ᠰᠦᠯᠳᠡ ᠶᠢᠨ ᠰᠣᠶᠣᠯ ᠤᠨ ᠰᠤᠳᠤᠯᠤᠯ – ᠮᠢᠩᠵᠤᠤᠷ <ᠳᠡᠭᠡᠳᠦ-11> Сүлдийн соёлын судлал – Минжуур<дээд-11>
81《ᠳ᠋ᠣᠣ (纛)》 ᠭᠡᠰᠡᠨ ᠪᠤᠷᠤᠭᠤ ᠣᠷᠴᠢᠭᠤᠯᠭᠠ ᠶ᠋ᠢ ᠪᠠᠰᠠ ᠯᠠ ᠮᠥᠷᠳᠡᠨ ᠳᠠᠭᠠᠵᠤ ᠪᠠᠢᠭᠠ ᠰᠣᠨᠢᠨ ᠶᠠᠪᠤᠳᠠᠯ ᠢ᠋ ᠥᠭᠦᠯᠡᠬᠦ ᠨᠢ
【ᠠᠭᠤᠯᠭᠠ ᠶ᠋ᠢᠨ ᠲᠣᠪᠴᠢ】 ᠲᠤᠰ ᠥᠭᠦᠯᠡᠯ ᠳ᠋ᠦ᠍ ᠴᠠᠭᠠᠨ ᠰᠦᠯᠳᠡ ᠶ᠋ᠢ
《查干苏勒德》 ᠭᠡᠵᠦ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠵᠤ᠂
ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠤᠤᠯ ᠨᠡᠷᠡ ᠪᠡᠷ ᠨᠢ ᠥᠷᠭᠡᠨ ᠣᠯᠠᠨ
ᠤᠩᠰᠢᠭᠴᠢᠳ ᠲᠤ᠌ ᠲᠠᠨᠢᠯᠴᠠᠭᠤᠯᠤᠨ ᠥᠭᠪᠡᠯ ᠵᠣᠬᠢᠬᠤ ᠲᠤᠬᠠᠢ
ᠳᠥᠭᠥᠮ ᠥᠭᠦᠯᠡᠬᠦ ᠪᠣᠯᠤᠨᠠ᠃
【ᠵᠠᠩᠭᠢᠯᠠᠭᠠ ᠦᠭᠡ】 ᠪᠤᠷᠤᠭᠤ ᠣᠷᠴᠢᠭᠤᠯᠭᠠ᠂ ᠮᠥᠷᠳᠡᠨ ᠳᠠᠭᠠᠬᠤ᠂
ᠰᠣᠨᠢᠨ ᠶᠠᠪᠤᠳᠠᠯ᠂ ᠥᠭᠦᠯᠡᠬᠦ ᠨᠢ᠃
ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠴᠠᠭᠠᠨ ᠲᠤᠭ ᠢ᠋ ᠴᠠᠭᠠᠨ ᠰᠦᠯᠳᠡ ᠭᠡᠵᠦ ᠨᠡᠷᠡᠢᠳᠦᠭᠡᠳ ᠨᠢᠭᠡᠨᠲᠡ ᠵᠠᠩᠰᠢᠵᠠᠢ᠃ ᠭᠡᠪᠡᠴᠦ ᠵᠠᠷᠢᠮ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠰᠠ ᠴᠠᠭᠠᠨ ᠰᠦᠯᠳᠡ ᠭᠡᠵᠦ ᠪᠢᠴᠢᠭᠡᠳ ᠲᠡᠭᠦᠨ ᠤ ᠳᠣᠣᠷᠠ ᠨᠢ ᠬᠠᠭᠠᠯᠲᠠ ᠨᠡᠮᠡᠵᠦ ᠲᠤᠭ ᠭᠡᠵᠦ ᠲᠣᠳᠣᠷᠬᠠᠢᠯᠠᠨ ᠪᠢᠴᠢᠳᠡᠭ᠃ᠶᠠᠭᠠᠬᠢᠵᠤ ᠬᠡᠯᠡᠭᠰᠡᠨ ᠴᠦ᠍ ᠬᠠᠮᠢᠶᠠ ᠦᠭᠡᠢ᠂ ᠴᠠᠭᠠᠨ ᠲᠤᠭ ᠪᠠ ᠴᠠᠭᠠᠨ ᠰᠦᠯᠳᠡ ᠪᠣᠯ ᠨᠢᠭᠡ ᠯᠡ ᠶᠠᠭᠤᠮᠠ ᠶ᠋ᠢ ᠵᠢᠭᠠᠭᠰᠠᠨ ᠨᠡᠷᠡ ᠦᠭᠡ ᠪᠣᠯᠤᠨᠠ᠃ ᠡᠳᠦᠭᠡ ᠦᠶᠡ ᠪᠣᠯᠬᠤ ᠳ᠋ᠤ᠌ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠪᠡᠯᠭᠡᠳᠡᠯ ᠤᠨ ᠰᠣᠶᠣᠯ ᠪᠣᠯᠤᠨ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠬᠦ (ᠤᠷᠠᠯᠢᠭ) ᠰᠣᠶᠣᠯ ᠨᠢ ᠪᠠᠳᠠᠷᠠᠨ ᠬᠥᠭᠵᠢᠭᠡᠳ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠪᠣᠳᠠᠰ ᠤ᠋ᠨ ᠳᠦᠷᠰᠦ ᠨᠢ ᠭᠠᠭᠴᠠ ᠬᠢᠮᠡᠯ ᠳᠦᠷᠢ① ᠪᠢᠰᠢ᠂ ᠪᠠᠰᠠ ᠵᠢᠷᠤᠮᠠᠯ᠂ ᠱᠤᠭᠤᠮᠠᠯ᠂ ᠴᠢᠳᠬᠤᠮᠠᠯ ᠵᠡᠷᠭᠡ ᠣᠯᠠᠨ ᠵᠦᠢᠯ ᠤᠨ ᠳᠦᠷᠢ ᠪᠡᠷ ᠢᠯᠡᠷᠡᠨ ᠭᠠᠷᠴᠤ᠂ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠦᠰᠦᠭ ᠪᠢᠴᠢᠭ ᠢ᠋ᠶ᠋ᠡᠷ ᠨᠠᠷᠢᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠦᠭᠡᠢ ᠴᠦ᠍ ᠲᠡᠭᠦᠨ ᠢ᠋ ᠣᠢᠯᠠᠭᠠᠵᠤ ᠪᠣᠯᠤᠮᠠᠷ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠴᠡᠢ᠃ ᠭᠡᠪᠡᠴᠦ ᠣᠳᠣ ᠵᠠᠷᠢᠮ ᠮᠣᠩᠭᠣᠯ ᠨᠣᠮ ᠪᠢᠴᠢᠭ ᠪᠠ ᠵᠣᠬᠢᠶᠠᠯ ᠢ᠋ ᠬᠢᠲᠠᠳᠴᠢᠯᠠᠨ ᠣᠷᠴᠢᠭᠤᠯᠬᠤ ᠳᠤᠮᠳᠠ ᠡᠷᠲᠡᠨ ᠤ ᠬᠥᠮᠦᠨ ᠤ ᠣᠷᠴᠢᠭᠤᠯᠭᠠ ᠶ᠋ᠢᠨ ᠪᠤᠷᠤᠭᠤ ᠪᠤᠶᠤ ᠬᠣᠴᠢ ᠨᠡᠷᠡ ᠶᠢ ᠪᠠᠰᠠ ᠯᠠ ᠮᠥᠷᠳᠡᠨ ᠳᠠᠭᠠᠵᠤ᠂ ᠴᠠᠭᠠᠨ ᠰᠦᠯᠳᠡ ᠶ᠋ᠢ 《ᠪᠠᠢ ᠮᠣᠤ ᠳ᠋ᠣᠣ》(白旄纛)᠂ 《ᠪᠠᠢ ᠳ᠋ᠣᠣ》(白纛) ᠭᠡᠬᠦ ᠮᠡᠲᠦ ᠪᠡᠷ ᠣᠷᠴᠢᠭᠤᠯᠵᠤ ᠪᠠᠢᠨᠠ᠃ ᠢᠩᠭᠢᠵᠦ ᠣᠷᠴᠢᠭᠤᠯᠤᠭᠰᠠᠨ ᠤ᠋ ᠦᠷᠡ ᠳ᠋ᠦᠩ ᠨᠢ ᠨᠢᠭᠡ ᠳ᠋ᠦ᠍᠂ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠬᠢᠲᠠᠳ ᠰᠣᠶᠣᠯ ᠲᠠᠢ ᠬᠥᠮᠦᠨ ᠳ᠋ᠦ᠍ ᠣᠢᠯᠠᠭᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠢᠨᠠᠭᠰᠢᠯᠠᠪᠠᠯ ᠪᠤᠷᠤᠭᠤ ᠣᠢᠯᠠᠭᠠᠯᠲᠠ ᠥᠭᠬᠦ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠭᠦᠯᠦᠨᠡ᠃ ᠬᠣᠶᠠᠷ ᠲᠤ᠌᠂ ᠰᠦᠯᠳᠡ ᠶ᠋ᠢᠨ ᠰᠣᠶᠣᠯ ᠢ᠋ᠶ᠋ᠠᠨ ᠦᠨᠡᠨ ᠵᠥᠪ ᠢ᠋ᠶ᠋ᠡᠷ ᠲᠠᠨᠢᠯᠴᠠᠭᠤᠯᠬᠤ ᠭᠡᠰᠡᠨ ᠵᠣᠷᠢᠯᠭᠠ ᠳ᠋ᠤ᠌ ᠭᠥᠷᠦᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ᠃ ᠡᠭᠦᠨ ᠢ᠋ ᠪᠣᠳᠠᠲᠠᠢ ᠪᠠᠷ ᠵᠠᠳᠠᠯᠵᠤ ᠬᠡᠯᠡᠪᠡᠯ 《ᠪᠠᠢ ᠮᠣᠤ ᠳ᠋ᠣᠣ》(白旄纛) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢ ᠣᠢᠯᠠᠭᠠᠬᠤ ᠳ᠋ᠤ᠌ ᠬᠥᠮᠦᠰ ᠡᠩ ᠦ᠋ᠨ《ᠲᠣᠯᠢ ᠪᠢᠴᠢᠭ》 ᠳᠡᠭᠡᠷᠡ ᠡᠷᠢᠭᠡᠳ ᠣᠯᠬᠤ ᠦᠭᠡᠢ ᠪᠣᠯᠪᠠᠯ ᠳᠠᠷᠠᠭᠠ ᠨᠢ ᠯᠠᠪᠲᠠᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠷᠬᠡ ᠰᠦᠷᠲᠦ ᠲᠣᠯᠢ ᠪᠢᠴᠢᠭ᠂ ᠳᠠᠷᠤᠢ 《ᠦᠭᠡᠰ ᠤᠨ ᠳᠠᠯᠠᠢ》(辞海) ᠳᠡᠭᠡᠷᠡ ᠡᠷᠢᠬᠦ ᠪᠣᠯᠤᠨᠠ᠃ᠭᠡᠪᠡᠴᠦ ᠲᠡᠷᠡ ᠡᠢᠮᠦ ᠨᠢᠭᠡ ᠨᠡᠷᠡ ᠦᠭᠡ ᠶ᠋ᠢ ᠣᠯᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠲᠡᠷᠡ ᠦᠭᠡ ᠶ᠋ᠢ ᠰᠠᠯᠭᠠᠵᠤ᠂ 《ᠮᠣᠤ ᠳ᠋ᠣᠣ》 ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠡᠷᠢᠵᠦ ᠦᠵᠡᠨᠡ᠃ ᠭᠡᠪᠡᠴᠦ ᠡᠢᠮᠦ ᠨᠢᠭᠡ ᠨᠡᠷᠡ ᠦᠭᠡ ᠶ᠋ᠢ ᠪᠠᠰᠠ ᠣᠯᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠢᠮᠦ ᠡᠴᠡ ᠴᠠᠭᠠᠨ ᠰᠦᠯᠳᠡ ᠨᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳ᠋ᠠᠭᠠᠨ᠂《ᠮᠣᠤ ᠳ᠋ᠣᠣ》(旄纛) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠴᠢᠨᠠᠭᠰᠢ ᠰᠠᠯᠭᠠᠵᠤ᠂ ᠭᠠᠭᠴᠠ《ᠮᠣᠤ》(旄) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠡᠷᠢᠵᠦ ᠦᠵᠡᠨᠡ᠃ ᠡᠨᠡ《ᠮᠣᠤ》(旄) ᠭᠡᠰᠡᠨ ᠨᠡᠷᠡ ᠦᠭᠡ ᠨᠢ ᠬᠠᠷᠢᠨ 《ᠦᠭᠡᠰ ᠤᠨ ᠳᠠᠯᠠᠢ》 ᠳᠡᠭᠡᠷᠡ 《ᠡᠷᠲᠡᠨ ᠤ ᠴᠠᠭ ᠲᠤ᠌ ᠲᠤᠭ ᠤ᠋ᠨ ᠡᠰᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠰᠠᠷᠯᠤᠭ ᠦᠬᠡᠷ ᠤᠨ ᠰᠡᠭᠦᠯ ᠢ᠋ᠶ᠋ᠡᠷ ᠵᠠᠰᠠᠯ ᠴᠢᠮᠡᠭ ᠬᠢᠳᠡᠭ᠂ ᠮᠣᠤ ᠪᠣᠯ ᠡᠢᠮᠦ ᠵᠠᠰᠠᠯ ᠴᠢᠮᠡᠭ ᠲᠡᠢ ᠲᠤᠭ ᠢ᠋ ᠵᠢᠭᠠᠳᠠᠭ》 ᠭᠡᠰᠡᠨ ᠲᠠᠢᠯᠪᠤᠷᠢ ᠲᠠᠢ ᠪᠠᠢᠳᠠᠭ᠃ ᠭᠡᠪᠡᠴᠦ ᠡᠨᠡ ᠨᠢ ᠶᠠᠮᠠᠷ ᠤᠯᠤᠰ ᠦᠨᠳᠦᠰᠦᠲᠡᠨ ᠤ ᠲᠣᠭ᠂ ᠶᠠᠭᠤᠨ ᠳ᠋ᠤ᠌ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠲᠠᠢᠯᠪᠤᠷᠢᠯᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ 《ᠮᠣᠤ》(旄) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠪᠠᠰᠠ ᠯᠠ ᠰᠠᠢᠨ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠢᠮᠦ ᠪᠣᠯᠬᠣᠷ 《ᠮᠣᠤ》(旄) ᠭᠡᠰᠡᠨ ᠶᠠᠭᠤᠮᠠ ᠠ᠋ᠴᠠ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠨᠡᠩ ᠴᠦ᠍ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠳᠠᠷᠠᠭᠠ ᠨᠢ 《ᠳ᠋ᠣᠣ》(纛) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠡᠷᠢᠵᠦ ᠦᠵᠡᠨᠡ᠃《ᠳ᠋ᠣᠣ》(纛) ᠭᠡᠰᠡᠨ ᠨᠡᠷᠡ ᠦᠭᠡ ᠨᠢ ᠬᠠᠷᠢᠨ 《ᠦᠭᠡᠰ ᠤᠨ ᠳᠠᠯᠠᠢ》 ᠳᠡᠭᠡᠷᠡ 《ᠳ᠋ᠣᠣ ᠪᠣᠯ ᠡᠷᠲᠡᠨ ᠤ ᠦᠶᠡ ᠶ᠋ᠢᠨ ᠴᠡᠷᠢᠭ ᠠᠩᠭᠢ ᠪᠤᠶᠤ ᠶᠣᠰᠣᠯᠠᠯ ᠤ᠋ᠨ ᠴᠡᠷᠢᠭ ᠤᠨ ᠶᠡᠬᠡ ᠲᠤᠭ ᠪᠣᠯᠤᠨᠠ》 ᠭᠡᠰᠡᠨ ᠲᠠᠢᠯᠪᠤᠷᠢ ᠲᠠᠢ ᠪᠠᠢᠳᠠᠭ᠂ ᠭᠡᠪᠡᠴᠦ ᠡᠨᠡ ᠨᠢ ᠶᠠᠮᠠᠷ ᠤᠯᠤᠰ ᠦᠨᠳᠦᠰᠦᠲᠡᠨ ᠤ ᠲᠣᠭ᠂ ᠶᠠᠮᠠᠷ ᠬᠡᠯᠪᠡᠷᠢ ᠮᠠᠶᠢᠭ ᠲᠠᠢ᠂ ᠶᠠᠭᠠᠬᠢᠵᠤ ᠦᠢᠯᠡᠳᠴᠦ ᠪᠦᠲᠦᠭᠡᠳᠡᠭ ᠭᠡᠳᠡᠭ ᠢ᠋ ᠲᠠᠢᠯᠪᠤᠷᠢᠯᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ 《ᠳ᠋ᠣᠣ》(纛) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ ᠪᠠᠰᠠ ᠯᠠ ᠰᠠᠢᠨ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠢᠮᠦ ᠪᠣᠯᠬᠣᠷ 《ᠳ᠋ᠣᠣ》(纛) ᠭᠡᠰᠡᠨ ᠦᠭᠡ ᠡᠴᠡ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠨᠡᠩ ᠴᠦ᠍ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠳᠡᠭᠡᠷᠡ 《ᠪᠠᠢ ᠮᠣᠤ ᠳ᠋ᠣᠣ》(白旄纛) ᠭᠡᠰᠡᠨ ᠨᠡᠷᠡ ᠦᠭᠡ ᠶ᠋ᠢ 《ᠲᠣᠯᠢ ᠪᠢᠴᠢᠭ》 ᠳᠡᠭᠡᠷᠡ ᠪᠦᠬᠦᠯᠢ ᠪᠡᠷ ᠨᠢ ᠡᠷᠢᠵᠦ ᠦᠵᠡᠯᠡ᠃ ᠪᠠᠰᠠ ᠰᠠᠯᠭᠠᠵᠤ ᠡᠷᠢᠵᠦ ᠦᠵᠡᠯᠡ᠂ ᠭᠡᠪᠡᠴᠦ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠣᠢᠯᠠᠭᠠᠬᠤ ᠪᠠᠢᠲᠤᠭᠠᠢ ᠲᠤᠰ ᠶᠠᠭᠤᠮᠠ ᠶ᠋ᠢ ᠴᠦ᠍ ᠣᠢᠯᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠦᠵᠡᠪᠡᠯ ᠡᠷᠲᠡᠨ ᠤ ᠣᠷᠴᠢᠭᠤᠯᠭᠠ ᠶ᠋ᠢᠨ ᠪᠤᠷᠤᠭᠤ ᠪᠤᠶᠤ ᠬᠣᠴᠢ ᠨᠡᠷᠡ ᠶ᠋ᠢ ᠮᠥᠷᠳᠡᠨ ᠳᠠᠭᠠᠬᠤ ᠨᠢ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠰᠣᠶᠣᠯ ᠢ᠋ᠶ᠋ᠠᠨ ᠲᠠᠨᠢᠯᠴᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠬᠢᠲᠠᠳ ᠰᠣᠶᠣᠯᠲᠠᠨ ᠳ᠋ᠤ᠌ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠪᠤᠷᠤᠭᠤ ᠣᠢᠯᠠᠭᠠᠭᠤᠯᠬᠤ ᠪᠣᠯᠤᠯᠴᠠᠭᠠ ᠭᠠᠷᠤᠮᠠᠷ ᠪᠣᠯᠭᠠᠵᠠᠢ᠃
ᠴᠠᠭᠠᠨ ᠰᠦᠯᠳᠡ ᠪᠣᠯ ᠡᠩᠬᠡ ᠲᠠᠢᠪᠤᠩ᠂ ᠬᠥᠭᠵᠢᠯ ᠪᠠᠳᠠᠷᠠᠯ᠂ ᠵᠣᠯ ᠵᠢᠷᠭᠠᠯ ᠢ᠋ ᠪᠡᠯᠭᠡᠳᠡᠵᠦ᠂ ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠨᠡᠷᠡ ᠠᠯᠳᠠᠷᠰᠢᠭᠰᠠᠨ ᠡᠷᠬᠢᠮ ᠳᠡᠭᠡᠳᠦ ᠪᠡᠯᠭᠡᠳᠡᠯ ᠤᠨ ᠡᠳ᠋ ᠮᠥᠨ᠂ ᠪᠠᠰᠠ ᠴᠤ᠌ ᠨᠢᠭᠡ ᠰᠢᠲᠦᠭᠡᠨ ᠪᠣᠯᠤᠨᠠ᠃ ᠭᠡᠲᠡᠯᠡ ᠡᠢᠮᠦ ᠨᠢᠭᠡᠨ ᠰᠣᠶᠣᠯ ᠤ᠋ᠨ ᠦᠵᠡᠭᠳᠡᠯ ᠢ᠋ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠪᠠ ᠠᠷᠠᠰᠤᠲᠠᠨ ᠳ᠋ᠤ᠌ ᠦᠨᠡᠨ ᠵᠥᠪ ᠢ᠋ᠶ᠋ᠡᠷ ᠲᠠᠨᠢᠯᠴᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠡᠴᠡ ᠪᠣᠯᠵᠤ᠂ ᠲᠡᠳᠡᠨ ᠳ᠋ᠦ᠍ ᠪᠤᠷᠤᠭᠤ ᠣᠢᠯᠠᠭᠠᠯᠲᠠ ᠲᠥᠷᠥᠭᠳᠡᠯ ᠥᠭᠬᠦ ᠨᠢ ᠲᠤᠢᠯ ᠤ᠋ᠨ ᠬᠠᠷᠠᠮᠰᠠᠯᠲᠠᠢ ᠶᠠᠪᠤᠳᠠᠯ ᠪᠣᠯᠤᠨᠠ᠃《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠳ᠋ᠤ᠌ ᠴᠠᠭᠠᠨ ᠰᠦᠯᠳᠡ ᠶ᠋ᠢ《ᠪᠠᠢ ᠮᠣᠤ ᠳ᠋ᠣᠣ》(白旄纛)᠂ ᠭᠡᠵᠦ ᠪᠤᠷᠤᠭᠤ ᠣᠷᠴᠢᠭᠤᠯᠤᠭᠰᠠᠨ ᠪᠠᠢᠳᠠᠭ᠃ ᠭᠡᠪᠡᠴᠦ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠰᠣᠶᠣᠯ ᠮᠡᠳᠡᠯᠭᠡ ᠬᠥᠭᠵᠢᠭᠰᠡᠨ ᠥᠨᠥᠳᠥᠷ ᠤᠨ ᠴᠠᠭ ᠲᠤ᠌ ᠲᠡᠭᠦᠨ ᠤ ᠣᠷᠴᠢᠭᠤᠯᠭᠠ ᠶ᠋ᠢᠨ ᠪᠤᠷᠤᠭᠤ ᠶ᠋ᠢ ᠮᠡᠳᠡᠵᠦ ᠪᠠᠢᠭᠠᠳ ᠬᠡᠷᠬᠢᠨ ᠦᠷᠭᠦᠯᠵᠢᠯᠡᠭᠦᠯᠵᠦ ᠪᠣᠯᠬᠤ ᠠᠵᠢ᠃ᠴᠠᠭᠠᠨ ᠰᠦᠯᠳᠡ ᠪᠣᠯ ᠬᠠᠷᠢ ᠦᠨᠳᠦᠰᠦᠲᠡᠨ ᠪᠠ ᠠᠷᠠᠰᠤᠲᠠᠨ ᠤ᠋ ᠰᠣᠶᠣᠯ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠲᠡᠳᠡᠨ ᠳ᠋ᠦ᠍ ᠣᠢᠯᠠᠭᠠᠭᠤᠯᠤᠶᠠ ᠭᠡᠪᠡᠯ ᠵᠠᠪᠠᠯ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠤᠬᠠᠭᠳᠠᠬᠤᠨ ᠢ᠋ ᠲᠠᠢᠯᠪᠤᠷᠢᠯᠠᠬᠤ ᠪᠠᠷ ᠳᠠᠮᠵᠢᠬᠤ ᠬᠡᠷᠡᠭᠲᠡᠢ᠃ ᠢᠩᠭᠢᠪᠡᠯ ᠵᠠᠪᠠᠯ ᠴᠠᠭᠠᠨ ᠰᠦᠯᠳᠡ ᠭᠡᠰᠡᠨ ᠨᠡᠷᠡᠢᠳᠦᠯ ᠢ᠋ ᠬᠡᠷᠡᠭᠯᠡᠬᠦ ᠶᠣᠰᠣᠲᠠᠢ᠃ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠪᠠ ᠠᠷᠠᠰᠤᠲᠠᠨ ᠤ᠋ ᠰᠣᠶᠣᠯ ᠤ᠋ᠨ ᠲᠡᠦᠬᠡᠨ ᠳᠡᠭᠡᠷᠡ ᠪᠠᠢᠳᠠᠭ ᠨᠡᠷᠡ ᠦᠭᠡ ᠶ᠋ᠢ ᠬᠡᠯᠡᠯᠭᠡᠨ ᠦᠭᠡᠢ ᠣᠷᠴᠢᠭᠤᠯᠵᠤ ᠪᠣᠯᠤᠨᠠ᠃ ᠬᠢᠲᠠᠳᠴᠢᠯᠠᠨ ᠣᠷᠴᠢᠭᠤᠯᠬᠤ ᠪᠠᠷ ᠵᠢᠱ᠌ᠢᠶᠡᠯᠡᠵᠦ ᠬᠡᠯᠡᠪᠡᠯ ᠲᠡᠭᠷᠢ ᠶ᠋ᠢ 《天》 ᠭᠡᠵᠦ᠂ ᠭᠠᠵᠠᠷ ᠢ᠋ 《地》 ᠭᠡᠵᠦ᠂ ᠬᠥᠮᠦᠨ ᠢ᠋《人》 ᠭᠡᠵᠦ ᠣᠷᠴᠢᠭᠤᠯᠵᠤ ᠪᠣᠯᠤᠨᠠ᠃ ᠭᠡᠲᠡᠯᠡ ᠬᠢᠲᠠᠳ ᠰᠣᠶᠣᠯ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ ᠪᠠᠢᠬᠤ ᠦᠭᠡᠢ ᠨᠡᠷᠡ ᠦᠭᠡᠰ ᠢ᠋ ᠠᠯᠪᠠ ᠪᠠᠷ ᠣᠷᠴᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠤᠭ ᠨᠡᠷᠡ ᠶ᠋ᠢ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠬᠤ ᠬᠡᠷᠡᠭᠲᠡᠢ᠃ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠬᠤ ᠪᠠᠷ ᠵᠢᠱ᠌ᠢᠶᠡ ᠲᠠᠲᠠᠪᠠᠯ ᠪᠠᠲᠤ ᠭᠡᠰᠡᠨ ᠬᠥᠮᠦᠨ ᠤ ᠨᠠᠷᠠ ᠶ᠋ᠢ 《巴图》 ᠭᠡᠵᠦ᠂ ᠪᠦᠷᠢᠳᠦ ᠨᠠᠭᠤᠷ ᠭᠡᠰᠡᠨ ᠭᠠᠵᠠᠷ ᠤ᠋ᠨ ᠨᠡᠷᠡ ᠶ᠋ᠢ 《布日德淖尔》 ᠭᠡᠵᠦ᠂ ᠨᠠᠭᠠᠳᠤᠮ ᠢ᠋ 《那达慕》 ᠭᠡᠬᠦ ᠮᠡᠲᠦ ᠪᠡᠷ ᠠᠪᠢᠶᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠭᠠ ᠬᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠳᠠᠭ᠃ ᠴᠠᠭᠠᠨ ᠰᠦᠯᠳᠡ ᠪᠣᠯ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠪᠠ ᠠᠷᠠᠰᠤᠲᠠᠨ ᠤ᠋ ᠰᠣᠶᠣᠯ ᠤ᠋ᠨ ᠲᠡᠦᠬᠡᠨ ᠳᠡᠭᠡᠷᠡ ᠪᠠᠢᠳᠠᠭ ᠦᠭᠡᠢ ᠪᠣᠳᠠᠰ ᠤ᠋ᠨ ᠨᠡᠷᠡ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠴᠠᠭᠠᠨ ᠰᠦᠯᠳᠡ ᠶ᠋ᠢ 《查干苏勒德》 ᠭᠡᠵᠦ ᠯᠡ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠵᠤ᠂ ᠴᠠᠭᠠᠨ ᠰᠦᠯᠳᠡ ᠶ᠋ᠢ ᠴᠠᠭᠠᠨ ᠰᠦᠯᠳᠡ ᠭᠡᠰᠡᠨ ᠥᠪᠡᠷ ᠤᠨ ᠨᠡᠷᠡ ᠪᠡᠷ ᠨᠢ ᠪᠤᠰᠤᠳ ᠲᠤ᠌ ᠲᠠᠨᠢᠯᠴᠠᠭᠤᠯᠬᠤ ᠬᠡᠷᠡᠭᠲᠡᠢ᠃ ᠬᠠᠷᠠ᠂ ᠰᠦᠯᠳᠡ ᠪᠠ ᠠᠯᠠᠭ ᠰᠦᠯᠳᠡ ᠳ᠋ᠦ᠍ ᠡᠢᠮᠦᠷᠬᠦᠦ ᠪᠠᠢᠳᠠᠯ ᠣᠷᠣᠰᠢᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠮᠥᠨ ᠲᠡᠭᠦᠨ ᠳ᠋ᠦ᠍ ᠪᠠᠰᠠ ᠠᠪᠢᠶᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠭᠠ ᠬᠢᠪᠡᠯ ᠵᠣᠬᠢᠨᠠ᠃ ᠲᠤᠬᠠᠢᠯᠠᠪᠠᠯ《哈日苏勒德᠂ 阿拉格苏勒德》 ᠭᠡᠬᠦ ᠮᠡᠲᠦ᠃
ᠵᠡᠭᠦᠯᠲᠡ
① ᠬᠢᠮᠡᠯ ᠳᠦᠷᠢ ᠪᠣᠯ ᠭᠢᠯᠣᠪᠠᠷ᠂ ᠴᠠᠷᠠ᠂ ᠮᠠᠨᠵᠢᠯᠭᠠ ᠪᠣᠯᠤᠨ ᠰᠢᠯᠪᠢ ᠵᠡᠷᠭᠡ ᠪᠦᠲᠦᠴᠡ ᠡᠳ᠋ ᠢ᠋ ᠤᠭᠰᠠᠷᠠᠭᠤᠯᠵᠤ ᠪᠦᠲᠦᠭᠡᠭᠰᠡᠨ ᠴᠠᠭᠠᠨ ᠰᠦᠯᠳᠡ ᠶ᠋ᠢᠨ ᠳᠦᠷᠢ ᠶ᠋ᠢ ᠵᠢᠭᠠᠵᠤ ᠪᠠᠢᠨᠠ᠃
2011 ᠣᠨ ᠤ᠋7 ᠰᠠᠷᠠ
【ᠵᠣᠬᠢᠶᠠᠯ ᠤ᠋ᠨ ᠲᠠᠨᠢᠯᠴᠠᠭᠤᠯᠭᠠ】 ᠲᠤᠰ ᠵᠣᠬᠢᠶᠠᠯ ᠢ᠋《ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠵᠢᠯ ᠮᠡᠷᠭᠡᠵᠢᠯ ᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠡᠳᠬᠦᠯ》 ᠦ᠋ᠨ2012 ᠣᠨ ᠤ᠋ ᠬᠣᠶᠠᠳᠤᠭᠠᠷ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠨᠡᠢᠲᠡᠯᠡᠪᠡ᠃
ᠵᠣᠬᠢᠶᠠᠭᠴᠢ