ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠬᠡᠯᠡ -ᠳ·ᠪᠠᠭᠠᠲᠤᠷGaikhamshigt mongol khel-D·BaatarГайхамшигт монгол хэл-Д·Баатар
399ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠬᠡᠯᠡ
ᠵᠣᠬᠢᠶᠠᠭᠴᠢ᠄ ᠳ·ᠪᠠᠭᠠᠲᠤᠷ
ᠤᠶᠠᠩᠭᠠᠯᠠᠭᠴᠢ᠄ ᠰᠤᠷᠤᠨᠠ
ᠤᠯᠠᠭᠠᠨ ᠨᠢᠯᠬᠠ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠰᠣᠨᠣᠰᠴᠤ ᠳᠠᠰᠤᠭᠰᠠᠨ ᠬᠡᠯᠡ ᠮᠢᠨᠢ
ᠤᠬᠠᠭᠠ ᠲᠥᠬᠥᠭᠡ ᠣᠷᠣᠩᠭᠤᠲᠠ ᠨᠢᠳᠦᠯᠡᠵᠦ ᠤᠩᠰᠢᠭᠰᠠᠨ ᠪᠢᠴᠢᠭ ᠮᠢᠨᠢ
ᠤᠷᠭᠤᠬᠤ ᠨᠠᠷᠠᠨ ᠤ᠋ ᠭᠠᠷᠠᠭ ᠲᠤ᠌《 ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠦᠯᠡᠳᠡᠭᠡᠭᠰᠡᠨ
ᠤᠴᠢᠷ ᠨᠢᠭᠤᠴᠠᠭᠠᠢ ᠰᠤᠷᠪᠤᠯᠵᠢ ᠲᠠᠢ ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠰᠣᠶᠣᠯ ᠮᠢᠨᠢ
ᠠᠽᠢᠶᠠ ᠶ᠋ᠢᠨ ᠣᠯᠠᠨ ᠨᠡᠭᠦᠳᠡᠯᠴᠢᠳ ᠡᠴᠡ ᠣᠢ ᠪᠢᠯᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠣᠳᠣᠷᠠᠵᠤ
ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠲᠠᠢ ᠱᠠᠰᠲᠢᠷ ᠲᠤ᠌ ᠮᠥᠩᠬᠡᠷᠡᠭᠰᠡᠨ ᠲᠡᠦᠬᠡ ᠮᠢᠨᠢ
ᠠᠪᠤᠷᠭᠤ ᠳᠡᠯᠡᠬᠡᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠵᠡᠨᠲᠦ ᠭᠦᠷᠦᠨ ᠢ᠋ᠶ᠋ᠡᠨ ᠴᠣᠭᠴᠠᠯᠠᠵᠤ
ᠠᠯᠲᠠᠨ ᠫᠠᠢᠵᠠ ᠲᠠᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠣᠢᠭᠲᠠᠨ ᠢ᠋ ᠰᠥᠭᠥᠳᠬᠡᠭᠰᠡᠨ ᠠᠯᠳᠠᠷ ᠮᠢᠨᠢ
ᠪᠤᠭᠤᠷᠤᠯ ᠠᠯᠲᠠᠢ ᠶ᠋ᠢᠨ ᠪᠠᠯ ᠳ᠋ᠤ᠌ ᠲᠠᠲᠠᠲᠤᠩᠭᠠ ᠶ᠋ᠢᠨ ᠡᠪᠦᠷ ᠡᠴᠡ
ᠪᠤᠷᠬᠠᠨ ᠲᠩᠷᠢ ᠶ᠋ᠢᠨ ᠬᠠᠢᠷᠠᠯᠠᠭᠰᠠᠨ ᠠᠯᠲᠠᠨ ᠪᠠᠷᠢᠭᠤᠯ ᠲᠠᠢ ᠲᠠᠮᠠᠭᠠ
ᠬᠠᠭᠠᠨ ᠴᠢᠩᠭᠢᠰ ᠦ᠋ᠨ ᠰᠣᠶᠣᠷᠬᠠᠯ ᠢ᠋ᠶ᠋ᠠᠷ ᠣᠷᠣᠢ ᠲᠡᠷᠢᠭᠦᠨ ᠳ᠋ᠦ᠍ ᠬᠦᠨᠳᠦᠯᠡᠭᠳᠡᠵᠦ
ᠬᠠᠮᠤᠭ ᠮᠣᠩᠭᠣᠯ ᠳ᠋ᠤ᠌ ᠲᠠᠷᠬᠠᠭᠰᠠᠨ ᠮᠥᠩᠬᠡ ᠨᠠᠰᠤᠲᠤ ᠬᠤᠳᠤᠮ
ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠤ᠋ ᠰᠤᠳᠤᠷ ᠠ᠋ᠴᠠ ᠫᠠᠭᠪᠠ ᠯᠠᠮᠠ ᠶ᠋ᠢᠨ ᠤᠯᠠᠷᠢᠭᠤᠯᠤᠭᠰᠠᠨ
ᠴᠠᠭᠠᠵᠠ ᠵᠠᠷᠯᠢᠭ ᠶᠠᠪᠤᠭᠤᠯᠤᠭᠴᠢ ᠶᠤᠸᠠᠨ ᠭᠦᠷᠦᠨ ᠦ᠌ ᠳᠥᠷᠪᠡᠯᠵᠢᠨ
ᠠᠷᠤ ᠡᠮᠦᠨᠡ ᠶ᠋ᠢ ᠵᠠᠭᠠᠭᠯᠠᠭᠰᠠᠨ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠠ᠋ᠴᠠ
ᠠᠶᠤᠰᠢ ᠭᠦᠦᠰᠢ ᠶ᠋ᠢᠨ ᠵᠣᠬᠢᠶᠠᠭᠰᠠᠨ ᠬᠠᠷᠠᠴᠢᠨ ᠣᠪᠣᠭ ᠤ᠋ᠨ ᠠᠯᠢ ᠭᠠᠯᠢ
ᠵᠠᠬᠠ ᠬᠥᠪᠡᠭᠡ ᠨᠢ ᠮᠠᠨᠠᠨᠲᠤᠭᠰᠠᠨ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠢᠵᠠᠭᠠᠷ ᠠ᠋ᠴᠠ
ᠵᠠᠶᠠ ᠪᠠᠨᠳᠢᠳᠠ ᠶ᠋ᠢᠨ ᠲᠤᠭᠤᠷᠪᠢᠭᠰᠠᠨ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠲᠣᠳᠣ
ᠥᠭᠯᠢᠭᠡ ᠪᠤᠶᠠᠨ ᠤ᠋ ᠰᠢᠳᠢ ᠶ᠋ᠢ ᠬᠠᠯᠬᠠ ᠲᠤᠶᠠᠭᠠᠷᠲᠤ ᠰᠠᠴᠤᠷᠠᠭᠤᠯᠤᠭᠰᠠᠨ
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠨᠣᠮ ᠤ᠋ᠨ ᠭᠡᠷᠡᠯᠲᠦ ᠰᠣᠶᠣᠩᠪᠣ
ᠴᠡᠩᠬᠡᠷ ᠪᠠᠢᠭᠠᠯᠢ ᠶ᠋ᠢᠨ ᠪᠣᠷᠭᠢᠶᠠᠨ ᠠ᠋ᠴᠠ ᠤᠳᠬᠠ ᠶ᠋ᠢᠨ ᠰᠢᠳᠢ ᠶ᠋ᠢ ᠣᠯᠵᠤ
ᠴᠡᠴᠡᠨ ᠮᠡᠷᠭᠡᠳ ᠦ᠋ᠨ ᠵᠣᠬᠢᠶᠠᠭᠰᠠᠨ ᠬᠣᠷᠢ ᠪᠤᠷᠢᠶᠠᠳ ᠤ᠋ᠨ ᠸᠠᠭᠢᠨᠳᠠᠷᠠ
ᠬᠤᠪᠢᠰᠬᠠᠯᠲᠤ ᠮᠣᠩᠭᠣᠯ ᠤ᠋ᠨ ᠡᠷᠳᠡᠮᠲᠡᠨ ᠳᠠᠮᠳᠢᠨᠰᠦ᠋ᠷᠦᠩ ᠦ᠋ᠨ ᠴᠡᠭᠡᠵᠢᠨ ᠡᠴᠡ
ᠬᠣᠷᠢᠳᠤᠭᠠᠷ ᠵᠠᠭᠤᠨ ᠳ᠋ᠤ᠌ ᠮᠡᠨᠳᠦᠯᠡᠭᠰᠡᠨ ᠰᠸᠯᠸ ᠪᠢᠴᠢᠭ ᠦ᠋ᠨ ᠺᠢᠷᠢᠯ
ᠠᠭᠤᠳᠠᠮ ᠰᠠᠨᠰᠠᠷ ᠤ᠋ᠨ ᠭᠦᠨ ᠳ᠋ᠦ᠍ ᠡᠭᠡᠰᠢᠭ ᠨᠢ ᠴᠤᠤᠷᠢᠶᠠᠳᠠᠭᠰᠠᠨ ᠬᠡᠯᠡ ᠮᠢᠨᠢ
ᠤᠷᠠᠨ ᠰᠠᠨᠠᠭᠠᠨ ᠤ᠋ ᠣᠷᠴᠢᠯᠠᠩ ᠳ᠋ᠤ᠌ ᠴᠠᠴᠤᠯᠭᠠ ᠨᠢ ᠨᠠᠮᠢᠷᠠᠭᠰᠠᠨ ᠪᠢᠴᠢᠭ ᠮᠢᠨᠢ
ᠤᠶᠠᠩᠭᠠ ᠨᠠᠢᠷᠠᠭ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍《 ᠭᠡᠰᠡᠷ》᠂《 ᠵᠠᠩᠭᠠᠷ》 ᠬᠠᠢᠯᠠᠭᠰᠠᠨ
ᠤᠳᠬᠠ ᠭᠦᠢᠴᠡᠳ ᠠᠶᠠᠯᠭᠤ ᠲᠠᠢ ᠭᠠᠢᠬᠠᠮᠰᠢᠭᠲᠤ ᠮᠣᠩᠭᠣᠯ ᠬᠡᠯᠡ ᠮᠢᠨᠢ
ᠬᠣᠯᠠ ᠶ᠋ᠢᠨ ᠲᠡᠷᠲᠡᠭᠡᠬᠢ ᠡᠷᠢᠨ ᠡᠴᠡ ᠰᠢᠳᠤᠷᠭᠤ ᠠᠷᠠᠨᠰᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠢᠯᠭᠠᠷᠠᠵᠤ
ᠬᠣᠷᠢᠨ ᠨᠢᠭᠡᠳᠦᠭᠡᠷ ᠵᠠᠭᠤᠨ ᠳ᠋ᠤ᠌ ᠮᠣᠷᠢ ᠲᠠᠢ ᠣᠷᠣᠭᠰᠠᠨ ᠵᠣᠷᠢᠭ ᠮᠢᠨᠢ
ᠬᠣᠷᠸᠠ ᠶ᠋ᠢᠨ ᠰᠡᠭᠡᠷ ᠨᠢᠷᠤᠭᠤᠨ ᠳᠡᠭᠡᠷᠡ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠬᠠᠩᠭᠢᠨᠠᠭᠤᠯᠵᠤ
ᠬᠣᠵᠢᠮ ᠮᠠᠷᠭᠠᠰᠢ ᠬᠡᠵᠢᠶᠡ ᠴᠦ᠍ ᠪᠣᠯᠤᠭᠰᠠᠨ ᠪᠣᠰᠤᠭᠠ ᠪᠢᠴᠢᠭᠳᠡᠬᠦ ᠨᠡᠷᠡ ᠮᠢᠨᠢ
ᠳᠣᠯᠣᠭᠠᠬᠠᠨ ᠡᠭᠡᠰᠢᠭ ᠡᠴᠡ ᠪᠦᠲᠦᠭᠰᠡᠨ ᠢᠷᠠᠭᠤ ᠰᠠᠢᠬᠠᠨ ᠬᠡᠯᠡ ᠪᠡᠨ
ᠳᠣᠯᠣᠭᠠᠬᠠᠨ ᠨᠣᠲ ᠢ᠋ᠶ᠋ᠠᠷ ᠪᠦᠲᠦᠳᠡᠭ ᠳᠠᠭᠤᠤ ᠪᠣᠯᠭᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠬᠠᠨ ᠡᠬᠡᠰᠢᠭ ᠡᠴᠡ ᠬᠤᠪᠢᠯᠤᠭᠰᠠᠨ ᠪᠠᠶᠠᠯᠢᠭ ᠲᠠᠩᠰᠤᠭ ᠬᠡᠯᠡ ᠪᠡᠨ
ᠳᠣᠯᠣᠭᠠᠨ ᠳᠣᠯᠣᠭᠠ ᠶ᠋ᠢᠨ ᠳᠥᠴᠢ ᠶᠢᠰᠦ ᠪᠦᠭᠦᠳᠡᠭᠡᠷ ᠳᠠᠭᠤᠯᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠨ ᠳᠣᠯᠣᠭᠠ ᠶ᠋ᠢᠨ ᠪᠡᠯᠭᠡᠳᠡᠯ ᠲᠡᠢ ᠠᠭᠤᠳᠠᠮ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ
ᠳᠣᠯᠣᠭᠠ ᠨᠠᠢ᠍ᠮᠠ ᠶ᠋ᠢᠨ ᠲᠠᠪᠢᠨ ᠵᠢᠷᠭᠤᠭᠠ ᠭᠡᠵᠦ ᠭᠠᠭᠴᠠ ᠣᠷᠬᠢᠭᠠᠳ ᠶᠠᠭᠠᠬᠢᠬᠤᠪ
ᠳᠣᠯᠣᠭᠠᠨ ᠡᠬᠡᠰᠡᠭ ᠡᠴᠡ ᠬᠤᠪᠢᠯᠤᠭᠰᠠᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠦᠭᠡ ᠶ᠋ᠢ
ᠳᠣᠯᠣᠭᠠᠨ ᠵᠦᠢᠯ ᠢ᠋ᠶ᠋ᠡᠷ ᠪᠢᠴᠢᠳᠡᠭ ᠭᠠᠢᠬᠠᠮᠰᠢᠭ ᠢᠭᠲᠦᠯᠦᠯ ᠦᠭᠡᠢ ᠶᠠᠭᠠᠬᠢᠬᠤᠪ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠦᠰᠦᠭ ᠬᠠᠳᠠᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ