ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠢᠩᠬᠢᠨᠢ ᠳᠣᠪᠴᠢ– ᠬᠦᠰᠡᠬᠦᠢ᠂ ᠬᠥᠬᠡᠯᠤᠤ ᠨᠠᠷ –ᠨᠢᠭᠡᠳᠦᠭᠡᠷ ᠪᠣᠲᠢ-ᠡᠷᠬᠢᠮ ᠨᠠᠢᠷᠠᠯᠭᠠᠳᠤ ᠢᠳᠡᠭᠡᠨ ᠤᠮᠳᠠᠭᠠᠨ–6 Идээ ундааны жинхэнэ товч–Хүсэхүй᠂ Хөхлуу нар – 1-р боть᠂Эрхэм найрлагат итгэн ундаа- 6
49ᠡᠷᠬᠢᠮ ᠨᠠᠢᠷᠠᠯᠭᠠᠳᠤ ᠢᠳᠡᠭᠡᠨ ᠤᠮᠳᠠᠭᠠᠨ–6
ᠭᠠᠯᠠᠭᠤ ᠨᠢᠭᠡ ᠶ᠋ᠢ ᠦᠰᠦ ᠨᠣᠯᠤᠤᠷ ᠪᠠ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠢᠨᠤ ᠴᠥᠮ ᠴᠡᠪᠡᠷᠯᠡᠨ ᠠᠷᠢᠯᠭᠠᠵᠤ᠂ᠬᠣᠨᠢᠨ ᠭᠦᠵᠡᠭᠡ ᠨᠢᠭᠡ ᠶ᠋ᠢ ᠮᠥᠨ ᠰᠠᠢᠲᠤᠷ ᠤᠬᠢᠶᠠᠵᠤ ᠴᠡᠪᠡᠷᠯᠡᠭᠡᠳ ᠭᠦᠵᠡᠭᠡᠨ ᠳᠣᠲᠣᠷᠠ ᠭᠠᠯᠠᠭᠤ ᠶ᠋ᠢ ᠠᠬᠤᠭᠤᠯᠵᠤ᠂ ᠰᠣᠩᠭᠢᠨᠠ ᠬᠣᠶᠠᠷ ᠯᠠᠩ᠂ ᠦᠨᠦᠷᠲᠦ ᠨᠣᠭᠣᠭᠠᠨ ᠤ᠋ ᠲᠠᠯᠬᠠ ᠨᠢᠭᠡᠨ ᠯᠠᠩ᠃
ᠳᠡᠭᠡᠷᠡᠬᠢ ᠰᠣᠩᠭᠢᠨᠠ ᠨᠤᠭᠤᠳ ᠢ᠋ ᠳᠠᠪᠤᠰᠤ ᠲᠠᠢ ᠨᠠᠢᠷᠠᠭᠤᠯᠵᠤ ᠭᠠᠯᠠᠭᠤ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ᠷ ᠬᠢᠭᠡᠳ ᠴᠢᠨᠠᠵᠤ ᠪᠤᠯᠭᠤᠮᠤᠢ᠃
ᠰᠢᠵᠠᠯᠮᠠᠯ ᠵᠠᠷᠠᠭ
ᠵᠠᠷᠠᠭ ᠠᠷᠪᠠ ᠶ᠋ᠢ ᠦᠰᠦ ᠨᠣᠯᠤᠤᠷ ᠢ᠋ ᠠᠷᠢᠯᠭᠠᠵᠤ ᠤᠬᠢᠶᠠᠨ᠂ ᠦᠰᠦ᠋ ᠶ᠋ᠢᠨ ᠲᠠᠯᠬᠠ ᠨᠢᠭᠡ ᠯᠠᠩ᠂ ᠰᠣᠩᠭᠢᠨᠠ ᠠᠷᠪᠠᠨ ᠲᠣᠯᠣᠭᠠᠢ᠂ ᠪᠠᠭᠰᠤᠷᠭᠠ ᠲᠠᠪᠤᠨ ᠴᠢᠨ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠳᠠᠪᠤᠰᠤ ᠬᠢᠵᠦ ᠨᠡᠢᠯᠡᠭᠦᠯᠦᠨ ᠲᠡᠭᠰᠢᠬᠡᠨ ᠬᠤᠳᠬᠤᠭᠠᠳ ᠴᠢᠨᠠᠵᠤ ᠰᠢᠯᠵᠠᠯᠤᠮᠤᠢ᠃ ᠡᠰᠡ ᠪᠥᠭᠡᠰᠦ ᠢᠰᠬᠡᠭᠰᠡᠨ ᠭᠤᠯᠢᠷ ᠢ᠋ᠶ᠋ᠠᠷ ᠵᠠᠷᠠᠭ ᠢ᠋ ᠪᠠᠭᠯᠠᠵᠤ ᠵᠢᠩᠨᠡᠭᠦᠷ ᠲᠣᠷ ᠲᠠᠯᠪᠢᠵᠤ ᠵᠢᠩᠨᠡᠵᠦ ᠪᠣᠯᠭᠣᠵᠤ ᠴᠤ᠌ ᠪᠣᠯᠤᠮᠤᠢ᠃ᠡᠰᠡᠬᠦᠯᠡ ᠰᠢᠷᠠ ᠲᠣᠰᠣ ᠲᠠᠢ ᠤᠰᠤ ᠪᠠᠷ ᠭᠤᠯᠢᠷ ᠵᠢᠭᠤᠷᠠᠭᠠᠳ ᠵᠠᠷᠠᠭ ᠢ᠋ ᠪᠠᠭᠯᠠᠵᠤ ᠬᠠᠢᠪᠢ ᠲᠣᠭᠣᠭᠠ ᠪᠠᠷ ᠬᠠᠭᠰᠠᠭᠠᠵᠤ ᠴᠤ᠌ ᠪᠣᠯᠤᠮᠤᠢ᠃
ᠪᠤᠷᠭᠠᠰᠤᠨ ᠵᠢᠩᠨᠡᠮᠡᠯ ᠬᠣᠨᠢᠨ ᠮᠢᠬᠠ
ᠨᠣᠣᠰᠣ ᠲᠠᠢ ᠬᠣᠨᠢ ᠨᠢᠭᠡ᠃
ᠭᠠᠵᠠᠷ ᠳᠡᠭᠡᠷᠡ ᠭᠤᠷᠪᠠᠨ ᠲᠣᠬᠣᠢ ᠥᠨᠳᠥᠷ ᠴᠢᠯᠠᠭᠤᠨ ᠵᠤᠤᠬᠠ ᠪᠠᠷᠢᠵᠤ᠂ ᠴᠢᠯᠠᠭᠤ ᠶ᠋ᠢ ᠤᠯᠠᠢᠰᠲᠠᠯᠠ ᠲᠥᠯᠥᠮᠦᠢ᠃ ᠵᠢᠴᠢ ᠭᠦᠷᠦᠮᠡᠯ ᠲᠡᠮᠦᠷ ᠰᠠᠪᠠᠨ ᠳ᠋ᠤᠷ ᠬᠣᠨᠢ ᠪᠠᠨ ᠲᠠᠯᠪᠢᠭᠠᠳ᠂ ᠵᠤᠤᠬᠠ ᠶ᠋ᠢᠨ ᠳᠣᠲᠣᠷᠠ ᠲᠠᠯᠪᠢᠵᠤ᠂ ᠳᠡᠭᠡᠭᠦᠷ ᠢᠨᠦ ᠪᠤᠷᠭᠠᠰᠤ ᠪᠠᠷ ᠪᠦᠲᠡᠭᠡᠵᠦ ᠰᠢᠷᠣᠢ ᠪᠠᠷ ᠪᠢᠲᠡᠭᠦᠮᠵᠢᠯᠡᠨ ᠳᠠᠷᠤᠭᠠᠳ ᠪᠣᠯᠭᠣᠭᠰᠠᠨ ᠤ᠋ ᠬᠡᠮᠵᠢᠶᠡᠨ ᠳ᠋ᠦ᠍ᠷ ᠬᠦᠷᠬᠦ ᠳ᠋ᠦ᠍ ᠭᠠᠷᠭᠠᠵᠤ ᠠᠪᠤᠮᠤᠢ᠃
ᠰᠠᠩ ᠤ᠋ᠨ ᠮᠠᠨᠲᠸᠤ (ᠮᠢᠬᠠᠨ ᠢᠳᠡᠭᠡ ᠲᠡᠢ ᠪᠣᠣᠽᠢ <ᠪᠤᠤᠵᠠ>)
ᠬᠣᠨᠢᠨ ᠮᠢᠬᠠ ᠥᠭᠡᠬᠦ᠂ ᠰᠣᠩᠭᠢᠨᠠ᠂ ᠨᠣᠢᠲᠠᠨ ᠭᠠ᠂ ᠵᠦᠷᠪᠠᠭ ᠵᠡᠷᠭᠡ ᠶ᠋ᠢ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠳᠠᠪᠤᠰᠤ ᠵᠢᠶᠠᠩ ᠲᠠᠢ ᠨᠡᠢᠯᠡᠭᠦᠯᠦᠨ ᠬᠤᠳᠬᠤᠵᠤ᠂ ᠮᠢᠬᠠᠨ ᠢᠳᠡᠭᠡᠨ ᠪᠣᠯᠭᠠᠨ ᠨᠠᠢᠷᠠᠭᠤᠯᠤᠭᠠᠳ ᠴᠠᠭᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠪᠠᠷᠢᠵᠤ ᠵᠢᠩᠨᠡᠮᠦᠢ᠃
ᠪᠤᠭᠤ ᠶ᠋ᠢᠨ ᠳᠠᠯᠠᠩ ᠤ᠋ᠨ ᠮᠠᠨᠲᠸᠤ (ᠰᠠᠩ ᠤ᠋ᠨ ᠮᠠᠨᠲᠸᠤ ᠪᠤᠶᠤ ᠨᠢᠮᠭᠡᠨ ᠬᠠᠯᠢᠰᠤ ᠲᠠᠢ ᠮᠠᠨᠲᠸᠤ ᠬᠢᠵᠦ ᠪᠦᠷ ᠪᠣᠯᠤᠨᠠ)
ᠪᠤᠭᠤ ᠶ᠋ᠢᠨ ᠳᠠᠯᠠᠩ ᠪᠠ ᠬᠣᠨᠢᠨ ᠰᠡᠭᠦᠯ ᠢ᠋ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠲᠤᠱᠠᠮᠠᠨ ᠲᠡᠳᠦᠢ ᠬᠡᠷᠴᠢᠵᠦ᠂ ᠨᠣᠢᠲᠠᠨ ᠭᠠ᠂ ᠵᠦᠷᠪᠠᠭ ᠢ᠋ ᠴᠥᠮ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠪᠠᠭᠰᠤᠷᠭᠠ᠂ ᠳᠠᠪᠤᠰᠤ ᠲᠠᠢ ᠬᠤᠳᠬᠤᠨ ᠨᠠᠢᠷᠠᠭᠤᠯᠵᠤ ᠢᠳᠡᠭᠡ ᠪᠣᠯᠭᠠᠭᠠᠳ᠂ ᠴᠠᠭᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠪᠠᠷᠢᠵᠤ ᠵᠢᠩᠨᠡᠮᠦᠢ᠃
ᠬᠠᠰᠢ ᠶ᠋ᠢᠨ ᠮᠠᠨᠲᠸᠤ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ᠂ᠰᠡᠭᠦᠯ᠂ ᠰᠣᠩᠭᠢᠨᠠ᠂ ᠵᠦᠷᠪᠠᠭ ᠵᠡᠷᠭᠡ ᠶ᠋ᠢ ᠴᠥᠮ ᠨᠠᠷᠢᠨ ᠬᠡᠷᠴᠢᠨ᠂ ᠵᠠᠯᠠᠭᠤ ᠨᠡᠮᠡᠭᠦᠨ ᠬᠠᠰᠢ ᠶ᠋ᠢ ᠳᠣᠲᠣᠷᠠᠬᠢ ᠭᠣᠣᠯ ᠢ᠋ ᠠᠨᠤ ᠠᠪᠴᠤ ᠬᠠᠶᠠᠮᠤᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠨᠠᠢᠷᠠᠭᠤᠯᠤᠨ ᠮᠢᠬᠠ ᠲᠠᠢ ᠢᠳᠡᠭᠡ ᠪᠣᠯᠭᠠᠨ ᠵᠢᠭᠤᠷᠠᠵᠤ ᠬᠠᠰᠢ ᠶ᠋ᠢᠨ ᠳᠣᠲᠣᠷᠠ ᠴᠢᠬᠢᠵᠦ ᠬᠠᠪᠴᠢᠭᠤᠯᠤᠭᠠᠳ ᠵᠢᠩᠨᠡᠮᠦᠢ᠃ ᠡᠭᠦᠨ ᠢ᠋ ᠰᠠᠷᠢᠮᠰᠠᠭ᠂ ᠲᠠᠷᠠᠭ᠂ ᠠᠮᠲᠠᠲᠤ ᠨᠣᠭᠣᠭᠠ ᠶ᠋ᠢᠨ ᠲᠠᠯᠬᠠ ᠨᠤᠭᠤᠳ ᠤ᠋ᠨ ᠨᠠᠢᠷᠠᠯᠭᠠ ᠳ᠋ᠤᠷ ᠬᠢᠵᠦ ᠢᠳᠡᠨᠡ᠃
ᠬᠠᠢᠴᠢᠯᠠᠮᠠᠯ ᠬᠤᠸᠠᠷᠯᠢᠭ
ᠬᠣᠨᠢᠨ ᠮᠢᠬᠠ᠂ ᠥᠭᠡᠬᠦ᠂ ᠰᠡᠭᠦᠯ᠂ᠰᠣᠩᠭᠢᠨᠠ᠂ ᠵᠦᠷᠪᠠᠭ ᠵᠡᠷᠭᠡ ᠶ᠋ᠢ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠪᠠᠭᠰᠤᠷᠭᠠ᠂ ᠳᠠᠪᠤᠰᠤ᠂ ᠵᠢᠶᠠᠩ ᠯᠤᠭᠠ ᠨᠠᠢᠷᠠᠭᠤᠯᠤᠨ ᠵᠢᠭᠤᠷᠠᠵᠤ᠂ ᠮᠢᠬᠠᠨ ᠢᠳᠡᠭᠡ ᠪᠣᠯᠭᠠᠵᠤ᠂ ᠴᠠᠭᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠪᠠᠷᠢᠭᠠᠳ᠂ ᠬᠠᠢᠴᠢ ᠪᠠᠷ ᠡᠯᠳᠡᠪ ᠮᠠᠶᠢᠭ ᠤ᠋ᠨ ᠬᠤᠸᠠᠷ ᠭᠠᠷᠭᠠᠨ ᠵᠢᠩᠨᠡᠵᠦ᠂ ᠬᠤᠸᠠᠷ ᠤ᠋ᠨ ᠳᠡᠭᠡᠷᠡ ᠡᠩᠭᠡᠰᠬᠡ ᠪᠡᠷ ᠪᠣᠳᠣᠭ ᠣᠷᠣᠭᠤᠯᠤᠮᠤᠢ᠃
ᠪᠣᠯᠣᠷᠯᠢᠭ ᠪᠣᠭᠣᠷᠰᠣᠭ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ᠂ ᠰᠡᠭᠦᠯ᠂ᠰᠣᠩᠭᠢᠨᠠ᠂ ᠵᠦᠷᠪᠠᠭ᠂ ᠨᠣᠢᠲᠠᠨ ᠭᠠ ᠨᠤᠭᠤᠳ ᠢ᠋ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠠᠮᠲᠠ ᠶ᠋ᠢᠨ ᠨᠠᠷᠢᠯᠢᠭ ᠪᠠᠭᠰᠤᠷᠭᠠ ᠪᠠ ᠳᠠᠪᠤᠰᠤ ᠵᠢᠶᠠᠩ ᠲᠠᠢ ᠨᠡᠢᠯᠡᠭᠦᠯᠦᠨ ᠲᠡᠭᠰᠢᠬᠡᠨ ᠵᠢᠭᠤᠷᠠᠭᠠᠳ ᠪᠤᠷᠴᠠᠭ ᠤ᠋ᠨ ᠭᠤᠯᠢᠷ (ᠡᠳᠦᠭᠡ ᠶ᠋ᠢᠨ ᠹᠧᠨᠮᠢᠶᠠᠨᠽᠢ ᠶ᠋ᠢ ᠬᠡᠯᠡᠵᠦ ᠪᠠᠢᠬᠤ ᠪᠤᠶᠤ) ᠢᠶᠠᠷ ᠬᠠᠯᠢᠰᠤ ᠬᠦᠪᠦᠷᠯᠡᠵᠦ ᠪᠠᠷᠢᠮᠤᠢ᠃
ᠦᠭᠦᠷᠡᠮᠡᠭ ᠬᠠᠯᠢᠰᠤᠲᠤ ᠪᠣᠭᠣᠷᠰᠣᠭ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ᠂ ᠰᠡᠭᠦᠯ᠂ᠰᠣᠩᠭᠢᠨᠠ᠂ ᠵᠦᠷᠪᠠᠭ᠂ ᠨᠣᠢᠲᠠᠨ ᠭᠠ ᠨᠤᠭᠤᠳ ᠢ᠋ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠵᠦ᠂ ᠲᠡᠭᠦᠨ ᠳᠡᠭᠡᠷᠡ ᠪᠠᠰᠠ ᠭᠤᠸᠠᠬᠠᠰᠤᠨ (ᠰᠠᠷᠠᠨᠠ ᠶ᠋ᠢᠨ ᠦᠨᠳᠦᠰᠦ) ᠢ ᠨᠡᠮᠡᠷᠢᠯᠡᠵᠦ ᠴᠦ᠍ ᠪᠣᠯᠤᠮᠤᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠪᠠᠭᠰᠤᠷᠭᠠ ᠪᠠ ᠳᠠᠪᠤᠰᠤ ᠵᠢᠶᠠᠩ ᠲᠠᠢ ᠨᠡᠢᠯᠡᠭᠦᠯᠦᠨ ᠲᠡᠭᠰᠢᠬᠡᠨ ᠵᠢᠭᠤᠷᠠᠵᠤ ᠵᠢᠴᠢ ᠦᠷᠡᠰ ᠦ᠋ᠨ ᠲᠣᠰᠣ᠂ ᠪᠤᠳᠠᠭᠠ ᠶ᠋ᠢᠨ ᠭᠤᠯᠢᠷ ᠤ᠋ᠳ ᠴᠠᠭᠠᠨ ᠭᠤᠯᠢᠷ ᠯᠤᠭᠠ ᠨᠡᠢᠯᠡᠭᠦᠯᠦᠨ ᠨᠤᠬᠤᠭᠠᠳ ᠬᠠᠯᠢᠰᠤ ᠬᠢᠵᠦ ᠪᠠᠷᠢᠮᠤᠢ᠃
ᠫᠢᠯᠲᠠᠭᠠᠷ ᠪᠣᠭᠤᠷᠰᠣᠭ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ ᠰᠡᠭᠦᠯ ᠪᠠ ᠰᠢᠨᠡ ᠭᠣᠭᠣᠳ ᠵᠡᠷᠭᠡ ᠶ᠋ᠢ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠲᠦ᠍ ᠠᠮᠲᠠ ᠶ᠋ᠢᠨ ᠨᠠᠢᠷᠠᠯᠭᠠ ᠪᠠ ᠳᠠᠪᠤᠰᠤ ᠵᠢᠶᠠᠩ ᠲᠠᠯᠪᠢᠵᠤ ᠲᠡᠭᠰᠢᠬᠡᠨ ᠵᠢᠭᠤᠷᠠᠵᠤ᠂ ᠴᠠᠭᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠬᠠᠯᠢᠰᠤ ᠬᠦᠪᠦᠷᠯᠡᠵᠦ ᠪᠠᠷᠢᠭᠠᠳ ᠬᠠᠢᠪᠢ ᠲᠣᠭᠣᠭᠠᠨ ᠳ᠋ᠤᠷ ᠬᠠᠭᠠᠷᠢᠵᠤ ᠪᠣᠯᠭᠠᠮᠤᠢ᠃ ᠡᠰᠡᠬᠦᠯᠡ ᠰᠢᠷᠠ ᠲᠣᠰᠣ ᠪᠠ ᠪᠠᠯ ᠢ᠋ᠶ᠋ᠠᠷ ᠪᠤᠶᠤ ᠬᠤᠯᠤᠨ ᠬᠡᠮᠬᠡ ᠪᠡᠷ ᠢᠳᠡᠭᠡ ᠬᠢᠵᠦ ᠴᠦ᠍ ᠪᠣᠯᠤᠮᠤᠢ᠃
ᠵᠣᠷᠭᠣᠳᠠᠰᠤ ᠶ᠋ᠢᠨ ᠢᠳᠡᠭᠡ ᠲᠠᠢ ᠪᠣᠭᠣᠷᠰᠣᠭ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ᠂ ᠰᠡᠭᠦᠯ᠂ᠰᠣᠩᠭᠢᠨᠠ᠂ ᠵᠦᠷᠪᠠᠭ᠂ ᠨᠣᠢᠲᠠᠨ ᠭᠠ ᠨᠤᠭᠤᠳ ᠢ᠋ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠲᠦ᠍ ᠳᠠᠪᠤᠰᠤ ᠵᠢᠶᠠᠩ ᠪᠠ ᠪᠠᠭᠰᠤᠷᠭᠠ ᠶ᠋ᠢ ᠲᠠᠯᠪᠢᠵᠤ ᠲᠡᠭᠰᠢᠬᠡᠨ ᠵᠢᠭᠤᠷᠠᠵᠤ ᠵᠢᠴᠢ ᠴᠠᠭᠠᠨ ᠭᠤᠯᠢᠷ ᠪᠠᠯ ᠢ᠋ ᠦᠷᠡᠰ ᠦ᠋ᠨ ᠲᠣᠰᠣ ᠯᠤᠭᠠ ᠵᠢᠭᠤᠷᠠᠵᠤ ᠲᠣᠭᠣᠭᠠᠨ ᠳᠣᠲᠣᠷᠠ ᠪᠤᠴᠠᠯᠤᠭᠰᠠᠨ ᠤᠰᠤ ᠪᠠᠷ ᠵᠢᠭᠤᠷᠠᠵᠤ ᠪᠣᠯᠭᠣᠭᠠᠳ ᠬᠠᠯᠢᠰᠤ ᠬᠢᠵᠦ ᠥᠨᠥᠬᠢ ᠢᠳᠡᠭᠡ ᠪᠡᠨ ᠪᠠᠷᠢᠮᠤᠢ᠃
ᠲᠩᠷᠢᠯᠢᠭ ᠴᠡᠴᠡᠭ ᠦ᠋ᠨ ᠨᠣᠭᠣᠭᠠᠨ ᠪᠣᠣᠽᠢ ᠪᠤᠤᠵᠠ
ᠬᠣᠨᠢᠨ ᠮᠢᠬᠠ ᠥᠭᠡᠬᠦ ᠰᠡᠭᠦᠯ᠂ᠰᠣᠩᠭᠢᠨᠠ᠂ ᠵᠦᠷᠪᠠᠭ᠂ ᠨᠣᠢᠲᠠᠨ ᠭᠠ ᠨᠤᠭᠤᠳ ᠢ᠋ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠨᠠᠷᠢᠨ ᠬᠡᠷᠴᠢᠵᠦ᠂ ᠲᠩᠷᠢᠯᠢᠭ ᠴᠡᠴᠡᠭ ᠨᠣᠭᠣᠭᠠ (ᠤᠲᠠᠢ ᠠᠭᠤᠯᠠᠨᠡ ᠭᠠᠷᠳᠠᠭ ᠮᠥᠭᠥ ᠰᠢᠭ ᠨᠣᠭᠣᠭᠠ) ᠶ᠋ᠢ ᠪᠤᠴᠠᠯᠭᠠᠭᠰᠠᠨ ᠤᠰᠤ ᠪᠠᠷ ᠪᠣᠯᠭᠣᠭᠠᠲᠠᠯᠠ ᠬᠠᠯᠠᠭᠠᠵᠤ ᠤᠬᠢᠶᠠᠨ ᠴᠡᠪᠡᠷᠯᠡᠭᠡᠳ ᠨᠠᠷᠢᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠲᠦ᠍ ᠠᠮᠲᠠ ᠶ᠋ᠢᠨ ᠨᠠᠢᠷᠠᠯᠭᠠ ᠪᠠ ᠳᠠᠪᠤᠰᠤ ᠵᠢᠶᠠᠩ ᠲᠠᠯᠪᠢᠵᠤ ᠵᠢᠭᠤᠷᠠᠭᠠᠳ ᠢᠳᠡᠬᠦ ᠪᠣᠯᠭᠠᠨ ᠵᠢᠴᠢ ᠴᠠᠭᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠨᠢᠮᠭᠡᠨ ᠬᠠᠯᠢᠰᠤ ᠬᠦᠪᠦᠷᠯᠡᠵᠦ ᠪᠠᠷᠢᠭᠠᠳ ᠵᠢᠩᠨᠡᠮᠦᠢ᠃
ᠵᠢᠩᠨᠡᠮᠡᠯ ᠯᠢᠩᠬᠤᠸᠠᠳᠦ ᠪᠣᠭᠣᠷᠰᠣᠭ
ᠬᠣᠨᠢᠨ ᠮᠢᠬᠠ ᠭᠤᠷᠪᠠᠨ ᠮᠥᠴᠢ ᠬᠢᠭᠡᠳ ᠬᠣᠨᠢᠨ ᠰᠡᠭᠦᠯ ᠬᠣᠶᠠᠷ ᠢ᠋ ᠬᠡᠷᠴᠢᠨ᠂ ᠭᠠᠷᠠᠨᠽᠠ ᠨᠠᠢ᠍ᠮᠠ ᠯᠠᠩ᠂ ᠰᠠᠮᠤᠷ ᠤ᠋ᠨ ᠦᠷᠡᠳᠡᠰᠦ ᠨᠠᠢ᠍ᠮᠠᠨ ᠯᠠᠩ᠂ ᠪᠠᠳᠠᠨ ᠭᠦᠢᠯᠡᠰᠦ ᠶ᠋ᠢᠨ ᠴᠥᠮᠡ ᠳᠥᠷᠪᠡᠨ ᠯᠠᠩ᠂ ᠮᠥᠭᠥ ᠨᠠᠢ᠍ᠮᠠᠨ ᠯᠠᠩ᠂ ᠭᠦᠢᠯᠡᠰᠦᠨ ᠦ᠌ ᠨᠦᠳᠦᠮᠡᠯ ᠬᠣᠭᠣᠷᠮᠠᠭ ᠨᠢᠭᠡᠨ ᠵᠢᠩ᠂ ᠬᠤᠰᠢᠭᠠ ᠶ᠋ᠢᠨ ᠴᠥᠮᠡ ᠨᠠᠢ᠍ᠮᠠᠨ ᠯᠠᠩ᠂ ᠪᠢᠰᠳᠠ ᠬᠡᠮᠡᠬᠦ ᠵᠢᠮᠢᠰ ᠦ᠋ᠨ ᠴᠥᠮᠡ ᠳᠥᠷᠪᠡᠨ ᠯᠠᠩ᠂ ᠡᠩᠭᠡᠰᠬᠡ ᠨᠢᠭᠡᠨ ᠯᠠᠩ᠂ ᠵᠦᠷᠦᠷᠠ ᠳᠥᠷᠪᠡᠨ ᠯᠠᠩ᠂ ᠦᠷᠡᠰ ᠦ᠋ᠨ ᠲᠣᠰᠣ ᠬᠣᠶᠠᠷ ᠵᠢᠩ᠂ ᠨᠣᠢᠲᠠᠨ ᠭᠠ ᠨᠠᠢ᠍ᠮᠠᠨ ᠯᠠᠩ᠂ ᠪᠤᠷᠴᠠᠭ ᠤ᠋ᠨ ᠲᠠᠯᠬᠠ ᠳᠥᠷᠪᠡᠨ ᠵᠢᠩ᠂ ᠨᠠᠩᠭᠢ ᠴᠠᠭᠠᠨ ᠭᠤᠷᠪᠠᠨ ᠵᠢᠩ᠂ ᠲᠠᠬᠢᠶᠠᠨ ᠥᠨᠳᠡᠭᠡ ᠭᠤᠴᠢ᠂ ᠬᠣᠨᠢᠨ ᠭᠦᠵᠡᠭᠡ ᠠᠭᠤᠰᠬᠢ ᠲᠤᠰ ᠪᠦᠷᠢ ᠬᠣᠶᠠᠷ ᠪᠦᠬᠦᠯᠢ᠂ ᠥᠯᠥᠨ ᠭᠡᠳᠡᠰᠦ ᠨᠢᠭᠡᠨ ᠪᠦᠬᠦᠯᠢ᠂ ᠰᠣᠩᠭᠢᠨᠠ ᠳᠥᠷᠪᠡᠨ ᠯᠠᠩ᠂ ᠼᠤᠤ ᠬᠠᠭᠠᠰ ᠯᠣᠩᠬᠣ᠂ ᠦᠨᠦᠷᠲᠦ ᠨᠣᠭᠣᠭᠠᠨ ᠤ᠋ ᠨᠠᠪᠴᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠳᠠᠪᠤᠰᠤ ᠵᠢᠶᠠᠩ ᠵᠡᠷᠭᠡ ᠲᠠᠪᠤᠨ ᠠᠮᠲᠠ ᠪᠠᠷ ᠨᠠᠢᠷᠠᠭᠤᠯᠤᠨ ᠪᠤᠷᠴᠠᠭ ᠤ᠋ᠨ ᠭᠤᠯᠢᠷ ᠢ᠋ᠶ᠋ᠠᠷ ᠬᠠᠯᠢᠰᠤ ᠬᠢᠵᠦ ᠪᠠᠷᠢᠭᠠᠳ ᠰᠠᠪᠠᠨ ᠳᠣᠲᠣᠷᠠ ᠲᠠᠯᠪᠢᠵᠤ ᠵᠢᠩᠨᠡᠵᠦ᠂ ᠨᠠᠷᠠᠰᠤᠨ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣᠨ ᠰᠥᠮᠥᠰᠦᠨ ᠳ᠋ᠦ᠍ᠷ ᠲᠦᠷᠢᠵᠦ ᠢᠳᠡᠮᠦᠢ᠃ (ᠲᠠᠢᠯᠪᠤᠷᠢᠯᠠᠬᠤ ᠠᠨᠤ: ᠪᠠᠳᠠᠨ ᠭᠦᠢᠯᠡᠰᠦ ᠬᠡᠮᠡᠭᠴᠢ ᠶ᠋ᠢ ᠤᠭ ᠬᠢᠲᠠᠳ ᠪᠢᠴᠢᠭ ᠲᠣᠷ ᠪᠠᠶᠠᠨ ᠭᠦᠢᠯᠡᠰᠦ ᠭᠡᠮᠡᠨ ᠪᠢᠴᠢᠵᠦ ᠪᠠᠢᠭᠰᠠᠨ ᠨᠢ ᠪᠤᠷᠤᠭᠤ ᠪᠢᠴᠢᠭᠰᠡᠨ ᠮᠠᠭᠠᠳ ᠦᠭᠡᠢ᠂ ᠯᠢ ᠱᠢ ᠵᠧᠨ ᠦ᠌ ᠡᠪᠡᠰᠦᠨ ᠡᠮ ᠦ᠋ᠨ ᠲᠣᠪᠴᠢ ᠬᠡᠮᠡᠬᠦ ᠨᠣᠮ ᠳ᠋ᠤᠷ ᠪᠠᠳᠠᠨ ᠭᠦᠢᠯᠡᠰᠦ ᠪᠣᠯᠪᠠᠯ ᠬᠣᠲᠣᠩ ᠣᠷᠣᠨᠠ ᠠ᠋ᠴᠠ ᠭᠠᠷᠳᠠᠭ᠃ ᠲᠡᠭᠦᠨ ᠦ᠌ ᠮᠣᠳᠣ ᠨᠢ ᠭᠦᠢᠯᠡᠰᠦᠨ ᠮᠣᠳᠣ ᠯᠤᠭᠠ ᠠᠳᠠᠯᠢᠪᠲᠤᠷ ᠪᠣᠯᠪᠠᠴᠤ᠂ ᠨᠠᠪᠴᠢ ᠨᠢ ᠪᠠᠬᠠᠨ ᠪᠠᠭᠠ᠂ ᠴᠥᠮᠡ ᠨᠢ ᠬᠠᠲᠠᠭᠤᠯᠢᠭ ᠪᠥᠭᠡᠳ ᠮᠢᠬᠠ ᠨᠢ ᠨᠢᠮᠭᠡᠨ᠂ ᠡᠨᠡ ᠪᠣᠯ ᠠᠮᠲᠠᠯᠢᠭ ᠰᠠᠢᠬᠠᠨ ᠠᠮᠲᠠᠲᠠᠢ᠂ ᠴᠠᠢ ᠶ᠋ᠢᠨ ᠳᠣᠲᠣᠷᠠ ᠲᠠᠯᠪᠢᠵᠤ ᠢᠳᠡᠬᠦᠢ ᠳ᠋ᠦ᠍ᠷ ᠰᠢᠳ ᠦ᠋ᠨ ᠠᠮᠲᠠᠲᠠᠢ ᠬᠡᠮᠡᠪᠡ᠃ ᠵᠢᠴᠢ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠪᠢᠰᠳᠠ ᠬᠡᠮᠡᠭᠴᠢ ᠶ᠋ᠢ ᠯᠢ ᠱᠢ ᠵᠧᠨ ᠦ᠌ ᠡᠪᠡᠰᠦᠨ ᠡᠮ ᠦ᠋ᠨ ᠲᠣᠪᠴᠢ ᠬᠡᠮᠡᠬᠦ ᠨᠣᠮ ᠳ᠋ᠤᠷ᠂ ᠬᠤᠪᠢᠯᠠᠢ ᠶ᠋ᠢᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠵᠢᠩᠬᠢᠨᠢ ᠲᠣᠪᠴᠢ ᠭᠡᠳᠡᠭ ᠪᠢᠴᠢᠭ ᠲᠣᠷ᠄ ᠠᠮᠲᠠᠯᠢᠭ ᠠᠮᠲᠠ ᠲᠠᠢ ᠬᠣᠣᠷ ᠦᠭᠡᠢ᠂ ᠬᠣᠳᠣᠭᠣᠳᠣ ᠳᠡᠯᠢᠭᠦᠦ ᠶ᠋ᠢ ᠰᠠᠢᠵᠢᠷᠠᠭᠤᠯᠤᠨ ᠬᠡᠢ ᠶ᠋ᠢ ᠶᠠᠪᠤᠭᠤᠯᠵᠤ᠂ ᠡᠨᠡ ᠪᠣᠯᠪᠠᠯ ᠬᠣᠲᠠᠨ ᠣᠷᠣᠨᠠ ᠭᠠᠷᠤᠮᠤᠢ ᠭᠡᠮᠡᠨ ᠲᠡᠮᠳᠡᠭᠯᠡᠪᠡ᠃ ᠭᠠᠭᠴᠠ ᠬᠦ ᠪᠢᠰᠳᠠ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠡᠴᠡ ᠪᠢᠰᠢ ᠡᠭᠡᠨᠡᠭᠲᠡ ᠥᠭᠡᠷᠡ ᠶᠠᠮᠠᠷ ᠨᠡᠷᠡ ᠲᠡᠢ ᠪᠣᠯᠬᠤ ᠶ᠋ᠢ ᠳᠤᠷᠠᠳᠤᠭᠰᠠᠨ ᠦᠭᠡᠢ᠃)
ᠬᠠᠷᠠ ᠬᠦᠨᠵᠢᠳ ᠲᠡᠢ ᠱᠣᠣᠪᠢᠩ(ᠬᠠᠭᠰᠠᠭᠠᠮᠠᠯ ᠪᠣᠭᠣᠷᠰᠣᠭ)
ᠴᠠᠭᠠᠨ ᠭᠤᠯᠢᠷ ᠲᠠᠪᠤᠨ ᠵᠢᠩ᠂ ᠦᠨᠢᠶᠡᠨ ᠦ᠌ ᠰᠦ ᠬᠣᠶᠠᠷ ᠱᠧᠩ᠂ ᠰᠢᠷᠠ ᠲᠣᠰᠣ ᠨᠢᠭᠡ ᠵᠢᠩ᠂ ᠬᠠᠷᠠ ᠭᠦᠨᠵᠢᠳ ᠨᠢᠭᠡᠨ ᠯᠠᠩ ᠢ᠋ ᠪᠠᠬᠠᠨ ᠬᠠᠭᠤᠷᠴᠤ᠃
ᠳᠡᠭᠡᠷᠡᠬᠢ ᠵᠦᠢᠯ ᠢ᠋ ᠥᠴᠦᠬᠡᠨ ᠲᠡᠳᠦᠢ ᠳᠠᠪᠤᠰᠤ ᠬᠤᠵᠢᠷ ᠯᠤᠭᠠ ᠨᠡᠢᠯᠡᠭᠦᠯᠦᠨ ᠭᠤᠯᠢᠷ ᠤ᠋ᠨ ᠬᠠᠮᠲᠤ ᠨᠤᠬᠤᠭᠠᠳ ᠬᠠᠭᠰᠠᠭᠠᠮᠠᠯ ᠪᠣᠭᠣᠷᠰᠣᠭ ᠬᠢᠮᠦᠢ᠃
ᠦᠨᠢᠶᠡᠨ ᠰᠦ ᠶ᠋ᠢᠨ ᠱᠣᠣᠪᠢᠩ
ᠴᠠᠭᠠᠨ ᠭᠤᠯᠢᠷ ᠲᠠᠪᠤᠨ ᠵᠢᠩ᠂ ᠦᠨᠢᠶᠡᠨ ᠰᠦ ᠬᠣᠶᠠᠷ ᠱᠧᠩ᠂ ᠰᠢᠷᠠ ᠲᠣᠰᠣ ᠨᠢᠭᠡ ᠵᠢᠩ᠂ ᠪᠠᠳᠮᠠᠭᠠ ᠨᠢᠭᠡᠨ ᠯᠠᠩ ᠢ᠋ ᠪᠠᠬᠠᠨ ᠬᠠᠭᠤᠷᠤᠮᠤᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠥᠴᠦᠬᠡᠨ ᠬᠡᠮᠵᠢᠶᠡᠨ ᠦ᠌ ᠳᠠᠪᠤᠰᠤ ᠬᠤᠵᠢᠷ ᠯᠤᠭᠠ ᠨᠡᠢᠯᠡᠭᠦᠯᠵᠦ᠂ ᠭᠤᠯᠢᠷ ᠤ᠋ᠨ ᠬᠠᠮᠲᠤ ᠨᠤᠬᠤᠭᠠᠳ ᠱᠣᠣᠪᠢᠩ ᠬᠢᠮᠦᠢ᠃
ᠵᠢᠩᠨᠡᠮᠡᠯ ᠪᠣᠭᠣᠷᠰᠣᠭ
ᠴᠠᠭᠠᠨ ᠭᠤᠯᠢᠷ ᠠᠷᠪᠠᠨ ᠵᠢᠩ᠂ᠦᠷᠡᠰ ᠦ᠋ᠨ ᠲᠣᠰᠣ ᠨᠢᠭᠡᠨ ᠵᠢᠩ᠂ ᠶᠧᠷᠮᠠ ᠨᠢᠭᠡᠨ ᠯᠠᠩ ᠢ᠋ ᠬᠠᠭᠤᠷᠴᠤ᠂ ᠴᠢᠭᠢᠭ ᠢ᠋ ᠢᠨᠦ ᠭᠠᠷᠭᠠᠨ ᠪᠠᠳᠮᠠᠭᠠ ᠨᠢᠭᠡᠨ ᠯᠠᠩ ᠢ᠋ ᠬᠠᠭᠤᠷᠤᠮᠤᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠦ᠋ᠳ ᠢ᠋ ᠲᠦᠷᠦᠭᠦᠦ ᠰᠥᠨᠢ ᠳ᠋ᠦ᠍ ᠪᠡᠨ ᠢᠰᠬᠡᠭᠦᠷ ᠬᠥᠷᠥᠩᠭᠡ ᠪᠠ ᠳᠠᠪᠤᠰᠤ ᠬᠤᠵᠢᠷ ᠯᠤᠭᠠ ᠨᠡᠢᠯᠡᠭᠦᠯᠦᠨ ᠪᠦᠯᠢᠶᠡᠨ ᠤᠰᠤ ᠪᠠᠷ ᠨᠤᠬᠤᠵᠤ ᠲᠠᠯᠪᠢᠮᠤᠢ᠃ ᠳᠠᠷᠠᠭᠠ ᠡᠳᠦᠷ ᠢᠨᠤ: ᠭᠤᠯᠢᠷ ᠨᠡᠮᠡᠵᠦ ᠵᠢᠴᠢ ᠰᠠᠢᠲᠤᠷ ᠨᠤᠬᠤᠵᠤ ᠲᠣᠬᠢᠷᠠᠭᠤᠯᠤᠭᠠᠳ ᠨᠢᠭᠡ ᠵᠢᠩ ᠢ᠋ᠶ᠋ᠡᠷ ᠬᠣᠶᠠᠷ ᠪᠣᠭᠣᠷᠰᠣᠭ ᠪᠠᠷᠢᠵᠤ᠂ ᠵᠢᠩᠨᠡᠭᠦᠷ ᠲᠣᠷ ᠲᠠᠯᠪᠢᠵᠤ ᠵᠢᠩᠨᠡᠮᠦᠢ᠃
ᠪᠣᠷᠪᠢ ᠶ᠋ᠢᠨ ᠶᠠᠰᠤᠨ ᠤ᠋ ᠱᠥᠯᠥ
ᠡᠨᠡ ᠢᠨᠦ ᠭᠣᠣᠯᠳᠠᠭᠤ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶ᠋ᠢᠨ ᠲᠠᠮᠢᠷ ᠳᠣᠷᠣᠢ ᠰᠠᠪᠠ ᠶ᠋ᠢᠨ ᠬᠦᠢᠲᠡᠨ ᠢ᠋ᠶ᠋ᠡᠷ ᠲᠤᠷᠠᠩᠬᠠᠢ ᠪᠣᠯᠵᠤ᠂ ᠪᠥᠭᠡᠷᠡ ᠶ᠋ᠢᠨ ᠲᠠᠮᠢᠷ ᠪᠠᠭᠤᠷᠠᠭᠰᠠᠨ ᠢ᠋ ᠵᠠᠰᠠᠵᠤ᠂ ᠴᠢᠰᠤᠨ ᠰᠤᠳᠠᠯ ᠢ᠋ ᠰᠠᠢᠵᠢᠷᠠᠭᠤᠯᠤᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠢ᠋ ᠲᠡᠭᠰᠢᠳᠬᠡᠮᠦᠢ᠃
ᠬᠣᠨᠢ ᠶ᠋ᠢᠨ ᠪᠣᠷᠪᠢ ᠶ᠋ᠢᠨ ᠶᠠᠰᠤ ᠭᠤᠴᠢ ᠳᠥᠴᠢ ᠶ᠋ᠢ ᠤᠰᠤᠨ ᠳ᠋ᠤᠷ ᠴᠡᠪᠡᠷᠯᠡᠨ ᠤᠬᠢᠶᠠᠮᠤᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠢ᠋ ᠬᠣᠷᠪᠣ ᠲᠣᠭᠣᠭᠠᠨ ᠳ᠋ᠤᠷ ᠪᠤᠴᠠᠯᠭᠠᠨ ᠰᠥᠮᠥᠰᠦ ᠢᠨᠦ ᠳᠥᠷᠪᠡᠨ ᠦ᠌ ᠨᠢᠭᠡ ᠬᠤᠪᠢ ᠥᠯᠳᠡᠲᠡᠯᠡ ᠪᠤᠴᠠᠯᠭᠠᠭᠠᠳ ᠲᠣᠰᠣ ᠪᠠ ᠰᠢᠭᠠᠷᠤ ᠶ᠋ᠢ ᠱᠦᠭᠦᠵᠦ ᠬᠠᠶᠠᠨ᠂ ᠲᠤᠩᠭᠠᠯᠠᠭ ᠰᠥᠮᠥᠰᠦ ᠶ᠋ᠢ ᠨᠢ ᠴᠠᠷᠴᠠᠭᠠᠵᠤ ᠲᠠᠯᠪᠢᠭᠠᠳ ᠢᠳᠡᠬᠦ ᠳᠤᠷᠠᠲᠠᠢ ᠦᠶᠡ ᠳ᠋ᠡᠭᠡᠨ ᠢᠯᠡᠭᠦᠦ ᠳᠤᠲᠠᠭᠤ ᠢᠳᠡᠵᠦ ᠴᠥᠮ ᠪᠣᠯᠤᠮᠤᠢ᠃
ᠮᠢᠬᠠᠨ ᠤ᠋ ᠱᠥᠭᠦᠰᠦᠨ
ᠡᠨᠡ ᠢᠨᠦ ᠲᠠᠪᠤᠨ ᠬᠥᠨᠥᠭᠡᠯ ᠳᠣᠯᠣᠭᠠᠨ ᠭᠡᠮᠲᠦᠯ ᠪᠠ ᠴᠤᠯᠤ ᠰᠠᠪᠠ ᠶ᠋ᠢᠨ ᠬᠦᠢᠲᠡᠨ ᠬᠡᠢ ᠶ᠋ᠢ ᠵᠠᠰᠠᠳᠠᠭ ᠶᠤᠮ᠃ ᠬᠡᠷᠪᠡ ᠦᠷᠭᠦᠯᠵᠢ ᠤᠤᠭᠤᠪᠠᠰᠤ ᠰᠠᠪᠠ ᠶ᠋ᠢ ᠰᠡᠯᠪᠢᠨ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠤᠮᠤᠢ᠃
ᠡᠭᠦᠨ ᠳ᠋ᠦ᠍ ᠬᠣᠨᠢ ᠶ᠋ᠢᠨ ᠬᠣᠢᠲᠤ ᠬᠥᠯ ᠨᠢᠭᠡ ᠶ᠋ᠢ ᠰᠢᠷᠪᠥᠰᠥ ᠨᠦ᠍ᠭᠦᠳ ᠢ᠋ ᠠᠪᠴᠤ ᠬᠠᠶᠠᠭᠠᠳ ᠵᠢᠵᠢᠭ ᠬᠡᠰᠡᠭ ᠪᠣᠯᠭᠠᠨ ᠬᠡᠷᠴᠢᠮᠦᠢ᠃
ᠳᠡᠭᠡᠷᠡᠬᠢ ᠵᠦᠢᠯ ᠢ᠋ ᠴᠡᠪᠡᠷ ᠲᠣᠭᠣᠭᠠᠨ ᠳ᠋ᠤᠷ ᠲᠠᠯᠪᠢᠵᠤ ᠬᠠᠲᠠᠩᠭᠢᠷᠠᠨ ᠰᠢᠯᠵᠢᠷᠡᠲᠡᠯᠡ ᠴᠢᠨᠠᠵᠤ ᠪᠣᠯᠭᠣᠬᠤ ᠳ᠋ᠠᠭᠠᠨ ᠲᠣᠭᠣᠭᠠ ᠶ᠋ᠢ ᠪᠡᠨ ᠬᠡᠢ ᠨᠠᠪᠲᠠᠷᠠᠯ ᠦᠭᠡᠢ ᠨᠢᠭᠲᠠ ᠪᠦᠲᠡᠭᠡᠵᠦ᠂ ᠰᠡᠭᠦᠯᠡᠷ ᠢᠨᠦ ᠴᠡᠪᠡᠷ ᠪᠥᠰ ᠢ᠋ᠶ᠋ᠡᠷ ᠪᠠᠭᠯᠠᠭᠠᠳ ᠮᠤᠰᠬᠢᠨ ᠨᠤᠬᠤᠯᠬᠢᠯᠠᠵᠤ ᠪᠠᠢᠭᠠᠳ ᠰᠢᠭᠦᠰᠦ ᠶ᠋ᠢ ᠰᠢᠪᠬᠠᠵᠤ ᠠᠪᠤᠮᠤᠢ᠃
(ᠲᠠᠢᠯᠪᠤᠷᠢᠯᠠᠬᠤ ᠠᠨᠤ ᠲᠠᠪᠤᠨ ᠬᠥᠨᠥᠭᠡᠯ ᠳᠣᠯᠣᠭᠠᠨ ᠭᠡᠮᠲᠦᠯ ᠬᠡᠮᠡᠭᠴᠢ ᠢᠨᠤ ᠵᠢᠷᠦᠬᠡ᠂ ᠡᠯᠢᠭᠡ᠂ᠳᠡᠯᠢᠭᠦᠦ᠂ ᠠᠭᠤᠰᠬᠢ ᠪᠠ ᠪᠥᠭᠡᠷᠡ ᠨᠦ᠍ᠭᠦᠳ ᠦ᠋ᠨ ᠡᠪᠡᠳᠴᠢᠯᠡᠭᠰᠡᠨ ᠡᠴᠡ ᠪᠣᠯᠤᠭᠰᠠᠨ ᠬᠣᠬᠢᠷᠠᠯ ᠬᠥᠨᠥᠭᠡᠯ ᠢ᠋ ᠬᠡᠯᠡᠭᠰᠡᠨ ᠪᠣᠯᠠᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠰᠦ ᠵᠢᠷᠦᠬᠡᠨ ᠦ᠌ ᠠᠷᠬᠠᠭ ᠢ᠋ᠶ᠋ᠠᠷ ᠴᠢᠰᠤ ᠬᠥᠨᠥᠭᠡᠭᠳᠡᠬᠦ᠂ ᠡᠯᠢᠭᠡᠨ ᠦ᠌ ᠠᠷᠬᠠᠭ ᠢ᠋ᠶ᠋ᠠᠷ ᠵᠢᠪᠬᠤᠯᠠᠩ ᠬᠥᠨᠥᠭᠡᠭᠳᠡᠬᠦ᠂ ᠳᠡᠯᠢᠭᠦᠦ ᠶ᠋ᠢᠨ ᠠᠷᠬᠠᠭ ᠢ᠋ᠶ᠋ᠠᠷ ᠢᠳᠡᠭᠡᠨ ᠬᠥᠨᠥᠭᠡᠭᠳᠡᠬᠦ᠂ ᠠᠭᠤᠰᠬᠢᠨ ᠤ᠋ ᠠᠷᠬᠠᠭ ᠢ᠋ᠶ᠋ᠠᠷ ᠬᠡᠢ ᠬᠥᠨᠥᠭᠡᠭᠳᠡᠬᠦ᠂ ᠪᠥᠭᠡᠷᠡᠨ ᠦ᠌ ᠠᠷᠬᠠᠭ ᠢ᠋ᠶ᠋ᠠᠷ ᠳᠤᠰᠤᠯ ᠬᠥᠨᠥᠭᠡᠭᠳᠡᠬᠦ᠂ ᠪᠠᠰᠠ ᠬᠢᠲᠠᠳ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠵᠠᠷᠢᠮ ᠪᠢᠴᠢᠭ ᠲᠣᠷ ᠥᠭᠦᠯᠡᠭᠰᠡᠨ ᠢᠨᠤ: ᠤᠳᠠᠲᠠᠯᠠ ᠬᠠᠷᠠᠪᠠᠰᠤ ᠴᠢᠰᠤ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠤᠳᠠᠲᠠᠯᠠ ᠬᠡᠪᠲᠡᠪᠡᠰᠦ ᠲᠠᠮᠢᠷ ᠢ᠋ ᠭᠡᠮᠲᠦᠭᠡᠮᠦᠢ᠂ ᠤᠳᠠᠲᠠᠯᠠ ᠰᠠᠭᠤᠪᠠᠰᠤ ᠮᠢᠬᠠ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠤᠳᠠᠲᠠᠯᠠ ᠵᠣᠭᠰᠣᠪᠠᠰᠤ ᠶᠠᠰᠤ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠤᠳᠠᠲᠠᠯᠠ ᠠᠯᠬᠤᠪᠠᠰᠤ ᠰᠢᠷᠪᠥᠰᠥ ᠶ᠋ᠢ ᠭᠡᠮᠲᠦᠭᠡᠮᠦᠢ᠃
ᠳᠣᠯᠣᠭᠠᠨ ᠭᠡᠮᠲᠦᠯ ᠬᠡᠮᠡᠭᠴᠢ ᠄ ᠨᠢᠭᠡ ᠳ᠋ᠦ᠍ ᠬᠡᠲᠦᠷᠬᠡᠢ ᠴᠠᠳᠪᠠᠰᠤ ᠳᠡᠯᠢᠭᠦᠦ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠬᠣᠶᠠᠷ ᠲᠤ᠌ ᠶᠡᠬᠡ ᠬᠢᠯᠢᠩᠯᠡᠪᠡᠰᠦ ᠬᠡᠢ ᠠᠭᠰᠠᠵᠤ ᠡᠯᠢᠭᠡ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠭᠤᠷᠪᠠ ᠳ᠋ᠤ᠌ ᠬᠦᠴᠦᠯᠡᠨ ᠬᠦᠨᠳᠦ ᠶ᠋ᠢ ᠡᠷᠭᠦᠬᠦ ᠪᠤᠶᠤ ᠤᠳᠠᠲᠠᠯᠠ ᠨᠣᠢᠲᠠᠨ ᠭᠠᠵᠠᠷ ᠰᠠᠭᠤᠪᠠᠰᠤ ᠪᠥᠭᠡᠷᠡ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠳᠥᠷᠪᠡ ᠳ᠋ᠦ᠍ ᠬᠡᠲᠦᠷᠬᠡᠢ ᠲᠠᠭᠠᠷᠠᠵᠤ ᠪᠡᠭᠡᠷᠡᠬᠦ ᠪᠤᠶᠤ ᠬᠦᠢᠲᠡᠨ ᠤᠮᠳᠠᠭᠠᠨ ᠢ᠋ ᠤᠤᠭᠤᠪᠠᠰᠤ ᠠᠭᠤᠰᠬᠢ ᠠᠭᠤᠰᠬᠢ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠲᠠᠪᠤ ᠳ᠋ᠤ᠌ ᠰᠠᠨᠠᠭᠠ ᠰᠡᠳᠬᠢᠯ ᠬᠡᠲᠦᠷᠬᠡᠢ ᠵᠣᠪᠠᠵᠤ ᠳᠡᠩᠳᠡᠭᠦᠦ ᠪᠣᠳᠣᠯᠬᠢᠯᠠᠨ ᠰᠠᠨᠠᠭᠠᠯᠵᠠᠪᠠᠰᠤ ᠵᠢᠷᠦᠬᠡ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠵᠢᠷᠭᠤᠭᠠ ᠳ᠋ᠤ᠌ ᠪᠣᠷᠣᠭᠠᠨ ᠰᠠᠯᠬᠢᠨ ᠬᠠᠯᠠᠭᠤᠨ ᠬᠦᠢᠲᠡᠨ ᠳ᠋ᠦ᠍ ᠪᠡᠶᠡ ᠶ᠋ᠢ ᠭᠡᠮᠲᠦᠭᠡᠮᠦᠢ᠂ ᠳᠣᠯᠣᠭᠠ ᠳ᠋ᠤ᠌ ᠠᠰᠤᠷᠤ ᠶᠡᠬᠡ ᠠᠶᠤᠵᠤ ᠰᠣᠴᠢᠵᠤ᠂ ᠲᠡᠰᠴᠦ ᠶᠠᠳᠠᠪᠠᠰᠤ ᠵᠣᠷᠢᠭ ᠢ᠋ ᠭᠡᠮᠲᠦᠭᠡᠮᠦᠢ ᠬᠡᠮᠡᠵᠦᠬᠦᠢ᠃ ᠡᠨᠡ ᠢᠨᠦ ᠬᠢᠲᠠᠳ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠣᠨᠣᠯ ᠮᠥᠨ ᠪᠥᠭᠡᠳ ᠲᠠᠰᠢᠷᠠᠮ ᠳ᠋ᠤ᠌ ᠳᠠᠭᠠᠯᠳᠤᠭᠤᠯᠤᠨ ᠪᠢᠴᠢᠵᠦ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠢ᠋ ᠤᠩᠰᠢᠭᠴᠢ ᠮᠡᠷᠭᠡᠳ ᠲᠣᠯᠢᠯᠠᠮᠤ — ᠣᠷᠴᠢᠭᠤᠯᠤᠭᠴᠢ ᠠ᠋ᠴᠠ)
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ
ᠬᠢᠨᠠᠭᠴᠢ ᠄ ᠲᠤᠭᠴᠢ ᠰᠠᠷᠠᠨᠠ