ᠰᠦᠯᠳᠡ ᠶᠢᠨ ᠰᠣᠶᠣᠯ ᠤᠨ ᠰᠤᠳᠤᠯᠤᠯ – ᠮᠢᠩᠵᠤᠤᠷ <ᠳᠠᠭᠠᠯᠳᠤᠭᠤᠯᠤᠯ ᠪᠦᠯᠦᠭ-1~2> Сүлдийн соёлын судлал – Минжуур<дагалдуулал бүлэг -1~2>
103ᠳᠠᠭᠠᠯᠳᠤᠭᠤᠯᠤᠯ ᠪᠦᠯᠦᠭ᠂ ᠬᠢᠨᠠᠨ ᠦᠨᠡᠯᠡᠯᠲᠡ ᠶ᠋ᠢᠨ ᠵᠣᠬᠢᠶᠠᠯ
ᠬᠢᠨᠠᠨ ᠦᠨᠡᠯᠡᠯᠲᠡ ᠶ᠋ᠢᠨ ᠵᠣᠬᠢᠶᠠᠯ ᠤ᠋ᠨ ᠡᠬᠢᠯᠡᠯᠲᠡ ᠦᠭᠡ
ᠵᠣᠬᠢᠶᠠᠭᠴᠢ
ᠨᠣᠮ ᠳ᠋ᠤ᠌ ᠥᠭᠬᠦ ᠥᠴᠢᠯ ᠦᠭᠡ
ᠬᠥᠳᠡᠯᠮᠦᠷᠢ ᠬᠥᠮᠦᠨ ᠢ᠋ ᠭᠣᠮᠣᠳᠠᠭᠠᠳᠠᠭ ᠥᠬᠡᠢ ᠭᠡᠳᠡᠭᠴᠢᠯᠡᠨ ᠬᠥᠪᠡᠭᠡᠲᠦ ᠰᠢᠷᠠ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠩᠰᠠ ᠰᠤᠸᠠᠮᠫᠠᠨ ᠪᠠᠷᠢᠵᠤ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠭᠠᠲᠤᠷ ᠴᠣᠯᠠᠯᠠᠭᠳᠠᠭᠰᠠᠨ ᠲᠡᠷᠡ᠂ ᠥᠲᠡᠯᠬᠦ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠡᠪᠦᠳᠦᠭ ᠰᠥᠬᠥᠷᠡᠵᠦ ᠠᠮᠠᠷᠠᠭᠠ ᠦᠭᠡᠢ᠂ ᠥᠪᠡᠷ ᠪᠤᠰᠤᠳ ᠢ᠋ ᠳᠠᠭᠤᠷᠢᠶᠠᠨ ᠥᠷᠥᠵᠦ ᠨᠠᠭᠠᠳᠴᠤ ᠲᠣᠭᠯᠠᠭᠠ ᠦᠭᠡᠢ᠂ ᠦᠯᠢᠭᠡᠷ ᠨᠣᠮ ᠢ᠋ ᠤᠩᠰᠢᠨ᠂ ᠦᠵᠡᠭᠰᠡᠨ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠲᠡᠮᠳᠡᠭᠯᠡᠵᠦ᠂ ᠡᠪᠦᠭᠡᠳ ᠨᠠᠰᠤᠲᠠᠨ ᠲᠠᠢ ᠵᠣᠭᠣᠭᠳᠠᠨ ᠦᠦᠭᠡ ᠲᠡᠦᠬᠡ ᠶ᠋ᠢ ᠰᠢᠨᠵᠢᠵᠦ᠂ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠲᠡᠢ ᠣᠢᠷᠠᠲᠤᠨ᠂ ᠡᠴᠢᠨᠡ ᠰᠤᠷᠭᠠᠯ ᠳ᠋ᠤ᠌ ᠰᠢᠮᠳᠠᠭᠰᠠᠨ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠬᠡᠮᠡᠬᠦ ᠦᠵᠡᠯᠲᠡ ᠲᠡᠢ ᠪᠣᠯᠵᠤ᠂ ᠡᠨᠡ ᠲᠡᠷᠡ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠡᠮᠬᠢᠳᠬᠡᠬᠦ ᠳ᠋ᠦ᠍ ᠬᠦᠷᠴᠦᠬᠦᠢ᠃
ᠡᠳᠦᠭᠡ ᠡᠷᠬᠢᠮ ᠠᠪᠤᠭᠠᠢ ᠶ᠋ᠢᠨ ᠮᠣᠩᠭᠣᠯ ᠤ᠋ᠨ ᠰᠦᠯᠳᠡ (ᠲᠤᠭ) ᠤ᠋ᠨ ᠲᠤᠬᠠᠢ ᠥᠭᠦᠯᠡᠯ ᠦ᠋ᠳ ᠨᠢ ᠨᠢᠭᠡ ᠳᠡᠪᠲᠡᠷ ᠨᠣᠮ ᠪᠣᠯᠤᠨ ᠬᠡᠪᠯᠡᠭᠳᠡᠵᠦ᠂ ᠣᠯᠠᠨ ᠤᠩᠰᠢᠭᠴᠢᠳ ᠲᠤ᠌ ᠳᠠᠬᠢᠨ ᠨᠢᠭᠤᠷ ᠵᠣᠯᠭᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠨᠠᠮᠠᠶ᠋ᠢ ᠱᠠᠯᠠᠵᠤ ᠰᠢᠭᠦᠮᠵᠢ ᠵᠣᠬᠢᠶᠠᠯ ᠪᠢᠴᠢᠵᠦ ᠥᠭᠬᠦ ᠶ᠋ᠢ ᠭᠤᠶᠤᠭᠰᠠᠨ ᠪᠢᠯᠡ᠃
ᠲᠤᠰ ᠨᠣᠮ ᠢ᠋ ᠬᠡᠪᠯᠡᠭᠦᠯᠬᠦ ᠳ᠋ᠦ᠍ ᠨᠢ ᠢᠪᠡᠭᠡᠯ ᠪᠣᠯᠭᠠᠨ ᠪᠢᠴᠢᠰᠦᠭᠡᠢ ᠭᠡᠬᠦ ᠳ᠋ᠦ᠍ ᠰᠦᠯᠳᠡ (ᠲᠤᠭ) ᠤ᠋ᠨ ᠲᠤᠬᠠᠢ ᠭᠦᠨ ᠲᠣᠳᠣᠷᠬᠠᠢ ᠰᠤᠳᠤᠯᠤᠭᠰᠠᠨ ᠦᠭᠡᠢ ᠤᠴᠢᠷ ᠠ᠋ᠴᠠ ᠡᠷᠲᠡ ᠡᠳᠦᠷ ᠦᠨ 《ᠮᠣᠩᠭᠣᠯᠴᠤᠳ ᠪᠠ ᠮᠣᠷᠢ》 ᠬᠡᠮᠡᠬᠦ ᠨᠣᠮ ᠢ᠋ ᠲᠤᠭᠤᠷᠪᠢᠨ ᠪᠢᠴᠢᠬᠦ ᠳ᠋ᠦ᠍ ᠡᠨᠡ ᠲᠤᠬᠠᠢ ᠬᠥᠭᠡᠨ ᠰᠡᠳᠬᠢᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠨ ᠬᠠᠷᠠᠵᠤ᠂ ᠥᠴᠦᠬᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠳᠬᠡᠬᠦ ᠨᠢᠭᠡᠨ ᠲᠥᠷᠥᠭᠳᠡᠯ ᠢ᠋ ᠪᠢᠴᠢᠨ᠂ ᠨᠣᠮ ᠤ᠋ᠨ ᠴᠠᠭᠠᠨ ᠪᠤᠶᠠᠨ ᠳᠡᠯᠭᠡᠷᠡᠬᠦ ᠶ᠋ᠢᠨ ᠥᠯᠵᠡᠢᠲᠦ ᠢᠷᠦᠭᠡᠯ ᠲᠠᠯᠪᠢᠰᠤᠭᠠᠢ᠃
᠁
ᠮᠣᠩᠭᠣᠯᠴᠤᠳ ᠤ᠋ᠨ ᠬᠥᠭᠵᠢᠯ ᠦ᠋ᠨ ᠦᠶᠡ ᠳ᠋ᠦ᠍ ᠪᠠᠰᠠ ᠴᠠᠭᠠᠨ ᠱᠣᠩᠬᠣᠷ ᠬᠠᠷᠠ ᠬᠡᠷᠢᠶᠡ ᠶ᠋ᠢ ᠪᠠᠷᠢᠵᠤ ᠪᠠᠢᠭᠰᠠᠨ ᠵᠢᠷᠤᠭ ᠲᠠᠢ ᠲᠤᠭ᠂ ᠬᠠᠷᠠ ᠰᠠᠷᠠ ᠲᠠᠢ ᠴᠠᠭᠠᠨ ᠲᠤᠭ᠂ ᠶᠢᠰᠦᠨ ᠬᠣᠰᠢᠭᠤᠲᠤ ᠲᠤᠭ᠁ ᠵᠡᠷᠭᠡ ᠨᠦ᠍ᠭᠦᠳ ᠢ᠋ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠭᠡᠬᠦ ᠮᠡᠳᠡᠭᠡ ᠵᠠᠷᠢᠮ ᠨᠣᠮ ᠰᠤᠳᠤᠷ ᠲᠤ᠌ ᠴᠤ᠌ ᠬᠠᠷᠠᠭᠳᠠᠳᠠᠭ᠃ ᠬᠠᠷᠢᠨ ᠡᠳᠦᠭᠡ ᠪᠣᠯᠲᠠᠯᠠ ᠰᠦᠯᠳᠡ ᠪᠣᠯᠭᠠᠨ ᠰᠢᠲᠦᠵᠦ ᠪᠠᠢᠭᠠ ᠲᠤᠭ ᠲᠤ᠌ 《ᠴᠠᠭᠠᠨ ᠲᠤᠭ》᠂ 《ᠬᠠᠷᠠ ᠲᠤᠭ》᠂ 《ᠠᠯᠠᠭ ᠲᠤᠭ》 ᠪᠠᠢᠨᠠ᠃ ᠮᠣᠩᠭᠣᠯᠴᠤᠳ ᠥᠪᠡᠷ ᠦ᠋ᠨ ᠬᠡᠮᠡᠬᠦ ᠲᠥᠷᠥ ᠭᠦᠷᠦᠨ ᠲᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠲᠥᠷᠥ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠲᠤᠭ ᠰᠦᠯᠳᠡ ᠶ᠋ᠢ ᠲᠣᠭᠲᠠᠭᠠᠵᠠᠢ᠃ ᠲᠡᠷᠡ ᠨᠢ ᠳᠠᠷᠤᠢ 1205 ᠣᠨ ᠳ᠋ᠤ᠌ ᠴᠢᠩᠭᠢᠰ ᠬᠠᠭᠠᠨ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠣᠷᠣ ᠰᠠᠭᠤᠬᠤ ᠳ᠋ᠤ᠌ ᠲᠣᠭᠲᠠᠭᠠᠭᠰᠠᠨ《ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ》 ᠪᠣᠯᠤᠨᠠ᠃ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠴᠠᠭᠠᠨ ᠠᠵᠢᠷᠭᠠᠨ ᠤ᠋ ᠳᠡᠯ ᠬᠥᠬᠥᠯ ᠢ᠋ᠶ᠋ᠡᠷ ᠬᠢᠭᠰᠡᠨ ᠨᠢ ᠴᠠᠭᠠᠨ ᠵᠦᠭ ᠦ᠋ᠨ ᠲᠠᠪᠢᠨ ᠲᠠᠪᠤᠨ ᠲᠡᠭᠷᠢ ᠶ᠋ᠢᠨ ᠪᠡᠯᠭᠡᠳᠡᠯ᠂ ᠠᠷᠢᠭᠤᠨ ᠴᠠᠭᠠᠨ ᠡᠩᠬᠡ ᠲᠠᠢᠪᠤᠩ ᠤ᠋ᠨ ᠵᠥᠩᠨᠡᠯ ᠪᠣᠯᠭᠠᠵᠤ᠂ ᠲᠥᠷᠥ ᠶ᠋ᠢᠨ ᠶᠣᠰᠣᠯᠠᠯ ᠳ᠋ᠤ᠌ ᠬᠡᠷᠡᠭᠯᠡᠵᠦᠬᠦᠢ᠃ ᠮᠣᠩᠭᠣᠯᠴᠤᠳ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠠᠰᠠ ᠴᠡᠷᠢᠭ ᠦ᠋ᠨ ᠲᠤᠭ ᠲᠠᠢ ᠪᠠᠢᠪᠠ᠃《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠳ᠋ᠤ᠌《ᠠᠯᠠᠭ ᠲᠤᠭᠲᠤ᠂ ᠬᠠᠷᠠ ᠲᠤᠭᠲᠤ ᠠ᠋ᠴᠠ ᠠᠮᠢ ᠪᠠᠨ ᠬᠢᠴᠢᠶᠡᠲᠦᠭᠡᠢ》 ᠬᠡᠮᠡᠬᠦ ᠦᠭᠡ ᠪᠠᠢᠳᠠᠭ ᠠ᠋ᠴᠠ ᠦᠵᠡᠪᠡᠯ ᠠᠯᠠᠭ ᠲᠤᠭ᠂ ᠬᠠᠷᠠ ᠲᠤᠭ ᠲᠠᠢ ᠪᠠᠢᠵᠠᠢ᠃ ᠬᠠᠷᠠᠭᠠ ᠶᠡᠬᠡᠲᠡᠢ ᠬᠠᠷᠠ ᠲᠤᠭ! ᠪᠤᠰᠤᠳ ᠢ᠋ ᠠᠶᠤᠯᠭᠠᠬᠤ ᠶ᠋ᠢᠨ ᠪᠡᠯᠭᠡ ᠭᠡᠳᠡᠭ ᠨᠢ ᠬᠠᠷᠠ ᠲᠤᠭ ᠪᠣᠯ ᠴᠡᠷᠢᠭ ᠲᠡᠢᠨ ᠦ᠌ ᠲᠤᠭ ᠪᠠᠢᠭᠰᠠᠨ ᠤ᠋ ᠭᠡᠷᠡᠴᠢ ᠪᠤᠶᠤ᠃ ᠬᠠᠷᠠ ᠰᠦᠯᠳᠡ ᠶ᠋ᠢ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠬᠥᠬᠥᠯ ᠳᠡᠯ ᠢ᠋ᠶ᠋ᠡᠷ ᠬᠢᠭᠰᠡᠨ ᠨᠢ ᠬᠠᠷᠠ ᠵᠦᠭ ᠦ᠋ᠨ ᠳᠥᠴᠢᠨ ᠳᠥᠷᠪᠡᠨ ᠲᠡᠭᠷᠢ ᠶᠢᠨ ᠪᠡᠯᠭᠡᠳᠡᠯ᠂ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠳᠠᠷᠤᠯᠭᠠ ᠪᠣᠯᠭᠠᠵᠤ᠂ ᠴᠡᠷᠢᠭ ᠲᠦ᠍ᠷ ᠬᠡᠷᠡᠭᠯᠡᠵᠡᠢ᠃ ᠬᠠᠷᠠ ᠲᠤᠭ ᠤᠤᠯ ᠨᠢ ᠬᠠᠷᠠ ᠤᠨᠠᠭᠠᠨ ᠤ᠋ ᠠᠷᠠᠰᠤ ᠪᠠᠷ ᠬᠢᠭᠳᠡᠭᠰᠡᠨ ᠭᠡᠳᠡᠭ ᠢ᠋ ᠮᠣᠩᠭᠣᠯ ᠤᠨ ᠳᠣᠷᠣᠨᠠᠲᠤ ᠠᠢᠮᠠᠭ ᠤ᠋ᠨ ᠪᠤᠯᠠᠭᠠᠨ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠳᠠᠬᠢ ᠨᠢᠭᠡᠨ ᠰᠦᠮᠡ ᠳ᠋ᠡᠬᠢ ᠡᠳ᠋ ᠥᠯᠥᠭ ᠭᠡᠷᠡᠴᠢ ᠥᠭᠴᠡᠢ᠃
ᠮᠣᠩᠭᠣᠯ ᠤ᠋ᠨ ᠲᠤᠭ ᠨᠢ ᠮᠣᠩᠭᠣᠯ ᠤ᠋ᠨ ᠵᠠᠰᠠᠭᠲᠤ ᠲᠥᠷᠥ ᠭᠦᠷᠦᠨ ᠢ᠋ ᠲᠥᠯᠥᠭᠡᠯᠡᠬᠦ ᠤᠴᠢᠷ ᠠ᠋ᠴᠠ ᠥᠪᠡᠷ ᠦ᠋ᠨ ᠲᠥᠷᠥ ᠵᠠᠰᠠᠭ ᠲᠠᠭᠠᠨ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠢ᠋ ᠮᠣᠩᠭᠣᠯ ᠤ᠋ᠨ ᠡᠷᠬᠡᠰᠢᠶᠡᠯᠲᠦ ᠶᠤᠸᠠᠨ ᠤᠯᠤᠰ ᠮᠡᠲᠦ ᠭᠦᠷᠦᠨ ᠦ᠌ ᠦᠶᠡ ᠶ᠋ᠢᠨ ᠮᠡᠳᠡᠭᠡ ᠰᠡᠯᠲᠡ ᠭᠡᠷᠡᠴᠢ ᠪᠣᠯᠵᠤ ᠪᠣᠢ᠃ ᠥᠪᠡᠷ ᠦ᠋ᠨ ᠲᠥᠷᠥ ᠭᠦᠷᠦᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠡᠳᠡᠭᠡᠷ ᠲᠥᠷᠥ ᠶ᠋ᠢᠨ ᠲᠤᠭ ᠨᠢ ᠠᠷᠠᠳ ᠢᠷᠭᠡᠳ ᠦ᠋ᠨ ᠳᠤᠮᠳᠠ ᠰᠢᠲᠦᠭᠳᠡᠭᠰᠡᠨ ᠡᠴᠡ ᠬᠣᠢᠰᠢ ᠲᠤᠭ ᠨᠡᠷᠡ ᠪᠡᠨ ᠠᠯᠳᠠᠵᠤ᠂ 《ᠴᠠᠭᠠᠨ ᠰᠦᠯᠳᠡ》᠂ 《ᠬᠠᠷᠠ ᠰᠦᠯᠳᠡ》᠂ 《ᠠᠯᠠᠭ ᠰᠦᠯᠳᠡ》 ᠬᠡᠮᠡᠭᠳᠡᠬᠦ ᠪᠣᠯᠵᠠᠢ᠃
᠁
ᠡᠷᠬᠢᠮ ᠠᠪᠤᠭᠠᠢ᠂ ᠦᠳᠡᠯᠦᠭᠡ ᠨᠠᠰᠤᠨ ᠳ᠋ᠠᠭᠠᠨ《ᠲᠦᠮᠡᠨ ᠪᠣᠳᠢ ᠨᠣᠮ ᠤᠩᠰᠢᠪᠠᠰᠤ᠂ ᠪᠢᠷ ᠦ᠋ᠨ ᠦᠵᠦᠭᠦᠷ ᠰᠢᠳᠢ ᠣᠷᠣᠰᠢᠮᠤᠢ》 ᠬᠡᠮᠡᠬᠦ ᠪᠡᠷ ᠵᠢᠳᠬᠦᠪᠡᠰᠦ ᠪᠠᠰᠠ ᠨᠢᠭᠡᠨ ᠣᠯᠵᠠᠷᠬᠠᠬᠤ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠬᠥᠷᠥᠩᠭᠡ ᠲᠡᠢ ᠪᠣᠯᠬᠤ ᠪᠢᠯᠡ ᠭᠡᠮᠡᠨ ᠰᠢᠭᠦᠮᠵᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠭᠦᠨ ᠢ᠋ ᠪᠢᠴᠢᠨ᠂ ᠡᠩ ᠴᠠᠭᠠᠨ ᠬᠠᠳᠠᠭ ᠤ᠋ᠨ ᠬᠠᠮᠲᠤ ᠡᠷᠭᠦᠨ ᠳᠡᠪᠰᠢᠭᠦᠯᠵᠦ᠂ ᠶᠢᠰᠦᠨ ᠴᠠᠭᠠᠨ ᠬᠦᠰᠡᠯ ᠴᠢᠨᠢ ᠨᠣᠮ ᠤ᠋ᠨ ᠴᠢᠨᠢ ᠬᠠᠮᠲᠤ ᠪᠡᠶᠡᠯᠡᠬᠦ ᠥᠯᠵᠡᠢᠲᠡᠢ ᠢᠷᠦᠭᠡᠯ ᠲᠠᠯᠪᠢᠰᠤᠭᠠᠢ᠃
ᠪᠣᠷᠵᠢᠭᠢᠨ ᠸᠠᠩᠴᠤᠭ
(ᠣᠳᠣᠨ ᠵᠢᠷᠤᠬᠠᠢ ᠶ᠋ᠢᠨ ᠤᠬᠠᠭᠠᠨ ᠤ᠋
ᠲᠡᠦᠬᠡ ᠶ᠋ᠢᠨ ᠳᠣᠺᠲ᠋ᠣᠷ᠂ ᠫᠷᠣᠹᠧᠰᠰᠣᠷ)
ᠬᠥᠬᠡᠬᠣᠲᠠᠨᠠ