ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠢᠩᠬᠢᠨᠢ ᠳᠣᠪᠴᠢ– ᠬᠦᠰᠡᠬᠦᠢ᠂ᠬᠥᠬᠡᠯᠤᠤ ᠨᠠᠷ (ᠬᠣᠶᠠᠳᠤᠭᠠᠷ ᠪᠣᠲᠢ) ᠠᠷᠰᠢ ᠰᠠᠬᠢᠭᠤᠯᠰᠤᠨ ᠤ᠋ ᠡᠮ ᠠᠳᠢᠰ 3 Идээ ундааны жинхэнэ товч– Хүсэхүй ᠂Хөхлуу нар – <2-р боть>Арш сахиусны эм адис 3
96ᠠᠷᠰᠢ ᠰᠠᠬᠢᠭᠤᠯᠰᠤᠨ ᠤ᠋ ᠡᠮ ᠠᠳᠢᠰ – 3
ᠭᠠᠵᠠᠷ ᠤ᠋ᠨ ᠠᠷᠰᠢ ᠪᠣᠯᠤᠭᠰᠠᠨ ᠠᠨᠤ
ᠡᠷᠲᠡᠨ ᠦ᠌ ᠦᠶᠡ ᠳ᠋ᠦ᠍ᠷ ᠯᠢᠨ ᠴᠤᠸᠠᠨ ᠭᠠᠵᠠᠷᠠ ᠨᠢᠭᠡᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠪᠠᠢᠭᠰᠠᠨ ᠠᠵᠢ᠃ ᠲᠡᠷᠡ ᠢᠨᠦ ᠵᠠᠷᠤᠳᠠᠰᠤᠨ ᠢᠨᠵᠢ ᠳ᠋ᠡᠭᠡᠨ ᠬᠠᠯᠠ ᠦᠵᠡᠭᠦᠯᠦᠭᠰᠡᠨ ᠡᠴᠡ ᠢᠨᠵᠢ ᠢᠨᠦ ᠵᠢᠭᠤᠲᠠᠨ ᠣᠷᠭᠣᠭᠠᠳ ᠠᠭᠤᠯᠠ ᠳ᠋ᠤ᠌ ᠭᠠᠷᠪᠠ᠃ ᠡᠳᠦᠷ ᠤᠳᠠᠭᠠᠨ ᠳ᠋ᠠᠭᠠᠨ ᠬᠡᠭᠡᠷᠡ ᠶ᠋ᠢᠨ ᠡᠪᠡᠰᠦ ᠤᠷᠭᠤᠮᠠᠯ ᠤ᠋ᠨ ᠰᠠᠯᠠᠭᠠ ᠮᠥᠴᠢᠷ ᠨᠠᠪᠴᠢ ᠨᠠᠬᠢᠶᠠ ᠶ᠋ᠢ ᠶᠡᠬᠡᠯᠡ ᠪᠠᠬᠠᠳᠤᠨ ᠰᠣᠨᠢᠷᠬᠠᠭᠠᠳ ᠦᠭᠲᠡᠭᠡᠵᠦ ᠠᠪᠤᠭᠠᠳ ᠢᠳᠡᠵᠦ ᠠᠮᠲᠠᠯᠠᠭᠰᠠᠨ ᠳ᠋ᠤᠷ ᠮᠠᠰᠢ ᠠᠮᠲᠠᠲᠠᠢ ᠰᠠᠨᠠᠭᠳᠠᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠦᠷᠭᠦᠯᠵᠢ ᠲᠡᠭᠦᠵᠦ ᠢᠳᠡᠭᠰᠡᠭᠡᠷ ᠥᠯᠥᠰᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠪᠡᠶᠡ ᠮᠠᠬᠠᠪᠣᠳ ᠠᠨᠤ ᠮᠥᠨ ᠬᠥᠩᠭᠡᠨ ᠴᠢᠭᠢᠷᠠᠭ ᠪᠣᠯᠵᠤᠬᠤᠢ᠃ ᠰᠥᠨᠢ ᠳ᠋ᠡᠭᠡᠨ ᠪᠦᠳᠦᠭᠦᠨ ᠮᠣᠳᠣᠨ ᠳᠣᠣᠷᠠ ᠣᠷᠣᠰᠢᠵᠤ ᠠᠮᠤᠰᠬᠢᠬᠦᠶᠡ᠂ ᠡᠪᠡᠰᠦ ᠱᠠᠷᠴᠢᠭᠢᠨᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠪᠠᠷᠰ ᠢᠷᠡᠭᠰᠡᠨ ᠪᠣᠢ ᠭᠡᠮᠡᠨ ᠠᠶᠤᠵᠤ ᠰᠣᠴᠢᠭᠠᠳ ᠭᠱᠠᠨᠠ ᠬᠠᠷᠠᠢᠯᠬᠢᠯᠠᠨ ᠮᠣᠳᠣᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠵᠠᠢᠯᠵᠤ᠂ ᠵᠢᠴᠢ ᠮᠠᠨᠠᠭᠠᠷ ᠤ᠋ᠨ ᠥᠷᠯᠥᠭᠡᠭᠦᠷ ᠮᠥᠨ ᠬᠠᠷᠠᠢᠯᠬᠢᠯᠠᠨ ᠮᠣᠳᠣᠨ᠂ ᠳᠡᠭᠡᠷᠡᠴᠡ ᠭᠠᠵᠠᠷᠠ ᠪᠠᠭᠤᠭᠰᠠᠨ ᠠᠨᠤ ᠣᠭᠣ ᠬᠥᠩᠭᠡᠨ ᠭᠠᠪᠰᠢᠭᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠬᠡᠢ ᠠᠭᠠᠷ ᠳᠡᠭᠡᠭᠦᠷ ᠦᠰᠦᠷᠬᠢᠯᠡᠨ ᠶᠠᠪᠤᠵᠤ᠂ ᠡᠰᠡᠬᠦᠯᠡ ᠬᠠᠯᠢᠨ ᠨᠢᠰᠬᠦ ᠰᠢᠪᠠᠭᠤ ᠮᠡᠲᠦ ᠪᠡᠷ ᠠᠭᠤᠯᠠᠨ ᠣᠷᠭᠢᠯ ᠳᠡᠭᠡᠷᠡ ᠶᠠᠮᠠᠷᠴᠤ ᠰᠠᠭᠠᠲᠤᠯ ᠦᠭᠡᠢ ᠪᠡᠷ ᠪᠠᠭᠤᠵᠤ ᠭᠠᠷᠤᠮᠤᠢ᠃ ᠬᠡᠴᠢᠨᠡᠨ ᠣᠨ ᠵᠢᠯ ᠢ᠋ ᠥᠩᠭᠡᠷᠡᠭᠡᠭᠡᠳ ᠲᠡᠭᠦᠨ ᠦ᠌ ᠭᠡᠷ ᠦ᠋ᠨ ᠤᠯᠤᠰ ᠠᠨᠤ ᠲᠡᠷᠡᠬᠦ ᠠᠭᠤᠯᠠᠨᠠ ᠮᠣᠳᠣ ᠲᠦᠯᠡᠭᠡ ᠠᠪᠬᠤ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠣᠯᠵᠤ ᠦᠵᠡᠭᠡᠳ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠡᠭᠡᠨ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠳ᠋ᠦ᠍᠂ ᠡᠵᠡᠨ ᠢᠨᠤ ᠪᠠᠷᠢᠪᠴᠢᠯᠠᠭᠲᠤᠨ ᠭᠡᠮᠡᠨ ᠲᠤᠰᠢᠶᠠᠭᠰᠠᠨ ᠪᠣᠯᠪᠠᠴᠤ ᠪᠠᠷᠢᠪᠴᠢᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠥᠯᠥᠭᠡ᠃ ᠲᠡᠭᠦᠨᠴᠡ ᠪᠠᠰᠠ ᠨᠢᠭᠡᠨ ᠡᠳᠦᠷᠡ ᠴᠠᠪᠴᠢᠮᠠ ᠬᠠᠳᠠᠨ ᠳᠣᠣᠷᠠ ᠲᠡᠷᠡ ᠢᠨᠵᠢ ᠯᠦᠭᠡ ᠤᠴᠠᠷᠠᠭᠰᠠᠨ ᠳ᠋ᠤᠷ ᠳᠠᠷᠤᠢ ᠥᠭᠡᠰᠢ ᠲᠣᠣᠷ ᠲᠠᠯᠪᠢᠵᠤ ᠭᠤᠷᠪᠠᠨ ᠲᠠᠯᠠ ᠪᠠᠷ ᠪᠦᠰᠡᠯᠡᠵᠦ ᠪᠠᠷᠢᠪᠴᠢᠯᠠᠬᠤᠢ ᠳ᠋ᠤᠷ ᠢᠨᠵᠢ ᠢᠨᠤ ᠨᠢᠭᠡᠨᠲᠡ ᠬᠠᠷᠠᠢᠯᠬᠢᠯᠠᠨ ᠳᠡᠭᠳᠡᠵᠦ ᠠᠭᠤᠯᠠᠨ ᠣᠷᠣᠢ ᠳ᠋ᠤ᠌ ᠨᠢᠰᠦᠯᠬᠢᠯᠡᠨ ᠭᠠᠷᠴᠤᠬᠤᠢ᠃ ᠢᠩᠭᠢᠭᠰᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠭᠡᠷ ᠦ᠋ᠨ ᠡᠵᠡᠨ ᠢᠨᠤ ᠶᠡᠬᠡᠯᠡ ᠭᠠᠢᠬᠠᠪᠠᠢ᠃ ᠵᠠᠷᠢᠮ ᠬᠥᠮᠦᠨ ᠢᠨᠤ ᠡᠨᠡ ᠢᠨᠵᠢ ᠢᠨᠤ ᠠᠷᠰᠢ ᠰᠠᠬᠢᠭᠤᠯᠰᠤᠨ ᠤ᠋ ᠶᠠᠰᠤ ᠴᠢᠨᠠᠷ ᠪᠠᠢᠬᠤ ᠪᠠᠷ ᠶᠠᠭᠤᠨ᠂ ᠯᠠᠪ᠂ ᠭᠠᠢᠬᠠᠮᠰᠢᠭᠲᠤ ᠬᠣᠪᠣᠷ ᠡᠷᠳᠡᠨᠢᠲᠦ ᠡᠮ ᠠᠳᠢᠰ ᠢ᠋ ᠢᠳᠡᠭᠰᠡᠨ ᠲᠡᠳᠦᠢ ᠯᠡ ᠪᠤᠢ ᠊ᠢ ᠠ ᠬᠡᠮᠡᠭᠡᠳ᠂ ᠳᠠᠷᠤᠢ ᠲᠠᠪᠤᠨ ᠠᠮᠲᠠ ᠪᠦᠷᠢᠳᠦᠭᠰᠡᠨ ᠠᠷᠢᠬᠢ ᠳᠠᠷᠠᠰᠤ ᠨᠣᠭᠣᠭᠠ᠂ ᠵᠤᠭᠤᠰᠢ ᠨᠤᠭᠤᠳ ᠢ᠋ ᠲᠡᠭᠦᠨ ᠦ᠌ ᠦᠷᠭᠦᠯᠵᠢ ᠢᠨᠠᠭᠰᠢ ᠴᠢᠨᠠᠭᠰᠢ ᠶᠠᠪᠤᠬᠤ ᠵᠠᠮ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠲᠡᠭᠦᠨ ᠦ᠌ ᠢᠳᠡᠬᠦ ᠡᠰᠡᠬᠦ ᠶ᠋ᠢ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠳ᠋ᠤᠷ᠂ ᠦᠵᠡᠵᠦ ᠪᠠᠢᠲᠠᠯᠠ ᠦᠨᠡᠬᠡᠷ ᠢᠷᠡᠵᠦ ᠢᠳᠡᠭᠡᠳ ᠣᠳᠣ ᠥᠩᠭᠡᠷᠡᠭᠰᠡᠨ ᠦ᠌ ᠮᠡᠲᠦ ᠪᠡᠷ ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠬᠠᠯᠢᠨ ᠳᠡᠭᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠪᠠᠷᠢᠪᠴᠢᠯᠠᠭᠳᠠᠪᠠ᠃ ᠵᠢᠴᠢ ᠲᠡᠭᠦᠨ ᠡᠴᠡ ᠯᠠᠪᠯᠠᠨ ᠠᠰᠠᠭᠤᠭᠰᠠᠨ ᠲᠣᠷ ᠦᠵᠡᠰᠡ ᠲᠡᠭᠦᠨ ᠦ᠌ ᠢᠳᠡᠭᠰᠡᠨ ᠡᠪᠡᠰᠦ ᠤᠷᠭᠤᠮᠠᠯ ᠠᠨᠤ ᠥᠭᠡᠷᠡ ᠶᠠᠭᠤᠮᠠ ᠪᠤᠰᠤ ᠬᠠᠷᠢᠨ ᠷᠠᠨᠢ ᠮᠥᠨ ᠠᠵᠤᠭᠤ᠃ ᠤᠤᠯ ᠠ᠋ᠴᠠ ᠷᠠᠨᠢ ᠪᠣᠯᠪᠠᠰᠤ ᠳᠣᠲᠣᠷ ᠢ᠋ ᠠᠭᠤᠵᠢᠷᠠᠭᠤᠯᠤᠨ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠵᠤ᠂ ᠲᠡᠭᠦᠨ ᠴᠤᠯᠤ ᠶ᠋ᠢ ᠲᠥᠯᠵᠢᠭᠦᠯᠦᠨ ᠪᠤᠯᠴᠢᠩ ᠮᠢᠬᠠ ᠶ᠋ᠢ ᠵᠣᠬᠢᠴᠠᠭᠤᠯᠤᠨ ᠲᠡᠭᠰᠢᠷᠡᠭᠦᠯᠵᠦ᠂ ᠶᠠᠰᠤᠨ ᠺᠠᠮᠢ ᠶ᠋ᠢ ᠴᠢᠨᠠᠷᠵᠢᠭᠤᠯᠤᠨ᠂ ᠶᠠᠰᠤ ᠰᠢᠷᠪᠥᠰᠥ ᠶ᠋ᠢ ᠴᠢᠭᠢᠷᠠᠭᠵᠢᠭᠤᠯᠵᠤ᠂ ᠨᠠᠰᠤ ᠶ᠋ᠢ ᠤᠷᠲᠤᠳᠬᠠᠵᠤ ᠦᠯᠦ ᠥᠲᠡᠯᠥᠭᠦᠯᠦᠨ᠂ ᠥᠩᠭᠡ ᠵᠢᠰᠦ ᠶ᠋ᠢ ᠰᠢᠮᠡᠴᠢᠭᠦᠯᠦᠨ ᠭᠢᠯᠪᠠᠯᠵᠢᠭᠤᠯᠵᠤ᠂ ᠦᠰᠦ ᠴᠠᠢᠭᠰᠠᠨ ᠢ᠋ ᠳᠠᠬᠢᠨ ᠬᠠᠷᠠᠯᠠᠭᠤᠯᠵᠤ᠂ ᠰᠢᠳᠦ ᠤᠨᠠᠭᠰᠠᠨ ᠢ᠋ ᠳᠠᠪᠲᠠᠨ ᠰᠢᠨᠡ ᠰᠢᠲᠦ ᠤᠷᠭᠤᠭᠤᠯᠬᠤ ᠴᠢᠳᠠᠯ ᠪᠣᠢ ᠠᠵᠤᠭᠤ᠃
ᠰᠠᠬᠢᠭᠤᠯᠰᠤᠨ ᠳᠡᠷᠡ ᠶ᠋ᠢᠨ ᠤᠴᠢᠷ
ᠡᠷᠲᠡᠨ ᠦ᠌ ᠬᠠᠨ ᠤᠯᠤᠰ ᠤ᠋ᠨ ᠡᠦ ᠳᠢ ᠬᠠᠭᠠᠨ ᠠᠨᠤ ᠵᠡᠭᠦᠨᠰᠢ ᠮᠣᠷᠢᠯᠠᠨ ᠲᠠᠢ ᠱᠠᠨ ᠠᠭᠤᠯᠠ ᠪᠠᠷ ᠲᠣᠭᠣᠷᠢᠨ ᠠᠵᠢᠭᠯᠠᠷᠠ ᠶᠠᠪᠤᠬᠤ ᠳ᠋ᠠᠭᠠᠨ᠂ ᠨᠢᠭᠡᠨ ᠬᠥᠭᠰᠢᠨ ᠡᠪᠦᠭᠡᠨ ᠵᠠᠮ ᠤ᠋ᠨ ᠬᠠᠵᠠᠭᠤ ᠲᠠᠷᠢᠶᠠ ᠠᠷᠴᠢᠵᠤ ᠠᠲᠠᠯᠠ ᠬᠠᠷᠢᠨ ᠲᠡᠭᠦᠨ ᠦ᠌ ᠨᠢᠷᠤᠭᠤᠨ ᠠ᠋ᠴᠠ ᠠᠨᠤ ᠬᠡᠴᠢᠨᠡᠨ ᠲᠣᠬᠣᠢ ᠥᠨᠳᠥᠷ ᠴᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠦᠬᠦᠢ ᠶ᠋ᠢ ᠠᠵᠢᠵᠤ ᠬᠠᠷᠠᠭᠠᠳ ᠭᠠᠢᠬᠠᠭᠰᠠᠨ ᠳ᠋ᠠᠭᠠᠨ ᠠᠷᠰᠢ ᠰᠠᠬᠢᠭᠤᠯᠰᠤᠨ ᠤ᠋ ᠭᠠᠢᠬᠠᠮᠰᠢᠭᠲᠤ ᠤᠪᠠᠳᠢᠰ ᠪᠣᠢ ᠪᠤᠶᠤ ᠭᠡᠮᠡᠨ ᠡᠪᠦᠭᠡᠨ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤᠷ᠂ ᠬᠥᠭᠰᠢᠨ ᠡᠪᠦᠭᠡᠨ ᠥᠴᠢᠷᠦᠨ᠄ ᠳᠣᠣᠷᠠᠲᠤ ᠠᠷᠠᠳ ᠪᠢ ᠠᠯᠢ ᠡᠷᠲᠡ ᠨᠠᠶᠠᠨ ᠲᠠᠪᠤᠨ ᠨᠠᠰᠤᠲᠠᠢ ᠦᠶᠡ ᠲᠦᠷ ᠨᠢᠭᠡᠨᠲᠡ ᠬᠥᠭᠰᠢᠷᠡᠨ ᠮᠠᠭᠤᠵᠢᠷᠠᠭᠠᠳ ᠦᠰᠦ ᠮᠢᠨᠢ ᠴᠠᠢᠵᠤ ᠰᠢᠲᠦ ᠮᠢᠨᠢ ᠤᠨᠠᠭᠠᠳ ᠦᠬᠦᠯ ᠦ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠦᠷᠦᠭᠰᠡᠨ ᠠᠵᠢ᠂ ᠵᠠᠪᠰᠢᠶᠠᠨᠠ ᠨᠢᠭᠡᠨ ᠪᠣᠮᠪᠣ ᠪᠠᠭᠰᠢ ᠠᠨᠤ ᠠᠷᠠᠳ ᠨᠠᠮᠠᠲᠤᠷ ᠴᠢᠪᠠᠭᠠ ᠢᠳᠡᠵᠦ ᠤᠰᠤ ᠤᠤᠭᠤ᠂ ᠲᠠᠪᠤᠨ ᠲᠠᠷᠢᠶᠠᠨ ᠦᠷᠡ ᠢᠳᠡᠬᠦ ᠪᠡᠨ ᠪᠤᠯᠢᠲᠤᠭᠠᠢ ᠬᠡᠮᠡᠭᠡᠳ ᠪᠠᠰᠠ ᠰᠠᠬᠢᠭᠤᠯᠰᠤᠨ ᠳᠡᠷᠡ ᠬᠡᠷᠡᠭᠯᠡᠬᠦ ᠠᠷᠭᠠ ᠶ᠋ᠢ ᠵᠢᠭᠠᠨ ᠰᠤᠷᠭᠠᠵᠤ ᠰᠣᠶᠣᠷᠬᠠᠭᠰᠠᠨ ᠪᠥᠯᠥᠭᠡ᠃ ᠡᠨᠡᠬᠦ ᠳᠡᠷᠡ ᠶ᠋ᠢᠨ ᠳᠣᠲᠣᠷᠠ ᠭᠤᠴᠢᠨ ᠬᠣᠶᠠᠷ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠶ᠋ᠢ ᠠᠬᠤᠭᠤᠯᠬᠤ ᠪᠥᠭᠡᠳ ᠲᠡᠭᠦᠨ ᠦ᠌ ᠬᠣᠷᠢᠨ ᠳᠥᠷᠪᠡᠨ ᠰᠠᠢᠨ ᠵᠦᠢᠯ ᠪᠣᠯᠪᠠᠰᠤ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠴᠠᠭ ᠠᠭᠤᠷ ᠲᠤ᠌ ᠲᠣᠬᠢᠷᠠᠭᠤᠯᠤᠨ ᠨᠡᠢᠯᠡᠭᠦᠯᠵᠦ᠂ ᠪᠤᠰᠤᠳ ᠨᠠᠢ᠍ᠮᠠᠨ ᠵᠦᠢᠯ ᠦ᠋ᠨ ᠬᠣᠣᠷᠲᠤ ᠪᠣᠳᠠᠰ ᠠᠨᠤ ᠨᠠᠢ᠍ᠮᠠᠨ ᠵᠣᠪᠬᠢᠰ ᠤ᠋ᠨ ᠭᠠᠵᠢᠭᠤ ᠰᠠᠯᠬᠢ ᠶ᠋ᠢ ᠬᠣᠷᠢᠭᠯᠠᠬᠤ ᠠᠴᠢ ᠲᠤᠰᠠ ᠲᠠᠢ᠃ ᠥᠴᠦᠬᠡᠨ ᠠᠷᠠᠳ ᠪᠢ ᠡᠨᠡᠬᠦ ᠠᠷᠭᠠ ᠪᠠᠷ ᠶᠣᠰᠣᠴᠢᠯᠠᠨ ᠭᠦᠢᠴᠡᠳᠬᠡᠭᠰᠡᠨᠡ ᠦᠨᠡᠬᠡᠷ ᠳᠠᠬᠢᠨ ᠵᠠᠯᠠᠭᠤᠰᠢᠷᠠᠭᠠᠳ ᠬᠠᠷᠠ ᠦᠰᠦ ᠰᠢᠨᠡ ᠪᠡᠷ ᠤᠷᠭᠤᠵᠤ ᠬᠠᠰ ᠴᠠᠭᠠᠨ ᠰᠢᠳᠦ ᠳᠠᠬᠢᠨ ᠣᠷᠭᠣᠭᠠᠳ ᠬᠠᠷᠠ ᠡᠳᠦᠷ ᠢ᠋ᠶ᠋ᠡᠷ ᠭᠤᠷᠪᠠᠨ ᠵᠠᠭᠤᠨ ᠭᠠᠵᠠᠷ ᠶᠠᠪᠤᠬᠤ ᠳ᠋ᠤ᠌ ᠬᠠᠷᠰᠢ ᠰᠠᠭᠠᠳ ᠦᠭᠡᠢ᠃ ᠭᠡᠪᠡᠴᠦ ᠳᠣᠣᠷᠠᠲᠤ ᠪᠢ ᠥᠨᠥᠳᠥᠷ ᠨᠢᠭᠡᠨᠲᠡ ᠵᠠᠭᠤ ᠨᠠᠶᠠᠨ ᠨᠠᠰᠤᠨ ᠤ᠋ ᠨᠢᠭᠤᠷ ᠢ᠋ ᠦᠵᠡᠵᠦ ᠠᠭᠠᠳ ᠤᠯᠠᠭᠠᠨ ᠲᠣᠭᠣᠰᠣᠨ ᠠ᠋ᠴᠠ ᠠᠩᠵᠢᠷᠠᠵᠤ ᠠᠭᠤᠯᠠᠨ ᠳ᠋ᠤᠷ ᠣᠷᠣᠰᠢᠨ ᠰᠠᠭᠤᠵᠤ ᠦᠯᠦ ᠴᠢᠳᠠᠨ᠂ ᠬᠡᠦᠬᠡᠨ ᠦᠷᠡ ᠠᠴᠢ ᠳ᠋ᠠᠭᠠᠨ ᠲᠠᠲᠠᠭᠠᠯᠵᠠᠭᠳᠠᠭᠠᠳ ᠬᠡᠪ ᠦ᠋ᠨ ᠶᠣᠰᠣᠭᠠᠷ ᠲᠠᠪᠤᠨ ᠲᠠᠷᠢᠶᠠ ᠶ᠋ᠢᠨ ᠦᠷᠡ ᠶ᠋ᠢ ᠢᠳᠡᠵᠦ ᠠᠮᠰᠠᠭᠠᠳ ᠬᠡᠳᠦᠢᠪᠡᠷ ᠬᠣᠷᠢᠭᠠᠳ ᠢᠯᠡᠭᠦᠦ ᠣᠨ ᠪᠣᠯᠵᠤ ᠪᠠᠢᠬᠤ ᠪᠣᠯᠪᠠᠴᠤ᠂ ᠮᠥᠨ ᠬᠦ ᠰᠠᠬᠢᠭᠤᠯᠰᠤᠨ ᠤ᠋ ᠳᠡᠷᠡ ᠶ᠋ᠢᠨ ᠠᠴᠢ ᠲᠤᠰᠠ ᠪᠠᠷ ᠳᠠᠬᠢᠨ ᠳᠡᠮᠡᠢ ᠯᠡ ᠥᠲᠡᠯᠦᠭᠰᠡᠨ ᠦᠭᠡᠢ ᠪᠠᠢᠭᠰᠠᠭᠠᠷ ᠠᠵᠢ ᠭᠡᠮᠡᠨ ᠨᠢᠭᠡᠨ ᠵᠡᠷᠭᠡ ᠬᠠᠷᠢᠭᠤ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ᠂ ᠡᠦ ᠳᠢ ᠬᠠᠭᠠᠨ ᠲᠡᠷᠡ ᠡᠪᠦᠭᠡᠨ ᠢ᠋ ᠰᠠᠢᠲᠤᠷ ᠰᠢᠨᠵᠢᠯᠡᠨ ᠠᠵᠢᠭᠯᠠᠪᠠᠰᠤ ᠥᠩᠭᠡ ᠪᠠᠢᠳᠠᠯ ᠠᠨᠤ ᠮᠥᠨ ᠲᠠᠪᠢᠭᠠᠳ ᠨᠠᠰᠤᠨ ᠤ᠋ ᠬᠥᠮᠦᠨ ᠲᠡᠳᠦᠢ ᠮᠡᠲᠦ᠂ ᠠᠢᠯ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠡᠴᠡ ᠯᠠᠪᠯᠠᠨ ᠠᠰᠠᠭᠠᠪᠠᠰᠤ ᠴᠥᠮ ᠦᠨᠡᠨ ᠮᠠᠭᠠᠳ ᠬᠡᠮᠡᠮᠦᠢ᠃ ᠬᠠᠭᠠᠨ ᠳᠠᠷᠤᠢ ᠡᠪᠦᠭᠡᠨ ᠦ᠌ ᠳᠤᠷᠠᠳᠤᠭᠰᠠᠨ ᠶᠣᠰᠣᠭᠠᠷ ᠰᠠᠬᠢᠭᠤᠯᠰᠤᠨ ᠤ᠋ ᠳᠡᠷᠡ ᠶ᠋ᠢ ᠦᠢᠯᠡᠳᠦᠭᠰᠡᠨ ᠪᠣᠯᠪᠠᠴᠤ ᠬᠠᠷᠢᠨ ᠲᠠᠪᠤᠨ ᠲᠠᠷᠢᠶᠠᠨ ᠦᠷᠡ ᠢᠳᠡᠬᠦ ᠶ᠋ᠢ ᠪᠣᠯᠢᠵᠤ ᠴᠢᠪᠠᠭᠠ ᠢᠳᠡᠵᠦ ᠤᠰᠤ ᠤᠤᠭᠤᠬᠤ ᠵᠡᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠥᠯᠥᠭᠡ᠃
ᠰᠠᠬᠢᠭᠤᠯᠰᠤᠨ ᠳᠡᠷᠡ ᠶ᠋ᠢ ᠦᠢᠯᠡᠳᠬᠦ ᠠᠷᠭᠠ
ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠲᠠᠪᠤᠨ ᠪᠠ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠳᠣᠯᠣᠭᠠᠨᠠ ᠠᠭᠤᠯᠠᠨ ᠰᠢᠭᠤᠢ ᠠ᠋ᠴᠠ ᠠᠷᠴᠠ ᠶ᠋ᠢ ᠠᠪᠴᠤ ᠳᠡᠷᠡ ᠦᠢᠯᠡᠳᠬᠦ ᠳ᠋ᠡᠭᠡᠨ ᠨᠢᠭᠡᠨ ᠲᠣᠬᠣᠢ ᠬᠣᠶᠠᠷ ᠢᠮᠠᠬᠤ ᠤᠷᠲᠤ᠂ ᠳᠥᠷᠪᠡᠨ ᠢᠮᠠᠬᠤ ᠥᠨᠳᠥᠷ ᠬᠢᠵᠦ᠂ ᠳᠣᠲᠣᠷᠠ ᠨᠢᠭᠡᠨ ᠳ᠋ᠧᠦ ᠬᠣᠶᠠᠷ ᠱᠧᠩ ᠪᠠᠭᠲᠠᠭᠠᠮᠵᠢᠲᠠᠢ᠂ ᠠᠷᠴᠠ ᠶ᠋ᠢᠨ ᠤᠯᠠᠭᠠᠨ ᠭᠣᠣᠯ ᠲᠠᠢ ᠮᠣᠳᠣ ᠪᠠᠷ ᠬᠣᠶᠠᠷ ᠹᠦᠨ ᠲᠡᠳᠦᠢ ᠵᠤᠵᠠᠭᠠᠨ ᠤ᠋ ᠪᠦᠲᠡᠭᠡᠯᠭᠡ ᠶ᠋ᠢ ᠨᠢᠭᠲᠠ ᠴᠢᠩᠭᠠ ᠪᠥᠭᠡᠳ ᠬᠠᠭᠠᠭᠠᠵᠤ ᠨᠡᠭᠡᠭᠡᠵᠦ ᠪᠣᠯᠬᠤ ᠪᠠᠷ ᠦᠢᠯᠡᠳᠦᠮᠦᠢ᠃ ᠵᠢᠴᠢ ᠪᠦᠲᠡᠭᠡᠯᠭᠡ᠂ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠢᠨᠤ ᠬᠣᠨᠣᠭ ᠪᠤᠳᠠᠭᠠᠨ ᠤ᠋ ᠴᠢᠨᠡᠭᠡᠨ ᠨᠦᠬᠡ ᠶ᠋ᠢ ᠭᠤᠷᠪᠠᠨ ᠮᠥᠷ᠂ ᠮᠥᠷ ᠪᠦᠷᠢ ᠳ᠋ᠦ᠍ ᠳᠥᠴᠢᠨ ᠶᠢᠰᠦᠨ ᠨᠦᠬᠡ ᠨᠡᠢᠲᠡ ᠵᠠᠭᠤ ᠳᠥᠴᠢᠨ ᠳᠣᠯᠣᠭᠠᠨ ᠨᠦᠬᠡ ᠭᠠᠷᠭᠠᠨ ᠥᠷᠥᠮᠳᠡᠮᠦᠢ᠃
ᠬᠡᠷᠡᠭᠯᠡᠬᠦ ᠡᠮ ᠦ᠋ᠳ ᠳᠠᠷᠠᠭᠠᠬᠢ ᠮᠡᠲᠦ᠄
ᠷᠢᠮᠢᠽᠠᠸᠠ᠂ ᠳ᠋ᠠᠩᠭᠦᠨ᠂ ᠰᠦᠭᠪᠠ᠂ ᠪᠦᠰᠪᠠᠭᠧᠰᠧᠷ (ᠪᠠᠰᠠ ᠳ᠋ᠠᠭ᠍ᠴᠦ᠋ᠩ)᠃ ᠳ᠋ᠦᠸᠠ᠂ ᠭᠠᠷᠪᠤᠶ᠂ ᠬᠠᠷᠠ ᠪᠠᠯᠴᠢᠷᠭᠠᠨᠠ ᠶ᠋ᠢᠨ ᠦᠨᠳᠦᠰᠦ᠂ ᠮᠣᠳᠣᠨ ᠴᠢᠬᠢᠷᠮᠡ᠂ ᠵᠠᠶᠧᠷᠮᠠ᠂ ᠲᠤᠸᠠᠽᠠ᠂ ᠵᠠᠭᠠ᠂ ᠰᠤᠷᠤᠯᠤᠰᠧᠷᠪᠤ᠂ ᠣᠷᠬᠣᠳᠠᠢ᠂ ᠬᠤᠷᠳᠤᠨ ᠴᠠᠭᠠᠨ᠂ ᠰᠦᠭᠷᠡ᠂ ᠢᠮᠠᠭᠠᠨ ᠬᠥᠬᠥ᠂ ᠵᠢᠷᠦ᠋ᠭᠪᠦᠷᠦ᠂ ᠤᠯᠠᠭᠠᠨ ᠭᠤᠶᠠᠨ᠂ ᠵᠠᠩᠽᠸᠷᠨᠠᠬᠪᠤ᠂ ᠶᠠᠪᠠᠭᠠᠨ ᠠᠷᠴᠠ ᠶ᠋ᠢᠨ ᠦᠷᠡ᠃ ᠬᠣᠯᠢᠮᠠ (ᠬᠣᠯᠢᠮᠪᠠ)᠂ ᠭᠠᠩᠭᠠᠴᠦ᠋ᠩ᠂ ᠪᠠᠢ ᠾᠦᠩ᠂ ᠪᠠᠷᠪᠠᠳᠠ᠂ ᠮᠠᠭᠠ᠃
ᠳᠡᠭᠡᠷᠡᠬᠢ ᠬᠣᠷᠢᠨ ᠳᠥᠷᠪᠡᠨ ᠬᠥᠯ ᠡᠮ ᠪᠣᠯᠪᠠᠰᠤ ᠬᠣᠷᠢᠨ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠴᠠᠭ ᠠᠭᠤᠷ ᠲᠤ᠌ ᠲᠣᠬᠢᠷᠠᠭᠤᠯᠤᠨ ᠨᠡᠢᠯᠡᠭᠦᠯᠦᠭᠰᠡᠨ ᠠᠵᠢ᠃
ᠪᠣᠩᠨᠠᠭ᠂ ᠯᠠᠭᠠᠩ᠂ ᠳ᠋ᠦᠷᠵᠢᠳ᠂ ᠳ᠋ᠣᠩᠭᠠ᠂ ᠮᠡᠯᠡᠬᠡᠢ ᠶ᠋ᠢᠨ ᠲᠠᠷᠢᠶᠠ᠂ ᠼᠦᠷᠳᠣ᠋᠂ ᠪᠠᠨᠽᠧ᠂ ᠬᠠᠷᠠ ᠮᠢᠩᠵᠠᠨ᠃ ᠳᠡᠭᠡᠷᠡᠬᠢ ᠨᠠᠢ᠍ᠮᠠᠨ ᠬᠥᠯ ᠡᠮ ᠪᠣᠯᠪᠠᠰᠤ ᠨᠠᠢ᠍ᠮᠠᠨ ᠵᠣᠪᠬᠢᠰ ᠤ᠋ᠨ ᠭᠠᠵᠢᠭᠤ ᠰᠠᠯᠬᠢ ᠶ᠋ᠢ ᠬᠣᠷᠢᠭᠯᠠᠬᠤ ᠪᠠᠷ ᠲᠣᠬᠢᠷᠠᠭᠤᠯᠤᠭᠰᠠᠨ ᠠᠵᠢ᠃ ᠳᠡᠭᠡᠷᠡᠬᠢ ᠭᠤᠴᠢᠨ ᠬᠣᠶᠠᠷ ᠬᠥᠯ ᠡᠮ ᠲᠣᠰᠪᠣᠷᠢ ᠨᠢᠭᠡᠨ ᠯᠠᠩ ᠢ᠋ ᠲᠡᠭᠰᠢ ᠬᠡᠮᠬᠡᠴᠢᠨ᠂ ᠳᠡᠷᠡ ᠶ᠋ᠢᠨ ᠳᠣᠲᠣᠷᠠ ᠠᠬᠤᠭᠤᠯᠬᠤ ᠳ᠋ᠠᠭᠠᠨ ᠬᠣᠣᠷᠠᠲᠤ ᠵᠦᠢᠯ ᠦ᠋ᠳ ᠢ᠋ ᠳᠡᠭᠡᠷᠡ ᠲᠠᠯᠠ ᠳ᠋ᠤᠷ ᠲᠠᠯᠪᠢᠭᠠᠳ ᠤᠭᠤᠲᠠ ᠣᠶᠣᠭᠠᠳ ᠠᠷᠴᠠᠲᠤ ᠳᠡᠷᠡ ᠪᠡᠨ ᠤᠭᠤᠲᠠᠯᠠᠮᠤᠢ᠃ ᠡᠨᠡᠬᠦ ᠳᠡᠷᠡ ᠶ᠋ᠢ ᠵᠠᠭᠤᠨ ᠬᠣᠨᠣᠭ ᠳᠡᠷᠡᠯᠡᠪᠡᠰᠦ ᠥᠩᠭᠡ ᠵᠢᠰᠦ ᠭᠢᠯᠪᠡᠯᠵᠡᠨ᠂ ᠨᠢᠭᠡᠨ ᠵᠢᠯ ᠪᠣᠯᠪᠠᠰᠤ ᠠᠷᠬᠠᠭ ᠡᠪᠡᠳᠴᠢᠨ ᠨᠢᠭᠡᠳ ᠨᠢᠭᠡᠨ ᠢ᠋ᠶ᠋ᠡᠷ ᠠᠷᠢᠯᠵᠤ ᠪᠦᠬᠦ ᠪᠡᠶᠡ ᠡᠴᠡ ᠰᠠᠢᠬᠠᠨ ᠦᠨᠦᠷ ᠠᠩᠬᠢᠯᠬᠤ ᠪᠥᠭᠡᠳ᠂ ᠳᠥᠷᠪᠡᠨ ᠵᠢᠯ ᠪᠣᠯᠪᠠᠰᠤ ᠪᠤᠭᠤᠷᠤᠯ ᠦᠰᠦ ᠢᠨᠤ ᠬᠠᠷᠠᠯᠠᠵᠤ ᠰᠢᠳᠦ ᠤᠨᠠᠭᠠᠳ ᠳᠠᠬᠢᠨ ᠰᠢᠨᠡ ᠰᠢᠲᠦ ᠤᠷᠭᠤᠵᠤ᠂ ᠴᠢᠬᠢ ᠰᠣᠨᠣᠷ ᠨᠢᠳᠦ ᠭᠡᠭᠡᠭᠡᠳᠦᠮᠦᠶ᠃ ᠡᠢᠮᠦ ᠭᠠᠢᠬᠠᠮᠰᠢᠭᠲᠤ ᠲᠤᠷᠰᠢᠯᠭᠠᠲᠤ ᠨᠢᠭᠤᠴᠠ ᠵᠣᠷ ᠢ᠋ ᠪᠤᠰᠤᠳ ᠲᠤᠷ ᠡᠰᠡ ᠤᠯᠠᠮᠵᠢᠯᠠᠪᠠᠰᠤ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠭᠰᠡᠨ ᠦ᠌ ᠠᠴᠢ ᠶᠠᠭᠤᠨ ᠬᠡᠮᠡᠪᠡ᠃ ᠲᠡᠭᠦᠨᠴᠡ ᠡᠦ ᠳᠢ ᠬᠠᠭᠠᠨ ᠳ᠋ᠦᠩ ᠹᠠᠩ ᠰᠦᠸᠧ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤᠷ ᠬᠠᠷᠢᠭᠤᠯᠤᠷᠤᠨ᠄ ᠡᠷᠲᠡ ᠴᠠᠭ ᠲᠤᠷ ᠡᠨᠡᠬᠦ ᠠᠷᠭᠠ ᠶ᠋ᠢ ᠨᠢᠦᠢ ᠯᠢᠶᠠᠨ ᠠ᠋ᠴᠠ ᠢᠦᠢ ᠴᠢᠩ ᠳ᠋ᠦ᠍ᠷ ᠤᠯᠠᠮᠵᠢᠯᠠᠵᠤ᠂ ᠢᠦᠢ ᠴᠢᠩ ᠡᠴᠡ ᠭᠤᠸᠠᠩ ᠴᠧᠩ ᠽᠢ ᠳ᠋ᠦ᠍ᠷ ᠤᠯᠠᠮᠵᠢᠯᠠᠵᠤ᠂ ᠭᠤᠸᠠᠩ ᠴᠧᠩ ᠽᠢ ᠡᠴᠡ ᠬᠤᠸᠠᠩᠳᠢ ᠳ᠋ᠤᠷ ᠤᠯᠠᠮᠵᠢᠯᠠᠭᠰᠠᠨ ᠠᠵᠤᠭᠤ᠃ ᠣᠷᠴᠢᠨ ᠳ᠋ᠤᠷ ᠬᠦ ᠴᠧᠩ ᠭᠠᠵᠠᠷ ᠤ᠋ᠨ ᠪᠣᠮᠪᠣ ᠴᠦᠨ ᠢᠦᠢ ᠬᠦᠩ ᠬᠡᠮᠡᠭᠴᠢ ᠡᠨᠡᠬᠦ ᠡᠮᠲᠦ ᠳᠡᠷᠡ ᠶ᠋ᠢ ᠳᠡᠷᠡᠯᠡᠭᠰᠡᠨ ᠡᠴᠡ ᠵᠠᠭᠤ ᠭᠠᠷᠤᠢ ᠨᠠᠰᠤᠯᠠᠲᠠᠯᠠ ᠭᠡᠵᠢᠭᠡ ᠦᠰᠦ ᠢᠨᠤ ᠣᠭᠲᠣ ᠦᠯᠦ ᠴᠠᠢᠭᠰᠠᠨ ᠪᠥᠯᠥᠭᠡ᠃ ᠠᠶᠠ ᠡᠪᠡᠳᠴᠢᠨ ᠡᠮᠭᠡᠭ ᠬᠡᠮᠡᠭᠴᠢ ᠴᠥᠮ ᠠᠷᠭᠠ ᠶ᠋ᠢᠨ ᠰᠤᠳᠠᠯ ᠠ᠋ᠴᠠ ᠡᠭᠦᠰᠬᠦ ᠪᠤᠢ ᠊ᠢ ᠠ᠃ ᠡᠳᠦᠭᠡ ᠡᠮᠲᠦ ᠳᠡᠷᠡ ᠶ᠋ᠢ ᠳᠡᠷᠡᠯᠡᠬᠦ ᠢᠨᠤ ᠭᠠᠵᠢᠭᠤ ᠰᠠᠯᠬᠢ ᠭᠠᠢᠲᠤ ᠠᠮᠢᠰᠬᠤᠯ ᠳ᠋ᠤᠷ ᠡᠯᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠠᠢ᠃ ᠭᠡᠪᠡᠰᠦ ᠳᠡᠷᠡ ᠶ᠋ᠢ ᠪᠥᠰ ᠦ᠋ᠨ ᠤᠭᠤᠲᠠ ᠪᠠᠷ ᠭᠡᠷᠯᠡᠵᠦ ᠳᠡᠷᠡᠯᠡᠵᠦ ᠠᠬᠤ ᠪᠣᠯᠪᠠᠴᠤ ᠪᠠᠰᠠ ᠬᠥᠰᠢᠭᠡᠯᠢᠭ ᠤᠭᠤᠲᠠ ᠪᠠᠷ ᠪᠠᠭᠯᠠᠵᠤ ᠤᠭᠤᠲᠠᠯᠠᠭᠠᠳ᠂ ᠬᠡᠵᠢᠶᠡ ᠬᠡᠪᠲᠡᠵᠦ ᠳᠡᠷᠡᠯᠡᠰᠦᠭᠡᠢ ᠬᠡᠮᠡᠬᠦ ᠦᠶᠡ ᠲᠦᠷ ᠭᠠᠳᠠᠷ ᠪᠦᠷᠬᠦᠪᠴᠢ ᠶ᠋ᠢ ᠲᠠᠢᠯᠵᠤ ᠬᠠᠶᠠᠪᠠᠰᠤ ᠪᠣᠯᠤᠮᠤᠢ ᠊ᠢ ᠠ ᠬᠡᠮᠡᠪᠡ᠃ ᠲᠡᠭᠦᠨᠴᠡ ᠡᠦ ᠳᠢ ᠬᠠᠭᠠᠨ ᠲᠡᠷᠡ ᠬᠥᠭᠰᠢᠨ ᠡᠪᠦᠭᠡᠨ ᠲᠦᠷ ᠲᠣᠷᠭᠠ ᠳᠤᠷᠳᠤᠩ ᠤ᠋ᠨ ᠵᠦᠢᠯ ᠥᠷᠥᠰᠢᠶᠡᠨ ᠱᠠᠩᠨᠠᠨ ᠰᠣᠶᠣᠷᠬᠠᠭᠰᠠᠨᠠ ᠡᠪᠦᠭᠡᠨ ᠮᠠᠷᠭᠤᠵᠤ ᠠᠢᠯᠠᠳᠬᠠᠷᠤᠨ᠄ ᠰᠠᠢᠳ ᠪᠣᠯᠤᠭᠴᠢ ᠠᠨᠤ ᠡᠵᠡᠨ ᠳ᠋ᠦ᠍ᠷ ᠶᠦ᠍ᠭᠡᠨ ᠴᠢᠪ ᠭᠡᠮᠡᠨ ᠬᠥᠪᠡᠭᠦᠳ ᠪᠣᠯᠤᠭᠴᠢ ᠠᠨᠤ ᠡᠴᠢᠭᠡ ᠲᠦᠷ ᠢ᠋ᠶ᠋ᠡᠨ ᠦᠢᠯᠡᠴᠢᠯᠡᠬᠦ ᠮᠡᠲᠦ ᠪᠣᠯᠠᠢ᠃ ᠬᠥᠪᠡᠭᠦᠨ ᠢᠨᠤ ᠶᠣᠰᠣᠯᠠᠯ ᠢ᠋ ᠪᠠᠷᠢᠮᠲᠠᠯᠠᠵᠤ ᠳᠡᠭᠡᠭᠰᠢ ᠡᠴᠢᠭᠡ ᠶ᠋ᠢᠨ ᠵᠢᠷᠤᠮ ᠳ᠋ᠤᠷ ᠭᠦᠢᠴᠡᠳᠬᠡᠪᠡᠰᠦ ᠵᠣᠬᠢᠬᠤᠢ ᠠᠲᠠᠯᠠ ᠱᠠᠩᠨᠠᠯ ᠢ᠋ᠶ᠋ᠠᠷ ᠶᠠᠭᠤᠬᠢᠮᠤᠢ᠃ ᠵᠢᠴᠢ ᠠᠷᠠᠳ ᠪᠢ ᠪᠠᠰᠠ ᠶᠠᠮᠠᠷᠴᠤ ᠤᠷᠠᠨ ᠤᠪᠠᠳᠢᠰ ᠠᠷᠠᠯᠵᠢᠶᠠᠯᠠᠭᠴᠢ ᠪᠤᠰᠤ ᠪᠥᠭᠡᠳ ᠭᠠᠭᠴᠠᠬᠦ ᠳᠡᠭᠡᠳᠦ ᠡᠵᠡᠨ ᠲᠠᠨ ᠤ᠋ ᠰᠠᠢᠨ ᠦᠢᠯᠡ ᠳ᠋ᠦ᠍ ᠪᠠᠬᠠᠳᠤᠬᠤ ᠶ᠋ᠢ ᠪᠣᠳᠣᠵᠤ ᠡᠨᠡᠬᠦ ᠠᠷᠭᠠ ᠶ᠋ᠢ ᠡᠷᠭᠦᠭᠰᠡᠨ ᠪᠠᠬᠠᠨᠠ ᠬᠡᠮᠡᠭᠰᠡᠨ ᠲᠦᠷ᠂ ᠬᠠᠭᠠᠨ ᠳᠠᠷᠤᠢ ᠲᠣᠷᠭᠠ ᠳᠤᠷᠳᠤᠩ ᠱᠠᠩᠨᠠᠨ ᠣᠯᠭᠣᠬᠤ ᠶ᠋ᠢ ᠵᠣᠭᠰᠣᠭᠠᠳ ᠥᠭᠡᠷᠡᠴᠢᠯᠡᠵᠦ ᠡᠯᠳᠡᠪ ᠡᠷᠳᠡᠨᠢᠲᠦ ᠡᠮ ᠢ᠋ ᠱᠠᠩᠨᠠᠵᠤ ᠥᠭᠭᠦᠭᠰᠡᠨ ᠪᠥᠯᠥᠭᠡ᠃
ᠠᠷᠰᠢᠲᠦ ᠢᠳᠡᠭᠡᠨ
ᠱᠤᠳᠠᠭᠭᠠᠷᠪᠤ (ᠴᠠᠭᠠᠨ ᠱᠤᠳᠠᠭ᠂ ᠶᠢᠰᠦᠨ ᠦᠶᠡ ᠪᠦᠬᠦᠢ ) ᠶ᠋ᠢ ᠰᠡᠭᠦᠳᠡᠷ ᠭᠠᠵᠠᠷᠠ ᠵᠠᠭᠤᠨ ᠡᠳᠦᠷ ᠬᠠᠲᠠᠭᠠᠭᠠᠳ ᠲᠠᠯᠠᠭᠳᠠᠵᠤ ᠡᠳᠦᠷ ᠪᠦᠷᠢ ᠭᠤᠷᠪᠠᠨ ᠤᠳᠠᠭᠠ᠂ ᠤᠳᠠᠭᠠᠨ ᠡᠳᠦᠷ ᠢᠳᠡᠪᠡᠰᠦ ᠴᠢᠬᠢ ᠰᠣᠨᠣᠷ ᠨᠢᠳᠦ ᠭᠡᠭᠡᠭᠡᠳᠦᠭᠡᠳ ᠤᠷᠲᠤ ᠨᠠᠰᠤᠯᠠᠮᠤᠢ᠃
ᠠᠷᠰᠢᠲᠦ ᠢᠳᠡᠭᠡᠨ
ᠽᠠᠷᠮᠠ ᠮᠠᠭᠠᠯᠢᠩᠭᠤ ᠶ᠋ᠢ ᠢᠳᠡᠪᠡᠰᠦ ᠠᠯᠢᠪᠠ ᠠᠷᠬᠠᠭ ᠡᠪᠡᠳᠴᠢᠨ ᠢ᠋ ᠠᠷᠢᠯᠭᠠᠬᠤ ᠪᠥᠭᠡᠳ ᠤᠳᠠᠭᠠᠨ ᠢᠳᠡᠪᠡᠰᠦ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠲᠥᠯᠵᠢᠭᠦᠯᠦᠨ ᠴᠢᠭᠢᠷᠠᠭᠵᠢᠭᠤᠯᠵᠤ ᠨᠠᠰᠤ ᠶ᠋ᠢ ᠤᠷᠲᠤᠳᠬᠠᠨ ᠦᠯᠦ ᠬᠥᠭᠰᠢᠷᠡᠮᠦᠢ᠃
ᠪᠦᠦ ᠫᠠᠶᠤᠤ ᠽᠢ ᠢᠨᠤ
ᠳ᠋ᠠᠷᠪᠤ (ᠤᠯᠠᠯᠵᠢᠭᠠᠨᠠ ᠶ᠋ᠢᠨ ᠦᠷᠡ) ᠶ᠋ᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠯ ᠢᠳᠡᠭᠡᠳ ᠥᠩᠭᠡ ᠵᠢᠰᠦ ᠬᠠᠰ ᠮᠡᠲᠦ ᠪᠣᠯᠵᠤ᠂ ᠭᠠᠯ ᠳ᠋ᠤᠷ ᠣᠷᠣᠪᠠᠴᠤ ᠲᠦᠯᠡᠭᠳᠡᠬᠦ ᠦᠭᠡᠢ᠂ ᠤᠰᠤᠨ ᠳ᠋ᠤᠷ ᠣᠷᠣᠪᠠᠴᠤ ᠨᠣᠷᠬᠤ ᠦᠭᠡᠢ᠃
ᠪᠦᠦ ᠫᠢᠶᠣᠣ ᠽᠢ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢᠨᠤ
ᠬᠠᠨ ᠵᠢᠦᠢ ᠬᠡᠮᠡᠬᠦ ᠬᠥᠮᠦᠨ ᠱᠤᠳᠠᠭ ᠢ᠋ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠢᠳᠡᠭᠡᠳ ᠪᠡᠶᠡ ᠶ᠋ᠢᠨ ᠳᠡᠭᠡᠷᠡ ᠢᠨᠤ ᠦᠰᠦ ᠤᠷᠭᠤᠵᠤ᠂ ᠨᠢᠭᠡᠨ ᠡᠳᠦᠷ ᠲᠦᠮᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠴᠡᠭᠡᠵᠢ ᠪᠡᠷ ᠤᠩᠰᠢᠵᠤ᠂ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠨᠢᠴᠦᠭᠦᠯᠡᠪᠡᠴᠦ ᠦᠯᠦ ᠲᠠᠭᠠᠷᠠᠮᠤᠢ᠃ ᠭᠡᠪᠡᠴᠦ ᠡᠷᠬᠡᠪᠰᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠤᠷᠭᠤᠵᠤ ᠶᠢᠰᠦᠨ ᠦᠶᠡ ᠪᠦᠬᠦᠢ ᠪᠥᠭᠡᠳ ᠦᠶᠡ ᠪᠦᠷᠢ ᠢᠮᠠᠬᠤ ᠲᠡᠳᠦᠢ ᠶ᠋ᠢ ᠣᠯᠬᠤ ᠬᠡᠷᠡᠭᠲᠡᠢ᠂ ᠬᠡᠷᠪᠡ ᠬᠦᠷᠡᠩ ᠴᠡᠴᠡᠭᠲᠡᠢ ᠪᠣᠯᠪᠠᠰᠤ ᠨᠡᠩ ᠰᠠᠢᠨ ᠶᠤᠮ᠃
ᠢᠳᠡᠭᠡᠨ ᠦ᠌ ᠵᠠᠰᠠᠯ ᠤ᠋ᠨ ᠵᠢᠷᠦᠬᠡᠨ ᠲᠣᠯᠢ ᠬᠡᠮᠡᠬᠦ ᠨᠣᠮ ᠳ᠋ᠤᠷ ᠲᠡᠮᠳᠡᠭᠯᠡᠭᠰᠡᠨ ᠢᠨᠤ
ᠯᠢᠩᠬᠤᠠ ᠶ᠋ᠢᠨ ᠦᠨᠳᠦᠰᠦ ᠪᠣᠯᠪᠠᠰᠤ ᠠᠮᠲᠠᠯᠢᠭ ᠲᠡᠭᠰᠢ ᠴᠢᠨᠠᠷᠲᠠᠢ ᠪᠥᠭᠡᠳ ᠬᠣᠣᠷᠠ ᠦᠭᠡᠢ᠃ ᠡᠨᠡ ᠪᠣᠯᠪᠠᠰᠤ ᠬᠣᠳᠣᠭᠣᠳᠣ ᠳᠡᠯᠢᠭᠦᠦ ᠶ᠋ᠢ ᠰᠡᠯᠪᠢᠨ ᠲᠡᠮᠦᠷ ᠊ᠢ ᠲᠡᠵᠢᠭᠡᠨ᠂ ᠣᠶᠤᠨ ᠤᠬᠠᠭᠠᠨ ᠊ᠢ ᠰᠡᠷᠭᠡᠭ ᠪᠣᠯᠭᠠᠨ᠂ ᠡᠪᠡᠳᠴᠢᠨ ᠪᠦᠬᠦᠨ ᠊ᠢ ᠠᠷᠢᠯᠭᠠᠨ᠂ ᠤᠳᠠᠭᠠᠨ ᠡᠳᠦᠷ ᠢᠳᠡᠪᠡᠰᠦ ᠤᠮᠳᠠᠭᠠᠰᠬᠤ ᠶ᠋ᠢ ᠵᠣᠭᠰᠣᠭᠠᠨ᠂ ᠴᠣᠭ ᠵᠢᠪᠬᠤᠯᠠᠩ ᠊ᠢ ᠰᠠᠶ᠋ᠢᠵᠢᠷᠠᠭᠤᠯᠤᠮᠤᠢ᠃
ᠿᠢ ᠬᠤᠸᠠ ᠽᠢ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢᠨᠤ
ᠪᠠᠳᠪᠠᠷᠠᠶ ᠬᠢᠭᠡᠳ ᠰᠠᠪᠠᠷᠠᠢ ᠶ᠋ᠢᠨ ᠭᠣᠣᠯ ᠢ᠋ ᠠᠨᠤ ᠠᠪᠴᠤ ᠬᠠᠶᠠᠭᠠᠳ ᠤᠳᠠᠭᠠᠨ ᠡᠳᠦᠷ ᠢᠳᠡᠪᠡᠰᠦ ᠰᠡᠳᠬᠢᠯ ᠪᠡᠶᠡᠰᠴᠦ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠤᠨ᠂ ᠤᠮᠳᠠᠭᠠᠰᠬᠤ ᠶ᠋ᠢ ᠵᠣᠭᠰᠣᠭᠠᠵᠤ᠂ ᠪᠡᠯᠬᠡᠭᠦᠰᠦ ᠪᠡᠷ ᠡᠪᠡᠳᠴᠦ ᠬᠥᠷᠥᠩᠭᠡ ᠴᠤᠪᠤᠷᠠᠨ ᠰᠠᠭᠤᠯᠭᠠᠬᠤ ᠶ᠋ᠢ ᠵᠠᠰᠠᠮᠤᠢ ᠬᠡᠮᠡᠵᠦᠬᠦᠢ᠃
ᠿᠢ ᠬᠤᠸᠠ ᠽᠢ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢᠨᠦ
ᠯᠢᠩᠬᠤᠠ ᠶ᠋ᠢᠨ ᠴᠣᠮᠣᠷᠯᠢᠭ ᠢ᠋ ᠤᠳᠠᠭᠠᠨ ᠡᠳᠦᠷ ᠢᠳᠡᠪᠡᠰᠦ ᠵᠢᠷᠦᠬᠡ ᠶ᠋ᠢ ᠲᠠᠢᠪᠤᠰᠢᠷᠠᠭᠤᠯᠤᠨ ᠥᠩᠭᠡ ᠵᠢᠰᠦ ᠶ᠋ᠢ ᠰᠠᠢᠵᠢᠷᠠᠭᠤᠯᠤᠨ ᠪᠡᠶᠡ ᠶ᠋ᠢ ᠬᠥᠩᠭᠡᠷᠡᠭᠦᠯᠦᠮᠦᠢ ᠬᠡᠮᠡᠪᠡ᠃
ᠿᠢ ᠬᠤᠸᠠ ᠽᠢ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢᠨᠤ
ᠰᠠᠽᠣᠩ ᠪᠣᠯᠪᠠᠰᠤ ᠠᠮᠲᠠᠯᠢᠭ ᠠᠮᠲᠠᠲᠠᠢ᠂ ᠬᠣᠣᠷᠠ ᠦᠭᠡᠢ᠂ ᠡᠭᠦᠨ ᠢ᠋ ᠤᠳᠠᠭᠠᠨ ᠡᠳᠦᠷ ᠢᠳᠡᠪᠡᠰᠦ ᠶᠠᠰᠤ ᠰᠢᠷᠪᠥᠰᠥ ᠶ᠋ᠢ ᠴᠢᠭᠢᠷᠠᠭᠵᠢᠭᠤᠯᠤᠨ ᠳᠤᠰᠤᠯ ᠴᠢᠮᠥᠭᠡ ᠶ᠋ᠢ ᠨᠡᠮᠡᠭᠳᠡᠭᠦᠯᠵᠦ᠂ ᠦᠰᠦ ᠭᠡᠵᠢᠭᠡ ᠶ᠋ᠢ ᠬᠠᠷᠠᠯᠠᠭᠤᠯᠤᠨ ᠬᠡᠦᠬᠡᠳ ᠲᠡᠢ ᠪᠣᠯᠭᠠᠮᠤᠢ ᠬᠡᠮᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠸᠠ