ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠬᠡᠯᠡ – ᠠᠪᠢᠶᠠ ᠵᠦᠢ(ᠨᠢᠭᠡᠳᠦᠭᠡᠷ ᠪᠥᠯᠥᠭ-3) Орчин цагийн монгол хэл - Авиа зүй 1-р бүлэг<3>
415ᠭᠤᠷᠪᠠᠳᠤᠭᠠᠷ ᠵᠦᠢᠯ ᠂ ᠠᠪᠢᠶᠠᠯᠠᠪᠤᠷᠢ ᠵᠢᠴᠢ ᠲᠡᠭᠦᠨ ᠦ᠌ ᠬᠤᠪᠢᠯᠪᠤᠷᠢ
ᠨᠢᠭᠡ ᠂ ᠠᠪᠢᠶᠠᠯᠠᠪᠤᠷᠢ
ᠬᠡᠯᠡᠨ ᠦ᠌ ᠨᠢᠭᠡᠴᠢ ᠳᠣᠲᠣᠷᠠ ᠠ᠋ᠴᠠ ᠬᠡᠯᠡ ᠵᠦᠢ᠂ ᠦᠭᠡ ᠶ᠋ᠢᠨ ᠰᠠᠩ ᠤ᠋ᠨ ᠨᠢᠭᠡᠴᠢ ᠨᠦ᠍ᠭᠦᠳ ᠪᠣᠯ ᠤᠳᠬᠠ ᠢᠯᠡᠳᠬᠡᠬᠦ ᠴᠢᠳᠠᠮᠵᠢ ᠲᠠᠢ ᠪᠠᠢᠳᠠᠭ᠃ ᠠᠪᠢᠶᠠ ᠵᠦᠢ ᠶᠢᠨ ᠨᠢᠭᠡᠴᠢ ᠨᠢ ᠬᠠᠷᠢᠨ ᠤᠳᠬᠠ ᠶᠢ ᠢᠯᠭᠠᠨ ᠲᠣᠳᠣᠷᠠᠭᠤᠯᠬᠤ ᠡᠭᠦᠷᠭᠡ ᠴᠢᠳᠠᠮᠵᠢ ᠲᠠᠢ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠠᠪᠢᠶᠠᠨ ᠤ᠋ ᠠᠯᠢ ᠨᠢᠭᠡᠴᠢ ᠪᠦᠷᠢᠯᠳᠦᠬᠦᠨ ᠨᠢ ᠤᠳᠬᠠ ᠢᠯᠭᠠᠬᠤ ᠡᠭᠦᠷᠭᠡ ᠭᠦᠢᠴᠡᠳᠬᠡᠬᠦ ᠵᠢᠴᠢ ᠲᠣᠳᠣᠷᠬᠠᠢ ᠠᠯᠢ ᠨᠢᠭᠡ ᠠᠪᠢᠶᠠ ᠨᠢ ᠤᠳᠬᠠ ᠢᠯᠭᠠᠬᠤ ᠡᠭᠦᠷᠭᠡ ᠭᠦᠢᠴᠡᠳᠬᠡᠬᠦ ᠨᠢ ᠲᠤᠬᠠᠢ ᠶ᠋ᠢᠨ ᠨᠡᠢᠭᠡᠮ ᠦ᠋ᠨ ᠵᠠᠩᠰᠢᠯ ᠠ᠋ᠴᠠ ᠲᠣᠭᠲᠠᠭᠠᠭᠳᠠᠳᠠᠭ ᠪᠢᠯᠡ᠃ ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠪᠣᠭᠣᠨᠢ ᠤᠷᠲᠤ ᠡᠬᠡᠰᠢᠭ ᠨᠢ[ ɔʧ′ ](ᠣᠴᠢ) ᠪᠠ[ ɔ:ʧ′ ](ᠣᠭᠣᠴᠢ) ᠭᠡᠬᠦ ᠮᠡᠲᠦ ᠪᠡᠷ ᠤᠳᠬᠠ ᠢᠯᠭᠠᠬᠤ ᠴᠢᠳᠠᠮᠵᠢ ᠲᠠᠢ᠃[ p ] [ p′ ] ᠬᠣᠶᠠᠷ ᠭᠡᠢᠭᠦᠯᠦᠭᠴᠢ ᠨᠢ[pαs](ᠪᠠᠰᠠ)[p′αs](ᠫᠠᠰ) ᠭᠡᠬᠦ ᠮᠡᠲᠦ ᠪᠡᠷ ᠲᠦᠷᠢᠯᠲᠡ ᠲᠡᠢ᠂ ᠲᠦᠷᠢᠯᠲᠡ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠤᠳᠬᠠ ᠢᠯᠭᠠᠨᠠ᠃ ᠡᠢᠮᠦ ᠡᠴᠡ ᠡᠨᠳᠡᠬᠢ[ ɔ ] ᠪᠠ[ ɔ:]᠂[ p ] ᠪᠠ[ p′ ]ᠪᠣᠯ ᠠᠪᠢᠶᠠᠯᠠᠪᠤᠷᠢ ᠪᠣᠯᠤᠨᠠ᠃ ᠡᠨᠡ ᠮᠡᠲᠦᠴᠢᠯᠡᠨ ᠲᠤᠬᠠᠢ ᠶ᠋ᠢᠨ ᠬᠡᠯᠡᠨ ᠳ᠋ᠡᠭᠡᠨ ᠪᠤᠰᠤᠳ ᠠᠪᠢᠶᠠ ᠲᠠᠢ ᠠᠯᠢ ᠨᠢᠭᠡ ᠪᠤᠶᠤ ᠬᠡᠳᠦᠨ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠯᠳᠦᠨ ᠣᠷᠣᠰᠢᠵᠤ᠂ ᠤᠳᠬᠠ ᠢᠯᠭᠠᠬᠤ ᠡᠭᠦᠷᠭᠡ ᠭᠦᠢᠴᠡᠳᠬᠡᠳᠡᠭ ᠠᠪᠢᠶᠠᠨ ᠤ᠋ ᠬᠠᠮᠤᠭ ᠪᠠᠭᠠ ᠨᠢᠭᠡᠴᠢ ᠶ᠋ᠢ ᠠᠪᠢᠶᠠᠯᠠᠪᠤᠷᠢ ᠭᠡᠨᠡ᠃ ᠠᠪᠢᠶᠠᠯᠠᠪᠤᠷᠢ ᠶ᠋ᠢ ᠬᠣᠶᠠᠷ ᠵᠢᠰᠢᠭᠦᠦ ᠵᠢᠷᠣᠭᠠ ᠳ᠋ᠤ᠌ ᠪᠢᠴᠢᠵᠦ ᠢᠯᠡᠳᠬᠡᠬᠦ ᠪᠥᠭᠡᠳ ᠡᠮᠦᠨᠡ ᠦᠵᠡᠭᠦᠯᠦᠭᠰᠡᠨ ᠠᠪᠢᠶᠠᠯᠠᠪᠤᠷᠢ ᠶ᠋ᠢ /ɔ / /ɔ:/ / p / / p′ / ᠭᠡᠵᠦ ᠲᠤᠰ ᠲᠤᠰ ᠲᠡᠮᠳᠡᠭᠯᠡᠨᠡ᠃
ᠠᠪᠢᠶᠠᠯᠠᠪᠤᠷᠢ ᠨᠢ ᠪᠣᠳᠠᠲᠠᠢ ᠨᠢᠭᠡ ᠬᠡᠯᠡ ᠪᠡᠷ ᠬᠢᠵᠠᠭᠠᠷᠯᠠᠭᠳᠠᠳᠠᠭ ᠪᠥᠭᠡᠳ ᠴᠠᠭᠠᠰᠢᠳᠠ ᠨᠢᠭᠡ ᠬᠡᠯᠡᠨ ᠦ᠌ ᠳᠣᠲᠣᠷᠠᠬᠢ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠪᠠᠷ ᠴᠦ᠍ ᠬᠢᠵᠠᠭᠠᠷᠯᠠᠭᠳᠠᠳᠠᠭ ᠶᠤᠮ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠣᠯᠠᠩᠬᠢ ᠠᠶᠠᠯᠭᠤ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌/ө/ ᠨᠢ ᠠᠪᠢᠶᠠᠯᠠᠪᠤᠷᠢ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠬᠣᠷᠴᠢᠨ ᠬᠠᠷᠠᠴᠢᠨ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠤᠤᠯ ᠠᠪᠢᠶᠠ ᠠᠪᠢᠶᠠᠯᠠᠪᠤᠷᠢ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃
ᠠᠪᠢᠶᠠᠯᠠᠪᠤᠷᠢ ᠪᠣᠯᠳᠠᠭ ᠠᠪᠢᠶᠠ ᠨᠢ ᠲᠤᠬᠠᠢ ᠶ᠋ᠢᠨ ᠬᠡᠯᠡ ᠪᠤᠶᠤ ᠠᠶᠠᠯᠭᠤᠨ ᠳ᠋ᠠᠭᠠᠨ ᠠᠯᠢ ᠨᠢᠭᠡ ᠣᠨᠴᠠᠯᠢᠭ ᠡᠰᠡᠪᠡᠯ ᠬᠡᠳᠦ ᠬᠡᠳᠦᠨ ᠣᠨᠴᠠᠯᠢᠭ ᠰᠢᠨᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠷᠢᠯᠴᠠᠨ ᠡᠰᠡᠷᠭᠦᠴᠡᠯᠳᠦᠨ ᠣᠷᠣᠰᠢᠵᠤ᠂ ᠦᠭᠡ ᠪᠤᠶᠤ ᠬᠡᠯᠡ ᠵᠦᠢ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠭᠠᠨ ᠲᠣᠳᠣᠷᠠᠭᠤᠯᠵᠤ ᠪᠠᠢᠳᠠᠭ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌[ t′] [ t ] ᠬᠣᠶᠠᠷ ᠭᠡᠢᠭᠦᠯᠦᠭᠴᠢ ᠨᠢ [t'a:rax - ta:rax] ᠭᠡᠬᠦ ᠮᠡᠲᠦᠴᠢᠯᠡᠨ ᠵᠥᠪᠬᠡᠨ ᠬᠡᠢ ᠶ᠋ᠢᠨ ᠲᠦᠷᠢᠯᠲᠡ ᠨᠢ ᠴᠢᠩᠭᠠ ᠪᠠ ᠰᠤᠯᠠ ᠪᠠᠢᠳᠠᠭ ᠨᠢᠭᠡ ᠯᠡ ᠵᠦᠢᠯ ᠦ᠋ᠨ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠡᠰᠡᠷᠭᠦᠴᠡᠯᠳᠦᠨ ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠭᠠᠵᠤ᠂ [t'][ tʃ ] ᠬᠣᠶᠠᠷ ᠠᠪᠢᠶᠠ ᠨᠢ ᠬᠡᠢ ᠶ᠋ᠢᠨ ᠲᠦᠷᠢᠯᠲᠡ ᠶ᠋ᠢᠨ ᠴᠢᠩᠭᠠ ᠪᠠ ᠰᠤᠯᠠ ᠶ᠋ᠢᠨ ᠢᠯᠭᠠᠭᠠ᠂ ᠥᠭᠦᠯᠡᠬᠦ ᠠᠷᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠬᠢ ᠬᠠᠮᠵᠢᠬᠤ ᠪᠠ ᠬᠠᠮᠵᠢᠨ ᠱᠦᠷᠭᠦᠬᠦ ᠶ᠋ᠢᠨ ᠢᠯᠭᠠᠭᠠ᠂ ᠥᠭᠦᠯᠡᠬᠦ ᠪᠠᠢᠷᠢ ᠶ᠋ᠢᠨ ᠲᠠᠯᠠ ᠪᠠᠷ ᠬᠢ ᠬᠡᠯᠡᠨ ᠦ᠌ ᠦᠵᠦᠭᠦᠷ ᠬᠡᠰᠡᠭ ᠪᠠ ᠬᠡᠯᠡᠨ ᠦ᠌ ᠡᠮᠦᠨᠡᠬᠢ ᠬᠡᠰᠡᠭ ᠦ᠋ᠨ ᠢᠯᠭᠠᠭᠠ ᠭᠡᠬᠦ ᠬᠡᠳᠦᠨ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠡᠰᠡᠷᠭᠦᠴᠡᠯᠳᠦᠨ ᠤᠳᠬᠠ ᠢᠯᠭᠠᠵᠤ ᠲᠤᠰ ᠲᠤᠰ ᠠᠪᠢᠶᠠᠯᠠᠪᠤᠷᠢ ᠪᠣᠯᠵᠤ ᠪᠠᠢᠨᠠ᠃
ᠠᠪᠢᠶᠠᠯᠠᠪᠤᠷᠢ ᠪᠣᠯᠵᠤ ᠪᠠᠢᠭᠠ ᠠᠪᠢᠶᠠ ᠨᠢ ᠪᠡᠶᠡ ᠮᠠᠬᠠᠪᠣᠳ ᠪᠣᠯᠤᠨ ᠹᠢᠽᠢᠺ ᠦ᠋ᠨ ᠣᠨᠴᠠᠯᠢᠭ ᠲᠤ᠌ ᠰᠠᠭᠤᠷᠢᠯᠠᠭᠳᠠᠭᠰᠠᠨ ᠥᠭᠦᠯᠡᠬᠦ ᠪᠠᠢᠷᠢ ᠪᠠ ᠥᠭᠦᠯᠡᠬᠦ ᠠᠷᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠬᠢ ᠬᠡᠳᠦ ᠬᠡᠳᠦᠨ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ᠃ ᠡᠳᠡᠭᠡᠷ ᠣᠨᠴᠠᠯᠢᠭ ᠢ᠋ ᠠᠪᠢᠶᠠᠯᠠᠪᠤᠷᠢ ᠵᠦᠢ ᠳ᠋ᠦ᠍ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠭᠡᠳᠡᠭ᠃ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠪᠣᠯ ᠬᠠᠷᠢᠯᠴᠠᠨ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠲᠤᠰᠠᠭᠠᠷᠯᠠᠨ ᠢᠯᠭᠠᠭᠳᠠᠬᠤ ᠰᠢᠨᠵᠢ ᠲᠡᠮᠳᠡᠭ ᠪᠣᠯᠬᠤ ᠪᠥᠭᠡᠳ ᠮᠥᠨ ᠴᠦ᠍ ᠵᠣᠬᠢᠬᠤ ᠬᠡᠪᠴᠢᠶᠡᠨ ᠳ᠋ᠦ᠍ ᠪᠡᠶᠡ ᠪᠡᠶᠡ ᠲᠡᠢ ᠪᠡᠨ ᠨᠢᠭᠡᠳᠦᠯᠴᠡᠨ᠂ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠰᠢᠰᠲ᠋ᠧᠮ ᠢ᠋ ᠪᠦᠷᠢᠯᠳᠦᠭᠦᠯᠬᠦ ᠶ᠋ᠢᠨ ᠦᠨᠳᠦᠰᠦ ᠪᠣᠯᠵᠤ ᠪᠠᠢᠳᠠᠭ᠃ ᠡᠮᠦᠨᠡ ᠵᠢᠱ᠌ᠢᠶᠡᠯᠡᠭᠰᠡᠨ [ t′] [ t ] ᠬᠣᠶᠠᠷ ᠭᠡᠢᠭᠦᠯᠦᠭᠴᠢ ᠨᠢ ᠲᠦᠷᠢᠯᠲᠡ ᠲᠠᠢ᠂ ᠲᠦᠷᠢᠯᠲᠡ ᠦᠭᠡᠢ ᠭᠡᠬᠦ ᠨᠢᠭᠡ ᠵᠦᠢᠯ ᠦᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢᠶᠠᠷ ᠢᠶᠠᠨ ᠡᠰᠡᠷᠭᠦᠴᠡᠯᠳᠦᠵᠦ ᠪᠠᠢᠪᠠᠴᠤ ᠬᠠᠮᠵᠢᠬᠤ ᠪᠤᠶᠤ ᠲᠡᠰᠦᠷᠡᠬᠦ᠂ ᠬᠡᠯᠡᠨ ᠦ᠌ ᠦᠵᠦᠭᠦᠷ ᠦ᠋ᠨ᠂ ᠳᠠᠭᠤᠨ ᠦᠭᠡᠢ ᠭᠡᠬᠦ ᠭᠤᠷᠪᠠᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠢᠯᠡᠨ ᠨᠢᠭᠡᠳᠦᠯᠴᠡᠨ᠂ ᠡᠨᠡ ᠮᠡᠲᠦ ᠶ᠋ᠢᠨ ᠣᠨᠴᠠᠯᠢᠭ ᠪᠦᠬᠦᠢ ᠭᠡᠢᠭᠦᠯᠦᠭᠴᠢ ᠶ᠋ᠢᠨ ᠪᠥᠭᠡᠮ ᠢ᠋ ᠪᠦᠷᠢᠯᠳᠦᠭᠦᠯᠵᠦ ᠪᠠᠢᠳᠠᠭ᠃[n][t'] ᠬᠣᠶᠠᠷ ᠭᠡᠢᠭᠦᠯᠦᠭᠴᠢ ᠨᠢ ᠬᠡᠳᠦᠢᠪᠡᠷ ᠲᠦᠷᠢᠯᠲᠡ ᠦᠭᠡᠢ ᠪᠠ ᠲᠦᠷᠢᠯᠲᠡ ᠲᠡᠢ᠂ ᠬᠠᠮᠠᠷ ᠤ᠋ᠨ ᠪᠠ ᠬᠠᠮᠠᠷ ᠤ᠋ᠨ ᠪᠤᠰᠤ᠂ ᠳᠠᠭᠤᠨ ᠲᠠᠢ ᠪᠠ ᠳᠠᠭᠤᠨ ᠦᠭᠡᠢ ᠵᠡᠷᠭᠡ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠯᠳᠦᠵᠦ ᠪᠠᠢᠪᠠᠴᠤ᠂ ᠬᠡᠯᠡᠨ ᠦ᠌ ᠦᠵᠦᠭᠦᠷ ᠦ᠋ᠨ᠂ ᠬᠠᠮᠵᠢᠬᠤ ᠵᠡᠷᠭᠡ ᠬᠣᠶᠠᠷ ᠵᠦᠢᠯ ᠦ᠋ᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠨᠢᠭᠡᠳᠦᠯᠴᠡᠨ ᠬᠡᠯᠡᠨ ᠤ ᠦᠵᠦᠭᠦᠷ ᠦ᠋ᠨ ᠬᠠᠮᠵᠢᠬᠤ ᠭᠡᠢᠭᠦᠯᠦᠭᠴᠢ ᠶ᠋ᠢᠨ ᠪᠥᠭᠡᠮ ᠢ᠋ ᠪᠦᠷᠢᠯᠳᠦᠭᠦᠯᠵᠦ ᠪᠠᠢᠨᠠ᠃ ᠪᠣᠳᠠᠲᠠᠢ ᠨᠢᠭᠡ ᠬᠡᠯᠡᠨ ᠦ᠌ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠰᠢᠰᠲ᠋ᠧᠮ ᠳ᠋ᠡᠬᠢ ᠠᠪᠢᠶᠠᠯᠠᠪᠤᠷᠢ ᠪᠦᠷᠢ ᠨᠢ ᠡᠮᠦᠨᠡ ᠲᠣᠳᠣᠷᠬᠠᠢᠯᠠᠭᠰᠠᠨ ᠰᠢᠭ᠋ ᠪᠤᠰᠤᠳ ᠠᠯᠢ ᠨᠢᠭᠡ ᠠᠪᠢᠶᠠᠯᠠᠪᠤᠷᠢ ᠠ᠋ᠴᠠ ᠪᠠᠨ ᠨᠠᠭᠠᠳᠤ ᠵᠠᠭᠠ ᠳ᠋ᠠᠭᠠᠨ ᠨᠢᠭᠡ ᠵᠦᠢᠯ ᠦ᠋ᠨ ᠡᠰᠡᠷᠭᠦᠴᠡᠯᠳᠦᠭᠰᠡᠨ ᠬᠠᠷᠢᠴᠠᠭᠠ ᠪᠦᠬᠦᠢ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠪᠠᠢᠬᠤ ᠬᠡᠷᠡᠭᠲᠡᠢ ᠪᠥᠭᠡᠳ ᠲᠡᠷᠡ ᠬᠦ᠌ ᠡᠰᠡᠷᠭᠦᠴᠡᠯᠳᠦᠭᠰᠡᠨ ᠬᠠᠷᠢᠴᠠᠭᠠ ᠪᠦᠬᠦᠢ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠨᠢ ᠵᠠᠪᠠᠯ ᠤᠳᠬᠠ ᠢᠯᠭᠠᠬᠤ ᠴᠢᠳᠠᠮᠵᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠡᠭᠦᠪᠡᠷ ᠦᠵᠡᠪᠡᠯ ᠠᠪᠢᠶᠠᠯᠠᠪᠤᠷᠢ ᠨᠢ ᠳᠠᠷᠠᠭᠠᠬᠢ ᠬᠡᠳᠦᠨ ᠦᠨᠳᠦᠰᠦᠨ ᠣᠨᠴᠠᠯᠢᠭ ᠲᠠᠢ ᠪᠠᠢᠨᠠ᠄
1. ᠠᠪᠢᠶᠠᠯᠠᠪᠤᠷᠢ ᠪᠣᠯ ᠦᠭᠡ ᠶ᠋ᠢᠨ ᠤᠳᠬᠠ ᠪᠣᠯᠤᠨ ᠬᠡᠯᠡ ᠵᠦᠢ ᠶ᠋ᠢᠨ ᠤᠳᠬᠠ ᠢᠯᠭᠠᠬᠤ ᠴᠢᠳᠠᠮᠵᠢ ᠲᠠᠢ ᠠᠪᠢᠶᠠᠨ ᠤ᠋ ᠨᠢᠭᠡᠴᠢ ᠪᠣᠯᠤᠨᠠ;
2. ᠠᠪᠢᠶᠠᠯᠠᠪᠤᠷᠢ ᠪᠣᠯ ᠬᠡᠯᠡᠨ ᠦ ᠤᠳᠬᠠ ᠢᠯᠭᠠᠬᠤ ᠨᠢᠭᠡᠴᠢ ᠶᠢᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤᠨ ᠪᠠᠭᠠ ᠨᠢᠭᠡᠴᠢ ᠪᠣᠯᠤᠨᠠ;
3. ᠠᠪᠢᠶᠠᠯᠠᠪᠤᠷᠢ ᠪᠣᠯ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡ ᠪᠤᠶᠤ ᠬᠡᠳᠦᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢᠶᠠᠷ ᠢᠶᠠᠨ ᠡᠰᠡᠷᠭᠦᠴᠡᠯᠳᠦᠵᠦ᠂ ᠨᠢᠭᠡ ᠪᠤᠶᠤ ᠬᠡᠳᠦᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠢᠶᠠᠷ ᠢᠶᠠᠨ ᠨᠢᠭᠡᠳᠦᠯᠴᠡᠬᠦ ᠬᠠᠷᠢᠴᠠᠭᠠ ᠲᠠᠶ ᠪᠠᠷ ᠣᠷᠣᠰᠢᠳᠠᠭ ᠰᠢᠰᠲ᠋ᠧᠮ ᠪᠣᠯᠤᠨᠠ;
4. ᠠᠪᠢᠶᠠᠯᠠᠪᠤᠷᠢ ᠪᠣᠯ ᠪᠣᠳᠠᠲᠠᠶ ᠨᠢᠭᠡᠨ ᠬᠡᠯᠡ ᠪᠤᠶᠤ ᠠᠶᠠᠯᠭᠤᠨ ᠳᠤ ᠬᠠᠷᠢᠶᠠᠯᠠᠭᠳᠠᠬᠤ ᠦᠵᠡᠭᠳᠡᠯ ᠪᠥᠭᠡᠳ ᠲᠤᠬᠠᠶ ᠶᠢᠨ ᠬᠡᠯᠡ ᠪᠤᠶᠤ ᠠᠶᠠᠯᠭᠤᠨ ᠳ᠋ᠠᠭᠠᠨ ᠠᠳᠠᠯᠢ ᠪᠤᠰᠤ ᠬᠤᠪᠢᠯᠪᠤᠷᠢ ᠪᠠᠷ ᠢᠯᠡᠷᠡᠵᠦ ᠣᠷᠣᠰᠢᠵᠤ ᠪᠣᠯᠳᠠᠭ᠃
ᠬᠣᠶᠠᠷ᠂ ᠠᠪᠢᠶᠠᠯᠠᠪᠤᠷᠢ ᠶᠢᠨ ᠬᠤᠪᠢᠯᠪᠤᠷᠢ
ᠨᠢᠭᠡ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠣᠯᠠᠨ ᠬᠤᠪᠢᠯᠪᠤᠷᠢ ᠪᠣᠯᠵᠤ ᠬᠡᠯᠡᠨ ᠳ᠋ᠦ᠍ ᠣᠷᠣᠰᠢᠳᠠᠭ ᠲᠡᠳᠡᠭᠡᠷ ᠣᠯᠠᠨ ᠠᠪᠢᠶᠠ ᠶ᠋ᠢ ᠠᠪᠢᠶᠠ ᠵᠦᠢ ᠳ᠋ᠦ᠍ ᠠᠪᠢᠶᠠᠯᠠᠰᠤ ᠭᠡᠳᠡᠭ᠃ ᠲᠡᠷᠡ ᠨᠢ ᠬᠡᠯᠡᠨ ᠦ᠌ ᠠᠪᠢᠶᠠᠨ ᠤ᠋ ᠰᠢᠰᠲ᠋ᠧᠮ ᠳ᠋ᠦ᠍ ᠠᠪᠢᠶᠠᠯᠠᠴᠠ ᠪᠠᠷ ᠢ᠋ᠶ᠋ᠠᠨ ᠢᠯᠭᠠᠷᠠᠨ ᠣᠷᠣᠰᠢᠵᠤ ᠪᠠᠢᠳᠠᠭ ᠠᠪᠢᠶᠠᠨ ᠤ᠋ ᠬᠠᠮᠤᠭ ᠪᠠᠭᠠ ᠨᠢᠭᠡᠴᠢ ᠪᠣᠯᠤᠨᠠ᠃ ᠨᠢᠭᠡ ᠬᠡᠯᠡᠨ ᠳ᠋ᠦ᠍ ᠠᠪᠢᠶᠠᠯᠠᠰᠤ ᠶ᠋ᠢᠨ ᠲᠣᠭᠠ ᠨᠢ ᠣᠯᠠᠨ ᠪᠠᠢᠳᠠᠭ᠂ ᠭᠡᠲᠡᠯᠡ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠲᠣᠭᠠ ᠨᠢ ᠬᠢᠵᠠᠭᠠᠷ ᠲᠠᠢ ᠴᠥᠭᠡᠨ ᠪᠠᠢᠳᠠᠭ᠃ ᠠᠪᠢᠶᠠᠯᠠᠰᠤ ᠶ᠋ᠢᠨ ᠵᠠᠷᠢᠮ ᠨᠢ ᠤᠳᠬᠠ ᠢᠯᠭᠠᠬᠤ ᠴᠢᠳᠠᠮᠵᠢ ᠲᠠᠢ ᠪᠠᠢᠬᠤ ᠳ᠋ᠤ᠌ ᠵᠠᠷᠢᠮ ᠨᠢ ᠡᠢᠮᠦᠷᠬᠦ ᠴᠢᠳᠠᠮᠵᠢ ᠦᠭᠡᠢ᠂ ᠭᠡᠲᠡᠯᠡ ᠠᠪᠢᠶᠠᠯᠠᠪᠤᠷᠢ ᠪᠣᠯ ᠪᠦᠷ ᠤᠳᠬᠠ ᠢᠯᠭᠠᠬᠤ ᠴᠢᠳᠠᠮᠵᠢ ᠲᠠᠢ ᠪᠠᠢᠳᠠᠭ᠂ ᠬᠡᠳᠦᠨ ᠠᠪᠢᠶᠠᠯᠠᠰᠤ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠷᠢᠯᠴᠠᠨ ᠨᠥᠬᠥᠬᠦ ᠬᠠᠷᠢᠴᠠᠭᠠᠨ ᠳ᠋ᠤ᠌ ᠪᠠᠢᠪᠠᠯ ᠲᠡᠳᠡᠭᠡᠷ ᠨᠢ ᠠᠳᠠᠯᠢ ᠨᠢᠭᠡ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠠᠳᠠᠯᠢ ᠪᠤᠰᠤ ᠬᠤᠪᠢᠯᠪᠤᠷᠢ ᠪᠣᠯᠤᠨᠠ᠃ ᠬᠡᠷᠪᠡ ᠬᠠᠷᠢᠯᠴᠠᠨ ᠡᠰᠡᠷᠭᠦᠴᠡᠯᠳᠦᠬᠦ ᠬᠠᠷᠢᠴᠠᠭᠠᠨ ᠳ᠋ᠤ᠌ ᠪᠠᠢᠪᠠᠯ ᠲᠡᠳᠡᠭᠡᠷ ᠨᠢ ᠲᠤᠰ ᠲᠤᠰ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠬᠡᠳᠦᠨ ᠠᠪᠢᠶᠠᠯᠠᠪᠤᠷᠢ ᠪᠣᠯᠳᠠᠭ᠂ ᠵᠢᠱ᠌ᠢᠶᠠᠯᠠᠪᠠᠯ᠂ [t'ʊt'ax ](ᠳᠤᠲᠠᠬᠤ) ᠭᠡᠳᠡᠭ ᠦᠭᠡᠨ ᠳ᠋ᠡᠬᠢ [a]ᠶᠢ [a] ᠪᠠᠷ ᠬᠡᠯᠡᠪᠡᠯ᠂ ᠬᠥᠮᠦᠰ ᠲᠦ᠍ ᠥᠭᠦᠯᠡᠭᠴᠢ ᠨᠢ ᠡᠬᠢᠨ ᠦ᠌ ᠪᠤᠰᠤ ᠦᠶᠡ ᠶ᠋ᠢᠨ ᠪᠣᠭᠣᠨᠢ [a]ᠡᠭᠡᠰᠢᠭ ᠢ᠋ ᠪᠤᠷᠤᠭᠤ ᠠᠪᠢᠶᠠᠯᠠᠭᠰᠠᠨ ᠭᠡᠬᠦ ᠲᠥᠷᠥᠭᠳᠡᠯ ᠥᠭᠬᠦ ᠡᠴᠡ ᠪᠢᠰᠢ [ t'ʊt'a:x ](ᠳᠤᠲᠠᠭᠠᠬᠤ) ᠭᠡᠳᠡᠭ ᠦᠭᠡ ᠶ᠋ᠢ ᠬᠡᠯᠡᠬᠦ ᠰᠢᠭ ᠣᠨᠳᠣᠣ ᠤᠳᠬᠠ ᠶ᠋ᠢ ᠰᠡᠳᠬᠢᠭᠳᠡᠭᠦᠯᠬᠦ ᠦᠭᠡᠢ ᠪᠠᠢᠳᠠᠭ᠃ ᠤᠴᠢᠷ ᠨᠢ [a] ᠪᠣᠯᠤᠨ [a]ᠨᠢ ᠬᠠᠷᠢᠯᠴᠠᠨ ᠨᠥᠬᠥᠬᠦ ᠬᠠᠷᠢᠴᠠᠭᠠ ᠲᠠᠢ ᠪᠠᠷ ᠣᠷᠣᠰᠢᠵᠤ᠂ [a] ᠶᠢᠨ ᠢᠯᠡᠷᠡᠬᠦ ᠦᠭᠡᠢ ᠪᠠᠢᠷᠢᠨ ᠳ᠋ᠤ᠌[a] ᠠᠪᠢᠶᠠ ᠨᠥᠬᠥᠪᠥᠷᠢᠯᠡᠨ ᠣᠷᠣᠵᠤ ᠪᠠᠢᠳᠠᠭ᠃ ᠭᠡᠲᠡᠯᠡ[a: ] ᠪᠣᠯᠤᠨ[a~a] ᠶᠢᠨ ᠬᠠᠷᠢᠴᠠᠭᠠ ᠪᠣᠯ ᠬᠠᠷᠢᠯᠴᠠᠨ ᠡᠰᠡᠷᠭᠦᠴᠡᠯᠳᠦᠭᠰᠡᠨ ᠰᠢᠨᠵᠢ ᠲᠡᠢ ᠤᠴᠢᠷ ᠬᠠᠷᠢᠯᠴᠠᠨ ᠰᠣᠯᠢᠨ ᠬᠡᠯᠡᠪᠡᠯ ᠬᠡᠯᠡᠨ ᠦ᠌ ᠤᠳᠬᠠ ᠶ᠋ᠢ ᠥᠭᠡᠷᠡᠳᠡᠭᠦᠯᠦᠨᠡ᠃
ᠠᠪᠢᠶᠠᠨ ᠤ᠋ ᠰᠢᠨᠵᠢᠯᠡᠯ ᠳ᠋ᠦ᠍ ᠠᠪᠢᠶᠠᠯᠠᠪᠤᠷᠢ ᠶ᠋ᠢ ᠪᠠᠰᠠ ᠳᠠᠭᠤᠳᠠᠯᠭᠠᠲᠤ ᠠᠪᠢᠶᠠᠯᠠᠪᠤᠷᠢ (ᠠᠪᠢᠶᠠᠨ ᠤ᠋ ᠥᠩᠭᠡ ᠶ᠋ᠢᠨ)᠂ ᠳᠠᠭᠠᠯᠳᠤᠬᠤ ᠠᠪᠢᠶᠠᠯᠠᠪᠤᠷᠢ(ᠠᠪᠢᠶᠠᠨ ᠤ᠋ ᠥᠩᠭᠡ ᠶ᠋ᠢᠨ ᠪᠤᠰᠤ)ᠭᠡᠵᠦ ᠲᠥᠷᠥᠯᠴᠢᠯᠡᠨ ᠨᠢᠭᠲᠠᠯᠠᠵᠤ ᠪᠠᠢᠳᠠᠭ᠃ ᠳᠠᠭᠤᠨ ᠤ᠋ ᠥᠨᠳᠥᠷ ᠨᠠᠮ᠂ ᠤᠷᠲᠤ ᠪᠣᠭᠣᠨᠢ᠂ ᠴᠢᠩᠭᠠ ᠰᠤᠯᠠ ᠶ᠋ᠢᠨ ᠣᠨᠴᠠᠯᠢᠭ ᠨᠢ ᠳᠠᠭᠠᠯᠳᠤᠬᠤ ᠠᠪᠢᠶᠠᠯᠠᠪᠤᠷᠢ ᠳ᠋ᠤ᠌ ᠬᠠᠷᠢᠶᠠᠯᠠᠭᠳᠠᠨᠠ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠤᠷᠲᠤ ᠡᠬᠡᠰᠢᠭ ᠪᠣᠯ ᠳᠠᠭᠠᠯᠳᠤᠬᠤ ᠠᠪᠢᠶᠠᠯᠠᠪᠤᠷᠢ ᠪᠣᠯᠤᠨᠠ᠃
ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠪᠢᠴᠢᠭ ᠦ᠋ᠨ ᠬᠡᠯᠡ ᠪᠠ ᠪᠠᠷᠢᠮᠵᠢᠶᠠ ᠠᠪᠢᠶᠠᠨ ᠤ᠋ ᠠᠪᠢᠶᠠᠯᠠᠪᠤᠷᠢ ᠨᠢ ᠲᠣᠳᠣᠷᠬᠠᠢ ᠪᠠᠢᠨᠠ᠃ ᠪᠠᠷᠢᠮᠵᠢᠶᠠ ᠠᠪᠢᠶᠠᠨ ᠳ᠋ᠤ᠌ 7 ᠪᠣᠭᠣᠨᠢ ᠪᠠ ᠤᠷᠲᠤ ᠡᠬᠡᠰᠢᠭ᠂ 6 ᠬᠣᠣᠰ ᠡᠬᠡᠰᠢᠭ᠂ ᠨᠡᠢᠲᠡ20 ᠡᠭᠡᠰᠢᠭ ᠠᠪᠢᠶᠠᠯᠠᠪᠤᠷᠢ ᠲᠠᠢ᠂ ᠦᠨᠳᠦᠰᠦᠨ ᠭᠡᠢᠭᠦᠯᠦᠭᠴᠢ17᠂ ᠵᠢᠭᠡᠯᠡᠭᠡ ᠦᠭᠡᠨ ᠦ᠌ ᠭᠡᠢᠭᠦᠯᠦᠭᠴᠢ8᠂ ᠨᠡᠢᠲᠡ25 ᠭᠡᠢᠭᠦᠯᠦᠭᠴᠢ ᠠᠪᠢᠶᠠᠯᠠᠪᠤᠷᠢ ᠪᠠᠢᠳᠠᠭ᠃ ᠡᠨᠳᠡ ᠪᠢᠳᠡ ᠪᠠᠷᠢᠮᠵᠢᠶᠠ ᠠᠪᠢᠶᠠᠨ ᠤ᠋ ᠠᠪᠢᠶᠠᠯᠠᠪᠤᠷᠢ ᠶ᠋ᠢ ᠭᠣᠣᠯᠯᠠᠨ ᠲᠠᠨᠢᠯᠴᠠᠭᠤᠯᠬᠤ ᠪᠥᠭᠡᠳ ᠤᠯᠠᠮᠵᠢᠯᠠᠯ ᠢ ᠪᠠᠷᠢᠮᠲᠠᠯᠠᠨ ᠮᠥᠨ ᠯᠠ ᠠᠪᠢᠶᠠ ᠭᠡᠳᠡᠭ ᠨᠡᠷᠡ ᠶᠢ ᠬᠡᠷᠡᠭᠯᠡᠨᠡ᠃