ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ< ᠲᠠᠪᠤᠳᠤᠭᠠᠷ ᠪᠦᠯᠦᠭ -4>᠂ ᠴᠡᠭᠡᠯ ᠦᠨ ᠤᠰᠤ ᠴᠠᠯᠭᠢᠯᠠᠪᠠ Бүргэд харьд үүрэлдэггүй – Ж᠂ Пүрэв <5-р бүлэг ~4>.цээлийн ус цалгилав
34ᠳᠥᠷᠪᠡ᠂ ᠴᠡᠭᠡᠯ ᠦ᠋ᠨ ᠤᠰᠤ ᠴᠠᠯᠭᠢᠯᠠᠪᠠ
—《ᠬᠠᠯᠠᠭᠤᠨ ᠴᠢᠰᠤ ᠪᠠᠨ ᠭᠠᠮᠨᠠᠬᠤ ᠦᠭᠡᠢ
ᠬᠠᠮᠬᠢᠬᠤ ᠨᠢᠳᠦ ᠪᠡᠨ ᠢᠷᠮᠡᠬᠦ ᠦᠭᠡᠢ
ᠭᠠᠷ ᠤ᠋ᠨ ᠬᠠᠨᠴᠤᠢ ᠶ᠋ᠢ ᠳᠡᠷᠡᠯᠡᠵᠦ
ᠭᠠᠳᠠᠭᠠᠳᠤ ᠬᠣᠷᠮᠣᠢ ᠪᠠᠨ ᠳᠡᠪᠢᠰᠴᠦ
ᠰᠢᠯᠦᠰᠦᠨ ᠦ᠌ ᠬᠥᠭᠡᠰᠦ ᠪᠡᠷ ᠤᠮᠳᠠᠭᠠᠯᠠᠵᠤ
ᠰᠢᠲᠦᠨ ᠦ᠌ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠵᠤ
ᠤᠯᠤᠰ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ ᠶᠠᠪᠤᠭᠰᠠᠨ᠁》
ᠪᠢᠯᠡ ᠭᠡᠮᠡᠨ ᠶᠠᠭ ᠬᠣᠷᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠵᠣᠬᠢᠶᠠᠭᠳᠠᠭᠰᠠᠨ《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠭᠡᠳᠡᠭ ᠰᠤᠳᠤᠷ ᠤ᠋ᠨ ᠰᠠᠶᠢᠬᠠᠨ ᠳᠠᠬᠢᠨ ᠰᠡᠢᠷᠡᠭᠦᠯᠵᠦ ᠪᠢᠴᠢᠭᠰᠡᠨ ᠡᠬᠡ ᠶ᠋ᠢ ᠤᠩᠰᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠬᠠ ᠳᠡᠭᠦᠦ ᠬᠣᠶᠠᠷ ᠢ᠋ ᠬᠠᠷᠠᠭᠠᠳ ᠨᠣᠮ ᠢ᠋ᠶ᠋ᠠᠨ ᠣᠷᠬᠢᠵᠤ᠂ ᠥᠪᠡᠷ ᠲᠦ᠍ ᠪᠡᠨ ᠣᠢᠷᠠᠲᠤᠭᠠᠳ ᠢᠷᠡ! ᠭᠡᠮᠡᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠳᠠᠯᠠᠯᠪᠠ᠃
ᠬᠦᠯᠦᠭ᠂ ᠪᠢᠯᠢᠭᠦᠨ ᠬᠣᠶᠠᠷ ᠳᠡᠷᠭᠡᠳᠡ ᠨᠢ ᠲᠤᠯᠵᠤ ᠣᠴᠢᠪᠠᠯ ᠠᠷᠢᠬᠪᠦᠢ᠍ᠬᠡ ᠲᠣᠮᠣ ᠬᠠᠷᠠ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠠᠬᠢᠭᠤᠯᠤᠨ ᠬᠠᠷᠠᠭᠠᠳ᠂ ᠨᠢᠭᠡ ᠶᠢ ᠪᠣᠳᠣᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠲᠠ ᠨᠠᠷ ᠬᠡᠵᠢᠶᠡ ᠢᠷᠡᠪᠡ ᠠ᠋? ᠪᠡᠶᠡ ᠴᠢᠨᠢ ᠵᠦᠭᠡᠷ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠬᠠᠭᠠᠨ ᠬᠠᠷᠢᠭᠤ ᠶ᠋ᠢ ᠰᠣᠨᠣᠰᠤᠨ ᠬᠡᠰᠡᠭ ᠵᠠᠭᠤᠷᠠ ᠡᠩ ᠦ᠋ᠨ ᠵᠦᠢᠯ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠦᠯᠦᠭ ᠲᠦ᠍ ᠬᠠᠨᠳᠤᠵᠤ
— ᠵᠠ᠂ ᠱᠠᠩᠳᠤ ᠭᠡᠳᠡᠭ ᠬᠣᠲᠠ ᠳ᠋ᠤ᠌ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠬᠤᠪᠢᠯᠠᠢ ᠨᠠᠮᠠᠶ᠋ᠢ ᠶᠠᠭᠤ ᠭᠡᠵᠦ ᠬᠠᠷᠢᠶᠠᠵᠤ ᠰᠠᠭᠤᠨᠠ ᠪᠣᠢ ᠭᠡᠮᠡᠨ ᠠᠰᠠᠭᠤᠭᠠᠳ ᠬᠠᠷᠢᠭᠤ ᠬᠦᠯᠢᠶᠡᠪᠡ᠃ ᠬᠦᠯᠦᠭ ᠬᠥᠭᠡᠷᠦᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠠᠷᠤᠵᠤ ᠵᠣᠭᠰᠣᠭᠠᠳ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ
— ᠬᠠᠭᠠᠨᠲᠠᠨ ᠮᠢᠨᠢ᠂ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ! ᠪᠣᠭᠣᠯ ᠨᠢ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡ ᠪᠦᠲᠦᠨ ᠰᠠᠷᠠ ᠭᠠᠷᠤᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠰᠢᠳᠠᠷᠯᠠᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠭᠳᠠᠨ᠂ ᠳᠠᠷᠠᠭᠠ ᠨᠢ ᠡᠯᠵᠢᠭᠡ ᠮᠠᠯᠯᠠᠵᠤ ᠶᠠᠪᠤᠭᠠᠳ ᠨᠠᠷᠢᠨ ᠰᠢᠷᠢᠨ ᠶᠠᠭᠤᠮᠠ ᠰᠣᠨᠣᠰᠴᠤ ᠮᠡᠳᠡᠬᠦ ᠪᠡᠨ ᠪᠠᠢᠭᠰᠠᠨ᠃ ᠲᠡᠢᠮᠦ ᠪᠣᠯᠬᠣᠷ ᠪᠠᠢᠳᠠᠯ ᠢ᠋ ᠬᠣᠯᠠ ᠠ᠋ᠴᠠ ᠯᠠ ᠠᠵᠢᠵᠤ᠂ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠰᠤᠯᠠ ᠶᠠᠷᠢᠯᠴᠠᠭᠠᠨ ᠠ᠋ᠴᠠ ᠳᠠᠮ ᠰᠣᠨᠣᠰᠤᠭᠰᠠᠨ ᠲᠡᠳᠦᠢ ᠪᠡᠷ ᠮᠡᠳᠡᠭᠰᠡᠨ ᠭᠡᠪᠡᠯ ᠠᠷᠢᠬᠪᠦᠢ᠍ᠬᠡ᠄
— ᠪᠢ ᠲᠡᠷᠡ ᠪᠦᠬᠦᠨ ᠢ᠋ ᠴᠢᠨᠢ ᠴᠢᠨᠦ ᠪᠢᠴᠢᠭᠰᠡᠨ ᠪᠢᠴᠢᠭ ᠡᠴᠡ ᠭᠠᠳᠠᠷᠯᠠᠭᠰᠠᠨ᠃ ᠴᠢ ᠣᠳᠣ ᠴᠣᠬᠣᠮ ᠶᠠᠭᠤ ᠮᠡᠳᠡᠵᠦ ᠪᠠᠢᠭᠠ ᠪᠠᠨ ᠯᠠ ᠨᠠᠳᠠᠳᠤ ᠶᠠᠷᠢᠭᠠᠳ ᠣᠷᠭᠢ᠃ ᠭᠡᠵᠦ ᠰᠢᠷᠦᠭᠦᠬᠡᠨ ᠳᠤᠤᠭᠠᠷᠪᠠ᠃
ᠬᠦᠯᠦᠭ ᠳᠠᠬᠢᠨ ᠥᠷᠥᠰᠢᠶᠡᠯ ᠭᠤᠶᠤᠭᠠᠳ᠂ ᠥᠪᠡᠷ ᠦ᠋ᠨ ᠦᠵᠡᠵᠦ ᠬᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠲᠣᠭᠠᠴᠢᠨ ᠠᠢᠯᠠᠳᠬᠠᠯᠠ᠃
ᠠᠷᠢᠬᠪᠦᠢ᠍ᠬᠡ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠬᠦᠯᠦᠭ ᠢ᠋ ᠰᠢᠷᠲᠡᠨ ᠰᠠᠭᠤᠵᠤ ᠠᠢᠯᠠᠳᠬᠠᠯ ᠢ᠋ ᠴᠢᠩᠨᠠᠨᠠ᠃ ᠬᠦᠯᠦᠭ ᠬᠥᠯᠥᠰᠥ ᠪᠡᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠱᠤᠳᠤᠷᠤᠨ ᠠᠷᠴᠢᠭᠠᠳ᠄
— ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠨᠠᠭᠠᠰᠢ ᠪᠠᠨ ᠰᠢᠭᠤᠳ ᠳᠣᠪᠲᠣᠯᠤᠨ ᠪᠠᠢᠯᠳᠤᠬᠤ ᠪᠠᠷ ᠬᠠᠮᠤᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠵᠡᠬᠡᠵᠦ ᠪᠠᠢᠬᠤ ᠪᠣᠯᠤᠯᠲᠠᠢ᠃ ᠰᠢᠳᠠᠷ ᠵᠠᠩᠵᠤᠨ ᠨᠤᠭᠤᠳ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠨ ᠪᠠᠢᠨ ᠴᠤᠭᠯᠠᠳᠠᠭ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠤᠷᠢᠶᠠᠩᠬᠠᠢᠳᠠᠢ ᠵᠠᠩᠵᠤᠨ ᠦᠵᠡᠭᠳᠡᠬᠦ ᠪᠡᠨ ᠪᠠᠢᠭᠰᠠᠨ᠃ ᠲᠡᠷᠡ ᠵᠠᠩᠵᠤᠨ ᠬᠡᠳᠦ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠨᠢᠭᠡ ᠢᠷᠡᠭᠡᠳ᠂ ᠱᠠᠩᠳᠤ ᠳ᠋ᠤ᠌ ᠤᠳᠠᠯ ᠦᠭᠡᠢ ᠠᠷᠪᠠᠭᠠᠳᠬᠠᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠣᠷᠣᠭᠰᠢ ᠪᠠᠨ ᠪᠤᠴᠠᠭᠠᠳ ᠶᠠᠪᠤᠴᠢᠬᠠᠬᠤ ᠶ᠋ᠢ ᠪᠢ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠡᠯᠵᠢᠭᠡ ᠬᠠᠷᠢᠭᠤᠯᠤᠨ ᠶᠠᠪᠤᠭᠠᠳ ᠬᠠᠷᠠᠭᠰᠠᠨ᠃ ᠬᠠᠳᠠᠨ ᠵᠠᠩᠵᠤᠨ ᠯᠠ ᠴᠡᠷᠢᠭ ᠦ᠋ᠨ ᠲᠠᠯᠠ ᠪᠠᠷ ᠬᠠᠮᠤᠭ ᠤ᠋ᠨ ᠶᠡᠬᠡ ᠬᠥᠮᠦᠨ ᠨᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ ᠭᠡᠳᠡᠢᠵᠦ ᠢᠷᠪᠠᠢᠭᠠᠳ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠲᠠᠰᠢᠶᠠ ᠲᠤᠯᠤᠨ ᠵᠣᠭᠰᠣᠵᠤ ᠪᠠᠢᠵᠤ ᠦᠵᠡᠭᠳᠡᠳᠡᠭ᠃ ᠰᠥᠩ ᠤᠯᠤᠰ ᠤ᠋ᠨ ᠬᠢᠯᠢ ᠳᠡᠭᠡᠷᠡ ᠪᠠᠢᠭᠰᠠᠨ ᠶᠡᠬᠡᠩᠬᠢ ᠴᠡᠷᠢᠭ᠂ ᠲᠡᠭᠦᠨ ᠦ᠌ ᠶᠡᠬᠡ ᠪᠠᠭᠠ ᠳᠠᠭᠠᠭᠠᠮᠠᠯ ᠤᠳ ᠱᠠᠩᠳᠤ ᠳ᠋ᠤ᠌ ᠴᠤᠭᠯᠠᠷᠠᠭᠠᠳ᠂ ᠬᠠᠮᠤᠭ ᠶᠠᠭᠤᠮᠠᠨ ᠤ᠋ ᠬᠣᠰᠢᠭᠤ ᠨᠢ ᠬᠣᠢᠰᠢ ᠪᠠᠨ ᠬᠠᠷᠠᠴᠢᠬᠠᠭᠰᠠᠨ ᠪᠠᠢᠭᠠ᠃ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠰᠥᠩ ᠦ᠋ᠨ ᠬᠠᠭᠠᠨ ᠲᠠᠢ ᠲᠤᠯᠤᠯᠳᠤᠬᠤ ᠳᠣᠯᠣᠭᠠᠨ ᠢ᠋ᠶ᠋ᠠᠨ ᠬᠦᠴᠦᠲᠡᠢ ᠪᠣᠯᠭᠠᠬᠤ ᠭᠡᠵᠦ ᠪᠠᠢᠭᠠ ᠪᠣᠯ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠭᠤᠨ ᠳ᠋ᠤ᠌ ᠨᠠᠭᠠᠰᠢ ᠨᠢ ᠲᠠᠲᠠᠬᠤ ᠪᠢᠯᠡ᠃ ᠲᠡᠷᠡ ᠶᠡᠬᠡ ᠨᠣᠶᠠᠨ ᠲᠠᠨ ᠲᠠᠢ ᠯᠠ ᠭᠠᠷᠴᠠᠭᠠ ᠦᠭᠡᠢ ᠳᠠᠢᠳᠤᠬᠤ ᠭᠡᠵᠦ ᠪᠡᠯᠡᠳᠬᠡᠵᠦ ᠪᠠᠢᠨᠠ᠃ ᠲᠡᠢᠨ ᠢ᠋ᠶ᠋ᠡᠨ ᠪᠦᠷ ᠤᠳᠠᠬᠤ ᠦᠭᠡᠢ ᠶᠠᠪᠤᠭᠤᠯᠬᠤ ᠰᠢᠨᠵᠢᠲᠡᠢ᠃ ᠲᠠ ᠪᠣᠯᠭᠣᠭᠠ! ᠪᠣᠭᠣᠯ ᠨᠠᠮᠠᠶ᠋ᠢ ᠬᠤᠪᠢᠯᠠᠢ ᠶ᠋ᠢᠨ ᠳᠡᠭᠦᠦ ᠲᠠᠨ ᠢ᠋ ᠬᠠᠭᠠᠨ ᠭᠡᠵᠦ ᠬᠡᠯᠡᠭᠰᠡᠨ ᠦ᠌ ᠲᠥᠯᠥᠭᠡ ᠪᠠᠷᠢᠵᠤ ᠠᠪᠴᠤ ᠬᠣᠷᠢᠨ᠂ ᠪᠣᠭᠣᠯ ᠤ᠋ᠨ ᠠᠵᠢᠯ ᠳ᠋ᠤ᠌ ᠰᠢᠯᠵᠢᠭᠦᠯᠦᠭᠰᠡᠨ᠃ ᠮᠡᠬᠦᠰ ᠪᠢ ᠠᠬᠠᠨ ᠳᠡᠭᠦᠦ ᠳᠡᠭᠡᠳᠦᠰ ᠨᠣᠶᠠᠳ ᠬᠠᠭᠠᠳ ᠲᠠ ᠪᠦᠬᠦᠨ ᠢ᠋ ᠬᠠᠭᠠᠷᠠᠯᠳᠠᠭᠤᠯᠬᠤ ᠶ᠋ᠢᠨ ᠲᠤᠯᠠ ᠳ᠋ᠤ᠌ ᠭᠡᠬᠦ ᠤᠤ᠂ ᠥᠪᠡᠷ ᠢ᠋ ᠪᠡᠨ ᠱᠣᠷᠣᠩ ᠳ᠋ᠤ᠌ ᠬᠣᠷᠢᠭᠰᠠᠨ ᠳ᠋ᠤ᠌ ᠥᠰᠢᠷᠬᠡᠨ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠭᠠ ᠶᠤᠮ ᠪᠢᠰᠢ ᠭᠡᠵᠦ ᠬᠡᠯᠡᠭᠡᠳ᠂ ᠪᠤᠰᠤᠳ ᠦᠵᠡᠵᠦ ᠬᠠᠷᠠᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠨᠡᠮᠡᠵᠦ ᠲᠣᠭᠠᠴᠢᠨ ᠠᠢᠯᠠᠳᠬᠠᠯᠠ᠁ ᠪᠢᠯᠢᠭᠦᠨ ᠪᠠᠰᠠ ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠰᠠᠶᠢ ᠬᠠᠷᠠᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠠᠢᠯᠠᠳᠬᠠᠪᠠ᠃ ᠶᠠᠷᠢᠶᠠ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠯᠡ᠃ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠠᠭᠤᠯᠵᠠᠯᠲᠠ ᠶ᠋ᠢᠨ ᠡᠴᠦᠰ ᠲᠦ᠍ ᠪᠢᠯᠢᠭᠦᠨ ᠢ᠋ ᠳᠡᠷᠭᠡᠳᠡ ᠶ᠋ᠢᠨ ᠰᠢᠳᠠᠷ ᠠᠯᠪᠠᠨ ᠳ᠋ᠤ᠌ ᠪᠠᠨ ᠲᠦᠷᠭᠡᠨ ᠣᠷᠣ᠃ ᠬᠦᠯᠦᠭ ᠪᠣᠯᠤᠭᠰᠠᠨ ᠪᠡᠶᠡ ᠪᠡᠨ ᠰᠤᠪᠢᠯᠠᠵᠤ ᠬᠤᠷᠳᠤᠨ ᠢᠯᠡᠷᠢᠰᠢᠬᠦ ᠶ᠋ᠢ ᠪᠣᠳᠣ! ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ᠄
— ᠡᠨᠡ ᠲᠦᠰᠢᠮᠡᠯ ᠳ᠋ᠦ᠍ ᠡᠵᠡᠨ ᠰᠠᠩ ᠠ᠋ᠴᠠ ᠬᠦᠨᠡᠰᠦᠨ ᠦ᠌ ᠬᠣᠨᠢ᠂ ᠬᠤᠪᠴᠠᠰᠤ ᠬᠢᠬᠦ ᠳᠠᠪᠤᠤ᠂ ᠤᠨᠤᠬᠤ ᠮᠣᠷᠢ ᠬᠣᠶᠠᠷ᠂ ᠰᠠᠭᠠᠬᠤ ᠦᠨᠢᠶᠡ ᠥᠭᠴᠦ ᠲᠤᠰᠠᠯᠠ! ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠭᠠᠳ᠄
— ᠴᠢ ᠪᠡᠶᠡ ᠪᠡᠨ ᠭᠠᠢᠭᠤᠢ ᠪᠣᠯᠤᠭᠰᠠᠨ ᠳᠣᠣᠷᠠ ᠪᠠᠨ ᠨᠠᠳᠠ ᠳᠡᠭᠡᠷᠡ ᠰᠢᠭᠤᠳ ᠢᠷᠡᠭᠡᠳ ᠳᠡᠷᠭᠡᠳᠡ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠪᠠᠢᠵᠤ ᠪᠣᠯᠤᠨᠠ ᠭᠡᠵᠦ ᠨᠡᠮᠡᠵᠦ ᠠᠢᠯᠠᠳᠬᠠᠪᠠ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠬᠠᠭᠠᠨ ᠤ᠋ ᠬᠡᠰᠢᠭ ᠲᠦ᠍ ᠮᠥᠷᠭᠥᠵᠦ ᠥᠷᠥᠭᠡᠨ ᠡᠴᠡ ᠭᠠᠷᠴᠠᠢ᠃
ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠳ᠋ᠤ᠌ ᠵᠥᠪᠬᠡᠨ ᠬᠦᠯᠦᠭ ᠦ᠋ᠨ ᠥᠭᠭᠦᠭᠰᠡᠨ ᠮᠡᠳᠡᠭᠡ ᠲᠡᠳᠦᠢ ᠪᠢᠰᠢ᠃ ᠥᠭᠡᠷᠡ ᠪᠤᠰᠤᠳ ᠬᠡᠯᠡ ᠴᠢᠮᠡᠭᠡ ᠨᠡᠯᠢᠶᠡᠳ ᠪᠠᠢᠭᠠ ᠨᠢ ᠢᠯᠡᠷᠬᠡᠢ᠃ ᠲᠡᠭᠡᠭᠡᠳ ᠬᠠᠭᠠᠨ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ᠂ ᠵᠠᠩᠵᠤᠨ ᠨᠤᠭᠤᠳ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠤᠯᠠ᠃ ᠬᠠᠭᠠᠨ ᠤ᠋ ᠨᠢᠭᠡ ᠲᠣᠮᠣ ᠦᠷᠭᠦᠭᠡᠨ ᠳ᠋ᠦ᠍ ᠭᠤᠴᠢ ᠳᠥᠴᠢᠨ ᠨᠣᠶᠠᠳ ᠵᠠᠩᠵᠤᠨ ᠨᠤᠭᠤᠳ ᠬᠦᠷᠴᠡᠢ᠃ ᠬᠠᠭᠠᠨ ᠵᠢᠷᠤᠮᠲᠤ ᠬᠤᠪᠴᠠᠰᠤ ᠪᠠᠨ ᠠᠭᠰᠠᠨ᠂ ᠨᠣᠶᠠᠳ ᠳᠠᠭᠠᠭᠠᠮᠠᠯ ᠤ᠋ᠳ ᠲᠠᠢ ᠠᠭᠤᠯᠵᠠᠬᠤ ᠳ᠋ᠤ᠌ ᠪᠠᠨ ᠵᠣᠷᠢᠮᠠᠭ ᠠᠭᠠᠳ ᠰᠢᠢᠳᠮᠡᠭᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠳᠡᠭᠡᠳᠦᠰ ᠨᠣᠶᠠᠳ᠂ ᠵᠠᠩᠵᠤᠨ ᠲᠠ ᠪᠦᠬᠦᠨ ᠳ᠋ᠦ᠍ ᠪᠢ ᠬᠠᠨᠳᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠯᠠ᠃ ᠮᠢᠨᠦ ᠠᠬᠠ ᠬᠤᠪᠢᠯᠠᠢ ᠱᠠᠩᠳᠤ ᠭᠡᠳᠡᠭ ᠬᠣᠲᠠᠬᠠᠨ ᠢ᠋ ᠭᠦᠷᠦᠨ ᠦ᠌ ᠨᠡᠢᠰᠯᠡᠯ᠂ ᠥᠪᠡᠷ ᠢ᠋ ᠪᠡᠨ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠭᠠᠨ ᠭᠡᠵᠦ ᠵᠠᠷᠯᠠᠭᠠᠳ᠂ ᠤᠯᠠᠮ ᠢ᠋ᠶ᠋ᠠᠷ ᠪᠢᠳᠡᠨ ᠢ᠋ ᠪᠠᠭᠠᠯᠵᠠᠭᠤᠷᠳᠠᠬᠤ ᠪᠠᠷ ᠲᠡᠨᠳᠡ ᠡᠮᠦᠨᠡᠲᠦ ᠬᠢᠲᠠᠳ ᠲᠠᠢ ᠪᠠᠢᠯᠳᠤᠨ ᠪᠣᠢ ᠴᠡᠷᠢᠭ ᠢ᠋ ᠲᠡᠳᠡᠨ ᠢᠷᠡᠭᠦᠯᠵᠦ᠂ ᠶᠡᠬᠡ ᠴᠡᠷᠢᠭ ᠬᠤᠷᠠᠯᠳᠤᠭᠤᠯᠤᠨ ᠳᠡᠭᠡᠷᠡ ᠨᠢ ᠬᠡᠳᠦᠨ ᠲᠦᠮᠡᠨ ᠬᠢᠲᠠᠳ ᠴᠡᠷᠢᠭ ᠨᠡᠮᠡᠨ ᠪᠥᠭᠡᠮᠨᠡᠷᠡᠭᠦᠯᠵᠦ ᠪᠠᠢᠨᠠ᠃ ᠡᠨᠡ ᠪᠣᠯ ᠳᠠᠪᠬᠤᠷ ᠪᠠᠲᠤᠯᠠᠭᠳᠠᠭᠰᠠᠨ ᠦᠨᠡᠨ ᠬᠡᠯᠡ ᠮᠡᠳᠡᠭᠡ ᠪᠢᠯᠡ᠃ ᠮᠢᠨᠦ ᠢᠲᠡᠭᠡᠯᠲᠦ ᠳᠡᠷᠭᠡᠳᠡ ᠶ᠋ᠢᠨ ᠬᠥᠮᠦᠰ ᠴᠦ᠍ ᠲᠡᠭᠦᠨ ᠢ᠋ ᠰᠠᠶᠢ ᠳᠤᠷᠠᠰᠢᠨ ᠦᠵᠡᠭᠡᠳ ᠢᠷᠡᠪᠡ᠃ ᠡᠢᠮᠦ ᠳ᠋ᠦ᠍ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠭᠠᠯ ᠭᠣᠯᠣᠮᠲᠠ ᠬᠠᠷᠠᠬᠣᠷᠣᠮ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠨ ᠨᠡᠷᠡ ᠲᠥᠷᠥ ᠪᠡᠨ ᠰᠠᠬᠢᠬᠤ ᠶᠣᠰᠣᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠰᠥᠩ ᠦ᠋ᠨ ᠬᠠᠭᠠᠨ ᠲᠠᠢ ᠬᠡᠳᠦᠨ ᠵᠢᠯ ᠳᠠᠢᠳᠤᠵᠤ ᠪᠠᠢᠭᠠ ᠮᠠᠨ ᠤ᠋ ᠬᠠᠲᠠᠭᠤᠵᠢᠯ ᠣᠯᠤᠭᠰᠠᠨ ᠰᠢᠯᠢᠳᠡᠭ ᠴᠡᠷᠢᠭ ᠦ᠋ᠳ ᠪᠠᠢᠭᠠ᠃ ᠲᠡᠳᠡ ᠲᠤᠯᠤᠯᠳᠤᠭᠠᠨ ᠤ᠋ ᠠᠷᠭᠠ ᠮᠡᠬᠡᠨ ᠳ᠋ᠦ᠍ ᠴᠢᠳᠠᠯ ᠣᠯᠤᠭᠰᠠᠨ ᠪᠠᠢᠭᠠ᠃ ᠡᠢᠮᠦ ᠳ᠋ᠦ᠍ ᠬᠤᠪᠢᠯᠠᠢ ᠶ᠋ᠢ ᠳᠡᠢᠯᠬᠦ ᠭᠠᠭᠴᠠᠬᠠᠨ ᠪᠣᠯᠤᠮᠵᠢ ᠪᠣᠯ ᠲᠡᠭᠦᠨ ᠢ᠋ ᠲᠡᠢᠨ ᠳ᠋ᠦ᠍ ᠴᠡᠭᠴᠡᠷᠡᠨ ᠣᠷᠣᠵᠤ ᠢᠷᠡᠬᠦ ᠡᠴᠡ ᠨᠢ ᠡᠮᠦᠨᠡ ᠥᠷᠢᠰᠴᠦ ᠴᠣᠬᠢᠬᠤ ᠶᠠᠪᠤᠳᠠᠯ ᠪᠣᠯᠵᠤ ᠪᠠᠢᠨᠠ᠃ ᠡᠭᠦᠨ ᠢ᠋ ᠲᠠ ᠣᠯᠠᠨ ᠨᠣᠶᠠᠳ ᠵᠥᠪᠰᠢᠶᠡᠷᠡᠮᠦ! ᠭᠡᠪᠡ᠃
ᠠᠯᠠᠨᠳᠠᠷ ᠵᠠᠩᠵᠤᠨ ᠪᠤᠰᠤᠳ ᠠ᠋ᠴᠠ ᠳᠦᠷᠦᠭᠦᠯᠦᠨ ᠪᠣᠰᠴᠤ ᠢᠷᠡᠭᠡᠳ᠂ ᠰᠦᠷᠯᠢᠭ ᠪᠠᠷᠠᠭᠠᠨ ᠴᠢᠷᠠᠢ ᠪᠠᠨ ᠴᠢᠨᠦᠷᠡᠭᠦᠯᠦᠨ ᠵᠣᠭᠰᠣᠵᠤ᠂ ᠲᠠᠬᠢᠷ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠩᠭᠠ ᠠᠳᠬᠤᠭᠠᠳ᠄
— ᠥᠷᠥᠰᠢᠶᠡᠯᠲᠦ ᠡᠵᠡᠨ ᠮᠢᠨᠢ ᠪᠣᠯᠭᠣᠭᠠ! ᠶᠡᠬᠡᠰ ᠨᠣᠶᠠᠳ ᠮᠢᠨᠢ ᠲᠠᠭᠠᠯᠠᠵᠤ ᠬᠠᠢᠷᠠᠯᠠ! ᠪᠢᠳᠡ ᠴᠦ᠍ ᠪᠠᠰᠠ ᠡᠨᠳᠡ ᠭᠠᠷ ᠬᠤᠮᠬᠢᠨ ᠵᠦᠭᠡᠷ ᠰᠠᠭᠤᠭᠠ ᠦᠭᠡᠢ᠃ ᠬᠤᠪᠢᠯᠠᠢ ᠶ᠋ᠢᠨ ᠵᠦᠭ ᠡᠴᠡ ᠡᠢᠮᠦ ᠬᠡᠷᠡᠭ ᠳᠡᠭᠳᠡᠭᠡᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠲᠠᠭᠠᠮᠠᠭᠯᠠᠨ ᠮᠡᠳᠡᠭᠰᠡᠨ᠃ ᠲᠡᠭᠡᠭᠡᠳ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠰᠢᠭᠰᠡᠨ᠃ ᠪᠢᠳᠡᠨ ᠳ᠋ᠦ᠍ ᠡᠨᠳᠡ ᠡᠵᠡᠨ ᠬᠠᠭᠠᠨ ᠤ᠋ ᠬᠡᠪᠲᠡᠭᠦᠯ ᠲᠦᠮᠡᠲᠦ ᠡᠴᠡ ᠭᠠᠳᠠᠨᠠ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠲᠤᠯᠤᠯᠳᠤᠭᠠᠨ ᠤ᠋ ᠬᠡᠩᠭᠡᠷᠭᠡ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠬᠦᠯᠢᠶᠡᠭᠡᠳ ᠰᠠᠭᠤᠵᠤ ᠪᠠᠢᠨᠠ᠃ ᠡᠢᠮᠦ ᠳ᠋ᠦ᠍ ᠪᠢᠳᠡ ᠬᠠᠭᠠᠨ ᠤ᠋ ᠲᠠᠭᠠᠯᠠᠵᠤ ᠪᠠᠢᠭᠠ ᠶᠣᠰᠤᠭᠠᠢ ᠬᠤᠪᠢᠯᠠᠢ ᠶ᠋ᠢ ᠥᠷᠢᠰᠴᠦ ᠴᠣᠬᠢᠬᠤ ᠶᠣᠰᠣᠲᠠᠢ ᠪᠣᠯᠵᠠᠢ᠃ ᠪᠢ ᠬᠤᠪᠢ ᠳ᠋ᠤ᠌ ᠪᠠᠨ ᠤᠯᠤᠰ ᠤ᠋ᠨ ᠭᠠᠯ ᠭᠣᠯᠣᠮᠲᠠ ᠳ᠋ᠤ᠌ ᠬᠠᠷᠠ ᠬᠣᠷᠣᠮ ᠢ᠋ᠶ᠋ᠠᠨ᠂ ᠶᠡᠬᠡ ᠡᠵᠡᠨ ᠬᠠᠭᠠᠨ ᠢ᠋ᠶ᠋ᠠᠨ ᠥᠮᠥᠭᠯᠡᠨ ᠲᠤᠯᠤᠯᠳᠤᠭᠠᠨ ᠬᠢᠬᠦ ᠳ᠋ᠦ᠍ ᠠᠮᠢ ᠪᠡᠶᠡ ᠶᠦ᠍ᠭᠡᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠵᠢᠳᠬᠦᠨᠡ᠃ ᠶᠡᠬᠡ ᠬᠠᠭᠠᠨᠲᠠᠨ ᠲᠠ ᠣᠳᠣ ᠴᠡᠷᠢᠭ ᠢ᠋ᠶ᠋ᠡᠨ ᠡᠮᠦᠨᠡ ᠵᠦᠭ ᠬᠥᠳᠡᠯᠭᠡᠬᠦ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠬᠠᠢᠷᠠᠯᠠᠭᠠᠴᠢ! ᠶᠡᠬᠡ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠦᠶᠡ! ᠨᠠᠮᠤᠷ ᠤ᠋ᠨ ᠥᠭᠡᠬᠦᠨ ᠴᠠᠭ ᠪᠣᠯᠬᠣᠷ ᠠᠭᠲᠠ ᠮᠣᠷᠢᠳ ᠲᠠᠷᠭᠤᠨ ᠪᠠᠢᠭᠠ ᠰᠢᠦ ᠭᠡᠵᠦ ᠪᠦᠳᠦᠭᠦᠨ ᠳᠠᠭᠤ ᠪᠠᠨ ᠬᠦᠩᠭᠢᠨᠡᠭᠦᠯᠦᠨ ᠬᠡᠯᠡᠪᠡ᠃ ᠦᠷᠭᠦᠭᠡᠨ ᠳ᠋ᠦ᠍ ᠬᠤᠷᠠᠭᠰᠠᠨ ᠨᠣᠶᠠᠳ ᠠᠯᠠᠨᠳᠠᠷ ᠵᠠᠩᠵᠤᠨ ᠤ᠋ ᠦᠭᠡ ᠶ᠋ᠢ ᠲᠠᠭᠠᠰᠢᠶᠠᠨ ᠤᠭᠲᠤᠵᠤ᠂ ᠭᠠᠷ ᠳᠡᠯᠭᠡᠨ ᠬᠤᠷᠤᠢᠯᠠᠯᠠ᠃ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠣᠯᠤᠭᠰᠠᠨ ᠡᠨᠡ ᠴᠤᠭᠯᠠᠷᠠᠯᠲᠠ ᠪᠠᠷ ᠭᠤᠷᠪᠠ ᠬᠣᠨᠣᠭᠠᠳ ᠶᠡᠬᠡ ᠴᠡᠷᠢᠭ ᠢ᠋ ᠡᠮᠦᠨᠡ ᠵᠦᠭ ᠬᠥᠳᠡᠯᠭᠡᠨ ᠮᠣᠷᠳᠠᠭᠤᠯᠬᠤ ᠪᠠᠷ ᠬᠡᠯᠡᠯᠴᠡᠨ ᠰᠢᠢᠳᠪᠡ᠃
— ᠲᠣᠪᠯᠠᠭᠰᠠᠨ ᠴᠠᠭ ᠢᠷᠡᠬᠦ ᠳ᠋ᠦ᠍ ᠥᠷᠯᠥᠭᠡ ᠦᠦᠷ ᠦ᠋ᠨ ᠲᠤᠶᠠᠭᠠ ᠲᠠᠢ ᠤᠷᠤᠯᠳᠤᠨ᠂ ᠨᠡᠢᠰᠯᠡᠯ ᠦ᠋ᠨ ᠲᠥᠪ ᠲᠦ᠍ ᠶᠡᠬᠡ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ᠂ ᠲᠡᠢᠨ ᠦ᠌ ᠳᠣᠬᠢᠶᠠ ᠥᠭᠴᠦ᠂ ᠪᠦᠬᠦ ᠴᠡᠷᠢᠭ ᠭᠠᠩ ᠳᠥᠷᠦᠭᠡᠨ ᠳ᠋ᠦ᠍ ᠬᠥᠯ ᠲᠠᠯᠪᠢᠯᠠ᠃ ᠬᠠᠷᠠ ᠬᠣᠷᠣᠮ ᠬᠣᠲᠠ ᠳ᠋ᠤ᠌ ᠬᠠᠵᠠᠭᠠᠷ ᠬᠦᠯᠦᠭ ᠡᠴᠡ ᠥᠭᠡᠷᠡ ᠢᠳᠡᠷ ᠨᠠᠰᠤᠨ ᠤ᠋ ᠡᠷᠡ ᠬᠥᠮᠦᠨ ᠲᠣᠭᠠᠲᠠᠢᠬᠠᠨ ᠦᠯᠡᠳᠡᠪᠡ᠃ ᠡᠮᠡᠭᠡᠯᠲᠦ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ᠂ ᠡᠷᠡ ᠭᠡᠵᠢᠭᠡᠲᠦ ᠬᠥᠮᠦᠰ ᠦ᠋ᠨ ᠬᠠᠷᠠᠭᠠ ᠡᠮᠦᠨᠡ ᠵᠦᠭ ᠴᠢᠭᠯᠡᠨ ᠰᠢᠷᠲᠡᠵᠦ ᠡᠬᠢᠯᠡᠪᠡ᠃ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠣᠭᠣᠰᠣ ᠤᠷᠠᠠᠳ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠶ᠋ᠢ ᠳᠠᠷᠤᠵᠤ᠂ ᠰᠢᠩᠬᠤ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠪᠠᠯ ᠢ᠋ ᠪᠦᠷᠬᠦᠭᠰᠡᠨ ᠨᠢ ᠨᠡᠢᠰᠯᠡᠯ ᠦ᠋ᠨ ᠬᠢᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠦᠯᠡᠳᠡᠭᠡᠯᠡ᠃ ᠤᠯᠠᠷᠢᠬᠤ ᠴᠠᠭ ᠤ᠋ᠨ ᠠᠶᠠᠰ ᠶᠠᠭᠠᠬᠢᠵᠤ ᠡᠷᠭᠢᠬᠦ ᠶ᠋ᠢ ᠤᠷᠢᠳᠴᠢᠯᠠᠨ ᠲᠠᠭᠠᠮᠠᠭᠯᠠᠵᠤ ᠬᠡᠯᠡᠬᠦ ᠠᠷᠭᠠ ᠬᠡᠨ ᠳ᠋ᠦ᠍ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃
ᠠᠷᠢᠭᠪᠥ᠋ᠬᠡ ᠬᠠᠭᠠᠨ ᠤ᠋ ᠶᠣᠰᠣ ᠪᠠᠷ ᠵᠠᠭᠤᠨ ᠳᠠᠭᠠᠭᠤᠯ ᠤ᠋ᠨ ᠬᠠᠮᠲᠤ ᠮᠣᠷᠳᠠᠵᠤ ᠳᠠᠪᠬᠢᠨ ᠤᠷᠠᠠᠳ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠢᠷᠡᠵᠦ ᠵᠢᠯᠣᠭᠣ ᠲᠡᠳᠡᠨ ᠪᠠᠭᠤᠭᠠᠳ᠂ ᠡᠬᠢ ᠭᠣᠣᠯ ᠤ᠋ᠨ ᠤᠰᠤ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠨ᠂ ᠴᠡᠭᠡᠯ ᠦ᠋ᠨ ᠴᠡᠩᠬᠡᠷ ᠲᠣᠯᠢᠨ ᠳ᠋ᠤ᠌ ᠥᠪᠡᠷ ᠢ᠋ ᠪᠡᠨ ᠬᠠᠷᠠᠵᠤ ᠲᠦᠷ ᠰᠠᠭᠠᠳᠠᠪᠠ᠃ ᠲᠡᠭᠡᠲᠡᠯᠡ ᠭᠠᠵᠠᠷ ᠤ᠋ᠨ ᠬᠠᠮᠢᠭᠠ ᠠ᠋ᠴᠠ ᠭᠠᠷᠴᠤ ᠢᠷᠡᠪᠡ ᠭᠡᠮᠡᠷ ᠬᠤᠢ ᠰᠠᠯᠬᠢ ᠪᠣᠰᠴᠤ᠂ ᠨᠠᠮᠤᠭᠤᠬᠠᠨ ᠮᠢᠷᠠᠯᠵᠠᠨ ᠪᠠᠢᠭᠰᠠᠨ ᠴᠡᠭᠡᠯ ᠦ᠋ᠨ ᠤᠰᠤ ᠶ᠋ᠢ ᠴᠠᠯᠭᠢᠯᠠᠭᠤᠯᠤᠨ ᠳᠠᠪᠠᠯᠭᠠᠯᠠᠭᠤᠯᠵᠤ ᠦᠢᠮᠡᠭᠦᠯᠦᠯᠡ᠃ ᠭᠣᠣᠯ ᠳ᠋ᠤ᠌ ᠨᠠᠮᠤᠭᠤᠨ ᠲᠠᠢᠪᠤᠩ ᠢ᠋ᠶ᠋ᠠᠷ ᠬᠦᠪᠦᠵᠦ ᠪᠠᠢᠭᠰᠠᠨ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠴᠤ᠌ ᠦᠢᠮᠡᠯᠳᠦᠨ ᠪᠤᠵᠢᠭᠢᠨᠠᠵᠤ᠂ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠡᠷ ᠵᠠᠢᠯᠠᠨ ᠣᠳᠬᠤ ᠨᠢ ᠨᠡᠢᠲᠡ ᠮᠣᠩᠭᠣᠯᠴᠤᠳ ᠤ᠋ᠨ ᠰᠡᠳᠬᠢᠯ ᠰᠠᠨᠠᠭᠠ ᠡᠢᠮᠦ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠠᠵᠢ᠃
ᠠᠷᠢᠭᠪᠥ᠋ᠬᠡ ᠪᠠᠢᠳᠠᠯ ᠢ᠋ ᠬᠠᠷᠠᠭᠠᠳ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ
— ᠮᠢᠨᠦ ᠤᠷᠠᠠᠳ ᠨᠠᠳᠠᠳᠤ ᠬᠢᠯᠢᠩᠨᠡᠭᠡ ᠦᠭᠡᠢ ᠪᠢᠵᠡ ᠠ᠋᠃ ᠴᠡᠭᠡᠯ ᠦ᠋ᠨ ᠤᠰᠤ ᠴᠠᠯᠭᠢᠯᠠᠵᠤ᠂ ᠲᠦᠮᠡᠨ ᠣᠯᠠᠨ᠂ ᠲᠥᠷᠥ ᠤᠯᠤᠰ ᠦᠢᠮᠡᠷᠡᠭᠰᠡᠨ ᠨᠢ ᠨᠠᠳᠠ ᠠ᠋ᠴᠠ ᠪᠣᠯᠤᠭᠠ ᠦᠭᠡᠢ ᠶ᠋ᠢ ᠮᠥᠩᠬᠡ ᠲᠩᠷᠢ ᠪᠣᠯᠭᠣᠭᠠᠨ ᠥᠷᠥᠰᠢᠶᠡᠬᠦ ᠪᠣᠯᠲᠤᠭᠠᠢ! ᠭᠡᠵᠦ ᠬᠡᠯᠡᠭᠡᠳ᠂ ᠳᠡᠷᠭᠡᠳᠡ ᠪᠡᠨ ᠶᠠᠪᠤᠭᠠ ᠬᠠᠷᠠ ᠯᠤᠤᠰ ᠤ᠋ᠨ ᠪᠥᠬᠡ ᠶ᠋ᠢ ᠬᠠᠷᠠᠨ᠂ ᠢᠳᠡᠭᠡ ᠴᠠᠭᠠᠨ ᠤ᠋ ᠪᠠᠨ ᠳᠡᠭᠡᠵᠢ ᠶ᠋ᠢ ᠡᠷᠭᠦᠨ ᠪᠠᠷᠢᠵᠤ᠄
— ᠰᠠᠬᠢᠭᠤᠰᠤ ᠪᠠᠨ ᠵᠠᠯᠠᠵᠤ᠂ ᠶᠡᠷᠡᠨ ᠶᠢᠰᠦᠨ ᠲᠩᠷᠢ ᠪᠡᠨ ᠳᠠᠭᠤᠳᠠᠨ ᠠᠪᠤᠷᠠᠯ ᠳ᠋ᠤ᠌ ᠪᠠᠨ ᠪᠠᠭᠲᠠᠭᠠᠵᠤ ᠬᠠᠢᠷᠠᠯᠠᠭᠠᠴᠢ! ᠭᠡᠪᠡ᠃ ᠡᠢᠨ ᠬᠦ᠌ ᠤᠷᠠᠠᠳ ᠭᠣᠣᠯ ᠤ᠋ᠨ ᠵᠠᠬᠠ᠂ ᠴᠡᠭᠡᠯ ᠤᠰᠤᠨ ᠤ᠋ ᠬᠠᠵᠠᠭᠤ ᠶ᠋ᠢᠨ ᠥᠨᠳᠥᠷ ᠡᠷᠭᠢ ᠳᠡᠭᠡᠷᠡ ᠪᠥᠬᠡ ᠶ᠋ᠢᠨ ᠬᠡᠩᠭᠡᠷᠭᠡ ᠫᠢᠵᠢᠭᠢᠨᠡᠭᠦᠯᠵᠦ ᠭᠠᠷᠤᠯᠠ᠃ ᠬᠠᠷᠠ ᠪᠥᠬᠡ ᠰᠠᠬᠢᠭᠤᠰᠤ ᠪᠠᠨ ᠵᠠᠯᠠᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠪᠠᠢᠵᠤ᠂ ᠰᠠᠯᠪᠠᠭᠠᠨᠠᠨ ᠰᠢᠷᠣᠢ ᠪᠤᠵᠢᠭᠢᠨᠠᠭᠤᠯᠵᠤ ᠬᠡᠯᠡᠬᠦ ᠳ᠋ᠦ᠍ ᠪᠡᠨ
— ᠲᠩᠷᠢ ᠬᠢᠯᠢᠩᠨᠡᠵᠦ᠂ ᠰᠠᠪᠳᠠᠭ ᠳᠣᠭᠰᠢᠷᠠᠵᠠᠢ᠃ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠡᠬᠢᠨ ᠦ᠌ ᠳᠣᠯᠣᠭᠠ ᠬᠣᠨᠣᠭ ᠨᠡᠩ ᠬᠡᠴᠡᠭᠦᠦ ᠪᠠᠢᠨᠠ᠃ ᠬᠠᠷᠠ᠂ ᠴᠠᠭᠠᠨ ᠲᠩᠷᠢ ᠯᠤᠤᠰ ᠤ᠋ᠨ ᠰᠠᠬᠢᠭᠤᠰᠤ ᠶ᠋ᠢ ᠡᠳᠦᠷ ᠪᠣᠯᠭᠠᠨ ᠵᠠᠯᠠᠵᠤ ᠠᠮᠢ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠵᠤ ᠮᠣᠷᠢᠯᠠ! ᠭᠡᠵᠦ ᠬᠡᠯᠡᠪᠡ᠃ ᠠᠷᠢᠭᠪᠥ᠋ᠬᠡ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ᠂ ᠢᠯᠳᠦ ᠪᠡᠨ ᠰᠤᠭᠤ ᠲᠡᠳᠡᠨ᠂ ᠪᠥᠬᠡ ᠶ᠋ᠢ ᠴᠢᠴᠢᠨ ᠵᠢᠭᠠᠵᠤ᠄
— ᠰᠠᠪᠳᠠᠭ ᠳᠣᠭᠰᠢᠷᠠᠭᠤᠯᠬᠤ ᠭᠡᠮ ᠨᠠᠳᠠᠳᠤ ᠢᠷᠡᠬᠦ ᠶᠣᠰᠣ ᠦᠭᠡᠢ᠃ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠭᠠ ᠪᠣᠯ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠲᠩᠷᠢ ᠳ᠋ᠦ᠍ ᠨᠢᠷᠭᠢᠭᠦᠯᠬᠦ ᠶᠣᠰᠣᠲᠠᠢ᠃ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠵᠠᠯᠭᠠᠮᠵᠢᠯᠠᠬᠤ ᠶᠣᠰᠣ ᠶ᠋ᠢ ᠪᠢ ᠡᠪᠳᠡᠭᠰᠡᠨ ᠪᠣᠯ ᠨᠠᠳᠠᠳᠤ ᠬᠠᠮᠤᠭ ᠬᠠᠷᠢᠶᠠᠯ ᠤ᠋ᠨ ᠦᠵᠦᠭᠦᠷ ᠲᠤᠰᠬᠤ ᠤᠴᠢᠷᠲᠠᠢ! ᠭᠡᠵᠦ ᠬᠡᠯᠡᠭᠡᠳ᠂ ᠦᠯᠡᠮᠵᠢ ᠶ᠋ᠢᠨ ᠬᠢᠯᠢᠩᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠢᠯᠢᠩ ᠬᠠᠷᠠ ᠬᠦᠯᠦᠭ ᠲᠦ᠍ ᠪᠡᠨ ᠬᠠᠷᠠᠢᠵᠤ ᠮᠣᠷᠳᠠᠭᠠᠳ᠂ ᠶᠡᠬᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠯᠠ᠃ ᠪᠦᠬᠦ ᠳᠠᠭᠠᠭᠤᠯ᠂ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠲᠣᠷᠭᠠᠨ ᠴᠡᠷᠢᠭ ᠴᠦ᠍ ᠬᠠᠭᠠᠨ ᠤ᠋ ᠠᠷᠤ ᠠ᠋ᠴᠠ ᠳ᠋ᠠᠭᠠᠨ ᠬᠣᠢᠷᠠᠨᠠᠭᠤᠯᠬᠤ ᠳ᠋ᠤ᠌ ᠮᠣᠷᠢᠨ ᠤ᠋ ᠬᠥᠯ ᠢ᠋ᠶ᠋ᠡᠷ ᠰᠢᠳᠡᠭᠳᠡᠭᠰᠡᠨ ᠴᠢᠯᠠᠭᠤ ᠴᠢᠬᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠰᠦᠩᠭᠢᠨᠡᠨ ᠥᠩᠭᠡᠷᠡᠵᠦ ᠪᠠᠢᠪᠠ᠃ ᠬᠡᠷᠡᠭ ᠶᠠᠪᠤᠳᠠᠯ ᠶᠠᠭᠤᠨ ᠳ᠋ᠤ᠌ ᠬᠦᠷᠴᠦ ᠲᠡᠭᠦᠰᠬᠦ ᠶ᠋ᠢ ᠪᠥᠬᠡ ᠢᠳᠤᠭᠠᠨ᠂ ᠯᠤᠤᠰ ᠰᠠᠪᠳᠠᠭ᠂ ᠲᠩᠷᠢ ᠰᠠᠬᠢᠭᠤᠰᠤ ᠳᠠᠭᠠᠵᠤ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠢᠯᠡ᠃ ᠲᠡᠭᠡᠯᠡ ᠴᠦ᠍ ᠲᠡᠢᠨ ᠳᠣᠯᠣᠭᠠᠨ ᠪᠠᠰᠠ ᠥᠪᠡᠷ ᠦ᠋ᠨ ᠬᠠᠤᠯᠢ ᠲᠠᠢ᠃ ᠲᠡᠷᠡ ᠬᠠᠤᠯᠢ ᠪᠠᠷ ᠢ᠋ᠶ᠋ᠠᠨ ᠡᠮᠦᠨᠡ ᠵᠦᠭ ᠲᠦ᠍ ᠶᠠᠪᠤᠭᠤᠯᠬᠤ ᠳᠣᠯᠣᠭᠠᠨ ᠰᠢᠢᠳᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ᠃
ᠬᠠᠷᠠᠬᠣᠷᠣᠮ ᠬᠣᠲᠠ ᠥᠨᠥᠴᠢᠷᠡᠵᠦ᠂ ᠥᠪᠡᠷ ᠦ᠋ᠨ ᠭᠡᠬᠦ ᠡᠵᠡᠨ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋᠂ ᠣᠯᠠᠨ ᠰᠦᠮᠡ ᠳᠤᠭᠠᠩ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠡᠢᠰᠬᠡᠭᠰᠡᠨ ᠲᠤᠭ ᠬᠢᠭᠢᠷᠢ ᠳᠠᠯᠠᠯᠤᠨ ᠬᠣᠴᠣᠷᠬᠤ ᠳ᠋ᠤ᠌ ᠪᠠᠨ ᠳᠠᠯᠳᠠ ᠶ᠋ᠢ ᠮᠡᠳᠡᠳᠡᠭ ᠰᠠᠨ ᠪᠣᠯ《ᠪᠢ ᠡᠵᠡᠨ ᠡᠴᠡ ᠪᠡᠨ ᠬᠠᠭᠠᠴᠠᠯᠠ》 ᠭᠡᠵᠦ ᠰᠢᠪᠡᠨᠡᠨ ᠤᠬᠢᠯᠠᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠤᠢᠳᠬᠠᠷᠲᠠᠢ ᠪᠠᠷ ᠨᠡᠪᠰᠡᠢᠵᠦ ᠬᠠᠷᠠᠯᠠᠨ ᠦᠯᠡᠳᠡᠪᠡ᠃ ᠲᠡᠭᠡᠯᠡ ᠴᠦ᠍ ᠡᠵᠡᠨ ᠬᠢᠴᠢᠶᠡᠪᠡᠯ ᠵᠠᠶᠠᠭᠠ ᠬᠢᠴᠢᠶᠡᠨᠡ ᠭᠡᠭᠴᠢ ᠪᠡᠷ ᠲᠡᠷᠡ ᠬᠣᠲᠠ ᠶ᠋ᠢᠨ ᠤᠤᠭᠠᠯ ᠡᠵᠡᠳ ᠪᠣᠯᠬᠤ ᠲᠦᠮᠡᠨ ᠣᠯᠠᠨ ᠨᠢ ᠥᠪᠡᠷ ᠢ᠋ ᠪᠡᠨ ᠬᠠᠮᠠᠭᠠᠯᠠᠬᠤ ᠶᠣᠰᠣᠲᠠᠢ ᠪᠣᠯᠵᠠᠢ᠃ ᠭᠡᠯᠡ ᠴᠦ᠍ ᠭᠠᠭᠴᠠ ᠨᠢᠭᠡ ᠠᠭᠠᠭ ᠣᠮᠣᠭ ᠲᠠᠢ ᠬᠥᠮᠦᠨ ᠪᠦᠬᠦᠨ ᠢ᠋ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠢᠳᠴᠦ ᠪᠠᠢᠭᠠ ᠶ᠋ᠢ ᠬᠠᠷᠠ ᠬᠣᠷᠣᠮ ᠤᠳᠠᠬᠤ ᠦᠭᠡᠢ ᠬᠠᠷᠠᠬᠤ ᠪᠢᠵᠡ ᠠ᠋᠃
ᠶᠡᠬᠡ ᠴᠡᠷᠢᠭ ᠤᠷᠤᠭᠰᠢᠯᠠᠭᠰᠠᠭᠠᠷ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠠᠳᠠᠯᠢ ᠲᠣᠭᠣᠰᠣ ᠮᠠᠨᠠᠷᠠᠵᠤ᠂ ᠣᠩᠭᠢ ᠶ᠋ᠢᠨ ᠴᠡᠩᠬᠡᠷ ᠭᠣᠣᠯ ᠢ᠋ ᠭᠠᠲᠤᠯᠤᠨ᠂ ᠡᠮᠦᠨᠡ ᠵᠦᠭ ᠴᠢᠭᠯᠡᠨ ᠴᠤᠪᠤᠭᠰᠠᠭᠠᠷ ᠪᠠᠢᠪᠠ᠃ ᠡᠨᠡ ᠴᠡᠷᠢᠭ ᠢ᠋ ᠪᠠᠷᠠᠭᠤᠨ᠂ ᠵᠡᠭᠦᠨ ᠬᠣᠶᠠᠷ ᠵᠢᠭᠦᠷ ᠪᠣᠯᠭᠠᠨ ᠬᠤᠪᠢᠶᠠᠵᠤ᠂ ᠪᠠᠷᠠᠭᠤᠨ ᠢ᠋ ᠨᠢ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ᠂ ᠵᠡᠭᠦᠨ ᠵᠢᠭᠦᠷ ᠢ᠋ ᠠᠯᠠᠨᠳᠠᠷ ᠵᠠᠩᠵᠤᠨ ᠲᠡᠷᠢᠭᠦᠯᠡᠵᠦ ᠶᠠᠪᠤᠪᠠ᠃ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠦᠭᠰᠡᠨ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠬᠠᠬᠤ ᠢᠴᠡᠭᠡᠨ ᠦ᠌ ᠨᠣᠬᠠᠢ ᠰᠢᠭ᠋ ᠠᠮᠢᠲᠠᠨ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠡᠨᠡ ᠴᠢᠮᠡᠭᠡ ᠶ᠋ᠢ ᠲᠡᠷᠡ ᠵᠠᠬᠢᠷᠤᠭᠴᠢ ᠮᠡᠳᠡᠭᠡᠳ ᠶᠠᠭᠠᠬᠢᠵᠤ ᠬᠥᠳᠡᠯᠵᠦ ᠪᠠᠢᠭᠠ ᠶ᠋ᠢ ᠲᠣᠯᠢᠨ ᠳ᠋ᠤ᠌ ᠲᠤᠰᠬᠠᠨ ᠬᠠᠷᠠᠪᠠᠯ ᠪᠠᠰᠠ ᠰᠣᠨᠢᠷᠬᠠᠯᠲᠠᠢ ᠲᠡᠳᠦᠢ ᠦᠭᠡᠢ ᠪᠦᠬᠦᠨ ᠦ᠌ ᠬᠢᠯᠢᠩ ᠪᠠᠳᠠᠷᠠᠭᠠᠬᠤ ᠬᠡᠷᠡᠭ ᠢ᠋ ᠲᠡᠷᠡ ᠪᠡᠷ ᠬᠢᠲᠠᠳ ᠨᠣᠶᠠᠳ ᠲᠠᠢ ᠨᠡᠢᠯᠡᠨ ᠦᠢᠯᠡᠳᠦᠭᠰᠡᠭᠡᠷ ᠪᠠᠢᠭᠠ ᠨᠢ ᠮᠠᠭᠠᠳ ᠲᠠᠢ ᠪᠢᠯᠡ᠃
ᠠᠷᠢᠭᠪᠥ᠋ᠬᠡ ᠶᠡᠬᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠲᠦᠷᠦᠭᠦᠨ ᠳ᠋ᠦ᠍ ᠨᠢ ᠨᠢᠭᠡ ᠭᠠᠷᠴᠤ᠂ ᠰᠡᠭᠦᠯ ᠳ᠋ᠦ᠍ ᠨᠢ ᠪᠠᠰᠠ ᠣᠷᠣᠵᠤ ᠦᠵᠡᠨ᠂ ᠳᠣᠭᠳᠣᠯᠤᠭᠰᠠᠨ ᠰᠡᠳᠬᠢᠯ ᠳ᠋ᠦ᠍ ᠪᠡᠨ ᠬᠥᠲᠥᠯᠦᠭᠳᠡᠨ ᠶᠠᠪᠤᠭᠠ ᠴᠤ᠌ ᠭᠡᠰᠡᠨ《ᠪᠢ ᠮᠣᠩᠭᠣᠯ ᠲᠦᠮᠡᠨ᠂ ᠬᠠᠷᠠᠬᠣᠷᠣᠮ ᠨᠡᠢᠰᠯᠡᠯ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠶᠠᠪᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠪᠤᠷᠤᠭᠤ ᠰᠠᠨᠠᠭᠠᠲᠠᠨ ᠤ᠋ ᠪᠣᠯᠵᠣᠭᠠᠲᠤ ᠰᠤᠮᠤᠨ ᠠ᠋ᠴᠠ ᠪᠤᠴᠠᠵᠤ ᠵᠠᠢᠯᠠᠬᠤ ᠦᠭᠡᠢ》 ᠂ 《ᠪᠢ ᠨᠢᠭᠡ ᠦᠬᠦᠨᠡ ᠤᠤ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠬᠣᠶᠠᠷ ᠳᠠᠬᠢᠨ ᠦᠬᠦᠬᠦ ᠦᠭᠡᠢ᠃ ᠪᠢ ᠬᠡᠵᠢᠶᠡ ᠴᠦ᠍ ᠰᠠᠨᠳᠤᠷᠬᠤ ᠦᠭᠡᠢ》 ᠭᠡᠵᠦ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠵᠦ ᠶᠠᠪᠤᠭᠠ ᠶ᠋ᠢ ᠲᠡᠭᠦᠨ ᠦ᠌ ᠳᠣᠭᠰᠢᠨ ᠬᠠᠷᠠᠴᠠ ᠠ᠋ᠴᠠ ᠨᠢ ᠠᠵᠢᠵᠤ ᠮᠡᠳᠡᠬᠦ ᠳ᠋ᠦ᠍ ᠲᠦᠪᠡᠭ ᠦᠭᠡᠢ ᠪᠠᠢᠪᠠ᠃
ᠶᠡᠬᠡ ᠴᠡᠷᠢᠭ ᠬᠡᠭᠡᠷᠡ ᠪᠠᠭᠤᠳᠠᠯᠯᠠᠨ᠂ ᠲᠦᠮᠡᠨ ᠭᠠᠯ ᠠᠰᠠᠭᠠᠵᠤ ᠬᠣᠭᠣᠯᠠᠯᠠᠨ ᠤᠮᠳᠠᠯᠠᠭᠰᠠᠭᠠᠷ᠂ ᠡᠳᠦᠷ ᠬᠠᠯᠠᠭᠤᠨ ᠳ᠋ᠤ᠌ ᠮᠣᠷᠢ ᠮᠠᠯ ᠢ᠋ᠶ᠋ᠠᠨ ᠠᠮᠠᠷᠠᠭᠠᠵᠤ᠂ ᠰᠥᠨᠢ ᠰᠡᠷᠢᠭᠦᠨ ᠳᠡᠭᠡᠷᠡ ᠠᠶᠠᠯᠠᠯ ᠶᠤᠭᠠᠨ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠵᠡᠭᠦᠨ ᠪᠣᠭᠳᠠ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠪᠠᠷ᠂ ᠵᠡᠭᠦᠨ ᠡᠮᠦᠨᠡ ᠵᠦᠭ ᠲᠦᠮᠡᠨ ᠳᠠᠭᠤ ᠪᠠᠷᠢᠬᠤ ᠬᠡᠮᠵᠢᠶᠡᠨ ᠦ᠌ ᠭᠠᠵᠠᠷ ᠲᠤ᠌ ᠠᠶᠠᠯᠠᠭᠰᠠᠨ ᠪᠠᠢᠪᠠ᠃ ᠠᠷᠢᠭᠪᠥ᠋ᠬᠡ ᠬᠠᠭᠠᠨ ᠥᠪᠡᠷ ᠦ᠋ᠨ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠬᠡᠭᠡᠷᠡ ᠶ᠋ᠢᠨ ᠠᠭᠠᠷ ᠲᠤ᠌ ᠦᠬᠡᠷ ᠦ᠋ᠨ ᠰᠢᠷᠢ ᠳᠡᠪᠢᠰᠦᠨ ᠬᠡᠪᠲᠡᠵᠦ᠂ ᠭᠡᠬᠦᠨ ᠦ᠌ ᠢᠰᠬᠦᠯᠡᠩ ᠠᠢᠷᠠᠭ ᠵᠠᠯᠭᠢᠯᠠᠭᠰᠠᠭᠠᠷ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠰᠠᠨᠠᠭᠠ ᠦᠭᠡᠢ ᠪᠡᠨ ᠰᠠᠨᠠᠯᠠ ᠭᠡᠵᠦ ᠪᠣᠯᠬᠤ ᠪᠠᠷ ᠡᠯᠳᠡᠪ ᠢ᠋ ᠪᠣᠳᠣᠭᠰᠠᠨ ᠤ᠋ ᠭᠣᠣᠯ ᠨᠢ 《ᠠᠬᠠ ᠳᠡᠭᠦᠦ ᠬᠡᠮᠡᠭᠳᠡᠬᠦ ᠪᠢᠳᠡ ᠬᠣᠶᠠᠷ ᠤ᠋ᠨ ᠡᠨᠡ ᠰᠠᠮᠠᠭᠤᠨ ᠠ᠋ᠴᠠ ᠪᠣᠯᠤᠭᠠᠳ ᠤᠯᠤᠰ ᠭᠦᠷᠦᠨ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠦᠢᠮᠡᠵᠦ ᠣᠷᠬᠢᠬᠤ ᠪᠣᠢ᠃ ᠲᠡᠭᠡᠪᠡᠯ ᠲᠡᠭᠦᠨ ᠰᠢᠭ ᠠᠶᠤᠯ ᠬᠠᠮᠢᠭᠠ ᠪᠠᠢᠬᠤ ᠪᠣᠢ᠃ ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠰᠬᠠᠵᠤ ᠪᠣᠢᠵᠢᠭᠤᠯᠤᠭᠰᠠᠨ ᠤᠯᠤᠰ ᠢ᠋ ᠴᠠᠴᠤᠭᠰᠠᠨ ᠲᠠᠷᠢᠶᠠ ᠠᠳᠠᠯᠢ ᠪᠣᠯᠭᠠᠵᠤ ᠣᠷᠬᠢᠪᠠᠯ ᠬᠡᠨ᠂ ᠬᠡᠵᠢᠶᠡ ᠴᠦ᠍ ᠨᠥᠬᠥᠵᠦ ᠴᠢᠳᠠᠬᠤ ᠦᠭᠡᠢ ᠭᠠᠷᠤᠵᠠ ᠪᠣᠯᠵᠤ ᠣᠷᠬᠢᠬᠤ ᠰᠢᠦ ᠳᠡ᠃ ᠡᠨᠡ ᠠᠶᠤᠯ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠶᠦᠮ ᠰᠠᠨ 》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠪᠠ᠃
ᠠᠯᠠᠨᠳᠠᠷ ᠵᠠᠩᠵᠤᠨ ᠠᠶᠠᠨ ᠤ᠋ ᠵᠠᠮ ᠤ᠋ᠨ ᠲᠤᠷᠰᠢᠲᠠ ᠬᠦᠷᠡᠯᠭᠡᠷ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ᠂ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠ ᠰᠢᠷᠲᠡᠨ ᠶᠠᠪᠤᠬᠤ ᠳ᠋ᠤ᠌ ᠪᠠᠨ 《ᠮᠣᠩᠭᠣᠯ ᠮᠣᠷᠢᠲᠤ ᠴᠡᠷᠢᠭ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠪᠠᠷᠢᠮᠵᠢᠶᠠ ᠲᠠᠢ᠃ ᠬᠢᠲᠠᠳ ᠴᠡᠷᠢᠭ ᠯᠡ ᠬᠤᠢᠬᠠᠯᠠᠭᠳᠠᠭᠰᠠᠨ ᠨᠤᠷᠮᠠᠨ ᠳᠣᠲᠣᠷᠠ ᠠ᠋ᠴᠠ ᠬᠤᠯᠤᠰᠤᠨ ᠰᠤᠮᠤ ᠪᠠᠷ ᠬᠠᠷᠪᠤᠨ ᠭᠠᠷᠴᠤ ᠢᠷᠡᠭᠡᠳ᠂ ᠦᠬᠦᠵᠦ ᠪᠠᠢᠭᠠ ᠮᠠᠭᠤᠬᠠᠢ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠨ ᠪᠠᠢᠯᠳᠤᠳᠠᠭ ᠳᠠ᠃ ᠴᠠᠭᠠᠨ ᠵᠠᠩᠵᠤᠨ ᠨᠢᠭᠡᠨ ᠬᠡᠰᠡᠭ ᠴᠡᠷᠢᠭ ᠲᠡᠷᠢᠭᠦᠯᠡᠨ ᠶᠠᠪᠤᠭᠠ ᠪᠢᠵᠡ᠃ ᠲᠡᠷᠡ ᠬᠥᠮᠦᠨ ᠣᠪᠯᠢᠭ ᠮᠠᠭᠤᠲᠠᠢ᠂ ᠲᠣᠭᠰᠢᠨ ᠬᠡᠷᠴᠡᠭᠡᠢ ᠵᠠᠩᠲᠠᠢ ᠰᠢᠦ᠃ ᠪᠠᠶᠠᠨ ᠵᠠᠩᠵᠤᠨ ᠤᠷᠢᠶᠠᠩᠬᠠᠢᠳᠠᠢ ᠨᠠᠷ ᠶᠠᠪᠤᠭᠠ ᠪᠣᠯ ᠮᠣᠩᠭᠣᠯ ᠴᠡᠷᠢᠭ ᠲᠡᠢ ᠪᠡᠨ ᠬᠦᠴᠦᠯᠡᠨ ᠪᠠᠢᠯᠳᠤᠬᠤ ᠦᠭᠡᠢ᠂ ᠢᠯᠠᠭᠰᠠᠨ ᠢᠯᠠᠭᠳᠠᠭᠰᠠᠨ ᠬᠣᠶᠠᠷ ᠢᠯᠭᠠᠭᠠ ᠦᠭᠡᠢ ᠭᠡᠬᠦ ᠪᠢᠵᠡ》 ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠪᠠᠢᠪᠠ᠃
ᠶᠡᠬᠡ ᠴᠡᠷᠢᠭ ᠬᠡᠳᠦᠨ ᠬᠣᠨᠣᠭ ᠠᠶᠠᠯᠠᠭᠠᠳ ᠲᠦᠷᠦᠭᠦᠴᠢ ᠨᠢ ᠵᠢᠷᠦᠬᠡ ᠬᠠᠢᠷᠬᠠᠨ ᠤ᠋ ᠵᠡᠭᠦᠨ ᠬᠣᠭᠣᠯᠠᠢ᠂ ᠠᠷᠰᠯᠠᠨ ᠴᠤᠬᠢᠶᠠᠳᠤ ᠶ᠋ᠢᠨ ᠥᠪᠥᠷ ᠪᠠᠯ ᠳ᠋ᠤ᠌ ᠣᠷᠣᠵᠤ ᠢᠷᠡᠵᠦ᠂ ᠶᠡᠬᠡ ᠡᠯᠡᠰᠦᠨ ᠦ᠌ ᠵᠠᠬᠠ ᠪᠠᠷ ᠤᠷᠤᠭᠰᠢ ᠠᠬᠢᠬᠤ ᠪᠣᠯᠤᠯᠠ᠃ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠳᠤᠷᠠᠨᠳᠠᠨ ᠰᠢᠨᠵᠢᠵᠦ ᠶᠠᠪᠤᠭᠠ ᠠᠷᠢᠭᠪᠥ᠋ᠬᠡ ᠨᠢᠭᠡᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠬᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡ ᠶ᠋ᠢᠨ ᠬᠥᠮᠦᠰ ᠲᠦ᠍ ᠪᠡᠨ ᠬᠠᠨᠳᠤᠵᠤ᠄
— ᠲᠡᠷᠲᠡᠭᠡ ᠠᠯᠤᠰ ᠲᠤ᠌ ᠶᠡᠬᠡ ᠲᠣᠭᠣᠰᠣ ᠮᠠᠨᠠᠷᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠪᠣᠯ ᠦᠷᠭᠦᠭᠰᠡᠨ ᠰᠦᠷᠦᠭ ᠬᠤᠯᠠᠨ ᠤ᠋ ᠲᠣᠭᠣᠰᠣ ᠪᠢᠵᠡ᠃ ᠠᠯᠢ ᠲᠡᠨᠳᠡ ᠤᠷᠢᠳ ᠠ᠋ᠴᠠ ᠴᠡᠷᠢᠭ ᠣᠷᠣᠵᠤ ᠢᠷᠡᠯᠡ ᠭᠡᠰᠡᠨ ᠦᠭᠡ ᠤᠤ ? ᠬᠤᠪᠢᠯᠠᠢ ᠭᠣᠪᠢ ᠶ᠋ᠢᠨ ᠶᠡᠬᠡ ᠡᠯᠡᠰᠦ ᠶ᠋ᠢ ᠪᠢᠳᠡ ᠨᠠᠷ ᠢ᠋ᠶ᠋ᠠᠷ ᠳᠣᠭᠣᠯᠤᠭᠤᠯᠵᠤ ᠰᠡᠲᠡᠯᠦᠨ ᠬᠦᠴᠦ ᠪᠠᠷᠠᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠨᠳᠡ ᠠᠮᠤᠷ ᠪᠠᠢᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠨ ᠢ᠋ ᠠᠮᠠᠳᠠᠨ ᠲᠣᠰᠴᠤ ᠴᠣᠬᠢᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠪᠣᠯᠪᠠ ᠤᠤ᠃ ᠲᠡᠢᠮᠦ ᠰᠠᠨᠠᠭᠠ ᠶ᠋ᠢ ᠬᠤᠪᠢᠯᠠᠢ ᠭᠠᠷᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠬᠡᠯᠡᠪᠡ ᠃ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠪᠠᠢᠵᠠᠢ᠃
ᠬᠠᠷᠠᠬᠣᠷᠣᠮ ᠤ᠋ᠨ ᠴᠡᠷᠢᠭ ᠬᠤᠪᠢᠯᠠᠢ ᠶ᠋ᠢ ᠤᠷᠢᠲᠠᠵᠤ ᠴᠣᠬᠢᠨᠠ ᠭᠡᠰᠡᠨ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠨ ᠬᠥᠲᠥᠯᠦᠭᠳᠡᠨ ᠳᠣᠪᠲᠣᠯᠤᠭᠰᠠᠭᠠᠷ ᠬᠠᠷᠭᠠᠨᠠᠳᠤ ᠶ᠋ᠢᠨ ᠬᠥᠨᠳᠡᠢ ᠶ᠋ᠢᠨ ᠶᠡᠬᠡ ᠡᠯᠡᠰᠦ᠂ ᠮᠣᠩᠭᠣᠯ ᠤ᠋ᠨ ᠡᠯᠡᠰᠦ ᠶ᠋ᠢ ᠮᠠᠴᠤᠨ ᠵᠢᠳᠬᠦᠵᠦ ᠳᠠᠪᠠᠭᠠᠳ᠂ ᠳᠠᠯᠠᠨ ᠲᠦᠷᠦᠭᠦᠦ᠂ ᠴᠠᠭᠠᠨ ᠡᠯᠡᠰᠦᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠲᠦᠷᠦᠭᠦᠴᠢ ᠨᠢ ᠦᠵᠡᠭᠳᠡᠵᠦ ᠡᠬᠢᠯᠡᠪᠡ᠃ ᠲᠡᠳᠡ ᠬᠣᠢᠲᠤ ᠵᠦᠭ ᠲᠠᠪᠰᠢᠬᠤ ᠦᠭᠡᠢ᠂ ᠬᠣᠷᠢᠭᠯᠠᠨ ᠬᠠᠭᠠᠭᠰᠠᠨ ᠰᠢᠨᠵᠢ ᠲᠡᠢ ᠪᠠᠢᠭᠠ ᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠦᠴᠦ ᠪᠡᠨ ᠪᠥᠭᠡᠮᠨᠡᠷᠡᠭᠦᠯᠦᠨ᠂ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠢ᠋ ᠪᠤᠲᠠᠷᠠᠭᠠᠬᠤ ᠠᠷᠭᠠ ᠪᠣᠳᠣᠭᠰᠠᠨ ᠨᠢ ᠢᠯᠡᠳᠲᠡ᠃ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠠᠷᠪᠠᠨ ᠳᠠᠭᠤᠨ ᠤ᠋ ᠵᠠᠢᠲᠠᠢ ᠭᠠᠵᠠᠷ ᠲᠤ᠌ ᠣᠢᠷᠠᠲᠤᠵᠤ ᠢᠷᠡᠭᠡᠳ ᠬᠥᠳᠡᠯᠬᠦ ᠦᠭᠡᠢ᠂ ᠨᠢᠭᠡ ᠪᠠᠢᠷᠢᠨ ᠳᠡᠭᠡᠷᠡ ᠪᠡᠨ ᠶᠠᠭ ᠵᠣᠭᠰᠣᠵᠤ ᠣᠷᠬᠢᠯᠠ᠃ ᠡᠨᠡ ᠨᠢ ᠠᠭᠲᠠ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠠᠮᠢᠰᠬᠤᠭᠠ ᠶ᠋ᠢ ᠳᠠᠷᠤᠬᠤ᠂ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠰᠢᠨᠵᠢᠬᠦ᠂ ᠳᠠᠢᠳᠤᠬᠤ ᠠᠷᠭᠠ ᠪᠠᠨ ᠪᠣᠯᠪᠠᠰᠤᠷᠠᠭᠤᠯᠵᠤ ᠦᠵᠡᠬᠦ ᠭᠡᠰᠡᠨ ᠰᠠᠨᠠᠭᠠ ᠪᠠᠢᠪᠠ᠃ ᠲᠡᠭᠡᠵᠦ ᠲᠡᠳᠡ ᠬᠣᠶᠠᠷ ᠪᠦᠲᠦᠨ ᠡᠳᠦᠷ ᠢ᠋ ᠪᠠᠷᠠᠭᠠᠳ᠂ ᠮᠠᠷᠭᠠᠰᠢ ᠨᠢ ᠬᠡᠯᠡᠯᠴᠡᠵᠦ ᠲᠣᠪᠯᠠᠭᠰᠠᠨ ᠮᠡᠲᠦ ᠤᠷᠭᠤᠬᠤ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠬᠣᠶᠠᠷ ᠲᠠᠯᠠ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠵᠡᠷᠭᠡ ᠳᠠᠭᠠᠷᠢᠨ ᠳᠣᠪᠲᠣᠯᠵᠤ ᠡᠬᠢᠯᠡᠪᠡ᠃ ᠪᠠᠷᠠᠭᠤᠨ ᠵᠢᠭᠦᠷ ᠲᠦ᠍ ᠶᠠᠪᠤᠭᠠ ᠴᠡᠷᠢᠭ ᠢ᠋ ᠬᠣᠶᠠᠷ ᠬᠠᠭᠠᠨ᠂ ᠵᠡᠭᠦᠨ ᠵᠢᠭᠦᠷ ᠲᠦ᠍ ᠳᠣᠪᠲᠣᠯᠵᠤ ᠪᠠᠢᠭᠠ ᠴᠡᠷᠢᠭ ᠢ᠋ ᠠᠯᠠᠨᠳᠠᠷ᠂ ᠬᠠᠳᠠᠨ ᠨᠠᠷ ᠲᠡᠷᠢᠭᠦᠯᠡᠨ ᠵᠠᠯᠠᠵᠤ ᠶᠠᠪᠤᠭᠠ ᠨᠢ ᠢᠯᠡ ᠪᠣᠯᠤᠯᠠ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠴᠡᠷᠢᠭ ᠠᠯᠢ ᠠᠯᠢ ᠨᠢ ᠬᠣᠶᠠᠷ ᠠ᠋ᠴᠠ ᠳᠥᠷᠪᠡᠨ ᠲᠦᠮᠡ ᠪᠡᠷ ᠲᠣᠭᠠᠯᠠᠭᠳᠠᠬᠤ ᠪᠠᠢᠲᠠᠯᠲᠠᠢ ᠠᠵᠢ᠃ ᠲᠡᠳᠡ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠭᠤᠷᠪᠠ ᠳᠠᠬᠢᠨ ᠳᠠᠭᠠᠷᠢᠭᠠᠳ ᠠᠯᠢᠨ ᠤ᠋ ᠪᠠᠨ ᠴᠦ᠍ ᠡᠩᠨᠡᠭᠡ ᠶ᠋ᠢ ᠰᠡᠲᠡᠯᠦᠨ ᠡᠪᠳᠡᠵᠦ ᠴᠢᠳᠠᠯ ᠦᠭᠡᠢ ᠪᠠᠬᠠᠨ ᠬᠥᠮᠦᠨ᠂ ᠮᠣᠷᠢᠳ ᠤ᠋ᠨ ᠰᠡᠭ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ᠌ ᠦᠯᠡᠳᠡᠭᠡᠨ ᠬᠠᠶᠠᠭᠠᠳ ᠡᠷᠭᠢᠨ ᠪᠤᠴᠠᠵᠤ᠂ ᠬᠠᠷᠭᠠᠨᠠ ᠶ᠋ᠢᠨ ᠪᠤᠲᠠ᠂ ᠵᠠᠭ ᠤ᠋ᠨ ᠰᠢᠭᠤᠢ ᠳᠣᠲᠣᠷᠠ ᠣᠷᠣᠵᠤ ᠪᠦᠭᠭᠦᠨ ᠬᠣᠨᠣᠭᠯᠠᠬᠤ ᠪᠣᠯᠪᠠ᠃ ᠠᠩᠬᠠᠨ ᠤ᠋ ᠡᠳᠦᠷ ᠦ᠋ᠨ ᠡᠨᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠬᠣᠶᠠᠷ ᠲᠠᠯᠠ ᠨᠢ ᠴᠦ᠍ ᠪᠠᠭᠠ ᠦᠭᠡᠢ ᠵᠡᠬᠡᠭᠰᠡᠨ ᠬᠣᠬᠢᠷᠠᠯ ᠦᠵᠡᠵᠡᠢ᠃
ᠠᠷᠢᠭᠪᠥ᠋ᠬᠡ᠂ ᠠᠯᠠᠨᠳᠠᠷ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠣᠶᠠᠷ ᠥᠷᠲᠡᠭᠡ ᠵᠠᠢᠲᠠᠢ ᠪᠠᠢᠭᠠ ᠪᠣᠯᠪᠠᠴᠤ ᠮᠣᠷᠢᠲᠠᠨ ᠨᠤᠭᠤᠳ ᠰᠠᠯᠵᠤ ᠳᠠᠪᠬᠢᠨ᠂ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ᠌ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠪᠠᠨ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠪᠠᠢᠪᠠ᠃ ᠠᠯᠠᠨᠳᠠᠷ ᠤ᠋ᠨ ᠲᠠᠯᠠ ᠳ᠋ᠤ᠌ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠬᠠᠳᠠᠨ ᠲᠡᠷᠢᠭᠦᠯᠡᠨ ᠵᠠᠬᠢᠷᠴᠤ᠂ ᠠᠷᠢᠭᠪᠥ᠋ᠬᠡ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠬᠤᠪᠢᠯᠠᠢ ᠵᠠᠬᠢᠷᠤᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠤᠳᠤᠷᠢᠳᠴᠤ ᠪᠠᠢᠭᠠ ᠨᠢ ᠪᠦᠷ ᠠᠩᠬᠠᠨ ᠠ᠋ᠴᠠ ᠪᠠᠨ ᠮᠡᠳᠡᠭᠳᠡᠵᠦ ᠪᠢᠯᠡ᠃ ᠳᠤᠷᠠᠨ ᠤ᠋ ᠬᠠᠷᠠᠭᠠᠨ ᠳ᠋ᠤ᠌ ᠬᠤᠪᠢᠯᠠᠢ ᠮᠠᠰᠢ ᠣᠯᠠᠨ ᠳᠠᠭᠠᠭᠤᠯ ᠲᠠᠢ᠂ ᠰᠢᠷᠠ ᠲᠣᠷᠭᠠᠨ ᠴᠠᠴᠠᠷ ᠬᠣᠣᠰ ᠢ᠋ᠶ᠋ᠠᠷ ᠪᠣᠰᠬᠠᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠬᠥᠬᠡ ᠮᠠᠩᠨᠤᠭ ᠳᠡᠪᠡᠯ ᠲᠡᠢ᠂ ᠣᠯᠠᠨ ᠨᠤᠭᠤᠯᠤᠭᠠᠲᠤ ᠳᠤᠷᠠᠨ ᠪᠠᠷᠢᠨ᠂ ᠭᠣᠣᠯᠳᠠᠭᠤ ᠰᠡᠦᠬᠡ ᠲᠡᠷᠭᠡ ᠪᠡᠷ ᠶᠠᠪᠤᠵᠤ ᠪᠠᠢᠭᠠ ᠨᠢ ᠲᠣᠳᠣᠷᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠪᠡᠷ ᠶᠠᠭ ᠳᠠᠢᠳᠤᠵᠤ ᠪᠠᠢᠭᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠣᠲᠣᠷᠠ ᠣᠷᠣᠵᠤ ᠢᠷᠡᠬᠦ ᠦᠭᠡᠢ᠂ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ᠌ ᠨᠢᠭᠡ ᠣᠢᠷᠠᠲᠤᠨ ᠵᠢᠭᠠᠪᠤᠷᠢ ᠥᠭᠭᠦᠭᠡᠳ᠂ ᠡᠷᠭᠢᠵᠦ ᠪᠤᠴᠠᠨ ᠶᠠᠮᠠᠷ ᠨᠢᠭᠡ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠪᠠᠢᠷᠢᠯᠠᠵᠤ ᠲᠡᠢᠨ ᠢ᠋ ᠤᠳᠤᠷᠢᠳᠤᠨᠠ᠃ ᠲᠡᠳᠡᠨ ᠤ ᠲᠡᠢᠨ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ ᠡᠬᠢᠯᠡᠭᠡᠳ᠂ ᠣᠷᠣᠢ ᠪᠦᠷᠦᠩᠬᠦᠢ ᠪᠣᠯᠬᠤ ᠪᠣᠷ ᠲᠦᠷ ᠵᠠᠪᠰᠠᠷᠯᠬᠤ ᠪᠠᠢᠳᠠᠯᠳᠠᠢ ᠭᠤᠷᠪᠠ ᠳᠥᠷᠪᠡᠨ ᠬᠣᠨᠣᠭ ᠦᠷᠭᠦᠯᠵᠢᠯᠡᠪᠡ᠃ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠠᠯᠢ ᠠᠯᠢ ᠨᠢ ᠪᠡᠶᠡ ᠪᠡᠶᠡ ᠪᠡᠨ ᠬᠢᠲᠦᠶᠡ ᠭᠡᠵᠦ ᠮᠡᠷᠡᠢᠨ ᠲᠤᠯᠤᠯᠳᠤᠬᠤ ᠦᠭᠡᠢ ᠪᠠᠢᠭᠠ ᠨᠢ ᠠᠵᠢᠭᠯᠠᠭᠳᠠᠨᠠ᠃ ᠠᠷᠢᠭᠪᠥ᠋ᠬᠡ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠬᠤᠪᠢᠯᠠᠢ ᠠ᠋ᠴᠠ ᠥᠭᠡᠷᠡ ᠪᠠᠢᠲᠠᠯᠲᠠᠢ ᠭᠡᠬᠦ ᠤᠤ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠬᠣᠰᠢᠭᠤᠴᠢᠯᠠᠨ ᠴᠣᠬᠢᠬᠤ ᠠᠩᠭᠢ ᠶ᠋ᠢ ᠠᠪᠴᠤ ᠳᠠᠪᠬᠢᠨ᠂ ᠳᠠᠢᠰᠤᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠠᠵᠠᠭᠤ ᠲᠠᠯᠠ ᠠ᠋ᠴᠠ ᠳᠠᠭᠠᠷᠢᠵᠤ ᠡᠩᠨᠡᠭᠡ ᠶ᠋ᠢ ᠡᠪᠳᠡᠨ ᠰᠠᠷᠨᠢᠭᠤᠯᠬᠤ ᠠᠷᠭᠠ ᠨᠢᠭᠡ ᠪᠢᠰᠢ ᠤᠳᠠᠭᠠ ᠬᠢᠯᠡ᠃ ᠡᠨᠡ ᠶᠠᠩᠵᠤ ᠪᠠᠷ ᠪᠣᠯ ᠬᠤᠪᠢᠯᠠᠢ ᠶ᠋ᠢᠨ ᠲᠠᠯᠠ ᠠᠮᠵᠢᠯᠲᠠ ᠣᠯᠬᠤ ᠦᠭᠡᠢ ᠰᠢᠨᠵᠢᠲᠡᠢ ᠮᠡᠲᠦ᠃ ᠲᠡᠷᠡ ᠨᠢ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠬᠠᠷᠠᠬᠣᠷᠣᠮ ᠤ᠋ᠨ ᠴᠡᠷᠢᠭ ᠦ᠋ᠨ ᠥᠭᠡᠳᠡ ᠡᠴᠡ ᠬᠦᠴᠦ ᠭᠠᠷᠭᠠᠨ ᠦᠬᠦᠨ ᠲᠤᠯᠤᠯᠳᠤᠬᠤ ᠦᠭᠡᠢ ᠪᠣᠯᠤᠯᠲᠠᠢ ᠶᠠᠪᠤᠭᠠ ᠠ᠋ᠴᠠ ᠨᠢ ᠰᠢᠯᠲᠠᠭᠠᠯᠠᠵᠤ ᠪᠠᠢᠭᠠ ᠨᠢ ᠮᠡᠳᠡᠭᠡᠵᠢ᠃ ᠭᠡᠬᠦ ᠳ᠋ᠦ᠍ ᠪᠠᠨ ᠯᠠ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠳᠤ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠠᠯᠠᠭᠤᠯᠤᠭᠰᠠᠨ ᠴᠡᠷᠢᠭ᠂ ᠮᠣᠷᠢᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠲᠡᠷᠡᠢᠨ ᠬᠡᠪᠲᠡᠵᠦ᠂ ᠬᠢᠩᠭᠢᠨᠡᠨ ᠣᠷᠢᠯᠠᠬᠤ ᠬᠥᠮᠦᠨ ᠦ᠌ ᠳᠠᠭᠤᠨ ᠴᠢᠬᠢᠨ ᠳ᠋ᠦ᠍ ᠴᠢᠬᠢᠷᠡ ᠪᠣᠯᠤᠨ ᠵᠢᠷᠦᠬᠡ ᠰᠢᠮᠰᠢᠷᠡᠭᠦᠯᠵᠦ ᠰᠣᠨᠣᠰᠤᠭᠳᠠᠨᠠ᠃ ᠲᠡᠳᠡ ᠴᠣᠬᠣᠮ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠢᠩᠭᠢᠵᠦ ᠠᠮᠢ ᠨᠠᠰᠤ ᠪᠠᠨ ᠪᠦᠷᠢᠯᠭᠡᠵᠦ ᠪᠠᠢᠭᠠ ᠶ᠋ᠢ ᠪᠣᠳᠣᠬᠤ᠂ ᠠᠷᠤ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠰᠠᠨᠠᠬᠤ ᠰᠡᠭᠡᠭᠡ ᠦᠭᠡᠢ ᠪᠠᠢᠪᠠ᠃
ᠠᠷᠢᠭᠪᠥ᠋ᠬᠡ ᠲᠡᠷᠡ ᠦᠳᠡᠰᠢ ᠳᠠᠢᠳᠤᠭᠰᠠᠨ ᠲᠠᠯᠠᠪᠤᠷ ᠳᠤᠮᠳᠠᠭᠤᠷ ᠮᠣᠷᠢ ᠪᠠᠷ ᠳᠠᠪᠬᠢᠨ ᠶᠠᠪᠤᠵᠤ ᠦᠵᠡᠭᠡᠳ ᠦᠦᠷᠰᠡᠨ ᠣᠷᠢᠯᠠᠵᠤ ᠪᠥᠭᠰᠡ ᠪᠡᠨ ᠴᠢᠷᠦᠨ ᠪᠣᠰᠬᠤ ᠭᠡᠵᠦ ᠲᠡᠮᠡᠦᠯᠦᠨ ᠪᠣᠢ ᠮᠣᠷᠢᠳ᠂ ᠳᠤᠲᠠᠭᠤ ᠠᠯᠠᠭᠳᠠᠨ ᠦᠬᠦᠵᠦ ᠴᠢᠳᠠᠬᠤ ᠦᠭᠡᠢ ᠭᠢᠩᠰᠢᠨ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ
— ᠡᠨᠡ ᠪᠣᠯᠠᠢ ᠬᠡᠷᠡᠭ ᠢ᠋ ᠪᠢ ᠪᠢᠰᠢ᠂ ᠬᠤᠪᠢᠯᠠᠢ ᠡᠳ᠋ᠯᠡᠭᠦᠯᠦᠭᠰᠡᠨ ᠭᠡᠵᠦ ᠠᠮᠢᠲᠠᠳ ᠮᠡᠳᠡᠵᠦ ᠪᠠᠢᠭᠠ ᠪᠣᠯᠪᠠ ᠤᠤ ᠶᠠᠭᠤᠮᠠ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ᠂ ᠮᠠᠭᠤᠬᠠᠢ ᠪᠠᠢᠳᠠᠭ ᠶᠤᠮ ᠪᠣᠢ ᠭᠡᠵᠦ ᠬᠦᠨᠳᠦ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠵᠦ ᠪᠢᠯᠡ᠃
ᠪᠠᠷᠠᠭᠤᠨ ᠵᠢᠭᠦᠷ ᠦ᠋ᠨ ᠡᠨᠡ ᠲᠤᠯᠤᠯᠳᠤᠭᠠᠨ ᠳᠠᠯᠠᠨ ᠪᠤᠯᠠᠭ ᠤ᠋ᠨ ᠠᠭᠤᠯᠵᠠᠭᠤᠷ ᠭᠡᠳᠡᠭ ᠭᠠᠵᠠᠷ ᠲᠤ ᠪᠣᠯᠵᠤ ᠪᠠᠢᠭᠠ ᠠᠵᠢ᠃ ᠨᠥᠭᠦᠭᠡ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠠᠯᠠᠨᠳᠠᠷ ᠤ᠋ᠨ ᠲᠡᠷᠢᠭᠦᠯᠡᠨ ᠶᠠᠪᠤᠭᠤᠯᠵᠤ ᠪᠣᠢ ᠲᠤᠯᠤᠯᠳᠤᠭᠠᠨ ᠨᠢ ᠭᠠᠰᠢᠭᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ᠃ ᠲᠡᠳᠡ ᠪᠠᠰᠠ ᠯᠠ ᠳᠥᠷᠪᠡᠳᠡᠬᠢ ᠡᠳᠦᠷ ᠲᠦ᠍ ᠪᠡᠨ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠳᠠᠭᠠᠷᠢᠯᠲᠠ ᠬᠢᠭᠡᠳ ᠬᠠᠢᠨᠴᠡᠭᠤ ᠪᠠᠢᠳᠠᠯᠲᠠᠢ ᠪᠠᠷ ᠣᠷᠣᠢ ᠵᠠᠪᠰᠠᠷᠯᠠᠵᠠᠢ᠃
— ᠪᠢᠳᠡ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠬᠦᠴᠦ ᠭᠠᠷᠭᠠᠨ ᠲᠤᠯᠤᠯᠳᠤᠶᠠ ᠭᠡᠬᠦ ᠳ᠋ᠦ᠍ ᠴᠡᠷᠢᠭ᠂ ᠮᠣᠷᠢ ᠠᠯᠢ ᠠᠯᠢ ᠨᠢ ᠣᠷᠣᠭᠰᠢ ᠠᠬᠢᠵᠤ ᠥᠭᠬᠦ ᠦᠭᠡᠢ ᠬᠣᠯᠬᠢᠵᠤ ᠤᠬᠤᠷᠢᠭᠠᠳ ᠪᠠᠢᠬᠤ ᠬᠠᠷᠠᠯᠠᠭᠰᠠᠨ ᠶᠤᠮ᠃ ᠮᠣᠩᠭᠣᠯ ᠮᠣᠩᠭᠣᠯ ᠲᠠᠢ ᠪᠠᠨ ᠳᠠᠢᠳᠤᠨᠠ ᠭᠡᠳᠡᠭ ᠦᠨᠡᠬᠡᠷ ᠨᠢᠭᠦᠯᠲᠦ ᠬᠡᠷᠡᠭ ᠭᠡᠳᠡᠭ ᠢ᠋ ᠮᠣᠷᠢ ᠬᠦᠷᠲᠡᠯᠡ ᠮᠡᠳᠡᠭᠰᠡᠨ ᠪᠠᠢᠨᠠ ᠭᠡᠵᠦ ᠤᠤ ᠳᠠ ᠭᠡᠮᠡᠨ ᠣᠷᠣᠢ ᠶ᠋ᠢᠨ ᠵᠣᠭᠣᠭ ᠳᠡᠭᠡᠷᠡ ᠪᠡᠨ ᠠᠷᠢᠭᠪᠥ᠋ᠬᠡ ᠬᠡᠯᠡᠵᠦ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠥᠭᠡᠷᠡ ᠨᠢᠭᠡ ᠳᠠᠭᠠᠭᠠᠮᠠᠯ ᠳᠠᠭᠤ ᠪᠠᠨ ᠡᠷᠭᠦᠨ᠄
— ᠪᠢᠳᠡᠨ ᠦ᠌ ᠬᠡᠨ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠬᠥᠬᠡ ᠳᠡᠪᠡᠯ ᠲᠡᠢ ᠬᠢᠲᠠᠳ ᠬᠥᠮᠦᠰ ᠵᠣᠭᠰᠣᠵᠤ ᠪᠣᠢ ᠶ᠋ᠢ ᠯᠡ ᠳᠤᠲᠠᠭᠤ ᠮᠡᠳᠡᠵᠦ ᠪᠠᠢᠭᠠ ᠠ᠋ᠴᠠ ᠤᠨᠤᠭᠰᠠᠨ ᠮᠣᠷᠢ ᠮᠠᠨᠠᠢ ᠲᠤᠰᠢᠶᠠ ᠲᠠᠢ ᠮᠡᠲᠦ ᠰᠠᠵᠢᠯᠠᠵᠤ ᠶᠠᠪᠤᠨᠠ ᠭᠡᠵᠦ ᠬᠡᠯᠡᠪᠡ᠃
ᠭᠠᠰᠢᠭᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ ᠪᠠᠰᠠ ᠯᠠ ᠰᠡᠭ ᠵᠡᠮᠳᠡᠭ ᠪᠣᠯᠤᠭᠰᠠᠨ ᠬᠥᠮᠦᠨ᠂ ᠮᠣᠷᠢ ᠲᠡᠮᠡᠭᠡ ᠮᠠᠯ ᠪᠠᠷᠤᠭ ᠪᠤᠲᠠᠨ ᠢ᠋ ᠲᠣᠭᠠᠯᠠᠨ ᠲᠡᠷᠡᠢᠵᠦ ᠬᠡᠪᠲᠡᠨᠡ᠃ ᠲᠡᠨᠳᠡ ᠦᠶᠡ ᠦᠶᠡ ᠬᠥᠮᠦᠨ ᠮᠣᠷᠢᠳ ᠪᠠᠴᠢᠮᠳᠠᠨ《ᠠᠮᠢ ᠠᠪᠤᠷᠠᠭᠠᠴᠢ》 ᠭᠡᠰᠡᠨ ᠶᠠᠩᠵᠤᠲᠠᠢ ᠬᠠᠰᠬᠢᠷᠬᠤ᠂《ᠡᠵᠢ ᠠ᠋!》 ᠭᠡᠵᠦ ᠡᠬᠡ ᠶ᠋ᠢ ᠪᠡᠨ ᠳᠠᠭᠤᠳᠠᠬᠤ ᠬᠥᠮᠦᠨ ᠦ᠌ ᠰᠥᠭᠡᠩᠭᠢᠲᠦᠭᠰᠡᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ ᠴᠡᠷᠢᠭ《ᠳᠠᠬᠢᠭᠠᠳ ᠡᠢᠮᠦ ᠦᠭᠡ ᠴᠢᠬᠢᠨ ᠳ᠋ᠦ᠍ ᠪᠤᠤ ᠳᠣᠭᠣᠯᠤᠭᠠᠰᠠᠢ》 ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠥᠩᠭᠡᠷᠡᠬᠦ ᠨᠢ ᠦᠭᠡᠢ ᠠᠵᠢ᠃
— ᠶᠠᠭᠠᠬᠢᠵᠤ ᠭᠡᠵᠦ ᠪᠢᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠳᠠᠢᠳᠤᠵᠤ ᠶᠠᠪᠤᠭᠠ ᠪᠢᠯᠡ?
— ᠬᠤᠪᠢᠯᠠᠢ ᠶᠠᠭᠤ ᠶ᠋ᠢ ᠬᠦᠰᠡᠵᠦ ᠨᠡᠢᠰᠯᠡᠯ ᠬᠠᠷᠠᠬᠣᠷᠣᠮ ᠢ᠋ᠶ᠋ᠠᠨ ᠳᠣᠪᠣ ᠪᠣᠯᠭᠠᠬᠤ ᠭᠡᠵᠦ ᠨᠠᠭᠠᠰᠢ ᠪᠠᠨ ᠵᠦᠭᠯᠡᠭᠡ ᠪᠣᠢ?
— ᠬᠤᠪᠢᠯᠠᠢ᠂ ᠠᠷᠢᠭᠪᠥ᠋ᠬᠡ ᠬᠣᠶᠠᠷ ᠨᠢᠭᠡ ᠡᠬᠡ ᠶ᠋ᠢᠨ ᠠᠯᠲᠠᠨ ᠬᠡᠪᠡᠯᠢ ᠡᠴᠡ ᠴᠤᠪᠤᠷᠠᠨ ᠭᠠᠷᠤᠭᠰᠠᠨ ᠠᠬᠠᠨ ᠳᠡᠭᠦᠦᠰ ᠪᠢᠰᠢ ᠤᠤ? ᠲᠡᠭᠡᠭᠡᠳ᠁ ᠭᠡᠵᠦ ᠬᠡᠯᠡᠬᠦ ᠦᠭᠡᠢ ᠴᠡᠷᠢᠭ᠂ ᠲᠦᠰᠢᠮᠡᠳ ᠨᠠᠷ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ ᠪᠠᠷᠤᠭ ᠦᠭᠡᠢ ᠠᠵᠢ᠃
ᠬᠠᠷᠠᠬᠣᠷᠣᠮ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠤᠷᠤᠭᠤ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠬᠢᠵᠦ᠂ ᠲᠡᠳᠡᠨ ᠦ᠌ ᠡᠩᠨᠡᠭᠡ ᠶ᠋ᠢ ᠰᠡᠲᠡᠯᠦᠨ᠂ ᠵᠠᠷᠢᠮ ᠭᠠᠵᠠᠷ ᠲᠤ ᠬᠦᠴᠦ ᠶ᠋ᠢ ᠨᠢ ᠰᠠᠷᠨᠢᠭᠤᠯᠬᠤ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃ ᠶᠠᠭ ᠢᠩᠭᠢᠬᠦ ᠦᠶᠡ ᠳ᠋ᠦ᠍ ᠬᠠᠳᠠᠨ ᠵᠠᠩᠵᠤᠨ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠠᠷᠭᠠᠨᠠ ᠶ᠋ᠢᠨ ᠪᠤᠲᠠᠨ ᠳ᠋ᠤ᠌ ᠬᠢᠷᠦᠭᠰᠡᠨ ᠲᠠᠤᠯᠠᠢ ᠠᠳᠠᠯᠢ ᠨᠢᠭᠤᠭᠳᠠᠭᠰᠠᠨ ᠬᠢᠲᠠᠳ ᠴᠡᠷᠢᠭ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠠᠷᠤ ᠠ᠋ᠴᠠ ᠭᠠᠷᠴᠤ ᠢᠷᠡᠵᠦ ᠲᠠᠪᠤ ᠳᠣᠯᠣᠭᠠᠨ ᠳᠠᠪᠬᠤᠷ ᠡᠩᠨᠡᠭᠡ ᠪᠡᠷ ᠵᠣᠭᠰᠣᠭᠠᠳ᠂ ᠬᠤᠯᠤᠰᠤᠨ ᠰᠤᠮᠤ ᠪᠠᠷ ᠮᠥᠨᠳᠥᠷ ᠪᠠᠭᠤᠯᠭᠠᠵᠤ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠤᠨᠤᠭᠠ ᠮᠣᠷᠢᠳ ᠢ᠋ ᠬᠠᠷᠪᠤᠨ ᠶᠠᠪᠠᠭᠠᠯᠠᠵᠤ ᠪᠠᠢᠪᠠ᠃ ᠡᠨᠡ ᠪᠣᠯ ᠵᠢᠩᠬᠢᠨᠢ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠳᠠᠢᠳᠤᠬᠤ ᠨᠢᠭᠡᠨ ᠠᠷᠭᠠ ᠪᠢᠯᠡ᠃
— ᠬᠤᠪᠢᠯᠠᠢ ᠡᠢᠮᠦ ᠬᠠᠭᠠᠯᠲᠠ ᠶ᠋ᠢ ᠲᠤᠯᠤᠯᠳᠤᠭᠠᠨ ᠤ᠋ ᠪᠠᠷᠠᠭᠤᠨ᠂ ᠵᠡᠭᠦᠨ ᠵᠢᠭᠦᠷ ᠲᠦ᠍ ᠢᠯᠭᠠᠭᠠ ᠦᠭᠡᠢ ᠪᠣᠢ ᠪᠣᠯᠭᠠᠵᠤ ᠬᠡᠷᠡᠭᠯᠡᠭᠰᠡᠨ ᠪᠠᠢᠨᠠ᠃ ᠬᠢᠲᠠᠳ ᠴᠡᠷᠢᠭ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠬᠣᠰᠢᠭᠤᠴᠢᠯᠠᠨ ᠣᠷᠣᠬᠤ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠲᠠᠯᠠᠪᠤᠷ ᠲᠤ ᠪᠠᠢᠭᠠ ᠡᠰᠡᠬᠦ ᠨᠢ ᠪᠠᠷᠤᠭ ᠮᠡᠳᠡᠭᠳᠡᠬᠦ ᠦᠭᠡᠢ ᠠᠲᠠᠯᠠ ᠬᠦᠴᠦ ᠪᠡᠨ ᠭᠡᠨᠡᠳᠲᠡ ᠭᠠᠷᠭᠠᠨ ᠢᠷᠡᠵᠦ ᠰᠡᠯᠪᠢᠳᠡᠭ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠯᠳᠤᠨᠠ᠃ ᠡᠢᠮᠦ ᠨᠢᠭᠡᠨ《ᠰᠣᠩᠭᠣᠮᠠᠯ》 ᠠᠷᠭᠠ ᠶ᠋ᠢ ᠬᠤᠪᠢᠯᠠᠢ ᠶ᠋ᠢᠨ ᠪᠢᠰᠢ᠂ ᠠᠩᠬᠠᠨ ᠪᠠᠶᠠᠨ ᠥᠷᠯᠥᠭ ᠰᠢᠷᠠ ᠮᠥᠷᠡᠨ ᠦ᠌ ᠠᠳᠠᠭ ᠳᠤ ᠤᠮᠠᠷᠠᠲᠤ ᠬᠢᠲᠠᠳ ᠲᠠᠢ ᠪᠠᠢᠯᠳᠤᠬᠤ ᠳ᠋ᠤ᠌ ᠪᠠᠨ ᠬᠡᠷᠡᠭᠯᠡᠭᠰᠡᠨ᠂ ᠬᠣᠵᠢᠮ ᠨᠢ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠪᠠᠨ ᠪᠠᠰᠠ ᠬᠡᠷᠡᠭᠯᠡᠭᠰᠡᠨ ᠤᠳᠠᠭᠠ ᠲᠠᠢ ᠠᠵᠢ᠃
ᠳᠠᠯᠠᠨ ᠪᠤᠯᠠᠭ ᠤ᠋ᠨ ᠠᠭᠤᠯᠵᠠᠭᠤᠷ ᠲᠤ ᠬᠢᠵᠦ ᠪᠠᠢᠭᠠ ᠲᠡᠢᠨ ᠦ᠌ ᠲᠠᠪᠤᠳᠠᠬᠢ ᠡᠳᠦᠷ ᠠᠷᠢᠭᠪᠥ᠋ᠬᠡ ᠨᠢᠭᠡ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠴᠤ ᠳᠤᠷᠠᠨᠳᠠᠭᠠᠳ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠶᠠᠭᠤ ᠪᠣᠯᠪᠠ ᠭᠡᠮᠡᠷ ᠤᠤᠯᠭᠠᠯᠠᠨ
— ᠳᠤᠲᠠᠭᠤᠳᠠᠯᠠ᠃ ᠳᠠᠬᠢᠭᠠᠳ ᠬᠥᠭᠡᠭᠡᠴᠢ! ᠭᠡᠵᠦ ᠳᠠᠭᠤᠨ ᠠᠯᠳᠠᠪᠠ᠃ ᠶᠠᠭᠠᠬᠢᠬᠤ ᠨᠢ ᠡᠨᠡ ᠪᠣᠢ? ᠭᠡᠵᠦ ᠳᠡᠷᠭᠡᠳᠡ ᠶ᠋ᠢᠨ ᠬᠢᠶᠡ ᠪᠡᠨ ᠠᠰᠠᠭᠤᠪᠠᠯ ᠬᠠᠭᠠᠨ ᠬᠢᠯᠢᠩᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠮᠠᠨ ᠤ᠋ ᠰᠦ᠍ ᠵᠠᠩᠵᠤᠨ ᠤ᠋ ᠮᠢᠩᠭᠠᠲᠤ ᠬᠤᠪᠢᠯᠠᠢ ᠶ᠋ᠢᠨ ᠴᠠᠴᠠᠷ ᠤᠷᠤᠭᠤ ᠵᠠᠭ ᠤ᠋ᠨ ᠰᠢᠭᠤᠢ ᠳᠣᠲᠣᠷᠠ ᠠ᠋ᠴᠠ ᠭᠡᠨᠡᠳᠲᠡ ᠳᠠᠭᠠᠷᠢᠭᠠᠳ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠴᠢᠳᠠᠯ ᠦᠭᠡᠢ ᠴᠠᠭᠠᠰᠢ ᠨᠢ ᠵᠡᠭᠤᠳᠠᠭᠤᠯᠴᠢᠬᠠᠯᠠ᠃ ᠬᠠᠢᠷᠠᠨ ᠶᠤᠮ᠃ ᠴᠠᠭᠠᠭᠤᠷ ᠨᠢ ᠲᠣᠭᠣᠷᠢᠵᠤ ᠳᠠᠭᠠᠷᠢᠭᠰᠠᠨ ᠪᠣᠯ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠪᠠᠭᠠᠯᠵᠠᠭᠤᠷ ᠢ᠋ ᠨᠢ ᠰᠢᠬᠠᠨ ᠨᠠᠭᠠᠰᠢ ᠨᠢ ᠴᠢᠷᠴᠦ ᠢᠷᠡᠭᠡᠳ ᠮᠠᠨ ᠤ᠋ ᠬᠥᠯ ᠳᠣᠣᠷᠠ ᠬᠠᠶᠠᠬᠤ ᠪᠠᠢᠭᠰᠠᠨ᠃ ᠲᠣᠭᠠ ᠦᠭᠡᠢ ᠬᠡᠷᠡᠭ ᠪᠣᠯᠤᠯᠠ ᠭᠡᠪᠡ᠃ ᠡᠨᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠤᠪᠢᠯᠠᠢ ᠶᠠᠭ ᠲᠤᠯᠤᠯᠳᠤᠭᠠᠨ ᠬᠢᠵᠦ ᠪᠠᠢᠭᠠ ᠲᠠᠯᠠᠪᠤᠷ ᠲᠤ ᠤᠢᠷᠲᠤᠨ ᠢᠷᠡᠬᠦ ᠪᠡᠨ ᠪᠦᠷ ᠪᠠᠢᠵᠤ᠂ ᠠᠯᠤᠰᠬᠠᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠲᠣᠷᠭᠠᠨ ᠴᠠᠴᠠᠷ ᠪᠤᠰᠬᠠᠭᠤᠯᠤᠭᠠᠳ ᠲᠡᠨᠳᠡ ᠪᠠᠢᠬᠤ ᠪᠣᠯᠵᠠᠢ᠃ ᠲᠡᠭᠦᠨ ᠦ᠌ ᠴᠡᠷᠢᠭ ᠢ᠋ ᠠᠷᠢᠭᠪᠥ᠋ᠬᠡ ᠮᠤᠩᠳᠠᠬᠤ ᠦᠭᠡᠢ ᠬᠣᠷᠣᠭᠠᠵᠤ ᠴᠢᠳᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠬᠢᠲᠠᠳ ᠴᠡᠷᠢᠭ ᠤᠰᠤᠨ ᠤᠨᠳᠤᠷᠤᠭᠠ ᠮᠡᠲᠦ ᠭᠠᠷᠴᠤ ᠢᠷᠡᠭᠰᠡᠭᠡᠷ ᠪᠠᠢᠭᠠ ᠨᠢ ᠡᠮᠦᠨᠡ ᠵᠦᠭ ᠲᠦ᠍ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠳᠠᠢᠳᠤᠵᠤ ᠪᠣᠢ ᠬᠦᠴᠦ ᠪᠡᠨ ᠨᠠᠭᠠᠰᠢ ᠨᠢ ᠪᠠᠷᠤᠭ ᠪᠦᠭᠦᠳᠡ ᠶ᠋ᠢ ᠲᠠᠲᠠᠭᠰᠠᠨ ᠤ᠋ ᠭᠡᠷᠡᠴᠢ᠃
ᠭᠠᠰᠢᠭᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠪᠣᠯᠵᠤ ᠪᠣᠢ ᠲᠤᠯᠤᠯᠳᠤᠭᠠᠨ ᠵᠢᠷᠭᠤᠭᠠᠳᠠᠬᠢ ᠡᠳᠦᠷ ᠲᠦ᠍ ᠪᠡᠨ ᠢᠳᠡ ᠡᠷᠴᠢ ᠶ᠋ᠢ ᠣᠯᠵᠤ ᠥᠷᠨᠢᠨ᠂ ᠬᠣᠶᠠᠷ ᠲᠠᠯᠠ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠬᠠᠮᠤᠭ ᠬᠦᠴᠦ ᠪᠡᠨ ᠪᠥᠭᠡᠮᠨᠡᠷᠡᠭᠦᠯᠦᠨ ᠳᠠᠭᠠᠷᠢᠵᠠᠢ᠃ ᠡᠨᠡ ᠡᠳᠦᠷ ᠦᠨᠡᠬᠡᠷ ᠭᠠᠰᠢᠭᠤᠨ ᠶᠠᠪᠤᠳᠠᠯ ᠣᠯᠠᠨ ᠪᠣᠯᠵᠤ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠴᠡᠷᠢᠭ᠂ ᠮᠣᠷᠢ ᠡᠩᠨᠡᠭᠡ ᠡᠩᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠢᠳᠤᠭᠳᠠᠭᠰᠠᠨ ᠪᠠᠢᠨᠠ᠃ ᠬᠠᠷᠠᠬᠣᠷᠣᠮ ᠤ᠋ᠨ ᠬᠡᠰᠡᠭ ᠴᠡᠷᠢᠭ ᠡᠷᠴᠢ ᠪᠡᠷ ᠢ᠋ᠶ᠋ᠡᠨ ᠳᠠᠢᠰᠤᠨ ᠤᠷᠤᠭᠤ ᠳᠠᠭᠠᠷᠢᠵᠤ ᠳᠠᠪᠬᠢᠭᠠᠳ ᠡᠯᠡᠰᠦᠨ ᠳ᠋ᠦ᠍ ᠰᠢᠭᠠᠭᠳᠠᠨ ᠴᠤᠴᠠᠬᠤ ᠳ᠋ᠤ᠌ ᠠᠯᠠᠨᠳᠠᠷ ᠵᠠᠩᠵᠤᠨ ᠵᠦᠭᠡᠷ ᠵᠣᠭᠰᠣᠵᠤ ᠠᠷᠭᠠ ᠦᠭᠡᠢ ᠪᠣᠯᠤᠭᠠᠳ᠂ ᠳᠡᠷᠭᠡᠳᠡ ᠪᠡᠨ ᠪᠡᠯᠡᠳᠬᠡᠯ ᠳ᠋ᠦ᠍ ᠪᠠᠢᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠳᠠᠭᠠᠭᠤᠯᠤᠨ ᠳᠣᠪᠲᠣᠯᠤᠭᠰᠠᠨ ᠳ᠋ᠤ᠌ ᠬᠤᠪᠢᠯᠠᠢ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠠᠷᠤ ᠠ᠋ᠴᠠ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠡᠩᠨᠡᠭᠡ ᠡᠴᠡ ᠬᠡᠳᠦᠨ ᠵᠠᠭᠤᠨ ᠰᠤᠮᠤ ᠬᠠᠷᠪᠤᠵᠤ᠂ ᠶᠡᠬᠡ ᠳᠠᠭᠠᠭᠠᠮᠠᠯ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠣᠯᠠᠨ ᠵᠡᠷᠭᠡ ᠲᠣᠰᠣᠨ᠂ ᠲᠡᠭᠦᠨ ᠦ᠌ ᠪᠡᠶᠡ ᠭᠠᠵᠠᠷᠳᠠᠨ ᠬᠥᠰᠡᠷᠳᠡᠨ ᠤᠨᠠᠯᠠ᠃ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠲᠡᠷᠢᠭᠦᠨ ᠡᠢᠨ ᠬᠦ᠌ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ ᠠᠮᠢ ᠪᠡᠶᠡ ᠬᠥᠨᠦᠭᠡᠯᠭᠡᠵᠡᠢ᠃
ᠡᠨᠡ ᠬᠡᠷᠡᠭ ᠪᠠᠢᠯᠳᠤᠭᠠᠨ ᠤ᠋ ᠪᠦᠬᠦ ᠶᠠᠪᠤᠴᠠ ᠳ᠋ᠤ᠌ ᠨᠥᠯᠥᠭᠡᠯᠡᠬᠦ ᠡᠷᠭᠢᠯᠲᠡ ᠪᠣᠯᠪᠠ᠃ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠶᠡᠬᠡ᠂ ᠪᠠᠭᠠ ᠳᠠᠭᠠᠭᠠᠮᠠᠯ ᠤ᠋ᠳ᠂ ᠵᠠᠬᠢᠷᠤᠭᠴᠢᠳ ᠴᠡᠷᠢᠭ ᠢ᠋ᠶ᠋ᠡᠨ ᠡᠮᠬᠢᠯᠡᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠰᠠᠷᠨᠢᠵᠤ᠂ ᠡᠮᠬᠢ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠳᠠᠯᠠ᠃ ᠴᠡᠷᠢᠭ ᠦ᠋ᠳ ᠣᠷᠣᠭᠰᠢ ᠳᠠᠪᠰᠢᠵᠤ ᠲᠤᠯᠤᠯᠳᠤᠬᠤ ᠡᠷᠡᠮᠡᠯᠵᠡᠯ ᠦᠭᠡᠢ᠂ ᠰᠡᠪ ᠯᠠ ᠬᠢᠪᠡᠯ ᠭᠡᠳᠡᠷᠭᠦ ᠤᠬᠤᠷᠢᠬᠤ ᠭᠡᠵᠦ ᠲᠡᠮᠡᠦᠯᠳᠡᠭ ᠨᠢ《ᠮᠣᠩᠭᠣᠯ ᠪᠠᠢᠵᠤ ᠮᠣᠩᠭᠣᠯ ᠢ᠋ᠶ᠋ᠠᠨ ᠬᠢᠳᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠢᠩᠭᠢᠭᠰᠡᠨ ᠳ᠋ᠦ᠍ ᠣᠷᠣᠪᠠᠯ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠠᠢᠯᠠᠭᠰᠠᠨ ᠨᠢ ᠳᠡᠭᠡᠷᠡ》 ᠭᠡᠰᠡᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ᠂ ᠲᠤᠯᠤᠯᠳᠤᠬᠤ ᠭᠠᠯ ᠳᠥᠯᠥ ᠪᠡᠨ ᠤᠨᠲᠠᠷᠠᠭᠠᠵᠠᠢ᠃ ᠡᠢᠮᠦ ᠪᠣᠳᠣᠯ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ᠂ ᠵᠠᠬᠢᠷᠤᠭᠴᠢ ᠨᠠᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠤᠯᠠᠮ ᠪᠦᠷ ᠨᠡᠪᠲᠡᠷᠡᠨ ᠣᠷᠣᠭᠰᠠᠭᠠᠷ ᠪᠠᠢᠪᠠ᠃ ᠢᠩᠭᠢᠭᠡᠳ ᠠᠯᠠᠨᠳᠠᠷ ᠵᠠᠩᠵᠤᠨ ᠤ᠋ ᠲᠡᠷᠢᠭᠦᠯᠡᠵᠦ ᠶᠠᠪᠤᠭᠰᠠᠨ ᠪᠦᠬᠦ ᠴᠡᠷᠢᠭ ᠭᠡᠳᠡᠷᠭᠦ ᠤᠬᠤᠷᠢᠨ ᠰᠠᠷᠨᠢᠵᠤ ᠡᠬᠢᠯᠡᠪᠡ᠃ ᠬᠠᠳᠠᠨ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠡᠨᠡ ᠰᠡᠢᠮᠡᠬᠡᠢ ᠶ᠋ᠢ ᠶᠠᠭᠤᠨ ᠡᠰᠡ ᠠᠨᠳᠠᠬᠤ ᠪᠢᠯᠡ᠃ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠬᠢᠳᠤᠨ ᠰᠥᠨᠥᠭᠡᠬᠦ ᠡᠷᠡᠮᠡᠯᠵᠡᠯ ᠳ᠋ᠦ᠍ ᠠᠪᠲᠠᠭᠰᠠᠨ ᠡᠲᠡᠭᠡᠳ ᠨᠦ᠍ᠭᠦᠳ ᠮᠣᠩᠭᠣᠯ ᠮᠢᠨᠢ ᠭᠡᠰᠡᠨ ᠦᠵᠡᠯ ᠶᠠᠭᠠᠬᠢᠵᠤ ᠪᠢᠯᠡ᠃
ᠨᠢᠭᠡᠨᠲᠡ ᠵᠡᠭᠦᠨ ᠵᠢᠭᠦᠷ ᠡᠢᠮᠦ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠡᠨᠳᠡ ᠲᠤᠯᠤᠯᠳᠤᠵᠤ ᠶᠠᠪᠤᠭᠠ ᠬᠤᠪᠢᠯᠠᠢ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠨᠥᠭᠦᠭᠡ ᠵᠢᠭᠦᠷ ᠤᠷᠤᠭᠤ ᠰᠢᠯᠵᠢᠨ᠂ ᠠᠷᠢᠭᠪᠥ᠋ᠬᠡ ᠬᠠᠭᠠᠨ ᠤ᠋ ᠥᠭᠡᠳᠡ ᠡᠴᠡ ᠮᠠᠴᠤᠵᠤ ᠪᠠᠢᠭᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠦᠢ ᠣᠯᠠᠨ ᠢ᠋ᠶ᠋ᠠᠷ ᠨᠡᠮᠡᠭᠳᠡᠵᠦ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠲᠡᠩᠴᠡᠭᠦᠷᠢ ᠶ᠋ᠢ ᠠᠯᠳᠠᠭᠳᠠᠭᠤᠯᠪᠠ᠃ ᠳᠠᠯᠠᠨ ᠪᠤᠯᠠᠭ ᠤ᠋ᠨ ᠠᠭᠤᠯᠵᠠᠭᠤᠷ ᠭᠡᠳᠡᠭ ᠥᠷᠭᠡᠨ ᠬᠥᠨᠳᠡᠢ ᠳ᠋ᠦ᠍ ᠬᠤᠪᠢᠯᠠᠢ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠨᠡ ᠪᠡᠷ ᠵᠢᠰᠢᠵᠤ᠂ ᠪᠦᠬᠦ ᠡᠩᠨᠡᠭᠡ ᠪᠡᠨ ᠭᠤᠷᠪᠠᠨ ᠳᠠᠪᠬᠤᠷ ᠪᠣᠯᠭᠠᠭᠠᠳ ᠬᠣᠢᠰᠢ ᠲᠠᠪᠰᠢᠭᠤᠯᠤᠯᠠ᠃ ᠬᠠᠷᠠ ᠬᠣᠷᠣᠮ ᠤ᠋ᠨ ᠴᠡᠷᠢᠭ ᠲᠣᠭᠠ ᠪᠠᠷ ᠦᠯᠡᠮᠵᠢ ᠳᠤᠲᠠᠭᠤ ᠪᠣᠯᠤᠭᠰᠠᠨ ᠤᠴᠢᠷ ᠠᠷᠭᠠ ᠪᠤᠶᠤ ᠭᠡᠳᠡᠷᠭᠦ ᠲᠦᠷᠢᠭᠳᠡᠨ ᠤᠬᠤᠷᠢᠵᠤ ᠡᠬᠢᠯᠡᠪᠡ᠃ ᠳᠠᠢᠰᠤᠨ ᠤ᠋ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠣᠮᠣᠭ ᠰᠢᠲᠠᠨ᠂ ᠪᠦᠷ ᠴᠦ᠍ ᠶᠡᠬᠡ ᠤᠯᠠᠢᠷᠠᠨ ᠲᠦᠷᠢᠵᠦ ᠬᠥᠭᠡᠭᠡᠬᠦ ᠪᠣᠯᠪᠠ᠃ ᠭᠡᠯᠡ ᠴᠦ᠍ ᠠᠷᠢᠭᠪᠥ᠋ᠬᠡ ᠬᠠᠭᠠᠨ ᠤ᠋ ᠴᠡᠷᠢᠭ ᠦᠶᠡ ᠦᠶᠡ ᠡᠷᠭᠢᠨ ᠪᠠᠢᠯᠳᠤᠵᠤ ᠦᠨᠡᠨ ᠲᠤᠯᠤᠯᠳᠤᠵᠤ ᠪᠠᠢᠯᠠ᠃ ᠬᠤᠪᠢᠯᠠᠢ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠪᠠᠰᠠ ᠬᠢᠲᠠᠳ ᠴᠡᠷᠢᠭ ᠲᠠᠪᠰᠢᠭᠤᠯᠵᠤ ᠪᠠᠢᠭᠠ ᠪᠣᠯᠬᠣᠷ ᠠᠭᠱᠠᠨ ᠪᠦᠷᠢ ᠳ᠋ᠦ᠍ ᠬᠦᠴᠦᠨ ᠦ᠌ ᠬᠠᠷᠢᠴᠠᠭᠠ ᠱᠠᠩᠳᠤ ᠶ᠋ᠢᠨ ᠴᠡᠷᠢᠭ ᠲᠦ᠍ ᠠᠰᠢᠭᠲᠠᠢ ᠪᠠᠷ ᠥᠭᠡᠷᠡᠴᠢᠯᠡᠭᠳᠡᠨ᠂ ᠬᠠᠷᠠ ᠬᠣᠷᠣᠮ ᠤ᠋ᠨ ᠴᠡᠷᠢᠭ ᠤᠬᠤᠷᠢᠭᠠᠳ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠴᠡᠢ᠃ ᠡᠢᠨ ᠬᠦ᠌ ᠬᠤᠪᠢᠯᠠᠢ ᠶᠡᠬᠡ ᠭᠣᠪᠢ ᠶ᠋ᠢᠨ ᠡᠮᠦᠨᠡᠲᠦ ᠬᠡᠰᠡᠭ ᠢ᠋ ᠴᠢᠰᠤ ᠪᠠᠷ ᠪᠣᠳᠣᠨ ᠤᠮᠠᠷᠠ ᠶ᠋ᠢ ᠳᠣᠪᠲᠣᠯᠤᠭᠰᠠᠭᠠᠷ ᠪᠠᠢᠪᠠ᠃
ᠠᠷᠢᠭᠪᠥ᠋ᠬᠡ ᠬᠡᠳᠦᠨ ᠳᠠᠬᠢᠨ ᠡᠷᠭᠢᠵᠦ ᠳᠠᠭᠠᠷᠢᠯᠲᠠ ᠬᠢᠭᠰᠡᠨ ᠪᠣᠯᠪᠠᠴᠤ ᠳᠠᠩᠴᠢ ᠬᠦᠴᠦᠨ ᠮᠡᠬᠦᠰᠳᠡᠵᠦ ᠪᠢᠯᠡ᠃ ᠰᠠᠢᠷ ᠤᠰᠤᠨ ᠤ᠋ ᠪᠠᠷᠠᠭᠤᠨ ᠬᠥᠨᠳᠡᠢ ᠳ᠋ᠦ᠍ ᠨᠢᠭᠡ ᠤᠳᠠᠭᠠ ᠠᠷᠢᠭᠪᠥ᠋ᠬᠡ ᠡᠷᠭᠢᠵᠦ ᠳᠠᠭᠠᠷᠢᠭᠠᠳ ᠠᠷᠤ ᠠ᠋ᠴᠠ ᠪᠠᠨ ᠡᠯᠳᠡᠵᠦ ᠶᠠᠪᠤᠭᠠ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠡᠩᠨᠡᠭᠡ ᠶ᠋ᠢ ᠰᠡᠲᠡᠯᠦᠨ ᠡᠪᠳᠡᠵᠦ᠂ ᠳᠠᠢᠰᠤᠨ ᠢ᠋ ᠰᠠᠨᠳᠤᠷᠭᠠᠭᠰᠠᠨ ᠪᠣᠯᠪᠠᠴᠤ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠬᠡᠳᠦᠨ ᠳᠠᠪᠬᠤᠷ ᠡᠩᠨᠡᠭᠡ ᠳ᠋ᠦ᠍ ᠲᠤᠯᠵᠤ ᠣᠴᠢᠭᠠᠳ ᠶᠠᠭᠠᠬᠢᠵᠤ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠪᠠᠰᠠ ᠯᠠ ᠴᠡᠷᠢᠭ᠂ ᠮᠣᠷᠢ ᠬᠣᠶᠠᠷ ᠢ᠋ᠶ᠋ᠠᠨ ᠪᠠᠬᠠᠨ ᠭᠠᠵᠠᠷᠳᠠᠭᠤᠯᠤᠭᠠᠳ ᠡᠷᠭᠢᠵᠦ ᠳᠤᠲᠠᠭᠠᠪᠠ᠃ ᠡᠨᠡ ᠪᠣᠯ ᠶᠡᠬᠡ ᠭᠣᠪᠢ ᠳ᠋ᠤ᠌ ᠶᠠᠪᠤᠭᠤᠯᠤᠭᠰᠠᠨ ᠠᠷᠢᠭᠪᠥ᠋ᠬᠡ ᠬᠤᠪᠢᠯᠠᠢ ᠬᠣᠶᠠᠷ ᠤ᠋ᠨ ᠠᠩᠬᠠᠨ ᠤ᠋ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠤ᠋ ᠰᠡᠭᠦᠯᠴᠢ ᠶ᠋ᠢᠨ ᠬᠢᠨᠢ ᠪᠣᠯᠵᠠᠢ᠃
ᠠᠷᠢᠭᠪᠥ᠋ᠬᠡ ᠶ᠋ᠢᠨ ᠴᠡᠷᠢᠭ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠢ᠋ ᠴᠢᠭᠯᠡᠨ ᠵᠣᠭᠰᠣᠯ ᠦᠭᠡᠢ ᠪᠡᠷ ᠤᠬᠤᠷᠢᠨ ᠰᠠᠷᠨᠢᠵᠤ᠂ ᠳᠠᠬᠢᠨ ᠡᠨᠡ ᠤᠳᠠᠭᠠ ᠳ᠋ᠤ᠌ ᠡᠮᠬᠢᠯᠡᠭᠦᠯᠦᠨ ᠠᠪᠬᠤ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠪᠡ᠃ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠪᠠᠢᠭᠠ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠭᠡᠨᠡᠳᠡᠭᠦᠯᠦᠨ ᠡᠷᠭᠢᠵᠦ ᠬᠤᠪᠢᠯᠠᠢ ᠶ᠋ᠢ ᠳᠠᠭᠠᠷᠢᠨ᠂ ᠪᠠᠷᠢᠵᠤ ᠠᠪᠬᠤ ᠰᠠᠨᠠᠭᠠ ᠰᠡᠳᠦᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠠ ᠲᠣᠷᠭᠠᠨ ᠬᠡᠪᠲᠡᠭᠦᠯ ᠴᠡᠷᠢᠭ ᠨᠢ ᠲᠡᠭᠡᠵᠦ ᠵᠣᠷᠢᠭ ᠢ᠋ᠶ᠋ᠠᠷ ᠨᠢ ᠲᠠᠯᠪᠢᠭᠰᠠᠨ ᠦᠭᠡᠢ᠂ ᠪᠡᠶᠡ ᠶ᠋ᠢ ᠨᠢ ᠬᠠᠭᠠᠴᠠᠢᠯᠠᠨ ᠭᠡᠳᠡᠷᠭᠦ ᠨᠢ ᠠᠪᠴᠤ ᠭᠠᠷᠴᠤ᠂ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠰᠢᠯᠤᠭᠤᠳᠤᠨ ᠳᠣᠪᠲᠣᠯᠭᠠᠵᠠᠢ᠃ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠪᠠᠨ ᠰᠠᠬᠢᠨ᠂ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠵᠣᠭᠰᠣᠯᠲᠠ ᠦᠭᠡᠢ ᠳᠣᠪᠲᠣᠯᠵᠤ᠂ ᠤᠮᠠᠷᠠ ᠶ᠋ᠢ ᠵᠣᠷᠢᠨ ᠶᠠᠪᠤᠭᠠ ᠶ᠋ᠢ ᠠᠷᠢᠭᠪᠥ᠋ᠬᠡ ᠲᠤᠷᠰᠢᠭᠤᠯ ᠤ᠋ᠨ ᠮᠡᠳᠡᠭᠡ ᠪᠡᠷ ᠪᠦᠷᠢᠨ ᠮᠡᠳᠡᠵᠦ ᠪᠠᠢᠪᠠ᠃ ᠢᠩᠭᠢᠵᠦ ᠲᠤᠷᠰᠢᠬᠤ ᠬᠡᠷᠡᠭ ᠢ᠋ ᠪᠢᠯᠢᠭᠦᠨ ᠲᠦᠰᠢᠮᠡᠯ ᠲᠡᠷᠢᠭᠦᠯᠡᠬᠦ ᠪᠣᠯᠤᠭᠰᠠᠨ ᠪᠢᠯᠡ᠃ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠡᠰᠡᠭ ᠰᠢᠯᠢᠮᠡᠯ(ᠲᠠᠪᠢᠲᠤ) ᠴᠡᠷᠢᠭ ᠢ᠋ ᠲᠡᠭᠦᠨ ᠦ᠌ ᠮᠠᠲᠠᠯ ᠳ᠋ᠤ᠌ ᠭᠠᠷᠭᠠᠨ ᠥᠭᠴᠦ᠂ ᠪᠢᠯᠢᠭᠦᠨ ᠬᠦᠯᠦᠭ ᠦ᠋ᠨ ᠬᠤᠷᠳᠤᠨ ᠢ᠋ᠶ᠋ᠠᠷ ᠬᠡᠭᠡᠷᠡ ᠲᠠᠯᠠ ᠶ᠋ᠢ ᠳᠠᠮᠵᠢᠨ᠂ ᠬᠤᠢ ᠰᠠᠯᠬᠢ ᠠᠳᠠᠯᠢ ᠬᠤᠢᠷᠠᠭᠨᠠᠭᠤᠯᠵᠦ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠰᠢᠨᠳᠠᠰᠤᠲᠤ ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠬᠤ ᠪᠠᠷ ᠢ᠋ᠶ᠋ᠠᠨ ᠴᠣᠭ ᠬᠡᠢ ᠮᠣᠷᠢ ᠪᠠᠨ ᠵᠠᠯᠠᠵᠤ ᠪᠠᠳᠠᠷᠠᠭᠠᠭᠰᠠᠨ ᠠᠳᠠᠯᠢ ᠵᠢᠪᠬᠤᠯᠠᠩᠲᠤ ᠪᠣᠯᠳᠠᠭ ᠢ᠋ ᠥᠭᠦᠯᠡᠬᠦ ᠶᠠᠭᠤᠨ ᠪᠢᠯᠡ᠃ ᠡᠨᠡ ᠲᠡᠢᠨ ᠲᠡᠭᠦᠰᠲᠡᠯᠡ ᠲᠡᠮᠡᠴᠡᠯ ᠬᠢᠮᠤᠷᠠᠯ ᠢ᠋ ᠡᠴᠦᠰ ᠪᠣᠯᠭᠠᠭᠰᠠᠨ ᠨᠢ ᠪᠢᠰᠢ᠃ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠴᠠᠭᠠᠰᠢᠳᠠ ᠤᠯᠠᠮ ᠬᠣᠷᠣᠰᠤᠯᠲᠠᠢ ᠪᠠᠷ ᠦᠷᠭᠦᠯᠵᠢᠯᠡᠬᠦ ᠨᠢ ᠬᠡᠨ ᠪᠦᠬᠦᠨ ᠳ᠋ᠦ᠍ ᠢᠯᠡᠷᠬᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠩᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ