ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠳᠥᠷᠪᠡ> Хүлэг баатар буурч - Б. Өлзийсүрэн <Тэргүүн бүлэг-4>
99ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠳᠥᠷᠪᠡ ᠂ ᠣᠯᠠᠨ ᠲᠠᠢ ᠭᠠᠵᠠᠷ ᠣᠮᠣᠭ ᠶᠡᠬᠡ ᠣᠮᠣᠭᠯᠠᠩ ᠭᠠᠵᠠᠷ ᠣᠰᠣᠯ ᠶᠡᠬᠡ
ᠬᠡᠷᠦᠯᠳᠵᠢᠨ ᠥᠷᠯᠥᠭᠡ ᠡᠷᠲᠡ ᠪᠡᠯᠴᠢᠭᠡᠭᠰᠡᠨ ᠬᠣᠨᠢᠨ ᠤ᠋ ᠪᠠᠨ ᠬᠣᠢᠨᠠ ᠠ᠋ᠴᠠ ᠮᠣᠷᠳᠠᠪᠠ᠃ ᠬᠣᠨᠢ ᠨᠢ ᠪᠣᠷᠣ ᠬᠤᠸᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠳᠠᠷᠬᠠᠨ ᠪᠡᠯᠴᠢᠭᠡᠷᠯᠡᠵᠦ ᠪᠠᠢᠭᠠ ᠬᠠᠷᠠᠭᠳᠠᠨᠠ᠃ ᠬᠣᠨᠢᠨ ᠤ᠋ ᠪᠠᠨ ᠵᠠᠬᠠ ᠳ᠋ᠤ᠌ ᠣᠴᠢᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠡᠵᠢ ᠡᠴᠡ ᠪᠡᠨ ᠨᠢᠭᠤᠨ ᠣᠶᠣᠵᠤ ᠶᠠᠪᠤᠭᠠ ᠫᠠᠩᠰᠠᠨ ᠴᠠᠮᠴᠠ ᠪᠠᠨ ᠡᠩᠭᠡᠷ ᠡᠴᠡ ᠪᠡᠨ ᠭᠠᠷᠭᠠᠨ ᠦᠨᠦᠷᠯᠡᠵᠦ ᠦᠵᠡᠭᠡᠳ ᠪᠠᠷᠠᠭᠤᠨ ᠵᠦᠭ ᠢ᠋ ᠰᠢᠷᠲᠡᠨ ᠬᠠᠷᠠᠵᠤ᠄
ᠬᠠᠢᠷᠠ ᠶ᠋ᠢᠨ ᠨᠠᠨᠳᠢᠨ ᠰᠡᠳᠬᠢᠯ ᠮᠢᠨᠦ
ᠬᠠᠯᠠᠭᠤᠨ ᠵᠢᠷᠦᠬᠡᠨ ᠦ᠌ ᠬᠠᠭᠠᠰ ᠮᠢᠨᠦ
ᠲᠡᠷᠲᠡᠭᠡ ᠪᠠᠷᠠᠭᠤᠨᠠ ᠶᠠᠪᠤᠨᠠ ᠤᠤ?
ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨᠠ ᠴᠡᠩᠬᠡᠷᠳᠡᠨᠡ ᠤᠤ?
ᠠᠮᠠᠷᠠᠭᠬᠠᠨ ᠨᠠᠨᠳᠢᠨ ᠬᠠᠢᠷᠠ ᠮᠢᠨᠦ
ᠠᠯᠠᠭᠬᠠᠨ ᠵᠢᠷᠦᠬᠡᠨ ᠦ᠌ ᠬᠠᠭᠠᠰ ᠮᠢᠨᠦ
ᠬᠠᠮᠢᠭᠠ ᠭᠠᠵᠠᠷ ᠠ᠋ᠴᠠ ᠢᠷᠡᠪᠡ ᠳᠠ?
ᠬᠠᠮᠤᠭ ᠪᠡᠶᠡ ᠶ᠋ᠢ ᠮᠢᠨᠦ ᠡᠵᠡᠯᠡᠪᠡ ᠳᠡ ᠭᠡᠰᠡᠨ ᠳᠠᠭᠤᠤ ᠠᠶᠠᠯᠤᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠣᠬᠣᠷᠬᠠᠨ ᠴᠥᠭᠡᠨ ᠬᠣᠨᠣᠭ ᠲᠤ᠌ ᠬᠣᠷᠸᠠ ᠠ᠋ᠴᠠ ᠬᠣᠣᠰ ᠦᠭᠡᠢ ᠬᠣᠪᠣᠷᠬᠠᠨ ᠡᠷᠳᠡᠨᠢ ᠶ᠋ᠢ ᠣᠯᠵᠤ ᠡᠳ᠋ᠯᠡᠭᠰᠡᠨ ᠪᠦᠰᠡᠭᠦᠢ ᠰᠡᠳᠬᠢᠯ ᠵᠢᠷᠦᠬᠡ ᠡᠢᠨ ᠬᠥᠭᠡᠷᠦᠬᠦᠨ ᠬᠥᠭᠵᠢᠶᠡᠨ ᠶᠡᠬᠡᠲᠡᠢ ᠠᠵᠤᠭᠤ᠃ ᠲᠡᠷᠡ ᠬᠣᠶᠠᠷ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢᠨ ᠨᠥᠮᠥᠷᠢ ᠳ᠋ᠦ᠍ ᠵᠦᠭᠡᠷ ᠨᠢᠭᠡ ᠠᠭᠤᠯᠵᠠᠵᠤ ᠲᠣᠭᠯᠠᠭᠰᠠᠨ ᠦᠭᠡᠢ᠂ ᠳᠠᠭᠠ ᠰᠢᠳᠦᠯᠡᠩ ᠰᠢᠷᠭᠤᠭᠤᠯᠵᠤ ᠤᠷᠭᠠᠯᠠᠨ ᠴᠡᠩᠭᠡᠬᠦ ᠡᠴᠡ ᠡᠬᠢᠯᠡᠭᠡᠳ ᠬᠣᠷᠸᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠮᠣᠷᠢᠨ ᠳᠡᠯ ᠳᠡᠭᠡᠷᠡ ᠦᠢᠯᠡᠳᠦᠭᠰᠡᠨ ᠳᠣᠯᠣᠭᠠᠨ ᠤᠴᠠᠷᠠᠯ ᠨᠢ ᠳᠡᠩᠳᠡᠭᠦᠦ ᠬᠠᠴᠢᠨ ᠵᠢᠭᠲᠡᠢ ᠰᠠᠨᠠᠭᠳᠠᠨᠠ᠃ ᠡᠨᠡ ᠪᠣᠯ ᠬᠡᠨ ᠬᠥᠮᠦᠨ ᠦ᠌ ᠬᠢᠵᠦ ᠠᠮᠵᠢᠭᠤᠯᠬᠤ ᠶᠠᠪᠤᠳᠠᠯ ᠪᠢᠰᠢ᠃ ᠮᠣᠷᠢᠨ ᠤ᠋ ᠴᠣᠭᠭᠢᠶᠠᠨ ᠳᠤᠮᠳᠠ ᠬᠢ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠠᠯᠴᠠᠵᠤ ᠲᠡᠪᠡᠷᠢᠯᠴᠡᠭᠰᠡᠨ ᠦᠢᠯᠡᠳᠦᠯ ᠪᠦᠷ ᠴᠦ᠍ ᠭᠠᠢᠬᠠᠮᠰᠢᠭᠲᠠᠢ᠃ ᠶᠡᠷᠦ ᠨᠢ ᠬᠥᠮᠦᠨ ᠰᠠᠨᠠᠵᠤ ᠰᠠᠲᠤᠪᠠᠯ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠶ᠋ᠢᠨ ᠵᠢᠱ᠌ᠢᠶᠡ ᠴᠦ᠍ ᠶᠦᠮ ᠤᠤ ᠳᠠ! ᠬᠡᠷᠦᠯᠳᠵᠢᠨ ᠬᠠᠢᠷᠠᠲᠠᠢ ᠬᠦᠦ ᠳ᠋ᠡᠭᠡᠨ ᠣᠶᠣᠭᠰᠠᠨ ᠴᠠᠮᠴᠠ ᠪᠠᠨ ᠲᠢᠭᠯᠡᠵᠦ ᠨᠢᠭᠡ ᠬᠠᠷᠠᠯᠠ᠃ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠲᠡᠢ ᠠᠶᠠᠲᠠᠢᠬᠠᠨ ᠪᠣᠯᠤᠭᠰᠠᠨ ᠰᠠᠨᠠᠭᠳᠠᠨᠠ᠃ ᠭᠠᠭᠴᠠᠬᠠᠨ ᠵᠢᠷᠦᠬᠡᠨ ᠲᠤᠰ ᠡᠩᠭᠡᠷ ᠳᠡᠭᠡᠷᠡ ᠨᠢ ᠬᠠᠳᠬᠤᠬᠤ ᠬᠠᠢᠲᠠᠩ ᠶᠠᠭᠠᠨ ᠴᠡᠴᠡᠭ ᠬᠠᠳᠬᠤᠬᠤ ᠦᠯᠡᠳᠡᠭᠰᠡᠨ ᠲᠤᠯᠠ ᠬᠠᠳᠬᠤᠬᠤ ᠠ᠋ᠴᠠ ᠪᠠᠨ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠪᠠᠷ ᠣᠷᠢᠶᠠᠵᠤ ᠱᠠᠭᠯᠠᠪᠠ᠃ ᠤᠳᠠᠵᠤ ᠲᠦᠳᠡᠭᠰᠡᠨ ᠴᠦ᠍ ᠦᠭᠡᠢ ᠤᠷᠠᠨ ᠴᠡᠴᠡᠭ ᠲᠣᠷᠣᠢᠭᠠᠳ ᠢᠷᠡᠯᠡ᠃
— ᠪᠣᠯᠤᠭᠰᠠᠨ ᠪᠠᠢᠬᠤ ᠠ᠋ ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷᠲᠡᠭᠡᠨ ᠬᠡᠯᠡᠭᠡᠳ ᠢᠨᠢᠶᠡᠪᠬᠢᠯᠡᠬᠦᠢ ᠨᠠᠷᠢᠬᠠᠨ ᠬᠥᠮᠥᠰᠬᠡ ᠲᠡᠢ ᠣᠨᠢᠭᠠᠷᠬᠠᠨ ᠪᠣᠷᠣ ᠨᠢᠳᠦ ᠨᠢ ᠴᠣᠭᠲᠠᠢ ᠭᠢᠯᠠᠯᠵᠠᠵᠤ ᠵᠢᠭᠠᠬᠠᠨ ᠬᠠᠮᠠᠷ ᠨᠢ ᠱᠣᠩᠳᠣᠢᠨ ᠤᠷᠤᠭᠤᠯ ᠨᠢ ᠵᠣᠮᠪᠣᠢᠰᠭᠢᠵᠤ ᠪᠦᠬᠦᠢ ᠯᠡ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠯᠡ᠃
ᠨᠥᠭᠥᠭᠡᠳᠦᠷ ᠨᠠᠭᠠᠳᠤᠮ ᠡᠬᠢᠯᠡᠨᠡ᠃ ᠥᠨᠥ ᠥᠷᠯᠥᠭᠡ ᠠᠪᠤ ᠬᠤᠸᠠ ᠬᠣᠩᠭᠣᠷ ᠠᠵᠢᠷᠭᠠ᠂ ᠨᠢᠭᠡ ᠰᠣᠶᠣᠭᠠᠯᠠᠩ ᠢ᠋ᠶ᠋ᠠᠨ ᠤᠨᠤᠭᠠᠴᠢ ᠬᠡᠦᠬᠡᠳ ᠦ᠋ᠳ ᠲᠡᠢ ᠪᠡᠨ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃ ᠨᠥᠭᠥᠭᠡᠳᠦᠷ ᠥᠷᠯᠥᠭᠡ ᠦᠶᠡ ᠶ᠋ᠢᠨ ᠪᠦᠰᠡᠭᠦᠢ ᠲᠡᠢ ᠪᠡᠨ ᠶᠠᠪᠤᠬᠤ ᠪᠠᠷ ᠭᠣᠶᠣᠯ ᠵᠠᠰᠠᠯ ᠢ᠋ᠶ᠋ᠠᠨ ᠲᠥᠬᠥᠭᠡᠷᠴᠦ᠂ ᠤᠨᠤᠬᠤ ᠮᠣᠷᠢ ᠪᠠᠨ ᠰᠢᠪᠬᠠᠷᠠᠭᠠᠵᠤ ᠪᠠᠢᠭᠠ᠃ ᠭᠤᠶᠤᠵᠤ ᠭᠤᠶᠤᠵᠤ ᠬᠥᠳᠡᠯᠦᠨᠡ᠂ ᠲᠡᠨᠳᠡ ᠪᠣᠭᠣᠷᠴᠢ ᠲᠠᠢ ᠠᠭᠤᠯᠵᠠᠨᠠ᠃ ᠡᠨᠡ ᠪᠣᠯ ᠵᠢᠩᠬᠢᠨᠢ ᠨᠠᠭᠠᠳᠤᠮ᠃
ᠨᠠᠭᠠᠳᠤᠮ ᠤ᠋ᠨ ᠥᠷᠯᠥᠭᠡ᠃ ᠲᠦᠭᠣᠨᠣ ᠠᠭᠤᠯᠠᠨ ᠠ᠋ᠴᠠ ᠪᠠᠷᠠᠭᠤᠨ ᠲᠡᠰᠢ ᠬᠢ ᠬᠡᠷᠦᠯᠦᠨ ᠳᠠᠭᠠᠤ ᠶᠡᠬᠡ ᠴᠡᠯᠡᠭᠡᠷ ᠬᠥᠨᠳᠡᠢ ᠳ᠋ᠦ᠍ ᠲᠩᠷᠢ ᠡᠴᠡ ᠴᠡᠴᠡᠭ ᠦ᠋ᠨ ᠬᠤᠷᠠ ᠪᠠᠭᠤᠵᠤ ᠭᠡᠯᠲᠡᠢ ᠡᠷᠢᠶᠡᠯᠵᠡᠨ ᠮᠢᠷᠠᠯᠵᠠᠵᠤ᠂ ᠡᠨᠳᠡ ᠲᠡᠨᠳᠡ ᠠᠯᠲᠠᠨ ᠰᠢᠷᠠ ᠠᠰᠠᠷ ᠴᠠᠴᠠᠷ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠯᠵᠠᠨ ᠭᠢᠯᠲᠠᠭᠠᠨᠠᠨᠠ᠃ ᠬᠣᠯᠠ ᠶ᠋ᠢᠨ ᠬᠦᠨᠳᠦᠲᠡᠢ ᠶᠠᠮᠪᠠᠲᠠᠢ ᠵᠣᠴᠢᠳ ᠴᠤ᠌ ᠣᠯᠠᠨ ᠭᠡᠯᠴᠡᠨᠡ᠃ ᠵᠦᠷᠬᠢᠨ ᠦ᠌ ᠰᠡᠴᠡ ᠪᠡᠬᠢ᠂ ᠲᠠᠢᠴᠢᠭᠤ᠂ ᠪᠣᠷᠵᠢᠭᠢᠨ ᠤ᠋ ᠠᠯᠲᠠᠨ᠂ ᠬᠣᠴᠠᠷ᠂ ᠬᠡᠷᠡᠢᠳ ᠦ᠋ᠨ ᠬᠠᠨ ᠬᠦᠦ ᠰᠡᠩᠭᠦᠮ᠂ ᠥᠭᠡᠷᠡ ᠪᠠᠰᠠ ᠬᠡᠨ ᠬᠡᠨ ᠴᠦ᠍ ᠭᠡᠨᠡ ᠪᠣᠢ? ᠲᠡᠳᠡ ᠴᠥᠮ ᠯᠡ ᠬᠤᠷᠳᠤ ᠲᠠᠢ᠂ ᠮᠣᠷᠢᠳ ᠲᠠᠢ᠂ ᠳᠠᠷᠴᠤᠭ ᠲᠠᠢ᠂ ᠳᠠᠭᠠᠭᠤᠯ ᠲᠠᠢ᠃
ᠤᠷᠵᠢᠳᠤᠷ ᠥᠷᠯᠥᠭᠡ ᠡᠷᠲᠡᠯᠡᠨ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠬᠢᠵᠦ ᠪᠠᠭᠠ ᠦᠳᠡ ᠡᠴᠡ ᠡᠮᠦᠨᠡ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠡᠮᠦᠨᠡᠭᠦᠷ ᠣᠷᠢᠶᠠᠵᠤ ᠪᠠᠷᠠᠭᠤᠨ ᠬᠣᠢᠲᠤ ᠰᠤᠭᠤᠨ ᠳ᠋ᠤᠨᠢ ᠢᠷᠡᠵᠦ ᠪᠠᠭᠤᠬᠤ ᠭᠡᠲᠡᠯᠡ ᠰᠡᠯᠡᠮᠡ ᠵᠢᠳᠠ ᠪᠠᠷᠢᠭᠰᠠᠨ ᠬᠡᠳᠦᠨ ᠬᠥᠮᠦᠨ ᠢᠷᠡᠯᠡ᠃ ᠪᠣᠭᠣᠷᠴᠢ ᠡᠢᠮᠦ ᠶᠠᠭᠤᠮᠠ ᠲᠡᠳᠦᠢ ᠯᠡ ᠦᠵᠡᠭᠡ ᠦᠭᠡᠢ ᠲᠤᠯᠠ ᠵᠢᠷᠦᠬᠡ ᠴᠡᠴᠡᠷᠡᠵᠦ ᠠᠶᠤᠵᠤ ᠮᠡᠭᠳᠡᠭᠰᠡᠨ᠃ ᠬᠠᠷᠢᠨ ᠠᠪᠤ ᠨᠢ ᠲᠣᠯᠣᠭᠠᠢ ᠮᠡᠬᠦᠢᠨ ᠰᠥᠭᠥᠳᠴᠦ᠄
— ᠲᠠ ᠪᠦᠬᠦᠨ ᠦ᠌ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ᠃ ᠪᠢ ᠪᠡᠷ ᠠᠷᠤᠯᠠᠳ ᠤ᠋ᠨ ᠨᠠᠬᠤ ᠬᠡᠮᠡᠭᠴᠢ ᠪᠢᠯᠡ᠃ ᠲᠦᠮᠡᠨ ᠲᠦᠪᠭᠦᠨ ᠦ᠌ ᠶᠡᠬᠡ ᠨᠠᠭᠠᠳᠤᠮ ᠳ᠋ᠤ᠌ ᠬᠦᠯᠦᠭ ᠮᠣᠷᠢᠳ ᠢ᠋ᠶ᠋ᠠᠨ ᠰᠣᠢᠵᠤ ᠢᠷᠡᠭᠰᠡᠨ ᠥᠴᠦᠬᠡᠨ ᠠᠯᠪᠠᠲᠤ ᠠᠷᠠᠳ᠃ ᠡᠷᠬᠢᠮ ᠬᠦᠨᠳᠦᠲᠦ ᠲᠠ ᠪᠦᠬᠦᠨ ᠦ᠌ ᠵᠠᠷᠯᠢᠭ ᠠᠢᠯᠠᠳᠪᠤᠷᠢ ᠳ᠋ᠤ᠌ ᠪᠢᠰᠢᠷᠡᠨ ᠳᠠᠭᠠᠷᠠ ᠭᠡᠵᠦ ᠡᠪᠦᠳᠦᠭ ᠰᠥᠬᠥᠷᠦᠨ ᠮᠡᠨᠳᠦᠴᠢᠯᠡᠪᠡ᠃ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠪᠡᠷ ᠠᠪᠢᠷ ᠶᠠᠷᠢᠯᠴᠠᠵᠤ ᠭᠣᠣᠯ ᠬᠥᠮᠦᠨ ᠨᠢ᠄
— ᠠᠷᠤᠯᠠᠳ ᠤ᠋ᠨ ᠨᠠᠬᠤ ᠪᠠᠶᠠᠨ ᠢ᠋ ᠪᠢᠳᠡ ᠰᠣᠨᠣᠰᠴᠤ ᠮᠡᠳᠡᠵᠦ ᠪᠠᠢᠭᠰᠠᠨ᠃ ᠲᠠᠨ ᠢ᠋ ᠲᠠᠨᠢᠬᠤ ᠦᠭᠡᠢ ᠯᠡ ᠳᠡ᠃ ᠣᠳᠣ ᠲᠠᠨᠢᠵᠤ ᠮᠡᠳᠡᠯᠡ᠃ ᠡᠨᠡ ᠪᠠᠷᠠᠭᠤᠨ ᠳᠠᠰᠢ ᠶᠡᠬᠡᠰ ᠳᠡᠭᠡᠳᠦᠰ᠂ ᠵᠣᠴᠢᠳ ᠭᠡᠢᠴᠢᠳ ᠪᠠᠭᠤᠭᠰᠠᠨ ᠪᠠᠭᠤᠷᠢ᠃ ᠲᠠ ᠲᠡᠳᠡᠨ ᠲᠡᠢ ᠠᠷᠴᠠᠵᠤ ᠡᠨᠳᠡ ᠢᠯᠡ ᠪᠠᠭᠤᠵᠤ ᠪᠣᠯᠬᠤ ᠦᠭᠡᠢ᠃ ᠶᠡᠷᠦᠳᠡᠭᠡᠨ ᠬᠡᠳᠦᠬᠡᠨ ᠠᠯᠬᠤᠭᠠᠳ ᠯᠠ ᠡᠨᠡ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠪᠠᠭᠤᠴᠢᠬᠠ᠃ ᠲᠡᠭᠡᠪᠡᠯ ᠨᠢ ᠶᠡᠬᠡᠰ ᠳᠡᠭᠡᠳᠦᠰ ᠡᠴᠡ ᠳᠠᠯᠳᠠ ᠣᠷᠣᠴᠢᠬᠠᠨᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠲᠠᠨ ᠤ᠋ ᠵᠡᠷᠭᠡ ᠵᠢᠩᠳᠠᠭᠠᠨ ᠤ᠋ ᠠᠷᠠᠳ ᠤ᠋ᠳ ᠪᠠᠢᠭᠠ ᠭᠡᠵᠦ ᠶᠡᠬᠡᠯᠡ ᠤᠴᠢᠷᠯᠠᠨ ᠥᠭᠦᠯᠡᠬᠦ ᠳ᠋ᠦ᠍ᠨᠢ ᠪᠣᠭᠣᠷᠴᠢ᠄
— ᠮᠠᠨ ᠤ᠋ ᠠᠪᠤ ᠨᠣᠶᠠᠳ ᠶᠡᠬᠡᠰ ᠪᠢᠰᠢ ᠴᠦ᠍ ᠭᠡᠰᠡᠨ ᠶᠡᠬᠡᠯᠡ ᠨᠡᠷᠡᠲᠡᠢ ᠬᠦᠨᠳᠦᠲᠡᠢ ᠬᠥᠮᠦᠨ ᠶᠦᠮ ᠪᠠᠢᠨᠠ ᠭᠡᠵᠦ ᠪᠠᠬᠠᠷᠬᠠᠬᠤ ᠰᠡᠳᠬᠢᠯ ᠲᠥᠷᠥᠪᠡ᠃ ᠢᠩᠭᠢᠵᠦ ᠳᠠᠰᠢ ᠪᠠᠭᠤᠭᠰᠠᠨ᠃ ᠣᠳᠣ ᠨᠠᠭᠠᠳᠤᠮ᠂ ᠶᠡᠬᠡ ᠬᠥᠯ ᠦ᠋ᠨ ᠳᠤᠮᠳᠠ ᠶᠠᠪᠤᠨᠠ᠃ ᠬᠡᠷᠦᠯᠦᠨᠵᠢᠨ ᠢᠷᠡᠭᠰᠡᠨ ᠪᠠᠢᠮᠠᠷ᠃ ᠬᠠᠮᠢᠭᠠ ᠶᠠᠪᠤᠭᠠ ᠪᠣᠢ? ᠡᠴᠢᠭᠡ ᠨᠢ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠴᠤ ᠶᠠᠪᠤᠭᠠ ᠬᠠᠷᠠᠭᠳᠠᠭᠰᠠᠨ᠃ ᠰᠣᠶᠣᠭᠠᠯᠠᠩ ᠢ᠋ᠶ᠋ᠠᠷ ᠨᠠᠭᠠᠳᠤᠮ ᠤ᠋ᠨ ᠮᠣᠷᠢᠳ ᠡᠬᠢᠯᠡᠵᠦ ᠶᠠᠪᠤᠭᠰᠠᠨ᠃ ᠨᠠᠭᠠᠳᠤᠮ ᠤ᠋ᠨ ᠲᠥᠪ ᠪᠠᠢᠷᠢ ᠰᠦᠷ ᠵᠢᠪᠬᠤᠯᠠᠩ ᠲᠤᠩ ᠶᠡᠬᠡ ᠠᠵᠤᠭᠤ᠃ ᠠᠯᠲᠠᠨ ᠰᠢᠷᠠᠮᠠᠯ ᠴᠠᠴᠠᠷ᠃ ᠲᠡᠨᠳᠡ ᠲᠦᠮᠡᠨ ᠲᠦᠪᠬᠦᠨ ᠦ᠌ ᠶᠡᠬᠡ ᠨᠣᠶᠠᠨ ᠠᠴᠢᠭ ᠱ᠌ᠢᠷᠦᠨ ᠬᠠᠲᠤᠭᠲᠠᠢ ᠲᠠᠢ ᠪᠠᠨ ᠵᠠᠯᠠᠷᠠᠵᠤ ᠬᠣᠶᠠᠷ ᠬᠢᠴᠢᠷ ᠳᠠᠰᠢ ᠶᠡᠬᠡᠰ ᠨᠣᠶᠠᠳ᠂ ᠵᠣᠴᠢᠳ᠂ ᠬᠣᠯᠠ ᠶ᠋ᠢᠨ ᠬᠠᠨ ᠂ ᠬᠠᠲᠤᠳ ᠰᠠᠭᠤᠭᠠ ᠭᠡᠯᠴᠡᠨᠡ᠃ ᠡᠷᠭᠢᠨ ᠲᠣᠭᠣᠷᠢᠨ ᠴᠢᠯᠠᠭᠤᠨ ᠲᠢᠭ ᠲᠠᠲᠠᠵᠤ ᠭᠠᠳᠠᠭᠤᠷ ᠨᠢ ᠵᠢᠳᠠ ᠰᠡᠯᠡᠮᠡ ᠰᠡᠯᠡᠯᠵᠠᠭᠦᠯᠦᠭᠰᠡᠨ ᠴᠡᠷᠢᠭ ᠬᠠᠷᠠᠭᠤᠯ᠃ ᠲᠢᠭ ᠭᠤᠯᠳᠤᠷᠢᠭ ᠠ᠋ᠴᠠ ᠳᠣᠲᠣᠭᠰᠢ ᠣᠷᠣᠭᠰᠠᠨ ᠬᠥᠮᠦᠨ ᠢ᠋ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠠᠰᠤ ᠴᠠᠪᠴᠢᠨᠠ ᠭᠡᠨᠡ᠃ ᠮᠣᠷᠢᠳ ᠢᠷᠡᠬᠦ ᠵᠠᠮ ᠤ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠤᠷᠲᠤ ᠰᠢᠯᠤᠭᠤᠨ ᠲᠢᠭ ᠪᠠᠷᠤᠭ ᠮᠣᠳᠣ ᠭᠠᠵᠠᠷ ᠤᠷᠲᠤ ᠰᠤᠨᠵᠤ ᠦᠵᠦᠭᠦᠷ ᠲᠦ᠍ ᠱᠣᠩ ᠪᠣᠰᠬᠠᠵᠠᠢ᠃ ᠮᠣᠷᠢᠳ ᠬᠠᠷᠠᠬᠤ ᠬᠥᠮᠦᠨ ᠲᠡᠷᠲᠡᠭᠡ ᠬᠣᠶᠠᠷ ᠪᠢᠴᠢᠬᠠᠨ ᠲᠤᠯᠤᠭᠠᠳ ᠳᠡᠭᠡᠷᠡ ᠡᠴᠡ ᠬᠠᠷᠠᠬᠤ᠂ ᠳᠣᠭᠣᠭᠰᠢ ᠵᠠᠮ ᠤ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠨᠡᠯᠢᠶᠡᠳ ᠵᠠᠢᠲᠠᠢ ᠵᠢᠳᠠ ᠰᠡᠷᠡᠭᠡ ᠪᠠᠷᠢᠭᠰᠠᠨ ᠴᠡᠷᠢᠭ᠃ ᠳᠣᠭᠣᠭᠰᠢ ᠳᠣᠪᠲᠣᠯᠪᠠᠯ ᠲᠡᠷᠡ ᠤᠷᠲᠤ ᠬᠤᠷᠴᠠ ᠮᠡᠰᠡ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠥᠷᠲᠥᠬᠦ ᠠᠵᠠᠢ᠃ ᠨᠠᠭᠠᠳᠤᠮ ᠳ᠋ᠤ᠌ ᠪᠠᠷᠤᠭ3000 ᠬᠥᠮᠦᠨ ᠴᠤᠭᠯᠠᠷᠠᠵᠤ ᠭᠡᠯᠴᠡᠨᠡ᠃ ᠪᠣᠭᠣᠷᠴᠤ ᠭᠡᠭᠦᠦ ᠪᠡᠨ ᠰᠠᠭᠠᠭᠠᠳ ᠠᠵᠢᠷᠭᠠ ᠪᠠᠨ ᠤᠷᠤᠯᠳᠤᠭᠠᠨ ᠤ᠋ ᠬᠦᠦ ᠳ᠋ᠦ᠍ ᠤᠨᠤᠭᠤᠯᠵᠤ ᠳᠠᠭᠠᠭᠤᠯᠤᠨ ᠨᠠᠭᠠᠳᠤᠮ ᠤ᠋ᠨ ᠭᠣᠣᠯ ᠠᠰᠠᠷ ᠤᠷᠤᠭᠤ ᠢᠷᠡᠭᠰᠡᠨ ᠨᠢ ᠡᠨᠡ᠃ ᠲᠡᠷᠲᠡᠭᠡ ᠲᠡᠨᠳᠡ ᠶᠠᠪᠤᠭᠠ ᠭᠤᠷᠪᠠᠨ ᠪᠦᠰᠡᠭᠦᠢ ᠶ᠋ᠢᠨ ᠨᠢᠭᠡ ᠨᠢ ᠬᠡᠷᠦᠯᠳᠵᠢᠨ ᠮᠥᠨ᠃ ᠲᠡᠷᠡ ᠴᠦ᠍ ᠲᠡᠭᠦᠨ ᠢ᠋ ᠬᠠᠷᠠᠴᠢᠬᠠᠪᠠ ᠪᠣᠯᠤᠯᠲᠠᠢ᠂ ᠴᠠᠭᠠᠳᠤᠯᠠ ᠠ᠋ᠴᠠ ᠪᠠᠨ ᠰᠠᠯᠵᠤ ᠳᠠᠪᠬᠢᠭᠠᠳ ᠢᠷᠡᠯᠡ᠃
— ᠰᠠᠢᠬᠠᠨ ᠨᠠᠭᠠᠳᠴᠤ ᠪᠠᠢᠨᠠ ᠤᠤ? ᠭᠡᠯᠴᠡᠨ ᠠᠭᠤᠯᠵᠠᠯᠠ᠃ ᠲᠡᠷᠡ ᠬᠣᠶᠠᠷ ᠨᠠᠭᠠᠳᠤᠮ ᠤ᠋ᠨ ᠰᠣᠨᠢᠨ᠂ ᠡᠨᠳᠡ ᠲᠡᠷᠡ ᠶ᠋ᠢ ᠶᠠᠷᠢᠯᠴᠠᠵᠤ ᠬᠦᠦᠷᠨᠢᠬᠦ ᠵᠠᠭᠤᠷᠠ ᠬᠡᠷᠦᠯᠳᠵᠢᠨ ᠄
— ᠪᠣᠭᠣᠷᠴᠤ᠂ ᠲᠡᠷᠲᠡᠭᠡ ᠡᠮᠦᠨᠡᠬᠢ ᠴᠢᠯᠠᠭᠤ ᠭᠡᠮᠡᠷ ᠪᠠᠷᠠᠭᠠᠨ ᠶᠠᠭᠤᠮᠠ ᠬᠠᠷᠠᠭᠳᠠᠨᠠ ᠤᠤ? ᠰᠣᠶᠣᠯᠠᠩ ᠢᠷᠡᠭᠡᠳ ᠠᠵᠢᠷᠭᠠᠨ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠭᠠᠷᠬᠤ ᠦᠶᠡ ᠪᠡᠷ ᠴᠢ ᠲᠡᠰᠢ ᠪᠡᠨ ᠣᠴᠢ᠃ ᠲᠡᠨᠳᠡ ᠠᠭᠤᠯᠵᠠᠶᠠ᠂ ᠬᠣᠶᠠᠭᠤᠯᠠ ᠭᠡᠵᠦ ᠪᠣᠯᠵᠣᠭᠠ ᠲᠠᠯᠪᠢᠯᠠ᠃ ᠲᠡᠷᠡ ᠪᠡᠷ
— ᠪᠢ ᠣᠷᠣᠢ ᠳ᠋ᠠᠭᠠᠨ ᠪᠤᠴᠠᠬᠤ ᠪᠠᠢᠬᠠ᠃ ᠠᠵᠢᠷᠭᠠ ᠪᠠᠨ ᠳᠠᠪᠬᠢᠭᠠᠳ ᠠᠪᠤ ᠣᠷᠣᠢ ᠳ᠋ᠠᠭᠠᠨ ᠪᠤᠴᠠᠨᠠ ᠭᠡᠵᠦ ᠪᠠᠢᠭᠰᠠᠨ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠬᠦ ᠨᠢ《ᠣᠴᠢᠬᠤ ᠦᠭᠡᠢ ᠪᠣᠯ ᠪᠢᠳᠡ ᠬᠣᠶᠠᠷ ᠠᠭᠤᠯᠵᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨᠠ》 ᠭᠡᠰᠡᠨ ᠰᠠᠨᠠᠮᠵᠢ ᠠᠵᠢ᠃ ᠰᠣᠶᠣᠯᠠᠩ ᠴᠤ᠌ ᠢᠷᠡᠯᠡ᠂ ᠠᠵᠢᠷᠭᠠ ᠮᠣᠷᠳᠠᠯᠠ᠃ ᠪᠣᠭᠣᠷᠴᠢ ᠰᠣᠶᠣᠯᠠᠩ ᠤ᠋ᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠭᠠᠷ ᠤᠷᠤᠭᠤ ᠪᠠᠨ ᠶᠠᠪᠤᠭᠤᠯᠵᠤ᠄
— ᠨᠠᠮᠠᠶ᠋ᠢ ᠢᠷᠡᠬᠦ ᠦᠭᠡᠢ ᠤᠳᠠᠪᠠᠯ ᠤᠨᠠᠭᠠ ᠪᠠᠨ ᠡᠬᠡ ᠳ᠋ᠦ᠍ᠨᠢ ᠭᠥᠭᠦᠭᠦᠯᠦᠭᠡᠳ ᠤᠶᠠᠴᠢᠬᠠᠭᠠᠷᠠᠢ᠃ ᠴᠢ ᠰᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠪᠣᠯᠪᠠᠯ ᠪᠢ ᠣᠴᠢᠬᠤ ᠶ᠋ᠢ ᠪᠣᠳᠣᠨᠠ ᠭᠡᠯᠡ᠃ ᠬᠣᠶᠠᠷ ᠵᠠᠯᠠᠭᠤ ᠪᠣᠯᠵᠣᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠵᠤ ᠣᠴᠢᠯᠠ᠃ ᠲᠡᠷᠡ ᠬᠣᠶᠠᠷ ᠬᠡᠷᠦᠯᠦᠨ ᠳ᠋ᠦ᠍ ᠣᠷᠣᠵᠤ ᠪᠡᠶᠡ ᠪᠡᠨ ᠠᠷᠢᠭᠤᠳᠬᠠᠨ ᠪᠤᠷᠭᠠᠰᠤᠨ ᠳᠣᠣᠷᠠ ᠨᠢᠭᠤᠭᠳᠠᠵᠤ ᠲᠣᠭᠯᠠᠪᠠ᠃ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠡᠷᠦᠯᠦᠨᠵᠢᠨ᠄
— ᠬᠡᠷᠦᠯᠦᠨ ᠮᠥᠷᠡᠨ ᠬᠠᠨ ᠬᠡᠨᠲᠡᠢ ᠠᠭᠤᠯᠠᠨ ᠠ᠋ᠴᠠ ᠡᠬᠢ ᠠᠪᠴᠤ ᠨᠠᠭᠠᠰᠢ ᠡᠮᠦᠨᠡ ᠵᠦᠭ ᠤᠷᠤᠰᠴᠤ ᠢᠷᠡᠭᠡᠳ ᠡᠨᠡᠦᠬᠡᠨ ᠪᠠᠷᠠᠭᠤᠨ ᠠ᠋ᠴᠠ ᠵᠡᠭᠦᠨ ᠲᠡᠰᠢ ᠳᠤᠭᠤᠢᠷᠠᠨ ᠤᠷᠤᠰᠳᠠᠭ ᠶᠤᠮ᠃ ᠡᠨᠡ ᠶᠡᠬᠡ ᠳᠤᠭᠤᠢᠷᠠᠭᠰᠠᠨ ᠭᠠᠵᠠᠷ ᠢ᠋ ᠬᠥᠳᠡᠭᠡ ᠠᠷᠠᠯ ᠭᠡᠳᠡᠭ᠃ ᠶᠡᠬᠡ ᠰᠠᠢᠬᠠᠨ ᠨᠤᠲᠤᠭ᠃ ᠮᠠᠨᠠᠢᠬᠢᠨ ᠣᠲᠣᠷ ᠬᠥᠭᠡᠭᠡᠵᠦ ᠢᠷᠡᠳᠡᠭ᠃ ᠬᠠᠩᠭᠠᠢᠲᠠᠭᠤ᠂ ᠡᠪᠡᠰᠦ ᠨᠢ ᠪᠦᠳᠦᠭᠦᠨ ᠭᠡᠳ ᠤᠳᠠᠭᠠᠨ ᠨᠤᠲᠤᠭᠯᠠᠬᠤ ᠳᠤᠷᠠ ᠦᠭᠡᠢ ᠪᠠᠢᠳᠠᠭ ᠶᠤᠮ ᠭᠡᠵᠦ ᠪᠣᠭᠣᠷᠴᠢ ᠳ᠋ᠤ᠌ ᠭᠠᠵᠠᠷ ᠣᠷᠣᠨ ᠤ᠋ ᠪᠠᠢᠳᠠᠯ ᠢ᠋ ᠰᠣᠨᠢᠷᠬᠠᠭᠤᠯᠤᠯᠠ᠃ ᠲᠡᠷᠡ ᠶᠡᠷᠦ ᠠᠮᠠ ᠬᠠᠭᠤᠷᠠᠢ ᠪᠠᠢᠭᠰᠠᠨ ᠦᠭᠡᠢ᠃ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠶᠠᠪᠤᠬᠤ ᠪᠣᠯᠬᠤ ᠳ᠋ᠤ᠌ ᠬᠡᠷᠦᠯᠦᠨᠵᠢᠨ᠄
— ᠪᠣᠭᠣᠷᠴᠢ ᠠ᠋᠂ ᠬᠠᠢᠷᠠᠲᠠᠢ ᠬᠣᠩᠭᠣᠷ ᠬᠡᠦᠬᠡᠨ ᠴᠢᠨᠢ ᠴᠢᠮᠠ ᠳ᠋ᠠᠭᠠᠨ ᠴᠠᠮᠴᠠ ᠣᠶᠣᠵᠤ ᠢᠷᠡᠭᠰᠡᠨ ᠰᠢᠦ᠃ ᠥᠨᠥ ᠥᠷᠯᠥᠭᠡ ᠯᠡ ᠡᠮᠦᠰᠦᠭᠰᠡᠨ᠂ ᠰᠢᠨᠡ᠃ ᠴᠢ ᠴᠠᠮᠴᠠ ᠪᠠᠨ ᠨᠠᠳᠠᠳᠤ ᠥᠭ᠂ ᠰᠣᠯᠢᠵᠤ ᠡᠮᠦᠰᠦᠶᠡ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ᠄
— ᠶᠠᠮᠠᠷ ᠰᠠᠢᠬᠠᠨ! ᠡᠵᠢ ᠮᠢᠨᠢ ᠰᠢᠨᠡ ᠴᠠᠮᠴᠠ ᠣᠶᠣᠵᠤ ᠥᠭᠭᠦᠭᠡᠳ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠡᠮᠦᠰᠦᠭᠡᠷᠡᠢ ᠭᠡᠰᠡᠨ ᠶᠦᠮ᠃ ᠥᠨᠥ ᠥᠷᠯᠥᠭᠡ ᠡᠮᠦᠰᠦᠭᠰᠡᠨ ᠰᠢᠨᠡ᠃
ᠬᠣᠶᠠᠷ ᠠᠮᠠᠷᠠᠭ ᠴᠠᠮᠴᠠ ᠪᠠᠨ ᠰᠣᠯᠢᠯᠴᠠᠨ ᠨᠢᠭᠤᠷ ᠨᠢᠭᠤᠷᠠᠨ ᠳ᠋ᠠᠭᠠᠨ ᠨᠠᠭᠠᠵᠤ ᠦᠨᠦᠷᠯᠡᠭᠡᠳ ᠡᠮᠦᠰᠦᠨ ᠲᠡᠪᠡᠷᠢᠯᠳᠦᠯᠡ᠃
— ᠬᠡᠷᠦᠯᠦᠨᠵᠢᠨ ᠠ᠋᠂ ᠪᠢ ᠣᠳᠣ ᠳᠠᠪᠬᠢᠶᠠ᠃ ᠤᠭ ᠨᠢ ᠮᠣᠷᠢᠨ ᠤ᠋ ᠬᠦᠦ ᠳ᠋ᠦ᠍ ᠤᠨᠠᠭᠠ ᠪᠠᠨ ᠬᠥᠬᠥᠭᠦᠯᠦᠭᠡᠳ ᠤᠶᠠᠭᠠᠷᠠᠢ ᠭᠡᠰᠡᠨ ᠳᠡ᠃ ᠣᠳᠣ ᠠᠮᠵᠢᠮᠠᠷ ᠪᠠᠢᠨᠠ᠃ ᠣᠴᠢᠵᠤ ᠰᠠᠭᠠᠶᠠ᠃ ᠬᠡᠷᠦᠯᠦᠨᠵᠢᠨ ᠳᠠᠭᠤ ᠠᠯᠲᠠᠨ᠄
— ᠬᠣᠶᠠᠭᠤᠯᠠ ᠣᠴᠢᠭᠠᠳ ᠰᠠᠭᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ?
— ᠪᠣᠯᠤᠨᠠ᠂ ᠬᠣᠶᠠᠭᠤᠯᠠ ᠳᠠᠪᠬᠢᠶᠠ᠃ ᠠᠵᠢᠷᠭᠠ ᠢᠷᠡᠬᠦ ᠡᠴᠡ ᠡᠮᠦᠨᠡ᠁
ᠬᠤᠢ ᠰᠠᠯᠬᠢ ᠮᠡᠲᠦ ᠭᠡᠷ ᠲᠡᠭᠡᠨ ᠪᠠᠭᠤᠴᠢᠬᠠᠯᠠ᠃
— ᠪᠢ ᠭᠠᠷᠴᠤ ᠤᠨᠠᠭᠠ ᠪᠠᠨ ᠭᠥᠭᠦᠭᠦᠯᠦᠶᠡ ᠤᠤ? ᠭᠡᠲᠡᠯᠡ ᠲᠠ ᠢᠷᠡᠯᠡ ᠭᠡᠵᠦ ᠪᠢᠴᠢᠬᠠᠨ ᠬᠦᠦ ᠬᠡᠯᠡᠯᠡ᠃ ᠬᠦᠦ ᠳ᠋ᠦ᠍ ᠨᠢᠭᠡ ᠬᠥᠭᠡᠷᠦᠬᠦᠨ ᠭᠣᠶᠣ ᠡᠭᠡᠴᠢ ᠢᠷᠡᠵᠦ ᠪᠣᠣᠪᠣ ᠰᠢᠬᠢᠷ ᠥᠭᠭᠦᠯᠡ᠃ ᠲᠡᠳᠡ ᠴᠦ᠍ ᠬᠤᠪᠢᠩ ᠠᠪᠤᠭᠠᠳ ᠳᠣᠯᠣᠭᠠᠨ ᠭᠡᠭᠦᠦ ᠶ᠋ᠢ ᠰᠠᠭᠠᠭᠠᠳ ᠣᠷᠣᠵᠤ᠂ ᠪᠣᠭᠣᠷᠴᠢ ᠠᠢᠷᠠᠭ ᠠᠶᠠᠭᠠᠯᠠᠨ ᠬᠡᠳᠦ ᠵᠠᠯᠭᠢᠯᠠᠭᠠᠳ ᠬᠡᠷᠦᠯᠦᠨᠵᠢᠨ ᠳ᠋ᠦ᠍ ᠥᠭᠬᠦ ᠨᠢ ᠰᠣᠨᠢᠨ᠁ ᠭᠣᠶᠣ ᠠᠶᠠᠭᠠ ᠲᠠᠢ ᠠᠢᠷᠠᠭ ᠢ᠋ᠶ᠋ᠠᠨ ᠬᠤᠪᠢᠶᠠᠵᠤ ᠤᠤᠭᠤᠭᠠᠳ᠂ ᠬᠡᠷᠦᠯᠦᠨᠵᠢᠨ᠄
— ᠠᠢᠯ ᠤ᠋ᠨ ᠡᠵᠡᠭᠲᠡᠢ ᠬᠥᠮᠦᠨ ᠴᠢᠨᠢ ᠁ ᠭᠡᠵᠦ ᠬᠡᠯᠡᠭᠡᠳ ᠲᠤᠯᠭᠠᠨ ᠵᠡᠭᠦᠨᠲᠡᠢ ᠰᠠᠭᠤᠵᠤ ᠠᠷᠭᠠᠯ ᠠᠰᠠᠭᠠᠵᠤ ᠭᠠᠯ ᠤᠤᠭᠢᠭᠤᠯᠤᠭᠠᠳ ᠲᠡᠷᠡ ᠳᠣᠣᠷᠠ ᠨᠢ ᠴᠠᠢ ᠪᠤᠴᠠᠯᠭᠠᠵᠤ ᠥᠷᠯᠥᠭᠡ ᠠᠢᠯ ᠠ᠋ᠴᠠ ᠠᠪᠤᠭᠰᠠᠨ ᠰᠦ ᠪᠡᠷ ᠢ᠋ᠶ᠋ᠡᠨ ᠰᠦᠯᠡᠵᠦ ᠠᠭᠤᠳᠠᠯᠤᠭᠠᠳ ᠳᠡᠭᠡᠵᠢ ᠶ᠋ᠢ ᠨᠢ ᠭᠡᠷ ᠦ᠋ᠨ ᠡᠵᠡᠨ ᠪᠣᠭᠣᠷᠴᠢ ᠳ᠋ᠤ᠌ ᠠᠶᠠᠭᠠᠯᠠᠵᠤ ᠪᠠᠷᠢᠪᠠ᠃ ᠪᠣᠭᠣᠷᠴᠢ ᠬᠣᠢᠮᠣᠷ ᠢ᠋ᠶ᠋ᠠᠨ ᠠᠪᠤ ᠰᠢᠭ᠋ ᠢ᠋ᠶ᠋ᠡᠨ ᠵᠠᠪᠢᠯᠠᠨ ᠰᠠᠭᠤᠵᠤ᠂ ᠠᠶᠠᠭᠠ ᠲᠠᠢ ᠴᠠᠢ ᠬᠡᠳᠦ ᠣᠭᠣᠴᠢᠯᠠᠭᠠᠳ᠄
— ᠣᠳᠣ ᠶᠠᠪᠤᠯ ᠦᠭᠡᠢ ᠪᠣᠯᠬᠤ ᠦᠭᠡᠢ ᠪᠠᠢᠬᠠ ᠠ᠋ ᠭᠡᠳ ᠭᠠᠷᠤᠯᠠ᠃ ᠭᠠᠷᠬᠤ ᠳ᠋ᠠᠭᠠᠨ ᠪᠣᠭᠣᠷᠴᠢ᠄ ᠮᠠᠨ ᠤ᠋ ᠠᠪᠤ ᠲᠡᠷᠡ ᠪᠣᠷᠣ ᠦᠷᠢᠶᠡ ᠠᠵᠢᠷᠭᠠᠨ ᠳ᠋ᠤ᠌ ᠨᠡᠭᠦᠴᠢᠬᠡᠭᠰᠡᠨ ᠭᠡᠪᠡ᠃
— ᠶᠠᠭᠤ ᠨᠡᠭᠦᠬᠦ ᠭᠡᠵᠦ?
— ᠬᠠᠮᠤᠭ ᠢ᠋ᠶ᠋ᠠᠨ ᠯᠠ ᠥᠭᠬᠦ ᠦᠭᠡᠢ ᠤᠤ ᠳᠠ᠃ ᠵᠦᠷᠬᠢᠨ ᠦ᠌ ᠬᠢᠨ ᠤᠷᠵᠢᠳᠤᠷ ᠬᠣᠯᠢᠮᠠᠭ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠤᠷᠤᠯᠳᠤᠭᠤᠯᠵᠤ ᠲᠦᠷᠦᠭᠦᠯᠡᠭᠰᠡᠨ ᠬᠢᠵᠠᠯᠠᠩ ᠦᠷᠢᠶᠡ ᠠᠵᠢᠷᠭᠠ᠃ ᠤᠭ ᠠ᠋ᠴᠠ ᠪᠠᠨ ᠤᠷᠤᠯᠳᠤᠭᠤᠯᠵᠤ ᠦᠨᠡ ᠬᠦᠷᠭᠡᠬᠦ ᠭᠡᠰᠡᠨ ᠶᠦᠮ ᠪᠠᠢᠨᠠ᠃ ᠡᠨᠡ ᠪᠣᠷᠣ ᠲᠦᠷᠦᠭᠦᠯᠡᠵᠦ ᠮᠠᠨ ᠤ᠋ ᠠᠪᠤ ᠦᠨᠡ ᠬᠠᠶᠠᠯᠴᠠᠵᠤ ᠶᠠᠭᠤ ᠶᠠᠭᠤ ᠥᠭᠭᠦᠭᠰᠡᠨ ᠪᠣᠢ? ᠭᠡᠷ᠂ ᠬᠣᠶᠠᠷ ᠲᠡᠷᠭᠡ᠂ ᠤᠨᠠᠭᠠ ᠲᠠᠢ ᠭᠡᠭᠦᠦ ᠬᠣᠶᠠᠷ ᠂ ᠬᠠᠷᠢᠨ ᠰᠠᠷᠠᠯ ᠪᠠᠢᠳᠠᠰᠤ ᠪᠠᠨ ᠥᠭᠬᠦ ᠭᠡᠬᠦ ᠳ᠋ᠦ᠍ᠨᠢ ᠪᠢ 《ᠥᠭᠬᠦ ᠦᠭᠡᠢ 》 ᠭᠡᠵᠦ ᠲᠠᠰᠤ ᠵᠥᠷᠢᠭᠡᠳ ᠣᠷᠣᠨ ᠳ᠋ᠤᠨᠢ ᠰᠢᠳᠦᠯᠡᠩ ᠦᠷᠢᠶᠡ ᠵᠢᠰᠦᠯᠡᠭᠰᠡᠨ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠷᠪᠠᠨ ᠵᠣᠭᠣᠰ ᠁ ᠣᠪᠣᠭᠠ ᠦᠨᠡᠲᠡᠢ ᠠᠳᠤᠭᠤᠰᠤ ᠪᠢᠵᠡ ᠳᠡ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠠᠪᠤ ᠨᠢ ᠯᠡ ᠪᠣᠯᠤᠨᠠ ᠭᠡᠰᠡᠨ ᠪᠣᠯ ᠪᠣᠯᠤᠨᠠ᠃
— ᠮᠠᠷᠭᠠᠰᠢ ᠨᠠᠭᠠᠳᠤᠮ ᠳᠠᠭᠤᠰᠤᠮᠠᠭᠴᠠ ᠶᠠᠭᠤᠮᠠ ᠪᠠᠨ ᠢᠷᠡᠵᠦ ᠠᠪᠤᠨᠠ᠃ ᠪᠣᠷᠣ ᠦᠷᠢᠶᠡ ᠬᠣᠶᠠᠷ ᠪᠠᠢᠳᠠᠰᠤ ᠬᠤᠷᠢᠶᠠᠭᠠᠳ ᠶᠡᠬᠡ ᠪᠠᠢᠭᠠ ᠪᠢᠵᠡ?
ᠲᠡᠷᠡ ᠨᠢ ᠠᠳᠤᠭᠤᠨ ᠤ᠋ ᠵᠠᠬᠠ ᠳ᠋ᠤ᠌ ᠨᠡᠭᠡᠷᠡᠨ ᠴᠦ᠍ ᠴᠠᠪᠢ ᠴᠠᠪᠢᠨ ᠳ᠋ᠠᠭᠠᠨ ᠬᠣᠰᠢᠭᠤ ᠪᠠᠨ ᠬᠢᠴᠢᠬᠡᠭᠡᠳ ᠶᠡᠬᠡ ᠳᠣᠳᠢᠭᠠᠷ ᠬᠠᠷᠠᠭᠳᠠᠨᠠ᠃
— ᠰᠠᠷᠠᠯ ᠪᠠᠢᠳᠠᠰᠤ ᠶ᠋ᠢ ᠶᠡᠷᠦ ᠡᠴᠡ ᠲᠣᠭᠣᠬᠤ ᠦᠭᠡᠢ ᠪᠠᠢᠭᠠ ᠶᠤᠮ᠃
— ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠂ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠦᠯᠴᠢᠬᠡᠭᠰᠡᠨ ᠶᠦᠮ ᠴᠢᠨᠢ ᠭᠡᠵᠦ ᠬᠡᠷᠦᠯᠦᠨᠵᠢᠨ ᠵᠤᠤᠮᠠᠯᠵᠠᠪᠠ᠃
ᠮᠣᠷᠳᠠᠭᠠᠳ ᠬᠣᠶᠠᠭᠤᠯᠠ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠠᠷᠤ ᠪᠠᠷ ᠬᠡᠢᠰᠬᠡᠨ ᠳᠠᠪᠬᠢᠪᠠ᠃ ᠬᠥᠮᠦᠰ ᠴᠦ᠍ ᠬᠤᠢᠨᠠᠷᠠᠨ ᠤᠷᠤᠯᠳᠤᠭᠠᠨ ᠤ᠋ ᠵᠦᠭ ᠳᠣᠪᠲᠣᠯᠭᠠᠨᠠ᠃ ᠵᠠᠮ ᠳ᠋ᠤ᠌ ᠬᠥᠮᠦᠰ ᠵᠠᠢ ᠵᠠᠪᠰᠠᠷ ᠦᠭᠡᠢ᠃ ᠪᠠᠷᠢᠶᠠᠨ ᠳ᠋ᠤ᠌ ᠢᠷᠡᠵᠦ ᠶᠠᠪᠤᠭᠠ ᠮᠣᠷᠢᠳ ᠤ᠋ᠨ ᠲᠣᠭᠣᠰᠣ᠂ ᠣᠨᠴᠠᠭᠠᠢ ᠲᠠᠰᠤᠷᠠᠭᠰᠠᠨ ᠨᠢᠭᠡᠨ ᠨᠢ ᠪᠣᠭᠣᠷᠴᠢ ᠳ᠋ᠤ᠌ ᠨᠢᠭᠡᠯᠡ ᠵᠢᠰᠦ ᠨᠢ ᠪᠠᠭᠤᠭᠠᠳ ᠪᠠᠢᠬᠤ ᠰᠢᠭ᠋᠃
— ᠲᠠᠨ ᠤ᠋ ᠬᠣᠩᠭᠣᠷ ᠪᠢᠰᠢᠦ?
ᠬᠡᠷᠦᠯᠦᠨᠵᠢᠨ ᠰᠡᠳᠬᠢᠯ ᠶᠡᠬᠡᠳᠡ ᠬᠥᠳᠡᠯᠦᠭᠰᠡᠨ ᠪᠣᠯᠤᠯᠲᠠᠢ᠂ ᠬᠣᠶᠠᠷ ᠬᠥᠭᠡᠷᠦᠬᠦᠨ ᠬᠥᠬᠥᠨ ᠦ᠌ ᠬᠢᠨᠢ ᠴᠠᠭᠠᠨᠠ ᠵᠢᠷᠦᠬᠡ ᠴᠡᠭᠡᠵᠢ ᠨᠢ ᠪᠥᠬᠥᠯᠵᠡᠭᠡᠳ᠁ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ᠄
— ᠮᠠᠨ ᠤ᠋ ᠬᠣᠩᠭᠣᠷ ᠮᠥᠨ ᠴᠦ᠍ ᠮᠥᠨ ᠯᠡ ᠳᠡ ᠭᠡᠵᠦ ᠳᠠᠭᠤ ᠠᠯᠳᠠᠭᠠᠳ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠳᠠᠪᠬᠢᠯᠠ᠃ ᠠᠪᠤ ᠨᠢ ᠴᠦ᠍ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠲᠠᠰᠢᠭᠤᠷᠳᠠᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠰᠠᠴᠠᠭᠤ ᠬᠡᠷᠦᠯᠦᠨᠵᠢᠨ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ᠂ ᠪᠣᠭᠣᠷᠴᠤ ᠲᠠᠢ ᠨᠡᠢᠯᠡᠭᠡᠳ᠄
— ᠵᠠ ᠮᠥᠨ ᠨᠢ ᠮᠥᠨ᠃ ᠲᠡᠷᠡ ᠲᠡᠭᠡᠭᠡᠳ ᠲᠥᠷᠥᠭᠦᠯᠦᠨᠡ ᠪᠢᠵᠡ᠃ ᠬᠠᠷᠢᠨ ᠲᠠᠨ ᠤ᠋ ᠬᠡᠭᠡᠷ ᠬᠠᠷᠠᠭᠳᠠᠨᠠ ᠤᠤ? ᠭᠡᠵᠦ ᠵᠣᠪᠠᠨᠢᠩᠭᠤᠢ ᠠᠰᠠᠭᠤᠪᠠ᠃
— ᠠᠷᠪᠠᠨ ᠬᠡᠳᠦ ᠳ᠋ᠦ᠍ ᠶᠠᠪᠤᠬᠤ ᠨᠢ ᠶᠠᠪᠤᠨᠠ᠃ ᠠᠪᠤ ᠴᠤ᠌ ᠲᠡᠷᠡ ᠬᠠᠵᠠᠭᠤ ᠪᠠᠷ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠯᠠ ᠭᠡᠵᠦ ᠲᠣᠭᠣᠮᠵᠢᠷ ᠦᠭᠡᠢᠬᠡᠨ ᠬᠡᠯᠡᠭᠡᠳ᠄
— ᠮᠠᠷᠭᠠᠰᠢ ᠬᠣᠶᠠᠷ ᠶᠡᠬᠡ ᠨᠠᠰᠤ ᠳᠠᠪᠬᠢᠨᠠ᠃ ᠲᠡᠷᠡ ᠬᠣᠶᠠᠷ ᠮᠠᠨᠢ ᠶᠠᠭᠠᠬᠢᠳᠠᠭ ᠪᠣᠯ? ᠨᠤᠲᠤᠭ ᠲᠠᠭᠠᠨ ᠣᠪᠣᠭᠠ ᠳ᠋ᠤ᠌ ᠣᠷᠣᠳᠠᠭ ᠶᠤᠮ ᠭᠡᠯᠡ᠃
ᠨᠠᠬᠤ ᠠᠪᠤ ᠰᠣᠶᠣᠭᠠᠯᠠᠩ᠂ ᠠᠵᠢᠷᠭᠠ ᠬᠣᠶᠠᠷ ᠢ᠋ᠶ᠋ᠠᠨ ᠣᠯᠢᠭᠲᠠᠢ ᠳᠠᠪᠬᠢᠭᠰᠠᠨ ᠦᠭᠡᠢ ᠳ᠋ᠦ᠍ ᠤᠷᠮᠠ ᠮᠠᠭᠤᠬᠠᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠯᠠ᠃ ᠬᠠᠷᠢᠨ ᠬᠡᠷᠦᠯᠦᠨᠵᠢᠨ ᠦ᠌ ᠠᠪᠤ ᠳᠡᠭᠡᠷᠡ ᠢᠷᠡᠲᠡᠯᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠢᠮᠠᠭ᠂ ᠤᠯᠤᠰ ᠤ᠋ᠨ ᠪᠠᠶᠠᠴᠤᠳ ᠶᠡᠬᠡᠰ ᠦ᠋ᠳ ᠴᠤᠭᠯᠠᠷᠠᠵᠤ ᠰᠢᠪᠡᠨ 《ᠬᠤᠳᠠᠯᠳᠤᠵᠤ ᠠᠪᠤᠶᠠ᠂ ᠦᠨᠡ ᠬᠠᠶᠠᠯᠴᠠᠶᠠ 》 ᠭᠡᠵᠦ ᠬᠠᠰᠬᠢᠷᠤᠯᠳᠤᠨᠠ᠃ ᠴᠠᠭᠠᠳᠤᠬᠢ ᠨᠢ 《ᠵᠠᠷᠤᠬᠤ ᠦᠭᠡᠢ᠃ ᠪᠢ ᠮᠡᠳᠡᠬᠦ ᠦᠭᠡᠢ᠃ ᠡᠵᠡᠨ ᠲᠡᠢ ᠶᠦᠮ ᠁ 》 ᠭᠡᠬᠦ ᠡᠴᠡ ᠥᠭᠡᠷᠡ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠵᠠᠯᠬᠠᠵᠤ ᠭᠦᠢᠴᠡᠯᠡ᠃ ᠲᠡᠭᠡᠲᠡᠯᠡ ᠠᠰᠢᠭᠦᠢ᠂ ᠨᠠᠭᠠᠳᠤᠮ ᠤ᠋ᠨ ᠶᠡᠬᠡ ᠠᠰᠠᠷ ᠠ᠋ᠴᠠ ᠲᠦᠷᠦᠭᠦᠦ ᠠᠵᠢᠷᠭᠠ ᠶ᠋ᠢ ᠦᠵᠡᠬᠦ ᠪᠡᠷ ᠶᠡᠬᠡᠰ ᠦ᠋ᠳ᠂ ᠬᠠᠲᠤᠳ ᠳᠠᠭᠠᠭᠤᠯ ᠲᠠᠢ ᠪᠠᠨ ᠭᠠᠷᠴᠤ ᠢᠷᠡᠪᠡ᠃ ᠨᠥᠭᠦᠭᠡ ᠪᠥᠭᠡᠮᠨᠡᠷᠡᠵᠦ ᠪᠦᠴᠢᠭᠰᠡᠨ ᠬᠥᠮᠦᠰ ᠴᠦ᠍ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠰᠢᠭ ᠥᠷᠢᠰᠦᠯᠳᠦᠨ ᠵᠠᠢᠯᠠᠵᠤ᠂ ᠨᠡᠯᠢᠶᠡᠳ ᠬᠣᠯᠠ ᠣᠴᠢᠭᠠᠳ ᠡᠷᠭᠢᠵᠦ ᠬᠠᠷᠠᠨ ᠲᠠᠷᠬᠡᠢᠯᠳᠦᠨ ᠵᠣᠭᠰᠣᠵᠤ ᠪᠣᠢ ᠬᠠᠷᠠᠭᠳᠠᠨᠠ᠃
ᠠᠴᠢᠭ ᠱ᠌ᠢᠷᠦᠨ ᠭᠡᠳᠡᠭ ᠨᠢ ᠲᠣᠩ ᠵᠠᠯᠠᠭᠤᠬᠠᠨ ᠥᠨᠳᠥᠷ ᠵᠣᠣᠯᠢᠭ (ᠵᠣ ᠨᠢᠷᠤᠭᠤ ᠥᠨᠳᠥᠷ ᠭᠡᠰᠡᠨ ᠦᠭᠡ ᠪᠣᠯᠤᠯᠲᠠᠢ ) ᠰᠠᠢᠬᠠᠨ ᠡᠷᠡ ᠶᠦᠮ᠃ ᠬᠠᠲᠤᠨ ᠨᠢ ᠮᠠᠷᠢᠶᠠᠯᠢᠭ᠂ ᠪᠠᠰᠠᠯᠠ ᠶᠡᠬᠡ ᠰᠠᠢᠬᠠᠨ ᠬᠡᠦᠬᠡᠨ ᠶᠦᠮ᠃
ᠬᠡᠷᠡᠢᠳ ᠦ᠋ᠨ ᠬᠠᠭᠠᠨ ᠤ᠋ ᠬᠦᠦ ᠰᠡᠩᠭᠦᠮ ᠣᠢᠷᠠᠲᠤᠭᠠᠳ ᠢᠷᠡᠭᠰᠡᠨ ᠨᠢ ᠪᠣᠭᠣᠷᠴᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠥᠪᠡᠭᠦᠨ ᠠᠵᠢ᠃ ᠬᠠᠷᠢᠨ ᠬᠠᠲᠤᠨ ᠨᠢ ᠡᠭᠡᠴᠢᠮᠡᠳ ᠪᠣᠯᠪᠠᠴᠤ ᠨᠠᠭᠠᠯᠢᠩᠬᠠᠢ᠂ ᠲᠤᠨᠢᠷᠠᠬᠤ ᠵᠠᠩ ᠭᠠᠷᠭᠠᠵᠤ ᠬᠠᠵᠠᠭᠤ ᠠ᠋ᠴᠠ ᠨᠢ ᠰᠤᠭᠤᠳᠠᠵᠤ ᠳᠡᠭᠦᠵᠢᠯᠡᠨ᠂ ᠶᠠᠭᠤᠮᠠ ᠪᠣᠯ ᠤᠷᠤᠭᠤᠯ ᠢ᠋ᠶ᠋ᠠᠨ ᠤᠨᠵᠢᠭᠤᠯᠵᠤ ᠪᠠᠢᠬᠤ ᠰᠢᠭ᠋ ᠮᠠᠶᠢᠭᠲᠠᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠪᠦᠬᠦ ᠬᠠᠲᠤᠳ ᠤ᠋ᠨ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠴᠢᠷᠠᠢᠯᠢᠭ ᠨᠢ ᠶᠦᠮ ᠪᠠᠢᠨᠠ᠃ ᠬᠠᠷᠢᠨ ᠪᠣᠷᠵᠢᠭᠢᠨ ᠤ᠋ ᠨᠣᠶᠠᠳ ᠤ᠋ᠳ ᠪᠦᠭᠦᠳᠡ ᠬᠢᠴᠢᠶᠠᠯᠳᠠᠬᠦᠦ᠂ ᠡᠷᠡ ᠳᠤᠮᠳᠠ ᠨᠠᠰᠤᠨ ᠠ᠋ᠴᠠ ᠥᠩᠭᠡᠷᠡᠵᠦ ᠶᠠᠪᠤᠭᠠ ᠴᠤ᠌ ᠰᠡᠴᠡ ᠪᠡᠬᠢ ᠶ᠋ᠢᠨ ᠡᠬᠡᠨᠡᠷ ᠵᠠᠯᠠᠭᠤᠬᠠᠨ ᠡᠮᠡᠭᠲᠡᠢ ᠠᠵᠢ᠃ ᠲᠡᠳᠡ ᠪᠦᠭᠦᠳᠡ ᠯᠡ ᠶᠡᠬᠡ ᠨᠠᠢᠷᠰᠠᠭ᠂ ᠨᠠᠮᠪᠠ ᠲᠠᠢ᠂ ᠠᠵᠢᠷᠭᠠ ᠶ᠋ᠢ ᠰᠢᠨᠵᠢᠵᠦ ᠰᠢᠪᠡᠷ ᠠᠪᠢᠷ ᠶᠠᠷᠢᠯᠴᠠᠬᠤ ᠠᠪᠠᠢ᠃ ᠬᠡᠷᠦᠯᠳᠵᠢᠨ ᠦ᠌ ᠠᠪᠤ ᠤᠷᠤᠭᠤ ᠠᠴᠢᠭ ᠱ᠌ᠢᠷᠦᠨ ᠣᠢᠷᠠᠲᠤᠭᠠᠳ ᠢᠷᠡᠮᠡᠭᠴᠡ ᠲᠡᠷᠡ ᠪᠡᠷ ᠡᠵᠡᠨ ᠨᠣᠶᠠᠨ ᠤ᠋ ᠪᠠᠨ ᠡᠮᠦᠨᠡ ᠬᠣᠷᠮᠣᠢ ᠳᠡᠪᠢᠰᠦᠨ ᠡᠪᠦᠳᠦᠭ ᠰᠥᠭᠥᠳᠪᠡ᠃
— ᠨᠡᠷᠡ ᠴᠢᠨᠢ ᠬᠡᠨ ᠪᠣᠢ? ᠬᠠᠮᠢᠭᠠᠭᠤᠷ ᠨᠤᠲᠤᠭᠯᠠᠳᠠᠭ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃
— ᠲᠡᠮᠦᠷᠴᠢ ᠭᠡᠳᠡᠭ᠃ ᠭᠤᠷᠪᠠᠨ ᠲᠠᠷᠭᠤᠨ ᠢ᠋ᠶ᠋ᠠᠷ ᠨᠤᠲᠤᠭᠯᠠᠳᠠᠭ ᠳᠠ᠃
— ᠤᠷᠢᠳᠤ ᠡᠮᠦᠨᠡ ᠲᠤᠭᠤᠯᠳᠠᠭᠠ ᠦᠭᠡᠢ ᠡᠵᠡᠨ ᠠᠵᠢᠷᠭᠠ ᠬᠣᠶᠠᠷ᠁ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠤᠤ? ᠬᠡᠳᠦᠨ ᠨᠠᠰᠤᠲᠠᠢ ᠠᠵᠢᠷᠭᠠ ᠪᠣᠢ?
— ᠭᠣᠣᠯ ᠤᠰᠤᠨ ᠳ᠋ᠠᠭᠠᠨ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ᠃ ᠡᠨᠡ ᠵᠢᠯ ᠨᠠᠰᠤ ᠭᠦᠢᠴᠡᠵᠦ ᠪᠠᠢᠭᠠ ᠶᠤᠮ᠃ ᠲᠡᠨᠳᠡ ᠪᠡᠨ ᠲᠦᠷᠦᠭᠦᠯᠡᠭᠡᠳ ᠪᠠᠢᠬᠤ ᠪᠠᠷ ᠡᠨᠡ ᠵᠢᠯ ᠡᠢᠰᠢ ᠢᠷᠡᠭᠰᠡᠨ᠃
— ᠤᠳᠤᠮ ᠨᠢ?
— ᠵᠡᠷᠯᠢᠭ ᠠᠳᠤᠭᠤᠨ ᠤ᠋ ᠦᠷᠡ ᠭᠡᠳᠡᠭ ᠶᠦᠮ᠃
ᠠᠴᠢᠭ ᠱ᠌ᠢᠷᠦᠨ ᠨᠣᠶᠠᠨ ᠴᠠᠭᠠᠰᠢ ᠡᠷᠭᠢᠵᠦ ᠨᠣᠶᠠᠳ ᠲᠠᠢ ᠶᠠᠷᠢᠯᠴᠠᠵᠤ ᠢᠨᠢᠶᠡᠯᠳᠦᠪᠡ᠃
ᠨᠣᠶᠠᠨ ᠤ᠋ ᠳᠠᠭᠠᠯᠳᠠᠭᠰᠠᠳ ᠤ᠋ᠨ ᠨᠢᠭᠡ ᠨᠢ ᠨᠠᠭᠠᠰᠢ ᠳᠥᠭᠥᠵᠦ ᠢᠷᠡᠭᠡᠳ ᠬᠡᠷᠦᠯᠳᠵᠢᠨ᠂ ᠪᠣᠭᠣᠷᠴᠢ ᠬᠣᠶᠠᠷ ᠤᠷᠤᠭᠤ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ᠄
— ᠲᠠ ᠬᠣᠶᠠᠷ ᠡᠵᠡᠨ ᠳ᠋ᠦ᠍ ᠪᠠᠭᠤᠵᠤ ᠰᠥᠭᠥᠳᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠵᠢᠭᠠᠯ ᠤ᠋ᠳ ᠪᠣᠢ? ᠪᠠᠭᠤ! ᠰᠥᠭᠥᠳ! ᠭᠡᠮᠡᠭᠴᠡ ᠬᠡᠷᠦᠯᠳᠵᠢᠨ᠂ ᠪᠣᠭᠣᠷᠴᠢ ᠬᠣᠶᠠᠷ ᠰᠣᠴᠢᠨ ᠮᠡᠩᠳᠡᠵᠦ ᠡᠢᠰᠢ ᠲᠡᠢᠰᠢ ᠬᠠᠷᠠᠪᠠᠰᠤ ᠮᠣᠷᠢᠲᠠᠢ᠂ ᠶᠠᠪᠠᠭᠠᠨ ᠢᠯᠭᠠᠭᠠ ᠦᠭᠡᠢ ᠪᠦᠭᠦᠳᠡ ᠰᠥᠭᠥᠳᠴᠡᠢ᠃ ᠲᠡᠷᠡ ᠬᠣᠶᠠᠷ ᠭᠣᠶᠣ ᠭᠠᠩᠭᠠᠩ᠂ ᠡᠷᠢᠶᠡᠨ ᠮᠢᠷᠢᠶᠠᠨ ᠨᠣᠶᠠᠳ ᠬᠠᠲᠤᠳ ᠲᠤ᠌ ᠨᠢᠳᠦ ᠠᠯᠳᠠᠭᠠᠳ ᠡᠨᠡ ᠪᠦᠬᠦᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠳᠡ ᠪᠤᠰᠢᠭᠤᠬᠠᠨ ᠪᠠᠭᠤᠵᠤ ᠬᠣᠶᠠᠭᠤᠯᠠ ᠰᠥᠭᠥᠳᠪᠡ᠃ ᠶᠡᠬᠡ ᠨᠣᠶᠠᠨ ᠠᠪᠤ ᠤᠷᠤᠭᠤ ᠨᠢ ᠡᠷᠭᠢᠵᠦ᠄
— ᠬᠥᠮᠦᠰ ᠶᠠᠭᠤ ᠭᠡᠳ ᠪᠠᠢᠪᠠ? ᠪᠥᠭᠡᠮ ᠱᠤᠤᠭᠢᠶᠠᠨ ᠪᠣᠯᠤᠭᠠᠳ ᠪᠠᠢᠭᠰᠠᠨ᠃
— ᠬᠤᠳᠠᠯᠳᠤ᠁ ᠶᠡᠬᠡ ᠦᠨᠡ ᠥᠭᠭᠦᠨᠡ ᠭᠡᠨᠡ᠃ ᠠᠰᠢᠭᠦᠢ ᠲᠠᠨ ᠤ᠋ ᠪᠡᠶᠡ ᠪᠡᠷ ᠳᠠᠢᠵᠢᠭᠠᠳ ᠶᠠᠪᠤᠴᠢᠬᠠᠯᠠ᠃
— ᠬᠠᠮᠢᠭᠠᠬᠢ ᠶ᠋ᠢᠨ ᠬᠥᠮᠦᠨ ᠪᠣᠢ?
ᠭᠣᠣᠯᠳᠠᠭᠤ ᠯᠠ ᠵᠦᠷᠬᠢᠨ ᠦ᠌ ᠬᠢᠨ ᠪᠠᠢᠬᠤ ᠠ᠋᠃
— ᠲᠠᠨᠠᠢᠬᠢᠨ ᠪᠠᠶᠠᠨ ᠶᠤᠮ ᠠ᠋ ᠭᠡᠵᠦ ᠰᠡᠴᠡ ᠪᠡᠬᠢ ᠤᠷᠤᠭᠤ ᠬᠠᠷᠠᠵᠤ ᠢᠨᠢᠶᠡᠭᠡᠳ᠂ ᠲᠡᠷᠡ ᠪᠠᠶᠠᠴᠤᠳ ᠲᠤ᠌ ᠬᠤᠳᠠᠯᠳᠤᠬᠤ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠲᠡᠮᠦᠷᠴᠢ ᠤᠷᠤᠭᠤ ᠬᠠᠨᠳᠤᠵᠤ ᠬᠡᠯᠡᠪᠡ᠃
— ᠶᠠᠭᠠᠬᠢᠯᠠ ᠭᠡᠵᠦ ᠳᠡ᠂ ᠡᠵᠡᠨ ᠮᠢᠨᠢ᠃
— ᠨᠠᠳᠠᠳᠤ ᠪᠣᠯ ᠬᠤᠳᠠᠯᠳᠤᠬᠤ ᠤᠤ?
— ᠲᠠᠨ ᠤ᠋ ᠯᠠ ᠶᠠᠭᠤᠮᠠ ᠰᠢᠦ ᠳᠡ᠃ ᠪᠢ ᠪᠣᠯ ᠲᠠᠨ ᠤ᠋ ᠠᠯᠪᠠᠲᠤ ᠪᠣᠭᠣᠯ᠁
— ᠵᠥᠪ᠃
— ᠨᠣᠶᠠᠨ ᠴᠠᠭᠠᠰᠢ ᠳᠣᠬᠢᠲᠠᠯᠠ ᠳᠠᠭᠠᠭᠤᠯ ᠨᠢᠭᠡ ᠶᠠᠭᠤᠮᠠ ᠥᠭᠭᠦᠯᠡ᠃ ᠲᠡᠷᠡ ᠪᠡᠷ ᠨᠠᠭᠠᠰᠢ ᠡᠷᠭᠢᠵᠦ᠄
— ᠲᠡᠮᠦᠷᠴᠢ ᠴᠢ ᠠᠵᠢᠷᠭᠠ ᠪᠠᠨ ᠰᠠᠢᠬᠠᠨ ᠠᠪᠴᠤ ᠶᠠᠪᠤᠵᠤ᠂ ᠬᠤᠷᠳᠤᠯᠠᠭᠤᠯᠵᠤ᠂ ᠠᠦ᠋ᠯᠡᠨ ᠬᠤᠷᠳᠤᠨ ᠦᠷᠡ ᠰᠠᠲᠤ ᠲᠠᠢ ᠪᠣᠯᠭᠠ! ᠬᠠᠷᠢᠨ ᠨᠠᠳᠠᠳᠤ ᠡᠨᠡ ᠲᠡᠢᠨ ᠦ᠌ ᠬᠤᠷᠳᠤᠨ ᠰᠠᠢᠨ ᠬᠦᠯᠦᠭ ᠭᠠᠷᠭᠠᠵᠤ ᠥᠭᠭᠦᠭᠡᠷᠡᠢ ᠭᠡᠳ ᠭᠠᠷ ᠲᠠᠭᠠᠨ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠬᠡᠷᠥᠯᠦᠨᠵᠢᠨ ᠦ᠌ ᠠᠪᠤ ᠳ᠋ᠤ᠌ ᠥᠭᠪᠡ᠃ ᠲᠡᠷᠡ ᠨᠢ ᠱᠠᠭᠠᠢ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠴᠢᠳᠬᠤᠭᠰᠠᠨ ᠲᠣᠮᠣ ᠴᠠᠭᠠᠨ ᠮᠥᠩᠭᠥ ᠪᠠᠷᠢᠯᠠ᠃ ᠲᠡᠮᠦᠷᠴᠢ ᠰᠥᠭᠥᠳᠦᠨ ᠠᠪᠴᠤ ᠳᠤᠬᠤᠨ ᠳ᠋ᠠᠭᠠᠨ ᠬᠦᠷᠭᠡᠵᠦ ᠮᠥᠷᠭᠥᠨ ᠡᠩᠭᠡᠷ ᠲᠡᠭᠡᠨ ᠲᠡᠪᠡᠷᠢᠪᠡ᠃
ᠨᠣᠶᠠᠨ ᠬᠠᠲᠤᠳ ᠴᠠᠭᠠᠰᠢ ᠠᠰᠠᠷ ᠤᠷᠤᠭᠤ ᠮᠣᠷᠢᠯᠠᠯᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠪᠤᠭᠤᠷᠴᠢ ᠵᠦᠭᠡᠷ ᠪᠠᠢᠭᠰᠠᠨ ᠦᠭᠡᠢ᠂ ᠡᠯᠳᠡᠪ ᠢ᠋ ᠪᠣᠳᠣᠭᠰᠠᠨ ᠨᠢ᠄
— ᠡᠨᠡ ᠨᠣᠶᠠᠳ ᠪᠠᠶᠠᠨ ᠶᠤᠮ᠂ ᠭᠠᠩᠭᠠᠩ ᠶᠤᠮ᠂ ᠬᠠᠲᠤᠳ ᠨᠢ ᠴᠦ᠍ ᠠᠳᠠᠯᠢ᠃ ᠭᠡᠬᠦ ᠳ᠋ᠡᠭᠡᠨ ᠲᠠᠨᠠᠷ ᠤ᠋ᠨ ᠭᠠᠢᠬᠠᠭᠤᠯᠤᠭᠰᠠᠨ ᠬᠠᠲᠤᠳ ᠲᠤ᠌ ᠮᠢᠨᠦ ᠬᠡᠷᠦᠯᠳᠵᠢᠨ ᠰᠢᠭ ᠬᠠᠲᠤᠨ ᠪᠠᠢᠨᠠ ᠤᠤ? ᠮᠣᠷᠢᠨ ᠳᠠᠪᠬᠢᠭᠠᠨ ᠳᠤᠮᠳᠠ ᠮᠤᠤᠷ ᠰᠢᠭ᠋ ᠦᠰᠦᠷᠦᠭᠡᠳ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠨ ᠨᠠᠭᠠᠯᠳᠤᠴᠢᠬᠠᠳᠠᠭ ᠬᠡᠦᠬᠡᠨ ᠪᠠᠢᠨᠠ ᠤᠤ? ᠪᠠᠢᠬᠤ ᠦᠭᠡᠢ ᠳᠡ ᠭᠡᠵᠦ ᠪᠣᠳᠣᠭᠠᠳ ᠢᠨᠢᠶᠡᠳᠦ ᠠᠯᠳᠠᠴᠢᠬᠠᠪᠠ᠃
ᠬᠡᠷᠤᠯᠤᠨᠵᠢᠨ ᠬᠠᠵᠠᠭᠤ ᠠ᠋ᠴᠠ ᠨᠢ᠄
— ᠶᠠᠭᠠᠬᠢᠬᠤᠪ? ᠴᠢ᠂ ᠢᠨᠢᠶᠡᠬᠦ ᠴᠢᠨᠢ᠁
— ᠡᠨᠡ ᠨᠣᠶᠠᠳ ᠬᠠᠲᠤᠳ ᠢ᠋ ᠬᠠᠷᠠᠭᠠᠳ ᠯᠠ ᠢᠨᠢᠶᠡᠳᠦ ᠬᠦᠷᠴᠦ ᠪᠠᠢᠬᠤ ᠦᠭᠡᠢ ᠤᠤ ᠳᠠ᠃ ᠡᠨᠡ ᠵᠤᠨ ᠤ᠋ ᠬᠠᠯᠠᠭᠤᠨ ᠳ᠋ᠤ᠌ ᠲᠣᠷᠭᠠ ᠮᠠᠩᠨᠤᠭ᠂ ᠮᠥᠩᠭᠥ ᠠᠯᠲᠠ ᠪᠣᠯᠤᠭᠰᠠᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠳᠠᠭᠠᠭᠠᠵᠤ ᠲᠠᠪᠰᠢ ᠦᠭᠡᠢ ᠬᠦᠨᠳᠦ ᠶᠠᠭᠤᠮᠠ ᠵᠡᠭᠦᠵᠦ᠂ ᠵᠤᠵᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠶᠠᠪᠤᠳᠠᠭ ᠶᠤᠮ ᠪᠣᠢ? ᠶᠠᠭᠠᠬᠢᠭᠰᠠᠨ ᠶᠡᠬᠡ ᠬᠥᠯᠥᠷᠡᠳᠡᠭ ᠪᠣᠯ? ᠬᠠᠷᠠᠬᠤ ᠠ᠋ᠴᠠ ᠢᠨᠢᠶᠡᠳᠦ ᠬᠦᠷᠦᠭᠡᠳ ᠭᠡᠬᠦ ᠳ᠋ᠦ᠍ᠨᠢ᠂ ᠬᠡᠷᠤᠯᠤᠨᠵᠢᠨ ᠪᠠᠰᠠ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠶᠠᠳᠠᠬᠤ ᠳ᠋ᠠᠭᠠᠨ ᠠᠮᠠ ᠪᠠᠨ ᠳᠠᠷᠤᠪᠠ᠃
《ᠠᠵᠢᠷᠭᠠ ᠴᠣᠯᠠᠯᠠᠨᠠ!》 ᠭᠡᠵᠦ ᠳᠠᠭᠤᠳᠠᠬᠤ ᠳ᠋ᠤ᠌ ᠲᠡᠮᠦᠷᠴᠢ ᠳᠣᠲᠣᠭᠰᠢ ᠠᠵᠢᠷᠭᠠ ᠪᠠᠨ ᠬᠥᠲᠥᠯᠦᠨ ᠣᠷᠣᠪᠠ᠃
ᠲᠦᠮᠡᠨ ᠲᠦᠪᠭᠦᠨ ᠦ᠌ ᠶᠡᠬᠡ ᠨᠠᠭᠠᠳᠤᠮ ᠤ᠋ᠨ
ᠲᠦᠷᠦᠭᠦᠦ ᠮᠠᠩᠨᠠᠢ ᠳ᠋ᠤ᠌ ᠢᠷᠡᠭᠰᠡᠨ
ᠲᠡᠮᠦᠷᠴᠢ ᠠᠯᠪᠠᠲᠤ ᠠᠷᠠᠳ ᠤ᠋ᠨ
ᠲᠡᠭᠦᠰ ᠬᠤᠷᠳᠤᠨ ᠡᠨᠡ ᠬᠦᠯᠦᠭ ᠪᠣᠯ
ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ
ᠠᠤᠭᠠ ᠵᠢᠪᠬᠤᠯᠠᠩ ᠪᠦᠷᠢᠳᠦᠭᠰᠡᠨ
ᠰᠦᠷᠲᠦ ᠠᠵᠢᠷᠭᠠᠨ ᠤ᠋ ᠦᠷᠡ
ᠰᠥᠳᠥ ᠭᠡᠭᠦᠦ ᠶ᠋ᠢᠨ ᠤᠨᠠᠭᠠ ᠠ᠋᠁ ᠭᠡᠵᠦ ᠡᠬᠢᠯᠡᠨ ᠤᠶᠠᠩᠭᠠᠯᠠᠭᠤᠯᠤᠨ ᠤᠷᠲᠤ ᠢᠷᠦᠭᠡᠯ ᠬᠡᠯᠡᠪᠡ᠃ ᠲᠡᠳᠡᠭᠡᠷ ᠤᠶᠠᠩᠭᠠ ᠠᠶᠠᠯᠭᠤᠨ ᠤ᠋ ᠵᠠᠷᠢᠮ ᠨᠢ ᠳᠤᠭᠤᠯᠳᠠᠨᠠ᠂ ᠵᠠᠷᠢᠮ ᠨᠢ ᠡᠰᠡ ᠳᠤᠭᠤᠯᠳᠠᠨᠠ᠃
ᠲᠡᠭᠡᠲᠡᠯᠡ ᠬᠡᠷᠦᠯᠦᠨᠵᠢᠨ ᠦ᠌ ᠠᠪᠤ ᠮᠣᠷᠢ᠂ ᠬᠤᠢ ᠲᠠᠢ ᠲᠣᠷᠭᠠ᠂ ᠨᠤᠮᠤ ᠰᠠᠭᠠᠳᠠᠭ᠂ ᠳᠡᠭᠡᠷᠡ ᠨᠢ ᠪᠣᠭᠣᠯᠲᠠᠲᠠᠢ ᠶᠠᠭᠤᠮᠠ ᠲᠠᠢ ᠬᠥᠷ ᠪᠠᠶᠠᠷ ᠲᠠᠢ ᠭᠠᠷᠴᠤ ᠢᠷᠡᠪᠡ᠃ ᠥᠨᠥᠬᠢ ᠦᠷᠭᠦᠵᠦ ᠰᠣᠴᠢᠵᠤ《ᠲᠡᠷᠭᠡᠢᠯᠳᠦᠭ᠌ᠰᠡᠨ》 ᠵᠡᠭᠡᠷᠡ ᠨᠦ᠍ᠭᠦᠳ ᠡᠷᠭᠢᠵᠦ ᠢᠷᠡᠭᠡᠳ᠄
— ᠠᠵᠢᠷᠭᠠᠨ ᠳ᠋ᠤ᠌ ᠴᠢᠨᠢ ᠦᠨᠡ ᠬᠠᠶᠠᠶᠠ᠂ ᠴᠢ ᠳᠤᠤᠭᠠᠷᠤᠭᠠᠴᠢ! ᠭᠡᠯᠴᠡᠪᠡ᠃ ᠬᠡᠷᠦᠯᠦᠨᠵᠢᠨ ᠦ᠌ ᠠᠪᠤ᠄
— ᠠᠰᠠᠷ ᠲᠤ᠌ ᠣᠷᠣᠭᠠᠳ ᠠᠴᠢᠭ ᠱ᠌ᠢᠷᠦᠨ ᠨᠣᠶᠠᠨ ᠲᠠᠢ ᠦᠨᠡ ᠬᠠᠶᠠᠯᠴᠠ ᠳᠠ᠃ ᠪᠢ ᠲᠠᠨᠠᠷ ᠲᠤ᠌ ᠡᠵᠡᠨ ᠲᠡᠢ ᠭᠡᠰᠡᠨ ᠰᠢᠦ ᠳᠡ᠃
— ᠦ᠂ ᠡᠨᠡ ᠮᠠᠭᠤ ᠪᠢᠯᠳᠠᠤᠴᠢ᠂ ᠨᠣᠶᠠᠨ ᠳ᠋ᠠᠭᠠᠨ ᠡᠷᠭᠦᠴᠢᠬᠡᠵᠡᠢ᠃ ᠭᠥᠯᠥᠭᠡ᠂ ᠨᠣᠬᠠᠢ! ᠭᠡᠵᠦ ᠬᠠᠮᠤᠭ ᠮᠠᠭᠤ ᠦᠭᠡ ᠪᠡᠨ ᠬᠡᠯᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠭᠠᠳ ᠪᠤᠴᠠᠵᠠᠭᠠᠪᠠ᠃
ᠬᠡᠷᠦᠯᠦᠨᠵᠢᠨ ᠦ᠌ ᠠᠪᠤ ᠰᠠᠨᠠᠭᠠ ᠠᠮᠠᠷᠠᠭᠰᠠᠨ ᠪᠣᠯᠤᠯᠲᠠᠢ᠂ ᠨᠡᠯᠢᠶᠡᠳ ᠵᠠᠢᠳᠠᠭᠤ ᠭᠠᠷᠴᠤ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠪᠠᠨ ᠵᠠᠳᠠᠯᠬᠤ ᠳ᠋ᠤ᠌ ᠠᠮᠲᠠᠲᠤ ᠦᠵᠦᠮ᠂ ᠪᠠᠯ ᠪᠤᠷᠠᠮ᠂ ᠨᠠᠨᠵᠢᠩ ᠴᠢᠪᠠᠭᠠ᠂ ᠪᠣᠣᠪᠣ ᠰᠢᠬᠢᠷ ᠪᠠᠢᠪᠠ᠃ ᠠᠭᠤᠯᠠ ᠤᠰᠤᠨ ᠳ᠋ᠠᠭᠠᠨ ᠡᠷᠭᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠠᠪᠴᠤ ᠠᠮᠰᠠᠨ ᠮᠣᠷᠢᠨ ᠤ᠋ ᠬᠦᠦ᠂ ᠬᠡᠷᠦᠯᠦᠨᠵᠢᠨ᠂ ᠪᠣᠭᠣᠷᠴᠢ ᠨᠠᠷ ᠲᠤ᠌ ᠠᠳᠬᠤᠵᠤ ᠥᠭᠭᠦᠭᠡᠳ ᠴᠠᠭᠠᠰᠢ ᠬᠢᠵᠦ᠄
— ᠬᠡᠷᠦᠯᠦᠨᠵᠢᠨ ᠠ᠋᠂ ᠣᠳᠣ ᠭᠤᠷᠪᠠᠭᠤᠯᠠ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠶᠠ᠃ ᠡᠨᠳᠡ ᠬᠣᠩᠭᠣᠷ ᠠᠵᠢᠷᠭᠠ ᠶ᠋ᠢ ᠮᠢᠨᠢ ᠱᠣᠬᠣᠭᠣᠷᠬᠠᠭᠠᠳ ᠠᠮᠢᠲᠠᠨ ᠤ᠋ ᠨᠢᠳᠦᠨ ᠬᠣᠣᠷ ᠤᠷᠤᠭᠤ ᠨᠢ᠃ ᠱᠠᠯᠠᠪᠬᠠᠨ ᠠᠷᠢᠯᠵᠤ ᠣᠳᠤᠶᠠ ᠭᠡᠯᠡ᠃
ᠲᠡᠭᠡᠭᠡᠳ ᠮᠣᠷᠳᠠᠵᠤ ᠵᠡᠭᠦᠨ ᠵᠦᠭ ᠴᠢᠭᠯᠡᠬᠦ ᠳ᠋ᠦ᠍ ᠨᠠᠷᠠᠨ ᠰᠢᠩᠭᠡᠵᠦ ᠪᠠᠢᠪᠠ᠃ ᠬᠡᠷᠦᠯᠦᠨᠵᠢᠨ᠄
— ᠠᠪᠤ ᠠ᠋᠂ ᠪᠢ ᠦᠯᠡᠳᠡᠵᠦ ᠵᠢᠭᠠᠬᠠᠨ ᠪᠠᠢᠵᠤ ᠪᠠᠢᠭᠠᠳ ᠠᠷᠤ ᠠ᠋ᠴᠠ ᠴᠢᠨᠢ ᠳᠠᠪᠬᠢᠭᠠᠳ ᠣᠴᠢᠶᠠ ᠭᠡᠪᠡ᠃
— ᠠ᠋᠂ ᠮᠡᠳᠡᠬᠦ ᠦᠭᠡᠢ᠂ ᠰᠥᠨᠢ ᠲᠥᠭᠡᠷᠢᠴᠢᠬᠡᠨᠡ᠃
— ᠲᠥᠭᠡᠷᠢᠬᠦ ᠦᠭᠡᠢ ᠠ᠋᠂ ᠤᠳᠠᠬᠤ ᠦᠭᠡᠢ ᠣᠴᠢᠨᠠ᠃
ᠲᠡᠷᠡ ᠬᠣᠶᠠᠷ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠨᠢᠭᠡ ᠲᠡᠪᠡᠷᠢᠯᠳᠦᠯᠡ᠃ ᠪᠣᠭᠣᠷᠴᠢ᠄
— ᠪᠢ ᠴᠢᠮᠠᠳᠠᠭᠠᠨ ᠤᠳᠠᠬᠤ ᠦᠭᠡᠢ ᠣᠴᠢᠨᠠ ᠭᠡᠯᠡ᠃ ᠬᠡᠷᠦᠯᠦᠨᠵᠢᠨ᠄ ᠮᠠᠨᠠᠢᠬᠢ ᠬᠡᠷᠦᠯᠦᠨ ᠦ᠌ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠤᠳᠠᠬᠤ ᠦᠭᠡᠢ ᠪᠠᠭᠤᠨᠠ᠃ ᠨᠠᠮᠤᠷᠵᠢᠭᠠᠳ ᠭᠤᠷᠪᠠᠨ ᠲᠠᠷᠭᠤᠨ ᠳ᠋ᠠᠭᠠᠨ ᠢᠷᠡᠵᠦ ᠡᠪᠦᠯᠵᠢᠨᠡ ᠭᠡᠪᠡ᠃ ᠪᠣᠭᠣᠷᠴᠢ᠄
— ᠵᠠ᠂ ᠬᠣᠩᠭᠣᠷ ᠮᠢᠨᠢ ᠳᠠᠪᠬᠢ ᠳᠠ᠃ ᠠᠪᠤ ᠶ᠋ᠢᠨ ᠴᠢᠨᠢ ᠰᠡᠳᠬᠢᠯ ᠵᠣᠪᠠᠨᠠ᠃ ᠪᠢ ᠨᠢᠭᠡ ᠠᠷᠭᠠ ᠪᠣᠳᠣᠵᠤ ᠣᠯᠤᠭᠠᠳ ᠴᠢᠮᠠᠲᠤ ᠢᠷᠡᠨᠡ᠃ ᠵᠠ᠂ ᠬᠣᠶᠠᠭᠤᠯᠠ ᠪᠠᠨ ᠬᠣᠶᠠᠷ ᠳᠠᠰᠢ ᠪᠠᠨ! ᠨᠢᠭᠡ᠂ ᠬᠣᠶᠠᠷ᠂ ᠭᠤᠷᠪᠠ ᠠ᠋ ᠭᠡᠳ ᠥᠰᠥᠷᠬᠡᠴᠢᠬᠡᠯᠡ᠃ ᠪᠣᠭᠣᠷᠴᠢ ᠲᠦᠳᠡᠯ ᠦᠭᠡᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ ᠡᠷᠭᠢᠨ ᠬᠡᠷᠦᠯᠦᠨᠵᠢᠨ ᠦ᠌ ᠠᠷᠤ ᠠ᠋ᠴᠠ ᠳᠠᠪᠬᠢᠪᠠ᠃ ᠬᠡᠰᠡᠭ ᠳᠠᠪᠬᠢᠯᠠ᠃ ᠵᠣᠷᠢᠯᠭᠠ ᠴᠤ᠌ ᠲᠣᠳᠣᠷᠬᠠᠢ ᠪᠤᠰᠤ᠃ ᠲᠡᠭᠡᠲᠡᠯᠡ ᠬᠡᠷᠦᠯᠦᠨᠵᠢᠨ ᠦ᠌ ᠠᠪᠤ ᠡᠴᠢᠭᠡ ᠲᠡᠮᠦᠷᠵᠢ ᠬᠠᠰᠬᠢᠷᠴᠤ᠂ ᠨᠠᠭᠠᠨᠠ ᠨᠢ᠄
— ᠠᠪᠤ ᠠ᠋᠂ ᠣᠴᠢᠵᠤ ᠶᠠᠪᠤᠨᠠ ᠠ᠋! ᠭᠡᠬᠦ ᠳᠠᠭᠤ ᠰᠣᠨᠣᠰᠴᠤ ᠰᠡᠳᠬᠢᠯ ᠨᠢ ᠠᠮᠠᠷᠠᠵᠤ ᠪᠤᠴᠠᠪᠠ᠃