ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠶᠢᠰᠦ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -9
136ᠠᠭᠤᠯᠠ ᠶ᠋ᠢᠨ ᠨᠥᠮᠥᠷᠢ
(ᠬᠡᠯᠢᠭ ᠦ᠋ᠨ ᠬᠢᠨ ᠦ᠌ ᠬᠣᠲᠠ)
ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠰᠢᠭᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠬᠣᠶᠠᠳᠠᠬᠢ ᠤᠳᠠᠭᠠ ᠳᠥᠷᠪᠡᠨ ᠢᠷᠡᠬᠦ ᠳ᠋ᠦ᠍ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠬᠡᠳᠦᠨ ᠳᠠᠪᠬᠤᠷ ᠬᠡᠷᠡᠮ ᠦ᠋ᠨ ᠠᠷᠤ ᠳ᠋ᠤ᠌ ᠣᠷᠣᠭᠰᠠᠨ ᠰᠢᠭ᠋ ᠲᠠᠢᠪᠤᠰᠢᠷᠠᠬᠤ ᠠᠵᠢ᠃ ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠠ᠋ᠴᠠ ᠠᠪᠬᠠᠭᠤᠯᠤᠭᠠᠳ ᠬᠠᠪᠤᠷ ᠤ᠋ᠨ ᠡᠬᠢᠨ ᠦ᠌ ᠰᠠᠷᠠ ᠶ᠋ᠢ ᠰᠢᠪᠲᠤᠷᠠᠲᠠᠯᠠ ᠦᠷᠭᠦᠯᠵᠢᠯᠡᠭᠰᠡᠨ ᠭᠠᠢᠬᠠᠯᠳᠤ ᠬᠦᠢᠲᠡᠨ ᠴᠦ᠍ ᠨᠤᠭᠤᠷᠠᠬᠤ ᠲᠠᠢᠰᠢ ᠬᠠᠨᠳᠤᠵᠠᠢ᠃ ᠡᠪᠦᠭᠡᠳ ᠡᠮᠡᠭᠡᠳ ᠲᠦ᠍ ᠭᠠᠵᠠᠷ ᠥᠨᠳᠥᠷᠳᠡᠨᠡ᠃ ᠲᠡᠳᠡ ᠥᠪᠡᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠮ ᠳ᠋ᠤ᠌ ᠰᠢᠭᠢᠳᠦᠨ ᠵᠢᠷᠦᠬᠡᠨ ᠦ᠌ ᠪᠡᠨ ᠴᠣᠬᠢᠯᠲᠠ ᠳ᠋ᠤ᠌ ᠳᠠᠷᠤᠭᠳᠠᠨ ᠬᠡᠪᠲᠡᠨᠡ᠃ ᠢᠳᠡᠷ ᠵᠠᠯᠠᠭᠤᠰ ᠨᠢ ᠮᠠᠯ ᠬᠥᠷᠥᠩᠭᠡ ᠳ᠋ᠡᠭᠡᠨ ᠢᠳᠡᠰᠢ ᠲᠡᠵᠢᠭᠡᠯ ᠭᠠᠷᠭᠠᠵᠤ ᠥᠭᠬᠦ ᠭᠡᠵᠦ ᠣᠢ ᠶ᠋ᠢᠨ ᠴᠤᠭᠤᠷᠬᠠᠢ ᠶ᠋ᠢᠨ ᠭᠦᠨ ᠴᠠᠰᠤ ᠶ᠋ᠢ ᠮᠠᠯᠲᠠᠨ ᠵᠠᠪ ᠴᠢᠯᠥᠭᠡ ᠦᠭᠡᠢ ᠬᠥᠳᠡᠯᠦᠨᠡ᠃ ᠮᠠᠯ ᠨᠢ ᠪᠦᠷ ᠶᠠᠳᠠᠷᠠᠵᠠᠢ᠃ ᠭᠠᠵᠠᠷ ᠪᠠᠰᠠ ᠥᠨᠳᠥᠷᠳᠡᠵᠦ ᠡᠪᠡᠰᠦ ᠤᠷᠤᠭᠤ ᠵᠢᠳᠬᠦᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠲᠤᠷᠢᠨ ᠬᠡᠪᠲᠡᠬᠦ ᠶ᠋ᠢ ᠡᠷᠬᠢᠮᠯᠡᠨᠡ᠃ ᠬᠣᠯᠠ ᠣᠢᠷᠠ ᠠ᠋ᠴᠠ ᠶᠠᠪᠤᠬᠤ ᠬᠥᠮᠦᠨ ᠦᠭᠡᠢ ᠲᠤᠯᠠ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠬᠡᠯᠡ ᠴᠢᠮᠡᠭᠡ ᠰᠣᠨᠣᠰᠬᠤ ᠶ᠋ᠢ ᠪᠦᠷ ᠪᠣᠯᠢᠭᠠᠳ ᠣᠷᠣᠨ ᠳ᠋ᠤᠨᠢ ᠡᠳᠦᠷ ᠦ᠋ᠨ ᠴᠠᠭ ᠢ᠋ᠶ᠋ᠠᠷ ᠢᠳᠡᠰᠢ ᠡᠷᠢᠭᠰᠡᠨ ᠬᠡᠷᠢᠶᠡ ᠢᠷᠡᠵᠦ ᠦᠬᠦᠯ ᠢ᠋ᠶ᠋ᠡᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠮᠠᠯ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ ᠴᠢᠨᠣᠠ ᠣᠯᠢᠯᠳᠤᠨ ᠱᠤᠤᠭᠢᠨᠠ᠃ ᠦᠵᠡᠭᠳᠡᠬᠦ ᠰᠣᠨᠣᠰᠳᠠᠬᠤ ᠬᠣᠶᠠᠷ ᠨᠢ ᠶᠡᠷᠦ ᠳ᠋ᠡᠭᠡᠨ ᠯᠡ ᠡᠨᠡ᠃
ᠨᠢᠭᠡ ᠦᠳᠡᠰᠢ ᠬᠡᠯᠢᠭ ᠦ᠋ᠨ ᠬᠠᠩᠬᠠᠢ ᠣᠷᠣᠮ ᠭᠠᠳᠠᠭᠠ ᠬᠥᠮᠦᠨ ᠢᠷᠡᠵᠦ《ᠨᠣᠬᠠᠢ ᠬᠣᠷᠢ ᠠ᠋!》 ᠭᠡᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠴᠥᠮ ᠰᠣᠴᠢᠨ ᠨᠠᠪᠲᠠᠰᠬᠢᠵᠦ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠪᠠ᠃ ᠭᠠᠳᠠᠭᠠ ᠳᠥᠷᠦᠭᠡᠨ ᠦ᠌ ᠳᠠᠭᠤ ᠬᠠᠩ ᠬᠢᠵᠦ ᠬᠣᠶᠠᠷ ᠬᠥᠮᠦᠨ ᠮᠣᠷᠢ ᠠ᠋ᠴᠠ ᠪᠠᠭᠤᠬᠤ ᠳ᠋ᠤ᠌ ᠪᠦᠷ ᠠᠯᠮᠠᠢᠷᠠᠨ ᠭᠠᠢᠬᠠᠨᠠ᠃ ᠶᠠᠭᠤ ᠶᠠᠭᠤ ᠦᠭᠡᠢ ᠡᠭᠦᠳᠡ ᠬᠥᠳᠡᠯᠬᠦ ᠳ᠋ᠦ᠍ ᠠᠮᠢᠰᠬᠤᠯ ᠬᠣᠷᠢᠶᠠᠨ ᠰᠢᠷᠳᠡᠨᠡ᠃ ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠳᠥᠷᠪᠡᠨ ᠲᠠᠯᠠᠲᠤ ᠪᠤᠯᠠᠭᠠᠨ ᠲᠣᠭᠣᠷᠴᠣᠭ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠭᠡᠷ ᠦ᠋ᠨ ᠬᠥᠮᠦᠰ ᠨᠢᠭᠡ ᠤᠳᠠᠭᠠ ᠠᠮᠢᠰᠬᠤᠯ ᠠᠪᠬᠤ ᠪᠣᠯᠪᠠᠴᠤ ᠬᠣᠢᠨᠠ ᠠ᠋ᠴᠠ ᠨᠢ ᠴᠠᠭᠠᠨ ᠨᠡᠬᠡᠢ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠭᠢᠯᠠᠰᠬᠢᠨ ᠣᠷᠣᠰ ᠯᠢᠶᠠᠨᠵᠤᠤ ᠫᠤᠤ ᠶ᠋ᠢᠨ ᠪᠥᠭᠰᠡ ᠪᠣᠱᠣᠭᠠ ᠳᠠᠪᠠᠬᠤ ᠳ᠋ᠤ᠌ ᠳᠠᠬᠢᠨ ᠠᠮᠢᠰᠬᠤᠯ ᠬᠤᠷᠢᠶᠠᠨᠠ᠃ ᠭᠡᠲᠡᠯᠡ ᠭᠡᠯᠢᠭ ᠲᠦᠷᠦᠭᠦᠴᠢ ᠶ᠋ᠢᠨ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠪᠠᠢᠵᠠᠢ᠃
— ᠵᠧ ᠡᠨᠡ ᠴᠢᠨᠢ ᠭᠦᠩᠲᠡᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ! ᠭᠡᠵᠦ ᠪᠣᠰᠤᠨ ᠬᠠᠷᠠᠢᠨ ᠠᠮᠤᠷ ᠡᠷᠢᠨ ᠵᠣᠯᠭᠠᠭᠠᠳ《ᠣᠯᠪᠣᠭ ᠭᠣᠳᠣᠰ ᠬᠠᠮᠢᠭᠠ ᠪᠣᠢ?》 ᠭᠡᠵᠦ ᠰᠠᠨᠳᠤᠷᠪᠠ᠃ ᠲᠡᠷᠡ ᠨᠢ ᠡᠨᠡ ᠭᠠᠬᠠᠢ ᠶ᠋ᠢᠨ ᠣᠷᠣᠮ ᠳ᠋ᠤ᠌ ᠬᠠᠷᠠᠬᠠᠨ ᠦᠭᠡᠢ᠃《ᠬᠠᠮᠢᠭᠠ ᠪᠣᠢ? ᠭᠠᠳᠠᠭᠠ ᠤᠤ?》《ᠦᠭᠡᠢ ᠪᠠᠢᠬᠠ᠂ ᠤᠳᠠᠭᠠ ᠳᠠᠷᠠᠭᠠ ᠳᠦᠷᠪᠡᠭᠡᠨ ᠳ᠋ᠦ᠍ ᠴᠤᠪᠤᠷᠠᠭᠤᠯᠤᠨ ᠬᠠᠶᠠᠭᠰᠠᠭᠠᠷ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠰᠢᠦ ᠳᠡ》 ᠭᠡᠬᠦ ᠶᠠᠷᠢᠶᠠ ᠭᠡᠷ ᠦ᠋ᠨ ᠬᠥᠮᠦᠰ ᠦ᠋ᠨ ᠬᠣᠭᠣᠷᠣᠨᠳᠣ ᠰᠠᠮ ᠶᠠᠪᠤᠭᠳᠠᠪᠠ᠃
ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠲᠡᠢ ᠬᠥᠮᠦᠨ᠄
— ᠦᠭᠡᠢ ᠲᠠ ᠮᠢᠨᠢ ᠣᠯᠪᠣᠭ ᠭᠣᠳᠣᠰ ᠭᠡᠬᠦ ᠶᠠᠭᠤ ᠪᠠᠢᠬᠤᠪ ᠵᠦᠭᠡᠷ ᠬᠥᠯ ᠨᠤᠭᠤᠯᠬᠤ ᠭᠠᠵᠠᠷ ᠯᠠ ᠪᠠᠢᠪᠠᠯ ᠪᠣᠯᠬᠤ ᠨᠢ ᠲᠡᠷᠡ! ᠭᠡᠳ ᠲᠤᠯᠭᠠ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠪᠠ᠃ ᠳᠡᠭᠡᠳᠦ ᠤᠷᠤᠭᠤᠯ ᠤ᠋ᠨ ᠢ᠋ᠶ᠋ᠠᠨ ᠰᠠᠢᠬᠠᠨ ᠣᠷᠣᠭᠤᠯᠤᠭᠰᠠᠨ ᠬᠠᠷᠠ ᠰᠠᠬᠠᠯ ᠳ᠋ᠤ᠌ ᠪᠢᠲᠡᠭᠦᠦ ᠪᠦᠷᠬᠦᠭᠰᠡᠨ ᠴᠠᠩ ᠬᠢᠷᠠᠭᠤ ᠶ᠋ᠢ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠢᠰᠢ ᠰᠡᠯᠭᠦᠯᠡᠨ ᠰᠢᠪᠲᠤᠷᠠᠴᠤ ᠦᠵᠦᠭᠦᠷ ᠲᠦ᠋ᠨᠢ ᠬᠥᠯᠳᠡᠭᠰᠡᠨ ᠮᠥᠰᠥ ᠶ᠋ᠢ ᠢᠮᠡᠷᠦᠨ ᠬᠠᠢᠯᠤᠭᠤᠯᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠶᠡᠷᠦ ᠡᠨᠡ ᠬᠥᠮᠦᠨ ᠮᠠᠩᠨᠠᠢ ᠳ᠋ᠠᠭᠠᠨ ᠪᠠᠭᠠ ᠵᠡᠷᠭᠡ ᠠᠲᠤᠷᠢᠶᠠ ᠲᠠᠢ ᠪᠣᠯᠪᠠᠴᠤ ᠥᠩᠭᠡ ᠲᠤᠩᠭᠠᠯᠠᠭ᠂ ᠬᠠᠷᠠᠴᠠ ᠵᠥᠭᠡᠯᠡᠨ᠂ ᠭᠡᠵᠢᠭᠡ ᠤᠷᠲᠤ᠂ ᠰᠠᠬᠠᠯ ᠤ᠋ᠨ ᠢ᠋ᠶ᠋ᠠᠨ ᠮᠥᠰᠥ ᠶ᠋ᠢ ᠢᠮᠡᠷᠬᠦ ᠬᠠᠯᠢᠭᠤᠨ ᠨᠢᠳᠤᠷᠭᠠ ᠲᠠᠢ ᠭᠠᠷ ᠤ᠋ᠨ ᠬᠤᠷᠤᠭᠤᠳ ᠡᠷᠬᠡ ᠲᠠᠩᠬᠢᠯ ᠥᠰᠦᠭᠰᠡᠨ ᠵᠠᠯᠠᠭᠤ ᠡᠮᠡᠭᠲᠡᠢ ᠶ᠋ᠢᠨ ᠬᠢ ᠲᠡᠢ ᠠᠳᠠᠯᠢ ᠪᠥᠭᠡᠳ ᠡᠨᠡ ᠪᠦᠬᠦᠨ ᠨᠢ ᠶᠠᠳᠠᠷᠠᠯ ᠵᠦᠳᠡᠭᠦᠷᠡᠯ ᠪᠠ ᠠᠶᠤᠨ ᠡᠮᠢᠶᠡᠬᠦ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠢ᠋ ᠥᠭᠡᠷᠡ ᠲᠠᠢᠰᠢ ᠲᠡᠳᠡᠨ ᠭᠡᠢᠭᠦᠯᠬᠦ ᠠᠵᠢ᠃
— ᠭᠦᠩᠲᠡᠨ᠂ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠᠰᠢ ᠪᠠᠨ ᠮᠣᠷᠢᠯᠠᠵᠤ ᠶᠠᠪᠤᠭᠠ ᠰᠠᠨ ᠪᠣᠯ? ᠭᠡᠬᠦ ᠳ᠋ᠦ᠍᠂
— ᠬᠦᠷᠢᠶᠡᠨ ᠡᠴᠡ ᠪᠠᠷᠠᠭᠤᠨ ᠬᠣᠢᠰᠢ᠂ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠠᠯᠳᠠᠴᠢᠬᠠᠬᠤ ᠦᠭᠡᠢ ᠪᠣᠯ ᠶᠠᠪᠤᠭᠠᠳ ᠯᠠ ᠪᠠᠢᠬᠤ ᠰᠠᠨᠠᠭᠠ ᠲᠠᠢ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠠᠯᠢᠶᠠᠯᠠᠨ ᠬᠠᠷᠢᠭᠤᠯᠪᠠ᠃ ᠭᠢᠯᠢᠭ ᠦᠭᠡ ᠶ᠋ᠢᠨ ᠬᠢᠨᠢ ᠤᠳᠬᠠ ᠶ᠋ᠢ ᠬᠠᠷᠠᠬᠠᠨ ᠡᠰᠡ ᠣᠢᠯᠠᠭᠠᠵᠤ《ᠵᠠ ᠠᠬᠠᠢ!》 ᠭᠡᠳᠡᠭ ᠢ᠋ᠶ᠋ᠡᠷ ᠳᠡᠮᠡᠢ ᠬᠦᠨᠳᠦᠳᠬᠡᠭᠡᠳ᠄
— ᠵᠠᠮ ᠵᠠᠭᠤᠷᠠ ᠳ᠋ᠠᠭᠠᠨ ᠰᠠᠭᠠᠳ ᠦᠭᠡᠢ ᠮᠣᠷᠢᠯᠠᠵᠤ ᠶᠠᠪᠤᠪᠠᠤ?
— ᠵᠠ ᠳᠠ᠂ ᠵᠠᠷᠢᠮ ᠭᠠᠵᠠᠷ ᠮᠣᠷᠢᠯᠠᠵᠤ᠂ ᠵᠠᠷᠢᠮ ᠭᠠᠵᠠᠷ ᠮᠥᠯᠬᠥᠵᠦ ᠯᠡ ᠶᠠᠪᠤᠨᠠ ᠳᠠ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠳᠠᠬᠢᠨ ᠠᠯᠢᠶᠠᠯᠠᠪᠠ᠃ ᠭᠡᠷ ᠦ᠋ᠨ ᠬᠥᠮᠦᠰ ᠰᠡᠳᠬᠢᠯ ᠬᠥᠭᠵᠢᠨ ᠢᠨᠢᠶᠡᠯᠳᠦᠨᠡ᠃
ᠭᠠᠮᠢᠩ᠂ ᠪᠠᠷᠤᠨ ᠦᠢᠮᠡᠵᠦ ᠠᠯᠠᠭᠠᠨ ᠬᠢᠲᠤᠭᠠᠨ ᠡᠬᠢᠯᠡᠭᠰᠡᠨ ᠡᠴᠡ ᠠᠪᠤᠭᠠᠳ ᠡᠳᠦᠢ ᠬᠦᠷᠲᠡᠯᠡ ᠲᠡᠳᠡᠨ ᠳ᠋ᠦ᠍ ᠢᠨᠢᠶᠡᠬᠦ ᠵᠠᠪᠰᠢᠶᠠᠨ ᠶᠡᠷᠦ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠪᠠᠢᠭᠠᠳ ᠰᠠᠶᠢ ᠨᠢᠭᠡ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠤᠴᠢᠷ ᠲᠡᠳᠡ᠂ ᠣᠳᠣ ᠲᠣᠬᠢᠶᠠᠯᠳᠤᠭᠰᠠᠨ ᠳᠡᠭᠡᠷᠡ ᠨᠢ ᠭᠡᠰᠡᠨ ᠰᠢᠭ ᠨᠡᠮᠡᠨ ᠨᠡᠮᠡᠨ ᠢᠨᠢᠶᠡᠯᠴᠡᠪᠡ᠃
— ᠬᠦᠷᠢᠶᠡ ᠵᠦᠭ ᠡᠴᠡ ᠰᠣᠨᠣᠰᠤᠭᠤᠰᠢᠲᠠᠢ ᠰᠣᠨᠢᠨ ᠶᠠᠭᠤ ᠪᠠᠢᠨᠠ ᠪᠣᠢ? ᠴᠠᠭ ᠲᠥᠷᠥ ᠮᠠᠨᠢ ᠲᠠᠢᠪᠤᠰᠢᠷᠠᠬᠤ ᠨᠢ ᠤᠤ? ᠭᠡᠵᠦ ᠭᠢᠯᠢᠭ ᠦ᠋ᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ᠄
— ᠬᠦᠷᠢᠶᠡ ᠵᠦᠭ ᠦ᠋ᠨ ᠰᠣᠨᠢᠨ ᠠᠶᠤᠯ ᠡᠮᠢᠶᠡᠯ᠂ ᠳᠣᠣᠷᠠᠲᠤ ᠠᠷᠠᠳ ᠤᠰᠤᠨ ᠳ᠋ᠤ᠌ ᠴᠢᠨᠠᠭᠰᠠᠨ ᠪᠤᠳᠠᠭᠠ ᠪᠠᠨ ᠲᠠᠪᠠᠲᠠᠢ ᠢᠳᠡᠬᠦ ᠳ᠋ᠦ᠍ ᠴᠦ᠍ ᠪᠡᠷᠬᠡ᠃ ᠡᠵᠡᠳ ᠳᠡᠭᠡᠳᠦᠰ ᠦ᠋ᠳ ᠮᠠᠨᠢ ᠴᠦ᠍ ᠰᠡᠳᠬᠢᠯ ᠲᠦᠭᠰᠢᠭᠡᠲᠡᠢ᠃ ᠲᠣᠪᠴᠢᠯᠠᠨ ᠬᠡᠯᠡᠬᠦ ᠳ᠋ᠦ᠍ ᠬᠣᠭᠣᠯᠠᠢ ᠳ᠋ᠤ᠌ ᠲᠦᠭᠵᠢᠯᠡᠭᠦᠷ᠂ ᠬᠣᠩᠭᠣᠨ ᠳ᠋ᠤ᠌ ᠱᠣᠯᠣᠭᠣᠷ ᠶᠡᠷᠦ ᠳ᠋ᠡᠭᠡᠨ ᠯᠡ ᠡᠨᠡ ᠳᠡ ᠭᠡᠪᠡ᠃
ᠭᠢᠯᠢᠭ ᠪᠤᠷᠬᠠᠨ ᠮᠢᠨᠢ! ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠨ ᠬᠠᠨᠴᠤᠢ ᠳ᠋ᠠᠭᠠᠨ ᠵᠠᠯᠪᠠᠷᠢᠭᠠᠳ᠄
— ᠦᠭᠡᠢ᠂ ᠭᠦᠩᠲᠡᠨ ᠮᠢᠨᠢ ᠮᠠᠨ ᠤ᠋ ᠤᠯᠤᠰ ᠶᠡᠷᠦ ᠶᠠᠭᠠᠬᠢᠭᠠᠳ ᠡᠢᠮᠦ ᠠᠶᠤᠯ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠢᠶᠠᠯᠳᠤᠵᠤ ᠣᠷᠬᠢᠪᠠ ᠳᠠ?
— ᠶᠠᠭᠠᠬᠢᠭᠰᠠᠨ ᠠ᠋ᠴᠠ ᠭᠡᠪᠡᠯ ᠲᠠᠭᠠᠷᠠᠬᠤ ᠶᠤᠮ ᠳᠠ? ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠣᠳᠣᠯᠬᠢᠯᠠᠨ ᠲᠣᠭᠣᠨᠣ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠪᠢᠳᠡᠨ ᠦ᠌ ᠦᠢᠯᠡ ᠶ᠋ᠢᠨ ᠦᠷᠡ ᠶᠦᠮ ᠪᠣᠯ ᠤᠤ ᠳᠠ᠃ ᠭᠠᠮᠢᠩ ᠢ᠋ ᠶᠠᠭᠠᠬᠢᠶᠠ ᠭᠡᠵᠦ ᠰᠠᠨᠳᠤᠷᠴᠤ ᠪᠠᠢᠬᠤ ᠳ᠋ᠤ᠌ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠤᠨ ᠣᠩᠭᠧᠷᠠᠨ ᠨᠡᠮᠡᠨ ᠢᠷᠡᠭᠡᠳ ᠭᠡᠳ ᠴᠠᠭᠠᠰᠢ ᠨᠢ ᠪᠠᠷᠤᠨ ᠣᠩᠭᠧᠷᠠᠨ ᠤ᠋ ᠬᠡᠨ ᠪᠣᠯᠬᠤ ᠪᠠ ᠶᠠᠭᠤ ᠵᠣᠷᠢᠵᠤ ᠪᠠᠢᠭᠠ ᠬᠢᠭᠡᠳ ᠲᠡᠭᠦᠨ ᠦ᠌ ᠬᠣᠣᠷ ᠬᠥᠨᠥᠭᠡᠯ ᠶᠠᠭᠤ ᠪᠣᠯᠬᠤ ᠶ᠋ᠢ ᠨᠡᠯᠢᠶᠡᠳ ᠳᠡᠯᠭᠡᠷᠡᠩᠭᠦᠢ ᠶᠠᠷᠢᠵᠤ ᠭᠠᠷᠤᠯᠠ᠃ ᠲᠣᠭᠣᠷᠢᠨ ᠰᠠᠭᠤᠭᠴᠢᠳ ᠠᠮᠠ ᠬᠠᠮᠬᠢᠯ ᠦᠭᠡᠢ ᠴᠢᠩᠨᠠᠪᠠ᠃ ᠲᠤᠰ ᠪᠦᠷᠢ ᠶ᠋ᠢᠨ ᠰᠡᠳᠬᠢᠬᠦᠢ ᠳ᠋ᠦ᠍ ᠮᠣᠩᠭᠣᠯ ᠣᠷᠣᠨ ᠠᠭᠤᠯᠠ ᠲᠠᠯᠠ᠂ ᠬᠥᠮᠦᠨ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠦᠬᠦᠯ ᠦ᠋ᠨ ᠬᠠᠷᠠ ᠲᠣᠭᠣᠭᠠᠨ ᠳ᠋ᠤ᠌ ᠦᠢᠭᠳᠡᠨ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠨ ᠪᠤᠴᠠᠯᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠨᠠ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠶᠠᠷᠢᠶᠠ ᠳᠠᠭᠤᠰᠴᠤ ᠳᠤᠭᠤᠢ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠦᠶᠡ ᠬᠡᠨ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠭᠠᠭᠴᠠᠬᠠᠨ ᠰᠢᠷᠦᠭᠦᠨ ᠭᠠᠯ ᠳᠡᠭᠡᠷᠡ ᠲᠣᠭᠣᠭᠠ ᠲᠠᠢ ᠪᠦᠬᠦᠯᠢ ᠮᠢᠬᠠ ᠫᠥᠯ ᠫᠥᠯ ᠪᠤᠴᠠᠯᠤᠨᠠ᠃
— ᠪᠤᠷᠬᠠᠨ ᠭᠣᠨᠴᠣᠭᠰᠤᠮ ᠠ᠋! ᠶᠠᠭᠠᠬᠢᠭᠰᠠᠨ ᠴᠦ᠍ ᠬᠡᠴᠡᠭᠦᠦ ᠴᠠᠭ ᠭᠡᠭᠴᠢ ᠪᠣᠢ? ᠭᠡᠵᠦ ᠠᠶᠠᠷᠬᠠᠨ ᠥᠭᠦᠯᠡᠭᠰᠡᠨ ᠬᠥᠮᠦᠨ ᠨᠢ ᠭᠢᠯᠢᠭ ᠪᠠᠢᠯᠠ᠃ ᠣᠯᠠᠨ ᠤ᠋ ᠠᠩᠬᠠᠷᠤᠯ ᠥᠪᠡᠷ ᠳᠡᠭᠡᠷᠡ ᠪᠡᠨ ᠢᠷᠡᠬᠦ ᠳ᠋ᠦ᠍ ᠭᠢᠯᠢᠭ ᠳᠣᠲᠣᠷᠠ ᠪᠠᠨ ᠭᠡᠮᠰᠢᠨ᠄
— ᠦᠭᠡᠢ᠂ ᠬᠡᠦᠬᠡ ᠠ᠋᠂ ᠨᠠᠭᠠᠳᠤ ᠲᠣᠭᠣᠭᠠ ᠲᠠᠢ ᠪᠠᠨ ᠨᠢᠭᠡ ᠡᠷᠭᠢᠭᠦᠯᠦᠨᠡ ᠪᠠᠢᠭᠠ ᠭᠡᠵᠦ ᠪᠡᠷᠢ ᠳ᠋ᠡᠭᠡᠨ ᠰᠢᠪᠡᠨᠡᠭᠡᠳ ᠳᠠᠷᠤᠢ ᠡᠷᠭᠢᠨ ᠪᠠᠯᠳᠠᠨᠴᠡᠷᠢᠩ ᠤᠷᠤᠭᠤ ᠬᠠᠨᠳᠤᠵᠤ᠄
— ᠢᠩᠭᠢᠬᠦ ᠳ᠋ᠦ᠍ ᠡᠷᠬᠢᠮ ᠳᠡᠭᠡᠳᠦ ᠬᠠᠭᠠᠳ᠂ ᠨᠣᠶᠠᠳ᠂ ᠬᠤᠲᠤᠭᠲᠤ᠂ ᠬᠤᠪᠢᠯᠭᠠᠳ ᠮᠠᠨᠢ ᠶᠠᠭᠤ ᠪᠢᠰᠢᠯᠭᠠᠨ ᠠᠢᠯᠠᠳᠳᠠᠭ ᠰᠠᠨ ᠪᠣᠯ?
— ᠲᠡᠳᠡᠨ ᠦ᠌ ᠵᠠᠷᠢᠮ ᠨᠢ ᠬᠤᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠬᠡ ᠶᠠᠩᠪᠠ ᠶ᠋ᠢ ᠠᠯᠳᠠᠴᠢᠬᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠭᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠰᠢᠪ ᠳᠡ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠬᠠᠷᠢᠭᠤᠯᠪᠠ᠃ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠶᠠᠷᠢᠶᠠ ᠳᠠᠬᠢᠨ ᠲᠠᠰᠤᠷᠠᠵᠤ᠂ ᠥᠨᠥᠬᠢ ᠲᠣᠭᠣᠭᠠ ᠲᠠᠢ ᠮᠢᠬᠠ ᠯᠠ ᠳᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠫᠥᠯ ᠫᠥᠯ ᠬᠢᠨᠡ᠃ ᠨᠡᠯᠢᠶᠡᠳ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠭᠢᠯᠢᠭ ᠠᠮᠠ ᠨᠡᠭᠡᠭᠡᠨ᠄
— ᠢᠩᠭᠢᠬᠦ ᠳ᠋ᠦ᠍ ᠪᠣᠭᠳᠠ ᠡᠵᠡᠨ ᠶᠠᠭᠤ ᠭᠡᠵᠦ ᠵᠠᠷᠯᠢᠭ ᠪᠣᠯᠵᠤ ᠪᠠᠢᠳᠠᠭ ᠪᠣᠯ?
— ᠪᠣᠭᠳᠠ ᠤᠤ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠲᠣᠭᠣᠮᠰᠠᠷ ᠦᠭᠡᠢ ᠳᠤᠤᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠦᠭᠡ ᠪᠡᠨ ᠲᠠᠰᠤᠯᠪᠠ᠃ ᠤᠭ ᠨᠢ ᠲᠡᠭᠦᠨ ᠢ᠋ ᠪᠠᠷᠤᠨ ᠣᠩᠭᠧᠷᠠᠨ ᠤ᠋ ᠡᠮᠦᠨᠡ ᠮᠡᠬᠦᠯᠵᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠠᠯᠠᠭᠠ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠵᠠᠪᠳᠤᠭᠰᠠᠨ ᠪᠣᠯᠪᠠᠴᠤ ᠡᠳᠦᠭᠡ ᠭᠢᠯᠢᠭ ᠦ᠋ᠨ ᠡᠮᠦᠨᠡ ᠳᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠰᠠᠨᠠᠪᠠ᠃《ᠪᠣᠭᠳᠠ ᠡᠵᠡᠨᠲᠡᠨ ᠪᠠᠷᠤᠨ ᠣᠩᠭᠧᠷᠠᠨ ᠢ᠋ ᠣᠷᠣᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠶ᠋ᠢ ᠰᠠᠮ ᠵᠠᠷᠯᠢᠭ ᠪᠣᠯᠭᠠᠵᠤ ᠪᠠᠢᠭᠠ ᠰᠢᠦ ᠳᠡ》 ᠭᠡᠵᠦ ᠰᠢᠪᠡᠨᠡᠪᠡ᠃ ᠡᠨᠡ ᠳᠠᠷᠤᠢ ᠭᠢᠯᠢᠭ ᠦ᠋ᠨ ᠰᠡᠳᠬᠢᠯ ᠰᠡᠷᠭᠦᠪᠡ᠃
— ᠬᠠᠢᠷᠬᠠᠨ! ᠭᠡᠵᠦ ᠣᠷᠣᠢ ᠳᠡᠭᠡᠷᠡ ᠪᠡᠨ ᠨᠠᠮᠠᠨᠴᠢᠯᠠᠭᠠᠳ ᠪᠣᠭᠳᠠ ᠭᠡᠭᠡᠨᠲᠡᠨ ᠡᠴᠡ ᠨᠢᠭᠡᠨᠲᠡ ᠳᠡᠭᠡᠵᠦ ᠵᠠᠷᠯᠢᠭᠯᠠᠵᠤ ᠪᠠᠢᠭᠠ ᠪᠣᠯ ᠴᠣᠬᠣᠮ ᠪᠢᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠷᠡ ᠪᠠᠷᠤᠨ ᠤ᠋ ᠥᠭᠡᠳᠡ ᠡᠴᠡ ᠪᠣᠰᠬᠤ᠂ ᠲᠡᠮᠡᠴᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠭᠢᠯᠢᠭ ᠪᠣᠳᠣᠵᠠᠢ᠃ ᠪᠠᠯᠳᠠᠨᠴᠡᠷᠢᠩ ᠴᠦ᠍ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠮᠥᠨ ᠯᠡ ᠪᠣᠭᠳᠠ ᠶ᠋ᠢᠨ ᠲᠤᠬᠠᠢ᠂ ᠲᠡᠭᠦᠨ ᠦ᠌ ᠠᠷᠠᠳ ᠣᠯᠠᠨ ᠤ᠋ ᠡᠮᠦᠨᠡ ᠬᠡᠴᠢᠨᠡᠭᠡᠨ ᠶᠡᠬᠡ ᠨᠥᠯᠥᠭᠡ ᠲᠡᠢ ᠶ᠋ᠢ ᠪᠣᠳᠣᠨ ᠰᠠᠭᠤᠯᠠ᠃
ᠭᠡᠷ ᠳᠣᠲᠣᠷᠠ ᠶᠠᠷᠢᠶᠠᠨ ᠬᠥᠭᠡᠷᠦᠭᠡᠨ ᠤᠷᠢᠳ ᠤᠷᠢᠳ ᠤ᠋ᠨ ᠬᠢ ᠡᠴᠡ ᠤᠳᠠᠭᠠᠨ ᠢ᠋ᠶ᠋ᠠᠷ ᠲᠠᠰᠤᠷᠠᠨ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠣᠯᠬᠤ ᠳ᠋ᠤ᠌᠂ ᠠᠷᠪᠠᠭᠠᠢ ᠮᠠᠨᠵᠤᠤᠷ ᠡᠷᠢᠶᠡᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠤᠯᠠᠭᠠᠨ ᠴᠣᠬᠣᠷ ᠰᠢᠷᠠᠮᠠᠯ ᠲᠦᠷᠡᠢᠲᠦ ᠢᠰᠡᠭᠡᠢ ᠭᠤᠲᠤᠯ ᠲᠠᠢ ᠬᠥᠯ ᠢ᠋ᠶ᠋ᠡᠨ ᠣᠷᠣᠭᠰᠢ ᠵᠢᠭᠢᠨ ᠲᠠᠯᠪᠢᠵᠤ ᠪᠣᠭᠣᠨᠢᠬᠠᠨ ᠴᠠᠭᠠᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠭᠠᠷᠭᠠᠨ ᠲᠠᠮᠠᠬᠢ ᠨᠡᠷᠡᠪᠡ᠃ ᠰᠡᠷᠢᠭᠦᠨ ᠴᠢᠨᠠᠷ ᠤ᠋ᠨ ᠶᠠᠩᠯᠤᠤ ᠬᠡᠮᠡᠬᠦ ᠤᠷᠭᠤᠮᠠᠯ ᠤ᠋ᠨ ᠰᠡᠩᠭᠢᠨᠡᠭᠰᠡᠨ ᠤᠲᠤᠭᠠ ᠣᠷᠣᠮ ᠳᠦᠭᠦᠷᠡᠩ ᠲᠤᠨᠵᠤ ᠬᠥᠮᠦᠰ ᠦ᠋ᠨ ᠬᠠᠮᠠᠷ ᠲᠤ ᠬᠠᠩᠬᠤᠯᠤᠨᠠ᠃ ᠭᠡᠨᠡᠳᠲᠡ ᠭᠠᠤᠯᠢᠨ ᠲᠦᠩᠫᠦᠩ ᠠᠮᠠᠰᠠᠷ ᠨᠢᠭᠡ ᠶᠠᠭᠤᠮᠠ ᠲᠠᠢ ᠮᠥᠷᠭᠥᠯᠳᠦᠨ ᠬᠠᠩᠭᠢᠨᠠᠬᠤ ᠳ᠋ᠤ᠌ ᠬᠥᠮᠦᠰ ᠰᠣᠴᠢᠨ ᠳᠣᠲᠣᠷᠠ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠵᠠᠢ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠭᠢᠯᠢᠭ ᠲᠣᠯᠣᠭᠠᠢ ᠥᠨᠳᠡᠢᠯᠭᠡᠨ ᠪᠡᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠭᠣᠯᠠ ᠭᠠᠷᠭᠠᠬᠤ ᠲᠦᠩᠫᠦᠩ ᠣᠢᠷᠠᠲᠤᠭᠤᠯᠤᠭᠰᠠᠨ ᠢ᠋ ᠬᠠᠷᠠᠵᠤ᠄
— ᠪᠠᠢᠵᠠᠨᠡ ᠬᠡᠦᠬᠡ ᠠ᠋᠂ ᠬᠥᠯᠳᠡᠭᠦᠦ ᠮᠢᠬᠠ ᠪᠣᠯᠤᠭᠠ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ ᠭᠡᠳ ᠪᠠᠯᠳᠠᠨᠴᠡᠷᠢᠩ ᠭᠦᠩᠲᠡᠨ ᠮᠢᠨᠢ ᠲᠡᠭᠡᠭᠡᠳ ᠲᠡᠷᠡ ᠪᠠᠷᠤᠨ ᠢ᠋ ᠴᠢᠨᠢ ᠶᠠᠭᠠᠬᠢᠵᠤ ᠵᠠᠢᠯᠠᠭᠤᠯᠳᠠᠭ ᠪᠠᠢᠨᠠ ᠳᠠ?
— ᠲᠡᠷᠡ ᠠᠮᠠᠷᠬᠠᠨ᠂ ᠪᠠᠷᠤᠨ ᠤ᠋ ᠥᠪᠡᠷ ᠦ᠋ᠨ ᠬᠢᠨᠢ ᠳᠠᠢᠰᠤᠨ ᠪᠣᠯᠬᠤ ᠤᠯᠠᠭᠠᠨ ᠣᠷᠣᠰ ᠪᠢᠳᠡᠨ ᠳ᠋ᠦ᠍ ᠬᠠᠨᠢ ᠨᠥᠬᠥᠳ ᠪᠣᠯᠤᠨᠠ ᠭᠡᠪᠡᠯ ᠭᠢᠯᠢᠭ ᠦ᠋ᠨ ᠮᠠᠩᠨᠠᠢ ᠲᠡᠨᠢᠢᠵᠦ᠄
— ᠤᠤᠬᠠᠢ! ᠭᠡᠪᠡᠴᠦ ᠲᠡᠷᠡ ᠤᠯᠠᠭᠠᠨ ᠣᠷᠣᠰ ᠲᠤ ᠬᠡᠨ ᠣᠴᠢᠵᠤ᠂ ᠶᠠᠮᠠᠷ ᠠᠷᠭᠠ ᠪᠠᠷ ᠲᠡᠳᠡ ᠴᠢᠨᠢ ᠪᠢᠳᠡᠨ ᠳ᠋ᠦ᠍ ᠬᠠᠨᠢ ᠨᠥᠬᠥᠳ ᠪᠣᠯᠬᠤ ᠬᠡᠷᠡᠭ ᠪᠣᠢ?
ᠪᠠᠯᠳᠠᠨᠴᠡᠷᠢᠩ᠂ ᠡᠨᠡ ᠠᠰᠠᠭᠤᠯᠲᠠ ᠶ᠋ᠢ ᠬᠠᠷᠢᠭᠤᠯᠬᠤ ᠶ᠋ᠢᠨ ᠲᠤᠯᠠ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠲᠤᠬᠠᠢ ᠶᠠᠷᠢᠬᠤ ᠬᠡᠷᠡᠭᠲᠡᠢ ᠪᠣᠯᠪᠠ᠃ ᠪᠠᠷᠤᠨ ᠢ᠋ ᠢᠷᠡᠬᠦ ᠡᠴᠡ ᠡᠮᠦᠨᠡ ᠰᠦᠬᠡᠪᠠᠭᠠᠲᠤᠷ ᠭᠠᠮᠢᠩ ᠤ᠋ᠨ ᠭᠠᠷ ᠠ᠋ᠴᠠ ᠭᠠᠷᠬᠤ ᠭᠡᠵᠦ ᠤᠯᠠᠭᠠᠨ ᠣᠷᠣᠰ ᠤᠯᠤᠰ ᠲᠤ ᠣᠴᠢᠬᠤ ᠰᠠᠨᠠᠭᠠ ᠰᠡᠳᠦᠵᠦ ᠪᠠᠢᠭᠠ ᠠ᠋ᠴᠠ ᠡᠬᠢᠯᠡᠨ ᠶᠠᠷᠢᠵᠤ ᠭᠠᠷᠪᠠ᠃ ᠲᠡᠷᠡ ᠴᠠᠭ ᠲᠤ ᠥᠪᠡᠷ ᠢ᠋ᠶ᠋ᠡᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠲᠡᠷᠡ ᠭᠠᠢᠬᠠᠮᠰᠢᠭᠲᠤ ᠪᠣᠳᠣᠯ ᠢ᠋ ᠦᠯᠦ ᠲᠣᠭᠣᠮᠰᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠴᠦ᠍ ᠣᠷᠭᠢᠯ ᠦᠭᠡᠢ ᠶᠠᠷᠢᠪᠠ᠃ ᠡᠴᠦᠰ ᠲᠦ᠋ᠨᠢ ᠪᠠᠯᠳᠠᠨᠴᠡᠷᠢᠩ ᠰᠦᠬᠡᠪᠠᠭᠠᠲᠤᠷ ᠤᠯᠠᠭᠠᠨ ᠣᠷᠣᠰ ᠤᠯᠤᠰ ᠠ᠋ᠴᠠ ᠵᠡᠪᠰᠡᠭ ᠦ᠋ᠨ ᠲᠤᠰᠠᠯᠠᠮᠵᠢ ᠣᠯᠤᠨ᠂ ᠬᠣᠢᠲᠤ ᠬᠢᠵᠠᠭᠠᠷ ᠢ᠋ᠶ᠋ᠠᠷ ᠴᠡᠷᠢᠭ ᠬᠤᠷᠠᠯᠳᠤᠭᠤᠯᠵᠤ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠶᠠᠷᠢᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠮᠥᠨ ᠲᠡᠨᠳᠡ ᠣᠴᠢᠵᠤ ᠨᠢᠭᠡ ᠮᠥᠷᠥ ᠶ᠋ᠢᠨ ᠬᠦᠴᠦᠨ ᠪᠣᠯᠬᠤ ᠭᠡᠵᠦ ᠶᠠᠪᠤᠭᠠ ᠪᠠᠨ ᠮᠡᠳᠡᠭᠳᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠡᠨᠡ ᠶᠠᠷᠢᠶᠠᠨ ᠠ᠋ᠴᠠ ᠬᠣᠢᠰᠢ᠂ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠰᠢᠨᠡ ᠪᠡᠷ ᠰᠡᠷᠭᠦᠨ ᠦᠬᠦᠭᠰᠡᠨ ᠡᠴᠡ ᠠᠮᠢ ᠣᠷᠣᠬᠤ ᠮᠡᠲᠦ ᠪᠣᠯᠵᠠᠢ᠃ ᠭᠢᠯᠢᠭ ᠠᠯᠢ ᠲᠦᠷᠦᠭᠦᠴᠢ ᠡᠴᠡ ᠠᠪᠤᠨ ᠳᠣᠷᠣᠭᠰᠢ ᠪᠥᠬᠥᠢᠨ《ᠠᠬᠠᠢ᠂ ᠠᠬᠠᠢ!》 ᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠰᠠᠨᠠᠭᠠ ᠠᠪᠤᠨ ᠥᠨᠳᠡᠢᠵᠦ᠄
— ᠬᠥᠶᠢ ᠬᠡᠦᠬᠡ ᠠ᠋ ᠨᠠᠭᠠᠳᠤ ᠲᠣᠭᠣᠭᠠ ᠲᠠᠢ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠪᠢᠯᠡ? ᠭᠡᠬᠦ ᠳ᠋ᠦ᠍ ᠬᠠᠨᠳᠠᠰᠦᠢ᠍ᠷᠦᠩ ᠭᠠᠤᠯᠢᠨ ᠲᠦᠩᠫᠦᠩ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠤᠷᠤᠭᠰᠢᠯᠠᠭᠤᠯᠵᠤ ᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠠᠢᠴᠢ ᠶ᠋ᠢ ᠵᠦᠯᠭᠦᠨ ᠴᠡᠪᠡᠷᠯᠡᠭᠡᠳ ᠲᠣᠭᠣᠭᠠᠨ ᠳ᠋ᠤ᠌ ᠲᠦᠷᠢᠵᠦ ᠮᠢᠬᠠ ᠭᠠᠷᠭᠠᠪᠠ᠃ ᠬᠦᠨᠳᠦᠲᠦ ᠵᠣᠴᠢᠳ ᠲᠠᠭᠠᠨ ᠭᠡᠵᠦ ᠪᠠᠢᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠠᠯᠢ ᠳᠡᠭᠡᠳᠦ ᠶ᠋ᠢ ᠴᠢᠨᠠᠭᠰᠠᠨ ᠨᠢ ᠬᠡᠳᠦ ᠪᠣᠯᠵᠤ ᠶᠠᠰᠤ ᠮᠢᠬᠠ ᠬᠣᠶᠠᠷ ᠨᠢ ᠢᠯᠭᠠᠷᠠᠨ ᠰᠠᠯᠬᠤ ᠰᠢᠬᠠᠭᠰᠠᠨ ᠮᠢᠬᠠ ᠠ᠋ᠴᠠ ᠲᠠᠯᠪᠢᠬᠤ ᠳ᠋ᠠᠭᠠᠨ ᠭᠢᠯᠢᠭ ᠲᠡᠭᠦᠨ ᠢ᠋ ᠬᠠᠷᠠᠨ ᠰᠡᠳᠬᠢᠯ ᠬᠠᠷᠠᠰᠠᠭᠠᠳ ᠤᠢᠰᠤᠨ ᠪᠠᠷᠢᠭᠤᠯᠲᠤ ᠬᠢᠲᠤᠭᠠ ᠪᠠᠨ ᠲᠠᠰᠢᠶᠠᠨ ᠳ᠋ᠠᠬᠢ ᠬᠤᠢ ᠠ᠋ᠴᠠ ᠨᠢ ᠰᠤᠭᠤᠯᠤᠨ ᠮᠢᠬᠠᠨ ᠳᠡᠭᠡᠷᠡ ᠲᠠᠯᠪᠢᠨ ᠵᠣᠴᠢᠳ ᠤ᠋ᠨ ᠡᠮᠦᠨᠡ ᠪᠠᠷᠢᠬᠤ ᠳ᠋ᠠᠭᠠᠨ ᠰᠠᠶᠢ ᠦᠵᠡᠭᠴᠢ ᠪᠣᠯᠤᠨ ᠰᠣᠴᠢᠵᠤ᠄
ᠫᠧᠢ ᠠ᠋ ᠡᠨᠡ ᠴᠢᠨᠢ ᠭᠡᠵᠦ ᠳᠠᠭᠤ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ᠂ ᠵᠠ ᠶᠠᠭᠠᠬᠢᠬᠤᠪ ᠠᠯᠤᠰ ᠲᠤ ᠵᠣᠷᠢᠭᠰᠠᠨ ᠵᠣᠴᠢᠳ ᠤ᠋ᠨ ᠵᠣᠭᠣᠭ ᠬᠡᠳᠦ ᠪᠣᠯᠤᠭᠰᠠᠨ ᠪᠠᠢᠪᠠᠯ ᠠᠵᠢᠯ ᠬᠡᠷᠡᠭ ᠨᠢ ᠵᠠᠪᠠᠯ ᠪᠦᠲᠦᠳᠡᠭ ᠭᠡᠯᠡ᠃ ᠭᠦᠩᠲᠡᠨ ᠮᠢᠨᠢ ᠲᠠᠨ ᠤ᠋ ᠬᠡᠷᠡᠭ ᠪᠦᠲᠦᠬᠦ ᠨᠢ ᠪᠠᠢᠨᠠ ᠰᠢᠦ ᠭᠡᠵᠦ ᠰᠢᠨᠡ ᠵᠦᠢᠷ ᠦᠭᠡ ᠵᠣᠬᠢᠶᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠤᠷᠤᠨ ᠪᠠᠭᠠ ᠵᠡᠷᠭᠡ ᠲᠠᠢᠪᠤᠰᠢᠷᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠠᠷᠪᠠᠭᠠᠢ ᠬᠣᠶᠠᠷ ᠤᠷᠢᠳ ᠰᠥᠨᠢ ᠬᠦᠷᠢᠶᠡᠨ ᠡᠴᠡ ᠭᠠᠷᠤᠭᠠᠳ ᠪᠠᠷᠤᠨ ᠤ᠋ ᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠳᠠᠩ ᠠᠭᠤᠯᠠ ᠨᠢᠷᠤᠭᠤ ᠳᠠᠮᠵᠢᠨ ᠵᠢᠳᠬᠦᠭᠰᠡᠭᠡᠷ ᠮᠣᠷᠢᠳ ᠢ᠋ᠶ᠋ᠠᠨ ᠡᠴᠡᠭᠡᠭᠰᠡᠨ ᠪᠥᠭᠡᠳ ᠠᠷᠭᠠ ᠪᠤᠶᠤ ᠶᠠᠪᠠᠭᠠᠷᠠᠬᠤ ᠳ᠋ᠤ᠌ ᠲᠤᠯᠭᠠᠷᠠᠬᠤ ᠳ᠋ᠠᠭᠠᠨ ᠭᠢᠯᠢᠭ ᠡᠪᠦᠭᠡᠨ ᠦ᠌ ᠬᠢ ᠶ᠋ᠢ ᠡᠷᠢᠨ ᠰᠤᠷᠠᠭᠰᠠᠭᠠᠷ ᠠᠷᠠᠢ ᠭᠡᠵᠦ ᠣᠯᠵᠤ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠣᠳᠣ ᠬᠣᠭᠣᠯᠠ ᠢᠳᠡᠬᠦ ᠵᠠᠭᠤᠷᠠ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠡᠴᠡᠭᠰᠡᠨ ᠢ᠋ᠶ᠋ᠡᠨ ᠳᠤᠷᠠᠳᠤᠨ ᠤᠨᠤᠭᠠ ᠵᠠᠯᠭᠠᠬᠤ ᠶ᠋ᠢ ᠡᠷᠢᠬᠦ ᠳ᠋ᠦ᠍ ᠭᠢᠯᠢᠭ ᠠ᠋᠂ ᠭᠡᠵᠦ ᠭᠤᠨᠢᠭᠲᠤ ᠴᠢᠷᠠᠢ ᠭᠠᠷᠭᠠᠬᠤ ᠪᠣᠯᠪᠠᠴᠤ᠂ ᠤᠨᠤᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠡᠰᠡ ᠴᠢᠳᠠᠨ᠂ ᠵᠠ ᠵᠠ ᠪᠣᠯᠣᠯᠭᠦᠢ ᠶᠠᠭᠠᠬᠢᠬᠤᠪ ᠭᠡᠵᠦ ᠤᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠪᠤᠶᠠᠨᠲᠠᠢ ᠶᠠᠪᠤᠭᠰᠠᠨ ᠢ᠋ ᠪᠡᠨ ᠣᠳᠣ ᠴᠦ᠍ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠠᠢᠭᠠ ᠶᠤᠮ ᠰᠢᠭ᠋ ᠴᠢᠷᠠᠢ ᠭᠠᠷᠭᠠᠨ ᠥᠭᠦᠯᠡᠪᠡ᠃
ᠮᠠᠷᠭᠠᠰᠢ ᠨᠢ ᠳᠣᠷᠵᠢ ᠡᠷᠲᠡᠯᠡᠨ ᠪᠣᠰᠴᠤ ᠠᠳᠤᠭᠤ ᠪᠠᠨ ᠠᠪᠴᠢᠷᠠᠪᠠ᠃ ᠭᠢᠯᠢᠭ ᠤᠯᠤᠰ ᠣᠷᠣᠨ ᠤ᠋ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠭᠠ ᠬᠦᠨᠳᠦᠲᠦ ᠵᠣᠴᠢᠳ ᠲᠤ ᠬᠥᠯ ᠤᠨᠤᠭᠠ ᠵᠠᠯᠭᠠᠬᠤ ᠶᠠᠭᠤᠮᠠ ᠶᠠᠭᠤ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠮᠣᠷᠢ ᠨᠢᠭᠡ ᠪᠦᠷᠢ ᠶ᠋ᠢ ᠪᠣᠳᠣᠨ ᠨᠣᠢᠷ ᠮᠠᠭᠤᠲᠠᠢ ᠬᠣᠨᠣᠭᠰᠠᠨ ᠠᠵᠢ᠃ ᠠᠳᠤᠭᠤᠨ ᠤ᠋ ᠴᠢᠮᠡᠭᠡ ᠪᠡᠷ ᠬᠣᠶᠠᠷ ᠵᠣᠴᠢᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠭᠠᠷᠪᠠ᠃ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠬᠦ ᠨᠢ ᠳᠠᠭᠠ᠂ ᠰᠠᠷᠪᠠ᠂ ᠭᠡᠭᠦᠦ᠂ ᠠᠵᠢᠷᠭᠠ᠁ ᠶᠠᠰᠤᠨ ᠬᠡᠳᠡᠷᠭᠡ ᠪᠣᠯᠤᠭᠰᠠᠨ ᠠᠮᠢᠲᠠᠳ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠠᠮᠢᠰᠬᠤᠭᠠᠳᠠᠨ ᠬᠡᠯᠲᠦᠷᠢᠨᠡ᠃ ᠳᠣᠷᠵᠢ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠬᠣᠶᠠᠷ ᠮᠣᠷᠢ ᠪᠠᠷᠢᠪᠠ᠃ ᠨᠢᠭᠡ ᠨᠢ ᠰᠡᠲᠡᠷᠲᠦ ᠬᠣᠩᠭᠣᠷ᠂ ᠨᠥᠭᠦᠭᠡ ᠨᠢ ᠬᠤᠷᠳᠤᠨ ᠬᠡᠭᠡᠷ ᠭᠡᠭᠴᠢ᠃
ᠡᠳᠡᠭᠡᠷ ᠮᠣᠷᠢᠳ ᠤ᠋ᠨ ᠠᠯᠳᠠᠷ ᠭᠣᠩᠰᠢᠨ ᠢ᠋ ᠲᠤᠭᠤᠯᠬᠤ ᠳ᠋ᠤ᠌ ᠰᠡᠳᠬᠢᠯ ᠵᠣᠪᠠᠭᠤᠰᠢᠲᠠᠢ ᠪᠠᠢᠪᠠᠴᠤ ᠭᠢᠯᠢᠭ ᠲᠡᠳᠡᠨ ᠳ᠋ᠦ᠍ ᠤᠨᠤᠭᠠ ᠵᠠᠯᠭᠠᠵᠤ ᠴᠢᠳᠠᠵᠤ ᠪᠠᠢᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃ ᠶᠠᠪᠤᠬᠤ ᠪᠣᠯᠬᠤ ᠳ᠋ᠤᠨᠢ᠂ ᠪᠤᠷᠬᠠᠨ ᠳ᠋ᠤ᠌ ᠪᠠᠨ ᠬᠡᠢ ᠮᠣᠷᠢ ᠶ᠋ᠢᠨ ᠰᠠᠩ ᠲᠠᠯᠪᠢᠵᠤ ᠡᠯᠳᠡᠪ ᠰᠠᠢᠨ ᠢ᠋ ᠢᠷᠥᠭᠡᠨ ᠦᠳᠡᠵᠦ ᠭᠠᠷᠭᠠᠪᠠ᠃ ᠰᠡᠳᠬᠢᠯ ᠪᠠᠰᠠ ᠦᠯᠦ ᠬᠠᠩᠬᠤ ᠤᠴᠢᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠮᠠᠴᠤᠨ ᠭᠠᠷᠴᠤ ᠣᠪᠣᠭᠠ ᠰᠡᠷᠭᠦᠭᠡᠨ ᠠᠷᠴᠠ ᠤᠭᠤᠭᠢᠭᠤᠯᠪᠠ᠃
ᠶᠠᠪᠤᠭᠰᠠᠨ ᠬᠣᠶᠠᠷ ᠨᠢ ᠥᠴᠥᠭᠡᠳᠦᠷ ᠭᠢᠯᠢᠭ ᠦ᠋ᠨ ᠳ᠋ᠦ᠍ ᠢᠷᠡᠬᠦ ᠳ᠋ᠡᠭᠡᠨ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠬᠦ᠂ ᠭᠤᠶᠠᠳᠠᠬᠤ ᠶᠠᠩᠵᠤ ᠪᠦᠷᠢ ᠶ᠋ᠢ ᠦᠵᠡᠨ ᠶᠠᠪᠤᠭᠰᠠᠨ ᠪᠣᠯ ᠣᠳᠣ ᠬᠡᠳᠦᠢᠪᠡᠷ ᠶᠠᠭᠢᠷ ᠶᠠᠨᠳᠠᠨ ᠪᠣᠯᠪᠠᠴᠤ ᠬᠥᠯ ᠠᠮᠤᠷ ᠪᠠᠢᠭᠰᠠᠨ ᠰᠠᠢᠨ ᠮᠣᠷᠢᠳ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠪᠠᠶᠠᠷ ᠲᠠᠢ ᠶᠠᠪᠤᠨᠠ᠃
ᠡᠨᠡ ᠪᠣᠯ ᠭᠢᠯᠢᠭ ᠡᠴᠡ ᠲᠡᠳᠡᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠰᠢᠨᠡ ᠬᠦᠴᠦ ᠪᠥᠭᠡᠳ ᠭᠡᠪᠡᠴᠦ ᠲᠡᠳᠡᠨ ᠭᠢᠯᠢᠭ ᠭᠡᠵᠦ ᠶᠠᠷᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠮᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠵᠠᠩ ᠰᠤᠷᠲᠠᠬᠤᠨ᠂ ᠤᠯᠤᠰ ᠣᠷᠣᠨ ᠪᠣᠯᠣᠳ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠶᠡᠬᠡ ᠡᠷᠡᠮᠡᠯᠵᠡᠯᠡᠯ ᠭᠡᠵᠦ ᠶᠠᠷᠢᠯᠴᠠᠬᠤ ᠠᠵᠢ᠃
ᠮᠣᠷᠢᠳ ᠢ᠋ᠶ᠋ᠠᠨ ᠲᠡᠳᠡ ᠬᠠᠵᠠᠭᠠᠷ ᠳᠠᠷᠤᠨ ᠤᠷᠤᠭᠰᠢ ᠲᠡᠮᠡᠦᠯᠬᠦ ᠳ᠋ᠦ᠍ ᠠᠶᠠᠨ ᠵᠠᠮ ᠤ᠋ᠨ ᠢ᠋ᠶ᠋ᠠᠨ ᠬᠣᠯᠠ ᠶ᠋ᠢ ᠰᠠᠨᠠᠨ ᠵᠢᠯᠣᠭᠣ ᠲᠠᠲᠠᠨᠠ᠃ ᠣᠢ ᠬᠥᠪᠴᠢ ᠠᠰᠬᠠ ᠴᠢᠯᠠᠭᠤ ᠪᠠᠷ ᠪᠢᠲᠡᠭᠦᠦ ᠪᠦᠷᠬᠦᠭᠳᠡᠭᠰᠡᠨ ᠶᠡᠬᠡ ᠠᠭᠤᠯᠠ ᠠ᠋ᠴᠠ ᠪᠠᠭᠤᠮᠠᠭᠴᠠ ᠪᠠᠯᠳᠠᠨᠴᠡᠷᠢᠩ ᠡᠪᠦᠷ ᠡᠴᠡ ᠪᠡᠨ ᠫᠤᠤ ᠪᠠᠨ ᠭᠠᠷᠭᠠᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠵᠡᠭᠦᠵᠦ ᠣᠳᠣ ᠶᠠᠭᠤ ᠴᠦ᠍ ᠳᠠᠭᠠᠷᠢᠯᠳᠤᠵᠤ ᠮᠠᠭᠠᠳ ᠦᠭᠡᠢ ᠫᠤᠤ ᠪᠠᠨ ᠰᠤᠮᠤᠯᠠᠭᠠᠷᠠᠢ! ᠭᠡᠬᠦ ᠳ᠋ᠦ᠍ ᠠᠷᠪᠠᠭᠠᠢ ᠫᠤᠤ ᠪᠠᠨ ᠨᠢᠷᠤᠭᠤᠨ ᠠ᠋ᠴᠠ ᠠᠪᠤᠨ ᠬᠣᠭᠣᠯᠠᠢ ᠳ᠋ᠤᠨᠢ ᠲᠠᠪᠤᠨ ᠰᠤᠮᠤ ᠬᠢᠪᠡ᠃ ᠴᠠᠰᠤ ᠮᠥᠰᠥ ᠨᠢ ᠣᠯᠠᠨ ᠤ᠋ ᠬᠥᠯ ᠳ᠋ᠦ᠍ ᠦᠷᠡᠭᠳᠡᠨ ᠬᠠᠨᠵᠠᠷᠠᠭᠰᠠᠨ ᠥᠷᠭᠡᠨ ᠰᠢᠷᠭᠠᠯ ᠵᠠᠮ ᠲᠡᠷᠡ ᠬᠣᠶᠠᠷ ᠢ᠋ ᠬᠥᠲᠥᠯᠦᠨ ᠳᠡᠷᠭᠡᠳᠡᠬᠢ ᠡᠩᠭᠡᠷ ᠢ᠋ ᠳᠠᠪᠠᠨ ᠣᠳᠤᠭᠰᠠᠨ ᠢ᠋ ᠲᠡᠷᠡ ᠬᠣᠶᠠᠷ ᠪᠠᠷᠢᠨ ᠮᠥᠷᠥ ᠵᠡᠷᠭᠡᠴᠡᠨ ᠬᠠᠲᠠᠷᠢᠭᠤᠯᠵᠤ ᠡᠬᠢᠯᠡᠪᠡ᠃
ᠭᠢᠯᠢᠭ ᠡᠪᠦᠭᠡᠨ ᠪᠣᠯ ᠶᠡᠬᠡ ᠰᠢᠲᠦᠯᠭᠡ ᠲᠡᠢ ᠬᠥᠮᠦᠨ ᠪᠢᠯᠡ᠃ ᠲᠡᠭᠦᠨ ᠦ᠌ ᠪᠡᠨ ᠳᠡᠭᠡᠷᠡ ᠪᠠᠯᠳᠠᠨᠴᠡᠷᠢᠩ ᠠᠷᠪᠠᠭᠠᠢ ᠬᠣᠶᠠᠷ ᠤ᠋ᠨ ᠢᠷᠡᠭᠡᠳ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠠᠯᠪᠠᠷᠢᠯ ᠳᠠᠭᠠᠳᠬᠠᠯ ᠬᠢᠬᠦ ᠨᠢ ᠪᠦᠷ ᠪᠠᠷᠠᠭᠳᠠᠬᠤ ᠪᠠᠨ ᠪᠠᠢᠪᠠ᠃ ᠥᠷᠯᠥᠭᠡ ᠪᠦᠷᠢ ᠬᠡᠢ ᠮᠣᠷᠢ ᠶ᠋ᠢᠨ ᠰᠠᠩ᠂ ᠡᠳᠦᠷ ᠪᠦᠷᠢ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠤᠨ ᠣᠪᠣᠭᠠ ᠰᠡᠷᠭᠦᠭᠡᠨ ᠠᠷᠴᠠ ᠤᠭᠤᠭᠢᠭᠤᠯᠤᠨᠠ᠃ ᠴᠠᠢ ᠴᠢᠨᠠᠬᠤ ᠪᠦᠷᠢ ᠳ᠋ᠦ᠍ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ ᠳᠡᠭᠡᠵᠢ ᠡᠷᠭᠦᠵᠦ ᠪᠠᠢᠬᠤ ᠶ᠋ᠢ ᠪᠡᠷᠢ ᠳ᠋ᠡᠭᠡᠨ ᠵᠠᠬᠢᠨᠠ᠃ ᠦᠳᠡᠰᠢ ᠪᠣᠯᠬᠤ ᠪᠠᠷ ᠯᠠ ᠮᠥᠨ ᠬᠡᠢ ᠮᠣᠷᠢ ᠶ᠋ᠢᠨ ᠰᠠᠩ᠂ ᠪᠤᠷᠬᠠᠨ ᠳ᠋ᠠᠭᠠᠨ ᠠᠷᠴᠠ ᠤᠭᠤᠭᠢᠭᠤᠯᠤᠨ ᠵᠠᠪᠢᠯᠠᠨ ᠰᠠᠭᠤᠵᠤ《ᠣᠮ ᠪᠠᠵᠠᠷ ᠠᠮᠢᠷᠲ᠋ᠠ᠂ ᠬᠥᠨᠳᠡᠯᠡᠢ ᠬᠠᠨᠠ ᠬᠠᠨᠠ ᠬᠣᠮ ᠫᠠᠳ᠂ ᠣᠮ ᠰᠤᠪᠬᠠᠠ ᠰᠤᠳᠠᠢ ᠬᠠ᠁》 ᠭᠡᠵᠦ ᠤᠴᠢᠷ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠲᠠᠷᠨᠢ ᠶ᠋ᠢᠨ ᠦᠭᠡᠰ ᠢ᠋ ᠬᠣᠶᠠᠷ ᠨᠢᠳᠦ ᠪᠡᠨ ᠲᠠᠰᠤ ᠠᠨᠢᠨ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠤᠩᠰᠢᠵᠤ ᠡᠬᠢᠯᠡᠭᠡᠳ ᠴᠠᠭᠠᠰᠢ ᠨᠢ ᠰᠦᠰᠦᠭᠯᠡᠨ ᠪᠢᠰᠢᠷᠡᠬᠦ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠭᠦᠨ ᠪᠣᠯᠤᠨ ᠠᠮᠠᠨ ᠳ᠋ᠠᠭᠠᠨ ᠪᠠᠬᠠᠨ ᠪᠤᠪᠠᠲᠤᠨᠠᠨᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍《᠁ ᠠᠷᠰᠯᠠᠨ ᠤ᠋ ᠪᠠᠳᠠᠷᠠᠩᠭᠤᠢ ᠮᠡᠲᠦ ᠪᠡᠷ ᠬᠡᠢ ᠮᠣᠷᠢ ᠶ᠋ᠢ ᠲᠠᠩᠰᠢᠳᠠ ᠮᠨᠨᠳᠤᠭᠤᠯᠠ᠂ ᠭᠠᠷᠤᠳᠢᠰ ᠤ᠋ᠨ ᠬᠠᠯᠢᠨ ᠨᠢᠰᠬᠦ ᠮᠡᠲᠦ ᠪᠡᠷ ᠬᠡᠢ ᠮᠣᠷᠢ ᠲᠠᠩᠰᠢᠳᠠ ᠮᠠᠨᠳᠤᠭᠤᠯᠠ! ᠯᠤᠤ ᠶ᠋ᠢᠨ ᠳᠡᠭᠳᠡᠨ ᠨᠢᠰᠦᠭᠡᠯᠭᠡ ᠶ᠋ᠢᠨ ᠮᠡᠲᠦ ᠬᠡᠢ ᠮᠣᠷᠢ ᠶ᠋ᠢ ᠲᠠᠩᠰᠢᠳᠠ ᠮᠠᠨᠳᠤᠭᠤᠯᠠ!》 ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠢ᠋ ᠲᠣᠪ ᠲᠣᠳᠣᠬᠠᠨ ᠥᠭᠦᠯᠡᠬᠦ ᠪᠥᠭᠡᠳ《᠁ ᠢᠯᠠᠩᠭᠤᠶᠠ ᠮᠢᠨᠦ ᠡᠨᠡ ᠥᠪᠡᠷ ᠦ᠋ᠨ ᠨᠠᠰᠤᠨ ᠬᠢᠭᠡᠳ ᠪᠤᠶᠠᠨ ᠬᠡᠰᠢᠭ ᠦ᠋ᠳ ᠪᠠ ᠴᠣᠭ ᠵᠠᠯᠢ ᠣᠯᠵᠠ ᠬᠢᠭᠡᠳ ᠬᠡᠢ ᠮᠣᠷᠢ ᠠᠷᠪᠠᠨ ᠵᠦᠭ ᠲᠦ᠍ ᠲᠦᠭᠡᠮᠡᠯ ᠢ᠋ᠶ᠋ᠡᠷ ᠳᠡᠯᠭᠡᠷᠡᠨ ᠨᠣᠮ ᠪᠠ ᠬᠠᠮᠤᠭ ᠶᠢᠷᠲᠢᠨᠴᠦ ᠶ᠋ᠢᠨ ᠬᠦᠰᠡᠬᠦ ᠶ᠋ᠢᠨ ᠡᠯᠡ ᠪᠦᠬᠦ ᠬᠡᠷᠡᠭ ᠬᠦᠰᠡᠯ ᠦ᠋ᠳ ᠢ᠋ᠶ᠋ᠡᠷ ᠲᠤᠯᠭᠠᠭᠤᠷᠢᠯ ᠦᠭᠡᠢ ᠠᠶᠠᠨᠳᠠᠭᠠᠨ ᠪᠦᠲᠦᠬᠦ ᠶ᠋ᠢᠨ ᠥᠯᠵᠡᠢ ᠬᠤᠲᠤᠭ ᠣᠷᠣᠰᠢᠬᠤ ᠪᠣᠯᠲᠤᠭᠠᠢ!》 ᠭᠡᠵᠦ ᠳᠡᠭᠡᠭᠰᠢ ᠰᠢᠷᠲᠡᠨ ᠲᠩᠷᠢ ᠳ᠋ᠦ᠍ ᠵᠠᠯᠪᠠᠷᠢᠬᠤ ᠨᠢ ᠳᠠᠷᠤᠢ ᠲᠡᠭᠦᠰᠬᠦ ᠶ᠋ᠢᠨ ᠰᠢᠨᠵᠢ ᠲᠡᠮᠳᠡᠭ ᠪᠣᠯᠤᠨᠠ᠃
ᠭᠢᠯᠢᠭ ᠡᠪᠦᠭᠡᠨ ᠦ᠌ ᠡᠢᠨᠬᠦ ᠣᠪᠰᠠᠩ ᠵᠠᠯᠪᠠᠷᠢᠯ ᠦᠢᠯᠡᠳᠬᠦ ᠨᠢ ᠠᠷᠠᠳ ᠤ᠋ᠨ ᠨᠠᠮ ᠰᠦᠬᠡᠪᠠᠭᠠᠲᠤᠷ ᠪᠠᠯᠳᠠᠨᠴᠡᠷᠢᠩ ᠨᠠᠷ ᠤ᠋ᠨ ᠲᠥᠯᠥᠭᠡ᠂ ᠲᠡᠳᠡᠨ ᠦ᠌ ᠠᠵᠠ ᠬᠡᠢ ᠮᠣᠷᠢ ᠶ᠋ᠢ ᠰᠡᠷᠭᠦᠭᠡᠬᠦ᠂ ᠲᠣᠬᠢᠶᠠᠯᠳᠤᠬᠤ ᠭᠠᠢ ᠪᠠᠷᠴᠢᠳ ᠢ᠋ ᠨᠢ ᠵᠠᠢᠯᠠᠭᠤᠯᠬᠤ ᠳᠠᠢᠰᠤᠨ ᠤ᠋ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠮᠤᠩᠬᠠᠷᠠᠭᠤᠯᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠵᠠᠢ᠃ ᠣᠷᠣᠭᠰᠠᠨ ᠭᠠᠷᠤᠭᠰᠠᠨ ᠬᠥᠮᠦᠰ ᠮᠥᠨ ᠯᠡ ᠲᠡᠳᠡᠨ ᠦ᠌ ᠲᠤᠬᠠᠢ ᠶᠠᠷᠢᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠤᠴᠢᠷ ᠢ᠋ ᠨᠢ ᠨᠠᠷᠢᠪᠴᠢᠯᠠᠨ ᠮᠡᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠪᠠᠯᠳᠠᠨᠴᠡᠷᠢᠩ ᠡᠴᠡ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠰᠢᠷᠬᠡᠭ ᠳᠠᠷᠠᠭᠠᠯᠠᠭᠤᠯᠤᠨ ᠶᠠᠷᠢᠨᠠ᠃ ᠲᠡᠷᠡ ᠨᠢ ᠭᠡᠷ ᠡᠴᠡ ᠭᠡᠷ ᠲᠦ᠍ ᠳᠠᠮᠵᠢᠭᠠᠳ ᠠᠭᠤᠯᠠᠨ ᠠ᠋ᠴᠠ ᠠᠭᠤᠯᠠ ᠶ᠋ᠢ ᠳᠠᠪᠠᠨ ᠪᠠᠭᠤᠨ᠂ ᠤᠯᠤᠰ ᠠᠮᠢᠲᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠬᠦᠷᠬᠦ ᠵᠠᠭᠤᠷᠠ᠄
— ᠳᠡᠯᠡᠬᠡᠢ ᠶ᠋ᠢᠨ ᠣᠯᠠᠨ ᠥᠩᠭᠡ ᠶ᠋ᠢᠨ ᠣᠷᠣᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠠᠮᠤᠭ ᠤ᠋ᠨ ᠬᠦᠴᠦᠷᠬᠡᠭ ᠪᠣᠯᠤᠭᠠᠳ ᠠᠷᠢᠭᠤᠨ ᠰᠢᠳᠤᠷᠭᠤ ᠨᠢ ᠤᠯᠠᠭᠠᠨ ᠣᠷᠣᠰ ᠭᠡᠨᠡ ᠴᠦ᠍ ᠭᠡᠬᠦ ᠰᠢᠭ᠂ ᠠᠷᠠᠳ ᠲᠦᠮᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠰᠦᠬᠡ ᠬᠡᠮᠡᠬᠦ ᠫᠤᠤ ᠶ᠋ᠢᠨ ᠰᠤᠮᠤᠨ ᠳ᠋ᠤ᠌ ᠦᠯᠦ ᠳᠠᠭᠠᠭᠠᠭᠳᠠᠬᠤ ᠪᠠᠭᠠᠲᠤᠷ ᠡᠷᠡ ᠲᠣᠳᠣᠷᠠᠨ ᠡᠩᠬᠡ ᠴᠠᠭ ᠢ᠋ ᠲᠣᠭᠲᠠᠭᠠᠬᠤ ᠭᠡᠯᠡ ᠴᠦ᠍ ᠭᠡᠬᠦ ᠰᠢᠭ᠂ ᠲᠡᠭᠦᠨ ᠦ᠌ ᠴᠡᠷᠢᠭ ᠲᠦ᠍ ᠡᠯᠰᠡᠨ ᠣᠷᠣᠵᠤ ᠠᠮᠢ ᠪᠡᠶᠡ ᠬᠠᠢᠷᠠ ᠦᠭᠡᠢ ᠵᠢᠳᠬᠦᠪᠡᠯ ᠡᠨᠡ ᠨᠠᠰᠤᠨ ᠤ᠋ ᠡᠷᠬᠢᠮ ᠳᠡᠭᠡᠳᠦ ᠵᠢᠷᠭᠠᠯ᠂ ᠡᠴᠦᠰ ᠬᠣᠢᠲᠤ ᠳ᠋ᠠᠭᠠᠨ ᠡᠭᠡᠯ ᠪᠤᠰᠤ ᠶ᠋ᠢᠨ ᠲᠥᠷᠥᠯ ᠣᠯᠤᠨᠠ ᠭᠡᠬᠦ ᠮᠡᠲᠦᠴᠢᠯᠡᠨ ᠥᠩᠭᠡ ᠪᠣᠳᠣᠭ ᠨᠡᠮᠡᠭᠳᠡᠨ ᠳᠡᠭᠳᠡᠵᠦ᠂ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠰᠡᠷᠭᠦᠭᠡᠵᠡᠢ᠃ ᠡᠭᠦᠨ ᠦ᠌ ᠪᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠪᠠᠷᠤᠨ ᠣᠩᠭᠧᠷᠠᠨ ᠢ᠋ ᠤᠯᠠᠮ ᠢ᠋ᠶ᠋ᠠᠷ ᠵᠢᠭᠰᠢᠨᠡ᠃ ᠪᠠᠷᠤᠨ ᠣᠩᠭᠧᠷᠠᠨ ᠤ᠋ ᠬᠠᠷᠭᠢᠰᠯᠠᠯ ᠲᠤᠢᠯ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠦ᠌ ᠤᠴᠢᠷ ᠭᠡᠪᠡᠯ ᠠᠯᠢᠪᠠ ᠶᠠᠭᠤᠮᠠ ᠰᠥᠨᠥᠬᠦ ᠪᠡᠨ ᠪᠣᠯᠬᠤ ᠪᠠᠷ ᠢᠩᠭᠢᠳᠡᠭ᠂ ᠭᠠᠯ ᠪᠣᠯᠪᠠᠴᠤ ᠤᠨᠲᠠᠷᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠳᠦᠷᠡᠯᠵᠡᠳᠡᠭ ᠰᠢᠦ ᠭᠡᠳᠡᠭ ᠦᠭᠡ ᠮᠥᠨ ᠯᠡ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠵᠠᠰᠠᠨ ᠰᠢᠯᠤᠭᠤᠳᠬᠠᠨᠠ᠃
ᠨᠢᠭᠡ ᠡᠳᠦᠷ ᠬᠦᠷᠡᠯ ᠦ᠋ᠨ ᠶᠡᠬᠡ ᠬᠦᠦ ᠴᠡᠷᠢᠨᠳᠣᠷᠵᠢ ᠰᠡᠩᠳᠡ ᠮᠡᠩᠳᠡ ᠳᠠᠪᠬᠢᠨ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠨᠠᠰᠤ ᠠᠷᠪᠠᠨ ᠳᠣᠯᠣᠭᠠ᠂ ᠲᠥᠷᠥᠯᠬᠢ ᠶ᠋ᠢᠨ ᠳᠣᠷᠣᠢ᠂ ᠡᠴᠢᠭᠡ ᠡᠴᠡ ᠪᠡᠨ ᠬᠣᠢᠰᠢ ᠬᠤᠪᠢ ᠶ᠋ᠢᠨ ᠬᠡᠳᠦᠨ ᠮᠠᠯ ᠤ᠋ᠨ ᠠᠵᠢᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠭᠠᠩᠳᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠪᠠᠷᠤᠨ ᠤ᠋ ᠬᠢᠨ ᠮᠠᠯ ᠳᠡᠭᠡᠷᠡ ᠪᠡᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤᠨᠢ ᠴᠡᠷᠢᠭ ᠲᠦ᠍ ᠪᠠᠷᠢᠪᠴᠢᠯᠠᠵᠠᠢ᠃ ᠪᠤᠰᠤᠳ ᠲᠠᠢ ᠨᠡᠢᠯᠡᠭᠦᠯᠦᠨ ᠡᠵᠡᠭᠦᠢ ᠪᠣᠯᠤᠭᠰᠠᠨ ᠫᠦᠰᠡ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠬᠣᠷᠢᠬᠤ ᠳ᠋ᠤᠨᠢ ᠴᠡᠷᠢᠨᠳᠣᠷᠵᠢ ᠶᠠᠪᠤᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠨᠠ ᠭᠡᠵᠦ ᠤᠬᠢᠯᠠᠨ ᠪᠠᠢᠵᠤ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠭᠡᠨᠡ᠃ ᠡᠬᠡ ᠨᠢ ᠬᠦᠦ ᠪᠡᠨ ᠭᠢᠯᠢᠭ ᠦ᠋ᠨ ᠬᠢ ᠤᠷᠤᠭᠤ ᠣᠷᠣᠭᠤᠯᠤᠭᠰᠠᠨ ᠠᠵᠢ᠃ ᠮᠠᠷᠭᠠᠰᠢ ᠨᠢ ᠴᠡᠷᠢᠨᠳᠣᠷᠵᠢ ᠶ᠋ᠢᠨ ᠡᠬᠡ ᠲᠣᠯᠵᠢᠨ ᠠᠪᠠᠭᠠᠢ ᠪᠠᠷᠤᠨ ᠤ᠋ ᠬᠢᠨ ᠡᠷᠡᠰ ᠦ᠋ᠳ ᠢ᠋ ᠪᠠᠷᠢᠪᠴᠢᠯᠠᠵᠤ ᠭᠦᠢᠴᠡᠭᠡᠳ ᠠᠭᠤᠯᠠᠨ ᠳ᠋ᠤ᠌ ᠳᠦᠷᠪᠡᠭᠰᠡᠳ ᠢ᠋ ᠪᠠᠷᠢᠪᠴᠢᠯᠠᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠳᠠᠮ ᠰᠣᠨᠣᠰᠤᠨ ᠮᠥᠨ ᠯᠡ ᠰᠡᠩᠳᠡ ᠮᠡᠩᠳᠡ ᠢᠷᠡᠪᠡ᠃ ᠲᠡᠷᠡ ᠳᠠᠷᠤᠢ ᠪᠦᠬᠦ ᠬᠣᠲᠠ ᠶ᠋ᠢᠨ ᠡᠷᠡᠭᠲᠡᠢᠴᠦᠳ ᠭᠢᠯᠢᠭ ᠦ᠋ᠨ ᠳ᠋ᠦ᠍ ᠴᠤᠭᠯᠠᠷᠠᠵᠤ ᠬᠡᠷᠬᠢᠬᠦ ᠶ᠋ᠢ ᠬᠡᠯᠡᠯᠴᠡᠪᠡ᠃《ᠠᠯᠢ ᠨᠢᠭᠡ ᠲᠡᠢᠰᠢ ᠵᠠᠢᠯᠠᠨ ᠵᠢᠭᠤᠲᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ!》 ᠭᠡᠵᠦ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠤᠤᠭᠢᠭᠰᠠᠨ ᠳ᠋ᠤ᠌ ᠭᠢᠯᠢᠭ᠄
— ᠦᠭᠡᠢ ᠲᠠ ᠮᠢᠨᠢ ᠵᠢᠭᠤᠲᠠᠵᠤ ᠶᠠᠭᠠᠬᠢᠬᠤ ᠶᠤᠮ ᠪᠣᠢ! ᠥᠳᠥ ᠵᠢᠭᠦᠷ ᠲᠡᠢ ᠪᠣᠯᠵᠤ ᠥᠨᠳᠥᠷ ᠲᠩᠷᠢ ᠳ᠋ᠦ᠍ ᠨᠢᠰᠬᠦ ᠦᠭᠡᠢ ᠡᠴᠡ ᠬᠣᠢᠰᠢ ᠳᠠᠢᠰᠤᠨ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠴᠦ᠍ ᠪᠠᠷᠢᠭᠳᠠᠬᠤ ᠪᠢᠰᠢ ᠤᠤ? ᠲᠡᠭᠡᠭᠰᠡᠨ ᠡᠴᠡ ᠬᠠᠷᠢᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠤᠷᠤᠭᠤ ᠵᠢᠳᠬᠦᠪᠡᠯ ᠠᠮᠢᠳᠤ ᠭᠠᠷᠬᠤ ᠶ᠋ᠢᠨ ᠤᠴᠢᠷ ᠪᠠᠢᠵᠤ ᠮᠡᠳᠡᠨᠡ ᠭᠡᠳ ᠴᠠᠭᠠᠰᠢ ᠨᠢ ᠮᠥᠨ ᠯᠡ ᠥᠨᠥᠬᠢ ᠠᠷᠠᠳ ᠤ᠋ᠨ ᠨᠠᠮ᠂ ᠰᠦᠬᠡᠪᠠᠭᠠᠲᠤᠷ᠂ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠲᠤᠬᠠᠢ ᠶᠠᠷᠢᠪᠠ᠃ ᠬᠥᠮᠦᠰ ᠦ᠋ᠨ ᠲᠡᠷᠡ ᠵᠦᠭ ᠶᠠᠪᠤᠬᠤ ᠨᠢ ᠵᠦᠢᠲᠡᠢ ᠰᠢᠭ ᠪᠠᠢᠪᠠᠴᠤ ᠳᠠᠢᠰᠤᠨ ᠢ᠋ ᠦᠯᠢᠶᠡᠨ ᠬᠡᠢᠰᠬᠡᠬᠦ ᠪᠡᠷ ᠪᠢᠰᠢ᠂ ᠬᠠᠰᠬᠢᠷᠤᠨ ᠠᠶᠤᠯᠭᠠᠬᠤ ᠪᠠᠷ ᠪᠢᠰᠢ᠂ ᠦᠬᠦᠬᠦ ᠰᠡᠬᠡᠬᠦ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠢᠭᠡ ᠶ᠋ᠢ ᠦᠵᠡᠯᠴᠡᠨ ᠲᠤᠯᠤᠯᠳᠤᠬᠤ ᠰᠢᠦ ᠭᠡᠵᠦ ᠪᠣᠳᠣᠨ ᠦᠯᠦ ᠳᠤᠤᠭᠠᠷᠬᠤ ᠠᠵᠢ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠳᠣᠷᠵᠢ ᠳᠠᠢᠰᠤᠨ ᠢ᠋ ᠳᠠᠢᠳᠤᠨ ᠤᠰᠠᠳᠬᠠᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠪᠠᠢᠬᠤ ᠦᠭᠡᠢ ᠭᠡᠵᠦ ᠦᠷᠭᠦᠯᠵᠢ ᠪᠣᠳᠣᠬᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠪᠢ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠤᠷᠤᠭᠤ ᠶᠠᠪᠤᠬᠤ ᠮᠢᠨᠢ ᠭᠡᠬᠦ ᠳ᠋ᠦ᠍ ᠠᠮᠢ ᠪᠠᠨ ᠪᠣᠳᠣᠨ ᠰᠠᠭᠤᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠣᠴᠢᠨ ᠬᠠᠷᠠᠪᠠ᠃ ᠳᠣᠷᠵᠢ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍᠂ ᠲᠡᠢᠨ ᠦ᠌ ᠠᠶᠤᠯ ᠬᠡᠴᠢᠨᠡᠭᠡᠨ ᠠᠢᠬᠤᠪᠲᠤᠷ ᠢ᠋ ᠰᠠᠨᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠠᠷᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠢᠨᠢ ᠴᠢᠷᠠᠢ ᠴᠠᠢᠷᠠᠭᠰᠠᠨ᠂ ᠠᠮᠢᠰᠬᠤᠭᠠ ᠬᠥᠭᠡᠷᠦᠨ ᠪᠠᠢᠭᠠ ᠦᠵᠡᠭᠳᠡᠪᠡ᠃ ᠡᠷᠭᠢᠨ ᠬᠠᠷᠠᠪᠠᠯ ᠡᠴᠢᠭᠡ ᠨᠢ ᠢᠨᠢᠶᠡᠮᠰᠦᠭᠯᠡᠨ᠄
— ᠵᠥᠪ! ᠴᠢ ᠶᠠᠪᠤᠬᠤ ᠶᠣᠰᠣᠲᠠᠢ! ᠪᠠᠯᠳᠠᠨᠴᠡᠷᠢᠩ ᠬᠦᠩ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠲᠡᠷᠡ ᠭᠠᠵᠠᠷ ᠤ᠋ᠨ ᠬᠣᠯᠠ ᠠ᠋ᠴᠠ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌᠂ ᠴᠢ ᠵᠡᠷᠭᠡ ᠶ᠋ᠢᠨ ᠬᠥᠮᠦᠨ ᠶᠠᠭᠤ ᠪᠠᠨ ᠬᠢᠬᠦ ᠭᠡᠵᠦ ᠠᠷᠤ ᠳ᠋ᠤᠨᠢ ᠬᠡᠪᠲᠡᠬᠦ ᠪᠢᠯᠡ ᠭᠡᠪᠡ᠃ ᠭᠡᠲᠡᠯᠡ ᠳᠣᠷᠵᠢ ᠶ᠋ᠢᠨ ᠨᠠᠢᠵᠢ ᠰᠠᠮᠪᠤᠤ ᠬᠠᠮᠲᠤ ᠶᠠᠪᠤᠨᠠ ᠭᠡᠪᠡ᠃ ᠠᠷᠤ ᠳ᠋ᠤᠨᠢ ᠬᠣᠶᠠᠷ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠪᠢᠴᠢᠬᠠᠨ ᠡᠬᠡᠨᠡᠷ᠂ ᠬᠥᠭᠰᠢᠨ ᠲᠡᠢ ᠦᠯᠡᠳᠡᠬᠦ ᠪᠠᠢᠵᠠᠢ᠃ ᠡᠢᠮᠦ ᠳ᠋ᠦ᠍ ᠬᠥᠮᠦᠰ ᠲᠡᠭᠦᠨ ᠢ᠋ ᠮᠥᠨ ᠯᠡ ᠰᠣᠴᠢᠨ ᠬᠠᠷᠠᠪᠠ᠃ ᠭᠢᠯᠢᠭ ᠪᠣᠯᠪᠠᠴᠤ ᠴᠢᠷᠠᠢ ᠬᠤᠪᠢᠷᠠᠭᠠᠨ ᠪᠣᠳᠣᠭᠠᠳ᠄
— ᠵᠠ ᠶᠠᠭᠠᠬᠢᠬᠤᠪ ᠴᠢ ᠴᠦ᠍ ᠶᠠᠪᠤ! ᠴᠢᠨᠠᠳᠤᠭᠤᠯᠠ ᠶ᠋ᠢ ᠴᠢᠨᠢ ᠪᠢ ᠴᠢᠳᠠᠬᠤ ᠶᠠᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠷᠢ ᠪᠡᠷ ᠬᠠᠷᠠᠵᠤ ᠪᠠᠢᠵᠤ ᠦᠵᠡᠶᠡ ᠭᠡᠪᠡ᠃
ᠳᠣᠷᠵᠢ ᠰᠠᠮᠪᠤᠤ ᠬᠣᠶᠠᠷ ᠠ᠋ᠴᠠ ᠪᠤᠰᠤᠳ ᠨᠢ ᠭᠡᠷ ᠪᠠᠢᠷᠢ᠂ ᠮᠠᠯ ᠬᠥᠷᠥᠩᠭᠡ ᠪᠡᠨ ᠬᠠᠷᠠᠵᠤ ᠬᠠᠨᠳᠤᠵᠤ ᠦᠵᠡᠶᠡ ᠭᠡᠪᠡ᠃
ᠳᠣᠷᠵᠢ ᠰᠠᠮᠪᠤᠤ ᠬᠣᠶᠠᠷ ᠠ᠋ᠴᠠ ᠴᠠᠭᠠᠰᠢ ᠪᠣᠯᠤᠯᠴᠠᠭᠠ ᠲᠠᠢ ᠡᠷᠡ ᠬᠣᠶᠠᠷ ᠭᠤᠷᠪᠠ ᠪᠠᠢᠪᠠᠴᠤ ᠲᠡᠳᠡ ᠶᠣᠰᠣᠲᠠᠢ ᠯᠠ ᠬᠠᠷᠠ ᠠᠮᠢ ᠪᠠᠨ ᠪᠣᠳᠣᠨ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠭᠠᠷ ᠯᠠ ᠪᠠᠢᠪᠠ᠃ ᠭᠢᠯᠢᠭ ᠲᠡᠳᠡᠨ ᠳ᠋ᠦ᠍ ᠪᠠᠬᠠᠨ ᠵᠢᠪᠡᠭᠦᠦ ᠬᠦᠷᠴᠦ《ᠲᠥᠷᠥ ᠳ᠋ᠦ᠍ ᠰᠦᠯᠳᠡ᠂ ᠲᠦᠮᠡᠨ ᠣᠯᠠᠨ ᠳ᠋ᠤ᠌ ᠴᠢᠨᠢ ᠬᠤᠪᠢ ᠵᠠᠶᠠᠭᠠ ᠭᠡᠵᠦ ᠪᠣᠢ᠂ ᠲᠠ ᠬᠣᠶᠠᠷ ᠮᠢᠨᠢ ᠲᠡᠭᠦᠨ ᠢ᠋ ᠢᠮᠠᠭᠲᠠ ᠰᠠᠨᠠᠨ ᠪᠤᠰᠤᠳ ᠤ᠋ᠨ ᠠᠷᠤ ᠳ᠋ᠤ᠌ ᠯᠠ ᠪᠢᠲᠡᠭᠡᠢ ᠣᠷᠣᠵᠤ ᠶᠠᠪᠤᠭᠠᠷᠠᠢ!》 ᠭᠡᠵᠦ ᠵᠣᠷᠢᠭᠤᠳᠠ ᠵᠠᠬᠢᠪᠠ᠃ ᠠᠮᠢ ᠪᠠᠨ ᠪᠣᠳᠣᠵᠤ ᠬᠤᠯᠮᠠᠢᠨ ᠰᠠᠭᠤᠭᠰᠠᠨ ᠥᠨᠥ ᠡᠷᠡᠴᠦᠳ ᠨᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠬᠢ ᠪᠡᠨ ᠬᠦᠷᠲᠡᠯᠡ ᠤᠯᠠᠢᠪᠠ᠃ ᠵᠠᠷᠢᠮ ᠨᠢ ᠠᠯᠢ ᠬᠡᠳᠦᠢᠨ ᠬᠣᠭᠣᠰᠣᠷᠠᠭᠰᠠᠨ ᠲᠠᠮᠠᠬᠢ ᠶ᠋ᠢᠨ ᠤᠭᠤᠲᠠ ᠶ᠋ᠢ ᠳᠡᠮᠡᠢ ᠭᠦᠪᠢᠨ ᠴᠠᠭ ᠨᠥᠭᠴᠢᠭᠡᠨᠡ᠃ ᠲᠣᠯᠵᠢᠨ ᠠᠪᠠᠭᠠᠢ ᠬᠠᠨᠴᠤᠢ ᠳ᠋ᠠᠭᠠᠨ ᠵᠠᠯᠪᠠᠷᠢᠨ᠄
— ᠦᠭᠡᠢ ᠳᠣᠷᠵᠢ ᠮᠢᠨᠢ ᠴᠢ ᠡᠭᠦᠨ ᠢ᠋ ᠮᠢᠨᠢ ᠠᠪᠤᠭᠠᠳ ᠶᠠᠪᠤᠵᠤ ᠦᠵᠡ! ᠭᠡᠪᠡ᠃
— ᠲᠣᠯᠵᠢᠨ ᠭᠤᠸᠠᠢ ᠮᠢᠨᠢ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠲᠡᠨᠳᠡ ᠴᠡᠷᠢᠨᠳᠣᠷᠵᠢ ᠶ᠋ᠢᠨ ᠬᠡᠷᠡᠭ ᠶᠡᠷᠦ ᠶᠠᠭᠤ ᠪᠠᠢᠬᠤ ᠪᠢᠯᠡ ᠭᠡᠬᠦ ᠳ᠋ᠦ᠍ ᠲᠣᠯᠵᠢᠨ᠄
— ᠡᠰᠢ᠂ ᠡᠨᠡ ᠮᠢᠨᠢ ᠨᠢᠯᠬᠠ ᠪᠣᠯᠪᠠᠴᠤ ᠡᠷᠡ ᠬᠥᠮᠦᠨ ᠰᠢᠦ ᠳᠡ᠂ ᠡᠷᠡ ᠬᠦᠢᠰᠦ ᠦᠭᠡᠢ ᠰᠠᠨ ᠪᠣᠯ ᠪᠠᠷᠤᠨ ᠤ᠋ ᠬᠢᠨ ᠶᠠᠭᠤᠨ ᠳ᠋ᠤ᠌ ᠡᠭᠦᠨ ᠢ᠋ ᠮᠢᠨᠢ ᠠᠪᠴᠤ ᠶᠠᠪᠤᠬᠤ ᠭᠡᠳ ᠪᠠᠢᠬᠤ ᠪᠢᠯᠡ ᠭᠡᠵᠦ ᠬᠣᠭᠣᠯᠠᠢ ᠴᠡᠴᠡᠷᠡᠭᠦᠯᠦᠨ ᠥᠭᠦᠯᠡᠭᠡᠳ ᠳᠣᠷᠵᠢ ᠶ᠋ᠢᠨ ᠬᠠᠷᠢᠭᠤ ᠡᠰᠡ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌᠂ ᠴᠢ ᠡᠴᠢᠭᠡ ᠶ᠋ᠢ ᠨᠢ ᠳᠠᠭᠠᠵᠤ ᠭᠠᠷᠤᠭᠠᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠷᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣ! ᠡᠰᠡᠪᠡᠯ ᠣᠳᠣ ᠬᠦᠦ ᠶ᠋ᠢ ᠨᠢ ᠳᠠᠭᠠᠭᠤᠯᠵᠤ ᠶᠠᠪᠤᠭᠠᠳ ᠪᠠᠰᠠ ᠦᠷᠡᠭᠳᠡᠭᠦᠯᠵᠦ ᠣᠷᠬᠢᠪᠠᠯ ᠡᠬᠡ ᠶ᠋ᠢᠨ ᠴᠢᠨᠢ ᠴᠢᠷᠠᠢ ᠶ᠋ᠢ ᠶᠠᠭᠠᠬᠢᠵᠤ ᠬᠠᠷᠠᠨᠠ ᠭᠡᠵᠦ ᠵᠣᠪᠠᠨᠠᠭᠠ ᠤᠤ? ᠦᠭᠡᠢ ᠳᠣᠷᠵᠢ ᠮᠢᠨᠢ ᠨᠠᠭᠠᠳᠤ ᠬᠦᠦ ᠪᠡᠨ ᠪᠠᠷᠤᠨ ᠤ᠋ ᠬᠢᠨ ᠳ᠋ᠦ᠍ ᠠᠯᠳᠠᠭᠰᠠᠨ ᠠ᠋ᠴᠠ ᠲᠡᠷᠡ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠭᠡᠳᠡᠭ ᠲᠦ᠍ ᠴᠢᠨᠢ ᠠᠯᠳᠠᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠨᠠ ᠭᠡᠵᠦ ᠨᠢᠳᠦᠨ ᠦ᠌ ᠪᠡᠨ ᠨᠢᠯᠪᠤᠰᠤ ᠶ᠋ᠢ ᠳᠤᠰᠤᠯᠠᠭᠤᠯᠤᠨ ᠪᠠᠢᠵᠤ ᠥᠭᠦᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ