ᠪᠤᠭᠤ ᠶ᠋ᠢᠨ ᠬᠠᠯᠢᠭᠤᠨ -ᠳᠣᠮᠣᠭ ᠦᠯᠢᠭᠡᠷБугын халиун-Домог үлгэр
2448ᠪᠤᠭᠤ ᠶ᠋ᠢᠨ ᠬᠠᠯᠢᠭᠤᠨ
ᠳᠣᠮᠣᠭ ᠦᠯᠢᠭᠡᠷ
ᠬᠠᠭᠤᠴᠢᠨ ᠲᠦᠰᠢᠶᠡᠲᠦ ᠬᠠᠨ ᠠᠢᠮᠠᠭ ᠤ᠋ᠨ ᠡᠷᠳᠡᠨᠢ ᠸᠠᠩ ᠤ᠋ᠨ ᠬᠣᠰᠢᠭᠤ ᠣᠳᠣ ᠶ᠋ᠢᠨ ᠰᠡᠯᠡᠩᠭᠡ ᠠᠢᠮᠠᠭᠤᠨ ᠴᠠᠭᠠᠨ ᠨᠠᠭᠤᠷ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠲᠤ᠌᠂ ᠳᠣᠮᠣᠭ ᠬᠠᠨ ᠭᠡᠳᠡᠭ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ ᠨᠢᠭᠡᠨ ᠰᠠᠢᠬᠠᠨ ᠠᠭᠤᠯᠠ ᠪᠣᠢ᠃
ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠲᠦ᠍ ᠮᠢᠩᠭᠠ ᠨᠠᠢ᠍ᠮᠠᠨ ᠵᠠᠭᠤ ᠵᠢᠷᠠᠭᠠᠳ ᠣᠨ ᠤ᠋ ᠦᠶᠡ ᠳ᠋ᠦ᠍ ᠨᠢᠭᠡᠨ ᠪᠠᠶᠠᠨ ᠲᠠᠢᠵᠢ ᠶ᠋ᠢᠨ ᠬᠢ ᠨᠤᠲᠤᠭᠯᠠᠳᠠᠭ ᠪᠠᠢᠵᠠᠢ᠃ ᠲᠡᠳᠡᠨ ᠦ᠌ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠳ᠋ᠤ᠌ ᠨᠠᠰᠤ ᠨᠠᠰᠤᠨ ᠤ᠋ ᠮᠣᠷᠢᠳ ᠨᠠᠭᠠᠳᠤᠮ ᠳ᠋ᠤ᠌ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠤᠶᠠᠭᠠ ᠰᠣᠢᠯᠭᠠ ᠨᠢ ᠭᠦᠢᠴᠡᠨ᠂ ᠠᠭᠤᠯᠠ ᠶ᠋ᠢᠨ ᠪᠤᠭᠤ ᠰᠢᠭ᠋ ᠲᠥᠭᠥᠯᠴᠢᠨ᠂ ᠤᠯᠤᠰ ᠠᠮᠢᠲᠠᠨ ᠲᠣᠭᠣᠷᠢᠨ ᠬᠠᠷᠠᠵᠠᠭᠠᠨᠠ᠃ ᠡᠵᠡᠨ ᠬᠠᠰᠢᠷ ᠤᠶᠠᠭᠠᠴᠢ ᠬᠣᠶᠠᠷ ᠡᠨᠡ ᠳᠠᠭᠠ ᠡᠢᠮᠦ ᠪᠠᠢᠨᠠ᠂ ᠲᠡᠷᠡ ᠰᠢᠳᠦᠯᠡᠩ ᠭᠡᠵᠦ ᠡᠷᠳᠡᠨᠢᠲᠦ ᠨᠤᠲᠤᠭ ᠤ᠋ᠨ ᠡᠷᠡ ᠰᠢᠨᠳᠠᠰᠤ ᠶ᠋ᠢ ᠮᠠᠭᠲᠠᠨ ᠶᠠᠷᠢᠬᠤ ᠳ᠋ᠤ᠌᠂ ᠠᠭᠠᠭ ᠲᠠᠢ ᠪᠠᠶᠠᠴᠤᠳ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠳ᠋ᠦ᠍ ᠠᠪᠲᠠᠭᠳᠠᠨ ᠤᠶᠠᠭᠠᠨ ᠤ᠋ ᠭᠠᠭᠴᠠ ᠱᠣᠩ ᠴᠤ᠌ ᠦᠭᠡᠢ᠂ ᠤᠶᠠᠭᠰᠠᠨ ᠭᠠᠭᠴᠠ ᠦᠷᠢᠶᠡ ᠴᠦ᠍ ᠦᠭᠡᠢ᠂ ᠬᠠᠷᠠᠴᠤ ᠶᠠᠳᠠᠭᠤ ᠬᠠᠰᠢᠷ ᠲᠤᠭ ᠤᠶᠠᠭᠠᠴᠢᠳ ᠢ᠋ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠰᠠᠮ ᠰᠡᠮᠡᠬᠡᠨ ᠶᠠᠷᠢᠵᠠᠭᠠᠨᠠ᠃ ᠤᠭᠯᠠᠭᠠ ᠨᠣᠭᠣᠭᠠᠨ ᠮᠣᠳᠣ ᠠᠷᠪᠠᠭᠠᠳ ᠢ᠋ ᠤᠭᠰᠠᠷᠠᠭᠤᠯᠤᠨ ᠵᠣᠭᠣᠵᠤ ᠲᠠᠲᠠᠭᠰᠠᠨ ᠴᠢᠩᠭᠠ ᠰᠤᠭᠤᠨ ᠬᠢᠴᠡ ᠲᠡᠢ ᠤᠷᠲᠤ ᠤᠶᠠᠭᠠᠨ ᠤ᠋ ᠳᠡᠪᠦᠯ ᠦ᠋ᠨ ᠬᠡᠯᠡ ᠳ᠋ᠦ᠍ ᠭᠠᠩ ᠲᠡᠮᠦᠷ ᠭᠠᠷᠠᠬᠠᠨ ᠡᠷᠭᠢᠭᠦᠯᠭᠡ ᠡᠴᠡ ᠤᠶᠠᠭᠠᠲᠠᠢ ᠪᠠᠢᠭᠠ ᠬᠠᠯᠲᠠᠷ ᠠᠮᠠ ᠲᠠᠢ ᠬᠠᠯᠢᠭᠤᠨ ᠦᠷᠢᠶᠡ ᠶ᠋ᠢ ᠡᠵᠡᠨ ᠬᠥᠮᠦᠨ ᠡᠯᠳᠡᠪ ᠢ᠋ᠶ᠋ᠡᠷ ᠮᠠᠭᠲᠠᠬᠤ ᠨᠢ ᠶᠡᠬᠡ᠂ ᠡᠷᠭᠢᠵᠦ ᠦᠵᠡᠬᠦ ᠬᠥᠮᠦᠨ ᠦ᠌ ᠲᠣᠭᠠ ᠴᠤ᠌ ᠣᠯᠠᠨ᠂ ᠵᠥᠪ ᠲᠠᠰᠢ ᠪᠠᠨ ᠨᠠᠯᠠᠭᠰᠠᠨ ᠰᠢᠩᠭᠡᠨ ᠳᠡᠯ ᠲᠡᠢ ᠲᠡᠷᠡ ᠬᠠᠯᠢᠭᠤᠨ᠂ ᠬᠢᠵᠠᠭᠠᠯᠠᠩ ᠤ᠋ᠨ ᠨᠠᠷᠢᠪᠲᠤᠷ ᠰᠢᠩᠭᠡᠨ ᠰᠡᠭᠦᠯ᠂ ᠰᠤᠭᠤᠨ ᠴᠢᠬᠢ᠂ ᠥᠷᠭᠡᠨ ᠰᠦᠪᠡᠭᠡᠲᠡᠢ ᠬᠠᠩᠬᠠᠭᠠᠷ ᠲᠠᠰᠢᠶᠠ ᠮᠣᠩᠬᠣᠷ ᠬᠠᠮᠠᠷ᠂ ᠭᠠᠯᠪᠢᠷ ᠴᠣᠣᠳᠠᠢᠬᠠᠨ ᠪᠠᠢᠭᠠ ᠨᠢ ᠬᠤᠷᠳᠤᠨ ᠮᠣᠷᠢᠨ ᠳ᠋ᠤ᠌ ᠭᠢᠷᠠᠬᠠᠢ ᠬᠥᠮᠦᠰ ᠲᠦ᠍ ᠲᠠᠭᠠᠯᠠᠭᠳᠠᠵᠤ ᠪᠠᠢᠭᠰᠠᠨ ᠪᠢᠵᠡ᠃ ᠡᠵᠡᠨ ᠤᠶᠠᠭᠠᠴᠢ ᠬᠣᠶᠠᠷ ᠳᠣᠯᠣᠭᠠᠨ ᠬᠣᠰᠢᠭᠤ ᠳᠠᠮᠵᠢᠭᠳᠠᠨ᠂ ᠡᠨᠡ ᠬᠢᠵᠠᠭᠠᠯᠠᠩ ᠤ᠋ᠨ ᠲᠣᠭᠣᠰᠣ ᠶ᠋ᠢ ᠦᠵᠡᠬᠦ ᠪᠡᠷ ᠵᠠᠪᠳᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠣᠯᠠᠨ ᠤ᠋ ᠰᠠᠢᠰᠢᠶᠠᠯ ᠢ᠋ ᠰᠣᠨᠣᠰᠤᠭᠠᠳ᠂ ᠴᠠᠭᠠᠨ ᠬᠡᠯᠡ ᠠᠮᠠ ᠬᠦᠷᠦᠨᠡ ᠭᠡᠵᠦ ᠨᠠᠭᠠᠨᠠ ᠪᠠᠨ ᠭᠤᠷᠪᠠᠨ ᠰᠤᠳᠤᠷ ᠦᠵᠡᠭᠦᠯᠳᠡᠭ ᠨᠢ ᠴᠠᠭᠠᠨᠠ ᠪᠠᠨ ᠮᠠᠰᠢ ᠬᠤᠷᠳᠤᠨ ᠠ᠋ᠴᠠ ᠠᠶᠤᠭᠰᠠᠨ ᠬᠡᠷᠡᠭ ᠪᠠᠢᠵᠠᠢ᠃
ᠬᠠᠰᠢᠷ ᠨᠤᠲᠤᠭ ᠤ᠋ᠨ ᠭᠠᠢᠬᠠᠮᠰᠢᠭᠲᠤ ᠬᠤᠷᠳᠤᠨ ᠬᠦᠯᠦᠭ ᠦ᠋ᠳ ᠬᠠᠯᠬᠠ ᠶ᠋ᠢᠨ ᠰᠠᠢᠨ ᠬᠦᠯᠦᠭ ᠦ᠋ᠳ ᠲᠡᠢ ᠣᠷᠣᠯᠳᠣᠬᠤ ᠪᠣᠯᠤᠭᠰᠠᠨ ᠬᠠᠩᠭᠠᠢ ᠨᠤᠲᠤᠭ ᠤ᠋ᠨ ᠤᠨᠠᠭᠠ᠂ ᠬᠠᠨ ᠠᠭᠤᠯᠠ ᠶ᠋ᠢᠨ ᠬᠠᠯᠢᠭᠤᠨ ᠡᠷᠡ ᠲᠠᠩᠰᠤᠭ ᠶᠡᠬᠡ ᠨᠠᠭᠠᠳᠤᠮ ᠳ᠋ᠤ᠌ ᠤᠷᠤᠯᠳᠤᠭᠤᠯᠬᠤ ᠪᠠᠷ ᠢᠵᠢᠯᠢ ᠰᠦᠷᠦᠭ ᠮᠣᠷᠢᠳ ᠤ᠋ᠨ ᠬᠠᠮᠲᠤ ᠬᠥᠲᠥᠯᠦᠨ ᠤᠨᠠᠭᠠᠨ ᠨᠤᠲᠤᠭ ᠤ᠋ᠨ ᠤᠶᠠᠭᠠᠨ ᠠ᠋ᠴᠠ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠭᠠᠷᠴᠤ ᠭᠡᠨᠡ᠃
ᠦᠰᠦᠭ ᠬᠠᠲᠠᠵᠤ᠂ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ