ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠨᠢᠭᠡ> Хүлэг баатар буурч - Б. Өлзийсүрэн <Тэргүүн бүлэг-1>
150ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠨᠢᠭᠡ᠂ ᠠᠶᠠᠨ ᠤ᠋ ᠴᠠᠢ ᠠᠭᠠᠭ ᠲᠠᠢ ᠬᠡᠭᠡᠷᠡ ᠶ᠋ᠢᠨ ᠬᠣᠭᠣᠯᠠ ᠰᠢᠮᠡ ᠲᠡᠢ
ᠬᠦᠷᠳᠦᠨ ᠭᠤᠷᠪᠠᠨ ᠪᠦᠷᠢᠳᠦ ᠡᠴᠡ ᠨᠢᠭᠡ ᠵᠠᠭᠤᠨ ᠲᠠᠪᠢ ᠬᠢᠷᠢ ᠶ᠋ᠢᠨ ᠮᠣᠳᠣ ᠭᠠᠵᠠᠷ ᠬᠡᠷᠦᠯᠦᠨ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠭᠤᠷᠪᠠᠨ ᠲᠠᠷᠭᠤᠨ ᠠᠭᠤᠯᠠ ᠶ᠋ᠢ ᠠᠷᠤᠯᠠᠨ ᠥᠩᠭᠡᠷᠡᠭᠡᠳ ᠰᠢᠨᠡ ᠢᠰᠡᠭᠡᠢ ᠪᠡᠷ ᠪᠦᠷᠢᠭᠰᠡᠨ ᠪᠡᠰᠡᠷᠡᠭᠬᠡᠨ ᠭᠡᠷ ᠢ᠋ᠶ᠋ᠡᠨ ᠪᠠᠷᠢᠵᠤ ᠨᠤᠲᠤᠭ ᠰᠠᠭᠤᠷᠢᠰᠢᠬᠤ ᠪᠢᠴᠢᠬᠠᠨ ᠨᠡᠭᠦᠳᠡᠯ ᠪᠠᠭᠤᠪᠠ᠃ ᠠᠷᠤᠯᠠᠳ ᠤ᠋ᠨ ᠨᠠᠬᠤ ᠪᠠᠶᠠᠨ ᠬᠡᠮᠡᠭᠴᠢ ᠨᠢ ᠬᠥᠪᠡᠭᠦᠨ ᠪᠣᠭᠤᠷᠴᠢ ᠶ᠋ᠢ ᠳᠠᠭᠠᠭᠤᠯᠤᠨ ᠮᠣᠷᠢᠨ ᠤ᠋ ᠬᠣᠶᠠᠷ ᠬᠡᠦᠬᠡᠳ ᠲᠡᠢ ᠳᠥᠷᠪᠡᠨ ᠠᠮᠠ ᠪᠦᠯᠢ ᠪᠡᠷ ᠶᠠᠪᠤᠭᠠ ᠨᠢ ᠡᠨᠡ ᠠᠵᠠᠢ᠃
ᠲᠡᠳᠡ ᠬᠠᠨᠠ ᠪᠠᠨ ᠳᠤᠭᠤᠢᠯᠠᠵᠤ ᠭᠡᠷ ᠢ᠋ᠶ᠋ᠡᠨ ᠪᠠᠷᠢᠬᠤ ᠵᠠᠭᠤᠷᠠ ᠡᠨᠡ ᠲᠡᠷᠡ ᠶ᠋ᠢ ᠬᠥᠭᠵᠢᠯᠳᠦᠨ ᠶᠠᠷᠢᠵᠤ᠂ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨᠠ ᠴᠡᠩᠬᠡᠷᠯᠡᠬᠦ ᠤᠨᠢᠶᠠᠷ ᠳᠤᠮᠳᠠ ᠪᠦᠲᠡᠢᠨ ᠪᠠᠢᠭᠠ ᠭᠦᠪᠳᠦᠷᠦᠦ ᠲᠡᠳᠦᠢ ᠦᠵᠡᠭᠳᠡᠨ ᠪᠣᠢ ᠳᠦᠷᠰᠦ ᠶ᠋ᠢ ᠵᠢᠭᠠᠵᠤ᠄
— ᠲᠡᠷᠡ ᠪᠣᠯ ᠲᠣᠭᠣᠨᠣ ᠠᠭᠤᠯᠠ᠂ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠤ᠋ ᠲᠥᠪ ᠨᠤᠲᠤᠭ ᠲᠡᠨᠳᠡ ᠡᠴᠡ ᠡᠬᠢᠯᠡᠳᠡᠭ ᠭᠡᠯᠴᠡᠳᠡᠭ᠃ ᠲᠡᠭᠡᠭᠡᠳ ᠴᠦ᠍ 《ᠲᠣᠭᠣᠨᠣ》 ᠭᠡᠰᠡᠨ ᠪᠠᠢᠬᠠ ᠭᠡᠵᠦ ᠨᠠᠬᠤ ᠠᠪᠤ ᠥᠭᠦᠯᠡᠭᠡᠳ᠄
— ᠲᠦᠮᠡᠨ ᠲᠥᠪᠬᠡᠨ ᠦ᠌ ᠨᠠᠭᠠᠳᠤᠮ ᠲᠤᠯᠤᠭᠠᠳ ᠢᠷᠡᠬᠦ ᠴᠢᠴᠠᠤ ᠳᠠᠰᠢ ᠨᠡᠭᠦᠵᠦ ᠲᠡᠷᠡ ᠬᠠᠢᠷᠬᠠᠨ ᠠᠭᠤᠯᠠ ᠶ᠋ᠢ ᠨᠠᠷᠠ ᠵᠥᠪ ᠲᠣᠭᠣᠷᠢᠵᠤ ᠬᠣᠨᠣᠭᠠᠳ ᠮᠣᠷᠢᠳ ᠢ᠋ᠶ᠋ᠠᠨ ᠣᠷᠣᠯᠳᠣᠨᠠ ᠳᠠ ᠭᠡᠯᠡ᠃
— ᠴᠠᠭᠠᠨᠠ ᠨᠢ ᠶᠠᠮᠠᠷ ᠤᠯᠤᠰ ᠪᠠᠢᠳᠠᠭ ᠪᠣᠯ? ᠭᠡᠵᠦ ᠪᠣᠭᠤᠷᠴᠢ ᠡᠴᠢᠭᠡ ᠡᠴᠡ ᠪᠡᠨ ᠰᠣᠨᠢᠭᠤᠴᠢᠷᠬᠠᠨ ᠠᠰᠠᠭᠤᠬᠤ ᠳ᠋ᠤ᠌᠄
— ᠵᠦᠷᠬᠢᠨ ᠦ᠌ ᠬᠢᠨ ᠭᠡᠵᠦ ᠨᠡᠯᠢᠶᠡᠳ ᠬᠥᠭᠡᠷᠦᠦ ᠰᠥᠰᠥᠲᠡᠢ ᠤᠯᠤᠰ ᠪᠠᠢᠳᠠᠭ ᠭᠡᠯᠴᠡᠳᠡᠭ᠃ ᠲᠡᠳᠡ ᠴᠦ᠍ ᠡᠳᠡᠨ ᠦ᠌ ᠨᠠᠭᠠᠳᠤᠮ ᠳ᠋ᠤ᠌ ᠢᠷᠡᠵᠦ ᠮᠣᠷᠢ ᠤᠷᠤᠯᠳᠤᠵᠤ ᠯᠠ ᠲᠠᠭᠠᠷᠠᠨᠠ ᠭᠡᠯᠡ᠃
ᠲᠤᠯᠤᠮ ᠳ᠋ᠤ᠌ ᠬᠠᠳᠠᠭᠠᠯᠠᠭᠰᠠᠨ ᠤᠰᠤ᠂ ᠥᠷᠯᠥᠭᠡ ᠠᠢᠯ ᠠ᠋ᠴᠠ ᠠᠪᠤᠭᠰᠠᠨ ᠰᠦ ᠪᠡᠷ ᠢ᠋ᠶ᠋ᠡᠨ ᠴᠠᠢ ᠴᠢᠨᠠᠵᠤ᠂ ᠲᠠᠷᠭᠤᠨ ᠠᠭᠤᠯᠠ᠂ ᠬᠡᠷᠦᠯᠦᠨ ᠮᠥᠷᠡᠨ ᠳ᠋ᠡᠭᠡᠨ ᠵᠠᠯᠪᠠᠷᠢᠨ ᠡᠷᠭᠦᠭᠡᠳ ᠴᠠᠢ ᠳ᠋ᠠᠭᠠᠨ ᠱᠤᠤᠵᠠ ᠬᠢᠵᠦ ᠬᠣᠭᠣᠯᠠ ᠴᠢᠭ᠂ ᠴᠠᠢ ᠴᠢᠭ ᠪᠣᠯᠭᠠᠨ ᠲᠡᠳᠡ ᠣᠭᠣᠴᠢᠯᠠᠬᠤ ᠵᠠᠭᠤᠷᠠ ᠡᠴᠢᠭᠡ ᠠᠶᠠᠨ ᠤ᠋ ᠬᠣᠯᠪᠣᠭᠠ ᠪᠠᠨ ᠠᠭᠤᠳᠠᠯᠵᠤ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠨᠠᠨᠵᠢᠩ ᠴᠢᠪᠠᠭᠠ ᠲᠡᠷᠢᠭᠦᠲᠡᠨ ᠠᠮᠲᠠᠲᠠᠨ ᠢ᠋ ᠥᠭᠴᠦ᠂ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠠᠭᠤ ᠬᠠᠷᠠ ᠠᠷᠠᠵᠠ ᠵᠠᠳᠠᠯᠤᠨ ᠠᠭᠤᠯᠠ ᠤᠰᠤ ᠨᠠᠷᠠᠯᠠᠨ ᠢᠨᠴᠠᠳᠠᠵᠤ ᠪᠠᠯᠭᠤᠭᠠᠳ ᠯᠣᠩᠬᠣ ᠲᠠᠢ ᠪᠠᠨ ᠳᠠᠯᠳᠠ ᠬᠢᠬᠦ ᠵᠠᠭᠤᠷᠠ᠄
— ᠵᠠ ᠬᠡᠦᠬᠡᠳ᠂ ᠥᠨᠥᠳᠥᠷ ᠢᠩᠭᠢᠭᠡᠳ ᠥᠨᠵᠢᠶᠡ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠬᠡᠳᠦᠨ ᠤᠨᠠᠭᠠ ᠪᠠᠨ ᠵᠡᠯᠡᠯᠡᠵᠦ᠁ ᠨᠢᠭᠡ ᠬᠤᠰᠠᠷᠠᠩ ᠲᠠᠢ ᠳᠣᠯᠣᠭᠠᠨ ᠭᠡᠭᠦᠦ ᠶ᠋ᠢᠨ ᠰᠠᠭᠠᠮᠠ ᠪᠢᠳᠡ ᠳᠥᠷᠪᠡ ᠳ᠋ᠦ᠍ ᠨᠢᠭᠡ ᠥᠨᠵᠢᠵᠦ ᠰᠠᠭᠠᠬᠤ ᠳ᠋ᠤ᠌ ᠬᠦᠷᠬᠦ ᠪᠠᠢᠬᠠ᠃ ᠲᠡᠭᠡᠬᠦᠯᠡᠷ ᠨᠢᠭᠡ ᠥᠨᠵᠢᠵᠦ ᠤᠨᠠᠭᠠ ᠪᠠᠨ ᠤᠶᠠᠨᠠ ᠪᠢᠵᠡ ᠭᠡᠯᠡ᠃
— ᠮᠣᠷᠢᠳ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠪᠣᠭᠣᠷᠴᠢ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌᠄
— ᠨᠥᠭᠥᠭᠡᠳᠦᠷ ᠶᠡᠬᠡ ᠪᠡᠯᠭᠡ ᠲᠡᠢ ᠰᠠᠢᠨ ᠡᠳᠦᠷ᠁ ᠲᠡᠷᠡ ᠡᠳᠦᠷ ᠯᠡ ᠤᠶᠠᠨᠠ ᠳᠠ᠃ ᠲᠡᠳᠡ᠄
— ᠵᠠ᠂ ᠵᠠ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠬᠡᠯᠡᠬᠦ ᠪᠣᠢ? ᠡᠴᠢᠭᠡ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠄
— ᠵᠠ ᠪᠠᠢᠵᠠ᠂ ᠪᠢ ᠮᠣᠷᠳᠠᠭᠠᠳ ᠡᠨᠡ ᠣᠢᠷᠠ ᠬᠠᠪᠢ ᠶ᠋ᠢ ᠵᠢᠭᠠᠬᠠᠨ ᠲᠠᠩᠳᠠᠭᠠᠳ(ᠳᠠᠩᠨᠠᠭᠠᠳ᠂ ᠮᠡᠳᠡᠭᠡᠳ) ᠢᠷᠡᠶᠡ᠃ ᠶᠠᠮᠠᠷ ᠠᠢᠯ ᠰᠠᠭᠠᠬᠠᠯᠲᠠ ᠤ᠋ᠳ ᠪᠠᠢᠨᠠ ᠪᠣᠢ? ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶᠠᠭᠤ ᠪᠠᠢᠨᠠ ᠭᠡᠳ ᠲᠡᠷᠡ ᠪᠡᠷ ᠵᠢᠭᠠᠬᠠᠨ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠪᠢᠳᠡ ᠪᠤᠴᠠᠬᠤ ᠳ᠋ᠠᠭᠠᠨ ᠠᠴᠢᠶᠠ ᠪᠠᠨ ᠬᠥᠩᠭᠡᠯᠡᠨᠡ᠃ ᠬᠣᠶᠠᠷ ᠲᠡᠷᠭᠡ ᠪᠡᠨ᠂ ᠭᠡᠷ ᠢ᠋ᠶ᠋ᠡᠨ ᠵᠠᠷᠤᠴᠢᠬᠠᠨᠠ ᠰᠢᠦ ᠳᠡ᠃ ᠶᠠᠭᠠᠬᠢᠵᠤ ᠰᠢᠦ ᠥᠭᠴᠦ ᠪᠣᠯᠤᠮᠠᠷ ᠪᠠᠢᠨᠠ ᠭᠡᠳᠡᠭ ᠢ᠋ ᠪᠠᠭᠴᠠᠭᠠ ᠠᠪᠤᠶᠠ᠃ ᠮᠣᠳᠣ ᠬᠣᠪᠣᠷ ᠲᠠᠢ ᠭᠠᠵᠠᠷ ᠠᠪᠴᠤ ᠯᠠ ᠲᠠᠭᠠᠷᠠᠨᠠ ᠭᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ ᠠᠪᠤ ᠶ᠋ᠢ ᠪᠡᠨ ᠴᠠᠭᠠᠰᠢᠯᠠᠭᠤᠯᠵᠤ᠄
— ᠬᠣᠶᠠᠷ ᠲᠡᠮᠡᠭᠡ᠂ ᠮᠣᠷᠢᠳ᠂ ᠠᠳᠤᠭᠤ ᠪᠠᠨ ᠶᠠᠭᠠᠬᠢᠬᠤ ᠪᠣᠢ?
— ᠵᠠᠷᠤᠴᠢᠬᠠᠨᠠ᠂ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠬᠤᠷᠳᠤ ᠰᠠᠢᠲᠠᠢ ᠭᠠᠵᠠᠷ ᠠ᠋ᠴᠠ ᠬᠥᠯ ᠴᠢᠩᠭᠠᠲᠠᠢ ᠦᠷᠢᠶᠡ ᠠᠪᠠᠴᠢᠵᠤ ᠠᠵᠢᠷᠭᠠ ᠲᠠᠯᠪᠢᠬᠤ ᠰᠠᠨᠠᠭᠠ ᠪᠠᠢᠨᠠ᠃ ᠦᠵᠡᠵᠦ ᠠᠯᠳᠠᠨᠠ ᠳᠠ᠃ ᠲᠡᠭᠦᠨ ᠳ᠋ᠦ᠍ ᠯᠡ ᠬᠠᠮᠤᠭ ᠢ᠋ᠶ᠋ᠠᠨ ᠶᠡᠭᠦᠯᠡᠴᠢᠬᠡᠳᠡᠭ ᠪᠣᠯᠪᠠ ᠤᠤ ᠭᠡᠳ ᠰᠠᠷᠪᠠᠯᠵᠠᠲᠠᠯᠠ ᠠᠯᠬᠤᠭᠠᠳ ᠭᠠᠷᠴᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠄
— ᠬᠣᠶᠠᠷ ᠲᠡᠮᠡᠭᠡ ᠪᠡᠨ ᠰᠠᠯᠬᠢᠳᠠᠭᠤᠯᠴᠢᠬᠠᠪᠠ! ᠭᠡᠪᠡ᠃