ᠳᠣᠯᠣᠭᠠᠨ ᠤᠰᠤᠨ ᠤ ᠲᠡᠦᠬᠡ – [ᠣᠷᠣᠰ]ᠪᠠᠷᠲ᠋ᠣᠯᠳ᠋ <ᠲᠠᠪᠤ᠂ ᠬᠠᠷᠠ ᠬᠢᠳᠠᠨ(ᠪᠠᠷᠠᠭᠤᠨ ᠯᠢᠶᠣᠣ) ᠶ᠋ᠢᠨ ᠲᠣᠪᠴᠢ ᠲᠡᠦᠬᠡ> Долоон усны түүх – [орос] Бартулд <5᠂ Хар хятан( баруун лийуу) ин товч түүх>
162ᠲᠠᠪᠤ᠂ ᠬᠠᠷᠠ ᠬᠢᠳᠠᠨ(ᠪᠠᠷᠠᠭᠤᠨ ᠯᠢᠶᠣᠣ) ᠶ᠋ᠢᠨ ᠲᠣᠪᠴᠢ ᠲᠡᠦᠬᠡ
ᠭᠢᠲᠠᠨᠴᠤᠳ ᠪᠠᠷᠠᠭᠤᠨᠰᠢ ᠨᠡᠭᠦᠬᠦ ᠳ᠋ᠡᠭᠡᠨ ᠬᠣᠶᠠᠷ ᠱᠤᠭᠤᠮ ᠢ᠋ᠶ᠋ᠠᠷ ᠵᠠᠮᠨᠠᠪᠠ᠄ ᠨᠢᠭᠡ ᠪᠦᠯᠦᠭ ᠨᠢ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ(ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠰᠢᠨᠵᠢᠶᠠᠩ) ᠢ᠋ ᠲᠤᠭᠤᠯᠬᠤ ᠳ᠋ᠠᠭᠠᠨ ᠺᠠᠱᠭᠠᠷ ᠤ᠋ᠨ ᠲᠠᠮᠤᠭ ᠬᠠᠨ ᠬᠣᠰᠠᠠ ᠶ᠋ᠢᠨ ᠬᠥᠪᠡᠭᠦᠨ᠂ ᠠᠷᠰᠯᠠᠨ ᠬᠠᠨ ᠰᠤᠯᠠᠢᠮᠠᠨ ᠤ᠋ ᠣᠮᠪᠣᠯᠣ — ᠠᠷᠰᠯᠠᠨ ᠬᠠᠨ ᠠᠬᠠᠮᠠᠢ᠌ᠲ ᠲᠤ᠌ ᠴᠣᠬᠢᠭᠳᠠᠨ ᠰᠠᠷᠨᠢᠪᠠ᠃ ᠢᠪᠣᠨ᠂ ᠠᠯ᠂ ᠠᠲ᠋ᠢᠯ ᠢ᠋ᠶ᠋ᠠᠷ ᠭᠢᠳᠠᠨᠴᠤᠳ ᠤ᠋ᠨ ᠠᠬᠠᠯᠠᠭᠴᠢ ᠶ᠋ᠢᠨ ᠠᠯᠠᠭᠳᠠᠭᠰᠠᠨ ᠣᠨ ᠢ᠋ ᠬᠣᠲᠣᠩ ᠲᠣᠭᠠᠯᠠᠯ ᠤ᠋ᠨ 522 ᠣᠨ᠂ ᠢᠰᠦᠢᠰ ᠲᠣᠭᠠᠯᠠᠯ ᠤ᠋ᠨ 1128 ᠣᠨ ᠭᠡᠵᠦ ᠲᠡᠮᠳᠡᠭᠯᠡᠪᠡ᠃ ᠦᠨᠡᠨ ᠳ᠋ᠡᠭᠡᠨ᠂ ᠡᠨᠡ ᠬᠡᠷᠡᠭ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠰᠠᠶᠢ ᠭᠠᠷᠤᠭᠰᠠᠨ ᠶᠤᠮ᠃ ᠶᠠᠭᠤ ᠭᠡᠪᠡᠯ᠂ ᠰᠡᠩᠭᠢᠷ ᠰᠤᠯᠲᠠᠨ 1135 ᠣᠨ ᠤ᠋7 ᠰᠠᠷᠠ ᠳ᠋ᠤ᠌ ᠵᠢᠳᠳᠠ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠤ᠌ ᠥᠭᠭᠦᠭᠰᠡᠨ ᠵᠠᠬᠢᠳᠠᠯ ᠳ᠋ᠠᠭᠠᠨ ᠡᠨᠡ ᠤᠳᠠᠭᠠᠨ ᠤ᠋ ᠳᠠᠢᠯᠠᠯᠳᠤᠭᠠᠨ ᠢ᠋ ᠥᠴᠥᠭᠡᠳᠦᠷᠬᠡᠨ ᠭᠠᠷᠤᠭᠰᠠᠨ ᠰᠢᠭ᠋ ᠪᠢᠴᠢᠭᠰᠡᠨ ᠪᠠᠢᠨᠠ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠨᠡᠭᠦᠵᠦ ᠪᠠᠢᠭᠠ ᠨᠢᠭᠡᠯᠬᠡᠨ ᠰᠠᠯᠠᠭᠠ ᠶ᠋ᠢ ᠨᠢ ᠪᠢᠴᠢᠭᠰᠡᠨ ᠪᠥᠭᠡᠳ ᠲᠡᠳᠡ ᠨᠠᠷ ᠢ᠋《ᠪᠠᠷᠠᠭᠤᠨ ᠯᠢᠶᠣᠣ》 ᠤᠯᠤᠰ ᠤ᠋ᠨ ᠪᠠᠢᠭᠤᠯᠤᠭᠳᠠᠭᠰᠠᠨ ᠶᠠᠪᠤᠳᠠᠯ ᠲᠠᠢ ᠬᠣᠯᠪᠣᠵᠠᠢ᠃ ᠡᠢᠨ ᠬᠦ᠌ ᠬᠠᠷᠠ ᠬᠢᠳᠠᠨ ᠤᠯᠤᠰ ᠢ᠋ ᠡᠭᠦᠰᠬᠡᠨ ᠪᠠᠢᠭᠤᠯᠤᠭᠴᠢ ᠬᠢᠭᠡᠳ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠠᠬᠢ ᠶᠸᠯᠢᠣᠢ ᠲᠡᠰᠢ ᠨᠢ ᠨᠢᠭᠡ ᠯᠡ ᠬᠥᠮᠦᠨ ᠮᠥᠨ ᠡᠰᠡᠬᠦ ᠨᠢ ᠰᠡᠵᠢᠭᠯᠡᠯ ᠲᠡᠢ ᠤᠴᠢᠷ ᠪᠣᠯᠵᠠᠢ᠃ ①
ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠪᠦᠬᠦ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌᠂ ᠭᠢᠳᠠᠨᠴᠤᠳ ᠢ᠋ ᠰᠥᠬᠦᠷᠡᠭᠦᠯᠵᠦ ᠠᠪᠤᠭᠰᠠᠨ ᠬᠠᠮᠤᠭ ᠤ᠋ᠨ ᠠᠩᠬᠠᠨ ᠤ᠋ ᠢᠰᠯᠠᠮ ᠤ᠋ᠨ ᠨᠣᠶᠠᠷᠬᠠᠭᠴᠢ ᠪᠣᠯ ᠪᠠᠯᠠᠱᠭᠥ᠋ᠨ ᠬᠠᠨ ᠮᠥᠨ ᠭᠡᠵᠦ ᠮᠠᠭᠠᠳᠯᠠᠨ ᠲᠡᠮᠳᠡᠭᠯᠡᠵᠦ ᠪᠠᠢᠨᠠ᠃ ᠢᠪᠣᠨ᠂ ᠠᠯ᠂ ᠠᠲ᠋ᠢ᠍ᠯ ᠤ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠠᠯᠢ ᠡᠷᠲᠡ ᠠᠷᠰᠯᠠᠨ ᠬᠠᠨ ᠰᠣᠯᠠᠢ᠌ᠮᠠᠨ ᠤ᠋ ᠦᠶᠡ ᠳ᠋ᠦ᠍᠂ ᠲᠦᠮᠡᠭᠡᠳ ᠴᠠᠴᠠᠷ ᠭᠢᠨᠳᠠᠨᠴᠤᠳ ᠳᠣᠯᠣᠭᠠᠨ ᠤᠰᠤᠨ ᠳ᠋ᠤ᠌ ᠨᠤᠲᠤᠭᠯᠠᠨ ᠰᠠᠭᠤᠷᠢᠰᠢᠵᠠᠢ᠃ ᠡᠬᠢᠯᠡᠩᠭᠦᠲᠡ ᠡᠳᠡᠭᠡᠷ ᠬᠥᠮᠦᠰ ᠳᠤᠮᠳᠠᠳᠤ ᠤᠯᠤᠰ ᠪᠣᠯᠤᠨ ᠺᠠᠷᠠᠬᠠᠨ ᠤ᠋ ᠡᠵᠡᠯᠡᠵᠦ ᠪᠦᠬᠦᠢ ᠨᠤᠲᠤᠭ ᠤ᠋ᠨ ᠵᠠᠬᠠ ᠬᠥᠪᠡᠭᠡ ᠪᠡᠷ ᠰᠠᠭᠤᠵᠤ᠂ ᠺᠠᠷᠠᠬᠠᠨ ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠠᠭᠤᠯᠠᠨ ᠬᠠᠪᠴᠢᠯ ᠢ᠋ ᠪᠡᠬᠢᠯᠡᠨ ᠰᠠᠬᠢᠬᠤ ᠠᠯᠪᠠ ᠶ᠋ᠢ ᠡᠭᠦᠷᠭᠡᠯᠡᠵᠦ ᠪᠠᠢᠪᠠ᠃ ᠬᠠᠷᠠᠮᠵᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠢᠨᠳᠠᠨᠴᠤᠳ ᠠ᠋ᠴᠠ ᠭᠠᠵᠠᠷ ᠤ᠋ᠨ ᠲᠦᠷᠢᠶᠡᠰᠦ ᠪᠠ ᠲᠣᠭᠲᠠᠭᠰᠠᠨ ᠨᠣᠷᠮᠠ ᠪᠦᠬᠦᠢ ᠡᠷᠭᠦᠴᠡ ᠮᠥᠩᠭᠥ ᠲᠠᠲᠠᠪᠤᠷᠢᠯᠠᠳᠠᠭ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ᠂ ᠲᠡᠳᠡ ᠨᠠᠷ ᠨᠢᠭᠡᠨ ᠪᠠᠶᠠᠨ ᠲᠠᠩᠰᠤᠭ ᠠᠷᠠᠯᠵᠢᠶᠠᠨ ᠤ᠋ ᠠᠩᠭᠢ ᠠ᠋ᠴᠠ ᠰᠠᠢᠬᠠᠨ ᠲᠠᠯᠠ ᠨᠤᠲᠤᠭ ᠬᠠᠮᠢᠭᠠ ᠠ᠋ᠴᠠ ᠣᠯᠳᠠᠨᠠ ᠪᠣᠢ ᠭᠡᠵᠦ ᠠᠰᠠᠭᠤᠨ ᠰᠤᠷᠠᠪᠠ᠃ ᠠᠯᠵᠢᠶᠠᠴᠢᠳ ᠲᠡᠳᠡ ᠨᠠᠷ ᠢ᠋ ᠳᠠᠭᠠᠭᠤᠯᠤᠨ ᠪᠠᠯᠠᠱᠭᠦ᠋ᠨ ᠳ᠋ᠦ᠍ ᠬᠦᠷᠴᠡᠢ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠪᠠᠢᠵᠠᠢ᠃ 16 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠨᠢᠭᠡᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠨᠠᠢᠷᠠᠭᠤᠯᠤᠨ ᠪᠢᠴᠢᠭᠴᠢ ② ᠪᠡᠷ ᠭᠢᠳᠠᠨᠴᠤᠳ ᠤ᠋ᠨ ᠨᠡᠭᠦᠭᠰᠡᠨ ᠣᠨ ᠵᠢᠯ ᠢ᠋ ᠬᠣᠲᠣᠩ ᠲᠣᠭᠠᠯᠠᠯ ᠤ᠋ᠨ 443 ᠣᠨ᠂ ᠢᠰᠦ᠋ᠰ ᠲᠣᠭᠠᠯᠠᠯ ᠤ᠋ᠨ 1041 ~ 1042 ᠣᠨ ᠭᠡᠵᠦ ᠪᠢᠴᠢᠵᠡᠢ᠂ ᠡᠨᠡ ᠬᠥᠮᠦᠨ ᠶᠠᠭᠤ ᠶ᠋ᠢ ᠦᠨᠳᠦᠰᠦᠯᠡᠭᠰᠡᠨ ᠢ᠋ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠲᠡᠷᠡ ᠦᠷᠭᠦᠯᠵᠢᠯᠡᠨ ᠲᠡᠮᠳᠡᠭᠯᠡᠬᠦ ᠳ᠋ᠡᠭᠡᠨ᠂ ᠠᠷᠰᠯᠠᠨ ᠬᠠᠨ ᠡᠳᠡᠭᠡᠷ ᠨᠡᠭᠦᠳᠡᠯ ᠢᠷᠭᠡᠳ ᠢ᠋ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠢ᠋ ᠰᠢᠲᠦᠭᠲᠦᠨ ᠭᠡᠵᠦ ᠰᠡᠩᠬᠡᠷᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠲᠡᠳᠡ ᠨᠠᠷ ᠡᠷᠡᠰ ᠲᠠᠲᠠᠭᠠᠯᠵᠠᠭᠰᠠᠨ ᠪᠠᠢᠨᠠ ᠭᠡᠪᠡ᠃ ᠭᠡᠬᠦ ᠳ᠋ᠡᠭᠡᠨ ᠪᠤᠰᠤᠳ ᠶᠠᠪᠤᠳᠠᠯ ᠳᠡᠭᠡᠷᠡ ᠲᠡᠳᠡ ᠨᠠᠷ ᠬᠠᠨ ᠤ᠋ ᠲᠣᠭᠲᠠᠭᠠᠭᠰᠠᠨ ᠳᠦᠷᠢᠮ ᠭᠣᠷᠢᠮ ᠢ᠋ ᠪᠦᠷᠢᠨ ᠵᠢᠷᠤᠮᠯᠠᠭᠰᠠᠨ ᠪᠠᠢᠨᠠ᠂ ᠡᠢᠨ ᠬᠦ᠌ ᠬᠠᠨ ᠢ᠋ᠶ᠋ᠠᠷ ᠲᠡᠳᠡᠨᠦᠰ ᠲᠡᠢ ᠬᠠᠮᠲᠤ ᠪᠠᠢᠯᠴᠠᠬᠤ ᠪᠣᠯᠪᠠ᠃ ᠢᠪᠣᠨ᠂ ᠠᠯ᠂ ᠠᠲ᠋ᠢᠯ ᠢ᠋ᠶ᠋ᠠᠷ ᠠᠷᠰᠯᠠᠨ ᠬᠠᠨ ᠦᠷᠭᠦᠯᠵᠢ ᠲᠡᠳᠡᠨᠦᠰ ᠢ᠋ ᠳᠠᠭᠠᠷᠢᠨ ᠳᠣᠪᠲᠣᠯᠳᠠᠭ ᠲᠤᠯᠠ ᠭᠢᠳᠠᠨᠴᠤᠳ ᠦᠬᠦᠨ ᠠᠶᠤᠳᠠᠭ ᠪᠠᠢᠵᠠᠢ ᠭᠡᠳᠡᠭ ᠢ᠋ ᠯᠡ ᠲᠡᠮᠳᠡᠭᠯᠡᠪᠡ ᠃ ᠬᠢᠳᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠳᠣᠯᠣᠭᠠᠨ ᠤᠰᠤᠨ ᠳ᠋ᠤ᠌ ᠨᠤᠲᠤᠭ ᠢ᠋ ᠲᠦᠷᠢᠨ ᠡᠵᠡᠯᠡᠬᠦ ᠦᠶᠡ ᠳ᠋ᠦ᠍᠂ ᠠᠯᠢ ᠡᠷᠲᠡ ᠨᠤᠲᠤᠭᠰᠢᠨ ᠰᠠᠭᠤᠷᠢᠰᠢᠭᠰᠠᠨ ᠨᠤᠲᠤᠭ ᠨᠢᠭᠡᠲᠡᠳ ᠨᠢ ᠴᠤᠤᠷᠢᠶᠠᠲᠤᠨ ᠪᠣᠰᠤᠯᠴᠠᠵᠤ᠂ ᠲᠡᠳᠡ ᠨᠠᠷ ᠲᠠᠢ ᠬᠠᠮᠲᠤ ᠵᠡᠭᠦᠨᠰᠢ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠰᠠᠨ ᠪᠠᠢᠨᠠ᠃
ᠵᠦᠸᠠᠢ᠌ᠨᠢ ᠶ᠋ᠢᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠢᠲᠠᠨᠴᠤᠳ᠂ ᠡᠰᠡᠬᠦᠯᠡ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠳᠠᠭᠤᠳᠠᠳᠠᠭ ᠬᠠᠷᠠ ᠭᠢᠳᠠᠨᠴᠤᠳ ᠬᠢᠷᠭᠢᠰ ᠦ᠋ᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠢ᠋ ᠲᠤᠭᠤᠯᠵᠤ᠂ ᠶᠸᠮᠢᠯ ᠭᠣᠣᠯ ᠤ᠋ᠨ ᠰᠠᠪᠠ ᠳ᠋ᠤ᠌ ᠬᠦᠷᠦᠭᠡᠳ ᠨᠢᠭᠡ ᠬᠣᠲᠠ ᠪᠠᠢᠭᠤᠯᠤᠭᠰᠠᠨ ᠪᠠᠢᠨᠠ᠃13 ᠳ᠋ᠤᠭᠠᠷ ᠵᠠᠭᠤᠨ ᠪᠣᠯᠬᠤ ᠳ᠋ᠤ᠌ ᠡᠨᠡ ᠬᠣᠲᠠ ᠶ᠋ᠢᠨ ᠪᠠᠭᠤᠷᠢ ᠦᠯᠡᠳᠡᠴᠡ ᠪᠦᠷ ᠪᠠᠯᠠᠷᠬᠠᠢᠰᠢᠪᠠ᠃ ᠡᠨᠡ ᠤᠴᠢᠷ ᠲᠡᠳᠡᠨᠦᠰ ᠦ᠋ᠨ ᠬᠠᠮᠤᠭ ᠤ᠋ᠨ ᠠᠩᠬᠠ ᠨᠤᠲᠤᠭᠰᠢᠨ ᠰᠠᠭᠤᠷᠢᠰᠢᠭᠰᠠᠨ ᠭᠠᠵᠠᠷ ᠨᠢ ᠣᠳᠣ ᠶ᠋ᠢᠨ ᠵᠦᠭᠴᠠᠭ ᠪᠠᠢᠵᠤ ᠮᠡᠳᠡᠨᠡ ᠭᠡᠳᠡᠭ ᠢ᠋ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃ ᠡᠨᠳᠡ᠂ ᠲᠡᠳᠡᠨ ᠦ᠌ ᠴᠠᠴᠠᠷ ᠨᠢ ᠳᠥᠷᠪᠡᠨ ᠲᠦᠮᠡ ᠪᠣᠯᠲᠠᠯᠠ ᠥᠷᠭᠡᠳᠴᠡᠢ᠃ ᠺᠠᠷᠠᠬᠠᠨ ᠬᠠᠭᠠᠨᠲᠤ ᠲᠥᠷᠥ (ᠪᠣᠳᠠᠲᠤ ᠨᠡᠷᠡ ᠨᠢ ᠦᠯᠡᠳᠡᠭᠳᠡᠭᠡ ᠦᠭᠡᠢ) ᠶ᠋ᠢᠨ ᠪᠠᠯᠠᠱᠭᠦ᠋ᠨ ᠦ᠌ ᠨᠣᠶᠠᠯᠠᠭᠴᠢ ᠨᠢ ᠬᠠᠷᠠ ᠬᠢᠳᠠᠨ ᠠ᠋ᠴᠠ ᠲᠤᠰᠠᠯᠠᠮᠵᠢ ᠬᠦᠰᠡᠵᠦ᠂ ᠦᠷᠭᠦᠯᠵᠢ ᠮᠠᠨ ᠢ᠋ ᠲᠦᠢᠪᠡᠭᠡᠳᠡᠭ ᠬᠠᠩᠭ᠌ᠯᠢ ᠂ ᠺᠠᠷᠯᠣᠭ ᠮᠡᠲᠦ ᠶ᠋ᠢᠨ ᠲᠥᠷᠥᠭᠴᠦᠳ ᠦ᠋ᠨ ᠠᠢᠮᠠᠭ ᠤ᠋ᠳ ᠢ᠋ ᠬᠠᠮᠲᠤ ᠪᠠᠷ ᠬᠣᠷᠢᠭᠯᠠᠶᠠ ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠭᠢᠳᠠᠨᠴᠤᠳ ᠵᠠᠪᠰᠢᠶᠠᠨ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠪᠠᠯᠠᠱᠭᠦ᠋ᠨ ᠢ᠋ ᠡᠵᠡᠯᠡᠭᠡᠳ᠂ ᠡᠨᠡ ᠬᠦ᠌ ᠨᠢᠣᠯᠲᠣ ᠪᠠᠭᠤᠷᠠᠢ ᠤᠤᠯ ᠤ᠋ᠨ ᠨᠣᠶᠠᠷᠬᠠᠭᠴᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠨᠤᠲᠤᠭᠰᠢᠨ ᠰᠠᠭᠤᠷᠢᠰᠢᠭᠠᠳ᠂ ᠶᠧᠨᠢᠰᠧᠢ ᠭᠣᠣᠯ ᠪᠣᠯᠤᠨ ᠲᠠᠯᠠᠰ ᠭᠣᠣᠯ ᠬᠦᠷᠲᠡᠯᠡᠬᠢ ᠠᠭᠤᠳᠠᠮ ᠨᠤᠲᠤᠭ ᠲᠠᠢ ᠤᠯᠤᠰ ᠢ᠋ ᠪᠠᠢᠭᠤᠯᠪᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ᠂ ᠲᠡᠳᠡ ᠨᠠᠷ ᠬᠠᠩᠭ᠌ᠯᠢ ᠶ᠋ᠢ ᠳᠠᠢᠯᠠᠨ ᠡᠷᠬᠡᠰᠢᠶᠡᠵᠦ᠂ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ ᠢ᠋ ᠴᠦ᠍ ᠨᠤᠲᠤᠭ ᠳᠡᠪᠢᠰᠬᠡᠷ ᠲᠡᠭᠡᠨ ᠣᠷᠣᠭᠤᠯᠵᠤ ᠠᠪᠤᠪᠠ᠃ ᠬᠣᠲᠣᠩ ᠲᠣᠭᠠᠯᠠᠯ ᠤ᠋ᠨ 531 ᠣᠨ᠂ ᠢᠰᠦ᠋ᠰ ᠲᠣᠭᠠᠯᠠᠯ ᠤ᠋ᠨ1137 ᠣᠨ ᠳ᠋ᠤ᠌᠂ ᠬᠣᠽᠠᠨ ᠣᠷᠴᠢᠮ ᠲᠷᠠᠨᠰᠤᠭᠰᠢᠨᠠ ᠶ᠋ᠢᠨ ᠨᠣᠶᠠᠷᠬᠠᠭᠴᠢ — ᠮᠠᠬᠠᠮᠸᠳ᠋ ᠬᠠᠨ ᠢ᠋ ᠳᠣᠪᠲᠣᠯᠤᠨ ᠰᠦᠢᠷᠡᠭᠦᠯᠪᠡ᠂ 1141 ᠣᠨ ᠳ᠋ᠤ᠌ ᠺᠠᠲ᠋ᠸᠠᠨ ᠤ᠋ ᠶᠡᠬᠡ ᠲᠠᠯᠠ ᠳ᠋ᠤ᠌ ᠰᠸᠯᠵᠦᠭ ᠰᠤᠯᠲᠠᠨ ᠰᠠᠩᠳᠢᠯ ᠤ᠋ᠨ ᠴᠡᠷᠢᠭ ᠢ᠋ ᠲᠤᠢᠯᠪᠤᠷᠢᠲᠠᠢ ᠴᠣᠬᠢᠨ ᠰᠦᠢᠷᠡᠭᠦᠯᠪᠡ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠲᠤᠰᠬᠠᠢ ᠲᠣᠮᠢᠯᠠᠭᠰᠠᠨ ᠨᠢᠭᠡ ᠰᠠᠯᠠᠭᠠ ᠴᠡᠷᠢᠭ ᠨᠢ ᠬᠣᠷᠧᠽᠮ ᠢ᠋ ᠪᠠᠭᠤᠯᠭᠠᠨ ᠠᠪᠤᠭᠰᠠᠨ ᠭᠡᠨᠡ᠃ ᠡᠢᠨ ᠬᠦ᠌ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠬᠢᠭᠡᠳ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ ᠤ᠋ ᠨᠤᠲᠤᠭ ᠨᠢ ᠬᠠᠮᠲᠤ ᠳ᠋ᠠᠭᠠᠨ ᠬᠠᠷᠠ ᠬᠢᠳᠠᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠦ᠋ᠨ ᠨᠢᠭᠡ ᠬᠡᠰᠡᠭ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠠᠬᠠᠯᠠᠭᠴᠢ ᠨᠢ《ᠬᠥᠷ ᠬᠠᠨ》 ᠭᠡᠰᠡᠨ ᠴᠣᠯᠠ ᠠᠪᠤᠪᠠ( ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠲᠠᠢᠯᠪᠤᠷᠢᠯᠠᠭᠰᠠᠨ ᠢ᠋ᠶ᠋ᠠᠷ ᠡᠨᠡ ᠨᠢ《ᠬᠠᠳ ᠤ᠋ᠨ ᠳᠣᠲᠣᠷᠠᠬᠢ ᠬᠠᠨ》 ᠭᠡᠰᠡᠨ ᠤᠳᠬᠠ ᠲᠠᠢ ) ᠂ ᠧᠦ᠋ᠷᠣᠫᠠ ᠶ᠋ᠢᠨ ᠵᠠᠷᠢᠮ ᠡᠷᠳᠡᠮᠲᠡᠳ ᠬᠠᠷᠢᠨ ᠭᠷᠢᠭᠤᠷᠢᠶᠸᠪ ᠤ᠋ᠨ ᠲᠠᠢᠯᠪᠤᠷᠢᠯᠠᠭᠰᠠᠨ ᠲᠥᠷᠥᠭ᠂ ᠮᠣᠩᠭᠣᠯ ᠦᠰᠦᠭ ᠦ᠋ᠨ《ᠬᠦᠷᠭᠡᠨ》 ᠭᠡᠰᠡᠨ ᠦᠭᠡ ᠮᠥᠨ ᠭᠡᠳᠡᠭ ᠢ᠋ ᠬᠦᠯᠢᠶᠡᠨ ᠠᠪᠴᠠᠢ᠃ ᠵᠡᠭᠦᠨ ᠯᠢᠶᠣᠣ ᠤᠯᠤᠰ ᠤ᠋ᠨ ᠲᠥᠷᠥᠯ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌᠂ ᠬᠠᠷᠠ ᠬᠢᠳᠠᠨ ᠡᠢᠮᠦᠷᠬᠦᠦ ᠴᠣᠯᠠ ᠶ᠋ᠢ ᠠᠪᠤᠪᠠ᠂ ᠬᠣᠵᠢᠮ ᠨᠢ ᠲᠡᠮᠦᠷ ᠴᠦ᠍ ᠭᠡᠰᠡᠨ ᠡᠨᠡ ᠴᠣᠯᠠ ᠶ᠋ᠢ ᠵᠠᠯᠭᠠᠮᠵᠢᠯᠠᠨ ᠠᠪᠴᠠᠢ᠃ ᠡᠢᠮᠦᠷᠬᠦᠦ ᠲᠠᠢᠯᠪᠤᠷᠢᠯᠠᠯ ᠨᠢ ᠶᠠᠮᠠᠷᠬᠠᠨ ᠪᠣᠯᠬᠤ ᠲᠤᠬᠠᠢ᠂ ᠬᠢᠳᠠᠨ ᠬᠡᠯᠡᠨ ᠳ᠋ᠦ᠍《ᠬᠥᠷ ᠬᠠᠨ》 ᠪᠣᠯᠤᠨ《ᠭᠦᠷᠭᠠᠨ》 ᠭᠡᠳᠡᠭ ᠨᠢ ᠶᠠᠮᠠᠷᠬᠠᠨ ᠢᠯᠭᠠᠭᠠ ᠲᠠᠢ ᠪᠠᠢᠬᠤ ᠲᠤᠬᠠᠢ ᠲᠣᠳᠣᠷᠬᠠᠢ ᠶᠠᠷᠢᠬᠤ ᠳ᠋ᠤ᠌ ᠪᠡᠷᠬᠡ᠃ ᠢᠪᠣᠨ᠂ ᠠᠯ᠂ ᠠᠲ᠋ᠢᠯ ᠤ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠠᠮᠤᠭ ᠤ᠋ᠨ ᠠᠩᠬᠠᠨ ᠤ᠋ ᠬᠥᠷ ᠬᠠᠨ ᠮᠠᠨᠢ ᠶ᠋ᠢᠨ ᠱᠠᠰᠢᠨ ᠢ᠋ ᠰᠢᠲᠦᠳᠡᠭ ᠪᠠᠢᠵᠠᠢ᠂ ᠥᠩᠭᠡ ᠵᠢᠰᠦ ᠨᠢ ᠲᠤᠩ ᠭᠣᠶᠣ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠣᠷᠭᠠᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠳᠡᠭ ᠪᠥᠭᠡᠳ ᠨᠢᠭᠤᠷ ᠢ᠋ᠶ᠋ᠠᠨ ᠪᠦᠲᠡᠭᠡᠳᠡᠭ᠂ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠸᠠᠩ ᠬᠡᠷᠭᠡᠮᠲᠡᠨ ᠦ᠌ ᠶᠣᠰᠣ ᠳᠦᠷᠢᠮ ᠢ᠋ ᠵᠢᠷᠤᠮᠯᠠᠳᠠᠭ ᠪᠣᠯᠬᠣᠷ ᠡᠢᠮᠦ ᠪᠠᠢᠵᠠᠢ᠃ ᠠᠷᠠᠳ ᠣᠯᠠᠨ ᠤ᠋ ᠪᠠᠨ ᠳᠤᠮᠳᠠ ᠲᠤᠢᠯ ᠤ᠋ᠨ ᠠᠯᠳᠠᠷ ᠬᠦᠨᠳᠦᠲᠡᠢ᠂ ᠴᠡᠷᠢᠭ ᠢ᠋ᠶ᠋ᠡᠨ ᠴᠢᠩᠭᠠ ᠪᠣᠯᠪᠠᠰᠤᠷᠠᠭᠤᠯᠳᠠᠭ ᠬᠠᠷᠠ ᠭᠢᠳᠠᠨᠴᠤᠳ ᠬᠣᠲᠠ ᠪᠠᠯᠭᠠᠰᠤ ᠶ᠋ᠢ ᠡᠵᠡᠯᠡᠨ ᠠᠪᠬᠤ ᠪᠦᠷᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ《ᠡᠷᠦᠬᠡ》 ᠶ᠋ᠢᠨ ᠶᠣᠰᠣᠭᠠᠷ ᠡᠷᠦᠬᠡ ᠪᠦᠷᠢ ᠡᠴᠡ ᠨᠢᠭᠡ ᠳ᠋ᠢᠨᠢᠷ (ᠨᠢᠭᠡ ᠵᠦᠢᠯ ᠦ᠋ᠨ ᠠᠯᠲᠠᠨ ᠵᠣᠭᠣᠰ᠂ ᠪᠠᠷᠤᠭ ᠠᠷᠪᠠᠨ ᠭᠤᠷᠪᠠᠨ ᠹᠠᠷᠠᠩᠺ ᠪᠤᠶᠤ ᠶᠢᠰᠦᠨ ᠰᠢᠯᠢᠩ ᠲᠡᠢ ᠲᠡᠩᠴᠡᠨᠡ) ᠠᠪᠤᠪᠠᠯ ᠪᠣᠯᠴᠢᠬᠠᠨᠠ᠃ ᠭᠡᠪᠡᠴᠦ ᠴᠡᠷᠢᠭ ᠦ᠋ᠳ ᠦ᠋ᠨ ᠢ᠋ᠶ᠋ᠡᠨ ᠪᠠᠯᠠᠮᠠᠳᠯᠠᠬᠤ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠡᠷᠬᠡ ᠳ᠋ᠦ᠍ ᠬᠠᠯᠳᠠᠬᠤ ᠶᠠᠪᠤᠳᠠᠯ ᠢ᠋ ᠶᠠᠯᠠᠯᠠᠨ ᠰᠢᠳᠬᠡᠳᠡᠭ ᠦᠭᠡᠢ᠃ ᠬᠥᠷ ᠬᠠᠨ ᠶᠡᠷᠦ ᠡᠴᠡ ᠳᠠᠭᠠᠭᠰᠠᠳ ᠲᠠᠭᠠᠨ ᠨᠤᠲᠤᠭ ᠰᠢᠷᠣᠢ ᠬᠤᠪᠢᠶᠠᠵᠤ ᠥᠭᠳᠡᠭ ᠦᠭᠡᠢ᠂ ᠲᠡᠷᠡᠴᠢᠯᠡᠨ ᠵᠠᠭᠤᠨ ᠬᠥᠮᠦᠨ ᠡᠴᠡ ᠳᠡᠭᠡᠭᠰᠢᠬᠢ ᠮᠣᠷᠢᠲᠤ ᠴᠡᠷᠢᠭ ᠳᠠᠭᠠᠭᠤᠯᠤᠭᠰᠠᠨ ᠶᠠᠮᠠᠷ ᠴᠦ᠍ ᠬᠥᠮᠦᠨ ᠢ᠋ ᠢᠲᠡᠭᠡᠳᠡᠭ ᠦᠭᠡᠢ (ᠣᠢᠷᠠ ᠵᠠᠮ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠶᠠᠨ ᠠ᠋ᠴᠠ ᠭᠠᠳᠠᠨᠠ)᠃ ᠵᠠᠷᠢᠮ ᠭᠠᠵᠠᠷ ᠢ᠋ ᠨᠣᠶᠠᠯᠠᠭᠴᠢᠳ ᠬᠥᠷ ᠬᠠᠨ ᠳ᠋ᠤ᠌ ᠪᠠᠭᠤᠵᠤ ᠥᠭᠭᠦᠪᠡᠯ ᠪᠦᠰᠡᠨ ᠳᠡᠭᠡᠷᠡ ᠪᠡᠨ ᠨᠢᠭᠡ ᠮᠥᠩᠭᠥᠨ ᠫᠠᠢᠰᠠ ᠵᠡᠭᠦᠵᠦ᠂ ᠣᠷᠣᠵᠤ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠢᠯᠡᠳᠬᠡᠨᠡ᠃ ᠡᠨᠡ ᠮᠡᠲᠦ ᠳᠠᠭᠠᠭᠰᠠᠨ ᠲᠦᠷᠦᠭᠦᠴᠦᠳ ᠲᠤᠩ ᠴᠥᠭᠡᠨ᠃ ᠮᠠᠨᠤᠰ ᠤ᠋ᠨ ᠠᠯᠢ ᠴᠢᠳᠠᠬᠤ ᠪᠠᠷ ᠱᠦᠭᠦᠵᠦ ᠣᠯᠤᠭᠰᠠᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠥᠷ ᠬᠠᠨ ᠳ᠋ᠤ᠌ ᠰᠢᠭᠤᠳ ᠬᠠᠷᠢᠶᠠᠯᠠᠭᠳᠠᠬᠤ ᠭᠠᠵᠠᠷ ᠨᠤᠲᠤᠭ ᠨᠢ ᠬᠦᠯᠳ᠋ᠵᠠ ᠣᠷᠣᠨ ᠪᠣᠯᠤᠨ ᠳᠣᠯᠣᠭᠠᠨ ᠤᠰᠤᠨ ᠮᠣᠵᠢ ᠶ᠋ᠢᠨ ᠡᠮᠦᠨᠡᠲᠦ ᠬᠡᠰᠡᠭ ᠵᠢᠴᠢ ᠰᠢᠷ ᠮᠥᠷᠡᠨ ᠮᠣᠵᠢ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤ ᠬᠡᠰᠡᠭ ᠯᠡ ᠪᠣᠯᠤᠨᠠ᠃ ᠬᠥᠷ ᠬᠠᠨ ᠨᠡᠢᠰᠯᠡᠯ ᠢ᠋ᠶ᠋ᠡᠨ ᠢᠯᠢ ᠭᠣᠣᠯ ᠠ᠋ᠴᠠ ᠪᠠᠷᠠᠭᠤᠨᠰᠢ ᠴᠦ ᠭᠣᠣᠯ ᠤ᠋ᠨ ᠡᠷᠭᠢ ᠪᠤᠶᠤ ᠪᠠᠯᠠᠱᠭᠦ᠋ᠨ ᠡᠴᠡ ᠬᠣᠯᠠ ᠪᠢᠰᠢ ᠬᠦᠰ ᠤᠷᠲᠤ(《 ᠶᠡᠬᠡ ᠴᠠᠴᠠᠷ》 ᠭᠡᠰᠡᠨ ᠤᠳᠬᠠ ᠲᠠᠢ)᠂ ᠡᠰᠡᠬᠦᠯᠡ ᠬᠣᠲ᠋ᠠ (《ᠬᠣᠲᠠ》) ᠭᠡᠰᠡᠨ ᠪᠠᠢᠭᠤᠯᠵᠠᠢ᠃ ᠳᠣᠯᠣᠭᠠᠨ ᠤᠰᠤᠨ ᠮᠣᠵᠢ ᠶ᠋ᠢᠨ ᠥᠭᠡᠷᠡ ᠬᠡᠰᠡᠭ ᠪᠣᠯᠬᠤ ᠢᠯᠢ ᠭᠣᠣᠯ ᠠ᠋ᠴᠠ ᠤᠮᠠᠷᠠᠰᠢᠬᠢ ᠨᠢ ᠺᠠᠷᠯᠣᠭ ᠤ᠋ᠨ ᠬᠠᠳ ᠨᠠᠷ ᠲᠤ᠌ ᠬᠠᠷᠢᠶᠠᠯᠠᠭᠳᠠᠵᠤ ᠪᠠᠢᠵᠠᠢ᠂ ᠨᠡᠢᠰᠯᠡᠯ ᠢ᠋ᠶ᠋ᠡᠨ ᠺᠠᠶᠠᠯᠢᠭ ᠲᠤ᠌ ᠪᠠᠢᠭᠤᠯᠤᠭᠰᠠᠨ ᠪᠠᠢᠪᠠ᠂ ᠡᠨᠡ ᠭᠠᠵᠠᠷ ᠬᠥᠬᠡᠪᠦᠷ ᠡᠴᠡ ᠪᠠᠷᠠᠭᠤᠨᠰᠢᠬᠢ ᠨᠢᠭᠡᠨ ᠲᠡᠭᠰᠢ ᠲᠠᠯᠠ ᠳ᠋ᠤ᠌ ᠪᠣᠢ᠃ ᠬᠠᠷᠠᠬᠠᠨ ᠤᠯᠤᠰ ᠤ᠋ᠨ ᠬᠠᠳ ᠨᠠᠷ ᠲᠷᠠᠨᠰᠤᠭᠰᠢᠨᠠ ᠪᠣᠯᠤᠨ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ ᠢ᠋ ᠨᠣᠶᠠᠷᠬᠠᠭᠰᠠᠭᠠᠷ ᠪᠠᠢᠪᠠ᠃ ᠬᠥᠷ ᠬᠠᠨ ᠤ᠋ ᠤᠯᠤᠰ ᠲᠤ᠌᠂ ᠶᠠᠳᠠᠬᠤ ᠳ᠋ᠠᠭᠠᠨ ᠲᠡᠷᠡ ᠪᠡᠷ ᠨᠣᠶᠠᠯᠠᠵᠤ ᠪᠠᠢᠭᠰᠠᠨ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠪᠡᠷ᠂ ᠭᠤᠷᠪᠠᠨ ᠳᠡᠰ ᠦ᠋ᠨ ᠬᠠᠷᠢᠶᠠᠯᠠᠵᠤ ᠬᠠᠷᠢᠶᠠᠯᠠᠭᠳᠠᠬᠤ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠭᠰᠠᠨ ᠢ᠋ ᠪᠢᠳᠡ ᠣᠯᠵᠤ ᠮᠡᠳᠡᠪᠡ᠃ ᠡᠨᠡ ᠨᠢ ᠮᠣᠩᠭᠣᠯᠴᠤᠳ ᠣᠷᠣᠰ ᠢ᠋ ᠨᠣᠶᠠᠷᠬᠠᠵᠤ ᠪᠠᠢᠭᠰᠠᠨ ᠲᠡᠦᠬᠡᠨ ᠴᠠᠭ ᠦᠶᠡ ᠲᠡᠢ ᠠᠳᠠᠯᠢᠬᠠᠨ᠂ ᠵᠢᠱ᠌ᠢᠶᠡᠯᠡᠪᠡᠯ ᠰᠠᠮᠠᠷᠺᠠᠠᠳ᠋ ᠤ᠋ᠨ ᠨᠣᠶᠠᠷᠬᠠᠭᠴᠢ ᠨᠢ ᠬᠥᠷ ᠬᠠᠨ ᠤ᠋ ᠲᠣᠮᠢᠯᠠᠭᠰᠠᠨ ᠪᠠᠢᠩᠭᠤ ᠰᠠᠭᠤᠬᠤ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠡᠮᠦᠨᠡ ᠬᠠᠷᠢᠶᠠᠯᠠᠭᠳᠠᠵᠤ ᠪᠠᠢᠭᠠ ᠬᠠᠷᠢᠴᠠᠭᠠ ᠪᠠᠨ ᠠᠯᠪᠠ ᠶ᠋ᠢᠨ ᠲᠡᠳᠦᠢ ᠮᠡᠳᠡᠷᠡᠳᠡᠭ ᠪᠠᠢᠪᠠ᠃ ᠪᠤᠰᠤᠳ ᠲᠦᠷᠦᠭᠦᠴᠦᠳ᠂ ᠵᠢᠱ᠌ᠢᠶᠡᠯᠡᠪᠡᠯ ᠬᠣᠷᠧᠽᠮ ᠤᠯᠤᠰ ᠤ᠋ᠨ ᠸᠠᠩ ᠵᠥᠪᠬᠡᠨ ᠲᠣᠭᠲᠠᠭᠰᠠᠨ ᠬᠤᠭᠤᠴᠠᠭᠠᠨ ᠳ᠋ᠠᠭᠠᠨ ᠬᠥᠮᠦᠨ ᠲᠣᠮᠢᠯᠠᠵᠤ ᠲᠦᠷᠢᠶᠡᠰᠦᠨ ᠭᠠᠢᠯᠢ ᠬᠣᠷᠢᠶᠠᠯᠭᠠᠳᠠᠭ ᠪᠠᠢᠪᠠ᠃ ᠥᠭᠡᠷᠡ ᠨᠢᠭᠡ ᠪᠦᠯᠦᠭ᠂ ᠵᠢᠱ᠌ᠢᠶᠡᠯᠡᠪᠡᠯ ᠪᠤᠬᠠᠷ ᠤ᠋ᠨ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠤ᠋ ᠲᠣᠭᠣᠷᠢᠭ ᠲᠤ᠌ ᠬᠠᠨᠳᠤᠬᠤ ᠳ᠋ᠠᠭᠠᠨ ᠨᠢᠭᠡᠨ ᠦᠶᠡ ᠶ᠋ᠢᠨ ᠯᠠᠮᠠ ᠬᠤᠸᠠᠷᠠᠭ ᠢ᠋ ᠨᠣᠶᠠᠷᠬᠠᠬᠤ ᠡᠷᠬᠡ ᠶ᠋ᠢ ᠪᠦᠷ ᠥᠪᠡᠷ ᠢ᠋ᠶ᠋ᠡᠨ ᠡᠵᠡᠮᠰᠢᠳᠡᠭ ᠪᠠᠢᠪᠠ᠂ ᠬᠠᠷᠠ ᠬᠢᠳᠠᠨ ᠤ᠋ ᠲᠤᠰᠢᠶᠠᠬᠤ ᠶᠣᠰᠣᠲᠠᠢ ᠭᠠᠢᠯᠢ ᠶ᠋ᠢ ᠭᠠᠵᠠᠷ ᠣᠷᠣᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠬᠠᠷᠢᠶᠠᠯᠭᠠᠳᠠᠭ ᠪᠠᠢᠪᠠ᠃
ᠢᠪᠣᠨ᠂ ᠠᠯ᠂ ᠠᠲ᠋ᠢᠯ ᠤ᠋ᠨ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠠᠩᠬᠠᠳᠠᠭᠴᠢ ᠬᠥᠷ ᠬᠠᠨ 1143 ᠣᠨ ᠤ᠋ ᠡᠬᠢ ᠪᠡᠷ ᠨᠠᠰᠤ ᠪᠠᠷᠠᠭᠰᠠᠨ ᠪᠠᠢᠨᠠ᠃ ᠥᠬᠢᠨ ᠨᠢ ᠰᠠᠭᠤᠷᠢᠨ ᠢ᠋ ᠨᠢ ᠵᠠᠯᠭᠠᠮᠵᠢᠯᠠᠭᠠᠳ ᠮᠥᠨ ᠤᠳᠠᠯ ᠦᠭᠡᠢ ᠦᠬᠦᠪᠡ᠃ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠡᠬᠡ ᠨᠢ᠂ ᠲᠤᠬᠠᠢᠯᠠᠪᠠᠯ ᠬᠥᠷ ᠬᠠᠨ ᠤ᠋ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠠᠳᠬᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠥᠪᠡᠭᠦᠨ ᠮᠦᠬᠠᠮᠠᠳ᠋ ᠤ᠋ᠨ ᠬᠢᠨᠢ ᠭᠠᠷ ᠲᠤ᠌ ᠣᠷᠣᠪᠠ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠲᠤᠯᠭᠤᠷ ᠲᠥᠷᠥ ᠪᠠᠢᠭᠤᠯᠤᠭᠴᠢ ᠶ᠋ᠢᠨ ᠬᠥᠪᠡᠭᠦᠨ — ᠶᠸᠯᠢᠣᠢ ᠢᠯᠸ ᠪᠣᠯᠤᠨ ᠲᠡᠭᠦᠨ ᠦ᠌ ᠡᠬᠡ ᠶ᠋ᠢᠨ ᠡᠷᠬᠡ ᠪᠠᠷᠢᠭᠰᠠᠨ ᠴᠠᠭ ᠨᠢ ᠶᠠᠭ ᠲᠣᠩᠭᠣᠷᠠᠭᠰᠠᠨ ᠪᠠᠢᠨᠠ᠂ ᠢᠯᠸ ᠦ᠋ᠨ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠬᠢᠨᠢ ᠡᠷᠬᠡ ᠪᠠᠷᠢᠭᠰᠠᠨ ᠴᠠᠭ ᠨᠢ ᠰᠡᠭᠦᠯᠡᠷ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠵᠦᠸᠠᠢᠨᠢ ᠶ᠋ᠢᠨ ᠨᠢᠭᠲᠠᠯᠠᠨ ᠲᠣᠳᠣᠯᠠᠭᠰᠠᠨ ᠢ᠋ᠶ᠋ᠠᠷ᠂ ᠬᠥᠷ ᠬᠠᠨ ᠤ᠋ ᠥᠬᠢᠨ ᠬᠠᠷᠠ ᠬᠢᠳᠠᠨ ᠸᠠᠩᠲᠤ ᠤᠯᠤᠰ ᠢ᠋ ᠨᠣᠶᠠᠷᠬᠠᠵᠤ ᠪᠠᠢᠭᠰᠠᠨ ᠴᠠᠭ ᠦᠶᠡ ᠪᠣᠯ 12 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠠᠯᠠᠭᠠᠳ ᠣᠨ ᠪᠣᠯᠤᠨᠠ᠃ ᠶᠸᠯᠢᠦᠢ ᠢᠯᠸ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠪᠦᠬᠦ ᠤᠯᠤᠰ ᠲᠠᠭᠠᠨ ᠬᠥᠮᠦᠨ ᠠᠮᠠ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠬᠢᠯᠭᠡᠭᠰᠡᠨ ᠳ᠋ᠦ᠍ ᠨᠠᠢ᠍ᠮᠠᠨ ᠲᠦᠮᠡ ᠳᠥᠷᠪᠡᠨ ᠮᠢᠩᠭᠠ ᠲᠠᠪᠤᠨ ᠵᠠᠭᠤᠨ ᠡᠷᠦᠬᠡ ᠪᠠᠢᠪᠠ᠃(《ᠯᠢᠶᠣᠣ ᠤᠯᠤᠰ ᠤ᠋ᠨ ᠲᠡᠦᠬᠡ 》) ᠡᠨᠡ ᠲᠣᠭᠠᠨ ᠳ᠋ᠤ᠌ ᠬᠥᠷ ᠬᠠᠨ ᠤ᠋ ᠰᠢᠭᠤᠳ ᠬᠠᠷᠢᠶᠠᠲᠤ ᠨᠤᠲᠤᠭ ᠲᠠᠬᠢ ᠨᠡᠭᠦᠳᠡᠯᠯᠡᠵᠦ ᠮᠠᠯᠵᠢᠳᠠᠭ ᠬᠥᠮᠦᠰ ᠢ᠋ ᠯᠡ ᠪᠠᠭᠲᠠᠭᠠᠭᠰᠠᠨ ᠰᠢᠭ᠋ ᠪᠠᠢᠨᠠ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠶᠸᠯᠢᠦᠢ ᠢᠯᠸ ᠦ᠋ᠨ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠬᠢᠨᠢ ᠨᠡᠷᠡ ᠫᠦᠰᠦᠸᠠᠨ᠃13 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠡᠬᠢᠨ ᠦ᠌ ᠦᠶᠡ ᠶ᠋ᠢᠨ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠬᠡᠯᠡᠬᠦ ᠪᠡᠷ ᠡᠨᠡ ᠬᠡᠦᠬᠡᠨ ᠦ᠌ ᠴᠣᠯᠠ ᠨᠢ《ᠬᠠᠳ ᠤ᠋ᠨ ᠳᠣᠲᠣᠷᠠᠬᠢ ᠬᠠᠨ》 ᠭᠡᠨᠡ᠃ ᠵᠦᠸᠠᠢᠨᠢ ᠶ᠋ᠢᠨ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ᠂ ᠪᠦᠰᠡᠭᠦᠢ ᠸᠠᠩ ᠲᠥᠷᠥ ᠵᠠᠰᠠᠵᠤ ᠪᠠᠢᠭᠰᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠣᠳᠠᠲᠤ ᠡᠷᠬᠡ ᠡᠷᠡ ᠶ᠋ᠢᠨ ᠬᠢᠨᠢ ᠭᠠᠷ ᠲᠤ᠌ ᠪᠠᠢᠵᠠᠢ᠃ ᠭᠡᠬᠦ ᠳ᠋ᠦ᠍ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ᠂ ᠪᠦᠰᠡᠭᠦᠢ ᠸᠠᠩ ᠡᠷᠡ ᠪᠡᠨ ᠠᠯᠠᠭᠠᠳ᠂ ᠬᠠᠨᠢᠯᠠᠭᠰᠠᠨ ᠡᠷᠡ ᠲᠡᠢ ᠪᠡᠨ ᠰᠠᠭᠤᠭᠰᠠᠨ ᠪᠠᠢᠨᠠ᠃ ᠠᠯᠠᠭᠳᠠᠭᠰᠠᠨ ᠡᠷᠡ ᠶ᠋ᠢᠨ ᠬᠢᠨᠢ ᠡᠴᠢᠭᠡ ᠨᠢ ᠪᠣᠰᠤᠯᠭᠠ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠣᠯᠠᠨ ᠬᠥᠮᠦᠰ ᠸᠠᠩ ᠤ᠋ᠨ ᠣᠷᠳᠣᠨ ᠢ᠋ ᠪᠦᠰᠡᠯᠡᠨ ᠬᠠᠭᠠᠪᠠ᠂ ᠪᠦᠰᠡᠭᠦᠢ ᠸᠠᠩ ᠣᠯᠠᠨ ᠤ᠋ ᠡᠮᠦᠨᠡ ᠬᠠᠨᠢᠯᠠᠭᠰᠠᠨ ᠡᠷᠡ ᠪᠡᠨ ᠠᠯᠠᠭᠤᠯᠤᠭᠠᠳ ᠰᠠᠶᠢ ᠠᠮᠢ ᠪᠠᠨ ᠣᠯᠵᠤ ᠬᠠᠮᠠᠭᠠᠯᠠᠭᠰᠠᠨ ᠪᠠᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠵᠦᠸᠠᠢᠨᠢ ᠶ᠋ᠢᠨ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠬᠥᠷ ᠬᠠᠨ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠪᠣᠯᠤᠨ ᠲᠡᠭᠦᠨ ᠦ᠌ ᠬᠠᠨᠢᠯᠠᠭᠰᠠᠨ ᠡᠷᠡ ᠪᠣᠰᠤᠯᠭᠠ ᠶ᠋ᠢᠨ ᠴᠡᠷᠢᠭ ᠲᠦ᠍ ᠪᠦᠰᠡᠯᠡᠭᠳᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠠᠯᠠᠭᠳᠠᠵᠠᠢ ᠭᠡᠵᠦ ᠪᠢᠴᠢᠪᠡ᠃ ᠵᠦᠸᠠᠢᠨᠢ ᠬᠠᠷᠠ ᠬᠢᠳᠠᠨ ᠤ᠋ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠠᠭᠠᠨ ᠬᠥᠷ ᠬᠠᠨ ᠤ᠋ ᠥᠬᠢᠨ ᠦ᠌ ᠤᠴᠢᠷ ᠢ᠋ ᠲᠡᠮᠳᠡᠭᠯᠡᠭᠡ ᠦᠭᠡᠢ᠂《ᠪᠡᠯᠪᠡᠰᠦᠨ ᠪᠦᠰᠡᠭᠦᠢ》ᠡᠨᠡ ᠲᠡᠷᠡ ᠭᠡᠳᠡᠭ ᠨᠢ 《ᠥᠬᠢᠨ》ᠭᠡᠳᠡᠭ ᠢ᠋ ᠪᠤᠷᠤᠭᠤ ᠲᠡᠮᠳᠡᠭᠯᠡᠭᠰᠡᠨ ᠤᠴᠢᠷ ᠪᠠᠢᠵᠤ ᠮᠡᠳᠡᠨᠡ᠃ ᠰᠡᠭᠦᠯᠡᠷ ᠨᠢ ᠪᠤᠰᠤᠳ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠵᠦᠸᠡᠢᠨᠢ ᠬᠥᠷ ᠬᠠᠨ ᠤ᠋ ᠥᠬᠢᠨ ᠢ᠋ ᠳᠤᠷᠠᠳᠴᠤ ᠥᠩᠭᠡᠷᠡᠪᠡ᠃ ᠫᠦᠰᠦᠸᠠᠨ ᠢ᠋ ᠨᠠᠰᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠶᠸᠯᠢᠦᠢ ᠢᠯᠸ ᠦ᠋ᠨ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠶᠸᠯᠢᠦᠢ ᡁᠢ ᠯᠦ᠍ ᠬᠦ ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠪᠠ᠃ ᠲᠡᠭᠦᠨ ᠢ᠋ ᠠᠬᠠ ᠪᠠᠨ ᠬᠣᠣᠷᠯᠠᠨ ᠠᠯᠠᠯᠠ ᠭᠡᠵᠦ ᠵᠦᠸᠡᠢᠨᠢ ᠲᠡᠮᠳᠡᠭᠯᠡᠪᠡ᠃ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ ᠬᠠᠮᠤᠭ ᠤ᠋ᠨ ᠡᠴᠦᠰ ᠦ᠋ᠨ ᠡᠨᠡ ᠬᠦ᠌ ᠬᠥᠷ ᠬᠠᠨ ᠤ᠋ ᠨᠡᠷᠡ ᠶ᠋ᠢ ᠮᠦᠨᠢ ᠭᠡᠳᠡᠭ ᠪᠠᠢᠨᠠ᠂ ᠪᠠᠰᠠ ᠨᠢᠭᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠺᠦᠮᠠᠨ ᠪᠤᠶᠤ ᠹᠦᠮᠨ ᠭᠡᠵᠦ ᠲᠡᠮᠳᠡᠭᠯᠡᠪᠡ᠃
ᠪᠦᠰᠡᠭᠦᠢ ᠬᠥᠮᠦᠨ ᠪᠠᠢᠨ ᠪᠠᠢᠨ ᠲᠥᠷᠥ ᠵᠠᠰᠠᠬᠤ ᠪᠣᠯᠤᠭᠰᠠᠨ ᠪᠥᠭᠡᠳ ᠣᠨᠴᠠᠭᠠᠢᠯᠠᠨ ᠡᠨᠡ ᠬᠦ᠌ ᠪᠦᠰᠡᠭᠦᠢ ᠡᠵᠡᠨ ᠬᠤᠪᠢ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠲᠠᠯᠠ ᠪᠠᠷ ᠠᠩᠭ᠌ᠯᠢ ᠶ᠋ᠢᠨ ᠰᠲ᠋ᠦ᠋ᠭᠠᠷᠲ᠋ ᠲᠥᠷᠥ ᠶ᠋ᠢᠨ ᠪᠦᠰᠡᠭᠦᠢ ᠸᠠᠩ ᠮᠡᠷᠢ ᠰᠢᠭ ᠡᠳᠦᠷ ᠰᠠᠷᠠ ᠶ᠋ᠢ ᠥᠩᠭᠡᠷᠡᠭᠡᠬᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠸᠠᠩ ᠤ᠋ᠨ ᠤᠭᠰᠠᠭᠠᠨ ᠤ᠋ ᠡᠷᠬᠡ ᠰᠦᠷ ᠢ᠋ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠠᠭᠤᠷᠠᠭᠤᠯᠪᠠ᠃ ᠵᠠᠷᠢᠮ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠮᠠᠲ᠋ᠧᠷᠢᠶᠠᠯ ᠠ᠋ᠴᠠ ᠦᠵᠡᠪᠡᠯ᠂ ᠬᠠᠷᠠ ᠬᠢᠳᠠᠨ ᠤ᠋ ᠬᠡᠳᠦᠨ ᠸᠠᠩ ᠬᠦᠩ ᠦ᠋ᠨ ᠭᠠᠷ ᠲᠠᠬᠢ ᠡᠷᠬᠡ ᠨᠢ ᠬᠥᠷ ᠬᠠᠨ ᠠ᠋ᠴᠠ ᠳᠡᠮᠡᠢ ᠲᠣᠯᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠡᠨᠡ ᠨᠢ ᠬᠠᠷᠠ ᠬᠢᠳᠠᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠪᠤᠰᠤᠳ ᠨᠡᠭᠦᠳᠡᠯᠴᠢᠳ ᠦ᠋ᠨ ᠤᠯᠤᠰ ᠤ᠋ᠳ ᠲᠠᠢ ᠠᠳᠠᠯᠢ ᠦᠭᠡᠢ ᠶ᠋ᠢ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠲᠡᠷᠡᠴᠢᠯᠡᠨ ᠤᠤᠯ ᠤ᠋ᠨ ᠵᠡᠭᠦᠨ ᠯᠢᠶᠣᠣ ᠤᠯᠤᠰ ᠤ᠋ᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠪᠣᠯᠪᠠᠰᠤᠨ ᠤ᠋ ᠨᠥᠯᠥᠭᠡ ᠶ᠋ᠢ ᠬᠦᠷᠲᠡᠭᠰᠡᠨ ᠪᠠᠢᠭᠤᠯᠤᠮᠵᠢ ᠨᠢ ᠤᠳᠠᠭᠠᠨ ᠲᠣᠭᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠲᠤᠰᠬᠠᠵᠤ ᠪᠠᠢᠨᠠ᠃ ᠵᠦᠸᠡᠢᠨᠢ ᠶ᠋ᠢᠨ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ᠂ ᠬᠠᠷᠠ ᠬᠢᠳᠠᠨ ᠤ᠋ ᠭᠠᠢᠯᠢ ᠶ᠋ᠢᠨ ᠲᠦᠰᠢᠮᠡᠯ ᠦ᠋ᠨ ᠬᠢᠳᠡᠯ ᠶᠠᠪᠤᠳᠠᠯ ᠨᠢ《ᠤᠷᠢᠳᠤ ᠶ᠋ᠢᠨ ᠬᠢ ᠲᠡᠢ ᠪᠡᠨ ᠪᠦᠷ ᠠᠳᠠᠯᠢ ᠦᠭᠡᠢ ᠪᠣᠯᠪᠠ》᠂ ᠬᠥᠷ ᠬᠠᠨ ᠤ᠋ ᠲᠣᠮᠢᠯᠠᠭᠰᠠᠨ ᠡᠯᠴᠢᠳ ᠦ᠋ᠨ ᠣᠮᠣᠷᠬᠠᠭ ᠪᠠᠷᠳᠠᠮ ᠠᠭᠠᠰᠢ ᠨᠢ ᠳᠠᠭᠠᠭᠤᠯᠢ ᠤᠯᠤᠰ ᠤ᠋ᠳ ᠤ᠋ᠨ ᠢᠵᠠᠭᠤᠷᠲᠠᠳ ᠤ᠋ᠨ ᠳᠤᠷᠠ ᠦᠭᠡᠢᠴᠡᠯ ᠢ᠋ ᠬᠦᠷᠭᠡᠪᠡ᠃ ᠲᠡᠷᠡᠴᠢᠯᠡᠨ ᠬᠥᠮᠦᠨ ᠠᠮᠠ ᠶ᠋ᠢᠨ ᠬᠢᠨᠢ ᠣᠯᠠᠨ ᠲᠣᠭᠠ ᠶ᠋ᠢ ᠡᠵᠡᠯᠡᠬᠦ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠢ᠋ᠶ᠋ᠠᠷ ᠪᠦᠲᠦᠭᠰᠡᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌᠂ ᠢᠵᠢᠯᠢ ᠪᠤᠰᠤ ᠱᠠᠰᠢᠨᠲᠠᠨ ᠤ᠋ ᠡᠵᠡᠷᠬᠡᠭᠯᠡᠯ ᠨᠢ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠰᠡᠳᠬᠢᠯ ᠢ᠋ ᠰᠢᠷᠬᠠᠲᠤᠭᠤᠯᠬᠤ ᠨᠢ ᠠᠶᠠᠨᠳᠠᠭᠠᠨ ᠤ᠋ ᠬᠡᠷᠡᠭ ᠶᠦ᠍ᠮ᠃ ᠬᠥᠷ ᠬᠠᠨ ᠴᠣᠬᠣᠮ ᠶᠠᠮᠠᠷ ᠱᠠᠰᠢᠨ ᠢ᠋ ᠰᠢᠲᠦᠳᠡᠭ ᠪᠠᠢᠭᠰᠠᠨ ᠪᠣᠢ? ᠢᠪᠣᠨ᠂ ᠠᠯ᠂ ᠠᠲ᠋ᠢ᠍ᠯ ᠤ᠋ᠨ ᠲᠡᠮᠳᠡᠭᠯᠡᠭᠰᠡᠨ ᠰᠢᠭ ᠠᠩᠬᠠᠳᠠᠭᠴᠢ ᠬᠥᠷ ᠬᠠᠨ ᠨᠢ ᠨᠡᠭᠡᠷᠡᠨ ᠮᠠᠨᠢ ᠶ᠋ᠢᠨ ᠱᠠᠰᠢᠨ ᠢ᠋ ᠰᠢᠲᠦᠳᠡᠭ ᠪᠠᠢᠭᠰᠠᠨ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠣᠪᠤᠯᠲ᠋ᠽᠠᠺ ᠤ᠋ᠨ ᠮᠡᠳᠡᠭᠡᠯᠡᠭᠰᠡᠨ ᠰᠢᠭ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠰᠢᠨᠲᠠᠨ ᠪᠠᠢᠭᠰᠠᠨ ᠶᠠᠮᠤ ᠤᠤ᠂ ᠲᠡᠳᠡ ᠨᠠᠷ ᠤ᠋ᠨ ᠨᠢᠭᠲᠠᠯᠠᠨ ᠲᠣᠳᠣᠯᠠᠭᠰᠠᠨ ᠢ᠋ᠶ᠋ᠠᠷ ᠠᠩᠬᠠᠳᠠᠭᠴᠢ ᠬᠥᠷ ᠬᠠᠨ ᠪᠣᠯ ᠧᠦ᠋ᠷᠣᠫᠠ ᠶ᠋ᠢᠨ ᠳᠤᠮᠳᠠᠳᠤ ᠡᠷᠲᠡᠨ ᠦ᠌ ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠨ ᠳ᠋ᠤ᠌ ᠭᠠᠷᠳᠠᠭ《ᠱᠠᠰᠢᠨ ᠢ᠋ ᠬᠠᠮᠠᠭᠠᠯᠠᠭᠴᠢ ᠶᠤᠬᠠᠨ》 ᠮᠥᠨ— ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠲᠣᠩ ᠪᠡᠷᠬᠡ ᠶᠦᠮ᠃ᠬᠣᠢᠨᠠᠬᠢ ᠡᠨᠡ ᠲᠥᠰᠦᠭᠡᠯᠡᠯ ᠨᠢ ᠨᠠᠢᠳᠠᠪᠤᠷᠢᠲᠠᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠷ ᠳᠤᠲᠠᠮᠠᠭ᠃ 15 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠲᠡᠦᠬᠡ ᠨᠠᠢᠷᠠᠭᠤᠯᠤᠭᠴᠢᠳ ᠤ᠋ᠨ ᠬᠡᠯᠡᠭᠰᠡᠨᠴᠢᠯᠡᠨ ᠬᠠᠮᠤᠭ ᠤ᠋ᠨ ᠡᠴᠦᠰ ᠦ᠋ᠨ ᠬᠥᠷ ᠬᠠᠨ ᠤ᠋ ᠥᠬᠢᠨ ᠨᠢ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠰᠢᠨᠲᠠᠨ ᠪᠠᠢᠵᠠᠢ ᠭᠡᠳᠡᠭ ᠢ᠋ ᠴᠦ᠍ ᠨᠡᠯᠢᠶᠡᠳ ᠡᠷᠲᠡ ᠦᠶᠡ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠨᠤᠲᠠᠯᠠᠬᠤ ᠳ᠋ᠤ᠌ ᠪᠡᠷᠬᠡ᠂ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠬᠣᠣᠷᠯᠠᠯ ᠠᠮᠰᠠᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠤ᠋ ᠵᠣᠬᠢᠶᠠᠯᠴᠢᠳ ᠨᠢᠭᠡᠳᠦᠭᠡᠷ᠂ ᠬᠣᠶᠠᠳᠤᠭᠠᠷ ᠦᠶᠡ ᠶ᠋ᠢᠨ ᠬᠥᠷ ᠬᠠᠨ ᠢ᠋ ᠲᠥᠪ ᠭᠣᠣᠯᠴᠢ ᠪᠥᠭᠡᠳ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠢ᠋ ᠬᠦᠨᠳᠦᠳᠬᠡᠳᠡᠭ ᠪᠠᠢᠯᠠ ᠭᠡᠵᠦ ᠮᠠᠭᠲᠠᠨ ᠳᠠᠭᠤᠯᠠᠪᠠ᠃ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠰᠢᠬᠠᠭᠳᠠᠭᠠᠳ᠂ ᠭᠠᠭᠴᠠᠭᠠᠷ ᠣᠷᠣᠰᠢᠬᠤ ᠪᠠᠢᠷᠢ ᠰᠠᠭᠤᠷᠢ ᠪᠠᠨ ᠠᠯᠳᠠᠭᠠᠳ᠂ ᠪᠤᠰᠤᠳ ᠰᠢᠲᠦᠯᠭᠡ ᠲᠡᠢ ᠵᠡᠷᠭᠡᠴᠡᠨ ᠣᠷᠣᠰᠢᠬᠤ ᠪᠣᠯᠤᠭᠰᠠᠨ ᠲᠡᠳᠦᠢ᠃ ᠲᠡᠳᠡ ᠨᠠᠷ ᠤ᠋ᠨ ᠦᠵᠡᠬᠦ ᠪᠡᠷ᠂ ᠡᠢᠮᠦᠷᠬᠦᠦ ᠰᠢᠨᠡ ᠡᠷᠬᠡ ᠴᠢᠯᠥᠭᠡ ᠡᠴᠡ ᠪᠣᠯᠵᠤ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠢ᠋ ᠰᠢᠲᠦᠬᠦ ᠬᠥᠮᠦᠨ ᠦ᠌ ᠲᠣᠭᠠ ᠭᠡᠳᠡᠷᠭᠦ ᠪᠡᠨ ᠨᠡᠮᠡᠭᠳᠡᠭᠰᠡᠨ ᠪᠠᠢᠨᠠ᠃ ᠺᠠᠲ᠋ᠣᠯᠢᠭ ᠱᠠᠰᠢᠨ ᠤ᠋ ᠲᠦᠷᠦᠭᠦᠦ ᠠᠯᠢᠶᠠᠰ ᠭᠤᠷᠪᠠᠳᠤᠭᠠᠷ(1176—1190) ᠺᠠᠱᠭᠠᠷ ᠲᠤ᠌ ᠨᠢᠭᠡ ᠱᠠᠰᠢᠨ ᠤ᠋ ᠲᠥᠪ ᠪᠠᠢᠭᠤᠯᠪᠠ᠂ ᠭᠠᠵᠠᠷ ᠣᠷᠣᠨ ᠤ᠋ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠨᠢ《ᠺᠠᠱᠭᠠᠷ ᠬᠢᠭᠡᠳ᠂ ᠨᠠᠸᠠᠺᠠ ᠶ᠋ᠢᠨ ᠨᠡᠢᠰᠯᠡᠯ ᠬᠣᠲᠠ》 ᠭᠡᠰᠡᠨ ᠨᠡᠷᠡᠢᠳᠦᠯ ᠢ᠋ ᠠᠪᠴᠠᠢ᠃ ᠡᠨᠡ ᠶᠠᠪᠤᠳᠠᠯ ᠨᠢ ᠺᠠᠱᠭᠠᠷ ᠨᠢᠭᠡ ᠦᠶᠡ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠡᠮᠦᠨᠡ ᠬᠡᠰᠡᠭ ᠢ᠋ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠣᠳᠣ ᠲᠣᠭᠮᠣᠺ ᠪᠣᠯᠤᠨ ᠫᠢᠱᠪᠣᠺ ᠤ᠋ᠨ ᠪᠤᠯᠠᠰᠢ ᠨᠤᠭᠤᠳ ᠤ᠋ᠨ ᠳᠣᠲᠣᠷᠠ᠂ ᠬᠠᠷᠠ ᠬᠢᠳᠠᠨ ᠨᠣᠶᠠᠷᠬᠠᠵᠤ ᠪᠠᠢᠭᠰᠠᠨ ᠦᠶᠡ ᠶ᠋ᠢᠨ ᠺᠠᠲ᠋ᠣᠯᠢᠭ ᠱᠠᠰᠢᠨᠲᠠᠨ ᠤ᠋ ᠪᠤᠯᠠᠰᠢ ᠴᠦ᠍ ᠪᠠᠢᠨᠠ᠃ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠰᠢᠨ ᠤ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠢᠯᠠᠯᠲᠠ ᠣᠯᠤᠭᠰᠠᠨ ᠶᠠᠪᠤᠳᠠᠯ ᠨᠢ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠳᠤᠷᠠ ᠦᠭᠡᠢᠴᠡᠯ ᠢ᠋ ᠬᠦᠷᠭᠡᠭᠰᠡᠨ ᠪᠣᠯᠤᠮᠵᠢ ᠶᠡᠬᠡ ᠪᠠᠢᠭᠠ᠃ ᠡᠭᠦᠨ ᠦ᠌ ᠳᠡᠭᠡᠷᠡ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠳ᠋ᠠᠬᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠨᠣᠶᠠᠷᠬᠠᠯ ᠠ᠋ᠴᠠ ᠪᠣᠯᠵᠤ᠂ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠲᠡᠦᠬᠡᠨ ᠳᠡᠭᠡᠷᠡᠬᠢ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠨᠢᠭᠡ ᠤᠳᠠᠭᠠᠨ ᠤ᠋ ᠬᠠᠮᠤᠭ ᠤ᠋ᠨ ᠬᠦᠨᠳᠦ ᠰᠦᠷᠡᠬᠡᠢ ᠪᠣᠰᠤᠯᠭᠠ ᠭᠠᠷᠤᠭᠰᠠᠨ ᠪᠠᠢᠨᠠ᠃
ᠰᠠᠮᠠᠭᠤᠷᠠᠯ ᠡᠭᠦᠰᠦᠮᠡᠭᠴᠡ ᠬᠥᠷ ᠬᠠᠨ ᠲᠡᠭᠦᠨ ᠦ᠌ ᠬᠦᠷᠢᠶᠡ ᠬᠡᠪᠴᠢᠶᠡ ᠪᠣᠯᠤᠨ ᠠᠶᠤᠯᠲᠤ ᠴᠢᠨᠠᠷ ᠢ᠋ ᠣᠯᠵᠤ ᠬᠠᠷᠠᠵᠠᠢ᠃ ᠡᠨᠡ ᠤᠳᠠᠭᠠᠨ ᠤ᠋ ᠤᠷᠪᠠᠯᠭᠠ ᠶ᠋ᠢ ᠺᠦᠰᠲ᠋ᠠᠨᠠ ᠶ᠋ᠢᠨ ᠨᠣᠶᠠᠷᠬᠠᠭᠴᠢ ᠳᠠᠭᠠᠭᠤᠯᠤᠨ ᠡᠭᠦᠰᠬᠡᠪᠡ᠃ ᠬᠥᠷ ᠬᠠᠨ ᠲᠡᠷᠡ ᠳᠣᠣᠷᠠ ᠪᠠᠨ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠢᠰᠯᠠᠮ ᠳᠠᠭᠠᠭᠤᠯᠢ ᠤᠯᠤᠰ ᠤ᠋ᠨ ᠸᠠᠩ ᠠᠷᠰᠯᠠᠨ ᠬᠠᠨ ᠺᠠᠯᠣᠺ ᠢ᠋ ᠰᠡᠵᠢᠭᠯᠡᠵᠦ᠂ ᠲᠡᠭᠦᠨ ᠢ᠋ ᠲᠤᠰᠠᠯᠠᠬᠤ ᠴᠡᠷᠢᠭ ᠢᠷᠡᠭᠦᠯᠵᠦ᠂ ᠳᠠᠢᠰᠤᠨ ᠢ᠋ ᠳᠠᠷᠤᠩᠭᠤᠢᠯᠠᠬᠤ ᠳ᠋ᠤ᠌ ᠣᠷᠣᠯᠴᠠᠭᠲᠤᠨ ᠭᠡᠪᠡ᠃ ᠡᠨᠡ ᠨᠢ ᠲᠡᠭᠦᠨ ᠢ᠋ ᠠᠯᠪᠠᠳᠠᠵᠤ ᠪᠠᠢᠭᠠᠳ ᠡᠰᠡᠬᠦᠯᠡ ᠢᠯᠡ ᠪᠡᠷ ᠤᠷᠪᠠᠯᠭᠠ ᠳ᠋ᠤ᠌ ᠣᠷᠣᠯᠴᠠ᠂ ᠡᠰᠡᠬᠦᠯᠡ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠢ᠋ ᠳᠠᠷᠤᠩᠭᠤᠢᠯᠠ ᠭᠡᠰᠡᠨ ᠰᠠᠨᠠᠭᠠ ᠶᠤᠮ᠃ ᠠᠷᠰᠯᠠᠨ ᠬᠠᠨ ᠬᠡᠷᠪᠡ ᠬᠣᠶᠠᠳᠤᠭᠠᠷ ᠢ᠋ ᠨᠢ ᠰᠣᠩᠭᠣᠬᠤ ᠳ᠋ᠤ᠌ ᠬᠦᠷᠪᠡᠯ ᠬᠥᠷ ᠬᠠᠨ ᠰᠢᠯᠲᠠᠭ ᠡᠷᠢᠵᠦ ᠪᠠᠢᠭᠠᠳ ᠡᠨᠡ ᠬᠦ᠌ ᠠᠶᠤᠯᠲᠤ ᠳᠠᠭᠠᠭᠤᠯᠢ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠸᠠᠩ ᠢ᠋ ᠬᠣᠷᠣᠭᠠᠵᠤ ᠬᠠᠶᠠᠨᠠ᠃ ᠠᠷᠰᠯᠠᠨ ᠬᠠᠨ ᠨᠡᠭᠡᠷᠡᠨ ᠬᠣᠶᠠᠳᠠᠬᠢ ᠵᠠᠮ ᠢ᠋ ᠰᠣᠩᠭᠣᠵᠤ᠂ ᠳᠡᠭᠡᠷᠡ ᠱᠠᠲᠤᠨ ᠤ᠋ ᠪᠠᠨ ᠵᠠᠷᠯᠢᠭ ᠢ᠋ ᠭᠦᠢᠴᠡᠳᠬᠡᠪᠡ᠃ ᠬᠠᠷᠠ ᠬᠢᠳᠠᠨ ᠤᠯᠤᠰ ᠤ᠋ᠨ ᠢᠵᠠᠭᠤᠷᠲᠠᠳ ᠤ᠋ᠨ ᠳᠣᠲᠣᠷᠠ᠂ ᠲᠡᠭᠦᠨ ᠳ᠋ᠦ᠍ ᠨᠢᠭᠡᠨ ᠨᠠᠢᠵᠠ ᠪᠠᠢᠵᠠᠢ᠃ ᠨᠡᠷᠡ ᠨᠢ ᠰᠠᠮᠣᠯ᠂ ᠳ᠋ᠠᠶᠠᠩᠬᠦ᠃ ᠡᠨᠡ ᠨᠠᠢᠵᠠ ᠨᠢ ᠠᠷᠰᠯᠠᠨ ᠬᠠᠨ ᠳ᠋ᠤ᠌ ᠬᠥᠷ ᠬᠠᠨ ᠤ᠋ ᠭᠣᠷᠢᠳᠠᠯᠭᠠ ᠶ᠋ᠢ ᠬᠡᠯᠡᠵᠦ ᠥᠭᠭᠦᠭᠡᠳ᠂ ᠬᠡᠷᠡᠭ ᠪᠦᠲᠦᠭᠰᠡᠭᠡᠷ ᠬᠥᠷ ᠬᠠᠨ ᠲᠠᠨ ᠤ᠋ ᠦᠨᠳᠦᠰᠦ ᠤᠭᠰᠠᠭᠠ ᠶ᠋ᠢ ᠬᠦᠢᠰᠦ ᠲᠡᠮᠲᠡᠷᠢᠨᠡ᠂ ᠡᠢᠮᠦ ᠡᠴᠡ ᠲᠠ ᠦᠷᠡ ᠬᠣᠢᠴᠢᠰ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠨᠠᠨᠳᠢᠩᠨᠠᠳᠠᠭ ᠶᠤᠮ ᠪᠣᠯ ᠬᠥᠷ ᠬᠠᠨ ᠠ᠋ᠴᠠ ᠡᠮᠦᠨᠡ ᠬᠥᠳᠡᠯᠵᠦ᠂ ᠳᠠᠢᠰᠤᠨ ᠢ᠋ ᠳᠠᠷᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠬᠣᠣᠷ ᠤᠤᠭᠤᠵᠤ ᠠᠮᠢ ᠪᠠᠨ ᠬᠣᠷᠣᠭᠠᠭᠲᠤᠨ᠂ ᠢᠩᠭᠢᠪᠡᠯ ᠬᠦᠦ ᠴᠢᠨᠢ ᠬᠠᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠵᠤ ᠴᠢᠳᠠᠨᠠ ᠭᠡᠵᠦ ᠰᠡᠷᠡᠮᠵᠢᠯᠡᠭᠦᠯᠪᠡ᠃ ᠠᠷᠰᠯᠠᠨ ᠬᠠᠨ ᠳ᠋ᠤ᠌ ᠥᠭᠡᠷᠡ ᠶᠠᠪᠤᠬᠤ ᠵᠠᠮ ᠦᠭᠡᠢ ᠲᠤᠯᠠ᠂ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠢᠳᠬᠠᠯ ᠢ᠋ ᠬᠦᠯᠢᠶᠡᠨ ᠠᠪᠴᠠᠢ᠃ ᠰᠠᠮᠣᠯ᠂ ᠳ᠋ᠠᠶᠠᠩᠬᠦ ᠴᠦ᠍ ᠨᠡᠭᠡᠷᠡᠨ ᠠᠷᠰᠯᠠᠨ ᠬᠠᠨ ᠤ᠋ ᠬᠥᠪᠡᠭᠦᠨ ᠢ᠋ ᠪᠦᠲᠦᠮᠵᠢᠲᠡᠢ ᠪᠡᠷ ᠬᠠᠨ ᠰᠠᠭᠤᠷᠢᠨ ᠢ᠋ ᠨᠢ ᠵᠠᠯᠭᠠᠮᠵᠢᠯᠠᠭᠤᠯᠵᠤ᠂ ᠬᠥᠷ ᠬᠠᠨ ᠤ᠋ ᠨᠢᠭᠡ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠪᠠᠷᠠ ᠪᠣᠯᠭᠠᠵᠤ᠂ ᠺᠠᠶᠠᠯᠢᠭ ᠲᠤ᠌ ᠬᠠᠷᠢᠭᠤᠯᠤᠭᠰᠠᠨ ᠪᠠᠢᠨᠠ᠃
ᠡᠴᠦᠰ ᠲᠦ᠍᠂ ᠬᠠᠷᠠ ᠬᠢᠳᠠᠨ ᠤ᠋ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠳᠠᠭᠠᠭᠤᠯᠢ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠤᠷᠪᠠᠯᠭᠠ ᠶ᠋ᠢ ᠳᠠᠷᠤᠩᠭᠤᠢᠯᠠᠬᠤ ᠲᠠᠯᠠ ᠪᠠᠷ ᠪᠦᠷᠢᠨ ᠠᠮᠵᠢᠯᠲᠠ ᠣᠯᠪᠠ᠃ ᠬᠣᠵᠢᠮ ᠨᠢ ᠪᠠᠢᠳᠠᠯ ᠨᠢ ᠬᠤᠪᠢᠷᠠᠯᠲᠠ ᠭᠠᠷᠴᠠᠢ᠂ ᠶᠠᠭᠤ ᠭᠡᠪᠡᠯ ᠲᠡᠳᠡᠨ ᠦ᠌ ᠵᠡᠭᠦᠨ ᠬᠡᠰᠡᠭ ᠦ᠋ᠨ ᠬᠢᠯᠢ ᠨᠢ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠡᠴᠡ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠡᠭᠦᠳᠡᠯᠴᠢᠨ ᠠᠢᠮᠠᠭ ᠲᠤ᠌ ᠡᠵᠡᠯᠡᠭᠳᠡᠵᠡᠢ᠃ ᠡᠨᠡ ᠠᠢᠮᠠᠭ ᠢ᠋ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠬᠦᠴᠦᠷᠬᠡᠭ ᠠᠢᠮᠠᠭ— ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠡᠴᠦᠰ ᠦ᠋ᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠬᠦᠴᠦᠯᠢᠭ ᠳᠠᠭᠠᠭᠤᠯᠤᠭᠰᠠᠨ ᠪᠠᠢᠪᠠ᠃ ᠨᠢᠭᠡ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠦᠴᠦᠯᠢᠭ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠤ᠌ ᠣᠷᠣᠮᠠᠭᠴᠠ(1209 ᠣᠨ ᠣᠷᠴᠢᠮ) ᠬᠥᠷ ᠬᠠᠨ ᠳ᠋ᠤ᠌ ᠣᠷᠣᠵᠤ ᠥᠭᠪᠡ᠃ ᠥᠭᠡᠷᠡ ᠨᠢᠭᠡ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠲᠡᠷᠡ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠲᠦ᠍ ᠣᠯᠵᠠᠯᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠥᠷ ᠬᠠᠨ ᠤ᠋ ᠥᠷᠥᠰᠢᠶᠡᠯ ᠢ᠋ ᠬᠦᠷᠲᠡᠭᠰᠡᠨ ᠪᠠᠢᠪᠠ᠂ ᠬᠥᠷ ᠬᠠᠨ ᠲᠡᠭᠦᠨ ᠦ᠌ ᠠᠢᠮᠠᠭ ᠤᠭᠰᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠢ᠋ ᠬᠣᠷᠢᠶᠠᠨ ᠴᠤᠭᠯᠠᠭᠤᠯᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠵᠡᠢ᠂ ᠭᠡᠲᠡᠯᠡ ᠬᠦᠴᠦᠯᠢᠭ ᠲᠣᠬᠢᠶᠠᠯ ᠢ᠋ ᠦᠵᠡᠵᠦ ᠠᠴᠢᠲᠤ ᠬᠥᠮᠦᠨ ᠡᠴᠡ ᠪᠡᠨ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠪᠠᠢᠨᠠ᠃ ᠵᠦᠸᠡᠢᠨᠢ ᠶ᠋ᠢᠨ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ᠂ ᠬᠦᠴᠦᠯᠢᠭ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠤᠷᠪᠠᠯᠭᠠ ᠭᠠᠷᠭᠠᠭᠴᠢᠳ ᠤ᠋ᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠬᠦᠴᠦᠷᠬᠡᠭ ᠬᠣᠷᠧᠽᠮ ᠸᠠᠩ ᠮᠦᠬᠠᠮᠠᠳ᠋ ᠲᠠᠢ ᠭᠡᠷᠡ ᠲᠣᠭᠲᠠᠵᠤ᠂ ᠬᠡᠨ ᠤᠷᠢᠳ ᠢ᠋ᠶ᠋ᠠᠷ ᠬᠥᠷ ᠬᠠᠨ ᠢ᠋ ᠴᠣᠬᠢᠵᠤ ᠢᠯᠠᠪᠠᠯ ᠲᠡᠷᠡ ᠬᠥᠮᠦᠨ ᠬᠦᠯᠳ᠋ᠵᠡ(ᠣᠳᠣ ᠶ᠋ᠢᠨ ᠢᠯᠢ ᠣᠷᠣᠨ) ᠪᠣᠯᠤᠨ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠰᠠᠪᠠ ᠭᠠᠵᠠᠷ ᠤ᠋ᠨ ᠡᠵᠡᠨ ᠰᠠᠭᠤᠨᠠ ᠭᠡᠪᠡ᠃ ᠡᠨᠡ ᠬᠦ᠌ ᠲᠡᠮᠳᠡᠭᠯᠡᠯ ᠢ᠋ ᠪᠢᠳᠡ ᠢᠲᠡᠭᠡᠬᠦ ᠳ᠋ᠦ᠍ ᠪᠡᠷᠬᠡ ᠪᠠᠢᠨᠠ᠃ ᠨᠠᠰᠠᠸᠢ ᠭᠡᠳᠡᠭ ᠲᠡᠦᠬᠡᠴᠢ ᠬᠣᠷᠧᠽᠮ ᠦ᠋ᠨ ᠣᠷᠳᠣᠨ ᠤ᠋ ᠤᠴᠢᠷ ᠤ᠋ᠳ ᠢ᠋ ᠶᠡᠬᠡ ᠰᠠᠢᠨ ᠮᠡᠳᠡᠳᠡᠭ ᠪᠠᠢᠪᠠ᠃ ᠲᠡᠢᠮᠦ ᠮᠥᠷᠲᠡᠭᠡᠨ ᠮᠦᠬᠠᠮᠠᠳ᠋ ᠤ᠋ᠨ ᠬᠦᠴᠦᠯᠢᠭ ᠦ᠋ᠨ ᠵᠦᠭ ᠢᠯᠡᠭᠡᠭᠰᠡᠨ ᠨᠢᠭᠡ ᠡᠯᠴᠢ ᠲᠡᠢ ᠬᠤᠪᠢ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠵᠠᠢ᠃ ᠲᠡᠷᠡ ᠬᠡᠯᠡᠬᠦ ᠳ᠋ᠡᠭᠡᠨ᠂ ᠬᠦᠴᠦᠯᠢᠭ ᠠᠷᠰᠯᠠᠨ ᠬᠠᠨ ᠤ᠋ ᠬᠥᠪᠡᠭᠦᠨ ᠮᠡᠩᠲᠦ ᠬᠠᠨ ᠺᠡᠷᠯᠤᠺ ᠲᠠᠢ ᠴᠡᠷᠢᠭ ᠬᠣᠯᠪᠣᠭᠠᠯᠠᠬᠤ ᠬᠡᠯᠡᠯᠴᠡᠭᠡᠷ ᠲᠣᠭᠲᠠᠭᠰᠠᠨ ᠲᠡᠳᠦᠢ ᠶᠦᠮ ᠭᠡᠵᠡᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠷᠡ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠤᠷᠪᠠᠯᠭᠠ ᠭᠠᠷᠭᠠᠭᠴᠢᠳ ᠤ᠋ᠨ ᠳᠡᠮᠵᠢᠯᠭᠡ ᠶ᠋ᠢ ᠣᠯᠤᠭᠰᠠᠨ ᠪᠠᠢᠨᠠ᠃ ᠬᠦᠴᠦᠯᠢᠭ ᠬᠥᠷ ᠬᠠᠨ ᠤ᠋ ᠦᠼᠢ᠍ᠭᠠᠨ ᠳ᠋ᠤ᠌ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠡᠳ᠋ ᠡᠷᠳᠡᠨᠢᠰ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠯᠭᠠᠵᠤ ᠠᠪᠤᠪᠠ᠃ ᠡᠭᠦᠨ ᠦ᠌ ᠬᠠᠮᠲᠤ (1210 ᠣᠨ) ᠬᠣᠷᠧᠽᠮ ᠸᠠᠩ ᠪᠣᠯᠤᠨ ᠰᠠᠮᠠᠷᠺᠠᠨᠳ᠋ ᠤ᠋ᠨ ᠦᠲ᠋ᠮᠡᠨ ᠦ᠌ ᠴᠡᠷᠢᠭ ᠬᠣᠯᠪᠣᠭᠠᠯᠠᠵᠤ᠂ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠯᠣ᠌ᠭᠡ ᠲᠠᠯᠠᠰ ᠭᠣᠣᠯ ᠣᠷᠴᠢᠮ ᠤ᠋ᠨ ᠢᠯᠠᠮᠢᠱ ᠤ᠋ᠨ ᠲᠡᠭᠰᠢ ᠲᠠᠯᠠ ᠳ᠋ᠤ᠌ ᠲᠡᠢᠨ ᠬᠢᠪᠡ᠃ ᠠᠯᠢ ᠲᠠᠯᠠ ᠨᠢ ᠳᠡᠢᠯᠦᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠠ ᠬᠢᠳᠠᠨ ᠤ᠋ ᠭᠣᠣᠯ ᠵᠠᠩᠵᠤᠨ ᠳ᠋ᠠᠶᠠᠩᠬᠦ᠂ ᠳᠠᠯᠠᠽᠢ ᠣᠯᠵᠠᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠪᠦᠬᠦ ᠴᠡᠷᠢᠭ ᠨᠢ ᠠᠷᠭᠠ ᠪᠤᠰᠤ ᠬᠣᠢᠰᠢ ᠤᠬᠤᠷᠢᠭᠰᠠᠨ ᠢ᠋ ᠯᠡ ᠮᠡᠳᠡᠵᠦ ᠪᠠᠢᠨᠠ᠃ ᠪᠠᠯᠠᠱᠬᠥ᠋ᠨ ᠣᠷᠴᠢᠮ ᠤ᠋ᠨ ᠰᠠᠭᠤᠭᠠᠯᠢ ᠠᠷᠠᠳ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠴᠡᠷᠢᠭ ᠬᠢᠷᠢ ᠵᠡᠷᠭᠡ ᠪᠦᠷᠢᠨ ᠢᠯᠠᠯᠲᠠ ᠶ᠋ᠢ ᠣᠯᠤᠭᠰᠠᠨ ᠲᠤᠬᠠᠢ ᠬᠡᠲᠦᠷᠬᠡᠢ ᠳᠠᠪᠠᠭᠤᠯᠤᠭᠰᠠᠨ ᠴᠤᠤ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠬᠥᠳᠡᠯᠵᠦ᠂ ᠬᠣᠷᠧᠽᠮ ᠸᠠᠩ ᠤᠳᠠᠯ ᠦᠭᠡᠢ ᠬᠦᠷᠴᠦ ᠢᠷᠡᠨᠡ ᠭᠡᠵᠦ ᠪᠠᠲᠤ ᠢᠲᠡᠭᠡᠭᠡᠳ᠂ ᠬᠣᠲᠠ ᠶ᠋ᠢᠨ ᠬᠠᠭᠠᠯᠭᠠ ᠪᠠᠨ ᠴᠢᠩᠭᠠ ᠳᠠᠷᠤᠭᠠᠳ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠢ᠋ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ᠃ ᠬᠥᠷ ᠬᠠᠨ ᠳ᠋ᠤ᠌ ᠰᠢᠳᠤᠷᠭᠤ ᠦᠢᠯᠡᠴᠢᠯᠡᠳᠡᠭ ᠮᠠᠬᠠᠮᠣᠳ᠋᠂ ᠪᠠᠶᠢ ᠭᠡᠳᠡᠭ ᠪᠠᠶᠠᠨ ᠠᠷᠠᠯᠵᠢᠶᠠᠴᠢᠨ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠᠬᠢ ᠬᠥᠮᠦᠰ ᠢ᠋ ᠪᠠᠭᠤᠵᠤ ᠦᠭᠭᠦᠵᠡᠭᠡᠶᠠ ᠭᠡᠵᠦ ᠢᠳᠬᠠᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ᠃ 16 ᠡᠳᠦᠷ ᠬᠣᠲᠠ ᠶ᠋ᠢ ᠪᠦᠰᠡᠯᠡᠭᠡᠳ ᠡᠴᠦᠰ ᠲᠡᠭᠡᠨ ᠬᠣᠲᠠ ᠶ᠋ᠢ ᠡᠪᠳᠡᠵᠦ᠂ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠭᠤᠷᠪᠠᠨ ᠡᠳᠦᠷ ᠶᠡᠬᠡ ᠪᠡᠷ ᠠᠯᠠᠯᠭᠠ ᠬᠢᠵᠦ᠂ ᠳᠥᠷᠪᠡᠨ ᠲᠦᠮᠡ ᠳᠣᠯᠣᠭᠠᠨ ᠮᠢᠩᠭᠠᠨ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠢ᠋ ᠠᠯᠠᠪᠠ᠃ ᠡᠨᠡ ᠮᠡᠲᠦ ᠪᠡᠷ᠂ ᠬᠣᠷᠧᠽᠮ ᠸᠠᠩ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠬᠦᠰᠡᠯ ᠢ᠋ ᠬᠥᠰᠡᠷᠳᠡᠭᠦᠯᠵᠦ ᠲᠷᠠᠨᠰᠤᠭᠰᠢᠨᠠ ᠬᠣᠲᠠ ᠪᠠᠨ ᠯᠠ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠪᠠ᠃ ᠬᠦᠴᠦᠯᠢᠭ ᠦ᠋ᠨ ᠴᠡᠷᠢᠭ ᠴᠦ᠍ ᠪᠠᠯᠠᠱᠬᠦ᠋ᠨ ᠣᠷᠴᠢᠮ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠲᠦ᠍ ᠢᠯᠠᠭᠳᠠᠪᠠ᠃ ᠬᠥᠷ ᠬᠠᠨ ᠤ᠋ ᠡᠳ᠋ ᠡᠷᠳᠡᠨᠢᠰ ᠬᠠᠷᠠ ᠬᠢᠳᠠᠨ ᠤ᠋ ᠴᠡᠷᠢᠭ ᠦ᠋ᠨ ᠭᠠᠷ ᠲᠤ᠌ ᠣᠷᠣᠵᠠᠢ᠂ ᠬᠥᠷ ᠬᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠡᠳ᠋ ᠡᠷᠳᠡᠨᠢᠰ ᠢ᠋ ᠠᠪᠴᠢᠷᠠᠭᠤᠯᠬᠤ ᠭᠡᠰᠡᠨ ᠳ᠋ᠦ᠍ ᠴᠡᠷᠢᠭ ᠠᠩᠭᠢ ᠨᠢ ᠤᠷᠪᠠᠨ ᠲᠡᠷᠰᠯᠡᠭᠰᠡᠨ ᠪᠠᠢᠨᠠ᠃ ᠬᠦᠴᠦᠯᠢᠭ ᠲᠣᠬᠢᠶᠠᠯ ᠢ᠋ ᠠᠰᠢᠭᠯᠠᠨ ᠤᠷᠪᠠᠭᠰᠠᠨ ᠴᠡᠷᠢᠭ ᠲᠡᠢ ᠬᠠᠮᠰᠠᠭᠰᠠᠨ ᠳ᠋ᠤ᠌ ᠬᠥᠷ ᠬᠠᠨ ᠭᠠᠴᠠᠭᠠᠷᠳᠠᠭᠠᠳ ᠠᠷᠭᠠ ᠪᠤᠰᠤ ᠳᠠᠢᠰᠤᠨ ᠳ᠋ᠠᠭᠠᠨ ᠪᠠᠭᠤᠵᠤ ᠥᠭᠪᠡ᠃ ᠬᠦᠴᠦᠯᠢᠭ ᠨᠢᠭᠤᠷ ᠳᠡᠭᠡᠷᠡ ᠪᠡᠨ ᠬᠥᠷ ᠬᠠᠨ ᠢ᠋ ᠡᠷᠭᠦᠨ ᠬᠦᠨᠳᠦᠯᠡᠵᠦ᠂ ᠬᠣᠶᠠᠷ ᠵᠢᠯ ᠦ᠋ᠨ ᠳᠠᠷᠠᠭᠠ ᠨᠠᠰᠤ ᠨᠥᠭᠴᠢᠬᠦ ᠪᠣᠯᠲᠠᠯᠠ ᠨᠢ ᠲᠡᠷᠡ ᠶᠠᠩᠵᠤ ᠪᠠᠷ ᠨᠢ ᠬᠠᠨ ᠰᠠᠭᠤᠷᠢᠨ ᠳ᠋ᠤᠨᠢ ᠪᠠᠢᠯᠭᠠᠪᠠ᠃
ᠡᠨᠡ ᠪᠦᠬᠦᠢ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠳ ᠶᠡᠬᠡ ᠲᠥᠯᠥᠪ 1212 ᠣᠨ ᠳ᠋ᠤ᠌ ᠭᠠᠷᠴᠠᠢ᠃ ᠡᠭᠦᠨ ᠡᠴᠡ ᠡᠮᠦᠨᠡᠬᠡᠨ ᠦ᠌1211 ᠣᠨ ᠳ᠋ᠤ᠌᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠩᠵᠤᠳ ᠤ᠋ᠨ ᠳᠣᠲᠣᠷᠠᠬᠢ ᠨᠣᠶᠠᠨ ᠬᠤᠪᠢᠯᠠᠢ ᠶ᠋ᠢᠨ ᠳᠠᠭᠠᠭᠤᠯᠤᠭᠰᠠᠨ ᠨᠢᠭᠡᠨ ᠰᠠᠯᠠᠭᠠ ᠮᠣᠩᠭᠣᠯ ᠴᠡᠷᠢᠭ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠤᠮᠠᠷᠠ ᠬᠡᠰᠡᠭ ᠲᠦ᠍ ᠬᠠᠷᠠᠭᠳᠠᠭᠰᠠᠨ ᠪᠠᠢᠨᠠ᠃ ᠠᠷᠰᠯᠠᠨ ᠬᠠᠨ ᠺᠠᠷᠯᠣᠺ (ᠳᠡᠭᠡᠷᠡ ᠳᠤᠷᠠᠳᠴᠤ ᠥᠩᠭᠡᠷᠡᠭᠰᠡᠨ ᠠᠷᠰᠯᠠᠨ ᠬᠠᠨ ᠢ᠋ ᠬᠥᠪᠡᠭᠦᠨ ᠮᠠᠩᠳᠦ ᠬᠠᠨ ᠤ᠋ ᠳᠡᠭᠦᠦ ᠪᠠᠢᠵᠤ ᠮᠡᠳᠡᠨᠡ) ᠺᠠᠶᠠᠯᠢᠭ ᠤ᠋ᠨ ᠬᠠᠷᠠ ᠬᠢᠳᠠᠨ ᠤ᠋ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢ ᠠᠯᠠᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠦᠰᠢᠮᠡᠯ ᠪᠣᠯᠵᠤ ᠳᠠᠭᠠᠭᠰᠠᠨ ᠢ᠋ᠶ᠋ᠠᠨ ᠲᠤᠩᠬᠠᠭᠯᠠᠪᠠ᠃ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠬᠡᠷᠡᠭ ᠡᠳᠦᠬᠦ ᠶᠠᠪᠤᠴᠠ ᠳ᠋ᠤ᠌᠂ ᠬᠦᠯᠳ᠋ᠵᠡ ᠣᠷᠣᠨ ᠳ᠋ᠤ᠌ ᠨᠢᠭᠡᠨ ᠰᠢᠨᠡ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨ ᠪᠠᠢᠨᠠ᠃ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠲᠤ᠌ ᠪᠦᠷᠵᠡᠯ ᠬᠡᠮᠡᠭᠴᠢ ᠪᠡᠷ ᠤᠭ ᠨᠢ ᠬᠤᠷᠰᠢᠶᠠ ᠨᠠᠮ ᠪᠠᠢᠭᠤᠯᠵᠤ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠬᠢᠳᠡᠭ ᠮᠥᠷᠡᠨ ᠦ᠌ ᠬᠤᠯᠠᠭᠠᠢᠴᠢ ᠪᠠᠢᠵᠠᠢ᠂ ᠣᠳᠣ ᠬᠦᠴᠦ ᠲᠡᠩᠬᠡᠭᠡ ᠨᠢ ᠨᠡᠮᠡᠭᠳᠡᠭᠡᠳ ᠡᠨᠡ ᠨᠤᠲᠤᠭ ᠤ᠋ᠨ ᠭᠣᠣᠯ ᠬᠣᠲᠠ ᠪᠣᠯᠬᠤ ᠠᠯᠢᠮᠠᠯ ᠢ᠋ ᠡᠵᠡᠯᠡᠨ ᠠᠪᠴᠤ᠂ ᠥᠪᠡᠷ ᠢ᠋ ᠪᠡᠨ ᠳᠣᠭᠯᠢᠯ ᠬᠠᠨ ᠬᠡᠮᠡᠪᠡ᠃ ᠲᠡᠷᠡ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠡᠷᠬᠡᠰᠢᠶᠡᠭᠳᠡᠬᠦ ᠪᠡᠨ ᠮᠡᠳᠡᠷᠡᠪᠡ᠃
ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨ ᠱᠤᠭᠤᠮ ᠳ᠋ᠤ᠌ ᠢᠯᠠᠯᠲᠠ ᠣᠯᠬᠤ ᠶᠠᠪᠤᠳᠠᠯ ᠳᠤᠮᠳᠠᠳᠤ ᠤᠯᠤᠰ ᠢ᠋ ᠠᠷᠭᠠᠴᠠᠬᠤ ᠤᠴᠢᠷ ᠠ᠋ᠴᠠ ᠪᠣᠯᠵᠤ ᠬᠣᠢᠰᠢᠯᠠᠭᠳᠠᠪᠠ᠃ ᠲᠡᠢᠨ ᠬᠦ᠌ ᠬᠦᠴᠦᠯᠢᠭ ᠬᠠᠷᠠ ᠬᠢᠳᠠᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠪᠠᠭᠤᠷᠢ ᠳᠡᠭᠡᠷᠡ ᠡᠷᠬᠡ ᠪᠡᠨ ᠪᠠᠢᠭᠤᠯᠬᠤ ᠲᠣᠬᠢᠶᠠᠯ ᠲᠠᠢ ᠪᠣᠯᠵᠠᠢ᠃ ᠨᠢᠭᠡ ᠳ᠋ᠦ᠍᠂ ᠲᠡᠷᠡ ᠡᠷᠬᠡᠪᠰᠢ ᠥᠪᠡᠷ ᠦ᠋ᠨ ᠵᠣᠷᠢᠯᠭᠠ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠠᠰᠢᠭᠯᠠᠵᠤ ᠥᠩᠭᠡᠷᠡᠭᠰᠡᠨ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠲᠠᠢ ᠬᠠᠷᠢᠴᠠᠬᠤ ᠬᠡᠷᠡᠭᠲᠡᠢ ᠪᠠᠢᠪᠠ᠃ ᠱᠠᠰᠢᠨ ᠤ᠋ ᠰᠢᠲᠦᠯᠭᠡ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠠᠪᠴᠤ ᠬᠡᠯᠡᠪᠡᠯ᠂ ᠬᠦᠴᠦᠯᠢᠭ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠢ᠋ ᠬᠥᠷ ᠬᠠᠨ ᠰᠢᠭ᠋ ᠵᠢᠭᠰᠢᠳᠡᠭ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠣᠯᠠᠩᠬᠢ ᠬᠥᠮᠦᠰ ᠲᠡᠢ ᠠᠳᠠᠯᠢ ᠪᠠᠷ ᠬᠦᠴᠦᠯᠢᠭ ᠪᠣᠯ ᠺᠠᠲ᠋ᠣᠯᠢᠭ(ᠡᠷᠭᠡᠭᠦᠨ) ᠱᠠᠰᠢᠨ ᠤ᠋ ᠮᠥᠷᠭᠥᠯᠴᠢᠨ ᠪᠠᠢᠭᠰᠠᠨ ᠶᠤᠮ᠂ ᠭᠡᠪᠡᠴᠦ ᠬᠣᠵᠢᠮ ᠨᠢ ᠲᠡᠷᠡ ᠬᠥᠷ ᠬᠠᠨ ᠯᠤᠭᠠ ᠤᠷᠤᠭ ᠤ᠋ᠨ ᠪᠣᠯᠵᠣᠭᠠ ᠲᠣᠭᠲᠠᠵᠤ ᠥᠩᠭᠡᠷᠡᠭᠰᠡᠨ ᠬᠠᠷᠠ ᠬᠢᠳᠠᠨ ᠤ᠋ ᠨᠢᠭᠡᠨ ᠢᠵᠠᠭᠤᠷᠲᠠᠨ ᠪᠦᠰᠡᠭᠦᠢ ᠶ᠋ᠢ ᠳᠠᠭᠠᠵᠤ ᠣᠩᠭᠣᠳ ᠱᠠᠰᠢᠨ(ᠪᠤᠷᠬᠠᠨ ᠱᠠᠰᠢᠨ ᠪᠠᠢᠵᠤ ᠮᠡᠳᠡᠨᠡ) ᠢ᠋ ᠰᠢᠲᠦᠬᠦ ᠪᠣᠯᠪᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠢᠰᠯᠠᠮ ᠤ᠋ᠨ ᠱᠠᠰᠢᠨ ᠤ᠋ ᠬᠥᠳᠡᠯᠭᠡᠭᠡᠨ ᠦ᠌ ᠤᠳᠤᠷᠢᠳᠤᠭᠴᠢ ᠬᠣᠷᠧᠽᠮ ᠸᠠᠩ ᠮᠦᠬᠠᠮᠠᠳ᠋ ᠢ᠋ᠶ᠋ᠠᠷ ᠬᠦᠴᠦᠯᠢᠭ ᠢ᠋ ᠬᠣᠷᠧᠽᠮ ᠦ᠋ᠨ ᠬᠠᠷᠠ ᠬᠢᠳᠠᠨ ᠢ᠋ ᠢᠯᠠᠭᠰᠠᠨ ᠢᠯᠠᠯᠲᠠ ᠶ᠋ᠢ ᠪᠤᠰᠠᠨᠢᠭᠤᠯᠵᠤ᠂ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠡᠳ ᠲᠦ᠍ ᠬᠠᠷᠢᠶᠠᠯᠠᠭᠳᠠᠬᠤ ᠶᠣᠰᠣᠲᠠᠢ ᠢᠯᠠᠯᠲᠠ ᠶ᠋ᠢᠨ ᠦᠷᠡ ᠪᠦᠲᠦᠭᠡᠯ ᠢ᠋ ᠪᠤᠯᠢᠶᠠᠨ ᠠᠪᠠᠴᠢᠯᠠ ᠭᠡᠵᠦ ᠭᠣᠣᠯᠴᠢ ᠪᠤᠰᠤ ᠪᠠᠷ ᠵᠢᠮᠡᠯᠡᠪᠡ᠃ ᠬᠣᠷᠧᠽᠮ ᠸᠠᠩ ᠤ᠋ᠨ ᠬᠦᠴᠦᠯᠢᠭ ᠦ᠋ᠨ ᠵᠦᠭ ᠲᠣᠮᠢᠯᠠᠭᠰᠠᠨ ᠡᠯᠴᠢ ᠨᠠᠷ ᠭᠠᠭᠴᠠ ᠪᠤᠰᠤ ᠤᠳᠠᠭᠠ ᠰᠦᠷᠳᠡᠭᠦᠯᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠣᠳᠠᠲᠠᠢ ᠠᠵᠢᠯᠯᠠᠭᠠ ᠬᠢᠭᠰᠡᠨ ᠦᠭᠡᠢ᠃ ᠬᠣᠷᠧᠽᠮ ᠸᠠᠩ ᠬᠥᠷ ᠬᠠᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠵᠡᠭᠦᠨ ᠬᠡᠰᠡᠭ᠂ ᠴᠢᠨᠠᠭᠰᠢᠯᠠᠭᠠᠳ ᠤᠤᠯ ᠤ᠋ᠨ ᠰᠢᠷ ᠮᠥᠷᠡᠨ ᠦ᠌ ᠪᠠᠷᠠᠭᠤᠨ ᠡᠷᠭᠢ ᠶ᠋ᠢᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠢ᠋ ᠴᠦ᠍ ᠠᠷᠭᠠ ᠪᠤᠰᠤ ᠬᠦᠴᠦᠯᠢᠭ ᠲᠦ᠍ ᠦᠯᠡᠳᠡᠭᠡᠨ ᠥᠭᠴᠡᠢ᠃ ᠡᠨᠡ ᠬᠡᠰᠡᠭ ᠨᠤᠲᠤᠭ ᠢ᠋ ᠨᠢᠭᠡ ᠤᠳᠠᠭᠠ ᠲᠠᠯᠬᠢᠵᠤ ᠥᠩᠭᠡᠷᠡᠭᠰᠡᠨ ᠪᠣᠯᠬᠣᠷ ᠳᠠᠢᠰᠤᠨ ᠨᠢ ᠳᠡᠮᠡᠢ ᠣᠯᠵᠠ ᠣᠯᠤᠭᠠ ᠦᠭᠡᠢ᠃
ᠬᠣᠷᠧᠽᠮ ᠸᠠᠩ ᠮᠦᠬᠠᠮᠠᠳ᠋ ᠬᠦᠴᠦᠯᠢᠭ ᠦ᠋ᠨ ᠵᠡᠭᠦᠨ ᠳᠦᠷᠺᠢᠰᠲ᠋ᠠᠨ ᠳ᠋ᠤ᠌ ᠡᠷᠬᠡ ᠪᠡᠨ ᠪᠠᠲᠤᠳᠬᠠᠬᠤ ᠶ᠋ᠢ ᠪᠦᠷ ᠬᠣᠷᠢᠭᠯᠠᠵᠤ ᠳᠡᠢᠯᠬᠦ ᠪᠡᠨ ᠪᠣᠯᠢᠪᠠ᠃ ᠡᠨᠡ ᠬᠡᠰᠡᠭ ᠭᠠᠵᠠᠷ ᠲᠤ᠌ ᠬᠦᠴᠦᠯᠢᠭ ᠠᠯᠪᠠᠨ ᠶᠣᠰᠣᠭᠠᠷ ᠳᠠᠢᠯᠠᠨ ᠳᠠᠭᠠᠭᠤᠯᠬᠤ ᠠᠷᠭᠠ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠭᠤᠷᠪᠠ ᠳᠥᠷᠪᠡᠨ ᠵᠢᠯ ᠦ᠋ᠨ ᠲᠤᠷᠰᠢ ᠬᠤᠷᠢᠶᠠᠯᠲᠠ ᠠᠪᠬᠤ ᠦᠶᠡ ᠪᠡᠷ ᠴᠡᠷᠢᠭ ᠬᠥᠳᠡᠯᠦᠨ ᠳᠠᠭᠠᠷᠢᠯᠲᠠ ᠬᠢᠳᠡᠭ ᠪᠠᠢᠪᠠ᠂ ᠲᠡᠢᠨ ᠬᠦ᠌ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠲᠠᠯᠬᠢᠭᠳᠠᠭᠰᠠᠨ ᠠᠷᠠᠳ ᠡᠴᠦᠰ ᠲᠡᠭᠡᠨ ᠲᠡᠭᠦᠨ ᠳ᠋ᠦ᠍ ᠪᠠᠭᠤᠨ ᠥᠭᠴᠡᠢ᠃ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠮᠤᠵᠢᠭᠤᠳᠠ ᠡᠰᠡᠷᠭᠦᠴᠡᠯ ᠳ᠋ᠦ᠍ ᠬᠠᠷᠢᠭᠤ ᠠᠷᠭᠠ ᠠᠪᠴᠤ᠂ ᠲᠡᠷᠡ ᠪᠡᠷ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠢ᠋ ᠡᠭᠡᠯᠵᠢ ᠪᠡᠷ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ᠂ ᠲᠡᠳᠡᠨ ᠢ᠋ ᠢᠰᠦ᠋ᠰ ᠪᠤᠶᠤ ᠪᠤᠷᠬᠠᠨ ᠢ᠋ ᠰᠢᠲᠦᠭᠲᠦᠨ ᠭᠡᠵᠦ ᠤᠷᠢᠶᠠᠯᠠᠪᠠ᠂ ᠡᠰᠡᠬᠦᠯᠡ ᠤᠤᠯ ᠰᠢᠲᠦᠭᠡᠨ ᠢ᠋ᠶ᠋ᠡᠨ ᠣᠷᠬᠢᠭᠲᠤᠨ ᠭᠡᠵᠦ ᠲᠤᠩᠬᠠᠭᠯᠠᠭᠠᠳ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠠᠶᠢᠭ ᠤ᠋ᠨ ᠬᠤᠪᠴᠠᠰᠤ ᠡᠮᠦᠰᠬᠡᠬᠦ ᠭᠡᠪᠡ᠃ ᠡᠨᠡ ᠵᠣᠷᠢᠯᠭᠠ ᠳ᠋ᠠᠭᠠᠨ ᠬᠦᠷᠬᠦ ᠶ᠋ᠢᠨ ᠲᠥᠯᠥᠭᠡ᠂ ᠲᠡᠷᠡ ᠯᠦᠶᠢ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠦ᠋ᠨ《ᠯᠤᠤᠲᠤ ᠮᠣᠷᠢᠲᠤ ᠴᠡᠷᠢᠭ》 ᠦ᠋ᠨ ᠬᠢ ᠰᠢᠭ ᠠᠷᠭᠠ ᠶ᠋ᠢ ᠠᠪᠴᠠᠢ᠂ ᠲᠤᠬᠠᠢᠯᠠᠪᠠᠯ ᠬᠦᠴᠦᠯᠢᠭ ᠦ᠋ᠨ ᠴᠡᠷᠢᠭ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠵᠤ ᠰᠠᠭᠤᠭᠠᠳ ᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠦᠭᠡᠢ ᠬᠥᠮᠦᠰ ᠢ᠋ ᠵᠠᠯᠬᠠᠭᠠᠨ ᠰᠢᠳᠬᠡᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠪᠡ᠃ ᠲᠡᠢᠨ ᠬᠦ᠌ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠢᠯᠡ ᠪᠡᠷ ᠨᠠᠮᠠᠨᠴᠢᠯᠠᠬᠤ ᠪᠠ ᠨᠣᠮ ᠤᠩᠰᠢᠬᠤ ᠶᠠᠪᠤᠳᠠᠯ ᠨᠢᠭᠡ ᠦᠶᠡ ᠪᠦᠷᠢᠮᠦᠰᠦᠨ ᠵᠣᠭᠰᠣᠭᠰᠠᠨ ᠪᠠᠢᠨᠠ᠃
ᠬᠦᠴᠦᠯᠢᠭ ᠤᠯᠤᠰ ᠤ᠋ᠨ ᠬᠢᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠭᠦᠨ ᠬᠣᠢᠲᠤ ᠬᠡᠰᠡᠭ ᠲᠦ᠍ ᠨᠢᠭᠡ ᠤᠳᠠᠭᠠ ᠠᠪᠠ ᠬᠢᠵᠦ ᠪᠠᠢᠭᠠᠳ ᠲᠣᠬᠢᠶᠠᠯ ᠢ᠋ ᠦᠵᠡᠨ ᠪᠦᠷᠵᠡᠯ ᠢ᠋ ᠪᠠᠷᠢᠪᠴᠢᠯᠠᠨ ᠠᠯᠠᠭᠠᠳ ᠠᠯᠢᠮᠠᠯ ᠬᠣᠲᠠ ᠶ᠋ᠢ ᠪᠦᠰᠡᠯᠡᠨ ᠬᠠᠭᠠᠪᠠ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠡᠨᠡ ᠠᠵᠢᠯᠯᠠᠭᠠ ᠨᠢ ᠬᠣᠷᠢᠬᠯᠠᠭᠳᠠᠵᠢ᠂ ᠮᠣᠩᠭᠣᠯᠴᠤᠳ1217 ᠣᠨ ᠳ᠋ᠤ᠌ ᠪᠠᠷᠠᠭᠤᠨᠰᠢ ᠬᠢᠬᠦ ᠲᠡᠢᠨ ᠢ᠋ᠶ᠋ᠡᠨ ᠳᠠᠬᠢᠨ ᠰᠡᠷᠭᠦᠭᠡᠭᠰᠡᠨ ᠪᠠᠢᠨᠠ᠃1218 ᠣᠨ ᠳ᠋ᠤ᠌᠂ ᠵᠡᠪᠡ ᠨᠣᠶᠠᠨ ᠬᠣᠶᠠᠷ ᠲᠦᠮᠡᠨ ᠬᠥᠮᠦᠨ ᠲᠡᠢ ᠨᠢᠭᠡᠨ ᠰᠠᠯᠠᠭᠠ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠪᠠᠷᠠᠭᠤᠨᠰᠢ ᠬᠦᠴᠦᠯᠢᠭ ᠢ᠋ ᠴᠣᠬᠢᠪᠠ᠃ ᠬᠦᠴᠦᠯᠢᠭ ᠦ᠋ᠨ ᠴᠡᠷᠢᠭ ᠠᠯᠢᠮᠠᠯ ᠬᠣᠲᠠ ᠶ᠋ᠢ ᠪᠦᠰᠡᠯᠡᠬᠦ ᠪᠠᠨ ᠪᠣᠯᠢᠵᠤ ᠬᠣᠢᠰᠢ ᠤᠬᠤᠷᠢᠪᠠ᠃ ᠵᠡᠪᠡ ᠨᠣᠶᠠᠨ ᠠᠯᠢᠮᠠᠯ ᠬᠣᠲᠠ ᠳ᠋ᠤ᠌ ᠪᠦᠷᠵᠡᠯ ᠦ᠋ᠨ ᠬᠥᠪᠡᠭᠦᠨ ᠰᠤᠨᠠ᠂ ᠳᠠᠵᠢᠨ ᠢ᠋ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠯᠭᠠᠪᠠ᠃ ᠮᠣᠩᠭᠣᠯ ᠵᠠᠩᠵᠤᠨ ᠨᠣᠶᠠᠳ ᠬᠦᠴᠦᠯᠢᠭ ᠦ᠋ᠨ ᠡᠵᠡᠯᠡᠵᠦ ᠪᠠᠢᠭᠰᠠᠨ ᠣᠷᠣᠨ ᠳ᠋ᠤ᠌ ᠣᠷᠣᠮᠠᠭᠴᠠ ᠱᠠᠰᠢᠨ ᠰᠢᠲᠦᠯᠭᠡ ᠶ᠋ᠢᠨ ᠪᠦᠷᠢᠨ ᠡᠷᠬᠡ ᠴᠢᠯᠥᠭᠡ ᠲᠡᠢ ᠭᠡᠵᠦ ᠲᠤᠩᠬᠠᠭᠯᠠᠵᠠᠢ᠃ ᠡᠢᠨ ᠬᠦ᠌ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠤ᠋ᠨ ᠪᠣᠰᠤᠯᠴᠠᠨ᠂ ᠢᠲᠡᠭᠡᠯ ᠪᠢᠰᠢᠷᠡᠯ ᠢ᠋ ᠨᠢ ᠳᠠᠷᠤᠩᠭᠤᠢᠯᠠᠳᠠᠭ ᠡᠲᠡᠭᠡᠳ ᠢ᠋ᠶ᠋ᠡᠨ ᠡᠰᠡᠷᠭᠦᠴᠡᠬᠦ ᠶ᠋ᠢ ᠶᠡᠬᠡ ᠪᠡᠷ ᠵᠣᠷᠢᠭᠵᠢᠭᠤᠯᠤᠭᠰᠠᠨ ᠪᠠᠢᠨᠠ᠃ ᠬᠦᠴᠦᠯᠢᠭ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠣᠷᠣᠨ ᠤ᠋ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠰᠡᠷᠭᠡᠢᠯᠡᠬᠦ ᠪᠡᠬᠢᠯᠡᠯᠲᠡ ᠪᠠᠷᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠪᠦᠲᠦᠭᠰᠡᠨ ᠦᠭᠡᠢ᠂ ᠺᠠᠱᠠᠭᠠᠷ ᠲᠤ᠌ ᠳᠤᠲᠠᠭᠠᠨ ᠣᠳᠴᠠᠢ᠃ ᠮᠣᠩᠭᠣᠯᠴᠤᠳ ᠪᠠᠯᠠᠱᠬᠦ᠋ᠨ ᠢ᠋ ᠡᠵᠡᠯᠡᠬᠦ ᠳ᠋ᠦ᠍ ᠪᠠᠷᠤᠭ ᠶᠠᠮᠠᠷᠴᠤ ᠡᠰᠡᠷᠭᠦᠴᠡᠯ ᠤᠴᠠᠷᠠᠭᠠ ᠦᠭᠡᠢ᠃ ᠶᠠᠭᠤ ᠭᠡᠪᠡᠯ ᠮᠣᠩᠭᠣᠯᠴᠤᠳ ᠡᠨᠡ ᠬᠣᠲᠠ ᠳ᠋ᠤ᠌ ᠬᠡᠪᠯᠢᠭ (《ᠰᠠᠢᠨ ᠬᠣᠲᠠ》) ᠭᠡᠰᠡᠨ ᠨᠡᠷᠡ ᠥᠭᠭᠦᠭᠰᠡᠨ ᠪᠠᠢᠨᠠ᠃ ᠡᠢᠮᠦ ᠨᠡᠷᠡ ᠶ᠋ᠢ ᠳᠤᠷᠠᠲᠠᠢ ᠪᠠᠭᠤᠵᠤ ᠥᠭᠭᠦᠭᠰᠡᠨ ᠬᠣᠲᠠ ᠪᠠᠯᠭᠠᠳ ᠲᠤ᠌ ᠯᠠ ᠥᠭᠳᠡᠭ ᠪᠠᠢᠵᠠᠢ᠃ ᠺᠠᠱᠠᠭᠠᠷ ᠣᠷᠣᠨ ᠳ᠋ᠤ᠌᠂ ᠢᠰᠯᠠᠮ ᠤ᠋ᠨ ᠱᠠᠰᠢᠨᠲᠠᠳ ᠪᠣᠰᠤᠯᠴᠠᠭᠠᠳ ᠬᠦᠴᠦᠯᠢᠭ ᠦ᠋ᠨ ᠲᠣᠮᠢᠯᠠᠵᠤ ᠭᠡᠷ ᠲᠦ᠍ ᠨᠢ ᠰᠠᠭᠤᠯᠭᠠᠭᠰᠠᠨ ᠴᠡᠷᠢᠭ ᠦ᠋ᠳ ᠢ᠋ ᠶᠡᠬᠡ ᠪᠡᠷ ᠠᠯᠠᠵᠤ ᠬᠢᠳᠤᠪᠠ᠃ ᠲᠡᠷᠡᠴᠢᠯᠡᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠠᠪᠤᠷᠠᠭᠴᠢ ᠪᠠᠨ ᠪᠣᠯᠭᠠᠵᠤ ᠤᠭᠲᠤᠨ ᠠᠪᠴᠠᠢ᠃ ᠲᠡᠳᠡ ᠨᠠᠷ ᠮᠣᠩᠭᠣᠯ ᠴᠡᠷᠢᠭ ᠪᠣᠯᠪᠠᠰᠤᠷᠠᠯ ᠰᠠᠢᠲᠠᠢ ᠪᠥᠭᠡᠳ ᠡᠩᠬᠡ ᠲᠠᠢᠪᠤᠭᠤᠨ ᠠᠵᠤ ᠲᠥᠷᠥᠵᠦ ᠪᠠᠢᠭᠠ ᠰᠠᠭᠤᠭᠠᠯᠢ ᠠᠷᠠᠳ ᠲᠤ᠌ ᠣᠭᠲᠣᠬᠠᠨ ᠴᠦ᠍ ᠬᠣᠣᠷ ᠦᠭᠡᠢ ᠤᠴᠢᠷ ᠲᠤ᠌ ᠶᠡᠬᠡ ᠲᠠᠯᠠᠷᠬᠠᠳᠠᠭ ᠪᠠᠢᠪᠠ᠃ ᠬᠦᠴᠦᠯᠢᠭ ᠰᠡᠯᠢᠬᠡᠯ(ᠰᠡᠯᠬᠢᠬᠣᠨ ᠴᠤ᠌ ᠭᠡᠳᠡᠭ) ᠲᠦ᠍ ᠳᠤᠲᠠᠭᠠᠨ ᠬᠦᠷᠦᠭᠡᠳ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠨ ᠠᠯᠠᠭᠳᠠᠪᠠ᠃
— — — —
① ᠬᠢᠲᠠᠳᠴᠢᠯᠠᠭᠴᠢ ᠶ᠋ᠢᠨ ᠴᠣᠬᠣᠯᠠᠪᠤᠷᠢ᠄ ᠡᠨᠡ ᠪᠠᠳᠠᠭ ᠦᠭᠡ ᠶ᠋ᠢᠨ ᠬᠣᠶᠠᠷ ᠵᠦᠢᠯ ᠢ᠋ ᠣᠨᠴᠠᠭᠠᠢ ᠬᠦᠨᠳᠦᠳᠬᠡᠵᠦ ᠦᠵᠡᠬᠦ ᠬᠡᠷᠡᠭᠲᠡᠢ᠃
a. ᠪᠠᠷᠲ᠋ᠤᠯᠳ᠋ ᠬᠡᠯᠡᠬᠦ ᠳ᠋ᠡᠭᠡᠨ᠄《 ᠭᠢᠲᠠᠨᠴᠤᠳ ᠪᠠᠷᠠᠭᠤᠨᠰᠢ ᠨᠡᠭᠦᠬᠦ ᠳ᠋ᠡᠭᠡᠨ ᠬᠣᠶᠠᠷ ᠱᠤᠭᠤᠮ ᠢ᠋ᠶ᠋ᠠᠷ ᠵᠠᠮᠨᠠᠵᠠᠢ》 ᠭᠡᠪᠡ᠃ ᠡᠨᠡ ᠦᠭᠡ ᠲᠤᠢᠯ ᠤ᠋ᠨ ᠦᠨᠡ ᠴᠠᠨᠠ ᠲᠠᠢ ᠶᠤᠮ᠂ ᠡᠭᠦᠨ ᠡᠴᠡ ᠶᠠᠫᠣᠨ ᠡᠷᠳᠡᠮᠲᠡᠨ ᠬᠠᠨ᠋ᠸᠳᠠ ᠲᠦᠦᠷᠣ᠋ ᠪᠣᠯᠤᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠡᠷᠳᠡᠮᠲᠡᠨ ᠯᠢᠶᠠᠩ ᠶᠤᠸᠠᠨ ᠳ᠋ᠦᠩ ᠨᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠮᠠᠷᠭᠤᠭᠠᠨ ᠢ᠋ ᠰᠡᠢᠳᠪᠤᠷᠢᠯᠡᠵᠤ ᠪᠣᠯᠤᠨᠠ᠃
b. ᠭᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠬᠠᠷᠠ ᠬᠢᠳᠠᠨ ᠢ᠋ ᠡᠭᠦᠰᠬᠡᠨ ᠪᠠᠢᠭᠤᠯᠤᠭᠴᠢ ᠪᠣᠯᠤᠨ ᠳᠠᠰᠢ ᠨᠢᠭᠡ ᠬᠥᠮᠦᠨ ᠮᠥᠨ ᠡᠰᠡᠬᠦ ᠶ᠋ᠢᠨ ᠲᠤᠬᠠᠢ ᠰᠡᠵᠢᠭᠯᠡᠯ ᠢ᠋ ᠨᠠᠢᠳᠠᠪᠤᠷᠢᠵᠢᠭᠤᠯᠬᠤ ᠳ᠋ᠤ᠌ ᠲᠤᠩ ᠪᠡᠷᠬᠡ᠃ ᠶᠠᠭᠤ ᠭᠡᠪᠡᠯ ᠰᠡᠩᠭᠢᠷ ᠰᠤᠯᠲᠠᠨ ᠬᠠᠯᠢᠹᠠ ᠪᠣᠯᠤᠨ ᠵᠢᠳᠳᠠ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠤ᠌ ᠥᠭᠭᠦᠭᠰᠡᠨ ᠵᠠᠬᠢᠳᠠᠯ ᠤ᠋ᠨ ᠣᠨ ᠵᠢᠯ ᠢ᠋ ᠲᠡᠮᠳᠡᠭᠯᠡᠬᠦ ᠳ᠋ᠡᠭᠡᠨ ᠪᠠᠷᠲ᠋ᠤ᠌ᠯᠳ᠋ ᠤ᠋ᠨ ᠨᠣᠮ ᠳ᠋ᠤ᠌ ᠨᠢᠭᠡ ᠤᠳᠠᠭᠠ 1133 ᠣᠨ ᠭᠡᠵᠦ ᠲᠡᠮᠳᠡᠭᠯᠡᠭᠡᠳ ᠪᠠᠰᠠ ᠨᠢᠭᠡ ᠤᠳᠠᠭᠠ 1135 ᠣᠨ ᠭᠡᠵᠦ ᠲᠡᠮᠳᠡᠭᠯᠡᠵᠡᠢ᠃ ᠵᠠᠬᠢᠳᠠᠯ ᠤ᠋ᠨ ᠠᠭᠤᠯᠭᠠ ᠶ᠋ᠢᠨ ᠲᠤᠬᠠᠢ ᠪᠠᠷᠲ᠋ᠤ᠌ᠯᠳ᠋ ᠤ᠋ᠨ ᠨᠣᠮ ᠳ᠋ᠤ᠌ ᠨᠢᠭᠡ ᠤᠳᠠᠭᠠ ᠬᠡᠯᠡᠬᠦ ᠳ᠋ᠡᠭᠡᠨ ᠬᠠᠷᠠ ᠬᠢᠳᠠᠨ ᠤ᠋ ᠲᠦᠷᠦᠭᠦᠦ ᠣᠯᠵᠠᠯᠠᠭᠳᠠᠪᠠ ᠭᠡᠰᠡᠨ ᠢ᠋ᠶ᠋ᠡᠨ ᠥᠭᠡᠷᠡ ᠶᠠᠩᠵᠤ ᠪᠠᠷ ᠬᠡᠯᠡᠬᠦ ᠳ᠋ᠡᠭᠡᠨ ᠠᠯᠠᠭᠳᠠᠪᠠ ᠭᠡᠪᠡ᠃ ᠡᠨᠡ ᠬᠦ᠌ ᠶᠡᠬᠡ ᠵᠦᠷᠢᠶᠡᠨ ᠲᠡᠢ ᠵᠠᠬᠢᠳᠠᠯ ᠢ᠋ ᠦᠨᠳᠦᠰᠦᠯᠡᠨ ᠳᠠᠰᠢ ᠶ᠋ᠢᠨ ᠣᠷᠣᠰᠢᠵᠤ ᠪᠠᠢᠭᠰᠠᠨ ᠡᠰᠡᠬᠦ ᠶ᠋ᠢ ᠰᠡᠵᠢᠭᠯᠡᠬᠦ ᠨᠢ ᠪᠠᠷᠢᠮᠲᠠ ᠪᠠᠷ ᠳᠤᠲᠠᠮᠠᠭ ᠶᠤᠮ᠃
② ᠲᠤᠭᠤᠷᠪᠢᠭᠰᠠᠨ ᠨᠣᠮ ᠤ᠋ᠨ ᠨᠡᠷᠡ ᠨᠢ《ᠪᠤᠬᠠᠷ ᠤ᠋ᠨ ᠲᠡᠦᠬᠡ ᠪᠠ ᠭᠠᠵᠠᠷ ᠵᠦᠢ》᠃ ᠲᠤᠰ ᠨᠣᠮ ᠳ᠋ᠤ᠌ ᠨᠤᠲᠠᠯᠠᠭᠰᠠᠨ ᠭᠢᠳᠠᠨᠴᠤᠳ ᠤ᠋ᠨ ᠠᠩᠬᠠᠳᠠᠭᠴᠢ ᠨᠡᠭᠦᠭᠰᠡᠨ ᠣᠨ ᠵᠢᠯ ᠨᠢ ᠶᠡᠬᠡ ᠲᠥᠯᠥᠪ ᠤᠮᠠᠷᠠᠲᠤ ᠰᠥᠩ ᠤᠯᠤᠰ ᠤ᠋ᠨ ᠷᠸᠨ ᠽᠦᠩ ᠬᠠᠭᠠᠨ ᠤ᠋ ᠴᠢᠩ ᠯᠢ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠪᠣᠯᠤᠨᠠ(ᠡᠨᠡ ᠨᠣᠮ 1892 ᠣᠨ ᠳ᠋ᠤ᠌ ᠫᠠᠷᠢᠰ ᠲᠤ᠌ ᠬᠡᠪᠯᠡᠭᠳᠡᠪᠡ)(ᠤᠤᠯ ᠲᠠᠢᠯᠪᠤᠷᠢ)