ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠨᠠᠢ᠍ᠮᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -8
99ᠳᠠᠢᠰᠦᠨ ᠤ ᠬᠥᠯ
ᠬᠠᠷᠠ ᠪᠤᠤᠷᠠ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠣᠪᠣᠩ ᠲᠣᠪᠣᠩ ᠶᠠᠰᠤ ᠳᠣᠣᠷᠠ ᠠ᠋ᠴᠠ ᠨᠤᠬᠤᠨ ᠪᠥᠭᠰᠡ ᠬᠣᠯᠭᠣᠪᠠᠴᠤ ᠮᠠᠰᠢ ᠳᠤᠯᠠᠭᠠᠨ᠃ ᠤᠷᠲᠤ ᠴᠢᠴᠠ ᠪᠠᠨ ᠲᠡᠷᠡ ᠴᠠᠭ ᠢᠮᠠᠭᠲᠠ ᠶᠠᠭᠠᠷᠠᠯᠲᠠᠢ ᠰᠤᠩᠭᠠᠨ ᠲᠠᠯᠪᠢᠬᠤ ᠨᠢ ᠶᠠᠪᠠᠭᠠᠨ ᠶᠠᠪᠤᠭᠰᠠᠨ ᠠ᠋ᠴᠠ ᠶᠡᠷᠦ ᠳᠣᠣᠷᠠ ᠦᠭᠡᠢ ᠬᠤᠷᠳᠤᠨ ᠠᠵᠢ᠃ ᠵᠠᠮ ᠳ᠋ᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠨᠤᠭᠤᠳ ᠢ᠋ᠶ᠋ᠠᠷ ᠣᠷᠣᠬᠤ ᠳ᠋ᠤ᠌ ᠵᠠᠩ ᠵᠠᠩᠰᠢᠯ ᠢ᠋ᠶ᠋ᠠᠷ ᠮᠠᠰᠢ ᠰᠠᠢᠬᠠᠨ᠂ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠳᠥᠩᠭᠡᠵᠦ ᠴᠤᠬᠤᠢᠯᠭᠠᠮᠠᠭᠴᠠ ᠡᠮᠡᠭᠡᠳ ᠠᠬᠠᠢ ᠨᠠᠷ《ᠡᠪᠡᠢ ᠬᠥᠭᠡᠷᠦᠬᠦᠢ!》 ᠭᠡᠵᠦ ᠳᠠᠭᠤ ᠱᠣᠣ ᠪᠣᠯᠤᠨ ᠦᠷᠦ ᠡᠪᠡᠳᠦᠨ ᠬᠠᠢᠷᠠᠯᠠᠵᠤ ᠵᠠᠮ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠬᠣᠭᠣᠯᠠ ᠬᠦᠨᠡᠰᠦ ᠪᠠᠵᠠᠭᠠᠵᠤ᠂ ᠡᠮᠦᠰᠬᠦ ᠳᠤᠯᠠᠭᠠᠨ ᠬᠤᠪᠴᠠᠰᠤ ᠴᠦ᠍ ᠨᠡᠮᠡᠷᠢᠯᠡᠨᠡ᠃
ᠡᠢᠨᠬᠦ ᠰᠠᠢᠨ ᠶᠠᠪᠤᠭᠰᠠᠭᠠᠷ ᠳ᠋ᠠᠨᠽᠠᠨ ᠨᠢᠭᠡ ᠡᠳᠦᠷ ᠬᠠᠭᠤᠴᠢᠨ ᠲᠠᠨᠢᠯ ᠵᠠᠮ ᠤ᠋ᠨ ᠡᠭᠦᠳᠡᠨᠡ ᠣᠷᠣᠵᠤ ᠢᠷᠡᠪᠡ᠃ ᠲᠡᠨᠳᠡ ᠡᠴᠡ ᠡᠬᠢᠯᠡᠨ ᠠᠢᠯ ᠠᠮᠢᠲᠠᠨ ᠤ᠋ ᠪᠠᠷᠠ ᠣᠯᠵᠤ ᠬᠠᠷᠠᠬᠤ ᠪᠠᠨ ᠪᠣᠯᠢᠪᠠ᠃ ᠭᠠᠭᠴᠠᠬᠠᠨ ᠶᠡᠬᠡ ᠲᠠᠯᠠ ᠶ᠋ᠢᠨ ᠴᠠᠭᠠᠨ ᠵᠡᠭᠡᠷᠡ ᠦᠶᠡ ᠦᠶᠡ ᠬᠤᠢᠯᠠᠷᠠᠨ ᠳᠠᠪᠬᠢᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠦᠨᠡᠨ ᠳ᠋ᠡᠭᠡᠨ ᠡᠨᠡ ᠦᠶᠡ ᠶ᠋ᠢᠨ ᠠᠢᠯ ᠠᠮᠢᠲᠠᠳ ᠬᠥᠯ ᠦᠢᠮᠡᠭᠡᠨ ᠡᠴᠡ ᠠᠶᠤᠨ ᠵᠠᠮ ᠠ᠋ᠴᠠ ᠵᠠᠢᠯᠠᠨ ᠠᠯᠤᠰᠯᠠᠨ ᠪᠠᠭᠤᠭᠰᠠᠨ ᠢ᠋ ᠳ᠋ᠠᠨᠽᠠᠨ ᠶᠠᠭᠠᠬᠢᠨ ᠤᠬᠠᠭᠠᠷᠠᠬᠤ ᠠᠵᠢ᠃《ᠣᠷᠣᠨ ᠨᠤᠲᠤᠭ ᠮᠠᠨᠢ ᠨᠡᠭᠡᠷᠡᠨ ᠬᠢᠲᠠᠳ ᠭᠠᠮᠢᠩ ᠳ᠋ᠤ᠌ ᠬᠥᠯ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠬᠤ ᠪᠠᠨ ᠠᠯᠳᠠᠲᠠᠯᠠ ᠪᠠᠨ ᠳᠡᠪᠰᠡᠭᠳᠡᠭᠰᠡᠨ ᠶᠦᠮ ᠪᠢᠰᠢ ᠪᠠᠢᠭᠠ ᠳᠠ》 ᠭᠡᠵᠦ ᠰᠡᠳᠬᠢᠯ ᠲᠦᠭᠰᠢᠨᠡ᠃ ᠨᠢᠭᠡ ᠥᠷᠯᠥᠭᠡ ᠳ᠋ᠠᠨᠽᠠᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨᠠ ᠰᠦᠨᠳᠡᠷᠯᠡᠨ ᠰᠦᠮᠡᠯᠵᠡᠭᠴᠢ ᠵᠠᠩᠵᠤᠨ ᠴᠣᠢᠷᠠ ᠭᠡᠳᠡᠭ ᠭᠣᠪᠢ ᠶ᠋ᠢᠨ ᠠᠯᠳᠠᠷᠲᠤ ᠠᠭᠤᠯᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠣᠯᠵᠤ ᠬᠠᠷᠠᠯᠠ᠃ ᠤᠷᠵᠢᠨᠤᠨ ᠵᠢᠯ ᠳ᠋ᠠᠨᠽᠠᠨ ᠡᠨᠡ ᠠᠭᠤᠯᠠ ᠶ᠋ᠢ ᠲᠡᠳᠦᠢ ᠯᠡ ᠲᠣᠭᠣᠮᠰᠠᠷᠯᠠᠭᠠ ᠦᠭᠡᠢ ᠠᠲᠠᠯᠠ᠂ ᠣᠳᠣ ᠪᠣᠯᠬᠣᠷ ᠥᠯᠵᠡᠢ ᠰᠠᠢᠬᠠᠨ ᠬᠠᠨ ᠪᠣᠭᠳᠠ ᠠᠭᠤᠯᠠ ᠮᠢᠨᠢ ᠠ᠋! ᠭᠡᠵᠦ ᠭᠠᠷ ᠡᠷᠭᠦᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠵᠠᠯᠪᠠᠷᠢᠨᠠ᠃ ᠡᠳᠦᠷ ᠳᠤᠮᠳᠠ ᠥᠩᠭᠡᠷᠡᠲᠡᠯᠡ ᠶᠠᠪᠤᠬᠤ ᠳ᠋ᠤ᠌ ᠴᠣᠢᠷᠠ ᠠᠭᠤᠯᠠ ᠤᠯᠠᠮ ᠢ᠋ᠶ᠋ᠠᠷ ᠰᠦᠨᠳᠡᠷᠯᠡᠨ ᠲᠩᠷᠢ ᠪᠠᠭᠠᠨᠠᠳᠠᠬᠤ ᠮᠡᠲᠦ᠃ ᠣᠷᠣᠢ ᠶ᠋ᠢᠨ ᠨᠠᠷᠠ ᠰᠢᠩᠭᠡᠬᠦ ᠶ᠋ᠢᠨ ᠡᠮᠦᠨᠡ ᠮᠥᠩᠭᠥᠨ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠪᠠᠷᠰ ᠤ᠋ᠨ ᠡᠷᠢᠶᠡᠨ ᠨᠥᠮᠥᠷᠭᠡ ᠡᠭᠡᠯᠳᠦᠷᠭᠡᠯᠡᠭᠰᠡᠨ ᠲᠣᠭᠰᠢᠨ ᠡᠵᠡᠨ ᠦ᠌ ᠳᠦᠷᠢ ᠲᠡᠢ ᠪᠣᠯᠵᠠᠢ᠃ ᠪᠠᠷᠠᠭᠤᠨ ᠤᠷᠲᠤᠬᠠᠨ ᠲᠠᠯᠠ ᠳ᠋ᠤ᠌ ᠵᠠᠩᠵᠤᠨ ᠴᠣᠢᠷᠠ ᠶ᠋ᠢᠨ ᠬᠡᠢᠳ ᠭᠡᠳᠡᠭ ᠠᠯᠳᠠᠷᠲᠤ ᠰᠠᠢᠬᠠᠨ ᠬᠦᠷᠢᠶᠡ ᠪᠠᠢᠳᠠᠭ ᠢ᠋ ᠳ᠋ᠠᠨᠽᠠᠨ ᠪᠠᠰᠠ ᠰᠠᠢᠨ ᠮᠡᠳᠡᠨᠡ᠃ ᠶᠠᠮᠠᠷ ᠪᠣᠯᠪᠠᠴᠤ ᠥᠨᠥ ᠰᠥᠨᠢ ᠲᠡᠨᠳᠡ ᠬᠦᠷᠴᠦ ᠬᠣᠨᠣᠶᠠ ᠭᠡᠵᠦ ᠤᠨᠤᠭᠰᠠᠨ ᠪᠤᠤᠷᠠ ᠪᠠᠨ ᠵᠣᠷᠢᠭ ᠢ᠋ᠶ᠋ᠠᠷ ᠨᠢ ᠠᠯᠬᠤᠭᠤᠯᠤᠨᠠ᠃ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠣᠮᠠᠭᠴᠠ ᠬᠡᠢᠳ ᠦ᠋ᠨ ᠵᠦᠭ ᠡᠴᠡ ᠲᠩᠷᠢ ᠳ᠋ᠦ᠍ ᠬᠠᠲᠠᠭᠰᠠᠨ ᠤᠯᠠᠭᠠᠨ ᠲᠤᠶᠠᠭᠠ ᠭᠠᠷᠬᠤ ᠪᠣᠯᠪᠠ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠨ ᠭᠠᠢᠬᠠᠨᠠ᠃ ᠣᠢᠷᠠᠲᠤᠬᠤ ᠳᠣᠳᠣᠮ ᠲᠤᠶᠠᠭᠠ ᠤᠯᠠᠮ ᠲᠣᠳᠣᠷᠠᠬᠤ ᠨᠢ ᠪᠦᠷ ᠴᠦ᠍ ᠬᠠᠴᠢᠨ᠃ ᠲᠣᠯᠢ ᠰᠢᠭ᠋ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠵᠢᠭᠠᠬᠠᠨ ᠡᠷᠭᠦᠭᠳᠡᠭᠰᠡᠨ ᠨᠠᠯᠠᠭᠤᠬᠠᠨ ᠳᠡᠨᠵᠢ ᠳᠡᠭᠡᠷᠡᠬᠢ ᠣᠯᠠᠨ ᠠᠯᠲᠠᠨ ᠰᠢᠷᠠᠮᠠᠯ ᠭᠠᠨᠵᠤᠤᠷ ᠤ᠋ᠳ ᠨᠢᠳᠦ ᠭᠢᠯᠪᠠᠮᠠ ᠲᠣᠰᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠡᠨᠳᠡ ᠲᠡᠨᠳᠡ ᠤᠯᠠᠭᠠᠨ ᠭᠠᠯ! ᠵᠠᠩᠵᠤᠨ ᠴᠣᠢᠷᠠ ᠶ᠋ᠢᠨ ᠬᠡᠢᠳ ᠰᠢᠳᠡᠵᠦ ᠪᠠᠢᠨᠠ᠃
ᠡᠨᠡ ᠬᠡᠢᠳ ᠶᠢᠰᠦᠨ ᠡᠷᠳᠡᠨᠢ ᠪᠡᠷ ᠪᠦᠲᠦᠭᠡᠭᠳᠡᠭᠰᠡᠨ ᠭᠠᠨᠵᠤᠤᠷ ᠳ᠋ᠠᠨᠵᠤᠤᠷ ᠬᠡᠮᠡᠬᠦ ᠠᠪᠤᠷᠭᠤ ᠣᠯᠠᠨ ᠪᠣᠳᠢ ᠶᠡᠬᠡ ᠭᠦᠯᠭᠡᠨ ᠰᠤᠳᠤᠷ ᠬᠠᠳᠠᠭᠠᠯᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠦᠬᠦ ᠮᠣᠩᠭᠣᠯ ᠪᠠ ᠮᠣᠩᠭᠣᠯ ᠣᠪᠣᠭᠲᠠᠨ ᠬᠢᠭᠡᠳ ᠲᠡᠳᠡ ᠯᠦ᠍ᠭᠡ ᠬᠣᠯᠪᠣᠭᠳᠠᠬᠤ ᠣᠷᠣᠨ ᠪᠦᠬᠦᠨ ᠦ᠌ ᠲᠡᠦᠬᠡ ᠱᠠᠰᠲᠢᠷ ᠪᠢᠴᠢᠭ ᠰᠡᠯᠲᠡ᠂ ᠡᠳ᠋ ᠮᠥᠷ ᠦ᠋ᠨ ᠪᠠᠷᠢᠮᠲᠠ ᠵᠦᠢᠯᠡᠰ ᠢ᠋ ᠬᠣᠷᠢᠶᠠᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠰᠠ ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ(ᠪᠤᠷᠬᠠᠨ ᠪᠣᠳᠢᠰᠠᠳ᠋ᠸᠠ) ᠶ᠋ᠢᠨ ᠭᠦᠨ ᠤᠬᠠᠭᠠᠨ᠂ ᠲᠡᠭᠦᠨ ᠢ᠋ ᠲᠤᠢᠯᠪᠤᠷᠢᠲᠠᠢ ᠰᠤᠳᠤᠯᠤᠭᠰᠠᠳ ᠤ᠋ᠨ ᠨᠡᠮᠡᠷᠢᠯᠡᠭᠰᠡᠨ ᠰᠢᠨᠡ ᠤᠬᠠᠭᠠᠨ᠂ ᠰᠥᠨᠢᠵᠢᠨ ᠰᠤᠳᠤᠯᠤᠭᠴᠢᠳ ᠤ᠋ᠨ ᠰᠢᠭᠦᠮᠵᠢ ᠨᠦ᠍ᠭᠦᠳ ᠪᠣᠳᠠᠲᠤ ᠦᠨᠡᠨ ᠪᠠ ᠪᠣᠳᠣᠯ ᠰᠡᠳᠬᠢᠬᠦᠢ ᠶ᠋ᠢ ᠪᠠᠷᠢᠮᠲᠠᠯᠠᠭᠰᠠᠳ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠮᠥᠷᠭᠥᠯᠳᠦᠭᠡᠨ᠂ ᠲᠡᠳᠡᠨ ᠦ᠌ ᠬᠤᠪᠢ ᠬᠣᠪᠢᠨ ᠳ᠋ᠠᠭᠠᠨ ᠵᠣᠬᠢᠶᠠᠭᠰᠠᠨ ᠦᠯᠢᠭᠡᠷ᠂ ᠳᠣᠮᠣᠭ᠂ ᠲᠣᠭᠣᠵᠢ᠂ ᠨᠠᠮᠲᠠᠷ᠂ ᠰᠢᠯᠦᠭ᠂ ᠨᠠᠢᠷᠠᠭᠯᠠᠯ᠂ ᠶᠣᠰᠣᠲᠠᠢ ᠲᠦᠮᠡᠨ ᠵᠢᠯ ᠦ᠋ᠨ ᠬᠤᠷᠢᠶᠠᠮᠵᠢ ᠪᠠᠰᠠ ᠳᠡᠭᠡᠷᠡ ᠨᠢ ᠨᠡᠮᠡᠷᠢᠯᠡᠬᠦ ᠬᠥᠮᠦᠰ ᠢ᠋ ᠲᠥᠷᠥᠭᠦᠯᠦᠭᠰᠡᠨ ᠭᠡᠵᠦ ᠮᠠᠰᠢ ᠬᠠᠲᠠᠭᠤ ᠳᠢᠭᠯᠢᠮ ᠢ᠋ ᠪᠠᠷᠢᠭᠰᠠᠨ ᠬᠢᠭᠡᠳ ᠥᠭᠡᠷᠡ ᠪᠡᠷ ᠬᠡᠯᠡᠬᠦ ᠳ᠋ᠦ᠍ ᠬᠥᠮᠦᠨ ᠦ᠌ ᠣᠶᠤᠨ ᠤᠬᠠᠭᠠᠨ᠂ ᠬᠥᠳᠡᠯᠮᠦᠷᠢᠯᠡᠨ ᠪᠦᠲᠦᠭᠡᠬᠦ ᠶ᠋ᠢᠨ ᠳᠡᠭᠡᠳᠦ ᠴᠢᠳᠠᠯ᠂ ᠬᠣᠷᠢᠶᠠᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠬᠠᠮᠤᠭ ᠰᠠᠢᠬᠠᠨ ᠤ᠋ ᠳᠡᠭᠡᠵᠢ ᠭᠦᠨ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠰᠢᠳᠡᠵᠦ ᠪᠠᠢᠵᠠᠢ᠃
ᠳ᠋ᠠᠨᠽᠠᠨ ᠠᠩᠬᠠ ᠬᠠᠷᠠᠩᠭᠤᠲᠠ ᠪᠠᠨ ᠤᠨᠲᠠᠷᠠᠭᠠᠬᠤ ᠪᠠᠷ ᠪᠤᠤᠷᠠ ᠠ᠋ᠴᠠ ᠪᠠᠭᠤᠨ ᠬᠠᠷᠠᠢᠵᠤ ᠭᠦᠶᠦᠨ ᠳᠤᠮᠳᠠ ᠨᠢ ᠣᠷᠣᠭᠰᠠᠨ ᠬᠣᠢᠨᠠ ᠪᠠᠨ ᠶᠠᠭᠠᠬᠢᠬᠤ ᠴᠣ ᠨᠥᠬᠥᠴᠡᠯ ᠦᠭᠡᠢ ᠶ᠋ᠢ ᠣᠯᠵᠤ ᠮᠡᠳᠡᠪᠡ᠃ ᠠᠯᠲᠠᠨ ᠳᠡᠭᠡᠪᠦᠷ ᠲᠡᠢ ᠲᠣᠮᠣ ᠳᠤᠭᠠᠩ ᠤ᠋ᠨ ᠣᠩᠭᠣᠢᠭᠰᠠᠨ ᠠᠩᠭᠠᠢᠭᠰᠠᠨ ᠪᠦᠬᠦᠨ ᠡᠴᠡ ᠨᠦᠰᠡᠷ ᠤᠯᠠᠭᠠᠨ ᠳᠥᠯᠥ ᠳᠦᠷᠡᠯᠵᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠡᠭᠡᠳᠦ ᠳᠡᠭᠡᠪᠦᠷ ᠨᠢ ᠭᠡᠨᠡᠳᠲᠡ ᠫᠠᠷᠭᠢᠲᠠᠯᠠ ᠪᠠᠭᠤᠨ ᠳᠣᠷᠣᠭᠰᠢ ᠤᠨᠠᠬᠤ ᠶ᠋ᠢ ᠦᠵᠡᠯᠡ᠃ ᠠᠷᠤ ᠳ᠋ᠤ᠌ ᠪᠠᠰᠠ ᠫᠢᠰᠬᠢᠲᠡᠯᠡ ᠪᠠᠭᠤᠨ ᠶᠡᠬᠡ ᠳᠡᠯᠪᠡᠷᠡᠯᠲᠡ ᠭᠠᠷᠴᠤ ᠲᠣᠮᠣ ᠳᠥᠯᠥ ᠪᠠᠳᠠᠷᠠᠬᠤ ᠨᠢ ᠬᠡᠳᠦᠨ ᠯᠦ᠍ ᠲᠣᠰᠣ ᠬᠠᠢᠯᠤᠨ ᠭᠠᠵᠠᠷ ᠨᠡᠯᠦᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠯ ᠳ᠋ᠤ᠌ ᠠᠪᠲᠠᠭᠳᠠᠨ ᠠᠪᠤᠯᠴᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠠᠵᠢ᠃ ᠥᠭᠡᠷᠡ ᠨᠢᠭᠡ ᠲᠡᠢ ᠡᠴᠡ ᠠᠭᠠᠷᠠᠤ ᠽᠠᠨᠳᠠᠨ ᠤ᠋ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠡᠨᠡ ᠶᠠᠭᠤ ᠪᠣᠢ! ᠬᠡᠳᠦᠨ ᠠᠷᠪᠠᠨ ᠵᠠᠩ ᠤ᠋ᠨ ᠤᠷᠲᠤ ᠪᠠᠢᠰᠢᠩ ᠳ᠋ᠤ᠌ ᠬᠤᠷᠢᠶᠠᠭᠳᠠᠭᠰᠠᠨ ᠮᠣᠳᠣᠨ ᠪᠠᠷ! ᠲᠡᠷᠡ ᠪᠠᠰᠠ ᠰᠢᠳᠡᠵᠦ ᠡᠬᠢᠯᠡᠬᠦ ᠨᠢ ᠭᠠᠯ ᠭᠠᠯ ᠠ᠋ᠴᠠ ᠢᠯᠡᠭᠦᠦ ᠢᠯᠴᠢ ᠲᠡᠢ ᠪᠣᠯᠣᠳ(ᠪᠣᠯᠤᠭᠠᠳ) ᠭᠡᠷᠡᠯ ᠲᠡᠢ᠃ ᠦᠵᠡᠲᠡᠯᠡ ᠨᠢᠭᠡ ᠭᠠᠯ ᠨᠥᠭᠦᠭᠡ ᠲᠠᠢᠰᠢ ᠦᠰᠦᠷᠦᠨ ᠳᠠᠮᠵᠢᠬᠤ ᠲᠤᠯᠠ ᠪᠦᠬᠦ ᠬᠡᠢᠳ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠰᠢᠳᠡᠵᠦ ᠪᠠᠢᠭᠠ ᠪᠥᠭᠡᠳ ᠢᠰᠡᠭᠡᠢ ᠭᠡᠷ ᠰᠢᠲᠠᠬᠤ ᠶ᠋ᠢᠨ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠲᠠᠷᠭᠤᠨ ᠮᠢᠬᠠ ᠰᠢᠲᠠᠬᠤ ᠶ᠋ᠢᠨ ᠬᠡᠢ ᠳᠠᠷᠤᠮᠠ ᠰᠠᠢᠬᠠᠨ ᠦᠨᠦᠷ᠂ ᠮᠣᠳᠣᠨ ᠠ᠋ᠴᠠ ᠳᠠᠪᠠᠷᠬᠠᠢ᠂ ᠲᠣᠷᠭᠠ᠂ ᠬᠣᠷᠭᠣᠢ᠂ ᠬᠠᠳᠠᠭ ᠶᠠᠩᠳᠠᠷ ᠤ᠋ᠨ ᠵᠦᠢᠯ ᠡᠴᠡ ᠪᠠᠰᠠ ᠲᠤᠰᠬᠠᠢ ᠳ᠋ᠠᠭᠠᠨ ᠥᠭᠡᠷᠡ ᠦᠨᠦᠷ᠂ ᠶᠡᠷᠦ ᠳ᠋ᠠᠨᠽᠠᠨ ᠡᠨᠳᠡ ᠡᠴᠡ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠰᠢᠲᠠᠬᠤ ᠦᠨᠦᠷ ᠢ᠋ ᠨᠢᠭᠡᠮᠦᠰᠦᠨ ᠣᠯᠵᠤ ᠦᠨᠦᠷᠯᠡᠨᠡ᠃
ᠤᠭ ᠨᠢ ᠳ᠋ᠠᠨᠽᠠᠨ ᠠᠭᠤᠤ ᠬᠦᠴᠦᠲᠦ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠶ᠋ᠢ ᠢᠩᠭᠢᠵᠦ ᠰᠢᠲᠠᠨᠠ ᠭᠡᠵᠦ ᠬᠡᠵᠢᠶᠡ ᠴᠦ᠍ ᠪᠣᠳᠣᠭᠰᠠᠨ ᠤᠳᠠᠭᠠ ᠦᠭᠡᠢ᠃ ᠪᠠᠰᠠ ᠢᠩᠭᠢᠵᠦ ᠰᠢᠲᠠᠭᠠᠬᠤ ᠨᠢᠭᠦᠯᠲᠦ ᠠᠮᠢᠲᠠᠨ ᠡᠨᠡ ᠣᠷᠴᠢᠯᠠᠩ ᠳ᠋ᠤ᠌ ᠪᠠᠢᠨᠠ ᠭᠡᠪᠡᠯ ᠰᠡᠳᠬᠢᠯ ᠳ᠋ᠦ᠍ ᠦᠯᠦ ᠪᠠᠭᠲᠠᠬᠤ ᠪᠥᠭᠡᠳ᠂ ᠬᠡᠷᠪᠡ ᠪᠠᠢᠵᠤ ᠬᠡᠮᠡᠬᠦᠨᠡ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠰᠢᠲᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠬᠢᠨᠢ ᠵᠢᠷᠦᠬᠡ ᠳᠡᠯᠪᠡᠷᠡᠨ ᠥᠭᠭᠦᠨᠡ ᠯᠡ ᠭᠡᠵᠦ ᠪᠣᠳᠣᠬᠤ ᠪᠠᠢᠪᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠦᠶᠡ ᠦᠶᠡ ᠨᠢᠳᠦᠨ ᠳ᠋ᠡᠭᠡᠨ ᠦᠯᠦ ᠢᠳᠡᠭᠡᠨ ᠮᠠᠩᠰᠢᠭᠤᠷᠠᠨᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠬᠠᠷᠠ ᠪᠤᠤᠷᠠ ᠨᠢ ᠪᠣᠯᠪᠠᠴᠤ ᠭᠠᠪᠠᠨ ᠭᠠᠢᠬᠠᠬᠤ ᠮᠡᠲᠦ ᠡᠯᠳᠡᠪ ᠦᠨᠦᠷ ᠲᠦ᠍ ᠬᠠᠮᠠᠷ ᠢ᠋ᠶ᠋ᠠᠨ ᠪᠠᠢᠨ ᠪᠠᠢᠨ ᠲᠤᠷᠬᠢᠷᠠᠨ ᠤᠷᠲᠤ ᠬᠦᠵᠦᠭᠦᠦ ᠪᠡᠨ ᠳᠡᠭᠡᠷᠡ ᠡᠷᠭᠦᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨᠡ᠃
ᠡᠴᠦᠰ ᠲᠦ᠋ᠨᠢ ᠳ᠋ᠠᠨᠽᠠᠨ ᠶᠠᠮᠠᠷ ᠨᠢᠭᠡ ᠠᠮᠢᠳᠤ ᠠᠮᠢᠲᠠᠨ ᠢ᠋ ᠣᠯᠵᠤ ᠬᠠᠷᠠᠬᠤ ᠶ᠋ᠢᠨ ᠮᠥᠷᠥᠭᠡᠳᠦᠰᠦ ᠪᠣᠯᠤᠨ ᠬᠡᠢᠳ ᠦ᠋ᠨ ᠵᠠᠬᠠ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠬᠣᠭ ᠤ᠋ᠨ ᠵᠣᠯᠪᠢᠩ ᠨᠣᠬᠠᠳ ᠴᠦ᠍ ᠠᠯᠠᠭᠠ᠃ ᠠᠯᠤᠰ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠠᠭ ᠬᠠᠷᠠᠩᠭᠤᠢ᠃ ᠬᠠᠷᠠᠩᠭᠤᠢ ᠬᠠᠷᠠ ᠬᠦᠷᠢᠶᠡ ᠣᠷᠴᠢᠨ ᠢ᠋ ᠪᠦᠰᠡᠯᠡᠨᠡ᠃ ᠶᠠᠳᠠᠵᠤ ᠲᠩᠷᠢ ᠳ᠋ᠦ᠍ ᠦᠵᠡᠭᠳᠡᠬᠦ ᠣᠳᠣᠨ ᠮᠡᠴᠢᠳ ᠴᠦ᠍ ᠠᠯᠠᠭᠠ᠃ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠥᠨᠥᠬᠢ ᠯᠡ ᠭᠠᠯ᠂ ᠲᠡᠭᠦᠨ ᠦ᠌ ᠳᠡᠭᠡᠭᠰᠢ ᠳᠦᠷᠡᠯᠵᠡᠬᠦ ᠳᠥᠯᠥ ᠨᠦᠷᠭᠢᠯᠡᠬᠦ ᠬᠦᠨᠳᠦ ᠠᠪᠢᠶᠠ᠃ ᠭᠡᠲᠡᠯᠡ ᠰᠢᠪᠡᠷ ᠬᠡᠷᠡᠮ ᠦ᠋ᠨ ᠬᠠᠰᠢᠶᠠᠨ ᠤ᠋ ᠥᠨᠴᠥᠭ ᠲᠦ᠍ ᠳᠦᠷᠦᠭᠦᠯᠭᠡ ᠪᠡᠨ ᠬᠠᠷᠠᠨ ᠤᠨᠠᠭᠰᠠᠨ ᠨᠢᠭᠡ ᠯᠠᠮᠠ ᠳᠠᠭᠠᠷᠢᠯᠳᠤᠯᠠ᠃ ᠴᠡᠭᠡᠵᠢᠨ ᠡᠴᠡ ᠨᠢ ᠭᠠᠷᠤᠭᠰᠠᠨ ᠬᠠᠯᠠᠭᠤᠨ ᠴᠢᠰᠤ ᠨᠢ ᠠᠯᠢ ᠬᠡᠳᠦᠢᠨ ᠬᠥᠯᠳᠡᠵᠦ ᠥᠩᠭᠡ ᠴᠢᠨᠠᠷ ᠢ᠋ᠶ᠋ᠠᠨ ᠠᠯᠳᠠᠵᠠᠢ᠃ ᠤᠷᠤᠭᠰᠢ ᠰᠡᠷᠪᠡᠢᠨ ᠭᠠᠵᠠᠷ ᠰᠠᠮᠠᠷᠳᠠᠭᠰᠠᠨ ᠭᠠᠷ ᠨᠢ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠬᠥᠯᠳᠡᠭᠰᠡᠨ ᠠᠵᠢ᠃ ᠭᠡᠪᠡᠴᠦ ᠠᠮᠢᠳᠤ᠃ ᠬᠥᠮᠦᠨ ᠳᠡᠷᠭᠡᠳᠡ ᠨᠢ ᠢᠷᠡᠬᠦ ᠶ᠋ᠢ ᠮᠡᠳᠡᠷᠡᠨ᠂ ᠬᠥᠯ ᠢ᠋ᠶ᠋ᠡᠨ ᠲᠡᠳᠡᠨ ᠠᠲᠤᠷᠢᠨᠠ᠃ ᠲᠡᠳᠡᠨ ᠥᠨᠳᠡᠢᠯᠭᠡᠬᠦ ᠭᠡᠬᠦ ᠳ᠋ᠦ᠍ ᠮᠠᠰᠢ ᠬᠦᠨᠳᠦ᠃ ᠭᠠᠵᠠᠷ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠰᠡᠷ ᠬᠢᠨ ᠬᠣᠪᠬᠣᠷᠠᠬᠤ ᠰᠢᠭ᠋ ᠪᠣᠯᠣᠮᠠᠭᠴᠠ ᠴᠠᠭᠠᠰᠤ ᠰᠢᠭ᠋ ᠬᠥᠩᠭᠡᠨ ᠪᠣᠯᠪᠠ᠃ ᠡᠨᠡ ᠨᠢ ᠴᠢᠰᠤ ᠪᠣᠯᠤᠭᠰᠠᠨ ᠤᠷᠢᠳᠠ ᠡᠩᠭᠡᠷ ᠨᠢ ᠭᠠᠵᠠᠷ ᠲᠠᠢ ᠨᠠᠭᠠᠯᠳᠤᠨ ᠬᠥᠯᠳᠡᠭᠰᠡᠨ ᠦ᠌ ᠬᠢ ᠪᠠᠢᠪᠠ᠃ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠨᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠡᠪᠦᠭᠡᠨ ᠬᠥᠮᠦᠨ ᠦ᠌ ᠴᠢᠷᠠᠢ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠪᠠ᠃ ᠳᠣᠷᠣᠭᠰᠢ ᠪᠠᠭᠤᠭᠰᠠᠨ ᠵᠣᠪᠬᠢ ᠪᠠᠨ ᠯᠠᠮᠠ ᠳᠡᠭᠡᠭᠰᠢ ᠬᠠᠭᠠᠰ ᠰᠡᠬᠦᠵᠦ ᠳ᠋ᠠᠨᠽᠠᠨ ᠢ᠋ ᠠᠵᠢᠭᠠᠳ ᠮᠣᠩᠭᠣᠯ ᠬᠥᠮᠦᠨ᠂ ᠪᠠᠷᠤᠭ ᠠᠮᠠ ᠬᠦᠳᠡᠯᠭᠡᠯ ᠦᠭᠡᠢ ᠬᠡᠯᠡᠭᠡᠳ ᠴᠠᠭᠠᠰᠢ ᠨᠢ ᠭᠠᠮᠢᠩ᠂ ᠭᠠᠮᠢᠩ ᠭᠡᠳ ᠭᠤᠷᠪᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠠᠮᠢᠰᠬᠤᠯ ᠬᠤᠷᠢᠶᠠᠪᠠ᠃ ᠡᠭᠦᠨ ᠡᠴᠡ ᠨᠢ ᠳ᠋ᠠᠨᠽᠠᠨ ᠴᠣᠢᠷᠠ ᠶ᠋ᠢᠨ ᠬᠡᠢᠳ ᠭᠠᠮᠢᠩ ᠤ᠋ᠳ ᠲᠤ ᠰᠢᠲᠠᠭᠠᠭᠳᠠᠵᠤ᠂ ᠡᠨᠡ ᠬᠥᠭᠡᠷᠦᠬᠦᠢ ᠡᠪᠦᠭᠡᠨ ᠯᠠᠮᠠ ᠫᠤᠤᠳᠠᠭᠳᠠᠵᠠᠢ ᠭᠡᠵᠦ ᠳᠠᠭᠠᠪᠤᠷᠢᠯᠠᠪᠠ᠃
ᠡᠴᠦᠰ ᠦ᠋ᠨ ᠲᠣᠮᠣ ᠳᠤᠭᠠᠩ ᠰᠢᠳᠡᠵᠦ ᠨᠦᠰᠡᠷ ᠲᠣᠮᠣ ᠣᠷᠣᠢ ᠨᠢ ᠳᠣᠲᠣᠭᠰᠢ ᠪᠠᠨ ᠫᠠᠷᠭᠢᠲᠠᠯᠠ ᠪᠠᠭᠤᠨ ᠤᠨᠠᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠬᠡᠢᠳ ᠢ᠋ ᠣᠷᠬᠢᠨ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠪᠡ᠃ ᠨᠢᠭᠡ ᠬᠡᠰᠡᠭ ᠶᠡᠬᠡ ᠭᠠᠯ ᠳ᠋ᠤ᠌ ᠳᠠᠰᠤᠭᠰᠠᠨ ᠨᠢᠳᠦ ᠡᠮᠦᠨᠡᠬᠢ ᠵᠠᠮ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠮᠠᠭᠤ ᠪᠠᠢᠬᠤ ᠰᠢᠭ᠋᠂ ᠲᠡᠭᠡᠭᠡᠳ ᠠᠶᠠᠨᠳᠠᠭᠠᠨ ᠳᠠᠰᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ ᠪᠥᠭᠡᠮ ᠬᠠᠷᠠ ᠭᠤᠨᠢᠭ᠃ ᠭᠠᠮᠢᠩ ᠢ᠋ ᠥᠰᠢᠨ ᠵᠠᠨᠤᠬᠤ ᠬᠣᠷᠣᠰᠤᠯ ᠵᠠᠨᠤᠯ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠭᠲᠠᠵᠤ ᠶᠠᠳᠠᠨᠠ᠃ ᠮᠢᠩᠭᠠᠨ ᠰᠤᠮᠤᠨ ᠳ᠋ᠤ᠌ ᠪᠡᠶᠡ ᠰᠡᠭᠯᠡᠭᠳᠡᠪᠡᠴᠦ ᠬᠠᠮᠢᠶᠠ ᠦᠭᠡᠢ᠂ ᠭᠠᠭᠴᠠᠬᠠᠨ ᠤᠯᠠᠭᠠᠨ ᠭᠣᠣᠯ ᠢ᠋ᠶ᠋ᠠᠨ ᠲᠠᠰᠤᠷᠠᠲᠠᠯᠠ ᠭᠠᠮᠢᠩ ᠤ᠋ᠳ ᠲᠠᠢ ᠦᠵᠡᠯᠴᠡᠬᠦ ᠰᠠᠨ ᠭᠡᠵᠦ ᠯᠡ ᠪᠣᠳᠣᠭᠳᠠᠨᠠ᠃
ᠨᠢᠭᠡ ᠦᠶᠡ ᠦᠷ ᠦ᠋ᠨ ᠡᠮᠦᠨᠡᠬᠢ ᠳᠣᠭᠰᠢᠨ ᠵᠢᠪᠠᠷ ᠳᠡᠰ ᠨᠢᠰ ᠬᠠᠭᠠᠷᠢᠬᠤ ᠶ᠋ᠢ ᠳ᠋ᠠᠨᠽᠠᠨ ᠶᠡᠷᠦ ᠠᠩᠬᠠᠷᠤᠭᠰᠠᠨ ᠦᠭᠡᠢ᠃ ᠦᠷ ᠴᠠᠢᠵᠤ ᠠᠯᠤᠰ ᠤ᠋ᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠪᠣᠯᠤᠭᠰᠠᠨ ᠢ᠋ ᠴᠦ᠍ ᠦᠯᠦ ᠮᠡᠳᠡᠨᠡ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠢᠵᠠᠭᠠᠷ ᠦᠭᠡᠢ ᠥᠰᠢᠶᠡ ᠬᠣᠷᠣᠰᠤᠯ᠂ ᠦᠵᠡᠯᠴᠡᠬᠦ᠂ ᠲᠤᠯᠤᠯᠳᠤᠬᠤ᠁ ᠳᠡᠭᠡᠷᠡ ᠮᠥᠷᠲᠡᠭᠡᠨ ᠪᠣᠯᠵᠤ ᠥᠭᠪᠡᠯ ᠲᠤᠩ ᠳᠠᠷᠤᠢᠬᠠᠨ ᠯᠠ ᠦᠵᠡᠯᠴᠡᠬᠦ ᠰᠠᠨ ᠭᠡᠵᠦ ᠮᠠᠰᠢ ᠶᠠᠭᠠᠷᠠᠬᠤ ᠮᠡᠲᠦ ᠠᠷᠤ ᠳ᠋ᠠᠭᠠᠨ ᠬᠥᠲᠥᠯᠦᠭᠰᠡᠨ ᠬᠠᠷᠠ ᠪᠤᠤᠷᠠ ᠲᠠᠢ ᠪᠠᠨ ᠲᠣᠯᠣᠭᠠᠢ ᠵᠡᠷᠭᠡᠴᠡᠭᠦᠯᠦᠨ ᠠᠴᠢ ᠲᠠᠴᠢ ᠠᠯᠬᠤᠯᠠᠨᠠ᠃
ᠭᠡᠨᠡᠳᠲᠡ ᠫᠤᠤ ᠳᠤᠤᠭᠠᠷᠴᠠᠢ᠃ ᠳ᠋ᠠᠨᠽᠠᠨ ᠰᠣᠴᠢᠨ ᠵᠣᠭ ᠲᠤᠰᠪᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠪᠤᠤᠷᠠ ᠲᠦᠰ ᠪᠠᠭᠤᠨ ᠭᠠᠵᠠᠷ ᠤᠨᠠᠯᠠ᠃ ᠶᠠᠭ ᠬᠤᠯᠬᠢ ᠪᠠᠷ ᠨᠢ ᠰᠤᠮᠤ ᠣᠷᠣᠭᠰᠠᠨ ᠤᠴᠢᠷ ᠪᠤᠤᠷᠠ ᠳᠠᠭᠤ ᠴᠦ᠍ ᠭᠠᠷᠤᠭᠰᠠᠨ ᠦᠭᠡᠢ᠂ ᠲᠡᠢᠴᠢᠯᠡᠭᠰᠡᠨ ᠴᠦ᠍ ᠦᠭᠡᠢ᠂ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠨᠢᠳᠦ ᠪᠡᠨ ᠠᠩᠬᠠ ᠠᠨᠢᠭᠰᠠᠨ ᠢ᠋ᠶ᠋ᠠᠨ ᠨᠡᠭᠡᠭᠡᠨ᠂ ᠵᠢᠪᠠᠷᠲᠤ ᠥᠷᠯᠥᠭᠡᠨ ᠦ᠌ ᠵᠢᠭᠠᠯ ᠰᠠᠷᠠᠯ ᠲᠩᠷᠢ ᠶ᠋ᠢ ᠭᠠᠢᠬᠠᠬᠤ ᠮᠡᠲᠦ ᠪᠣᠯᠤᠭᠠᠳ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠦᠬᠦᠵᠡᠢ᠃ ᠳ᠋ᠠᠨᠽᠠᠨ ᠶᠠᠭᠠᠬᠢᠬᠤ ᠴᠦ᠍ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠦᠭᠡᠢ ᠳᠡᠮᠡᠢ ᠯᠡ ᠳᠣᠷᠣᠭᠰᠢ ᠪᠦᠭᠲᠡᠷᠡᠨ ᠪᠤᠤᠷᠠ ᠪᠠᠨ ᠰᠢᠷᠳᠡᠪᠡ᠃ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠭᠤᠷᠪᠠᠨ ᠮᠣᠷᠢᠲᠠᠢ ᠬᠥᠮᠦᠨ ᠴᠠᠰᠤ ᠬᠤᠢᠯᠠᠷᠠᠭᠠᠨ ᠠᠢᠰᠤᠢ᠃ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠶᠠᠪᠤᠭᠠ ᠪᠠᠷᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠪᠣᠭᠣᠨᠢᠬᠠᠨ ᠳᠥᠷᠥᠭᠡ ᠲᠡᠢ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠪᠡᠶᠡ ᠪᠤᠰᠬᠠᠨ ᠬᠣᠷᠮᠣᠢ ᠬᠣᠲᠠ ᠪᠠᠨ ᠬᠣᠢᠰᠢ ᠬᠡᠢᠰᠬᠡᠵᠦ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠤᠷᠲᠤ ᠫᠤᠤ ᠶ᠋ᠢᠨ ᠠᠮᠠᠨ ᠲᠠᠯᠠ ᠠ᠋ᠴᠠ ᠨᠢ ᠪᠠᠷᠢᠨ ᠳᠠᠯᠠᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠳᠠᠯᠠᠢᠬᠤ ᠨᠢ ᠳ᠋ᠠᠨᠽᠠᠨ ᠢ᠋ ᠴᠣᠬᠢᠨ ᠤᠨᠠᠭᠠᠰᠤᠭᠠᠢ ᠭᠡᠬᠦ ᠡᠴᠡ ᠥᠭᠡᠷᠡ ᠪᠣᠳᠣᠯ ᠦᠭᠡᠢ ᠶᠠᠪᠤᠭᠠ ᠨᠢ ᠢᠯᠡᠷᠬᠡᠢ᠃ ᠳ᠋ᠠᠨᠽᠠᠨ ᠴᠦ᠍ ᠲᠦᠷᠦᠭᠦᠯᠡᠵᠦ ᠴᠣᠬᠢᠬᠤ ᠪᠠᠷ ᠰᠢᠢᠳᠦᠨ ᠰᠢᠳᠠᠮ ᠢ᠋ᠶ᠋ᠠᠨ ᠪᠡᠯᠡᠳᠬᠡᠨ ᠬᠦᠯᠢᠶᠡᠪᠡ᠃ ᠥᠨᠥᠬᠢ ᠬᠥᠮᠦᠨ ᠲᠤᠯᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠠᠷᠢᠶᠠᠯ ᠲᠠᠯᠪᠢᠨ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠰᠢᠭᠤᠯᠤᠨ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠭᠡᠳ ᠡᠷᠭᠢᠨ ᠢᠷᠡᠵᠦ᠄
— ᠴᠢ ᠡᠨᠳᠡ ᠶᠠᠮᠠᠷ ᠶᠠᠭᠤᠮᠠ ᠪᠠᠨ ᠬᠢᠵᠦ ᠶᠠᠪᠤᠭᠠ ᠬᠠᠷᠠ ᠲᠡᠨᠡᠭ ᠪᠣᠢ? ᠭᠡᠵᠦ ᠬᠠᠰᠬᠢᠷᠤᠨ ᠵᠠᠩᠳᠤᠷᠪᠠ᠃ ᠨᠥᠭᠦᠭᠡ ᠬᠣᠶᠠᠷ ᠨᠢ ᠴᠦ᠍ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠡᠳᠡ ᠪᠦᠭᠦᠳᠡ ᠬᠤᠷᠳᠤᠨ ᠫᠤᠤ ᠲᠠᠢ᠂ ᠥᠷᠯᠥᠭᠡᠨ ᠦ᠌ ᠵᠢᠪᠠᠷ ᠲᠤ ᠦᠰᠦ ᠬᠥᠮᠥᠰᠬᠡ ᠴᠠᠭᠠᠨ ᠪᠤᠭᠤᠷᠤᠯ ᠪᠣᠯᠤᠨ ᠴᠠᠩᠲᠤᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠮᠣᠷᠢᠳ ᠨᠢ ᠪᠠᠰᠠ ᠣᠮᠣᠭᠣᠯᠠᠩ᠂ ᠬᠥᠯᠳᠡᠭᠰᠡᠨ ᠬᠥᠯᠥᠰᠦᠲᠦ ᠴᠡᠭᠡᠵᠢᠨ ᠪᠡᠶᠡ ᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠲᠣᠭᠲᠠᠵᠤ ᠶᠠᠳᠠᠨ ᠳᠡᠪᠬᠡᠴᠡᠨᠡ᠃
— ᠬᠠᠷᠢᠨ ᠲᠠ ᠨᠠᠷ ᠮᠥᠷ ᠲᠡᠭᠡᠨ ᠶᠠᠪᠤᠭᠠ ᠬᠥᠮᠦᠨ ᠦ᠌ ᠤᠨᠤᠭᠠ ᠲᠡᠮᠡᠭᠡ ᠶ᠋ᠢ ᠫᠤᠤᠳᠠᠳᠠᠭ ᠶᠠᠮᠠᠷ ᠬᠥᠮᠦᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠮᠣᠩᠭᠣᠯ ᠪᠣᠢ? ᠭᠡᠵᠦ ᠵᠠᠩᠳᠤᠷᠬᠤ ᠳ᠋ᠤ᠌ ᠨᠢᠭᠡ ᠨᠢ ᠲᠡᠮᠡᠭᠡ ᠭᠡᠨᠡ ᠭᠡᠵᠦ ᠡᠭᠳᠡᠭᠦᠦ ᠲᠡᠢ ᠪᠡᠷ ᠢᠨᠢᠶᠡᠨᠡ᠃ ᠬᠣᠶᠠᠳᠠᠬᠢ ᠨᠢ ᠬᠠᠷᠢᠨ ᠴᠦ᠍ ᠪᠠᠶᠠᠷᠯᠠᠯᠠ! ᠤᠭ ᠨᠢ ᠪᠢ ᠲᠡᠮᠡᠭᠡ ᠶ᠋ᠢ ᠴᠢᠨᠢ ᠪᠢᠰᠢ᠂ ᠨᠠᠭᠠᠳᠤ ᠪᠥᠨᠲᠥᠭᠡᠷ ᠢ᠋ ᠴᠢᠨᠢ ᠱᠠᠭᠠᠢᠭᠰᠠᠨ ᠶᠤᠮ᠃ ᠭᠤᠷᠪᠠᠳᠠᠬᠢ ᠨᠢ ᠪᠡᠷᠢ᠂ ᠨᠣᠬᠠᠢ ᠶ᠋ᠢ! ᠡᠨᠡ ᠯᠠᠪ ᠭᠠᠮᠢᠩ ᠤ᠋ᠨ ᠲᠠᠩᠨᠠᠭᠤᠯ ᠪᠠᠢᠯᠭᠦᠢ᠃
ᠭᠤᠷᠪᠠᠭᠤᠯᠠ ᠵᠡᠷᠭᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠬᠠᠷᠠᠢᠵᠤ ᠬᠤᠷᠳᠤᠨ ᠫᠤᠤ ᠴᠡᠭᠡᠵᠢᠨ ᠳ᠋ᠦ᠍ ᠲᠤᠯᠭᠠᠪᠠ᠃ ᠠᠷᠤ ᠠ᠋ᠴᠠ ᠨᠢ ᠨᠢᠭᠡ ᠨᠢ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠥᠭᠰᠡ ᠪᠡᠷ ᠳᠡᠯᠡᠰᠪᠡ ᠪᠣᠯᠤᠯᠲᠠᠢ ᠳᠣᠲᠣᠷᠠ ᠮᠠᠨᠠᠷᠠᠨ ᠬᠠᠷᠠᠩᠭᠤᠢᠯᠠᠬᠤ ᠵᠠᠭᠤᠷᠠ ᠬᠣᠶᠠᠷ ᠭᠠᠷ ᠠᠯᠢ ᠬᠡᠳᠦᠢᠨ ᠠᠷᠤ ᠳ᠋ᠤ᠌ ᠵᠥᠷᠢᠭᠦᠯᠦᠨ ᠬᠦᠯᠢᠭᠳᠡᠵᠡᠢ᠃
ᠳ᠋ᠠᠨᠽᠠᠨ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠪᠠᠢᠨ ᠪᠠᠢᠨ《ᠭᠦᠶᠦ᠂ ᠭᠦᠶᠦ᠁》 ᠭᠡᠵᠦ ᠵᠠᠩᠳᠤᠷᠤᠭᠤᠯᠤᠨ ᠲᠠᠰᠢᠭᠤᠷᠳᠠᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ《ᠲᠠ ᠨᠠᠷ ᠨᠠᠮᠠᠶ᠋ᠢ ᠬᠠᠮᠢᠭᠠ ᠠᠪᠠᠴᠢᠬᠤ ᠭᠡᠵᠦ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠ᠃《ᠵᠠᠩᠵᠤᠨ ᠳ᠋ᠤ᠌》 ᠭᠡᠵᠦ ᠨᠥᠭᠥᠭᠡᠳᠦᠭᠦᠯᠡ ᠶ᠋ᠢᠨ ᠬᠠᠷᠢᠭᠤᠯᠬᠤ ᠳ᠋ᠤ᠌《ᠤᠤᠬᠠᠢ ᠲᠠ ᠨᠠᠷ ᠲᠤ ᠪᠠᠰᠠ ᠵᠠᠩᠵᠤᠨ ᠪᠠᠢᠳᠠᠭ ᠪᠣᠢ》 ᠭᠡᠬᠦ ᠳ᠋ᠦ᠍ ᠨᠢᠭᠡ ᠨᠢ ᠳᠣᠷᠣᠮᠵᠢᠯᠠᠪᠠ ᠭᠡᠵᠦ ᠬᠢᠯᠢᠩᠨᠡᠨ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠣᠷᠢᠶᠠᠯᠭᠠᠪᠠ᠃ ᠳ᠋ᠠᠨᠽᠠᠨ《ᠨᠡᠭᠡᠷᠡᠨ ᠲᠠ ᠨᠠᠷ ᠲᠤ ᠵᠠᠩᠵᠤᠨ ᠪᠠᠢᠳᠠᠭ ᠪᠣᠯ ᠪᠢ ᠲᠡᠭᠦᠨ ᠳ᠋ᠦ᠍ ᠴᠢᠨᠢ ᠪᠤᠤᠷᠠ ᠪᠠᠨ ᠠᠯᠠᠭᠤᠯᠤᠭᠰᠠᠨ ᠭᠣᠮᠣᠳᠠᠯ ᠮᠡᠳᠡᠭᠦᠯᠦᠨ ᠥᠪᠡᠷᠰᠡᠳ ᠢ᠋ ᠴᠢᠨᠢ ᠪᠠᠩᠵᠠᠳᠠᠭᠤᠯᠬᠤ ᠪᠣᠯᠤᠨᠠ ᠳᠠ》 ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠨ ᠭᠦᠶᠦᠭᠰᠡᠭᠡᠷ ᠯᠡ ᠶᠠᠪᠤᠯᠠ᠃
ᠵᠢᠯᠠᠭᠠᠨ ᠳ᠋ᠤ᠌ ᠪᠠᠢᠭᠠ ᠠᠷᠪᠠ ᠭᠠᠷᠤᠢ ᠮᠠᠢᠬᠠᠨ ᠳᠡᠭᠡᠷᠡ ᠣᠷᠣᠵᠤ ᠢᠷᠡᠪᠡ᠃ ᠭᠣᠣᠯ ᠤ᠋ᠨ ᠲᠣᠮᠣ ᠮᠠᠢᠬᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠨᠥᠭᠥᠭᠡᠳᠦᠭᠦᠯᠡ ᠳ᠋ᠠᠨᠽᠠᠨ ᠢ᠋ ᠵᠣᠭᠰᠣᠭᠠᠨ ᠨᠢᠭᠡ ᠨᠢ ᠣᠷᠣᠵᠤ ᠬᠡᠳᠦᠨ ᠦᠭᠡ ᠬᠡᠯᠡᠯᠴᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠨ ᠢᠷᠡᠵᠦ ᠳ᠋ᠠᠨᠽᠠᠨ ᠢ᠋ ᠣᠷᠣᠭᠤᠯᠪᠠ᠃ ᠮᠠᠢᠬᠠᠨ ᠤ᠋ ᠭᠣᠣᠯ ᠳ᠋ᠤ᠌ ᠭᠤᠷᠪᠠᠨ ᠲᠣᠮᠣ ᠴᠢᠯᠠᠭᠤ ᠲᠤᠯᠤᠭᠰᠠᠨ ᠭᠣᠯᠣᠮᠲᠠ ᠳ᠋ᠤ᠌ ᠶᠡᠬᠡ ᠬᠠᠷᠠᠭᠠᠨᠠ ᠶ᠋ᠢᠨ ᠭᠠᠯ ᠰᠢᠳᠡᠨ ᠣᠪᠣᠯᠵᠠᠵᠤ ᠳ᠋ᠠᠨᠽᠠᠨ ᠤ᠋ ᠬᠥᠯᠳᠡᠭᠰᠡᠨ ᠬᠠᠴᠠᠷ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠬᠣᠶᠠᠷ ᠢ᠋ ᠭᠡᠨᠡᠳᠲᠡ ᠬᠠᠯᠠᠭᠠᠨ ᠬᠣᠷᠣᠰᠬᠠᠨᠠ᠃ ᠬᠣᠢᠮᠣᠷ ᠲᠤ ᠣᠮᠪᠣᠭᠰᠠᠨ ᠡᠯᠳᠡᠭᠦᠷ ᠲᠡᠢ ᠴᠠᠭᠠᠨ ᠨᠡᠬᠡᠢ ᠳᠡᠪᠡᠯ ᠲᠡᠢ᠂ ᠤᠯᠠᠭᠠᠨ ᠦᠨᠡᠭᠡᠨ ᠯᠣᠪᠤᠤᠵᠠ ᠠᠷᠤ ᠰᠢᠯᠢᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠭᠰᠠᠨ ᠬᠦᠳᠡᠷ ᠴᠢᠷᠠᠢ ᠲᠠᠢ ᠥᠨᠳᠥᠷ ᠬᠠᠷᠠ ᠬᠥᠮᠦᠨ ᠵᠠᠪᠢᠯᠠᠨ ᠰᠠᠭᠤᠵᠤ ᠫᠤᠤ ᠶ᠋ᠢᠨ ᠰᠦᠮᠪᠦᠨ ᠳ᠋ᠦ᠍ ᠮᠢᠬᠠ ᠱᠣᠷᠣᠯᠠᠨ ᠰᠢᠷᠠᠵᠤ ᠰᠠᠭᠤᠨᠠ᠃ ᠡᠨᠡ ᠬᠥᠮᠦᠨ ᠵᠠᠩᠵᠤᠨ᠂ ᠵᠦᠭᠡᠷ ᠴᠦ᠍ ᠦᠭᠡᠢ ᠲᠤᠭᠠᠷ ᠪᠠᠭᠠᠲᠤᠷ ᠭᠡᠭᠴᠢ ᠪᠠᠢᠵᠠᠢ᠃ ᠰᠢᠷᠠᠵᠤ ᠪᠠᠢᠭᠠ ᠮᠢᠬᠠ ᠪᠠᠨ ᠲᠡᠳᠡᠨ ᠠᠪᠴᠤ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠭᠠᠷᠭᠠᠨ ᠱᠣᠷᠣ ᠠ᠋ᠴᠠ ᠨᠢ ᠰᠤᠭᠤᠯᠵᠤ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠣᠭᠲᠣᠯᠵᠤ ᠠᠮᠲᠠᠯᠠᠨ ᠢᠳᠡᠬᠦ ᠵᠠᠭᠤᠷᠠ ᠳ᠋ᠠᠨᠽᠠᠨ ᠢ᠋ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠭᠠᠳ᠄
— ᠦᠭᠡᠢ ᠲᠠ ᠮᠢᠨᠢ ᠨᠠᠭᠠᠳᠤᠬᠢ ᠴᠢᠨᠢ ᠮᠣᠩᠭᠣᠯ ᠶᠤᠮ ᠰᠢᠪ ᠳᠡ? ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ᠄
— ᠲᠡᠢᠮᠦ ᠠ᠋ ᠪᠢ ᠮᠣᠩᠭᠣᠯ ᠬᠥᠮᠦᠨ ᠭᠡᠵᠦ ᠶᠠᠭᠠᠷᠠᠨ ᠥᠭᠦᠯᠡᠪᠡ᠃ ᠠᠷᠤ ᠠ᠋ᠴᠠ ᠨᠢᠭᠡ ᠨᠢ᠄
— ᠮᠣᠩᠭᠣᠯ ᠨᠢ ᠴᠦ᠍ ᠮᠣᠩᠭᠣᠯ ᠳᠠ᠂ ᠭᠡᠪᠡᠴᠦ ᠡᠮᠦᠨᠡ ᠡᠴᠡ ᠭᠠᠭᠴᠠ ᠲᠡᠮᠡᠭᠡ ᠲᠡᠢ ᠭᠠᠷᠴᠤ ᠢᠷᠡᠭᠰᠡᠨ ᠭᠡᠬᠦ ᠳ᠋ᠦ᠍ ᠪᠠᠰᠠ ᠨᠢᠭᠡ ᠨᠢ᠄
— ᠦᠭᠡᠢ ᠲᠡᠭᠡᠭᠡᠳ ᠪᠠᠰᠠ ᠪᠢᠳᠡᠨ ᠲᠡᠢ ᠨᠦᠳᠦᠯᠴᠡᠬᠦ ᠭᠡᠰᠡᠨ ᠢ᠋ ᠨᠢ ᠶᠠᠭᠠᠬᠢᠨᠠ ᠭᠡᠪᠡ᠃
ᠭᠤᠷᠪᠠᠳᠠᠬᠢ ᠨᠢ᠄
— ᠥ᠂ ᠲᠡᠢᠮᠦ ᠨᠠᠮᠠᠶ᠋ᠢ ᠪᠦᠷ ᠴᠣᠬᠢᠭᠠᠳ ᠠᠪᠤᠭᠰᠠᠨ ᠭᠡᠭᠴᠢ!
ᠳ᠋ᠠᠨᠽᠠᠨ ᠰᠠᠨᠳᠤᠷᠤᠨ ᠡᠷᠭᠢᠵᠦ᠄ ᠬᠤᠳᠠᠯ ᠠ᠋᠂ ᠶᠠᠭᠠᠬᠢᠭᠰᠠᠨ ᠰᠦᠨᠡᠰᠦ ᠪᠡᠨ ᠠᠯᠳᠠᠭᠰᠠᠨ ᠤᠯᠤᠰ ᠪᠣᠢ ᠭᠡᠵᠦ ᠠᠮᠢ ᠲᠡᠮᠡᠴᠡᠨ ᠬᠡᠷᠡᠯᠳᠦᠵᠦ ᠭᠠᠷᠪᠠ᠃
ᠲᠤᠭᠠᠷ ᠪᠠᠭᠠᠲᠤᠷ ᠲᠡᠳᠡᠨ ᠢ᠋ ᠶᠡᠷᠦ ᠬᠠᠢᠬᠤᠷᠤᠭᠰᠠᠨ ᠦᠭᠡᠢ《ᠵᠠ᠂ ᠵᠠ ᠪᠢᠲᠡᠭᠡᠢ ᠳᠡᠮᠡᠢ ᠱᠤᠤᠭᠢᠯᠳᠤ》 ᠭᠡᠵᠦ ᠴᠥᠮ ᠢ᠋ ᠳᠠᠭᠤ ᠦᠭᠡᠢ ᠪᠣᠯᠭᠠᠭᠠᠳ《ᠨᠠᠭᠠᠳᠤᠬᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠯᠢᠶᠡ ᠶ᠋ᠢ ᠲᠠᠢᠯ!》 ᠭᠡᠵᠦ ᠲᠤᠰᠢᠶᠠᠪᠠ᠃ ᠲᠤᠭᠠᠷ ᠪᠠᠭᠠᠲᠤᠷ ᠬᠠᠵᠠᠭᠤ ᠲᠠᠢᠰᠢ ᠡᠷᠭᠢᠨ ᠦᠬᠡᠷ ᠦ᠋ᠨ ᠬᠥᠯᠳᠡᠭᠦᠦ ᠭᠤᠶᠠ ᠠ᠋ᠴᠠ ᠰᠡᠯᠡᠮᠡ ᠪᠡᠷ ᠴᠠᠪᠴᠢᠯᠠᠨ ᠲᠠᠰᠤᠯᠵᠤ ᠱᠣᠷᠣᠯᠠᠨ ᠳᠠᠬᠢᠨ ᠰᠢᠷᠠᠵᠤ ᠭᠠᠷᠤᠯᠠ᠃ ᠳ᠋ᠠᠨᠽᠠᠨ ᠬᠦᠯᠢᠶᠡ ᠡᠴᠡ ᠰᠠᠯᠤᠭᠰᠠᠨ ᠳ᠋ᠠᠭᠠᠨ ᠡᠷᠡᠮᠰᠢᠨ ᠳᠥᠭᠥᠵᠦ ᠰᠠᠭᠤᠵᠤ᠄
— ᠡᠳᠡ ᠴᠢᠨᠢ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠭᠠ ᠠᠲᠠᠯᠠ ᠬᠠᠷᠢᠨ ᠤᠨᠤᠭᠠ ᠲᠡᠮᠡᠭᠡ ᠶ᠋ᠢ ᠮᠢᠨᠢ ᠭᠡᠵᠦ ᠦᠭᠡ ᠪᠡᠨ ᠡᠬᠢᠯᠡᠨ ᠪᠦᠬᠦ ᠭᠣᠮᠣᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠦᠯᠵᠦ ᠭᠠᠷᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠲᠤᠭᠠᠷ ᠮᠥᠨ ᠬᠠᠢᠬᠤᠷᠤᠮᠵᠢ ᠦᠭᠡᠢ᠂ ᠭᠣᠣᠯ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠰᠢᠷᠠᠵᠤ ᠪᠠᠢᠭᠠ ᠮᠢᠬᠠᠨ ᠳ᠋ᠤ᠌ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠦᠭᠡᠢ ᠴᠢ ᠶᠠᠭᠤᠨ ᠳᠡᠮᠡᠢ ᠶᠠᠭᠤᠮᠠ ᠶᠠᠷᠢᠭᠠᠳ ᠪᠠᠢᠨᠠ ᠪᠣᠢ? ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠠ ᠡᠵᠡᠨ ᠮᠢᠨᠢ ᠦᠨᠡᠨ᠂ ᠡᠳᠡ ᠴᠢᠨᠢ ᠮᠢᠨᠦ ᠲᠡᠮᠡᠭᠡ ᠶ᠋ᠢ ᠨᠡᠭᠡᠷᠡᠨ ᠫᠤᠤᠳᠠᠭᠠᠳ ᠠᠯᠠᠭᠰᠠᠨ ᠭᠡᠬᠦ ᠳ᠋ᠦ᠍ ᠲᠤᠭᠠᠷ ᠢᠨᠢᠶᠡᠨ᠂ ᠵᠠ ᠶᠠᠷᠰᠢᠭ! ᠴᠠᠭᠠᠨᠠ ᠴᠢᠨᠢ ᠡᠨᠡ ᠤᠷᠢᠲᠠᠢ ᠠᠭᠤᠯᠠ ᠪᠠᠷ ᠳᠦᠭᠦᠷᠡᠩ ᠭᠠᠮᠢᠩ᠂ ᠨᠠᠭᠠᠨᠠ ᠨᠢ ᠬᠥᠮᠦᠰ ᠭᠠᠭᠴᠠ ᠲᠡᠮᠡᠭᠡ ᠪᠠᠢᠲᠤᠭᠠᠢ ᠪᠡᠶᠡ ᠪᠡᠨ ᠮᠠᠷᠲᠠᠨ ᠲᠤᠯᠤᠯᠳᠤᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠳ᠋ᠠᠨᠽᠠᠨ ᠰᠠᠶᠢ ᠤᠬᠠᠭᠠᠷᠠᠬᠤ ᠰᠢᠭ᠋ ᠪᠣᠯᠵᠤ᠄
— ᠠ ᠲᠡᠢᠮᠦ ᠤᠤ? ᠭᠡᠳ ᠴᠣᠢᠷᠠ ᠶ᠋ᠢᠨ ᠬᠡᠢᠳ ᠦ᠋ᠨ ᠰᠢᠲᠠᠭᠰᠠᠨ ᠢ᠋ ᠭᠣᠮᠣᠳᠠᠯ ᠪᠣᠯᠭᠠᠨ ᠮᠡᠳᠡᠭᠦᠯᠪᠡ᠃ ᠲᠤᠭᠠᠷ ᠮᠥᠨ ᠯᠡ ᠬᠠᠢᠬᠤᠷᠤᠮᠵᠢ ᠦᠭᠡᠢ᠂ ᠰᠣᠨᠣᠰᠬᠤ᠂ ᠰᠣᠨᠣᠰᠬᠤ ᠦᠭᠡᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄ ᠵᠠ᠂ ᠵᠠ ᠮᠡᠳᠡᠯᠡ᠂ ᠢᠩᠭᠢᠬᠦᠯᠡᠷ ᠴᠢ ᠣᠯᠠᠨ ᠲᠠᠪᠤᠨ ᠦᠭᠡ ᠦᠭᠡᠢ ᠴᠡᠷᠢᠭ ᠲᠦ᠍ ᠣᠷᠣ! ᠭᠠᠮᠢᠩ ᠲᠠᠢ ᠪᠠᠢᠯᠳᠤᠨᠠ ᠳᠠ ᠭᠡᠬᠦ ᠳ᠋ᠦ᠍᠄
— ᠠ ᠲᠡᠭᠡᠶᠡ ᠭᠡᠬᠦ ᠳ᠋ᠡᠭᠡᠨ ᠳ᠋ᠠᠨᠽᠠᠨ ᠤ᠋ ᠨᠢᠳᠦ ᠰᠡᠷᠭᠦᠨ ᠢᠷᠡᠪᠡ᠃
ᠲᠤᠭᠠᠷ ᠰᠢᠷᠠᠭᠰᠠᠨ ᠮᠢᠬᠠ ᠪᠠᠨ ᠲᠦᠷᠦᠭᠦᠴᠢ ᠶ᠋ᠢᠨ ᠡᠴᠡ ᠠᠷᠠᠢ ᠴᠦ᠍ ᠢᠯᠡᠭᠦᠦ ᠲᠡᠢ ᠢᠳᠡᠩᠭᠦᠲᠡ ᠪᠡᠨ ᠳ᠋ᠠᠨᠽᠠᠨ ᠤ᠋ ᠨᠢᠳᠦ ᠶ᠋ᠢ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠴᠦ᠍ ᠥᠯᠥᠰᠬᠦ ᠭᠡᠵᠦ ᠴᠢᠨᠣᠠ ᠰᠢᠭ᠋ ᠪᠣᠯᠤᠭᠰᠠᠨ ᠡᠳ᠋ ᠰᠢᠪ? ᠵᠠ ᠲᠠᠢᠰᠢ ᠪᠠᠨ ᠰᠠᠭᠤ᠂ ᠡᠨᠡ ᠭᠤᠶᠠ ᠠ᠋ᠴᠠ ᠰᠢᠷᠠᠭᠠᠳ ᠪᠠᠢ! ᠭᠡᠪᠡ᠃ ᠳ᠋ᠠᠨᠽᠠᠨ ᠪᠠᠶᠠᠷᠯᠠᠨ ᠪᠣᠰᠴᠤ ᠬᠥᠯᠳᠡᠭᠦᠦ ᠭᠤᠶᠠ ᠲᠠᠢ ᠨᠣᠴᠣᠯᠳᠤᠵᠤ ᠭᠠᠷᠪᠠ᠃ ᠠᠷᠠᠢᠭᠡᠵᠦ ᠬᠡᠰᠡᠭ ᠮᠢᠬᠠ ᠶ᠋ᠢ ᠲᠠᠰᠤᠯᠤᠨ ᠠᠪᠴᠤ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠰᠢᠷᠠᠬᠤ ᠳ᠋ᠤ᠌ ᠲᠤᠭᠠᠷ᠄
— ᠰᠠᠢᠨ ᠢᠳᠡᠵᠦ ᠠᠪᠤᠭᠠᠷᠠᠢ᠃ ᠥᠯᠥᠰᠬᠦᠯᠡᠩ ᠦᠬᠦᠪᠡᠯ ᠰᠦᠨᠡᠰᠦ ᠬᠣᠷᠭᠣᠳᠠᠨ ᠪᠠᠰᠠ ᠭᠠᠢ ᠪᠣᠯᠤᠨᠠ ᠭᠡᠵᠦ ᠮᠡᠳᠡ ᠭᠡᠵᠦ ᠲᠥᠪ ᠴᠢᠷᠠᠢ ᠪᠠᠷ ᠥᠭᠦᠯᠡᠨ ᠬᠠᠵᠠᠭᠤᠯᠠᠪᠠ᠃
ᠳ᠋ᠠᠨᠽᠠᠨ ᠲᠡᠢᠮᠦ ᠠ᠋ ᠭᠡᠵᠦ ᠢᠨᠢᠶᠡᠳᠦ ᠠᠯᠳᠠᠭᠠᠳ᠂ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠣᠷᠣᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠡᠷᠬᠢᠨ ᠭᠠᠷᠤᠭᠰᠠᠨ ᠠ᠋ᠴᠠ ᠪᠠᠨ ᠶᠠᠷᠢᠬᠤ ᠭᠡᠲᠡᠯᠡ ᠲᠤᠭᠠᠷ᠄
— ᠵᠠ ᠲᠡᠭᠦᠨ ᠢ᠋ ᠪᠡᠨ ᠰᠡᠭᠦᠯ ᠳ᠋ᠦ᠍ᠨᠢ ᠪᠣᠯ ᠳᠠ! ᠪᠢ ᠤᠷᠢᠳ ᠰᠥᠨᠢ ᠤᠷᠢᠳᠤ ᠠᠭᠤᠯᠠᠨ ᠳ᠋ᠤ᠌ ᠨᠣᠢᠷ ᠦᠭᠡᠢ ᠬᠣᠨᠣᠭᠠᠳ ᠳᠥᠩᠭᠡᠵᠦ ᠰᠠᠶᠢ ᠢᠷᠡᠪᠡ᠃ ᠣᠳᠣ ᠵᠢᠭᠠᠬᠠᠨ ᠨᠣᠢᠷ ᠠᠪᠬᠤ ᠮᠢᠨᠢ᠃ ᠡᠨᠡ ᠰᠥᠨᠢ ᠪᠠᠰᠠ ᠳᠠᠢᠳᠤᠨᠠ᠃ ᠭᠠᠮᠢᠩ ᠤ᠋ᠨ ᠲᠣᠭᠠ ᠣᠯᠠᠨ᠂ ᠰᠥᠨᠢ ᠬᠦᠢᠲᠡᠨ ᠵᠢᠪᠠᠷ ᠲᠠᠢ ᠬᠠᠮᠵᠢᠬᠤ ᠦᠭᠡᠢ ᠪᠡᠷ ᠳᠡᠢᠯᠬᠦ ᠳ᠋ᠦ᠍ ᠪᠡᠷᠬᠡ ᠭᠡᠳ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠳᠠᠬᠤ ᠨᠥᠮᠥᠷᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ