ᠳᠣᠷᠣᠨᠠ ᠶᠢᠨ ᠠᠶᠠᠯᠭᠤ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Дорнын аялгуу - Очирбатын Дашбалбар
866ᠳᠣᠷᠣᠨᠠ ᠶᠢᠨ ᠠᠶᠠᠯᠭᠤ
ᠪᠣᠷᠣᠭ ᠡᠪᠡᠰᠦ ᠨᠣᠷᠭᠠᠬᠤ ᠨᠠᠮᠤᠷ ᠤ᠋ᠨ ᠪᠣᠷᠣᠭᠠ ᠰᠢᠪᠡᠷᠡᠨᠡ᠃
ᠠᠶᠠᠨᠴᠢᠨ ᠨᠡᠭᠦᠳᠡᠯᠴᠢᠨ ᠦ᠌ ᠭᠡᠷ ᠦ᠋ᠳ ᠲᠠᠭᠠᠷᠠᠭᠰᠠᠨ ᠶᠠᠩᠵᠤ ᠲᠠᠢ ᠪᠥᠮᠪᠥᠢᠭᠡᠳ
ᠠᠶᠠᠰ ᠤ᠋ᠨ ᠵᠢᠬᠡᠭᠦᠨ ᠠᠮᠢᠰᠬᠤᠯ ᠡᠪᠡᠰᠦᠨ ᠦ᠌ ᠦᠨᠳᠦᠰᠦᠨ ᠳ᠋ᠦ᠍ ᠰᠢᠷᠭᠤᠨᠠ᠃
ᠴᠥᠪᠥᠷᠢᠭᠦᠦ ᠨᠠᠮᠤᠷ ᠤ᠋ᠨ ᠦᠳᠡᠰᠢ ᠴᠡᠴᠡᠭᠡᠰ ᠤᠢᠳᠬᠤ ᠴᠠᠭ ᠢ᠋ᠶ᠋ᠠᠷ
ᠴᠡᠪᠡᠷᠬᠡᠨ ᠢᠨᠠᠭ ᠢ᠋ᠶ᠋ᠠᠨ ᠦᠭᠡᠢᠯᠡᠵᠦ᠂ ᠴᠡᠭᠡᠵᠢᠨ ᠦ᠌ ᠭᠦᠨ ᠳ᠋ᠦ᠍ ᠬᠥᠨᠳᠡᠭᠦᠷᠯᠡᠨᠡ᠃
ᠠᠬᠠᠰ ᠶᠡᠬᠡᠰ ᠦ᠋ᠨ ᠦᠭᠡ ᠶ᠋ᠢ ᠠᠪᠤᠯ ᠦᠭᠡᠢ ᠶᠠᠪᠤᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠨᠡ᠃
ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠶ᠋ᠢ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠳᠠᠭᠤᠯᠠᠵᠤ ᠭᠢᠩᠰᠢᠨᠡᠮ᠃
ᠴᠡᠩᠭᠡᠯ ᠦ᠋ᠨ ᠳᠠᠭᠤᠤ ᠨᠠᠮᠳᠠᠵᠤ᠂ ᠲᠣᠭᠣᠷᠤᠤ ᠪᠤᠴᠠᠭᠰᠠᠨ ᠬᠣᠢᠨᠠ
ᠴᠡᠩᠬᠡᠷ ᠲᠠᠯᠠ ᠵᠢᠪᠡᠷᠭᠡᠨ᠂ ᠲᠣᠭᠣ ᠳᠠᠭᠤ ᠦᠭᠡᠢ ᠪᠥᠮᠪᠥᠢᠨᠡ᠃
ᠵᠣᠷᠢᠭ ᠢ᠋ᠶ᠋ᠠᠷ ᠪᠤᠭᠤᠷᠤᠯ ᠬᠣᠷᠸᠠ ᠳ᠋ᠤ᠌ ᠵᠣᠪᠠᠯᠠᠩ ᠢ᠋ ᠲᠤᠭᠤᠯᠵᠤ ᠭᠡᠲᠦᠯᠦᠨᠡ
ᠵᠣᠷᠢᠵᠤ ᠪᠤᠳᠤᠯᠢᠭᠰᠠᠭᠠᠷ ᠶᠠᠪᠤᠭᠠᠳ ᠵᠣᠯᠭᠠᠵᠤ ᠦᠨᠡᠨ ᠲᠡᠢ ᠮᠥᠷᠭᠥᠨᠡ᠃
ᠠᠶᠠᠯᠭᠤᠲᠤ ᠱᠠᠨᠵᠠᠨ ᠤ᠋ ᠡᠭᠡᠰᠢᠭ ᠨᠢᠯᠪᠤᠰᠤ ᠲᠣᠰᠣᠯᠠᠮᠠ ᠪᠥᠮᠪᠥᠷᠢᠵᠦ
ᠠᠷᠭᠠᠳᠠᠨ ᠤᠴᠢᠷᠯᠠᠨ ᠬᠦᠦᠷᠨᠢᠬᠦ ᠠᠷᠠᠳ ᠤ᠋ᠨ ᠳᠠᠭᠤᠨ ᠳ᠋ᠠᠭᠠᠨ ᠰᠥᠭᠥᠳᠦᠨᠡᠮ᠃
ᠬᠥᠬᠡᠷᠡᠨ ᠬᠥᠬᠡᠷᠡᠨ ᠮᠠᠨᠠᠷᠠᠭᠠᠳ ᠬᠥᠳᠡᠭᠡ ᠴᠠᠢᠳᠠᠮ ᠪᠣᠷᠣᠭᠠᠰᠢᠨᠠ
ᠬᠥᠩᠭᠡᠨ ᠨᠢᠮᠭᠡᠨ ᠭᠠᠷᠤᠭᠰᠠᠨ ᠶᠤᠮ᠂ ᠲᠠᠭᠠᠷᠠᠵᠤ ᠶᠠᠪᠤᠭᠠ ᠪᠣᠯᠪᠠ ᠤᠤ᠃
ᠵᠦᠳᠡᠭ ᠡᠨᠡᠬᠡᠨ ᠬᠣᠷᠸᠠ ᠳ᠋ᠤ᠌ ᠵᠢᠰᠦ ᠲᠡᠢ ᠲᠥᠷᠥᠭᠰᠡᠨ ᠦᠷᠡ ᠶᠦᠮ ᠳᠡ
ᠵᠦᠢ ᠦᠭᠡᠢ ᠦᠢᠯᠡ ᠶ᠋ᠢ ᠬᠢᠯ ᠦᠭᠡᠢ᠂ ᠵᠦᠭᠡᠷ ᠶᠠᠪᠤᠭᠠᠳ ᠶᠠᠭᠠᠬᠢᠬᠤᠪ ᠳᠠ
ᠪᠦᠳᠡᠭᠢ ᠡᠨᠡᠬᠡᠨ ᠬᠣᠷᠸᠠ ᠳ᠋ᠤ᠌ ᠪᠦᠰᠡᠭᠦᠢ ᠲᠥᠷᠥᠭᠰᠡᠨ ᠦᠷᠡ ᠶᠦᠮ ᠳᠡ
ᠪᠦᠬᠦᠨ ᠡᠴᠡ ᠬᠥᠭᠡᠷᠦᠬᠦᠨ ᠴᠢᠮᠠ ᠳ᠋ᠠᠭᠠᠨ ᠪᠤᠷᠤᠭᠤ ᠶ᠋ᠢ ᠥᠭᠭᠦᠭᠡᠳ ᠶᠠᠭᠠᠬᠢᠬᠤᠪ ᠳᠠ᠃
ᠨᠠᠰᠤᠨ ᠪᠠᠭᠠ ᠲᠡᠭᠦᠨ ᠦ᠌ ᠮᠢᠨᠢ ᠨᠠᠢᠷᠲᠠᠢ ᠬᠣᠩᠭᠣᠷ ᠠᠭᠠᠰᠢ ᠨᠢ
ᠨᠠᠮᠤᠷ ᠤ᠋ᠨ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠬᠤ ᠨᠠᠷᠢᠨ ᠨᠣᠭᠣᠭᠠ ᠪᠢᠰᠢ ᠠ᠋
ᠤᠷᠠᠨ ᠪᠠᠭᠠ ᠲᠡᠭᠦᠨ ᠦ᠌ ᠮᠢᠨᠢ ᠤᠷᠢᠬᠠᠨ ᠬᠣᠩᠭᠣᠷ ᠠᠭᠠᠯᠢ ᠨᠢ
ᠤᠮᠠᠷᠠ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠬᠤ ᠠᠭᠤᠯᠠ ᠶ᠋ᠢᠨ ᠨᠣᠭᠣᠭᠠ ᠪᠢᠰᠢ ᠠ᠋᠃
ᠳᠣᠯᠣᠭᠠᠨ ᠦᠶᠡ ᠶ᠋ᠢᠨ ᠡᠪᠦᠭᠡᠳ ᠮᠢᠨᠢ ᠵᠡᠭᠦᠳᠦᠨ ᠳᠤᠮᠳᠠ ᠵᠢᠮᠡᠯᠡᠨᠡ᠃
ᠳᠣᠷᠣᠨᠠ ᠶ᠋ᠢᠨ ᠪᠤᠭᠤᠷᠤᠯ ᠠᠶᠠᠯᠭᠤ ᠨᠢ ᠨᠣᠢᠷ ᠳᠤᠮᠳᠠ ᠤᠴᠢᠷᠯᠠᠨᠠ᠃
ᠠᠯᠲᠠᠨ ᠤᠷᠤᠭ ᠤ᠋ᠨ ᠥᠬᠢᠳ ᠨᠢ ᠠᠯᠤᠰ ᠤ᠋ᠨ ᠵᠠᠭᠤᠨ ᠨᠤᠭᠤᠳ ᠠ᠋ᠴᠠ ᠤᠴᠢᠷᠯᠠᠨᠠ
ᠠᠷᠪᠠᠨ ᠦᠶᠡ ᠶ᠋ᠢᠨ ᠡᠪᠦᠭᠡᠳ ᠮᠢᠨᠢ ᠵᠡᠭᠦᠳᠦᠨ ᠳᠤᠮᠳᠠ ᠵᠢᠮᠡᠯᠡᠨᠡ᠃
ᠬᠣᠯᠠᠳᠤᠭᠠᠳ ᠬᠣᠯᠠᠳᠤᠭᠠᠳ ᠲᠡᠷᠡ ᠮᠢᠨᠢ ᠬᠣᠷᠸᠠ ᠠ᠋ᠴᠠ ᠶᠠᠪᠤᠬᠤ ᠪᠢᠰᠢ ᠳᠡ
ᠬᠣᠶᠠᠷᠬᠠᠨ ᠪᠡᠶᠡ ᠪᠡᠷ ᠤᠴᠠᠷᠠᠭᠰᠠᠨ ᠶᠤᠮ᠃ᠨᠠᠮᠠᠶ᠋ᠢ ᠪᠠᠨ ᠵᠣᠪᠠᠭᠠᠵᠤ ᠶᠠᠭᠠᠬᠢᠬᠤᠪ ᠳᠠ᠃
ᠠᠯᠤᠰᠯᠠᠭᠠᠳ ᠠᠯᠤᠰᠯᠠᠭᠠᠳ ᠲᠡᠷᠡ ᠮᠢᠨᠢ᠂ ᠳᠡᠯᠡᠬᠡᠢ ᠡᠴᠡ ᠶᠠᠪᠤᠭᠰᠠᠨ ᠪᠢᠰᠢ ᠳᠡ
ᠠᠯᠳᠠᠬᠠᠨ ᠪᠡᠶᠡ ᠪᠡᠷ ᠤᠴᠠᠷᠠᠭᠰᠠᠨ ᠶᠤᠮ᠂ ᠨᠠᠮᠠᠶ᠋ᠢ ᠪᠠᠨ ᠵᠣᠪᠠᠭᠠᠵᠤ ᠶᠠᠭᠠᠬᠢᠬᠤᠪ ᠳᠠ᠃
ᠬᠣᠷᠢᠳ ᠤ᠋ᠨ ᠴᠠᠭᠠᠨ ᠰᠠᠷᠠᠨ ᠲᠣᠭᠣᠨᠣ ᠳᠦᠭᠦᠷᠡᠩ ᠬᠡᠷᠡᠯᠳᠦᠵᠦ
ᠬᠣᠶᠠᠷ ᠳᠡᠷᠡᠨ ᠦ᠌ ᠨᠢᠭᠡ ᠨᠢ ᠴᠢᠮᠠᠶ᠋ᠢ ᠦᠭᠡᠢᠯᠡᠵᠦ ᠴᠠᠢᠷᠠᠨᠠ᠃
ᠬᠣᠵᠢᠮᠳᠠᠭᠰᠠᠨ ᠤᠴᠠᠷᠠᠯ ᠤ᠋ᠨ ᠳᠡᠯᠪᠢᠭᠡ ᠯᠡ ᠨᠠᠮᠠᠶ᠋ᠢ ᠪᠠᠨ ᠡᠭᠦᠷᠢᠳᠡ ᠵᠣᠪᠠᠭᠠᠵᠤ
ᠬᠣᠩᠭᠣᠷ ᠴᠢᠮᠠᠶ᠋ᠢ ᠪᠠᠨ ᠰᠠᠨᠠᠭᠰᠠᠨ ᠥᠨᠥᠴᠢᠨ ᠵᠢᠷᠦᠬᠡ ᠰᠢᠨᠠᠯᠤᠨᠠ᠃
ᠤᠢᠳᠬᠠᠷᠲᠤ ᠡᠨᠡᠬᠡᠨ ᠰᠥᠨᠢ ᠠᠷᠪᠠᠨ ᠵᠢᠯ ᠰᠢᠭ ᠪᠣᠳᠣᠭᠳᠠᠵᠤ
ᠣᠨ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠡᠷᠢᠨ ᠤᠯᠠᠷᠢᠭᠰᠠᠨ ᠰᠠᠨᠠᠭᠳᠠᠨᠠ᠃
ᠬᠦᠢᠲᠡᠨ ᠨᠠᠮᠤᠷ ᠤ᠋ᠨ ᠰᠥᠨᠢ᠂ ᠡᠷᠭᠢᠨ ᠬᠥᠷᠪᠡᠬᠦ ᠬᠡᠴᠡᠭᠦᠦ
ᠬᠥᠮᠦᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠣᠴᠢᠭᠰᠠᠨ ᠮᠢᠨᠦ ᠯᠡ ᠠᠮᠠᠷᠠᠭ ᠬᠥᠭᠡᠷᠦᠬᠦᠢ᠃
ᠨᠠᠮᠤᠷ ᠤ᠋ᠨ ᠰᠠᠯᠬᠢ ᠢᠰᠬᠡᠷᠴᠦ ᠳᠡᠭᠡᠪᠦᠷ ᠴᠠᠪᠤᠭ ᠳᠡᠷᠪᠡᠭᠦᠯᠦᠨᠡ
ᠨᠡᠷᠡᠲᠦ ᠳ᠋ᠦ᠍ ᠣᠯᠳᠠᠭᠰᠠᠨ ᠨᠠᠰᠤ ᠪᠠᠨ ᠴᠢᠮᠠ ᠦᠭᠡᠢ ᠥᠩᠭᠡᠷᠡᠭᠡᠬᠦ ᠨᠢ ᠬᠠᠯᠠᠭ
ᠨᠠᠰᠤᠨ ᠡᠭᠦᠷᠢᠳᠡ ᠶ᠋ᠢᠨ ᠵᠢᠪᠠᠷ ᠬᠠᠷᠠᠬᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠬᠤᠷᠭᠠᠵᠤ
ᠨᠠᠮᠤᠭᠤᠨ ᠰᠥᠨᠢ ᠶ᠋ᠢᠨ ᠠᠨᠢᠷ ᠦᠭᠡᠢ ᠳ᠋ᠦ᠍ ᠳᠡᠷᠡ ᠪᠡᠨ ᠨᠡᠪᠲᠡᠯᠦᠨ ᠤᠬᠢᠯᠠᠨᠠ᠃
ᠴᠠᠷᠴᠠ ᠶ᠋ᠢᠨ ᠳᠠᠭᠤ ᠪᠦᠳᠡᠭᠢᠷᠡᠭᠰᠡᠨ ᠨᠠᠮᠤᠷ ᠤ᠋ᠨ ᠰᠡᠭᠦᠯᠴᠢ ᠡᠳᠦᠷ ᠦ᠋ᠳ ᠲᠦ᠍
ᠴᠠᠩᠲᠤᠭᠰᠠᠨ ᠡᠪᠡᠰᠦ ᠪᠥᠬᠥᠯᠵᠡᠨ ᠨᠠᠮᠠᠢ ᠳ᠋ᠠᠭᠠᠨ ᠨᠠᠢᠭᠤᠨᠠ᠃
ᠬᠡᠭᠡᠷᠡ ᠶ᠋ᠢᠨ ᠡᠮᠨᠢᠭ ᠰᠠᠯᠬᠢ᠂ ᠡᠩᠭᠡᠷ ᠵᠠᠭᠠᠮᠠ ᠪᠠᠷ ᠰᠢᠷᠭᠤᠯᠠᠵᠤ
ᠬᠡᠵᠢᠶᠡ ᠪᠠᠭᠠ ᠶ᠋ᠢᠨ ᠳᠤᠷᠠᠳᠬᠠᠯ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠭᠦᠨᠳᠡᠨᠡ᠃
ᠡᠷᠢᠶᠡᠨ ᠪᠠᠷᠠᠭᠠᠨ ᠬᠣᠷᠸᠠ ᠶ᠋ᠢᠨ ᠠᠭᠠᠰᠢ ᠶ᠋ᠢ ᠳᠠᠭᠠᠬᠤ ᠬᠡᠴᠡᠭᠦᠦ
ᠡᠩ ᠦ᠋ᠨ ᠬᠥᠮᠦᠨ ᠰᠢᠭ ᠶᠠᠪᠤᠭᠠᠳ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠬᠡᠴᠡᠭᠦᠦ
ᠵᠡᠭᠦᠳᠦ ᠵᠡᠷᠭᠡᠯᠭᠡᠲᠦ ᠬᠣᠷᠸᠠ ᠶ᠋ᠢᠨ ᠠᠭᠠᠯᠢ ᠶ᠋ᠢ ᠳᠠᠭᠠᠬᠤ ᠬᠡᠴᠡᠭᠦᠦ
ᠵᠦᠭ ᠦ᠋ᠨ ᠬᠥᠮᠦᠨ ᠰᠢᠭ ᠶᠠᠪᠤᠭᠠᠳ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠬᠡᠴᠡᠭᠦᠦ᠃
ᠮᠢᠩᠭᠠ ᠮᠢᠩᠭᠠᠨ ᠵᠢᠯ ᠢ᠋ ᠡᠯᠡᠭᠡᠵᠦ ᠂ᠡᠯᠡᠭᠳᠡᠭᠰᠡᠨ ᠠᠭᠤᠯᠠᠰ
ᠮᠠᠩᠨᠠᠢ ᠳ᠋ᠠᠭᠠᠨ ᠡᠭᠦᠯᠡ ᠭᠡᠲᠡᠷᠦᠨ᠂ ᠳᠣᠷᠣᠨᠠ ᠵᠦᠭ ᠤᠷᠤᠭᠤ ᠬᠣᠰᠢᠭᠤᠷᠠᠨᠠ
ᠮᠢᠷᠠᠯᠵᠠᠨ ᠮᠢᠷᠠᠯᠵᠠᠨ ᠣᠳᠬᠤ ᠡᠷᠲᠡᠨ ᠦ᠌ ᠤᠷᠤᠰᠬᠠᠯ ᠭᠣᠣᠯ ᠤ᠋ᠳ
ᠮᠠᠨᠠᠨ ᠪᠤᠳᠠᠩ ᠨᠡᠪᠲᠡᠯᠦᠨ ᠥᠷᠥᠨᠡ ᠤᠷᠤᠭᠤ ᠳᠣᠪᠲᠣᠯᠤᠨᠠ᠃
ᠠᠯᠲᠠᠨ ᠨᠠᠷᠠᠨ ᠠ᠋ᠴᠠ ᠤᠶᠠᠭᠠ ᠲᠠᠢ ᠠᠩᠭᠢᠷ ᠨᠠᠮᠤᠷ ᠤ᠋ᠨ ᠡᠳᠦᠷ ᠦ᠋ᠳ
ᠠᠯᠠᠭ ᠡᠷᠢᠶᠡᠨ ᠬᠣᠷᠸᠠ ᠳ᠋ᠤ᠌ ᠡᠭᠡᠯᠵᠢᠯᠡᠨ ᠡᠭᠡᠯᠵᠢᠯᠡᠨ ᠢᠷᠡᠨᠡ᠃
ᠠᠮᠠᠷᠠᠭ ᠴᠢᠮᠠ ᠳ᠋ᠠᠭᠠᠨ ᠤᠶᠠᠭᠠ ᠲᠠᠢ ᠮᠢᠨᠦ ᠬᠣᠩᠭᠣᠷ ᠰᠡᠳᠬᠢᠯ
ᠠᠳᠤᠭᠤᠲᠤ ᠲᠠᠯᠠ ᠶ᠋ᠢᠨ ᠠᠭᠤᠯᠠᠰ ᠤᠷᠤᠭᠤ ᠡᠷᠭᠢᠨ ᠨᠢᠰᠦᠨᠡ᠃
ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠥᠪᠡᠷ ᠦ᠋ᠨ ᠭᠠᠭᠴᠠ ᠶ᠋ᠢ ᠬᠠᠷᠠᠭᠤᠯᠳᠠᠨᠠ
ᠥᠷᠯᠥᠭᠡ ᠡᠷᠲᠡ ᠭᠠᠷᠤᠭᠰᠠᠨ ᠶᠤᠮ᠂ ᠡᠳᠦᠷ ᠳᠤᠮᠳᠠ ᠢᠷᠡᠨᠡ ᠳᠠ᠃
ᠬᠣᠢᠲᠤ ᠬᠥᠨᠳᠡᠢ ᠠᠭᠤᠳᠠᠮ᠂ ᠬᠣᠶᠠᠷ ᠮᠣᠷᠢ ᠲᠠᠢ ᠭᠠᠷᠤᠭᠰᠠᠨ ᠳᠠ
ᠬᠣᠯᠠ ᠠ᠋ᠴᠠ ᠳᠠᠪᠬᠢᠭᠰᠠᠭᠠᠷ ᠢᠷᠡᠬᠦ ᠳ᠋ᠦ᠍ ᠬᠣᠭᠣᠯᠠᠢ ᠳᠡᠭᠡᠷᠡ ᠵᠠᠩᠭᠢᠷᠠᠨᠠ᠃
ᠬᠠᠳᠠᠨ ᠳ᠋ᠤ᠌ ᠤᠷᠭᠤᠭᠰᠠᠨ ᠴᠡᠴᠡᠭ ᠬᠠᠮᠤᠭ ᠠ᠋ᠴᠠ ᠲᠦᠷᠦᠭᠦᠨ ᠳ᠋ᠦ᠍ ᠭᠤᠨᠳᠠᠨᠠ
ᠬᠠᠳᠠᠮ ᠳ᠋ᠤ᠌ ᠣᠴᠢᠭᠰᠠᠨ ᠪᠦᠰᠡᠭᠦᠢ ᠳ᠋ᠦ᠍ ᠬᠠᠢᠷᠠ ᠪᠠᠨ ᠶᠠᠭᠤᠨ ᠳ᠋ᠠᠭᠠᠨ ᠥᠭᠪᠡ ᠳᠡ᠃
ᠡᠯᠡᠰᠦᠨ ᠳ᠋ᠦ᠍ ᠤᠷᠭᠤᠭᠰᠠᠨ ᠴᠡᠴᠡᠭ ᠡᠬᠢᠨ ᠦ᠌ ᠵᠢᠪᠠᠷ ᠲᠤ᠌ ᠭᠤᠨᠳᠠᠨᠠ
ᠡᠬᠡᠨᠡᠷ ᠨᠡᠷᠡ ᠲᠡᠢ ᠪᠦᠰᠡᠭᠦᠢ ᠳ᠋ᠦ᠍ ᠬᠠᠢᠷᠠ ᠪᠠᠨ ᠶᠠᠭᠤᠨ ᠳ᠋ᠤ᠌ ᠥᠭᠪᠡ ᠳᠡ᠃
ᠳᠣᠯᠣᠭᠠᠨ ᠬᠥᠪᠡᠭᠡᠨ ᠦ᠌ ᠴᠢᠨᠠᠳᠤ ᠥᠨᠥᠴᠢᠨ ᠪᠣᠲᠣᠭᠣ ᠪᠣᠢᠯᠠᠨᠠ
ᠳᠣᠷᠣᠨᠠ ᠶ᠋ᠢᠨ ᠨᠠᠮᠤᠭᠤᠨ ᠠᠶᠠᠯᠭᠤ ᠰᠡᠳᠬᠢᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠰᠡᠮᠡᠯᠦᠨᠡ᠃
ᠶᠢᠰᠦᠨ ᠮᠠᠩᠬᠠᠨ ᠤ᠋ ᠴᠠᠭᠠᠨᠠ ᠴᠠᠭᠠᠨ ᠤᠨᠠᠭᠠ ᠦᠦᠷᠰᠡᠨᠡ
ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠠᠶᠠᠯᠭᠤ ᠪᠦᠯᠢᠶᠡᠨ ᠭᠤᠨᠢᠭ ᠤᠷᠤᠰᠬᠠᠨᠠ᠃
ᠠᠯᠴᠢᠭᠤᠷ ᠲᠤ᠌ ᠪᠣᠭᠣᠭᠰᠠᠨ ᠴᠠᠭᠠᠶ ᠢ᠋ ᠠᠮᠠᠷᠠᠭ ᠴᠢᠮᠠ ᠠ᠋ᠴᠠ ᠪᠠᠨ ᠠᠪᠤᠭᠰᠠᠨ ᠳᠠ
ᠠᠢᠯ ᠤ᠋ᠨ ᠪᠡᠷᠢ ᠪᠣᠯᠬᠤ ᠳ᠋ᠤ᠌ ᠠᠷᠤ ᠠ᠋ᠴᠠ ᠨᠢ ᠬᠠᠷᠠᠭᠠᠳ ᠬᠣᠴᠣᠷᠤᠭᠰᠠᠨ ᠳᠠ
ᠲᠣᠷᠭᠠᠨ ᠳ᠋ᠤ᠌ ᠪᠣᠭᠣᠭᠰᠠᠨ ᠠᠶᠠᠭᠠ ᠶ᠋ᠢ ᠲᠣᠮᠣᠭᠠ ᠦᠭᠡᠢ ᠴᠢᠮᠠ ᠠ᠋ᠴᠠ ᠪᠠᠨ ᠠᠪᠤᠭᠰᠠᠨ ᠳᠠ
ᠲᠣᠭᠯᠠᠵᠤ ᠪᠠᠢᠭᠠᠳ ᠶᠠᠪᠤᠬᠤ ᠳ᠋ᠤᠨᠢ ᠲᠣᠩᠭᠣᠢᠵᠤ ᠤᠬᠢᠯᠠᠭᠠᠳ ᠬᠣᠴᠣᠷᠤᠭᠰᠠᠨ ᠳᠠ᠃
ᠡᠪᠦᠭᠡᠨ ᠮᠠᠩᠬᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠬᠣᠷᠭᠣᠳᠠᠨ ᠬᠣᠶᠠᠭᠤᠯᠠ ᠪᠠᠨ ᠰᠠᠭᠤᠳᠠᠭ ᠰᠠᠨ
ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠯᠠ ᠵᠣᠭᠰᠣᠨᠠᠮ᠃
ᠰᠡᠷᠪᠡᠩ ᠦ᠋ᠨ ᠬᠠᠢᠯᠠᠰᠤ ᠪᠥᠬᠥᠯᠵᠡᠨ ᠨᠠᠮᠤᠷ ᠤ᠋ᠨ ᠰᠠᠯᠬᠢᠨ ᠳ᠋ᠤ᠌ ᠢᠰᠬᠡᠷᠦᠨᠡ
ᠰᠡᠳᠬᠢᠯ ᠦ᠋ᠨ ᠲᠡᠩᠭᠡᠯᠢᠭ ᠠᠯᠳᠠᠷᠠᠵᠤ᠂ ᠨᠠᠢᠭᠤᠨ ᠨᠠᠢᠭᠤᠨ ᠭᠠᠩᠰᠠᠷᠠᠨᠠ᠃
ᠬᠠᠷᠪᠤᠭᠰᠠᠨ ᠣᠳᠣᠨ ᠤ᠋ ᠭᠡᠭᠡ ᠵᠠᠮᠬᠠᠷᠠᠵᠤ ᠠᠮᠵᠢᠭᠠ ᠦᠭᠡᠢ ᠴᠢᠯᠥᠭᠡᠨ ᠳ᠋ᠦ᠍
ᠠᠯᠬᠠ ᠶ᠋ᠢᠨ ᠰᠠᠷᠠᠭᠤᠯ ᠲᠠᠯᠠ ᠳ᠋ᠤ᠌ ᠠᠳᠤᠭᠤ ᠢᠨᠴᠠᠭᠠᠬᠤ ᠰᠣᠨᠣᠰᠳᠠᠨᠠ᠃
ᠲᠣᠭᠣᠷᠢᠮ ᠤ᠋ᠨ ᠴᠠᠭᠠᠨ ᠳᠠᠷᠠᠰᠤ ᠲᠣᠳᠣᠷᠠᠨ ᠪᠦᠳᠡᠭᠢᠷᠡᠨ ᠦᠵᠡᠭᠳᠡᠵᠦ
ᠲᠣᠮᠣᠭᠠ ᠦᠭᠡᠢ ᠪᠠᠭᠠ ᠴᠢᠮᠠ ᠲᠠᠢ ᠪᠠᠨ ᠡᠭᠦᠪᠡᠷ ᠲᠡᠭᠦᠪᠡᠷ ᠶᠠᠪᠤᠳᠠᠭ ᠰᠠᠨ᠃
ᠬᠦᠳᠡᠩ ᠲᠠᠲᠠᠭᠰᠠᠨ ᠰᠠᠷᠢᠳᠠᠭ᠂ ᠬᠦᠢᠲᠡᠨ ᠰᠡᠷᠡᠭᠦᠨ ᠠᠮᠢᠰᠬᠤᠯ ᠲᠠᠢ
ᠬᠥᠮᠦᠨ ᠦ᠌ ᠬᠢ ᠪᠣᠯᠤᠭᠰᠠᠨ ᠠᠨᠢᠮᠠ ᠬᠦᠷᠦᠭᠡᠳ ᠢᠷᠡᠬᠦ ᠦᠭᠡᠢ ᠨᠢ ᠭᠠᠰᠠᠯᠠᠩ ᠲᠠᠢ
ᠴᠡᠴᠡᠭ ᠦ᠋ᠨ ᠳᠡᠯᠪᠡᠭᠡᠨ ᠳ᠋ᠦ᠍ ᠠᠮᠠᠷᠠᠭᠰᠠᠨ ᠴᠡᠩᠬᠡᠷ ᠶᠠᠭᠠᠨ ᠰᠠᠯᠬᠢ ᠲᠠᠢ
ᠴᠡᠩᠭᠡᠯ ᠲᠡᠢ ᠵᠤᠨ ᠤ᠋ ᠰᠠᠷᠠ ᠨᠤᠭᠤᠳ ᠬᠦᠰᠡᠭᠡᠳ ᠢᠷᠡᠬᠦ ᠦᠭᠡᠢ ᠨᠢ ᠭᠠᠴᠢᠯᠠᠩ ᠲᠠᠢ᠃
ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠨᠠᠮᠠᠶ᠋ᠢ ᠪᠠᠨ ᠵᠠᠪᠰᠠᠷ ᠵᠠᠢ ᠦᠭᠡᠢ ᠪᠣᠳᠣᠨᠠ ᠳᠠ
ᠣᠶᠣᠭᠠᠳ ᠥᠭᠭᠦᠭᠰᠡᠨ ᠳᠡᠪᠡᠯ ᠢ᠋ ᠨᠢ ᠬᠠᠶᠠ ᠨᠢᠭᠡ ᠡᠮᠦᠰᠦᠨᠡ
ᠤᠬᠢᠯᠠᠭᠠᠳ ᠶᠠᠪᠤᠭᠰᠠᠨ ᠨᠠᠮᠠᠶ᠋ᠢ ᠪᠠᠨ ᠵᠠᠪᠰᠠᠷ ᠵᠠᠢ ᠦᠭᠡᠢ ᠪᠣᠳᠣᠨᠠ ᠳᠠ
ᠤᠷᠠᠯᠠᠭᠠᠳ ᠥᠭᠭᠦᠭᠰᠡᠨ ᠴᠠᠮᠴᠠ ᠶ᠋ᠢ ᠨᠢ ᠠᠭᠤᠴᠢᠯᠠᠵᠤ ᠨᠢᠭᠡ ᠡᠮᠦᠰᠦᠨᠡ ᠳᠡ᠃
ᠠᠢᠯ ᠤ᠋ᠨ ᠬᠥᠮᠦᠨ ᠡᠴᠡ ᠠᠰᠠᠭᠤᠬᠤ ᠠ᠋ᠴᠠ ᠠᠶᠤᠵᠤ ᠢᠴᠢᠵᠦ ᠵᠣᠪᠠᠨᠠ ᠳᠠ
ᠠᠷᠭᠠᠯᠢ ᠶ᠋ᠢᠨ ᠡᠪᠡᠷ ᠰᠢᠭ ᠠᠭᠤᠯᠠᠰ ᠠᠷᠬᠠᠢᠵᠤ ᠳᠠᠷᠬᠠᠢᠵᠤ ᠬᠥᠨᠳᠡᠯᠢᠳᠦᠨᠡ
ᠠᠶᠠᠨ ᠤ᠋ ᠬᠥᠮᠦᠨ ᠡᠴᠡ ᠰᠤᠷᠠᠬᠤ ᠠ᠋ᠴᠠ ᠠᠶᠤᠵᠤ ᠢᠴᠢᠵᠦ ᠵᠣᠪᠠᠨᠠ ᠳᠠ
ᠠᠷᠰᠯᠠᠨ ᠤ᠋ ᠳᠡᠯ ᠰᠢᠭ ᠠᠭᠤᠯᠠᠰ ᠠᠷᠤ ᠡᠪᠦᠷ ᠦᠭᠡᠢ ᠬᠥᠨᠳᠡᠯᠢᠳᠦᠨᠡ᠃
ᠳᠠᠮ ᠳᠠᠮᠵᠢᠭᠤ ᠬᠥᠮᠦᠨ ᠡᠴᠡ ᠰᠤᠷᠠᠭ ᠨᠢᠭᠡᠨ ᠲᠡᠢ ᠰᠣᠨᠣᠰᠪᠠᠯ
ᠳᠠᠪᠬᠤᠷ ᠳᠠᠪᠬᠤᠷ ᠪᠠᠶᠠᠷ ᠬᠡᠳᠦᠨ ᠡᠳᠦᠷ ᠦᠷᠭᠦᠯᠵᠢᠯᠡᠨᠡ ᠳᠡ
ᠬᠣᠯᠠ ᠳᠠᠮᠵᠢᠭᠤ ᠬᠥᠮᠦᠨ ᠡᠴᠡ ᠰᠤᠷᠠᠭ ᠨᠢᠭᠡᠨᠲᠡ ᠰᠣᠨᠣᠰᠪᠠᠯ
ᠬᠣᠨᠣᠭ ᠬᠣᠨᠣᠭ ᠪᠠᠶᠠᠷ ᠬᠡᠳᠦᠨ ᠡᠳᠦᠷ ᠦᠷᠭᠦᠯᠵᠢᠯᠡᠨᠡ ᠳᠡ᠃
ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠲᠩᠷᠢ ᠮᠠᠷᠭᠠᠳ ᠡᠷᠳᠡᠨᠢ ᠶ᠋ᠢᠨ ᠥᠩᠭᠡ ᠲᠡᠢ
ᠮᠠᠭᠠᠳ ᠤ᠋ᠨ ᠠᠮᠠᠷᠠᠭ ᠬᠦᠦ ᠲᠡᠢ ᠪᠡᠨ ᠬᠡᠵᠢᠶᠡ ᠨᠢᠭᠡ ᠠᠭᠤᠯᠵᠠᠬᠤ ᠪᠣᠯ
ᠣᠷᠴᠢᠯᠠᠩ ᠬᠣᠷᠸᠠ ᠶ᠋ᠢᠨ ᠲᠩᠷᠢ ᠸᠴᠢᠷ ᠡᠷᠳᠡᠨᠢ ᠶ᠋ᠢᠨ ᠥᠩᠭᠡ ᠲᠡᠢ
ᠣᠷᠬᠢᠵᠤ ᠪᠣᠯᠤᠮᠠ ᠦᠭᠡᠢ ᠬᠦᠦ ᠲᠡᠢ ᠪᠡᠨ ᠬᠡᠵᠢᠶᠡ ᠨᠢᠭᠡ ᠠᠭᠤᠯᠵᠠᠬᠤ ᠪᠣᠯ᠃
ᠬᠤᠭᠤᠷ᠂ ᠬᠠᠭᠤᠴᠢᠷ ᠬᠣᠶᠠᠷ ᠬᠠᠭᠤᠴᠢᠯᠠᠵᠤ ᠬᠦᠦᠷᠨᠢᠨ ᠬᠦᠩᠭᠢᠨᠡᠨᠡ
ᠬᠤᠯᠤᠰᠤᠨ ᠯᠢᠮᠪᠦ ᠶ᠋ᠢᠨ ᠡᠭᠡᠰᠢᠭ᠂ ᠡᠬᠢᠯᠡᠯ ᠲᠡᠭᠦᠰᠬᠡᠯ ᠦᠭᠡᠢ ᠣᠶᠠᠩᠭᠠᠷᠠᠨᠠ᠃
ᠬᠤᠪᠢᠯᠭᠠᠨ ᠳᠣᠷᠣᠨᠠ ᠶ᠋ᠢᠨ ᠠᠶᠠᠯᠭᠤ ᠰᠡᠳᠬᠢᠯ ᠵᠢᠷᠦᠬᠡ ᠶ᠋ᠢ ᠬᠥᠨᠳᠡᠨᠡ
ᠬᠤᠤᠳᠤᠤ ᠦᠭᠡᠢ ᠠᠮᠠᠷᠠᠭ ᠬᠦᠦ ᠪᠡᠨ ᠰᠠᠨᠠᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠢᠨᠠᠭᠰᠢᠨᠠ᠃
ᠬᠥᠬᠡᠯᠪᠡᠢ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠬᠥᠳᠡᠭᠡ ᠶ᠋ᠢᠨ ᠠᠭᠠᠷ ᠴᠢᠴᠢᠭᠢᠨᠡᠨᠡ
ᠬᠥᠭᠰᠢᠨ ᠤᠯᠢᠶᠠᠰᠤᠨ ᠤ᠋ ᠮᠥᠴᠢᠷ ᠲᠦ᠍ ᠡᠬᠡ ᠶ᠋ᠢᠨ ᠣᠳᠣᠳ
ᠲᠣᠷᠭᠠᠨ ᠴᠠᠭᠠᠨ ᠰᠠᠷᠠ ᠲᠣᠮᠣ ᠭᠡᠷ ᠰᠢᠭ ᠴᠠᠢᠷᠠᠨᠠ
ᠲᠤᠯᠤᠭᠠᠳ ᠳᠠᠮᠵᠢᠭᠰᠠᠨ ᠰᠠᠯᠬᠢ ᠲᠣᠭᠲᠠᠵᠤ ᠨᠢᠭᠡᠬᠡᠨ ᠠᠮᠠᠷᠠᠨᠠ᠃
ᠲᠠᠷᠢᠶᠠ ᠪᠤᠳᠠᠭᠠ ᠤᠢᠳᠬᠤ ᠨᠠᠮᠤᠷ ᠣᠷᠣᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ
ᠳᠠᠭᠠᠨᠠ ᠶ᠋ᠢᠨ ᠴᠡᠴᠡᠭᠡᠰ ᠭᠠᠩᠳᠠᠵᠤ᠂ ᠲᠠᠯᠠ ᠬᠥᠨᠳᠡᠢ ᠵᠡᠭᠦᠷᠮᠡᠭᠯᠡᠨᠡ᠃
ᠬᠦᠢᠲᠡᠨ ᠠᠭᠠᠷ ᠲᠤ᠌ ᠠᠭᠤᠰᠬᠤ ᠢᠩᠭᠡᠨ ᠦ᠌ ᠪᠤᠢᠯᠠᠭᠠᠨ ᠴᠠᠷᠴᠠᠵᠤ
ᠬᠡᠦᠷᠡᠭ ᠲᠠᠲᠠᠭᠰᠠᠨ ᠰᠥᠨᠢ ᠶ᠋ᠢᠨ ᠮᠥᠩᠭᠥᠨ ᠣᠳᠣᠳ ᠵᠢᠩᠭᠢᠨᠡᠨᠡ᠃
ᠦᠦᠷ ᠦ᠋ᠨ ᠵᠢᠪᠠᠷ ᠲᠤ᠌ ᠰᠣᠢᠭᠰᠠᠨ ᠦᠷᠢᠶᠡ ᠬᠡᠭᠡᠷ ᠵᠢᠪᠬᠡᠷᠴᠦ
ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠤᠨᠠᠬᠤ ᠳ᠋ᠤ᠌ ᠲᠡᠭᠡᠵᠦ ᠳᠡᠭᠦᠯᠢᠨ ᠠᠯᠳᠠᠨᠠ᠃
ᠬᠠᠲᠠᠭᠤ ᠲᠡᠮᠦᠷ ᠠᠮᠠᠭᠠᠢ ᠶ᠋ᠢ ᠬᠠᠷᠭᠢᠶᠠ ᠬᠦᠢᠲᠡᠨ ᠳ᠋ᠦ᠍ ᠵᠠᠭᠤᠯᠭᠠᠵᠤ
ᠬᠠᠯᠠᠭᠤᠨ ᠠᠮᠢᠰᠬᠤᠯᠲᠤ ᠵᠠᠪᠠᠵᠢ ᠶ᠋ᠢ ᠨᠢ ᠬᠠᠭᠠᠷᠢᠬᠤ ᠠ᠋ᠴᠠ ᠠᠶᠤᠯ ᠦᠭᠡᠢ ᠮᠣᠷᠳᠠᠨᠠ᠃
ᠠᠩᠭᠠᠷᠠᠭ ᠬᠦᠷᠬᠦ ᠵᠠᠢ ᠶ᠋ᠢ ᠠᠤᠭᠠ ᠠᠭᠤᠵᠢᠮ ᠳ᠋ᠤ᠌ ᠪᠣᠳᠣᠭᠰᠠᠨ ᠶᠤᠮ
ᠠᠮᠠᠷᠠᠭ ᠰᠡᠳᠬᠢᠯ ᠦ᠋ᠨ ᠵᠠᠢ ᠲᠡᠭᠦᠨ ᠡᠴᠡ ᠬᠣᠯᠠ ᠪᠠᠢᠬᠤ ᠳᠠ
ᠬᠣᠶᠠᠷ ᠰᠡᠳᠬᠢᠯ ᠦ᠋ᠨ ᠵᠠᠢ ᠠ᠋ᠴᠠ ᠬᠣᠯᠠ ᠶᠠᠭᠤᠮᠠ ᠦᠭᠡᠢ ᠶ᠋ᠢ
ᠬᠣᠷᠸᠠ ᠶ᠋ᠢ ᠲᠠᠨᠢᠭᠰᠠᠨ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠦᠨᠡᠨ ᠥᠭᠦᠯᠡᠵᠦ ᠳᠡ᠃
ᠵᠡᠭᠦᠦ ᠣᠷᠣᠬᠤ ᠵᠠᠢ ᠶ᠋ᠢ ᠬᠠᠮᠤᠭ ᠤ᠋ᠨ ᠦᠷᠡ ᠳ᠋ᠦ᠍ ᠪᠣᠳᠣᠭᠰᠠᠨ ᠶᠤᠮ
ᠵᠢᠷᠦᠬᠡᠨ ᠦ᠌ ᠢᠨᠠᠭ ᠰᠡᠳᠬᠢᠯ ᠲᠡᠭᠦᠨ ᠡᠴᠡ ᠣᠢᠷᠠ ᠪᠠᠢᠵᠤ ᠳᠠ
ᠵᠡᠭᠦᠳᠦᠨ ᠪᠤᠭᠤᠷᠤᠯ ᠬᠣᠷᠸᠠ ᠳ᠋ᠤ᠌ ᠬᠣᠶᠠᠷ ᠰᠡᠳᠬᠢᠯ ᠡᠴᠡ ᠦᠷᠡ ᠦᠭᠡᠢ ᠶ᠋ᠢ
ᠵᠦᠢᠯ ᠢ᠋ ᠲᠠᠨᠢᠭᠰᠠᠨ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠦᠨᠡᠨ ᠥᠭᠦᠯᠡᠵᠦ ᠳᠡ᠃
ᠬᠠᠯᠠᠭᠤᠨ ᠢᠨᠠᠭ ᠰᠡᠳᠬᠢᠯ ᠨᠢ ᠢᠮᠠᠬᠤ ᠶ᠋ᠢᠨ ᠲᠡᠳᠦᠢ ᠴᠦ᠍ ᠵᠠᠢ ᠦᠭᠡᠢ
ᠬᠠᠢᠷᠠᠲᠠᠢ ᠵᠢᠭᠠᠬᠠᠨ ᠠᠨᠢᠮᠠ ᠮᠢᠨᠦᠬᠢ ᠴᠦ᠍ ᠭᠡᠰᠡᠨ ᠬᠥᠮᠦᠨ ᠦ᠌ ᠬᠢ ᠠ᠋
ᠦᠨᠡᠨ ᠢᠨᠠᠭ ᠰᠡᠳᠬᠢᠯ ᠳ᠋ᠦ᠍ᠨᠢ ᠥᠴᠦᠬᠡᠨ ᠲᠡᠳᠦᠢ ᠴᠦ᠍ ᠵᠠᠢ ᠦᠭᠡᠢ ᠠ᠋
ᠦᠶᠡ ᠶ᠋ᠢᠨ ᠵᠢᠭᠠᠬᠠᠨ ᠠᠨᠢᠮᠠ ᠬᠥᠮᠦᠨ ᠦ᠌ ᠬᠢ ᠴᠦ᠍ ᠭᠡᠰᠡᠨ ᠮᠢᠨᠦᠬᠢ ᠠ᠋᠃
ᠮᠥᠩᠬᠡ ᠪᠢᠰᠢ ᠨᠠᠰᠤᠨ ᠳ᠋ᠠᠭᠠᠨ ᠮᠥᠨ ᠪᠡᠶᠡ ᠶ᠋ᠢ ᠨᠢ ᠣᠯᠤᠭᠰᠠᠨ ᠶᠤᠮ
ᠮᠥᠩᠭᠥᠨ ᠰᠠᠷᠠᠨ ᠤ᠋ ᠳᠣᠣᠷᠠ ᠬᠦᠦᠷᠨᠢᠵᠦ ᠰᠠᠭᠤᠭᠠᠳ ᠳᠠᠰᠤᠭᠰᠠᠨ ᠶᠤᠮ
ᠡᠨᠡ ᠶᠠᠪᠤᠭᠠ ᠨᠠᠰᠤᠨ ᠳ᠋ᠠᠭᠠᠨ ᠡᠷᠬᠡ ᠬᠣᠩᠭᠣᠷ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠶᠤᠮ
ᠡᠷᠳᠡᠨᠢ ᠶ᠋ᠢᠨ ᠨᠠᠷᠠᠨ ᠳᠣᠣᠷᠠ ᠬᠦᠦᠷᠨᠢᠵᠦ ᠰᠠᠭᠤᠭᠠᠳ ᠳᠠᠰᠤᠭᠰᠠᠨ ᠶᠤᠮ᠃
ᠪᠥᠭᠡᠷᠡᠩᠬᠡᠢ ᠡᠨᠡ ᠬᠣᠷᠸᠠ ᠶ᠋ᠢᠨ ᠪᠥᠭᠡᠷᠡᠨ ᠳᠡᠭᠡᠷᠡ ᠨᠢ ᠠᠮᠢᠳᠤᠷᠠᠨᠠ
ᠪᠥᠭᠡᠮ ᠴᠠᠭᠠᠨ ᠡᠭᠦᠯᠡ ᠰᠢᠭ ᠨᠡᠭᠦᠵᠦ ᠶᠠᠪᠤᠭᠠᠳ ᠳᠠᠭᠤᠰᠤᠨᠠ᠃
ᠮᠠᠨᠠᠨ ᠲᠠᠢ ᠡᠨᠡ ᠣᠷᠴᠢᠯᠠᠩ ᠤ᠋ᠨ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠠᠮᠢᠳᠤᠷᠠᠨᠠ
ᠮᠠᠷᠲᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠠᠨᠢᠮᠠ ᠪᠠᠨ ᠬᠠᠢᠷᠠᠯᠠᠵᠤ ᠶᠠᠪᠤᠭᠠᠳ ᠳᠠᠭᠤᠰᠤᠨᠠ᠃
ᠬᠥᠬᠡᠷᠡᠬᠦ ᠮᠥᠩᠬᠡ ᠶ᠋ᠢᠨ ᠠᠭᠤᠳᠠᠮ ᠨᠢ ᠨᠠᠷᠠᠨ ᠰᠠᠷᠠᠨ ᠴᠢᠮᠡᠭ ᠲᠡᠢ
ᠬᠥᠬᠢᠭᠡᠨ ᠳᠠᠭᠤᠨ ᠤ᠋ ᠡᠭᠡᠰᠢᠭ ᠨᠢ ᠨᠠᠮᠤᠷ ᠤ᠋ᠨ ᠰᠠᠷᠠ ᠳ᠋ᠠᠭᠠᠨ ᠲᠠᠲᠠᠷᠠᠨᠠ
ᠬᠥᠭᠡᠷᠦᠬᠦᠨ ᠲᠥᠷᠥᠭᠰᠡᠨ ᠲᠡᠷᠡ ᠮᠢᠨᠢ ᠮᠡᠩᠭᠡ ᠰᠡᠪᠬᠡᠨ ᠴᠢᠮᠡᠭ ᠲᠡᠢ
ᠬᠥᠭᠰᠢᠷᠡᠬᠦ ᠴᠠᠭ ᠠ᠋ᠴᠠ ᠡᠮᠦᠨᠡ ᠨᠠᠭᠠᠯᠢᠩᠬᠠᠢ ᠲᠡᠭᠦᠨ ᠳ᠋ᠡᠭᠡᠨ ᠲᠡᠰᠦᠨᠡ᠃
ᠡᠲᠡᠭᠡᠳ ᠪᠤᠷᠤᠭᠤ ᠦᠢᠯᠡ ᠡᠴᠡ ᠵᠢᠭᠤᠲᠠᠨ ᠵᠠᠢᠯᠠᠵᠤ ᠶᠠᠪᠤᠨᠠᠮ
ᠡᠷᠳᠡᠨᠢᠲᠦ ᠬᠣᠩᠭᠣᠷ ᠴᠢᠮᠠᠶ᠋ᠢ ᠪᠠᠨ ᠰᠢᠳᠦᠨ ᠪᠢᠰᠢᠷᠡᠵᠦ ᠶᠠᠪᠤᠨᠠᠮ
ᠰᠠᠢᠨ ᠬᠤᠪᠢᠲᠤ ᠰᠢᠯᠦᠭᠴᠢ ᠶ᠋ᠢᠨ ᠰᠠᠷᠠᠭᠤᠯ ᠣᠶᠤᠨ ᠢ᠋ ᠢᠪᠡᠭᠡᠨᠡᠮ
ᠰᠠᠢᠲᠤᠷ ᠨᠣᠮᠯᠠᠭᠰᠠᠨ ᠰᠤᠷᠭᠠᠯ ᠢ᠋ ᠥᠷᠯᠥᠭᠡ ᠦᠳᠡᠰᠢ ᠦᠭᠡᠢ ᠠᠢᠯᠠᠳᠤᠨᠠᠮ᠃
ᠴᠡᠩᠭᠡᠯ ᠵᠢᠷᠭᠠᠯ ᠶᠡᠬᠡᠳᠦᠪᠡᠰᠦ ᠴᠡᠩᠭᠡᠵᠦ ᠁ ᠬᠠᠢᠷᠠᠯᠠᠨᠠᠮ
ᠴᠥᠪ ᠦ᠋ᠨ ᠴᠠᠭ ᠤ᠋ᠨ ᠦᠢᠯᠡ ᠡᠴᠡ ᠰᠡᠴᠡᠳ ᠮᠡᠷᠭᠡᠳ᠁
ᠤᠷᠠᠨ ᠢᠷᠠᠭᠤ ᠰᠢᠯᠦᠭ ᠢ᠋ᠶ᠋ᠡᠨ ᠤᠬᠠᠭᠠᠨᠲᠤ ᠠᠨᠢᠮᠠ ᠳ᠋ᠠᠭᠠᠨ ᠵᠣᠷᠢᠭᠤᠯᠤᠨᠠᠮ
ᠤᠶᠠᠩᠭᠠ ᠨᠠᠢᠷᠠᠭ ᠤ᠋ᠨ ᠲᠩᠷᠢ᠂ ᠤᠴᠢᠷ ᠢ᠋ ᠠᠢᠯᠠᠳᠤᠨ ᠪᠣᠯᠭᠣᠭᠠᠨᠠᠮ᠃
ᠦᠯᠡᠮᠵᠢ ᠰᠠᠢᠬᠠᠨ ᠵᠢᠰᠦ ᠨᠢ ᠡᠭᠦᠯᠡᠨ ᠴᠢᠯᠥᠭᠡᠨ ᠦ᠌ ᠨᠠᠷᠠᠨ
ᠦᠵᠡᠲᠡᠯᠡ ᠠᠷᠢᠭᠤᠨ ᠰᠡᠳᠬᠢᠯ ᠨᠢ ᠡᠭᠦᠷᠢᠳᠡ ᠶ᠋ᠢᠨ ᠦᠨᠡᠲᠡᠢ ᠨᠠᠷᠠ
ᠳᠣᠷᠣᠢᠲᠠᠬᠤ ᠦᠢᠯᠡ ᠡᠴᠡ ᠵᠠᠢᠯᠠᠭᠤᠯᠤᠭᠰᠠᠨ ᠳᠣᠲᠣᠨᠣᠬᠠᠨ ᠪᠦᠰᠡᠭᠦᠢ ᠶ᠋ᠢ ᠳᠠᠭᠤᠯᠠᠶᠠ
ᠳᠣᠷᠣᠨᠠ ᠶ᠋ᠢᠨ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ ᠳᠣᠯᠣᠭᠠᠨ ᠦᠶᠡ ᠳ᠋ᠡᠭᠡᠨ ᠮᠠᠭᠲᠠᠶᠠ᠃
ᠵᠠᠳᠠᠷᠠᠨ ᠨᠠᠮᠢᠷᠠᠬᠤ ᠦᠰᠦᠨ ᠳ᠋ᠦ᠍ ᠵᠠᠯᠠᠭᠤ ᠶ᠋ᠢᠨ ᠦᠵᠡᠰᠬᠦᠯᠡᠩ ᠲᠡᠭᠦᠰ
ᠵᠠᠯᠭᠠᠨ ᠤᠨᠳᠤᠷᠬᠤ ᠦᠭᠡᠨ ᠳ᠋ᠦ᠍ᠨᠢ ᠵᠠᠪᠰᠠᠷ ᠤ᠋ᠨ᠁
ᠵᠠᠩ ᠢ᠋ᠶ᠋ᠠᠨ ᠬᠤᠪᠢᠷᠠᠭᠠᠬᠤ ᠶᠣᠰᠣ ᠨᠢ ᠽᠠᠮᠪᠤᠯᠢᠩ ᠤ᠋ᠨ ᠦᠭᠡᠨ ᠳ᠋ᠦ᠍ ᠦᠭᠡᠢ
ᠵᠠᠶᠠᠭᠠ ᠰᠠᠢᠲᠤ ᠲᠡᠷᠡ ᠮᠢᠨᠢ ᠳᠣᠷᠣᠨᠠ ᠶ᠋ᠢᠨ ᠥᠬᠢᠨ ᠲᠩᠷᠢ ᠠ᠋᠃