ᠵᠠᠬᠢᠶᠠ-ᠮᠠᠨᠳᠤᠬᠤ ᠪᠠᠭᠰᠢ ᠶ᠋ᠢᠨ ᠤᠷᠠᠨ ᠪᠢᠴᠢᠯᠭᠡZakhiaЗахиа
170ᠵᠠᠬᠢᠶᠠ
ᠦᠭᠡ᠂ᠠᠶᠠ ᠄ ᠮᠡᠷᠭᠡᠨᠪᠠᠭᠠᠲᠤᠷ
ᠤᠯᠤᠰ ᠲᠦᠮᠡᠨ ᠢ᠋ ᠱᠠᠭᠰᠢᠭᠤᠯᠤᠭᠰᠠᠨ
ᠤᠷᠠᠨ ᠭᠠᠷ ᠲᠠᠢ ᠲᠥᠷᠥᠯᠡ ᠴᠦ᠍ ᠭᠡᠰᠡᠨ
ᠤᠷᠠᠩᠬᠠᠢ ᠳᠡᠪᠡᠯ ᠢ᠋ ᠮᠢᠨᠢ ᠨᠥᠬᠥᠵᠦ ᠥᠭᠭᠦᠭᠰᠡᠨ
ᠡᠵᠢ ᠡᠴᠡ ᠲᠥᠷᠥᠭᠰᠡᠨ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠶᠠ᠃
ᠠᠪᠤᠷᠭᠤ ᠶ᠋ᠢᠨ ᠲᠠᠢᠵᠠᠨ ᠳ᠋ᠤ᠌ ᠬᠠᠩᠬᠠᠢᠭᠠᠳ
ᠠᠯᠲᠠᠨ ᠮᠧᠲ᠋ᠠᠯ ᠵᠡᠭᠦᠯᠡ ᠴᠦ᠍ ᠭᠡᠰᠡᠨ
ᠠᠷᠤᠬᠠᠨ ᠨᠢᠷᠤᠭᠤᠨ ᠳ᠋ᠠᠭᠠᠨ ᠡᠭᠦᠷᠴᠦ ᠶᠠᠪᠤᠭᠰᠠᠨ
ᠠᠪᠤ ᠠ᠋ᠴᠠ ᠵᠠᠶᠠᠭᠠᠭᠰᠠᠨ ᠢ᠋ᠶ᠋ᠠᠨ ᠪᠤᠤ ᠮᠠᠷᠲᠠᠶᠠ᠃
ᠲᠦᠮᠡᠨ ᠣᠯᠠᠨ ᠢ᠋ ᠪᠠᠬᠠᠳᠤᠭᠤᠯᠤᠭᠰᠠᠨ
ᠲᠥᠷᠥ ᠶ᠋ᠢᠨ ᠳᠠᠭᠤᠴᠢᠨ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ
ᠲᠣᠢᠭ ᠤ᠋ᠨ ᠳᠠᠭᠤᠤ ᠪᠠᠨ ᠠᠶᠠᠯᠤᠭᠰᠠᠨ
ᠡᠵᠢ ᠡᠴᠡ ᠲᠥᠷᠥᠭᠰᠡᠨ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠶᠠ᠃
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠳᠣᠩᠰᠣᠯᠭᠠᠭᠰᠠᠨ
ᠠᠪᠤᠷᠭᠤ ᠬᠦᠴᠦᠲᠡᠨ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ
ᠠᠷᠳᠠᠭ ᠳᠣᠭᠰᠢᠨ ᠢ᠋ ᠰᠤᠷᠭᠠᠳᠠᠭ
ᠠᠪᠤ ᠠ᠋ᠴᠠ ᠵᠠᠶᠠᠭᠠᠭᠰᠠᠨ ᠢ᠋ᠶ᠋ᠠᠨ ᠪᠤᠤ ᠮᠠᠷᠲᠠᠶᠠ᠃
ᠨᠤᠲᠤᠭ ᠤ᠋ᠨ ᠠᠯᠤᠰ ᠲᠤ᠌ ᠶᠠᠪᠤᠭᠠᠳ
ᠨᠥᠬᠥᠳ ᠣᠯᠠᠨ ᠲᠠᠨᠢᠯᠠ ᠴᠤ᠌ ᠭᠡᠰᠡᠨ
ᠨᠢᠰᠦ ᠨᠢ ᠬᠠᠲᠠᠭᠰᠠᠨ ᠬᠠᠨᠴᠤᠢ ᠲᠠᠢ
ᠪᠠᠭᠠ ᠶ᠋ᠢᠨ ᠠᠨᠳᠠ ᠪᠠᠨ ᠪᠤᠤ ᠮᠠᠷᠲᠠᠶᠠ᠃
ᠪᠢᠯᠢᠭ ᠡᠷᠳᠡᠮ ᠬᠣᠣᠰᠯᠠᠭᠰᠠᠨ
ᠪᠢᠴᠢᠭ ᠦ᠋ᠨ ᠮᠡᠷᠭᠡᠳ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ
ᠪᠢᠷ ᠦ᠋ᠨ ᠨᠤᠨᠲᠠᠭ ᠲᠤ᠌ ᠪᠤᠭᠤᠷᠤᠯᠲᠤᠭᠰᠠᠨ
ᠪᠠᠭᠰᠢ ᠶ᠋ᠢᠨ ᠬᠠᠢᠷᠠ ᠪᠠᠨ ᠪᠤᠤ ᠮᠠᠷᠲᠠᠶᠠ᠃
ᠠᠪᠳᠠᠷᠠ ᠳᠦᠭᠦᠷᠡᠩ ᠡᠷᠳᠡᠨᠢᠰ ᠲᠡᠢ
ᠪᠠᠶᠠᠨ ᠲᠠᠩᠰᠤᠭ ᠶᠠᠪᠤᠯᠠ ᠴᠤ᠌ ᠭᠡᠰᠡᠨ
ᠠᠯᠵᠢᠶᠠᠵᠤ ᠵᠣᠪᠠᠬᠤ ᠳ᠋ᠤ᠌ ᠲᠤᠰᠠᠯᠠᠭᠰᠠᠨ
ᠠᠴᠢᠲᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠶᠠ᠃
ᠠᠯᠲᠠᠨ ᠵᠢᠮᠰᠡᠭ ᠢ᠋ᠶ᠋ᠡᠷ ᠭᠣᠶᠣᠯᠠᠭᠰᠠᠨ
ᠭᠠᠩᠭᠠᠩ ᠠᠪᠠᠬᠠᠢ ᠣᠯᠠᠨ ᠴᠤ᠌ ᠭᠡᠰᠡᠨ
ᠠᠢᠯ ᠭᠡᠷ ᠢ᠋ ᠴᠢᠨᠢ ᠥᠭᠡᠳᠡᠯᠡᠭᠦᠯᠦᠭᠰᠡᠨ
ᠠᠮᠠᠷᠠᠭ ᠬᠠᠨᠢ ᠪᠠᠨ ᠪᠤᠤ ᠮᠠᠷᠲᠠᠶᠠ᠃
ᠠᠶᠠᠯᠤᠨ ᠳᠠᠭᠤᠯᠠᠬᠤ ᠳ᠋ᠤ᠌ ᠤᠷᠮᠠᠲᠠᠢ
ᠰᠠᠢᠬᠠᠨ ᠳᠠᠭᠤᠤ ᠨᠤᠭᠤᠳ ᠣᠯᠠᠨ ᠴᠤ᠌ ᠭᠡᠰᠡᠨ
ᠠᠭᠲᠠ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠠᠮᠢᠯᠠᠭᠰᠠᠨ
ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠪᠤᠤ ᠮᠠᠷᠲᠠᠶᠠ᠃
ᠤᠯᠤᠰ ᠭᠦᠷᠦᠨ ᠢ᠋ ᠵᠠᠬᠢᠷᠤᠭᠰᠠᠨ
ᠲᠥᠷᠥ ᠶ᠋ᠢᠨ ᠲᠡᠷᠢᠭᠦᠲᠡᠨ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ
ᠠᠤᠭᠠ ᠬᠦᠴᠦᠨ ᠢ᠋ ᠣᠯᠭᠣᠭᠰᠠᠨ
ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠶᠠ᠃
ᠨᠣᠶᠠᠨ ᠵᠢᠩᠰᠡ ᠶ᠋ᠢ ᠨᠢ ᠵᠡᠭᠦᠭᠡᠳ
ᠨᠤᠲᠤᠭ ᠤ᠋ᠨ ᠡᠷᠬᠢᠮᠲᠡᠨ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ
ᠨᠣᠮᠣᠬᠠᠨ ᠰᠢᠳᠤᠷᠭᠤ ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ
ᠠᠷᠢᠭᠤᠨ ᠬᠥᠯᠥᠰᠥ ᠶ᠋ᠢ ᠨᠢ ᠬᠠᠢᠷᠠᠯᠠᠵᠤ ᠶᠠᠪᠤ ᠳᠠ᠃
ᠠᠷᠤ ᠶ᠋ᠢᠨ ᠡᠭᠦᠳᠡ ᠪᠡᠷ ᠭᠦᠶᠦᠭᠴᠢ ᠶ᠋ᠢᠨ
ᠠᠷᠭᠠ ᠮᠡᠬᠡᠨ ᠳ᠋ᠦ᠍ ᠠᠪᠲᠠᠯᠠ ᠦᠭᠡᠢ
ᠠᠰᠢᠭ ᠣᠯᠵᠠ ᠠ᠋ᠴᠠ ᠰᠠᠯᠤᠰᠬᠢᠨ ᠪᠠᠢᠵᠤ
ᠠᠯᠳᠠᠷ ᠬᠦᠨᠳᠦ ᠪᠡᠨ ᠬᠠᠮᠠᠭᠠᠯᠠᠵᠤ ᠶᠠᠪᠤ ᠳᠠ᠃
ᠢᠨᠢᠶᠡᠵᠦ ᠶᠠᠪᠤᠳᠠᠭ ᠠᠬᠠ ᠳᠡᠭᠦᠦ ᠴᠢᠨᠢ
ᠦᠨᠡᠨ ᠨᠥᠬᠥᠷ ᠴᠢᠨᠢ ᠪᠢᠰᠢ ᠪᠠᠢᠵᠤ ᠮᠡᠳᠡᠨᠡ
ᠢᠯᠡ ᠦᠭᠡᠢ ᠳᠠᠯᠳᠠ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ
ᠨᠢᠳᠦ ᠦᠭᠡᠢ ᠰᠤᠮᠤ ᠶ᠋ᠢ ᠬᠠᠷᠪᠤᠵᠤ ᠮᠡᠳᠡᠨᠡ᠃
ᠮᠠᠭᠲᠠᠭᠠᠯ ᠥᠭᠳᠡᠭ ᠠᠮᠠᠨ ᠪᠦᠬᠦᠨ
ᠮᠠᠭᠠᠳ ᠢᠷᠦᠭᠡᠯ ᠪᠢᠰᠢ ᠪᠠᠢᠵᠤ ᠮᠡᠳᠡᠨᠡ
ᠮᠠᠯᠠᠭᠠᠢ ᠵᠢᠩᠰᠡ ᠶ᠋ᠢ ᠴᠢᠨᠢ ᠬᠡᠢᠰᠬᠡᠭᠡᠳ
ᠮᠠᠨᠠᠨ ᠰᠠᠯᠬᠢᠨ ᠳ᠋ᠤ᠌ ᠪᠥᠮᠪᠥᠢᠵᠦ ᠮᠡᠳᠡᠨᠡ᠃
ᠢᠳᠡᠭᠡᠨ ᠪᠦᠬᠦᠨ ᠡᠴᠡ ᠠᠷᠢᠭᠤᠬᠠᠨ
ᠠᠢᠷᠠᠭ ᠲᠠᠷᠠᠭ ᠴᠠᠯᠭᠢᠵᠤ ᠪᠠᠢᠬᠤ ᠪᠠᠷ
ᠢᠰᠬᠦᠯᠡᠩ ᠭᠠᠰᠢᠭᠤᠨ ᠠᠮᠲᠠᠲᠠᠢ
ᠠᠷᠢᠬᠢ ᠳᠠᠷᠠᠰᠤ ᠪᠠᠷ ᠤᠮᠳᠠᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃
ᠡᠮᠵᠢᠶᠡᠷᠢ ᠵᠠᠬᠠ ᠨᠢ ᠲᠣᠳᠣᠷᠬᠠᠢ
ᠡᠯᠪᠡᠭ ᠳᠡᠪᠡᠯ ᠴᠢᠨᠢ ᠭᠣᠶᠣᠬᠠᠨ ᠪᠠᠢᠬᠤ ᠪᠠᠷ
ᠡᠩᠭᠡᠷ ᠬᠣᠷᠮᠣᠢ ᠨᠢ ᠰᠡᠲᠡᠷᠬᠡᠢ
ᠡᠯᠳᠡᠪ ᠦ᠋ᠨ ᠪᠥᠰ ᠢ᠋ᠶ᠋ᠡᠷ ᠶᠠᠩᠵᠤᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃
ᠬᠠᠷᠢ ᠶ᠋ᠢᠨ ᠭᠦᠷᠦᠨ ᠦ᠌ ᠠᠭᠤᠯᠠᠰ ᠨᠢ
ᠬᠡᠴᠢᠨᠡᠨ ᠭᠣᠶᠣᠬᠠᠨ ᠪᠠᠢᠯᠠ ᠴᠤ᠌ ᠭᠡᠰᠡᠨ
ᠬᠠᠮᠤᠭ ᠤ᠋ᠨ ᠠᠩᠬᠠᠨ ᠳ᠋ᠤ᠌ ᠭᠢᠰᠬᠢᠭᠰᠡᠨ
ᠠᠯᠲᠠᠨ ᠰᠢᠷᠣᠢ ᠪᠠᠨ ᠪᠤᠤ ᠮᠠᠷᠲᠠᠶᠠ᠃
ᠪᠤᠯᠠᠭ ᠤ᠋ᠨ ᠤᠰᠤ ᠰᠢᠭ᠋ ᠪᠤᠷᠭᠢᠯᠤᠭᠰᠠᠨ
ᠪᠤᠰᠤᠳ ᠤ᠋ᠨ ᠬᠡᠯᠡ ᠨᠢ ᠤᠷᠤᠰᠤᠮᠠ ᠴᠤ᠌ ᠭᠡᠰᠡᠨ
ᠪᠣᠮᠠᠨ ᠰᠤᠳᠤᠷ ᠲᠤ᠌ ᠭᠠᠭᠴᠠᠬᠠᠨ ᠪᠣᠰᠤᠭᠠ
ᠡᠬᠡ ᠬᠡᠯᠡ ᠪᠡᠨ ᠪᠤᠤ ᠮᠠᠷᠲᠠᠶᠠ᠃
ᠠᠯᠤᠰ ᠤ᠋ᠨ ᠭᠠᠵᠠᠷ ᠢ᠋ ᠠᠪᠴᠢᠭᠤᠯᠳᠠᠭ
ᠬᠦᠷᠳᠦᠲᠦ ᠮᠠᠰᠢᠨ ᠬᠤᠷᠳᠤᠨ ᠴᠤ᠌ ᠭᠡᠰᠡᠨ
ᠠᠽᠢᠶᠠ ᠧᠦ᠋ᠷᠣᠫᠠ ᠶ᠋ᠢ ᠲᠤᠭᠤᠯᠵᠤ ᠶᠠᠪᠤᠭᠰᠠᠨ
ᠠᠵᠢᠨᠠᠢ ᠬᠦᠯᠦᠭ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠶᠠ᠃
ᠪᠤᠷᠤᠭᠤ ᠵᠥᠪ ᠦᠭᠡᠢ ᠮᠡᠷᠭᠡᠯᠡᠭᠰᠡᠨ
ᠪᠤᠰᠤᠳ ᠤ᠋ᠨ ᠭᠠᠢᠬᠠᠮᠰᠢᠭ ᠰᠣᠨᠢᠨ ᠴᠤ᠌ ᠭᠡᠰᠡᠨ
ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠪᠦᠲᠦᠭᠡᠭᠰᠡᠨ
ᠪᠤᠭᠤᠷᠤᠯ ᠲᠡᠦᠬᠡ ᠪᠡᠨ ᠪᠤᠤ ᠮᠠᠷᠲᠠᠶᠠ
ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠪᠦᠲᠦᠭᠡᠭᠰᠡᠨ
ᠪᠤᠭᠤᠷᠤᠯ ᠲᠡᠦᠬᠡ ᠪᠡᠨ ᠪᠤᠤ ᠮᠠᠷᠲᠠᠶᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠲᠣᠭᠣᠰ
ᠬᠢᠨᠠᠭᠴᠢ᠄ ᠤᠤᠭᠠᠨᠵᠢᠳ