ᠠᠩᠭᠠᠬᠠᠢ ᠰᠢᠪᠠᠭᠤᠨ ᠤ᠋ ᠦᠯᠢᠭᠡᠷ Ангаахай шувууны үлгэр
407ᠠᠩᠭᠠᠬᠠᠢ ᠰᠢᠪᠠᠭᠤᠨ ᠤ᠋ ᠦᠯᠢᠭᠡᠷ
ᠠᠷᠠᠳ ᠤ᠋ᠨ ᠠᠮᠠᠨ ᠦᠯᠢᠭᠡᠷ
ᠵᠠ᠊· ᠥᠭᠡᠳᠡᠯᠡᠬᠦ ᠤᠩᠰᠢᠪᠠ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠠᠩᠭᠠᠬᠠᠢ ᠰᠢᠪᠠᠭᠤ ᠪᠠᠢᠵᠤ ᠭᠡᠨᠡ
ᠠᠭᠢ ᠶ᠋ᠢᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣᠨ ᠤ᠋ ᠳᠡᠭᠡᠷᠡ
ᠠᠯᠲᠠᠨ ᠫᠢᠯᠠ ᠰᠢᠭ᠋ ᠰᠠᠢᠬᠠᠨ ᠡᠭᠦᠷ ᠢ᠋ ᠪᠠᠷᠢᠭᠠᠳ ᠠᠮᠤᠷ ᠲᠠᠢᠪᠤᠩ ᠰᠠᠭᠤᠳᠠᠭ ᠪᠠᠢᠯᠠ᠃
ᠤᠳᠠᠯ ᠦᠭᠡᠢ ᠠᠩᠭᠠᠬᠠᠢ ᠰᠢᠪᠠᠭᠤ ᠥᠰᠴᠦ ᠲᠣᠮᠣ ᠪᠣᠯᠤᠭᠠᠳ ᠠᠷᠪᠠᠨ ᠭᠤᠷᠪᠠᠨ ᠥᠨᠳᠡᠭᠡ ᠭᠠᠷᠭᠠᠵᠤ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠠᠷᠤ ᠶ᠋ᠢᠨ ᠤᠯᠠᠭᠠᠨ ᠦᠨᠡᠭᠡ ᠲᠣᠭᠣᠷᠢᠨ ᠶᠠᠪᠤᠭᠰᠠᠭᠠᠷ
ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣᠨ ᠤ᠋ ᠳᠣᠣᠷᠠ ᠢᠷᠡᠵᠦ ᠪᠠᠶᠠᠷ ᠪᠠᠶᠠᠰᠤᠯ ᠢ᠋ᠶ᠋ᠠᠷ ᠪᠢᠯᠬᠠᠭᠰᠠᠨ ᠰᠢᠪᠠᠭᠤ ᠳ᠋ᠤ᠌ ᠬᠠᠨᠳᠤᠵᠤ
《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠲᠠ ᠠᠷᠪᠢᠨ ᠶᠡᠬᠡ ᠥᠨᠳᠡᠭᠡᠨ ᠡᠴᠡ ᠪᠡᠨ ᠦᠨᠡᠭᠡ ᠨᠠᠳᠠ ᠨᠢᠭᠡ ᠬᠣᠶᠠᠷᠬᠠᠨ ᠢ᠋ ᠥᠭᠭᠦᠭᠡᠴᠢ!》 ᠭᠡᠯᠡ᠃
ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠥᠳᠥ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠪᠢᠭᠡᠳ ᠦᠨᠡᠭᠡ ᠳ᠋ᠦ᠍᠄
《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠪᠢ ᠠᠷᠪᠠᠨ ᠭᠤᠷᠪᠠᠨ ᠥᠨᠳᠡᠭᠡ ᠡᠴᠡ ᠪᠡᠨ
ᠦᠨᠡᠭᠡ ᠴᠢᠮᠠ ᠳ᠋ᠤ᠌ ᠥᠭᠬᠦ ᠶ᠋ᠢ ᠪᠤᠤ ᠬᠡᠯᠡ ᠬᠠᠭᠠᠨ ᠡᠵᠡᠨ ᠢᠷᠡᠵᠦ ᠭᠤᠶᠤᠭᠰᠠᠨ ᠴᠤ᠌ ᠪᠢ
ᠥᠨᠳᠡᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠥᠭᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠯᠡ᠃
ᠦᠨᠡᠭᠡ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠠᠭᠤᠷᠯᠠᠵᠤ᠄《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠴᠢ ᠥᠨᠳᠡᠭᠡ ᠡᠴᠡ ᠪᠡᠨ ᠥᠭᠬᠦ ᠦᠭᠡᠢ ᠪᠣᠯ ᠦᠨᠡᠭᠡ ᠪᠢ
ᠠᠯᠤᠰ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠵᠤ ᠨᠠᠭᠠᠳᠤ ᠮᠠᠭᠤ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠴᠢᠨᠢ ᠬᠤᠭᠤ ᠮᠥᠷᠭᠥᠨᠡ》 ᠭᠡᠬᠦ ᠳ᠋ᠦ᠍᠃
ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠰᠠᠨᠳᠤᠷᠴᠤ᠄《 ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠮᠢᠨᠢ
ᠬᠤᠭᠤ ᠮᠥᠷᠭᠥᠬᠦ ᠶᠤᠮ ᠪᠣᠯ ᠠᠷᠪᠠᠨ ᠭᠤᠷᠪᠠᠨ ᠥᠨᠳᠡᠭᠡ ᠮᠢᠨᠢ
ᠬᠠᠭᠠᠷᠠᠵᠤ ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠪᠢ ᠪᠠᠶᠠᠷ ᠬᠥᠷ ᠦᠭᠡᠢ ᠪᠣᠯᠵᠤ ᠭᠤᠨᠢᠭ ᠵᠣᠪᠠᠯᠠᠩ ᠨᠠᠮᠠ ᠶ᠋ᠢ ᠪᠦᠷᠬᠦᠨᠡ᠃
ᠠᠷᠪᠠᠨ ᠭᠤᠷᠪᠠᠨ ᠥᠨᠳᠡᠭᠡ ᠪᠡᠨ ᠬᠠᠭᠠᠯᠤᠭᠤᠯᠤᠭᠰᠠᠨ ᠣᠷᠣᠨ ᠳ᠋ᠤ᠌ ᠨᠢᠭᠡ ᠥᠨᠳᠡᠭᠡ ᠪᠡᠨ ᠬᠠᠭᠠᠯᠤᠭᠤᠯᠤᠭᠰᠠᠨ ᠳᠡᠭᠡᠷᠡ ᠪᠢᠰᠢ ᠤᠤ?》 ᠭᠡᠵᠦ ᠪᠣᠳᠣᠭᠠᠳ ᠬᠥᠭᠡᠷᠦᠬᠦᠢ ᠰᠢᠪᠠᠭᠤ ᠨᠢᠭᠡ ᠥᠨᠳᠡᠭᠡ ᠪᠡᠨ ᠮᠣᠳᠣᠨ ᠠ᠋ᠴᠠ ᠤᠨᠠᠭᠠᠬᠤ ᠳ᠋ᠤ᠌
ᠳᠣᠣᠷᠠ ᠠ᠋ᠴᠠ ᠨᠢ ᠵᠠᠯᠢᠲᠤ ᠦᠨᠡᠭᠡ ᠰᠢᠭᠦᠷᠡᠴᠦ ᠠᠪᠤᠭᠠᠳ ᠶᠠᠪᠤᠵᠤ ᠣᠳᠤᠯᠠ᠃
ᠨᠢᠭᠡᠮᠦᠰᠦᠨ ᠥᠨᠳᠡᠭᠡᠨ ᠦ᠌ ᠠᠮᠲᠠᠨ ᠳ᠋ᠤ᠌ ᠨᠢ ᠣᠷᠣᠭᠰᠠᠨ ᠵᠠᠯᠢᠲᠤ ᠦᠨᠡᠭᠡ
ᠡᠳᠦᠷ ᠪᠦᠷᠢ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠲᠡᠢ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠣᠣᠷᠠ ᠢᠷᠡᠵᠦ᠄
《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠲᠠ ᠥᠨᠳᠡᠭᠡᠨ ᠡᠴᠡ ᠪᠡᠨ ᠥᠭᠬᠦ ᠦᠭᠡᠢ ᠶᠤᠮ ᠪᠣᠯ ᠦᠨᠡᠭᠡ ᠪᠢ ᠠᠯᠤᠰ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠵᠤ ᠨᠠᠭᠠᠳᠤ ᠮᠠᠭᠤ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠴᠢᠨᠢ ᠬᠤᠭᠤ ᠮᠥᠷᠭᠥᠨᠡ》 ᠭᠡᠵᠦ
ᠠᠶᠤᠯᠭᠠᠭᠰᠠᠭᠠᠷ ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤᠨ ᠤ᠋ ᠥᠨᠳᠡᠭᠡ ᠶ᠋ᠢ ᠨᠢᠭᠡ ᠨᠢᠭᠡ ᠪᠡᠷ ᠠᠪᠴᠤ
ᠡᠴᠦᠰ ᠲᠡᠭᠡᠨ ᠬᠥᠭᠡᠷᠦᠬᠦᠢ ᠰᠢᠪᠠᠭᠤ ᠳᠣᠯᠣᠭᠠᠨ ᠥᠨᠳᠡᠭᠡ ᠲᠡᠢ ᠦᠯᠡᠳᠡᠵᠦ ᠭᠡᠨᠡ᠃
ᠨᠢᠭᠡᠨ ᠨᠠᠷᠠ ᠮᠠᠨᠳᠤᠭᠰᠠᠨ ᠥᠷᠯᠥᠭᠡ ᠠᠭᠢ ᠶ᠋ᠢᠨ ᠥᠨᠳᠥᠷ ᠠᠭᠤᠯᠠᠨ ᠤ᠋
ᠠᠷᠪᠠᠨ ᠬᠣᠶᠠᠷ ᠰᠠᠯᠠᠭᠠ ᠡᠪᠡᠷ ᠲᠡᠢ ᠪᠤᠭᠤ ᠲᠤᠩᠭᠠᠯᠠᠭ ᠪᠤᠯᠠᠭ ᠤ᠋ᠨ ᠤᠰᠤ ᠪᠠᠨ ᠤᠤᠭᠤᠭᠠᠳ
ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠵᠣᠭᠰᠣᠬᠤᠯᠠᠷ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠤᠨᠢᠭ ᠵᠣᠪᠠᠯᠠᠩ ᠳ᠋ᠤ᠌ ᠠᠪᠲᠠᠭᠰᠠᠨ ᠬᠥᠭᠡᠷᠦᠬᠦᠢ ᠰᠢᠪᠠᠭᠤ᠄《 ᠠ᠋ ᠠ᠋ ᠠ᠋》 ᠭᠡᠵᠦ ᠤᠬᠢᠯᠠᠵᠤ ᠪᠠᠢᠯᠠ᠃
ᠪᠤᠭᠤ᠄《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠲᠠ ᠶᠠᠭᠠᠬᠢᠭᠠᠳ ᠭᠤᠨᠢᠭ ᠲᠤ᠌ ᠠᠪᠲᠠᠭᠳᠠᠭᠰᠠᠨ ᠶᠤᠮ ᠪᠣᠢ 》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄
ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ《 ᠪᠢ ᠠᠷᠪᠠᠨ ᠭᠤᠷᠪᠠᠨ ᠥᠨᠳᠡᠭᠡ ᠲᠡᠢ ᠪᠠᠢᠯᠠ᠃ ᠭᠡᠲᠡᠯᠡ ᠠᠷᠤ ᠶ᠋ᠢᠨ ᠤᠯᠠᠭᠠᠨ ᠦᠨᠡᠭᠡ ᠢᠷᠡᠵᠦ ᠠᠯᠤᠰ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠵᠤ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠴᠢᠨᠢ
ᠬᠤᠭᠤ ᠮᠥᠷᠭᠥᠨᠡ》 ᠭᠡᠵᠦ ᠨᠠᠮᠠ ᠶ᠋ᠢ ᠠᠶᠤᠯᠭᠠᠭᠰᠠᠭᠠᠷ ᠥᠨᠳᠡᠭᠡ ᠶ᠋ᠢ ᠮᠢᠨᠢ ᠨᠢᠭᠡ ᠨᠢᠭᠡ ᠪᠡᠷ ᠠᠪᠤᠭᠰᠠᠭᠠᠷ ᠣᠳᠣ ᠪᠢ
ᠳᠤᠯᠠᠭᠠᠬᠠᠨ ᠥᠨᠳᠡᠭᠡ ᠲᠡᠢ ᠪᠣᠯᠴᠢᠬᠠᠯᠠ᠃》《 ᠠ᠋ ᠠ᠋ ᠠ᠋᠁ 》 ᠭᠡᠵᠡᠢ᠃
ᠪᠤᠭᠤ᠄《 ᠲᠡᠭᠡᠪᠡᠯ ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡ ᠦᠭᠡ ᠵᠢᠭᠠᠵᠤ ᠥᠭᠭᠦᠶᠡ᠃ ᠦᠨᠡᠭᠡ ᠳᠠᠬᠢᠭᠠᠳ ᠢᠷᠡᠪᠡᠯ ᠢᠩᠭᠢᠵᠦ ᠠᠰᠠᠭᠤ᠃ ᠠᠯᠤᠰ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠬᠤ ᠠᠰᠢᠲᠠᠢ ᠨᠠᠢ᠍ᠮᠠᠨ ᠲᠤᠭᠤᠷᠠᠢ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ᠂ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠮᠢᠨᠢ ᠬᠤᠭᠤ ᠮᠥᠷᠭᠥᠬᠦ ᠡᠪᠡᠷ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ》 ᠭᠡᠳ ᠣᠢ ᠳᠤᠮᠳᠠᠭᠤᠷ ᠶᠠᠪᠤᠭᠠᠳ ᠦᠭᠭᠦᠵᠡᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠵᠠᠯᠢᠲᠤ ᠦᠨᠡᠭᠡ ᠳᠠᠬᠢᠭᠠᠳ ᠢᠷᠡᠵᠦ᠄《 ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠲᠠ ᠥᠨᠳᠡᠭᠡ ᠡᠴᠡ ᠪᠡᠨ ᠨᠢᠭᠡ ᠶ᠋ᠢ ᠥᠭᠭᠦᠭᠡᠴᠢ》 ᠭᠡᠬᠦᠯᠡᠷ᠂
《 ᠠᠯᠤᠰ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠬᠤ ᠨᠠᠢ᠍ᠮᠠᠨ ᠲᠤᠭᠤᠷᠠᠢ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ᠂ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠮᠢᠨᠢ ᠬᠤᠭᠤ ᠮᠥᠷᠭᠥᠬᠦ ᠡᠪᠡᠷ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ 》ᠭᠡᠵᠦ ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ ᠬᠡᠯᠡᠨᠡ᠃
ᠦᠨᠡᠭᠡ《 ᠡᠨᠡ ᠦᠭᠡ ᠶ᠋ᠢ ᠴᠢᠮᠠ ᠳ᠋ᠤ᠌ ᠶᠠᠮᠠᠷ ᠠᠮᠢᠲᠠᠨ ᠬᠡᠯᠡᠭᠰᠡᠨ ᠪᠣᠢ》 ᠭᠡᠵᠦ ᠰᠦᠷᠳᠡᠭᠦᠯᠬᠦ ᠳ᠋ᠦ᠍ ᠪᠠᠶᠠᠰᠬᠤᠯᠠᠩᠲᠤ ᠰᠢᠪᠠᠭᠤ《 ᠡᠨᠡ ᠦᠭᠡ ᠶ᠋ᠢ ᠪᠣᠯ ᠠᠷᠪᠠᠨ ᠬᠣᠶᠠᠷ ᠰᠠᠯᠠᠭᠠ ᠡᠪᠡᠷ ᠲᠡᠢ ᠪᠤᠭᠤ ᠨᠠᠮᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠶᠤᠮ》 ᠭᠡᠯᠡ᠃
ᠵᠠᠯᠢᠲᠤ ᠦᠨᠡᠭᠡ ᠪᠤᠭᠤ ᠶ᠋ᠢ ᠣᠯᠬᠤ ᠪᠠᠷ ᠣᠢ ᠳᠤᠮᠳᠠᠭᠤᠷ ᠱᠣᠭᠰᠢᠨ ᠣᠳᠪᠠ᠃
ᠦᠨᠡᠭᠡ ᠶᠠᠪᠤᠭᠰᠠᠭᠠᠷ ᠦᠬᠦᠭᠰᠡᠨ ᠮᠠᠯ ᠤ᠋ᠨ ᠰᠡᠭ ᠳᠡᠭᠡᠷᠡ ᠬᠦᠷᠴᠦ ᠣᠴᠢᠭᠠᠳ
ᠢᠳᠡᠰᠢ ᠬᠠᠢᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠠᠩᠴᠢᠨ ᠤ᠋ ᠬᠠᠪᠬᠠ ᠳ᠋ᠤ᠌
ᠣᠷᠣᠴᠢᠬᠠᠵᠠᠢ ᠭᠡᠨᠡ᠃
ᠡᠭᠦᠨ ᠡᠴᠡ ᠬᠣᠢᠰᠢ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣᠨ ᠤ᠋ ᠳᠡᠭᠡᠷᠡ ᠠᠯᠲᠠᠨ ᠫᠢᠯᠠ ᠰᠢᠭ᠋ ᠰᠠᠢᠬᠠᠨ ᠡᠭᠦᠷ ᠲᠡᠢ ᠰᠢᠪᠠᠭᠤ ᠠᠮᠤᠷ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ ᠪᠣᠯᠤᠭᠰᠠᠨ ᠶᠤᠮ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠦᠰᠦᠭ ᠬᠠᠳᠠᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠬᠢᠨᠠᠭᠴᠢ᠄ ᠰᠣᠨᠢᠨᠪᠠᠶᠠᠷ