ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -7
171ᠦᠯᠦ ᠤᠨᠲᠠᠷᠠᠬᠤ ᠦᠵᠡᠯ ᠰᠠᠨᠠᠭᠠ
《ᠲᠥᠷᠥ ᠤᠯᠤᠰ ᠤ᠋ᠨ ᠭᠡᠵᠦ ᠬᠡᠩᠬᠡᠭᠯᠡᠵᠦ᠂ ᠬᠡᠩᠬᠡᠭᠯᠡᠵᠦ ᠡᠴᠦᠰ ᠲᠦ᠋ᠨᠢ ᠪᠢ ᠶᠠᠭᠤ ᠦᠵᠡᠪᠡ?》 ᠬᠡᠨ ᠳ᠋ᠦ᠍ ᠴᠦ᠍ ᠭᠡᠮ ᠲᠡᠢ ᠶᠠᠭᠤᠮᠠ ᠬᠢᠵᠦ ᠴᠢᠳᠠᠭᠠ ᠦᠭᠡᠢ ᠠᠲᠠᠯᠠ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ ᠦᠵᠡᠪᠡ᠃ ᠲᠥᠷᠥ᠂ ᠤᠯᠤᠰ ᠲᠥᠷᠥ ᠭᠡᠵᠦ ᠡᠯᠳᠡᠪ ᠱᠡᠯᠳᠡᠪ ᠢ᠋ᠶ᠋ᠡᠷ ᠳᠡᠮᠡᠢ ᠬᠡᠨᠡᠭᠡᠷᠬᠡᠬᠦ ᠪᠡᠨ ᠪᠣᠯᠢᠶᠠ ᠪᠠᠢᠵᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠠᠮᠢᠳᠤᠷᠠᠬᠤ ᠶ᠋ᠢᠨ ᠡᠷᠬᠡ ᠶ᠋ᠢ ᠳᠠᠭᠠᠨ ᠠᠯᠪᠠ ᠬᠠᠭᠠᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠠᠯᠠᠭᠠ᠃
《ᠲᠥᠷᠥ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ ᠠᠮᠢᠳᠤ ᠬᠥᠮᠦᠨ ᠬᠥᠲᠥᠯᠬᠦ ᠪᠣᠯᠪᠠᠴᠤ᠂ ᠲᠥᠷᠥ ᠤᠯᠤᠰ ᠲᠣᠭᠲᠠᠨᠢᠭᠰᠠᠨ ᠰᠠᠭᠤᠷᠢ ᠨᠢ ᠠᠮᠢ ᠪᠡᠶᠡ ᠬᠠᠢᠷᠠ ᠦᠭᠡᠢ ᠵᠢᠳᠬᠦᠨ ᠦᠬᠦᠵᠦ ᠦᠷᠡᠭᠳᠡᠭᠰᠡᠳ ᠦ᠋ᠨ ᠶᠠᠰᠤ ᠴᠢᠮᠦᠭᠡᠨ ᠳᠡᠭᠡᠷᠡ ᠪᠠᠢᠳᠠᠭ》 ᠭᠡᠵᠦ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ ᠠᠮᠢᠰᠬᠤᠯ ᠬᠤᠷᠢᠶᠠᠬᠤ ᠳ᠋ᠠᠭᠠᠨ ᠥᠭᠦᠯᠡᠭᠰᠡᠨ ᠪᠤᠰᠤ ᠤᠤ? ᠡᠨᠡ ᠦᠨᠡᠨ᠃ ᠮᠠᠨᠵᠤ ᠶ᠋ᠢᠨ ᠡᠰᠡᠷᠭᠦ ᠲᠡᠮᠡᠴᠡᠭᠰᠡᠨ ᠬᠡᠴᠢᠨᠡᠭᠡᠨ ᠣᠯᠠᠨ ᠬᠥᠮᠦᠨ ᠦ᠌ ᠠᠮᠢ ᠳᠡᠮᠡᠢ ᠦᠷᠡᠭᠳᠡᠪᠡ᠃ ᠦᠬᠦᠵᠦ ᠦᠬᠦᠵᠦ ᠶᠣᠰᠣᠲᠠᠢ ᠯᠠ ᠲᠡᠳᠡᠨ ᠦ᠌ ᠶᠠᠰᠤ ᠴᠢᠮᠦᠭᠡᠨ ᠳᠡᠭᠡᠷᠡ ᠠᠦ᠋ᠲ᠋ᠣᠨᠣᠮᠢᠲᠤ ᠲᠥᠷᠥ ᠲᠣᠭᠲᠠᠪᠠ᠃ ᠳᠠᠷᠠᠭᠠ ᠨᠢ ᠭᠠᠮᠢᠩ ᠤ᠋ᠨ ᠡᠰᠡᠷᠭᠦ ᠲᠡᠮᠡᠴᠡᠭᠰᠡᠨ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠠᠮᠢ ᠦᠷᠡᠭᠳᠡᠪᠡ᠃ ᠵᠦᠭᠡᠷ ᠰᠠᠯᠬᠢᠨ ᠳ᠋ᠤ᠌ ᠪᠢ ᠬᠦᠷᠲᠡᠯᠡ᠁ ᠬᠣᠢᠰᠢᠳᠠ ᠪᠠᠰᠠ ᠰᠢᠨᠡ ᠲᠡᠮᠡᠴᠡᠯ ᠭᠠᠷᠤᠨ ᠰᠢᠨᠡ ᠪᠡᠷ ᠦᠷᠡᠭᠳᠡᠵᠦ ᠡᠬᠢᠯᠡᠭᠡᠳ ᠡᠴᠦᠰ ᠲᠦ᠋ᠨᠢ ᠲᠥᠷᠥ ᠲᠣᠭᠲᠠᠨᠢᠨᠠ᠃ ᠲᠡᠢᠨᠬᠦ ᠦᠬᠦᠭᠰᠡᠳ ᠪᠦᠷᠢ ᠪᠡᠷ ᠢ᠋ᠶ᠋ᠡᠨ ᠭᠠᠪᠢᠶᠠ ᠲᠠᠢ ᠪᠣᠯᠪᠠᠴᠤ ᠪᠢ ᠦᠬᠦᠵᠦ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠠᠮᠢᠳᠤ ᠦᠯᠡᠳᠡᠭᠰᠡᠨ ᠨᠢ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠬᠥᠲᠥᠯᠳᠡᠭ ᠭᠡᠪᠡᠴᠦ ᠪᠢ ᠪᠠᠰᠠ ᠲᠡᠭᠦᠪᠡᠷ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠠᠯᠢ ᠠᠯᠢᠨ ᠤ᠋ ᠬᠢᠨᠢ ᠬᠡᠷᠡᠭ ᠠᠯᠠᠭᠠ᠃ ᠨᠠᠳᠠ ᠮᠡᠲᠦ ᠶ᠋ᠢᠨ ᠵᠤᠯᠳᠠᠷᠠᠢ ᠡᠷᠡ ᠳ᠋ᠦ᠍ ᠠᠮᠠᠯᠠᠬᠤ ᠴᠤ᠌ ᠶᠠᠭᠤᠮᠠ ᠪᠢᠰᠢ ᠪᠠᠢᠨᠠ ᠰᠢᠦ᠃ ᠢᠩᠭᠢᠬᠦᠯᠡᠷ ᠶᠠᠭᠠᠬᠢᠬᠤ ᠪᠣᠢ? ᠣᠷᠣᠨ ᠨᠤᠲᠤᠭ ᠮᠠᠨᠢ ᠥᠷᠭᠡᠨ ᠳᠡᠯᠭᠡᠷ᠂ ᠠᠷᠠᠳ ᠲᠦᠮᠡᠨ ᠮᠠᠨᠢ ᠥᠭᠭᠢᠶᠡᠮᠦᠷ ᠪᠠᠶᠠᠨ᠂ ᠬᠠᠮᠢᠭᠠ ᠨᠢᠭᠡ ᠲᠡᠢ ᠨᠢ ᠣᠴᠢᠵᠤ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠬᠤ ᠮᠢᠬᠠ ᠪᠠᠨ ᠢᠳᠡᠭᠰᠡᠨ ᠠᠷᠠᠳ ᠪᠣᠯᠤᠶᠠ ᠪᠠᠢᠵᠠ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠱᠣᠷᠣᠩ ᠠ᠋ᠴᠠ ᠭᠠᠷᠤᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠪᠡᠨ ᠡᠬᠢᠯᠡᠨ ᠪᠣᠳᠣᠯᠠ᠃ ᠴᠠᠭᠠᠰᠢ ᠨᠢ ᠪᠦᠬᠦ ᠡᠳ᠋ ᠬᠣᠭᠰᠢᠯ ᠢ᠋ᠶ᠋ᠠᠨ ᠵᠠᠷᠤᠵᠤ ᠪᠣᠷᠣᠯᠠᠭᠤᠯᠪᠠᠯ ᠶᠠᠭᠤᠨ ᠳ᠋ᠤ᠌ ᠬᠦᠷᠬᠦ ᠶ᠋ᠢ ᠨᠢ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠵᠤᠨ ᠳ᠋ᠤᠨᠢ ᠴᠠᠭᠠᠨ ᠢᠳᠡᠭᠡ ᠲᠡᠢ᠂ ᠡᠪᠦᠯ ᠳ᠋ᠦ᠍ᠨᠢ ᠮᠢᠬᠠ ᠪᠣᠯᠤᠭᠠᠳ ᠯᠠ ᠶᠠᠪᠤᠳᠠᠭ ᠪᠣᠷᠣ ᠭᠡᠷᠲᠡᠨ ᠨᠦ᠍ᠭᠦᠳ ᠦ᠋ᠨ ᠨᠢᠭᠡ ᠨᠢ ᠪᠣᠯᠵᠤ ᠴᠢᠳᠠᠬᠤ ᠨᠢ ᠪᠦᠷ ᠴᠦ᠍ ᠠᠮᠲᠠᠲᠠᠢ ᠠᠵᠢ᠃
ᠪᠠᠯᠳᠠᠨᠴᠡᠷᠢᠩ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠬᠡᠯᠡᠨᠡ᠃ ᠬᠢᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠬᠡᠳᠦᠨ ᠳᠠᠪᠬᠤᠷ ᠪᠣᠳᠣᠵᠤ ᠠᠪᠤᠭᠠᠳ ᠴᠣᠬᠣᠮ ᠬᠦ᠌ ᠬᠢᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠡᠯᠡᠵᠦ ᠰᠤᠷᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠥᠪᠬᠡᠨ ᠳᠣᠲᠣᠷᠠ ᠪᠠᠨ ᠬᠠᠳᠠᠭᠠᠯᠠᠨᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠠᠷᠪᠠᠭᠠᠢ ᠭᠡᠭᠴᠢ ᠪᠠᠢᠭᠠ ᠪᠢᠯᠡ᠃ ᠡᠨᠡ ᠠᠷᠪᠠᠭᠠᠢ ᠲᠡᠷᠡ ᠵᠢᠯ ᠰᠤᠪᠤᠷᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠦᠬᠦᠵᠦ ᠬᠡᠪᠲᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠠᠮᠢᠨ ᠳ᠋ᠤᠨᠢ ᠣᠷᠣᠭᠰᠠᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠱᠣᠷᠣᠩ ᠳ᠋ᠤ᠌ ᠪᠠᠢᠬᠤ ᠳ᠋ᠤᠨᠢ ᠬᠣᠭᠣᠯᠠ ᠵᠥᠭᠡᠭᠡᠭᠰᠡᠨ᠂ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ᠨᠢ ᠭᠡᠷ ᠲᠦ᠋ᠨᠢ ᠤᠭᠲᠤᠨ ᠠᠪᠤᠭᠰᠠᠨ᠂ ᠣᠳᠣ ᠪᠣᠯᠬᠣᠷ ᠪᠠᠭᠰᠢ ᠠ᠋! ᠭᠡᠵᠦ ᠳᠠᠭᠤᠳᠠᠬᠤ ᠲᠡᠳᠦᠢ ᠦᠭᠡᠢ ᠬᠤᠪᠢ ᠶ᠋ᠢᠨ ᠬᠥᠳᠡᠯᠮᠦᠷᠢ ᠢᠷᠭᠠ ᠬᠢᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠪᠠᠷ ᠳᠡᠷᠭᠡᠳᠡ ᠨᠢ ᠰᠠᠭᠤᠨ ᠬᠣᠭᠣᠯᠠ ᠤᠮᠳᠠ ᠶ᠋ᠢ ᠨᠢ ᠬᠢᠨᠡ᠃
ᠥᠭᠡᠷᠡ ᠨᠢᠭᠡ ᠵᠦᠢᠯ ᠢ᠋ ᠥᠭᠦᠯᠡᠪᠡᠯ ᠱᠣᠷᠣᠩ ᠠ᠋ᠴᠠ ᠭᠠᠷᠤᠭᠰᠠᠨ ᠤ᠋ ᠬᠢᠨᠢ ᠮᠠᠷᠭᠠᠰᠢ ᠳᠡᠭᠡᠷᠡ ᠴᠠᠭ ᠲᠤ ᠳᠣᠲᠣᠭᠠᠳᠤ ᠶᠠᠮᠤᠨ ᠳ᠋ᠤ᠌ ᠬᠠᠮᠲᠤ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠪᠢᠴᠢᠭᠡᠴᠢ ᠫᠠᠯᠢᠮᠠ ᠭᠡᠭᠴᠢ ᠪᠦᠬᠦᠯᠢ ᠪᠦᠲᠦᠨ ᠬᠣᠨᠢᠨ ᠤ᠋ ᠭᠦᠯᠤᠵᠡ ᠡᠭᠦᠷᠭᠡᠯᠡᠨ ᠠᠭᠠᠬᠢᠯᠠᠵᠤ ᠤᠭᠤᠬᠢᠯᠠᠨ ᠣᠷᠣᠵᠤ ᠢᠷᠡᠪᠡ᠃ ᠫᠠᠯᠢᠮᠠ ᠭᠦᠯᠤᠵᠡ ᠪᠡᠨ ᠭᠡᠷ ᠦ᠋ᠨ ᠬᠠᠨᠠ ᠲᠦᠰᠢᠭᠦᠯᠦᠨ ᠲᠠᠯᠪᠢᠭᠠᠳ ᠳᠠᠭᠤ ᠠᠯᠲᠠᠨ ᠮᠡᠨᠳᠦᠯᠡᠨ ᠵᠣᠯᠭᠠᠵᠤ ᠣᠷᠣᠨ᠂ ᠱᠣᠷᠣᠩ ᠠ᠋ᠴᠠ ᠠᠮᠤᠷ ᠮᠡᠨᠳᠦ ᠭᠠᠷᠴᠤ ᠢᠷᠡᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠪᠠᠶᠠᠷ ᠬᠥᠷ ᠪᠣᠯᠵᠤ ᠭᠠᠷᠤᠯᠠ᠃ ᠱᠣᠷᠣᠩ ᠳ᠋ᠤ᠌ ᠪᠠᠢᠬᠤ ᠳ᠋ᠤᠨᠢ ᠬᠣᠭᠣᠯᠠ ᠣᠷᠣᠭᠤᠯᠬᠤ ᠶ᠋ᠢ ᠬᠡᠴᠢᠨᠡᠭᠡᠨ ᠪᠣᠳᠣᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠢᠭᠳᠠᠬᠤ ᠠ᠋ᠴᠠ ᠠᠶᠤᠨ ᠠᠷᠠᠢ ᠯᠠ ᠲᠠᠷᠪᠠᠭᠠᠨ ᠤ᠋ ᠨᠦᠬᠡᠨ ᠳ᠋ᠦ᠍ ᠲᠣᠯᠣᠭᠠᠢ ᠪᠠᠨ ᠰᠢᠷᠭᠤᠭᠤᠯᠵᠤ ᠪᠠᠢᠭᠰᠠᠨ ᠦᠭᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠣᠳᠣ ᠮᠢᠬᠠ ᠠᠪᠴᠢᠷᠠᠵᠤ ᠪᠠᠢᠭᠠ ᠠᠵᠢ᠃
— ᠵᠥᠪᠬᠡᠨ ᠳᠡ᠂ ᠭᠠᠮᠢᠩ ᠤ᠋ᠳ ᠬᠡᠨ ᠢ᠋ ᠴᠦ᠍ ᠪᠠᠷᠢᠬᠤ ᠠ᠋ᠴᠠ ᠪᠠᠨ ᠦᠯᠦ ᠪᠤᠴᠠᠨᠠ᠃ ᠨᠠᠮᠠᠶ᠋ᠢ ᠪᠣᠯ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠠᠷᠢᠭᠰᠠᠨ ᠰᠢᠦ ᠭᠡᠬᠦ ᠳ᠋ᠦ᠍ ᠫᠠᠯᠢᠮᠠ᠄
— ᠲᠡᠢᠮᠦ ᠠ᠋᠂ ᠪᠠᠷᠢᠬᠤ ᠳ᠋ᠠᠭᠠᠨ ᠯᠠ ᠪᠠᠷᠢᠨᠠ ᠭᠡᠰᠡᠨ ᠠ᠋᠃ ᠭᠡᠪᠡᠴᠦ ᠴᠢ! ᠭᠡᠵᠦ ᠤᠴᠢᠷᠲᠠᠢᠬᠠᠨ ᠨᠢᠳᠦ ᠪᠡᠷ ᠠᠵᠢᠨ ᠢᠨᠢᠶᠡᠬᠦ ᠳ᠋ᠦ᠍ᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠳᠣᠲᠣᠷᠠ ᠠᠶᠠ ᠦᠭᠡᠢ ᠪᠣᠯᠪᠠ᠃
— ᠮᠥᠨ ᠴᠦ᠍ ᠲᠣᠭᠰᠢᠨ ᠪᠠᠢᠪᠠ ᠰᠢᠦ ᠭᠡᠳ ᠤᠭ ᠶᠠᠷᠢᠶᠠᠨ ᠢ᠋ ᠲᠠᠰᠤᠯᠬᠤ ᠭᠡᠲᠡᠯᠡ᠂ ᠠᠷᠭᠠ ᠦᠭᠡᠢ ᠳᠡ᠂ ᠠᠯᠢᠪᠠ ᠶᠠᠭᠤᠮᠠ ᠮᠥᠬᠥᠬᠦ ᠶ᠋ᠢᠨ ᠡᠮᠦᠨᠡ ᠳᠦᠷᠡᠯᠵᠡᠳᠡᠭ᠂ ᠲᠡᠷᠡ ᠶᠣᠰᠣᠭᠠᠷ ᠳᠣᠭᠰᠢᠷᠠᠭᠰᠠᠨ ᠬᠡᠷᠡᠭ᠃ ᠲᠡᠭᠡᠭᠡᠳ ᠴᠦ᠍ ᠮᠥᠬᠥᠯᠡ᠃ ᠭᠡᠲᠡᠯᠡ ᠣᠷᠣᠨ ᠳ᠋ᠤᠨᠢ ᠰᠢᠨᠡ ᠭᠠᠯ ᠠᠰᠠᠵᠤ ᠡᠬᠢᠯᠡᠬᠦ ᠶ᠋ᠢ ᠶᠠᠭᠠᠬᠢᠨᠠ᠃
— ᠶᠠᠭᠤᠨ ᠰᠢᠨᠡ ᠭᠠᠯ ᠪᠣᠢ?
— ᠪᠠᠷᠤᠨ ᠣᠩᠭᠧᠷᠠᠨ ᠰᠠᠶᠢᠬᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠠᠲᠠᠯᠠ ᠰᠦᠷᠡᠬᠡᠢ ᠳᠦᠷᠡᠯᠵᠡᠵᠦ ᠪᠠᠢᠨᠠ᠃
ᠪᠠᠯᠳᠠᠨᠴᠡᠷᠢᠩ《ᠪᠠᠢᠵᠠ! ᠡᠨᠡ ᠴᠢᠨᠢ ᠬᠡᠨ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠪᠠᠷᠤᠨ ᠣᠩᠭᠧᠷᠠᠨ ᠢ᠋ ᠶᠠᠭᠠᠷᠠᠨ ᠮᠠᠭᠤᠴᠢᠯᠠᠨᠠ ᠪᠣᠢ? ᠬᠠᠷᠢᠨ ᠨᠢᠭᠡ ᠮᠡᠳᠡᠭᠦᠨᠡ ᠨᠢᠮᠠᠵᠠᠪ ᠰᠢᠭ᠋ ᠲᠡᠳᠡᠨ ᠦ᠌ ᠲᠠᠩᠨᠠᠭᠤᠯ ᠪᠠᠢᠵᠤ ᠪᠣᠯᠬᠤ ᠪᠤᠰᠤ ᠤᠤ?》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠡᠵᠢᠭᠯᠡᠪᠡ᠃
— ᠠ ᠲᠡᠢᠮᠦ ᠤᠤ? ᠪᠢ ᠭᠡᠷ ᠡᠴᠡ ᠭᠠᠷᠬᠤ ᠦᠭᠡᠢ ᠪᠠᠢᠭᠠ ᠪᠣᠯᠤᠭᠠᠳ ᠶᠠᠭᠤ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠ ᠰᠢᠦ ᠳᠡ᠃
— ᠬᠡᠴᠡᠭᠦᠦ᠂ ᠬᠡᠴᠡᠭᠦᠦ᠂ ᠮᠠᠰᠢ ᠠᠶᠤᠯᠲᠠᠢ᠂ ᠬᠣᠢᠰᠢᠳᠠ ᠪᠠᠨ ᠤᠯᠠᠮ ᠰᠢᠷᠦᠭᠦᠰᠬᠦ ᠨᠢ ᠴᠦ᠍ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠭᠡᠳ ᠴᠠᠭᠠᠰᠢ ᠵᠠᠯᠭᠠᠨ ᠶᠠᠷᠢᠬᠤ ᠭᠡᠬᠦ ᠳ᠋ᠦ᠍ᠨᠢ᠄
— ᠪᠢ ᠴᠦ᠍ ᠮᠥᠨ ᠠᠶᠤᠯᠲᠠᠢ ᠶ᠋ᠢ ᠦᠵᠡᠪᠡ ᠰᠢᠦ ᠳᠡ ᠭᠡᠵᠦ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠭᠠᠳ ᠱᠣᠷᠣᠩ ᠤ᠋ᠨ ᠰᠣᠭᠲᠣᠭᠤ ᠪᠠᠭᠠᠲᠤᠷ᠂ ᠴᠡᠯᠮᠡᠭ ᠰᠢᠷᠠ ᠶ᠋ᠢᠨ ᠰᠣᠨᠢᠨ ᠶᠠᠪᠤᠳᠠᠯ ᠢ᠋ ᠦᠷᠭᠦᠯᠵᠢᠯᠡᠭᠦᠯᠦᠨ ᠶᠠᠷᠢᠭᠰᠠᠭᠠᠷ ᠫᠠᠯᠢᠮᠠ ᠪᠢᠴᠢᠭᠡᠴᠢ ᠶ᠋ᠢ ᠭᠠᠷᠭᠠᠪᠠ᠃
ᠠᠷᠤ ᠳ᠋ᠤᠨᠢ ᠠᠪᠴᠢᠷᠠᠭᠰᠠᠨ ᠬᠣᠨᠢᠨ ᠤ᠋ ᠮᠢᠬᠠ ᠨᠢ ᠦᠯᠡᠳᠡᠪᠡ᠃ ᠲᠠᠷᠭᠤᠨ ᠰᠢᠷᠭᠠᠯ ᠥᠭᠡᠬᠦᠨ ᠥᠩᠭᠡ ᠨᠢ ᠭᠡᠷ ᠦ᠋ᠨ ᠳᠤᠯᠠᠭᠠᠨ ᠳ᠋ᠤ᠌ ᠬᠠᠢᠯᠤᠮᠬᠠᠲᠠᠨ ᠪᠠᠢᠭᠠ ᠶ᠋ᠢᠨ ᠴᠠᠭᠠᠨᠠ ᠨᠢᠭᠡ ᠲᠠᠩᠨᠠᠭᠤᠯ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠨ ᠰᠡᠵᠢᠭ ᠬᠦᠷᠦᠨᠡ᠃ ᠭᠡᠲᠡᠯᠡ ᠭᠠᠳᠠᠭᠤᠷ ᠨᠡᠭᠡᠷᠡᠨ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠲᠡᠭᠦᠨ ᠢ᠋ ᠡᠷᠬᠡ ᠦᠭᠡᠢ ᠮᠡᠳᠡᠭᠦᠰᠢᠲᠡᠢ ᠪᠠᠢᠬᠤ ᠲᠤᠯᠠ ᠬᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠯ ᠦᠭᠡᠢ ᠵᠥᠪᠬᠡᠨ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠪᠠᠷ ᠰᠢᠢᠳᠪᠦᠷᠢᠯᠡᠨ ᠭᠡᠷ ᠡᠴᠡ ᠭᠠᠷᠪᠠ᠃ ᠲᠡᠭᠡᠭᠡᠳ ᠶᠠᠭᠤ ᠦᠵᠡᠪᠡ᠃ ᠶᠠᠳᠠᠭᠤ ᠭᠤᠲᠤᠯᠴᠢᠨ ᠬᠣᠭ ᠳᠡᠭᠡᠷᠡ ᠨᠢᠳᠦ ᠪᠦᠯᠲᠡᠯᠵᠡᠭᠦᠯᠦᠨ ᠪᠠᠷᠬᠢᠷᠠᠵᠤ᠂ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠠᠮᠢ ᠶ᠋ᠢ ᠨᠢ ᠠᠪᠬᠤ᠂ ᠠᠯᠠᠭᠤᠯᠬᠤ ᠬᠣᠶᠠᠷ ᠳᠡᠭᠡᠷᠡ ᠡᠭᠡᠯᠵᠢᠯᠡᠨ ᠱᠤᠤᠭᠢᠯᠳᠤᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠡᠰᠡ ᠲᠡᠰᠪᠦᠷᠢᠯᠡᠭᠰᠡᠨ ᠠᠵᠢ᠃ ᠬᠥᠮᠦᠰ ᠤᠴᠢᠷ ᠮᠡᠳᠡᠭᠦᠯᠬᠦ᠂ ᠬᠣᠢᠰᠢᠳᠠ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠳᠡᠮᠡᠢ ᠰᠢᠢᠳᠬᠡᠭᠦᠯᠬᠦ ᠦᠭᠡᠢ ᠪᠣᠯᠭᠠᠬᠤ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠪᠠᠬᠠᠨ ᠢ᠋ ᠶᠠᠷᠢᠵᠤ ᠪᠠᠢᠭᠠᠳ ᠣᠷᠣᠰ᠂ ᠮᠣᠩᠭᠣᠯ ᠬᠣᠶᠠᠷ ᠨᠣᠶᠠᠨ ᠤ᠋ ᠪᠠᠷᠠ ᠪᠠᠷ ᠲᠣᠯᠣᠭᠠᠢ ᠤᠷᠤᠭᠤ ᠪᠠᠨ ᠤᠰᠤ ᠬᠢᠭᠰᠡᠨ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠨ ᠵᠢᠭᠤᠲᠠᠵᠠᠢ᠃ ᠳᠠᠷᠠᠭᠠ ᠨᠢ ᠶᠠᠭᠤ ᠲᠠᠢ ᠳᠠᠭᠠᠷᠢᠯᠳᠤᠪᠠ? ᠮᠣᠩᠭᠣᠯ ᠳᠡᠪᠡᠯ ᠨᠥᠮᠥᠭᠡᠨ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠭᠤᠳᠤᠮᠵᠢ ᠥᠭᠰᠥᠨ ᠭᠦᠶᠦᠨ ᠠᠢᠰᠤᠢ᠂ ᠬᠣᠢᠨᠠ ᠠ᠋ᠴᠠ ᠨᠢ ᠰᠡᠯᠡᠮᠡ ᠳᠠᠯᠠᠢᠭᠰᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠬᠠᠷᠠ ᠬᠤᠷᠳᠤ ᠪᠠᠷ ᠳᠠᠪᠬᠢᠨ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠩᠭᠦᠲᠡ ᠪᠡᠨ ᠰᠡᠯᠡᠮᠡ ᠪᠠᠭᠤᠯᠭᠠᠵᠤ᠂ ᠲᠠᠯᠠ ᠮᠥᠷᠦᠨ ᠡᠴᠡ ᠨᠢ ᠠᠪᠤᠭᠠᠳ ᠪᠦᠰᠡᠯᠡᠬᠦ ᠶ᠋ᠢ ᠨᠢ ᠬᠦᠷᠲᠡᠯᠡ ᠴᠠᠪᠴᠢᠪᠠ᠃ ᠡᠨᠡ ᠶᠠᠭᠤᠲᠠᠢ ᠶᠡᠬᠡ ᠠᠶᠤᠮᠰᠢᠭ ᠪᠣᠢ? ᠳᠠᠪᠬᠢᠨ ᠣᠳᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠡᠷᠴᠢ ᠶ᠋ᠢ ᠪᠠᠭᠤᠯᠭᠠᠨ ᠡᠷᠭᠢᠵᠦ ᠢᠷᠡᠬᠦ ᠶ᠋ᠢ ᠨᠢ ᠦᠵᠡᠪᠡᠯ ᠭᠣᠣᠵᠤᠤ ᠪᠠᠭᠠᠲᠤᠷ᠃ ᠮᠣᠷᠢᠨ ᠠ᠋ᠴᠠ ᠪᠠᠭᠤᠨ ᠬᠠᠷᠠᠢᠵᠤ ᠰᠥᠭᠥᠳᠦᠨ ᠠᠮᠤᠷ ᠡᠷᠢᠬᠦ ᠳ᠋ᠦ᠍ᠨᠢ《ᠴᠢ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠴᠢᠨᠢ ᠡᠨᠡ ᠪᠣᠢ?》 ᠭᠡᠵᠦ ᠵᠠᠩᠳᠤᠷᠪᠠ᠃ ᠭᠣᠣᠵᠤᠤ ᠳᠡᠭᠡᠭᠰᠢ ᠥᠨᠳᠡᠢᠨ᠄
— ᠡᠨᠡ ᠤᠤ? ᠭᠡᠵᠦ ᠠᠯᠠᠭᠰᠠᠨ ᠬᠥᠮᠦᠨ ᠤᠷᠤᠭᠤ ᠪᠠᠨ ᠭᠢᠯᠯᠠᠮᠬᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠭᠡᠢ ᠡᠨᠡ ᠴᠢᠨᠢ ᠭᠠᠮᠢᠩ᠃ ᠴᠢ ᠲᠡᠷᠡ ᠭᠤᠲᠤᠯ ᠢ᠋ ᠨᠢ ᠬᠠᠷᠠᠯ ᠯᠠ ᠳᠠ! ᠠᠢᠯ ᠤ᠋ᠨ ᠪᠠᠢᠰᠢᠩ ᠤ᠋ᠨ ᠬᠥᠨᠳᠡᠢ ᠡᠴᠡ ᠭᠠᠷᠴᠤ ᠵᠢᠭᠤᠲᠠᠭᠰᠠᠨ ᠶᠤᠮ ᠭᠡᠵᠦ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠪᠠᠬᠠᠷᠬᠠᠬᠤ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠪᠡ᠃
ᠳᠤᠤᠭᠠᠷᠴᠤ ᠴᠤ᠌ ᠵᠠᠪᠳᠤᠯ ᠦᠭᠡᠢ ᠬᠣᠷᠣᠭᠠᠭᠳᠠᠭᠰᠠᠨ ᠲᠡᠷᠡ ᠬᠥᠮᠦᠨ ᠢ᠋ ᠬᠠᠷᠠᠪᠠᠯ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠭᠠᠮᠢᠩ ᠴᠡᠷᠢᠭ᠃ ᠭᠤᠲᠤᠯ ᠨᠢ ᠴᠦ᠍ ᠭᠠᠮᠢᠩ ᠱᠠᠬᠠᠢ᠃ ᠭᠡᠯᠡ ᠴᠦ᠍ ᠬᠥᠮᠦᠨ ᠦ᠌ ᠠᠮᠢ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠬᠠᠢᠷᠠᠨ ᠪᠥᠭᠡᠳ ᠲᠡᠢᠨ ᠳᠠᠭᠤᠰᠤᠭᠠᠳ ᠪᠠᠢᠬᠤ ᠳ᠋ᠤ᠌ ᠠᠯᠠᠭᠠᠳ ᠯᠠ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠪᠣᠳᠣᠪᠠᠴᠤ᠂ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠬᠡᠯᠡᠬᠦ ᠦᠭᠡ ᠡᠰᠡ ᠣᠯᠳᠠᠵᠠᠢ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠦᠷᠢ ᠡᠴᠡ ᠶᠡᠬᠡ ᠪᠠᠭᠠ ᠬᠥᠮᠦᠰ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠡᠷᠡᠭ ᠦ᠋ᠨ ᠲᠤᠬᠠᠢ ᠱᠠᠭᠰᠢᠶᠠᠨ ᠱᠤᠤᠭᠢᠶᠠᠨ ᠪᠣᠯᠤᠨ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠡ ᠭᠣᠣᠵᠤᠤ ᠶ᠋ᠢ ᠬᠠᠷᠠᠮᠠᠭᠴᠠ ᠪᠠᠨ ᠳᠠᠭᠤ ᠱᠣᠣ ᠪᠠᠨ ᠳᠠᠷᠤᠨᠠ᠃ ᠭᠣᠣᠵᠤᠤ ᠲᠡᠭᠦᠨ ᠢ᠋ ᠡᠰᠡ ᠠᠩᠬᠠᠷᠤᠨ《ᠲᠠ ᠮᠠᠨ ᠤ᠋ ᠳ᠋ᠤ᠌ ᠮᠣᠷᠢᠯᠠ! ᠪᠢ ᠲᠠᠨ ᠢ᠋ ᠵᠠᠯᠠᠬᠤ ᠶᠣᠰᠣᠲᠠᠢ! ᠮᠣᠷᠢ ᠪᠠᠷ ᠮᠢᠨᠢ ᠵᠠᠯᠠᠷᠠ!》 ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠢ᠋ ᠤᠷᠢᠪᠡ᠃ ᠠᠮᠠᠨ ᠠ᠋ᠴᠠ ᠨᠢ ᠠᠷᠢᠬᠢ ᠬᠠᠩᠬᠤᠯᠤᠨᠠ᠃
ᠣᠳᠣ ᠦᠵᠡᠪᠡᠯ ᠲᠡᠭᠦᠨ ᠳ᠋ᠦ᠍ ᠬᠠᠢᠷᠷᠠᠯᠠᠭᠤᠰᠢᠲᠠᠢ᠂ ᠦᠷᠦ ᠡᠪᠡᠳᠦᠯᠲᠡᠢ ᠶᠠᠭᠤ ᠴᠦ᠍ ᠦᠭᠡᠢ ᠬᠠᠷᠢᠨ ᠠᠶᠤᠮᠠᠷ᠃ ᠣᠯᠠᠨ ᠤ᠋ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠲᠡᠢ ᠮᠠᠷᠭᠤᠬᠤ ᠠ᠋ᠴᠠ ᠬᠠᠯᠠᠰᠢᠷᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠠᠪᠠ᠃
《ᠮᠠᠨ ᠤ᠋ ᠬᠢ》 ᠭᠡᠳᠡᠭ ᠨᠢ ᠶᠠᠭᠤ ᠪᠣᠢ? ᠳᠡᠭᠡᠷᠡ ᠴᠠᠭ ᠲᠤ ᠠᠯᠢ ᠨᠢᠭᠡ ᠲᠠᠮᠠᠭᠠ ᠶᠠᠮᠤᠨ ᠤ᠋ ᠬᠣᠭᠰᠢᠯ ᠠᠬᠤᠭᠤᠯᠵᠤ ᠪᠠᠢᠭᠰᠠᠨ ᠲᠣᠮᠣ ᠮᠣᠳᠣᠨ ᠭᠡᠷ᠃ ᠡᠨᠳᠡ ᠭᠣᠣᠵᠤᠤ ᠱᠣᠷᠣᠩ ᠳ᠋ᠤ᠌ ᠬᠠᠮᠲᠤ ᠵᠣᠪᠠᠯᠠᠩ ᠡᠳ᠋ᠯᠡᠭᠰᠡᠨ ᠳᠠᠷᠤᠭᠠ ᠨᠥᠬᠥᠳ ᠲᠡᠢ ᠪᠡᠨ ᠰᠠᠭᠤᠬᠤ ᠪᠣᠯᠵᠠᠢ᠃ ᠬᠡᠨ ᠨᠢ ᠪᠣᠯᠪᠠᠴᠤ ᠳᠤᠷᠠ ᠲᠠᠢ ᠴᠠᠭ ᠲᠠᠭᠠᠨ ᠭᠠᠳᠠᠭᠰᠢ ᠭᠠᠷᠤᠨ ᠡᠨᠳᠡ ᠲᠡᠨᠳᠡ ᠨᠢᠭᠤᠭᠳᠠᠵᠤ ᠦᠯᠡᠳᠡᠭᠰᠡᠨ ᠭᠠᠮᠢᠩ ᠢ᠋ ᠠᠩᠨᠠᠬᠤ ᠶ᠋ᠢᠨ ᠳᠡᠯᠢᠮ ᠳ᠋ᠦ᠍ ᠭᠠᠮᠢᠩ ᠳ᠋ᠤ᠌ ᠪᠤᠷᠤᠭᠤ ᠪᠠᠨ ᠬᠦᠯᠢᠶᠡᠨ ᠱᠣᠷᠣᠩ ᠠ᠋ᠴᠠ ᠭᠠᠷᠴᠤ ᠠᠮᠠ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠥᠭᠭᠦᠨ ᠴᠡᠷᠢᠭ ᠲᠤᠨᠢ ᠣᠷᠣᠭᠰᠠᠨ ᠥᠭᠡᠳᠡ ᠦᠭᠡᠢ ᠴᠡᠷᠢᠭ ᠦ᠋ᠳ ᠢ᠋ ᠣᠯᠵᠤ ᠠᠪᠴᠢᠷᠠᠨ ᠴᠡᠭᠡᠷᠯᠡᠭᠦᠯᠬᠦ ᠪᠥᠭᠡᠳ ᠠᠶᠠ ᠦᠭᠡᠢ ᠮᠠᠭᠤᠬᠠᠢ ᠪᠠᠷ ᠬᠣᠪᠯᠠᠨ ᠤᠷᠪᠠᠭᠰᠠᠳ ᠢ᠋ ᠠᠯᠠᠬᠤ ᠨᠢ ᠴᠦ᠍ ᠪᠠᠰᠠ ᠥᠪᠡᠷᠰᠡᠳ ᠦ᠋ᠨ ᠡᠷᠬᠡ ᠪᠣᠯᠵᠠᠢ᠃ ᠭᠠᠳᠠᠭᠠ ᠨᠢ ᠢᠷᠡᠬᠦ ᠳ᠋ᠦ᠍ ᠪᠠᠩᠵᠠ ᠳᠡᠰ ᠳᠡᠰ ᠪᠠᠭᠤᠵᠤ ᠥᠷᠥᠰᠢᠶᠡᠯ ᠭᠤᠶᠤᠨ ᠪᠠᠷᠬᠢᠷᠠᠬᠤ ᠰᠣᠨᠣᠰᠳᠠᠨᠠ᠃ ᠭᠣᠣᠵᠤᠤ ᠲᠦᠷᠦᠭᠦᠯᠡᠨ ᠣᠷᠣᠵᠤ《ᠪᠣᠯᠢ》 ᠭᠡᠵᠦ ᠵᠠᠩᠳᠤᠷᠪᠠ ᠪᠣᠯᠤᠯᠲᠠᠢ᠂ ᠬᠣᠢᠨᠠ ᠠ᠋ᠴᠠ ᠨᠢ ᠣᠷᠣᠬᠤ ᠳ᠋ᠤ᠌ ᠪᠠᠩᠵᠠᠳᠠᠭᠤᠯᠤᠭᠰᠠᠨ ᠬᠥᠮᠦᠨ ᠪᠣᠰᠤᠨ ᠥᠮᠥᠳᠥ ᠪᠡᠨ ᠲᠠᠲᠠᠨᠠ᠃ ᠴᠠᠭᠠᠨᠠ ᠠ᠋ᠴᠠ ᠨᠢ ᠬᠣᠷᠢ ᠭᠠᠷᠤᠢ ᠬᠥᠮᠦᠰ《ᠠᠮᠤᠷ ᠢ᠋ ᠠᠢᠯᠠᠳᠬᠠᠶᠠ》 ᠭᠡᠵᠦ ᠮᠡᠬᠦᠯᠵᠡᠨ ᠤᠭᠲᠤᠨᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠤᠷᠢᠳ ᠡᠮᠦᠨᠡ ᠡᠷᠬᠡ ᠦᠭᠡᠢ ᠦᠵᠡᠭᠳᠡᠭᠰᠡᠨ ᠪᠣᠯᠪᠠ ᠤᠤ ᠭᠡᠯᠲᠡᠢ ᠵᠢᠰᠦ ᠴᠢᠷᠠᠢ ᠪᠢᠰᠢᠭᠦᠢ ᠪᠠᠢᠨᠠ᠃ ᠦᠭᠡᠢ ᠴᠦ᠍ ᠭᠡᠰᠡᠨ ᠣᠷᠣᠨ ᠱᠣᠷᠣᠩ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠᠳ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠭᠠᠷᠤᠭᠰᠠᠨ ᠢ᠋ ᠨᠢ ᠮᠡᠳᠡᠵᠡᠢ᠃ ᠫᠤᠤ ᠵᠡᠪᠰᠡᠭ ᠡᠨᠳᠡ ᠲᠡᠨᠳᠡ ᠦᠭᠡᠢ ᠡᠯᠭᠦᠭᠡᠰᠦᠲᠡᠢ᠂ ᠳᠡᠪᠢᠰᠬᠡᠷ ᠬᠤᠴᠢᠯᠭᠠ ᠭᠠᠵᠠᠷ ᠢ᠋ᠶ᠋ᠠᠷ ᠬᠥᠭᠯᠡᠷᠡᠨᠡ᠃ ᠲᠡᠳᠡ ᠴᠥᠮ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ᠂ ᠣᠷᠣᠨ ᠱᠣᠷᠣᠩ᠂ ᠥᠯᠥᠰᠦᠭᠰᠡᠨ ᠵᠦᠳᠡᠷᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠠᠢᠪᠤᠩ ᠲᠠᠢᠪᠤᠩ ᠶᠠᠷᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠯᠠᠬᠤ ᠬᠢᠳᠤᠬᠤ ᠶ᠋ᠢ ᠬᠢᠲᠠᠳ ᠬᠠᠷᠢᠶᠠᠯ ᠵᠢᠷ ᠵᠠᠨᠤᠯᠬᠢᠯᠠᠨ ᠠᠮᠠ ᠪᠠᠨ ᠥᠮᠥᠯᠵᠡᠭᠦᠯᠦᠨ ᠱᠤᠤᠭᠢᠯᠳᠤᠬᠤ ᠨᠢ ᠲᠡᠳᠡᠨ ᠦ᠌ ᠶᠠᠷᠢᠶᠠᠨ ᠤ᠋ ᠭᠣᠣᠯ ᠪᠣᠯᠵᠠᠢ᠃ ᠣᠷᠣᠨ ᠱᠣᠷᠣᠩ ᠠ᠋ᠴᠠ ᠰᠠᠶᠢᠬᠠᠨ ᠭᠠᠷᠤᠭᠰᠠᠨ ᠤ᠋ ᠲᠡᠮᠳᠡᠭ ᠪᠣᠯᠬᠤ ᠥᠯᠥᠨ ᠴᠣᠩᠬᠢᠭᠠᠷ ᠴᠢᠷᠠᠢ ᠳ᠋ᠠᠭᠠᠨ ᠬᠤᠷᠴᠠ ᠨᠢᠳᠦ ᠭᠢᠯᠠᠯᠵᠠᠭᠤᠯᠤᠨ ᠵᠦᠭ ᠪᠦᠷᠢ ᠡᠴᠡ《 ᠵᠠ᠂ ᠵᠠ》 ᠭᠡᠵᠦ ᠬᠦᠨᠳᠦᠳᠬᠡᠬᠦ ᠨᠢ ᠬᠠᠯᠠᠭᠴᠤᠳ ᠠ᠋ᠴᠠ ᠳᠠᠪᠠᠭᠤ ᠲᠠᠢ ᠪᠠᠢᠪᠠᠴᠤ ᠲᠡᠷᠡ ᠳᠤᠮᠳᠠ ᠪᠠᠨ ᠮᠥᠨ ᠯᠡ ᠬᠠᠷᠢᠶᠠᠯᠲᠠᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠭᠡᠪᠡᠯ ᠡᠳᠡ ᠲᠦᠮᠡᠨ ᠪᠡᠷᠬᠡ ᠭᠠᠰᠢᠭᠤᠨ ᠤ᠋ ᠡᠰᠡᠷᠭᠦ ᠳᠠᠢᠳᠤᠨ ᠲᠤᠯᠤᠯᠳᠤᠭᠰᠠᠭᠠᠷ ᠶᠠᠪᠤᠭᠠᠳ ᠬᠠᠷᠢᠶᠠᠯ ᠦᠭᠡᠢ ᠲᠠᠢᠪᠤᠩ ᠬᠡᠯᠡᠯᠴᠡᠨ ᠶᠠᠷᠢᠯᠴᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠤᠯᠤᠰ ᠠᠵᠢ᠃
ᠡᠷᠬᠢᠮ ᠵᠣᠴᠢᠳ ᠢᠷᠡᠭᠰᠡᠨ ᠭᠡᠵᠦ ᠬᠣᠭᠣᠯᠠ ᠬᠢᠬᠦ ᠪᠣᠯᠬᠤ ᠳ᠋ᠠᠭᠠᠨ ᠮᠢᠬᠠ ᠶ᠋ᠢ ᠪᠦᠬᠦᠯᠢ ᠬᠦᠯᠤᠵᠡ ᠪᠡᠷ᠂ ᠭᠤᠯᠢᠷ ᠢ᠋ ᠱᠤᠤᠳᠠᠢ ᠪᠠᠷ ᠨᠢ ᠣᠷᠣᠭᠤᠯᠵᠤ ᠢᠷᠡᠨ᠂ ᠳᠤᠷᠠ ᠪᠦᠷᠢ ᠪᠡᠷ ᠬᠥᠳᠡᠯᠦᠨ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠬᠣᠭᠣᠯᠠ ᠪᠡᠯᠡᠳᠬᠡᠵᠦ᠂ ᠨᠠᠢᠷ ᠴᠡᠩᠭᠡᠯ ᠬᠢᠬᠦ ᠳ᠋ᠡᠭᠡᠨ ᠠᠷᠢᠬᠢ ᠶ᠋ᠢ ᠯᠦᠦ ᠪᠡᠷ ᠠᠪᠴᠢᠷᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠣᠷᠣᠵᠤ ᠢᠷᠡᠭᠰᠡᠨ ᠳᠠᠷᠤᠢ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠪᠲᠠᠭᠳᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠯ ᠲᠡᠳᠡᠨ ᠦ᠌ ᠴᠢᠩ ᠰᠡᠳᠬᠢᠯ ᠳ᠋ᠦ᠍ ᠠᠪᠲᠠᠭᠳᠠᠨ ᠢᠵᠢᠯᠢ ᠳᠠᠰᠤᠯ ᠪᠣᠯᠵᠤ ᠡᠬᠢᠯᠡᠭᠡᠳ ᠳᠠᠷᠠᠭᠠ ᠨᠢ ᠵᠢᠭᠠᠯ ᠵᠤᠭᠠ ᠠᠷᠢᠬᠢ ᠤᠤᠭᠤᠬᠤ ᠲᠠᠢ ᠪᠠᠨ ᠵᠡᠷᠭᠡ ᠬᠠᠨᠢ ᠨᠥᠬᠥᠳ ᠦ᠋ᠨ ᠳᠤᠮᠳᠠ ᠣᠷᠣᠭᠰᠠᠨ ᠲᠠᠢ ᠠᠳᠠᠯᠢ ᠪᠣᠯᠤᠯᠠ᠃ ᠡᠴᠡᠩᠬᠡᠢ ᠪᠡᠶᠡ ᠲᠡᠢ ᠶᠠᠩᠬᠢᠭᠠᠷ ᠴᠡᠭᠡᠵᠢ ᠲᠡᠢ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠡᠷᠡ ᠳᠣᠷᠣᠭᠰᠢ ᠤᠨᠵᠢᠭᠰᠠᠨ ᠰᠢᠩᠭᠡᠨ ᠰᠠᠬᠠᠯ ᠢ᠋ᠶ᠋ᠠᠨ ᠰᠡᠯᠭᠦᠯᠡᠨ ᠰᠢᠪᠲᠤᠷᠴᠤ ᠠᠪᠤᠭᠠᠳ᠂ ᠬᠤᠭᠤᠷᠴᠢ ᠵᠢᠩᠭᠢᠨᠡᠭᠦᠯᠵᠦ ᠭᠠᠷᠬᠤ ᠳ᠋ᠤ᠌᠂ ᠴᠥᠮ ᠬᠣᠭᠣᠯᠠᠢ ᠨᠡᠢᠯᠡᠭᠦᠯᠦᠨ᠂《ᠳ᠋ᠦᠩ ᠱᠠᠨ ᠬᠡ ᠬᠡ》 ᠭᠡᠳᠡᠭ ᠳᠠᠭᠤᠤ ᠶ᠋ᠢ ᠬᠥᠪᠤᠷᠡᠯᠳᠤᠭᠦᠯᠦᠨ ᠳᠠᠭᠤᠯᠠᠪᠠ᠃(《 ᠳ᠋ᠦᠩ ᠱᠠᠨ》 ᠭᠡᠵᠦ ᠵᠡᠭᠦᠨ ᠠᠭᠤᠯᠠ《ᠬᠡ᠂ ᠬᠡ》 ᠭᠡᠳᠡᠭ ᠨᠢ ᠠᠬᠠ) ᠥᠩᠭᠡᠷᠡᠭᠰᠡᠨ ᠵᠢᠷᠠᠨ ᠤ᠋ ᠥᠪᠥᠢ ᠮᠣᠩᠭᠣᠯ ᠳ᠋ᠤ᠌ ᠮᠠᠨᠵᠤ— ᠬᠢᠲᠠᠳ ᠤ᠋ᠨ ᠡᠰᠡᠷᠭᠦ ᠬᠥᠳᠡᠯᠦᠨ ᠨᠠᠰᠤᠨ ᠡᠴᠦᠰ ᠪᠣᠯᠲᠠᠯᠠ ᠪᠠᠨ ᠲᠡᠮᠡᠴᠡᠭᠰᠡᠨ ᠠᠷᠠᠳ ᠤ᠋ᠨ ᠪᠠᠭᠠᠲᠤᠷ ᠡᠷᠡ ᠶ᠋ᠢ ᠲᠠᠯᠠ ᠶ᠋ᠢᠨ ᠬᠢᠨ ᠨᠢ ᠳ᠋ᠦᠩ ᠱᠠᠨ ᠤ᠋ ᠳ᠋ᠡᠢᠸᠠᠩ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠥᠭᠡᠳ ᠡᠨᠡ ᠳᠠᠭᠤᠤ ᠲᠡᠷᠡ ᠡᠷᠡ ᠶ᠋ᠢᠨ ᠲᠤᠬᠠᠢ ᠠᠵᠢ᠃ ᠡᠬᠢᠯᠡᠭᠡᠳ ᠬᠠᠢᠷᠠ ᠳᠤᠷᠠᠯᠠᠯ᠂ ᠢᠨᠠᠭ ᠠᠮᠠᠷᠠᠭ ᠤᠶᠠᠩᠭᠠᠯᠠᠭᠰᠠᠨ ᠢ᠋ᠶ᠋ᠠᠨ ᠬᠠᠭᠠᠴᠠᠯ ᠲᠡᠮᠡᠴᠡᠯ ᠭᠠᠰᠠᠯᠠᠩ ᠵᠣᠪᠠᠯᠠᠩ ᠵᠠᠯᠭᠠᠵᠤ ᠠᠪᠤᠭᠠᠳ ᠪᠠᠰᠠ ᠲᠡᠢᠨ ᠲᠤᠯᠤᠯᠳᠤᠭᠠᠨ᠂ ᠠᠯᠠᠭᠠᠨ ᠬᠢᠲᠤᠭᠠᠨ᠃ ᠡᠭᠦᠨ ᠢ᠋ᠶ᠋ᠡᠨ ᠳᠠᠭᠤᠯᠠᠬᠤ ᠳ᠋ᠠᠭᠠᠨ ᠲᠡᠳᠡ ᠶᠡᠷᠦ ᠬᠥᠭᠵᠢᠯ ᠴᠡᠩᠭᠡᠯ ᠢ᠋ᠶ᠋ᠡᠷ ᠪᠢᠰᠢ᠂ ᠴᠥᠮ ᠤᠷᠤᠭᠤ᠂ ᠣᠢ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠯᠠ ᠳᠡᠭᠡᠭᠰᠢ ᠳᠣᠷᠣᠭᠰᠢ ᠨᠢ ᠡᠷᠭᠦᠨ ᠬᠥᠪᠤᠷᠡᠯᠳᠤᠭᠦᠯᠦᠨᠡ᠃ ᠢᠯᠠᠩᠭᠤᠶᠠ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠤᠭᠤᠴᠢᠷ ᠢ᠋ ᠮᠠᠰᠢ ᠴᠢᠳᠠᠮᠠᠭᠠᠢ ᠵᠢᠩᠭᠢᠨᠡᠭᠦᠯᠦᠭᠴᠢ ᠠᠬᠢᠮᠠᠭ ᠨᠠᠰᠤᠲᠠᠨ ᠨᠢᠳᠦ ᠠᠨᠢᠵᠤ ᠲᠣᠯᠣᠭᠠᠢ ᠤᠨᠠᠭᠠᠨ᠂ ᠴᠡᠭᠡᠵᠢ ᠵᠠᠢᠮᠤᠷᠠᠭᠤᠯᠬᠤ ᠨᠢ ᠲᠡᠷᠡ ᠳ᠋ᠦᠩ ᠱᠠᠨ ᠤ᠋ ᠡᠯᠳᠡᠪ ᠶᠠᠪᠤᠳᠠᠯ ᠢ᠋ ᠰᠡᠳᠬᠢᠯ ᠳ᠋ᠡᠭᠡᠨ ᠦᠵᠡᠵᠦ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠯᠲᠡᠢ᠃
ᠡᠨᠡ ᠪᠦᠬᠦᠨ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠤᠷᠠᠬᠳᠠᠯᠠ᠃《ᠡᠳᠡ ᠴᠢᠨᠢ ᠶᠠᠭᠤ ᠪᠣᠢ?》 ᠠᠯᠢ ᠬᠡᠳᠦᠢᠨ ᠥᠩᠭᠡᠷᠡᠭᠰᠡᠨ ᠭᠡᠪᠡᠴᠦ ᠳ᠋ᠦᠩ ᠱᠠᠨ! ᠳ᠋ᠦᠩ ᠱᠠᠨ ᠤ᠋ ᠲᠡᠮᠡᠴᠡᠯ ᠢ᠋ ᠵᠠᠯᠭᠠᠵᠤ ᠠᠪᠤᠭᠠᠳ ᠪᠠᠰᠠ ᠦᠵᠡᠭᠰᠡᠨ ᠵᠣᠪᠠᠯᠠᠩ᠂ ᠡᠳ᠋ᠯᠡᠭᠰᠡᠨ ᠭᠠᠰᠢᠭᠤᠨ ᠢ᠋ ᠨᠢ ᠡᠳ᠋ᠯᠡᠭᠰᠡᠨ ᠤᠯᠤᠰ ᠪᠤᠰᠤ ᠤᠤ? ᠭᠡᠲᠡᠯᠡ ᠡᠴᠦᠰ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠪᠣᠳᠣᠭᠳᠠᠨ ᠰᠡᠳᠬᠢᠯ ᠤᠷᠠᠭᠳᠠᠵᠤ ᠨᠢᠯᠪᠤᠰᠤ ᠬᠤᠷᠠᠯᠳᠤᠪᠠ᠃ ᠭᠡᠪᠡᠴᠦ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠪᠠᠨ ᠲᠠᠲᠠᠪᠠ᠃ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠰᠢᠨᠵᠢ ᠭᠡᠪᠡᠯ᠄《ᠬᠠᠢᠷᠠ ᠪᠠᠨ ᠳᠣᠲᠣᠷᠠ ᠪᠠᠨ ᠥᠰᠢᠶᠡ ᠪᠡᠨ ᠭᠠᠳᠠᠨᠠ ᠪᠠᠨ ᠬᠡᠴᠢᠨᠡᠭᠡᠨ ᠬᠦᠨᠳᠦ ᠰᠢᠷᠬᠠᠲᠤᠪᠠᠴᠤ ᠳᠠᠭᠤ ᠱᠣᠣ ᠦᠭᠡᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠬᠦᠯ ᠨᠢ ᠪᠣᠯᠪᠠᠴᠤ ᠲᠠᠢᠪᠤᠩ ᠪᠠᠢᠬᠤ ᠲᠠᠪᠢᠯᠠᠩᠲᠠᠢ ᠭᠡᠳᠡᠭ ᠪᠢᠰᠢ ᠪᠢᠯᠢᠤ? ᠭᠡᠲᠡᠯᠡ ᠪᠢ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ?》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠨᠢ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠵᠣᠭᠰᠣᠪᠠ᠃
ᠠᠱ᠌ᠢᠭᠦᠢ ᠳᠠᠭᠤᠤ ᠳᠠᠭᠤᠰᠴᠤ ᠢᠨᠢᠶᠡᠳᠦᠮ ᠱᠤᠤᠭᠢᠶᠠᠨ ᠳ᠋ᠤ᠌ ᠰᠢᠯᠵᠢᠨ ᠣᠷᠣᠯᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠠᠷᠢᠬᠢ ᠰᠢᠬᠠᠵᠤ ᠵᠠᠪᠠᠯ ᠨᠢᠭᠡ ᠬᠤᠨᠳᠠᠭᠠ ᠳᠤᠭᠳᠠᠭᠠᠯᠠᠭᠠᠬᠤ ᠰᠢᠨᠡ ᠳᠠᠭᠤᠤ ᠡᠬᠢᠯᠡᠪᠡ᠃
ᠥᠮᠥ ᠽᠠᠨᠳᠠᠨ ᠰᠢᠷᠡᠭᠡ ᠪᠠᠢᠨᠠ ᠬᠦ
ᠰᠤᠮᠤ ᠽᠠᠨᠳᠠᠨ ᠭᠣᠢᠯᠠᠨᠵᠠ ᠪᠠᠢᠨᠠ ᠬᠦ
ᠥᠩᠭᠡ ᠶ᠋ᠢ ᠭᠠᠷᠲᠠᠯᠠ ᠵᠦᠯᠭᠦᠭᠡᠳ ᠪᠠᠢᠨᠠ ᠬᠦ
ᠦᠨᠦᠷ ᠰᠠᠢᠲᠠᠢ ᠱᠠᠨᠽᠢ ᠪᠠᠢᠨᠠ ᠬᠦ
ᠡᠨᠡ ᠳᠠᠭᠤᠤ ᠮᠠᠰᠢ ᠱᠠᠯᠢᠭ᠃ ᠦᠭᠡ᠂ ᠠᠶᠠ ᠬᠣᠶᠠᠷ ᠬᠣᠶᠠᠭᠤᠯᠠ ᠪᠠᠨ ᠱᠠᠪᠯᠠᠵᠤ ᠱᠠᠪᠯᠠᠨ ᠱᠠᠯᠢᠭᠯᠠᠬᠤ ᠠᠲᠠᠯᠠ ᠭᠣᠣᠵᠤᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠬᠤᠷᠠᠯᠳᠤᠨ ᠨᠥᠬᠥᠳ ᠡᠴᠡ ᠪᠡᠨ ᠬᠣᠴᠣᠷᠪᠠ᠃ ᠱᠣᠷᠣᠩ ᠳ᠋ᠤ᠌ ᠪᠠᠢᠬᠤ ᠳ᠋ᠠᠭᠠᠨ ᠴᠤ᠌ ᠲᠡᠳᠦᠢ ᠯᠡ ᠬᠤᠪᠢᠷᠠᠭᠠ ᠦᠭᠡᠢ ᠬᠥᠬᠡ ᠴᠢᠷᠠᠢ ᠨᠢ ᠲᠦᠭᠰᠤᠢᠵᠤ᠂ ᠰᠢᠳᠦ ᠬᠠᠪᠢᠷᠤᠨ ᠰᠢᠨᠠ ᠭᠦᠷᠡᠯᠵᠡᠭᠦᠯᠵᠦ᠂ ᠬᠥᠮᠥᠰᠬᠡ ᠵᠠᠩᠭᠢᠳᠤᠭᠰᠠᠨ ᠤ᠋ ᠬᠢᠨᠢ ᠳᠡᠭᠡᠷᠡᠬᠢ ᠲᠠᠯᠠ ᠳ᠋ᠤ᠌ ᠳᠤᠭᠤᠢ ᠬᠢᠯᠠᠭᠠᠨ ᠰᠣᠷᠪᠢ ᠨᠢ ᠬᠦᠷᠡᠩᠲᠦᠨᠡ᠂ ᠡᠢᠮᠦ ᠬᠥᠮᠦᠨ ᠡᠴᠡ ᠬᠡᠷᠬᠢᠪᠡᠴᠦ ᠨᠢᠯᠪᠤᠰᠤ ᠭᠠᠷᠤᠮᠠ ᠦᠭᠡᠢ ᠪᠠᠢᠪᠠᠴᠤ ᠬᠠᠴᠠᠷ ᠢ᠋ᠶ᠋ᠠᠨ ᠳᠠᠭᠠᠨ ᠤᠷᠤᠰᠤᠨᠠ᠃
ᠪᠠᠯᠳᠠᠨᠴᠡᠷᠢᠩ ᠭᠠᠢᠬᠠᠯᠠ᠂ ᠨᠥᠬᠥᠳ ᠨᠢ᠄
ᠳᠠᠯᠠᠢ ᠶ᠋ᠢᠨ ᠨᠣᠭᠣᠭᠠ ᠬᠠᠢ ᠲᠠ ᠪᠠᠢᠨᠠ ᠬᠦ
ᠳᠠᠪᠤᠰᠤᠨ ᠳ᠋ᠤ᠌ ᠣᠷᠣᠭᠰᠠᠨ ᠱᠠᠨᠼᠠᠢ ᠪᠠᠢᠨᠠ ᠬᠦ
ᠳᠠᠪᠬᠤᠷ ᠭᠣᠣᠯᠲᠠᠢ ᠪᠠᠢᠼᠠᠢ ᠪᠠᠢᠨᠠ ᠬᠦ
ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠥᠷᠥᠵᠦ ᠪᠠᠢᠨᠠ ᠬᠦ᠃ ᠭᠡᠵᠦ ᠳᠠᠭᠤᠯᠠᠭᠰᠠᠭᠠᠷ ᠪᠥᠭᠡᠳ ᠭᠣᠵᠤᠤ ᠶ᠋ᠢᠨ ᠲᠡᠰᠴᠦ ᠶᠠᠳᠠᠨ ᠭᠠᠷ ᠵᠠᠩᠭᠢᠳᠴᠤ ᠳᠡᠭᠡᠷᠡ ᠳᠠᠯᠠᠢᠨ ᠡᠪᠦᠳᠦᠭ ᠳᠡᠭᠡᠷᠡ ᠲᠦᠰᠬᠢᠯᠭᠡᠨ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠴᠥᠮ ᠰᠣᠴᠢᠨ ᠲᠠᠭ ᠵᠣᠭᠰᠣᠪᠠ᠃
— ᠲᠠ ᠨᠣᠷᠪᠤ ᠬᠦᠩ ᠨᠣᠶᠠᠨᠲᠠᠨ ᠢ᠋ ᠲᠠᠨᠢᠬᠤ ᠤᠤ?
ᠪᠠᠯᠳᠠᠨᠴᠢᠷᠢᠩ᠂ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠦᠶᠡ ᠪᠡᠷ ᠨᠣᠷᠪᠤ ᠬᠦᠩ ᠭᠡᠳᠡᠭ ᠴᠡᠷᠢᠭ ᠦ᠋ᠨ ᠵᠠᠯᠠᠭᠤ ᠳᠠᠷᠤᠭᠠ ᠪᠠᠷᠭᠤ ᠡᠷᠡ᠂ ᠭᠣᠣᠯᠴᠢᠯᠠᠨ ᠮᠠᠢᠮᠠᠢ ᠬᠣᠲᠠ ᠪᠠᠷ ᠨᠠᠢᠷ ᠨᠠᠷᠭᠢᠶᠠᠨ ᠳᠡᠭᠡᠭᠦᠷ ᠶᠠᠪᠤᠳᠠᠭ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃
— ᠨᠣᠶᠠᠨ ᠭᠡᠪᠡᠯ ᠦᠭᠡᠢ᠂ ᠵᠦᠭᠡᠷ ᠨᠣᠷᠪᠤ ᠬᠦᠩ ᠭᠡᠳᠡᠭ ᠢ᠋ ᠭᠠᠳᠠᠷᠯᠠᠵᠤ ᠪᠣᠯᠤᠨᠠ᠃
— ᠵᠠ ᠲᠡᠢᠮᠦ᠂ ᠲᠡᠷᠡ ᠴᠢᠨᠢ ᠡᠨᠡ ᠳᠠᠭᠤᠤ ᠶ᠋ᠢ ᠡᠨᠡ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨᠡ ᠪᠠᠢᠬᠤ ᠳ᠋ᠠᠭᠠᠨ ᠵᠣᠬᠢᠶᠠᠪᠠ᠃ ᠤᠬᠠᠭᠠᠨ ᠲᠠᠢ᠂ ᠵᠣᠷᠢᠭ ᠲᠠᠢ᠂ ᠰᠢᠳᠤᠷᠭᠤ᠂ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠶᠠᠷ ᠦᠭᠡᠢ᠃ ᠪᠠ ᠳᠢ ᠯᠦᠸᠧ ᠴᠢᠩ ᠯᠦ᠍ᠭᠡ ᠠᠳᠠᠯᠢ ᠰᠠᠢᠬᠠᠨ ᠡᠷᠡ᠃ ᠲᠡᠷᠡ ᠣᠳᠣ ᠪᠠᠢᠬᠤ ᠦᠭᠡᠢ᠃ ᠪᠢᠳᠡᠨ ᠢ᠋ ᠵᠠᠬᠢᠷᠤᠨ ᠶᠠᠪᠤᠵᠤ ᠪᠠᠢᠭᠠᠳ ᠦᠷᠡᠭᠳᠡᠪᠡ᠃ ᠪᠢᠳᠡ ᠣᠳᠣ ᠲᠡᠭᠦᠨ ᠦ᠌ ᠦᠰ ᠥᠰᠢᠶᠡ ᠶ᠋ᠢ ᠠᠪᠴᠤ ᠴᠢᠳᠠᠭᠠ ᠦᠭᠡᠢ ᠪᠠᠢᠵᠤ ᠵᠣᠬᠢᠶᠠᠭᠰᠠᠨ ᠳᠠᠭᠤᠤ ᠪᠠᠷ ᠨᠢ ᠨᠠᠢᠷ ᠴᠡᠩᠭᠡᠯ ᠬᠢᠵᠦ ᠰᠠᠭᠤᠬᠤ ᠨᠢ ᠶᠠᠭᠤ ᠪᠣᠢ᠃ ᠠ ᠳᠠ ᠪᠢᠳᠡ ᠴᠣᠬᠣᠮ ᠡᠢᠮᠦ ᠳ᠋ᠡᠭᠡᠨ ᠯᠡ ᠢᠯᠠᠵᠤ ᠳᠡᠢᠯᠬᠦ ᠶ᠋ᠢ ᠦᠵᠡᠬᠦ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠪᠣᠢ ᠊ᠢᠠ ᠭᠡᠵᠦ ᠥᠭᠦᠯᠡᠨ᠂ ᠰᠢᠯᠦᠰᠦ ᠵᠠᠯᠭᠢᠨ ᠨᠢᠯᠪᠤᠰᠤ ᠪᠠᠨ ᠰᠢᠪᠬᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠳᠠᠬᠢᠨ ᠠᠶᠠ ᠦᠭᠡᠢ ᠪᠣᠯᠪᠠ᠃
— ᠨᠣᠷᠪᠤ ᠬᠦᠩ ᠬᠡᠵᠢᠶᠡ ᠬᠡᠨ ᠳ᠋ᠦ᠍ ᠬᠣᠣᠷᠯᠠᠭᠳᠠᠪᠠ? ᠭᠡᠬᠦ ᠳ᠋ᠦ᠍ ᠭᠣᠣᠵᠤᠤ᠄
— ᠪᠢᠳᠡ ᠬᠠᠯᠬᠠ ᠶ᠋ᠢᠨ ᠬᠣᠢᠲᠤ ᠬᠢᠯᠢ ᠪᠡᠷ ᠣᠷᠣᠵᠤ ᠢᠷᠡᠭᠡᠳ ᠭᠡᠳ ᠦᠷᠭᠦᠯᠵᠢᠯᠡᠨ ᠶᠠᠷᠢᠭᠰᠠᠨ ᠢ᠋ ᠨᠢ ᠲᠣᠪᠴᠢᠯᠠᠪᠠᠯ᠄ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠴᠢᠳᠠ ᠬᠣᠲᠠ ᠳ᠋ᠤ᠌ ᠶᠠᠫᠣᠨ ᠤᠯᠤᠰ ᠤ᠋ᠨ ᠤᠳᠤᠷᠢᠳᠤᠮᠵᠢ ᠪᠠᠷ ᠪᠦᠬᠦ ᠮᠣᠩᠭᠣᠯ ᠢ᠋ ᠨᠢᠭᠡᠳᠬᠡᠬᠦ ᠳᠠᠭᠠᠪᠤᠷᠢ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠪᠣᠳᠣᠯᠭᠠ ᠲᠠᠯᠪᠢᠵᠤ ᠨᠣᠷᠪᠤ ᠬᠦᠩ ᠢ᠋ ᠨᠠᠢᠵᠢ ᠭᠡᠭᠡᠨ ᠭᠡᠭᠴᠢ ᠲᠡᠢ ᠨᠡᠢᠯᠡᠭᠦᠯᠦᠨ ᠮᠢᠩᠭᠠ ᠰᠢᠬᠠᠮ ᠴᠡᠷᠢᠭ ᠥᠭᠭᠦᠨ ᠨᠠᠭᠠᠰᠢ ᠮᠣᠷᠳᠠᠭᠤᠯᠤᠭᠰᠠᠨ ᠠᠵᠢ᠃
ᠲᠡᠨᠳᠡᠴᠡ ᠨᠣᠷᠪᠤ ᠬᠦᠩ ᠪᠤᠷᠢᠶᠠᠳ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠮᠵᠢᠨ ᠶᠠᠪᠤᠭᠰᠠᠭᠠᠷ ᠬᠠᠯᠬᠠ ᠶ᠋ᠢᠨ ᠬᠣᠢᠲᠤ ᠬᠢᠯᠢ ᠪᠡᠷ ᠨᠡᠪᠲᠡᠷᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍᠂ ᠥᠨᠥᠬᠢ ᠬᠣᠢᠰᠢ ᠰᠠᠭᠤᠳᠠᠭ ᠬᠠᠯᠬᠠ ᠨᠢ ᠭᠠᠯᠢᠩ ᠤ᠋ᠨ ᠭᠠᠷ ᠲᠤ ᠣᠷᠤᠴᠢᠬᠰᠡᠨ ᠪᠠᠢᠵᠠᠢ᠃ ᠡᠷᠭᠢᠭᠡᠳ ᠶᠠᠪᠤᠬᠤ ᠭᠡᠲᠡᠯᠡ ᠶᠠᠪᠤᠬᠤ ᠵᠠᠮ ᠨᠢ ᠵᠥᠪᠯᠡᠯᠲᠦ ᠶ᠋ᠢᠨ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠭᠠᠷ ᠲᠤ ᠣᠷᠣᠨ ᠲᠦᠭᠵᠢᠭᠳᠡᠭᠰᠡᠨ ᠠᠵᠢ᠃ ᠭᠣᠣᠵᠤᠤ ᠡᠢᠮᠦᠷᠬᠦ ᠵᠦᠢᠯ ᠢ᠋ ᠳᠡᠯᠭᠡᠷᠡᠩᠭᠦᠢ ᠶᠠᠷᠢᠭᠠᠳ ᠴᠠᠭᠠᠰᠢ ᠨᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠦᠷᠭᠦᠯᠵᠢᠯᠡᠭᠦᠯᠬᠦ ᠳ᠋ᠡᠭᠡᠨ᠄
— ᠪᠢᠳᠡ ᠳᠡᠭᠡᠷᠡ ᠳᠣᠣᠷᠠ ᠦᠭᠡᠢ ᠬᠡᠷᠬᠢᠬᠦ ᠰᠢᠢᠳᠪᠦᠷᠢ ᠪᠡᠨ ᠣᠯᠬᠤ ᠦᠭᠡᠢ ᠪᠠᠢᠲᠠᠯᠠ ᠬᠢᠶᠠᠭᠲᠤ ᠳ᠋ᠤ᠌ ᠭᠠᠮᠢᠩ ᠤ᠋ᠨ ᠨᠣᠶᠠᠳ ᠪᠡᠶᠡᠰ ᠢ᠋ᠶ᠋ᠡᠷ ᠢᠷᠡᠨ ᠢᠨᠢᠶᠡᠪᠡ᠂ ᠤᠷᠢᠪᠠ᠂ ᠮᠥᠷᠭᠥᠪᠡ᠃
《ᠲᠠ ᠨᠠᠷ ᠢ᠋ ᠳᠠᠢᠰᠤᠨ ᠢ᠋ᠶ᠋ᠠᠨ ᠭᠡᠵᠦ ᠦᠵᠡᠬᠦ ᠦᠭᠡᠢ ᠭᠡᠵᠦ ᠨᠢᠭᠡ ᠲᠠᠩᠭᠠᠷᠢᠭ᠂ ᠲᠠᠨ ᠤ᠋ ᠳᠠᠭᠠᠪᠤᠷᠢ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠠᠶᠤᠯ ᠳ᠋ᠤ᠌ ᠠᠪᠲᠠᠭᠳᠠᠨ ᠮᠥᠬᠥᠭᠰᠡᠨ ᠭᠡᠵᠦ ᠬᠣᠶᠠᠳᠠᠬᠢ ᠲᠠᠩᠭᠠᠷᠢᠭ᠂ ᠪᠢᠳᠡ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠡᠵᠡᠯᠡᠭᠰᠡᠨ ᠪᠢᠰᠢ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠠᠶᠤᠯ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠪᠠᠷ ᠢᠷᠡᠭᠰᠡᠨ ᠭᠤᠷᠪᠠᠳᠠᠬᠢ ᠲᠠᠩᠭᠠᠷᠢᠭ᠃ ᠪᠢᠳᠡᠨ ᠳ᠋ᠦ᠍ ᠠᠬᠠ ᠳᠡᠭᠦᠦ ᠪᠣᠯᠰᠤᠭᠠᠢ ᠭᠡᠳᠡᠭ ᠳᠥᠷᠪᠡᠳᠡᠬᠢ ᠲᠠᠩᠭᠠᠷᠢᠭ᠂ ᠤᠯᠠᠭᠠᠨ ᠤ᠋ ᠠᠶᠤᠯ ᠠᠢᠰᠤᠢ ᠶᠠᠪᠤᠨᠠ᠃ ᠬᠠᠮᠲᠤ ᠳ᠋ᠠᠭᠠᠨ ᠲᠡᠮᠡᠴᠡᠶᠡ᠃ ᠬᠠᠯᠬᠠ ᠮᠣᠩᠭᠣᠯ ᠪᠣᠯᠤᠭᠠᠳ ᠠᠽᠢᠶᠠ ᠲᠢᠪ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠶᠠ ᠭᠡᠳᠡᠭ ᠲᠠᠪᠤᠳᠠᠬᠢ ᠲᠠᠩᠭᠠᠷᠢᠭ》 ᠡᠯᠡ ᠣᠯᠠᠨ ᠲᠠᠩᠭᠠᠷᠢᠭ ᠲᠤᠨᠢ ᠪᠢᠳᠡ ᠢᠲᠡᠭᠡᠯᠡ᠃ ᠭᠡᠲᠡᠯᠡ ᠪᠢᠳᠡᠨ ᠦ᠌ ᠰᠠᠨᠠᠯ ᠵᠣᠷᠢᠭ ᠲᠤ ᠦᠢᠮᠡᠭᠡᠨ ᠭᠠᠷᠤᠯᠠ᠃《ᠭᠠᠮᠢᠩ ᠳ᠋ᠤ᠌ ᠲᠠ ᠨᠠᠷ ᠢᠲᠡᠭᠡᠨᠡ ᠤᠤ? ᠡᠳᠡ ᠴᠢᠨᠢ ᠢᠨᠢᠶᠡᠬᠦ ᠶ᠋ᠢᠨ ᠰᠠᠢᠬᠠᠨ ᠢ᠋ᠶ᠋ᠠᠷ ᠢᠨᠢᠶᠡᠭᠡᠳ ᠡᠴᠦᠰ ᠲᠦ᠋ᠨᠢ ᠠᠯᠠᠬᠤ ᠶ᠋ᠢᠨ ᠮᠠᠭᠤᠬᠠᠢ ᠪᠠᠷ ᠠᠯᠠᠳᠠᠭ ᠠᠷᠭᠠ ᠲᠠᠢ ᠡᠳᠡᠨ ᠢ᠋ ᠢᠲᠡᠭᠡᠭᠰᠡᠨ ᠡᠴᠡ ᠥᠯᠪᠡᠷᠴᠦ ᠦᠬᠦᠭᠰᠡᠨ ᠳᠡᠭᠡᠷᠡ ᠭᠡᠳ ᠨᠢᠭᠡ ᠬᠡᠰᠡᠭ ᠮᠠᠨᠢ ᠠᠮᠤᠷ ᠰᠠᠢᠬᠠᠨ ᠳ᠋ᠠᠭᠠᠨ ᠵᠢᠷᠭᠠᠬᠤ ᠪᠠᠨ ᠲᠠ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠮᠡᠳᠡ᠂ ᠠᠯᠠᠯᠴᠠᠬᠤ ᠳᠠᠢᠰᠤᠨ ᠲᠤᠯᠭᠠᠷᠠᠪᠠᠯ᠂ ᠡᠷᠡ᠂ ᠡᠮᠡ ᠪᠡᠨ ᠦᠵᠡᠯᠴᠡᠨ ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠬᠦᠷᠬᠦ ᠪᠡᠨ ᠪᠢᠳᠡ ᠮᠡᠳᠡᠶᠡ》 ᠭᠡᠳ ᠲᠡᠳᠡ ᠲᠠᠰᠤᠷᠠᠨ ᠶᠠᠪᠤᠴᠢᠬᠠᠪᠠ᠃ ᠦᠯᠡᠳᠡᠭᠰᠡᠨ ᠨᠢ ᠪᠢᠳᠡ ᠲᠠᠪᠤᠨ ᠵᠠᠭᠤᠨ ᠬᠥᠮᠦᠨ ᠢᠲᠡᠭᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠳᠡᠭᠡᠨ ᠭᠠᠮᠢᠩ ᠤ᠋ᠳ ᠲᠠᠢ ᠨᠡᠢᠯᠡᠬᠦ ᠳ᠋ᠦ᠍᠂ ᠭᠠᠮᠢᠩ ᠤ᠋ᠳ ᠲᠤᠭ ᠬᠢᠭᠢᠷᠢ ᠪᠡᠨ ᠪᠣᠰᠬᠠᠵᠤ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠳᠡᠯᠡᠳᠴᠦ ᠶᠡᠬᠡ ᠪᠠᠶᠠᠷ ᠶᠣᠰᠣᠯᠠᠯ ᠤ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠬᠣᠭᠣᠯᠠ ᠤᠮᠳᠠ᠂ ᠠᠷᠢᠬᠢ ᠳᠡᠷᠡᠰᠦᠨ ᠦ᠌ ᠪᠡᠨ ᠳᠡᠭᠡᠳᠦ ᠪᠡᠷ ᠵᠣᠴᠢᠯᠠᠨ ᠪᠡᠯᠡᠭ ᠰᠡᠯᠲᠡ ᠪᠠᠷᠢᠨ ᠠᠬᠠ ᠳᠡᠭᠦᠦ ᠪᠡᠨ ᠳᠠᠭᠤᠳᠠᠯᠴᠠᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠰᠢ ᠦᠭᠡᠢ᠃ ᠲᠡᠷᠡ ᠡᠳᠦᠷ ᠲᠡᠭᠡᠨ ᠲᠤᠩ ᠵᠦᠭᠡᠷ᠂ ᠦᠳᠡᠰᠢ ᠨᠢ ᠵᠦᠴᠦᠭᠡ ᠭᠠᠷᠭᠠᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠪᠠᠶᠠᠰᠬᠠᠪᠠ᠃ ᠮᠠᠷᠭᠠᠰᠢ ᠨᠢ ᠮᠥᠨ ᠯᠡ ᠵᠦᠭᠡᠷ᠃ ᠥᠷᠯᠥᠭᠡᠨ ᠦ᠌ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠳᠠᠷᠠᠭᠠ ᠳᠣᠲᠣᠭᠤᠷ ᠭᠠᠳᠠᠭᠤᠷ ᠰᠣᠯᠢᠬᠤ ᠬᠤᠪᠴᠠᠰᠤ ᠲᠠᠯᠪᠢᠨ ᠣᠯᠭᠣᠵᠤ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠣᠷᠣᠭᠤᠯᠬᠤ ᠪᠠᠷ ᠪᠣᠯᠤᠯᠠ᠃ ᠠᠶᠠᠨ ᠵᠠᠮ ᠤ᠋ᠨ ᠤᠷᠲᠤ ᠳ᠋ᠤ᠌ ᠣᠯᠠᠨ ᠬᠣᠨᠣᠭ ᠶᠠᠪᠤᠭᠰᠠᠨ ᠪᠢᠳᠡᠨ ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠳᠤᠷᠠ ᠦᠭᠡᠢ ᠪᠠᠢᠬᠤ ᠪᠢᠯᠡ᠃ ᠭᠡᠪᠡᠴᠦ ᠲᠡᠨᠳᠡ ᠡᠴᠡ ᠲᠠ ᠶᠠᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠰᠠᠨᠠᠨᠠ? ᠠᠭᠤᠷ ᠮᠠᠨᠠᠨ ᠲᠠᠲᠠᠭᠰᠠᠨ ᠨᠠᠭᠤᠷ ᠰᠢᠭ᠋ ᠶᠡᠬᠡ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠴᠥᠮ ᠨᠢᠴᠦᠭᠦᠨ ᠪᠡᠶᠡ ᠪᠡᠷ ᠤᠬᠢᠶᠠᠵᠤ ᠪᠠᠢᠲᠠᠯᠠ᠂ ᠬᠢᠶᠠᠭᠲᠤ ᠶ᠋ᠢᠨ ᠪᠦᠬᠦ ᠭᠠᠮᠢᠩ ᠨᠢᠭᠡ ᠵᠡᠷᠭᠡ ᠳᠣᠪᠲᠣᠯᠤᠨ ᠢᠷᠡᠵᠦ ᠫᠤᠤ ᠲᠤᠯᠭᠠᠪᠠ᠃ ᠪᠢᠳᠡᠨ ᠳ᠋ᠦ᠍ ᠬᠠᠷᠢᠭᠤᠯᠬᠤ ᠶᠠᠭᠤᠮᠠ ᠶᠠᠭᠤ ᠴᠦ᠍ ᠠᠯᠠᠭᠠ᠃ ᠬᠠᠯᠠᠭᠤᠨ ᠤᠰᠤ ᠰᠠᠴᠤᠶᠠ ᠭᠡᠪᠡᠴᠦ ᠲᠡᠷᠡ ᠨᠢ ᠶᠠᠮᠠᠷ ᠬᠥᠮᠦᠨ ᠰᠢᠯᠵᠠᠯᠬᠤ ᠪᠠᠷ ᠪᠢᠰᠢ ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠵᠠ ᠲᠡᠭᠡᠭᠡᠳ ᠭᠡᠬᠦ ᠳ᠋ᠦ᠍᠄
— ᠪᠢᠳᠡ ᠴᠥᠮ ᠭᠢᠨᠵᠢᠯᠡᠭᠳᠡᠪᠡ᠃ ᠨᠣᠷᠪᠤ ᠨᠣᠶᠠᠨ᠂ ᠨᠠᠢᠵᠢ ᠭᠡᠭᠡᠨ ᠬᠣᠶᠠᠷ ᠢ᠋ ᠲᠦᠷᠦᠭᠦᠨ ᠦ᠌ ᠬᠡᠳᠦᠨ ᠳᠠᠷᠤᠭᠠ ᠨᠠᠷ ᠲᠠᠢ ᠪᠢᠳᠡᠨ ᠦ᠌ ᠡᠮᠦᠨᠡ ᠫᠤᠤᠳᠠᠨ ᠠᠯᠠᠪᠠ᠂ ᠭᠡᠳ ᠳᠣᠷᠣᠭᠰᠢ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ᠄
— ᠮᠣᠩᠭᠣᠯ ᠬᠥᠮᠦᠨ ᠦ᠌ ᠢᠯᠠᠭᠳᠠᠯ ᠡᠢᠮᠦ ᠪᠠᠢᠳᠠᠭ ᠭᠡᠵᠦ ᠰᠠᠨᠠᠭᠠ ᠠᠯᠳᠠᠪᠠ᠃
ᠨᠢᠭᠡ ᠬᠡᠰᠡᠭ ᠴᠥᠮ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠣᠷᠣᠢ ᠪᠣᠯᠵᠤ ᠬᠣᠶᠠᠷ ᠤᠷᠲᠤ ᠯᠠ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠯᠢ ᠬᠡᠳᠦᠢᠨ ᠬᠠᠳᠬᠤᠭᠰᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠥᠰᠢᠶᠡ ᠬᠣᠷᠣᠰᠤᠯ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠰᠠᠨ ᠦᠯᠪᠦᠩ ᠴᠣᠩᠬᠢᠭᠠᠷ ᠨᠢᠭᠤᠷ ᠤ᠋ᠳ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠭᠥᠯᠢᠷᠡᠨᠡ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍《ᠮᠣᠩᠭᠣᠯ ᠬᠥᠮᠦᠨ ᠦ᠌ ᠢᠯᠠᠭᠳᠠᠯ ᠪᠠᠢᠳᠠᠭ》 ᠭᠡᠰᠡᠨ ᠦᠭᠡ ᠡᠷᠭᠢᠯᠳᠦᠨᠡ᠃
— ᠲᠠ ᠳᠠᠮᠫᠢᠯ ᠭᠡᠳᠡᠭ ᠬᠥᠮᠦᠨ ᠢ᠋ ᠶᠡᠷᠦ ᠰᠠᠨᠠᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠰᠢᠪᠡᠨᠡᠬᠦ ᠰᠢᠭ ᠪᠣᠯᠬᠤ ᠶ᠋ᠢ ᠬᠠᠷᠠᠪᠠᠯ ᠭᠣᠣᠵᠤᠤ᠄
— ᠦᠭᠡᠢ ᠶᠡᠷᠦ ᠰᠠᠨᠠᠬᠤ ᠦᠭᠡᠢ ᠪᠠᠢᠨᠠ᠃
— ᠤᠭ ᠨᠢ ᠲᠡᠷᠡ ᠬᠥᠮᠦᠨ ᠲᠤᠩ ᠰᠣᠳᠣᠨ᠂ ᠨᠠᠳᠠ ᠳᠡᠭᠡᠷᠡ ᠳᠠᠬᠢᠨ ᠨᠢᠭᠡ ᠬᠥᠮᠦᠨ ᠢ᠋ ᠨᠡᠮᠡᠭᠰᠡᠨ ᠠᠳᠠᠯᠢ ᠥᠨᠳᠥᠷ᠃
— ᠠᠬᠠᠢ᠂ ᠴᠢ ᠲᠡᠷᠡ ᠬᠥᠮᠦᠨ ᠲᠡᠢ ᠶᠠᠮᠠᠷ ᠬᠣᠯᠪᠣᠭᠳᠠᠯ ᠲᠠᠢ ᠶᠤᠮ ᠪᠣᠢ?
— ᠲᠡᠷᠡ ᠪᠣᠯ ᠶᠣᠰᠣᠲᠠᠢ ᠵᠣᠷᠢᠭᠲᠤ ᠪᠠᠭᠠᠲᠤᠷ ᠡᠷᠡ᠃ ᠪᠢ ᠲᠡᠭᠦᠨ ᠲᠡᠢ ᠰᠤᠮᠢᠶᠠ ᠪᠡᠢᠰᠡ ᠶ᠋ᠢᠨ ᠴᠡᠷᠢᠭ ᠲᠦ᠍ ᠤᠷᠤᠭᠰᠢ ᠪᠠᠨ ᠲᠤᠯᠤᠨ ᠨᠠᠭᠤᠷ᠂ ᠪᠢᠷᠠᠭᠤᠲᠤ ᠬᠣᠲᠠ ᠬᠦᠷᠲᠡᠯᠡ ᠬᠢᠲᠠᠳ ᠤ᠋ᠨ ᠬᠠᠷᠠ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠲᠠᠨᠢᠯᠴᠠᠭᠰᠠᠨ ᠶᠤᠮ᠃ ᠣᠳᠣ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠪᠠᠯ ᠪᠢ ᠪᠣᠯᠤᠭᠠᠳ ᠮᠠᠨ ᠤ᠋ ᠡᠨᠡ ᠨᠥᠬᠥᠳ ᠬᠡᠷᠬᠢᠬᠦ ᠵᠠᠮ ᠢ᠋ᠶ᠋ᠠᠨ ᠣᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠭᠣᠷᠢᠳᠠᠨᠠ᠃
— ᠢᠩᠭᠢᠬᠦᠯᠡᠷ ᠴᠢ ᠲᠤᠩ ᠳᠡᠭᠡᠷᠡ ᠴᠠᠭ ᠤ᠋ᠨ ᠴᠡᠷᠢᠭ ᠨᠢ ᠠ᠋?
— ᠲᠡᠢᠮᠦ ᠠ᠋᠂ ᠳᠡᠭᠡᠷᠡ ᠴᠠᠭ ᠤ᠋ᠨ ᠭᠡᠳ ᠲᠠᠢᠪᠤᠩ ᠢ᠋ᠶ᠋ᠠᠷ ᠦᠷᠭᠦᠯᠵᠢᠯᠡᠭᠦᠯᠬᠦ ᠳ᠋ᠡᠭᠡᠨ᠄
— ᠠᠷᠪᠠᠨ ᠳᠣᠯᠣᠭᠠ ᠲᠠᠢ ᠪᠠᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠦ᠋ᠨ ᠪᠣᠰᠤᠯᠭᠠ ᠳ᠋ᠤ᠌ ᠣᠷᠣᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠴᠢᠭᠡ ᠮᠢᠨᠢ ᠠᠯᠠᠭᠤᠯᠤᠯᠠ᠃ ᠪᠦᠬᠦ ᠭᠡᠷ ᠪᠦᠯᠢ ᠶ᠋ᠢ ᠬᠦᠢᠰᠦ ᠲᠡᠮᠲᠡᠷᠢᠬᠦ ᠪᠣᠯᠬᠤ ᠳ᠋ᠤᠨᠢ ᠳᠠᠩ ᠪᠡᠶᠡ ᠵᠢᠭᠤᠲᠠᠨ ᠭᠠᠷᠴᠤ ᠲᠣᠭᠲᠠᠬᠤ ᠲᠠᠢᠵᠢ ᠶ᠋ᠢᠨ ᠴᠡᠷᠢᠭ ᠲᠦ᠍ ᠣᠷᠣᠯᠠ᠃ ᠲᠣᠭᠲᠠᠬᠤ ᠲᠠᠢᠵᠢ ᠮᠠᠨᠢ ᠨᠢᠭᠡ ᠦᠶᠡ ᠴᠣᠬᠢᠭᠳᠠᠨ ᠴᠡᠷᠢᠭ ᠠᠷᠠᠳ ᠨᠢ ᠪᠤᠲᠠᠷᠠᠬᠤ ᠳ᠋ᠤ᠌ ᠪᠠᠪᠤᠵᠠᠪ ᠤ᠋ᠨ ᠳ᠋ᠤ᠌᠂ ᠳᠠᠷᠠᠭᠠ ᠨᠢ ᠭᠠᠩ ᠬᠠᠢ ᠰᠦᠢ ᠲᠡᠢ᠂ ᠲᠡᠭᠡᠭᠡᠳ ᠰᠤᠮᠢᠶᠠ ᠪᠠᠢᠰᠠ ᠶ᠋ᠢᠨ ᠴᠡᠷᠢᠭ ᠲᠦ᠍ ᠳᠠᠷᠠᠭᠠ ᠨᠢ ᠳᠠᠬᠢᠨ ᠪᠠᠪᠤᠵᠠᠪ ᠤ᠋ᠨ ᠴᠡᠷᠢᠭ ᠲᠦ᠍ ᠡᠴᠦᠰ ᠲᠦ᠋ᠨᠢ ᠨᠣᠷᠪᠤ ᠬᠦᠩ ᠦ᠋ᠨ ᠴᠡᠷᠢᠭ᠂ ᠣᠳᠣ ᠪᠠᠷᠤᠨ ᠣᠩᠬᠧᠷᠡᠨ ᠦ᠌ ᠴᠡᠷᠢᠭ ᠲᠦ᠍᠂ ᠡᠨᠡ ᠪᠦᠬᠦ ᠰᠣᠯᠢᠭᠳᠠᠯ ᠤ᠋ᠳ ᠴᠥᠮ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ᠂ ᠡᠭᠡᠭᠡ ᠯᠡ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠪᠠᠷᠤᠨ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠲᠡᠢ ᠨᠡᠢᠯᠡᠭᠰᠡᠨ ᠦ᠌ ᠠᠳᠠᠯᠢ᠂ ᠬᠣᠢᠰᠢᠳᠠ ᠪᠠᠨ ᠶᠠᠭᠤ ᠪᠣᠯᠬᠤ ᠶ᠋ᠢ ᠬᠡᠨ ᠴᠦ᠍ ᠮᠡᠳᠡᠬᠦ ᠳ᠋ᠦ᠍ ᠪᠡᠷᠬᠡ᠂ ᠭᠠᠭᠴᠠᠬᠠᠨ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠤᠷᠪᠠᠵᠤ ᠦᠵᠡᠭᠡ ᠦᠭᠡᠢ ᠰᠢᠭ ᠤᠷᠪᠠᠬᠤ ᠦᠭᠡᠢ ᠪᠠᠰᠠ ᠳᠠᠢᠰᠤᠨ ᠳ᠋ᠤ᠌ ᠠᠮᠢᠳᠤ ᠪᠠᠷ ᠪᠠᠷᠢᠭᠳᠠᠨ ᠲᠠᠮᠤᠯᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠥᠭᠦᠯᠡᠨ ᠲᠣᠮᠣ ᠬᠢᠯᠠᠭᠠᠨ ᠰᠣᠷᠪᠢᠲᠤ ᠮᠠᠩᠨᠠᠢ ᠪᠠᠨ ᠡᠷᠭᠦᠨ᠂ ᠴᠢᠨᠣᠠ ᠶ᠋ᠢᠨ ᠬᠦᠢᠲᠡᠨ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠴᠢᠷᠠᠢ ᠪᠠᠨ ᠴᠢᠯᠠᠭᠤ ᠰᠢᠭ᠋ ᠪᠣᠯᠭᠠᠨ ᠲᠦᠩᠰᠦᠢᠯᠭᠡᠪᠡ᠃ ᠲᠡᠷᠡ ᠨᠢ ᠦᠨᠡᠬᠡᠷ ᠲᠦᠩᠰᠦᠭᠡᠷ᠂ ᠢᠷᠡᠭᠡᠳᠦᠢ ᠨᠢ ᠴᠦ᠍ ᠳᠦᠩᠰᠦᠭᠡᠷ᠂ ᠦᠨᠡᠨ ᠳ᠋ᠡᠭᠡᠨ ᠭᠣᠣᠵᠤᠤ ᠳ᠋ᠤ᠌ ᠲᠦᠩᠰᠦᠭᠡᠷ ᠦᠭᠡᠢ ᠶᠠᠭᠤᠮᠠ ᠨᠢᠭᠡ ᠴᠦ᠍ ᠠᠯᠠᠭᠠ᠃
— ᠵᠠ ᠢᠳᠡᠯᠡ᠂ ᠤᠤᠭᠤᠯᠠ᠂ ᠰᠠᠢᠨ ᠨᠠᠷᠭᠢᠬᠤ ᠵᠠᠪᠰᠢᠶᠠᠨ ᠳ᠋ᠤ᠌ ᠲᠠ ᠪᠦᠬᠦᠨ ᠲᠡᠢ ᠮᠠᠰᠢ ᠰᠠᠢᠬᠠᠨ ᠲᠠᠨᠢᠯᠴᠠᠯᠠ᠃ ᠣᠳᠣ ᠪᠢ ᠶᠠᠪᠤᠶᠠ ᠭᠡᠳ ᠪᠠᠯᠳᠠᠨᠴᠡᠷᠩ ᠪᠣᠰᠬᠤ ᠳ᠋ᠤ᠌ ᠨᠥᠭᠥᠭᠡᠳᠦᠭᠦᠯᠡ ᠴᠥᠮ ᠬᠦᠨᠳᠦᠳᠬᠡᠨ ᠪᠣᠰᠪᠠ᠃ ᠭᠣᠣᠵᠤᠤ ᠣᠷᠣ ᠪᠠᠨ ᠬᠤᠷᠢᠶᠠᠭᠰᠠᠨ ᠳᠡᠷᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠵᠠᠳᠠᠯᠵᠤ ᠨᠢᠭᠡ ᠫᠤᠤ ᠡᠮᠦᠨᠡ ᠨᠢ ᠪᠠᠷᠢᠪᠠ᠃
— ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠳ ᠬᠣᠢᠰᠢ ᠤᠬᠤᠷᠢᠪᠠ᠃
— ᠪᠡᠯᠡᠭ᠃
— ᠦᠭᠡᠢ ᠪᠢ ᠡᠢᠮᠦ ᠦᠨᠡᠲᠦ ᠪᠡᠯᠡᠭ ᠢ᠋ ᠠᠪᠴᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠢᠯᠡ᠃
— ᠬᠠᠷᠢᠨ ᠡᠨᠡ ᠪᠣᠯ ᠲᠠᠨ ᠤ᠋ ᠨᠠᠮᠠᠶ᠋ᠢ ᠭᠡᠢᠭᠦᠯᠦᠨ ᠪᠠᠶᠠᠰᠬᠠᠭᠰᠠᠨ ᠤ᠋ ᠳᠡᠷᠭᠡᠳᠡ ᠶᠠᠭᠤ ᠴᠣ ᠪᠢᠰᠢ᠃
— ᠬᠠᠮᠢᠭᠠ ᠠ᠋ᠴᠠ᠂ ᠪᠢ ᠴᠢᠮᠠ ᠳ᠋ᠤ᠌ ᠭᠠᠭᠴᠠ ᠶᠠᠩᠴᠢᠶᠠᠨ ᠲᠡᠳᠦᠢ ᠶ᠋ᠢ ᠥᠭᠭᠦᠭᠰᠡᠨ ᠪᠣᠯᠤᠭᠰᠠᠨ ᠠ᠋ᠴᠠ ᠥᠭᠡᠷᠡ ᠵᠦᠢᠯ ᠦᠭᠡᠢ᠃
— ᠲᠡᠢᠮᠦ ᠠ᠋᠂ ᠭᠠᠭᠴᠠ ᠶᠠᠩᠴᠢᠶᠠᠨ᠃ ᠭᠡᠪᠡᠴᠦ ᠲᠡᠷᠡ ᠭᠠᠭᠴᠠ ᠶᠠᠩᠴᠢᠶᠠᠨ ᠱᠣᠷᠣᠩ ᠳ᠋ᠤ᠌ ᠭᠢᠨᠵᠢ ᠲᠡᠢ ᠰᠠᠭᠤᠵᠤ ᠪᠠᠢᠭᠠ ᠨᠠᠳᠠ ᠲᠦᠮᠡ ᠯᠠᠩ ᠰᠢᠭ᠋ ᠪᠠᠢᠭᠰᠠᠨ ᠠ᠋ᠴᠠ ᠲᠡᠭᠦᠨ ᠢ᠋ ᠲᠠᠨ ᠤ᠋ ᠥᠭ᠍ᠭᠦᠶᠡ ᠭᠡᠰᠡᠨ ᠰᠡᠳᠬᠢᠯ ᠢ᠋ ᠶᠠᠭᠤ ᠪᠠᠷ ᠵᠢᠱ᠌ᠢᠶᠡᠯᠡᠬᠦ ᠳ᠋ᠦ᠍ ᠪᠡᠷᠬᠡ᠂ ᠤᠭ ᠵᠦᠢᠯ ᠢ᠋ᠶ᠋ᠡᠨ ᠤᠯᠠᠮ ᠢ᠋ᠶ᠋ᠠᠷ ᠲᠤᠯᠭᠠᠨ ᠪᠠᠷᠢᠬᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠢᠬᠠᠭᠳᠠᠨ ᠠᠪᠤᠯᠠ᠃ ᠭᠡᠲᠡᠯᠡ ᠲᠡᠷᠡ ᠠᠯᠠᠭᠠᠨ ᠬᠢᠲᠤᠭᠠᠨ ᠤ᠋ ᠬᠡᠷᠡᠭ᠍ᠯᠡᠭᠦᠷ᠂ ᠪᠦᠲᠦᠨ ᠲᠠᠪᠤᠨ ᠳ᠋ᠠᠢᠵᠠ ᠲᠠᠢ ᠮᠣᠳᠣᠨ ᠬᠣᠢᠲᠤ ᠮᠠᠣᠵᠠᠷ ᠭᠠᠵᠠᠷ ᠲᠦ ᠮᠠᠰᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠪᠠᠷᠢᠭᠳᠠᠨ ᠰᠡᠳᠬᠢᠯ ᠳ᠋ᠦ᠍ ᠶᠠᠮᠠᠷ ᠨᠢᠭᠡ ᠠᠯᠠᠭᠳᠠᠭᠰᠠᠨ ᠭᠠᠮᠢᠩ ᠳᠠᠷᠤᠭᠠ ᠪᠣᠳᠣᠭᠳᠠᠨ ᠴᠠᠭᠠᠰᠢ ᠪᠠᠨ ᠮᠠᠰᠢ ᠣᠯᠠᠨ ᠡᠪ ᠦᠭᠡᠢ ᠶᠠᠭᠤᠮᠠᠰ ᠢ᠋ ᠰᠠᠨᠠᠭᠳᠠᠭᠤᠯᠤᠨᠠ᠃
— ᠡᠨᠡ ᠴᠢᠨᠢ ᠶᠡᠷᠦ ᠪᠠᠭᠠ ᠪᠡᠯᠡᠭ ᠪᠢᠰᠢ᠂ ᠭᠠᠭᠴᠠᠬᠠᠨ ᠬᠠᠷᠠᠮᠰᠠᠯᠲᠠᠢ ᠨᠢ ᠪᠢ ᠳᠠᠩᠴᠤ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠤ᠋ ᠡᠷᠡ ᠪᠢᠰᠢ ᠶᠦᠮ ᠳᠡ ᠭᠡᠬᠦ ᠳ᠋ᠦ᠍ ᠭᠣᠣᠵᠤᠤ᠄
— ᠡᠷᠬᠢᠮ ᠠᠬᠠ ᠠ᠋᠂ ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠲᠠ ᠴᠡᠷᠢᠭ ᠲᠡᠢᠨ ᠦ᠌ ᠬᠥᠮᠦᠨ ᠪᠢᠰᠢ ᠪᠣᠯᠪᠠᠴᠤ᠂ ᠴᠡᠷᠢᠭ ᠲᠡᠢᠨ ᠦ᠌ ᠦᠶᠡ᠂ ᠬᠥᠮᠦᠨ ᠢ᠋ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠲᠡᠳᠡᠨ ᠣᠷᠣᠭᠤᠯᠳᠠᠭ ᠪᠣᠯᠬᠣᠷ᠂ ᠡᠨᠡ ᠵᠦᠢᠯ ᠲᠠᠨ ᠳ᠋ᠤ᠌ ᠯᠠᠪ ᠬᠡᠷᠡᠭ ᠪᠣᠯᠤᠨᠠ ᠪᠣᠢ ᠊ᠶᠠ ᠭᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠭᠠᠳᠠᠭᠠ ᠭᠠᠷᠪᠠ᠃ ᠶᠠᠭᠤᠮᠠ ᠪᠦᠬᠦᠨ ᠣᠳᠣ ᠮᠠᠰᠢ ᠰᠢᠷᠦᠭᠦᠨ᠂ ᠬᠥᠮᠦᠨ ᠠᠮᠢᠲᠠᠨ ᠬᠡᠷᠡᠭ ᠲᠦᠪᠡᠭ ᠲᠦ᠍ ᠣᠷᠣᠬᠤ ᠪᠠᠢᠲᠤᠭᠠᠢ ᠠᠮᠢ ᠠᠯᠳᠠᠬᠤ ᠳ᠋ᠤ᠌ ᠲᠤᠩ ᠠᠮᠠᠷᠬᠠᠨ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠠᠢᠭᠠ ᠪᠣᠯᠬᠣᠷ ᠪᠣᠯᠭᠣᠮᠵᠢᠲᠠᠢ᠂ ᠬᠢᠴᠢᠶᠡᠮᠵᠢᠲᠡᠢ ᠶᠠᠪᠤᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠢᠷᠡᠮᠡᠭᠴᠡ ᠡᠭᠦᠳᠡ ᠬᠠᠭᠠᠯᠭᠠ ᠪᠠᠨ ᠴᠥᠮ ᠢ᠋ ᠲᠦᠭᠵᠢᠪᠡ᠃ ᠳᠡᠷᠭᠡᠳᠡᠬᠢ ᠠᠷᠪᠠᠭᠠᠢ ᠳ᠋ᠠᠭᠠᠨ ᠴᠤ᠌ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠠᠮᠢᠲᠠᠨ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠪᠠᠯ ᠵᠣᠬᠢᠬᠤ ᠶ᠋ᠢ ᠵᠠᠬᠢᠪᠠ᠃
ᠭᠡᠪᠡᠴᠦ ᠮᠠᠷᠭᠠᠰᠢ ᠨᠢ ᠠᠷᠪᠠᠭᠠᠢ ᠶ᠋ᠢᠨ ᠦᠭᠡᠢ ᠪᠡᠷ ᠬᠥᠮᠦᠨ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠬᠠᠭᠠᠯᠭᠠ ᠶ᠋ᠢ ᠴᠣᠬᠢᠵᠠᠢ᠃ ᠥᠭᠪᠡᠯ ᠫᠠᠯᠢᠮᠠ ᠥᠷᠯᠥᠭᠡᠨ ᠦ᠌ ᠮᠡᠨᠳᠦ ᠮᠡᠳᠡᠨ ᠢᠨᠢᠶᠡᠭᠰᠡᠭᠡᠷ ᠣᠷᠣᠵᠤ ᠢᠷᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠥᠴᠥᠭᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠵᠢᠭᠯᠡᠭᠰᠡᠨ ᠢ᠋ᠶ᠋ᠡᠷ ᠰᠡᠵᠢᠭᠯᠡᠭᠡᠳ ᠣᠳᠣ ᠶᠠᠭᠤ ᠭᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠪᠡᠯ᠂
— ᠭᠡᠷ ᠡᠴᠡ ᠭᠠᠷᠬᠤ ᠦᠭᠡᠢ ᠯᠡ ᠰᠠᠭᠤᠭᠠᠳ ᠪᠠᠢᠨᠠ ᠤᠤ? ᠭᠡᠪᠡ᠃
— ᠲᠡᠢᠮᠦ ᠠ᠋᠂ ᠭᠠᠷᠬᠤ ᠦᠭᠡᠢ ᠯᠡ ᠪᠠᠢᠨᠠ ᠭᠡᠬᠦ ᠳ᠋ᠦ᠍᠂
— ᠵᠥᠪ ᠳᠡ ᠭᠡᠳ ᠭᠠᠳᠠᠭᠠ ᠪᠠᠢᠳᠠᠯ ᠰᠢᠷᠦᠭᠦᠨ ᠪᠠᠢᠭᠠ ᠠ᠋ᠴᠠ ᠶᠠᠷᠢᠬᠤ ᠪᠦᠷᠢ ᠳ᠋ᠡᠭᠡᠨ ᠪᠠᠷᠤᠨ ᠣᠩᠬᠧᠷᠠᠨ ᠤ᠋ ᠡᠪᠲᠡᠢᠬᠡᠨ ᠢ᠋ᠶ᠋ᠡᠷ ᠮᠠᠭᠤᠴᠢᠯᠠᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠲᠡᠭᠡᠬᠦ ᠳᠣᠳᠣᠮ ᠪᠡᠯᠳᠠᠨᠴᠡᠷᠢᠩ᠂《ᠠ ᠳᠠ ᠴᠢ᠂ ᠠᠷᠠᠳ ᠤ᠋ᠨ ᠨᠠᠮ ᠲᠠᠢ ᠬᠣᠯᠪᠣᠭᠳᠠᠯ ᠲᠠᠢ ᠬᠡᠨ ᠪᠠᠢᠭᠠ ᠶ᠋ᠢ ᠡᠷᠢᠨ ᠰᠤᠷᠪᠤᠯᠵᠢᠯᠠᠬᠤ᠂ ᠪᠠᠷᠤᠨ ᠤᠩᠬᠧᠷᠠᠨ ᠤ᠋ ᠲᠠᠩᠨᠠᠭᠤᠯ ᠪᠣᠢ!》 ᠭᠡᠵᠦ ᠤᠯᠠᠮ ᠢ᠋ᠶ᠋ᠠᠷ ᠰᠡᠵᠢᠭᠯᠡᠨᠡ᠃ ᠲᠡᠭᠡᠭᠡᠳ ᠲᠡᠭᠦᠨ ᠦ᠌ ᠠᠮᠠ ᠶ᠋ᠢ ᠳᠠᠭᠠᠨ ᠪᠠᠷᠤᠨ ᠢ᠋ ᠮᠠᠭᠤᠴᠢᠯᠠᠬᠤ ᠠ᠋ᠴᠠ ᠪᠠᠨ ᠠᠶᠤᠨᠠ᠃ ᠥᠮᠥᠭᠯᠡᠭᠴᠢ ᠪᠣᠯᠤᠶᠠ ᠭᠡᠲᠡᠯᠡ ᠠᠮᠠᠨ ᠳ᠋ᠤ᠌ ᠦᠭᠡ ᠦᠯᠦ ᠡᠪᠯᠡᠷᠡᠨᠡ᠃ ᠫᠠᠯᠢᠮᠠ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠤᠯᠭᠠᠮᠳᠠᠬᠤ ᠳ᠋ᠠᠭᠠᠨ《ᠠ ᠬᠠᠢ᠂ ᠵᠠ ᠦᠭᠡᠢ᠂ ᠶᠡᠷᠦ ᠠ᠋》 ᠭᠡᠬᠦ ᠲᠡᠳᠦᠢᠬᠡᠨ ᠢ᠋ ᠯᠡ ᠬᠡᠯᠡᠨᠡ᠃ ᠭᠡᠲᠡᠯᠡ᠄
— ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡ ᠵᠦᠢᠯ ᠢ᠋ ᠰᠣᠨᠢᠷᠬᠠᠭᠤᠯᠬᠤ ᠪᠠᠷ ᠠᠪᠴᠢᠷᠠᠭᠰᠠᠨ ᠭᠡᠳ ᠬᠣᠶᠠᠷ ᠬᠡᠰᠡᠭ ᠭᠠᠷ ᠪᠢᠴᠢᠮᠡᠯ ᠵᠦᠢᠯ ᠢ᠋ ᠭᠠᠷᠭᠠᠵᠤ ᠥᠭᠪᠡ᠃
— ᠡᠨᠡ ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠣᠢ? ᠭᠡᠬᠦ ᠳ᠋ᠦ᠍᠂
— ᠲᠤᠩ ᠴᠢᠬᠤᠯᠠ ᠮᠡᠳᠡᠭᠦᠰᠢᠲᠡᠢ ᠯᠡ ᠵᠦᠢᠯ ᠳᠡ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠭᠡᠷ ᠡᠴᠡ ᠭᠠᠷᠪᠠ᠃ ᠪᠢᠴᠢᠭ ᠢ᠋ ᠦᠵᠡᠪᠡᠯ ᠨᠢᠭᠡᠳᠡᠬᠢ ᠨᠢ᠄ ᠣᠷᠣᠰ ᠤ᠋ᠨ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ1917 ᠣᠨ ᠤ᠋ ᠤᠻᠲ᠋ᠢᠶᠠᠪᠡᠷ ᠬᠡᠮᠡᠬᠦ ᠠᠷᠪᠠᠳᠤᠭᠠᠷ ᠰᠠᠷᠠ ᠳ᠋ᠤ᠌ ᠬᠠᠷᠭᠢᠰ ᠲᠢᠭᠯᠢᠮᠲᠦ ᠬᠠᠭᠠᠨᠲᠤ ᠵᠠᠰᠠᠭ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠨ ᠪᠣᠰᠴᠤ ᠤᠰᠠᠳᠬᠠᠨ᠂ ᠨᠡᠢᠭᠡᠮ ᠵᠢᠷᠤᠮᠲᠤ ᠣᠷᠣᠰ ᠤᠯᠤᠰ ᠲᠣᠭᠲᠠᠭᠠᠭᠰᠠᠨ ᠲᠤᠩᠬᠠᠭ᠃ ᠬᠣᠶᠠᠳᠠᠬᠢ ᠨᠢ᠄ ᠮᠥᠨ ᠣᠷᠣᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠲᠦᠷᠦᠭᠦᠴᠢ ᠶ᠋ᠢᠨ ᠬᠠᠭᠠᠨᠲᠤ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠮᠣᠩᠭᠣᠯ᠂ ᠹᠷᠠᠨᠼᠢ᠂ ᠲᠦᠷᠺ ᠭᠤᠷᠪᠠᠨ ᠤᠯᠤᠰ ᠢ᠋ ᠡᠵᠡᠮᠰᠢᠬᠦ ᠭᠡᠵᠦ ᠪᠠᠢᠭᠰᠠᠨ ᠢ᠋ ᠲᠡᠮᠳᠡᠭᠯᠡᠭᠡᠳ ᠳᠠᠷᠠᠭᠠ ᠨᠢ ᠬᠠᠭᠠᠨᠲᠤ ᠵᠠᠰᠠᠭ ᠠ᠋ᠴᠠ ᠮᠣᠩᠭᠣᠯ ᠤᠷᠤᠭᠤ ᠬᠠᠨᠳᠤᠭᠤᠯᠤᠭᠰᠠᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠤᠪ ᠮᠡᠬᠡ ᠨᠦ᠍ᠭᠦᠳ ᠢ᠋ ᠰᠢᠭᠤᠳ ᠢᠯᠡᠷᠬᠡᠢᠯᠡᠭᠡᠳ ᠤᠷᠠᠬᠠᠳᠠᠨ ᠠᠪᠬᠤ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠵᠢᠭᠡᠯᠡᠲᠤᠯᠦᠭᠰᠡᠨ ᠮᠥᠩᠭᠥ᠂ ᠲᠤᠰᠬᠠᠢ ᠳ᠋ᠠᠭᠠᠨ ᠡᠳ᠋ᠯᠡᠬᠦ ᠪᠣᠯᠤᠭᠰᠠᠨ ᠡᠯᠳᠡᠪ ᠡᠷᠬᠡ ᠪᠦᠭᠦᠳᠡ ᠶ᠋ᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠡᠪ ᠨᠠᠢᠷᠠᠮᠳᠠᠯ ᠢ᠋ ᠰᠢᠨᠡ ᠪᠡᠷ ᠰᠡᠷᠭᠦᠭᠡᠬᠦ ᠶ᠋ᠢ ᠡᠷᠡᠮᠡᠯᠵᠡᠯᠢᠭᠰᠡᠨ ᠮᠡᠳᠡᠭᠡ ᠪᠢᠴᠢᠭ ᠠᠵᠢ᠃ ᠡᠳᠡᠭᠡᠷ ᠢ᠋ ᠪᠠᠯᠳᠠᠨᠴᠡᠷᠢᠩ ᠱᠣᠷᠣᠩ ᠤ᠋ᠨ ᠦᠮᠡᠬᠡᠢ ᠪᠤᠯᠤᠩ ᠳ᠋ᠤ᠌ ᠵᠠᠮᠢᠶᠠᠨ ᠬᠦᠩ ᠡᠴᠡ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠶᠠᠩᠵᠤ ᠪᠦᠷᠢ ᠪᠡᠷ ᠳ᠋ᠦᠩᠨᠡᠨ ᠰᠤᠳᠤᠯᠤᠭᠰᠠᠨ ᠪᠣᠯᠬᠣᠷ ᠰᠣᠨᠢᠷᠬᠠᠭᠰᠠᠨ ᠵᠦᠢᠯ ᠦᠭᠡᠢ᠃ ᠬᠠᠷᠢᠨ ᠣᠳᠣ ᠫᠠᠯᠢᠮᠠ ᠶ᠋ᠢᠨ ᠠᠪᠴᠢᠷᠠᠵᠤ ᠥᠭᠬᠦ ᠶ᠋ᠢᠨ ᠤᠴᠢᠷ ᠶᠠᠭᠤ ᠪᠣᠢ? ᠭᠡᠬᠦ ᠡᠴᠡ ᠮᠥᠨ ᠯᠡ ᠲᠠᠩᠨᠠᠨ ᠲᠤᠷᠰᠢᠬᠤ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠪᠣᠯ ᠤᠤ? ᠭᠡᠬᠦ ᠡᠴᠡ ᠥᠭᠡᠷᠡ ᠰᠢᠯᠲᠠᠭᠠᠨ ᠠᠯᠠᠭᠠ᠃
ᠮᠠᠷᠭᠠᠰᠢ ᠨᠢ ᠪᠠᠰᠠ ᠯᠠ ᠬᠠᠭᠠᠯᠭᠠ ᠴᠣᠬᠢᠯᠠ᠃ ᠮᠥᠨ ᠯᠡ ᠫᠠᠯᠢᠮᠠ ᠢᠨᠢᠶᠡᠮᠰᠦᠭᠯᠡᠯ ᠢ᠋ᠶ᠋ᠡᠷ ᠢᠷᠡᠭᠡᠳ᠄
— ᠥᠨᠥᠬᠢ ᠪᠢᠴᠢᠭ ᠢ᠋ ᠤᠩᠰᠢᠭᠰᠠᠨ ᠤᠤ? ᠰᠡᠳᠬᠢᠯ ᠳ᠋ᠦ᠍ ᠴᠢᠨᠢ ᠶᠠᠭᠤ ᠪᠣᠳᠣᠭᠳᠠᠪᠠ᠃
— ᠤᠩᠰᠢᠭᠰᠠᠨ᠂ ᠰᠣᠨᠢᠨ ᠯᠠ ᠪᠠᠢᠨᠠ᠂ ᠭᠡᠪᠡᠴᠦ ᠪᠢᠳᠡᠨ ᠦ᠌ ᠳᠡᠭᠡᠷᠡ ᠪᠣᠭᠳᠠ ᠯᠠᠮᠠᠳᠠᠨ᠂ ᠳᠡᠰ ᠳᠠᠷᠠᠭᠠ ᠶᠡᠬᠡᠰ ᠮᠡᠷᠭᠡᠳ ᠪᠠᠢᠨᠠ᠂ ᠬᠣᠢᠨᠠ ᠨᠠᠳᠠ ᠮᠡᠲᠦ ᠶ᠋ᠢᠨ ᠬᠢᠨ ᠢ᠋ ᠶᠠᠭᠤ ᠶ᠋ᠢ ᠨᠢ ᠪᠣᠳᠣᠬᠤ ᠪᠢᠯᠡ ᠭᠡᠪᠡᠯ᠂
— ᠵᠠ ᠬᠠᠮᠢᠭᠠ ᠠ᠋ᠴᠠ! ᠭᠡᠳ ᠫᠠᠯᠢᠮᠠ ᠵᠥᠩᠳᠡᠭᠡᠨ ᠢᠨᠢᠶᠡᠪᠡ᠃ ᠡᠨᠡ ᠨᠢ ᠱᠠᠯ ᠬᠠᠭᠤᠷᠠᠢ ᠢᠨᠢᠶᠡᠳᠦ᠂ ᠶᠣᠰᠣᠲᠠᠢ ᠯᠠ ᠲᠠᠩᠨᠠᠭᠤᠯ ᠬᠥᠮᠦᠨ ᠠᠷᠭᠠ ᠪᠠᠨ ᠪᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠢᠩᠭᠢᠳᠡᠭ ᠪᠠᠢᠬᠤ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠪᠣᠳᠣᠭᠳᠠᠪᠠ᠃ ᠮᠠᠷᠭᠠᠰᠢ ᠨᠢ ᠪᠠᠰᠠ ᠯᠠ ᠬᠠᠭᠠᠯᠭᠠ ᠴᠣᠬᠢᠯᠠ᠃ ᠲᠠᠢᠯᠬᠤ ᠦᠭᠡᠢ ᠪᠠᠢᠶᠠ ᠭᠡᠲᠡᠯᠡ ᠶᠣᠰᠣᠨ ᠳ᠋ᠤ᠌ ᠦᠯᠦ ᠨᠡᠢᠴᠡᠨᠡ᠃ ᠲᠡᠷᠡ ᠪᠠᠢᠲᠤᠭᠠᠢ ᠶᠡᠷᠦ ᠡᠴᠡ ᠪᠡᠨ ᠬᠠᠭᠠᠯᠭᠠ ᠡᠭᠦᠳᠡ ᠶ᠋ᠢ ᠢᠮᠠᠭᠲᠠ ᠲᠦᠭᠵᠢᠬᠦ ᠨᠢ ᠵᠦᠢ ᠪᠤᠰᠤ ᠠᠵᠢ᠃ ᠪᠠᠯᠳᠠᠨᠴᠡᠷᠢᠩ ᠬᠠᠭᠠᠯᠭᠠ ᠪᠠᠨ ᠲᠠᠢᠯᠵᠤ ᠥᠭᠭᠦᠭᠡᠳ ᠶᠠᠷᠰᠢᠭ ᠤᠷᠰᠢᠭ ᠲᠠᠢ ᠶᠤᠮ᠂ ᠢᠩᠭᠢᠭᠡᠳ ᠯᠡ ᠨᠡᠭᠡᠭᠡᠯᠲᠡ ᠲᠡᠢ ᠪᠠᠢᠭ ᠭᠡᠵᠦ ᠪᠣᠳᠣᠨ ᠬᠠᠭᠠᠯᠭᠠ ᠪᠠᠨ ᠵᠣᠷᠢᠭᠤᠳᠠ ᠳᠡᠯᠭᠡᠨ ᠬᠠᠶᠠᠪᠠ᠃ ᠫᠠᠯᠢᠮᠠ ᠥᠨᠥᠳᠥᠷ ᠢᠨᠢᠶᠡᠬᠦ ᠦᠭᠡᠢ ᠬᠠᠷᠢᠨ᠂ ᠭᠤᠨᠢᠭ ᠲᠠᠢ ᠴᠢᠷᠠᠢ ᠲᠠᠢ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠨ᠄
— ᠺᠸᠮᠪᠸᠷᠵᠸᠸᠰᠺᠢ᠂ ᠺᠤᠴᠸᠷᠸᠨ᠋ᠺᠦ ᠬᠣᠶᠠᠷ ᠢ᠋ ᠪᠠᠷᠤᠨ ᠤ᠋ ᠬᠢᠨ ᠳᠡᠭᠦᠵᠢᠯᠡᠨ ᠠᠯᠠᠪᠠ ᠭᠡᠵᠦ ᠭᠠᠰᠢᠭᠤᠳᠠᠨ ᠶᠠᠷᠢᠪᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠷᠡ ᠬᠣᠶᠠᠷ ᠢ᠋ ᠮᠡᠳᠡᠨᠡ᠃ ᠮᠣᠩᠭᠣᠯ ᠳ᠋ᠤ᠌ ᠠᠷᠠᠳ ᠤ᠋ᠨ ᠨᠠᠮ ᠪᠠᠢᠭᠤᠯᠬᠤ ᠬᠡᠷᠡᠭ ᠲᠦ᠍ ᠢᠳᠡᠪᠬᠢᠯᠡᠨ ᠣᠷᠣᠯᠴᠠᠵᠤ ᠪᠠᠢᠳᠠᠭ ᠭᠡᠳᠡᠭ ᠢ᠋ ᠱᠣᠷᠣᠩ ᠳ᠋ᠤ᠌ ᠵᠠᠮᠢᠶᠠᠨ ᠬᠦᠩ ᠡᠴᠡ ᠲᠣᠳᠣᠷᠬᠠᠢ ᠰᠣᠨᠣᠰᠤᠭᠰᠠᠨ ᠤ᠋ ᠪᠠᠨ ᠬᠤᠪᠢ ᠳ᠋ᠤ᠌ ᠮᠥᠨ ᠶᠡᠬᠡᠳᠡ ᠬᠠᠷᠠᠰᠪᠠ᠃ ᠭᠡᠪᠡᠴᠦ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠲᠣᠪ ᠳᠤᠭᠤᠢ ᠳᠣᠷᠣᠭᠰᠢ ᠰᠢᠷᠲᠡᠭᠰᠡᠭᠡᠷ ᠰᠠᠭᠤᠭᠠᠳ ᠫᠠᠯᠢᠮᠠ ᠶ᠋ᠢ ᠭᠠᠷᠭᠠᠪᠠ᠃ ᠡᠭᠦᠨᠴᠡ ᠬᠣᠢᠰᠢ ᠫᠠᠯᠢᠮᠠ ᠶᠢᠨ ᠢᠷᠡᠬᠦ ᠨᠢ ᠴᠥᠭᠡᠷᠡᠯᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠳᠣᠯᠣᠭᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠬᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ ᠠᠱ᠌ᠢᠭᠦᠢ ᠲᠡᠷᠡ ᠲᠠᠩᠨᠠᠭᠤᠯ ᠴᠥᠬᠥᠷᠡᠩᠭᠡ ᠪᠡᠨ ᠪᠠᠷᠠᠭᠰᠠᠨ ᠪᠣᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠨᠠ᠃ ᠡᠴᠦᠰ ᠦ᠋ᠨ ᠤᠳᠠᠭᠠ ᠨᠢᠭᠡ ᠢᠷᠡᠭᠡᠳ ᠵᠥᠪᠬᠡᠨ ᠠᠮᠤᠷ ᠮᠡᠨᠳᠦ ᠮᠡᠳᠡᠯᠴᠡᠭᠰᠡᠨ ᠡᠴᠡ ᠴᠠᠭᠠᠰᠢ ᠶᠠᠭᠤᠮᠠ ᠦᠭᠡᠢ ᠳᠣᠷᠣᠭᠰᠢ ᠰᠢᠷᠳᠡᠨ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤᠨᠢ ᠨᠢᠭᠡ ᠬᠥᠮᠦᠨ ᠬᠠᠭᠠᠯᠭᠠ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠨᠡᠭᠡᠭᠡᠨ᠄ ᠵᠠ ᠪᠠᠷᠠᠭᠠᠯᠠᠭᠵᠤ ᠪᠣᠯᠬᠤ ᠪᠣᠯ ᠤᠤ? ᠭᠡᠪᠡ᠃ ᠦᠵᠡᠪᠡᠯ ᠨᠢᠭᠡ ᠯᠠᠮᠠ᠃ ᠮᠣᠷᠢᠯᠠ᠂ ᠮᠣᠷᠢᠯᠠ ᠭᠡᠬᠦ ᠳ᠋ᠦ᠍ ᠯᠠᠮᠠ ᠠᠯᠭᠤᠷ ᠬᠥᠳᠡᠯᠦᠨ ᠪᠣᠱᠣᠭᠠ ᠳᠠᠪᠠᠵᠤ᠂ ᠥᠷᠭᠡᠨ ᠣᠷᠬᠢᠮᠵᠢ ᠶ᠋ᠢᠨ ᠨᠠᠮᠢᠷᠠᠬᠤ ᠦᠵᠦᠭᠦᠷ ᠢ᠋ ᠠᠯᠭᠤᠷ ᠡᠷᠭᠦᠨ ᠠᠪᠴᠤ ᠠᠮᠤᠷ ᠡᠷᠢᠭᠡᠳ᠄
— ᠪᠠᠭᠰᠢ ᠯᠠᠮᠠᠳᠠᠨ ᠲᠠᠨ ᠢ᠋ ᠮᠣᠷᠢᠯᠠᠨ ᠢᠷᠡᠵᠦ ᠠᠭᠤᠯᠵᠠᠨᠠ ᠤᠤ ᠭᠡᠵᠦ ᠨᠠᠮᠠᠶ᠋ᠢ ᠶᠠᠪᠤᠭᠤᠯᠪᠠ᠃
— ᠪᠠᠭᠰᠢ ᠯᠠᠮᠠᠳᠠᠨ ᠭᠡᠵᠦ ᠬᠡᠨ ᠪᠣᠢ?
— ᠳᠠᠷᠢ ᠡᠬᠡ ᠯᠠᠮᠠᠲᠠᠨ᠃
— ᠨᠡᠷᠡ ᠶ᠋ᠢ ᠨᠢ ᠰᠣᠨᠣᠰᠤᠮᠠᠭᠴᠠ ᠲᠡᠭᠦᠨ ᠦ᠌ ᠱᠣᠷᠣᠩ ᠳ᠋ᠤ᠌ ᠲᠤᠩ ᠬᠡᠨᠡᠭ ᠦᠭᠡᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠠᠴᠢᠨ ᠳᠦᠷᠢ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠰᠡᠷᠭᠦᠬᠦ ᠰᠢᠭ ᠪᠣᠯᠪᠠ᠃
— ᠰᠣᠨᠣᠰᠤᠯᠠ᠂ ᠯᠠᠮᠠᠳᠠᠨ ᠳ᠋ᠤ᠌ ᠮᠠᠷᠭᠠᠰᠢ ᠪᠠᠷᠭᠠᠯᠬᠠᠶᠠ ᠭᠡᠵᠦ ᠠᠢᠯᠠᠳᠬᠠᠨᠠ ᠤᠤ?
— ᠵᠠ ᠭᠡᠳ ᠯᠠᠮᠠ ᠭᠠᠷᠪᠠ᠃ ᠳᠠᠷᠠᠭᠠ ᠨᠢ ᠫᠠᠯᠢᠮᠠ ᠶᠠᠪᠤᠵᠠᠢ᠃ ᠭᠡᠷ ᠥᠷᠯᠥᠭᠡᠨ ᠦ᠌ ᠲᠦᠯᠡᠯᠲᠡ ᠳ᠋ᠦ᠍ ᠮᠢᠨᠴᠢᠳᠲᠡᠯᠡ ᠪᠡᠨ ᠬᠠᠯᠠᠰᠠᠨ ᠨᠢᠮᠭᠡᠨ ᠲᠡᠮᠦᠷ ᠵᠤᠤᠬᠠ ᠠᠯᠢ ᠬᠡᠳᠦᠢᠨ ᠬᠦᠷᠦᠵᠦ᠂ ᠬᠦᠢᠲᠡᠨ ᠵᠢᠪᠠᠷ ᠡᠷᠭᠢᠯᠳᠦᠨᠡ᠃ ᠭᠠᠷ ᠬᠥᠯ ᠦᠵᠦᠭᠦᠷ ᠡᠴᠡ ᠪᠡᠨ ᠡᠬᠢᠯᠡᠨ ᠲᠠᠭᠠᠷᠠᠬᠤ ᠮᠠᠶᠢᠭ ᠲᠠᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠲᠦᠯᠡᠭᠡ ᠪᠡᠨ ᠬᠠᠢᠷᠠᠯᠠᠨ᠂ ᠬᠠᠨᠴᠤᠢ ᠳ᠋ᠠᠭᠠᠨ ᠭᠠᠷ ᠵᠥᠷᠢᠭᠦᠯᠦᠨ ᠰᠠᠭᠤᠭᠰᠠᠭᠠᠷ ᠯᠠ ᠪᠠᠢᠪᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠭᠡᠷ ᠦ᠋ᠨ ᠬᠠᠶᠠᠭᠠᠨᠠ ᠨᠢᠭᠡ ᠶᠠᠭᠤᠮᠠ ᠳᠡᠰ ᠬᠢᠨ ᠳᠤᠤᠭᠠᠷᠪᠠ᠃ ᠡᠨᠡ ᠴᠢᠨᠢ ᠶᠠᠭᠤ ᠪᠠᠢᠳᠠᠭ ᠪᠢᠯᠡ? ᠬᠠᠶᠠᠭᠠᠨ ᠳ᠋ᠤ᠌ ᠬᠤᠪᠢᠩ ᠲᠠᠢ ᠤᠰᠤ ᠬᠥᠯᠲᠡᠨ ᠳᠤᠮᠳᠠ ᠪᠠᠨ ᠳᠣᠪᠣᠢᠨ ᠬᠠᠭᠠᠷᠠᠵᠤ ᠪᠠᠢᠭᠠ ᠠᠵᠢ᠃ ᠭᠡᠪᠡᠴᠦ ᠪᠠᠯᠳᠠᠨᠵᠡᠷᠢᠩ ᠰᠠᠭᠤᠭᠰᠠᠭᠠᠷ ᠯᠠ᠃ ᠰᠡᠳᠬᠢᠯ ᠬᠥᠳᠡᠭᠡ ᠭᠠᠷᠬᠤ᠂ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠠᠨ ᠬᠥᠷᠥᠩᠭᠡ ᠵᠠᠷᠤᠳᠠᠯ ᠪᠠᠭᠠ ᠣᠷᠣᠬᠤ ᠨᠢᠭᠡ ᠠᠢᠯ ᠤ᠋ᠨ ᠬᠡᠦᠬᠡᠨ ᠲᠡᠢ ᠰᠠᠭᠤᠬᠤ᠂ ᠲᠡᠭᠡᠭᠡᠳ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠷ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ᠂ ᠲᠡᠭᠦᠨ ᠳ᠋ᠡᠭᠡᠨ ᠤᠷᠢᠨ ᠳᠤᠯᠠᠭᠠᠨ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠵᠦ ᠶᠠᠳᠠᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠯᠠ ᠡᠷᠭᠢᠯᠳᠦᠨᠡ᠃
ᠬᠠᠭᠠᠯᠭᠠ ᠰᠠᠮ ᠨᠡᠭᠡᠭᠡᠭᠳᠡᠨ ᠲᠦᠷᠦᠭᠦᠨ ᠦ᠌ ᠯᠠᠮᠠ《ᠵᠠ ᠪᠠᠷᠠᠭᠠᠯᠬᠠᠶᠠ》 ᠭᠡᠵᠦ ᠴᠡᠭᠡᠵᠢ ᠳᠠᠷᠤᠨ ᠨᠠᠬᠢᠰᠬᠢᠨ ᠣᠷᠣᠵᠤ ᠢᠷᠡᠭᠡᠳ᠂
— ᠪᠠᠭᠰᠢ ᠯᠠᠮᠠᠳᠠᠨ ᠲᠤᠩ ᠴᠢᠬᠤᠯᠠ ᠬᠡᠷᠡᠭ ᠲᠡᠢ᠂ ᠠᠷᠭᠠ ᠦᠭᠡᠢ ᠣᠳᠣᠬᠠᠨ ᠢᠷᠡᠵᠦ ᠠᠭᠤᠯᠵᠠᠨᠠ ᠤᠤ ᠭᠡᠵᠦ ᠳᠠᠬᠢᠨ ᠨᠠᠮᠠᠶ᠋ᠢ ᠶᠠᠪᠤᠭᠤᠯᠪᠠ᠃
— ᠵᠠ ᠲᠡᠭᠡᠪᠡᠯ ᠣᠴᠢᠯᠭᠦᠢ ᠶᠠᠭᠠᠬᠢᠬᠤᠪ ᠭᠡᠳ ᠪᠠᠯᠳᠠᠨᠴᠡᠷᠢᠩ ᠶᠠᠭᠠᠷᠠᠨ ᠭᠠᠷᠪᠠ᠃
ᠳᠠᠷᠢ ᠡᠬᠡ ᠯᠠᠮᠠ ᠶ᠋ᠢᠨ ᠬᠢ ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠳᠤᠮᠳᠠ ᠨᠢᠭᠤᠷᠤᠨ ᠳ᠋ᠤ᠌ ᠪᠠᠢᠳᠠᠭ ᠪᠠᠢᠯᠠ᠃ ᠣᠳᠣ ᠦᠵᠡᠪᠡᠯ ᠳᠤᠮᠳᠠ ᠰᠠᠢᠬᠠᠨ ᠬᠠᠰᠢᠶᠠᠨ ᠤ᠋ ᠪᠠᠨ ᠶᠡᠬᠡ ᠬᠠᠭᠠᠯᠭᠠ ᠶ᠋ᠢ ᠨᠢ ᠬᠢᠷᠥᠭᠡᠳᠡᠵᠦ ᠬᠠᠶᠠᠭᠰᠠᠨ ᠨᠢ ᠭᠠᠢᠬᠠᠯᠲᠠᠢ᠃ ᠤᠯᠠᠭᠠᠨ ᠬᠠᠯᠵᠠᠲᠠᠢ ᠲᠣᠮᠣ ᠴᠠᠭᠠᠨ ᠥᠷᠥᠭᠡ ᠨᠢ ᠲᠦᠩᠬᠦᠢᠬᠦ ᠪᠣᠯᠪᠠᠴᠤ᠂ ᠲᠠᠯᠠ ᠳᠣᠲᠣᠷᠠ ᠪᠠᠢᠭᠠ ᠰᠢᠭ᠋ ᠪᠥᠭᠡᠳ ᠤᠷᠢᠳ ᠨᠢ ᠬᠠᠰᠢᠶᠠᠨ ᠤ᠋ ᠪᠠᠭᠠ ᠬᠠᠭᠠᠯᠭᠠ ᠭᠠᠭᠴᠠᠭᠠᠷ ᠶᠣᠷᠳᠣᠢᠬᠤ ᠨᠢ ᠶᠣᠰᠣ ᠪᠣᠯᠭᠠᠨ ᠦᠯᠡᠳᠡᠭᠰᠡᠨ ᠨᠢ ᠢᠯᠡᠷᠬᠡᠢ᠃
— ᠵᠠ ᠲᠠᠨ ᠤ᠋ ᠬᠢ ᠴᠢᠨᠢ ᠶᠠᠭᠠᠬᠢᠬᠤ ᠪᠠᠷ ᠢᠩᠭᠢᠵᠦ ᠬᠠᠮᠤᠭ ᠬᠠᠰᠢᠶᠠ ᠪᠠᠨ ᠬᠠᠲᠠᠵᠤ ᠣᠷᠬᠢᠳᠠᠭ ᠪᠢᠯᠡ᠃ ᠭᠡᠬᠦ ᠳ᠋ᠦ᠍ ᠯᠠᠮᠠ᠄
— ᠵᠠ ᠭᠡᠵᠦ ᠠᠯᠠᠭᠠ ᠬᠠᠪᠰᠤᠷᠤᠨ ᠤᠷᠢᠳ ᠢ᠋ᠶ᠋ᠠᠨ ᠪᠠᠷᠢᠵᠤ ᠪᠠᠭᠰᠢ ᠯᠠᠮᠠᠳᠠᠨ ᠱᠣᠷᠣᠩ ᠠ᠋ᠴᠠ ᠮᠣᠷᠢᠯᠠᠵᠤ ᠢᠷᠡᠭᠰᠡᠨ ᠦ᠌ ᠪᠡᠨ ᠣᠷᠣᠢ ᠨᠠᠩᠴᠢᠳ ᠪᠣᠯᠭᠣᠭᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠬᠠᠭᠠᠯᠭᠠ ᠲᠦᠭᠵᠢᠭᠰᠡᠨ ᠡᠴᠡ ᠪᠣᠯᠤᠨ ᠬᠢᠯᠢᠩᠨᠡᠵᠦ ᠶᠡᠷᠦ ᠨᠢ ᠭᠠᠮᠢᠩ ᠠ᠋ᠴᠠ ᠬᠠᠮᠠᠭᠠᠯᠠᠵᠤ ᠴᠢᠳᠠᠭᠠ ᠦᠭᠡᠢ ᠬᠠᠰᠢᠶᠠ ᠶᠠᠭᠤᠨ ᠳ᠋ᠤ᠌ ᠬᠡᠷᠡᠭᠲᠡᠢ ᠶᠦᠮ ᠪᠣᠢ? ᠡᠭᠦᠨᠴᠡ ᠬᠣᠢᠰᠢ ᠬᠡᠨ ᠳᠤᠷᠠ ᠲᠠᠢ ᠨᠢ ᠴᠢᠯᠥᠭᠡᠲᠡᠢ ᠣᠷᠣᠵᠤ ᠢᠷᠡᠴᠦ ᠪᠠᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠥᠯᠥᠰᠬᠦᠯᠡᠩ ᠨᠣᠬᠠᠳ ᠴᠤ᠌ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠴᠤᠭᠯᠠᠷᠠᠵᠤ ᠪᠠᠢᠭ ᠭᠡᠵᠦ ᠠᠢᠯᠠᠳᠤᠨ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠬᠢᠷᠦᠭᠡᠳᠡᠭᠦᠯᠦᠭᠰᠡᠨ ᠶᠦᠮ ᠭᠡᠵᠦ ᠰᠦᠰᠦᠭ ᠡᠷᠭᠦᠨ ᠬᠠᠷᠢᠭᠤᠯᠪᠠ᠃ ᠪᠠᠯᠳᠡᠨᠴᠡᠷᠢᠩ ᠳ᠋ᠦ᠍ ᠪᠣᠯ ᠰᠦᠰᠦᠭᠯᠡᠬᠦ ᠶᠠᠭᠤᠮᠠ ᠠᠯᠠᠭᠠ᠃ ᠵᠦᠭᠡᠷ ᠳᠠᠷᠢ ᠡᠬᠡ ᠯᠠᠮᠠ ᠶ᠋ᠢᠨ ᠬᠥᠮᠦᠨ ᠡᠴᠡ ᠡᠲᠡᠭᠡᠳ ᠵᠠᠩ ᠴᠢᠨᠠᠷ ᠲᠠᠢ ᠶ᠋ᠢ ᠨᠢ ᠭᠠᠢᠬᠠᠨᠠ᠃ ᠡᠨᠡ ᠯᠠᠮᠠ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ ᠳ᠋ᠠᠨ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠠ᠋ᠴᠠ ᠭᠠᠵᠢᠭᠤᠳᠠ᠃ ᠭᠠᠵᠠᠷ ᠯᠤᠤᠰ ᠲᠣᠭᠰᠢᠷᠪᠠ ᠭᠡᠪᠡᠯ ᠪᠤᠯᠠᠭ ᠱᠠᠩᠳᠠ ᠤᠷᠤᠭᠤ ᠨᠢ ᠪᠤᠵᠠᠷ ᠪᠤᠷᠲᠠᠭ ᠢ᠋ ᠬᠢᠨ ᠳᠥᠪᠴᠢᠬᠡᠨᠡᠨᠡ᠃ ᠬᠠᠯᠳᠠᠪᠤᠷᠢᠲᠤ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠭᠠᠷᠪᠠ ᠭᠡᠪᠡᠯ ᠵᠣᠷᠢᠭᠤᠳᠠ ᠬᠡᠰᠦᠭᠦᠴᠢᠯᠡᠨ ᠲᠦᠷᠡᠮᠳᠡᠨ ᠲᠦᠪᠴᠢᠬᠢᠨᠡᠨᠡ᠃ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠠᠯᠲᠠᠨ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠬᠤ᠂ ᠠᠪᠠᠭᠠᠢ ᠡᠬᠡᠨᠡᠷ ᠦ᠋ᠳ ᠲᠡᠢ ᠳᠡᠭᠡᠷᠡ ᠳᠣᠣᠷᠠ ᠣᠷᠣᠬᠤ ᠨᠢ ᠶᠡᠷᠦᠳᠡ ᠶ᠋ᠢᠨ ᠬᠡᠷᠡᠭ᠃ ᠲᠡᠷᠡ ᠪᠦᠬᠦᠨ ᠦ᠌ ᠳᠤᠮᠳᠠ ᠠ᠋ᠴᠠ ᠬᠥᠮᠦᠨ ᠡᠨᠡ ᠲᠡᠷᠡ ᠶ᠋ᠢ ᠬᠠᠷᠠᠳᠠᠨ ᠰᠡᠵᠢᠭᠯᠡᠵᠦ ᠶᠠᠳᠠᠬᠤ ᠳ᠋ᠠᠭᠠᠨ ᠡᠭᠦᠳᠡ ᠬᠠᠭᠠᠯᠭᠠ ᠪᠠᠨ ᠬᠠᠭᠠᠵᠤ ᠲᠦᠭᠵᠢᠬᠦ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠬᠤ ᠳ᠋ᠤ᠌ ᠡᠳᠡ ᠬᠠᠲᠠᠵᠤ ᠬᠠᠶᠠᠭᠰᠠᠨ ᠨᠢ ᠬᠠᠷᠢᠨ ᠬᠠᠮᠤᠭ ᠠ᠋ᠴᠠ ᠰᠡᠴᠡᠨ᠂ ᠣᠢᠷᠠᠲᠤᠨ ᠣᠴᠢᠮᠠᠭᠴᠠ ᠣᠯᠠᠨ ᠲᠣᠮᠣ ᠨᠣᠬᠠᠳ ᠬᠠᠶᠠᠭᠠ ᠠ᠋ᠴᠠ ᠨᠢ ᠬᠤᠴᠠᠯᠳᠤᠨ ᠪᠣᠰᠴᠤ ᠬᠣᠰᠢᠭᠤᠷᠬᠤ ᠨᠢ ᠬᠡᠨ ᠢ᠋ ᠴᠦ᠍ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠦᠨᠡ᠃ ᠶᠣᠰᠣ ᠪᠣᠯᠭᠠᠨ ᠦᠯᠡᠳᠡᠭᠡᠭᠰᠡᠨ ᠬᠠᠭᠠᠯᠭᠠ ᠪᠠᠷ ᠨᠢ ᠳᠠᠮᠵᠢᠨ ᠥᠷᠥᠭᠡᠨ ᠳ᠋ᠦ᠍ᠨᠢ ᠪᠠᠷᠠᠭᠠᠯᠬᠠᠬᠤ ᠳ᠋ᠤ᠌ ᠯᠠᠮᠠ ᠤᠯᠠᠭᠠᠨ ᠵᠡᠷᠭᠡᠳᠡ ᠪᠣᠯᠤᠭᠰᠠᠨ ᠴᠢᠷᠠᠢ ᠪᠠᠷ ᠳᠠᠭᠤ ᠠᠯᠲᠠᠨ ᠤᠭᠲᠤᠨᠠ᠃
— ᠯᠠᠮᠠᠳᠠᠨ ᠯᠠᠭᠰᠢᠨ ᠲᠤᠩᠭᠠᠯᠠᠭ ᠤᠤ ᠭᠡᠵᠦ ᠬᠦᠨᠳᠦᠳᠬᠡᠨ ᠮᠡᠬᠦᠰᠬᠢᠬᠦ ᠳ᠋ᠦ᠍᠂
— ᠵᠠ ᠶᠠᠷᠰᠢᠭ᠂ ᠱᠣᠷᠣᠩ ᠳ᠋ᠤ᠌ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠪᠡᠶᠡ᠂ ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠢᠷᠡᠭᠡᠳ ᠶᠠᠭᠠᠬᠢᠪᠠ ᠯᠠ ᠭᠡᠵᠦ ᠬᠡᠯᠡᠨ ᠳᠡᠰ ᠨᠢᠰ ᠢᠨᠢᠶᠡᠨᠡ᠃ ᠵᠠ ᠴᠢ ᠳᠡᠭᠡᠭᠰᠢ ᠪᠡᠨ ᠭᠡᠭᠰᠡᠭᠡᠷ ᠭᠡᠷ ᠦ᠋ᠨ ᠨᠢᠭᠡ ᠲᠠᠯᠠ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠥᠪᠡᠷ ᠲᠡᠢ ᠪᠡᠨ ᠮᠥᠷᠥ ᠵᠡᠷᠭᠡᠴᠡᠭᠦᠯᠦᠨ ᠰᠠᠭᠤᠯᠭᠠᠪᠠ᠃ ᠲᠡᠷᠡ ᠳᠣᠣᠷᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠨᠦᠰᠡᠷ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ᠄ ᠵᠠ ᠪᠠᠯᠳᠠᠨᠴᠡᠷᠢᠩ ᠰᠠᠢᠨ ᠪᠢᠵᠡ ᠳᠡ? ᠭᠡᠬᠦ ᠳ᠋ᠦ᠍ᠨᠢ ᠬᠠᠷᠠᠪᠠᠯ ᠰᠣᠭᠲᠣᠭᠤ ᠪᠠᠭᠠᠲᠤᠷ ᠡᠳᠦᠭᠡ ᠮᠥᠨ ᠱᠣᠷᠣᠩ ᠳ᠋ᠤ᠌ ᠪᠠᠢᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠬᠠᠲᠠᠪᠴᠢᠨ ᠳ᠋ᠤ᠌ ᠪᠣᠯᠪᠠᠴᠤ ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠳᠡᠭᠡᠷᠡ ᠬᠦᠷᠡᠩ ᠲᠣᠷᠭᠠᠨ ᠬᠠᠨᠳᠠᠭᠠᠴᠠ ᠡᠮᠦᠰᠴᠦ᠂ ᠲᠠᠰᠢᠶᠠᠨ ᠳ᠋ᠠᠭᠠᠨ ᠭᠠᠷ ᠫᠤᠤ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠨᠢ《ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠢᠯᠡ?》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠭᠡᠯᠡ᠃ ᠬᠠᠷᠢᠭᠤ ᠮᠡᠨᠳᠦᠯᠡᠭᠡᠳ ᠨᠢᠭᠤᠷ ᠢ᠋ ᠨᠢ ᠠᠵᠢᠪᠠᠯ ᠯᠠᠮᠠᠳᠠᠨ ᠤ᠋ ᠠᠳᠠᠯᠢ ᠠᠷᠢᠬᠢᠨ ᠳ᠋ᠤ᠌ ᠬᠠᠯᠠᠩᠭᠢ《ᠡᠨᠡ ᠬᠣᠶᠠᠷ ᠡᠨᠳᠡ ᠶᠣᠰᠣᠲᠠᠢ ᠯᠠ ᠪᠤᠶᠠᠨ ᠢ᠋ᠶ᠋ᠠᠨ ᠡᠳ᠋ᠯᠡᠨ ᠪᠤᠷᠬᠠᠨ ᠢ᠋ᠶ᠋ᠠᠨ ᠳᠠᠬᠢᠵᠤ ᠰᠠᠭᠤᠭᠠ ᠶᠤᠮ ᠪᠠᠢᠨᠠ ᠳᠠ》 ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠣᠳᠣᠪᠠ᠃ ᠯᠠᠮᠠ ᠥᠪᠡᠷ ᠢ᠋ᠶ᠋ᠡᠨ ᠲᠣᠮᠣ ᠳᠤᠭᠤᠢ ᠬᠡ ᠲᠡᠢ ᠶᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠮᠥᠩᠭᠥᠨ ᠬᠡᠲᠡ ᠬᠢᠲᠤᠭᠠ ᠵᠡᠭᠦᠵᠦ᠂ ᠣᠷᠣᠨ ᠤ᠋ ᠪᠠᠨ ᠠᠷᠤ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠣᠷᠣᠰ ᠯᠢᠶᠠᠨᠵᠤᠤ ᠫᠤᠤ᠂ ᠠᠯᠲᠠ ᠪᠠᠷᠢᠭᠤᠯᠲᠤ ᠰᠡᠯᠡᠮᠡ ᠵᠡᠷᠭᠡ ᠶ᠋ᠢ ᠡᠯᠭᠦᠭᠰᠡᠨ ᠨᠢ ᠮᠥᠨ ᠯᠡ ᠶᠡᠷᠦ ᠪᠢᠰᠢ᠃
ᠯᠠᠮᠠᠳᠠᠨ ᠤ᠋ ᠪᠠᠷᠠᠭᠠ ᠪᠣᠯᠤᠭᠴᠢ ᠯᠠᠮᠠ᠂ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠴᠠᠢ ᠢᠳᠡᠭᠡ ᠪᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ᠂ ᠶᠠᠭᠤ ᠶᠠᠭᠤ ᠦᠭᠡᠢ ᠬᠣᠭᠣᠯᠠ᠂ ᠬᠣᠭᠣᠯᠠᠨ ᠤ᠋ ᠬᠠᠵᠠᠭᠤ ᠪᠠᠷ ᠠᠷᠢᠬᠢ ᠪᠠᠷᠢᠪᠠ᠃ ᠯᠠᠮᠠᠲᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠡᠴᠢᠨᠡᠭᠡᠨ ᠤᠤᠭᠤᠪᠠᠴᠤ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠬᠤ ᠠ᠋ᠴᠠ ᠴᠠᠭᠠᠰᠢ ᠦᠯᠦ ᠰᠣᠭᠲᠣᠳᠠᠭ ᠲᠠᠭᠠᠨ ᠨᠠᠢᠳᠠᠬᠤ ᠮᠡᠲᠦ᠂ ᠤᠰᠤ ᠦᠭᠡᠢ ᠬᠠᠷᠠ ᠠᠷᠢᠬᠢ ᠶ᠋ᠢ ᠮᠥᠩᠭᠥᠨ ᠠᠶᠠᠭᠠ ᠪᠠᠷ ᠭᠦᠳ ᠭᠦᠳ ᠬᠢᠯᠭᠡᠨ ᠵᠣᠭᠣᠭᠯᠠᠭᠠᠳ ᠪᠤᠰᠤᠳ ᠢ᠋ ᠮᠥᠨ ᠲᠠᠢᠨᠬᠦ ᠤᠤᠭᠤᠯᠭᠠᠬᠤ ᠶ᠋ᠢ ᠣᠷᠣᠯᠳᠣᠬᠤ ᠨᠢ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠲᠣᠮᠣ ᠭᠡᠭᠴᠢ ᠠᠶᠤᠯ ᠪᠣᠯᠪᠠ᠃ ᠭᠡᠲᠡᠯᠡ ᠡᠨᠡ ᠶᠠᠭᠤ ᠴᠦ᠍ ᠪᠢᠰᠢ᠂ ᠶᠣᠰᠣᠲᠠᠢ ᠠᠶᠤᠯ ᠭᠡᠪᠡᠯ ᠯᠠᠮᠠᠳᠠᠨ᠄
— ᠪᠢ ᠪᠠᠷᠤᠨ ᠤᠩᠬᠧᠷᠡᠨ ᠦ᠌ ᠪᠦᠬᠦ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠳᠠᠭᠠᠭᠠᠬᠤ ᠯᠠᠮᠠ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠳᠡᠭᠡᠷᠡᠬᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠦᠯᠢᠶᠡᠨ ᠠᠪᠤᠯᠠ᠃ ᠨᠠᠳᠠ ᠨᠢᠭᠡ ᠪᠡᠶᠡ ᠬᠠᠮᠠᠭᠠᠯᠠᠭᠴᠢ ᠬᠡᠷᠡᠭᠲᠡᠢ ᠪᠣᠯᠬᠤ ᠳ᠋ᠤ᠌ ᠲᠡᠷᠡ ᠪᠠᠭᠠᠲᠤᠷ ᠢ᠋ ᠲᠠᠲᠠᠵᠤ ᠠᠪᠤᠯᠠ᠃ ᠣᠳᠣ ᠪᠢᠴᠢᠭ ᠬᠡᠷᠡᠭ ᠬᠥᠳᠡᠯᠭᠡᠬᠦ ᠨᠢᠭᠡ ᠬᠥᠮᠦᠨ ᠬᠡᠷᠡᠭᠲᠡᠢ᠂ ᠲᠡᠭᠦᠨ ᠳ᠋ᠦ᠍ ᠪᠢ ᠴᠢᠮᠠᠶ᠋ᠢ᠁ ᠭᠡᠲᠡᠯᠡ᠂ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠪᠦᠬᠦ ᠮᠡᠳᠡᠷᠡᠯ ᠫᠠᠯ ᠪᠠᠭᠤᠨ ᠰᠣᠴᠢᠵᠤ᠄
— ᠦᠭᠡᠢ ᠯᠠᠮᠠᠳᠠᠨ ᠠ᠋! ᠪᠢ ᠲᠡᠷᠡ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠶᠠᠮᠠᠷ ᠮᠡᠳᠡᠬᠦ ᠪᠢᠰᠢ᠁
— ᠵᠦᠭᠡᠷ! ᠡᠨᠡ ᠠᠯᠪᠠ᠃ ᠪᠢᠷ ᠪᠠᠷᠢᠬᠤ ᠠ᠋ᠴᠠ ᠪᠢᠰᠢ᠂ ᠫᠤᠤ ᠪᠠᠷᠢᠬᠤ ᠠᠯᠪᠠ ᠪᠢᠰᠢ ᠭᠡᠳ ᠢᠨᠢᠶᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠳᠣᠷᠣᠭᠰᠢ ᠰᠢᠷᠲᠡᠨ ᠪᠣᠳᠣᠯ ᠪᠣᠯᠪᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠤᠯᠤᠰ ᠣᠷᠣᠨ᠂ ᠠᠷᠠᠳ ᠲᠦᠮᠡᠨ ᠦ᠌ ᠢᠷᠡᠭᠡᠳᠦᠢ ᠶ᠋ᠢᠨ ᠬᠢᠨᠢ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠠᠰᠠᠭᠤᠳᠠᠯ ᠤ᠋ᠳ ᠪᠠᠭᠲᠠᠵᠤ ᠶᠠᠳᠠᠨ ᠡᠷᠭᠢᠯᠳᠦᠨᠡ᠃ ᠡᠴᠦᠰ ᠲᠦ᠋ᠨᠢ ᠳᠦᠭᠦᠷᠦᠭᠰᠡᠨ ᠬᠡᠷᠡᠭ ᠭᠡᠵᠦ ᠵᠣᠷᠢᠭᠵᠢᠨ᠄
— ᠦᠭᠡᠢ ᠯᠠᠮᠠᠳᠠᠨ ᠠ᠋! ᠢᠩᠭᠢᠬᠦ ᠳ᠋ᠦ᠍ ᠪᠢ ᠲᠠᠨ ᠢ᠋ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠭᠡᠵᠦ ᠲᠤᠭᠤᠯᠤᠭᠰᠠᠨ᠂ ᠡᠨᠡ ᠦᠨᠡᠨ ᠤᠤ?
— ᠦᠨᠡᠨ ᠠ᠋᠂ ᠲᠡᠭᠡᠭᠡᠳ ᠴᠦ᠍ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠣᠷᠣᠪᠠ᠃ ᠭᠡᠲᠡᠯᠡ ᠠᠷᠠᠳ ᠤ᠋ᠨ ᠨᠠᠮ ᠮᠠᠨᠢ᠁ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃
— ᠲᠡᠭᠡᠭᠡᠳ ᠣᠳᠣ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠶᠠᠪᠤᠳᠠᠯ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ?
— ᠰᠦᠬᠡᠪᠠᠭᠠᠲᠤᠷ᠂ ᠪᠣᠳᠤᠤ᠂ ᠳ᠋ᠠᠠᠽᠠᠨ ᠨᠠᠷ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠬᠣᠢᠲᠤ ᠬᠢᠯᠢ ᠳᠡᠭᠡᠷᠡ ᠢᠷᠡᠭᠡᠳ ᠭᠠᠷ ᠲᠠᠭᠠᠨ ᠠᠪᠤᠭᠠ ᠦᠭᠡᠢ ᠵᠡᠪᠰᠡᠭ ᠦ᠋ᠨ ᠲᠤᠰᠠᠯᠠᠮᠵᠢ ᠳ᠋ᠤ᠌ ᠢᠳᠡᠭᠡᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠢ᠋ ᠴᠤᠭᠯᠠᠷᠠᠭᠤᠯᠵᠤ ᠪᠠᠢᠭᠠ ᠰᠤᠷᠠᠭ ᠲᠠᠢ᠃ ᠲᠡᠷᠡ ᠪᠦᠲᠦᠬᠦ ᠦᠭᠡᠢ᠃ ᠨᠢᠭᠡ ᠳ᠋ᠦ᠍᠂ ᠤᠯᠠᠭᠠᠨ ᠣᠷᠣᠰ ᠬᠥᠮᠦᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠪᠠᠢᠲᠤᠭᠠᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠠᠳᠠᠷᠠᠵᠤ ᠣᠷᠬᠢᠭᠰᠠᠨ ᠤᠯᠤᠰ ᠠ᠋᠃ ᠬᠣᠶᠠᠷ ᠲᠤ᠂ ᠪᠠᠷᠤᠨ ᠤᠩᠬᠧᠷᠠᠨ ᠡᠨᠳᠡ ᠤᠯᠤᠰ ᠢ᠋ ᠠᠪᠤᠷᠠᠨ ᠵᠠᠰᠠᠭ ᠲᠥᠷᠥ ᠶ᠋ᠢ ᠲᠣᠭᠲᠠᠭᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠳᠡᠮᠡᠢ ᠦᠢᠮᠡᠭᠦᠯᠬᠦ ᠶ᠋ᠢᠨ ᠨᠡᠮᠡᠭᠦᠷᠢ᠃ ᠭᠤᠷᠪᠠ ᠳ᠋ᠤ᠌᠂ ᠶᠡᠷᠦᠨᠢ ᠠᠷᠠᠳ ᠤ᠋ᠨ ᠨᠠᠮ ᠭᠡᠳᠡᠭ ᠮᠠᠨᠢ ᠶᠠᠭᠤ ᠪᠣᠢ᠂ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠰᠠᠢᠨ ᠢ᠋ ᠦᠢᠯᠡᠳᠬᠦ ᠨᠢ ᠵᠥᠪ ᠪᠣᠯᠪᠠᠴᠤ ᠶᠡᠬᠡᠰ ᠳᠡᠭᠡᠳᠦᠰ ᠢ᠋ᠶ᠋ᠡᠨ ᠢᠯᠭᠠᠪᠤᠷᠢᠯᠠᠨ ᠳᠠᠩ ᠠᠷᠠᠳ ᠤ᠋ᠨ ᠨᠠᠮ ᠪᠠᠢᠬᠤ ᠨᠢ ᠣᠰᠣᠯ ᠲᠠᠢ ᠬᠡᠷᠡᠭ᠃
— ᠡᠨᠡ ᠶᠠᠪᠤᠳᠠᠯ ᠢ᠋ ᠲᠠ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠣᠯᠭᠣᠭᠠᠭᠰᠠᠨ ᠭᠡᠵᠢ ᠤᠤ?
— ᠪᠣᠳᠣᠭᠰᠠᠨ᠃ ᠠᠷᠠᠳ ᠤ᠋ᠨ ᠨᠠᠮ ᠭᠡᠵᠦ ᠨᠡᠷᠡᠯᠡᠬᠦ ᠨᠢ ᠤᠯᠠᠭᠠᠨ ᠣᠷᠣᠰ ᠠ᠋ᠴᠠ ᠵᠠᠷ ᠵᠡᠪᠰᠡᠭ ᠦ᠋ᠨ ᠲᠤᠰᠠᠯᠠᠮᠵᠢ ᠠᠪᠬᠤ ᠶ᠋ᠢᠨ ᠨᠢᠭᠡ ᠠᠷᠭᠠ ᠪᠣᠢ ᠊ᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠲᠡᠢᠮᠦ ᠪᠢᠰᠢ᠃ ᠰᠦᠬᠡᠪᠠᠭᠠᠲᠤᠷ ᠦᠨᠡᠬᠡᠷ ᠠᠷᠠᠳ ᠤ᠋ᠨ ᠨᠠᠮ ᠪᠠᠢᠭᠤᠯᠬᠤ ᠭᠡᠳ ᠪᠠᠢᠭᠠ ᠪᠣᠯᠤᠯᠲᠠᠢ᠃
— ᠢᠩᠭᠢᠬᠦᠯᠡᠷ ᠡᠨᠳᠡᠬᠢ ᠶ᠋ᠢᠨ ᠵᠠᠰᠠᠭ ᠲᠥᠷᠥ ᠮᠠᠨᠢ ᠲᠡᠳᠡᠨ ᠳᠡᠭᠡᠷᠡ ᠶᠠᠮᠠᠷ ᠪᠣᠳᠣᠯᠭᠠ ᠲᠠᠯᠪᠢᠬᠤ ᠭᠡᠵᠢ ᠪᠠᠢᠭᠠ ᠪᠣᠯ?
— ᠪᠣᠭᠳᠠ ᠡᠵᠡᠨᠲᠡᠨ ᠡᠴᠡ ᠲᠤᠰᠬᠠᠢ ᠬᠥᠮᠦᠨ ᠶᠠᠪᠤᠭᠤᠯᠬᠤ ᠭᠡᠨᠡ ᠪᠢᠯᠡ᠃ ᠪᠢᠳᠡ ᠴᠦ᠍ ᠪᠠᠰᠠ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠲᠤᠰᠠᠯᠠᠮᠵᠢ ᠬᠡᠷᠡᠭ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠤᠬᠠᠭᠤᠯᠤᠨ ᠲᠠᠨᠢᠭᠤᠯᠤᠭᠰᠠᠨ ᠪᠢᠴᠢᠭ ᠬᠢᠨ ᠬᠥᠮᠦᠨ ᠶᠠᠪᠤᠭᠤᠯᠤᠨᠠ᠃ ᠲᠡᠳᠡ ᠤᠬᠠᠭᠠᠨ ᠲᠠᠢ ᠰᠡᠷᠭᠦᠯᠡᠩ᠂ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠪᠣᠳᠣᠭᠰᠠᠨ ᠰᠠᠢᠨ ᠬᠥᠮᠦᠰ᠂ ᠡᠷᠬᠡ ᠦᠭᠡᠢ ᠤᠬᠠᠭᠠᠷᠠᠨ ᠰᠡᠩᠬᠡᠷᠡᠵᠦ ᠡᠷᠭᠢᠵᠦ ᠢᠷᠡᠬᠦ ᠪᠢᠵᠡ᠃
— ᠦᠭᠡᠢ᠂ ᠬᠡᠷᠪᠡ ᠢᠷᠡᠬᠦ ᠦᠭᠡᠢ ᠪᠣᠯ ᠶᠠᠭᠤ ᠪᠣᠯᠬᠤ ᠪᠣᠢ?
— ᠲᠡᠭᠡᠪᠡᠯ ᠤᠤ? ᠭᠡᠵᠦ ᠬᠡᠰᠡᠭ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠠᠷᠤᠨ ᠵᠠᠩᠵᠤᠨᠲᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠯᠠ ᠬᠠᠮᠤᠭ ᠤᠴᠢᠷ ᠢ᠋ ᠣᠯᠬᠤ ᠳ᠋ᠤ᠌ ᠬᠦᠷᠬᠦ ᠪᠠᠢᠬᠠ ᠳᠠ᠃
ᠡᠯᠡ ᠶᠠᠷᠢᠶᠠᠨ ᠳ᠋ᠠᠭᠠᠨ ᠪᠠᠯᠳᠠᠨᠴᠡᠷᠢᠩ ᠳᠠᠷᠢ ᠡᠬᠡ ᠯᠠᠮᠠᠲᠠᠨ ᠢ᠋ ᠴᠠᠭ ᠦᠷᠭᠦᠯᠵᠢ ᠭᠠᠢᠬᠠᠯᠠ᠃ ᠤᠷᠢᠳ ᠡᠮᠦᠨᠡ ᠣᠭᠲᠣ ᠳᠡᠮᠡᠢ᠂ ᠡᠯᠳᠡᠪ ᠶᠡᠷᠦ ᠪᠤᠰᠤ ᠪᠠᠷ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠣᠯᠵᠠ ᠣᠮᠣᠭ ᠬᠠᠢᠭᠰᠠᠨ ᠡᠲᠡᠭᠡᠳ ᠭᠡᠵᠦ ᠭᠣᠣᠯᠴᠢᠯᠠᠨ ᠦᠵᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠣᠳᠣ᠂ ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠣᠯᠤᠭᠠ ᠪᠣᠢ? ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠠᠯᠠ ᠪᠠᠷ ᠶᠠᠭ ᠦᠭᠡᠢ ᠬᠥᠮᠦᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠭᠠᠢᠬᠠᠪᠠ᠃ ᠭᠡᠪᠡᠴᠦ ᠨᠥᠭᠦᠭᠡ ᠲᠠᠯᠠ ᠪᠠᠷ ᠱᠣᠷᠣᠩ ᠳ᠋ᠤ᠌ ᠵᠠᠮᠢᠶᠠᠨ ᠬᠦᠩ ᠡᠴᠡ ᠳᠠᠷᠢ ᠡᠬᠡ ᠯᠠᠮᠠ᠂ ᠵᠠᠯᠠᠬᠠᠵᠠ ᠬᠤᠲᠤᠭᠲᠤ ᠭᠡᠬᠦ ᠮᠡᠲᠦ ᠶ᠋ᠢᠨ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠳ ᠢ᠋ ᠠᠷᠠᠳ ᠤ᠋ᠨ ᠨᠠᠮ ᠳ᠋ᠤ᠌ ᠲᠤᠤᠱᠲᠠᠢ ᠨᠥᠬᠥᠳ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠰᠢᠪᠡᠨᠡᠭᠰᠡᠨ ᠢ᠋ ᠣᠳᠣ ᠨᠢᠳᠦ ᠪᠡᠷ ᠦᠵᠡᠵᠦ ᠪᠠᠢᠭᠠ ᠪᠠᠨ ᠪᠠᠰᠠ ᠭᠠᠢᠬᠠᠨᠠ᠃
ᠭᠠᠳᠠᠭᠠ ᠴᠢᠴᠧ ᠬᠦᠷᠴᠢᠭᠢᠨᠡᠨ ᠳᠠᠪᠬᠢᠨ ᠢᠷᠡᠵᠦ ᠵᠣᠭᠰᠣᠨ ᠴᠢᠮᠡᠭᠡ ᠨᠢ ᠲᠠᠰᠤᠷᠠᠪᠠ᠃ ᠡᠨᠡ ᠬᠡᠨ ᠪᠣᠢ? ᠴᠢᠴᠧ ᠲᠡᠷᠭᠡ ᠪᠣᠭᠳᠠ ᠳ᠋ᠤ᠌ ᠬᠣᠶᠠᠷ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠨᠢ ᠭᠠᠳᠠᠭᠤᠷ ᠶᠠᠪᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠪᠠᠢᠰᠢᠩ ᠯᠠ ᠲᠠᠬᠢᠯᠲᠠᠲᠠᠢ ᠪᠠᠢᠳᠠᠭ ᠭᠡᠳᠡᠭ᠃ ᠬᠠᠷᠢᠨ ᠭᠠᠮᠢᠩ ᠤ᠋ᠨ ᠨᠣᠶᠠᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠡᠳᠦᠨ ᠴᠢᠴᠧ ᠶ᠋ᠢ ᠴᠠᠭ ᠢᠮᠠᠭᠲᠠ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠭᠤᠯᠤᠨ ᠳᠠᠪᠬᠢᠳᠠᠭ ᠪᠠᠢᠭᠰᠠᠨ ᠪᠢᠰᠢ ᠪᠢᠯᠢᠤ᠃ ᠣᠳᠣ ᠢᠩᠭᠢᠬᠦᠯᠡᠷ ᠬᠡᠨ ᠪᠠᠢᠵᠤ ᠲᠠᠭᠠᠷᠠᠬᠤ ᠪᠣᠢ?
ᠣᠭᠣᠳᠣᠩ ᠮᠠᠯᠠᠭᠠᠢ ᠲᠠᠢ ᠣᠹᠢᠼᠧᠷ ᠳᠠᠷᠢ ᠡᠬᠡ ᠯᠠᠮᠠᠳᠠᠨ ᠤ᠋ ᠳ᠋ᠤ᠌ ᠭᠠᠪᠰᠢᠭᠠᠢᠯᠠᠨ ᠣᠷᠣᠵᠤ ᠢᠷᠡᠵᠦ᠂ ᠭᠡᠷ ᠦ᠋ᠨ ᠣᠨᠢ ᠳ᠋ᠤ᠌ ᠲᠣᠯᠣᠭᠠᠢ ᠲᠤᠯᠤᠨ ᠴᠢᠭ ᠵᠣᠭᠰᠣᠵᠤ ᠴᠢᠳᠠᠬᠤ ᠦᠭᠡᠢ ᠶᠣᠰᠣᠯᠠᠩᠭᠤᠲᠠ ᠪᠠᠨ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢ ᠰᠢᠮᠳᠠᠭᠠᠢᠯᠠᠨ ᠠᠵᠢᠭᠯᠠᠪᠠ᠃ ᠠᠷᠤ ᠠ᠋ᠴᠠ ᠨᠢ ᠠᠯᠲᠠᠨ ᠸᠴᠢᠷ ᠵᠢᠩᠰᠡᠲᠡᠨ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠬᠡᠷᠬᠡᠮᠲᠤ ᠮᠠᠯᠠᠭᠠᠢ ᠲᠠᠢ ᠪᠥᠭᠡᠳ ᠰᠢᠷᠠ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠥᠨᠳᠥᠷ ᠪᠡᠶᠡ ᠲᠡᠢ ᠮᠥᠨ ᠣᠷᠣᠰ ᠬᠥᠮᠦᠨ ᠮᠠᠯᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠷᠬᠡᠮ ᠵᠡᠷᠭᠡ ᠶ᠋ᠢ ᠬᠠᠭᠠᠯᠭᠠ ᠶ᠋ᠢᠨ ᠲᠣᠲᠣᠭᠣ ᠳ᠋ᠤ᠌ ᠬᠦᠷᠭᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠪᠥᠬᠥᠢᠨ ᠪᠡᠶᠡ ᠨᠤᠮᠤᠯᠠᠨ ᠣᠷᠣᠵᠤ ᠢᠷᠡᠪᠡ᠃
ᠡᠨᠡ ᠬᠡᠨ ᠪᠣᠢ? ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠪᠠᠷᠤᠨ ᠤᠩᠬᠧᠷᠠᠨ ᠵᠠᠩᠵᠤᠨ᠃
ᠭᠡᠷ ᠲᠦ᠍ ᠪᠠᠢᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠶᠤᠨ ᠰᠦᠷᠳᠡᠵᠦ ᠵᠢᠷᠦᠬᠡ ᠳᠣᠩᠰᠣᠯᠤᠨᠠ᠃ ᠳᠠᠷᠢ ᠡᠬᠡ ᠯᠠᠮᠠᠲᠠᠨ ᠬᠦᠷᠲᠡᠯᠡ ᠶᠠᠭᠠᠷᠠᠨ ᠪᠣᠰᠤᠨ ᠬᠠᠷᠠᠢᠵᠤ《 ᠳᠡᠭᠡᠭᠰᠢ ᠪᠡᠨ ᠮᠣᠷᠢᠯᠠᠵᠤ ᠬᠠᠢᠷᠠᠯᠠ!》 ᠭᠡᠵᠦ ᠪᠥᠮᠪᠥᠭᠡᠨᠡᠨᠡ᠃ ᠭᠡᠲᠡᠯᠡ ᠪᠠᠷᠤᠨ ᠤᠩᠬᠧᠷᠠᠨ ᠶᠠᠮᠠᠷ ᠬᠡᠯᠡ ᠪᠡᠷ ᠬᠠᠷᠢᠭᠤ ᠨᠠᠢᠷ ᠲᠠᠯᠪᠢᠪᠠ᠃ ᠮᠣᠩᠭᠣᠯ ᠢ᠋ᠶ᠋ᠠᠷ᠃ ᠴᠠᠭᠠᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠶᠠᠷᠢᠬᠤ ᠨᠢ ᠴᠦ᠍ ᠮᠣᠩᠭᠣᠯ ᠬᠡᠯᠡ ᠪᠡᠷ᠃ ᠮᠣᠩᠭᠣᠯ ᠦᠭᠡ ᠬᠡᠯᠡᠪᠡᠯ ᠦᠰᠦᠭ ᠢ᠋ ᠶᠡᠬᠡᠪᠴᠢᠯᠡᠨ ᠬᠠᠮᠠᠷ ᠤ᠋ᠨ《 ᠨ》 ᠢ᠋ ᠲᠠᠩᠳᠠ ᠬᠣᠭᠣᠯᠠᠢ ᠶ᠋ᠢᠨ《 ᠊ᠩ᠊》 ᠢ᠋ᠶ᠋ᠡᠷ ᠳᠠᠭᠤᠳᠠᠬᠤ ᠪᠣᠯᠪᠠᠴᠤ ᠣᠢᠯᠠᠭᠠᠮᠵᠢᠲᠠᠢ᠃ ᠨᠢᠳᠦ ᠴᠡᠩᠬᠡᠷ ᠪᠣᠯᠣᠳ ᠤᠬᠤᠷᠬᠠᠢ ᠭᠦᠨ᠂ ᠬᠠᠮᠠᠷ ᠤ᠋ᠨ ᠢᠷᠮᠡᠭ ᠬᠤᠷᠴᠠ ᠪᠣᠯᠣᠳ ᠰᠢᠯᠤᠭᠤᠨ᠂ ᠦᠰᠦ ᠨᠢ ᠰᠢᠨᠠᠨ ᠳ᠋ᠠᠭᠠᠨ ᠪᠤᠭᠤᠷᠤᠯ ᠲᠠᠢ ᠪᠣᠯᠪᠠᠴᠤ ᠠᠯᠲᠠᠨ ᠰᠢᠷᠭᠠᠯ ᠪᠥᠭᠡᠳ ᠳᠡᠭᠡᠳᠦ ᠤᠷᠤᠭᠤᠯ ᠳ᠋ᠠᠭᠠᠨ ᠱᠥᠷᠪᠥᠭᠡᠷ ᠰᠢᠷᠠ ᠰᠠᠬᠠᠯ ᠲᠠᠢ ᠠᠵᠢ᠃ ᠡᠢᠮᠦ ᠬᠥᠮᠦᠨ ᠦ᠌ ᠠᠮᠠᠨ ᠠ᠋ᠴᠠ ᠮᠣᠩᠭᠣᠯ ᠬᠡᠯᠡ ᠬᠡᠳᠦᠢᠨ ᠬᠠᠵᠠᠭᠠᠢ ᠮᠤᠷᠤᠢ᠂ ᠦᠭᠡ ᠦᠰᠦᠭ ᠪᠦᠬᠦᠨ ᠳ᠋ᠡᠭᠡᠨ ᠴᠣᠬᠢᠯᠲᠠ ᠲᠠᠢ ᠭᠠᠷᠴᠤ ᠢᠷᠡᠬᠦ ᠨᠢ ᠤᠷᠢᠳ ᠡᠮᠦᠨᠡ ᠮᠣᠩᠭᠣᠯ ᠢ᠋ᠶ᠋ᠠᠷ ᠶᠠᠷᠢᠳᠠᠭ ᠣᠷᠣᠰ ᠬᠥᠮᠦᠨ ᠢ᠋ ᠲᠡᠳᠦᠢ ᠯᠡ ᠣᠯᠠᠨ ᠢ᠋ ᠦᠵᠡᠭᠡ ᠦᠭᠡᠢ ᠮᠣᠩᠭᠣᠯ ᠬᠥᠮᠦᠰ ᠲᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠠᠢᠬᠠᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠦᠨᠡ᠃ ᠪᠠᠰᠠ ᠥᠨᠳᠥᠷ ᠴᠢᠭᠢᠷᠠᠭ ᠪᠡᠶᠡ ᠳ᠋ᠦ᠍ᠨᠢ ᠸᠴᠢᠷ ᠵᠢᠩᠰᠡᠲᠡᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠮᠠᠯᠠᠭᠠᠢ᠂ ᠰᠢᠷᠠ ᠲᠣᠷᠭᠠᠨ ᠳᠡᠪᠡᠯ ᠥᠩᠭᠡ ᠮᠠᠶᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠡᠳ ᠵᠣᠬᠢᠴᠠᠵᠠᠢ᠃ ᠲᠥᠷᠥᠭᠰᠡᠨ ᠪᠠᠢᠳᠠᠯ ᠡᠢᠮᠦ ᠪᠥᠭᠡᠳ ᠲᠡᠭᠦᠨ ᠦ᠌ ᠬᠢᠵᠦ ᠪᠦᠲᠦᠭᠡᠭᠰᠡᠨ ᠦᠢᠯᠡ ᠶᠠᠪᠤᠳᠠᠯ ᠭᠡᠪᠡᠯ ᠬᠦᠷᠢᠶᠡ ᠳᠦᠭᠦᠷᠡᠩ ᠪᠠᠢᠭᠰᠠᠨ ᠭᠠᠮᠢᠩ ᠢ᠋ ᠭᠠᠭᠴᠠᠬᠠᠨ ᠡᠳᠦᠷ ᠰᠥᠨᠢ ᠬᠣᠶᠠᠷ ᠤ᠋ᠨ ᠳᠣᠲᠣᠷᠠ ᠪᠠᠨ ᠨᠢᠷᠭᠡᠵᠦ ᠴᠢᠳᠠᠭᠰᠠᠨ ᠤ᠋ ᠤᠴᠢᠷ ᠬᠥᠮᠦᠰ ᠲᠦ᠍ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠬᠤᠪᠢᠯᠭᠠᠨ ᠭᠡᠵᠦ ᠬᠦᠨᠳᠦᠯᠡᠭᠳᠡᠨ ᠠᠯᠳᠠᠷᠰᠢᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠠᠵᠢ᠃
— ᠪᠢ ᠰᠠᠶᠢ ᠪᠣᠭᠳᠠ ᠡᠵᠡᠨᠲᠡᠨ ᠳ᠋ᠦ᠍ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠪᠠᠷᠠᠯᠬᠠᠬᠤ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠵᠠᠩᠵᠤᠨ ᠬᠠᠢᠷᠠᠯᠠᠵᠤ ᠶ᠋ᠢ ᠠᠢᠯᠠᠳᠬᠠᠨ ᠢᠷᠡᠪᠡ᠃ ᠲᠥᠷᠥ ᠶ᠋ᠢᠨ ᠶᠡᠬᠡᠰ ᠰᠠᠢᠳ ᠤ᠋ᠳ ᠤ᠋ᠨ ᠵᠥᠪᠯᠡᠨ ᠬᠡᠯᠡᠯᠴᠡᠬᠦ ᠨᠢ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠪᠠᠢᠭᠠ ᠨᠣᠶᠠᠨ ᠰᠤᠩᠳᠤᠢ ᠬᠦᠩ ᠭᠡᠭᠴᠢ ᠶ᠋ᠢ ᠵᠠᠩᠵᠤᠨ ᠰᠠᠭᠤᠯᠭᠠᠶᠠ ᠭᠡᠵᠦ ᠪᠠᠢᠨᠠ᠃ ᠯᠠᠮᠠᠲᠠᠨ ᠲᠡᠷᠡ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠤᠤ ᠬᠡᠷᠪᠡ ᠲᠠᠨᠢᠬᠤ ᠪᠣᠯ ᠲᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤ ᠭᠡᠵᠦ ᠲᠠᠭᠠᠯᠠᠭᠳᠠᠳᠠᠭ ᠰᠠᠨ ᠪᠣᠯ ᠳᠠ? ᠭᠡᠵᠦ ᠪᠠᠷᠤᠨ ᠵᠠᠩᠵᠤᠨ ᠦᠭᠡ ᠪᠡᠨ ᠶᠡᠬᠡᠳᠡ ᠳᠠᠪᠬᠤᠴᠠᠭᠤᠯᠤᠨ ᠥᠭᠦᠯᠡᠬᠦ ᠳ᠋ᠦ᠍᠂ ᠵᠡᠭᠦᠨ ᠡᠩᠭᠡᠷ ᠲᠦ᠋ᠨᠢ ᠵᠡᠭᠦᠯᠲᠡ ᠲᠡᠢ ᠠᠯᠲᠠᠨ ᠬᠡᠷᠡᠭᠡᠰᠦ ᠶᠠᠭᠠᠷᠠᠭᠰᠠᠨ ᠰᠡᠳᠬᠢᠯ ᠢ᠋ ᠨᠢ ᠢᠯᠡᠴᠢᠯᠡᠬᠦ ᠮᠡᠲᠦ ᠦᠷᠭᠦᠯᠵᠢ ᠰᠠᠨᠵᠢᠭᠢᠨᠠᠨ ᠭᠢᠯᠠᠯᠵᠠᠨᠠ᠃
— ᠲᠠᠨᠢᠨᠠ᠂ ᠲᠡᠷᠡ ᠰᠤᠩᠳᠤᠢ ᠤᠷᠢᠳ ᠡᠮᠦᠨᠡ ᠬᠡᠳᠦᠢ ᠪᠡᠷ ᠬᠣᠰᠢᠭᠤ ᠨᠣᠶᠠᠨ ᠲᠡᠳᠦᠢ ᠡᠴᠡ ᠬᠡᠲᠦᠷᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠤᠬᠠᠭᠠᠨ ᠰᠠᠨᠠᠭᠠ᠂ ᠴᠣᠭ ᠵᠢᠪᠬᠤᠯᠠᠩ ᠮᠥᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠤᠤᠲᠠᠢ ᠡᠷᠡ᠃ ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠪᠢᠳᠡᠨ ᠳ᠋ᠦ᠍ ᠲᠡᠭᠦᠨᠴᠡ ᠢᠯᠡᠭᠦᠦ ᠵᠠᠩᠵᠤᠨ ᠪᠣᠯᠬᠤ ᠴᠣᠪᠣᠭᠣ ᠡᠷᠡ ᠦᠨᠡᠬᠡᠷ ᠠᠯᠠᠭᠠ ᠴᠤ᠌ ᠪᠣᠯ ᠤᠤ ᠳᠠ᠃ ᠭᠡᠮ ᠨᠢ ᠵᠠᠯᠠᠭᠤ ᠪᠠᠯᠴᠢᠷ ᠯᠠ ᠬᠥᠮᠦᠨ ᠳᠡ᠃ ᠣᠳᠣ ᠳᠥᠩᠭᠡᠵᠦ ᠭᠤᠴᠢ ᠭᠠᠷᠴᠤ ᠶᠠᠪᠤᠭᠠ ᠪᠣᠯ ᠤᠤ ᠭᠡᠵᠦ ᠳᠠᠷᠢ ᠡᠬᠡ ᠯᠠᠮᠠ ᠶ᠋ᠢᠨ ᠠᠢᠯᠠᠳᠬᠠᠬᠤ ᠳ᠋ᠤ᠌᠂
— ᠵᠦᠭᠡᠷ! ᠭᠡᠵᠦ ᠪᠠᠷᠤᠨ ᠠᠯᠲᠠᠨ ᠬᠡᠷᠡᠭᠡᠰᠦ ᠪᠡᠨ ᠳᠣᠩᠰᠣᠯᠭᠠᠨ ᠢᠨᠢᠶᠡᠵᠦ᠄ ᠣᠳᠣ ᠲᠡᠷᠡ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠪᠠᠨ ᠴᠣᠭ ᠵᠢᠪᠬᠤᠯᠠᠩ ᠢ᠋ ᠭᠠᠰᠢᠭᠤᠨ ᠳᠠᠷᠢ ᠶ᠋ᠢᠨ ᠤᠲᠤᠭᠠ ᠲᠠᠢ ᠬᠣᠯᠢᠵᠤ ᠦᠵᠡᠪᠡᠯ ᠡᠴᠦᠰ ᠲᠡᠭᠡᠨ ᠡᠨᠡ ᠳᠡᠯᠡᠬᠡᠢ ᠲᠡᠢ ᠬᠡᠯᠡᠯᠴᠡᠬᠦ ᠵᠠᠩᠵᠤᠨ ᠪᠣᠯᠵᠤ ᠴᠢᠳᠠᠨᠠ ᠭᠡᠵᠦ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯᠲᠡᠨ ᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠭᠦᠯᠡᠨ ᠪᠠᠰᠠ ᠯᠠ ᠢᠨᠢᠶᠡᠬᠦ ᠳ᠋ᠦ᠍ ᠥᠨᠥᠬᠢ ᠡᠩᠭᠡᠷ ᠲᠡᠬᠢ ᠠᠯᠲᠠᠨ ᠬᠡᠷᠡᠭᠡᠰᠦ ᠮᠥᠨ ᠯᠡ ᠭᠢᠯᠠᠯᠵᠠᠨ ᠰᠠᠨᠵᠢᠭᠢᠨᠠᠪᠠ᠃
— ᠯᠠᠮᠠᠲᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠦᠨᠡᠬᠡᠷ ᠲᠣᠬᠢᠷᠠᠵᠤ ᠪᠠᠢᠭᠠ ᠪᠣᠯ ᠪᠢ ᠲᠡᠷᠡ ᠰᠤᠩᠳᠤᠢ ᠶ᠋ᠢ ᠣᠳᠣᠬᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠣᠴᠢᠵᠤ ᠠᠪᠴᠢᠷᠠᠨᠠ᠃
— ᠨᠠᠳᠠ ᠲᠠᠲᠠᠭᠠᠯᠵᠠᠬᠤ ᠶᠠᠭᠤᠮᠠ ᠦᠭᠡᠢ᠃ ᠢᠯᠠᠩᠭᠤᠶᠠ ᠶᠡᠬᠡ ᠵᠠᠩᠵᠤᠨ ᠲᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠯᠲᠠᠢ ᠪᠠᠢᠪᠠᠯ ᠪᠦᠬᠦ ᠬᠡᠷᠡᠭ ᠭᠦᠢᠴᠡᠬᠦ ᠨᠢ ᠲᠡᠷᠡ ᠭᠡᠳ ᠳᠠᠷᠢ ᠡᠬᠡ ᠯᠠᠮᠠ᠂ ᠲᠠ ᠡᠨᠡ ᠬᠥᠮᠦᠨ ᠲᠡᠢ ᠲᠠᠨᠢᠯᠴᠠ᠂ ᠡᠨᠡ ᠬᠥᠮᠦᠨ ᠪᠣᠯ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠪᠢᠳᠡᠨ ᠲᠡᠢ ᠬᠠᠮᠲᠤ ᠰᠠᠭᠤᠵᠤ ᠪᠠᠢᠭᠠᠳ ᠭᠠᠷᠤᠭᠰᠠᠨ ᠪᠠᠯᠳᠠᠨᠴᠡᠷᠢᠩ ᠬᠦᠩ ᠭᠡᠭᠴᠢ᠂ ᠪᠢ ᠣᠳᠣ ᠥᠪᠡᠷ ᠲᠡᠭᠡᠨ ᠲᠡᠳᠡᠨ ᠠᠪᠴᠤ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠥᠲᠥᠯᠦᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠪᠠᠢᠨᠠ᠃
ᠪᠠᠷᠤᠨ ᠵᠠᠩᠵᠤᠨ ᠢᠨᠢᠶᠡᠮᠰᠦᠭᠯᠡᠨ ᠦᠭᠡ ᠪᠦᠷᠢ ᠳᠡᠭᠡᠷᠡ《ᠰᠠᠢᠨ᠂ ᠰᠠᠢᠨ》 ᠭᠡᠵᠦ ᠥᠭᠦᠯᠡᠨ ᠯᠠᠮᠠ ᠪᠠᠯᠳᠠᠨᠴᠡᠷᠢᠩ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠭᠦᠯᠦᠨ ᠠᠵᠢᠭᠯᠠᠭᠠᠳ᠄
— ᠲᠠ ᠴᠦ᠍ ᠶᠠᠭᠠᠬᠢᠬᠤᠪ ᠲᠡᠢᠮᠦ ᠰᠠᠨᠠᠭᠠ ᠲᠠᠢ ᠶᠤᠮ ᠪᠠᠢᠵᠠᠢ᠃ ᠭᠡᠪᠡᠴᠦ ᠡᠷᠬᠢᠮ ᠬᠥᠮᠦᠨ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠤ ᠪᠣᠳᠣᠵᠤ ᠪᠠᠢᠨᠠ ᠪᠣᠢ?
ᠪᠠᠯᠳᠠᠨᠴᠡᠷᠢᠩ ᠠᠯᠠᠭᠠ ᠬᠠᠪᠰᠤᠷᠤᠨ ᠮᠡᠬᠦᠢᠵᠦ᠄
— ᠵᠠ ᠪᠢ ᠤᠷᠢᠳᠠ ᠪᠠᠷ ᠪᠣᠳᠣᠪᠠᠯ ᠵᠦᠭᠡᠷ ᠶᠦᠮ ᠰᠠᠨ᠃
— ᠪᠠᠷᠤᠨ ᠵᠠᠩᠵᠤᠨ ᠤ᠋ ᠴᠢᠷᠠᠢ ᠬᠣᠪᠢᠰᠬᠢᠪᠡ᠃ ᠠᠶᠤᠮᠰᠢᠭᠲᠠᠢ ᠨᠢ ᠠᠷᠭᠠ ᠦᠭᠡᠢ᠃
— ᠪᠣᠳᠣᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ? ᠭᠡᠳ ᠭᠦᠨ ᠤᠬᠤᠷᠬᠠᠢᠲᠤ ᠬᠤᠷᠴᠠ ᠴᠡᠩᠬᠡᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠨᠢ ᠰᠢᠷᠳᠡᠪᠡ᠃
— ᠱᠣᠷᠣᠩ ᠳ᠋ᠤ᠌ ᠰᠠᠭᠤᠵᠤ ᠪᠡᠶᠡ ᠶ᠋ᠢᠨ ᠡᠷᠡᠭᠦᠯ ᠮᠡᠨᠳᠦ ᠪᠠᠬᠠᠨ ᠳᠣᠷᠣᠢᠲᠠᠭᠰᠠᠨ ᠭᠡᠬᠦ ᠳ᠋ᠦ᠍ ᠪᠠᠷᠤᠨ ᠤᠯᠠᠮ ᠢ᠋ᠶ᠋ᠠᠷ ᠬᠤᠪᠢᠷᠠᠨ᠄
— ᠪᠣᠳᠣᠬᠤ ᠪᠠᠷ ᠲᠡᠩᠬᠡᠯ ᠣᠷᠣᠨᠠ ᠭᠡᠵᠦ ᠤᠤ? ᠦᠭᠡᠢ ᠪᠠᠢᠬᠠ ᠠ᠋ ᠭᠡᠳ ᠴᠢᠷᠠᠢ ᠵᠠᠰᠠᠨ ᠢᠨᠢᠶᠡᠵᠦ᠂《ᠵᠠᠯᠠᠭᠤ ᠬᠥᠮᠦᠨ ᠴᠢ ᠰᠣᠨᠣᠰ! ᠭᠠᠮᠢᠩ ᠴᠢᠮᠠᠶ᠋ᠢ ᠱᠣᠷᠣᠩ ᠳ᠋ᠤ᠌ ᠬᠢᠵᠦ ᠠᠮᠢᠳᠤ ᠪᠠᠷ ᠴᠢᠨᠢ ᠦᠮᠡᠬᠡᠢᠷᠡᠭᠦᠯᠦᠭᠰᠡᠨ᠃ ᠣᠳᠣ ᠴᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠣᠢ》 ᠪᠣᠰ! ᠬᠠᠷᠢᠭᠤ ᠪᠠᠨ ᠠᠪᠴᠤ ᠨᠡᠷᠡ ᠰᠦᠷ ᠢ᠋ᠶ᠋ᠡᠨ ᠮᠠᠨᠳᠤᠭᠤᠯ! ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠯᠠᠮᠠᠲᠠᠨ ᠤ᠋ ᠳᠡᠷᠭᠡᠳᠡ ᠪᠢᠷ ᠪᠠᠷᠢᠨ ᠰᠠᠭᠤᠬᠤ ᠴᠢᠨᠢ ᠴᠦ᠍ ᠪᠠᠭᠠᠳᠠᠨᠠ᠃ ᠮᠣᠩᠭᠣᠯ ᠣᠷᠣᠨ ᠴᠢᠨᠢ ᠣᠳᠣ ᠣᠷᠣᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠪᠣᠰᠴᠤ ᠤᠯᠠᠮ ᠢ᠋ᠶ᠋ᠠᠷ ᠴᠠᠭᠠᠰᠢ ᠨᠢ ᠲᠡᠪᠰᠢᠨ ᠪᠦᠬᠦ ᠳᠡᠯᠡᠬᠡᠢ ᠶ᠋ᠢ ᠳᠣᠩᠰᠣᠯᠭᠠᠨ ᠠᠤᠭᠠ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠶᠡᠬᠡ ᠲᠥᠷᠥ ᠶ᠋ᠢ ᠳᠠᠬᠢᠨ ᠪᠤᠰᠬᠠᠨᠠ ᠭᠡᠵᠦ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠨ ᠴᠢᠭ ᠪᠤᠰᠬᠠᠨ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠷᠭᠦᠵᠡᠢ᠃
ᠪᠡᠯᠳᠠᠨᠴᠡᠷᠢᠩ《ᠵᠠ》 ᠭᠡᠵᠦ ᠮᠡᠬᠦᠢᠬᠦ ᠪᠣᠯᠪᠠᠴᠤ《ᠠᠢ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠲᠡᠢᠨ ᠳᠡᠭᠳᠡᠭᠡᠬᠦ ᠨᠢ ᠪᠣᠢ》 ᠭᠡᠵᠦ ᠵᠢᠷᠦᠬᠡ ᠰᠢᠮᠰᠢᠷᠡᠨᠡ᠃ ᠲᠡᠷᠡ ᠰᠢᠮᠰᠢᠷᠡᠯ ᠢ᠋ ᠪᠠᠷᠤᠨ ᠪᠠᠰᠠ ᠮᠡᠳᠡᠪᠡ ᠪᠣᠯᠤᠯᠲᠠᠢ᠄
— ᠨᠡᠭᠡᠷᠡᠨ ᠮᠣᠩᠭᠣᠯ ᠤᠯᠤᠰ ᠳᠡᠯᠡᠬᠡᠢ ᠶ᠋ᠢ ᠳᠣᠩᠰᠣᠯᠭᠠᠵᠤ ᠴᠢᠳᠠᠬᠤ ᠶ᠋ᠢ ᠵᠠᠷᠢᠮ ᠬᠥᠮᠦᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠴᠢᠩᠭᠢᠰ ᠬᠠᠭᠠᠨ ᠠᠩᠬᠠ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠢᠰᠤᠨ ᠳ᠋ᠤ᠌ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠶᠠᠳᠠᠭᠤ ᠭᠡᠷ ᠡᠴᠡ ᠭᠠᠭᠴᠠ ᠪᠡᠶᠡ ᠪᠡᠷ ᠪᠣᠰᠤᠨ ᠬᠥᠳᠡᠯᠦᠭᠰᠡᠨ ᠢ᠋ ᠨᠢ ᠰᠠᠨᠠᠬᠤ ᠬᠡᠷᠡᠭᠲᠡᠢ᠃
ᠪᠠᠯᠳᠠᠨᠴᠡᠷᠢᠩ《ᠵᠠ ᠲᠡᠢᠮᠦ ᠠ᠋》 ᠭᠡᠵᠦ ᠳᠠᠬᠢᠨ ᠮᠡᠬᠦᠢᠪᠡ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠦ᠍ᠨᠢ《ᠡᠳᠦᠭᠡ ᠴᠠᠭ ᠤ᠋ᠨ ᠲᠡᠷᠡ ᠴᠢᠩᠭᠢᠰ ᠬᠠᠭᠠᠨ ᠴᠢᠨᠢ ᠬᠡᠨ ᠪᠣᠢ? ᠪᠠᠷᠤᠨ ᠵᠠᠩᠵᠤᠨ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠤᠤ? ᠦᠭᠡᠢ ᠠ᠋᠂ ᠲᠠ ᠴᠣᠬᠣᠮ ᠬᠡᠴᠢᠨᠡᠭᠡᠨ ᠰᠦᠷᠡᠬᠡᠢ ᠭᠡᠪᠡᠴᠦ ᠠᠷᠠᠢ ᠪᠢᠰᠢ ᠪᠠᠢᠯᠭᠦᠢ》 ᠭᠡᠵᠦ ᠪᠣᠳᠣᠪᠠ᠃ ᠳᠠᠷᠢ ᠡᠬᠡ ᠯᠠᠮᠠᠳᠠᠨ ᠬᠠᠵᠠᠭᠤ ᠠ᠋ᠴᠠ ᠨᠢ᠄
— ᠲᠡᠢᠮᠦ ᠠ᠋᠂ ᠲᠡᠷᠡ ᠶᠡᠬᠡ ᠬᠡᠷᠡᠭ ᠢ᠋ ᠮᠣᠩᠭᠣᠯ ᠤᠯᠤᠰ ᠭᠠᠭᠴᠠᠬᠠᠨ ᠲᠠᠨ ᠤ᠋ ᠳᠣᠣᠷᠠ ᠶᠠᠪᠤᠵᠤ ᠭᠡᠮᠡᠨ ᠭᠦᠢᠴᠡᠳᠬᠡᠵᠦ ᠴᠢᠳᠠᠨᠠ ᠭᠡᠵᠦ ᠵᠤᠯᠭᠤᠢᠳᠠᠬᠤ ᠳ᠋ᠤ᠌ ᠪᠠᠷᠤᠨ ᠤᠩᠬᠧᠷᠡᠨ ᠬᠠ ᠬᠠ ᠢᠨᠢᠶᠡᠨ᠄
— ᠦᠭᠡᠢ ᠠ᠋᠂ ᠮᠢᠨᠦ ᠳᠣᠣᠷᠠ ᠶᠠᠪᠤᠬᠤ ᠪᠢᠰᠢ᠂ ᠪᠢ ᠬᠠᠷᠢᠨ ᠵᠠᠮ ᠳ᠋ᠤᠨᠢ ᠦᠷᠡᠭᠳᠡᠨᠡ᠃
— ᠬᠠᠮᠢᠭᠠ ᠠ᠋ᠴᠠ! ᠭᠡᠵᠦ ᠳᠠᠷᠢ ᠡᠬᠡ ᠯᠠᠮᠠᠲᠠᠨ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠪᠠ᠃ ᠪᠠᠷᠤᠨ ᠰᠠᠨᠠᠭᠠ ᠠᠯᠲᠠᠨ ᠭᠤᠨᠢᠭ ᠲᠠᠢ ᠪᠣᠯᠪᠠ᠃ ᠡᠩᠭᠡᠷ ᠲᠤᠨᠢ ᠰᠡᠨᠵᠢᠭᠢᠨᠡᠨ ᠭᠢᠯᠠᠯᠵᠠᠭᠴᠢ ᠠᠯᠲᠠᠨ ᠬᠡᠷᠡᠭᠡᠰᠦ ᠨᠢ ᠴᠦ᠍ ᠬᠥᠳᠡᠯᠬᠦ ᠪᠡᠨ ᠪᠣᠯᠢᠪᠠ᠃
— ᠪᠢ ᠦᠷᠡᠭᠳᠡᠬᠦ᠂ ᠦᠷᠡᠭᠳᠡᠬᠦ ᠳ᠋ᠡᠭᠡᠨ ᠯᠠᠮᠠ ᠲᠠᠨᠠ ᠴᠢᠳᠠᠬᠤ ᠶᠠᠳᠠᠬᠤ ᠪᠠᠷ ᠢ᠋ᠶ᠋ᠠᠨ ᠵᠢᠳᠬᠦᠵᠦ ᠶᠠᠪᠤᠭᠠᠳ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠣᠣᠷᠠᠯᠠᠭᠳᠠᠬᠤ ᠰᠢᠦ ᠳᠡ ᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
— ᠦᠭᠡᠢ᠂ ᠲᠠ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠦᠯᠦ ᠪᠠᠭᠲᠠᠬᠤ ᠶᠠᠭᠤᠮᠠ ᠶ᠋ᠢ ᠠᠢᠯᠠᠳᠤᠨᠠ ᠪᠣᠢ? ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠲᠠᠨ ᠤ᠋ ᠡᠨᠡ ᠠᠷᠢᠭᠤᠨ ᠯᠠᠭᠰᠢᠨ ᠳ᠋ᠤ᠌ ᠮᠠᠭᠤ ᠪᠠᠷ ᠬᠠᠯᠳᠠᠬᠤ ᠬᠥᠮᠦᠨ ᠮᠠᠨ ᠤ᠋ ᠯᠠ ᠡᠨᠡ ᠤᠯᠤᠰ ᠣᠷᠣᠨ ᠳ᠋ᠤ᠌ ᠬᠡᠷᠬᠢᠪᠡᠴᠦ ᠭᠠᠷᠬᠤ ᠦᠭᠡᠢ᠃
ᠪᠠᠷᠤᠨ ᠵᠠᠩᠵᠤᠨ ᠴᠢᠷᠠᠢ ᠶᠡᠬᠡᠳᠡ ᠬᠦᠢᠲᠡᠨ ᠪᠣᠯᠵᠤ᠂ ᠭᠠᠷᠬᠤ ᠦᠭᠡᠢ ᠭᠡᠨᠡ? ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠠᠶᠠ ᠦᠭᠡᠢ ᠪᠣᠯ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠬᠠᠯᠳᠠᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠴᠢᠬᠢᠨ ᠳ᠋ᠦ᠍ᠨᠢ ᠣᠢᠷᠠᠲᠤᠨ ᠰᠢᠪᠡᠨᠡᠬᠦ ᠳ᠋ᠦ᠍᠂《ᠵᠠ ᠡᠨᠡ ᠴᠦ᠍ ᠬᠠᠷᠢᠨ ᠪᠠᠢᠵᠤ ᠪᠣᠯᠤᠨᠠ ᠳᠠ》 ᠭᠡᠳᠡᠭ ᠪᠣᠳᠣᠯ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠯᠠ᠃ ᠳᠠᠷᠢ ᠡᠬᠡ ᠯᠠᠮᠠ ᠵᠢᠪᠡᠭᠦᠴᠡᠨ ᠥᠨᠳᠡᠰᠬᠢᠵᠦ᠄
— ᠪᠤᠷᠬᠠᠨ ᠮᠢᠨᠢ᠂ ᠲᠠ ᠶᠠᠭᠤᠲᠠᠢ ᠮᠠᠭᠤᠬᠠᠢ ᠮᠠᠭᠤ ᠢᠷᠣᠠ ᠶ᠋ᠢᠨ ᠶᠠᠭᠤᠮᠠ ᠠᠢᠯᠠᠳᠤᠨᠠ ᠪᠣᠢ? ᠭᠡᠵᠦ ᠭᠣᠮᠣᠷᠬᠠᠪᠠ᠃ ᠪᠠᠷᠤᠨ ᠳᠠᠷᠤᠢ ᠢᠨᠢᠶᠡᠵᠦ᠄ ᠯᠠᠮᠠᠲᠠᠨ ᠲᠠ ᠨᠠᠳᠠ ᠮᠠᠭᠤ ᠰᠠᠨᠠᠬᠤ ᠬᠡᠷᠡᠭ ᠦᠭᠡᠢ᠂ ᠪᠢ ᠵᠦᠭᠡᠷ ᠣᠷᠣᠰ ᠤ᠋ᠨ ᠴᠢᠨᠠᠳᠤᠬᠢ ᠲᠥᠷᠥᠯᠬᠢ ᠨᠤᠲᠤᠭ ᠳᠤ ᠮᠢᠨᠢ《ᠪᠠᠷᠰ ᠰᠤᠷᠭᠠᠭᠴᠢ ᠶ᠋ᠢᠨ ᠲᠡᠭᠦᠰᠬᠡᠯ ᠪᠠᠷᠰ ᠲᠠᠭᠠᠨ ᠪᠠᠷᠢᠭᠤᠯᠬᠤ ᠳ᠋ᠤ᠌ ᠪᠠᠢᠳᠠᠭ》 ᠭᠡᠰᠡᠨ ᠵᠦᠢᠷ ᠦᠭᠡ ᠪᠠᠢᠳᠠᠭ ᠢ᠋ ᠰᠠᠨᠠᠨ ᠳᠡᠮᠡᠢ ᠶᠠᠷᠢᠪᠠ᠃ ᠡᠨᠡ ᠪᠣᠯ ᠰᠡᠴᠡᠨ ᠦᠭᠡ᠃ ᠭᠡᠪᠡᠴᠦ ᠪᠢ ᠪᠠᠷᠰ ᠰᠤᠷᠭᠠᠭᠴᠢ ᠪᠢᠰᠢ᠂ ᠪᠣᠭᠳᠠ ᠡᠵᠡᠨ ᠪᠣᠯᠣᠳ ᠲᠠ ᠪᠦᠬᠦᠨ ᠦ᠌ ᠵᠠᠷᠯᠢᠭ ᠢ᠋ ᠭᠦᠢᠴᠡᠳᠬᠡᠭᠴᠢ ᠪᠣᠯᠬᠣᠷ ᠬᠠᠮᠢᠭᠠ ᠠ᠋ᠴᠠ ᠲᠡᠢᠮᠦ ᠮᠠᠭᠤᠬᠠᠢ ᠲᠡᠭᠦᠰᠬᠡᠯ ᠳ᠋ᠦ᠍ ᠬᠦᠷᠬᠦ ᠪᠢᠯᠡ ᠭᠡᠳ ᠮᠥᠩᠭᠥᠨ ᠠᠶᠠᠭᠠᠲᠤ ᠬᠠᠭᠤᠷᠠᠢ ᠠᠷᠢᠬᠢ ᠶ᠋ᠢ ᠬᠥᠨᠲᠥᠷᠦᠨ ᠤᠤᠭᠤᠭᠠᠳ᠄ ᠵᠠ ᠪᠢ ᠶᠠᠪᠤᠶᠠ᠂ ᠲᠠᠨ ᠤ᠋ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠨᠣᠶᠠᠨ ᠰᠤᠩᠳᠣᠢ ᠶ᠋ᠢ ᠠᠪᠴᠢᠷᠠᠵᠤ ᠮᠠᠷᠭᠠᠰᠢ ᠲᠠᠨ ᠲᠠᠢ ᠠᠭᠤᠯᠵᠠᠭᠤᠯᠤᠨᠠ ᠭᠡᠳ ᠪᠣᠰᠪᠠ᠃ ᠭᠡᠷ ᠲᠦ᠍ ᠪᠠᠢᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠦᠳᠡᠨ ᠵᠠᠯᠠᠵᠤ ᠴᠢᠴᠧ ᠳ᠋ᠦ᠍ᠨᠢ ᠮᠣᠷᠳᠠᠭᠤᠯᠪᠠ᠃ ᠴᠢᠴᠧ ᠠᠰᠠᠵᠤ ᠬᠦᠷᠴᠢᠭᠢᠨᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠪᠠᠷᠤᠨ ᠵᠠᠩᠵᠤᠨ ᠨᠢᠭᠡ ᠯᠡ ᠭᠤᠨᠢᠭᠲᠠᠢ᠂ ᠢᠷᠡᠭᠡᠳᠦᠢ ᠳ᠋ᠡᠭᠡᠨ ᠯᠠᠪ ᠮᠠᠭᠤ ᠲᠡᠭᠦᠰᠬᠡᠯ ᠳ᠋ᠦ᠍ ᠬᠦᠷᠦᠨᠡ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯ ᠤᠤ ᠭᠡᠯᠲᠡᠢ ᠦᠵᠡᠭᠳᠡᠨᠡ᠃ ᠬᠠᠷᠢᠨ ᠡᠩᠭᠡᠷ ᠲᠡᠬᠢ ᠠᠯᠲᠠᠨ ᠬᠡᠷᠡᠭᠡᠰᠦ ᠨᠢ ᠪᠥᠬᠥᠰᠬᠢᠨ ᠰᠠᠭᠤᠭᠰᠠᠨ ᠴᠡᠭᠡᠵᠢ ᠡᠴᠡ ᠨᠢ ᠳᠣᠷᠣᠭᠰᠢ ᠤᠨᠵᠢᠰᠬᠢᠨ ᠰᠠᠨᠵᠢᠭᠢᠨᠠᠨ ᠭᠢᠯᠠᠯᠵᠠᠨᠠ᠃
ᠵᠠ᠂ ᠶᠡᠬᠡ ᠵᠠᠩᠵᠤᠨᠲᠠᠨ ᠠᠮᠤᠭᠤᠯᠠᠩ ᠮᠣᠷᠢᠯᠠᠲᠤᠭᠠᠢ ᠭᠡᠵᠦ ᠵᠦᠭ ᠪᠦᠷᠢ ᠡᠴᠡ ᠨᠢ ᠢᠷᠦᠭᠡᠯ ᠲᠠᠯᠪᠢᠬᠤ ᠳ᠋ᠤ᠌ ᠪᠠᠷᠤᠨ᠄《ᠪᠤᠷᠬᠠᠨ ᠪᠣᠳᠢᠳᠠ ᠪᠢᠳᠡᠨ ᠢ᠋ ᠬᠡᠵᠢᠶᠡᠳᠡ ᠢᠪᠡᠭᠡᠨᠡ》 ᠭᠡᠵᠦ ᠵᠠᠯᠪᠠᠷᠢᠪᠠ᠃ ᠴᠢᠴᠧ ᠶ᠋ᠢᠨ ᠳᠠᠭᠤ ᠰᠢᠷᠦᠭᠦᠰᠦᠨ ᠣᠷᠣᠭᠰᠢ ᠬᠥᠳᠡᠯᠪᠡ᠃ ᠪᠤᠷᠭᠢᠯᠠᠬᠤ ᠲᠣᠭᠣᠰᠣ ᠳᠣᠣᠷᠠ ᠨᠢ ᠬᠠᠶᠠᠭᠳᠠᠵᠤ ᠫᠠᠷᠴᠢᠭᠢᠨᠠᠨ ᠬᠤᠷᠳᠤᠯᠠᠬᠤ ᠶ᠋ᠢ ᠬᠠᠷᠠᠪᠠᠯ ᠲᠡᠷᠡ ᠴᠢᠴᠧ ᠭᠠᠮᠢᠩ ᠨᠣᠶᠠᠳ ᠤ᠋ᠨ ᠴᠢᠴᠧ᠂ ᠠᠷᠤ ᠳ᠋ᠤᠨᠢ ᠬᠠᠲᠠᠭᠰᠠᠨ ᠬᠢᠲᠠᠳ ᠪᠢᠴᠢᠭᠲᠦ ᠫᠠᠢᠵᠠ ᠨᠢ ᠬᠡᠪ ᠢ᠋ᠶ᠋ᠡᠷ ᠪᠥᠭᠡᠳ ᠲᠡᠷᠡ ᠨᠢ ᠨᠢᠳᠦᠨ ᠳ᠋ᠦ᠍ ᠰᠣᠳᠣᠨ ᠲᠣᠰᠴᠤ᠂ ᠲᠡᠳᠡᠨ ᠦ᠌ ᠠᠷᠭᠠᠴᠠᠭᠠ ᠦᠭᠡᠢ ᠢᠯᠠᠭᠳᠠᠭᠰᠠᠨ ᠢ᠋ ᠰᠠᠨᠠᠭᠳᠠᠭᠤᠯᠤᠨᠠ᠃
— ᠵᠠ ᠯᠠᠮᠠᠲᠠᠨ ᠠ᠋᠂ ᠪᠢ ᠣᠳᠣ ᠬᠠᠷᠢᠶᠠ ᠭᠡᠬᠦ ᠳ᠋ᠦ᠍᠂ ᠳᠠᠷᠢ ᠡᠬᠡ ᠯᠠᠮᠠᠲᠠᠨ᠄
— ᠴᠢ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ ᠵᠥᠪᠰᠢᠶᠡᠷᠡᠨᠡ ᠪᠢᠵᠡ ᠳᠡ᠃
— ᠵᠠ ᠪᠢ ᠪᠣᠳᠣᠶᠠ᠂ ᠠᠯᠢᠪᠠ ᠶᠠᠭᠤᠮᠠ ᠶ᠋ᠢ ᠤᠷᠢᠳ ᠢ᠋ᠶ᠋ᠠᠷ ᠪᠣᠳᠣᠬᠤ ᠨᠢ ᠴᠢᠬᠤᠯᠠ ᠪᠠᠢᠳᠠᠭ ᠰᠢᠦ ᠳᠡ᠃
— ᠪᠣᠳᠣᠬᠤ ᠤᠤ? ᠭᠡᠵᠦ ᠯᠠᠮᠠᠲᠠᠨ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ᠂ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠴᠢᠨᠦ ᠲᠡᠷᠡ ᠪᠣᠳᠣᠬᠤ ᠬᠡᠷᠡᠭ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ ᠪᠠᠢᠬᠠ ᠠ᠋᠃ ᠵᠠ ᠶᠠᠭᠠᠬᠢᠬᠤᠪ ᠪᠣᠳᠣ! ᠪᠣᠳᠣᠭᠠᠳ ᠨᠥᠭᠥᠭᠡᠳᠦᠷ ᠡᠴᠡ ᠬᠡᠷᠬᠢᠪᠡᠴᠦ ᠬᠡᠲᠦᠷᠡᠭᠦᠯᠬᠦ ᠦᠭᠡᠢ ᠪᠡᠷ ᠢᠷᠡᠭᠡᠷᠡᠢ!
ᠵᠠᠩᠳᠤᠷᠤᠩᠭᠤᠢ ᠥᠭᠦᠯᠡᠭᠰᠡᠨ ᠢ᠋ ᠨᠢ ᠠᠵᠢᠪᠠᠯ ᠴᠢᠷᠠᠢ ᠬᠦᠢᠲᠡᠨ ᠵᠠᠨᠤᠬᠤ ᠮᠡᠲᠦ ᠦᠵᠡᠭᠳᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠯᠠᠮᠠᠳᠠᠨ ᠡᠢᠨᠬᠦ ᠰᠢᠷᠦᠭᠦᠨ ᠳᠦᠷᠢ ᠭᠠᠷᠭᠠᠭᠰᠠᠨ ᠠ᠋ᠴᠠ ᠰᠡᠳᠬᠢᠯ ᠶᠡᠬᠡᠳᠡ ᠬᠦᠨᠳᠦᠷᠡᠨ ᠶᠠᠪᠤᠯᠠ᠃ ᠶᠠᠭᠤᠨ ᠳ᠋ᠤ᠌ ᠡᠨᠡ ᠪᠣᠢ ᠭᠡᠬᠦ ᠡᠴᠡ ᠯᠠᠮᠠᠳᠠᠨ ᠥᠪᠡᠷ ᠢ᠋ᠶ᠋ᠡᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠴᠠ ᠶ᠋ᠢ ᠰᠠᠨᠠᠮᠰᠠᠷ ᠦᠭᠡᠢ ᠡᠴᠡ ᠪᠤᠶᠤ ᠢᠲᠡᠭᠡᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠠᠯᠳᠠᠭᠰᠠᠨ ᠠ᠋ᠴᠠ ᠪᠠᠨ ᠪᠣᠯᠵᠤ᠂ ᠥᠪᠡᠷ ᠢ᠋ ᠨᠢ ᠲᠡᠳᠡᠨ ᠠᠪᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠬᠡᠷᠬᠢᠪᠡᠴᠦ ᠣᠷᠬᠢᠵᠤ ᠦᠯᠦ ᠪᠣᠯᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠨᠢᠭᠡ ᠠᠶᠤᠯ! ᠬᠣᠶᠠᠷ ᠲᠤ᠂ ᠣᠳᠣ ᠶ᠋ᠢᠨ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠪᠣᠯᠣᠳ ᠯᠠᠮᠠᠳᠠᠨ ᠤ᠋ ᠬᠡᠷᠡᠭ ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠬᠠᠮᠵᠢᠯᠭᠠᠲᠤ ᠶᠣᠰᠣᠨ ᠠ᠋ᠴᠠ ᠨᠢ ᠰᠠᠯᠭᠠᠬᠤ ᠦᠭᠡᠢ ᠭᠡᠰᠡᠨ ᠪᠠᠰᠠ ᠨᠢᠭᠡ ᠠᠶᠤᠯ᠃ ᠭᠤᠷᠪᠠᠳᠠᠬᠢ᠂ ᠪᠠᠷᠤᠨ ᠵᠠᠩᠵᠤᠨ᠂ ᠲᠡᠭᠦᠨ ᠦ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠠᠶᠤᠮᠰᠢᠭᠲᠤ ᠳᠦᠷᠢ᠂ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠲᠠᠰᠢ ᠦᠭᠡᠢ ᠠᠭᠤᠤ ᠠᠭᠤᠤ ᠶᠡᠬᠡ ᠶᠠᠷᠢᠶᠠ ᠴᠥᠮ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠡᠩᠭᠡᠷ ᠲᠦ᠋ᠨᠢ ᠰᠠᠨᠵᠢᠭᠢᠨᠠᠬᠤ ᠠᠯᠲᠠᠨ ᠬᠡᠷᠡᠭᠡᠰᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠰᠠᠳᠬᠠᠭᠳᠠᠨ ᠮᠥᠬᠥᠭᠰᠡᠨ ᠴᠠᠭᠠᠨ ᠬᠠᠭᠠᠨ ᠤ᠋ ᠠᠯᠲᠠᠨ ᠬᠡᠷᠡᠭᠡᠰᠦ᠂ ᠲᠡᠭᠦᠨ ᠢ᠋ ᠶᠠᠩᠵᠤ ᠪᠦᠷᠢ ᠪᠡᠷ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠪᠠᠷᠤᠨ ᠵᠠᠩᠵᠤᠨ ᠤ᠋ ᠪᠦᠬᠦ ᠰᠡᠳᠬᠢᠯ ᠮᠣᠩᠭᠣᠯ ᠤ᠋ᠨ ᠲᠥᠯᠥᠭᠡ ᠪᠢᠰᠢ᠂ ᠬᠠᠷᠢᠨ ᠲᠡᠷᠡ ᠬᠠᠭᠠᠨᠲᠤ ᠵᠠᠰᠠᠭ ᠢ᠋ ᠳᠠᠬᠢᠨ ᠪᠣᠰᠬᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠤᠰᠤ ᠤᠤ? ᠭᠡᠳᠡᠭ ᠪᠣᠳᠣᠯ ᠭᠡᠨᠡᠳᠲᠡ ᠣᠷᠣᠵᠤ ᠢᠷᠡᠯᠡ᠃ ᠲᠡᠭᠡᠭᠡᠳ ᠪᠠᠯᠳᠠᠨᠴᠡᠷᠢᠩ ᠪᠠᠷᠤᠨ ᠤᠩᠬᠧᠷᠡᠨ ᠢ᠋ ᠥᠰᠢᠪᠡ᠂ ᠵᠠᠨᠤᠪᠠ ᠵᠢᠭᠰᠢᠪᠡ᠃ ᠲᠡᠭᠡᠲᠡᠯᠡ ᠥᠪᠡᠷ ᠦ᠋ᠨ ᠬᠢᠨᠢ ᠬᠤᠪᠢ ᠵᠠᠶᠠᠭᠠ ᠶᠠᠭᠤ ᠪᠣᠯᠬᠤ ᠭᠡᠵᠦ ᠪᠠᠢᠨᠠ? ᠪᠠᠷᠤᠨ ᠤ᠋ ᠲᠡᠷᠡ ᠬᠡᠷᠡᠭ ᠲᠦ᠍ ᠵᠢᠳᠬᠦᠬᠦ᠂ ᠳᠠᠷᠢ ᠡᠬᠡ ᠯᠠᠮᠠ ᠶ᠋ᠢᠨ ᠭᠠᠷ ᠲᠤ ᠣᠷᠣᠬᠤ ᠬᠡᠷᠡᠭ ᠤᠤ? ᠡᠰᠡᠪᠡᠯ ᠬᠥᠳᠡᠭᠡ ᠵᠢᠭᠤᠲᠠᠬᠤ ᠤᠤ᠂ ᠵᠢᠭᠤᠲᠠᠭᠠᠳ ᠲᠤᠰᠠ ᠨᠡᠮᠡᠭᠦᠷᠢ ᠦᠭᠡᠢ᠂ ᠬᠣᠵᠢᠮᠳᠠᠭᠰᠠᠨ ᠠᠵᠢ᠃ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠰᠤᠩᠳᠤᠢ ᠬᠦᠩ ᠢ᠋ ᠰᠠᠢᠨ ᠲᠠᠨᠢᠨᠠ᠃ ᠲᠡᠷᠡ ᠪᠣᠯ ᠨᠤᠮᠤ ᠲᠡᠳᠡᠨ ᠰᠤᠷ ᠬᠠᠷᠪᠤᠬᠤ ᠠ᠋ᠴᠠ ᠡᠬᠢᠯᠡᠭᠡᠳ ᠫᠤᠤ ᠱᠠᠭᠠᠢᠨ ᠠᠩ ᠬᠦᠷᠦᠭᠡ ᠬᠢᠬᠦ᠂ ᠪᠢᠷ ᠨᠡᠢᠯᠡᠭᠦᠯᠦᠨ ᠪᠢᠴᠢᠭ ᠪᠢᠴᠢᠬᠦ ᠡᠴᠡ ᠡᠬᠢᠯᠡᠭᠡᠳ ᠬᠣᠭᠣᠯᠠᠢ ᠵᠠᠰᠠᠨ ᠳᠠᠭᠤᠤ ᠳᠠᠭᠤᠯᠠᠬᠤ᠂ ᠮᠣᠷᠢ ᠪᠥᠬᠡ ᠬᠣᠶᠠᠷ ᠢ᠋ ᠰᠢᠨᠵᠢᠯᠡᠨ ᠲᠠᠨᠢᠬᠤ᠂ ᠤᠷᠠᠨ ᠳᠠᠷᠬᠠᠨ ᠬᠢᠬᠦ ᠵᠡᠷᠭᠡ ᠡᠷᠡ ᠬᠥᠮᠦᠨ ᠦ᠌ ᠭᠠᠢᠬᠠᠭᠤᠯᠪᠠᠯ ᠵᠣᠬᠢᠬᠤ ᠪᠦᠬᠦᠨ ᠳ᠋ᠦ᠍ ᠣᠨᠴᠠᠭᠠᠢ ᠲᠥᠷᠥᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠡᠷᠡ᠃ ᠲᠡᠷᠡ ᠡᠷᠡ ᠣᠳᠣ ᠥᠪᠡᠷ ᠢ᠋ᠶ᠋ᠡᠨ ᠳᠤᠷᠠᠯᠠᠪᠠᠴᠤ᠂ ᠡᠰᠡ ᠳᠤᠷᠠᠯᠠᠪᠠᠴᠤ ᠢᠵᠢᠯᠢ ᠳ᠋ᠡᠭᠡᠨ ᠢᠵᠢᠯᠢ᠂ ᠪᠠᠷᠤᠨ ᠵᠠᠩᠵᠤᠨ᠂ ᠳᠠᠷᠢ ᠡᠬᠡ ᠯᠠᠮᠠ ᠬᠣᠶᠠᠷ ᠤ᠋ᠨ ᠭᠠᠷ ᠲᠤ ᠠᠳᠬᠤᠭᠳᠠᠬᠤ ᠪᠣᠯᠤᠯᠠ᠃ ᠡᠢᠮᠦ ᠭᠤᠷᠪᠠᠨ ᠬᠥᠮᠦᠨ ᠢ᠋ᠶ᠋ᠡᠷ ᠲᠣᠯᠣᠭᠠᠢᠯᠠᠭᠤᠯᠤᠭᠰᠠᠨ ᠴᠡᠷᠢᠭ ᠶᠠᠮᠠᠷ ᠪᠠᠢᠬᠤ ᠪᠣᠢ? ᠭᠡᠬᠦ ᠡᠴᠡ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠪᠠᠰᠠ ᠯᠠ ᠦᠵᠡᠭᠳᠡᠵᠦ ᠮᠡᠳᠡᠭᠳᠡᠭᠡ ᠦᠭᠡᠢ ᠶᠠᠮᠠᠷ ᠨᠢᠭᠡ ᠠᠶᠤᠮᠰᠢᠭ ᠲᠥᠷᠥᠨᠡ᠃ ᠡᠨᠡ ᠮᠡᠲᠦ ᠠᠷᠪᠢᠨ ᠠᠶᠤᠮᠰᠢᠭ ᠲᠤ ᠪᠠᠯᠳᠠᠨᠴᠡᠷᠢᠩ ᠬᠦᠯᠢᠭᠳᠡᠭᠰᠡᠭᠡᠷ ᠭᠡᠷ ᠲᠡᠭᠡᠨ ᠰᠣᠭᠲᠣᠭᠰᠠᠨ ᠬᠥᠮᠦᠨ ᠰᠢᠭ ᠭᠤᠢᠪᠢᠯᠠᠨ ᠢᠷᠡᠪᠡ᠃ ᠭᠡᠷ ᠨᠢ ᠳᠤᠯᠠᠭᠠᠨ᠂ ᠬᠣᠭᠣᠯᠠ ᠤᠮᠳᠠ ᠪᠡᠯᠡᠨ ᠪᠠᠢᠪᠠᠴᠤ ᠰᠡᠳᠬᠢᠯ ᠲᠠᠢᠪᠤᠰᠢᠷᠠᠬᠤ ᠶᠠᠭᠤᠮᠠ ᠶᠡᠷᠦ ᠠᠯᠠᠭᠠ᠃ ᠥᠪᠡᠷ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠶᠠᠭᠠᠬᠢᠬᠤ ᠪᠢᠯᠡ? ᠭᠡᠵᠦ ᠡᠯᠳᠡᠪᠴᠢᠯᠡᠨ ᠪᠣᠳᠣᠬᠤ ᠲᠣᠯᠣᠭᠠᠢ ᠪᠠᠨ ᠭᠠᠰᠠᠯᠭᠠᠨᠠ᠃ ᠠᠱ᠌ᠢᠭᠦᠢ ᠨᠢᠭᠡ ᠵᠠᠮ ᠮᠥᠷ᠂ ᠲᠡᠷᠡ ᠨᠢ ᠵᠢᠭᠤᠲᠠᠬᠤ᠃ ᠠᠷᠠᠳ ᠤ᠋ᠨ ᠨᠠᠮ᠂ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠵᠦᠭ᠂ ᠡᠴᠦᠰ ᠨᠢ ᠴᠣᠬᠣᠮ ᠶᠠᠭᠤ ᠪᠣᠯᠪᠠᠴᠤ ᠬᠠᠮᠢᠶᠠ ᠦᠭᠡᠢ᠂ ᠥᠪᠡᠷ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠭᠠᠭᠴᠠᠬᠠᠨ ᠲᠡᠳᠡᠨ ᠠᠪᠴᠢᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠮᠥᠷ ᠦᠭᠡᠢ ᠪᠣᠯᠵᠠᠢ᠃ ᠣᠷᠣᠨ ᠳᠡᠭᠡᠷᠡ ᠬᠥᠨᠳᠡᠯᠡᠨ ᠬᠠᠶᠠᠭᠰᠠᠨ ᠪᠡᠶᠡ ᠪᠡᠨ ᠶᠠᠭᠠᠷᠠᠨ ᠥᠨᠳᠡᠢᠯᠭᠡᠵᠦ᠂ ᠠᠪᠳᠠᠷᠠ ᠪᠠᠨ ᠠᠭᠤᠳᠠᠯᠤᠨ ᠪᠠᠶᠠᠷ ᠶᠣᠰᠣᠯᠠᠯ ᠳ᠋ᠤ᠌ ᠡᠮᠦᠰᠳᠡᠭ ᠦᠨᠡᠲᠦ ᠳᠡᠪᠡᠯ᠂ ᠤᠲᠠᠰᠤ ᠬᠠᠳᠬᠤᠮᠠᠯ ᠭᠤᠲᠤᠯ᠂ ᠬᠥᠭᠡᠷᠦᠭ ᠳᠠᠯᠢᠩ ᠲᠠᠢ ᠪᠠᠨ ᠭᠠᠷᠭᠠᠨ᠄
— ᠵᠠ ᠬᠦ ᠠᠷᠪᠠᠭᠠᠢ! ᠡᠳᠡᠨ ᠢ᠋ ᠮᠠᠷᠭᠠᠰᠢ ᠵᠠᠬᠠ ᠳᠡᠭᠡᠷᠡ ᠭᠠᠷᠭᠠᠨ ᠵᠠᠷᠤᠭᠠᠳ ᠬᠣᠶᠠᠷ ᠰᠠᠢᠨ ᠮᠣᠷᠢ ᠪᠣᠯᠭᠠᠨᠠ ᠰᠢᠦ᠃
— ᠵᠠ ᠲᠠ ᠶᠠᠭᠤ ᠭᠡᠪᠡ ᠠ᠋?
ᠪᠠᠯᠳᠠᠨᠴᠡᠷᠢᠩ ᠦᠭᠡ ᠪᠡᠨ ᠳᠠᠪᠲᠠᠭᠠᠳ ᠮᠠᠷᠭᠠᠰᠢ ᠶ᠋ᠢᠨ ᠳᠣᠲᠣᠷᠠ ᠵᠠᠪᠠᠯ ᠠᠮᠵᠢᠭᠤᠯᠬᠤ ᠬᠡᠷᠡᠭᠲᠡᠢ! ᠭᠡᠵᠦ ᠨᠡᠮᠡᠪᠡ᠃
ᠥᠷᠯᠥᠭᠡ ᠪᠠᠯᠳᠠᠨᠴᠡᠷᠢᠩ ᠡᠷᠲᠡᠯᠡᠨ ᠪᠣᠰᠴᠤ ᠴᠠᠬᠠᠷ᠂ ᠥᠪᠥᠷ ᠮᠣᠩᠭᠣᠯᠴᠤᠳ ᠪᠠᠢᠷᠢ ᠤᠷᠤᠭᠤ ᠶᠠᠪᠤᠯᠠ᠃ ᠮᠣᠳᠣᠨ ᠭᠡᠷ ᠲᠦ᠍ ᠢᠷᠡᠬᠦ ᠳ᠋ᠦ᠍ ᠬᠤᠭᠤᠷ ᠳᠠᠷᠤᠳᠠᠭ ᠡᠪᠦᠭᠡᠨ ᠴᠠᠬᠠᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠪᠠᠭᠯᠠᠨ ᠰᠠᠭᠤᠨᠠ᠃ ᠠᠮᠤᠷ ᠡᠷᠢᠭᠡᠳ ᠭᠣᠣᠵᠤᠤ ᠪᠠᠭᠠᠲᠤᠷ ᠢ᠋ ᠰᠤᠷᠠᠭᠯᠠᠬᠤ ᠳ᠋ᠤ᠌᠄
— ᠵᠠ ᠮᠡᠳᠡᠬᠦ ᠦᠭᠡᠢ᠂ ᠲᠡᠳᠡ ᠴᠥᠮ ᠶᠠᠪᠤᠴᠢᠬᠠᠭᠰᠠᠨ᠃
— ᠬᠡᠵᠢᠶᠡ?
— ᠥᠴᠥᠭᠡᠳᠦᠷ᠃ ᠣᠷᠣᠰ ᠮᠣᠩᠭᠣᠯ ᠬᠣᠶᠠᠷ ᠳᠠᠷᠤᠭᠠ ᠢᠷᠡᠭᠡᠳ ᠳᠠᠷᠤᠭᠠ ᠨᠠᠷ ᠪᠣᠯᠭᠠᠬᠤ ᠪᠠᠷ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃
— ᠠ ᠲᠠ?
— ᠨᠠᠮᠠᠶ᠋ᠢ ᠤᠤ? ᠣᠳᠣ ᠶᠠᠭᠠᠬᠢᠨᠠ᠂ ᠴᠢᠨᠣᠠ ᠥᠲᠡᠯᠬᠦ ᠪᠡᠷ ᠢ᠋ᠶ᠋ᠡᠨ ᠰᠦᠷᠦᠭ ᠲᠡᠭᠡᠨ ᠬᠠᠶᠠᠭᠳᠠᠨᠠ᠂ ᠡᠷᠡ ᠥᠲᠡᠯᠬᠦ ᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠡᠴᠡ ᠬᠠᠰᠤᠭᠳᠠᠨᠠ ᠭᠡᠵᠦ ᠥᠭᠦᠯᠡᠪᠡ᠃
— ᠲᠠᠨ ᠳ᠋ᠤ᠌ ᠭᠣᠣᠵᠤᠤ ᠶ᠋ᠢᠨ ᠬᠠᠮᠢᠭᠠ ᠣᠴᠢᠭᠰᠠᠨ ᠢ᠋ ᠮᠡᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ ᠤᠤ?
— ᠵᠠ ᠪᠢ ᠮᠡᠳᠡᠨᠡ ᠳᠠ᠂ ᠭᠡᠪᠡᠴᠦ ᠲᠡᠷᠡ ᠪᠠᠭᠠᠲᠤᠷ ᠡᠷᠡ ᠬᠡᠷᠬᠢᠪᠡᠴᠦ ᠬᠠᠶᠠᠭᠳᠠᠬᠤ ᠦᠭᠡᠢ᠃
ᠪᠠᠯᠳᠡᠨᠴᠡᠷᠢᠩ ᠪᠤᠴᠠᠨ ᠭᠠᠷᠴᠤ ᠭᠱᠠᠨ ᠵᠠᠭᠤᠷᠠ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠯᠮᠠᠢᠷᠠᠨ ᠰᠢᠷᠲᠡᠭᠡᠳ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠤᠷᠤᠭᠤ ᠶᠠᠪᠤᠯᠠ᠃ ᠬᠦᠷᠬᠦ ᠵᠠᠭᠤᠷᠠ᠂ ᠪᠡᠷᠤᠨ ᠤ᠋ ᠬᠢᠨ ᠲᠡᠳᠡᠨ ᠢ᠋ ᠨᠡᠭᠡᠷᠡᠨ ᠳᠠᠷᠤᠭᠠ ᠪᠣᠯᠭᠠᠬᠤ ᠪᠠᠷ ᠠᠪᠠᠴᠢᠭᠰᠠᠨ ᠬᠡᠷᠡᠭ ᠤᠤ? ᠠᠯᠢ ᠪᠥᠭᠡᠮ ᠪᠠᠢᠯᠭᠠᠪᠠᠯ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠭᠠᠮᠢᠩ ᠤ᠋ᠳ ᠢ᠋ ᠡᠷᠭᠢᠨ ᠳᠠᠢᠰᠤᠩᠨᠠᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠶᠠᠭᠤᠮᠠ ᠪᠣᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠲᠠᠷᠬᠠᠭᠠᠪᠠ ᠤᠤ ᠭᠡᠳᠡᠭ ᠠᠰᠠᠭᠤᠳᠠᠯ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠠᠵᠢ᠃ ᠬᠤᠸᠠᠷᠠᠨ ᠳᠡᠭᠡᠷᠡ ᠢᠷᠡᠭᠡᠳ ᠳᠡᠭᠡᠭᠦᠷ ᠳᠣᠣᠭᠤᠷ ᠦᠭᠡᠢ ᠶᠠᠪᠤᠨ᠂ ᠵᠠᠷᠢᠮ ᠨᠥᠬᠥᠳ ᠲᠡᠢ ᠨᠢ ᠲᠠᠭᠠᠷᠠᠯᠳᠤᠪᠠᠴᠤ᠂ ᠲᠡᠳᠡ ᠭᠣᠣᠵᠤᠤ ᠶ᠋ᠢᠨ ᠬᠠᠮᠢᠭᠠ ᠣᠴᠢᠭᠰᠠᠨ ᠢ᠋ ᠦᠯᠦ ᠮᠡᠳᠡᠨᠡ᠃ ᠴᠠᠭ ᠦᠳᠡ ᠥᠩᠭᠡᠷᠡᠵᠦ ᠪᠠᠢᠬᠤ ᠲᠤᠯᠠ ᠬᠣᠢᠰᠢᠬᠢ ᠠᠵᠢᠯ ᠢ᠋ᠶ᠋ᠠᠨ ᠪᠣᠳᠣᠨ ᠶᠠᠭᠠᠷᠠᠤ ᠪᠤᠴᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ 《ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠯᠠ ᠶᠠᠪᠤᠨᠠ ᠳᠠ》 ᠭᠡᠵᠦ ᠰᠡᠳᠬᠢᠯ ᠰᠢᠯᠤᠭᠤᠳᠪᠠᠴᠤ ᠲᠡᠷᠡ ᠰᠠᠢᠨ ᠡᠷᠡ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠥᠪᠡᠷ ᠦ᠋ᠨ ᠬᠢ ᠲᠡᠢ ᠪᠡᠨ ᠬᠣᠯᠪᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠬᠦ ᠡᠴᠡ ᠮᠠᠰᠢ ᠬᠠᠷᠠᠰᠬᠠᠳᠠᠨᠠ᠃ ᠬᠠᠰᠢᠶᠠᠨ ᠳ᠋ᠠᠭᠠᠨ ᠢᠷᠡᠨ ᠬᠠᠭᠠᠯᠭᠠ ᠲᠠᠲᠠᠬᠤ ᠳ᠋ᠤ᠌ ᠬᠣᠶᠠᠷ ᠰᠠᠢᠬᠠᠨ ᠮᠣᠷᠢ ᠤᠶᠠᠭᠠᠲᠠᠢ ᠪᠠᠢᠭᠠ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠪᠠᠶᠠᠷᠯᠠᠯᠲᠠᠢ ᠪᠠᠢᠪᠠᠴᠤ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠭᠣᠣᠵᠤᠤ ᠶ᠋ᠢ ᠳᠠᠬᠢᠨ ᠳᠤᠷᠠᠰᠤᠨ ᠰᠠᠨᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠡᠷᠡ ᠶ᠋ᠢᠨ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠮᠣᠳᠣᠨ ᠬᠣᠢᠲᠠᠢ ᠬᠤᠷᠴᠠ ᠵᠡᠪᠰᠡᠭ ᠲᠤᠯᠭᠠᠨ ᠥᠭᠭᠦᠭᠰᠡᠨ ᠦ᠌ ᠳᠠᠷᠠᠭᠠ《ᠲᠠ ᠴᠡᠷᠢᠭ ᠲᠡᠢᠨ ᠦ᠌ ᠬᠥᠮᠦᠨ ᠪᠢᠰᠢ ᠪᠣᠯᠪᠠᠴᠤ᠂ ᠴᠡᠷᠢᠭ ᠲᠡᠢᠨ ᠦ᠌ ᠦᠶᠡ ᠬᠥᠮᠦᠨ ᠢ᠋ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠲᠡᠳᠡᠨ ᠣᠷᠣᠭᠤᠯᠳᠠᠭ᠁》 ᠭᠡᠵᠦ ᠥᠭᠦᠯᠡᠭᠰᠡᠨ ᠨᠢ ᠣᠳᠣ ᠶᠠᠭ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠵᠤ ᠪᠠᠢᠭᠠ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ《ᠦᠭᠡᠢ ᠶᠠᠭᠤᠲᠠᠢ ᠶᠡᠬᠡ ᠶᠠᠭᠤᠮᠠ ᠦᠵᠡᠭᠰᠡᠨ᠂ ᠶᠢᠷᠲᠢᠨᠴᠦ ᠶ᠋ᠢ ᠲᠤᠭᠤᠯᠤᠭᠰᠠᠨ ᠡᠷᠡ ᠪᠢᠯᠡ?》 ᠭᠡᠵᠦ ᠭᠠᠢᠬᠠᠪᠠ᠃ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌ ᠠᠷᠪᠠᠭᠠᠢ ᠭᠣᠣᠵᠤᠤ ᠲᠠᠢ ᠵᠦᠢᠷᠯᠡᠵᠦ ᠬᠡᠷᠬᠢᠪᠡᠴᠦ ᠦᠯᠦ ᠪᠣᠯᠬᠤ ᠪᠣᠯᠪᠠᠴᠤ ᠮᠥᠨ ᠯᠡ ᠡᠷᠡ᠂ ᠶᠠᠭ ᠴᠤ᠌ ᠦᠭᠡᠢ ᠤᠷᠢᠳ ᠡᠮᠦᠨᠡ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠭᠰᠠᠨ ᠢᠳᠡᠷ ᠡᠷᠡ᠃ ᠴᠠᠭᠠᠰᠢ ᠬᠠᠷᠠᠨ ᠮᠢᠬᠠ ᠢᠳᠡᠵᠦ ᠰᠠᠭᠤᠬᠤ ᠶ᠋ᠢ ᠪᠠᠯᠳᠡᠨᠴᠡᠷᠢᠩ ᠬᠠᠷᠠᠭᠠᠳ ᠡᠭᠦᠨ ᠢ᠋ ᠴᠦ᠍ ᠪᠢ ᠪᠠᠷᠤᠨ ᠤ᠋ ᠬᠢᠨ ᠳ᠋ᠦ᠍ ᠠᠯᠳᠠᠬᠤ ᠬᠡᠷᠡᠭ ᠦᠭᠡᠢ》 ᠭᠡᠵᠦ ᠪᠣᠳᠣᠵᠠᠢ᠃
— ᠵᠠ ᠬᠦ ᠬᠣᠭᠣᠯᠠ ᠬᠢᠬᠦ ᠬᠡᠷᠡᠭ ᠦᠭᠡᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠢᠩᠭᠢᠰᠬᠢᠭᠡᠳ ᠶᠠᠪᠤᠨᠠ᠃
— ᠵᠠ ᠪᠠᠭᠰᠢ ᠠ᠋ ᠬᠠᠮᠢᠭᠠᠰᠢ ᠪᠠᠨ? ᠭᠡᠵᠦ ᠡᠷᠭᠢᠵᠦ ᠭᠠᠢᠬᠠᠨ ᠬᠠᠷᠠᠪᠠ᠃
— ᠠᠯᠤᠰ ᠲᠤ᠂ ᠴᠢᠮᠠ ᠳ᠋ᠤ᠌ ᠡᠮᠡᠭᠡᠯ ᠬᠠᠵᠠᠭᠠᠷ ᠤ᠋ᠨ ᠶᠠᠭᠤᠮᠠ ᠪᠠᠢᠳᠠᠭ ᠪᠢᠯᠢᠤ?
— ᠵᠠ ᠪᠣᠢ᠃ ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ ᠭᠡᠵᠦ ᠪᠣᠳᠣᠭᠠᠳ ᠪᠢ ᠠᠯᠢ ᠬᠡᠳᠦᠢᠨᠡᠢ ᠲᠥᠬᠥᠭᠡᠷᠴᠦ ᠠᠪᠤᠭᠰᠠᠨ᠃
— ᠰᠠᠢᠨ᠃
ᠠᠷᠪᠠᠭᠠᠢ ᠮᠢᠬᠠ ᠱᠥᠯᠥ ᠪᠡᠨ ᠳᠠᠯᠳᠠ ᠬᠢᠵᠦ ᠪᠠᠯᠳᠡᠨᠵᠡᠷᠢᠩ ᠦ᠋ᠨ ᠮᠣᠷᠢ ᠶ᠋ᠢ ᠡᠮᠡᠭᠡᠯᠯᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠰᠣᠯᠢᠵᠤ᠂ ᠣᠢᠮᠣᠰᠤᠨ ᠤ᠋ ᠲᠦᠷᠡᠢ ᠳ᠋ᠦ᠍ ᠬᠢᠵᠦ ᠪᠠᠢᠰᠢᠩ ᠤ᠋ᠨ ᠬᠥᠨᠳᠡᠢ ᠳᠣᠣᠭᠤᠷ ᠬᠠᠶᠠᠭᠰᠠᠨ ᠮᠠᠣᠽᠢᠷ ᠫᠤᠤ ᠪᠠᠨ ᠠᠪᠴᠠᠢ᠃ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠭᠡᠳ ᠪᠤᠷᠬᠠᠨ ᠳ᠋ᠠᠭᠠᠨ ᠵᠤᠯᠠ ᠡᠷᠭᠦᠵᠦ᠂ ᠠᠷᠴᠠ ᠤᠭᠤᠭᠢᠭᠤᠯᠬᠤ ᠨᠢ ᠬᠤᠪᠢ ᠵᠠᠶᠠᠭᠠ ᠪᠠᠨ ᠳᠠᠭᠠᠳᠬᠠᠵᠤ ᠪᠠᠢᠭᠠ ᠬᠡᠷᠡᠭ ᠪᠠᠢᠵᠠᠢ᠃ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠮᠣᠷᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠬᠡ ᠶᠣᠰᠣᠯᠠᠯ ᠢ᠋ ᠪᠠᠯᠳᠠᠨᠴᠡᠷᠢᠩ ᠳᠥᠷᠪᠡᠨ ᠲᠠᠯᠠᠲᠤ ᠪᠣᠯᠭᠠᠨ ᠲᠣᠭᠣᠷᠴᠣᠭ ᠢ᠋ᠶ᠋ᠠᠨ ᠲᠥᠪ ᠡᠮᠦᠰᠴᠦ ᠵᠠᠪᠢᠯᠠᠨ ᠰᠠᠭᠤᠵᠤ ᠨᠢᠭᠡ ᠠᠶᠠᠭᠠ ᠴᠠᠢ ᠤᠤᠭᠤᠵᠤ᠂ ᠲᠠᠪᠠᠭ ᠲᠠᠢ ᠢᠳᠡᠭᠡ ᠡᠴᠡ ᠪᠡᠨ ᠠᠮᠰᠠᠪᠠ᠃ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤᠨᠢ ᠠᠷᠪᠠᠭᠠᠢ ᠬᠠᠮᠢᠭᠠᠰᠢ ᠪᠠᠨ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠬᠤ ᠶ᠋ᠢ ᠬᠡᠯᠡᠵᠦ ᠯᠠᠪᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠᠴᠤ ᠶᠠᠪᠤᠬᠤ ᠯᠠ ᠪᠣᠯᠵᠤ ᠳᠠ ᠭᠡᠵᠦ ᠪᠣᠳᠣᠨ ᠬᠢᠶᠡ ᠬᠥᠮᠦᠨ ᠦ᠌ ᠨᠣᠶᠠᠨ ᠳ᠋ᠠᠭᠠᠨ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡ ᠪᠠᠷᠢᠨ ᠰᠠᠭᠤᠨᠠ᠃ ᠪᠠᠯᠳᠠᠨᠴᠡᠷᠢᠩ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠦᠨᠳᠦᠰᠦᠨ ᠲᠠᠭᠰᠢᠲᠤ ᠴᠠᠢ ᠪᠠᠨ ᠬᠤᠷᠤᠭᠤ ᠨᠤᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠦᠵᠦᠭᠦᠷ ᠦ᠋ᠳ ᠲᠦ᠍ ᠴᠣᠮᠴᠣᠢᠯᠭᠠᠨ ᠪᠠᠷᠢᠵᠤ᠂ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠣᠲᠣᠷᠠᠬᠢ ᠶ᠋ᠢ ᠠᠢᠪᠤᠩ ᠲᠠᠢᠪᠤᠩ ᠠᠵᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠬᠤ ᠭᠡᠵᠦ ᠪᠠᠢᠭᠠ ᠨᠢᠭᠡ ᠶᠠᠭᠤᠮᠠ ᠪᠠᠨ ᠰᠠᠨᠠᠵᠠᠢ᠃ ᠳᠡᠷᠭᠡᠳᠡᠬᠢ ᠪᠢᠴᠢᠬᠠᠨ ᠰᠢᠷᠭᠤᠤᠯ ᠤ᠋ᠨ ᠢ᠋ᠶ᠋ᠠᠨ ᠨᠢᠳᠦ ᠶ᠋ᠢ ᠲᠠᠲᠠᠵᠤ ᠮᠥᠩᠭᠥᠨ ᠬᠤᠰᠢᠭᠤᠨ ᠳ᠋ᠤ᠌ ᠰᠢᠷᠭᠤᠭᠤᠯᠤᠭᠰᠠᠨ ᠬᠣᠣᠰ ᠪᠢᠷ᠂ ᠬᠥᠮᠦᠨ ᠬᠥᠮᠦᠨ ᠦ᠌ ᠬᠢ ᠡᠴᠡ ᠳᠠᠪᠠᠭᠤ ᠲᠠᠢ ᠲᠣᠮᠣ ᠭᠠᠤᠯᠢᠨ ᠶᠨ᠌ᠨ᠌ᠲ᠋ᠨ᠌ᠢ ᠡᠳᠡᠭᠡᠷ ᠢ᠋ ᠭᠠᠷᠭᠠᠨ ᠠᠪᠴᠤ ᠡᠪᠦᠷᠯᠡᠪᠡ᠃
ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠷᠦᠬᠡ ᠶ᠋ᠢ ᠤᠷᠤᠭᠰᠢ ᠪᠥᠬᠥᠢᠯᠭᠡᠨ ᠪᠠᠷᠤᠭ ᠪᠦᠲᠡᠭᠡᠬᠦ ᠰᠢᠬᠠᠮ ᠪᠣᠯᠭᠠᠵᠤ ᠬᠣᠰᠢᠭᠤ ᠶ᠋ᠢ ᠨᠢ ᠳᠥᠩᠭᠡᠵᠦ ᠡᠷᠭᠢᠭᠦᠯᠦᠮᠡᠷ ᠪᠣᠯᠵᠤ ᠣᠭᠣᠰᠣᠷ ᠢ᠋ ᠨᠢ ᠠᠷᠤ ᠳ᠋ᠤᠨᠢ ᠤᠶᠠᠬᠤ ᠪᠣᠯ ᠡᠵᠡᠨ ᠦᠭᠡᠢ ᠶ᠋ᠢᠨ ᠲᠡᠮᠳᠡᠭ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠤ᠋ ᠨᠡᠭᠡᠭᠡᠬᠦ ᠰᠤᠷ ᠢ᠋ ᠰᠤᠭᠤᠯᠵᠤ ᠣᠨᠢᠰᠤᠯᠠᠬᠤ ᠰᠤᠷ ᠢ᠋ ᠲᠠᠲᠠᠮᠠᠭᠴᠠ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠣᠷᠣᠬᠤ ᠡᠷᠬᠡ ᠦᠭᠡᠢ ᠲᠦᠭᠵᠢᠭᠳᠡᠪᠡ᠃ ᠲᠡᠳᠡ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠦᠨ ᠭᠤᠳᠤᠮᠵᠢ ᠳ᠋ᠠᠭᠠᠨ ᠠᠯᠬᠤᠯᠠᠪᠠ᠃ ᠭᠡᠪᠡᠴᠦ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠰᠢᠭᠤᠳᠤᠷᠠᠨ ᠣᠷᠣᠵᠤ ᠪᠠᠢᠭᠠ ᠨᠢ ᠬᠠᠷᠠᠬᠠᠨ ᠪᠢᠰᠢ᠂ ᠨᠢᠭᠡ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠷᠢᠭᠰᠠᠨ ᠳᠥᠷᠪᠡᠨ ᠬᠠᠨᠠ ᠲᠠᠢ ᠲᠣᠪᠬᠢᠭᠰᠠᠨ ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠡᠮᠡᠭᠡᠨ《ᠠ ᠭᠦᠩᠲᠡᠨ》 ᠭᠡᠵᠦ ᠳᠠᠭᠤ ᠠᠯᠳᠠᠨ ᠤᠭᠲᠤᠨᠠ᠃ ᠬᠠᠷᠠᠪᠠᠯ ᠡᠨᠡ ᠡᠮᠡᠭᠡᠨ ᠳ᠋ᠦ᠍ ᠬᠠᠭᠤᠴᠢᠨ ᠶᠠᠭᠤᠮᠠ ᠶᠡᠷᠦ ᠠᠯᠠᠭᠠ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠲᠣᠬᠢᠲᠠᠢ ᠡᠮᠦᠰᠬᠡᠯ ᠬᠤᠪᠴᠠᠰᠤ ᠴᠡᠪᠡᠷ ᠰᠠᠢᠬᠠᠨ᠂ ᠨᠢᠭᠤᠷ ᠴᠢᠷᠠᠢ ᠲᠣᠯᠢ ᠰᠢᠭ᠋ ᠭᠡᠭᠡᠨ ᠲᠤᠩᠭᠠᠯᠠᠭ᠂ ᠬᠠᠴᠠᠷ ᠠ᠋ᠴᠠ ᠨᠢ ᠤᠯᠠᠭᠠᠨ ᠶᠠᠭᠠᠨ ᠲᠤᠶᠠᠭᠠ ᠲᠠᠲᠠᠬᠤ ᠨᠢ ᠡᠷᠲᠡ ᠤᠷᠢᠳᠤ ᠡᠷᠬᠢᠮ ᠳᠡᠭᠡᠳᠦ ᠬᠥᠮᠦᠨ ᠦ᠌ ᠬᠠᠲᠤᠨ ᠤᠯᠠᠭᠠᠨ ᠡᠩᠭᠡᠰᠬᠡ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠤ᠋ ᠣᠷᠣ ᠮᠥᠷ ᠰᠢᠭ ᠰᠠᠨᠠᠭᠳᠠᠨᠠ᠃ ᠪᠠᠯᠳᠠᠨᠵᠡᠷᠢᠩ ᠢ᠋ ᠡᠮᠡᠭᠡᠨ ᠳᠠᠭᠤ ᠠᠯᠳᠠᠨ ᠤᠭᠲᠤᠩᠭᠤᠲᠠ ᠪᠠᠨ ᠵᠣᠯᠭᠠᠵᠤ᠂ ᠬᠣᠶᠠᠷ ᠬᠠᠴᠠᠷ ᠢ᠋ ᠨᠢ ᠦᠨᠦᠰᠬᠦ ᠶ᠋ᠢ ᠨᠢ ᠦᠵᠡᠬᠦ ᠳ᠋ᠦ᠍ ᠣᠳᠣ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠥᠮᠦᠨ ᠦ᠌ ᠵᠡᠷᠭᠡ ᠲᠡᠢ ᠬᠥᠮᠦᠨ ᠭᠡᠵᠦ ᠦᠵᠡᠬᠦ ᠳ᠋ᠦ᠍ ᠬᠦᠷᠦᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠬᠦᠨᠳᠦᠲᠦ ᠡᠮᠡᠭᠡᠨ ᠭᠡᠵᠦ ᠲᠣᠭᠣᠮᠰᠠᠷᠯᠠᠬᠤ ᠪᠣᠯᠤᠭᠰᠠᠨ ᠨᠢ ᠢᠯᠡᠷᠬᠡᠢ᠃ ᠬᠣᠭᠣᠯᠠ ᠤᠮᠳᠠ ᠪᠡᠯᠡᠳᠬᠡᠨ ᠬᠠᠯᠠᠭᠤᠨ ᠳᠣᠲᠣᠨᠣ ᠪᠠᠷ ᠵᠣᠴᠢᠯᠠᠬᠤ ᠵᠠᠭᠤᠷᠠ《ᠠᠢ ᠳᠠ ᠡᠨᠡ ᠳᠡᠯᠡᠬᠡᠢ ᠭᠡᠳᠡᠭ ᠶᠠᠭᠤᠲᠠᠢ ᠰᠢᠷᠦᠭᠦᠨ ᠪᠣᠢ? ᠤᠷᠢᠳᠤ ᠨᠠᠰᠤᠨ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡ ᠶᠡᠬᠡ ᠨᠢᠭᠦᠯ ᠬᠢᠭᠰᠡᠨ ᠦ᠌ ᠯᠡ ᠪᠣᠢ ᠊ᠶᠠ᠃ ᠣᠯᠠᠨ ᠵᠢᠯ ᠯᠠᠢ ᠯᠠᠨᠴᠠᠭ ᠡᠳ᠋ᠯᠡᠭᠡᠳ ᠪᠤᠷᠬᠠᠨ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠵᠠᠯᠪᠠᠷᠢᠬᠤ ᠶ᠋ᠢᠨ ᠬᠦᠴᠦ ᠪᠡᠷ ᠬᠤᠪᠢ ᠢᠷᠦᠭᠡᠯ ᠦ᠋ᠨ ᠬᠦᠦ ᠲᠡᠢ ᠪᠡᠨ ᠤᠴᠠᠷᠠᠨ ᠰᠠᠶᠢ ᠠᠱ᠌ᠢᠭᠦᠢ ᠨᠢᠭᠡ ᠵᠢᠷᠭᠠᠯ ᠡᠬᠢᠯᠡᠬᠦ ᠭᠡᠲᠡᠯᠡ ᠴᠢ ᠪᠠᠰᠠ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ ᠪᠠᠬᠠᠨ ᠵᠣᠪᠠᠯᠠᠩ ᠡᠳ᠋ᠯᠡᠭᠦᠯᠪᠡ ᠰᠢᠦ》 ᠭᠡᠳ ᠴᠠᠭᠠᠰᠢ ᠨᠢ ᠵᠠᠯᠪᠠᠷᠢᠭᠰᠠᠨ ᠵᠠᠯᠪᠠᠷᠢᠯ ᠵᠡᠭᠦᠳᠦᠯᠡᠭᠰᠡᠨ ᠵᠡᠭᠦᠳᠦ᠂ ᠵᠥᠩᠨᠡᠭᠰᠡᠨ ᠵᠦᠩ ᠰᠤᠪᠢᠨ ᠪᠦᠬᠦᠨ ᠢ᠋ᠶ᠋ᠡᠨ ᠤᠬᠢᠯᠠᠬᠤ᠂ ᠢᠨᠢᠶᠡᠬᠦ ᠬᠣᠶᠠᠷ ᠢ᠋ ᠬᠣᠣᠰᠯᠠᠭᠤᠯᠤᠨ ᠶᠠᠷᠢᠵᠤ ᠭᠠᠷᠪᠠ᠃ ᠪᠠᠯᠳᠠᠨᠴᠡᠷᠢᠩ ᠬᠡᠳᠦᠢᠪᠡᠷ ᠰᠡᠳᠬᠢᠯ ᠶᠠᠭᠠᠷᠠᠨ ᠪᠠᠢᠵᠤ ᠶᠠᠳᠠᠵᠤ ᠪᠠᠢᠪᠠᠴᠤ ᠡᠮᠡᠭᠡᠨ ᠦ᠌ ᠦᠭᠡ ᠶ᠋ᠢ ᠬᠦᠨᠳᠦᠳᠬᠡᠨ᠂ ᠵᠣᠴᠢᠯᠠᠭᠰᠠᠨ ᠬᠣᠭᠣᠯᠠ ᠤᠮᠳᠠ ᠠ᠋ᠴᠠ ᠨᠢ ᠲᠠᠪᠠᠲᠠᠢ ᠢᠳᠡᠵᠦ ᠤᠤᠭᠤᠨᠠ᠃ ᠡᠨᠡ ᠵᠠᠭᠤᠷᠠ ᠠᠷᠪᠠᠭᠠᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠷᠢ ᠶ᠋ᠢ ᠡᠮᠡᠭᠡᠯᠯᠡᠵᠦ ᠪᠠᠰᠠ ᠪᠤᠰᠤᠳ ᠶᠠᠭᠤᠮᠠ ᠪᠠᠨ ᠪᠦᠷᠢᠨ ᠴᠡᠭᠴᠡᠯᠡᠪᠡ᠃
— ᠠᠬᠠᠢ ᠮᠢᠨᠢ ᠪᠢᠳᠡ ᠬᠣᠶᠠᠷ ᠢᠩᠭᠢᠭᠡᠳ ᠶᠡᠬᠡ ᠴᠢᠬᠤᠯᠠ ᠶᠠᠭᠤᠮᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ ᠰᠢᠦ ᠳᠡ ᠭᠡᠵᠦ ᠰᠡᠳᠬᠢᠯ ᠵᠣᠪᠠᠭᠤᠷᠢᠯᠠᠨ ᠥᠭᠦᠯᠡᠬᠦ ᠳ᠋ᠦ᠍᠄
— ᠠ ᠶᠠᠮᠠᠷ ᠬᠡᠷᠡᠭ ᠲᠦ᠍ ᠪᠣᠢ?
— ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠳᠡ᠃
— ᠵᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠲᠠ ᠨᠠᠷ ᠲᠥᠷᠥ ᠶ᠋ᠢᠨ ᠬᠠᠷᠠ ᠬᠥᠮᠦᠰ ᠪᠣᠯᠬᠣᠷ ᠲᠡᠷᠡ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠶᠠᠪᠤᠬᠤ ᠯᠠ ᠶᠣᠰᠣᠲᠠᠢ ᠪᠠᠢᠳᠠᠭ ᠪᠣᠢ ᠊ᠶᠠ᠃ ᠭᠠᠭᠴᠠᠬᠠᠨ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠳ᠋ᠠᠭᠠᠨ ᠯᠠ ᠴᠠᠭ ᠢᠮᠠᠭᠲᠠ ᠵᠠᠯᠪᠠᠷᠢᠵᠤ ᠶᠠᠪᠤᠭᠠᠷᠠᠢ! ᠭᠡᠵᠦ ᠡᠮᠡᠭᠡᠨ ᠵᠠᠬᠢᠵᠠᠢ᠃
ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠡᠷ ᠭᠡᠷ ᠡᠴᠡ ᠭᠠᠷᠴᠠᠭᠠᠪᠠ᠃
— ᠵᠠ ᠪᠠᠭᠰᠢ ᠠ᠋᠂ ᠪᠢᠳᠡᠨ ᠳ᠋ᠦ᠍ ᠵᠡᠪᠰᠡᠭ ᠠᠪᠴᠤ ᠶᠠᠪᠤᠬᠤ ᠶ᠋ᠢᠨ ᠬᠡᠷᠡᠭ ᠤᠤ? ᠭᠡᠵᠦ ᠠᠷᠪᠠᠭᠠᠢ ᠰᠢᠪᠡᠨᠡᠬᠦ ᠳ᠋ᠦ᠍᠄
— ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ᠂ ᠭᠠᠭᠴᠠᠬᠠᠨ ᠬᠠᠮᠢᠭᠠ ᠠ᠋ᠴᠠ ᠣᠯᠤᠨᠠ ᠪᠣᠢ?
— ᠨᠠᠳᠠ ᠪᠣᠢ᠃ ᠠᠷᠪᠠᠭᠠᠢ ᠭᠡᠷ ᠦ᠋ᠨ ᠴᠠᠪᠤᠭ ᠥᠭᠡᠳᠡ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠤᠨ ᠣᠷᠣᠰ ᠯᠢᠶᠠᠨᠵᠤᠤ ᠰᠤᠭ ᠲᠡᠳᠡᠨ ᠭᠠᠷᠭᠠᠵᠤ ᠢᠷᠡᠪᠡ᠃
— ᠨᠠᠭᠠᠳᠤᠬᠢ ᠴᠢᠨᠢ ᠰᠤᠮᠤ ᠲᠠᠢ ᠶᠤᠮ ᠤᠤ?
— ᠪᠣᠢ ᠭᠡᠳ ᠳᠠᠬᠢᠨ ᠭᠠᠷ ᠰᠢᠷᠠᠭᠤᠯᠪᠠ᠃
ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠮᠣᠷᠢᠳ ᠢ᠋ᠶ᠋ᠠᠨ ᠰᠠᠮ ᠭᠠᠷᠭᠠᠨ ᠮᠣᠷᠳᠠᠲᠠᠯᠠ ᠪᠡᠯᠳᠠᠨᠴᠡᠷᠢᠩ ᠳ᠋ᠦ᠍ ᠵᠢᠪᠡᠭᠦᠷᠬᠡᠨ ᠰᠡᠵᠢᠭᠯᠡᠭᠳᠡᠳᠡᠭ ᠫᠠᠯᠢᠮᠠ ᠭᠡᠭᠴᠢ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠤ《ᠲᠡᠷᠡ ᠨᠠᠮᠠᠶ᠋ᠢ ᠲᠤᠩ ᠣᠢᠭᠠ ᠦᠭᠡᠢ ᠡᠷᠭᠢᠭᠦᠯᠳᠡᠭᠰᠡᠨ ᠪᠢᠰᠢ ᠪᠢᠯᠢᠤ? ᠭᠡᠪᠡᠴᠦ ᠶᠠᠭᠤ ᠯᠠ ᠪᠣᠯ? ᠫᠠᠯᠢᠮᠠ ᠨᠡᠭᠡᠷᠡᠨ ᠪᠠᠷᠤᠨ ᠤ᠋ ᠲᠠᠩᠨᠠᠭᠤᠯ ᠪᠠᠢᠪᠠ ᠤᠤ᠂ ᠡᠰᠡᠪᠡᠯ᠁ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠴᠣᠬᠣᠮ ᠬᠡᠨ ᠦ᠌ ᠪᠣᠯᠬᠤ ᠶ᠋ᠢ ᠴᠢᠨᠢ ᠮᠡᠳᠡᠬᠦ ᠨᠢ ᠴᠢᠬᠤᠯᠠ》 ᠭᠡᠵᠦ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠡᠷᠭᠢᠭᠦᠯᠪᠡ᠃ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠭᠠᠳᠠᠨᠠ ᠢᠷᠡᠭᠡᠳ ᠠᠷᠪᠠᠭᠠᠢ ᠶ᠋ᠢ ᠮᠣᠷᠢ ᠲᠠᠢ ᠪᠠᠨ ᠦᠯᠡᠳᠡᠭᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠣᠷᠣᠪᠠ᠃ ᠭᠡᠷ ᠲᠦ᠍ ᠲᠣᠰᠣᠨ ᠳ᠋ᠧᠩ ᠰᠦᠮᠡᠯᠵᠡᠨᠡ᠃ ᠫᠠᠯᠢᠮᠠ《ᠦᠭᠡᠢ ᠢᠷᠣᠠ》 ᠭᠡᠵᠦ ᠭᠠᠢᠬᠠᠨ ᠤᠭᠲᠤᠵᠤ ᠡᠬᠡᠨᠡᠷ ᠲᠡᠭᠡᠨ ᠬᠣᠭᠣᠯᠠ ᠤᠮᠳᠠ ᠪᠡᠯᠡᠳᠬᠡᠬᠦ ᠶ᠋ᠢ ᠱᠠᠭᠠᠷᠳᠠᠪᠠ᠃
— ᠵᠦᠭᠡᠷ! ᠪᠢ ᠶᠠᠭᠠᠷᠠᠵᠤ ᠶᠠᠪᠤᠨᠠ᠂ ᠪᠡᠯᠡᠨ ᠶᠠᠭᠤᠮᠠ ᠠᠮᠰᠠᠶᠠ᠃
— ᠵᠠ ᠪᠠᠢᠵᠠ ᠲᠠᠨ ᠳ᠋ᠤ᠌ ᠡᠢᠮᠦ ᠶᠠᠭᠠᠷᠠᠤ ᠶᠠᠮᠠᠷ ᠶᠠᠪᠤᠳᠠᠯ ᠪᠣᠯᠳᠠᠭ ᠪᠢᠯᠡ?
— ᠣᠨᠴᠠ ᠶ᠋ᠢᠨ ᠶᠠᠭᠤᠮᠠ ᠦᠭᠡᠢ᠂ ᠭᠡᠪᠡᠴᠦ ᠬᠣᠶᠠᠷᠬᠠᠨ ᠪᠡᠶᠡ ᠪᠡᠷ ᠶᠠᠷᠢᠯᠴᠠᠪᠠᠯ ᠵᠦᠭᠡᠷ ᠰᠠᠨ᠃
— ᠠᠯᠢ᠂ ᠡᠬᠡᠨᠡᠷ ᠴᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠪᠤᠭᠠᠳ ᠵᠡᠭᠦᠨ ᠭᠡᠷ ᠲᠦ᠍ ᠣᠷᠣᠭᠠᠴᠢ! ᠭᠡᠵᠦ ᠫᠠᠯᠢᠮᠠ ᠥᠭᠦᠯᠡᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠭᠠᠷᠭᠠᠯᠠ᠃
ᠪᠠᠯᠳᠠᠨᠴᠡᠷᠢᠩ ᠠᠩᠬᠠ ᠡᠨᠳᠡ ᠣᠷᠣᠵᠤ ᠢᠷᠡᠬᠦ ᠳ᠋ᠡᠭᠡᠨ ᠲᠤᠩ ᠵᠣᠷᠢᠭᠲᠠᠢ᠂ ᠬᠡᠷᠪᠡ ᠦᠨᠡᠬᠡᠷ ᠪᠠᠷᠤᠨ ᠤ᠋ ᠲᠠᠩᠨᠠᠭᠤᠯ ᠮᠥᠨ ᠪᠠᠢᠭᠠᠳ ᠪᠠᠷᠢᠭᠳᠠᠬᠤ ᠮᠡᠳᠡᠭᠳᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠫᠤᠤᠳᠠᠭᠠᠳ ᠤᠨᠠᠭᠠᠴᠢᠬᠠᠶᠠ ᠭᠡᠵᠦ ᠫᠤᠤ ᠪᠠᠨ ᠬᠠᠨᠴᠤᠢ ᠳ᠋ᠠᠭᠠᠨ ᠶᠡᠭᠡᠨ ᠣᠷᠣᠵᠤ ᠢᠷᠡᠭᠰᠡᠨ ᠠᠲᠠᠯᠠ ᠴᠣᠬᠣᠮ ᠬᠦ᠌ ᠬᠣᠶᠠᠷᠬᠠᠨ ᠪᠡᠶᠡ ᠪᠡᠷ ᠦᠯᠡᠳᠡᠮᠡᠭᠴᠡ《ᠦᠭᠡᠢ ᠪᠢ ᠶᠠᠭᠤᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ? ᠶᠠᠭᠤ ᠯᠠ ᠪᠣᠯ ᠶᠠᠭᠤ ᠪᠠᠢᠭᠠ ᠯᠠ ᠪᠢᠵᠡ᠂ ᠴᠣᠬᠣᠮ ᠭᠣᠯᠢᠶᠠ ᠠᠵᠠ ᠪᠠᠨ ᠦᠵᠡᠬᠦ ᠭᠡᠵᠦ ᠵᠠᠮ ᠳᠡᠭᠡᠷᠡ ᠬᠡᠪᠲᠡᠬᠦ ᠭᠡᠬᠦ ᠰᠢᠭ ᠪᠢ ᠶᠠᠮᠠᠷ ᠳᠡᠮᠡᠢ ᠶᠠᠭᠤᠮᠠ ᠪᠠᠷ ᠬᠥᠭᠡᠭᠢᠴᠡᠯᠳᠤᠪᠡ?》 ᠭᠡᠵᠦ ᠪᠣᠳᠣᠨ ᠵᠢᠷᠦᠬᠡ ᠨᠢ ᠲᠦᠭ ᠲᠦᠭ ᠲᠦᠭᠰᠢᠵᠦ ᠡᠬᠢᠯᠡᠪᠡ᠃
— ᠵᠠ ᠨᠠᠳᠠ ᠲᠠᠢ ᠠᠮᠢᠨᠴᠢᠯᠠᠨ ᠶᠠᠷᠢᠬᠤ ᠶᠠᠭᠤᠮᠠ ᠴᠢᠨᠢ ᠶᠠᠭᠤ ᠪᠣᠢ ᠳᠠ? ᠭᠡᠵᠦ ᠪᠠᠶᠠᠰᠬᠤᠯᠠᠩᠲᠤ ᠴᠢᠷᠠᠢ ᠪᠠᠷ ᠳᠥᠭᠥᠨ ᠰᠠᠭᠤᠬᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ ᠳᠠᠬᠢᠨ ᠬᠡᠷᠬᠢᠨ ᠵᠣᠷᠢᠭ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠬᠠᠨᠴᠤᠢ ᠳ᠋ᠠᠬᠢ ᠫᠤᠤ ᠪᠠᠨ ᠭᠠᠷᠭᠠᠨ ᠲᠤᠯᠭᠠᠬᠤ ᠳ᠋ᠤ᠌ ᠪᠡᠯᠡᠨ ᠪᠣᠯᠭᠠᠵᠤ ᠠᠪᠤᠭᠠᠳ᠄
— ᠪᠢ ᠣᠳᠣ ᠶᠠᠪᠤᠯᠠ᠃
— ᠬᠠᠮᠢᠭᠠᠰᠢ ᠪᠠᠨ?
— ᠬᠣᠢᠰᠢ ᠪᠠᠨ! ᠰᠦᠬᠡᠪᠠᠭᠠᠲᠤᠷ ᠤᠷᠤᠭᠤ᠃
ᠫᠠᠯᠢᠮᠠ ᠰᠡᠵᠢᠭᠯᠡᠭᠦᠰᠢᠲᠡᠢ ᠪᠡᠷ ᠰᠣᠴᠢᠨ ᠥᠨᠳᠡᠢᠰᠬᠢᠵᠤ᠄
— ᠰᠦᠬᠡᠪᠠᠭᠠᠲᠤᠷ ᠤᠷᠤᠭᠤ ᠭᠡᠨᠡ? ᠴᠡᠭᠡᠵᠢ ᠪᠡᠨ ᠬᠣᠢᠰᠢ ᠲᠠᠲᠠᠬᠤ ᠨᠢ ᠤᠬᠤᠰᠬᠢᠨ ᠪᠠᠷᠢᠵᠤ ᠠᠪᠬᠤ ᠨᠢ ᠤᠤ ᠭᠡᠮᠡᠷ ᠪᠠᠢᠬᠤ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠫᠤᠤ ᠪᠠᠨ ᠭᠠᠷᠭᠠᠨ ᠲᠤᠯᠭᠠᠬᠤ ᠳ᠋ᠤ᠌ ᠪᠡᠯᠡᠳᠬᠡᠨᠡ᠃
— ᠵᠠ ᠲᠡᠭᠡᠭᠡᠳ ᠭᠡᠵᠦ ᠣᠷᠣᠭᠰᠢ ᠠᠬᠢᠪᠠ᠃
ᠬᠡᠷᠪᠡ ᠨᠡᠭᠡᠷᠡᠨ ᠶᠠᠪᠤᠬᠤ ᠭᠡᠵᠦ ᠪᠠᠢᠭᠠ ᠪᠣᠯ ᠪᠢ ᠴᠢᠮᠠ ᠪᠠᠷ ᠨᠢᠭᠡ ᠪᠢᠴᠢᠭ᠁ ᠭᠡᠳ ᠫᠠᠯᠢᠮᠠ ᠦᠭᠡ ᠪᠡᠨ ᠲᠠᠰᠤᠯᠤᠨ ᠠᠮᠠ ᠨᠢ ᠬᠠᠮᠬᠢᠭᠳᠠᠵᠤ ᠴᠢᠷᠠᠢ ᠨᠢ ᠴᠠᠢᠷᠠᠬᠤ᠂ ᠰᠢᠷᠠᠯᠠᠬᠤ ᠬᠣᠶᠠᠷ ᠢ᠋ᠶ᠋ᠠᠷ ᠡᠭᠡᠯᠵᠢᠯᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍《ᠣᠳᠣ ᠴᠢᠨᠦ ᠬᠡᠨ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠳ᠋ᠦ᠍ ᠠᠮᠠᠷᠬᠠᠨ ᠪᠣᠯᠪᠠ》 ᠭᠡᠳᠡᠭ ᠪᠣᠳᠣᠯ ᠲᠥᠷᠥᠵᠦ᠄
— ᠲᠡᠭᠡᠪᠡᠯ ᠠᠯᠢ ᠲᠡᠷᠡ ᠪᠢᠴᠢᠭ ᠢ᠋ᠶ᠋ᠡᠨ! ᠭᠡᠳ ᠭᠠᠷ ᠲᠤᠰᠪᠠ᠃
ᠫᠠᠯᠢᠮᠠ ᠰᠡᠢᠳᠪᠤᠷᠢ ᠦᠭᠡᠢᠬᠡᠨ ᠢ᠋ᠶ᠋ᠡᠷ ᠪᠣᠰᠴᠤ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠢᠳᠡᠰ ᠡᠴᠡ ᠲᠣᠭᠳᠣᠢ ᠲᠠᠢ ᠪᠢᠴᠢᠭ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠥᠭᠬᠦ ᠪᠡᠨ ᠲᠦᠳᠡᠭᠡᠯᠵᠡᠵᠦ᠄
— ᠢᠩᠭᠢᠬᠦ ᠳ᠋ᠦ᠍ ᠴᠢ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠬᠤ ᠭᠡᠵᠦ ᠪᠠᠢᠭᠠ ᠪᠢᠯᠡ?
— ᠵᠠ ᠴᠢ ᠪᠢᠲᠡᠭᠡᠢ ᠵᠣᠪᠠ! ᠭᠡᠵᠦ ᠤᠴᠠᠭᠠᠷᠯᠠᠭᠠᠳ ᠪᠠᠯᠳᠠᠨᠴᠡᠷᠢᠩ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠪᠢᠴᠢᠭ ᠢ᠋ ᠰᠢᠪᠲᠤ ᠲᠡᠳᠡᠨ ᠠᠪᠬᠤ ᠳ᠋ᠤ᠌ ᠫᠠᠯᠢᠮᠠ ᠬᠣᠢᠨᠠ ᠠ᠋ᠴᠠ ᠨᠢ ᠵᠢᠭᠤᠷᠠᠪᠠ᠃ ᠭᠡᠪᠡᠴᠦ ᠫᠠᠯᠢᠮᠠ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠠᠨᠴᠤᠢ ᠠ᠋ᠴᠠ ᠫᠤᠤ ᠶ᠋ᠢᠨ ᠠᠮᠠ ᠴᠤᠬᠤᠢᠬᠤ ᠶ᠋ᠢ ᠬᠠᠷᠠᠨ ᠴᠢᠷᠠᠢ ᠵᠢᠪᠡᠬᠡᠢ ᠴᠠᠭᠠᠨ ᠪᠣᠯᠤᠨ ᠬᠣᠢᠰᠢ ᠤᠬᠤᠷᠢᠵᠠᠢ᠃ ᠪᠠᠯᠳᠠᠨᠴᠡᠷᠢᠩ ᠲᠣᠭᠳᠣᠢ ᠶ᠋ᠢ ᠰᠢᠢᠳᠮᠡᠭᠡᠢ ᠤᠷᠠᠵᠤ ᠪᠢᠴᠢᠭ ᠢ᠋ ᠳᠡᠯᠭᠡᠨ ᠬᠠᠷᠠᠭᠠᠳ《᠁ ᠨᠠᠮ ᠤ᠋ᠨ ᠨᠥᠬᠥᠷ ᠰᠠᠢᠨ᠂ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠠᠵᠢᠯ ᠤ᠋ᠨ ᠪᠦᠲᠦᠮᠵᠢ ᠮᠠᠭᠤ ᠪᠣᠯᠪᠠ᠃ ᠢᠯᠠᠩᠭᠤᠶᠠ ᠱᠣᠷᠣᠩ ᠠ᠋ᠴᠠ ᠭᠠᠷᠤᠭᠰᠠᠨ ᠨᠥᠬᠥᠳ ᠦ᠋ᠨ ᠵᠠᠷᠢᠮ ᠨᠢ ᠪᠠᠷᠤᠨ ᠤᠩᠬᠧᠷᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠭᠤᠢᠪᠢᠨ ᠣᠷᠣᠵᠤ ᠪᠠᠢᠭᠠ ᠨᠢ ᠬᠠᠷᠠᠮᠰᠠᠯᠲᠠᠢ᠁》 ᠭᠡᠵᠦ ᠪᠢᠴᠢᠭᠰᠡᠨ ᠢ᠋ ᠦᠵᠡᠭᠡᠳ ᠰᠡᠳᠬᠢᠯ ᠠᠮᠠᠷᠠᠨ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠵᠤ᠂ ᠫᠤᠤ ᠪᠠᠨ ᠭᠠᠷᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠤ᠄
— ᠵᠠ ᠫᠠᠯᠢᠮᠠ ᠮᠢᠨᠢ᠂ ᠡᠨᠡ ᠪᠢᠴᠢᠭ ᠢ᠋ᠶ᠋ᠡᠨ ᠳᠠᠬᠢᠨ ᠳᠤᠭᠲᠤᠢᠯᠠ! ᠨᠠᠳᠠ ᠬᠦᠷᠢᠶᠡᠨ ᠡᠴᠡ ᠲᠤᠩ ᠶᠠᠭᠠᠷᠠᠯᠲᠠᠢ ᠵᠠᠢᠯᠠᠨ ᠭᠠᠷᠴᠤ ᠰᠦᠬᠡᠪᠠᠭᠠᠲᠤᠷ ᠳᠡᠭᠡᠷᠡ ᠣᠴᠢᠵᠤ ᠨᠠᠮ ᠤ᠋ᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠦᠬᠦᠲᠡᠯᠡ ᠵᠢᠳᠬᠦᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠪᠠ᠃ ᠭᠡᠬᠦ ᠳ᠋ᠦ᠍ ᠫᠠᠯᠢᠮᠠ ᠴᠤ᠌ ᠮᠠᠩᠨᠠᠢ ᠲᠠᠨᠢᠨ ᠪᠠᠶᠠᠷᠯᠠᠵᠤ᠂ ᠪᠢᠴᠢᠭ ᠢ᠋ᠶ᠋ᠡᠨ ᠰᠢᠨᠡ ᠪᠡᠷ ᠳᠤᠭᠲᠤᠢᠯᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ