ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠲᠠᠪᠤ> Элсэнд булагдсан сувдаа – П.Оюунгэрэл <5>
9ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ –<ᠲᠠᠪᠤ>
ᠰᠠᠢᠰᠢᠶᠠᠯᠲᠤ ᠶ᠋ᠢ ᠠᠯᠤᠰ ᠬᠣᠯᠠ ᠪᠣᠢᠳᠠ ᠪᠥᠭᠯᠡᠭᠦᠦ ᠭᠠᠵᠠᠷ ᠪᠣᠯᠬᠤ ᠰᠣᠩᠭᠢᠨᠠᠲᠤ ᠰᠤᠮᠤᠨ ᠤ᠋ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠠᠬᠢᠷᠤᠯ ᠢ᠋ᠶ᠋ᠠᠷ ᠳᠡᠪᠰᠢᠭᠦᠯᠦᠨ ᠰᠢᠯᠵᠢᠭᠦᠯᠵᠡᠢ᠃ ᠬᠡᠴᠢᠨᠡᠨ ᠣᠯᠠᠨ ᠬᠦᠴᠢᠷ ᠪᠡᠷᠬᠡᠰᠢᠶᠡᠯ ᠢ᠋ ᠲᠤᠭᠤᠯᠤᠨ ᠠᠵᠢᠯ ᠠᠮᠢᠳᠤᠷᠠᠯ ᠨᠢ ᠳᠥᠩᠭᠡᠵᠦ ᠲᠣᠭᠲᠠᠪᠤᠷᠢ ᠲᠠᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠬᠠᠷᠢᠨ ᠣᠨᠳᠣᠣ ᠭᠠᠵᠠᠷ ᠲᠤ᠌ ᠣᠴᠢᠭᠤᠯᠬᠤ ᠪᠣᠯᠤᠭᠰᠠᠨ ᠨᠢ ᠭᠠᠪᠢᠷᠠ ᠳ᠋ᠤ᠌ ᠬᠦᠯᠢᠶᠡᠬᠦ ᠳ᠋ᠦ᠍ ᠪᠡᠷᠬᠡ ᠲᠡᠢ ᠰᠠᠨᠠᠭᠳᠠᠨᠠ᠃ ᠬᠡᠵᠢᠶᠡᠳᠡ ᠠᠷᠠᠯ ᠳ᠋ᠤ᠌ ᠰᠤᠷᠮᠠᠭᠠᠢ ᠨᠣᠮᠣᠬᠠᠨ ᠱᠠᠷ ᠰᠢᠭ᠋ ᠬᠠᠮᠢᠭᠠ ᠵᠢᠭᠠᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠨᠢ ᠵᠢᠳᠬᠦᠵᠦ ᠶᠠᠪᠤᠳᠠᠭ ᠰᠠᠢᠰᠢᠶᠠᠯᠳᠤ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠲᠡᠢᠮᠦ ᠴᠦ᠍ ᠲᠦᠪᠡᠭᠲᠡᠢ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠭᠡᠲᠡᠯᠡ ᠭᠠᠪᠢᠷᠠ ᠲᠤᠢᠯ ᠢ᠋ᠶ᠋ᠠᠷ ᠠᠭᠤᠷᠯᠠᠨ ᠪᠠᠴᠢᠮᠳᠠᠪᠠ᠃
— ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢ ᠪᠠᠢᠭᠤᠯᠬᠤ ᠭᠡᠵᠦ ᠴᠢ ᠪᠢᠳᠡ ᠬᠣᠶᠠᠷ ᠬᠡᠴᠢᠨᠡᠨ ᠣᠯᠠᠨ ᠬᠦᠴᠢᠷ ᠢ᠋ ᠳᠤᠭᠤᠯᠪᠠ? ᠠᠷᠠᠢ ᠭᠡᠵᠦ ᠬᠥᠯ ᠤᠯᠠ ᠪᠠᠨ ᠣᠯᠵᠤ ᠲᠠᠪᠠᠯᠠᠵᠤ ᠰᠠᠭᠤᠷᠢᠰᠢᠭᠠᠳ ᠢᠷᠡᠬᠦᠯᠡᠷ ᠪᠠᠰᠠ ᠥᠭᠡᠷᠡ ᠭᠠᠵᠠᠷ ᠶᠠᠪᠤᠭᠤᠯᠴᠢᠬᠠᠨᠠ ᠭᠡᠳᠡᠭ ᠴᠢᠨᠢ᠂ ᠲᠡᠷᠡ ᠵᠠᠬᠢᠷᠤᠯ ᠢ᠋ ᠨᠢ ᠰᠠᠭᠤᠬᠤ ᠬᠡᠷᠡᠭ ᠦᠭᠡᠢ᠃ ᠡᠨᠳᠡ ᠪᠡᠨ ᠡᠩ ᠦ᠋ᠨ ᠪᠠᠭᠰᠢ ᠪᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠶ᠋ᠢ ᠭᠤᠶᠤᠪᠠᠯ ᠶᠠᠭᠠᠬᠢᠭᠰᠠᠨ ᠪᠣᠢ?《ᠵᠢᠳᠬᠦᠭᠰᠡᠨ ᠦᠬᠡᠷ ᠦ᠋ᠨ ᠵᠢᠷᠦᠬᠡ ᠶ᠋ᠢ》 ᠭᠡᠭᠴᠢ ᠪᠡᠷ ᠡᠨᠡ ᠳᠠᠷᠤᠭᠠ ᠨᠠᠷ ᠨᠡᠭᠡᠷᠡᠨ ᠪᠣᠯᠵᠤ ᠪᠠᠢᠨᠠ ᠠ᠋! ᠠᠯᠠᠭᠠᠨ ᠴᠢᠨᠡᠭᠡᠨ ᠭᠠᠵᠠᠷ ᠤ᠋ᠨ ᠬᠡᠳᠦᠬᠡᠨ ᠬᠥᠮᠦᠨ ᠲᠡᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠠᠬᠢᠷᠤᠯ ᠨᠡᠷᠡ ᠵᠡᠭᠦᠵᠦ ᠶᠠᠪᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠨᠳᠡ ᠪᠡᠨ ᠪᠠᠢᠭᠰᠠᠨ ᠳᠡᠭᠡᠷᠡ ᠪᠢᠰᠢ ᠤᠤ?
ᠲᠡᠷᠡ ᠬᠣᠶᠠᠷ ᠬᠤᠷᠢᠮᠯᠠᠭᠠᠳ ᠨᠠᠢ᠍ᠮᠠᠨ ᠵᠢᠯ ᠪᠣᠯᠲᠠᠯᠠ ᠰᠠᠢᠰᠢᠶᠠᠯᠳᠤ ᠠᠩᠬᠠ ᠤᠳᠠᠭᠠ ᠪᠠᠨ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠠᠭᠤᠷᠯᠠᠬᠤ ᠶ᠋ᠢ ᠬᠠᠷᠠᠵᠤ ᠪᠣᠢ᠃ ᠲᠡᠭᠦᠨ ᠦ᠌ ᠬᠡᠯᠡᠬᠦ ᠶᠣᠰᠣ ᠦᠭᠡᠢ ᠪᠢᠰᠢ ᠶᠦᠮ᠃
ᠲᠡᠷᠡ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠠᠢᠪᠤᠰᠢᠷᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠤᠳᠠᠲᠠᠯᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ
— ᠪᠢᠳᠡ ᠬᠣᠶᠠᠷ ᠠᠵᠢᠯ ᠳ᠋ᠤ᠌ ᠭᠠᠷᠤᠭᠠᠳ ᠰᠠᠶᠢ ᠬᠡᠳᠦᠬᠡᠨ ᠵᠢᠯ ᠪᠣᠯᠵᠤ ᠪᠠᠢᠨᠠ ᠪᠣᠢ! ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠶ᠋ᠢᠨ ᠬᠤᠪᠢᠶᠠᠷᠢᠯᠠᠯᠲᠠ ᠶ᠋ᠢ ᠳᠠᠭᠠᠬᠤ ᠦᠭᠡᠢ ᠪᠣᠯᠤᠨᠠ ᠤᠤ? ᠪᠢ ᠤᠷᠢᠳ ᠢ᠋ᠶ᠋ᠠᠷ ᠣᠴᠢᠵᠤ ᠣᠷᠣᠨ ᠪᠠᠢᠷᠢ ᠪᠠᠨ ᠲᠥᠪᠬᠢᠨᠡᠭᠦᠯᠦᠭᠡᠳ ᠢᠷᠡᠬᠦ ᠵᠢᠯ ᠡᠴᠡ ᠭᠡᠷ ᠪᠦᠯᠢ ᠪᠡᠨ ᠠᠪᠠᠴᠢᠶᠠ ᠭᠡᠰᠡᠨ ᠳ᠋ᠦ᠍ ᠵᠥᠪᠰᠢᠶᠡᠷᠡᠭᠰᠡᠨ ᠶᠦᠮ ᠭᠡᠯᠡ᠃ ᠭᠠᠪᠢᠷᠠ ᠳᠠᠬᠢᠭᠠᠳ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠵᠦ ᠤᠷᠤᠭᠤᠯ ᠨᠢ ᠴᠡᠴᠡᠷᠬᠢᠯᠡᠨᠡ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠢᠨᠢ ᠳᠠᠷᠠᠭᠠ ᠰᠠᠢᠰᠢᠶᠠᠯᠳᠤ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠲᠠᠷᠢᠶᠠᠯᠠᠩ ᠪᠠᠷᠢᠭᠠᠳᠠᠠ᠋ᠴᠠ ᠨᠢᠭᠡᠨ ᠠᠰᠠᠷᠠᠭᠴᠢ ᠣᠯᠵᠤ ᠥᠭᠭᠦᠭᠰᠡᠨ ᠰᠢᠨᠡ ᠠᠵᠢᠯ ᠤ᠋ᠨ ᠪᠠᠢᠷᠢ ᠳ᠋ᠠᠭᠠᠨ ᠶᠠᠪᠤᠬᠤ ᠪᠣᠯᠪᠠ᠃
ᠰᠤᠮᠤᠨ ᠤ᠋ ᠤᠳᠤᠷᠢᠳᠤᠯᠭᠠ᠂ ᠡᠯᠡ ᠭᠠᠴᠠᠭᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠴᠤ᠌ ᠣᠷᠣᠯᠴᠠᠭᠰᠠᠨ ᠦᠳᠡᠬᠦ ᠶᠣᠰᠣᠯᠠᠯ ᠢ᠋ ᠰᠤᠷᠭᠠᠭᠤᠯᠢᠠ᠋ᠴᠠ ᠨᠢ ᠨᠢᠵᠢᠭᠢᠷ ᠬᠢᠪᠡ᠃ ᠣᠯᠠᠨ ᠴᠤ᠌ ᠭᠡᠷ ᠦ᠋ᠨ ᠠᠬᠠᠮᠠᠳ ᠵᠠᠯᠠᠯᠭᠠ ᠦᠭᠡᠢ ᠪᠡᠷ ᠬᠦᠷᠦᠯᠴᠡᠨ ᠢᠷᠡᠵᠡᠢ᠃《ᠬᠠᠢᠷᠠᠨ ᠰᠠᠢᠨ ᠪᠠᠭᠰᠢ ᠶ᠋ᠢ ᠶᠠᠪᠤᠭᠤᠯᠴᠢᠬᠠᠯᠠ》 ᠭᠡᠵᠦ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠠᠮᠰᠠᠵᠤ ᠪᠠᠢᠯᠠ᠃ ᠡᠨᠡ ᠦᠳᠡᠯᠲᠡ ᠡᠴᠦᠰ ᠦ᠋ᠨ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠬᠡᠨ ᠰᠠᠨᠠᠵᠤ ᠣᠯᠬᠤ ᠠᠵᠢ᠃
ᠰᠠᠢᠰᠢᠶᠠᠯᠲᠤ ᠰᠢᠨᠡ ᠭᠠᠵᠠᠷ ᠲᠠᠭᠠᠨ ᠣᠴᠢᠵᠤ ᠰᠠᠷᠠ ᠪᠣᠯᠤᠭᠰᠠᠨ ᠤ᠋ ᠬᠢᠨᠢ ᠳᠠᠷᠠᠭᠠ ᠭᠠᠪᠢᠷᠠ ᠶ᠋ᠢ ᠴᠦ᠍ ᠠᠵᠢᠯ ᠰᠢᠯᠵᠢᠭᠦᠯᠦᠭᠰᠡᠨ ᠮᠡᠳᠡᠭᠳᠡᠯ ᠨᠢ ᠪᠠᠭᠤᠭᠰᠠᠨ ᠪᠠᠢᠯᠠ᠃ ᠡᠳᠡᠨ ᠦ᠌ ᠬᠢ ᠳᠠᠷᠠᠭᠠ ᠵᠢᠯ ᠢ᠋ ᠬᠦᠯᠢᠶᠡᠬᠦ ᠪᠣᠯᠤᠯᠴᠠᠭᠠ ᠦᠭᠡᠢ ᠪᠣᠯᠵᠠᠢ᠃ ᠳᠡᠮᠡᠢ ᠬᠡᠳᠦᠨ ᠡᠳᠦᠷ ᠪᠣᠯᠤᠭᠰᠠᠨ ᠦᠭᠡᠢ ᠰᠠᠢᠰᠢᠶᠠᠯᠲᠤ ᠭᠡᠷ ᠢ᠋ᠶ᠋ᠡᠨ ᠨᠡᠭᠦᠯᠭᠡᠬᠦ ᠲᠡᠷᠭᠡ ᠲᠡᠢ ᠪᠡᠨ ᠬᠦᠷᠴᠦ ᠢᠷᠡᠵᠡᠢ᠃
ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠠᠩᠬᠠᠨ ᠤ᠋ ᠠᠯᠬᠤᠮ ᠢ᠋ ᠡᠬᠢᠯᠡᠭᠦᠯᠦᠭᠰᠡᠨ ᠡᠨᠡᠬᠦ ᠳᠤᠷᠠᠰᠤᠯᠲᠤ ᠰᠠᠢᠬᠠᠨ ᠨᠤᠲᠤᠭ ᠪᠣᠯᠤᠨ ᠲᠠᠨᠢᠯᠴᠠᠵᠤ ᠳᠠᠰᠤᠯᠴᠠᠭᠰᠠᠨ ᠳᠣᠲᠣᠨᠣ ᠬᠥᠮᠦᠰ᠂ ᠬᠠᠢᠷᠠᠲᠤ ᠣᠯᠠᠨ ᠰᠤᠷᠤᠭᠴᠢᠳᠠ᠋ᠴᠠ ᠪᠠᠨ ᠭᠠᠪᠢᠷᠠ ᠰᠠᠯᠵᠤ ᠶᠠᠳᠠᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠪᠠᠢᠯᠠ᠃ ᠡᠳᠡᠨ ᠦ᠌ ᠬᠢ ᠨᠡᠭᠦᠵᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠷᠤᠭ ᠪᠦᠬᠦ ᠰᠤᠮᠤᠨ ᠤ᠋ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠷᠡᠵᠦ ᠦᠳᠡᠨ ᠮᠣᠷᠳᠠᠭᠤᠯᠵᠠᠢ᠃ ᠲᠡᠷᠭᠡᠨ ᠦ᠌ ᠬᠢᠨᠢ ᠬᠣᠶᠠᠷ ᠲᠠᠯᠠ ᠪᠠᠷ ᠮᠥᠷᠯᠡᠨ ᠵᠣᠭᠰᠣᠭᠰᠠᠨ ᠰᠤᠷᠤᠭᠴᠢᠳ《ᠰᠠᠢ᠍ᠢ᠍᠊ ᠪᠠᠭᠰᠢ ᠠ᠋᠂ ᠭᠠ ᠪᠠᠭᠰᠢ ᠠ᠋᠂ ᠪᠠᠶᠠᠷᠲᠠᠢ!》 ᠭᠡᠳ ᠤᠬᠢᠯᠠᠯᠳᠤᠨ ᠪᠠᠢᠵᠤ ᠦᠳᠡᠭᠰᠡᠨ ᠪᠢᠯᠡ᠃
ᠰᠣᠩᠭᠢᠨᠠᠲᠤ ᠭᠡᠵᠦ ᠶᠣᠰᠣᠲᠠᠢ ᠶᠢᠷᠲᠢᠨᠴᠦ ᠡᠴᠡ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠶᠤᠮ ᠰᠢᠭ᠋ ᠡᠵᠡᠭᠦᠢ ᠵᠡᠯᠢᠭᠦᠳ ᠶᠡᠬᠡ ᠲᠠᠯᠠ ᠶ᠋ᠢᠨ ᠳᠤᠮᠳᠠᠬᠢ ᠥᠴᠦᠬᠡᠨ ᠬᠡᠰᠡᠭ ᠳᠠᠷᠠᠰᠤᠲᠠᠢ ᠬᠣᠩᠬᠣᠷ ᠲᠤ᠌ ᠪᠠᠢᠷᠢᠰᠢᠭᠰᠠᠨ ᠪᠠᠭᠠᠬᠠᠨ ᠰᠤᠮᠤ ᠠᠵᠢ᠃ ᠪᠦᠬᠦ ᠰᠤᠮᠤ ᠪᠠᠷ ᠢ᠋ᠶ᠋ᠠᠨ ᠭᠤᠷᠪᠠᠨ ᠵᠠᠭᠤᠭᠠᠳ ᠯᠠ ᠬᠥᠮᠦᠨ ᠠᠮᠠ ᠲᠠᠢ᠃ ᠬᠣᠷᠰᠢᠶᠠ᠂ ᠠᠮᠤ ᠪᠤᠳᠠᠭᠠᠨ ᠤ᠋ ᠥᠷᠲᠡᠭᠡ ᠭᠡᠵᠦ ᠳᠥᠷᠪᠡᠨ ᠥᠨᠴᠥᠭ ᠢ᠋ ᠨᠢ ᠲᠣᠭᠣᠰᠬᠠ ᠪᠠᠷ ᠥᠨᠴᠥᠭᠯᠡᠭᠰᠡᠨ ᠨᠢᠭᠡᠨ ᠪᠠᠢᠰᠢᠩ ᠲᠠᠢ᠃ ᠪᠤᠰᠤᠳ ᠨᠢ ᠴᠥᠮ ᠨᠠᠮᠬᠠᠨ ᠴᠠᠭᠠᠨ ᠰᠢᠪᠡᠷ ᠪᠠᠢᠰᠢᠩ ᠤ᠋ᠳ᠃ ᠰᠤᠷᠭᠠᠭᠤᠯᠢ ᠨᠢ ᠭᠡᠪᠡᠯ ᠭᠤᠷᠪᠠᠨ ᠮᠥᠷ ᠨᠠᠪᠲᠠᠭᠠᠷ ᠬᠠᠭᠤᠴᠢᠨ ᠰᠢᠪᠡᠷ ᠪᠠᠢᠰᠢᠩ᠂ ᠪᠦᠭᠦᠳᠡ ᠵᠢᠷᠠ ᠭᠠᠷᠤᠢᠬᠠᠨ ᠰᠤᠷᠤᠭᠴᠢ ᠲᠠᠢ᠂ ᠨᠠᠢ᠍ᠮᠠᠨ ᠪᠠᠭᠰᠢ ᠠᠵᠢᠯᠲᠠᠨ ᠲᠠᠢ᠃ ᠬᠠᠮᠢᠭᠠᠠ᠋ᠴᠠ ᠨᠢ ᠬᠠᠷᠠᠭᠰᠠᠨ ᠴᠤ᠌ ᠳᠠᠮᠫᠤᠷᠠᠵᠤ ᠳᠠᠮᠳᠤᠭᠷᠠᠭᠰᠠᠨ ᠠᠷᠠᠴᠢᠭᠠ ᠦᠭᠡᠢ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠰᠤᠷᠭᠠᠭᠤᠯᠢ ᠪᠠᠢᠯᠠ᠃ ᠡᠨᠳᠡ ᠬᠣᠶᠠᠷᠬᠠᠨ ᠮᠠᠯᠵᠢᠬᠤ ᠭᠠᠴᠠᠭᠠ ᠲᠠᠢ᠃ ᠪᠡᠯᠴᠢᠭᠡᠷ ᠶᠡᠬᠡᠲᠡᠢ ᠪᠣᠯᠪᠠᠴᠤ ᠤᠰᠤ ᠬᠣᠪᠣᠷ ᠪᠣᠯᠬᠣᠷ ᠶᠡᠬᠡᠩᠬᠢ ᠨᠢ ᠡᠵᠡᠭᠦᠢ ᠲᠠᠯᠪᠢᠭᠳᠠᠵᠤ ᠪᠠᠢᠯᠠ᠃
ᠰᠠᠢᠰᠢᠶᠠᠯᠳᠤ ᠳ᠋ᠤ᠌ ᠣᠨᠣᠭᠳᠠᠭᠰᠠᠨ ᠭᠡᠷ ᠪᠣᠯ ᠬᠣᠶᠠᠷᠬᠠᠨ ᠵᠢᠵᠢᠭ ᠲᠠᠰᠤᠯᠭᠠ ᠲᠠᠢ ᠨᠠᠪᠰᠠᠭᠠᠷ ᠴᠢᠬᠤᠯ ᠰᠢᠪᠡᠷ ᠪᠠᠢᠰᠢᠩ᠃ ᠭᠡᠷ ᠦ᠋ᠨ ᠠᠳᠠᠭᠠᠷ ᠲᠤᠨᠢ ᠥᠨᠳᠥᠷ ᠪᠡᠶᠡ ᠲᠡᠢ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠲᠣᠯᠣᠭᠠᠢ ᠲᠤᠯᠤᠨᠠ᠃ ᠰᠣᠨᠢᠨ ᠢ᠋ᠶ᠋ᠠᠷ ᠨᠠᠭᠠᠭᠰᠠᠨ ᠫᠧᠩ ᠲᠡᠢ᠃ ᠴᠣᠬᠣᠢᠳᠠᠭᠰᠠᠨ ᠦᠭᠡᠢ ᠤᠳᠠᠭᠰᠠᠨᠠ᠋ᠴᠠ ᠬᠡᠷᠡᠮ ᠬᠠᠨᠠ ᠨᠢ ᠬᠠᠪ ᠬᠠᠷᠠ᠃ ᠳᠥᠩᠭᠡᠵᠦ ᠭᠡᠷᠡᠯ ᠲᠣᠰᠬᠤᠢᠴᠠ ᠵᠢᠵᠢᠭᠬᠡᠨ ᠴᠣᠩᠬᠣ ᠲᠠᠢ᠃ ᠡᠭᠦᠳᠡ ᠬᠠᠭᠠᠯᠭᠠ ᠨᠢ ᠴᠦ᠍ ᠭᠠᠵᠢᠴᠢᠬᠠᠵᠠᠢ᠃
ᠲᠡᠳᠡ ᠬᠣᠶᠠᠷ ᠡᠨᠳᠡᠬᠢ ᠶ᠋ᠢᠨ ᠤᠤᠯ ᠤ᠋ᠨ ᠡᠪᠦᠭᠡᠨ ᠵᠠᠬᠢᠷᠤᠯ ᠤ᠋ᠨ ᠳ᠋ᠤ᠌ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠬᠡᠳᠦᠨ ᠡᠳᠦᠷ ᠰᠠᠭᠤᠯᠭᠠᠭᠠᠳ ᠵᠤᠳᠠᠷᠠᠭᠰᠠᠨ ᠪᠠᠢᠰᠢᠩ ᠢ᠋ᠶ᠋ᠠᠨ ᠵᠠᠰᠠᠵᠤ ᠰᠡᠯᠪᠢᠨ᠂ ᠴᠣᠬᠣᠢᠳᠠᠵᠤ᠂ ᠫᠧᠩ ᠢ᠋ ᠨᠢ ᠴᠠᠭᠠᠨ ᠴᠠᠭᠠᠰᠤ ᠪᠠᠷ ᠨᠠᠭᠠᠵᠤ ᠴᠣᠩᠬᠣ ᠶ᠋ᠢ ᠨᠢ ᠲᠡᠯᠡᠵᠦ᠂ ᠡᠭᠦᠳᠡ ᠬᠠᠭᠠᠯᠭᠠ ᠶ᠋ᠢ ᠨᠢ ᠰᠣᠯᠢᠬᠤ ᠵᠡᠷᠭᠡ ᠪᠡᠷ ᠨᠡᠯᠢᠶᠡᠳ ᠡᠳᠦᠷ ᠠᠮᠤᠰᠬᠢᠬᠦ ᠴᠢᠯᠥᠭᠡ ᠦᠭᠡᠢ ᠠᠵᠢᠯᠯᠠᠭᠰᠠᠨ ᠤ᠋ ᠳ᠋ᠦᠩ ᠳ᠋ᠦ᠍ ᠳᠥᠩᠭᠡᠵᠦ ᠨᠢᠭᠡ ᠨᠡᠭᠦᠵᠦ ᠣᠷᠣᠨ ᠲᠥᠪᠬᠢᠨᠡᠬᠦ ᠳᠠᠰᠢ ᠪᠣᠯᠪᠠ᠃ ᠲᠣᠮᠣ ᠪᠢᠴᠢᠭ ᠦ᠋ᠨ ᠬᠣᠷᠭᠣ ᠨᠢ ᠣᠷᠣᠭᠤᠯᠵᠤ ᠪᠠᠭᠲᠠᠭᠰᠠᠨ ᠦᠭᠡᠢ ᠲᠤᠯᠠ ᠠᠢᠯ ᠤ᠋ᠨ ᠰᠠᠩ ᠬᠥᠮᠥᠷᠭᠡ ᠳ᠋ᠦ᠍ ᠭᠤᠶᠤᠵᠤ ᠲᠠᠯᠪᠢᠯᠠ᠃ ᠨᠢᠭᠡ ᠲᠠᠰᠤᠯᠭᠠ ᠶ᠋ᠢ ᠨᠢ ᠪᠢᠴᠢᠭ ᠦ᠋ᠨ ᠭᠡᠷ ᠮᠠᠶᠢᠭ ᠲᠠᠢ ᠵᠠᠰᠠᠵᠤ᠂ ᠪᠢᠴᠢᠭ ᠨᠣᠮ ᠤ᠋ᠨ ᠬᠡᠷᠡᠭᠰᠡᠯ᠂ ᠲᠣᠮᠣ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡ ᠪᠡᠨ ᠣᠷᠣᠭᠤᠯᠤᠨ ᠲᠠᠯᠪᠢᠬᠤ ᠳ᠋ᠤ᠌ ᠯᠠ ᠨᠢᠭᠡ ᠲᠠᠰᠤᠯᠭᠠ ᠳᠦᠭᠦᠷᠴᠦ᠂ ᠬᠣᠶᠠᠷ ᠲᠣᠮᠣ ᠥᠬᠢᠨ ᠦ᠌ ᠬᠢᠨᠢ ᠄ ᠮᠣᠳᠣᠨ ᠣᠷᠣ ᠣᠷᠣᠵᠤ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠮᠣᠳᠣᠨ ᠬᠠᠪᠲᠠᠰᠤ ᠶ᠋ᠢ ᠨᠢ ᠰᠠᠯᠭᠠᠨ ᠠᠪᠴᠤ ᠳᠣᠣᠷᠠ ᠨᠢ ᠲᠣᠭᠣᠰᠬᠠ ᠵᠡᠷᠭᠡᠯᠡᠨ ᠲᠠᠯᠪᠢᠵᠤ ᠡᠪᠯᠡᠭᠦᠯᠪᠡ ᠃ ᠨᠥᠭᠦᠭᠡ ᠲᠠᠰᠤᠯᠭᠠ ᠳ᠋ᠤᠨᠢ ᠱᠠᠹᠠ ᠪᠣᠯᠤᠨ ᠲᠡᠷᠡ ᠬᠣᠶᠠᠷ ᠤ᠋ᠨ ᠣᠷᠣ ᠶ᠋ᠢ ᠣᠷᠣᠭᠤᠯᠤᠭᠠᠳ ᠪᠥᠭᠰᠡ ᠡᠷᠭᠢᠬᠦ ᠵᠠᠢ ᠦᠭᠡᠢ ᠳᠦᠭᠦᠷᠴᠢᠬᠡᠯᠡ᠃
ᠦᠷᠭᠦᠭᠡᠨ ᠦ᠌ ᠳᠣᠲᠣᠷᠠ ᠬᠡᠳᠦᠢ ᠢᠪᠴᠤᠤ ᠴᠢᠬᠤᠯ ᠴᠤ᠌᠂ ᠲᠡᠷᠡ ᠬᠣᠶᠠᠷ ᠤ᠋ᠨ ᠠᠵᠢᠯᠴᠢ ᠭᠠᠷ ᠢ᠋ᠶ᠋ᠠᠷ ᠡᠪ ᠵᠦᠢ ᠲᠡᠢ ᠲᠣᠬᠢᠷᠠᠭᠤᠯᠤᠭᠰᠠᠨ ᠤ᠋ ᠦᠷᠡ ᠳ᠋ᠦᠩ ᠳ᠋ᠦ᠍ ᠡᠳᠡᠨ ᠦ᠌ ᠬᠢ ᠬᠡᠨ ᠬᠠᠷᠠᠭᠰᠠᠨ ᠴᠤ᠌ ᠴᠡᠪᠡᠷ ᠴᠡᠮᠴᠡᠭᠡᠷ ᠲᠣᠬᠢᠯᠢᠭ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃
ᠡᠨᠳᠡ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠭᠠᠪᠢᠷᠠ ᠶ᠋ᠢᠨ ᠠᠭᠤᠷᠯᠠᠵᠤ ᠤᠴᠠᠭᠠᠷᠳᠠᠬᠤ ᠨᠢ ᠣᠯᠠᠳᠠᠵᠤ᠂ ᠨᠢᠭᠡᠯᠡ ᠲᠦᠩᠰᠦᠭᠡᠷ ᠪᠣᠯᠵᠤ ᠬᠤᠪᠢᠷᠠᠪᠠ᠃ ᠨᠢᠭᠡᠨ ᠦᠳᠡᠰᠢ ᠣᠷᠣᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠢᠰᠢᠶᠠᠯᠲᠤ ᠲᠡᠭᠦᠨ ᠢ᠋ ᠡᠯᠢᠭᠡᠨ ᠳ᠋ᠡᠭᠡᠨ ᠨᠠᠭᠠᠯᠳᠤᠭᠤᠯᠤᠨ ᠲᠡᠪᠡᠷᠢᠵᠦ
— ᠤᠷᠮᠠᠲᠠᠢᠬᠠᠨ ᠪᠠᠢᠭᠠᠴᠢ ᠳᠠ᠂ ᠬᠥᠭᠰᠢᠨ ᠮᠢᠨᠢ! ᠶᠠᠭᠠᠬᠢᠭᠰᠠᠨ ᠪᠣᠢ? ᠤᠷᠤᠭᠤ ᠴᠢᠷᠠᠢᠯᠠᠭᠠᠳ ᠯᠠ᠁
— ᠶᠠᠭᠠᠬᠢᠯᠠ ᠴᠤ᠌ ᠭᠡᠬᠦ ᠶᠦᠮ ᠳᠡ᠃ ᠡᠨᠡ ᠭᠠᠵᠠᠷ ᠨᠠᠳᠠ ᠨᠢᠭᠡ ᠯᠡ ᠬᠠᠴᠢᠨ ᠰᠠᠨᠠᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃ ᠪᠢ ᠲᠠᠩᠳᠠ ᠠᠶᠤᠵᠤ ᠰᠣᠴᠢᠨ ᠨᠣᠢᠷ ᠬᠤᠯᠵᠢᠵᠤ᠂ ᠵᠢᠪᠡᠭᠦᠨ ᠮᠠᠭᠤᠬᠠᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠨᠡ᠃ ᠵᠠᠷᠢᠮ ᠦᠶᠡ ᠳ᠋ᠦ᠍ ᠬᠠᠷᠠᠩᠭᠤᠢ ᠰᠥᠨᠢ ᠡᠵᠡᠭᠦᠢ ᠵᠡᠯᠢᠭᠦᠳ ᠬᠡᠭᠦᠷ ᠣᠩᠭᠣᠨ ᠤ᠋ ᠭᠠᠵᠠᠷ ᠲᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠢᠳᠠᠰ ᠲᠠᠢ ᠰᠠᠨᠠᠭᠳᠠᠭᠠᠳ ᠪᠠᠢᠬᠤ ᠪᠣᠯᠴᠢᠬᠠᠯᠠ᠃
— ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠪᠠᠢᠭᠠ ᠪᠣᠢ? ᠪᠡᠶᠡ ᠴᠢᠨᠢ ᠵᠦᠭᠡᠷ ᠪᠢᠵᠡ ᠳᠡ? ᠪᠠᠷᠤᠭ ᠲᠡᠷᠡ ᠣᠷᠣᠢ ᠰᠣᠭᠲᠣᠭᠤ ᠵᠢᠭᠮᠢᠳ ᠢᠷᠡᠵᠦ ᠠᠶᠤᠯᠭᠠᠭᠰᠠᠨᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠬᠠ᠂ ᠮᠠᠷᠭᠠᠰᠢ ᠵᠠᠮᠪᠠᠯ ᠮᠠᠮᠠ ᠳ᠋ᠤ᠌ ᠦᠵᠡᠭᠦᠯᠦᠨ ᠡᠮ ᠠᠪᠴᠤ ᠤᠤᠭᠤ ᠳᠠ᠃ ᠮᠢᠨᠦ ᠬᠥᠭᠰᠢᠨ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠡᠪᠦᠭᠡᠨ ᠨᠢ ᠤᠳᠠᠯ ᠦᠭᠡᠢ ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢ ᠴᠣ ᠰᠢᠨᠡ ᠪᠡᠷ ᠪᠠᠢᠭᠤᠯᠤᠨ ᠬᠤᠪᠢᠷᠠᠭᠤᠯᠤᠨᠠ᠃ ᠬᠠᠷᠠᠵᠤ ᠪᠠᠢᠭᠠᠷᠠᠢ! ᠭᠠᠪᠢᠷᠠ ᠬᠥᠩᠭᠡᠬᠡᠨ ᠰᠠᠨᠠᠭᠠ ᠠᠯᠳᠠᠵᠤ
— ᠣᠳᠣ ᠶ᠋ᠢᠨ ᠵᠠᠷᠢᠮ ᠪᠠᠢᠳᠠᠯ ᠨᠡᠭᠡᠷᠡᠨ ᠱᠣᠭᠲᠠᠢ᠃ ᠡᠢᠮᠦ ᠨᠢᠭᠡ ᠭᠠᠵᠠᠷ ᠲᠤ᠌ ᠬᠥᠮᠦᠨ ᠢ᠋ ᠠᠪᠴᠢᠷᠠᠴᠢᠬᠠᠭᠠᠳ ᠪᠠᠰᠠ ᠶᠡᠬᠡ ᠳᠡᠪᠰᠢᠭᠦᠯᠵᠦ ᠬᠡᠷᠡᠭᠯᠡᠭᠰᠡᠨ ᠪᠣᠯᠴᠢᠬᠠᠵᠠᠢ᠃ ᠴᠢ ᠪᠢᠳᠡ ᠬᠣᠶᠠᠷ ᠴᠤ᠌ ᠪᠠᠢᠬᠤ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠪᠠᠢᠭᠤᠯᠬᠤ ᠪᠢᠰᠢ ᠪᠣᠯ ᠴᠤᠴᠠᠷᠠᠵᠤ ᠬᠠᠭᠤᠴᠢᠷᠠᠭᠰᠠᠨ ᠢ᠋ ᠰᠡᠯᠪᠢᠬᠦ ᠯᠡ ᠵᠠᠶᠠᠭᠠ ᠲᠠᠢ ᠤᠯᠤᠰ ᠶᠤᠮ ᠪᠠᠢᠨᠠ ᠠ᠋᠃
— ᠲᠡᠭᠡᠵᠦ ᠪᠣᠳᠣᠵᠤ ᠪᠣᠯᠬᠤ ᠦᠭᠡᠢ᠃ ᠤᠳᠤᠷᠢᠳᠤᠯᠭᠠᠠ᠋ᠴᠠ ᠨᠠᠮᠠ ᠶ᠋ᠢ ᠡᠨᠡ ᠠᠵᠢᠯ ᠢ᠋ ᠬᠢᠵᠦ ᠴᠢᠳᠠᠨᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠵᠦ ᠢᠷᠡᠭᠦᠯᠦᠭᠰᠡᠨ ᠪᠠᠢᠯᠭᠦᠢ ᠳᠡ᠃ ᠪᠢᠳᠡ ᠪᠦᠷ ᠭᠠᠯ ᠵᠠᠯᠠᠭᠤ ᠨᠠᠰᠤᠨ ᠳ᠋ᠠᠭᠠᠨ ᠪᠠᠢᠭᠠ ᠪᠣᠯᠬᠣᠷ ᠪᠠᠬᠠᠨ ᠬᠦᠴᠢᠷ ᠠᠮᠰᠠᠬᠤ ᠶᠠᠭᠤ ᠯᠠ ᠪᠠᠢᠬᠤᠪ᠃ ᠮᠢᠨᠦ ᠬᠠᠢᠷᠠᠲᠤ ᠪᠦᠰᠡᠭᠦᠢ᠂ ᠡᠪᠦᠭᠡᠨ ᠳ᠋ᠡᠭᠡᠨ ᠨᠢᠭᠡᠨ ᠮᠣᠷᠢᠨ ᠤ᠋ ᠬᠦᠴᠦ ᠪᠣᠯᠬᠤ ᠬᠡᠷᠡᠭᠲᠡᠢ ᠰᠢᠦ ᠳᠡ᠃ ᠬᠣᠶᠠᠭᠤᠯᠠ ᠪᠠᠨ ᠮᠥᠨ ᠭᠢᠯᠠᠯᠵᠠᠲᠠᠯᠠ ᠠᠵᠢᠯᠯᠠᠶᠠ᠃ ᠢᠷᠡ᠂ ᠡᠪᠦᠭᠡᠨ ᠢ᠋ᠶ᠋ᠡᠨ ᠦᠨᠦᠰ! ᠭᠡᠳ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠥᠭᠡᠯᠡᠨ ᠬᠠᠯᠠᠭᠤᠨ ᠪᠡᠶᠡ ᠶ᠋ᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠬᠤᠮᠢᠨ ᠳᠠᠷᠤᠪᠠ᠃
ᠰᠣᠩᠭᠢᠨᠠᠲᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢᠨᠠᠷ ᠤ᠋ᠨ ᠣᠯᠠᠩᠬᠢ ᠨᠢ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠲᠤᠤᠱᠯᠠᠭᠤᠯᠤᠨ ᠣᠷᠣᠨ ᠲᠣᠭᠠ ᠪᠠᠷ ᠠᠵᠢᠯ ᠳ᠋ᠤ᠌ ᠣᠷᠣᠭᠰᠠᠳ᠃ ᠭᠠᠭᠴᠠ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠤ᠋ ᠶᠡᠬᠡ ᠰᠤᠷᠭᠠᠭᠤᠯᠢᠠ᠋ᠴᠠ ᠵᠢᠷᠤᠭ ᠤ᠋ᠨ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠵᠢᠭᠮᠢᠳ ᠭᠡᠭᠴᠢ ᠪᠠᠭᠰᠢ ᠣᠶᠤᠲᠠᠨ ᠪᠠᠢᠭᠰᠠᠨ ᠴᠣ ᠣᠶᠤᠲᠠᠨ ᠤ᠋ ᠮᠠᠶᠢᠭ ᠳᠠᠩᠴᠤ ᠦᠭᠡᠢ᠃ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠠᠭᠰᠤᠮ ᠲᠠᠯᠪᠢᠨ ᠠᠢᠯ ᠬᠣᠲᠠ ᠶ᠋ᠢ ᠦᠢᠮᠡᠭᠦᠯᠦᠨ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠡᠭᠦᠰᠬᠡᠵᠦ᠂ ᠶᠣᠰᠣᠲᠠᠢ ᠨᠡᠷᠡ ᠨᠢᠳᠡᠷ ᠲᠡᠭᠡᠨ ᠨᠡᠢᠴᠡᠭᠰᠡᠨ ᠳᠠᠯᠠ ᠨᠠᠶᠠᠭᠠᠳ ᠣᠨ ᠤ᠋ ᠲᠠᠩᠬᠠᠢ ᠯᠤᠢᠪᠠᠷᠴᠢᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠳᠦᠷᠢ ᠭᠡᠯᠲᠡᠢ᠃ ᠡᠢᠮᠦ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠪᠠᠭᠰᠢ ᠶ᠋ᠢᠨ ᠡᠩᠨᠡᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ ᠬᠡᠨ ᠴᠦ᠍ ᠭᠠᠢᠬᠠᠮᠠᠷ᠃ ᠰᠢᠨᠡ ᠢᠷᠡᠭᠰᠡᠨ ᠵᠠᠬᠢᠷᠤᠯ ᠤ᠋ᠨ ᠢ᠋ᠶ᠋ᠠᠨ ᠰᠦᠷ ᠢ᠋ ᠳᠠᠷᠤᠬᠤ ᠭᠡᠵᠦ ᠲᠡᠳᠡᠨ ᠦ᠌ ᠳ᠋ᠦ᠍ ᠰᠣᠭᠲᠣᠭᠤ ᠪᠠᠷ ᠬᠢᠲᠤᠭᠠ ᠪᠣᠣᠳᠤᠤ ᠪᠠᠷᠢᠵᠤ ᠣᠴᠢᠨ᠄《 ᠰᠠᠢ ᠣᠪᠣᠭᠲᠤ ᠠ᠋᠂ ᠡᠨᠡ ᠭᠠᠵᠠᠷ ᠢᠷᠡᠪᠡᠯ ᠤᠷᠢᠳ ᠢ᠋ᠶ᠋ᠠᠷ ᠡᠪᠦᠭᠡ ᠪᠡᠨ ᠲᠠᠨᠢᠵᠤ ᠠᠪᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠡᠪᠦᠭᠡ ᠪᠡᠨ ᠠᠭᠤᠷᠯᠠᠭᠤᠯᠪᠠᠯ ᠤᠤ᠂ ᠰᠠᠢᠨ ᠢ᠋ᠶ᠋ᠠᠨ ᠦᠵᠡᠬᠦ ᠦᠭᠡᠢ ᠭᠡᠵᠦ ᠮᠡᠳᠡᠭᠡᠷᠡᠢ!》 ᠭᠡᠮᠡᠨ ᠰᠦᠷᠳᠡᠭᠦᠯᠵᠡᠢ᠃ ᠡᠢᠮᠦ ᠶᠣᠰᠣ ᠪᠤᠰᠤ ᠬᠥᠨᠳᠡᠯᠡᠨ ᠠᠮᠢᠲᠠᠨ ᠲᠠᠢ ᠠᠩᠬᠠ ᠬᠠᠷᠭᠤᠵᠤ ᠪᠠᠢᠭᠠ ᠭᠠᠪᠢᠷᠠ ᠨᠡᠭᠡᠷᠡᠨ ᠦᠩᠬᠦᠯᠴᠡᠭ ᠢ᠋ᠶ᠋ᠡᠨ ᠬᠠᠭᠠᠷᠠᠲᠠᠯᠠ ᠠᠶᠤᠭᠰᠠᠨ ᠶᠤᠮ᠃ ᠰᠠᠢᠰᠢᠶᠠᠯᠳᠤ ᠠᠵᠢᠭ ᠴᠤ᠌ ᠦᠭᠡᠢ᠂ ᠴᠢ ᠲᠡᠭᠡᠵᠦ ᠯᠡ ᠪᠠᠢ ᠭᠠᠢᠭᠤᠢ᠂ ᠰᠠᠢᠬᠠᠨ ᠬᠡᠯᠡᠭᠡᠳ ᠮᠡᠳᠡᠬᠦ ᠦᠭᠡᠢ ᠪᠣᠯ ᠥᠪᠡᠷ ᠦ᠋ᠨ ᠴᠢᠨᠢ ᠠᠷᠭᠠ ᠶ᠋ᠢ ᠥᠪᠡᠷ ᠲᠦ᠍ ᠴᠢᠨᠢ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠨᠠᠮᠠ ᠬᠠᠷᠢᠭᠤᠴᠠᠬᠤ ᠲᠡᠩᠬᠡᠭᠡ ᠴᠢᠮᠠ ᠳ᠋ᠤ᠌ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠪᠤᠤ ᠮᠡᠳᠡ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠨᠠ᠃ ᠲᠡᠷᠡ ᠭᠣᠣᠯ ᠠᠵᠢᠯ ᠳ᠋ᠠᠭᠠᠨ ᠣᠮ ᠬᠣᠮ ᠦᠭᠡᠢ ᠶᠠᠭᠠᠷᠠᠤ ᠪᠣᠯᠬᠣᠷ ᠠᠷᠢᠭᠴᠢᠢᠨ ᠵᠢᠭᠮᠢᠳ ᠢ᠋ ᠲᠦᠷ ᠬᠣᠢᠰᠢ ᠲᠠᠯᠪᠢᠪᠠ᠃
ᠡᠨᠳᠡᠬᠢ ᠪᠠᠭᠰᠢᠨᠠᠷ ᠤ᠋ᠨ ᠪᠦᠷᠢᠯᠳᠦᠬᠦᠨ ᠨᠡᠭᠡᠷᠡᠨ ᠴᠦ᠍ ᠪᠤᠳᠤᠯᠢᠶᠠᠨ ᠲᠠᠢ ᠪᠠᠢᠯᠠ᠃ ᠨᠣᠭᠣᠭᠠᠨ ᠨᠢᠳᠦᠲᠡᠢ ᠪᠠᠶᠠᠷᠲᠤ᠂ ᠢᠮᠠᠭᠠᠨ ᠰᠠᠬᠠᠯᠲᠤ ᠪᠠᠽᠠᠷ᠂ ᠠᠯᠠᠭ ᠲᠣᠯᠣᠭᠠᠢᠲᠤ ᠪᠠᠶᠠᠨᠳᠦᠭᠦᠷᠡᠩ᠂ ᠲᠣᠭᠰᠢᠨ ᠵᠠᠭᠠᠨ ᠰᠦᠯᠳᠡ ᠭᠡᠳ ᠪᠦᠭᠦᠳᠡ ᠠᠷᠢᠬᠢᠴᠢᠨ ᠮᠥᠷᠲᠡᠭᠡᠨ ᠠᠭᠠᠰᠢ ᠵᠠᠩ ᠲᠦᠯᠬᠢᠨ ᠲᠣᠭᠰᠢᠨ ᠬᠥᠮᠦᠰ᠃ ᠢᠮᠠᠭᠠᠨ ᠰᠠᠬᠠᠯᠲᠤ ᠶ᠋ᠢᠨ ᠡᠬᠡᠨᠡᠷ ᠲᠤᠩᠭᠠᠯᠠᠭ ᠭᠡᠵᠦ ᠣᠪᠣᠭᠠ ᠬᠥᠭᠡᠷᠦᠬᠦᠨ ᠪᠦᠰᠡᠭᠦᠢ᠃ ᠭᠡᠪᠡᠴᠦ ᠪᠠᠽᠠᠷ ᠠᠷᠢᠬᠢ ᠤᠤᠭᠤᠪᠠᠯ ᠡᠬᠡᠨᠡᠷ ᠢ᠋ᠶ᠋ᠡᠨ ᠭᠡᠷ ᠲᠡᠭᠡᠨ ᠬᠣᠷᠢᠵᠤ ᠡᠭᠦᠳᠡ ᠪᠡᠨ ᠳᠣᠲᠣᠷᠠᠠ᠋ᠴᠠ ᠨᠢ ᠴᠦᠳᠡᠵᠦ ᠪᠠᠢᠭᠠᠳ ᠵᠠᠨᠴᠢᠨᠠ᠃ ᠭᠡᠪᠡᠴᠦ ᠡᠷᠡᠭᠦᠯ ᠦᠶᠡ ᠳ᠋ᠡᠭᠡᠨ ᠠᠪᠠᠭᠠᠢ ᠳ᠋ᠠᠭᠠᠨ ᠪᠡᠷᠬᠡ ᠰᠠᠢᠨ᠃ ᠲᠤᠯᠭᠤᠷ ᠭᠡᠵᠦ ᠮᠠᠷᠠᠩ ᠪᠦᠳᠦᠭᠦᠨ᠂ ᠬᠠᠷᠠ ᠴᠢᠷᠠᠢ ᠲᠠᠢ᠂ ᠳᠠᠷᠪᠠᠭᠠᠷ ᠪᠦᠳᠦᠭᠦᠨ ᠠᠮᠠ᠂ ᠣᠨᠢᠭᠠᠷ ᠰᠢᠬᠢᠢᠭᠡᠷ ᠨᠢᠳᠦ ᠲᠡᠢ᠂ ᠶᠠᠭ ᠯᠠ ᠲᠡᠮᠡᠭᠡ ᠰᠢᠶᠠᠩᠽᠢ ᠭᠡᠬᠦ ᠷᠣᠮᠠᠨ ᠳ᠋ᠠᠬᠢ ᠬᠤ᠌ ᠨᠢᠦ ᠰᠢᠭ ᠥᠬᠢᠨ᠃ ᠵᠢᠷᠭᠠᠯᠲᠤ ᠭᠡᠵᠦ ᠫᠠᠭᠳᠠᠭᠠᠷ ᠲᠠᠷᠭᠤᠨ ᠪᠡᠶᠡ ᠲᠡᠢ᠂ ᠵᠢᠵᠢᠭᠬᠡᠨ ᠬᠤᠷᠴᠠ ᠬᠠᠷᠠ ᠨᠢᠳᠦ ᠲᠡᠢ᠂ ᠢᠷᠠᠢᠭᠰᠠᠨ ᠴᠠᠭᠠᠨ ᠰᠢᠳᠦ ᠲᠡᠢ ᠵᠠᠯᠠᠭᠤ᠃ ᠠᠵᠢᠯ ᠳ᠋ᠠᠭᠠᠨ ᠶᠡᠬᠡ ᠬᠢᠨᠠᠮᠠᠭᠠᠢ ᠬᠠᠷᠢᠭᠤᠴᠠᠯᠭᠠ ᠲᠠᠢ᠃ ᠪᠠᠰᠠ ᠣᠬᠣᠷ ᠴᠢᠮᠡᠭᠡ ᠮᠡᠳᠡᠭᠡᠯᠡᠯ᠂ ᠰᠢᠯᠦᠭ ᠨᠠᠢᠷᠠᠭ ᠴᠤ᠌ ᠪᠢᠴᠢᠴᠢᠬᠡᠨᠡ᠃ ᠪᠠᠬᠠᠨ ᠪᠠᠷᠳᠠᠮ ᠶᠡᠬᠡᠷᠬᠡᠭ ᠵᠠᠩ ᠲᠠᠢ ᠠ᠋ᠴᠠ ᠪᠢᠰᠢ᠂ ᠡᠳᠡᠨᠥᠰ ᠦ᠋ᠨ ᠢ᠋ᠶ᠋ᠡᠨ ᠳᠣᠲᠣᠷᠠ ᠠ᠋ᠴᠠ ᠨᠡᠯᠢᠶᠡᠳ ᠵᠦᠭᠡᠷ ᠲᠦ᠍ ᠲᠣᠭᠠᠴᠠᠭᠳᠠᠨᠠ᠃
ᠰᠠᠢᠰᠢᠶᠠᠯᠲᠤ ᠡᠨᠳᠡ ᠢᠷᠡᠭᠡᠳ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠦᠷᠢᠮ ᠲᠣᠭᠲᠠᠭᠠᠯ ᠢ᠋ ᠰᠠᠢᠵᠢᠷᠠᠭᠤᠯᠤᠨ ᠪᠠᠭᠰᠢᠨᠠᠷ ᠢ᠋ ᠠᠵᠢᠯ ᠤ᠋ᠨ ᠴᠠᠭ ᠲᠤ᠌ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠬᠤ ᠶ᠋ᠢ ᠴᠢᠩᠭᠠ ᠬᠣᠷᠢᠭᠯᠠᠵᠤ᠂ ᠠᠵᠢᠯ ᠤ᠋ᠨ ᠪᠠᠢᠷᠢ ᠪᠠᠨ ᠴᠢᠩᠭᠠ ᠰᠠᠬᠢᠬᠤ ᠶ᠋ᠢ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠱᠠᠭᠠᠷᠳᠠᠵᠤ ᠬᠤᠪᠢ ᠲᠡᠮᠳᠡᠭᠯᠡᠵᠦ᠂ ᠱᠠᠩᠨᠠᠵᠤ ᠲᠣᠷᠭᠠᠬᠤ ᠳᠦᠷᠢᠮ ᠢ᠋ ᠭᠠᠷᠭᠠᠵᠤ ᠠᠵᠢᠯ ᠤ᠋ᠨ ᠰᠤᠷᠲᠠᠯ ᠢ᠋ ᠳᠡᠭᠡᠭᠰᠢᠯᠡᠭᠦᠯᠬᠦ ᠳ᠋ᠦ᠍ ᠬᠦᠴᠦ ᠲᠠᠯᠪᠢᠨᠠ᠃ ᠣᠷᠴᠢᠨ ᠲᠣᠭᠣᠷᠢᠨ᠂ ᠬᠣᠭᠣᠯᠠᠨ ᠭᠡᠷ ᠦ᠋ᠨ ᠠᠷᠢᠭᠤᠨ ᠴᠡᠪᠡᠷ᠂ ᠢᠳᠡᠭᠡ ᠵᠠᠭᠤᠰᠢ ᠶ᠋ᠢ ᠬᠢᠬᠦ ᠡᠴᠡ ᠡᠬᠢᠯᠡᠭᠡᠳ ᠠᠰ ᠠᠰ ᠲᠤᠨᠢ ᠬᠡᠷᠡᠭᠵᠢᠭᠦᠯᠬᠦ ᠳᠦᠷᠢᠮ ᠭᠣᠷᠢᠮ ᠭᠠᠷᠭᠠᠪᠠ᠃
ᠡᠨᠡᠬᠦ ᠶᠢᠷᠲᠢᠨᠴᠦ ᠡᠴᠡ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠰᠢᠭ᠋ ᠠᠯᠤᠰ ᠵᠡᠯᠢᠭᠦᠳ ᠬᠥᠳᠡᠭᠡ ᠶ᠋ᠢᠨ ᠬᠡᠳᠦᠬᠡᠨ ᠠᠷᠪᠠᠨ ᠬᠥᠮᠦᠨ ᠲᠡᠢ ᠰᠤᠮᠤᠨ ᠤ᠋ ᠬᠣᠲᠣᠭᠣᠷ ᠲᠤ᠌ ᠢᠷᠡᠭᠰᠡᠨ ᠰᠠᠢᠰᠢᠶᠠᠯᠳᠤ ᠭᠠᠪᠢᠷᠠ ᠬᠣᠶᠠᠷ ᠤ᠋ᠨ ᠲᠤᠬᠠᠢ ᠬᠡᠰᠡᠭᠬᠡᠨ ᠬᠤᠭᠤᠴᠠᠭᠠ ᠶᠠᠭ ᠯᠠ ᠬᠣᠨᠢᠨ ᠳ᠋ᠤᠨᠢ ᠴᠢᠨᠣᠠ ᠣᠷᠣᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠱᠤᠤᠭᠢᠯᠳᠤᠵᠤ ᠮᠡᠳᠡᠭᠡ ᠴᠢᠮᠡᠭᠡᠨ ᠦ᠌ ᠭᠣᠣᠯ ᠰᠡᠳᠦᠪ ᠪᠣᠯᠤᠨ ᠠᠢᠯ ᠠ᠋ᠴᠠ ᠠᠢᠯ ᠳ᠋ᠤ᠌᠂ ᠠᠮᠠᠨ ᠠ᠋ᠴᠠ ᠠᠮᠠ ᠳᠠᠮᠵᠢᠨ ᠶᠠᠷᠢᠭᠳᠠᠬᠤ ᠭᠣᠣᠯ ᠰᠡᠳᠦᠪ ᠪᠣᠯᠵᠤ ᠪᠠᠢᠯᠠ᠃ ᠰᠠᠢᠰᠢᠶᠠᠯᠳᠤ ᠶ᠋ᠢ ᠡᠢᠮᠦ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠵᠠᠬᠢᠷᠤᠯ ᠪᠣᠯᠤᠭᠰᠠᠨ ᠢ᠋ ᠦᠵᠡᠬᠦ ᠳ᠋ᠦ᠍᠂ ᠠᠯᠢ ᠨᠢᠭᠡᠨ ᠳᠠᠷᠤᠭᠠ ᠶ᠋ᠢᠨ ᠬᠢᠨᠢ ᠬᠡᠦᠬᠡᠳ ᠪᠤᠶᠤ ᠰᠠᠳᠤᠨ ᠲᠥᠷᠥᠯ ᠪᠠᠢᠬᠠ ᠳᠠ ᠭᠡᠵᠦ ᠪᠦᠷ 《ᠲᠡᠢᠮᠦ ᠶᠦᠮ ᠭᠡᠨᠡ ᠬᠡᠯᠡᠢ 》ᠭᠡᠳ ᠨᠡᠮᠡᠵᠦ ᠣᠷᠬᠢᠨᠠ᠃ ᠭᠠᠳᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠶᠡᠬᠡ ᠨᠣᠮᠣᠬᠠᠨ ᠳᠠᠷᠤᠤ ᠰᠢᠭ᠋ ᠪᠣᠯᠪᠠᠴᠤ ᠠᠢᠬᠤᠪᠲᠤᠷ ᠴᠢᠩᠭᠠ ᠬᠠᠲᠠᠭᠤ ᠭᠡᠰᠡᠨ᠃ ᠨᠥᠭᠦᠭᠡ ᠬᠡᠳᠦᠨ ᠠᠷᠢᠬᠢᠴᠢᠨ ᠪᠠᠭᠰᠢᠨᠠᠷ ᠢ᠋ᠶ᠋ᠠᠨ ᠬᠠᠮᠢᠶᠠᠷᠤᠭᠠᠳ ᠲᠠᠢᠯᠵᠤ ᠪᠠᠢᠬᠤ ᠴᠢᠨᠢ ᠨᠡᠭᠡᠷᠡᠨ ᠬᠢᠯᠪᠠᠷ ᠦᠭᠡᠢ᠃ ᠵᠢᠭᠮᠢᠳ ᠭᠡᠷ ᠲᠦ᠋ᠨᠢ ᠣᠴᠢᠵᠤ ᠠᠭᠰᠤᠮᠨᠠᠭᠠᠳ ᠡᠬᠡᠨᠡᠷ ᠨᠢ ᠠᠶᠤᠵᠤ ᠡᠪᠡᠳᠴᠢᠬᠡᠵᠡᠢ ᠭᠡᠨᠡ᠃ ᠭᠡᠷ ᠪᠠᠢᠰᠢᠩ ᠢ᠋ᠶ᠋ᠠᠨ ᠭᠣᠶᠣ ᠵᠠᠰᠠᠵᠤ ᠭᠢᠯᠠ ᠴᠢᠯᠡ ᠪᠣᠯᠭᠠᠭᠰᠠᠨ ᠳᠥᠷᠪᠡᠨ ᠬᠡᠦᠬᠡᠳ ᠲᠡᠢ ᠠᠢᠯ ᠭᠡᠵᠦ ᠦᠵᠡᠵᠦ ᠭᠠᠷᠬᠤ ᠦᠭᠡᠢ ᠴᠡᠮᠴᠡᠭᠡᠷ᠂ ᠣᠷᠣᠬᠤ ᠠ᠋ᠴᠠ ᠬᠠᠯᠠᠰᠢᠷᠠᠮᠠᠷ ᠰᠠᠢᠬᠠᠨ ᠰᠠᠭᠤᠳᠠᠭ ᠠᠢᠯ ᠪᠠᠢᠨᠠ ᠯᠠᠢ᠃ ᠡᠬᠡᠨᠡᠷ ᠨᠢ ᠡᠯᠪᠡᠭ ᠳᠡᠯᠪᠡᠭ ᠭᠠᠷ ᠲᠠᠢ ᠶᠡᠬᠡ ᠵᠣᠴᠢᠨᠰᠠᠭ ᠰᠠᠢᠬᠠᠨ ᠠᠭᠠᠯᠢ ᠲᠠᠢ ᠪᠦᠰᠡᠭᠦᠢ ᠭᠡᠨᠡ ᠭᠡᠬᠦ ᠵᠡᠷᠭᠡ ᠪᠡᠷ ᠶᠠᠷᠢᠵᠠᠭᠠᠨᠠ᠃
ᠨᠡᠩ ᠴᠦ᠍ ᠬᠠᠷᠠ ᠲᠤᠯᠭᠤᠷ᠂ ᠲᠤᠩᠭᠠᠯᠠᠭ ᠬᠣᠶᠠᠷ ᠡᠳᠡᠨ ᠦ᠌ ᠬᠢ ᠪᠡᠷ ᠡᠳᠦᠷ ᠦ᠋ᠨ ᠬᠡᠳᠦ ᠤᠳᠠᠭᠠ ᠣᠷᠣᠵᠤ ᠭᠠᠷᠤᠨ ᠬᠠᠭᠤᠴᠢᠨ ᠵᠠᠬᠢᠷᠤᠯ ᠪᠣᠯᠤᠨ ᠪᠠᠭᠰᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠵᠥᠩᠳᠡᠭᠡᠨ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠬᠤ ᠪᠥᠭᠡᠳ ᠰᠢᠨᠡ ᠵᠠᠬᠢᠷᠤᠯ ᠪᠣᠯᠤᠨ ᠭᠡᠷᠭᠡᠢ ᠶ᠋ᠢᠨ ᠬᠢᠨᠢ ᠠᠮᠠᠨ ᠠ᠋ᠴᠠ ᠶᠠᠭᠤ ᠨᠢᠭᠡ ᠶ᠋ᠢ ᠰᠣᠨᠣᠰᠴᠤ ᠴᠠᠭᠠᠰᠢ ᠳᠡᠯᠭᠡᠷᠡᠭᠦᠯᠬᠦ《ᠰᠤᠷᠠᠭ ᠵᠠᠩᠭᠢ》 ᠣᠯᠬᠤ ᠭᠡᠵᠦ ᠶᠠᠭᠠᠷᠠᠨᠠ᠃ ᠭᠡᠬᠦ ᠳ᠋ᠦ᠍ ᠰᠢᠨᠡ ᠵᠠᠬᠢᠷᠤᠯ ᠨᠢ ᠲᠠᠭ ᠳᠤᠭᠤᠢ᠃ ᠭᠡᠷᠭᠡᠢ ᠨᠢ ᠰᠠᠢᠬᠠᠨ ᠰᠢᠷᠭᠠᠯ ᠴᠠᠢ᠂ ᠰᠢᠬᠢᠷ ᠪᠣᠭᠣᠷᠰᠣᠭ ᠢ᠋ᠶ᠋ᠠᠷ ᠵᠣᠴᠢᠯᠠᠭᠠᠳ ᠭᠠᠷᠭᠠᠬᠤ ᠠ᠋ᠴᠠ ᠥᠭᠡᠷᠡ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠦᠭᠡᠢ ᠳ᠋ᠦ᠍ ᠲᠡᠳᠡ ᠪᠠᠬᠠᠨ ᠤᠷᠮᠠ ᠬᠤᠭᠤᠷᠠᠪᠠ᠃ ᠬᠠᠷᠠ ᠲᠤᠯᠭᠤᠷ ᠪᠣᠯ ᠡᠨᠡᠬᠦ《ᠳᠡᠷᠡᠰᠦᠨ ᠬᠣᠲᠣᠭᠣᠷ》 ᠤ᠋ᠨ ᠮᠡᠳᠡᠭᠡ ᠴᠢᠮᠡᠭᠡᠨ ᠦ᠌ ᠭᠣᠣᠯ ᠵᠠᠭᠤᠴᠢᠯᠠᠭᠤᠷ ᠪᠣᠯᠬᠤ ᠶᠤᠮ᠃ ᠲᠡᠭᠦᠨ ᠦ᠌ ᠣᠷᠣᠳᠠᠭ ᠦᠭᠡᠢ ᠠᠢᠯ᠂ ᠶᠠᠷᠢᠳᠠᠭ ᠦᠭᠡᠢ ᠵᠣᠭᠣᠭ ᠭᠡᠵᠦ ᠦᠭᠡᠢ᠃ ᠬᠣᠪ ᠬᠣᠩᠰᠢᠶᠠᠷ ᠵᠥᠭᠡᠭᠡᠭᠰᠡᠨ ᠦ᠌ ᠬᠢᠨᠢ ᠤᠷᠰᠢᠭ ᠢ᠋ᠶ᠋ᠠᠷ ᠠᠢᠯ ᠰᠠᠭᠠᠬᠠᠯᠲᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠬᠡᠷᠡᠭᠦᠯ ᠴᠤᠤᠭᠢᠶᠠᠨ ᠡᠭᠦᠰᠬᠡᠳᠡᠭ ᠴᠦ᠍ ᠤᠳᠠᠭᠠ ᠲᠠᠢ᠃ ᠬᠠᠷᠠ ᠲᠤᠯᠭᠤᠷ ᠭᠠᠪᠢᠷᠠ ᠶ᠋ᠢᠨ ᠪᠡᠶᠡ ᠭᠠᠯᠪᠢᠷ᠂ ᠡᠮᠦᠰᠴᠦ ᠵᠡᠭᠦᠬᠦ᠂ ᠶᠠᠪᠤᠵᠤ ᠰᠠᠭᠤᠬᠤ ᠶ᠋ᠢ ᠨᠢ ᠠᠵᠢᠭᠯᠠᠨ ᠥᠪᠡᠷ ᠦ᠋ᠨ ᠮᠤᠨᠳᠠᠭ ᠥᠨᠳᠥᠷ ᠪᠦᠳᠦᠭᠦᠨ ᠪᠡᠶᠡ ᠬᠠᠷᠠᠭᠠ ᠲᠠᠢ ᠪᠠᠨ ᠬᠠᠷᠢᠴᠠᠭᠤᠯᠤᠨ ᠪᠣᠳᠣᠬᠤ ᠳ᠋ᠤ᠌ ᠠᠲᠠᠭᠠ ᠵᠢᠲᠥᠭᠡᠨ ᠦ᠌ ᠬᠢᠨᠢ ᠭᠠᠯ ᠦᠷᠪᠢᠰᠦᠨ ᠨᠣᠴᠣᠨᠠ᠃
ᠲᠡᠷᠡ ᠭᠠᠪᠢᠷᠠ ᠶ᠋ᠢᠨ ᠪᠡᠶᠡ ᠳᠡᠭᠡᠷᠡ ᠡᠴᠡ ᠦ᠋ ᠰᠡᠪ ᠣᠯᠬᠤ ᠭᠡᠵᠦ ᠬᠡᠴᠡᠭᠦᠦ ᠶᠠᠭᠠᠷᠠᠨᠠ᠃
ᠰᠠᠢᠰᠢᠶᠠᠯᠲᠤ᠂ ᠵᠢᠭᠠᠨ ᠰᠤᠷᠭᠠᠬᠤ ᠠᠵᠢᠯ ᠳ᠋ᠠᠭᠠᠨ ᠮᠠᠰᠢ ᠨᠠᠷᠢᠨ ᠲᠥᠯᠥᠪᠯᠡᠯᠭᠡ ᠲᠣᠬᠢᠷᠠᠭᠤᠯᠤᠯᠲᠠ ᠬᠢᠵᠦ᠂ ᠪᠠᠭᠰᠢᠨᠠᠷ ᠤ᠋ᠨ ᠠᠵᠢᠯᠯᠠᠵᠤ ᠰᠤᠷᠤᠯᠴᠠᠬᠤ ᠤᠷᠮᠠ ᠰᠡᠳᠬᠢᠯ ᠢ᠋ ᠬᠥᠭᠵᠢᠭᠡᠵᠦ᠂ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠬᠢᠴᠢᠶᠡᠯ ᠢ᠋ ᠰᠣᠨᠣᠰᠤᠭᠤᠯᠤᠨ ᠰᠠᠨᠠᠯ ᠵᠥᠪᠯᠡᠯᠭᠡ ᠪᠡᠨ ᠰᠣᠯᠢᠯᠴᠠᠬᠤ ᠵᠡᠷᠭᠡ ᠠᠯᠢ ᠣᠯᠠᠨ ᠪᠦᠲᠦᠮᠵᠢ ᠲᠡᠢ ᠠᠷᠭᠠ ᠶ᠋ᠢ ᠰᠦᠪᠡᠭᠴᠢᠯᠡᠨ᠂ ᠳᠡᠭᠡᠳᠦ ᠱᠠᠲᠤ ᠪᠣᠯᠤᠨ ᠰᠤᠮᠤ ᠭᠠᠴᠠᠭᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠲᠠᠢ ᠬᠠᠷᠢᠴᠠᠭᠠ ᠪᠠᠨ ᠨᠢᠭᠲᠠᠷᠠᠭᠤᠯᠵᠤ᠂ ᠰᠠᠨᠠᠯ ᠵᠥᠪᠯᠡᠯᠭᠡ ᠶ᠋ᠢ ᠨᠢ ᠰᠣᠨᠣᠰᠴᠤ᠂ ᠰᠤᠷᠭᠠᠭᠤᠯᠢ ᠪᠠᠨ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠪᠠᠢᠭᠤᠯᠬᠤ ᠲᠥᠰᠥᠪ ᠲᠥᠯᠥᠪᠯᠡᠭᠡ ᠲᠣᠭᠲᠠᠭᠠᠬᠤ ᠭᠡᠳ ᠲᠣᠯᠣᠭᠠᠢ ᠥᠨᠳᠡᠢᠬᠦ ᠦᠭᠡᠢ ᠶᠠᠭᠠᠷᠠᠵᠤ᠂ ᠣᠳᠣᠬᠢ ᠪᠠᠢᠳᠠᠯ ᠢ᠋ᠶ᠋ᠠᠨ ᠥᠭᠡᠷᠡᠴᠢᠯᠡᠵᠦ ᠰᠠᠢᠵᠢᠷᠠᠭᠤᠯᠬᠤ ᠠᠷᠭᠠ ᠰᠦᠪᠡᠭᠴᠢᠯᠡᠨᠡ᠃
ᠨᠣᠭᠣᠭᠠᠨ ᠨᠢᠳᠦᠲᠦ ᠪᠠᠶᠠᠷᠲᠤ ᠠ᠋ᠴᠠ ᠡᠬᠢᠯᠡᠨ ᠪᠦᠬᠦ ᠪᠠᠭᠰᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠰᠣᠨᠣᠰᠴᠤ᠂ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ ᠭᠠᠪᠢᠷᠠ ᠶ᠋ᠢᠨ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠰᠣᠨᠣᠰᠪᠠ᠃
ᠰᠢᠨᠡ ᠵᠠᠬᠢᠷᠤᠯ ᠤ᠋ᠨ ᠢ᠋ᠶ᠋ᠠᠨ ᠠᠪᠠᠭᠠᠢ ᠶ᠋ᠢᠨ《ᠦ ᠶ᠋ᠢ ᠡᠷᠢᠬᠦ》 ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠲᠡᠳᠡ ᠶᠡᠬᠡᠯᠡ ᠤᠷᠮᠠ ᠲᠠᠢ ᠪᠠᠢᠯᠠ᠃ ᠨᠡᠩ ᠴᠦ᠍ ᠬᠠᠷᠠ ᠲᠤᠯᠭᠤᠷ ᠢ᠋ ᠶᠠᠭᠤᠨ ᠥᠭᠦᠯᠡᠬᠦ ᠪᠣᠢ᠃ ᠲᠣᠮᠣ ᠠᠮᠠ ᠪᠠᠨ ᠳᠠᠷᠪᠠᠢᠯᠭᠠᠨ ᠨᠠᠷᠢᠬᠠᠨ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠬᠠᠷᠠᠵᠤ ᠰᠠᠭᠤᠬᠤ ᠪᠥᠭᠡᠳ ᠶᠠᠭᠤ ᠨᠢᠭᠡ ᠶᠢ ᠬᠡᠯᠡᠬᠦ ᠭᠡᠬᠦ ᠡᠴᠡ ᠵᠠᠪᠠᠵᠢᠨ ᠳ᠋ᠤᠨᠢ ᠰᠢᠯᠦᠰᠦ ᠬᠤᠷᠠᠨᠠ᠃ ᠬᠣᠩᠬᠣ ᠳᠤᠤᠭᠠᠷᠴᠤ ᠭᠠᠪᠢᠷᠠ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠨᠠᠷᠢᠬᠠᠨ ᠪᠡᠯᠬᠡᠭᠦᠰᠦ ᠶ᠋ᠢ ᠪᠠᠷᠢᠭᠰᠠᠨ ᠪᠠᠩᠵᠠᠯ ᠬᠡᠯᠪᠡᠷᠢ ᠲᠡᠢ ᠬᠥᠬᠡ ᠥᠩᠭᠡ ᠶ᠋ᠢᠨ ᠰᠠᠯᠬᠢᠨ ᠰᠢᠨᠧᠯ ᠡᠮᠦᠰᠴᠦ᠂ ᠳᠣᠲᠣᠷᠠ ᠪᠠᠨ ᠪᠣᠰᠤᠭᠠ ᠵᠠᠭᠠᠮᠠ ᠲᠠᠢ ᠴᠠᠭᠠᠨ ᠤᠲᠠᠰᠤᠨ ᠴᠠᠮᠴᠠ ᠲᠣᠬᠢᠷᠠᠭᠤᠯᠵᠤ᠂ ᠬᠠᠯᠢᠭᠤᠨ ᠬᠦᠷᠡᠩ ᠦᠰᠦ ᠪᠡᠨ ᠠᠷᠤ ᠤᠷᠤᠭᠤ ᠪᠠᠨ ᠬᠣᠯᠪᠣᠨ ᠤᠨᠵᠢᠭᠤᠯᠵᠠᠢ᠃ ᠢᠷ ᠭᠠᠷᠲᠠᠯᠠ ᠢᠯᠢᠭᠦᠷᠳᠡᠭᠰᠡᠨ ᠰᠢᠷᠭᠠᠯ ᠥᠩᠭᠡ ᠶ᠋ᠢᠨ ᠥᠮᠥᠳᠥ ᠲᠡᠢ᠂ ᠬᠦᠯᠲᠦᠭᠡᠨᠡᠲᠡᠯᠡ ᠵᠦᠯᠭᠦᠭᠰᠡᠨ ᠬᠠᠷᠠ ᠠᠷᠠᠰᠤᠨ ᠱᠠᠬᠠᠢ ᠤᠭᠯᠠᠭᠰᠠᠨ ᠨᠢ ᠴᠣᠪᠣᠭᠣ ᠬᠥᠭᠵᠢᠭᠦᠨ ᠬᠠᠷᠠᠭᠳᠠᠨᠠ᠃ ᠰᠠᠭᠤᠯᠴᠠᠭᠰᠠᠨ ᠬᠥᠮᠦᠰ ᠲᠡᠭᠦᠨ ᠢ᠋ ᠶᠡᠬᠡᠯᠡ ᠱᠣᠬᠣᠭᠣᠷᠬᠠᠨ ᠰᠢᠷᠲᠡᠵᠦ ᠰᠠᠭᠤᠵᠠᠭᠠᠨᠠ᠃ ᠭᠠᠪᠢᠷᠠ᠂ ᠪᠠᠭᠰᠢ ᠰᠤᠷᠤᠭᠴᠢᠳ ᠲᠤ᠌ ᠲᠣᠯᠣᠭᠠᠢ ᠳᠣᠬᠢᠨ ᠮᠡᠨᠳᠦᠯᠡᠭᠡᠳ ᠴᠡᠭᠡᠯᠬᠡᠨ ᠲᠤᠩᠭᠠᠯᠠᠭ ᠬᠣᠭᠣᠯᠠᠢ ᠪᠠᠷ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠲᠠᠢᠯᠪᠤᠷᠢᠯᠠᠵᠤ ᠡᠬᠢᠯᠡᠯᠡ᠃ ᠰᠠᠮᠪᠠᠷᠠ ᠳ᠋ᠤ᠌《ᠬᠥᠬᠡ ᠮᠣᠩᠭᠣᠯ ᠨᠤᠲᠤᠭ》 ᠭᠡᠬᠦ ᠭᠠᠷᠴᠠᠭ ᠢ᠋ ᠭᠣᠴᠣ ᠰᠠᠢᠬᠠᠨ ᠦᠰᠦᠭ ᠢ᠋ᠶ᠋ᠡᠷ ᠳᠤᠷᠠᠢᠲᠠᠯᠠ ᠪᠢᠴᠢᠨᠡ᠃ ᠭᠠᠪᠢᠷᠠ ᠶ᠋ᠢᠨ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠦᠭᠡᠯᠡᠮᠡᠷ ᠦᠭᠡᠢ ᠠᠮᠵᠢᠯᠲᠠ ᠣᠯᠵᠠᠢ᠃ ᠭᠠᠷᠠᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍᠂ ᠪᠦᠬᠦ ᠪᠠᠭᠰᠢ ᠨᠠᠷ ᠤ᠋ᠨ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠬᠠᠮᠲᠤ ᠪᠠᠷ ᠶᠠᠷᠢᠯᠴᠠᠬᠤ ᠪᠣᠯᠤᠯᠠ᠃ ᠭᠠᠪᠢᠷᠠ ᠶ᠋ᠢᠨ ᠬᠢᠴᠢᠶᠡᠯ ᠢ᠋ ᠶᠠᠷᠢᠯᠴᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠭᠰᠢᠨᠠᠷ ᠲᠡᠭᠦᠨ ᠦ᠌ ᠬᠢᠴᠢᠶᠡᠯ ᠡᠴᠡ ᠡᠷᠢᠮᠡᠷ ᠦ ᠣᠯᠤᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠮᠠᠭᠲᠠᠬᠤ ᠵᠦᠢᠯ ᠠᠷᠪᠢᠨ ᠪᠠᠢᠯᠠ᠃ ᠭᠡᠶᠡ ᠲᠡᠳᠡ ᠰᠠᠢᠨ ᠲᠠᠢ ᠲᠠᠯᠠ ᠶ᠋ᠢ ᠨᠢ ᠮᠠᠭᠲᠠᠶᠠ ᠭᠡᠬᠦ ᠳ᠋ᠦ᠍ ᠠᠮᠠᠨ ᠠ᠋ᠴᠠ ᠨᠢ ᠶᠡᠷᠦ ᠯᠡ ᠭᠠᠷᠴᠤ ᠥᠭᠬᠦ ᠦᠭᠡᠢ ᠠᠮᠠ ᠨᠢ ᠲᠠᠭᠯᠠᠷᠠᠭᠠᠳ ᠳᠣᠮᠪᠣᠢᠵᠤ ᠰᠠᠭᠤᠨᠠ᠃ ᠭᠠᠪᠢᠷᠠ ᠲᠡᠳᠦᠢ ᠴᠦ᠍ ᠶᠠᠭᠤᠮᠠ ᠪᠣᠯᠭᠠᠭᠰᠠᠨ ᠦᠭᠡᠢ᠃ ᠲᠡᠷᠡ ᠪᠣᠯ ᠠᠯᠳᠠᠰᠢ ᠠᠮᠵᠢᠯᠲᠠ ᠬᠣᠶᠠᠷ ᠢ᠋ᠶ᠋ᠠᠨ ᠲᠤᠩᠭᠠᠵᠤ ᠳ᠋ᠦᠩᠨᠡᠵᠦ ᠴᠢᠳᠠᠳᠠᠭ ᠤ᠋ᠨ ᠨᠢᠭᠡᠨ ᠪᠢᠯᠡ᠃ ᠰᠠᠢᠰᠢᠶᠠᠯᠲᠤ᠂ ᠪᠤᠰᠤᠳ ᠪᠠᠭᠰᠢᠨᠠᠷ ᠤ᠋ᠨ ᠠᠮᠵᠢᠯᠲᠠ ᠲᠠᠢ ᠲᠠᠯᠠ ᠶ᠋ᠢ ᠢᠯᠡᠭᠦᠦ ᠮᠠᠭᠲᠠᠵᠤ᠂ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠠᠩᠬᠠᠷᠤᠭᠤᠯᠤᠭᠰᠠᠨ ᠬᠡᠳᠦᠨ ᠤᠴᠢᠷ ᠢ᠋ ᠶᠠᠷᠢᠭᠠᠳ᠂ ᠬᠠᠷᠢᠨ ᠠᠪᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠴᠢᠶᠡᠯ ᠡᠴᠡ ᠪᠠᠭᠠ ᠦᠭᠡᠢ ᠠᠰᠠᠭᠤᠳᠠᠯ ᠭᠠᠷᠭᠠᠵᠤ ᠶᠠᠷᠢᠵᠠᠢ᠃ ᠡᠨᠡ ᠨᠢ ᠪᠤᠰᠤᠳ ᠢ᠋ ᠰᠡᠷᠡᠮᠵᠢᠯᠡᠭᠦᠯᠵᠦ ᠪᠠᠢᠭᠠ ᠭᠡᠳᠡᠭ ᠢ᠋ ᠭᠠᠪᠢᠷᠠ ᠮᠡᠳᠡᠵᠦ ᠪᠠᠢᠭᠰᠠᠨ ᠴᠤ᠌ ᠵᠥᠭᠡᠯᠡᠨ ᠬᠦᠷᠡᠩ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠭᠣᠮᠣᠳᠠᠩᠭᠤᠢ ᠬᠠᠷᠠᠵᠤ ᠰᠠᠭᠤᠨᠠ᠃ ᠭᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ
— ᠨᠠᠮᠠ ᠶ᠋ᠢ ᠣᠯᠠᠨ ᠤ᠋ ᠡᠮᠦᠨᠡ ᠦᠭᠡᠯᠡᠭᠡᠳ ᠯᠡ᠂ ᠮᠢᠨᠦ ᠬᠢᠴᠢᠶᠡᠯ ᠨᠡᠭᠡᠷᠡᠨ ᠪᠣᠯᠤᠭᠰᠠᠨ ᠦᠭᠡᠢ ᠤᠤ? ᠭᠡᠰᠡᠨ ᠳ᠋ᠦ᠍᠂ ᠰᠠᠢᠰᠢᠶᠠᠯᠲᠤ᠄
— ᠬᠠᠨᠠᠰᠠ ᠳᠠ᠂ ᠴᠢᠨᠦ ᠬᠢᠴᠢᠶᠡᠯ ᠲᠤᠩ ᠴᠤ᠌ ᠰᠠᠢᠬᠠᠨ ᠪᠣᠯᠤᠭᠰᠠᠨ᠃ ᠭᠡᠲᠡᠯᠡ ᠡᠳᠡᠨᠥᠰ ᠴᠢᠨᠢ ᠮᠡᠳᠡᠬᠦ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠮᠡᠳᠡᠷᠡᠳᠡᠭ ᠦᠭᠡᠢ ᠬᠥᠮᠦᠰ᠃ ᠪᠠᠬᠠᠨ ᠤᠷᠮᠠ ᠬᠠᠢᠷᠠᠯᠠᠵᠤ ᠪᠠᠢᠪᠠᠯ ᠳᠠᠷᠠᠭᠠᠴᠢ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠮᠢᠨᠢ ᠲᠤᠰᠠᠲᠠᠢ ᠪᠣᠯ ᠤᠤ ᠭᠡᠵᠦ ᠪᠣᠳᠣᠬᠤ ᠶᠤᠮ ᠭᠡᠯᠡ᠃
ᠬᠠᠷᠠ ᠲᠤᠯᠭᠤᠷ᠂ ᠲᠤᠩᠭᠠᠯᠠᠭ ᠬᠣᠶᠠᠷ ᠴᠢᠯᠥᠭᠡ ᠯᠡ ᠭᠠᠷᠪᠠᠯ ᠬᠦᠵᠦᠭᠦᠦ ᠲᠣᠯᠣᠭᠠᠢ ᠬᠣᠯᠪᠣᠭᠠᠰᠤᠲᠠᠢ᠂ ᠴᠢᠬᠢ ᠴᠢᠬᠢᠨ ᠳ᠋ᠡᠭᠡᠨ ᠶᠠᠭᠤ ᠨᠢᠭᠡ ᠶ᠋ᠢ ᠰᠢᠪᠡᠭᠡᠨᠡᠨ ᠭᠠᠪᠢᠷᠠ ᠲᠡᠳᠡᠨ ᠳ᠋ᠦ᠍ ᠠᠷᠭᠠ ᠦᠭᠡᠢ 《ᠬᠥᠩᠭᠡᠨ ᠰᠦᠷᠳᠡᠭᠦᠯᠦᠯ》 ᠪᠣᠯᠵᠤ ᠪᠠᠢᠯᠠ᠃ ᠲᠡᠭᠡᠬᠦ ᠮᠥᠷᠲᠡᠭᠡᠨ ᠭᠠᠳᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠳᠤᠭᠤᠢ ᠨᠣᠮᠣᠬᠠᠨ ᠳᠦᠷᠢ ᠲᠡᠢ ᠴᠦ᠍ ᠮᠠᠰᠢ ᠴᠢᠩᠭᠠ ᠬᠠᠲᠠᠭᠤ ᠠᠷᠠᠨᠰᠢᠨ ᠲᠠᠢ ᠵᠠᠯᠠᠭᠤ ᠵᠠᠬᠢᠷᠤᠯ ᠨᠢ ᠤᠤᠯ ᠤ᠋ᠨ ᠡᠪᠦᠭᠡᠨ ᠵᠠᠬᠢᠷᠤᠯ ᠸᠠᠩᠲᠠᠨ ᠭᠤᠸᠠᠢ ᠲᠠᠢ ᠣᠭᠲᠣ ᠠᠳᠠᠯᠢ ᠦᠭᠡᠢ᠃ ᠢᠯᠡ ᠳᠠᠯᠳᠠ ᠤᠯᠠᠷᠢᠭᠤᠯᠤᠨ ᠬᠡᠷᠡᠭᠯᠡᠳᠡᠭ 《ᠣᠪᠵᠢᠩ ᠬᠠᠭᠤᠷᠮᠠᠴᠢ ᠤᠬᠠᠭᠠᠨ》 ᠢ᠋ ᠡᠳᠡᠨ ᠳ᠋ᠦ᠍ ᠬᠡᠷᠡᠭᠯᠡᠭᠡᠳ ᠬᠡᠷᠡᠭ ᠲᠦ᠍ ᠬᠦᠷᠬᠦ ᠦᠭᠡᠢ ᠭᠡᠳᠡᠭ ᠢ᠋ ᠤᠬᠠᠭᠠᠷᠠᠭᠰᠠᠨ ᠲᠡᠷᠡ ᠪᠡᠷ ᠠᠯᠢ ᠪᠣᠯᠬᠤ ᠪᠠᠷ ᠠᠶᠠᠯᠳᠠᠨ ᠳᠠᠭᠠᠬᠤ ᠶ᠋ᠢ ᠬᠢᠴᠢᠶᠡᠨᠡ᠃
ᠪᠦᠲᠦᠨ ᠰᠠᠢᠨ ᠡᠳᠦᠷ᠃ ᠰᠠᠢᠰᠢᠶᠠᠯᠲᠤ ᠭᠠᠪᠢᠷᠠ ᠬᠣᠶᠠᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠢᠪᠡᠷ ᠬᠦᠷᠢᠶᠡ ᠶ᠋ᠢ ᠥᠨᠳᠥᠷᠲᠡᠭᠡᠨ ᠵᠠᠰᠠᠵᠤ ᠪᠠᠢᠯᠠ᠃ ᠭᠤᠷᠪᠠᠨ ᠥᠬᠢᠨ ᠨᠢ ᠳᠤᠷᠠᠲᠠᠢ ᠳᠤᠷᠠᠲᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠨᠠ᠃ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠶᠡᠬᠡ ᠥᠬᠢᠨ ᠠᠷᠤᠷᠠ ᠨᠢ ᠭᠠᠷ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠨᠢᠭᠤᠷ ᠤ᠋ᠨ ᠭᠠᠳᠤᠷᠠ ᠳ᠋ᠤ᠌ ᠬᠢᠵᠦ ᠬᠥᠭᠡᠰᠦ ᠰᠠᠬᠠᠷᠠᠲᠠᠯᠠ ᠰᠠᠪᠤᠩ ᠳᠦᠷᠭᠢᠭᠡᠳ ᠤᠬᠢᠶᠠᠵᠤ ᠵᠣᠭᠰᠣᠨᠠ᠃ ᠲᠠᠪᠤᠨ ᠨᠠᠰᠤᠲᠠᠢ ᠬᠣᠶᠠᠳᠤᠭᠠᠷ ᠥᠬᠢᠨ ᠣᠴᠢ ᠨᠢ ᠬᠦᠷᠢᠶᠡᠨ ᠳ᠋ᠡᠭᠡᠨ ᠦᠰᠦᠷᠴᠦ ᠳᠡᠭᠳᠡᠨ ᠠᠯᠢᠶᠠᠷᠬᠠᠨᠠ᠃ ᠲᠡᠷᠡ ᠪᠣᠯ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠢᠬᠠᠨ ᠪᠦᠭᠦᠳᠡ ᠶ᠋ᠢ ᠠᠪᠴᠤ ᠲᠥᠷᠥᠭᠰᠡᠨ ᠪᠣᠮᠪᠣᠭᠣᠷ ᠴᠠᠭᠠᠨ ᠴᠢᠷᠠᠢ ᠲᠠᠢ᠂ ᠬᠤᠷᠴᠠ ᠰᠡᠷᠭᠦᠯᠡᠩ ᠪᠣᠷᠣ ᠨᠢᠳᠦ ᠲᠡᠢ ᠥᠬᠢᠨ᠃ ᠭᠡᠬᠦ ᠳ᠋ᠡᠭᠡᠨ ᠬᠦᠦ ᠰᠢᠭ ᠠᠯᠢᠶᠠᠷᠬᠠᠭ ᠳᠡᠭᠵᠢᠨ᠃ ᠨᠢᠯᠬᠠ ᠶ᠋ᠢᠨ ᠮᠠᠷᠢᠶᠠ ᠨᠢ ᠰᠢᠭᠤᠷᠠᠭᠠ ᠦᠭᠡᠢ ᠪᠠᠭᠠ ᠥᠬᠢᠨ ᠮᠠᠢᠯᠠᠰᠤ ᠨᠢ ᠳᠥᠩᠭᠡᠵᠦ ᠭᠤᠷᠪᠠ ᠬᠦᠷᠴᠦ ᠪᠠᠢᠭᠠ᠂ ᠳᠠᠪ ᠲᠠᠷᠭᠤᠨ᠂ ᠲᠡᠷᠡ ᠮᠠᠨᠢ ᠴᠠᠭᠠᠬᠠᠨ ᠵᠢᠰᠦ ᠲᠡᠢ᠂ ᠣᠷᠣᠰ ᠬᠡᠦᠬᠡᠳ ᠰᠢᠭ ᠠᠯᠲᠠᠨ ᠰᠢᠷᠠ ᠦᠰᠦ ᠲᠡᠢ ᠥᠬᠢᠨ᠃ ᠲᠡᠷᠡ ᠪᠣᠨᠲᠣᠭᠣᠷ ᠵᠢᠭᠠᠬᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠪᠡᠷ ᠨᠤᠬᠤᠵᠤ ᠲᠣᠭᠯᠠᠨᠠ᠃
ᠵᠢᠭᠮᠡᠳ᠂ ᠪᠠᠶᠠᠷᠲᠤ᠂ ᠪᠠᠽᠠᠷ ᠭᠤᠷᠪᠠᠭᠤᠯᠠ ᠨᠡᠯᠢᠶᠡᠳ ᠬᠠᠯᠠᠮᠴᠠᠭᠤ ᠲᠡᠳᠡᠨ ᠣ ᠳ᠋ᠤ᠌ ᠢᠷᠡᠯᠡ᠃ ᠵᠢᠭᠮᠢᠳ ᠴᠠᠪᠴᠢᠭᠤᠯᠤᠭᠰᠠᠨ ᠰᠣᠷᠪᠢ ᠲᠠᠢ ᠮᠤᠬᠤᠷ ᠲᠣᠯᠣᠭᠠᠢ ᠪᠠᠨ ᠢᠯᠪᠢᠨ᠂ ᠰᠢᠷᠠ ᠨᠢᠳᠦ ᠪᠡᠨ ᠭᠢᠯᠠᠮᠠᠯᠵᠠᠭᠤᠯᠤᠨ
— ᠭᠠᠷᠠᠭ ᠤ᠋ᠨ ᠡᠳᠦᠷ ᠴᠦ᠍ ᠠᠮᠠᠷᠠᠳᠠᠭ ᠦᠭᠡᠢ᠂ ᠨᠡᠭᠡᠷᠡᠨ ᠴᠦ᠍ ᠠᠵᠢᠯᠰᠠᠭ ᠠ᠋᠃ ᠣᠳᠣ ᠭᠡᠷ ᠲᠡᠭᠡᠨ ᠣᠷᠣᠵᠠᠭᠠ᠂ ᠲᠠᠨ ᠤ᠋ ᠳ᠋ᠤ᠌ ᠬᠣᠶᠠᠷ ᠬᠤᠨᠳᠠᠭᠠ ᠤᠤᠭᠤᠶᠠ᠂ ᠪᠣᠯᠤᠨᠠ ᠪᠢᠵᠡ ᠳᠡ ᠪᠢ ᠭᠡᠵᠦ ᠳᠡᠭᠡᠷᠡᠩᠭᠦᠢᠯᠡᠨ ᠵᠠᠩᠳᠤᠷᠬᠤ ᠰᠢᠬᠠᠭᠤ ᠥᠭᠦᠯᠡᠨᠡ᠃ ᠰᠠᠢᠰᠢᠶᠠᠯᠲᠤ ᠢᠨᠢᠶᠡᠰᠬᠢᠭᠡᠳ
— ᠠᠢᠯ ᠭᠡᠷ ᠪᠣᠯᠵᠤ ᠠᠪᠠᠭᠠᠢ ᠬᠡᠦᠬᠡᠳ ᠲᠡᠢ ᠪᠣᠯᠴᠢᠬᠠᠪᠠᠯ ᠠᠮᠢᠳᠤᠷᠠᠨᠠ ᠭᠡᠵᠦ ᠵᠢᠳᠬᠦᠬᠦ ᠦᠭᠡᠢ ᠴᠦ᠍ ᠪᠣᠢ ᠳᠠ᠃ ᠵᠠ᠂ ᠭᠡᠷ ᠲᠦ᠍ ᠣᠷᠣᠵᠠᠭᠠ! ᠭᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍᠂ ᠵᠢᠭᠠᠯ ᠣᠴᠢ ᠨᠢᠳᠦ ᠪᠡᠨ ᠲᠣᠮᠣᠷᠠᠭᠤᠯᠤᠨ ᠭᠠᠷ ᠢ᠋ᠶ᠋ᠠᠨ ᠠᠯᠳᠠᠯᠠᠨ ᠵᠢᠭᠮᠢᠳ ᠦ᠋ᠨ ᠡᠮᠦᠨᠡ ᠵᠣᠭᠰᠣᠵᠤ
— ᠮᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠃ ᠴᠢ ᠮᠢᠨᠦ ᠠᠪᠤ ᠶ᠋ᠢ ᠬᠠᠷᠢᠶᠠᠯᠠ ᠪᠠ? ᠳᠠᠬᠢᠭᠠᠳ ᠮᠠᠨ ᠤ᠋ ᠳ᠋ᠤ᠌ ᠠᠷᠢᠬᠢ ᠤᠤᠭᠤᠵᠤ ᠮᠢᠨᠦ ᠠᠪᠤ ᠶ᠋ᠢ ᠬᠠᠷᠢᠶᠠᠪᠠᠯ ᠤᠤ᠂ ᠴᠢᠮᠠ ᠶ᠋ᠢ ᠪᠢ ᠰᠢᠭᠦᠰᠦᠯᠡᠵᠦ ᠣᠷᠬᠢᠨᠠ ᠰᠢᠦ ! ᠭᠡᠳ ᠪᠢᠴᠢᠬᠠᠨ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨ ᠳᠠᠯᠠᠢᠪᠠ᠃ ᠲᠡᠷᠡ ᠭᠤᠷᠪᠠᠭᠤᠯᠠ 《ᠬᠠ — ᠬᠠ》 ᠭᠡᠮᠡᠨ ᠬᠠᠳᠠᠭᠠᠨᠠᠨ ᠢᠨᠢᠶᠡᠯᠴᠡᠵᠦ
— ᠶᠠᠮᠠᠷ ᠠᠢᠬᠤᠪᠲᠤᠷ ᠥᠬᠢᠨ ᠪᠣᠢ! ᠴᠢᠮᠠ ᠶ᠋ᠢ ᠪᠢᠰᠢᠷᠡᠯᠡ᠃ ᠳᠠᠬᠢᠭᠠᠳ ᠲᠡᠭᠡᠵᠦ ᠠᠭᠠᠰᠢᠯᠠᠬᠤ ᠦᠭᠡᠢ᠃ ᠪᠤᠷᠤᠭᠤ ᠬᠦᠯᠢᠶᠡᠶᠡ᠂ ᠪᠣᠯᠤᠨᠠ ᠪᠠ? ᠭᠡᠰᠡᠨ ᠳ᠋ᠦ᠍
— ᠵᠠ᠂ ᠲᠡᠢᠮᠦ ᠪᠣᠯ ᠣᠷᠣᠭᠠᠷᠠᠢ᠂ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠰᠠᠭᠤᠨᠠ ᠰᠢᠦ! ᠭᠡᠳ ᠵᠢᠭᠮᠢᠳ ᠢ᠋ ᠢᠲᠡᠭᠡᠵᠦ ᠶᠠᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠰᠢᠷᠳᠡᠨᠡ᠃
— ᠮᠢᠨᠦ ᠥᠬᠢᠨ᠂ ᠠᠪᠠᠭᠠ ᠨᠠᠷ ᠲᠠᠭᠠᠨ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠳ ᠭᠠᠪᠢᠷᠠ ᠲᠡᠳᠡᠨ ᠦ᠌ ᠠᠷᠤ ᠠ᠋ᠴᠠ ᠨᠢ ᠳ᠋ᠡᠭᠡᠨ ᠣᠷᠣᠯᠠ᠃ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠭᠠᠪᠢᠷᠠ ᠬᠦᠢᠲᠡᠨ ᠬᠠᠯᠠᠭᠤᠨ ᠵᠠᠭᠤᠰᠢ ᠥᠷᠥᠵᠦ᠂ ᠰᠠᠢᠰᠢᠶᠠᠯᠳᠤ ᠨᠢᠭᠡ ᠰᠢᠯ ᠠᠷᠢᠬᠢ ᠵᠠᠳᠠᠯᠵᠤ ᠬᠡᠮᠨᠡᠯᠡ᠃ ᠵᠢᠭᠮᠢᠳ᠂ ᠠᠩᠭᠠᠭᠰᠠᠨ ᠦᠬᠡᠷ ᠤᠰᠤ ᠦᠵᠡᠭᠰᠡᠨ ᠮᠡᠲᠦ ᠠᠷᠤ ᠠᠷᠤ ᠠ᠋ᠴᠠ ᠨᠢ ᠵᠠᠯᠭᠢᠬᠤ ᠶ᠋ᠢᠨ ᠳᠠᠭᠠᠤ ᠰᠠᠢᠰᠢᠶᠠᠯᠲᠤ ᠶ᠋ᠢ ᠴᠦ᠍ ᠤᠤᠭᠤᠯᠭᠠᠬᠤ ᠭᠡᠵᠦ ᠰᠢᠬᠠᠨᠠ᠃ ᠰᠠᠢᠰᠢᠶᠠᠯᠲᠤ ᠠᠷᠢᠬᠢ ᠳᠡᠮᠡᠢ ᠤᠤᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ᠃ ᠬᠠᠶᠠ ᠲᠤᠯᠭᠠᠮᠳᠠᠪᠠᠯ ᠬᠡᠳᠦᠨ ᠬᠤᠨᠳᠠᠭᠠ ᠤᠤᠭᠤᠨᠠ᠃ ᠭᠡᠪᠡᠴᠦ ᠭᠠᠭᠴᠠ ᠬᠤᠨᠳᠠᠭᠠᠨ ᠳ᠋ᠤ᠌ ᠯᠠ ᠴᠢᠷᠠᠢ ᠨᠢ ᠤᠯᠠᠢᠵᠤ᠂ ᠢᠯᠡᠭᠦᠦ ᠬᠣᠶᠠᠷ ᠬᠤᠨᠳᠠᠭᠠ ᠤᠤᠭᠤᠴᠢᠬᠠᠪᠠᠯ ᠬᠣᠳᠣᠭᠣᠳᠣ ᠪᠠᠨ ᠤᠷᠪᠠᠲᠠᠯᠠ ᠪᠠᠨ ᠪᠥᠭᠡᠯᠵᠢᠵᠦ ᠶᠡᠬᠡ ᠵᠣᠪᠠᠳᠠᠭ ᠠ᠋ᠴᠠ ᠠᠷᠢᠬᠢ ᠤᠤᠭᠤᠬᠤ ᠳ᠋ᠤ᠌ ᠴᠠᠭᠠᠨᠠ ᠡᠴᠡ ᠪᠡᠨ ᠳᠤᠷᠠ ᠦᠭᠡᠢ᠃ ᠵᠢᠭᠮᠢᠳ ᠥᠨᠥᠳᠥᠷ ᠰᠠᠢᠰᠢᠶᠠᠯᠳᠤ ᠶ᠋ᠢ ᠵᠠᠪᠠᠯ ᠨᠢᠭᠡ ᠰᠣᠭᠲᠣᠭᠠᠶᠠ ᠭᠡᠵᠦ ᠪᠣᠳᠣᠬᠤ ᠪᠥᠭᠡᠳ ᠤᠤᠭᠤᠬᠤ ᠦᠭᠡᠢ ᠳ᠋ᠦ᠍ ᠬᠦᠷᠪᠡᠯ ᠨᠥᠭᠦᠭᠡ ᠪᠠᠯᠠᠮᠠᠳ ᠵᠠᠩ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠭᠡᠰᠡᠨ ᠲᠥᠯᠥᠪᠯᠡᠭᠡ ᠲᠡᠢ ᠢᠷᠡᠵᠡᠢ᠃ ᠨᠥᠭᠦᠭᠡ ᠬᠣᠶᠠᠷ ᠨᠢ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠷᠠᠵᠤ ᠶᠧᠨᠦᠦ ᠦᠵᠡᠬᠦ ᠪᠣᠳᠣᠯ ᠲᠠᠢ᠃ ᠵᠢᠭᠮᠢᠳ ᠪᠦᠳᠦᠭᠦᠨ ᠠᠮᠠ ᠪᠠᠨ ᠳᠠᠷᠪᠠᠯᠵᠠᠭᠤᠯᠤᠨ ᠴᠠᠭᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ᠂ ᠬᠠᠮᠢᠭᠠ ᠬᠡᠵᠢᠶᠡ ᠬᠡᠨ ᠬᠡᠨ ᠢ᠋ ᠶᠠᠭᠠᠬᠢᠵᠤ ᠠᠶᠤᠯᠭᠠᠵᠤ ᠰᠦᠷᠳᠡᠭᠦᠯᠵᠦ᠂ ᠲᠠᠢᠯᠵᠤ ᠪᠠᠢᠭᠰᠠᠨ 《ᠪᠠᠭᠠᠲᠤᠷᠯᠢᠭ ᠭᠠᠢᠬᠠᠮᠰᠢᠭᠲᠤ》 ᠲᠡᠦᠬᠡ ᠪᠡᠨ ᠮᠠᠵᠤᠤᠯᠠᠨ᠂ ᠪᠦᠷ ᠰᠡᠭᠦᠯ ᠳ᠋ᠡᠭᠡᠨ ᠰᠠᠢᠰᠢᠶᠠᠯᠳᠤ ᠤᠷᠤᠭᠤ ᠨᠢᠳᠦ ᠡᠷᠡᠢᠯᠭᠡᠵᠦ 《ᠡᠷᠡ ᠬᠥᠮᠦᠨ ᠪᠣᠯ ᠴᠢ ᠤᠤᠭᠤ》 ᠭᠡᠳ ᠠᠷᠢᠬᠢ ᠶ᠋ᠢ ᠠᠮᠠᠨ ᠳ᠋ᠤ᠌ ᠨᠢ ᠴᠢᠳᠬᠤᠮᠠᠷ ᠠᠭᠠᠰᠢᠯᠠᠨᠠ᠃ ᠰᠠᠢᠰᠢᠶᠠᠯᠲᠤ ᠡᠬᠢᠨ ᠳ᠋ᠡᠭᠡᠨ ᠳᠤᠭᠤᠢ ᠯᠠ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠭᠡᠭᠡᠳ ᠤᠯᠠᠮ ᠲᠡᠰᠬᠦ ᠳᠣᠳᠣᠮ ᠤᠯᠠᠮ ᠴᠤ᠌ ᠳᠠᠪᠠᠭᠤᠷᠠᠨ ᠠᠭᠠᠰᠢᠯᠠᠬᠤ ᠳ᠋ᠤᠨᠢ ᠡᠭᠳᠡᠭᠦᠦ ᠬᠦᠷᠴᠦ
— ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ ᠠᠷᠢᠬᠢ ᠪᠠᠷ ᠢᠯᠭᠠᠬᠤ ᠶᠤᠮ ᠪᠢᠰᠢ ᠴᠢ ᠨᠡᠭᠡᠷᠡᠨ ᠲᠡᠢᠮᠦ ᠰᠠᠢᠨ ᠡᠷᠡ ᠪᠣᠯ ᠬᠣᠶᠠᠭᠤᠯᠠ ᠭᠠᠳᠠᠨᠠ ᠭᠠᠷᠤᠭᠠᠳ ᠦᠵᠡᠯᠴᠡᠵᠦ ᠦᠵᠡᠶᠡ ᠭᠡᠪᠡ᠃ ᠵᠢᠭᠮᠢᠳ ᠡᠯᠦᠨᠴᠡ ᠡᠪᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠶᠤᠮ ᠰᠢᠭ᠋ ᠠᠷᠠᠭᠠ ᠰᠢᠲᠦ ᠬᠠᠪᠢᠷᠤᠨ᠂ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ
— ᠪᠣᠯᠤᠨᠠ᠂ ᠬᠡᠷᠪᠡ ᠪᠢ ᠴᠢᠮᠠ ᠳ᠋ᠤ᠌ ᠳᠡᠢᠯᠦᠭᠳᠡᠪᠡᠯ ᠬᠦᠦ ᠴᠢᠨᠢ ᠪᠣᠯᠤᠶᠠ᠂ ᠴᠢ ᠳᠡᠢᠯᠦᠭᠳᠡᠪᠡᠯ ᠨᠠᠮᠠ ᠶ᠋ᠢ ᠡᠪᠦᠭᠡ ᠭᠡᠵᠦ ᠳᠠᠭᠤᠳᠠ! ᠭᠡᠵᠦ ᠠᠭᠰᠤᠷᠤᠨᠠ᠃ ᠲᠡᠳᠡ ᠬᠣᠶᠠᠷ ᠬᠦᠷᠢᠶᠡᠨ ᠡᠴᠡ ᠭᠠᠷᠴᠤ ᠠᠭᠤᠵᠢᠮ ᠰᠢᠭ᠋ ᠭᠠᠵᠠᠷ ᠲᠤ᠌ ᠥᠭᠡᠳᠡ ᠥᠭᠡᠳᠡ ᠪᠡᠨ ᠬᠠᠷᠠᠵᠤ ᠵᠣᠭᠰᠣᠯᠠ᠃ ᠰᠠᠢᠰᠢᠶᠠᠯᠳᠤ ᠶᠣᠵᠣᠲᠠᠢᠬᠠᠨ ᠢᠨᠢᠶᠡᠴᠢᠬᠡᠭᠡᠳ
— ᠨᠢᠳᠤᠷᠭᠠᠨ ᠡᠷᠳᠡᠮ ᠲᠡᠢ ᠭᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠠ ᠤᠷᠢᠳ ᠢ᠋ᠶ᠋ᠠᠷ ᠡᠬᠢᠯᠡ ᠭᠡᠪᠡ᠃ ᠡᠨᠡ ᠳᠡᠷᠡᠰᠦᠨ ᠬᠣᠲᠣᠭᠣᠷ ᠲᠤ᠌ ᠪᠤᠤ ᠬᠡᠯᠡ᠂ ᠬᠠᠪᠢ ᠣᠢᠷᠠᠯᠴᠠᠭᠠ ᠭᠠᠵᠠᠷ ᠤ᠋ᠳ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠥᠭᠡᠳᠡ ᠡᠴᠡ ᠢᠩᠭᠢᠵᠦ ᠵᠣᠷᠢᠭ ᠲᠠᠢ ᠡᠰᠡᠷᠭᠦᠴᠡᠭᠴᠢ ᠶᠡᠷᠦ ᠲᠠᠭᠠᠷᠠᠯᠳᠤᠭᠠ ᠦᠭᠡᠢ ᠪᠣᠯᠬᠣᠷ ᠣᠮᠣᠭ ᠨᠢ ᠰᠢᠳᠡᠵᠦ ᠠᠷᠢᠬᠢ ᠨᠢ ᠨᠢᠭᠡᠨᠲᠡ ᠰᠡᠷᠭᠦᠵᠦ᠂ ᠮᠥᠷᠭᠥᠯᠳᠦᠬᠦ ᠭᠡᠵᠦ ᠬᠡᠷᠡᠵᠦ ᠪᠠᠢᠭᠠ ᠪᠤᠬᠠ ᠰᠢᠭ᠋ ᠨᠢᠳᠦ ᠨᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠨᠡ᠃ ᠲᠡᠷᠡ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠨᠢᠳᠤᠷᠭᠠᠳᠠᠬᠤ ᠭᠡᠵᠦ ᠳᠠᠭᠠᠷᠢᠨ ᠣᠷᠣᠲᠠᠯᠠ ᠰᠠᠢᠰᠢᠶᠠᠯᠳᠤ ᠲᠡᠭᠦᠨ ᠦ᠌ ᠬᠦᠴᠦᠨ ᠳ᠋ᠦ᠍ᠨᠢ ᠲᠠᠭᠠᠷᠠᠭᠤᠯᠤᠨ ᠭᠠᠭᠴᠠᠬᠠᠨ ᠳᠡᠯᠡᠰᠴᠦ ᠰᠢᠷᠣᠢ ᠡᠮᠬᠦᠭᠦᠯᠪᠡ᠃ ᠵᠢᠭᠮᠢᠳ ᠭᠠᠯᠵᠠᠭᠤᠷᠠᠭᠰᠠᠨ ᠶᠤᠮ ᠰᠢᠭ᠋ ᠣᠷᠢᠯᠠᠨ᠂ ᠳᠠᠬᠢᠭᠠᠳ ᠳᠠᠭᠠᠷᠢᠭᠰᠠᠨ ᠳ᠋ᠤ᠌᠂ ᠰᠠᠢᠰᠢᠶᠠᠯᠲᠤ ᠵᠠᠢᠯᠠᠰᠬᠢᠮᠡᠭᠴᠡ ᠬᠤᠯᠬᠢ ᠤᠷᠤᠭᠤ ᠨᠢ ᠰᠢᠭᠠᠵᠤ ᠣᠷᠬᠢᠭᠰᠠᠨ ᠳ᠋ᠤ᠌ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠲᠤᠯᠤᠨ ᠡᠪᠬᠡᠷᠡᠨ ᠤᠨᠠᠭᠠᠳ ᠰᠤᠯᠳᠠᠢᠨ ᠬᠡᠪᠲᠡᠯᠡ᠃ ᠠᠮᠠᠨ ᠳ᠋ᠤᠨᠢ ᠴᠢᠰᠤ ᠠᠮᠲᠠᠯᠠᠭᠳᠠᠨ᠂ ᠴᠢᠬᠢᠨ ᠡᠴᠡ ᠨᠢ ᠴᠢᠰᠤ ᠭᠠᠷᠤᠨᠠ᠃ ᠠᠷᠠᠢ ᠭᠡᠵᠦ ᠮᠡᠳᠡᠭᠡ ᠣᠷᠣᠭᠰᠠᠨ ᠵᠢᠭᠮᠢᠳ᠄
— ᠪᠢᠰᠢᠷᠡᠯᠡ᠂ ᠪᠢᠰᠢᠷᠡᠯᠡ ᠠ᠋᠂ ᠴᠢ ᠨᠡᠭᠡᠷᠡᠨ ᠬᠡᠴᠡᠭᠦᠦ ᠵᠠᠯᠢᠲᠠᠢ ᠵᠣᠳᠣᠯᠳᠤᠳᠠᠭ ᠬᠥᠮᠦᠨ ᠪᠠᠢᠨᠠ᠃ ᠬᠣᠵᠢᠮ ᠴᠢᠮᠠ ᠶ᠋ᠢ ᠡᠪᠦᠭᠡ ᠰᠢᠭ ᠢ᠋ᠶ᠋ᠡᠨ ᠬᠦᠨᠳᠦᠯᠡᠵᠦ ᠶᠠᠪᠤᠶᠠ ᠭᠡᠯᠡ᠃ ᠰᠠᠢᠰᠢᠶᠠᠯᠳᠤ᠂ ᠵᠢᠭᠮᠢᠳ ᠢ᠋ ᠲᠡᠳᠡᠨ ᠪᠤᠰᠬᠠᠭᠠᠳ
— ᠬᠣᠵᠢᠮ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠬᠢᠵᠦ ᠠᠢᠯ ᠠᠢᠮᠠᠭ ᠢ᠋ ᠦᠢᠮᠡᠭᠦᠯᠵᠦ ᠶᠠᠪᠤᠳᠠᠭ ᠢ᠋ᠶ᠋ᠠᠨ ᠪᠣᠯᠢᠵᠤ ᠦᠵᠡ᠃ ᠴᠢ ᠪᠠᠭᠰᠢ ᠬᠥᠮᠦᠨ ᠰᠢᠦ ᠳᠡ᠃ ᠳᠦᠷᠢ ᠲᠥᠷᠬᠦ ᠪᠡᠨ ᠬᠢᠴᠢᠶᠡᠬᠦ ᠶᠦᠮ ᠰᠢᠦ ᠭᠡᠳ ᠮᠥᠷᠥ ᠶ᠋ᠢ ᠨᠢ ᠠᠯᠠᠭᠠᠳᠠᠪᠠ᠃
ᠲᠡᠷᠡ ᠬᠣᠶᠠᠷ ᠤ᠋ᠨ ᠵᠣᠳᠣᠭᠠᠨ ᠢ᠋ ᠵᠢᠷᠦᠬᠡ ᠲᠦᠭᠰᠢᠨ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠪᠠᠶᠠᠷᠲᠤ᠂ ᠪᠠᠽᠠᠷ ᠬᠣᠶᠠᠷ ᠪᠦᠯᠡᠬᠡ ᠵᠠᠯᠭᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠠᠩᠭᠠᠢᠨ ᠮᠡᠯᠡᠷᠡᠵᠡᠢ᠃ ᠡᠨᠡᠬᠦ ᠳᠤᠭᠤᠢ ᠳᠠᠷᠤᠤᠬᠠᠨ᠂ ᠨᠢᠮᠭᠡᠨ ᠴᠠᠭᠠᠨ ᠠᠷᠠᠰᠤ ᠬᠥᠷᠥᠰᠥ ᠲᠡᠢ ᠡᠴᠡᠩᠬᠡᠢ ᠥᠨᠳᠥᠷ ᠵᠠᠯᠠᠭᠤ ᠶ᠋ᠢ ᠡᠢᠮᠦ ᠰᠢᠷᠪᠥᠰᠥᠯᠢᠭ ᠬᠠᠲᠠᠭᠤ ᠡᠷᠡ ᠭᠡᠵᠦ ᠪᠣᠳᠣᠭᠰᠠᠨ ᠦᠭᠡᠢ᠃ ᠬᠤᠷᠳᠤᠨ ᠪᠣᠰᠢᠭᠣ ᠬᠥᠳᠡᠯᠭᠡᠭᠡᠨ᠂ ᠣᠨᠣᠴᠢᠲᠠᠢ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ᠂ ᠢᠳᠡ ᠬᠣᠷᠣᠲᠠᠢ ᠴᠣᠬᠢᠭᠠ ᠶ᠋ᠢ ᠭᠤᠷᠪᠠᠨ ᠵᠢᠭᠮᠢᠳ ᠴᠦ᠍ ᠳᠡᠢᠯᠬᠦ ᠪᠡᠷ ᠦᠭᠡᠢ ᠳᠠᠯᠳᠠ ᠨᠢᠭᠤᠴᠠᠭᠠᠢ ᠬᠦᠴᠦᠨ ᠲᠡᠢ ᠠᠵᠢ᠃ ᠵᠢᠭᠠᠯ ᠣᠴᠢ ᠠᠯᠠᠭᠠ ᠲᠡᠰᠢᠨ ᠦᠰᠦᠴᠢᠨ ᠪᠠᠶᠠᠷᠯᠠᠵᠤ
— ᠮᠢᠨᠦ ᠠᠪᠤ ᠠᠶᠤᠮᠠᠷ ᠪᠠᠢᠭᠠ ᠪᠢᠵᠡ᠂ ᠳᠠᠬᠢᠭᠠᠳ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠵᠦ ᠠᠭᠠᠰᠢᠯᠠᠨᠠ ᠤᠤ? ᠭᠡᠨᠡ᠃
— ᠠᠪᠤ ᠠ᠋ᠴᠠ ᠴᠢᠨᠢ ᠠᠶᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠴᠢᠮᠠᠠ᠋ᠴᠠ ᠯᠠ ᠠᠶᠤᠴᠢᠬᠠᠯᠠ᠃ ᠬᠣᠵᠢᠮ ᠠᠪᠠᠭᠠ ᠨᠢ ᠠᠷᠢᠬᠢ ᠤᠤᠭᠤᠬᠤ ᠦᠭᠡᠢ ᠭᠡᠳ ᠵᠢᠭᠮᠢᠳ ᠨᠢᠭᠤᠷ ᠤ᠋ᠨ ᠭᠠᠳᠤᠷᠠ ᠳ᠋ᠤ᠌ ᠤᠰᠤ ᠬᠢᠯᠭᠡᠨ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠴᠢᠰᠤ ᠰᠢᠷᠣᠢ ᠶ᠋ᠢ ᠴᠡᠪᠡᠷᠯᠡᠨᠡ᠃ ᠪᠠᠶᠠᠷᠲᠤ ᠵᠤᠵᠠᠭᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠷᠪᠣᠢᠯᠭᠠᠨ ᠢᠨᠢᠶᠡᠵᠦ ᠵᠢᠭᠮᠢᠳ ᠲᠦ᠍
— ᠴᠢᠮᠠ ᠶ᠋ᠢ ᠴᠢᠨᠢ ᠶᠠᠭ ᠦᠭᠡᠢ ᠵᠣᠳᠣᠭᠠᠴᠢᠨ ᠭᠡᠵᠦ ᠪᠣᠳᠣᠭᠰᠠᠨ ᠴᠢᠨᠢ ᠰᠠᠢ ᠭᠤᠸᠠᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠣᠯ ᠶᠠᠭᠤ ᠴᠤ᠌ ᠪᠢᠰᠢ ᠶᠦᠮ ᠪᠠᠢᠨᠠ ᠭᠡᠯᠡ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠰᠠᠢᠰᠢᠶᠠᠯᠲᠤ ᠶ᠋ᠢ《ᠠᠮᠠᠷ ᠦᠭᠡᠢ ᠵᠣᠳᠣᠭᠠᠴᠢᠨ》 ᠭᠡᠵᠦ ᠶᠥᠭᠡᠳᠡᠭᠰᠡᠨ ᠦᠭᠡ ᠢᠯᠡᠬᠡᠨ᠃ ᠰᠠᠢᠰᠢᠶᠠᠯᠲᠤ ᠶ᠋ᠢᠨ ᠡᠭᠳᠡᠭᠦᠦ ᠬᠦᠷᠴᠦ
— ᠪᠢ ᠵᠣᠳᠣᠭᠠᠴᠢᠨ ᠪᠢᠰᠢ ᠠ᠋᠂ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠡᠴᠡ ᠪᠡᠨ ᠠᠪᠤᠭᠠᠳ ᠬᠡᠨ ᠲᠡᠢ ᠴᠦ᠍ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠬᠢᠵᠦ ᠪᠠᠢᠭᠠ ᠦᠭᠡᠢ᠃ ᠵᠦᠭᠡᠷ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠲᠠᠩᠳᠠ ᠬᠠᠯᠳᠠᠵᠤ ᠣᠷᠣᠯᠳᠣᠭᠠᠳ ᠪᠠᠢᠬᠤᠯᠠᠷ ᠨᠢ ᠠᠷᠭᠠ ᠳ᠋ᠤᠨᠢ ᠠᠷᠭᠠ ᠬᠡᠷᠡᠭᠯᠡᠭᠰᠡᠨ ᠯᠡ ᠲᠡᠳᠦᠢ᠃ ᠬᠠᠮᠠᠷ ᠵᠢᠭᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠠᠷᠠᠢ ᠴᠤ᠌ ᠬᠠᠷᠠᠵᠤ ᠪᠠᠢᠭᠠᠳ ᠴᠣᠬᠢᠭᠤᠯᠴᠢᠬᠠᠳᠠᠭ ᠲᠡᠢᠮᠦ ᠴᠦ᠍ ᠶᠠᠳᠠᠭᠰᠠᠨ ᠡᠷᠡ ᠪᠢᠰᠢ ᠠ᠋᠃ ᠪᠠᠶᠠᠷᠲᠤ ᠠᠷᠭᠠ ᠪᠠᠷᠠᠭᠳᠠᠨ ᠢᠨᠢᠶᠡᠭᠰᠡᠨ ᠮᠠᠶᠢᠭᠲᠠᠢ ᠢᠷᠪᠠᠢᠯᠠ᠃ 《ᠬᠣᠣᠷ ᠢ᠋ ᠬᠣᠣᠷ ᠢ᠋ᠶ᠋ᠠᠷ》 ᠭᠡᠭᠴᠢ ᠪᠡᠷ ᠵᠢᠭᠮᠢᠳ ᠲᠡᠢᠨ ᠬᠦ᠌ ᠨᠢᠭᠡ ᠠᠪᠲᠠᠭᠰᠠᠨᠠ᠋ᠴᠠ ᠬᠣᠢᠰᠢ ᠰᠠᠢᠰᠢᠶᠠᠯᠳᠤ ᠳ᠋ᠤ᠌ ᠶᠡᠬᠡᠯᠡ ᠰᠠᠢᠮᠰᠤᠷᠬᠠᠨ ᠠᠭᠠᠰᠢᠯᠠᠬᠤ ᠪᠣᠯᠵᠤ᠂ ᠠᠷᠤ ᠬᠣᠢᠨᠠ ᠨᠢ《ᠲᠡᠨᠡᠭ ᠵᠢᠭᠮᠢᠳ》 ᠢ᠋ ᠥᠳᠥᠭᠡᠳᠡᠭ ᠬᠥᠮᠦᠰ ᠴᠦ᠍ ᠬᠢᠷᠢ ᠪᠡᠨ ᠮᠡᠳᠡᠨ ᠳᠤᠭᠤᠢ ᠶᠠᠪᠤᠬᠤ ᠪᠣᠯᠵᠠᠢ᠃
ᠰᠣᠩᠭᠢᠨᠠᠲᠤ ᠭᠡᠳᠡᠭ ᠭᠠᠵᠠᠷ ᠬᠥᠮᠦᠨ ᠠᠮᠠ ᠪᠠᠷ ᠴᠥᠭᠡᠨ ᠴᠦ᠍ ᠪᠠᠭᠠᠳᠠᠬᠤ ᠪᠠᠷ ᠦᠭᠡᠢ ᠪᠤᠳᠤᠯᠢᠶᠠᠨ ᠲᠠᠢ ᠣᠷᠴᠢᠨ ᠭᠡᠵᠦ ᠪᠣᠯᠬᠤ ᠪᠣᠯᠪᠠᠴᠤ ᠭᠠᠪᠢᠷᠠ ᠶᠠᠮᠠᠷ ᠴᠤ᠌ ᠬᠥᠮᠦᠨ ᠲᠡᠢ ᠡᠪ ᠵᠦᠢ ᠲᠡᠢ ᠬᠠᠷᠢᠴᠠᠵᠤ ᠴᠢᠳᠠᠨᠠ᠃ ᠲᠡᠭᠡᠪᠡᠴᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠭᠠ ᠬᠠᠲᠠᠭᠤ᠃ ᠶᠠᠮᠠᠷ ᠬᠥᠮᠦᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠬᠠᠨᠳᠤᠬᠤ ᠬᠡᠷᠬᠢᠨ ᠠᠷᠭᠠᠴᠠᠬᠤ ᠤᠬᠠᠭᠠᠨ ᠢ᠋ ᠨᠠᠷᠢᠯᠢᠭ ᠪᠢᠰᠢᠯᠭᠠᠵᠤ ᠪᠠᠢᠳᠠᠭ᠃ ᠲᠡᠷᠡ ᠨᠥᠬᠥᠷ ᠰᠢᠭ ᠢ᠋ᠶ᠋ᠡᠨ ᠳᠠᠭᠠᠭᠠᠮᠠᠭᠠᠢ ᠬᠦᠯᠢᠴᠡᠩᠭᠦᠢ ᠪᠢᠰᠢ᠃ ᠬᠡᠷᠪᠡ ᠦᠨᠡᠨ ᠶᠣᠰᠣᠨ ᠤ᠋ ᠲᠥᠯᠥᠭᠡ ᠯᠡ ᠶᠦᠮ ᠪᠣᠯ ᠬᠡᠨ ᠳ᠋ᠦ᠍ ᠴᠦ᠍ ᠢᠯᠳᠠᠷ ᠬᠠᠶᠠᠬᠤ ᠦᠭᠡᠢ ᠠᠰ ᠲᠤᠯᠤᠨ ᠠᠪᠤᠨ ᠬᠠᠷᠢᠭᠤᠴᠠᠬᠤᠠ᠋ᠴᠠ ᠪᠤᠴᠠᠬᠤ ᠦᠭᠡᠢ᠃ ᠵᠠᠷᠢᠮ ᠬᠥᠮᠦᠨ ᠲᠠᠩᠳᠠ ᠪᠤᠰᠤᠳ ᠤ᠋ᠨ ᠦ᠋ ᠰᠡᠪ ᠢ᠋ ᠬᠠᠢᠵᠤ᠂ ᠬᠣᠷᠣ ᠬᠣᠨᠵᠢᠩ ᠢ᠋ᠶ᠋ᠠᠷ ᠠᠮᠢᠰᠬᠤᠯᠯᠠᠨ ᠶᠠᠪᠤᠳᠠᠭ ᠪᠣᠯ ᠭᠠᠪᠢᠷᠠ ᠬᠡᠵᠢᠶᠡᠳᠡ ᠪᠤᠰᠤᠳ ᠤ᠋ᠨ ᠰᠠᠢᠨ ᠲᠠᠯᠠ᠂ ᠵᠥᠪ ᠲᠠᠯᠠ ᠶ᠋ᠢ ᠣᠢᠯᠠᠭᠠᠨ ᠮᠡᠳᠡᠷᠡᠵᠦ᠂ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠰᠠᠢᠨ ᠰᠠᠢᠬᠠᠨ ᠲᠡᠰᠢ ᠬᠥᠭᠵᠢᠬᠦ ᠶ᠋ᠢ ᠬᠦᠰᠡᠨ ᠡᠷᠡᠮᠡᠯᠵᠡᠯᠡᠨᠡ᠃ 《ᠨᠢᠭᠡ ᠬᠥᠮᠦᠨ ᠠᠷᠪᠠᠨ ᠮᠠᠭᠤ ᠲᠠᠢ ᠴᠤ᠌ ᠯᠠᠪ ᠨᠢᠭᠡ ᠳᠠᠪᠠᠭᠤᠯᠢᠭ ᠲᠠᠯᠠ ᠲᠠᠢ᠃ ᠪᠤᠰᠤᠳ ᠢ᠋ ᠰᠠᠢᠨ ᠲᠠᠢ ᠲᠠᠯᠠᠠ᠋ᠴᠠ ᠨᠢ ᠬᠠᠷᠠᠵᠤ ᠬᠥᠮᠦᠨ ᠬᠥᠮᠦᠨ ᠳ᠋ᠡᠭᠡᠨ ᠤᠷᠮᠠ ᠬᠠᠢᠷᠠᠯᠠᠵᠤ ᠶᠠᠪᠤᠪᠠᠯ ᠵᠣᠬᠢᠨᠠ》 ᠭᠡᠵᠦ ᠦᠷᠭᠦᠯᠵᠢ ᠬᠡᠯᠡᠳᠡᠭ ᠪᠠᠢᠯᠠ᠃
ᠰᠣᠩᠭᠢᠨᠠᠲᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠥᠩᠳᠡᠭᠡᠨ ᠶᠡᠬᠡ ᠬᠤᠪᠢᠷᠠᠯᠲᠠ ᠭᠠᠷᠴᠤ ᠪᠠᠢᠪᠠ᠃ ᠪᠠᠭᠰᠢᠨᠠᠷ ᠤ᠋ᠨ ᠠᠵᠢᠯ ᠤ᠋ᠨ ᠢᠳᠡᠪᠬᠢᠵᠢᠯ ᠴᠦ᠍ ᠶᠡᠬᠡᠬᠡᠨ ᠳᠡᠭᠡᠭᠰᠢᠯᠡᠵᠡᠢ᠃ ᠪᠤᠤ ᠬᠠᠰᠣ᠋ᠷᠬᠢᠯ ᠭᠡᠳᠡᠭ ᠵᠠᠯᠠᠭᠤ ᠪᠠᠭᠰᠢ ᠰᠢᠯᠵᠢᠵᠦ ᠢᠷᠡᠭᠰᠡᠨ ᠨᠢ ᠰᠠᠢᠰᠢᠶᠠᠯᠲᠤ ᠳ᠋ᠤ᠌ ᠨᠢᠭᠡᠨ ᠮᠥᠷᠥ ᠶ᠋ᠢᠨ ᠬᠦᠴᠦᠨ ᠨᠡᠮᠡᠭᠳᠡᠵᠡᠢ᠃ ᠬᠢᠲᠠᠳ ᠮᠣᠩᠭᠣᠯ ᠬᠡᠯᠡᠨ ᠳ᠋ᠡᠭᠡᠨ ᠲᠡᠭᠰᠢ᠂ ᠬᠥᠩᠭᠡᠮᠰᠦᠭ ᠰᠢᠭᠤᠷᠬᠠᠢ ᠵᠠᠩ ᠲᠠᠢ ᠡᠨᠡ ᠵᠠᠯᠠᠭᠤ ᠶ᠋ᠢ ᠬᠢᠴᠢᠶᠡᠯ ᠬᠥᠮᠦᠵᠢᠯ ᠦ᠋ᠨ ᠡᠷᠬᠢᠯᠡᠭᠴᠢ ᠪᠠ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ ᠶ᠋ᠢᠨ ᠠᠵᠢᠯ ᠢ᠋ ᠬᠠᠪᠰᠤᠷᠭᠠᠨ ᠬᠢᠯᠭᠡᠪᠡ᠃ ᠭᠣᠣᠯᠯᠠᠭᠴᠢ ᠪᠠᠭᠰᠢᠨᠠᠷ ᠭᠡᠪᠡᠯ ᠭᠠᠪᠢᠷᠠ᠂ ᠨᠣᠭᠣᠭᠠᠨ ᠨᠢᠳᠦᠨ ᠪᠠᠶᠠᠷᠲᠤ᠂ ᠵᠢᠷᠭᠠᠯᠲᠤ᠂ ᠪᠠᠽᠠᠷ᠂ ᠬᠠᠷᠠ ᠲᠤᠯᠭᠤᠷ ᠨᠠᠷ ᠪᠠᠢᠵᠤ᠂ ᠲᠤᠩᠭᠠᠯᠠᠭ ᠳᠠᠭᠤᠤ ᠤᠷᠠᠯᠢᠭ ᠤ᠋ᠨ ᠬᠢᠴᠢᠶᠡᠯ᠂ ᠵᠢᠭᠮᠢᠳ ᠨᠢᠭᠡ ᠡᠴᠡ ᠲᠠᠪᠤᠨ ᠣᠨ ᠤ᠋ ᠵᠢᠷᠤᠭ ᠤ᠋ᠨ ᠬᠢᠴᠢᠶᠡᠯ ᠢ᠋ ᠣᠷᠣᠨᠠ᠃ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠠᠢᠯ ᠬᠡᠰᠦᠳᠡᠭ ᠢ᠋ᠶ᠋ᠡᠨ ᠴᠦ᠍ ᠠᠶᠠᠳᠴᠤ᠂ ᠭᠠᠷᠠᠭ ᠤ᠋ᠨ ᠡᠳᠦᠷ ᠡᠴᠡ ᠪᠤᠰᠤᠳ ᠴᠠᠭ ᠲᠤ᠌ ᠪᠠᠷᠤᠭ ᠠᠷᠢᠬᠢ ᠤᠤᠭᠤᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠵᠠᠢ᠃ 《ᠲᠣᠭᠰᠢᠨ ᠵᠠᠭᠠᠨ》 ᠴᠣᠯᠠ ᠲᠠᠢ ᠵᠠᠯᠠᠭᠤ ᠶ᠋ᠢ ᠥᠭᠡᠷᠡ ᠭᠠᠵᠠᠷ ᠲᠤ᠌ ᠶᠠᠪᠤᠭᠤᠯᠵᠠᠢ᠃ 《ᠠᠯᠠᠭ ᠲᠣᠯᠣᠭᠠᠢᠲᠤ》 ᠪᠠᠶᠠᠨᠳᠦᠭᠦᠷᠡᠩ ᠢ᠋ᠶ᠋ᠡᠷ ᠬᠣᠭᠣᠯᠠᠨ ᠭᠡᠷ᠂ ᠠᠷᠤ ᠲᠠᠯᠠ ᠶ᠋ᠢᠨ ᠠᠵᠢᠯ ᠢ᠋ ᠬᠠᠮᠢᠶᠠᠷᠤᠭᠤᠯᠪᠠ᠃ ᠬᠤᠷᠢᠶᠠᠵᠤ ᠬᠤᠷᠠᠮᠳᠤᠭᠤᠯᠬᠤ ᠳ᠋ᠠᠭᠠᠨ ᠬᠤᠯᠤᠭᠠᠨᠠ ᠰᠢᠭ᠋ ᠨᠠᠷᠢᠨ ᠤᠬᠠᠭᠠᠨ ᠲᠠᠢ ᠪᠠᠶᠠᠨᠳᠦᠭᠦᠷᠡᠩ ᠳ᠋ᠦ᠍ ᠡᠨᠡ ᠠᠵᠢᠯ ᠠᠷᠭᠠ ᠦᠭᠡᠢ ᠵᠣᠬᠢᠷᠠᠵᠠᠢ᠃ ᠰᠠᠬᠠᠯᠲᠤ ᠪᠠᠽᠠᠷ ᠲᠤᠩᠭᠠᠯᠠᠭ ᠬᠣᠶᠠᠷ ᠬᠦᠦ ᠲᠡᠢ ᠪᠣᠯᠤᠭᠰᠠᠨ ᠡᠴᠡ ᠪᠡᠨ ᠬᠣᠢᠰᠢ ᠭᠡᠷ ᠵᠠᠭᠤᠷᠠ ᠶ᠋ᠢᠨ 《ᠲᠡᠢᠨ》 ᠨᠢ ᠴᠦ᠍ ᠨᠠᠮᠬᠠᠷᠠᠪᠠ᠃ ᠡᠳᠡᠭᠡᠷ ᠪᠣᠯ ᠰᠢᠨᠡ ᠵᠠᠬᠢᠷᠤᠯ ᠤ᠋ᠨ ᠤᠳᠤᠷᠢᠳᠤᠯᠭᠠ ᠳᠣᠣᠷᠠ ᠭᠠᠷᠤᠭᠰᠠᠨ ᠬᠠᠮᠤᠭ ᠠᠩᠬᠠᠨ ᠤ᠋ ᠪᠠᠶᠠᠷᠯᠠᠭᠤᠰᠢᠲᠠᠢ ᠬᠤᠪᠢᠷᠠᠯᠲᠠ ᠪᠣᠯᠬᠤ ᠶᠤᠮ᠃
ᠣᠳᠣ ᠰᠠᠢᠰᠢᠶᠠᠯᠲᠤ ᠬᠤᠰᠢᠭᠤᠨ ᠤ᠋ ᠳᠠᠷᠤᠭᠠ ᠨᠠᠷ ᠢ᠋ ᠭᠤᠶᠤᠵᠤ ᠲᠡᠭᠦᠵᠦ ᠪᠠᠢᠭᠠᠳ ᠨᠡᠯᠢᠶᠡᠳ ᠮᠥᠩᠭᠥ ᠵᠣᠭᠣᠰ ᠣᠯᠬᠤ ᠪᠠᠷ ᠪᠣᠯᠵᠤ ᠰᠤᠷᠭᠠᠭᠤᠯᠢ ᠪᠠᠨ ᠳᠠᠬᠢᠵᠤ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠪᠠᠢᠭᠤᠯᠬᠤ ᠭᠡᠵᠦ ᠲᠥᠰᠥᠪ ᠲᠥᠯᠥᠪᠯᠡᠭᠡ ᠭᠠᠷᠭᠠᠭᠠᠳ ᠶᠠᠭᠠᠷᠠᠵᠤ ᠪᠠᠢᠯᠠ᠃ ᠰᠤᠮᠤᠨ ᠤ᠋ ᠪᠠᠨ ᠤᠳᠤᠷᠢᠳᠤᠯᠭᠠ ᠪᠣᠯᠤᠨ ᠭᠠᠴᠠᠭᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠤ᠋ᠨ ᠳᠡᠮᠵᠢᠯᠭᠡ ᠲᠤᠰᠠᠯᠠᠮᠵᠢ ᠪᠠᠷ ᠨᠡᠯᠢᠶᠡᠳ ᠪᠠᠷᠢᠯᠭᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠤ᠋ᠳ ᠢ᠋ ᠣᠷᠣᠭᠤᠯᠤᠨ ᠠᠪᠴᠢᠷᠠᠵᠠᠢ᠃ ᠲᠡᠭᠡᠭᠡᠳ ᠰᠤᠮᠤᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡ ᠬᠡᠰᠡᠭ ᠲᠦ᠍ ᠪᠠᠢᠳᠠᠭ ᠶᠡᠬᠡᠬᠡᠨ ᠲᠠᠯᠠᠪᠠᠢ ᠲᠠᠢ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ᠂ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠬᠤ ᠪᠠᠷᠢᠯᠭᠠ ᠵᠢᠩᠬᠢᠨᠢ ᠪᠡᠷ ᠡᠬᠢᠯᠡᠯᠡ᠃
ᠨᠠᠶᠠᠨ ᠵᠢᠷᠭᠤᠭᠠᠨ ᠣᠨ ᠤ᠋ ᠶᠢᠰᠦᠳᠦᠭᠡᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠤ᠋ ᠪᠠᠭᠰᠢ ᠶ᠋ᠢᠨ ᠪᠠᠶᠠᠷ ᠢ᠋ ᠲᠣᠬᠢᠶᠠᠯᠳᠤᠭᠤᠯᠤᠨ ᠰᠣᠩᠭᠢᠨᠠᠲᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠠᠬᠢᠨ ᠰᠢᠨᠡ ᠪᠡᠷ ᠪᠠᠢᠭᠤᠯᠤᠭᠳᠠᠭᠰᠠᠨ《ᠡᠬᠢᠯᠡᠬᠦ ᠶᠣᠰᠣᠯᠠᠯ》 ᠢ᠋ ᠦᠪᠡᠳᠡᠭᠰᠢ ᠶᠡᠬᠡᠪᠡᠷ ᠬᠢᠯᠡ᠃ ᠠᠢᠮᠠᠭ᠂ ᠬᠤᠰᠢᠭᠤᠨ ᠤ᠋ ᠳᠠᠷᠤᠭᠠ ᠨᠠᠷ᠂ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠳᠠᠷᠤᠭᠠ ᠨᠠᠷ᠂ ᠰᠤᠮᠤ ᠭᠠᠴᠠᠭᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠪᠣᠯᠤᠨ ᠭᠡᠷ ᠦ᠋ᠨ ᠠᠬᠠᠮᠠᠳ᠂ ᠮᠠᠯᠴᠢᠨ ᠲᠦᠮᠡᠨ ᠢ᠋ ᠪᠠᠭᠲᠠᠭᠠᠭᠰᠠᠨ ᠨᠢᠵᠢᠭᠢᠷ ᠨᠠᠢᠷ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠰᠢᠨᠡ ᠪᠠᠢᠭᠤᠯᠤᠭᠳᠠᠭᠰᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠶᠠᠭᠤᠮᠠ ᠪᠦᠬᠦᠨ ᠰᠢᠨᠡ᠂ ᠲᠣᠬᠢᠯᠢᠭ ᠲᠥᠪᠬᠢᠨᠡᠭᠦᠨ᠂ ᠰᠤᠷᠤᠭᠴᠢ ᠶ᠋ᠢᠨ ᠪᠠᠢᠷᠢ ᠰᠠᠭᠤᠴᠠ᠂ ᠬᠣᠭᠣᠯᠠᠨ ᠭᠡᠷ᠂ ᠠᠯᠪᠠᠨ ᠭᠡᠷ ᠦ᠋ᠨ ᠪᠦᠬᠦ ᠶᠠᠭᠤᠮᠠ ᠪᠦᠷᠢᠨ ᠲᠡᠭᠦᠯᠳᠡᠷ᠂ ᠳᠠᠪ ᠭᠡᠰᠡᠨ ᠰᠠᠢᠬᠠᠨ ᠵᠢᠭᠠᠨ ᠰᠤᠷᠭᠠᠬᠤ ᠣᠷᠴᠢᠨ ᠲᠠᠢ ᠪᠣᠯᠤᠨ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠡᠴᠡ ᠪᠠᠭᠰᠢᠨᠠᠷ ᠴᠤ᠌ ᠮᠠᠰᠢ ᠪᠠᠶᠠᠷ ᠬᠥᠭᠵᠢᠯ ᠲᠡᠢ ᠠᠵᠢᠯᠯᠠᠨᠠ᠃ ᠳᠡᠭᠡᠳᠦ ᠱᠠᠲᠤᠨ ᠤ᠋ ᠤᠳᠤᠷᠢᠳᠤᠯᠭᠠ ᠨᠠᠷ ᠰᠠᠢᠰᠢᠶᠠᠯᠲᠤ ᠳ᠋ᠤ᠌ ᠮᠠᠰᠢ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠪᠠᠢᠵᠤ ᠥᠨᠳᠥᠷ ᠦᠨᠡᠯᠡᠭᠰᠡᠨ ᠪᠠᠢᠯᠠ᠃ ᠡᠭᠦᠨ ᠦ᠌ ᠳᠠᠭᠠᠤ ᠳ᠋ᠤ᠌᠂ ᠡᠨᠡᠬᠦ《ᠰᠢᠳᠤᠷᠭᠤ ᠭᠠᠷᠮᠠᠭᠠᠢ ᠱᠠᠷ》 ᠢ᠋ ᠪᠠᠰᠠ ᠨᠢᠭᠡᠨ ᠳᠠᠮᠫᠤᠷᠠᠭᠰᠠᠨ ᠰᠤᠷᠭᠠᠭᠤᠯᠢ ᠪᠣᠯᠬᠤ ᠬᠤᠰᠢᠭᠤᠨ ᠤ᠋ ᠭᠤᠷᠪᠠᠳᠤᠭᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠠᠬᠢᠷᠤᠯ ᠢ᠋ᠶ᠋ᠠᠷ ᠶᠠᠪᠤᠭᠤᠯᠬᠤ ᠬᠠᠷᠠᠯᠲᠠ ᠪᠠᠨ ᠲᠣᠭᠲᠠᠴᠢᠬᠠᠭᠰᠠᠨ ᠪᠠᠢᠯᠠ᠃ ᠪᠠᠭᠰᠢᠨᠠᠷ ᠤ᠋ᠨ ᠨᠡᠯᠢᠶᠡᠳ ᠢ᠋ ᠬᠥᠳᠡᠯᠭᠡᠵᠦ ᠰᠢᠯᠵᠢᠭᠦᠯᠵᠡᠢ᠃ ᠪᠠᠽᠠᠷ ᠲᠤᠩᠭᠠᠯᠠᠭ ᠬᠣᠶᠠᠷ ᠢ᠋ ᠡᠨᠳᠡ ᠡᠴᠡ ᠰᠢᠯᠵᠢᠭᠦᠯᠵᠡᠢ᠃ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠭᠡᠷᠡᠯ ᠭᠡᠳᠡᠭ ᠥᠬᠢᠨ ᠬᠤᠪᠢᠶᠠᠭᠳᠠᠨ ᠢᠷᠡᠵᠦ᠂ ᠥᠭᠡᠷᠡ ᠰᠤᠮᠤᠨᠠ᠋ᠴᠠ ᠰᠢᠷᠠᠪ᠂ ᠴᠢᠷᠮᠡ᠂ ᠣᠳᠣᠩᠭᠤᠸᠠ ᠵᠡᠷᠭᠡ ᠪᠠᠭᠰᠢᠨᠠᠷ ᠰᠢᠯᠵᠢᠵᠦ ᠢᠷᠡᠪᠡ᠃ ᠪᠤᠤ· ᠬᠠᠰᠠᠣᠷᠬᠢᠯ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠪᠠᠭᠰᠢ ᠶ᠋ᠢᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠮᠡᠳᠡᠯᠭᠡ ᠳᠡᠭᠡᠭᠰᠢᠯᠡᠭᠦᠯᠬᠦ ᠪᠣᠯᠪᠠᠰᠤᠷᠠᠯ ᠳ᠋ᠤ᠌ ᠬᠣᠶᠠᠷ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠲᠠᠢ ᠰᠤᠷᠤᠯᠴᠠᠬᠤ ᠪᠠᠷ ᠶᠠᠪᠤᠴᠢᠬᠠᠯᠠ᠃
ᠰᠣᠩᠬᠢᠨᠠᠲᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠥᠮᠦᠰ ᠢ᠋ ᠪᠠᠶᠠᠷᠯᠠᠭᠤᠯᠤᠮᠠ ᠬᠤᠪᠢᠷᠠᠯᠲᠠ ᠭᠠᠷᠴᠤ᠂ ᠠᠵᠢᠯ ᠶᠠᠪᠤᠳᠠᠯ ᠶᠠᠭᠠᠷᠠᠯᠲᠠᠢ ᠮᠥᠷᠲᠡᠭᠡᠨ ᠢᠯᠭᠤᠮ ᠰᠢᠯᠤᠭᠤᠨ ᠶᠠᠪᠤᠭᠳᠠᠵᠤ ᠪᠠᠢᠯᠠ᠃ ᠵᠢᠷᠠ ᠬᠦᠷᠬᠦ ᠦᠭᠡᠢ ᠰᠤᠷᠤᠭᠴᠢᠳ ᠲᠠᠢ ᠪᠠᠢᠭᠰᠠᠨᠠ᠋ᠴᠠ ᠪᠠᠨ ᠵᠠᠭᠤ ᠭᠠᠷᠤᠢ ᠰᠤᠷᠤᠭᠴᠢ ᠲᠠᠢ ᠪᠣᠯᠪᠠ᠃ ᠡᠢᠮᠦᠷᠬᠦᠦ ᠪᠠᠢᠳᠠᠯ ᠦᠷᠭᠦᠯᠵᠢᠯᠡᠵᠦ ᠳᠠᠷᠠᠭᠠ ᠵᠢᠯ ᠦ᠋ᠨ ᠬᠢᠨᠢ ᠨᠠᠮᠤᠷ ᠪᠣᠯᠵᠤ ᠰᠢᠨᠡ ᠬᠤᠭᠤᠴᠠᠭᠠ ᠡᠬᠢᠯᠡᠭᠡᠳ ᠪᠠᠢᠲᠠᠯᠠ᠂ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠪᠡᠶᠡ ᠨᠢ ᠨᠢᠭᠡᠯᠡ ᠡᠪᠡᠷᠰᠢᠶᠡᠯ ᠲᠡᠢ ᠪᠣᠯᠵᠤ ᠬᠣᠭᠣᠯᠠ ᠤᠮᠳᠠᠨ ᠳ᠋ᠤ᠌ ᠪᠠᠷᠤᠭᠲᠠᠢ ᠪᠣᠯᠵᠤ ᠡᠴᠡᠵᠦ ᠲᠤᠷᠠᠭᠠᠳ᠂ ᠬᠣᠭᠣᠯᠠᠢ ᠳᠣᠲᠣᠷᠠ ᠨᠢ ᠨᠢᠭᠡ ᠶᠠᠭᠤᠮᠠ ᠲᠡᠭᠡᠭᠯᠡᠭᠡᠳ ᠪᠠᠢᠬᠤ ᠪᠣᠯᠵᠠᠢ᠃ ᠶᠠᠭᠤᠮᠠ ᠢᠳᠡᠬᠦ ᠳ᠋ᠡᠭᠡᠨ ᠬᠦᠴᠢᠷᠳᠡᠬᠦ ᠪᠥᠭᠡᠳ ᠡᠪ ᠦᠭᠡᠢ ᠨᠢ ᠲᠠᠭᠠᠷᠠᠪᠠᠯ ᠪᠥᠭᠡᠯᠵᠢᠭᠡᠳ ᠭᠠᠷᠭᠠᠴᠢᠬᠠᠨᠠ᠃ ᠠᠵᠢᠯ ᠶᠠᠪᠤᠳᠠᠯ ᠨᠢ ᠳᠡᠩᠳᠡᠭᠦᠦ ᠶᠠᠭᠠᠷᠠᠤ ᠪᠠᠢᠭᠰᠠᠨᠠ᠋ᠴᠠ ᠦᠨᠡᠨᠳᠡᠭᠡᠨ ᠦᠵᠡᠭᠦᠯᠵᠦ ᠬᠠᠷᠠᠭᠤᠯᠬᠤ ᠠᠮᠵᠢᠯ ᠭᠠᠷᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠨᠡᠯᠢᠶᠡᠳ ᠤᠳᠠᠵᠠᠢ᠃ ᠭᠠᠪᠢᠷᠠ᠂ ᠨᠥᠬᠥᠷ ᠦ᠋ᠨ ᠬᠢᠨᠢ ᠪᠠᠢᠳᠠᠯ ᠨᠢᠭᠡ ᠯᠡ ᠪᠢᠰᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ
— ᠬᠤᠷᠳᠤᠨ ᠭᠠᠳᠠᠭᠰᠢ ᠭᠠᠷᠴᠤ ᠦᠵᠡᠭᠦᠯ᠂ ᠴᠢᠨᠦ ᠠᠵᠢᠯ ᠢ᠋ ᠣᠷᠣᠯᠠᠵᠤ ᠬᠢᠬᠦ ᠬᠥᠮᠦᠨ ᠣᠯᠳᠠᠬᠤ ᠯᠠ ᠪᠤᠶᠠᠨ᠂ ᠬᠠᠷᠢᠨ ᠪᠡᠶᠡ ᠴᠢᠨᠢ ᠪᠣᠯ ᠭᠠᠭᠴᠠᠬᠠᠨ ᠰᠢᠦ ᠭᠡᠵᠦ ᠢᠳᠬᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠤᠴᠠᠭᠠᠷᠳᠠᠵᠤ᠂
— ᠦᠰᠦᠨ ᠡᠴᠡ ᠪᠡᠨ ᠣᠯᠠᠨ ᠡᠨᠡ ᠠᠵᠢᠯ ᠢ᠋ ᠴᠢᠨᠢ ᠬᠠᠶᠠᠴᠢᠬᠠᠭᠠᠳ ᠬᠠᠮᠢᠭᠠ ᠣᠴᠢᠵᠤ ᠪᠡᠶᠡ ᠪᠡᠨ ᠰᠤᠪᠢᠯᠠᠵᠤ ᠬᠡᠪᠲᠡᠬᠦ ᠪᠡᠷ ᠪᠣᠯᠵᠤ ᠪᠠᠢᠨᠠ ᠪᠣᠢ ᠭᠡᠨᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠨᠠᠮᠤᠷ ᠤ᠋ᠨ ᠠᠵᠢᠯ ᠤ᠋ᠨ ᠪᠠᠢᠴᠠᠭᠠᠯᠲᠠ ᠪᠣᠯᠵᠤ᠂ ᠬᠣᠰᠢᠭᠤ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠨᠠᠷ ᠠᠵᠢᠯ ᠪᠠᠢᠴᠠᠭᠠᠬᠤ ᠪᠠᠷ ᠢᠷᠡᠵᠡᠭᠡᠪᠡ᠃ ᠲᠡᠭᠡᠭᠡᠳ ᠰᠠᠢᠰᠢᠶᠠᠯᠳᠤ ᠳ᠋ᠤ᠌ ᠨᠠᠮᠤᠷ ᠤ᠋ᠨ ᠠᠵᠢᠯ ᠤ᠋ᠨ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠬᠠᠮᠲᠤ ᠶᠠᠪᠤᠬᠤ ᠶ᠋ᠢ ᠮᠡᠳᠡᠭᠳᠡᠵᠦ᠂ ᠳᠠᠭᠠᠤ ᠳ᠋ᠤᠨᠢ ᠪᠠᠰᠠ ᠬᠤᠰᠢᠭᠤᠨ ᠤ᠋ ᠭᠤᠷᠪᠠᠳᠤᠭᠠᠷ ᠮᠣᠩᠭᠣᠯ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠠᠬᠢᠷᠤᠯ ᠢ᠋ᠶ᠋ᠠᠷ ᠲᠣᠮᠢᠯᠠᠭᠰᠠᠨ᠂ ᠭᠠᠪᠢᠷᠠ ᠶ᠋ᠢ ᠬᠤᠰᠢᠭᠤᠨ ᠤ᠋ ᠮᠣᠩᠭᠣᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠠᠵᠢᠯ ᠰᠢᠯᠵᠢᠭᠦᠯᠬᠦ ᠪᠡᠷ ᠪᠣᠯᠤᠭᠰᠠᠨ ᠢ᠋ ᠴᠦ᠍ ᠮᠡᠳᠡᠭᠳᠡᠵᠡᠢ᠃ ᠰᠠᠢᠰᠢᠶᠠᠯᠳᠤ ᠳᠠᠭᠤ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠵᠠᠢ᠃ ᠭᠡᠲᠡᠯᠡ ᠭᠠᠪᠢᠷᠠ ᠶ᠋ᠢᠨ ᠠᠭᠤᠰᠬᠢ ᠵᠢᠷᠦᠬᠡ ᠲᠠᠪᠤᠨ ᠴᠤᠯᠤ ᠨᠢ ᠪᠠᠭᠠᠯᠵᠠᠭᠤᠷ ᠲᠠᠭᠠᠨ ᠲᠤᠯᠤᠨ ᠠᠭᠰᠢᠬᠤ ᠰᠢᠭ᠋ ᠴᠢᠬᠤᠯᠳᠠᠵᠤ
— ᠳᠠᠷᠤᠭᠠ ᠨᠠᠷ ᠲᠤ᠌ ᠨᠢᠭᠡ ᠵᠦᠢᠯ ᠢ᠋ ᠭᠤᠶᠤᠪᠠᠯ ᠪᠣᠯᠳᠠᠭ ᠪᠣᠯ ᠤᠤ? ᠪᠢᠳᠡᠨ ᠢ᠋ ᠣᠳᠣᠬᠠᠨ ᠡᠨᠳᠡ ᠡᠴᠡ ᠰᠢᠯᠵᠢᠭᠦᠯᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠤᠤ? ᠮᠠᠨ ᠤ᠋ ᠬᠥᠮᠦᠨ ᠢᠳᠡᠰᠢ ᠬᠣᠭᠣᠯᠠᠨᠠ᠋ᠴᠠ ᠭᠠᠷᠤᠭᠠᠳ ᠤᠳᠠᠵᠤ ᠪᠠᠢᠨᠠ᠃ ᠭᠠᠳᠠᠭᠰᠢ ᠭᠠᠷᠴᠤ ᠡᠮᠴᠢᠯᠡᠭᠡ ᠬᠢᠯᠭᠡᠬᠦ ᠴᠢᠬᠤᠯᠠᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ ᠭᠡᠵᠦ ᠬᠣᠭᠣᠯᠠᠢ ᠪᠠᠨ ᠡᠷᠢᠶᠡᠨᠳᠡᠭᠦᠯᠦᠨ ᠬᠠᠰᠬᠢᠷᠬᠤ ᠰᠢᠬᠠᠮ ᠬᠡᠯᠡᠪᠡ᠃ ᠡᠨᠡ ᠪᠣᠯ ᠲᠡᠭᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠦ᠍ ᠣᠯᠠᠨ ᠵᠢᠯ ᠮᠠᠨᠠᠭᠳᠠᠭᠰᠠᠨ ᠭᠣᠮᠣᠳᠠᠯ ᠪᠡᠭᠲᠡᠷᠡᠯ ᠦ᠋ᠨ ᠬᠢᠨᠢ ᠬᠠᠰᠬᠢᠷᠤᠯ ᠪᠠᠢᠯᠠ᠃ ᠬᠣᠰᠢᠭᠤ ᠳᠠᠷᠤᠭᠠ ᠴᠣᠭᠪᠠᠶᠠᠷ ᠭᠤᠸᠠᠢ᠂ ᠭᠠᠪᠢᠷᠠ ᠶ᠋ᠢᠨ ᠨᠢᠯᠪᠤᠰᠤ ᠬᠤᠷᠠᠭᠰᠠᠨ ᠪᠣᠷᠣ ᠨᠢᠳᠦ ᠶ᠋ᠢ ᠭᠠᠢᠬᠠᠰᠢᠷᠠᠨ ᠰᠢᠷᠳᠡᠵᠦ
— ᠠᠵᠢᠯ ᠰᠢᠯᠵᠢᠭᠦᠯᠬᠦ ᠶᠠᠪᠤᠳᠠᠯ ᠢ᠋ ᠬᠤᠪᠢᠷᠠᠭᠠᠬᠤ ᠦᠭᠡᠢ᠂ ᠬᠠᠷᠢᠨ ᠡᠪᠡᠳᠴᠢᠨ ᠡᠮᠵᠡᠭ ᠲᠡᠢ ᠪᠣᠯ ᠦᠵᠡᠭᠦᠯᠬᠦ ᠨᠢ ᠵᠥᠪ᠃ ᠨᠠᠮᠤᠷ ᠤ᠋ᠨ ᠠᠵᠢᠯ ᠤ᠋ᠨ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠰᠠᠢᠰᠢᠶᠠᠯᠲᠤ ᠡᠷᠬᠡᠪᠰᠢ ᠣᠷᠣᠯᠴᠠᠬᠤ ᠴᠢᠬᠤᠯᠠ ᠲᠠᠢ᠂ ᠡᠨᠡ ᠨᠢ ᠴᠢᠨᠦ ᠳᠠᠷᠠᠭᠠᠴᠢ ᠪᠠᠷ ᠡᠬᠢᠯᠡᠭᠦᠯᠬᠦ ᠠᠵᠢᠯ ᠳ᠋ᠤ᠌ ᠶᠡᠬᠡᠬᠡᠨ ᠲᠤᠰᠠᠲᠠᠢ ᠭᠡᠪᠡ᠃ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠳᠠᠷᠤᠭᠠ ᠴᠢᠯᠠᠭᠤᠨ ᠭᠤᠸᠠᠢ ᠪᠣᠯ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠨᠢ ᠦᠶᠡ ᠶ᠋ᠢᠨ ᠪᠠᠭᠰᠢ᠃ ᠲᠡᠭᠦᠨ ᠦ᠌ ᠰᠢᠯᠢᠳᠡᠭ ᠰᠤᠷᠤᠭᠴᠢ ᠶ᠋ᠢᠨ ᠬᠢᠨᠢ ᠨᠢᠭᠡᠨ ᠪᠣᠯᠬᠤ ᠰᠠᠢᠰᠢᠶᠠᠯᠳᠤ ᠪᠠᠭᠰᠢ ᠶ᠋ᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠴᠦ ᠢᠷᠡᠭᠰᠡᠨ ᠡᠴᠡ ᠪᠡᠨ ᠠᠪᠤᠭᠠᠳ ᠬᠠᠮᠤᠭ ᠤ᠋ᠨ ᠬᠦᠴᠢᠷ ᠪᠡᠷᠬᠡᠰᠢᠶᠡᠯ ᠲᠡᠢ ᠣᠷᠴᠢᠨ ᠳ᠋ᠤ᠌ ᠭᠠᠷᠮᠠᠭᠠᠢ ᠵᠢᠳᠬᠦᠯ ᠭᠠᠷᠭᠠᠵᠤ ᠶᠠᠪᠤᠭᠠ ᠳ᠋ᠤᠨᠢ ᠲᠤᠩ ᠴᠤ᠌ ᠪᠠᠶᠠᠷᠯᠠᠳᠠᠭ ᠪᠥᠭᠡᠳ ᠦᠷᠭᠦᠯᠵᠢᠯᠡᠨ ᠴᠢᠬᠤᠯᠠ ᠪᠠᠢᠷᠢᠨ ᠳ᠋ᠤ᠌ ᠳᠡᠪᠰᠢᠭᠦᠯᠦᠨ ᠬᠡᠷᠡᠭᠯᠡᠬᠦ ᠶ᠋ᠢ ᠰᠠᠨᠠᠭᠠᠴᠢᠯᠠᠳᠠᠭ ᠪᠠᠢᠯᠠ᠃ ᠴᠢᠯᠠᠭᠤᠨ ᠭᠤᠸᠠᠢ ᠨᠡᠯᠢᠶᠡᠳ ᠤᠳᠠᠭᠠᠨ ᠪᠣᠳᠣᠯᠭᠠᠰᠢᠷᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ
— ᠴᠤ᠌ ·ᠳᠠᠷᠤᠭᠠ ᠶ᠋ᠢᠨ ᠬᠡᠯᠡᠬᠦ ᠵᠥᠪ᠂ ᠡᠨᠡ ᠤᠳᠠᠭᠠᠨ ᠤ᠋ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠴᠢ ᠣᠷᠣᠯᠴᠠᠪᠠᠯ ᠵᠦᠭᠡᠷ ᠶᠤᠮᠰᠠᠨ᠃ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠢ᠋ᠶ᠋ᠠᠷ ᠲᠣᠭᠣᠷᠢᠬᠤ ᠳ᠋ᠤ᠌ ᠳᠣᠯᠣᠭᠠ ᠨᠠᠢ᠍ᠮᠠᠨ ᠡᠳᠦᠷ ᠲᠦ᠍ ᠪᠠᠷᠠᠴᠢᠬᠠᠨᠠ᠂ ᠲᠡᠭᠡᠭᠡᠳ ᠴᠢᠮᠠ ᠳ᠋ᠤ᠌ ᠰᠠᠷᠠ ᠶ᠋ᠢᠨ ᠴᠢᠯᠥᠭᠡ ᠥᠭᠭᠦᠶᠡ᠃ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠦᠵᠡᠭᠦᠯᠬᠦ ᠪᠡᠷ ᠶᠠᠪᠤ᠂ ᠪᠤᠰᠤᠳ ᠵᠦᠢᠯ ᠢ᠋ ᠲᠣᠪᠴᠢᠶᠠᠨᠠ᠋ᠴᠠ ᠲᠣᠬᠢᠷᠠᠭᠤᠯᠬᠤ ᠶᠤᠮ ᠭᠡᠯᠡ᠃ ᠰᠠᠢᠰᠢᠶᠠᠯᠲᠤ᠄
— ᠳᠠᠷᠤᠭᠠ ᠨᠠᠷ ᠲᠤ᠌ ᠪᠠᠶᠠᠷᠯᠠᠯᠠ᠃ ᠮᠢᠨᠦ ᠪᠡᠶᠡ ᠭᠠᠢᠭᠤᠢ ᠪᠠᠢᠨᠠ᠂ ᠤᠷᠢᠳ ᠢ᠋ᠶ᠋ᠠᠷ ᠠᠵᠢᠯ ᠢ᠋ᠶ᠋ᠠᠨ ᠪᠠᠷᠠᠴᠢᠬᠠᠭᠠᠳ ᠮᠡᠳᠡᠶᠡ ᠭᠡᠯᠡ᠃ ᠲᠡᠭᠷᠢ ᠣᠷᠣᠢᠲᠠᠭᠰᠠᠨ ᠪᠣᠯᠬᠣᠷ ᠪᠠᠢᠴᠠᠭᠠᠬᠤ ᠳᠤᠭᠤᠢᠯᠠᠩ ᠤ᠋ᠨ ᠳᠠᠷᠤᠭᠠ ᠨᠠᠷ ᠢ᠋ ᠰᠤᠮᠤᠨ ᠤ᠋ ᠪᠠᠭᠤᠳᠠᠯ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ᠂ ᠣᠷᠣᠢ ᠰᠤᠮᠤᠨ ᠤ᠋ ᠤᠳᠤᠷᠢᠳᠤᠯᠭᠠ ᠨᠠᠷ ᠤ᠋ᠨ ᠲᠣᠬᠢᠷᠠᠭᠤᠯᠤᠭᠰᠠᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠬᠠᠮᠲᠤ ᠣᠷᠣᠯᠴᠠᠭᠠᠳ ᠰᠠᠢᠰᠢᠶᠠᠯᠲᠤ ᠨᠡᠯᠢᠶᠡᠳ ᠣᠷᠣᠢ ᠬᠠᠷᠢᠵᠤ ᠢᠷᠡᠪᠡ᠃ ᠣᠷᠣᠨ ᠳ᠋ᠠᠭᠠᠨ ᠨᠣᠮ ᠱᠠᠭᠠᠢᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠭᠠᠪᠢᠷᠠ ᠥᠨᠳᠡᠢᠨ ᠰᠠᠭᠤᠵᠤ
— ᠬᠠᠷᠢᠭᠠᠳ ᠢᠷᠡᠴᠢᠬᠡᠪᠡ ᠤᠤ? ᠶᠠᠭᠤᠮᠠ ᠢᠳᠡᠵᠦ ᠴᠢᠳᠠᠭᠰᠠᠨ ᠤᠤ?
— ᠥᠨᠥ ᠣᠷᠣᠢ ᠠᠰᠢᠭᠦᠢ ᠰᠠᠢᠨ ᠢᠳᠡᠭᠰᠡᠨ ᠭᠡᠳ ᠣᠷᠣᠨ ᠳ᠋ᠠᠭᠠᠨ ᠭᠠᠷᠴᠤ ᠬᠡᠪᠲᠡᠨ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠵᠦᠭᠦᠨ ᠳᠣᠣᠭᠤᠷ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠤᠨ ᠲᠡᠪᠡᠷᠢᠭᠡᠳ
— ᠮᠢᠨᠦ ᠬᠥᠭᠰᠢᠨ᠂ ᠥᠨᠥᠳᠥᠷ ᠳᠠᠷᠤᠭᠠ ᠨᠠᠷ ᠤ᠋ᠨ ᠡᠮᠦᠨᠡ ᠶᠠᠭᠠᠬᠢᠵᠤ ᠪᠠᠢᠭᠠ ᠴᠢᠨᠢ ᠲᠡᠷᠡ ᠪᠣᠢ! ᠲᠡᠭᠡᠲᠡᠯᠡ ᠪᠡᠨ ᠠᠭᠤᠷᠯᠠᠳᠠᠭ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠪᠡ᠃
— ᠠᠷᠠᠢ ᠴᠤ᠌ ᠳᠡᠩᠳᠡᠭᠦᠦ ᠶᠦᠮ ᠠ᠋᠃ ᠪᠢᠳᠡᠨ ᠢ᠋ ᠲᠠᠩᠳᠠ ᠲᠠᠮᠳᠤᠭᠷᠠᠵᠤ ᠴᠤᠴᠠᠷᠠᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠭᠤᠯᠤᠨᠠ᠃ ᠲᠡᠭᠡᠭᠡᠳ ᠠᠷᠠᠢ ᠭᠡᠵᠦ ᠪᠠᠢᠷᠢ ᠪᠠᠨ ᠣᠯᠤᠭᠠᠳ ᠢᠷᠡᠮᠡᠭᠴᠡ ᠯᠡ ᠳᠠᠬᠢᠭᠠᠳ ᠰᠢᠯᠵᠢᠭᠦᠯᠴᠢᠬᠡᠨᠡ᠃ ᠣᠴᠢᠵᠤ ᠣᠴᠢᠵᠤ ᠬᠣᠰᠢᠭᠤ ᠭᠤᠷᠪᠠᠳᠤᠭᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠭᠡᠨᠡ ᠰᠢᠦ᠂ ᠵᠠᠬᠢᠷᠤᠯ ᠲᠣᠭᠲᠠᠳᠠᠭ ᠦᠭᠡᠢ ᠨᠡᠷᠡᠲᠡᠢ ᠰᠤᠷᠭᠠᠭᠤᠯᠢ ᠭᠡᠰᠡᠨ ᠪᠢᠵᠡ ᠳᠡ᠃ ᠪᠠᠰᠠ ᠨᠢᠭᠡ ᠶᠠᠭᠠᠬᠢᠵᠤ ᠪᠤᠲᠠᠷᠠᠵᠤ ᠰᠠᠨᠳᠠᠭᠰᠠᠨ ᠭᠠᠵᠠᠷ ᠪᠠᠢᠭᠠ ᠪᠣᠯ ᠳᠠ᠃
— ᠬᠡᠴᠢᠨᠡᠨ ᠬᠥᠮᠦᠨ ᠬᠤᠰᠢᠭᠤᠨ ᠲᠥᠪ ᠲᠦ᠍ ᠠᠵᠢᠯ ᠰᠢᠯᠵᠢᠶᠡ ᠭᠡᠳ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠰᠢᠦ ᠳᠡ᠃ ᠪᠢᠳᠡ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠶ᠋ᠢᠨ ᠲᠣᠬᠢᠷᠠᠭᠤᠯᠤᠯᠲᠠ ᠶ᠋ᠢ ᠳᠠᠭᠠᠪᠠᠯ ᠵᠣᠬᠢᠨᠠ᠃ ᠪᠢᠳᠡ ᠵᠠᠯᠠᠭᠤ ᠬᠥᠮᠦᠰ᠃ ᠠᠵᠢᠯ ᠪᠢᠳᠡᠨ ᠢ᠋ ᠰᠣᠩᠭᠣᠬᠤᠠ᠋ᠴᠠ ᠪᠢᠰᠢ᠂ ᠪᠢᠳᠡ ᠨᠥᠬᠥᠴᠡᠯ ᠳᠤᠷᠠᠳᠬᠤ ᠪᠣᠯᠤᠯᠴᠠᠭᠠ ᠦᠭᠡᠢ᠃
— ᠪᠢ ᠳᠠᠷᠤᠭᠠ ᠵᠡᠷᠭᠡ ᠳ᠋ᠦ᠍ ᠴᠢᠨᠢ ᠣᠭᠲᠣ ᠳᠤᠷᠠᠯᠠᠬᠤ ᠦᠭᠡᠢ᠂ ᠡᠩ ᠦ᠋ᠨ ᠪᠠᠭᠰᠢ ᠪᠠᠨ ᠶᠠᠪᠤᠵᠤ᠂ ᠴᠢᠮᠠ ᠲᠠᠢ ᠪᠠᠨ ᠡᠩᠬᠡ ᠮᠡᠨᠳᠦ ᠦᠷᠡ ᠬᠡᠦᠬᠡᠳ ᠲᠡᠢ ᠪᠡᠨ ᠡᠯᠢᠭᠡ ᠪᠦᠲᠦᠨ ᠵᠢᠷᠭᠠᠵᠤ ᠶᠠᠪᠤᠪᠠᠯ ᠪᠣᠯᠬᠤ ᠨᠢ ᠲᠡᠷᠡ ᠭᠡᠳ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠤᠯᠠᠮ ᠢ᠋ᠶ᠋ᠠᠷ ᠡᠴᠡᠵᠦ ᠲᠤᠷᠠᠵᠤ ᠪᠠᠢᠭᠠ ᠪᠡᠶᠡ ᠶ᠋ᠢ ᠴᠢᠩᠭᠠ ᠲᠡᠪᠡᠷᠢᠪᠡ᠃
— ᠮᠢᠨᠦ ᠬᠥᠭᠰᠢᠨ ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠡᠪᠦᠭᠡᠨ ᠨᠢ ᠡᠨᠡ ᠤᠳᠠᠭᠠᠨ ᠤ᠋ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠬᠠᠭᠠᠳ ᠪᠡᠶᠡ ᠪᠡᠨ ᠦᠵᠡᠭᠦᠯᠦᠨᠡ᠃
— ᠲᠡᠭᠡᠭᠡᠳ ᠮᠠᠷᠭᠠᠰᠢ ᠳᠠᠷᠤᠭᠠ ᠲᠠᠢ ᠶᠠᠪᠤᠬᠤ ᠪᠠᠷ ᠪᠣᠯᠴᠢᠬᠠᠪᠠ ᠤᠤ?
— ᠲᠡᠭᠡᠭᠰᠡᠨ᠂ ᠥᠷᠯᠥᠭᠡ ᠡᠷᠲᠡ ᠶᠠᠪᠤᠨᠠ᠃ ᠲᠡᠷᠡ ᠭᠡᠷᠭᠡᠢ ᠪᠡᠨ ᠦᠨᠦᠰᠦᠨ
— ᠨᠠᠰᠢ ᠪᠠᠨ᠂ ᠡᠪᠦᠭᠡᠨ ᠢ᠋ᠶ᠋ᠡᠨ ᠰᠠᠨᠠ! ᠭᠡᠳ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠶᠠᠨ ᠬᠥᠳᠡᠯᠭᠡᠭᠡᠨ ᠲᠡᠢ ᠵᠥᠭᠡᠯᠡᠨ ᠪᠡᠶᠡ ᠶ᠋ᠢ ᠲᠠᠭᠠᠯᠠᠨ ᠵᠢᠷᠭᠠᠯᠠ᠃ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠬᠢᠨᠢ ᠳᠠᠷᠠᠭᠠ ᠰᠠᠢᠰᠢᠶᠠᠯᠲᠤ ᠤᠯᠠᠭᠠᠨᠬᠠᠳᠠ ᠳ᠋ᠤ᠌ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠦᠵᠡᠭᠦᠯᠬᠦ ᠪᠡᠷ ᠣᠴᠢᠵᠠᠢ᠃ ᠭᠡᠷ ᠲᠡᠭᠡᠨ ᠴᠠᠬᠢᠯᠭᠠᠨ ᠢᠷᠡᠭᠦᠯᠵᠦ ᠰᠥᠰᠥᠨ ᠦ᠌ ᠴᠢᠯᠠᠭᠤᠵᠢᠮᠠᠯ ᠭᠡᠵᠦ ᠲᠣᠳᠣᠯᠠᠭᠰᠠᠨ ᠢ᠋ ᠮᠡᠳᠡᠭᠳᠡᠵᠡᠢ᠃ ᠭᠠᠪᠢᠷᠠ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠠᠮᠠᠷᠠᠭᠰᠠᠨ ᠴᠤ᠌ ᠳᠣᠲᠣᠷᠠ ᠪᠠᠨ ᠨᠢᠭᠡ ᠯᠡ ᠳ᠋ᠦᠩ ᠲᠡᠢ ᠰᠠᠨᠠᠭᠳᠠᠨᠠ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠪᠡᠳᠴᠢᠨ ᠢ᠋ ᠡᠬᠢᠯᠡᠮᠡᠭᠴᠡ ᠯᠡ ᠶᠡᠷᠦᠨᠢ ᠰᠡᠵᠢᠭᠯᠡᠭᠡᠳ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠦᠨ ᠳ᠋ᠦ᠍ ᠶᠡᠷᠦ ᠳ᠋ᠡᠭᠡᠨ ᠨᠢᠭᠡ ᠪᠡᠯᠭᠡ ᠮᠠᠭᠤᠲᠠᠢ ᠵᠦᠩ ᠰᠤᠪᠢᠨ ᠲᠠᠲᠠᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠣᠯᠬᠤ ᠦᠭᠡᠢ ᠪᠣᠯᠬᠣᠷ ᠪᠠᠢᠭᠤᠯᠭᠠ ᠳ᠋ᠠᠭᠠᠨ ᠴᠢᠯᠥᠭᠡ ᠬᠡᠯᠡᠵᠦ᠂ ᠭᠤᠷᠪᠠᠨ ᠥᠬᠢᠨ ᠢ᠋ᠶ᠋ᠡᠨ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠳ᠋ᠠᠭᠠᠨ ᠣᠷᠬᠢᠭᠠᠳ᠂ ᠬᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠤᠠ᠋ᠴᠠ ᠭᠡᠨᠡᠳᠲᠡ ᠬᠦᠷᠴᠦ ᠣᠴᠢᠪᠠ᠃ ᠰᠠᠢᠰᠢᠶᠠᠯᠳᠤ ᠡᠬᠡᠨᠡᠷ ᠬᠦᠦ ᠬᠣᠶᠠᠷ ᠢ᠋ᠶ᠋ᠠᠨ ᠦᠵᠡᠭᠡᠳ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠭᠰᠠᠨ ᠪᠣᠯᠪᠠᠴᠤ
— ᠠᠵᠢᠯ ᠢ᠋ᠶ᠋ᠠᠨ ᠰᠠᠭᠠᠲᠠᠭᠠᠵᠤ ᠥᠬᠢᠨ ᠢ᠋ ᠮᠢᠨᠢ ᠣᠷᠬᠢᠭᠠᠳ ᠮᠢᠨᠦ ᠬᠣᠢᠨᠠᠠ᠋ᠴᠠ ᠢᠷᠡᠵᠦ ᠶᠠᠭᠠᠬᠢᠬᠤ ᠭᠡᠰᠡᠨ ᠶᠦᠮ ᠭᠡᠵᠦ ᠴᠠᠭᠠᠷᠠᠭᠤᠯᠪᠠ᠃ ᠭᠠᠪᠢᠷᠠ᠄
— ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ᠂ ᠰᠠᠨᠠᠭᠠ ᠠᠮᠤᠷ ᠦᠭᠡᠢ ᠪᠣᠯᠤᠭᠠᠳ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠨᠡᠨ ᠪᠠᠢᠳᠠᠯ ᠢ᠋ ᠴᠢᠨᠢ ᠬᠠᠷᠠᠬᠤ ᠭᠡᠵᠦ ᠢᠷᠡᠯᠡ ᠭᠡᠪᠡ᠃
— ᠡᠪᠡᠳᠴᠢᠨ ᠢ᠋ ᠨᠢᠭᠡᠨᠲᠡ ᠲᠣᠳᠣᠯᠠᠵᠤ᠂ ᠣᠳᠣ ᠡᠮᠴᠢᠯᠡᠭᠡ ᠬᠢᠵᠦ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠢᠲᠡᠭᠡᠳᠡᠭ ᠦᠭᠡᠢ ᠶᠦᠮ ᠪᠣᠢ?
— ᠲᠡᠭᠡᠭᠰᠡᠨ ᠴᠦ᠍ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠠᠬᠤ ᠦᠭᠡᠢ ᠪᠣᠯ ᠰᠠᠨᠠᠭᠠ ᠠᠮᠤᠷ ᠦᠭᠡᠢ᠃ ᠣᠷᠣᠢ᠂ ᠬᠡᠳᠦᠭᠦᠯᠡ ᠨᠡᠯᠢᠶᠡᠳ ᠬᠡᠳᠦᠨ ᠨᠣᠭᠣᠭᠠ ᠵᠠᠭᠤᠰᠢ ᠠᠪᠴᠤ ᠬᠣᠭᠣᠯᠠ ᠢᠳᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠰᠠᠢᠰᠢᠶᠠᠯᠲᠤ ᠵᠠᠭᠤᠰᠢᠨᠠ᠋ᠴᠠ ᠭᠠᠭᠴᠠ ᠴᠤ᠌ ᠰᠠᠪᠬᠠᠯᠠᠭᠰᠠᠨ ᠦᠭᠡᠢ᠂ ᠱᠥᠯᠥ ᠲᠡᠢ ᠶᠠᠭᠤᠮᠠ ᠢᠳᠡᠶᠡ ᠭᠡᠳ ᠭᠠᠭᠴᠠ ᠠᠶᠠᠭᠠ ᠭᠤᠯᠢᠷ ᠢᠳᠡᠭᠰᠡᠨ ᠪᠣᠯᠪᠠᠴᠤ ᠬᠣᠭᠣᠯᠠᠨ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠮᠡᠭᠴᠡ ᠪᠦᠬᠦᠨ ᠢ᠋ ᠪᠥᠭᠡᠯᠵᠢᠵᠦ ᠭᠠᠷᠭᠠᠪᠠ᠃ ᠭᠠᠪᠢᠷᠠ ᠴᠢᠬᠤᠯᠳᠠᠨ ᠠᠭᠤᠷᠰᠠᠵᠤ
— ᠶᠠᠮᠠᠷ ᠰᠥᠰᠥᠨ ᠦ᠌ ᠴᠢᠯᠠᠭᠤ ᠴᠢᠨᠢ ᠢᠳᠡᠭᠰᠡᠨ ᠤᠤᠭᠤᠭᠰᠠᠨ ᠢ᠋ᠶ᠋ᠠᠨ ᠲᠣᠭᠲᠠᠭᠠᠬᠤ ᠦᠭᠡᠢ ᠭᠠᠷᠭᠠᠳᠠᠭ ᠶᠤᠮ᠃ ᠡᠨᠡ ᠡᠮᠴᠢ ᠨᠠᠷ ᠯᠠᠪᠲᠠᠢ ᠪᠤᠷᠤᠭᠤ ᠣᠨᠣᠰᠢᠯᠠᠭᠰᠠᠨ ᠪᠠᠢᠬᠤ ᠠ᠋᠃ ᠮᠠᠷᠭᠠᠰᠢ ᠪᠢ ᠡᠮᠴᠢ ᠨᠠᠷ ᠲᠠᠢ ᠶᠠᠷᠢᠯᠴᠠᠵᠤ ᠳᠠᠬᠢᠭᠠᠳ ᠪᠠᠢᠴᠠᠭᠠᠯᠭᠠᠨᠠ ᠭᠡᠯᠡ᠃
— ᠬᠡᠷᠡᠭ ᠦᠭᠡᠢ᠂ ᠡᠨᠳᠡᠬᠢ ᠡᠮᠴᠢ ᠨᠠᠷ ᠤ᠋ᠨ ᠮᠡᠷᠭᠡᠵᠢᠯ ᠣᠪᠣᠭᠠ ᠵᠦᠭᠡᠷ ᠭᠡᠰᠡᠨ᠂ ᠮᠠᠰᠢᠨ ᠲᠣᠨᠣᠭᠯᠠᠯ ᠴᠤ᠌ ᠵᠦᠭᠡᠷ᠃
— ᠶᠠᠭᠤ ᠴᠤ᠌ ᠭᠡᠰᠡᠨ ᠪᠢ ᠳᠠᠬᠢᠵᠤ ᠪᠠᠢᠴᠠᠭᠠᠯᠭᠠᠬᠤᠠ᠋ᠴᠠ ᠨᠡᠰᠢ ᠢᠲᠡᠭᠡᠬᠦ ᠦᠭᠡᠢ᠃ ᠥᠷᠯᠥᠭᠡ᠂ ᠡᠮᠴᠢ ᠨᠠᠷ ᠡᠪᠡᠳᠴᠢᠲᠡᠨ ᠦ᠌ ᠲᠠᠰᠤᠭ ᠢ᠋ᠶ᠋ᠠᠷ ᠣᠷᠣᠵᠤ ᠢᠷᠡᠬᠦᠯᠡᠷ᠂ ᠭᠠᠪᠢᠷᠠ ᠡᠪᠡᠳᠴᠢᠨ ᠦ᠌ ᠣᠨᠣᠰᠢᠯᠠᠯ ᠳ᠋ᠤ᠌ ᠰᠡᠵᠢᠭ ᠲᠡᠢ ᠪᠠᠢᠭᠠ ᠪᠠᠨ ᠭᠣᠣᠯᠯᠠᠭᠴᠢ ᠡᠮᠴᠢ ᠨᠠᠷ ᠲᠤ᠌ ᠬᠡᠯᠡᠪᠡ᠃ ᠡᠷᠬᠢᠯᠡᠭᠴᠢ ᠡᠮᠴᠢ ᠭᠡᠵᠦ ᠥᠨᠳᠥᠷ ᠴᠠᠭᠠᠨ ᠪᠦᠰᠡᠭᠦᠢ ᠪᠠᠬᠠᠨ ᠲᠠᠭᠠᠯᠠᠮᠵᠢ ᠦᠭᠡᠢ᠄
— ᠮᠠᠨ ᠤ᠋ ᠡᠨᠳᠡ ᠠᠵᠢᠯᠯᠠᠵᠤ ᠪᠠᠢᠭᠠ ᠡᠮᠴᠢ ᠪᠦᠭᠦᠳᠡ ᠡᠮᠨᠡᠯᠭᠡ ᠶ᠋ᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠳ ᠶᠦᠮ᠃ ᠡᠨᠡ ᠵᠡᠷᠭᠡ ᠶ᠋ᠢᠨ ᠡᠪᠡᠳᠴᠢᠨ ᠢ᠋ ᠠᠷᠠᠢ ᠴᠤ᠌ ᠡᠨᠳᠡᠭᠦᠦ ᠲᠣᠳᠣᠯᠠᠬᠤ ᠪᠠᠷ ᠦᠭᠡᠢ ᠭᠡᠲᠡᠯᠡ ᠭᠠᠪᠢᠷᠠ᠂ ᠥᠪᠡᠷ ᠦ᠋ᠨ ᠪᠣᠳᠣᠯ ᠢ᠋ᠶ᠋ᠠᠨ ᠪᠠᠷᠢᠮᠲᠠᠯᠠᠵᠤ
— ᠪᠢ ᠲᠠᠨᠠᠷ ᠤ᠋ᠨ ᠮᠡᠷᠭᠡᠵᠢᠯ ᠢ᠋ ᠰᠡᠵᠢᠭᠯᠡᠵᠦ ᠪᠠᠢᠭᠠ ᠪᠢᠰᠢ᠂ ᠡᠪᠡᠳᠴᠢᠨ ᠦ᠌ ᠣᠨᠣᠰᠢᠯᠠᠯᠲᠠ ᠵᠥᠪ ᠪᠠᠢᠭᠠᠰᠠᠢ ᠭᠡᠵᠦ ᠪᠢ ᠴᠦ᠍ ᠬᠦᠰᠡᠨᠡ᠃ ᠬᠡᠷᠪᠡ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠵᠤ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠢ᠋ ᠲᠣᠳᠣᠯᠠᠵᠤ ᠭᠠᠷᠭᠠᠭᠠ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃ ᠮᠠᠨ ᠤ᠋ ᠬᠥᠮᠦᠨ ᠢᠳᠡᠰᠢ ᠬᠣᠭᠣᠯᠠ ᠪᠠᠨ ᠲᠣᠭᠲᠠᠭᠠᠬᠤ ᠦᠭᠡᠢ ᠭᠠᠷᠭᠠᠭᠠᠳ ᠪᠠᠢᠭᠠ ᠰᠢᠦ ᠳᠡ ᠭᠡᠪᠡ ᠃ ᠡᠷᠬᠢᠯᠡᠭᠴᠢ ᠡᠮᠴᠢ ᠦᠯᠦ ᠲᠣᠭᠣᠮᠰᠠᠷᠯᠠᠨ ᠢᠷᠪᠠᠢᠵᠤ᠄
— ᠰᠥᠰᠥᠨ ᠦ᠌ ᠴᠢᠯᠠᠭᠤ ᠲᠠᠢ ᠬᠥᠮᠦᠨ ᠴᠢᠨᠢ ᠲᠡᠭᠡᠵᠦ ᠪᠥᠭᠡᠯᠵᠢᠳᠡᠭ ᠶᠦᠮ᠃ ᠪᠢᠳᠡ ᠬᠢᠬᠦ ᠵᠣᠬᠢᠰ ᠲᠠᠢ ᠪᠠᠢᠴᠠᠭᠠᠯᠲᠠ ᠪᠠᠨ ᠪᠦᠷ ᠬᠢᠭᠰᠡᠨ ᠶᠦᠮ ᠭᠡᠨᠡ᠃
ᠲᠡᠷᠡ ᠦᠶᠡ ᠳ᠋ᠦ᠍᠂ ᠬᠣᠶᠠᠷ ᠦᠵᠦᠮᠦᠴᠢᠨ ᠦ᠌ ᠬᠥᠮᠦᠰ ᠣᠢᠷᠠ ᠰᠢᠭ᠋ ᠪᠠᠢᠳᠠᠭ ᠢ᠋ᠶ᠋ᠠᠷ ᠨᠢ ᠡᠪᠡᠳᠴᠢᠨ ᠦᠵᠡᠭᠦᠯᠪᠡᠯ ᠤᠯᠠᠭᠠᠨᠬᠠᠳᠠ ᠤᠷᠤᠭᠤ ᠣᠴᠢᠳᠠᠭ ᠪᠠᠢᠵᠠᠢ᠃ ᠰᠢᠯᠤᠭᠤᠨ ᠰᠢᠳᠤᠷᠭᠤ ᠮᠠᠯᠴᠢᠳ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠡᠷᠭᠢᠭᠦᠯᠦᠨ ᠡᠯᠳᠡᠪ ᠠᠷᠭᠠ ᠪᠠᠰᠢᠷ ᠬᠡᠷᠡᠭᠯᠡᠵᠦ ᠮᠥᠩᠭᠥ ᠵᠣᠭᠣᠰ ᠠᠪᠴᠤ ᠰᠤᠷᠤᠭᠰᠠᠨ ᠡᠳᠡᠭᠡᠷ ᠡᠮᠴᠢ ᠨᠠᠷ ᠬᠥᠮᠦᠨ ᠦ᠌ ᠦᠬᠦᠵᠦ ᠤᠨᠠᠬᠤ ᠶ᠋ᠢ ᠶᠠᠭᠤᠮᠠᠨ ᠲᠡᠳᠦᠢ ᠳ᠋ᠦ᠍ ᠦᠵᠡᠳᠡᠭ ᠦᠭᠡᠢ᠂ ᠵᠣᠷᠢᠯᠭᠠ ᠳ᠋ᠠᠭᠠᠨ ᠬᠦᠷᠬᠦ ᠶ᠋ᠢᠨ ᠲᠥᠯᠥᠭᠡ ᠡᠯᠳᠡᠪ ᠪᠠᠰᠢᠷ ᠬᠡᠷᠡᠭᠯᠡᠨᠡ᠃
ᠡᠳᠡᠭᠡᠷ ᠡᠮᠴᠢ ᠨᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠨᠢᠭᠡᠨᠲᠡ ᠦᠵᠡᠵᠦ ᠭᠠᠷᠤᠭᠰᠠᠨ ᠭᠠᠪᠢᠷᠠ ᠳᠠᠬᠢᠭᠠᠳ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠦᠦ ᠪᠡᠨ ᠠᠪᠤ ᠲᠠᠢ ᠨᠢ ᠣᠷᠬᠢᠭᠠᠳ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠣᠴᠢᠯᠠ᠃ ᠬᠣᠷᠢᠶᠠᠨ ᠳᠠᠷᠤᠭᠠ ᠨᠢ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠨᠠᠮᠬᠠᠨ ᠪᠡᠶᠡ ᠲᠡᠢ᠂ ᠰᠢᠷᠠᠮᠠᠩ ᠵᠢᠰᠦ ᠲᠡᠢ ᠬᠥᠮᠦᠨ ᠪᠠᠢᠯᠠ᠃
ᠭᠠᠪᠢᠷᠠ᠂ ᠠᠮᠤᠷ ᠮᠡᠨᠳᠦ ᠠᠰᠠᠭᠤᠵᠤ ᠮᠡᠨᠳᠦᠯᠡᠭᠡᠳ ᠢᠷᠡᠭᠰᠡᠨ ᠵᠣᠷᠢᠯᠭᠠ ᠪᠠᠨ ᠬᠡᠯᠡᠵᠦ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ᠂ ᠡᠮᠴᠢ ᠨᠠᠷ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠴᠦ᠍ ᠶᠠᠷᠢᠪᠠ᠃ ᠬᠣᠷᠢᠶᠠᠨ ᠳᠠᠷᠤᠭᠠ ᠡᠶᠡᠯᠳᠡᠭᠬᠡᠨ ᠲᠣᠯᠣᠭᠠᠢ ᠳᠣᠬᠢᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ
— ᠴᠢ ᠲᠡᠭᠡᠪᠡᠯ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠪᠡᠳᠴᠢᠨ ᠢ᠋ ᠠᠯᠢ ᠲᠠᠯᠠ ᠪᠠᠷ ᠰᠡᠵᠢᠭᠯᠡᠭᠡᠳ ᠪᠠᠢᠭᠠ ᠶᠤᠮ ᠪᠣᠢ ᠭᠡᠵᠦ ᠠᠰᠠᠭᠤᠨᠠ᠃ ᠭᠠᠪᠢᠷᠠ᠄
— ᠪᠢ ᠡᠬᠢᠯᠡᠮᠡᠭᠴᠡ ᠯᠡ ᠤᠯᠠᠭᠠᠨ ᠬᠣᠭᠣᠯᠠᠢ ᠪᠤᠶᠤ ᠬᠣᠳᠣᠭᠣᠳᠣᠨ ᠤ᠋ ᠥᠮᠡᠨ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠰᠡᠵᠢᠭᠯᠡᠭᠡᠳ ᠪᠠᠢᠭᠰᠠᠨ ᠶᠤᠮ ᠭᠡᠪᠡ᠃ ᠬᠣᠷᠢᠶᠠᠨ ᠳᠠᠷᠤᠭᠠ ᠰᠣᠴᠢᠭᠰᠠᠨ ᠪᠠᠢᠳᠠᠯ ᠲᠠᠢ᠂ ᠳᠠᠩᠴᠤ ᠵᠠᠯᠠᠭᠤ ᠪᠠᠭᠠ ᠳᠦᠷᠢ ᠲᠡᠢ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢ ᠬᠠᠷᠠᠭᠠᠳ
— ᠴᠢᠨᠦ ᠨᠥᠬᠥᠷ ᠴᠢᠨᠢ ᠲᠡᠭᠡᠭᠡᠳ ᠬᠡᠳᠦᠨ ᠨᠠᠰᠤᠲᠠᠢ ᠬᠥᠮᠦᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠭᠤᠴᠢᠨ ᠭᠤᠷᠪᠠᠲᠠᠢ᠃
— ᠦ᠂ ᠡᠢᠮᠦ ᠵᠠᠯᠠᠭᠤ ᠬᠥᠮᠦᠨ ᠠᠷᠠᠢ ᠲᠡᠢᠮᠦ ᠡᠪᠡᠳᠴᠢᠨ ᠣᠯᠬᠤ ᠪᠣᠯᠤᠯᠴᠠᠭᠠ ᠦᠭᠡᠢ ᠪᠠᠢᠮᠠᠷ᠂ ᠭᠡᠪᠡᠴᠦ ᠪᠠᠰᠠ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠢᠩᠭᠢᠶᠡ᠂ ᠴᠢ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠳ ᠢᠷᠡ᠂ ᠪᠢ ᠪᠠᠢᠴᠠᠭᠠᠵᠤ ᠥᠭᠭᠦᠶᠡ ᠭᠡᠯᠡ᠃ ᠭᠠᠪᠢᠷᠠ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠭᠠᠳ ᠡᠪᠡᠳᠴᠢᠲᠡᠨ ᠦ᠌ ᠥᠷᠥᠭᠡᠨ ᠳ᠋ᠦ᠍ ᠣᠴᠢᠵᠤ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠠᠪᠴᠢᠷᠠᠯᠠ᠃
ᠬᠣᠷᠢᠶᠠᠨ ᠳᠠᠷᠤᠭᠠ᠂ ᠰᠠᠢᠰᠢᠶᠠᠯᠲᠤ ᠶ᠋ᠢ ᠳᠠᠭᠠᠭᠤᠯᠤᠨ ᠬᠣᠳᠣᠭᠣᠳᠣᠨ ᠤ᠋ ᠵᠢᠷᠤᠭ ᠠᠪᠬᠤ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠶᠡᠬᠡᠯᠡ ᠤᠳᠠᠭᠠᠨ ᠪᠠᠢᠴᠠᠭᠠᠯᠠ᠃ ᠲᠡᠭᠡᠭᠡᠳ ᠭᠠᠷᠴᠤ ᠢᠷᠡᠬᠦ ᠳ᠋ᠡᠭᠡᠨ ᠰᠠᠢᠰᠢᠶᠠᠯᠲᠤ ᠳ᠋ᠤ᠌᠂
— ᠴᠢ ᠤᠷᠢᠳ ᠢ᠋ᠶ᠋ᠠᠷ ᠡᠪᠡᠳᠴᠢᠲᠡᠨ ᠦ᠌ ᠥᠷᠥᠭᠡᠨ ᠳ᠋ᠡᠭᠡᠨ ᠬᠠᠷᠢᠭᠠᠳ ᠪᠠᠢ᠃ ᠭᠡᠷ ᠦ᠋ᠨ ᠬᠥᠮᠦᠨ ᠴᠢᠨᠢ ᠡᠨᠳᠡ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠳ᠋ᠦᠩ ᠢ᠋ ᠠᠪᠤᠭᠠᠳ ᠶᠠᠪᠤᠭ ᠭᠡᠯᠡ᠃ ᠶᠠᠮᠠᠷ ᠤᠴᠢᠷ ᠪᠣᠯᠤᠭᠰᠠᠨ ᠢ᠋ ᠪᠠᠷᠤᠭᠯᠠᠭᠰᠠᠨ ᠭᠠᠪᠢᠷᠠ ᠨᠥᠬᠥᠷ ᠲᠡᠭᠡᠨ
— ᠴᠢ ᠬᠦᠦ ᠪᠡᠨ ᠠᠪᠤᠭᠠᠳ ᠭᠠᠳᠠᠭᠤᠷ ᠵᠢᠭᠠᠬᠠᠨ ᠨᠠᠭᠠᠳᠤᠭᠤᠯᠤᠭᠠᠳ ᠢᠷᠡ ᠂ ᠪᠢ ᠬᠦᠯᠢᠶᠡᠵᠦ ᠪᠠᠢᠶᠠ ᠭᠡᠪᠡ᠃
ᠬᠣᠷᠢᠶᠠᠨ ᠳᠠᠷᠤᠭᠠ ᠳᠣᠲᠣᠷ ᠰᠠᠯᠠᠭᠠᠨ ᠤ᠋ ᠭᠣᠣᠯᠯᠠᠭᠴᠢ ᠡᠮᠴᠢ ᠨᠠᠷ ᠢ᠋ ᠪᠦᠭᠦᠳᠡ ᠶ᠋ᠢ ᠳᠠᠭᠤᠳᠠᠵᠤ᠂ ᠡᠪᠡᠳᠴᠢᠲᠡᠨ ᠦ᠌ ᠪᠠᠢᠳᠠᠯ ᠢ᠋ ᠶᠠᠭᠠᠬᠢᠵᠤ ᠣᠨᠣᠰᠢᠯᠠᠭᠰᠠᠨ ᠲᠤᠬᠠᠢ᠂ ᠮᠥᠨ ᠴᠦ᠍ ᠰᠥᠰᠥᠨ ᠦ᠌ ᠴᠢᠯᠠᠭᠤᠵᠢᠮᠠᠯ ᠪᠢᠰᠢ ᠮᠥᠷᠲᠡᠭᠡᠨ ᠤᠯᠠᠭᠠᠨ ᠬᠣᠭᠣᠯᠠᠢ ᠶ᠋ᠢᠨ ᠥᠮᠡᠨ ᠪᠥᠭᠡᠳ ᠨᠢᠭᠡᠨᠲᠡ ᠣᠷᠣᠢᠲᠠᠭᠰᠠᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠪᠠᠢᠭᠠ ᠭᠡᠳᠡᠭ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠴᠠᠭᠠᠭᠰᠠᠨ ᠳ᠋ᠦᠩ ᠢ᠋ ᠮᠡᠳᠡᠭᠳᠡᠪᠡ᠃ ᠡᠪᠡᠳᠴᠢᠨ ᠢ᠋ ᠪᠤᠷᠤᠭᠤ ᠣᠨᠣᠰᠢᠯᠠᠵᠤ᠂ ᠡᠢᠮᠦ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠦ᠌ ᠡᠪᠡᠳᠴᠢᠨ ᠢ᠋ ᠰᠠᠷᠠ ᠰᠢᠬᠠᠮ ᠰᠠᠭᠠᠲᠠᠭᠤᠯᠵᠤ ᠣᠷᠬᠢᠭᠰᠠᠨ ᠪᠠᠢᠨᠠ᠃ ᠲᠠᠨᠠᠷ ᠲᠤ᠌ ᠲᠦᠯᠬᠢᠵᠦ ᠵᠠᠢᠯᠠᠭᠤᠯᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠠᠷᠢᠭᠤᠴᠠᠯᠭᠠ ᠲᠠᠢ᠃ ᠣᠳᠣ ᠡᠪᠡᠳᠴᠢᠲᠡᠨ ᠦ᠌ ᠭᠡᠷ ᠦ᠋ᠨ ᠬᠢᠨ ᠳ᠋ᠦ᠍ ᠶᠠᠭᠤ ᠭᠡᠯᠲᠡᠢ ᠪᠢᠯᠡ? ᠲᠠᠨᠠᠷ ᠡᠨᠡᠬᠦ ᠥᠪᠴᠢ ᠴᠠᠭᠠᠨ ᠬᠤᠪᠴᠠᠰᠤ ᠶ᠋ᠢ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠡᠮᠦᠰᠴᠦ ᠶᠠᠪᠤᠭᠠ ᠪᠠᠨ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠶᠣᠰᠣᠲᠠᠢ ᠰᠠᠨ ᠭᠡᠮᠡᠨ ᠬᠠᠲᠠᠭᠤ ᠵᠢᠮᠡᠯᠡᠪᠡ᠃ ᠳᠠᠷᠠᠭᠠ ᠨᠢ ᠭᠠᠪᠢᠷᠠ ᠶ᠋ᠢ ᠣᠷᠣᠭᠤᠯᠤᠨ ᠡᠨᠡᠬᠦ ᠵᠣᠯ ᠪᠤᠰᠤ ᠴᠢᠮᠡᠭᠡ ᠶ᠋ᠢ ᠮᠡᠳᠡᠭᠳᠡᠯᠡ᠃ ᠲᠡᠷᠡ ᠠᠶᠤᠩᠭᠠ ᠳ᠋ᠤ᠌ ᠨᠢᠷᠭᠡᠭᠦᠯᠦᠭᠰᠡᠨ ᠶᠦᠮ ᠰᠢᠭ ᠳᠠᠢᠪᠠᠯᠵᠠᠭᠠᠳ ᠵᠥᠭᠡᠯᠡᠷᠡᠨ ᠤᠨᠠᠯᠠ᠃ ᠡᠮᠴᠢ ᠨᠠᠷ ᠶᠠᠭᠠᠷᠠᠨ ᠲᠦᠰᠢᠵᠦ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠯᠭᠠᠪᠠ᠃ ᠬᠠᠮᠤᠭ ᠪᠡᠶᠡ ᠨᠢ ᠴᠡᠴᠡᠷᠬᠢᠯᠡᠨ᠂ ᠨᠢᠳᠦ ᠪᠡᠨ ᠠᠨᠢᠨ ᠬᠡᠰᠡᠭ ᠰᠠᠭᠤᠵᠤ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠭᠠᠳ᠂ ᠥᠨᠥ ᠥᠷᠯᠥᠭᠡ ᠥᠪᠡᠷ ᠲᠦ᠍ ᠨᠢ ᠣᠪᠣᠷᠳᠠᠵᠤ ᠪᠠᠢᠭᠰᠠᠨ ᠡᠮᠴᠢ ᠨᠠᠷ ᠢ᠋ ᠨᠢᠯᠪᠤᠰᠤ ᠮᠡᠯᠮᠡᠯᠵᠡᠭᠰᠡᠨ ᠰᠢᠷᠦᠭᠦᠨ ᠨᠢᠳᠦ ᠪᠡᠷ ᠡᠭᠡᠯᠵᠢᠯᠡᠨ ᠰᠢᠷᠳᠡᠵᠦ᠂ ᠬᠣᠭᠣᠯᠠᠢ ᠪᠠᠨ ᠡᠷᠢᠶᠡᠨᠳᠡᠭᠦᠯᠦᠨ᠄
— ᠡᠨᠡ ᠪᠣᠯ ᠲᠠᠨᠠᠷ ᠤ᠋ᠨ ᠡᠮᠴᠢ ᠶ᠋ᠢᠨ ᠮᠣᠷᠠᠯ ᠲᠡᠢᠮᠦ ᠪᠢᠵᠡ? ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠪᠤᠰᠠᠨᠢᠭᠤᠯᠬᠤᠠ᠋ᠴᠠ ᠴᠤ᠌ ᠪᠤᠴᠠᠬᠤ ᠦᠭᠡᠢ᠂ ᠶᠣᠰᠣᠲᠠᠢ ᠶᠠᠷᠭᠠᠴᠢᠳ! ᠭᠡᠳ ᠬᠣᠷᠢᠶᠠᠨ ᠳᠠᠷᠤᠭᠠ ᠳ᠋ᠤ᠌ ᠬᠠᠨᠳᠤᠨ
— ᠲᠠᠨ ᠳ᠋ᠤ᠌ ᠶᠣᠰᠣᠲᠠᠢ ᠲᠠᠯᠠᠷᠬᠠᠯᠠ᠂ ᠪᠢ ᠲᠠᠨ ᠢ᠋ ᠡᠷᠢᠭᠰᠡᠨ ᠦᠭᠡᠢ ᠪᠣᠯ ᠬᠡᠳᠦᠢ ᠪᠣᠯᠲᠠᠯᠠ ᠡᠨᠳᠡ ᠵᠦᠭᠡᠷ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠲᠡᠵᠢᠭᠡᠵᠦ ᠰᠠᠭᠤᠬᠤ ᠶ᠋ᠢ ᠪᠦᠦ ᠮᠡᠳᠡ᠃ ᠲᠠ ᠣᠳᠣᠬᠠᠨ ᠡᠮᠨᠡᠯᠭᠡ ᠰᠢᠯᠵᠢᠭᠦᠯᠬᠦ ᠭᠠᠷ ᠭᠦᠢᠴᠡᠳᠬᠡᠯ ᠬᠢᠵᠦ ᠠᠯᠢ᠂ ᠪᠢᠳᠡ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠪᠤᠨᠠ ᠭᠡᠵᠦ ᠴᠡᠴᠡᠷᠬᠢᠨᠡᠨ ᠬᠠᠰᠬᠢᠷᠪᠠ᠃ ᠬᠣᠷᠢᠶᠠᠨ ᠳᠠᠷᠤᠭᠠ᠄
— ᠪᠢ ᠪᠦᠬᠦ ᠡᠮᠴᠢ ᠨᠠᠷ ᠢ᠋ᠶ᠋ᠠᠨ ᠲᠥᠯᠥᠭᠡᠯᠡᠨ ᠲᠠᠨ ᠳ᠋ᠤ᠌ ᠪᠤᠷᠤᠭᠤ ᠬᠦᠯᠢᠶᠡᠵᠦ ᠪᠠᠢᠨᠠ᠃ ᠡᠨᠡ ᠰᠠᠷᠠ ᠢᠯᠡᠭᠦᠦ ᠶ᠋ᠢᠨ ᠡᠮᠨᠡᠯᠭᠡ ᠳ᠋ᠦ᠍ ᠰᠠᠭᠤᠭᠰᠠᠨ ᠰᠦᠢᠳᠬᠡᠯ ᠢ᠋ ᠪᠣᠳᠣᠬᠤ ᠦᠭᠡᠢ᠃ ᠬᠡᠷᠪᠡ ᠴᠠᠭ ᠰᠠᠭᠠᠲᠠᠬᠤ ᠦᠭᠡᠢ ᠶ᠋ᠢ ᠪᠣᠳᠣᠪᠠᠯ᠂ ᠪᠢᠳᠡ ᠪᠡᠭᠡᠵᠢᠩ ᠡᠴᠡ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠵᠠᠯᠠᠵᠤ ᠮᠡᠰᠡ ᠵᠠᠰᠠᠯ ᠬᠢᠯᠭᠡᠶᠡ᠃
— ᠬᠡᠷᠡᠭ ᠦᠭᠡᠢ᠂ ᠪᠢ ᠨᠥᠬᠥᠷ ᠢ᠋ᠶ᠋ᠡᠨ ᠲᠠᠨ ᠤ᠋ ᠡᠨᠳᠡ ᠦᠬᠦᠭᠦᠯᠦᠮᠡᠷ ᠦᠭᠡᠢ ᠪᠠᠢᠨᠠ᠃ ᠣᠳᠣᠬᠠᠨ ᠡᠮᠨᠡᠯᠭᠡ ᠡᠴᠡ ᠭᠠᠷᠬᠤ ᠭᠠᠷ ᠭᠦᠢᠴᠡᠳᠬᠡᠯ ᠬᠢᠭᠡᠳ ᠠᠯᠢ᠃ ᠪᠢᠳᠡ ᠥᠨᠥᠳᠥᠷ ᠲᠡᠭᠡᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠨᠠ᠃ ᠭᠠᠪᠢᠷᠠ ᠭᠦᠶᠦᠨ ᠭᠠᠷᠴᠤ ᠤᠬᠢᠶᠠᠯᠭᠠ ᠶ᠋ᠢᠨ ᠲᠠᠰᠤᠭ ᠲᠤ᠌ ᠣᠷᠣᠵᠤ᠂ ᠡᠭᠰᠢᠵᠦ ᠪᠥᠭᠯᠡᠷᠡᠲᠡᠯᠡ ᠪᠡᠨ ᠤᠬᠢᠯᠠᠵᠤ᠂ ᠪᠡᠭᠲᠡᠷᠡᠵᠦ ᠪᠠᠢᠭᠠ ᠴᠡᠭᠡᠵᠢ ᠪᠡᠨ ᠣᠩᠭᠣᠢᠯᠭᠠᠨ ᠪᠠᠭᠠ ᠴᠤ᠌ ᠭᠡᠰᠡᠨ ᠲᠠᠢᠪᠤᠰᠢᠷᠠᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠵᠢᠷᠦᠬᠡ ᠨᠢ ᠵᠦᠰᠦᠵᠦ ᠪᠠᠢᠭᠠ ᠰᠢᠭ᠋ ᠡᠪᠡᠳᠦᠨᠡ᠃ ᠲᠡᠷᠡ᠂ ᠶᠠᠭᠠᠬᠢᠵᠤ ᠡᠢᠨ ᠬᠦᠴᠦᠯᠡᠵᠦ ᠪᠠᠢᠭᠠᠳ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠬᠤ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠡᠨᠡ ᠪᠠᠢᠳᠠᠯ ᠢ᠋ᠶ᠋ᠠᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠨᠥᠬᠥᠷ ᠲᠡᠭᠡᠨ ᠮᠡᠳᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠭᠠᠪᠢᠷᠠ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨᠠ᠋ᠴᠠ ᠭᠠᠷᠴᠤ᠂ ᠰᠢᠤᠳᠠᠨ ᠤ᠋ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠶ᠋ᠢ ᠵᠠᠯᠭᠠᠪᠠ᠃ ᠠᠰᠢᠭᠦᠢ ᠴᠢᠯᠠᠭᠤᠨ ᠳᠠᠷᠤᠭᠠ ᠲᠤᠰᠴᠠᠢ᠃ ᠴᠢᠯᠠᠭᠤᠨ ᠳᠠᠷᠤᠭᠠ ᠴᠤ᠌ ᠴᠣᠴᠢᠷᠳᠠᠵᠤ ᠮᠡᠯᠡᠷᠡᠪᠡ᠃ ᠰᠠᠶᠢ ᠭᠤᠴᠢ ᠭᠠᠷᠴᠤ ᠶᠠᠪᠤᠭᠠ ᠬᠥᠮᠦᠨ ᠰᠢᠦ᠃ ᠶᠠᠭᠠᠬᠢᠬᠤᠯᠠᠷ ᠢ᠋ᠶ᠋ᠠᠨ ᠡᠢᠮᠦ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠳᠬᠠᠨ ᠡᠪᠡᠳᠴᠢᠨ ᠣᠯᠳᠠᠭ ᠪᠠᠢᠨᠠ ᠭᠡᠮᠡᠨ ᠪᠣᠳᠣᠵᠤ᠂ ᠭᠠᠪᠢᠷᠠ ᠶ᠋ᠢ ᠲᠠᠢᠳᠬᠤᠷᠠᠭᠤᠯᠤᠨ
一 ᠴᠢ ᠥᠪᠡᠷ ᠢ᠋ᠶ᠋ᠡᠨ ᠵᠣᠷᠢᠭ ᠲᠠᠢ ᠪᠠᠢᠬᠤ ᠶᠤᠮ ᠰᠢᠦ᠂ ᠰᠠᠢᠰᠢᠶᠠᠯᠳᠤ ᠳ᠋ᠤ᠌ ᠮᠡᠳᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠪᠢ ᠲᠣᠪᠴᠢᠶᠠᠨ ᠤ᠋ ᠲᠡᠷᠭᠡ ᠶ᠋ᠢ ᠶᠠᠪᠤᠭᠤᠯᠵᠤ ᠲᠤᠰᠤᠶᠠ᠃ ᠰᠤᠷᠭᠠᠭᠤᠯᠢ ᠲᠠᠢ ᠴᠢᠨᠢ ᠬᠠᠷᠢᠴᠠᠵᠤ ᠮᠥᠩᠭᠥ ᠵᠣᠭᠣᠰ ᠢ᠋ ᠲᠦᠷᠭᠡᠨ ᠪᠡᠯᠡᠳᠬᠡᠭᠡᠳ ᠪᠠᠢᠵᠤ ᠪᠠᠢᠶᠠ᠃ ᠴᠢ ᠠᠷᠤ ᠭᠡᠷ ᠬᠡᠦᠬᠡᠳ ᠰᠢᠤᠬᠠᠳ ᠢ᠋ᠶ᠋ᠠᠨ ᠠᠶᠠᠲᠠᠢᠬᠠᠨ ᠲᠣᠬᠢᠷᠠᠭᠤᠯ᠃ ᠪᠢᠳᠡ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠷᠮᠠᠢᠬᠤ ᠶᠤᠮ᠃ ᠴᠢ ᠰᠠᠨᠠᠭᠠ ᠠᠮᠤᠷ ᠪᠠᠢ! ᠭᠡᠯᠡ᠃ ᠭᠠᠪᠢᠷᠠ ᠶ᠋ᠢᠨ ᠰᠡᠳᠬᠢᠯ ᠰᠠᠨᠠᠭᠠ ᠪᠠᠭᠠ ᠠᠭᠤᠵᠢᠷᠠᠪᠠ᠃ ᠲᠡᠷᠡ ᠰᠤᠯᠠᠷᠠᠵᠤ ᠲᠠᠮᠢᠷᠳᠠᠭᠰᠠᠨ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠡᠮᠨᠡᠯᠭᠡ ᠵᠦᠭ ᠬᠡᠯᠲᠦᠷᠢᠯᠡ᠃ ᠲᠡᠷᠡ ᠡᠪᠡᠳᠴᠢᠲᠡᠨ ᠦ᠌ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠬᠡᠰᠡᠭ ᠵᠣᠭᠰᠣᠵᠤ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠭᠠᠳ ᠵᠣᠷᠢᠭ ᠲᠠᠢ ᠠᠯᠬᠤᠵᠤ ᠣᠷᠣᠯᠠ᠃ ᠣᠷᠣᠨ ᠳᠡᠭᠡᠷᠡ ᠪᠡᠨ ᠳᠡᠭᠡᠭᠰᠢ ᠬᠠᠷᠠᠨ ᠬᠡᠪᠲᠡᠵᠦ᠂ ᠬᠦᠦ ᠪᠡᠨ ᠭᠡᠳᠡᠰᠦᠨ ᠳᠡᠭᠡᠷᠡ ᠪᠡᠨ ᠤᠨᠤᠭᠤᠯᠤᠨ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠰᠠᠢᠰᠢᠶᠠᠯᠲᠤ᠄
一 ᠶᠠᠭᠠᠬᠢᠭᠰᠠᠨ ᠶᠡᠬᠡ ᠤᠳᠠᠪᠠ? ᠪᠠᠢᠴᠠᠭᠠᠭᠰᠠᠨ ᠳ᠋ᠦᠩ ᠶᠠᠭᠤ ᠪᠣᠯᠪᠠ? ᠭᠡᠵᠦ ᠠᠵᠢᠭ ᠴᠤ᠌ ᠦᠭᠡᠢ ᠠᠰᠠᠭᠤᠨᠠ᠃ ᠭᠠᠪᠢᠷᠠ᠄
一 ᠮᠢᠨᠦ ᠪᠣᠳᠣᠭᠰᠠᠨᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡᠢ᠃ ᠰᠥᠰᠥᠨ ᠦ᠌ ᠴᠢᠯᠠᠭᠤᠵᠢᠮᠠᠯ ᠪᠢᠰᠢ ᠭᠡᠨᠡ᠃ ᠤᠯᠠᠭᠠᠨ ᠬᠣᠭᠣᠯᠠᠢ ᠳᠣᠲᠣᠷᠠ ᠴᠢᠨᠢ ᠤᠷᠭᠤᠭᠰᠠᠨ ᠶᠠᠭᠤᠮᠠ ᠪᠠᠢᠨᠠ ᠭᠡᠨᠡ᠃ ᠮᠠᠰᠢᠨ ᠵᠠᠰᠠᠯ ᠬᠢᠬᠦ ᠴᠢᠬᠤᠯᠠᠲᠠᠢ ᠭᠡᠨᠡ᠃ ᠰᠥᠰᠥᠨ ᠦ᠌ ᠴᠢᠯᠠᠭᠤᠵᠢᠮᠠᠯ ᠪᠢᠰᠢ ᠭᠡᠨᠡ᠃ ᠡᠨᠳᠡᠬᠢ ᠨᠥᠬᠥᠴᠡᠯ ᠪᠠᠷᠤᠭᠲᠠᠢ ᠪᠣᠯᠬᠣᠷ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠵᠤ ᠵᠠᠰᠠᠯ ᠬᠢᠯᠭᠡᠪᠡᠯ ᠵᠦᠭᠡᠷ ᠭᠡᠵᠦ ᠪᠠᠢᠨᠠ᠃ ᠪᠢ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠴᠢᠯᠠᠭᠤᠨ ᠳᠠᠷᠤᠭᠠ ᠲᠠᠢ ᠶᠠᠷᠢᠭᠰᠠᠨ᠃ ᠪᠢᠳᠡᠨ ᠢ᠋ ᠲᠡᠷᠭᠡ ᠪᠡᠷ ᠢ᠋ᠶ᠋ᠡᠨ ᠲᠣᠰᠤᠭᠤᠯᠤᠨᠠ᠃ ᠮᠥᠩᠭᠥ ᠵᠣᠭᠣᠰ ᠢ᠋ ᠴᠦ᠍ ᠪᠡᠯᠡᠨ ᠪᠣᠯᠭᠠᠭᠠᠳ ᠪᠠᠢᠶᠠ ᠭᠡᠰᠡᠨ᠃ ᠪᠢᠳᠡᠨ ᠢ᠋ ᠠᠯᠢ ᠪᠣᠯᠬᠤ ᠪᠠᠷ ᠲᠦᠷᠭᠡᠨ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠪᠤ ᠭᠡᠵᠦ ᠪᠠᠢᠨᠠ ᠭᠡᠯᠡ᠃ ᠰᠠᠢᠰᠢᠶᠠᠯᠲᠤ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠬᠠᠨ ᠣᠨᠳᠣᠣ ᠪᠠᠢᠳᠠᠯ ᠲᠠᠢ ᠬᠠᠷᠠᠴᠠ ᠶ᠋ᠢ ᠭᠠᠢᠬᠠᠰᠢᠷᠠᠨ ᠰᠢᠷᠳᠡᠵᠦ
一 ᠪᠦᠷ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠶ᠋ᠢ ᠬᠦᠷᠲᠡᠯᠡ ᠳᠡᠪᠵᠢᠶᠡᠷᠡᠭᠦᠯᠵᠦ ᠣᠷᠬᠢᠪᠠ ᠤᠤ? ᠵᠠᠪᠠᠯ ᠮᠡᠰᠡ ᠵᠠᠰᠠᠯ ᠬᠢᠨᠡ ᠤᠤ? ᠤᠷᠲᠤ ᠬᠤᠭᠤᠴᠠᠭᠠ ᠡᠮᠨᠡᠯᠭᠡ ᠳ᠋ᠦ᠍ ᠰᠠᠭᠤᠵᠤ᠂ ᠪᠦᠬᠦ ᠠᠵᠢᠯ ᠴᠤ᠌ ᠪᠠᠯᠠᠷᠠᠬᠤ ᠶᠤᠮ ᠪᠠᠢᠨᠠ ᠭᠡᠵᠦ ᠬᠠᠷᠠᠮᠰᠠᠪᠠ᠃ ᠡᠨᠡ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠭᠠᠪᠢᠷᠠ ᠴᠢᠬᠤᠯᠳᠠᠨ ᠪᠡᠭᠲᠡᠷᠡᠵᠦ
— ᠡᠷᠡᠭᠦᠯ ᠡᠩᠬᠡ ᠪᠠᠢᠪᠠᠯ ᠴᠢᠮᠠ ᠳ᠋ᠤ᠌ ᠠᠵᠢᠯ ᠮᠤᠩᠳᠠᠬᠤ ᠦᠭᠡᠢ ᠣᠯᠳᠠᠨᠠ᠃ ᠨᠣᠢᠷ ᠬᠣᠭᠣᠯᠠ ᠦᠭᠡᠢ᠂ ᠪᠡᠶᠡ ᠰᠡᠳᠬᠢᠯ ᠵᠦᠳᠡᠵᠦ ᠶᠠᠪᠤᠭᠰᠠᠭᠠᠷ ᠡᠢᠮᠦ ᠪᠣᠯᠤᠭᠰᠠᠨ ᠪᠢᠰᠢ ᠤᠤ? ᠮᠢᠨᠦ ᠦᠭᠡ ᠶ᠋ᠢ ᠰᠣᠨᠣᠰᠴᠢᠬᠠ᠃ ᠰᠠᠷᠠ ᠢᠯᠡᠭᠦᠦ ᠡᠪᠡᠳᠴᠢᠨ ᠢ᠋ ᠴᠢᠨᠢ ᠪᠤᠷᠤᠭᠤ ᠡᠮᠨᠡᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠬᠠᠢᠬᠤᠷᠤᠮᠵᠢ ᠦᠭᠡᠢ ᠪᠠᠢᠵᠤ ᠡᠨᠡ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠭᠡᠴᠢᠬᠡᠯᠡ᠃ ᠪᠠᠰᠠ ᠶᠠᠭᠠᠬᠢᠬᠤ ᠰᠠᠨᠠᠭᠠᠲᠠᠢ ᠪᠣᠢ? ᠭᠡᠳ ᠬᠣᠷᠢᠭᠯᠠᠵᠤ ᠪᠠᠢᠭᠰᠠᠨ ᠨᠢᠯᠪᠤᠰᠤ ᠨᠢ ᠪᠥᠮᠪᠥᠷᠢᠪᠡ᠃ ᠲᠡᠷᠡ ᠬᠠᠢᠷᠠᠲᠤ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠯᠪᠤᠰᠤ ᠶ᠋ᠢ ᠬᠠᠷᠠᠭᠠᠳ ᠰᠠᠨᠳᠤᠷᠴᠢᠬᠠᠪᠠ᠃ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠰᠡᠳᠬᠢᠯ ᠰᠢᠮᠰᠢᠷᠡᠨ ᠤᠬᠢᠯᠠᠬᠤ ᠶ᠋ᠢ ᠠᠩᠬᠠ ᠤᠳᠠᠭᠠ ᠬᠠᠷᠠᠵᠤ ᠪᠠᠢᠭᠠ ᠠᠵᠢ᠃ ᠲᠡᠳᠡ ᠬᠣᠶᠠᠷ ᠤ᠋ᠨ ᠬᠠᠮᠲᠤ ᠠᠮᠢᠳᠤᠷᠠᠭᠰᠠᠨ ᠠᠷᠪᠠ ᠰᠢᠬᠠᠮ ᠵᠢᠯ ᠳ᠋ᠦ᠍᠂ ᠪᠠᠶᠠᠷ ᠵᠢᠷᠭᠠᠯ ᠴᠠᠯᠭᠢᠯᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠢᠰᠢ ᠭᠣᠮᠣᠳᠠᠯ ᠭᠤᠨᠢᠷᠬᠠᠯ ᠬᠡᠵᠢᠶᠡ ᠴᠦ᠍ ᠪᠠᠢᠭᠠ ᠦᠭᠡᠢ ᠰᠠᠨ᠃ ᠰᠠᠢᠰᠢᠶᠠᠯᠳᠤ ᠭᠡᠷᠭᠡᠢ ᠪᠡᠨ ᠠᠷᠭᠠᠳᠠᠨ 《ᠴᠢᠨᠦ ᠦᠭᠡ ᠶ᠋ᠢ ᠰᠣᠨᠣᠰᠤᠶᠠ᠂ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠪᠤᠶᠠ᠂ ᠪᠤᠤ ᠤᠬᠢᠯᠠ》 ᠭᠡᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠥᠭᠦᠭᠡ ᠡᠮᠴᠢ ᠨᠠᠷ ᠴᠤ᠌ ᠣᠷᠣᠵᠤ ᠢᠷᠡᠨ
— ᠲᠡᠢᠮᠦ ᠬᠦᠨᠳᠦ ᠡᠪᠡᠳᠴᠢᠨ ᠪᠢᠰᠢ᠂ ᠬᠣᠭᠣᠯᠠᠢ ᠳᠣᠲᠣᠷᠠ ᠴᠢᠨᠢ ᠨᠢᠭᠡᠨ ᠮᠢᠬᠠᠨ ᠥᠷᠭᠡᠰᠦ ᠮᠠᠶᠢᠭ ᠲᠠᠢ ᠶᠠᠭᠤᠮᠠ ᠤᠷᠭᠤᠭᠰᠠᠨ ᠪᠠᠢᠨᠠ᠃ ᠠᠪᠤᠭᠤᠯᠪᠠᠯ ᠵᠦᠭᠡᠷ ᠪᠣᠯᠴᠢᠬᠠᠨᠠ᠃ ᠪᠡᠭᠡᠵᠢᠩ ᠳ᠋ᠦ᠍ ᠪᠣᠯ ᠨᠥᠬᠥᠴᠡᠯ ᠰᠠᠢᠨ᠂ ᠮᠡᠷᠭᠡᠵᠢᠯ ᠥᠨᠳᠥᠷ ᠶᠦᠮ ᠭᠡᠵᠡᠭᠡᠵᠦ ᠠᠯᠢ ᠪᠣᠯᠬᠤ ᠪᠠᠷ ᠥᠪᠡᠷ ᠲᠤᠨᠢ ᠰᠡᠵᠢᠭ ᠠᠵᠢᠭ ᠠᠪᠤᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨᠡ᠃ ᠦᠳᠡ ᠥᠩᠭᠡᠷᠡᠭᠡᠳ ᠲᠣᠪᠴᠢᠶᠠᠨ ᠤ᠋ ᠲᠡᠷᠭᠡ ᠬᠦᠷᠴᠦ ᠢᠷᠡᠪᠡ᠃ ᠲᠡᠳᠡ ᠬᠣᠰᠢᠭᠤ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠪᠠᠷ ᠬᠥᠳᠡᠯᠦᠯᠡ᠃ ᠭᠠᠪᠢᠷᠠ᠂ ᠵᠠᠮ ᠲᠤᠷᠰᠢ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠨᠠ᠃ ᠨᠥᠬᠥᠷ ᠨᠢ ᠬᠦᠦ ᠲᠡᠢ ᠪᠡᠨ ᠲᠣᠭᠯᠠᠨ ᠢᠨᠢᠶᠡᠳᠦ ᠬᠥᠭᠵᠢᠯ ᠲᠡᠢ ᠶᠠᠪᠤᠬᠤ ᠶ᠋ᠢ ᠬᠠᠷᠠᠭᠠᠳ ᠵᠢᠷᠦᠬᠡ ᠨᠢ ᠰᠢᠨᠠᠯᠤᠨ ᠡᠮᠵᠡᠭᠯᠡᠨᠡ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠮᠥᠷᠦᠨ ᠳ᠋ᠦ᠍ ᠲᠣᠯᠣᠭᠠᠢ ᠪᠠᠨ ᠨᠠᠭᠠᠯᠳᠤᠭᠤᠯᠤᠨ ᠨᠢᠳᠦ ᠪᠡᠨ ᠠᠨᠢᠨ ᠤᠨᠲᠠᠭᠰᠠᠨ ᠮᠡᠲᠦ ᠶᠠᠪᠤᠨᠠ᠃
— ᠶᠠᠭᠠᠬᠢᠭᠰᠠᠨ ᠪᠣᠢ? ᠳᠣᠲᠣᠷᠠ ᠴᠢᠨᠢ ᠡᠪ ᠦᠭᠡᠢᠷᠡᠵᠦ ᠪᠠᠢᠭᠠ ᠤᠤ?
— ᠬᠠᠷᠢᠨ ᠭᠡᠮ᠂ ᠳᠣᠲᠣᠷᠠ ᠡᠪ ᠦᠭᠡᠢ ᠣᠷᠬᠢᠵᠤ ᠪᠥᠭᠡᠯᠵᠢᠮᠡᠷ ᠪᠠᠢᠨᠠ᠃
— ᠲᠡᠷᠭᠡ ᠶ᠋ᠢ ᠵᠣᠭᠰᠣᠭᠠᠵᠤ ᠰᠠᠯᠬᠢ ᠦᠵᠡᠬᠦ ᠤᠤ ?
— ᠬᠡᠷᠡᠭ ᠦᠭᠡᠢ᠂ ᠬᠤᠷᠳᠤᠨ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠶᠡ᠃
ᠲᠡᠷᠡ ᠰᠥᠨᠢ ᠶ᠋ᠢᠨ ᠨᠢᠭᠡ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠬᠤᠰᠢᠭᠤᠨ ᠳ᠋ᠠᠭᠠᠨ ᠬᠦᠷᠴᠦ ᠪᠠᠭᠤᠳᠠᠯ ᠳ᠋ᠤ᠌ ᠣᠷᠣᠯᠠ᠃ ᠬᠦᠦ ᠨᠢ ᠨᠢᠭᠡᠨᠲᠡ ᠤᠨᠲᠠᠴᠢᠬᠠᠭᠰᠠᠨ ᠲᠤᠯᠠ ᠲᠠᠢᠴᠢᠵᠤ ᠬᠡᠪᠲᠡᠭᠦᠯᠦᠭᠡᠳ᠂ ᠬᠣᠶᠠᠭᠤᠯᠠ ᠪᠠᠨ ᠤᠬᠢᠶᠠᠵᠤ ᠴᠡᠪᠡᠷᠯᠡᠨ᠂ ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠢᠳᠡᠭᠡᠳ ᠬᠡᠪᠲᠡᠵᠡᠭᠡᠯᠡ᠃ ᠰᠠᠷᠠ ᠰᠢᠬᠠᠮ ᠣᠢᠷᠠᠳᠤᠭᠠ ᠦᠭᠡᠢ ᠵᠠᠯᠠᠭᠤ ᠡᠷᠡ ᠡᠮᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠦᠰᠡᠨ ᠲᠠᠴᠢᠶᠠᠳᠠᠬᠤ ᠨᠢ ᠳᠠᠮᠵᠢᠭ ᠦᠭᠡᠢ᠃ ᠰᠠᠢᠰᠢᠶᠠᠯᠲᠤ᠂ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠥᠭᠡᠯᠡᠨ ᠪᠡᠶᠡ ᠶ᠋ᠢ ᠲᠡᠪᠡᠷᠢᠨ ᠲᠠᠭᠠᠯᠠᠵᠤ ᠠᠮᠠᠷᠠᠭ ᠴᠡᠩᠭᠡᠯ ᠦ᠋ᠨ ᠠᠮᠲᠠᠲᠤ ᠵᠢᠷᠭᠠᠯ ᠳ᠋ᠤ᠌ ᠱᠤᠩᠪᠠᠨ ᠪᠠᠢᠬᠤ ᠳ᠋ᠤ᠌᠂ ᠭᠠᠪᠢᠷᠠ ᠥᠪᠡᠷ ᠢ᠋ ᠨᠢ ᠲᠠᠰᠤ ᠲᠡᠪᠡᠷᠢᠨ ᠨᠠᠭᠠᠯᠳᠤᠵᠤ᠂ ᠬᠠᠷᠠᠩᠭᠤᠢ ᠳ᠋ᠤ᠌ ᠨᠢᠯᠪᠤᠰᠤ ᠪᠠᠨ ᠬᠠᠰᠢᠯᠭᠠ ᠪᠠᠨ ᠰᠡᠲᠡᠯᠦᠭᠰᠡᠨ ᠦᠶᠡᠷ ᠰᠢᠭ ᠠᠰᠬᠠᠷᠠᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠵᠢᠷᠭᠠᠯ ᠳ᠋ᠠᠭᠠᠨ ᠰᠣᠭᠲᠣᠭᠤᠷᠠᠵᠤ ᠪᠠᠢᠭᠰᠠᠨ ᠨᠥᠬᠥᠷ ᠨᠢ ᠮᠡᠳᠡᠭᠰᠡᠨ ᠦᠭᠡᠢ ᠥᠩᠭᠡᠷᠡᠵᠡᠢ᠃ ᠡᠢᠮᠦᠷᠬᠦᠦ ᠠᠮᠠᠷᠠᠭ ᠰᠥᠨᠢ ᠶ᠋ᠢᠨ ᠵᠢᠷᠭᠠᠯ ᠣᠳᠣ ᠡᠳᠡ ᠬᠣᠶᠠᠭᠤᠯᠠ ᠳ᠋ᠤ᠌ ᠬᠡᠳᠦᠢ ᠤᠳᠠᠭᠠ ᠪᠠᠢᠵᠤ ᠴᠢᠳᠠᠬᠤ ᠶ᠋ᠢ ᠲᠩᠷᠢ ᠯᠡ ᠮᠡᠳᠡᠭᠰᠡᠨ ᠬᠡᠷᠡᠭ᠃
ᠲᠡᠳᠡ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠨᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠵᠤ ᠪᠡᠯᠡᠳᠬᠡᠯ ᠠᠵᠢᠯ ᠢ᠋ᠶ᠋ᠠᠨ ᠲᠣᠬᠢᠷᠠᠭᠤᠯᠪᠠ᠃ ᠲᠣᠪᠴᠢᠶᠠᠨ ᠠ᠋ᠴᠠ ᠨᠢᠭᠡᠳᠦᠭᠡᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠭᠰᠢᠯᠠᠳᠠᠭ ᠪᠡᠭᠡᠵᠢᠩ ᠨᠤᠲᠤᠭ ᠲᠠᠢ ᠰᠢᠦᠢ ᠣᠪᠣᠭᠲᠤ ᠪᠠᠭᠰᠢ ᠶ᠋ᠢ ᠬᠠᠮᠲᠤ ᠶᠠᠪᠤᠭᠤᠯᠬᠤ ᠪᠠᠷ ᠪᠣᠯᠪᠠ᠃
ᠭᠠᠪᠢᠶᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠬᠡᠳᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠶᠡᠬᠡ ᠠᠪᠠᠭᠠ ᠠᠪᠤ ᠶ᠋ᠢᠨ ᠳ᠋ᠦ᠍ᠨᠢ ᠬᠦᠷᠭᠡᠵᠦ ᠥᠭᠭᠦᠭᠡᠳ᠂ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠬᠤ ᠪᠠᠷ ᠬᠥᠳᠡᠯᠦᠯᠡ᠃
ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠴᠤ᠌ ᠲᠣᠬᠢᠷᠠᠮᠵᠢᠲᠠᠢ ᠠᠷᠭᠠ ᠪᠦᠬᠦᠨ ᠢ᠋ ᠠᠪᠴᠤ᠂ ᠲᠡᠳᠡᠨ ᠳ᠋ᠦ᠍ ᠲᠤᠰᠠ ᠳᠡᠮᠵᠢᠯᠭᠡ ᠦᠵᠡᠭᠦᠯᠵᠦ ᠪᠠᠢᠯᠠ᠃ ᠰᠠᠢᠰᠢᠶᠠᠯᠲᠤ ᠶ᠋ᠢ ᠭᠤᠷᠪᠠᠳᠤᠭᠠᠷ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠢᠯᠵᠢᠭᠦᠯᠬᠦ ᠪᠠᠨ ᠪᠣᠯᠢᠵᠤ᠂ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠰᠢᠯᠵᠢᠭᠦᠯᠵᠦ ᠠᠪᠴᠢᠷᠠᠪᠠ᠃ ᠭᠡᠷ ᠪᠦᠯᠢ ᠶ᠋ᠢ ᠨᠢ ᠴᠦ᠍ ᠬᠤᠰᠢᠭᠤᠨ ᠳ᠋ᠤ᠌ ᠨᠡᠭᠦᠯᠭᠡᠬᠦ ᠪᠡᠷ ᠪᠣᠯᠵᠤ᠂ ᠮᠣᠩᠭᠣᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠣᠷᠴᠢᠨ ᠪᠠᠢᠷᠢᠨ ᠠ᠋ᠴᠠ ᠭᠡᠷ ᠲᠣᠬᠢᠷᠠᠭᠤᠯᠵᠤ ᠥᠭᠪᠡ᠃
ᠭᠠᠪᠢᠶᠠ ᠰᠢᠨᠡ ᠰᠢᠯᠵᠢᠵᠦ ᠢᠷᠡᠭᠰᠡᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠲᠤ᠌ ᠮᠡᠳᠡᠭᠳᠡᠵᠦ ᠤᠷᠲᠤ ᠴᠢᠯᠥᠭᠡ ᠠᠪᠤᠯᠠ᠃ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠠ᠋ᠴᠠ ᠨᠢ ᠲᠡᠳᠡᠨ ᠦ᠌ ᠠᠵᠢᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠨᠡ ᠮᠡᠲᠦ ᠰᠠᠨᠠᠭᠠ ᠲᠠᠯᠪᠢᠨ ᠬᠠᠷᠠᠵᠤ ᠳᠡᠮᠵᠢᠵᠦ ᠪᠠᠢᠬᠤ ᠳ᠋ᠤ᠌ ᠲᠡᠳᠡ ᠬᠣᠶᠠᠭᠤᠯᠠ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠵᠤ᠂ ᠤᠷᠮᠠᠰᠢᠨ ᠵᠣᠷᠢᠭᠵᠢᠪᠠ᠃
ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠵᠤ᠂ ᠨᠡᠢᠰᠯᠡᠯ ᠦ᠋ᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠳ᠋ᠤ᠌ ᠪᠠᠢᠴᠠᠭᠠᠯᠭᠠᠭᠰᠠᠨ ᠤ᠋ ᠳ᠋ᠦᠩ ᠳ᠋ᠦ᠍᠂ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠨᠢᠭᠡᠨᠲᠡ ᠰᠡᠭᠦᠯᠴᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠷᠣᠵᠤ᠂ ᠮᠡᠰᠡ ᠵᠠᠰᠠᠯ ᠬᠢᠭᠡᠳ ᠴᠦ᠍ ᠳᠡᠮᠡᠢ ᠬᠡᠳᠦᠨ ᠡᠳᠦᠷ ᠠᠮᠢᠳᠤᠷᠠᠬᠤ ᠪᠣᠯᠤᠯᠴᠠᠭᠠ ᠦᠭᠡᠢ᠂ ᠡᠮᠨᠡᠯᠭᠡ ᠳ᠋ᠦ᠍ ᠡᠪᠡᠳᠴᠢᠲᠡᠨ ᠦ᠌ ᠣᠷᠣ ᠦᠭᠡᠢ᠂ ᠳ᠋ᠤᠭᠠᠷᠯᠠᠵᠤ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠮᠡᠳᠡᠭᠳᠡᠵᠡᠢ᠃ ᠬᠠᠮᠤᠭ ᠴᠥᠭᠡᠨ ᠳ᠋ᠡᠭᠡᠨ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠬᠤᠭᠤᠴᠠᠭᠠ ᠬᠡᠷᠡᠭᠰᠡᠨᠡ᠃ ᠡᠪᠡᠳᠴᠢᠲᠡᠨ ᠦ᠌ ᠪᠠᠢᠳᠠᠯ ᠢᠩᠭᠢᠵᠦ ᠤᠳᠠᠭᠠᠰᠢᠷᠠᠭᠤᠯᠬᠤ ᠶ᠋ᠢ ᠬᠦᠯᠢᠶᠡᠵᠦ ᠳᠡᠢᠯᠬᠦ ᠦᠭᠡᠢ ᠭᠡᠰᠡᠨ ᠪᠠᠢᠯᠠ᠃ ᠲᠡᠳᠡ ᠳᠠᠬᠢᠭᠠᠳ ᠰᠢᠶᠧ ᠾᠧ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠳ᠋ᠤ᠌ ᠣᠴᠢᠭᠰᠠᠨ ᠳ᠋ᠤ᠌ ᠦᠷᠡ ᠳ᠋ᠦᠩ ᠨᠢ ᠮᠥᠨ ᠠᠳᠠᠯᠢᠬᠠᠨ᠃ ᠡᠨᠡ ᠡᠮᠨᠡᠯᠭᠡ ᠶ᠋ᠢᠨ ᠡᠪᠡᠳᠴᠢᠲᠡᠨ ᠦ᠌ ᠣᠷᠣ ᠣᠯᠬᠤ ᠳ᠋ᠤ᠌ ᠨᠡᠩ ᠣᠯᠠᠨ ᠬᠣᠨᠣᠭ ᠬᠦᠯᠢᠶᠡᠬᠦ ᠶᠦᠮ ᠪᠠᠢᠨᠠ᠃ ᠬᠡᠯᠡ ᠬᠣᠩᠰᠢᠶᠠᠷ ᠰᠠᠢᠨ᠂ ᠠᠷᠭᠠ ᠰᠠᠮᠪᠠᠭᠠ ᠣᠯᠠᠨᠲᠠᠢ ᠰᠢᠦᠢ ᠢ ᠮᠢᠨ ᠪᠠᠭᠰᠢ᠂ ᠪᠦᠬᠦ ᠪᠡᠭᠡᠵᠢᠩ ᠬᠣᠲᠠᠨ ᠳ᠋ᠠᠬᠢ ᠨᠡᠷᠡᠲᠡᠢ ᠰᠢᠭ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠪᠦᠬᠦᠨ ᠲᠡᠢ ᠬᠣᠯᠪᠣᠭᠠ ᠠᠪᠴᠤ᠂ ᠲᠠᠨᠢᠵᠤ ᠮᠡᠳᠡᠳᠡᠭ ᠬᠥᠮᠦᠨ ᠪᠦᠬᠦᠨ ᠲᠡᠢ ᠪᠡᠨ ᠬᠠᠷᠢᠴᠠᠵᠤ᠂ ᠠᠷᠭᠠ ᠪᠦᠬᠦᠨ ᠢ᠋ ᠰᠦᠪᠡᠭᠴᠢᠯᠡᠨ ᠠᠯᠢ ᠪᠣᠯᠬᠤ ᠪᠠᠷ ᠲᠦᠷᠭᠡᠨ ᠰᠢᠭ ᠡᠮᠨᠡᠭᠦᠯᠬᠦ ᠡᠮᠨᠡᠯᠭᠡ ᠣᠯᠬᠤ ᠭᠡᠵᠦ ᠨᠣᠢᠷ ᠬᠣᠭᠣᠯᠠ ᠪᠠᠨ ᠤᠮᠠᠷᠲᠠᠨ ᠭᠦᠶᠦᠨᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠡᠳᠡᠭᠡ ᠬᠣᠯᠪᠣᠭᠠ ᠣᠳᠣ ᠶ᠋ᠢᠨ ᠬᠢ ᠰᠢᠭ ᠳᠥᠭᠥᠮ ᠪᠢᠰᠢ᠂ ᠬᠠᠮᠢᠭᠠ ᠣᠴᠢᠭᠰᠠᠨ ᠴᠤ᠌ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠭᠦᠶᠦᠵᠦ ᠬᠦᠷᠬᠦ ᠬᠡᠷᠡᠭᠲᠡᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠪᠡᠶᠡ ᠤᠯᠠᠮ ᠮᠠᠭᠤᠳᠠᠵᠤ ᠤᠰᠤ ᠴᠤ᠌ ᠵᠠᠯᠭᠢᠵᠤ ᠣᠷᠣᠬᠤ ᠪᠠᠨ ᠪᠣᠯᠢᠵᠠᠢ᠃ ᠰᠢᠦᠢ ᠪᠠᠭᠰᠢ ᠨᠢᠭᠡᠨ ᠪᠠᠭᠠ ᠰᠢᠭ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠭᠤᠶᠤᠵᠤ ᠪᠠᠢᠭᠠᠳ ᠰᠠᠢᠰᠢᠶᠠᠯᠲᠤ ᠳ᠋ᠤ᠌ ᠰᠤᠳᠠᠯ ᠤ᠋ᠨ ᠰᠢᠩᠭᠡᠨ ᠶᠡᠭᠦᠯᠡᠵᠦ᠂ ᠲᠦᠷ ᠴᠦ᠍ ᠭᠡᠰᠡᠨ ᠤᠰᠤ᠂ ᠰᠢᠮᠡ ᠲᠡᠵᠢᠭᠡᠯ ᠦ᠋ᠨ ᠰᠢᠩᠭᠡᠨ ᠶᠡᠭᠦᠯᠡᠭᠦᠯᠦᠨ ᠠᠷᠭᠠᠴᠠᠨᠠ᠃
ᠲᠡᠭᠡᠭᠡᠳ ᠡᠴᠦᠰ ᠲᠡᠭᠡᠨ ᠳᠤᠮᠳᠠᠳᠤ ᠶᠠᠫᠣᠨ ᠤ᠋ ᠬᠣᠷᠰᠢᠭᠰᠠᠨ ᠡᠮᠨᠡᠯᠭᠡ ᠳ᠋ᠦ᠍ ᠣᠴᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠨᠡᠬᠦ ᠡᠮᠨᠡᠯᠭᠡ ᠪᠠᠢᠭᠤᠯᠤᠭᠳᠠᠭᠠᠳ ᠤᠳᠠᠭᠠ ᠦᠭᠡᠢ ᠪᠠᠢᠵᠤ᠂ ᠪᠦᠬᠦ ᠤᠯᠤᠰ ᠲᠤ᠌ ᠨᠡᠯᠢᠶᠡᠳ ᠣᠳᠣᠬᠢᠴᠢᠯᠠᠭᠰᠠᠨ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠲᠡᠢ᠂ ᠨᠥᠬᠥᠴᠡᠯ ᠢ᠋ᠶ᠋ᠡᠷ ᠰᠠᠢᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠬᠤ ᠡᠮᠨᠡᠯᠭᠡ ᠶ᠋ᠢᠨ ᠨᠢᠭᠡᠨ ᠪᠠᠢᠭᠰᠠᠨ᠃ ᠡᠨᠳᠡ ᠭᠠᠳᠠᠭᠠᠳᠤ ᠭᠦᠷᠦᠨ ᠦ᠌ ᠬᠥᠮᠦᠰ ᠭᠣᠣᠯᠲᠠᠢ ᠰᠠᠭᠤᠳᠠᠭ᠃ ᠥᠨᠳᠥᠷ ᠴᠠᠯᠢᠩ ᠲᠠᠢ ᠪᠤᠶᠤ ᠪᠠᠶᠠᠨ ᠬᠥᠮᠦᠰ ᠯᠡ ᠡᠨᠡ ᠡᠮᠨᠡᠯᠭᠡ ᠳ᠋ᠦ᠍ ᠢᠷᠡᠬᠦ ᠡᠴᠡ ᠪᠤᠰᠤ᠂ ᠡᠭᠡᠯ ᠬᠥᠮᠦᠨ ᠪᠣᠯ ᠮᠥᠩᠭᠥ ᠵᠠᠷᠤᠳᠠᠯ ᠢ᠋ ᠨᠢ ᠬᠦᠴᠦᠷᠡᠬᠦ ᠶᠦᠮ ᠪᠢᠰᠢ᠃ ᠥᠨᠳᠥᠷ ᠥᠷᠲᠡᠭ ᠦ᠋ᠨ ᠡᠮᠨᠡᠯᠭᠡ ᠪᠠᠢᠭᠰᠠᠨ ᠴᠤ᠌ ᠡᠪᠡᠳᠴᠢᠲᠡᠨ ᠦ᠌ ᠣᠷᠣ ᠨᠢ ᠬᠡᠵᠢᠶᠡ ᠪᠡᠯᠡᠨ ᠪᠠᠢᠳᠠᠭ ᠪᠠᠢᠯᠠ᠃
ᠪᠠᠢᠳᠠᠯ ᠢ᠋ ᠮᠡᠳᠡᠭᠡᠳ ᠰᠠᠢᠰᠢᠶᠠᠯᠲᠤ ᠡᠨᠳᠡ ᠣᠷᠣᠬᠤ ᠳᠤᠷᠠ ᠦᠭᠡᠢ᠃《ᠨᠢᠭᠡ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠴᠢᠬᠠᠵᠤ ᠳᠡᠢᠯᠬᠦ ᠲᠡᠢᠮᠦ ᠶᠡᠬᠡ ᠮᠥᠩᠭᠥ ᠶ᠋ᠢ ᠪᠢ ᠶᠠᠮᠠᠷ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠠᠷᠤᠵᠤ ᠡᠨᠳᠡ ᠬᠡᠪᠲᠡᠬᠦ ᠪᠢᠯᠡ᠃ ᠪᠣᠯᠢᠶᠠ᠂ ᠭᠡᠷ ᠲᠡᠭᠡᠨ ᠬᠠᠷᠢᠶᠠ᠂ ᠦᠬᠦᠪᠡᠯ ᠦᠬᠦᠭ ᠴᠠᠰᠢ ᠪᠠᠨ᠂ ᠮᠢᠨᠦ ᠡᠨᠡ ᠮᠠᠭᠤ ᠠᠮᠢ ᠶᠠᠭᠤ ᠯᠠ ᠭᠡᠵᠦ ᠳᠡ》 ᠭᠡᠵᠦ ᠵᠥᠷᠢᠭᠦᠳᠯᠡᠪᠡ᠃
ᠭᠠᠪᠢᠷᠠ ᠵᠣᠪᠠᠭᠰᠠᠭᠠᠷ ᠪᠠᠢᠵᠤ ᠨᠣᠢᠷ ᠬᠣᠭᠣᠯᠠᠨ ᠠ᠋ᠴᠠ ᠪᠠᠨ ᠴᠤ᠌ ᠭᠠᠷᠴᠤ᠂ ᠬᠤᠵᠢᠢᠵᠤ ᠰᠢᠪᠬᠠᠢᠭᠠᠳ ᠬᠡᠳᠦᠬᠡᠨ ᠡᠳᠦᠷ ᠳᠣᠲᠣᠷᠠ ᠦᠯᠢᠶᠡᠬᠦ ᠳ᠋ᠦ᠍ ᠤᠨᠠᠮᠠᠷ ᠡᠴᠡᠵᠦ ᠲᠤᠷᠠᠵᠠᠢ᠃ ᠰᠢᠦᠢ ᠪᠠᠭᠰᠢ ᠶᠠᠭᠠᠬᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠤᠲᠠᠰᠤᠳᠠᠵᠤ ᠪᠠᠢᠳᠠᠯ ᠢ᠋ ᠮᠡᠳᠡᠭᠳᠡᠪᠡ᠃ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠴᠢᠯᠠᠭᠤᠨ
— ᠮᠥᠩᠭᠥ ᠵᠠᠷᠤᠳᠠᠯ ᠢ᠋ ᠬᠠᠮᠢᠶᠠᠷᠬᠤ ᠬᠡᠷᠡᠭ ᠦᠭᠡᠢ᠂ ᠬᠥᠮᠦᠨ ᠢ᠋ᠶ᠋ᠡᠨ ᠠᠪᠤᠷᠠᠬᠤ ᠶ᠋ᠢ ᠪᠣᠳᠣᠵᠤ ᠲᠦᠷᠭᠡᠯᠡᠵᠦ ᠦᠵᠡ᠃ ᠡᠳᠦᠢ ᠪᠣᠯᠲᠠᠯᠠ ᠡᠮᠨᠡᠯᠭᠡ ᠳ᠋ᠦ᠍ ᠣᠷᠣᠭᠤᠯᠵᠤ ᠴᠢᠳᠠᠭᠠ ᠦᠭᠡᠢ ᠭᠡᠳᠡᠭ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ! ᠴᠢᠮᠠ ᠶ᠋ᠢ ᠶᠠᠭᠤ ᠭᠡᠵᠦ ᠲᠡᠳᠡᠨ ᠲᠡᠢ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ? ᠭᠡᠵᠦ ᠭᠡᠳᠡᠷᠭᠦ ᠪᠡᠨ ᠰᠢᠦᠢ ᠪᠠᠭᠰᠢ ᠶ᠋ᠢ ᠵᠢᠮᠡᠯᠡᠵᠡᠢ᠃
ᠲᠡᠭᠡᠭᠡᠳ ᠳᠤᠮᠳᠠᠳᠤ ᠶᠠᠫᠣᠨ ᠤ᠋ ᠬᠣᠷᠰᠢᠭᠰᠠᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠳ᠋ᠤ᠌ ᠣᠷᠣᠯᠠ᠃ ᠡᠮᠨᠡᠯᠭᠡ ᠳ᠋ᠦ᠍ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ ᠡᠪᠡᠳᠴᠢᠨ ᠳ᠋ᠦ᠍ᠨᠢ ᠲᠣᠬᠢᠷᠠᠭᠤᠯᠤᠨ ᠵᠡᠭᠦᠦ ᠲᠠᠷᠢᠯᠭᠠ᠂ ᠰᠤᠳᠠᠯ ᠤ᠋ᠨ ᠰᠢᠩᠭᠡᠨ ᠶᠡᠭᠦᠯᠡᠭᠰᠡᠨ ᠡᠴᠡ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠤᠤᠯ ᠤ᠋ᠨ ᠬᠢᠨᠢ ᠵᠠᠯᠠᠭᠤ ᠴᠢᠭᠢᠷᠠᠭ ᠪᠡᠶᠡ ᠶ᠋ᠢᠨ ᠡᠰᠡᠷᠭᠦᠴᠡᠬᠦ ᠴᠢᠳᠠᠪᠤᠷᠢ ᠳᠡᠭᠡᠭᠰᠢᠯᠡᠭᠰᠡᠨ ᠡᠴᠡ ᠭᠡᠳᠡᠰᠦ ᠨᠢ ᠠᠷᠤ ᠨᠢᠷᠤᠭᠤ ᠲᠠᠢ ᠪᠠᠨ ᠨᠠᠭᠠᠯᠳᠤᠮᠠᠷ ᠪᠠᠢᠭᠰᠠᠨ ᠪᠠᠢᠳᠠᠯ ᠲᠤᠩ ᠲᠦᠷᠭᠡᠨ ᠡᠷᠭᠢᠯᠲᠡ ᠭᠠᠷᠴᠤ᠂ ᠰᠢᠩᠭᠡᠨ ᠬᠥᠩᠭᠡᠨ ᠬᠣᠭᠣᠯᠠ ᠶ᠋ᠢ ᠴᠦ᠍ ᠢᠳᠡᠬᠦ ᠪᠣᠯᠤᠭᠰᠠᠨ ᠠ᠋ᠴᠠ ᠶᠡᠬᠡ ᠬᠤᠷᠳᠤᠨ ᠲᠡᠩᠬᠡᠷᠡᠨ ᠰᠠᠢᠵᠢᠷᠠᠵᠤ ᠪᠠᠢᠯᠠ᠃
ᠴᠡᠭᠡᠵᠢᠨ ᠰᠠᠯᠠᠭᠠᠨ ᠤ᠋ ᠵᠣᠣ ᠣᠪᠣᠭ ᠲᠠᠢ ᠡᠷᠬᠢᠯᠡᠭᠴᠢ ᠡᠮᠴᠢ ᠶ᠋ᠢ ᠭᠠᠷᠭᠠᠪᠠᠯ᠂ ᠶᠠᠫᠣᠨ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠲᠡᠨᠳᠡ ᠣᠯᠠᠨ ᠵᠢᠯ ᠠᠵᠢᠯᠯᠠᠭᠰᠠᠨ ᠱᠢ ᠣᠪᠣᠭ ᠲᠠᠢ ᠨᠢᠭᠡᠨ ᠨᠡᠷᠡᠲᠦ ᠫᠷᠣᠹᠧᠰᠰᠣᠷ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠶᠡᠬᠡ ᠨᠡᠷᠡ ᠠᠯᠳᠠᠷ ᠲᠠᠢ ᠮᠡᠷᠭᠡᠵᠢᠯ ᠥᠨᠳᠥᠷ ᠡᠮᠴᠢ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠭᠠᠷᠠᠭ ᠲᠤ᠌ ᠬᠣᠶᠠᠷᠬᠠᠨ ᠤᠳᠠᠭᠠ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠡᠪᠡᠳᠴᠢᠨ ᠦᠵᠡᠳᠡᠭ ᠪᠥᠭᠡᠳ ᠬᠠᠭᠠᠰ ᠰᠠᠷᠠ ᠳ᠋ᠤ᠌ ᠭᠠᠭᠴᠠ ᠤᠳᠠᠭᠠ ᠯᠠ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠭᠠᠷᠳᠠᠨ ᠮᠡᠰᠡ ᠵᠠᠰᠠᠯ ᠬᠢᠳᠡᠭ ᠪᠠᠢᠯᠠ᠃ ᠭᠠᠪᠢᠷᠠ᠂ ᠱᠢ ᠫᠷᠣᠹᠧᠰᠰᠣᠷ ᠤ᠋ᠨ ᠳ᠋ᠤᠭᠠᠷ ᠢ᠋ ᠣᠯᠬᠤ ᠭᠡᠵᠦ ᠲᠠᠪᠤᠨ ᠰᠥᠨᠢ ᠳᠠᠷᠠᠭᠠᠯᠠᠨ ᠵᠣᠭᠰᠣᠵᠤ ᠪᠠᠢᠵᠤ ᠳᠥᠩᠭᠡᠵᠦ ᠣᠯᠤᠯᠠ᠃ ᠱᠢ ᠫᠷᠣᠹᠧᠰᠰᠣᠷ ᠨᠡᠭᠡᠷᠡᠨ ᠴᠦ᠍ ᠬᠣᠭᠣᠰᠣᠨ ᠨᠡᠷᠡ ᠭᠠᠷᠤᠭᠰᠠᠨ ᠦᠭᠡᠢ᠃ ᠡᠪᠡᠳᠴᠢᠨ ᠣᠨᠣᠰᠢᠯᠠᠬᠤ ᠮᠡᠷᠭᠡᠵᠢᠯ᠂ ᠪᠤᠰᠤᠳ ᠲᠠᠢ ᠬᠠᠷᠢᠯᠴᠠᠬᠤ ᠣᠪᠣᠷ ᠪᠠᠢᠳᠠᠯ᠂ ᠦᠭᠡ ᠶᠠᠷᠢᠶᠠ ᠠ᠋ᠴᠠ ᠡᠬᠢᠯᠡᠨ ᠠᠰᠤᠷᠤ ᠥᠨᠳᠥᠷ ᠪᠣᠯᠪᠠᠰᠤᠷᠠᠯ ᠲᠠᠢ ᠬᠥᠮᠦᠨ ᠭᠡᠳᠡᠭ ᠢ᠋ ᠦᠵᠡᠵᠦ ᠭᠠᠷᠤᠨᠠ᠃ ᠱᠢ ᠫᠷᠣᠹᠧᠰᠰᠣᠷ ᠭᠠᠪᠢᠷᠠ ᠳ᠋ᠤ᠌
— ᠲᠠᠨ ᠤ᠋ ᠨᠥᠬᠥᠷ ᠦ᠋ᠨ ᠡᠪᠡᠳᠴᠢᠨ ᠪᠣᠯ A ᠬᠡᠯᠪᠡᠷᠢ ᠶ᠋ᠢᠨ ᠬᠣᠣᠷᠲᠤ ᠬᠠᠪᠤᠳᠠᠷ᠂ ᠨᠢᠭᠡᠨᠲᠡ ᠰᠡᠭᠦᠯᠴᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠭᠡᠪᠡᠴᠦ ᠨᠠᠰᠤ ᠵᠠᠯᠠᠭᠤ᠂ ᠪᠤᠰᠤᠳ ᠡᠪᠡᠳᠴᠢᠨ ᠭᠡᠮ ᠦᠭᠡᠢ ᠪᠣᠯᠬᠣᠷ ᠮᠡᠰᠡ ᠵᠠᠰᠠᠯ ᠬᠢᠭᠰᠡᠨ ᠴᠦ᠍ ᠪᠣᠯᠤᠨᠠ᠃ ᠬᠡᠷᠪᠡ ᠮᠡᠰᠡ ᠵᠠᠰᠠᠯ ᠠᠮᠵᠢᠯᠲᠠ ᠣᠯᠬᠤ ᠳ᠋ᠤ᠌ ᠬᠦᠷᠪᠡᠯ ᠬᠣᠶᠠᠷ ᠠ᠋ᠴᠠ ᠭᠤᠷᠪᠠᠨ ᠰᠠᠷᠠ ᠠᠮᠢᠳᠤᠷᠠᠵᠤ ᠳᠡᠢᠯᠬᠦ ᠪᠣᠯᠤᠯᠴᠠᠭᠠ ᠲᠠᠢ᠃ ᠮᠡᠰᠡ ᠵᠠᠰᠠᠯ ᠢᠯᠠᠭᠳᠠᠪᠠᠯ ᠮᠡᠰᠡ ᠵᠠᠰᠠᠯ ᠤ᠋ᠨ ᠲᠠᠢᠰᠠᠨ ᠠ᠋ᠴᠠ ᠪᠠᠭᠤᠵᠤ ᠳᠡᠢᠯᠬᠦ ᠦᠭᠡᠢ ᠴᠦ᠍ ᠮᠠᠭᠠᠳ᠃ ᠬᠣᠣᠷᠲᠤ ᠬᠠᠪᠤᠳᠠᠷ ᠤᠯᠠᠭᠠᠨ ᠬᠣᠭᠣᠯᠠᠢ ᠶ᠋ᠢᠨ ᠳᠡᠭᠡᠳᠦ ᠳᠤᠮᠳᠠ ᠬᠡᠰᠡᠭ ᠲᠦ᠍ ᠪᠠᠢᠵᠤ᠂ 15 ᠰᠡᠨᠲ᠋ᠢᠮᠧᠲᠷ ᠤᠷᠲᠤ᠂ ᠮᠡᠰᠡ ᠵᠠᠰᠠᠯ ᠳ᠋ᠤ᠌ ᠤᠯᠠᠭᠠᠨ ᠬᠣᠭᠣᠯᠠᠢ ᠠ᠋ᠴᠠ16 ᠰᠡᠨᠲ᠋ᠢᠮᠧᠲᠷ ᠣᠭᠲᠣᠯᠤᠨ ᠠᠪᠴᠤ᠂ ᠬᠣᠳᠣᠭᠣᠳᠣᠨ ᠤ᠋ ᠭᠤᠷᠪᠠᠨ ᠤ᠋ ᠬᠣᠶᠠᠷ ᠢ᠋ ᠴᠡᠭᠡᠵᠢᠨ ᠦ᠌ ᠬᠥᠨᠳᠡᠢ ᠳ᠋ᠦ᠍ ᠣᠷᠣᠭᠤᠯᠤᠨ ᠵᠠᠯᠭᠠᠬᠤ ᠪᠣᠯᠤᠨᠠ᠃ ᠠᠭᠤᠰᠬᠢ ᠵᠢᠷᠦᠬᠡᠨ ᠦ᠌ ᠲᠣᠮᠣ ᠰᠤᠳᠠᠯ ᠲᠠᠢ ᠣᠢᠷᠠ ᠪᠣᠯᠬᠣᠷ ᠠᠶᠤᠯ ᠲᠦᠭᠰᠢᠭᠦᠷᠢ ᠶᠡᠬᠡ᠃ ᠮᠡᠰᠡ ᠵᠠᠰᠠᠯ ᠠᠮᠵᠢᠯᠲᠠ ᠣᠯᠬᠤ ᠪᠣᠯᠤᠮᠵᠢ ᠲᠤᠩ ᠪᠠᠭᠠ᠃ ᠬᠡᠷᠪᠡ ᠮᠡᠰᠡ ᠵᠠᠰᠠᠯ ᠬᠢᠯᠭᠡᠶᠡ ᠭᠡᠪᠡᠯ ᠢᠷᠡᠬᠦ ᠭᠠᠷᠠᠭ ᠲᠤ᠌ ᠮᠢᠨᠦ ᠡᠭᠡᠯᠵᠢᠨ ᠳ᠋ᠦ᠍ ᠲᠣᠬᠢᠶᠠᠪᠠᠯ ᠵᠦᠭᠡᠷ ᠶᠤᠮᠰᠠᠨ᠃ ᠳ᠋ᠤᠭᠠᠷ ᠣᠯᠬᠤ ᠳ᠋ᠤ᠌ ᠶᠡᠬᠡ ᠬᠦᠴᠢᠷ ᠪᠠᠢᠳᠠᠭ ᠶᠤᠮ ᠭᠡᠯᠡ᠃
ᠭᠠᠪᠢᠷᠠ ᠳ᠋ᠤ᠌᠂ ᠡᠮᠴᠢ ᠶ᠋ᠢᠨ ᠬᠢᠭᠰᠡᠨ ᠡᠨᠡᠬᠦ ᠣᠨᠣᠰᠢᠯᠠᠯᠲᠠ ᠦᠨᠡᠬᠡᠷ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠨᠢ ᠤᠷᠢᠵᠤ ᠲᠠᠰᠤᠴᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠢᠨᠠᠯᠭᠠᠵᠤ᠂ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠦᠨ ᠪᠠᠢᠵᠤ᠂
— ᠮᠢᠩᠭᠠᠨ ᠤ᠋ ᠨᠢᠭᠡ ᠶ᠋ᠢᠨ ᠡᠷᠡᠮᠡᠯᠵᠡᠯ ᠲᠠᠢ ᠯᠠ ᠪᠣᠯ ᠪᠢ ᠵᠠᠪᠠᠯ ᠲᠤᠷᠰᠢᠵᠤ ᠦᠵᠡᠨᠡ᠃ ᠬᠠᠷᠠᠵᠤ ᠪᠠᠢᠭᠠᠳ ᠥᠯᠪᠡᠷᠦᠭᠦᠯᠵᠦ ᠦᠬᠦᠭᠦᠯᠦᠭᠰᠡᠨ ᠡᠴᠡ ᠶᠠᠭᠠᠬᠢᠪᠠᠴᠤ ᠳᠡᠭᠡᠷᠡ ᠪᠠᠢᠯᠭᠦᠢ ᠭᠡᠵᠦ ᠴᠥᠬᠦᠷᠡᠩᠭᠦᠢ ᠮᠥᠷᠲᠡᠭᠡᠨ ᠡᠷᠡᠰ ᠰᠢᠭᠤᠷᠬᠠᠢ ᠬᠠᠷᠢᠭᠤᠯᠤᠨᠠ᠃ ᠱᠢ ᠫᠷᠣᠹᠧᠰᠰᠣᠷ
— ᠲᠡᠭᠡᠪᠡᠯ ᠮᠡᠰᠡ ᠵᠠᠰᠠᠯ ᠢ᠋ ᠳᠠᠷᠠᠭᠠ ᠭᠠᠷᠠᠭ ᠲᠤ᠌ ᠲᠣᠬᠢᠷᠠᠭᠤᠯᠤᠶᠠ᠃ ᠬᠡᠷᠪᠡ ᠴᠢ ᠮᠢᠨᠦ ᠳ᠋ᠤᠭᠠᠷ ᠢ᠋ ᠣᠯᠵᠤ ᠳᠡᠢᠯᠬᠦ ᠳ᠋ᠦ᠍ ᠬᠦᠷᠪᠡᠯ᠂ ᠮᠡᠰᠡ ᠵᠠᠰᠠᠯ ᠢ᠋ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠭᠠᠷᠳᠠᠵᠤ ᠬᠢᠨᠡ ᠭᠡᠪᠡ᠃ ᠲᠡᠭᠡᠭᠡᠳ ᠡᠨᠡᠬᠦ ᠡᠷᠡᠰ ᠬᠠᠳᠠᠨ ᠵᠣᠷᠢᠭ ᠲᠠᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠶ᠋ᠢ ᠪᠢᠰᠢᠷᠡᠩᠭᠦᠢ ᠮᠥᠷᠲᠡᠭᠡᠨ ᠬᠠᠷᠠᠮᠰᠠᠩᠭᠤᠢ ᠬᠠᠷᠠᠴᠠ ᠪᠠᠷ ᠰᠢᠷᠲᠡᠵᠦ《ᠢᠷᠡᠬᠦ ᠭᠠᠷᠠᠭ ᠠᠭᠤᠯᠵᠠᠶᠠ》 ᠭᠡᠯᠡ᠃
ᠭᠠᠪᠢᠷᠠ ᠰᠢᠦᠢ ᠪᠠᠭᠰᠢ ᠬᠣᠶᠠᠷ ᠡᠮᠦᠨᠡ ᠡᠳᠦᠷ ᠦ᠋ᠨ ᠬᠢᠨᠢ ᠦᠳᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠡᠬᠢᠯᠡᠨ ᠳ᠋ᠤᠭᠠᠷ ᠬᠤᠳᠠᠯᠳᠤᠬᠤ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠡᠭᠡᠯᠵᠢᠯᠡᠨ ᠵᠣᠭᠰᠣᠵᠤ᠂ ᠣᠷᠣᠢ ᠶ᠋ᠢᠨ ᠠᠷᠪᠠᠨ ᠴᠠᠭ ᠠ᠋ᠴᠠ ᠭᠠᠪᠢᠷᠠ ᠦᠯᠡᠳᠡᠬᠦ ᠪᠡᠷ ᠪᠣᠯᠪᠠ᠃ ᠰᠥᠨᠢᠵᠢᠨ ᠡᠨᠳᠡ ᠰᠠᠬᠢᠨ ᠵᠣᠭᠰᠣᠮᠠᠨᠵᠢᠨ ᠰᠠᠶᠢ ᠱᠢ ᠫᠷᠣᠹᠧᠰᠰᠣᠷ ᠤ᠋ᠨ ᠭᠠᠷᠠᠭ ᠲᠤ᠌ ᠭᠠᠭᠴᠠ ᠤᠳᠠᠭᠠ ᠮᠡᠰᠡ ᠵᠠᠰᠠᠯ ᠳ᠋ᠤ᠌ ᠣᠷᠣᠯᠴᠠᠳᠠᠭ ᠳ᠋ᠤᠭᠠᠷ ᠢ᠋ ᠣᠯᠵᠤ ᠴᠢᠳᠠᠨᠠ᠃ ᠪᠦᠭᠦᠳᠡ ᠲᠠᠪᠤᠨ ᠳ᠋ᠤᠭᠠᠷ ᠬᠤᠳᠠᠯᠳᠤᠳᠠᠭ ᠪᠠᠢᠯᠠ᠃ ᠨᠥᠬᠥᠷ ᠢ᠋ᠶ᠋ᠡᠨ ᠢᠯᠡᠭᠦᠦ ᠬᠡᠳᠦᠨ ᠡᠳᠦᠷ ᠠᠮᠢᠳᠤᠷᠠᠭᠤᠯᠵᠤ ᠴᠢᠳᠠᠬᠤ ᠡᠰᠡᠬᠦ᠂ ᠮᠢᠩᠭᠠᠨ ᠤ᠋ ᠨᠢᠭᠡ ᠶ᠋ᠢᠨ ᠡᠷᠡᠮᠡᠯᠵᠡᠯ ᠪᠦᠲᠦᠬᠦ ᠡᠰᠡᠬᠦ ᠡᠨᠡ ᠤᠳᠠᠭᠠ ᠳ᠋ᠤ᠌ ᠯᠠ ᠪᠣᠢ᠃ ᠲᠡᠷᠡ ᠬᠡᠳᠦᠨ ᠰᠣᠨᠢᠨ ᠳᠠᠪᠬᠤᠷᠯᠠᠨ ᠳᠡᠪᠢᠰᠦᠭᠡᠳ᠂ ᠴᠣᠩᠬᠣᠨ ᠤ᠋ ᠳᠣᠣᠷᠠᠬᠢ ᠬᠡᠷᠡᠮ ᠢ᠋ ᠲᠦᠰᠢᠨ ᠰᠠᠭᠤᠨᠠ᠃ ᠣᠯᠠᠨ ᠬᠣᠨᠣᠭ ᠰᠡᠳᠬᠢᠯ ᠢ᠋ᠶ᠋ᠡᠷ ᠰᠢᠨᠠᠯᠵᠤ ᠶᠠᠪᠤᠭᠰᠠᠨ ᠠ᠋ᠴᠠ ᠴᠢᠷᠠᠢ ᠨᠢ ᠬᠤᠵᠢᠢᠨ ᠰᠢᠷᠠᠯᠠᠵᠤ᠂ ᠤᠷᠤᠭᠤᠯ ᠨᠢ ᠣᠮᠣᠭᠣᠯᠲᠤᠨ ᠬᠠᠲᠠᠵᠤ᠂ ᠬᠤᠷᠴᠠ ᠰᠡᠷᠭᠦᠯᠡᠩ ᠭᠡᠷᠡᠯ ᠭᠢᠯᠠᠯᠵᠠᠵᠤ ᠪᠠᠢᠳᠠᠭ ᠪᠣᠷᠣ ᠨᠢᠳᠦᠨ ᠳ᠋ᠦ᠍ᠨᠢ ᠭᠤᠨᠢᠭ ᠪᠣᠳᠣᠯᠭᠠᠰᠢᠷᠠᠯ ᠤ᠋ᠨ ᠮᠠᠨᠠᠨ ᠲᠠᠲᠠᠨᠠ᠃ ᠬᠦᠯᠢᠶᠡᠬᠦ ᠳ᠋ᠦ᠍ ᠴᠠᠭ ᠳᠠᠩᠴᠤ ᠥᠩᠭᠡᠷᠡᠵᠦ ᠥᠭᠬᠦ ᠦᠭᠡᠢ ᠪᠠᠴᠢᠮᠳᠠᠭᠤᠯᠤᠨᠠ᠃ ᠥᠷᠯᠥᠭᠡᠨ ᠦ᠌ ᠨᠠᠢ᠍ᠮᠠᠨ ᠴᠠᠭ ᠬᠠᠭᠠᠰ ᠪᠣᠯᠲᠠᠯᠠ ᠪᠠᠰᠠ ᠵᠢᠷᠭᠤᠭᠠᠨ ᠴᠠᠭ ᠭᠠᠷᠤᠢ ᠶ᠋ᠢᠨ ᠵᠠᠢ ᠲᠠᠢ᠃ ᠭᠡᠪᠡᠴᠦ ᠲᠡᠷᠡ ᠨᠡᠯᠢᠶᠡᠳ ᠰᠡᠳᠬᠢᠯ ᠲᠠᠯᠪᠢᠭᠤᠨ ᠪᠠᠢᠯᠠ᠃ ᠲᠡᠷᠡ ᠬᠠᠮᠤᠭ ᠲᠡᠷᠢᠭᠦᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠭᠠ ᠪᠣᠯᠬᠣᠷ ᠭᠠᠷᠠᠭ ᠲᠤ᠌ ᠭᠠᠭᠴᠠ ᠣᠯᠳᠠᠳᠠᠭ ᠡᠨᠡᠬᠦ ᠨᠠᠨᠳᠢᠨ ᠳ᠋ᠤᠭᠠᠷ ᠣᠳᠣ ᠭᠠᠷᠴᠠᠭᠠ ᠦᠭᠡᠢ ᠲᠡᠭᠦᠨ ᠦ᠌ ᠬᠢ ᠪᠣᠯᠤᠭᠰᠠᠨ ᠭᠡᠳᠡᠭ ᠲᠦ᠍ ᠡᠷᠡᠭᠡᠯᠵᠡᠬᠦ ᠬᠡᠷᠡᠭ ᠦᠭᠡᠢ ᠶᠦᠮ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠴᠠᠭ ᠪᠣᠯᠵᠤ ᠳ᠋ᠤᠭᠠᠷ ᠬᠤᠳᠠᠯᠳᠤᠭᠴᠢ ᠣᠷᠣᠵᠤ ᠢᠷᠡᠯᠡ᠃《ᠭᠠᠳᠠᠷ ᠰᠠᠯᠠᠭᠠᠨ ᠤ᠋ ᠱᠢ ᠫᠷᠣᠹᠧᠰᠰᠣᠷ ᠤ᠋ᠨ ᠳ᠋ᠤᠭᠠᠷ ᠢ᠋ ᠠᠪᠤᠶᠠ》 ᠭᠡᠳ ᠮᠥᠩᠭᠥ ᠠᠳᠬᠤᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠴᠡᠴᠡᠷᠡᠭᠦᠯᠦᠨ ᠰᠤᠩᠭᠠᠪᠠ᠃ ᠨᠥᠭᠦᠭᠡ ᠳ᠋ᠤᠭᠠᠷ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠦ᠌ ᠠᠳᠬᠤᠨ ᠳ᠋ᠤ᠌ ᠪᠠᠲᠤᠯᠠᠭᠠ ᠲᠠᠢ ᠠᠳᠬᠤᠭᠳᠠᠪᠠ᠃
ᠳ᠋ᠤᠭᠠᠷᠯᠠᠬᠤ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠡᠴᠡ ᠬᠣᠯᠠᠳᠤᠨ ᠨᠥᠭᠦᠭᠡ ᠳ᠋ᠤᠭᠠᠷ ᠢ᠋ᠶ᠋ᠡᠨ ᠳᠠᠬᠢᠨ ᠳᠠᠪᠲᠠᠨ ᠳᠡᠯᠭᠡᠵᠦ ᠦᠵᠡᠨᠡ᠃ ᠲᠡᠷᠡ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠦᠰᠦᠷᠦᠨ ᠳᠡᠭᠳᠡᠵᠦ ᠴᠠᠬᠢᠯᠭᠠᠨ ᠱᠠᠲᠤᠨ ᠳ᠋ᠤ᠌ ᠭᠠᠷᠬᠤ ᠪᠠᠨ ᠴᠤ᠌ ᠮᠠᠷᠲᠠᠵᠤ᠂ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠳᠠᠪᠬᠤᠷ ᠤᠷᠤᠭᠤ ᠠᠰᠠᠷ ᠤ᠋ᠨ ᠱᠠᠲᠤ ᠶ᠋ᠢ ᠬᠡᠳᠦ ᠬᠡᠳᠦ ᠪᠡᠷ ᠠᠯᠤᠰᠯᠠᠨ ᠭᠢᠰᠬᠢᠭᠰᠡᠭᠡᠷ ᠭᠦᠶᠦᠵᠦ ᠪᠠᠢᠯᠠ᠃ ᠡᠨᠡᠬᠦ ᠲᠤᠩ ᠬᠦᠴᠢᠷᠳᠡᠵᠦ ᠪᠠᠢᠵᠤ ᠣᠯᠤᠭᠰᠠᠨ ᠬᠤᠷᠤᠭᠤ ᠬᠢᠷᠢᠲᠡᠢ ᠨᠠᠨᠳᠢᠨ ᠴᠠᠭᠠᠰᠤ ᠲᠡᠭᠦᠨ ᠳ᠋ᠦ᠍ ᠭᠠᠢᠬᠠᠮᠰᠢᠭ ᠢ᠋ ᠠᠪᠴᠢᠷᠠᠵᠤ ᠴᠤ᠌ ᠮᠡᠳᠡᠨᠡ᠃ ᠠᠵᠠ ᠲᠠᠭᠠᠷᠠᠪᠠᠯ ᠬᠠᠢᠷᠠᠲᠤ ᠬᠠᠨᠢ ᠲᠠᠢ ᠪᠠᠨ ᠢᠯᠡᠭᠦᠦ ᠬᠡᠳᠦᠨ ᠡᠳᠦᠷ ᠬᠠᠮᠲᠤ ᠪᠠᠢᠵᠤ ᠴᠢᠳᠠᠨᠠ᠃ ᠬᠡᠳᠦᠨ ᠰᠠᠷᠠ᠂ ᠬᠡᠳᠦᠨ ᠵᠢᠯ ᠴᠦ᠍ ᠪᠠᠢᠵᠤ ᠪᠣᠯᠬᠤ ᠰᠠᠨ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠢᠭᠠ ᠥᠷᠥᠭᠡᠨ ᠳ᠋ᠦ᠍ ᠢᠨᠢᠶᠡᠳᠦ ᠠᠯᠲᠠᠨ ᠴᠢᠷᠠᠢᠯᠠᠭᠰᠠᠭᠠᠷ ᠠᠮᠢᠰᠬᠤᠯ ᠳᠦᠭᠦᠷᠬᠦ ᠳ᠋ᠡᠭᠡᠨ ᠴᠡᠭᠡᠵᠢ ᠪᠡᠨ ᠭᠦᠳᠦᠯᠵᠡᠭᠦᠯᠦᠨ ᠠᠮᠢᠰᠬᠤᠭᠠᠳᠠᠵᠤ
— ᠱᠢ ᠫᠷᠣᠹᠧᠰᠰᠣᠷ ᠤ᠋ᠨ ᠳ᠋ᠤᠭᠠᠷ ᠢ᠋ ᠣᠯᠴᠢᠬᠠᠯᠠ᠃ ᠡᠭᠦᠨ ᠢ᠋ ᠬᠠᠷᠠ ᠳᠠ ᠭᠡᠳ ᠨᠥᠭᠦᠭᠡ ᠳ᠋ᠤᠭᠠᠷ ᠢ᠋ᠶ᠋ᠡᠨ ᠬᠤᠷᠤᠢᠯᠠᠪᠠ᠃ ᠰᠠᠢᠰᠢᠶᠠᠯᠲᠤ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠪᠬᠢ ᠨᠢ ᠬᠥᠬᠡᠷᠡᠨ ᠬᠣᠩᠬᠣᠢᠭᠰᠠᠨ ᠨᠢᠳᠦ ᠶ᠋ᠢ ᠰᠢᠷᠲᠡᠵᠦ
— ᠰᠠᠢᠨ ᠪᠣᠯᠤᠯᠠ᠂ ᠣᠳᠣ ᠪᠠᠭᠤᠳᠠᠯ ᠳ᠋ᠠᠭᠠᠨ ᠬᠠᠷᠢᠭᠠᠳ ᠲᠦᠷ ᠴᠦ᠍ ᠭᠡᠰᠡᠨ ᠤᠨᠲᠠᠭᠠᠳ ᠠᠪ᠂ ᠴᠢᠮᠠ ᠶ᠋ᠢ ᠪᠡᠨ ᠶᠣᠰᠣᠲᠠᠢ ᠴᠤ᠌ ᠵᠦᠳᠡᠭᠡᠵᠦ ᠭᠦᠢᠴᠡᠯᠡ᠃ ᠬᠤᠷᠳᠤᠨ ᠶᠠᠪᠤᠵᠤ ᠤᠨᠲᠠ᠂ ᠡᠨᠳᠡ ᠰᠢᠦᠢ ᠪᠠᠭᠰᠢ ᠪᠠᠢᠭᠠ ᠶᠤᠮ ᠴᠢᠨᠢ ᠭᠡᠨᠡ᠃
ᠭᠤᠷᠪᠠᠳᠠᠬᠢ ᠡᠳᠦᠷ ᠲᠦ᠍ ᠰᠠᠢᠰᠢᠶᠠᠯᠲᠤ ᠶ᠋ᠢ ᠮᠡᠰᠡ ᠵᠠᠰᠠᠯ ᠤ᠋ᠨ ᠲᠠᠰᠤᠭ ᠲᠤ᠌ ᠠᠪᠴᠤ ᠣᠷᠣᠯᠠ᠃ ᠬᠦᠷᠳᠦᠲᠦ ᠣᠷᠣᠨ ᠳᠡᠭᠡᠷᠡ ᠬᠡᠪᠲᠡᠭᠦᠯᠦᠨ ᠲᠦᠯᠬᠢᠵᠦ ᠶᠠᠪᠤᠬᠤ ᠳ᠋ᠤ᠌ ᠭᠠᠪᠢᠷᠠ ᠬᠠᠵᠠᠭᠤ ᠳ᠋ᠤᠨᠢ ᠳᠠᠭᠠᠨ ᠮᠡᠰᠡ ᠵᠠᠰᠠᠯ ᠤ᠋ᠨ ᠲᠠᠰᠤᠭ ᠲᠤ᠌ ᠣᠷᠣᠭᠤᠯᠤᠯᠠ᠃ ᠲᠡᠷᠡ ᠰᠠᠶᠢᠬᠠᠨ ᠡᠮᠴᠢ ᠨᠠᠷ ᠤ᠋ᠨ ᠭᠡᠷ ᠲᠦ᠍ ᠴᠡᠴᠡᠷᠬᠢᠯᠡᠭᠰᠡᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠪᠠ᠃ 《ᠮᠡᠰᠡ ᠵᠠᠰᠠᠯ ᠠᠮᠵᠢᠯᠲᠠ ᠣᠯᠬᠤ ᠪᠣᠯᠤᠮᠵᠢ ᠲᠤᠩ ᠴᠤ᠌ ᠪᠠᠭᠠ᠂ ᠴᠢ ᠦᠵᠡᠯ ᠰᠠᠨᠠᠭᠠᠨ ᠤ᠋ ᠪᠡᠯᠡᠳᠬᠡᠯ ᠲᠡᠢ ᠪᠠᠢᠬᠤ ᠬᠡᠷᠡᠭᠲᠡᠢ》 ᠭᠡᠰᠡᠨ ᠡᠮᠴᠢ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠴᠡᠭᠡᠵᠢ ᠬᠠᠷᠠᠩᠭᠤᠢᠯᠠᠨ ᠪᠡᠭᠲᠡᠷᠡᠵᠦ ᠪᠠᠢᠯᠠ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠭᠰᠡᠨ ᠨᠢᠳᠦ ᠪᠡᠷ ᠰᠢᠷᠳᠡᠨ ᠠᠮᠢᠳᠤ ᠰᠡᠷᠡᠭᠦᠨ ᠦᠶᠡ ᠶ᠋ᠢ ᠨᠢ ᠡᠴᠦᠰ ᠦ᠋ᠨ ᠤᠳᠠᠭᠠ ᠬᠠᠷᠠᠵᠤ ᠪᠠᠢᠭᠠ ᠮᠠᠨᠢ ᠡᠨᠡ ᠪᠣᠯ ᠤᠤ? ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠳᠠᠭᠤ ᠲᠠᠯᠪᠢᠨ ᠤᠬᠢᠯᠠᠮᠠᠷ ᠰᠠᠨᠠᠭᠳᠠᠪᠠᠴᠤ ᠠᠯᠢ ᠪᠣᠯᠬᠤ ᠪᠠᠷ ᠪᠡᠶᠡ ᠪᠡᠨ ᠪᠠᠷᠢᠵᠤ ᠵᠣᠷᠢᠭ ᠢ᠋ᠶ᠋ᠠᠨ ᠴᠢᠩᠭᠠᠯᠠᠨ ᠬᠠᠲᠠᠭᠤᠵᠢᠨᠠ᠃ ᠮᠡᠰᠡ ᠵᠠᠰᠠᠯ ᠤ᠋ᠨ ᠥᠷᠥᠭᠡᠨ ᠦ᠌ ᠡᠭᠦᠳᠡ ᠠᠯᠭᠤᠷᠬᠠᠨ ᠬᠠᠭᠠᠭᠳᠠᠵᠤ᠂ ᠤᠳᠠᠯ ᠦᠭᠡᠢ ᠳᠣᠬᠢᠶᠠᠨ ᠳ᠋ᠧᠩ ᠭᠡᠷᠡᠯᠲᠦᠪᠡ᠃
ᠭᠠᠪᠢᠷᠠ ᠂ ᠰᠢᠦᠢ ᠪᠠᠭᠰᠢ ᠳ᠋ᠤ᠌ ᠡᠮᠴᠢ ᠶ᠋ᠢᠨ ᠰᠠᠶᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠬᠡᠯᠡᠵᠦ ᠮᠡᠭᠰᠢᠨ ᠤᠬᠢᠯᠠᠪᠠ᠃ ᠰᠢᠦᠢ ᠪᠠᠭᠰᠢ ᠭᠠᠪᠢᠷᠠ ᠶ᠋ᠢ ᠲᠠᠢᠳᠬᠤᠷᠠᠭᠤᠯᠤᠨ
— ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠂ ᠱᠢ ᠮᠡᠷᠭᠡᠵᠢᠯᠲᠡᠨ ᠪᠣᠯ ᠶᠠᠫᠣᠨ ᠳ᠋ᠤ᠌ ᠠᠨᠠᠭᠠᠬᠤ ᠤᠬᠠᠭᠠᠨ ᠰᠤᠷᠤᠭᠰᠠᠨ ᠥᠨᠳᠥᠷ ᠮᠡᠷᠭᠡᠵᠢᠯ ᠲᠤᠷᠰᠢᠯᠭᠠ ᠲᠠᠢ ᠡᠮᠴᠢ ᠶᠦᠮ᠃ ᠶᠡᠷᠦᠨᠢ ᠡᠩ ᠦ᠋ᠨ ᠨᠢᠭᠡ ᠮᠡᠰᠡ ᠵᠠᠰᠠᠯ ᠤ᠋ᠨ ᠡᠮᠦᠨᠡ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠬᠤ ᠳ᠋ᠤ᠌ ᠴᠤ᠌ ᠪᠦᠷ ᠲᠡᠭᠡᠵᠦ ᠬᠡᠯᠡᠳᠡᠭ ᠶᠦᠮ ᠭᠡᠨᠡ᠃
ᠴᠠᠭ ᠥᠩᠭᠡᠷᠡᠭᠰᠡᠭᠡᠷ᠃ ᠮᠡᠰᠡ ᠵᠠᠰᠠᠯ ᠡᠬᠢᠯᠡᠭᠡᠳ ᠲᠠᠪᠤᠨ ᠴᠠᠭ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠬᠠᠨ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠯᠠ᠃ ᠴᠠᠭ ᠤᠳᠠᠬᠤ ᠲᠣᠰᠤᠮ ᠭᠠᠪᠢᠷᠠ ᠶ᠋ᠢᠨ ᠵᠢᠷᠦᠬᠡ ᠲᠦᠭᠰᠢᠨᠡ᠃ ᠲᠡᠷᠡᠬᠦ ᠴᠢᠩᠭᠠ ᠬᠠᠭᠠᠭᠳᠠᠭᠰᠠᠨ ᠡᠭᠦᠳᠡ ᠳᠠᠬᠢᠨ ᠨᠡᠭᠡᠭᠡᠭᠳᠡᠬᠦ ᠦᠶᠡ ᠳ᠋ᠦ᠍᠂ ᠪᠠᠶᠠᠷ ᠵᠣᠪᠠᠯᠠᠩ ᠤ᠋ᠨ ᠠᠯᠢᠨ ᠨᠢ ᠢᠷᠡᠬᠦ ᠶ᠋ᠢ ᠪᠦᠦ ᠮᠡᠳᠡ᠃ ᠲᠡᠷᠡ ᠨᠡᠭᠡᠭᠡᠭᠳᠡᠬᠦ ᠡᠭᠦᠳᠡᠨ ᠡᠴᠡ ᠭᠠᠪᠢᠷᠠ ᠭᠡᠳᠡᠷᠭᠦ ᠪᠡᠨ ᠬᠠᠷᠢᠨ ᠠᠶᠤᠵᠤ ᠪᠠᠢᠯᠠ᠃ ᠳᠠᠬᠢᠭᠠᠳ ᠴᠠᠭ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠤ᠋ ᠰᠡᠭᠦᠯᠡᠷ᠂ ᠱᠢ ᠫᠷᠣᠹᠧᠰᠰᠣᠷ ᠬᠠᠯᠵᠠᠨ ᠮᠠᠩᠨᠠᠢᠠ᠋ᠴᠠ ᠪᠠᠨ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠢᠯᠠᠭᠤᠯᠤᠨ ᠭᠠᠷᠴᠤ ᠢᠷᠡᠯᠡ᠃ ᠲᠡᠷᠡ ᠠᠮᠠᠪᠴᠢ ᠪᠠᠨ ᠠᠪᠴᠤ ᠪᠠᠶᠠᠷᠲᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠵᠦ
— ᠮᠡᠰᠡ ᠵᠠᠰᠠᠯ ᠰᠠᠨᠠᠭᠰᠠᠨᠠ᠋ᠴᠠ ᠭᠠᠳᠠᠭᠤᠷ ᠠᠮᠵᠢᠯᠲᠠ ᠲᠠᠢ ᠪᠣᠯᠤᠭᠰᠠᠨ᠂ ᠨᠡᠭᠡᠷᠡᠨ ᠭᠠᠢᠬᠠᠮᠠᠷ᠂ ᠣᠳᠣ ᠡᠷᠭᠢᠨ ᠲᠡᠩᠬᠡᠷᠡᠬᠦ ᠪᠠᠢᠳᠠᠯ ᠢ᠋ ᠦᠵᠡᠨᠡ᠃ ᠰᠢᠶᠣᠤ ᠰᠠᠢ ᠶ᠋ᠢ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠦ᠌ ᠭᠠᠭᠴᠠ ᠬᠥᠮᠦᠨ ᠦ᠌ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠭᠤᠯᠤᠨᠠ᠃ ᠭᠡᠷ ᠦ᠋ᠨ ᠬᠥᠮᠦᠰ ᠢ᠋ ᠣᠷᠣᠭᠤᠯᠳᠠᠭ ᠦᠭᠡᠢ ᠶᠦᠮ᠃ ᠲᠠᠨᠠᠷ ᠶᠠᠪᠤᠵᠤ ᠠᠮᠠᠷᠠᠵᠤ ᠪᠣᠯᠤᠨᠠ ᠭᠡᠯᠡ᠃ ᠭᠠᠪᠢᠷᠠ ᠪᠠᠭᠠ ᠴᠤ᠌ ᠭᠡᠰᠡᠨ ᠰᠡᠳᠬᠢᠯ ᠠᠭᠤᠵᠢᠷᠠᠨ᠂ ᠱᠢ ᠫᠷᠣᠹᠧᠰᠰᠣᠷ ᠲᠤ᠌ ᠳᠠᠬᠢᠨ ᠳᠠᠪᠲᠠᠨ ᠲᠠᠯᠠᠷᠬᠠᠯ ᠢᠯᠡᠳᠬᠡᠪᠡ᠃ ᠱᠢ ᠫᠷᠣᠹᠧᠰᠰᠣᠷ᠄
— ᠠᠶᠤᠯᠲᠤ ᠬᠤᠭᠤᠴᠠᠭᠠ ᠨᠢ ᠳᠣᠯᠣᠭᠠᠨ ᠬᠣᠨᠣᠭ᠂ ᠡᠨᠡ ᠳᠣᠯᠣᠭᠠᠨ ᠬᠣᠨᠣᠭ ᠢ᠋ ᠠᠵᠢᠭ ᠦᠭᠡᠢ ᠥᠩᠭᠡᠷᠡᠭᠡᠴᠢᠬᠡᠪᠡᠯ ᠬᠠᠮᠢᠶᠠ ᠦᠭᠡᠢ ᠪᠣᠯᠴᠢᠬᠠᠨᠠ ᠭᠡᠯᠡ᠃
ᠤᠳᠠᠭᠰᠠᠨ ᠦᠭᠡᠢ ᠰᠠᠢᠰᠢᠶᠠᠯᠲᠤ ᠶ᠋ᠢ ᠲᠦᠯᠬᠢᠨ ᠭᠠᠷᠴᠤ ᠢᠷᠡᠪᠡ᠃ ᠮᠢᠨᠴᠦᠭᠦᠷᠡᠭᠦᠯᠬᠦ ᠡᠮ ᠦ᠋ᠨ ᠬᠦᠴᠦᠨ ᠳ᠋ᠦ᠍ ᠤᠨᠲᠠᠭᠰᠠᠭᠠᠷ ᠪᠠᠢᠯᠠ᠃ ᠠᠮᠠ ᠬᠠᠮᠠᠷ ᠦᠭᠡᠢ ᠭᠤᠤᠷᠰᠤ ᠬᠠᠳᠬᠤᠵᠤ᠂ ᠰᠥᠪᠡᠭᠡᠨ ᠳ᠋ᠦ᠍ ᠨᠢ ᠪᠠᠰᠠ ᠨᠢᠭᠡ ᠭᠤᠤᠷᠰᠤ ᠬᠢᠵᠦ ᠲᠣᠮᠣ ᠯᠣᠩᠬᠣᠨ ᠳ᠋ᠤ᠌ ᠤᠯᠠᠭᠠᠨ ᠬᠦᠷᠡᠩ ᠰᠢᠭᠦᠰᠦ ᠳᠤᠰᠤᠭᠠᠨ᠂ ᠬᠣᠶᠠᠷ ᠬᠥᠯ ᠦ᠋ᠨ ᠬᠢᠨᠢ ᠰᠢᠯᠪᠢᠨ ᠳ᠋ᠦ᠍ ᠴᠢᠰᠤ᠂ ᠰᠤᠳᠠᠯ ᠤ᠋ᠨ ᠰᠢᠩᠭᠡᠨ ᠭᠡᠳ ᠲᠠᠪᠤ ᠵᠢᠷᠭᠤᠭᠠᠨ ᠲᠣᠮᠣ ᠯᠣᠩᠬᠣ ᠡᠯᠭᠦᠭᠡᠰᠦᠲᠡᠢ᠂ ᠬᠠᠷᠠᠬᠤ ᠠ᠋ᠴᠠ ᠨᠢᠳᠦ ᠬᠠᠯᠲᠤᠷᠢᠮᠠᠷ᠃
ᠭᠠᠪᠢᠷᠠ᠂ ᠰᠢᠦᠢ ᠪᠠᠭᠰᠢ ᠶ᠋ᠢ ᠶᠠᠪᠤᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠢ᠋ ᠬᠠᠷᠠᠨ ᠰᠤᠪᠢᠯᠠᠬᠤ ᠥᠷᠥᠭᠡᠨ ᠦ᠌ ᠲᠣᠮᠣ ᠰᠢᠯ ᠴᠣᠩᠬᠣᠨ ᠳ᠋ᠤ᠌ ᠨᠢᠭᠤᠷ ᠢ᠋ᠶ᠋ᠠᠨ ᠨᠠᠭᠠᠯᠳᠤᠭᠤᠯᠤᠨ ᠬᠠᠷᠠᠵᠤ ᠵᠣᠭᠰᠣᠨᠠ᠃ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠢ᠋ ᠰᠤᠪᠢᠯᠠᠬᠤ ᠲᠠᠰᠤᠭ ᠠᠭᠤᠳᠠᠮ ᠮᠥᠷᠲᠡᠭᠡᠨ ᠣᠳᠣᠬᠢᠴᠢᠯᠠᠭᠰᠠᠨ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠵᠡᠷᠭᠡ ᠨᠢ ᠪᠦᠷ ᠴᠦ᠍ ᠣᠨᠴᠠᠭᠠᠢ᠃ ᠳᠥᠷᠪᠡᠨ ᠰᠤᠪᠢᠯᠠᠭᠴᠢ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠬᠥᠳᠡᠯᠦᠯ ᠦᠭᠡᠢ ᠬᠠᠷᠠᠵᠤ ᠵᠣᠭᠰᠣᠨ᠂ ᠬᠠᠭᠠᠰ ᠴᠠᠭ ᠠᠯᠤᠰᠯᠠᠬᠤ ᠪᠦᠷᠢ ᠳ᠋ᠦ᠍ ᠨᠢᠭᠡ ᠤᠳᠠᠭᠠ ᠵᠡᠭᠦᠦ ᠲᠠᠷᠢᠯᠭᠠ ᠬᠢᠵᠦ ᠪᠠᠢᠯᠠ᠃ ᠣᠷᠣᠢ ᠶ᠋ᠢᠨ ᠶᠢᠰᠦᠨ ᠴᠠᠭ ᠥᠩᠭᠡᠷᠡᠭᠡᠳ ᠰᠠᠢᠰᠢᠶᠠᠯᠲᠤ ᠰᠡᠷᠭᠦᠪᠡ᠃ ᠲᠡᠷᠡ ᠡᠰᠢ ᠲᠠᠰᠢ ᠪᠠᠨ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠣᠮᠣ ᠰᠢᠯ ᠬᠠᠯᠬᠠᠪᠴᠢ ᠶ᠋ᠢᠨ ᠴᠠᠭᠠᠨᠠ ᠵᠣᠭᠰᠣᠬᠤ ᠭᠡᠷᠭᠡᠢ ᠪᠡᠨ ᠣᠯᠵᠤ ᠬᠠᠷᠠᠭᠠᠳ《ᠪᠢ ᠲᠤᠩ ᠰᠠᠢᠨ ᠪᠠᠢᠨᠠ》 ᠭᠡᠰᠡᠨ ᠳᠣᠬᠢᠶᠠ ᠥᠭᠴᠦ᠂ ᠢᠨᠢᠶᠡᠮᠰᠦᠭᠯᠡᠨ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠭᠠᠪᠢᠷᠠ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠯᠤᠨ ᠬᠠᠷᠢᠭᠤ ᠥᠭᠴᠦ《ᠪᠢ ᠬᠠᠵᠠᠭᠤ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠪᠠᠢᠨᠠ》 ᠭᠡᠳᠡᠭ ᠢ᠋ᠶ᠋ᠡᠨ ᠮᠡᠳᠡᠭᠳᠡᠪᠡ᠃ ᠬᠠᠵᠠᠭᠤ ᠶ᠋ᠢᠨ ᠬᠢᠨᠢ ᠥᠷᠥᠭᠡ ᠪᠣᠯ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠦ᠌ ᠭᠡᠷ ᠪᠦᠯᠢ ᠶ᠋ᠢᠨ ᠬᠢᠨ ᠦ᠌ ᠠᠮᠠᠷᠠᠵᠤ᠂ ᠬᠦᠯᠢᠶᠡᠳᠡᠭ ᠭᠠᠵᠠᠷ ᠪᠣᠯᠬᠤ ᠶᠤᠮ᠃
ᠮᠡᠰᠡ ᠵᠠᠰᠠᠯ ᠤ᠋ᠨ ᠳᠠᠷᠠᠭᠠ᠂ ᠰᠠᠢᠰᠢᠶᠠᠯᠲᠤ ᠶ᠋ᠢᠨ ᠪᠡᠶᠡ ᠭᠠᠢᠬᠠᠯᠲᠠᠢ ᠲᠦᠷᠭᠡᠨ ᠰᠠᠢᠵᠢᠷᠠᠵᠤ ᠪᠠᠢᠯᠠ᠃ ᠱᠢ ᠫᠷᠣᠹᠧᠰᠰᠣᠷ ᠲᠤᠢᠯ ᠢ᠋ᠶ᠋ᠠᠷ ᠪᠠᠶᠠᠷᠯᠠᠵᠤ
— ᠮᠢᠨᠦ ᠡᠮᠴᠢᠯᠡᠭᠰᠡᠨ ᠲᠡᠦᠬᠡᠨ ᠳ᠋ᠦ᠍᠂ ᠡᠢᠮᠦ ᠠᠶᠤᠯ ᠲᠦᠭᠰᠢᠭᠦᠷᠢ ᠲᠡᠢ ᠮᠡᠰᠡ ᠵᠠᠰᠠᠯ ᠢ᠋ ᠬᠢᠭᠰᠡᠨ ᠪᠣᠯ ᠠᠩᠬᠠ ᠤᠳᠠᠭᠠ ᠪᠣᠯᠬᠤ ᠶᠤᠮ᠃ ᠮᠥᠨ ᠴᠦ᠍ ᠡᠢᠮᠦ ᠰᠥᠰᠥ ᠵᠣᠷᠢᠭ ᠲᠠᠢ ᠠᠮᠢᠵᠢᠷᠠᠯ ᠤ᠋ᠨ ᠬᠦᠴᠦᠨ ᠲᠡᠭᠦᠯᠳᠡᠷ ᠡᠪᠡᠳᠴᠢᠲᠡᠨ ᠲᠡᠢ ᠮᠥᠨ ᠬᠦ᠌ ᠠᠩᠬᠠ ᠲᠣᠬᠢᠶᠠᠯᠳᠤᠵᠤ ᠪᠠᠢᠨᠠ᠃ ᠡᠨᠡ ᠵᠠᠰᠠᠯ ᠢ᠋ ᠵᠣᠷᠢᠭ ᠲᠠᠢ ᠬᠢᠯᠭᠡᠭᠰᠡᠨ ᠬᠥᠮᠦᠨ ᠢ᠋ ᠶᠣᠰᠣᠲᠠᠢ ᠠᠮᠢᠳᠤ ᠪᠡᠶᠡ ᠪᠡᠨ ᠠᠨᠠᠭᠠᠬᠤ ᠤᠬᠠᠭᠠᠨ ᠳ᠋ᠤ᠌ ᠡᠷᠭᠦᠵᠦ ᠲᠤᠷᠰᠢᠭᠤᠯᠤᠰᠠᠨ ᠬᠡᠷᠡᠭ ᠭᠡᠵᠦ ᠪᠣᠯᠬᠤ ᠶᠤᠮ᠃ ᠨᠡᠭᠡᠷᠡᠨ ᠭᠠᠢᠬᠠᠮᠰᠢᠭ ᠲᠠᠢ᠃ ᠲᠠᠨ ᠤ᠋ ᠰᠦ ᠰᠠᠭᠠᠯᠢ᠂ ᠮᠢᠬᠠ ᠲᠣᠰᠣ ᠢᠳᠡᠵᠦ ᠥᠰᠦᠭᠰᠡᠨ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠪᠡᠶᠡ ᠴᠠᠭᠠᠨᠠ ᠪᠠᠨ ᠨᠢᠭᠡ ᠰᠢᠷᠪᠥᠰᠥᠯᠢᠭ ᠴᠢᠩᠭᠠ᠂ ᠬᠡᠢᠮᠣᠷᠢ ᠵᠢᠪᠬᠤᠭᠠ ᠲᠠᠢ ᠠᠵᠢ᠃ ᠬᠡᠷᠪᠡ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠳ᠋ᠤ᠌ ᠣᠨᠴᠠᠭᠠᠢ ᠬᠤᠪᠢᠷᠠᠯᠲᠠ ᠭᠠᠷᠬᠤ ᠦᠭᠡᠢ ᠯᠡ ᠪᠣᠯ ᠲᠠᠨ ᠤ᠋ ᠨᠥᠬᠥᠷ ᠬᠡᠳᠦᠨ ᠵᠢᠯ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠠᠰᠠᠭᠤᠳᠠᠯ ᠦᠭᠡᠢ ᠭᠡᠯᠡ᠃
ᠰᠠᠢᠰᠢᠶᠠᠯᠲᠤ ᠶ᠋ᠢ ᠬᠦᠨᠳᠦ ᠡᠪᠡᠳᠴᠢᠲᠡᠨ ᠦ᠌ ᠲᠠᠰᠤᠭ ᠲᠤ᠌ ᠭᠠᠷᠠᠭ ᠪᠣᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠮᠥᠨ ᠬᠦ᠌ ᠣᠨᠴᠠ ᠳᠡᠰ ᠦ᠋ᠨ ᠥᠷᠥᠭᠡᠨ ᠦ᠌ ᠭᠠᠭᠴᠠ ᠬᠥᠮᠦᠨ ᠦ᠌ ᠭᠡᠷ ᠲᠦ᠍ ᠣᠷᠣᠭᠤᠯᠪᠠ᠃ ᠮᠡᠰᠡ ᠵᠠᠰᠠᠯᠠ᠋ᠴᠠ ᠡᠮᠦᠨᠡᠬᠡᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠠ᠋ᠴᠠ ᠰᠦᠢ ᠪᠠᠭᠰᠢ ᠳ᠋ᠤ᠌ ᠤᠲᠠᠰᠤ ᠢᠷᠡᠭᠦᠯᠵᠦ ᠬᠠᠮᠤᠭ ᠰᠠᠢᠨ ᠡᠮᠴᠢᠯᠡᠭᠡ᠂ ᠬᠠᠮᠤᠭ ᠰᠠᠢᠨ ᠬᠠᠷᠠᠭᠠᠯᠵᠠᠯ ᠢ᠋ ᠦᠵᠡᠭᠦᠯᠬᠦ ᠶ᠋ᠢ ᠬᠦᠰᠡᠵᠦ᠂
— ᠡᠨᠡ ᠵᠠᠯᠠᠭᠤ ᠪᠢᠳᠡᠨ ᠳ᠋ᠦ᠍ ᠬᠣᠷᠢᠨ ᠲᠦᠮᠡᠨ ᠲᠥᠭᠥᠷᠢᠭ ᠡᠴᠡ ᠬᠣᠯᠠ ᠢᠯᠡᠭᠦᠦ ᠥᠷᠲᠡᠭ ᠲᠡᠢ ᠭᠡᠳᠡᠭ ᠢ᠋ ᠮᠡᠳᠡᠭᠡᠷᠡᠢ᠃ ᠡᠮᠴᠢ ᠨᠠᠷ ᠲᠤ᠌ ᠠᠯᠪᠠᠨ ᠠ᠋ᠴᠠ ᠨᠢ ᠢᠩᠭᠢᠵᠦ ᠨᠠᠢᠳᠠᠵᠤ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠪᠣᠯᠪᠠ ᠤᠤ? ᠭᠡᠵᠡᠢ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠬᠡᠳᠦᠢᠪᠡᠷ ᠤᠯᠤᠰ ᠤ᠋ᠨ ᠺᠠᠳ᠋ᠷ ᠤ᠋ᠳ ᠡᠪᠡᠳᠴᠢᠨ ᠦᠵᠡᠭᠦᠯᠬᠦ ᠳ᠋ᠦ᠍ ᠪᠦᠲᠦᠨ ᠤᠯᠤᠰ ᠤ᠋ᠨ ᠰᠦᠢᠳᠬᠡᠯ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠡᠨᠡ ᠡᠮᠨᠡᠯᠭᠡ ᠳ᠋ᠦ᠍ ᠵᠠᠷᠤᠴᠠᠭᠤᠯᠬᠤ ᠰᠦᠢᠳᠬᠡᠯ ᠪᠣᠯ ᠲᠤᠩ ᠴᠤ᠌ ᠥᠨᠳᠥᠷ᠂ ᠰᠠᠢᠰᠢᠶᠠᠯᠲᠤ ᠶ᠋ᠢᠨ《ᠨᠢᠭᠡ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠬᠤ ᠮᠥᠩᠭᠥ ᠶ᠋ᠢ ᠨᠠᠳᠠᠳᠤ ᠦᠷᠡᠴᠢᠬᠡᠯᠡ》 ᠭᠡᠵᠦ ᠬᠠᠷᠠᠮᠰᠠᠬᠤ ᠨᠢ ᠪᠤᠷᠤᠭᠤ ᠦᠭᠡᠢ ᠯᠡ ᠳᠡ᠃ ᠭᠡᠪᠡᠴᠦ ᠡᠨᠡ ᠪᠣᠯ ᠣᠨᠴᠠᠭᠠᠢ ᠪᠠᠴᠢᠮ ᠦᠶᠡ ᠳ᠋ᠦ᠍ ᠠᠪᠤᠭᠰᠠᠨ ᠣᠨᠴᠠᠭᠠᠢ ᠪᠠᠢᠳᠠᠯ ᠪᠣᠯᠬᠤ ᠶᠤᠮ᠃
ᠮᠡᠰᠡ ᠵᠠᠰᠠᠯ ᠤ᠋ᠨ ᠳᠠᠷᠠᠭᠠ᠂ ᠰᠠᠢᠰᠢᠶᠠᠯᠲᠤ ᠶ᠋ᠢᠨ ᠪᠡᠶᠡ ᠮᠠᠰᠢ ᠲᠦᠷᠭᠡᠨ ᠡᠷᠡᠭᠦᠯᠵᠢᠵᠦ ᠪᠠᠢᠯᠠ᠃
ᠭᠠᠪᠢᠷᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠬᠡᠳᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠷᠭᠢᠭᠡᠳ᠂ ᠰᠣᠩᠭᠢᠨᠠᠲᠤ ᠠ᠋ᠴᠠ ᠬᠤᠰᠢᠭᠤᠨ ᠳ᠋ᠤ᠌ ᠨᠡᠭᠦᠵᠦ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠲᠥᠪᠬᠢᠨᠡᠭᠦᠯᠦᠨ᠂ ᠭᠤᠷᠪᠠᠨ ᠥᠬᠢᠨ ᠳ᠋ᠡᠭᠡᠨ ᠠᠰᠠᠷᠠᠭᠴᠢ ᠣᠯᠵᠤ ᠬᠠᠷᠠᠭᠤᠯᠤᠭᠠᠳ ᠬᠦᠦ ᠪᠡᠨ ᠠᠪᠴᠤ ᠪᠡᠭᠡᠵᠢᠩ ᠳ᠋ᠦ᠍ ᠪᠤᠴᠠᠵᠤ ᠢᠷᠡᠭᠡᠳ ᠰᠢᠦᠢ ᠪᠠᠭᠰᠢ ᠶ᠋ᠢ ᠪᠤᠴᠠᠭᠠᠪᠠ᠃
ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠨᠠᠶᠠᠨ ᠨᠠᠢ᠍ᠮᠠᠨ ᠣᠨ ᠤ᠋ ᠵᠤᠨ ᠪᠣᠯᠤᠯᠠ᠃ ᠪᠡᠭᠡᠵᠢᠩ ᠬᠣᠲᠠ ᠶ᠋ᠢᠨ ᠠᠭᠤᠷ ᠠᠮᠢᠰᠬᠤᠯ ᠲᠤᠩ ᠴᠤ᠌ ᠬᠠᠯᠠᠭᠤᠨ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠳᠡ ᠬᠠᠯᠠᠭᠤᠨ ᠤ᠋ ᠭᠣᠣᠯ ᠢ᠋ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠥᠩᠭᠡᠷᠡᠭᠦᠯᠬᠦ ᠪᠡᠷ ᠪᠣᠯᠪᠠ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠬᠢᠮᠢ ᠶ᠋ᠢᠨ ᠵᠠᠰᠠᠯ ᠬᠢᠬᠦ ᠴᠢᠬᠤᠯᠠ ᠦᠭᠡᠢ ᠪᠣᠯᠬᠣᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠰᠤᠪᠢᠯᠠᠬᠤ ᠶ᠋ᠢ ᠡᠮᠴᠢ ᠨᠠᠷ ᠵᠥᠪᠰᠢᠶᠡᠷᠡᠪᠡ᠃ ᠰᠠᠢᠰᠢᠶᠠᠯᠲᠤ᠂ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠬᠡᠦᠬᠡᠳ ᠦ᠋ᠳ ᠲᠡᠢ ᠪᠡᠨ ᠴᠤᠭᠯᠠᠵᠤ ᠮᠠᠰᠢ ᠪᠠᠶᠠᠷ ᠬᠥᠷ ᠲᠡᠢ ᠪᠠᠢᠯᠠ᠃
ᠲᠡᠷᠡ ᠰᠣᠩᠭᠢᠨᠠᠲᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠴᠢᠵᠤ ᠰᠢᠨᠡ ᠢᠷᠡᠭᠰᠡᠨ ᠵᠠᠬᠢᠷᠤᠯ ᠳ᠋ᠤ᠌ ᠥᠪᠡᠷ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠲᠤᠰᠢᠶᠠᠵᠤ ᠥᠭᠭᠦᠯᠡ᠃ ᠰᠠᠢᠰᠢᠶᠠᠯᠲᠤ ᠶ᠋ᠢ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠬᠥᠳᠡᠯᠮᠦᠷᠢ ᠠᠵᠢᠯᠲᠠᠨ ᠤ᠋ ᠺᠣᠮᠢᠰ ᠲᠤ᠌ ᠲᠣᠬᠢᠷᠠᠭᠤᠯᠵᠠᠢ᠃ ᠲᠡᠭᠦᠨ ᠢ᠋ ᠠᠵᠢᠯᠯᠠᠬᠤ ᠬᠡᠷᠡᠭ ᠦᠭᠡᠢ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠲᠡᠰᠬᠦ ᠦᠭᠡᠢ ᠠᠯᠪᠠᠨ ᠭᠡᠷ ᠲᠡᠭᠡᠨ ᠣᠴᠢᠵᠤ ᠰᠠᠭᠤᠨᠠ᠃ ᠲᠡᠭᠦᠨ ᠢ᠋ ᠭᠠᠳᠠᠷ ᠪᠠᠢᠳᠠᠯᠠ᠋ᠴᠠ ᠨᠢ ᠬᠠᠷᠠᠪᠠᠯ ᠶᠡᠬᠡ ᠵᠠᠰᠠᠯ ᠬᠢᠯᠭᠡᠭᠰᠡᠨ ᠬᠦᠨᠳᠦ ᠡᠪᠡᠳᠴᠢᠨᠲᠡᠢ ᠬᠥᠮᠦᠨ ᠭᠡᠵᠦ ᠮᠡᠳᠡᠭᠳᠡᠬᠦ ᠦᠭᠡᠢ᠂ ᠨᠢᠭᠤᠷ ᠴᠢᠷᠠᠢ ᠨᠢ ᠤᠯᠠᠭᠠ ᠪᠤᠲᠠᠷᠠᠨ᠂ ᠤᠤᠯ ᠡᠴᠡ ᠪᠡᠨ ᠨᠡᠯᠢᠶᠡᠳ ᠮᠠᠷᠢᠶᠠᠯᠠᠵᠤ᠂ ᠨᠡᠩ ᠴᠦ᠍ ᠰᠦᠷ ᠵᠢᠪᠬᠤᠭᠠ ᠲᠠᠢ ᠬᠠᠷᠠᠭᠳᠠᠨᠠ᠃
ᠲᠣᠪᠴᠢᠶᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠨᠠᠷ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠢᠷᠮᠠᠢᠭᠰᠠᠨ ᠴᠢᠷᠮᠠᠢᠯᠭᠠ ᠬᠣᠭᠣᠰᠣᠳᠠᠭᠰᠠᠨ ᠦᠭᠡᠢ ᠳ᠋ᠦ᠍ ᠲᠤᠩ ᠴᠤ᠌ ᠪᠠᠶᠠᠷᠯᠠᠵᠤ ᠪᠠᠢᠯᠠ᠃ ᠲᠡᠳᠡ ᠰᠠᠢᠰᠢᠶᠠᠯᠲᠤ ᠶ᠋ᠢ ᠲᠤᠢᠯ ᠢ᠋ᠶ᠋ᠠᠷ ᠬᠠᠯᠠᠮᠵᠢᠯᠠᠨᠠ᠃ ᠠᠯᠪᠠᠨ ᠭᠡᠷ ᠢ᠋ᠶ᠋ᠡᠷ ᠨᠢ ᠦᠷᠭᠦᠯᠵᠢ ᠣᠷᠣᠵᠤ ᠠᠰᠠᠭᠤᠵᠤ ᠪᠣᠯᠭᠣᠭᠠᠬᠤ ᠪᠥᠭᠡᠳ ᠰᠠᠢᠲᠤᠷ ᠰᠤᠪᠢᠯᠠᠬᠤ ᠶ᠋ᠢ ᠦᠷᠭᠦᠯᠵᠢ ᠠᠩᠬᠠᠷᠤᠭᠤᠯᠤᠨ ᠵᠠᠷᠢᠮ ᠳ᠋ᠠᠭᠠᠨ ᠠᠯᠪᠠᠳᠠᠵᠤ ᠪᠠᠢᠭᠠᠳ ᠠᠯᠪᠠᠨ ᠭᠡᠷ ᠡᠴᠡ ᠨᠢ ᠶᠠᠪᠤᠭᠤᠯᠴᠢᠬᠠᠳᠠᠭ᠃
ᠰᠠᠢᠰᠢᠶᠠᠯᠲᠤ ᠨᠢᠭᠡ ᠶᠠᠭᠤᠮᠠ ᠶ᠋ᠢ ᠬᠢᠪᠡᠯ ᠵᠠᠪᠠᠯ ᠲᠤᠤᠱ ᠲᠤᠢᠯᠪᠤᠷᠢᠲᠠᠢ ᠬᠢᠵᠦ᠂ ᠠᠵᠢᠯᠯᠠᠭᠠᠳ ᠡᠬᠢᠯᠡᠪᠡᠯ ᠠᠮᠠᠷᠠᠬᠤ ᠪᠠᠨ ᠮᠠᠷᠲᠠᠴᠢᠬᠠᠳᠠᠭ᠃ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠣᠯᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠡᠪᠡᠳᠴᠢᠨ ᠳ᠋ᠦ᠍ ᠭᠡᠨᠡᠳᠲᠡ ᠡᠷᠭᠢᠯᠲᠡ ᠭᠠᠷᠴᠤ ᠡᠬᠢᠯᠡᠪᠡ᠃ ᠴᠡᠭᠡᠵᠢᠨ ᠳᠣᠲᠣᠷᠠ ᠨᠢ ᠡᠪᠡᠳᠴᠦ᠂ ᠢᠳᠡᠵᠦ ᠤᠤᠭᠤᠬᠤ ᠨᠢ ᠮᠠᠭᠤᠳᠠᠵᠤ ᠡᠬᠢᠯᠡᠯᠡ᠃
ᠭᠠᠪᠢᠷᠠ᠂ ᠭᠡᠷ ᠣᠷᠣᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠲᠣᠬᠢᠷᠠᠭᠤᠯᠤᠭᠠᠳ᠂ ᠶᠠᠭᠠᠷᠠᠨ ᠤᠤᠯ ᠤ᠋ᠨ ᠡᠮᠨᠡᠯᠭᠡ ᠳ᠋ᠡᠭᠡᠨ ᠣᠴᠢᠯᠠ᠃ ᠪᠠᠢᠴᠠᠭᠠᠭᠰᠠᠨ ᠳ᠋ᠦᠩ ᠳ᠋ᠦ᠍ ᠡᠪᠡᠳᠴᠢᠨ ᠦ᠌ ᠬᠣᠣᠷ ᠨᠢᠭᠡᠨᠲᠡ ᠲᠠᠷᠬᠠᠵᠤ ᠡᠬᠢᠯᠡᠭᠰᠡᠨ ᠢ᠋ ᠲᠣᠳᠣᠯᠠᠪᠠ᠃ ᠲᠡᠭᠡᠭᠡᠳ ᠬᠢᠮᠢ ᠶ᠋ᠢᠨ ᠵᠠᠰᠠᠯ ᠪᠣᠯᠤᠨ ᠰᠠᠴᠤᠷᠠᠭ ᠵᠠᠰᠠᠯ ᠢ᠋ ᠡᠭᠡᠯᠵᠢᠯᠡᠨ ᠬᠡᠷᠡᠭᠯᠡᠭᠰᠡᠨ ᠪᠣᠯᠪᠠᠴᠤ ᠢᠯᠡᠷᠬᠡᠢ ᠮᠡᠳᠡᠭᠳᠡᠬᠦ ᠶᠠᠭᠤᠮᠠ ᠦᠭᠡᠢ᠂ ᠪᠡᠶᠡ ᠨᠢ ᠲᠤᠩ ᠵᠣᠪᠠᠵᠤ ᠪᠠᠢᠯᠠ᠃ ᠡᠨᠡ ᠮᠠᠶᠢᠭ ᠢ᠋ᠶ᠋ᠠᠷ ᠡᠮᠨᠡᠯᠭᠡ ᠳ᠋ᠦ᠍ ᠬᠡᠳᠦᠨ ᠰᠠᠷᠠ ᠰᠠᠭᠤᠵᠤ᠂ ᠳᠠᠬᠢᠨ ᠨᠢᠭᠡ ᠪᠠᠢᠴᠠᠭᠠᠬᠤ ᠳ᠋ᠤ᠌᠂ ᠡᠪᠡᠳᠴᠢᠨ ᠦ᠌ ᠬᠣᠣᠷ ᠨᠢᠭᠡᠨᠲᠡ ᠴᠢᠰᠤᠨ ᠳ᠋ᠤ᠌ ᠨᠡᠪᠴᠢᠭᠰᠡᠨ ᠭᠡᠵᠦ ᠮᠡᠳᠡᠭᠳᠡᠵᠦ᠂
— ᠣᠳᠣ ᠪᠦᠬᠦ ᠪᠡᠶᠡ ᠶ᠋ᠢᠨ ᠴᠢᠰᠤ ᠶ᠋ᠢ ᠰᠣᠯᠢᠪᠠᠯ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠠᠮᠢ ᠨᠠᠰᠤ ᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃ ᠥᠭᠡᠷᠡ ᠶᠠᠮᠠᠷ ᠴᠤ᠌ ᠡᠮᠴᠢᠯᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ᠃ ᠣᠳᠣ ᠪᠢᠳᠡᠨ ᠦ᠌ ᠬᠢᠵᠦ ᠴᠢᠳᠠᠬᠤ ᠴᠣᠷ ᠤ᠋ᠨ ᠭᠠᠭᠴᠠ ᠵᠦᠢᠯ ᠪᠣᠯ ᠰᠡᠭᠦᠯᠴᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠳᠤᠲᠠᠭᠤ ᠰᠢᠭ᠋ ᠵᠣᠪᠠᠭᠠᠬᠤ ᠶ᠋ᠢ ᠯᠡ ᠪᠣᠳᠣᠬᠤ ᠬᠡᠷᠡᠭ ᠭᠡᠯᠡ᠃
ᠰᠠᠢᠰᠢᠶᠠᠯᠲᠤ ᠴᠣ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠡᠳ《ᠬᠤᠷᠳᠤᠨ ᠬᠠᠷᠢᠶᠠ》 ᠭᠡᠳ ᠶᠠᠭᠠᠷᠠᠬᠤ ᠪᠣᠯᠪᠠ᠃ ᠲᠡᠳᠡ ᠠᠷᠭᠠ ᠶ᠋ᠢᠨ ᠴᠠᠭᠠᠨ ᠰᠠᠷᠠ ᠶ᠋ᠢ ᠪᠡᠭᠡᠵᠢᠩ ᠳ᠋ᠦ᠍ ᠥᠩᠭᠡᠷᠡᠭᠦᠯᠦᠭᠡᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠯᠡ᠃ ᠬᠠᠷᠢᠵᠤ ᠢᠷᠡᠭᠰᠡᠨ ᠬᠡᠳᠦ ᠬᠣᠨᠣᠭ ᠲᠤ᠌ ᠲᠡᠷᠡ᠂ ᠥᠪᠡᠷ ᠦ᠋ᠨ ᠡᠪᠡᠳᠴᠦ ᠰᠢᠨᠠᠯᠬᠤ ᠪᠠᠨ ᠲᠡᠰᠪᠦᠷᠢᠯᠡᠨ᠂ ᠭᠡᠷᠭᠡᠢ ᠬᠡᠦᠬᠡᠳ ᠦ᠋ᠳ ᠲᠡᠢ ᠪᠡᠨ ᠰᠡᠭᠦᠯᠴᠢ ᠶ᠋ᠢᠨ ᠡᠳᠦᠷ ᠬᠣᠨᠣᠭ ᠤ᠋ᠳ ᠢ᠋ᠶ᠋ᠠᠨ ᠠᠯᠢ ᠪᠣᠯᠬᠤ ᠪᠠᠷ ᠬᠥᠷ ᠬᠥᠭᠵᠢᠯᠲᠡᠢ ᠥᠩᠭᠡᠷᠡᠭᠡᠬᠦ ᠶ᠋ᠢ ᠪᠣᠳᠣᠨᠠ᠃ ᠵᠣᠪᠠᠵᠤ ᠰᠢᠨᠠᠯᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠵᠤ᠂ ᠥᠪᠡᠷ ᠡᠴᠡ ᠨᠢ ᠴᠦ᠍ ᠳᠡᠭᠡᠷᠡ ᠦᠭᠡᠢ ᠴᠢᠷᠠᠢ ᠠᠯᠳᠠᠭᠰᠠᠨ ᠬᠠᠢᠷᠠᠲᠤ ᠪᠦᠰᠡᠭᠦᠢ ᠪᠡᠨ ᠵᠦᠳᠡᠭᠡᠵᠦ ᠵᠣᠪᠠᠭᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠥᠪᠡᠷ ᠦ᠋ᠨ ᠡᠪᠡᠳᠴᠢᠨ ᠦ᠌ ᠲᠠᠷᠴᠢᠯᠠᠭᠠᠯ ᠪᠠ ᠦᠬᠦᠯ ᠦ᠋ᠨ ᠲᠤᠬᠠᠢ ᠠᠶᠤᠵᠤ ᠰᠦᠷᠳᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠭᠠᠯ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠤᠯᠠᠭᠠᠨ ᠨᠢᠯᠵᠠᠷᠠᠢ ᠬᠡᠦᠬᠡᠳ ᠦ᠋ᠳ ᠲᠡᠢ ᠪᠡᠨ ᠦᠯᠡᠳᠡᠬᠦ ᠭᠡᠵᠦ ᠪᠠᠢᠭᠠ ᠪᠦᠰᠡᠭᠦᠢ ᠪᠡᠨ ᠪᠣᠳᠣᠬᠤ ᠳ᠋ᠤ᠌ ᠡᠯᠢᠭᠡ ᠡᠮᠲᠡᠷᠡᠨ ᠵᠣᠪᠠᠨᠠ᠃ ᠡᠨᠡ ᠮᠠᠨᠢ ᠬᠣᠵᠢᠮ ᠤ᠋ᠨ ᠤᠷᠲᠤ ᠤᠳᠠᠭᠠᠨ ᠬᠣᠨᠣᠭ ᠡᠳᠦᠷ ᠦ᠋ᠳ ᠲᠦ᠍ ᠶᠠᠭᠠᠬᠢᠵᠤ ᠴᠤ᠌ ᠵᠣᠪᠠᠵᠤ ᠵᠦᠳᠡᠳᠡᠭ ᠪᠣᠯ ᠳᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠪᠡᠶᠡ ᠳ᠋ᠡᠭᠡᠨ ᠤᠴᠠᠭᠠᠷᠳᠠᠨᠠ᠃ ᠬᠡᠷᠪᠡ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠡᠷᠲᠡᠬᠡᠨ ᠦᠵᠡᠭᠦᠯᠦᠭᠰᠡᠨ ᠪᠣᠯ᠂ ᠤᠯᠠᠭᠠᠨᠬᠠᠳᠠ ᠳ᠋ᠤ᠌ ᠵᠥᠪ ᠵᠦᠭᠡᠷ ᠨᠢᠭᠡ ᠰᠠᠷᠠ ᠰᠠᠭᠠᠲᠠᠭᠰᠠᠨ ᠦᠭᠡᠢ ᠰᠠᠨ ᠪᠣᠯ ᠲᠡᠷᠡ ᠣᠳᠣ ᠪᠦᠷᠢᠮᠦᠰᠦᠨ ᠡᠷᠡᠭᠦᠯᠵᠢᠭᠡᠳ ᠪᠠᠢᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠰᠠᠨ᠃ ᠡᠬᠢᠯᠡᠩᠭᠦᠲᠡ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠭᠰᠠᠨ ᠪᠣᠯ ᠣᠳᠣ ᠶᠠᠭᠤ ᠭᠡᠵᠦ ᠢᠩᠭᠢᠵᠦ ᠡᠳᠦᠷ ᠢ᠋ᠶ᠋ᠡᠨ ᠬᠦᠯᠢᠶᠡᠵᠦ ᠬᠡᠪᠲᠡᠬᠦ ᠪᠢᠯᠡ᠃ ᠣᠳᠣ ᠶᠠᠭᠤ ᠬᠡᠯᠡᠭᠰᠡᠨ ᠴᠦ᠍ ᠣᠷᠣᠢᠲᠠᠵᠠᠢ᠃ ᠦᠬᠦᠯ ᠬᠠᠭᠠᠴᠠᠯ ᠤ᠋ᠨ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠡᠳᠡᠨ ᠦ᠌ ᠬᠢ ᠤᠷᠤᠭᠤ ᠬᠣᠨᠣᠭ ᠲᠣᠭᠠᠯᠠᠨ ᠣᠢᠷᠠᠲᠤᠭᠰᠠᠭᠠᠷ ᠪᠠᠢᠯᠠ᠃
ᠰᠢᠨᠡ ᠵᠢᠯ ᠣᠢᠷᠠᠳᠴᠤ ᠬᠥᠮᠦᠰ ᠰᠢᠨᠡᠯᠡᠬᠦ ᠭᠡᠵᠦ ᠶᠠᠭᠠᠷᠠᠵᠠᠭᠠᠨᠠ᠃ ᠰᠠᠳᠤᠨ ᠲᠥᠷᠥᠯ᠂ ᠨᠠᠢᠵᠠ ᠨᠥᠬᠥᠳ ᠨᠢ ᠡᠭᠡᠯᠵᠢ ᠬᠠᠯᠠᠭᠠ ᠪᠠᠷ ᠡᠷᠭᠢᠵᠦ ᠲᠣᠭᠣᠷᠢᠨ ᠡᠳᠡᠨ ᠦ᠌ ᠬᠢ ᠬᠥᠯ ᠤᠯᠠ ᠣᠯᠠᠨ ᠲᠠᠢ ᠪᠠᠢᠯᠠ᠃ ᠥᠨᠥᠳᠥᠷ ᠭᠠᠯ ᠲᠠᠬᠢᠯᠭᠠ ᠶ᠋ᠢᠨ ᠬᠣᠷᠢᠨ ᠭᠤᠷᠪᠠᠨ ᠪᠣᠯᠤᠭᠰᠠᠨ ᠲᠤᠯᠠ ᠬᠥᠮᠦᠰ ᠭᠡᠷ ᠭᠡᠷ ᠲᠡᠭᠡᠨ ᠰᠢᠨᠡᠯᠡᠬᠦ ᠪᠡᠷ ᠬᠠᠷᠢᠵᠠᠭᠠᠪᠠ᠃
ᠭᠠᠪᠢᠷᠠ ᠭᠡᠷ ᠦ᠋ᠨ ᠲᠣᠭᠣᠰᠣ ᠳᠠᠭᠲᠤᠷ ᠭᠦᠪᠢᠵᠦ ᠴᠡᠪᠡᠷᠯᠡᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠤᠬᠢᠶᠠᠵᠤ ᠠᠷᠴᠢᠬᠤ ᠭᠡᠳ ᠶᠠᠭᠠᠷᠠᠨᠠ ᠃ ᠭᠠᠯ ᠲᠠᠬᠢᠯᠭᠠ ᠶ᠋ᠢᠨ ᠰᠢᠭᠦᠰᠦ ᠪᠡᠨ ᠴᠢᠨᠠᠵᠤ ᠢᠳᠡᠭᠡ ᠴᠠᠭᠠ ᠪᠠᠨ ᠪᠡᠯᠡᠳᠬᠡᠪᠡ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠡᠨᠡ ᠪᠣᠯ ᠨᠥᠬᠥᠷ ᠲᠡᠢ ᠪᠡᠨ ᠬᠠᠯᠠᠭᠤᠨ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠠᠮᠲᠤ ᠥᠩᠭᠡᠷᠡᠭᠦᠯᠬᠦ ᠡᠴᠦᠰ ᠦ᠋ᠨ ᠨᠢᠭᠡᠨ ᠭᠠᠯ ᠲᠠᠬᠢᠯᠭᠠ ᠪᠣᠯᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠷᠡ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠵᠤᠷᠰᠢᠯ ᠶᠣᠰᠣᠭᠠᠷ ᠡᠯᠪᠡᠭ ᠲᠠᠩᠰᠤᠭ ᠪᠡᠯᠡᠳᠬᠡᠨ ᠲᠥᠬᠥᠭᠡᠷᠴᠦ ᠪᠠᠢᠯᠠ᠃
ᠰᠠᠢᠰᠢᠶᠠᠯᠳᠤ ᠣᠷᠴᠢᠮ ᠤ᠋ᠨ ᠨᠢᠭᠡᠨ ᠭᠠᠷᠠᠭ ᠲᠤ᠌ ᠶᠠᠭᠤ ᠴᠤ᠌ ᠢᠳᠡᠵᠦ ᠤᠤᠭᠤᠵᠤ ᠣᠷᠣᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠡᠴᠡᠭᠦᠦ ᠰᠢᠨᠠᠯᠤᠨ ᠡᠪᠡᠳᠴᠦ᠂ ᠦᠷᠭᠦᠯᠵᠢ ᠳᠣᠣᠷᠠ ᠬᠠᠯᠠᠭᠤᠷᠠᠨ᠂ ᠶᠡᠷᠦ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠵᠣᠪᠠᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠥᠨᠥᠳᠥᠷ ᠬᠠᠷᠢᠨ ᠪᠡᠶᠡ ᠨᠢ ᠨᠢᠭᠡ ᠯᠡ ᠭᠠᠢᠬᠠᠯᠲᠠᠢ ᠲᠡᠭᠰᠢᠷᠡᠵᠦ ᠲᠠᠢᠪᠤᠰᠢᠷᠠᠭᠠᠳ ᠬᠠᠯᠠᠭᠤᠷᠠᠭᠰᠠᠨ ᠴᠤ᠌ ᠦᠭᠡᠢ᠂ ᠶᠡᠬᠡ ᠯᠡ ᠴᠣᠭ ᠵᠢᠪᠬᠤᠭᠠ ᠲᠠᠢ ᠪᠠᠢᠯᠠ᠃
ᠭᠠᠪᠢᠶᠠ ᠭᠡᠷ ᠲᠡᠭᠡᠨ ᠦᠰᠦ ᠵᠠᠰᠠᠭᠴᠢ ᠶ᠋ᠢ ᠠᠪᠴᠢᠷᠠᠨ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠦᠰᠦ ᠶ᠋ᠢ ᠵᠠᠰᠠᠭᠤᠯᠵᠤ᠂ ᠪᠡᠶᠡ ᠶ᠋ᠢ ᠨᠢ ᠵᠦᠯᠭᠦᠨ ᠤᠬᠢᠶᠠᠵᠤ᠂ ᠬᠥᠯ ᠭᠠᠷ ᠤ᠋ᠨ ᠬᠢᠨᠢ ᠬᠢᠮᠤᠰᠤ ᠶ᠋ᠢ ᠬᠦᠷᠲᠡᠯᠡ ᠵᠠᠰᠠᠵᠤ ᠥᠭᠭᠦᠭᠡᠳ ᠥᠪᠴᠢ ᠰᠢᠨᠡ ᠬᠤᠪᠴᠠᠰᠤ ᠰᠣᠯᠢᠵᠤ ᠡᠮᠦᠰᠬᠡᠨ᠂ ᠳᠠᠷᠢ ᠲᠡᠭᠰᠢ ᠬᠤᠪᠴᠠᠯᠠᠨ᠂ ᠭᠠᠯ ᠲᠠᠬᠢᠯᠭᠠ ᠪᠠᠨ ᠡᠬᠢᠯᠡᠬᠦ ᠪᠡᠷ ᠪᠡᠯᠡᠳᠬᠡᠵᠦ ᠪᠠᠷᠠᠪᠠ᠃ ᠲᠠᠪᠤᠨ ᠴᠠᠭ ᠥᠩᠭᠡᠷᠡᠭᠡᠳ ᠭᠠᠯ ᠪᠤᠷᠬᠠᠨ ᠢ᠋ᠶ᠋ᠠᠨ ᠳᠠᠬᠢᠵᠤ᠂ ᠢᠳᠡᠭᠡ ᠴᠠᠢ ᠶ᠋ᠢᠨ ᠳᠡᠭᠡᠵᠢ ᠪᠡᠨ ᠲᠩᠷᠢ ᠭᠠᠵᠠᠷ ᠲᠤ᠌ ᠡᠷᠭᠦᠵᠦ᠂ ᠬᠡᠳᠦᠢᠪᠡᠷ ᠤᠰᠤ ᠴᠤ᠌ ᠵᠠᠯᠭᠢᠵᠤ ᠣᠷᠣᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠨᠥᠬᠥᠷ ᠢ᠋ᠶ᠋ᠡᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠤ᠂ ᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠰᠢᠭ ᠳᠡᠭᠡᠵᠢ ᠪᠡᠨ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠡᠭᠡᠨ ᠠᠮᠰᠠᠭᠤᠯᠪᠠ᠃ ᠬᠡᠦᠬᠡᠳ ᠦ᠋ᠳ ᠨᠢ ᠬᠦᠷᠢᠶᠡᠨ ᠳ᠋ᠡᠭᠡᠨ ᠫᠤᠤᠵᠢᠩ ᠲᠠᠯᠪᠢᠨ ᠬᠥᠭᠵᠢᠯᠳᠦᠨᠡ᠃ ᠭᠠᠳᠠᠨᠠ ᠴᠠᠰᠤ ᠠᠶᠠᠷᠬᠠᠨ ᠪᠤᠲᠠᠷᠠᠨ ᠬᠠᠶᠠᠯᠠᠵᠤ ᠪᠠᠢᠯᠠ᠃ ᠭᠠᠪᠢᠷᠠ᠂ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠥᠷᠥᠭᠡᠨ ᠳ᠋ᠦ᠍ᠨᠢ ᠣᠷᠣᠭᠤᠯᠤᠨ ᠤᠨᠲᠠᠭᠤᠯᠤᠭᠠᠳ᠂ ᠬᠣᠶᠠᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣᠨ ᠤ᠋ ᠪᠦᠲᠡᠭᠡᠯᠭᠡ᠂ ᠬᠥᠨᠵᠢᠯᠡ ᠶ᠋ᠢᠨ ᠳᠣᠲᠣᠷ ᠢ᠋ ᠪᠦᠬᠦᠨ ᠢ᠋ ᠰᠣᠯᠢᠭᠠᠳ᠂ ᠴᠡᠪᠡᠷ ᠵᠥᠭᠡᠯᠡᠨ ᠳᠡᠪᠢᠰᠬᠡᠷ ᠳᠠᠪᠬᠤᠷᠯᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠬᠡᠪᠲᠡᠭᠦᠯᠬᠦ ᠭᠡᠰᠡᠨ ᠳ᠋ᠦ᠍᠂ ᠰᠠᠢᠰᠢᠶᠠᠯᠲᠤ
— ᠬᠣᠶᠠᠭᠤᠯᠠ ᠵᠢᠭᠠᠬᠠᠨ ᠶᠠᠷᠢᠭᠠᠳ ᠰᠠᠭᠤᠶᠠ ᠭᠡᠳ ᠣᠷᠣᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠳᠥᠰᠢᠨ ᠰᠠᠭᠤᠪᠠ᠃ ᠭᠠᠪᠢᠷᠠ ᠣᠷᠣᠨ ᠳ᠋ᠤ᠌ ᠭᠠᠷᠴᠤ ᠰᠠᠭᠤᠭᠠᠳ
— ᠲᠡᠭᠡᠶᠡ᠂ ᠨᠠᠭᠠᠰᠢ ᠪᠠᠨ ᠪᠢ ᠴᠢᠮᠠᠶ᠋ᠢ ᠲᠡᠪᠡᠷᠢᠭᠡᠳ ᠰᠠᠭᠤᠶᠠ ᠭᠡᠯᠡ᠃ ᠰᠠᠢᠰᠢᠶᠠᠯᠳᠤ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠴᠡᠭᠡᠵᠢᠨ ᠳ᠋ᠦ᠍ ᠨᠠᠭᠠᠯᠳᠤᠨ᠂ ᠭᠠᠷ ᠢ᠋ ᠨᠢ ᠢᠯᠪᠢᠨ ᠠᠳᠬᠤᠵᠤ
— ᠮᠢᠨᠦ ᠬᠥᠭᠰᠢᠨ᠂ ᠴᠢ ᠪᠣᠯ ᠪᠤᠷᠬᠠᠨ ᠨᠠᠳᠠᠳᠤ ᠬᠠᠢᠷᠠᠯᠠᠭᠰᠠᠨ ᠬᠠᠮᠤᠭ ᠤ᠋ᠨ ᠡᠷᠬᠢᠮ ᠨᠠᠨᠳᠢᠨ ᠪᠡᠯᠡᠭ ᠶᠦᠮ ᠰᠢᠦ᠂ ᠮᠥᠨ ᠴᠦ᠍ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠮᠢᠨᠢ ᠰᠠᠢᠨ ᠡᠵᠢ ᠪᠢᠯᠡ᠃ ᠴᠢ ᠪᠣᠯ ᠤᠬᠠᠭᠠᠨ ᠰᠡᠷᠭᠦᠯᠡᠩ ᠰᠠᠢᠨ ᠪᠦᠰᠡᠭᠦᠢ᠃ ᠬᠣᠵᠢᠮ ᠵᠠᠪᠠᠯ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠶᠠᠪᠤᠬᠤ ᠶᠤᠮ ᠰᠢᠦ᠃ ᠭᠤᠨᠢᠭ ᠭᠤᠲᠤᠷᠠᠯ ᠢ᠋ᠶ᠋ᠠᠷ ᠬᠦᠴᠦᠨ ᠪᠣᠯᠭᠠᠵᠤ᠂ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠰᠠᠢᠬᠠᠨ ᠬᠥᠮᠦᠵᠢᠭᠦᠯᠵᠦ ᠥᠰᠬᠡᠬᠦ ᠶ᠋ᠢ ᠨᠠᠢᠳᠠᠶᠠ᠃ ᠡᠪᠦᠭᠡᠨ ᠳ᠋ᠦ᠍ᠨᠢ ᠣᠳᠣ ᠳᠡᠮᠡᠢ ᠬᠡᠳᠦᠨ ᠡᠳᠦᠷ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ ᠭᠡᠪᠡ᠃
— ᠴᠢᠮᠠ ᠶ᠋ᠢ ᠦᠭᠡᠢ ᠪᠡᠷ ᠮᠢᠨᠦ ᠠᠮᠢᠳᠤᠷᠠᠯ ᠰᠠᠢᠬᠠᠨ ᠪᠠᠢᠵᠤ ᠴᠢᠳᠠᠨᠠ ᠤᠤ? ᠡᠪᠦᠭᠡᠨ ᠮᠢᠨᠢ ᠳᠡ᠂ ᠡᠪᠦᠭᠡᠨ ᠮᠢᠨᠢ! ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠠᠮᠢ ᠪᠡᠶᠡ ᠪᠡᠨ ᠬᠠᠢᠬᠤᠷᠬᠤ ᠦᠭᠡᠢ ᠶᠠᠪᠤᠳᠠᠭ ᠪᠠᠢᠭᠰᠠᠨ ᠪᠣᠢ? ᠭᠡᠳ ᠭᠠᠪᠢᠷᠠ ᠶ᠋ᠢᠨ ᠨᠢᠯᠪᠤᠰᠤ ᠬᠡᠯᠬᠢᠶᠡ ᠨᠢ ᠲᠠᠰᠤᠷᠠᠭᠰᠠᠨ ᠰᠤᠪᠤᠳ ᠰᠢᠭ᠋ ᠪᠥᠮᠪᠥᠷᠢᠨᠡ᠃
— ᠬᠠᠷᠢᠨ ᠲᠡᠢᠮᠦ ᠠ᠋᠃ ᠡᠪᠦᠭᠡᠨ ᠨᠢ ᠣᠳᠣ ᠯᠠ ᠰᠠᠶᠢ ᠭᠡᠮᠰᠢᠵᠦ ᠪᠠᠢᠨᠠ᠃
— ᠴᠢ ᠦᠬᠦᠵᠦ ᠪᠣᠯᠬᠤ ᠦᠭᠡᠢ᠂ ᠮᠡᠳᠡᠪᠡ ᠤᠤ? ᠪᠢ ᠴᠢᠮᠠ ᠲᠠᠢ ᠠᠮᠢᠳᠤᠷᠠᠵᠤ ᠤᠢᠳᠬᠤ ᠶ᠋ᠢ ᠪᠦᠦ ᠬᠡᠯᠡ᠂ ᠠᠮᠠᠷᠠᠭᠯᠠᠵᠤ ᠪᠠᠰᠠ ᠬᠠᠨᠤᠭᠠ ᠦᠭᠡᠢ᠃ ᠮᠡᠳᠡᠨᠡ ᠤᠤ᠂ ᠴᠢ? ᠣᠳᠣ ᠢᠷᠡᠬᠦ ᠡᠨᠡ ᠵᠢᠯ ᠦ᠋ᠨ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠲᠠᠪᠤᠨ ᠪᠣᠯ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠤᠷᠢᠮᠯᠠᠭᠰᠠᠨ ᠠᠷᠪᠠᠨ ᠵᠢᠯ ᠦ᠋ᠨ ᠣᠢ᠂ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ ᠳᠡ? ᠭᠡᠳ ᠭᠠᠪᠢᠷᠠ ᠪᠦᠷ ᠴᠦ᠍ ᠮᠡᠭᠰᠢᠭᠦᠯᠪᠡ᠃
— ᠶᠠᠭᠤ ᠭᠡᠵᠦ ᠮᠠᠷᠲᠠᠬᠤ ᠪᠢᠯᠡ ᠳᠠ᠂ ᠲᠡᠷᠡ ᠰᠠᠢᠬᠠᠨ ᠡᠳᠦᠷ ᠦ᠋ᠳ ᠢ᠋ᠶ᠋ᠡᠨ! ᠪᠢᠲᠡᠭᠡᠢ ᠤᠬᠢᠯᠠ ᠠ᠋᠂ ᠮᠢᠨᠦ ᠬᠥᠭᠰᠢᠨ᠃ ᠬᠥᠶᠢ᠂ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠤᠷᠢᠮᠯᠠᠭᠰᠠᠨ ᠣᠷᠣᠢ ᠪᠠᠨ ᠨᠥᠮᠥᠷᠦᠭᠰᠡᠨ ᠨᠥᠭᠦᠭᠡ ᠠᠯᠲᠠᠨ ᠰᠠᠷᠭᠠᠢ ᠬᠡ ᠲᠡᠢ ᠤᠯᠠᠭᠠᠨ ᠲᠣᠷᠭᠠᠨ ᠬᠥᠨᠵᠢᠯᠡ ᠪᠡᠨ ᠭᠠᠷᠭᠠᠭᠠᠳ ᠢᠷᠡ᠂ ᠡᠨᠡ ᠣᠷᠣᠢ ᠬᠣᠶᠠᠭᠤᠯᠠ ᠨᠥᠮᠥᠷᠴᠦ ᠤᠨᠲᠠᠶᠠ ᠭᠡᠯᠡ᠃
ᠭᠠᠪᠢᠷᠠ ᠪᠣᠰᠴᠤ ᠬᠤᠪᠴᠠᠰᠤᠨ ᠤ᠋ ᠲᠣᠮᠣ ᠮᠣᠳᠣᠨ ᠬᠣᠷᠭᠣ ᠪᠠᠨ ᠠᠭᠤᠳᠠᠯᠤᠨ ᠲᠡᠷᠡᠬᠦ ᠨᠠᠨᠳᠢᠨ ᠳᠤᠷᠠᠰᠬᠠᠯ ᠲᠠᠢ ᠬᠥᠨᠵᠢᠯᠡ ᠪᠡᠨ ᠭᠠᠷᠭᠠᠵᠤ ᠠᠪᠴᠢᠷᠠᠯᠠ᠃ ᠬᠣᠶᠠᠭᠤᠯᠠ ᠰᠠᠷᠭᠠᠢ ᠬᠡ ᠲᠡᠢ ᠲᠣᠷᠭᠠᠨ ᠬᠥᠨᠵᠢᠯᠡ ᠪᠡᠨ ᠨᠥᠮᠥᠷᠦᠨ ᠬᠡᠪᠲᠡᠯᠡ᠃ ᠰᠠᠢᠰᠢᠶᠠᠯᠲᠤ᠂ ᠪᠦᠰᠡᠭᠦᠢ ᠪᠡᠨ ᠪᠡᠶᠡ ᠥᠭᠡᠳᠡ ᠪᠡᠨ ᠲᠡᠳᠡᠨ ᠲᠡᠪᠡᠷᠢᠵᠦ ᠣᠮᠣᠭᠣᠯᠳᠠᠭᠰᠠᠨ ᠤᠷᠤᠭᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠷᠯᠡᠨ ᠦᠨᠦᠰᠦᠭᠡᠳ
— ᠡᠨᠡ ᠬᠥᠨᠵᠢᠯᠡ ᠶᠠᠭᠠᠬᠢᠭᠰᠠᠨ ᠭᠣᠶᠣ ᠦᠨᠦᠷ ᠲᠡᠢ ᠪᠣᠢ! ᠶᠠᠮᠠᠷ ᠦᠨᠦᠷ ᠢ᠋ ᠮᠡᠳᠡᠨᠡ ᠤᠤ?
— ᠮᠡᠳᠡᠬᠦ ᠦᠭᠡᠢ᠃
— ᠴᠢᠨᠦ ᠥᠬᠢᠨ ᠪᠡᠶᠡ ᠶ᠋ᠢᠨ ᠴᠢᠨᠢ ᠦᠨᠦᠷ ᠰᠢᠩᠭᠡᠴᠢᠬᠡᠵᠡᠢ᠃ ᠭᠠᠪᠢᠷᠠ ᠨᠢᠯᠪᠤᠰᠤ ᠲᠠᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠢᠷᠠᠯᠠᠨ ᠰᠢᠷᠳᠡᠭᠡᠳ
— ᠴᠢᠨᠦ ᠬᠥᠯᠥᠰᠥᠨ ᠦ᠌ ᠦᠨᠦᠷ ᠴᠦ᠍ ᠦᠨᠦᠷᠲᠦᠭᠳᠡᠵᠦ ᠪᠠᠢᠨᠠ ᠭᠡᠳ ᠢᠨᠢᠶᠡᠨᠡ᠃
ᠬᠣᠶᠠᠭᠤᠯᠠ ᠢᠩᠭᠢᠵᠦ ᠬᠡᠯᠡᠯᠴᠡᠨ ᠬᠡᠪᠲᠡᠵᠦ ᠪᠠᠢᠭᠰᠠᠭᠠᠷ ᠭᠠᠪᠢᠷᠠ ᠲᠦᠷ ᠵᠡᠭᠦᠷᠮᠡᠭᠯᠡᠭᠡᠳ ᠠᠪᠴᠠᠢ᠃ ᠰᠠᠢᠰᠢᠶᠠᠯᠳᠤ ᠭᠡᠨᠡᠳᠲᠡ ᠬᠠᠴᠢᠨ ᠨᠢᠭᠡ ᠴᠡᠴᠡᠨ ᠬᠠᠨᠢᠶᠠᠯᠭᠠᠵᠤ ᠠᠪᠤᠭᠠᠳ ᠣᠬᠢᠭᠤᠯᠤᠭᠰᠠᠨ ᠳ᠋ᠤ᠌ ᠴᠢᠰᠤ ᠪᠠᠷ ᠪᠥᠭᠡᠯᠵᠢᠵᠦ ᠡᠬᠢᠯᠡᠯᠡ᠃ ᠭᠠᠪᠢᠷᠠ ᠠᠶᠤᠬᠤ ᠳ᠋ᠠᠭᠠᠨ ᠤᠬᠠᠭᠠᠨ ᠠᠯᠳᠠᠬᠤ ᠰᠢᠬᠠᠵᠤ ᠠᠪᠤᠭᠠᠳ ᠰᠡᠬᠢᠰᠬᠢᠨ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠵᠤ ᠤᠴᠢᠷ ᠪᠢᠰᠢ ᠪᠣᠯᠤᠭᠰᠠᠨ ᠢ᠋ ᠤᠬᠠᠭᠠᠷᠠᠨ᠂ ᠶᠡᠬᠡ ᠥᠬᠢᠨ ᠠᠷᠤᠷᠠ ᠪᠠᠨ ᠳᠠᠭᠤᠳᠠᠵᠤ ᠪᠤᠰᠬᠠᠭᠠᠳ ᠬᠠᠵᠠᠭᠤ ᠶ᠋ᠢᠨ ᠠᠢᠯ ᠤ᠋ᠨ ᠬᠥᠮᠦᠰ ᠢ᠋ ᠳᠠᠭᠤᠳᠠᠭᠤᠯᠪᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠰᠠᠢᠰᠢᠶᠠᠯᠲᠤ ᠶᠡᠬᠡᠪᠡᠷ ᠴᠢᠰᠤ ᠠᠯᠳᠠᠵᠤ᠂ ᠠᠮᠢᠰᠬᠤᠯ ᠬᠤᠷᠢᠶᠠᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠪᠦᠰᠡᠭᠦᠢ ᠳ᠋ᠡᠭᠡᠨ《ᠴᠢ ᠪᠢᠲᠡᠭᠡᠢ ᠠᠶᠤ᠂ ᠬᠡᠦᠬᠡᠳ ᠦ᠋ᠳ ᠢ᠋ ᠵᠠᠢᠯᠠᠭᠤᠯ!》 ᠭᠡᠮᠡᠨ ᠬᠡᠯᠡᠵᠦ ᠠᠮᠵᠢᠵᠠᠢ᠃ ᠭᠠᠪᠢᠷᠠ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠤᠯᠠᠮ ᠢ᠋ᠶ᠋ᠠᠷ ᠬᠥᠰᠢᠵᠦ ᠪᠠᠢᠭᠠ ᠪᠡᠶᠡ ᠶ᠋ᠢ ᠲᠡᠪᠡᠷᠢᠨ ᠰᠠᠭᠤᠭᠰᠠᠭᠠᠷ ᠪᠠᠢᠯᠠ᠃ ᠶᠡᠬᠡ ᠪᠡᠭᠲᠡᠷᠡᠯ᠂ ᠴᠥᠬᠥᠷᠡᠯ ᠭᠤᠨᠢᠭᠠ᠋ᠴᠠ ᠪᠠᠨ ᠪᠣᠯᠤᠭᠠᠳ ᠲᠡᠷᠡ ᠤᠬᠢᠯᠠᠵᠤ ᠴᠤ᠌ ᠭᠠᠷᠬᠤ ᠦᠭᠡᠢ ᠪᠣᠯᠴᠢᠬᠠᠵᠠᠢ᠃
ᠠᠢᠯ ᠰᠠᠭᠠᠬᠠᠯᠲᠠ᠂ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠳᠠᠷᠤᠭᠠ ᠠᠵᠢᠯᠲᠠᠨ ᠨᠠᠷ ᠴᠥᠮ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠪᠡ᠃ ᠡᠮᠴᠢ ᠢᠷᠡᠵᠦ ᠦᠵᠡᠭᠡᠳ《ᠨᠢᠭᠡᠨᠲᠡ ᠥᠩᠭᠡᠷᠡᠴᠢᠬᠡᠵᠡᠢ》 ᠭᠡᠯᠡ᠃ ᠢᠷᠡᠭᠰᠡᠨ ᠬᠥᠮᠦᠰ ᠡᠨᠡᠬᠦ ᠨᠢᠭᠡᠨᠲᠡ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠴᠣᠭᠴᠠ ᠶ᠋ᠢ ᠲᠡᠪᠡᠷᠢᠨ ᠰᠠᠭᠤᠭᠠᠳ ᠬᠣᠶᠠᠷ ᠨᠢᠳᠦ ᠨᠢ ᠭᠥᠯᠢᠷᠡᠨ ᠲᠣᠭᠲᠠᠭᠰᠠᠨ ᠪᠦᠰᠡᠭᠦᠢ ᠶ᠋ᠢ ᠶᠠᠭᠠᠬᠢᠵᠤ ᠰᠠᠯᠭᠠᠬᠤ ᠪᠠᠨ ᠣᠯᠬᠤ ᠦᠭᠡᠢ ᠬᠡᠰᠡᠭ ᠬᠠᠷᠠᠵᠤ ᠵᠣᠭᠰᠣᠵᠠᠭᠠᠪᠠ᠃ ᠲᠡᠭᠡᠭᠡᠳ ᠴᠢᠯᠠᠭᠤᠨ ᠳᠠᠷᠤᠭᠠ ᠤᠷᠢᠳ ᠢ᠋ᠶ᠋ᠠᠷ ᠣᠢᠷᠠᠲᠤᠨ ᠣᠴᠢᠵᠤ
— ᠭᠠᠪᠢᠷᠠ ᠠ᠋᠂ ᠣᠳᠣ ᠲᠤᠰᠠ ᠦᠭᠡᠢ ᠪᠣᠯᠤᠭᠰᠠᠨ᠂ ᠵᠠᠰᠠᠭᠠᠳ ᠬᠡᠪᠲᠡᠭᠦᠯᠴᠢᠬᠡ ᠭᠡᠰᠡᠨ ᠳ᠋ᠦ᠍᠂
— ᠪᠢ ᠵᠢᠭᠠᠬᠠᠨ ᠲᠡᠪᠡᠷᠢᠭᠡᠳ ᠰᠠᠭᠤᠶᠠ᠂ ᠠᠮᠢᠰᠬᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠭᠡᠨᠡ᠃
ᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠰᠡᠳᠬᠢᠯ ᠰᠢᠮᠰᠢᠷᠡᠨ ᠤᠬᠢᠯᠠᠯᠳᠤᠵᠤ᠂ ᠠᠬᠠᠮᠠᠳ ᠲᠣᠮᠣᠭᠠ ᠲᠠᠢ ᠬᠡᠳᠦᠨ ᠬᠥᠮᠦᠨ ᠨᠢ ᠭᠠᠪᠢᠷᠠ ᠶ᠋ᠢ ᠵᠠᠢᠯᠠᠭᠤᠯᠵᠤ᠂ ᠴᠢᠨᠳᠠᠷ ᠢ᠋ ᠬᠤᠪᠴᠠᠰᠤᠯᠠᠨ ᠵᠠᠰᠠᠵᠤ ᠬᠡᠪᠲᠡᠭᠦᠯᠦᠯᠡ᠃ ᠣᠬᠣᠷᠬᠠᠨ ᠨᠠᠰᠤᠨ ᠳ᠋ᠠᠭᠠᠨ ᠦᠷ ᠦ᠋ᠨ ᠴᠣᠯᠮᠣᠨ ᠣᠳᠣ ᠰᠢᠭ᠋ ᠭᠢᠯᠠᠯᠵᠠᠵᠤ᠂ ᠣᠯᠠᠨ ᠴᠤ᠌ ᠤᠳᠠᠭᠠ ᠰᠢᠯᠢᠳᠡᠭ ᠨᠠᠮ ᠤ᠋ᠨ ᠭᠡᠰᠢᠭᠦᠨ᠂ ᠰᠢᠯᠢᠳᠡᠭ ᠠᠩᠭᠢ ᠶ᠋ᠢᠨ ᠡᠷᠬᠢᠯᠡᠭᠴᠢ᠂ ᠲᠡᠷᠢᠭᠦᠨ ᠦ᠌ ᠠᠵᠢᠯᠲᠠᠨ ᠤ᠋ ᠣᠳᠣᠨ ᠲᠡᠮᠳᠡᠭ ᠢ᠋ᠶ᠋ᠡᠷ ᠡᠩᠭᠡᠷ ᠢ᠋ᠶ᠋ᠡᠨ ᠮᠢᠯᠢᠶᠠᠯᠭᠠᠵᠤ ᠶᠠᠪᠤᠭᠰᠠᠨ ᠡᠨᠡᠬᠦ ᠭᠤᠴᠢᠨ ᠳᠦᠷᠪᠡᠭᠡᠨ ᠨᠠᠰᠤᠲᠠᠢ ᠵᠠᠯᠠᠭᠤ ᠢᠩᠭᠢᠵᠦ ᠬᠣᠷᠸᠠᠠ᠋ᠴᠠ ᠰᠠᠯᠵᠤ ᠣᠳᠤᠯᠠ᠃
ᠴᠢᠨᠳᠠᠷ ᠲᠠᠢ ᠰᠠᠯᠬᠤ ᠶᠣᠰᠣᠯᠠᠯ ᠭᠤᠷᠪᠠᠨ ᠡᠳᠦᠷ ᠦᠷᠭᠦᠯᠵᠢᠯᠡᠵᠦ᠂ ᠡᠳᠡᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠴᠠᠭᠠᠷᠢᠭᠲᠤ ᠴᠡᠴᠡᠭ ᠢ᠋ᠶ᠋ᠡᠷ ᠳᠦᠭᠦᠷᠴᠦ᠂ ᠮᠠᠰᠢ ᠣᠯᠠᠨ ᠬᠥᠮᠦᠨ ᠭᠠᠰᠢᠭᠤᠳᠠᠯ ᠢᠯᠡᠷᠬᠡᠢᠯᠡᠬᠦ ᠪᠡᠷ ᠭᠠᠵᠠᠷ ᠪᠦᠬᠦᠨ ᠡᠴᠡ ᠬᠦᠷᠦᠯᠴᠡᠨ ᠢᠷᠡᠵᠡᠢ᠃ ᠳᠤᠮᠳᠠᠳᠤ ᠶᠠᠫᠣᠨ ᠤ᠋ ᠬᠤᠷᠰᠢᠭᠰᠠᠨ ᠡᠮᠨᠡᠯᠭᠡ ᠶ᠋ᠢᠨ ᠡᠮᠴᠢ ᠰᠤᠪᠢᠯᠠᠭᠴᠢᠳ ᠴᠤ᠌ ᠭᠠᠰᠢᠭᠤᠳᠠᠯ ᠤ᠋ᠨ ᠴᠠᠬᠢᠯᠭᠠᠨ ᠢᠯᠡᠭᠡᠭᠰᠡᠨ ᠪᠥᠭᠡᠳ ᠬᠣᠯᠠ ᠭᠠᠵᠠᠷ ᠪᠠᠢᠭᠠᠳ ᠢᠷᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠬᠥᠮᠦᠰ ᠴᠥᠮ ᠭᠠᠰᠢᠭᠤᠳᠠᠯ ᠤ᠋ᠨ ᠴᠠᠬᠢᠯᠭᠠᠨ ᠢᠯᠡᠭᠡᠵᠡᠢ᠃ ᠭᠤᠷᠪᠠᠳᠠᠬᠢ ᠡᠳᠦᠷ ᠲᠤᠨᠢ ᠴᠢᠨᠳᠠᠷ ᠢ᠋ ᠭᠠᠯ ᠢ᠋ᠶ᠋ᠠᠷ ᠳᠡᠭᠳᠡᠭᠡᠵᠦ᠂ ᠱᠠᠷᠢᠯ ᠢ᠋ ᠨᠤᠲᠤᠭ ᠲᠤᠨᠢ ᠬᠦᠷᠭᠡᠵᠦ ᠣᠷᠣᠰᠢᠭᠤᠯᠪᠠ᠃ ᠪᠦᠬᠦ ᠬᠣᠢᠲᠤ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠪᠣᠯᠤᠨ ᠤᠤᠯ ᠤ᠋ᠨ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠨᠢ ᠳᠠᠷᠤᠭᠠ ᠳᠠᠭᠠᠭᠰᠠᠳ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠭᠦᠢᠴᠡᠳᠬᠡᠪᠡ᠃
ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠤ᠋ ᠴᠢᠯᠠᠭᠤᠨ ᠳᠠᠷᠤᠭᠠ ᠴᠢᠨᠳᠠᠷ ᠢ᠋ ᠭᠤᠷᠪᠠ ᠬᠣᠨᠣᠭ ᠰᠠᠬᠢᠨ ᠰᠠᠭᠤᠪᠠ᠃ ᠭᠠᠰᠢᠭᠤᠳᠠᠯ ᠤ᠋ᠨ ᠦᠭᠡ ᠶ᠋ᠢ ᠬᠣᠭᠣᠯᠠᠢ ᠪᠠᠨ ᠴᠡᠴᠡᠷᠡᠭᠦᠯᠦᠨ᠄《᠁ ᠦᠵᠦᠮᠦᠴᠢᠨ ᠨᠤᠲᠤᠭ ᠨᠢᠭᠡᠨ ᠰᠣᠳᠣᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠯᠳᠠᠯᠠ᠂ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠨᠠᠰᠤ ᠨᠥᠭᠴᠢᠭᠰᠡᠨ ᠨᠢ ᠦᠵᠦᠮᠦᠴᠢᠨ ᠨᠤᠲᠤᠭ ᠤ᠋ᠨ ᠰᠣᠶᠣᠯ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠹᠷᠣᠨᠲ ᠲᠤ᠌ ᠨᠥᠬᠥᠪᠥᠷᠢᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠲᠣᠮᠣ ᠭᠠᠷᠤᠵᠠ ᠪᠣᠯᠬᠤ ᠶᠤᠮ》 ᠭᠡᠵᠦ ᠣᠬᠣᠷᠬᠠᠨ ᠨᠠᠰᠤᠨ ᠤ᠋ ᠬᠢᠨᠢ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠳ᠋ᠦᠩᠨᠡᠨ ᠦᠨᠡᠯᠡᠵᠡᠢ᠃
1989 ᠣᠨ ᠤ᠋ ᠴᠠᠭᠠᠨ ᠰᠠᠷᠠ ᠭᠠᠷᠴᠤ᠂ ᠠᠭᠤᠯᠠ ᠲᠤᠯᠤᠭᠠᠳ ᠤ᠋ᠨ ᠴᠠᠰᠤ ᠴᠣᠬᠣᠷᠲᠤᠨ᠂ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ᠌ ᠬᠠᠪᠤᠷ ᠡᠷᠲᠡ ᠰᠠᠭᠠᠲᠠᠵᠠᠢ᠃ ᠣᠢ ᠭᠠᠰᠢᠭᠤ ᠳ᠋ᠤ᠌ ᠠᠪᠲᠠᠭᠰᠠᠨ ᠭᠠᠪᠢᠷᠠ ᠬᠥᠨᠳᠡᠢᠷᠡᠵᠦ ᠬᠠᠩᠬᠠᠢᠷᠠᠭᠰᠠᠨ ᠭᠡᠷ ᠲᠡᠭᠡᠨ ᠬᠡᠳᠦᠨ ᠬᠡᠦᠬᠡᠳ ᠲᠡᠢ ᠪᠡᠨ ᠪᠥᠭᠡᠮᠨᠡᠷᠡᠨ ᠨᠢᠯᠪᠤᠰᠤᠨ ᠳ᠋ᠠᠭᠠᠨ ᠳᠡᠪᠲᠦᠵᠦ ᠰᠠᠭᠤᠨᠠ᠃ ᠬᠡᠦᠬᠡᠳ ᠦ᠋ᠳ ᠨᠢ ᠡᠴᠢᠭᠡ ᠪᠡᠨ ᠰᠠᠨᠠᠨ ᠤᠬᠢᠯᠠᠯᠳᠤᠵᠤ᠂ ᠬᠡᠵᠢᠶᠡᠳᠡ ᠠᠪᠤ ᠲᠠᠢ ᠪᠠᠨ ᠴᠣᠭ ᠲᠣᠭᠯᠠᠵᠤ᠂ ᠠᠪᠤ ᠡᠴᠡ ᠪᠡᠨ ᠰᠠᠯᠳᠠᠭ ᠦᠭᠡᠢ ᠳᠥᠩᠭᠡᠵᠦ ᠭᠤᠷᠪᠠᠨ ᠣᠢ ᠬᠦᠷᠴᠦ ᠪᠠᠢᠭᠰᠠᠨ ᠬᠦᠦ ᠨᠢ《ᠮᠢᠨᠦ ᠠᠪᠤ ᠬᠠᠮᠢᠭᠠ ᠶᠠᠪᠤᠴᠢᠬᠠᠭᠰᠠᠨ ᠪᠣᠢ? ᠬᠡᠵᠢᠶᠡ ᠢᠷᠡᠬᠦ ᠶᠦᠮ ᠪᠣᠢ?》 ᠭᠡᠵᠦ ᠡᠵᠢ ᠡᠴᠡ ᠪᠡᠨ ᠨᠡᠬᠡᠨᠡ᠃ ᠰᠠᠢᠰᠢᠶᠠᠯᠳᠤ ᠶ᠋ᠢᠨ ᠬᠣᠶᠠᠷ ᠪᠡᠷᠭᠡᠨ ᠨᠢ ᠡᠳᠡᠨ ᠲᠡᠢ ᠪᠡᠨ ᠬᠡᠳᠦᠨ ᠡᠳᠦᠷ ᠬᠠᠨᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠬᠥᠳᠡᠭᠡ ᠶ᠋ᠢᠨ ᠠᠵᠢᠯ ᠶᠠᠪᠤᠳᠠᠯ ᠨᠢ ᠠᠮᠵᠢᠬᠤ ᠦᠭᠡᠢ ᠪᠣᠯᠬᠣᠷ ᠬᠠᠷᠢᠵᠠᠭᠠᠪᠠ᠃ ᠭᠠᠪᠢᠷᠠ ᠶ᠋ᠢᠨ ᠣᠢ ᠤᠬᠠᠭᠠᠨ ᠬᠡᠰᠡᠭ ᠦᠶᠡ ᠡᠯᠡᠢ ᠪᠠᠯᠠᠢᠬᠠᠨ ᠪᠣᠯᠵᠤ᠂ ᠡᠨᠡ ᠪᠦᠬᠦᠨ ᠢ᠋ ᠦᠨᠡᠨ ᠭᠡᠵᠦ ᠢᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠳᠡ ᠬᠣᠶᠠᠷ ᠤ᠋ᠨ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠦᠬᠦ ᠶᠠᠭᠤᠮᠠ ᠪᠠᠢᠭᠠ ᠪᠣᠯᠪᠠᠴᠤ ᠭᠡᠷ ᠨᠢ ᠬᠥᠨᠳᠡᠢ ᠬᠣᠭᠣᠰᠣᠨ ᠰᠠᠨᠠᠭᠳᠠᠨᠠ᠃《ᠡᠷᠡ ᠦᠭᠡᠢ ᠪᠣᠯ ᠰᠦᠷ ᠦᠭᠡᠢ᠂ ᠡᠮᠡ ᠦᠭᠡᠢ ᠪᠣᠯ ᠭᠠᠯ ᠦᠭᠡᠢ》 ᠭᠡᠳᠡᠭ ᠦᠭᠡ ᠶ᠋ᠢ ᠴᠣᠬᠣᠮ ᠶᠠᠮᠠᠷ ᠬᠥᠮᠦᠨ ᠣᠨᠣᠭᠠᠵᠤ ᠬᠡᠯᠡᠭᠰᠡᠨ ᠢ᠋ ᠪᠤᠤ ᠮᠡᠳᠡ᠃ ᠲᠡᠷᠡ ᠥᠨᠥᠴᠢᠨ ᠬᠡᠳᠦᠨ ᠦᠷᠡ ᠲᠡᠢ ᠪᠡᠨ ᠳᠠᠩᠴᠤ ᠤᠷᠲᠤ ᠡᠳᠦᠷ ᠬᠣᠨᠣᠭ ᠢ᠋ ᠶᠠᠭᠠᠬᠢᠵᠤ ᠴᠤ᠌ ᠲᠤᠭᠤᠯᠬᠤ ᠪᠢᠯᠡ᠃ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠭᠤᠴᠢᠨ ᠬᠣᠶᠠᠷᠬᠠᠨ ᠨᠠᠰᠤᠲᠠᠢ᠂ ᠬᠡᠦᠬᠡᠳᠯᠢᠭ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠭᠠ ᠰᠢᠦ᠃
ᠬᠠᠪᠤᠷ ᠤ᠋ᠨ ᠤᠷᠢ ᠣᠷᠣᠵᠤ᠂ ᠪᠠᠯᠭᠠᠷ ᠭᠣᠣᠯ ᠬᠠᠨᠠᠷᠠᠨ ᠬᠠᠯᠢᠶᠠᠯᠠᠵᠤ᠂ ᠵᠣᠪᠠᠯᠠᠩᠲᠤ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠠᠶᠠᠰ ᠢ᠋ ᠤᠶᠠᠩᠭᠠᠯᠠᠨ ᠬᠥᠭᠵᠢᠮᠳᠡᠬᠦ ᠮᠡᠲᠦ᠃ ᠭᠠᠪᠢᠷᠠ ᠳ᠋ᠤ᠌ ᠠᠭᠤᠯᠠ ᠲᠤᠯᠤᠭᠠᠳ ᠤ᠋ᠨ ᠣᠷᠣᠢ ᠪᠠᠷ᠂ ᠤᠰᠤ ᠭᠣᠣᠯ ᠬᠥᠪᠡᠭᠡᠳᠡᠨ ᠬᠠᠮᠢᠭᠠ ᠨᠢᠭᠡ ᠲᠠᠰᠢ ᠪᠠᠨ ᠶᠠᠭᠤ ᠨᠢᠭᠡ ᠶ᠋ᠢ ᠡᠷᠢᠵᠦ ᠬᠠᠢᠭᠠᠳ ᠭᠦᠶᠦᠮᠡᠷ ᠰᠠᠨᠠᠭᠳᠠᠨᠠ᠃ ᠲᠡᠷᠡ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠬᠢᠨᠢ ᠡᠪᠦᠷ ᠳᠡᠭᠡᠷᠡ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠠᠢᠭᠠ ᠴᠤ᠌ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠲᠤ᠌ ᠠᠬᠢᠨ ᠠᠭᠤᠯᠵᠠᠴᠢᠬᠠᠬᠤ ᠰᠢᠭ᠋ ᠪᠣᠳᠣᠭᠳᠠᠭᠠᠳ ᠪᠠᠢᠨᠠ᠃
ᠨᠢᠭᠡᠨ ᠥᠷᠯᠥᠭᠡ ᠲᠡᠷᠡ ᠡᠷᠲᠡ ᠪᠣᠰᠴᠤ᠂ ᠪᠠᠯᠭᠠᠰᠤᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡ ᠪᠠᠢᠳᠠᠭ ᠱᠣᠪᠣᠭᠣᠷ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠬᠤ ᠪᠠᠷ ᠪᠠᠯᠭᠠᠰᠤᠨ ᠤ᠋ ᠶᠡᠬᠡ ᠵᠡᠭᠡᠯᠢ ᠪᠡᠷ ᠪᠠᠷᠠᠭᠤᠨᠰᠢ ᠪᠠᠨ ᠠᠯᠬᠤᠪᠠ᠃ ᠲᠡᠭᠡᠵᠦ ᠶᠠᠪᠤᠲᠠᠯᠠ ᠰᠤᠷᠤᠭᠴᠢ ᠶ᠋ᠢᠨ ᠬᠢᠨᠢ ᠭᠡᠷ ᠦ᠋ᠨ ᠠᠬᠠᠮᠠᠳ᠂ ᠰᠠᠢᠬᠠᠨ ᠳᠠᠰᠤᠯᠴᠠᠭᠰᠠᠨ ᠬᠥᠳᠡᠭᠡ ᠶ᠋ᠢᠨ ᠮᠠᠯᠴᠢᠨ ᠡᠵᠢ ᠨᠠᠰᠤᠲᠠᠨ ᠲᠠᠢ ᠲᠠᠭᠠᠷᠠᠴᠢᠬᠠᠪᠠ᠃ ᠨᠥᠬᠥᠷ ᠨᠢ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨᠠ᠋ᠴᠠ ᠬᠣᠢᠰᠢ ᠰᠠᠶᠢ ᠠᠭᠤᠯᠵᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠬᠣᠶᠠᠭᠤᠯᠠ ᠪᠠᠬᠠᠨ ᠤᠬᠢᠯᠠᠯᠳᠤᠵᠤ᠂ ᠨᠠᠰᠤᠲᠠᠨ᠄
— ᠬᠡᠦᠬᠡᠨ ᠠ᠋᠂ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠭᠡᠵᠦ ᠪᠠᠢᠭᠠ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠭᠡᠷ ᠲᠦ᠍ ᠰᠠᠭᠤᠵᠤ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠰᠠᠨᠠᠭᠳᠠᠭᠠᠳ ᠪᠠᠢᠬᠤᠯᠠᠷ ᠪᠠᠷᠠᠭᠤᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠶᠠ ᠭᠡᠰᠡᠨ ᠶᠦᠮ᠃
— ᠢᠯᠡᠢ᠂ ᠮᠢᠨᠦ ᠬᠡᠦᠬᠡᠨ᠂ ᠬᠡᠳᠦ ᠭᠤᠨᠢᠵᠤ ᠵᠣᠪᠠᠭᠰᠠᠨ ᠬᠥᠮᠦᠨ ᠲᠡᠭᠡᠵᠦ ᠭᠠᠵᠠᠷ ᠤ᠋ᠨ ᠥᠨᠳᠥᠷ ᠢ᠋ᠶ᠋ᠡᠷ ᠰᠠᠯᠬᠢ ᠪᠠᠷᠢᠵᠤ ᠭᠦᠶᠦᠵᠦ ᠪᠣᠯᠳᠠᠭ ᠦᠭᠡᠢ ᠶᠦᠮ᠃ ᠠᠯᠢᠪ᠂ ᠡᠵᠢ ᠲᠡᠢ ᠪᠡᠨ ᠮᠠᠨ ᠤ᠋ ᠳ᠋ᠤ᠌ ᠣᠴᠢᠶᠠ ᠭᠡᠵᠦ ᠨᠠᠰᠤᠲᠠᠨ ᠶᠠᠷᠢᠪᠠ᠃
ᠭᠠᠪᠢᠷᠠ ᠷᠢᠭᠵᠢᠮᠡ ᠡᠵᠢ ᠶ᠋ᠢᠨ ᠳ᠋ᠦ᠍ ᠣᠴᠢᠪᠠᠯ᠂ ᠨᠠᠰᠤᠲᠠᠨ ᠰᠢᠷᠠ ᠲᠣᠰᠣ ᠪᠤᠷᠠᠮ ᠲᠠᠢ ᠪᠠᠷᠠᠭᠠᠨ ᠴᠠᠢ ᠬᠢᠵᠦ ᠥᠭᠭᠦᠭᠡᠳ᠄
— ᠵᠣᠷᠢᠭ ᠢ᠋ᠶ᠋ᠠᠨ ᠪᠠᠷᠢᠵᠤ ᠬᠠᠲᠠᠭᠤᠵᠢ᠂ ᠬᠡᠦᠬᠡᠨ ᠮᠢᠨᠢ! ᠨᠥᠭᠴᠢᠭᠰᠡᠨ ᠬᠥᠮᠦᠨ ᠳᠠᠬᠢᠭᠠᠳ ᠠᠮᠢᠯᠠᠬᠤ ᠪᠢᠰᠢ ᠳᠡ᠃ ᠬᠡᠳᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠣᠳᠣᠭᠠᠳ ᠵᠣᠷᠢᠭᠲᠠᠢ ᠠᠮᠢᠳᠤᠷᠠᠬᠤ ᠬᠡᠷᠡᠭᠲᠡᠢ᠃ ᠢᠩᠭᠢᠵᠦ ᠡᠯᠡᠢ ᠪᠠᠯᠠᠢ ᠭᠦᠶᠦᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠬᠡᠢ ᠭᠡᠮ ᠰᠠᠭᠤᠴᠢᠬᠠᠳᠠᠭ ᠶᠤᠮ᠃ ᠴᠠᠢ ᠪᠠᠨ ᠤᠤᠭᠤ᠂ ᠵᠣᠪᠠᠵᠤ ᠭᠤᠨᠢᠭᠯᠠᠭᠰᠠᠭᠠᠷ ᠬᠡᠢ ᠡᠵᠡᠯᠡᠴᠢᠬᠡᠭᠰᠡᠨ ᠪᠠᠢᠯᠭᠦᠢ᠃ ᠬᠥᠭᠡᠷᠦᠬᠦᠢᠰ ᠮᠢᠨᠢ! ᠭᠡᠳ ᠢᠯᠡᠢ ᠬᠠᠯᠠᠭ ᠠᠯᠳᠠᠨᠠ᠃
ᠭᠠᠪᠢᠷᠠ᠂ ᠷᠢᠭᠵᠢᠮᠡ ᠡᠵᠢ ᠲᠡᠢ ᠨᠡᠯᠢᠶᠡᠳ ᠶᠠᠷᠢᠯᠴᠠᠵᠤ ᠰᠠᠭᠤᠭᠠᠳ ᠬᠠᠷᠢᠯᠠ᠃ ᠨᠠᠰᠤᠲᠠᠨ ᠤ᠋ ᠬᠡᠯᠡᠬᠦ ᠮᠠᠰᠢ ᠵᠦᠢᠲᠡᠢ᠃ ᠬᠡᠳᠦᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠪᠢ ᠳᠠᠬᠢᠭᠠᠳ ᠨᠢᠯᠪᠤᠰᠤ ᠪᠠᠨ ᠭᠠᠳᠠᠭᠰᠢ ᠤᠷᠤᠰᠬᠠᠬᠤ ᠪᠢᠰᠢ᠂ ᠳᠣᠲᠣᠭᠰᠢ ᠵᠠᠯᠭᠢᠨᠠ ᠭᠡᠵᠦ ᠪᠣᠳᠣᠯᠠ᠃ ᠭᠠᠪᠢᠷᠠ ᠳ᠋ᠤ᠌ ᠬᠢᠬᠦ ᠶᠠᠭᠤᠮᠠ ᠵᠥᠩᠳᠡᠭᠡᠨ᠃ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠭᠦᠯᠴᠢ ᠶ᠋ᠢᠨ ᠦᠯᠡᠳᠡᠵᠦ ᠪᠠᠢᠭᠠ ᠡᠮᠨᠡᠯᠭᠡ ᠶ᠋ᠢᠨ ᠵᠠᠷᠤᠳᠠᠯ ᠮᠥᠩᠭᠥ ᠶ᠋ᠢ ᠡᠳ᠋ ᠦ᠋ᠨ ᠵᠠᠰᠠᠭ ᠪᠣᠯᠤᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠲᠠᠢ ᠴᠠᠢᠷᠠᠭᠤᠯᠤᠯᠲᠠ ᠬᠢᠬᠦ ᠤᠴᠢᠷ ᠲᠠᠢ᠃ ᠬᠡᠳᠦᠢᠪᠡᠷ ᠪᠦᠲᠦᠨ ᠤᠯᠤᠰ ᠤ᠋ᠨ ᠰᠦᠢᠳᠬᠡᠯ ᠪᠣᠯᠪᠠᠴᠤ ᠪᠦᠬᠦ ᠮᠥᠩᠭᠥᠨ ᠦ᠌ ᠵᠠᠷᠤᠳᠠᠯ ᠨᠢ ᠦᠨᠡᠨᠳᠡᠭᠡᠨ ᠴᠥᠮ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠪᠡᠯᠡ ᠮᠥᠩᠭᠥᠨ ᠦ᠌ ᠵᠠᠷᠤᠳᠠᠯ ᠠ᠋ᠴᠠ ᠭᠠᠷᠤᠭᠰᠠᠨ ᠲᠤᠯᠠ ᠡᠭᠦᠨ ᠢ᠋ ᠡᠮᠨᠡᠯᠭᠡ ᠶ᠋ᠢᠨ ᠳᠠᠩᠰᠠ ᠶ᠋ᠢ ᠴᠠᠢᠷᠠᠭᠤᠯᠤᠨ ᠪᠣᠳᠣᠵᠤ᠂ ᠡᠳ᠋ ᠦ᠋ᠨ ᠵᠠᠰᠠᠭᠠ᠋ᠴᠠ ᠦᠯᠡᠳᠡᠵᠦ ᠪᠠᠢᠭᠠ ᠶ᠋ᠢ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠪᠡᠯᠡ ᠮᠥᠩᠭᠥᠨ ᠦ᠌ ᠣᠷᠣᠭᠰᠠᠨ ᠳᠠᠩᠰᠠ ᠶ᠋ᠢ ᠪᠦᠬᠦᠨ ᠢ᠋ ᠪᠣᠳᠣᠵᠤ ᠲᠥᠯᠥᠬᠦ ᠶᠣᠰᠣᠲᠠᠢ᠃ ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠨᠡᠯᠭᠡ ᠶ᠋ᠢᠨ ᠪᠦᠬᠦ ᠵᠠᠷᠤᠳᠠᠯ ᠢ᠋ ᠪᠣᠳᠣᠵᠤ ᠦᠵᠡᠭᠰᠡᠨ ᠳ᠋ᠦ᠍ ᠬᠣᠷᠢ ᠰᠢᠬᠠᠮ ᠲᠦᠮᠡᠨ ᠲᠥᠭᠥᠷᠢᠭ ᠣᠷᠣᠵᠠᠢ᠃ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠪᠠᠷᠢᠮᠲᠠ ᠶ᠋ᠢ ᠪᠦᠬᠦᠨ ᠢ᠋ ᠠᠪᠴᠤ᠂ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠳᠠᠩᠰᠠ ᠶ᠋ᠢ ᠴᠠᠢᠷᠠᠭᠤᠯᠤᠭᠰᠠᠨ ᠳ᠋ᠤ᠌᠂ ᠪᠠᠷᠢᠮᠲᠠ ᠪᠠᠨ ᠰᠠᠭᠤᠯᠭᠠᠨ ᠪᠣᠳᠣᠭᠠᠳ ᠪᠠᠰᠠ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠭᠤᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠲᠥᠭᠥᠷᠢᠭ ᠦ᠋ᠨ ᠥᠷᠢ ᠦᠯᠡᠳᠡᠵᠦ ᠪᠠᠢᠯᠠ᠃ ᠨᠠᠶᠠᠭᠠᠳ ᠣᠨ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠭᠤᠷᠪᠠᠨ ᠲᠦᠮᠡᠨ ᠲᠥᠭᠥᠷᠢᠭ ᠭᠡᠳᠡᠭ ᠴᠢᠨᠢ ᠪᠠᠭᠠ ᠲᠣᠭᠠ ᠪᠢᠰᠢ᠃ ᠰᠠᠢᠰᠢᠶᠠᠯᠳᠤ ᠤᠯᠤᠰ ᠤ᠋ᠨ ᠰᠦᠢᠳᠬᠡᠯ ᠢ᠋ᠶ᠋ᠡᠷ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠦᠵᠡᠭᠦᠯᠦᠭᠰᠡᠨ ᠴᠦ᠍ ᠬᠡᠵᠢᠶᠡᠳᠡ ᠰᠡᠳᠬᠢᠯ ᠠᠮᠤᠷ ᠦᠭᠡᠢ ᠪᠠᠢᠵᠤ᠂《ᠬᠡᠳᠦᠨ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠬᠤ ᠮᠥᠩᠭᠥ ᠶ᠋ᠢ ᠬᠡᠷᠡᠭ ᠦᠭᠡᠢ ᠮᠢᠨᠦ ᠲᠥᠯᠥᠭᠡ ᠦᠷᠡᠴᠢᠬᠡᠯᠡ》 ᠭᠡᠳᠡᠭ ᠪᠠᠢᠭᠰᠠᠨ ᠶᠤᠮ᠃ ᠭᠠᠪᠢᠷᠠ᠂ ᠬᠣᠶᠠᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠴᠠᠯᠢᠩ ᠪᠣᠯᠤᠨ ᠲᠡᠳᠡ ᠬᠣᠶᠠᠷ ᠤ᠋ᠨ ᠥᠨᠳᠥᠷ ᠳᠡᠰ ᠦ᠋ᠨ ᠴᠣᠯᠠ ᠣᠯᠭᠣᠬᠤ ᠳ᠋ᠤ᠌ ᠨᠥᠬᠥᠵᠦ ᠥᠭᠭᠦᠭᠰᠡᠨ ᠲᠦᠮᠡ ᠢᠯᠡᠭᠦᠦ ᠲᠥᠭᠥᠷᠢᠭ ᠲᠡᠢ ᠪᠡᠨ ᠨᠡᠢᠯᠡᠭᠡᠳ ᠲᠡᠷᠡᠬᠦ ᠭᠤᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠥᠷᠢ ᠶ᠋ᠢ ᠳᠠᠷᠤᠭᠠᠳ ᠭᠦᠢᠴᠡᠳ ᠬᠦᠷᠪᠡ᠃ ᠡᠨᠡ ᠤᠴᠢᠷ ᠢ᠋ ᠳᠠᠭᠤᠰᠬᠠᠭᠠᠳ ᠭᠠᠪᠢᠷᠠ ᠶ᠋ᠢᠨ ᠳᠣᠲᠣᠷᠠ ᠪᠠᠬᠠᠨ ᠠᠭᠤᠵᠢᠷᠠᠪᠠ᠃ ᠰᠠᠢᠰᠢᠶᠠᠯᠲᠤ ᠪᠣᠯ ᠮᠠᠰᠢ ᠠᠷᠢᠭᠤᠨ ᠴᠢᠭᠴᠢ ᠬᠥᠮᠦᠨ ᠪᠢᠯᠡ᠃ ᠲᠡᠷᠡ ᠠᠯᠪᠠᠨ ᠤ᠋ ᠶᠠᠭᠤᠮᠠ ᠭᠡᠪᠡᠯ ᠲᠠᠰᠤᠷᠬᠠᠢ ᠤᠲᠠᠰᠤ ᠶ᠋ᠢ ᠴᠦ᠍ ᠪᠡᠶᠡ ᠳ᠋ᠡᠭᠡᠨ ᠰᠢᠩᠭᠡᠭᠡᠳᠡᠭ ᠦᠭᠡᠢ ᠪᠠᠢᠳᠠᠭᠠ᠋ᠴᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭᠠ ᠳᠠᠭᠠᠭᠰᠠᠳᠠ᠋ᠴᠠ ᠡᠬᠢᠯᠡᠨ ᠲᠤᠩ ᠴᠤ᠌ ᠪᠢᠰᠢᠷᠡᠳᠡᠭ᠃
ᠰᠤᠩᠭᠢᠨᠠᠲᠤ ᠰᠤᠷᠭᠠᠭᠤᠯᠢ ᠶ᠋ᠢ ᠰᠢᠨᠡ ᠪᠡᠷ ᠪᠠᠢᠭᠤᠯᠤᠭᠰᠠᠨ ᠮᠢᠯᠢᠶᠠᠯᠭᠠ ᠶ᠋ᠢᠨ ᠨᠠᠢᠷ ᠳᠡᠭᠡᠷᠡ ᠨᠢᠭᠡ ᠪᠦᠬᠦᠯᠢ ᠬᠠᠢᠷᠴᠠᠭ ᠵᠦᠩ ᠬᠤᠸᠠ ᠲᠠᠮᠠᠬᠢ ᠠᠪᠤᠭᠠᠳ ᠬᠣᠶᠠᠷ ᠬᠠᠢᠷᠴᠠᠭ ᠦᠯᠡᠳᠡᠭᠡᠳ ᠪᠠᠢᠭᠰᠠᠨ ᠢ᠋ ᠬᠤᠷᠢᠶᠠᠵᠤ ᠬᠠᠳᠠᠭᠠᠯᠠᠭᠠᠳ ᠬᠠᠭᠠᠰ ᠵᠢᠯ ᠦ᠋ᠨ ᠬᠢᠨᠢ ᠳᠠᠷᠠᠭᠠ ᠠᠵᠢᠯ ᠤ᠋ᠨ ᠪᠠᠢᠴᠠᠭᠠᠯᠲᠠ ᠪᠠᠷ ᠢᠷᠡᠭᠰᠡᠨ ᠳᠠᠷᠤᠭᠠ ᠨᠠᠷ ᠲᠤ᠌ ᠭᠠᠷᠭᠠᠵᠤ ᠥᠭᠴᠦ ᠪᠠᠢᠭᠰᠠᠨ ᠰᠠᠨ᠃ ᠦᠨᠡᠨᠳᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠲᠠᠮᠠᠬᠢ ᠲᠠᠲᠠᠳᠠᠭ ᠬᠥᠮᠦᠨ ᠴᠢᠨᠢ ᠲᠡᠷᠡ ᠬᠣᠶᠠᠷᠬᠠᠨ ᠬᠠᠢᠷᠴᠠᠭ ᠲᠠᠮᠠᠬᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠦᠯᠡᠳᠡᠭᠡᠭᠡᠳ ᠲᠠᠲᠠᠴᠢᠬᠠᠬᠤ ᠳ᠋ᠤ᠌ ᠪᠣᠯᠵᠤ ᠶᠠᠳᠠᠬᠤ ᠴᠤ᠌ ᠶᠠᠭᠤ ᠰᠠᠨ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠲᠡᠳᠦᠢᠬᠡᠨ ᠢ᠋ ᠴᠦ᠍ ᠥᠪᠡᠷ ᠲᠡᠭᠡᠨ ᠰᠢᠩᠭᠡᠭᠡᠵᠦ ᠲᠦᠪᠳᠡᠬᠦ ᠦᠭᠡᠢ᠃ ᠲᠡᠭᠡᠬᠦᠯᠡᠷ ᠭᠠᠪᠢᠷᠠ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠥᠨᠳᠡᠯᠵᠡᠭᠦᠯᠬᠦ ᠥᠷᠢ ᠰᠢᠷᠢ ᠶ᠋ᠢᠨ ᠵᠦᠢᠯ ᠢ᠋ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠴᠠᠢᠷᠠᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠵᠡᠢ᠃ ᠦᠨᠡᠨᠳᠡᠭᠡᠨ ᠡᠨᠡᠬᠦ ᠭᠤᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠲᠥᠭᠥᠷᠢᠭ ᠢ᠋ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠᠠ᠋ᠴᠠ ᠭᠡᠯᠳᠦᠷᠢᠭᠦᠯᠵᠦ ᠥᠭᠭᠦᠨᠡ ᠭᠡᠰᠡᠨ ᠢ᠋ ᠭᠠᠪᠢᠷᠠ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃
ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠲᠣᠪᠴᠢᠶᠠ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠢᠷᠮᠠᠢᠵᠤ ᠰᠠᠢᠰᠢᠶᠠᠯᠲᠤ ᠶ᠋ᠢᠨ ᠵᠠᠯᠠᠭᠤ ᠬᠠᠯᠠᠭᠤᠨ ᠠᠮᠢ ᠨᠠᠰᠤ ᠶ᠋ᠢ ᠠᠪᠤᠷᠠᠬᠤ ᠭᠡᠵᠦ᠂ ᠭᠠᠭᠴᠠᠬᠠᠨ ᠰᠠᠷᠠ ᠠᠮᠢᠳᠤᠷᠠᠬᠤ ᠬᠥᠮᠦᠨ ᠢ᠋ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠪᠤᠷᠠᠵᠤ ᠪᠠᠢᠭᠠᠳ ᠪᠦᠲᠦᠨ ᠨᠢᠭᠡ ᠵᠢᠯ ᠦ᠋ᠨ ᠠᠮᠢᠳᠤᠷᠠᠬᠤ ᠵᠠᠢ ᠣᠯᠭᠣᠭᠰᠠᠨ ᠶᠤᠮ᠃ ᠡᠨᠡ ᠨᠢ ᠲᠡᠳᠡᠨ ᠦ᠌ ᠴᠢᠷᠮᠠᠢᠯᠭᠠ ᠬᠣᠭᠣᠰᠣᠳᠠᠭᠰᠠᠨ ᠦᠭᠡᠢ ᠶ᠋ᠢ ᠭᠡᠷᠡᠴᠢᠯᠡᠵᠦ ᠪᠠᠢᠭᠠ ᠪᠢᠰᠢ ᠤᠤ᠃ ᠡᠨᠡ ᠨᠢ ᠨᠡᠩ ᠴᠦ᠍ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠭᠡᠷᠭᠡᠢ ᠨᠢ ᠪᠣᠯᠤᠭᠰᠠᠨ ᠭᠠᠪᠢᠷᠠ ᠳ᠋ᠤ᠌ ᠦᠨᠡᠯᠡᠰᠢ ᠦᠭᠡᠢ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠬᠦᠴᠦᠨ ᠵᠣᠷᠢᠭᠵᠢᠭᠤᠯᠤᠯ ᠪᠣᠯᠤᠨ ᠬᠥᠪᠴᠢᠯᠡᠭᠳᠡᠵᠡᠢ᠃