ᠰᠦᠯᠳᠡ ᠶᠢᠨ ᠰᠣᠶᠣᠯ ᠤᠨ ᠰᠤᠳᠤᠯᠤᠯ – ᠮᠢᠩᠵᠤᠤᠷ <ᠳᠡᠭᠡᠳᠦ-15> Сүлдийн соёлын судлал – Минжуур<дээд-15>
122ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠢᠮᠡᠯ ᠴᠠᠭᠠᠨ ᠲᠤᠭ (ᠰᠦᠯᠳᠡ) ᠶ᠋ᠢᠨ ᠪᠦᠲᠦᠴᠡ ᠡᠳ᠋ ᠢ᠋ ᠲᠣᠳᠣᠷᠠᠭᠤᠯᠤᠨ ᠥᠭᠦᠯᠡᠬᠦ ᠨᠢ
ᠬᠤᠪᠢᠯᠠᠢ ᠬᠠᠭᠠᠨ ᠶᠤᠸᠠᠨ ᠤᠯᠤᠰ ᠢ᠋ ᠪᠠᠢᠭᠤᠯᠬᠤ ᠳ᠋ᠤ᠌ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ
ᠲᠥᠷᠥ ᠶ᠋ᠢᠨ ᠴᠠᠭᠠᠨ ᠲᠤᠭ ᠢ᠋ ᠵᠠᠯᠭᠠᠮᠵᠢᠯᠠᠨ ᠠᠪᠴᠤ᠂ ᠶᠤᠸᠠᠨ ᠤᠯᠤᠰ ᠤ᠋ᠨ
ᠲᠥᠷᠥ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ ᠢ᠋ᠶ᠋ᠡᠨ ᠪᠣᠯᠭᠠᠭᠰᠠᠨ ᠭᠡᠳᠡᠭ ᠨᠤᠲᠠᠯᠠᠯᠲᠠ ᠶ᠋ᠢᠨ
ᠵᠥᠪ ᠪᠣᠯᠬᠤ ᠶ᠋ᠢ ᠤᠯᠠᠮ ᠴᠢᠨᠠᠭᠰᠢᠳᠠ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃
ᠡᠢᠮᠦ ᠡᠴᠡ ᠲᠤᠰ ᠥᠭᠦᠯᠡᠯ ᠳ᠋ᠦ᠍ ᠶᠡᠬᠡ ᠶᠤᠸᠠᠨ ᠤᠯᠤᠰ ᠨᠢ ᠴᠠᠭᠠᠨ ᠲᠤᠭ ᠢ᠋ᠶ᠋ᠠᠷ
ᠲᠥᠷᠥ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ ᠢ᠋ᠶ᠋ᠡᠨ ᠪᠣᠯᠭᠠᠭᠰᠠᠨ ᠪᠠ ᠡᠰᠡᠬᠦ ᠶ᠋ᠢ ᠥᠭᠦᠯᠡᠬᠦ ᠪᠢᠰᠢ᠂
ᠬᠠᠷᠢᠨ《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠶ᠋ᠢᠨ ᠳᠡᠭᠡᠷᠡᠬᠢ
ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠶ᠋ᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠬᠦ ᠪᠡᠷ ᠳᠠᠮᠵᠢᠨ᠂
ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠪᠦᠲᠦᠴᠡ ᠶ᠋ᠢ ᠲᠣᠳᠣᠷᠠᠭᠤᠯᠤᠨ
ᠥᠭᠦᠯᠡᠬᠦ ᠪᠣᠯᠤᠨᠠ᠃ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠪᠦᠲᠦᠴᠡ ᠨᠢ
ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠴᠢᠬᠤᠯᠠ ᠨᠢᠭᠡᠨ ᠠᠭᠤᠯᠭᠠ ᠪᠣᠯᠬᠣᠷ
ᠬᠣᠢᠰᠢᠳᠠ ᠬᠢᠮᠡᠯ ᠴᠠᠭᠠᠨ ᠲᠤᠭ᠂ ᠴᠢᠨᠠᠭᠰᠢᠯᠠᠪᠠᠯ ᠵᠢᠷᠤᠮᠠᠯ᠂ ᠱᠤᠭᠤᠮᠠᠯ ᠪᠣᠯᠤᠨ
ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠢ᠋ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ ᠰᠣᠶᠣᠯ ᠢ᠋ᠶ᠋ᠠᠷ ᠨᠢ
ᠦᠢᠯᠡᠳᠦᠨ ᠪᠦᠲᠦᠭᠡᠬᠦ ᠳ᠋ᠦ᠍ ᠴᠢᠬᠤᠯᠠ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃
【ᠵᠠᠩᠭᠢᠯᠠᠭᠠ ᠦᠭᠡ】 ᠶᠤᠸᠠᠨ ᠤᠯᠤᠰ᠂ ᠬᠢᠮᠡᠯ ᠴᠠᠭᠠᠨ ᠲᠤᠭ᠂ ᠪᠦᠲᠦᠴᠡ ᠡᠳ᠋᠂
ᠲᠣᠳᠣᠷᠠᠭᠤᠯᠤᠨ ᠥᠭᠦᠯᠡᠬᠦ ᠨᠢ᠃
《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》① ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠨᠢ ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠠᠭᠤᠯᠭᠠ ᠶ᠋ᠢ ᠪᠦᠷᠢᠨ ᠲᠤᠰᠬᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠡᠪᠡᠴᠦ ᠪᠠᠰᠠ ᠲᠡᠭᠦᠨ ᠤ ᠵᠠᠷᠢᠮ ᠵᠦᠢᠯ ᠢ᠋ ᠰᠢᠨᠵᠢᠯᠡᠨ ᠲᠣᠳᠣᠯᠠᠪᠠᠯ ᠰᠠᠶᠢ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠪᠦᠲᠦᠴᠡ ᠶ᠋ᠢ ᠲᠣᠳᠣᠷᠠᠭᠤᠯᠵᠤ ᠴᠢᠳᠠᠨᠠ᠃ ᠡᠢᠮᠦ ᠡᠴᠡ ᠪᠢᠳᠡ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠢ᠋ ᠰᠡᠷᠡᠭᠡ ᠬᠢᠯᠣᠪᠠᠷ᠂ ᠴᠠᠷᠠ ᠪᠣᠯᠤᠨ ᠮᠠᠨᠵᠢᠯᠭᠠ ᠭᠡᠵᠦ ᠭᠤᠷᠪᠠ ᠬᠤᠪᠢᠶᠠᠨ ᠲᠡᠭᠦᠨ ᠤ ᠵᠠᠷᠢᠮ ᠵᠦᠢᠯ ᠢ᠋ ᠲᠤᠰ ᠲᠤᠰ ᠢ᠋ᠶ᠋ᠠᠷ ᠨᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠵᠦ᠂ ᠳᠠᠷᠠᠭᠠ ᠨᠢ ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠪᠦᠲᠦᠴᠡ ᠶ᠋ᠢ ᠲᠣᠳᠣᠷᠠᠭᠤᠯᠤᠨ ᠥᠭᠦᠯᠡᠶᠡ᠃
《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠶ᠋ᠢ ᠠᠵᠢᠭᠯᠠᠨ ᠰᠢᠨᠵᠢᠯᠡᠪᠡᠯ ᠶᠤᠸᠠᠨ ᠤᠯᠤᠰ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠭᠢᠯᠣᠪᠠᠷ ᠢ᠋ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ ᠰᠣᠶᠣᠯ ᠢ᠋ᠶ᠋ᠠᠷ ᠨᠢ ᠦᠢᠯᠡᠳᠦᠭᠰᠡᠨ ᠮᠥᠷᠲᠡᠭᠡᠨ ᠪᠠᠰᠠ ᠲᠡᠭᠦᠨ ᠤ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠠᠭᠤᠯᠤᠭᠳᠠᠬᠤᠨ ᠢ᠋ ᠨᠢ ᠪᠠᠶᠠᠯᠢᠭᠵᠢᠭᠤᠯᠤᠭᠰᠠᠨ ᠪᠠᠢᠨᠠ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠣᠯᠤᠨᠠ᠃
(ᠨᠢᠭᠡ) ᠲᠤᠭᠴᠢᠳ ② ᠤᠨ ᠠᠮᠠᠨ ᠤᠯᠠᠮᠵᠢᠯᠠᠯ ᠳ᠋ᠤ᠌ 《ᠴᠠᠭᠠᠨ ᠲᠤᠭ ᠤ᠋ᠨ ᠣᠷᠣᠢ ᠨᠢ ᠨᠢᠭᠡ ᠲᠣᠬᠣᠢ ᠤᠷᠲᠤ ᠠᠯᠲᠠ ᠰᠢᠷᠠᠭᠰᠠᠨ ᠭᠤᠷᠪᠠᠨ ᠦᠵᠦᠭᠦᠷᠲᠦ ᠲᠡᠮᠦᠷ ᠰᠡᠷᠡᠭᠡ ᠮᠠᠢᠭ ᠤ᠋ᠨ ᠡᠳ᠋᠃ ᠢᠩᠭᠢᠵᠦ ᠬᠢᠭᠰᠡᠨ ᠨᠢ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢᠨᠢ ᠨᠤᠮᠤ ᠪᠠᠨ ᠲᠥᠯᠥᠭᠡᠯᠡᠵᠦ᠂ ᠭᠣᠣᠯ ᠤ᠋ᠨ ᠬᠢᠨᠢ ᠰᠤᠮᠤ ᠪᠠᠨ ᠲᠥᠯᠥᠭᠡᠯᠡᠵᠦ ᠪᠠᠢᠨᠠ 》 ③ ᠭᠡᠵᠦ ᠶᠠᠷᠢᠭᠰᠠᠨ ᠪᠠᠢᠳᠠᠭ᠃ ᠡᠢᠮᠦ ᠡᠴᠡ ᠬᠣᠵᠢᠮ ᠤ᠋ᠨ ᠬᠥᠮᠦᠰ ᠭᠣᠣᠯ ᠤ᠋ᠨ ᠬᠢ ᠶ᠋ᠢ ᠨᠢ ᠰᠤᠮᠤᠨ ᠬᠢᠯᠣᠪᠠᠷ ᠭᠡᠵᠦ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢ ᠶ᠋ᠢ ᠨᠢ ᠨᠣᠮᠤᠨ ᠬᠢᠯᠣᠪᠠᠷ ᠭᠡᠵᠦ᠂ ᠰᠤᠮᠤᠨ ᠬᠢᠯᠦᠪᠠᠷ ᠪᠣᠯᠤᠨ ᠨᠣᠮᠣᠨ ᠭᠢᠯᠦᠪᠠᠷ ᠢ᠋ ᠨᠡᠢᠯᠡᠭᠦᠯᠦᠨ ᠪᠦᠲᠦᠭᠡᠭᠰᠡᠨ ᠰᠡᠷᠡᠭᠡ ᠳᠦᠷᠰᠦᠲᠦ ᠡᠳ᠋ ᠢ᠋ ᠰᠡᠷᠡᠭᠡ ᠭᠢᠯᠣᠪᠠᠷ ᠭᠡᠵᠡᠢ᠃ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠤᠮᠤᠨ ᠭᠢᠯᠣᠪᠠᠷ ᠤ᠋ᠨ ᠦᠵᠦᠭᠦᠷ (ᠵᠡᠪᠡ) ᠳ᠋ᠦ᠍ ᠱᠥᠪᠥᠭᠡᠷ ᠳᠦᠷᠰᠦ (ᠵᠢᠷᠤᠭ 2) ᠭᠠᠷᠭᠠᠵᠠᠢ᠃ ᠡᠨᠡ ᠪᠣᠯ ᠳᠠᠷᠤᠢ ᠭᠠᠯ ᠤ᠋ᠨ ᠳᠦᠷᠰᠦ ᠮᠥᠨ᠃ ᠤᠴᠢᠷ ᠨᠢ ᠮᠣᠩᠭᠣᠯᠴᠤᠳ ᠠᠯᠢ ᠡᠷᠲᠡᠨ ᠡᠴᠡ ᠠᠪᠤᠭᠠᠳ ᠭᠠᠯ ᠤ᠋ᠨ ᠳᠦᠷᠰᠦ ᠶ᠋ᠢ ᠪᠠᠭᠲᠠᠭᠠᠭᠰᠠᠨ ᠭᠠᠯ ᠢ᠋ ᠰᠢᠲᠦᠳᠡᠭ ᠡᠴᠡ ᠪᠣᠯᠵᠤ᠂ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠬᠢᠯᠣᠪᠠᠷ ᠤ᠋ᠨ ᠦᠵᠦᠭᠦᠷ ᠲᠦ᠍ ᠨᠢ ᠭᠠᠯ ᠤ᠋ᠨ ᠳᠦᠷᠰᠦ ᠭᠠᠷᠭᠠᠳᠠᠭ ᠵᠠᠩᠰᠢᠯ ᠲᠠᠢ᠃ ᠭᠠᠯ ᠤ᠋ᠨ ᠳᠦᠷᠰᠦ ᠨᠢ ᠲᠣᠭᠲᠠᠭᠤᠨ ᠪᠠᠢᠬᠤ ᠠ᠋ᠴᠠ ᠦᠵᠡᠪᠡᠯ ᠡᠨᠡ ᠨᠢ ᠵᠤᠯᠠ ᠶ᠋ᠢᠨ ᠭᠠᠯ ᠤ᠋ᠨ ᠳᠦᠷᠰᠦ ᠮᠥᠨ᠂ ᠨᠡᠩ ᠪᠣᠳᠠᠲᠠᠢ ᠬᠡᠯᠡᠪᠡᠯ ᠮᠥᠩᠬᠡ ᠵᠤᠯᠠ ᠶ᠋ᠢᠨ ᠭᠠᠯ ᠤ᠋ᠨ ᠳᠦᠷᠰᠦ ᠪᠣᠯᠤᠨᠠ᠃ ᠭᠡᠪᠡᠴᠦ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠪᠠᠳᠠᠷᠠᠬᠤ ᠭᠠᠯ ᠤ᠋ᠨ ᠳᠦᠷᠰᠦ(ᠵᠢᠷᠤᠭ 3) ᠪᠠᠷ ᠭᠠᠯ ᠢ᠋ ᠢᠯᠡᠳᠬᠡᠳᠡᠭ ᠪᠣᠯᠪᠠ᠃ ᠡᠢᠮᠦ ᠡᠴᠡ ᠶᠤᠸᠠᠨ ᠤᠯᠤᠰ ᠲᠣᠭᠲᠠᠭᠤᠨ ᠭᠠᠯ ᠤ᠋ᠨ ᠳᠦᠷᠰᠦ ᠪᠡᠷ ᠶᠠᠮᠠᠷ ᠨᠢᠭᠡᠨ ᠣᠨᠴᠠᠭᠠᠢ ᠤᠳᠬᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠶᠦᠮ ᠤᠤ ᠡᠰᠡᠬᠦᠯᠡ ᠲᠡᠷᠡ ᠦᠶᠡ ᠳ᠋ᠦ᠍ ᠭᠠᠯ ᠤ᠋ᠨ ᠳᠦᠷᠰᠦ ᠶ᠋ᠢ ᠲᠣᠭᠲᠠᠭᠤᠨ ᠭᠠᠯ ᠤ᠋ᠨ ᠳᠦᠷᠰᠦ ᠪᠡᠷ ᠢᠯᠡᠳᠬᠡᠳᠡᠭ ᠪᠠᠢᠭᠰᠠᠨ ᠶᠤᠮ ᠤᠤ ᠭᠡᠳᠡᠭ ᠢ᠋ ᠴᠢᠨᠠᠭᠰᠢᠳᠠ ᠰᠤᠳᠤᠯᠤᠭᠤᠰᠢᠲᠠᠢ᠃
(ᠬᠣᠶᠠᠷ) ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠤᠮᠤᠨ ᠬᠢᠯᠣᠪᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠲᠣᠮᠣ ᠬᠠᠪᠲᠠᠭᠠᠢ ᠲᠣᠭᠣᠷᠢᠭ ᠳᠦᠷᠰᠦ (ᠵᠢᠷᠤᠭ 4) ᠶ᠋ᠢ ᠪᠠᠢᠷᠢᠯᠠᠭᠤᠯᠵᠠᠢ᠃ ᠡᠭᠦᠨ ᠢ ᠮᠣᠩᠭᠣᠯᠴᠤᠳ ᠠᠯᠢ ᠡᠷᠲᠡᠨ ᠡᠴᠡ ᠨᠠᠷᠠ ᠪᠠ ᠨᠠᠷᠠᠨ ᠤ᠋ ᠳᠦᠷᠰᠦ ᠶ᠋ᠢ ᠰᠢᠲᠦᠳᠡᠭ ᠡᠴᠡ ᠪᠣᠯᠵᠤ ᠴᠠᠭᠠᠨ ᠲᠤᠭ ᠤ᠋ᠨ ᠬᠢᠯᠣᠪᠠᠷ ᠲᠤ᠌ ᠨᠠᠷᠠᠨ ᠤ᠋ ᠳᠦᠷᠰᠦ ᠶ᠋ᠢ ᠭᠠᠷᠭᠠᠳᠠᠭ ᠵᠠᠩᠰᠢᠯ ᠠ᠋ᠴᠠ ᠦᠵᠡᠪᠡᠯ ᠡᠨᠡ ᠨᠢ ᠳᠠᠷᠤᠢ ᠨᠠᠷᠠᠨ ᠤ᠋ ᠳᠦᠷᠰᠦ ᠮᠥᠨ᠃ ᠭᠡᠲᠡᠯᠡ ᠪᠠᠰᠠ ᠲᠣᠮᠣ ᠬᠠᠪᠲᠠᠭᠠᠢ ᠲᠣᠭᠣᠷᠢᠭ ᠤ᠋ᠨ ᠳᠥᠷᠪᠡᠨ ᠲᠠᠯᠠ ᠳ᠋ᠤ᠌ ᠳᠥᠷᠪᠡᠨ ᠦᠵᠦᠭᠦᠷ ᠪᠤᠯᠲᠠᠢᠨ ᠭᠠᠷᠤᠭᠰᠠᠨ ᠨᠢ ᠭᠠᠢᠬᠠᠯᠲᠠᠢ᠃ ᠬᠡᠳᠦᠢ ᠡᠢᠮᠦ ᠪᠣᠯᠪᠠᠴᠤ ᠪᠢᠳᠡ ᠰᠤᠳᠤᠯᠤᠨ ᠰᠢᠨᠵᠢᠯᠡᠪᠡᠯ ᠲᠡᠭᠦᠨ ᠤ ᠤᠴᠢᠷ ᠢ᠋ ᠮᠡᠳᠡᠵᠦ ᠪᠣᠯᠬᠤ ᠶᠤᠮ᠃ ᠡᠨᠡ ᠲᠣᠮᠣ ᠬᠠᠪᠲᠠᠭᠠᠢ ᠲᠣᠭᠣᠷᠢᠭ ᠢ᠋ ᠨᠠᠷᠢᠨ ᠠᠵᠢᠭᠯᠠᠪᠠᠯ ᠲᠡᠭᠦᠨ ᠤ ᠨᠢᠭᠤᠷ ᠲᠠᠯᠠ ᠳᠡᠭᠡᠷᠡ ᠨᠢᠭᠡ x ᠳᠦᠷᠰᠦ (ᠵᠢᠷᠤᠭ 5) ᠵᠢᠭᠠᠬᠠᠨ ᠭᠦᠷᠡᠭᠡᠷ ᠦᠵᠡᠭᠳᠡᠵᠦ (ᠭᠡᠪᠡᠴᠦ ᠲᠡᠢᠮᠦ ᠲᠣᠳᠣ ᠪᠢᠰᠢ)᠂ ᠪᠠᠰᠠ ᠡᠨᠡ х ᠳᠦᠷᠰᠦ ᠶ᠋ᠢᠨ ᠳᠥᠷᠪᠡᠨ ᠦᠵᠦᠭᠦᠷ ᠨᠢ ᠲᠣᠮᠣ ᠬᠠᠪᠲᠠᠭᠠᠢ ᠲᠣᠭᠣᠷᠢᠭ ᠤᠨ ᠳᠥᠷᠪᠡᠨ ᠲᠠᠯᠠ ᠳ᠋ᠤᠨᠢ ᠪᠤᠯᠲᠠᠢᠨ ᠭᠠᠷᠤᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠢ᠋ ᠨᠣᠮ ᠪᠢᠴᠢᠭ ᠳᠡᠭᠡᠷ ᠡᠴᠡ ᠬᠠᠢᠨ ᠦᠵᠡᠪᠡᠯ ᠡᠨᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢᠨ ᠲᠤᠭ( ᠵᠢᠷᠤᠭ 6) ᠲᠠᠢ ᠠᠳᠠᠯᠢ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠶᠤᠸᠠᠨ ᠤᠯᠤᠰ ᠬᠢᠮᠡᠯ ᠴᠠᠭᠠᠨ ᠲᠤᠭ ᠢ᠋ ᠦᠢᠯᠡᠳᠬᠦ ᠳ᠋ᠦ᠍ ᠲᠡᠭᠦᠨ ᠤ ᠰᠤᠮᠤᠨ ᠬᠢᠯᠣᠪᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠡᠨᠡ ᠬᠦ᠌ x ᠳᠦᠷᠰᠦ ᠶ᠋ᠢ ᠨᠠᠷᠠᠨ ᠤ᠋ ᠳᠦᠷᠰᠦ ᠲᠡᠢ ᠳᠠᠪᠬᠤᠷᠳᠠᠭᠤᠯᠤᠨ ᠪᠠᠢᠷᠢᠯᠠᠭᠤᠯᠵᠤ᠂ ᠶᠠᠮᠠᠷ ᠨᠢᠭᠡᠨ ᠣᠨᠴᠠᠭᠠᠢ ᠤᠳᠬᠠ ᠶ᠋ᠢ ᠢᠯᠡᠳᠬᠡᠵᠡᠢ ᠭᠡᠵᠦ ᠮᠡᠳᠡᠵᠦ ᠪᠣᠯᠤᠨᠠ᠃ ᠡᠨᠳᠡ ᠣᠨᠴᠠᠭᠠᠢᠯᠠᠨ ᠳᠤᠷᠠᠳᠤᠭᠤᠰᠢᠲᠠᠢ ᠨᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠡᠴᠡ ᠶᠤᠸᠠᠨ ᠤᠯᠤᠰ ᠬᠢᠮᠡᠯ ᠴᠠᠭᠠᠨ ᠲᠤᠭ ᠢ᠋ ᠦᠢᠯᠡᠳᠬᠦ ᠳ᠋ᠦ᠍ ᠨᠠᠷᠠᠨ ᠳᠦᠷᠰᠦ ᠶ᠋ᠢ ᠲᠣᠮᠣ ᠭᠠᠷᠭᠠᠵᠤ᠂ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠠᠭᠤᠯᠭᠠ ᠶ᠋ᠢ ᠲᠣᠪᠣᠢᠯᠭᠠᠭᠰᠠᠨ ᠮᠥᠷᠲᠡᠭᠡᠨ ᠴᠠᠭᠠᠨ ᠲᠤᠭ ᠪᠣᠯ ᠨᠠᠷᠠᠨ ᠤ᠋ ᠰᠢᠲᠦᠯᠭᠡ(ᠬᠡᠯᠡᠯᠭᠡᠨ ᠦᠭᠡᠢ ᠰᠠᠷᠠ᠂ ᠲᠡᠭᠷᠢ ᠶ᠋ᠢᠨ ᠰᠢᠲᠦᠯᠭᠡ ᠪᠠᠢᠵᠤ ᠪᠣᠯᠤᠨᠠ) ᠠ᠋ᠴᠠ ᠢᠷᠡᠯᠲᠡᠢ ᠭᠡᠰᠡᠨ ᠢ᠋ ᠣᠢᠯᠠᠭᠠᠵᠤ ᠪᠣᠯᠤᠨᠠ᠃
(ᠭᠤᠷᠪᠠ) ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠨᠣᠮ ᠤᠨ ᠬᠡᠯᠪᠡᠷᠢᠲᠦ ᠬᠢᠯᠣᠪᠠᠷ(ᠵᠢᠷᠤᠭ7) ᠤᠨ ᠬᠣᠶᠠᠷ ᠦᠵᠦᠭᠦᠷ ᠲᠦ᠍ ᠨᠢ ᠭᠠᠯ ᠤ᠋ᠨ ᠳᠦᠷᠰᠦ ᠭᠠᠷᠭᠠᠭᠰᠠᠨ ᠦᠭᠡᠢ ᠪᠠᠢᠨᠠ᠃ ᠡᠨᠡ ᠨᠢ ᠤᠤᠯ ᠰᠣᠶᠣᠯ ᠤ᠋ᠨ ᠠᠭᠤᠯᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠪᠣᠯᠤᠯᠲᠠᠢ᠃ ᠭᠡᠪᠡᠴᠦ ᠰᠡᠭᠦᠯ ᠦᠶᠡ ᠶ᠋ᠢᠨ ᠴᠠᠭᠠᠨ ᠲᠤᠭ ᠤ᠋ᠨ ᠨᠣᠮᠤᠨ ᠬᠡᠯᠪᠡᠷᠢᠲᠦ ᠬᠢᠯᠣᠪᠠᠷ ᠤ᠋ᠨ ᠬᠣᠶᠠᠷ ᠦᠵᠦᠭᠦᠷ ᠲᠦ᠍ ᠨᠢ ᠪᠠᠳᠠᠷᠠᠬᠤ ᠭᠠᠯ ᠤ᠋ᠨ ᠳᠦᠷᠰᠦ ᠶ᠋ᠢ ᠭᠠᠷᠭᠠᠭᠰᠠᠨ ᠪᠠᠢᠳᠠᠭ᠃《ᠮᠣᠩᠭᠣᠯ ᠤᠯᠤᠰ ᠲᠤ᠌ ᠲᠠᠬᠢᠵᠤ ᠪᠠᠢᠭᠰᠠᠨ ᠵᠠᠷᠢᠮ ᠴᠠᠭᠠᠨ ᠲᠤᠭ ᠨᠢ ᠭᠠᠯ ᠳᠥᠯᠥ ᠲᠡᠢ ᠭᠤᠷᠪᠠᠨ ᠦᠵᠦᠭᠦᠷᠲᠦ ᠰᠡᠷᠡᠭᠡ ᠪᠠᠢᠵᠠᠢ᠃ ᠭᠠᠯ ᠤ᠋ᠨ ᠰᠤᠷ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ ᠮᠥᠩᠬᠡᠵᠢᠬᠦ ᠶ᠋ᠢᠨ ᠤᠳᠬᠠᠲᠤ ᠭᠤᠷᠪᠠᠨ ᠳᠥᠯᠥᠲᠦ ᠭᠠᠯ ᠭᠡᠮᠡᠨ ᠲᠠᠢᠯᠪᠤᠷᠢᠯᠠᠵᠠᠢ 》④᠃ ᠡᠨᠡ ᠨᠢ ᠪᠠᠷᠤᠭ ᠱᠠᠰᠢᠨ ᠤ᠋ ᠰᠣᠶᠣᠯ ᠤ᠋ᠨ ᠨᠥᠯᠥᠭᠡ ᠡᠴᠡ ᠪᠣᠯᠤᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠳᠡᠭᠡᠷᠡᠬᠢ ᠰᠢᠨᠵᠢᠯᠡᠯᠲᠡ ᠡᠴᠡ ᠦᠵᠡᠬᠦ ᠳ᠋ᠦ᠍ 《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠤᠮᠤᠨ ᠭᠢᠯᠣᠪᠠᠷ ᠤ᠋ᠨ ᠲᠣᠭᠲᠠᠭᠤᠨ ᠭᠠᠯ ᠤ᠋ᠨ ᠳᠦᠷᠰᠦ᠂ ᠰᠤᠮᠤᠨ ᠬᠢᠯᠣᠪᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡᠬᠢ ᠨᠠᠷᠠᠨ ᠤ᠋ ᠳᠦᠷᠰᠦ ᠪᠠ ᠨᠠᠷᠠᠨ ᠤ᠋ ᠳᠦᠷᠰᠦ ᠲᠡᠢ ᠳᠠᠪᠬᠤᠷᠯᠠᠭᠳᠠᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢᠨ ᠲᠤᠭ ᠤ᠋ᠨ ᠳᠦᠷᠰᠦ᠂ ᠨᠣᠮᠣᠨ ᠤ᠋ ᠳᠦᠷᠰᠦ ᠨᠢ ᠨᠡᠢᠯᠡᠭᠡᠳ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠬᠢᠯᠣᠪᠠᠷ ᠢ᠋ ᠢᠯᠡᠳᠬᠡᠵᠡᠢ᠃
ᠬᠣᠶᠠᠷ᠂ ᠴᠠᠷᠠ
《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠴᠠᠷᠠ ᠶ᠋ᠢ ᠠᠵᠢᠭᠯᠠᠨ ᠰᠢᠨᠵᠢᠯᠡᠪᠡᠯ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠭᠢᠯᠣᠪᠠᠷ ᠤ᠋ᠨ ᠳᠣᠣᠷᠠ ᠲᠠᠯᠠ ᠳ᠋ᠤ᠌ ᠨᠢ ᠳᠡᠭᠡᠷᠡ ᠨᠢᠭᠤᠷ ᠲᠠᠭᠠᠨ ᠶᠢᠰᠦᠨ ᠵᠢᠷᠤᠭᠠᠰᠤ ᠲᠠᠢ ᠵᠤᠤᠪᠠᠭᠠᠷ ᠬᠠᠪᠲᠠᠭᠠᠢ (ᠵᠢᠷᠤᠭ 8) ᠡᠳ᠋ ᠢ᠋ ᠪᠠᠢᠷᠢᠯᠠᠭᠤᠯᠵᠠᠢ᠃ᠡᠭᠦᠨ ᠢ᠋ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠮᠥᠩᠬᠡ ᠶ᠋ᠢᠨ ᠤᠳᠬᠠ ᠲᠠᠢ ᠮᠥᠩᠭᠥ ᠶ᠋ᠢ ᠬᠡᠷᠡᠭᠯᠡᠨ ᠲᠡᠭᠷᠢ ᠶ᠋ᠢ ᠢᠯᠡᠳᠬᠡᠬᠦ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠪᠡᠷ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠬᠢᠯᠦᠪᠠᠷ ᠲᠤ᠌ ᠴᠠᠷᠠ ᠶ᠋ᠢ ᠦᠢᠯᠡᠳᠳᠡᠭ ᠤᠯᠠᠮᠵᠢᠯᠠᠯᠲᠤ ᠵᠠᠩᠰᠢᠯ ᠠ᠋ᠴᠠ ᠦᠵᠡᠪᠡᠯ ᠡᠨᠡ ᠨᠢ ᠳᠠᠷᠤᠢ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠮᠥᠩᠭᠥᠨ ᠴᠠᠷᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠪᠠᠢᠨᠠ᠃ ᠵᠢᠷᠤᠭᠠᠰᠤ ᠨᠢ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ ᠢ᠋ᠶ᠋ᠠᠨ ᠲᠥᠯᠥᠭᠡᠯᠡᠭᠰᠡᠨ ᠤᠳᠬᠠ ᠲᠠᠢ᠃
ᠭᠤᠷᠪᠠ᠂ ᠮᠠᠨᠵᠢᠯᠭᠠ
《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠶ᠋ᠢ ᠠᠵᠢᠭᠯᠠᠨ ᠰᠢᠨᠵᠢᠯᠡᠪᠡᠯ ᠮᠥᠩᠭᠥᠨ ᠴᠠᠷᠠ ᠶ᠋ᠢᠨ ᠳᠦᠷᠰᠦ ᠡᠴᠡ ᠳᠣᠷᠣᠭᠰᠢ ᠬᠤᠢᠯᠠᠷᠠᠨ ᠤᠨᠵᠢᠭᠰᠠᠨ ᠬᠢᠯᠭᠠᠰᠤ ᠶ᠋ᠢ ᠢᠯᠡᠳᠬᠡᠭᠰᠡᠨ ᠥᠨᠳᠥᠷ ᠪᠣᠭᠣᠨᠢ ᠵᠢᠷᠤᠭᠠᠰᠤ (ᠵᠢᠷᠤᠭ9) ᠨᠤᠭᠤᠳ ᠢ᠋ ᠰᠡᠢᠯᠦᠭᠰᠡᠨ ᠪᠠᠢᠨᠠ᠃ ᠡᠭᠦᠨ ᠢ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠮᠥᠩᠭᠥᠨ ᠴᠠᠷᠠ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠡᠬᠢ ᠶᠢᠰᠦ ᠶᠢᠰᠦ ᠶ᠋ᠢᠨ ᠨᠠᠶᠠᠨ ᠨᠢᠭᠡᠨ ᠨᠦᠬᠡ ᠡᠴᠡ ᠣᠩᠭᠤᠨ ᠴᠠᠭᠠᠨ ᠠᠵᠢᠷᠭᠠᠨ ᠤ᠋ ᠬᠥᠬᠥᠯ ᠢ᠋ ᠲᠠᠰᠠᠮᠠ ᠪᠠᠷ ᠰᠦᠯᠵᠢᠨ ᠲᠣᠭᠲᠠᠭᠠᠵᠤ ᠤᠨᠵᠢᠭᠤᠯᠤᠨ ᠬᠢᠳᠡᠭ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ ᠰᠣᠶᠣᠯ ᠠ᠋ᠴᠠ ᠦᠵᠡᠪᠡᠯ ᠡᠨᠡ ᠨᠢ ᠳᠠᠷᠤᠢ ᠣᠩᠭᠤᠨ ᠴᠠᠭᠠᠨ ᠠᠵᠢᠷᠭᠠᠨ ᠤ᠋ ᠬᠥᠬᠥᠯ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠮᠠᠨᠵᠢᠯᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠪᠠᠢᠨᠠ᠃
ᠳᠥᠷᠪᠡ᠂ ᠰᠢᠯᠪᠢ
《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ (ᠵᠢᠷᠤᠭ 10) ᠶ᠋ᠢ ᠠᠵᠢᠭᠯᠠᠨ ᠰᠢᠨᠵᠢᠯᠡᠪᠡᠯ ᠮᠥᠩᠭᠥᠨ ᠴᠠᠷᠠ ᠶ᠋ᠢᠨ ᠳᠦᠷᠰᠦ ᠶ᠋ᠢᠨ ᠳᠣᠣᠷᠠ ᠲᠠᠯᠠ ᠳ᠋ᠤ᠌ ᠰᠢᠯᠪᠢ ᠭᠠᠷᠭᠠᠭᠰᠠᠨ ᠦᠭᠡᠢ ᠪᠠᠢᠨᠠ᠃ ᠡᠨᠡ ᠨᠢ ᠵᠥᠪᠬᠡᠨ ᠴᠠᠭᠠᠨ ᠲᠤᠭ ᠢ᠋ ᠵᠢᠷᠤᠵᠤ ᠳᠦᠷᠰᠦᠯᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠭᠰᠡᠨ ᠡᠩ ᠤᠨ ᠠᠷᠭᠠ ᠲᠡᠳᠦᠢ ᠡᠴᠡ ᠪᠢᠰᠢ ᠴᠠᠭᠠᠨ ᠲᠤᠭ ᠲᠤ᠌ ᠰᠢᠯᠪᠢ ᠦᠭᠡᠢ ᠭᠡᠰᠡᠨ ᠶᠠᠪᠤᠳᠠᠯ ᠣᠭᠲᠣ ᠪᠢᠰᠢ ᠶᠦᠮ᠃ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠬᠠᠷᠠ ᠲᠤᠭ ᠤ᠋ᠨ ᠰᠢᠯᠪᠢ ᠳ᠋ᠦ᠍ ᠴᠠᠭᠠᠨ ᠰᠢᠷ ᠰᠠᠭᠤᠯᠭᠠᠭᠰᠠᠨ ᠪᠠᠢᠳᠠᠭ ᠠ᠋ᠴᠠ ᠠᠪᠴᠤ ᠬᠡᠯᠡᠪᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠢᠯᠪᠢ ᠶ᠋ᠢ ᠮᠥᠨ ᠮᠣᠳᠣ ᠪᠠᠷ ᠬᠢᠵᠦ᠂ ᠴᠠᠭᠠᠨ ᠪᠣᠳᠣᠭ ᠰᠠᠭᠤᠯᠭᠠᠭᠰᠠᠨ ᠪᠠᠢᠬᠠ᠃
ᠳᠡᠭᠡᠷᠡ ᠪᠢᠳᠡ 《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》 ᠳᠡᠭᠡᠷᠡᠬᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠰᠡᠷᠡᠭᠡ ᠭᠢᠯᠣᠪᠠᠷ᠂ ᠮᠥᠩᠭᠥᠨ ᠴᠠᠷᠠ ᠪᠣᠯᠤᠨ ᠮᠠᠨᠵᠢᠯᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠳᠦᠷᠰᠦ ᠶ᠋ᠢ ᠲᠤᠰ ᠲᠤᠰ ᠢ᠋ᠶ᠋ᠠᠷ ᠨᠢ ᠵᠠᠳᠠᠯᠤᠨ ᠰᠢᠨᠵᠢᠯᠡ᠃ ᠡᠨᠡ ᠬᠦ᠌ ᠵᠠᠳᠠᠯᠤᠨ ᠰᠢᠨᠵᠢᠯᠡᠯᠲᠡ ᠶ᠋ᠢᠨ ᠳ᠋ᠦᠩ ᠡᠴᠡ ᠶᠤᠸᠠᠨ ᠤᠯᠤᠰ᠂ ᠬᠢᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠦᠢᠯᠡᠳᠬᠦ ᠰᠣᠶᠣᠯ ᠢ᠋ ᠬᠥᠭᠵᠢᠭᠦᠯᠦᠯᠲᠡ ᠲᠡᠢ ᠪᠡᠷ ᠵᠠᠯᠭᠠᠮᠵᠢᠯᠠᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠣᠯᠵᠤ ᠬᠠᠷᠠᠯᠠ᠃ ᠪᠣᠳᠠᠲᠠᠢ ᠪᠠᠷ ᠬᠡᠯᠡᠪᠡᠯ ᠲᠡᠷᠡ ᠦᠶᠡ ᠳ᠋ᠦ᠍ ᠰᠤᠮᠤᠨ ᠬᠡᠯᠪᠡᠷᠢᠲᠦ ᠲᠡᠮᠦᠷᠯᠢᠭ ᠡᠳ᠋ ᠤᠨ ᠦᠵᠦᠭᠦᠷ ᠲᠦ᠍ ᠨᠢ ᠲᠣᠭᠲᠠᠭᠤᠨ ᠭᠠᠯ ᠤ᠋ᠨ ᠳᠦᠷᠰᠦ ᠶ᠋ᠢ ᠭᠠᠷᠭᠠᠵᠤ᠂ ᠳᠤᠮᠳᠠ ᠪᠡᠶᠡ ᠳᠡᠭᠡᠷᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢᠨ ᠲᠤᠭ ᠤ᠋ᠨ ᠳᠦᠷᠰᠦ ᠶ᠋ᠢ ᠨᠠᠷᠠᠨ ᠤ᠋ ᠳᠦᠷᠰᠦ ᠲᠡᠢ ᠳᠠᠪᠬᠤᠷᠳᠠᠭᠤᠯᠤᠨ ᠪᠠᠢᠷᠢᠯᠠᠭᠤᠯᠵᠤ᠂ ᠡᠰᠢᠨ ᠳ᠋ᠦ᠍ ᠨᠢ ᠨᠣᠮ ᠤᠨ ᠬᠡᠯᠪᠡᠷᠢᠲᠦ ᠲᠡᠮᠦᠷᠯᠢᠭ ᠡᠳ᠋ ᠢ᠋ ᠳᠠᠭᠠᠷᠠᠭᠤᠯᠤᠭᠰᠠᠨ ᠰᠡᠷᠡᠭᠡ ᠭᠢᠯᠦᠪᠠᠷ ᠢ᠋ ᠦᠢᠯᠡᠳᠴᠡᠢ᠃ ᠡᠨᠡ ᠬᠦ᠌ ᠰᠡᠷᠡᠭᠡ ᠬᠢᠯᠦᠪᠠᠷ ᠢ᠋ᠶ᠋ᠠᠨ ᠮᠥᠩᠭᠥᠨ ᠴᠠᠷᠠ ᠶ᠋ᠢᠨ ᠲᠥᠪ ᠳᠤᠮᠳᠠ ᠨᠢ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠰᠠᠭᠤᠯᠭᠠᠵᠤ᠂ ᠮᠥᠩᠭᠥᠨ ᠴᠠᠷᠠ ᠶ᠋ᠢᠨ ᠬᠥᠪᠡᠭᠡᠨ ᠡᠴᠡ ᠣᠩᠭᠤᠨ ᠴᠠᠭᠠᠨ ᠠᠵᠢᠷᠭᠠᠨ ᠤ ᠬᠥᠬᠥᠯ ᠢ᠋ᠶ᠋ᠡᠷ ᠬᠢᠭᠰᠡᠨ ᠮᠠᠨᠵᠢᠯᠭᠠ ᠶ᠋ᠢ ᠤᠨᠵᠢᠭᠤᠯᠵᠤ᠂ ᠴᠠᠷᠠ ᠶ᠋ᠢᠨ ᠳᠣᠣᠷᠠ ᠨᠢ ᠴᠠᠭᠠᠨ ᠪᠣᠳᠣᠭ ᠰᠠᠭᠤᠯᠭᠠᠭᠰᠠᠨ ᠮᠤᠳᠤᠨ ᠰᠢᠯᠪᠢ ᠶ᠋ᠢ ᠤᠭᠰᠠᠷᠠᠭᠤᠯᠵᠤ᠂ ᠬᠢᠮᠡᠯ ᠴᠠᠭᠠᠨ ᠲᠤᠭ ᠦᠢᠯᠡᠳᠴᠦ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠾᠦᠩᠨᠦ ᠶ᠋ᠢᠨ ᠲᠥᠷᠥ ᠶ᠋ᠢᠨ ᠲᠤᠭ ᠲᠤ᠌ ᠵᠠᠰᠠᠯᠲᠠ ᠬᠢᠬᠦ ᠳ᠋ᠦ᠍ ᠪᠦᠲᠦᠭᠡᠭᠰᠡᠨ ᠦᠢᠯᠡᠳᠬᠦ ᠰᠣᠶᠣᠯ ᠤ᠋ᠨ ᠠᠭᠤᠯᠭᠠ ᠶ᠋ᠢ ᠪᠦᠷ ᠵᠠᠯᠭᠠᠮᠵᠢᠯᠠᠭᠰᠠᠨ ᠪᠠᠢᠨᠠ᠃ ᠭᠡᠪᠡᠴᠦ ᠶᠤᠸᠠᠨ ᠤᠯᠤᠰ ᠨᠢ ᠱᠠᠰᠢᠨ ᠲᠥᠷᠥ ᠶ᠋ᠢ ᠵᠡᠷᠭᠡᠪᠡᠷ ᠳᠡᠯᠭᠡᠷᠡᠭᠦᠯᠬᠦ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠪᠣᠯᠬᠣᠷ ᠬᠢᠮᠡᠯ ᠴᠠᠭᠠᠨ ᠲᠤᠭ ᠢ᠋ ᠦᠢᠯᠡᠳᠦᠨ ᠪᠦᠲᠦᠭᠡᠬᠦ ᠳ᠋ᠦ᠍ ᠪᠠᠰᠠ ᠱᠠᠰᠢᠨ ᠰᠤᠷᠲᠠᠬᠤᠨ ᠤ᠋ ᠰᠣᠶᠣᠯ ᠤ᠋ᠨ ᠡᠯᠧᠮᠧᠨ᠋ᠲ ᠦ᠋ᠳ ᠨᠠᠪᠴᠢᠨ ᠣᠷᠣᠭᠰᠠᠨ ᠪᠠᠢᠨᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠨᠡ ᠬᠦ᠌ ᠱᠠᠰᠢᠨ ᠰᠤᠷᠲᠠᠬᠤᠨ ᠤ᠋ ᠰᠣᠶᠣᠯ ᠤ᠋ᠨ ᠡᠯᠧᠮᠧᠨ᠋ᠲ ᠨᠢ ᠯᠠᠪ ᠵᠣᠬᠢᠬᠤ ᠨᠢᠭᠡᠨ ᠤᠳᠬᠠ ᠰᠠᠨᠠᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠪᠠᠢᠬᠠ᠃
ᠡᠷᠳᠡᠮᠲᠡᠨ ᠮᠡᠷᠭᠡᠳ ᠤᠨ ᠮᠠᠷᠭᠤᠨ ᠥᠭᠦᠯᠡᠬᠦ ᠶ᠋ᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠬᠦᠰᠡᠵᠦ ᠪᠠᠢᠨᠠ᠃
ᠵᠡᠭᠦᠯᠲᠡ
① 《ᠶᠤᠸᠠᠨ ᠤᠯᠤᠰ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》ᠪᠣᠯ ᠡᠮᠦᠨᠡ ᠨᠢᠭᠤᠷ ᠲᠤ᠌ ᠨᠢ ᠰᠡᠢᠯᠦᠮᠡᠯ ᠴᠠᠭᠠᠨ ᠲᠤᠭ ᠤ᠋ᠨ ᠳᠦᠷᠢ ᠶ᠋ᠢ ᠮᠠᠨᠳᠤᠭᠤᠯᠵᠤ᠂ ᠠᠷᠤ ᠨᠢᠭᠤᠷ ᠲᠤ᠌ ᠨᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠰᠡᠢᠯᠦᠭᠰᠡᠨ᠂ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠬᠦᠨᠳᠦᠲᠡᠢ ᠬᠠᠮᠤᠭ ᠤ᠋ᠨ ᠡᠷᠬᠡ ᠰᠦᠷᠲᠦ ᠫᠠᠢᠰᠠ ᠪᠣᠯᠤᠨᠠ᠃ ᠡᠨᠡ ᠨᠢ ᠰᠤᠳᠤᠯᠭᠠᠨ ᠤ᠋ ᠦᠨᠡ ᠥᠷᠲᠡᠭ ᠢ᠋ᠶ᠋ᠡᠷ ᠥᠨᠳᠥᠷ᠂ ᠬᠣᠪᠣᠷ ᠨᠠᠨᠳᠢᠨ ᠳᠤᠷᠠᠰᠬᠠᠯᠲᠤ ᠡᠳ᠋ ᠪᠣᠯᠬᠤ ᠨᠢ ᠢᠯᠡᠷᠬᠡᠢ ᠪᠠᠢᠨᠠ᠃ ᠬᠡᠷᠪᠡ 《ᠡᠷᠲᠡᠨ ᠤ ᠬᠥᠰᠢᠶᠡ ᠪᠢᠴᠢᠭᠡᠰᠦ》 ᠶᠢ ᠦᠨᠡ ᠥᠷᠲᠡᠭ ᠲᠡᠢ ᠭᠡᠳᠡᠭ ᠶᠦᠮ ᠪᠣᠯ 《ᠵᠠᠷᠯᠢᠭ ᠤ᠋ᠨ ᠠᠯᠲᠠᠨ ᠫᠠᠢᠰᠠ》ᠲᠡᠭᠦᠨ ᠡᠴᠡ ᠵᠠᠭᠤ ᠳᠠᠬᠢᠨ ᠦᠨᠡ ᠥᠷᠲᠡᠭ ᠲᠡᠢ᠃ ᠲᠡᠭᠦᠨ ᠤ ᠠᠷᠤ ᠨᠢᠭᠤᠷ ᠳᠡᠭᠡᠷᠡ ᠰᠡᠢᠯᠦᠭᠰᠡᠨ ᠵᠠᠷᠯᠢᠭ ᠤ᠋ᠨ ᠦᠭᠡᠰ ᠪᠣᠯᠬᠤ 《※※※※》(ᠳᠠᠭᠠᠯᠲᠠ ᠵᠢᠷᠤᠭ) ᠢ ᠬᠢᠴᠢᠶᠡᠩᠭᠦᠢᠯᠡᠨ ᠣᠷᠴᠢᠭᠤᠯᠪᠠᠯ 《ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦ᠍ᠷ ᠡᠷᠳᠦᠭᠰᠡᠨ ᠶᠡᠬᠡ ᠲᠥᠷᠥ ᠶ᠋ᠢᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠲᠤᠰ ᠫᠠᠢᠰᠠ ᠶ᠋ᠢ ᠪᠠᠷᠢᠭᠴᠢ ᠦᠢᠯᠡ ᠶ᠋ᠢ ᠳᠥᠭᠥᠮ ᠢ᠋ᠶ᠋ᠡᠷ ᠭᠦᠢᠴᠡᠳᠬᠡᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠪᠣᠭᠳᠠ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠬᠦᠷᠭᠡᠲᠦᠭᠡᠢ》ᠭᠡᠰᠡᠨ ᠤᠳᠬᠠ ᠲᠠᠢ ᠪᠠᠢᠨᠠ᠃
② ᠲᠤᠭᠴᠢᠳ ᠪᠣᠯ ᠬᠡᠪᠲᠡᠭᠦᠯ ᠤᠨ ᠬᠣᠢᠴᠢᠰ ᠪᠣᠯᠤᠨᠠ᠃ ᠬᠡᠪᠲᠡᠭᠦᠯ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠵᠤ᠂ 《ᠲᠤᠭ ᠬᠡᠩᠭᠡᠷᠭᠡ ᠪᠦᠷᠢᠶᠡ ᠵᠢᠳᠠ ᠶ᠋ᠢ ᠬᠡᠪᠲᠡᠭᠦᠯ ᠬᠠᠮᠢᠶᠠᠷᠲᠤᠭᠠᠢ》 ᠭᠡᠰᠡᠨ ᠵᠠᠷᠯᠢᠭ ᠢ᠋ ᠪᠠᠭᠤᠯᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠤᠰᠬᠠᠢᠯᠠᠨ ᠴᠠᠭᠠᠨ ᠲᠤᠭ ᠢ᠋ ᠬᠠᠮᠢᠶᠠᠷᠳᠠᠭ ᠴᠡᠷᠢᠭ ᠪᠣᠯᠤᠨᠠ᠃ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠡᠨᠡ ᠬᠦ᠌ ᠳᠦᠷᠢᠮ ᠢ᠋ ᠦᠷᠭᠦᠯᠵᠢᠯᠡᠨ ᠬᠡᠷᠡᠭᠵᠢᠭᠦᠯᠵᠡᠢ᠃ ᠬᠡᠪᠲᠡᠭᠦᠯ ᠪᠣᠯ ᠬᠡᠰᠢᠭᠲᠡᠨ ᠴᠡᠷᠢᠭ ᠤᠨ ᠨᠢᠭᠡ ᠰᠠᠯᠪᠤᠷᠢ ᠨᠢ ᠪᠣᠯᠤᠨᠠ᠃ ᠣᠯᠠᠨ ᠣᠪᠣᠭ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠶᠦᠮ᠃ ᠶᠤᠸᠠᠨ ᠤᠯᠤᠰ ᠤ᠋ᠨ ᠯᠢᠭᠳᠡᠨ ᠬᠠᠭᠠᠨ ᠤ᠋ ᠴᠠᠭᠠᠨ ᠲᠤᠭ ᠢ᠋ ᠬᠠᠮᠠᠭᠠᠯᠠᠭᠠᠳ ᠣᠷᠳᠣᠰ ᠲᠤ᠌ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠮᠢᠩᠭᠠᠨ ᠬᠥᠮᠦᠰ ᠲᠦ᠍ ᠬᠦᠢᠳ᠂ ᠲᠥᠯᠥᠩᠭᠦᠰ᠂ ᠲᠤᠭᠴᠢᠨ᠂ ᠬᠠᠳᠠᠴᠢᠨ᠂ ᠶᠠᠩᠭᠠᠭᠠᠳ᠂ ᠤᠨᠤᠭᠠᠴᠢᠨ᠂ ᠬᠣᠷᠴᠢᠨ᠂ ᠰᠢᠨᠡᠳ᠂ ᠣᠩᠨᠢᠭᠤᠳ᠂ ᠰᠢᠷᠭᠠ ᠠᠵᠢᠷᠭᠠᠳᠠᠨ ᠵᠡᠷᠭᠡ ᠣᠪᠣᠭ ᠠᠢᠮᠠᠭ ᠤ᠋ᠨ ᠬᠢᠨ ᠪᠣᠢ᠃ ᠡᠳᠡᠨ ᠤ ᠬᠤᠢᠴᠢ ᠦᠶᠡ ᠨᠢ ᠣᠳᠣ ᠴᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠴᠠᠭᠠᠨ ᠲᠤᠭ ᠢ᠋ᠶ᠋ᠠᠨ ᠳᠠᠬᠢᠭ᠍ᠰᠠᠭᠠᠷ ᠪᠣᠢ᠃
③ ᠰᠠᠢᠨᠵᠢᠷᠭᠠᠯ: 《ᠮᠣᠩᠭᠣᠯ ᠲᠠᠬᠢᠯᠭᠠ》᠂ ᠦᠨᠳᠦᠰᠦᠲᠡᠨ ᠤ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 2001 ᠣᠨ᠂ 293᠂ 293 ᠳ᠋ᠤᠭᠠᠷ ᠨᠢᠭᠤᠷ᠃
④ ᠪᠠᠲᠤᠰᠡᠴᠡᠨ: 《ᠮᠥᠩᠬᠡ ᠵᠤᠯᠠ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ ᠬᠡᠪᠯᠡᠯ ᠤᠨ ᠬᠣᠷᠢᠶᠠ᠂ 2009 ᠣᠨ᠂ 39 ᠳ᠋ᠦ᠍ᠭᠡᠷ ᠨᠢᠭᠤᠷ᠃
2014 ᠣᠨ ᠤ᠋ 5 ᠰᠠᠷᠠ
【ᠵᠣᠬᠢᠶᠠᠯ ᠤ᠋ᠨ ᠲᠠᠨᠢᠯᠴᠠᠭᠤᠯᠭᠠ】 ᠲᠤᠰ ᠥᠭᠦᠯᠡᠯ《ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠡᠳᠦᠷ ᠤᠨ ᠰᠣᠨᠢᠨ》 ᠤ᠋ 《ᠰᠣᠶᠣᠯ ᠭᠠᠷᠠᠭ ᠤ᠋ᠨ ᠬᠡᠪᠯᠡᠯ》ᠤᠨ ᠲᠠᠯᠠᠨ ᠳᠥᠷᠪᠡᠳᠦᠭᠡᠷ ᠬᠤᠭᠤᠴᠠᠭᠠ ᠪᠣᠯᠤᠨ 《ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠵᠢᠯ ᠮᠡᠷᠭᠡᠵᠢᠯ ᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠡᠳᠬᠦᠯ) (2014 ᠣᠨ) ᠦᠨ ᠬᠣᠶᠠᠳᠤᠭᠠᠷ ᠬᠤᠭᠤᠴᠠᠭᠠ ᠳᠡᠭᠡᠷᠡ ᠨᠡᠢᠲᠡᠯᠡᠭᠳᠡᠵᠦ ᠥᠩᠭᠡᠷᠡᠵᠡᠢ᠃
ᠵᠣᠬᠢᠶᠠᠭᠴᠢ
※ᠳᠠᠭᠠᠠᠯᠲᠠ ᠵᠢᠷᠤᠭ
