ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠨᠢᠭᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -11
101ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠡᠯᠰᠡᠭᠰᠡᠳ
ᠬᠠᠪᠤᠷ ᠤ᠋ᠨ ᠨᠢᠭᠡ ᠰᠠᠢᠬᠠᠨ ᠡᠳᠦᠷ ᠪᠠᠢᠵᠠᠢ᠃ ᠥᠪᠥᠷ ᠬᠢᠶᠠᠭᠲᠤ ᠠ᠋ᠴᠠ ᠪᠠᠷᠠᠭᠤᠨ ᠣᠷᠣᠭᠰᠢ ᠪᠠᠷᠤᠭᠴᠠᠭᠠᠯᠠᠪᠠᠯ ᠥᠷᠲᠡᠭᠡ ᠭᠠᠷᠤᠢ ᠶ᠋ᠢᠨ ᠲᠡᠷᠲᠡᠭᠡ ᠭᠤᠷᠪᠠᠨ ᠶᠠᠪᠠᠭᠠᠨ ᠬᠥᠮᠦᠨ ᠨᠢᠭᠡ ᠪᠣᠯ ᠶᠡᠬᠡ ᠭᠣᠣᠯ ᠤ᠋ᠨ ᠪᠤᠷᠭᠠᠰᠤ ᠳ᠋ᠠᠭᠠᠨ᠂ ᠡᠰᠡᠪᠡᠯ ᠨᠠᠷᠠᠰᠤᠨ ᠣᠢ ᠳᠠᠮᠵᠢᠨ ᠭᠦᠶᠦᠯᠳᠦᠨᠡ᠃ ᠡᠳᠡ ᠪᠣᠯ ᠳᠣᠷᠵᠢ᠂ ᠰᠠᠮᠪᠤᠤ᠂ ᠴᠡᠷᠢᠨᠳᠣᠷᠵᠢ ᠭᠤᠷᠪᠠ᠃ ᠠᠩᠬᠠ ᠣᠷᠣᠨ ᠭᠡᠷ ᠡᠴᠡ ᠭᠠᠷᠬᠤ ᠳ᠋ᠠᠭᠠᠨ ᠲᠤᠰ ᠪᠦᠷᠢ ᠪᠡᠨ ᠤᠨᠤᠭᠠ ᠲᠠᠢ᠂ ᠬᠣᠭᠣᠯᠠ ᠬᠦᠨᠡᠰᠦ ᠲᠡᠢ᠂ ᠲᠣᠭᠣᠭᠠ ᠰᠢᠨᠠᠭᠠ ᠲᠠᠢ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠮᠣᠷᠢᠳ ᠨᠢ ᠲᠤᠩ ᠮᠠᠭᠤ᠂ ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠬᠦᠷᠦᠯ ᠦᠭᠡᠢ ᠨᠢᠭᠡ ᠶ᠋ᠢ ᠬᠠᠶᠠᠭᠠᠳ᠂ ᠳᠤᠮᠳᠠ ᠠ᠋ᠴᠠ ᠥᠩᠭᠡᠷᠡᠵᠦ ᠪᠠᠰᠠ ᠨᠢᠭᠡ ᠶ᠋ᠢ ᠬᠠᠶᠠᠭᠠᠳ ᠡᠴᠦᠰ ᠲᠦ᠋ᠨᠢ ᠭᠠᠭᠴᠠ ᠮᠣᠷᠢᠨ ᠳ᠋ᠤ᠌ ᠬᠠᠮᠤᠭ ᠶᠠᠭᠤᠮᠠ ᠪᠠᠨ ᠠᠴᠢᠨ ᠣᠪᠣᠭᠠ ᠭᠠᠵᠠᠷ ᠠᠪᠴᠤ ᠶᠠᠪᠤᠬᠤ ᠳ᠋ᠤᠨᠢ ᠭᠠᠮᠢᠩ ᠤ᠋ᠳ ᠳᠠᠭᠠᠷᠢᠯᠳᠤᠨ ᠬᠥᠭᠡᠭᠡᠬᠦ ᠳ᠋ᠦ᠍ ᠡᠴᠦᠰ ᠦ᠋ᠨ ᠮᠣᠷᠢ ᠶ᠋ᠢ ᠣᠢ ᠶ᠋ᠢᠨ ᠰᠢᠷᠢᠩᠭᠢᠨ ᠳ᠋ᠦ᠍ ᠬᠠᠶᠠᠨ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠭᠠᠵᠠᠷ ᠤ᠋ᠨ ᠪᠡᠷᠬᠡ ᠶ᠋ᠢ ᠳᠠᠮᠵᠢᠨ ᠭᠦᠶᠦᠬᠦ ᠶ᠋ᠢᠨ ᠠᠴᠢ ᠪᠠᠷ ᠭᠠᠷᠴᠠᠢ᠃
ᠣᠳᠣ ᠪᠣᠯᠬᠣᠷ ᠭᠠᠵᠠᠷ ᠦᠯᠦ ᠮᠡᠳᠡᠨᠡ᠃ ᠬᠥᠮᠦᠨ ᠲᠠᠨᠢᠬᠤ ᠴᠦ᠍ ᠪᠦᠷ ᠪᠠᠢᠳᠠᠭ ᠦᠭᠡᠢ ᠬᠡᠷᠡᠭ᠃ ᠭᠣᠷᠢᠳᠠᠬᠤ ᠨᠢ ᠭᠡᠪᠡᠯ ᠥᠨᠥᠬᠢ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠦ᠌ ᠪᠠᠢᠭᠠ ᠭᠠᠵᠠᠷ ᠡᠷᠬᠡ ᠦᠭᠡᠢ ᠢᠷᠡᠭᠰᠡᠨ ᠪᠣᠯ ᠤᠤ ᠭᠡᠵᠦ ᠪᠣᠳᠣᠨᠠ᠃ ᠲᠡᠭᠡᠭᠡᠳ ᠲᠡᠷᠲᠡᠭᠡᠬᠢ ᠬᠣᠩᠬᠣᠷ ᠲᠤ ᠬᠠᠷᠠᠭᠳᠠᠬᠤ ᠬᠡᠳᠦᠨ ᠭᠡᠷ ᠢ᠋ ᠴᠢᠭᠯᠡᠪᠡ᠃ ᠲᠡᠨᠳᠡ ᠮᠠᠯ ᠴᠥᠭᠡᠨ ᠲᠡᠢ ᠶᠠᠳᠠᠭᠤᠬᠠᠨ ᠪᠠᠢᠷᠢ ᠶ᠋ᠢᠨ ᠪᠣᠯᠤᠯᠲᠠᠢ ᠭᠡᠷ ᠦ᠋ᠳ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠬᠣᠢᠲᠤ ᠵᠠᠬᠠ ᠶ᠋ᠢᠨ ᠬᠠᠨᠠ ᠶ᠋ᠢᠨ ᠲᠤᠭᠤᠷᠭᠠ ᠶ᠋ᠢ ᠬᠠᠷᠠ ᠮᠣᠳᠣᠨ ᠤ᠋ ᠬᠣᠯᠲᠣᠰᠣ ᠪᠠᠷ ᠳᠠᠪᠬᠤᠷ ᠪᠦᠷᠢᠨ ᠠᠷᠭᠢᠯᠠᠭᠰᠠᠨ ᠪᠥᠭᠡᠳ ᠳᠡᠭᠡᠪᠦᠷ ᠦ᠋ᠨ ᠢᠰᠡᠭᠡᠢ ᠳᠡᠰ ᠬᠠᠷᠠ ᠲᠡᠢᠮᠦ ᠠᠢᠯ ᠢ᠋ ᠲᠡᠷᠡ ᠠᠷᠠᠢ ᠯᠠ ᠠᠶᠤᠯ ᠦᠭᠡᠢ ᠪᠣᠯᠪᠠ ᠤᠤ ᠭᠡᠵᠦ ᠡᠯᠢᠭᠡ ᠪᠠᠷᠢᠨ ᠬᠡᠯᠡᠯᠴᠡᠵᠦ ᠣᠷᠣᠬᠤ ᠪᠠᠷ ᠰᠢᠢᠳᠦᠯᠡ᠃ ᠭᠠᠳᠠᠭᠠ ᠨᠢ ᠬᠣᠩᠭᠣᠷᠴᠤᠭ ᠢ᠋ᠶ᠋ᠠᠨ ᠳᠠᠭᠠᠭᠠᠵᠤ ᠶᠠᠳᠠᠭᠰᠠᠨ ᠰᠠᠭᠰᠠᠭᠠᠷ ᠰᠡᠭᠦᠯ ᠲᠡᠢ ᠠᠰᠤᠷᠤ ᠲᠣᠮᠣ ᠨᠣᠬᠠᠢ ᠮᠣᠳᠣᠨ ᠲᠡᠷᠭᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠤᠬᠤᠰᠬᠢᠨ ᠭᠠᠷᠴᠤ ᠬᠦᠨᠳᠦ ᠭᠡᠭᠴᠢ ᠶ᠋ᠢᠨ ᠭᠢᠨᠵᠢ ᠪᠡᠨ ᠬᠠᠷᠴᠢᠭᠢᠨᠠᠭᠤᠯᠤᠨ ᠲᠡᠮᠡᠦᠯᠦᠨᠡ᠃ ᠡᠭᠦᠪᠡᠷ ᠦᠵᠡᠬᠦ ᠳ᠋ᠦ᠍ ᠡᠵᠡᠨ ᠨᠢ ᠲᠡᠢᠮᠦ ᠴᠦ᠍ ᠬᠠᠷᠢᠭᠤ ᠦᠭᠡᠢ ᠠᠮᠢᠲᠠᠨ ᠪᠠᠢᠮᠠ ᠦᠭᠡᠢ ᠠᠵᠢ᠃ ᠭᠡᠲᠡᠯᠡ ᠪᠠᠰᠠ ᠨᠣᠬᠠᠢ ᠶ᠋ᠢ ᠬᠥᠷ ᠬᠠᠷ ᠦᠰᠦᠴᠢᠨ ᠰᠦᠢᠳ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠭᠡᠷ ᠡᠴᠡ ᠬᠥᠮᠦᠨ ᠭᠠᠷᠬᠤ ᠦᠭᠡᠢ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠷ ᠲᠦ᠋ᠨᠢ ᠪᠠᠰᠠ ᠶᠠᠮᠠᠷ ᠨᠢᠭᠡᠨ ᠬᠦᠴᠦᠷᠬᠡᠭ ᠠᠮᠢᠲᠠᠨ ᠬᠤᠷᠬᠢᠷᠠᠬᠤ ᠠᠳᠠᠯᠢ ᠠᠪᠢᠶᠠ ᠭᠠᠷᠬᠤ ᠰᠣᠨᠣᠰᠳᠠᠨᠠ᠃ ᠳᠣᠷᠵᠢ ᠲᠦᠷᠦᠭᠦᠯᠡᠨ ᠮᠣᠳᠣᠨ ᠰᠠᠮᠪᠠᠷᠠ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠨ ᠣᠷᠣᠪᠠ᠃ ᠡᠮᠦᠨᠡ ᠡᠴᠡ ᠨᠢ ᠬᠢᠷᠢ ᠬᠡᠮᠵᠢᠶᠡ ᠡᠴᠡ ᠬᠡᠲᠦᠷᠡᠭᠰᠡᠨ ᠬᠠᠯᠠᠭᠤᠨ ᠠᠭᠤᠷ ᠨᠢᠭᠤᠷ ᠴᠣᠷᠭᠢᠨ ᠤᠭᠲᠤᠨᠠ᠃ ᠭᠡᠷ ᠦ᠋ᠨ ᠬᠣᠢᠮᠣᠷ ᠪᠠᠳᠠᠷᠠᠭᠰᠠᠨ ᠤᠯᠠᠭᠠᠨ ᠴᠣᠭ ᠤ᠋ᠨ ᠭᠠᠯ ᠤᠷᠤᠭᠤ ᠭᠠᠤᠯᠢᠨ ᠭᠤᠤᠷᠰᠤ ᠦᠯᠢᠶᠡᠭᠦᠷ ᠦᠯᠢᠶᠡᠵᠦ ᠪᠠᠢᠭᠠ ᠬᠤᠤᠵᠠ ᠰᠠᠬᠠᠯ᠂ ᠬᠠᠷᠠ ᠨᠡᠭᠦᠷᠡᠰᠦᠨ ᠬᠦ ᠬᠣᠶᠠᠷ ᠲᠤ ᠳᠠᠷᠤᠭᠳᠠᠭᠰᠠᠨ ᠡᠪᠦᠭᠡᠨ ᠦᠯᠢᠶᠡᠭᠦᠷ ᠢ᠋ᠶ᠋ᠡᠨ ᠠᠮᠠᠨ ᠠ᠋ᠴᠠ ᠪᠠᠨ ᠲᠦᠷ ᠰᠠᠯᠠᠭᠠᠨ《ᠬᠠᠭᠠᠯᠭᠠ ᠬᠠᠭᠠ᠂ ᠬᠠᠭᠠ》 ᠭᠡᠵᠦ ᠬᠠᠰᠬᠢᠷᠤᠨᠠ᠃ ᠪᠠᠷᠠᠭᠤᠨ ᠲᠠᠢ ᠨᠢ ᠪᠦᠲᠦᠭᠡᠨ ᠪᠡᠶᠡ ᠲᠡᠢ ᠠᠪᠠᠭᠠᠢ ᠠᠪᠳᠠᠷᠠ ᠬᠥᠭᠡᠷᠭᠡ ᠶ᠋ᠢ ᠬᠥᠷ ᠬᠥᠷ ᠳᠤᠤᠭᠠᠷᠭᠠᠨ ᠲᠠᠲᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠠᠮᠤᠷ ᠡᠷᠢᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠭᠤᠷ ᠲᠠᠢ ᠪᠠᠷ ᠭᠢᠯᠠᠯᠵᠠᠨ ᠪᠣᠰᠤᠨ ᠬᠠᠷᠠᠢᠵᠤ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠠᠯᠭᠠ ᠶ᠋ᠢ ᠬᠠᠪ ᠬᠢᠲᠡᠯᠡ ᠬᠠᠭᠠᠨ ᠳᠠᠬᠢᠨ ᠰᠠᠭᠤᠵᠤ ᠬᠥᠭᠡᠷᠭᠡ ᠪᠡᠨ ᠲᠠᠲᠠᠨᠠ᠃
ᠦᠵᠡᠲᠡᠯᠡ ᠡᠪᠦᠭᠡᠨ ᠨᠢ ᠳᠠᠷᠬᠠᠨ᠂ ᠠᠪᠠᠭᠠᠢ ᠨᠢ ᠲᠤᠰᠠᠯᠠᠭᠴᠢ ᠨᠢ ᠪᠠᠢᠯᠠ᠃ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠴᠠᠬᠢᠭᠤᠷ ᠫᠤᠤ᠂ ᠪᠢᠷᠳᠡᠩ ᠫᠤᠤ᠂ ᠣᠷᠣᠰ ᠸᠸᠨ᠋ᠲ᠋ᠤᠸ᠂ ᠬᠢᠲᠠᠳ ᠰᠧ ᠰᠠᠨ ᠯᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠠᠭᠤᠴᠢᠨ ᠰᠡᠯᠡᠮᠡ ᠨᠦ᠍ᠭᠦᠳ ᠳᠦᠭᠦᠷᠡᠩ᠃ ᠭᠠᠵᠠᠷ ᠢ᠋ᠶ᠋ᠠᠷ ᠬᠠᠷᠠ ᠴᠠᠭᠠᠨ ᠲᠤᠭᠤᠯᠭᠠ᠂ ᠭᠠᠤᠯᠢ ᠵᠡᠰ ᠦ᠋ᠨ ᠥᠭᠡᠳᠡᠰᠦ᠂ ᠡᠯᠳᠡᠪ ᠲᠥᠷᠥᠯ ᠦ᠋ᠨ ᠫᠤᠤ ᠰᠤᠮᠤᠨ ᠤ᠋ ᠬᠣᠩᠬᠢᠶᠠ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠬᠣᠯᠢᠯᠳᠤᠨ ᠬᠡᠪᠲᠡᠨᠡ᠃
ᠳᠣᠷᠵᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠰᠠᠭᠤᠯᠠ᠃ ᠡᠪᠦᠭᠡᠨ ᠶᠠᠮᠠᠷ ᠨᠢᠭᠡᠨ ᠬᠠᠲᠠᠭᠤ ᠡᠳ᠋ᠯᠡᠯ ᠬᠠᠢᠯᠬᠤ ᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠂ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠷᠠ ᠬᠥᠯᠥᠰᠥ ᠪᠡᠨ ᠳᠤᠰᠤᠯᠠᠭᠤᠯᠤᠨ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠬᠥᠭᠡᠷᠭᠡᠳᠡᠨ ᠪᠠᠢᠬᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠨᠡᠮᠡᠨ ᠦᠯᠢᠶᠡᠭᠦᠷᠳᠡᠨᠠ᠃ ᠳᠠᠭᠤ ᠴᠢᠮᠡᠭᠡ ᠨᠢ ᠰᠣᠨᠢᠨ᠂ ᠬᠠᠯᠠᠭᠤᠨ ᠨᠢ ᠠᠢᠬᠤᠪᠲᠤᠷ ᠬᠤᠰᠤ ᠮᠣᠳᠣᠨ ᠤ᠋ ᠴᠢᠭᠢᠷᠠᠭ ᠨᠡᠭᠦᠷᠡᠰᠦ ᠬᠥᠬᠡ ᠳᠥᠯᠥ ᠣᠪᠣᠯᠵᠠᠭᠤᠯᠤᠨ ᠮᠠᠨᠠᠯᠵᠠᠵᠤ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠬᠣᠨᠣᠭ ᠭᠠᠯ ᠤ᠋ᠨ ᠪᠠᠷᠠ ᠬᠠᠷᠠᠭᠠ ᠦᠭᠡᠢ ᠬᠥᠮᠦᠰ ᠦ᠋ᠨ ᠨᠢᠭᠤᠷ ᠢ᠋ ᠮᠢᠨᠴᠦᠷᠡᠭᠦᠯᠦᠨᠡ᠃ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠦ᠋ᠨ ᠦᠰᠦ ᠲᠡᠢ ᠳᠣᠲᠣᠷ᠂ ᠥᠩᠭᠡ ᠨᠡᠪᠲᠡ ᠬᠠᠯᠠᠨ ᠲᠦᠯᠡᠭᠳᠡᠬᠦ ᠦᠨᠦᠷ ᠬᠠᠩᠬᠤᠯᠤᠭᠤᠯᠬᠤ ᠪᠠᠷ ᠦᠯᠦ ᠪᠠᠷᠠᠮ ᠬᠠᠶᠠᠭᠠᠨ ᠳ᠋ᠠᠬᠢ ᠠᠪᠳᠠᠷᠠ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠳᠠᠪᠠᠷᠬᠠᠢ ᠳᠠᠭᠠᠪᠤᠷᠢᠯᠠᠨᠠ᠃ ᠭᠡᠪᠡᠴᠦ ᠳᠠᠷᠬᠠᠨ ᠤ᠋ ᠠᠵᠢᠯ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠠᠵᠢ᠃ ᠠᠮᠠᠨ ᠳ᠋ᠠᠬᠢ ᠦᠯᠢᠶᠡᠭᠦᠷ ᠢ᠋ᠶ᠋ᠡᠨ ᠰᠠᠯᠭᠠᠯ ᠦᠭᠡᠢ《ᠬᠥᠭᠡᠷᠭᠡᠳᠡ ᠬᠥᠭᠡᠷᠭᠡᠳᠡ》 ᠭᠡᠵᠦ ᠬᠠᠰᠬᠢᠷᠤᠨᠠ᠃ ᠬᠠᠯᠠᠭᠤᠨ ᠤ᠋ ᠢᠯᠴᠢ ᠬᠡᠴᠡᠭᠦᠦ ᠳ᠋ᠦ᠍ ᠭᠡᠷ ᠲᠦ᠋ᠨᠢ ᠴᠦ᠍ ᠭᠡᠨᠡᠳᠲᠡ ᠳᠥᠯᠥ ᠠᠪᠤᠯᠴᠠᠬᠤ ᠪᠠᠷ ᠭᠡᠮᠡᠷ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠬᠠᠩᠬᠤᠯᠤᠨᠠ᠃ ᠭᠠᠳᠠᠨᠠ ᠠ᠋ᠴᠠ ᠢᠷᠡᠭᠰᠡᠳ ᠲᠡᠰᠪᠦᠷᠢᠯᠡᠰᠢ ᠦᠭᠡᠢ ᠳ᠋ᠦ᠍᠂ ᠲᠦᠷᠭᠡᠨ ᠭᠠᠷᠤᠶᠠ ᠭᠡᠲᠡᠯᠡ ᠬᠠᠭᠠᠯᠭᠠ ᠣᠩᠭᠣᠢᠯᠭᠠᠵᠤ ᠦᠯᠦ ᠪᠣᠯᠬᠤ ᠶ᠋ᠢ ᠲᠦᠷᠦᠭᠦᠬᠡᠨ ᠮᠡᠳᠡᠭᠰᠡᠨ᠃ ᠬᠠᠨᠴᠤᠢ ᠪᠠᠷ ᠨᠢᠭᠤᠷ ᠬᠠᠯᠬᠠᠯᠠᠨ ᠳᠣᠣᠷᠠ ᠪᠦᠷᠢᠨᠡ ᠠᠭᠠᠬᠢᠯᠠᠯᠳᠤᠨᠠ᠃ ᠬᠥᠭᠡᠷᠭᠡ ᠶ᠋ᠢᠨ ᠳᠠᠭᠤ ᠭᠡᠨᠡᠳᠲᠡ ᠵᠣᠭᠰᠣᠪᠠ᠃ ᠳᠠᠷᠬᠠᠨ᠂ ᠴᠣᠭ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠴᠢᠰᠤ ᠤᠯᠠᠭᠠᠨ ᠶᠠᠭᠤᠮᠠ ᠭᠠᠷᠭᠠᠨ ᠲᠡᠮᠦᠷ ᠳᠡᠭᠡᠷᠡ ᠲᠠᠯᠪᠢᠩᠭᠤᠲᠠ ᠪᠠᠨ ᠪᠠᠰᠠ ᠪᠢᠴᠢᠬᠠᠨ ᠲᠡᠮᠦᠷ ᠲᠣᠭᠣᠭᠠᠨ ᠳ᠋ᠤ᠌ ᠮᠡᠯᠲᠡᠭᠡᠨᠡᠨ ᠪᠣᠢ ᠨᠢᠭᠡ ᠶᠠᠭᠤᠮᠠ ᠭᠠᠷᠭᠠᠨ ᠳᠡᠭᠡᠷᠡ ᠡᠴᠡ ᠨᠢ ᠴᠢᠳᠬᠤᠭᠤᠷᠳᠠᠭᠠᠳ《ᠨᠡᠬᠡᠭᠡ᠂ ᠨᠡᠬᠡᠭᠡ》 ᠭᠡᠵᠦ ᠬᠠᠰᠬᠢᠷᠤᠨᠠ᠃ ᠣᠳᠣ ᠯᠠ ᠠᠵᠢᠯ ᠳᠠᠭᠤᠰᠴᠤ ᠪᠠᠢᠭᠠ ᠪᠠᠢᠵᠤ᠂ ᠠᠪᠠᠭᠠᠢ ᠨᠢ ᠬᠠᠭᠠᠯᠭᠠ ᠨᠡᠭᠡᠭᠡᠨ ᠳᠡᠯᠭᠡᠵᠦ ᠬᠠᠯᠠᠭᠤᠨ ᠬᠠᠷᠠ ᠴᠠᠢ ᠠᠶᠠᠭᠠᠯᠠᠨ ᠳᠠᠷᠬᠠᠨ ᠳ᠋ᠤ᠌ ᠥᠭᠪᠡ᠃ ᠳᠠᠷᠬᠠᠨ ᠬᠦᠯᠢᠶᠡᠨ ᠠᠪᠴᠤ ᠳᠡᠭᠡᠷᠡ ᠡᠴᠡ ᠨᠢ ᠨᠡᠭᠦᠷᠡᠰᠦᠨ ᠦ᠌ ᠴᠣᠭ ᠬᠢᠨ《ᠴᠢᠰ》 ᠭᠡᠰᠡᠨ ᠴᠢᠮᠡᠭᠡ ᠭᠠᠷᠭᠠᠨ ᠳᠡᠭᠡᠭᠰᠢ ᠣᠷᠬᠢᠯᠠᠬᠤ ᠠᠭᠤᠷ ᠢ᠋ᠶ᠋ᠠᠷ ᠨᠢ ᠠᠮᠢᠰᠬᠤᠯ ᠠᠪᠤᠨ ᠤᠳᠠᠭᠰᠠᠨ ᠢ᠋ᠶ᠋ᠠᠨ《ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋》 ᠭᠡᠳ ᠶᠠᠭᠠᠷᠠᠨ ᠣᠭᠣᠴᠢᠯᠠᠨᠠ᠃ ᠠᠪᠠᠭᠠᠢ ᠨᠢ ᠮᠥᠨ ᠲᠡᠷᠡᠴᠢᠯᠡᠨ ᠴᠣᠭ ᠲᠠᠢ ᠴᠠᠢ ᠤᠤᠭᠤᠭᠰᠠᠨ ᠪᠣᠯᠪᠠᠴᠤ《ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋》 ᠭᠡᠰᠡᠨ ᠦᠭᠡᠢ᠃ ᠡᠨᠡ ᠪᠦᠬᠦ ᠪᠠᠢᠳᠠᠯ ᠢ᠋ ᠳᠣᠷᠵᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠶᠡᠬᠡᠳᠡ ᠭᠠᠢᠬᠠᠨ ᠠᠵᠢᠭᠯᠠᠵᠤ ᠰᠠᠭᠤᠪᠠ᠃ ᠡᠪᠦᠭᠡᠨ ᠲᠡᠳᠡᠨ ᠢ᠋ ᠭᠡᠨᠡᠳᠲᠡ ᠦᠵᠡᠵᠦ ᠪᠠᠢᠭᠠ ᠮᠡᠲᠦ ᠰᠣᠴᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋! ᠭᠡᠵᠦ ᠳᠠᠬᠢᠨ ᠤᠤᠯᠭᠠ ᠠᠯᠳᠠᠵᠤ ᠨᠢᠭᠤᠷ ᠲᠣᠯᠣᠭᠠᠢ ᠤᠷᠤᠭᠤ ᠵᠠᠮ ᠲᠠᠲᠠᠭᠤᠯᠤᠨ ᠤᠷᠤᠰᠬᠤ ᠬᠥᠯᠥᠰᠥ ᠪᠡᠨ ᠥᠩᠭᠡ ᠨᠢ ᠠᠯᠢ ᠬᠡᠳᠦᠢᠨ ᠲᠠᠨᠢᠭᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠠᠷᠪᠠᠭᠠᠷ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠠᠷᠴᠢᠨ᠄
— ᠬᠥᠶᠢ ᠡᠬᠡᠨᠡᠷ! ᠡᠨᠡ ᠤᠯᠤᠰ ᠲᠤ ᠴᠠᠢ!
ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠶᠠᠭᠠ ᠠᠪᠤᠨ ᠴᠠᠢ ᠬᠢᠵᠦ ᠥᠭᠬᠦ ᠳ᠋ᠦ᠍᠄
— ᠦᠭᠡᠢ ᠪᠠᠢᠵᠠ! ᠲᠠ ᠨᠠᠷ ᠴᠦ᠍ ᠭᠡᠰᠡᠨ ᠣᠲᠣᠬᠤ ᠬᠡᠷᠡᠭᠲᠡᠢ! ᠭᠡᠳ ᠬᠢᠮᠰᠠ ᠬᠠᠢᠴᠢ ᠪᠠᠷ ᠴᠣᠭ ᠠᠪᠠᠴᠢᠨ ᠲᠤᠰ ᠪᠦᠷᠢ ᠶ᠋ᠢᠨ ᠠᠶᠠᠭᠠᠨ ᠳ᠋ᠤ᠌ ᠬᠢᠨ ᠴᠢᠰ ᠴᠢᠰ ᠳᠠᠭᠤ ᠭᠠᠷᠭᠠᠭᠠᠳ᠄ ᠤᠲᠤᠵᠠᠭᠠ᠂ ᠤᠲᠤᠵᠠᠭᠠ! ᠭᠡᠪᠡ᠃
ᠨᠥᠭᠥᠭᠡᠳᠦᠭᠦᠯᠡ᠂ ᠳᠠᠷᠬᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠶᠣᠰᠣᠴᠢᠯᠠᠨ ᠭᠦᠢᠴᠡᠳᠬᠡᠭᠡᠳ ᠴᠣᠭ ᠤ᠋ᠨ ᠨᠡᠭᠦᠷᠡᠰᠦ ᠪᠤᠯᠠᠩᠭᠢᠷᠲᠤᠭᠰᠠᠨ ᠬᠠᠷᠠ ᠴᠠᠢ ᠶ᠋ᠢ ᠤᠤᠭᠤᠭᠰᠠᠨ ᠳᠠᠷᠤᠢ ᠲᠣᠯᠣᠭᠠᠢ ᠶ᠋ᠢᠨ ᠮᠠᠩᠰᠢᠭᠤᠷᠠᠯ ᠠᠷᠢᠯᠤᠨ ᠨᠢᠳᠦ ᠰᠡᠷᠭᠦᠬᠦ ᠳ᠋ᠦ᠍ ᠤᠭ ᠬᠡᠷᠡᠭ ᠦ᠋ᠨ ᠠᠴᠢ ᠲᠤᠰᠠ ᠶ᠋ᠢ ᠰᠠᠶᠢ ᠤᠬᠠᠭᠠᠷᠠᠨ ᠮᠡᠳᠡᠪᠡ᠃ ᠭᠡᠲᠡᠯᠡ ᠪᠠᠰᠠ ᠨᠢᠭᠡ ᠶᠠᠭᠤᠮᠠ ᠴᠢᠰ ᠫᠢᠰᠬᠢᠨ ᠳᠤᠤᠭᠠᠷᠤᠭᠠᠳ ᠳᠠᠷᠠᠭᠠ ᠳ᠋ᠤᠨᠢ ᠫᠥᠯ ᠫᠥᠯ ᠪᠤᠴᠠᠯᠤᠭᠰᠠᠨ ᠢ᠋ ᠦᠵᠡᠪᠡᠯ ᠴᠠᠭᠠᠨ ᠰᠢᠷᠭᠠᠯ ᠥᠩᠭᠡ ᠶ᠋ᠢᠨ ᠪᠥᠭᠡᠮ ᠰᠢᠪᠡᠷ ᠲᠦᠩᠫᠦᠩ ᠲᠡᠢ ᠤᠰᠤᠨ ᠳ᠋ᠤ᠌ ᠬᠢᠭᠳᠡᠵᠡᠢ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠵᠦᠢᠯ ᠭᠠᠤᠯᠢ ᠴᠢᠳᠬᠤᠭᠰᠠᠨ ᠰᠢᠪᠡᠷ ᠬᠡᠪ ᠪᠠᠢᠭᠰᠠᠨ ᠠᠵᠢ᠃ ᠳᠠᠷᠬᠠᠨ᠂ ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋ ᠳᠠᠭᠤᠳᠠᠨ ᠰᠢᠪᠡᠷ ᠬᠡᠪ ᠦ᠋ᠨ ᠲᠦᠩᠫᠦᠩ ᠡᠴᠡ ᠭᠠᠷᠭᠠᠨ ᠬᠠᠭᠠ ᠬᠠᠭᠠ ᠴᠣᠬᠢᠬᠤ ᠳ᠋ᠤ᠌ ᠳᠣᠲᠣᠷᠠ ᠠ᠋ᠴᠠ ᠠᠯᠲᠠᠨ ᠰᠢᠷᠭᠠᠯ ᠫᠤᠤ ᠶ᠋ᠢᠨ ᠵᠠᠮᠤᠭ ᠭᠠᠷᠤᠨᠠ᠃
— ᠵᠠ ᠲᠡᠭᠡᠭᠡᠳ ᠲᠠ ᠨᠠᠷ ᠮᠢᠨᠢ ᠬᠠᠮᠢᠭᠠᠬᠢ ᠶ᠋ᠢᠨ ᠤᠯᠤᠰ ᠪᠣᠢ? ᠳᠣᠷᠵᠢ᠄
— ᠨᠤᠲᠤᠭ ᠬᠣᠯᠠ ᠠ᠋᠃ ᠠᠯᠲᠠᠨ ᠬᠡᠮᠡᠬᠦ ᠭᠠᠵᠠᠷ ᠬᠦᠷᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠨᠠ ᠭᠡᠵᠦ ᠲᠦᠭᠳᠡᠷᠡᠨ ᠬᠡᠯᠡᠪᠡ᠃
— ᠦ᠂ ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋! ᠢᠩᠭᠢᠬᠦ ᠳ᠋ᠦ᠍ ᠲᠠ ᠨᠠᠷ ᠴᠢᠨᠢ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠦ᠍ ᠡᠯᠰᠡᠬᠦ ᠪᠡᠷ ᠶᠠᠪᠤᠬᠤ ᠤᠯᠤᠰ ᠤᠤ? ᠳᠣᠷᠵᠢ ᠵᠣᠷᠢᠭᠯᠠᠨ᠄
— ᠲᠡᠢᠮᠦ ᠠ᠋᠂ ᠲᠡᠭᠡᠬᠦ ᠭᠡᠵᠦ ᠶᠠᠪᠤᠭᠠ ᠤᠯᠤᠰ ᠪᠢᠯᠡ ᠪᠢᠳᠡ ᠭᠡᠪᠡ᠃
— ᠤᠤᠬᠠᠢ! ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠴᠢᠨᠢ ᠠᠱᠶ᠋ᠭᠦᠢ ᠡᠯᠳᠡᠪ ᠮᠠᠭᠤ ᠰᠠᠢᠨ ᠶᠠᠭᠤᠮᠠ ᠳᠠᠭᠠᠷᠢᠯᠳᠤᠭᠰᠠᠨ ᠦᠭᠡᠢ ᠤᠤ?
ᠨᠥᠭᠥᠭᠡᠳᠦᠭᠦᠯᠡ ᠶ᠋ᠢᠨ ᠰᠡᠵᠢᠭ ᠠᠷᠢᠯᠤᠨ ᠰᠡᠳᠬᠢᠯ ᠪᠡᠶᠡᠰᠴᠦ᠂ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠲᠡᠷᠡ ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠭᠡᠵᠦ ᠪᠠᠢᠨ ᠪᠠᠢᠨ ᠥᠭᠦᠯᠡᠨ᠂
— ᠬᠥᠶᠢ ᠡᠬᠡᠨᠡᠷ᠂ ᠡᠨᠡ ᠤᠯᠤᠰ ᠲᠤ ᠢᠳᠡᠭᠡ ᠪᠤᠳᠠᠭᠠ!
ᠡᠬᠡᠨᠡᠷ ᠨᠢ ᠭᠦᠶᠦᠨ ᠭᠠᠷᠴᠤ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠬᠤᠷᠢᠶᠠᠭᠰᠠᠨ ᠭᠦᠵᠡᠭᠡᠲᠡᠢ ᠥᠷᠥᠮᠡ ᠪᠡᠨ ᠲᠡᠪᠡᠷᠢᠨ ᠣᠷᠣᠵᠤ ᠢᠷᠡᠪᠡ᠃ ᠡᠪᠦᠭᠡᠨ ᠲᠡᠭᠦᠨ ᠢ᠋ ᠨᠢ ᠤᠭᠲᠤᠨ ᠠᠪᠴᠤ ᠳᠡᠭᠡᠷᠡ ᠨᠢ ᠲᠡᠮᠦᠷ ᠦ᠋ᠨ ᠬᠠᠰᠤᠭᠤᠷ ᠰᠢᠭᠢᠳᠬᠡᠨ ᠠᠯᠤᠬᠠ ᠪᠠᠷ ᠴᠣᠬᠢᠨ ᠬᠠᠭᠠᠯᠤᠨᠠ᠃ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠲᠠᠪᠠᠭ ᠲᠠᠯᠪᠢᠨ ᠴᠢᠩᠭᠠᠮᠠᠯ ᠪᠤᠳᠠᠭᠠ ᠲᠠᠢ ᠢᠳᠡᠬᠦ ᠶ᠋ᠢ ᠱᠠᠭᠠᠷᠳᠠᠬᠤ ᠶ᠋ᠢᠨ ᠳᠡᠯᠢᠮ ᠳ᠋ᠦ᠍ ᠪᠠᠰᠠ ᠯᠠ ᠸᠴᠢᠷ ᠸᠠᠨᠢ ᠬᠣᠮ ᠫᠠᠳ ᠠ᠋ ᠳᠠᠭᠤᠳᠠᠨ ᠶᠡᠬᠡ ᠶᠠᠷᠢᠶᠠ ᠳᠡᠯᠭᠡᠵᠦ ᠭᠠᠷᠤᠯᠠ᠃ ᠲᠡᠷᠡ ᠪᠡᠷ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠬᠤᠷᠠᠯᠳᠤᠵᠤ ᠪᠠᠢᠭᠠ ᠭᠠᠵᠠᠷ ᠢ᠋ ᠮᠡᠳᠡᠬᠦ ᠪᠡᠷ ᠦᠯᠦ ᠪᠠᠷᠠᠮ ᠵᠠᠷ ᠵᠡᠪᠰᠡᠭ ᠢ᠋ ᠨᠢ ᠵᠠᠰᠠᠨ ᠰᠡᠯᠪᠢᠵᠦ ᠪᠠᠢᠭᠠ ᠠᠵᠢ᠃ ᠤᠯᠤᠰ ᠣᠷᠣᠨ ᠤ᠋ ᠳᠣᠲᠣᠷᠠ ᠥᠪᠡᠷ ᠰᠢᠭ ᠨᠢ ᠵᠠᠭᠤᠨ ᠳᠠᠷᠬᠠᠨ ᠪᠠᠢᠪᠠᠯ ᠨᠢᠭᠡ ᠬᠥᠮᠦᠨ ᠦ᠌ ᠬᠡᠷᠡᠭᠯᠡᠬᠦ ᠶ᠋ᠢ ᠪᠠᠢᠲᠤᠭᠠᠢ ᠮᠢᠩᠭᠠᠨ ᠬᠥᠮᠦᠨ ᠦ᠌ ᠬᠢ ᠶ᠋ᠢ ᠬᠢᠬᠦ ᠳ᠋ᠦ᠍ ᠶᠠᠭᠤᠬᠠᠨ ᠪᠠᠢᠭᠠ ᠪᠣᠢ ᠭᠡᠨᠡ᠃ ᠶᠡᠷᠦᠨᠢ ᠵᠠᠭᠤᠨ ᠳᠠᠷᠬᠠᠨ ᠶᠣᠰᠣᠲᠠᠢ ᠵᠠᠷ ᠵᠡᠪᠰᠡᠭ ᠬᠢᠳᠡᠭ ᠪᠠᠭᠠᠵᠢ ᠲᠠᠢ ᠪᠣᠯ ᠮᠣᠩᠭᠣᠯ ᠤᠯᠤᠰ ᠭᠠᠳᠠᠭᠠᠳᠤ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠢᠲᠤᠭᠠᠢ ᠭᠠᠳᠠᠭᠠᠳᠤ ᠳ᠋ᠤ᠌ ᠬᠤᠳᠠᠯᠳᠤᠨ ᠶᠡᠬᠡ ᠣᠯᠵᠠ ᠣᠯᠬᠤ ᠶᠤᠮ ᠭᠡᠨᠡ᠃
— ᠮᠠᠨ ᠤ᠋ ᠪᠠᠭᠠᠲᠤᠷ ᠰᠦᠷᠡᠬᠡᠢ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠪᠣᠯᠬᠣᠷ ᠢᠷᠡᠭᠡᠳᠦᠢ ᠳ᠋ᠦ᠍ ᠪᠦᠬᠦ ᠬᠠᠯᠬᠠ ᠶ᠋ᠢᠨ ᠳᠠᠷᠬᠠᠴᠤᠳ ᠢ᠋ ᠴᠤᠭᠯᠠᠷᠠᠭᠤᠯᠤᠨ ᠵᠠᠷ ᠵᠡᠪᠰᠡᠭ ᠬᠢᠬᠦ ᠲᠣᠮᠣ ᠭᠠᠵᠠᠷ ᠪᠠᠢᠭᠤᠯᠬᠤ ᠨᠢ ᠮᠠᠭᠠᠳ ᠳᠠ ᠭᠡᠳ ᠴᠢᠳᠬᠤᠭᠰᠠᠨ ᠵᠠᠮᠤᠭ ᠢ᠋ᠶ᠋ᠠᠨ ᠲᠤᠰᠬᠠᠢᠯᠠᠨ ᠪᠡᠯᠡᠳᠬᠡᠭᠰᠡᠨ ᠰᠢᠪᠦᠭᠡ ᠲᠡᠮᠦᠷ ᠲᠡᠢ ᠡᠪᠯᠡᠭᠦᠯᠦᠨ ᠤᠭᠰᠠᠷᠠᠬᠤ ᠶ᠋ᠢ ᠣᠷᠣᠯᠳᠣᠪᠠ᠃ ᠲᠤᠰ ᠲᠤᠰ ᠤ᠋ᠨ ᠬᠢᠨᠢ ᠥ ᠰᠡᠪ ᠬᠣᠭᠣᠷᠣ ᠵᠠᠭᠤᠷᠠ ᠪᠠᠨ ᠬᠠᠷᠰᠢᠯᠳᠤᠬᠤ ᠶ᠋ᠢ ᠨᠢ ᠬᠠᠭᠤᠷᠠᠢᠳᠠᠨ ᠵᠦᠯᠭᠦᠭᠦᠷᠳᠡᠬᠦ ᠨᠢ ᠴᠢᠳᠠᠮᠠᠭ ᠪᠣᠯᠬᠤ ᠶ᠋ᠢ ᠳᠣᠷᠵᠢ ᠨᠥᠬᠥᠳ ᠲᠡᠢ ᠪᠡᠨ ᠨᠢᠳᠦ ᠪᠦᠯᠲᠡᠢᠯᠭᠡᠨ ᠰᠢᠷᠲᠡᠨᠡ᠃ ᠭᠠᠭᠴᠠᠬᠠᠨ ᠬᠠᠷᠠᠮᠰᠠᠯᠲᠠᠢ ᠨᠢ ᠭᠠᠤᠯᠢᠨ ᠵᠠᠮᠤᠭ ᠤᠳᠠᠬᠤ ᠦᠭᠡᠢ ᠡᠯᠡᠭᠳᠡᠨᠡ ᠪᠠᠢᠬᠠ ᠳᠠ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠳᠣᠷᠵᠢ ᠪᠠᠷᠢᠵᠤ ᠴᠢᠳᠠᠯ ᠦᠭᠡᠢ ᠠᠮᠠ ᠨᠡᠭᠡᠭᠡᠨ ᠬᠡᠯᠡᠬᠦ ᠳ᠋ᠦ᠍ ᠳᠠᠷᠬᠠᠨ᠄
— ᠲᠡᠷᠡ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠂ ᠭᠡᠪᠡᠴᠦ ᠡᠨᠡ ᠪᠣᠯ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠬᠢ ᠡᠴᠡ ᠵᠡᠪᠰᠡᠭ ᠢᠷᠡᠬᠦ ᠶ᠋ᠢᠨ ᠨᠠᠭᠠᠨᠠ ᠲᠠ ᠨᠠᠷ ᠢ᠋ ᠰᠤᠷᠭᠠᠭᠤᠯᠢᠯᠠᠬᠤ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠵᠦᠢᠯ᠂ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠰᠠᠢᠨ ᠳᠤᠰᠤᠯᠠᠵᠤ ᠪᠠᠢᠬᠤ ᠪᠠᠨ ᠮᠡᠳᠡᠭᠡᠷᠡᠢ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠡᠨᠡ ᠳᠠᠷᠬᠠᠨ ᠳ᠋ᠤ᠌᠂ ᠫᠤᠤ ᠶ᠋ᠢᠨ ᠵᠠᠮᠤᠭ ᠤ᠋ᠳ ᠬᠢᠭᠰᠡᠨ ᠡᠴᠡ ᠭᠠᠳᠠᠨᠠ᠂ ᠡᠪᠳᠡᠷᠡᠭᠰᠡᠨ ᠬᠡᠮᠬᠡᠷᠡᠭᠰᠡᠨ ᠢ᠋ ᠵᠠᠰᠠᠨ ᠰᠡᠯᠪᠢᠭᠰᠡᠨ ᠨᠢ ᠪᠠᠭᠠ ᠦᠭᠡᠢ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠬᠣᠭᠣᠰᠣᠨ ᠬᠣᠩᠬᠢᠶᠠ ᠶ᠋ᠢᠨ ᠪᠥᠭᠰᠡᠨ ᠳ᠋ᠦ᠍ᠨᠢ ᠭᠠᠯ᠂ ᠬᠥᠨᠳᠡᠢ ᠳ᠋ᠦ᠍ᠨᠢ ᠳᠠᠷᠢ᠂ ᠦᠵᠦᠭᠦᠷ ᠲᠤᠨᠢ ᠮᠥᠨ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠨᠢᠮᠭᠡᠨ ᠵᠡᠰ ᠪᠤᠶᠤ ᠭᠠᠤᠯᠢ ᠮᠡᠲᠦ ᠶ᠋ᠢ ᠮᠠᠰᠢ ᠨᠠᠷᠢᠨ ᠢ᠋ᠶ᠋ᠠᠷ ᠬᠤᠢᠯᠠᠨ ᠳᠣᠲᠣᠷᠠ ᠨᠢ ᠲᠤᠭᠤᠯᠭᠠ ᠴᠢᠳᠬᠤᠭᠠᠳ ᠰᠠᠭᠤᠯᠭᠠᠭᠰᠠᠨ ᠢ᠋ ᠲᠣᠭᠠᠯᠠᠪᠠᠯ ᠬᠡᠳᠦᠨ ᠵᠠᠭᠤ ᠳ᠋ᠤ᠌ ᠬᠦᠷᠬᠦ ᠪᠥᠭᠡᠳ ᠥᠩᠭᠡ ᠦᠵᠡᠮᠵᠢ ᠨᠢ ᠵᠢᠩᠬᠢᠨᠢ ᠦᠢᠯᠡᠳᠪᠦᠷᠢ ᠳ᠋ᠦ᠍ ᠬᠢᠭᠰᠡᠨ ᠡᠴᠡ ᠦᠯᠦ ᠢᠯᠭᠠᠭᠳᠠᠨᠠ᠃ ᠲᠡᠭᠦᠨ ᠢ᠋ ᠨᠢ ᠬᠥᠮᠦᠰ ᠦᠵᠡᠨ ᠭᠠᠢᠬᠠᠬᠤ ᠳ᠋ᠤ᠌ ᠳᠠᠷᠬᠠᠨ᠄
— ᠨᠡᠭᠡᠷᠡᠨ ᠪᠢ ᠶᠠᠷᠢ ᠶᠢᠰᠦᠨ ᠰᠠᠢᠨ ᠨᠥᠬᠥᠳ ᠲᠡᠢ ᠰᠠᠨ ᠪᠣᠯ ᠵᠢᠷᠤᠮᠲᠠᠨ ᠴᠡᠷᠢᠭ ᠲᠠ ᠨᠠᠷ ᠢ᠋ᠶ᠋ᠠᠨ ᠵᠢᠮᠰᠡᠭ ᠢ᠋ᠶ᠋ᠡᠷ ᠶᠠᠭᠠᠬᠢᠭᠰᠠᠨ ᠴᠦ᠍ ᠳᠤᠲᠠᠭᠠᠬᠤ ᠦᠭᠡᠢ ᠰᠠᠨ ᠳᠠ ᠭᠡᠬᠦ ᠨᠢ ᠢᠨᠢᠶᠡᠳᠦ ᠬᠦᠷᠦᠮᠡ ᠪᠣᠯᠪᠠᠴᠤ᠂ ᠦᠨᠡᠨ ᠰᠠᠨᠠᠭᠠ ᠨᠢ ᠲᠡᠢᠮᠦ ᠯᠡ ᠠᠵᠢ᠃
ᠨᠥᠭᠥᠭᠡᠳᠦᠭᠦᠯᠡ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠴᠣᠬᠣᠮ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠰᠤᠷᠠᠭᠯᠠᠭᠰᠠᠨ ᠳ᠋ᠤ᠌ ᠳᠠᠷᠬᠠᠨ᠄
— ᠨᠠᠳᠠ ᠴᠦ᠍ ᠭᠡᠰᠡᠨ ᠬᠢᠭᠰᠡᠨ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ᠂ ᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠬᠤ ᠬᠣᠶᠠᠷ ᠵᠦᠢᠯ ᠦ᠋ᠨ ᠴᠢᠬᠤᠯᠠ ᠬᠡᠷᠡᠭ ᠪᠣᠢ᠃ ᠬᠠᠮᠲᠤ ᠶᠠᠪᠤᠪᠠᠯ ᠪᠠᠷᠠᠪᠠ ᠭᠡᠳ ᠭᠠᠵᠠᠷ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠦᠬᠡᠷ ᠫᠤᠤ ᠶ᠋ᠢᠨ ᠪᠦᠲᠦᠭᠡᠨ ᠬᠣᠩᠬᠢᠶᠠ ᠳ᠋ᠤ᠌ ᠭᠠᠷ ᠨᠢᠭᠤᠷ ᠤᠬᠢᠶᠠᠬᠤ ᠤᠰᠤ ᠬᠢᠨ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠪᠠᠴᠤ ᠤᠭ ᠨᠢ ᠬᠠᠷᠠ ᠭᠡᠭᠴᠢ ᠪᠡᠷ ᠨᠡᠭᠦᠷᠡᠰᠦᠨ ᠦ᠌ ᠭᠠᠯ ᠳ᠋ᠤ᠌ ᠣᠯᠠᠨ ᠵᠢᠯ ᠰᠢᠷᠠᠭᠳᠠᠭᠰᠠᠨ ᠠᠷᠠᠰᠤᠨ ᠤ᠋ ᠬᠢᠨᠢ ᠭᠬᠢᠷ ᠬᠡᠪ ᠢ᠋ᠶ᠋ᠡᠷ ᠪᠠᠢᠨᠠ᠃ ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠠᠷᠤ ᠲᠠᠯᠠ ᠨᠢ ᠪᠠᠷᠤᠭ ᠰᠢᠨᠡ ᠠᠲᠠᠯᠠ ᠤᠷᠢᠳ ᠲᠠᠯᠠ ᠨᠢ ᠮᠥᠨ ᠨᠡᠭᠦᠷᠡᠰᠦᠨ ᠳ᠋ᠦ᠍ ᠬᠥᠳᠡᠭᠳᠡᠨ ᠬᠠᠭᠤᠴᠢᠷᠠᠭᠰᠠᠨ ᠰᠢᠷᠠ ᠨᠡᠬᠡᠢ ᠳᠡᠪᠡᠯ ᠭᠠᠷᠭᠠᠪᠠ᠃ ᠲᠡᠭᠦᠨ ᠢ᠋ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠨᠥᠮᠥᠷᠦᠨ ᠶᠡᠬᠡᠩᠬᠢ ᠶ᠋ᠢ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠭᠠᠷᠭᠠᠨ ᠪᠦᠰᠡᠯᠡᠨᠡ᠃ ᠶᠠᠪᠤᠬᠤ ᠪᠣᠯᠣᠮᠠᠭᠴᠠ ᠳᠣᠷᠵᠢ᠂ ᠰᠠᠮᠪᠤᠤ᠂ ᠴᠡᠷᠢᠨᠳᠣᠷᠵᠢ ᠭᠤᠷᠪᠠ ᠳ᠋ᠤ᠌ ᠬᠣᠶᠠᠷ ᠬᠣᠶᠠᠷ ᠫᠤᠤ ᠡᠭᠦᠷᠦᠭᠦᠯᠦᠨ ᠡᠪᠦᠷ ᠲᠦ᠋ᠨᠢ ᠬᠡᠳᠦᠨ ᠠᠷᠪᠠᠨ ᠰᠤᠮᠤ ᠬᠢᠪᠡ᠃ ᠥᠪᠡᠷ ᠢ᠋ᠶ᠋ᠡᠨ ᠭᠤᠷᠪᠠᠨ ᠫᠤᠤ ᠳᠠᠪᠬᠤᠷᠯᠠᠨ ᠡᠭᠦᠷᠴᠦ ᠬᠡᠳᠦᠨ ᠵᠠᠭᠤᠨ ᠰᠤᠮᠤᠨ ᠤ᠋ ᠶᠡᠬᠡᠩᠬᠢ ᠶ᠋ᠢ ᠡᠪᠦᠷᠯᠡᠵᠡᠢ᠃ ᠭᠡᠷ ᠡᠴᠡ ᠭᠠᠷᠤᠨ ᠵᠡᠭᠦᠨ ᠵᠦᠭ ᠢ᠋ ᠴᠢᠭᠯᠡᠪᠡ᠃
ᠳᠠᠷᠬᠠᠨ ᠤ᠋ ᠶᠠᠪᠤᠯᠲᠠ ᠬᠤᠷᠳᠤᠨ᠃ ᠴᠡᠭᠡᠵᠢᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠠᠭᠠᠷ ᠰᠡᠯᠡᠭᠦᠷᠳᠡᠨ ᠬᠣᠯᠠ ᠬᠣᠯᠠ ᠭᠢᠰᠬᠢᠯᠡᠬᠦ ᠳ᠋ᠦ᠍ᠨᠢ ᠡᠪᠦᠳᠦᠭ ᠳᠡᠭᠡᠭᠦᠷ ᠨᠢ ᠲᠠᠲᠠᠭᠰᠠᠨ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠤᠭᠲᠤᠨ᠂ ᠳᠡᠭᠳᠡᠨ ᠬᠥᠳᠡᠯᠵᠦ᠂ ᠰᠤᠯᠠ ᠡᠪᠦᠷᠯᠡᠭᠰᠡᠨ ᠰᠤᠮᠤ ᠨᠤᠭᠤᠳ ᠱᠠᠷᠵᠠᠩ ᠱᠠᠷᠵᠠᠩ ᠴᠢᠮᠡᠭᠡ ᠭᠠᠷᠭᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ