ᠪᠤᠬᠠ᠂ ᠬᠤᠴᠠ᠂ ᠤᠬᠤᠨᠠ ᠭᠤᠷᠪᠠ ᠶ᠋ᠢᠨ ᠦᠯᠢᠭᠡᠷBukh, khuts, ukhna gurvyn ülgerБух, хуц, ухна гурвын үлгэр
1763ᠪᠤᠬᠠ᠂ ᠬᠤᠴᠠ᠂ ᠤᠬᠤᠨᠠ ᠭᠤᠷᠪᠠ ᠶ᠋ᠢᠨ ᠦᠯᠢᠭᠡᠷ
ᠳᠣᠮᠣᠭ ᠦᠯᠢᠭᠡᠷ
ᠨᠢᠭᠡ ᠪᠠᠶᠠᠨ ᠠᠢᠯ ᠪᠠᠢᠵᠠᠢ᠃ ᠲᠡᠷᠡ ᠠᠢᠯ ᠴᠠᠭ ᠤ᠋ᠨ ᠬᠦᠢᠲᠡᠨ ᠳ᠋ᠦ᠍ ᠵᠤᠲᠠᠷᠠᠵᠤ᠂ ᠴᠠᠰᠤ ᠵᠤᠳ ᠲᠤ᠌ ᠲᠤᠢᠯᠳᠠᠵᠤ ᠪᠣᠰᠴᠤ ᠴᠢᠳᠠᠬᠤ ᠪᠠᠨ ᠪᠠᠢᠭᠰᠠᠨ ᠦᠶᠡᠰᠦᠮᠡᠯ ᠪᠤᠬᠠ᠂ ᠲᠥᠯᠥᠭᠡᠨ ᠬᠤᠴᠠ᠂ ᠰᠢᠳᠦᠯᠡᠩ ᠤᠬᠤᠨᠠ ᠡᠢᠮᠦ ᠭᠤᠷᠪᠠᠨ ᠮᠠᠯ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠬᠠᠶᠠᠭᠠᠳ ᠨᠡᠭᠦᠵᠡᠢ᠃ ᠨᠡᠭᠦᠭᠰᠡᠨ ᠡᠴᠡ ᠬᠣᠢᠰᠢ ᠬᠦᠢᠲᠡᠨ ᠦ᠌ ᠢᠯᠴᠢ ᠪᠠᠭᠤᠷᠠᠵᠤ᠂ ᠴᠠᠭ ᠵᠤᠳ ᠲᠠᠯᠪᠢᠭᠳᠠᠭᠠᠳ ᠬᠠᠪᠤᠷ ᠤ᠋ᠨ ᠠᠭᠤᠷ ᠣᠷᠣᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠭᠤᠷᠪᠠᠨ ᠮᠠᠯ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠠᠷᠠᠢᠬᠠᠨ ᠠᠮᠢ ᠲᠠᠢ ᠭᠠᠷᠴᠤ᠂ ᠪᠠᠭᠠ ᠵᠡᠷᠭᠡ ᠲᠡᠩᠬᠡᠷᠡᠭᠡᠳ ᠪᠠᠢᠲᠠᠯᠠ ᠨᠢᠭᠡ ᠴᠢᠨᠣᠠ ᠲᠡᠷᠡ ᠭᠤᠷᠪᠠ ᠶ᠋ᠢ ᠢᠳᠡᠬᠦ ᠰᠠᠨᠠᠭᠠ ᠲᠠᠢ ᠳᠠᠪᠬᠢᠵᠤ ᠢᠷᠡᠭᠡᠳ ᠪᠤᠬᠠᠨ ᠠ᠋ᠴᠠ ᠠᠰᠠᠭᠤᠵᠠᠢ᠃
— ᠴᠢᠨᠦ ᠨᠡᠷᠡ ᠬᠡᠨ ᠭᠡᠳᠡᠭ ᠪᠣᠢ? ᠭᠡᠰᠡᠨ ᠳ᠋ᠦ᠍᠂ ᠪᠤᠬᠠᠨ ᠪᠢᠷᠠᠭᠤ᠂ ᠮᠢᠨᠦ ᠨᠡᠷᠡ ᠭᠦᠵᠡᠭᠡ ᠶᠡᠬᠡᠲᠦ ᠭᠦᠨᠳᠡᠨ ᠬᠠᠭᠠᠨ ᠭᠡᠳᠡᠭ ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠴᠢᠨᠣᠠ ᠪᠠᠭᠠᠬᠠᠨ ᠰᠣᠨᠢᠷᠬᠠᠨ᠂ ᠪᠤᠬᠠ ᠶ᠋ᠢᠨ ᠡᠪᠡᠷ ᠢ᠋ ᠵᠢᠭᠠᠵᠤ ᠪᠠᠰᠠ ᠠᠰᠠᠭᠤᠪᠠ᠃ ᠴᠢᠨᠦ ᠡᠨᠡ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠪᠤᠬᠠ ᠮᠢᠨᠦ ᠡᠨᠡ ᠪᠣᠯ ᠲᠩᠷᠢ ᠪᠤᠷᠬᠠᠨ ᠤ᠋ ᠬᠠᠢᠷᠠᠯᠠᠭᠰᠠᠨ ᠲᠡᠭ ᠬᠠᠷᠠ ᠵᠢᠳᠠ ᠶᠤᠮ᠂ ᠲᠡᠷᠰᠯᠡᠵᠦ ᠢᠷᠡᠭᠰᠡᠨ ᠳᠠᠢᠰᠤᠨ ᠢ᠋ ᠲᠡᠰᠬᠡᠯ ᠦᠭᠡᠢ ᠰᠦᠯᠳᠡᠳᠡᠭ ᠶᠤᠮ ᠭᠡᠪᠡ᠃ ᠴᠢᠨᠣᠠ ᠪᠠᠭᠠᠬᠠᠨ ᠭᠠᠢᠬᠠᠨ᠂ ᠪᠤᠬᠠ ᠶ᠋ᠢᠨ ᠲᠥᠮᠥᠰᠥ ᠶ᠋ᠢ ᠵᠢᠭᠠᠵᠤ ᠠᠰᠠᠭᠤᠷᠤᠨ᠂ ᠴᠢᠨᠦ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠪᠤᠬᠠ ᠬᠡᠯᠡᠪᠡ᠃ ᠮᠢᠨᠦ ᠡᠨᠡ ᠠᠪᠤ ᠡᠵᠢ ᠶ᠋ᠢᠨ ᠬᠠᠢᠷᠠᠯᠠᠭᠰᠠᠨ ᠠᠰᠠᠷ ᠭᠠᠰᠢᠭᠤᠨ ᠰᠣᠩᠭᠢᠨᠠ᠂ ᠠᠷᠭᠠᠳᠠᠨ ᠴᠢᠨᠣᠠ ᠶ᠋ᠢᠨ ᠮᠢᠬᠠ ᠶ᠋ᠢ ᠠᠮᠲᠠᠯᠠᠵᠤ ᠢᠳᠡᠳᠡᠭ ᠶᠤᠮ ᠭᠡᠪᠡ᠃ ᠴᠢᠨᠣᠠ ᠪᠤᠬᠠᠨ ᠠ᠋ᠴᠠ ᠠᠶᠤᠵᠤ ᠲᠥᠯᠥᠭᠡᠨ ᠬᠤᠴᠠᠨ ᠠ᠋ᠴᠠ ᠠᠰᠠᠭᠤᠪᠠ᠂ ᠴᠢᠨᠦ ᠨᠡᠷᠡ ᠬᠡᠨ ᠭᠡᠳᠡᠭ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠬᠤᠴᠠ ᠮᠢᠨᠦ ᠨᠡᠷᠡ ᠶ᠋ᠢ ᠲᠣᠯᠣᠭᠠᠢ ᠶᠡᠬᠡᠲᠦ ᠲᠤᠩ ᠴᠠᠭᠠᠨ ᠭᠡᠳᠡᠭ ᠶᠤᠮ ᠭᠡᠪᠡ᠃ ᠴᠢᠨᠣᠠ ᠬᠤᠴᠠ ᠶ᠋ᠢᠨ ᠡᠪᠡᠷ ᠢ᠋ ᠬᠠᠷᠠᠵᠤ ᠠᠰᠠᠭᠤᠪᠠ᠂ ᠴᠢᠨᠦ ᠡᠨᠡ ᠶᠠᠭᠤ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠲᠥᠯᠥᠭᠡᠨ ᠬᠤᠴᠠ᠂ ᠮᠢᠨᠦ ᠡᠨᠡ ᠲᠩᠷᠢ ᠪᠤᠷᠬᠠᠨ ᠠ᠋ᠴᠠ ᠬᠠᠢᠷᠠᠯᠠᠭᠰᠠᠨ ᠲᠣᠮᠣ ᠬᠠᠷᠠ ᠨᠤᠮᠤ᠂ ᠳᠣᠪᠲᠣᠯᠵᠤ ᠢᠷᠡᠭᠰᠡᠨ ᠴᠢᠨᠣᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠠᠭᠠ ᠴᠣᠬᠢᠳᠠᠭ ᠶᠤᠮ ᠭᠡᠪᠡ᠃ ᠴᠢᠨᠣᠠ ᠬᠤᠴᠠᠨ ᠠ᠋ᠴᠠ ᠪᠠᠰᠠ ᠠᠶᠤᠭᠠᠳ᠂ ᠰᠢᠳᠦᠯᠡᠩ ᠤᠬᠤᠨᠠ ᠠ᠋ᠴᠠ ᠣᠴᠢᠵᠤ ᠠᠰᠠᠭᠤᠪᠠ᠃ ᠴᠢᠨᠦ ᠨᠡᠷᠡ ᠬᠡᠨ ᠭᠡᠳᠡᠭ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠤᠬᠤᠨᠠ ᠬᠡᠯᠡᠪᠡ᠂ ᠮᠢᠨᠦ ᠨᠡᠷᠡ ᠰᠡᠯᠡᠮᠡ ᠶ᠋ᠢᠨ ᠡᠪᠡᠷᠲᠦ ᠰᠡᠩᠭᠡ ᠪᠠᠭᠠᠲᠤᠷ ᠰᠠᠬᠠᠯ ᠶᠡᠬᠡᠲᠦ ᠰᠠᠩᠴᠢ ᠬᠠᠭᠠᠨ ᠭᠡᠳᠡᠭ ᠭᠡᠪᠡ᠃ ᠴᠢᠨᠣᠠ ᠶᠡᠬᠡᠲᠦ ᠭᠠᠢᠬᠠᠵᠤ ᠤᠬᠤᠨᠠ ᠶ᠋ᠢᠨ ᠡᠪᠡᠷ ᠢ᠋ ᠵᠢᠭᠠᠵᠤ᠂ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠤᠬᠤᠨᠠ ᠬᠡᠯᠡᠪᠡ᠃ ᠮᠢᠨᠦ ᠡᠨᠡ ᠡᠵᠡᠨ ᠲᠩᠷᠢ ᠡᠴᠡ ᠵᠠᠶᠠᠭᠠᠭᠰᠠᠨ ᠢᠷᠲᠦ ᠬᠢᠮᠤᠰᠤ᠂ ᠡᠷᠡᠰᠯᠡᠵᠦ ᠢᠷᠡᠭᠰᠡᠨ ᠴᠢᠨᠣᠠ ᠶ᠋ᠢᠨ ᠡᠯᠢᠭᠡ ᠪᠥᠭᠡᠷᠡ ᠶ᠋ᠢ ᠰᠦᠯᠳᠡᠳᠡᠭ ᠶᠤᠮ ᠭᠡᠵᠡᠢ᠃ ᠴᠢᠨᠣᠠ ᠶᠡᠬᠡ ᠯᠡ ᠰᠦᠷᠳᠡᠵᠦ ᠪᠠᠯᠠᠮᠠᠭᠳᠠᠵᠤ ᠳᠡᠮᠡᠢ ᠯᠡ ᠤᠬᠤᠨᠠ ᠶ᠋ᠢᠨ ᠲᠥᠮᠥᠰᠥ ᠶ᠋ᠢ ᠵᠢᠭᠠᠵᠤ᠂ ᠲᠠᠨ ᠤ᠋ ᠡᠨᠡ ᠲᠠᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠤᠬᠤᠨᠠ ᠤᠯᠠᠮ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠬᠡᠯᠡᠪᠡ᠃ ᠠ ᠡᠨᠡ ᠪᠣᠯ ᠲᠦᠭᠦᠬᠡᠢ ᠴᠢᠨᠣᠠ ᠶ᠋ᠢᠨ ᠮᠢᠬᠠ ᠶ᠋ᠢ ᠲᠥᠷᠥᠵᠦ ᠠᠮᠲᠠᠯᠠᠵᠤ ᠢᠳᠡᠳᠡᠭ᠂ ᠲᠦᠩᠭᠡᠷᠴᠡᠭ ᠰᠠᠪᠠ ᠲᠠᠢ ᠳᠠᠪᠤᠰᠤ ᠰᠣᠩᠭᠢᠨᠠ ᠬᠣᠶᠠᠷ᠂ ᠲᠦᠷᠦᠭᠦᠯᠡᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠣᠳᠣ ᠴᠢᠮᠠ ᠶ᠋ᠢ ᠢᠳᠡᠶᠡ ᠭᠡᠳ ᠳᠣᠷᠭᠢᠵᠤ ᠳᠠᠪᠬᠢᠭᠰᠠᠨ ᠳ᠋ᠤ᠌᠂ ᠥᠨᠥᠬᠢ ᠴᠢᠨᠣᠠ ᠤᠬᠠᠭᠠᠨ ᠦᠭᠡᠢ ᠠᠶᠤᠵᠤ᠂ ᠤᠷᠲᠤ ᠬᠠᠷᠠ ᠴᠠᠴᠤᠭ ᠬᠠᠶᠠᠨ ᠤᠬᠤᠰᠬᠢᠨ ᠳᠡᠭᠦᠯᠢᠵᠦ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠭᠦᠷ ᠬᠠᠷᠠᠢᠵᠤ ᠭᠣᠳ ᠬᠠᠳᠬᠤᠨ ᠳᠤᠲᠠᠭᠠᠵᠠᠢ᠃ ᠤᠬᠤᠨᠠ ᠤᠯᠠᠮ ᠠᠶᠤᠯᠭᠠᠬᠤ ᠭᠡᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠢᠯᠡᠳᠡᠵᠦ ᠶᠠᠪᠤᠲᠠᠯᠠ ᠮᠥᠰᠥᠨ ᠳᠡᠭᠡᠷᠡ ᠬᠠᠯᠲᠤᠷᠢᠭᠠᠳ᠂ ᠰᠠᠯᠳᠠᠢ ᠪᠠᠨ ᠬᠠᠭᠠᠯᠴᠢᠬᠠᠵᠠᠢ᠃ ᠡᠨᠡᠬᠦ ᠰᠠᠯᠳᠠᠢ ᠪᠠᠨ ᠬᠠᠭᠠᠯᠤᠭᠰᠠᠨ ᠢ᠋ᠶ᠋ᠠᠨ ᠴᠢᠨᠣᠠ ᠳ᠋ᠤ᠌ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠨ᠂ ᠴᠢᠮᠠ ᠶ᠋ᠢ ᠳ᠋ᠠ! ᠪᠢ ᠥᠮᠥᠳᠦᠨ ᠦ᠌ ᠳᠠᠯᠠᠢ ᠲᠠᠰᠤᠷᠠᠭᠠ ᠦᠭᠡᠢ ᠪᠣᠯ ᠭᠡᠵᠦ ᠶᠡᠬᠡ ᠯᠡ ᠵᠠᠨᠤᠭᠰᠠᠭᠠᠷ ᠬᠣᠴᠣᠷᠴᠠᠢ᠃
ᠢᠩᠭᠢᠵᠦ ᠴᠢᠨᠣᠠ ᠶ᠋ᠢ ᠠᠶᠤᠯᠭᠠᠭᠠᠳ ᠲᠡᠷᠡ ᠭᠤᠷᠪᠠᠨ ᠮᠠᠯ ᠨᠣᠭᠣᠭᠠ ᠭᠠᠷᠤᠭᠰᠠᠨ ᠬᠣᠢᠨᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠰᠦᠷᠦᠭ ᠲᠡᠭᠡᠨ ᠨᠡᠢᠯᠡᠭᠡᠳ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠤ ᠭᠡᠨᠡ᠃
ᠦᠰᠦᠭ ᠬᠠᠲᠠᠵᠤ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ