ᠵᠠᠯᠬᠠᠭᠤ ᠵᠧᠺ Zalkhuu JyekЗалхуу Жек
1577ᠵᠠᠯᠬᠠᠭᠤ ᠵᠧᠺ
ᠠᠩᠭ᠌ᠯᠢ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠵᠸᠺ ᠭᠡᠳᠡᠭ ᠨᠢᠭᠡᠨ ᠬᠠᠷᠠ ᠬᠦᠦ ᠬᠥᠭᠰᠢᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠠᠮᠢᠳᠤᠷᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠡᠮᠡᠭᠡᠨ ᠡᠵᠢ ᠨᠢ ᠪᠤᠰᠤᠳ ᠲᠤ᠌ ᠶᠠᠭᠤᠮᠠ ᠨᠡᠬᠡᠵᠦ ᠥᠭᠳᠡᠭ ᠪᠣᠯᠪᠠᠴᠤ ᠲᠡᠭᠦᠨ ᠡᠴᠡ ᠬᠡᠴᠦᠨᠡᠬᠡᠨ ᠴᠥ᠍ ᠣᠷᠣᠯᠭᠠ ᠣᠯᠬᠤ ᠪᠢᠯᠡ ᠳ᠋ᠠ᠃ ᠵᠸᠺ ᠬᠦᠦ ᠶᠠᠭᠤ ᠴᠤ᠌ ᠬᠢᠳᠡᠭ ᠦᠭᠡᠢ ᠰᠠᠭᠤᠵᠤ᠂ ᠵᠤᠨ ᠤ᠋ ᠴᠠᠭ ᠲᠤ᠌ ᠨᠢᠯᠬᠠ ᠬᠡᠦᠬᠡᠳ ᠰᠢᠭ᠌ ᠭᠠᠳᠠᠭᠠ ᠨᠡᠷᠡᠯᠡᠵᠦ᠂ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠭᠠᠯ ᠤ᠋ᠨ ᠵᠠᠬᠠ ᠠ᠋ᠴᠠ ᠰᠠᠯᠳᠠᠭ ᠦᠭᠡᠢ ᠶᠤᠮᠰᠠᠨᠵᠠᠢ᠃
ᠲᠡᠭᠡᠭᠡᠳ ᠬᠥᠮᠦᠰ ᠲᠡᠭᠦᠨ ᠢ᠋ ᠵᠠᠯᠬᠠᠭᠤ ᠵᠸᠺ ᠭᠡᠳᠡᠭ ᠪᠣᠯᠵᠠᠢ᠃ ᠡᠵᠢ ᠨᠢ ᠬᠦᠦ ᠪᠡᠨ ᠠᠵᠢᠯ ᠰᠤᠷᠭᠠᠬᠤ ᠭᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠣᠷᠣᠯᠳᠣᠭᠠᠳ ᠲᠤᠩ ᠴᠤ᠌ ᠳᠡᠢᠯᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠨᠢᠭᠡ ᠤᠳᠠᠭᠠ ᠡᠬᠡ ᠨᠢ ᠠᠵᠢᠯ ᠬᠢᠵᠦ ᠠᠮᠢ ᠪᠠᠨ ᠲᠡᠵᠢᠭᠡᠬᠦ ᠦᠭᠡᠢ ᠪᠣᠯ ᠴᠢᠮᠠ ᠶ᠋ᠢ ᠭᠡᠷ ᠡᠴᠡ ᠪᠡᠨ ᠬᠥᠭᠡᠭᠡᠨᠡ ᠰᠢᠦ! ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠬᠤ ᠪᠠᠨ ᠪᠣᠳᠣᠭᠠᠷᠠᠢ ᠭᠡᠵᠦ ᠭᠡᠨᠡ᠃ ᠵᠸᠺ ᠮᠠᠷᠭᠠᠰᠢ ᠨᠢ ᠰᠠᠭᠭᠠᠯᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠡ ᠪᠠᠶᠠᠨ ᠠᠢᠯ ᠳ᠋ᠤ᠌ ᠠᠵᠢᠯ ᠬᠢᠵᠦ ᠬᠡᠳᠦᠨ ᠮᠥᠩᠭᠥ ᠣᠯᠵᠠᠢ᠃ ᠲᠡᠭᠡᠭᠡᠳ ᠬᠠᠷᠢᠬᠤ ᠵᠠᠮ ᠳ᠋ᠠᠭᠠᠨ ᠭᠣᠷᠣᠬᠠ ᠭᠠᠲᠤᠯᠵᠤ ᠶᠠᠪᠤᠭᠠᠳ ᠨᠥᠭᠦᠭᠡ ᠮᠥᠩᠭᠥ ᠪᠡᠨ ᠤᠰᠤᠨ ᠳ᠋ᠤ᠌ ᠤᠨᠠᠭᠠᠴᠢᠬᠠᠵᠠᠢ᠃ ᠵᠠᠯᠤᠯ ᠵᠸᠺ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠠᠨ ᠮᠥᠩᠭᠥ ᠠᠪᠴᠤ ᠶᠠᠪᠤᠵᠤ ᠦᠵᠡᠭᠡ ᠦᠭᠡᠢ ᠳ᠋ᠦ᠍ ᠪᠡᠨ ᠲᠡᠷᠡ ᠰᠢᠦ ᠳ᠋ᠠ᠃
— ᠠᠢ ᠥᠯᠵᠡᠢ ᠪᠤᠰᠤ ᠭᠡᠵᠦ ᠮᠥᠩᠭᠥ ᠶ᠋ᠢ ᠪᠠᠷᠢᠵᠤ ᠶᠠᠪᠤᠳᠠᠭ ᠦᠭᠡᠢ ᠶᠤᠮ᠂ ᠬᠠᠳᠠᠭᠠᠰᠤᠨ ᠳ᠋ᠤ᠌ ᠪᠠᠨ ᠬᠢᠳᠡᠭ ᠶᠤᠮ ᠭᠡᠵᠦ ᠡᠵᠢ ᠨᠢ ᠵᠠᠩᠨᠠᠭᠰᠠᠨ ᠳ᠋ᠤ᠌᠂ ᠵᠸᠺ᠂ ᠵᠠ ᠵᠠ ᠣᠳᠣ ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠠᠳᠠᠭᠠᠰᠤᠨ ᠳ᠋ᠤ᠌ ᠪᠠᠨ ᠬᠢᠵᠦ ᠪᠠᠢᠶᠠ ᠭᠡᠵᠡᠢ᠂
ᠨᠥᠭᠥᠭᠡᠳᠦᠷ ᠨᠢ ᠵᠸᠺ ᠨᠢᠭᠡ ᠮᠠᠯᠴᠢᠨ ᠠᠢᠯ ᠳ᠋ᠤ᠌ ᠣᠴᠢᠵᠤ ᠦᠬᠡᠷ ᠬᠠᠷᠢᠭᠤᠯᠵᠠᠢ ᠭᠡᠨᠡ᠂ ᠲᠡᠳᠡᠨ ᠦ᠌ ᠬᠥᠯᠥᠰᠥᠨ ᠳ᠋ᠦ᠍ ᠨᠢ ᠳᠣᠩᠪᠣ ᠰᠦ᠋ ᠥᠭᠴᠡᠢ᠃ ᠵᠸᠺ ᠲᠡᠷᠡ ᠰᠦ᠋ ᠶ᠋ᠢ ᠴᠠᠮᠴᠠᠨ ᠤ ᠪᠠᠨ ᠭᠠᠳᠠᠭᠤᠷ ᠬᠠᠳᠠᠭᠠᠰᠤᠨ ᠳ᠋ᠤ᠌ ᠬᠢᠭᠰᠡᠨ ᠳ᠋ᠦ᠍ ᠪᠤᠴᠠᠬᠤ ᠵᠠᠮ ᠤ᠋ᠨ ᠳᠤᠮᠳᠠ ᠴᠤ᠌ ᠬᠦᠷᠦᠭᠡ ᠦᠭᠡᠢ ᠪᠠᠢᠲᠠᠯᠠ ᠰᠦ᠋ ᠨᠢ ᠱᠦᠭᠦᠷᠴᠦ ᠭᠣᠭᠣᠵᠢᠭᠠᠳ ᠳᠠᠭᠤᠰᠴᠠᠢ᠃
— ᠠᠢ ᠡᠢᠮᠦ ᠯᠡ ᠳᠣᠩᠪᠣ ᠲᠠᠢ ᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠰᠠᠨ ᠪᠣᠯ ᠬᠠᠮᠢᠭᠠ ᠠ᠋ᠴᠠ ᠨᠢ ᠠᠰᠬᠠᠬᠤ ᠪᠣᠢ ᠳ᠋ᠠ ᠭᠡᠵᠦ ᠡᠵᠢ ᠶ᠋ᠢ ᠪᠡᠨ ᠵᠢᠮᠡᠯᠡᠬᠦ ᠳ᠋ᠦ᠍᠂ ᠳᠠᠷᠠᠭᠠ ᠪᠠᠷ ᠬᠢᠴᠢᠶᠡᠶᠡ ᠭᠡᠵᠡᠢ᠃ ᠴᠠᠭᠠᠳᠤ ᠡᠳᠦᠷ ᠨᠢ ᠵᠸᠺ ᠪᠠᠰᠠ ᠨᠢᠭᠡ ᠠᠢᠯ ᠳ᠋ᠤ᠌ ᠠᠵᠢᠯ ᠬᠢᠵᠦ ᠰᠦᠨ ᠪᠢᠰᠢᠯᠭᠠ ᠠᠪᠴᠠᠢ᠃ ᠣᠷᠣᠢ ᠨᠢ ᠵᠸᠺ ᠪᠢᠰᠢᠯᠭᠠ ᠪᠠᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ᠂ ᠭᠡᠷ ᠥᠭᠡᠳᠡ ᠪᠡᠨ ᠶᠠᠪᠤᠵᠤ ᠭᠡᠨᠡ᠃ ᠭᠡᠷ ᠲᠦ᠍ ᠪᠡᠨ ᠢᠷᠡᠭᠡᠳ ᠪᠢᠰᠢᠯᠭᠠ ᠪᠠᠨ ᠡᠵᠢ ᠳ᠋ᠦ᠍ ᠪᠡᠨ ᠥᠭᠬᠦ ᠭᠡᠰᠡᠨ ᠴᠢᠨᠢ ᠲᠦᠭᠦᠬᠡᠢ ᠪᠢᠰᠢᠯᠭᠠ ᠨᠢ ᠦᠢᠷᠡᠵᠦ ᠤᠨᠠᠭᠠᠳ ᠦᠰᠦ ᠲᠡᠢ ᠨᠢ ᠨᠠᠭᠠᠯᠳᠤᠭᠰᠠᠨ ᠪᠠᠢᠵᠠᠢ᠂
— ᠠᠢ᠂ ᠲᠡᠨᠡᠭ ᠠᠮᠢᠲᠠᠨ ᠭᠠᠷ ᠲᠤ᠌ ᠪᠠᠨ ᠠᠶᠠᠲᠠᠢᠬᠠᠨ ᠪᠠᠷᠢᠭᠠᠳ ᠢᠷᠡᠬᠦ ᠦᠭᠡᠢ ᠶᠤ᠌ ᠳ᠋ᠠ ᠭᠡᠵᠦ ᠡᠵᠢ ᠶ᠋ᠢ ᠪᠡᠨ ᠵᠢᠮᠡᠯᠡᠬᠦ ᠳ᠋ᠦ᠍᠂ ᠵᠠ ᠳᠠᠷᠠᠭᠠ ᠪᠠᠷ ᠲᠡᠭᠡᠵᠦ ᠪᠠᠢᠶᠠ ᠭᠡᠵᠡᠢ᠃ ᠲᠡᠭᠦᠨ ᠦ᠌ ᠴᠠᠭᠠᠳᠤ ᠡᠳᠦᠷ ᠵᠸᠺ ᠲᠠᠯᠬᠠᠴᠢᠨ ᠠᠢᠯ ᠳ᠋ᠤ᠌ ᠣᠴᠢᠵᠤ ᠠᠵᠢᠯᠯᠠᠭᠠᠳ ᠨᠢᠭᠡ ᠲᠣᠮᠣ ᠮᠤᠤᠷ ᠠᠪᠴᠠᠢ᠃ ᠮᠤᠤᠷ ᠢ᠋ᠶ᠋ᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠪᠠᠷᠢᠭᠠᠳ ᠶᠠᠪᠤᠲᠠᠯᠠ ᠭᠠᠷ ᠢ᠋ ᠨᠢ ᠮᠠᠭᠠᠵᠢᠭᠰᠠᠨ ᠳ᠋ᠤ᠌ ᠰᠣᠴᠢᠭᠠᠳ ᠠᠯᠳᠠᠴᠢᠬᠠᠪᠠ᠃ ᠵᠸᠺ ᠳᠠᠬᠢᠭᠠᠳ ᠯᠠ ᠭᠡᠷ ᠲᠦ᠍ ᠪᠡᠨ ᠶᠠᠭᠤ ᠴᠥ᠍ ᠦᠭᠡᠢ ᠢᠷᠡᠭᠰᠡᠨ ᠳ᠋ᠦ᠍ ᠡᠵᠢ ᠨᠢ᠂
— ᠡᠷᠡᠭᠦᠦ ᠮᠢᠨᠢ! ᠲᠡᠭᠦᠨ ᠢ᠋ ᠤᠲᠠᠰᠤ ᠪᠠᠷ ᠣᠭᠣᠰᠣᠷᠯᠠᠭᠠᠳ ᠬᠥᠲᠥᠯᠦᠭᠡᠳ ᠢᠷᠡᠬᠦ ᠦᠭᠡᠢ ᠳ᠋ᠠ ᠭᠡᠵᠦ ᠵᠢᠮᠡᠯᠡᠵᠡᠢ᠂ ᠵᠸᠺ ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠭᠡᠵᠦ ᠪᠠᠢᠶᠠ ᠭᠡᠵᠡᠢ᠃ ᠳᠠᠷᠠᠭᠠ ᠡᠳᠦᠷ ᠨᠢ ᠵᠸᠺ ᠮᠢᠬᠠ ᠬᠤᠳᠠᠯᠳᠤᠭᠴᠢ ᠶ᠋ᠢᠨ ᠳ᠋ᠦ᠍ ᠠᠵᠢᠯᠯᠠᠵᠤ᠂ ᠬᠣᠨᠢᠨ ᠤ᠋ ᠭᠤᠶᠠ ᠠᠪᠴᠠᠢ᠃ ᠵᠸᠺ ᠮᠢᠬᠠ ᠪᠠᠨ ᠣᠭᠣᠰᠣᠷᠯᠠᠵᠤ ᠰᠢᠪᠡᠷ ᠰᠢᠪᠬᠠᠢ ᠳᠤᠮᠳᠠᠭᠤᠷ ᠴᠢᠷᠦᠭᠡᠳ ᠢᠷᠡᠵᠡᠢ᠃ ᠲᠡᠷᠡ ᠮᠢᠬᠠ ᠪᠠᠷ ᠶᠠᠭᠠᠬᠢᠵᠤ ᠬᠣᠭᠣᠯᠠ ᠬᠢᠵᠦ ᠢᠳᠡᠬᠦ ᠪᠣᠢ? ᠡᠵᠢ ᠨᠢ ᠭᠠᠶ᠋ᠢᠬᠠᠰᠢ ᠲᠠᠰᠤᠷᠠᠭᠠᠳ᠂ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠽᠠᠢ ᠠ᠋ᠴᠠ ᠥᠭᠡᠷᠡ ᠬᠣᠭᠣᠯᠠᠨ ᠤ᠋ ᠶᠠᠭᠤᠮᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠡᠨᠡ ᠲᠡᠨᠡᠭ ᠦ᠋ᠨ ᠮᠢᠬᠠ ᠠᠪᠴᠢᠷᠠᠵᠤ ᠪᠠᠢᠬᠤ ᠴᠢᠷᠠᠢ ᠶ᠋ᠢ ᠡᠨᠡ ᠮᠢᠬᠠ ᠪᠠᠨ ᠡᠭᠦᠷᠴᠦ ᠢᠷᠡᠬᠦ ᠶ᠋ᠢ ᠶᠠᠭᠠᠬᠢᠬᠤ ᠪᠣᠢ ᠳ᠋ᠠ ᠭᠡᠵᠦ ᠥᠭᠦᠯᠡᠭᠰᠡᠨ ᠳ᠋ᠦ᠍᠂ ᠵᠸᠺ ᠳᠠᠷᠠᠭᠠ ᠯᠠ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠳᠠᠭᠠᠶᠠ ᠭᠡᠵᠡᠢ᠃
ᠮᠠᠷᠭᠠᠰᠢ ᠨᠢ ᠵᠸᠺ ᠮᠠᠯ ᠮᠠᠢᠮᠠᠢᠴᠢᠨ ᠤ᠋ ᠳ᠋ᠤ᠌ ᠣᠴᠢᠵᠤ ᠠᠵᠢᠯᠯᠠᠭᠠᠳ ᠨᠢᠭᠡ ᠡᠯᠵᠢᠭᠡ ᠠᠪᠴᠠᠢ᠃ ᠵᠸᠺ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ ᠰᠠᠨᠠᠵᠤ᠂ ᠲᠡᠷᠡ ᠡᠯᠵᠢᠭᠡ ᠶ᠋ᠢ ᠠᠷᠠᠢ ᠴᠢᠮᠠᠢ ᠡᠭᠦᠷᠴᠦ ᠭᠡᠷ ᠥᠭᠡᠳᠡ ᠪᠡᠨ ᠭᠣᠢᠪᠢᠯᠴᠢᠨ ᠳᠦᠢᠪᠢᠯᠴᠢᠨ ᠠᠯᠬᠤᠵᠤ ᠭᠡᠨᠡ᠃ ᠨᠢᠭᠡ ᠪᠠᠶᠠᠨ ᠠᠢᠯ ᠤ᠋ᠨ ᠭᠠᠳᠠᠭᠤᠷ ᠭᠠᠷᠴᠤ ᠶᠠᠪᠤᠵᠠᠢ᠃ ᠲᠡᠷᠡ ᠪᠠᠶᠠᠨ ᠠᠢᠯ ᠤ᠋ᠨ ᠭᠠᠭᠴᠠ ᠥᠬᠢᠨ ᠨᠢ ᠬᠡᠯᠡ ᠦᠭᠡᠢ ᠳᠦᠯᠢ᠃ ᠲᠡᠭᠡᠭᠡᠳ ᠴᠦ᠍ ᠭᠠᠭᠴᠠ ᠤᠳᠠᠭᠠ ᠴᠤ᠌ ᠢᠨᠢᠶᠡᠵᠦ ᠦᠵᠡᠭᠡ ᠦᠭᠡᠢ ᠶᠤᠮ ᠪᠠᠢᠵᠠᠢ᠃ ᠡᠮᠴᠢ ᠳᠣᠮᠴᠢ ᠨᠠᠷ ᠢᠨᠢᠶᠡᠯᠭᠡᠵᠦ ᠯᠡ ᠴᠢᠳᠠᠪᠠᠯ ᠬᠡᠯᠡ ᠣᠷᠣᠨᠠ ᠭᠡᠳᠡᠭ ᠪᠠᠢᠵᠠᠢ᠃ ᠲᠡᠭᠡᠲᠡᠯᠡ ᠲᠡᠷᠡ ᠥᠬᠢᠨ ᠡᠯᠵᠢᠭᠡ ᠡᠭᠦᠷᠦᠭᠰᠡᠨ ᠵᠸᠺ ᠢ᠋ ᠭᠡᠨᠡᠳᠲᠡ ᠬᠠᠷᠠᠭᠠᠳ ᠢᠨᠢᠶᠡᠳᠦ ᠠᠯᠳᠠᠴᠢᠬᠠᠪᠠ᠃
ᠢᠩᠭᠢᠭᠡᠳ ᠲᠡᠷᠡ ᠳᠣᠣᠷᠠ ᠪᠠᠨ ᠶᠠᠷᠢᠵᠤ ᠴᠢᠳᠠᠳᠠᠭ ᠰᠣᠨᠣᠰᠴᠤ ᠴᠢᠳᠠᠳᠠᠭ ᠪᠣᠯᠵᠠᠢ᠃ ᠡᠴᠢᠭᠡ ᠨᠢ ᠪᠠᠶᠠᠷᠯᠠᠬᠤ ᠳ᠋ᠤ᠌ ᠪᠠᠨ ᠥᠬᠢᠨ ᠢ᠋ᠶ᠋ᠡᠨ ᠵᠸᠺ ᠲᠡᠢ ᠰᠠᠭᠤᠯᠭᠠᠵᠠᠢ ᠭᠡᠨᠡ᠃
ᠢᠩᠭᠢᠭᠡᠳ ᠵᠠᠯᠬᠠᠭᠤ ᠵᠸᠺ ᠪᠠᠶᠠᠵᠢᠵᠤ ᠭᠡᠨᠡ᠃ ᠲᠣᠮᠣ ᠥᠷᠥᠭᠡᠨ ᠳ᠋ᠦ᠍ ᠮᠣᠷᠢᠯᠠᠵᠤ ᠡᠵᠢ ᠶ᠋ᠢ ᠪᠡᠨ ᠠᠪᠴᠢᠷᠠᠵᠤ᠂ ᠭᠠᠴᠢᠭᠳᠠᠬᠤ ᠳᠤᠲᠠᠭᠳᠠᠬᠤ ᠶᠠᠭᠤᠮᠠ ᠦᠭᠡᠢ᠂ ᠶᠠᠳᠠᠷᠠᠬᠤ ᠵᠦᠳᠡᠷᠡᠬᠦ ᠶ᠋ᠢ ᠦᠵᠡᠯ ᠥᠬᠡᠢ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠤ ᠭᠡᠨᠡ᠃
ᠦᠰᠦᠭ ᠬᠠᠲᠠᠵᠤ᠂ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ