ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢ> Хялгасан дөрөөн дээр – Хасвулаг зохиов <30>
102ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢ>
ᠬᠥᠬᠡᠲᠤᠯᠢ ᠨᠢᠭᠡ ᠦᠭᠡ ᠴᠦ᠍ ᠳᠤᠤᠭᠠᠷᠬᠤ ᠳᠤᠷᠠ ᠦᠭᠡᠢ᠃ ᠳᠣᠲᠣᠷᠠ ᠨᠢ ᠵᠥᠷᠢᠴᠡᠯ ᠢ᠋ᠶ᠋ᠡᠷ ᠳᠥᠭᠥᠷᠦᠨ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠪᠣᠳᠣᠭᠳᠠᠨᠠ᠃
ᠤᠤᠯ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠢ᠋ ᠲᠡᠷᠡ ᠭᠠᠷᠳᠠᠨ ᠪᠠᠢᠴᠠᠭᠠᠵᠠᠢ᠃ ᠲᠡᠷᠡ ᠮᠥᠷᠲᠡᠭᠡᠨ ᠮᠠᠰᠢ ᠤᠷᠤᠭᠰᠢᠲᠠᠢ ᠶᠠᠪᠤᠭᠳᠠᠭᠰᠠᠨ ᠲᠤᠯᠠ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠦᠷᠢᠳᠦᠭᠦᠯᠦᠨ᠂ ᠶᠠᠯᠠ ᠲᠣᠭᠲᠠᠭᠠᠨ ᠳᠡᠭᠡᠭᠰᠢ ᠮᠡᠳᠡᠭᠦᠯᠵᠦ ᠪᠢᠯᠡ᠃ ᠭᠡᠲᠡᠯᠡ ᠡᠷᠡᠭᠦᠦ ᠲᠤᠯᠭᠠᠬᠤ ᠠ᠋ᠴᠠ ᠡᠮᠦᠨᠡᠬᠢ ᠬᠡᠳᠦᠨ ᠰᠧᠺᠦ᠋ᠨ᠋ᠳ᠋ ᠲᠦ᠍ ᠰᠠᠨᠠᠮᠰᠠᠷ ᠦᠭᠡᠢ ᠬᠡᠷᠡᠭ ᠡᠭᠦᠰᠴᠦ᠂ ᠪᠣᠯᠤᠷᠴᠠᠭᠠᠨ ᠢ᠋ ᠴᠠᠭᠠᠵᠠ ᠶᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠨ ᠠᠪᠴᠢᠷᠠᠬᠤ ᠳ᠋ᠤ᠌ ᠬᠥᠬᠡᠲᠤᠯᠢ ᠢᠯᠡᠭᠦᠴᠡ ᠬᠡᠷᠡᠭ ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃ ᠲᠦᠪᠰᠢᠨ ᠢ᠋ ᠲᠠᠬᠢᠵᠤ ᠡᠨᠡ ᠬᠡᠷᠡᠭ ᠢ᠋ ᠪᠦᠬᠦ ᠲᠠᠯᠠ ᠪᠠᠷ ᠪᠠᠢᠴᠠᠭᠠᠨ ᠮᠥᠷᠳᠡᠬᠦ ᠳ᠋ᠦ᠍ ᠲᠡᠷᠡ ᠢᠳᠡᠪᠬᠢᠲᠡᠢ ᠳᠡᠮᠵᠢᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠰᠠᠨᠠᠭᠠᠨ ᠳᠤ ᠪᠠᠨ ᠴᠦ᠍ ᠠᠪᠬᠤ ᠳᠤᠷᠠ ᠦᠭᠡᠢ ᠪᠠᠢᠪᠠ᠃ ᠭᠡᠪᠡᠴᠦ ᠡᠨᠡ ᠬᠦ᠌ ᠬᠡᠷᠡᠭ ᠳᠡᠭᠡᠷᠡ ᠡᠢᠮᠦ ᠣᠯᠠᠨ ᠶᠠᠷᠰᠢᠭ ᠪᠤᠳᠤᠯᠢᠶᠠᠨ ᠤᠴᠠᠷᠠᠨᠠ ᠭᠡᠵᠦ ᠲᠡᠷᠡ ᠣᠭᠲᠣ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ ᠪᠠᠢᠵᠠᠢ᠃
ᠢᠯᠠᠩᠭᠤᠶᠠ ᠢᠩᠭᠢᠵᠦ ᠬᠡᠷᠡᠭ ᠤᠷᠪᠠᠭᠠᠳ ᠦᠨᠳᠦᠰᠦᠨ ᠡᠷᠭᠢᠯᠲᠡ ᠭᠠᠷᠤᠨᠠ ᠭᠡᠵᠦ ᠵᠡᠭᠦᠳᠦᠨ ᠳ᠋ᠦ᠍ᠨᠢ ᠴᠦ᠍ ᠣᠷᠣᠭᠰᠠᠨ ᠦᠭᠡᠢ ᠠᠵᠢ᠃ ᠭᠡᠰᠡᠨ ᠴᠦ᠍ ᠲᠡᠷᠡ ᠠᠩᠬᠠᠨ ᠳᠤ ᠪᠠᠨ ᠪᠣᠯᠤᠷᠴᠠᠭᠠᠨ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠬᠤ ᠳ᠋ᠤ᠌ ᠴᠠᠭᠠᠲᠠᠢ ᠨᠢ ᠯᠠᠪ ᠨᠢᠭᠡ ᠵᠣᠷᠢᠯᠭᠠ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠯᠬᠢᠯᠠᠵᠤ ᠥᠩᠭᠡᠷᠡᠵᠡᠢ᠃ ᠡᠢᠮᠦ ᠨᠠᠷᠢᠨ ᠪᠡᠯᠡᠳᠬᠡᠯ ᠲᠥᠯᠥᠪᠯᠡᠭᠡ ᠲᠡᠢ ᠪᠡᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠣᠷᠯᠠᠭᠰᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠡᠷᠡ ᠡᠮᠡ ᠶ᠋ᠢᠨ ᠡᠩ ᠦ᠋ᠨ ᠡᠪᠳᠡᠷᠡᠯᠴᠡᠯ᠂ ᠬᠠᠢᠷᠠ ᠳᠤᠷᠠᠯᠠᠯ ᠤ᠋ᠨ ᠬᠠᠭᠠᠴᠠᠯ᠂ ᠨᠢᠭᠡ ᠴᠠᠭ ᠤ᠋ᠨ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠷ ᠭᠠᠷ ᠠᠯᠳᠠᠭᠰᠠᠨ ᠶᠠᠪᠤᠳᠠᠯ ᠣᠭᠲᠣ ᠪᠢᠰᠢ᠂ ᠯᠠᠪ ᠨᠢᠭᠡᠨ ᠨᠢᠭᠤᠴᠠ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ᠂ ᠤᠴᠢᠷ ᠰᠢᠯᠲᠠᠭᠠᠨ ᠪᠠᠢᠨᠠ ᠭᠡᠵᠦ ᠣᠯᠠᠨ ᠤᠳᠠᠭᠠ ᠪᠣᠳᠣᠵᠠᠢ᠃
ᠡᠨᠡ ᠬᠦ᠌ ᠨᠢᠭᠤᠴᠠ ᠶ᠋ᠢ ᠢᠯᠡᠷᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠣᠯᠠᠨ ᠤᠳᠠᠭᠠ ᠮᠥᠷᠳᠡᠨ ᠪᠠᠢᠴᠠᠭᠠᠵᠤ ᠰᠢᠭᠦᠵᠦ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠨᠢᠭᠡ ᠦᠭᠡ ᠴᠦ᠍ ᠪᠤᠯᠲᠠᠢᠯᠭᠠᠭᠰᠠᠨ ᠦᠭᠡᠢ ᠲᠠᠭ ᠳᠤᠭᠤᠢ ᠥᠩᠭᠡᠷᠡᠪᠡ᠃
ᠬᠠᠤᠯᠢ ᠶ᠋ᠢᠨ ᠵᠤᠷᠪᠤᠰ ᠢ᠋ᠶ᠋ᠠᠷ ᠬᠢᠨᠠᠬᠤ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠣᠷᠯᠠᠭᠰᠠᠨ ᠭᠡᠷᠡᠴᠢ ᠪᠠᠷᠢᠮᠲᠠ ᠨᠢ ᠶᠡᠬᠡ ᠲᠥᠯᠥᠪ ᠪᠦᠷᠢᠯᠳᠦᠭᠰᠡᠨ ᠪᠣᠯᠬᠣᠷ ᠵᠠᠪᠠᠯ ᠰᠢᠨᠡ ᠭᠡᠷᠡᠴᠢ ᠪᠠᠷᠢᠮᠲᠠ ᠭᠠᠷᠭᠠᠨᠠ ᠭᠡᠵᠦ ᠣᠷᠣᠯᠳᠣᠬᠤ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠳᠠᠬᠢᠨ ᠳᠠᠪᠲᠠᠨ ᠪᠠᠲᠤᠯᠠᠨ ᠬᠡᠯᠡᠭᠰᠡᠨ ᠠᠮᠠᠨ ᠥᠴᠢᠭ ᠢ᠋ᠶ᠋ᠡᠷ ᠪᠣᠯᠭᠠᠬᠤ ᠶ᠋ᠢ ᠬᠦᠷᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠵᠠᠢ᠃
ᠣᠷᠴᠢᠮ ᠳ᠋ᠤ᠌ ᠲᠦᠪᠰᠢᠨ ᠢ᠋ ᠳᠠᠭᠠᠵᠤ ᠳᠠᠬᠢᠨ ᠪᠠᠢᠴᠠᠭᠠᠯᠲᠠ ᠬᠢᠬᠦ ᠳᠦ ᠪᠡᠨ ᠵᠠᠷᠢᠮ ᠳᠤ ᠪᠠᠨ ᠴᠢᠬᠢ ᠪᠡᠨ ᠢᠲᠡᠭᠡᠬᠦ ᠦᠭᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠴᠦ᠂ ᠵᠠᠷᠢᠮ ᠳᠤ ᠪᠠᠨ ᠪᠣᠯᠤᠷᠴᠠᠭᠠᠨ᠂ ᠡᠦ ᠹᠧᠩ ᠮᠧᠢ ᠬᠣᠶᠠᠭᠤᠯᠠ ᠶ᠋ᠢ ᠮᠡᠳᠡᠷᠡᠯ ᠳ᠋ᠦ᠍ᠨᠢ ᠭᠡᠮ ᠭᠠᠷᠤᠭᠠᠳ᠂ ᠰᠣᠯᠢᠶᠠ ᠭᠠᠯᠵᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠭᠡᠵᠦ ᠰᠡᠵᠢᠭᠯᠡᠮᠡᠷ ᠪᠣᠯᠳᠠᠭ ᠪᠠᠢᠯᠠ᠃
ᠭᠡᠲᠡᠯᠡ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠲᠦᠪᠰᠢᠨ ᠶᠠᠭ ᠯᠠ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠮᠡᠲᠦ ᠨᠢᠭᠡ ᠨᠢᠭᠡ ᠭᠡᠷᠡᠴᠢ᠂ ᠵᠤᠷᠪᠤᠰ ᠵᠤᠷᠪᠤᠰ ᠪᠠᠷᠢᠮᠲᠠ ᠪᠠᠷ ᠲᠤᠯᠭᠠᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠴᠦ᠍ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳᠤ ᠪᠠᠨ ᠨᠢᠭᠤᠴᠠ ᠬᠠᠷᠢᠴᠠᠭᠠ ᠪᠠᠨ ᠭᠠᠷᠭᠠᠵᠤ ᠬᠡᠯᠡᠭᠰᠡᠨ ᠨᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠲᠠᠢ ᠳᠠᠩᠴᠤ ᠨᠢᠭᠲᠠ ᠬᠣᠯᠪᠣᠭᠳᠠᠵᠠᠢ᠃
ᠨᠢᠭᠡ ᠬᠠᠤᠯᠢ ᠶ᠋ᠢᠨ ᠰᠢᠭᠦᠭᠴᠢ ᠬᠦᠨᠳᠦ ᠶᠡᠬᠡ ᠡᠷᠡᠭᠦᠦ ᠶ᠋ᠢᠨ ᠬᠡᠷᠡᠭ ᠳᠡᠭᠡᠷᠡ ᠡᠢᠮᠦ ᠲᠣᠮᠣ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠣᠷᠬᠢᠭᠳᠠᠭᠤᠯᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠠᠵᠢᠯ ᠤ᠋ᠨ ᠬᠠᠷᠢᠭᠤᠴᠠᠯᠭᠠ ᠪᠠᠨ ᠠᠯᠳᠠᠭᠰᠠᠨ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠰᠢᠭᠦᠨ ᠲᠠᠰᠤᠯᠬᠤ ᠠᠵᠢᠯᠲᠠᠳ ᠵᠠᠪᠠᠯ ᠭᠡᠷᠡᠴᠢ ᠪᠠᠷᠢᠮᠲᠠ ᠳ᠋ᠤ᠌ ᠳᠥᠰᠢᠨ᠂ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠷ ᠦᠭᠡ ᠶᠠᠷᠢᠬᠤ ᠬᠡᠷᠡᠭᠲᠡᠢ ᠶᠦᠮ᠃ ᠨᠢᠭᠡ ᠶᠠᠯᠠᠲᠠᠨ ᠰᠠᠳᠤᠷ ᠵᠠᠪᠬᠠᠢ ᠡᠮᠡ ᠶ᠋ᠢᠨ ᠲᠥᠯᠥᠭᠡ ᠳᠤᠷᠠᠲᠠᠢᠶᠠ ᠠᠮᠢ ᠪᠠᠨ ᠥᠭᠬᠦ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠬᠦ ᠶ᠋ᠢ ᠬᠥᠬᠡᠲᠤᠯᠢ ᠭᠠᠢᠬᠠᠬᠤ ᠪᠣᠯᠪᠠᠴᠤ ᠡᠢᠮᠦ ᠬᠡᠷᠡᠭ ᠡᠮᠦᠨᠡ ᠨᠢ ᠥᠪ ᠦᠨᠡᠨ ᠢ᠋ᠶ᠋ᠡᠷ ᠭᠠᠷᠬᠤ ᠳ᠋ᠤ᠌ ᠲᠡᠷᠡ ᠪᠠᠲᠤᠲᠠᠢ ᠢᠲᠡᠭᠡᠯᠡ᠃
ᠭᠠᠢᠬᠠᠭᠤᠰᠢᠲᠠᠢ ᠨᠢ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠲᠦᠪᠰᠢᠨ ᠶᠠᠭᠠᠬᠢᠭᠠᠳ ᠥᠭᠡᠷᠡ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠨᠢᠭᠤᠴᠠ ᠳᠠᠯᠳᠠ ᠬᠡᠷᠡᠭ ᠦ᠋ᠳ ᠢ᠋ ᠢᠩᠭᠢᠵᠦ ᠨᠠᠷᠢᠨ ᠢᠯᠡᠷᠡᠭᠦᠯᠵᠦ ᠭᠠᠷᠭᠠᠭᠰᠠᠨ ᠪᠣᠢ? ᠲᠡᠷᠡ ᠡᠳᠡᠭᠡᠷ ᠢ᠋ ᠰᠡᠳᠬᠢᠯ ᠲᠠᠯᠪᠢᠨ ᠪᠣᠳᠣᠯᠬᠢᠯᠠᠭᠰᠠᠭᠠᠷ ᠁
ᠭᠠᠳᠠᠨᠠ ᠠ᠋ᠴᠠ ᠭᠤᠷᠪᠠ ᠳᠥᠷᠪᠡᠨ ᠬᠠᠤᠯᠢ ᠶ᠋ᠢᠨ ᠴᠠᠭᠳᠠᠭᠠ ᠵᠢᠭᠰᠠᠭᠠᠯ ᠲᠠᠢ ᠶᠤᠮ ᠰᠢᠭ᠋ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠣᠷᠣᠵᠤ ᠢᠷᠡᠭᠡᠳ᠄
— ᠡᠦ ᠹᠧᠩ ᠮᠧᠢ ᠶ᠋ᠢ ᠶᠠᠭᠠᠬᠢᠨᠠ ᠪᠣᠢ? ᠲᠦᠷ ᠬᠣᠷᠢᠬᠤ ᠤᠤ? ᠡᠰᠡᠪᠡᠯ ᠤᠭ ᠭᠠᠵᠠᠷ ᠲᠤᠨᠢ ᠠᠪᠠᠴᠢᠵᠤ ᠮᠠᠨᠠᠬᠤ ᠤᠤ? ᠭᠡᠮᠡᠨ ᠲᠦᠪᠰᠢᠨ ᠡᠴᠡ ᠵᠢᠭᠠᠪᠤᠷᠢ ᠠᠪᠬᠤ ᠳ᠋ᠤ᠌ ᠲᠡᠷᠡ ᠳᠡᠮᠡᠢ ᠴᠦ᠍ ᠪᠣᠳᠣᠯᠬᠢᠯᠠᠭᠰᠠᠨ ᠦᠭᠡᠢ ᠪᠡᠷ᠄
— ᠣᠳᠣ ᠪᠠᠷ ᠢ᠋ᠶ᠋ᠠᠨ ᠡᠨᠳᠡ ᠳᠠᠭᠤᠳᠠᠵᠤ ᠠᠪᠴᠢᠷᠠ ᠭᠡᠵᠦ ᠲᠤᠰᠢᠶᠠᠯᠠ᠃
ᠴᠢᠷᠠᠢ ᠨᠢ ᠦᠨᠡᠰᠦ ᠰᠢᠭ ᠬᠥᠬᠡᠷᠡᠭᠰᠡᠨ ᠡᠦ ᠹᠧᠩ ᠮᠧᠢ ᠲᠣᠯᠣᠭᠠᠢ ᠪᠠᠨ ᠳᠡᠭᠦᠵᠢᠯᠡᠨ ᠠᠯᠭᠤᠷ ᠠᠯᠬᠤᠭᠰᠠᠭᠠᠷ ᠣᠷᠣᠵᠤ ᠢᠷᠡᠪᠡ᠃ ᠲᠦᠪᠰᠢᠨ ᠡᠮᠦᠨᠡ ᠪᠡᠨ ᠪᠠᠢᠭᠠ ᠰᠠᠨᠳᠠᠯᠢ ᠳᠡᠭᠡᠷᠡ ᠲᠡᠭᠦᠨ ᠢ᠋ ᠰᠠᠭᠤᠯᠭᠠᠭᠠᠳ᠄
— ᠡᠦ ᠹᠧᠩ ᠮᠧᠢ᠂ ᠢᠯᠡ ᠰᠢᠭᠦᠯᠲᠡ ᠶ᠋ᠢᠨ ᠲᠢᠩᠬᠢᠮ ᠳ᠋ᠦ᠍ ᠴᠢᠨᠦ ᠬᠢᠭᠰᠡᠨ ᠭᠡᠷᠡᠴᠢ ᠶ᠋ᠢ ᠬᠥᠮᠦᠰ ᠰᠣᠨᠣᠰᠤᠭᠠᠳ ᠶᠡᠬᠡ ᠭᠠᠢᠬᠠᠵᠤ ᠪᠠᠢᠯᠠ᠃
— ᠬᠥᠮᠦᠰ ᠦ᠋ᠨ ᠭᠠᠢᠬᠠᠬᠤ ᠨᠢ ᠲᠡᠢᠮᠦ ᠬᠠᠴᠢᠨ ᠪᠢᠰᠢ ᠠ᠋᠂ ᠤᠴᠢᠷ ᠨᠢ ᠮᠢᠨᠦ ᠭᠡᠷᠡᠴᠢ ᠬᠢᠭᠰᠡᠨ ᠨᠢ ᠪᠦᠷ ᠴᠦ᠍ ᠬᠥᠮᠦᠰ ᠦ᠋ᠨ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠ ᠪᠣᠯᠤᠭᠰᠠᠨ ᠶᠤᠮ᠃
— ᠨᠠᠳᠠ ᠪᠣᠯ ᠢᠩᠭᠢᠵᠦ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ᠃ ᠵᠥᠪᠬᠡᠨ ᠴᠢᠮᠠ ᠳ᠋ᠤ᠌ ᠪᠠᠬᠠᠨ ᠣᠰᠣᠯᠳᠠᠭᠰᠠᠨ ᠰᠢᠭ᠋ ᠪᠠᠢᠨᠠ᠃
— ᠨᠠᠳᠠ ᠣᠰᠣᠯᠳᠠᠭᠰᠠᠨ ᠭᠡᠨᠡ ᠤᠤ?
— ᠲᠡᠢᠮᠦ ᠠ᠋᠂ ᠴᠢᠮᠠ ᠳ᠋ᠤ᠌᠃
— ᠶᠠᠭᠠᠬᠢᠭᠠᠳ?
— ᠤᠴᠢᠷ ᠨᠢ ᠨᠢᠭᠡ ᠬᠥᠮᠦᠨ ᠥᠪᠡᠷ ᠦ᠋ᠨ ᠠᠮᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠵᠤ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠣᠯᠠᠨ ᠳᠠᠶᠠᠭᠠᠷ ᠤ᠋ᠨ ᠳᠤᠮᠳᠠ ᠬᠡᠯᠡᠵᠦ ᠳᠡᠯᠭᠡᠭᠰᠡᠨ ᠦᠶᠡ ᠳ᠋ᠦ᠍ ᠳᠠᠬᠢᠭᠠᠳ ᠬᠤᠷᠢᠶᠠᠵᠤ ᠠᠪᠬᠤ ᠪᠤᠶᠤ ᠠᠷᠢᠯᠭᠠᠵᠤ ᠴᠠᠭᠠᠳᠬᠠᠬᠤ ᠳ᠋ᠤ᠌ ᠦᠨᠡᠬᠡᠷ ᠴᠦ᠍ ᠬᠦᠴᠢᠷ ᠲᠡᠢ ᠶᠦᠮ᠃
— ᠡᠭᠦᠨ ᠢ᠋ ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠪᠣᠳᠠᠲᠠᠢ ᠳᠡᠭᠡᠷᠡ ᠡᠭᠦᠨ ᠢ᠋ ᠪᠣᠳᠣᠯᠬᠢᠯᠠᠬᠤ ᠬᠡᠷᠡᠭᠴᠡᠭᠡ ᠦᠭᠡᠢ ᠶᠦᠮ᠃
— ᠪᠢᠳᠡ ᠣᠯᠠᠨ ᠤᠳᠠᠭᠠ ᠲᠠᠨ ᠠ᠋ᠴᠠ ᠠᠰᠠᠭᠤᠬᠤ ᠳᠤ ᠪᠠᠨ ᠵᠠᠷᠢᠮ ᠦᠶᠡ ᠳ᠋ᠦ᠍ ᠪᠠᠷᠤᠭ ᠯᠠ ᠰᠢᠬᠠᠵᠤ ᠠᠯᠪᠠᠳᠠᠮᠠᠷ ᠪᠠᠢᠭᠰᠠᠨ ᠴᠦ᠍ ᠬᠠᠷᠢᠭᠤᠯᠲᠠ ᠦᠭᠡᠢ ᠪᠠᠢᠳᠠᠭ ᠰᠢᠳᠡ᠃ ᠭᠡᠲᠡᠯᠡ ᠥᠨᠥᠳᠥᠷ ᠴᠢ ᠬᠠᠷᠢᠨ ᠨᠢᠭᠤᠭᠳᠠᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠢᠯᠡ ᠲᠢᠩᠬᠢᠮ ᠳ᠋ᠦ᠍ ᠭᠠᠷᠴᠤ ᠲᠠᠭᠠᠷᠴᠤᠭ ᠰᠠᠪᠠ ᠲᠠᠢ ᠨᠢ ᠶᠡᠭᠦᠯᠡᠭᠰᠡᠨ ᠢ᠋ ᠪᠣᠳᠣᠪᠠᠯ ᠠᠷᠭᠠ ᠦᠭᠡᠢᠳᠡᠬᠦ ᠳᠦ ᠪᠡᠨ ᠢᠩᠭᠢᠵᠦ ᠬᠢᠭᠰᠡᠨ ᠪᠢᠵᠡ᠃
— ᠪᠢ ᠳᠠᠩᠴᠤ ᠮᠤᠵᠢᠭᠤᠳᠠ ᠪᠤᠷᠤᠩᠬᠤᠢ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠲᠠ ᠨᠠᠷ ᠤ᠋ᠨ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠡᠮᠦᠨᠡ ᠠᠪᠤᠭᠰᠠᠨ ᠣᠪᠣᠷ ᠲᠤ ᠪᠠᠨ ᠶᠡᠬᠡ ᠭᠡᠮᠰᠢᠵᠦ ᠪᠠᠢᠨᠠ᠃ ᠢᠯᠠᠩᠭᠤᠶᠠ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠦᠴᠢᠷ ᠲᠤᠯᠭᠠᠨ ᠬᠢᠯᠢᠰᠳᠡᠭᠦᠯᠬᠦ ᠰᠢᠬᠠᠭᠰᠠᠨ ᠳᠤ ᠪᠠᠨ ᠲᠤᠩ ᠬᠠᠷᠠᠮᠰᠠᠵᠤ ᠪᠠᠢᠨᠠ᠃ ᠪᠢ ᠥᠨᠥᠳᠥᠷ ᠢᠩᠭᠢᠵᠦ ᠴᠠᠭᠠᠪᠤᠷᠯᠠᠭᠰᠠᠨ ᠨᠢ ᠠᠯᠢᠪᠠ ᠣᠰᠣᠯ ᠢ᠋ᠶ᠋ᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠬᠦᠯᠢᠶᠡᠶᠡ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃
— ᠲᠠ ᠣᠳᠣ ᠪᠡᠶᠡ ᠪᠡᠨ ᠪᠠᠷᠤᠭ ᠪᠠᠷᠢᠪᠴᠢᠯᠠᠭᠳᠠᠨᠠ ᠭᠡᠵᠦ ᠪᠣᠳᠣᠭᠠ ᠪᠢᠵᠡ᠃
— ᠲᠠ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠪᠣᠢ?
— ᠴᠢᠨᠦ ᠵᠠᠰᠠᠵᠤ ᠴᠢᠮᠡᠭᠰᠡᠨ ᠡᠴᠡ ᠪᠠᠷᠤᠭᠯᠠᠵᠠᠢ᠃
— ᠲᠡᠢᠮᠦ ᠠ᠋᠂ ᠲᠠ ᠵᠥᠪ ᠪᠣᠳᠣᠵᠠᠢ᠃ ᠥᠨᠥᠳᠥᠷ ᠮᠢᠨᠦ ᠲᠠᠢᠰᠠᠨ ᠳ᠋ᠤ᠌ ᠭᠠᠷᠴᠤ ᠦᠭᠡ ᠬᠡᠯᠡᠭᠰᠡᠨ ᠨᠢ ᠡᠷᠬᠡ ᠴᠢᠯᠥᠭᠡ ᠲᠡᠢ ᠪᠠᠢᠬᠤ ᠦᠶᠡ ᠶ᠋ᠢᠨ ᠬᠠᠮᠤᠭ ᠡᠴᠦᠰ ᠦ᠋ᠨ ᠤᠳᠠᠭᠠ ᠪᠠᠢᠬᠠ᠃ ᠪᠠᠰᠠ ᠴᠦ᠍ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠣᠯᠠᠨ ᠤ᠋ ᠳᠤᠮᠳᠠ ᠡᠷᠬᠡ ᠴᠢᠯᠥᠭᠡ ᠲᠡᠢ ᠪᠡᠷ ᠪᠡᠶᠡ ᠪᠡᠨ ᠴᠢᠮᠡᠭᠰᠡᠨ ᠰᠡᠭᠦᠯ ᠦ᠋ᠨ ᠤᠳᠠᠭᠠ ᠶᠤᠮ᠃ ᠮᠢᠨᠦ ᠶᠠᠷᠢᠶᠠ ᠪᠠᠷᠠᠮᠠᠭᠴᠠ ᠪᠢ ᠳᠠᠷᠤᠢ ᠬᠥᠮᠦᠨ ᠦ᠌ ᠡᠷᠬᠡᠨ ᠳ᠋ᠦ᠍ ᠣᠷᠣᠵᠤ ᠴᠢᠨᠠᠭᠰᠢᠯᠠᠪᠠᠯ ᠠᠯᠠᠬᠤ ᠡᠷᠡᠭᠦᠦ ᠪᠡᠷ ᠰᠢᠢᠳᠬᠡᠭᠳᠡᠬᠦ ᠪᠣᠯᠤᠨᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠮᠢᠨᠦ ᠪᠡᠶᠡ ᠪᠡᠨ ᠶᠡᠬᠡ ᠴᠢᠮᠡᠵᠦ ᠵᠠᠰᠠᠭᠰᠠᠨ ᠤ᠋ ᠤᠴᠢᠷ ᠪᠣᠯ ᠬᠥᠮᠦᠨ ᠦ᠌ ᠠᠩᠬᠠᠷᠤᠯ ᠢ᠋ ᠲᠠᠲᠠᠵᠤ ᠭᠡᠷᠡᠴᠢ ᠪᠡᠨ ᠰᠣᠨᠣᠰᠬᠠᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠶᠠᠷᠢᠶᠠᠨ ᠦᠭᠡᠢ ᠮᠢᠨᠦ ᠭᠡᠷᠡᠴᠢ ᠶ᠋ᠢ ᠰᠣᠨᠣᠰᠤᠭᠰᠠᠨ ᠬᠥᠮᠦᠰ ᠨᠠᠮᠠ ᠶᠢ ᠵᠢᠭᠰᠢᠨ ᠬᠠᠷᠠᠶᠠᠵᠠᠭᠠᠬᠤ ᠨᠢ ᠯᠠᠪᠲᠠᠢ᠃ ᠠᠢ! ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠬᠠᠷᠢᠶᠠᠯ ᠨᠢ ᠨᠠᠳᠠ ᠲᠠᠢᠳᠬᠤᠷᠠᠭᠤᠯᠤᠯ ᠪᠣᠯᠬᠤ ᠶᠤᠮ᠃
— ᠲᠠ ᠡᠯᠡ ᠲᠠᠯᠠ ᠶᠢᠨ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠪᠦᠬᠦᠨ ᠢ᠋ ᠬᠢᠵᠦ ᠵᠠᠪᠳᠤᠵᠠᠢ᠃
— ᠲᠡᠷᠡ ᠴᠦ᠍ ᠯᠠᠪᠲᠠᠢ᠃ ᠪᠢ ᠨᠢᠭᠡᠨᠲᠡ ᠭᠢᠨᠳᠠᠨ ᠳ᠋ᠤ᠌ ᠣᠷᠣᠬᠤ ᠪᠡᠯᠡᠳᠬᠡᠯ ᠲᠡᠢ ᠢᠷᠡᠭᠰᠡᠨ᠃
— ᠦ᠂ ᠲᠡᠢᠮᠦ ᠤᠤ? ᠪᠡᠯᠡᠳᠬᠡᠯ ᠴᠢᠨᠢ ᠪᠠᠬᠠᠨ ᠡᠷᠲᠡᠳᠡᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ᠃ ᠤᠴᠢᠷ ᠨᠢ ᠠᠮᠠᠨ ᠥᠴᠢᠭ ᠢ᠋ ᠴᠢᠨᠢ ᠳᠠᠬᠢᠨ ᠪᠠᠢᠴᠠᠭᠠᠵᠤ ᠦᠨᠡᠨ ᠮᠠᠭᠠᠳ ᠢ᠋ ᠨᠢ ᠭᠦᠢᠴᠡᠳ ᠲᠣᠳᠣᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠶᠢ ᠶᠠᠭᠠᠬᠢᠬᠤ ᠲᠤᠬᠠᠢ ᠰᠢᠢᠳᠪᠦᠷᠢ ᠭᠠᠷᠭᠠᠬᠤ ᠶᠤᠮ᠃
— ᠲᠡᠷᠡ ᠴᠦ᠍ ᠡᠷᠲᠡ ᠣᠷᠣᠢ ᠦᠭᠡᠢ ᠭᠠᠷᠬᠤ ᠯᠠ ᠰᠢᠢᠳᠪᠦᠷᠢ ᠪᠠᠢᠯ ᠦᠭᠡᠢ᠃ ᠪᠢ ᠴᠦ᠍ ᠶᠠᠷᠢᠶᠠᠨ ᠦᠭᠡᠢ ᠲᠠᠨ ᠤ᠋ ᠬᠠᠤᠯᠢ ᠶ᠋ᠢᠨ ᠠᠯᠬᠤᠮ ᠳᠠᠷᠠᠭᠠ ᠶ᠋ᠢ ᠬᠦᠨᠳᠦᠳᠬᠡᠬᠦ ᠶᠦᠮ᠃
— ᠲᠡᠢᠮᠦ ᠪᠣᠯ ᠰᠠᠢᠨ᠃ ᠭᠡᠪᠡᠴᠦ ᠡᠢᠮᠦ ᠲᠡᠢᠮᠦ ᠣᠬᠣᠷ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠬᠡᠷᠪᠡ ᠁
— ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢᠭᠠᠷᠠᠢ᠃ ᠪᠢ ᠨᠢᠭᠡᠨᠲᠡ ᠢᠯᠡ ᠰᠢᠭᠦᠯᠲᠡ ᠳᠡᠭᠡᠷᠡ ᠰᠣᠨᠣᠰᠤᠭᠴᠢᠳ ᠤ᠋ᠨ ᠡᠮᠦᠨᠡ ᠦᠭᠡ ᠪᠡᠨ ᠬᠡᠯᠡᠭᠰᠡᠨ ᠡᠴᠡ ᠬᠣᠢᠰᠢ᠂ ᠬᠠᠤᠯᠢ ᠶᠣᠰᠣᠭᠠᠷ ᠰᠢᠢᠳᠬᠡᠭᠦᠯᠬᠦ ᠡᠴᠡ ᠪᠢᠰᠢ᠂ ᠬᠣᠭᠣᠯᠠᠢ ᠪᠠᠨ ᠪᠣᠭᠣᠮᠢᠯᠠᠬᠤ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠬᠤ ᠦᠭᠡᠢ᠃
— ᠴᠢᠨᠦ ᠠᠮᠤᠷ ᠲᠦᠪᠰᠢᠨ ᠪᠣᠯᠤᠨ ᠭᠡᠷᠡᠴᠢᠯᠡᠭᠰᠡᠨ ᠬᠡᠷᠡᠭ ᠢ᠋ ᠴᠢᠨᠢ ᠤᠯᠠᠮ ᠨᠢᠭᠡ ᠠᠯᠬᠤᠮ ᠲᠣᠳᠣᠯᠠᠬᠤ ᠶᠢᠨ ᠲᠥᠯᠥᠭᠡ᠂ ᠪᠢᠳᠡ ᠨᠢᠭᠡᠨᠲᠡ ᠴᠢᠮᠠ ᠳ᠋ᠤ᠌ ᠳᠠᠷᠠᠭᠠ ᠠᠯᠬᠤᠮ ᠤ᠋ᠨ ᠲᠣᠬᠢᠷᠠᠭᠤᠯᠤᠯᠲᠠ ᠬᠢᠭᠰᠡᠨ ᠶᠦᠮ᠃ ᠲᠠ ᠣᠳᠣ ᠮᠠᠨ ᠤ᠋ ᠪᠠᠢᠭᠤᠯᠭᠠ ᠶ᠋ᠢᠨ ᠬᠣᠶᠠᠷ ᠡᠮᠡᠭᠲᠡᠢ ᠠᠵᠢᠯᠲᠠᠨ ᠲᠠᠢ ᠬᠠᠮᠲᠤ ᠶᠠᠪᠤᠭᠠᠷᠠᠢ᠃ ᠲᠡᠳᠡ ᠲᠠᠨ ᠢ᠋ ᠲᠣᠬᠢᠷᠠᠭᠤᠯᠬᠤ ᠶᠤᠮ᠃ ᠡᠳᠦᠭᠡ ᠴᠢᠮᠠ ᠳ᠋ᠤ᠌ ᠨᠢᠭᠡ ᠬᠤᠪᠢ ᠲᠦᠷ ᠬᠣᠷᠢᠬᠤ ᠲᠡᠮᠳᠡᠭ ᠥᠭᠭᠦᠶᠡ᠃ ᠡᠨᠡ ᠨᠢ ᠶᠠᠯᠠᠲᠠᠨ ᠪᠣᠯᠭᠠᠵᠤ ᠬᠣᠷᠢᠬᠤ ᠪᠢᠰᠢ ᠰᠢᠦ᠃ ᠬᠡᠷᠪᠡ ᠡᠨᠡ ᠭᠠᠷ ᠭᠦᠢᠴᠡᠳᠬᠡᠯ ᠦᠭᠡᠢ ᠪᠣᠯ ᠬᠣᠵᠢᠮ ᠴᠢᠮᠠ ᠳ᠋ᠤ᠌ ᠶᠣᠰᠣ ᠦᠭᠡᠢ ᠶᠠᠪᠤᠳᠠᠯ ᠬᠢᠭᠰᠡᠨ ᠰᠢᠭ ᠪᠣᠯᠤᠨᠠ᠃ ᠵᠠ ᠡᠢᠮᠦ ᠪᠠᠢᠨᠠ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠨᠢᠭᠡ ᠰᠢᠢᠳᠪᠦᠷᠢ ᠭᠠᠷᠴᠢᠬᠠᠬᠤ ᠪᠣᠢ᠃
ᠡᠦ ᠹᠧᠩ ᠮᠧᠢ ᠬᠡᠳᠦᠢᠪᠡᠷ ᠡᠷᠡᠰ ᠰᠢᠭᠤᠷᠬᠠᠢ ᠲᠣᠯᠣᠭᠠᠢ ᠳᠣᠬᠢᠭᠰᠠᠨ ᠪᠣᠯᠪᠠᠴᠤ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍ᠨᠢ ᠵᠠᠢᠷ ᠭᠦᠶᠦᠨ ᠮᠡᠯᠲᠡᠭᠡᠨᠡᠵᠦ ᠪᠠᠢᠯᠠ᠃
ᠲᠦᠪᠰᠢᠨ ᠲᠡᠭᠦᠨ ᠢ᠋ ᠲᠡᠷᠭᠡᠨ ᠳ᠋ᠦ᠍ ᠭᠠᠷᠲᠠᠯᠠ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠷᠠᠯᠠ᠃
ᠲᠦᠪᠰᠢᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠢᠯᠡ ᠰᠢᠭᠦᠬᠦ ᠲᠢᠩᠬᠢᠮ ᠳ᠋ᠠᠬᠢ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠨᠢᠭᠡ ᠦᠭᠡ ᠨᠢᠭᠡ ᠬᠥᠳᠡᠯᠦᠯ ᠨᠢ ᠴᠦ᠍ ᠢᠯᠡᠬᠡᠨ ᠪᠣᠳᠣᠭᠳᠠᠵᠤ ᠲᠣᠯᠣᠭᠠᠢ ᠪᠠᠨ ᠠᠪᠤᠭᠤᠯᠬᠤ ᠭᠡᠷᠡᠴᠢ᠂ ᠠᠮᠢ ᠪᠠᠨ ᠠᠯᠳᠠᠬᠤ ᠪᠠᠷᠢᠮᠲᠠ ᠪᠠᠨ ᠲᠦᠮᠡᠨ ᠦ᠌ ᠳᠤᠮᠳᠠ ᠴᠢᠷᠠᠢ ᠬᠤᠪᠢᠷᠠᠵᠤ ᠵᠢᠷᠦᠬᠡ ᠲᠦᠭᠰᠢᠬᠦ ᠦᠭᠡᠢ ᠪᠡᠷ ᠤᠷᠤᠰᠬᠠᠲᠠᠯᠠ ᠴᠡᠪᠡᠷ ᠶᠠᠷᠢᠬᠤ ᠨᠢ ᠳᠠᠬᠢᠨ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠤᠯᠠ᠃
ᠣᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ