ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠲᠠᠪᠤᠳᠤᠭᠠᠷ ᠪᠦᠯᠦᠭ 1–3> Бүлжхэн хатан– [монгол] Дамбын Төрбат <тавдугаар бүлэг 1–3>
77ᠪᠦᠯᠵᠢᠬᠢᠨ ᠬᠠᠲᠤᠨ–<ᠲᠠᠪᠤᠳᠤᠭᠠᠷ ᠪᠦᠯᠦᠭ 1–3>
《ᠲᠡᠮᠦᠵᠢᠨ ᠦᠭᠡ》 ᠨᠣᠶᠠᠨ ᠤ᠋ ᠲᠡᠷᠰᠯᠡᠭᠦᠦ ᠰᠤᠷᠠᠭ
᠁ ᠬᠠᠷᠠᠭᠠ ᠶᠡᠬᠡᠲᠦ ᠲᠤᠭ ᠢ᠋ᠶ᠋ᠠᠨ ᠲᠠᠬᠢᠵᠤ
ᠬᠠᠷᠠ ᠪᠤᠬᠠᠨ ᠤ᠋ ᠠᠷᠠᠰᠤ ᠪᠠᠷ ᠪᠦᠷᠢᠭᠰᠡᠨ
ᠬᠠᠷᠬᠢᠬᠤ ᠳᠠᠭᠤ ᠲᠠᠢ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ
ᠬᠠᠳᠠᠨ ᠪᠣᠯᠣᠳ ᠵᠢᠳᠠ ᠪᠠᠨ ᠪᠠᠷᠢᠵᠤ
ᠬᠠᠯᠬᠠ ᠬᠤᠶᠠᠭᠲᠤ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ
ᠬᠠᠳᠬᠤᠬᠤ ᠵᠠᠪᠠᠲᠤ ᠰᠤᠮᠤ ᠪᠠᠨ ᠣᠨᠢᠯᠠᠵᠤ
ᠬᠠᠷᠠ ᠬᠣᠯᠠ ᠮᠣᠷᠢ ᠪᠠᠨ ᠤᠨᠤᠵᠤ
ᠬᠠᠮᠤᠭ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ
ᠬᠠᠳᠬᠤᠯᠳᠤᠨ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠪᠠ ᠪᠢ
《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》
1
ᠨᠢᠭᠡᠨ ᠶᠡᠬᠡ ᠬᠠᠷᠠ ᠪᠠᠷᠠ ᠬᠡᠪ ᠭᠡᠨᠡᠳᠲᠡ ᠨᠡᠭᠦᠭᠡᠯᠲᠦᠨ ᠭᠠᠷᠴᠤ ᠢᠷᠡᠪᠡ᠃ ᠰᠠᠢᠨ ᠬᠠᠷᠠᠪᠠᠯ ᠦᠬᠡᠷ ᠮᠥᠨ ᠬᠡᠳᠦᠢ ᠴᠦ᠍ ᠬᠣᠯᠪᠣᠵᠤ ᠲᠠᠯᠪᠢᠭᠰᠠᠨ᠂ ᠡᠰᠡᠪᠡᠯ ᠠᠴᠢᠶᠠ ᠪᠠᠨ ᠴᠢᠷᠦᠭᠰᠡᠨ ᠬᠣᠶᠠᠷ ᠤ᠋ᠨ ᠯᠠ ᠨᠢᠭᠡᠨ ᠪᠠᠢᠯᠲᠠᠢ ᠦᠬᠡᠷ ᠦᠬᠡᠷ ᠡᠴᠡ ᠡᠲᠡᠭᠡᠳ ᠨᠦᠰᠡᠷ ᠣᠪᠣᠷ ᠲᠠᠢ ᠦᠵᠡᠭᠳᠡᠬᠦ ᠪᠥᠯᠥᠭᠡ᠃ ᠲᠡᠢᠨ ᠠᠲᠠᠯᠠ ᠪᠦᠳᠡᠭᠢ ᠵᠢᠮ ᠡᠴᠡ ᠦᠯᠦ ᠭᠠᠵᠢᠷᠠᠬᠤ ᠠᠭᠠᠳ ᠠᠯᠢ ᠪᠣᠢ ᠨᠢᠭᠡᠨ ᠬᠢᠵᠠᠭᠠᠷ ᠲᠤ᠌ ᠲᠡᠮᠡᠦᠯᠦᠨ ᠶᠠᠭᠠᠷᠠᠭᠰᠠᠨ ᠰᠢᠨᠵᠢ ᠣᠭᠲᠣᠬᠠᠨ ᠴᠤ᠌ ᠦᠭᠡᠢ ᠠᠵᠢ᠃ ᠣᠯᠠᠨ ᠳᠣᠣᠷᠠ ᠠ᠋ᠴᠠ ᠬᠠᠯᠠᠭᠤᠨ ᠬᠠᠭᠠᠷᠢᠭᠤᠯ ᠮᠡᠲᠦ ᠲᠥᠭᠡᠨᠡᠬᠦ ᠰᠢᠷᠣᠢ᠂ ᠵᠤᠯᠠᠢ ᠳᠡᠭᠡᠷᠡ ᠡᠴᠡ ᠵᠢᠩᠨᠡᠭᠦᠷ ᠦ᠋ᠨ ᠲᠠᠭ ᠮᠡᠲᠦ ᠴᠣᠷᠭᠢᠬᠤ ᠨᠠᠷᠠ ᠠᠯᠢ ᠠᠯᠢ ᠨᠢ ᠮᠥᠨᠥᠬᠡᠨ ᠦᠬᠡᠷ ᠢ᠋ ᠰᠢᠪᠠᠳᠠᠭᠤᠯᠵᠤ ᠦᠯᠦ ᠴᠢᠳᠠᠬᠤ ᠠᠪᠠᠢ᠃ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠬᠡᠯᠲᠦᠷᠢᠬᠦ ᠨᠢ ᠪᠠᠰᠠ ᠴᠤ᠌ ᠠᠷᠭᠠ ᠦᠭᠡᠢ ᠰᠠᠨᠵᠠᠢ᠃ ᠰᠣᠯᠵᠢᠷ ᠤᠯᠠᠭᠴᠢᠨ ᠦᠨᠢᠶᠡ ᠶ᠋ᠢ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠯᠡᠭᠡᠳ ᠤᠳᠠᠭᠰᠠᠨ ᠶᠠᠩᠵᠤ ᠢᠯᠡᠷᠬᠡᠢ ᠪᠠᠢᠪᠠ᠃ ᠶᠠᠩᠭᠢᠶᠠᠨ ᠤ᠋ ᠲᠣᠬᠣᠮ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠠᠲᠠᠭᠰᠠᠨ ᠬᠥᠯᠥᠰᠥᠨ ᠦ᠌ ᠣᠷᠣᠮ ᠪᠤᠷᠵᠢᠢᠵᠤ᠂ ᠡᠪᠬᠡᠵᠦ ᠣᠷᠬᠢᠭᠰᠠᠨ ᠲᠥᠷᠥ ᠨᠢ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠤᠩᠭᠤᠵᠤ ᠭᠠᠩᠳᠠᠵᠠᠢ᠃ ᠪᠠᠰᠠ ᠬᠦ᠌ ᠲᠡᠷᠭᠡᠨ ᠦ᠌ ᠭᠤᠶᠠ ᠮᠣᠳᠣ ᠬᠥᠰᠡᠷᠡᠢ ᠥᠩᠭᠡ ᠲᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠬᠥᠮᠦᠨ ᠦ᠌ ᠭᠠᠷ ᠬᠦᠷᠦᠯ ᠦᠭᠡᠢ ᠤᠳᠠᠭᠰᠠᠨ ᠬᠡᠷᠡᠭ ᠪᠢᠯᠡ᠃ ᠮᠥᠨᠥᠬᠡᠨ ᠤᠯᠠᠭᠴᠢᠨ ᠦᠨᠢᠶᠡ ᠨᠢᠭᠤᠷ ᠨᠢᠳᠦ ᠦᠭᠡᠢ ᠰᠢᠪᠠᠬᠤ ᠬᠠᠷᠠ ᠢᠯᠠᠭᠠ ᠶ᠋ᠢ ᠲᠦᠪᠡᠭᠰᠢᠶᠡᠨ ᠰᠠᠵᠢᠯᠠᠵᠤ᠂ ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠪᠬᠠᠴᠢᠨ ᠮᠠᠭᠤᠬᠠᠢ ᠠᠭᠠᠰᠢᠯᠠᠪᠠᠴᠤ ᠦᠷᠭᠦᠨ ᠬᠣᠯᠠᠳᠴᠤ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠰᠢᠨᠵᠢ ᠠᠯᠠᠭᠠ᠃ ᠶᠡᠷᠦ ᠮᠣᠳᠣᠨ ᠲᠡᠷᠭᠡᠨ ᠳᠡᠭᠡᠷᠡ ᠬᠠᠷᠠ ᠢᠯᠠᠭᠠ ᠠᠴᠢᠵᠤ ᠶᠠᠪᠤᠭᠠ ᠶᠤᠮ ᠰᠢᠭ᠋ ᠪᠠᠭᠠᠷᠴᠠᠭᠯᠠᠵᠠᠢ᠃ ᠡᠢᠨ ᠬᠣᠯᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠮᠥᠨᠥᠬᠡᠨ ᠲᠣᠮᠣ ᠲᠣᠮᠣ ᠨᠣᠭᠣᠭᠠᠨ ᠢᠯᠠᠭᠠ ᠨᠤᠭᠤᠳ ᠪᠠᠷᠠ ᠪᠦᠷ ᠨᠡᠮᠡᠳᠡᠭ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠪᠢᠯᠡ᠃ ᠶᠠᠭᠤ ᠲᠠᠢ ᠴᠤ᠌ ᠬᠤᠲᠤᠭᠲᠤ ᠮᠣᠩᠬᠣᠷ ᠲᠤ᠌ ᠨᠢᠭᠡ ᠦᠨᠢᠶᠡ ᠬᠣᠶᠠᠷ ᠦᠬᠡᠷ ᠦ᠋ᠨ ᠳᠠᠢᠲᠠᠢ ᠬᠠᠷᠠᠭᠳᠠᠵᠠᠢ᠃ ᠲᠡᠷᠡ ᠪᠡᠷ ᠠᠢᠯ ᠤ᠋ᠨ ᠭᠠᠵᠠᠷ ᠲᠤ᠌ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠵᠢᠯᠣᠭᠣ ᠲᠠᠲᠠᠵᠤ ᠬᠠᠯᠠᠭᠰᠠᠨ ᠠᠭᠠᠷ ᠲᠤ᠌ ᠨᠡᠭᠰᠢᠭᠰᠡᠨ ᠦᠨᠦᠷ ᠢ᠋ ᠰᠢᠩᠰᠢᠯᠡᠨ᠂
— ᠴᠢ ᠦᠵᠡᠭᠡᠳ ᠢᠷᠡ! ᠭᠡᠮᠡᠨ ᠬᠥᠲᠥᠴᠢ ᠡᠪᠦᠭᠡᠨ ᠢ᠋ᠶ᠋ᠡᠨ ᠵᠠᠷᠤᠯᠠ᠃ ᠨᠠᠰᠤᠵᠢᠬᠤ ᠡᠷᠡ ᠮᠣᠷᠢ ᠪᠠᠨ ᠳᠠᠪᠢᠷᠠᠨ ᠲᠡᠪᠡᠷᠢᠪᠡᠴᠦ ᠦᠷᠭᠦᠨ ᠬᠤᠤᠬᠢᠷᠠᠭᠠᠳ ᠡᠰᠡ ᠣᠢᠷᠠᠲᠤᠭᠰᠠᠨ ᠲᠤᠯᠠ ᠠᠷᠭᠠ ᠶᠠᠳᠠᠨ ᠪᠠᠭᠤᠵᠤ ᠣᠴᠢᠵᠠᠢ᠃ ᠴᠢᠩᠭᠢᠭᠡᠳ ᠲᠦᠭᠳᠦᠭ ᠲᠦᠭᠳᠦᠭ ᠠᠯᠬᠤᠯᠠᠨ ᠳᠥᠭᠥᠭᠰᠡᠨ ᠢ᠋ᠶ᠋ᠡᠨ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠮᠠᠷ ᠠᠮᠠ ᠪᠠᠨ ᠪᠥᠭᠯᠡᠨ ᠰᠡᠵᠢᠭᠯᠡᠭᠰᠡᠨ ᠪᠠᠢᠷᠢ ᠲᠠᠢ ᠵᠣᠭ ᠲᠤᠰᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠷᠠᠯᠠ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠢᠯᠠᠭᠠᠷᠬᠠᠨ ᠲᠦᠬᠦᠭᠡᠯᠵᠡᠬᠦ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠡᠳᠡᠨ ᠬᠥᠨᠳᠡᠯᠢᠰᠦᠭᠦᠯᠵᠦ᠂
— ᠦᠵᠡ᠂ ᠦᠵᠡ! ᠶᠠᠭᠤ ᠪᠠᠢᠨᠠ? ᠭᠡᠬᠦ ᠳ᠋ᠦ᠍ ᠱᠠᠪᠢᠯᠬᠠᠨ ᠡᠷᠡ ᠵᠣᠷᠢᠭᠯᠠᠨ ᠳᠥᠭᠥᠵᠦ ᠣᠴᠢᠪᠠᠯ ᠦᠷᠭᠦᠭᠰᠡᠨ ᠢᠯᠠᠭᠠ ᠳᠠᠷᠬᠢᠨ ᠨᠢᠰᠬᠦ ᠨᠢ ᠨᠠᠷᠠ ᠬᠠᠷᠠᠩᠬᠠᠢᠯᠠᠬᠤ ᠰᠢᠭ᠋ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠢᠯᠠᠭᠠ ᠦᠷᠭᠦᠭᠡᠵᠦ ᠪᠦᠲᠡᠭᠡᠯᠭᠡ ᠶᠠᠭᠤ ᠶ᠋ᠢ ᠨᠢ ᠰᠡᠬᠦᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠡᠷᠭᠢᠨ ᠫᠡᠷ ᠫᠡᠷ ᠭᠦᠶᠦᠭᠰᠡᠭᠡᠷ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠥᠯᠮᠡᠢ ᠶ᠋ᠢᠨ ᠳᠣᠣᠷᠠ ᠰᠥᠬᠥᠷᠡᠨ ᠤᠨᠠᠪᠠ᠃ ᠬᠠᠩᠭᠠᠯ ᠬᠦᠯᠦᠭ ᠨᠠᠯᠮᠠᠭᠠᠰᠬᠢᠨ ᠰᠥᠭᠥᠳᠦᠭᠰᠡᠨ ᠡᠪᠦᠭᠡᠨ ᠡᠴᠡ ᠰᠣᠴᠢᠨ ᠲᠠᠪᠲᠤᠷ ᠠᠯᠳᠠᠬᠤ ᠳ᠋ᠤ᠌ ᠬᠠᠨ ᠬᠥᠪᠡᠭᠦᠨ ᠪᠠᠬᠠᠨ ᠳᠣᠭᠣᠭᠢᠯᠠᠩᠭᠤᠢ ᠳᠠᠭᠤ ᠪᠠᠷ᠂
— ᠵᠠ ᠶᠠᠭᠠᠬᠢᠪᠠ᠂ ᠶᠠᠭᠤ ᠦᠵᠡᠪᠡ? ᠬᠡᠯᠡᠭᠲᠦᠨ! ᠬᠡᠮᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠯᠠ᠃ ᠲᠡᠭᠦᠨ ᠦ᠌ ᠲᠦᠮᠡᠨ ᠦᠷᠴᠢᠯᠡᠭᠡ ᠰᠢᠪᠠᠭᠰᠠᠨ ᠨᠢᠭᠤᠷᠤᠨ ᠳ᠋ᠤ᠌ ᠠᠶᠤᠳᠠᠰᠤ ᠰᠦᠮᠡᠯᠵᠡᠵᠦ᠂ ᠬᠣᠶᠠᠷ ᠤᠷᠲᠤ ᠭᠠᠷ ᠨᠢ ᠬᠡᠢ ᠶᠠᠭᠤᠮᠠ ᠲᠡᠮᠲᠡᠴᠢᠨ ᠠᠮᠠ ᠨᠢ ᠠᠩᠭᠠᠯᠵᠠᠬᠤ ᠶ᠋ᠢ ᠦᠵᠡᠭᠡᠳ ᠬᠤᠲᠤᠭᠲᠤ ᠮᠣᠩᠬᠣᠷ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠠ ᠠᠶᠠᠨ ᠳ᠋ᠠᠭᠠᠨ ᠲᠦᠭᠰᠢᠭᠦᠷᠢ ᠳ᠋ᠦ᠍ ᠠᠪᠲᠠᠨ᠂
— ᠶᠠᠭᠤ ᠪᠠᠢᠨᠠ? ᠭᠡᠪᠡ᠃ ᠡᠪᠦᠭᠡᠨ ᠴᠡᠷᠢᠭ ᠤᠷᠤᠭᠰᠢ ᠮᠥᠯᠬᠥᠵᠦ᠂ ᠠᠮᠠ ᠨᠢ ᠠᠩᠭᠠᠯᠵᠠᠨ᠂ ᠨᠢᠳᠦ ᠨᠢ ᠪᠦᠯᠲᠡᠯᠵᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠬᠠᠬᠠᠵᠤ ᠴᠡᠴᠡᠨ ᠠᠮᠢᠰᠬᠤᠭᠠ ᠠᠪᠴᠤ᠂
— ᠲᠩᠷᠢ ᠮᠢᠨᠢ᠁ ᠬᠡᠮᠡᠭᠰᠡᠨ ᠢ᠋ᠶ᠋ᠡᠨ ᠤᠷᠤᠭᠰᠢ ᠠᠬᠢᠵᠤ ᠮᠥᠯᠬᠥᠨ᠂
— ᠡᠵᠡᠨ ᠲᠠ ᠥᠷᠥᠰᠢᠶᠡ! ᠲᠡᠷᠡ᠁ ᠲᠡᠷᠡ᠁ ᠭᠡᠳ ᠦᠬᠡᠷ ᠨᠢ ᠴᠢᠷᠦᠨ ᠵᠦᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠭᠠᠰᠢᠯᠠᠵᠤ ᠶᠠᠪᠤᠭᠠ ᠲᠡᠷᠭᠡ ᠶ᠋ᠢ ᠵᠢᠭᠠᠨ᠂
— ᠲᠡᠷᠡ᠁ ᠲᠡᠷᠡ᠁ ᠭᠡᠮᠡᠨ ᠣᠳᠣ ᠬᠦᠷᠲᠡᠯᠡ ᠠᠶᠤᠨᠠ ᠪᠣᠯᠤᠯᠲᠠᠢ ᠬᠤᠲᠤᠭᠲᠤ ᠮᠣᠩᠬᠣᠷ ᠤᠷᠤᠭᠤ ᠬᠣᠶᠠᠷ ᠨᠢᠭᠡᠨ ᠮᠥᠯᠬᠥᠨ ᠳᠥᠭᠥᠵᠦ᠂
— ᠥᠬᠢᠨᠪᠠᠷᠬᠠᠭ᠁ ᠭᠡᠯᠡ᠃ ᠨᠠᠷᠠ ᠲᠠᠢ ᠲᠩᠷᠢ ᠡᠴᠡ ᠠᠶᠤᠩᠭᠠ ᠪᠠᠭᠤᠭᠰᠠᠨ ᠮᠡᠲᠦ ᠰᠣᠨᠣᠰᠳᠠᠵᠠᠢ᠃ ᠡᠪᠦᠭᠡᠨ ᠴᠡᠷᠢᠭ ᠦ᠋ᠨ ᠮᠣᠷᠢ ᠪᠠᠷᠢᠵᠤ ᠦᠯᠡᠳᠡᠭᠰᠡᠨ ᠵᠠᠯᠠᠭᠤ ᠪᠠᠭᠠᠲᠤᠷ ᠬᠦᠷᠲᠡᠯᠡ᠂
— ᠠᠩ⁈ ᠬᠡᠮᠡᠪᠡ᠃ ᠪᠤᠭᠤᠷᠤᠯ ᠡᠷᠡ ᠰᠠᠶᠢ ᠯᠠ ᠰᠡᠭᠡᠭᠡ ᠠᠪᠴᠤ ᠬᠣᠷᠮᠣᠢ ᠬᠣᠳᠣ ᠪᠠᠨ ᠭᠦᠪᠢᠨ ᠪᠣᠰᠴᠤ ᠢᠷᠡᠭᠡᠳ᠂
— ᠥᠬᠢᠨᠪᠠᠷᠬᠠᠭ ᠨᠣᠶᠠᠨ ᠤ᠋ ᠱᠠᠷᠢᠯ ᠪᠠᠢᠵᠠᠢ ᠭᠡᠵᠦ ᠢᠲᠡᠭᠡᠯ ᠲᠡᠢ ᠥᠭᠦᠯᠡᠵᠡᠢ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠡᠬᠢᠯᠡᠭᠡᠳ ᠡᠪᠦᠭᠡᠨ ᠢ᠋᠂ ᠳᠠᠷᠠᠭᠠ ᠨᠢ ᠵᠠᠯᠠᠭᠤ ᠴᠡᠷᠢᠭ ᠢ᠋᠂ ᠲᠡᠭᠡᠭᠡᠳ ᠪᠠᠷᠠ ᠪᠣᠯᠵᠤ ᠶᠠᠪᠤᠭᠠ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠢ᠋ᠶ᠋ᠠᠨ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠪᠠ᠃ ᠴᠢᠩᠭᠢᠭᠡᠳ ᠵᠢᠯᠣᠭᠣ ᠪᠠᠨ ᠪᠦᠭᠦᠷᠭᠡᠨ ᠳ᠋ᠡᠭᠡᠨ ᠰᠣᠢᠭᠰᠠᠨ ᠢ᠋ᠶ᠋ᠠᠨ ᠵᠥᠭᠡᠯᠡᠬᠡᠨ ᠪᠠᠭᠤᠵᠤ᠂ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠡᠪᠦᠭᠡᠨ ᠬᠥᠲᠥᠴᠢ ᠳ᠋ᠡᠭᠡᠨ ᠠᠶᠠᠷᠬᠠᠨ ᠥᠭᠭᠦᠯᠡ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠡᠪᠡᠰᠦ ᠭᠠᠭᠴᠠ ᠨᠢᠭᠡ ᠬᠠᠵᠠᠯᠠᠨ ᠰᠠᠵᠢᠯᠠᠬᠤ ᠦᠬᠡᠷ ᠦ᠋ᠨ ᠲᠥᠷᠥ ᠰᠢᠭᠦᠷᠡᠨ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ ᠨᠢ ᠠᠮᠢᠰᠬᠤᠭᠠ ᠪᠠᠨ ᠳᠠᠷᠤᠨ ᠬᠠᠷᠠᠬᠤ ᠬᠦᠯᠦᠭ ᠡᠷᠡᠰ ᠢ᠋ᠶ᠋ᠡᠨ ᠨᠢᠭᠡᠨᠲᠡ ᠰᠢᠷᠳᠡᠪᠡ᠃ ᠲᠡᠭᠡᠭᠡᠳ ᠪᠠᠭᠠᠷᠴᠠᠭᠯᠠᠨ ᠰᠢᠪᠠᠭᠰᠠᠨ ᠬᠠᠷᠠ ᠢᠯᠠᠭᠠ ᠶ᠋ᠢ ᠰᠡᠪᠢᠵᠦ ᠦᠷᠭᠦᠭᠡᠨ᠂ ᠣᠩᠭᠣᠵᠤ ᠭᠠᠩᠳᠠᠭᠰᠠᠨ ᠰᠠᠰᠠᠷ ᠬᠣᠷᠭᠣᠢ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠰᠡᠬᠦᠨ ᠬᠠᠷᠠᠯᠠ᠃ ᠣᠢ ᠭᠤᠲᠤᠮᠠ ᠦᠮᠡᠬᠡᠢ ᠦᠨᠦᠷ ᠨᠢᠯ ᠬᠢᠨ ᠬᠠᠮᠠᠷ ᠴᠣᠷᠭᠢᠵᠤ᠂ ᠲᠦᠮᠡᠨ ᠥᠳᠥ ᠣᠯᠵᠠᠨ ᠳᠡᠭᠡᠷᠡ ᠪᠡᠨ ᠣᠪᠣᠯᠵᠠᠵᠤ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠡᠷᠬᠡ ᠦᠭᠡᠢ ᠣᠭᠢᠭᠤᠳᠠᠰᠤ ᠬᠦᠷᠴᠦ ᠪᠤᠰᠢᠭᠤᠬᠠᠨ ᠬᠤᠴᠢᠪᠠ᠃ ᠴᠢᠩᠭᠢᠭᠡᠳ ᠠᠬᠢᠨ ᠬᠠᠷᠠᠵᠤ ᠡᠰᠡ ᠴᠢᠳᠠᠨ᠂
— ᠲᠡᠷᠡ ᠮᠥᠨ ᠤᠤ? ᠭᠡᠵᠦ ᠰᠢᠪᠡᠨᠡᠨ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠭᠰᠠᠨ ᠬᠡᠳᠦᠢ ᠴᠦ᠍ ᠬᠥᠲᠥᠴᠢ ᠡᠪᠦᠭᠡᠨ᠂ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠰᠣᠨᠣᠰᠴᠠᠢ᠃
— ᠮᠥᠨ ᠠ᠋᠁ ᠮᠥᠨ᠁
— ᠴᠢ ᠶᠠᠭᠤ ᠪᠠᠷ ᠨᠢ ᠮᠢᠨᠦ ᠠᠬᠠ ᠶ᠋ᠢ ᠭᠡᠮᠡᠨ ᠬᠡᠯᠡᠵᠦ ᠵᠢᠷᠦᠬᠡᠯᠡᠪᠡ᠃
— ᠡᠷᠬᠢᠮ ᠳᠡᠭᠡᠳᠦᠰ ᠮᠢᠨᠢ᠂ ᠥᠬᠢᠨᠪᠠᠷᠬᠠᠭ ᠨᠣᠶᠠᠨ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠲᠣᠮᠣ ᠠᠯᠲᠠᠨ ᠪᠠᠭᠤᠪᠴᠢ ᠵᠡᠭᠦᠳᠡᠭ ᠪᠢᠯᠡ᠃ ᠲᠡᠷᠡ ᠨᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠨᠠ ᠯᠠᠢ᠁ ᠭᠡᠵᠦ ᠥᠭᠦᠯᠡᠬᠦ ᠳ᠋ᠦ᠍ ᠬᠤᠲᠤᠭᠲᠤ ᠮᠣᠩᠬᠣᠷ ᠥᠷᠥᠭᠡᠯᠳᠡᠵᠦ ᠨᠥᠮᠥᠷᠭᠡᠭᠰᠡᠨ ᠳᠡᠪᠡᠯ ᠦ᠋ᠨ ᠬᠢᠨᠢ ᠬᠣᠷᠮᠣᠢ ᠶ᠋ᠢ ᠰᠡᠮᠬᠡᠨ ᠰᠡᠬᠦᠵᠦ ᠦᠵᠡᠪᠡ᠃ ᠡᠪᠦᠭᠡᠨ ᠦᠨᠡᠨ ᠬᠡᠯᠡᠵᠡᠢ᠃ ᠯᠤᠤ ᠣᠷᠢᠶᠠᠯᠭᠠᠵᠤ ᠤᠷᠠᠯᠠᠭᠰᠠᠨ ᠰᠢᠵᠢᠷ ᠠᠯᠲᠠᠨ ᠪᠠᠭᠤᠪᠴᠢ ᠨᠢ ᠭᠢᠯᠠᠯᠵᠠᠨ ᠪᠠᠢᠯᠠ᠃ ᠲᠡᠷᠡ ᠠᠩᠵᠠᠭᠠᠷᠠᠭᠠ ᠦᠭᠡᠢ ᠶᠦᠮ ᠰᠠᠨᠵᠠᠢ᠃ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠥᠮᠦᠨ ᠪᠣᠯᠵᠤ ᠲᠦᠷᠦᠭᠰᠡᠭᠡᠷ ᠳᠤᠲᠠᠭᠤ ᠶᠠᠭᠤᠮᠠ ᠦᠭᠡᠢ ᠥᠰᠦᠭᠰᠡᠨ ᠬᠥᠮᠦᠨ ᠡᠷᠳᠡᠨᠢᠰ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠨᠢᠳᠦ ᠬᠤᠷᠢᠴᠠᠵᠤ ᠬᠠᠷᠠᠬᠤ ᠪᠠᠨ ᠪᠣᠯᠢᠳᠠᠭ ᠶᠤᠮ᠃ ᠬᠠᠷᠢᠨ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠥᠯᠥᠰᠴᠦ ᠵᠦᠳᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠨᠢᠳᠦ ᠥᠯᠥᠨ ᠪᠠᠢᠬᠤ ᠲᠤᠯᠠ ᠰᠢᠵᠢᠷ ᠠᠯᠲᠠᠨ ᠪᠠᠭᠤᠪᠴᠢ ᠶ᠋ᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠣᠯᠵᠤ ᠬᠠᠷᠠᠵᠠᠢ᠃
— ᠲᠡᠢᠮᠦ ᠪᠠᠢᠨᠠ ᠁
— ᠣᠳᠣ ᠶᠠᠭᠠᠬᠢᠬᠤ ᠪᠣᠢ᠂ ᠨᠣᠶᠠᠨᠲᠠᠨ ᠠ᠋?
— ᠬᠤᠷᠠᠯᠲᠠᠢ ᠳ᠋ᠤ᠌ ᠣᠴᠢᠨᠠ ᠠ᠋᠃
— ᠡᠨᠡ ᠱᠠᠷᠢᠯ ᠢ᠋᠁
— ᠥᠬᠢᠨᠪᠠᠷᠬᠠᠭ ᠤᠤ? ᠲᠡᠷᠡ ᠲᠥᠷᠥ ᠶ᠋ᠢᠨ ᠬᠤᠷᠠᠯᠲᠠᠢ ᠳ᠋ᠤ᠌ ᠣᠷᠣᠯᠴᠠᠬᠤ ᠡᠷᠬᠡ ᠲᠡᠢ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠥᠮᠦᠨ᠂ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠶᠠ ᠭᠡᠵᠦ ᠶᠡᠷᠦ ᠠᠮᠢᠳᠤ ᠬᠥᠮᠦᠨ ᠦ᠌ ᠲᠤᠬᠠᠢ ᠶᠠᠷᠢᠵᠤ ᠪᠣᠢ ᠮᠡᠲᠦ ᠬᠡᠪ ᠨᠢᠭᠡ ᠥᠭᠦᠯᠡᠵᠡᠢ᠃ ᠴᠢᠩᠭᠢᠭᠡᠳ ᠬᠠᠨ ᠬᠥᠪᠡᠭᠦᠨ ᠣᠮᠣᠭᠯᠠᠩ ᠬᠡᠭᠡᠷ ᠮᠣᠷᠢᠨ ᠳ᠋ᠠᠭᠠᠨ ᠤᠬᠤᠰᠬᠢᠨ ᠮᠣᠷᠳᠠᠭᠠᠳ ᠡᠪᠦᠭᠡᠨ ᠴᠡᠷᠢᠭ ᠲᠦ᠍᠂
— ᠲᠠ ᠬᠥᠲᠥᠯᠦᠭᠡᠳ ᠣᠷᠣ! ᠶᠡᠬᠡ ᠬᠤᠷᠠᠯᠲᠠᠢ ᠬᠣᠷᠬᠣᠨᠠᠭ ᠵᠢᠪᠤᠷ ᠲᠤ᠌ ᠪᠣᠯᠵᠤ ᠪᠣᠢ᠁ ᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠯᠡ᠃ ᠬᠦᠰᠡᠭᠡ ᠦᠭᠡᠢ ᠠᠯᠪᠠᠨ ᠳ᠋ᠠᠭᠠᠨ ᠲᠣᠬᠣᠭᠠᠭᠳᠠᠵᠤ᠂ ᠠᠷᠠᠴᠢᠭᠠ ᠦᠭᠡᠢ ᠰᠠᠨᠳᠤᠷᠤᠭᠰᠠᠨ ᠡᠪᠦᠭᠡᠨ ᠦ᠌ ᠨᠢᠳᠦᠨ ᠦ᠌ ᠡᠮᠦᠨᠡᠭᠦᠷ ᠬᠤᠢ ᠰᠠᠯᠬᠢ ᠰᠢᠭ᠋ ᠮᠣᠷᠢᠲᠠᠢ ᠡᠷᠡᠰ ᠳᠣᠪᠲᠣᠯᠭᠠᠨ ᠣᠳᠴᠠᠢ᠃ ᠵᠠᠶᠠᠭᠠ ᠮᠠᠭᠤ ᠲᠠᠢ ᠡᠪᠦᠭᠡᠨ ᠬᠥᠲᠥᠴᠢ ᠨᠣᠮᠣᠬᠠᠨ ᠵᠡᠭᠡᠷᠳᠡ ᠮᠣᠷᠢ ᠪᠠᠨ ᠬᠠᠨᠢ ᠲᠡᠳᠡᠨ ᠮᠠᠩᠨᠠᠢ ᠶ᠋ᠢ ᠨᠢ ᠢᠯᠪᠢᠭᠰᠡᠨ ᠢ᠋ᠶ᠋ᠡᠨ ᠮᠣᠷᠳᠠᠵᠤ᠂ ᠴᠡᠴᠡᠷᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ᠂
— ᠴᠥᠬᠥ᠁ ᠭᠡᠮᠡᠨ ᠲᠡᠷᠭᠡ ᠲᠡᠢ ᠦᠬᠡᠷ ᠢ᠋ ᠲᠠᠭᠤᠬᠤᠢᠴᠠ ᠪᠠᠨ ᠪᠣᠯᠪᠠ᠃
2
ᠬᠣᠷᠬᠤᠨᠤᠭ ᠵᠢᠪᠤᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠬᠦᠷᠢᠶᠡ ᠡᠭᠦᠰᠬᠡᠨ ᠪᠠᠷᠢᠭᠰᠠᠨ ᠶᠡᠬᠡ ᠴᠠᠭᠠᠨ ᠥᠷᠭᠥᠭᠡ᠂ ᠨᠣᠮᠢᠨ ᠴᠡᠩᠬᠡᠷ ᠠᠰᠠᠷ᠂ ᠰᠣᠪᠤᠳᠤᠨ ᠴᠠᠪᠢᠳᠠᠷ ᠴᠠᠴᠠᠷ ᠠᠯᠠᠭᠯᠠᠨ ᠬᠠᠷᠠᠭᠳᠠᠨᠠ᠃ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠠ᠋ᠴᠠ ᠴᠢᠳᠬᠤᠵᠤ ᠣᠷᠣᠭᠰᠠᠨ ᠬᠠᠷᠭᠤᠢ ᠵᠠᠮ ᠢ᠋ᠶ᠋ᠠᠷ ᠠᠯᠲᠠᠨ ᠤᠷᠤᠭ ᠤ᠋ᠨ ᠶᠡᠬᠡᠰ ᠳᠡᠭᠡᠳᠦᠰ ᠮᠣᠷᠢᠯᠠᠨ ᠠᠢᠰᠤᠢ ᠠᠵᠢ᠃ ᠵᠡᠭᠦᠨ ᠤᠷᠲᠤ ᠠ᠋ᠴᠠ ᠪᠠᠷᠳᠠᠨᠪᠠᠭᠠᠲᠤᠷ ᠬᠥᠪᠡᠭᠦᠳ ᠥᠬᠢᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠴᠤᠪᠤᠪᠠ᠃ ᠮᠡᠩᠭᠢᠲᠦ ᠬᠢᠶᠡ ᠡᠴᠢᠭᠡ ᠡᠴᠡ ᠪᠡᠨ ᠥᠨᠳᠥᠷ ᠡᠷᠡ ᠪᠣᠯᠵᠤ ᠥᠰᠴᠡᠢ᠃ ᠲᠡᠭᠦᠨ ᠦ᠌ ᠤᠳᠠᠭᠠ ᠬᠢ ᠨᠡᠭᠦᠨ ᠲᠠᠢᠵᠢ ᠰᠠᠶᠢᠬᠠᠨ ᠬᠣᠩᠭᠢᠷᠠᠳ ᠠ᠋ᠴᠠ ᠪᠠᠭᠤᠯᠭᠠᠵᠤ ᠠᠪᠤᠭᠰᠠᠨ ᠵᠠᠯᠠᠭᠤ ᠭᠡᠷᠭᠡᠢ ᠪᠡᠨ ᠨᠢᠳᠦ ᠶ᠋ᠢ ᠨᠢ ᠪᠦᠯᠲᠡᠷᠡᠲᠡᠯᠡ ᠭᠤᠶᠤᠭᠰᠠᠨ ᠬᠠᠷᠠᠭᠳᠠᠨᠠ᠃ ᠶᠡᠷᠦ ᠥᠪᠡᠷ ᠢ᠋ᠶ᠋ᠡᠨ ᠬᠡᠦᠬᠡᠳ ᠮᠡᠲᠦ ᠳᠡᠪᠡᠷᠡᠭᠦᠨ᠂ ᠬᠥᠭᠡᠷᠦᠦ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠲᠤᠯᠠ ᠨᠢᠰᠴᠢᠬᠡᠬᠦ ᠠᠯᠲᠠᠨ ᠳᠡᠪᠡᠯᠵᠡᠵᠦ ᠶᠠᠪᠤᠪᠠ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠰᠢᠳᠠᠷ ᠵᠠᠭᠤᠲᠤ ᠠᠬᠠᠯᠠᠨ ᠰᠠᠵᠢᠯᠠᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠡᠷᠭᠡᠨ ᠡᠭᠡᠴᠢ ᠪᠡᠨ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠬᠢᠯᠠᠮ ᠬᠢᠯᠠᠮᠬᠢᠨ ᠳᠣᠲᠣᠷᠠ ᠰᠡᠳᠬᠢᠯ ᠳ᠋ᠡᠭᠡᠨ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠪᠦᠳᠡᠭᠬᠡᠨ ᠳᠦᠷᠢ ᠶ᠋ᠢ ᠤᠷᠭᠤᠭᠤᠯᠤᠨ ᠳᠤᠷᠠᠰᠴᠤ ᠶᠠᠪᠤᠯᠠ᠃ ᠮᠥᠨᠥᠬᠡᠨ ᠬᠣᠢᠯᠭᠠ ᠶ᠋ᠢᠨ ᠦᠶᠡ ᠪᠡᠷ ᠨᠡᠭᠦᠨ ᠲᠠᠢᠵᠢ ᠬᠠᠯᠲᠤ ᠮᠦᠯᠲᠦᠬᠡᠨ ᠲᠠᠭᠠᠷᠠᠵᠤ᠂ ᠬᠥᠲᠥᠯᠦᠭᠡ ᠤᠨᠤᠭᠠ ᠦᠭᠡᠢ ᠶ᠋ᠢᠨ ᠤᠴᠢᠷ ᠰᠤᠨᠳᠠᠯᠠᠭᠰᠠᠨ ᠭᠡᠮᠡᠨ ᠭᠠᠢᠬᠠᠭᠤᠯᠵᠤ ᠶᠠᠷᠢᠭᠰᠠᠨ ᠨᠢ ᠪᠣᠢ᠃ ᠴᠢᠩᠭᠢᠬᠦ ᠳ᠋ᠦ᠍ ᠵᠥᠭᠡᠯᠡᠨ ᠪᠤᠯᠪᠠᠷᠠᠢ ᠪᠡᠶᠡ ᠨᠢ ᠬᠠᠯᠠᠭᠤ ᠳᠦᠦᠭᠡᠭᠦᠯᠵᠦ ᠂ ᠬᠣᠶᠠᠷ ᠲᠣᠮᠣ ᠬᠥᠬᠥ ᠨᠢ ᠰᠤᠯᠠᠬᠠᠨ ᠲᠡᠪᠡᠷᠢᠭᠰᠡᠨ ᠭᠠᠷ ᠤ᠋ᠨ ᠪᠠᠭᠤᠨ ᠳᠡᠭᠡᠷᠡ ᠨᠢ ᠪᠤᠯᠬᠠᠭᠨᠠᠵᠤ ᠪᠠᠢᠭᠰᠠᠨ ᠭᠡᠵᠦ ᠲᠡᠰᠬᠡᠯ ᠠᠯᠳᠠᠲᠠᠯᠠ ᠭᠠᠢᠬᠠᠭᠤᠯᠤᠭᠰᠠᠨ ᠨᠢ ᠪᠣᠢ᠃ ᠣᠳᠣ ᠥᠪᠡᠷ ᠦ᠋ᠨ ᠭᠡᠷᠭᠡᠢ ᠶ᠋ᠢᠨ ᠳᠡᠷᠭᠡᠳᠡ ᠬᠣᠨᠢ ᠰᠢᠭ᠋ ᠨᠣᠮᠣᠬᠠᠨ ᠠᠮᠢᠲᠠᠨ ᠰᠠᠵᠢᠯᠠᠵᠤ ᠶᠠᠪᠤᠭᠠ ᠠᠵᠠᠢ᠃
ᠲᠠᠷᠢᠳᠠᠢ ᠣᠳᠴᠢᠬᠢᠨ ᠬᠡᠯᠡ ᠪᠡᠨ ᠬᠠᠵᠠᠭᠰᠠᠨ ᠡᠷᠬᠡ ᠬᠥᠮᠦᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠨᠠᠷᠠ ᠬᠠᠮᠪᠤ᠂ ᠨᠠᠨᠵᠢᠩ ᠴᠢᠪᠠᠭᠠ ᠲᠡᠷᠢᠭᠦᠲᠡᠨ ᠮᠡᠮᠢᠷᠡᠨ ᠵᠠᠯᠠᠷᠠᠨᠠ᠃ ᠪᠠᠷᠠᠭᠤᠨ ᠵᠦᠭ ᠡᠴᠡ ᠬᠣᠲᠣᠯᠠ ᠨᠣᠶᠠᠨ ᠠᠢᠰᠤᠢ ᠠᠵᠠᠢ᠃ ᠶᠡᠬᠡ ᠬᠠᠲᠤᠳ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠵᠠᠯᠠᠷᠠᠵᠤ᠂ ᠪᠦᠯᠵᠢᠭᠡᠨ ᠭᠤᠸᠠ ᠨᠣᠶᠠᠨ ᠲᠠᠢ ᠵᠢᠰᠦ ᠨᠡᠢᠯᠡᠭᠰᠡᠨ ᠬᠣᠯᠠ ᠮᠣᠷᠢ ᠪᠠᠷ ᠭᠤᠶᠤᠵᠠᠢ᠃ ᠲᠡᠭᠦᠨ ᠦ᠌ ᠭᠡᠳᠡᠰᠦ ᠮᠡᠳᠡᠭᠳᠡᠬᠦᠢᠴᠡ ᠲᠣᠮᠣᠷᠠᠵᠤ᠂ ᠴᠢᠷᠠᠢ ᠨᠢ ᠰᠢᠩᠭᠡᠷᠡᠨ ᠡᠭᠡᠯ ᠦᠭᠡᠢ ᠭᠤᠸᠠ ᠦᠵᠡᠰᠬᠦᠯᠡᠩ ᠢ᠋ ᠣᠯᠵᠠᠢ᠃ ᠵᠣᠴᠢ᠂ ᠬᠠᠴᠢᠨᠤᠨ ᠬᠣᠶᠠᠷ ᠬᠠᠲᠤᠳ ᠤ᠋ᠨ ᠬᠠᠮᠲᠤ ᠵᠠᠯᠠᠷᠠᠵᠤ ᠠᠢᠰᠤᠢ᠃ ᠰᠢᠳᠠᠷ ᠵᠠᠭᠤᠲᠤ ᠶ᠋ᠢᠨ ᠲᠡᠷᠢᠭᠦᠨ ᠳ᠋ᠦ᠍ ᠪᠢᠴᠢᠬᠠᠨ ᠠᠯᠲᠠᠨ ᠳᠡᠷᠪᠡᠬᠦ ᠠᠭᠠᠳ ᠲᠡᠷᠡ ᠪᠡᠷ ᠬᠦ ᠬᠤᠶᠠᠭ ᠡᠮᠦᠰᠴᠦ ᠢᠯᠳᠦ ᠨᠤᠮᠤ ᠠᠭᠰᠠᠨ᠂ ᠪᠦᠷ ᠠᠯᠲᠠᠨ ᠵᠡᠪᠡ ᠲᠡᠢ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠬᠡᠳᠦᠢ ᠴᠦ᠍ ᠬᠡᠦᠬᠡᠳ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠬᠠᠷᠠᠭᠳᠠᠬᠤ ᠪᠣᠯᠠᠢ᠃ ᠬᠠᠷᠢᠨ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠪᠠᠷᠠ ᠡᠰᠡ ᠦᠵᠡᠭᠳᠡᠵᠡᠢ᠃ ᠲᠡᠭᠦᠨ ᠢ᠋ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠬᠤ ᠲᠣᠭᠰᠢᠨ ᠬᠤᠯᠠᠨ᠂ ᠨᠣᠮᠣᠬᠠᠨ ᠲᠣᠳᠣᠢᠨ ᠬᠣᠶᠠᠷ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠠᠢᠯ ᠰᠠᠭᠠᠬᠠᠯᠲᠠ ᠶᠠᠪᠤᠬᠤ ᠲᠤᠯᠠ ᠬᠥᠰᠬᠡ ᠨᠢᠭᠡᠨ ᠠᠢᠰᠤᠢ᠃ ᠬᠤᠯᠠᠨ ᠮᠡᠷᠭᠢᠳ ᠬᠠᠲᠤᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ᠂ ᠲᠣᠳᠣᠢᠨ ᠨᠠᠢ᠍ᠮᠠᠨ ᠠᠨᠳᠠ ᠪᠠᠨ ᠠᠪᠴᠤ ᠭᠠᠷᠴᠠᠢ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠤ᠋ ᠦᠷᠡᠰ ᠡᠢᠨ ᠡᠳᠦᠷ ᠦ᠋ᠨ ᠰᠠᠢᠨ ᠢ᠋ ᠥᠨᠵᠢᠨ ᠬᠦᠯᠢᠶᠡᠵᠦ ᠬᠣᠷᠬᠣᠨᠣᠭ ᠵᠢᠪᠦᠷ ᠦ᠋ᠨ ᠬᠥᠨᠳᠡᠢ ᠳ᠋ᠦ᠍ ᠬᠤᠷᠠᠨ ᠴᠢᠭᠤᠯᠪᠠ᠃ ᠬᠠᠷᠯᠢ ᠺᠤ ᠢᠵᠢᠢ ᠶᠡᠬᠡ ᠴᠠᠭᠠᠨ ᠦᠷᠭᠦᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠶᠢᠰᠦᠨ ᠠᠯᠲᠠ ᠤᠷᠲᠤ ᠴᠠᠭᠠᠨ ᠢᠰᠡᠭᠡᠢ ᠳᠡᠪᠢᠰᠦᠭᠦᠯᠦᠨ ᠤᠭᠲᠤᠵᠤ ᠠᠪᠤᠯᠠ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠠᠭᠤᠯᠠ ᠰᠢᠭ᠋ ᠬᠠᠩᠬᠠᠷ ᠡᠷᠡᠰ ᠢ᠋ᠶ᠋ᠡᠨ ᠥᠯᠮᠡᠢ ᠥᠨᠳᠡᠢᠵᠦ ᠦᠨᠦᠰᠪᠡ᠃ ᠴᠢᠩᠭᠢᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠶᠠᠭᠠᠨ ᠬᠠᠴᠠᠷ ᠳᠡᠭᠡᠭᠦᠷ ᠴᠠᠭᠠᠨ ᠰᠠᠨᠴᠢᠭ ᠨᠣᠷᠭᠠᠨ ᠬᠠᠷᠠ ᠨᠢᠯᠪᠤᠰᠤ ᠤᠷᠤᠰᠴᠤ᠂
— ᠮᠠᠭᠤ ᠥᠬᠢᠨᠪᠳᠷᠬᠠᠭ ᠮᠢᠨᠢ᠁ ᠭᠡᠮᠡᠨ ᠥᠮᠥᠯᠵᠡᠵᠦ ᠪᠠᠢᠪᠠ᠃ ᠨᠢᠯᠪᠤᠰᠤ ᠪᠠᠨ ᠨᠢᠭᠤᠬᠤ ᠭᠡᠳ ᠡᠰᠡ ᠴᠢᠳᠠᠵᠠᠢ᠃ ᠬᠥᠪᠡᠭᠦᠳ ᠴᠠᠭᠠᠨ ᠰᠦᠯᠲᠠᠨ ᠳ᠋ᠤ᠌ ᠨᠢᠭᠡ᠂ ᠬᠠᠷᠠ ᠰᠦᠯᠲᠠᠨ ᠳ᠋ᠤ᠌ ᠨᠢᠭᠡ ᠮᠥᠷᠭᠥᠵᠦ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠬᠣᠢᠨᠠ᠂ ᠬᠠᠨ ᠬᠦᠦ ᠨᠦ᠍ᠭᠦᠳ ᠦ᠋ᠨ ᠭᠠᠯ ᠰᠠᠬᠢᠬᠤ ᠬᠠᠲᠤᠳ ᠶᠡᠬᠡ ᠭᠡᠷ ᠦ᠋ᠨ ᠭᠣᠯᠣᠮᠳᠠᠨ ᠳ᠋ᠤ᠌ ᠭᠤᠷᠪᠠ ᠭᠤᠷᠪᠠ ᠮᠥᠷᠭᠥᠵᠦ ᠠᠪᠠᠢ᠃ ᠬᠠᠷᠢᠨ ᠪᠦᠯᠵᠢᠭᠡᠨ ᠢ᠋ ᠡᠰᠡ ᠮᠥᠷᠭᠥᠭᠦᠯᠵᠡᠢ᠃ ᠲᠡᠭᠦᠨ ᠢ᠋ ᠥᠨᠥ ᠬᠢᠷᠢ ᠬᠠᠲᠤᠨ ᠳ᠋ᠤ᠌ ᠡᠰᠡ ᠲᠣᠭᠠᠴᠠᠭᠰᠠᠭᠠᠷ ᠪᠥᠯᠥᠭᠡ᠃ ᠪᠦᠰᠡᠭᠦᠢ ᠴᠡᠭᠡᠵᠢ ᠬᠥᠨᠳᠡᠭᠦᠷᠯᠡᠨ ᠨᠢᠯᠪᠤᠰᠤ ᠴᠢᠢᠯᠡᠵᠦ ᠬᠣᠲᠣᠯᠠ ᠶ᠋ᠢ ᠬᠠᠷᠠᠪᠠᠯ ᠨᠣᠶᠠᠨ ᠢᠨᠢᠶᠡᠮᠰᠦᠷᠡᠨ᠂
— ᠴᠢ ᠨᠠᠳᠠ ᠬᠦᠦ ᠲᠥᠷᠥᠭᠦᠯᠵᠦ ᠥᠭ! ᠭᠡᠮᠡᠨ ᠣᠭᠲᠣ ᠥᠭᠡᠷᠡ ᠶ᠋ᠢ ᠬᠡᠯᠡᠨ ᠰᠠᠳᠤᠭᠠᠷᠠᠭᠤᠯᠵᠤ ᠠᠪᠠᠢ᠃ ᠲᠡᠳᠦᠢ ᠯᠡ ᠣᠯᠠᠨ ᠬᠤᠷᠠᠵᠤ ᠴᠢᠭᠤᠯᠵᠤ᠂ ᠶᠠᠷᠢᠵᠤ ᠬᠥᠭᠡᠷᠴᠦ ᠡᠰᠡ ᠵᠠᠪᠳᠤᠨ ᠨᠤᠲᠤᠭ ᠬᠥᠭᠡᠭᠡᠵᠦ ᠣᠳᠤᠭᠰᠠᠨ ᠬᠠᠨ ᠬᠥᠪᠡᠭᠦᠳ᠂ ᠮᠥᠨᠥᠬᠡᠨ ᠶᠢᠯᠦᠢ ᠳᠠᠰᠢ ᠶ᠋ᠢᠨ ᠮᠣᠷᠢᠯᠠᠨ ᠢᠷᠡᠳᠡᠭ ᠵᠢᠯ ᠯᠡ ᠨᠢᠭᠤᠷ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠᠨ ᠨᠢᠭᠡ ᠠᠭᠤᠯᠵᠠᠭᠰᠠᠨ ᠶᠠᠪᠤᠳᠠᠯ ᠪᠣᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠡᠨᠡ ᠮᠡᠲᠦ ᠪᠠᠶᠠᠷ ᠬᠥᠷ ᠪᠣᠯᠤᠨ ᠤᠴᠠᠷᠠᠭᠰᠠᠨ ᠲᠣᠬᠢᠶᠠᠯ ᠦᠭᠡᠢ ᠪᠢᠯᠡ᠃ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠬᠣᠢᠯᠭᠠ ᠶ᠋ᠢᠨ ᠨᠠᠢᠷ ᠲᠤ᠌ ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ᠂ ᠵᠢᠰᠦ ᠵᠢᠰᠦ ᠪᠡᠨ ᠬᠠᠷᠠᠭᠠᠳ ᠯᠠ ᠥᠩᠭᠡᠷᠡᠵᠦ ᠠᠪᠠᠢ᠃ ᠡᠢᠨ ᠬᠤᠷᠠᠨ ᠢᠷᠡᠭᠰᠡᠨ ᠬᠥᠪᠡᠭᠦᠳ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠭᠠᠷ ᠤ᠋ᠨ ᠴᠠᠢ ᠶ᠋ᠢ ᠤᠤᠭᠤᠵᠤ᠂ ᠪᠠᠷᠠᠳᠠᠨᠪᠠᠭᠠᠲᠤᠷ ᠳᠤᠭᠤᠯᠠᠭᠠ ᠪᠠᠨ ᠠᠪᠴᠤ ᠲᠤᠬᠠᠯᠠᠬᠤ ᠳ᠋ᠤ᠌ ᠮᠥᠷᠥ ᠪᠡᠨ ᠪᠦᠲᠡᠭᠡᠵᠦ ᠪᠠᠭᠤᠭᠰᠠᠨ ᠦᠰᠦ ᠨᠢ ᠴᠡᠯ ᠪᠤᠭᠤᠷᠤᠯ ᠪᠣᠯᠤᠭᠰᠠᠨ ᠢ᠋ ᠪᠦᠭᠦᠳᠡ ᠠᠩᠵᠠᠭᠠᠷᠠᠵᠠᠢ᠃ ᠣᠨ ᠴᠠᠭ ᠤᠷᠤᠰᠤᠨ ᠪᠣᠢ ᠨᠢ ᠡᠨᠡ ᠪᠥᠯᠥᠭᠡ᠃ ᠶᠡᠷᠦ ᠡᠯᠡ ᠴᠠᠭᠠᠨ ᠦᠰᠦᠨ ᠡᠴᠡ ᠰᠣᠴᠢᠭᠰᠠᠨ ᠮᠡᠲᠦ ᠳᠣᠲᠣᠷᠠ ᠰᠠᠷᠬᠢᠵᠤ ᠪᠡᠶᠡ ᠪᠠᠶᠠᠨ ᠢ᠋ᠶ᠋ᠠᠨ ᠰᠡᠮᠬᠡᠨ ᠠᠵᠢᠭᠯᠠᠵᠤ ᠪᠢᠯᠡ᠃ ᠪᠠᠷᠳᠠᠨᠪᠠᠭᠠᠲᠤᠷ ᠤ᠋ᠨ ᠦᠰᠦ ᠴᠠᠢᠵᠤ᠂ ᠥᠳᠬᠡᠨ ᠬᠥᠮᠥᠰᠬᠡ ᠨᠢ ᠤᠪ ᠲᠣᠪ ᠪᠤᠭᠤᠷᠤᠯ ᠤᠨᠠᠨ ᠨᠠᠰᠤ ᠠᠬᠢᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠬᠠᠭᠠᠨ ᠡᠴᠢᠭᠡ ᠲᠡᠢ ᠪᠡᠨ ᠠᠳᠠᠯᠢ ᠪᠣᠯᠬᠤ ᠨᠢ ᠠ᠋᠃ ᠬᠠᠷᠯᠢ ᠺᠤ ᠬᠠᠩᠭᠢᠨᠠᠲᠠᠯᠠ ᠰᠠᠨᠠᠭᠠ ᠠᠯᠲᠠᠨ《᠁ ᠮᠢᠨᠦ ᠮᠠᠭᠤ ᠬᠦᠦ ᠪᠠᠢᠭᠰᠠᠨ ᠪᠣᠯ᠁》 ᠭᠡᠵᠦ ᠲᠠᠪᠤᠨ ᠰᠠᠢᠬᠠᠨ ᠬᠦᠦ ᠪᠡᠨ ᠪᠠᠢᠭᠰᠠᠭᠠᠷ ᠠᠲᠠᠯᠠ ᠪᠠᠢᠬᠤ ᠦᠭᠡᠢ ᠥᠬᠢᠨᠪᠠᠷᠬᠠᠭ ᠢ᠋ᠶ᠋ᠠᠨ ᠰᠦᠷᠡᠬᠡᠢ ᠦᠭᠡᠢᠯᠡᠪᠡ᠃ ᠡᠳᠦᠢ ᠳ᠋ᠦ᠍ ᠠᠮᠢᠳᠤ ᠮᠡᠨᠳᠦ ᠪᠣᠯ ᠢᠷᠡᠮᠡᠷ ᠶᠦᠮ ᠠ᠋ ᠭᠡᠵᠦ ᠦᠭᠡᠢᠯᠡᠪᠡ᠃ ᠴᠢᠩᠭᠢᠭᠡᠳ ᠨᠠᠰᠤᠨ ᠤ᠋ ᠴᠡᠭᠡᠵᠢᠨ ᠳ᠋ᠦ᠍ ᠭᠠᠷᠬᠤ ᠶ᠋ᠢᠨ ᠴᠠᠭ ᠲᠤ᠌ ᠲᠩᠷᠢ ᠪᠣᠯᠤᠭᠠᠴᠢ ᠠᠪᠤ ᠲᠠᠢ ᠪᠠᠨ ᠤᠯᠠᠮ ᠯᠠ ᠠᠳᠠᠯᠢ ᠬᠠᠷᠠᠭᠳᠠᠬᠤ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠡᠩᠬᠦᠷᠡᠢᠯᠡᠵᠦ ᠠᠵᠢᠯᠠ᠃ ᠬᠣᠲᠣᠯᠠ ᠴᠢᠯᠭᠡᠷ ᠰᠠᠢᠬᠠᠨ ᠬᠡᠪ ᠢ᠋ᠶ᠋ᠡᠷ ᠠᠪᠠᠴᠤ ᠥᠷᠭᠡᠨ ᠮᠠᠩᠨᠠᠢ ᠳ᠋ᠤᠨᠢ ᠨᠢᠭᠡ ᠶ᠋ᠢᠨ ᠵᠡᠷᠭᠡ ᠦᠷᠴᠢᠯᠡᠭᠡ ᠰᠠᠭᠤᠵᠤ᠂ ᠭᠦᠷᠦᠮᠡᠯ ᠭᠡᠵᠢᠭᠡᠨ ᠦ᠌ ᠬᠢᠨᠢ ᠱᠠᠩᠬᠤᠨ ᠳ᠋ᠤ᠌ ᠡᠳᠦᠷ ᠦ᠋ᠨ ᠣᠳᠣ ᠰᠢᠭ᠋ ᠴᠠᠭᠠᠨ ᠦᠰᠦ ᠬᠠᠷᠠᠭᠳᠠᠨᠠ᠃ ᠳᠣᠭᠰᠢᠨ ᠬᠤᠯᠠᠨ ᠬᠠᠷᠢᠨ ᠠᠬᠠ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠣᠪᠣᠷ ᠲᠠᠢ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠢᠯᠳᠦ ᠠᠭᠰᠠᠵᠤ ᠲᠡᠢᠨ ᠪᠦᠬᠦᠨ ᠢ᠋ ᠮᠠᠩᠯᠠᠢᠯᠠᠬᠤ ᠲᠤᠯᠠ ᠵᠢᠳᠠ ᠰᠤᠮᠤᠨ ᠤ᠋ ᠰᠣᠷᠪᠢ ᠰᠢᠷᠬᠠ ᠶᠡᠬᠡ ᠲᠡᠢ ᠶᠦᠮ᠃ ᠡᠨᠡ ᠨᠢ ᠨᠢᠭᠤᠷ ᠴᠢᠷᠠᠢ ᠶ᠋ᠢ ᠨᠢ ᠰᠦᠷᠯᠢᠭ ᠪᠣᠯᠭᠠᠬᠤ ᠬᠡᠳᠦᠢ ᠴᠦ᠍ ᠯᠠᠪᠲᠠᠶᠠ ᠲᠠᠪᠤᠨ ᠨᠠᠰᠤ ᠪᠠᠷ ᠠᠬᠠ ᠪᠣᠯᠭᠠᠨᠠ ᠠᠵᠢ᠃ ᠬᠠᠷᠢᠨ ᠬᠤᠯᠠᠨ ᠪᠠᠭᠠᠲᠤᠷ ᠥᠪᠡᠷ ᠢ᠋ᠶ᠋ᠡᠨ᠂
— ᠰᠠᠢᠬᠠᠨ ᠰᠣᠷᠪᠢ ᠡᠷᠡ ᠶ᠋ᠢᠨ ᠴᠢᠮᠡᠭ᠁ ᠭᠡᠮᠡᠨ ᠪᠠᠬᠠᠷᠬᠠᠬᠤ ᠪᠥᠯᠥᠭᠡ᠃ ᠨᠣᠮᠣᠬᠠᠨ ᠲᠣᠳᠣᠢᠨ ᠭᠠᠯ ᠤ᠋ᠨ ᠡᠵᠡᠨ ᠭᠡᠮᠡᠨ ᠬᠢᠯᠢ ᠶ᠋ᠢᠨ ᠳᠡᠭᠡᠰᠦ ᠠᠯᠬᠤᠵᠤ ᠠᠶᠠᠨ ᠲᠡᠢᠨ ᠳ᠋ᠦ᠍ ᠦᠯᠦ ᠶᠠᠪᠤᠬᠤ ᠪᠢᠯᠡ᠃ ᠭᠡᠷ ᠡᠴᠡ ᠭᠠᠷᠬᠤ ᠦᠭᠡᠢ᠂ ᠭᠡᠳᠡᠰᠦ ᠠᠯᠳᠠᠬᠤ ᠦᠭᠡᠢ ᠲᠤᠯᠠ ᠴᠢᠷᠠᠢ ᠵᠢᠰᠦ ᠥᠩᠭᠡᠯᠢᠭ ᠰᠠᠢᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢ᠃ ᠬᠠᠷᠢᠨ ᠰᠠᠭᠤᠳᠠᠯ ᠲᠠᠷᠭᠤᠳᠠᠵᠤ ᠪᠠᠬᠠᠨ ᠭᠡᠳᠡᠰᠦ ᠰᠠᠭᠤᠬᠤ ᠶᠠᠩᠵᠤ ᠲᠠᠢ᠃《 ᠬᠤᠲᠤᠭᠲᠤ ᠮᠣᠩᠬᠣᠷ ᠮᠢᠨᠢ ᠶᠠᠭᠠᠬᠢᠴᠢᠬᠠᠪᠠ ᠳᠠ᠂ ᠪᠠᠢᠵᠠ᠁》 ᠭᠡᠮᠡᠨ ᠬᠠᠷᠯᠢ ᠺᠤ ᠡᠬᠡ ᠥᠨᠳᠡᠯᠵᠡᠬᠦ ᠳ᠋ᠦ᠍ ᠪᠠᠷᠳᠠᠨᠪᠠᠭᠠᠲᠤᠷ ᠨᠡᠯᠮᠡᠭᠡᠷ ᠪᠤᠭᠤᠷᠤᠯ ᠦᠰᠦ ᠪᠡᠨ ᠰᠠᠵᠢᠯᠠᠨ ᠰᠡᠭᠰᠦᠷᠴᠦ᠂
— ᠬᠠᠮᠢᠭᠠ ᠠ᠋ᠴᠠ ᠬᠤᠢ ᠪᠣᠰᠤᠨᠠ᠂ ᠲᠡᠨᠳᠡ ᠡᠴᠡ ᠯᠡ ᠬᠤᠲᠤᠭᠲᠤ ᠢᠷᠡᠨᠡ ᠭᠡᠯᠡ᠃ ᠨᠡᠭᠡᠷᠡᠨ ᠯᠡ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠬᠤᠢ ᠰᠠᠯᠬᠢᠨ ᠮᠡᠲᠦ ᠬᠣᠢᠰᠠᠩᠨᠠᠨ ᠰᠢᠭᠤᠷᠴᠤ ᠶᠠᠪᠤᠳᠠᠭ ᠡᠷᠡ ᠶᠦᠮ᠃ ᠬᠠᠷᠯᠢ ᠺᠤ ᠬᠠᠲᠤᠨ᠂
— ᠪᠠᠢᠭ᠂ ᠮᠢᠨᠦ ᠮᠠᠭᠤ ᠬᠦᠦ ᠶ᠋ᠢ᠁ ᠬᠡᠮᠡᠨᠡ᠃ ᠳᠥᠴᠢ ᠭᠠᠷᠤᠭᠰᠠᠨ ᠡᠷᠡ ᠴᠦ᠍ ᠭᠡᠯᠡ ᠡᠬᠡ ᠬᠠᠲᠤᠨ ᠳ᠋ᠤ᠌ ᠨᠢᠯᠬᠠ ᠶ᠋ᠢᠨ ᠰᠡᠪᠡᠯᠭᠡ ᠲᠡᠢ᠂ ᠨᠢᠷᠠᠢ ᠪᠠᠭᠠ ᠰᠢᠭ᠋ ᠢ᠋ᠶ᠋ᠡᠨ ᠪᠣᠳᠣᠭᠳᠠᠬᠤ ᠠᠵᠤᠭᠤ᠃ ᠡᠨᠡ ᠦᠶᠡᠰ ᠬᠣᠯᠠ ᠠ᠋ᠴᠠ ᠠᠢᠰᠤᠬᠤ ᠮᠣᠷᠢᠨ ᠲᠦᠪᠡᠷᠭᠡᠨ ᠴᠢᠬᠢᠨ ᠦ᠌ ᠦᠵᠦᠭᠦᠷ ᠲᠦ᠍ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠬᠡᠪᠯᠡᠭᠦᠦ ᠲᠣᠳᠣᠢᠨ ᠣᠳᠴᠢᠬᠡᠨ᠂
— ᠡᠨᠡ ᠬᠤᠲᠤᠭᠲᠤ ᠮᠣᠩᠬᠣᠷ ᠮᠥᠨ ᠬᠡᠮᠡᠬᠦ ᠳ᠋ᠦ᠍ ᠬᠠᠷᠯᠢ ᠺᠤ ᠢᠵᠢᠢ ᠵᠠᠩᠳᠤᠷᠤᠭᠰᠠᠨ ᠢ᠋ᠶ᠋ᠠᠨ ᠤᠬᠤᠰᠬᠢᠨ ᠭᠠᠷᠴᠤ ᠲᠣᠰᠤᠭᠠᠳ᠂
— ᠦ᠂ ᠠᠮᠪᠠᠭᠠᠢ ᠬᠠᠭᠠᠨ ᠠᠢᠰᠤᠢ ᠭᠡᠵᠦ ᠰᠤᠯᠠᠬᠠᠨ ᠳᠤᠤᠭᠠᠷᠪᠠ᠃ ᠲᠠᠢᠴᠢᠭᠤᠳ ᠤ᠋ᠨ ᠠᠮᠪᠠᠭᠠᠢ ᠬᠠᠭᠠᠨ ᠲᠡᠷᠢᠭᠦᠨ ᠵᠠᠭᠤᠲᠤ ᠪᠠᠨ ᠳᠠᠭᠠᠭᠤᠯᠵᠤ᠂ ᠬᠥᠪᠡᠭᠦᠨ ᠬᠠᠲᠠᠭᠠᠨ ᠢ᠋ᠶ᠋ᠠᠨ ᠰᠢᠳᠠᠷᠯᠠᠨ ᠠᠪᠴᠤ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠮᠣᠷᠢᠳ ᠤ᠋ᠨ ᠲᠣᠭᠣᠰᠣ ᠪᠣᠰᠤᠭᠠ᠂ ᠵᠣᠪᠬᠢ ᠥᠭᠡᠳᠡ ᠪᠡᠨ ᠶᠡᠬᠡ ᠯᠡ ᠬᠡᠢᠮᠣᠷᠢᠯᠢᠭ ᠬᠠᠷᠠᠭᠳᠠᠨᠠ᠃
— ᠠᠯᠲᠠᠨ ᠤᠷᠤᠭ ᠤ᠋ᠨ ᠠᠬᠠᠰ ᠶᠡᠬᠡᠰ ᠦ᠋ᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ!
— ᠠᠮᠤᠭᠤᠯᠠᠩ᠁ ᠳᠡᠭᠡᠭᠰᠢ ᠪᠡᠨ ᠮᠣᠷᠢᠯᠠ᠁ ᠥᠭᠡᠳᠡ ᠪᠡᠨ᠁ᠥᠭᠡᠳᠡ ᠪᠡᠨ᠁ ᠭᠡᠯᠴᠡᠨ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠬᠣᠶᠠᠷ ᠲᠠᠯᠠ ᠪᠠᠷ ᠡᠩᠨᠡᠵᠦ ᠰᠠᠭᠤᠭᠰᠠᠨ ᠨᠣᠶᠠᠳ ᠨᠣᠶᠠᠭᠲᠠᠢ ᠨᠠᠷ ᠬᠣᠷᠮᠣᠢ ᠬᠣᠳᠣ ᠪᠠᠨ ᠬᠤᠮᠢᠨ ᠵᠠᠢ ᠭᠠᠷᠭᠠᠵᠤ ᠵᠠᠯᠠᠪᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠨ ᠮᠡᠬᠦᠯᠵᠡᠭᠰᠡᠭᠡᠷ ᠵᠡᠭᠦᠨ ᠡᠩᠨᠡᠭᠡ ᠲᠡᠷᠢᠭᠦᠯᠡᠵᠦ ᠰᠠᠭᠤᠯᠠ᠃ ᠶᠡᠷᠦ ᠵᠠᠶᠢᠭ ᠲᠡᠢᠮᠦ ᠶᠦᠮ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠬᠠᠪᠤᠯ ᠶᠡᠬᠡ ᠲᠠᠯᠠ ᠭᠡᠮᠡᠨ ᠪᠠᠷᠠᠭᠤᠨ ᠡᠩᠨᠡᠭᠡ ᠶ᠋ᠢ ᠲᠡᠷᠢᠭᠦᠯᠡᠵᠦ ᠰᠦᠷᠳᠡᠶᠡ ᠵᠠᠯᠠᠷᠠᠳᠠᠭ ᠪᠠᠢᠭᠰᠠᠨ ᠪᠢᠯᠡ᠃ ᠥᠨᠥ ᠲᠡᠭᠦᠨ ᠦ᠌ ᠡᠵᠡᠭᠦᠢ ᠰᠠᠭᠤᠳᠠᠯ ᠣᠩᠭᠣᠢᠵᠤ᠂ ᠨᠥᠮᠥᠷᠢ ᠨᠥᠭᠡᠯᠭᠡ ᠨᠢ ᠬᠥᠮᠦᠨ ᠬᠥᠮᠦᠨ ᠳ᠋ᠦ᠍ ᠦᠭᠡᠢᠯᠡᠭᠳᠡᠵᠦ ᠪᠠᠢᠯᠠ᠃ ᠲᠩᠷᠢ ᠳ᠋ᠦ᠍ ᠣᠳᠤᠭᠰᠠᠨ ᠬᠠᠭᠠᠨ ᠤ᠋ ᠳᠣᠣᠷᠠ ᠮᠥᠷᠥ ᠳᠠᠷᠤᠵᠤ ᠰᠠᠭᠤᠳᠠᠭ ᠠᠭᠰᠠᠨ ᠣᠬᠢᠨᠪᠠᠷᠬᠠᠭ ᠠᠯᠠᠭᠠ᠂ ᠲᠡᠷᠡ ᠪᠡᠷ ᠬᠣᠶᠠᠷ ᠲᠠᠯᠠ ᠤᠷᠤᠭᠤ ᠪᠠᠨ ᠰᠢᠯᠪᠡᠯᠵᠡᠨ ᠬᠠᠩᠬᠠᠯᠵᠠᠵᠤ ᠰᠠᠭᠤᠳᠠᠭ ᠪᠥᠯᠥᠭᠡ᠃ ᠠᠮᠠ ᠨᠡᠭᠡᠭᠡᠬᠦ ᠪᠦᠷᠢ ᠳ᠋ᠡᠭᠡᠨ ᠮᠡᠷᠭᠡᠨ ᠰᠠᠨᠠᠭᠠ ᠭᠠᠷᠭᠠᠵᠤ ᠴᠡᠴᠡᠨ ᠦᠭᠡ ᠣᠷᠣᠯᠳᠣᠭᠤᠯᠳᠠᠭ ᠭᠡᠪᠡᠯ ᠬᠤᠳᠠᠯ ᠴᠤ᠌ ᠬᠤᠷᠴᠠ ᠶᠠᠷᠢᠵᠤ ᠬᠤᠷᠳᠤᠨ ᠰᠢᠢᠳᠬᠦ ᠭᠡᠵᠦ ᠳᠦᠷᠡᠯᠵᠡᠨ ᠶᠠᠪᠤᠳᠠᠭ ᠨᠢᠭᠡᠨ ᠠᠪᠠᠢ᠃ ᠲᠡᠷᠡ ᠬᠥᠮᠦᠨ ᠥᠨᠥ ᠦᠭᠡᠢ ᠠᠵᠢ᠃ ᠦᠬᠦᠭᠰᠡᠨ᠂ ᠠᠮᠢᠳᠤ ᠶ᠋ᠢ ᠡᠰᠡ ᠮᠡᠳᠡᠨᠡ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠤ᠋ ᠨᠢᠳᠦ ᠠᠶᠠᠨᠳᠠᠭᠠᠨ ᠴᠢᠬᠢᠭᠳᠡᠨ ᠰᠢᠪᠡᠭᠴᠢᠨ ᠥᠬᠢᠨ ᠤᠷᠤᠭᠤ ᠬᠠᠷᠠᠵᠤ᠂
— ᠬᠤᠲᠤᠭᠲᠤ ᠬᠦᠦ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠨᠠ ᠪᠣᠯ ᠤᠤ᠁ ᠭᠡᠮᠡᠨ ᠳᠡᠭᠳᠡᠯᠡᠨᠡ᠃ ᠰᠢᠪᠡᠭᠴᠢᠨ ᠭᠣᠳᠬᠢᠨ ᠭᠠᠷᠴᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠠᠭᠤᠨ ᠳ᠋ᠤᠨᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠰᠢᠩᠭᠡᠵᠦ᠂
— ᠬᠠᠲᠤᠨ ᠠᠬᠠᠢ᠂ ᠬᠠᠨ ᠬᠥᠪᠡᠭᠦᠨ ᠢᠷᠡᠯᠡ ᠬᠡᠮᠡᠪᠡ᠃ ᠪᠠᠷᠳᠠᠨ ᠬᠦᠦ ᠶ᠋ᠢᠨ ᠬᠢᠨᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠡᠭᠡᠷᠡᠨ ᠯᠡ ᠤᠯᠠᠭᠠᠨ ᠲᠣᠭᠣᠰᠣ ᠲᠠᠢ ᠪᠠᠨ ᠠᠢᠰᠤᠢ ᠠᠵᠢ᠃ ᠬᠠᠷᠯᠢ ᠺᠤ ᠢᠵᠢᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠰᠦᠮᠡᠯᠵᠡᠵᠦ ᠪᠠᠢᠭᠰᠠᠨ ᠨᠢᠯᠪᠤᠰᠤ ᠵᠠᠳᠠᠭᠠᠢ ᠠᠰᠬᠠᠷᠠᠵᠤ᠂
— ᠳᠠᠩᠴᠤ ᠳᠠ᠂ ᠢᠩᠭᠢᠮᠡᠷ ᠳᠡ᠃ ᠠᠪᠴᠤ ᠳᠠᠭᠤᠰᠳᠠᠭ ᠪᠣᠯ ᠳᠠᠭᠤᠰᠬᠤ ᠪᠣᠯᠤᠮᠠᠷ ᠳᠠ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠭᠰᠡᠨ ᠢ᠋ᠶ᠋ᠡᠨ ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ ᠴᠠᠯᠠᠢᠭᠴᠢ ᠬᠥᠬᠡ ᠲᠩᠷᠢ ᠶ᠋ᠢ ᠰᠢᠷᠳᠡᠨ᠂
— ᠬᠥᠬᠡ ᠲᠩᠷᠢ ᠥᠷᠥᠰᠢᠶᠡ! ᠭᠡᠯᠡ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠬᠦᠷᠴᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠤᠶᠠᠭᠠᠨᠠ ᠲᠤᠯᠵᠤ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠠᠩᠭᠠᠢᠲᠠᠯᠠ ᠲᠠᠲᠠᠬᠤ ᠳ᠋ᠤ᠌ ᠰᠠᠭᠠᠷᠠᠯ ᠲᠣᠭᠣᠰᠣ ᠭᠦᠢᠴᠡᠨ ᠢᠷᠡᠵᠦ ᠨᠥᠮᠥᠷᠦᠨ ᠠᠪᠤᠯᠠ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠢᠯᠲᠠᠰᠤᠲᠤ ᠬᠤᠶᠠᠭ ᠢ᠋ᠶ᠋ᠠᠨ ᠬᠠᠷ ᠶᠠᠷ ᠬᠢᠯᠭᠡᠨ ᠪᠠᠭᠤᠵᠤ ᠱᠠᠯᠠᠮᠠᠭ ᠠᠯᠬᠤᠵᠤ ᠨᠠᠭᠠᠰᠢᠯᠠᠬᠤ ᠳ᠋ᠤ᠌᠂
— ᠮᠢᠨᠦ ᠬᠦᠦ᠂ ᠶᠠᠭᠠᠬᠢᠭᠰᠠᠨ ᠤᠳᠠᠨᠠ ᠪᠣᠢ? ᠭᠡᠭᠰᠡᠭᠡᠷ ᠬᠠᠷᠯᠢ ᠺᠤ ᠤᠭᠲᠤᠯᠠ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠬᠣᠯᠴᠣᠷᠠᠤᠲᠤᠭᠰᠠᠨ ᠮᠠᠩᠨᠠᠢ ᠪᠠᠨ ᠬᠠᠲᠤᠨ ᠢᠵᠢᠢ ᠳ᠋ᠡᠭᠡᠨ ᠦᠨᠦᠷᠯᠡᠭᠦᠯᠦᠩᠭᠡᠨ᠂
— ᠪᠦᠭᠦᠳᠡ ᠢᠷᠡᠪᠡ ᠤᠤ᠂ ᠢᠵᠢᠢ ᠠ᠋? ᠭᠡᠬᠦ ᠳ᠋ᠦ᠍ ᠭᠣᠷᠢᠳᠠᠯ ᠲᠠᠰᠤᠷᠠᠭᠠ ᠦᠭᠡᠢ ᠬᠠᠲᠤᠨ᠂
— ᠠᠬᠠ ᠠ᠋ᠴᠠ ᠴᠢᠨᠢ ᠪᠤᠰᠤᠳ ᠨᠢ ᠢᠷᠡᠭᠰᠡᠨ ᠭᠡᠪᠡ᠃
— ᠶᠠᠮᠠᠷ ᠠᠬᠠ?
— ᠥᠬᠢᠨᠪᠠᠷᠬᠠᠭ ᠠᠬᠠ ᠴᠢᠨᠢ!
— ᠠᠩ᠁ ᠢᠵᠢᠢ ᠪᠡᠨ ᠨᠢᠭᠡ ᠶᠡᠬᠡ ᠰᠦᠷᠡᠬᠡᠢ ᠬᠠᠷᠠᠭᠠᠳ ᠠᠮᠠᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠦᠭᠡ ᠪᠡᠨ ᠵᠠᠯᠭᠢᠨ ᠣᠷᠣᠭᠤᠯᠤᠯᠠ᠃ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠬᠤᠷᠠᠭᠰᠠᠨ ᠣᠯᠠᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠠᠮᠤᠷ ᠮᠡᠨᠳᠦ ᠶ᠋ᠢᠨ ᠦᠭᠡ ᠬᠡᠯᠡᠯᠴᠡᠨ ᠬᠤᠲᠤᠭᠲᠤ ᠮᠣᠩᠬᠣᠷ ᠭᠣᠯᠣᠮᠲᠠ ᠶ᠋ᠢᠨ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠳᠡᠭᠡᠭᠰᠢ ᠥᠭᠰᠥᠵᠦ ᠵᠢᠭᠦᠷ ᠤᠳᠠᠭᠠᠯᠠᠵᠤ ᠰᠠᠭᠤᠪᠠ᠃ ᠴᠢᠩᠭᠢᠭᠡᠳ ᠬᠤᠷᠠᠵᠤ ᠴᠢᠭᠤᠯᠤᠭᠰᠠᠨ ᠣᠯᠠᠨ ᠢ᠋ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ᠂
— ᠬᠤᠷᠠᠯᠲᠠᠢ ᠪᠠᠨ ᠡᠬᠢᠯᠡᠭᠦᠯᠪᠡᠯ ᠶᠠᠭᠠᠬᠢᠨᠠ? ᠭᠡᠬᠦ ᠳ᠋ᠦ᠍ ᠪᠠᠷᠠᠳᠠᠨᠪᠠᠭᠠᠲᠤᠷ᠂
— ᠬᠣᠷᠴᠢ ᠶ᠋ᠢ ᠬᠦᠯᠢᠶᠡᠶᠡ! ᠭᠡᠮᠡᠨ ᠥᠭᠦᠯᠡᠲᠡᠯᠡ᠂
— ᠲᠡᠷᠡ ᠮᠠᠨᠠᠭᠤᠬᠠᠢ ᠡᠨᠳᠡ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠨᠠ᠃ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠡᠷᠡᠭᠦᠯ᠂ ᠡᠪᠡᠳᠴᠢᠲᠡᠢ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠠᠮᠢᠲᠠᠨ ᠤ᠋ ᠬᠡᠷᠡᠭ ᠶᠠᠭᠤ ᠪᠠᠢᠨᠠ ᠭᠡᠯᠡ᠃ ᠬᠣᠲᠣᠯᠠ᠂ ᠠᠬᠠ ᠪᠠᠨ ᠭᠠᠢᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠲᠡᠷᠡ ᠴᠢᠨᠢ ᠲᠥᠷᠥ ᠶ᠋ᠢᠨ ᠬᠣᠷᠴᠢ ᠰᠢᠦ᠃ ᠬᠦᠯᠢᠶᠡᠶᠡ! ᠬᠡᠮᠡᠪᠡ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠰᠦᠷ ᠲᠡᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠳᠤᠤᠭᠠᠷᠤᠨ ᠭᠠᠯ ᠲᠠᠢ ᠲᠤᠯᠭᠠ ᠰᠢᠷᠳᠡᠬᠦ ᠳ᠋ᠦ᠍ ᠬᠠᠮᠠᠷ ᠨᠢ ᠰᠡᠷᠲᠡᠯᠵᠡᠨ᠂ ᠴᠡᠭᠡᠵᠢ ᠨᠢ ᠲᠦᠬᠦᠯᠵᠡᠨ ᠪᠠᠢᠯᠠ᠃
3
ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠥᠪᠥᠷ ᠬᠥᠷᠯᠡᠬᠦ ᠳᠣᠲᠣᠷᠠ ᠤᠷᠤᠰᠬᠤ ᠰᠡᠩᠬᠦᠷ ᠦ᠋ᠨ ᠭᠣᠣᠯ ᠥᠭᠰᠥᠨ ᠨᠢᠭᠡᠨ ᠪᠠᠷᠠᠭᠠᠨ ᠮᠣᠷᠢᠲᠠᠢ ᠬᠥᠮᠦᠨ ᠰᠠᠵᠢᠯᠠᠭᠤᠯᠵᠤ ᠶᠠᠪᠤᠯᠠ᠃
— ᠴᠦ᠁ᠴᠦ᠁ ᠭᠡᠮᠡᠨ ᠮᠢᠩᠭᠠᠨᠲᠠ ᠳᠠᠪᠢᠷᠠᠵᠤ᠂ ᠲᠦᠮᠡᠨᠲᠡ ᠲᠠᠰᠢᠭᠤᠷᠳᠠᠪᠠᠴᠤ ᠬᠤᠷ ᠳᠡᠯ ᠲᠡᠢ ᠬᠣᠩᠭᠣᠷ ᠬᠠᠯᠵᠠᠨ ᠮᠣᠷᠢ ᠤᠷᠤᠭᠰᠢ ᠭᠢᠰᠬᠢᠬᠦ ᠲᠤᠩ ᠳᠤᠷᠠ ᠦᠭᠡᠢ ᠠᠵᠢ᠃ ᠰᠠᠯᠬᠢ ᠦᠭᠡᠢ ᠪᠦᠭᠴᠢᠮ ᠡᠳᠦᠷ ᠡᠢᠨ ᠬᠡᠯᠲᠦᠷᠢᠬᠦ ᠲᠡᠭᠦᠨ ᠢ᠋ ᠢᠯᠠᠭᠠ ᠰᠢᠮᠠᠭᠤᠯ ᠡᠯᠡᠭ ᠪᠠᠷᠢᠨ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠶ᠋ᠢ ᠨᠢ ᠮᠥᠯᠵᠢᠨ ᠠᠯᠳᠠᠬᠤ ᠲᠤᠯᠠ ᠪᠠᠬᠠᠨ ᠲᠡᠪᠡᠳᠡᠭᠦᠦ ᠶᠠᠪᠤᠯᠠ᠃
— ᠴᠦ᠁ᠴᠦ᠁ ᠭᠡᠮᠡᠨ ᠶᠠᠩᠭᠢᠶᠠᠨ ᠳᠡᠭᠡᠷᠡ ᠣᠪᠣᠭᠠᠨᠠᠬᠤ ᠠᠪᠠᠴᠤ ᠰᠤᠯᠠᠳᠠᠵᠤ ᠶᠠᠳᠠᠷᠠᠭᠰᠠᠨ ᠬᠣᠩᠭᠣᠷ ᠬᠠᠯᠵᠠᠨ ᠮᠣᠷᠢ ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠬᠣᠶᠠᠷ ᠨᠢᠭᠡᠲᠡᠭᠡ ᠫᠦᠭ ᠫᠦᠭ ᠱᠣᠭᠰᠢᠭᠠᠳ ᠬᠡᠯᠲᠦᠷᠢᠬᠦ ᠪᠢᠯᠡ᠃ ᠪᠤᠭᠤᠷᠤᠯ ᠲᠡᠷᠢᠭᠦᠨ ᠲᠡᠢ᠂ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠨᠢᠷᠤᠭᠤᠯᠢᠭ ᠡᠷᠡ ᠠᠷᠭᠠ ᠲᠠᠰᠤᠷᠠᠨ ᠡᠢᠰᠢ ᠲᠡᠢᠰᠢ ᠬᠠᠷᠠᠭᠠᠴᠢᠯᠠᠬᠤ ᠳ᠋ᠤ᠌ ᠬᠢᠷᠥᠭᠡᠨ ᠦ᠌ ᠢᠷ ᠰᠢᠭ ᠬᠥᠬᠡ ᠠᠭᠤᠯᠠᠰ ᠰᠦᠮᠡᠯᠵᠡᠨ ᠳᠤᠨᠢᠶᠠᠷᠲᠤᠵᠤ᠂ ᠴᠠᠷᠴᠠᠭᠠ ᠴᠠᠷᠭᠢᠬᠤ᠂ ᠲᠠᠷᠪᠠᠭᠠ ᠬᠣᠰᠬᠢᠷᠠᠬᠤ ᠠ᠋ᠴᠠ ᠥᠭᠡᠷᠡ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠰᠠᠨᠵᠠᠢ᠃ ᠲᠡᠷᠡ ᠪᠡᠷ ᠵᠡᠭᠦᠷᠮᠡᠭᠯᠡᠨ ᠰᠦᠮᠡᠢᠬᠦ ᠬᠣᠯᠠ ᠶ᠋ᠢᠨ ᠠᠭᠤᠯᠠᠰ ᠢ᠋ ᠬᠠᠷᠠᠭᠰᠠᠭᠠᠷ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠳᠦ ᠠᠨᠢᠨ᠂ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠳᠣᠩᠬᠤᠩᠨᠠᠵᠤ ᠡᠬᠢᠯᠡᠪᠡ᠃ ᠮᠥᠨᠥᠬᠢ ᠡᠷᠡ ᠶ᠋ᠢᠨ ᠴᠢᠬᠢᠨᠡ ᠢᠯᠮᠠ ᠬᠠᠲᠤᠨ ᠤ᠋ ᠨᠠᠮᠤᠭᠤᠬᠠᠨ ᠤᠶᠠᠩᠭᠠᠯᠢᠭ ᠳᠠᠭᠤᠨ ᠰᠣᠨᠣᠰᠳᠠᠵᠤ᠂
— ᠡᠯᠵᠢᠭᠡᠳᠡᠢ᠂ ᠬᠦᠦ ᠪᠠᠨ ᠯᠠ ᠣᠯᠴᠢᠬᠠᠬᠤ ᠶᠤᠮ ᠰᠠᠨ᠃ ᠲᠣᠷᠯᠣᠭ ᠲᠤᠭᠤᠷᠢᠯ ᠮᠢᠨᠢ ᠡᠨᠳᠡ ᠢᠳᠡᠭᠡᠰᠢᠪᠡᠯ ᠪᠢ ᠲᠠᠨ ᠤ᠋ ᠳᠡᠷᠭᠡᠳᠡ ᠳᠠᠰᠬᠤ ᠨᠢ ᠪᠠᠢᠨᠠ ᠭᠡᠵᠦ ᠥᠭᠦᠯᠡᠭᠰᠡᠨ ᠨᠢ ᠰᠠᠨᠠᠭᠳᠠᠨᠠ᠃ ᠢᠯᠮᠠ ᠭᠤᠸᠠ ᠦᠵᠢᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠡᠨᠡ ᠦᠭᠡ ᠶ᠋ᠢ ᠥᠭᠦᠯᠡᠨ ᠰᠠᠯᠵᠤ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠴᠡᠴᠡᠷᠯᠢᠭ ᠦ᠋ᠨ ᠬᠥᠬᠡ ᠴᠠᠪᠢᠳᠠᠷ ᠮᠣᠳᠣᠳ ᠴᠢᠮᠡᠭᠡ ᠦᠭᠡᠢ ᠨᠠᠢᠭᠤᠵᠤ᠂ ᠲᠩᠷᠢ ᠶ᠋ᠢᠨ ᠰᠠᠷᠠᠨ ᠤ᠋ ᠮᠥᠩᠭᠥᠨ ᠲᠤᠶᠠᠭᠠ ᠤᠶᠠᠷᠠᠩᠭᠤᠢ ᠮᠡᠯᠮᠡᠷᠡᠵᠦ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠢᠯᠮᠠ ᠦᠵᠢᠨ ᠵᠥᠪ ᠡᠩᠭᠡᠷ ᠢ᠋ ᠨᠢ ᠬᠠᠯᠠᠭᠤ ᠳᠦᠦᠭᠡᠭᠦᠯᠦᠨ ᠲᠦᠰᠢᠵᠦ᠂ ᠬᠡᠭᠡᠨᠴᠢᠷ ᠰᠡᠭᠦᠳᠡᠷᠦᠪᠴᠢᠨᠡ ᠤᠳᠠᠲᠠᠯᠠ ᠵᠣᠭᠰᠣᠭᠰᠠᠨ ᠨᠢ ᠪᠣᠢ᠃ ᠶᠡᠷᠦ ᠣᠯᠵᠠᠯᠠᠭᠳᠠᠨ ᠢᠷᠡᠵᠦ᠂ ᠣᠷᠳᠣᠨ ᠤ᠋ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠪᠠᠭᠠ ᠬᠠᠷᠰᠢᠨ ᠳ᠋ᠤ᠌ ᠬᠣᠷᠢᠭᠳᠠᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠡᠯᠵᠢᠭᠡᠳᠡᠢ ᠡᠴᠢᠨᠡ ᠬᠠᠷᠠᠭᠠᠯᠵᠠᠨ ᠪᠠᠢᠬᠤ ᠡᠭᠦᠷᠭᠡ ᠬᠦᠯᠢᠶᠡᠵᠡᠢ᠃ ᠡᠬᠢᠨ ᠦ᠌ ᠬᠡᠳᠦᠨ ᠡᠳᠦᠷ ᠲᠣᠯᠣᠭᠠᠢ ᠳᠡᠭᠡᠭᠰᠢ ᠲᠠᠲᠠᠯ ᠦᠭᠡᠢ ᠤᠬᠢᠯᠠᠨ ᠪᠠᠢᠭᠰᠠᠨ ᠬᠠᠲᠤᠨ ᠶᠠᠪᠤᠭᠠᠨ ᠳ᠋ᠠᠭᠠᠨ ᠲᠠᠢᠳᠬᠤᠷᠠᠵᠤ᠂ ᠭᠠᠭᠴᠠ ᠬᠣᠶᠠᠷ ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠭᠠᠷ ᠤ᠋ᠨ ᠲᠣᠭᠣᠭᠠᠴᠢ ᠨᠠᠷ ᠤ᠋ᠨ ᠬᠢᠭᠰᠡᠨ ᠨᠠᠷᠢᠨ ᠬᠣᠭᠣᠯᠠ᠂ ᠵᠢᠮᠢᠰ ᠵᠢᠮᠢᠰᠬᠡᠨᠡ ᠬᠢᠭᠡᠳ ᠣᠷᠳᠣᠨ ᠤ᠋ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠠᠪᠤᠭᠠᠨ ᠳ᠋ᠠᠭᠠᠨ ᠰᠠᠳᠠᠭᠠᠷᠠᠵᠤ ᠭᠤᠨᠢᠭ ᠭᠤᠲᠤᠷᠠᠯ ᠢ᠋ᠶ᠋ᠠᠨ ᠮᠠᠷᠲᠠᠩᠨᠠᠵᠤ ᠡᠬᠢᠯᠡᠭᠰᠡᠨ ᠪᠣᠯᠠᠢ᠃ ᠬᠠᠷᠢᠨ ᠬᠥᠪᠡᠭᠦᠨ ᠬᠡᠴᠡᠭᠦᠦ ᠬᠥᠮᠦᠨ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠡᠬᠢᠨ ᠦ᠌ ᠬᠡᠳᠦᠨ ᠰᠠᠷᠠ ᠣᠷᠳᠣᠨ ᠤ᠋ ᠲᠠᠢᠭᠠᠨ ᠨᠠᠷ ᠲᠠᠢ ᠲᠣᠭᠯᠠᠵᠤ ᠨᠠᠭᠠᠳᠤᠨ ᠶᠠᠭᠤ ᠴᠤ᠌ ᠡᠰᠡ ᠠᠩᠵᠠᠭᠠᠷᠠᠬᠤ ᠶᠠᠩᠵᠤ ᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠭᠠᠵᠢᠮ ᠳ᠋ᠠᠭᠠᠨ ᠨᠤᠲᠤᠭ ᠣᠷᠣᠨ ᠢ᠋ᠶ᠋ᠠᠨ ᠰᠠᠨᠠᠭᠠᠯᠵᠠᠭᠰᠠᠨ ᠰᠢᠨᠵᠢ ᠲᠣᠳᠣᠷᠠᠵᠤ᠂ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠨᠠᠷᠠᠨ ᠵᠢᠷᠭᠠᠬᠤ ᠵᠦᠭ ᠵᠠᠯᠪᠠᠷᠢᠵᠤ ᠬᠣᠨᠣᠳᠠᠭ ᠪᠣᠯᠤᠭᠰᠠᠨ ᠠᠪᠠᠢ᠃ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢ ᠴᠡᠴᠡᠭ ᠰᠡᠩᠭᠢᠨᠡᠭᠦᠯᠦᠨ ᠮᠣᠷᠢᠯᠠᠭᠰᠠᠨ ᠬᠠᠪᠤᠯ ᠬᠠᠭᠠᠨ ᠤ᠋ ᠠᠢᠯᠴᠢᠯᠠᠯ ᠤ᠋ᠨ ᠳᠠᠷᠠᠭᠠ ᠲᠣᠷᠯᠣᠭ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠦ᠌ ᠵᠠᠩ ᠡᠷᠡᠰ ᠥᠭᠡᠷᠡ ᠪᠣᠯᠵᠤ᠂
— ᠨᠢᠭᠡ ᠯᠡ ᠡᠳᠦᠷ ᠤᠷᠭᠤᠨᠠ ᠳᠠ ᠭᠡᠵᠦ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠤ᠋ᠨ ᠵᠠᠪᠰᠠᠷ ᠥᠭᠦᠯᠡᠵᠦ᠂ ᠢᠵᠢᠢ ᠬᠠᠲᠤᠨ ᠨᠢ
— ᠵᠠ᠂ ᠨᠢᠭᠦᠯ! ᠭᠡᠮᠡᠨ ᠵᠠᠩᠳᠤᠷᠳᠠᠭ ᠪᠠᠢᠪᠠ᠃ ᠴᠢᠩᠭᠢᠲᠡᠯᠡ ᠨᠢᠭᠡ ᠯᠡ ᠡᠳᠦᠷ ᠤᠰᠤᠨ ᠳ᠋ᠤ᠌ ᠬᠠᠶᠠᠭᠰᠠᠨ ᠴᠢᠯᠠᠭᠤ ᠮᠡᠲᠦ ᠠᠯᠠᠭᠠ ᠪᠣᠯᠵᠠᠢ᠃ ᠦᠵᠢᠮᠡᠢ ᠬᠠᠲᠤᠨ ᠤ᠋ ᠶᠡᠬᠡ ᠣᠷᠳᠣᠨ ᠤ᠋ ᠲᠦᠮᠡᠨ ᠲᠠᠢᠭᠠᠨ ᠡᠷᠢᠭᠡᠳ ᠣᠯᠤᠭᠰᠠᠨ ᠦᠭᠡᠢ ᠪᠢᠯᠡ᠃ ᠢᠯᠮᠠ ᠦᠵᠢᠨ᠂
— ᠨᠤᠲᠤᠭ᠂ ᠨᠤᠲᠤᠭ ᠦᠭᠡᠢ ᠪᠣᠯᠪᠠ᠃ ᠬᠦᠦ᠂ ᠬᠦᠦ ᠦᠭᠡᠢ ᠪᠣᠯᠪᠠ᠁ ᠭᠡᠮᠡᠨ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠵᠤ᠂ ᠬᠠᠭᠠᠨ ᠴᠡᠴᠡᠷᠯᠢᠭ ᠢ᠋ ᠨᠡᠩᠵᠢᠭᠦᠯᠦᠨ ᠳᠠᠷᠠᠭᠠ ᠨᠢ ᠬᠠᠭᠠᠨ ᠬᠣᠲᠠ ᠶ᠋ᠢ ᠣᠩᠭᠢᠴᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠣᠯᠳᠠᠭᠰᠠᠨ ᠦᠭᠡᠢ᠃ ᠡᠢᠨ ᠭᠤᠷᠪᠠᠳᠠᠬᠢ ᠬᠣᠨᠣᠭ ᠤ᠋ᠨ ᠰᠥᠨᠢ ᠲᠡᠢ ᠤᠴᠠᠷᠠᠵᠤ ᠣᠯᠠᠨ ᠡᠳᠦᠷ ᠤᠬᠢᠯᠠᠭᠰᠠᠨ ᠤᠴᠢᠷ ᠶᠠᠩᠭᠢᠨᠠᠨ ᠡᠪᠡᠳᠬᠦ ᠲᠣᠯᠣᠭᠠᠢ ᠶ᠋ᠢᠨ ᠡᠪᠡᠳᠴᠢᠨ ᠨᠠᠮᠳᠠᠭᠤᠵᠠᠢ ᠭᠡᠮᠡᠨ ᠰᠠᠯᠬᠢᠯᠠᠵᠤ ᠠᠪᠠᠢ᠃ ᠲᠡᠢᠨ ᠵᠢᠮᠢᠰ ᠦ᠋ᠨ ᠲᠦᠭᠦᠯ ᠳ᠋ᠦ᠍ ᠵᠤᠭᠠᠯᠠᠵᠤ ᠠᠬᠤᠢ ᠳ᠋ᠠᠭᠠᠨ ᠵᠢᠩᠭᠢᠨᠡᠨ ᠱᠠᠷᠬᠢᠭᠴᠢ ᠮᠥᠩᠭᠥᠨ ᠬᠣᠩᠬᠣᠨ ᠤ᠋ ᠳᠠᠭᠤ ᠪᠠᠷ᠂
— ᠡᠯᠵᠢᠭᠡᠳᠡᠢ᠂ ᠬᠦᠦ ᠪᠡᠨ ᠣᠯᠬᠤ ᠶᠤᠮ ᠰᠠᠨ᠁ ᠭᠡᠵᠦ ᠥᠭᠦᠯᠡᠭᠡᠳ ᠰᠠᠯᠤᠭᠰᠠᠨ ᠪᠢᠯᠡ᠃ ᠴᠢᠩᠭᠢᠲᠡᠯᠡ ᠦᠷ ᠦ᠋ᠨ ᠲᠠᠪᠤᠨ ᠵᠢᠩ ᠢ᠋ᠶ᠋ᠡᠷ ᠶᠡᠬᠡ ᠣᠷᠳᠣᠨ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠳᠦᠷᠬᠢᠷᠡᠨ ᠪᠣᠰᠴᠤ᠂
— ᠬᠡᠷᠡᠢᠳ ᠦ᠋ᠨ ᠢᠯᠮᠠ ᠥᠵᠢᠨ᠂ ᠲᠣᠷᠯᠣᠭ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠲᠡᠢ ᠪᠡᠨ ᠠᠯᠠᠭᠠ ᠪᠣᠯᠪᠠ ᠭᠡᠮᠡᠨ ᠡᠷᠢᠭᠰᠡᠨ ᠬᠡᠳᠦᠢ ᠴᠦ᠍ ᠡᠰᠡ ᠣᠯᠵᠠᠢ᠃ ᠬᠠᠭᠠᠨ ᠴᠡᠴᠡᠷᠯᠢᠭ ᠢ᠋ ᠨᠡᠩᠵᠢᠭᠡᠳ ᠦᠯᠦ ᠣᠯᠳᠠᠪᠠ᠃ ᠦᠬᠦᠭᠰᠡᠨ ᠪᠣᠯ ᠱᠠᠷᠢᠯ ᠢ᠋ ᠨᠢ ᠠᠪᠴᠢᠷᠠ! ᠭᠡᠵᠦ ᠦᠵᠢᠮᠡᠢ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠵᠠᠢ᠃ ᠬᠠᠭᠠᠨ ᠬᠣᠲᠠ ᠶ᠋ᠢ ᠣᠩᠭᠢᠴᠢᠭᠠᠳ ᠴᠤ᠌ ᠡᠰᠡ ᠣᠯᠳᠠᠪᠠ᠃ ᠠᠯᠲᠠᠨ ᠤᠯᠤᠰ ᠳᠠᠶᠠᠭᠠᠷ ᠵᠠᠷ ᠲᠦᠭᠡᠭᠡᠵᠦ ᠡᠷᠢᠵᠦ ᠰᠤᠷᠠᠭᠰᠠᠨ ᠴᠤ᠌ ᠣᠷᠣ ᠮᠥᠷ ᠦᠭᠡᠢ ᠪᠣᠯᠵᠤ ᠠᠪᠠᠢ᠃ ᠡᠨᠡ ᠤᠴᠠᠷᠠᠯ ᠶᠡᠬᠡ ᠬᠠᠭᠠᠨ ᠤ᠋ ᠢᠲᠡᠭᠡᠯᠲᠦ ᠰᠢᠳᠠᠷ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠢ᠋ ᠵᠢᠷᠦᠬᠡ ᠦᠭᠡᠢ ᠬᠥᠨᠳᠡᠢ ᠴᠡᠭᠡᠵᠢ᠂ ᠰᠡᠳᠬᠢᠯ ᠦᠭᠡᠢ ᠮᠢᠬᠠᠨ ᠲᠣᠷᠬᠠ ᠮᠡᠲᠦ ᠪᠣᠯᠭᠠᠨ ᠬᠤᠪᠢᠷᠠᠭᠠᠵᠠᠢ᠃ ᠲᠡᠷᠡ ᠡᠳᠦᠷ ᠰᠥᠨᠢ ᠶ᠋ᠢ ᠥᠩᠭᠡᠷᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠲᠥᠷᠥᠭᠰᠡᠨ ᠦᠯᠭᠡᠨ ᠰᠠᠯᠭᠠᠨ ᠠᠮᠢᠲᠠᠨ ᠯᠠ ᠪᠣᠯᠵᠤ ᠣᠷᠬᠢᠪᠠ᠃ ᠦᠵᠢᠮᠡᠢ ᠬᠠᠭᠠᠨ ᠠᠷᠭᠠ ᠪᠠᠨ ᠪᠠᠷᠠᠵᠤ ᠭᠠᠪᠢᠶᠠᠲᠠᠨ ᠰᠠᠢᠳ ᠲᠠᠭᠠᠨ ᠭᠠᠷ ᠦᠯᠦ ᠲᠠᠲᠠᠨᠠ᠃ ᠥᠪᠡᠷ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡᠰ ᠡᠴᠡ ᠭᠤᠴᠢ ᠶ᠋ᠢ ᠥᠭᠴᠦ᠂ ᠰᠢᠳᠠᠷ ᠵᠦᠭ ᠦ᠋ᠨ ᠰᠠᠢᠳ ᠨᠠᠷ ᠤ᠋ᠨ ᠬᠦᠩᠵᠦᠰ ᠢ᠋ ᠦᠵᠡᠭᠦᠯᠵᠦ ᠠᠷᠭᠠᠳᠠᠭᠰᠠᠨ ᠴᠤ᠌ ᠲᠤᠰᠠ ᠶ᠋ᠢ ᠡᠰᠡ ᠣᠯᠵᠠᠢ᠃ ᠬᠠᠷᠢᠨ ᠴᠢᠩᠭᠢᠲᠡᠯᠡ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠵᠠᠯᠠᠭᠤ ᠵᠠᠩᠵᠤᠨ ᠲᠡᠮᠦᠵᠢᠨ ᠦᠭᠡ ᠨᠣᠶᠠᠨ ᠠ᠋ᠴᠠ《᠁ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠬᠠᠲᠤᠨ ᠢᠯᠮᠠ ᠥᠵᠢᠨ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠲᠣᠷᠯᠣᠭ ᠲᠣᠭᠣᠷᠢᠯ ᠤ᠋ᠨ ᠬᠠᠮᠲᠤ ᠣᠯᠳᠠᠪᠠ》 ᠭᠡᠰᠡᠨ ᠬᠡᠯᠡ ᠢᠷᠡᠵᠦ ᠠᠪᠠᠢ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤ᠋ ᠪᠠᠶᠠᠷᠯᠠᠭᠰᠠᠨ ᠭᠡᠵᠦ ᠲᠣᠢᠮᠣ ᠦᠭᠡᠢ ᠪᠢᠯᠡ᠃ ᠦᠵᠢᠮᠡᠢ ᠴᠡᠴᠡᠨ ᠬᠠᠭᠠᠨ ᠴᠤ᠌ ᠨᠥᠬᠥᠷ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠴᠡᠩᠭᠡᠯ ᠢ᠋ ᠣᠢᠰᠢᠶᠠᠨ ᠬᠤᠪᠢᠶᠠᠯᠴᠠᠵᠤ᠂
— ᠡᠯᠵᠢᠭᠡᠳᠡᠢ ᠨᠣᠶᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠳᠠᠴᠢᠬᠠᠭᠠ ᠦᠭᠡᠢ ᠳᠡᠭᠡᠷᠡ ᠪᠡᠨ ᠣᠯᠵᠤ ᠢᠷᠡ! ᠭᠡᠮᠡᠨ ᠢᠯᠡᠭᠡᠭᠰᠡᠨ ᠶᠦᠮ ᠰᠠᠨᠵᠠᠢ᠃ ᠬᠠᠭᠠᠨ ᠤ᠋ ᠰᠢᠳᠠᠷ ᠲᠦᠮᠡᠲᠦ ᠡᠴᠡ ᠮᠢᠩᠭᠠᠲᠤ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠳᠣᠪᠲᠣᠯᠭᠠᠵᠤ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠨᠤᠲᠤᠭ ᠢ᠋ ᠵᠣᠷᠢᠵᠠᠢ᠃ ᠵᠦᠷᠴᠢᠳ ᠦ᠋ᠨ ᠠᠯᠲᠠᠨ ᠤᠯᠤᠰ ᠬᠠᠪᠤᠯ ᠬᠠᠭᠠᠨ ᠤ᠋ ᠴᠢᠷᠠᠢ ᠦᠵᠡᠭᠡᠳ ᠲᠠᠯᠠ ᠵᠠᠰᠠᠵᠤ ᠢᠨᠢᠶᠡᠳᠦ ᠠᠯᠳᠠᠪᠠᠴᠤ ᠠᠷᠤ ᠬᠤᠳᠠᠷᠭᠠ ᠪᠠᠷ ᠨᠢ ᠨᠢᠳᠤᠷᠭᠠ ᠦᠭᠡᠢ ᠵᠠᠩᠨᠠᠵᠤ ᠪᠠᠷᠠᠭᠤᠨ ᠲᠠᠩᠭᠤᠳ ᠬᠢᠭᠡᠳ ᠪᠠᠷᠠᠭᠤᠨ ᠯᠢᠶᠣᠣ ᠤᠯᠤᠰ ᠢ᠋ ᠮᠣᠩᠭᠣᠯ ᠤ᠋ᠨ ᠡᠰᠡᠷᠭᠦ ᠨᠢᠭᠤᠷ ᠦᠭᠡᠢ ᠬᠦᠦ ᠪᠣᠯᠭᠠᠨ ᠲᠦᠯᠬᠢᠵᠦ ᠪᠠᠢᠭᠰᠠᠨ ᠦᠶᠡ ᠪᠢᠯᠡ᠃ ᠡᠨᠡ ᠨᠢ ᠰᠠᠢᠬᠠᠨ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠮᠠᠭᠤ ᠶᠠᠪᠤᠳᠠᠯ ᠪᠤᠰᠤ᠂ ᠨᠠᠩᠭᠢᠶᠠᠳ ᠤᠬᠠᠭᠠᠨ ᠢ᠋ᠶ᠋ᠠᠷ ᠴᠢᠭᠵᠢᠭᠰᠡᠨ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠨᠢ ᠪᠠᠢᠯᠠ᠃ ᠲᠡᠷᠡ ᠬᠦ᠌ ᠨᠡᠭᠦᠳᠡᠯ ᠦ᠋ᠨ ᠬᠥᠯ ᠳ᠋ᠦ᠍ ᠲᠦᠯᠬᠢᠭᠰᠡᠨ ᠬᠦᠦ ᠨᠦ᠍ᠭᠦᠳ ᠦ᠋ᠨ ᠨᠢᠭᠡ ᠨᠢ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠣᠯᠪᠣᠭᠠ ᠪᠠᠢᠪᠠ᠃ ᠡᠢᠮᠦ ᠶ᠋ᠢᠨ ᠤᠴᠢᠷ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤ᠋ ᠮᠢᠩᠭᠠᠲᠤ ᠶᠡᠷᠦ ᠥᠪᠡᠷ ᠦ᠋ᠨ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠪᠠᠢᠭᠠ ᠮᠡᠲᠦ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠷᠭᠢᠵᠤ ᠳᠤᠮᠳᠠ ᠴᠢᠮᠥᠭᠡ ᠪᠡᠷ ᠢ᠋ᠶ᠋ᠡᠨ ᠵᠢᠷᠭᠢᠵᠦ ᠶᠠᠪᠤᠭᠰᠠᠨ ᠠᠪᠠᠢ᠃ ᠡᠢᠨ ᠪᠤᠢᠷ ᠨᠠᠭᠤᠷ ᠣᠢᠷᠠᠲᠤᠭᠰᠠᠨ ᠢ᠋ ᠢᠯᠡᠳᠬᠡᠨ ᠰᠠᠯᠬᠢᠨ ᠤ᠋ ᠦᠵᠦᠭᠦᠷ ᠲᠦ᠍ ᠳᠠᠯᠠᠢ ᠦᠨᠦᠷᠲᠦᠬᠦ ᠭᠠᠵᠠᠷ ᠲᠤ᠌ ᠢᠷᠡᠪᠡ᠃ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠣᠯᠠᠨ ᠬᠣᠨᠣᠭ ᠳᠣᠪᠲᠣᠯᠭᠠᠭᠰᠠᠨ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠲᠡᠳᠡᠨ ᠠᠮᠢᠰᠬᠤᠭᠠ ᠳᠠᠷᠤᠬᠤ ᠦᠶᠡᠰ ᠳᠣᠲᠣᠷᠠ ᠰᠡᠷᠢᠭᠦᠦ ᠲᠠᠲᠠᠭᠰᠠᠨ ᠴᠢᠭᠢᠭ ᠪᠤᠰᠤ᠂ ᠬᠠᠮᠠᠷ ᠬᠣᠷᠣᠰᠬᠠᠨ ᠤᠲᠤᠭᠠ ᠬᠠᠩᠬᠤᠯᠵᠠᠢ᠃
— ᠶᠠᠭᠤᠨ ᠬᠢᠷᠪᠤᠰᠤ ᠪᠢᠯᠡ᠃
— ᠬᠠᠷᠢᠨ᠁
— ᠶᠢᠰᠦᠨ ᠲᠠᠲ᠋ᠠᠷ ᠢ᠋ ᠮᠣᠩᠭᠣᠯᠴᠤᠳ ᠬᠦᠢᠰᠦ ᠲᠡᠮᠲᠡᠷᠢᠭᠰᠡᠨ ᠪᠤᠰᠤ ᠤᠤ? ᠡᠨᠡ ᠰᠢᠲᠠᠭᠰᠠᠨ ᠢᠰᠡᠭᠡᠢ ᠶ᠋ᠢᠨ ᠦᠨᠦᠷ ᠪᠠᠢᠨᠠ᠁ᠭᠡᠯᠴᠡᠬᠦ ᠳ᠋ᠦ᠍ ᠰᠠᠨᠳᠤᠷᠴᠤ ᠲᠡᠪᠡᠳᠡᠭᠰᠡᠨ ᠡᠯᠵᠢᠭᠡᠳᠡᠢ ᠲᠠᠰᠢᠭᠤᠷ ᠥᠭᠭᠦᠨ ᠤᠬᠤᠰᠬᠢᠯᠡ᠃ ᠣᠯᠠᠨ ᠵᠢᠯ ᠦ᠋ᠨ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠤᠩᠭᠤᠵᠤ ᠭᠠᠩᠳᠠᠲᠠᠯᠠ ᠪᠠᠨ ᠳᠠᠢᠳᠤᠭᠰᠠᠨ ᠬᠠᠰᠢᠷ ᠳᠠᠢᠴᠢᠳ ᠦᠨᠡᠨ ᠬᠡᠯᠡᠵᠡᠢ᠃ ᠡᠷᠭᠦᠨᠡ ᠭᠣᠣᠯ ᠤ᠋ᠨ ᠰᠠᠯᠬᠢᠨ ᠳᠣᠣᠷᠠ᠂ ᠬᠥᠯᠥᠨ ᠪᠤᠢᠷ ᠤ᠋ᠨ ᠬᠠᠶᠠᠭᠠ ᠲᠦᠰᠢᠵᠦ ᠥᠷᠭᠥᠭᠡᠯᠡᠭᠰᠡᠨ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠠᠨᠯᠢᠭ ᠤ᠋ᠨ ᠤᠷᠲᠤ ᠤᠯᠠᠭᠠᠨ ᠲᠦᠢᠮᠡᠷ ᠳᠦᠷᠡᠯᠵᠡᠵᠦ ᠪᠠᠢᠪᠠ᠃
— ᠠ᠋᠂ ᠲᠩᠷᠢ ᠮᠢᠨᠢ᠁
— ᠮᠣᠩᠭᠣᠯᠴᠤᠳ ᠢᠷᠡᠭᠡᠳ ᠪᠤᠴᠠᠵᠠᠢ ᠃
— ᠲᠡᠢᠮᠦ ᠰᠢᠭ ᠪᠠᠢᠨᠠ᠃ ᠴᠦ᠁ ᠭᠡᠮᠡᠨ ᠳᠣᠪᠲᠣᠯᠭᠠᠭᠰᠠᠭᠠᠷ ᠣᠴᠢᠬᠤ ᠳ᠋ᠤ᠌ ᠰᠢᠲᠠᠵᠤ ᠨᠤᠷᠠᠭᠰᠠᠨ ᠦᠨᠡᠰᠦ ᠨᠤᠷᠮᠠᠨ ᠳᠣᠲᠣᠷᠠ ᠠ᠋ᠴᠠ ᠡᠷᠡ ᠡᠮᠡ ᠦᠭᠡᠢ ᠤᠢᠯᠠᠯᠳᠤᠨ ᠰᠢᠷᠠᠭᠳᠠᠨ ᠡᠷᠡᠰ᠂ ᠲᠦᠯᠡᠭᠳᠡᠭᠰᠡᠨ ᠨᠢᠯᠬᠠᠰ ᠵᠥᠭᠡᠭᠡᠵᠦ ᠪᠠᠢᠯᠠ᠃ ᠲᠡᠷᠡ ᠪᠦᠭᠦᠳᠡ ᠥᠪᠡᠷ ᠲᠤᠨᠢ ᠣᠭᠲᠣ ᠬᠠᠮᠢᠶᠠ ᠦᠭᠡᠢ ᠮᠡᠲᠦ ᠮᠣᠳᠣᠨ ᠲᠡᠷᠭᠡᠨ ᠦ᠌ ᠭᠤᠶᠠ ᠰᠠᠨᠳᠠᠢᠯᠠᠨ ᠰᠠᠭᠤᠭᠠᠳ ᠠᠯᠤᠰ ᠢ᠋ ᠰᠠᠨᠠᠭᠠᠰᠢᠷᠠᠨ ᠰᠢᠷᠲᠡᠬᠦ ᠵᠠᠯᠠᠭᠤ ᠡᠷᠡ ᠶ᠋ᠢ ᠡᠯᠵᠢᠭᠡᠳᠡᠢ ᠬᠠᠷᠠᠭᠤᠳᠠ ᠲᠠᠨᠢᠵᠠᠢ᠃ ᠲᠡᠭᠦᠨ ᠦ᠌ ᠣᠮᠣᠭᠯᠠᠩ ᠲᠥᠷᠬᠦ᠂ ᠣᠮᠣᠭᠷᠠᠬᠠᠤ ᠬᠢᠯᠢᠩᠲᠦ ᠬᠠᠷᠠᠴᠠ ᠮᠥᠨᠥᠬᠡᠨ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠲᠡᠮᠦᠵᠢᠨ ᠦᠭᠡ ᠨᠣᠶᠠᠨ ᠮᠥᠨ ᠭᠡᠮᠡᠨ ᠲᠠᠨᠢᠯᠠ᠃
— ᠠᠮᠤᠷ ᠪᠠᠢᠨᠠ ᠤᠤ? ᠲᠠ᠃
— ᠮᠡᠨᠳᠦ ᠠ᠋᠂ ᠠᠮᠤᠷ ᠤᠤ᠁ ᠭᠡᠵᠦ ᠤᠷᠢᠶᠠᠯᠢᠭᠬᠠᠨ ᠮᠡᠨᠳᠦᠯᠡᠭᠰᠡᠨ ᠬᠡᠳᠦᠢ ᠴᠦ᠍ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤᠷᠤᠭᠤ ᠬᠠᠷᠠᠭᠰᠠᠨ ᠦᠭᠡᠢ ᠪᠣᠯᠠᠢ᠃ ᠰᠢᠩᠭᠡᠬᠦ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳᠣᠣᠭᠤᠷ ᠰᠢᠷᠭᠠᠯᠲᠤᠨ ᠴᠡᠯᠡᠢᠬᠦ ᠶᠡᠬᠡ ᠲᠠᠯᠠ ᠤᠷᠤᠭᠤ ᠬᠠᠷᠠᠭᠠ ᠪᠡᠯᠴᠢᠭᠡᠨ ᠰᠠᠭᠤᠬᠤ ᠪᠥᠯᠥᠭᠡ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠳᠡᠷᠭᠡᠳᠡ ᠨᠢ ᠣᠴᠢᠨ᠂
— ᠶᠠᠭᠤ ᠪᠣᠯᠤᠭᠠ ᠪᠣᠢ? ᠬᠡᠮᠡᠪᠡᠯ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠨᠢ ᠬᠠᠷᠠᠬᠤ ᠦᠭᠡᠢ ᠪᠠᠢᠨᠠ ᠤᠤ ᠭᠡᠬᠦ ᠰᠢᠭ ᠳᠦᠷᠯᠡᠢᠲᠡᠯᠡ ᠲᠣᠮᠣ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤᠤ? ᠭᠡᠬᠦ ᠳ᠋ᠦ᠍ ᠪᠤᠭᠤᠷᠤᠯ ᠡᠷᠡ ᠶ᠋ᠢᠨ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠡᠮᠦᠨᠡ ᠴᠡᠴᠡᠷᠡᠳᠡᠭ ᠦᠭᠡᠢ ᠡᠪᠦᠳᠦᠭ ᠨᠢ ᠬᠣᠷᠮᠣᠢ ᠳᠡᠷᠭᠡᠭᠦᠯᠬᠦ ᠰᠢᠭ ᠪᠣᠯᠵᠤ᠂
— ᠵᠠ ᠲᠡᠢᠮᠦ ᠠ᠋᠂ ᠪᠢ ᠡᠯᠵᠢᠭᠡᠳᠡᠢ ᠭᠡᠪᠡᠯ ᠵᠠᠯᠠᠭᠤ ᠵᠠᠩᠵᠤᠨ ᠨᠠᠷᠠᠨ ᠰᠢᠩᠭᠡᠬᠦ ᠵᠦᠭ ᠲᠦ᠍ ᠠᠪᠴᠠᠭᠠ ᠲᠠᠢ ᠬᠠᠷᠠᠵᠤ᠂
— ᠢᠯᠮᠠ ᠬᠠᠲᠤᠨ ᠢ᠋ ᠠᠪᠤᠭᠠᠳ ᠶᠠᠪᠤᠴᠢᠬᠠᠯᠠ ᠭᠡᠵᠦ ᠥᠭᠦᠯᠡᠪᠡ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠠᠷᠭᠠ ᠮᠤᠬᠤᠷᠳᠠᠵᠤ᠂ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ ᠬᠤᠸᠠᠷᠠᠩᠨᠠᠭᠤᠯᠤᠨ ᠪᠠᠭᠤᠯᠭᠠᠵᠤ᠂ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠦᠷᠢᠶᠡ ᠶ᠋ᠢ ᠥᠭᠡᠳᠡ ᠲᠠᠲᠠᠬᠤ ᠦᠢᠯᠡᠰ ᠲᠦ᠍ ᠬᠦᠴᠦᠨ ᠵᠢᠳᠬᠦᠭᠦᠯᠬᠦ ᠵᠠᠷᠯᠢᠭ ᠪᠣᠯᠭᠠᠪᠠ᠃ ᠮᠢᠩᠭᠠᠲᠤ ᠠᠬᠠᠯᠠᠵᠤ ᠮᠣᠷᠳᠠᠭᠰᠠᠨ ᠨᠣᠶᠠᠨ ᠦᠵᠢᠮᠡᠢ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠪᠡᠷ ᠢᠯᠡᠭᠡᠭᠡᠳ ᠬᠡᠩᠰᠢᠭᠦᠦ ᠦᠨᠦᠷᠲᠦᠵᠦ᠂ ᠬᠢᠷᠪᠤᠰᠤ ᠬᠠᠩᠬᠤᠯᠤᠭᠰᠠᠨ ᠪᠠᠭᠤᠷᠢᠨ ᠳᠡᠭᠡᠷᠡ ᠬᠠᠷᠢᠭᠤ ᠬᠦᠯᠢᠶᠡᠵᠦ ᠠᠷᠪᠠᠭᠠᠳ ᠬᠣᠨᠣᠵᠠᠢ᠃ ᠲᠡᠮᠦᠵᠢᠨ ᠦᠭᠡ ᠲᠦᠯᠡᠭᠳᠡᠭᠰᠡᠨ ᠰᠢᠷᠣᠢ᠂ ᠬᠤᠢᠬᠠᠯᠠᠭᠳᠠᠭᠰᠠᠨ ᠬᠣᠵᠤᠤᠯᠠ ᠳᠤᠮᠳᠠ ᠠ᠋ᠴᠠ ᠨᠡᠭᠦᠬᠦ ᠭᠡᠵᠦ ᠶᠠᠭᠠᠷᠠᠭᠰᠠᠨ ᠦᠭᠡᠢ᠃
— ᠭᠠᠯ ᠤ᠋ᠨ ᠳᠥᠯᠥ ᠥᠭᠡᠳᠡ ᠪᠡᠨ! ᠡᠨᠳᠡ ᠪᠡᠨ ᠵᠤᠰᠠ ᠭᠡᠮᠡᠨ ᠬᠠᠭᠠᠨ ᠤ᠋ ᠬᠦᠷᠢᠶᠡᠨ ᠡᠴᠡ ᠭᠠᠭᠴᠠ ᠠᠢᠯ ᠴᠦ᠍ ᠭᠠᠷᠭᠠᠭᠰᠠᠨ ᠦᠭᠡᠢ ᠠᠪᠠᠢ᠃ ᠡᠢᠨ ᠬᠠᠷᠠ ᠬᠢᠷᠪᠤᠰᠤ᠂ ᠰᠠᠭᠠᠷᠠᠯ ᠤᠲᠤᠭᠠᠨ ᠤ᠋ ᠳᠤᠮᠳᠠ ᠲᠦᠮᠡᠨ ᠴᠡᠷᠢᠭ᠂ ᠮᠢᠩᠭᠠᠭᠠᠳ ᠡᠷᠦᠬᠡ ᠠᠢᠯ ᠦᠭᠡ ᠪᠡᠨ ᠪᠠᠷᠠᠵᠤ ᠭᠦᠢᠴᠡᠵᠡᠢ᠃ ᠬᠡᠳᠦᠨ ᠮᠠᠯ ᠴᠦ᠍ ᠪᠡᠯᠴᠢᠭᠡᠷ ᠬᠥᠭᠡᠭᠡᠵᠦ᠂ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠪᠡᠷᠬᠡ ᠪᠣᠯᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠮᠡᠭᠡᠳ ᠬᠡᠦᠬᠡᠨ ᠨᠦ᠍ᠭᠦᠳ ᠦᠭᠡ ᠪᠡᠨ ᠪᠠᠷᠠᠵᠤ᠂ ᠳᠠᠷᠠᠭᠠ ᠨᠢ ᠬᠠᠷᠠᠴᠤᠤᠯ᠂ ᠪᠦᠷ ᠴᠡᠷᠢᠭ ᠦ᠋ᠳ ᠲᠡᠪᠴᠢᠶᠡᠷᠢ ᠪᠡᠨ ᠪᠠᠷᠠᠯᠠ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠡᠯᠡ ᠲᠦᠭᠰᠢᠭᠦᠷᠢᠲᠦ ᠬᠠᠷᠠ ᠡᠳᠦᠷ ᠦ᠋ᠳ ᠢ᠋ ᠴᠢᠮᠡᠭᠡ ᠦᠭᠡᠢ ᠠᠵᠢᠭᠯᠠᠵᠤ ᠪᠠᠢᠪᠠ᠃ ᠴᠢᠩᠭᠢᠲᠡᠯᠡ ᠶᠢᠰᠦᠳᠡᠬᠢ ᠡᠳᠦᠷ ᠦ᠋ᠨ ᠦᠷ ᠢ᠋ᠶ᠋ᠡᠷ ᠲᠦᠮᠡᠲᠦ ᠶ᠋ᠢᠨ ᠭᠤᠷᠪᠠᠨ ᠨᠣᠶᠠᠨ ᠲᠡᠮᠦᠵᠢᠨ ᠦᠭᠡ ᠳ᠋ᠦ᠍ ᠪᠠᠷᠠᠯᠬᠠᠵᠠᠢ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠤᠨᠲᠠᠵᠤ ᠠᠭᠰᠠᠨ ᠬᠠᠰᠠᠭ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠣᠴᠢᠨᠠ ᠭᠡᠰᠡᠨ ᠦᠭᠡ ᠶᠦᠮ᠃ ᠲᠡᠳᠡ ᠲᠠᠪᠤᠨ ᠤᠨᠠᠭᠠᠨ ᠤ᠋ ᠵᠠᠯᠠᠨ ᠳᠡᠢᠲᠠᠢ ᠣᠴᠢᠲᠠᠯᠠ ᠲᠡᠮᠦᠵᠢᠨ ᠦᠭᠡ ᠤᠬᠤᠰᠬᠢᠨ ᠪᠣᠰᠬᠤ ᠳ᠋ᠤ᠌ ᠮᠥᠨᠥᠬᠡᠨ ᠭᠤᠷᠪᠠᠨ ᠨᠣᠶᠠᠨ ᠪᠦᠨᠲᠦᠭᠡᠰᠬᠢᠲᠡᠯᠡ ᠴᠣᠴᠢᠵᠠᠢ᠃
— ᠲᠠ ᠨᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ?
— ᠠᠢᠯᠠᠳᠬᠠᠯ ᠪᠠᠢᠨᠠ᠃
— ᠨᠠᠭᠠᠨᠠ ᠠ᠋ᠴᠠ ᠪᠠᠨ ᠬᠡᠯᠡ!
— ᠨᠣᠶᠠᠨᠲᠠᠨ ᠮᠢᠨᠢ᠂ ᠡᠨᠡ ᠬᠢᠷᠪᠤᠰᠤ᠂ ᠬᠡᠩᠰᠢᠭᠦᠨ ᠳᠤᠮᠳᠠ ᠠ᠋ᠴᠠ ᠨᠡᠭᠦᠮᠡᠷ ᠪᠠᠢᠨᠠ᠃
— ᠪᠢ ᠰᠢᠲᠠᠭᠠᠭᠠ ᠦᠭᠡᠢ᠃ ᠮᠣᠩᠭᠣᠯᠴᠤᠳ ᠰᠢᠲᠠᠭᠠᠭᠰᠠᠨ! ᠲᠡᠳᠡᠨ ᠡᠴᠡ ᠣᠴᠢᠵᠤ ᠠᠰᠠᠭᠤ!
— ᠣᠯᠠᠨ ᠬᠢᠯᠢᠩᠨᠡᠪᠡᠯ᠁
— ᠨᠠᠳᠠ ᠳ᠋ᠤ᠌ ᠪᠢᠰᠢ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠣᠲᠣᠯᠠ ᠨᠣᠶᠠᠨ ᠳ᠋ᠤ᠌ ᠬᠢᠯᠢᠩᠨᠡ! ᠭᠡᠳ ᠳᠡᠪᠡᠯ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠨᠥᠮᠥᠷᠦᠨ ᠬᠡᠪᠲᠡᠭᠡᠳ ᠥᠭᠴᠡᠢ᠃ ᠲᠦᠮᠡᠲᠦ ᠶ᠋ᠢᠨ ᠨᠣᠶᠠᠳ ᠬᠡᠯᠡᠬᠦ ᠦᠭᠡ ᠡᠰᠡ ᠣᠯᠵᠤ ᠪᠡᠶᠡ ᠪᠡᠶᠡ ᠶ᠋ᠢ ᠮᠡᠯᠡᠷᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠥᠯᠮᠡᠢ ᠳᠡᠭᠡᠷᠡ ᠪᠡᠨ ᠭᠡᠲᠡᠨ ᠪᠤᠴᠠᠵᠤ ᠠᠪᠠᠢ᠃ ᠶᠡᠷᠦ ᠨᠢᠳᠦ ᠪᠡᠷ ᠣᠯᠵᠠᠯᠠᠬᠤ ᠡᠷᠡ ᠪᠢᠰᠢ ᠶᠦ᠍ᠮ᠃ ᠨᠠᠰᠤ ᠪᠠᠭᠠ ᠴᠤ᠌ ᠣᠯᠵᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠭᠤᠲᠤᠮᠰᠢᠭᠲᠤ ᠡᠳᠦᠷ ᠬᠣᠨᠣᠭ ᠤ᠋ᠳ ᠲᠡᠭᠦᠨ ᠳ᠋ᠦ᠍ ᠤᠬᠠᠭᠠᠨ ᠰᠠᠭᠤᠯᠭᠠᠵᠤ᠂ ᠬᠠᠳᠠ ᠨᠡᠮᠡᠵᠡᠢ᠃ ᠵᠣᠪᠠᠯᠠᠩ ᠬᠥᠮᠦᠨ ᠢ᠋ ᠬᠥᠮᠦᠨ ᠪᠣᠯᠭᠠᠳᠠᠭ ᠪᠢᠯᠡ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠲᠡᠷᠢᠭᠦᠨ ᠵᠠᠩᠵᠤᠨ ᠢ᠋ ᠰᠦᠷᠡᠬᠡᠢ ᠦᠨᠡᠯᠡᠵᠡᠢ᠃ ᠡᠨᠡ ᠬᠢᠷᠢ ᠦᠵᠢᠮᠡᠢ ᠨᠣᠶᠠᠨ ᠳ᠋ᠤ᠌ ᠢᠯᠡᠭᠡᠭᠰᠡᠨ ᠡᠯᠴᠢ ᠢᠷᠡᠵᠦ᠂
— ᠮᠢᠩᠭᠠᠲᠤ ᠴᠡᠷᠢᠭ ᠢ᠋ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠮᠠᠲᠠᠯ ᠳ᠋ᠤ᠌ ᠣᠷᠭᠢ! ᠡᠯᠵᠢᠭᠡᠳᠡᠢ ᠨᠣᠶᠠᠨ ᠲᠠᠨ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠣᠴᠢᠵᠤ ᠢᠯᠮᠠ ᠬᠠᠲᠤᠨ ᠲᠠᠢ ᠠᠭᠤᠯᠵᠠᠬᠤ ᠶ᠋ᠢ ᠬᠠᠭᠠᠨ ᠰᠣᠶᠣᠷᠬᠠᠪᠠ ᠭᠡᠵᠡᠢ᠃ ᠡᠯᠡ ᠥᠷᠥᠰᠢᠶᠡᠩᠭᠦᠢ ᠵᠠᠷᠯᠢᠭ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠲᠠᠢ ᠪᠤᠲᠠ ᠬᠠᠶᠠᠭᠰᠠᠨ ᠨᠡᠭᠦᠳᠡᠯ ᠪᠠᠢᠵᠤ ᠠᠪᠠᠢ᠃ ᠭᠡᠪᠡᠴᠦ ᠥᠨᠥ ᠬᠢᠷᠢ ᠡᠳᠦᠷ ᠦ᠋ᠨ ᠪᠣᠳᠣᠯ᠂ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ ᠪᠣᠯᠤᠭᠰᠠᠨ ᠢᠯᠮᠠ ᠬᠠᠲᠤᠨ ᠳ᠋ᠠᠭᠠᠨ ᠶᠠᠭᠠᠷᠠᠨ ᠪᠢᠯᠡ᠃ ᠬᠢᠰᠠᠯᠠᠩ ᠪᠣᠯᠬᠤ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠮᠣᠷᠢ ᠨᠢ ᠣᠷᠣᠭᠰᠢ ᠪᠠᠨ ᠭᠢᠰᠬᠢᠬᠦ ᠶᠠᠩᠵᠤ ᠠᠯᠠᠭᠠ ᠠᠵᠢ᠃ᠡᠢᠨ ᠶᠠᠭᠠᠷᠠᠭᠰᠠᠨ ᠰᠡᠳᠬᠢᠯ ᠳᠣᠭᠳᠣᠯᠵᠤ᠂ ᠰᠤᠯᠠᠳᠠᠭᠰᠠᠨ ᠮᠣᠷᠢ ᠰᠠᠵᠢᠯᠠᠵᠤ ᠪᠠᠢᠲᠠᠯᠠ ᠰᠣᠯᠣᠭᠠᠢ ᠭᠠᠷ ᠲᠠᠯᠠ ᠠ᠋ᠴᠠ ᠵᠠᠮ ᠣᠭᠲᠣᠯᠤᠨ ᠨᠢᠭᠡᠨ ᠶᠡᠬᠡ ᠬᠠᠷᠠ ᠪᠠᠷᠠ ᠠᠢᠰᠤᠨ ᠢᠷᠡᠭᠰᠡᠨ ᠠᠪᠠᠢ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠬᠥᠮᠦᠨ ᠦ᠌ ᠪᠠᠷᠠ ᠬᠠᠷᠠᠭᠰᠠᠨ ᠳ᠋ᠠᠭᠠᠨ ᠣᠯᠵᠠᠭᠤᠷᠬᠠᠨ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ᠂ ᠴᠤᠯᠪᠤᠭᠤᠷ ᠢ᠋ᠶ᠋ᠠᠷ ᠢᠯᠠᠭᠠ ᠦᠷᠭᠦᠭᠡᠨ ᠬᠦᠯᠢᠶᠡᠵᠦ ᠵᠣᠭᠰᠣᠲᠠᠯᠠ ᠶᠡᠷᠦ ᠪᠤᠰᠤ ᠶ᠋ᠢᠨ ᠳᠦᠩᠭᠢᠨᠡᠬᠦ ᠴᠢᠮᠡᠭᠡ ᠨᠠᠭᠠᠰᠢᠯᠠᠨ᠂ ᠮᠥᠨᠥᠬᠢ ᠮᠣᠷᠢᠲᠠᠢ ᠡᠪᠦᠭᠡᠨ᠂ ᠲᠡᠭᠦᠨ ᠦ᠌ ᠬᠥᠲᠥᠯᠦᠭᠰᠡᠨ ᠲᠡᠷᠭᠡᠨ ᠦ᠌ ᠠᠴᠢᠶᠠᠨ ᠳᠡᠭᠡᠭᠦᠷ ᠨᠡᠭᠦᠬᠦ ᠡᠭᠦᠯᠡ ᠮᠡᠲᠦ ᠬᠠᠷᠠ ᠪᠠᠭᠠᠷᠴᠠᠭ ᠢᠯᠠᠭᠠ ᠠᠢᠰᠤᠢ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤᠴᠢᠷ ᠦᠭᠡᠢ ᠭᠠᠢᠬᠠᠨ ᠬᠠᠷᠠᠪᠠᠯ᠂ ᠨᠢᠭᠤᠷ ᠨᠢ ᠴᠠᠢᠵᠤ᠂ ᠨᠢᠳᠦ ᠨᠢ ᠭᠥᠯᠢᠢᠭᠰᠡᠨ ᠱᠠᠪᠢᠯᠬᠠᠨ ᠡᠪᠦᠭᠡᠨ ᠠᠮᠢᠰᠬᠤᠭᠠ ᠲᠠᠢ ᠲᠡᠳᠦᠢ ᠠᠭᠠᠳ᠂
— ᠰᠠᠢᠨ ᠤᠤ? ᠭᠡᠬᠦ ᠰᠣᠨᠣᠰᠳᠠᠬᠤ ᠲᠡᠳᠦᠢ ᠮᠡᠨᠳᠦ ᠰᠣᠯᠢᠪᠠ᠃ ᠳᠠᠭᠤ ᠨᠢ ᠴᠠᠭᠠᠰᠢ ᠪᠠᠨ ᠣᠷᠣᠵᠤ᠂ ᠰᠦᠷ ᠰᠦᠯᠳᠡ ᠨᠢ ᠬᠡᠢᠰᠦᠨ ᠣᠳᠤᠭᠰᠠᠨ ᠬᠥᠮᠦᠨ ᠰᠠᠨᠵᠠᠢ᠃
~~ ᠦᠷᠭᠦᠯᠵᠢᠯᠡᠯ ᠪᠣᠢ ~~