ᠲᠡᠷᠭᠡᠯ ᠬᠦᠦ ᠶ᠋ᠢᠨ ᠦᠯᠢᠭᠡᠷTergel khüügiin ülgerТэргэл хүүгийн үлгэр
2523ᠲᠡᠷᠭᠡᠯ ᠬᠦᠦ ᠶ᠋ᠢᠨ ᠦᠯᠢᠭᠡᠷ
ᠳᠣᠮᠣᠭ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠤᠶᠠᠨ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠬᠠᠳᠠᠨ ᠤᠨᠤᠨ ᠤ᠋ ᠪᠡᠯᠴᠢᠭᠡᠷ ᠲᠦ᠍ ᠲᠡᠷᠭᠡᠯ ᠭᠡᠳᠡᠭ ᠬᠦᠦ ᠪᠠᠢᠵᠠᠢ᠃ ᠲᠡᠷᠭᠡᠯ ᠬᠦᠦ ᠤᠬᠠᠭᠠᠨ ᠰᠠᠢᠨ ᠠᠪᠤ᠂ ᠤᠳᠤᠮᠲᠤ ᠰᠠᠢᠬᠠᠨ ᠡᠵᠢ ᠲᠡᠢ ᠶᠤᠮ ᠭᠡᠨᠡ᠃ ᠠᠪᠤ ᠨᠢ ᠬᠦᠦ ᠳ᠋ᠡᠭᠡᠨ᠂ ᠡᠬᠡ ᠪᠣᠯᠤᠭᠰᠠᠨ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠪᠡᠨ ᠬᠠᠢᠷᠠᠯᠠᠨ ᠡᠨᠡᠷᠢᠵᠦ ᠶᠠᠪᠤ! ᠣᠨᠴᠠ ᠴᠢᠬᠤᠯᠠ ᠬᠡᠷᠡᠭ ᠦᠭᠡᠢ ᠪᠣᠯ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠪᠤᠤ ᠰᠡᠨᠳᠡᠭᠡᠴᠢ ᠭᠡᠵᠦ ᠰᠤᠷᠭᠠᠳᠠᠭ ᠪᠠᠢᠵᠠᠢ᠃ ᠬᠦᠦ ᠠᠷᠪᠠᠨ ᠲᠠᠪᠤᠨ ᠨᠠᠰᠤ ᠬᠦᠷᠦᠭᠰᠡᠨ ᠵᠢᠯ ᠲᠡᠳᠡᠨ ᠦ᠌ ᠬᠢ ᠪᠡᠯᠴᠢᠭᠡᠷ ᠰᠡᠯᠭᠦᠵᠦ ᠤᠨᠤᠨ ᠮᠥᠷᠡᠨ ᠦ᠌ ᠪᠡᠨ ᠨᠢᠭᠡᠨ ᠰᠠᠢᠬᠠᠨ ᠲᠣᠬᠣᠢ ᠳ᠋ᠤ᠌ ᠪᠠᠭᠤᠵᠠᠢ᠃ ᠦᠳᠡᠰᠢ ᠪᠣᠯᠤᠨ ᠣᠳᠣ ᠲᠦᠭᠡᠬᠦ ᠳ᠋ᠦ᠍ ᠠᠪᠤ ᠨᠢ᠂
— ᠠᠪᠤ ᠶ᠋ᠢᠨ ᠶ᠋ᠢᠡᠨ ᠮᠣᠷᠢ ᠶ᠋ᠢ ᠠᠷᠭᠠᠮᠵᠢᠭᠠᠳ ᠢᠷᠡ ᠭᠡᠵᠦ ᠬᠡᠯᠡᠪᠡ᠃
ᠤᠷᠢᠳᠤ ᠵᠢᠯ ᠨᠢ ᠡᠨᠡ ᠰᠠᠢᠬᠠᠨ ᠲᠣᠬᠣᠢ ᠳ᠋ᠤ᠌ ᠨᠠᠮᠤᠷᠵᠢᠬᠤ ᠳ᠋ᠠᠭᠠᠨ ᠨᠢᠭᠡᠨ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠠ᠋ᠴᠠ ᠠᠪᠤ ᠨᠢ ᠮᠣᠷᠢ ᠠᠷᠭᠠᠮᠵᠢᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠵᠦᠯᠭᠡᠨ ᠥᠨᠳᠥᠷ ᠡᠪᠡᠰᠦᠨ ᠳᠤᠮᠳᠠ ᠠ᠋ᠴᠠ ᠠᠷᠭᠠᠮᠵᠢᠶᠠᠨ ᠤ᠋ ᠪᠠᠨ ᠴᠢᠯᠠᠭᠤ ᠶ᠋ᠢ ᠬᠠᠢᠭᠠᠳ ᠬᠠᠢᠭᠠᠳ ᠣᠯᠤᠭᠰᠠᠨ ᠦᠭᠡᠢ ᠭᠡᠨᠡ᠃ ᠡᠳᠦᠷ ᠦ᠋ᠨ ᠠᠵᠢᠯ ᠳ᠋ᠠᠭᠠᠨ ᠠᠯᠵᠢᠶᠠᠯᠠᠵᠤ ᠶᠠᠳᠠᠷᠠᠭᠰᠠᠨ ᠬᠦᠦ ᠤᠨᠲᠠᠬᠤ ᠶ᠋ᠢᠨ ᠲᠦᠭᠦᠰ ᠪᠣᠯᠵᠤ᠂ ᠮᠠᠢᠬᠠᠨ ᠤ᠋ ᠪᠠᠨ ᠨᠢᠭᠡ ᠭᠠᠳᠠᠰᠤ ᠶ᠋ᠢ ᠭᠣᠣᠯ ᠤ᠋ᠨ ᠰᠢᠷᠭᠢᠨ ᠳᠡᠭᠡᠷᠡ ᠵᠤᠭᠤᠭᠠᠳ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠮᠣᠷᠢ ᠶ᠋ᠢ ᠠᠷᠭᠠᠮᠵᠢᠵᠤ ᠣᠷᠬᠢᠪᠠ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠮᠣᠷᠢ ᠶ᠋ᠢ ᠳᠥᠬᠥᠭᠦᠯᠵᠦ ᠥᠭᠭᠦᠭᠡᠳ᠂ ᠬᠢᠴᠢᠶᠡᠩᠭᠦᠢᠯᠡᠨ ᠡᠷᠢᠭᠰᠡᠭᠡᠷ ᠠᠷᠭᠠᠮᠵᠢᠶᠠᠨ ᠤ᠋ ᠪᠠᠨ ᠴᠢᠯᠠᠭᠤ ᠶ᠋ᠢ ᠣᠯᠵᠠᠢ᠃ ᠭᠡᠪᠡᠴᠦ ᠬᠦᠦ ᠨᠥᠭᠥᠭᠡ ᠭᠠᠳᠠᠰᠤ ᠪᠠᠨ ᠰᠤᠭᠤᠯᠵᠤ ᠠᠪᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠪᠠᠢᠯᠠ᠃ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠲᠡᠳᠡᠨ ᠦ᠌ ᠬᠢ ᠳᠠᠬᠢᠨ ᠨᠤᠲᠤᠭ ᠰᠡᠯᠭᠦᠨ ᠨᠡᠭᠦᠪᠡ᠃ ᠰᠢᠨᠡ ᠨᠤᠲᠤᠭ ᠲᠤ᠌ ᠪᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠦᠦ ᠶ᠋ᠢᠨ ᠥᠭᠡᠵᠡᠭ ᠳᠡᠭᠡᠷᠡ ᠬᠠᠲᠠᠭᠢ ᠭᠠᠷᠴᠤ ᠶᠡᠬᠡ ᠯᠡ ᠰᠢᠨᠠᠯᠭᠠᠬᠤ ᠪᠣᠯᠪᠠ᠃ ᠡᠨᠡ ᠲᠤᠬᠠᠢ ᠪᠠᠨ ᠠᠪᠤ ᠡᠵᠢ ᠳ᠋ᠦ᠍ ᠪᠡᠨ ᠬᠡᠯᠡᠯᠡ ᠦᠭᠡᠢ᠂ ᠮᠣᠷᠢ ᠤᠨᠤᠵᠤ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠬᠠᠲᠠᠭᠢ ᠨᠢ ᠬᠥᠨᠳᠡᠭᠳᠡᠵᠦ ᠬᠦᠦ ᠬᠠᠯᠠᠭᠤᠷᠠᠵᠤ ᠬᠡᠪᠲᠡᠷᠢ ᠳ᠋ᠦ᠍ ᠣᠷᠣᠵᠠᠢ᠃ ᠠᠪᠤ ᠡᠵᠢ ᠨᠢ ᠡᠯᠳᠡᠪ ᠠᠷᠭᠠ ᠬᠡᠷᠡᠭᠯᠡᠵᠦ ᠡᠮ ᠳᠠᠩ ᠥᠭᠭᠦᠭᠡᠳ ᠴᠦ᠍ ᠬᠦᠦ ᠶ᠋ᠢ ᠢᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ᠂ ᠲᠡᠷᠭᠡᠯ ᠬᠦᠦ ᠡᠪᠡᠳᠴᠢᠨ ᠳ᠋ᠡᠭᠡᠨ ᠰᠢᠨᠡᠯᠡᠵᠦ ᠬᠡᠪᠲᠡᠵᠦ ᠪᠠᠢᠲᠠᠯᠠ ᠥᠷᠭᠥᠭᠡ ᠭᠡᠷ ᠦ᠋ᠨ ᠬᠢᠨ ᠬᠠᠭᠠᠯᠭᠠ ᠣᠩᠭᠣᠢᠵᠤ᠂ ᠲᠡᠷᠢᠭᠦᠨ ᠡᠴᠡ ᠪᠡᠨ ᠭᠡᠷᠡᠯ ᠰᠠᠴᠤᠷᠠᠭᠤᠯᠤᠭᠰᠠᠨ ᠨᠢᠭᠡᠨ ᠰᠠᠢᠬᠠᠨ ᠳᠠᠭᠢᠨᠢ ᠣᠷᠣᠵᠤ ᠢᠷᠡᠪᠡ᠃ ᠳᠠᠭᠢᠨᠢ ᠲᠡᠷᠭᠡᠯ ᠳ᠋ᠦ᠍ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ ᠬᠠᠮᠲᠤ ᠶᠠᠪᠤᠬᠤ ᠶ᠋ᠢ ᠬᠦᠰᠡᠵᠡᠢ᠃ ᠬᠦᠦ ᠴᠦ᠍ ᠳᠤᠭᠤᠢ ᠪᠣᠰᠴᠤ ᠳᠠᠭᠢᠨᠢ ᠶ᠋ᠢ ᠳᠠᠭᠠᠨ ᠭᠠᠷᠪᠠ᠃ ᠬᠣᠶᠠᠭᠤᠯᠠ ᠶᠠᠪᠤᠭᠰᠠᠭᠠᠷ ᠤᠨᠤᠨ ᠮᠥᠷᠡᠨ ᠦ᠌ ᠡᠷᠭᠢ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍᠂ ᠳᠠᠭᠢᠨᠢ ᠲᠡᠷᠭᠡᠯ ᠳ᠋ᠦ᠍᠂
— ᠨᠢᠳᠦ ᠪᠡᠨ ᠠᠨᠠᠢ ᠭᠡᠵᠦ ᠬᠡᠯᠡᠪᠡ᠃
ᠬᠦᠦ ᠨᠢᠳᠦ ᠪᠡᠨ ᠠᠨᠢᠵᠤ ᠵᠢᠩᠭᠦᠢᠳᠡᠬᠦ ᠮᠡᠲᠦ ᠬᠥᠪᠦᠭᠰᠡᠭᠡᠷ ᠤᠳᠠᠯ ᠦᠭᠡᠢ ᠨᠢᠳᠦ ᠪᠡᠨ ᠨᠡᠬᠡ ᠭᠡᠬᠦ ᠳ᠋ᠦ᠍᠂ ᠬᠠᠷᠠᠪᠠᠯ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠭᠠ ᠬᠥᠮᠦᠨ ᠳ᠋ᠦ᠍ ᠬᠣᠢᠮᠣᠷ ᠨᠢ ᠬᠠᠷᠠᠭᠳᠠᠬᠤ ᠪᠠᠷ ᠦᠭᠡᠢ ᠠᠰᠠᠷ ᠲᠣᠮᠣ ᠰᠠᠷᠠᠭᠤᠯ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠲᠡᠷᠢᠭᠦᠨ ᠦ᠌ ᠳᠡᠭᠡᠷᠡ ᠡᠴᠡ ᠡᠷᠳᠡᠨᠢ ᠶ᠋ᠢᠨ ᠲᠢᠲᠢᠮ ᠠᠰᠠᠭᠠᠭᠰᠠᠨ ᠯᠤᠤᠰ ᠤ᠋ᠨ ᠬᠠᠭᠠᠨ ᠲᠡᠳᠡᠨ ᠦ᠌ ᠵᠦᠭ ᠳᠥᠭᠥᠵᠦ ᠢᠷᠡᠭᠡᠳ ᠬᠥᠮᠥᠰᠬᠡ ᠪᠡᠨ ᠠᠲᠤᠷᠢᠭᠤᠯᠤᠨ᠂
— ᠠ᠂ ᠨᠥᠭᠥᠭᠡ ᠪᠤᠯᠴᠢᠩ ᠦᠭᠡᠢ ᠬᠦᠦ ᠴᠢ ᠤᠤ? ᠨᠠᠰᠢ ᠢᠷᠡ! ᠮᠢᠨᠦ ᠬᠦᠦ ᠶ᠋ᠢ ᠶᠠᠮᠠᠷ ᠪᠣᠯᠭᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠ ᠭᠡᠵᠦ ᠵᠠᠩᠳᠤᠷᠤᠩᠭᠤᠢ ᠬᠡᠯᠡᠭᠡᠳ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠣᠷᠣᠨ ᠳᠡᠭᠡᠷᠡ ᠲᠣᠷᠭᠠᠨ ᠬᠥᠨᠵᠢᠯᠡ ᠨᠥᠮᠥᠷᠦᠨ ᠬᠡᠪᠲᠡᠵᠦ ᠪᠣᠢ ᠵᠠᠯᠠᠭᠤ ᠬᠦᠦ ᠶ᠋ᠢᠨ ᠡᠮᠦᠨᠡ ᠠᠪᠠᠴᠢᠯᠠ᠃ ᠵᠠᠯᠠᠭᠤ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠶᠡᠬᠡ ᠯᠡ ᠰᠢᠨᠠᠯᠤᠭᠰᠠᠨ ᠰᠢᠨᠵᠢ ᠢᠯᠡᠷᠬᠡᠢ᠃ ᠳᠠᠭᠢᠨᠢ᠂ ᠡᠨᠡ ᠮᠢᠨᠦ ᠠᠬᠠ ᠪᠠᠢᠭᠠ ᠶᠤᠮ᠃ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠡᠳᠦᠷ ᠶᠡᠬᠡ ᠯᠡ ᠵᠣᠪᠠᠵᠤ ᠪᠠᠢᠨᠠ ᠳ᠋ᠠ ᠭᠡᠵᠦ ᠬᠡᠯᠡᠭᠡᠳ᠂ ᠬᠥᠨᠵᠢᠯᠡ ᠶ᠋ᠢ ᠰᠡᠬᠦᠨ ᠬᠠᠷᠠᠭᠤᠯᠬᠤ ᠳ᠋ᠤ᠌ ᠬᠦᠦ ᠶ᠋ᠢᠨ ᠴᠡᠭᠡᠵᠢᠨ ᠪᠡᠶᠡ ᠬᠥᠮᠦᠨ ᠰᠢᠭ᠌ ᠪᠣᠯᠪᠠᠴᠤ ᠪᠦᠰᠡᠯᠡᠭᠦᠷ ᠡᠴᠡ ᠳᠣᠷᠣᠭᠰᠢ ᠵᠢᠭᠠᠰᠤ ᠰᠢᠬ ᠬᠠᠢᠷᠰᠤ ᠲᠠᠢ ᠠᠵᠢ᠃ ᠭᠡᠲᠡᠯᠡ ᠬᠦᠦ ᠶ᠋ᠢᠨ ᠥᠭᠡᠵᠡᠭ ᠳᠡᠭᠡᠷᠡ ᠲᠡᠷᠭᠡᠯ ᠦ᠋ᠨ ᠭᠠᠵᠠᠷ ᠲᠤ᠌ ᠱᠠᠭᠠᠵᠤ ᠣᠷᠬᠢᠭᠰᠠᠨ ᠭᠠᠳᠠᠰᠤᠨ ᠤ᠋ ᠲᠣᠯᠣᠭᠠᠢ ᠴᠤᠬᠤᠢᠵᠤ ᠪᠠᠢᠬᠤ ᠨᠢ ᠦᠵᠡᠭᠳᠡᠪᠡ ᠭᠡᠨᠡ᠃ ᠲᠡᠷᠭᠡᠯ ᠰᠣᠴᠢᠨ ᠠ᠋᠂ ᠶᠠᠭᠠᠬᠢᠳᠠᠭ ᠪᠢᠯᠡ᠂ ᠪᠢ ᠶᠠᠭᠤ ᠬᠢᠴᠢᠬᠡᠪᠡ? ᠣᠳᠣ ᠶᠠᠭᠠᠬᠢᠨᠠ ᠭᠡᠮᠡᠨ ᠣᠬᠢᠯᠠᠭᠠ ᠠᠯᠳᠠᠪᠠ᠃ ᠯᠤᠤᠰ ᠤ᠋ᠨ ᠬᠠᠭᠠᠨ᠂
— ᠴᠢᠨᠦ ᠪᠠᠯᠠᠭ ᠢ᠋ᠶ᠋ᠠᠷ ᠬᠦᠦ ᠮᠢᠨᠢ ᠡᠢᠮᠦ ᠪᠣᠯᠴᠢᠬᠠᠭᠠᠳ ᠰᠢᠨᠡᠯᠡᠵᠦ ᠪᠠᠢᠨᠠ᠂ ᠯᠤᠤᠰ ᠤ᠋ᠨ ᠬᠠᠭᠠᠨ ᠪᠢ ᠬᠦᠴᠦ ᠴᠢᠳᠠᠯ ᠲᠠᠢ ᠪᠣᠯᠪᠠᠴᠤ ᠡᠭᠦᠨ ᠢ᠋ ᠠᠪᠴᠤ ᠳᠡᠢᠯᠬᠦ ᠦᠭᠡᠢ᠂ ᠡᠭᠦᠨ ᠢ᠋ ᠭᠠᠭᠴᠠᠬᠠᠨ ᠴᠢ ᠯᠡ ᠠᠪᠴᠤ ᠴᠢᠳᠠᠨᠠ᠃ ᠡᠨᠡ ᠭᠠᠢ ᠲᠠᠢ ᠶᠠᠭᠤᠮᠠ ᠪᠠᠨ ᠬᠦᠦ ᠶ᠋ᠢᠨ ᠪᠡᠶᠡ ᠡᠴᠡ ᠠᠪᠴᠤ ᠥᠭ ᠭᠡᠯᠡ᠃ ᠬᠦᠦ ᠠᠪᠬᠤ ᠭᠡᠵᠦ ᠬᠡᠴᠢᠨᠡᠨ ᠲᠠᠲᠠᠭᠰᠠᠨ ᠪᠣᠯᠪᠠᠴᠤ ᠭᠠᠳᠠᠰᠤ ᠰᠤᠭᠤᠷᠠᠭᠰᠠᠨ ᠦᠭᠡᠢ᠂ ᠯᠤᠤᠰ ᠤ᠋ᠨ ᠬᠠᠭᠠᠨ ᠠᠭᠤᠷ ᠲᠠᠢ ᠪᠠᠷ᠂ ᠴᠢ ᠢᠩᠭᠢᠵᠦ ᠠᠪᠴᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠴᠢ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠬᠠᠷᠢ! ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠱᠠᠭᠠᠵᠤ ᠣᠷᠬᠢᠭᠰᠠᠨ ᠲᠡᠷᠡ ᠭᠠᠳᠠᠰᠤ ᠪᠠᠨ ᠡᠷᠢᠵᠦ ᠣᠯᠤᠭᠠᠳ ᠠᠪᠴᠤ ᠦᠵᠡ! ᠲᠡᠭᠡᠬᠦ ᠦᠭᠡᠢ ᠪᠣᠯ ᠴᠢᠨᠦ ᠪᠡᠶᠡ ᠳᠡᠭᠡᠷᠡ ᠬᠢ ᠬᠠᠲᠠᠭᠢ ᠴᠤ᠌ ᠢᠲᠡᠭᠡᠬᠦ ᠦᠭᠡᠢ᠂ ᠴᠢ ᠪᠠᠰᠠ ᠮᠢᠨᠦ ᠬᠦᠦ ᠰᠢᠭ᠌ ᠰᠢᠨᠠᠯᠤᠭᠰᠠᠭᠠᠷ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠳᠬᠤ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍᠂ ᠰᠠᠨᠳᠤᠷᠤᠭᠰᠠᠨ ᠬᠦᠦ ᠥᠷᠥᠰᠢᠶᠡ ᠬᠠᠭᠠᠨᠲᠠᠨ ᠮᠢᠨᠢ! ᠨᠠᠮᠠ ᠶ᠋ᠢ ᠳᠠᠷᠤᠢᠬᠠᠨ ᠭᠡᠷ ᠲᠦ᠍ ᠨᠢ ᠪᠤᠴᠠᠭᠠᠨᠠ ᠤᠤ? ᠪᠢ ᠲᠡᠷᠡ ᠭᠠᠳᠠᠰᠤ ᠶ᠋ᠢ ᠵᠠᠪᠠᠯ ᠣᠯᠵᠤ ᠰᠤᠭᠤᠯᠵᠤ ᠬᠡᠦᠬᠡᠳ ᠢ᠋ᠶ᠋ᠡᠨ ᠢᠲᠡᠭᠡᠬᠦ ᠪᠣᠯᠤᠨᠠ᠃ ᠨᠠᠳᠠᠳᠤ ᠬᠡᠴᠡᠭᠦᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠪᠡ᠃
ᠬᠦᠦ ᠭᠡᠷ ᠲᠡᠭᠡᠨ ᠢᠷᠡᠬᠦ ᠳ᠋ᠦ᠍ ᠦᠷ ᠦ᠋ᠨ ᠰᠢᠷᠭᠠᠯ ᠲᠤᠶᠠᠭᠠ ᠲᠣᠭᠣᠨᠣ ᠪᠠᠷ ᠲᠣᠰᠴᠤ ᠪᠠᠢᠯᠠ᠃ ᠪᠡᠶᠡ ᠶ᠋ᠢᠨ ᠬᠢᠨ ᠡᠪᠡᠳᠴᠢᠨ ᠴᠦ᠍ ᠪᠠᠭᠠ ᠵᠡᠷᠭᠡ ᠠᠷᠢᠯᠤᠭᠰᠠᠨ ᠮᠡᠲᠦ᠃ ᠲᠡᠷᠡ ᠮᠣᠷᠢᠨ ᠳ᠋ᠤ᠌ ᠪᠠᠨ ᠮᠣᠷᠳᠠᠨ ᠭᠠᠳᠠᠰᠤ ᠱᠠᠭᠠᠵᠤ ᠣᠷᠬᠢᠭᠰᠠᠨ ᠭᠣᠣᠯ ᠤ᠋ᠨ ᠲᠣᠬᠣᠢ ᠵᠦᠭ ᠳᠠᠪᠬᠢᠪᠠ᠃ ᠲᠡᠷᠭᠡᠯ ᠬᠠᠯᠢᠭᠤᠷᠠᠨ ᠰᠢᠷᠭᠠᠯᠳᠠᠬᠤ ᠶᠡᠬᠡ ᠡᠪᠡᠰᠦᠨ ᠳᠤᠮᠳᠠ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠢᠭᠰᠠᠭᠠᠷ ᠨᠥᠭᠥᠭᠡ ᠭᠠᠳᠠᠰᠤ ᠶ᠋ᠢ ᠠᠷᠠᠢ ᠬᠡᠨ ᠣᠯᠵᠤ ᠰᠤᠭᠤᠯᠤᠨ ᠠᠪᠴᠤ ᠨᠦᠬᠡ ᠶ᠋ᠢ ᠨᠢ ᠰᠠᠢᠲᠤᠷ ᠪᠤᠯᠠᠯᠠ᠃
ᠲᠡᠭᠡᠭᠡᠳ ᠭᠠᠳᠠᠰᠤ ᠪᠠᠨ ᠪᠠᠷᠢᠭᠰᠠᠭᠠᠷ᠂ ᠤᠨᠤᠨ ᠤ᠋ ᠡᠷᠭᠢ ᠳᠡᠭᠡᠷᠡ ᠢᠷᠡᠵᠦ᠂ ᠤᠰᠤᠨ ᠯᠤᠭᠠ ᠬᠠᠷᠠᠵᠤ ᠬᠡᠰᠡᠭ ᠵᠣᠭᠰᠣᠬᠤ ᠳ᠋ᠤ᠌ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ ᠤ᠋ ᠭᠡᠷᠡᠯ ᠭᠢᠯᠲᠠᠭᠠᠨᠠᠵᠤ ᠤᠷᠤᠰᠬᠠᠯ ᠳᠤᠮᠳᠠ ᠠ᠋ᠴᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠬᠦᠦ ᠥᠬᠢᠨ ᠬᠣᠶᠠᠷ ᠤ᠋ᠨ ᠪᠠᠶᠠᠰᠬᠤᠯᠠᠩ ᠲᠠᠢ ᠴᠢᠷᠠᠢ ᠵᠢᠷᠢᠰᠬᠢᠨ ᠦᠵᠡᠭᠳᠡᠭᠡᠳ ᠵᠠᠮᠬᠠᠷᠠᠪᠠ ᠭᠡᠨᠡ᠃
ᠦᠰᠦᠭ ᠬᠠᠲᠠᠵᠤ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ