ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠳᠥᠷᠪᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -14
107《ᠬᠠ ᠬᠠ》 ᠳᠠᠮᠫᠢᠯ
ᠡᠳᠡ ᠪᠣᠯ ᠮᠠᠯ ᠠᠵᠤ ᠠᠬᠤᠢᠲᠠᠨ᠃ ᠦᠷᠡ ᠲᠠᠷᠢᠶᠠ ᠶ᠋ᠢ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠬᠡᠷᠡᠭᠴᠡᠭᠡᠨ ᠳ᠋ᠦ᠍ ᠵᠢᠮᠢᠰ᠂ ᠨᠣᠭᠣᠭᠠ ᠶ᠋ᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠰᠣᠨᠢᠷᠬᠠᠯ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠬᠡᠷᠡᠭᠯᠡᠨᠡ᠃ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠮᠣᠳᠣ ᠳᠤᠬᠤᠨ ᠮᠣᠷᠢ ᠤᠨᠤᠵᠤ᠂ ᠮᠠᠯ ᠮᠠᠯᠯᠠᠨ ᠮᠢᠬᠠ᠂ ᠰᠦ᠂ ᠴᠠᠭᠠᠨ ᠢᠳᠡᠭᠡ ᠪᠡᠷ ᠠᠮᠢᠳᠤᠷᠠᠭᠰᠠᠳ ᠪᠣᠯᠬᠤ ᠲᠤᠯᠠ ᠵᠤᠪᠠᠭᠠ ᠴᠦ᠍ ᠦᠭᠡᠢ᠂ ᠭᠠᠴᠢᠭᠳᠠᠨ ᠳᠤᠲᠠᠭᠳᠠᠭᠰᠠᠨ ᠴᠦ᠍ ᠵᠦᠢᠯ ᠦᠭᠡᠢ᠂ ᠨᠢᠭᠡ ᠶᠣᠰᠣᠨ ᠤ᠋ ᠵᠢᠷᠭᠠᠭᠰᠠᠨ ᠤᠯᠤᠰ᠃ ᠭᠡᠲᠡᠯᠡ ᠲᠡᠳᠡᠨ ᠦ᠌ ᠮᠥᠬᠥᠵᠦ᠂ ᠣᠷᠣᠨ ᠨᠤᠲᠤᠭ ᠬᠥᠮᠦᠨ ᠦ᠌ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠵᠢᠷᠭᠠᠯ ᠶᠠᠭᠠᠬᠢᠨ ᠪᠠᠢᠬᠤ ᠪᠢᠯᠡ᠃ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠨᠢ ᠤᠷᠤᠭᠤᠳᠠᠬᠤ ᠨᠣᠢᠷ ᠲᠤ ᠯᠠ ᠳᠠᠷᠤᠭᠳᠠᠭᠰᠠᠨ ᠬᠡᠷᠡᠭ᠃ ᠭᠡᠪᠡᠴᠦ ᠡᠳᠡ ᠮᠣᠩᠭᠣᠯᠴᠤᠳ ᠭᠡᠳᠡᠭ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠨᠡ᠃ ᠮᠣᠩᠭᠣᠯ ᠭᠡᠵᠦ ᠨᠡᠷᠡᠯᠡᠭᠳᠡᠳᠡᠭ ᠲᠡᠭᠡᠨ ᠪᠠᠶᠠᠷᠯᠠᠨᠠ᠃ ᠦᠨᠳᠦᠰᠦᠲᠡᠨ ᠦ᠌ ᠶᠠᠩᠪᠠ᠂ ᠶᠣᠰᠣ ᠰᠤᠷᠲᠠᠬᠤᠨ ᠢ᠋ᠶ᠋ᠠᠨ ᠬᠦᠨᠳᠦᠳᠬᠡᠨ ᠬᠠᠳᠠᠭᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠣᠯᠬᠣᠷ ᠮᠥᠨ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠮᠣᠩᠭᠣᠯᠴᠤᠳ᠃ ᠲᠡᠭᠦᠪᠡᠷ ᠦᠯᠦ ᠪᠠᠷᠠᠮ᠂ ᠮᠠᠨ ᠤ᠋ ᠥᠭᠡᠯᠡᠳ ᠦᠨᠳᠦᠰᠦᠲᠡᠨ ᠡᠷᠲᠡ ᠤᠷᠢᠳᠤ ᠴᠠᠭ ᠠ᠋ᠴᠠ ᠬᠦᠴᠦᠷᠬᠡᠭ ᠴᠢᠭᠢᠷᠠᠭ ᠪᠠᠢᠭᠰᠠᠨ ᠢ᠋ ᠮᠠᠨᠵᠤ ᠶ᠋ᠢᠨ ᠬᠠᠷᠭᠢᠰ ᠳᠠᠢᠳᠤᠨ ᠳᠠᠭᠠᠭᠤᠯᠤᠭᠰᠠᠳ ᠳᠠᠢᠰᠤᠩᠨᠠᠨ ᠳᠣᠪᠲᠣᠯᠤᠭᠰᠠᠭᠠᠷ ᠪᠠᠢᠭᠠᠳ ᠮᠠᠨ ᠢ᠋ ᠡᠢᠮᠦ ᠪᠠᠭᠠ ᠪᠠᠭᠤᠷᠠᠢ ᠪᠣᠯᠭᠠᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ ᠭᠡᠵᠦ᠂ ᠬᠣᠭᠣᠷᠣ ᠵᠠᠭᠤᠷᠠ ᠪᠠᠨ ᠦᠷᠭᠦᠯᠵᠢ ᠶᠠᠷᠢᠨᠠ᠃ ᠣᠷᠣᠢ ᠦᠳᠡᠰᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠡᠪᠦᠭᠡᠳ ᠦ᠋ᠨ ᠨᠢᠭᠡ ᠨᠢ ᠬᠢᠯᠭᠠᠰᠤᠨ ᠤᠲᠠᠰᠤᠲᠤ ᠮᠣᠳᠣᠨ ᠬᠤᠭᠤᠷ ᠳᠠᠷᠤᠨ ᠥᠭᠡᠯᠡᠳ ᠦ᠋ᠨ ᠡᠴᠦᠰ ᠦ᠋ᠨ ᠤᠳᠤᠷᠢᠳᠤᠭᠴᠢ ᠠᠮᠤᠷᠰᠠᠨᠠᠭᠠ᠂ ᠲᠡᠭᠦᠨ ᠦ᠌ ᠮᠠᠨᠵᠤ ᠶ᠋ᠢᠨ ᠡᠰᠡᠷᠭᠦ ᠬᠥᠳᠡᠯᠦᠭᠰᠡᠨ ᠶᠡᠬᠡ ᠪᠣᠰᠤᠯᠭᠠ ᠳ᠋ᠤ᠌ ᠡᠪ ᠰᠠᠨᠠᠭᠠ ᠨᠢᠭᠡᠳᠦᠨ ᠬᠦᠴᠦᠨ ᠲᠤᠰᠠᠯᠠᠭᠰᠠᠨ ᠬᠠᠯᠬᠠ ᠨᠣᠶᠠᠨ ᠴᠢᠩᠭᠦᠨᠵᠠᠪ ᠲᠡᠭᠦᠨᠴᠡ ᠴᠢᠨᠠᠭᠰᠢᠯᠠᠨ ᠠᠶᠤᠮᠰᠢᠭ ᠦᠭᠡᠢ ᠵᠣᠷᠢᠭᠲᠤ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠲᠡᠦᠬᠡᠲᠦ ᠶᠠᠪᠤᠳᠠᠯ ᠢ᠋ ᠤᠷᠠᠨ ᠢ᠋ᠶ᠋ᠠᠷ ᠰᠢᠯᠦᠭᠯᠡᠨ ᠤᠶᠠᠩᠭᠠᠲᠤ ᠬᠣᠭᠣᠯᠠᠢ ᠪᠠᠷ ᠠᠶᠠᠯᠤᠨ ᠳᠠᠭᠤᠯᠠᠵᠤ ᠥᠭᠦᠯᠡᠨᠡ᠃ ᠭᠤᠷᠪᠠᠨ ᠬᠥᠯ ᠲᠡᠢ ᠳᠤᠭᠤᠢ ᠲᠤᠯᠭᠠ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠰᠣᠨᠣᠰᠤᠭᠴᠢᠳ ᠨᠢ ᠵᠠᠳᠠᠭᠠᠢ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠬᠤᠭᠤᠷᠴᠢ ᠶ᠋ᠢᠨ ᠨᠢᠭᠤᠷ ᠢ᠋ ᠭᠥᠯᠢᠷᠡᠨ ᠰᠢᠷᠲᠡᠬᠦ ᠪᠥᠭᠡᠳ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠰᠡᠳ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠲᠦᠮᠡᠨ ᠵᠦᠢᠯ ᠦ᠋ᠨ ᠭᠠᠰᠠᠯᠠᠩ ᠡᠷᠭᠢᠯᠳᠦᠨ ᠤᠬᠢᠯᠠᠭᠠᠨ ᠤᠨᠵᠢᠭᠠᠨ ᠪᠣᠯᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠭᠤᠨ ᠤ᠋ ᠪᠠᠶᠠᠷ ᠴᠡᠩᠭᠡᠯ ᠪᠠᠢᠬᠤ ᠪᠢᠯᠡ᠃ ᠶᠡᠷᠦ ᠲᠡᠷᠡ ᠥᠭᠡᠯᠡᠳ ᠦ᠋ᠳ ᠲᠡᠢᠮᠦ ᠭᠤᠨᠢᠭᠲᠤ ᠳᠠᠭᠤᠯᠠᠯ ᠢ᠋ ᠴᠠᠭ ᠢᠮᠠᠭᠲᠠ ᠰᠣᠨᠣᠰᠤᠨ ᠲᠡᠭᠡᠵᠦ ᠤᠬᠢᠯᠠᠯᠳᠤᠵᠤ ᠰᠠᠭᠤᠬᠤ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠶᠦᠮ ᠰᠢᠭ ᠲᠡᠭᠦᠨ ᠳ᠋ᠡᠭᠡᠨ ᠪᠠᠰᠠ ᠤᠬᠠᠭᠠᠨ ᠦᠭᠡᠢ ᠳᠤᠷᠠ ᠲᠠᠢ ᠤᠯᠤᠰ ᠪᠠᠢᠨᠠ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠨᠢ ᠥᠨᠳᠥᠷ ᠨᠠᠰᠤᠲᠠᠨ ᠨᠤᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠵᠠᠭᠤ ᠬᠠᠪᠢᠷᠭᠠ ᠪᠠᠷ ᠨᠢᠭᠤᠷ ᠪᠤᠯᠲᠠᠢᠯᠭᠠᠨ ᠦᠭᠡ ᠦᠰᠦᠭ ᠪᠦᠷᠢ ᠶ᠋ᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠬᠣᠨᠣᠭᠰᠢᠭᠤᠯᠤᠨ ᠲᠣᠭᠲᠠᠭᠠᠵᠤ ᠠᠪᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠠᠨ ᠮᠥᠨ ᠯᠡ ᠠᠶᠠᠯᠤᠨ ᠳᠠᠭᠤᠯᠠᠵᠤ ᠥᠭᠡᠷᠡ ᠪᠤᠰᠤᠳ ᠢ᠋ ᠦᠢᠮᠡᠭᠦᠯᠦᠨᠡ᠃ ᠢᠩᠭᠢᠵᠦ ᠲᠡᠳᠡ ᠤᠳᠬᠠ ᠵᠣᠬᠢᠶᠠᠯ ᠪᠠ ᠲᠡᠦᠬᠡ ᠱᠠᠰᠲᠢᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠢᠨᠬᠦ ᠤᠯᠠᠮᠵᠢᠯᠠᠨ ᠵᠠᠯᠭᠠᠳᠠᠭ ᠪᠠᠢᠵᠠᠢ᠃ ᠬᠠᠷᠢ ᠭᠠᠵᠠᠷ ᠤ᠋ᠨ ᠡᠯᠳᠡᠪ ᠦᠨᠳᠦᠰᠦᠲᠡᠨ ᠳ᠋ᠦ᠍ ᠬᠡᠳᠦᠨ ᠳᠠᠪᠬᠤᠷ ᠪᠦᠰᠡᠯᠡᠭᠳᠡᠭᠰᠡᠨ ᠤᠴᠢᠷ᠂ ᠭᠠᠳᠠᠭᠠᠳᠤ ᠶ᠋ᠢᠨ ᠤᠯᠤᠰ ᠭᠦᠷᠦᠨ ᠨᠦ᠍ᠭᠦᠳ ᠡᠴᠡ ᠪᠦᠷᠢᠮᠦᠰᠦᠨ ᠲᠠᠰᠤᠷᠠᠭᠠᠳ ᠲᠠᠨᠢᠨ ᠮᠡᠳᠡᠬᠦ ᠨᠢ ᠵᠥᠪᠬᠡᠨ ᠬᠢᠲᠠᠳ᠂ ᠬᠠᠰᠠᠭ᠂ ᠴᠠᠨᠲ᠋ᠤᠤ ᠪᠣᠯᠵᠤ ᠭᠦᠢᠴᠡᠭᠡᠳ ᠣᠷᠣᠰᠢᠨ ᠰᠠᠭᠤᠬᠤ ᠭᠠᠵᠠᠷ ᠠ᠋ᠴᠠ ᠬᠣᠯᠠᠳᠠᠨ ᠭᠠᠷᠪᠠᠯ ᠶᠠᠮᠠᠷ ᠶᠠᠮᠠᠷ ᠤᠯᠤᠰ ᠣᠷᠣᠨ ᠪᠠᠢᠳᠠᠭ ᠢ᠋ ᠣᠭᠲᠣ ᠦᠯᠦ ᠮᠡᠳᠡᠨᠡ᠃ ᠠᠶᠤᠨ ᠰᠦᠷᠳᠡᠳᠡᠭ ᠨᠢ ᠭᠠᠭᠴᠠᠬᠠᠨ ᠮᠠᠨᠵᠤ ᠪᠠᠢᠳᠠᠭ ᠶᠤᠮ᠃ ᠮᠠᠨᠵᠤ ᠬᠠᠭᠠᠨ ᠲᠩᠷᠢ ᠶᠦᠮ ᠤᠤ᠂ ᠠᠯᠢ ᠭᠠᠵᠠᠷ ᠲᠤ ᠴᠦ᠍ ᠪᠢᠯᠢᠤ ᠬᠡᠨ ᠮᠡᠳᠡᠯᠡ᠂ ᠮᠠᠨᠵᠤ ᠬᠡᠮᠡᠬᠦ᠂ ᠣᠷᠴᠢᠯᠠᠩ ᠢ᠋ ᠪᠦᠬᠦᠯᠢ ᠪᠦᠲᠦᠨ ᠢ᠋ᠶ᠋ᠡᠷ ᠨᠢ ᠵᠠᠬᠢᠷᠤᠭᠰᠠᠨ ᠶᠡᠬᠡ ᠬᠠᠭᠠᠨ ᠮᠠᠨ ᠢ᠋ ᠵᠠᠬᠢᠷᠳᠠᠭ ᠭᠡᠵᠦ ᠲᠡᠳᠡ ᠪᠣᠳᠣᠨᠠ᠃ ᠭᠡᠲᠡᠯᠡ ᠥᠨᠥ ᠶ᠋ᠢᠨ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠰᠤᠮᠤᠨ ᠳᠠᠷᠤᠭᠠ ᠳᠠᠮᠫᠢᠯ ᠮᠠᠨᠢ ᠬᠠᠷᠢᠨ ᠲᠡᠷᠡ ᠥᠭᠡᠯᠡᠳ ᠦ᠋ᠨ ᠨᠢᠭᠡ ᠪᠣᠯᠤᠨᠠ᠃
ᠮᠠᠨᠵᠤ ᠭᠦᠷᠦᠨ ᠨᠢ ᠠᠷᠪᠠ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠳ᠋ᠤ᠌ ᠰᠢᠪᠲᠤᠷᠴᠤ᠂ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠡᠬᠢᠯᠡᠬᠦ ᠲᠡᠢ ᠵᠡᠷᠭᠡ ᠢᠯᠢ ᠲᠠᠷᠪᠠᠭᠠᠲᠠᠢ ᠬᠢᠨ ᠦ᠌ ᠢᠳᠡᠷ ᠵᠠᠯᠠᠭᠤᠰ ᠢ᠋ ᠴᠡᠷᠢᠭ ᠲᠦ᠍ ᠲᠡᠳᠡᠨ ᠰᠤᠷᠭᠠᠭᠤᠯᠢ ᠬᠢᠯᠭᠡᠵᠦ ᠡᠬᠢᠯᠡᠪᠡ᠃ ᠡᠭᠦᠨ ᠳ᠋ᠦ᠍ᠨᠢ ᠥᠭᠡᠯᠡᠳ ᠦ᠋ᠳ《ᠶᠡᠬᠡ ᠡᠵᠡᠨ ᠬᠠᠭᠠᠨ ᠮᠠᠨ ᠢ᠋ ᠪᠡᠨ ᠢᠪᠡᠭᠡᠨ ᠲᠡᠳᠬᠦᠵᠦ ᠪᠠᠢᠭᠠ ᠨᠢ ᠡᠨᠡ ᠪᠣᠯ ᠤᠤ》 ᠭᠡᠵᠦ ᠪᠠᠶᠠᠷᠯᠠᠯᠳᠤᠨᠠ᠃ ᠭᠡᠪᠡᠴᠦ ᠬᠥᠮᠦᠨ᠂ ᠲᠡᠷᠡ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤᠨᠢ ᠬᠡᠴᠢᠨᠡᠭᠡᠨ ᠳᠠᠳᠤᠯᠭᠠᠵᠢᠨ ᠮᠡᠷᠭᠡᠵᠢᠪᠡᠴᠦ ᠲᠤᠰᠢᠶᠠᠯ ᠳ᠋ᠤ᠌ ᠡᠰᠡ ᠳᠠᠪᠰᠢᠨᠠ᠃ ᠳᠡᠭᠡᠷᠡ ᠡᠴᠡ ᠠᠪᠤᠭᠠᠳ ᠳᠣᠣᠷᠠᠲᠤ ᠠᠷᠪᠠᠲᠤ ᠶ᠋ᠢᠨ ᠳᠠᠷᠤᠭᠠ ᠪᠣᠯᠪᠠᠴᠤ ᠮᠠᠨᠵᠤ ᠬᠢᠲᠠᠳ ᠨᠠᠷ ᠪᠠᠢᠯᠠ᠃ ᠳᠥᠷᠪᠡ ᠲᠠᠪᠤᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠬᠢᠭᠰᠡᠨ ᠥᠭᠡᠯᠡᠳ ᠦ᠋ᠳ ᠢ᠋ ᠪᠠᠷᠠᠭᠤᠨ ᠲᠠᠢᠰᠢ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃ ᠡᠬᠢᠨ ᠦ᠌ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠴᠣᠬᠢᠭᠳᠠᠨ ᠬᠣᠢᠰᠢ ᠤᠬᠤᠷᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠴᠣᠬᠣᠮ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠬᠡᠨ ᠲᠡᠢ ᠪᠠᠢᠯᠳᠤᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠡᠴᠢᠭᠡ ᠡᠪᠦᠭᠡᠳ ᠦ᠋ᠨ ᠢ᠋ᠶ᠋ᠡᠨ ᠡᠷᠡᠯᠬᠡᠭ ᠪᠠᠭᠠᠲᠤᠷ ᠨᠡᠷᠡ ᠶᠦ᠍ᠭᠡᠨ ᠭᠤᠲᠤᠭᠠᠪᠠ ᠭᠡᠵᠦ ᠠᠭᠤᠷᠰᠠᠨ ᠪᠤᠬᠢᠨᠢᠳᠤᠨᠠ᠃ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠲᠡᠳᠡ ᠬᠣᠶᠠᠳᠠᠬᠢ ᠤᠳᠠᠭᠠ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳᠡᠢᠯᠦᠭᠰᠡᠨ ᠠᠵᠢ᠃ ᠭᠡᠪᠡᠴᠦ ᠳᠠᠢᠰᠤᠨ ᠠ᠋ᠴᠠ ᠣᠯᠵᠠᠯᠠᠭᠰᠠᠨ ᠬᠥᠮᠦᠰ ᠢ᠋ ᠦᠵᠡᠬᠦ ᠳ᠋ᠦ᠍ ᠳᠠᠩ ᠮᠣᠩᠭᠣᠯ᠃ ᠥᠪᠡᠷᠰᠡᠳ ᠲᠡᠢ ᠨᠢ ᠠᠳᠠᠯᠢ ᠥᠭᠡᠯᠡᠳ ᠦ᠋ᠳ᠃ ᠡᠢᠮᠦ ᠳ᠋ᠦ᠍ ᠢᠯᠢ ᠲᠠᠷᠪᠠᠭᠠᠲᠠᠢ ᠶ᠋ᠢᠨ ᠬᠢᠨ ᠶᠡᠬᠡᠳᠡ ᠭᠠᠢᠬᠠᠨᠠ᠃《ᠦ ᠶᠠᠭᠠᠯᠠᠢ ᠪᠣᠢ! ᠶᠠᠭᠠᠯᠠᠢ ᠪᠣᠢ ᠥᠭᠡᠯᠡᠳ ᠪᠢᠳᠡᠨ ᠦ᠌ ᠬᠣᠭᠣᠷᠣ ᠵᠠᠭᠤᠷᠠ᠃ ᠪᠠᠢᠯᠳᠤᠬᠤ ᠤᠴᠢᠷ ᠶᠠᠭᠤ ᠪᠢᠯᠡ? ᠮᠣᠩᠭᠣᠯ ᠭᠡᠳᠡᠭ ᠮᠣᠬᠣᠰᠢ ᠦᠭᠡᠢ ᠵᠣᠷᠢᠭᠲᠤ ᠮᠠᠨᠳᠤᠭᠰᠠᠨ ᠡᠬᠡ ᠣᠷᠣᠨ ᠪᠠᠢᠭᠰᠠᠨ ᠢ᠋ ᠮᠠᠨᠵᠤ ᠨᠤᠭᠤᠳ ᠬᠣᠭᠣᠷᠣᠨᠳᠣ ᠨᠢ ᠡᠯᠳᠡᠪ ᠢ᠋ᠶ᠋ᠡᠷ ᠮᠡᠬᠡᠯᠡᠨ ᠡᠪᠳᠡᠷᠡᠯᠴᠡᠭᠦᠯᠦᠨ ᠬᠢᠳᠤᠯᠴᠠᠭᠤᠯᠵᠤ ᠮᠥᠬᠥᠭᠡᠭᠰᠡᠨ ᠭᠡᠳᠡᠭ ᠪᠢᠰᠢ ᠪᠢᠯᠢᠤ᠂ ᠦ ᠶᠠᠭᠠᠯᠠᠢ ᠪᠣᠢ᠂ ᠶᠠᠭᠠᠯᠠᠢ ᠪᠣᠢ ᠣᠳᠣ ᠪᠣᠯᠢᠰ! ᠢᠷᠡᠭᠡᠳᠦᠢ ᠶ᠋ᠢᠨ ᠬᠡᠷᠡᠭ ᠢ᠋ ᠬᠥᠬᠡ ᠲᠩᠷᠢ ᠮᠡᠳᠡᠲᠦᠭᠡᠢ!》 ᠭᠡᠵᠦ ᠱᠤᠤᠭᠢᠯᠳᠤᠨ ᠲᠡᠷᠡ ᠳᠣᠣᠷᠠ ᠪᠠᠨ ᠪᠦᠬᠦ ᠮᠠᠨᠵᠤ ᠬᠢᠲᠠᠳ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠤᠰᠠᠳᠬᠠᠵᠠᠢ᠃ ᠡᠳᠡ ᠳᠤᠮᠳᠠ ᠥᠨᠳᠥᠷ ᠳᠠᠮᠫᠢᠯ ᠴᠣ ᠶᠠᠪᠤᠯᠴᠠᠵᠤ ᠪᠠᠢᠭᠰᠠᠨ ᠠᠵᠢ᠃
ᠥᠭᠡᠯᠡᠳ ᠦ᠋ᠳ ᠦ᠋ᠨ ᠪᠠᠢᠯᠳᠤᠭᠰᠠᠨ ᠭᠠᠵᠠᠷ᠂ ᠴᠡᠩᠬᠡᠷ ᠬᠥᠬᠡ ᠲᠩᠷᠢ ᠶ᠋ᠢ ᠨᠢᠭᠡ ᠵᠢᠭᠳᠡ ᠰᠢᠷᠳᠡᠭᠰᠡᠨ ᠥᠷᠭᠡᠨ ᠴᠠᠭᠠᠨ ᠲᠠᠯᠠ ᠪᠠᠢᠯᠠ᠃ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠡᠵᠡᠭᠦᠢ ᠬᠡᠭᠡᠷᠡ ᠭᠡᠭᠴᠢ ᠪᠡᠷ ᠥᠭᠡᠯᠡᠳ ᠴᠡᠷᠢᠭ ᠦ᠋ᠳ ᠳᠠᠷᠤᠩᠭᠤᠢᠯᠠᠨ ᠵᠠᠬᠢᠷᠤᠭᠴᠢ ᠳᠠᠷᠤᠭᠠ ᠨᠣᠶᠠᠳ ᠢ᠋ᠶ᠋ᠠᠨ ᠤᠰᠠᠳᠬᠠᠭᠰᠠᠨ ᠢ᠋ᠶ᠋ᠠᠷ ᠶᠡᠬᠡ ᠨᠠᠢᠷ ᠬᠢᠬᠦ ᠪᠣᠯᠵᠠᠢ᠃ ᠬᠠᠪᠢ ᠣᠢᠷᠠ ᠶ᠋ᠢᠨ ᠬᠠᠰᠠᠭ᠂ ᠴᠠᠨᠲ᠋ᠤᠤ ᠨᠠᠷ ᠠ᠋ᠴᠠ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠶ᠋ᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠠᠪᠴᠢᠷᠠᠬᠤ ᠶ᠋ᠢᠨ ᠳᠡᠯᠢᠮ ᠳ᠋ᠦ᠍ ᠲᠡᠳᠡᠨ ᠢ᠋ ᠴᠦ᠍ ᠤᠷᠢᠨ ᠳᠠᠭᠤᠳᠠᠭᠰᠠᠨ ᠠᠵᠢ᠃ ᠤᠷᠢᠬᠳᠠᠭᠰᠠᠳ ᠠᠩᠬᠠᠨ ᠳ᠋ᠠᠭᠠᠨ ᠠᠶᠤᠨ ᠰᠦᠷᠳᠡᠬᠦ ᠪᠣᠯᠪᠠᠴᠤ᠂ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠮᠡᠳᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠰᠡᠳᠬᠢᠯ ᠲᠠᠲᠠᠭᠳᠠᠨ ᠪᠠᠶᠠᠷᠯᠠᠵᠤ᠂ ᠠᠷᠢᠬᠢ ᠳᠠᠷᠠᠰᠤ ᠶ᠋ᠢ ᠨᠡᠮᠡᠨ ᠨᠡᠮᠡᠨ ᠠᠪᠴᠢᠷᠠᠨᠠ᠃ ᠠᠮᠲᠠᠲᠤ ᠠᠷᠢᠬᠢ ᠶ᠋ᠢ ᠬᠤᠪᠢᠶᠠᠨ ᠤᠤᠭᠤᠯᠴᠠᠵᠤ᠂ ᠠᠶᠠᠭᠠ ᠲᠠᠪᠠᠭ ᠴᠢᠨᠦ ᠮᠢᠨᠦ ᠦᠭᠡᠢ ᠪᠣᠯᠤᠨ ᠦᠨᠡᠨᠬᠦ ᠰᠡᠳᠬᠢᠯ ᠦ᠋ᠨ ᠦᠭᠡᠰ ᠢ᠋ ᠬᠥᠭᠡᠷᠦᠯᠴᠡᠬᠦ ᠳ᠋ᠦ᠍ ᠡᠴᠢᠭᠡ ᠡᠪᠦᠭᠡᠳ ᠡᠴᠡ ᠬᠡᠯᠬᠢᠭᠳᠡᠭᠰᠡᠨ ᠡᠯᠢᠭᠡᠨ ᠰᠠᠳᠤᠨ ᠳ᠋ᠤ᠌ ᠬᠣᠯᠪᠣᠭᠠ ᠦᠭᠡᠢ ᠬᠡᠨ ᠴᠦ᠍ ᠠᠯᠠᠭᠠ᠃ ᠬᠠᠰᠠᠭ ᠴᠦ᠍᠂ ᠴᠠᠨᠲ᠋ᠤᠤ ᠴᠦ᠍ ᠠᠬᠠ ᠳᠡᠭᠦᠦ᠂ ᠠᠯᠢᠨ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠮᠠᠨᠵᠤ ᠶ᠋ᠢᠨ ᠡᠰᠡᠷᠭᠦ《ᠠᠢ ᠠᠬᠠ ᠳᠡᠭᠦᠦ ᠨᠠᠷ ᠠ᠋! ᠠᠬᠠ ᠳᠡᠭᠦᠦ ᠪᠢᠳᠡᠨ ᠳ᠋ᠦ᠍ ᠡᠪᠳᠡᠷᠡᠯᠴᠡᠨ ᠬᠢᠳᠤᠯᠴᠠᠬᠤ ᠤᠴᠢᠷ ᠬᠡᠵᠢᠶᠡ ᠴᠦ᠍ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠂ ᠡᠭᠦᠨ ᠢ᠋ ᠦᠷᠡ ᠠᠴᠢ ᠨᠠᠷ ᠲᠠᠭᠠᠨ ᠵᠠᠬᠢᠲᠤᠭᠠᠢ! 》 ᠭᠡᠵᠦ ᠱᠤᠤᠭᠢᠯᠳᠤᠨᠠ᠃ ᠬᠠᠰᠠᠭ᠂ ᠴᠠᠨᠲ᠋ᠤᠤ ᠥᠭᠡᠯᠡᠳ ᠳᠠᠭᠤᠤ ᠪᠥᠵᠢᠭ ᠦᠷᠭᠦᠯᠵᠢᠯᠡᠭᠰᠡᠨ ᠨᠡᠭᠡᠷᠡᠨ ᠶᠡᠬᠡ ᠪᠠᠶᠠᠷ ᠪᠣᠯᠵᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠵᠡᠪᠰᠡᠭ ᠬᠡᠷᠡᠭᠯᠡᠯ ᠦ᠋ᠨ ᠪᠠᠢᠷᠢ ᠰᠢᠳᠡᠨ ᠭᠠᠯ ᠳᠦᠷᠡᠯᠵᠡᠵᠦ ᠪᠠᠢᠬᠤ ᠳ᠋ᠤ᠌ ᠮᠠᠨᠵᠤ ᠬᠢᠲᠠᠳ ᠤ᠋ᠨ ᠡᠲᠡᠭᠡᠳ ᠡᠴᠡ ᠭᠠᠯ ᠲᠠᠯᠪᠢᠪᠠ ᠭᠡᠵᠦ ᠬᠠᠷᠠᠳᠠᠨ ᠰᠡᠵᠢᠭᠯᠡᠭᠰᠡᠨ ᠴᠦ᠍ ᠦᠭᠡᠢ᠂《ᠮᠠᠨ ᠤ᠋ ᠦᠢᠯᠡ ᠬᠡᠷᠡᠭ ᠢ᠋ ᠳᠡᠭᠡᠳᠦ ᠲᠩᠷᠢ ᠲᠠᠭᠠᠯᠠᠪᠠ》 ᠭᠡᠵᠦ ᠪᠠᠶᠠᠷᠯᠠᠯᠳᠤᠨᠠ᠃ ᠠᠷᠪᠠᠨ ᠯᠦ᠍ ᠬᠠᠷᠠ ᠳᠠᠷᠢ ᠭᠡᠨᠡᠳᠲᠡ ᠲᠠᠰᠤᠷᠠᠨ ᠣᠷᠴᠢᠯᠠᠩ ᠳ᠋ᠤ᠌ ᠭᠠᠷᠤᠭᠠ ᠦᠭᠡᠢ ᠶᠡᠬᠡ ᠳᠠᠭᠤ ᠭᠠᠷᠤᠨ ᠣᠷᠭᠢᠯᠤᠭᠰᠠᠨ ᠬᠠᠷᠠ ᠤᠲᠤᠭᠠ ᠨᠢ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠪᠢᠲᠡᠭᠦᠦ ᠪᠦᠷᠬᠦᠨ ᠬᠠᠯᠬᠠᠯᠠᠬᠤ ᠳ᠋ᠤ᠌ ᠴᠦ᠍ ᠪᠠᠶᠠᠷ᠂《ᠠᠬᠠ ᠳᠡᠭᠦᠦ ᠪᠢᠳᠡ ᠨᠠᠷ ᠠᠯᠠᠯᠴᠠᠭᠤᠯᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠪᠤᠵᠠᠷ ᠬᠡᠷᠡᠭᠯᠡᠯ ᠤᠰᠠᠳᠪᠠ》 ᠭᠡᠵᠦ ᠱᠤᠤᠭᠢᠯᠳᠤᠨᠠ᠃ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠨᠠᠢᠷᠯᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠥᠭᠡᠯᠡᠳ ᠦ᠋ᠳ ᠭᠡᠳᠡᠷᠭᠦ ᠪᠤᠴᠠᠪᠠ᠃ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ ᠠᠪᠤ ᠡᠵᠢ ᠨᠠᠷ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠵᠠᠰᠠᠭ ᠵᠠᠬᠢᠷᠭᠠᠨ ᠳ᠋ᠠᠭᠠᠨ ᠪᠣᠯᠪᠠᠴᠤ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍ ᠬᠣᠢᠴᠢ ᠡᠳᠦᠷ ᠬᠣᠵᠢᠮ ᠤ᠋ᠨ ᠮᠠᠷᠭᠠᠰᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠪᠣᠳᠣᠨ ᠵᠣᠪᠠᠨᠢᠭᠰᠠᠨ ᠬᠡᠨ ᠴᠦ᠍ ᠦᠭᠡᠢ᠂ ᠮᠥᠨ ᠯᠡ ᠪᠠᠶᠠᠷ᠃ ᠮᠣᠩᠭᠣᠯᠴᠤᠳ ᠬᠣᠭᠣᠷᠣ ᠵᠠᠭᠤᠷᠠ ᠪᠠᠢᠯᠳᠤᠬᠤ ᠰᠢᠭ᠋ ᠪᠤᠵᠠᠷ ᠮᠠᠭᠤᠬᠠᠢ ᠶᠠᠭᠤᠮᠠ ᠲᠡᠳᠡᠨ ᠳ᠋ᠦ᠍ ᠦᠭᠡᠢ᠃ ᠶᠠᠮᠠᠷ ᠪᠣᠯᠪᠠᠴᠤ ᠪᠠᠢᠯᠳᠤᠬᠤ ᠦᠭᠡᠢ ᠪᠠᠢᠬᠤ ᠰᠢᠭ᠋ ᠰᠠᠢᠨ ᠰᠠᠢᠬᠠᠨ ᠶᠠᠭᠤᠮᠠ ᠦᠭᠡᠢ ᠠᠵᠢ᠃ ᠡᠪᠦᠭᠡᠳ ᠬᠥᠭᠰᠢᠳ ᠨᠢ ᠬᠤᠭᠤᠷ ᠢ᠋ᠶ᠋ᠠᠨ ᠬᠥᠭᠯᠡᠨ ᠦᠯᠢᠭᠡᠷ ᠳᠣᠮᠣᠭ ᠢ᠋ᠶ᠋ᠠᠨ ᠳᠠᠭᠤᠯᠠᠯᠳᠤᠨ ᠶᠡᠬᠡ ᠨᠠᠢᠷ ᠢ᠋ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠡᠭᠦᠨ ᠦ᠌ ᠳᠠᠷᠠᠭᠠ ᠨᠢᠭᠡ ᠵᠢᠯ ᠨᠠᠮ ᠲᠠᠢᠪᠤᠩ ᠥᠩᠭᠡᠷᠡᠪᠡ᠃ ᠬᠣᠶᠠᠳᠠᠬᠢ ᠵᠢᠯ ᠴᠦ᠍ ᠡᠩᠬᠡ ᠠᠮᠤᠭᠤᠯᠠᠩ᠃《ᠥᠨᠥᠬᠢ ᠴᠠᠭ ᠠ᠋ᠴᠠ ᠬᠣᠢᠰᠢ ᠥᠯᠥᠭᠡᠢ ᠲᠡᠢ ᠬᠡᠦᠬᠡᠳ ᠪᠣᠯᠪᠠᠴᠤ ᠤᠬᠢᠯᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠰᠢᠭ᠋ ᠪᠠᠢᠬᠤ ᠨᠢ ᠶᠠᠭᠤᠲᠠᠢ ᠬᠠᠴᠢᠨ᠂ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ》 ᠭᠡᠵᠦ ᠬᠡᠯᠡᠯᠴᠡᠨ ᠪᠠᠢᠲᠠᠯᠠ ᠬᠡᠷᠡᠭ ᠪᠣᠯᠵᠤ ᠡᠬᠢᠯᠡᠪᠡ᠃ ᠡᠮᠦᠨᠡ ᠵᠦᠭ ᠡᠴᠡ ᠦᠢ ᠣᠯᠠᠨ ᠴᠡᠷᠢᠭ ᠠᠢᠰᠤᠢ ᠭᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ《ᠤᠭ ᠠ᠋ᠴᠠ ᠪᠠᠨ ᠪᠣᠯᠳᠠᠭ ᠦᠭᠡᠢ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠥᠭᠡᠯᠡᠳ ᠦ᠋ᠳ ᠢ᠋ ᠡᠨᠡ ᠳᠡᠯᠡᠬᠡᠢ ᠡᠴᠡ ᠬᠦᠢᠰᠦ ᠲᠡᠮᠲᠡᠷᠢᠨ ᠤᠰᠠᠳᠬᠠᠨᠠ》 ᠭᠡᠰᠡᠨ ᠳᠠᠢᠰᠤᠨ ᠤ᠋ ᠱᠤᠤᠭᠢᠶᠠᠨ ᠢ᠋ ᠥᠭᠡᠯᠡᠳ ᠦ᠋ᠳ ᠬᠦᠯᠢᠶᠡᠨ ᠠᠪᠤᠪᠠ᠃
ᠥᠭᠡᠯᠡᠳ ᠦ᠋ᠳ ᠴᠥᠭᠡᠨ᠂ ᠪᠠᠢᠯᠳᠤᠬᠤ ᠵᠡᠪᠰᠡᠭ ᠪᠦᠳᠦᠭᠦᠯᠢᠭ᠂ ᠳᠠᠷᠢ ᠲᠤᠭᠤᠯᠭᠠ ᠪᠠᠷ ᠳᠤᠲᠠᠭᠤ ᠬᠣᠮᠰᠠ ᠭᠡᠪᠡᠴᠦ ᠡᠰᠡᠷᠭᠦᠴᠡᠨ ᠬᠥᠳᠡᠯᠪᠡ᠃ ᠣᠯᠠᠨ ᠤ᠋ ᠪᠠᠨ ᠰᠠᠨᠠᠯ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠨᠳᠦᠰᠦᠲᠡᠨ ᠢ᠋ᠶ᠋ᠡᠨ ᠵᠠᠬᠢᠷᠬᠤ ᠪᠣᠯᠤᠭᠰᠠᠨ ᠳᠣᠣᠷᠠᠲᠤ ᠭᠡᠷ ᠡᠴᠡ ᠭᠠᠷᠤᠯᠲᠠᠢ ᠥᠬᠡᠯᠦᠯᠭᠡ ᠨᠣᠶᠠᠨ ᠭᠡᠭᠴᠢ ᠠᠢᠯ ᠡᠷᠦᠬᠡ ᠨᠢᠭᠡᠪᠦᠷᠢ ᠶ᠋ᠢ ᠠᠪᠤᠷᠠᠬᠤ ᠶ᠋ᠢᠨ ᠲᠥᠯᠥᠭᠡ ᠨᠣᠬᠠᠢ ᠪᠠᠨ ᠬᠦᠷᠲᠡᠯᠡ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠲᠤᠯᠤᠯᠳᠤᠪᠠᠴᠤ ᠳᠠᠢᠰᠤᠨ ᠤ᠋ ᠲᠣᠭᠠ ᠮᠠᠰᠢ ᠣᠯᠠᠨ᠂ ᠦᠶᠡᠷ ᠦ᠋ᠨ ᠤᠰᠤ ᠰᠢᠭ᠋ ᠨᠥᠮᠥᠷᠦᠨ ᠪᠠᠭᠤᠨᠠ᠃ ᠠᠷᠭᠠ ᠪᠤᠶᠤ ᠬᠣᠢᠰᠢ ᠤᠬᠤᠷᠢᠬᠤ ᠳ᠋ᠤ᠌ ᠳᠠᠢᠰᠤᠨ ᠥᠯᠥᠭᠡᠢ ᠲᠡᠢ ᠬᠡᠦᠬᠡᠳ ᠡᠴᠡ ᠠᠪᠤᠭᠠᠳ ᠡᠪᠦᠭᠡᠳ ᠡᠮᠡᠭᠡᠳ ᠢ᠋ ᠪᠣᠯᠪᠠᠴᠤ ᠭᠣᠣᠯ ᠲᠠᠰᠤᠯᠤᠨ ᠬᠢᠳᠤᠨᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠥᠭᠡᠯᠡᠳ ᠶᠠᠭᠠᠬᠢᠵᠤ ᠴᠦ᠍ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠠᠳ ᠳᠠᠷᠬᠠᠨ ᠪᠤᠲᠠᠷᠠᠬᠤ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠥᠭᠡᠯᠦᠯᠭᠡ ᠨᠣᠶᠠᠨ ᠬᠡᠰᠡᠭ ᠠᠢᠯ ᠡᠷᠦᠬᠡ ᠶ᠋ᠢ ᠳᠠᠭᠠᠭᠤᠯᠤᠨ ᠣᠷᠣᠰ ᠤ᠋ᠨ ᠨᠤᠲᠤᠭ ᠲᠤ ᠵᠢᠭᠤᠲᠠᠨ ᠣᠷᠣᠵᠠᠢ᠃ ᠲᠡᠳᠡ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠬᠠᠶᠠᠨ ᠵᠥᠪᠬᠡᠨ ᠮᠠᠯ ᠬᠥᠷᠥᠩᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠭᠠᠰ ᠬᠤᠭᠤᠰ ᠢ᠋ ᠠᠪᠤᠨ ᠢᠷᠡᠭᠰᠡᠨ ᠲᠤᠯᠠ ᠡᠳᠦᠷ ᠰᠥᠨᠢ ᠶ᠋ᠢ ᠭᠠᠭᠴᠠᠬᠠᠨ ᠳᠡᠭᠡᠷᠡ ᠮᠡᠯᠲᠡᠢᠬᠦ ᠬᠥᠬᠡ ᠲᠩᠷᠢ ᠰᠢᠷᠳᠡᠨ ᠭᠥᠯᠢᠷᠡᠬᠦ ᠪᠡᠷ ᠥᠩᠭᠡᠷᠡᠭᠦᠯᠦᠨᠡ᠃ ᠳᠣᠣᠷᠠ ᠨᠢ ᠣᠷᠣᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠷᠠᠮᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠬᠥᠮᠦᠨ ᠮᠠᠯ ᠠᠯᠢ ᠠᠯᠢᠨ ᠳ᠋ᠤ᠌ ᠭᠢᠰᠬᠢᠬᠦ ᠭᠠᠵᠠᠷ ᠨᠣᠶᠠᠨ ᠳ᠋ᠤᠨᠢ ᠪᠣᠯᠪᠠᠴᠤ ᠵᠣᠪᠠᠯᠠᠩ᠂ ᠨᠣᠬᠠᠢ ᠳ᠋ᠤ᠌ ᠪᠣᠯᠪᠠᠴᠤ ᠥᠯᠥᠰᠬᠦᠯᠡᠩ᠂ ᠳᠡᠭᠡᠳᠦ ᠲᠠᠯᠠ ᠠ᠋ᠴᠠ ᠨᠢ ᠬᠠᠭᠠᠨᠲᠤ ᠵᠠᠰᠠᠭ ᠤ᠋ᠨ ᠭᠠᠵᠠᠷ᠂ ᠨᠢᠭᠡ ᠪᠣᠯ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠ! ᠡᠰᠡᠪᠡᠯ ᠮᠠᠨ ᠤ᠋ ᠤᠯᠤᠰ ᠲᠤ ᠳᠠᠭᠠᠷᠠ ᠣᠷᠣᠨ ᠵᠠᠬᠢᠷᠤᠭᠳᠠ ᠭᠡᠬᠦ ᠨᠢ ᠮᠥᠨ ᠯᠡ ᠠᠶᠤᠯ᠃ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠪᠠᠯ ᠮᠠᠨᠵᠤ ᠶ᠋ᠢᠨ ᠬᠠᠷᠭᠢᠰ ᠴᠡᠷᠢᠭ ᠦ᠋ᠳ ᠲᠦ᠍ ᠠᠯᠠᠭᠳᠠᠨᠠ᠃ ᠣᠷᠣᠰ ᠲᠤ ᠳᠠᠭᠠᠷᠠ ᠣᠷᠣᠶᠠ ᠭᠡᠲᠡᠯᠡ ᠳᠡᠭᠡᠷᠡ ᠴᠠᠭ ᠮᠠᠨᠵᠤ ᠶ᠋ᠢ ᠡᠰᠡᠷᠭᠦᠴᠡᠨ ᠪᠣᠰᠤᠭᠰᠠᠨ ᠠᠮᠤᠷᠰᠠᠨᠠᠭᠠ ᠪᠠᠬᠠᠨ ᠬᠥᠮᠦᠰ ᠢ᠋ ᠳᠠᠭᠠᠭᠤᠯᠤᠨ ᠣᠷᠣᠰ ᠲᠤ ᠣᠴᠢᠭᠰᠠᠨ ᠢ᠋ ᠣᠷᠣᠰ ᠤ᠋ᠳ ᠣᠷᠣᠨ ᠨᠤᠲᠤᠭ ᠲᠤᠨᠢ ᠡᠭᠦᠷᠢᠳᠡ ᠪᠤᠴᠠᠭᠠᠬᠤ ᠦᠭᠡᠢ ᠭᠡᠵᠦ ᠭᠠᠵᠠᠷ ᠤ᠋ᠨ ᠮᠤᠬᠤᠷ ᠡᠯᠡᠰᠦᠨ ᠴᠦᠯ ᠦ᠋ᠨ ᠵᠠᠬᠠ ᠳ᠋ᠤ᠌ ᠠᠪᠠᠴᠢᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ ᠭᠡᠵᠦ ᠵᠢᠪᠡᠭᠦᠴᠡᠨᠡ᠃ ᠶᠠᠭᠤᠮᠠ ᠪᠦᠬᠦᠨ ᠳ᠋ᠦ᠍ ᠨᠢᠭᠡ ᠢᠷᠡᠭᠡᠳᠦᠢ᠂ ᠶᠠᠪᠤᠳᠠᠯ ᠪᠦᠬᠦᠨ ᠳ᠋ᠦ᠍ ᠨᠢᠭᠡ ᠤᠬᠠᠭᠠᠨ ᠪᠠᠢᠳᠠᠭ ᠪᠣᠯ ᠡᠨᠳᠡ ᠶᠠᠭᠠᠬᠢᠭᠠᠳ ᠴᠦ᠍ ᠭᠠᠷᠬᠤ ᠭᠠᠵᠠᠷ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠪᠠᠢᠬᠤ ᠠ᠋ᠴᠠ ᠥᠨᠥᠳᠥᠷ ᠮᠠᠷᠭᠠᠰᠢ᠂ ᠨᠥᠭᠥᠭᠡᠳᠦᠷ ᠶᠡᠷᠦ ᠳ᠋ᠡᠭᠡᠨ ᠯᠡ ᠲᠡᠷᠡ᠃ ᠭᠡᠪᠡᠴᠦ ᠰᠠᠢᠨ ᠴᠦ᠍᠂ ᠮᠠᠭᠤ ᠴᠦ᠍ ᠨᠢᠭᠡ ᠬᠤᠪᠢ ᠵᠠᠶᠠᠭᠠ ᠪᠠᠢᠳᠠᠭ ᠭᠡᠯᠡ᠃ ᠲᠡᠷᠡ ᠶᠣᠰᠣᠭᠠᠷ ᠨᠢᠭᠡ ᠨᠢ ᠣᠯᠠᠨ ᠤ᠋ ᠲᠥᠪᠯᠡᠷᠡᠭᠰᠡᠨ ᠨᠢᠭᠡ ᠬᠣᠲᠠ ᠪᠠᠷ ᠬᠡᠰᠦᠭᠦᠴᠢᠯᠡᠨ ᠶᠠᠪᠤᠵᠤ ᠪᠠᠢᠭᠠᠳ ᠬᠠᠯᠬᠠ ᠬᠡᠮᠡᠬᠦ ᠮᠣᠩᠭᠣᠯ ᠣᠷᠣᠨ ᠮᠠᠨᠵᠤ ᠶ᠋ᠢ ᠡᠰᠡᠷᠭᠦᠴᠡᠨ ᠪᠣᠰᠴᠤ ᠲᠤᠰᠠᠭᠠᠷ ᠤᠯᠤᠰ ᠪᠣᠯᠵᠤ ᠠᠪᠤᠭᠠᠳ ᠪᠦᠬᠦ ᠮᠣᠩᠭᠣᠯ ᠣᠪᠣᠭᠲᠠᠨ ᠪᠠ ᠲᠤᠭᠤᠷᠭᠠᠲᠠᠨ ᠢ᠋ ᠨᠡᠢᠯᠡᠭᠲᠦᠨ! ᠭᠡᠵᠦ ᠳᠠᠭᠤᠳᠠᠳᠠᠭ ᠭᠡᠨᠡ ᠭᠡᠳᠡᠭ ᠴᠤᠤ ᠰᠣᠨᠣᠰᠤᠨ ᠤᠬᠠᠭᠠᠨ ᠦᠭᠡᠢ ᠪᠠᠶᠠᠷᠯᠠᠨ ᠭᠦᠶᠦᠨ ᠢᠷᠡᠵᠡᠢ᠃ ᠦᠨᠡᠨ ᠳ᠋ᠡᠭᠡᠨ ᠬᠠᠯᠬᠠ ᠬᠡᠮᠡᠬᠦ ᠮᠣᠩᠭᠣᠯ ᠪᠠᠢᠳᠠᠭ ᠢ᠋ ᠥᠭᠡᠯᠦᠯᠭᠡ ᠨᠣᠶᠠᠨ ᠨᠢ ᠪᠣᠯᠪᠠᠴᠤ ᠦᠯᠦ ᠮᠡᠳᠡᠬᠦ ᠤᠴᠢᠷ ᠬᠠᠴᠢᠷᠬᠠᠨ ᠱᠤᠤᠭᠢᠯᠳᠤᠬᠤ ᠦᠭᠡᠢ ᠨᠢ ᠨᠢᠭᠡ ᠴᠦ᠍ ᠦᠭᠡᠢ᠃ ᠭᠡᠪᠡᠴᠦ《ᠮᠣᠩᠭᠣᠯ》 ᠭᠡᠳᠡᠭ ᠢ᠋ᠶ᠋ᠡᠷ ᠨᠢ ᠡᠯᠢᠭᠡᠨ ᠰᠠᠳᠤᠨ ᠢ᠋ᠶ᠋ᠠᠨ ᠭᠡᠵᠦ ᠦᠵᠡᠨ᠂ ᠮᠠᠨᠵᠤ ᠶ᠋ᠢ ᠡᠰᠡᠷᠭᠦᠴᠡᠨ ᠪᠣᠰᠤᠭᠰᠠᠨ ᠭᠡᠳᠡᠭ ᠢ᠋ᠶ᠋ᠡᠷ ᠮᠠᠨ ᠢ᠋ ᠡᠨᠡᠷᠢᠨ ᠲᠡᠳᠬᠦᠭᠴᠢ ᠭᠡᠵᠦ ᠦᠵᠡᠨ᠂ ᠬᠠᠮᠢᠭᠠ ᠪᠠᠢᠭᠠ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠨᠢ ᠵᠢᠳᠬᠦᠰᠦᠭᠡᠢ ᠭᠡᠯᠴᠡᠵᠡᠢ᠃
ᠤᠭ ᠨᠢ ᠥᠭᠡᠯᠥᠯᠭᠡ ᠨᠣᠶᠠᠨ ᠰᠠᠢᠨ ᠵᠠᠶᠠᠭᠠᠨ ᠤ᠋ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠦᠨᠳᠦᠰᠦᠲᠡᠨ ᠦ᠌ ᠳᠤᠮᠳᠠ ᠦᠰᠦᠨ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠷᠡ ᠪᠦᠬᠦᠨ ᠲᠡᠢ ᠡᠪ ᠲᠠᠩᠭᠠᠷᠢᠭ ᠰᠠᠬᠢᠬᠤ ᠶ᠋ᠢ ᠬᠢᠴᠢᠶᠡᠭᠴᠢ᠃ ᠭᠡᠲᠡᠯᠡ ᠥᠪᠡᠷ ᠦ᠋ᠨ ᠬᠢᠨᠢ ᠥᠴᠦᠬᠡᠨ ᠪᠠᠭᠠ ᠥᠭᠡᠯᠡᠳ ᠦᠨᠳᠦᠰᠦᠲᠡᠨ ᠦ᠌ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠣᠨᠴᠠᠭᠠᠢᠳᠠᠨ ᠶᠡᠬᠡ ᠵᠣᠪᠠᠯᠠᠩ ᠵᠦᠳᠡᠭᠦᠷᠡᠯ ᠪᠠᠭᠤᠭᠰᠠᠨ ᠠ᠋ᠴᠠ ᠤᠯᠠᠮᠵᠢᠯᠠᠨ ᠬᠠᠷᠠᠳᠠᠭᠴᠢ᠂ ᠰᠡᠵᠢᠭᠯᠡᠭᠴᠢ᠂ ᠦᠯᠦ ᠢᠲᠡᠭᠡᠭᠴᠢ᠂ ᠬᠠᠷᠢ ᠦᠨᠳᠦᠰᠦᠲᠡᠨ ᠪᠦᠬᠦᠨ ᠯᠦ᠍ᠭᠡ ᠠᠲᠠᠭᠠᠷᠬᠠᠭᠴᠢ᠂ ᠢᠯᠠᠩᠭᠤᠶᠠ ᠮᠠᠨᠵᠤ ᠬᠢᠲᠠᠳ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠨᠢᠳᠦ ᠬᠣᠷᠣᠰᠤᠨ ᠵᠠᠨᠤᠨ ᠵᠦᠬᠡᠭᠴᠢ ᠪᠣᠯᠤᠨ ᠬᠤᠪᠢᠷᠠᠵᠠᠢ᠃ ᠡᠨᠡ ᠪᠣᠯ ᠮᠠᠨᠵᠤ ᠶ᠋ᠢᠨ ᠳᠠᠷᠤᠯᠠᠯ᠂ ᠲᠡᠳᠡᠨ ᠦ᠌ ᠦᠨᠳᠦᠰᠦᠲᠡᠨ ᠦ᠌ ᠳᠡᠭᠡᠷᠡᠩᠭᠦᠢ ᠦᠵᠡᠯ᠂ ᠦᠯᠦ ᠬᠠᠢᠷᠠᠯᠠᠬᠤ ᠬᠠᠷᠭᠢᠰᠯᠠᠯ᠂ ᠰᠢᠳᠤᠷᠭᠤ ᠡᠷᠡ ᠶ᠋ᠢ ᠡᠢᠮᠦ ᠪᠣᠯᠭᠠᠨ ᠥᠪᠡᠷᠲᠡᠭᠡᠨ ᠳᠠᠢᠰᠤᠨ ᠲᠥᠷᠥᠭᠦᠯᠦᠭᠰᠡᠨ ᠬᠡᠷᠡᠭ᠃
1912 ᠣᠨ ᠤ᠋ ᠨᠠᠮᠤᠷ ᠤ᠋ᠨ ᠡᠬᠢᠨ ᠦ᠌ ᠰᠠᠷᠠ ᠪᠠᠷ ᠥᠭᠡᠯᠥᠯᠭᠡ ᠨᠣᠶᠠᠨ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠬᠥᠮᠦᠨ ᠲᠡᠢ ᠪᠢᠰᠢ ᠬᠣᠶᠠᠷ ᠵᠠᠭᠤᠭᠠᠳ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠤᠨ ᠠᠷᠤ ᠬᠢᠶᠠᠭᠲᠤ ᠳ᠋ᠤ᠌ ᠢᠷᠡᠭᠡᠳ ᠣᠷᠣᠰ ᠬᠢᠯᠢ ᠶ᠋ᠢᠨ ᠵᠠᠬᠢᠷᠤᠯ ᠨᠣᠶᠠᠨ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠬᠢᠯᠢ ᠶ᠋ᠢᠨ ᠵᠠᠩᠭᠢ ᠳ᠋ᠤ᠌ ᠬᠡᠳᠦ ᠳᠠᠬᠢᠨ ᠬᠠᠲᠠᠭᠤ ᠱᠠᠭᠠᠷᠳᠠᠯᠭᠠ ᠲᠠᠯᠪᠢᠭᠰᠠᠨ ᠤ᠋ ᠬᠦᠴᠦ ᠪᠡᠷ ᠥᠪᠥᠷ ᠬᠢᠶᠠᠭᠲᠤ ᠳ᠋ᠤ᠌ ᠢᠷᠡᠯᠡ᠃
ᠭᠡᠲᠡᠯᠡ ᠡᠨᠳᠡ ᠶᠠᠭᠤ ᠪᠠᠢᠪᠠ᠃ ᠥᠭᠡᠯᠥᠯᠭᠡ ᠶ᠋ᠢᠨ ᠬᠠᠷᠠᠭᠳᠠᠬᠤ ᠵᠦᠭ ᠪᠣᠯᠭᠠᠨ ᠬᠢᠲᠠᠳ᠂ ᠬᠢᠲᠠᠳ ᠫᠦᠰᠡ ᠨᠦ᠍ᠭᠦᠳ᠂ ᠬᠢᠲᠠᠳ ᠳᠡᠯᠭᠡᠭᠦᠷ ᠦ᠋ᠳ᠂ ᠬᠢᠲᠠᠳ ᠰᠦᠮᠡ᠂ ᠬᠢᠲᠠᠳ ᠠᠵᠢᠯ ᠤ᠋ᠨ ᠬᠥᠮᠦᠰ᠂《ᠥᠨᠥᠬᠢ ᠬᠢᠲᠠᠳ ᠮᠠᠨᠵᠤ ᠠ᠋ᠴᠠ ᠰᠠᠯᠤᠭᠰᠠᠨ ᠬᠠᠯᠬᠠ ᠭᠡᠳᠡᠭ ᠮᠠᠨᠢ ᠡᠨᠡ ᠤᠤ? ᠪᠢ ᠪᠠᠭᠤᠬᠤ ᠦᠭᠡᠢ ᠪᠤᠴᠠᠬᠤ ᠮᠢᠨᠢ!》 ᠭᠡᠵᠦ ᠥᠭᠡᠯᠦᠯᠭᠡ ᠨᠣᠶᠠᠨ ᠠᠷᠤ ᠬᠢᠶᠠᠭᠲᠤ ᠠ᠋ᠴᠠ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠳᠥᠷᠪᠡᠨ ᠳᠤᠭᠤᠢ ᠲᠠᠢ ᠲᠡᠷᠭᠡᠨ ᠡᠴᠡ ᠡᠰᠡ ᠪᠠᠭᠤᠪᠠ᠃ ᠮᠣᠩᠭᠣᠯ ᠵᠠᠩᠭᠢ ᠠᠷᠭᠠᠳᠠᠨ ᠲᠠᠢᠳᠬᠤᠷᠠᠭᠤᠯᠵᠤ ᠬᠢᠶᠠᠭᠲᠤ ᠶ᠋ᠢᠨ ᠵᠡᠭᠦᠨ ᠡᠮᠦᠨᠡᠬᠢ ᠬᠢᠯᠠᠭᠠᠨ ᠨᠠᠭᠤᠷ ᠬᠡᠮᠡᠬᠦ ᠭᠠᠵᠠᠷ᠂ ᠳᠡᠭᠡᠷᠡ ᠴᠠᠭ ᠲᠤ ᠮᠠᠨᠵᠤ ᠲᠦᠰᠢᠮᠡᠯ ᠦ᠋ᠨ ᠵᠤᠨ ᠤ᠋ ᠵᠤᠭᠠᠯᠭᠠ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠨ ᠪᠠᠢᠭᠤᠯᠤᠭᠳᠠᠭᠰᠠᠨ ᠰᠢ ᠶ᠋ᠢᠨ ᠲᠣᠮᠣ ᠪᠠᠢᠰᠢᠩ ᠳ᠋ᠤ᠌ ᠠᠪᠠᠴᠢᠨ ᠪᠠᠭᠤᠯᠭᠠᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ