ᠮᠣᠩᠭᠣᠯ ᠪᠢᠴᠢᠭ - ᠬᠡᠪᠳᠡᠬᠦ ᠤᠴᠢᠷ ᠦᠭᠡᠢ ᠪᠣᠰᠤᠭᠠ ᠪᠢᠴᠢᠭ – ᠪᠢᠮᠪᠠ ᠶᠢᠨ ᠰᠠᠷᠠᠨᠲᠤᠶᠠᠭᠠ Монгол бичиг - Хэвтэх учиргүй босоо бичиг – Бямбын Сарантуяа
1182ᠮᠣᠩᠭᠣᠯ ᠪᠢᠴᠢᠭ - ᠬᠡᠪᠳᠡᠬᠦ ᠤᠴᠢᠷ ᠦᠭᠡᠢ ᠪᠣᠰᠤᠭᠠ ᠪᠢᠴᠢᠭ
ᠪᠤᠭᠤᠷᠤᠯ ᠲᠡᠦᠬᠡ ᠶ᠋ᠢᠨ ᠡᠭᠡᠳᠡᠷᠡᠭᠡᠨᠲᠦ ᠬᠦᠷᠳᠦᠨ ᠳ᠋ᠦ᠍
ᠪᠥᠬᠥᠢᠵᠦ ᠨᠣᠮᠣᠬᠠᠷᠠᠭᠠ ᠦᠭᠡᠢ ᠪᠣᠰᠤᠭᠠ ᠪᠢᠴᠢᠭ
ᠡᠨᠡ ᠯᠡ ᠮᠣᠩᠭᠣᠯ ᠤ᠋ᠨ ᠢᠵᠠᠭᠤᠷ ᠬᠡᠯᠡᠨ ᠳ᠋ᠦ᠍
ᠡᠪ ᠦ᠋ᠨ ᠭᠠᠩᠨᠠᠭᠠᠰᠤ ᠰᠢᠭ᠋
ᠡᠪᠴᠡᠵᠦ ᠳᠠᠭᠠᠴᠢᠬᠰᠠᠨ ᠮᠣᠩᠭᠣᠯ ᠪᠢᠴᠢᠭ
ᠲᠦᠮᠡᠨ ᠭᠠᠰᠠᠯᠠᠩ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠱᠠᠵᠠᠭᠤᠷ ᠵᠠᠭᠤᠨ ᠥᠨᠳᠡᠢᠬᠦ
ᠲᠡᠭᠦᠯᠳᠡᠷ ᠮᠣᠩᠭᠣᠯ ᠤ᠋ᠨ ᠪᠣᠰᠤᠭᠠ ᠬᠡᠢᠮᠣᠷᠢ ᠨᠢ ᠪᠣᠯᠵᠤ ᠲᠤᠯᠤᠭᠰᠠᠨ ᠶᠤᠮ
ᠪᠤᠳᠠᠩᠲᠤ ᠠᠯᠤᠰ ᠤ᠋ᠨ ᠰᠦᠮᠡᠯᠵᠡᠬᠦ ᠲᠡᠳᠦᠢ ᠢᠷᠡᠭᠡᠳᠦᠢ ᠳ᠋ᠦ᠍ ᠴᠤ᠌
ᠪᠤᠷᠬᠠᠨ ᠤ᠋ ᠳᠦᠷᠢ ᠰᠢᠭ ᠲᠣᠳᠣᠷᠠᠨ ᠳᠤᠷᠠᠢᠬᠤ ᠤᠴᠢᠷ ᠲᠠᠢ ᠶᠤᠮ
ᠣᠶᠤᠨᠲᠤ ᠳᠡᠯᠡᠬᠡᠢ ᠶ᠋ᠢᠨ ᠡᠷᠳᠡᠮ ᠦ᠋ᠨ ᠭᠡᠭᠡ
ᠬᠡᠪᠲᠡᠵᠦ ᠮᠥᠯᠬᠥᠨ ᠰᠠᠴᠤᠷᠠᠵᠤ ᠪᠠᠢᠬᠤ ᠳ᠋ᠤ᠌
ᠣᠷᠴᠢᠯᠠᠩ ᠤ᠋ᠨ ᠶᠠᠪᠤᠳᠠᠯ ᠢ᠋ ᠳᠡᠭᠡᠷᠡ ᠡᠴᠡ ᠨᠢ ᠲᠣᠯᠢᠳᠠᠬᠤ ᠭᠡᠰᠡᠨ ᠰᠢᠭ
ᠴᠣᠷᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠵᠣᠭᠰᠣᠵᠤ ᠦᠯᠡᠳᠡᠭᠰᠡᠨ ᠪᠣᠰᠤᠭᠠ ᠪᠢᠴᠢᠭ
ᠵᠠᠭᠤᠨ ᠵᠠᠭᠤᠨ ᠢ᠋ ᠥᠷᠲᠡᠭᠡᠯᠡᠭᠰᠡᠨ ᠲᠠᠯᠠ ᠶ᠋ᠢᠨ ᠬᠥᠬᠡ ᠰᠠᠯᠬᠢᠨ ᠨᠢ
ᠵᠤᠯᠵᠠᠭᠠᠨ ᠡᠪᠡᠰᠦᠨ ᠦ᠌ ᠦᠵᠦᠭᠦᠷ ᠢᠮᠡᠷᠦᠨ ᠢᠮᠡᠷᠦᠨ ᠳᠣᠮᠣᠭ ᠬᠦᠦᠷᠨᠢᠬᠦ ᠰᠢᠭ
ᠵᠤᠷᠪᠤᠰ ᠴᠠᠭᠠᠨ ᠲᠤᠶᠠᠭᠠᠲᠤ ᠲᠩᠷᠢ ᠶ᠋ᠢᠨ ᠬᠢᠯᠢ ᠳ᠋ᠦ᠍ ᠪᠦᠷᠢᠯᠳᠦᠭᠰᠡᠨ
ᠵᠠᠶᠠᠭᠠ ᠪᠤᠶᠠᠨᠲᠤ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠮᠢᠨᠢ
ᠲᠠᠰᠤᠷᠠᠬᠤ ᠤᠴᠢᠷ ᠦᠭᠡᠢ ᠦᠷᠭᠦᠯᠵᠢᠯᠡᠯ
ᠬᠥᠬᠡ ᠲᠣᠯᠪᠣᠲᠤ ᠮᠣᠩᠭᠣᠯ ᠬᠥᠮᠦᠨ ᠳ᠋ᠦ᠍
ᠤᠬᠠᠭᠠᠷᠠᠯ ᠢ᠋᠂ ᠤᠶᠠᠷᠠᠯ ᠢ᠋᠂ ᠠᠭᠤᠴᠢᠯᠠᠯ ᠢ᠋
ᠰᠢᠪᠡᠨᠡᠨ ᠰᠢᠪᠡᠨᠡᠨ ᠥᠭᠦᠯᠡᠬᠦ ᠬᠢᠷᠢ ᠨᠢ
ᠬᠠᠳᠬᠤᠯᠳᠤᠬᠤ ᠳᠠᠢᠰᠦᠨ ᠴᠢᠨᠢ
ᠬᠠᠷᠢ ᠳ᠋ᠤ᠌ ᠪᠣᠢ ᠶ᠋ᠢ ᠰᠠᠨᠠᠭᠤᠯᠤᠨ ᠬᠡᠯᠡᠬᠦ
ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠮᠡᠲᠦ ᠨᠢᠳᠦ ᠴᠠᠪᠴᠢᠯ ᠦᠭᠡᠢ
ᠨᠢᠷᠤᠭᠤ ᠴᠢᠬᠡ ᠵᠣᠭᠰᠣᠨ᠂ ᠭᠡᠵᠢᠭᠡ ᠪᠡᠨ ᠬᠡᠢᠰᠬᠡᠵᠦ
ᠭᠡᠳᠡᠰᠦ ᠪᠡᠨ ᠲᠦᠷᠢᠵᠦ ᠰᠢᠳᠦ ᠪᠡᠨ ᠵᠠᠭᠤᠵᠤ
ᠰᠢᠯᠪᠢ ᠪᠡᠨ ᠲᠠᠰᠤᠷᠠᠲᠠᠯᠠ ᠵᠢᠭᠡᠵᠤ
ᠰᠦᠯᠳᠡ ᠬᠡᠢᠮᠣᠷᠢ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠮᠣᠩᠭᠣᠯ ᠢ᠋ᠶ᠋ᠠᠨ ᠲᠤᠯᠤᠭᠰᠠᠨ ᠪᠣᠰᠤᠭᠠ ᠪᠢᠴᠢᠭ
ᠲᠢᠲᠢᠮ ᠡᠴᠡ ᠰᠡᠭᠦᠯ ᠬᠦᠷᠲᠡᠯᠡ
ᠦᠶᠡ ᠬᠣᠯᠪᠣᠨ ᠦᠭᠡ ᠪᠦᠲᠦᠭᠡᠵᠦ
ᠬᠠᠭᠠᠳ ᠠ᠋ᠴᠠ ᠬᠠᠷᠠᠴᠤ ᠣᠯᠠᠨ ᠢ᠋ ᠬᠦᠷᠲᠡᠯᠡ
ᠦᠰᠦᠭ ᠬᠣᠯᠪᠣᠨ ᠦᠶᠡ ᠳᠠᠮᠵᠢᠨ ᠤᠩᠰᠢᠭᠳᠠᠭᠰᠠᠨ
ᠨᠠᠷᠠᠨ ᠤ᠋ ᠰᠠᠴᠤᠷᠠᠭ ᠮᠡᠲᠦ ᠪᠣᠮᠠᠨ ᠵᠦᠭ ᠲᠡᠭᠡᠨ ᠳᠡᠯᠭᠡᠷᠡᠭᠰᠡᠨ
ᠨᠠᠵᠢᠭ ᠮᠤᠩᠬᠠᠭ ᠤ᠋ᠨ ᠬᠠᠷᠠᠩᠭᠤᠢ ᠶ᠋ᠢ ᠭᠡᠷᠡᠯᠲᠦᠭᠦᠯᠦᠨ ᠭᠡᠢᠭᠦᠯᠦᠭᠰᠡᠨ
ᠲᠡᠭᠦᠨ ᠦ᠌ ᠳᠣᠣᠷᠠ ᠲᠦᠮᠡᠨ ᠠᠭᠲᠠᠨ ᠤ᠋ ᠲᠣᠭᠣᠰᠣᠨ ᠳ᠋ᠤ᠌
ᠤᠤᠬᠠᠢ ᠶᠠᠭᠤ ᠪᠠᠨ ᠬᠠᠲᠠᠭᠠᠭᠰᠠᠨ
ᠮᠣᠷᠢᠲᠠᠨ ᠮᠣᠩᠭᠣᠯ ᠤ᠋ᠨ ᠬᠡᠢᠮᠣᠷᠢ ᠰᠢᠭ᠋
ᠲᠡᠭᠦᠯᠳᠡᠷ ᠣᠷᠴᠢᠯᠠᠩ ᠤ᠋ᠨ ᠡᠯᠢᠭᠡᠨ ᠳᠡᠭᠡᠷᠡ
ᠬᠡᠪᠲᠡᠬᠦ ᠮᠥᠯᠬᠥᠬᠦ ᠤᠴᠢᠷ ᠦᠭᠡᠢ
ᠪᠣᠰᠤᠭᠠ ᠪᠢᠴᠢᠭ ᠮᠢᠨᠦ᠂
ᠮᠣᠩᠭᠣᠯ ᠪᠢᠴᠢᠭ ᠮᠢᠨᠦ
ᠰᠢᠯᠦᠭ ᠤᠶᠠᠩᠭᠠᠯᠠᠭᠴᠢ᠄ ᠣᠶᠤᠩᠬᠤᠸᠡᠷ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠷᠳᠡᠮᠲᠦ
ᠬᠢᠨᠠᠭᠴᠢ᠄ ᠵᠢᠩᠯᠢᠬᠤᠸᠠᠷ