ᠮᠢᠨᠦ ᠨᠢᠭᠡ ᠨᠠᠰᠤ – ᠴᠢ ᠂ ᠮᠡᠷᠭᠡᠨ Миний нэг нас – Чи.Мэргэн
468ᠮᠢᠨᠦ ᠨᠢᠭᠡ ᠨᠠᠰᠤ
ᠵᠣᠬᠢᠶᠠᠭᠴᠢ᠄ ᠴᠢ᠂ ᠮᠡᠷᠭᠡᠨ
ᠬᠥᠮᠦᠨ ᠦ᠌ ᠰᠡᠳᠬᠢᠯ
ᠤᠰᠤᠨ ᠳ᠋ᠤ᠌ ᠠᠭᠤᠰᠤᠭᠰᠠᠨ ᠳᠠᠪᠤᠰᠤ ᠮᠡᠲᠦ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠡᠰᠡ ᠦᠵᠡᠭᠳᠡᠨᠡ
ᠤᠷᠭᠤᠮᠠᠯ ᠳ᠋ᠤ᠌ ᠰᠢᠩᠭᠡᠭᠰᠡᠨ ᠦᠨᠦᠷ ᠮᠡᠲᠦ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠡᠰᠡ ᠪᠠᠷᠢᠭᠳᠠᠨᠠ
ᠤᠶᠠᠩᠭᠠ ᠳ᠋ᠤ᠌ ᠣᠷᠣᠰᠢᠭᠰᠠᠨ ᠰᠠᠨᠠᠭᠠ ᠮᠡᠲᠦ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠡᠰᠡ ᠪᠠᠯᠠᠷᠠᠨᠠ
ᠬᠥᠮᠦᠨ ᠦ᠌ ᠴᠢᠨᠠᠷ
ᠨᠢᠭᠡ
ᠢᠷᠡᠬᠦ ᠴᠦ᠍ ᠦᠭᠡᠢ᠂ ᠣᠳᠬᠤ ᠴᠤ᠌ ᠦᠭᠡᠢ ᠪᠠᠷᠠ ᠦᠭᠡᠢ ᠶᠠᠭᠤᠮᠠ
ᠢᠯᠡᠷᠡᠬᠦ ᠴᠦ᠍ ᠦᠭᠡᠢ᠂ ᠪᠠᠯᠠᠷᠠᠬᠤ ᠴᠤ᠌ ᠦᠭᠡᠢ ᠪᠡᠶᠡ ᠦᠭᠡᠢ ᠶᠠᠭᠤᠮᠠ
ᠢᠯᠡᠭᠦᠳᠡᠬᠦ ᠴᠦ᠍ ᠦᠭᠡᠢ ᠂ ᠳᠤᠲᠠᠬᠤ ᠴᠤ᠌ ᠦᠭᠡᠢ ᠰᠠᠪᠠ ᠦᠭᠡᠢ ᠶᠠᠭᠤᠮᠠ
ᠬᠣᠶᠠᠷ
ᠶᠠᠮᠤᠨ ᠤ᠋ ᠨᠣᠶᠠᠨ ᠰᠠᠭᠤᠯᠠ ᠴᠤ᠌ ᠭᠡᠰᠡᠨ ᠬᠥᠮᠦᠨ ᠦ᠌ ᠴᠢᠨᠠᠷ ᠦᠯᠦ ᠨᠡᠮᠡᠭᠳᠡᠨᠡ
ᠶᠠᠯᠠᠲᠠᠨ ᠤ᠋ ᠲᠦᠷᠦᠭᠦᠦ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ ᠬᠥᠮᠦᠨ ᠦ᠌ ᠴᠢᠨᠠᠷ ᠦᠯᠦ ᠬᠠᠰᠤᠭᠳᠠᠨᠠ
ᠶᠠᠩᠬᠠᠨ ᠤ᠋ ᠭᠠᠵᠠᠷ ᠤᠨᠠᠯᠠ ᠴᠤ᠌ ᠭᠡᠰᠡᠨ ᠬᠥᠮᠦᠨ ᠦ᠌ ᠴᠢᠨᠠᠷ ᠦᠯᠦ ᠭᠬᠢᠷᠲᠦᠨᠡ
ᠭᠤᠷᠪᠠ
ᠥᠷᠭᠡᠨ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠᠨ ᠨᠢ ᠵᠣᠭᠰᠣᠪᠠᠯ ᠴᠡᠭᠡᠯ ᠨᠢ ᠰᠠᠶᠢ ᠲᠤᠨᠤᠷᠠᠨᠠ
ᠥᠨᠳᠥᠷ ᠲᠡᠭᠷᠢ ᠶ᠋ᠢᠨ ᠡᠭᠦᠯᠡ ᠨᠢ ᠠᠷᠢᠯᠪᠠᠯ ᠮᠠᠨᠳᠠᠯ ᠨᠢ ᠰᠠᠶᠢ ᠴᠡᠯᠮᠡᠭᠰᠢᠨᠡ
ᠥᠪᠡᠷ ᠪᠡᠶᠡ ᠶ᠋ᠢᠨ ᠪᠣᠳᠣᠯ ᠨᠢ ᠲᠠᠰᠤᠷᠠᠪᠠᠯ ᠴᠢᠨᠠᠷ ᠨᠢ ᠰᠠᠶᠢ ᠢᠯᠡᠷᠡᠨᠡ
ᠬᠥᠮᠦᠨ ᠦ᠌ ᠤᠬᠠᠭᠠᠷᠠᠯ
ᠤᠷᠤᠰᠴᠤ ᠪᠠᠢᠭᠠ ᠤᠰᠤ ᠶ᠋ᠢ ᠦᠵᠡᠭᠰᠡᠨ ᠴᠦ᠍ ᠤᠰᠤ ᠡᠰᠡ ᠤᠷᠤᠰᠤᠨᠠ
ᠤᠨᠠᠵᠤ ᠪᠠᠢᠭᠠ ᠨᠠᠪᠴᠢ ᠶ᠋ᠢ ᠭᠢᠰᠬᠢᠭᠰᠡᠨ ᠴᠦ᠍ ᠨᠠᠪᠴᠢ ᠡᠰᠡ ᠤᠨᠠᠨᠠ
ᠤᠶᠠᠩᠭᠠᠯᠠᠵᠤ ᠪᠠᠢᠭᠠ ᠳᠠᠭᠤᠤ ᠶ᠋ᠢ ᠰᠣᠨᠣᠰᠤᠭᠰᠠᠨ ᠴᠤ᠌ ᠳᠠᠭᠤᠤ ᠡᠰᠡ ᠰᠣᠨᠣᠰᠳᠠᠨᠠ
ᠬᠥᠮᠦᠨ ᠦ᠌ ᠠᠯᠳᠠᠭᠠ
ᠦᠨᠡᠨ ᠭᠡᠲᠡᠯᠡ ᠬᠤᠳᠠᠯ ᠭᠡᠵᠦ ᠦᠰᠦ ᠪᠡᠨ ᠴᠠᠢᠲᠠᠯᠠ ᠮᠠᠷᠭᠤᠯᠳᠤᠭᠰᠠᠨ ᠴᠤ᠌᠂
ᠪᠡᠶᠡ ᠪᠡᠨ ᠡᠰᠡ ᠲᠠᠨᠢᠨᠠ
ᠦᠬᠦᠬᠦ ᠭᠡᠲᠡᠯᠡ ᠲᠥᠷᠥᠬᠦ ᠭᠡᠵᠦ ᠰᠢᠳᠦ ᠪᠡᠨ ᠤᠨᠠᠲᠠᠯᠠ ᠰᠤᠳᠤᠯᠤᠭᠰᠠᠨ ᠴᠤ᠌᠂
ᠰᠡᠳᠬᠢᠯ ᠢ᠋ᠶ᠋ᠡᠨ ᠡᠰᠡ ᠮᠡᠳᠡᠨᠡ
ᠥᠭᠦᠯᠡᠯᠭᠡ ᠭᠡᠲᠡᠯᠡ ᠰᠢᠯᠦᠭ ᠭᠡᠵᠦ ᠪᠢᠷ ᠢ᠋ᠶ᠋ᠡᠨ ᠬᠤᠭᠤᠷᠠᠲᠠᠯᠠ ᠪᠢᠴᠢᠭᠰᠡᠨ ᠴᠦ᠍᠂
ᠬᠣᠵᠢᠮ ᠢ᠋ᠶ᠋ᠠᠨ ᠡᠰᠡ ᠪᠣᠳᠣᠨᠠ
ᠬᠥᠮᠦᠨ ᠦ᠌ ᠮᠤᠩᠬᠠᠭ
ᠥᠴᠦᠬᠡᠨ ᠶᠠᠭᠤᠮᠠ ᠶ᠋ᠢ ᠣᠯᠤᠭᠠᠳ᠂ ᠶᠡᠬᠡ ᠶᠠᠭᠤᠮᠠ ᠶ᠋ᠢ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠨᠡ
ᠥᠪᠡᠷ ᠪᠢ ᠶ᠋ᠢ ᠣᠯᠤᠭᠠᠳ᠂ ᠦᠨᠡᠨ ᠪᠢ ᠶ᠋ᠢ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠨᠡ
ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠣᠯᠤᠭᠠᠳ ᠂ ᠪᠠᠢᠬᠤ ᠶᠠᠭᠤᠮᠠ ᠶ᠋ᠢ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠨᠡ
ᠬᠥᠮᠦᠨ ᠦ᠌ ᠲᠥᠭᠡᠷᠢᠯ
ᠨᠢᠭᠡ
ᠡᠪᠦᠭᠡᠷᠡᠵᠦ ᠣᠳᠬᠤ ᠦᠭᠡᠢ ᠶᠦ᠍ᠮ ᠰᠢᠭ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠬᠥᠮᠦᠨ ᠳᠡᠮᠡᠢ ᠯᠡ ᠠᠭᠠᠰᠢᠯᠠᠨᠠ
ᠡᠭᠡᠯᠵᠢᠯᠡᠵᠦ ᠶᠠᠪᠤᠬᠤ ᠦᠭᠡᠢ ᠶᠦ᠍ᠮ ᠰᠢᠭ᠂ ᠣᠷᠴᠢᠯᠠᠩ ᠤ᠋ᠨ ᠬᠥᠮᠦᠨ ᠳᠡᠮᠡᠢ ᠯᠡ ᠪᠡᠶᠡᠰᠦᠨᠡ
ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠶᠦᠮ ᠰᠢᠭ᠂ ᠡᠳᠦᠭᠡ ᠶ᠋ᠢᠨ ᠬᠥᠮᠦᠨ ᠳᠡᠮᠡᠢ ᠯᠡ ᠵᠡᠭᠦᠳᠦᠯᠡᠨᠡ
ᠬᠣᠶᠠᠷ
ᠪᠣᠳᠢ ᠮᠣᠳᠣ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠤᠷᠭᠤᠵᠤ ᠪᠠᠢᠲᠠᠯᠠ ᠬᠣᠯᠠ ᠠ᠋ᠴᠠ ᠡᠷᠢᠨᠡ
ᠪᠤᠷᠬᠠᠨ ᠪᠣᠳᠢᠰᠠᠳ᠋ᠸᠠ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠰᠠᠭᠠᠲᠠᠵᠤ ᠪᠠᠢᠲᠠᠯᠠ ᠰᠦᠮᠡ ᠡᠴᠡ ᠰᠤᠷᠠᠨᠠ
ᠪᠤᠭ ᠰᠢᠮᠨᠤᠰ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠣᠷᠣᠰᠢᠵᠤ ᠪᠠᠢᠲᠠᠯᠠ ᠭᠠᠳᠠᠨᠠ ᠠ᠋ᠴᠠ ᠬᠥᠭᠡᠭᠡᠨᠡ
ᠬᠥᠮᠦᠨ ᠦ᠌ ᠵᠣᠪᠠᠯᠠᠩ
ᠥᠷᠯᠥᠭᠡ ᠲᠠᠷᠢᠭᠰᠠᠨ ᠥᠷᠭᠡᠰᠦᠨ ᠳ᠋ᠦ᠍ ᠪᠡᠨ ᠬᠥᠮᠦᠨ ᠥᠪᠡᠷᠲᠡᠭᠡᠨ ᠬᠠᠳᠬᠤᠭᠳᠠᠨᠠ
ᠦᠳᠡᠰᠢ ᠲᠠᠯᠪᠢᠭᠰᠠᠨ ᠬᠠᠪᠬᠠᠨ ᠳ᠋ᠤ᠌ ᠪᠠᠨ ᠬᠥᠮᠦᠨ ᠥᠪᠡᠷ ᠲᠡᠭᠡᠨ ᠬᠠᠪᠴᠢᠭᠳᠠᠨᠠ
ᠥᠴᠥᠭᠡᠳᠦᠷ ᠮᠠᠯᠲᠠᠭᠰᠠᠨ ᠨᠦᠬᠡᠨ ᠳ᠋ᠦ᠍ ᠪᠡᠨ ᠬᠥᠮᠦᠨ ᠥᠪᠡᠷ ᠲᠡᠭᠡᠨ ᠪᠤᠯᠠᠭᠳᠠᠨᠠ
ᠬᠥᠮᠦᠨ ᠦ᠌ ᠪᠤᠶᠠᠨ
ᠡᠳ᠋ ᠲᠦ᠍ ᠳᠤᠷᠠᠯᠠᠬᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠶᠠᠭᠰᠠᠭᠠᠷ ᠬᠥᠮᠦᠨ ᠳᠠᠷᠤᠢ ᠬᠤᠪᠢᠯᠭᠠᠨ ᠪᠣᠯᠴᠢᠬᠠᠨᠠ
ᠡᠷᠬᠡᠨ ᠳ᠋ᠦ᠍ ᠰᠢᠨᠤᠬᠤ ᠵᠠᠩ ᠢ᠋ᠶ᠋ᠠᠨ ᠬᠠᠯᠠᠭᠰᠠᠭᠠᠷ ᠬᠥᠮᠦᠨ ᠳᠠᠷᠤᠢ ᠪᠣᠳᠢᠰᠠᠳ᠋ᠸᠠ ᠪᠣᠯᠴᠢᠬᠠᠨᠠ
ᠡᠮᠡᠰ ᠲᠦ᠍ ᠭᠣᠷᠢᠯᠠᠬᠤ ᠳᠤᠷᠠ ᠪᠠᠨ ᠲᠠᠰᠤᠯᠤᠭᠰᠠᠭᠠᠷ ᠬᠥᠮᠦᠨ ᠳᠠᠷᠤᠢ ᠪᠤᠷᠬᠠᠨ ᠪᠣᠯᠴᠢᠬᠠᠨᠠ
ᠵᠡᠭᠦᠯᠲᠡ ᠄ ᠠᠪᠢᠳᠠ ᠪᠤᠷᠬᠠᠨ ᠢ᠋ ᠤᠩᠰᠢᠬᠤ ᠨᠢ
2006 ᠣᠨ
ᠢᠷᠡᠯᠲᠡ ᠰᠦᠯᠵᠢᠶᠡ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ