ᠳᠣᠯᠣᠭᠠᠨ ᠤᠰᠤᠨ ᠤ ᠲᠡᠦᠬᠡ – [ᠣᠷᠣᠰ]ᠪᠠᠷᠲ᠋ᠣᠯᠳ᠋ <ᠨᠠᠢ᠍ᠮᠠ᠂ᠬᠠᠯᠢᠮᠠᠭ (ᠵᠡᠭᠦᠭᠠᠷ) ᠤ᠋ᠨ ᠲᠣᠪᠴᠢ ᠲᠡᠦᠬᠡ> Долоон усны түүх – [орос] Бартулд <8᠂Халимаг (зүүнгар) он товч түүх>
295ᠨᠠᠢ᠍ᠮᠠ ᠂ ᠬᠠᠯᠢᠮᠠᠭ (ᠵᠡᠭᠦᠭᠠᠷ) ᠤ᠋ᠨ ᠲᠣᠪᠴᠢ ᠲᠡᠦᠬᠡ
ᠲᠤᠰ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠤᠤᠯ ᠵᠣᠬᠢᠶᠠᠭᠴᠢ ᠨᠢ ᠭᠢᠷᠭᠢᠰᠴᠦᠳ ᠪᠣᠯᠤᠨ ᠬᠠᠰᠠᠭᠴᠤᠳ ᠢ᠋ ᠴᠢᠨᠠᠭᠰᠢᠳᠠ ᠳᠥᠬᠥᠮᠬᠡᠨ ᠢ᠋ᠶ᠋ᠡᠷ ᠳᠦᠷᠰᠦᠯᠡᠨ ᠪᠢᠴᠢᠪᠡ᠄《ᠭᠢᠷᠭᠢᠰᠴᠤᠳ ᠬᠢᠭᠡᠳ ᠮᠣᠩᠭᠣᠯᠴᠤᠳ ᠪᠣᠯ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠠᠷᠢᠴᠠᠭᠠ ᠲᠠᠢ ᠶᠤᠮ᠃ ᠲᠡᠳᠡ ᠨᠠᠷ ᠲᠤ᠌ ᠤᠯᠤᠰ ᠤ᠋ᠨ ᠸᠠᠩ ᠭᠡᠵᠦ ᠪᠠᠢᠬᠤ ᠦᠭᠡᠢ᠂〈ᠪᠡᠬᠢ〉 ᠭᠡᠵᠦ ᠯᠡ ᠪᠠᠢᠳᠠᠭ᠂ ᠨᠤᠲᠤᠭ ᠤ᠋ᠨ ᠬᠡᠯᠡ ᠪᠡᠷ᠂〈ᠭᠠᠱᠤᠭ〉 ᠭᠡᠵᠦ ᠬᠡᠯᠡᠨᠡ᠃ ᠭᠢᠷᠭᠢᠰᠴᠦᠳ ᠪᠣᠯ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠪᠢᠰᠢ᠂ ᠢᠵᠢᠯᠢ ᠪᠤᠰᠤ ᠱᠠᠰᠢᠨᠲᠠᠨ ᠴᠤ᠌ ᠪᠢᠰᠢ᠃ ᠲᠡᠳᠡ ᠨᠠᠷ ᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠰᠠᠭᠤᠵᠤ ᠪᠣᠢ᠂ ᠬᠠᠪᠴᠢᠯ ᠠᠮᠠ ᠪᠣᠯᠭᠠᠨ ᠨᠢ ᠭᠠᠳᠠᠭᠰᠢ ᠨᠡᠪᠲᠡᠷᠡᠳᠡᠭ᠃ ᠠᠯᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠸᠠᠩ ᠴᠡᠷᠢᠭ ᠠᠪᠴᠤ ᠲᠡᠳᠡᠨᠦᠰ ᠢ᠋ ᠳᠠᠭᠠᠷᠢᠨ ᠳᠣᠪᠲᠣᠯᠪᠠᠯ᠂ ᠲᠡᠳᠡ ᠨᠠᠷ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠰ ᠢ᠋ᠶ᠋ᠡᠨ ᠠᠭᠤᠯᠠ ᠶ᠋ᠢᠨ ᠭᠦᠨ ᠠᠭᠯᠠᠭ ᠲᠤ᠌ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ᠂ ᠬᠠᠪᠴᠢᠯ ᠠᠮᠠ ᠪᠣᠯᠭᠠᠨ ᠢ᠋ᠶ᠋ᠠᠨ ᠪᠡᠬᠢᠯᠡᠨ ᠰᠠᠬᠢᠳᠠᠭ ᠲᠤᠯᠠ ᠭᠠᠳᠠᠨᠠᠬᠢ ᠬᠦᠴᠦ ᠲᠦᠷᠢᠨ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠡᠳᠡ ᠨᠠᠷ ᠨᠢᠭᠡ ᠵᠦᠢᠯ ᠦ᠋ᠨ ᠤᠪᠠᠳᠢᠰ ᠲᠠᠢ ᠴᠢᠯᠠᠭᠤ ᠶ᠋ᠢ ᠬᠡᠷᠡᠭᠯᠡᠨᠡ᠂ ᠨᠤᠲᠤᠭ ᠤ᠋ᠨ ᠬᠡᠯᠡ ᠪᠡᠷ ᠨᠢ 〈ᠶᠠᠳ〉 ᠭᠡᠳᠡᠭ᠂ ᠰᠠᠯᠬᠢ ᠳᠠᠭᠤᠳᠠᠨ ᠪᠣᠷᠣᠭᠠᠨ ᠤᠷᠢᠵᠤ᠂ ᠴᠠᠰᠤ ᠣᠷᠣᠭᠤᠯᠵᠤ ᠴᠢᠳᠠᠳᠠᠭ ᠲᠤᠯᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠯ ᠭᠠᠷ ᠢ᠋ ᠬᠥᠯᠳᠡᠭᠡᠵᠦ ᠣᠷᠬᠢᠨᠠ᠃ ① ᠲᠡᠭᠡᠭᠡᠳ ᠲᠡᠳᠡ ᠨᠠᠷ ᠳᠠᠭᠠᠷᠢᠯᠲᠠ ᠬᠢᠵᠦ᠂ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠡᠢᠯᠦᠨᠡ᠃ ᠲᠡᠳᠡ ᠨᠠᠷ ᠤ᠋ᠨ ᠵᠠᠩᠰᠢᠯ ᠶᠣᠰᠣ ᠪᠠᠷ ᠪᠣᠯ ᠲᠠᠯᠢ᠌ᠭᠰᠠᠳ ᠢ᠋ᠶ᠋ᠠᠨ ᠪᠤᠯᠠᠵᠤ ᠣᠷᠣᠰᠢᠭᠤᠯᠬᠤ ᠦᠭᠡᠢ᠂ ᠬᠠᠷᠢᠨ ᠠᠪᠰᠠ ᠪᠠᠨ ᠮᠣᠳᠣᠨ ᠰᠠᠯᠠᠭᠠᠨ ᠳᠡᠭᠡᠷᠡ ᠠᠪᠠᠴᠢᠵᠤ ᠲᠠᠯᠪᠢᠨᠠ᠂ ᠲᠡᠢᠨ ᠬᠦ᠌ ᠶᠠᠰᠤ ᠦᠰᠦ ᠨᠢ ᠢᠯᠵᠢᠷᠡᠭᠡᠳ ᠪᠤᠲᠠᠷᠠᠵᠤ ᠤᠨᠠᠨᠠ᠃ ᠭᠢᠷᠭᠢᠰᠴᠦᠳ ᠬᠢᠭᠡᠳ ᠬᠠᠰᠠᠭᠴᠤᠳ ᠪᠣᠯ ᠬᠥᠷᠰᠢ ᠵᠡᠷᠭᠡᠯᠡᠳᠡᠭᠡ ᠤᠯᠤᠰ ᠶᠤᠮ᠃ ᠬᠠᠰᠠᠭᠴᠤᠳ ᠪᠠᠷᠤᠭ ᠬᠣᠷᠢᠨ ᠲᠦᠮᠡᠨ ᠡᠷᠦᠬᠡ ᠲᠡᠢ᠂ ᠲᠡᠳᠡ ᠨᠠᠷ ᠪᠣᠯ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠶᠤᠮ᠂ ᠲᠡᠷᠡᠴᠢᠯᠡᠨ ᠢᠮᠠᠮ· ᠠᠽᠠᠮ( ᠠᠪ· ᠬᠠᠨᠢᠹᠠ ) ᠶ᠋ᠢᠨ ᠪᠦᠯᠦᠭ ᠦ᠋ᠨ ᠶᠣᠰᠣᠯᠠᠯ ᠢ᠋ ᠵᠢᠷᠤᠮᠯᠠᠨᠠ᠃ ᠲᠡᠳᠡ ᠮᠤᠨᠳᠠᠭ ᠶᠡᠬᠡ ᠬᠡᠪᠴᠢᠶᠡᠨ ᠦ᠌ ᠬᠣᠨᠢᠨ ᠰᠦᠷᠦᠭ ᠪᠠ ᠲᠡᠮᠡᠭᠡᠨ ᠰᠦᠷᠦᠭ ᠲᠡᠢ᠃ ᠲᠡᠷᠭᠡᠨ ᠳᠡᠭᠡᠷᠡ ᠪᠡᠨ ᠬᠣᠨᠣᠭᠯᠠᠳᠠᠭ᠃ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠬᠣᠨᠢᠨ ᠨᠣᠣᠰᠣ ᠪᠠᠷ ᠬᠢᠨᠡ᠂ ᠨᠣᠣᠰᠣᠨ ᠰᠢᠷᠬᠡᠭ ᠢ᠋ᠶ᠋ᠡᠨ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠥᠩᠭᠡ ᠪᠡᠷ ᠪᠣᠳᠣᠨᠠ᠂ ᠨᠡᠬᠡᠵᠦ ᠭᠠᠷᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠣᠷᠭᠠ ᠰᠢᠭ᠋ ᠭᠣᠶᠣ ᠪᠣᠯᠴᠢᠬᠠᠳᠠᠭ᠃ ᠡᠳᠡᠭᠡᠷ ᠬᠤᠪᠴᠠᠰᠤ ᠵᠠᠰᠠᠯ ᠢ᠋ᠶ᠋ᠠᠨ ᠪᠤᠬᠠᠷ ᠲᠤ᠌ ᠠᠪᠠᠴᠢᠵᠤ ᠬᠤᠳᠠᠯᠳᠤᠨᠠ᠂ ᠦᠨᠡ ᠬᠠᠩᠰᠢ ᠨᠢ ᠲᠣᠷᠭᠠ ᠲᠠᠢ ᠠᠳᠠᠯᠢᠬᠠᠨ᠂ ᠭᠣᠶᠣᠮᠰᠣᠭ ᠨᠠᠷᠢᠯᠢᠭ ᠤ᠋ᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠴᠤ᠌ ᠲᠣᠷᠭᠠ ᠠ᠋ᠴᠠ ᠲᠣᠯᠢᠳᠠᠬᠤ ᠦᠭᠡᠢ᠃ ᠪᠣᠷᠣᠭᠠᠨ ᠤ᠋ ᠨᠥᠮᠥᠷᠭᠡ ᠪᠡᠨ ᠴᠦ᠍ ᠬᠣᠨᠢᠨ ᠤ᠋ ᠨᠣᠣᠰᠣ ᠪᠠᠷ ᠬᠢᠨᠡ᠃ ᠡᠨᠡ ᠬᠦ᠌ ᠪᠦᠲᠦᠭᠡᠭᠳᠡᠬᠦᠨ ᠨᠢ ᠪᠣᠷᠣᠭᠠᠨ ᠳ᠋ᠤ᠌ ᠶᠡᠷᠦ ᠨᠡᠪᠲᠡᠷᠡᠬᠦ ᠦᠭᠡᠢ᠃ ᠴᠢᠨᠠᠷ ᠴᠢᠨᠰᠠᠭᠠ ᠨᠢ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠠᠢᠨ ᠪᠣᠢ ᠭᠡᠪᠡᠯ᠂ ᠬᠣᠨᠢ ᠨᠢ ᠣᠨᠴᠠᠭᠠᠢ ᠨᠢᠭᠡ ᠵᠦᠢᠯ ᠦ᠋ᠨ ᠠᠩᠬᠢᠯᠤᠮᠠ ᠡᠪᠡᠰᠦ ᠶ᠋ᠢ ᠢᠳᠡᠭᠰᠡᠨ ᠡᠴᠡ ᠪᠣᠯᠤᠭᠰᠠᠨ ᠭᠡᠨᠡ᠃ 》
1594 ᠣᠨ ᠳ᠋ᠤ᠌᠂ ᠼᠡᠢᠺᠸᠷ ᠮᠣᠰᠺᠸᠠ ᠳ᠋ᠤ᠌ ᠡᠯᠴᠢᠳ ᠦ᠋ᠨ ᠪᠦᠯᠬᠦᠮ ᠲᠣᠮᠢᠯᠠᠵᠤ᠂ ᠴᠠᠭᠠᠨ ᠬᠠᠭᠠᠨ ᠹᠸᠢ᠌ᠳᠠᠷ ᠯᠤᠭᠠ ᠠᠢᠮᠠᠭ ᠤ᠋ᠨ ᠬᠣᠯᠪᠣᠭᠠ ᠪᠠᠢᠭᠤᠯᠤᠶᠠ ᠭᠡᠵᠦ ᠱᠠᠭᠠᠷᠳᠠᠪᠠ᠃ ᠡᠯᠴᠢᠳ ᠲᠡᠭᠡᠨ ᠪᠠᠷᠢᠭᠤᠯᠤᠭᠰᠠᠨ ᠪᠢᠴᠢᠭ ᠲᠡᠭᠡᠨ ᠥᠪᠡᠷ ᠢ ᠪᠡᠨ《ᠬᠠᠰᠠᠭ ᠪᠣᠯᠤᠨ ᠬᠠᠯᠢᠮᠠᠭ ᠤ᠋ᠨ ᠸᠠᠩ》 ᠬᠡᠮᠡᠪᠡ᠃ ᠡᠭᠦᠨ ᠡᠴᠡ ᠨᠢᠭᠡ ᠪᠦᠯᠦᠭ ᠬᠠᠯᠢᠮᠠᠭᠴᠤᠳ ᠲᠡᠭᠦᠨ ᠳ᠋ᠦ᠍ ᠪᠠᠭᠤᠨ ᠥᠭᠭᠦᠭᠰᠡᠨ ᠢ᠋ ᠲᠥᠰᠦᠭᠡᠯᠡᠨ ᠮᠡᠳᠡᠵᠦ ᠪᠣᠯᠤᠨᠠ᠃1598 ᠣᠨ ᠳ᠋ᠤ᠌ ᠨᠠᠰᠤ ᠪᠠᠷᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠼᠡᠢᠺᠸᠷ ᠢ᠋ᠶ᠋ᠡᠷ ᠲᠠᠱᠺᠸᠨ᠋ᠲ ᠪᠣᠯᠤᠨ ᠶᠠᠰᠢ ᠶ᠋ᠢ ᠡᠵᠡᠯᠡᠨ ᠠᠪᠤᠪᠠ᠃ ᠡᠨᠡ ᠬᠣᠶᠠᠷ ᠬᠣᠲᠠ1723 ᠣᠨ ᠪᠣᠯᠲᠠᠯᠠ ᠬᠠᠰᠠᠭᠴᠤᠳ ᠤ᠋ᠨ ᠨᠣᠶᠠᠷᠬᠠᠯ ᠳᠣᠣᠷᠠ ᠪᠠᠢᠭᠠᠳ ᠪᠠᠢᠭᠰᠠᠨ ᠶᠤᠮ᠃ ᠸᠧᠢ᠌ᠯᠢᠶᠠ· ᠮᠢᠨᠨᠣᠫᠴᠸᠼᠨᠣᠹ ᠤ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠠᠰᠠᠭᠴᠤᠳ ᠭᠤᠷᠪᠠᠨ ᠪᠦᠯᠦᠭ ᠲᠦ᠍ ᠬᠤᠪᠢᠶᠠᠭᠳᠠᠭᠰᠠᠨ ᠨᠢ ᠡᠨᠡ ᠤᠴᠢᠷ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃17 ᠳ᠋ᠤᠭᠠᠷ ᠵᠠᠭᠤᠨ ᠳ᠋ᠤ᠌᠂ ᠶᠠᠰᠢ ᠪᠣᠯᠤᠨ ᠲᠠᠱᠺᠸᠨ᠋ᠲ ᠨᠢ ᠬᠠᠰᠠᠭᠴᠤᠳ ᠤ᠋ᠨ ᠬᠣᠶᠠᠷ ᠲᠥᠪ ᠪᠣᠯᠤᠭᠰᠠᠭᠠᠷ ᠢᠷᠡᠭᠰᠡᠨ ᠶᠦᠮ᠃ ᠭᠡᠪᠡᠴᠦ ᠮᠥᠨ ᠶᠠᠭ ᠰᠠᠢᠬᠠᠨ ᠡᠨᠡ ᠦᠶᠡ ᠳ᠋ᠦ᠍᠂ ᠲᠡᠳᠡ ᠨᠠᠷ ᠬᠠᠯᠢᠮᠠᠭᠴᠤᠳ ᠲᠤ᠌ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠬᠥᠭᠡᠭᠡᠭᠳᠡᠨ ᠳᠣᠯᠣᠭᠠᠨ ᠤᠰᠤᠨ ᠠ᠋ᠴᠠ ᠰᠠᠯᠵᠠᠢ᠃17 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍᠂ ᠬᠠᠯᠢᠮᠠᠭᠴᠤᠳ ᠬᠣᠷᠧᠽᠮ ᠢ᠋ ᠡᠵᠡᠯᠡᠨ ᠠᠪᠤᠭᠠᠳ ᠸᠣᠯᠭᠠ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠠᠢᠪᠠ᠃ ᠡᠭᠦᠨ ᠦ᠌ ᠵᠡᠷᠭᠡᠴᠡᠭᠡ ᠪᠡᠷ᠂ ᠴᠣᠷᠣᠰ ᠤ᠋ᠨ ᠬᠠᠨ ᠬᠠᠷᠠᠬᠥ᠋ᠯ ᠠᠯᠢ ᠴᠢᠳᠠᠬᠤ ᠪᠠᠷ ᠥᠭᠡᠯᠦᠨ(ᠣᠢᠷᠠᠳ) ᠤ᠋ᠨ ᠬᠠᠭᠤᠴᠢᠨ ᠪᠦᠯᠦᠭ ᠢ᠋ᠶ᠋ᠡᠨ ᠳᠠᠬᠢᠨ ᠪᠦᠯᠬᠦᠮᠳᠡᠭᠦᠯᠵᠦ ᠠᠪᠬᠤ ᠶ᠋ᠢ ᠰᠠᠨᠠᠵᠤ ᠪᠠᠢᠵᠠᠢ᠃ ᠨᠠᠰᠤ ᠪᠠᠷᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡᠬᠡᠨ᠂ ᠲᠡᠷᠡ ᠪᠡᠷ᠂ ᠵᠠᠷᠢᠮ ᠹᠧᠣᠳᠠᠯ ᠸᠠᠩ ᠬᠦᠩ(《ᠲᠠᠢᠵᠢ》) ᠤ᠋ᠳ ᠤ᠋ᠨ ᠮᠤᠵᠢᠭᠤᠳᠠ ᠡᠰᠡᠷᠭᠦᠴᠡᠯ ᠢ᠋ ᠦᠭᠡᠢ ᠪᠣᠯᠭᠠᠵᠤ᠂ ᠵᠣᠷᠢᠯᠭᠠ ᠳ᠋ᠠᠭᠠᠨ ᠬᠦᠷᠴᠦ ᠴᠢᠳᠠᠭᠰᠠᠨ ᠪᠠᠢᠨᠠ᠃1634 ᠣᠨ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠠᠭᠠᠲᠤᠷ ᠨᠢ《ᠬᠣᠩ ᠲᠠᠢᠵᠢ》 ᠴᠣᠯᠠ ᠶ᠋ᠢ ᠣᠯᠪᠠ᠃ ᠶᠠᠭ ᠡᠨᠡ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠥᠭᠡᠯᠦᠨ(ᠣᠢᠷᠠᠳ) ᠤ᠋ᠨ ᠣᠯᠠᠨ ᠠᠢᠮᠠᠭ ᠪᠤᠶᠤ ᠡᠰᠡᠬᠦᠯᠡ ᠵᠡᠭᠦᠨᠭᠠᠷᠴᠤᠳ ᠨᠢᠭᠡᠳᠦᠯᠲᠡᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠲᠠᠢ ᠪᠣᠯᠬᠤ ᠳ᠋ᠤ᠌ ᠣᠢᠷᠠᠲᠤᠭᠰᠠᠨ ᠪᠠᠢᠨᠠ᠃1610 ᠣᠨ ᠳ᠋ᠤ᠌᠂ ᠲᠡᠷᠡ ᠪᠡᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠡᠬᠡ ᠤᠷᠲᠤ ᠳ᠋ᠠᠭᠠᠨ ᠬᠤᠷᠠᠯᠲᠠᠢ ᠬᠤᠷᠠᠯᠳᠤᠭᠤᠯᠤᠭᠰᠠᠨ ᠳ᠋ᠤ᠌ ᠣᠷᠣᠰ ᠤ᠋ᠨ ᠬᠢᠯᠢ ᠳ᠋ᠦ᠍ ᠣᠷᠣᠵᠤ ᠣᠴᠢᠭᠠᠳ ᠪᠠᠢᠭᠰᠠᠨ ᠨᠣᠶᠠᠳ ᠤ᠋ᠳ ᠨᠢ ᠴᠦ᠍ ᠢᠷᠡᠵᠦ ᠬᠤᠷᠠᠯ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠪᠠᠢᠨᠠ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠶᠡᠬᠡ ᠬᠤᠷᠠᠯ ᠳᠡᠭᠡᠷᠡ᠂ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠬᠠᠯᠢᠮᠠᠭᠴᠤᠳ ᠤ᠋ᠨ《ᠲᠠᠯᠠ ᠨᠤᠲᠤᠭ ᠤ᠋ᠨ ᠦᠨᠳᠦᠰᠦᠨ ᠬᠠᠤᠯᠢ》 ᠶ᠋ᠢ ᠲᠤᠩᠬᠠᠭᠯᠠᠭᠰᠠᠨ ᠪᠠᠢᠨᠠ᠃《ᠬᠣᠩ ᠲᠠᠢᠵᠢ》 ᠶ᠋ᠢᠨ ᠪᠡᠯᠴᠢᠭᠡᠷ ᠨᠤᠲᠤᠭ ᠨᠢ ᠤᠤᠯ ᠳ᠋ᠠᠭᠠᠨ ᠡᠷᠴᠢᠰ ᠭᠣᠣᠯ ᠤ᠋ᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠤ᠋ᠨ ᠵᠠᠢᠰᠠᠩ ᠨᠠᠭᠤᠷ ᠤ᠋ᠨ ᠠᠷᠤ ᠳ᠋ᠤ᠌ ᠪᠠᠢᠭᠰᠠᠨ ᠶᠤᠮ᠃ ᠪᠠᠭᠠᠲᠤᠷ ᠢ᠋ᠶ᠋ᠠᠷ ᠼᠠᠢ᠌ᠺᠸᠷ ᠤ᠋ᠨ ᠠᠬᠠ ᠪᠥᠭᠡᠳ ᠵᠠᠯᠭᠠᠮᠵᠢᠯᠠᠭᠴᠢ— ᠬᠠᠰᠠᠭ ᠬᠠᠨ ᠢᠰᠢᠮ ᠲᠡᠢ ᠵᠣᠭᠰᠣᠯ ᠦᠭᠡᠢ ᠲᠡᠢᠨ ᠬᠢᠵᠦ᠂ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠦ᠌ ᠢᠯᠠᠯᠲᠠ ᠣᠯᠤᠭᠰᠠᠨ ᠪᠠᠢᠨᠠ᠃
1653 ᠣᠨᠠ᠂ ᠪᠠᠭᠠᠲᠤᠷ ᠨᠠᠰᠤ ᠨᠥᠭᠴᠢᠭᠰᠡᠨ ᠡᠴᠡ ᠪᠣᠯᠵᠤ ᠥᠭᠡᠯᠦᠨ ᠦ᠌ ᠬᠣᠯᠪᠣᠭᠠᠨ ᠤ᠋ ᠨᠢᠭᠡᠳᠦᠯ ᠰᠤᠯᠠᠷᠠᠪᠠ᠃ ᠣᠷᠣᠰ ᠬᠡᠯᠡᠨ ᠦ᠌ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠰᠡᠩᠭᠡ ᠰᠠᠭᠤᠷᠢᠨ ᠢ᠋ ᠨᠢ ᠵᠠᠯᠭᠠᠮᠵᠢᠯᠠᠵᠠᠢ᠃ ᠭᠡᠪᠡᠴᠦ ᠠ· ᠮ᠊· ᠫᠦᠽᠳ᠋ᠶᠸᠨᠸᠸ ᠦ᠋ᠨ ᠬᠡᠯᠡᠬᠦ ᠪᠡᠷ᠄《ᠲᠡᠷᠡ ᠪᠡᠷ ᠡᠴᠢᠭᠡ ᠲᠡᠢ ᠪᠡᠨ ᠪᠦᠷ ᠠᠳᠠᠯᠢ ᠦᠭᠡᠢ᠂ ᠶᠡᠷᠦ ᠡᠴᠡ ᠥᠭᠡᠯᠦᠨ ᠦ᠌ ᠬᠣᠯᠪᠣᠭᠠᠨ ᠤ᠋ ᠡᠵᠡᠨ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠪᠠᠭᠠᠲᠤᠷ〈ᠬᠣᠩ ᠲᠠᠢᠵᠢ〉 ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠ ᠵᠢᠷᠭᠤᠭᠠ᠂ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠲᠡᠷᠡ ᠪᠡᠷ ᠵᠡᠭᠦᠨᠭᠠᠷ ᠠᠢᠮᠠᠭ ᠤ᠋ᠨ ᠨᠣᠶᠠᠯᠠᠭᠴᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠬᠦ᠌ ᠪᠠᠢᠷᠢ ᠠ᠋ᠴᠠ ᠪᠠᠨ ᠳᠡᠭᠡᠭᠰᠢᠯᠡᠵᠦ ᠶᠡᠷᠦ ᠳᠡᠢᠯᠦᠭᠡ ᠦᠭᠡᠢ》᠃ ᠪᠤᠰᠤᠳ ᠬᠡᠳᠦᠨ ᠸᠠᠩ ᠨᠠᠷ ᠴᠤ᠌ ᠰᠡᠩᠭᠡ ᠰᠢᠭ《ᠬᠣᠩ ᠲᠠᠢᠵᠢ》 ᠴᠣᠯᠠ ᠠᠪᠤᠪᠠ᠃ ᠪᠠᠭᠠᠲᠤᠷ ᠤ᠋ᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠰᠡᠴᠡᠨ ᠡᠷᠴᠢᠰ ᠭᠣᠣᠯ ᠣᠷᠴᠢᠮ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ ᠠᠮᠢᠳᠤᠷᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠠᠢᠪᠠ᠃
1671 ᠣᠨ ᠳ᠋ᠤ᠌ ᠰᠡᠩᠭᠡ ᠬᠣᠣᠷᠯᠠᠭᠳᠠᠪᠠ᠃ ᠲᠡᠭᠦᠨ ᠦ᠌ ᠳᠡᠭᠦᠦ ᠭᠠᠯᠳᠠᠨ ᠪᠣᠱᠣᠭᠲᠤ ᠲᠥᠪᠡᠳ ᠡᠴᠡ ᠬᠠᠷᠢᠵᠤ ᠢᠷᠡᠭᠡᠳ ᠳᠠᠷᠤᠢᠬᠠᠨ ᠠᠬᠠ ᠰᠡᠴᠡᠨ ᠲᠡᠢ ᠪᠡᠨ ᠳᠠᠢᠰᠤᠩᠨᠠᠯᠳᠤᠬᠤ ᠬᠦᠴᠦ ᠶ᠋ᠢ ᠪᠣᠢ ᠪᠣᠯᠭᠠᠪᠠ᠃ 1676 ᠣᠨ ᠳ᠋ᠤ᠌᠂ ᠰᠡᠴᠡᠨ ᠬᠠᠨ ᠲᠠᠷᠭᠤ ᠶ᠋ᠢᠨ ᠬᠠᠪᠴᠢᠯ ᠪᠣᠯᠤᠨ ᠰᠠᠷᠠᠢᠨ ᠨᠠᠭᠤᠷ ᠣᠷᠴᠢᠮ ᠢᠯᠠᠭᠳᠠᠭᠠᠳ ᠠᠷᠭᠠ ᠪᠤᠰᠤ ᠭᠠᠯᠳᠠᠨ ᠳ᠋ᠤ᠌ ᠪᠠᠭᠤᠵᠤ ᠥᠭᠪᠡ᠃ ᠭᠠᠯᠳᠠᠨ ᠴᠤ᠌ ᠠᠬᠠ ᠳᠡᠭᠡᠳᠦᠰ ᠬᠠᠳ ᠨᠠᠷ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠬᠠᠰᠠᠭᠴᠤᠳ ᠪᠤᠯᠠ ᠬᠢᠷᠬᠢᠰᠴᠤᠳ ᠲᠠᠢ ᠲᠡᠢᠨ ᠬᠢᠪᠡ᠃ 1681 ᠣᠨ ᠪᠣᠯᠤᠨ 1683 ᠣᠨ ᠳ᠋ᠤ᠌᠂ ᠲᠡᠷᠡ ᠪᠡᠷ ᠰᠠᠷᠠᠢᠨ ᠨᠠᠭᠤᠷ ᠣᠷᠴᠢᠮ ᠳᠠᠢᠯᠠᠪᠠ᠂ 1682 ᠣᠨ᠂ 1684 ᠣᠨ ᠪᠣᠯᠤᠨ 1685 ᠣᠨ ᠳ᠋ᠤ᠌ ᠲᠡᠷᠡ ᠪᠡᠷ ᠬᠢᠷᠬᠢᠰᠴᠤᠳ ᠪᠣᠯᠤᠨ ᠳᠠ ᠶᠤᠸᠠᠨ ᠣᠷᠣᠨ ᠢ᠋ ᠳᠠᠢᠯᠠᠪᠠ᠃ 1684 ᠣᠨ ᠳ᠋ᠤ᠌ ᠰᠠᠷᠠᠢᠨ ᠬᠣᠲᠠ ᠶ᠋ᠢ ᠡᠪᠳᠡᠨ ᠡᠵᠡᠯᠡᠪᠡ᠃ ᠲᠡᠭᠦᠨ ᠦ᠌ ᠵᠠᠩᠵᠤᠨ ᠯᠣᠪᠳᠤᠨ ᠡᠨᠡ ᠬᠣᠲᠠ ᠶ᠋ᠢ ᠲᠠᠯᠬᠢᠳᠠᠵᠤ ᠬᠠᠶᠠᠭᠰᠠᠨ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠠᠪᠤᠭᠠᠳ ᠬᠠᠯᠢᠮᠠᠭᠴᠤᠳ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠤ᠌ ᠳᠠᠬᠢᠭᠠᠳ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠭᠠ ᠦᠭᠡᠢ᠃ ᠲᠡᠳᠡ ᠨᠠᠷ ᠬᠠᠰᠠᠭᠴᠤᠳ᠂ ᠮᠣᠩᠭᠣᠯᠴᠤᠳ᠂ ᠬᠢᠲᠠᠳᠴᠤᠳ ᠯᠤᠭᠠ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠤᠳᠠᠭᠠᠨ ᠤ᠋ ᠲᠡᠢᠨ ᠢ᠋ ᠬᠢᠭᠰᠡᠨ ᠪᠣᠯᠪᠠᠴᠤ ᠳᠣᠯᠣᠭᠠᠨ ᠤᠰᠤ ᠲᠠᠢ ᠣᠭᠲᠣᠬᠠᠨ ᠴᠤ᠌ ᠬᠣᠯᠪᠣᠭᠠ ᠭᠠᠷᠤᠭᠠ ᠦᠭᠡᠢ᠃ ᠭᠠᠯᠳᠠᠨ ᠪᠣᠯ ᠬᠠᠯᠢᠮᠠᠭᠴᠤᠳ ᠤ᠋ᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠲᠣᠮᠣ ᠤᠷᠲᠤ ᠪᠠᠨ ᠢᠯᠢ ᠭᠣᠣᠯ ᠤ᠋ᠨ ᠳᠡᠨᠵᠢᠨ ᠳ᠋ᠦ᠍ ᠪᠤᠰᠬᠠᠳᠠᠭ ᠬᠠᠹ ᠨᠠᠷ ᠤ᠋ᠨ ᠨᠢᠭᠡ ᠨᠢ ᠪᠠᠢᠪᠠ᠃ ᠡᠪᠦᠯ ᠪᠣᠯᠪᠠᠯ ᠲᠡᠷᠡ ᠵᠠᠷᠢᠮ ᠳ᠋ᠠᠭᠠᠨ ᠡᠷᠴᠢᠰ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠣᠴᠢᠵᠤ ᠡᠪᠦᠯᠵᠢᠳᠡᠭ᠃ ᠶᠠᠭ ᠡᠨᠡ ᠦᠶᠡ ᠡᠴᠡ ᠯᠡ ᠡᠬᠢᠯᠡᠭᠡᠳ ᠯᠡ ᠣᠳᠣ ᠶ᠋ᠢᠨ ᠢᠯᠢ ᠨᠤᠲᠤᠭ ᠪᠣᠯᠤᠨ ᠬᠥᠯ ᠬᠠᠷᠬᠤᠰᠤ ᠨᠤᠲᠤᠭ《ᠬᠣᠩ ᠲᠠᠢᠵᠢ》 ᠶ᠋ᠢᠨ ᠬᠠᠷᠢᠶᠠᠨ ᠤ᠋ ᠨᠤᠲᠤᠭ ᠪᠣᠯᠤᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠸᠠᠩᠺᠤᠹᠰᠺᠢ ᠶ᠋ᠢᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ 18 ᠳ᠋ᠤᠭᠠᠷ ᠵᠠᠭᠤᠨ ᠳ᠋ᠤ᠌᠂ ᠪᠦᠷᠦᠳᠴᠤᠳ᠂ (ᠭᠢᠷᠭᠢᠰᠴᠤᠳ) ᠯᠠ ᠢᠰᠠᠢᠺᠺᠦ᠋ᠯ ᠨᠠᠭᠤᠷ ᠣᠷᠴᠢᠮ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠲᠥᠷᠥᠭ ᠬᠥᠮᠦᠰ ᠮᠥᠨ ᠪᠠᠢᠵᠠᠢ᠃
ᠭᠠᠯᠳᠠᠨ ᠤᠯᠤᠰ ᠢ᠋ᠶ᠋ᠠᠨ ᠨᠢᠭᠡᠳᠬᠡᠨ ᠵᠠᠰᠠᠬᠤ ᠶ᠋ᠢᠨ ᠲᠥᠯᠥᠭᠡ ᠬᠡᠳᠦᠨ ᠲᠥᠷᠥᠯ ᠰᠠᠳᠤᠨ ᠤ᠋ ᠪᠠᠨ ᠠᠮᠢ ᠶ᠋ᠢ ᠬᠣᠷᠣᠭᠠᠪᠠ᠃ ᠲᠡᠭᠦᠨ ᠦ᠌ ᠠᠴᠢ ᠴᠠᠸᠠᠩᠷᠠᠪᠳᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ 1678 ᠣᠨ ᠳ᠋ᠤ᠌ ᠲᠥᠷᠫᠡᠨ ᠳ᠋ᠦ᠍ ᠳᠤᠲᠠᠭᠠᠨ ᠣᠳᠴᠠᠢ᠃ 1688 ᠣᠨ ᠳ᠋ᠤ᠌᠂ ᠭᠠᠯᠳᠠᠨ ᠠᠯᠤᠰ ᠬᠣᠯᠠ ᠶ᠋ᠢᠨ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠢ᠋ ᠳᠠᠢᠯᠠᠬᠤ ᠦᠶᠡ ᠳ᠋ᠦ᠍᠂ᠴᠠᠸᠠᠩᠷᠠᠪᠳᠠᠨ ᠲᠤᠬᠠᠢ ᠶ᠋ᠢᠨ ᠵᠢᠯ ᠳ᠋ᠦ᠍ ᠪᠤᠶᠤ ᠳᠠᠷᠠᠭᠠ ᠵᠢᠯ ᠳ᠋ᠦ᠍ᠨᠢ ᠨᠢᠭᠡ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠪᠠ᠃ ᠲᠡᠷᠡ ᠪᠡᠷ ᠤᠷᠢᠳ ᠢ᠋ᠶ᠋ᠠᠷ ᠪᠣᠷᠣᠲᠠᠯᠠ ᠳ᠋ᠤ᠌ ᠰᠠᠭᠤᠷᠢᠰᠢᠭᠠᠳ᠂ ᠬᠦᠴᠦ ᠪᠡᠨ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠪᠦᠬᠦ ᠬᠢᠯᠢ ᠳᠣᠲᠣᠷᠠ ᠪᠠᠨ ᠥᠷᠭᠡᠳᠬᠡᠪᠡ᠃ ᠭᠠᠯᠳᠠᠨ ᠳᠠᠬᠢᠵᠤ ᠪᠤᠴᠠᠵᠤ ᠢᠷᠡᠭᠡ ᠦᠭᠡᠢ᠂ ᠲᠡᠷᠡ ᠮᠣᠩᠭᠣᠯ ᠨᠤᠲᠤᠭ ᠲᠤ᠌ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠤ᠋ᠨ ᠳᠠᠩᠴᠤ ᠬᠦᠨᠳᠦ ᠨᠤᠭᠤᠷᠠᠯ ᠳ᠋ᠤ᠌ ᠤᠴᠠᠷᠠᠵᠤ᠂ 1697 ᠣᠨᠠ ᠠᠮᠢ ᠪᠠᠨ ᠬᠣᠷᠣᠭᠠᠪᠠ᠃
ᠭᠠᠯᠳᠠᠨ ᠤ᠋ ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠ᠂ ᠴᠠᠸᠠᠩᠷᠠᠪᠳᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠨᠣᠶᠠᠯᠠᠭᠴᠢ ᠪᠣᠯᠪᠠ᠃ ᠲᠤᠬᠠᠢ ᠶ᠋ᠢᠨ ᠵᠢᠯ ᠳ᠋ᠦ᠍ ᠰᠠᠭᠤᠷᠢᠨ ᠳ᠋ᠤ᠌ ᠪᠠᠢᠭᠰᠠᠨ ᠠᠪᠠᠭᠠ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠲᠡᠷᠡ ᠪᠠᠰᠠ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠦᠴᠦᠲᠦ ᠳᠠᠢᠰᠤᠨ ᠪᠣᠯᠤᠭᠰᠠᠨ ᠪᠠᠢᠨᠠ᠃ 1714 ᠣᠨ ᠠ᠋ᠴᠠ ᠡᠮᠦᠨᠡ᠂ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠳᠤᠮᠳᠠᠳᠤ ᠤᠯᠤᠰ ᠲᠠᠢ ᠡᠶᠡ ᠨᠠᠢᠷᠠᠮᠳᠠᠯ ᠲᠠᠢ ᠪᠠᠢᠵᠠᠢ᠃ 1714 ᠣᠨ ᠳ᠋ᠤ᠌᠂ ᠴᠠᠸᠠᠩᠷᠠᠪᠳᠠᠨ ᠭᠡᠨᠡᠳᠲᠡ ᠬᠠᠮᠢᠯ ᠢ᠋ ᠳᠣᠪᠲᠣᠯᠪᠠ᠃ ᠲᠤᠰ ᠵᠢᠯ ᠳ᠋ᠦ᠍ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠨᠢᠭᠡᠨ ᠬᠤᠪᠢ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠪᠠᠭᠤᠯᠭᠠᠪᠠ᠂ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠲᠡᠭᠡᠨ ᠴᠠᠸᠠᠩᠷᠠᠪᠳᠠᠨ ᠤ᠋ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠬᠢᠭᠰᠡᠨ ᠶᠠᠯᠠ ᠶ᠋ᠢ ᠲᠣᠭᠠᠴᠢᠵᠤ᠂ ᠲᠡᠭᠦᠨ ᠢ᠋ ᠵᠡᠭᠦᠨᠭᠠᠷ ᠤ᠋ᠨ ᠸᠠᠩ ᠨᠠᠷ ᠠ᠋ᠴᠠ ᠪᠤᠯᠢᠶᠠᠨ ᠠᠪᠠᠴᠢᠭᠰᠠᠨ ᠬᠠᠷᠢᠶᠠ ᠨᠤᠲᠤᠭ ᠪᠠ ᠡᠷᠬᠡ ᠶ᠋ᠢ ᠨᠢ ᠪᠤᠴᠠᠭᠠᠵᠤ ᠥᠭᠭᠦᠭᠲᠦᠨ ᠭᠡᠪᠡ᠃ ᠡᠭᠦᠨ ᠢ᠋ ᠭᠦᠢᠴᠡᠳᠬᠡᠬᠦ ᠶ᠋ᠢᠨ ᠲᠥᠯᠥᠭᠡ ᠴᠠᠸᠠᠩᠷᠠᠪᠳᠠᠨ ᠨᠢᠭᠡ ᠤᠳᠠᠭᠠᠨ ᠤ᠋ ᠸᠠᠩ ᠬᠦᠩ ᠨᠠᠷ ᠤ᠋ᠨ ᠬᠤᠷᠠᠯ ᠢ᠋ ᠬᠤᠷᠠᠯᠳᠤᠭᠤᠯᠬᠤ ᠪᠠᠷ ᠵᠥᠪᠰᠢᠶᠡᠷᠡᠭᠰᠡᠨ ᠳ᠋ᠦ᠍ ᠴᠢᠩ ᠤᠯᠤᠰ ᠲᠥᠯᠥᠭᠡᠯᠡᠭᠴᠢ ᠲᠣᠮᠢᠯᠠᠨ ᠣᠷᠣᠯᠴᠠᠭᠤᠯᠪᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠠᠷᠠᠭ (ᠠᠷᠠᠳᠤ) ᠶ᠋ᠢᠨ ᠪᠡᠯᠴᠢᠭᠡᠷ ᠢ᠋ ᠬᠣᠢᠳ ᠠᠢᠮᠠᠭ ᠲᠤ᠌ ᠡᠷᠬᠡᠪᠰᠢ ᠪᠤᠴᠠᠭᠠᠭᠲᠤᠨ ᠭᠡᠵᠦ ᠱᠠᠭᠠᠷᠳᠠᠵᠤ᠂《ᠬᠣᠩ ᠲᠠᠢᠵᠢ》 ᠳ᠋ᠤ᠌ ᠡᠷᠴᠢᠰ ᠭᠣᠣᠯ ᠬᠠᠪᠢ ᠶ᠋ᠢᠨ ᠵᠢᠵᠢᠭᠬᠡᠨ ᠬᠡᠰᠡᠭ ᠭᠠᠵᠠᠷ ᠢ᠋ ᠯᠡ ᠥᠭᠴᠡᠢ᠃ ᠶᠠᠷᠢᠶᠠᠨ ᠦᠭᠡᠢ ᠴᠠᠸᠠᠩᠷᠠᠪᠳᠠᠨ ᠡᠨᠡ ᠬᠦ᠌ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠶᠦᠮ᠃ ᠲᠡᠢᠨ ᠬᠦ᠌ ᠳᠠᠬᠢᠭᠠᠳ ᠯᠠ ᠲᠡᠢᠨ ᠳᠠᠵᠢᠨ ᠪᠣᠯᠵᠤ ᠡᠬᠢᠯᠡᠪᠡ᠃ ᠴᠢᠩ ᠤᠯᠤᠰ ᠬᠠᠯᠢᠮᠠᠭᠴᠤᠳ ᠤ᠋ᠨ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠶ᠋ᠢᠨ ᠬᠢᠨᠢ ᠡᠮᠵᠡᠭ ᠲᠠᠯᠠ ᠶ᠋ᠢ ᠶᠡᠬᠡ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠪᠠ᠂ ᠲᠡᠷᠡᠴᠢᠯᠡᠨ ᠬᠠᠯᠢᠮᠠᠭᠴᠤᠳ ᠦᠷᠭᠦᠯᠵᠢ ᠬᠠᠰᠠᠭᠴᠤᠳ ᠪᠣᠯᠤᠨ ᠪᠦᠷᠦᠳᠴᠦᠳ (ᠭᠢᠷᠭᠢᠰᠴᠤᠳ) ᠤ᠋ᠨ ᠰᠦᠷᠳᠡᠭᠦᠯᠦᠯ ᠳ᠋ᠦ᠍ ᠤᠴᠠᠷᠠᠳᠠᠭ ᠢ᠋ ᠴᠦ᠍ ᠰᠠᠢᠨ ᠮᠡᠳᠡᠵᠦ ᠪᠠᠢᠵᠠᠢ᠃ ᠲᠡᠢᠨ ᠬᠦ᠌ ᠴᠢᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠠᠮᠤᠭ ᠤ᠋ᠨ ᠬᠦᠴᠦᠷᠬᠡᠭ ᠬᠦᠴᠦ ᠪᠡᠨ ᠵᠣᠷᠢᠭᠤᠳᠠ ᠬᠠᠰᠠᠭᠴᠤᠳ ᠪᠣᠯᠤᠨ ᠪᠦᠷᠦᠳᠴᠦᠳ ᠦ᠋ᠨ ᠬᠢᠯᠢ ᠳᠡᠭᠡᠷᠡ ᠠᠪᠠᠴᠢᠵᠤ ᠪᠠᠢᠷᠢᠯᠠᠭᠤᠯᠪᠠ᠃ ᠴᠢᠩ ᠤᠯᠤᠰ ᠤ᠋ᠨ ᠪᠠᠢᠴᠠᠭᠠᠭᠴᠢ ᠲᠦᠰᠢᠮᠡᠳ ᠦ᠋ᠨ ᠠᠢᠯᠠᠳᠬᠠᠯ ᠳ᠋ᠤ᠌ ᠬᠡᠯᠡᠬᠦ ᠳ᠋ᠡᠭᠡᠨ ᠣᠯᠠᠨ ᠬᠠᠯᠢᠮᠠᠭᠴᠤᠳ ᠴᠢᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠪᠲᠣᠯᠬᠤ ᠠ᠋ᠴᠠ ᠠᠶᠤᠭᠠᠳ ᠢᠯᠢ ᠭᠣᠣᠯ ᠢ᠋ ᠳᠠᠭᠠᠵᠤ ᠪᠠᠷᠠᠭᠤᠨᠰᠢ ᠳᠤᠲᠠᠭᠠᠵᠤ ᠪᠠᠢᠨᠠ ᠭᠡᠵᠡᠢ᠃
ᠣᠷᠣᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠬᠠᠯᠢᠮᠠᠭᠴᠤᠳ ᠤ᠋ᠨ ᠲᠦᠭᠰᠢᠯ ᠢ᠋ ᠠᠰᠢᠭᠯᠠᠨ᠂ ᠲᠡᠳᠡ ᠨᠠᠷ ᠢ᠋ ᠣᠷᠣᠰ ᠤ᠋ᠨ ᠬᠣᠯᠪᠣᠭᠠ ᠳ᠋ᠤ᠌ ᠲᠠᠲᠠᠵᠤ ᠠᠪᠴᠢᠷᠠᠬᠤ ᠪᠠᠷ ᠭᠣᠷᠢᠳᠠᠪᠠ᠃ ᠺᠣᠵᠠᠺᠢ ᠶ᠋ᠢᠨ ᠠᠬᠠᠯᠠᠭᠴᠢ ᠢᠹᠠᠨ· ᠴᠸᠯᠸᠳᠣᠹ 1719 ᠣᠨᠠ ᠬᠠᠯᠢᠮᠠᠭ ᠲᠤ᠌ ᠠᠢᠯᠴᠢᠯᠠᠬᠤ ᠳ᠋ᠠᠭᠠᠨ ᠡᠨᠡ ᠰᠠᠨᠠᠭᠠ ᠶ᠋ᠢ ᠨᠢ ᠬᠡᠯᠡᠵᠦ ᠥᠭᠴᠡᠢ᠃ ᠲᠦᠷᠦᠭᠦᠬᠡᠨ 1717 ᠣᠨ ᠳ᠋ᠤ᠌᠂ ᠳᠦᠪᠣ ᠦᠨᠳᠦᠰᠦᠲᠡᠨ ᠦ᠌ ᠢᠵᠠᠭᠤᠷᠲᠠᠨ ᠸᠢᠯᠶᠠᠩᠨᠣᠪ ᠢ᠋ᠶ᠋ᠠᠷ ᠬᠠᠵᠢᠷ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠦ᠌ ᠮᠦᠵᠠᠲ ᠨᠤᠲᠤᠭ ᠠ᠋ᠴᠠ ᠴᠠᠸᠠᠩᠷᠠᠪᠳᠠᠨ ᠳ᠋ᠤ᠌ ᠮᠡᠨᠳᠦᠴᠢᠯᠡᠯ ᠳᠡᠪᠰᠢᠭᠦᠯᠪᠡ᠃ ᠳᠠᠷᠠᠭᠠ ᠵᠢᠯ ᠨᠢ《ᠬᠣᠩ ᠲᠠᠢᠵᠢ》 ᠶ᠋ᠢᠨ ᠶᠡᠬᠡ ᠤᠷᠲᠤ ᠦᠷᠭᠦᠯᠵᠢ ᠶ᠋ᠢᠨ ᠡᠪᠦᠯᠵᠢᠶᠡᠨ ᠦ᠌ ᠭᠠᠵᠠᠷ ᠲᠠᠷᠠᠭ ᠤ᠋ᠨ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠠᠬᠢ ᠺᠦᠷᠺᠦᠰ ᠲᠦ᠍ ᠪᠠᠭᠤᠭᠠᠳ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠸᠢᠯᠶᠠᠩᠨᠣᠪ ᠠᠶᠠᠷᠯᠠᠨ ᠮᠣᠷᠳᠠᠪᠠ᠃ ᠸᠠᠩᠺᠣᠹᠰᠺᠢ ᠶ᠋ᠢᠨ ᠡᠯᠴᠢᠯᠡᠭᠰᠡᠨ ᠲᠡᠮᠳᠡᠭᠯᠡᠯ ᠡᠴᠡ ᠡᠨᠡ ᠲᠤᠬᠠᠢ ᠨᠡᠩ ᠣᠯᠠᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠵᠤ ᠪᠣᠯᠤᠨᠠ᠃ 1722 ᠣᠨ ᠤ᠋ 11 ᠰᠠᠷᠠ ᠳ᠋ᠤ᠌ ᠡᠨᠡ ᠬᠦ᠌ ᠴᠡᠷᠢᠭ ᠦ᠋ᠨ ᠨᠣᠶᠠᠨ《ᠬᠣᠩ ᠲᠠᠢᠵᠢ》 ᠶ᠋ᠢᠨ ᠢᠯᠢ ᠭᠣᠣᠯ ᠤ᠋ᠨ ᠡᠮᠦᠨᠡ ᠡᠷᠭᠢᠨ ᠳ᠋ᠦ᠍ ᠪᠠᠭᠤᠳᠠᠯᠯᠠᠵᠤ ᠪᠠᠢᠭᠰᠠᠨ ᠶᠡᠬᠡ ᠤᠷᠲᠤ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡ᠂ ᠡᠨᠳᠡ ᠡᠴᠡ ᠵᠡᠭᠦᠨᠰᠢ᠂ ᠺᠠᠷᠤᠨ ᠭᠣᠣᠯ ᠬᠡᠳᠦᠬᠡᠨ ᠭᠠᠵᠠᠷ ᠤ᠋ᠨ ᠵᠠᠢᠲᠠᠢ᠃ 1723 ᠣᠨ ᠤ᠋ 9 ᠰᠠᠷᠠ ᠠ᠋ᠴᠠ ᠡᠮᠦᠨᠡ ᠪᠣᠯᠲᠠᠯᠠ ᠲᠡᠷᠡ ᠪᠡᠷ ᠬᠠᠯᠢᠮᠠᠭᠴᠤᠳ ᠤ᠋ᠨ ᠨᠣᠶᠠᠯᠠᠭᠴᠢ ᠶ᠋ᠢᠨ ᠲᠥᠷᠥ ᠳ᠋ᠦ᠍ ᠪᠠᠢᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠨᠠᠷ ᠢ᠋ ᠳᠠᠭᠠᠵᠤ᠂ ᠳᠦᠫᠣ ᠭᠣᠣᠯ ᠪᠣᠯᠤᠨ ᠵᠠᠭᠠᠯᠠᠨ ᠭᠣᠣᠯ ᠢ᠋ ᠳᠠᠭᠠᠵᠤ ᠬᠦᠷᠢᠶᠡ ᠪᠠᠭᠤᠳᠠᠭ ᠪᠠᠢᠪᠠ᠃ ᠡᠨᠡ ᠬᠦ᠌ ᠡᠯᠴᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠠᠯᠠ ᠪᠠᠷ ᠳᠡᠮᠡᠢ ᠶᠡᠬᠡ ᠪᠦᠲᠦᠭᠡᠯ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠣᠨᠴᠠᠭᠠᠢᠯᠠᠨ 1722 ᠣᠨ ᠳ᠋ᠤ᠌ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠠ᠋ᠴᠠ ᠪᠣᠯᠵᠤ᠂ ᠴᠢᠩ ᠤᠯᠤᠰ ᠤ᠋ᠨ ᠲᠠᠯᠠ ᠠ᠋ᠴᠠ ᠢᠷᠡᠬᠦ ᠰᠦᠷᠳᠡᠭᠦᠯᠦᠯ ᠤᠯᠠᠮ ᠪᠠᠭᠠᠳᠠᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ᠂ 1723 ᠣᠨ ᠳ᠋ᠤ᠌ ᠬᠠᠯᠢᠮᠠᠭᠴᠤᠳ ᠬᠠᠰᠠᠭᠴᠤᠳ ᠲᠠᠢ ᠬᠢᠭᠰᠡᠨ ᠲᠡᠢᠨ ᠳ᠋ᠦ᠍ ᠶᠡᠬᠡ ᠢᠯᠠᠯᠲᠠ ᠣᠯᠵᠤ᠂ ᠰᠠᠢᠷᠠᠨ᠂ ᠲᠡᠱᠺᠸᠨ᠋ᠲ ᠪᠣᠯᠤᠨ ᠶᠠᠰᠢ ᠶ᠋ᠢ ᠡᠵᠡᠯᠡᠨ ᠠᠪᠤᠪᠠ᠃
ᠸᠠᠩᠺᠦᠹᠰᠺᠢ ᠶ᠋ᠢᠨ ᠮᠡᠳᠡᠭᠦᠯᠦᠯᠲᠡ ᠶ᠋ᠢ ᠦᠨᠳᠦᠰᠦᠯᠡᠪᠡᠯ᠂ ᠬᠠᠯᠢᠮᠠᠭᠴᠤᠳ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠲᠠᠲᠠᠵᠤ ᠳᠡᠢᠯᠦᠨᠡ᠃《ᠬᠣᠩ ᠲᠠᠢᠵᠢ》 ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠ ᠶᠡᠬᠡ ᠢᠲᠡᠭᠡᠯ ᠬᠦᠨᠳᠦ ᠲᠡᠢ ᠪᠠᠢᠵᠠᠢ᠂ ᠲᠡᠢᠨ ᠬᠦ᠌ ᠲᠡᠷᠡ ᠪᠡᠷ ᠥᠭᠡᠷᠡ ᠠᠢᠮᠠᠭ ᠪᠦᠯᠦᠭ ᠦ᠋ᠨ ᠵᠠᠢᠰᠠᠩ ᠨᠠᠷ ᠠ᠋ᠴᠠ ᠶᠠᠭᠤ ᠴᠤ᠌ ᠰᠤᠷᠠᠵᠤ ᠠᠰᠠᠭᠤᠳᠠᠭ ᠦᠭᠡᠢ ᠪᠠᠢᠪᠠ᠃《ᠬᠣᠩ ᠲᠠᠢᠵᠢ》 ᠶ᠋ᠢᠨ ᠦᠶᠡᠯᠢᠳ ᠠᠬᠠ ᠴᠠᠷᠢᠩᠳᠣᠨᠳᠣᠪ ᠪᠣᠯ《ᠵᠠᠢᠰᠠᠩ》᠂ ᠯᠠᠢᠫᠦᠴᠢ ᠭᠣᠣᠯ ᠪᠣᠯᠤᠨ ᠬᠠᠯᠲᠠᠷ ᠭᠣᠣᠯ ᠤ᠋ᠨ ᠡᠷᠭᠢᠨ ᠳ᠋ᠦ᠍ ᠤᠷᠲᠤ ᠪᠠᠭᠤᠳᠠᠭ ᠪᠠᠢᠪᠠ᠃ ᠭᠤᠴᠢᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ᠂ ᠬᠠᠯᠢᠮᠠᠭᠴᠤᠳ ᠶᠡᠷᠦ ᠡᠴᠡ ᠲᠠᠷᠢᠶᠠᠯᠠᠳᠠᠭ ᠦᠭᠡᠢ ᠪᠠᠢᠪᠠ᠂ ᠭᠡᠪᠡᠴᠦ ᠸᠠᠩᠺᠦᠹᠰᠺᠢ ᠶ᠋ᠢ ᠠᠢᠯᠴᠢᠯᠠᠨ ᠬᠦᠷᠬᠦ ᠳ᠋ᠦ᠍᠂ ᠣᠯᠵᠠᠯᠠᠵᠤ ᠠᠪᠴᠢᠷᠠᠭᠰᠠᠨ ᠪᠤᠬᠠᠷᠴᠤᠳ(《ᠰᠠᠷᠲᠠᠭᠤᠯ》ᠴᠤ᠌ ᠭᠡᠳᠡᠭ) ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ᠂ ᠬᠠᠯᠢᠮᠠᠭᠴᠤᠳ ᠬᠦᠷᠲᠡᠯᠡ ᠲᠠᠷᠢᠶᠠ ᠲᠠᠷᠢᠳᠠᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠠᠷᠢᠰᠢᠨ ᠭᠠᠵᠠᠷ ᠨᠢ ᠵᠣᠭᠰᠣᠯ ᠦᠭᠡᠢ ᠥᠷᠭᠡᠳᠴᠦ ᠪᠠᠢᠪᠠ᠃ ᠰᠠᠷᠲᠠᠭᠤᠯᠴᠤᠳ ᠺᠦ᠋ᠷᠺᠦᠰ ᠠᠭᠤᠯᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠨᠢᠭᠡ ᠪᠠᠯᠭᠠᠰᠤ ᠬᠣᠲᠠ ᠲᠠᠢ ᠪᠠᠢᠪᠠ᠃ ᠲᠡᠳᠡ ᠨᠠᠷ ᠬᠠᠯᠢᠮᠠᠭ᠂ ᠣᠷᠣᠰ᠂ ᠬᠢᠲᠠᠳ(ᠡᠩᠬᠡ ᠲᠠᠢᠪᠤᠩ ᠦᠶᠡ ᠶ᠋ᠢᠨ)᠂ ᠲᠠᠩᠭᠤᠳ᠂ ᠡᠨᠡᠳᠬᠡᠭ ᠪᠣᠯᠤᠨ ᠲᠠᠷᠠᠨᠰᠣᠠᠠᠰᠢᠨ᠋ᠨ ᠣᠷᠣᠨ ᠤ᠋ ᠬᠥᠮᠦᠰ ᠲᠡᠢ ᠠᠷᠠᠯᠵᠢᠶᠠ ᠶ᠋ᠢᠨ ᠶᠠᠪᠤᠯᠴᠠᠭᠠ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠵᠠᠢ᠃
1715 ~ 1716 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠡᠷᠴᠢᠰ ᠭᠣᠣᠯ ᠤ᠋ᠨ ᠰᠠᠪᠠ ᠭᠠᠵᠠᠷ ᠲᠤ᠌ ᠢᠷᠡᠭᠰᠡᠨ ᠪᠠᠷᠲᠠᠭᠠ ᠰᠢᠨᠵᠢᠯᠡᠭᠴᠢᠳ ᠦ᠋ᠨ ᠠᠩᠭᠢ ᠶ᠋ᠢᠨ ᠳᠣᠲᠣᠷᠠ ᠯᠧᠨᠠ ᠭᠡᠳᠡᠭ ᠰᠸᠸᠳ᠋ᠸᠨ ᠨᠤᠲᠤᠭ ᠲᠤ᠌ ᠨᠢᠭᠡ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠠᠢᠵᠠᠢ᠂ ᠲᠡᠳᠡ ᠨᠠᠷ ᠬᠠᠯᠢᠮᠠᠭᠴᠤᠳ ᠲᠤ᠌ ᠣᠯᠵᠠᠯᠠᠭᠳᠠᠪᠠ᠃ ᠡᠨᠡ ᠬᠥᠮᠦᠨ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠪᠠ ᠰᠣᠶᠣᠯ ᠤ᠋ᠨ ᠲᠠᠯᠠ ᠪᠠᠷ ᠬᠠᠯᠢᠮᠠᠭᠴᠤᠳ ᠢ᠋ ᠶᠡᠬᠡ ᠪᠡᠷ ᠬᠠᠪᠰᠤᠷᠪᠠ᠃ ᠯᠧᠨᠠ 1733 ᠣᠨ ᠪᠣᠯᠲᠠᠯᠠ ᠬᠠᠯᠢᠮᠠᠭᠴᠤᠳ ᠤ᠋ᠨ ᠳᠤᠮᠳᠠ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠯᠵᠤ ᠣᠳᠪᠠ᠃ ᠲᠡᠷᠡ ᠪᠡᠷ ᠬᠠᠯᠢᠮᠠᠭᠴᠤᠳ ᠲᠤ᠌ ᠫᠤᠤ ᠫᠤᠤᠳᠠᠬᠤ ᠮᠡᠷᠭᠡᠵᠢᠯ ᠪᠠ ᠪᠤᠰᠤᠳ ᠮᠡᠷᠭᠡᠵᠢᠯ ᠦ᠋ᠳ ᠢ᠋ ᠵᠢᠭᠠᠵᠤ ᠥᠭᠪᠡ᠃ ᠲᠡᠷᠡᠴᠢᠯᠡᠨ ᠨᠢᠭᠡ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠪᠠ᠃ ᠤᠯᠤᠰ ᠲᠠᠭᠠᠨ ᠪᠤᠴᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠷᠡ ᠨᠢᠭᠡ ᠬᠤᠪᠢ ᠵᠡᠭᠦᠨᠭᠠᠷ ᠤ᠋ᠨ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠢ᠋ ᠵᠢᠷᠤᠵᠤ ᠪᠦᠲᠦᠭᠡᠪᠡ᠃ ᠡᠨᠡ ᠵᠢᠷᠤᠭ ᠲᠤ᠌ ᠨᠡᠭᠦᠳᠡᠯᠴᠢᠳ ᠦ᠋ᠨ ᠴᠠᠴᠠᠷ ᠪᠣᠰᠬᠠᠭᠰᠠᠨ ᠭᠠᠵᠠᠷ ᠪᠣᠯᠭᠠᠨ ᠢ᠋ ᠨᠠᠷᠢᠨ ᠲᠡᠮᠳᠡᠭᠯᠡᠵᠡᠢ᠃ ᠡᠳᠡᠭᠡᠷ ᠭᠠᠵᠠᠷ ᠤ᠋ᠨ ᠣᠯᠠᠩᠬᠢ ᠨᠢ ᠠᠭᠤᠯᠠ ᠶ᠋ᠢᠨ ᠬᠥᠯ ᠭᠣᠣᠯ ᠤ᠋ᠨ ᠡᠬᠢᠨ ᠳ᠋ᠦ᠍ ᠪᠠᠢᠳᠠᠭ ᠪᠠᠢᠵᠠᠢ᠃ ᠳᠣᠯᠣᠭᠠᠨ ᠤᠰᠤᠨ ᠳ᠋ᠤ᠌ ᠲᠡᠳᠡᠨᠦᠰ ᠦ᠋ᠨ ᠴᠠᠴᠠᠷ ᠪᠤᠰᠬᠠᠭᠰᠠᠨ ᠭᠠᠵᠠᠷ ᠤ᠋ᠳ ᠭᠡᠪᠡᠯ᠄ (ᠨᠢᠭᠡ) ᠠᠷᠠᠳᠤ ᠭᠣᠣᠯ ᠪᠣᠯᠤᠨ ᠪᠠᠯᠬᠠᠱ ᠨᠠᠭᠤᠷ ᠤᠷᠤᠭᠤ ᠤᠷᠤᠰᠬᠤ ᠭᠣᠣᠯ ᠪᠣᠯᠭᠠᠨ ᠤ᠋ ᠳᠡᠭᠡᠳᠦ ᠤᠷᠤᠰᠬᠠᠯ᠃ (ᠬᠣᠶᠠᠷ) ᠠᠯᠲᠢᠨ· ᠡᠮᠢᠯ ᠪᠣᠯᠤᠨ ᠭᠦᠪᠢᠨ ᠦ᠌ ᠬᠣᠭᠣᠷᠣᠨᠳᠣ᠂ ᠢᠯᠢ ᠭᠣᠣᠯ ᠤ᠋ᠨ ᠬᠣᠢᠲᠤ ᠡᠷᠭᠢ᠂ ᠺᠦᠭᠳᠠ ᠠ᠋ᠴᠠ ᠺᠣᠳᠠᠢᠯ ᠤ᠋ᠨ ᠬᠣᠭᠣᠷᠣᠨᠳᠣ᠃ (ᠭᠤᠷᠪᠠ) ᠺᠡᠭᠡᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠡᠷᠭᠢ᠂ ᠺᠠᠷᠳ ᠭᠣᠣᠯ ᠠ᠋ᠴᠠ ᠵᠡᠭᠦᠨᠰᠢ᠂ ᠺᠠᠢᠲ᠋ᠮᠠᠨ ᠠᠭᠤᠯᠠ ᠨᠢᠷᠤᠭᠤᠨ ᠤ᠋ ᠬᠣᠢᠲᠤ ᠳᠠᠪᠠᠭᠠ᠃ (ᠳᠥᠷᠪᠡ) ᠵᠢᠯᠢ ᠭᠣᠣᠯ ᠤ᠋ᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠪᠠ ᠲᠡᠭᠦᠨ ᠦ᠌ ᠰᠠᠯᠪᠤᠷᠢ ᠤᠷᠤᠰᠬᠠᠯ ᠳᠠᠭᠠᠤ; (ᠲᠠᠪᠤ) ᠲᠦᠫᠦ ᠭᠣᠯ ᠤ᠋ᠨ ᠪᠠᠷᠠᠭᠤᠨ ᠡᠷᠭᠢ ᠪᠣᠯᠤᠨ ᠢᠰᠠᠢᠺᠺᠦ᠋ᠯ ᠨᠠᠭᠤᠷ ᠤ᠋ᠨ ᠡᠮᠦᠨᠡᠲᠦ ᠡᠷᠭᠢ ᠪᠠ ᠨᠠᠭᠤᠷ ᠳᠠᠭᠠᠤ ᠪᠠᠷᠠᠭᠤᠨ ᠥᠨᠴᠥᠭ᠂ ᠤᠮᠠᠷᠠᠲᠤ ᠡᠷᠭᠢ ᠶ᠋ᠢᠨ ᠬᠦᠦᠰ ᠭᠣᠣᠯ ᠬᠢᠭᠡᠳ ᠠᠺᠰᠤ ᠭᠣᠣᠯ ᠤ᠋ᠨ ᠬᠣᠭᠣᠷᠣᠨᠳᠣ;(ᠵᠢᠷᠭᠤᠭᠠ) ᠶᠡᠬᠡ ᠺᠠᠪᠢᠨ ᠭᠣᠣᠯ ᠤ᠋ᠨ ᠵᠢᠯᠠᠭᠠ᠂ ᠵᠢᠴᠢ ᠴᠦ ᠭᠣᠣᠯ ᠤᠷᠤᠭᠤ ᠤᠷᠤᠰᠬᠤ ᠪᠠᠭᠠ ᠭᠣᠣᠯ ᠳᠠᠭᠠᠤ ᠡᠷᠭᠢ ᠪᠠ ᠬᠠᠷᠠ ᠬᠠᠳᠠ ᠬᠦᠷᠲᠡᠯᠡ᠃ ᠯᠧᠨᠠ ᠪᠠᠷ(ᠬᠣᠩ ᠲᠠᠢᠵᠢ) ᠶ᠋ᠢᠨ ᠭᠣᠣᠯ ᠴᠠᠴᠠᠷ ᠢ᠋ ᠲᠠᠷᠴᠢ ᠶ᠋ᠢᠨ ᠬᠠᠪᠴᠢᠯ ᠠᠮᠠᠨ ᠳ᠋ᠤ᠌ ᠵᠡᠭᠦᠨ ᠡᠮᠦᠨᠡ᠂ ᠣᠳᠣ ᠶ᠋ᠢᠨ ᠬᠦᠷᠳ᠋ᠵᠡ ᠣᠷᠴᠢᠮ ᠪᠠᠢᠬᠤ ᠪᠠᠷ ᠵᠢᠷᠤᠭᠯᠠᠨ ᠪᠦᠲᠦᠭᠡᠵᠡᠢ᠃
ᠴᠠᠸᠠᠩᠷᠠᠪᠳᠠᠨ ᠢ᠋ ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠭᠠᠯᠳᠠᠨᠴᠠᠷᠢᠩ(1727—1745) ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠪᠠ᠃ ᠡᠨᠡ ᠬᠥᠮᠦᠨ ᠦᠷᠭᠦᠯᠵᠢᠯᠡᠨ ᠴᠢᠩ ᠤᠯᠤᠰ ᠲᠠᠢ ᠪᠠᠢᠯᠳᠤᠭᠰᠠᠨ ᠪᠣᠯᠪᠠᠴᠤ1732 ᠣᠨ ᠤ᠋ ᠬᠡᠯᠡᠯᠴᠡᠭᠡᠷ ᠢ᠋ ᠲᠣᠭᠲᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠠᠭᠠᠰ ᠬᠢᠷᠢ ᠬᠠᠷᠢᠶᠠᠲᠤ ᠨᠤᠲᠤᠭ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠪᠠᠢᠪᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠠᠰᠠᠭᠴᠤᠳ ᠨᠡᠷᠡ ᠳᠡᠭᠡᠷᠡ ᠪᠡᠨ ᠣᠷᠣᠰ ᠤ᠋ᠨ ᠢᠷᠭᠡᠨ ᠪᠣᠯᠴᠢᠬᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠪᠡᠷ ᠬᠠᠰᠠᠭ ᠤᠷᠤᠭᠤ ᠬᠦᠴᠦ ᠪᠡᠨ ᠶᠡᠬᠡ ᠪᠦᠲᠦᠮᠵᠢᠲᠡᠢ ᠥᠷᠭᠡᠳᠬᠡᠵᠡᠢ᠃ ᠬᠠᠰᠠᠭᠴᠤᠳ ᠤ᠋ᠨ ᠬᠠᠮᠢᠶᠠ ᠪᠦᠬᠦᠢ ᠬᠡᠷᠡᠭ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠶ᠋ᠢᠨ ᠲᠥᠯᠥᠭᠡ᠂ ᠣᠷᠣᠰ ᠤᠯᠤᠰ ᠣᠯᠠᠨ ᠤᠳᠠᠭᠠ ᠡᠯᠴᠢ ᠲᠣᠮᠢᠯᠠᠨ ᠭᠠᠯᠳᠠᠨᠴᠠᠷᠢᠩ ᠤ᠋ᠨ ᠲᠡᠨᠳᠡ ᠣᠴᠢᠭᠤᠯᠤᠭᠰᠠᠨ ᠶᠤᠮ᠃ ᠲᠡᠳᠡ ᠨᠠᠷ ᠳᠣᠲᠣᠷᠠᠬᠢ ᠨᠢᠭᠡ ᠪᠣᠯᠬᠤ ᠰᠠᠯᠪᠤᠷᠢ ᠠᠩᠭᠢ ᠶ᠋ᠢᠨ ᠳᠠᠷᠤᠭᠠ ᠦᠬᠯᠢᠨᠦᠹ (1732—1733) ᠭᠠᠯᠳᠠᠨᠴᠡᠷᠢᠩ ᠢ᠋ ᠳᠠᠭᠠᠵᠤ ᠴᠠᠴᠠᠷ ᠬᠤᠸᠠᠷᠠᠨ ᠨᠤᠭᠤᠳ ᠢ᠋ ᠪᠠᠢᠴᠠᠭᠠᠨ ᠦᠵᠡᠳᠡᠭ ᠪᠠᠢᠪᠠ᠃ ᠳᠥᠷᠪᠡ᠂ ᠲᠠᠪᠤᠳᠤᠭᠠᠷ ᠰᠠᠷᠠ ᠳ᠋ᠤ᠌ ᠲᠡᠳᠡ ᠨᠠᠷ ᠬᠡᠴᠢᠭᠡᠷ ᠠᠭᠤᠯᠠ ᠶ᠋ᠢ ᠳᠠᠭᠠᠵᠤ ᠢᠯᠢ ᠭᠣᠣᠯ ᠢ᠋ ᠤᠷᠤᠭᠤᠳᠠᠨ ᠪᠠᠭᠤᠨᠠ᠃ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠠ ᠵᠤᠨ ᠤ᠋ ᠤᠯᠠᠷᠢᠯ ᠳ᠋ᠤ᠌ ᠲᠡᠳᠡ ᠨᠠᠷ ᠲᠠᠮᠢᠯᠢᠺ᠂ ᠺᠠᠢᠱ᠂ ᠬᠠᠯᠬᠠᠯ᠂ ᠲᠠᠺᠡᠢ ᠠᠭᠤᠯᠠᠰ ᠢ᠋ᠶ᠋ᠠᠷ ᠨᠡᠭᠦᠳᠡᠯᠯᠡᠨ ᠮᠡᠯᠵᠢᠨᠡ᠃ ᠶᠢᠰᠦᠨ ᠰᠠᠷᠠ ᠠ᠋ᠴᠠ ᠳᠠᠷᠠᠭᠠ ᠵᠢᠯ ᠦ᠋ᠨ ᠬᠢᠨᠢ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠣᠯᠲᠠᠯᠠ ᠳᠠᠬᠢᠨ ᠢᠯᠢ ᠭᠣᠣᠯ ᠢ᠋ ᠳᠠᠭᠠᠵᠤ᠂《 ᠤᠷᠢᠳ ᠢ᠋ᠶ᠋ᠠᠷ ᠤᠷᠤᠰᠬᠠᠯ ᠤᠷᠤᠭᠤᠳᠠᠨ ᠪᠠᠭᠤᠵᠤ᠂ ᠳᠠᠷᠠᠭᠠ ᠨᠢ ᠤᠷᠤᠰᠬᠠᠯ ᠥᠭᠰᠥᠨ ᠬᠥᠳᠡᠯᠵᠦ᠂ ᠳᠠᠬᠢᠭᠠᠳ ᠬᠡᠴᠢᠭᠡᠷ ᠲᠦ᠍ ᠬᠦᠷᠦᠨᠡ᠂ ᠡᠨᠳᠡ ᠢᠷᠡᠭᠡᠳ ᠵᠤᠷᠰᠢᠯ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠲᠠᠪᠤᠨ ᠰᠠᠷᠠ ᠪᠣᠯᠲᠠᠯᠠ ᠰᠠᠭᠤᠨᠠ》᠃
ᠭᠠᠯᠳᠠᠨᠴᠡᠷᠢᠩ ᠢ᠋ ᠨᠠᠰᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠬᠥᠪᠡᠭᠦᠨ ᠨᠢ ᠴᠠᠸᠠᠩᠳᠠᠷᠵᠢ(1745—1750) ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠪᠠ᠂ ᠲᠡᠷᠡ ᠪᠡᠷ ᠳᠡᠭᠦᠦ ᠯᠠᠮᠠᠳᠠᠷᠵᠢ ᠳ᠋ᠠᠭᠠᠨ ᠠᠯᠠᠭᠳᠠᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠬᠣᠢᠰᠢᠬᠢ ᠳᠣᠲᠣᠭᠠᠳᠤ ᠶ᠋ᠢᠨ ᠵᠢᠭᠤᠷᠠᠭᠠᠨ ᠤ᠋ ᠳᠤᠮᠳᠠ᠂ ᠭᠠᠯᠳᠠᠨᠴᠷᠢᠩ ᠤ᠋ᠨ ᠠᠴᠢ ᠬᠦᠦ ᠠᠮᠤᠷᠰᠠᠨᠠᠭᠠ ᠥᠨᠳᠥᠷ ᠰᠠᠭᠤᠷᠢᠨᠠ ᠳᠠᠪᠰᠢᠪᠠ᠃ ᠲᠡᠷᠡ ᠪᠡᠷ ᠬᠠᠰᠠᠭᠴᠤᠳ ᠤ᠋ᠨ ᠬᠠᠪᠰᠤᠷᠤᠯᠭᠠ ᠳ᠋ᠤ᠌ ᠳᠥᠰᠢᠨ᠂ ᠡᠮᠢᠯ ᠭᠣᠣᠯ ᠪᠣᠯᠤᠨ ᠡᠷᠴᠢᠰ ᠭᠣᠣᠯ ᠤ᠋ᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠢ᠋ ᠡᠵᠡᠯᠡᠨ ᠠᠪᠴᠠᠢ᠃1754 ᠣᠨ ᠳ᠋ᠤ᠌᠂ ᠲᠡᠷᠡ ᠴᠢᠩ ᠤᠯᠤᠰ ᠲᠤ᠌ ᠪᠠᠭᠤᠨ ᠥᠭᠭᠦᠭᠡᠳ ᠦᠰᠲᠡᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠠᠷᠭᠠᠴᠠᠬᠤ ᠶ᠋ᠢᠨ ᠲᠥᠯᠥᠭᠡ ᠴᠢᠩ ᠤᠯᠤᠰ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠪᠠ᠃1755 ᠣᠨ ᠳ᠋ᠤ᠌᠂ ᠴᠢᠩ ᠤᠯᠤᠰ ᠤ᠋ᠨ ᠬᠣᠶᠠᠷ ᠵᠠᠮ ᠤ᠋ᠨ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠪᠠᠷᠠᠭᠤᠨᠰᠢ ᠳᠠᠢᠯᠠᠵᠤ ᠥᠴᠦᠬᠡᠨ ᠴᠦ᠍ ᠴᠢᠰᠤ ᠤᠷᠤᠰᠬᠠᠯ ᠦᠭᠡᠢ ᠪᠡᠷ ᠬᠠᠯᠢᠮᠠᠭ ᠸᠠᠩᠲᠤ ᠤᠯᠤᠰ ᠤ᠋ᠨ ᠪᠦᠬᠦ ᠨᠤᠲᠤᠭ ᠢ᠋ ᠲᠦᠪᠰᠢᠳᠬᠡᠪᠡ᠃ ᠲᠤᠰ ᠵᠢᠯ ᠳ᠋ᠦ᠍ᠨᠢ ᠠᠮᠤᠷᠰᠠᠨᠠᠭᠠ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠴᠢᠩ ᠦ᠋ᠨ ᠲᠥᠷᠥ ᠡᠴᠡ ᠤᠷᠪᠠᠨ ᠪᠣᠰᠤᠭᠰᠠᠨ ᠪᠣᠯᠪᠠᠴᠤ ᠢᠯᠠᠭᠳᠠᠭᠠᠳ ᠬᠠᠰᠠᠭ ᠲᠤ᠌ ᠳᠤᠲᠠᠭᠠᠨ ᠣᠴᠢᠪᠠ᠃1757 ᠣᠨ ᠤ᠋ ᠨᠢᠭᠡᠨ ᠲᠤᠢᠯ ᠤ᠋ᠨ ᠣᠬᠣᠷ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠲᠡᠷᠡ ᠳᠠᠬᠢᠨ ᠢᠯᠢ ᠭᠣᠣᠯ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡ᠃ ᠭᠡᠪᠡᠴᠦ ᠬᠠᠰᠠᠭ ᠬᠠᠨ ᠠᠪᠣᠯᠠᠢ ᠴᠢᠩ ᠤᠯᠤᠰ ᠲᠤ᠌ ᠨᠢᠭᠤᠴᠠ ᠪᠠᠷ ᠮᠡᠳᠡᠭᠦᠯᠦᠭᠰᠡᠨ ᠲᠤᠯᠠ ᠠᠷᠭᠠ ᠪᠤᠰᠤ ᠳᠤᠲᠠᠭᠠᠵᠤ ᠶᠠᠪᠤᠪᠠ᠃ ᠲᠡᠷᠡ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠣᠷᠣᠰ ᠤ᠋ᠨ ᠬᠢᠯᠢ ᠪᠡᠷ ᠲᠡᠨᠦᠭᠦᠴᠢᠯᠡᠵᠦ᠂ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠴᠡᠴᠡᠭ ᠡᠪᠡᠳᠴᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠠᠳ ᠨᠠᠰᠤ ᠪᠠᠷᠠᠪᠠ᠃ ᠡᠢᠨ ᠬᠦ᠌ ᠳᠤᠮᠳᠠᠳᠤ ᠠᠽᠢᠶᠠ ᠳ᠋ᠠᠬᠢ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡ ᠨᠡᠭᠦᠳᠡᠯ ᠬᠠᠨᠳᠤ ᠤᠯᠤᠰ ᠮᠥᠬᠥᠭᠰᠡᠨ ᠪᠠᠢᠨᠠ᠃ 1758 ᠣᠨ ᠳ᠋ᠤ᠌᠂ ᠴᠢᠩ ᠦ᠋ᠨ ᠲᠥᠷᠥ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠴᠡᠷᠢᠭ ᠲᠣᠮᠢᠯᠠᠨ᠂ ᠬᠠᠯᠢᠮᠠᠭᠴᠤᠳ ᠲᠤ᠌ ᠲᠤᠢᠯ ᠤ᠋ᠨ ᠬᠡᠷᠴᠡᠭᠡᠢ ᠶᠡᠬᠡ ᠬᠢᠳᠤᠯᠲᠠ ᠬᠢᠪᠡ᠃
ᠵᠡᠭᠦᠨᠭᠠᠷ ᠬᠠᠨᠳᠤ ᠤᠯᠤᠰ ᠮᠥᠬᠥᠭᠰᠡᠨ ᠦ᠌ ᠳᠠᠷᠠᠭᠠ᠂ ᠬᠠᠰᠠᠭᠴᠤᠳ ᠬᠢᠭᠡᠳ ᠬᠢᠷᠬᠢᠰᠴᠤᠳ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠤ᠌ ᠳᠠᠬᠢᠨ ᠪᠤᠴᠠᠵᠤ ᠢᠷᠡᠪᠡ᠃ ᠲᠤᠢᠯ ᠤ᠋ᠨ ᠤᠷᠲᠤ ᠨᠢᠭᠡ ᠬᠤᠭᠤᠴᠠᠭᠠᠨᠠ᠂ ᠲᠡᠳᠡ ᠨᠠᠷ ᠢ᠋ ᠳᠠᠢᠴᠢᠩ ᠭᠦᠷᠦᠨ ᠦ᠌ ᠠᠷᠠᠳ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍᠂ ᠴᠢᠩ ᠤᠯᠤᠰ ᠤ᠋ᠨ ᠲᠠᠲᠠᠭᠰᠠᠨ ᠤᠯᠤᠰ ᠤ᠋ᠨ ᠬᠢᠯᠢ ᠶ᠋ᠢᠨ ᠱᠤᠭᠤᠮ ᠨᠢ ᠶᠡᠬᠡ ᠲᠥᠯᠥᠪ ᠥᠨᠥᠳᠥᠷ ᠦ᠋ᠨ ᠳᠤᠮᠳᠠᠳᠤ᠂ ᠣᠷᠣᠰ ᠤ᠋ᠨ ᠬᠢᠯᠢ ᠶ᠋ᠢ ᠲᠣᠬᠢᠷᠠᠯᠴᠠᠨᠠ᠃ ᠰᠡᠭᠦᠯᠡᠷ ᠨᠢ ᠣᠷᠣᠰ ᠤᠯᠤᠰ ᠳᠣᠯᠣᠭᠠᠨ ᠤᠰᠤᠨ ᠳ᠋ᠤ᠌ ᠭᠣᠣᠯ ᠡᠷᠭᠢ ᠶ᠋ᠢ ᠪᠠᠢᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠬᠠᠰᠠᠭᠴᠤᠳ ᠬᠢᠭᠡᠳ ᠬᠢᠷᠬᠢᠰᠴᠤᠳ ᠰᠠᠶᠢ ᠦᠨᠡᠨ ᠬᠦ᠌ ᠥᠪᠡᠷ ᠦ᠋ᠨ ᠡᠷᠬᠡ ᠮᠠᠲᠠᠯ ᠲᠠᠢ ᠪᠣᠯᠵᠤ ᠴᠢᠳᠠᠪᠠ᠃
ᠳᠣᠯᠣᠭᠠᠨ ᠤᠰᠤᠨ ᠤ᠋ ᠲᠡᠦᠬᠡ
— ᠵᠣᠬᠢᠶᠠᠭᠴᠢ᠄ [ ᠣᠷᠣᠰ] ᠪᠠᠷᠲ᠋ᠣᠯᠳ᠋
ᠬᠢᠲᠠᠳᠴᠢᠯᠠᠭᠴᠢ᠄ ᠵᠣᠣ ᠯᠢ ᠱᠧᠩ
ᠮᠣᠩᠭᠣᠯᠴᠢᠯᠠᠭᠴᠢ᠄ ᠨᠣ·ᠰᠠᠢᠨᠴᠣᠭᠲᠣ
ᠬᠠᠷᠢᠭᠤᠴᠠᠭᠰᠠᠨ ᠨᠠᠢᠷᠠᠭᠤᠯᠤᠭᠴᠢ᠄ ᠰᠸᠷᠠᠩᠨᠣᠷᠪᠤ ᠰᠢᠦ ᠰᠢᠶᠠ
ᠬᠠᠪᠢᠰᠤ ᠤᠷᠠᠯᠠᠭᠴᠢ᠄ ᠪᠡᠰᠦᠲᠡᠢ ᠬᠠᠰᠪᠢᠯᠢᠭ᠌
ᠬᠡᠪᠯᠡᠭᠦᠯᠦᠨ ᠲᠠᠷᠬᠠᠭᠠᠭᠰᠠᠨ ᠨᠢ᠄ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ
ᠬᠡᠪᠯᠡᠨ ᠳᠠᠷᠤᠮᠠᠯᠯᠠᠭᠰᠠᠨ ᠨᠢ᠄ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠰᠢᠳᠠ ᠨᠡᠷᠡᠮᠵᠢᠲᠦ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠪᠦᠷᠢᠨ ᠪᠤᠰᠤ ᠬᠠᠷᠢᠭᠤᠴᠠᠯᠭᠠᠲᠤ ᠺᠣᠮᠫᠠᠨᠢ
ᠴᠠᠭᠠᠰᠤᠨ ᠤ᠋ ᠬᠡᠮᠵᠢᠶᠡ᠄ 710×1000 1/16
ᠬᠡᠪᠯᠡᠯ ᠦ᠋ᠨ ᠬᠠᠭᠤᠳᠠᠰᠤ᠄ 8.75
ᠦᠰᠦᠭ ᠦ᠋ᠨ ᠲᠣᠭᠠ᠄ 100 ᠮᠢᠩᠭᠠ
ᠬᠡᠪ ᠬᠢᠭᠰᠡᠨ ᠤᠳᠠᠭᠠ᠄ 2016 ᠣᠨ ᠤ᠋ 6 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
ᠬᠡᠪᠯᠡᠭᠰᠡᠨ ᠤᠳᠠᠭᠠ᠄ 2020 ᠣᠨ ᠤ᠋ 11 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠬᠡᠪᠯᠡᠭᠰᠡᠨ ᠲᠣᠭᠠ᠄ 2001— 5000
ᠨᠣᠮ ᠤ᠋ᠨ ᠨᠣᠮᠧᠷ᠄ lSBN 978 — 7 — 204 — 14121 — 0
ᠦᠨᠡ᠄ 30.00 ᠲᠥᠭᠥᠷᠢᠭ