ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠬᠡᠯᠡ – ᠠᠪᠢᠶᠠ ᠵᠦᠢ(ᠨᠢᠭᠡᠳᠦᠭᠡᠷ ᠪᠥᠯᠥᠭ-2) Орчин цагийн монгол хэл - Авиа зүй 1-р бүлэг<2>
384ᠨᠢᠭᠡᠳᠦᠭᠡᠷ ᠪᠥᠯᠥᠭ - ᠠᠪᠢᠶᠠ ᠵᠦᠢ ᠶᠢᠨ ᠶᠡᠷᠦᠩᠬᠡᠢ ᠮᠡᠳᠡᠴᠡ
ᠬᠣᠶᠠᠳᠤᠭᠠᠷ ᠵᠦᠢᠯ – ᠠᠪᠢᠶᠠ ᠶᠢ ᠰᠤᠳᠤᠯᠬᠤ ᠠᠷᠭᠠ ᠵᠢᠴᠢ ᠮᠣᠩᠭᠣᠯ ᠬᠡᠯᠡᠨ ᠦ ᠠᠪᠢᠶᠠᠨ ᠤ ᠰᠤᠳᠤᠯᠤᠭᠳᠠᠵᠤ ᠪᠠᠢᠭᠠ ᠪᠠᠢᠳᠠᠯ
ᠣᠳᠣᠬᠠᠨᠠ ᠠᠪᠢᠶᠠ ᠰᠤᠳᠤᠯᠬᠤ ᠠᠷᠭᠠ ᠮᠡᠷᠭᠡᠵᠢᠯ ᠨᠢ ᠬᠡᠯᠡ ᠰᠢᠨᠵᠢᠯᠡᠯ ᠳ᠋ᠦ᠍ ᠳᠠᠪᠠᠭᠤᠯᠢᠭ ᠪᠠᠢᠷᠢ ᠲᠠᠢ ᠪᠠᠢᠨᠠ᠃ ᠠᠪᠢᠶᠠ ᠶ᠋ᠢ ᠥᠭᠦᠯᠡᠬᠦ ᠡᠷᠬᠡᠲᠡᠨ ᠬᠡᠷᠬᠢᠨ ᠠᠪᠢᠶᠠᠯᠠᠵᠤ ᠪᠠᠢᠭᠠ ᠲᠠᠯᠠ ᠠ᠋ᠴᠠ ᠰᠤᠳᠤᠯᠬᠤ᠂ ᠠᠪᠢᠶᠠ ᠨᠢ ᠬᠡᠷᠬᠢᠨ ᠡᠭᠦᠰᠴᠦ ᠪᠦᠷᠢᠯᠳᠦᠵᠦ ᠪᠠᠢᠭᠠ ᠳᠠᠭᠤᠨ ᠤ᠋ ᠤᠬᠠᠭᠠᠨ ᠤ᠋ ᠲᠠᠯᠠ ᠠ᠋ᠴᠠ ᠰᠤᠳᠤᠯᠬᠤ᠂ ᠠᠪᠢᠶᠠ ᠨᠢ ᠬᠥᠮᠦᠨ ᠦ᠌ ᠰᠣᠨᠣᠷ ᠲᠤ ᠬᠡᠷᠬᠢᠨ ᠮᠡᠳᠡᠷᠡᠭᠳᠡᠵᠦ ᠣᠢᠯᠠᠭᠠᠭᠳᠠᠵᠤ ᠪᠠᠢᠭᠠ ᠰᠣᠨᠣᠰᠤᠯ ᠵᠦᠢ ᠶ᠋ᠢᠨ ᠲᠠᠯᠠ ᠠ᠋ᠴᠠ ᠰᠤᠳᠤᠯᠬᠤ ᠵᠡᠷᠭᠡ ᠠᠳᠠᠯᠢ ᠪᠤᠰᠤ ᠠᠷᠭᠠ ᠵᠠᠮ ᠢ᠋ᠶ᠋ᠠᠷ᠂ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠰᠤᠳᠤᠯᠵᠤ ᠨᠢᠭᠲᠠᠯᠠᠵᠤ ᠪᠣᠯᠤᠨᠠ᠃
ᠪᠦᠲᠦᠴᠡ ᠵᠦᠢ ᠶ᠋ᠢᠨ ᠠᠪᠢᠶᠠᠨ ᠤ᠋ ᠰᠢᠨᠵᠢᠯᠡᠯ ᠦ᠋ᠨ ᠠᠷᠭᠠ ᠨᠢ ᠰᠢᠨᠡ ᠪᠡᠷ ᠨᠡᠭᠡᠭᠡᠭᠰᠡᠨ ᠱᠠᠲᠤᠨ ᠳ᠋ᠤ᠌ ᠠᠪᠢᠶᠠᠯᠠᠪᠤᠷᠢ ᠵᠦᠢ ᠶ᠋ᠢ ᠰᠢᠰᠲ᠋ᠧᠮᠵᠢᠭᠦᠯᠦᠭᠰᠡᠨ ᠪᠥᠭᠡᠳ ᠠᠪᠢᠶᠠᠯᠠᠪᠤᠷᠢ ᠵᠦᠢ ᠶ᠋ᠢᠨ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠤ᠋ᠨ ᠣᠨᠣᠯ ᠠᠷᠭᠠ ᠨᠢ ᠴᠠᠭᠠᠰᠢᠳᠠ ᠡᠭᠦᠰᠬᠡᠬᠦ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠤᠬᠠᠭᠠᠨ ᠤ᠋ ᠦᠨᠳᠦᠰᠦ ᠰᠠᠭᠤᠷᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠡᠭᠦᠰᠬᠡᠬᠦ ᠠᠪᠢᠶᠠᠯᠠᠪᠤᠷᠢ ᠶ᠋ᠢᠨ ᠤᠬᠠᠭᠠᠨ ᠪᠣᠯ ᠬᠤᠪᠢᠷᠠᠭᠠᠯ ᠢ᠋ᠶ᠋ᠠᠷ ᠡᠭᠦᠰᠬᠡᠬᠦ ᠬᠡᠯᠡ ᠵᠦᠢ ᠶ᠋ᠢᠨ ᠨᠢᠭᠡᠨ ᠪᠦᠷᠢᠯᠳᠦᠬᠦᠨ ᠬᠡᠰᠡᠭ ᠶᠦᠮ᠃
ᠥᠨᠥᠳᠥᠷ ᠦ᠋ᠨ ᠠᠪᠢᠶᠠᠨ ᠤ᠋ ᠰᠢᠨᠵᠢᠯᠡᠭᠡᠨ ᠳ᠋ᠦ᠍ ᠬᠥᠭᠵᠢᠯᠲᠡ ᠪᠡᠷ ᠲᠦᠷᠭᠡᠨ ᠮᠥᠷᠲᠡᠭᠡᠨ ᠬᠡᠷᠡᠭᠴᠡᠭᠡ ᠪᠡᠷ ᠥᠷᠭᠡᠨ ᠨᠢ ᠲᠤᠷᠰᠢᠯᠲᠠ ᠶ᠋ᠢᠨ ᠠᠪᠢᠶᠠ ᠵᠦᠢ ᠪᠣᠯᠤᠨᠠ᠃ ᠲᠡᠷᠡ ᠨᠢ ᠹᠢᠽᠢᠺ᠂ ᠪᠡᠶᠡ ᠮᠠᠬᠠᠪᠣᠳ ᠪᠠ ᠰᠡᠳᠬᠢᠴᠡ ᠶ᠋ᠢᠨ ᠲᠤᠷᠰᠢᠯᠲᠠ ᠵᠡᠷᠭᠡ ᠠᠳᠠᠯᠢ ᠪᠤᠰᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠰᠤᠳᠤᠯᠤᠯ ᠤ᠋ᠨ ᠠᠷᠭᠠ ᠪᠠ ᠲᠥᠬᠥᠭᠡᠷᠦᠮᠵᠢ ᠶ᠋ᠢ ᠠᠰᠢᠭᠯᠠᠨ᠂ ᠠᠪᠢᠶᠠᠯᠠᠬᠤ ᠪᠠᠢᠳᠠᠯ᠂ ᠠᠪᠢᠶᠠ ᠳᠠᠮᠵᠢᠭᠤᠯᠬᠤ ᠪᠠᠢᠳᠠᠯ᠂ ᠰᠣᠨᠣᠰᠤᠭᠳᠠᠬᠤ ᠪᠠ ᠣᠢᠯᠠᠭᠠᠭᠳᠠᠬᠤ ᠪᠠᠢᠳᠠᠯ ᠵᠡᠷᠭᠡ ᠶ᠋ᠢ ᠪᠠᠭᠲᠠᠭᠠᠭᠰᠠᠨ ᠠᠮᠢᠳᠤ ᠶᠠᠷᠢᠶᠠᠨ ᠤ᠋ ᠬᠡᠯᠡ ᠶ᠋ᠢ ᠭᠣᠣᠯᠯᠠᠨ ᠰᠤᠳᠤᠯᠳᠠᠭ ᠵᠠᠪᠰᠠᠷ ᠤ᠋ᠨ ᠰᠢᠨᠵᠢ ᠲᠡᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠪᠣᠯᠬᠤ ᠲᠤᠯᠠ ᠠᠪᠢᠶᠠᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠬᠡᠯᠡ ᠲᠡᠢ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠴᠢᠮᠡᠭᠡ ᠨᠡᠪᠲᠡᠷᠡᠯᠭᠡ᠂ ᠰᠤᠷᠠᠭ ᠵᠠᠩᠭᠢ ᠶ᠋ᠢᠨ ᠳᠠᠮᠵᠢᠭᠤᠯᠤᠯᠲᠠ ᠶ᠋ᠢ ᠮᠠᠰᠢᠨ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠭᠦᠯᠬᠦ ᠵᠡᠷᠭᠡ ᠠᠵᠢᠯ ᠮᠡᠷᠭᠡᠵᠢᠯ ᠲᠡᠢ ᠰᠢᠭᠤᠳ ᠬᠣᠯᠪᠣᠭᠳᠠᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠲᠤᠷᠰᠢᠯᠲᠠ ᠶ᠋ᠢᠨ ᠠᠪᠢᠶᠠ ᠵᠦᠢ ᠨᠢ ᠬᠡᠯᠡ ᠪᠠ ᠪᠢᠴᠢᠭ ᠦ᠋ᠨ ᠠᠵᠢᠯ ᠢ᠋ ᠮᠠᠰᠢᠨᠴᠢᠯᠠᠬᠤ᠂ ᠠᠦ᠋ᠲ᠋ᠣᠴᠢᠯᠠᠬᠤ᠂ ᠴᠠᠭᠠᠰᠢᠳᠠ ᠰᠣᠨᠣᠷ ᠪᠠ ᠮᠡᠳᠡᠷᠡᠯ ᠢ᠋ ᠡᠮᠨᠡᠨ ᠵᠠᠰᠠᠬᠤ᠂ ᠲᠣᠭᠠᠨ ᠤ᠋ ᠤᠬᠠᠭᠠᠨ ᠵᠡᠷᠭᠡ ᠣᠯᠠᠨ ᠲᠠᠯᠠ ᠶ᠋ᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳ᠋ᠤ᠌ ᠬᠣᠯᠪᠣᠭᠳᠠᠨ ᠰᠤᠳᠤᠯᠤᠭᠳᠠᠳᠠᠭ ᠥᠷᠭᠡᠨ ᠬᠡᠷᠡᠭᠴᠡᠭᠡ ᠲᠡᠢ ᠰᠢᠨᠵᠢᠯᠡᠭᠡᠨ ᠪᠣᠯᠵᠤ ᠪᠠᠢᠨᠠ᠃
ᠤᠯᠠᠮᠵᠢᠯᠠᠯᠲᠤ ᠠᠪᠢᠶᠠ ᠵᠦᠢ ᠨᠢ ᠭᠣᠣᠯᠳᠠᠭᠤ ᠠᠮᠠ ᠬᠡᠯᠡ᠂ ᠴᠢᠬᠢᠨ ᠦ᠌ ᠴᠢᠳᠠᠮᠵᠢ ᠳ᠋ᠤ᠌ ᠲᠦᠰᠢᠭᠯᠡᠨ ᠬᠡᠯᠡᠨ ᠦ᠌ ᠠᠪᠢᠶᠠ ᠶ᠋ᠢ ᠵᠠᠳᠠᠯᠤᠨ ᠰᠠᠯᠭᠠᠭᠠᠳ ᠲᠣᠭᠲᠠᠩᠭᠢ ᠪᠠᠷ ᠰᠤᠳᠤᠯᠵᠤ ᠪᠠᠢᠵᠠᠢ᠃ ᠭᠡᠲᠡᠯᠡ ᠬᠥᠮᠦᠨ ᠦ᠌ ᠠᠮᠠ ᠬᠡᠯᠡ᠂ ᠴᠢᠬᠢᠨ ᠦ᠌ ᠢᠯᠭᠠᠬᠤ ᠴᠢᠳᠠᠯ ᠬᠢᠵᠠᠭᠠᠷ ᠲᠠᠢ ᠲᠤᠯᠠ ᠪᠣᠳᠠᠲᠠᠢ ᠰᠢᠨᠵᠢᠯᠡᠭᠡᠨ ᠳᠡᠭᠡᠷᠡ ᠪᠡᠨ ᠶᠠᠮᠠᠷ ᠠᠪᠢᠶᠠ ᠨᠢ ᠬᠠᠮᠢᠭᠠᠭᠤᠷ ᠬᠡᠷᠬᠢᠨ ᠠᠪᠢᠶᠠᠯᠠᠭᠳᠠᠬᠤ᠂ ᠠᠪᠢᠶᠠᠳ ᠤ᠋ᠨ ᠪᠣᠳᠠᠲᠠᠢ ᠤᠶᠠᠯᠳᠤᠬᠤ ᠣᠨᠴᠠᠯᠢᠭ᠂ ᠡᠷᠭᠦᠯᠲᠡ ᠠᠶᠠᠰ ᠵᠡᠷᠭᠡ ᠲᠠᠯᠠ ᠪᠠᠷ ᠠᠳᠠᠯᠢ ᠪᠤᠰᠤ ᠲᠣᠳᠣᠷᠬᠠᠢᠯᠠᠯᠲᠠ ᠪᠠ ᠰᠠᠨᠠᠯ ᠣᠷᠣᠰᠢᠵᠤ ᠪᠠᠢᠳᠠᠭ᠃ ᠵᠣᠬᠢᠬᠤ ᠮᠠᠰᠢᠨ ᠲᠣᠨᠣᠭᠯᠠᠯ ᠢ᠋ᠶ᠋ᠠᠷ ᠠᠪᠢᠶᠠᠨ ᠤ᠋ ᠪᠠᠢᠳᠠᠯ ᠢ᠋ ᠲᠣᠭᠲᠠᠩᠭᠢ ᠪᠠᠷ ᠪᠢᠰᠢ ᠬᠠᠷᠢᠨ ᠵᠣᠬᠢᠬᠤ ᠠᠪᠢᠶᠠᠨ ᠤ᠋ ᠬᠣᠯᠪᠣᠯᠳᠤᠭᠠᠨ ᠳ᠋ᠤ᠌ ᠬᠥᠳᠡᠯᠦᠩᠭᠦᠢ ᠪᠡᠷ ᠰᠤᠳᠤᠯᠬᠤ᠂ ᠠᠪᠢᠶᠠᠨ ᠤ᠋ ᠬᠣᠯᠪᠣᠯᠳᠤᠭᠠᠨ ᠳ᠋ᠤ᠌ ᠢᠯᠡᠷᠡᠬᠦ ᠵᠣᠬᠢᠬᠤ ᠲᠣᠭᠠ ᠪᠠᠷᠢᠮᠲᠠ ᠶ᠋ᠢᠨ ᠪᠦᠷᠢᠳᠬᠡᠯ ᠢ᠋ᠶ᠋ᠡᠷ ᠪᠣᠳᠠᠲᠤ ᠪᠠᠢᠳᠠᠯ ᠢ᠋ ᠲᠣᠳᠣᠷᠬᠠᠢᠯᠠᠬᠤ ᠪᠣᠯᠤᠭᠰᠠᠨ ᠨᠢ ᠠᠳᠠᠯᠢ ᠪᠤᠰᠤ ᠦᠵᠡᠯᠲᠡ ᠰᠠᠨᠠᠯ ᠢ᠋ ᠨᠢᠭᠡᠳᠬᠡᠨ ᠲᠥᠪᠯᠡᠷᠡᠭᠦᠯᠵᠦ᠂ ᠰᠤᠳᠤᠯᠭᠠᠨ ᠤ᠋ ᠠᠵᠢᠯ ᠢ᠋ ᠡᠷᠴᠢᠮᠵᠢᠭᠦᠯᠵᠦ᠂ ᠠᠪᠢᠶᠠᠨ ᠤ᠋ ᠰᠤᠳᠤᠯᠤᠯ ᠢ᠋ ᠤᠯᠠᠮ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠴᠢᠨᠠᠷ ᠲᠠᠢ ᠪᠥᠭᠡᠳ ᠪᠣᠯᠭᠠᠬᠤ ᠪᠣᠯᠤᠮᠵᠢ ᠲᠠᠢ ᠪᠣᠯᠭᠠᠵᠠᠢ᠃
ᠲᠤᠷᠰᠢᠯᠲᠠ ᠶ᠋ᠢᠨ ᠠᠪᠢᠶᠠ ᠵᠦᠢ ᠪᠣᠢ ᠪᠣᠯᠤᠭᠠᠳ ᠵᠠᠭᠤ ᠭᠠᠷᠤᠢ ᠵᠢᠯ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠠᠪᠢᠶᠠᠨ ᠤ᠋ ᠰᠤᠳᠤᠯᠭᠠᠨ ᠳ᠋ᠤ᠌ ᠬᠡᠷᠡᠭᠯᠡᠭᠳᠡᠭᠰᠡᠨ ᠨᠢ ᠣᠢᠷᠠ ᠶ᠋ᠢᠨ ᠵᠢᠯ ᠦ᠋ᠳ ᠦ᠋ᠨ ᠤᠴᠢᠷ ᠪᠢᠯᠡ᠃ ᠡᠭᠦᠨ ᠳ᠋ᠦ᠍᠂ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠤᠷᠰᠢᠯᠲᠠ ᠶ᠋ᠢᠨ ᠠᠪᠢᠶᠠᠨ ᠤ᠋ ᠰᠤᠳᠤᠯᠤᠯ ᠨᠢ ᠭᠣᠣᠯᠳᠠᠭᠤ ᠪᠠᠷᠢᠮᠵᠢᠶᠠ ᠠᠪᠢᠶᠠᠨ ᠤ᠋ ᠰᠢᠨᠵᠢᠯᠡᠯ ᠳ᠋ᠦ᠍ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠰᠢᠨᠵᠢ ᠲᠡᠢ ᠶᠦᠮ᠃