ᠳᠣᠯᠣᠭᠠᠨ ᠤᠰᠤᠨ ᠤ ᠲᠡᠦᠬᠡ – [ᠣᠷᠣᠰ]ᠪᠠᠷᠲ᠋ᠣᠯᠳ᠋ <ᠨᠢᠭᠡ᠂ᠦᠰᠦᠨ ᠦ᠌ ᠲᠣᠪᠴᠢ ᠲᠡᠦᠬᠡ> Долоон усны түүх – [орос] Бартулд <1᠂ Үсний товч түүх>
155ᠨᠢᠭᠡ᠂ ᠦᠰᠦᠨ ᠦ᠌ ᠲᠣᠪᠴᠢ ᠲᠡᠦᠬᠡ
ᠳᠣᠯᠣᠭᠠᠨ ᠤᠰᠤᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠠᠩᠬᠠᠨ ᠤ᠋ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ ᠪᠣᠯ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠪᠢᠴᠢᠭ ᠡᠴᠡ ᠢᠷᠡᠭᠰᠡᠨ ᠶᠦ᠍ᠮ᠃ ᠡᠷᠲᠡᠨ ᠦ᠌ ᠭᠷᠧᠭ᠂ ᠷᠣᠮᠠ ᠶ᠋ᠢᠨ ᠵᠣᠬᠢᠶᠠᠭᠴᠢᠳ ᠰᠢᠷ ᠮᠥᠷᠡᠨ ᠡᠴᠡ ᠵᠡᠭᠦᠨᠰᠢ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ ᠤᠭᠰᠠᠭᠠᠲᠠᠨ ᠨᠤᠭᠤᠳ ᠤ᠋ᠨ ᠬᠡᠳᠦᠬᠡᠨ ᠨᠡᠷᠡ ᠶ᠋ᠢ ᠳᠤᠷᠠᠳᠴᠤ ᠥᠩᠭᠡᠷᠡᠪᠡ᠂ ᠭᠡᠬᠦ ᠳ᠋ᠡᠭᠡᠨ ᠲᠡᠳᠡ ᠨᠠᠷ ᠤ᠋ᠨ ᠵᠢᠩᠬᠢᠨᠢ ᠪᠣᠳᠠᠲᠠᠢ ᠨᠤᠲᠤᠭ ᠬᠢᠵᠠᠭᠠᠷ ᠢ᠋ ᠨᠢ ᠵᠢᠭᠠᠵᠤ ᠭᠠᠷᠭᠠᠭᠠ ᠦᠭᠡᠢ᠃ ᠳᠤᠮᠳᠠᠳᠤ ᠤᠯᠤᠰ ᠲᠤ᠌ ᠠᠪᠴᠤ ᠬᠡᠯᠡᠭᠰᠡᠨ ᠴᠦ᠍᠂ ᠨᠡᠢᠲᠡ ᠶ᠋ᠢᠨ ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡᠬᠢ2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍᠂ ᠬᠦᠴᠦᠷᠬᠡᠭ ᠴᠢᠩᠬᠠ ᠾᠦᠩᠨᠦ ᠶ᠋ᠢ ᠡᠰᠡᠷᠭᠦᠴᠡᠨ᠂ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠬᠥᠭᠵᠢᠭᠡᠨ ᠮᠠᠨᠳᠤᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ᠂ ᠡᠯᠴᠢ ᠲᠣᠮᠢᠯᠠᠨ᠂ ᠪᠠᠷᠠᠭᠤᠨ ᠣᠷᠣᠨᠠ ᠣᠴᠢᠭᠤᠯᠵᠠᠢ᠃ ᠾᠦᠩᠨᠦ ᠶ᠋ᠢᠨ ᠳᠠᠢᠯᠠᠨ ᠳᠠᠭᠠᠭᠤᠯᠤᠭᠰᠠᠨ ᠤᠯᠤᠰ ᠭᠦᠷᠦᠨ ᠨᠦ᠍ᠭᠦᠳ ᠦ᠋ᠨ ᠳᠣᠲᠣᠷᠠ ᠦᠰᠦᠨ ᠤᠯᠤᠰ ᠪᠠᠭᠲᠠᠵᠤ ᠪᠣᠢ᠃ ᠬᠥᠮᠦᠨ ᠠᠷᠠᠳ ᠠᠨᠤ ᠡᠮᠦᠨᠡ ᠠᠭᠤᠯᠠ(ᠴᠢ ᠯᠢᠶᠠᠨ ᠱᠠᠨ) ᠬᠢᠭᠡᠳ ᠪᠤᠯᠠᠩᠭᠢᠷ ᠭᠣᠣᠯ(ᠡᠵᠡᠨᠡ ᠭᠣᠣᠯ) ᠤ᠋ᠨ ᠬᠣᠭᠣᠷᠣᠨᠳᠣ ᠠ᠋ᠴᠠ ᠢᠷᠡᠪᠡ᠂ ᠤᠤᠯ ᠨᠢ ᠮᠠᠯᠵᠢᠵᠤ ᠠᠮᠢᠳᠤᠷᠠᠵᠤ ᠪᠠᠢᠵᠠᠢ᠃ ᠤᠯᠤᠰ ᠤ᠋ᠨ ᠸᠠᠩ ᠨᠢ ᠾᠦᠩᠨᠦ ᠳ᠋ᠦ᠍ ᠠᠯᠠᠭᠳᠠᠪᠠ᠃ ᠾᠦᠩᠨᠦ ᠸᠠᠩ ᠢ᠋ᠶ᠋ᠠᠷ ᠦᠰᠦᠨ ᠸᠠᠩ ᠤ᠋ᠨ ᠨᠢᠯᠬᠠ ᠬᠥᠪᠡᠭᠦᠨ ᠢ᠋ ᠡᠷᠭᠦᠨ ᠲᠡᠵᠢᠭᠡᠪᠡ᠃ ᠡᠨᠡ ᠨᠢᠯᠬᠠ ᠬᠥᠪᠡᠭᠦᠨ ᠥᠭᠡᠯᠡᠢ ᠲᠣᠮᠣ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠾᠦᠩᠨᠦ ᠸᠠᠩ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠢᠶᠠ ᠨᠤᠲᠤᠭ ᠢ᠋ ᠬᠤᠷᠢᠶᠠᠵᠤ ᠠᠪᠤᠭᠲᠤᠨ ᠬᠡᠮᠡᠪᠡ᠃ ᠦᠰᠦᠨᠴᠦᠳ ᠤᠤᠯ ᠤ᠋ᠨ ᠵᠡᠷᠭᠡᠯᠡᠳᠡᠭᠡ ᠬᠥᠷᠰᠢ— ᠷᠦᠵᠢ (rouzhi) ᠠᠢᠮᠠᠭ ᠢ᠋ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠪᠠ ᠂ ᠡᠨᠡ ᠠᠢᠮᠠᠭ ᠨᠢ ᠴᠢᠶᠠᠩ ᠤᠭᠰᠠᠭᠠᠲᠠᠨ ① ᠪᠠᠢᠵᠤ ᠮᠡᠳᠡᠨᠡ᠂ ᠡᠳᠡ ᠨᠠᠷ ᠴᠦ᠍ ᠾᠦᠩᠨᠦ ᠳ᠋ᠦ᠍ ᠢᠯᠠᠭᠳᠠᠭᠰᠠᠨ ᠶᠤᠮ᠃ ᠦᠰᠦᠨᠴᠦᠳ ᠪᠠᠷᠠᠭᠤᠨᠰᠢ ᠨᠡᠭᠦᠬᠦ ᠶᠠᠪᠤᠴᠠ ᠳ᠋ᠠᠭᠠᠨ ᠰᠡᠺᠡᠴᠤᠳ ᠢ᠋ ᠴᠦ᠍ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠠ᠋ᠴᠠ ᠦᠯᠳᠡᠨ ᠬᠥᠭᠡᠭᠡᠪᠡ᠃ ᠡᠨᠡ ᠨᠡᠷᠡ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠲᠤᠬᠠᠢ ᠡᠷᠲᠡᠨ ᠦ᠌ ᠻᠷᠸᠭ᠌ ᠪᠣᠯᠤᠨ ᠷᠣᠮᠠ ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠦ᠍ ᠦᠷᠭᠦᠯᠵᠢ ᠬᠠᠷᠠᠭᠳᠠᠳᠠᠭ᠃ ᠲᠤᠰ ᠨᠤᠲᠠᠯᠠᠯᠲᠠ ᠨᠢ ᠭᠣᠣᠯᠳᠠᠭᠤ ᠡᠨᠡ ᠬᠣᠶᠠᠷ ᠬᠡᠯᠡᠨ ᠦ᠌ ᠠᠪᠢᠶᠠ ᠨᠢ ᠲᠤᠢᠯ ᠤ᠋ᠨ ᠲᠥᠰᠦᠭᠡᠲᠡᠢ ᠪᠠᠢᠬᠤ ᠤᠴᠢᠷ ᠲᠤ᠌ ᠰᠠᠭᠤᠷᠢᠯᠠᠵᠠᠢ᠃ ᠬᠣᠵᠢᠮ ᠨᠢ ᠳᠤᠮᠳᠠᠳᠤ ᠤᠯᠤᠰ ᠡᠯᠴᠢ ᠲᠣᠮᠢᠯᠠᠨ ᠪᠠᠷᠠᠭᠤᠨ ᠣᠷᠣᠨ ᠲᠠᠢ ᠬᠠᠷᠢᠯᠴᠠᠬᠤ ᠦᠶᠡ ᠳ᠋ᠦ᠍᠂ ᠷᠦᠵᠢᠴᠦᠳ ᠨᠢ ᠦᠰᠦᠨᠴᠦᠳ ᠲᠦ᠍ ᠬᠥᠭᠡᠭᠡᠭᠳᠡᠨ ᠰᠠᠯᠵᠠᠢ᠂ ᠨᠢᠭᠡ ᠬᠡᠰᠡᠭ ᠰᠡᠺᠡᠴᠤᠳ ᠪᠣᠯᠤᠨ ᠷᠦᠵᠢ ᠨᠠᠷ ᠯᠠ ᠨᠤᠲᠤᠭ ᠲᠠᠭᠠᠨ ᠦᠯᠡᠳᠡᠨ ᠰᠠᠭᠤᠷᠢᠰᠢᠪᠠ᠃ ② ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠠᠢ ᠦᠰᠦᠨ ᠤᠯᠤᠰ ᠤ᠋ᠨ ᠸᠠᠩ — ᠯᠢᠶᠧ ᠵᠢᠶᠣᠤ ᠮᠢ ᠶ᠋ᠢᠨ ᠴᠣᠯᠠ ᠨᠢ《ᠺᠦᠨᠮᠦ᠋》 ᠭᠡᠳᠡᠭ ᠪᠠᠢᠵᠠᠢ᠂ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠬᠦᠴᠦᠷᠬᠡᠭᠵᠢᠭᠡᠳ ᠾᠦᠩᠨᠦ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠪᠠᠨ ᠪᠣᠯᠢᠪᠠ᠃ ᠦᠰᠦᠨ ᠦ᠌ ᠵᠡᠭᠦᠨ ᠵᠠᠬᠠ ᠨᠢ ᠾᠦᠩᠨᠦ ᠲᠡᠢ ᠬᠢᠯᠢ ᠵᠠᠯᠭᠠᠳᠠᠭ ᠪᠠᠢᠵᠠᠢ᠂ ᠭᠡᠪᠡᠴᠦ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠪᠢᠴᠢᠭ ᠲᠦ᠍ ᠡᠭᠦᠨ ᠦ᠌ ᠲᠤᠬᠠᠢ ᠨᠠᠷᠢᠨ ᠲᠡᠮᠳᠡᠭᠯᠡᠯ ᠪᠠᠢᠬᠤ ᠦᠭᠡᠢ᠃ ᠦᠰᠦᠨ ᠦ᠌ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠣᠳᠣᠬᠢ ᠰᠢᠨᠵᠢᠶᠠᠩ ᠤ᠋ᠨ ᠬᠢᠯᠢ ᠳ᠋ᠦ᠍ ᠦᠷᠭᠦᠯᠵᠢ ᠰᠠᠭᠤᠷᠢᠰᠢᠳᠠᠭ《ᠤᠯᠤᠰ》 ᠤ᠋ᠳ ᠪᠠᠢᠪᠠ᠃ ᠵᠡᠭᠦᠨ ᠡᠮᠦᠨᠡ ᠲᠠᠯᠠ ᠨᠢ ᠳᠡ ᠶᠤᠸᠠᠨ ᠤᠯᠤᠰ᠂ ᠪᠠᠷᠠᠭᠤᠨ ᠲᠠᠯᠠ ᠨᠢ 《ᠨᠡᠭᠦᠳᠡᠯ ᠤᠯᠤᠰ》 ᠺᠠᠩ ᠵᠢᠦᠢ ᠤᠯᠤᠰ ᠪᠠᠢᠵᠠᠢ᠃ ᠦᠰᠦᠨ ᠤᠯᠤᠰ ᠨᠢ ᠳᠡ ᠶᠤᠸᠠᠨ ᠤ᠋ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠪᠠᠢᠷᠢᠯᠠᠳᠠᠭ ᠪᠥᠭᠡᠳ ᠺᠠᠩ ᠵᠢᠦᠢ ᠤᠯᠤᠰ ᠨᠢ ᠳᠡ ᠶᠤᠸᠠᠨ ᠤ᠋ ᠪᠠᠷᠠᠭᠤᠨ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠪᠠᠢᠳᠠᠭ ᠪᠣᠯᠬᠣᠷ᠂ ᠡᠨᠡ ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠢᠯᠢ ᠵᠠᠬᠠ ᠨᠢ ᠣᠳᠣ ᠶ᠋ᠢᠨ ᠳᠣᠯᠣᠭᠠᠨ ᠤᠰᠤᠨ ᠮᠣᠵᠢ ᠬᠢᠭᠡᠳ ᠰᠢᠷ ᠭᠣᠣᠯ ᠮᠣᠵᠢ ᠶ᠋ᠢᠨ ᠵᠠᠬᠠ ᠬᠢᠵᠠᠭᠠᠷ ᠲᠤ᠌ ᠨᠡᠢᠯᠡᠵᠦ ᠪᠠᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠦᠰᠦᠨᠴᠦᠳ ᠦ᠋ᠨ ᠤᠭᠰᠠᠭᠠ ᠭᠠᠷᠤᠯ ᠤ᠋ᠨ ᠲᠤᠬᠠᠢ ᠭᠡᠪᠡᠯ᠂ ᠲᠡᠳᠡ ᠨᠠᠷ ᠤ᠋ᠨ ᠦᠭᠡ ᠬᠡᠯᠡᠨ ᠳ᠋ᠡᠬᠢ ᠵᠠᠷᠢᠮ ᠬᠥᠮᠦᠨ ᠦ᠌ ᠨᠡᠷᠡ ᠪᠣᠯᠤᠨ ᠴᠣᠯᠠ ᠨᠡᠷᠡᠢᠳᠦᠯ ᠨᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠠ᠋ᠴᠠ ᠤᠯᠠᠮᠵᠢᠯᠠᠭᠳᠠᠨ ᠢᠷᠡᠵᠡᠢ᠃ ᠡᠨᠡ ᠲᠤᠬᠠᠢ ᠬᠡᠯᠡᠨ ᠦ᠌ ᠡᠷᠳᠡᠮᠲᠡᠨ ᠰᠤᠳᠤᠯᠭᠠ ᠬᠢᠭᠡ ᠦᠭᠡᠢ ᠪᠠᠢᠭᠰᠠᠭᠠᠷ᠂ ᠮᠠᠨᠤᠰ ᠤ᠋ᠨ ᠡᠨᠳᠡ ᠵᠢᠭᠠᠵᠤ ᠭᠠᠷᠭᠠᠵᠤ ᠴᠢᠳᠠᠬᠤ ᠦᠭᠡ ᠭᠡᠪᠡᠯ ᠲᠡᠳᠡ ᠨᠠᠷ ᠤ᠋ᠨ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢᠨ ᠡᠴᠦᠰ ᠲᠦ᠍《ᠮᠢ》 ᠭᠡᠳᠡᠭ ᠠᠪᠢᠶᠠ ᠵᠠᠯᠭᠠᠳᠠᠭ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠲᠡᠳᠡ ᠨᠠᠷ ᠤ᠋ᠨ ᠭᠠᠳᠠᠷ ᠲᠥᠷᠬᠦ ᠶ᠋ᠢᠨ ᠲᠤᠬᠠᠢ ᠪᠢᠳᠡ ᠪᠦᠷ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ(ᠣᠨ ᠲᠣᠭᠠᠯᠠᠯ ᠤ᠋ᠨ 7 ᠳ᠋ᠤᠭᠠᠷ ᠵᠠᠭᠤᠨ) ᠶᠢᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠵᠣᠬᠢᠶᠠᠭᠴᠢ ᠶᠠᠨ ᠱᠢ ᠬᠦ ᠶ᠋ᠢᠨ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠵᠦ ᠪᠠᠢᠨᠠ᠄《ᠦᠰᠦᠨᠴᠦᠳ ᠪᠣᠯᠪᠠᠰᠤ ᠪᠠᠷᠠᠭᠤᠨ ᠣᠷᠣᠨ ᠤ᠋ ᠣᠯᠠᠨ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠵᠢᠰᠦ ᠲᠥᠷᠬᠦ ᠨᠢ ᠡᠲᠡᠭᠡᠳ ᠥᠭᠡᠷᠡ᠃ ᠣᠳᠣ ᠶ᠋ᠢᠨ ᠾᠥ᠋ᠩᠨᠦᠴᠦᠳ ᠪᠣᠯᠪᠠᠰᠤ ᠬᠥᠬᠡ ᠨᠢᠳᠦᠲᠦ᠂ ᠤᠯᠠᠭᠠᠨ ᠴᠢᠷᠠᠢᠲᠤ ᠪᠥᠭᠡᠳ ᠪᠡᠴᠢᠨ ᠦ᠌ ᠳᠦᠷᠰᠦᠲᠦ ᠪᠥᠯᠥᠭᠡ᠂ ᠦᠨᠡᠨ ᠳ᠋ᠡᠭᠡᠨ ᠦᠰᠦᠨᠴᠦᠳ ᠦ᠋ᠨ ᠤᠭᠰᠠᠭᠠ ᠪᠤᠶᠤ᠃ 》 ᠦᠰᠦᠨᠴᠦᠳ ᠴᠣᠬᠣᠮ ᠬᠦ᠌ ᠶᠡᠬᠡ ᠡᠷᠲᠡᠨ ᠦ᠌ ᠳᠣᠷᠣᠨᠠ ᠳ᠋ᠠᠬᠢᠨ ᠰᠤᠳᠤᠯᠤᠯ ᠤ᠋ᠨ ᠡᠷᠳᠡᠮᠲᠡᠨ ᠠᠪᠠᠢᠷ᠂ ᠯᠠᠢᠮᠢᠰᠤᠰᠠ ᠪᠣᠯᠤᠨ ᠺᠯᠠᠫᠣᠯᠲ᠋ ᠤ᠋ᠨ ᠲᠥᠰᠦᠭᠡᠯᠡᠭᠰᠡᠨ ᠠᠷᠢᠶᠠᠨᠴᠤᠳ ᠲᠠᠢ ᠠᠳᠠᠯᠢᠬᠠᠨ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠨᠡᠯᠢᠶᠡᠳ ᠰᠡᠭᠦᠯᠴᠢ ᠦᠶᠡ ᠶ᠋ᠢᠨ ᠲᠥᠷᠥᠭ ᠲᠡᠦᠬᠡ ᠶ᠋ᠢᠨ ᠡᠷᠳᠡᠮᠲᠡᠨ ᠷᠠᠲᠯᠤᠸ ᠪᠣᠯᠤᠨ ᠠᠷᠢᠰᠲ᠋ᠣᠸ ᠤ᠋ᠨ ᠬᠡᠯᠡᠭᠰᠡᠨᠴᠢᠯᠡᠨ ᠲᠥᠷᠥᠭᠴᠦᠳ ᠶᠦᠮ ᠤᠤ ᠭᠡᠬᠦ ᠲᠠᠯᠠ ᠪᠠᠷ ᠮᠠᠨᠤᠰ ᠲᠤ᠌ ᠣᠯᠳᠠᠭᠰᠠᠨ ᠨᠤᠲᠠᠯᠠᠬᠤ ᠮᠠᠲ᠋ᠧᠷᠢᠶᠠᠯ ᠲᠤᠩ ᠭᠦᠢᠴᠡᠳ ᠦᠭᠡᠢ ᠪᠠᠢᠨᠠ᠃
ᠦᠰᠦᠨᠴᠦᠳ ᠦ᠋ᠨ ᠪᠡᠯᠴᠢᠭᠡᠷ ᠭᠣᠣᠯᠳᠠᠬᠤ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠤ᠌ ᠪᠠᠢᠵᠠᠢ᠂ ᠡᠨᠡ ᠲᠤᠬᠠᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠡᠨᠡ ᠨᠤᠲᠤᠭ ᠢ᠋《ᠭᠠᠵᠠᠷ ᠠᠨᠤ ᠠᠭᠯᠠᠭ ᠲᠡᠭᠰᠢ 》᠂《ᠬᠤᠷᠠ ᠪᠣᠷᠣᠭᠠᠨ ᠶᠡᠬᠡ ᠪᠥᠭᠡᠳ ᠬᠦᠢᠲᠡᠨ 》᠂《ᠠᠭᠤᠯᠠ ᠣᠯᠠᠨ ᠨᠠᠷᠠᠰᠤᠨ ᠰᠢᠭᠤᠢ ᠡᠯᠪᠡᠭ 》᠂《ᠠᠷᠪᠠᠨ ᠬᠣᠶᠠᠷ ᠲᠦᠮᠡᠨ ᠡᠷᠦᠬᠡ᠂ ᠬᠥᠮᠦᠨ ᠠᠮᠠ ᠠᠨᠤ ᠵᠢᠷᠠᠨ ᠭᠤᠷᠪᠠᠨ ᠲᠦᠮᠡ᠂ ᠰᠢᠯᠢᠳᠡᠭ ᠴᠡᠷᠢᠭ ᠠᠷᠪᠠᠨ ᠨᠠᠢ᠍ᠮᠠᠨ ᠲᠦᠮᠡ ᠨᠠᠢ᠍ᠮᠠᠨ ᠮᠢᠩᠭᠠ ᠨᠠᠢ᠍ᠮᠠᠨ ᠵᠠᠭᠤᠨ ᠬᠥᠮᠦᠨ ᠪᠠᠢᠮᠤᠢ 》 ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠢᠨᠠ᠃ ᠨᠡᠢᠰᠯᠡᠯ ᠬᠣᠲᠠ ᠶ᠋ᠢ ᠨᠢ ᠲᠡᠳᠡ ᠨᠠᠷ ᠤ᠋ᠨ ᠭᠣᠣᠯ ᠴᠠᠴᠠᠷ ᠪᠠᠢᠭᠰᠠᠨ ᠤᠯᠠᠭᠠᠨ ᠵᠢᠯᠠᠭᠠ ᡂᠢ ᠬᠦ ᠴᠧᠩ ᠬᠣᠲᠠ ᠳ᠋ᠤ᠌ ᠪᠠᠢᠯᠠ ᠭᠡᠵᠦ ᠬᠡᠯᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠳᠣ ᠶ᠋ᠢᠨ ᠢᠰᠠᠢᠺᠺᠥ᠋ᠯ ᠨᠠᠭᠤᠷ ᠤ᠋ᠨ ᠵᠡᠭᠦᠨ ᠡᠮᠦᠨᠡᠲᠦ ᠡᠷᠭᠢ ᠣᠷᠴᠢᠮ ᠪᠠᠢᠯᠠ ᠭᠡᠪᠡᠯ ᠨᠡᠩ ᠵᠣᠬᠢᠰᠲᠠᠢ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠥᠮᠦᠨ ᠲᠡᠭᠦᠨ ᠢ᠋ ᠳᠦᠷᠰᠦᠯᠡᠨ ᠲᠣᠭᠠᠴᠢᠬᠤ ᠳ᠋ᠠᠭᠠᠨ ᠠᠺᠰᠤ ᠠ᠋ᠴᠠ ᠪᠠᠷᠠᠭᠤᠨ ᠬᠣᠢᠰᠢ610 ᠭᠠᠵᠠᠷ᠂ ᠳᠠ ᠶᠤᠸᠠᠨ ᠠ᠋ᠴᠠ ᠵᠡᠭᠦᠨ ᠬᠣᠢᠰᠢ2000 ᠭᠠᠵᠠᠷ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠢᠯᠢ ᠡᠴᠡ5000 ᠭᠠᠵᠠᠷ ᠵᠠᠢᠲᠠᠢ ᠭᠡᠵᠡᠢ᠃7 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠵᠢᠭᠤᠯᠴᠢᠯᠠᠭᠴᠢᠳ ᠤ᠋ᠨ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠲᠡᠭᠦᠨ ᠢ᠋ ᠪᠠᠰᠠ ᠪᠡᠷᠬᠡ ᠪᠣᠭᠣᠮᠲᠠ ᠠ᠋ᠴᠠ50 ᠭᠠᠵᠠᠷ ᠤ᠋ᠨ ᠳᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠪᠣᠢ ᠭᠡᠵᠦ ᠲᠡᠮᠳᠡᠭᠯᠡᠪᠡ᠂ ᠭᠡᠪᠡᠴᠦ ᠡᠳᠡᠭᠡᠷ ᠠᠶᠠᠨ ᠤ᠋ ᠲᠡᠮᠳᠡᠭᠯᠡᠯ ᠨᠢ ᠣᠭᠲᠣᠬᠠᠨ ᠴᠦ᠍ ᠨᠠᠢᠳᠠᠪᠤᠷᠢ ᠦᠭᠡᠢ ᠶᠦᠮ᠃ ᠡᠨᠡ ᠲᠠᠯᠠ ᠪᠠᠷ ᠬᠢᠲᠠᠳᠴᠢ ᠡᠷᠳᠡᠮᠲᠡᠳ ᠦ᠋ᠨ ᠳᠠᠬᠢᠨ ᠬᠢᠨᠠᠨ ᠵᠠᠰᠠᠯᠲᠠ ᠬᠡᠷᠡᠭ ᠲᠡᠢ᠃ ᠠᠷᠢᠰᠲ᠋ᠣᠸ ᠶᠠᠭᠤ ᠶ᠋ᠢ ᠦᠨᠳᠦᠰᠦᠯᠡᠵᠦ ᠤᠯᠠᠭᠠᠨ ᠵᠢᠯᠠᠭᠠ ᡂᠢ ᠬᠦ ᠶ᠋ᠢ ᠺᠽᠠᠯᠰᠤ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ ᠪᠢᠳᠡ ᠮᠡᠳᠡᠬᠦ ᠦᠭᠡᠢ᠂ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠡᠨᠡ ᠰᠠᠨᠠᠯ ᠢ᠋ ᠵᠥᠪᠰᠢᠶᠡᠷᠡᠨᠡ᠂ ᠲᠤᠬᠠᠢᠯᠠᠪᠠᠯ᠂ ᠦᠰᠦᠨᠴᠳᠳ ᠰᠢᠭ ᠡᠢᠮᠦᠷᠬᠦᠦ《ᠨᠡᠭᠦᠳᠡᠯ ᠤᠯᠤᠰ》 ᠤ᠋ᠨ ᠭᠡᠷ ᠪᠠᠷᠢᠯᠭᠠ ᠶ᠋ᠢᠨ ᠪᠠᠭᠤᠷᠢ ᠦᠯᠡᠳᠡᠭᠳᠡᠯ ᠢ᠋ ᠡᠷᠢᠬᠦ ᠶᠠᠪᠤᠳᠠᠯ ᠪᠣᠯ ᠠᠴᠢ ᠬᠣᠯᠪᠣᠭᠳᠠᠯ ᠦᠭᠡᠢ ᠶᠦ᠍ᠮ ᠃ ᠢᠰᠡᠢᠺᠺᠥ᠋ᠯ ᠨᠠᠭᠤᠷ ᠤ᠋ᠨ ᠡᠷᠭᠢ ᠪᠠ ᠢᠷᠣᠭᠠᠷ ᠠ᠋ᠴᠠ ᠮᠠᠯᠲᠠᠵᠤ ᠭᠠᠷᠭᠠᠭᠰᠠᠨ ᠬᠥᠰᠢᠶᠡ ᠲᠡᠮᠳᠡᠭᠯᠡᠯ ᠢ᠋ ᠠᠰᠢᠭᠯᠠᠨ ᠨᠤᠲᠠᠯᠠᠭᠰᠠᠨ(ᠣᠳᠣ ᠪᠣᠯᠲᠠᠯᠠ ᠵᠠᠷᠢᠮ ᠬᠥᠮᠦᠨ ᠢᠩᠭᠢᠵᠦ ᠬᠢᠭᠰᠡᠭᠡᠷ) ᠴᠦ᠍ ᠤᠳᠬᠠ ᠦᠭᠡᠢ ᠶᠦ᠍ᠮ᠃ ᠢᠰᠡᠢᠺᠺᠥ᠋ᠯ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠦ᠌ ᠬᠣᠲᠠ ᠴᠠᠢᠵᠠ ᠶ᠋ᠢᠨ ᠪᠠᠭᠤᠷᠢ ᠦᠯᠡᠳᠡᠭᠳᠡᠯ ᠪᠣᠯ ᠦᠰᠦᠨ ᠭᠡᠳᠡᠭ ᠡᠨᠡ ᠦᠭᠡ ᠠᠯᠢ ᠡᠷᠲᠡ ᠬᠥᠮᠦᠰ ᠲᠦ᠍ ᠮᠠᠷᠲᠠᠭᠳᠠᠴᠢᠬᠠᠭᠰᠠᠨ ᠲᠡᠷᠡ ᠦᠶᠡ ᠪᠡᠷ ᠰᠠᠶᠢ ᠪᠠᠢᠭᠤᠯᠤᠭᠳᠠᠭᠰᠠᠨ ᠭᠡᠳᠡᠭ ᠢ᠋ ᠪᠢᠳᠡ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃
ᠨᠡᠢᠲᠡ ᠶ᠋ᠢᠨ ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡᠬᠢ 105 ᠣᠨ ᠳ᠋ᠤ᠌᠂ ᠳᠤᠮᠳᠠᠳᠤ ᠤᠯᠤᠰ ᠵᠠᠩ ᠴᠢᠶᠠᠨ ᠢ᠋ ᠡᠯᠴᠢ ᠪᠣᠯᠭᠠᠨ ᠦᠰᠦᠨ ᠢ᠋ ᠵᠡᠭᠦᠨᠰᠢ ᠬᠠᠭᠤᠴᠢᠨ ᠨᠤᠲᠤᠭ ᠲᠠᠭᠠᠨ ᠨᠡᠭᠦᠵᠦ᠂ ᠳᠤᠮᠳᠠᠳᠤ ᠤᠯᠤᠰ ᠲᠠᠢ ᠠᠬᠠ ᠳᠡᠭᠦᠦ ᠪᠣᠯᠤᠯᠴᠠᠨ᠂ ᠾᠦᠩᠨᠦ ᠶ᠋ᠢ ᠳᠠᠷᠤᠰᠤᠭᠠᠢ ᠭᠡᠵᠦ ᠢᠳᠬᠠᠭᠰᠠᠨ ᠪᠣᠯᠪᠠᠴᠤ ᠦᠰᠦᠨᠴᠦᠳ ᠡᠳᠡᠭᠡᠷ ᠡᠯᠴᠢᠳ ᠢ᠋ ᠣᠢᠰᠢᠶᠠᠭᠰᠠᠨ ᠦᠭᠡᠢ᠂ ᠲᠡᠢᠨ ᠬᠦ᠌ ᠵᠠᠩ ᠴᠢᠶᠠᠨ ᠤ᠋ ᠲᠥᠯᠥᠪᠯᠡᠭᠡ ᠪᠦᠲᠦᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠣᠵᠢᠮ ᠨᠢ ᠦᠰᠦᠨ ᠦ᠌ ᠡᠯᠴᠢ ᠵᠠᠩ ᠴᠢᠶᠠᠨ ᠢ᠋ ᠳᠠᠭᠠᠵᠤ ᠬᠠᠨ ᠤᠯᠤᠰ ᠲᠤ᠌ ᠬᠦᠷᠦᠭᠡᠳ ᠰᠠᠶᠢ ᠬᠠᠨ ᠤᠯᠤᠰ ᠤ᠋ᠨ 《ᠬᠥᠮᠦᠨ ᠣᠯᠠᠨ ᠤᠯᠤᠰ ᠪᠠᠶᠠᠨ》ᠪᠠᠢᠬᠤ ᠶ᠋ᠢ ᠮᠡᠳᠡᠵᠦ ᠂ ᠤᠯᠤᠰ ᠲᠠᠭᠠᠨ ᠪᠤᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠢᠯᠠᠳᠬᠠᠨ ᠮᠡᠳᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠬᠠᠨ ᠤᠯᠤᠰ ᠤ᠋ᠨ ᠨᠡᠷᠡ ᠰᠦᠷ ᠵᠢᠭᠠᠬᠠᠨ ᠮᠠᠨᠳᠤᠪᠠ᠃ᠵᠠᠩ ᠴᠢᠶᠠᠨ ᠠ᠋ᠴᠠ ᠰᠡᠭᠦᠯᠡᠷ ᠂ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠶᠡᠷᠦ ᠡᠴᠡ ᠲᠠᠰᠤᠷᠠᠭᠠ ᠦᠭᠡᠢ᠂ ᠭᠡᠪᠡᠴᠦ ᠳᠡ ᠶᠤᠸᠠᠨ ᠤᠯᠤᠰ ᠲᠤᠷ ᠣᠴᠢᠬᠤ ᠠᠨᠤ ᠣᠯᠠᠨ᠂ ᠦᠰᠤᠨᠴᠤᠳ ᠳᠡᠮᠡᠢ ᠶᠠᠭᠤᠮᠠ ᠣᠯᠵᠤ ᠬᠦᠷᠲᠡᠭᠰᠡᠨ ᠦᠭᠡᠢ᠃ ᠲᠡᠢᠨ ᠬᠦ᠌ ᠺᠦᠨᠮᠥ᠋ ᠪᠡᠷ ᠡᠯᠴᠢ ᠢᠯᠡᠬᠡᠨ ᠠᠭᠲᠠ ᠪᠡᠯᠡᠭᠯᠡᠵᠦ᠂ ᠬᠠᠨ ᠤᠯᠤᠰ ᠤ᠋ᠨ ᠭᠦᠩᠵᠦ ᠶ᠋ᠢ ᠪᠣᠭᠲᠣᠯᠠᠨ ᠠᠪᠰᠤᠭᠠᠢ ᠭᠡᠮᠡᠨ ᠮᠢᠩᠭᠠᠨ ᠠᠭᠲᠠ ᠶ᠋ᠢᠨ ᠪᠡᠯᠡᠭ ᠪᠠᠷᠢᠪᠠ᠃ ᠬᠠᠨ ᠤᠯᠤᠰ ᠬᠦᠰᠡᠭᠰᠡᠨ ᠢᠨᠦ ᠬᠦᠯᠢᠶᠡᠨ ᠠᠪᠤᠭᠰᠠᠨᠠ᠂ ᠺᠦᠨᠮᠥ᠋ ᠪᠡᠷ ᠬᠠᠨ ᠤᠯᠤᠰ ᠤ᠋ᠨ ᠭᠦᠩᠵᠦ ᠶ᠋ᠢ ᠪᠠᠷᠠᠭᠤᠨ ᠣᠷᠳᠣᠨ ᠤ᠋ ᠬᠠᠲᠤᠨ ᠪᠣᠯᠭᠠᠵᠤ᠂ ᠾᠦᠩᠨᠦ ᠶ᠋ᠢᠨ ᠴᠠᠨ ᠢᠦᠢ ᠶ᠋ᠢᠨ ᠥᠬᠢᠨ ᠢ᠋ ᠵᠡᠭᠦᠨ ᠣᠷᠳᠣᠨ ᠤ᠋ ᠬᠠᠲᠤᠨ ᠪᠣᠯᠭᠠᠪᠠ᠃ ᠭᠦᠩᠵᠦ ᠪᠡᠷ ᠵᠠᠩ ᠳᠠᠳᠬᠠᠯ ᠦᠰᠦᠳ ᠥᠭᠡᠷᠡ ᠪᠥᠭᠡᠳ ᠦᠭᠡ ᠬᠡᠯᠡ ᠨᠡᠪᠲᠡᠷᠡᠬᠦ ᠦᠭᠡᠢ ᠠᠯᠤᠰ ᠬᠣᠯᠠ ᠬᠠᠷᠢ ᠤᠯᠤᠰ ᠤ᠋ᠨ ᠦᠰᠦᠨ ᠸᠠᠩ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠳ᠋ᠠᠭᠠᠨ ᠡᠮᠭᠡᠨᠢᠨ ᠵᠣᠪᠠᠵᠤ ᠰᠢᠯᠦᠭ ᠵᠣᠬᠢᠶᠠᠪᠠ᠃ 《ᠢᠰᠡᠭᠡᠢ ᠬᠠᠨᠠ ᠲᠠᠢ ᠴᠠᠴᠠᠷ ᠮᠠᠢᠬᠠᠨ ᠳ᠋ᠤ᠌ ᠰᠠᠭᠤᠮᠤᠢ ᠂ ᠢᠳᠡᠵᠦ ᠤᠤᠭᠤᠬᠤ ᠠᠨᠤ ᠮᠢᠬᠠ ᠰᠦ ᠪᠤᠶᠤ》᠃
ᠺᠦᠨᠮᠥ᠋ ᠥᠲᠡᠯᠵᠦ᠂ ᠨᠠᠰᠤ ᠪᠠᠷᠠᠬᠤ ᠦᠶᠡ ᠳ᠋ᠡᠭᠡᠨ ᠬᠠᠨ ᠤᠯᠤᠰ ᠤ᠋ᠨ ᠭᠦᠩᠵᠦ ᠶ᠋ᠢ ᠥᠪᠡᠷ ᠦ᠋ᠨ ᠣᠮᠪᠣᠯᠣ ᠵᠢᠶᠦ᠋ᠨ ᠰᠢᠦᠢ ᠮᠢ ᠳ᠋ᠦ᠍ ᠪᠣᠭᠲᠣᠯᠠᠨ ᠥᠭᠰᠦᠭᠡᠢ ᠭᠡᠰᠡᠨ ᠳ᠋ᠦ᠍ ᠭᠦᠩᠵᠦ ᠪᠡᠷ ᠦᠭᠡ ᠶ᠋ᠢ ᠨᠢ ᠳᠠᠭᠠᠬᠤ ᠦᠭᠡᠢ ᠲᠤᠯᠠ ᠬᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠭᠦᠩᠵᠦ ᠪᠡᠨ ᠦᠰᠦᠨ ᠤᠯᠤᠰ ᠤ᠋ᠨ ᠵᠠᠩ ᠵᠤᠷᠰᠢᠯ ᠢ᠋ ᠳᠠᠭᠠᠭᠲᠤᠨ ᠭᠡᠵᠦ ᠢᠳᠬᠠᠪᠠ᠃ ᠵᠢᠶᠦ᠋ᠨ ᠰᠢᠦᠢ ᠮᠢ ᠶ᠋ᠢᠨ ᠨᠣᠶᠠᠨ ᠴᠣᠯᠠ《ᠼᠸᠠ ᠽᠧᠦ》᠂ ᠾᠦᠩᠨᠦ ᠪᠦᠰᠡᠭᠦᠢ ᠡᠴᠡ ᠨᠢ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠦ᠌ ᠬᠢᠨᠢ ᠨᠡᠷᠡ ᠨᠢᠮᠢ᠃ 《ᠼᠸᠠ ᠽᠧᠦ》 ᠶ᠋ᠢ ᠨᠠᠰᠤ ᠪᠠᠷᠠᠬᠤ ᠦᠶᠡ ᠳ᠋ᠦ᠍ ᠨᠢᠮᠢ ᠪᠠᠭᠠ ᠪᠠᠢᠭᠰᠠᠨ ᠲᠤᠯᠠ ᠤᠯᠤᠰ ᠤ᠋ᠨ ᠡᠷᠬᠡ ᠶ᠋ᠢ ᠲᠦᠷ《 ᠼᠸᠠ ᠽᠧᠦ》 ᠶ᠋ᠢᠨ ᠪᠠᠭᠠ ᠠᠪᠠᠭᠠ ᠶ᠋ᠢᠨ ᠬᠥᠪᠡᠭᠦᠨ ᠸᠧᠩ ᠬᠦᠢ ᠮᠢ ᠳ᠋ᠦ᠍ ᠲᠤᠰᠢᠶᠠᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠵᠢᠶᠠᠩ ᠳᠦ ᠭᠦᠩᠵᠦ ᠬᠡᠳᠦᠢᠨ ᠨᠠᠰᠤ ᠪᠠᠷᠠᠴᠢᠬᠠᠭᠰᠠᠨ ᠪᠠᠢᠨᠠ᠃ ᠬᠠᠨ ᠤᠯᠤᠰ ᠳᠠᠬᠢᠨᠲᠠ ᠴᠦ ᠭᠦᠩᠵᠦ ᠶ᠋ᠢ《ᠽᠧᠨ ᠽᠧᠦ》 ᠳ᠋ᠦ᠍ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠪᠡ᠃ ᠸᠧᠩ ᠬᠦᠢ ᠮᠢ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠴᠦ ᠭᠦᠩᠵᠦ ᠶ᠋ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠪᠠ᠃ ᠸᠧᠩ ᠬᠦᠢ ᠮᠢ ᠤᠯᠤᠰ ᠢ᠋ ᠵᠠᠰᠠᠬᠤ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠠᠵᠤᠭᠤ᠂ ᠳᠣᠲᠣᠭᠠᠳᠤ ᠪᠠᠨ ᠠᠮᠤᠷᠵᠢᠭᠤᠯᠵᠤ᠂ ᠭᠠᠳᠠᠭᠠᠳᠤ ᠳ᠋ᠤ᠌ ᠴᠢᠩᠭᠠ ᠬᠠᠨᠳᠤᠬᠤ ᠬᠦᠴᠦᠨ ᠲᠡᠢ ᠪᠠᠢᠪᠠ᠃ ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡᠬᠢ71 ᠣᠨ ᠳ᠋ᠤ᠌ ᠸᠧᠩ ᠬᠦᠢ ᠮᠢ ᠪᠡᠷ ᠬᠠᠨ ᠤᠯᠤᠰ ᠲᠠᠢ ᠬᠣᠯᠪᠣᠭᠠᠯᠠᠨ᠂ ᠾᠦᠩᠨᠦ ᠶ᠋ᠢ ᠴᠣᠬᠢᠵᠤ ᠳᠥᠷᠪᠡᠨ ᠮᠢᠩᠭᠠᠨ ᠲᠡᠷᠢᠭᠦᠨ ᠢ᠋ ᠴᠠᠪᠴᠢᠵᠤ᠂ ᠮᠣᠷᠢ᠂ ᠦᠬᠡᠷ᠂ ᠬᠣᠨᠢ᠂ ᠡᠯᠵᠢᠭᠡ᠂ ᠲᠡᠮᠡᠭᠡ ᠳᠣᠯᠣᠭᠠᠨ ᠲᠦᠮᠡ ᠶ᠋ᠢ ᠣᠯᠵᠠᠯᠠᠪᠠ᠃③ ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠺᠦᠨᠮᠦ᠋ ᠪᠠᠰᠠ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠫᠠᠮᠢᠷ ᠤ᠋ᠨ ᠥᠨᠳᠥᠷᠯᠢᠭ ᠡᠴᠡ ᠵᠡᠭᠦᠨᠰᠢᠬᠢ ᠬᠡᠷᠡᠭ ᠲᠦ᠍ ᠭᠠᠷ ᠲᠥᠷᠥᠬᠦ ᠪᠣᠯᠪᠠ᠃ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠨᠢ ᠶᠠᠷᠤᠺᠠᠨᠳ᠋( ᠱᠠ ᠴᠧ ᠸᠠᠩ) ᠸᠠᠩ ᠪᠣᠯᠪᠠ᠃ ᠶᠡᠬᠡ ᠥᠬᠢᠨ ᠨᠢ ᠺᠦᠴᠠ(ᠺᠦᠴᠢᠨᠠᠨ) ᠸᠠᠩ ᠳ᠋ᠤ᠌ ᠮᠣᠷᠳᠠᠪᠠ᠃ ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡᠬᠢ60 ᠣᠨ ᠳ᠋ᠤ᠌᠂ ᠸᠧᠩ ᠬᠦᠢ ᠮᠢ ᠨᠠᠰᠤ ᠨᠥᠭᠴᠢᠪᠡ᠂《ᠽᠧᠨ ᠽᠧᠦ》 ᠶ᠋ᠢᠨ ᠬᠥᠪᠡᠭᠦᠨ ᠨᠢᠮᠢ ᠰᠠᠭᠤᠷᠢᠨ ᠳ᠋ᠤ᠌ ᠭᠠᠷᠴᠤ᠂《ᠺᠤᠸᠠᠩ ᠸᠠᠩ》 ᠬᠡᠮᠡᠭᠳᠡᠪᠡ᠃
ᠺᠤᠸᠠᠩ ᠸᠠᠩ ᠢ᠋ᠶ᠋ᠠᠷ ᠴᠦ ᠭᠦᠩᠵᠦ ᠶ᠋ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠪᠠ᠂ ᠭᠦᠩᠵᠦ ᠨᠠᠰᠤᠨ ᠠᠬᠢᠭᠰᠠᠨ(ᠲᠠᠪᠢ ᠭᠠᠷᠤᠢ ᠨᠠᠰᠤᠲᠠᠢ) ᠪᠣᠯᠪᠠᠴᠤ ᠨᠢᠭᠡᠨ ᠬᠥᠪᠡᠭᠦᠨ ᠲᠥᠷᠥᠭᠦᠯᠪᠡ᠃ ᠺᠤᠸᠠᠩ ᠸᠠᠩ ᠢ᠋ᠶ᠋ᠠᠷ ᠴᠦ ᠭᠦᠩᠵᠦ ᠯᠦ᠍ᠭᠡ ᠠᠶᠠ ᠡᠪᠳᠡᠷᠡᠭᠰᠡᠨ ᠪᠥᠭᠡᠳ ᠵᠠᠩ ᠠᠨᠤ ᠬᠡᠷᠴᠡᠭᠡᠢ ᠳᠣᠭᠰᠢᠨ ᠲᠤᠯᠠ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠠᠯᠳᠠᠪᠠ᠃ ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠬᠦᠷᠴᠦ ᠢᠷᠡᠭᠰᠡᠨᠡ᠂ ᠭᠦᠩᠵᠦ ᠪᠡᠷ ᠡᠯᠴᠢᠳ ᠯᠦ᠍ᠭᠡ ᠵᠥᠪᠯᠡᠯᠳᠦᠨ ᠠᠷᠢᠬᠢᠨ ᠰᠢᠷᠡᠭᠡ ᠵᠠᠰᠠᠵᠤ᠂ ᠺᠤᠸᠠᠩ ᠸᠠᠩ ᠢ᠋ ᠠᠯᠠᠰᠤᠭᠠᠢ ᠬᠡᠮᠡᠪᠡ᠃ ᠰᠡᠯᠡᠮᠡ ᠢᠨᠦ ᠡᠰᠡ ᠤᠨᠤᠭᠰᠠᠨ ᠳ᠋ᠤᠷ ᠺᠤᠸᠠᠩ ᠸᠠᠩ ᠰᠣᠴᠢᠨ ᠪᠣᠰᠴᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠳᠤᠲᠠᠭᠠᠪᠠ᠃ ᠺᠤᠸᠠᠩ ᠸᠠᠩ ᠤ᠋ᠨ ᠬᠥᠪᠡᠭᠦᠨ ᠰᠢ ᠱᠧᠨ ᠱᠧᠦ ᠴᠡᠷᠢᠭ ᠳᠠᠢᠴᠢᠯᠠᠨ ᡂᠢ ᠬᠦ ᠬᠣᠲᠠ ᠶ᠋ᠢ ᠪᠦᠰᠡᠯᠡᠵᠦ ᠬᠠᠭᠠᠭᠰᠠᠨ ᠳ᠋ᠤ᠌ ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠪᠣᠯᠤᠨ ᠭᠦᠩᠵᠦ ᠨᠠᠷ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠ ᠪᠦᠰᠡᠯᠡᠭᠳᠡᠪᠡ᠃ ᠡᠨᠡ ᠣᠴᠢᠷᠠ ᠬᠠᠨ ᠤᠯᠤᠰ ᠣᠰᠣᠯ ᠬᠦᠯᠢᠶᠡᠨ᠂ ᠡᠯᠴᠢ ᠸᠧᠢ ᠾᠧ ᠢ᠂ ᠷᠧᠨ ᠴᠠᠩ ᠢ᠋ ᠬᠣᠲᠠᠨᠠ ᠳᠠᠷᠤᠨ ᠠᠪᠴᠢᠷᠠᠵᠤ᠂ ᠴᠠᠪᠴᠢᠨ ᠠᠯᠠᠪᠠ᠃ ᠵᠦᠩ ᠯᠠᠩ ᠵᠠᠩᠵᠤᠨ ᠢ᠋ ᠲᠣᠮᠢᠯᠠᠨ᠂ ᠡᠮ ᠥᠭᠴᠦ ᠺᠤᠸᠠᠩ ᠸᠠᠩ ᠤ᠋ᠨ ᠪᠡᠶᠡ ᠶ᠋ᠢ ᠡᠮᠨᠡᠭᠦᠯᠵᠦ᠂ ᠠᠯᠲᠠ ᠲᠣᠷᠭᠠ ᠪᠡᠯᠡᠭᠯᠡᠪᠡ᠃ ᠭᠦᠩᠵᠦ ᠶ᠋ᠢ ᠦᠯᠡᠳᠡᠭᠡᠨ᠂ ᠶᠠᠯᠠ ᠡᠰᠡ ᠬᠡᠯᠡᠯᠴᠡᠪᠡ᠃ ᠸᠧᠩ ᠬᠦᠢ ᠮᠢ ᠶ᠋ᠢᠨ ᠬᠥᠪᠡᠭᠦᠨ ᠡᠦ ᠵᠢᠦ ᠲᠦ ᠪᠡᠷ ᠾᠦᠩᠨᠦ ᠭᠦᠩᠵᠦ ᠡᠴᠡ ᠲᠥᠷᠥᠭᠰᠡᠨ ᠪᠥᠯᠥᠭᠡ᠂ ᠺᠤᠸᠠᠩ ᠸᠠᠩ ᠢ᠋ᠶ᠋ᠠᠷ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠠᠯᠳᠠᠭᠰᠠᠨ ᠲᠣᠬᠢᠶᠠᠯ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠤᠮᠠᠷᠠᠲᠤ ᠠᠭᠤᠯᠤᠨᠠ(ᠠᠯᠲᠠᠢ ᠠᠭᠤᠯᠠ) ᠣᠷᠣᠵᠤ᠂ ᠡᠬᠡ ᠶ᠋ᠢᠨ ᠮᠢᠨᠢ ᠲᠥᠷᠬᠥᠮ ᠾᠦᠩᠨᠦ ᠶ᠋ᠢᠨ ᠴᠡᠷᠢᠭ ᠨᠠᠳᠠ ᠶ᠋ᠢ ᠲᠤᠰᠠᠯᠠᠬᠤ ᠪᠠᠷ ᠢᠷᠡᠬᠦ ᠭᠡᠵᠦ ᠪᠣᠢ ᠭᠡᠮᠡᠨ ᠴᠤᠤ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠳ᠋ᠤ᠌ ᠬᠥᠮᠦᠰ ᠲᠡᠭᠦᠨ ᠢ᠋ ᠳᠠᠭᠠᠪᠠ᠃ ᠡᠦ ᠵᠢᠦ ᠳ᠋ᠦ᠍ ᠬᠣᠵᠢᠮ ᠨᠢ ᠺᠤᠸᠠᠩ ᠸᠠᠩ ᠢ᠋ ᠠᠯᠠᠵᠤ᠂ ᠰᠠᠭᠤᠷᠢᠨ ᠢ᠋ ᠠᠨᠤ ᠡᠵᠡᠯᠡᠪᠡ᠃ ᠾᠥ᠋ᠩᠨᠦᠴᠦᠳ ᠦ᠋ᠨ ᠤᠬᠠᠭᠠᠯᠠᠭᠰᠠᠨ ᠲᠥᠷᠥ ᠶ᠋ᠢᠨ ᠬᠤᠪᠢᠰᠤᠯ ᠪᠦᠲᠦᠭᠰᠡᠨ ᠶᠠᠪᠤᠳᠠᠯ ᠬᠠᠨ ᠤᠯᠤᠰ ᠤ᠋ᠨ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠪᠣᠯᠪᠠ᠂ ᠲᠡᠢᠨ ᠬᠦ᠌ ᠬᠤᠳᠳᠤᠭ ᠮᠠᠯᠲᠠᠨ᠂ ᠰᠤᠪᠠᠭ ᠲᠠᠲᠠᠵᠤ᠂ ᠠᠮᠤ ᠬᠠᠳᠠᠭᠠᠯᠠᠨ᠂ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠭᠠᠵᠠᠷ ᠤ᠋ᠨ ᠬᠤᠪᠢᠰᠤᠯ ᠢ᠋ ᠰᠡᠷᠭᠡᠢᠯᠡᠪᠡ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠣᠯ ᠢ᠋ᠶ᠋ᠠᠷ ᠴᠦ ᠭᠦᠩᠵᠦ ᠶ᠋ᠢᠨ ᠰᠢᠪᠡᠭᠴᠢᠨ ᠹᠧᠩ ᠯᠢᠶᠣᠣ᠂ ᠲᠤᠬᠠᠢᠯᠠᠪᠠᠯ ᠹᠧᠩ ᠬᠠᠲᠤᠨ ᠪᠠᠢᠳᠠᠯ ᠢ᠋ ᠠᠷᠭᠠᠯᠠᠨ ᠡᠪᠰᠡᠭᠦᠯᠪᠡ᠃ ᠡᠦ ᠵᠢᠦ ᠲᠦ ᠶ᠋ᠢ ᠪᠠᠭᠠ ᠺᠦᠨᠮᠢ ᠬᠡᠮᠡᠵᠦ᠂ ᠸᠧᠩ ᠬᠦᠢ ᠮᠢ ᠶ᠋ᠢᠨ ᠬᠥᠪᠡᠭᠦᠨ ᠶᠤᠸᠠᠨ ᠬᠦᠢ ᠮᠢ ᠶ᠋ᠢ ᠶᠡᠬᠡ ᠺᠥᠨᠮᠢ(《ᠺᠦᠨ᠌ᠮᠥ᠋》 ᠶ᠋ᠢ ᠬᠣᠵᠢᠮ ᠨᠢ《ᠺᠥ᠋ᠨᠮᠢ》 ᠭᠡᠵᠦ ᠨᠡᠷᠡᠯᠡᠬᠦ ᠪᠣᠯᠪᠠ) ᠬᠡᠮᠡᠪᠡ᠃ ᠶᠡᠬᠡ ᠺᠥ᠋ᠨᠮᠢ ᠵᠢᠷᠭᠤᠭᠠᠨ ᠲᠦᠮᠡ ᠢᠯᠡᠭᠦᠦ ᠡᠷᠦᠬᠡ ᠶ᠋ᠢ ᠳᠠᠭᠠᠭᠤᠯᠵᠤ᠂ ᠪᠠᠭᠠ ᠺᠥ᠋ᠨᠮᠢ ᠳᠥᠷᠪᠡᠨ ᠮᠢᠩᠭᠠ ᠢᠯᠡᠭᠦᠦ ᠡᠷᠦᠬᠡ ᠶ᠋ᠢ ᠳᠠᠭᠠᠭᠤᠯᠪᠠ᠃ ᠡᠦ ᠵᠢᠦ ᠳ᠋ᠦ᠍ ᠾᠦᠩᠨᠦ ᠯᠦ᠍ᠭᠡ ᠪᠠᠢᠯᠳᠤᠭᠰᠠᠨ ᠪᠣᠯᠪᠠᠴᠤ ᠠᠰᠢᠭ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠯᠦ᠍ᠭᠡ ᠶᠠᠪᠤᠯᠴᠠᠭᠠᠳ ᠶᠡᠬᠡ ᠡᠪ ᠲᠡᠢ ᠪᠣᠯᠪᠠ᠃
ᠶᠡᠬᠡ ᠪᠠᠭᠠ ᠺᠥ᠋ᠨᠮᠢ ᠭᠡᠵᠦ ᠢᠯᠭᠠᠭᠰᠠᠨ ᠠ᠋ᠴᠠ ᠪᠣᠯᠵᠤ᠂ ᠥᠷᠢᠰᠦᠯᠳᠦᠬᠦ ᠳ᠋ᠦ᠍ ᠠᠮᠠᠷ ᠪᠣᠯᠪᠠ᠃ ᠶᠤᠸᠠᠨ ᠬᠦᠢ ᠮᠢ ᠶ᠋ᠢᠨ ᠣᠮᠪᠣᠯᠣ ᠼᠢ ᠯᠢ ᠮᠢ ᠶᠡᠬᠡ ᠺᠥ᠋ᠨᠮᠢ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠤᠯᠤᠰ ᠠᠨᠤ ᠬᠦᠴᠦᠷᠬᠡᠭᠵᠢᠵᠦ᠂ ᠠᠷᠠᠳ ᠠᠨᠤ ᠠᠮᠤᠭᠤᠯᠠᠩ ᠪᠣᠯᠵᠤ᠂ ᠸᠧᠩ ᠬᠦᠢ ᠮᠢ ᠶ᠋ᠢᠨ ᠦᠶᠡ ᠡᠴᠡ ᠳᠠᠪᠠᠪᠠ᠃ ᠼᠢ ᠯᠢ ᠮᠢ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠠᠷᠠᠳ ᠢ᠋ᠶ᠋ᠠᠨ ᠮᠠᠯ ᠤᠨᠤᠭᠠ ᠪᠠᠨ ᠺᠥ᠋ᠨᠮᠢ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠵᠢᠭᠤᠷᠠᠯᠳᠤᠭᠠᠨ ᠡᠭᠦᠰᠬᠦ ᠶ᠋ᠢ ᠰᠡᠷᠭᠡᠢᠯᠡᠬᠦ ᠬᠡᠷᠡᠭᠲᠡᠢ ᠬᠡᠮᠡᠪᠡ᠃ ᠦᠰᠦᠨ ᠤᠯᠤᠰ ᠲᠤ᠌ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠢᠭᠡᠨᠲᠡ ᠬᠤᠪᠢ ᠶ᠋ᠢᠨ ᠪᠡᠯᠴᠢᠭᠡᠷ ᠪᠣᠢ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠢ᠋ ᠡᠨᠡ ᠤᠴᠢᠷ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠡᠨᠡ ᠨᠢ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠲᠥᠷᠥᠭᠴᠢᠳ ᠪᠠ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠯᠡᠳᠡᠭ《ᠺᠠᠯᠺᠠ》 ᠲᠠᠢ ᠠᠳᠠᠯᠢᠬᠠᠨ᠃ ᠪᠠᠭᠠ ᠺᠥ᠋ᠨᠮᠢ ᠠᠯᠠᠭᠤᠷᠴᠢᠨ ᠲᠣᠮᠢᠯᠠᠵᠤ᠂ ᠶᠡᠬᠡ ᠺᠥ᠋ᠨᠮᠢ ᠶ᠋ᠢ ᠨᠢᠭᠤᠴᠠ ᠪᠠᠷ ᠬᠣᠷᠣᠭᠠᠪᠠ᠃ ᠬᠠᠨ ᠤᠯᠤᠰ ᠳᠠᠬᠢᠨ ᠬᠠᠨ ᠤᠯᠤᠰ ᠤ᠋ᠨ ᠭᠦᠩᠵᠦ ᠶ᠋ᠢᠨ ᠣᠮᠪᠣᠯᠣ ᠡᠢ ᡁᠢ ᠮᠢ ᠶ᠋ᠢ ᠶᠡᠬᠡ ᠺᠥ᠋ᠨᠮᠢ ᠪᠣᠯᠭᠠᠪᠠ᠃ ᠶᠡᠬᠡ ᠪᠠᠭᠠ ᠬᠣᠶᠠᠷ ᠺᠥ᠋ᠨᠮᠢ ᠶ᠋ᠢᠨ ᠲᠡᠮᠡᠴᠡᠯᠳᠦᠭᠡᠨ ᠦ᠌ ᠳᠤᠮᠳᠠ᠂ ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠪᠠᠭᠠ ᠺᠥ᠋ᠨᠮᠢ ᠲᠡᠢ ᠬᠣᠯᠪᠣᠭᠳᠠᠬᠤ ᠪᠣᠯᠪᠠ᠃ ᠪᠠᠭᠠ ᠺᠥ᠋ᠨᠮᠢ ᠠᠨ ᠯᠢ ᠮᠢ ᠾᠦᠩᠨᠦ ᠳ᠋ᠦ᠍ ᠬᠣᠣᠷᠯᠠᠭᠳᠠᠭᠰᠠᠨ ᠢ᠋ ᠬᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠤᠷᠢᠳᠴᠢᠯᠠᠨ ᠣᠯᠵᠤ ᠮᠡᠳᠡᠭᠡᠳ᠂ ᠣᠷᠣᠨ ᠳ᠋ᠤᠨᠢ ᠬᠠᠨ ᠤᠯᠤᠰ ᠤ᠋ᠨ ᠳᠦ ᠬᠤ᠌ ᠲᠦᠰᠢᠮᠡᠯ ᠢ᠋ ᠲᠣᠮᠢᠯᠠᠪᠠ(ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡ11 ᠣᠨ)᠃ ᠠᠨ ᠯᠢ ᠮᠢ ᠶ᠋ᠢᠨ ᠪᠠᠭᠠ ᠠᠪᠠᠭᠠ ᠪᠧᠢ ᠶᠤᠸᠠᠨ ᡁᠢ ᠨᠠᠢ᠍ᠮᠠᠨ ᠲᠦᠮᠡᠨ ᠡᠷᠦᠬᠡ ᠳᠠᠭᠠᠭᠤᠯᠤᠨ ᠨᠡᠭᠦᠵᠦ᠂ ᠬᠣᠶᠠᠷ ᠺᠦᠨᠮᠢ ᠶ᠋ᠢ ᠨᠡᠢᠯᠡᠭᠦᠯᠬᠦ ᠭᠡᠰᠡᠨ ᠳ᠋ᠦ᠍ ᠬᠠᠨ ᠤᠯᠤᠰ ᠪᠣᠯᠤᠨ ᠬᠣᠶᠠᠷ ᠺᠦᠨᠮᠢ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠬᠠᠷᠢᠴᠠᠭᠠ ᠨᠢᠭᠡ ᠦᠶᠡ ᠪᠠᠴᠢᠮ ᠪᠣᠯᠪᠠ᠃ ᠣᠨ ᠲᠣᠭᠠᠯᠠᠯ ᠠ᠋ᠴᠠ ᠡᠮᠦᠨᠡ ᠨᠢᠭᠡ ᠣᠨ ᠳ᠋ᠤ᠌᠂ ᠡᠢ ᡁᠢ ᠮᠢ ᠪᠣᠯᠤᠨ ᠾᠦᠩᠨᠦ ᠶ᠋ᠢᠨ ᠴᠡᠨ ᠢᠦᠢ ᠬᠠᠮᠲᠤ ᠪᠠᠷ ᠬᠠᠨ ᠤᠯᠤᠰ ᠲᠤ᠌ ᠣᠷᠣᠵᠤ ᠥᠭᠭᠦᠭᠰᠡᠨᠡ ᠬᠠᠨ ᠤᠯᠤᠰ ᠶᠡᠬᠡᠲᠡᠨ ᠣᠮᠣᠭᠰᠢᠪᠠ᠃ ᠰᠡᠭᠦᠯᠡᠷ ᠨᠢ ᠬᠠᠨ ᠤᠯᠤᠰ ᠤ᠋ᠨ ᠳᠦ ᠬᠤ᠌ ᠪᠠᠷ ᠪᠧᠢ ᠶᠤᠸᠠᠨ ᡁᠢ ᠶ᠋ᠢ ᠠᠯᠠᠪᠠ᠃ ᠣᠨ ᠲᠣᠭᠠᠯᠠᠯ ᠤ᠋ᠨ8 ᠣᠨ ᠤ᠋ ᠦᠶᠡ ᠪᠡᠷ᠂ ᠵᠡᠭᠦᠨ ᠲᠦᠷᠺᠢᠰᠲ᠋ᠠᠨ ᠴᠤ᠌ ᠾᠦᠩᠨᠦ ᠳ᠋ᠦ᠍ ᠡᠵᠡᠯᠡᠭᠳᠡᠪᠡ᠃ ᠡᠭᠦᠨ ᠡᠴᠡ ᠳᠤᠮᠳᠠᠳᠤ ᠣᠷᠣᠨ ᠬᠢᠭᠡᠳ《ᠪᠠᠷᠠᠭᠤᠨ ᠣᠷᠣᠨ》 ᠤ᠋ ᠬᠠᠷᠢᠴᠠᠭᠠ ᠲᠠᠰᠤᠷᠠᠭᠠᠳ ᠣᠨ ᠲᠣᠭᠠᠯᠠᠯ ᠤ᠋ᠨ73 ᠣᠨ ᠳ᠋ᠤ᠌ ᠰᠠᠶᠢ ᠬᠠᠷᠢᠴᠠᠭᠠ ᠰᠡᠷᠭᠦᠪᠡ᠃ ᠣᠨ ᠲᠣᠭᠠᠯᠠᠯ ᠤ᠋ᠨ97 ᠣᠨ ᠳ᠋ᠤ᠌᠂ ᠵᠡᠭᠦᠨ ᠬᠠᠨ ᠤᠯᠤᠰ ᠤ᠋ᠨ ᠵᠠᠩᠵᠤᠨ ᠢ᠋ᠶ᠋ᠠᠨ ᠴᠤᠤ ᠨᠢᠭᠡᠨ ᠰᠠᠯᠠᠭᠠ ᠴᠡᠷᠢᠭ ᠳᠠᠭᠠᠭᠤᠯᠵᠤ᠂ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠲᠤ᠌ ᠭᠦᠨᠡ ᠣᠷᠣᠵᠤ᠂ ᠠᠯᠤᠰ ᠬᠣᠯᠠ ᠶ᠋ᠢᠨ ᠺᠠᠰᠫᠢ ᠲᠠᠩᠭᠢᠰ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠠᠢᠪᠠ᠃ ᠭᠡᠪᠡᠴᠦ ᠡᠨᠡ ᠶᠠᠪᠤᠳᠠᠯ ᠨᠢ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠲᠠᠢ ᠬᠣᠯᠪᠣᠭᠠ ᠦᠭᠡᠢ᠂ ᠤᠴᠢᠷ ᠨᠢ ᠡᠨᠡ ᠦᠶᠡ ᠪᠡᠷ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠯᠤᠭᠠ ᠬᠠᠷᠢᠴᠠᠭᠠ ᠪᠦᠬᠦᠢ ᠶᠠᠮᠠᠷ ᠴᠦ᠍ ᠬᠡᠷᠡᠭ ᠲᠤᠭᠤᠯᠳᠠᠭᠠ ᠦᠭᠡᠢ᠃ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠦᠰᠦᠨ ᠨᠢᠭᠡᠨᠲᠡ ᠳᠤᠮᠳᠠᠳᠤ ᠤᠯᠤᠰ ᠯᠤᠭᠠ《 ᠪᠦᠷᠢᠮᠦᠰᠦᠨ ᠬᠠᠭᠠᠴᠠᠭᠰᠠᠨ》 ᠢ᠋ ᠯᠡ ᠳᠤᠷᠠᠳᠴᠠᠢ᠃ ᠾᠥ᠋ᠩᠨᠤᠴᠤᠳ ᠤ᠋ᠨ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠳᠡᠭᠡᠷᠡ ᠡᠴᠡ ᠪᠠᠷᠠᠭᠤᠨᠰᠢ ᠨᠡᠭᠦᠵᠦ᠂ ᠳᠣᠯᠣᠭᠠᠨ ᠤᠰᠤᠨ ᠤ᠋ ᠨᠤᠲᠤᠭ ᠢ᠋ᠶ᠋ᠠᠷ ᠥᠩᠭᠡᠷᠡᠬᠦ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠢ᠋ ᠴᠦ᠍ ᠮᠡᠳᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠰᠡᠭᠦᠯᠴᠢ ᠪᠣᠯᠬᠤ ᠳ᠋ᠤ᠌ ᠨᠡᠭᠦᠭᠰᠡᠨ ᠬᠥᠮᠦᠨ ᠦ᠌ ᠲᠣᠭᠠ ᠶᠡᠬᠡ ᠣᠯᠠᠨ ᠪᠣᠯᠤᠯᠠ ᠭᠡᠳᠡᠭ ᠢ᠋ ᠯᠡ ᠮᠡᠳᠡᠵᠦ ᠪᠠᠢᠨᠠ᠃2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠤᠮᠳᠠᠴᠢ ᠦᠶᠡ ᠪᠡᠷ ᠳᠤᠮᠳᠠᠳᠤ ᠤᠯᠤᠰ ᠲᠤ᠌ ᠬᠡᠷᠡᠭ ᠤᠴᠢᠷ ᠲᠠᠰᠤᠷᠠᠬᠤ ᠪᠠᠨ ᠪᠣᠯᠢᠵᠤ᠂ ᠪᠠᠷᠠᠭᠤᠨ ᠣᠷᠣᠨ ᠯᠤᠭᠠ ᠶᠠᠪᠤᠯᠴᠠᠬᠤ ᠪᠠᠨ ᠪᠣᠯᠢᠪᠠ᠃5 ᠳ᠋ᠤᠭᠠᠷ ᠵᠠᠭᠤᠨ ᠬᠦᠷᠦᠭᠡᠳ ᠰᠠᠶᠢ ᠶᠠᠪᠤᠯᠴᠠᠬᠤ ᠪᠣᠯᠪᠠ᠃
ᠤᠤᠯ ᠤ᠋ᠨ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠳᠡᠭᠡᠷᠡ᠂ ᠰᠢᠶᠠᠨᠪᠢᠴᠤᠳ ᠾᠦᠩᠨᠦ ᠶ᠋ᠢ ᠣᠷᠣᠯᠠᠪᠠ᠃ ᠰᠢᠶᠠᠨᠪᠢ ᠶ᠋ᠢᠨ ᠡᠬᠢ ᠡᠭᠦᠰᠦᠯ ᠨᠢ ᠳ᠋ᠦᠩᠬᠣ (ᠲᠦᠩᠬᠦᠰᠴᠤᠳ) ᠪᠠᠢᠵᠤ ᠮᠡᠳᠡᠨᠡ᠂ ᠰᠢᠶᠠᠨᠪᠢ ᠶ᠋ᠢᠨ ᠲᠦᠷᠦᠭᠦᠦ ᠲᠠᠨ ᠱᠢ ᠺᠦᠢ(181 ᠣᠨ) ᠪᠠᠷᠠᠭᠤᠨᠰᠢ ᠦᠰᠦᠨ ᠦ᠌ ᠨᠤᠲᠤᠭ ᠬᠦᠷᠲᠡᠯᠡᠬᠢ ᠭᠠᠵᠠᠷ ᠢ᠋ ᠡᠵᠡᠯᠡᠪᠡ᠃4 ᠳ᠋ᠦ᠍ᠭᠡᠷ ᠵᠠᠭᠤᠨ ᠤ᠋ ᠰᠡᠭᠦᠯᠴᠢ ᠡᠴᠡ6 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠤᠮᠳᠠᠴᠢ ᠪᠣᠯᠲᠠᠯᠠ᠂ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠨᠣᠶᠠᠷᠬᠠᠬᠤ ᠡᠷᠬᠡ ᠶ᠋ᠢ ᠿᠸᠤᠷᠠᠨᠴᠤᠳ ᠡᠵᠡᠮᠳᠡᠵᠦ ᠪᠠᠢᠪᠠ᠃ ᠿᠸᠤᠷᠠᠨ ᠢ᠋ ᠪᠠᠰᠠ ᠳ᠋ᠦᠩᠬᠣ(ᠲᠦᠩᠭᠦᠰ) ᠦ᠋ᠨ ᠨᠢᠭᠡᠨ ᠰᠠᠯᠠᠭᠠ ᠭᠡᠵᠦ ᠦᠵᠡᠳᠡᠭ᠂ ᠿᠸᠤᠷᠠᠨ ᠤ᠋ ᠰᠢᠬᠠᠯᠲᠠ ᠠ᠋ᠴᠠ ᠪᠣᠯᠵᠤ ᠦᠰᠤᠨᠴᠤᠳ ᠲᠡᠭᠰᠢ ᠲᠠᠯᠠ ᠪᠠᠨ ᠣᠷᠬᠢᠭᠠᠳ ᠲᠩᠷᠢ ᠠᠭᠤᠯᠠ ᠶ᠋ᠢᠨ ᠠᠭᠯᠠᠭ ᠵᠢᠯᠠᠭᠠ ᠳ᠋ᠤ᠌ ᠣᠷᠣᠵᠤ ᠰᠠᠭᠤᠷᠢᠰᠢᠪᠠ᠃ ᠤᠮᠠᠷᠠᠲᠤ ᠸᠧᠢ ᠤᠯᠤᠰ(ᠪᠤᠶᠤ ᠶᠤᠸᠠᠨ ᠸᠧᠢ ᠤᠯᠤᠰ) ᠪᠠᠢᠭᠤᠯᠤᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠤᠬᠠᠢᠯᠠᠪᠠᠯ ᠣᠨ ᠲᠣᠭᠠᠯᠠᠯ ᠤ᠋ᠨ425 ᠣᠨ ᠠ᠋ᠴᠠ ᠪᠠᠷᠠᠭᠤᠨ ᠣᠷᠣᠨ ᠤ᠋ ᠤᠯᠤᠰ ᠤ᠋ᠳ ᠬᠠᠷᠢᠯᠴᠠᠨ ᠡᠯᠴᠢ ᠲᠣᠮᠢᠯᠠᠬᠤ ᠪᠣᠯᠪᠠ᠃ ᠡᠭᠦᠨ ᠡᠴᠡ ᠠᠪᠤᠭᠠᠳ ᠳᠤᠮᠳᠠᠳᠤ ᠣᠷᠣᠨ ᠪᠣᠯᠤᠨ ᠪᠠᠷᠠᠭᠤᠨ ᠣᠷᠣᠨ ᠤ᠋ ᠶᠠᠪᠤᠯᠴᠠᠭᠠ ᠳᠠᠬᠢᠨ ᠰᠡᠷᠭᠦᠵᠡᠢ᠃ ᠣᠨ ᠲᠣᠭᠠᠯᠠᠯ ᠤ᠋ᠨ436 ᠣᠨ ᠳ᠋ᠤ᠌ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠯᠴᠢ ᠦᠰᠦᠨ ᠳ᠋ᠦ᠍ ᠬᠦᠷᠴᠦ ᠢᠷᠡᠪᠡ᠃④ ᠡᠭᠦᠨ ᠡᠴᠡ ᠦᠰᠦᠨ ᠵᠢᠯ ᠪᠦᠷᠢ ᠡᠯᠴᠢ ᠲᠣᠮᠢᠯᠠᠨ ᠡᠷᠭᠦᠴᠡ ᠡᠷᠭᠦᠬᠦ ᠪᠣᠯᠪᠠ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ᠂《ᠦᠰᠦᠨ》 ᠭᠡᠳᠡᠭ ᠡᠨᠡ ᠨᠡᠷᠡ ᠪᠠᠷᠠ ᠪᠠᠨ ᠳᠠᠭᠠᠭᠠᠭᠰᠠᠨ ᠠᠢᠮᠠᠭ ᠤᠭᠰᠠᠭᠠ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠬᠤᠪᠢ ᠪᠠᠷ ᠲᠡᠦᠬᠡᠨ ᠲᠠᠪᠴᠠᠩ ᠠ᠋ᠴᠠ ᠠᠷᠢᠯᠵᠤ ᠣᠳᠴᠠᠢ᠃ ᠡᠨᠡ ᠦᠭᠡ ᠣᠳᠣ ᠬᠢᠷᠭᠢᠰ — ᠬᠠᠰᠠᠭ ᠬᠡᠯᠡᠨ ᠦ᠌ ᠶᠡᠬᠡ《ᠴᠠᠴᠠᠷ》(ᠦᠰᠦᠨ) ᠭᠡᠰᠡᠨ ᠦᠭᠡᠨ ᠳ᠋ᠦ᠍ ᠯᠡ ᠦᠯᠡᠳᠡᠭᠳᠡᠵᠦ ᠪᠠᠢᠭᠠ ᠶ᠋ᠢ ᠪᠢᠳᠡ ᠰᠠᠢᠨ ᠮᠡᠳᠡᠵᠦ ᠪᠠᠢᠨᠠ᠃
— — — —
① ᠡᠨᠡ ᠶᠠᠪᠤᠳᠠᠯ ᠲᠤᠩ ᠰᠡᠵᠢᠭᠯᠡᠯᠲᠡᠢ —— ᠮᠢᠨᠨᠤᠷᠰᠺᠢ᠃(ᠣᠷᠴᠢᠭᠤᠯᠭᠠ ᠶ᠋ᠢᠨ ᠲᠠᠢᠯᠪᠤᠷᠢ)
② ᠰᠡᠻᠡᠴᠤᠳ ᠨᠡᠢᠲᠡ ᠭᠤᠷᠪᠠᠨ ᠤᠯᠤᠰ ᠲᠠᠢ᠃ ᠬᠢᠲᠠᠳ ᠲᠡᠦᠬᠡᠨ ᠪᠢᠴᠢᠭ ᠲᠦ᠍ ᠵᠢᠢ ᠪᠢᠨ(罽宾)(ᠺᠠᠱᠮᠢᠷ)᠂ ᠰᠢᠦ ᠰᠢᠶᠦ᠋ᠨ(休循)᠂ ᠵᠢᠦᠸᠠᠨ ᠳᠦ(捐毒) ᠭᠡᠵᠦ ᠨᠠᠷᠠᠯᠠᠪᠠ᠃ ᠡᠨᠡ ᠭᠤᠷᠪᠠᠨ ᠤᠯᠤᠰ ᠳᠣᠯᠣᠭᠠᠨ ᠤᠰᠤᠨ ᠪᠣᠯᠤᠨ ᠰᠢᠨᠵᠢᠶᠠᠩ ᠤ᠋ᠨ ᠳᠤᠮᠳᠠ ᠪᠠᠢᠭᠠ ᠦᠭᠡᠢ᠂ ᠬᠠᠷᠢᠨ ᠾᠢ᠍ᠨᠳᠤᠺᠦ᠋ᠱ ᠠᠭᠤᠯᠠ ᠪᠣᠯᠤᠨ ᠭᠣᠣ ᠹᠦ ᠶ᠋ᠢᠨ ᠭᠣᠣ ᠵᠠᠯᠭᠠ ᠪᠠᠷ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ᠃ ᠻᠷᠸᠭ᠌ ᠦ᠋ᠨ ᠲᠡᠦᠬᠡᠴᠢᠳ ᠡᠳᠡᠭᠡᠷ ᠬᠥᠮᠦᠰ ᠢ᠋ ᠡᠨᠡᠳᠬᠡᠭ᠂ ᠰᠠᠬᠢᠶᠠᠨ ᠬᠥᠮᠦᠨ ᠭᠡᠵᠦ ᠨᠠᠷᠠᠯᠠᠪᠠ᠃ ᠡᠢᠨ ᠬᠦ᠌ ᠰᠡᠻᠡᠴᠤᠳ ᠪᠣᠯ ᠰᠠᠬᠢᠶᠠᠨᠴᠤᠳ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠰᠡᠵᠢᠭᠯᠡᠬᠦ ᠶᠠᠪᠤᠳᠠᠯ ᠠᠯᠠᠭᠠ᠃ (ᠤᠤᠯ ᠲᠠᠢᠯᠪᠤᠷᠢ)
③ 《ᠬᠠᠨ ᠤᠯᠤᠰ ᠤ᠋ᠨ ᠪᠢᠴᠢᠭ》 ᠦ᠋ᠨ ᠤᠤᠯ ᠡᠬᠡ ᠳ᠋ᠦ᠍ ᠳᠥᠷᠪᠡᠨ ᠲᠦᠮᠡᠨ ᠲᠡᠷᠢᠭᠦᠨ ᠢ᠋ ᠴᠠᠪᠴᠢᠵᠤ᠂ ᠦᠬᠡᠷ ᠬᠣᠨᠢ ᠲᠡᠷᠢᠭᠦᠲᠡᠨ ᠢ᠋ ᠳᠠᠯᠠᠨ ᠬᠡᠳᠦᠨ ᠲᠦᠮᠡ ᠣᠯᠵᠠᠯᠠᠪᠠ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠣᠢ᠃ ᠡᠨᠡ ᠪᠣᠯ ᠬᠣᠯᠪᠣᠭᠠᠲᠤ ᠴᠡᠷᠢᠭ ᠦ᠋ᠨ ᠣᠯᠵᠠᠯᠠᠭᠰᠠᠨ ᠪᠦᠬᠦ ᠲᠣᠭᠠ ᠪᠣᠯᠤᠨᠠ᠃ ᠲᠤᠰ ᠵᠣᠬᠢᠶᠠᠯ ᠤ᠋ᠨ ᠵᠣᠬᠢᠶᠠᠭᠴᠢ ᠡᠨᠡ ᠲᠣᠭᠠᠨ ᠤ᠋ ᠠᠷᠪᠠᠨ ᠤ᠋ ᠨᠢᠭᠡ ᠶ᠋ᠢ ᠯᠡ ᠲᠡᠮᠳᠡᠭᠯᠡᠪᠡ᠃ ᠶᠠᠭᠤ ᠠ᠋ᠴᠠ ᠡᠰᠢᠯᠡᠭᠰᠡᠨ ᠢ᠋ ᠨᠢ ᠦᠯᠦ ᠮᠡᠳᠡᠨᠡ᠃(ᠬᠢᠲᠠᠳᠴᠢᠯᠠᠭᠴᠢ ᠶ᠋ᠢᠨ ᠲᠠᠢᠯᠪᠤᠷᠢ)
④ ᠤᠮᠠᠷᠠᠲᠤ ᠸᠧᠢ ᠤᠯᠤᠰ ᠤ᠋ᠨ ᠲᠠᠢ ᠡᠦ ᠳᠢ ᠬᠠᠭᠠᠨ ᠲᠦᠸᠧ ᠪᠠ ᠱᠧᠦ ᠶ᠋ᠢᠨ ᠲᠣᠮᠢᠯᠠᠭᠰᠠᠨ ᠡᠯᠴᠢ— ᠰᠠᠨ ᠴᠢ ᠴᠠᠩ ᠱᠢ ᠲᠦᠰᠢᠮᠡᠯ ᠳ᠋ᠦᠩ ᠸᠠᠨ ᠨᠠᠷ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃ (ᠬᠢᠲᠠᠳᠴᠢᠯᠠᠭᠴᠢ ᠶ᠋ᠢᠨ ᠲᠠᠢᠯᠪᠤᠷᠢ)