ᠵᠠᠷᠠᠭᠠ ᠬᠠᠳᠤᠭᠤᠷ ᠪᠣᠳᠣᠵᠤ ᠣᠯᠤᠭᠰᠠᠨ ᠨᠢZaraa khaduur bodoj olson niЗараа хадуур бодож олсон нь
2205ᠵᠠᠷᠠᠭᠠ ᠬᠠᠳᠤᠭᠤᠷ ᠪᠣᠳᠣᠵᠤ ᠣᠯᠤᠭᠰᠠᠨ ᠨᠢ
ᠳᠣᠮᠣᠭ ᠦᠯᠢᠭᠡᠷ
ᠡᠷᠲᠡ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠬᠥᠮᠦᠰ ᠠᠮᠢᠲᠠᠨ ᠤ᠋ ᠠᠳᠠᠯᠢ ᠡᠪᠡᠰᠦ ᠢᠳᠡᠳᠡᠭ ᠪᠠᠢᠵᠠᠢ ᠭᠡᠨᠡ᠃ ᠬᠥᠮᠦᠨ ᠣᠯᠠᠨ ᠪᠣᠯᠵᠤ ᠢᠳᠡᠬᠦ ᠡᠪᠡᠰᠦ ᠨᠢ ᠤᠯᠠᠮ ᠯᠠ ᠪᠠᠭᠠ ᠪᠣᠯᠤᠭᠠᠳ ᠪᠠᠢᠬᠤ ᠪᠠᠷ ᠨᠢ ᠨᠢᠭᠡ ᠤᠳᠠᠭᠠ ᠠᠮᠢᠲᠠᠳ ᠲᠣᠮᠣ ᠬᠤᠷᠠᠯ ᠬᠢᠵᠦ᠂ ᠪᠢᠳᠡ ᠥᠯᠥᠰᠴᠦ ᠪᠠᠢᠨᠠ᠂ ᠪᠢᠳᠡ ᠥᠯᠥᠰᠴᠦ ᠬᠠᠨᠤᠯᠠ᠃ ᠣᠳᠣ ᠠ᠋ᠴᠠ ᠡᠬᠢᠯᠡᠨ ᠬᠥᠮᠦᠨ ᠡᠪᠡᠰᠦ ᠢᠳᠡᠬᠦ ᠶᠣᠰᠣ ᠦᠭᠡᠢ ᠭᠡᠵᠦ ᠰᠢᠢᠳᠴᠡᠢ᠃ ᠢᠩᠭᠢᠭᠡᠳ ᠬᠥᠮᠦᠰ ᠭᠠᠵᠠᠷ ᠬᠠᠭᠠᠯᠤᠨ ᠰᠢᠷᠠ᠂ ᠴᠠᠭᠠᠨ ᠪᠤᠳᠠᠭᠠ᠂ ᠠᠷᠪᠠᠢ ᠪᠤᠭᠤᠳᠠᠢ ᠲᠠᠷᠢᠵᠠᠢ᠃ ᠭᠡᠲᠡᠯᠡ ᠪᠤᠭᠤᠳᠠᠢ ᠤᠷᠭᠤᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠶᠡᠬᠡ ᠤᠷᠭᠤᠴᠠ ᠶ᠋ᠢ ᠶᠠᠭᠠᠬᠢᠵᠤ ᠬᠤᠷᠢᠶᠠᠬᠤ ᠪᠠᠨ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠠᠢ ᠭᠡᠨᠡ᠃ ᠲᠡᠷᠡ ᠴᠠᠭ ᠲᠤ᠌ ᠬᠥᠮᠦᠨ ᠪᠠ ᠠᠷᠢᠶᠠᠲᠠᠨ ᠠᠮᠢᠲᠠᠳ ᠨᠢᠭᠡ ᠬᠠᠭᠠᠨ ᠲᠠᠢ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ ᠬᠠᠭᠠᠨ᠂ ᠬᠥᠮᠦᠨ᠂ ᠠᠷᠢᠶᠠᠲᠠᠨ ᠠᠮᠢᠲᠠᠳ᠂ ᠵᠢᠭᠦᠷᠲᠡᠨ ᠰᠢᠪᠠᠭᠤ ᠪᠦᠭᠦᠳᠡ ᠶ᠋ᠢ ᠨᠢ ᠣᠷᠳᠣᠨ ᠳ᠋ᠤ᠌ ᠪᠠᠨ ᠴᠤᠭᠯᠠᠭᠤᠯᠤᠨ ᠡᠢᠨᠬᠦ ᠠᠢᠯᠠᠳᠴᠤ ᠭᠡᠨᠡ᠃ ᠤᠷᠭᠤᠴᠠ ᠬᠤᠷᠢᠶᠠᠬᠤ ᠴᠠᠭ ᠪᠣᠯᠤᠯᠠ᠂ ᠭᠡᠲᠡᠯᠡ ᠪᠢᠳᠡ ᠶᠠᠭᠠᠬᠢᠵᠤ ᠬᠤᠷᠢᠶᠠᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠬᠠᠷᠢᠨ ᠲᠠᠨᠠᠷ ᠤ᠋ᠨ ᠨᠢᠭᠡ ᠨᠢ ᠡᠨᠡ ᠠᠷᠪᠠᠢ ᠪᠤᠳᠠᠭᠠ ᠶ᠋ᠢ ᠶᠠᠭᠠᠬᠢᠵᠤ ᠬᠤᠷᠢᠶᠠᠬᠤ ᠠᠷᠭᠠ ᠶ᠋ᠢ ᠮᠡᠳᠡᠳᠡᠭ ᠪᠣᠯ ᠬᠡᠯᠡᠵᠦ ᠥᠭᠴᠦ ᠪᠣᠯᠤᠨᠠ ᠳᠠ ᠭᠡᠵᠡᠢ᠃ ᠭᠡᠪᠡᠴᠦ ᠬᠥᠮᠦᠨ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠦ᠌ ᠬᠡᠨ ᠨᠢ ᠴᠦ᠍ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠂ ᠡᠴᠦᠰ ᠲᠦ᠍ ᠨᠢ ᠨᠢᠭᠡ ᠡᠪᠦᠭᠡᠨ ᠤᠷᠤᠭᠰᠢ ᠭᠠᠷᠴᠤ ᠢᠷᠡᠭᠡᠳ᠂
— ᠪᠢᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠠᠭᠠᠨ ᠲᠠᠨ ᠤ᠋ ᠳᠠᠭᠤᠳᠠᠯᠭᠠ ᠪᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠪᠢᠳᠡᠨ ᠦ᠌ ᠳᠤᠮᠳᠠ ᠭᠠᠭᠴᠠ ᠵᠠᠷᠠᠭᠠ ᠯᠠ ᠠᠯᠠᠭᠠ᠂ ᠲᠡᠷᠡ ᠯᠠᠪ ᠵᠥᠪᠯᠡᠯᠭᠡ ᠥᠭᠴᠦ ᠴᠢᠳᠠᠬᠤ ᠪᠠᠢᠬᠠ ᠭᠡᠵᠦ᠂ ᠵᠠᠷᠠᠭᠠ ᠶᠡᠬᠡ ᠠᠮᠠᠷᠬᠠᠨ ᠭᠣᠮᠣᠳᠠᠳᠠᠭ ᠠᠮᠢᠲᠠᠨ ᠭᠡᠳᠡᠭ ᠢ᠋ ᠪᠢᠳᠡᠨ ᠮᠠᠷᠲᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠷᠪᠡ ᠲᠠᠨᠠᠷ ᠲᠡᠭᠦᠨ ᠢ᠋ ᠢᠷᠡᠬᠦ ᠳ᠋ᠦ᠍ ᠱᠣᠣᠯᠠᠵᠤ ᠢᠨᠢᠶᠡᠬᠦ ᠶᠦᠮ ᠪᠣᠯ ᠲᠡᠷᠡ ᠭᠣᠮᠣᠳᠠᠵᠤ ᠠᠭᠤᠷᠯᠠᠭᠠᠳ ᠪᠢᠳᠡᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠥᠭᠬᠦ ᠦᠭᠡᠢ᠃
ᠢᠩᠭᠢᠭᠡᠳ ᠬᠠᠭᠠᠨ ᠵᠠᠷᠠᠭᠠ ᠶ᠋ᠢ ᠣᠯᠵᠤ ᠢᠷᠡᠬᠦ ᠶ᠋ᠢ ᠲᠤᠰᠢᠶᠠᠵᠤ ᠡᠯᠴᠢ ᠡᠯᠡᠭᠡᠵᠦ ᠭᠡᠨᠡ᠃ ᠡᠯᠴᠢ ᠵᠠᠷᠠᠭᠠ ᠶ᠋ᠢ ᠡᠷᠢᠵᠦ ᠣᠯᠤᠭᠠᠳ ᠳᠠᠭᠠᠭᠤᠯᠵᠤ ᠢᠷᠡᠬᠦ ᠵᠠᠮ ᠳ᠋ᠠᠭᠠᠨ ᠬᠠᠭᠠᠨ ᠶᠠᠭᠠᠬᠢᠬᠤ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠤᠴᠢᠷ ᠢ᠋ ᠲᠡᠭᠦᠨ ᠳ᠋ᠦ᠍ ᠶᠠᠷᠢᠵᠠᠢ᠃ ᠵᠠᠷᠠᠭᠠ ᠣᠷᠳᠣᠨ ᠳ᠋ᠤ᠌ ᠰᠡᠮᠬᠡᠨ ᠣᠷᠣᠵᠤ ᠢᠷᠡᠭᠡᠳ᠂ ᠪᠥᠨᠲᠥᠢᠭᠰᠡᠨ ᠪᠣᠷᠣ ᠶᠠᠭᠤᠮᠠ ᠪᠣᠯᠤᠨ ᠠᠲᠤᠷᠢᠵᠤ ᠣᠯᠠᠨ ᠤ᠋ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰᠴᠤ ᠡᠬᠢᠯᠡᠯᠡ᠃ ᠭᠡᠪᠡᠴᠦ ᠲᠡᠨᠳᠡ ᠪᠠᠢᠭᠰᠠᠨ ᠬᠥᠮᠦᠰ᠂ ᠲᠡᠭᠦᠨ ᠢ᠋ ᠣᠯᠵᠤ ᠬᠠᠷᠠᠭᠠᠳ ᠲᠣᠭᠣᠷᠢᠨ ᠵᠣᠭᠰᠣᠵᠠᠢ᠃ ᠬᠥᠭᠰᠢᠴᠦᠦᠯ ᠨᠢ ᠲᠠᠢᠪᠤᠩ ᠵᠣᠭᠰᠣᠵᠤ᠂ ᠬᠠᠷᠢᠨ ᠵᠠᠯᠠᠭᠤᠴᠤᠳ ᠨᠢ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠢᠩᠭᠠ ᠴᠢᠩᠭᠠ ᠪᠠᠷ ᠢᠨᠢᠶᠡᠯᠳᠦᠵᠡᠢ᠃ ᠡᠨᠡ ᠬᠥᠮᠦᠰ ᠵᠤᠭᠠ ᠪᠠᠨ ᠭᠠᠷᠭᠠᠬᠤ ᠭᠡᠵᠦ ᠨᠠᠮᠠ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠵᠠᠷᠠᠭᠠ ᠨᠢ ᠠᠭᠤᠷ ᠬᠦᠷᠴᠦ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠶᠠᠪᠤᠯᠠ᠃ ᠵᠠᠯᠠᠭᠤᠴᠤᠳ ᠡᠪᠦᠭᠡᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠭᠡᠨᠡᠳᠲᠡ ᠰᠠᠨᠠᠵᠤ ᠢᠨᠢᠶᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠣᠯᠪᠠᠴᠤ ᠵᠠᠷᠠᠭᠠ ᠠᠯᠢ ᠬᠡᠳᠦᠢ ᠨᠢ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠶᠠᠪᠤᠭᠰᠠᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠨᠥᠭᠦᠭᠡ ᠵᠠᠷᠠᠭᠠ ᠶ᠋ᠢ ᠠᠪᠴᠢᠷᠠᠭᠤᠯᠬᠤ ᠶ᠋ᠢ ᠰᠠᠨᠠᠯ ᠪᠣᠯᠭᠠᠭᠰᠠᠨ ᠡᠪᠦᠭᠡᠨ ᠭᠠᠷᠴᠤ ᠢᠷᠡᠭᠡᠳ᠂
— ᠵᠠᠯᠠᠭᠤᠰ ᠤ᠋ᠨ ᠡᠨᠡ ᠠᠯᠳᠠᠭᠠ ᠶ᠋ᠢ ᠵᠠᠰᠠᠵᠤ ᠪᠣᠯᠤᠨᠠ᠂ ᠵᠠᠷᠠᠭᠠ ᠠᠭᠤᠷᠯᠠᠬᠤ ᠪᠠᠷ ᠢ᠋ᠶ᠋ᠠᠨ ᠶᠡᠬᠡ ᠲᠥᠯᠥᠪ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷᠲᠡᠭᠡᠨ ᠶᠠᠷᠢᠭᠠᠳ ᠪᠠᠢᠳᠠᠭ ᠶᠤᠮ᠃ ᠬᠡᠨ ᠨᠢᠭᠡ ᠨᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠶᠠᠪᠤᠵᠤ᠂ ᠶᠠᠭᠤ ᠶᠠᠷᠢᠬᠤ ᠶ᠋ᠢ ᠨᠢ ᠰᠡᠮᠬᠡᠨ ᠴᠢᠩᠨᠠᠭᠠᠳ ᠢᠷᠡ ᠭᠡᠵᠡᠢ᠃ ᠭᠡᠲᠡᠯᠡ ᠮᠤᠤᠷ᠂
— ᠬᠠᠭᠠᠨᠲᠠᠨ᠂ ᠨᠠᠮᠠ ᠶ᠋ᠢ ᠶᠠᠪᠤᠭᠤᠯᠤᠨᠠ ᠤᠤ? ᠨᠠᠳᠠ ᠠ᠋ᠴᠠ ᠢᠯᠡᠭᠦᠦ ᠰᠡᠮᠬᠡᠨ ᠳᠠᠭᠠᠵᠤ ᠴᠢᠳᠠᠬᠤ ᠠᠮᠢᠲᠠᠨ ᠬᠠᠮᠢᠭᠠ ᠴᠤ᠌ ᠪᠠᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍᠂
ᠬᠠᠭᠠᠨ ᠮᠤᠤᠷ ᠲᠤ᠌ ᠵᠠᠷᠠᠭᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠡᠮᠬᠡᠨ ᠳᠠᠭᠠᠬᠤ ᠶ᠋ᠢ ᠲᠤᠰᠢᠶᠠᠬᠤ ᠳ᠋ᠤ᠌᠂ ᠲᠡᠷᠡ ᠵᠠᠷᠠᠭᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠭᠡᠲᠡᠨ ᠳᠠᠭᠠᠵᠤ ᠶᠠᠭᠤ ᠶᠠᠷᠢᠬᠤ ᠶ᠋ᠢ ᠨᠢ ᠰᠣᠨᠣᠰᠴᠤ ᠭᠡᠨᠡ᠃ ᠵᠠᠷᠠᠭᠠ ᠵᠠᠮ ᠳ᠋ᠠᠭᠠᠨ᠂
— ᠡᠢᠮᠦ ᠵᠢᠭᠠᠬᠠᠨ ᠪᠠᠢᠬᠤ ᠭᠡᠵᠦ᠂ ᠮᠤᠩᠬᠠᠭ ᠭᠡᠳᠡᠭ ᠨᠢ ᠠᠯᠠᠭᠠᠨ ᠴᠢᠨᠡᠭᠡ ᠲᠡᠮᠦᠷ ᠠᠪᠤᠭᠠᠳ ᠬᠠᠪᠢᠷᠭᠠᠨ ᠰᠠᠷᠠ ᠰᠢᠭ᠋ ᠪᠣᠯᠲᠠᠯᠠ ᠨᠢ ᠠᠳᠬᠤᠭᠠᠳ ᠠᠳᠬᠤᠭᠠᠳ ᠠᠮᠠᠷᠬᠠᠨ ᠶᠠᠭᠤᠮᠠ ᠭᠡᠵᠦ ᠪᠠᠢᠬᠤ ᠳᠠ! ᠳᠠᠷᠠᠭᠠ ᠨᠢ ᠡᠰᠢᠯᠡᠵᠦ ᠢᠷᠯᠡᠭᠡᠳ ᠯᠡ ᠬᠠᠳᠤᠭᠤᠷ ᠪᠡᠯᠡᠨ ᠰᠢᠦ ᠳᠡ! ᠡᠨᠡ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠶᠣᠰᠣᠲᠠᠢ ᠮᠤᠩᠬᠠᠭ ᠠᠮᠢᠲᠠᠳ ᠶᠤᠮ ᠭᠡᠵᠦ ᠥᠭᠦᠯᠡᠭᠰᠡᠭᠡᠷ ᠶᠠᠪᠤᠵᠤ ᠭᠡᠨᠡ᠃
ᠮᠤᠤᠷ ᠵᠠᠷᠠᠭᠠ ᠶ᠋ᠢᠨ ᠶᠠᠷᠢᠭᠰᠠᠨ ᠢ᠋ ᠲᠣᠭᠲᠠᠭᠠᠵᠤ ᠠᠪᠤᠭᠠᠳ ᠣᠷᠳᠣᠨ ᠳ᠋ᠤ᠌ ᠢᠷᠡᠵᠦ᠂ ᠬᠠᠭᠠᠨ ᠳ᠋ᠤ᠌ ᠪᠠᠨ ᠪᠦᠭᠦᠳᠡ ᠶ᠋ᠢ ᠶᠠᠷᠢᠵᠠᠢ᠃ ᠬᠠᠭᠠᠨ ᠲᠡᠷᠡ ᠳᠣᠣᠷᠠ ᠨᠢ ᠳᠠᠷᠬᠠᠨ ᠳ᠋ᠤ᠌ ᠵᠠᠷᠠᠭᠠ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠣᠯᠠᠨ ᠬᠠᠳᠤᠭᠤᠷ ᠬᠢᠬᠦ ᠶ᠋ᠢ ᠲᠤᠰᠢᠶᠠᠵᠠᠢ᠃ ᠢᠩᠭᠢᠭᠡᠳ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷᠲᠡᠭᠡᠨ ᠬᠠᠳᠤᠭᠤᠷ ᠬᠢᠵᠦ ᠠᠪᠤᠭᠠᠳ ᠤᠷᠭᠤᠭᠤᠯᠤᠭᠰᠠᠨ ᠲᠠᠷᠢᠶᠠ ᠪᠠᠨ ᠲᠦᠷᠭᠡᠨ ᠬᠤᠷᠢᠶᠠᠵᠤ ᠠᠪᠴᠤ ᠭᠡᠨᠡ᠃ ᠡᠢᠨᠬᠦ ᠵᠠᠷᠠᠭᠠ ᠬᠠᠳᠤᠭᠤᠷ ᠢ᠋ ᠬᠢᠬᠦ ᠠᠷᠭᠠ ᠶ᠋ᠢ ᠪᠣᠳᠣᠵᠤ ᠣᠯᠤᠭᠰᠠᠨ ᠶᠤᠮ ᠭᠡᠳᠡᠭ᠃
ᠦᠰᠦᠭ ᠬᠠᠲᠠᠵᠤ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ