡᠨ᠎ᠡ ᠭᠡᠪᠡ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠡᠯᠪᠡᠭ ᠵᠠᠬᠢᠷᠤᠯ ᠳᠠᠩᠴᠤ ᠨᠦᠮᠵᠦᠭ ᠦᠭᠡᠢ ᠬᠠᠬᠢᠷ ᠳᠠᠭᠤᠨ ᠢ᠋ᠶ᠋ᠠᠷ

一 ᠢᠩᠭᠢᠵᠦ ᠲᠣᠬᠢᠷᠠᠭᠤᠯᠬᠤ ᠪᠠᠷ ᠪᠣᠯᠤᠯ᠎ᠠ᠃ ᠴᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠶ᠋ᠢᠨ ᠲᠣᠬᠢᠷᠠᠭᠤᠯᠭ᠎ᠠ ᠶ᠋ᠢ ᠰᠣᠨᠣᠰᠬᠤ ᠰᠠᠨᠠᠭ᠎ᠠ ᠦᠭᠡᠢ ᠪᠣᠯ ᠵᠠᠭᠤᠨ ᠤ᠋ ᠳᠠᠯᠠ ᠶ᠋ᠢᠨ ᠴᠠᠯᠢᠩ ᠢ᠋ᠶ᠋ᠠᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠪᠡᠶ᠎ᠡ ᠪᠡᠨ ᠰᠤᠪᠢᠯᠠᠭᠠᠳ ᠰᠠᠭᠤᠭᠰᠠᠨ ᠴᠤ᠌ ᠪᠣᠯᠤᠨ᠎ᠠ ᠰᠢᠲᠠ᠂ ᠳᠤᠷ᠎ᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠯ ᠳᠠ! ᠭᠡᠵᠦ ᠵᠠᠷᠯᠠᠪᠠ᠃ ᠬᠤᠷᠠᠯ ᠲᠠᠷᠬᠠᠭᠰᠠᠨ ᠤ᠋ ᠳᠠᠷᠠᠭ᠎ᠠ ᠭᠠᠪᠢᠷ᠎ᠠ ᠵᠠᠬᠢᠷᠤᠯ ᠤ᠋ᠨ ᠠᠯᠪᠠᠨ ᠭᠡᠷ ᠲᠦ᠍ ᠪᠡᠨ ᠣᠷᠣᠵᠤ

一 ᠪᠠᠢᠭᠠᠯᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠬᠡᠳᠦᠢᠪᠡᠷ ᠰᠤᠯᠠ ᠬᠢᠴᠢᠶᠡᠯ ᠭᠡᠳᠡᠭ ᠪᠣᠯᠪᠠᠴᠤ ᠲᠡᠷᠡ ᠪᠣᠯ ᠣᠯᠠᠨ ᠲᠠᠯ᠎ᠠ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢ ᠬᠠᠮᠤᠷᠤᠭᠰᠠᠨ ᠴᠢᠬᠤᠯᠠ ᠬᠢᠴᠢᠶᠡᠯ ᠲᠥᠷᠥᠯ ᠪᠣᠯᠬᠤ ᠶᠤᠮ᠃ ᠪᠢ ᠵᠢᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠬ᠎ᠠ ᠠ᠋᠂ ᠬᠠᠰᠢᠯᠠ ᠬᠡᠯᠡ ᠪᠢᠴᠢᠭ ᠢ᠋ᠶ᠋ᠡᠨ ᠵᠢᠭᠠᠴᠢᠬᠠᠶ᠎ᠠ ᠳᠠ᠂ ᠲᠠ ᠳᠠᠬᠢᠭᠠᠳ ᠪᠣᠳᠣᠯᠬᠢᠯᠠᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠭᠤᠶᠤᠴᠢᠯᠠᠯ᠎ᠠ᠃

一 ᠵᠠᠯᠠᠭᠤ ᠬᠥᠮᠦᠨ ᠪᠠᠢᠭᠠᠳ ᠰᠤᠷᠬᠤ ᠶ᠋ᠢᠨ ᠳᠤᠮᠳᠠ ᠪᠠᠨ ᠵᠢᠭᠠᠨ᠎ᠠ ᠪᠢᠵᠡ ᠳᠡ᠂ ᠣᠳᠣ ᠪᠣᠯ ᠠᠵᠢᠯ ᠴᠢᠮ᠎ᠠ ᠶ᠋ᠢ ᠰᠣᠩᠭᠣᠬᠤ ᠠ᠋ᠴᠠ ᠪᠢᠰᠢ᠂ ᠬᠠᠷᠢᠨ ᠴᠢᠮ᠎ᠠ ᠳ᠋ᠤ᠌ ᠰᠢᠯᠢᠵᠦ ᠰᠣᠩᠭᠣᠬᠤ ᠡᠷᠬᠡ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ᠃ ᠡᠨᠡ ᠠᠵᠢᠯ ᠤ᠋ᠨ ᠪᠠᠢᠷᠢ ᠳᠡᠭᠡᠷ᠎ᠡ ᠪᠡᠨ ᠠᠵᠢᠯᠯᠠᠬᠤ ᠰᠠᠨᠠᠭ᠎ᠠ ᠲᠠᠢ ᠪᠣᠯ ᠮᠠᠷᠭᠠᠰᠢ ᠎ᠠ᠋ᠴᠠ ᠲᠣᠬᠢᠷᠠᠭᠤᠯᠤᠯᠲᠠ ᠶᠣᠰᠣᠭᠠᠷ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠣᠷᠣ ᠭᠡᠳ ᠵᠠᠬᠢᠷᠤᠯ ᠨᠢᠷᠤᠭᠤ ᠪᠠᠨ ᠡᠭᠦᠷᠦᠨ ᠭᠠᠷᠴᠤ ᠶᠠᠪᠤᠯ᠎ᠠ᠃

ᠭᠠᠪᠢᠷ᠎ᠠ᠂ ᠵᠠᠬᠢᠷᠤᠯ ᠤ᠋ᠨ ᠠᠯᠪᠠᠨ ᠭᠡᠷ ᠲᠦ᠍ ᠭᠠᠭᠴᠠᠭᠠᠷ ᠬᠡᠰᠡᠭ ᠮᠡᠯᠡᠷᠡᠨ ᠵᠣᠭᠰᠣᠪᠠ᠃ ᠨᠢᠳᠦᠨ ᠦ᠌ ᠬᠢᠨᠢ ᠠᠶᠠᠭᠠᠨ ᠳ᠋ᠤ᠌ ᠮᠡᠯᠮᠡᠷᠡᠵᠦ ᠪᠠᠢᠭᠰᠠᠨ ᠨᠢᠯᠪᠤᠰᠤᠨ ᠳᠤᠰᠤᠯ ᠪᠣᠰᠤᠭ᠎ᠠ ᠬᠠᠮᠠᠷ ᠢ᠋ ᠨᠢ ᠳᠠᠭᠠᠵᠤ ᠪᠥᠮᠪᠥᠷᠢᠨ ᠤᠨᠠᠪᠠ᠃ ᠲᠡᠷᠡ ᠠᠯᠠᠭ᠎ᠠ ᠪᠠᠷ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠪᠠᠨ ᠲᠦᠷᠭᠡᠨ ᠭᠡᠭᠴᠢ ᠵᠦᠯᠭᠦᠨ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠭᠦᠨ ᠠᠮᠢᠰᠬᠤᠨ ᠦᠯᠦ ᠮᠡᠳᠡᠭ ᠴᠡᠴᠡᠷᠬᠢᠯᠡᠬᠦ ᠪᠡᠶ᠎ᠡ ᠪᠡᠨ ᠲᠣᠭᠲᠠᠭᠠᠨ ᠵᠠᠬᠢᠷᠤᠯ ᠤ᠋ᠨ ᠠᠯᠪᠠᠨ ᠭᠡᠷ ᠡᠴᠡ ᠭᠠᠷᠴᠤ ᠳᠤᠭᠤᠢ ᠪᠠᠨ ᠤᠨᠤᠨ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠵᠢᠷᠢᠢᠯᠭᠡᠪᠡ ᠃ ᠲᠡᠷᠡ᠂ ᠥᠪᠡᠷ ᠦ᠋ᠨ ᠳᠤᠷ᠎ᠠ ᠪᠠᠬ᠎ᠠ ᠲᠠᠢ ᠬᠡᠯᠡᠨ ᠦ᠌ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠰᠤᠨ ᠲᠤᠷᠰᠢᠲᠠ ᠠᠵᠢᠯᠯᠠᠬᠤ ᠡᠷᠬᠡ ᠪᠡᠨ ᠡᠢᠨ ᠬᠦ᠌ ᠬᠠᠰᠤᠭᠳᠠᠵᠤ᠂ ᠥᠪᠡᠷ ᠲᠦ᠍ ᠨᠢ ᠣᠭᠲᠣ ᠬᠠᠮᠢᠶᠠᠳᠠᠬᠤ ᠦᠭᠡᠢ ᠰᠢᠨ᠎ᠡ ᠨᠢᠭᠡᠨ ᠵᠦᠢᠯ ᠢ᠋ ᠡᠬᠢᠨ ᠡᠴᠡ ᠨᠢ ᠡᠬᠢᠯᠡᠵᠦ ᠬᠢᠬᠦ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠤᠬᠠᠭᠠᠷᠠᠪᠠ᠃

ᠭᠠᠪᠢᠷ᠎ᠠ ᠬᠣᠵᠢᠮ ᠣᠯᠠᠨ ᠳᠠᠷᠤᠭ᠎ᠠ ᠵᠠᠬᠢᠷᠤᠯ ᠤ᠋ᠨ ᠭᠠᠷ ᠳᠣᠣᠷ᠎ᠠ ᠠᠵᠢᠯᠯᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠤᠳᠤᠷᠢᠳᠤᠯᠭ᠎ᠠ ᠪᠣᠯᠣᠭᠰᠠᠳ ᠶᠡᠷᠦᠨᠢ ᠥᠷᠭᠡᠨ ᠮᠡᠳᠡᠯᠭᠡ ᠲᠡᠢ ᠠᠭᠤᠴᠢ ᠪᠠᠭᠲᠠᠭᠠᠮᠵᠢ ᠲᠠᠢ᠂ ᠠᠪᠬᠠᠯᠵᠢ ᠬᠤᠷᠴᠠ ᠠᠷᠭ᠎ᠠ ᠤᠬᠠᠭᠠᠨ ᠲᠠᠢ᠂ ᠳᠣᠣᠷᠠᠬᠢ ᠬᠥᠮᠦᠰ ᠦ᠋ᠨ ᠢ᠋ᠶ᠋ᠡᠨ ᠴᠢᠳᠠᠪᠤᠷᠢ ᠮᠡᠷᠭᠡᠵᠢᠯ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠬᠥᠮᠦᠨ ᠢ᠋ ᠬᠡᠷᠡᠭᠯᠡᠵᠦ ᠴᠢᠳᠠᠳᠠᠭ ᠬᠥᠮᠦᠨ ᠰᠠᠶᠢ ᠭᠠᠷᠮᠠᠭᠠᠢ ᠤᠳᠤᠷᠢᠳᠤᠯᠭ᠎ᠠ ᠳ᠋ᠤ᠌ ᠲᠣᠭᠠᠴᠠᠭᠳᠠᠨ᠎ᠠ᠃ ᠬᠠᠷᠢᠨ ᠠᠰᠢᠭ ᠬᠣᠨᠵᠢᠶ᠎ᠠ ᠬᠠᠷᠠᠵᠤ ᠶᠠᠪᠤᠳᠠᠭ᠂ ᠴᠢᠬᠢ ᠵᠥᠭᠡᠯᠡᠨ ᠨᠢᠳᠦ ᠪᠠᠯᠠᠷᠬᠠᠢ ᠮᠡᠳᠡᠯᠭᠡ ᠮᠡᠬᠦᠰ ᠥᠪᠡᠷ ᠡᠴᠡ ᠪᠡᠨ ᠳᠣᠣᠭᠤᠷ ᠳᠠᠷᠤᠭ᠎ᠠ ᠶ᠋ᠢᠨ ᠳᠣᠣᠷ᠎ᠠ ᠠᠵᠢᠯᠯᠠᠬᠤ ᠰᠢᠭ᠋ ᠭᠤᠲᠤᠮᠰᠢᠭ ᠲᠠᠢ ᠵᠦᠢᠯ ᠦᠭᠡᠢ ᠭᠡᠮᠡᠨ ᠪᠣᠳᠣᠳᠠᠭ ᠪᠣᠯᠵᠠᠢ᠃

ᠭᠠᠪᠢᠷ᠎ᠠ ᠰᠥᠨᠢᠵᠢᠨ ᠨᠣᠢᠷ ᠦᠭᠡᠢ ᠣᠯᠠᠨ ᠶᠠᠭᠤᠮ᠎ᠠ ᠪᠣᠳᠣᠵᠤ ᠥᠩᠭᠡᠷᠡᠭᠦᠯᠪᠡ᠃ ᠰᠢᠨ᠎ᠡ ᠵᠦᠢᠯ ᠢ᠋ ᠡᠬᠢᠯᠡᠵᠦ ᠰᠤᠷᠴᠤ ᠮᠡᠳᠡᠬᠦ ᠨᠢ ᠭᠠᠪᠢᠷ᠎ᠠ ᠳ᠋ᠤ᠌ ᠲᠡᠢᠮᠦ ᠴᠦ᠍ ᠪᠣᠯᠤᠮᠵᠢ ᠦᠭᠡᠢ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ᠂ ᠠᠷᠠᠢ ᠴᠤ᠌ ᠵᠠᠬᠢᠷᠤᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠰᠢᠭ ᠵᠠᠭᠤᠨ ᠤ᠋ ᠳᠠᠯᠠ ᠶ᠋ᠢᠨ ᠴᠠᠯᠢᠩ ᠠᠪᠤᠭᠠᠳ ᠰᠠᠭᠤᠴᠢᠬᠠᠬᠤ ᠪᠠᠷ ᠦᠭᠡᠢ᠃ ᠲᠡᠷᠡ ᠦᠶ᠎ᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠴᠠᠯᠢᠩ ᠳᠥᠩᠭᠡᠵᠦ ᠬᠣᠶᠠᠷ ᠵᠠᠭᠤ ᠨᠠᠶᠠᠨ ᠲᠥᠭᠥᠷᠢᠭ ᠪᠠᠢᠵᠠᠢ᠃ ᠬᠣᠶᠠᠷ ᠵᠠᠭᠤ ᠨᠠᠶᠠᠨ ᠲᠥᠭᠥᠷᠢᠭ ᠦ᠋ᠨ ᠵᠠᠭᠤᠨ ᠤ᠋ ᠳᠠᠯᠠ ᠭᠡᠳᠡᠭ ᠴᠢᠨᠢ ᠬᠡᠳᠦᠢᠬᠡᠨ ᠵᠣᠭᠣᠰ ᠦᠯᠡᠳᠡᠬᠦ ᠪᠢᠯᠡ! ᠵᠠᠬᠢᠷᠤᠯ ᠭᠤᠸᠠᠢ ᠮᠥᠨ ᠴᠦ᠍ ᠦᠭᠡ ᠶ᠋ᠢ ᠣᠯᠵᠤ ᠬᠡᠯᠡᠬᠦ ᠶᠦᠮ ᠳᠡ ᠭᠡᠮᠡᠨ ᠪᠣᠳᠣᠭᠠᠳ ᠭᠠᠪᠢᠷ᠎ᠠ ᠶ᠋ᠢᠨ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠦᠨ᠎ᠡ᠃ ᠨᠢᠭᠡᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠳ᠋ᠤ᠌ ᠠᠯᠢ ᠨᠢᠭᠡ ᠤᠯᠤᠰ ᠤ᠋ᠨ ᠠᠵᠢᠯᠲᠠᠨ ᠢ᠋ ᠪᠠᠭᠤᠯᠭᠠᠨ᠎ᠠ ᠭᠡᠪᠡᠯ ᠪᠠᠭᠤᠯᠭᠠᠴᠢᠬᠠᠳᠠᠭ ᠲᠡᠢᠮᠦ ᠲᠣᠮᠣ ᠡᠷᠬᠡ ᠮᠠᠲᠠᠯ ᠭᠡᠵᠦ ᠦᠭᠡᠢ ᠰᠢᠦ ᠳᠡ᠃ ᠵᠥᠪᠬᠡᠨ ᠪᠠᠭᠰᠢ ᠶ᠋ᠢᠨ ᠬᠠᠤᠯᠢ ᠴᠠᠭᠠᠵᠠ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠦᠷᠢᠮ ᠲᠣᠭᠲᠠᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠦᠷᠢᠶ᠎ᠡ ᠬᠡᠪᠴᠢᠶᠡᠨ ᠦ᠌ ᠳᠣᠲᠣᠷ᠎ᠠ ᠬᠦᠨᠳᠦ ᠨᠣᠴᠢᠲᠠᠢ ᠠᠯᠳᠠᠭ᠎ᠠ ᠭᠠᠷᠭᠠᠭᠰᠠᠨ ᠪᠠᠭᠰᠢ ᠪᠠᠢᠬᠤ ᠳ᠋ᠤ᠌ ᠬᠦᠷᠪᠡᠯ ᠳᠣᠩᠭᠣᠳᠴᠤ ᠰᠢᠳᠬᠡᠬᠦ ᠯᠡ ᠡᠷᠬᠡ ᠲᠡᠢ᠃ ᠭᠡᠬᠦ ᠳ᠋ᠦ᠍ ᠭᠠᠪᠢᠷ᠎ᠠ ᠶᠠᠮᠠᠷᠴᠤ ᠪᠤᠷᠤᠭᠤ ᠶᠠᠭᠤᠮ᠎ᠠ ᠬᠢᠭᠡ ᠦᠭᠡᠢ ᠰᠢᠦ ᠳᠡ᠃

ᠳᠠᠷᠠᠭ᠎ᠠ ᠥᠷᠯᠥᠭᠡ ᠨᠢ ᠭᠠᠪᠢᠷ᠎ᠠ ᠠᠯᠪᠠᠨ ᠭᠡᠷ ᠲᠡᠭᠡᠨ ᠢᠷᠡᠵᠦ ᠰᠢᠨ᠎ᠡ ᠣᠷᠣᠬᠤ ᠬᠢᠴᠢᠶᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠡᠯᠡᠳᠬᠡᠯ ᠢ᠋ ᠪᠢᠴᠢᠵᠦ ᠰᠠᠭᠤᠲᠠᠯ᠎ᠠ ᠯᠦᠩᠲᠠᠩ ᠰᠢᠷᠦᠭᠦᠨ ᠬᠠᠷ᠎ᠠ ᠨᠢᠳᠦ ᠪᠡᠨ ᠵᠠᠯᠢᠷᠬᠠᠭ ᠴᠠᠪᠴᠢᠯᠠᠨ ᠢᠨᠢᠶᠡᠭᠰᠡᠭᠡᠷ ᠣᠷᠣᠵᠤ ᠢᠷᠡᠨ

— ᠴᠢᠮ᠎ᠠ ᠶ᠋ᠢ ᠰᠤᠯᠠ ᠬᠢᠴᠢᠶᠡᠯ ᠦ᠋ᠨ ᠪᠠᠭᠰᠢ ᠪᠣᠯᠭᠠᠴᠢᠬᠠᠨ᠎ᠠ ᠭᠡᠳᠡᠭ ᠴᠢᠨᠢ ᠬᠡᠳᠦᠢ ᠣᠯᠢᠭ ᠦᠭᠡᠢ ᠪᠣᠢ? ᠭᠡᠮᠡᠨ ᠠᠶ᠎ᠠ ᠶᠠᠩ ᠲᠡᠳᠡᠨ ᠬᠡᠯᠡᠨ᠎ᠡ᠃ ᠭᠠᠪᠢᠷ᠎ᠠ᠂ ᠲᠡᠭᠦᠨ ᠢ᠋ ᠠᠰ ᠰᠢᠷᠳᠡᠭᠰᠡᠭᠡᠷ

— ᠴᠢᠮ᠎ᠠ ᠳ᠋ᠤ᠌ ᠲᠡᠭᠡᠵᠦ ᠰᠠᠨᠠᠭᠳᠠᠵᠤ ᠪᠠᠢᠨ᠎ᠠ ᠤᠤ? ᠭᠡᠮᠡᠨ ᠶᠣᠵᠣᠲᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃

ᠬᠣᠯᠬᠢᠶ᠎ᠠ ᠮᠧᠳᠡᠭᠮ᠎ᠡ ᠴᠦ᠍ ᠣᠷᠣᠭᠠᠳ ᠢᠷᠡᠴᠢᠬᠡᠭᠰᠡᠨ

— ᠬᠠᠢᠷᠠᠨ ᠬᠡᠯᠡᠨ ᠦ᠌ ᠪᠠᠭᠰᠢ ᠶ᠋ᠢ ᠥᠭᠡᠢᠬᠢᠵᠦ ᠪᠠᠢᠨ᠎ᠠ ᠰᠢᠦ᠂ ᠮᠠᠨ ᠤ᠋ ᠡᠨᠡ ᠳᠠᠷᠤᠭ᠎ᠠ ᠭᠡᠵᠢ ᠳᠡ ᠭᠡᠨ᠎ᠡ᠃

— ᠬᠠᠷᠢᠨ ᠰᠢᠲᠠ᠂ ᠮᠢᠨᠦ ᠲᠡᠷᠡ ᠡᠭᠳᠡᠭᠦᠦ ᠬᠦᠷᠦᠭᠰᠡᠨ ᠭᠡᠵᠢ ᠠ᠋᠃ ᠶᠠᠭ ᠴᠢᠨᠦ ᠡᠮᠦᠨ᠎ᠡ ᠡᠴᠡ ᠬᠡᠳᠦᠨ ᠦᠭᠡ ᠬᠡᠯᠡᠶ᠎ᠡ ᠭᠡᠵᠦ ᠪᠠᠢᠲᠠᠯ᠎ᠠ ᠬᠤᠷᠠᠯ ᠲᠠᠷᠬᠠᠴᠢᠬᠠᠬᠤ ᠶᠤᠮ ᠪᠢᠯᠡ ᠭᠡᠰᠡᠨ ᠨᠢ ᠬᠣᠷᠯᠣᠮ᠎ᠠ ᠪᠠᠢᠪᠠ᠃ ᠠᠯᠢ ᠵᠠᠪ ᠲᠤᠨᠢ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠪᠦᠦ ᠮᠡᠳᠡ᠂《ᠬᠠᠭᠠᠷᠬᠠᠢ》 ᠴᠤ᠌ ᠪᠠᠰᠠ ᠢᠷᠡᠴᠢᠬᠡᠭᠡᠳ ᠬᠥᠭ ᠨᠡᠮᠡᠨ ᠬᠠᠩᠭᠢᠨᠠᠵᠤ ᠪᠠᠢᠯ᠎ᠠ᠃ ᠭᠠᠪᠢᠷ᠎ᠠ ᠲᠡᠳᠡᠨ ᠢ᠋ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ ᠶᠣᠵᠣᠯᠠᠩᠭᠤᠢ ᠢᠨᠢᠶᠡᠭᠡᠳ

— ᠲᠠᠨᠠᠷ ᠲᠤ᠌ ᠪᠠᠶᠠᠷᠯᠠᠯ᠎ᠠ! ᠨᠠᠳᠠᠳᠤ ᠲᠠᠨᠠᠷ ᠰᠢᠭ᠋ ᠡᠢᠮᠦ ᠰᠠᠢᠨ ᠬᠠᠮᠲᠤ ᠨᠥᠬᠥᠳ ᠪᠠᠢᠬᠤ ᠶᠤᠮ ᠴᠢᠨᠢ ᠶᠠᠭᠤᠨ᠎ ᠠᠴᠠ ᠠᠶᠤᠬᠤ ᠪᠢᠯᠡ ᠳᠠ᠃ ᠡᠷᠳᠡᠮ ᠮᠡᠳᠡᠯᠭᠡ ᠳ᠋ᠦ᠍ ᠭᠣᠣᠯ ᠳᠡᠳ᠋ ᠦ᠋ᠨ ᠢᠯᠭᠠᠭ᠎ᠠ ᠭᠡᠵᠦ ᠦᠭᠡᠢ᠃ ᠪᠠᠢᠭᠠᠯᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠬᠡᠷᠡᠭ ᠦᠭᠡᠢ ᠬᠢᠴᠢᠶᠡᠯ ᠣᠭᠲᠣ ᠪᠢᠰᠢ ᠳᠡ᠂ ᠲᠤᠩ ᠴᠢᠬᠤᠯᠠ ᠬᠢᠴᠢᠶᠡᠯ ᠲᠥᠷᠥᠯ ᠳ᠋ᠦ᠍ ᠪᠠᠭᠲᠠᠨ᠎ᠠ᠂ ᠨᠠᠳᠠ ᠨᠢᠭᠡ ᠶᠡᠬᠡ ᠬᠣᠬᠢᠷᠠᠭᠰᠠᠨ ᠶᠠᠭᠤᠮ᠎ᠠ ᠴᠤ᠌ ᠠᠯᠠᠭ᠎ᠠ ᠯᠠ ᠳᠠ ᠭᠡᠪᠡ᠃ ᠣᠩᠭᠢᠷᠠᠭ᠎ᠠ ᠮᠧᠳᠡᠭᠮ᠎ᠡ ᠭᠤᠸᠠᠢ ᠥᠪᠡᠷ ᠦ᠋ᠨ ᠭᠤᠴᠢ ᠰᠢᠬᠠᠮ ᠵᠢᠯ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠣᠯᠵᠤ ᠬᠡᠯᠡ ᠪᠢᠴᠢᠭ ᠵᠢᠭᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠥᠰᠬᠡᠭᠡᠨ ᠲᠦᠰᠬᠡᠭᠡᠨ ᠲᠡᠢ ᠶᠠᠷᠢᠵᠤ᠂

— ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠣᠯᠬᠤ ᠶᠠᠭᠤ ᠨᠢ ᠰᠠᠢᠨ ᠭᠡᠵᠦ? ᠢᠯᠡᠭᠦᠦ ᠳ᠋ᠡᠭᠡᠨ ᠵᠣᠪᠠᠬᠤ ᠶ᠋ᠢᠨ ᠨᠡᠮᠡᠷᠢ᠃ ᠦᠨᠡᠨᠳᠡᠭᠡᠨ ᠪᠢ ᠴᠦ᠍ ᠭᠡᠰᠡᠨ ᠰᠤᠯᠠ ᠬᠢᠴᠢᠶᠡᠯ ᠣᠷᠣᠮᠠᠷ ᠪᠠᠢᠨ᠎ᠠ᠃ ᠭᠡᠲᠡᠯ᠎ᠡ ᠡᠨᠡ ᠳᠠᠷᠤᠭ᠎ᠠ ᠨᠠᠷ ᠴᠢᠨᠢ ᠵᠠᠪᠠᠯ ᠨᠠᠳᠠᠳᠤ ᠠᠩᠭᠢ ᠥᠭᠭᠦᠭᠡᠳ ᠪᠠᠢᠬᠤ ᠶᠤᠮ ᠭᠡᠨ᠎ᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠭᠠᠪᠢᠷ᠎ᠠ ᠶᠡᠬᠡᠯ᠎ᠡ ᠢᠨᠢᠶᠡᠵᠦ

— ᠲᠠᠨ ᠰᠢᠭ᠋ ᠰᠣᠳᠣᠨ ᠪᠠᠭᠰᠢ ᠶ᠋ᠢ ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠂ ᠨᠠᠳᠠ ᠰᠢᠭ᠋ ᠪᠣᠯᠤᠭᠰᠠᠨ ᠪᠣᠯ ᠠᠯᠢ ᠬᠡᠳᠦᠢᠨ ᠰᠤᠯᠠ ᠬᠢᠴᠢᠶᠡᠯ ᠵᠢᠭᠠᠯᠭᠠᠬᠤ ᠪᠤᠶᠤ ᠵᠠᠭᠤᠨ ᠤ᠋ ᠳᠠᠯᠠ ᠶ᠋ᠢᠨ ᠴᠠᠯᠢᠩ ᠢ᠋ᠶ᠋ᠠᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠰᠠᠭᠤᠴᠢᠬᠠᠬᠤ ᠦᠭᠡᠢ ᠤᠤ ᠳᠠ ᠭᠡᠮᠡᠨ ᠶᠥᠭᠡᠳᠡᠪᠡ᠃

ᠲᠡᠷᠡ ᠬᠡᠳᠦᠭᠦᠯᠡ ᠬᠤᠳᠠᠯ ᠢᠨᠢᠶᠡᠵᠦ ᠬᠠᠭᠤᠷᠮᠠᠴᠢ ᠦᠭᠡᠰ ᠪᠠᠬᠠᠨ ᠬᠡᠯᠡᠭᠡᠳ ᠭᠠᠷᠴᠤ ᠶᠠᠪᠤᠪᠠ᠃

ᠭᠠᠪᠢᠷ᠎ᠠ ᠲᠡᠳᠡᠨ ᠦ᠌ ᠠᠷᠤ ᠠ᠋ᠴᠠ ᠨᠢ ᠡᠭᠳᠡᠭᠦᠴᠡᠩᠭᠦᠢ ᠬᠠᠷᠠᠵᠤ ᠬᠣᠴᠣᠷᠬᠤ ᠳ᠋ᠠᠭᠠᠨ ᠨᠡᠭᠡᠷᠡᠨ ᠴᠦ᠍ ᠰᠢ ᠶ᠋ᠢᠨ ᠳᠣᠲᠣᠷᠠᠬᠢ ᠠᠯᠠᠭ ᠴᠢᠷᠠᠢᠲᠤ ᠰᠢᠭ᠋ ᠠᠷᠪᠠᠨ ᠭᠤᠷᠪᠠᠨ ᠶᠠᠩᠵᠤ ᠪᠠᠷ ᠬᠤᠪᠢᠷᠠᠨ ᠵᠦᠴᠦᠭᠡᠯᠡᠬᠦ ᠶᠦᠮ ᠳᠡ᠂ ᠥᠪᠡᠷ ᠲᠦ᠋ᠨᠢ ᠲᠡᠭᠡᠭᠡᠳ ᠶᠠᠭᠤ ᠣᠯᠳᠠᠳᠠᠭ ᠶᠤᠮ ᠪᠣᠯ ᠭᠡᠮᠡᠨ ᠪᠣᠳᠣᠪᠠ᠃ ᠭᠠᠪᠢᠷ᠎ᠠ ᠦᠨᠡᠨ ᠳ᠋ᠡᠭᠡᠨ ᠡᠳᠡᠨᠥᠰ ᠲᠦ᠍ ᠶᠠᠮᠠᠷ ᠴᠤ᠌ ᠬᠣᠣᠷ ᠬᠣᠨᠵᠢᠩ ᠢ᠋ ᠨᠢ ᠬᠥᠳᠡᠯᠭᠡᠮᠡᠷ ᠮᠠᠭᠤ ᠶᠠᠭᠤᠮ᠎ᠠ ᠬᠢᠭᠡ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠬᠢᠨᠢ ᠬᠥᠮᠦᠨ ᠪᠣᠯᠬᠤ ᠵᠠᠷᠴᠢᠮ ᠲᠠᠢ᠃ ᠲᠡᠷᠡ ᠪᠣᠯ ᠥᠪᠡᠷ ᠦ᠋ᠨ ᠮᠡᠳᠡᠳᠡᠭ᠂ ᠮᠡᠳᠡᠳᠡᠭ ᠦᠭᠡᠢ ᠪᠡᠨ ᠦᠨᠡᠨ ᠬᠦ᠌ ᠮᠡᠳᠡᠳᠡᠭ ᠬᠥᠮᠦᠨ᠃ ᠬᠥᠮᠦᠨ ᠨᠡᠢᠭᠡᠮ ᠦ᠋ᠨ ᠡᠷᠢᠶᠡᠨ ᠪᠠᠷᠠᠭᠠᠨ ᠳᠤᠮᠳᠠ ᠥᠪᠡᠷ ᠢ ᠪᠡᠨ ᠠᠪᠴᠤ ᠭᠠᠷᠬᠤ ᠠᠪᠬᠠᠯᠵᠢ ᠰᠡᠷᠭᠦᠯᠡᠩ ᠤᠬᠠᠭᠠᠨ ᠪᠣᠳᠣᠯ᠂ ᠨᠤᠭᠤᠷᠠᠯ ᠪᠦᠳᠦᠷᠢᠯ ᠢ᠋ ᠲᠡᠪᠴᠢᠵᠦ ᠴᠢᠳᠠᠬᠤ ᠲᠡᠰᠪᠦᠷᠢ ᠵᠣᠷᠢᠭ ᠲᠠᠢ ᠮᠥᠷᠲᠡᠭᠡᠨ ᠪᠡᠶ᠎ᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠮᠡᠳᠡᠯᠭᠡ ᠪᠣᠯᠪᠠᠰᠤᠷᠠᠯ ᠲᠠᠢ ᠬᠥᠮᠦᠨ ᠳ᠋ᠦ᠍ ᠲᠣᠭᠠᠴᠠᠭᠳᠠᠨ᠎ᠠ᠃ ᠶᠠᠭ ᠡᠨᠡᠬᠦ ᠳᠠᠪᠠᠭᠤᠯᠢᠭ ᠲᠠᠯ᠎ᠠ ᠨᠢ ᠬᠡᠵᠢᠶᠡᠳᠡ ᠪᠤᠰᠤᠳ ᠤ᠋ᠨ ᠠᠲᠠᠭ᠎ᠠ ᠵᠢᠲᠥᠭᠡ ᠶ᠋ᠢ ᠬᠦᠷᠭᠡᠳᠡᠭ ᠴᠦ᠍ ᠪᠢᠯᠡ ᠤᠤ? ᠮᠠᠭᠠᠳ ᠦᠭᠡᠢ᠃ ᠲᠡᠭᠦᠨ ᠦ᠌ ᠬᠡᠭᠡᠨᠴᠢᠷ ᠶᠡᠬᠡᠮᠰᠦᠭ ᠳᠦᠷᠢ ᠲᠥᠷᠬᠦ᠂ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠦᠯᠦ ᠨᠢᠴᠤᠭᠠᠭᠳᠠᠬᠤ ᠪᠠᠬᠠᠨ ᠣᠮᠣᠷᠬᠠᠭ ᠰᠣᠷᠲᠣᠭᠣ ᠲᠠᠢ ᠵᠠᠩ᠎ ᠠ᠋ᠴᠠ ᠨᠢ ᠪᠣᠯᠤᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠬᠦ ᠶᠦᠮ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠠᠪᠢᠷ᠎ᠠ ᠳ᠋ᠤ᠌ ᠢᠯᠡ ᠳᠠᠯᠳᠠ《ᠳᠠᠢᠰᠤᠨ》 ᠬᠠᠮᠢᠭ᠎ᠠ ᠶᠠᠪᠤᠭᠰᠠᠨ ᠴᠤ᠌ ᠲᠠᠭᠠᠯᠴᠠᠵᠤ ᠪᠠᠢᠳᠠᠭ ᠨᠢ ᠪᠣᠳᠠᠲᠤ ᠦᠨᠡᠨ᠃

ᠭᠠᠪᠢᠷ᠎ᠠ ᠶ᠋ᠢᠨ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠶ᠋ᠢ ᠠᠪᠴᠤ ᠬᠡᠯᠡ ᠪᠢᠴᠢᠭ ᠦ᠋ᠨ ᠬᠢᠴᠢᠶᠡᠯ ᠢ᠋ ᠣᠷᠣᠭᠤᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠣᠯᠠᠩᠬᠢ ᠪᠠᠭᠰᠢᠨᠠᠷ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠳᠤᠷ᠎ᠠ ᠦᠭᠡᠢ ᠪᠠᠢᠯ᠎ᠠ᠃ ᠭᠡᠷ ᠦ᠋ᠨ ᠠᠬᠠᠮᠠᠳ ᠨᠠᠷ ᠴᠤ᠌《ᠲᠡᠢᠮᠦ ᠰᠠᠢᠬᠠᠨ ᠵᠢᠭᠠᠳᠠᠭ ᠪᠠᠭᠰᠢ ᠶ᠋ᠢ ᠰᠣᠯᠢᠴᠢᠬᠠᠯ᠎ᠠ》 ᠭᠡᠳ ᠰᠤᠷᠭᠠᠭᠤᠯᠢ ᠶ᠋ᠢ ᠡᠷᠢᠵᠦ ᠪᠠᠢᠭᠰᠠᠨ ᠴᠤ᠌ ᠤᠳᠠᠭ᠎ᠠ ᠲᠠᠢ᠃ ᠲᠡᠭᠡᠪᠡᠴᠦ ᠵᠠᠬᠢᠷᠤᠯ ᠭᠤᠸᠠᠢ ᠥᠪᠡᠷ ᠦ᠋ᠨ ᠰᠠᠨᠠᠭ᠎ᠠ ᠪᠠᠨ ᠬᠤᠪᠢᠷᠠᠭᠤᠯᠤᠭᠰᠠᠨ ᠦᠭᠡᠢ᠃ ᠪᠠᠭᠰᠢ ᠪᠣᠯᠤᠭᠰᠠᠨ ᠡᠴᠡ ᠪᠡᠨ ᠨᠠᠰᠢ ᠠᠷᠪᠠᠨ ᠲᠠᠪᠤᠨ ᠵᠢᠯ ᠠᠩᠭᠢ ᠡᠷᠬᠢᠯᠡᠵᠦ ᠬᠡᠯᠡ ᠪᠢᠴᠢᠭ ᠵᠢᠭᠠᠭᠰᠠᠨ ᠭᠠᠪᠢᠷ᠎ᠠ ᠡᠢᠨ ᠬᠦ᠌ ᠥᠪᠡᠷ ᠦ᠋ᠨ ᠰᠤᠷᠤᠭᠰᠠᠨ ᠮᠡᠷᠭᠡᠵᠢᠯ ᠢ᠋ᠶ᠋ᠡᠨ ᠣᠷᠬᠢᠵᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠵᠢᠭᠠᠳᠠᠭ ᠲᠤᠰᠬᠠᠢ ᠪᠠᠭᠰᠢ ᠪᠣᠯᠤᠭᠰᠠᠨ ᠪᠠᠢᠯ᠎ᠠ᠃ ᠡᠨᠡ ᠨᠢ ᠲᠡᠭᠦᠨ ᠳ᠋ᠦ᠍ ᠲᠡᠳᠦᠢ ᠴᠦ᠍ ᠬᠣᠬᠢᠷᠠᠯ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠦᠭᠡᠢ᠂ ᠲᠡᠷᠡ ᠵᠢᠭᠠᠳᠠᠭ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠵᠢᠭᠠᠬᠤ ᠶ᠋ᠢᠨ ᠳᠠᠭᠠᠤ ᠳ᠋ᠤ᠌ ᠨᠣᠮ ᠵᠣᠬᠢᠶᠠᠯ ᠤᠩᠰᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠩᠰᠢᠵᠤ᠂ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠣᠷᠣᠯᠳᠣᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠤᠯᠳᠤᠵᠤ ᠶᠠᠪᠤᠨ᠎ᠠ᠃ ᠰᠢᠨ᠎ᠡ ᠡᠬᠢᠯᠡᠵᠦ ᠵᠢᠭᠠᠭᠰᠠᠨ ᠬᠢᠴᠢᠶᠡᠯ ᠲᠥᠷᠥᠯ ᠦ᠋ᠨ ᠢ᠋ᠶ᠋ᠡᠨ ᠲᠠᠯ᠎ᠠ ᠪᠠᠷ ᠰᠤᠷᠬᠤ ᠭᠡᠵᠦ ᠲᠡᠷᠡ ᠬᠤᠰᠢᠭᠤᠨ ᠤ᠋ ᠪᠠᠨ ᠬᠡᠳᠦᠨ ᠤᠳᠠᠭᠠᠨ ᠤ᠋ ᠲᠤᠰᠬᠠᠢ ᠪᠣᠯᠪᠠᠰᠤᠷᠠᠯ ᠳ᠋ᠤ᠌ ᠣᠷᠣᠵᠤ ᠮᠡᠳᠡᠯᠭᠡ ᠪᠡᠨ ᠳᠡᠭᠡᠭᠰᠢᠯᠡᠭᠦᠯᠬᠦ ᠳᠠᠪᠲᠠᠯᠲᠠ ᠬᠢᠵᠡᠢ᠃

ᠶᠡᠷᠡᠭᠡᠳ ᠣᠨ ᠤ᠋ ᠳᠤᠮᠳᠠ ᠦᠶ᠎ᠡ ᠪᠣᠯᠬᠤ ᠳ᠋ᠤ᠌ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠦᠢᠯᠡᠰ ᠲᠦ᠍ ᠵᠥᠩᠳᠡᠭᠡᠨ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠴᠤ ᠲᠥᠷᠥᠯ ᠪᠦᠬᠦᠨ ᠢ᠋ ᠬᠦᠨᠳᠦᠳᠬᠡᠨ ᠦᠵᠡᠵᠦ ᠬᠢᠴᠢᠶᠡᠯ ᠪᠦᠬᠦᠨ ᠢ᠋ ᠨᠢᠭᠡᠳᠦᠯᠲᠡᠢ ᠰᠢᠯᠭᠠᠯᠲᠠ ᠳ᠋ᠤ᠌ ᠣᠷᠣᠭᠤᠯᠵᠤ ᠰᠢᠯᠭᠠᠳᠠᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠨᠡᠩ ᠢᠯᠠᠩᠭᠤᠶ᠎ᠠ ᠪᠠᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠢᠴᠢᠶᠡᠯ ᠢ᠋ ᠴᠢᠬᠤᠯᠠ ᠨᠢᠭᠡᠨ ᠬᠢᠴᠢᠶᠡᠯ ᠲᠥᠷᠥᠯ ᠪᠣᠯᠭᠠᠨ ᠲᠤᠰᠬᠠᠢ ᠪᠠᠭᠰᠢᠨᠠᠷ ᠢ᠋ ᠲᠣᠮᠢᠯᠠᠨ ᠰᠤᠷᠤᠯᠴᠠᠭᠤᠯᠬᠤ ᠪᠠᠷ ᠪᠣᠯᠤᠭᠰᠠᠨ ᠪᠠᠢᠯ᠎ᠠ᠃ ᠡᠨᠡ ᠨᠢ ᠤᠤᠯ ᠡᠴᠡ ᠪᠡᠨ ᠰᠤᠷᠴᠤ ᠮᠡᠳᠡᠬᠦ ᠳ᠋ᠦ᠍ ᠪᠠᠬᠠᠲᠠᠢ ᠭᠠᠪᠢᠷ᠎ᠠ ᠳ᠋ᠤ᠌ ᠰᠠᠢᠬᠠᠨ ᠲᠣᠬᠢᠶᠠᠯ ᠣᠯᠭᠤᠵᠠᠢ᠃ ᠡᠭᠦᠨ ᠳ᠋ᠦ᠍ ᠬᠢᠮᠢ᠂ ᠹᠢᠽᠢᠺ᠂ ᠤᠷᠭᠤᠮᠠᠯ᠂ ᠠᠮᠢᠳᠤ ᠪᠣᠳᠠᠰ᠂ ᠹᠢᠽᠢᠣᠯᠣᠭᠢ᠂ ᠣᠳᠣᠨ ᠣᠷᠣᠨ ᠤ᠋ ᠲᠤᠬᠠᠢ ᠬᠠᠮᠤᠭ ᠦᠨᠳᠦᠰᠦᠨ ᠮᠡᠳᠡᠯᠭᠡ ᠶ᠋ᠢᠨ ᠰᠠᠭᠤᠷᠢ ᠬᠢᠴᠢᠶᠡᠯ ᠪᠣᠯᠬᠤ ᠲᠤᠯᠠ ᠥᠷᠭᠡᠨ ᠬᠦᠷᠢᠶ᠎ᠡ ᠬᠡᠪᠴᠢᠶᠡᠨ ᠦ᠌ ᠶᠠᠭᠤᠮ᠎ᠠ ᠶ᠋ᠢ ᠮᠡᠳᠡᠭᠰᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃

ᠭᠠᠪᠢᠷ᠎ᠠ᠂ ᠡᠨᠡ ᠬᠢᠴᠢᠶᠡᠯ ᠢ᠋ ᠵᠢᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠠᠢᠮᠠᠭ ᠪᠣᠯᠤᠨ ᠬᠤᠰᠢᠭᠤᠨ ᠤ᠋ ᠪᠠᠨ ᠴᠠᠬᠢᠯᠭᠠᠨᠵᠢᠭᠰᠠᠨ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠢ᠋ ᠬᠠᠮᠢᠶᠠᠷᠳᠠᠭ ᠲᠠᠰᠤᠭ ᠤ᠋ᠨ ᠤᠳᠤᠷᠢᠳᠤᠯᠭ᠎ᠠ ᠪᠠ ᠠᠵᠢᠯᠲᠠᠨ ᠨᠠᠷ ᠤ᠋ᠨ ᠳᠡᠮᠵᠢᠯᠭᠡ ᠪᠡᠷ ᠬᠣᠰᠢᠭᠤ ᠮᠣᠩᠭᠣᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠬᠠᠮᠤᠭ ᠠᠩᠬᠠᠳᠠᠭᠴᠢ ᠪᠠᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠢᠴᠢᠶᠡᠯ ᠦ᠋ᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠢ᠋ ᠡᠭᠦᠰᠬᠡᠨ ᠪᠠᠢᠭᠤᠯᠵᠠᠢ᠃ ᠲᠡᠷᠡ ᠠᠩᠬ᠎ᠠ ᠭᠠᠭᠴᠠ ᠠᠩᠭᠢ ᠳ᠋ᠤ᠌ ᠬᠡᠯᠡᠨ ᠦ᠌ ᠬᠢᠴᠢᠶᠡᠯ ᠣᠷᠣᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ 3—5 ᠣᠨ ᠤ᠋ ᠪᠠᠢᠭᠠᠯᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠣᠷᠣᠳᠠᠭ ᠪᠥᠭᠡᠳ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠤ᠋ᠨ ᠪᠦᠬᠦ ᠠᠵᠢᠯ ᠢ᠋ ᠭᠠᠷᠳᠠᠨ ᠬᠢᠳᠡᠭ ᠡᠴᠡ ᠨᠡᠩ ᠣᠯᠠᠨ ᠠᠵᠢᠯ ᠶᠠᠪᠤᠳᠠᠯ ᠲᠠᠢ ᠪᠣᠯᠤᠯ᠎ᠠ᠃ ᠰᠤᠷᠤᠭᠴᠢᠳ ᠪᠠᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠢᠴᠢᠶᠡᠯ ᠳ᠋ᠦ᠍ ᠮᠠᠰᠢ ᠤᠷᠮ᠎ᠠ ᠪᠠᠬ᠎ᠠ ᠲᠠᠢ᠂ ᠬᠢᠴᠢᠶᠡᠯ ᠪᠦᠬᠦᠨ ᠳ᠋ᠦ᠍ ᠦᠵᠡᠬᠦᠯᠭᠡ ᠲᠤᠷᠰᠢᠯᠲᠠ ᠲᠠᠢ ᠪᠠᠢᠳᠠᠭ᠎ ᠠᠴᠠ ᠰᠤᠷᠤᠭᠴᠢᠳ ᠤ᠋ᠨ ᠰᠣᠨᠢᠭᠤᠴᠢ ᠰᠡᠳᠬᠢᠯ ᠢ᠋ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭ᠎ᠠ ᠦᠭᠡᠢ ᠲᠠᠲᠠᠵᠤ ᠪᠠᠢᠳᠠᠭ᠃ ᠭᠠᠪᠢᠷ᠎ᠠ ᠶᠣᠰᠣᠲᠠᠢ ᠴᠤ᠌ ᠰᠤᠷᠬᠤ ᠶ᠋ᠢᠨ ᠳᠠᠭᠠᠤ ᠵᠢᠭᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠡᠨᠡᠬᠦ ᠠᠵᠢᠯ ᠳ᠋ᠠᠭᠠᠨ ᠮᠠᠰᠢ ᠪᠠᠬ᠎ᠠ ᠲᠠᠢ ᠪᠣᠯᠵᠤ ᠪᠦᠬᠦ ᠣᠶᠤᠨ ᠰᠠᠨᠠᠭ᠎ᠠ᠂ ᠬᠦᠴᠦ ᠬᠥᠳᠡᠯᠮᠦᠷᠢ ᠪᠡᠨ ᠵᠣᠷᠢᠭᠤᠯᠤᠨ ᠭᠠᠷᠮᠠᠭᠠᠢ ᠠᠵᠢᠯᠯᠠᠨ᠎ᠠ᠂ ᠣᠳᠣ ᠲᠡᠷᠡ 1—5 ᠣᠨ ᠤ᠋ ᠪᠦᠬᠦ ᠬᠢᠴᠢᠶᠡᠯ ᠦ᠋ᠨ ᠲᠤᠷᠰᠢᠯᠲᠠ ᠶ᠋ᠢ ᠴᠥᠮ ᠪᠣᠯᠪᠠᠰᠤᠷᠠᠩᠭᠤᠢ ᠬᠢᠵᠦ ᠴᠢᠳᠠᠭᠰᠠᠨ ᠪᠥᠭᠡᠳ ᠲᠤᠷᠰᠢᠯᠲᠠ ᠳ᠋ᠤ᠌ ᠬᠡᠷᠡᠭᠯᠡᠭᠳᠡᠬᠦ ᠲᠣᠮᠣ ᠵᠢᠵᠢᠭ ᠬᠡᠯᠪᠡᠷᠢ ᠶ᠋ᠢᠨ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠶ᠋ᠢᠨ ᠨᠡᠷᠡᠰ ᠢ᠋ ᠲᠣᠷᠬᠤ ᠦᠭᠡᠢ ᠴᠡᠭᠡᠵᠢᠯᠡᠭᠰᠡᠨ ᠪᠠᠢᠯ᠎ᠠ᠃ ᠮᠣᠩᠭᠣᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠢᠴᠢᠶᠡᠯ ᠦ᠋ᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠠᠩᠬ᠎ᠠ ᠪᠠᠢᠭᠤᠯᠤᠭᠳᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠢᠮᠠᠭ ᠬᠤᠰᠢᠭᠤᠨ ᠳ᠋ᠠᠭᠠᠨ ᠨᠡᠷ᠎ᠡ ᠨᠥᠯᠥᠭᠡ ᠲᠡᠢ ᠪᠠᠢᠵᠤ᠂ ᠪᠦᠬᠦ ᠠᠢᠮᠠᠭ ᠤ᠋ᠨ ᠡᠯ᠎ᠡ ᠬᠣᠰᠢᠭᠤ ᠪᠣᠯᠤᠨ ᠦᠨᠳᠦᠰᠦᠨ ᠱᠠᠲᠤᠨ ᠤ᠋ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠤ᠋ᠨ ᠲᠤᠰ ᠬᠢᠴᠢᠶᠡᠯ ᠲᠥᠷᠥᠯ ᠦ᠋ᠨ ᠪᠠᠭᠰᠢᠨᠠᠷ ᠤ᠋ᠨ ᠦᠵᠡᠵᠦ ᠰᠤᠷᠤᠯᠴᠠᠬᠤ ᠭᠣᠣᠯᠳᠠᠯᠭ᠎ᠠ ᠲᠠᠢ ᠴᠢᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠣᠵᠢᠮ ᠨᠢ ᠡᠯ᠎ᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠴᠥᠮ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠲᠠᠢ ᠪᠣᠯᠵᠤ ᠲᠤᠰᠬᠠᠢ ᠪᠠᠭᠰᠢᠨᠠᠷ ᠢ᠋ ᠲᠣᠮᠢᠯᠠᠨ ᠪᠣᠯᠪᠠᠰᠤᠷᠠᠭᠤᠯᠤᠨ ᠰᠤᠷᠤᠯᠴᠠᠭᠤᠯᠵᠤ ᠪᠠᠢᠵᠠᠢ᠃ ᠭᠠᠪᠢᠷ᠎ᠠ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠬᠡᠮᠵᠢᠶᠡᠨ ᠳ᠋ᠦ᠍ ᠣᠯᠠᠨ ᠤᠳᠠᠭ᠎ᠠ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠬᠢᠵᠦ ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠪᠠᠭᠰᠢᠨᠠᠷ ᠲᠠᠢ ᠲᠤᠷᠰᠢᠯᠭ᠎ᠠ ᠰᠤᠷᠭᠠᠮᠵᠢ ᠪᠠᠨ ᠰᠣᠯᠢᠯᠴᠠᠨ ᠠᠮᠵᠢᠯᠲᠠ ᠠᠯᠳᠠᠭᠳᠠᠯ ᠢ᠋ᠶ᠋ᠠᠨ ᠠᠳᠠᠯᠢᠳᠬᠠᠨ ᠳ᠋ᠦᠩᠨᠡᠵᠦ᠂ ᠣᠯᠠᠨ ᠤ᠋ ᠨᠠᠨᠳᠢᠨ ᠰᠠᠨᠠᠯ ᠰᠢᠭᠦᠮᠵᠢ ᠶ᠋ᠢ ᠰᠣᠨᠣᠰᠴᠤ᠂ ᠤᠯᠠᠮ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠡᠨᠡᠬᠦ ᠠᠵᠢᠯ ᠳ᠋ᠠᠭᠠᠨ ᠴᠠᠭᠠᠷᠠᠨ ᠳᠠᠳᠴᠤ ᠪᠠᠢᠯ᠎ᠠ᠃

ᠲᠡᠭᠡᠭᠡᠳ ᠲᠡᠷᠡ ᠠᠩᠬ᠎ᠠ ᠤᠳᠠᠭ᠎ᠠ ᠪᠦᠬᠦ ᠠᠢᠮᠠᠭ ᠤ᠋ᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠤ᠋ᠨ ᠠᠵᠢᠯ ᠤ᠋ᠨ ᠲᠡᠷᠢᠭᠦᠨ ᠦ᠌ ᠠᠵᠢᠯᠲᠠᠨ ᠢ᠋ᠶ᠋ᠠᠷ ᠰᠣᠩᠭᠣᠭᠳᠠᠵᠤ᠂ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠬᠡᠮᠵᠢᠶᠡᠨ ᠳ᠋ᠦ᠍ ᠵᠢᠯ ᠳ᠋ᠦ᠍ ᠨᠢᠭᠡ ᠤᠳᠠᠭ᠎ᠠ ᠶᠠᠪᠤᠭᠳᠠᠳᠠᠭ《ᠬᠦᠰᠡᠯᠡᠩ ᠬᠤᠨᠳᠠᠭᠠᠲᠤ》 ᠪᠠᠢᠭᠠᠯᠢ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠱᠠᠩᠨᠠᠯᠲᠤ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠨᠢᠭᠡᠳᠦᠭᠡᠷ ᠵᠢᠯ ᠳ᠋ᠦ᠍ᠨᠢ ᠲᠡᠷᠢᠭᠦᠨ ᠨᠡᠷ᠎ᠡ ᠶ᠋ᠢ ᠠᠪᠴᠤ ᠳᠠᠷᠠᠭ᠎ᠠ ᠵᠢᠯ ᠳ᠋ᠦ᠍ᠨᠢ ᠬᠣᠶᠠᠳᠤᠭᠠᠷ ᠲᠤ᠌ ᠣᠷᠣᠵᠠᠢ᠃ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠨᠢᠭᠡᠳᠦᠯᠲᠡᠢ ᠰᠢᠯᠭᠠᠯᠲᠠ ᠳ᠋ᠤ᠌ ᠵᠢᠯ ᠳᠠᠷᠠᠭᠠᠯᠠᠨ ᠲᠡᠷᠢᠭᠦᠨ ᠭᠤᠷᠪᠠᠨ ᠨᠡᠷ᠎ᠡ ᠳ᠋ᠦ᠍ ᠣᠷᠣᠳᠠᠭ ᠪᠠᠢᠯ᠎ᠠ᠃ ᠲᠡᠷᠡ ᠥᠪᠡᠷ ᠦ᠋ᠨ ᠰᠢᠨᠳᠠᠰᠤᠯᠢᠭ ᠵᠣᠷᠢᠭ ᠰᠥᠰᠥ᠂ ᠴᠥᠬᠥᠷᠡᠯ ᠦᠭᠡᠢ ᠴᠢᠷᠮᠠᠢᠯᠭ᠎ᠠ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠮᠦᠰ ᠲᠦ᠍ ᠲᠡᠢᠮᠦ ᠴᠦ᠍ ᠬᠢᠯᠪᠠᠷᠬᠠᠨ ᠤᠷᠲᠤ ᠡᠩᠭᠡᠷ ᠲᠡᠭᠡᠨ ᠣᠷᠢᠶᠠᠯᠳᠤᠨ ᠪᠦᠳᠦᠷᠢᠵᠦ ᠣᠢᠴᠢᠳᠠᠭ ᠳᠣᠷᠣᠢ ᠨᠣᠮᠣᠢ ᠪᠦᠰᠡᠭᠦᠢ ᠪᠢᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠠᠩᠬ᠎ᠠ ᠬᠠᠷᠠᠭᠤᠯᠵᠤ ᠴᠢᠳᠠᠵᠠᠢ᠃ ᠭᠡᠪᠡᠴᠦ ᠡᠨᠡ ᠠᠮᠵᠢᠯᠲᠠ ᠲᠡᠢᠮᠦ ᠴᠦ᠍ ᠬᠢᠯᠪᠠᠷ ᠢᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠲᠡᠷᠡ ᠠᠩᠬᠠᠨ ᠤ᠋ ᠵᠢᠯ ᠦ᠋ᠳ ᠲᠡᠭᠡᠨ ᠣᠯᠠᠨ ᠬᠦᠴᠢᠷ ᠲᠦᠪᠡᠭᠳᠡᠯ ᠳ᠋ᠦ᠍ ᠤᠴᠠᠷᠠᠵᠤ᠂ ᠢᠯᠠᠵᠤ ᠢᠯᠠᠭᠳᠠᠬᠤ ᠶ᠋ᠢᠨ ᠰᠤᠷᠭᠠᠮᠵᠢ ᠶ᠋ᠢ ᠣᠯᠠᠨᠲᠠ ᠥᠩᠭᠡᠷᠡᠭᠦᠯᠦᠭᠰᠡᠨ ᠶᠦᠮ᠃ ᠤᠭ ᠨᠢ ᠡᠨᠡᠬᠦ ᠬᠢᠴᠢᠶᠡᠯ ᠲᠥᠷᠥᠯ ᠢ᠋ ᠵᠢᠭᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠶᠡᠷᠦᠩᠬᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠡᠨᠡᠬᠦ ᠬᠢᠴᠢᠶᠡᠯ ᠲᠥᠷᠥᠯ ᠢ᠋ ᠶᠡᠷᠦ ᠬᠦᠨᠳᠦᠳᠬᠡᠵᠦ ᠦᠵᠡᠳᠡᠭ ᠦᠭᠡᠢ ᠵᠦᠭᠡᠷ ᠨᠢᠭᠡ ᠰᠤᠯᠠ ᠬᠢᠴᠢᠶᠡᠯ ᠲᠥᠷᠥᠯ ᠪᠣᠯᠬᠤ ᠲᠤᠯᠠ ᠴᠢᠨᠠᠷ ᠴᠢᠨᠰᠠᠭ᠎ᠠ ᠶ᠋ᠢ ᠣᠮᠲᠣᠭᠠᠢᠯᠠᠵᠤ᠂ ᠵᠢᠭᠠᠭᠰᠠᠨ ᠪᠠᠭᠰᠢᠨᠠᠷ ᠨᠢ ᠶᠠᠮᠠᠷ ᠴᠤ᠌ ᠦᠵᠡᠬᠦᠯᠭᠡ ᠲᠤᠷᠰᠢᠯᠲᠠ ᠶ᠋ᠢᠨ ᠪᠠᠭᠠᠵᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠦᠭᠡᠢ ᠪᠣᠯᠬᠤ ᠲᠤᠩ ᠬᠡᠢᠰᠪᠦᠷᠢ ᠪᠡᠷ ᠴᠠᠭ ᠤ᠋ᠨ ᠬᠢᠴᠢᠶᠡᠯ ᠢ᠋ ᠠᠷᠭᠠᠴᠠᠨ ᠥᠩᠭᠡᠷᠡᠭᠡᠳᠡᠭ ᠪᠥᠭᠡᠳ ᠰᠢᠯᠭᠠᠯᠲᠠ ᠪᠠᠢᠴᠠᠭᠠᠯᠲᠠ ᠶ᠋ᠢ ᠴᠦ᠍ ᠲᠤᠩ ᠰᠤᠯᠠ ᠵᠠᠳᠠᠭᠠᠢ ᠬᠢᠳᠡᠭ ᠡᠴᠡ ᠡᠨᠡᠬᠦ ᠬᠢᠴᠢᠶᠡᠯ ᠲᠥᠷᠥᠯ ᠪᠣᠯ ᠬᠥᠮᠦᠰ ᠦ᠋ᠨ ᠶᠡᠷᠦ ᠳᠡᠮᠡᠢ ᠠᠩᠬᠠᠷᠤᠯ  ᠳ᠋ᠠᠭᠠᠨ ᠠᠪᠴᠤ ᠴᠢᠬᠤᠯᠠᠴᠢᠯᠠᠳᠠᠭ ᠦᠭᠡᠢ ᠠᠭᠤᠯᠭ᠎ᠠ ᠪᠠᠢᠵᠠᠢ᠃

ᠭᠠᠪᠢᠷ᠎ᠠ ᠳ᠋ᠤ᠌ ᠡᠨᠡ ᠬᠦ᠌ ᠬᠢᠴᠢᠶᠡᠯ ᠢ᠋ ᠠᠯᠪᠠᠲᠠᠨ ᠲᠤᠯᠭᠠᠵᠤ ᠥᠭᠭᠦᠭᠰᠡᠨ ᠡᠴᠡ ᠬᠣᠢᠰᠢ ᠡᠬᠢᠨ ᠳ᠋ᠡᠭᠡᠨ ᠶᠠᠭᠠᠬᠢᠵᠤ ᠵᠢᠭᠠᠬᠤ ᠠᠭᠤᠯᠭ᠎ᠠ ᠪᠠᠨ ᠪᠠᠢᠷᠢᠯᠠᠭᠤᠯᠵᠤ ᠪᠡᠯᠡᠳᠬᠡᠯ ᠬᠢᠬᠦ ᠲᠤᠬᠠᠢ ᠶᠡᠬᠡ ᠬᠦᠴᠢᠷᠳᠡᠵᠦ ᠪᠠᠢᠵᠠᠢ᠃ ᠲᠡᠷᠡ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ  ᠶ᠋ᠢᠨ ᠬᠢᠮᠢ᠂ ᠹᠢᠽᠢᠺ ᠠᠮᠢᠳᠤ ᠪᠣᠳᠠᠰ᠂ ᠹᠢᠽᠢᠣᠯᠣᠭᠢ ᠶ᠋ᠢᠨ ᠬᠢᠴᠢᠶᠡᠯ ᠵᠢᠭᠠᠳᠠᠭ ᠪᠠᠭᠰᠢ ᠨᠠᠷ ᠲᠠᠢ ᠬᠠᠷᠢᠯᠴᠠᠵᠤ ᠵᠥᠪᠯᠡᠯᠭᠡ ᠠᠪᠴᠠᠢ᠃ ᠮᠣᠩᠭᠣᠯ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠤᠳᠠᠭᠠᠨ ᠵᠢᠯ ᠬᠢᠮᠢ ᠹᠢᠽᠢᠺ ᠵᠢᠭᠠᠭᠰᠠᠨ ᠬᠠᠰ ᠭᠡᠳᠡᠭ ᠠᠬᠠᠮᠠᠳ ᠪᠠᠭᠰᠢ ᠲᠠᠢ ᠦᠷᠭᠦᠯᠵᠢ ᠬᠠᠷᠢᠴᠠᠵᠤ ᠠᠰᠠᠭᠤᠵᠤ ᠰᠤᠷᠠᠳᠠᠭ ᠪᠢᠯᠡ᠃ ᠬᠠ‍ ᠪᠠᠭᠰᠢ ᠲᠡᠭᠦᠨ ᠳ᠋ᠦ᠍

— ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠢᠭᠠᠯᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠪᠣᠯ ᠮᠠᠰᠢ ᠴᠢᠬᠤᠯᠠ ᠬᠢᠴᠢᠶᠡᠯ ᠲᠥᠷᠥᠯ ᠪᠣᠯᠬᠤ ᠶᠤᠮ ᠠ᠋᠂ ᠲᠡᠷᠡ ᠪᠣᠯ ᠬᠢᠮᠢ ᠹᠢᠽᠢᠺ ᠦ᠋ᠨ ᠴᠢᠬᠤᠯᠠ ᠰᠠᠭᠤᠷᠢ ᠬᠢᠴᠢᠶᠡᠯ ᠪᠣᠯᠬᠤ  ᠶᠤᠮ᠃ ᠡᠨᠡᠬᠦ ᠬᠢᠴᠢᠶᠡᠯ ᠢ᠋ ᠣᠷᠣᠬᠤ ᠳ᠋ᠤ᠌ ᠵᠠᠪᠠᠯ ᠦᠵᠡᠭᠦᠯᠬᠦ᠂ ᠲᠤᠷᠰᠢᠬᠤ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠬᠠᠷᠢᠨ ᠬᠡᠢᠰᠪᠦᠷᠢ ᠪᠡᠷ ᠵᠢᠭᠠᠵᠤ ᠪᠣᠯᠳᠠᠭ ᠬᠢᠴᠢᠶᠡᠯ ᠪᠢᠰᠢ ᠶᠦᠮ᠃ ᠡᠨᠡ ᠲᠠᠯ᠎ᠠ ᠪᠠᠷ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠣᠯᠠᠨ ᠶᠠᠭᠤᠮ᠎ᠠ ᠶ᠋ᠢ ᠡᠭᠦᠳᠴᠦ ᠬᠢᠬᠦ ᠶ᠋ᠢ ᠰᠤᠷᠬᠤ ᠬᠡᠷᠡᠭᠲᠡᠢ ᠭᠡᠵᠡᠢ᠃ ᠡᠨᠡ ᠪᠣᠯ ᠮᠠᠰᠢ ᠵᠦᠢᠲᠡᠢ ᠰᠠᠨᠠᠭᠤᠯᠭ᠎ᠠ ᠵᠥᠪᠯᠡᠮᠵᠢ ᠪᠠᠢᠯ᠎ᠠ᠃

ᠲᠡᠭᠡᠭᠡᠳ ᠲᠡᠷᠡ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠲᠤᠷᠰᠢᠯᠲᠠ ᠶ᠋ᠢᠨ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠲᠡᠢ ᠪᠣᠯᠬᠤ ᠬᠡᠷᠡᠭᠲᠡᠢ ᠭᠡᠳᠡᠭ ᠢ᠋ ᠤᠬᠠᠭᠠᠷᠠᠵᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠨᠠᠷ ᠲᠠᠭᠠᠨ ᠡᠨᠡ ᠰᠠᠨᠠᠭ᠎ᠠ ᠪᠠᠨ ᠬᠡᠯᠡᠪᠡ᠃ ᠡᠯᠪᠡᠭ ᠵᠠᠬᠢᠷᠤᠯ᠄

— ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠴᠢᠨᠢ ᠤᠭ ᠨᠢ ᠠᠩᠬ᠎ᠠ ᠳᠤᠮᠳᠠᠳᠤ ᠶ᠋ᠢᠨ ᠠᠩᠭᠢ ᠲᠠᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠪᠠᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ᠂ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠪᠠᠢᠭᠠᠯᠢ  ᠶ᠋ᠢᠨ ᠬᠢᠴᠢᠶᠡᠯ ᠵᠢᠭᠠᠭᠰᠠᠨ ᠪᠠᠭᠰᠢ ᠨᠠᠷ ᠡᠢᠮᠦ ᠳᠤᠷᠠᠳᠤᠯᠭ᠎ᠠ ᠶᠡᠷᠦ ᠭᠠᠷᠭᠠᠵᠤ ᠪᠠᠢᠭ᠎ᠠ ᠦᠭᠡᠢ᠂ ᠴᠢᠨᠦ ᠡᠨᠡ ᠴᠢᠨᠢ ᠶᠡᠬᠡ ᠵᠦᠢᠲᠡᠢ ᠰᠠᠨᠠᠭᠤᠯᠭ᠎ᠠ ᠪᠠᠢᠨ᠎ᠠ᠂ ᠴᠢ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠠᠭᠤᠴᠢᠨ ᠬᠥᠮᠥᠷᠭᠡ ᠳ᠋ᠦ᠍ ᠡᠷᠢᠵᠦ ᠦᠵᠡ᠂ ᠨᠢᠭᠡ ᠪᠦᠯᠦᠭ ᠶᠠᠭᠤᠮ᠎ᠠ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠶᠦᠮ ᠭᠡᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠬᠢᠨᠢ ᠠᠵᠢᠯ ᠢ᠋ ᠳᠡᠮᠵᠢᠵᠦ ᠪᠠᠢᠭ᠎ᠠ ᠳ᠋ᠤ᠌ ᠭᠠᠪᠢᠷ᠎ᠠ ᠲᠤᠩ ᠪᠠᠶᠠᠷᠯᠠᠪᠠ᠃

ᠲᠡᠭᠡᠭᠡᠳ ᠨᠢᠭᠡᠨ ᠡᠳᠦᠷ ᠰᠠᠩ ᠬᠥᠮᠥᠷᠭᠡ ᠬᠠᠮᠢᠶᠠᠷᠳᠠᠭ ᠪᠠᠭᠰᠢ ᠲᠠᠢ ᠪᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠠᠭᠤᠴᠢᠨ ᠰᠠᠩ ᠬᠥᠮᠥᠷᠭᠡ ᠶ᠋ᠢᠨ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠲᠣᠮᠣ ᠪᠠᠢᠰᠢᠩ ᠢ᠋ ᠳᠦᠭᠦᠷᠲᠡᠯ᠎ᠡ ᠣᠪᠣᠭᠠᠯᠠᠭᠰᠠᠨ ᠮᠣᠳᠣ ᠲᠡᠮᠦᠷ᠂ ᠡᠪᠳᠡᠷᠬᠡᠢ ᠪᠠᠯᠪᠠᠷᠬᠠᠢ ᠰᠠᠨᠳᠠᠯᠢ ᠰᠢᠷᠡᠭᠡ᠂ ᠬᠡᠮᠬᠡᠷᠬᠡᠢ ᠵᠤᠤᠬ᠎ᠠ ᠬᠢᠰᠠ ᠪᠠ ᠬᠡᠷᠡᠭ ᠲᠡᠢ ᠬᠡᠷᠡᠭ ᠦᠭᠡᠢ ᠨᠢᠭᠡ ᠣᠪᠣᠭ᠎ᠠ ᠨᠣᠪᠰᠢ ᠴᠢᠬᠢᠭᠰᠡᠨ ᠶᠠᠭᠤᠮᠠᠰ ᠢ᠋ ᠠᠭᠤᠳᠠᠯᠤᠨ ᠣᠩᠭᠢᠴᠢᠪᠠ᠃ ᠲᠡᠭᠡᠵᠦ ᠪᠦᠲᠦᠨ ᠨᠢᠭᠡ ᠡᠳᠦᠷ ᠣᠩᠭᠢᠴᠢᠭᠠᠳ ᠰᠠᠨᠠᠭᠰᠠᠨ᠎ ᠠᠴᠠ ᠭᠠᠳᠠᠭᠤᠷ ᠣᠯᠠᠨ ᠴᠤ᠌ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠣᠯᠵᠠᠢ᠃ ᠥᠷᠥᠯᠲᠡ ᠡᠴᠡ ᠴᠠᠬᠢᠯᠭᠠᠨ ᠡᠭᠦᠰᠬᠡᠬᠦ ᠭᠠᠷᠭᠠᠭᠤᠷ ᠪᠠ ᠰᠣᠷᠢᠨᠵᠢᠨ ᠬᠦᠴᠦᠨ ᠦ᠌ ᠴᠠᠬᠢᠯᠭᠠᠨ ᠭᠠᠷᠭᠠᠭᠤᠷ ᠮᠠᠰᠢᠨ ᠤ᠋ ᠵᠠᠭᠪᠤᠷ᠂ ᠬᠤᠸᠠᠨᠳᠧᠩ ᠮᠠᠰᠢᠨ᠂ ᠰᠢᠯ ᠰᠠᠪᠠᠭ᠎ᠠ᠂ ᠭᠣᠮ ᠰᠠᠪᠠᠭ᠎ᠠ᠂ ᠲᠣᠷᠭ᠎ᠠ᠂ ᠬᠥᠳᠥᠰᠥ᠂《ᠭᠤᠷᠪᠠᠨ ᠪᠥᠮᠪᠥᠷᠴᠡᠭ ᠦ᠋ᠨ ᠵᠠᠭᠪᠤᠷ》᠂ ᠳᠥᠭᠥᠮ ᠮᠧᠬᠠᠨᠢᠭ ᠤ᠋ᠨ ᠵᠠᠭᠪᠤᠷ ᠮᠠᠰᠢᠨ ᠨᠤᠭᠤᠳ᠂ ᠬᠡᠳᠦᠨ ᠬᠡᠯᠪᠡᠷᠢ ᠶ᠋ᠢᠨ ᠬᠠᠷᠢᠮᠠᠭ ᠵᠢᠩᠯᠡᠭᠦᠷ ᠦ᠋ᠳ᠂ ᠬᠥᠮᠦᠨ ᠦ᠌ ᠠᠷᠠᠭ ᠶᠠᠰᠤ ᠪᠠ ᠪᠡᠶ᠎ᠡ ᠶ᠋ᠢᠨ ᠪᠦᠲᠦᠴᠡ ᠶ᠋ᠢᠨ ᠵᠠᠭᠪᠤᠷ᠂ ᠡᠷᠦᠳᠡᠰᠦ ᠴᠢᠯᠠᠭᠤᠨ ᠤ᠋ ᠦᠵᠡᠭᠦᠯᠦᠮᠵᠢ ᠶ᠋ᠢᠨ ᠮᠠᠰᠢ ᠭᠣᠶᠣ ᠬᠠᠢᠷᠴᠠᠭ ᠲᠠᠢ ᠦᠵᠡᠭᠦᠯᠦᠮᠵᠢ ᠶ᠋ᠢᠨ ᠵᠠᠭᠪᠤᠷ᠂ ᠴᠢᠯᠠᠭᠤᠵᠢᠮᠠᠯ ᠤ᠋ᠨ ᠦᠵᠡᠭᠦᠯᠦᠮᠵᠢ ᠶ᠋ᠢᠨ ᠵᠠᠭᠪᠤᠷ᠂ ᠬᠠᠯᠠᠭᠤᠨ ᠤ᠋ ᠬᠡᠮᠵᠢᠭᠦᠷ ᠦ᠋ᠳ᠂ ᠰᠢᠪᠠᠵᠢ ᠶ᠋ᠢᠨ ᠦᠵᠡᠭᠦᠯᠦᠮᠵᠢ ᠪᠠ ᠰᠢᠪᠡᠵᠢ ᠬᠣᠷᠣᠬᠠᠢ ᠪᠠᠷᠢᠬᠤ ᠪᠠᠭᠠᠵᠢ᠎ᠠ᠋ᠴᠠ ᠡᠬᠢᠯᠡᠨ ᠵᠥᠩᠳᠡᠭᠡᠨ ᠣᠯᠠᠨ ᠪᠠᠭᠠᠵᠢ ᠶ᠋ᠢ ᠡᠷᠢᠨ ᠭᠠᠷᠭᠠᠵᠤ ᠭᠠᠪᠢᠷ᠎ᠠ ᠶᠠᠭ ᠯᠠ ᠠᠯᠲᠠᠨ ᠤ᠋ ᠠᠭᠤᠷᠬᠠᠢ ᠢᠯᠡᠷᠡᠭᠦᠯᠦᠭᠰᠡᠨ ᠶᠦᠮ ᠰᠢᠭ ᠬᠠᠭ᠎ᠠ ᠪᠠᠶᠠᠷᠯᠠᠵᠠᠢ᠃ ᠲᠡᠭᠡᠭᠡᠳ ᠨᠥᠭᠦᠭᠡ ᠣᠯᠠᠨ ᠬᠡᠷᠡᠭᠰᠡᠯ ᠦ᠋ᠨ ᠢ᠋ᠶ᠋ᠡᠨ ᠤᠬᠠᠭᠠᠨ ᠵᠦᠢ ᠶ᠋ᠢ ᠣᠯᠬᠤ ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠨᠢᠭᠡ ᠪᠡᠷ ᠲᠤᠷᠰᠢᠨ ᠤᠷᠤᠯᠳᠤᠵᠤ ᠡᠬᠢᠯᠡᠪᠡ᠃ ᠲᠡᠭᠡᠭᠡᠳ ᠠᠩᠬ᠎ᠠ ᠤᠳᠠᠭ᠎ᠠ ᠰᠤᠷᠤᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨ᠎ᠡ ᠦᠵᠡᠭᠦᠯᠬᠦ ᠲᠠᠨᠢᠭᠤᠯᠬᠤ ᠵᠢᠭᠠᠬᠤ ᠪᠠᠭᠠᠵᠢ ᠲᠠᠢ ᠬᠢᠴᠢᠶᠡᠯᠯᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠤᠷᠤᠭᠴᠢᠳ ᠴᠤ᠌ ᠪᠡᠷᠬᠡ ᠤᠷᠮ᠎ᠠ ᠪᠠᠬ᠎ᠠ ᠲᠠᠢ ᠪᠣᠯᠵᠤ《ᠤᠭ ᠨᠢ ᠡᠨᠡ ᠬᠢᠴᠢᠶᠡᠯ ᠴᠢᠨᠢ ᠡᠢᠮᠦ ᠭᠣᠶᠣ ᠬᠢᠴᠢᠶᠡᠯ ᠪᠠᠢᠵᠤ ᠰᠢᠳᠡ》᠂《ᠦᠭᠡᠢ᠂ ᠤᠷᠠᠨ ᠪᠠᠭᠰᠢ ᠪᠢᠳᠡᠨ ᠳ᠋ᠦ᠍ ᠡᠢᠮᠦ ᠶᠠᠭᠤᠮᠠᠰ ᠢ᠋ ᠶᠡᠷᠦ ᠡᠴᠡ ᠦᠵᠡᠭᠦᠯᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠰᠢᠳᠡ》᠂《 ᠭᠠ‍· ᠪᠠᠭᠰᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠰᠣᠨᠣᠰᠬᠤ ᠶᠣᠰᠣᠲᠠᠢ ᠭᠣᠶᠣ》 ᠭᠡᠬᠦ ᠵᠡᠷᠭᠡ ᠪᠡᠷ ᠬᠥᠭᠵᠢᠨ ᠪᠤᠵᠢᠭᠢᠨᠠᠯᠳᠤᠵᠤ ᠨᠥᠭᠦᠭᠡ ᠮᠠᠰᠢᠨ ᠮᠧᠬᠠᠨᠢᠭ ᠤ᠋ᠨ ᠵᠠᠭᠪᠤᠷ ᠢ᠋ ᠤᠭᠰᠠᠷᠠᠵᠤ ᠦᠵᠡᠬᠦ ᠭᠡᠵᠦ ᠪᠤᠯᠢᠶᠠᠯᠴᠠᠨ ᠣᠷᠣᠯᠳᠣᠨ᠎ᠠ᠃ ᠤᠤᠯ ᠳ᠋ᠠᠭᠠᠨ ᠡᠨᠡᠬᠦ ᠬᠢᠴᠢᠶᠡᠯ ᠨᠢ ᠥᠩᠭᠡᠷᠡᠵᠦ ᠥᠭᠳᠡᠭ ᠦᠭᠡᠢ ᠶᠠᠳᠠᠷᠠᠯ ᠲᠠᠢ ᠬᠢᠴᠢᠶᠡᠯ ᠪᠠᠢᠭᠰᠠᠨ ᠪᠣᠯ ᠣᠳᠣ ᠬᠠᠷᠢᠨ ᠳᠥᠴᠢᠨ ᠮᠢᠨᠦ᠋ᠲ ᠨᠢ ᠶᠠᠭᠠᠬᠢᠬᠤ ᠶ᠋ᠢᠨ ᠠᠮᠵᠢᠯ ᠦᠭᠡᠢ ᠥᠩᠭᠡᠷᠡᠴᠢᠬᠡᠭᠡᠳ ᠣᠯᠵᠤ ᠬᠢᠭᠰᠡᠨ ᠦᠭᠡᠢ ᠰᠤᠷᠤᠭᠴᠢᠳ ᠨᠢ ᠤᠷᠮ᠎ᠠ ᠦᠭᠡᠢ ᠭᠣᠩᠰᠣᠢᠵᠤ《ᠪᠠᠭᠰᠢ ᠠ᠋᠂ ᠳᠠᠷᠠᠭ᠎ᠠ ᠶ᠋ᠢᠨ ᠬᠢᠴᠢᠶᠡᠯ ᠳᠡᠭᠡᠷ᠎ᠡ ᠶᠠᠭᠠᠬᠢᠭᠰᠠᠨ ᠴᠦ᠍ ᠨᠠᠳᠠ ᠪᠠᠷ ᠬᠢᠯᠭᠡᠨ᠎ᠡ ᠰᠢᠦ》 ᠭᠡᠵᠦ ᠭᠤᠶᠤᠨ᠎ᠠ᠃ ᠲᠡᠭᠡᠭᠡᠳ ᠰᠤᠷᠤᠭᠴᠢᠳ ᠳᠠᠷᠠᠭᠠᠴᠢ ᠶ᠋ᠢᠨ ᠬᠢᠴᠢᠶᠡᠯ ᠪᠣᠯᠬᠤ ᠶ᠋ᠢ ᠲᠡᠰᠴᠦ ᠶᠠᠳᠠᠨ ᠬᠦᠯᠢᠶᠡᠳᠡᠭ ᠪᠣᠯᠵᠠᠢ᠃ ᠡᠢᠮᠦᠷᠬᠦᠦ ᠤᠷᠢᠳ ᠡᠮᠦᠨ᠎ᠡ ᠪᠠᠢᠭ᠎ᠠ ᠦᠭᠡᠢ ᠬᠤᠪᠢᠷᠠᠯᠲᠠ ᠨᠢ ᠤᠳᠤᠷᠢᠳᠤᠯᠭ᠎ᠠ ᠪᠣᠯᠤᠨ ᠣᠯᠠᠨ ᠪᠠᠭᠰᠢᠨᠠᠷ ᠢ᠋ ᠭᠠᠢᠬᠠᠰᠢ ᠠᠯᠳᠠᠭᠤᠯᠵᠠᠢ᠃ ᠭᠠᠪᠢᠷ᠎ᠠ ᠡᠨᠡ ᠪᠠᠢᠳᠠᠯ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠶ᠋ᠢᠨ ᠳᠠᠭᠠᠤ ᠪᠠᠰᠠ ᠰᠠᠨᠠᠭᠠᠰᠢᠷᠠᠵᠤ ᠪᠠᠢᠪᠠ᠃ ᠤᠴᠢᠷ ᠨᠢ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠨᠢ ᠳᠡᠩᠳᠡᠭᠦᠦ ᠴᠥᠭᠡᠨ ᠲᠤᠯᠠ ᠳᠥᠴᠢᠨ ᠮᠢᠨᠦ᠋ᠲ ᠦ᠋ᠨ ᠴᠠᠭ ᠲᠤ᠌ ᠰᠤᠷᠤᠭᠴᠢ ᠪᠦᠬᠦᠨ ᠨᠢᠭᠡ ᠤᠳᠠᠭ᠎ᠠ ᠬᠢᠵᠦ ᠠᠮᠵᠢᠬᠤ ᠦᠭᠡᠢ᠃ ᠲᠡᠭᠡᠬᠦᠯᠡᠷ ᠲᠤᠰᠬᠠᠢ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠲᠠᠢ᠂ ᠬᠦᠷᠦᠯᠴᠡᠬᠦᠢᠴᠡ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠲᠡᠢ᠂ ᠪᠠᠭ᠎ᠠ ᠳᠤᠭᠤᠢᠯᠠᠩ ᠬᠤᠪᠢᠶᠠᠵᠤ ᠬᠢᠬᠦ ᠳ᠋ᠦ᠍ ᠬᠦᠷᠪᠡᠯ ᠰᠤᠷᠤᠭᠴᠢ ᠪᠦᠬᠦᠨ ᠬᠢᠵᠦ ᠣᠷᠣᠯᠳᠣᠬᠤ ᠶᠠᠭᠤᠮ᠎ᠠ ᠲᠠᠢ ᠪᠣᠯᠴᠢᠬᠠᠪᠠᠯ ᠦᠷ᠎ᠡ ᠠᠰᠢᠭ ᠨᠢ ᠨᠡᠩ ᠴᠦ᠍ ᠰᠠᠢᠨ ᠪᠣᠯᠤᠨ᠎ᠠ ᠭᠡᠵᠦ ᠭᠠᠪᠢᠷ᠎ᠠ ᠪᠣᠳᠣᠬᠤ ᠪᠣᠯᠤᠯ᠎ᠠ᠃ ᠲᠡᠭᠡᠪᠡᠴᠦ ᠲᠤᠬᠠᠢ ᠶ᠋ᠢᠨ ᠦᠶ᠎ᠡ ᠳ᠋ᠦ᠍ ᠨᠥᠬᠥᠴᠡᠯ ᠪᠣᠯᠤᠯᠴᠠᠭ᠎ᠠ ᠨᠢ ᠠᠷᠠᠢ ᠬᠦᠷᠴᠦ ᠥᠭᠬᠦ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠲᠡᠯ᠎ᠡ ᠭᠠᠪᠢᠷ᠎ᠠ ᠶ᠋ᠢ《ᠭᠠᠢᠭᠤᠢ ᠴᠢᠳᠠᠵᠤ ᠣᠷᠬᠢᠯ᠎ᠠ》 ᠭᠡᠮᠡᠨ ᠰᠡᠳᠬᠢᠯ ᠬᠠᠨᠵᠤ ᠶᠠᠪᠤᠭᠰᠠᠨ ᠬᠥᠮᠦᠰ ᠳᠠᠬᠢᠭᠠᠳ ᠱᠣᠷ ᠭᠣᠷ ᠭᠡᠵᠡᠭᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠳᠤᠷᠴᠤ ᠬᠠᠪᠢᠷᠬᠤ ᠨᠢ ᠣᠯᠠᠰᠢᠷᠠᠯ᠎ᠠ᠃

— ᠪᠠᠢᠭᠠᠯᠢ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠨᠢ ᠣᠳᠣ ᠬᠠᠷᠢᠨ ᠨᠠᠭᠠᠳᠴᠤ ᠲᠣᠭᠯᠠᠵᠤ ᠦᠢᠮᠡᠵᠦ ᠱᠤᠤᠭᠢᠭᠠᠳ ᠥᠩᠭᠡᠷᠡᠭᠦᠯᠳᠡᠭ ᠬᠢᠴᠢᠶᠡᠯ ᠪᠣᠯᠴᠢᠬᠠᠯ᠎ᠠ᠃

— ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠥᠮᠥᠷᠭᠡ ᠡᠴᠡ ᠨᠢᠭᠡ ᠣᠯᠠᠨ ᠵᠢᠪᠡᠷᠡᠭᠰᠡᠨ ᠲᠡᠮᠦᠷ᠂ ᠮᠣᠳᠣ ᠴᠢᠯᠠᠭᠤ ᠭᠠᠷᠭᠠᠨ ᠠᠪᠴᠤ ᠢᠷᠡᠭᠡᠳ ᠬᠡᠦᠬᠡᠳ ᠬᠥᠭᠵᠢᠯᠳᠦᠨ ᠨᠠᠭᠠᠳᠴᠤ ᠴᠠᠭ ᠨᠥᠭᠴᠢᠭᠡᠵᠦ ᠪᠠᠢᠨ᠎ᠠ᠃

— ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠰᠤᠷᠤᠭᠴᠢᠳ ᠬᠢᠴᠢᠶᠡᠯ ᠳᠡᠭᠡᠷ᠎ᠡ ᠪᠡᠨ ᠠᠩᠬᠠᠷᠬᠤ ᠪᠠᠨ ᠪᠣᠯᠢᠵᠤ ᠪᠠᠢᠨ᠎ᠠ᠂ ᠭᠠᠪᠢᠷ᠎ᠠ ᠶ᠋ᠢᠨ《ᠨᠠᠭᠠᠳᠤᠭᠤᠯᠳᠠᠭ ᠬᠢᠴᠢᠶᠡᠯ》 ᠢ᠋ ᠬᠦᠯᠢᠶᠡᠬᠦ ᠪᠣᠯᠴᠢᠬᠠᠵᠠᠢ ᠭᠡᠬᠦ ᠮᠡᠲᠦ ᠪᠡᠷ ᠬᠡᠯᠡᠯᠴᠡᠨ ᠵᠠᠬᠢᠷᠤᠯ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠴᠦ᠍ ᠵᠥᠩᠳᠡᠭᠡᠨ ᠳᠡᠯ ᠰᠡᠭᠦᠯ ᠲᠡᠢ《ᠴᠢᠮᠡᠭᠡ》 ᠳᠠᠮᠵᠢᠭᠤᠯᠵᠤ ᠠᠮᠵᠢᠵᠠᠢ᠃

ᠭᠡᠪᠡᠴᠦ ᠡᠨᠡ ᠤᠳᠠᠭ᠎ᠠ ᠬᠠᠷᠢᠨ ᠤᠳᠤᠷᠢᠳᠤᠯᠭ᠎ᠠ ᠨᠠᠷ ᠨᠢ ᠲᠡᠳᠡᠨ ᠦ᠌ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠦᠭᠡᠢ ᠭᠠᠪᠢᠷ᠎ᠠ ᠶ᠋ᠢ ᠳᠡᠮᠵᠢᠵᠡᠢ᠃ ᠤᠴᠢᠷ ᠨᠢ ᠭᠠᠪᠢᠷ᠎ᠠ ᠠᠯᠢ ᠬᠡᠳᠦᠢᠨ ᠡᠳᠡᠭᠡᠷ ᠪᠠᠢᠳᠠᠯ ᠢ᠋ ᠮᠡᠳᠡᠬᠦ ᠲᠤᠯᠠ ᠣᠯᠠᠨ ᠤ᠋ ᠬᠤᠷᠠᠯ ᠳᠡᠭᠡᠷ᠎ᠡ ᠥᠪᠡᠷ ᠦ᠋ᠨ ᠳᠠᠷᠠᠭᠠᠴᠢ ᠪᠠᠷ ᠬᠢᠬᠦ ᠭᠡᠵᠦ ᠰᠠᠨᠠᠭᠠᠴᠢᠯᠠᠵᠤ ᠪᠠᠢᠭ᠎ᠠ ᠠᠵᠢᠯ ᠤ᠋ᠨ ᠲᠥᠯᠥᠪᠯᠡᠭᠡ ᠪᠡᠨ ᠳᠤᠷᠠᠳᠴᠤ᠂ ᠡᠨᠡᠬᠦ ᠬᠢᠴᠢᠶᠡᠯ ᠲᠥᠷᠥᠯ ᠢ᠋ ᠬᠦᠨᠳᠦᠳᠬᠡᠪᠡᠯ ᠵᠣᠬᠢᠬᠤ ᠲᠠᠯ᠎ᠠ ᠠᠴᠠ ᠣᠨᠴᠠᠯᠠᠨ ᠶᠠᠷᠢᠵᠤ᠂ ᠲᠤᠰᠬᠠᠢ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠭᠠᠷᠭᠠᠬᠤ ᠭᠡᠰᠡᠨ ᠰᠠᠨᠠᠭ᠎ᠠ ᠪᠠᠨ ᠳᠤᠷᠠᠳᠴᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠠᠯ᠎ᠠ᠎ᠠ᠋ᠴᠠ ᠳᠡᠮᠵᠢᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠭ᠎ᠠ ᠪᠠᠨ ᠬᠡᠯᠡᠵᠡᠢ᠃ ᠠᠵᠢᠯ ᠠᠯᠪᠠᠨ ᠤ᠋ ᠪᠠᠨ ᠲᠥᠯᠥᠭᠡ᠂ ᠦᠨᠡᠨ ᠵᠥᠪ ᠡᠨᠡᠬᠦ ᠰᠠᠨᠠᠭᠤᠯᠭ᠎ᠠ ᠶ᠋ᠢ ᠨᠢ ᠤᠳᠤᠷᠢᠳᠤᠯᠭ᠎ᠠ ᠪᠣᠯᠤᠨ ᠣᠯᠠᠩᠬᠢ ᠪᠠᠭᠰᠢ ᠨᠠᠷ ᠶᠡᠬᠡᠳᠡ ᠳᠠᠮᠵᠢᠨ ᠵᠣᠷᠢᠭᠵᠢᠭᠤᠯᠵᠠᠢ᠃ ᠲᠡᠭᠡᠭᠡᠳ ᠳᠡᠮᠡᠢ ᠤᠳᠠᠯ ᠦᠭᠡᠢ ᠠᠢᠮᠠᠭ ᠤ᠋ᠨ ᠵᠢᠭᠠᠯᠲᠠ ᠶ᠋ᠢᠨ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠢ᠋ ᠬᠠᠮᠢᠶᠠᠷᠳᠠᠭ ᠥᠷᠲᠡᠭᠡᠨ ᠡᠴᠡ ᠪᠦᠬᠦᠯᠢ ᠪᠦᠲᠦᠨ ᠢᠵᠢ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠶ᠋ᠢ ᠬᠣᠰᠢᠭᠤ ᠮᠣᠩᠭᠣᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠥᠭᠴᠡᠢ᠃

ᠭᠠᠪᠢᠷ᠎ᠠ ᠬᠤᠰᠢᠭᠤᠨ ᠤ᠋ ᠪᠠᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶ᠎ᠠ ᠪᠣᠯᠤᠨ ᠴᠠᠬᠢᠯᠭᠠᠨᠵᠢᠭᠰᠠᠨ ᠪᠠᠭᠠᠵᠢ ᠲᠥᠬᠥᠭᠡᠷᠦᠮᠵᠢ ᠶ᠋ᠢᠨ ᠲᠠᠰᠤᠭ ᠤ᠋ᠨ ᠬᠠᠷᠢᠭᠤᠴᠠᠯᠭᠠᠲᠠᠨ ᠤ᠋ ᠬᠠᠪᠰᠤᠷᠤᠯᠭ᠎ᠠ ᠳᠡᠮᠵᠢᠯᠭᠡ ᠲᠡᠢ ᠪᠡᠷ᠂ ᠰᠤᠷᠭᠠᠭᠤᠯᠢ ᠠ᠋ᠴᠠ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠠᠩᠭᠢ ᠶ᠋ᠢᠨ ᠭᠡᠷ ᠢ᠋ ᠠᠰᠢᠭᠯᠠᠨ ᠪᠦᠬᠦ ᠠᠢᠮᠠᠭ ᠤ᠋ᠨ ᠬᠡᠪᠴᠢᠶᠡᠨ ᠳ᠋ᠡᠬᠢ ᠬᠠᠮᠤᠭ ᠠᠩᠬᠠᠳᠠᠭᠴᠢ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠢ᠋ ᠪᠠᠢᠭᠤᠯᠵᠤ᠂ ᠪᠦᠬᠦ ᠵᠦᠢᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠴᠠᠨ ᠬᠠᠮᠢᠶᠠᠷᠬᠤ ᠪᠣᠯᠵᠤ ᠡᠨᠡᠬᠦ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠲᠠᠭᠠᠨ ᠪᠦᠬᠦᠯᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠯ ᠠᠵᠢᠯᠯᠠᠭᠰᠠᠨ ᠪᠢᠯᠡ᠃ ᠲᠡᠷᠡ᠂ ᠡᠨᠡᠬᠦ ᠪᠠᠭᠠᠬᠠᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠰᠤᠭ ᠲᠤ᠌ ᠬᠣᠶᠠᠷ ᠨᠠᠷᠠ ᠶ᠋ᠢ ᠰᠤᠨᠳᠠᠯᠠᠨ ᠶᠠᠭᠠᠷᠠᠯᠲᠠᠢ ᠠᠵᠢᠯᠯᠠᠳᠠᠭ ᠪᠠᠢᠯ᠎ᠠ᠃ ᠡᠬᠢᠯᠡᠭᠡᠳ ᠪᠦᠬᠦ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠢ᠋ ᠳ᠋ᠤᠭᠠᠷᠯᠠᠨ ᠲᠥᠷᠥᠯ ᠵᠦᠢᠯ ᠢ᠋ᠶ᠋ᠡᠷ ᠨᠢ ᠢᠯᠭᠠᠨ ᠳᠠᠩᠰᠠ ᠡᠪᠬᠡᠮᠡᠯ ᠪᠠᠢᠭᠤᠯᠤᠨ᠂ ᠠᠷᠪᠠᠨ ᠬᠣᠶᠠᠷ ᠲᠤᠷᠰᠢᠯᠲᠠ ᠶ᠋ᠢᠨ ᠪᠠᠭ᠎ᠠ ᠪᠠᠭ᠎ᠠ ᠳᠤᠭᠤᠢᠯᠠᠩ ᠬᠤᠪᠢᠶᠠᠵᠤ᠂ ᠬᠢᠴᠢᠶᠡᠯᠯᠡᠭᠡ ᠪᠦᠬᠦᠨ ᠳ᠋ᠦ᠍ ᠦᠵᠡᠬᠦᠯᠭᠡ ᠶ᠋ᠢᠨ ᠲᠤᠷᠰᠢᠯᠲᠠ᠂ ᠪᠠᠭ᠎ᠠ ᠳᠤᠭᠤᠢᠯᠠᠩ ᠤ᠋ᠨ ᠲᠤᠷᠰᠢᠯᠲᠠ ᠶ᠋ᠢ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠬᠢᠯᠭᠡᠳᠡᠭ ᠠᠵᠢ᠃ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠪᠠᠭᠰᠢ ᠰᠤᠷᠤᠭᠴᠢᠳ ᠲᠤ᠌ ᠲᠤᠩ ᠳᠥᠭᠥᠮ ᠲᠦᠳᠡ ᠪᠣᠯᠵᠤ ᠬᠢᠴᠢᠶᠡᠯᠯᠡᠭᠡ ᠶ᠋ᠢᠨ ᠦᠷ᠎ᠡ ᠠᠰᠢᠭ ᠴᠤ᠌ ᠥᠨᠳᠥᠷᠵᠢᠨ ᠰᠤᠷᠤᠭᠴᠢᠳ ᠤ᠋ᠨ ᠰᠤᠷᠴᠤ ᠮᠡᠳᠡᠬᠦ ᠤᠷᠮᠠᠰᠢᠯ ᠶᠡᠬᠡᠳᠡ ᠳᠡᠭᠡᠭᠰᠢᠯᠡᠪᠡ᠃

ᠲᠡᠷᠡ ᠪᠠᠰᠠ ᠬᠢᠴᠢᠶᠡᠯ ᠦ᠋ᠨ ᠭᠠᠳᠠᠭᠤᠷ ᠴᠠᠭ ᠭᠠᠷᠭᠠᠨ ᠰᠤᠷᠤᠭᠴᠢᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠡᠭᠡᠷ᠎ᠡ ᠭᠠᠷᠴᠤ᠂ ᠤᠷᠭᠤᠮᠠᠯ ᠨᠠᠪᠴᠢ ᠶ᠋ᠢᠨ ᠵᠦᠢᠯ ᠢ᠋ ᠴᠤᠭᠯᠠᠭᠤᠯᠤᠨ᠂ᠤᠷᠭᠤᠮᠠᠯ ᠤ᠋ᠨ ᠦᠵᠡᠭᠦᠯᠦᠮᠵᠢ ᠬᠢᠬᠦ᠂ ᠰᠢᠪᠡᠵᠢ ᠪᠠᠷᠢᠵᠤ ᠰᠢᠪᠡᠵᠢ ᠶ᠋ᠢᠨ ᠦᠵᠡᠭᠦᠯᠦᠮᠵᠢ ᠬᠢᠬᠦ᠂ ᠮᠡᠯᠡᠬᠡᠢ ᠳ᠋ᠦ᠍ ᠲᠤᠶᠠᠴᠢᠯᠠᠯᠲᠠ ᠬᠢᠬᠦ᠂ ᠠᠷᠠᠭ ᠶᠠᠰᠤᠨ ᠤ᠋ ᠦᠵᠡᠭᠦᠯᠦᠮᠵᠢ ᠬᠢᠬᠦ ᠵᠡᠷᠭᠡ ᠣᠯᠠᠨ ᠵᠦᠢᠯ ᠢ᠋ ᠪᠣᠳᠠᠲᠤ ᠦᠢᠯᠡᠳᠦᠯᠭᠡ ᠳ᠋ᠦ᠍ ᠳᠠᠭᠠᠭᠤᠯᠤᠨ ᠠᠵᠢᠯᠯᠠᠨ᠎ᠠ᠃ ᠣᠷᠣᠢ ᠣᠳᠣᠨ ᠣᠷᠣᠨ ᠤ᠋ ᠳᠤᠷᠠᠨ ᠢ᠋ᠶ᠋ᠠᠷ ᠣᠳᠣᠳ ᠢ᠋ ᠠᠵᠢᠭᠯᠠᠭᠤᠯᠤᠨ ᠣᠳᠣᠨ ᠣᠷᠣᠨ ᠢ᠋ ᠠᠵᠢᠭᠯᠠᠬᠤ ᠵᠡᠷᠭᠡ ᠠᠵᠢᠯᠯᠠᠭ᠎ᠠ ᠶ᠋ᠢ ᠥᠷᠨᠢᠭᠦᠯᠳᠡᠭ ᠡᠴᠡ ᠰᠤᠷᠤᠭᠴᠢᠳ ᠤ᠋ᠨ ᠰᠤᠷᠴᠤ ᠰᠤᠳᠤᠯᠬᠤ᠂ ᠬᠢᠵᠦ ᠪᠦᠲᠦᠭᠡᠬᠦ᠂ ᠵᠠᠳᠠᠯᠵᠤ ᠰᠢᠨᠵᠢᠯᠡᠬᠦ᠂ᠬᠤᠷᠢᠶᠠᠩᠭᠤᠢᠯᠠᠵᠤ ᠳ᠋ᠦᠩᠨᠡᠬᠦ ᠵᠡᠷᠭᠡ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠣᠪᠣᠷ ᠰᠤᠷᠲᠠᠯ ᠤ᠋ᠨ ᠬᠥᠮᠦᠵᠢᠯ ᠳ᠋ᠦ᠍ ᠶᠡᠬᠡᠬᠡᠨ ᠨᠥᠯᠥᠭᠡ ᠲᠤᠰᠬᠠᠯ ᠦᠵᠡᠭᠦᠯᠦᠭᠰᠡᠨ ᠠᠵᠢ᠃ ᠡᠳᠡᠭᠡᠷ ᠪᠣᠯ ᠲᠡᠭᠦᠨ ᠦ᠌ ᠡᠳᠦᠷ ᠳᠣᠳᠣᠮ ᠤ᠋ᠨ ᠵᠢᠭᠠᠵᠤ ᠰᠤᠷᠭᠠᠬᠤ ᠠᠷᠭ᠎ᠠ ᠠᠪᠴᠠᠯ ᠤ᠋ᠨ ᠬᠢᠨᠢ ᠨᠢᠭᠡᠨ ᠭᠠᠷᠮᠠᠭᠠᠢ ᠲᠠᠯ᠎ᠠ ᠪᠣᠯᠬᠤ ᠶᠤᠮ᠃

ᠲᠡᠭᠦᠨ ᠦ᠌ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠲᠠᠯ᠎ᠠ ᠪᠠᠷ ᠬᠠᠮᠤᠭ ᠣᠷᠭᠢᠯ ᠦᠶ᠎ᠡ ᠨᠢ ᠴᠦ᠍ ᠶᠠᠭ ᠰᠠᠢᠬᠠᠨ ᠲᠡᠷᠡ ᠬᠦ᠌ ᠴᠠᠭ ᠦᠶ᠎ᠡ ᠪᠠᠢᠭᠰᠠᠨ ᠭᠡᠬᠦ ᠳ᠋ᠦ᠍ ᠪᠣᠯᠤᠨ᠎ᠠ᠃ ᠣᠯᠠᠨ ᠰᠠᠢᠬᠠᠨ ᠨᠠᠢᠷᠠᠭᠤᠯᠤᠯ᠂ ᠲᠤᠭᠤᠵᠢᠰ ᠤ᠋ᠨ ᠵᠣᠬᠢᠶᠠᠯ ᠨᠢ ᠴᠥᠮ ᠲᠡᠷᠡ ᠦᠶ᠎ᠡ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠶᠦᠮ᠃ ᠶᠠᠭᠠᠬᠢᠭᠠᠳ ᠴᠦ᠍ ᠶᠤᠮ᠂ ᠲᠡᠭᠦᠨ ᠳ᠋ᠦ᠍ ᠲᠥᠷᠥᠯᠬᠢ ᠵᠠᠶᠠᠭᠠᠭᠳᠠᠭᠰᠠᠨ ᠬᠤᠷᠴᠠ ᠮᠡᠳᠡᠷᠡᠮᠵᠢ᠂ ᠬᠡᠢ ᠰᠡᠳᠬᠢᠬᠦᠢ ᠪᠠ ᠤᠷᠭᠤᠭᠤᠯᠤᠨ ᠰᠡᠳᠬᠢᠬᠦ᠂ ᠣᠨᠣᠪᠴᠢᠲᠠᠢ ᠮᠠᠭᠠᠳᠯᠠᠯ ᠬᠢᠬᠦ ᠵᠡᠷᠭᠡ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠨᠢ ᠵᠠᠷᠢᠮ ᠲᠠᠯ᠎ᠠ ᠪᠠᠷ ᠥᠪᠡᠷ ᠦ᠋ᠨ ᠬᠢᠨᠢ ᠡᠨᠡᠬᠦ ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠲᠠᠢ ᠪᠠᠰᠠ ᠴᠦ᠍ ᠭᠠᠢᠬᠠᠯᠲᠠᠢ ᠵᠣᠬᠢᠴᠠᠯᠳᠤᠵᠤ ᠵᠠᠷᠢᠮ ᠳ᠋ᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠰᠣᠴᠢᠨ ᠭᠠᠢᠬᠠᠮᠠᠷ ᠰᠢᠨ᠎ᠡ ᠰᠡᠪᠡᠭᠦᠨ ᠵᠦᠢᠯᠡᠰ ᠢ᠋ ᠲᠥᠷᠥᠭᠳᠡᠭᠦᠯᠳᠡᠭ ᠪᠠᠢᠯ᠎ᠠ᠃ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠶ᠋ᠢᠨ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠦᠷᠡᠵᠢᠵᠦ ᠲᠥᠯᠵᠢᠬᠦ ᠪᠠ ᠡᠭᠦᠰᠴᠦ ᠪᠣᠢ ᠪᠣᠯᠬᠤ᠂ ᠦᠭᠡᠢᠰᠬᠡᠵᠦ ᠪᠠᠯᠠᠷᠠᠬᠤ ᠶ᠋ᠢᠨ ᠵᠢᠮ᠎ᠡ ᠬᠠᠤᠯᠢ ᠳ᠋ᠤ᠌ ᠰᠤᠷᠴᠤ ᠰᠤᠳᠤᠯᠤᠭᠠᠳ ᠳᠠᠭᠤᠰᠤᠰᠢ ᠦᠭᠡᠢ ᠤᠴᠢᠷ ᠶᠣᠰᠣᠨ ᠪᠠᠢᠳᠠᠭ ᠢ᠋ ᠤᠯᠠᠮ ᠭᠦᠨ ᠤᠬᠠᠭᠠᠷᠠᠵᠤ ᠣᠢᠯᠠᠭᠠᠳᠠᠭ ᠪᠣᠯᠵᠠᠢ᠃ ᠲᠡᠢᠮᠦ ᠡᠴᠡ ᠭᠠᠪᠢᠷ᠎ᠠ ᠳ᠋ᠤ᠌ ᠪᠠᠢᠭᠠᠯᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠵᠢᠭᠠᠭᠠᠳ ᠪᠣᠯᠵᠤ ᠶᠠᠳᠠᠭᠰᠠᠨ ᠴᠦ᠍ ᠶᠠᠭᠤᠮ᠎ᠠ ᠠᠯᠠᠭ᠎ᠠ᠃ ᠡᠰᠡᠷᠭᠦ ᠪᠡᠷ ᠲᠡᠭᠦᠨ ᠦ᠌ ᠮᠡᠳᠡᠯᠭᠡ ᠶ᠋ᠢᠨ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠶ᠋ᠢ ᠨᠡᠩ ᠥᠷᠭᠡᠵᠢᠭᠦᠯᠵᠦ ᠠᠰᠤᠷᠤ ᠶᠡᠬᠡ ᠶ᠋ᠢ ᠰᠤᠷᠴᠤ ᠮᠡᠳᠡᠬᠦ ᠵᠣᠷᠢᠭ ᠬᠦᠰᠡᠯᠡᠩ ᠢ᠋ ᠨᠢ ᠤᠯᠠᠮ ᠴᠤ᠌ ᠬᠥᠭᠵᠢᠭᠡᠵᠡᠢ᠃

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠳᠣᠯᠣᠭ᠎ᠠ> Элсэнд булагдсан сувдаа – П.Оюунгэрэл <7>

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ –<ᠳᠣᠯᠣᠭ᠎ᠠ>

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠳᠣᠯᠣᠭ᠎ᠠ> Элсэнд булагдсан сувдаа – П.Оюунгэрэл <7>

ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ –<ᠳᠣᠯᠣᠭ᠎ᠠ>