ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ< ᠲᠠᠪᠤᠳᠤᠭᠠᠷ ᠪᠦᠯᠦᠭ -3>᠂ ᠦᠢᠮᠡᠭᠡᠨ ᠳᠡᠭᠳᠡᠪᠡ Бүргэд харьд үүрэлдэггүй – Ж᠂ Пүрэв <5-р бүлэг ~3>.үймээн дэгдэв
4ᠲᠠᠪᠤᠳᠤᠭᠠᠷ ᠪᠦᠯᠦᠭ -3᠂ ᠦᠢᠮᠡᠭᠡᠨ ᠳᠡᠭᠳᠡᠪᠡ
ᠠᠯᠠᠨᠳᠠᠷ ᠵᠠᠩᠵᠤᠨ ᠪᠢᠯᠢᠭᠦᠨ ᠢ᠋ ᠳᠠᠭᠤᠳᠠᠭᠤᠯᠵᠤ ᠠᠭᠤᠯᠵᠠᠭᠠᠳ ᠪᠦᠳᠦᠭᠦᠨ ᠳᠠᠭᠤ ᠪᠠᠷ
— ᠨᠣᠶᠠᠨ ᠲᠦᠰᠢᠮᠡᠯ ᠴᠢ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠶᠣᠰᠣ ᠪᠠᠷ ᠲᠤᠩ ᠶᠠᠭᠠᠷᠠᠯᠲᠠᠢ ᠳᠠᠪᠬᠢᠵᠤ ᠱᠠᠩᠳᠤ ᠳ᠋ᠤ᠌ ᠬᠦᠷᠦᠭᠡᠳ ᠡᠷᠭᠢᠵᠦ ᠢᠷᠡᠬᠦ ᠤᠴᠢᠷᠲᠠᠢ ᠪᠣᠯᠤᠯᠠ ᠭᠡᠪᠡ᠃ ᠪᠢᠯᠢᠭᠦᠨ ᠭᠠᠢᠬᠠᠵᠤ《ᠲᠡᠭᠡᠪᠡᠯ ᠪᠢ ᠲᠡᠨᠳᠡ ᠣᠴᠢᠬᠤ ᠪᠠᠷ ᠢ᠋ᠶ᠋ᠠᠨ ᠪᠠᠰᠠ ᠪᠠᠷᠢᠭᠳᠠᠵᠤ ᠯᠠ ᠲᠠᠭᠠᠷᠠᠬᠤ ᠪᠣᠢ》 ᠭᠡᠵᠦ ᠪᠣᠳᠣᠨ᠂ ᠵᠠᠩᠵᠤᠨ ᠤ᠋ ᠨᠢᠭᠤᠷ ᠥᠭᠡᠳᠡ ᠳᠠᠷᠠᠭᠠ ᠶ᠋ᠢᠨ ᠦᠭᠡ ᠶ᠋ᠢ ᠬᠦᠯᠢᠶᠡᠵᠦ ᠬᠠᠷᠠᠪᠠᠯ ᠠᠯᠠᠨᠳᠠᠷ ᠴᠠᠭ ᠦᠷᠭᠦᠯᠵᠢᠳᠡ ᠰᠠᠨᠵᠢᠭᠢᠨᠠᠭᠤᠯᠵᠤ ᠶᠠᠪᠤᠳᠠᠭ ᠲᠠᠬᠢᠷ ᠢᠯᠳᠦ ᠪᠡᠨ ᠪᠠᠷᠢᠵᠤ᠄
— ᠴᠢ ᠬᠦ! ᠲᠠᠪᠢᠨ ᠴᠡᠷᠢᠭ ᠳᠠᠭᠠᠭᠤᠯ! ᠬᠠᠭᠠᠨ ᠤ᠋ ᠰᠦᠷᠦᠭ ᠡᠴᠡ ᠭᠡᠰᠦᠭ ᠮᠣᠷᠢ ᠰᠢᠯᠢᠵᠦ ᠪᠠᠷᠢᠭᠠᠳ ᠲᠡᠭᠦᠨ ᠢ᠋ ᠪᠡᠨ ᠬᠥᠯᠥᠭᠯᠡ! ᠲᠡᠭᠡᠭᠡᠳ ᠲᠤᠩ ᠰᠡᠮᠬᠡᠨ ᠢ᠋ᠶ᠋ᠡᠷ ᠶᠠᠪᠤᠭᠠᠳ ᠪᠣᠭᠣᠯᠴᠢᠯᠠᠭᠳᠠᠨ ᠪᠣᠢ ᠬᠦᠯᠦᠭ ᠢ᠋ ᠰᠤᠯᠠᠯᠠᠵᠤ ᠠᠪᠤᠭᠠᠳ ᠢᠷᠡ! ᠡᠭᠦᠨ ᠢ᠋ ᠴᠢ ᠴᠢᠳᠠᠬᠤ ᠶᠣᠰᠣᠲᠠᠢ ᠭᠡᠯᠡ᠃
ᠵᠠᠷᠯᠢᠭ ᠢ᠋ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠬᠦ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠪᠢᠯᠢᠭᠦᠨ ᠳᠡᠭᠡᠳᠦ ᠶ᠋ᠢᠨ ᠵᠥᠪᠰᠢᠶᠡᠷᠡᠭᠰᠡᠨ ᠶᠣᠰᠣᠭᠠᠷ《ᠣᠷᠬᠣᠨ ᠲᠦᠮᠡᠲᠦ》 ᠡᠴᠡ ᠲᠠᠪᠢᠨ ᠴᠡᠷᠢᠭ ᠰᠢᠯᠢᠭᠦᠯᠦᠨ ᠭᠠᠷᠭᠠᠭᠤᠯᠵᠤ ᠠᠪᠤᠭᠠᠳ᠂ ᠰᠢᠩᠬᠤ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠬᠥᠨᠳᠡᠢ ᠳ᠋ᠦ᠍ ᠪᠡᠯᠴᠢᠭᠡᠷᠯᠡᠨ ᠪᠣᠢ ᠬᠠᠭᠠᠨ ᠤ᠋ ᠣᠩᠭᠣᠨ ᠰᠦᠷᠦᠭ ᠳᠡᠭᠡᠷᠡ ᠳᠠᠪᠬᠢᠨ ᠢᠷᠡᠵᠦ᠂ ᠮᠣᠷᠢᠳ ᠰᠣᠩᠭᠣᠨ ᠪᠠᠷᠢᠭᠤᠯᠤᠯᠠ᠃ ᠲᠤᠩ ᠠᠮᠠᠷ ᠦᠭᠡᠢ ᠠᠵᠢᠯ ᠪᠣᠯᠪᠠ᠃ ᠬᠤᠢᠯᠠᠷᠠᠨ ᠱᠠᠭᠢᠬᠤ ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠬᠦᠯᠦᠭ ᠦ᠋ᠨ ᠰᠢᠨᠳᠠᠰᠤ ᠰᠢᠯᠢᠨᠡ ᠭᠡᠳᠡᠭ ᠵᠢᠷ ᠦ᠋ᠨ ᠬᠠᠷᠠᠭᠠ ᠪᠠᠷ ᠪᠦᠲᠦᠬᠦ ᠬᠡᠷᠡᠭ ᠪᠢᠰᠢ ᠠᠵᠢ᠃
— ᠬᠡᠳᠦ ᠲᠠᠷᠭᠤᠨ ᠮᠣᠷᠢ ᠠᠮᠢᠰᠬᠤᠭᠠᠳᠠᠭᠠᠳ ᠶᠠᠪᠤᠵᠤ ᠥᠭᠬᠦ ᠦᠭᠡᠢ ᠰᠢᠦ᠃ ᠬᠥᠯ᠂ ᠲᠤᠭᠤᠷᠠᠢ᠂ ᠴᠡᠭᠡᠵᠢ ᠰᠠᠢᠨᠲᠠᠢ ᠮᠣᠷᠢ ᠪᠠᠷᠢᠭᠠᠷᠠᠢ! ᠭᠡᠵᠦ ᠲᠦᠰᠢᠮᠡᠯ ᠴᠡᠷᠢᠭ ᠦ᠋ᠳ ᠲᠦ᠍ ᠪᠡᠨ ᠲᠤᠰᠢᠶᠠᠭᠠᠳ᠂ ᠲᠦᠮᠡᠨ ᠰᠦᠷᠦᠭ ᠳᠤᠮᠳᠠ ᠤᠷᠭᠠ ᠪᠠᠨ ᠪᠠᠷᠢᠨ ᠣᠷᠣᠵᠤ ᠪᠢᠯᠡ᠃ ᠥᠷᠭᠡᠨ ᠬᠥᠨᠳᠡᠢ ᠳ᠋ᠦ᠍ ᠪᠠᠬᠠᠨ ᠲᠣᠭᠣᠰᠣ ᠬᠠᠳᠤᠭᠤᠯᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠬᠥᠬᠡ ᠮᠢᠬᠠ ᠨᠢ ᠴᠡᠴᠡᠷᠡᠨ᠂ ᠪᠠᠢᠵᠤ ᠰᠠᠭᠤᠵᠤ ᠶᠠᠳᠠᠭᠰᠠᠨ ᠰᠠᠢᠬᠠᠨ ᠮᠣᠷᠢᠳ ᠢ᠋ ᠬᠡᠯᠬᠢᠵᠦ ᠠᠪᠤᠭᠠᠳ᠂ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠬᠣᠶᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠨᠢ ᠥᠭᠴᠦ ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ ᠨᠢ ᠲᠠᠭᠠᠷᠠᠭᠤᠯᠪᠠ᠃
ᠪᠢᠯᠢᠭᠦᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠡᠷᠭᠢᠨ ᠢᠷᠡᠵᠦ ᠴᠡᠷᠢᠭ ᠦ᠋ᠳ ᠲᠦ᠍ ᠪᠡᠨ ᠪᠡᠯᠡᠨ ᠵᠡᠬᠡᠭᠡᠰᠦᠲᠡᠢ ᠬᠦᠨᠡᠰᠦᠨ ᠡᠴᠡ ᠠᠪᠴᠤ ᠭᠠᠨᠵᠤᠭᠠᠯᠠᠭᠤᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠭᠡᠷ ᠲᠦ᠍ ᠪᠡᠨ ᠢᠷᠡᠵᠦ ᠠᠬᠠ ᠶ᠋ᠢᠨ ᠡᠬᠡᠨᠡᠷ ᠬᠤᠰᠢᠮᠣᠭᠲᠦ ᠲᠡᠢ ᠠᠭᠤᠯᠵᠠᠨ᠂ ᠱᠠᠩᠳᠤ ᠬᠣᠲᠠ ᠶ᠋ᠢᠨ ᠪᠠᠢᠳᠠᠯ᠂ ᠬᠦᠯᠦᠭ ᠦ᠋ᠨ ᠪᠠᠢᠳᠠᠯ ᠭᠠᠵᠠᠷ ᠢ᠋ ᠵᠢᠭᠠᠯᠭᠠᠭᠤᠯᠵᠤ ᠠᠪᠤᠭᠠᠳ᠂ ᠰᠠᠢᠨ ᠬᠣᠭᠣᠯᠠ ᠢᠳᠡᠭᠰᠡᠨ ᠳᠣᠣᠷᠠ ᠪᠠᠨ ᠰᠥᠨᠢ ᠳᠤᠮᠳᠠ ᠲᠤᠰᠢᠶᠠᠯ ᠶᠣᠰᠣᠭᠠᠷ ᠰᠡᠮᠬᠡᠨ ᠮᠣᠷᠳᠠᠵᠠᠢ᠃ ᠠᠯᠠᠨᠳᠠᠷ ᠵᠠᠩᠵᠤᠨ ᠤ᠋ ᠬᠡᠯᠡᠵᠦ ᠪᠠᠢᠭᠠ ᠪᠠᠷ ᠪᠣᠯ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ《ᠪᠢᠳᠡᠨ ᠳ᠋ᠦ᠍ ᠬᠦᠯᠦᠭ ᠡᠴᠡ ᠢᠯᠡᠭᠦᠦ ᠬᠡᠷᠡᠭᠲᠡᠢ ᠬᠥᠮᠦᠨ ᠠᠯᠠᠭᠠ᠃ ᠲᠡᠷᠡ ᠡᠷᠡ ᠬᠤᠪᠢᠯᠠᠢ ᠶ᠋ᠢᠨ ᠬᠠᠮᠤᠭ ᠪᠠᠢᠳᠠᠯ ᠢ᠋ ᠮᠡᠳᠡᠵᠦ ᠪᠠᠢᠭᠠ ᠪᠢᠳᠡᠨ ᠦ᠌ ᠲᠠᠯᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠢᠲᠡᠭᠡᠯᠲᠡᠢ ᠡᠷᠡ ᠪᠣᠯᠵᠤ ᠪᠠᠢᠨᠠ》ᠭᠡᠰᠡᠨ ᠠᠵᠢ᠃ ᠦᠨᠡᠨ ᠳ᠋ᠦ᠍ ᠪᠡᠨ ᠴᠤ᠌ ᠲᠡᠢᠮᠦ ᠪᠠᠢᠯᠠ᠃ ᠨᠢᠭᠡᠨᠲᠡ ᠬᠤᠷᠴᠠᠳᠤᠭᠰᠠᠨ ᠦᠢᠮᠡᠭᠡᠨ ᠢ᠋ ᠥᠪᠡᠷ ᠲᠦ᠍ ᠪᠡᠨ ᠠᠰᠢᠭᠲᠠᠢ ᠰᠢᠢᠳᠪᠦᠷᠢᠯᠡᠬᠦ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠲᠠᠯᠠ ᠶ᠋ᠢᠨ ᠰᠠᠢᠨ ᠮᠠᠭᠤ᠂ ᠢᠯᠡᠭᠦᠦ ᠳᠤᠲᠠᠭᠤ ᠶ᠋ᠢ ᠪᠦᠷᠢᠨ ᠮᠡᠳᠡᠵᠦ ᠪᠠᠢᠵᠤ ᠦᠵᠡᠯᠴᠡᠬᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠢᠯᠡ᠃ ᠡᠭᠦᠨ ᠢ᠋ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠪᠣᠳᠣᠵᠤ ᠠᠮᠵᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠠᠷᠤᠭ ᠡᠷᠡ ᠬᠥᠢᠰᠦᠲᠠᠢ ᠪᠦᠬᠦᠨ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠭᠳᠠᠨ᠂ ᠴᠡᠷᠢᠭ ᠦ᠋ᠨ ᠠᠩᠭᠢ ᠨᠤᠭᠤᠳ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠡᠯᠡᠳᠬᠡᠵᠦ᠂ ᠳᠠᠭᠠᠭᠠᠮᠠᠯ᠂ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠳᠠᠭᠤ ᠥᠨᠳᠥᠷ ᠪᠣᠯᠤᠭᠰᠠᠨ ᠴᠠᠭ ᠪᠢᠯᠡ᠃ ᠨᠡᠢᠰᠯᠡᠯ ᠳ᠋ᠦ᠍ ᠪᠠᠬᠠᠨ ᠬᠢᠲᠠᠳ ᠴᠡᠷᠢᠭ ᠭᠡᠨᠡᠳᠲᠡ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠮᠡᠲᠦ ᠬᠥᠯ ᠬᠥᠰᠬᠡᠨ ᠪᠣᠯᠵᠤ ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠰᠢᠳᠠᠷ ᠨᠣᠶᠠᠳ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠤᠨ ᠵᠥᠪᠯᠡᠯᠳᠦᠵᠦ ᠡᠬᠢᠯᠡᠭᠰᠡᠨ ᠴᠠᠭ ᠢ᠋ᠶ᠋ᠠᠷ ᠪᠢᠯᠢᠭᠦᠨ ᠬᠦᠯᠦᠭ ᠦ᠋ᠨ ᠰᠢᠨᠳᠠᠰᠤ ᠰᠣᠩᠭᠣᠨ ᠡᠮᠦᠨᠡᠲᠦ ᠶ᠋ᠢ ᠵᠣᠷᠢᠯᠠ᠃ ᠠᠩᠬᠠᠨ ᠤ᠋ ᠡᠳᠦᠷ ᠤᠨᠤᠭᠰᠠᠨ ᠬᠦᠯᠦᠭ ᠦ᠋ᠳ ᠶᠡᠬᠡ ᠯᠡ ᠣᠩᠭᠣᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠶᠠᠨ ᠤ᠋ ᠵᠠᠮ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠨᠣᠮᠣᠬᠠᠷᠠᠨ ᠣᠷᠣᠵᠤ ᠢᠷᠡᠪᠡ᠃ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠪᠦᠷ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ ᠬᠦᠷᠲᠡᠯᠡ ᠠᠶᠠᠯᠠᠵᠤ ᠦᠵᠡᠭᠰᠡᠨ ᠪᠢᠯᠢᠭᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠡᠳ᠋ᠯᠡᠬᠦ ᠪᠡᠨ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠡᠬᠢᠨ ᠦ᠌ ᠬᠣᠶᠠᠷ ᠡᠳᠦᠷ ᠨᠠᠮᠤᠭᠤᠨ ᠵᠥᠭᠡᠯᠡᠳᠡᠭᠦᠦ᠂ ᠭᠣᠣᠯᠳᠠᠭᠤ ᠰᠡᠷᠢᠭᠦᠨ ᠴᠠᠭ ᠢ᠋ᠶ᠋ᠠᠷ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠶᠡᠬᠡ ᠭᠣᠪᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠲᠠᠩᠨᠠᠨ ᠰᠥᠨᠢ ᠳᠠᠪᠬᠢᠵᠤ᠂ ᠡᠳᠦᠷ ᠲᠦ᠍ ᠠᠭᠤᠯᠠ ᠬᠠᠳᠠ ᠪᠠᠷ ᠠᠯᠤᠰ ᠤ᠋ᠨ ᠪᠠᠷᠠ ᠬᠠᠷᠠᠨ ᠪᠡᠶᠡᠰ ᠢ᠋ᠶ᠋ᠡᠨ ᠨᠢᠭᠤᠵᠤ ᠪᠠᠢᠯᠠ᠃ ᠤᠷᠢᠳ ᠶᠠᠪᠤᠵᠤ᠂ ᠵᠢᠷᠠᠬᠠᠢ ᠨᠢᠳᠦ ᠪᠡᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠨ ᠪᠠᠷᠢᠮᠵᠢᠶᠠ ᠪᠠᠨ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠣᠳᠣᠬᠠᠨ ᠲᠣᠰᠴᠤ ᠪᠠᠢᠪᠠ᠃ ᠪᠢᠯᠢᠭᠦᠨ ᠦ᠌ ᠴᠡᠷᠢᠭ ᠬᠡᠳᠦᠬᠡᠨ ᠬᠣᠨᠣᠭ ᠰᠠᠭᠠᠳ ᠦᠭᠡᠢ ᠠᠶᠠᠯᠠᠭᠠᠳ᠂ ᠵᠠᠷᠢᠮ ᠭᠠᠭᠴᠠ ᠨᠢᠭᠡ ᠵᠣᠭᠰᠣᠭᠰᠠᠨ ᠮᠣᠷᠢ ᠣᠷᠬᠢᠨ ᠳᠣᠪᠲᠣᠯᠤᠭᠰᠠᠭᠠᠷ ᠱᠠᠩᠳᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠲᠤᠯᠵᠤ ᠢᠷᠡᠯᠡ᠃
ᠣᠳᠣ ᠶᠠᠭᠠᠬᠢᠵᠤ ᠬᠦᠯᠦᠭ ᠢ᠋ ᠠᠪᠬᠤ ᠪᠣᠢ? ᠡᠳᠦᠷ ᠠᠭᠤᠯᠵᠠᠬᠤ ᠤᠤ? ᠰᠥᠨᠢ ᠠᠭᠤᠯᠵᠠᠬᠤ ᠤᠤ? ᠭᠡᠵᠦ ᠡᠨᠡ ᠲᠦᠰᠢᠮᠡᠯ ᠪᠣᠳᠣᠭᠰᠠᠭᠠᠷ᠂ ᠴᠡᠷᠢᠭ ᠢ᠋ᠶ᠋ᠡᠨ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠭᠤᠯᠠᠨ ᠳ᠋ᠤ᠌ ᠮᠣᠳᠣ ᠠᠪᠴᠤ ᠪᠣᠢ ᠶᠠᠩᠵᠤ ᠪᠠᠷ ᠪᠠᠢᠯᠭᠠᠨ᠂ ᠪᠢᠯᠢᠭᠦᠨ ᠡᠩ ᠦ᠋ᠨ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ ᠥᠷᠯᠥᠭᠡ ᠦᠷ ᠴᠥᠷ ᠢ᠋ᠶ᠋ᠡᠷ ᠣᠯᠠᠨ ᠤ᠋ ᠬᠥᠯ ᠦᠢᠮᠡᠭᠡᠨ ᠡᠴᠡ ᠲᠡᠷᠢᠭᠦᠯᠡᠨ ᠶᠠᠪᠤᠵᠤ᠂ ᠬᠣᠲᠠ ᠳ᠋ᠤ᠌ ᠣᠷᠣᠭᠰᠠᠨ ᠳᠣᠣᠷᠠ ᠪᠠᠨ ᠳᠠᠭᠠᠭᠤᠯ ᠭᠤᠷᠪᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠰᠠ ᠡᠨᠳᠡ ᠲᠡᠨᠳᠡ ᠨᠢᠭᠤᠴᠢᠯᠠᠨ ᠲᠠᠯᠪᠢᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠮᠠᠯ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠬᠠᠭᠠᠯᠭᠠ ᠶ᠋ᠢ ᠰᠠᠮ ᠴᠣᠬᠢᠪᠠ᠃ ᠲᠡᠭᠦᠨ ᠢ᠋ ᠬᠠᠷᠠ ᠠᠪᠴᠤ ᠠᠵᠢᠵᠤ ᠪᠠᠢᠭᠠ ᠶᠠᠩᠵᠤ ᠶᠡᠷᠦ ᠦᠭᠡᠢ ᠠᠵᠢ᠃ ᠬᠣᠮᠢᠨᠢ ᠶ᠋ᠢᠨ ᠪᠠᠢᠷᠢ ᠨᠢ ᠬᠣᠲᠠ ᠶ᠋ᠢᠨ ᠵᠠᠬᠠᠳᠠᠭᠤ ᠨᠠᠷᠢᠨ ᠭᠤᠳᠤᠮᠵᠢᠨ ᠤ᠋ ᠠᠳᠠᠭ᠂ ᠵᠢᠵᠢᠭ ᠰᠢᠪᠡᠷ ᠬᠡᠷᠡᠮ ᠠᠵᠢ᠃ ᠡᠯᠵᠢᠭᠡ ᠲᠡᠢ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠬᠣᠲᠠ ᠶ᠋ᠢᠨ ᠳᠤᠮᠳᠠ ᠬᠡᠰᠡᠭ ᠲᠦ᠍ ᠶᠠᠭᠤᠨ ᠳ᠋ᠤ᠌ ᠪᠠᠢᠯᠭᠠᠬᠤ ᠪᠢᠯᠡ᠃ ᠪᠠᠢᠨ ᠪᠠᠢᠨ ᠨᠣᠬᠠᠢ ᠪᠣᠷᠭᠣᠵᠤ ᠬᠤᠴᠠᠨᠠ᠃ ᠬᠠᠶᠠ ᠮᠣᠩᠭᠣᠯ ᠬᠢᠲᠠᠳ ᠴᠡᠷᠢᠭ ᠦ᠋ᠳ ᠴᠠᠭᠠᠭᠤᠷ ᠶᠠᠪᠤ᠂ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠵᠣᠭᠰᠣ! ᠭᠡᠵᠦ ᠬᠠᠰᠬᠢᠷᠬᠤ ᠳᠠᠭᠤ ᠰᠣᠨᠣᠰᠤᠭᠳᠠᠨᠠ᠃ ᠬᠣᠲᠠ ᠶ᠋ᠢᠨ ᠬᠣᠢᠲᠤ ᠬᠡᠰᠡᠭ ᠲᠦ᠍ ᠪᠠᠷᠢᠵᠤ ᠪᠣᠢ ᠬᠢᠮᠡᠯ ᠠᠭᠤᠯᠠ ᠳ᠋ᠤ᠌ ᠬᠦᠷᠵᠡ᠂ ᠵᠡᠭᠡᠲᠦᠦ ᠶ᠋ᠢᠨ ᠳᠠᠭᠤ ᠰᠣᠨᠣᠰᠤᠭᠳᠠᠨᠠ᠃ ᠡᠢᠮᠦ ᠶᠠᠩᠵᠤ ᠶ᠋ᠢᠨ ᠬᠥᠭᠲᠡᠢ ᠦᠶᠡ ᠳ᠋ᠦ᠍ ᠬᠣᠰᠢᠮᠣᠭᠲᠦ ᠶ᠋ᠢᠨ ᠵᠢᠭᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠢᠯᠢᠭᠦᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠭᠠ ᠭᠠᠵᠠᠷ ᠲᠤ ᠢᠷᠡᠵᠦ ᠠᠮᠵᠢᠯᠠ᠃ ᠬᠥᠮᠦᠨ ᠦ᠌ ᠶᠠᠭᠤᠮᠠ ᠬᠠᠷᠠᠵᠤ ᠬᠠᠭᠠᠴᠠᠢᠯᠠᠨ ᠪᠠᠢᠭᠠ ᠪᠣᠭᠣᠯ ᠬᠦᠯᠦᠭ ᠰᠡᠷᠡᠮᠵᠢᠲᠡᠢ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠂ ᠬᠠᠭᠠᠯᠭᠠ ᠶ᠋ᠢ ᠴᠣᠬᠢᠮᠠᠭᠴᠠ ᠭᠦᠶᠦᠵᠦ ᠢᠷᠡᠭᠡᠳ ᠴᠢᠩᠭᠠ ᠪᠠᠷ᠄
— ᠶᠠᠭᠤᠨ ᠬᠥᠮᠦᠨ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃ ᠪᠢᠯᠢᠭᠦᠨ ᠨᠠᠮᠵᠢᠭᠤᠬᠠᠨ ᠳᠠᠭᠤ ᠪᠠᠷ
— ᠴᠢᠮᠡᠭᠡ ᠦᠭᠡᠢ! ᠬᠠᠭᠠᠯᠭᠠ ᠪᠠᠨ ᠨᠡᠬᠡᠭᠡ! ᠭᠡᠪᠡᠯ ᠠᠬᠠ ᠨᠢ ᠳᠠᠭᠤ ᠪᠠᠷ ᠲᠠᠨᠢᠭᠠ ᠤᠤ᠂ ᠠᠯᠢ ᠤᠴᠢᠷ ᠢ᠋ ᠣᠢᠯᠠᠭᠠᠭᠠ ᠤᠤ᠂ ᠡᠭᠦᠳᠡᠨ ᠦ᠌ ᠪᠡᠨ ᠱᠠᠭᠠᠨᠲᠠᠭ ᠤ᠋ᠨ ᠲᠦᠭᠵᠢᠭᠡ ᠶ᠋ᠢ ᠰᠤᠭᠤ ᠲᠠᠲᠠᠪᠠ᠃ ᠡᠢᠨ ᠬᠦ᠌ ᠠᠬᠠ ᠳᠡᠭᠦᠦ ᠬᠣᠶᠠᠷ ᠲᠦᠪᠡᠭ ᠪᠠᠭᠠᠲᠠᠢ ᠪᠠᠷ ᠠᠭᠤᠯᠵᠠᠨ᠂ ᠪᠡᠶᠡ ᠪᠡᠶᠡ ᠪᠡᠨ ᠲᠠᠨᠢᠵᠤ ᠤᠴᠠᠷᠠᠯᠠ᠃ ᠬᠡᠯᠡᠬᠦ ᠶᠠᠷᠢᠬᠤ᠂ ᠬᠡᠯᠡᠯᠴᠡᠬᠦ ᠵᠦᠢᠯ ᠲᠣᠯᠣᠭᠠᠢ ᠲᠠᠢ ᠦᠰᠦᠨ ᠡᠴᠡ ᠣᠯᠠᠨ᠂ ᠪᠢᠯᠢᠭᠦᠨ ᠶᠠᠭᠤᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠭᠤᠳᠤᠮᠵᠢᠨ ᠤ᠋ ᠡᠬᠢ ᠠᠳᠠᠭ ᠲᠤ ᠵᠣᠭᠰᠣᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠪᠣᠭᠣᠯ ᠢ᠋ᠶ᠋ᠠᠷ ᠳᠠᠭᠤᠳᠠᠭᠤᠯᠤᠨ ᠠᠪᠴᠤ ᠢᠷᠡᠵᠦ ᠡᠯᠵᠢᠭᠡᠨ ᠦ᠌ ᠬᠠᠰᠢᠶᠠᠨ ᠳ᠋ᠤ᠌ ᠨᠢᠭᠤᠵᠤ ᠰᠠᠭᠤᠯᠭᠠᠯᠠ᠃
ᠨᠠᠷᠠᠨ ᠤᠷᠭᠤᠬᠤ ᠦᠶᠡ ᠳ᠋ᠦ᠍ ᠡᠵᠡᠨ ᠬᠣᠮᠢᠨᠢ ᠳᠡᠭᠡᠭᠰᠢᠯᠡᠵᠦ᠂ ᠪᠢᠯᠢᠭᠦᠨ ᠢ᠋ ᠬᠠᠷᠠᠭᠰᠠᠨ ᠳᠣᠣᠷᠠ ᠪᠠᠨ ᠰᠠᠨᠳᠤᠷᠤᠨ ᠰᠣᠴᠢᠪᠠ᠃ ᠡᠨᠡ ᠬᠠᠷᠢᠨ ᠲᠦᠪᠡᠭᠲᠡᠢ ᠶᠠᠪᠤᠳᠠᠯ ᠪᠣᠯᠵᠤ ᠮᠠᠭᠠᠳ ᠦᠭᠡᠢ ᠪᠠᠢᠯᠠ᠃ ᠬᠤᠳᠠᠯᠳᠤᠭᠠᠴᠢᠨ ᠡᠷᠡ ᠡᠬᠢᠯᠡᠭᠡᠳ ᠥᠪᠡᠷ ᠲᠦ᠍ ᠪᠡᠨ ᠭᠡᠮ ᠲᠡᠢ ᠶᠠᠪᠤᠳᠠᠯ ᠲᠠᠷᠢᠬᠤ ᠨᠢ ᠭᠡᠵᠦ ᠵᠢᠭᠲᠡᠢ ᠶᠡᠬᠡ ᠠᠶᠤᠪᠠ ᠪᠣᠯᠤᠯᠲᠠᠢ᠃ ᠵᠢᠭᠠᠬᠠᠨ ᠰᠠᠭᠤᠭᠠᠳ ᠶᠠᠷᠢᠪᠠᠯ ᠬᠣᠮᠢᠨᠢ ᠤᠴᠢᠷ ᠢ᠋ ᠣᠢᠯᠠᠭᠠᠵᠤ᠂ ᠡᠷᠡᠭᠡᠯᠵᠡᠬᠦ᠂ ᠲᠡᠨᠡᠭᠡᠯᠵᠡᠬᠦ ᠪᠠᠢᠳᠠᠯ ᠲᠠᠢ ᠪᠣᠯᠵᠤ᠂ ᠪᠢᠯᠡᠭᠦᠨ ᠲᠡᠢ ᠲᠠᠨᠢᠯᠴᠠᠯᠠ᠃ ᠲᠡᠷᠡ ᠰᠢᠪᠡᠷ ᠪᠠᠢᠰᠢᠩ ᠳ᠋ᠤ᠌ ᠵᠡᠷᠭᠡᠴᠡᠵᠦ ᠰᠠᠭᠤᠭᠠᠳ ᠴᠠᠢ ᠤᠤᠭᠤᠪᠠ᠃ ᠪᠢᠯᠢᠭᠦᠨ ᠠᠬᠠ ᠶ᠋ᠢ ᠪᠡᠨ ᠠᠪᠠᠴᠢᠬᠤ ᠪᠠᠷ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠡᠳᠡᠨ ᠳ᠋ᠦ᠍ ᠬᠡᠯᠡᠯᠡ᠃ ᠬᠣᠮᠢᠨᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠬᠥᠯᠥᠰᠥ ᠪᠡᠨ ᠠᠰᠬᠠᠷᠠᠭᠤᠯᠤᠨ ᠪᠠᠢᠵᠤ ᠬᠡᠯᠡᠬᠦ ᠳ᠋ᠦ᠍ ᠪᠡᠨ᠄
— ᠲᠠ ᠨᠠᠷ ᠨᠠᠮᠠᠶ᠋ᠢ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ᠃ ᠪᠢ ᠬᠦᠯᠦᠭ ᠢ᠋ ᠶᠠᠪᠤᠭᠤᠯᠵᠤ ᠣᠷᠬᠢᠪᠠᠯ ᠡᠨᠳᠡᠬᠢ ᠶ᠋ᠢᠨ ᠨᠣᠶᠠᠳ ᠶᠠᠯᠠᠲᠠᠨ ᠲᠠᠢ ᠬᠤᠤᠪᠢᠯᠳᠤᠭᠰᠠᠨ ᠠ᠋ᠴᠠ ᠠᠭᠤᠴᠢᠯᠠᠵᠤ ᠴᠢᠳᠠᠬᠤ ᠪᠠᠨ ᠪᠠᠢᠨᠠ ᠭᠡᠵᠦ ᠬᠡᠯᠡᠨᠡ ᠭᠡᠪᠡ᠃
ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠬᠣᠮᠢᠨᠢ ᠶ᠋ᠢᠨ ᠦᠭᠡ ᠦᠨᠡᠨ ᠲᠡᠢ᠃ ᠬᠦᠯᠦᠭ ᠢ᠋ ᠬᠠᠭᠠᠨ ᠳᠠᠭᠤᠳᠠᠭᠰᠠᠨ ᠪᠣᠯᠬᠣᠷ ᠵᠠᠪᠠᠯ ᠣᠴᠢᠬᠤ ᠶᠣᠰᠣᠲᠠᠢ᠃ ᠡᠢᠮᠦ ᠬᠡᠷᠡᠭ ᠲᠡᠷᠡ ᠰᠢᠢᠳᠬᠦ ᠳ᠋ᠦ᠍ ᠪᠡᠨ ᠪᠡᠷᠬᠡ ᠪᠣᠯᠪᠠ᠃ ᠬᠣᠮᠢᠨᠢ ᠭᠠᠢᠬᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ
— ᠪᠢ ᠬᠦᠯᠦᠭ ᠢ᠋ ᠪᠣᠭᠣᠯ ᠶᠣᠰᠣᠭᠠᠷ ᠡᠯᠵᠢᠭᠡ ᠪᠡᠨ ᠲᠠᠭᠤᠯᠭᠠᠭᠠᠳ ᠡᠨᠳᠡ ᠡᠴᠡ ᠶᠠᠪᠤᠶᠠ᠃ ᠲᠡᠭᠡᠭᠡᠳ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠭᠦᠶᠡ ᠭᠡᠵᠦ ᠨᠢᠭᠡᠨ ᠠᠷᠭᠠ ᠭᠠᠷᠭᠠᠪᠠ᠃ ᠪᠢᠯᠢᠭᠦᠨ ᠲᠡᠭᠦᠨ ᠢ᠋ ᠡᠰᠡ ᠵᠥᠪᠰᠢᠶᠡᠷᠡᠵᠦ
— ᠬᠣᠶᠠᠷ ᠬᠠᠭᠠᠨ ᠤ᠋ ᠳᠤᠮᠳᠠ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠬᠤᠷᠴᠠᠳᠤᠭᠰᠠᠨ ᠪᠣᠯᠬᠣᠷ ᠠᠷᠢᠬᠪᠦ᠋ᠬᠡ ᠬᠠᠭᠠᠨ᠂ ᠠᠬᠠ ᠶ᠋ᠢ ᠲᠦᠷᠭᠡᠨ ᠠᠪᠠᠴᠢᠵᠤ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠨ ᠬᠤᠪᠢᠯᠠᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠮᠡᠳᠡᠵᠦ ᠠᠪᠬᠤ ᠲᠠᠭᠠᠯᠠᠯᠲᠠᠢ ᠪᠠᠢᠬᠤ ᠳ᠋ᠤ᠌ ᠨᠢ ᠲᠡᠭᠦᠨ ᠢ᠋ ᠲᠠᠰᠤᠯᠳᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠠᠬᠠ ᠶ᠋ᠢ ᠪᠢ ᠵᠠᠪᠠᠯ ᠠᠪᠴᠤ ᠶᠠᠪᠤᠨᠠ ᠭᠡᠯᠡ᠃ ᠲᠡᠳᠡᠨ ᠦ᠌ ᠶᠠᠷᠢᠶᠠ ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯᠪᠠ᠃ ᠬᠦᠯᠦᠭ ᠨᠢᠭᠡ ᠠᠷᠭᠠ ᠭᠠᠷᠭᠠᠵᠤ ᠬᠡᠯᠡᠭᠰᠡᠨ ᠨᠢ ᠪᠠᠰᠠ ᠯᠠ ᠲᠡᠳᠡᠨ ᠳ᠋ᠦ᠍ ᠲᠠᠭᠠᠰᠢᠶᠠᠭᠳᠠᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠃ ᠶᠠᠭᠤ ᠪᠣᠢ ᠭᠡᠪᠡᠯ᠂
— ᠪᠢᠳᠡ ᠰᠥᠨᠢ ᠡᠨᠳᠡ ᠡᠴᠡ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠮᠢᠨᠦ ᠡᠵᠡᠨ ᠢ᠋ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠡᠭᠦᠳᠡᠨ ᠳᠡᠭᠡᠷᠡ ᠬᠦᠯᠢᠵᠦ ᠬᠠᠶᠠᠵᠤ ᠣᠷᠬᠢᠭᠠᠳ ᠵᠠᠢᠯᠠᠶᠠ᠃ ᠪᠢᠳᠡᠨ ᠢ᠋ ᠡᠨᠳᠡ ᠡᠴᠡ ᠬᠣᠯᠠᠳᠴᠤ ᠴᠢᠳᠠᠭᠰᠠᠨ ᠪᠠᠢᠬᠤ ᠭᠡᠬᠦ ᠦᠶᠡ ᠳ᠋ᠦ᠍ ᠬᠣᠮᠢᠨᠢ ᠪᠠᠢᠳᠠᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠭᠠᠳ ᠬᠥᠮᠦᠨ ᠢᠷᠡᠭᠦᠯᠪᠡᠯ ᠨᠠᠮᠠᠶ᠋ᠢ ᠡᠵᠡᠨ ᠢ᠋ᠶ᠋ᠡᠨ ᠪᠠᠭᠯᠠᠨ ᠬᠠᠶᠠᠵᠤ ᠣᠷᠬᠢᠭᠠᠳ ᠪᠡᠶᠡ ᠵᠠᠢᠯᠠᠭᠰᠠᠨ ᠪᠠᠢᠨᠠ ᠭᠡᠪᠡᠯ ᠮᠠᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠶᠠᠯᠠ ᠨᠣᠭᠳᠠᠭᠤᠯᠬᠤ ᠦᠭᠡᠢ ᠪᠣᠯᠪᠠ ᠤᠤ ᠭᠡᠯᠡ᠃ ᠡᠨᠡ ᠰᠠᠨᠠᠭᠠ ᠶ᠋ᠢ ᠶᠠᠪᠤᠴᠠ ᠦᠭᠡᠢ ᠭᠡᠵᠦ ᠬᠣᠮᠢᠨᠢ᠂ ᠪᠢᠯᠢᠭᠦᠨ ᠬᠣᠶᠠᠷ ᠠᠯᠢ ᠠᠯᠢ ᠨᠢ ᠦᠵᠡᠪᠡ᠃ ᠲᠡᠭᠡᠭᠡᠳ ᠬᠡᠷᠬᠢᠬᠦ ᠪᠣᠢ? ᠭᠡᠮᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠰᠠᠳᠤᠨ ᠶᠠᠷᠢᠯᠴᠠᠭᠠᠳ ᠡᠴᠦᠰ ᠲᠦ᠍ ᠨᠢ ᠠᠷᠭᠠ ᠪᠤᠶᠤ ᠬᠦᠯᠦᠭ ᠢ᠋ ᠤᠷᠭᠤᠨ ᠵᠠᠢᠯᠠᠭᠰᠠᠨ ᠪᠣᠯᠭᠠᠨ ᠶᠠᠪᠤᠭᠤᠯᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ ᠭᠡᠵᠦ ᠰᠢᠢᠳᠦᠯᠡ᠃
ᠬᠣᠮᠢᠨᠢ ᠴᠤ᠌ ᠤᠳᠠᠯ ᠦᠭᠡᠢ ᠱᠠᠩᠳᠤ ᠠ᠋ᠴᠠ ᠶᠠᠪᠤᠵᠤ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠴᠢᠬᠤ ᠪᠠᠷ ᠰᠢᠢᠳᠪᠡ᠃ ᠡᠨᠡ ᠡᠷᠡ ᠭᠡᠷ ᠣᠷᠣᠨ᠂ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠰᠠᠨᠠᠵᠤ ᠪᠠᠢᠭᠠ ᠴᠤ᠌ ᠭᠡᠵᠦ ᠤᠴᠢᠷ ᠦᠭᠡᠢ ᠭᠡᠨᠡ᠃ ᠲᠡᠷᠡ ᠨᠢ ᠦᠨᠡᠨ ᠭᠡᠳᠡᠭ ᠢ᠋ ᠬᠡᠨ ᠪᠦᠬᠦᠨ ᠮᠡᠳᠡᠨᠡ᠃ ᠪᠢᠯᠢᠭᠦᠨ ᠪᠡᠶᠡ ᠪᠡᠨ ᠨᠢᠭᠤᠨ ᠴᠠᠭ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠭᠠᠳ ᠰᠥᠨᠢ ᠳᠤᠮᠳᠠ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠬᠣᠶᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠪᠤᠷᠠᠭᠤᠯᠤᠨ ᠬᠠᠰᠢᠶᠠᠨ ᠠ᠋ᠴᠠ ᠭᠠᠷᠭᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠠᠬᠠ ᠶ᠋ᠢ ᠪᠡᠨ ᠳᠠᠭᠠᠭᠤᠯᠤᠨ ᠣᠳᠬᠤ ᠶ᠋ᠢᠨ ᠡᠮᠦᠨᠡ ᠬᠣᠮᠢᠨᠢ ᠲᠠᠢ ᠰᠠᠯᠵᠤ ᠶᠠᠪᠤᠨ ᠪᠠᠢᠵᠤ᠂ ᠲᠡᠭᠦᠨ ᠢ᠋ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠤᠭᠲᠤᠵᠤ ᠠᠪᠤᠭᠠᠳ᠂ ᠴᠠᠭᠠᠰᠢᠳᠠ ᠨᠢ ᠨᠤᠲᠤᠭ ᠲᠤ ᠪᠠᠨ ᠪᠤᠴᠠᠬᠤ ᠵᠠᠮ ᠢ ᠬᠠᠷᠢᠭᠤᠴᠠᠨᠠ ᠭᠡᠵᠦ ᠠᠮᠠᠯᠠᠪᠠ᠃ ᠪᠡᠶᠡ ᠳ᠋ᠦ᠍ ᠪᠡᠨ ᠬᠢᠲᠤᠭᠠᠨ ᠠ᠋ᠴᠠ ᠥᠭᠡᠷᠡ ᠵᠡᠪᠰᠡᠭ ᠦᠭᠡᠢ ᠬᠣᠶᠠᠷ ᠡᠷᠡ ᠬᠠᠷᠠᠩᠭᠤᠢ ᠳᠤᠮᠳᠠ ᠬᠤᠳᠠᠯᠳᠤᠭᠠᠴᠢᠨ ᠠ᠋ᠴᠠ ᠴᠢᠮᠡᠭᠡ ᠦᠭᠡᠢᠬᠡᠨ ᠰᠠᠯᠤᠭᠠᠳ᠂ ᠭᠤᠳᠤᠮᠵᠢ ᠤᠷᠤᠭᠤᠳᠠᠨ ᠶᠠᠪᠤᠭᠰᠠᠭᠠᠷ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠪᠡᠨ ᠲᠡᠷᠡᠬᠡᠨ ᠪᠣᠭᠣᠨᠢ ᠵᠠᠢ ᠳ᠋ᠤ᠌ ᠶᠠᠪᠤᠭᠰᠠᠨ ᠨᠢ ᠬᠡᠳᠦᠨ ᠥᠷᠲᠡᠭᠡ ᠭᠠᠵᠠᠷ ᠢ᠋ ᠲᠤᠭᠤᠯᠤᠭᠰᠠᠨ ᠠ᠋ᠴᠠ ᠢᠯᠡᠭᠦᠦ ᠬᠣᠯᠠ ᠠᠶᠤᠯᠲᠠᠢ ᠰᠠᠨᠠᠭᠳᠠᠨ᠂ ᠬᠠᠮᠢᠭᠠ ᠠ᠋ᠴᠠ ᠯᠠ ᠰᠤᠮᠤ ᠱᠣᠩ ᠬᠢᠨ ᠣᠷᠣᠵᠤ ᠢᠷᠡᠬᠦ ᠪᠣᠯ ᠭᠡᠬᠦ ᠡᠴᠡ ᠶᠠᠰᠤ ᠨᠢ ᠬᠠᠪᠲᠠᠯᠵᠠᠵᠤ᠂ ᠪᠣᠷᠭᠣᠵᠤ ᠪᠠᠢᠭᠠ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠴᠤ᠌ ᠴᠢᠩᠭᠠ ᠶᠤᠮ ᠰᠢᠭ᠋ ᠪᠠᠢᠯᠠ᠃ ᠲᠡᠳᠡ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠭᠣᠣᠯ ᠤ᠋ᠨ ᠡᠷᠭᠢ ᠶ᠋ᠢᠨ ᠪᠤᠷᠭᠠᠰᠤᠨ ᠳᠣᠲᠣᠷᠠ ᠪᠠᠢᠭᠠ ᠮᠣᠷᠢᠨ ᠳ᠋ᠤ᠌ ᠪᠠᠨ ᠬᠦᠷᠴᠦ ᠬᠥᠮᠦᠰ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠳ᠋ᠤ᠌ ᠴᠣᠬᠣᠮ ᠬᠡᠵᠢᠶᠡ ᠢᠷᠡᠭᠰᠡᠨ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ᠂ ᠳᠠᠢᠰᠤᠨ ᠤ᠋ ᠬᠡᠰᠡᠭ ᠴᠡᠷᠢᠭ ᠲᠣᠭᠣᠷᠢᠵᠤ ᠪᠦᠰᠡᠯᠡᠭᠰᠡᠨ ᠪᠠᠢᠯᠠ᠃ ᠡᠨᠳᠡ ᠪᠢᠯᠢᠭᠦᠨ ᠢ᠋ ᠠᠷᠪᠠᠭᠠᠳ ᠴᠡᠷᠢᠭ ᠬᠥᠭᠡᠭᠡᠵᠦ ᠡᠬᠢᠯᠡᠪᠡ᠃ ᠪᠢᠯᠢᠭᠦᠨ ᠨᠠᠷ ᠶᠡᠬᠡ ᠭᠣᠣᠯ ᠢ᠋ ᠬᠥᠯᠯᠡᠨ ᠭᠠᠲᠤᠯᠵᠤ᠂ ᠠᠭᠤᠯᠠ ᠳᠠᠪᠠᠨ ᠣᠷᠢᠶᠠᠵᠤ ᠳᠠᠪᠬᠢᠭᠰᠠᠭᠠᠷ ᠵᠠᠢᠯᠠᠬᠤ ᠳ᠋ᠤ᠌ ᠪᠠᠨ ᠮᠣᠷᠢᠨ ᠤ᠋ ᠬᠦᠴᠦ ᠲᠡᠩᠬᠡᠭᠡ᠂ ᠲᠡᠭᠦᠨ ᠦ᠌ ᠬᠤᠷᠳᠤ ᠶ᠋ᠢ ᠰᠣᠷᠢᠨ ᠲᠤᠷᠰᠢᠵᠤ ᠪᠠᠢᠭᠠ ᠮᠡᠲᠦ ᠭᠡᠬᠦ ᠤᠤ᠂ ᠡᠭᠦᠯᠡᠨ ᠳᠡᠭᠡᠷᠡ ᠭᠠᠷᠴᠤ ᠨᠢᠰᠦᠭᠰᠡᠨ ᠮᠡᠲᠦ ᠳᠡᠭᠦᠯᠢᠨ ᠬᠠᠷᠪᠤᠭᠰᠠᠨ ᠪᠢᠯᠡ᠃ ᠥᠷᠲᠡᠭᠡ ᠬᠢᠷᠢ ᠶ᠋ᠢᠨ ᠭᠠᠵᠠᠷ ᠲᠤ ᠵᠠᠢᠯᠠᠵᠤ ᠭᠠᠷᠤᠭᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠪᠦᠷᠢᠳᠬᠡᠨ ᠦᠵᠡᠪᠡᠯ ᠲᠠᠪᠤᠨ ᠴᠡᠷᠢᠭ ᠳᠠᠢᠰᠤᠨ ᠳ᠋ᠤ᠌ ᠬᠠᠷᠪᠤᠭᠤᠯᠤᠨ ᠤᠨᠠᠭᠰᠠᠨ ᠰᠤᠷᠠᠭ ᠲᠠᠢ ᠠᠯᠠᠭᠠ ᠪᠠᠢᠪᠠ᠃ ᠬᠦᠯᠦᠭ ᠥᠷᠥᠭᠡᠰᠦᠨ ᠭᠤᠶᠠᠨ ᠳ᠋ᠤ᠌ ᠪᠠᠨ ᠬᠥᠩᠭᠡᠪᠲᠦᠷ ᠰᠢᠷᠬᠠ ᠣᠯᠵᠠᠢ᠃ ᠤᠨᠤᠭᠠ ᠪᠠ ᠬᠥᠲᠥᠯᠦᠭᠡ ᠮᠣᠷᠢᠳ ᠤ᠋ᠨ ᠪᠠᠷᠤᠭ ᠬᠠᠭᠠᠰ ᠨᠢ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠲᠡᠳᠡ ᠳᠥᠩᠭᠡᠵᠢ ᠠᠮᠢᠰᠬᠤᠭᠠ ᠪᠠᠨ ᠳᠠᠷᠤᠭᠰᠠᠨ ᠳᠣᠣᠷᠠ ᠪᠠᠨ ᠬᠠᠷᠠᠬᠣᠷᠣᠮ ᠬᠠᠮᠢᠭᠠ ᠪᠣᠢ ᠭᠡᠳ ᠯᠡ ᠳᠥᠷᠥᠭᠡ ᠵᠢᠭᠢᠭᠰᠡᠨ ᠠᠵᠢ᠃
ᠠᠷᠤ ᠳ᠋ᠤ᠌ ᠬᠣᠴᠣᠷᠤᠭᠰᠠᠨ ᠬᠣᠮᠢᠨᠢ ᠶ᠋ᠢ ᠠᠵᠢᠵᠤ ᠰᠡᠷᠡᠳᠡᠭᠰᠡᠨ ᠬᠥᠮᠦᠨ ᠦᠭᠡᠢ᠃ ᠲᠡᠷᠡ ᠪᠡᠷ ᠬᠤᠳᠠᠯᠳᠤᠭᠠ ᠪᠠᠨ ᠬᠢᠵᠦ᠂ ᠡᠯᠵᠢᠭᠡ ᠪᠡᠨ ᠬᠥᠮᠦᠨ ᠬᠥᠯᠥᠰᠥᠯᠡᠨ ᠬᠠᠷᠢᠭᠤᠯᠤᠭᠤᠯᠵᠤ ᠬᠡᠳᠦ ᠬᠣᠨᠣᠬᠤ ᠳ᠋ᠤ᠌ ᠪᠠᠨ《ᠬᠣᠢᠲᠤ ᠵᠦᠭ ᠲᠦ᠍ ᠲᠡᠢᠨ ᠳᠠᠵᠢᠨ ᠭᠠᠷᠬᠤ ᠨᠢ ᠵᠠᠢᠯᠠᠰᠢ ᠦᠭᠡᠢ ᠪᠣᠯᠤᠯᠠ᠃ ᠲᠡᠭᠦᠨ ᠡᠴᠡ ᠨᠢ ᠡᠮᠦᠨᠡ ᠮᠣᠩᠭᠣᠯ ᠭᠣᠪᠢ ᠶ᠋ᠢ ᠲᠤᠭᠤᠯᠬᠤ ᠠᠷᠭᠠ ᠬᠠᠢᠶᠠ》 ᠭᠡᠵᠦ ᠰᠢᠢᠳᠦᠨ᠂ ᠠᠬᠠᠷᠬᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠶᠠᠭᠤᠮᠠ ᠪᠠᠨ ᠡᠮᠬᠢᠯᠡᠭᠦᠯᠵᠦ ᠠᠪᠤᠭᠠᠳ᠂ ᠬᠦᠯᠦᠭ ᠢ᠋ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠢᠷᠭᠤᠭᠠ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠱᠠᠩᠳᠤ ᠠ᠋ᠴᠠ ᠭᠠᠷᠴᠠᠢ᠃ ᠲᠡᠷᠡ ᠪᠡᠷ ᠮᠣᠩᠭᠣᠯ᠂ ᠬᠢᠲᠠᠳ ᠬᠣᠶᠠᠷ ᠬᠥᠮᠦᠨ ᠬᠥᠯᠥᠰᠥᠯᠡᠨ ᠠᠪᠴᠤ ᠡᠯᠵᠢᠭᠡ ᠪᠡᠨ ᠬᠥᠲᠥᠯᠦᠭᠦᠯᠦᠨ᠂ ᠥᠪᠡᠷ ᠢ᠋ᠶ᠋ᠡᠨ ᠠᠴᠢᠶᠠᠨ ᠳᠡᠭᠡᠷᠡ ᠲᠤᠬᠠᠯᠠᠨ ᠰᠠᠭᠤᠭᠠᠳ ᠬᠥᠳᠡᠯᠬᠦ ᠳ᠋ᠦ᠍ ᠨᠢ ᠲᠡᠭᠦᠨ ᠢ᠋ ᠪᠣᠭᠣᠯ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ ᠤᠤ᠂ ᠦᠭᠡᠢ ᠤᠤ? ᠶᠠᠭᠠᠬᠢᠵᠤ᠂ ᠬᠡᠨ ᠲᠡᠢ ᠶᠠᠪᠤᠨᠠ ᠪᠣᠢ? ᠭᠡᠮᠡᠨ ᠠᠵᠢᠭᠰᠠᠨ ᠠᠮᠢᠲᠠᠨ ᠨᠢᠭᠡᠨ ᠢ᠋ᠶ᠋ᠡᠷ ᠴᠦ᠍ ᠦᠭᠡᠢ᠃ ᠬᠣᠮᠢᠨᠢ ᠶ᠋ᠢ ᠱᠠᠩᠳᠤ ᠠ᠋ᠴᠠ ᠥᠷᠯᠥᠭᠡ ᠬᠥᠳᠡᠯᠬᠦ ᠳ᠋ᠦ᠍ ᠨᠢ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠣᠯᠠᠨ ᠭᠡᠷᠡᠯ ᠳ᠋ᠧᠩᠯᠦ ᠠᠰᠠᠭᠠᠯ ᠲᠠᠢ᠂ ᠶᠡᠬᠡ ᠯᠡ ᠬᠥᠯ ᠬᠥᠰᠬᠡᠨ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠨᠳᠡ ᠴᠣᠬᠣᠮ ᠶᠠᠮᠠᠷ ᠬᠥᠭᠲᠡᠢ ᠬᠡᠷᠡᠭ ᠶᠠᠭᠠᠬᠢᠵᠤ ᠬᠤᠢᠷᠠᠭᠨᠠᠭᠤᠯᠵᠤ ᠪᠠᠢᠭᠠ ᠶ᠋ᠢ ᠬᠡᠨ ᠬᠡᠯᠡᠬᠦ ᠪᠢᠯᠡ᠃
ᠬᠤᠪᠢᠯᠠᠢ ᠳᠣᠲᠣᠭᠠᠳᠤ ᠣᠷᠳᠣᠨ ᠠ᠋ᠴᠠ ᠪᠠᠨ ᠰᠥᠨᠢᠳ ᠡᠴᠡ ᠠᠪᠴᠤ ᠢᠷᠡᠭᠦᠯᠦᠭᠰᠡᠨ ᠵᠠᠯᠠᠭᠤ ᠡᠮᠡ ᠶ᠋ᠢ ᠳᠥᠩᠭᠡᠵᠢ ᠭᠠᠷᠭᠠᠨ ᠶᠠᠪᠤᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠶᠡᠬᠡ ᠬᠠᠲᠤᠨ ᠴᠡᠪᠡᠷ ᠪᠣᠭᠳᠣᠭ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠦᠭᠡᠳ ᠶᠣᠰᠣᠷᠬᠠᠤ᠂ ᠨᠠᠮᠪᠠᠯᠢᠭ ᠪᠠᠢᠳᠠᠯ ᠢ᠋ᠶ᠋ᠠᠷ ᠣᠷᠣᠵᠤ ᠢᠷᠡᠪᠡ᠃ ᠬᠤᠪᠢᠯᠠᠢ ᠡᠨᠡ ᠬᠠᠲᠤᠨ ᠢ᠋ᠶ᠋ᠠᠨ ᠬᠦᠨᠳᠦᠯᠡᠨ ᠦᠵᠡᠳᠡᠭ ᠪᠣᠯᠪᠠᠴᠤ ᠳᠡᠷᠭᠡᠳᠡ ᠪᠡᠨ ᠢᠯᠠᠩᠭᠤᠶᠠ ᠠᠯᠪᠠ ᠶᠠᠪᠤᠭᠤᠯᠳᠠᠭ ᠭᠠᠵᠠᠷ ᠢ᠋ᠶ᠋ᠠᠨ ᠶᠠᠭᠠᠬᠠᠨ ᠬᠠᠴᠠᠷ ᠲᠠᠢ᠂ ᠲᠠᠢᠭᠠ ᠶ᠋ᠢᠨ ᠴᠡᠴᠡᠭ ᠦ᠋ᠨ ᠠᠩᠬᠢᠯᠤᠮᠠ ᠦᠨᠦᠷ ᠬᠠᠩᠬᠤᠯᠤᠭᠤᠯᠤᠭᠰᠠᠨ ᠡᠨᠡ ᠬᠠᠲᠤᠨ ᠡᠷᠡ ᠨᠥᠬᠥᠷ ᠲᠦ᠍ ᠪᠡᠨ ᠳᠡᠭᠡᠳᠦ ᠶ᠋ᠢᠨ ᠦᠨᠡᠨᠴᠢ᠂ ᠬᠡᠷᠡᠭ ᠶᠠᠪᠤᠳᠠᠯ ᠳ᠋ᠤ᠌ ᠨᠢ ᠴᠣᠬᠣᠮ ᠬᠦ᠌ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠥᠪᠯᠡᠭᠡᠨ ᠥᠭᠴᠦ ᠴᠢᠳᠠᠳᠠᠭ ᠤᠴᠢᠷ ᠣᠷᠳᠣᠨ ᠤ᠋ ᠬᠠᠪᠢ ᠶ᠋ᠢᠨ ᠬᠢᠨ ᠲᠡᠭᠦᠨ ᠢ᠋《 ᠨᠠᠨᠳᠢᠨ ᠡᠷᠳᠡᠨᠢ》 ᠭᠡᠵᠦ ᠬᠦᠨᠳᠦᠯᠡᠨ ᠡᠷᠭᠦᠮᠵᠢᠯᠡᠳᠡᠭ ᠨᠢ ᠦᠨᠡᠬᠡᠷ ᠵᠣᠬᠢᠴᠠᠭᠰᠠᠨ ᠪᠠᠢᠯᠠ᠃ ᠴᠡᠪᠡᠷ ᠬᠠᠲᠤᠨ ᠡᠷᠡ ᠨᠥᠬᠥᠷ ᠲᠦ᠍ ᠪᠡᠨ ᠶᠣᠰᠣ ᠬᠢᠵᠦ ᠮᠡᠨᠳᠦᠯᠡᠭᠡᠳ᠂ ᠳᠡᠷᠭᠡᠳᠡ ᠨᠢ ᠣᠴᠢᠵᠤ ᠪᠢᠰᠢᠭᠦᠷᠬᠡᠭᠰᠡᠨ᠂ ᠪᠠᠰᠠ ᠴᠤ᠌ ᠵᠢᠭᠠᠬᠠᠨ ᠵᠢᠪᠡᠭᠦᠴᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠷᠠᠵᠤ ᠵᠣᠭᠰᠣᠭᠠᠳ ᠰᠤᠯᠠᠬᠠᠨ ᠳᠠᠭᠤ ᠪᠠᠷ᠄
— ᠲᠠᠨ ᠤ᠋ ᠠᠯᠪᠠ ᠶᠡᠬᠡ ᠤᠤ? ᠪᠠᠰᠠ ᠯᠠ ᠰᠡᠪᠰᠡᠭ ᠡᠮᠡ ᠨᠦ᠍ᠭᠦᠳ ᠴᠤᠭᠯᠠᠭᠤᠯᠤᠭᠰᠠᠭᠠᠷ ᠪᠠᠢᠨᠠ ᠤᠤ? ᠪᠡᠶᠡ ᠪᠡᠨ ᠪᠣᠳᠣᠪᠠᠯ ᠥᠪᠡᠷ ᠲᠦ᠍ ᠲᠠᠨᠢ ᠳᠡᠭᠡᠷᠡ ᠪᠠᠢᠬᠤ ᠳᠠ᠃ ᠡᠷᠡ ᠬᠥᠮᠦᠨ ᠳᠥᠴᠢᠨ ᠨᠠᠰᠤ ᠭᠠᠷᠤᠭᠠᠳ ᠢᠷᠡᠬᠦ ᠪᠡᠷ ᠢ᠋ᠶ᠋ᠡᠨ ᠠᠮᠠᠷᠬᠠᠨ ᠴᠤᠴᠠᠳᠠᠭ ᠪᠣᠯᠳᠠᠭ᠃ ᠲᠡᠭᠡᠭᠡᠳ ᠪᠡᠶᠡ ᠯᠠᠭᠱᠠᠨ ᠨᠢ ᠰᠤᠯᠠᠷᠠᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠲᠠ ᠡᠭᠦᠨ ᠢ᠋ ᠪᠣᠯᠭᠣᠭᠠᠪᠠᠯ ᠦᠷᠡ ᠬᠡᠦᠬᠡᠳ ᠲᠦ᠍ ᠪᠡᠨ ᠲᠤᠰᠠᠲᠠᠢ ᠪᠣᠯᠬᠤ ᠪᠣᠢ᠃ ᠪᠢ ᠬᠤᠪᠢ ᠪᠠᠨ ᠪᠣᠳᠣᠨ ᠲᠠᠨ ᠢ᠋ ᠬᠠᠷᠠᠮᠨᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠰᠢᠦ ᠭᠡᠵᠦ ᠬᠡᠯᠡᠪᠡ᠃
ᠬᠤᠪᠢᠯᠠᠢ ᠬᠠᠲᠤᠨ ᠢ᠋ᠶ᠋ᠠᠨ ᠵᠢᠪᠡᠭᠦᠴᠡᠩᠭᠦᠢ ᠨᠢᠳᠦ ᠪᠡᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠥᠭᠡᠷᠴᠦᠭᠳᠡᠭᠰᠡᠨ ᠬᠠᠯᠠᠭᠤᠨ ᠴᠠᠢ ᠪᠠᠯᠭᠤᠭᠠᠳ᠄
— ᠴᠢ ᠨᠠᠳᠠᠳᠤ ᠡᠨᠡ ᠦᠭᠡ ᠶ᠋ᠢ ᠬᠡᠯᠡᠬᠦ ᠭᠡᠵᠦ ᠣᠷᠣᠵᠤ ᠢᠷᠡᠭᠡ ᠤᠤ? ᠪᠢ ᠰᠣᠨᠣᠰᠤᠯᠠ᠃ ᠣᠳᠣ ᠪᠣᠯᠤᠭᠠ ᠪᠢᠵᠡ᠃ ᠨᠠᠳᠠᠳᠤ ᠬᠡᠷᠡᠭ ᠶᠡᠬᠡ ᠪᠠᠢᠨᠠ ᠭᠡᠵᠦ ᠲᠡᠭᠦᠨ ᠢ᠋ ᠣᠷᠳᠣᠨ ᠠ᠋ᠴᠠ ᠪᠠᠨ ᠬᠥᠭᠡᠭᠡᠬᠦ ᠪᠠᠢᠳᠠᠯ ᠦᠵᠡᠭᠦᠯᠪᠡ᠃ ᠬᠠᠲᠤᠨ ᠭᠤᠸᠠ ᠶᠠᠭᠠᠨ ᠴᠢᠷᠠᠢ ᠳ᠋ᠤ᠌ ᠪᠠᠨ ᠲᠥᠯᠥᠪ ᠪᠠᠢᠳᠠᠯ ᠳᠤᠰᠬᠠᠨ ᠵᠣᠭᠰᠣᠵᠤ᠄
— ᠦᠭᠡᠢ ᠳᠡ ᠬᠠᠭᠠᠨᠲᠠᠨ ᠮᠢᠨᠢ!《ᠶᠠᠨᠲᠠᠭᠠᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠢᠮᠠᠭᠠᠨ ᠤ᠋ ᠲᠣᠯᠣᠭᠠᠢ ᠶᠠᠮᠪᠠᠨ ᠳ᠋ᠤ᠌ ᠲᠠᠯᠪᠢᠳᠠᠭ ᠦᠭᠡᠢ》 ᠭᠡᠳᠡᠭ ᠦᠭᠡ ᠶ᠋ᠢ ᠪᠢ ᠮᠡᠳᠡᠳᠡᠭ᠃ ᠲᠡᠭᠡᠯᠡ ᠴᠦ᠍ ᠭᠡᠰᠡᠨ ᠲᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠬᠣᠷᠭᠣᠳᠠᠨ ᠱᠥᠯᠥ ᠤᠤᠭᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠬᠣᠭᠣᠯᠠ ᠰᠢᠩᠭᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠭᠠᠭᠴᠠ ᠨᠢᠭᠡ ᠦᠭᠡ ᠰᠣᠨᠣᠷ ᠲᠤ ᠬᠦᠷᠭᠡᠮᠡᠷ ᠪᠣᠳᠣᠭᠳᠠᠬᠤ ᠶᠤᠮ ᠭᠡᠯᠡ᠃
— ᠴᠢ ᠵᠥᠨᠥᠬᠦ ᠠᠷᠠᠢ ᠪᠣᠯᠤᠭᠠ ᠦᠭᠡᠢ ᠪᠠᠢᠯᠲᠠᠢ᠃ ᠲᠡᠷᠡ ᠦᠭᠡ ᠪᠡᠨ ᠦᠭᠡᠯᠡᠵᠦ ᠯᠡ ᠪᠠᠢᠬᠤ ᠦᠭᠡᠢ ᠤᠤ᠃ ᠪᠢ ᠦᠨᠡᠬᠡᠷ ᠵᠠᠪ ᠮᠠᠭᠤᠲᠠᠢ ᠪᠠᠢᠨᠠ᠃ ᠬᠣᠭᠣᠯᠠᠢ ᠪᠠᠨ ᠬᠡᠷᠴᠢᠭᠦᠯᠵᠦ ᠴᠦ᠍ ᠮᠠᠭᠠᠳ ᠦᠭᠡᠢ ᠪᠣᠯᠤᠭᠠᠳ ᠪᠠᠢᠭᠠ ᠶ᠋ᠢ ᠴᠢ ᠣᠢᠯᠠᠭᠠᠵᠤ ᠶᠠᠪᠤᠭᠠ ᠪᠢᠵᠡ ᠳᠡ?
— ᠵᠠ᠂ ᠡᠵᠡᠨᠲᠡᠨ ᠮᠢᠨᠢ! ᠪᠠᠢᠳᠠᠯ ᠢ᠋ ᠣᠯᠠᠨ ᠤ᠋ ᠰᠢᠪᠢᠷ ᠢᠪᠢᠷ ᠶᠠᠷᠢᠶᠠᠨ ᠠ᠋ᠴᠠ ᠲᠥᠰᠦᠭᠡᠯᠡᠵᠦ ᠪᠠᠢᠨᠠ᠃ ᠲᠡᠭᠡᠭᠡᠳ ᠯᠡ ᠪᠠᠷᠠᠯᠬᠠᠵᠤ ᠶᠠᠪᠤᠭᠠ ᠰᠢᠦ ᠰᠠᠨᠠᠭᠠᠲᠠᠢ ᠰᠡᠭᠦᠳᠡᠭᠡᠨᠡᠨ ᠣᠷᠣᠵᠤ ᠢᠷᠡᠯᠡ᠃
— ᠦ᠂ ᠴᠢ ᠲᠡᠷᠡ ᠬᠡᠷᠡᠭ ᠲᠦ᠍ ᠬᠤᠷᠤᠭᠤ ᠲᠦᠷᠢᠬᠦ ᠭᠡᠵᠦ ᠰᠠᠨᠠᠭᠠᠷᠬᠠᠭᠠ ᠤᠤ?
— ᠲᠡᠢᠮᠦ ᠠ᠋᠂ ᠡᠵᠡᠨᠲᠡᠨ ᠮᠢᠨᠢ! ᠡᠮᠡ ᠬᠥᠮᠦᠨ ᠦᠰᠦ ᠤᠷᠲᠤ ᠲᠠᠢ᠂ ᠤᠬᠠᠭᠠᠨ ᠪᠣᠭᠣᠨᠢ ᠲᠠᠢ ᠭᠡᠳᠡᠭ ᠦᠭᠡ ᠶ᠋ᠢ ᠪᠢ ᠪᠠᠰᠠ ᠰᠣᠨᠣᠰᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠭᠡᠯᠡ ᠴᠦ᠍ ᠭᠡᠰᠡᠨ ᠪᠢ ᠪᠡᠶᠡ ᠪᠡᠨ ᠭᠣᠯᠣᠯ ᠦᠭᠡᠢ ᠪᠡᠷ ᠨᠢᠭᠡ ᠵᠦᠢᠯ ᠠᠢᠯᠠᠳᠬᠠᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠤᠬᠠᠭᠠᠨ ᠲᠠᠢ᠃
— ᠦᠭᠡᠯᠡᠭᠡᠳ ᠪᠠᠢᠬᠤ ᠪᠠᠷ ᠲᠡᠷᠡ ᠦᠭᠡ ᠪᠠᠨ ᠯᠠ ᠬᠡᠯᠡᠭᠡᠴᠢ!
— ᠡᠵᠡᠨᠲᠡᠨ ᠮᠢᠨᠢ! ᠪᠢ ᠲᠠᠨ ᠢ᠋ ᠥᠪᠡᠷ ᠦ᠋ᠨ ᠳᠡᠭᠦᠦ ᠲᠡᠢ ᠬᠢᠮᠤᠷᠠᠯᠳᠤᠨ ᠲᠡᠮᠡᠴᠡᠯᠳᠦᠵᠦ᠂ ᠪᠦᠷ ᠲᠡᠢᠨ ᠳᠣᠯᠣᠭᠠᠨ ᠬᠢᠬᠦ ᠳ᠋ᠦ᠍ ᠬᠦᠷᠴᠦ ᠪᠠᠢᠭᠠ ᠶᠤᠮ ᠪᠢᠰᠢ ᠪᠢᠵᠡ ᠠ᠋ ᠭᠡᠵᠦ ᠵᠣᠪᠠᠬᠤ ᠪᠣᠯᠤᠯᠠ᠃ ᠲᠠ ᠬᠣᠶᠠᠷ ᠨᠢᠭᠡᠨ ᠡᠬᠡ ᠶ᠋ᠢᠨ ᠠᠯᠲᠠᠨ ᠰᠠᠪᠠ ᠠ᠋ᠴᠠ ᠴᠤᠪᠤᠷᠠᠨ ᠭᠠᠷᠴᠤ ᠢᠷᠡᠭᠡᠳ᠂ ᠣᠳᠣ ᠡᠨᠡ ᠳᠠᠢᠲᠠᠢ ᠪᠣᠯᠴᠢᠬᠠᠭᠠᠳ ᠪᠡᠶᠡ ᠪᠡᠶᠡ ᠪᠡᠨ ᠬᠥᠨᠥᠭᠡᠬᠦ ᠭᠡᠵᠦ ᠢᠯᠳᠦ ᠳᠠᠯᠠᠢᠨ ᠳᠠᠭᠠᠷᠢᠵᠤ ᠶᠠᠪᠤᠬᠤ ᠪᠣᠯᠵᠤ ᠪᠠᠢᠨᠠ ᠤᠤ? ᠲᠠ ᠰᠠᠷᠠᠭᠤᠯ ᠤᠬᠠᠭᠠᠨᠲᠠᠢ ᠡᠷᠳᠡᠮ ᠲᠡᠭᠦᠰ ᠪᠢᠰᠢ ᠤᠤ? ᠢᠩᠭᠢᠬᠦ ᠲᠠᠨᠢ ᠤᠯᠤᠰ ᠭᠦᠷᠦᠨ ᠢ᠋ᠶ᠋ᠡᠨ ᠰᠦᠢᠳᠬᠡᠨ᠂ ᠲᠦᠮᠡᠨ ᠦ᠌ ᠰᠢᠪᠰᠢᠭ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠪᠢᠵᠡ ᠠ᠋? ᠡᠭᠦᠨ ᠳ᠋ᠦ᠍ ᠲᠠᠨᠢ ᠬᠢᠲᠠᠳ ᠤ᠋ᠳ ᠠ᠋ᠴᠠ ᠥᠭᠡᠷᠡ ᠪᠠᠶᠠᠷᠯᠠᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠠᠷᠢᠬᠪᠦ᠋ᠬᠡ ᠲᠠ ᠬᠣᠶᠠᠷ ᠨᠠᠢᠷᠲᠠᠢ ᠪᠠᠷ ᠵᠡᠷᠭᠡᠴᠡᠨ ᠰᠠᠭᠤᠭᠠᠳ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠡᠯᠡᠯᠴᠡᠵᠦ ᠪᠣᠯᠳᠠᠭ ᠦᠭᠡᠢ ᠶᠦᠮ ᠤᠤ?
— ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠠᠷᠢᠬᠪᠦ᠋ᠬᠡ ᠨᠠᠮᠠᠶ᠋ᠢ ᠠᠬᠠ ᠶ᠋ᠢ ᠪᠡᠨ ᠭᠡᠵᠦ ᠦᠵᠡᠬᠦ ᠪᠡᠨ ᠪᠠᠢᠭᠰᠠᠨ᠃
— ᠳᠡᠭᠦᠦ ᠲᠠᠨᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠲᠠᠨ ᠢ᠋ ᠲᠡᠷᠡ ᠬᠥᠮᠦᠨ ᠶᠠᠭᠠᠬᠢᠵᠤ ᠣᠷᠬᠢᠭᠠ ᠪᠣᠢ?
— ᠪᠢ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠠᠬᠠ᠃ ᠲᠡᠭᠡᠬᠦ ᠳ᠋ᠦ᠍ ᠨᠠᠳᠠ ᠠ᠋ᠴᠠ ᠠᠰᠠᠭᠤᠯ ᠦᠭᠡᠢ ᠪᠡᠷ ᠲᠡᠷᠡ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠡᠵᠡᠯᠡᠨ ᠠᠪᠤᠯᠠ ᠭᠡᠰᠡᠨ᠃ ᠲᠡᠭᠡᠵᠦ ᠬᠥᠮᠦᠨ ᠢ᠋ ᠳᠣᠣᠷᠠ ᠳ᠋ᠤ᠌ ᠦᠵᠡᠵᠦ ᠪᠣᠯᠬᠤ ᠤᠤ? ᠴᠢ ᠪᠣᠳᠣ! ᠲᠡᠷᠡ ᠪᠢᠰᠢ᠂ ᠪᠢ ᠬᠠᠭᠠᠨ᠃
— ᠲᠡᠭᠡᠵᠡᠢ᠃ ᠳᠡᠭᠦᠦ ᠲᠠᠨᠢ ᠶᠡᠬᠡ ᠬᠠᠭᠠᠨ ᠪᠣᠯᠵᠠᠢ᠃ ᠲᠠ ᠪᠠᠰᠠ ᠥᠪᠡᠷ ᠢ᠋ ᠪᠡᠨ ᠬᠠᠭᠠᠨ ᠭᠡᠵᠦ ᠵᠠᠷᠯᠠᠭᠠ ᠪᠢᠵᠡ ᠳᠡ? ᠲᠠ ᠶᠡᠬᠡ ᠬᠠᠭᠠᠨ ᠪᠣᠯᠵᠤ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠶ᠋ᠢ ᠵᠠᠯᠭᠠᠬᠤ ᠬᠦᠰᠡᠯ ᠲᠡᠢ ᠪᠠᠢᠬᠤ ᠳ᠋ᠤ᠌ ᠳᠡᠭᠦᠦ ᠲᠠᠨᠢ ᠪᠠᠰᠠ ᠲᠡᠢᠮᠦ ᠵᠦᠢᠯ ᠢ᠋ ᠪᠣᠳᠣᠵᠤ ᠪᠣᠯᠬᠤ ᠪᠢᠰᠢ ᠤᠤ? ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠨ ᠠᠬᠠ ᠳᠡᠭᠦᠦ ᠶ᠋ᠢᠨ ᠶᠣᠰᠣ ᠪᠠᠷ ᠬᠡᠯᠡᠯᠴᠡᠨ ᠰᠢᠢᠳᠦᠶᠡ ᠭᠡᠵᠦ ᠲᠠ ᠳᠡᠭᠦᠦ ᠳ᠋ᠦ᠍ ᠪᠡᠨ ᠡᠪᠲᠡᠢᠬᠡᠨ ᠬᠡᠯᠡᠵᠦ ᠪᠣᠯᠬᠤ ᠪᠠᠢᠭᠰᠠᠨ ᠪᠢᠰᠢ ᠤᠤ?
— ᠴᠡᠪᠡᠷ ᠮᠢᠨᠢ! ᠴᠢ ᠳᠡᠮᠡᠢ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠨᠠ᠃ ᠠᠷᠢᠬᠪᠥᠶ᠋ᠬᠡ ᠴᠢᠨᠦ ᠰᠠᠨᠠᠵᠤ ᠪᠠᠢᠭᠠ ᠰᠢᠭ᠋ ᠬᠥᠮᠦᠨ ᠦ᠌ ᠦᠭᠡ ᠰᠣᠨᠣᠰᠬᠤ ᠡᠷᠡ ᠪᠢᠰᠢ ᠪᠣᠯᠵᠠᠢ᠃ ᠪᠢ ᠤᠯᠤᠰ ᠭᠦᠷᠦᠨ ᠦ᠌ ᠪᠡᠨ ᠲᠤᠰᠠ ᠶ᠋ᠢ ᠪᠣᠳᠣᠨ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠵᠠᠯᠭᠠᠬᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠵᠠᠷᠯᠠᠭᠰᠠᠨ ᠬᠡᠷᠡᠭ᠃ ᠴᠢ ᠪᠣᠳᠣᠭᠠᠳ ᠦᠵᠡ! ᠠᠷᠢᠬᠪᠥᠶ᠋ᠬᠡ ᠶᠡᠬᠡ ᠬᠠᠭᠠᠨ ᠪᠠᠢᠬᠤ ᠶᠤᠮ ᠪᠣᠯ ᠪᠢᠳᠡ ᠬᠢᠲᠠᠳ ᠢ᠋ ᠠᠯᠳᠠᠨᠠ᠃ ᠡᠷᠲᠡᠨ ᠦ᠌ ᠥᠰᠢᠶᠡᠲᠦ ᠬᠢᠲᠠᠳ ᠢ᠋ ᠥᠰᠥᠭᠡᠢ ᠳᠣᠣᠷᠠ ᠪᠠᠨ ᠴᠢᠩᠭᠠ ᠭᠢᠰᠬᠢᠨ ᠳᠠᠷᠤᠵᠤ ᠪᠠᠢᠬᠤ ᠦᠭᠡᠢ ᠪᠣᠯ ᠮᠣᠩᠭᠣᠯ ᠭᠦᠷᠦᠨ ᠣᠷᠣᠰᠢᠨ ᠲᠣᠭᠲᠠᠨᠢᠵᠤ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠬᠢᠲᠠᠳ ᠢ᠋ ᠬᠠᠲᠠᠭᠤ᠂ ᠵᠥᠭᠡᠯᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠳᠠᠷᠤᠵᠤ ᠪᠠᠢᠬᠤ ᠤᠬᠠᠭᠠᠨ ᠢ᠋ ᠪᠢ ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠨᠢ ᠵᠢᠭᠠᠯᠭᠠᠵᠤ ᠮᠡᠳᠡᠭᠰᠡᠨ ᠪᠣᠯᠬᠣᠷ ᠣᠷᠣ ᠰᠠᠭᠤᠬᠤ ᠨᠢ ᠤᠯᠤᠰ ᠭᠦᠷᠦᠨ ᠦ᠌ ᠲᠤᠰᠠ ᠳ᠋ᠤ᠌ ᠨᠢ ᠢᠯᠡᠭᠦᠦ ᠠᠰᠢᠭᠲᠠᠢ ᠪᠠᠢᠭᠠ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠴᠢ ᠡᠭᠦᠨ ᠢ᠋ ᠪᠣᠳᠣᠭᠠᠴᠢ!
— ᠪᠢ ᠮᠤᠩᠬᠠᠭ ᠴᠤ᠌ ᠭᠡᠰᠡᠨ ᠡᠨᠡ ᠪᠦᠭᠦᠳᠡ ᠶ᠋ᠢ ᠪᠣᠳᠣᠵᠤ ᠦᠵᠡᠭᠰᠡᠨ᠃ ᠮᠥᠩᠬᠡ ᠠᠬᠠ ᠲᠠᠨᠢ ᠲᠠ ᠨᠠᠷ ᠢ᠋ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠵᠤ ᠪᠠᠢᠭᠠᠳ ᠨᠢᠭᠡ ᠤᠳᠠᠭᠠ ᠴᠠᠢ ᠤᠤᠭᠤᠩᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠪᠡᠨ《ᠪᠢᠳᠡ ᠪᠣᠯᠵᠤ ᠥᠭᠪᠡᠯ ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠲᠡᠢ ᠶᠠᠰᠤ ᠪᠤᠯᠢᠶᠠᠯᠳᠤᠭᠰᠠᠨ ᠨᠣᠬᠠᠢ ᠠᠳᠠᠯᠢ ᠶᠠᠷᠵᠠᠭᠠᠨᠠᠵᠤ ᠶᠠᠪᠤᠬᠤ ᠦᠭᠡᠢ ᠶᠦᠮ ᠰᠠᠨ᠃ ᠲᠡᠭᠡᠪᠡᠯ ᠲᠦᠮᠡᠨ ᠦ᠌ ᠰᠢᠪᠰᠢᠭ᠂ ᠲᠥᠷᠥ ᠶ᠋ᠢᠨ ᠭᠠᠢ ᠪᠣᠯᠤᠨᠠ》 ᠭᠡᠵᠦ ᠪᠠᠢᠬᠤ ᠶ᠋ᠢ ᠪᠢ ᠰᠣᠨᠣᠰᠤᠭᠰᠠᠨ ᠪᠢᠯᠡ᠃ ᠶᠡᠬᠡ ᠬᠠᠭᠠᠨ ᠲᠡᠷᠡ ᠦᠭᠡ ᠪᠡᠨ ᠥᠪᠡᠷ ᠦ᠋ᠨ ᠳᠡᠭᠦᠦ ᠲᠠ ᠨᠠᠷ ᠲᠤ᠌ ᠪᠠᠨ ᠵᠣᠷᠢᠭᠤᠯᠤᠨ ᠬᠡᠯᠡᠭᠰᠡᠨ ᠶᠦᠮ ᠪᠢᠰᠢ ᠪᠢᠵᠡ ᠭᠡᠵᠦ ᠪᠣᠳᠣᠭᠳᠠᠬᠤ ᠪᠣᠯᠤᠯᠠ᠃ ᠪᠢ ᠪᠡᠶᠡ ᠪᠡᠨ ᠭᠡᠯ ᠦᠭᠡᠢ ᠪᠡᠷ ᠡᠭᠦᠨ ᠢ᠋ ᠲᠠᠨ ᠤ᠋ ᠰᠣᠨᠣᠷ ᠲᠤ ᠪᠣᠯᠭᠣᠭᠠᠯᠭᠠᠶᠠ ᠭᠡᠵᠦ ᠪᠣᠳᠣᠨ᠂ ᠣᠯᠠᠨ ᠬᠣᠨᠣᠭ ᠨᠣᠢᠷ ᠦᠭᠡᠢ ᠬᠥᠷᠪᠡᠵᠦ ᠪᠠᠢᠨᠠ᠃ ᠲᠠᠨ ᠤ᠋ ᠪᠤᠰᠤᠳ ᠬᠠᠲᠤᠳ ᠴᠤ᠌ ᠮᠢᠨᠦ ᠨᠢᠭᠡᠨ ᠠᠳᠠᠯᠢ ᠰᠡᠳᠬᠢᠯ ᠲᠡᠢ ᠪᠠᠢᠭᠠ ᠰᠢᠦ᠃ ᠲᠠ ᠪᠣᠯᠭᠣᠭᠠᠵᠤ ᠦᠵᠡ! ᠭᠡᠵᠦ ᠴᠡᠪᠡᠷ ᠬᠡᠯᠡᠭᠡᠳ ᠪᠥᠬᠥᠢᠨ ᠶᠣᠰᠣ ᠬᠢᠪᠡ᠃ ᠬᠤᠪᠢᠯᠠᠢ ᠳᠠᠭᠤ ᠪᠠᠨ ᠥᠨᠳᠥᠷᠯᠡᠨ᠂ ᠴᠡᠪᠡᠷ ᠢ᠋ ᠰᠢᠷᠦᠭᠦᠨ ᠨᠢᠳᠦ ᠪᠡᠷ ᠬᠠᠷᠠᠵᠤ᠄
— ᠴᠢ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠬᠠᠭᠠᠨ ᠰᠢᠷᠡᠭᠡᠨ ᠡᠴᠡ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠪᠠᠭᠤᠵᠤ ᠦᠵᠡ᠃ ᠤᠯᠤᠰ ᠭᠦᠷᠦᠨ ᠦ᠌ ᠪᠡᠨ ᠬᠡᠷᠡᠭ ᠢ᠋ ᠣᠷᠭᠢ! ᠭᠡᠵᠦ ᠱᠠᠭᠠᠷᠳᠠᠨ ᠪᠠᠢᠭᠠ ᠬᠡᠷᠡᠭ ᠤᠤ? ᠪᠢ ᠴᠢᠨᠦ ᠡᠨᠡ ᠦᠭᠡ ᠶ᠋ᠢ ᠢᠩᠭᠢᠵᠦ ᠣᠢᠯᠠᠭᠠᠬᠤ ᠤᠤ? ᠭᠡᠮᠡᠨ ᠰᠢᠵᠠᠷᠠᠭᠤᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠰᠠᠭᠤᠯᠠ᠃
— ᠤᠬᠠᠭᠠᠨᠲᠤ ᠡᠵᠡᠨ ᠮᠢᠨᠢ ᠪᠣᠯᠭᠣᠭᠠ! ᠶᠠᠮᠠᠷ ᠴᠣ ᠪᠣᠯᠤᠭᠰᠠᠨ ᠠᠬᠠ ᠳᠡᠭᠦᠦ ᠲᠠ ᠨᠠᠷ ᠢ᠋ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠪᠢᠲᠡᠭᠡᠢ ᠢᠯᠳᠦ ᠳᠠᠯᠠᠢᠭᠠᠴᠢ ᠭᠡᠵᠦ ᠭᠤᠶᠤᠵᠤ ᠪᠠᠢᠨᠠ᠃ ᠲᠠ ᠬᠠᠭᠠᠨ ᠪᠠᠢᠵᠤ᠂ ᠪᠢ ᠬᠠᠲᠤᠨ ᠬᠠᠭᠠᠨ ᠪᠠᠢᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠪᠤᠶᠠᠨᠲᠠᠢ ᠰᠠᠢᠬᠠᠨ ᠬᠡᠷᠡᠭ ᠪᠢᠵᠡ ᠠ᠋᠃ ᠡᠭᠦᠨ ᠳ᠋ᠦ᠍ ᠳᠣᠣᠷᠠᠲᠤ ᠡᠮᠡ ᠪᠢ ᠰᠦᠰᠦᠭᠯᠡᠵᠦ ᠪᠠᠢᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠲᠥᠷᠥᠭᠰᠡᠨ ᠠᠬᠠ ᠳᠡᠭᠦᠦ ᠨᠠᠷ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠬᠥᠨᠥᠭᠡᠬᠦ ᠭᠡᠵᠦ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠳᠡᠭᠳᠡᠭᠡᠵᠦ ᠪᠠᠢᠬᠤ ᠠ᠋ᠴᠠ ᠲᠡᠷᠡ ᠶᠡᠬᠡ ᠡᠷᠭᠦᠮᠵᠢᠯᠡᠯ ᠢᠯᠡᠭᠦᠦ ᠰᠠᠢᠬᠠᠨ ᠭᠡᠵᠢ ᠤᠤ? ᠪᠢ ᠳᠡᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠨᠠ᠃ ᠡᠭᠦᠨ ᠢ᠋ ᠠᠢᠯᠠᠳᠬᠠᠯᠠ ᠭᠡᠳ ᠲᠠ ᠨᠠᠮᠠᠶ᠋ᠢ ᠬᠡᠷᠴᠢᠨ ᠲᠠᠰᠤᠴᠢᠵᠤ ᠬᠠᠶᠠᠪᠠᠯ ᠬᠠᠶᠠᠭᠠᠷᠠᠢ! ᠪᠢ ᠭᠣᠮᠣᠳᠠᠬᠤ ᠦᠭᠡᠢ᠃ ᠪᠢ ᠡᠵᠡᠨᠲᠡᠨ ᠲᠠᠨ ᠢ᠋ ᠪᠡᠨ ᠨᠡᠷᠡ ᠠᠯᠳᠠᠷ᠂ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠲᠠᠨᠢ ᠰᠦᠷ ᠵᠢᠪᠬᠤᠯᠠᠩ ᠤ᠋ᠨ ᠲᠠᠨᠢ ᠲᠤᠰᠠᠳᠠ ᠵᠣᠷᠢᠭᠤᠯᠤᠨ ᠲᠩᠷᠢ ᠶ᠋ᠢᠨ ᠰᠦᠯᠳᠡ ᠳ᠋ᠦ᠍ ᠵᠠᠯᠪᠠᠷᠢᠨ ᠡᠨᠡ ᠬᠡᠳᠦᠨ ᠦᠭᠡ ᠶ᠋ᠢ ᠠᠢᠯᠠᠳᠬᠠᠵᠤ ᠪᠠᠢᠭᠠ ᠪᠢᠯᠡ᠃ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ! ᠭᠡᠳ ᠴᠡᠪᠡᠷ ᠬᠠᠲᠤᠨ ᠤᠬᠢᠯᠠᠵᠤ ᠬᠠᠢᠯᠠᠨ ᠰᠥᠭᠥᠳᠪᠡ᠃ ᠬᠤᠪᠢᠯᠠᠢ ᠲᠣᠭᠰᠢᠭᠤᠷ ᠮᠣᠳᠣ ᠪᠠᠨ ᠴᠣᠬᠢᠨ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠭᠠᠳ᠂《ᠭᠦᠢᠳᠠᠩ》 ᠠᠪᠠᠭᠠᠢ ᠶ᠋ᠢ ᠢᠷᠡᠭᠦᠯ ᠭᠡᠪᠡ᠃ ᠡᠭᠦᠳᠡᠨ ᠳ᠋ᠦ᠍ ᠨᠢ《ᠲᠠᠭᠠᠯᠠᠯ ᠠᠰᠠᠭᠤᠬᠤ ᠪᠠᠷ》 ᠬᠦᠯᠢᠶᠡᠵᠦ ᠪᠠᠢᠭᠠ ᠯᠣᠯᠣᠢ ᠠᠪᠠᠭᠠᠢ ᠲᠡᠷᠡ ᠳᠣᠣᠷᠠ ᠨᠢ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠤ᠌ ᠭᠦᠶᠦᠨ ᠣᠷᠣᠵᠤ ᠢᠷᠡᠭᠡᠳ ᠪᠥᠬᠥᠢᠨ ᠶᠣᠰᠣ ᠬᠢᠯᠡ᠃
ᠬᠤᠪᠢᠯᠠᠢ ᠰᠢᠷᠦᠭᠦᠬᠡᠨ ᠳᠠᠭᠤ ᠪᠠᠷ ᠲᠡᠷᠡ ᠡᠮᠡ ᠳ᠋ᠦ᠍ ᠬᠠᠨᠳᠤᠵᠤ᠂ ᠬᠢᠯᠢᠩᠲᠡᠢ ᠪᠡᠷ᠄
— ᠴᠢ ᠡᠨᠡ ᠴᠡᠪᠡᠷ ᠢ᠋ ᠥᠪᠡᠷ ᠦ᠋ᠨ ᠬᠢᠨᠢ ᠪᠠᠢᠷᠢᠨ ᠳ᠋ᠤ᠌ ᠬᠦᠷᠭᠡᠭᠡᠳ᠂ ᠰᠡᠳᠬᠢᠯ ᠢ᠋ ᠨᠢ ᠵᠠᠰᠠᠭᠠᠳ ᠣᠷᠭᠢᠭᠠᠴᠢ! ᠭᠡᠪᠡ᠃ ᠴᠡᠪᠡᠷ ᠤᠬᠢᠯᠠᠩᠬᠠᠢ ᠳᠠᠭᠤ ᠪᠠᠷ ᠯᠣᠯᠣᠢ ᠳ᠋ᠤ᠌ ᠬᠠᠨᠳᠤᠨ᠄
— ᠲᠥᠷᠥ ᠶ᠋ᠢᠨ ᠬᠤᠳᠬᠤᠰᠢ ᠰᠡᠲᠡᠷ ᠡᠮᠡ ᠴᠢᠮᠠ ᠪᠠᠷ ᠪᠢ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠭᠤᠯᠬᠤ ᠦᠭᠡᠢ᠂ ᠪᠢ ᠰᠣᠬᠣᠷ ᠬᠥᠮᠦᠨ ᠪᠢᠰᠢ ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠭᠡᠳ ᠬᠤᠪᠢᠯᠠᠢ ᠶ᠋ᠢᠨ ᠲᠠᠰᠤᠯᠭᠠᠨ ᠠ᠋ᠴᠠ ᠭᠠᠷᠴᠤ ᠣᠳᠤᠯᠠ᠃
ᠡᠵᠡᠨ ᠳᠡᠭᠡᠳᠦᠰ《ᠲᠥᠷᠥ ᠶ᠋ᠢᠨ》 ᠶᠡᠬᠡ ᠪᠥᠬᠡ ᠶ᠋ᠢ ᠣᠷᠳᠣᠨ ᠳ᠋ᠤ᠌ ᠪᠠᠨ ᠵᠠᠯᠠᠭᠰᠠᠨ ᠪᠠᠢᠯᠠ᠃ ᠳᠡᠭᠡᠳᠦ ᠶᠡᠬᠡ ᠬᠠᠭᠠᠨᠲᠠᠨ ᠪᠣᠯᠤᠨ ᠵᠠᠩᠵᠤᠨ ᠨᠤᠭᠤᠳ᠂ ᠪᠤᠰᠤᠳ ᠴᠥᠭᠡᠪᠲᠦᠷ ᠨᠣᠶᠠᠨ ᠶᠡᠬᠡ ᠲᠠᠩᠬᠢᠮ ᠳ᠋ᠤ᠌ ᠴᠤᠭᠯᠠᠷᠠᠵᠤ᠂ ᠲᠩᠷᠢ ᠶ᠋ᠢᠨ ᠶᠡᠬᠡ ᠪᠥᠬᠡ ᠶ᠋ᠢ ᠣᠷᠣᠭᠤᠯᠵᠤ ᠢᠷᠡᠭᠡᠳ᠄
— ᠬᠣᠢᠲᠤ ᠵᠦᠭ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠡᠳᠦᠷ ᠢ᠋ ᠪᠣᠯᠭᠣᠭᠠᠨ ᠠᠢᠯᠠᠳᠴᠤ᠂ ᠪᠢᠳᠡᠨ ᠦ᠌ ᠦᠢᠯᠡ ᠶ᠋ᠢ ᠪᠠᠳᠠᠷᠠᠭᠠᠨ᠂ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠦᠢᠯᠡ ᠶ᠋ᠢ ᠪᠠᠷᠠᠭᠠᠨᠳᠠᠭᠤᠯᠬᠤ ᠤᠴᠢᠷ ᠢ᠋ ᠰᠠᠬᠢᠭᠤᠰᠤ ᠳ᠋ᠤ᠌ ᠪᠠᠨ ᠳᠠᠭᠠᠳᠬᠠᠨ ᠪᠠᠭᠤᠵᠤ ᠬᠠᠢᠷᠠᠯᠠ! ᠭᠡᠵᠦ ᠬᠤᠪᠢᠯᠠᠢ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠠᠳᠠᠨ ᠵᠠᠩᠵᠤᠨ ᠰᠥᠬᠥᠷᠡᠨ ᠮᠥᠷᠭᠥᠵᠦ ᠪᠥᠬᠡ ᠳ᠋ᠦ᠍ ᠠᠢᠯᠠᠳᠬᠠᠯᠠ᠃ ᠥᠳᠥ ᠰᠦᠳᠦᠲᠦ ᠮᠠᠯᠠᠭᠠᠢ᠂ ᠡᠯᠳᠡᠪ ᠨᠠᠪᠰᠠᠩ ᠤᠨᠵᠢᠭᠤᠷᠭᠠᠲᠤ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ᠂ ᠬᠦᠷᠡᠯᠭᠡᠷ ᠪᠠᠷᠠᠭᠠᠨ ᠴᠢᠷᠠᠢᠲᠠᠢ᠂ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠪᠥᠬᠡ᠂ ᠱᠠᠯᠠᠨ ᠳᠡᠭᠡᠷᠡ ᠭᠠᠯ ᠥᠷᠳᠡᠭᠦᠯᠦᠨ᠂ ᠳᠡᠭᠡᠷᠡ ᠡᠴᠡ ᠨᠢ ᠲᠣᠰᠣ ᠲᠤᠰᠤᠭᠠᠵᠤ᠂ ᠤᠲᠤᠭᠠ ᠪᠠᠰᠬᠤᠷᠤᠳᠤᠯᠤᠭᠠᠳ᠂ ᠲᠠᠯᠠ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ᠂ ᠤᠶᠠᠩᠭᠠᠯᠠᠭᠰᠠᠨ ᠳᠠᠭᠤ ᠪᠠᠷ ᠤᠩᠰᠢᠯᠭᠠ ᠤᠩᠰᠢᠨ᠂ ᠰᠠᠬᠢᠭᠤᠰᠤ ᠪᠠᠨ ᠤᠷᠢᠨ ᠵᠠᠯᠠᠵᠤ ᠡᠬᠢᠯᠡᠯᠡ᠃ ᠪᠥᠬᠡ ᠳᠣᠣᠷᠠ ᠪᠠᠨ ᠬᠡᠳᠦ ᠠᠯᠬᠤᠨ ᠪᠠᠢᠵᠤ ᠬᠣᠭᠣᠯᠠᠢ ᠪᠠᠨ ᠴᠢᠩᠭᠠᠷᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠬᠥᠳᠡᠯᠭᠡᠭᠡᠨ ᠨᠢ ᠤᠯᠠᠮ ᠰᠢᠷᠦᠭᠦᠰᠦᠨ᠂ ᠬᠠᠷᠠᠢᠵᠤ ᠴᠣᠪᠬᠣᠴᠢᠭᠠᠳ᠄
— ᠡᠶᠡᠢ᠃
ᠭᠠᠯ ᠮᠣᠭᠠᠢ ᠲᠠᠰᠢᠭᠤᠷ ᠲᠠᠢ
ᠭᠠᠯᠵᠠᠭᠤ ᠴᠢᠨᠣᠠ ᠶ᠋ᠢᠨ ᠬᠦᠯᠦᠭ ᠲᠡᠢ
ᠬᠥᠮᠦᠨ ᠦ᠌ ᠮᠢᠬᠠᠨ ᠬᠦᠨᠡᠰᠦ ᠲᠡᠢ
ᠬᠦᠷᠡᠯ ᠴᠢᠯᠠᠭᠤᠨ ᠵᠢᠷᠦᠬᠡ ᠲᠡᠢ᠁ ᠭᠡᠵᠦ ᠰᠠᠬᠢᠭᠤᠰᠤ ᠪᠠᠨ ᠳᠠᠭᠤᠳᠠᠨ ᠳᠠᠭᠤᠯᠠᠨ ᠤᠩᠰᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ
— ᠁ ᠁ ᠁ ᠁
ᠬᠠᠩᠭᠠᠢ ᠬᠠᠭᠠᠨ ᠤ᠋ ᠳᠣᠪᠣᠨ ᠪᠦᠬᠦᠢ ᠡᠴᠡ
ᠬᠠᠲᠤᠨ ᠳᠠᠯᠠᠢ ᠶ᠋ᠢᠨ ᠱᠠᠯᠴᠢᠭ ᠪᠦᠬᠦᠢ ᠡᠴᠡ
ᠬᠠᠯᠲᠠᠷ ᠳᠠᠬᠢ ᠶ᠋ᠢᠨ ᠢᠰᠢᠭᠡᠨ ᠪᠦᠬᠦᠢ ᠡᠴᠡ
ᠬᠠᠷᠴᠠᠭᠠᠢ ᠰᠢᠪᠠᠭᠤᠨ ᠤ᠋ ᠳᠡᠭᠳᠡᠮᠡᠯ ᠪᠦᠬᠦᠢ ᠡᠴᠡ
ᠬᠠᠢᠯᠠᠰᠤ ᠮᠣᠳᠣᠨ ᠤ᠋ ᠨᠠᠢᠯᠵᠠᠭᠤᠷ ᠪᠦᠬᠦᠢ ᠡᠴᠡ
ᠡᠰᠡᠨ ᠵᠠᠶᠠᠭᠠᠭᠰᠠᠨ ᠡᠬᠡ ᠳ᠋ᠦ᠍ ᠪᠡᠨ
ᠥᠭᠡᠬᠦᠨ ᠲᠣᠰᠣ ᠶ᠋ᠢ ᠳᠤᠰᠤᠭᠠᠨ ᠪᠠᠢᠵᠤ
ᠥᠷᠥᠰᠢᠶᠡᠯᠲᠦ ᠠᠪᠤᠷᠠᠯ ᠢ᠋ ᠭᠤᠶᠤᠬᠤ ᠨᠢ ᠭᠡᠳ ᠬᠤᠪᠢᠯᠠᠢ ᠡᠵᠡᠨ ᠳ᠋ᠦ᠍ ᠴᠣᠭ ᠬᠡᠢ ᠮᠣᠷᠢ᠂ ᠡᠷᠡ ᠵᠣᠷᠢᠭ᠂ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠡᠬᠡ ᠬᠦᠴᠦᠨ ᠬᠠᠢᠷᠠᠯᠠᠵᠤ ᠥᠷᠥᠰᠢᠶᠡ! ᠢᠯᠳᠦ ᠳᠠᠯᠠᠢᠨ ᠳᠣᠪᠲᠣᠯᠤᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠡᠷᠡᠮᠡᠬᠡᠢ ᠵᠣᠷᠢᠭᠲᠤ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠰᠦᠯᠳᠡ ᠬᠡᠢ ᠮᠣᠷᠢ ᠶ᠋ᠢ ᠬᠥᠲᠥᠯᠦᠭᠦᠯᠵᠦ᠂ ᠬᠦᠴᠦ ᠲᠡᠩᠬᠡᠭᠡ ᠶ᠋ᠢ ᠨᠢ ᠪᠠᠭᠤᠷᠠᠭᠤᠯᠤᠨ ᠤᠨᠠᠭᠠᠵᠤ ᠥᠷᠥᠰᠢᠶᠡ! ᠭᠡᠮᠡᠨ ᠶᠡᠷᠡ ᠶᠢᠰᠦᠨ ᠲᠡᠭᠷᠢ ᠳ᠋ᠦ᠍ ᠪᠡᠨ ᠳᠠᠭᠠᠳᠬᠠᠨ ᠳᠠᠭᠤᠳᠠᠨ ᠪᠠᠷᠢᠭᠰᠠᠨ ᠢ᠋ᠶ᠋ᠠᠨ᠂ ᠠᠮᠠᠨ ᠠ᠋ᠴᠠ ᠪᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠠᠳ ᠪᠠᠢᠵᠤ
— ᠮᠢᠨᠦ ᠬᠠᠷᠠ ᠯᠤᠤᠰ ᠴᠢᠮᠠᠶ᠋ᠢ ᠲᠡᠳᠬᠦᠨ ᠥᠷᠥᠰᠢᠶᠡᠬᠦ ᠨᠢ ᠠ᠋᠃ ᠴᠢ ᠳᠠᠢᠳᠤᠪᠠᠰᠤ ᠴᠢᠮᠠᠲᠤ ᠠᠵᠠ ᠵᠠᠪᠰᠢᠶᠠᠨ ᠢ᠋ ᠲᠡᠭᠷᠢ ᠪᠠᠭᠤᠯᠭᠠᠨ ᠬᠠᠢᠷᠠᠯᠠᠬᠤ ᠨᠢ ᠁ ᠭᠡᠵᠦ ᠲᠡᠷᠲᠡᠭᠡ ᠥᠨᠳᠥᠷ ᠡᠴᠡ ᠰᠣᠨᠣᠰᠴᠤ ᠪᠣᠢ ᠠᠳᠠᠯᠢ ᠪᠠᠷ ᠬᠣᠭᠣᠯᠠᠢ ᠰᠤᠩᠭᠠᠨ ᠰᠢᠷᠣᠩᠬᠠᠢᠯᠠᠵᠤ ᠥᠭᠦᠯᠡᠪᠡ᠃
ᠪᠥᠬᠡ ᠶ᠋ᠢ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ 《ᠮᠠᠩᠨᠠᠢ ᠲᠡᠨᠢᠢᠨ ᠪᠠᠶᠠᠷᠯᠠᠬᠤ》 ᠭᠡᠭᠴᠢ ᠪᠣᠯᠪᠠ ᠪᠣᠯᠤᠯᠲᠠᠢ᠂ ᠮᠢᠰᠢᠶᠡᠨ ᠳᠠᠭᠠᠯᠠᠭᠰᠠᠨ ᠪᠠᠢᠳᠠᠯ ᠨᠢᠭᠤᠷ ᠲᠤ᠌ ᠪᠠᠨ ᠲᠣᠳᠣᠷᠠᠭᠤᠯᠤᠨ
— ᠲᠡᠭᠷᠢ ᠲᠡᠳᠬᠦᠵᠦ ᠪᠠᠢᠨᠠ᠃ ᠡᠦᠲᠦ ᠬᠡᠷᠡᠭ ᠦᠢᠯᠡᠰ ᠪᠦᠲᠦᠨᠡ᠃
— ᠮᠠᠨ ᠤ᠋ ᠶᠡᠬᠡ ᠬᠠᠭᠠᠨ ᠢ᠋ ᠮᠥᠩᠬᠡ ᠲᠡᠭᠷᠢ ᠲᠠᠭᠠᠯᠠᠨ ᠢᠪᠡᠭᠡᠵᠦ ᠪᠠᠢᠨᠠ ᠭᠡᠮᠡᠨ ᠵᠣᠷᠢᠭ ᠪᠠᠳᠠᠷᠠᠩᠭᠤᠢ ᠪᠠᠷ ᠬᠥᠷ ᠲᠡᠢ ᠥᠭᠦᠯᠡᠯᠴᠡᠵᠦ᠂ ᠭᠠᠷ ᠳᠡᠯᠭᠡᠨ ᠬᠤᠷᠤᠢᠯᠠᠵᠤ᠂ ᠪᠤᠶᠠᠨ ᠬᠡᠰᠢᠭ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠪᠠᠢᠬᠤ ᠳ᠋ᠤ᠌᠂ ᠶᠡᠬᠡ ᠬᠠᠷᠠ ᠪᠥᠬᠡ ᠶ᠋ᠢ ᠪᠣᠯᠤᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠨᠣᠶᠠᠳ᠂ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠬᠤᠪᠢᠯᠠᠢ ᠰᠠᠬᠢᠭᠤᠰᠤ ᠵᠠᠯᠠᠵᠤ᠂ ᠥᠯᠵᠡᠢ ᠲᠡᠢ ᠰᠠᠢᠬᠠᠨ ᠦᠭᠡ ᠰᠣᠨᠣᠰᠤᠭᠰᠠᠨ ᠪᠠᠶᠠᠷ ᠲᠤ᠌ ᠵᠣᠷᠢᠭᠤᠯᠤᠭᠰᠠᠨ ᠵᠣᠭᠣᠭ ᠲᠤ᠌ ᠤᠷᠢᠯᠠ᠃ ᠬᠣᠨᠢᠨ ᠤ᠋ ᠪᠦᠬᠦᠯᠢ ᠮᠢᠬᠠ ᠰᠡᠯᠲᠡ ᠶ᠋ᠢ ᠲᠠᠯᠪᠢᠵᠤ ᠦᠷᠦᠭᠰᠡᠨ ᠲᠡᠷᠡ ᠵᠣᠭᠣᠭ ᠳᠡᠭᠡᠷᠡ ᠬᠤᠪᠢᠩ ᠢ᠋ᠶ᠋ᠠᠷ ᠠᠷᠠᠵᠠ ᠬᠣᠣᠷᠠᠵᠠ ᠢᠷᠡᠵᠦ ᠬᠥᠷ ᠬᠥᠭᠵᠢᠶᠡᠨ ᠡᠭᠦᠰᠪᠡ᠃
ᠴᠠᠢᠯᠠᠯᠭᠠ ᠳᠡᠭᠡᠷᠡ ᠭᠠᠩᠭᠠᠷ ᠱᠠᠭᠠᠵᠠᠩ ᠳ᠋ᠤ᠌ ᠰᠠᠷᠬᠤᠳ ᠮᠡᠯᠲᠡᠯᠵᠡᠭᠦᠯᠦᠨ ᠶᠠᠮᠪᠠᠷᠬᠠᠭ ᠢ᠋ᠶ᠋ᠠᠷ ᠲᠠᠮᠰᠢᠶᠠᠯᠠᠨ ᠪᠠᠯᠭᠤᠵᠤ ᠰᠠᠭᠤᠭᠠ ᠬᠤᠪᠢᠯᠠᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠵᠤᠵᠠᠭᠠᠨ ᠬᠥᠬᠡ ᠴᠢᠷᠠᠢᠲᠠᠢ᠂ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠬᠠᠳᠠᠨ ᠵᠠᠩᠵᠤᠨ ᠡᠷᠡᠵᠦ ᠪᠥᠬᠥᠢᠨ ᠶᠣᠰᠣ ᠬᠢᠭᠰᠡᠨ ᠢ᠋ᠶ᠋ᠡᠨ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠪᠣᠯᠭᠣᠮᠵᠢᠯᠠᠭᠰᠠᠨ ᠶᠠᠩᠵᠤᠲᠠᠢ ᠪᠠᠷ᠄
— ᠬᠠᠭᠠᠨᠲᠠᠨ ᠮᠢᠨᠢ ! ᠲᠠᠨ ᠤ᠋ ᠬᠠᠢᠷᠠᠯᠠᠵᠤ ᠪᠠᠢᠭᠠ ᠡᠨᠡ ᠵᠣᠭᠣᠭ ᠲᠤ᠌ ᠪᠠᠶᠠᠨ ᠵᠠᠩᠵᠤᠨ ᠶᠠᠭᠠᠬᠢᠭᠠᠳ ᠢᠷᠡᠵᠦ ᠬᠡᠰᠢᠭ ᠬᠦᠷᠲᠡᠬᠦ ᠦᠭᠡᠢ ᠪᠠᠢᠭᠠ ᠪᠢᠯᠡ? ᠭᠡᠵᠦ ᠠᠰᠠᠭᠤᠪᠠ ᠃ ᠬᠤᠪᠢᠯᠠᠢ ᠵᠢᠰᠢᠮᠡ ᠦᠭᠡᠢ ᠴᠢᠷᠠᠢ ᠭᠠᠷᠭᠠᠨ ᠬᠠᠳᠠᠨ ᠢ᠋ ᠬᠠᠷᠠᠵᠤ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠭᠡᠳ᠄
— ᠪᠠᠶᠠᠨ ᠢᠷᠡᠬᠦ ᠶᠣᠰᠣ ᠦᠭᠡᠢ ᠰᠢᠦ ᠳᠡ᠃ ᠲᠡᠷᠡ ᠲᠡᠢᠨ ᠦ᠌ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠭᠠᠳ ᠦᠭᠭᠦᠭᠰᠡᠨ ᠭᠡᠪᠡ᠃
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ᠂ ᠬᠠᠭᠠᠨᠲᠠᠨ ᠮᠢᠨᠢ! ᠪᠠᠶᠠᠨ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠪᠢᠯᠡ?
— ᠪᠢ ᠴᠢᠮᠠᠲᠤ ᠬᠡᠯᠡᠵᠦ ᠠᠮᠵᠢᠭᠠ ᠦᠭᠡᠢ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠪᠠᠶᠠᠨ ᠬᠣᠢᠲᠤ ᠵᠦᠭ ᠲᠦ᠍ ᠬᠢᠬᠦ ᠲᠡᠢᠨ ᠦ᠌ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠦᠭᠡᠢ᠂ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠡᠢ ᠨᠦᠳᠦᠯᠳᠦᠵᠦ ᠶᠠᠪᠤᠬᠤ ᠳᠤᠷᠠᠲᠠᠢ ᠭᠡᠨᠡ᠃ ᠲᠡᠭᠡᠭᠡᠳ ᠬᠠᠩᠵᠧᠦ᠂ ᠡᠵᠧᠦ ᠬᠣᠲᠠ ᠨᠤᠭᠤᠳ ᠤ᠋ᠨ ᠪᠦᠰᠡᠯᠡᠯᠲᠡ ᠤᠷᠤᠭᠤ ᠡᠷᠭᠢᠭᠡᠳ ᠶᠠᠪᠤᠭᠰᠠᠨ᠃ ᠲᠡᠷᠡ ᠬᠥᠮᠦᠨ ᠢᠷᠡᠬᠦ᠂ ᠶᠠᠪᠤᠬᠤ ᠭᠡᠵᠦ ᠲᠦᠪᠡᠭ ᠪᠠᠢᠬᠤ ᠪᠢᠰᠢ᠂ ᠬᠤᠴᠢᠯᠭᠠ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠬᠤᠢᠯᠠᠵᠤ ᠪᠠᠷᠢᠭᠠᠳ ᠯᠠ ᠶᠠᠭᠤ ᠲᠠᠭᠠᠷᠠᠯᠳᠤᠭᠰᠠᠨ ᠤᠨᠤᠭᠠᠨ ᠳ᠋ᠤ᠌ ᠬᠥᠯ ᠳᠡᠭᠦᠵᠢᠯᠡᠭᠡᠳ ᠬᠡᠯᠲᠦᠷᠢᠵᠦ ᠣᠷᠬᠢᠳᠠᠭ ᠶᠤᠮ ᠴᠢᠨᠢ᠃
— ᠪᠠᠶᠠᠨ ᠤ᠋ ᠲᠡᠭᠡᠵᠦ ᠶᠠᠪᠤᠬᠤ ᠶ᠋ᠢ ᠡᠵᠡᠨ ᠮᠢᠨᠢ ᠲᠠ ᠲᠠᠭᠠᠯᠠᠨ ᠰᠣᠶᠣᠷᠬᠠᠵᠤ ᠪᠠᠢᠭᠠ ᠶᠤᠮ ᠤᠤ? ᠪᠢ ᠭᠠᠷ ᠮᠤᠬᠤᠷᠳᠠᠬᠤ ᠪᠢᠰᠢ ᠪᠠᠵᠠ ᠠ᠋?
— ᠭᠠᠢᠭᠤᠢ ᠪᠠᠢᠬᠠ᠃ ᠴᠢ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠨᠢᠭᠡ ᠬᠡᠰᠡᠭ ᠢ᠋᠂ ᠪᠢ ᠨᠥᠭᠦᠭᠡ ᠬᠡᠰᠡᠭ ᠢ᠋ ᠨᠢ ᠠᠪᠤᠭᠠᠳ ᠮᠣᠷᠳᠠᠬᠤ ᠳ᠋ᠤ᠌ ᠤᠴᠢᠷ ᠨᠢ ᠣᠯᠳᠠᠬᠤ ᠪᠢᠵᠡ᠂ ᠴᠠᠭᠠᠨ ᠢ᠋ ᠪᠠᠰᠠ ᠵᠠᠷᠤᠨᠠ᠃ ᠥᠭᠡᠷᠡ ᠵᠠᠩᠵᠤᠨ ᠪᠢᠳᠡᠨ ᠳ᠋ᠦ᠍ ᠪᠠᠢᠨᠠ ᠰᠢᠦ᠃ ᠴᠢ ᠪᠤᠤ ᠵᠣᠪᠠ!
— ᠪᠠᠶᠠᠨ ᠲᠡᠨᠳᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠭᠤ ᠬᠢᠵᠦ ᠶᠠᠪᠤᠬᠤ ᠭᠡᠰᠡᠨ ᠶᠦᠮ ᠪᠣᠯ? ᠠᠷᠠᠢ ᠰᠥᠩ ᠦ᠋ᠨ ᠲᠠᠯᠠ ᠳ᠋ᠤ᠌ ᠣᠷᠣᠬᠤ ᠰᠠᠨᠠᠭᠠᠲᠠᠢ ᠪᠣᠯᠵᠤ ᠣᠷᠬᠢᠬᠤ ᠦᠭᠡᠢ ᠪᠠᠢᠭᠠ?
— ᠲᠡᠷᠡ ᠴᠤ᠌ ᠦᠭᠡᠢ ᠪᠢᠵᠡ᠃ ᠪᠠᠶᠠᠨ ᠡᠮᠦᠨᠡᠲᠦ ᠬᠢᠯᠢ ᠶ᠋ᠢᠨ ᠵᠠᠭᠠᠭ ᠢ᠋ᠶ᠋ᠠᠷ ᠪᠠᠢᠬᠤ ᠨᠢ ᠪᠢᠳᠡᠨ ᠳ᠋ᠦ᠍ ᠪᠠᠰᠠ ᠶᠡᠬᠡ ᠬᠡᠷᠡᠭ ᠪᠣᠯᠤᠭᠠᠳ ᠪᠠᠢᠨᠠ ᠰᠢᠦ᠃ ᠬᠣᠢᠲᠤ᠂ ᠡᠮᠦᠨᠡᠲᠦ ᠠᠯᠢ ᠨᠢ ᠢᠯᠭᠠᠭᠠ ᠦᠭᠡᠢ ᠵᠢᠭᠠᠬᠠᠨ ᠰᠡᠢᠮᠡᠬᠡᠢ ᠭᠠᠷᠪᠠᠯ ᠬᠢᠲᠠᠳ ᠤ᠋ᠳ ᠦᠢᠮᠡᠭᠡᠨ ᠳᠡᠭᠳᠡᠭᠡᠵᠦ ᠪᠣᠰᠬᠤ ᠭᠡᠳ ᠪᠠᠢᠬᠤ ᠬᠠᠷᠠᠯᠠᠭᠰᠠᠨ ᠶᠤᠮ᠃
— ᠲᠡᠢᠮᠦ ᠠ᠋᠃ ᠲᠡᠳᠡ ᠨᠣᠮᠣᠬᠠᠷᠠᠳᠠᠭ ᠦᠭᠡᠢ ᠠᠮᠢᠲᠠᠨ ᠪᠠᠢᠨᠠ᠃ ᠬᠢᠲᠠᠳ ᠤ᠋ᠨ ᠢᠵᠠᠭᠤᠷᠲᠠᠨ᠂ ᠭᠠᠵᠠᠷ ᠡᠵᠡᠮᠰᠢᠭᠴᠢᠳ ᠨᠢ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠥᠭᠡᠳᠡ ᠡᠴᠡ ᠤᠯᠠᠭᠠᠨ ᠵᠢᠳᠠ ᠪᠠᠨ ᠪᠠᠷᠢᠭᠠᠳ ᠥᠨᠳᠡᠢᠬᠦ ᠰᠠᠨᠠᠭᠠᠲᠠᠢ᠃
— ᠡᠢᠮᠦ ᠬᠥᠮᠦᠰ ᠲᠡᠢ ᠪᠠᠶᠠᠨ ᠬᠥᠭᠡᠭᠡᠴᠡᠯᠳᠦᠵᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠪᠦᠷ ᠳᠠᠮ ᠢ᠋ ᠨᠢ ᠣᠯᠵᠤ ᠰᠢᠦ᠃ ᠲᠡᠭᠡᠭᠡᠳ ᠪᠢ ᠪᠠᠶᠠᠨ ᠢ᠋ ᠡᠮᠦᠨᠡ ᠵᠦᠭ ᠲᠦ᠍ ᠪᠠᠢᠪᠠᠯ ᠪᠠᠢᠭ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠠ᠃
ᠲᠡᠭᠦᠨ ᠳ᠋ᠦ᠍ ᠪᠢ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠪᠦᠷᠢᠨ ᠠᠯᠠᠭᠠ ᠪᠣᠯᠭᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠥᠭᠴᠦ ᠳᠥᠩᠭᠡᠨᠡ ᠪᠠᠢᠬᠤ ᠠ᠋ ᠭᠡᠰᠡᠨ ᠶᠠᠷᠢᠶᠠ ᠬᠤᠪᠢᠯᠠᠢ᠂ ᠬᠠᠳᠠᠨ ᠨᠠᠷ ᠤ᠋ᠨ ᠳᠤᠮᠳᠠ ᠪᠣᠯᠬᠤ ᠳ᠋ᠤ᠌ ᠬᠠᠭᠠᠨ ᠠᠯᠪᠠ ᠪᠠᠷ ᠢᠨᠢᠶᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠭᠠᠷᠮᠠ᠂ ᠳᠠᠪᠰᠢᠯᠲᠦ᠂ ᠴᠣᠯᠮᠣᠨᠲᠤᠶᠠᠭᠠ