ᠰᠢᠨᠡ ᠶ᠋ᠢᠨ ᠳᠤᠷᠠᠰᠤᠮᠵᠢ-ᠨᠠ᠂ ᠬᠥᠬᠡᠰᠢᠭᠤᠢShiniin dursamj-Na,KhiishuguiШинийн дурсамж-На,Хийшугуй
217
ᠰᠢᠨᠡ ᠶ᠋ᠢᠨ ᠳᠤᠷᠠᠰᠤᠮᠵᠢ
ᠨᠠ᠂ ᠬᠥᠬᠡᠰᠢᠭᠤᠢ
ᠰᠢᠨᠠᠯᠠᠨᠠ ᠭᠡᠵᠦ ᠮᠠᠨ ᠤ᠋ ᠪᠠᠭᠠ ᠨᠠᠰᠤᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠪᠠᠶᠠᠷ ᠲᠠᠢ᠂ ᠲᠤᠢᠯ ᠤ᠋ᠨ ᠵᠢᠷᠭᠠᠯ ᠲᠠᠢ᠂ ᠶᠡᠬᠡᠬᠡᠨ ᠮᠥᠷᠥᠭᠡᠳᠦᠯ ᠳᠤᠷᠠᠰᠤᠯ ᠲᠠᠢ ᠡᠳᠦᠷ ᠬᠣᠨᠣᠭ ᠪᠠᠢᠵᠤ ᠪᠢᠯᠡ᠃
ᠮᠢᠨᠦ ᠲᠥᠷᠥᠭᠰᠡᠨ ᠨᠤᠲᠤᠭ ᠶᠠᠭᠷᠠᠢ ᠣᠢ ᠰᠢᠭᠤᠢ ᠶ᠋ᠢᠨ ᠲᠠᠯᠠᠪᠠᠢ ᠭᠡᠵᠦ ᠬᠣᠷᠢᠭᠠᠳ ᠡᠷᠦᠬᠡ ᠲᠡᠢ ᠬᠠᠶᠠᠭᠠ ᠬᠠᠶᠠᠭᠠ ᠪᠠᠨ ᠨᠡᠢᠯᠡᠵᠦ ᠰᠠᠭᠤᠭᠰᠠᠨ ᠡᠯᠢᠭᠡ ᠨᠢᠭᠡᠲᠡᠢ ᠬᠣᠲᠣᠭᠣᠷ ᠤ᠋ᠨ ᠠᠢᠯ ᠪᠢᠯᠡ᠃ ᠳᠠᠭᠤᠴᠢᠨ ᠲᠡᠭᠷᠢ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ 《ᠲᠡᠷᠡ ᠦᠶᠡ ᠶ᠋ᠢᠨ ᠬᠥᠮᠦᠨ ᠴᠥᠭᠡᠨ᠂ ᠲᠡᠷᠡ ᠦᠶᠡ ᠶ᠋ᠢᠨ ᠬᠥᠮᠦᠨ ᠳᠣᠲᠣᠨᠣ 》ᠭᠡᠳᠡᠭ ᠢ᠋ᠶ᠋ᠡᠷ ᠮᠠᠨ ᠤ᠋ ᠠᠢᠯ ᠤ᠋ᠨ ᠬᠥᠮᠦᠰ ᠬᠡᠨ ᠠᠯᠢᠨ ᠳ᠋ᠠᠭᠠᠨ ᠮᠠᠰᠢ ᠡᠯᠢᠭᠡᠰᠡᠭ᠂ ᠬᠣᠭᠣᠷᠣ ᠬᠣᠭᠣᠷᠣᠨᠳᠣ ᠪᠠᠨ ᠲᠤᠩ ᠡᠶᠡ ᠨᠠᠢᠷᠲᠠᠢ ᠶᠠᠪᠤᠯᠴᠠᠳᠠᠭ ᠢ᠋ ᠨᠢ ᠣᠳᠣ ᠡᠷᠭᠢᠴᠡᠭᠦᠯᠬᠦ ᠳ᠋ᠦ᠍ ᠴᠦ᠍ ᠰᠡᠳᠬᠢᠯ ᠳ᠋ᠦ᠍ ᠮᠠᠰᠢ ᠲᠠᠭᠠᠯᠠᠮᠵᠢᠲᠠᠢ ᠰᠠᠨᠠᠭᠳᠠᠨᠠ᠃
ᠵᠢᠷᠠᠭᠠᠳ ᠣᠨ ᠤ᠋ ᠲᠥᠯ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠮᠠᠨ ᠤ᠋ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠠᠮᠢᠳᠤᠷᠠᠯ ᠲᠡᠢᠮᠦ ᠪᠠᠶᠠᠯᠢᠭ ᠪᠢᠰᠢ᠃ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠪᠦᠷ ᠬᠡᠮᠵᠢᠶᠡ ᠲᠡᠢ ᠬᠠᠩᠭᠠᠵᠤ ᠪᠠᠢᠭᠰᠠᠨ ᠴᠠᠭ ᠲᠤᠯᠠ ᠨᠦᠬᠡᠴᠢᠯᠡᠮᠡᠷ ᠪᠠᠷᠠᠭᠠ᠂ ᠬᠠᠳᠠᠭᠠᠯᠠᠮᠠᠷ ᠪᠣᠳᠠᠰ ᠭᠡᠵᠦ ᠪᠠᠷᠤᠭ ᠪᠠᠢᠬᠤ ᠦᠭᠡᠢ᠃ ᠰᠢᠨᠠᠯᠠᠨᠠ ᠯᠠ ᠭᠡᠪᠡᠯ ᠰᠠᠶᠢ ᠬᠡᠳᠦᠨ ᠵᠢᠩ ᠴᠠᠭᠠᠨ ᠭᠤᠯᠢᠷ᠂ ᠬᠡᠳᠦᠨ ᠵᠢᠩ ᠲᠤᠲᠤᠷᠭᠠ᠂ ᠬᠡᠳᠦᠨ ᠵᠢᠩ ᠲᠣᠰᠣ ᠣᠯᠵᠤ ᠬᠤᠪᠢᠶᠠᠨᠠ ᠭᠡᠳᠡᠭ ᠢ᠋ ᠣᠳᠣ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠮᠡᠷ ᠦᠭᠡᠢ ᠪᠣᠯᠪᠠᠴᠤ ᠪᠢᠳᠡ ᠶᠠᠭ ᠲᠡᠢᠮᠦ ᠴᠠᠭ ᠦᠶᠡ ᠶ᠋ᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠥᠩᠭᠡᠷᠡᠭᠦᠯᠵᠦ ᠢᠷᠡᠭᠰᠡᠨ ᠶᠦ᠍ᠮ᠃
ᠬᠥᠬᠡᠭᠡ ᠰᠠᠷᠠ ᠣᠷᠣᠭᠰᠠᠭᠠᠷ ᠭᠡᠷ ᠪᠣᠯᠭᠠᠨ ᠪᠣᠷᠳᠣᠭᠠᠨ ᠭᠠᠬᠠᠢ ᠪᠠᠨ ᠠᠯᠠᠵᠤ᠂ ᠰᠢᠨᠡ ᠶ᠋ᠢᠨ ᠮᠢᠬᠠ ᠪᠠᠨ ᠪᠡᠯᠡᠳᠬᠡᠳᠡᠭ᠃ ᠮᠠᠨ ᠤ᠋ ᠪᠠᠭᠠ ᠨᠠᠰᠤᠨ ᠳ᠋ᠤ᠌ ᠬᠤᠸᠠᠷ ᠫᠤᠤᠵᠢᠩ ᠭᠡᠰᠡᠨ ᠶᠠᠭᠤᠮᠠ ᠪᠠᠢᠭᠰᠠᠨ ᠡᠰᠡᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠃ ᠨᠢᠭᠡ ᠬᠣᠶᠠᠷ ᠬᠡᠯᠬᠢᠶᠡ ᠪᠢᠶᠠᠨ ᠫᠤᠤᠵᠢᠩ ᠣᠯᠵᠤ ᠲᠠᠯᠪᠢᠬᠤ ᠴᠢᠨᠢ ᠬᠦᠰᠡᠭᠡᠳ ᠣᠯᠳᠠᠬᠤ ᠦᠭᠡᠢ ᠪᠠᠶᠠᠷᠲᠤ ᠶᠠᠪᠤᠳᠠᠯ ᠭᠡᠵᠦ ᠮᠡᠳᠡ᠃ ᠪᠠᠭᠠ ᠳ᠋ᠠᠭᠠᠨ ᠪᠢᠳᠡ ᠭᠠᠬᠠᠢ ᠶ᠋ᠢᠨ ᠵᠣᠭᠳᠣᠷ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ᠂ ᠬᠠᠩᠭᠠᠯᠭᠠ ᠶ᠋ᠢᠨ ᠬᠣᠷᠰᠢᠶᠠᠨ ᠳ᠋ᠤ᠌ ᠣᠴᠢᠵᠤ ᠵᠣᠭᠣᠰ ᠪᠣᠯᠭᠠᠭᠠᠳ ᠫᠤᠤᠵᠢᠩ ᠬᠤᠳᠠᠯᠳᠤᠨ ᠠᠪᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠰᠤᠷ ᠨᠢ ᠬᠡᠳᠦᠢ ᠥᠨᠳᠥᠷ᠂ ᠥᠩᠭᠡ ᠨᠢ ᠬᠡᠳᠦᠢ ᠭᠢᠯᠠᠭᠠᠷ ᠪᠣᠯ ᠲᠡᠳᠦᠢ ᠵᠣᠭᠣᠰ ᠬᠦᠷᠳᠡᠭ᠃ ᠴᠠᠭᠠᠨ ᠭᠠᠬᠠᠢ ᠶ᠋ᠢᠨ ᠵᠣᠭᠳᠣᠷ ᠨᠢ ᠬᠠᠷᠠ ᠭᠠᠬᠠᠢ ᠶ᠋ᠢᠨ ᠵᠣᠭᠳᠣᠷ ᠤ᠋ᠨ ᠵᠡᠷᠭᠡ ᠦᠨᠡ ᠳ᠋ᠦ᠍ ᠬᠦᠷᠳᠡᠭ ᠦᠭᠡᠢ᠃ ᠳᠡᠭᠡᠭᠰᠢ ᠲᠡᠢᠷᠬᠦ ᠬᠣᠶᠠᠷ ᠳᠤᠤᠭᠠᠷᠬᠤ ᠫᠤᠤᠵᠢᠩ ᠢ᠋ ᠬᠡᠳᠦ ᠶ᠋ᠢ ᠣᠯᠤᠭᠠᠳ ᠠᠪᠤᠪᠠᠯ ᠬᠥᠯ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠳᠠᠭ ᠰᠠᠨ᠃
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠪᠣᠯᠤᠭᠰᠠᠭᠠᠷ ᠪᠢᠳᠡ ᠦᠶᠡ ᠬᠤᠷᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠢᠯᠡᠵᠦ᠂ ᠡᠷᠦᠬᠡ ᠳᠠᠷᠠᠭᠠᠯᠠᠨ ᠠᠢᠯ ᠤ᠋ᠨ ᠨᠠᠰᠤᠲᠠᠳ ᠲᠠᠭᠠᠨ ᠰᠢᠨᠡ ᠶ᠋ᠢᠨ ᠵᠣᠯᠭᠠᠯᠲᠠ ᠬᠢᠵᠦ ᠶᠠᠪᠤᠳᠠᠭ᠃ ᠠᠢᠯ ᠤ᠋ᠨ ᠡᠪᠦᠭᠡ ᠡᠮᠡᠭᠡ ᠨᠠᠷ ᠤ᠋ᠨ ᠢᠷᠦᠭᠡᠯ ᠢ᠋ ᠰᠣᠨᠣᠰᠴᠤ᠂ ᠠᠮᠲᠠᠲᠠᠢ ᠰᠢᠬᠢᠷ ᠢ᠋ ᠨᠢ ᠣᠯᠵᠤ ᠬᠦᠷᠲᠡᠬᠦ ᠨᠢ ᠮᠠᠨ ᠤ᠋ ᠪᠠᠭᠠ ᠨᠠᠰᠤᠨ ᠤ᠋ ᠪᠠᠯ ᠪᠤᠷᠠᠮ ᠮᠡᠲᠦ ᠠᠮᠢᠳᠤᠷᠠᠯ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠠᠢᠯ ᠤ᠋ᠨ ᠠᠬᠠᠮᠠᠳ ᠶᠠᠭᠠᠬᠢᠭᠰᠠᠨ ᠲᠡᠭᠡᠵᠦ ᠰᠠᠢᠬᠠᠨ ᠢᠷᠥᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ᠃ 《ᠨᠠᠷᠠᠨ ᠳ᠋ᠤ᠌ ᠠᠳᠠᠯᠢ ᠰᠠᠴᠤᠷᠠᠵᠤ ᠶᠠᠪᠤ᠂ ᠨᠠᠮᠠᠭᠠᠨ ᠳ᠋ᠤ᠌ ᠠᠳᠠᠯᠢ ᠳᠡᠯᠭᠡᠷᠡᠵᠦ ᠶᠠᠪᠤ 》ᠭᠡᠵᠦ ᠡᠬᠢᠯᠡᠭᠡᠳ ᠠᠪᠤᠪᠠᠯ ᠬᠡᠳᠦᠨ ᠮᠢᠨᠦ᠋ᠲ ᠢ᠋ᠶ᠋ᠡᠷ ᠢᠷᠦᠭᠡᠭᠡᠳ ᠵᠣᠭᠰᠣᠬᠤ ᠦᠭᠡᠢ᠃ ᠣᠳᠣ ᠪᠣᠳᠣᠪᠠᠯ ᠠᠢᠯ ᠤ᠋ᠨ ᠡᠪᠦᠭᠡ ᠡᠮᠡᠭᠡ ᠨᠠᠷ ᠤ᠋ᠨ ᠲᠡᠷᠡ ᠰᠠᠢᠬᠠᠨ ᠢᠷᠦᠭᠡᠯ ᠴᠢᠨᠢ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠳᠠᠰ ᠤ᠋ᠨ ᠪᠤᠰᠤ ᠰᠣᠶᠣᠯ ᠤ᠋ᠨ ᠥᠪ ᠪᠠᠢᠭᠰᠠᠨ ᠳᠠ᠃
ᠪᠠᠭᠠ ᠨᠠᠰᠤᠨ ᠤ᠋ ᠰᠢᠨᠡ ᠶ᠋ᠢᠨ ᠳᠤᠷᠠᠰᠤᠮᠵᠢ ᠳ᠋ᠤ᠌ ᠪᠠᠰᠠ ᠨᠢᠭᠡᠨ ᠲᠡᠮᠳᠡᠭᠯᠡᠭᠦᠰᠢᠲᠡᠢ ᠶᠠᠪᠤᠳᠠᠯ ᠭᠡᠪᠡᠯ ᠰᠢᠨᠡ ᠱᠠᠬᠠᠢ ᠣᠯᠵᠤ ᠡᠮᠦᠰᠦᠨᠡ ᠭᠡᠳ ᠡᠵᠢ ᠶ᠋ᠢ ᠪᠡᠨ ᠰᠢᠬᠠᠮᠳᠠᠭᠤᠯᠵᠤ ᠪᠠᠢᠭᠰᠠᠨ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠰᠢᠨᠡᠯᠡᠬᠦ ᠪᠡᠯᠡᠳᠬᠡᠯ ᠳ᠋ᠦ᠍ ᠡᠭᠦᠷᠲᠦᠵᠦ ᠪᠠᠢᠭᠰᠠᠨ ᠡᠵᠢ ᠮᠢᠨᠢ ᠡᠭᠡᠴᠢ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠳ᠋ᠤ᠌ ᠰᠢᠨᠡ ᠱᠠᠬᠠᠢ ᠡᠮᠦᠰᠬᠡᠨᠡ ᠭᠡᠵᠦ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ ᠲᠣᠰᠣᠨ ᠳ᠋ᠧᠩ ᠦ᠋ᠨ ᠳᠣᠣᠷᠠ ᠤᠯᠠ ᠱᠠᠭᠯᠠᠵᠤ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠨᠢ ᠣᠳᠣ ᠪᠣᠯᠲᠠᠯᠠ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠵᠦ ᠪᠠᠢᠮᠠᠷ ᠰᠠᠨᠠᠭᠳᠠᠨᠠ᠃ ᠪᠢᠲᠡᠭᠦᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦᠭᠡᠢ ᠡᠵᠢ ᠶ᠋ᠢ ᠪᠡᠨ ᠠᠮᠠᠷᠠᠭᠤᠯᠬᠤ ᠦᠭᠡᠢ ᠦᠢᠯᠡ ᠤᠲᠠᠰᠤᠨ ᠳ᠋ᠤ᠌ ᠶᠠᠭᠠᠷᠠᠭᠤᠯᠵᠤ ᠪᠠᠢᠭᠰᠠᠨ ᠮᠢᠨᠢ ᠴᠠᠭᠠᠨ ᠰᠠᠷᠠ ᠳ᠋ᠠᠭᠠᠨ ᠰᠢᠨᠡ ᠱᠠᠬᠠᠢ ᠣᠯᠵᠤ ᠡᠮᠦᠰᠦᠭᠡᠳ ᠠᠢᠯ ᠤ᠋ᠨ ᠬᠡᠦᠬᠡᠳ ᠲᠦ᠍ ᠭᠠᠢᠬᠠᠭᠤᠯᠬᠤ ᠭᠡᠰᠡᠨ ᠨᠡᠷᠡᠯᠬᠡᠭ ᠪᠣᠳᠣᠯ ᠴᠤ᠌ ᠪᠠᠢᠪᠠᠤ ᠳᠠ᠃ ᠰᠢᠨᠡ ᠣᠶᠣᠭᠰᠠᠨ ᠱᠠᠬᠠᠢ ᠳ᠋ᠠᠭᠠᠨ ᠡᠵᠢ ᠮᠢᠨᠢ ᠨᠣᠢᠲᠠᠨ ᠬᠤᠮᠠᠭ ᠨᠦᠳᠦᠭᠡᠳ ᠬᠥᠯ ᠦ᠋ᠨ ᠬᠡᠪ ᠣᠷᠣᠭᠤᠯᠵᠤ ᠪᠠᠢᠭᠰᠠᠨ ᠨᠢ ᠥᠴᠥᠭᠡᠳᠦᠷ ᠰᠢᠭ ᠰᠠᠨᠠᠭᠳᠠᠪᠠᠴᠤ ᠥᠩᠭᠡᠷᠡᠭᠡᠳ ᠶᠠᠭ ᠬᠠᠭᠠᠰ ᠵᠠᠭᠤᠨ ᠪᠣᠯᠵᠤ ᠪᠠᠢᠨᠠ ᠠ᠋᠃ 《ᠲᠡᠨᠦᠭᠦᠯ ᠬᠦᠦ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ᠂ ᠲᠡᠭᠷᠢ ᠡᠵᠢ ᠶ᠋ᠢᠨ ᠭᠠᠷ ᠳᠣᠣᠷᠠᠬᠢ ᠤᠲᠠᠰᠤ 》ᠭᠡᠰᠡᠨ ᠬᠢᠲᠠᠳ ᠰᠢᠯᠦᠭ ᠶᠠᠭᠠᠬᠢᠵᠤ ᠴᠤ᠌ ᠣᠯᠵᠤ ᠬᠡᠯᠡᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ᠃
《ᠰᠢᠩᠭᠡᠯᠡᠭᠰᠡᠭᠡᠷ ᠰᠢᠩᠭᠡᠯᠡᠭᠰᠡᠭᠡᠷ ᠥᠳᠬᠡᠷᠡᠵᠦ᠂ ᠰᠢᠨᠡᠯᠡᠭᠰᠡᠭᠡᠷ ᠰᠢᠨᠡᠯᠡᠭᠰᠡᠭᠡᠷ ᠬᠠᠭᠤᠴᠢᠷᠠᠪᠠ》 ᠭᠡᠳᠡᠭ ᠢ᠋ᠶ᠋ᠡᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠢ ᠴᠢᠨᠢ ᠵᠠᠵᠢᠨ ᠦᠰᠦ ᠴᠠᠢᠭᠠᠳ ᠵᠠᠬᠠ ᠶ᠋ᠢᠨ ᠠᠷᠠᠭᠠ ᠰᠡᠢᠭᠡᠭᠰᠡᠨ ᠵᠢᠷᠠᠨ ᠨᠠᠰᠤ ᠲᠠᠢ ᠬᠤᠸᠠᠩᠯᠢ ᠪᠣᠯᠴᠢᠬᠠᠯᠠ᠃ ᠣᠨ ᠵᠢᠯ ᠭᠡᠵᠦ ᠥᠪᠡᠷ ᠦ᠋ᠨ ᠵᠢᠮᠡ ᠪᠡᠷ ᠢ᠋ᠶ᠋ᠡᠨ ᠤᠷᠤᠰᠤᠨ ᠣᠳᠤᠨᠠ᠃ ᠡᠷᠭᠢᠴᠡᠭᠦᠯᠦᠯ ᠳᠤᠷᠠᠰᠤᠯ ᠭᠡᠵᠦ ᠥᠷᠥᠴᠡ ᠵᠢᠷᠦᠬᠡᠨ ᠳ᠋ᠦ᠍ ᠲᠤᠨᠤᠨ ᠦᠯᠡᠳᠡᠨᠡ᠃
ᠴᠠᠭ ᠰᠢᠨᠡᠳᠴᠦ᠂ ᠨᠡᠢᠭᠡᠮ ᠬᠥᠭᠵᠢᠭᠡᠳ ᠴᠠᠭᠯᠠᠰᠢ ᠦᠭᠡᠢ ᠵᠢᠷᠭᠠᠯ ᠳ᠋ᠤ᠌ ᠪᠢᠳᠡ ᠮᠠᠷᠭᠤᠰᠢ ᠦᠭᠡᠢ ᠱᠤᠩᠪᠠᠵᠤ ᠪᠠᠢᠨᠠ᠃ ᠭᠡᠲᠡᠯᠡ ᠲᠠᠪᠢᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠴᠠᠭᠠᠨ ᠰᠠᠷᠠ ᠬᠣᠷᠢᠭᠠᠳ ᠡᠷᠦᠬᠡ ᠲᠡᠢ ᠬᠣᠲᠣᠭᠣᠷ ᠤ᠋ᠨ ᠠᠢᠯ ᠤ᠋ᠨ ᠰᠢᠨᠡ ᠵᠢᠯ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠢᠩᠭᠢᠵᠦ ᠡᠩᠰᠡᠷᠡᠲᠡᠯᠡ ᠡᠷᠢᠭᠳᠡᠬᠦ ᠶ᠋ᠢ ᠪᠦᠦ ᠮᠡᠳᠡ᠃ 《ᠨᠤᠲᠤᠭ ᠭᠡᠵᠦ ᠵᠠᠯᠠᠭᠤ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠰᠠᠯᠤᠶᠠ ᠭᠡᠳ ᠰᠠᠯᠵᠤ ᠣᠷᠬᠢᠭᠰᠠᠨ ᠣᠷᠣᠨ᠂ ᠨᠤᠲᠤᠭ ᠭᠡᠵᠦ ᠵᠠᠭᠠᠯ ᠪᠤᠭᠤᠷᠤᠯ ᠦᠶᠡ ᠳ᠋ᠦ᠍ ᠪᠡᠨ ᠬᠠᠷᠢᠶᠠ ᠭᠡᠳ ᠬᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠭᠠᠵᠠᠷ 》 ᠭᠡᠳᠡᠭᠴᠢᠯᠡᠨ ᠥᠲᠡᠯᠬᠦ ᠶ᠋ᠢᠨ ᠦᠵᠦᠭᠦᠷ ᠪᠠᠭᠠ ᠨᠠᠰᠤᠨ ᠤ᠋ ᠴᠠᠭᠠᠨ ᠰᠠᠷᠠ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠳᠤᠷᠠᠰᠤᠭᠳᠠᠵᠤ᠂ ᠬᠥᠭᠰᠢᠷᠡᠬᠦ ᠶ᠋ᠢᠨ ᠴᠠᠭ ᠬᠥᠳᠡᠭᠡ ᠠᠢᠯ ᠤ᠋ᠨ ᠰᠢᠨᠠᠯᠠᠵᠤ ᠪᠢᠲᠡᠭᠦᠯᠡᠬᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠷᠢᠭᠳᠡᠨᠡ ᠠ᠋ ᠁ (2026·2·14)
ᠢᠷᠡᠯᠲᠡ ᠄ ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤ᠋ᠨ ᠲᠥᠪ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ
ᠬᠢᠨᠠᠯᠲᠠ ᠶ᠋ᠢᠨ ᠰᠢᠰᠲ᠋ᠧᠮ ᠢ᠋ᠶ᠋ᠡᠷ ᠬᠢᠨᠠᠪᠠ