ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠲᠠᠪᠤ> Хүлэг баатар буурч - Б. Өлзийсүрэн <Тэргүүн бүлэг-5>
86ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠲᠠᠪᠤ ᠂ ᠡᠷᠢᠵᠦ ᠭᠠᠷᠪᠠᠯ ᠣᠯᠤᠨᠠ ᠡᠬᠢᠯᠡᠵᠦ ᠣᠷᠣᠯᠳᠣᠪᠠᠯ ᠪᠦᠲᠦᠨᠡ
ᠥᠷᠯᠥᠭᠡ ᠦᠦᠷ ᠢ᠋ᠶ᠋ᠡᠷ ᠤᠨᠤᠭᠠ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠵᠤ ᠤᠶᠠᠪᠠ᠃ ᠨᠠᠭᠠᠳᠤᠮ ᠤ᠋ᠨ ᠰᠡᠭᠦᠯᠴᠢ ᠡᠳᠦᠷ᠃ ᠨᠠᠷᠠ ᠨᠡᠯᠢᠶᠡᠳ ᠳᠡᠭᠡᠭᠰᠢ ᠬᠥᠭᠡᠷᠦᠭᠡᠳ ᠢᠷᠡᠬᠦᠯᠡᠷ ᠭᠡᠭᠦᠦ ᠪᠡᠨ ᠰᠠᠭᠠᠵᠤ ᠰᠠᠭᠠᠮᠠ ᠪᠠᠨ ᠰᠡᠯᠪᠢᠯᠡ᠃ ᠨᠠᠬᠤ ᠠᠪᠤ ᠬᠣᠶᠠᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠮᠣᠷᠢᠳ ᠢ᠋ ᠨᠢ ᠤᠨᠤᠭᠤᠯᠤᠭᠠᠳ ᠨᠠᠭᠠᠳᠤᠮ ᠥᠭᠡᠳᠡ ᠳᠠᠭᠠᠭᠤᠯᠤᠨ ᠶᠠᠪᠤᠵᠤ᠂ ᠪᠣᠭᠣᠷᠴᠢ ᠥᠷᠯᠥᠭᠡ ᠡᠷᠲᠡ ᠲᠠᠯᠪᠢᠵᠤ ᠥᠷᠭᠡᠰᠦ ᠬᠠᠵᠠᠭᠤᠯᠤᠭᠰᠠᠨ ᠬᠣᠶᠠᠷ ᠲᠡᠮᠡᠭᠡ ᠪᠡᠨ ᠠᠪᠴᠢᠷᠠᠵᠤ ᠭᠠᠳᠠᠨᠠ ᠪᠠᠨ ᠤᠶᠠᠭᠠᠳ ᠵᠡᠭᠦᠨ ᠵᠦᠭ ᠬᠠᠷᠠᠪᠠᠯ ᠨᠣᠭᠣᠭᠠᠨ ᠤ᠋ ᠬᠥᠭᠡᠩᠭᠢ ᠴᠡᠩᠬᠡᠷᠲᠦᠬᠦ ᠤᠨᠢᠶᠠᠷ ᠳᠤᠮᠳᠠ ᠲᠡᠭᠦᠨ ᠦ᠌ ᠬᠠᠢᠷᠠ ᠰᠡᠳᠬᠢᠯ ᠦ᠋ᠨ ᠰᠢᠨᠡᠬᠡᠨ ᠴᠡᠴᠡᠭ ᠳᠡᠯᠪᠡᠭᠡᠯᠡᠭᠰᠡᠨ ᠢ᠋ ᠮᠠᠲᠠᠷᠠᠨᠠᠮ᠃
ᠠᠭᠯᠠᠭ ᠬᠡᠭᠡᠷᠡ ᠨᠤᠲᠤᠭ ᠤ᠋ᠨ
ᠠᠩᠭᠢᠷ ᠰᠢᠪᠠᠭᠤᠬᠠᠢ ᠴᠢ
ᠠᠮᠠᠷᠠᠭ ᠬᠠᠢᠷᠠᠲᠤ ᠶ᠋ᠢᠨ ᠤᠶᠠᠭᠠ ᠤᠤ ?
ᠬᠣᠨᠣᠭ ᠤ᠋ᠨ ᠴᠥᠭᠡᠨ ᠲᠣᠬᠢᠶᠠᠯ ᠳ᠋ᠤ᠌
ᠬᠣᠶᠠᠷ ᠪᠡᠶᠡ ᠪᠡᠷ ᠢᠵᠢᠯᠳᠡᠯᠡ
ᠤᠰᠤᠨ ᠤ᠋ ᠭᠦᠨᠡ ᠰᠡᠯᠢᠬᠦ
ᠤᠷᠠᠨ ᠵᠢᠷᠠᠭᠠᠬᠠᠢ ᠠᠳᠠᠯᠢ
ᠬᠤᠳᠳᠤᠭ ᠤ᠋ᠨ ᠲᠤᠩᠭᠠᠯᠠᠭ ᠣᠰᠤᠨᠠ
ᠬᠣᠣᠰ ᠳᠦᠷᠰᠦ ᠪᠡᠷ ᠨᠠᠭᠠᠳᠤᠯᠠ
ᠬᠥᠬᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠬᠠᠯᠢᠬᠤ
ᠬᠤᠨ ᠤ᠋ ᠴᠡᠨ ᠠᠳᠠᠯᠢ
ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠰᠡᠷᠢᠭᠦᠨ ᠢ᠋ᠶ᠋ᠡᠷ
ᠡᠭᠦᠯᠡᠨ ᠪᠣᠷᠣᠭᠠᠨ ᠢ᠋ᠶ᠋ᠠᠷ ᠨᠠᠭᠠᠳᠤᠯᠠ᠃
ᠪᠤᠭᠤᠷᠴᠢ ᠢᠩᠭᠢᠵᠦ ᠪᠣᠳᠣᠯᠠ᠃ ᠲᠡᠭᠡᠭᠡᠳ ᠪᠠᠭᠠ ᠦᠳᠡ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠭᠡᠭᠦᠦ ᠪᠡᠨ ᠰᠠᠭᠠᠭᠠᠳ ᠨᠠᠭᠠᠳᠤᠮ ᠤ᠋ᠨ ᠭᠠᠵᠠᠷ ᠤᠷᠤᠭᠤ ᠮᠠᠨᠠᠷᠠᠭᠠᠯᠠ᠃ ᠰᠡᠭᠦᠯᠴᠢ ᠶ᠋ᠢᠨ ᠦᠵᠦᠭᠦᠷ ᠲᠦᠷᠦᠭᠦᠦ ᠪᠥᠬᠡ ᠨᠣᠴᠣᠯᠳᠤᠵᠤ ᠪᠠᠢᠪᠠ᠃ ᠵᠦᠷᠬᠢᠨ ᠦ᠌ ᠪᠦᠷᠢ ᠪᠥᠬᠡ᠂ ᠲᠦᠮᠡᠨ ᠲᠦᠪᠭᠦᠨ ᠦ᠌ ᠲᠦᠨᠲᠦᠭᠡᠷ ᠬᠦᠷᠡᠩ ᠬᠣᠶᠠᠷ ᠪᠤᠬᠠ ᠠᠳᠠᠯᠢ ᠬᠥᠯᠬᠢᠯᠴᠡᠵᠦ᠂ ᠪᠤᠤᠷᠠ ᠠᠳᠠᠯᠢ ᠱᠦᠷᠭᠦᠴᠡᠯᠳᠦᠨ ᠦᠵᠡᠭᠳᠡᠨᠡ᠃ ᠡᠨᠡ ᠬᠣᠶᠠᠷ ᠮᠣᠷᠢᠳ ᠭᠠᠷᠬᠤ ᠦᠶᠡ ᠳ᠋ᠦ᠍ ᠨᠣᠴᠣᠯᠳᠤᠵᠤ ᠡᠬᠢᠯᠡᠭᠰᠡᠨ ᠭᠡᠨᠡᠮ᠃ ᠴᠠᠭᠠᠰᠢ ᠨᠠᠭᠠᠳᠤᠮ ᠤ᠋ᠨ ᠦᠬᠡᠷ ᠭᠠᠵᠠᠷ ᠤᠷᠤᠭᠤ ᠳᠠᠪᠬᠢᠯᠠ᠃ ᠲᠡᠷᠡ ᠨᠢ ᠨᠤᠮᠤ ᠰᠤᠮᠤᠨ ᠤ᠋ ᠬᠠᠷᠪᠤᠭᠠᠨ ᠪᠣᠯᠵᠤ ᠪᠠᠢᠭᠠ ᠲᠠᠯᠠᠪᠤᠷ᠃ ᠥᠴᠥᠭᠡᠳᠦᠷ ᠪᠠᠢᠲᠤ ᠰᠤᠷ ᠤ᠋ᠨ ᠬᠠᠷᠪᠤᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠬᠡᠷᠦᠯᠳᠵᠢᠨ ᠲᠡᠢ ᠬᠠᠵᠠᠭᠤ ᠪᠠᠷ ᠨᠢ ᠶᠠᠪᠤᠵᠤ ᠲᠠᠪᠬᠢᠭᠠᠨ ᠳᠤᠮᠳᠠ ᠦᠵᠡᠭᠰᠡᠨ᠃ ᠥᠨᠥᠳᠥᠷ ᠵᠠᠢ ᠶ᠋ᠢᠨ ᠬᠠᠷᠪᠤᠭᠠ ᠪᠣᠯᠵᠤ᠂ ᠬᠠᠷᠪᠤᠭᠠᠴᠢ ᠲᠡᠩᠬᠡᠭᠡ ᠮᠡᠳᠡᠨ ᠨᠤᠮᠤ ᠪᠠᠨ ᠡᠪᠰᠢᠶᠡᠯᠭᠡᠵᠦ᠂ ᠲᠩᠷᠢ ᠴᠢᠭᠯᠡᠭᠦᠯᠦᠨ ᠬᠠᠷᠪᠤᠵᠤ ᠬᠡᠨ ᠦ᠌ ᠰᠤᠮᠤ ᠬᠡᠳᠦᠨ ᠠᠯᠲᠠ ᠬᠣᠯᠠ ᠶᠠᠪᠤᠬᠤ ᠶ᠋ᠢ ᠦᠵᠡᠵᠦ ᠪᠠᠢᠭᠠ ᠠᠵᠢ᠃ ᠬᠠᠮᠤᠭ ᠤ᠋ᠨ ᠬᠣᠯᠠ ᠨᠢ ᠭᠤᠷᠪᠠᠨ ᠵᠠᠭᠤᠨ ᠣᠷᠴᠢᠮ ᠠᠯᠲᠠ ᠠ᠋ᠴᠠ ᠳᠠᠪᠠᠬᠤ ᠦᠭᠡᠢ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠥᠭᠡᠷᠡ ᠳᠠᠰᠢ ᠰᠣᠨᠢᠷᠬᠠᠨ ᠳᠠᠪᠬᠢᠯᠠ᠃ ᠰᠠᠷᠠᠨ ᠫᠠᠢ ᠬᠠᠷᠪᠤᠬᠤ ᠨᠠᠭᠠᠳᠤᠮ ᠪᠣᠯᠵᠤ ᠪᠠᠢᠭᠠ ᠭᠠᠵᠠᠷ ᠣᠴᠢᠯᠠ᠃ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠲᠡᠯᠡᠵᠦ ᠲᠠᠲᠠᠭᠰᠠᠨ ᠪᠠᠢ ᠶ᠋ᠢ ᠮᠣᠷᠢᠨ ᠤ᠋ ᠲᠠᠪᠬᠢᠭᠠᠨ ᠳᠤᠮᠳᠠ ᠬᠠᠷᠪᠤᠵᠤ᠂ ᠳᠡᠭᠡᠷᠡ ᠨᠢ ᠵᠢᠷᠤᠭᠰᠠᠨ ᠠᠩ ᠠᠷᠢᠶᠠᠲᠠᠨ ᠤ᠋ ᠳᠦᠷᠰᠦ ᠶ᠋ᠢ ᠬᠠᠮᠢᠭᠠᠭᠤᠷ ᠨᠢ ᠬᠡᠷᠬᠢᠨ ᠤᠨᠤᠭᠰᠠᠨ ᠢ᠋ ᠦᠨᠡᠯᠡᠵᠦ᠂ ᠪᠠᠢ ᠱᠠᠩ ᠢ᠋ ᠨᠢ ᠣᠯᠭᠣᠬᠤ ᠵᠡᠷᠭᠡ ᠤᠷᠤᠯᠳᠤᠭᠠᠨ ᠲᠡᠮᠡᠴᠡᠭᠡᠨ ᠪᠣᠯᠵᠤ ᠪᠠᠢᠨᠠ᠃ ᠰᠡᠯᠡᠮᠡ ᠪᠡᠷ ᠴᠠᠪᠴᠢᠬᠤ᠂ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠰᠢᠭᠦᠷᠬᠦ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠨᠠᠭᠠᠳᠤᠮ ᠳ᠋ᠤ᠌ ᠡᠯᠳᠡᠪ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠬᠥᠮᠦᠰ ᠣᠷᠣᠯᠴᠠᠵᠤ ᠴᠤ᠌ ᠪᠣᠯᠬᠤ ᠶᠠᠩᠵᠤᠲᠠᠢ᠃ ᠠᠷᠤᠯᠠᠳ ᠤ᠋ᠨ ᠬᠢᠨ ᠳ᠋ᠦ᠍ ᠡᠢᠮᠦ ᠲᠡᠮᠡᠴᠡᠭᠡᠨ ᠪᠣᠯᠳᠠᠭ᠂ ᠵᠠᠷᠢᠮ ᠳ᠋ᠤᠨᠢ ᠪᠣᠭᠣᠷᠴᠢ ᠣᠷᠣᠯᠴᠠᠵᠤ ᠦᠵᠡᠭᠰᠡᠨ᠃ ᠵᠠᠩᠭᠢᠳᠤᠭᠰᠠᠨ ᠰᠣᠷᠣᠨ ᠪᠥᠮᠪᠥᠭᠡ ᠮᠣᠷᠢ ᠪᠠᠷ ᠬᠥᠭᠡᠭᠡᠵᠦ ᠴᠣᠬᠢᠬᠤ ᠲᠣᠭᠯᠠᠭᠠᠮ᠂ ᠴᠢᠯᠠᠭᠤ ᠰᠢᠭᠦᠷᠴᠦ ᠪᠠᠢ ᠶ᠋ᠢ ᠰᠢᠳᠡᠬᠦ ᠵᠡᠷᠭᠡ ᠳ᠋ᠦ᠍ ᠪᠣᠭᠣᠷᠴᠢ ᠨᠤᠲᠤᠭ ᠲᠠᠭᠠᠨ ᠣᠷᠣᠯᠴᠠᠵᠤ᠂ ᠰᠦᠷᠡᠬᠡᠢ ᠳ᠋ᠦ᠍ ᠲᠣᠭᠠᠴᠢᠭᠳᠠᠳᠠᠭ ᠪᠠᠢᠭᠰᠠᠨ ᠴᠤ᠌ ᠡᠨᠳᠡ ᠬᠠᠷᠢ ᠨᠤᠲᠤᠭ ᠤ᠋ᠨ ᠪᠢᠴᠢᠬᠠᠨ《ᠨᠢᠰᠤᠬᠠᠢ》 ᠵᠢᠭᠠᠯ ᠢ᠋ ᠬᠡᠨ ᠲᠣᠭᠣᠵᠤ ᠤᠷᠤᠯᠳᠤᠭᠠᠨ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠣᠷᠣᠭᠤᠯᠬᠤ ᠪᠣᠢ? 《ᠣᠷᠣᠶᠠ》 ᠭᠡᠵᠦ ᠴᠦ᠍ ᠪᠣᠳᠣᠭᠠ ᠦᠭᠡᠢ᠃ ᠪᠣᠭᠣᠷᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠬᠡᠷᠦᠯᠳᠵᠢᠨ ᠲᠡᠢ ᠬᠠᠮᠲᠤ ᠮᠣᠷᠢᠨ ᠤ᠋ ᠡᠩ ᠭᠦᠶᠦᠬᠦ ᠪᠡᠷ ᠡᠰᠢ ᠲᠡᠰᠢ ᠳᠠᠪᠬᠢᠵᠤ ᠬᠡᠷᠦᠯᠦᠨ ᠦ᠌ ᠡᠷᠭᠢ ᠳᠡᠭᠡᠷᠡ ᠣᠴᠢᠵᠤ ᠪᠡᠶᠡ ᠪᠡᠨ ᠨᠠᠨᠵᠢᠩ ᠴᠢᠪᠠᠭᠠ᠂ ᠪᠠᠯ ᠪᠤᠷᠠᠮ ᠵᠡᠷᠭᠡ ᠠᠮᠲᠠᠲᠠᠨ ᠢ᠋ᠶ᠋ᠠᠷ ᠳᠠᠢᠯᠠᠵᠤ ᠵᠤᠭᠠᠯᠠᠬᠤ ᠨᠢ ᠵᠢᠩᠬᠢᠨᠢ ᠨᠠᠭᠠᠳᠤᠮ ᠪᠠᠢᠯᠠ᠃
— ᠮᠣᠷᠢᠳ ᠢᠷᠡᠯᠡ᠃ ᠮᠣᠷᠢᠳ ᠢᠷᠡᠯᠡ ᠭᠡᠵᠡᠭᠡᠵᠦ ᠬᠥᠮᠦᠰ ᠱᠤᠤᠭᠢᠯᠳᠤᠨ ᠵᠠᠮ ᠲᠣᠰᠣᠨ ᠳᠠᠪᠬᠢᠯᠳᠤᠪᠠ᠃ ᠪᠣᠭᠤᠷᠴᠢ ᠴᠣ ᠮᠥᠨ ᠬᠣᠴᠣᠷᠤᠭᠰᠠᠨ ᠦᠭᠡᠢ᠂ ᠲᠦᠷᠦᠭᠦᠨ ᠦ᠌ ᠡᠩᠨᠡᠭᠡᠨ ᠳ᠋ᠦ᠍ᠨᠢ ᠱᠤᠤᠭᠢᠵᠤ ᠬᠦᠷᠦᠯᠡ᠃ ᠰᠠᠢᠬᠠᠨ ᠬᠡᠭᠡᠷ ᠮᠣᠷᠢ ᠠᠷᠭᠠ ᠦᠭᠡᠢ᠂ ᠮᠠᠩᠯᠠᠢ ᠳ᠋ᠤ᠌ ᠢᠷᠡᠵᠦ ᠶᠠᠪᠤᠨᠠ᠃ ᠡᠬᠢᠨ ᠦ᠌ ᠮᠣᠷᠢᠳ ᠶᠡᠷᠦ ᠨᠢ ᠪᠦᠬᠡᠮᠳᠡᠬᠦᠦ᠃
《ᠬᠠᠷᠴᠠᠭᠠᠢ ᠮᠢᠨᠢ᠂ ᠬᠠᠷᠴᠠᠭᠠᠢ ᠮᠢᠨᠢ᠂ ᠳᠠᠭᠠᠷᠢᠭᠠᠷᠠᠢ᠂ ᠳᠠᠭᠠᠷᠢᠭᠠᠷᠠᠢ! ᠭᠢᠡᠭ ᠭᠣᠣ》
ᠪᠣᠭᠣᠷᠴᠢ ᠴᠣᠴᠢᠨ ᠬᠠᠷᠠᠪᠠᠯ ᠥᠪᠡᠷᠦᠨ ᠬᠢᠨᠢ ᠬᠦᠷᠡᠩ᠃ ᠳᠥᠷᠪᠡ᠂ ᠲᠠᠪᠤ᠂ ᠵᠢᠷᠭᠤᠭᠠ᠂ ᠳᠣᠯᠣᠭᠠ᠁ ᠠᠯᠢ ᠨᠢ ᠪᠣᠢ? ᠥᠨᠳᠥᠷ ᠬᠦᠷᠡᠩ ᠮᠣᠷᠢᠲᠠᠢ᠂ ᠴᠡᠩᠬᠡᠷ ᠳᠡᠪᠡᠯ ᠲᠡᠢ ᠬᠥᠮᠦᠨ ᠲᠦᠷᠦᠭᠦᠦ ᠮᠣᠷᠢᠨ ᠤ᠋ ᠬᠠᠵᠠᠭᠤ ᠪᠠᠷᠢᠨ ᠳᠠᠪᠬᠢᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ《ᠭᠤᠤᠭ》 ᠬᠠᠰᠬᠢᠷᠤᠨ ᠲᠡᠭᠡᠭᠡᠨ ᠳᠣᠲᠣᠷᠠ ᠣᠷᠣᠲᠠᠯᠠ᠂ ᠲᠡᠭᠦᠨ ᠦ᠌ ᠰᠢᠯᠢᠨ ᠬᠦᠵᠦᠭᠦᠦ ᠣᠷᠴᠢᠮ ᠤᠷᠤᠭᠤ ᠨᠢ ᠰᠡᠯᠡᠮᠡ ᠪᠠᠭᠤᠵᠤ ᠳᠠᠯᠤ ᠮᠥᠷᠥ ᠪᠡᠨ ᠳᠠᠭᠠᠭ ᠴᠢᠰᠤ ᠤᠷᠤᠰᠴᠤ᠂ ᠮᠣᠷᠢᠳ ᠤ᠋ᠨ ᠬᠠᠵᠠᠭᠤ ᠪᠠᠷ ᠳᠠᠭᠠᠯᠳᠤᠨ ᠳᠠᠪᠬᠢᠬᠰᠠᠳ ᠡᠮᠬᠢ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠲᠠᠨ ᠳᠠᠭᠤ ᠱᠤᠤᠭᠢᠶᠠᠨ᠂ ᠭᠠᠰᠠᠯᠠᠩ ᠭᠠᠩᠭᠢᠨᠠᠭᠠ ᠡᠭᠦᠰᠦᠨ᠂ ᠰᠡᠯᠡᠮᠡ ᠬᠠᠩᠭᠢᠨᠠᠯᠳᠤᠵᠤ ᠵᠢᠳᠠ ᠰᠡᠷᠡᠯᠵᠡᠬᠦ ᠨᠢ ᠠᠶᠤᠮᠰᠢᠭᠲᠠᠢ᠃
ᠪᠣᠭᠤᠷᠴᠢ ᠠᠰᠠᠷ ᠳᠠᠰᠢ ᠣᠴᠢᠲᠠᠯᠠ ᠠᠪᠤ ᠨᠢ ᠬᠣᠶᠠᠷ ᠮᠣᠷᠢᠳ ᠢ᠋ᠶ᠋ᠠᠨ ᠣᠯᠤᠭᠠᠳ ᠶᠡᠬᠡᠯᠡ ᠪᠠᠶᠠᠷ ᠲᠠᠢ ᠠᠵᠢ᠃ ᠬᠤᠸᠠ ᠬᠣᠩᠭᠣᠷ ᠨᠢ ᠲᠠᠪᠤ ᠶ᠋ᠢᠨ᠂ ᠨᠥᠭᠦᠭᠡ ᠤᠷᠤᠭ ᠱᠣᠩᠬᠣᠷ ᠨᠢ ᠶᠢᠰᠦ ᠶ᠋ᠢᠨ ᠫᠠᠢᠰᠠ ᠲᠠᠢ᠂ ᠰᠠᠢᠨ ᠳᠠᠪᠬᠢᠵᠠᠢ᠃ ᠶᠠᠭᠤᠲᠠᠢ ᠴᠤ᠌ ᠠᠷᠪᠠ ᠳᠣᠲᠣᠷᠠ ᠰᠢᠷᠭᠤᠵᠤ᠂ ᠬᠣᠢᠰᠢ ᠬᠣᠢᠰᠢᠬᠢ ᠶ᠋ᠢᠨ ᠬᠢᠨᠢ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠪᠦᠦ ᠮᠡᠳᠡ᠃ ᠲᠦᠷᠦᠭᠦᠦ ᠮᠣᠷᠢ ᠶ᠋ᠢ ᠵᠦᠷᠬᠢᠨ ᠦ᠌ ᠬᠢ᠂ ᠡᠵᠡᠨ ᠨᠢ ᠲᠡᠨᠳᠡ ᠠᠮᠢᠨ ᠳᠦᠢᠵᠡ ᠦᠯᠡᠳᠡᠭᠰᠡᠨ ᠭᠡᠬᠦ᠃ ᠲᠥᠷᠥᠭᠦᠯᠦᠭᠰᠡᠨ ᠪᠥᠬᠡ ᠵᠦᠷᠭᠢᠨ ᠦ᠌ ᠬᠢ᠂ ᠡᠭᠦᠨ ᠡᠴᠡ ᠴᠦ᠍ ᠪᠣᠯᠤᠭᠰᠠᠨ ᠶᠤᠮ ᠤᠤ? ᠶᠠᠭᠤᠨ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ ᠪᠣᠢ? ᠠᠰᠠᠷ ᠳᠣᠲᠣᠷᠠ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠳᠤᠮᠳᠠ ᠪᠠᠰᠠ ᠬᠡᠷᠡᠭᠦᠯ᠃
ᠡᠴᠢᠭᠡ ᠬᠦᠦ ᠬᠣᠶᠠᠷ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠬᠥᠯᠥᠰᠥ ᠶ᠋ᠢ ᠬᠤᠰᠤᠭᠠᠳ ᠭᠢᠰᠬᠢᠭᠦᠯᠬᠦ ᠵᠠᠭᠤᠷᠠ ᠨᠠᠬᠤ᠄
— ᠲᠠᠨᠠᠷ ᠡᠨᠳᠡ ᠪᠡᠨ ᠮᠣᠷᠢᠳ ᠢ᠋ᠶ᠋ᠠᠨ ᠭᠢᠰᠬᠢᠭᠦᠯᠵᠦ ᠪᠠᠢ᠂ ᠪᠢ ᠮᠣᠷᠢᠨ ᠤ᠋ ᠪᠠᠨ ᠪᠠᠢ(ᠱᠠᠩ) ᠱᠠᠩᠨᠠᠯ ᠢ᠋ ᠠᠪᠬᠤ ᠶ᠋ᠢ ᠪᠣᠳᠣᠶᠠ᠃ ᠴᠣᠯᠠ ᠮᠣᠯᠡ ᠳᠠᠭᠤᠳᠠᠬᠤ ᠴᠤ᠌ ᠥᠩᠭᠡᠷᠡᠪᠡ ᠪᠣᠯᠤᠯᠲᠠᠢ ᠭᠡᠵᠦ ᠬᠣᠶᠠᠷ ᠫᠠᠢᠰᠠ ᠪᠠᠨ ᠠᠪᠤᠭᠠᠳ ᠠᠰᠠᠷ ᠤ᠋ᠨ ᠵᠡᠭᠦᠨ ᠵᠢᠭᠦᠷ ᠤᠷᠤᠭᠤ ᠶᠠᠪᠤᠯᠠ᠃ ᠠᠵᠠ ᠪᠣᠯᠵᠤ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠡᠴᠢᠭᠡ ᠨᠢ ᠬᠥᠯᠥᠰᠥ ᠪᠡᠨ ᠮᠠᠨᠠᠷᠠᠭᠤᠯᠤᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠱᠤᠳᠤᠷᠴᠤ ᠠᠷᠴᠢᠭᠰᠠᠭᠠᠷ ᠬᠣᠷᠮᠣᠢ ᠳᠦᠭᠦᠷᠡᠩ ᠶᠠᠭᠤᠮᠠ ᠲᠠᠢ ᠢᠷᠡᠯᠡ᠃ ᠲᠠᠪᠤ ᠳ᠋ᠤ᠌ ᠣᠷᠣᠭᠰᠠᠨ ᠳ᠋ᠤᠨᠢ ᠬᠤᠢ ᠲᠣᠷᠭᠠ᠂ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ᠂ ᠨᠥᠭᠥᠭᠡᠳᠡᠬᠢ ᠳ᠋ᠦ᠍ᠨᠢ ᠵᠤᠵᠠᠭᠠᠨ ᠨᠥᠮᠥᠷᠭᠡ ᠳᠠᠪᠤᠤ᠂ ᠪᠠᠰᠠ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠥᠭᠴᠡᠢ᠃ ᠡᠴᠢᠭᠡ ᠲᠤᠩ ᠪᠠᠶᠠᠷ ᠲᠠᠢ᠂ ᠮᠣᠷᠢᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠵᠠᠳᠠᠯᠪᠠᠯ ᠠᠮᠲᠠᠲᠤ ᠪᠣᠣᠪᠣ ᠰᠢᠬᠢᠷ ᠠᠵᠢ᠃ ᠲᠡᠭᠦᠨ ᠡᠴᠡ ᠨᠢᠭᠡ ᠠᠳᠬᠤ ᠶ᠋ᠢ ᠠᠪᠴᠤ ᠲᠣᠭᠣᠨᠣ ᠠᠭᠤᠯᠠᠨ ᠳ᠋ᠤ᠌ ᠡᠷᠭᠦᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠠᠮᠰᠠᠭᠠᠳ ᠭᠤᠷᠪᠠᠨ ᠬᠥᠪᠡᠭᠦᠳ ᠲᠦ᠍ ᠠᠳᠬᠤ ᠠᠳᠬᠤ ᠪᠠᠷ ᠬᠡᠰᠢᠭ ᠬᠦᠷᠲᠡᠭᠡᠭᠡᠳ᠄
— ᠵᠠ ᠬᠡᠦᠬᠡᠳ ᠦ᠋ᠳ ᠮᠢᠨᠢ᠂ ᠡᠨᠡ ᠣᠯᠠᠨ ᠤᠯᠠᠩᠭᠠᠰᠴᠤ ᠭᠠᠯᠵᠠᠭᠤᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠰᠡᠷᠡᠭᠡ ᠵᠢᠳᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠣᠨᠣᠭᠳᠠᠴᠢᠬᠠᠬᠤ ᠦᠭᠡᠢᠬᠡᠨ ᠵᠠᠢᠯᠠᠶᠠ ᠭᠡᠳ ᠶᠠᠪᠤᠵᠠᠭᠠᠪᠠ᠃
ᠪᠤᠭᠤᠷᠴᠢ ᠲᠦᠷᠦᠭᠦᠯᠡᠵᠦ ᠳᠠᠪᠬᠢᠨ ᠭᠡᠷ ᠲᠡᠭᠡᠨ ᠢᠷᠡᠪᠡᠯ ᠵᠦᠷᠭᠢᠨ ᠦ᠌ ᠬᠣᠶᠠᠷ ᠬᠥᠮᠦᠨ ᠢᠷᠡᠭᠡᠳ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠲᠡᠳᠡᠨ ᠲᠡᠢ ᠮᠡᠨᠳᠦᠯᠡᠭᠡᠳ ᠭᠡᠭᠦᠦ ᠪᠡᠨ ᠰᠠᠭᠠᠬᠤ ᠠᠵᠢᠯ ᠳ᠋ᠠᠭᠠᠨ ᠣᠷᠣᠲᠠᠯᠠ ᠲᠡᠳᠡ ᠵᠠᠯᠠᠨ ᠳᠡᠭᠡᠷᠡ ᠨᠢ ᠢᠷᠡᠵᠦ ᠤᠨᠠᠭᠠ ᠲᠠᠲᠠᠵᠤ ᠥᠭᠴᠦ ᠲᠤᠰᠠᠯᠠᠪᠠ᠃ ᠲᠡᠳᠡᠨ ᠲᠡᠢ ᠪᠤᠭᠤᠷᠴᠢ ᠶᠠᠭᠤ ᠶᠠᠷᠢᠬᠤ ᠪᠣᠢ᠂ ᠲᠡᠳᠡ ᠴᠦ᠍ ᠲᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠲᠣᠭᠣᠵᠤ ᠶᠠᠷᠢᠬᠤ ᠪᠣᠢ᠃ ᠬᠠᠷᠢᠨ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠬᠤ ᠨᠢ᠄
— ᠶᠠᠭᠠᠬᠢᠭᠠᠳ ᠮᠠᠨ ᠤ᠋ ᠰᠡᠴᠡ ᠪᠡᠬᠢ ᠲᠡᠷᠢᠭᠦᠨ ᠡᠨᠡ ᠲᠦᠮᠡᠨ ᠲᠦᠪᠬᠦᠨ ᠦ᠌ ᠠᠴᠢᠭ ᠱ᠌ᠢᠷᠦᠨ ᠲᠡᠢ ᠰᠡᠯᠡᠮᠡ ᠳᠠᠯᠠᠢᠬᠤ ᠳ᠋ᠤ᠌ ᠬᠦᠷᠪᠡ?
— ᠰᠡᠴᠡ ᠪᠡᠬᠢ ᠲᠡᠷᠢᠭᠦᠨ ᠪᠦᠷᠢ ᠪᠥᠬᠡ ᠳ᠋ᠦ᠍ ᠠᠯᠲᠠᠨ ᠪᠦᠰᠡ ᠪᠡᠨ ᠲᠠᠢᠯᠵᠤ ᠥᠭᠬᠦ ᠦᠭᠡᠢ ᠳ᠋ᠦ᠍ᠨᠢ ᠠᠴᠢᠭ ᠱ᠌ᠢᠷᠦᠨ ᠥᠪᠡᠷᠦᠨ ᠳᠥᠨᠳᠥᠭᠡᠷ ᠲᠡᠭᠡᠨ ᠪᠠᠰᠠ ᠠᠯᠲᠠᠨ ᠪᠦᠰᠡ ᠪᠡᠨ ᠲᠠᠢᠯᠵᠤ ᠥᠭᠭᠦᠭᠰᠡᠨ ᠶᠦᠮ ᠯᠡ ᠳᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ᠄
— ᠴᠢ ᠶᠠᠭᠠᠬᠢᠭᠠᠳ ᠲᠥᠷᠥᠭᠦᠯᠦᠭᠰᠡᠨ ᠮᠠᠨ ᠤ᠋ ᠪᠥᠬᠡ ᠳ᠋ᠦ᠍ ᠥᠭᠳᠡᠭ ᠦᠭᠡᠢ ᠶᠦᠮ ᠪᠣᠢ? ᠤᠨᠠᠭᠰᠠᠨ ᠪᠥᠬᠡ ᠶ᠋ᠢ ᠱᠠᠩᠨᠠᠬᠤ ᠨᠢ ᠪᠤᠤ ᠬᠡᠯᠡ᠂ ᠣᠷᠢᠶᠠᠯᠭᠠᠬᠤ ᠶᠣᠰᠣᠲᠠᠢ ᠭᠡᠬᠦ ᠳ᠋ᠦ᠍ᠨᠢ᠄
— ᠵᠥᠪ ᠰᠢᠦ ᠳᠡ ᠭᠡᠵᠦ ᠬᠣᠶᠠᠷ ᠤ᠋ᠨ ᠨᠢᠭᠡ ᠨᠢ ᠥᠪᠡᠷᠦᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠰᠠᠢᠰᠢᠶᠠᠵᠤ᠄
— ᠲᠡᠭᠡᠬᠦ ᠪᠡᠷ ᠶᠠᠭᠤ ᠪᠣᠯᠤᠭᠰᠠᠨ ᠶᠤᠮ ᠪᠣᠢ? ᠭᠡᠪᠡ᠃
— ᠶᠠᠭ ᠡᠨᠡ ᠦᠶᠡ ᠪᠡᠷ ᠲᠦᠮᠡᠨ ᠲᠦᠪᠬᠦᠨ ᠦ᠌ ᠨᠢᠭᠡ ᠴᠡᠷᠢᠭ ᠢᠷᠡᠵᠦ ᠨᠣᠶᠠᠳ ᠲᠠᠭᠠᠨ ᠮᠠᠨ ᠤ᠋ ᠲᠦᠷᠦᠭᠦᠦ ᠮᠣᠷᠢᠨ ᠤ᠋ ᠡᠵᠡᠨ ᠦ᠌ ᠲᠢᠭ ᠳᠣᠲᠣᠷᠠ ᠳᠠᠭᠠᠷᠢᠵᠤ ᠣᠷᠣᠭᠰᠠᠨ᠃ ᠲᠡᠭᠦᠨ ᠢ᠋ ᠡᠨᠳᠡᠬᠢ ᠶ᠋ᠢᠨ ᠬᠢᠨ ᠴᠠᠪᠴᠢᠭᠰᠠᠨ ᠠ᠋ᠴᠠ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠭᠠᠷᠴᠤ ᠴᠢᠰᠤ ᠨᠥᠵᠢ ᠪᠡᠨ ᠭᠣᠭᠣᠵᠢᠭᠤᠯᠵᠤ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠡᠴᠡ ᠠᠴᠢᠭ ᠱ᠌ᠢᠷᠦᠨ᠄
— ᠶᠠᠭᠠᠬᠢᠨᠠ ᠭᠡᠨᠡ? ᠡᠨᠡ ᠵᠦᠷᠭᠢᠨ ᠦ᠌ ᠬᠢᠨ ᠢ᠋ ᠬᠠᠰᠢᠷᠠᠭᠠᠭᠠᠳ ᠥᠭᠭᠦᠶᠡ ᠭᠡᠵᠦ ᠰᠡᠯᠡᠮᠡ ᠰᠤᠭᠤᠯᠬᠤ ᠳ᠋ᠤ᠌ ᠰᠡᠴᠡ ᠪᠡᠬᠢ ᠨᠣᠶᠠᠨ ᠴᠤ᠌ ᠪᠠᠰᠠ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠵᠤ ᠬᠡᠷᠡᠭᠦᠯ ᠡᠬᠢᠯᠡᠮᠡᠭᠴᠡ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠠᠲᠤᠳ᠂ ᠬᠠᠮᠠᠭᠠᠯᠠᠭᠴᠢᠳ ᠨᠢ《ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠨᠣᠶᠠᠳ ᠢ᠋ᠶ᠋ᠠᠨ ᠠᠷᠭᠠᠳᠠᠨ ᠵᠢᠭᠤᠷᠠᠯᠳᠤᠵᠤ᠂ ᠪᠣᠷᠵᠢᠭᠢᠨ ᠤ᠋ ᠠᠯᠲᠠᠨ ᠨᠣᠶᠠᠨ ᠳᠤᠮᠳᠠ ᠨᠢ ᠣᠷᠣᠵᠤ ᠲᠡᠳᠡᠨ ᠢ᠋ ᠡᠪᠯᠡᠭᠦᠯᠬᠦ ᠶᠠᠩᠵᠤᠲᠠᠢ ᠶᠠᠭᠤᠮᠠ ᠪᠣᠯᠤᠭᠠᠳ ᠪᠠᠢᠭᠰᠠᠨ᠂ ᠣᠳᠣ ᠶᠠᠭᠤ ᠪᠣᠯᠤᠭᠰᠠᠨ ᠪᠣᠢ᠂ ᠪᠤᠤ ᠮᠡᠳᠡ ᠭᠡᠯᠴᠡᠨᠡ᠃
ᠨᠠᠬᠤ ᠠᠪᠤ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠢᠷᠡᠬᠦ᠂ ᠵᠦᠷᠭᠢᠨ ᠦ᠌ ᠨᠢᠭᠡ ᠵᠠᠷᠤᠴᠠ ᠬᠣᠶᠠᠷ ᠲᠡᠮᠡᠭᠡ ᠬᠥᠲᠥᠯᠦᠭᠡᠳ ᠢᠷᠡᠬᠦ ᠲᠠᠭᠠᠷᠠᠯᠠ᠃ ᠠᠷᠤ ᠠ᠋ᠴᠠ ᠨᠢ ᠵᠢᠳᠠ ᠰᠡᠷᠡᠭᠡ ᠪᠠᠷᠢᠭᠰᠠᠨ ᠬᠣᠶᠠᠷ ᠡᠲᠡᠭᠡᠳ ᠢᠷᠡᠬᠦ ᠨᠢ ᠪᠠᠰᠠ ᠦᠵᠡᠭᠳᠡᠬᠦ ᠦᠭᠡᠢ ᠨᠢ ᠵᠢᠪᠡᠭᠦᠨ ᠠᠵᠢ᠃
ᠨᠠᠬᠤ ᠲᠡᠳᠡᠨ ᠲᠡᠢ ᠡᠶᠡᠯᠳᠡᠭ ᠳᠣᠲᠣᠨᠣ ᠮᠡᠨᠳᠦᠯᠡᠵᠦ᠂ ᠨᠠᠭᠠᠳᠤᠮ ᠨᠠᠢᠷ ᠤ᠋ᠨ ᠪᠡᠯᠭᠡ ᠲᠡᠢ ᠰᠠᠢᠬᠠᠨ ᠦᠭᠡ ᠪᠡᠷ ᠤᠭᠲᠤᠵᠤ ᠲᠡᠳᠡ ᠴᠦ᠍ ᠮᠥᠨ ᠠᠳᠠᠯᠢ ᠰᠠᠢᠨ ᠰᠠᠢᠬᠠᠨ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠪᠣᠯᠵᠤ᠂ ᠭᠡᠷ ᠲᠦ᠍ ᠣᠷᠣᠵᠤ ᠠᠢᠷᠠᠭ ᠰᠠᠷᠬᠤᠳ ᠠᠶᠠᠭᠠᠯᠠᠵᠤ ᠠᠮᠲᠠᠲᠤ ᠢᠳᠡᠭᠡ ᠪᠡᠷ ᠲᠡᠳᠡᠨ ᠢ᠋ ᠳᠠᠢᠯᠠᠭᠠᠳ᠄
— ᠪᠢᠳᠡ ᠬᠣᠯᠠ ᠶ᠋ᠢᠨ ᠬᠥᠮᠦᠰ᠂ ᠥᠭᠬᠦ ᠠᠪᠬᠤ ᠪᠠᠨ ᠥᠭᠴᠦ ᠠᠪᠤᠯᠴᠠᠭᠠᠳ ᠬᠥᠳᠡᠯᠦᠶᠡ ᠭᠡᠵᠦ ᠨᠠᠬᠤ ᠠᠪᠤ ᠰᠢᠳᠮᠡᠭ ᠬᠡᠯᠡᠵᠦ ᠵᠢᠰᠦᠯᠡᠵᠦ ᠬᠡᠯᠡᠯᠴᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠥᠭᠭᠦᠭᠡᠳ᠂ ᠲᠡᠳᠡ ᠭᠡᠷ ᠠᠴᠢᠵᠤ᠂ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠪᠠᠷᠢᠵᠤ ᠠᠪᠤᠭᠠᠳ ᠨᠠᠬᠤ ᠦᠯᠡᠳᠡᠭᠰᠡᠨ ᠥᠮᠪᠦ ᠴᠦᠮᠪᠦ ᠶᠠᠭᠤᠮᠠ ᠪᠠᠨ ᠬᠣᠶᠠᠷ ᠲᠡᠮᠡᠭᠡᠨ ᠳ᠋ᠡᠭᠡᠨ ᠬᠤᠪᠢᠶᠠᠵᠤ ᠠᠴᠢᠭᠠᠳ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠵᠣᠴᠢᠯᠠᠬᠤ᠂ ᠳᠠᠬᠢᠨ ᠠᠭᠤᠯᠵᠠᠬᠤ ᠢᠷᠦᠭᠡᠯ ᠲᠠᠯᠪᠢᠯᠴᠠᠵᠤ ᠬᠣᠶᠠᠷ ᠲᠠᠰᠢ ᠬᠥᠳᠡᠯᠪᠡ᠃ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠪᠠᠭᠤᠵᠤ ᠵᠢᠷᠭᠠᠵᠤ ᠠᠪᠠᠢ᠃
— ᠵᠠ ᠬᠡᠦᠬᠡᠳ᠂ ᠲᠡᠷᠲᠡᠭᠡ ᠥᠨᠳᠥᠷ ᠬᠠᠢᠷᠬᠠᠨ ᠠᠭᠤᠯᠠ ᠠ᠋ᠴᠠ ᠤᠷᠳᠤᠭᠤᠷ ᠬᠠᠷᠠᠭᠳᠠᠬᠤ ᠣᠨᠢ ᠴᠢᠭᠯᠡᠭᠡᠳ ᠶᠠᠪᠤᠭᠠᠳ ᠪᠠᠢᠲᠠᠯᠠ ᠬᠠᠷᠢᠴᠢᠬᠠᠨᠠ ᠳᠠ ᠭᠡᠵᠦ ᠨᠠᠬᠤ ᠠᠪᠤ ᠶ᠋ᠢ ᠬᠥᠬᠢᠭᠦᠨ ᠥᠭᠦᠯᠡᠬᠦ ᠳ᠋ᠦ᠍ ᠨᠢ ᠪᠣᠭᠤᠷᠴᠢ᠄
— ᠢᠩᠭᠢᠭᠡᠳ ᠰᠢᠯᠤᠭᠤᠨ ᠶᠠᠪᠤᠭᠠᠳ ᠢᠷᠡᠵᠦ ᠪᠣᠯᠬᠤ ᠪᠠᠢᠲᠠᠯᠠ ᠶᠠᠭᠤ ᠪᠠᠨ ᠡᠷᠢᠵᠦ ᠲᠡᠷᠡ ᠲᠣᠨᠲᠣᠭᠣᠷ ᠬᠡᠷᠦᠯᠦᠨ ᠭᠠᠷᠴᠤ ᠭᠤᠷᠪᠠᠨ ᠲᠠᠷᠭᠤᠨ ᠢ᠋ᠶ᠋ᠠᠷ ᠶᠠᠪᠤᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠤᠷᠳᠤᠨ ᠠᠳᠤᠭᠤ ᠴᠤ᠌ ᠪᠠᠢᠵᠤ ᠶᠠᠭᠤ ᠮᠠᠭᠠᠳ᠂ ᠬᠥᠮᠦᠨ ᠠᠮᠢᠲᠠᠨ ᠲᠠᠢ ᠴᠤ᠌ ᠠᠭᠤᠯᠵᠠᠶᠠ᠂ ᠲᠡᠭᠡᠭᠡᠳ ᠬᠡᠷᠦᠯᠦᠨ ᠦ᠌ ᠤᠷᠲᠤ ᠪᠡᠶᠡ ᠶ᠋ᠢᠨ ᠭᠣᠪᠢᠷᠬᠠᠭ ᠭᠠᠵᠠᠷ ᠤ᠋ᠨ ᠨᠠᠷᠢᠨ ᠤᠷᠭᠤᠮᠠᠯ ᠨᠣᠭᠣᠭᠠᠨ ᠠ᠋ᠴᠠ ᠮᠣᠷᠢᠳ ᠳᠠᠭᠠᠨ ᠬᠠᠵᠠᠭᠤᠯᠤᠶᠠ᠂ ᠬᠦᠴᠦ ᠴᠢᠳᠠᠯ ᠨᠡᠮᠡᠭᠳᠡᠵᠦ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ᠃
— ᠡᠷᠢᠭᠰᠡᠨ ᠰᠤᠷᠠᠭᠰᠠᠨ ᠢ᠋ᠶ᠋ᠠᠨ ᠣᠯᠪᠠᠤ?
— ᠣᠯᠤᠯᠠ᠃ ᠡᠨᠡ ᠵᠢᠭᠠᠬᠠᠨ ᠬᠤᠷᠳᠤᠨ ᠪᠣᠷᠣ ᠠᠵᠢᠷᠭᠠ ᠶ᠋ᠢ ᠣᠯᠤᠯᠠ᠃ ᠪᠢ ᠨᠢᠭᠡ ᠡᠢᠮᠦ ᠠᠵᠢᠷᠭᠠ ᠲᠠᠢ ᠪᠣᠯᠤᠶᠠ ᠭᠡᠵᠦ ᠠᠯᠢ ᠡᠷᠲᠡ ᠡᠴᠡ ᠪᠣᠳᠣᠭᠰᠠᠨ ᠶᠤᠮ᠃
— ᠲᠠ ᠡᠭᠦᠨ ᠦ᠌ ᠬᠤᠷᠳᠤᠨ ᠭᠡᠳᠡᠭ ᠢ᠋ ᠶᠠᠭᠠᠬᠢᠵᠤ ᠮᠡᠳᠡᠵᠦ ᠪᠠᠢᠭᠠ ᠶᠤᠮ ᠪᠣᠢ?
— ᠬᠤᠷᠳᠤᠨ ᠠ᠋᠂ ᠬᠤᠷᠳᠤᠨ! ᠴᠢ ᠬᠠᠷᠠᠭᠠ ᠪᠢᠵᠡ ᠳᠡ᠂ ᠬᠣᠯᠢᠮᠠᠭ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠲᠦᠷᠦᠭᠦᠯᠡᠵᠦ ᠢᠷᠡᠭᠰᠡᠨ ᠢ᠋᠃
— ᠬᠠᠷᠠᠭᠰᠠᠨ᠂ ᠬᠠᠷᠠᠭᠰᠠᠨ᠃ ᠨᠡᠭᠡᠷᠡᠨ ᠴᠦ᠍ ᠬᠤᠷᠳᠤᠨ ᠪᠠᠢᠬᠠ ᠳᠠ᠃
— ᠬᠤᠷᠳᠤᠨ ᠳᠠ᠃ ᠬᠤᠷᠳᠤᠨ ᠠᠳᠤᠭᠤᠨ ᠤ᠋ ᠰᠢᠨᠵᠢ᠄《ᠠᠮᠠᠨ ᠬᠦᠵᠦᠭᠦᠦ ᠵᠠᠨᠲᠠᠭᠠᠷ᠂ ᠣᠪᠣᠭᠠ᠂ ᠰᠡᠷᠪᠡᠭᠡ᠂ ᠮᠤᠨᠳᠠᠭᠠ ᠭᠤᠷᠪᠠ ᠨᠢ ᠬᠣᠯᠪᠣᠭᠠᠲᠠᠢ᠃ ᠴᠡᠭᠡᠵᠢ ᠥᠨᠳᠥᠷ᠂ ᠬᠠᠮᠠᠷ ᠠᠭᠤᠵᠢᠮ᠂ ᠰᠠᠯᠲᠠᠭᠠ ᠥᠷᠭᠡᠨ᠂ ᠰᠠᠭᠯᠠᠭᠠ ᠥᠳᠬᠡᠨ᠂ ᠪᠡᠷᠪᠡᠬᠡᠢ ᠨᠠᠷᠢᠬᠠᠨ᠂ ᠲᠤᠭᠤᠷᠠᠢ ᠴᠣᠮᠪᠣᠩ》 ᠭᠡᠳ ᠣᠯᠠᠨ ᠵᠦᠢᠯ ᠪᠣᠢ᠃ ᠲᠡᠷᠡ ᠪᠦᠭᠦᠳᠡ ᠡᠨᠡ ᠪᠣᠷᠣ ᠠᠵᠢᠷᠭᠠᠨ ᠳ᠋ᠤ᠌ ᠯᠠ ᠪᠣᠢ᠃
— ᠮᠠᠨ ᠤ᠋ ᠰᠠᠷᠠᠯ ᠪᠠᠢᠳᠠᠰᠤᠨ ᠠ᠋ᠴᠠ᠂ ᠲᠡᠷᠡ ᠣᠯᠠᠨ ᠵᠦᠢᠯ ᠪᠦᠷᠢᠯᠳᠦᠭᠰᠡᠨ ᠤᠨᠠᠭᠠ ᠭᠠᠷᠬᠤ ᠪᠠᠢᠬᠠ᠃
— ᠴᠢ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠪᠣᠢ?
— ᠮᠡᠳᠡᠵᠦ ᠶᠠᠳᠠᠭᠠᠳ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ᠃ ᠲᠡᠮᠦᠷᠴᠢ ᠭᠤᠸᠠᠢ ᠶ᠋ᠢᠨ ᠬᠣᠩᠭᠣᠷ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠦᠯᠦᠭᠰᠡᠨ᠃ ᠨᠠᠬᠤ ᠠᠪᠤ ᠳᠠᠭᠤ ᠠᠯᠳᠠᠵᠤ ᠭᠤᠶᠠ ᠪᠠᠨ ᠠᠯᠠᠭᠠᠳᠠᠨ᠄
— ᠲᠡᠭᠡᠪᠡᠯ ᠴᠦ᠍ ᠪᠦᠷ ᠡᠷᠢᠯ ᠢ᠋ᠶ᠋ᠡᠨ ᠣᠯᠵᠤ᠂ ᠣᠯᠵᠠ ᠪᠠᠨ ᠡᠪᠦᠷᠯᠡᠵᠦ ᠯᠡ ᠳᠡ ᠭᠡᠵᠦ ᠤᠴᠢᠷ ᠦᠭᠡᠢ ᠶᠡᠬᠡ ᠪᠠᠶᠠᠷᠯᠠᠪᠠ᠃ ᠪᠤᠭᠤᠷᠴᠢ᠄
— ᠲᠡᠭᠡᠪᠡᠯ ᠪᠢ᠁ ᠭᠡᠳ ᠲᠠᠷᠭᠤᠨ ᠤ᠋ ᠠᠭᠤᠯᠠᠰ ᠤᠷᠤᠭᠤ ᠬᠠᠷᠠᠪᠠᠰᠤ ᠣᠷᠣᠢ ᠳ᠋ᠤᠨᠢ ᠨᠠᠷᠠᠨ ᠤ᠋ ᠰᠢᠷᠭᠠᠯ ᠲᠤᠶᠠᠭᠠ ᠲᠤᠰᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠰᠢᠵᠢᠷᠲᠦᠬᠦ ᠳ᠋ᠦ᠍ᠨᠢ᠄
— ᠡᠷᠢᠭᠡᠳ ᠣᠯᠬᠤ ᠦᠭᠡᠢ ᠡᠷᠳᠡᠨᠢ᠂ ᠰᠤᠷᠠᠭᠠᠳ ᠣᠯᠬᠤ ᠦᠭᠡᠢ ᠰᠤᠪᠤᠳ ᠡᠷᠳᠡᠨᠢ ᠡᠪᠦᠷᠯᠡᠵᠦ ᠯᠡ ᠳᠡ ᠭᠡᠮᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠡᠯᠡᠵᠦ ᠬᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠬᠠᠯᠬᠠᠯᠠᠪᠠ᠃