ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠲᠠᠪᠤ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -15
147ᠡᠳᠡ ᠶᠠᠭᠤ ᠪᠠᠷ ᠭᠢᠯᠠᠢᠪᠠ
ᠲᠡᠷᠡ ᠸᠡᠭᠳᠡᠨ ᠭᠡᠬᠦ ᠶᠦᠮ ᠤᠤ᠂ ᠡᠰᠡᠪᠡᠯ ᠰᠠᠢᠳ ᠨᠣᠶᠠᠨᠲᠠᠨ ᠣᠷᠣᠰ ᠣᠷᠣᠬᠤ ᠪᠠᠷ ᠬᠣᠢᠰᠢ ᠮᠣᠷᠢᠯᠠᠨ ᠠᠢᠰᠤᠢ ᠭᠡᠨᠡ ᠭᠡᠳᠡᠭ ᠰᠤᠷᠠᠭ ᠢ᠋ᠶ᠋ᠠᠷ ᠥᠭᠡᠯᠦᠯᠭᠡ ᠡᠴᠡ ᠪᠤᠰᠤᠳ ᠨᠢ ᠴᠥᠮ ᠤᠭᠲᠤᠨ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠰᠥᠬᠥᠷᠡᠨ ᠰᠠᠭᠤᠵᠤ ᠬᠦᠯᠢᠶᠡᠨᠡ᠃ ᠲᠥᠷᠥ ᠶ᠋ᠢᠨ ᠳᠡᠭᠡᠳᠦ ᠠᠯᠪᠠᠨ ᠤ᠋ ᠲᠡᠷᠡ ᠬᠥᠮᠦᠰ ᠨᠢ ᠠᠷᠤ ᠳ᠋ᠠᠭᠠᠨ ᠬᠢᠶᠡ ᠳᠠᠭᠠᠭᠤᠯ ᠤ᠋ᠳ ᠲᠠᠢ ᠵᠤᠤᠵᠠ ᠪᠠᠷ ᠶᠤᠮ ᠤᠤ᠂ ᠡᠰᠡᠪᠡᠯ ᠰᠡᠦᠬᠡ ᠲᠡᠷᠭᠡ ᠲᠡᠢ ᠬᠠᠢᠪᠠᠩ ᠳᠠᠢᠪᠠᠩ ᠨᠠᠮᠪᠠᠭᠠᠨᠠᠨ ᠥᠩᠭᠡᠷᠡᠨᠡ᠃ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠨᠢᠭᠡ ᠬᠢᠶᠡ ᠨᠢ ᠪᠤᠴᠠᠨ ᠳᠠᠪᠬᠢᠵᠤ ᠢᠷᠡᠨ《ᠲᠠ ᠨᠠᠷ ᠶᠠᠭᠤᠨ ᠤᠯᠤᠰ ᠪᠣᠢ? ᠶᠠᠭᠤᠨ ᠤ᠋ ᠤᠴᠢᠷ ᠡᠵᠡᠨᠲᠡᠨ ᠦ᠌ ᠵᠠᠮ ᠲᠤᠰᠪᠠ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠥᠭᠡᠳᠦᠭᠦᠯᠡ᠄
— ᠵᠠ ᠪᠢᠳᠡ᠁ ᠭᠡᠵᠦ ᠦᠭᠡ ᠪᠡᠨ ᠡᠬᠢᠯᠡᠨ ᠬᠠᠮᠢᠭᠠᠬᠢ ᠶ᠋ᠢᠨ ᠬᠥᠮᠦᠰ ᠪᠣᠯᠬᠤ ᠪᠠᠨ ᠥᠭᠦᠯᠡᠭᠡᠳ《ᠡᠵᠡᠨᠲᠡᠨ ᠳ᠋ᠦ᠍ ᠬᠡᠰᠢᠭ ᠬᠠᠢᠷᠠᠯᠠᠬᠤ ᠶ᠋ᠢ ᠠᠢᠯᠠᠳᠤᠨᠠ ᠤᠤ》 ᠭᠡᠬᠦ ᠳ᠋ᠦ᠍ ᠬᠢᠶᠡ ᠳᠠᠪᠬᠢᠨ ᠣᠳᠤᠨᠠ᠃ ᠲᠡᠭᠡᠭᠡᠳ ᠮᠠᠷᠭᠠᠰᠢ ᠨᠢ ᠶᠦᠮ ᠤᠤ ᠡᠰᠡᠪᠡᠯ ᠲᠡᠷᠡ ᠣᠷᠣᠢ ᠳ᠋ᠠᠭᠠᠨ《ᠡᠵᠡᠨᠲᠡᠨ ᠲᠠ ᠨᠠᠷ ᠲᠤ ᠬᠣᠶᠠᠷ ᠬᠥᠮᠦᠨ ᠦ᠌ ᠳᠤᠮᠳᠠ ᠨᠢᠭᠡ ᠦᠬᠡᠷ ᠦ᠋ᠨ ᠭᠡᠳᠡᠰᠦ ᠳᠣᠲᠣᠷᠠ ᠡᠰᠡᠪᠡᠯ ᠬᠥᠮᠦᠨ ᠳᠣᠳᠣᠮ ᠳ᠋ᠤ᠌ ᠬᠣᠨᠢᠨ ᠤ᠋ ᠭᠡᠳᠡᠰᠦ ᠬᠠᠢᠷᠠᠯᠠᠬᠤ ᠪᠠᠷ ᠬᠡᠰᠢᠭ ᠪᠠᠭᠤᠯᠭᠠᠪᠠ》 ᠭᠡᠵᠦ ᠵᠠᠷ ᠢᠷᠡᠨᠡ᠃
ᠲᠡᠷᠡ ᠪᠦᠬᠦᠨ ᠳᠡᠭᠡᠷᠡ ᠥᠭᠡᠯᠦᠯᠭᠡ ᠶ᠋ᠢᠨ ᠬᠢᠨ ᠪᠠᠶᠠᠷᠯᠠᠨᠠ᠃ ᠬᠠᠭᠠᠰ ᠥᠷᠲᠡᠭᠡ ᠭᠠᠷᠤᠢ ᠵᠠᠢ ᠲᠠᠢ ᠬᠢᠶᠠᠭᠲᠤ ᠣᠷᠣᠨ᠂ ᠮᠠᠯ ᠨᠢᠳᠤᠯᠭᠠᠨ ᠤ᠋ ᠭᠠᠵᠠᠷ ᠣᠴᠢᠨ ᠤᠭ ᠬᠡᠰᠢᠭ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠡᠭᠦᠷᠭᠡᠯᠡᠨ ᠢᠨᠢᠶᠡᠯᠳᠦᠨ ᠪᠤᠴᠠᠵᠤ ᠢᠷᠡᠨᠡ᠃
ᠨᠠᠮᠤᠷ ᠤ᠋ᠨ ᠤᠯᠠᠷᠢᠯ ᠥᠩᠭᠡᠷᠡᠵᠦ ᠬᠦᠢᠲᠡᠨ ᠰᠡᠷᠢᠭᠦᠨ ᠵᠠᠯᠭᠠᠨ ᠢᠷᠡᠬᠦ ᠳ᠋ᠦ᠍ ᠴᠥᠮ ᠭᠠᠭᠴᠠ ᠰᠢ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠴᠢᠭᠴᠢᠡᠯᠳᠤᠨ ᠬᠣᠷᠭᠣᠳᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠯᠠ᠃ ᠵᠤᠤᠬᠠ ᠶᠠᠩᠳᠤᠩ ᠤ᠋ᠨ ᠵᠦᠢᠯ ᠬᠠᠮᠢᠭᠠ ᠪᠠᠢᠬᠤ ᠪᠢᠯᠡ᠃ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠭᠠᠯ ᠢ᠋ ᠬᠤᠪᠢ ᠬᠤᠪᠢ ᠳ᠋ᠠᠭᠠᠨ ᠵᠠᠳᠠᠭᠠᠢ ᠲᠦᠯᠡᠬᠦ ᠤᠴᠢᠷ ᠪᠠᠢᠰᠢᠩ ᠳᠦᠭᠦᠷᠡᠩ ᠮᠠᠢ᠃ ᠨᠠᠷᠠᠰᠤᠨ ᠮᠣᠳᠣᠨ ᠤ᠋ ᠤᠲᠤᠭᠠ ᠭᠠᠰᠢᠭᠤᠨ ᠪᠣᠯᠤᠭᠠᠳ ᠬᠦ ᠲᠣᠷᠲᠣᠭ ᠨᠢ ᠬᠢᠵᠠᠭᠠᠷ ᠦᠭᠡᠢ᠃ ᠥᠬᠡᠯᠦᠯᠭᠡ ᠶ᠋ᠢᠨ ᠭᠡᠷ ᠪᠦᠯᠢ ᠲᠠᠢᠵᠠᠨ ᠤ᠋ ᠠᠷᠤ ᠶ᠋ᠢᠨ ᠰᠢᠴᠢᠳ ᠦ᠋ᠨ ᠬᠤᠪᠴᠠᠰᠤᠯᠠᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠲᠤᠰᠬᠠᠢ ᠲᠠᠰᠤᠯᠭᠠᠨ ᠳ᠋ᠤ᠌《ᠮᠡᠩᠭᠡᠲᠦ》 ᠬᠡᠮᠡᠬᠦ ᠬᠥᠮᠦᠨ ᠦ᠌ ᠭᠡᠷ ᠪᠦᠯᠢ ᠲᠡᠢ ᠨᠡᠢᠯᠡᠨ ᠰᠠᠭᠤᠬᠤ ᠪᠣᠯᠪᠠᠴᠤ ᠬᠠᠭᠠᠯᠭᠠ ᠬᠠᠲᠠᠪᠴᠢ ᠪᠠᠷ ᠨᠢ ᠭᠠᠰᠢᠭᠤᠨ ᠤᠲᠤᠭᠠ ᠨᠡᠪᠲᠡᠷᠡᠨ ᠣᠷᠣᠵᠤ ᠢᠷᠡᠨᠡ᠃ ᠲᠡᠷᠡ ᠳᠤᠮᠳᠠ ᠥᠭᠡᠯᠦᠯᠭᠡ ᠶᠣᠰᠣᠲᠠᠢ ᠯᠠ ᠳᠠᠯᠠᠪᠴᠢ ᠬᠤᠭᠤᠷᠠᠨ ᠭᠠᠵᠠᠷ ᠤᠨᠠᠭᠰᠠᠨ ᠪᠦᠷᠭᠦᠳ ᠰᠢᠭ ᠭᠤᠳᠤᠷᠠᠨ ᠰᠠᠭᠤᠨᠠ᠃ ᠴᠢᠬᠢᠨ ᠳ᠋ᠦ᠍ᠨᠢ ᠥᠯᠥᠰᠬᠦᠯᠡᠩ ᠪᠠᠭᠠᠴᠤᠳ ᠤ᠋ᠨ ᠤᠬᠢᠯᠠᠬᠤ᠂ ᠡᠮᠡᠭᠡᠳ ᠬᠥᠭᠰᠢᠳ ᠦ᠋ᠨ ᠭᠠᠰᠠᠯᠠᠩ ᠭᠠᠩᠭᠢᠨᠠᠭᠠ ᠲᠠᠰᠤᠷᠠᠯᠲᠠ ᠦᠭᠡᠢ ᠰᠣᠨᠣᠰᠳᠠᠨᠠ᠃
ᠨᠢᠭᠡ ᠡᠳᠦᠷ ᠤᠷᠢᠳ ᠡᠮᠦᠨᠡ ᠦᠵᠡᠭᠳᠡᠭᠡ ᠦᠭᠡᠢ ᠥᠴᠦᠬᠡᠨ ᠠᠮᠢᠲᠠᠨ ᠤ᠋ ᠤᠬᠢᠯᠠᠬᠤ ᠰᠣᠨᠣᠰᠳᠠᠪᠠ᠃ ᠡᠨᠡ ᠶᠠᠭᠤ ᠪᠣᠢ? ᠬᠥᠮᠦᠨ! ᠰᠢᠨᠡ ᠬᠥᠮᠦᠨ᠃ ᠢᠩᠭᠢᠵᠦ ᠶᠠᠳᠠᠷᠠᠯ ᠵᠦᠳᠡᠭᠦᠷᠡᠯ ᠦ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠰᠠ ᠡᠷᠡ ᠲᠥᠷᠥᠵᠦ ᠪᠠᠢᠨᠠ᠃ ᠬᠡᠨ ᠡᠴᠡ ᠲᠡᠷᠡ ᠪᠣᠢ? ᠠᠷᠪᠠᠨ ᠨᠠᠢ᠍ᠮᠠᠲᠠᠢ ᠥᠨᠥᠴᠢᠨ ᠥᠬᠢᠨ ᠡᠴᠡ᠃ ᠡᠴᠢᠭᠡ ᠨᠢ ᠬᠡᠨ ᠪᠣᠢ? ᠪᠠᠢᠬᠤ ᠦᠭᠡᠢ᠃ ᠳᠡᠭᠡᠳᠦ ᠦᠳᠡ ᠬᠣᠲᠠ ᠶ᠋ᠢᠨ ᠲᠡᠨᠳᠡ ᠬᠠᠯᠳᠠᠪᠤᠷᠢᠲᠤ ᠰᠢᠷᠦᠭᠦᠨ ᠲᠣᠮᠣᠭᠣ ᠪᠠᠷ ᠥᠩᠭᠡᠷᠡᠭᠰᠡᠨ᠃ ᠭᠡᠪᠡᠴᠦ ᠥᠭᠡᠯᠦᠯᠭᠡ ᠪᠠᠶᠠᠷᠯᠠᠪᠠ᠃ ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠣᠢ? ᠡᠷᠬᠡ ᠦᠭᠡᠢ ᠬᠥᠮᠦᠨ ᠪᠣᠯᠭᠠᠵᠤ ᠪᠣᠯᠤᠨᠠ ᠪᠠᠢᠬᠤ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠠᠵᠢ᠃ ᠡᠬᠡ ᠨᠢ ᠪᠠᠰᠠ ᠪᠠᠶᠠᠷ ᠲᠠᠢ ᠪᠠᠢᠨᠠ᠃ ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠣᠢ?! ᠡᠮᠡ ᠬᠥᠮᠦᠨ ᠬᠡᠦᠬᠡᠳ ᠲᠥᠷᠥᠭᠦᠯᠬᠦ ᠬᠤᠪᠢ ᠵᠠᠶᠠᠭᠠ ᠲᠠᠢ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠡᠩᠬᠦᠷᠡᠢᠯᠡᠨ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ ᠤᠴᠢᠷ ᠠ᠋ᠴᠠ ᠲᠡᠷᠡ! ᠥᠭᠡᠷᠡ ᠬᠡᠨ ᠴᠦ᠍ ᠪᠠᠶᠠᠷᠯᠠᠭᠰᠠᠨ ᠦᠭᠡᠢ᠃
ᠮᠠᠷᠭᠠᠰᠢ ᠨᠢ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠭᠠᠷᠤᠭᠰᠠᠨ ᠶᠡᠬᠡ ᠡᠯᠴᠢ ᠮᠣᠷᠢᠯᠠᠨ ᠢᠷᠡᠯᠡ᠃ ᠡᠯᠴᠢ ᠭᠤᠸᠠᠢ ᠶ᠋ᠢᠨ ᠵᠠᠩ ᠲᠤᠩ ᠰᠠᠢᠬᠠᠨ᠂ ᠤᠴᠠᠷᠠᠭᠰᠠᠨ ᠪᠦᠬᠦᠨ ᠲᠡᠢ ᠠᠮᠤᠷ ᠡᠷᠢᠨ ᠢᠨᠢᠶᠡᠮᠰᠦᠭᠯᠡᠨᠡ᠃ ᠡᠨᠡ ᠪᠣᠯ ᠡᠵᠡᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠡᠪᠦᠷᠯᠡᠭᠰᠡᠨ ᠬᠥᠮᠦᠨ ᠪᠥᠭᠡᠳ ᠤᠭ ᠵᠠᠷᠯᠢᠭ ᠨᠢ ᠪᠦᠷ ᠴᠦ᠍ ᠡᠨᠡᠷᠢᠩᠭᠦᠢ᠃ ᠡᠯᠴᠢ ᠪᠦᠭᠦᠳᠡ ᠶ᠋ᠢ ᠡᠮᠦᠨᠡ ᠪᠡᠨ ᠰᠥᠬᠥᠷᠡᠭᠦᠯᠦᠨ ᠰᠠᠭᠤᠯᠭᠠᠵᠤ ᠤᠩᠰᠢᠬᠤ ᠨᠢ ᠮᠠᠰᠢ ᠭᠠᠢᠬᠠᠯᠲᠠᠢ᠃ ᠥᠭᠡᠯᠦᠯᠭᠡ ᠶ᠋ᠢᠨ ᠬᠢᠨ ᠢ᠋ ᠬᠢᠶᠠᠭᠲᠤ ᠶ᠋ᠢᠨ ᠪᠠᠷᠠᠭᠤᠨ ᠬᠡᠰᠡᠭ ᠢ᠋ ᠬᠠᠷᠢᠭᠤᠴᠠᠨ ᠬᠠᠮᠠᠭᠠᠯᠠᠬᠤ ᠬᠣᠰᠢᠭᠤ ᠪᠣᠯᠭᠠᠨ ᠭᠠᠵᠠᠷ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠣᠳᠣ ᠥᠯᠥᠭᠡᠢ ᠲᠡᠢ ᠪᠠᠢᠭᠠ ᠠ᠋ᠴᠠ ᠠᠪᠤᠭᠠᠳ ᠳᠠᠯᠠ ᠨᠠᠶᠠ ᠬᠦᠷᠦᠭᠰᠡᠨ ᠭᠡᠪᠡᠴᠦ ᠢᠯᠭᠠᠭᠠ ᠦᠭᠡᠢ ᠡᠷᠡ ᠪᠦᠬᠦᠨ ᠳ᠋ᠦ᠍ ᠰᠠᠷᠠ ᠳ᠋ᠤ᠌ ᠠᠷᠪᠠᠨ ᠶᠠᠩᠴᠢᠶᠠᠨ ᠤ᠋ ᠴᠠᠯᠢᠩ ᠣᠯᠭᠣᠰᠤᠭᠠᠢ ᠭᠡᠵᠡᠢ᠃
ᠦᠭᠡᠢ ᠶᠡᠷᠦ ᠡᠨᠡ ᠦᠨᠡᠨ ᠤᠤ? ᠦᠨᠡᠨ᠃ ᠡᠯᠴᠢ ᠭᠤᠸᠠᠢ ᠡᠵᠡᠨ ᠦ᠌ ᠵᠠᠷᠯᠢᠬ ᠲᠤ ᠮᠥᠷᠭᠥᠵᠡᠭᠡ ᠭᠡᠵᠦ ᠮᠥᠷᠭᠥᠭᠦᠯᠦᠭᠡᠳ᠂ ᠲᠤᠯᠤᠮ ᠲᠠᠢ ᠮᠥᠩᠭᠥ ᠠᠪᠴᠢᠷᠠᠨ ᠵᠠᠷᠯᠢᠭ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢᠬᠢ ᠰᠠᠷᠠ ᠶ᠋ᠢᠨ ᠴᠠᠯᠢᠩ ᠭᠡᠵᠦ ᠠᠷᠪᠠ ᠠᠷᠪᠠ ᠪᠠᠷ ᠲᠣᠭᠠᠯᠠᠨ ᠡᠷᠡ ᠪᠦᠷᠢ ᠶ᠋ᠢᠨ ᠭᠠᠷ ᠳᠡᠭᠡᠷᠡ ᠲᠠᠯᠪᠢᠪᠠ᠃ ᠠᠷᠪᠠᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠶᠠᠳᠠᠷᠠᠭᠰᠠᠨ ᠠᠮᠢᠲᠠᠳ ᠲᠤ ᠬᠡᠴᠢᠨᠡᠭᠡᠨ ᠶᠡᠬᠡ ᠮᠥᠩᠭᠥ ᠪᠣᠢ? ᠠᠯᠠᠭᠠᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠨᠢ ᠲᠩᠷᠢ ᠶ᠋ᠢᠨ ᠨᠠᠷᠠᠨ ᠠᠯᠠᠭᠠᠨ ᠳ᠋ᠤ᠌ ᠣᠷᠣᠬᠤ ᠰᠢᠭ᠋᠃
ᠥᠴᠥᠭᠡᠳᠦᠷ ᠦ᠋ᠨ ᠭᠠᠷᠤᠭᠰᠠᠨ ᠮᠠᠨᠴᠤᠢ ᠲᠠᠢ ᠬᠡᠦᠬᠡᠳ ᠳᠡᠭᠡᠷᠡ ᠡᠯᠴᠢ ᠭᠤᠸᠠᠢ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠠᠷᠪᠠᠨ ᠶᠠᠩᠴᠢᠶᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠬᠡᠨ ᠡᠰᠡ ᠪᠠᠶᠠᠷᠯᠠᠬᠤ ᠪᠣᠢ? ᠬᠡᠨ ᠪᠠᠶᠠᠷ ᠤ᠋ᠨ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠪᠠᠨ ᠡᠰᠡ ᠲᠤᠰᠠᠯᠠᠭᠤᠯᠪᠠ᠃ ᠲᠡᠷᠡ ᠦᠭᠡᠢ ᠠ᠋᠃
ᠡᠵᠡᠨ ᠦ᠌ ᠵᠠᠷᠯᠢᠭ ᠲᠤ ᠪᠠᠰᠠ ᠥᠭᠡᠯᠦᠯᠭᠡ ᠶ᠋ᠢ ᠬᠣᠰᠢᠭᠤ ᠨᠣᠶᠠᠨ ᠡᠷᠭᠦᠮᠵᠢᠯᠡᠭᠡᠳ ᠰᠠᠷᠠ ᠪᠦᠷᠢ ᠲᠠᠪᠢᠨ ᠶᠠᠩᠴᠢᠶᠠᠨ ᠤ᠋ ᠴᠠᠯᠢᠩ ᠣᠯᠭᠣᠰᠤᠭᠠᠢ ᠭᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃
ᠡᠯᠴᠢ ᠥᠭᠡᠯᠦᠯᠭᠡ ᠳ᠋ᠦ᠍ ᠲᠠᠪᠢᠨ ᠶᠠᠩᠴᠢᠶᠠᠨ ᠭᠠᠷᠳᠠᠭᠤᠯᠤᠨ ᠥᠭᠭᠦᠭᠡᠳ᠄
— ᠨᠣᠶᠠᠨᠲᠠᠨ ᠲᠠ ᠡᠨᠡ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠪᠣᠭᠳᠠ ᠡᠵᠡᠨᠲᠡᠨ ᠳ᠋ᠦ᠍ ᠪᠠᠷᠠᠭᠠᠯᠬᠠᠵᠤ ᠵᠡᠷᠭᠡ ᠵᠢᠩᠰᠡ ᠬᠦᠯᠢᠶᠡᠨ ᠬᠦᠷᠲᠡᠨᠡ ᠰᠢᠦ ᠳᠡ ᠭᠡᠪᠡ᠃
ᠦᠭᠡᠯᠦᠯᠭᠡ《ᠵᠠ》 ᠭᠡᠳ ᠣᠴᠢᠨ ᠪᠠᠷᠠᠭᠠᠯᠬᠠᠬᠤ ᠳ᠋ᠤ᠌ ᠡᠮᠦᠰᠬᠦ ᠳᠡᠪᠡᠯ ᠬᠤᠪᠴᠠᠰᠤ ᠦᠭᠡᠢ ᠪᠡᠨ ᠪᠣᠳᠣᠵᠤ ᠪᠠᠢᠲᠠᠯᠠ᠄
— ᠪᠣᠭᠳᠠ ᠳ᠋ᠤ᠌ ᠪᠠᠷᠠᠭᠠᠯᠬᠠᠬᠤ ᠳ᠋ᠠᠭᠠᠨ ᠲᠠ ᠮᠠᠨᠳᠠᠯ ᠡᠷᠭᠦᠨᠡ ᠰᠢᠦ ᠳᠡ᠃
— ᠵᠠ ᠭᠡᠳ ᠮᠠᠨᠳᠠᠯ ᠡᠷᠭᠦᠬᠦ ᠳ᠋ᠦ᠍ ᠶᠠᠭᠤ ᠣᠷᠣᠳᠠᠭ ᠰᠠᠨ ᠪᠣᠯ?
— ᠵᠡᠷᠭᠡ ᠵᠢᠩᠰᠡ ᠬᠦᠯᠢᠶᠡᠵᠦ ᠬᠦᠷᠲᠡᠬᠦ ᠮᠠᠨᠳᠠᠯ ᠳᠠ 2500 ᠠ᠋ᠴᠠ ᠳᠣᠷᠣᠭᠰᠢ ᠦᠭᠡᠢ ᠶᠠᠩᠴᠢᠶᠠᠨ ᠪᠣᠯ ᠵᠦᠭᠡᠷ ᠰᠠᠨ ᠭᠡᠵᠦ ᠡᠯᠴᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠥᠭᠦᠯᠡᠪᠡ᠃ (2500!)᠂ ᠥᠭᠡᠯᠦᠯᠭᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠡᠭᠦᠯᠡ ᠮᠠᠨᠠᠨ ᠪᠣᠰᠬᠤ ᠰᠢᠭ᠋ ᠪᠣᠯᠬᠤ ᠪᠠᠯᠪᠠᠵᠤ《ᠵᠠ》 ᠭᠡᠯᠡ᠃
ᠭᠡᠪᠡᠴᠦ ᠥᠭᠡᠯᠦᠯᠭᠡ ᠣᠳᠣ ᠨᠣᠶᠠᠨ᠂ ᠬᠣᠲᠠᠯᠠ ᠬᠣᠰᠢᠭᠤ᠂ ᠭᠠᠵᠠᠷ ᠨᠤᠲᠤᠭ ᠶᠠᠭᠤᠮᠠ ᠪᠦᠬᠦᠨ ᠲᠡᠢ ᠶᠣᠰᠣᠲᠠᠢ ᠨᠣᠶᠠᠨ ᠪᠣᠯᠤᠭᠰᠠᠨ ᠤᠴᠢᠷ ᠮᠡᠬᠦᠢᠨ ᠰᠥᠭᠥᠳᠬᠦ ᠦᠭᠡᠢ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠬᠢᠶᠠᠭᠲᠤ ᠶ᠋ᠢᠨ ᠬᠡᠳᠦᠨ ᠪᠠᠶᠠᠨ ᠫᠦᠰᠡ ᠨᠤᠭᠤᠳ ᠲᠤᠰ ᠪᠦᠷᠢᠨᠡ ᠲᠦᠩᠰᠢᠯᠡᠬᠦ ᠶ᠋ᠢ ᠪᠣᠳᠣᠨ ᠲᠣᠯᠢᠭᠠᠨᠠᠵᠠᠭᠠᠬᠤ ᠪᠥᠭᠡᠳ ᠥᠭᠡᠯᠥᠯᠭᠡ ᠲᠡᠳᠡᠨ ᠡᠴᠡ ᠬᠡᠷᠡᠭᠯᠡᠭᠳᠡᠬᠦ ᠮᠥᠩᠭᠥ ᠶᠠᠩᠴᠢᠶᠠᠨ ᠵᠢᠭᠡᠯᠡᠨ ᠠᠪᠴᠤ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠭᠠᠯᠬᠠᠪᠠ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠰᠤ ᠦᠨᠳᠦᠰᠦᠲᠡᠨ ᠦ᠌ ᠭᠠᠷᠤᠯ ᠡᠭᠦᠰᠦᠯ ᠪᠠ ᠬᠠᠯᠬᠠ ᠣᠷᠣᠨ ᠢ᠋ ᠲᠡᠮᠡᠴᠡᠨ ᠢᠷᠡᠭᠰᠡᠨ ᠦ᠌ ᠪᠡᠨ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠠᠢᠯᠠᠳᠬᠠᠨ ᠮᠥᠷᠭᠥᠬᠦ ᠳ᠋ᠦ᠍ ᠪᠣᠭᠳᠠ ᠲᠡᠳᠦᠢ ᠯᠡ ᠣᠯᠠᠨ ᠴᠤ᠌ ᠶᠠᠭᠤᠮᠠ ᠠᠢᠯᠠᠳᠤᠭᠰᠠᠨ ᠦᠭᠡᠢ᠂《ᠵᠠ ᠪᠢ ᠮᠠᠨᠵᠤ ᠬᠢᠲᠠᠳ ᠤ᠋ᠨ ᠡᠰᠡᠷᠭᠦ ᠲᠡᠮᠡᠴᠡᠵᠦ ᠶᠠᠪᠤᠭᠠᠳ ᠡᠴᠦᠰ ᠲᠦ᠋ᠨᠢ ᠡᠨᠡ ᠦᠨᠳᠦᠰᠦ ᠤᠭᠰᠠᠭᠠ ᠨᠢᠭᠡᠲᠦ ᠬᠠᠯᠬᠠ ᠮᠣᠩᠭᠣᠯ ᠢ᠋ᠶ᠋ᠠᠨ ᠲᠡᠮᠡᠴᠡᠨ ᠢᠷᠡᠭᠰᠡᠨ ᠦ᠌ ᠴᠢᠨᠢ ᠬᠤᠪᠢ ᠳ᠋ᠤ᠌ ᠴᠢᠮᠠ ᠳ᠋ᠤ᠌ ᠢᠲᠡᠭᠡᠵᠦ ᠪᠠᠢᠨᠠ᠃ ᠣᠳᠣ ᠤᠷᠢᠳᠠ ᠵᠦᠭ ᠡᠴᠡ ᠪᠠᠬᠠᠨ ᠬᠢᠲᠠᠳ ᠬᠠᠷᠠ ᠴᠡᠷᠢᠭ ᠳᠤᠷᠠᠨ ᠤᠯᠤᠰ ᠤ᠋ᠨ ᠬᠢᠯᠢ ᠬᠢᠵᠠᠭᠠᠷ ᠢ᠋ ᠨᠡᠪᠲᠡᠷᠡᠨ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠨᠠ᠃ ᠪᠢ ᠴᠢᠮᠠ ᠳ᠋ᠤ᠌ ᠬᠡᠳᠦᠨ ᠵᠠᠭᠤᠨ ᠰᠢᠯᠢᠳᠡᠭ ᠴᠡᠷᠢᠭ ᠥᠭᠭᠦᠶᠡ᠂ ᠴᠢ ᠲᠡᠳᠡᠨ ᠢ᠋ ᠠᠪᠤᠨ ᠮᠣᠷᠳᠠᠵᠤ ᠲᠡᠷᠡ ᠬᠠᠷᠠ ᠴᠡᠷᠢᠭ ᠢ᠋ ᠰᠥᠨᠥᠭᠡ!》 ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠬᠤᠵᠢᠷᠪᠤᠯᠤᠩ ᠬᠡᠮᠡᠬᠦ ᠭᠠᠵᠠᠷ ᠬᠣᠶᠠᠷ ᠮᠢᠩᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠪᠠᠢᠭᠰᠠᠨ᠃ ᠲᠡᠳᠡ ᠠᠷᠠᠳ ᠲᠦᠮᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠲᠠᠲᠠᠭᠳᠠᠭᠰᠠᠨ ᠠᠦ᠋ᠲ᠋ᠣᠨᠣᠮᠢᠲᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠡᠬᠦ ᠪᠣᠯᠪᠠᠴᠤ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ᠂ ᠲᠣᠬᠣᠬᠤ ᠡᠮᠡᠭᠡᠯ ᠠᠮᠢ ᠬᠤᠪᠢ ᠶ᠋ᠢᠨ ᠪᠥᠭᠡᠳ ᠤᠷᠠᠩᠬᠠᠢ ᠨᠣᠣᠷᠠᠩᠬᠠᠢ᠃ ᠢᠳᠡᠬᠦ ᠬᠣᠭᠣᠯᠠ ᠶ᠋ᠢ ᠤᠯᠤᠰ ᠠ᠋ᠴᠠ ᠵᠠᠯᠭᠠᠭᠤᠯᠬᠤ ᠪᠣᠯᠪᠠᠴᠤ ᠲᠡᠷᠡ ᠨᠢ ᠪᠠᠢᠨ ᠪᠠᠢᠨ ᠲᠠᠰᠤᠷᠠᠨᠠ᠃ ᠡᠳᠡ ᠴᠣᠬᠣᠮ ᠶᠠᠭᠤ ᠪᠠᠢᠬᠤ ᠪᠣᠢ? ᠭᠡᠪᠡᠯ ᠥᠯᠥᠰᠬᠦᠯᠡᠩ᠂ ᠤᠢᠳᠬᠠᠷ ᠬᠣᠶᠠᠷ᠃ ᠥᠯᠥᠨ ᠰᠢᠷᠣᠢ᠂ ᠬᠤᠷᠴᠠ ᠨᠠᠷᠠ᠂ ᠰᠢᠷᠦᠭᠦᠨ ᠰᠠᠯᠬᠢ ᠵᠡᠷᠭᠡ ᠳ᠋ᠦ᠍ ᠢᠳᠡᠭᠳᠡᠨ ᠪᠤᠬᠢᠨᠢᠳᠤᠭᠰᠠᠨ ᠠᠮᠢᠲᠠᠳ᠃ ᠭᠠᠭᠴᠠᠬᠠᠨ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠬᠤ ᠭᠡᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠯᠡ ᠡᠨᠳᠡ ᠬᠣᠷᠭᠣᠳᠠᠨᠠ᠃ ᠲᠡᠢᠮᠦ ᠰᠡᠳᠬᠢᠯ ᠦᠭᠡᠢ ᠨᠢ ᠠᠯᠢ ᠬᠡᠳᠦᠢᠨ ᠣᠷᠭᠣᠭᠠᠳ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠵᠠᠢ᠃ ᠨᠢᠭᠡ ᠡᠳᠦᠷ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠡᠮᠡᠭᠡᠯ ᠬᠠᠵᠠᠭᠠᠷ ᠪᠠ ᠳᠡᠪᠡᠯ ᠬᠤᠪᠴᠠᠰᠤ ᠪᠦᠷᠢᠨ ᠲᠡᠢ ᠬᠥᠮᠦᠰ ᠢ᠋ ᠤᠷᠢᠳᠠ ᠵᠦᠭ ᠡᠴᠡ ᠬᠠᠯᠳᠠᠨ ᠢᠷᠡᠭᠰᠡᠨ ᠬᠢᠲᠠᠳ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠭᠤᠯᠬᠤ ᠪᠠᠷ ᠮᠣᠷᠳᠠᠭᠤᠯᠤᠨᠠ ᠭᠡᠵᠦ ᠵᠠᠷ ᠲᠠᠷᠠᠬᠤ ᠶ᠋ᠢ ᠲᠡᠳᠡ ᠠᠶᠤᠨ ᠰᠣᠴᠢᠬᠤ ᠪᠠᠷ ᠪᠢᠰᠢ᠂ ᠬᠠᠷᠢᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ᠋ᠶ᠋ᠠᠷ ᠤᠭᠲᠤᠨ ᠠᠪᠤᠭᠰᠠᠨ ᠪᠥᠭᠡᠳ ᠳᠠᠷᠤᠢ ᠭᠤᠷᠪᠠᠨ ᠵᠠᠭᠤᠨ ᠡᠷᠡᠰ ᠬᠦᠰᠡᠯ ᠰᠠᠨᠠᠯ ᠢᠯᠡᠷᠬᠡᠢᠯᠡᠭᠰᠡᠨ ᠢ᠋ ᠰᠢᠯᠭᠠᠨ ᠦᠵᠡᠪᠡᠯ ᠵᠠᠭᠤᠭᠠᠳ ᠨᠢ ᠬᠡᠷᠡᠭᠯᠡᠯ ᠳᠤᠲᠠᠮᠠᠭ ᠠᠵᠢ᠃ ᠥᠭᠡᠯᠦᠯᠭᠡ ᠲᠡᠨᠳᠡ ᠡᠴᠡ ᠬᠣᠶᠠᠷ ᠵᠠᠭᠤᠨ ᠰᠠᠢᠨ ᠡᠷᠡ ᠶ᠋ᠢ ᠰᠢᠯᠭᠠᠨ ᠠᠪᠴᠠᠢ᠃ ᠡᠳᠡᠨ ᠦ᠌ ᠳᠡᠭᠡᠷᠡ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠲᠡᠮᠡᠴᠡᠨ᠂ ᠦᠬᠦᠬᠦ ᠡᠴᠡ ᠪᠤᠰᠤᠳ ᠢ᠋ ᠪᠦᠷᠢᠨ ᠦᠵᠡᠭᠰᠡᠨ ᠳᠠᠯᠠᠭᠠᠳ ᠡᠷᠡᠰ ᠢ᠋ ᠨᠡᠢᠯᠡᠭᠦᠯᠦᠨ ᠪᠦᠬᠦ ᠴᠡᠷᠢᠭ ᠭᠤᠷᠪᠠᠨ ᠵᠠᠭᠤ ᠰᠢᠬᠠᠮ ᠪᠣᠯᠤᠭᠰᠠᠨ ᠤ᠋ ᠳᠣᠲᠣᠷᠠ ᠭᠣᠣᠵᠤᠤ ᠪᠠᠭᠠᠲᠤᠷ ᠣᠷᠣᠯᠴᠠᠵᠠᠢ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠥᠮᠦᠰ ᠡᠴᠡ ᠥᠭᠡᠯᠦᠯᠭᠡ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠠᠪᠴᠤ ᠶᠠᠪᠤᠭᠰᠠᠨ ᠤ᠋ ᠨᠢᠭᠡ ᠨᠢ ᠳᠠᠮᠫᠢᠯ ᠪᠢᠯᠡ᠃
1915 ᠣᠨ ᠤ᠋ ᠡᠪᠦᠯ ᠪᠠᠢᠯᠳᠤᠬᠤ ᠴᠡᠷᠢᠭ ᠲᠤᠩ ᠤ᠋ᠨ ᠶᠠᠩᠰᠢᠯᠲᠠ(ᠳᠠᠭᠤ) ᠪᠠᠷ ᠵᠢᠷᠭᠤᠭᠠ ᠵᠢᠷᠭᠤᠭᠠ ᠪᠠᠷ ᠡᠩᠨᠡᠨ ᠵᠢᠭᠰᠠᠵᠤ ᠠᠩᠬᠠ ᠬᠥᠳᠡᠯᠬᠦ ᠳ᠋ᠦ᠍ ᠠᠷᠤ ᠳ᠋ᠤᠨᠢ ᠦᠯᠡᠳᠡᠬᠦ ᠬᠠᠨᠢ ᠨᠥᠬᠥᠳ ᠭᠣᠯᠣᠭᠳᠠᠨ ᠬᠣᠴᠣᠷᠴᠤ ᠪᠠᠢᠭᠠ ᠳ᠋ᠠᠭᠠᠨ ᠰᠡᠳᠬᠢᠯ ᠭᠤᠲᠤᠷᠠᠬᠤ ᠪᠣᠯᠪᠠᠴᠤ ᠠᠰᠢᠳᠠ ᠶ᠋ᠢᠨ ᠪᠢᠯᠢᠭᠲᠦ ᠰᠠᠢᠨ ᠢ᠋ ᠢᠷᠥᠭᠡᠨ ᠱᠤᠤᠭᠢᠯᠳᠤᠬᠤ ᠨᠢ ᠶᠠᠪᠤᠭᠰᠠᠳ ᠤ᠋ᠨ ᠰᠡᠳᠬᠢᠯ ᠢ᠋ ᠨᠡᠩ ᠴᠤ᠌ ᠬᠥᠭᠵᠢᠭᠡᠪᠡ᠃ ᠲᠤᠤᠯᠠ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠭᠦᠷ ᠲᠡᠳᠡ ᠮᠣᠷᠢᠳ ᠢ᠋ᠶ᠋ᠠᠨ ᠬᠠᠯᠲᠤᠷᠢᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠭᠠᠷᠤᠭᠠᠳ ᠴᠠᠭᠠᠨᠠ ᠨᠢ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ᠂《ᠬᠠᠲᠤᠨ ᠡᠬᠡ ᠠᠬᠠᠢ ᠮᠢᠨᠢ᠂ ᠬᠠᠯᠠᠭᠤᠨ ᠠᠮᠢ ᠪᠦᠯᠢᠶᠡᠨ ᠴᠢᠰᠤ ᠶ᠋ᠢ ᠨᠢ ᠮᠡᠳᠡᠲᠦᠭᠡᠢ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃
ᠡᠳᠡ ᠪᠣᠯ ᠶᠣᠰᠣᠲᠠᠢ ᠡᠷᠡᠰ᠃ ᠬᠤᠵᠢᠷᠪᠤᠯᠤᠩ ᠳ᠋ᠤ᠌ ᠬᠣᠷᠢᠭᠳᠠᠨ ᠰᠠᠭᠤᠭᠰᠠᠨ ᠢ᠋ ᠨᠢ ᠬᠡᠯᠡᠪᠡᠯ ᠠᠭᠤᠯᠠ ᠶ᠋ᠢᠨ ᠪᠦᠷᠭᠦᠳ ᠭᠢᠨᠵᠢᠯᠡᠭᠳᠡᠨ ᠪᠣᠢᠯᠠᠭᠳᠠᠵᠤ ᠪᠠᠢᠭᠰᠠᠨ ᠤ᠋ ᠠᠳᠠᠯᠢ ᠲᠡᠨᠳᠡ ᠡᠴᠡ ᠠᠱ᠌ᠢᠭᠦᠢ ᠨᠢᠭᠡ ᠮᠤᠯᠲᠤᠷᠠᠨ ᠭᠠᠷᠤᠭᠰᠠᠨ ᠪᠣᠯ᠂ ᠭᠢᠨᠵᠢ ᠲᠠᠰᠤᠷᠠᠨ ᠠᠭᠠᠷ ᠲᠤ ᠬᠥᠭᠡᠷᠬᠦ ᠠᠳᠠᠯᠢ᠃ ᠭᠡᠪᠡᠴᠦ ᠪᠤᠢᠯᠠᠭᠰᠠᠨ ᠪᠦᠷᠭᠦᠳ ᠶᠠᠭᠤ ᠦᠵᠡᠭᠰᠡᠨ ᠤᠷᠤᠭᠤ ᠪᠠᠨ ᠳᠠᠭᠠᠷᠢᠬᠤ ᠠᠳᠠᠯᠢ ᠪᠢᠰᠢ᠂ ᠬᠠᠷᠢᠨ ᠠᠭᠤᠯᠠ ᠶ᠋ᠢᠨ ᠪᠦᠷᠭᠦᠳ ᠠᠩᠭᠠᠬᠠᠢ ᠪᠠᠨ ᠠᠭᠠᠷ ᠲᠤ ᠭᠠᠷᠬᠤ ᠲᠠᠢ ᠪᠣᠯᠬᠤ ᠶ᠋ᠢᠨ ᠬᠢᠨᠢ ᠨᠠᠭᠠᠨᠠ ᠦᠷᠡ ᠪᠡᠨ ᠦᠬᠦᠲᠡᠯᠡ ᠪᠡᠨ ᠠᠮᠢ ᠲᠠᠯᠪᠢᠨ ᠬᠠᠮᠠᠭᠠᠯᠠᠬᠤ ᠠᠳᠠᠯᠢ ᠠᠯᠢᠪᠠ ᠨᠢᠭᠡ ᠲᠠᠯᠠ ᠪᠠᠷ ᠠᠰᠤᠷᠤ ᠬᠣᠢᠨᠠ ᠬᠣᠴᠣᠷᠤᠭᠰᠠᠨ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠭᠴᠢᠳ ᠶᠤᠮ᠃ ᠲᠡᠷᠡ ᠦᠶᠡ ᠶ᠋ᠢᠨ ᠶᠠᠮᠠᠷ ᠨᠢᠭᠡ ᠬᠦᠴᠦᠷᠬᠡᠭ ᠣᠷᠣᠨ ᠤ᠋ ᠬᠤᠪᠢ ᠵᠠᠶᠠᠭᠠ ᠪᠠᠨ ᠮᠠᠰᠢᠳᠠ ᠥᠨᠳᠥᠷ ᠲᠦ᠍ ᠡᠷᠭᠦᠬᠦ ᠶ᠋ᠢᠨ ᠳᠡᠭᠡᠷᠡ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠡᠵᠡᠷᠬᠡᠢᠯᠡᠨ ᠲᠦᠷᠢᠮᠡᠬᠡᠢᠯᠡᠬᠦ ᠶᠠᠪᠤᠳᠠᠯ ᠢ᠋ ᠪᠠᠭᠠ ᠪᠠᠭᠤᠷᠠᠢ ᠣᠷᠣᠨ ᠢ᠋ ᠤᠷᠤᠭᠰᠢ ᠲᠠᠪᠰᠢᠭᠤᠯᠬᠤ ᠢᠪᠡᠭᠡᠯᠲᠦ ᠬᠡᠷᠡᠭ ᠭᠡᠵᠦ ᠦᠵᠡᠳᠡᠭ ᠦᠨᠳᠦᠰᠦᠲᠡᠨ ᠦ᠌ ᠳᠡᠭᠡᠷᠡᠩᠭᠦᠢ ᠦᠵᠡᠯᠲᠡᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠣᠯ ᠪᠣᠯᠬᠢ ᠪᠦᠳᠦᠭᠦᠯᠢᠭ ᠪᠤᠵᠠᠷ ᠪᠣᠯᠠᠢ ᠠᠷᠪᠠᠨ ᠬᠡᠳᠦᠨ ᠮᠧᠲ᠋ᠷ ᠦ᠋ᠨ ᠬᠣᠯᠠ ᠠ᠋ᠴᠠ ᠮᠢᠬᠠ ᠲᠣᠰᠣ ᠬᠥᠯᠥᠰᠥ ᠦᠨᠦᠷᠲᠦᠭᠰᠡᠨ ᠨᠢᠭᠡ ᠶᠣᠰᠣᠨ ᠤ᠋ ᠡᠷᠲᠡ ᠪᠠᠯᠠᠷ ᠴᠠᠭ ᠤ᠋ᠨ ᠠᠮᠢᠲᠠᠨ᠃ ᠭᠡᠪᠡᠴᠦ ᠦᠨᠡᠨ ᠴᠢᠨᠠᠷ ᠨᠢ ᠭᠡᠪᠡᠯ ᠰᠡᠳᠬᠢᠯ ᠰᠢᠯᠤᠭᠤᠨ᠂ ᠤᠬᠠᠭᠠᠨ ᠰᠡᠷᠭᠦᠯᠡᠩ᠂ ᠵᠣᠷᠢᠭ ᠴᠢᠩᠭᠠ ᠪᠤᠰᠤᠳ ᠤ᠋ᠨ ᠡᠮᠦᠨᠡ ᠲᠣᠯᠢᠭᠠᠨᠠᠵᠤ ᠪᠠᠢᠭᠠᠳ ᠬᠣᠢᠨᠠ ᠨᠢ ᠭᠠᠷᠬᠤ ᠲᠠᠢ ᠪᠠᠨ ᠵᠡᠷᠭᠡ ᠬᠣᠢᠲᠤ ᠬᠣᠷᠮᠣᠢ ᠶ᠋ᠢ ᠣᠭᠲᠣᠯᠤᠨ ᠠᠪᠬᠤ ᠵᠠᠩᠰᠢᠯ ᠢ᠋ ᠳᠠᠩᠴᠤ ᠰᠤᠷᠤᠭᠰᠠᠨ ᠦᠭᠡᠢ᠃ ᠭᠠᠳᠠᠭᠠᠳᠤ ᠪᠠᠢᠳᠠᠯ ᠨᠢ ᠭᠡᠪᠡᠯ ᠬᠠᠷᠢᠨ ᠦᠨᠡᠬᠡᠷ ᠪᠣᠯᠬᠢ᠂ ᠡᠮᠦᠰᠦᠭᠰᠡᠨ ᠭᠤᠲᠤᠯ ᠨᠢ ᠬᠦᠷᠲᠡᠯᠡ ᠡᠲᠡᠭᠡᠳ ᠬᠠᠴᠢᠨ ᠪᠣᠯᠪᠠᠴᠤ ᠪᠤᠰᠤᠳ ᠲᠤ ᠬᠠᠯᠳᠠᠪᠤᠷᠢᠯᠠᠬᠤ ᠡᠪᠡᠳᠴᠢᠨ ᠦᠭᠡᠢ᠃ ᠬᠠᠷᠠᠭᠠ ᠬᠤᠷᠴᠠ᠂ ᠰᠢᠳᠦ ᠡᠪᠡᠳᠬᠦ ᠶ᠋ᠢ ᠴᠦ᠍ ᠦᠵᠡᠭᠡ ᠦᠭᠡᠢ ᠤᠯᠤᠰ᠃ ᠠᠯᠲᠠ ᠮᠥᠩᠭᠥ ᠬᠣᠶᠠᠷ ᠲᠠᠢ ᠪᠣᠯ ᠬᠥᠮᠦᠨ ᠶᠠᠭᠤ ᠶ᠋ᠢ ᠴᠦ᠍ ᠬᠤᠳᠠᠯᠳᠤᠨ ᠠᠪᠴᠤ ᠪᠣᠯᠤᠨᠠ ᠭᠡᠭᠴᠢ ᠶ᠋ᠢ ᠲᠡᠳᠡ ᠰᠠᠢᠨ ᠮᠡᠳᠡᠬᠦ ᠪᠣᠯᠪᠠᠴᠤ ᠠᠶᠠᠨ ᠲᠡᠢᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠲᠡᠭᠦᠨ ᠰᠢᠭ ᠲᠡᠭᠡᠭᠡᠷᠡ ᠲᠡᠢ ᠶᠠᠭᠤ ᠪᠠᠢᠬᠤ ᠪᠣᠢ! ᠭᠡᠵᠦ ᠬᠣᠭᠣᠷᠣ ᠵᠠᠭᠤᠷᠠ ᠬᠡᠯᠡᠯᠴᠡᠨᠡ᠃ ᠲᠣᠷᠭᠠ ᠬᠣᠷᠭᠣᠢ ᠪᠠᠷ ᠪᠡᠶᠡ ᠴᠢᠮᠡᠬᠦ ᠳᠤᠷᠠ ᠲᠠᠢ ᠪᠣᠯᠪᠠᠴᠤ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠭᠢᠯᠭᠠᠷᠲᠠᠨᠠ᠃
ᠥᠭᠡᠯᠦᠯᠭᠡ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠠᠩᠬᠠ ᠤᠳᠠᠭᠠ ᠳᠠᠷᠢᠭᠠᠩᠭᠠ ᠶ᠋ᠢᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠢᠲᠠᠳ ᠴᠡᠷᠢᠭ ᠲᠡᠢ ᠲᠤᠯᠭᠠᠷᠠᠨ ᠪᠠᠢᠯᠳᠤᠪᠠ᠃ ᠲᠡᠳᠡᠨ ᠢ᠋ ᠲᠡᠨᠳᠡ ᠨᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠵᠤ᠂ ᠶᠡᠬᠡᠩᠬᠢ ᠴᠡᠷᠢᠭ ᠪᠢᠷᠳᠡᠩᠭᠡ᠂ ᠵᠠᠷᠢᠮ ᠨᠢ ᠪᠦᠷ ᠴᠠᠬᠢᠭᠤᠷ ᠫᠤᠤ ᠲᠠᠢ ᠬᠦᠷᠲᠡᠯᠡ ᠶᠠᠪᠤᠭᠰᠠᠨ ᠢ᠋ ᠰᠢᠨᠡᠳᠬᠡᠨ ᠰᠢᠨᠡ ᠦᠶᠡ ᠶ᠋ᠢᠨ ᠵᠡᠪᠰᠡᠭ ᠢ᠋ᠶ᠋ᠡᠷ ᠵᠡᠪᠰᠡᠭᠯᠡᠭᠰᠡᠨ ᠪᠥᠭᠡᠳ ᠮᠥᠨ ᠲᠡᠷᠡ ᠪᠠᠢᠯᠳᠤᠭᠠᠨ ᠠ᠋ᠴᠠ ᠣᠯᠵᠠᠯᠠᠭᠰᠠᠨ ᠦᠬᠡᠷ ᠫᠤᠤ᠂ ᠰᠤᠮᠤ(ᠫᠦᠯᠧᠮᠶᠣᠲ) ᠲᠤᠰ ᠪᠦᠷᠢ ᠨᠢᠭᠡ ᠶ᠋ᠢ ᠠᠰᠢᠭᠯᠠᠨ ᠴᠠᠭᠠᠰᠢ ᠲᠠᠪᠰᠢᠵᠤ ᠲᠤᠯᠤᠨ ᠨᠠᠭᠤᠷ ᠤ᠋ᠨ ᠬᠣᠢᠲᠤᠬᠢ ᠲᠩᠷᠢ ᠡᠯᠡᠰᠦ ᠭᠡᠳᠡᠭ ᠭᠠᠵᠠᠷ ᠬᠣᠶᠠᠳᠠᠬᠢ ᠤᠳᠠᠭᠠ ᠶ᠋ᠢᠨ ᠲᠣᠮᠣ ᠳᠣᠯᠣᠭᠠᠨ ᠢ᠋ ᠬᠢᠪᠡ᠃ ᠲᠡᠭᠦᠨᠴᠡ ᠴᠠᠭᠠᠰᠢ ᠪᠠᠰᠠ ᠳᠠᠪᠰᠢᠨ ᠪᠢᠷᠠᠭᠤᠳᠤ ᠬᠣᠲᠠ ᠶ᠋ᠢ ᠮᠥᠨ ᠰᠦᠷᠡᠬᠡᠢ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠢ᠋ᠶ᠋ᠠᠷ ᠡᠵᠡᠯᠡᠪᠡ᠃ ᠠᠩᠬᠠ ᠮᠣᠷᠳᠠᠭᠰᠠᠨ ᠠ᠋ᠴᠠ ᠠᠪᠤᠭᠠᠳ ᠣᠳᠣ ᠬᠦᠷᠬᠦ ᠪᠡᠷ ᠬᠣᠶᠠᠷ ᠵᠢᠯ ᠪᠣᠯᠵᠠᠢ᠃ ᠡᠴᠦᠰ ᠲᠦ᠋ᠨᠢ ᠣᠷᠣᠰ᠂ ᠬᠢᠲᠠᠳ᠂ ᠮᠣᠩᠭᠣᠯ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠣᠯᠢᠭᠲᠤ ᠬᠡᠯᠡᠯᠴᠡᠭᠡᠷ ᠪᠣᠯᠤᠭᠰᠠᠨ ᠪᠥᠭᠡᠳ ᠠᠦ᠋ᠲ᠋ᠣᠨᠣᠮᠢᠲᠤ ᠮᠣᠩᠭᠣᠯ ᠤ᠋ᠨ ᠪᠣᠳᠣᠯᠭᠠ ᠥᠭᠡᠷᠡᠴᠢᠯᠡᠭᠳᠡᠨ ᠥᠭᠡᠯᠦᠯᠭᠡ ᠶ᠋ᠢᠨ ᠠᠩᠭᠢ ᠶ᠋ᠢ ᠡᠷᠭᠢᠭᠦᠯᠦᠨ ᠳᠠᠭᠤᠳᠠᠬᠤ ᠡᠯᠴᠢ ᠢᠯᠡᠭᠡᠭᠰᠡᠨ ᠠᠵᠢ᠃ ᠭᠡᠪᠡᠴᠦ ᠲᠡᠭᠡᠭᠡᠳ ᠲᠡᠢᠨ ᠵᠣᠭᠰᠣᠭᠰᠠᠨ ᠪᠢᠰᠢ᠂ ᠳᠠᠢᠰᠤᠨ ᠤ᠋ ᠠᠷᠤ ᠳ᠋ᠤ᠌ ᠬᠡᠳᠦ ᠣᠷᠣᠭᠰᠠᠨ ᠤᠴᠢᠷ ᠬᠠᠯᠬᠠ ᠣᠷᠣᠨ ᠤ᠋ ᠪᠠᠨ ᠬᠢᠵᠠᠭᠠᠷ ᠲᠤ ᠣᠷᠣᠵᠤ ᠢᠷᠡᠬᠦ ᠬᠦᠷᠲᠡᠯᠡ ᠰᠢᠪᠲᠤ ᠪᠠᠢᠯᠳᠤᠭᠰᠠᠭᠠᠷ ᠡᠴᠦᠰ ᠦ᠋ᠨ ᠳ᠋ᠦᠩ ᠳ᠋ᠦ᠍ ᠶᠡᠬᠡ ᠪᠠᠭᠠ ᠲᠡᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠲᠣᠭᠠᠯᠠᠵᠤ ᠦᠵᠡᠬᠦ ᠳ᠋ᠦ᠍ ᠵᠢᠷᠠ ᠭᠠᠷᠤᠢ ᠲᠣᠭᠠᠨ ᠳ᠋ᠤ᠌ ᠬᠦᠷᠬᠦ ᠪᠥᠭᠡᠳ ᠲᠡᠷᠡ ᠪᠦᠷᠢ ᠶ᠋ᠢ ᠨᠡᠷᠡ ᠲᠥᠷᠥ ᠲᠡᠢ ᠳᠠᠪᠠᠨ ᠳᠣᠭᠣᠯᠵᠠᠢ᠃
ᠥᠪᠡᠷᠰᠡᠳ ᠢ᠋ ᠪᠡᠨ ᠲᠡᠳᠡ ᠦᠬᠦᠯ ᠦᠭᠡᠢ ᠮᠥᠩᠬᠡ ᠮᠡᠲᠦ ᠦᠵᠡᠨ ᠶᠠᠪᠤᠭᠰᠠᠭᠠᠷ ᠡᠭᠡᠵᠦ ᠢᠷᠡᠭᠰᠡᠨ ᠬᠣᠢᠨᠠ ᠪᠠᠨ ᠦᠵᠡᠪᠡᠯ ᠠᠩᠬᠠ ᠮᠣᠷᠳᠠᠭᠰᠠᠨ ᠭᠤᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠲᠠᠯᠠ ᠬᠤᠪᠢ ᠨᠢ ᠠᠯᠠᠭᠳᠠᠭᠰᠠᠨ ᠪᠠᠢᠯᠠ᠃ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠬᠤᠨᠠᠷ ᠭᠡᠪᠡᠯ ᠥᠨᠥᠬᠢ ᠮᠠᠭᠤ ᠠ᠋ᠴᠠ ᠪᠠᠨ ᠤᠯᠠᠮ ᠳᠣᠷᠣᠢᠲᠠᠵᠠᠢ᠃ ᠪᠠᠷᠢᠭᠰᠠᠨ ᠲᠤᠭ ᠬᠦᠷᠲᠡᠯᠡ ᠲᠩᠷᠢ ᠬᠥᠬᠡ ᠥᠩᠭᠡ ᠪᠡᠨ ᠠᠯᠲᠠᠨ ᠰᠢᠯᠪᠤᠷᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠴᠠᠭ ᠲᠤ ᠬᠠᠯᠬᠠ ᠮᠣᠩᠭᠣᠯ ᠠ᠋ᠴᠠ ᠲᠠᠪᠤᠨ ᠠᠩᠭᠢ ᠴᠡᠷᠢᠭ ᠣᠷᠣᠭᠰᠢ ᠭᠠᠷᠤᠨ ᠪᠠᠢᠯᠳᠤᠭᠰᠠᠨ ᠤ᠋ ᠬᠠᠮᠤᠭ ᠤ᠋ᠨ ᠠᠮᠢᠵᠢᠯᠲᠠ ᠲᠠᠢ ᠶᠠᠪᠤᠭᠰᠠᠨ ᠨᠢ ᠥᠭᠡᠯᠦᠯᠭᠡ ᠨᠣᠶᠠᠨ ᠤ᠋ ᠠᠩᠭᠢ ᠶᠤᠮ᠃
ᠭᠡᠪᠡᠴᠦ ᠲᠡᠢᠨ ᠪᠦᠷᠢ ᠠᠶᠤᠯᠲᠠᠢ᠂ ᠴᠡᠷᠢᠭ ᠪᠦᠷᠢ ᠨᠢᠭᠦᠯᠲᠡᠨ ᠭᠡᠭᠴᠢ ᠪᠡᠷ ᠲᠡᠳᠡ ᠬᠡᠳᠦᠢᠪᠡᠷ ᠡᠮᠡᠰ ᠥᠬᠢᠳ ᠢ᠋ ᠬᠦᠴᠦᠷᠬᠡᠢᠯᠡᠨ ᠳᠠᠷᠤᠯᠠᠬᠤ᠂ ᠡᠳ᠋ ᠮᠥᠩᠭᠥ ᠶ᠋ᠢ ᠪᠤᠯᠢᠶᠠᠨ ᠡᠪᠦᠷᠯᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠡᠳᠦᠷ ᠳᠣᠳᠣᠮ ᠤ᠋ᠨ ᠬᠣᠭᠣᠯᠠ ᠬᠡᠷᠡᠭᠯᠡᠯ ᠢ᠋ ᠬᠠᠮᠢᠭᠠ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠭᠰᠡᠨ᠂ ᠪᠠᠰᠠ ᠰᠤᠮᠤ ᠬᠡᠷᠡᠭᠯᠡᠯ ᠢ᠋ ᠶᠡᠬᠡᠪᠴᠢᠯᠡᠨ ᠲᠡᠢᠨ ᠡᠴᠡ ᠣᠯᠵᠠᠯᠠᠭᠰᠠᠨ ᠢ᠋ᠶ᠋ᠠᠷ ᠨᠥᠬᠥᠨ ᠵᠠᠯᠠᠭᠠᠬᠤ ᠤᠴᠢᠷ ᠠᠯᠠᠨ ᠬᠢᠳᠤᠬᠤ ᠤᠷᠤᠭᠤ ᠪᠡᠶᠡ ᠪᠡᠶᠡ ᠡᠴᠡ ᠥᠷᠢᠰᠦᠯᠳᠦᠨ ᠵᠢᠳᠬᠦᠵᠦ ᠶᠠᠪᠤᠯᠠ᠃ ᠬᠡᠨ ᠰᠠᠢᠨ ᠪᠠᠢᠯᠳᠤᠪᠠᠯ ᠲᠡᠭᠦᠨ ᠦ᠌ ᠡᠪᠦᠷ ᠲᠦᠷᠡᠢ ᠳ᠋ᠦ᠍ ᠫᠤᠤᠳᠠᠬᠤ ᠰᠤᠮᠤ ᠬᠡᠳᠦᠨ ᠵᠠᠭᠤ ᠪᠠᠷ ᠪᠢᠰᠢ᠂ ᠬᠡᠳᠦᠨ ᠮᠢᠩᠭᠠ ᠪᠠᠷ ᠱᠠᠵᠢᠭᠢᠨᠠᠨ ᠶᠠᠪᠤᠨᠠ᠃ ᠬᠡᠨ ᠮᠠᠭᠤ ᠪᠠᠢᠯᠳᠤᠪᠠᠯ ᠬᠠᠵᠠᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠨᠥᠬᠥᠳ ᠡᠴᠡ ᠵᠢᠭᠡᠯ ᠭᠣᠶᠣᠯ ᠬᠢᠨ ᠥᠷᠢ ᠰᠢᠷᠢᠨ ᠳ᠋ᠦ᠍ ᠣᠷᠣᠨᠠ᠃ ᠶᠡᠷᠦ ᠲᠡᠳᠡᠨ ᠦ᠌ ᠡᠷᠬᠢᠮᠯᠡᠬᠦ ᠨᠢ ᠭᠠᠭᠴᠠᠬᠠᠨ ᠰᠤᠮᠤ᠂ ᠰᠤᠮᠤ ᠪᠠᠷ ᠮᠥᠷᠥᠢᠴᠡᠨ ᠨᠠᠭᠠᠳᠴᠤ ᠵᠤᠭᠠᠴᠠᠨᠠ᠃ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠴᠤ᠌ ᠬᠢᠨᠡ᠃ ᠪᠠᠶᠠᠨ ᠬᠥᠮᠦᠨ ᠲᠠᠪᠤᠨ ᠬᠠᠭᠠᠨ ᠳ᠋ᠤ᠌ ᠨᠢᠭᠤᠷ ᠲᠠᠢ ᠭᠡᠭᠴᠢ ᠪᠡᠷ ᠳ᠋ᠠᠢᠵᠠᠲᠤ ᠰᠤᠮᠤ ᠨᠤᠭᠤᠳ ᠢ᠋ᠶ᠋ᠠᠷ ᠴᠡᠭᠡᠵᠢᠨ ᠪᠡᠶᠡ ᠪᠡᠨ ᠬᠡᠳᠦᠨ ᠳᠠᠪᠬᠤᠷ ᠣᠷᠢᠶᠠᠨ ᠲᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠠᠵᠤ ᠶᠠᠳᠠᠬᠤ ᠮᠡᠲᠦ ᠲᠠᠬᠠᠯᠵᠠᠨ ᠬᠥᠳᠡᠯᠵᠦ ᠶᠠᠪᠤᠪᠠᠯ ᠬᠠᠵᠠᠭᠤ ᠶ᠋ᠢᠨ ᠨᠥᠬᠥᠳ ᠪᠠᠢᠲᠤᠭᠠᠢ ᠳᠡᠭᠡᠳᠦ ᠳᠠᠷᠤᠭᠠ ᠪᠣᠯᠪᠠᠴᠤ ᠬᠦᠨᠳᠦᠳᠬᠡᠨᠡ᠃
ᠠᠦ᠋ᠲ᠋ᠣᠨᠣᠮᠢᠲᠤ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠡᠢᠮᠦ ᠪᠢᠯᠡ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠳᠠᠮᠫᠢᠯ ᠶᠤᠮ᠃ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠳᠤᠮᠳᠠ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠳᠠᠳᠤᠯᠭᠠᠵᠢᠨ ᠮᠡᠷᠭᠡᠵᠢᠭᠰᠡᠨ ᠪᠠᠭᠠᠲᠤᠷ ᠡᠷᠡ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠡᠯᠰᠡᠬᠦ ᠪᠡᠷ ᠢᠷᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠰᠤᠮᠤᠨ ᠳᠠᠷᠤᠭᠠ ᠪᠣᠯᠤᠭᠰᠠᠨ ᠠᠵᠢ᠃ ᠡᠳᠦᠭᠡ ᠥᠨᠳᠥᠷ ᠳᠠᠮᠫᠢᠯ ᠡᠳᠦᠷ ᠦ᠋ᠨ ᠴᠠᠭ ᠢ᠋ᠶ᠋ᠠᠷ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠬᠢᠯᠭᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠬᠠᠮᠠᠷ ᠢ᠋ᠶ᠋ᠠᠨ ᠰᠠᠷᠲᠠᠢᠯᠭᠠᠨ ᠣᠭᠣᠨᠣ ᠶ᠋ᠢᠨ ᠬᠢ ᠰᠢᠭ ᠥᠨᠳᠥᠷ ᠬᠦᠵᠦᠭᠦᠦ ᠪᠡᠨ ᠭᠣᠨᠠᠯᠵᠢᠭᠤᠯᠤᠨ ᠬᠦᠦᠭᠴᠢᠨ ᠬᠠᠰᠬᠢᠴᠢᠬᠤ ᠨᠢ ᠳᠠᠩᠴᠤ ᠶᠡᠬᠡ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠯ ᠶᠣᠰᠣᠲᠠᠢ ᠰᠢᠵᠢᠶᠡᠷ ᠦᠭᠡᠢ ᠠᠮᠢᠲᠠᠨ ᠪᠣᠯᠪᠠ ᠤᠤ ᠭᠡᠯᠲᠡᠢ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ ᠲᠡᠢᠮᠦ ᠪᠢᠰᠢ᠃ ᠦᠳᠡᠰᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠪᠠᠨ ᠶᠠᠪᠤᠳᠠᠯ ᠠ᠋ᠴᠠ ᠶᠠᠷᠢᠬᠤ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠦ᠌ ᠪᠣᠳᠣᠯ ᠤ᠋ᠨ ᠮᠤᠩᠭᠠᠨᠢᠭᠰᠠᠨ ᠢ᠋ ᠶᠦᠮ ᠤᠤ᠂ ᠲᠡᠨᠡᠭᠯᠡᠭᠰᠡᠨ᠂ ᠲᠡᠨᠡᠭᠯᠡᠭᠰᠡᠨ ᠠᠲᠠᠯᠠ ᠪᠠᠨ ᠲᠤᠩ ᠰᠡᠴᠡᠨ ᠢ᠋ ᠦᠢᠯᠡᠳᠦᠭᠰᠡᠨ ᠵᠡᠷᠭᠡ ᠶᠠᠪᠤᠳᠠᠯ ᠤ᠋ᠳ ᠲᠤ᠌ ᠢᠨᠢᠶᠡᠳᠦᠮ ᠣᠷᠣᠭᠤᠯᠤᠨ ᠶᠠᠷᠢᠵᠤ ᠤᠷᠲᠤ ᠴᠢᠴᠡᠲᠤ ᠡᠪᠦᠳᠦᠭ ᠢ᠋ᠶ᠋ᠡᠨ ᠪᠠᠢᠨ ᠪᠠᠢᠨ ᠠᠯᠠᠭᠠᠳᠠᠨ ᠬᠠ ᠬᠠ ᠢᠨᠢᠶᠡᠨᠡ᠃ ᠲᠡᠷᠡ ᠳᠤᠮᠳᠠ ᠪᠠᠨ ᠳᠠᠮᠫᠢᠯ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠶᠡ ᠶ᠋ᠢ ᠦᠶᠡᠷᠬᠡᠨ ᠨᠥᠬᠥᠷᠯᠡᠭᠰᠡᠨ ᠭᠣᠣᠵᠤᠤ ᠪᠠᠭᠠᠲᠤᠷ ᠭᠡᠭᠴᠢ ᠶ᠋ᠢ ᠪᠠᠬᠠᠳᠤᠨ ᠶᠠᠷᠢᠬᠤ ᠨᠢ ᠮᠠᠰᠢ ᠭᠠᠢᠬᠠᠯᠲᠠᠢ᠃《ᠲᠡᠷᠡ ᠪᠣᠯ ᠰᠤᠮᠤ ᠭᠡᠭᠡᠬᠦ ᠶ᠋ᠢ ᠦᠵᠡᠳᠡᠭ ᠦᠭᠡᠢ ᠮᠡᠷᠭᠡᠨ ᠫᠤᠤᠳᠠᠭᠴᠢ᠃ ᠠᠶᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠨᠢᠶᠡᠬᠦ᠂ ᠢᠨᠢᠶᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠵᠠᠵᠠᠭᠤᠷ ᠵᠠᠭᠤᠨ ᠰᠢᠨᠠ ᠭᠦᠷᠡᠯᠵᠡᠭᠦᠯᠦᠨᠡ》 ᠭᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠯᠢᠮ ᠳ᠋ᠦ᠍《ᠳᠠᠩ ᠤᠰᠤ ᠪᠠᠷ ᠭᠤᠯᠢᠷ ᠵᠢᠭᠤᠷᠠᠨ ᠬᠠᠪᠲᠠᠭᠠᠢᠯᠠᠵᠤ᠂ ᠬᠠᠯᠠᠭᠠᠳ ᠲᠡᠮᠦᠷ ᠳᠡᠭᠡᠷᠡ ᠬᠡᠳᠦᠬᠡᠨ ᠡᠷᠭᠢᠭᠦᠯᠵᠦ ᠬᠢᠲᠠᠳ ᠭᠠᠨ ᠪᠢᠩ ᠬᠡᠮᠡᠬᠦ ᠶᠠᠭᠤᠮᠠ ᠶ᠋ᠢ ᠬᠠᠴᠢᠨ ᠰᠠᠢᠬᠠᠨ ᠠᠮᠲᠠᠲᠠᠢ ᠬᠢᠳᠡᠭ》 ᠰᠠᠨ ᠭᠡᠵᠦ ᠵᠠᠪᠠᠯ ᠶᠠᠷᠢᠨ ᠰᠢᠯᠦᠰᠦ ᠵᠠᠯᠭᠢᠨᠠ᠃ ᠳᠠᠮᠫᠢᠯ ᠢᠩᠭᠢᠵᠦ ᠶᠠᠷᠢᠬᠤ ᠠᠲᠠᠯᠠ ᠴᠡᠷᠢᠭ ᠦ᠋ᠳ ᠡᠴᠡ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠲᠤᠬᠠᠢ ᠭᠣᠮᠣᠳᠠᠯ ᠮᠡᠳᠡᠭᠦᠯᠪᠡᠯ ᠬᠠᠷᠢᠭᠤ ᠳ᠋ᠤᠨᠢ᠄ ᠵᠦᠭᠡᠷ! ᠮᠣᠩᠭᠣᠯ ᠬᠥᠮᠦᠨ᠂ ᠮᠣᠩᠭᠣᠯ ᠮᠣᠷᠢ ᠬᠣᠶᠠᠷ ᠬᠡᠴᠢᠨᠡᠭᠡᠨ ᠣᠯᠠᠨ ᠬᠣᠨᠣᠭ ᠥᠯ ᠬᠣᠭᠣᠯᠠ ᠰᠣᠯᠢᠭᠳᠠᠵᠤ ᠪᠠᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠪᠠᠢᠯᠳᠤᠬᠤ ᠳ᠋ᠠᠭᠠᠨ ᠰᠠᠢᠨ ᠪᠠᠢᠳᠠᠭ ᠶᠤᠮ ᠭᠡᠵᠦ ᠬᠡᠯᠡᠩᠭᠦᠲᠡ ᠪᠡᠨ ᠮᠥᠨ ᠯᠡ ᠬᠠ ᠬᠠ ᠢᠨᠢᠶᠡᠨᠡ᠃ ᠳᠡᠪᠡᠯ ᠬᠤᠪᠴᠠᠰᠤ ᠮᠠᠭᠤᠲᠠᠢ ᠬᠥᠮᠦᠨ ᠦ᠌《ᠲᠠᠭᠠᠷᠠᠪᠠ》 ᠭᠡᠬᠦ ᠶ᠋ᠢ ᠰᠣᠨᠣᠰᠪᠠᠯ ᠪᠠᠰᠠ ᠯᠠ《ᠵᠦᠭᠡᠷ!》 ᠤᠳᠠᠬᠤ ᠦᠭᠡᠢ ᠳᠠᠢᠳᠤᠨᠠ᠂ ᠲᠡᠭᠡᠬᠦ ᠳ᠋ᠦ᠍ ᠴᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠯᠠᠭᠤᠴᠠᠨ ᠬᠠᠨᠴᠤᠢ ᠰᠤᠭᠤᠯᠤᠨ ᠰᠤᠭᠤᠯᠳᠤᠷᠭᠠᠯᠠᠨᠠ ᠭᠡᠵᠦ ᠮᠡᠳᠡ! ᠭᠡᠳ ᠬᠠ ᠬᠠ ᠢᠨᠢᠶᠡᠨᠡ᠃ ᠡᠩ ᠦ᠋ᠨ ᠴᠠᠭ ᠲᠤ ᠳᠠᠮᠫᠢᠯ ᠬᠠᠮᠢᠭᠠ ᠶᠠᠪᠤᠭᠠ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠨ ᠬᠠ ᠬᠠ ᠢᠨᠢᠶᠡᠬᠦ ᠲᠤᠯᠠ ᠬᠥᠮᠦᠰ ᠲᠡᠭᠦᠨ ᠢ᠋ ᠬᠠ ᠬᠠ ᠳᠠᠮᠫᠢᠯ ᠭᠡᠵᠦ ᠨᠡᠷᠡᠯᠡᠳᠡᠭ ᠪᠠᠢᠪᠠ᠃ ᠳᠠᠮᠫᠢᠯ ᠬᠠ ᠬᠠ ᠢᠨᠢᠶᠡᠬᠦ ᠡᠴᠡ ᠭᠠᠳᠠᠨᠠ ᠪᠡᠷᠬᠡᠰᠢᠶᠡᠯ ᠪᠦᠷᠢ ᠶ᠋ᠢ《ᠵᠦᠭᠡᠷ》 ᠭᠡᠵᠦ ᠦᠵᠡᠨᠡ᠃ ᠲᠡᠭᠦᠨ ᠦ᠌ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ ᠥᠯᠥᠰᠬᠦ ᠴᠦ᠍ ᠵᠦᠭᠡᠷ᠂ ᠲᠠᠭᠠᠷᠠᠬᠤ ᠴᠤ᠌ ᠵᠦᠭᠡᠷ᠂ ᠵᠦᠭᠡᠷ ᠦᠭᠡᠢ ᠶᠠᠭᠤᠮᠠ ᠭᠡᠪᠡᠯ ᠴᠣᠢᠯᠠᠭᠰᠠᠨ ᠪᠤᠶᠤ ᠲᠡᠨᠦᠭᠰᠡᠨ ᠰᠤᠮᠤ ᠪᠠᠢᠯᠠ᠃
— ᠠᠢ ᠳᠠ ᠲᠠ ᠮᠢᠨᠢ ᠴᠢᠭᠯᠡᠭᠰᠡᠨ ᠰᠤᠮᠤ ᠶᠠᠭᠠᠬᠢᠬᠤᠪ᠂ ᠴᠢᠬᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠰᠢᠪ ᠬᠢᠨ ᠥᠩᠭᠡᠷᠡᠨᠡ᠂ ᠬᠠᠷᠢᠨ ᠴᠣᠢᠯᠠᠭᠰᠠᠨ ᠨᠢ ᠵᠣᠪᠬᠢᠨ ᠳ᠋ᠤ᠌ ᠲᠡᠨᠦᠭᠰᠡᠨ ᠨᠢ ᠲᠠᠷᠢᠬᠢᠨ ᠳ᠋ᠤ᠌ ᠭᠡᠭᠴᠢ ᠪᠡᠷ ᠡᠨᠡ ᠬᠣᠶᠠᠷ ᠲᠤ ᠡᠷᠡ ᠶ᠋ᠢᠨ ᠠᠮᠢ ᠶ᠋ᠢ ᠠᠪᠴᠢᠳᠠᠭ ᠶᠠᠭᠤᠮᠠ ᠮᠠᠨᠢ ᠪᠣᠢ ᠰᠢᠦ ᠳᠡ ᠭᠡᠵᠦ ᠴᠡᠷᠢᠭ ᠦ᠋ᠳ ᠲᠦ᠍ ᠵᠠᠬᠢᠳᠠᠭ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ