ᠰᠦᠯᠳᠡ ᠶᠢᠨ ᠰᠣᠶᠣᠯ ᠤᠨ ᠰᠤᠳᠤᠯᠤᠯ – ᠮᠢᠩᠵᠤᠤᠷ <ᠳᠡᠭᠡᠳᠦ-16> Сүлдийн соёлын судлал – Минжуур<дээд-16>
73ᠡᠷᠳᠡᠮᠲᠡᠳ ᠦᠨ ᠰᠦᠯᠳᠡ ᠶᠢᠨ ᠳᠤᠬᠠᠢ ᠶᠠᠷᠢᠶᠠ ᠠᠴᠠ ᠦᠵᠡᠵᠡᠭᠡᠶᠡ
ᠨᠢᠭᠡ᠂ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠲᠤᠬᠠᠢ
《ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠭᠣᠣᠯᠴᠢᠯᠠᠨ ᠡᠩᠬᠡᠵᠢᠨ ᠤ ᠦᠢᠯᠡ ᠳ᠋ᠦ᠍ ᠬᠡᠷᠡᠭᠯᠡᠳᠡᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃ ᠲᠤᠬᠠᠢᠯᠠᠪᠠᠯ ᠬᠠᠭᠠᠨ ᠢ᠋ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠬᠤ ᠶᠡᠬᠡ ᠪᠠᠶᠠᠷ ᠶᠣᠰᠣᠯᠠᠯ ᠢ᠋ ᠬᠢᠬᠦ ᠳ᠋ᠦ᠍ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠪᠡᠨ ᠵᠠᠰᠠᠳᠠᠭ ᠪᠠᠢᠪᠠ᠃ ᠴᠠᠭᠠᠨ ᠰᠦᠯᠳᠡ ᠬᠡᠮᠡᠭᠴᠢ ᠨᠢ ᠴᠠᠭᠠᠨ ᠠᠳᠤᠭᠤᠨ ᠤ᠋ ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠷ ᠮᠠᠨᠵᠢᠯᠭᠠ ᠬᠢᠭᠰᠡᠨ ᠬᠢᠯᠭᠠᠰᠤᠨ ᠲᠤᠭ ᠶᠤᠮ᠂ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠲᠥᠷᠥ ᠶ᠋ᠢᠨ ᠡᠷᠬᠢᠮ ᠪᠡᠯᠭᠡᠳᠡᠯ ᠪᠣᠯᠭᠠᠳᠠᠭ ᠪᠠᠢᠭᠰᠠᠨ ᠠᠵᠢ᠃ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠭᠡᠳᠡᠭ ᠨᠢ ᠭᠣᠣᠯ ᠳ᠋ᠠᠭᠠᠨ ᠨᠢᠭᠡ ᠲᠣᠮᠣ ᠲᠤᠭ ᠰᠦᠯᠳᠡ᠂ ᠲᠡᠭᠦᠨ ᠢ᠋ ᠪᠡᠨ ᠲᠣᠭᠣᠷᠢᠭᠤᠯᠤᠨ ᠨᠠᠢ᠍ᠮᠠᠨ ᠪᠠᠭᠠ ᠲᠤᠭ ᠰᠦᠯᠳᠡ ᠡᠴᠡ ᠪᠦᠷᠢᠳᠳᠡᠭ ᠪᠠᠢᠵᠠᠢ᠃ ᠡᠨᠡ ᠬᠦ᠌ ᠲᠣᠭᠣᠷᠢᠭᠤᠯᠤᠭᠰᠠᠨ ᠨᠠᠢ᠍ᠮᠠᠨ ᠪᠠᠭᠠ ᠰᠦᠯᠳᠡ ᠶ᠋ᠢ ᠡᠯᠴᠢ ᠰᠦᠯᠳᠡ ᠭᠡᠳᠡᠭ ᠪᠠᠢᠨᠠ》①᠃《ᠭᠣᠣᠯ ᠰᠦᠯᠳᠡ ᠡᠴᠡ ᠪᠡᠨ ᠭᠤᠷᠪᠠᠨ ᠠᠯᠲᠠ ᠵᠠᠢᠲᠠᠢ ᠳᠥᠷᠪᠡᠨ ᠥᠨᠴᠥᠭ ᠳᠥᠷᠪᠡᠨ ᠲᠠᠯᠠ ᠳ᠋ᠤ᠌ ᠨᠢ ᠨᠠᠢ᠍ᠮᠠᠨ ᠡᠯᠴᠢ ᠰᠦᠯᠳᠡ ᠪᠡᠨ ᠪᠤᠰᠬᠠᠵᠤ᠂ ᠬᠢᠯᠭᠠᠰᠤ ᠪᠠᠷ ᠲᠠᠮᠤᠭᠰᠠᠨ ᠬᠥᠬᠡᠨᠡᠴᠦᠭ ᠢ᠋ᠶ᠋ᠡᠷ ᠭᠣᠣᠯ ᠰᠦᠯᠳᠡ ᠲᠡᠢ ᠪᠡᠨ ᠴᠢᠭᠲᠠᠯᠠᠨ ᠬᠣᠯᠪᠣᠳᠠᠭ᠃ ᠡᠯᠴᠢ ᠰᠦᠯᠳᠡ ᠶ᠋ᠢᠨ ᠡᠰᠢ ᠨᠢ ᠶᠢᠰᠦᠨ ᠲᠣᠬᠣᠢ᠂ ᠰᠡᠷᠡᠭᠡ ᠨᠢ ᠭᠣᠣᠯ ᠰᠦᠯᠳᠡ ᠲᠡᠢ ᠪᠡᠨ ᠠᠳᠠᠯᠢ》②᠃《ᠴᠠᠭᠠᠨ ᠰᠦᠯᠳᠡ ᠲᠤᠭ ᠤ᠋ᠨ ᠣᠷᠣᠢ ᠳ᠋ᠤ᠌ ᠮᠥᠩᠬᠡᠵᠢᠨ ᠤ ᠤᠳᠬᠠ ᠲᠠᠢ ᠭᠤᠷᠪᠠᠨ ᠳᠥᠯᠥᠲᠦ ᠭᠠᠯ ᠪᠣᠯᠤᠨ ᠨᠠᠷᠠ᠂ ᠰᠠᠷᠠᠨ ᠤ᠋ ᠳᠦᠷᠰᠦ ᠪᠠᠢᠷᠢᠯᠠᠭᠤᠯᠳᠠᠭ ᠪᠠᠢᠨᠠ᠃ ᠡᠨᠡ ᠬᠦ᠌ ᠪᠦᠬᠦ ᠤᠯᠠᠮᠵᠢᠯᠠᠯ ᠢ᠋ ᠡᠳᠦᠭᠡ ᠰᠡᠷᠭᠦᠭᠡᠨ ᠥᠪᠯᠡᠵᠦ ᠠᠪᠤᠭᠰᠠᠨ ᠨᠢ ᠨᠡᠩ ᠰᠠᠢᠰᠢᠶᠠᠯᠲᠠᠢ ᠶᠤᠮ᠃ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠶᠡᠬᠡ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠲᠡᠦᠬᠡ ᠶ᠋ᠢᠨ ᠡᠭᠡᠳᠡᠷᠡᠭᠡᠨᠲᠡᠢ ᠬᠦᠨᠳᠦ ᠬᠡᠴᠡᠭᠦᠦ ᠦᠶᠡ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠦᠶᠡ ᠤᠯᠠᠷᠢᠭᠤᠯᠤᠨ ᠬᠠᠳᠠᠭᠠᠯᠠᠵᠤ ᠬᠠᠮᠠᠭᠠᠯᠠᠨ᠂ ᠨᠢᠭᠤᠴᠠᠯᠠᠨ ᠲᠠᠬᠢᠵᠤ ᠰᠢᠲᠦᠨ ᠢᠷᠡᠭᠰᠡᠨ ᠤᠯᠠᠮᠵᠢᠯᠠᠯ ᠲᠠᠢ᠃ ᠡᠭᠦᠨ ᠢ᠋ ᠨᠤᠲᠠᠯᠠᠬᠤ ᠪᠠᠷᠢᠮᠲᠠ ᠪᠣᠯ ᠡᠳᠦᠭᠡ ᠤᠯᠤᠰ (ᠮᠣᠩᠭᠣᠯ) ᠤ᠋ᠨ ᠲᠥᠪ ᠮᠦᠽᠧᠢ ᠳ᠋ᠦ᠍ ᠪᠠᠢᠭᠠ ᠴᠠᠭᠠᠨ ᠰᠦᠯᠳᠡ ᠶᠦᠮ᠃ ᠡᠭᠦᠨ ᠢ᠋ ᠴᠢᠩᠭᠢᠰ ᠤᠨ ᠦᠶᠡ ᠶ᠋ᠢᠨ ᠰᠦᠯᠳᠡ ᠶ᠋ᠢᠨ ᠨᠢᠭᠡ ᠭᠡᠮᠡᠨ ᠦᠵᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠰᠦᠯᠳᠡ ᠶ᠋ᠢ ᠬᠠᠯᠬᠠ ᠶ᠋ᠢᠨ ᠲᠥᠪ ᠨᠤᠲᠤᠭ ᠪᠤᠶᠤ ᠡᠷᠳᠡᠨᠢ ᠵᠣᠣ ᠬᠡᠢᠳ ᠤᠨ ᠣᠢᠷᠠᠯᠴᠠᠭᠠᠬᠢ ᠪᠠᠷᠠᠭᠤᠨ ᠬᠦᠷᠢᠶᠡ ᠭᠡᠭᠳᠡᠬᠦ ᠣᠳᠣ ᠶ᠋ᠢᠨ ᠱᠠᠩᠬᠤ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠭᠰᠠᠨ ᠢ᠋ 1930 ᠣᠨ ᠤ᠋ ᠳᠤᠮᠳᠠᠭᠤᠷ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠤ᠋ᠨ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠷ ᠤᠯᠤᠰ ᠤ᠋ᠨ ᠮᠦᠽᠧᠢ ᠳ᠋ᠦ᠍ ᠵᠠᠯᠠᠵᠤ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠭᠡᠬᠦ ᠶᠠᠷᠢᠶᠠ ᠪᠣᠢ᠃ ᠴᠢᠩᠭᠢᠰ ᠤᠨ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠪᠠᠷᠠᠭᠤᠨ ᠬᠦᠷᠢᠶᠡᠨ ᠤ ᠯᠠᠮᠠ ᠨᠠᠷ ᠵᠢᠯ ᠪᠦᠷᠢ ᠨᠣᠮ ᠤᠩᠰᠢᠵᠤ ᠳᠠᠬᠢᠳᠠᠭ ᠪᠠᠢᠵᠠᠢ᠂ ᠡᠷᠲᠡᠨ ᠤ ᠦᠶᠡ ᠳ᠋ᠦ᠍ ᠴᠠᠭᠠᠨ ᠰᠦᠯᠳᠡ ᠲᠤᠭ ᠢ᠋ ᠲᠤᠰᠬᠠᠢ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠪᠠᠢᠷᠢᠨ ᠳ᠋ᠤ᠌ ᠪᠤᠶᠤ ᠰᠦᠮᠡ ᠳ᠋ᠦ᠍ ᠬᠠᠳᠠᠭᠠᠯᠠᠳᠠᠭ ᠪᠠᠢᠭᠰᠠᠨ ᠪᠠᠢᠨᠠ᠃ ᠲᠡᠭᠦᠨ ᠢ᠋ ᠨᠢ <ᠲᠤᠭ ᠤ᠋ᠨ ᠰᠦᠮᠡ> ᠭᠡᠬᠦ ᠪᠣᠢ》③᠃《ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ ᠨᠢ ᠭᠣᠣᠯ ᠰᠦᠯᠳᠡ ᠪᠠ ᠡᠯᠴᠢ ᠰᠦᠯᠳᠡ ᠪᠡᠷ ᠪᠦᠷᠢᠯᠳᠦᠨᠡ᠃ ᠭᠣᠣᠯ ᠰᠦᠯᠳᠡ ᠶ᠋ᠢᠨ ᠣᠷᠣᠢ ᠨᠢ ᠨᠢᠭᠡ ᠲᠣᠬᠣᠢ ᠤᠷᠲᠤ ᠠᠯᠲᠠ ᠰᠢᠷᠠᠭᠰᠠᠨ ᠭᠤᠷᠪᠠᠨ ᠦᠵᠦᠭᠦᠷᠲᠦ ᠲᠡᠮᠦᠷ ᠰᠡᠷᠡᠭᠡ ᠮᠠᠶᠢᠭ ᠲᠠᠢ ᠡᠳ᠋᠃ ᠢᠩᠭᠢᠵᠦ ᠬᠢᠭᠰᠡᠨ ᠨᠢ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢᠨᠢ ᠨᠤᠮᠤ ᠪᠠᠨ ᠲᠥᠯᠥᠭᠡᠯᠡᠵᠦ᠂ ᠭᠣᠣᠯ ᠤ᠋ᠨ ᠬᠢᠨᠢ ᠰᠤᠮᠤ ᠪᠠᠨ ᠲᠥᠯᠥᠭᠡᠯᠡᠵᠦ ᠪᠠᠢᠨᠠ ᠬᠡᠮᠡᠳᠡᠭ᠃ᠮᠣᠩᠭᠣᠯ ᠤᠯᠤᠰ ᠲᠤ᠌ ᠲᠠᠬᠢᠵᠤ ᠪᠠᠢᠭᠰᠠᠨ ᠵᠠᠷᠢᠮ ᠴᠠᠭᠠᠨ ᠰᠦᠯᠳᠡ ᠨᠢ ᠭᠠᠯ ᠤ᠋ᠨ ᠳᠥᠯᠥ ᠲᠡᠢ ᠭᠤᠷᠪᠠᠨ ᠦᠵᠦᠭᠦᠷᠲᠦ ᠰᠡᠷᠡᠭᠡ ᠪᠠᠢᠵᠠᠢ᠃ ᠭᠠᠯ ᠤ᠋ᠨ ᠰᠤᠷ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ <ᠮᠥᠩᠬᠡᠵᠢᠬᠦ ᠶ᠋ᠢᠨ ᠤᠳᠬᠠᠲᠤ ᠭᠤᠷᠪᠠᠨ ᠳᠥᠯᠥᠲᠦ ᠭᠠᠯ> ᠭᠡᠮᠡᠨ ᠲᠠᠢᠯᠪᠤᠷᠢᠯᠠᠵᠠᠢ》④᠃
ᠬᠣᠶᠠᠷ᠂ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠲᠤᠬᠠᠢ
《ᠬᠠᠷᠠ ᠰᠦᠯᠳᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠡᠷᠬᠢᠮ ᠳᠡᠭᠡᠳᠦ ᠪᠡᠯᠭᠡᠳᠡᠯ ᠤᠨ ᠡᠳ᠋ ᠮᠥᠨ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡᠨ ᠤ ᠴᠡᠷᠢᠭ ᠤᠨ ᠳᠣᠭ ᠪᠣᠯᠤᠨᠠ》⑤᠃《ᠡᠷᠲᠡᠨ ᠤ ᠮᠣᠩᠭᠣᠯ ᠴᠡᠷᠢᠭ ᠤᠨ ᠬᠠᠷᠠ ᠰᠦᠯᠳᠡ ᠨᠢ ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠰᠦᠯᠳᠡ ᠪᠠᠢᠪᠠ᠃ ᠡᠨᠡ ᠰᠦᠯᠳᠡ ᠲᠤᠭ ᠢ᠋ ᠴᠡᠷᠢᠭ ᠲᠡᠢᠨ ᠤ ᠦᠶᠡ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠤᠴᠢᠷ ᠳᠠᠢᠰᠤᠨ ᠢ᠋ ᠠᠶᠤᠯᠭᠠᠬᠤ ᠳᠣᠭᠰᠢᠨ ᠵᠢᠰᠦ ᠪᠣᠯᠬᠤ ᠬᠠᠷᠠ ᠥᠩᠭᠡ ᠶ᠋ᠢᠨ ᠬᠢᠯᠭᠠᠰᠤ ᠪᠠᠷ ᠲᠤᠭ ᠢ᠋ ᠬᠢᠵᠡᠢ᠃ ᠬᠠᠷᠠ ᠰᠦᠯᠳᠡ ᠲᠤᠭ ᠤ᠋ᠨ ᠣᠷᠣᠢ ᠨᠢ ᠵᠢᠳᠠ ᠬᠡᠯᠪᠡᠷᠢᠲᠡᠢ᠂ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠢᠷᠲᠡᠢ᠂ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠤᠵᠠᠭᠠᠨ᠂ ᠨᠢᠭᠡᠨ ᠲᠣᠬᠣᠢ ᠰᠢᠬᠠᠮ ᠤᠷᠲᠤ ᠲᠡᠮᠦᠷ ᠪᠠᠢᠳᠠᠭ ᠪᠠᠢᠨᠠ》⑥᠃《ᠲᠡᠮᠦᠵᠢᠨ ᠬᠠᠮᠤᠭ ᠮᠣᠩᠭᠣᠯ ᠤᠨ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠳᠡᠭᠡᠳ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠨᠡᠴᠢᠯᠡᠨ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠲᠡᠳᠡᠨ ᠤ ᠰᠦᠷ ᠬᠦᠴᠦ ᠶ᠋ᠢ ᠨᠡᠮᠡᠭᠳᠡᠭᠦᠯᠵᠦ᠂ ᠢᠲᠡᠭᠡᠯ ᠪᠢᠰᠢᠷᠡᠯ ᠢ᠋ ᠨᠢ ᠪᠠᠳᠠᠷᠠᠭᠠᠬᠤ ᠶᠢᠨ ᠲᠤᠯᠠᠳᠠ ᠬᠠᠷᠠ ᠲᠤᠭ ᠢ᠋ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠵᠠᠯᠠᠵᠤ ᠲᠠᠬᠢᠭ᠍ᠰᠠᠨ ᠪᠠᠢᠨᠠ᠃ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠪᠡᠷ ᠴᠣᠬᠣᠮ ᠬᠡᠳᠦᠨ ᠣᠨ ᠳ᠋ᠤ᠌ ᠴᠡᠷᠢᠭ ᠤᠨ ᠬᠠᠷᠠ ᠲᠤᠭ ᠢ᠋ᠶ᠋ᠠᠨ ᠪᠦᠲᠦᠭᠡᠨ ᠵᠠᠯᠬᠠᠭᠰᠠᠨ ᠲᠤᠬᠠᠢ ᠮᠡᠳᠡᠭᠡ ᠰᠤᠷᠪᠤᠯᠵᠢ ᠪᠢᠴᠢᠭ ᠦ᠋ᠳ ᠲᠦ᠍ ᠪᠠᠢᠬᠤ ᠦᠭᠡᠢ ᠠᠭᠠᠳ ᠬᠠᠷᠢᠨ ᠤᠭ ᠦᠢᠯᠡ ᠶᠠᠪᠤᠳᠠᠯ ᠳ᠋ᠤ᠌ ᠬᠣᠯᠪᠣᠭᠳᠠᠬᠤ ᠨᠢᠭᠡᠨ ᠳᠣᠮᠣᠭ ᠢ᠋ ᠰᠡᠢᠷᠡᠭᠦᠯᠪᠡᠯ:
ᠴᠢᠩᠭᠢᠰ ᠬᠠᠭᠠᠨ ᠰᠢᠷᠠ ᠯᠤᠤ ᠵᠢᠯ ᠳ᠋ᠦ᠍ ᠨᠢᠭᠡᠨ ᠤᠳᠠᠭᠠ ᠶ᠋ᠢᠨ ᠲᠡᠢᠨ ᠳ᠋ᠦ᠍ ᠬᠦᠴᠦᠨ ᠮᠡᠬᠦᠰᠳᠡᠭᠰᠡᠨ ᠲᠤᠯᠠ ᠡᠷᠲᠡᠨ ᠤ ᠲᠠᠬᠢᠯᠭᠠᠲᠤ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠪᠠᠨ ᠳᠡᠷᠭᠡᠳᠡ ᠣᠴᠢᠵᠤ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠬᠥᠯᠥᠰᠥᠲᠡᠢ ᠲᠣᠬᠣᠮ ᠢ᠋ ᠠᠪᠴᠤ ᠳᠡᠭᠡᠭᠰᠢ ᠨᠢ ᠬᠠᠷᠠᠭᠤᠯᠤᠨ ᠲᠠᠯᠪᠢᠵᠤ᠂ ᠪᠦᠰᠡ ᠪᠡᠨ ᠲᠠᠢᠯᠵᠤ ᠬᠦᠵᠦᠭᠦᠨ ᠳ᠋ᠡᠭᠡᠨ ᠳᠤᠬᠤᠨ ᠰᠥᠭᠥᠳᠦᠭᠡᠳ 〈ᠲᠡᠭᠷᠢ ᠡᠴᠢᠭᠡ ᠮᠢᠨᠢ ᠨᠠᠮᠠᠶ᠋ᠢ ᠪᠠᠨ ᠲᠡᠳᠬᠦᠵᠦ ᠲᠡᠩᠬᠡᠷᠡᠭᠦᠯᠦᠨᠡ ᠤᠤ?〉 ᠭᠡᠮᠡᠨ ᠮᠥᠷᠭᠥᠵᠦ ᠭᠤᠶᠤᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠲᠡᠭᠷᠢ ᠳ᠋ᠦ᠍ ᠶᠡᠬᠡ ᠳᠠᠭᠤᠨ ᠨᠦᠷᠭᠢᠯᠡᠵᠦ ᠬᠠᠨ ᠬᠤᠷᠮᠤᠰᠲᠠ ᠲᠡᠭᠷᠢ ᠡᠴᠡ ᠬᠠᠷᠠ ᠰᠦᠯᠳᠡ ᠪᠠᠭᠤᠨ ᠢᠷᠡᠵᠦ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠮᠥᠴᠢᠷ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠭᠡᠳᠡᠭ᠃
ᠡᠭᠦᠨ ᠢ᠋ ᠦᠵᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠵᠠᠩᠵᠤᠨ ᠮᠤᠬᠤᠯᠠᠢ ᠳ᠋ᠤ᠌ ᠬᠠᠨᠳᠤᠨ ᠬᠠᠷᠠ ᠲᠤᠭ ᠢ᠋ ᠲᠣᠰᠴᠤ ᠠᠪᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠬᠡᠭᠡᠷ ᠠᠵᠢᠷᠭᠠᠨ ᠤ᠋ ᠣᠩᠭᠣᠨ ᠮᠤᠨᠳᠠᠭᠠᠨ ᠳᠡᠭᠡᠷᠡ ᠵᠠᠯᠠᠵᠤ ᠠᠪᠴᠢᠷᠠᠨ ᠴᠠᠭᠠᠨ ᠢᠰᠡᠭᠡᠢ ᠳᠡᠪᠢᠰᠦᠨ ᠪᠠᠭᠤᠯᠭᠠᠭᠠᠳ ᠬᠤᠷᠮᠤᠰᠲᠠ ᠠ᠋ᠴᠠ ᠬᠠᠢᠷᠠᠯᠠᠭᠰᠠᠨ ᠬᠠᠷᠠ ᠲᠤᠭ ᠢ᠋ ᠲᠠᠬᠢᠬᠤ ᠶ᠋ᠢ ᠬᠠᠭᠠᠨ ᠳ᠋ᠤ᠌ ᠠᠢᠯᠠᠳᠬᠠᠭᠰᠠᠨ ᠪᠠᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠮᠤᠬᠤᠯᠠᠢ ᠵᠠᠩᠵᠤᠨ ᠤ᠋ ᠳᠥᠷᠪᠡᠨ ᠰᠢᠳᠠᠷ ᠪᠠᠭᠠᠲᠤᠷ ᠢ᠋ᠶ᠋ᠠᠷ ᠬᠠᠷᠠ ᠲᠤᠭ ᠢ᠋ ᠪᠠᠷᠢᠭᠤᠯᠵᠤ ᠵᠣᠭᠰᠣᠭᠠᠭᠠᠳ ᠰᠥᠭᠥᠳᠦᠨ ᠮᠥᠷᠭᠥᠵᠦ᠂ 〈ᠥᠨᠥ ᠡᠰᠡ ᠵᠠᠪᠳᠤᠪᠠ ᠳᠠᠷᠠᠭᠠ ᠪᠠᠷ ᠳᠥᠷᠪᠡᠨ ᠬᠥᠯ ᠣᠷᠣᠭᠤᠯᠵᠤ᠂ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠡᠢᠲᠡ ᠮᠣᠩᠭᠣᠯ ᠤ᠋ᠨ ᠳᠠᠷᠬᠠᠨ ᠰᠢᠲᠦᠭᠡᠨ ᠪᠣᠯᠭᠠᠵᠤ ᠲᠠᠬᠢᠶᠠ> ᠭᠡᠵᠦ ᠠᠨᠳᠠᠭᠠᠢᠯᠠᠨ <ᠮᠢᠩᠭᠠᠨ ᠤᠯᠠᠢ ᠪᠠᠵᠠᠭᠠᠵᠤ᠂ ᠲᠦᠮᠡᠨ ᠰᠢᠭᠦᠰᠦ ᠪᠡᠷ ᠳᠠᠬᠢ〉 ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠠᠳ ᠶᠢᠰᠦᠨ ᠶᠢᠰᠦ ᠨᠠᠶᠠᠨ ᠨᠢᠭᠡᠨ ᠬᠠᠷᠠ᠂ ᠬᠡᠭᠡᠷ ᠠᠵᠢᠷᠭᠠᠨ ᠤ᠋ ᠬᠤᠷ ᠳᠡᠯ ᠡᠴᠡ ᠨᠢᠭᠡ ᠨᠢᠭᠡ ᠲᠤᠭ ᠦᠰᠦ ᠠᠪᠴᠤ ᠬᠠᠷᠠ ᠲᠤᠭ ᠢ᠋ ᠤᠶᠠᠨ ᠴᠢᠮᠡᠨ ᠳᠠᠬᠢᠭᠠᠳ ᠡᠵᠡᠨᠲᠦ ᠲᠥᠷᠥ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠤᠨ ᠳᠣᠭ ᠪᠣᠯᠭᠠᠨ ᠳᠠᠷᠬᠠᠯᠠᠭᠰᠠᠨ ᠭᠡᠳᠡᠭ᠃ ᠡᠢᠨ ᠬᠦ᠌ ᠰᠦᠷᠦᠭ ᠤᠨ ᠮᠠᠩᠯᠠᠢ ᠠᠵᠢᠷᠭᠠᠨ ᠤ᠋ ᠪᠠᠨ ᠲᠤᠭ ᠦᠰᠦ ᠪᠡᠷ ᠪᠠᠭᠴᠠᠯᠠᠨ ᠬᠢᠭᠰᠡᠨ ᠲᠤᠯᠠ 〈ᠬᠠᠷᠠ ᠲᠤᠭ〉 ᠭᠡᠮᠡᠨ ᠳᠠᠭᠤᠳᠠᠳᠠᠭ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠠᠷᠠ ᠲᠤᠭ ᠢ᠋ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠵᠠᠯᠠᠵᠤ ᠶᠠᠪᠤᠬᠤ᠂ ᠲᠠᠬᠢᠬᠤ᠂ ᠳᠣᠭᠰᠢᠷᠠᠭᠤᠯᠬᠤ᠂ ᠪᠠᠢᠷᠢᠨ ᠠ᠋ᠴᠠ ᠨᠢ ᠬᠥᠳᠡᠯᠭᠡᠬᠦ ᠳ᠋ᠦ᠍ ᠮᠤᠬᠤᠯᠠᠢ ᠵᠠᠩᠵᠤᠨ᠂ ᠲᠡᠭᠦᠨ ᠤ ᠦᠷᠡ ᠤᠳᠤᠮ ᠤ᠋ᠨ ᠬᠢᠨ ᠭᠠᠷᠳᠠᠨ ᠭᠦᠢᠴᠡᠳᠬᠡᠬᠦ ᠪᠣᠯᠤᠭᠰᠠᠨ ᠠᠭᠠᠳ ᠲᠡᠳᠡᠨ ᠡᠴᠡ ᠥᠭᠡᠷᠡ ᠬᠥᠮᠦᠰ ᠬᠠᠷᠠ ᠰᠦᠯᠳᠡ ᠳ᠋ᠦ᠍ ᠭᠠᠷ ᠬᠦᠷᠴᠦ ᠬᠥᠨᠳᠡᠬᠦ ᠶ᠋ᠢ ᠴᠡᠭᠡᠷᠯᠡᠳᠡᠭ ᠪᠠᠢᠭᠰᠠᠨ ᠠᠵᠢ᠃
ᠡᠨᠡ ᠬᠦ᠌ ᠳᠣᠮᠣᠭ ᠤ᠋ᠨ ᠥᠭᠦᠯᠡᠮᠵᠢ ᠡᠴᠡ ᠠᠵᠢᠭᠯᠠᠬᠤ ᠳ᠋ᠤ᠌ ᠴᠢᠩᠭᠢᠰ ᠬᠠᠭᠠᠨ ᠴᠡᠷᠢᠭ ᠤᠨ ᠬᠠᠷᠠ ᠲᠤᠭ ᠢ᠋ᠶ᠋ᠠᠨ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠵᠠᠯᠠᠵᠤ᠂ ᠲᠠᠬᠢᠬᠤ ᠳ᠋ᠤ᠌ ᠲᠡᠭᠦᠨ ᠤ ᠢᠲᠡᠭᠡᠯᠲᠦ ᠨᠥᠬᠥᠷ᠂ ᠠᠯᠳᠠᠷᠲᠤ ᠵᠠᠩᠵᠤᠨ ᠵᠠᠯᠠᠢᠷ ᠠᠢᠮᠠᠭ ᠤ᠋ᠨ ᠮᠤᠬᠤᠯᠠᠢ ᠭᠣᠣᠯ ᠡᠭᠦᠷᠭᠡ ᠭᠦᠢᠴᠡᠳᠬᠡᠭᠰᠡᠨ ᠪᠠᠢᠨᠠ᠃ ᠡᠭᠦᠨ ᠲᠡᠢ ᠬᠣᠯᠪᠣᠭᠳᠠᠭᠤᠯᠤᠨ ᠨᠢᠭᠡᠨ ᠪᠠᠷᠢᠮᠲᠠ ᠶ᠋ᠢ ᠳᠤᠷᠠᠳᠬᠤ ᠳ᠋ᠤ᠌ <ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ> ᠳ᠋ᠤ᠌ ᠴᠢᠩᠭᠢᠰ ᠬᠠᠭᠠᠨ 1206 ᠣᠨ ᠳ᠋ᠤ᠌ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠤᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠤ ᠳᠠᠷᠠᠭᠠ ᠤᠯᠤᠰ ᠲᠥᠷᠥ ᠶ᠋ᠢ ᠪᠠᠢᠭᠤᠯᠤᠯᠴᠠᠭᠰᠠᠨ ᠤᠷᠢᠳ ᠤ᠋ᠨ ᠭᠠᠪᠢᠶᠠᠲᠤ ᠨᠥᠬᠥᠳ ᠢ᠋ᠶ᠋ᠡᠨ ᠡᠷᠭᠦᠮᠵᠢᠯᠡᠨ ᠰᠣᠶᠣᠷᠬᠠᠬᠤ ᠳ᠋ᠠᠭᠠᠨ ᠮᠤᠬᠤᠯᠠᠢ ᠳ᠋ᠤ᠌ ᠬᠠᠨᠳᠤᠨ᠄ ᠬᠣᠲᠠᠯᠠ ᠬᠠᠭᠠᠨ ᠤ᠋ ᠪᠥᠵᠢᠭᠯᠡᠬᠦ ᠬᠣᠷᠬᠣᠨᠠᠭ - ᠵᠤᠪᠤᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠰᠠᠭᠠᠳᠠᠨ ᠪᠠᠭᠤᠬᠤ ᠴᠠᠭ ᠲᠤ᠌ ᠮᠤᠬᠤᠯᠠᠢ ᠲᠡᠭᠷᠢ ᠶ᠋ᠢᠨ ᠵᠠᠢᠷᠠᠩ (ᠰᠦᠯᠳᠡ) ᠶ᠋ᠢᠨ ᠵᠢᠭᠠᠭᠰᠠᠨ ᠦᠭᠡ ᠶ᠋ᠢ ᠲᠡᠮᠳᠡᠭᠯᠡᠨ ᠬᠡᠯᠡᠭᠰᠡᠨ ᠲᠤᠯᠠ ᠲᠡᠨᠳᠡ ᠪᠢ ᠬᠦᠩ ᠭᠤᠸᠠ (ᠮᠤᠬᠤᠯᠠᠢ ᠶ᠋ᠢᠨ ᠡᠴᠢᠭᠡ) ᠶ᠋ᠢ ᠳᠤᠷᠠᠰᠴᠤ ᠮᠤᠬᠤᠯᠠᠢ ᠲᠠᠢ ᠦᠭᠡ ᠪᠠᠷᠢᠯᠳᠤᠭᠰᠠᠨ ᠪᠢᠯᠡ᠃ ᠣᠳᠣ ᠲᠡᠭᠦᠨ ᠤ ᠶᠣᠰᠤ ᠪᠠᠷ ᠪᠢ ᠶᠡᠬᠡ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠲᠤᠯᠠ < ᠮᠤᠬᠤᠯᠠᠢ ᠶ᠋ᠢ ᠤᠷᠤᠭ ᠤ᠋ᠨ ᠤᠷᠤᠭ ᠲᠤ᠌ ᠬᠦᠷᠲᠡᠯᠡ ᠤᠯᠤᠰ ᠭᠦᠷᠦᠨ ᠤ ᠭᠦᠸᠧ ᠸᠠᠩ ᠪᠣᠯᠭᠠᠶᠠ> ᠭᠡᠵᠦ ᠭᠦᠸᠧ ᠸᠠᠩ ᠴᠣᠯᠠ ᠱᠠᠩᠨᠠᠨ᠂ ᠨᠢᠭᠡᠨ ᠲᠦᠮᠡᠨ ᠢ᠋ ᠵᠠᠬᠢᠷᠤᠭᠤᠯᠤᠭᠰᠠᠨ ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠳᠠᠭ᠃
ᠴᠣᠬᠣᠮ ᠬᠦ᠌ ᠡᠨᠡ <ᠬᠣᠷᠬᠣᠨᠠᠭ ᠵᠤᠪᠤᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠰᠠᠭᠠᠲᠠᠨ ᠪᠠᠭᠤᠬᠤ ᠦᠶᠡ ᠳ᠋ᠦ᠍ ᠲᠡᠭᠷᠢ ᠶ᠋ᠢᠨ ᠵᠠᠢᠷᠠᠩ(ᠰᠦᠯᠳᠡ) ᠶ᠋ᠢᠨ ᠵᠢᠭᠠᠭᠰᠠᠨ ᠦᠭᠡ ᠶ᠋ᠢ ᠲᠡᠮᠳᠡᠭᠯᠡᠨ ᠬᠡᠯᠡᠭᠰᠡᠨ> ᠬᠡᠮᠡᠬᠦ ᠨᠢ ᠬᠠᠷᠠ ᠰᠦᠯᠳᠡ ᠶ᠋ᠢ ᠪᠦᠲᠦᠭᠡᠨ ᠲᠠᠬᠢᠬᠤ ᠲᠤᠬᠠᠢ ᠰᠠᠨᠠᠭᠤᠯᠤᠨ ᠬᠡᠯᠡᠵᠦ᠂ ᠭᠠᠷᠳᠠᠨ ᠭᠦᠢᠴᠡᠳᠬᠡᠭᠰᠡᠨ ᠢ᠋ ᠬᠡᠯᠡᠭᠰᠡᠨ ᠬᠡᠷᠡᠭ ᠪᠣᠯᠪᠠ ᠤᠤ? ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠤ ᠪᠠᠢᠨᠠ᠃ ᠤᠴᠢᠷ ᠨᠢ ᠰᠤᠷᠪᠤᠯᠵᠢ ᠶ᠋ᠢᠨ ᠡᠨᠡ ᠮᠡᠳᠡᠭᠡ ᠤᠷᠢᠳ ᠥᠭᠦᠯᠡᠭᠰᠡᠨ ᠳᠣᠮᠣᠭ ᠤ᠋ᠨ ᠥᠭᠦᠯᠡᠮᠵᠢ ᠲᠡᠢ ᠠᠭᠤᠯᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠶᠡᠬᠡ ᠯᠡ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠶᠤᠮ᠃
ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠶᠡᠬᠡ ᠴᠡᠷᠢᠭ ᠤᠨ ᠬᠠᠷᠠ ᠲᠤᠭ ᠢ᠋ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠵᠠᠯᠠᠬᠤ ᠶ᠋ᠢ ᠮᠤᠬᠤᠯᠠᠢ ᠠᠩᠬᠠᠯᠠᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠰᠠᠨᠠᠭᠤᠯᠤᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠲᠡᠳᠡ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠰᠦᠷ ᠬᠦᠴᠦ ᠲᠡᠢ ᠳᠣᠭᠰᠢᠨ ᠬᠠᠷᠠ ᠲᠤᠭ ᠢ᠋ᠶ᠋ᠠᠨ ᠪᠦᠲᠦᠭᠡᠨ ᠵᠠᠯᠠᠵᠤ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠪᠥᠬᠡ᠂ ᠢᠳᠤᠭᠠᠳ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠦᠨ᠂ ᠲᠠᠮᠠᠯᠠᠭᠠ ᠪᠠᠨ ᠤᠩᠰᠢᠨ᠂ ᠣᠩᠭᠣᠳ ᠢ᠋ᠶ᠋ᠠᠨ ᠳᠠᠭᠤᠳᠠᠨ ᠪᠠᠢᠵᠤ ᠡᠷᠲᠡᠨ ᠤ ᠶᠡᠬᠡ ᠪᠠᠭᠠᠲᠤᠷ ᠡᠷᠡᠰ ᠤᠨ ᠰᠦᠨᠡᠰᠦ ᠶ᠋ᠢ ᠳᠡᠭᠡᠳᠦ ᠲᠡᠭᠷᠢ ᠡᠴᠡ ᠤᠷᠢᠨ ᠵᠠᠯᠠᠵᠤ ᠬᠠᠷᠠ ᠲᠤᠭ ᠢ᠋ ᠠᠮᠢᠯᠠᠭᠤᠯᠤᠨ ᠮᠤᠬᠤᠯᠠᠢ ᠵᠠᠩᠵᠤᠨ ᠢ᠋ ᠲᠤᠭᠴᠢᠨ ᠢ᠋ᠶ᠋ᠠᠷ ᠲᠣᠮᠢᠯᠠᠭᠰᠠᠨ ᠪᠠᠢᠨᠠ᠃ ᠮᠤᠬᠤᠯᠠᠢ(1169 - 1223 ᠣᠨ) ᠪᠣᠯ ᠴᠡᠷᠢᠭ ᠤᠨ ᠶᠡᠬᠡ ᠪᠣᠳᠣᠯᠭᠠᠴᠢ᠂ ᠭᠠᠷᠮᠠᠭᠠᠢ ᠵᠠᠩᠵᠤᠨ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠣᠮᠣ ᠵᠢᠳᠬᠦᠯᠲᠡᠨ ᠪᠠᠢᠭᠰᠠᠨ ᠪᠥᠭᠡᠳ ᠤᠯᠤᠰ ᠲᠥᠷᠥ᠂ ᠴᠡᠷᠢᠭ ᠤᠨ ᠣᠯᠠᠨ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠢ᠋ᠶ᠋ᠠᠷ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠰᠠᠨᠠᠯ᠂ ᠵᠥᠪᠯᠡᠯᠭᠡ ᠥᠭᠳᠡᠭ ᠪᠠᠢᠭᠰᠠᠨ ᠭᠡᠳᠡᠭ᠃
ᠡᠢᠨ ᠬᠦ᠌ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠢ ᠶ᠋ᠢᠨ ᠳᠡᠭᠡᠳᠦ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠬᠠᠷᠠ ᠲᠤᠭ ᠢ᠋ ᠰᠢᠨᠡ ᠪᠡᠷ ᠪᠦᠲᠦᠭᠡᠨ ᠵᠠᠯᠠᠵᠤ ᠠᠩᠬᠠᠨ ᠤ᠋ ᠶᠡᠬᠡ ᠲᠠᠬᠢᠯᠭᠠ ᠶ᠋ᠢ ᠤᠨᠤᠨ ᠮᠥᠷᠡᠨ ᠤ ᠬᠣᠷᠬᠣᠨᠠᠭ- ᠵᠤᠪᠤᠷ ᠤ᠋ᠨ ᠬᠥᠨᠳᠡᠢ (ᠣᠳᠣ ᠶ᠋ᠢᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠡᠨᠲᠡᠢ ᠠᠢᠮᠠᠭ ᠤ᠋ᠨ ᠡᠮᠦᠨᠡᠳᠡᠯᠭᠡᠷ᠂ ᠪᠠᠲᠤᠰᠢᠷᠡᠭᠡᠲᠦ᠂ ᠪᠢᠳᠡᠷ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠬᠤᠷᠠᠬᠤ᠂ ᠵᠢᠷᠭᠠᠯᠠᠩᠲᠤ ᠶ᠋ᠢᠨ ᠬᠥᠨᠳᠡᠢ) ᠶ᠋ᠢᠨ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠦᠢᠯᠡᠳᠦᠭᠰᠡᠨ ᠪᠣᠯᠬᠤ ᠨᠢ ᠳᠣᠮᠣᠭ᠂ ᠲᠡᠦᠬᠡ ᠶ᠋ᠢᠨ ᠮᠡᠳᠡᠭᠡ ᠶ᠋ᠢ ᠬᠠᠷᠢᠴᠠᠭᠤᠯᠤᠨ ᠰᠤᠳᠤᠯᠬᠤ ᠳ᠋ᠤ᠌ ᠲᠣᠳᠣᠷᠬᠠᠢ ᠪᠣᠯᠵᠤ ᠪᠠᠢᠨᠠ》⑦᠃ 《ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠥᠨᠴᠥᠭ ᠪᠤᠯᠤᠩ ᠪᠦᠷᠢ ᠳ᠋ᠦ᠍ ᠬᠠᠷᠠ ᠰᠦᠯᠳᠡ ᠶ᠋ᠢ ᠳᠠᠢᠵᠤ ᠳᠠᠬᠢᠨ ᠰᠢᠲᠦᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠡᠨᠡ ᠤᠯᠠᠮᠵᠢᠯᠠᠯ 1930 ᠭ᠋ᠠᠳ ᠣᠨ ᠤ᠋ ᠰᠡᠭᠦᠯᠴᠢ ᠬᠦᠷᠲᠡᠯᠡ ᠲᠠᠰᠤᠷᠠᠭᠠ ᠦᠭᠡᠢ ᠶᠦᠮ᠃ ᠪᠦᠷᠢᠨ ᠪᠤᠰᠤ ᠮᠡᠳᠡᠭᠡ ᠪᠡᠷ 1930 ᠭ᠋ᠠᠳ ᠣᠨ ᠤ᠋ ᠰᠡᠭᠦᠯᠴᠢ ᠬᠦᠷᠲᠡᠯᠡ ᠠᠷᠤ ᠮᠣᠩᠭᠣᠯ ᠳ᠋ᠤ᠌ 30 ᠣᠷᠴᠢᠮ ᠭᠠᠵᠠᠷ ᠬᠠᠷᠠ᠂ ᠴᠠᠭᠠᠨ ᠲᠤᠭ ᠲᠠᠬᠢᠵᠤ ᠪᠠᠢᠵᠠᠢ᠃ ᠲᠡᠳᠡᠭᠡᠷ ᠲᠤᠭ ᠢ᠋ ᠬᠠᠳᠠᠭᠠᠯᠠᠵᠤ᠂ ᠲᠠᠬᠢᠵᠤ ᠲᠠᠢᠲᠠᠭ ᠬᠥᠮᠦᠰ ᠢ᠋ ᠲᠤᠭᠴᠢᠨ᠂ ᠲᠣᠭᠲᠠᠨ ᠭᠡᠨᠡ》⑧᠃《ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ ᠦᠵᠡᠯ ᠨᠣᠮᠯᠠᠯ ᠤ᠋ᠨ ᠡᠭᠦᠳᠡᠨ ᠡᠴᠡ ᠪᠦᠲᠦᠭᠡᠭᠳᠡᠭᠰᠡᠨ᠂ ᠡᠵᠡᠨᠲᠦ ᠭᠦᠷᠦᠨ ᠤ ᠲᠥᠪ ᠡᠬᠡ ᠮᠣᠩᠭᠣᠯ ᠨᠤᠲᠤᠭ ᠲᠠᠭᠠᠨ᠂ ᠬᠠᠭᠠᠨ ᠤ᠋ ᠤᠷᠲᠤ ᠦᠷᠭᠦᠭᠡᠨᠡ ᠵᠠᠯᠠᠭᠳᠠᠨ ᠪᠠᠢᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠠᠷᠠ ᠰᠦᠯᠳᠡ ᠲᠡᠭᠦᠨ (ᠬᠤᠪᠢᠯᠠᠢ) ᠤ ᠭᠠᠷ ᠲᠤ᠌ ᠣᠷᠣᠭᠠ ᠦᠭᠡᠢ ᠨᠢ ᠯᠠᠪᠲᠠᠢ ᠶᠤᠮ᠃ ᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠬᠤᠪᠢᠯᠠᠢ ᠬᠠᠭᠠᠨ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠳᠦᠷᠢ ᠶ᠋ᠢ ᠪᠦᠲᠦᠭᠡᠯᠭᠡᠵᠦ᠂ ᠲᠥᠷᠥ ᠶ᠋ᠢᠨ ᠶᠢᠰᠦᠨ ᠪᠡᠯᠭᠡ ᠡᠷᠳᠡᠨᠢ ᠶ᠋ᠢᠨ ᠨᠢᠭᠡ ᠪᠣᠯᠭᠠᠨ ᠳᠡᠭᠡᠳᠦᠯᠡᠬᠦ ᠶ᠋ᠢᠨ ᠬᠠᠮᠲᠤ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨ ᠤ᠋ ᠳᠣᠭᠰᠢᠨ ᠰᠠᠬᠢᠭᠤᠰᠤ ᠶᠡᠬᠡ ᠬᠠᠷᠠ ᠮᠠᠬᠠᠺᠠᠯᠠ ᠪᠤᠷᠬᠠᠨ ᠢ᠋ᠶ᠋ᠠᠷ ᠬᠠᠷᠠ ᠰᠦᠯᠳᠡ ᠶ᠋ᠢ ᠲᠥᠯᠥᠭᠡᠯᠡᠭᠦᠯᠦᠨ ᠲᠠᠬᠢᠬᠤ ᠪᠣᠯᠤᠭᠰᠠᠨ ᠪᠤᠢ ᠊ᠢᠠ》⑨᠃《ᠴᠢᠩᠭᠢᠰ ᠬᠠᠭᠠᠨ ᠬᠠᠷᠠ ᠰᠦᠯᠳᠡ ᠶ᠋ᠢ ᠪᠦᠲᠦᠭᠡᠬᠦ ᠳ᠋ᠡᠭᠡᠨ ᠮᠠᠰᠢ ᠨᠠᠷᠢᠨ ᠲᠢᠭ ᠶᠣᠰᠣ ᠶ᠋ᠢ ᠪᠠᠷᠢᠮᠲᠠᠯᠠᠨ ᠭᠦᠨ ᠭᠦᠨᠵᠡᠭᠡᠢ ᠤᠳᠬᠠ ᠰᠠᠨᠠᠭᠠ ᠶ᠋ᠢ ᠰᠢᠪᠰᠢᠯᠡᠨ ᠰᠢᠩᠭᠡᠭᠡᠵᠦ ᠠᠮᠢᠯᠠᠭᠤᠯᠤᠭᠰᠠᠨ ᠠᠵᠤᠭᠤ᠃ ᠲᠡᠭᠦᠨ ᠢ᠋ ᠤᠬᠠᠭᠠᠨ ᠪᠣᠳᠣᠯ᠂ ᠤᠷᠠ ᠴᠢᠳᠠᠪᠤᠷᠢ᠂ ᠤᠭᠰᠠᠭᠠ ᠭᠠᠷᠤᠯ ᠢ᠋ᠶ᠋ᠠᠷ ᠢᠶᠠᠨ ᠢᠯᠭᠠᠷᠠᠨ ᠲᠣᠳᠣᠷᠠᠭᠰᠠᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠤᠷᠠᠨ ᠳᠠᠷᠬᠠᠴᠤᠳ ᠡᠳᠦᠷ ᠤᠨ ᠰᠠᠢᠨ ᠢ᠋ ᠰᠢᠨᠵᠢᠵᠦ᠂ ᠴᠠᠭ ᠤ᠋ᠨ ᠰᠠᠢᠨ ᠢ᠋ ᠲᠣᠪᠯᠠᠨ ᠪᠠᠢᠵᠤ᠂ ᠡᠳ᠋ ᠤᠨ ᠳᠡᠭᠡᠳᠦ ᠶ᠋ᠢ ᠰᠢᠯᠢᠨ ᠰᠣᠩᠭᠣᠵᠤ ᠦᠢᠯᠡᠳᠦᠭᠰᠡᠨ ᠤᠴᠢᠷ ᠡᠳ᠋ ᠡᠰ ᠪᠦᠬᠦᠨ᠂ ᠬᠡᠯᠪᠡᠷᠢ ᠳᠦᠷᠰᠦ᠂ ᠥᠩᠭᠡ ᠵᠢᠰᠦ ᠪᠦᠭᠦᠳᠡ ᠨᠢ ᠨᠠᠭᠠᠨᠠ ᠪᠠᠨ ᠨᠠᠨᠳᠢᠨ ᠬᠢᠴᠡᠲᠡᠢ᠂ ᠴᠠᠭᠠᠨᠠ ᠪᠠᠨ ᠭᠦᠨᠵᠡᠭᠡᠢ ᠠᠭᠤᠯᠭᠠ ᠲᠠᠢ ᠠᠵᠢ᠃ ᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠰᠦᠯᠳᠡ ᠨᠢ ᠤᠷᠠᠯᠠᠯ ᠬᠢᠴᠡ᠂ ᠤᠳᠬᠠ ᠴᠢᠨᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠣᠨᠴᠠᠭᠠᠢ ᠪᠦᠲᠦᠭᠡᠯ ᠪᠣᠯᠵᠤ ᠣᠯᠠᠨ ᠦᠶᠡ ᠶ᠋ᠢᠨ ᠲᠤᠷᠰᠢ ᠣᠷᠣᠢᠯᠠᠨ ᠲᠠᠬᠢᠭᠳᠠᠵᠤ ᠢᠷᠡᠭᠰᠡᠨ ᠪᠠᠢᠨᠠ᠃
ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠣᠷᠣᠢ ᠨᠢ ᠨᠢᠭᠡ ᠲᠣᠬᠣᠢ ᠰᠢᠬᠠᠮ ᠤᠷᠲᠤ ᠵᠢᠳᠠᠨ ᠤ᠋ ᠬᠡᠯᠪᠡᠷᠢᠲᠡᠢ᠂ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠢᠷᠲᠡᠢ᠂ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠤᠵᠠᠭᠠᠨ᠂ ᠳᠣᠣᠷᠠ ᠪᠠᠨ ᠣᠩᠬᠢ ᠲᠠᠢ᠃ ᠣᠩᠭᠢᠨ ᠳᠡᠭᠡᠷᠡ ᠲᠣᠭᠣᠷᠢᠭ ᠮᠥᠩᠭᠥᠨ ᠴᠠᠷᠠ ᠪᠠᠢᠬᠤ ᠪᠠ ᠲᠡᠭᠦᠨ ᠤ ᠬᠥᠪᠡᠭᠡ ᠪᠡᠷ 81 ᠨᠦᠬᠡ ᠭᠠᠷᠭᠠᠵᠤ ᠬᠡᠭᠡᠷ ᠠᠵᠢᠷᠭᠠᠨ ᠤ᠋ ᠬᠠᠷᠠ ᠬᠢᠯᠭᠠᠰᠤᠨ ᠬᠥᠬᠥᠯ ᠢ᠋ᠶ᠋ᠡᠨ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠶ᠋ᠢ ᠰᠢᠷᠠ ᠲᠣᠰᠣ ᠪᠠᠷ ᠳᠤᠰᠤᠯᠠᠵᠤ ᠬᠢᠭᠰᠡᠨ ᠲᠠᠰᠠᠮᠠ ᠭᠡᠳᠡᠭ ᠵᠦᠰᠦᠮᠡᠯ ᠠᠷᠠᠰᠤ ᠪᠠᠷ ᠰᠦᠯᠵᠢᠵᠦ ᠲᠣᠭᠲᠠᠭᠠᠨᠠ᠃ ᠡᠨᠡ ᠠᠷᠠᠰᠤ ᠶ᠋ᠢ ᠲᠠᠰᠠᠮᠠ ᠭᠡᠬᠦ ᠠᠭᠠᠳ ᠲᠡᠭᠦᠨ ᠢ᠋ ᠴᠠᠷ ᠤ᠋ᠨ ᠭᠣᠣᠯ ᠤ᠋ᠨ ᠨᠦᠬᠡ ᠪᠡᠷ ᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠡᠰᠢ ᠶ᠋ᠢ ᠣᠷᠣᠭᠤᠯᠤᠨ ᠵᠢᠳᠠᠨ ᠳ᠋ᠤ᠌ ᠲᠤᠯᠭᠠᠭᠤᠷᠯᠠᠨ ᠪᠡᠬᠢᠯᠡᠳᠡᠭ᠃ ᠡᠨᠡ ᠬᠦ᠌ ᠡᠰᠢ ᠶ᠋ᠢ ᠰᠦᠯᠳᠡ ᠶ᠋ᠢᠨ ᠰᠢᠯᠪᠢ ᠭᠡᠬᠦ ᠠᠭᠠᠳ ᠲᠡᠭᠦᠨ ᠢ ᠣᠩᠭᠤᠨ ᠲᠠᠬᠢᠯᠭᠠᠲᠤ ᠠᠭᠤᠯᠠ ᠶ᠋ᠢᠨ ᠰᠢᠯᠤᠭᠤᠨ ᠬᠤᠰᠤ ᠮᠣᠳᠣ ᠪᠠᠷ ᠬᠢᠳᠡᠭ᠃ ᠡᠨᠡ ᠮᠣᠳᠣ ᠶ᠋ᠢ ᠠᠪᠬᠤ ᠳ᠋ᠠᠭᠠᠨ ᠠᠭᠤᠯᠠ ᠶ᠋ᠢᠨ ᠡᠵᠡᠨ ᠰᠠᠪᠳᠠᠭ ᠢ᠋ ᠠᠷᠭᠠᠳᠠᠨ ᠭᠤᠶᠤᠵᠤ ᠪᠠᠢᠵᠤ ᠠᠪᠤᠨᠠ᠃ ᠭᠣᠣᠯ ᠰᠦᠯᠳᠡ ᠶ᠋ᠢᠨ ᠰᠢᠯᠪᠢ ᠨᠢ 13 ᠲᠣᠬᠣᠢ (540 ᠰᠡᠨᠲ᠋ᠢᠮᠧᠲ᠋ᠷ) ᠤᠷᠲᠤ ᠪᠠᠢᠨᠠ᠃ ᠳᠥᠷᠪᠡᠨ ᠰᠠᠯᠪᠤᠷᠢ ᠰᠦᠯᠳᠡ ᠨᠢ ᠬᠡᠯᠪᠡᠷᠢ ᠬᠢᠴᠡ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠭᠣᠣᠯ ᠰᠦᠯᠳᠡ ᠲᠡᠢ ᠪᠡᠨ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠠᠳᠠᠯᠢᠬᠠᠨ ᠪᠣᠯᠪᠠᠴᠤ ᠬᠡᠮᠵᠢᠶᠡᠨ ᠤ ᠬᠤᠪᠢ ᠳ᠋ᠤ᠌ ᠠᠷᠠᠢ ᠵᠢᠵᠢᠭ᠂ ᠲᠤᠬᠠᠢᠯᠠᠪᠠᠯ ᠰᠢᠯᠪᠢ ᠨᠢ 9 ᠲᠣᠬᠣᠢ ᠤᠷᠲᠤ ᠪᠠᠢᠳᠠᠭ᠃ ᠡᠳᠡᠭᠡᠷ ᠳᠥᠷᠪᠡᠨ ᠰᠦᠯᠳᠡ ᠶ᠋ᠢ ᠡᠯᠴᠢ ᠰᠦᠯᠳᠡ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠳᠥᠷᠪᠡᠨ ᠡᠯᠴᠢ ᠰᠦᠯᠳᠡ ᠨᠢ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠭᠣᠣᠯ ᠰᠦᠯᠳᠡ ᠪᠡᠨ ᠪᠡᠬᠢᠯᠡᠭᠰᠡᠨ ᠳᠥᠷᠪᠡᠨ ᠬᠥᠯ ᠤᠴᠢᠷ ᠠ᠋ᠴᠠ ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠰᠦᠯᠳᠡ ᠭᠡᠵᠦ ᠨᠡᠷᠡᠯᠡᠳᠡᠭ》⑩᠃《ᠡᠵᠡᠨ ᠴᠢᠩᠭᠢᠰ ᠤᠨ ᠬᠠᠷᠠ ᠰᠦᠯᠳᠡ ᠨᠢ ᠳᠦᠷᠰᠦ ᠬᠡᠯᠪᠡᠷᠢ ᠪᠣᠯᠤᠭᠠᠳ ᠥᠩᠭᠡ᠂ ᠲᠣᠭᠠ᠂ ᠵᠦᠭ ᠴᠢᠭ ᠭᠡᠬᠦᠴᠢᠯᠡᠨ ᠣᠯᠠᠨ ᠪᠡᠯᠭᠡᠳᠡᠯ ᠢ᠋ ᠰᠢᠩᠭᠡᠭᠡᠭᠰᠡᠨ ᠪᠠᠢᠳᠠᠭ᠃ ᠴᠣᠬᠣᠮ ᠬᠦ᠌ ᠬᠠᠷᠠ ᠰᠦᠯᠳᠡ ᠨᠢ ᠣᠯᠠᠨ ᠵᠢᠯ ᠤᠨ ᠳᠤᠷᠰᠢ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠳᠠᠶᠠᠭᠠᠷ ᠲᠤ᠌ ᠰᠢᠲᠦᠭᠳᠡᠨ ᠢᠷᠡᠭᠰᠡᠨ ᠤᠴᠢᠷ ᠨᠢ ᠡᠨᠡ ᠬᠦ᠌ ᠪᠡᠯᠭᠡᠳᠡᠯ ᠤᠳᠬᠠ ᠰᠠᠨᠠᠭᠠᠨ ᠳ᠋ᠤ᠌ ᠪᠣᠢ᠃
ᠬᠡᠯᠪᠡᠷᠢ ᠳᠦᠷᠰᠦ ᠶ᠋ᠢᠨ ᠪᠡᠯᠭᠡᠳᠡᠯ : ᠣᠷᠣᠢ ᠳ᠋ᠠᠭᠠᠨ ᠢᠯᠠᠨ ᠳᠡᠢᠯᠬᠦ ᠶ᠋ᠢᠨ ᠤᠳᠬᠠ ᠰᠠᠨᠠᠭᠠ ᠶ᠋ᠢ ᠢᠯᠡᠷᠬᠡᠢᠯᠡᠭᠰᠡᠨ ᠠᠯᠲᠠᠨ ᠰᠢᠷᠭᠠᠯ ᠵᠢᠳᠠᠨ ᠤ᠋ ᠳᠦᠷᠰᠦ ᠲᠡᠢ ᠪᠣᠯ ᠲᠡᠭᠦᠨ ᠤ ᠳᠣᠣᠷᠠᠬᠢ ᠮᠥᠩᠭᠥᠨ ᠴᠠᠷᠠ᠂ ᠲᠤᠭ ᠦᠰᠦ ᠵᠡᠷᠭᠡ ᠨᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠴᠣᠮᠴᠣᠭ ᠤᠷᠲᠤ ᠥᠷᠭᠥᠭᠡ ᠲᠡᠢ ᠲᠥᠰᠲᠡᠢ ᠳᠤᠭᠤᠢ ᠬᠡᠯᠪᠡᠷᠢᠲᠡᠢ ᠪᠠ ᠡᠨᠡ ᠨᠢ ᠨᠡᠢᠲᠡ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ᠋ ᠰᠦᠯᠳᠡ ᠰᠢᠲᠦᠭᠡᠨ ᠪᠣᠯᠬᠤ ᠶ᠋ᠢ ᠢᠯᠡᠷᠬᠡᠢᠯᠡᠨᠡ᠃ ᠭᠣᠣᠯ ᠰᠦᠯᠳᠡ ᠶ᠋ᠢᠨ ᠰᠠᠭᠤᠷᠢ ᠶ᠋ᠢ ᠴᠢᠯᠠᠭᠤᠨ ᠮᠡᠯᠡᠬᠡᠢ ᠪᠡᠷ ᠬᠢᠭᠰᠡᠨ ᠨᠢ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠦᠯᠦ ᠳᠡᠢᠯᠦᠭᠳᠡᠬᠦ ᠪᠠᠲᠤ ᠲᠣᠭᠲᠠᠪᠤᠷᠢᠲᠠᠢ᠂ ᠬᠠᠲᠠᠭᠤ ᠴᠢᠩᠳᠠ᠂ ᠦᠯᠦ ᠬᠥᠳᠡᠯᠬᠦ᠂ ᠬᠤᠪᠢᠷᠠᠰᠢ ᠦᠭᠡᠢ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠡᠷᠬᠡᠢᠯᠡᠨᠡ᠃
ᠵᠦᠭ ᠴᠢᠭ ᠤᠨ ᠪᠡᠯᠭᠡᠳᠡᠯ: ᠬᠠᠷᠠ ᠰᠦᠯᠳᠡ ᠨᠢ ᠡᠳᠦᠭᠡᠨ ᠡᠬᠡ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠡᠴᠡ ᠡᠴᠢᠭᠡ ᠬᠥᠬᠡ ᠮᠥᠩᠬᠡ ᠲᠡᠭᠷᠢ ᠥᠭᠡᠳᠡ ᠲᠡᠮᠡᠦᠯᠦᠭᠰᠡᠨ ᠪᠣᠰᠤᠭᠠ ᠴᠢᠭᠯᠡᠯ ᠲᠡᠢ ᠨᠢ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠬᠦᠴᠦ ᠶ᠋ᠢ ᠣᠯᠵᠤ ᠢᠮᠠᠭᠲᠠ ᠥᠭᠡᠳᠡᠯᠡᠨ ᠳᠡᠪᠵᠢᠵᠦ᠂ ᠮᠠᠨᠳᠤᠨ ᠪᠠᠳᠠᠷᠠᠵᠤ ᠪᠠᠢᠬᠤ ᠶ᠋ᠢ ᠪᠡᠯᠭᠡᠳᠡᠭᠰᠡᠨ᠂ ᠳᠥᠷᠪᠡᠨ ᠲᠠᠯᠠ ᠳ᠋ᠤ᠌ ᠨᠢ ᠡᠯᠴᠢ ᠰᠦᠯᠳᠡ ᠶ᠋ᠢ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠨᠢ ᠶᠢᠷᠲᠢᠨᠴᠦ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠲᠦ᠍ ᠮᠣᠩᠭᠣᠯ ᠴᠡᠷᠢᠭ ᠤᠨ ᠰᠦᠷ ᠬᠦᠴᠦ ᠮᠠᠨᠳᠤᠨ ᠪᠠᠳᠠᠷᠠᠵᠤ᠂ ᠳᠥᠷᠪᠡᠨ ᠵᠦᠭ ᠤᠨ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠢ᠋ ᠳᠠᠷᠤᠨ ᠰᠥᠨᠥᠭᠡᠬᠦ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠡᠷᠬᠡᠢᠯᠡᠬᠦ ᠪᠥᠯᠥᠭᠡ᠃
ᠥᠩᠭᠡ ᠶ᠋ᠢᠨ ᠪᠡᠯᠭᠡᠳᠡᠯ: ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠨᠣᠮᠯᠠᠯ ᠶᠣᠰᠣ ᠪᠠᠷ ᠮᠣᠩᠭᠣᠯᠴᠤᠳ ᠢ᠋ ᠢᠪᠡᠭᠡᠵᠦ ᠪᠠᠢᠳᠠᠭ ᠴᠠᠭᠠᠨ ᠲᠡᠭᠷᠢ᠂ ᠬᠠᠷᠠ ᠲᠡᠭᠷᠢ ᠬᠡᠮᠡᠬᠦ ᠬᠣᠶᠠᠷ ᠲᠡᠭᠷᠢ ᠪᠣᠢ᠂ ᠴᠠᠭᠠᠨ ᠵᠦᠭ ᠤᠨ ᠲᠡᠭᠷᠢ ᠨᠢ ᠡᠨᠡᠷᠢᠩᠭᠦᠢ ᠶᠣᠰᠣ᠂ ᠰᠠᠢᠨ ᠰᠠᠢᠨ ᠤ᠋ ᠪᠡᠯᠭᠡᠳᠡᠯ ᠪᠣᠯᠵᠤ ᠪᠠᠢᠳᠠᠭ ᠪᠣᠯ ᠬᠠᠷᠠ ᠵᠦᠭ ᠤᠨ ᠲᠡᠭᠷᠢ ᠨᠢ ᠵᠣᠷᠢᠭ ᠪᠠᠭᠠᠲᠤᠷᠯᠢᠭ ᠤ᠋ᠨ ᠪᠣᠯᠤᠭᠠᠳ ᠬᠠᠲᠠᠭᠤ ᠴᠢᠩᠭᠠ ᠶᠣᠰᠣᠨ ᠤ᠋ ᠢᠯᠡᠷᠬᠡᠢᠯᠡᠯ ᠪᠣᠯᠵᠤ ᠪᠠᠢᠳᠠᠭ᠃ ᠴᠣᠬᠣᠮ ᠡᠢᠮᠦ ᠤᠴᠢᠷ ᠠ᠋ᠴᠠ ᠴᠢᠩᠭᠢᠰ ᠬᠠᠭᠠᠨ ᠳᠡᠭᠡᠷᠡᠬᠢ ᠬᠣᠶᠠᠷ ᠲᠡᠭᠷᠢ ᠶ᠋ᠢ ᠲᠥᠯᠥᠭᠡᠯᠡᠭᠰᠡᠨ᠂ ᠬᠣᠶᠠᠷ ᠦᠢᠯᠡᠰ ᠳᠠᠭᠠᠭᠠᠭᠰᠠᠨ ᠲᠥᠷᠥ ᠶ᠋ᠢᠨ ᠴᠠᠭᠠᠨ᠂ ᠬᠠᠷᠠ ᠲᠤᠭ ᠢ᠋ ᠪᠦᠲᠦᠭᠡᠨ ᠵᠠᠯᠬᠠᠭᠰᠠᠨ ᠪᠣᠯᠠᠢ᠃ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠶᠣᠰᠣ ᠪᠠᠷ ᠬᠠᠷᠠ ᠥᠩᠭᠡ ᠨᠢ ᠠᠯᠢᠪᠠ ᠬᠣᠣᠷᠯᠠᠯ᠂ ᠠᠶᠤᠯ ᠵᠠᠨᠤᠯ ᠳᠠᠢᠰᠤᠩᠨᠠᠯ ᠵᠡᠷᠭᠡ ᠮᠠᠭᠤ ᠨᠥᠯᠥᠭᠡ ᠬᠢᠭᠡᠳ ᠲᠡᠭᠦᠨ ᠤ ᠡᠰᠡᠷᠭᠦ ᠲᠡᠮᠡᠴᠡᠯ ᠵᠡᠷᠭᠡ ᠪᠠᠢᠭᠠᠯᠢ᠂ ᠨᠡᠢᠭᠡᠮ᠂ ᠬᠥᠮᠦᠨ ᠤ ᠠᠮᠢᠳᠤᠷᠠᠯ ᠤ᠋ᠨ ᠬᠠᠲᠠᠭᠤ ᠪᠡᠷᠬᠡ ᠪᠦᠬᠦᠨ ᠢ᠋ ᠢᠯᠡᠷᠬᠡᠢᠯᠡᠳᠡᠭ᠂ ᠪᠢᠳᠡ ᠡᠳᠦᠭᠡ ᠬᠦᠷᠲᠡᠯᠡ ᠬᠠᠷᠠ ᠰᠠᠨᠠᠭᠠ᠂ ᠬᠠᠷᠠ ᠬᠡᠷᠡᠭ᠂ ᠬᠠᠷᠠ ᠭᠠᠢ ᠭᠡᠬᠦᠴᠢᠯᠡᠨ ᠶᠠᠷᠢᠳᠠᠭ ᠨᠢ ᠥᠨᠢ ᠡᠷᠲᠡᠨ ᠤ ᠪᠥᠬᠡ ᠮᠥᠷᠭᠥᠯ ᠤᠨ ᠡᠨᠡ ᠬᠦ᠌ ᠦᠵᠡᠯ ᠨᠣᠮᠯᠠᠯ ᠠ᠋ᠴᠠ ᠤᠯᠪᠠᠭᠠᠲᠠᠢ ᠶᠤᠮ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠳ᠋ᠤ᠌ ᠳᠡᠭᠡᠳᠦ ᠲᠡᠭᠷᠢ᠂ ᠭᠠᠵᠠᠷ ᠤᠰᠤᠨ ᠤ᠋ ᠡᠵᠡᠳ ᠢ᠋ ᠨᠣᠮᠣᠬᠠᠨ᠂ ᠳᠣᠭᠰᠢᠨ ᠭᠡᠮᠡᠨ ᠬᠣᠶᠠᠷ ᠠᠩᠭᠢᠯᠠᠨ ᠦᠵᠡᠵᠦ᠂ ᠳᠣᠭᠰᠢᠳ ᠪᠦᠬᠦᠯᠢ ᠳ᠋ᠦ᠍ᠨᠢ ᠬᠠᠷᠠ ᠲᠡᠭᠷᠢ ᠨᠦ᠍ᠭᠦᠳ ᠭᠡᠮᠡᠨ ᠲᠠᠬᠢᠵᠤ ᠰᠢᠲᠦᠬᠦ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠬᠠᠷᠠ ᠲᠡᠭᠷᠢ ᠨᠦ᠍ᠭᠦᠳ ᠨᠢ ᠬᠥᠮᠦᠰ ᠤᠨ ᠠᠯᠢᠪᠠ ᠠᠶᠤᠯ᠂ ᠵᠠᠨᠤᠯᠬᠢᠯᠡᠯ ᠡᠴᠡ ᠠᠪᠤᠷᠠᠨ ᠬᠠᠮᠠᠭᠠᠯᠠᠬᠤ᠂ ᠦᠰᠲᠡᠨ ᠳᠠᠢᠰᠤᠨ ᠠ᠋ᠴᠠ ᠥᠰᠢᠯ ᠥᠰᠢᠵᠦ᠂ ᠬᠢᠰᠠᠯ ᠬᠢᠰᠠᠬᠤ ᠵᠡᠷᠭᠡ ᠪᠡᠷ ᠮᠠᠭᠤ ᠪᠦᠬᠦᠨ ᠤ ᠡᠰᠡᠷᠭᠦ ᠪᠡᠶᠡ ᠪᠡᠨ ᠳᠠᠭᠠᠭᠠᠨ ᠲᠡᠮᠡᠴᠡᠳᠡᠭ ᠨᠢᠭᠡᠨ ᠶᠣᠰᠣᠨ ᠤ᠋ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠵᠣᠷᠢᠭ ᠪᠠᠭᠠᠲᠤᠷᠯᠢᠭ ᠤ᠋ᠨ ᠢᠯᠡᠷᠬᠡᠢᠯᠡᠯ ᠪᠣᠯᠳᠠᠭ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠬᠠᠷᠢ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠭᠴᠢᠳ ᠡᠴᠡ ᠬᠠᠮᠠᠭᠠᠯᠠᠵᠤ ᠦᠬᠦᠯ ᠰᠡᠭᠡᠯ ᠤᠨ ᠢᠷᠮᠡᠭ ᠳᠡᠭᠡᠷᠡ ᠲᠡᠮᠡᠴᠡᠨ ᠲᠤᠯᠤᠯᠳᠤᠵᠤ ᠶᠠᠪᠤᠳᠠᠭ ᠴᠡᠷᠢᠭ ᠡᠷᠡᠰ ᠤᠨ ᠣᠷᠣᠢ ᠶ᠋ᠢᠨ ᠳᠡᠭᠡᠳᠦ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠲᠤᠭ ᠢ᠋ ᠬᠠᠷᠠ ᠥᠩᠭᠡ ᠪᠡᠷ ᠬᠢᠭᠰᠡᠨ ᠪᠠᠢᠨᠠ᠃ ᠡᠨᠡ ᠨᠢ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠬᠠᠷᠠ ᠲᠡᠭᠷᠢ ᠯᠦ᠍ᠭᠡ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠦᠯᠦ ᠳᠡᠢᠯᠦᠭᠳᠡᠬᠦ᠂ ᠬᠠᠲᠠᠭᠤ ᠰᠢᠷᠦᠭᠦᠨ ᠪᠦᠬᠦᠨ ᠢ᠋ ᠳᠠᠪᠠᠨ ᠲᠤᠭᠤᠯᠬᠤ ᠬᠠᠷᠰᠢ ᠦᠭᠡᠢ ᠬᠦᠴᠦ ᠴᠢᠳᠠᠯ ᠤ᠋ᠨ ᠢᠯᠡᠷᠬᠡᠢᠯᠡᠯ᠂ ᠴᠡᠷᠢᠭ ᠡᠷᠡᠰ ᠤᠨ ᠵᠣᠷᠢᠭ ᠪᠠᠭᠠᠲᠤᠷᠯᠢᠭ᠂ ᠢᠯᠠᠯᠲᠠ ᠠᠮᠵᠢᠯᠲᠠ ᠶ᠋ᠢᠨ ᠤᠷᠢᠶᠠ ᠳᠠᠭᠤᠳᠠᠯᠭᠠ ᠪᠣᠯᠬᠤ ᠶ᠋ᠢᠨ ᠬᠠᠮᠲᠤ ᠳᠣᠭᠰᠢᠨ ᠬᠠᠷᠠ ᠲᠡᠭᠷᠢ ᠨᠦ᠍ᠭᠦᠳ ᠢ᠋ ᠤᠷᠢᠨ ᠳᠠᠭᠤᠳᠠᠵᠤ ᠵᠣᠷᠢᠭ ᠬᠦᠴᠦ ᠶ᠋ᠢ ᠬᠥᠪᠴᠢᠯᠡᠵᠦ ᠪᠣᠢ ᠬᠡᠷᠡᠭ ᠠᠵᠢ᠃
ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠳ᠋ᠤ᠌ ᠬᠠᠷᠠ ᠲᠡᠭᠷᠢ ᠶ᠋ᠢ ᠰᠢᠲᠦᠵᠦ᠂ ᠬᠠᠷᠠ ᠣᠩᠭᠣᠨ ᠢ᠋ᠶ᠋ᠠᠷ ᠬᠥᠯᠯᠡᠭᠰᠡᠨ ᠪᠥᠬᠡ ᠶ᠋ᠢ <ᠬᠠᠷᠠ ᠵᠦᠭ ᠤᠨ ᠪᠥᠬᠡ> ᠭᠡᠮᠡᠨ ᠨᠡᠷᠡᠯᠡᠳᠡᠭ ᠪᠥᠭᠡᠳ ᠲᠡᠳᠡᠨ ᠤ ᠣᠩᠭᠣᠳ ᠨᠢ ᠶᠡᠬᠡ ᠳᠣᠭᠰᠢᠨ᠂ ᠬᠦᠴᠦ ᠨᠢ ᠦᠯᠡᠮᠵᠢ ᠪᠠᠢᠳᠠᠭ ᠠᠵᠢ᠃ ᠡᠨᠡ ᠬᠦ᠌ ᠬᠠᠷᠠ ᠵᠦᠭ ᠤᠨ ᠪᠥᠬᠡ ᠨᠢ ᠬᠠᠷᠠ ᠲᠡᠭᠷᠢ᠂ ᠲᠡᠭᠦᠨ ᠤ ᠰᠢᠳᠢ ᠪᠦᠲᠦᠭᠡᠯ ᠪᠣᠯᠤᠭᠰᠠᠨ ᠴᠡᠷᠢᠭ ᠤᠨ ᠲᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠶ᠋ᠢ ᠳᠠᠬᠢᠨ ᠴᠡᠷᠢᠭ ᠡᠷᠡᠰ ᠤᠨ ᠰᠦᠷ ᠬᠦᠴᠦ ᠶ᠋ᠢ ᠨᠡᠮᠡᠭᠳᠡᠭᠦᠯᠬᠦ᠂ ᠠᠭᠠᠭ ᠣᠮᠣᠭ ᠢ᠋ ᠨᠢ ᠪᠠᠳᠠᠷᠠᠭᠠᠨ ᠬᠥᠮᠦᠨ ᠠᠷᠠᠳ᠂ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠬᠤ ᠡᠷᠬᠢᠮ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠳᠡᠭ ᠪᠠᠢᠵᠠᠢ᠃
ᠲᠣᠭᠠᠨ ᠤ᠋ ᠪᠡᠯᠭᠡᠳᠡᠯ : ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠴᠠᠷᠠ ᠶ᠋ᠢᠨ ᠨᠦᠬᠡ ᠨᠢ 81᠂ ᠰᠢᠯᠪᠢ ᠶ᠋ᠢᠨ ᠤᠷᠲᠤ ᠨᠢ 13 ᠲᠣᠬᠣᠢ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ 4 ᠡᠯᠴᠢ ᠰᠦᠯᠳᠡ ᠲᠡᠢ ᠪᠣᠯᠬᠤ ᠶ᠋ᠢ ᠡᠮᠦᠨᠡ ᠥᠭᠦᠯᠡᠭᠰᠡᠨ᠃
ᠡᠳᠡᠭᠡᠷ ᠲᠣᠭᠠ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠵᠦᠢᠯ ᠪᠤᠰᠤ ᠬᠠᠷᠢᠨ ᠡᠷᠲᠡᠨ ᠤ ᠮᠣᠩᠭᠣᠯᠴᠤᠳ ᠤ᠋ᠨ ᠶᠢᠷᠲᠢᠨᠴᠦ ᠶ᠋ᠢ ᠦᠵᠡᠬᠦ ᠦᠵᠡᠯ᠂ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠰᠤᠷᠭᠠᠯ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠲᠣᠳᠣᠷᠬᠠᠢ ᠤᠳᠬᠠ ᠠᠭᠤᠯᠭᠠ ᠶ᠋ᠢ ᠢᠯᠡᠷᠬᠡᠢᠯᠡᠭᠰᠡᠨ ᠪᠡᠯᠭᠡᠳᠡᠯ ᠲᠣᠭᠠ ᠶᠤᠮ᠃ ᠮᠣᠩᠭᠣᠯ ᠲᠦᠮᠡᠨ ᠣᠲᠣᠮᠳᠠ ᠶᠢᠰᠦ ᠶ᠋ᠢᠨ ᠲᠣᠭᠠᠨ ᠤ᠋ ᠪᠡᠯᠭᠡᠳᠡᠯ ᠬᠠᠮᠤᠭ ᠤ᠋ᠨ ᠶᠡᠬᠡ ᠪᠠᠢᠳᠠᠭ ᠪᠥᠭᠡᠳ ᠰᠤᠳᠤᠯᠭᠠᠴᠢᠳ ᠤ᠋ᠨ ᠲᠣᠳᠣᠷᠬᠠᠢᠯᠠᠭᠰᠠᠨ ᠢ᠋ᠶ᠋ᠠᠷ ᠶᠢᠰᠦ ᠶ᠋ᠢᠨ ᠲᠣᠭᠠ ᠨᠢ ᠲᠡᠭᠷᠢ ᠶ᠋ᠢᠨ ᠬᠦᠴᠦᠨ ᠤ ᠪᠡᠯᠭᠡᠳᠡᠯ ᠪᠣᠯᠳᠠᠭ᠃ ᠲᠡᠢᠮᠦ ᠤᠴᠢᠷ ᠬᠠᠷᠠ ᠵᠦᠭ ᠤᠨ ᠪᠥᠬᠡ ᠨᠠᠷ ᠶᠢᠰᠦᠨ ᠤ ᠡᠳᠣᠷ ᠬᠠᠮᠤᠭ ᠤ᠋ᠨ ᠬᠦᠴᠦᠲᠡᠢ ᠳᠣᠭᠰᠢᠨ ᠬᠠᠷᠠ ᠲᠡᠭᠷᠢ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠳᠠᠢᠰᠤᠨ ᠡᠲᠡᠭᠡᠳ ᠢ᠋ᠶ᠋ᠡᠨ ᠳᠠᠷᠤᠬᠤ᠂ ᠬᠤᠯᠠᠭᠠᠢ ᠬᠠᠭᠤᠷᠮᠠᠭ ᠢ᠋ ᠨᠣᠮᠣᠬᠠᠳᠬᠠᠬᠤ ᠵᠠᠩ ᠦᠢᠯᠡ ᠪᠡᠨ ᠦᠢᠯᠡᠳᠳᠡᠭ ᠪᠠᠢᠵᠠᠢ᠃ ᠰᠠᠷᠠ ᠪᠦᠷᠢ ᠶ᠋ᠢᠨ 9᠂ 19᠂ 29 ᠤ ᠡᠳᠣᠷ ᠤ᠋ᠳ ᠨᠢ ᠶᠡᠬᠡᠪᠴᠢᠯᠡᠨ ᠬᠠᠲᠠᠭᠤ᠂ ᠴᠡᠷᠢᠭ ᠲᠡᠢᠨ ᠤ ᠬᠠᠷᠠ ᠲᠡᠭᠷᠢ ᠶ᠋ᠢᠨ ᠭᠦᠶᠦᠳᠡᠯ ᠲᠡᠢ᠂ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠲᠠᠬᠢᠯᠭᠠ ᠶ᠋ᠢᠨ ᠡᠳᠦᠷ ᠦ᠋ᠳ ᠪᠥᠭᠡᠳ ᠢᠯᠠᠩᠭᠤᠶᠠ 29 ᠶ᠋ᠢ ᠶᠡᠬᠡ ᠬᠠᠲᠠᠭᠤ ᠡᠳᠦᠷ ᠭᠡᠵᠦ ᠦᠵᠡᠳᠡᠭ᠃
ᠬᠠᠷᠢᠨ9 ᠶᠢᠨ ᠲᠤᠭᠠ ᠶ᠋ᠢ 9 ᠵᠡᠷᠭᠡ ᠳᠡᠪᠰᠢᠭᠦᠯᠦᠭᠰᠡᠨ 81 ᠶ᠋ᠢ ᠲᠡᠭᠷᠢ ᠶ᠋ᠢᠨ ᠬᠦᠴᠦ ᠶ᠋ᠢ 9 ᠳᠠᠬᠢᠨ ᠨᠡᠮᠡᠭᠰᠡᠨ ᠤ ᠪᠡᠯᠭᠡᠳᠡᠯ ᠭᠡᠵᠦ ᠦᠵᠡᠵᠦ ᠪᠣᠯᠬᠤ ᠶᠤᠮ᠃ ᠮᠣᠩᠭᠣᠯ ᠳᠣᠮᠣᠭ ᠵᠦᠢ᠂ ᠲᠤᠤᠯᠢᠰ ᠤ᠋ᠨ 9 ᠶᠢᠨ ᠲᠤᠭᠠᠨ ᠤ᠋ ᠣᠯᠠᠰᠢᠷᠠᠭᠤᠯᠤᠭᠰᠠᠨ ᠬᠤᠪᠢᠯᠪᠤᠷᠢ ᠪᠣᠯᠬᠤ 99 ᠭᠡᠰᠡᠨ ᠲᠣᠭᠠ ᠪᠠᠷ ᠲᠡᠭᠷᠢ (99 ᠲᠡᠭᠷᠢ)᠂ ᠰᠡᠴᠡᠨ ᠮᠡᠷᠭᠡᠨ ᠣᠶᠤᠨ ᠤᠬᠠᠭᠠᠨ᠂ ᠵᠦᠩ ᠪᠢᠯᠢᠭ (99 ᠵᠢᠯ ᠤᠨ ᠡᠮᠦᠨᠡᠬᠢ ᠵᠦᠢᠯ ᠢ᠋ ᠬᠥᠭᠡᠭᠡᠵᠦ᠂ ᠮᠥᠨ 99 ᠵᠢᠯ ᠤᠨ ᠬᠣᠢᠲᠤᠬᠢ ᠶ᠋ᠢ ᠳᠠᠭᠠᠭᠠᠵᠤ ᠮᠡᠳᠡᠬᠦ ᠴᠢᠳᠠᠪᠤᠷᠢ)᠂ ᠤᠷᠤᠨ ᠵᠠᠢ᠂ ᠴᠠᠭ ᠬᠤᠭᠤᠴᠠᠭᠠᠨ ᠤ᠋ ᠬᠡᠮᠨᠡᠯ (9 ᠵᠢᠯ ᠤᠨ ᠭᠠᠵᠠᠷ) ᠭᠡᠰᠡᠨ ᠤᠳᠬᠠ ᠶ᠋ᠢ ᠲᠤᠰ ᠲᠤᠰ ᠪᠡᠯᠭᠡᠳᠡᠳᠡᠭ ᠪᠠᠢᠨᠠ᠃ ᠡᠨᠡ ᠪᠦᠭᠦᠳᠡ ᠡᠴᠡ ᠦᠵᠡᠬᠦ ᠳ᠋ᠦ᠍ 81᠂ 99 ᠵᠡᠷᠭᠡ ᠨᠢ 9 ᠶᠢᠨ ᠲᠤᠭᠠᠨ ᠤ᠋ ᠪᠡᠯᠭᠡᠳᠡᠯ ᠤᠨ ᠠᠳᠠᠯᠢ ᠬᠥᠮᠦᠨ᠂ ᠠᠮᠢᠲᠠᠨ ᠤ᠋ ᠡᠷᠳᠡᠮ ᠴᠢᠳᠠᠯ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠣᠬᠢ ᠮᠠᠩᠯᠠᠢ᠂ ᠵᠠᠷ ᠵᠡᠪᠰᠡᠭ ᠣᠨᠢᠳᠠ ᠬᠠᠪᠤ᠂ ᠢᠳᠡᠭᠡ ᠤᠮᠳᠠᠭᠠᠨ ᠤ᠋ ᠳᠡᠭᠡᠵᠢ᠂ ᠰᠢᠮᠡ ᠶ᠋ᠢᠨ ᠪᠦᠷᠢᠳᠦᠯ ᠪᠡᠯᠭᠡᠳᠡᠳᠡᠭ ᠪᠠᠢᠨᠠ᠃
ᠡᠨᠳᠡ ᠡᠴᠡ ᠤᠷᠭᠤᠭᠤᠯᠤᠨ ᠪᠣᠳᠣᠵᠤ ᠤᠬᠠᠭᠤᠯᠤᠨ ᠰᠡᠳᠬᠢᠪᠡᠰᠦ ᠬᠠᠷᠠ ᠰᠦᠯᠳᠡ ᠶ᠋ᠢᠨ 81᠂ 99 ᠵᠡᠷᠭᠡ ᠲᠣᠭᠠ ᠨᠢ ᠮᠣᠩᠭᠣᠯ ᠴᠡᠷᠢᠭ ᠤᠨ ᠡᠷᠡᠰ ᠣᠨᠢᠳᠠ ᠬᠠᠪᠤ᠂ ᠡᠷᠡ ᠴᠢᠳᠠᠯ᠂ ᠡᠷᠡᠮᠡᠬᠡᠢ ᠵᠣᠷᠢᠭ ᠨᠢ ᠪᠠᠳᠠᠷᠠᠵᠤ᠂ ᠤᠬᠠᠭᠠᠨ ᠪᠢᠯᠢᠭ ᠨᠢ ᠣᠨᠳᠣᠷᠴᠤ᠂ ᠵᠠᠷ ᠵᠡᠪᠰᠡᠭ ᠨᠢ ᠬᠤᠷᠴᠠ ᠪᠠᠢᠵᠤ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠠᠳᠠᠯᠢ ᠰᠦᠷ ᠬᠦᠴᠦᠨ ᠲᠡᠭᠦᠰ ᠪᠠᠢᠬᠤ ᠶ᠋ᠢ ᠪᠡᠯᠭᠡᠳᠡᠵᠡᠢ᠃
ᠬᠠᠷᠢᠨ <13> ᠶᠢᠨ ᠲᠣᠭᠠ ᠨᠢ ᠮᠣᠩᠭᠣᠯ ᠪᠥᠬᠡ ᠮᠥᠷᠭᠥᠯ ᠤᠨ ᠬᠠᠷᠠ ᠲᠡᠭᠷᠢ ᠨᠦ᠍ᠭᠦᠳ ᠤᠨ ᠠᠬᠠᠯᠠᠭᠴᠢ ᠠᠲᠠᠭᠠ ᠲᠡᠭᠷᠢ ᠶ᠋ᠢ ᠪᠡᠯᠭᠡᠳᠡᠨ ᠶᠠᠪᠤᠳᠠᠭ ᠡᠷᠲᠡᠨ ᠤ ᠣᠭᠰᠢᠯᠲᠠᠢ ᠪᠣᠯᠬᠤ ᠶ᠋ᠢ ᠡᠷᠳᠡᠮᠲᠡᠨ ᠰ · ᠳᠤᠯᠮᠠ <ᠮᠣᠩᠭᠣᠯ ᠪᠡᠯᠭᠡᠳᠡᠯ ᠵᠦᠢ> ᠨᠣᠮ ᠤ᠋ᠨ ᠢ᠋ᠶ᠋ᠠᠨ <ᠲᠣᠭᠠᠨ ᠤ᠋ ᠪᠡᠯᠭᠡᠳᠡᠯ ᠵᠦᠢ> ᠬᠡᠮᠡᠬᠦ ᠲᠡᠷᠢᠭᠦᠨ ᠳᠡᠪᠲᠡᠷ ᠲᠦ᠍ ᠪᠢᠴᠢᠭᠰᠡᠨ ᠪᠠᠢᠨᠠ᠃
ᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠪᠥᠬᠡ ᠮᠥᠷᠭᠥᠯ ᠳ᠋ᠦ᠍ <ᠠᠷᠪᠠᠨ ᠭᠤᠷᠪᠠᠨ ᠠᠲᠠᠭᠠ ᠲᠡᠭᠷᠢ ᠶ᠋ᠢᠨ ᠳᠠᠢᠯᠭᠠ> ᠬᠡᠮᠡᠬᠦ ᠶᠡᠬᠡ ᠶᠣᠰᠣᠯᠠᠯ ᠦᠢᠯᠡᠳᠳᠡᠭ᠃ ᠮᠥᠨ ᠡᠨᠡ ᠲᠣᠭᠠ ᠨᠢ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠤᠬᠠᠭᠠᠨ ᠪᠢᠯᠢᠭ᠂ ᠠᠷᠭᠠ ᠵᠠᠯᠢ (ᠡᠷᠡ ᠬᠥᠮᠦᠨ ᠦ᠌13 ᠮᠡᠬᠡ)᠂ ᠴᠡᠷᠢᠭ ᠡᠷᠡᠰ ᠤᠨ ᠳᠠᠢᠰᠤᠨ ᠳ᠋ᠤ᠌ ᠠᠪᠲᠠᠵᠤ ᠡᠵᠡᠯᠡᠭᠳᠡᠰᠢ ᠦᠭᠡᠢ ᠬᠡᠷᠡᠮ ᠮᠡᠲᠦ ᠪᠠᠲᠤ ᠪᠡᠬᠢ᠂ ᠡᠪ ᠡᠶᠡ ᠲᠡᠢ (13 ᠬᠦᠷᠢᠶᠡ) ᠪᠠᠢᠬᠤ ᠴᠢᠨᠠᠷ ᠢ᠋ ᠢᠯᠡᠷᠬᠡᠢᠯᠡᠨ ᠬᠡᠯᠡᠭᠳᠡᠵᠦ ᠢᠷᠡᠵᠡᠢ᠃
ᠮᠣᠩᠭᠣᠯ ᠤ᠋ᠨ ᠲᠥᠷᠥ᠂ ᠴᠡᠷᠢᠭ ᠤᠨ ᠶᠣᠰᠣᠨ ᠳ᠋ᠤ᠌ ᠳᠥᠷᠪᠡ ᠶ᠋ᠢᠨ ᠲᠣᠭᠠᠨ ᠤ᠋ ᠪᠡᠯᠭᠡᠳᠡᠯ ᠴᠢᠬᠤᠯᠠ ᠰᠠᠭᠤᠷᠢ ᠶ᠋ᠢ ᠡᠵᠡᠯᠡᠳᠡᠭ᠃ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠦᠷᠡ ᠳᠣᠲᠣᠨᠣ ᠰᠢᠳᠠᠷᠯᠠᠨ ᠶᠠᠪᠤᠳᠠᠭ ᠬᠤᠪᠢᠯᠠᠢ᠂ ᠵᠠᠯᠠᠮᠠ᠂ ᠵᠡᠪᠡ᠂ ᠰᠦᠪᠡᠭᠡᠳᠡᠢ ᠳᠥᠷᠪᠡᠨ ᠨᠣᠬᠠᠰ᠂ ᠪᠤᠭᠤᠷᠴᠢ᠂ ᠮᠤᠬᠤᠯᠠᠢ᠂ ᠪᠤᠷᠤᠬᠤᠯ᠂ ᠴᠢᠯᠠᠭᠤᠨ ᠳᠥᠷᠪᠡᠨ ᠬᠦᠯᠦᠭ ᠪᠠᠢᠭᠰᠠᠨ ᠪᠣᠯ ᠲᠡᠭᠦᠨ ᠤ ᠴᠡᠷᠢᠭ ᠤᠨ ᠶᠡᠬᠡ ᠬᠠᠷᠠ ᠰᠦᠯᠳᠡ ᠨᠢ ᠳᠥᠷᠪᠡᠨ ᠬᠥᠯ ᠲᠡᠢ ᠪᠠᠢᠭᠰᠠᠨ ᠨᠢ ᠰᠣᠨᠢᠷᠬᠠᠯᠲᠠᠢ ᠶᠤᠮ᠃
ᠡᠢᠨ ᠬᠦ᠌ ᠴᠢᠩᠭᠢᠰ ᠬᠠᠭᠠᠨ ᠳᠡᠷᠭᠡᠳᠡ ᠪᠡᠨ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠰᠢᠳᠠᠷᠯᠠᠭᠤᠯᠵᠤ᠂ ᠡᠮᠦᠨᠡ ᠪᠡᠨ ᠳᠥᠷᠪᠡᠨ ᠨᠣᠬᠠᠰ ᠢ᠋ᠶ᠋ᠠᠨ ᠢᠯᠡᠭᠡᠵᠦ᠂ ᠶᠡᠬᠡ ᠬᠠᠷᠠ ᠰᠦᠯᠳᠡ ᠪᠡᠨ ᠳᠥᠷᠪᠡᠨ ᠬᠥᠯ ᠢ᠋ᠶ᠋ᠡᠷ ᠬᠣᠯᠪᠤᠨ ᠲᠣᠭᠲᠠᠭᠠᠭᠰᠠᠨ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠶᠢᠷᠲᠢᠨᠴᠦ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠡᠴᠡ ᠳᠠᠢᠰᠤᠨ ᠬᠠᠯᠳᠠᠭᠠᠬᠤ ᠦᠭᠡᠢ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠶᠢᠷᠲᠢᠨᠴᠦ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠲᠦ᠍ ᠮᠣᠩᠭᠣᠯ ᠴᠡᠷᠢᠭ ᠤᠨ ᠡᠷᠡᠰ ᠤᠨ ᠰᠦᠷ ᠬᠦᠴᠦ ᠶ᠋ᠢ ᠪᠠᠳᠠᠷᠠᠭᠤᠯᠤᠨ᠂ ᠳᠥᠷᠪᠡᠨ ᠵᠦᠭ ᠤᠨ ᠳᠠᠢᠰᠤᠨ ᠢ᠋ ᠦᠳᠲᠡᠷ ᠲᠣᠨᠢᠯᠭᠠᠬᠤ ᠶ᠋ᠢ ᠪᠡᠯᠭᠡᠳᠡᠭᠰᠡᠨ ᠪᠠᠢᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠡᠨᠡ ᠬᠦ᠌ ᠳᠥᠷᠪᠡ ᠶ᠋ᠢᠨ ᠲᠣᠭᠠᠨ ᠤ᠋ ᠪᠡᠯᠭᠡᠳᠡᠯ ᠨᠢ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠪᠠᠲᠤ ᠪᠡᠬᠢ ᠲᠣᠭᠲᠠᠪᠤᠷᠢᠲᠠᠢ ᠪᠠᠢᠬᠤ ᠶ᠋ᠢᠨ ᠪᠡᠯᠭᠡᠳᠡᠯ ᠶᠦᠮ᠃
ᠡᠳᠡᠭᠡᠷ ᠢ᠋ ᠨᠢᠭᠡᠳᠬᠡᠨ ᠳ᠋ᠦᠩᠨᠡᠪᠡᠯ ᠬᠠᠷᠠ ᠰᠦᠯᠳᠡ ᠨᠢ ᠮᠣᠩᠭᠣᠯ ᠴᠡᠷᠢᠭ ᠤᠨ ᠰᠦᠷ ᠰᠦᠯᠳᠡ᠂ ᠡᠷᠡ ᠵᠣᠷᠢᠭ᠂ ᠢᠳᠡ ᠬᠠᠪᠤ᠂ ᠣᠮᠣᠭ ᠵᠣᠷᠢᠭ ᠢ᠋ ᠨᠢ ᠪᠠᠳᠠᠷᠠᠭᠤᠯᠵᠤ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠤᠨ ᠳᠠᠢᠰᠤᠨ ᠡᠲᠡᠭᠡᠳ ᠢ᠋ ᠳᠠᠷᠤᠨ ᠰᠥᠨᠥᠭᠡᠵᠦ᠂ ᠢᠯᠠᠨ ᠳᠡᠢᠯᠬᠦ ᠶ᠋ᠢᠨ ᠪᠡᠯᠭᠡᠳᠡᠯ ᠪᠣᠯᠵᠤ ᠪᠠᠢᠨᠠ 》⑪᠃《 <ᠬᠠᠷᠢᠶᠠ ᠶᠡᠬᠡᠲᠦ ᠬᠠᠷᠠ ᠲᠤᠭ>- <ᠪᠤᠰᠤᠳ ᠢ᠋ ᠠᠶᠠᠬᠤᠯᠬᠤᠶ ᠤ᠋ᠨ ᠪᠡᠯᠭᠡ> ᠶ᠋ᠢᠨ ᠤᠴᠢᠷ᠂ <ᠪᠤᠰᠤᠳ ᠢ᠋ ᠠᠶᠠᠬᠤᠯᠬᠤᠶ> ᠭᠡᠳᠡᠭ ᠪᠣᠯ ᠪᠤᠰᠤᠳ ᠢ᠋ ᠠᠶᠤᠯᠭᠠᠬᠤ ᠭᠡᠰᠡᠨ ᠦᠭᠡ᠃ ᠡᠨᠡ ᠪᠣᠯ<ᠬᠠᠷᠠ ᠲᠤᠭ> ᠤ᠋ᠨ 〈ᠲᠡᠢᠨ ᠤ ᠰᠦᠯᠳᠡ〉᠂ 〈ᠲᠣᠭᠰᠢᠨ〉 ᠬᠡᠮᠡᠳᠡᠭ ᠰᠢᠨᠵᠢ ᠴᠢᠨᠠᠷ ᠲᠠᠢ ᠬᠣᠯᠪᠣᠭᠠᠲᠠᠢ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠨᠡᠩ ᠴᠢᠬᠤᠯᠠ ᠨᠢ ᠶᠡᠬᠡ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠦᠨᠳᠦᠰᠦᠨ ᠬᠥᠲᠥᠯᠪᠦᠷᠢ᠂ ᠦᠨᠳᠦᠰᠦᠨ ᠪᠣᠳᠣᠯᠭᠠ ᠶ᠋ᠢᠨ ᠰᠢᠭᠤᠳ ᠢᠯᠡᠷᠡᠯ ᠪᠣᠯᠵᠤ ᠪᠠᠢᠭᠠ ᠶᠤᠮ᠃< ᠪᠤᠰᠤᠳ 〉 - ᠪᠣᠢ ᠪᠦᠬᠦᠢ ᠤᠯᠤᠰ ᠠᠷᠠᠳ ᠢ᠋ <ᠪᠢᠰᠢᠷᠡᠭᠦᠯᠬᠦ>< ᠠᠶᠤᠯᠭᠠᠬᠤ> ᠬᠣᠶᠠᠷ ᠢ᠋ᠶ᠋ᠠᠷ ᠬᠣᠷᠢᠶᠠᠨ ᠨᠢᠭᠡᠳᠬᠡᠬᠦ ᠭᠡᠰᠡᠨ ᠪᠣᠯ ᠶᠡᠬᠡ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠦᠨᠳᠦᠰᠦᠨ ᠬᠥᠲᠥᠯᠪᠦᠷᠢ᠂ ᠦᠨᠳᠦᠰᠦᠨ ᠪᠣᠳᠣᠯᠭᠠ ᠪᠠᠢᠭᠰᠠᠨ ᠶᠤᠮ᠃< ᠪᠢᠰᠢᠷᠡᠭᠦᠯᠬᠦ>᠂ < ᠠᠶᠤᠯᠭᠠᠬᠤ> ᠪᠣᠳᠣᠯᠭᠠ ᠶ᠋ᠢᠨ ᠨᠠᠷᠢᠨ ᠢᠯᠭᠠᠭᠠ ᠨᠢ ᠭᠡᠪᠡᠯ ᠡᠶᠡ ᠨᠠᠢᠷᠠᠮᠳᠠᠭᠤ ᠤᠯᠤᠰ ᠠᠷᠠᠳ ᠲᠤ᠌ ᠡᠮᠦᠨᠡᠬᠢ ᠨᠢ ᠢᠯᠡᠭᠦᠦ ᠬᠣᠯᠪᠣᠭᠳᠠᠵᠤ᠂ ᠡᠰᠡᠷᠭᠦᠴᠡᠭᠴᠢ ᠳᠠᠢᠰᠤᠨ ᠳ᠋ᠤ᠌ ᠪᠣᠯ ᠬᠣᠢᠨᠠᠬᠢ ᠨᠢ ᠢᠯᠡᠭᠦᠦ ᠬᠣᠯᠪᠣᠭᠳᠠᠳᠠᠭ ᠪᠠᠢᠵᠠᠢ᠃ ᠶᠡᠬᠡ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠲᠠᠮᠠᠭᠠᠨ ᠳ᠋ᠤ᠌ ᠨᠢ ᠶᠠᠭ ᠡᠭᠦᠨ ᠢ᠋ ᠪᠢᠴᠢᠭᠡᠰᠦᠯᠡᠵᠦ ᠪᠠᠢᠭᠰᠠᠨ ᠶᠤᠮ᠃<ᠬᠥᠶᠦᠭ ᠬᠠᠭᠠᠨ ᠤ᠋ ᠲᠠᠮᠠᠭᠠ> ᠶ᠋ᠢᠨ ᠪᠢᠴᠢᠭᠡᠰᠦ ᠨᠢ ᠶᠠᠭ <ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠳᠠᠯᠠᠢ ᠶ᠋ᠢᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢᠯ ᠪᠤᠯᠬᠠ ᠢᠷᠭᠡᠨ ᠳ᠋ᠦ᠍ᠷ ᠬᠦᠷᠪᠡᠰᠦ ᠪᠢᠰᠢᠷᠡᠲᠦᠭᠡᠢ ᠠᠶᠤᠲᠤᠭᠠᠢ> ᠭᠡᠵᠦ ᠪᠠᠢᠨᠠ᠃ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ ᠢᠪᠡᠭᠡᠭᠳᠡᠭᠰᠡᠨ ᠶᠡᠬᠡ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠳᠠᠯᠠᠢ ᠶ᠋ᠢᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠡᠶᠡ ᠨᠠᠢᠷᠠᠮᠳᠠᠭᠤ ᠤᠯᠤᠰ ᠢᠷᠭᠡᠨ ᠴᠦ᠍ ᠪᠣᠯᠤᠭ ᠳᠠᠢᠰᠤᠩᠨᠠᠭᠴᠢ ᠤᠯᠤᠰ ᠢᠷᠭᠡᠨ ᠴᠦ᠍ ᠪᠣᠯᠤᠭ᠂ ᠬᠠᠮᠢᠭᠠ ᠬᠦᠷᠦᠭᠰᠡᠨ ᠴᠦ᠍ ᠪᠣᠢ ᠪᠦᠬᠦᠢ ᠤᠯᠤᠰ ᠢᠷᠭᠡᠨ ᠪᠦᠷ ᠪᠢᠰᠢᠷᠡᠬᠦ ᠬᠡᠷᠡᠭᠲᠡᠢ ᠠᠶᠤᠬᠤ ᠬᠡᠷᠡᠭᠲᠡᠢ ᠭᠡᠰᠡᠨ ᠤᠳᠬᠠ ᠲᠠᠢ ᠶᠤᠮ᠃ ᠬᠣᠵᠢᠳᠠᠭᠤ ᠦᠶᠡ ᠶ᠋ᠢᠨ ᠲᠤᠯᠭᠤᠷ ᠪᠢᠴᠢᠭ ᠲᠦ᠍ ᠪᠠᠰᠠ ᠡᠨᠡ < ᠪᠢᠰᠢᠷᠡᠬᠦ>᠂ 〈ᠠᠶᠤᠬᠤ> ᠶ᠋ᠢ <ᠬᠦᠰᠡᠬᠦ>᠂ 〈ᠡᠮᠢᠶᠡᠬᠦ> ᠭᠡᠬᠦᠴᠢᠯᠡᠨ ᠢᠯᠡᠳᠬᠡᠭᠰᠡᠨ ᠤᠴᠢᠷ ᠴᠤ᠌ ᠪᠣᠢ᠃ ᠴᠢᠩᠭᠢᠰ ᠬᠠᠭᠠᠨ ᠠᠬᠠ ᠳᠡᠭᠦᠦᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠭᠷᠢ ᠶ᠋ᠢᠨ ᠪᠣᠱᠣᠭ ᠢ᠋ᠶ᠋ᠠᠷ ᠤᠯᠤᠰ ᠢᠷᠭᠡᠨ ᠢ᠋ ᠬᠣᠷᠢᠶᠠᠨ ᠨᠢᠭᠡᠳᠬᠡᠭᠰᠡᠨ ᠤᠴᠢᠷ ᠢ᠋ <ᠪᠣᠯᠣᠷ ᠲᠣᠯᠢ> ᠳ᠋ᠤ᠌ ᠲᠡᠮᠳᠡᠭᠯᠡᠬᠦ ᠳ᠋ᠦ᠍ ᠪᠡᠨ <ᠲᠡᠳᠡᠭᠡᠷ ᠦᠨ ᠬᠦᠴᠦᠨ ᠴᠢᠳᠠᠯ ᠤᠯᠠᠮ ᠤᠯᠠᠮ ᠳᠡᠯᠭᠡᠷᠡᠭᠡᠳ ᠥᠷᠥᠰᠢᠶᠡᠯ ᠵᠢᠷᠤᠮ ᠠᠨᠤ ᠵᠦᠭ ᠪᠦᠷᠢ ᠠᠯᠳᠠᠷᠰᠢᠭᠰᠠᠨ ᠲᠤᠯᠠᠳᠠ ᠬᠣᠯᠠ ᠦᠷᠡ ᠭᠠᠵᠠᠷ ᠣᠯᠠᠨ ᠠᠢᠮᠠᠭ ᠤᠯᠤᠰ ᠢᠷᠭᠡᠨ ᠬᠦᠰᠡᠬᠦᠢ ᠪᠠ ᠡᠮᠢᠶᠡᠬᠦᠢ ᠬᠣᠶᠠᠷ ᠪᠦᠷᠢ ᠶ᠋ᠢᠨ ᠤᠴᠢᠷ ᠢ᠋ᠶ᠋ᠠᠷ ᠥᠪᠡᠰᠦᠪᠡᠨ ᠳᠠᠭᠠᠪᠠᠢ> ᠭᠡᠰᠡᠨ ᠪᠠᠢᠳᠠᠭ》⑫᠃
ᠡᠷᠳᠡᠮᠲᠡᠨ ᠠ · ᠸᠴᠢᠷ 《ᠴᠠᠭᠠᠨ᠂ ᠪᠠᠷᠠᠭᠠᠨ ᠠᠳᠤᠭᠤᠨ ᠤ᠋ ᠬᠢᠯᠭᠠᠰᠤ ᠶ᠋ᠢ ᠬᠣᠯᠢᠵᠤ ᠬᠢᠭᠰᠡᠨ ᠠᠯᠠᠭ ᠰᠦᠯᠳᠡ ᠭᠡᠵᠦ ᠪᠠᠢᠭᠰᠠᠨ᠃ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠣᠢᠯᠠᠭᠠᠯᠲᠠ ᠪᠠᠷ ᠪᠣᠯ ᠡᠨᠡ ᠲᠤᠭ ᠨᠢ ᠪᠠᠷᠠᠭᠤᠨ ᠤ᠋ ᠪᠣᠯᠣᠭᠠᠳ ᠵᠡᠭᠦᠨ ᠤ ᠲᠡᠭᠷᠢ ᠨᠦ᠍ᠭᠦᠳ ᠢ᠋ ᠡᠶᠡᠯᠳᠦᠭᠦᠯᠵᠦ ᠪᠠᠢᠳᠠᠭ ᠵᠠᠭᠤ᠋ᠴᠢ ᠰᠦᠯᠳᠡ ᠠᠵᠢ᠃ ᠬᠠᠷᠠ᠂ ᠴᠠᠭᠠᠨ ᠬᠣᠶᠠᠷ ᠲᠤᠭ ᠢ᠋ ᠬᠠᠮᠲᠤ ᠪᠠᠢᠷᠢᠯᠠᠭᠤᠯᠳᠠᠭ ᠦᠭᠡᠢ᠂ ᠴᠠᠭᠠᠨ ᠲᠤᠭ ᠢ᠋ ᠪᠠᠷᠠᠭᠤᠨ (ᠣᠳᠣ ᠶ᠋ᠢᠨ ᠤᠷᠲᠤ)᠂ ᠬᠠᠷᠠ ᠲᠤᠭ ᠢ᠋ ᠵᠡᠭᠦᠨ (ᠣᠳᠣ ᠶ᠋ᠢᠨ ᠬᠣᠢᠲᠤ) ᠵᠦᠭ ᠲᠦ᠍ ᠨᠢᠭᠡ ᠨᠢ ᠨᠥᠭᠦᠭᠡ ᠳ᠋ᠡᠭᠡᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠭᠠᠵᠠᠷ ᠪᠠᠢᠷᠢᠯᠠᠭᠤᠯᠳᠠᠭ ᠪᠠᠢᠵᠠᠢ》⑬᠃《ᠠᠯᠠᠭ ᠰᠦᠯᠳᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠯ ᠲᠠᠢ ᠡᠷᠬᠢᠮ ᠳᠡᠭᠡᠳᠦ ᠪᠡᠯᠭᠡᠳᠡᠯ ᠤᠨ ᠡᠳ᠋ ᠪᠣᠯᠤᠨᠠ᠂ ᠮᠥᠨ ᠴᠦ᠍ ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠤ᠋ ᠤᠯᠠᠮᠵᠢᠯᠠᠯᠲᠤ ᠭᠤᠷᠪᠠᠨ ᠲᠤᠭ ᠰᠦᠯᠳᠡ ᠶ᠋ᠢᠨ ᠨᠢᠭᠡ ᠨᠢ ᠶᠦᠮ 》⑭᠃《ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠤᠨ ᠪᠠᠷᠠᠭᠤᠨ ᠬᠣᠢᠨᠠ ᠪᠠᠢᠭᠠ ᠬᠠᠲᠠᠨᠲᠠᠶ ᠠᠭᠤᠯᠠᠨ ᠳᠡᠭᠡᠷᠡ ᠪᠤᠰᠬᠠᠭᠰᠠᠨ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠬᠢᠯᠣᠪᠠᠷ ᠢ᠋ ᠲᠡᠮᠦᠷ ᠢ᠋ᠶ᠋ᠡᠷ ᠦᠢᠯᠡᠳᠴᠦ ᠪᠦᠲᠦᠭᠡᠵᠡᠢ᠃ ᠶᠡᠬᠡ ᠨᠡᠢᠰᠯᠡᠯ ᠤᠨ ᠲᠦᠮᠡᠨᠨᠠᠰᠤᠲᠤ ᠠᠭᠤᠯᠠᠨ ᠳᠡᠭᠡᠷᠡ ᠪᠤᠰᠬᠠᠭᠰᠠᠨ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠬᠢᠯᠣᠪᠠᠷ ᠨᠢ ᠤᠤᠯ ᠨᠢ ᠮᠥᠨ ᠲᠡᠮᠦᠷ ᠢ᠋ᠶ᠋ᠡᠷ ᠦᠢᠯᠡᠳᠴᠦ ᠪᠦᠲᠦᠭᠡᠵᠡᠢ᠃ ᠡᠭᠦᠨ ᠢ᠋ <ᠠᠩᠬᠠ ᠪᠣᠰᠬᠠᠬᠤ ᠳ᠋ᠤ᠌ ᠬᠠᠷᠢᠨ ᠭᠠᠤᠯᠢᠨ ᠴᠢᠳᠬᠤᠮᠠᠯ ᠪᠢᠰᠢ ᠪᠠᠢᠵᠠᠢ〉ᠭᠡᠰᠡᠨ ᠲᠡᠮᠳᠡᠭᠯᠡᠯ ᠪᠦᠷᠢᠨ ᠭᠡᠷᠡᠴᠢᠯᠡᠨᠡ᠃ᠰᠡᠭᠦᠯ ᠳ᠋ᠦ᠍ ᠨᠢ ᠭᠠᠤᠯᠢᠨ ᠭᠢᠯᠣᠪᠠᠷ ᠲᠠᠢ ᠠᠯᠠᠭ ᠰᠦᠯᠳᠡ ᠪᠣᠯᠭᠠᠵᠠᠢ᠃ ᠡᠢᠮᠦ ᠡᠴᠡ ᠲᠦᠩ ᠹᠠᠨ ᠭᠠᠨ ᠭᠡᠵᠦ ᠨᠡᠷᠡᠰᠢᠵᠡᠢ᠃ ᠠᠯᠠᠭ ᠰᠦᠯᠳᠡ ᠶ᠋ᠢ ᠴᠥᠩ ᠲᠢᠶᠠᠨ ᠮᠧᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠪᠤᠰᠬᠠᠬᠤ ᠳ᠋ᠤ᠌ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠭᠢᠯᠣᠪᠠᠷ ᠢ᠋ ᠠᠯᠲᠠ ᠪᠠᠷ ᠥᠩᠭᠡᠯᠡᠵᠦ ᠪᠤᠰᠬᠠᠵᠠᠢ᠃ ᠡᠢᠮᠦ ᠡᠴᠡ ᠴᠥᠩ ᠲᠢᠶᠠᠨ ᠮᠧᠨ ᠬᠠᠭᠠᠯᠭᠠ ᠶ᠋ᠢᠨ ᠠᠯᠠᠭ ᠰᠦᠯᠳᠡ ᠶ᠋ᠢ ᠠᠯᠲᠠ ᠪᠠᠷ ᠰᠢᠷᠲᠡᠭᠰᠡᠨ ᠲᠦᠩ ᠹᠠᠨ ᠭᠠᠨ (涂金铜幡竿) ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠭᠢᠯᠦᠪᠠᠷ ᠢ᠋ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠵᠦ ᠪᠠᠢᠭᠰᠠᠨ ᠠ᠋ᠴᠠ ᠭᠠᠤᠯᠢ ᠪᠠᠷ ᠬᠢᠬᠦ ᠪᠣᠯᠤᠭᠰᠠᠨ᠂ ᠮᠥᠷᠲᠡᠭᠡᠨ ᠨᠡᠩ ᠴᠢᠨᠠᠭᠰᠢᠳᠠ ᠠᠯᠲᠠ ᠪᠠᠷ ᠰᠢᠷᠲᠡᠵᠦ ᠬᠢᠭᠰᠡᠨ ᠶᠠᠪᠤᠳᠠᠯ ᠠ᠋ᠴᠠ ᠰᠦᠯᠳᠡ ᠶ᠋ᠢ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠬᠥᠭᠵᠢᠯᠲᠡ ᠶ᠋ᠢ ᠮᠥᠷᠳᠡᠨ ᠣᠢᠯᠠᠭᠠᠵᠤ ᠪᠣᠯᠤᠨᠠ᠃ ᠳᠠᠷᠤᠢ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠠᠷᠭᠠ ᠪᠠᠷᠢᠯ ᠤ᠋ᠨ ᠰᠢᠨᠡᠴᠢᠯᠡᠯᠲᠡ ᠨᠢ ᠮᠣᠩᠭᠣᠯᠴᠤᠳ ᠤ᠋ᠨ ᠣᠶᠤᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠥᠩᠭᠡ ᠲᠥᠷᠬᠦ ᠶ᠋ᠢ ᠰᠢᠨᠡᠳᠬᠡᠵᠦ᠂ ᠡᠭᠦᠳᠦᠨ ᠪᠦᠲᠦᠭᠡᠬᠦ ᠵᠣᠷᠢᠭ ᠰᠠᠨᠠᠭᠠ ᠶ᠋ᠢ ᠨᠢ ᠬᠥᠪᠴᠢᠯᠡᠨ ᠳᠠᠢᠴᠢᠯᠠᠵᠤ ᠪᠠᠢᠵᠠᠢ᠃ ᠠᠯᠲᠠᠨ ᠬᠢᠯᠣᠪᠠᠷ ᠲᠠᠢ ᠠᠯᠠᠭ ᠰᠦᠯᠳᠡ ᠶ᠋ᠢ ᠴᠥᠩ ᠲᠢᠶᠠᠨ ᠮᠧᠨ ᠬᠠᠭᠠᠯᠭᠠ ᠶ᠋ᠢᠨ ᠪᠠᠷᠠᠭᠤᠨ ᠴᠢᠬᠢᠨ ᠠᠰᠠᠷ ᠲᠤ᠌ ᠬᠦᠨᠳᠦᠳᠬᠡᠨ ᠪᠣᠰᠬᠠᠵᠤ ᠳᠡᠭᠡᠳᠦᠯᠡᠨ ᠰᠢᠲᠦᠭᠰᠡᠨ ᠪᠠᠢᠵᠠᠢ᠃ ᠳᠡᠭᠡᠷᠡᠬᠢ ᠪᠠᠢᠳᠠᠯ ᠠ᠋ᠴᠠ ᠦᠵᠡᠪᠡᠯ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠪᠣᠯ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠬᠥᠭᠵᠢᠯᠲᠡ ᠶ᠋ᠢᠨ ᠰᠢᠵᠢᠷ ᠠᠯᠲᠠᠨ ᠴᠠᠭ ᠦᠶᠡ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ》⑮᠃
ᠳᠥᠷᠪᠡ᠂ ᠴᠠᠭᠠᠨ᠂ ᠬᠠᠷᠠ ᠪᠣᠯᠤᠨ ᠠᠯᠠᠭ ᠭᠤᠷᠪᠠᠨ ᠰᠦᠯᠳᠡ ᠶ᠋ᠢᠨ
ᠶᠡᠷᠦᠩᠬᠡᠢᠯᠡᠭᠰᠡᠨ ᠬᠡᠯᠡᠯᠭᠡ ᠶ᠋ᠢᠨ ᠲᠤᠬᠠᠢ
《ᠮᠣᠩᠭᠣᠯᠴᠤᠳ ᠤ᠋ᠨ ᠴᠠᠭᠠᠨ᠂ ᠬᠠᠷᠠ᠂ ᠠᠯᠠᠭ ᠭᠤᠷᠪᠠᠨ ᠢᠯᠠᠭᠤᠬᠤ ᠲᠤᠭ ᠰᠦᠯᠳᠡ ᠨᠢ ᠪᠣᠢ ᠪᠣᠯᠤᠭᠰᠠᠨ ᠴᠠᠭ ᠠ᠋ᠴᠠ ᠪᠡᠯᠭᠡᠳᠡᠯ᠂ ᠪᠢᠰᠢᠷᠡᠯ᠂ ᠰᠦᠰᠦᠭ ᠤᠨ ᠨᠢᠭᠤᠴᠠ ᠳᠠᠯᠳᠠ ᠶ᠋ᠢᠨ ᠬᠦᠴᠦᠨ ᠤ ᠲᠠᠭᠠᠮᠠᠭᠯᠠᠯ ᠲᠥᠰᠦᠭᠡᠯᠡᠯ᠂ ᠢᠲᠡᠭᠡᠯ ᠪᠢᠰᠢᠷᠡᠯ ᠤᠨ ᠠᠭᠤᠯᠭᠠ ᠲᠠᠢ ᠪᠠᠢᠭᠰᠠᠨ ᠶᠤᠮ᠃ ᠡᠨᠡ ᠨᠢ ᠮᠣᠩᠭᠣᠯᠴᠤᠳ ᠮᠤᠩᠬᠠᠷᠠᠭᠰᠠᠨ ᠳ᠋ᠠᠭᠠᠨ ᠢᠩᠭᠢᠭᠰᠡᠨ ᠪᠢᠰᠢ᠂ ᠪᠡᠯᠭᠡᠳᠡᠯ ᠪᠢᠰᠢᠷᠡᠯ ᠨᠢ ᠪᠦᠬᠦᠢᠯᠡ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠳ᠋ᠦ᠍ ᠤᠵᠠᠭᠤᠷ ᠠ᠋ᠴᠠ ᠪᠠᠢᠭᠰᠠᠨ᠂ ᠬᠣᠢᠰᠢᠳᠠ ᠳ᠋ᠤ᠌ ᠴᠤ᠌ ᠮᠥᠩᠬᠡ ᠪᠠᠢᠵᠤ ᠯᠠ ᠪᠠᠢᠬᠤ ᠵᠠᠩᠰᠢᠯ ᠪᠣᠯᠤᠨᠠ᠃ ᠥᠨᠥ ᠶ᠋ᠢᠨ ᠪᠤᠷᠬᠠᠨ ᠦᠭᠡᠢ ᠦᠵᠡᠯ ᠲᠡᠢ ᠤᠯᠤᠰ ᠭᠦᠷᠦᠨ ᠤ ᠲᠣᠭ ᠰᠦᠯᠳᠡ ᠳ᠋ᠦ᠍ ᠮᠥᠨ ᠴᠦ᠍ ᠪᠡᠯᠭᠡᠳᠡᠯ ᠤᠨ ᠠᠭᠤᠯᠭᠠ ᠨᠢ ᠪᠠᠢᠭᠰᠠᠭᠠᠷ ᠪᠠᠢᠭᠠ ᠶᠤᠮ》⑯ ᠂ 《ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠨᠢᠭᠡᠳᠦᠭᠰᠡᠨ ᠲᠤᠯᠭᠤᠷ ᠲᠥᠷᠥ ᠪᠠᠢᠭᠤᠯᠤᠭᠳᠠᠬᠤ ᠴᠠᠭ ᠲᠤ᠌ ᠲᠥᠷᠥ ᠶ᠋ᠢᠨ ᠲᠤᠭ ᠰᠦᠯᠳᠡ ᠪᠡᠨ ᠡᠷᠲᠡᠨ ᠤ ᠤᠯᠠᠮᠵᠢᠯᠠᠯ ᠳ᠋ᠤ᠌ ᠦᠨᠳᠦᠰᠦᠯᠡᠨ ᠰᠢᠨᠡ ᠪᠡᠷ ᠪᠦᠲᠦᠭᠡᠵᠦ ᠬᠦᠨᠳᠦᠳᠬᠡᠨ ᠲᠠᠬᠢᠬᠤ ᠪᠣᠯᠤᠭᠰᠠᠨ ᠪᠠᠢᠨᠠ》 ⑰᠂ 《ᠳᠡᠯᠡᠬᠡᠢ ᠳ᠋ᠦ᠍ ᠣᠯᠠᠨ ᠤᠯᠤᠰ ᠤ᠋ᠨ ᠰᠦᠯᠳᠡ ᠲᠡᠮᠳᠡᠭ ᠢ᠋ ᠰᠤᠳᠤᠯᠳᠠᠭ ᠲᠡᠦᠬᠡ ᠶ᠋ᠢᠨ ᠬᠠᠪᠰᠤᠷᠬᠤ ᠤᠬᠠᠭᠠᠨ ᠪᠣᠯᠬᠤ <ᠭᠧᠷᠯᠳᠢᠺ> ᠪᠤᠶᠤ ᠰᠦᠯᠳᠡ ᠰᠤᠳᠤᠯᠤᠯ ᠤ᠋ᠨ ᠤᠬᠠᠭᠳᠠᠬᠤᠨ ᠳ᠋ᠤ᠌ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠬᠠᠮᠤᠭ ᠤ᠋ᠨ ᠡᠪᠦᠭᠡ ᠵᠠᠷ ᠵᠡᠪᠰᠡᠭ ᠤᠨ ᠡᠷᠲᠡᠨ ᠤ ᠰᠦᠯᠳᠡ ᠲᠡᠮᠳᠡᠭ ᠲᠦ᠍ ᠣᠷᠣᠭᠤᠯᠵᠤ ᠲᠣᠭᠠᠴᠢᠬᠤ ᠨᠢ ᠪᠠᠢᠳᠠᠭ ᠠᠵᠢ᠃ᠲᠤᠬᠠᠢᠯᠠᠪᠠᠯ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠬᠦᠴᠦᠨ ᠤ ᠬᠥᠭᠵᠢᠯ ᠢ᠋ ᠳᠠᠭᠠᠨ ᠪᠠᠭᠠᠵᠢ ᠵᠡᠪᠰᠡᠭ ᠬᠥᠭᠵᠢᠭᠰᠡᠨ᠂ ᠰᠠᠢᠨ ᠪᠠᠭᠠᠵᠢ ᠲᠠᠢ ᠬᠥᠮᠦᠨ ᠢᠯᠡᠭᠦᠦ ᠣᠯᠵᠠ ᠣᠯᠵᠤ᠂ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠪᠠᠭᠠᠲᠤᠷ ᠴᠡᠷᠢᠭ ᠤᠨ ᠠᠩᠭᠢ ᠨᠢ ᠢᠯᠠᠯᠲᠠ ᠣᠯᠳᠠᠭ ᠪᠣᠯᠬᠣᠷ ᠬᠥᠮᠦᠰ ᠪᠠᠭᠠᠵᠢ ᠵᠡᠪᠰᠡᠭ ᠢ᠋ᠶ᠋ᠡᠨ ᠰᠢᠲᠦᠨ ᠪᠢᠰᠢᠷᠡᠬᠦ᠂ ᠳᠠᠭᠠᠳᠬᠠᠬᠤ ᠦᠵᠡᠯ ᠤᠬᠠᠮᠰᠠᠷ ᠪᠣᠢ ᠪᠣᠯᠵᠠᠢ᠃ ᠬᠣᠵᠢᠮ ᠨᠢ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠢᠯᠠᠵᠤ ᠢᠯᠠᠭᠳᠠᠬᠤ ᠪᠠᠨ ᠵᠠᠷ ᠵᠡᠪᠰᠡᠭ ᠲᠡᠭᠡᠨ ᠳᠠᠭᠠᠳᠬᠠᠬᠤ᠂ ᠲᠡᠢᠨ ᠤ ᠢᠯᠠᠯᠲᠠ ᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠣᠯᠵᠠᠯᠠᠭᠳᠠᠭᠰᠠᠨ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠲᠠᠬᠢᠵᠤ ᠪᠠᠢᠭᠰᠠᠨ ᠲᠡᠮᠳᠡᠭᠯᠡᠯ ᠲᠦᠭᠡᠮᠡᠯ ᠪᠠᠢᠳᠠᠭ ᠠᠵᠢ᠃ᠨᠡᠢᠲᠡ ᠶ᠋ᠢᠨ ᠤᠨ ᠲᠣᠭᠠᠯᠠᠯ ᠤ᠋ᠨ ᠡᠮᠦᠨᠡᠬᠢ ᠲᠠᠪᠤᠳᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠢᠰᠺᠹᠴᠤᠳ ᠢᠷᠪᠢᠰ ᠤᠨ ᠲᠠᠬᠢᠯᠭᠠ ᠶ᠋ᠢᠨ ᠫᠠᠢᠰᠠ ᠳᠡᠭᠡᠷᠡ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠭᠰᠡᠨ ᠡᠷᠲᠡᠨ ᠤ ᠣᠬᠣᠷ ᠢᠯᠳᠦ ᠶ᠋ᠢ ᠬᠠᠳᠬᠤᠵᠤ᠂ ᠲᠡᠢᠨ ᠳ᠋ᠦ᠍ ᠢᠯᠠᠯᠲᠠ ᠣᠯᠬᠤ ᠶ᠋ᠢ ᠪᠡᠯᠭᠡᠳᠡᠵᠦ ᠪᠠᠢᠵᠠᠢ᠃ ᠵᠢᠳᠠ᠂ ᠰᠡᠷᠪᠡᠭᠡᠲᠦ ᠵᠢᠳᠠ ᠶ᠋ᠢ ᠴᠡᠷᠢᠭ ᠤᠨ ᠰᠦᠷ ᠰᠦᠯᠳᠡ ᠪᠣᠯᠭᠠᠨ ᠲᠠᠬᠢᠵᠤ ᠪᠠᠢᠭᠰᠠᠨ ᠲᠡᠮᠳᠡᠭᠯᠡᠯ ᠪᠠᠢᠨᠠ᠃ ᠲᠡᠭᠡᠪᠡᠯ ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠴᠤ᠌ ᠣᠳᠣ ᠶ᠋ᠢᠨ ᠪᠢᠳᠡᠨ ᠤ ᠰᠢᠲᠦᠵᠦ ᠪᠣᠢ ᠲᠥᠷᠥ ᠶ᠋ᠢᠨ ᠬᠠᠷᠠ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠬᠡᠯᠪᠡᠷᠢ ᠲᠡᠢ ᠢᠵᠢᠯ ᠳᠦᠷᠰᠦ ᠲᠡᠢ ᠣᠯᠳᠠᠪᠤᠷᠢ ᠣᠯᠳᠠᠳᠠᠭ᠃ ᠲᠤᠬᠠᠢᠯᠠᠪᠠᠯ ᠬᠦᠷᠡᠯ ᠵᠡᠪᠰᠡᠭ ᠤᠨ ᠦᠶᠡ ᠶ᠋ᠢᠨ ᠪᠤᠭᠤᠨ ᠴᠢᠯᠠᠭᠤᠨ ᠬᠥᠰᠢᠶᠡᠨ ᠳ᠋ᠦ᠍ ᠵᠠᠷ ᠵᠡᠪᠰᠡᠭ ᠢ᠋ ᠳᠠᠬᠢᠨ ᠰᠢᠲᠦᠵᠦ ᠪᠠᠢᠭᠰᠠᠨ ᠭᠡᠷᠡᠴᠢ ᠪᠣᠯᠬᠤ ᠵᠢᠳᠠ ᠰᠡᠯᠡᠮᠡ ᠶ᠋ᠢ ᠰᠡᠢᠯᠦᠨ ᠦᠯᠡᠳᠡᠭᠡᠭᠰᠡᠨ ᠪᠠᠢᠳᠠᠭ ᠠᠵᠢ᠃ ᠮᠥᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠰᠤᠳᠤᠯᠭᠠᠴᠢ ᠵ· ᠪᠠᠵᠠᠷᠰᠦ᠋ᠷᠦᠩ <ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠣᠳᠣ ᠪᠠᠷ ᠣᠯᠳᠠᠭᠠᠳ ᠪᠠᠢᠭᠠ ᠬᠠᠮᠤᠭ ᠤ᠋ᠨ ᠡᠷᠲᠡᠨ ᠤ ᠣᠭ ᠤ᠋ᠨ ᠳᠤᠷᠠᠰᠬᠠᠯ ᠨᠢ ᠪᠠᠶᠠᠨᠬᠣᠩᠭᠣᠷ ᠠᠢᠮᠠᠭ ᠤ᠋ᠨ ᠪᠠᠶᠠᠯᠢᠭ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠪᠢᠴᠢᠭᠲᠦ ᠶ᠋ᠢᠨ ᠬᠠᠳᠠᠨ ᠤ᠋ ᠵᠢᠷᠤᠭ ᠶᠤᠮ᠃ ᠨᠢᠭᠡ ᠭᠠᠷ ᠲᠠᠭᠠᠨ ᠲᠤᠭ ᠪᠠᠷᠢᠭᠰᠠᠨ᠂ ᠮᠣᠷᠢᠲᠠᠨ ᠤ᠋ ᠵᠢᠷᠤᠭ ᠢ᠋ ᠳᠦᠷᠰᠦᠯᠡᠭᠰᠡᠨ ᠤᠭ ᠳᠤᠷᠠᠰᠬᠠᠯ ᠢ᠋ ᠫᠷᠣᠹᠧᠰᠰᠣᠷ ᠳ· ᠴᠠᠸᠠᠩᠳᠣᠷᠵᠢ ᠲᠡᠷᠢᠭᠦᠲᠡᠢ ᠰᠤᠳᠤᠯᠭᠠᠴᠢᠳ 2000 ᠣᠨ ᠳ᠋ᠤ᠌ ᠢᠯᠡᠷᠡᠭᠦᠯᠵᠡᠢ᠃ ᠡᠨᠡ ᠳᠤᠷᠠᠰᠬᠠᠯ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠪᠦᠷ ᠬᠦᠷᠡᠯ ᠵᠡᠪᠰᠡᠭ ᠤᠨ ᠦᠶᠡ ᠠ᠋ᠴᠠ ᠬᠦᠯᠦᠭ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠷ ᠲᠤᠭ ᠬᠢᠵᠦ᠂ ᠲᠡᠭᠦᠨ ᠢ᠋ ᠪᠡᠨ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡᠵᠦ ᠢᠷᠡᠵᠡᠢ ᠭᠡᠵᠦ ᠪᠣᠯᠤᠨᠠ> ᠭᠡᠵᠦ ᠣᠨᠴᠠᠯᠠᠵᠠᠢ᠃ ᠡᠷᠲᠡᠨ ᠤ ᠮᠣᠩᠭᠣᠯᠴᠤᠳ ᠤ᠋ᠨ ᠴᠠᠭᠠᠨ᠂ ᠬᠠᠷᠠ᠂ ᠠᠯᠠᠭ ᠭᠤᠷᠪᠠᠨ ᠲᠤᠭ ᠰᠦᠯᠳᠡ ᠶ᠋ᠢᠨ ᠬᠡᠯᠪᠡᠷᠢ᠂ ᠳᠦᠷᠰᠦ᠂ ᠥᠴᠢᠭ ᠤᠩᠰᠢᠯᠭᠠ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠡᠷᠲᠡᠨ ᠤ ᠵᠠᠷ ᠵᠡᠪᠰᠡᠭ ᠪᠤᠶᠤ ᠵᠡᠪᠰᠡᠭ ᠤᠨ ᠰᠢᠲᠦᠯᠭᠡ ᠲᠡᠢ ᠮᠥᠨ ᠬᠣᠯᠪᠣᠭᠳᠠᠵᠤ ᠪᠠᠢᠨᠠ᠃ ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠣᠷᠣᠢ ᠶ᠋ᠢᠨ ᠬᠡᠯᠪᠡᠷᠢ ᠨᠢ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠮᠤᠬᠤᠷ ᠢᠷ ᠲᠡᠢ ᠵᠢᠳᠠ ᠬᠡᠯᠪᠡᠷᠢ ᠲᠡᠢ ᠪᠠᠢᠳᠠᠭ᠃ ᠠᠯᠠᠭ ᠰᠦᠯᠳᠡ ᠶ᠋ᠢᠨ ᠣᠷᠣᠢ ᠶ᠋ᠢᠨ ᠬᠡᠯᠪᠡᠷᠢ ᠨᠢ ᠴᠦ᠍ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠤᠵᠠᠭᠠᠨ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠮᠤᠬᠤᠷ ᠢᠷ ᠲᠡᠢ ᠵᠢᠳᠠ ᠬᠡᠯᠪᠡᠷᠢ ᠲᠡᠢ ᠳᠣᠣᠷᠠ ᠪᠠᠨ ᠣᠩᠬᠢ ᠲᠠᠢ ᠪᠠᠢᠳᠠᠭ᠃ ᠡᠭᠦᠨ ᠡᠴᠡ ᠮᠣᠩᠭᠣᠯᠴᠤᠳ ᠤ᠋ᠨ ᠰᠦᠯᠳᠡ ᠰᠢᠲᠦᠭᠡᠨ ᠨᠢ ᠴᠡᠷᠢᠭ ᠤᠨ ᠵᠡᠪᠰᠡᠭ ᠲᠡᠢ ᠬᠣᠯᠪᠣᠭᠠᠲᠠᠢ᠂ ᠵᠠᠷ ᠵᠡᠪᠰᠡᠭ ᠡᠴᠡ ᠭᠠᠷᠤᠯᠲᠠᠢ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠣᠯᠬᠤ ᠶᠤᠮ᠃ ᠮᠣᠩᠭᠣᠯ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠶ᠋ᠢᠨ ᠢᠷᠡᠯ ᠭᠠᠷᠤᠯ ᠢ᠋ ᠨᠡᠬᠡᠨ ᠪᠦᠷ ᠡᠷᠲᠡ ᠦᠶᠡ ᠳ᠋ᠦ᠍ ᠶᠠᠮᠠᠷ ᠰᠦᠯᠳᠡ ᠰᠢᠲᠦᠭᠡᠨ ᠲᠡᠢ ᠪᠠᠢᠭᠰᠠᠨ ᠢ᠋ ᠰᠤᠷᠪᠤᠯᠵᠢᠯᠠᠪᠠᠯ ᠲᠡᠦᠬᠡ ᠰᠤᠳᠤᠷ ᠲᠤ᠌ ᠾᠦᠩᠨᠦᠴᠦᠳ ᠨᠠᠷᠠ ᠰᠠᠷᠠ ᠶ᠋ᠢ ᠰᠢᠲᠦᠵᠦ ᠮᠥᠷᠭᠥᠯ ᠲᠠᠬᠢᠯ ᠬᠢᠵᠦ ᠪᠠᠢᠭᠰᠠᠨ ᠮᠡᠳᠡᠭᠡ ᠪᠠᠢᠬᠤ ᠳ᠋ᠤ᠌ ᠡᠷᠳᠡᠮᠲᠡᠨ ᠰ · ᠵᠠᠮᠪᠠᠯᠳᠣᠷᠵᠢ <ᠮᠣᠩᠭᠣᠯ ᠨᠤᠲᠤᠭ ᠲᠤ᠌ 2000 ᠵᠢᠯ ᠤᠨ ᠲᠡᠷᠲᠡᠭᠡ ᠠᠩᠬᠠᠨ ᠤ᠋ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠪᠠᠢᠭᠤᠯᠤᠭᠰᠠᠨ ᠾᠦᠩᠨᠦᠴᠦᠳ ᠨᠠᠷᠠ᠂ ᠰᠠᠷᠠ᠂ ᠭᠠᠯ᠂ ᠪᠤᠭᠤ ᠭᠥᠷᠦᠭᠡᠰᠦᠨ ᠤ ᠳᠦᠷᠰᠦ ᠲᠡᠢ ᠲᠤᠭ ᠰᠦᠯᠳᠡ ᠲᠠᠬᠢᠵᠤ ᠪᠠᠢᠵᠠᠢ᠃ ᠡᠨᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠬᠠᠮᠤᠭ ᠤ᠋ᠨ ᠡᠷᠲᠡᠨ ᠤ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠶᠦᠮ᠃ ᠮᠣᠩᠭᠣᠯᠴᠤᠳ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠨᠢᠭᠡᠳᠦᠭᠰᠡᠨ ᠲᠤᠯᠭᠤᠷ ᠲᠥᠷᠥ ᠪᠡᠨ ᠪᠠᠢᠭᠤᠯᠬᠤ ᠳ᠋ᠠᠭᠠᠨ ᠵᠠᠯᠭᠠᠮᠵᠢᠯᠠᠨ ᠬᠡᠷᠡᠭᠯᠡᠵᠡᠢ> ᠭᠡᠵᠦ ᠳ᠋ᠦᠩᠨᠡᠭᠰᠡᠨ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠮᠣᠩᠭᠣᠯᠴᠤᠳ ᠤ᠋ᠨ ᠰᠦᠯᠳᠡ ᠰᠢᠲᠦᠭᠡᠨ ᠨᠢ ᠡᠷᠲᠡᠨ ᠤ ᠵᠡᠪᠰᠡᠭ ᠤᠨ ᠰᠢᠲᠦᠯᠭᠡ ᠡᠴᠡ ᠡᠬᠢ ᠠᠪᠴᠤ ᠨᠡᠭᠦᠳᠡᠯᠴᠢᠨ ᠦᠨᠳᠦᠰᠦᠲᠡᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢᠨ ᠮᠡᠳᠡᠯᠭᠡ ᠲᠠᠨᠢᠯᠲᠠ ᠰᠢᠲᠦᠯᠭᠡ ᠪᠢᠰᠢᠷᠡᠯ ᠵᠡᠷᠭᠡ ᠳ᠋ᠦ᠍ ᠰᠠᠭᠤᠷᠢᠯᠠᠨ ᠪᠠᠶᠠᠯᠢᠭᠵᠢᠵᠤ ᠬᠥᠭᠵᠢᠵᠦ ᠢᠷᠡᠭᠰᠡᠨ ᠪᠠᠢᠨᠠ》⑱᠃《ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠮᠠᠨᠳᠤᠬᠤ ᠠ᠋ᠴᠠ ᠡᠮᠦᠨᠡ᠂ ᠤᠮᠠᠷᠠᠲᠤ ᠶ᠋ᠢᠨ ᠦᠨᠳᠦᠰᠦᠲᠡᠨ ᠪᠠᠰᠠ ᠰᠦᠯᠳᠡ ᠶ᠋ᠢᠨ ᠬᠡᠯᠪᠡᠷᠢ ᠳᠦᠷᠰᠦ ᠲᠡᠢ ᠰᠢᠲᠦᠭᠡᠨ ᠡᠳ᠋ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠮᠤᠨᠢ ᠠᠭᠤᠯᠠ ᠶ᠋ᠢᠨ ᠬᠠᠳᠠᠨ ᠵᠢᠷᠤᠭ ᠭᠡᠷᠡᠴᠢᠯᠡᠵᠦ ᠪᠣᠢ᠃ ᠡᠨᠡ ᠨᠢ ᠰᠡᠭᠦᠯᠡᠷᠬᠢ ᠮᠣᠩᠭᠣᠯᠴᠤᠳ ᠤ᠋ᠨ ᠰᠦᠯᠳᠡ ᠲᠡᠢ ᠴᠦ᠍ ᠵᠣᠬᠢᠬᠤ ᠬᠣᠯᠪᠣᠭᠠᠲᠠᠢ᠃ ᠭᠡᠬᠦ ᠮᠥᠷᠲᠡᠭᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠰᠦᠯᠳᠡ ᠨᠢ ᠣᠯᠠᠨ ᠵᠠᠭᠤᠨ ᠵᠢᠯ ᠢ᠋ᠶ᠋ᠡᠷ ᠤᠯᠠᠮᠵᠢᠯᠠᠨᠳᠠᠵᠤ ᠪᠠᠢᠭᠠ ᠶᠠᠪᠤᠴᠠ ᠳ᠋ᠤ᠌ ᠪᠠᠨ ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡ ᠳ᠋ᠦ᠍ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠤᠳᠬᠠ ᠠᠭᠤᠯᠭᠠ ᠪᠦᠬᠦᠢ ᠠᠭᠤᠯᠤᠭᠳᠠᠬᠤᠨ ᠢ᠋ ᠬᠠᠷᠢᠯᠴᠠᠨ ᠬᠤᠳᠬᠤᠵᠤ ᠪᠣᠯᠬᠤ ᠦᠭᠡᠢ᠂ ᠡᠷᠬᠡᠪᠰᠢ ᠰᠦᠯᠳᠡ ᠶ᠋ᠢ ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡ ᠳ᠋ᠦ᠍ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠠᠭᠤᠯᠤᠭᠳᠠᠬᠤᠨ ᠲᠠᠢ ᠤᠬᠠᠭᠳᠠᠬᠤᠨ ᠭᠡᠳᠡᠭ ᠢ᠋ ᠮᠡᠳᠡᠷᠡᠬᠦ ᠶ᠋ᠢᠨ ᠬᠠᠮᠲᠤ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠴᠠᠭ ᠦᠶᠡ ᠶ᠋ᠢᠨ ᠣᠨᠴᠠᠯᠢᠭ ᠰᠢᠨᠵᠢ ᠪᠣᠯᠤᠨ ᠨᠡᠢᠭᠡᠮ ᠤᠨ ᠡᠭᠦᠷᠭᠡ ᠴᠢᠳᠠᠪᠬᠢ ᠶ᠋ᠢ ᠨᠢ ᠦᠨᠳᠦᠰᠦᠯᠡᠨ ᠰᠦᠯᠳᠡ ᠶ᠋ᠢᠨ ᠠᠭᠤᠯᠤᠭᠳᠠᠬᠤᠨ ᠢ᠋ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠷ ᠲᠠᠢᠯᠪᠤᠷᠢᠯᠠᠬᠤ ᠴᠢᠬᠤᠯᠠᠲᠠᠢ᠃ ᠤᠴᠢᠷ ᠨᠢ ᠰᠦᠯᠳᠡ ᠪᠣᠯ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠴᠠᠭ ᠦᠶᠡ ᠳ᠋ᠦ᠍ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠤᠳᠬᠠ ᠠᠭᠤᠯᠭᠠ ᠲᠠᠢ᠂ ᠠᠭᠤᠯᠤᠭᠳᠠᠬᠤᠨ ᠨᠢ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠲᠠᠢᠯᠤᠮᠵᠢ ᠲᠠᠢ ᠪᠠᠢᠳᠠᠭ ᠲᠤ᠌ ᠣᠷᠣᠰᠢᠨᠠ》⑲᠃《 ᠮᠣᠩᠭᠣᠯ ᠤ᠋ᠨ 〈ᠲᠤᠭ〉ᠪᠠ 〈ᠰᠦᠯᠳᠡ〉 ᠶ᠋ᠢᠨ ᠨᠡᠷᠡᠢᠳᠦᠯᠭᠡ ᠡᠷᠲᠡᠨ ᠤ ᠲᠤᠯᠭᠤᠷ ᠪᠢᠴᠢᠭ ᠡᠴᠡ ᠡᠳᠦᠭᠡᠬᠢ ᠵᠠᠩ ᠦᠢᠯᠡ ᠶ᠋ᠢᠨ ᠲᠡᠮᠳᠡᠭᠯᠡᠯ ᠬᠦᠷᠲᠡᠯᠡ ᠴᠥᠮ ᠬᠤᠳᠬᠤᠯᠳᠤᠭᠠᠨ ᠲᠠᠢ ᠵᠦᠢᠯ ᠣᠷᠣᠰᠢᠭᠰᠠᠭᠠᠷ ᠢᠷᠡᠭᠰᠡᠨ ᠶᠦᠮ᠃〈ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ〉 ᠳ᠋ᠠᠬᠢ 〈ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ〉 ᠪᠠ 〈ᠬᠠᠷᠠᠭᠠᠲᠤ ᠲᠤᠭ〉 ᠪᠣᠯ ᠪᠦᠷ ᠰᠦᠯᠳᠡ ᠶᠦᠮ᠃〈ᠮᠣᠩᠭᠣᠯ -ᠲᠠᠲ᠋ᠠᠷ ᠤ᠋ᠨ ᠪᠦᠷᠢᠨ ᠲᠡᠮᠳᠡᠭᠯᠡᠯ> ᠤᠨ ᠲᠠᠢᠯᠪᠤᠷᠢᠯᠠᠨ ᠭᠡᠷᠡᠴᠢᠯᠡᠭᠰᠡᠨ ᠪᠢᠴᠢᠭ ᠲᠡᠬᠢ 〈ᠶᠢᠰᠦᠨ ᠰᠡᠭᠦᠯᠲᠦ (ᠬᠥᠯ) ᠳᠤᠮᠳᠠ ᠪᠠᠨ ᠬᠠᠷᠠ ᠰᠠᠷᠠ ᠲᠠᠢ ᠴᠠᠭᠠᠨ ᠲᠤᠭ〉 ᠬᠢᠭᠡᠳ 〈ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠡᠦᠬᠡ〉 ᠳ᠋ᠡᠬᠢ 〈ᠶᠢᠰᠦᠨ ᠬᠥᠯᠲᠦ ᠶᠡᠬᠡ ᠲᠤᠭ〉 ᠪᠣᠯ ᠮᠥᠨ ᠴᠦ᠍ ᠰᠦᠯᠳᠡ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠶᠤᠮ᠃ ᠮᠥᠨ 〈ᠰᠤᠳᠤᠷ ᠤ᠋ᠨ ᠴᠢᠭᠤᠯᠭᠠᠨ〉 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ᠂〈ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ〉᠂ 〈ᠪᠣᠯᠣᠷ ᠲᠣᠯᠢ〉 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ 〈ᠨᠠᠢ᠍ᠮᠠᠨ ᠬᠥᠯᠲᠦ ᠴᠠᠭᠠᠨ ᠲᠤᠭ〉᠂ 〈ᠪᠣᠭᠳᠠ ᠪᠠᠭᠠᠲᠤᠷ ᠪᠡᠶᠡ ᠪᠡᠷ ᠳᠠᠢᠯᠠᠭᠰᠠᠨ ᠲᠡᠮᠳᠡᠭᠯᠡᠯ〉 ᠳᠤ ᠲᠡᠮᠳᠡᠭᠯᠡᠭᠰᠡᠨ 〈ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ〉᠂ 〈ᠭᠠᠩᠭᠠ ᠶ᠋ᠢᠨ ᠤᠷᠤᠰᠬᠠᠯ〉 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ 〈ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ〉᠂ 〈 ᠪᠣᠯᠣᠷ ᠡᠷᠢᠭᠡ〉 ᠳ᠋ᠦ᠍ ᠲᠡᠮᠳᠡᠭᠯᠡᠭᠰᠡᠨ 〈ᠶᠢᠰᠦᠨ ᠮᠠᠨᠵᠢᠯᠭᠠ ᠲᠠᠢ ᠴᠠᠭᠠᠨ ᠲᠤᠭ〉 ᠵᠢᠴᠢ 〈ᠠᠯᠲᠠᠨ ᠣᠷᠳᠣᠨ ᠤ᠋ ᠳᠠᠢᠯᠭᠠ〉 ᠳ᠋ᠦ᠍ ᠲᠡᠮᠳᠡᠭᠯᠡᠭᠰᠡᠨ ᠃〈ᠶᠢᠰᠦᠨ ᠬᠥᠯᠲᠦ ᠲᠤᠭ〉 ᠨᠢ ᠪᠦᠷ 〈ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ〉 ᠪᠤᠶᠤ 〈ᠨᠠᠢ᠍ᠮᠠᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ〉 ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ》⑳᠃ 《ᠡᠩ ᠤᠨ ᠪᠠᠢᠳᠠᠯ ᠳ᠋ᠤ᠌ ᠮᠣᠷᠢᠲᠠᠢ ᠬᠥᠮᠦᠨ ᠡᠷᠬᠡᠪᠰᠢ ᠵᠡᠭᠦᠨ ᠭᠠᠷ ᠲᠠᠭᠠᠨ ᠵᠢᠯᠣᠭᠣ ᠪᠠᠷᠢᠨᠠ᠃ ᠲᠡᠢᠮᠦ ᠡᠴᠡ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠲᠠᠰᠢᠭᠤᠷ᠂ ᠢᠯᠳᠦ ᠲᠤᠭ ᠵᠡᠷᠭᠡ ᠶ᠋ᠢᠨ ᠵᠦᠢᠯ ᠢ᠋ ᠪᠠᠷᠢᠬᠤ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠵᠤᠷᠰᠢᠯ ᠠ᠋ᠴᠠ ᠲᠣᠭᠲᠠᠭᠠᠭᠳᠠᠭᠰᠠᠨ ᠰᠣᠩᠭᠣᠯᠲᠠ ᠮᠥᠨ᠃ ᠨᠥᠭᠦᠭᠡ ᠴᠢᠬᠤᠯᠠ ᠤᠴᠢᠷ ᠪᠣᠯ ᠲᠤᠭ ᠢ᠋ ᠪᠠᠷᠠᠭᠤᠨ ᠲᠠᠯᠠ ᠳ᠋ᠠᠭᠠᠨ ᠳᠥᠷᠥᠭᠡᠪᠴᠢᠯᠡᠬᠦ ᠨᠢ ᠶᠠᠭ ᠮᠣᠩᠭᠣᠯᠴᠤᠳ ᠤ᠋ᠨ ᠡᠴᠢᠭᠡ ᠶ᠋ᠢᠨ ᠡᠷᠬᠡᠲᠦ ᠶᠣᠰᠣᠨ ᠤ᠋ ᠪᠠᠷᠠᠭᠤᠨ ᠢ᠋ ᠳᠡᠭᠡᠳᠦᠯᠡᠬᠦ ᠵᠠᠩ ᠦᠢᠯᠡ ᠲᠡᠢ ᠨᠡᠢᠴᠡᠬᠦ ᠶᠦᠮ᠃<ᠠᠷᠢᠮᠫᠢᠯ ᠤ᠋ᠨ ᠵᠠᠩᠭᠠᠷ> ᠲᠤ ᠪᠠᠷᠠᠭᠤᠨ ᠳᠥᠷᠥᠭᠡ ᠡᠴᠡ ᠠᠳᠢᠰ ᠠᠪᠴᠤ ᠪᠠᠢᠬᠤ ᠪᠠᠷ ᠦᠭᠦᠯᠡᠭᠳᠡᠳᠡᠭ ᠵᠢᠱ᠌ᠢᠶᠡ ᠲᠡᠢ ᠪᠣᠢ᠃ ᠲᠡᠢᠨ ᠤ ᠲᠣᠭ ᠰᠦᠯᠳᠡ ᠶ᠋ᠢ ᠪᠠᠷᠠᠭᠤᠨ ᠲᠠᠯᠠ ᠳ᠋ᠠᠭᠠᠨ 〈ᠳᠥᠷᠥᠭᠡᠪᠴᠢᠯᠡᠵᠦ〉 ᠶᠠᠪᠤᠬᠤ ᠨᠢ <ᠲᠤᠭ> ᠬᠢᠭᠡᠳ <ᠳᠥᠷᠥᠭᠡ> ᠬᠣᠶᠠᠷ ᠢ᠋ ᠨᠢᠭᠲᠠ ᠪᠠᠷᠢᠯᠳᠤᠯᠭᠠ ᠲᠠᠢ ᠪᠣᠯᠭᠠᠨ ᠲᠠᠯᠪᠢᠵᠠᠢ》㉑ ᠃《ᠰᠦᠯᠳᠡ ᠨᠢ ᠶᠠᠮᠠᠷ ᠨᠢᠭᠡᠨ ᠪᠣᠳᠠᠭᠠᠯᠢ ᠪᠡᠶᠡᠰ ᠢ᠋ᠶ᠋ᠡᠷ ᠢᠯᠡᠷᠡᠵᠦ ᠪᠠᠢᠭᠠ ᠦᠵᠡᠭᠳᠡᠯ ᠲᠡᠳᠦᠢ ᠯᠡ ᠪᠢᠰᠢ᠂ ᠬᠠᠷᠢᠨ ᠡᠷᠲᠡᠨ ᠤ ᠪᠣᠯᠤᠨ ᠡᠳᠦᠭᠡᠬᠢ ᠪᠣᠢ ᠪᠦᠬᠦᠢ ᠰᠦᠯᠳᠡ ᠶ᠋ᠢᠨ ᠶᠡᠷᠦᠩᠬᠡᠢᠯᠡᠭᠰᠡᠨ ᠴᠢᠨᠠᠷ ᠲᠠᠢ ᠨᠡᠷᠡᠢᠳᠦᠯ ᠪᠣᠯᠬᠤ ᠶᠤᠮ᠃ ᠲᠡᠦᠬᠡᠨ ᠡᠴᠡ ᠣᠳᠣ ᠬᠦᠷᠲᠡᠯᠡ ᠰᠦᠯᠳᠡ ᠨᠢ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠪᠠᠢᠳᠠᠭ᠃ ᠲᠥᠷᠥᠯ ᠵᠦᠢᠯ ᠤᠨ ᠬᠤᠪᠢ ᠳ᠋ᠤ᠌ ᠰᠦᠯᠳᠡ ᠳ᠋ᠦ᠍ ᠴᠠᠭᠠᠨ ᠰᠦᠯᠳᠡ᠂ ᠬᠠᠷᠠ ᠰᠦᠯᠳᠡ᠂ ᠠᠯᠠᠭ ᠰᠦᠯᠳᠡ ᠭᠡᠬᠦ ᠶ᠋ᠢᠨ ᠨᠡᠷᠡᠢᠳᠦᠯ ᠪᠣᠢ᠃ ᠬᠥᠮᠦᠰ ᠡᠨᠡ ᠭᠤᠷᠪᠠᠨ ᠰᠦᠯᠳᠡ ᠶ᠋ᠢ ᠰᠦᠯᠳᠡ ᠰᠣᠶᠣᠯ ᠤ᠋ᠨ ᠬᠠᠮ ᠴᠣᠭᠴᠠ ᠪᠠᠷ ᠦᠵᠡᠭᠡᠳ <ᠮᠣᠩᠭᠣᠯ ᠤ᠋ᠨ ᠢᠯᠠᠭᠤᠭᠰᠠᠨ ᠭᠤᠷᠪᠠᠨ ᠰᠦᠯᠳᠡ〉 ᠭᠡᠵᠦ ᠳᠠᠭᠤᠳᠠᠳᠠᠭ ᠨᠢ ᠮᠠᠰᠢ ᠵᠦᠢᠲᠡᠢ ᠶᠦᠮ᠃
ᠰᠦᠯᠳᠡ ᠪᠣᠯ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠪᠡᠯᠭᠡᠳᠡᠯ ᠡᠳ᠋ ᠪᠣᠯᠤᠨᠠ᠃ ᠥᠩᠭᠡ ᠪᠡᠷ ᠨᠡᠷᠡᠢᠳᠦᠭᠰᠡᠨ ᠭᠤᠷᠪᠠᠨ ᠰᠦᠯᠳᠡ ᠨᠢ ᠲᠤᠰ ᠲᠤᠰ ᠲᠤ᠌ ᠪᠠᠨ ᠭᠤᠷᠪᠠᠨ ᠵᠦᠢᠯ ᠤᠨ ᠪᠡᠯᠭᠡᠳᠡᠯ ᠤᠳᠬᠠ ᠶ᠋ᠢ ᠢᠯᠡᠳᠬᠡᠨᠡ》㉒᠃《ᠣᠷᠴᠢᠨ ᠦᠶᠡ ᠳ᠋ᠦ᠍ < ᠪᠡᠯᠭᠡᠳᠡᠯ> ᠭᠡᠳᠡᠭ ᠢ᠋ <ᠤᠴᠢᠷ ᠵᠦᠢ ᠶ᠋ᠢᠨ ᠲᠠᠰᠢᠶᠠᠷᠠᠯ> ᠭᠡᠮᠡᠨ ᠦᠵᠡᠬᠦ ᠪᠡᠨ ᠪᠣᠯᠢᠭᠠᠳ ᠣᠶᠤᠨ ᠪᠢᠯᠢᠭ ᠤᠨ ᠨᠥᠭᠦᠭᠡ ᠲᠠᠯᠠ ᠪᠥᠭᠡᠳ ᠠᠯᠢᠪᠠ ᠳᠡᠪᠰᠢᠯ ᠨᠡᠭᠡᠭᠡᠯᠲᠡ ᠶ᠋ᠢᠨ ᠤᠷᠮᠠᠰ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ ᠭᠡᠮᠡᠨ ᠦᠵᠡᠬᠦ ᠪᠣᠯᠵᠠᠢ᠃ ᠡᠨᠡ ᠬᠦ᠌ ᠦᠵᠡᠯ ᠪᠣᠳᠣᠷᠣᠯ ᠤ᠋ᠨ ᠨᠣᠮ ᠠ᠋ᠴᠠ ᠡᠷᠲᠡᠨ ᠤ ᠳᠣᠮᠣᠭ ᠢ ᠲᠠᠢᠯᠪᠤᠷᠢᠯᠠᠬᠤ ᠬᠠᠭᠤᠴᠢᠨ ᠠᠷᠭᠠ ᠥᠭᠡᠷᠡᠴᠢᠯᠡᠭᠳᠡᠵᠦ᠂ ᠰᠢᠨᠡ ᠳᠣᠮᠣᠭ ᠤ᠋ᠨ ᠡᠬᠢᠯᠡᠯ᠂ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠨᠢᠭᠤᠴᠠ ᠳ᠋ᠤ᠌ ᠨᠡᠪᠲᠡᠷᠡᠨ ᠶᠠᠷᠭᠢᠬᠤ ᠪᠣᠯᠤᠮᠵᠢ ᠣᠯᠭᠣᠵᠤ ᠪᠠᠢᠨᠠ᠃ᠡᠢᠮᠦ ᠳ᠋ᠦ᠍ ᠪᠡᠯᠭᠡᠳᠡᠯ ᠪᠣᠯ ᠪᠢᠳᠡᠨ ᠤ ᠳᠦᠷᠰᠦᠯᠡᠬᠦ ᠪᠣᠳᠣᠯ ᠤ᠋ᠨ ᠵᠢᠷᠦᠬᠡ ᠰᠤᠳᠠᠰᠤ ᠪᠣᠯᠵᠤ᠂ ᠦᠯᠦ ᠲᠠᠨᠢᠭᠳᠠᠬᠤ ᠲᠡᠭᠦᠰᠬᠡᠯ ᠦᠭᠡᠢ ᠪᠦᠬᠦᠨ ᠢ᠋ ᠨᠡᠭᠡᠭᠡᠨ ᠬᠠᠷᠠᠬᠤ᠂ ᠲᠡᠷᠡ ᠳᠤᠮᠳᠠ ᠪᠠᠨ ᠤᠬᠠᠮᠰᠠᠷ ᠪᠤᠰᠤ ᠶ᠋ᠢᠨ ᠴᠢᠨᠠᠳᠤ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠡᠷᠳᠡᠨᠢᠰ ᠤᠨ ᠥᠪ ᠢ᠋ ᠬᠥᠨᠳᠡᠬᠦ ᠵᠦᠭ ᠴᠢᠭ ᠲᠦ᠍ ᠬᠥᠲᠥᠯᠵᠦ ᠪᠠᠢᠨᠠ᠃ ᠪᠡᠯᠭᠡᠳᠡᠯ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠪᠢᠳᠡ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠤᠬᠠᠮᠰᠠᠷᠯᠠᠭᠰᠠᠨ ᠡᠰᠡᠬᠦ ᠡᠴᠡ ᠦᠯᠦ ᠰᠢᠯᠲᠠᠭᠯᠠᠨ ᠡᠳᠦᠷ ᠳᠣᠳᠣᠮ ᠤ᠋ᠨ ᠠᠵᠢᠯ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠦᠷᠭᠦᠯᠵᠢ ᠲᠤᠯᠭᠠᠷᠠᠵᠤ ᠪᠠᠢᠳᠠᠭ ᠲᠡᠢᠮᠦ ᠦᠵᠡᠭᠳᠡᠯ ᠶᠦᠮ᠃ ᠬᠦᠰᠡᠯᠡᠩ ᠮᠥᠷᠥᠭᠡᠳᠦᠯ᠂ ᠦᠢᠯᠡ ᠬᠡᠷᠡᠭ᠂ ᠠᠶᠠ ᠵᠠᠩ ᠠᠯᠢ ᠨᠢᠭᠡᠨ ᠳ᠋ᠦ᠍ ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠮᠠᠨᠢ ᠮᠡᠳᠡᠭᠦᠯᠦᠯ ᠦᠭᠡᠢ ᠲᠦᠯᠬᠢᠨ ᠣᠷᠣᠭᠤᠯᠵᠤ᠂ ᠮᠠᠨᠳᠤᠯ ᠪᠠᠭᠤᠷᠠᠯ ᠤ᠋ᠨ ᠠᠯᠢ ᠨᠢᠭᠡ ᠶ᠋ᠢ ᠠᠮᠰᠠᠭᠤᠯᠵᠤ ᠪᠠᠢᠳᠠᠭ ᠪᠢᠯᠡ᠃ ᠴᠣᠬᠣᠮ ᠡᠢᠮᠦ ᠤᠴᠢᠷ ᠠ᠋ᠴᠠ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠡᠷᠲᠡᠨ ᠡᠴᠡ ᠨᠠᠭᠠᠰᠢ ᠪᠡᠯᠭᠡᠳᠡᠯ ᠤᠨ ᠴᠢᠨᠠᠳᠤᠰ ᠤ᠋ᠨ ᠭᠦᠨ ᠤᠴᠢᠷ ᠤᠳᠬᠠ ᠶ᠋ᠢ ᠰᠣᠷᠭᠣᠭ ᠣᠶᠤᠨ᠂ ᠰᠡᠷᠭᠡᠭ ᠵᠦᠩ ᠪᠢᠯᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠦ ᠡᠳᠦᠷ ᠳᠣᠳᠣᠮ ᠤ᠋ᠨ ᠠᠵᠢᠯ ᠦᠢᠯᠡ᠂ ᠦᠭᠡ ᠶᠠᠷᠢᠶᠠᠨ ᠳ᠋ᠠᠭᠠᠨ ᠬᠦᠷᠲᠡᠯᠡ ᠪᠡᠯᠭᠡᠳᠡᠯ ᠤᠨ ᠲᠠᠯᠲᠠ ᠨᠢᠭᠤᠴᠠᠯᠢᠭ ᠬᠦᠴᠦᠨ ᠢ᠋ ᠬᠡᠷᠡᠭᠯᠡᠬᠦ ᠭᠡᠮᠡᠨ ᠡᠷᠡᠮᠡᠯᠵᠡᠵᠦ᠂ <ᠮᠣᠩᠭᠣᠯ ᠬᠥᠮᠦᠨ ᠠᠮᠠᠨ ᠤ᠋ ᠪᠡᠯᠭᠡ ᠪᠡᠷ>᠂ <ᠠᠮᠠᠨ ᠤ᠋ ᠪᠡᠯᠭᠡ ᠡᠴᠡ ᠠᠰᠢᠳᠠ ᠶ᠋ᠢᠨ ᠪᠡᠯᠭᠡ> ᠭᠡᠬᠦᠴᠢᠯᠡᠨ ᠬᠡᠯᠡᠯᠴᠡᠵᠦ ᠢᠷᠡᠭᠰᠡᠨ ᠪᠢᠯᠡ》㉓᠃
ᠳᠡᠭᠡᠷᠡᠬᠢ ᠲᠡᠭᠦᠪᠦᠷᠢ ᠪᠣᠯ ᠵᠥᠪᠬᠡᠨ ᠨᠠᠳᠠᠳᠤ ᠰᠣᠩᠭᠣᠭᠳᠠᠭᠰᠠᠨ ᠬᠡᠰᠡᠭ ᠯᠡ ᠪᠣᠯᠤᠨᠠ᠃ ᠡᠭᠦᠨ ᠡᠴᠡ ᠥᠭᠡᠷᠡ ᠣᠯᠠᠨ ᠠᠷᠪᠢᠨ ᠪᠠᠢᠬᠤ ᠨᠢ ᠬᠡᠯᠡᠯᠭᠡᠨ ᠦᠭᠡᠢ ᠶᠠᠪᠤᠳᠠᠯ ᠡ᠃ ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠠᠳᠠᠯᠢ ᠠᠭᠤᠯᠭᠠ ᠲᠠᠢ ᠵᠦᠢᠯ ᠢ᠋ ᠳᠠᠪᠬᠤᠷᠳᠠᠭᠤᠯᠤᠨ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ᠃ ᠡᠨᠳᠡ ᠬᠠᠷᠢᠨ ᠳᠤᠷᠠᠳᠤᠭᠤᠰᠢᠲᠠᠢ ᠨᠢᠭᠡ ᠠᠰᠠᠭᠤᠳᠠᠯ ᠭᠡᠪᠡᠯ ᠲᠤᠭ (ᠰᠦᠯᠳᠡ) ᠶ᠋ᠢᠨ ᠲᠤᠬᠠᠢ ᠨᠡᠷᠡ ᠦᠭᠡᠰ ᠦ᠋ᠨ ᠳᠠᠭᠤᠳᠠᠯᠭᠠ ᠨᠢ ᠭᠠᠭᠴᠠ ᠳᠡᠭᠡᠷᠡᠬᠢ ᠲᠡᠭᠦᠪᠦᠷᠢ ᠭᠡᠰᠡᠨ ᠪᠢᠰᠢ᠂ ᠶᠡᠷᠦ ᠳ᠋ᠡᠭᠡᠨ ᠨᠢᠭᠡᠳᠦᠯ ᠦᠭᠡᠢ ᠪᠠᠢᠳᠠᠭ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠲᠤᠬᠠᠢᠯᠠᠪᠠᠯ ᠶᠡᠷᠦᠩᠬᠡᠢᠯᠡᠭᠰᠡᠨ ᠤᠳᠬᠠ ᠲᠠᠢ《ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠰᠦᠯᠳᠡ》᠂ 《ᠲᠤᠭ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠵᠤ᠂ 《ᠴᠠᠭᠠᠨ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠴᠠᠭᠠᠨ ᠰᠦᠯᠳᠡ》᠂ 《ᠶᠡᠬᠡ ᠴᠠᠭᠠᠨ ᠲᠤᠭ》᠂ 《ᠶᠡᠬᠡ ᠴᠠᠭᠠᠨ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠳᠠᠭᠤᠳᠠᠵᠤ᠂ 《ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶᠢ《ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ》᠂ 《ᠶᠢᠰᠦᠨ ᠬᠥᠯᠲᠦ ᠶᠡᠬᠡ ᠴᠠᠭᠠᠨ ᠲᠤᠭ》᠂ 《ᠶᠢᠰᠦᠨ ᠬᠥᠯᠲᠦ ᠶᠡᠬᠡ ᠴᠠᠭᠠᠨ ᠰᠦᠯᠳᠡ》᠂ 《ᠨᠠᠢ᠍ᠮᠠᠨ ᠬᠥᠯᠲᠦ ᠴᠠᠭᠠᠨ ᠲᠤᠭ》᠂ 《ᠨᠠᠢ᠍ᠮᠠᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠵᠤ᠂ 《ᠬᠠᠷᠠ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠬᠠᠷᠠ ᠰᠦᠯᠳᠡ》 《ᠶᠡᠬᠡ ᠬᠠᠷᠠ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠵᠤ᠂ 《ᠲᠠᠪᠤᠨ ᠬᠥᠯᠲᠦ ᠬᠠᠷᠠ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠲᠠᠪᠤᠨ ᠬᠥᠯᠲᠦ ᠬᠠᠷᠠ ᠰᠦᠯᠳᠡ》᠂ 《ᠲᠠᠪᠤᠨ ᠬᠥᠯᠲᠦ ᠶᠡᠬᠡ ᠬᠠᠷᠠ ᠲᠤᠭ》᠂ 《ᠲᠠᠪᠤᠨ ᠬᠥᠯᠲᠦ ᠶᠡᠬᠡ ᠬᠠᠷᠠ ᠰᠦᠯᠳᠡ》᠂ 《ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠲᠤᠭ》᠂《ᠳᠥᠷᠪᠡᠨ ᠬᠥᠯᠲᠦ ᠬᠠᠷᠠ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠵᠤ᠂ 《ᠠᠯᠠᠭ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠠᠯᠠᠭ ᠰᠦᠯᠳᠡ》 ᠭᠡᠵᠦ ᠳᠠᠭᠤᠳᠠᠵᠤ᠂ 《ᠲᠠᠪᠤᠨ ᠬᠥᠯᠲᠦ ᠠᠯᠠᠭ ᠲᠤᠭ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠲᠠᠪᠤᠨ ᠬᠥᠯᠲᠦ ᠠᠯᠠᠭ ᠲᠤᠭ》᠂ 《ᠳᠥᠷᠪᠡᠨ ᠬᠥᠯᠲᠦ ᠠᠯᠠᠭ ᠲᠤᠭ》᠂ 《ᠳᠥᠷᠪᠡᠨ ᠬᠥᠯᠲᠦ ᠠᠯᠠᠭ ᠰᠦᠯᠳᠡ》 ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠵᠤ ᠪᠠᠢᠳᠠᠭ᠃ ᠡᠨᠡ ᠪᠣᠯ ᠲᠤᠭ ᠰᠦᠯᠳᠡ ᠪᠡᠨ ᠳᠡᠭᠡᠳᠦᠯᠡᠨ ᠰᠢᠲᠦᠬᠦ ᠰᠡᠳᠬᠢᠴᠡ ᠡᠴᠡ ᠪᠣᠯᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠦᠵᠡᠨᠡ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠢᠲᠠᠳ ᠪᠠ ᠪᠤᠰᠤᠳ ᠦᠨᠳᠦᠰᠦᠲᠡᠨ 《ᠲᠤᠭ》 ᠲᠤ᠌ ᠥᠭᠭᠦᠭᠰᠡᠨ ᠬᠣᠴᠢ ᠨᠡᠷᠡᠢᠳᠦᠯ ᠴᠦ᠍ ᠠᠷᠪᠢᠨ ᠪᠣᠢ᠃ ᠵᠢᠱ᠌ᠢᠶᠡᠯᠡᠪᠡᠯ ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠢᠲᠠᠳ ᠪᠢᠴᠢᠭᠲᠡᠨ 《ᠠᠯᠠᠭ ᠲᠤᠭ》 ᠢ᠋ ᠲᠢᠶᠧ ᠹᠠᠨ ᠭᠠᠨ (铁幡竿)᠂ ᠲᠦᠩ ᠹᠠᠨ ᠭᠠᠨ (铜幡竿)᠂ ᠲᠤ ᠶ᠋ᠢᠨ ᠲᠦᠩ ᠹᠠᠨ ᠭᠠᠨ (涂金铜幡竿) ᠭᠡᠬᠦ ᠮᠡᠲᠦ ᠪᠡᠷ ᠳᠠᠭᠤᠳᠠᠭᠰᠠᠨ ᠪᠠᠢᠳᠠᠭ᠃
ᠡᠳᠡᠭᠡᠷ ᠶᠠᠪᠤᠳᠠᠯ ᠢ᠋ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠡᠭᠦᠳᠡᠨ ᠡᠴᠡ ᠠᠪᠴᠤ ᠬᠡᠯᠡᠪᠡᠯ ᠵᠠᠪᠠᠯ ᠨᠢᠭᠡᠳᠬᠡᠪᠡᠯ ᠵᠣᠬᠢᠰᠲᠠᠢ ᠠᠰᠠᠭᠤᠳᠠᠯ ᠪᠣᠯᠤᠨᠠ᠃ ᠣᠯᠠᠨ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠰᠠᠨᠠᠭᠠᠨ ᠳ᠋ᠠᠭᠠᠨ ᠠᠪᠴᠤ᠂ ᠡᠨᠡ ᠲᠠᠯᠠ ᠶ᠋ᠢᠨ ᠴᠢᠷᠮᠠᠢᠯᠭᠠ ᠪᠠᠨ ᠭᠠᠷᠭᠠᠬᠤ ᠶ᠋ᠢ ᠶᠡᠬᠡᠳᠡ ᠬᠦᠰᠡᠵᠦ ᠪᠠᠢᠨᠠ᠃
ᠵᠡᠭᠦᠯᠲᠡ
①③⑥⑰ ᠰᠡᠴᠡᠨ᠂ ᠭᠠᠩᠲᠡᠮᠦᠷ᠂ ᠤᠷᠠᠨᠲᠣᠭᠣᠰ᠄《ᠲᠥᠷᠥ ᠶ᠋ᠢᠨ ᠮᠢᠨᠢ ᠰᠦᠯᠳᠡ ᠢᠪᠡᠭᠡ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 2012 ᠣᠨ᠂12᠂13᠂14᠂11 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠃
②④⑤⑭⑯ ᠰᠠᠢᠨᠵᠢᠷᠭᠠᠯ᠄《ᠮᠣᠩᠭᠣᠯ ᠲᠠᠬᠢᠯᠭᠠ》᠂ ᠦᠨᠳᠦᠰᠦᠲᠡᠨ ᠤ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 2001 ᠣᠨ᠂ 252᠂ 294᠂ 293᠂ 314᠂411 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
⑦⑧⑨⑩⑪ ᠲᠠᠬᠢᠯᠲᠤ᠂ ᠬ᠌ · ᠮᠢᠭ᠍ᠮᠠᠷᠰᠠᠮᠪᠤᠤ᠄ 《ᠴᠢᠩᠬᠢᠰ ᠬᠠᠭᠠᠨ ᠤ ᠲᠤᠭᠰᠢᠨ ᠬᠠᠷᠠ ᠰᠦᠯᠳᠡ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂2010 ᠣᠨ᠂ 14~17᠂ 58᠂ 95~96᠂ 24᠂26~31 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
⑫ 《ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ》 ᠳ᠋ᠤ᠌ ᠳᠡᠪᠰᠢᠭᠦᠯᠦᠭᠰᠡᠨ ᠪᠦᠷᠢᠨᠪᠠᠲᠤ ᠶ᠋ᠢᠨ 《<ᠴᠠᠭᠠᠨ ᠭᠡᠷ> ᠤᠨ ᠰᠣᠶᠣᠯ ᠤ᠋ᠨ ᠰᠤᠳᠤᠯᠤᠯ》 ᠭᠡᠰᠡᠨ ᠥᠭᠦᠯᠡᠯ᠂ 10 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌᠃
⑬ ᠲᠠᠢᠴᠢᠭᠤᠳ ᠠᠶᠤᠲᠠᠶ ᠤ᠋ᠨ ᠸᠴᠢᠷ: 《ᠮᠣᠩᠭᠣᠯᠴᠤᠳ ᠤ᠋ᠨ ᠭᠠᠷᠤᠯ᠂ ᠨᠡᠷᠡᠰᠢᠯ》: ᠤᠯᠠᠭᠠᠨᠪᠠᠭᠠᠲᠤᠷ᠂ 2008 ᠣᠨ᠂ 180-181 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
⑮《ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ》 ᠳ᠋ᠤ᠌ ᠳᠡᠪᠰᠢᠭᠦᠯᠦᠭᠰᠡᠨ ᠰᠠᠷᠠᠩᠨᠠᠳᠮᠢᠳ ᠤ᠋ᠨ 《ᠶᠡᠬᠡ ᠨᠡᠢᠰᠯᠡᠯ ᠬᠣᠲᠠ ᠶ᠋ᠢᠨ ᠲᠦᠮᠡᠨᠨᠠᠰᠤᠲᠤ ᠠᠭᠤᠯᠠ ᠶ᠋ᠢᠨ <ᠲᠦᠩ ᠹᠠᠨ ᠭᠠᠨ> ᠪᠣᠯ ᠠᠯᠠᠭ ᠰᠦᠯᠳᠡ ᠪᠣᠯᠬᠤ ᠲᠤᠬᠠᠢ ᠥᠭᠦᠯᠡᠬᠦ ᠨᠢ》᠂ 41 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
⑱ 2012 ᠣᠨ ᠤ᠋ 11 ᠰᠠᠷᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠭᠤᠷᠪᠠᠳᠤᠭᠠᠷ ᠬᠤᠭᠤᠴᠠᠭᠠᠨ ᠤ᠋ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠠᠢᠯᠭᠠ ᠲᠠᠬᠢᠯᠭᠠ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠳ᠋ᠤ᠌ ᠳᠡᠪᠰᠢᠭᠦᠯᠦᠭᠰᠡᠨ ᠥᠭᠦᠯᠡᠯ ᠦ᠋ᠳ( ᠳᠣᠣᠷᠠ ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ ᠭᠡᠵᠦ ᠲᠣᠪᠴᠢᠯᠠᠨᠠ) ᠲᠤ ᠨᠡᠢᠲᠡᠯᠡᠭᠳᠡᠭᠰᠡᠨ ᠨ᠂ ᠮᠠᠷᠠᠯᠮᠠ ᠶ᠋ᠢᠨ《ᠮᠣᠩᠭᠣᠯᠴᠤᠳ ᠤ᠋ᠨ ᠰᠦᠯᠳᠡ ᠶ᠋ᠢᠨ ᠢᠵᠠᠭᠤᠷ ᠤᠯᠠᠮᠵᠢᠯᠠᠯ》᠂ 141 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
⑲㉒《ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ》 ᠳ᠋ᠤ᠌ ᠳᠡᠪᠰᠢᠭᠦᠯᠦᠭᠰᠡᠨ ᠪᠤ᠌᠂ ᠰᠠᠢᠵᠢᠷᠠᠬᠤ ᠶ᠋ᠢᠨ 《ᠰᠦᠯᠳᠡ ᠶ᠋ᠢᠨ ᠠᠭᠤᠯᠤᠭᠳᠠᠬᠤᠨ ᠢ᠋ ᠲᠠᠢᠯᠪᠤᠷᠢᠯᠠᠬᠤ ᠠᠷᠭᠠ ᠵᠦᠢ ᠶ᠋ᠢᠨ ᠠᠰᠠᠭᠤᠳᠠᠯ ᠳ᠋ᠤ᠌》᠂ 26᠂ 28 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌᠃
⑳㉑《ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯ》 ᠳ᠋ᠤ᠌ ᠳᠡᠪᠰᠢᠭᠦᠯᠦᠭᠰᠡᠨ ᠱᠠᠭᠠᠯᠠᠢ ᠶ᠋ᠢᠨ《ᠡᠷᠲᠡᠨ ᠤ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ᠋ ᠶᠣᠰᠣᠯᠠᠯ ᠤ᠋ᠨ ᠵᠠᠩ ᠦᠢᠯᠡ ᠳ᠋ᠡᠬᠢ ᠲᠤᠭ ᠰᠦᠯᠳᠡ ᠬᠢᠭᠡᠳ ᠬᠡᠩᠭᠡᠷᠭᠡ ᠪᠦᠷᠢᠶᠡ ᠶ᠋ᠢᠨ ᠳᠦᠷᠢᠮ ᠪᠠᠢᠭᠤᠯᠤᠮᠵᠢ》᠂ 53᠂ 55 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌᠃
㉓ [ᠮᠣᠩᠭᠣᠯ] ᠰ᠂ ᠳᠤᠯᠮᠠ:《ᠮᠣᠩᠭᠣᠯ ᠪᠡᠯᠭᠡᠳᠡᠯ ᠵᠦᠢ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 2009 ᠣᠨ᠂1 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌᠃
2012 ᠣᠨ ᠤ᠋12 ᠰᠠᠷᠠ ᠶ᠋ᠢᠨ20 ᠤ᠋ ᠡᠳᠦᠷ