ᠰᠢᠨᠡ ᠮᠡᠨᠳᠦᠯᠡᠭᠰᠡᠨ ᠬᠡᠦᠬᠡᠳ ᠦ᠋ᠨ ᠢᠷᠦᠭᠡᠯShine mendelsen khüükhdiin yeröölШинэ мэндэлсэн хүүхдийн ерөөл
328ᠰᠢᠨᠡ ᠮᠡᠨᠳᠦᠯᠡᠭᠰᠡᠨ ᠬᠡᠦᠬᠡᠳ ᠦ᠋ᠨ ᠢᠷᠦᠭᠡᠯ
ᠢᠷᠦᠭᠡᠯᠴᠢ᠄ ᠪ· ᠣᠶᠤᠨᠬᠦᠦ( ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠰᠣᠶᠣᠯ ᠲᠠᠮᠢᠷ ᠤ᠋ᠨ ᠠᠵᠢᠯᠲᠠᠨ)
ᠵᠧ! ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ
ᠡᠮᠡᠭᠡ ᠳᠡᠭᠡᠳᠦᠰ ᠦ᠋ᠨ ᠡᠨᠡᠷᠢᠯ ᠢ᠋ᠶ᠋ᠡᠷ
ᠦᠷᠡ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ
ᠠᠮᠢ ᠲᠩᠷᠢ ᠶ᠋ᠢᠨ ᠠᠴᠢᠯᠠᠯ ᠢ᠋ᠶ᠋ᠠᠷ
ᠵᠠᠶᠠᠭᠠ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ
ᠽᠠᠮᠪᠤᠲᠢᠪ ᠤ᠋ᠨ ᠵᠠᠯᠠᠯᠭᠠ ᠪᠠᠷ
ᠭᠠᠯ ᠢ᠋ ᠲᠠᠨᠢ ᠵᠣᠷᠢᠵᠤ
ᠪᠦᠯᠢ ᠶ᠋ᠢ ᠲᠠᠨᠢ ᠲᠦᠰᠢᠵᠦ
ᠤᠳᠤᠮ ᠢ᠋ ᠲᠠᠨᠢ ᠪᠥᠭᠯᠡᠵᠦ
ᠤᠷᠤᠭ ᠢ᠋ ᠲᠠᠨᠢ ᠲᠡᠳᠬᠦᠵᠦ
ᠵᠠᠶᠠᠭᠠᠭᠰᠠᠨ ᠪᠢᠴᠢᠬᠠᠨ ᠨᠤᠭᠤᠨ ᠦᠷᠡ ᠶ᠋ᠢᠨ ᠲᠠᠨᠢ
ᠪᠡᠶᠡ ᠨᠢ ᠴᠢᠭᠢᠷᠠᠭ ᠪᠠᠢᠵᠤ
ᠪᠢᠯᠢᠭ ᠨᠢ ᠰᠠᠷᠠᠭᠤᠯ ᠪᠠᠢᠵᠤ
ᠬᠥᠯ ᠨᠢ ᠰᠢᠷᠣᠢ ᠭᠢᠰᠬᠢᠵᠦ
ᠭᠠᠷ ᠨᠢ ᠭᠠᠨᠵᠤᠭᠠ ᠠᠳᠬᠤᠵᠤ
ᠡᠷᠡᠭᠦᠯ ᠰᠠᠷᠠᠭᠤᠯ ᠥᠰᠴᠦ
ᠡᠷᠡ ᠶ᠋ᠢᠨ ᠴᠡᠭᠡᠨ ᠳ᠋ᠦ᠍ ᠬᠦᠷᠴᠦ
ᠡᠬᠡ ᠡᠴᠢᠭᠡ ᠳ᠋ᠡᠭᠡᠨ ᠬᠡᠰᠢᠭ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ!
ᠡᠯᠢᠭᠡᠨ ᠰᠠᠳᠤᠨ ᠳ᠋ᠠᠭᠠᠨ ᠲᠦᠰᠢᠭ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ!
ᠡᠭᠡᠯ ᠠᠷᠠᠳ ᠲᠠᠭᠠᠨ ᠡᠨᠡᠷᠢᠯ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ!
ᠡᠬᠡ ᠳᠡᠯᠡᠬᠡᠢ ᠳ᠋ᠡᠭᠡᠨ ᠡᠭᠡᠯᠢ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠬᠠᠨᠠᠲᠤ ᠭᠡᠷ ᠢ᠋ ᠲᠠᠨᠢ ᠭᠡᠢᠭᠦᠯᠦᠭᠡᠳ
ᠬᠠᠯᠠᠭᠤᠨ ᠡᠩᠭᠡᠷ ᠢ᠋ ᠲᠠᠨᠢ ᠢᠪᠢᠯᠭᠡᠭᠡᠳ
ᠪᠠᠶᠠᠷ ᠵᠢᠷᠭᠠᠯ ᠪᠢᠯᠬᠠᠭᠤᠯᠤᠭᠠᠳ
ᠪᠠᠭᠲᠠᠭᠠᠳ ᠣᠷᠣᠭᠠᠳ ᠢᠷᠡᠭᠰᠡᠨ ᠣᠯᠳᠠᠰᠢ ᠦᠭᠡᠢ
ᠣᠨᠴᠠᠭᠠᠢ ᠡᠷᠳᠡᠨᠢ ᠣᠯᠵᠠ ᠶ᠋ᠢᠨ ᠲᠠᠨᠢ
ᠣᠭᠣᠰᠣᠷ ᠨᠢ ᠪᠥᠬᠡ ᠪᠣᠯᠵᠤ
ᠣᠯᠪᠣᠭ ᠨᠢ ᠵᠤᠵᠠᠭᠠᠨ ᠪᠠᠢᠵᠤ
ᠣᠷᠢᠶᠠᠬᠤ ᠡᠭᠡᠷᠡᠬᠦ ᠰᠢᠯᠲᠠᠭ ᠦᠭᠡᠢ
ᠣᠷᠴᠢᠯᠠᠩ ᠤ᠋ᠨ ᠵᠢᠷᠭᠠᠯ ᠳ᠋ᠤ᠌ ᠪᠠᠭᠲᠠᠵᠤ
ᠠᠴᠢᠷᠬᠠᠵᠤ ᠠᠶᠤᠯᠭᠠᠯ ᠥᠬᠡᠢ
ᠠᠮᠤᠷ ᠲᠠᠢᠪᠤᠩ ᠥᠰᠴᠦ
ᠠᠷᠤ ᠳ᠋ᠠᠭᠠᠨ ᠣᠯᠠᠨ ᠳᠡᠭᠦᠦ ᠳᠠᠭᠠᠭᠤᠯᠵᠤ
ᠠᠮᠢ ᠨᠠᠰᠤᠨ ᠨᠢ ᠪᠠᠲᠤ ᠣᠷᠣᠰᠢᠵᠤ
ᠠᠪᠤ ᠡᠵᠢ ᠳ᠋ᠡᠭᠡᠨ ᠠᠴᠢᠯᠠᠯ ᠲᠠᠢ ᠦᠷᠡᠨ ᠪᠣᠯᠲᠤᠭᠠᠢ!
ᠠᠪᠠᠭᠠ ᠨᠠᠭᠠᠴᠤ ᠳ᠋ᠠᠭᠠᠨ ᠲᠦᠰᠢᠭ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ!
ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ ᠠᠪᠤᠷᠠᠯ ᠲᠠᠢ ᠦᠷᠡᠨ ᠪᠣᠯᠲᠤᠭᠠᠢ!
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠡᠭᠡᠨ ᠢᠷᠦᠭᠡᠯ ᠲᠡᠢ ᠦᠷᠡᠨ ᠪᠣᠯᠲᠤᠭᠠᠢ! ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠬᠦᠴᠦᠲᠡᠢ ᠦᠷᠡᠨ ᠪᠣᠯᠤᠭᠠᠳ
ᠬᠥᠮᠦᠨ ᠲᠥᠷᠥᠯ ᠢ᠋ ᠣᠯᠵᠠᠢ
ᠬᠦᠰᠡᠯ ᠲᠡᠢ ᠦᠷᠡᠨ ᠪᠣᠯᠤᠭᠠᠳ
ᠬᠡᠦᠬᠡᠨ ᠪᠡᠶᠡ ᠶ᠋ᠢ ᠲᠠᠨᠢ ᠬᠤᠪᠢᠶᠠᠵᠠᠢ
ᠲᠡᠩᠬᠡᠭᠡ ᠲᠡᠢ ᠦᠷᠡᠨ ᠪᠣᠯᠤᠭᠠᠳ
ᠲᠡᠨᠢᠭᠦᠨ ᠮᠣᠩᠭᠣᠯ ᠳ᠋ᠠᠭᠠᠨ ᠡᠷᠭᠢᠵᠡᠢ
ᠲᠡᠮᠳᠡᠭ ᠲᠡᠢ ᠦᠷᠡᠨ ᠪᠣᠯᠤᠭᠠᠳ
ᠲᠩᠷᠢ ᠵᠠᠶᠠᠭᠠ ᠶ᠋ᠢ ᠥᠷᠲᠡᠭᠡᠯᠡᠵᠡᠢ
ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ
ᠲᠡᠷᠢᠭᠦᠨ ᠳᠡᠭᠡᠷᠡ ᠨᠢ ᠲᠡᠷᠭᠡᠯ ᠰᠠᠷᠠᠨ ᠤ᠋ ᠭᠡᠷᠡᠯ ᠭᠡᠢᠭᠰᠡᠨ
ᠣᠷᠣᠢ ᠳᠡᠭᠡᠷᠡ ᠨᠢ ᠣᠳᠣ ᠮᠥᠴᠢᠳ ᠭᠡᠷᠡᠯ ᠲᠤᠶᠠᠭᠠᠷᠠᠭᠰᠠᠨ
ᠵᠤᠯᠠᠢ ᠳᠡᠭᠡᠷᠡ ᠨᠢ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠪᠠᠳᠮᠠᠯᠠᠭᠰᠠᠨ
ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ
ᠨᠢᠭᠤᠷ ᠲᠠᠭᠠᠨ ᠴᠣᠭ ᠲᠠᠢ
ᠰᠦᠨᠡᠰᠦᠨ ᠳ᠋ᠡᠭᠡᠨ ᠬᠦᠴᠦᠲᠡᠢ
ᠰᠦᠯᠲᠠᠨ ᠳ᠋ᠠᠭᠠᠨ ᠲᠤᠭ ᠲᠠᠢ
ᠭᠠᠷᠤᠭᠰᠠᠨ ᠡᠳᠦᠷ ᠦ᠋ᠨ ᠭᠠᠷᠠᠭ ᠨᠢ
ᠭᠠᠯ ᠭᠣᠯᠣᠮᠲᠠ ᠪᠠᠨ ᠡᠷᠭᠦᠬᠦ ᠬᠤᠪᠢ ᠲᠠᠢ
ᠲᠥᠷᠥᠭᠰᠡᠨ ᠡᠳᠦᠷ ᠦ᠋ᠨ ᠲᠥᠭᠡᠷᠭᠡ ᠨᠢ
ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠲᠦᠪᠰᠢᠳᠬᠡᠬᠦ ᠵᠠᠶᠠᠭᠠ ᠲᠠᠢ
ᠪᠠᠶᠠᠯᠢᠭ ᠶᠡᠬᠡ ᠡᠷᠳᠡᠨᠢ ᠶ᠋ᠢᠨ ᠬᠡᠰᠢᠭ ᠲᠡᠢ
ᠪᠠᠭᠰᠢᠷᠠᠭᠰᠠᠨ ᠶᠡᠬᠡ ᠰᠦᠷᠦᠭ ᠦ᠋ᠨ ᠬᠡᠰᠢᠭ ᠲᠡᠢ
ᠰᠤᠳᠤᠷ ᠶᠡᠬᠡ ᠨᠣᠮ ᠤ᠋ᠨ ᠬᠡᠰᠢᠭ ᠲᠡᠢ
ᠰᠤᠤ ᠶᠡᠬᠡ ᠡᠷᠳᠡᠮ ᠦ᠋ᠨ ᠬᠡᠰᠢᠭ ᠲᠡᠢ
ᠰᠠᠷᠠᠨ ᠤ᠋ ᠭᠡᠷᠡᠯ ᠢ᠋ᠶ᠋ᠡᠷ ᠭᠡᠢᠭᠰᠡᠨ
ᠰᠠᠷᠠᠭᠤᠯ ᠰᠠᠢᠬᠠᠨ ᠵᠢᠰᠦ ᠲᠡᠢ
ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ᠶ᠋ᠡᠷ ᠰᠠᠴᠤᠷᠠᠭᠰᠠᠨ
ᠨᠠᠷᠢᠨ ᠰᠠᠢᠬᠠᠨ ᠤᠬᠠᠭᠠᠨ ᠲᠠᠢ
ᠣᠳᠣ ᠶ᠋ᠢᠨ ᠭᠡᠷᠡᠯ ᠢ᠋ᠶ᠋ᠡᠷ ᠲᠦᠭᠡᠭᠰᠡᠨ
ᠣᠨᠴᠠ ᠮᠡᠷᠭᠡᠨ ᠣᠶᠤᠨ ᠲᠠᠢ
ᠭᠠᠯ ᠤ᠋ᠨ ᠭᠡᠷᠡᠯ ᠢ᠋ᠶ᠋ᠡᠷ ᠪᠠᠳᠠᠷᠠᠭᠰᠠᠨ
ᠭᠠᠯ ᠬᠠᠯᠠᠭᠤᠨ ᠵᠢᠷᠦᠬᠡ ᠲᠡᠢ
ᠡᠨᠡ ᠴᠠᠭ ᠤ᠋ᠨ ᠡᠵᠡᠨ ᠪᠠᠢᠬᠤ
ᠡᠩᠬᠡ ᠴᠠᠭ ᠤ᠋ᠨ ᠪᠠᠭᠠᠲᠤᠷ ᠪᠠᠢᠬᠤ
ᠥᠨᠳᠥᠷ ᠵᠠᠶᠠᠭᠠᠲᠠᠢ ᠦᠷᠡ ᠨᠢ
ᠥᠷᠭᠥᠭᠡ ᠭᠡᠷ ᠲᠦ᠍ ᠲᠠᠨᠢ ᠵᠠᠯᠠᠷᠠᠵᠠᠢ
ᠬᠠᠭᠠᠨ ᠵᠠᠶᠠᠭᠠ ᠲᠠᠢ ᠦᠷᠡ ᠨᠢ
ᠬᠠᠯᠠᠭᠤᠨ ᠭᠣᠯᠣᠮᠲᠠ ᠳ᠋ᠤ᠌ ᠲᠠᠨᠢ ᠮᠡᠨᠳᠦᠯᠡᠵᠡᠢ
ᠳᠡᠭᠡᠳᠦ ᠵᠠᠶᠠᠭᠠᠲᠤ ᠦᠷᠡ ᠨᠢ
ᠳᠡᠯᠭᠡᠷ ᠮᠣᠩᠭᠣᠯ ᠳ᠋ᠠᠭᠠᠨ ᠡᠷᠭᠢᠵᠡᠢ
ᠪᠠᠭᠠᠲᠤᠷ ᠵᠠᠶᠠᠭᠠᠲᠤ ᠦᠷᠡ ᠨᠢ
ᠪᠠᠷᠠᠭᠤᠨ ᠠᠯᠲᠠᠢ ᠳ᠋ᠠᠭᠠᠨ ᠮᠣᠷᠢᠯᠠᠵᠠᠢ
ᠤᠨᠠᠭᠰᠠᠨ ᠭᠠᠵᠠᠷ ᠤ᠋ᠨ ᠷᠠᠰᠢᠶᠠᠨ ᠤᠰᠤ ᠪᠠᠷ ᠠᠷᠢᠭᠤᠰᠬᠠᠭᠠᠳ
ᠤᠭᠤᠷᠠᠭ ᠰᠡᠭᠦᠯᠲᠦ ᠬᠣᠨᠢᠨ ᠤ᠋
ᠭᠤᠷᠪᠠᠨ ᠰᠢᠮᠡᠳᠦ ᠶ᠋ᠢᠨ ᠱᠥᠯᠥ ᠪᠡᠷ ᠤᠬᠢᠶᠠᠭᠠᠳ
ᠪᠠᠷᠠᠭᠤᠨ ᠴᠢᠬᠢᠨ ᠳ᠋ᠦ᠍ᠨᠢ ᠳᠠᠭᠤᠳᠠᠬᠤ ᠠᠯᠳᠠᠷ ᠢ᠋ ᠨᠢ ᠰᠣᠨᠣᠷᠳᠠᠭᠤᠯᠤᠭᠠᠳ
ᠪᠠᠬᠠᠲᠠᠢ ᠰᠠᠢᠬᠠᠨ ᠤᠴᠠᠷᠠᠯ ᠳᠣᠣᠷᠠ
ᠰᠢᠨᠡ ᠬᠥᠮᠦᠨ ᠦ᠌ ᠪᠡᠨ ᠬᠦᠨᠳᠦᠯᠡᠨ ᠵᠠᠯᠠᠶᠠ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠤᠬᠠᠭᠠᠨᠲᠤ ᠮᠡᠷᠭᠡᠳ ᠦ᠋ᠨ ᠦᠷᠡᠨ ᠪᠣᠯᠬᠣᠷ
ᠤᠳᠤᠮ ᠵᠠᠯᠭᠠᠭᠰᠠᠨ ᠦᠷᠭᠦᠯᠵᠢᠯᠡᠯ ᠪᠣᠯᠬᠣᠷ
ᠤᠯᠠᠭᠠᠨ ᠭᠠᠯ ᠳ᠋ᠤᠨᠢ ᠥᠯᠵᠡᠢ ᠨᠡᠮᠡᠶᠡ!
ᠤᠭ ᠤ᠋ᠨ ᠶᠡᠬᠡ ᠴᠢᠳᠠᠯ ᠢ᠋ ᠨᠢ ᠲᠡᠳᠬᠦᠶᠡ!
ᠮᠣᠷᠢᠲᠠᠨ ᠲᠦᠮᠡᠨ ᠦ᠌ ᠦᠷᠡᠨ ᠪᠣᠯᠬᠣᠷ
ᠮᠣᠬᠣᠰᠢ ᠦᠭᠡᠢ ᠵᠣᠷᠢᠭᠲᠠᠨ ᠤ᠋ ᠦᠷᠭᠦᠯᠵᠢᠯᠡᠯ ᠪᠣᠯᠬᠣᠷ
ᠵᠠᠳᠠᠭᠠᠢ ᠭᠠᠯ ᠳ᠋ᠤ᠌ ᠵᠣᠷᠢᠭ ᠢ᠋ ᠨᠢ ᠨᠡᠮᠡᠶᠡ!
ᠵᠠᠶᠠᠭᠠᠨ ᠳ᠋ᠤ᠌ ᠪᠠᠨ ᠡᠵᠡᠨ ᠰᠠᠭᠤᠬᠤ ᠵᠠᠮ ᠢ᠋ ᠨᠢ ᠲᠡᠳᠬᠦᠶᠡ!
ᠠᠭᠤᠤ ᠳᠡᠭᠡᠳᠦᠰ ᠦ᠋ᠨ ᠦᠷᠡᠨ ᠪᠣᠯᠬᠣᠷ
ᠠᠯᠲᠠᠨ ᠤᠳᠤᠮ ᠤ᠋ᠨ ᠦᠷᠭᠦᠯᠵᠢᠯᠡᠯ ᠪᠣᠯᠬᠣᠷ
ᠢᠯᠡ ᠭᠠᠯ ᠳ᠋ᠤ᠌ ᠡᠷᠴᠢᠮ ᠢ᠋ ᠨᠢ ᠨᠡᠮᠡᠶᠡ!
ᠶᠡᠬᠡ ᠬᠡᠷᠡᠭ ᠢ᠋ ᠪᠦᠲᠦᠭᠡᠬᠦ ᠡᠷᠳᠡᠮ ᠢ᠋ ᠨᠢ ᠲᠡᠳᠬᠦᠶᠡ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠳᠡᠯᠡᠬᠡᠢ ᠳ᠋ᠦ᠍ ᠶᠡᠷᠦ ᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠷᠡᠭᠰᠡᠨ ᠦᠭᠡᠢ
ᠳᠡᠭᠡᠳᠦ ᠶᠡᠬᠡ ᠲᠩᠷᠢ ᠨᠢ ᠲᠦᠰᠢᠵᠦ ᠢᠷᠡᠯᠡ
ᠳᠡᠷᠭᠡᠳᠡ ᠶ᠋ᠢᠨ ᠶᠡᠬᠡ ᠰᠠᠬᠢᠭᠤᠰᠤ ᠨᠢ ᠳᠠᠮᠨᠠᠵᠤ ᠢᠷᠡᠯᠡ
ᠳᠡᠪᠵᠢᠶᠡᠲᠦ ᠨᠠᠢ᠍ᠮᠠᠨ ᠯᠤᠤᠰ ᠨᠢ ᠲᠡᠳᠬᠦᠵᠦ ᠢᠷᠡᠯᠡ
ᠬᠠᠷᠠ ᠴᠠᠭᠠᠨ ᠲᠩᠷᠢ ᠨᠢ ᠬᠠᠮᠠᠭᠠᠯᠠᠵᠤ ᠢᠷᠡᠯᠡ
ᠬᠠᠷᠠᠭᠰᠠᠨ ᠵᠢᠭᠠᠭᠰᠠᠨ ᠲᠩᠷᠢ ᠨᠢ
ᠬᠠᠵᠠᠭᠤ ᠠ᠋ᠴᠠ ᠨᠢ ᠮᠠᠨᠠᠵᠤ ᠢᠷᠡᠯᠡ
ᠭᠠᠯ ᠤ᠋ᠨ ᠲᠩᠷᠢ ᠪᠡᠷ ᠲᠣᠰᠣᠭᠣᠯᠵᠣ ᠢᠷᠡᠯᠡ
ᠭᠠᠨᠵᠤᠭᠠ ᠬᠡᠰᠢᠭ ᠳᠦᠭᠦᠷᠡᠩ ᠢᠷᠡᠯᠡ
ᠬᠤᠪᠢᠯᠭᠠᠨ ᠲᠩᠷᠢ ᠪᠡᠷ ᠬᠦᠷᠢᠶᠡᠯᠡᠭᠦᠯᠵᠦ ᠢᠷᠡᠯᠡ
ᠬᠤᠪᠢ ᠬᠡᠰᠢᠭ ᠳᠦᠭᠦᠷᠡᠩ ᠢᠷᠡᠯᠡ
ᠬᠣᠲᠠ ᠬᠣᠲᠠ ᠪᠠᠨ ᠳᠦᠭᠦᠷᠭᠡᠬᠦ
ᠬᠣᠰᠢᠭᠤ ᠮᠠᠯ ᠨᠢ ᠳᠠᠭᠠᠵᠤ ᠢᠷᠡᠯᠡ
ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠢ᠋ ᠲᠣᠪᠴᠢᠯᠠᠬᠤ
ᠬᠤᠷᠳᠤᠨ ᠬᠦᠯᠦᠭ ᠨᠢ ᠳᠠᠪᠬᠢᠵᠤ ᠢᠷᠡᠯᠡ
ᠠᠪᠳᠠᠷᠠ ᠠᠪᠳᠠᠷᠠ ᠪᠠᠷ ᠠᠯᠲᠠ ᠡᠷᠳᠡᠨᠢᠰ ᠢ᠋ᠶ᠋ᠡᠨ ᠠᠴᠢᠭᠠᠳ ᠢᠷᠡᠯᠡ
ᠠᠷᠪᠢᠨ ᠶᠡᠬᠡ ᠬᠤᠪᠢ ᠬᠡᠰᠢᠭ ᠢ᠋ᠶ᠋ᠡᠨ ᠠᠪᠤᠭᠠᠳ ᠢᠷᠡᠯᠡ
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠢᠯᠠᠭᠤᠯᠤᠭᠰᠠᠨ ᠪᠠᠭᠠᠲᠤᠷ ᠤ᠋ᠨ ᠰᠦᠷ ᠲᠡᠢ
ᠢᠵᠠᠭᠤᠷ ᠤ᠋ᠨ ᠰᠦᠯᠳᠡ ᠲᠡᠢ
ᠠᠷᠪᠠᠨ ᠵᠦᠭ ᠲᠡᠭᠡᠨ ᠢᠪᠡᠭᠡᠯ ᠲᠡᠢ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠡᠭᠡᠨ ᠢᠷᠦᠭᠡᠯ ᠲᠡᠢ
ᠬᠤᠪᠢ ᠲᠠᠢ ᠰᠠᠢᠬᠠᠨ ᠦᠷᠡ ᠪᠡᠨ
ᠬᠤᠷᠤᠢᠯᠠᠨ ᠲᠣᠰᠤᠭᠠᠳ ᠠᠪᠴᠠᠭᠠᠶᠠ!
ᠤᠴᠢᠷ ᠲᠠᠢ ᠰᠠᠢᠬᠠᠨ ᠦᠷᠡ ᠪᠡᠨ
ᠤᠤᠬᠠᠢᠯᠠᠨ ᠲᠣᠰᠤᠭᠠᠳ ᠤᠭᠲᠤᠵᠠᠭᠠᠶᠠ!
ᠭᠠᠯ ᠭᠣᠯᠣᠮᠲᠠ ᠳ᠋ᠠᠭᠠᠨ ᠲᠠᠪᠠᠲᠠᠢ ᠮᠣᠷᠢᠯᠠᠭᠲᠤᠨ!
ᠭᠠᠵᠠᠷ ᠰᠢᠷᠣᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠭᠠᠪᠢᠶᠠᠲᠠᠨ ᠪᠣᠯᠲᠤᠭᠠᠢ!
ᠤᠳᠤᠮ ᠤᠭᠰᠠᠭᠠᠨ ᠳ᠋ᠠᠭᠠᠨ ᠲᠠᠪᠠᠲᠠᠢ ᠮᠣᠷᠢᠯᠠᠭᠲᠤᠨ!
ᠠᠭᠤᠯᠠ ᠤᠰᠤ ᠪᠠᠨ ᠲᠡᠳᠬᠦᠬᠦ ᠤᠪᠠᠳᠢᠰᠲᠠᠨ ᠪᠣᠯᠲᠤᠭᠠᠢ!
ᠠᠯᠲᠠᠢ ᠨᠤᠲᠤᠭ ᠲᠠᠭᠠᠨ ᠲᠠᠪᠠᠲᠠᠢ ᠮᠣᠷᠢᠯᠠᠭᠲᠤᠨ!
ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠠᠮᠤᠷᠵᠢᠭᠤᠯᠬᠤ ᠠᠴᠢᠲᠠᠨ ᠪᠣᠯᠲᠤᠭᠠᠢ!
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠳ᠋ᠡᠭᠡᠨ ᠲᠠᠪᠠᠲᠠᠢ ᠮᠣᠷᠢᠯᠠᠭᠲᠤᠨ!
ᠬᠥᠬᠡ ᠮᠣᠩᠭᠣᠯ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠬᠤ ᠬᠦᠴᠦᠲᠡᠨ ᠪᠣᠯᠲᠤᠭᠠᠢ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠵᠧ! ᠦᠭᠡ ᠭᠡᠳᠡᠭ ᠨᠢ ᠬᠦᠴᠦᠲᠡᠢ ᠪᠢᠯᠡ
ᠦᠢᠯᠡ ᠪᠦᠲᠦᠭᠡᠬᠦ ᠰᠢᠳᠢ ᠲᠡᠢ ᠪᠢᠯᠡ
ᠢᠷᠦᠭᠡᠯ ᠪᠦᠬᠦᠨ ᠨᠢ ᠠᠮᠢ ᠲᠠᠢ ᠪᠢᠯᠡ
ᠶᠢᠷᠲᠢᠨᠴᠦ ᠶ᠋ᠢ ᠤᠶᠠᠷᠠᠭᠠᠬᠤ ᠤᠪᠠᠳᠢᠰ ᠲᠠᠢ ᠪᠢᠯᠡ
ᠠᠷᠭᠠᠲᠤ ᠦᠨᠡᠭᠡᠨ ᠰᠠᠬᠢᠭᠤᠰᠤ ᠪᠠᠷ
ᠠᠮᠤᠭᠤᠯᠠᠩ ᠨᠣᠢᠷ ᠢ᠋ ᠨᠢ ᠥᠯᠥᠭᠡᠢᠳᠡᠶᠡ!
ᠠᠮᠠᠨ ᠤ᠋ ᠰᠠᠢᠬᠠᠨ ᠪᠡᠯᠭᠡ ᠪᠡᠷ
ᠠᠰᠢᠳᠠ ᠶ᠋ᠢᠨ ᠵᠠᠶᠠᠭᠠ ᠶ᠋ᠢ ᠨᠢ ᠮᠢᠯᠢᠶᠠᠶᠠ!
ᠪᠣᠷᠪᠢ ᠶ᠋ᠢᠨ ᠱᠥᠯᠦᠨ ᠳ᠋ᠡᠭᠡᠨ ᠪᠣᠢᠵᠢᠵᠤ ᠦᠰᠲᠦᠭᠡᠢ!
ᠪᠣᠯᠤᠭᠰᠠᠨ ᠢᠳᠡᠭᠡᠨ ᠳ᠋ᠡᠭᠡᠨ ᠪᠣᠰᠴᠤ ᠥᠨᠳᠡᠢᠲᠦᠭᠡᠢ!
ᠴᠡᠪᠡᠷ ᠠᠭᠠᠷ ᠲᠠᠭᠠᠨ ᠴᠡᠩᠭᠡᠵᠦ ᠥᠰᠲᠦᠭᠡᠢ!
ᠴᠠᠭᠠᠨ ᠢᠳᠡᠭᠡᠨ ᠳ᠋ᠡᠭᠡᠨ ᠴᠠᠳᠴᠤ ᠲᠣᠷᠨᠢᠲᠤᠭᠠᠢ!
ᠰᠢᠷᠠ ᠲᠣᠰᠣ ᠪᠠᠷ ᠪᠢᠯᠬᠠᠵᠤ
ᠰᠢᠷᠭᠠᠯ ᠴᠠᠢ ᠪᠠᠷ ᠴᠠᠯᠭᠢᠵᠤ ᠦᠰᠭᠡ!
ᠥᠷᠥᠮᠡ ᠲᠣᠰᠣ ᠪᠠᠷ ᠪᠢᠯᠬᠠᠵᠤ ᠦᠰᠭᠡ!
ᠥᠳᠬᠡᠨ ᠴᠠᠢ ᠪᠠᠷ ᠬᠠᠯᠭᠢᠵᠤ ᠦᠰᠭᠡ!
ᠲᠣᠭᠣᠨᠣᠲᠤ ᠭᠡᠷ ᠲᠦ᠍ ᠭᠠᠯ ᠨᠢ ᠪᠡᠶᠡᠰᠴᠦ
ᠲᠣᠰᠣᠲᠠᠢ ᠲᠣᠭᠣᠭᠠᠨ ᠳ᠋ᠤ᠌ ᠬᠣᠳᠣᠭᠣᠳᠣ ᠨᠢ ᠬᠠᠭᠠᠷᠠᠵᠤ
ᠵᠣᠭᠣᠭ ᠢᠳᠡᠭᠡ ᠪᠡᠷ ᠢ᠋ᠶ᠋ᠡᠨ ᠪᠢᠯᠬᠠᠭᠠᠳ
ᠵᠣᠯ ᠳᠦᠭᠦᠷᠡᠩ ᠥᠰᠬᠡᠭᠡᠳ
ᠵᠣᠪᠠᠯᠠᠩ ᠦᠷᠭᠦᠭᠡᠭᠰᠡᠨ ᠠᠯᠲᠠᠢ ᠳ᠋ᠠᠭᠠᠨ
ᠵᠢᠷᠭᠠᠯ ᠳᠦᠭᠦᠷᠡᠩ ᠥᠨᠳᠡᠢᠭᠡᠷᠡᠢ!
ᠥᠯᠵᠡᠢ ᠲᠡᠢ ᠰᠠᠢᠬᠠᠨ ᠦᠷᠡ ᠶ᠋ᠢᠨ ᠲᠠᠨᠢ
ᠥᠯᠮᠡᠢ ᠨᠢ ᠪᠠᠲᠤ ᠮᠡᠯᠮᠡᠢ ᠨᠢ ᠲᠤᠩᠭᠠᠯᠠᠭ
ᠦᠷᠭᠦᠯᠵᠢ ᠳᠡᠭᠡᠳᠦ ᠶ᠋ᠢᠨ ᠥᠭᠯᠢᠭᠡ ᠳᠣᠣᠷᠠ
ᠡᠮᠦᠨᠡᠬᠢ ᠵᠠᠮ ᠨᠢ ᠬᠡᠷᠡᠯᠳᠦᠭᠡᠳ
ᠴᠠᠭᠠᠨ ᠰᠦ ᠶ᠋ᠢᠨ ᠰᠠᠴᠤᠯᠢ ᠳᠣᠣᠷᠠ
ᠴᠠᠭᠠᠳᠤᠬᠢ ᠵᠠᠮ ᠨᠢ ᠲᠡᠭᠰᠢᠷᠡᠭᠡᠳ
ᠤᠨᠠᠭᠠᠨ ᠪᠡᠶᠡ ᠨᠢ ᠤᠪᠠᠳᠢᠰ ᠰᠢᠳᠢ ᠪᠡᠷ ᠲᠡᠳᠬᠦᠭᠳᠡᠭᠡᠳ
ᠲᠡᠭᠡᠨ ᠪᠡᠶᠡ ᠨᠢ ᠳᠠᠯᠳᠠ ᠶ᠋ᠢᠨ ᠴᠢᠳᠠᠯ ᠢ᠋ᠶ᠋ᠠᠷ ᠳᠡᠮᠨᠡᠭᠳᠡᠭᠡᠳ
ᠤᠬᠠᠭᠠᠨ ᠰᠠᠢᠨ ᠲᠠᠢ ᠨᠥᠬᠥᠷᠯᠡᠵᠦ
ᠤᠳᠤᠮ ᠰᠠᠢᠨ ᠲᠠᠢ ᠤᠷᠤᠭᠯᠠᠵᠤ
ᠬᠠᠨᠢ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠲᠦᠰᠢᠭᠦᠯᠵᠦ
ᠦᠷᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠦᠨᠳᠦᠰᠦᠯᠡᠵᠦ
ᠲᠩᠷᠢ ᠶ᠋ᠢᠨ ᠨᠠᠷᠠᠨ ᠮᠡᠲᠦ ᠪᠦᠲᠦᠨ
ᠲᠡᠷᠭᠡᠯ ᠰᠠᠷᠠᠨ ᠮᠡᠲᠦ ᠳᠦᠭᠦᠷᠡᠩ
ᠳᠡᠭᠡᠳᠦ ᠵᠠᠶᠠᠭᠠ ᠪᠠᠨ ᠳᠡᠯᠭᠡᠷᠡᠭᠦᠯᠦᠭᠡᠳ
ᠳᠡᠯᠡᠬᠡᠢ ᠳ᠋ᠦ᠍ ᠠᠯᠳᠠᠷ ᠢ᠋ᠶ᠋ᠠᠨ ᠳᠠᠭᠤᠷᠢᠰᠬᠠᠵᠤ ᠶᠠᠪᠤᠬᠤ ᠶ᠋ᠢᠨ
ᠳᠡᠭᠡᠳᠦ ᠶ᠋ᠢᠨ ᠳᠡᠭᠡᠳᠦ ᠳᠡᠮᠪᠡᠷᠢᠯ ᠢᠷᠦᠭᠡᠯ ᠢ᠋
ᠳᠡᠯᠭᠡᠨ ᠪᠠᠷᠢᠵᠤ ᠳᠡᠪᠰᠢᠭᠦᠯᠦᠨ ᠠᠢᠯᠠᠳᠬᠠᠶᠠ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵᠡᠷᠮᠦᠳ ᠸ· ᠥᠯᠵᠡᠢ