ᠬᠥᠪᠰᠥᠷ ᠪᠠᠰᠢᠷ -ᠪ· ᠲᠡᠮᠦᠷᠪᠣᠯᠣᠳKhövsör bashir-B·Tömörbold Хөвсөр башир-Б·Төмөрболд
162ᠬᠥᠪᠰᠥᠷ ᠪᠠᠰᠢᠷ
ᠮᠠᠯᠴᠢᠨ ᠢᠷᠠᠭᠤ ᠨᠠᠢᠷᠠᠭᠴᠢ᠄ ᠪ· ᠲᠡᠮᠦᠷᠪᠣᠯᠣᠳ
ᠳᠠᠷᠤᠭᠠ ᠢᠷᠡᠵᠦ ᠪᠠᠢᠴᠠᠭᠠᠬᠤ ᠴᠢᠮᠡᠭᠡ
ᠳᠠᠶᠠᠭᠠᠷ ᠤ᠋ᠨ ᠰᠣᠨᠣᠷ ᠲᠤ᠌ ᠳᠠᠭᠤᠷᠢᠰᠤᠯᠠ
ᠳᠣᠯᠳᠣᠢᠴᠢ ᠤᠳᠤᠷᠢᠳᠤᠯᠭᠠ ᠨᠤᠭᠤᠳ ᠰᠣᠨᠣᠰᠤᠩᠭᠤᠲᠠ
ᠳᠣᠣᠷᠠ ᠨᠢ ᠪᠡᠯᠡᠳᠬᠡᠬᠦ ᠶ᠋ᠢ ᠶᠠᠭᠠᠷᠠᠵᠠᠭᠠᠯᠠ
ᠮᠠᠯ ᠰᠦᠷᠦᠭ ᠦ᠋ᠨ ᠥᠰᠦᠯᠲᠡ ᠪᠡᠨ
ᠮᠠᠰᠢ ᠳᠡᠭᠡᠭᠦᠷ ᠮᠡᠳᠡᠭᠦᠯ ᠭᠡᠯᠡ
ᠮᠠᠯᠴᠢᠨ ᠲᠦᠮᠡᠨ ᠦ᠌ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ
ᠮᠠᠩᠯᠠᠢ ᠪᠠᠢᠷᠢᠨ ᠳ᠋ᠤ᠌ ᠶᠠᠷᠢ! ᠭᠡᠯᠡ
ᠡᠯᠡ ᠨᠢᠭᠡᠴᠢ ᠳ᠋ᠦ᠍ ᠤᠲᠠᠰᠤᠳᠠᠨ
ᠡᠪᠲᠡᠢ ᠠᠷᠭᠠᠴᠠᠭᠠᠬᠤ ᠶ᠋ᠢ ᠵᠠᠬᠢᠵᠠᠭᠠᠯᠠ
ᠡᠰᠡᠷᠭᠦ ᠰᠠᠨᠠᠯ ᠳᠤᠷᠠᠳᠤᠭᠰᠠᠳ ᠢ᠋
ᠡᠷᠡᠭᠡ ᠦᠭᠡᠢ ᠳᠠᠷᠤ ᠭᠡᠵᠦ ᠵᠠᠷᠯᠢᠭᠳᠠᠯᠠ
ᠪᠠᠭᠠ ᠲᠡᠷᠭᠡ ᠪᠡᠨ ᠭᠠᠯᠯᠠᠭᠠᠳ
ᠲᠠᠷᠭᠤᠨ ᠬᠣᠨᠢᠨ ᠳ᠋ᠤ᠌ ᠳᠠᠪᠬᠢᠵᠠᠭᠠᠯᠠ
ᠪᠠᠯᠪᠤᠩ ᠲᠠᠢ ᠥᠨᠵᠢᠮᠡᠯ ᠰᠤᠷᠠᠭᠯᠠᠭᠠᠳ
ᠲᠠᠩᠰᠤᠭ ᠭᠠᠴᠠᠭᠠᠨ ᠳ᠋ᠤ᠌ ᠪᠠᠭᠤᠵᠠᠭᠠᠯᠠ
ᠢᠷᠡᠵᠦ ᠪᠤᠴᠠᠬᠤ ᠵᠠᠮ ᠢ᠋ ᠨᠢ ᠬᠦᠷᠲᠡᠯᠡ
ᠢᠨᠢᠶᠡᠳᠦ ᠬᠦᠷᠦᠮᠡᠷ ᠲᠣᠬᠢᠷᠠᠭᠤᠯᠤᠯᠠ
ᠶᠠᠳᠠᠭᠤ ᠡᠷᠦᠬᠡ ᠡᠴᠡ ᠬᠣᠯᠠᠭᠤᠷ ᠭᠡᠵᠦ
ᠶᠠᠩᠭᠢᠷ ᠬᠠᠲᠠᠭᠤ ᠵᠢᠭᠠᠪᠤᠷᠢᠯᠠᠯᠠ
ᠴᠢᠨᠡᠭᠡᠯᠢᠭ ᠪᠠᠶᠠᠨ ᠬᠡᠳᠦᠨ ᠠᠢᠯ ᠳ᠋ᠤ᠌
ᠴᠢᠮᠡᠭᠡ ᠥᠭᠭᠦᠭᠡᠳ ᠲᠥᠪᠬᠢᠨᠡᠭᠦᠯᠦᠯᠡ
ᠴᠡᠬᠡ ᠰᠠᠷᠬᠤᠳ ᠳᠡᠪᠡᠯ ᠭᠤᠲᠤᠯ ᠢ᠋ ᠨᠢ
ᠴᠡᠷᠢᠭ ᠦ᠋ᠨ ᠪᠡᠯᠡᠳᠬᠡᠯ ᠰᠢᠭ᠌ ᠬᠢᠵᠡᠭᠡᠯᠡ
ᠪᠥᠭᠡᠷᠡᠩᠬᠡᠢ ᠦᠭᠡ ᠲᠡᠢ ᠨᠢᠭᠡ ᠶ᠋ᠢ ᠪᠡᠨ
ᠪᠦᠭᠦᠳᠡ ᠳᠠᠭᠠᠭᠠᠮᠠᠯ ᠢ᠋ᠶ᠋ᠠᠷ ᠲᠣᠮᠢᠯᠠᠯᠠ
ᠪᠥᠵᠢᠭᠴᠢᠨ ᠳᠠᠭᠤᠴᠢᠨ ᠬᠡᠦᠬᠡᠨ ᠨᠦ᠍ᠭᠦᠳ ᠢ᠋
ᠪᠦᠷᠢᠨ ᠴᠢᠮᠡᠵᠦ ᠪᠡᠯᠡᠳᠬᠡᠭᠦᠯᠦᠯᠡ
ᠪᠠᠢᠴᠠᠭᠠᠬᠤ ᠳᠤᠭᠤᠢᠯᠠᠩ ᠢ᠋ ᠬᠠᠭᠤᠷᠬᠤ
(ᠪᠠᠢᠯᠳᠤᠭᠠᠨ ᠤ᠋ ᠪᠡᠯᠡᠳᠬᠡᠯ) ᠢ᠋ᠶ᠋ᠡᠨ ᠳᠠᠭᠤᠰᠬᠠᠭᠠᠳ
ᠤᠬᠠᠭᠠᠯᠠᠵᠤ ᠪᠢᠴᠢᠭᠰᠡᠨ ᠮᠡᠳᠡᠭᠦᠯᠦᠯᠲᠡ ᠪᠡᠨ
ᠤᠩᠰᠢᠵᠤ ᠦᠵᠡᠭᠡᠳ ᠮᠦᠰᠢᠶᠡᠴᠢᠬᠡᠯᠡ᠃
ᠬᠠᠷᠠᠵᠤ ᠪᠠᠢᠲᠠᠯᠠ ᠭᠣᠶᠣ ᠮᠠᠰᠢᠨ ᠨᠤᠭᠤᠳ
ᠬᠠᠷᠠᠭᠠᠨ ᠤ᠋ ᠦᠵᠦᠭᠦᠷ ᠲᠣᠳᠣᠷᠠᠯᠠ
ᠵᠠ ᠲᠡᠷᠡ! ᠭᠡᠵᠦ ᠬᠡᠯᠡᠬᠦ ᠶ᠋ᠢᠨ ᠵᠠᠪᠰᠠᠷ
ᠵᠠᠰᠠᠭ ᠤ᠋ᠨ ᠶᠠᠮᠤᠨ ᠤ᠋ ᠡᠮᠦᠨᠡ ᠵᠣᠭᠰᠣᠯᠠ
ᠯᠠᠪᠠ ᠳᠠᠩᠭᠢᠨᠠᠭᠤᠯᠤᠭᠰᠠᠨ ᠵᠥᠭᠡᠯᠡᠨ ᠬᠥᠰᠬᠡ ᠨᠦ᠍ᠭᠦᠳ
ᠯᠠᠪᠢᠷ ᠬᠡᠢᠰᠬᠡᠨ ᠨᠡᠮᠡᠰᠬᠢᠨᠡ
ᠯᠠᠷᠵᠢᠶᠠ ᠲᠠᠲᠠᠭᠰᠠᠨ ᠲᠤᠰᠢᠶᠠᠯᠲᠠᠳ
ᠯᠠᠪᠳᠠᠭᠤᠨ ᠠᠯᠬᠤᠯᠠᠵᠤ ᠮᠠᠳᠠᠶ᠋ᠢᠯᠵᠠᠨᠠ
ᠰᠤᠮᠤ ᠭᠠᠴᠠᠭᠠᠨ ᠤ᠋ ᠤᠳᠤᠷᠢᠳᠤᠯᠭᠠ
ᠰᠤᠪᠤᠷᠠᠵᠤ ᠣᠴᠢᠭᠠᠳ ᠮᠡᠨᠳᠦᠴᠢᠯᠡᠨᠡ
ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠦᠬᠡᠳ ᠢ᠋ ᠳᠣᠬᠢᠵᠤ
ᠰᠣᠷᠭᠣᠭ ᠴᠡᠴᠡᠭ ᠬᠦᠷᠭᠡᠭᠦᠯᠦᠨᠡ
ᠴᠢᠷᠠᠢ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠵᠦ
ᠦᠨᠡᠨᠴᠢ ᠤᠭᠲᠤᠯᠭᠠ ᠪᠠᠨ ᠢᠯᠡᠳᠬᠡᠨᠡ
ᠴᠠᠢᠯᠠᠯᠭᠠ ᠳᠠᠢᠯᠠᠯᠭᠠ ᠤᠭᠰᠠᠷᠠᠭᠤᠯᠵᠤ
ᠦᠯᠢᠶᠡᠪᠡᠷ ᠮᠡᠳᠡᠭᠦᠯᠦᠯᠲᠡ ᠪᠡᠨ ᠢᠲᠡᠭᠡᠭᠦᠯᠦᠨᠡ
ᠰᠦ ᠲᠡᠢ ᠴᠠᠢ ᠥᠷᠥᠮᠡ ᠬᠤᠷᠤᠳ
ᠰᠡᠭᠦᠯ ᠪᠦᠳᠦᠭᠦᠨ ᠬᠣᠨᠢᠨ ᠰᠢᠭᠦᠰᠦ
ᠰᠦᠷᠡᠬᠡᠢ ᠨᠠᠮᠵᠢᠭᠤᠨ ᠮᠣᠩᠭᠣᠯ ᠠᠷᠢᠬᠢ
ᠦᠷᠬᠦᠢ ᠬᠥᠭᠡᠷᠦᠬᠦᠨ ᠦᠢᠯᠡᠴᠢᠯᠡᠭᠴᠢ ᠬᠡᠦᠬᠡᠨ
ᠵᠠᠯᠠᠷᠠᠭᠰᠠᠨ ᠳᠠᠷᠤᠭᠠ ᠶ᠋ᠢᠨ ᠨᠢᠳᠦ ᠶ᠋ᠢ ᠪᠠᠶᠠᠰᠬᠠᠨ
ᠰᠤᠯᠠᠷᠠᠭᠰᠠᠨ ᠪᠡᠶᠡ ᠶ᠋ᠢᠨ ᠬᠢᠨᠢ ᠴᠢᠯᠡᠭᠡ ᠶ᠋ᠢ ᠲᠠᠢᠯᠤᠨ
ᠬᠢ ᠬᠢ! ᠭᠡᠵᠦ ᠮᠠᠷᠰᠠᠢᠵᠤ ᠢᠨᠢᠶᠡᠭᠡᠳ
ᠬᠢᠷᠢ ᠲᠡᠩᠴᠡᠭᠰᠡᠨ ᠰᠤᠮᠤ! ᠭᠡᠵᠦ ᠡᠷᠡᠬᠡᠢ ᠱᠠᠩᠨᠠᠪᠠ
ᠪᠢᠷᠠᠭᠤ ᠨᠢ ᠡᠬᠡ ᠪᠡᠨ ᠦᠵᠡᠭᠰᠡᠨ ᠰᠢᠭ᠌
ᠪᠢᠯᠳᠠᠤᠴᠢ ᠵᠡᠷᠭᠡᠲᠡᠳ ᠤᠪ ᠲᠠᠢ ᠮᠠᠭᠠᠰᠠᠢᠵᠤ
ᠫᠢᠴᠢᠭᠢᠨᠠᠲᠠᠯᠠ ᠬᠤᠨᠳᠠᠭᠠ ᠮᠥᠷᠭᠥᠭᠦᠯᠦᠨᠡ
ᠲᠠᠴᠢᠭᠢᠨᠠᠲᠠᠯᠠ ᠠᠯᠠᠭᠠ ᠲᠠᠰᠢᠵᠠᠭᠠᠨᠠ
ᠤᠤᠵᠢ ᠮᠢᠷᠠᠯᠵᠠᠭᠤᠯᠤᠭᠰᠠᠨ ᠳᠠᠭᠤᠴᠢᠨ
ᠬᠡᠦᠬᠡᠨ ᠲᠡᠨᠳᠡ ᠤᠶᠠᠩᠭᠠᠯᠠᠨᠠ
ᠤᠨᠠᠲᠠᠯᠠ ᠵᠣᠭᠣᠭᠯᠠᠭᠰᠠᠨ ᠮᠠᠷᠢᠶᠠᠯᠢᠭ
ᠨᠣᠶᠠᠳ ᠡᠨᠳᠡ ᠬᠠᠬᠠᠯᠠᠨᠠ
ᠤᠳᠠᠬᠤ ᠦᠭᠡᠢ ᠳᠡᠭᠡᠷᠡ ᠡᠴᠡ
ᠣᠳᠣ ᠭᠡᠳ ᠬᠤᠷᠤᠭᠤ ᠭᠠᠷᠭᠠᠨᠠ
ᠤᠯᠤᠰ ᠤ᠋ᠨ ᠪᠠᠢᠷᠢᠯᠠᠭᠤᠯᠤᠯᠲᠠ ᠴᠢᠮᠠ ᠶ᠋ᠢ! ᠭᠡᠳ
ᠮᠥᠷᠥ ᠶ᠋ᠢ ᠨᠢ ᠲᠠᠪᠰᠢᠨᠠ
ᠬᠠᠷᠢᠭᠤ ᠮᠡᠳᠡᠭᠦᠯᠦᠯᠲᠡ ᠳ᠋ᠦ᠍ ᠪᠡᠨ ᠶᠠᠭᠤ ᠭᠡᠵᠦ ᠬᠡᠯᠡᠪᠡ⁈
ᠬᠠᠢᠷᠠᠲᠤ ᠤᠩᠰᠢᠭᠴᠢ ᠳ᠋ᠤ᠌ ᠪᠠᠨ ᠵᠣᠬᠢᠶᠠᠭᠴᠢ ᠪᠢ
ᠬᠠᠷᠢᠮᠠᠬᠠᠢ ᠪᠣᠯᠭᠠᠵᠤ ᠲᠣᠪᠴᠢᠬᠠᠨ ᠬᠡᠯᠡᠶᠡ!
ᠰᠤᠨᠤᠮᠠᠬᠠᠢ ᠪᠣᠯᠭᠠᠵᠤ ᠬᠡᠮᠵᠢᠵᠦ ᠥᠭᠭᠦᠶᠡ!
ᠮᠠᠩᠬᠠ ᠡᠯᠡᠰᠦ ᠪᠡᠨ ᠪᠢᠳᠡ
ᠭᠠᠩᠭᠠᠩ ᠪᠦᠷᠢᠳᠦ ᠪᠣᠯᠭᠠᠯᠠ
ᠮᠠᠯᠴᠢᠳ ᠤ᠋ᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠪᠢᠳᠡ
ᠭᠠᠢᠬᠠᠮᠰᠢᠭ ᠲᠦᠪᠰᠢᠨ ᠳ᠋ᠦ᠍ ᠬᠦᠷᠭᠡᠯᠡ
ᠮᠠᠷᠭᠠᠰᠢ ᠶ᠋ᠢᠨ ᠠᠮᠵᠢᠯᠲᠠ ᠨᠢᠭᠡᠨᠲᠡ
ᠭᠠᠷ ᠤ᠋ᠨ ᠠᠯᠠᠭᠠ ᠪᠣᠯᠤᠯᠠ
ᠠᠷᠠᠳ ᠤ᠋ᠨ ᠬᠡᠦᠬᠡᠳ ᠦ᠋ᠨ ᠶᠡᠬᠡᠩᠬᠢ ᠨᠢ
ᠠᠯᠪᠠᠨ ᠤ᠋ ᠰᠦᠢᠳᠬᠡᠯ ᠢ᠋ᠶ᠋ᠡᠷ ᠰᠤᠷᠤᠯᠴᠠᠵᠤ ᠪᠣᠢ
ᠠᠭᠰᠢᠷᠠᠭᠠ ᠵᠡᠮᠳᠡᠭ ᠲᠤᠵᠢ ᠪᠠᠷ ᠢ᠋ᠶ᠋ᠠᠨ
ᠠᠮᠤᠷ ᠵᠢᠷᠭᠠᠯᠲᠠᠢ ᠲᠡᠳᠬᠦᠭᠳᠡᠵᠦ ᠪᠣᠢ
ᠰᠤᠮᠤᠨ ᠠ᠋ᠴᠠ ᠨᠠᠮᠠ ᠶ᠋ᠢ ᠳᠡᠭᠡᠭᠰᠢᠯᠡᠭᠦᠯᠬᠦ ᠶᠤᠮ ᠪᠣᠯ
ᠰᠤᠷᠠᠭ ᠢ᠋ ᠨᠢ ᠳᠣᠭᠣᠯᠤᠭᠰᠠᠭᠠᠷ— ᠠᠷᠠᠳ ᠤᠬᠢᠯᠠᠨᠠ ᠭᠡᠳ
ᠲᠥᠷᠥ ᠶ᠋ᠢ ᠮᠡᠬᠡᠯᠡᠳᠡᠭ
ᠪᠢᠯᠳᠠᠤᠴᠢ ᠤᠬᠠᠭᠠᠨ ᠢ᠋ᠶ᠋ᠠᠨ
ᠲᠥᠪ ᠴᠢᠷᠠᠢᠯᠠᠨ
ᠪᠡᠶᠡᠯᠡᠭᠦᠯᠵᠦ ᠪᠠᠢᠯᠠ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠦᠰᠦᠭ ᠬᠠᠳᠠᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ