ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ < ᠭᠤᠲᠠᠭᠠᠷ ᠪᠦᠯᠦᠭ 4–5> Бүлжхэн хатан– [монгол] Дамбын Төрбат <гутгар бүлэг 4–5>
152ᠪᠦᠯᠵᠢᠬᠢᠨ ᠬᠠᠲᠤᠨ– < ᠭᠤᠲᠠᠭᠠᠷ ᠪᠦᠯᠦᠭ 4–5>
ᠬᠥᠬᠡ ᠲᠩᠷᠢ ᠶ᠋ᠢᠨ ᠪᠣᠷᠣ ᠭᠠᠵᠠᠷ ᠲᠡᠪᠡᠷᠢᠬᠦ ᠲᠣᠷᠭᠠᠨ ᠬᠠᠶᠠᠭᠠᠨ ᠠ᠋ᠴᠠ ᠤᠯᠠᠭᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠳᠣᠪᠲᠣᠯᠵᠤ ᠠᠢᠰᠤᠢ ᠪᠠᠷᠠ ᠶ᠋ᠢ ᠬᠠᠢᠩᠭᠤᠳᠠ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ《ᠮᠢᠨᠦ ᠮᠠᠭᠤ ᠬᠦᠦ ᠪᠠᠢᠭᠰᠠᠨ ᠪᠣᠯ ᠬᠣᠲᠣᠯᠠ ᠠᠬᠠ᠂ ᠵᠢᠯᠢ ᠪᠤᠬᠠ ᠠᠪᠠᠭᠠ᠂ ᠬᠠᠷᠢ ᠪᠤᠬᠠ ᠨᠠᠭᠠᠴᠤ ᠢᠷᠡᠯᠡ᠃ ᠶᠢᠰᠦᠨ ᠲᠠᠲ᠋ᠠᠷ ᠮᠢᠨᠢ ᠢᠷᠡᠯᠡ ᠭᠡᠵᠦ ᠬᠥᠭᠡᠷᠦᠴᠡᠭᠯᠡᠬᠦ ᠪᠠᠢᠭᠰᠠᠨ ᠳᠠ》 ᠭᠡᠵᠦ ᠪᠣᠳᠣᠪᠠ᠃ ᠴᠢᠩᠭᠢᠭᠡᠳ ᠬᠠᠩᠭᠠᠯ ᠨᠠᠭᠤᠷ ᠤ᠋ᠨ ᠤᠷᠠᠨ ᠳᠠᠪᠠᠯᠭᠠ ᠶ᠋ᠢ ᠰᠢᠷᠲᠡᠵᠦ᠂ ᠵᠤᠨ ᠤ᠋ ᠵᠥᠭᠡᠯᠡᠨ ᠰᠠᠯᠬᠢᠨᠠ ᠪᠢᠳᠡᠷᠳᠦᠬᠦ ᠳᠣᠯᠭᠢᠶᠠᠨ ᠳᠡᠭᠡᠷᠡ ᠨᠢ ᠪᠣᠳᠣᠯ ᠢ᠋ᠶ᠋ᠠᠨ ᠪᠡᠯᠴᠢᠭᠡᠵᠦ ᠰᠠᠭᠤᠯᠠ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠨᠣᠶᠠᠨ ᠤ᠋ ᠪᠤᠶᠠᠨ ᠳ᠋ᠤ᠌ ᠥᠯᠥᠰᠬᠦ ᠲᠠᠭᠠᠷᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠠ᠋ᠴᠠ ᠰᠠᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠥᠯᠥᠭᠡ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠭᠠᠷ ᠰᠤᠩᠭᠠᠵᠤ ᠳᠠᠮ ᠪᠣᠯᠤᠭᠰᠠᠨ ᠨᠣᠶᠠᠨ ᠳ᠋ᠠᠭᠠᠨ ᠭᠠᠢ ᠲᠠᠷᠢᠵᠤ᠂ ᠵᠣᠪᠠᠯᠠᠩ ᠣᠳᠤᠭᠰᠠᠨ ᠨᠢ ᠪᠣᠢ᠃
ᠬᠠᠪᠤᠯ ᠬᠠᠭᠠᠨ ᠰᠠᠷᠠ ᠰᠢᠨᠡ ᠥᠩᠭᠡᠷᠡᠭᠡᠨ ᠨᠣᠭᠣᠭᠠ ᠴᠤᠬᠤᠢᠭᠰᠠᠨ ᠬᠣᠢᠨᠠ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠮᠣᠷᠢᠯᠠᠨ ᠢᠷᠡᠬᠦ ᠳ᠋ᠦ᠍ ᠬᠠᠨ ᠬᠥᠪᠡᠭᠦᠳ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠲᠤ᠌ ᠴᠤᠭᠯᠠᠨ ᠲᠣᠰᠴᠤ ᠵᠣᠯᠭᠠᠨ ᠮᠥᠷᠭᠥᠭᠰᠡᠨ ᠦᠶᠡ ᠪᠡᠷ ᠶᠦᠮ ᠰᠠᠨ᠃ ᠬᠠᠭᠠᠨ ᠬᠥᠰᠬᠡ ᠬᠠᠪᠤᠷ ᠤ᠋ᠨ ᠵᠡᠷᠭᠡᠯᠭᠡᠨᠲᠦ ᠬᠥᠨᠳᠡᠢ ᠶ᠋ᠢᠨ ᠲᠡᠷᠲᠡᠭᠡ ᠲᠣᠷᠣᠯᠵᠠᠨ ᠬᠠᠷᠠᠭᠳᠠᠬᠤ ᠦᠶᠡᠰ ᠯᠡ ᠶᠡᠬᠡ ᠬᠦᠷᠢᠶᠡ ᠬᠥᠯ ᠪᠣᠯᠤᠨ ᠣᠪᠣᠯᠵᠠᠵᠤ᠂ ᠡᠮᠡᠰ ᠥᠬᠢᠳ ᠰᠢᠨᠡ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ᠂ ᠱ᠌ᠢᠷᠦ ᠰᠤᠪᠤᠳ ᠢ᠋ᠶ᠋ᠠᠨ ᠵᠡᠭᠦᠨ ᠭᠤᠶᠤᠵᠤ ᠠᠪᠠᠢ᠃ ᠪᠦᠯᠵᠢᠭᠡᠨ ᠭᠤᠸᠠ ᠤᠭᠤᠵᠠ ᠲᠠᠲ᠋ᠠᠷ᠂ ᠲᠣᠺᠣᠵᠠ ᠲᠠᠲ᠋ᠠᠷ ᠤ᠋ᠨ ᠤᠳᠤᠮᠲᠤ ᠬᠣᠢᠮᠣᠷ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠷᠭᠢᠵᠤ᠂ ᠴᠣᠬᠣᠮ ᠳᠤᠮᠳᠠ ᠴᠢᠮᠥᠭᠡ ᠪᠡᠷ ᠢ᠋ᠶ᠋ᠡᠨ ᠵᠢᠷᠭᠢᠵᠦ ᠶᠠᠪᠤᠭᠰᠠᠨ ᠳᠡᠩᠳᠡᠭᠦᠦ ᠵᠢᠷᠭᠠᠯ ᠲᠠᠢ ᠦᠶᠡ ᠪᠡᠨ ᠳᠤᠷᠠᠰᠤᠨ ᠳᠤᠷᠠᠰᠤᠨ ᠬᠢᠷᠢ ᠲᠠᠭᠠᠷᠠᠤ ᠭᠣᠶᠣᠯ ᠢ᠋ᠶ᠋ᠠᠨ ᠵᠡᠭᠦᠵᠦ᠂ ᠬᠡᠭᠡᠷᠡ ᠶ᠋ᠢᠨ ᠴᠠᠴᠠᠷ ᠲᠤ᠌ ᠳᠣᠭᠳᠣᠯᠤᠨ ᠬᠦᠯᠢᠶᠡᠭᠰᠡᠨ ᠪᠢᠯᠡ᠃ ᠰᠠᠷᠠ ᠰᠢᠨᠡ ᠶ᠋ᠢᠨ ᠢᠲᠡᠭᠡᠯᠭᠡ᠂ ᠪᠤᠳᠠᠭᠠᠯᠠᠭᠠ ᠳ᠋ᠤ᠌ ᠲᠠᠲᠠᠪᠤᠷᠢ ᠡᠮᠡ ᠳᠠᠭᠠᠵᠤ ᠣᠷᠣᠬᠤ ᠦᠭᠡᠢ ᠬᠡᠳᠦᠢ ᠴᠦ᠍《᠁ ᠬᠠᠭᠠᠨ ᠠᠪᠤ ᠳ᠋ᠤ᠌ ᠪᠢ ᠠᠢᠯᠠᠳᠬᠠᠨᠠ》 ᠭᠡᠵᠦ ᠬᠣᠲᠣᠯᠠ ᠨᠣᠶᠠᠨ ᠥᠭᠦᠯᠡᠭᠰᠡᠨ ᠲᠤᠯᠠ《ᠠᠯᠢ ᠪᠣᠢ᠂ ᠦᠵᠡᠭᠦᠯ》 ᠭᠡᠬᠦ ᠪᠤᠶᠤ《ᠠᠪᠤᠭᠠᠳ ᠢᠷᠡ》 ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠵᠤ ᠬᠡᠮᠡᠨᠡ ᠨᠡᠷᠡ ᠬᠣᠯᠪᠣᠭᠳᠠᠭᠰᠠᠨ ᠡᠷᠡ ᠶ᠋ᠢᠨ ᠨᠢᠭᠤᠷ ᠤᠯᠠᠢᠯᠭᠠᠬᠤ ᠪᠠᠷ ᠦᠭᠡᠢ ᠥᠩᠭᠡ ᠲᠡᠢ᠂ ᠥᠭᠡᠳᠡ ᠲᠡᠢ ᠪᠠᠢᠶᠠ ᠭᠡᠵᠦ ᠪᠣᠳᠣᠪᠠ᠃ ᠴᠢᠩᠭᠢᠭᠡᠳ ᠥᠪᠡᠷ ᠦ᠋ᠨ ᠴᠠᠴᠠᠷ ᠠ᠋ᠴᠠ ᠲᠣᠯᠣᠭᠠᠢ ᠴᠤᠬᠤᠢᠯᠭᠠᠭᠰᠠᠨ ᠦᠭᠡᠢ ᠪᠢᠲᠡᠭᠦᠬᠡᠨ ᠰᠢᠨᠠᠯᠤᠨ ᠡᠨᠡᠯᠦᠨ ᠬᠦᠯᠢᠶᠡᠪᠡ᠃ ᠭᠠᠳᠠᠭᠰᠢ ᠪᠠᠨ ᠭᠠᠭᠴᠠ ᠠᠯᠬᠤᠵᠤ ᠬᠡᠮᠡᠨᠡ ᠬᠣᠲᠣᠯᠠ ᠶ᠋ᠢᠨ ᠶᠡᠬᠡ᠂ ᠪᠠᠭᠠ ᠬᠠᠲᠤᠳ ᠰᠢᠪᠡᠷ ᠠᠪᠢᠷ ᠭᠡᠯᠴᠡᠵᠦ ᠲᠡᠯᠮᠡᠨ ᠭᠤᠸᠠ ᠬᠡᠮᠡᠬᠦ ᠪᠠᠭᠠ ᠬᠠᠲᠤᠨ ᠨᠢ ᠤᠷᠠᠨ ᠬᠣᠰᠢᠭᠤ ᠪᠠᠨ ᠬᠠᠨᠴᠤᠢ ᠳ᠋ᠠᠭᠠᠨ ᠰᠢᠷᠭᠤᠭᠤᠯᠤᠨ ᠪᠠᠢᠵᠤ ᠵᠢᠭ ᠵᠢᠭ ᠢᠨᠢᠶᠡᠬᠦ ᠨᠢ ᠵᠢᠪᠡᠭᠦᠦ ᠲᠡᠢ᠃ ᠨᠢᠭᠡᠨ ᠠᠢᠯ ᠤ᠋ᠨ ᠪᠡᠷᠭᠡᠳ ᠲᠤᠯᠠ ᠥᠬᠢᠨᠪᠠᠷᠬᠠᠰ᠂ ᠬᠤᠲᠤᠭᠲᠤ ᠮᠣᠩᠬᠣᠷ ᠨᠠᠷ ᠤ᠋ᠨ ᠬᠠᠲᠤᠳ ᠪᠡᠶᠡ ᠪᠡᠶᠡ ᠪᠡᠨ ᠨᠢᠳᠤᠷᠤᠨ ᠨᠠᠮᠵᠢᠷ ᠬᠠᠶᠠᠬᠤ ᠨᠢ ᠲᠦᠪᠡᠭ ᠲᠡᠢ᠃ ᠶᠡᠷᠦ ᠡᠮᠡᠰ ᠦ᠋ᠨ ᠵᠠᠩ ᠲᠡᠷᠡ ᠪᠢᠵᠡ᠃ ᠴᠠᠷᠭᠢᠯ ᠨᠣᠲᠤᠢ ᠮᠡᠨᠳᠦ ᠠᠮᠤᠷ ᠪᠠᠢᠭᠠᠳ ᠲᠠᠲᠠᠪᠤᠷᠢ ᠡᠮᠡ ᠬᠠᠶᠠᠭᠠᠨ ᠳ᠋ᠠᠭᠠᠨ ᠪᠠᠭᠤᠯᠭᠠᠭᠰᠠᠨ ᠪᠣᠯ ᠭᠤᠸᠠ ᠪᠦᠯᠵᠢᠭᠡᠨ ᠪᠠᠰᠠ ᠯᠠ ᠡᠨᠡ ᠮᠡᠲᠦ ᠠᠶᠠᠭᠯᠠᠬᠤ ᠪᠠᠢᠭᠰᠠᠨ ᠨᠢ ᠯᠠᠪ᠃ ᠡᠢᠨ ᠪᠦᠭᠡᠷᠡᠯᠬᠡᠬᠦ ᠶ᠋ᠢ ᠭᠠᠳᠠᠨᠠ ᠪᠠᠨ ᠦᠯᠦ ᠲᠣᠭᠣᠭᠴᠢ ᠪᠣᠯᠵᠤ ᠴᠢᠳᠠᠬᠤ ᠠᠪᠠᠴᠤ ᠳᠣᠲᠣᠷᠠ ᠪᠠᠨ ᠪᠡᠲᠡᠭᠢᠷᠡᠨ ᠰᠢᠨᠠᠯᠤᠭᠰᠠᠭᠠᠷ ᠪᠠᠢᠵᠤ ᠪᠢᠯᠡ᠃
ᠶᠡᠬᠡ ᠬᠠᠭᠠᠨᠲᠠᠨ ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠᠭᠰᠠᠨ ᠬᠣᠢᠨᠠ ᠬᠠᠨ ᠬᠥᠪᠡᠭᠦᠳ᠂ ᠬᠠᠲᠤᠳ ᠦᠷᠡᠰ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠲᠣᠷᠭᠠ ᠮᠠᠩᠨᠤᠭ ᠨᠠᠮᠢᠷᠠᠭᠤᠯᠤᠨ ᠬᠠᠭᠠᠨ ᠲᠠᠷᠮᠠ ᠤᠷᠤᠭᠤ ᠴᠤᠪᠤᠬᠤ ᠶ᠋ᠢ ᠴᠠᠴᠠᠷ ᠤ᠋ᠨ ᠡᠭᠦᠳᠡ ᠪᠡᠷ ᠬᠠᠷᠠᠨ ᠬᠣᠴᠣᠷᠬᠤ ᠳ᠋ᠤ᠌ ᠬᠣᠭᠣᠯᠠᠢ ᠳ᠋ᠤᠨᠢ ᠨᠢᠭᠡ ᠯᠡ ᠶᠠᠭᠤᠮᠠ ᠠᠷᠭᠠᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠨᠢ ᠪᠣᠢ᠃ ᠬᠣᠲᠣᠯᠠ ᠨᠣᠶᠠᠨ ᠢᠨᠵᠢᠮᠡᠢ᠂ ᠲᠡᠯᠮᠡᠨ ᠭᠤᠸᠠ ᠬᠣᠶᠠᠷ ᠢ᠋ᠶ᠋ᠠᠨ ᠨᠢᠳᠦ ᠶ᠋ᠢ ᠨᠢ ᠪᠦᠯᠲᠡᠷᠡᠲᠡᠯᠡ ᠭᠤᠶᠤᠵᠤ᠂ ᠵᠣᠴᠢ᠂ ᠭᠢᠷᠮᠡᠦ᠂ ᠠᠯᠲᠠᠨ ᠭᠤᠷᠪᠠᠨ ᠬᠦᠦ ᠪᠡᠨ ᠬᠥᠲᠥᠯᠦᠨ ᠣᠳᠬᠤ ᠳ᠋ᠤ᠌ ᠮᠥᠨᠥᠬᠡᠨ ᠬᠠᠲᠠᠭᠤ ᠭᠤᠨᠢᠭ ᠭᠣᠣᠯ ᠳ᠋ᠠᠭᠠᠨ ᠥᠭᠰᠥᠭᠰᠡᠨ ᠢ᠋ᠶ᠋ᠡᠨ ᠬᠣᠶᠠᠷ ᠨᠢᠭᠡᠨ ᠳᠤᠰᠤᠯ ᠨᠢᠯᠪᠤᠰᠤ ᠪᠣᠯᠤᠨ ᠰᠢᠪᠡᠷᠡᠵᠦ ᠠᠪᠠᠢ᠃ ᠪᠣᠷᠣᠭ ᠪᠠᠭᠠᠵᠠᠳᠠᠭᠤ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠨᠣᠷᠭᠠᠭᠰᠠᠨ ᠲᠡᠷᠡ ᠱᠣᠷᠪᠣᠭ ᠨᠢᠯᠪᠤᠰᠤ ᠬᠣᠲᠣᠯᠠ ᠨᠣᠶᠠᠨ ᠳ᠋ᠤ᠌ ᠰᠡᠳᠬᠢᠯ ᠠᠯᠳᠠᠭᠰᠠᠨ ᠢ᠋ ᠰᠢᠪᠡᠨᠡᠵᠦ ᠰᠢᠩᠭᠡᠭᠰᠡᠨ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠶᠦᠮ᠃
ᠬᠠᠷᠠᠮᠨᠠᠬᠤ᠂ ᠬᠠᠢᠷᠠᠯᠠᠬᠤ ᠬᠢᠭᠡᠳ ᠪᠠᠰᠠ ᠬᠦ᠌ ᠠᠶᠤᠬᠤ᠂ ᠲᠦᠭᠰᠢᠬᠦ ᠡᠲᠡᠭᠡᠳ ᠰᠤᠪᠢᠨ ᠳ᠋ᠤ᠌ ᠠᠪᠲᠠᠭᠰᠠᠨ ᠪᠦᠰᠡᠭᠦᠢ ᠬᠠᠴᠠᠷ ᠬᠠᠭᠠᠷᠢᠬᠤ ᠬᠦᠢᠲᠡᠨ ᠳᠡᠷᠡᠨ ᠡᠴᠡ ᠬᠠᠯᠠᠰᠢᠷᠠᠵᠤ᠂ ᠴᠠᠭᠠᠷᠢᠭᠯᠠᠨ ᠬᠡᠪᠲᠡᠬᠦ ᠭᠠᠭᠴᠠᠭᠠᠷ ᠵᠠᠶᠠᠭᠠᠨ ᠠ᠋ᠴᠠ ᠬᠠᠯᠭᠠᠵᠤ ᠭᠤᠷᠪᠠᠨ ᠮᠠᠷᠠᠯ ᠭᠣᠣᠯᠯᠠᠲᠠᠯᠠ ᠬᠦᠯᠢᠶᠡᠵᠦ ᠠᠪᠠᠢ᠃ ᠴᠢᠩᠭᠢᠲᠡᠯᠡ ᠴᠦ᠍ ᠬᠠᠭᠠᠨ ᠲᠠᠷᠮᠠᠨ ᠳ᠋ᠤ᠌ ᠴᠢᠭᠤᠯᠤᠭᠰᠠᠨ ᠶᠡᠬᠡᠰ ᠳᠡᠭᠡᠳᠦᠰ ᠭᠠᠳᠠᠭᠠᠯᠠᠵᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠮᠲᠠᠲᠤ ᠵᠢᠮᠢᠰ ᠰᠠᠭᠰᠤ ᠰᠠᠭᠰᠤ ᠪᠠᠷ ᠲᠡᠪᠡᠷᠢᠭᠰᠡᠨ ᠬᠥᠪᠡᠭᠦᠳ᠂ ᠤᠷᠲᠤ ᠭᠠᠵᠠᠷ ᠤ᠋ᠨ ᠤᠷᠠᠨ ᠬᠡ ᠲᠡᠢ ᠲᠣᠷᠭᠠ ᠬᠤᠢ ᠬᠤᠢ ᠪᠠᠷ ᠠᠪᠤᠭᠰᠠᠨ ᠬᠠᠲᠤᠳ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠨ ᠠᠭᠠᠷ ᠲᠤ᠌ ᠠᠭᠠᠭ ᠲᠠᠢ ᠳᠡᠷᠡᠰᠦᠨ ᠦ᠌ ᠦᠨᠦᠷ ᠢ᠋ ᠠᠳᠠ ᠲᠠᠢ ᠬᠥᠭᠵᠢᠭᠦᠨ ᠢᠨᠢᠶᠡᠳᠦ ᠲᠡᠢ ᠴᠣᠭ ᠰᠠᠴᠤᠨ ᠪᠡᠯᠴᠢᠪᠡ᠃
ᠪᠦᠯᠵᠢᠭᠡᠨ ᠭᠤᠸᠠ ᠨᠤᠭᠤᠯᠵᠤ ᠰᠠᠭᠤᠭᠰᠠᠨ ᠡᠪᠦᠳᠦᠭ ᠴᠡᠴᠡᠷᠡᠵᠦ᠂ ᠨᠤᠮᠤᠯᠠᠵᠤ ᠴᠢᠪᠴᠢᠷᠡᠭᠰᠡᠨ ᠬᠥᠮᠥᠰᠬᠡ ᠬᠦᠷᠲᠡᠯᠡ ᠬᠠᠯᠠᠭᠤ ᠣᠷᠬᠢᠬᠤ ᠶ᠋ᠢ ᠮᠡᠳᠡᠷᠡᠨ ᠪᠡᠶᠡ ᠪᠡᠨ ᠬᠤᠷᠢᠶᠠᠵᠤ ᠴᠢᠮᠡᠭᠡ ᠴᠢᠩᠨᠠᠪᠠ᠃ ᠡᠨᠡ ᠬᠢᠷᠢ ᠨᠢᠯᠬᠠ ᠨᠣᠭᠣᠭᠠ ᠰᠡᠷᠵᠢᠭᠢᠨᠡᠬᠦ ᠰᠣᠨᠣᠰᠳᠠᠵᠤ ᠲᠦᠳᠡᠬᠡᠨ ᠬᠥᠩᠭᠡᠨ ᠠᠯᠬᠤᠭᠠ ᠨᠠᠭᠠᠰᠢᠯᠠᠬᠤ ᠨᠢ ᠬᠣᠲᠣᠯᠠ ᠨᠣᠶᠠᠨ ᠮᠥᠨ ᠠᠵᠢ᠃ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠪᠠᠷᠠᠳᠠᠭᠤᠯᠵᠤ ᠪᠠᠷᠢᠭᠰᠠᠨ ᠪᠢᠴᠢᠬᠠᠨ ᠭᠡᠷ ᠲᠡᠭᠡᠨ ᠡᠨᠡ ᠬᠥᠯ ᠦ᠋ᠨ ᠴᠢᠮᠡᠭᠡ ᠶ᠋ᠢ ᠴᠢᠩᠨᠠᠵᠤ ᠬᠡᠪᠲᠡᠭᠰᠡᠭᠡᠷ ᠲᠠᠨᠢᠯ ᠳᠣᠲᠣᠨᠣ ᠪᠣᠯᠵᠠᠢ᠃ ᠰᠠᠶᠢᠬᠠᠨ ᠤ᠋ ᠭᠤᠨᠢᠭ᠂ ᠣᠮᠣᠭ ᠬᠣᠷᠣᠮᠬᠠᠨ ᠬᠡᠢᠰᠦᠨ ᠠᠷᠢᠯᠵᠤ᠂ ᠮᠥᠩᠭᠥᠨ ᠴᠥᠭᠥᠴᠡ ᠲᠡᠢ ᠳ᠋ᠧᠩ ᠢ᠋ᠶ᠋ᠡᠨ ᠡᠷᠢᠬᠦ ᠦᠶᠡᠰ᠂
— ᠬᠣᠲᠣᠯᠠ! ᠭᠡᠬᠦ ᠵᠠᠬᠢᠷᠤᠩᠭᠤᠢ ᠳᠠᠭᠤᠨ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠪᠦᠯᠵᠢᠭᠡᠨ ᠮᠣᠭᠠᠢ ᠲᠡᠮᠲᠡᠷᠢᠭᠰᠡᠨ ᠮᠡᠲᠦ ᠭᠠᠷ ᠢ᠋ᠶ᠋ᠠᠨ ᠣᠭᠵᠣᠮ ᠲᠠᠲᠠᠵᠤ ᠠᠪᠤᠯᠠ᠃ ᠥᠬᠢᠨᠪᠠᠷᠬᠠᠭ ᠤ᠋ᠨ ᠫᠠᠷᠭᠢᠶᠠ ᠳᠠᠭᠤ ᠶ᠋ᠢ ᠵᠠᠯᠭᠠᠵᠤ ᠬᠤᠲᠤᠭᠲᠤ ᠮᠣᠩᠬᠣᠷ ᠨᠠᠮᠳᠠᠭᠤ᠂
— ᠠᠬᠠ ᠬᠠᠨ ᠲᠠ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠬᠠᠲᠤᠭᠲᠠᠢ᠂ ᠵᠢᠰᠦᠯᠡᠵᠦ ᠦᠨᠦᠷᠯᠡᠬᠦ ᠦᠷᠡ ᠲᠡᠢ ᠠᠲᠠᠯᠠ ᠪᠠᠨ ᠶᠠᠭᠤᠨ ᠳ᠋ᠤ᠌ ᠶᠠᠯᠠᠨ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠶᠠᠩᠬᠠᠨ ᠤᠷᠤᠭᠤ ᠭᠦᠶᠦᠨᠡ ᠪᠢᠯᠡ᠃ ᠡᠷᠡ ᠶ᠋ᠢᠨ ᠨᠡᠷᠡ ᠳᠦᠭᠦᠷᠴᠡᠢ ᠭᠡᠬᠦ ᠳ᠋ᠦ᠍ ᠲᠥᠷᠥ ᠶ᠋ᠢᠨ ᠨᠡᠷᠡ ᠬᠠᠢᠷᠠᠨ ᠪᠢᠰᠢ ᠤᠤ᠁ ᠭᠡᠬᠦ ᠰᠣᠨᠣᠰᠲᠠᠯᠠ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠠᠮᠢᠰᠬᠤᠭᠠ ᠲᠦᠭᠵᠢᠨ ᠴᠢᠬᠢ ᠲᠠᠯᠪᠢᠪᠠ᠃ ᠬᠣᠲᠣᠯᠠ ᠨᠣᠶᠠᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠡᠨᠡ ᠦᠶᠡᠰ ᠵᠢᠭᠠᠯ ᠲᠣᠳᠣᠢᠨ ᠨᠣᠶᠠᠨ ᠤ᠋ ᠬᠡᠦᠬᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠩᠭᠡᠨ ᠳᠠᠭᠤ ᠭᠠᠷᠴᠤ᠂
— ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠨᠡᠷᠡ ᠳ᠋ᠦ᠍ ᠲᠣᠯᠪᠣ ᠲᠠᠢ᠂ ᠰᠡᠳᠬᠢᠯ ᠳ᠋ᠦ᠍ ᠲᠣᠢᠪᠣ ᠲᠠᠢ ᠪᠢᠰᠢ ᠤᠤ ᠭᠡᠬᠦ ᠳ᠋ᠦ᠍ ᠪᠦᠭᠦᠳᠡ ᠶ᠋ᠢ ᠲᠡᠷᠢᠭᠦᠯᠡᠭᠴᠢ ᠥᠬᠢᠨᠪᠠᠷᠬᠠᠰ ᠤ᠋ᠨ ᠳᠡᠭᠡᠷᠡᠩᠭᠦᠢ ᠳᠠᠭᠤᠨ᠂
— ᠲᠠᠲᠠᠪᠤᠷᠢ ᠡᠮᠡᠰ ᠮᠤᠩᠳᠠᠭᠰᠠᠨ ᠪᠢᠰᠢ᠁ ᠬᠠᠲᠤᠨ ᠴᠢᠨᠢ ᠴᠥᠭᠡᠳᠡᠵᠦ᠂ ᠬᠠᠢᠷᠠ ᠴᠢᠨᠢ ᠶᠡᠬᠡᠲᠡᠭᠡᠳ ᠪᠠᠢᠪᠠᠯ ᠠᠬᠠ ᠨᠢ ᠥᠪᠡᠷ ᠦ᠋ᠨ ᠲᠤᠭ ᠤ᠋ᠨ ᠳᠣᠣᠷᠠ ᠴᠡᠷᠢᠭ ᠵᠠᠰᠠᠨ ᠪᠣᠰᠴᠤ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠭᠤᠸᠠ ᠡᠮᠡᠰ ᠢ᠋ ᠬᠤᠷᠢᠶᠠᠵᠤ ᠢᠷᠡᠶᠡ ᠪᠢ᠁ ᠭᠡᠯᠡ᠃
ᠲᠡᠷᠡ ᠦᠭᠡᠨ ᠳ᠋ᠡᠭᠡᠨ ᠬᠦᠷᠴᠦ ᠴᠢᠳᠠᠬᠤ ᠪᠢᠯᠡ᠃ ᠶᠡᠷᠦ ᠵᠣᠷᠢᠮᠠᠭ᠂ ᠴᠣᠴᠢᠮᠠᠭ ᠨᠢᠭᠡᠨ ᠲᠤᠯᠠ ᠬᠠᠷᠢ ᠡᠯᠢᠭᠡ ᠶ᠋ᠢᠨ ᠬᠥᠮᠦᠨ ᠪᠦᠦ ᠬᠡᠯᠡ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠨᠢ ᠴᠦ᠍ ᠠᠶᠤᠨ ᠰᠢᠷᠪᠡᠭᠡᠲᠦᠬᠦ ᠨᠢ ᠪᠣᠢ᠃ ᠬᠣᠲᠣᠯᠠ ᠨᠣᠶᠠᠨ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠠᠵᠢ᠃ ᠲᠡᠭᠦᠨ ᠦ᠌ ᠳᠦᠷᠯᠡᠭᠡᠷ ᠠᠯᠠᠭ ᠨᠢᠳᠦ ᠲᠦᠷᠭᠡᠨ ᠲᠦᠷᠭᠡᠨ ᠴᠠᠪᠴᠢᠯᠠᠵᠤ᠂ ᠡᠮᠡ ᠬᠥᠮᠦᠨ ᠦ᠌ ᠬᠢ ᠮᠡᠲᠦ ᠪᠤᠯᠪᠠᠷᠠᠢ ᠶᠠᠭᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠵᠠᠯᠠᠨ ᠪᠠᠢᠭᠠ ᠶ᠋ᠢ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠠᠷᠠᠭᠰᠠᠨ ᠶᠤᠮ ᠰᠢᠭ᠋ ᠮᠡᠳᠡᠷᠡᠵᠦ ᠪᠠᠢᠪᠠ᠃
ᠬᠠᠪᠤᠯ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠦ᠌ ᠳᠤᠮᠳᠠ ᠡᠳᠦᠷ ᠦ᠋ᠨ ᠣᠳᠣ ᠰᠢᠭ᠋ ᠵᠠᠶᠠᠭᠠᠭᠰᠠᠨ ᠠᠷᠪᠠᠨ ᠬᠤᠷᠤᠭᠤ ᠲᠡᠭᠰᠢ ᠠᠮᠢᠲᠠᠨ᠃ ᠴᠠᠭᠠᠨ ᠬᠡᠯᠡ ᠠᠮᠠᠨ ᠠ᠋ᠴᠠ ᠨᠢᠭᠤᠵᠤ ᠶᠠᠪᠤᠮᠠᠷ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠬᠣᠲᠣᠯᠠ ᠨᠣᠶᠠᠨ ᠬᠦᠯᠢᠶᠡᠴᠡ ᠲᠡᠢ ᠪᠢᠯᠡ᠃ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠵᠠᠭᠠᠨ ᠡᠷᠳᠡᠨᠢ ᠭᠡᠵᠦ ᠬᠥᠩᠬᠥᠷ ᠬᠣᠷᠴᠢ ᠨᠢᠭᠡᠨᠲᠡ ᠥᠭᠦᠯᠡᠭᠰᠡᠨ ᠨᠢ ᠪᠣᠢ ᠶᠤᠮ᠃ ᠶᠡᠷᠦ ᠣᠷᠣ ᠲᠠᠢ ᠯᠠ ᠬᠡᠯᠡᠭᠰᠡᠨ ᠬᠡᠷᠡᠭ ᠠᠪᠠᠢ᠃ ᠥᠬᠢᠨᠪᠠᠷᠬᠠᠭ ᠬᠠᠷᠢᠭᠤ ᠬᠦᠯᠢᠶᠡᠵᠦ ᠲᠦᠷ ᠠᠩᠵᠠᠭᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠣᠴᠢᠵᠤ ᠣᠴᠢᠵᠤ ᠶᠠᠯᠠ ᠶᠠᠩᠬᠠᠨ ᠲᠠᠢ ᠡᠮᠡ ᠣᠯᠵᠤ ᠣᠷᠢᠶᠠᠴᠠᠯᠳᠤᠳᠠᠭ ᠳᠦᠭᠦᠷᠴᠢᠬᠡᠭᠰᠡᠨ ᠴᠦ᠍ ᠡᠷᠡ ᠪᠣᠯ ᠳᠠ᠃ ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠯᠡ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠲᠠᠢ ᠠᠮᠢᠲᠠᠨ ᠢ᠋ ᠬᠡᠨ ᠯᠡ ᠨᠡᠬᠡᠵᠦ ᠢᠷᠡᠭᠡ ᠠᠵᠢ᠁ ᠴᠢ ᠥᠷᠥᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯ ᠪᠢ ᠴᠢᠳᠠᠨᠠ ᠰᠢᠦ ᠭᠡᠬᠦ ᠯᠡ ᠦᠭᠡ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠵᠢᠷᠦᠬᠡᠨ ᠳ᠋ᠦ᠍ ᠵᠡᠪᠡ ᠮᠡᠲᠦ ᠰᠢᠭᠢᠳᠴᠡᠢ᠃ ᠬᠡ ᠲᠡᠢ ᠴᠠᠴᠠᠷ ᠤ᠋ᠨ ᠱᠤᠷᠭᠠᠭᠠᠨ ᠪᠠᠭᠠᠨᠠ ᠭᠠᠩᠬᠤᠬᠤ ᠰᠢᠭ᠋ ᠪᠣᠯᠵᠤ᠂
— ᠮᠠᠭᠤ ᠬᠦᠦ ᠮᠢᠨᠢ᠁ ᠭᠡᠮᠡᠨ ᠪᠦᠷᠦᠭ ᠪᠠᠷᠤᠭ ᠪᠣᠳᠣᠵᠤ ᠠᠮᠵᠢᠵᠠᠢ᠃ ᠲᠡᠭᠡᠭᠡᠳ ᠴᠣᠬᠣᠮ ᠬᠡᠨ ᠶᠠᠭᠤ ᠶᠠᠷᠢᠵᠤ᠂ ᠬᠡᠷᠬᠢᠨ ᠵᠠᠨᠤᠭᠰᠠᠨ ᠢ᠋ ᠰᠣᠨᠣᠰᠴᠤ ᠦᠯᠦ ᠴᠢᠳᠠᠪᠠ᠃ ᠬᠡᠳᠦᠢ ᠬᠢᠷᠢ ᠤᠬᠠᠭᠠᠨ ᠦᠭᠡᠢ ᠬᠡᠪᠲᠡᠭᠰᠡᠨ ᠢ᠋ ᠦᠯᠦ ᠮᠡᠳᠡᠨᠡ᠃ ᠲᠡᠷᠡ ᠪᠡᠷ ᠰᠥᠨᠢ ᠶ᠋ᠢᠨ ᠠᠶᠤᠮᠰᠢᠭᠲᠤ ᠶᠠᠷᠢᠶᠠᠨ ᠳ᠋ᠤ᠌ ᠪᠡᠶᠡ ᠪᠠᠷᠢᠭᠳᠠᠨ ᠡᠬᠢᠯᠡᠭᠡᠳ ᠨᠢᠳᠦ ᠪᠡᠨ ᠵᠥᠭᠡᠯᠡᠬᠡᠨ ᠨᠡᠭᠡᠭᠡᠵᠦ ᠬᠠᠷᠠᠪᠠᠯ ᠳᠡᠷᠭᠡᠳᠡ ᠨᠢ ᠬᠣᠲᠣᠯᠠ ᠨᠣᠶᠠᠨ ᠪᠦᠰᠡ ᠪᠡᠨ ᠴᠦ᠍ ᠲᠠᠢᠯᠤᠭᠰᠠᠨ ᠦᠭᠡᠢ᠂ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠡᠪᠲᠡᠬᠦ ᠠᠭᠠᠳ ᠭᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠪᠴᠢᠯᠠᠨ ᠳᠡᠷᠡᠯᠡᠵᠦ᠂ ᠲᠣᠷᠭᠠᠨ ᠴᠠᠴᠠᠷ ᠤ᠋ᠨ ᠣᠷᠣᠢ ᠰᠢᠷᠲᠡᠵᠡᠢ᠃ ᠭᠦᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠨᠣᠶᠠᠨ ᠢ᠋ ᠢᠨᠠᠭᠰᠢᠨ ᠬᠠᠢᠷᠠᠯᠠᠬᠤ ᠤᠶᠠᠷᠠᠩᠭᠤᠢ ᠰᠡᠳᠬᠢᠯ ᠳ᠋ᠦ᠍ ᠠᠪᠲᠠᠵᠤ ᠠᠮᠢᠰᠬᠤᠭᠠ ᠲᠦᠭᠵᠢᠨ ᠨᠢᠳᠦ ᠪᠡᠨ ᠠᠨᠢᠬᠤ ᠳ᠋ᠠᠭᠠᠨ ᠰᠥᠨᠢ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ᠂ ᠵᠣᠪᠠᠯᠠᠩ ᠳᠡᠭᠡᠷᠡ ᠵᠣᠪᠠᠯᠠᠩ ᠨᠡᠮᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ ᠭᠡᠮᠡᠨ ᠪᠣᠳᠣᠵᠤ ᠪᠢᠯᠡ᠃
ᠪᠦᠯᠵᠢᠭᠡᠨ ᠬᠠᠲᠤᠨ ᠡᠢᠨ ᠡᠷᠲᠡ ᠡᠳᠦᠭᠡ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠬᠠᠩᠭᠠᠯ ᠨᠠᠭᠤᠷ ᠤ᠋ᠨ ᠳᠣᠯᠭᠢᠶᠠᠨ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠰᠠᠭᠤᠬᠤ ᠳᠤᠷᠠᠲᠠᠢ ᠶᠤᠮ᠃ ᠪᠡᠶᠡᠰ ᠢ᠋ᠶ᠋ᠡᠨ ᠬᠥᠭᠡᠭᠡᠬᠦ ᠬᠥᠬᠡ ᠲᠣᠷᠭᠠᠨ ᠪᠢᠳᠠᠷ ᠥᠰᠴᠦ ᠲᠥᠷᠥᠭᠰᠡᠨ ᠪᠤᠢᠷ ᠨᠠᠭᠤᠷ ᠢ᠋ ᠨᠢ ᠰᠠᠨᠠᠭᠤᠯᠵᠤ᠂ ᠠᠷᠢᠭᠤᠨ ᠳᠣᠯᠭᠢᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠳᠬᠢᠯ ᠦ᠋ᠨ ᠭᠤᠨᠢᠭ ᠢ᠋ ᠨᠢ ᠤᠬᠢᠶᠠᠵᠤ ᠥᠭᠬᠦ ᠰᠢᠭ ᠪᠣᠯᠳᠠᠭ ᠪᠢᠯᠡ᠃ ᠬᠣᠲᠣᠯᠠ᠂
— ᠪᠦᠯᠵᠢᠭᠡᠨ ᠮᠢᠨᠢ᠂ ᠥᠬᠢᠨᠪᠠᠷᠬᠠᠭ ᠨᠣᠶᠠᠨ ᠣᠷᠣ ᠦᠭᠡᠢ ᠦᠭᠡ ᠬᠡᠯᠡᠳᠡᠭ ᠦᠭᠡᠢ ᠶᠦᠮ ᠰᠢᠦ ᠭᠡᠮᠡᠨ ᠮᠡᠯᠲᠡᠭ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠡᠴᠡ ᠬᠡᠰᠢᠭᠲᠡᠨ ᠳᠠᠭᠠᠭᠤᠯᠵᠤ ᠮᠣᠷᠳᠠᠭᠤᠯᠬᠤ ᠨᠢ ᠪᠣᠢ᠃ ᠭᠡᠪᠡᠴᠦ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠪᠡᠶᠡ ᠪᠡᠨ ᠪᠠᠷᠢᠵᠤ᠂ ᠰᠠᠨᠠᠭᠠ ᠵᠣᠪᠠᠬᠤ ᠲᠤᠯᠠ ᠦᠶᠡ ᠦᠶᠡᠬᠡᠨ ᠨᠣᠶᠠᠨ ᠠ᠋ᠴᠠ ᠪᠠᠨ ᠨᠢᠭᠤᠭᠳᠠᠵᠤ ᠬᠠᠩᠭᠠᠯ ᠨᠠᠭᠤᠷ ᠲᠤ᠌ ᠡᠨᠡ ᠮᠡᠲᠦ ᠢᠷᠡᠬᠦ ᠪᠥᠯᠥᠭᠡ᠃ ᠴᠢᠩᠭᠢᠲᠡᠯᠡ ᠭᠡᠨᠡᠳᠲᠡ ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠥᠳᠥᠲᠦ ᠰᠤᠮᠤ ᠱᠤᠩᠭᠤᠨ ᠣᠷᠣᠵᠤ ᠵᠡᠭᠡᠰᠦᠨ ᠳᠤᠮᠳᠠ ᠵᠣᠭᠣᠭᠳᠠᠪᠠ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠴᠣᠴᠢᠨ ᠡᠷᠭᠢᠵᠦ ᠬᠠᠷᠠᠪᠠᠯ᠂ ᠲᠣᠭᠲᠠᠵᠤ ᠶᠠᠳᠠᠨ ᠲᠦᠬᠦᠬᠡᠯᠵᠡᠬᠦ ᠬᠣᠯᠠ ᠮᠤᠷᠢᠨᠠ ᠲᠠᠰᠢᠶᠠᠯᠳᠠᠨ ᠰᠠᠭᠤᠭᠰᠠᠨ ᠥᠬᠢᠨᠪᠠᠷᠬᠠᠭ ᠤ᠋ᠨ ᠬᠥᠯᠴᠥᠭᠦᠦ ᠬᠠᠷᠠᠴᠠ ᠲᠠᠢ ᠲᠤᠯᠭᠠᠷᠠᠪᠠ᠃ ᠲᠦᠭᠰᠢᠭᠦᠷᠢᠲᠦ ᠲᠡᠷᠡ ᠰᠥᠨᠢ ᠡᠴᠡ ᠬᠣᠢᠰᠢ ᠴᠡᠴᠡᠭ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠠᠨᠢᠷ ᠭᠦᠮ ᠪᠠᠢᠭᠰᠠᠨ ᠨᠢ ᠥᠬᠢᠨᠪᠠᠷᠬᠠᠭ ᠨᠣᠶᠠᠨ ᠠᠢᠷᠠᠭ ᠨᠠᠢᠷ ᠤ᠋ᠨ ᠴᠠᠭ ᠢ᠋ᠶ᠋ᠠᠷ ᠳᠥᠷᠥᠭᠡ ᠮᠤᠯᠲᠤᠯᠬᠤ ᠬᠦᠷᠢᠶᠡ ᠠᠷᠪᠢᠨ᠂ ᠠᠢᠯ ᠣᠯᠠᠨ ᠲᠤᠯᠠ ᠵᠠᠪ ᠦᠭᠡᠢ ᠪᠠᠢᠵᠠᠢ᠃ ᠨᠠᠮᠤᠷ ᠤ᠋ᠨ ᠠᠮᠢᠰᠬᠤᠭᠠ ᠣᠷᠣᠭᠰᠠᠨ ᠡᠯᠡ ᠡᠳᠦᠷ ᠦ᠋ᠳ ᠡᠴᠡ ᠬᠣᠢᠰᠢ ᠰᠢᠲᠦ ᠵᠠᠭᠤᠭᠰᠠᠨ ᠠᠬᠠ ᠨᠣᠶᠠᠨ ᠤ᠋ ᠤᠬᠠᠭᠠᠨ ᠴᠡᠭᠴᠡᠷᠡᠵᠦ᠂ ᠤᠷᠢᠳᠤ ᠣᠳᠣ ᠶ᠋ᠢ ᠰᠠᠨᠠᠬᠤ ᠲᠠᠢ ᠪᠣᠯᠳᠠᠭ ᠶᠤᠮ ᠰᠢᠦ ᠭᠡᠵᠦ ᠬᠣᠲᠣᠯᠠ ᠨᠣᠶᠠᠨ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠢ᠋ᠶ᠋ᠠᠷ ᠥᠭᠦᠯᠡᠭᠰᠡᠨ ᠨᠢ ᠦᠨᠡᠨ ᠪᠠᠢᠵᠠᠢ᠃
— ᠲᠥᠷᠥ ᠪᠤᠵᠠᠷᠯᠠᠭᠰᠠᠨ ᠮᠠᠭᠤ ᠭᠢᠴᠢᠢ᠁
— ᠨᠣᠶᠠᠨ ᠲᠠ ᠠᠮᠤᠭᠤᠯᠠᠩ ᠤᠤ?
— ᠲᠠᠯᠠ ᠶ᠋ᠢᠨ ᠮᠣᠩᠭᠣᠯ ᠤ᠋ᠨ ᠠᠮᠤᠭᠤᠯᠠᠩ᠂ ᠲᠠᠲ᠋ᠠᠷ ᠤ᠋ᠨ ᠬᠥᠲᠥᠪᠴᠢᠨ ᠳ᠋ᠦ᠍ ᠬᠦᠷᠲᠡᠭᠡᠯ ᠶᠠᠭᠤᠨ? ᠭᠡᠬᠦ ᠳ᠋ᠦ᠍ ᠪᠠᠷᠠ ᠪᠣᠯᠤᠭᠠᠴᠢᠳ ᠨᠢ ᠪᠠᠬᠠ ᠬᠠᠨᠤᠭᠰᠠᠨ ᠶᠠᠩᠵᠤ ᠲᠠᠢ ᠮᠡᠷ ᠮᠡᠷ ᠬᠥᠬᠥᠷᠡᠯᠳᠦᠪᠡ᠃ ᠥᠬᠢᠨᠪᠠᠷᠬᠠᠭ ᠭᠠᠷ ᠢ᠋ᠶ᠋ᠠᠨ ᠵᠥᠭᠡᠯᠡᠬᠡᠨ ᠡᠷᠭᠦᠬᠦ ᠳ᠋ᠦ᠍ ᠪᠠᠶᠠᠰᠤᠭᠴᠢᠳ ᠨᠠᠮ ᠭᠦᠮ ᠪᠣᠯᠤᠯᠠ᠃
— ᠴᠢᠮᠠᠶ᠋ᠢ ᠪᠢ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠ ᠭᠡᠵᠦ ᠳᠡᠭᠦᠦ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠪᠢᠯᠡ᠃ ᠠᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠬᠣᠭᠣᠯᠠ ᠲᠠᠢ ᠪᠠᠨ ᠢᠳᠡᠵᠦ᠂ ᠠᠯᠤᠰ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠬᠣᠷᠮᠣᠢ ᠲᠠᠢ ᠪᠠᠨ ᠬᠤᠳᠬᠤᠵᠤ ᠪᠠᠢᠭᠠ ᠠᠵᠢ! ᠭᠡᠳ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠬᠤᠮᠢᠵᠤ ᠠᠳᠬᠤᠩᠭᠠᠨ ᠪᠣᠳᠣᠯ ᠰᠠᠨᠠᠭᠠ ᠪᠠᠨ ᠴᠤᠭᠯᠠᠭᠤᠯᠬᠤ ᠮᠡᠲᠦ ᠬᠡᠰᠡᠭ ᠠᠵᠠᠨᠠᠭᠰᠠᠨ ᠢ᠋ᠶ᠋ᠠᠨ᠂
— ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠬᠠᠯᠲᠤ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠠ᠋ᠴᠠ ᠪᠢᠰᠢ ᠨᠢᠭᠤᠷ ᠲᠤᠯᠤᠨ ᠤᠴᠠᠷᠠᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠣᠳᠣ ᠬᠠᠷᠠᠪᠠᠯ ᠴᠢ ᠲᠤᠭᠤᠷᠭᠠ ᠨᠡᠪᠲᠡ ᠲᠤᠶᠠᠭᠠ ᠲᠠᠢ᠂ ᠭᠡᠷ ᠨᠡᠪᠲᠡ ᠭᠡᠭᠡ ᠲᠡᠢ ᠡᠮᠡ ᠮᠥᠨ ᠰᠠᠨᠵᠠᠢ᠃ ᠡᠢᠮᠦ ᠬᠡᠦᠬᠡᠨ ᠳ᠋ᠦ᠍ ᠳᠤᠷᠠᠯᠠᠭᠰᠠᠨ ᠮᠢᠨᠦ ᠳᠡᠭᠦᠦ ᠳ᠋ᠦ᠍ ᠪᠤᠷᠤᠭᠤ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠭᠡᠬᠦ ᠳ᠋ᠡᠭᠡᠨ ᠲᠥᠷᠥ ᠭᠡᠳᠡᠭ ᠲᠥᠷᠥ᠁ ᠭᠡᠮᠡᠨ ᠣᠮᠣᠭ ᠪᠠᠷᠳᠠᠮ ᠬᠠᠷᠠᠴᠠ ᠪᠠᠷ ᠳᠡᠭᠡᠷᠡ ᠬᠥᠬᠡᠷᠡᠭᠴᠢ ᠲᠩᠷᠢ ᠰᠢᠷᠲᠡᠨ᠂
— ᠬᠠᠭᠠᠨ ᠠᠪᠤ ᠶ᠋ᠢᠨ ᠬᠦᠦ ᠬᠠᠷᠢ ᠭᠦᠷᠦᠨ ᠦ᠌ ᠶᠠᠯᠠᠲᠤ ᠡᠮᠡ ᠲᠡᠢ ᠳᠡᠷᠡ ᠨᠡᠢᠯᠡᠵᠦ ᠦᠯᠦ ᠪᠣᠯᠬᠤ ᠪᠢᠯᠡ᠃ ᠪᠥᠵᠥᠩ ᠲᠠᠤᠯᠠᠢ ᠰᠢᠭ᠋ ᠪᠦᠯᠲᠡᠭᠡᠨᠡᠵᠦ ᠵᠣᠭᠰᠣᠬᠤ ᠳ᠋ᠤ᠌ ᠴᠢᠨᠢ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠶᠠᠭᠠᠬᠢᠵᠤ ᠬᠠᠷᠪᠤᠬᠤ ᠪᠣᠢ᠂ ᠬᠦᠦ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠪᠣᠯ ᠬᠥᠯ ᠳᠡᠭᠦᠵᠢᠯᠡᠬᠦ ᠤᠨᠤᠭᠠ ᠥᠭᠭᠦᠶᠡ᠂ ᠪᠤᠢᠷ ᠨᠠᠭᠤᠷ ᠢ᠋ᠶ᠋ᠠᠨ ᠪᠤᠰᠢᠭᠤ ᠲᠡᠮᠡᠴᠡ! ᠭᠡᠳ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠬᠦᠷᠡᠯ ᠰᠤᠪᠤᠷᠭᠠ ᠰᠢᠭ᠋ ᠬᠦᠳᠡᠷ ᠨᠢᠭᠡᠨ ᠡᠷᠡ ᠬᠥᠲᠥᠯᠦᠭᠡ ᠬᠣᠶᠠᠷ ᠮᠣᠷᠢ ᠲᠠᠢ ᠳᠡᠷᠭᠡᠭᠦᠯᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠰᠥᠬᠥᠷᠡᠵᠦ ᠰᠠᠭᠤᠭᠰᠠᠨ ᠪᠦᠰᠡᠭᠦᠢ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠴᠤᠯᠪᠤᠭᠤᠷ ᠢ᠋ ᠨᠢ ᠰᠢᠳᠡᠴᠢᠬᠡᠪᠡ᠃ ᠭᠤᠸᠠ ᠬᠠᠲᠤᠨ ᠴᠢᠮᠡᠭᠡ ᠦᠭᠡᠢ ᠠᠳᠬᠤᠨ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠥᠷᠥ ᠨᠢ ᠴᠡᠴᠡᠷᠭᠡᠨᠡᠨ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠵᠤ ᠠᠪᠠᠢ᠃ ᠲᠡᠷᠡ ᠪᠡᠷ ᠥᠬᠢᠨᠪᠠᠷᠬᠠᠭ ᠨᠣᠶᠠᠨ ᠢ᠋ ᠬᠥᠮᠦᠨ ᠦ᠌ ᠠᠳᠠᠭ ᠭᠡᠮᠡᠨ ᠢᠲᠡᠭᠡᠵᠦ᠂ ᠵᠢᠷᠭᠠᠯ ᠲᠠᠢ ᠬᠥᠮᠦᠨ ᠳ᠋ᠦ᠍ ᠵᠣᠪᠠᠯᠠᠩ ᠲᠠᠢ ᠬᠥᠮᠦᠨ ᠦ᠌ ᠰᠡᠭᠦᠳᠡᠷ ᠴᠦ᠍ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠶ᠋ᠢᠨ ᠦᠯᠢᠭᠡᠷ ᠦᠨᠡᠨ ᠠᠵᠢ ᠭᠡᠵᠦ ᠭᠣᠮᠣᠳᠠᠵᠤ ᠶᠠᠪᠤᠭᠰᠠᠨ ᠨᠢ ᠪᠣᠢ᠃ ᠨᠢᠭᠤᠷ ᠲᠤᠯᠤᠨ ᠤᠴᠠᠷᠠᠪᠠᠯ ᠦᠭᠡ ᠶ᠋ᠢᠨ ᠰᠣᠯᠢᠭᠠ ᠦᠭᠡᠢ ᠬᠠᠷᠪᠤᠴᠢᠬᠠᠬᠤ ᠨᠢᠭᠡᠨ ᠪᠢᠰᠢ ᠠᠵᠤᠭᠤ᠃
ᠠᠶᠤᠵᠤ ᠪᠠᠯᠠᠮᠠᠭᠳᠠᠭᠰᠠᠨ ᠰᠡᠳᠬᠢᠯ ᠨᠢ ᠨᠢᠯᠪᠤᠰᠤ ᠪᠣᠯᠤᠨ ᠭᠠᠳᠠᠭᠰᠢ ᠤᠷᠤᠰᠴᠤ ᠶᠠᠯᠢ ᠦᠭᠡᠢ ᠲᠠᠢᠪᠤᠰᠢᠷᠠᠨ ᠬᠠᠷᠠᠪᠠᠯ ᠮᠣᠷᠢᠲᠠᠨ ᠡᠷᠡᠰ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠣᠯᠵᠠᠢ᠃ ᠪᠡᠶᠡ ᠲᠠᠯᠪᠢᠭᠤᠷᠠᠵᠤ ᠠᠮᠢᠰᠬᠤᠭᠠ ᠠᠪᠬᠤ ᠲᠠᠢ ᠪᠣᠯᠪᠠ᠃ ᠴᠢᠩᠭᠢᠭᠡᠳ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠦᠨ ᠪᠣᠰᠴᠤ ᠵᠠᠢᠳᠠᠭᠤ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠲᠤᠱᠠᠵᠤ ᠣᠷᠬᠢᠭᠰᠠᠨ ᠤᠨᠤᠭᠠᠨ ᠳᠡᠭᠡᠷᠡ ᠪᠡᠨ ᠢᠷᠡᠲᠡᠯᠡ ᠬᠣᠲᠣᠯᠠ ᠨᠣᠶᠠᠨ ᠳᠥᠷᠪᠡᠨ ᠮᠥᠴᠢ ᠪᠡᠨ ᠲᠡᠯᠡᠭᠡᠳ ᠬᠠᠶᠠᠴᠢᠬᠠᠭᠰᠠᠨ ᠲᠣᠷᠵᠢᠭᠢᠨᠠᠲᠠᠯᠠ ᠬᠤᠷᠬᠢᠷᠠᠵᠤ ᠬᠡᠪᠲᠡᠬᠦ ᠳ᠋ᠦ᠍ ᠰᠠᠶᠢ ᠶ᠋ᠢᠨ ᠲᠦᠭᠰᠢᠭᠦᠷᠢ᠂ ᠠᠶᠤᠳᠠᠰᠤ ᠬᠡᠢᠰᠦᠨ ᠠᠷᠢᠯᠵᠤ᠂ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠯᠠ᠃ ᠬᠣᠲᠣᠯᠠ ᠰᠣᠴᠢᠨ ᠰᠡᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠪᠦᠯᠵᠢᠭᠡᠨ ᠴᠢᠮᠠᠶ᠋ᠢ ᠨᠠᠭᠤᠷ ᠰᠢᠷᠳᠡᠭᠡᠳ ᠰᠠᠭᠤᠬᠤ ᠪᠠᠷ ᠪᠤᠢᠷ ᠢ᠋ᠶ᠋ᠠᠨ ᠰᠠᠨᠠᠭᠠ ᠶᠤᠮ ᠪᠣᠯᠪᠠ ᠤᠤ? ᠪᠣᠳᠣᠯ ᠢ᠋ ᠨᠢ ᠦᠷᠭᠦᠭᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠪᠣᠳᠣᠭᠠᠳ᠁ ᠭᠡᠰᠡᠨ ᠢ᠋ᠶ᠋ᠡᠨ ᠮᠣᠷᠢᠳ ᠢ᠋ ᠨᠢ ᠬᠠᠷᠠᠨ᠂
— ᠶᠠᠭᠤᠨ ᠬᠦᠯᠦᠭ ᠪᠢᠯᠡ᠃ ᠬᠤᠷᠠᠭᠠᠨ ᠤ᠋ ᠬᠡᠦᠬᠡᠳ ᠨᠣᠣᠯᠠᠵᠤ᠂ ᠬᠤᠪᠢᠩ ᠲᠠᠢ ᠤᠰᠤ ᠲᠡᠩᠨᠡᠵᠦ ᠶᠠᠪᠤᠮᠠᠷ ᠭᠣᠳᠣᠯᠢ ᠰᠡᠭᠦᠯᠲᠦ᠂ ᠭᠣᠯᠢᠶᠠ ᠭᠡᠳᠡᠰᠦ ᠲᠡᠢ ᠡᠳ᠋ ᠰᠢᠪ ᠳᠡ ᠭᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠰᠠᠨᠠᠭᠠ ᠠᠯᠳᠠᠵᠤ᠂
— ᠥᠬᠢᠨᠪᠠᠷᠬᠠᠭ ᠨᠣᠶᠠᠨᠲᠠᠨ ᠥᠭᠭᠦᠭᠰᠡᠨ ᠶᠦᠮ ᠭᠡᠪᠡᠯ ᠬᠣᠲᠣᠯᠠ ᠴᠡᠴᠡᠭ ᠲᠣᠬᠣᠢᠯᠳᠠᠨ ᠥᠨᠳᠡᠢᠵᠦ᠂
— ᠠᠬᠠ ᠨᠣᠶᠠᠨ ᠬᠡᠵᠢᠶᠡ ᠢᠷᠡᠪᠡ? ᠭᠡᠯᠡ᠃
— ᠳᠥᠩᠭᠡᠵᠦ ᠰᠠᠶᠢᠬᠠᠨ ᠮᠣᠷᠢᠯᠠᠭᠠᠳ᠂ ᠬᠦᠦ ᠪᠢᠳᠡᠨ ᠬᠣᠶᠠᠷ ᠤ᠋ᠨ ᠠᠮᠢ ᠶ᠋ᠢ ᠥᠷᠥᠰᠢᠶᠡᠶᠡ᠂ ᠪᠤᠢᠷ ᠨᠠᠭᠤᠷ ᠤᠷᠤᠭᠤ ᠪᠠᠨ ᠪᠤᠴᠠ ᠭᠡᠮᠡᠨ ᠡᠨᠡ ᠮᠣᠷᠢᠳ ᠢ᠋ ᠥᠭᠪᠡ ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ᠂
— ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ ᠴᠢᠨᠢ ᠠᠷᠠᠰᠤ ᠶ᠋ᠢ ᠥᠭᠴᠦ ᠶᠠᠪᠤᠭᠤᠯᠤᠨᠠ ᠳᠠ ᠭᠡᠪᠡ᠃ ᠬᠠᠩᠭᠠᠯ ᠤ᠋ᠨ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠠᠪᠢ ᠣᠷᠴᠢᠨ ᠠᠨᠢᠷ ᠭᠦᠮ ᠠᠵᠢ᠃
5
ᠶᠢᠰᠦᠭᠡᠢ ᠡᠷᠡᠬᠡᠢ ᠪᠡᠨ ᠰᠢᠯᠡᠮᠡᠳᠡᠨ ᠰᠤᠮᠤᠨ ᠤ᠋ ᠪᠠᠨ ᠥᠳᠥ ᠶ᠋ᠢ ᠴᠡᠮᠴᠡᠭᠡᠷᠬᠡᠨ ᠴᠢᠮᠬᠢᠵᠦ᠂ ᠨᠤᠮᠤ ᠪᠠᠨ ᠵᠤᠭᠤᠤᠬᠠᠨ ᠡᠪᠰᠢᠶᠡᠯᠭᠡᠨ ᠫᠠᠢ ᠬᠠᠷᠠᠭᠠᠯᠠᠵᠤ ᠥᠷᠥᠭᠡᠰᠦᠨ ᠨᠢᠳᠦ ᠪᠡᠨ ᠠᠨᠢᠰᠬᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠲᠠᠲᠠᠯᠭᠠ ᠪᠠᠨ ᠰᠤᠯᠠᠷᠠᠭᠤᠯᠵᠤ ᠬᠣᠯᠠ ᠶ᠋ᠢ ᠬᠠᠷᠠᠪᠠ᠂ ᠬᠠᠭᠠᠨ ᠬᠦᠷᠢᠶᠡ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠣᠷᠣᠰᠢᠬᠤ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠣᠢᠷᠠᠳᠴᠤ ᠰᠡᠩᠬᠦᠷ ᠭᠣᠷᠣᠬᠠᠨ ᠤ᠋ ᠮᠥᠷᠡᠨ ᠤᠷᠤᠭᠤ ᠡᠷᠭᠢᠬᠦ ᠠᠭᠤᠵᠢᠮ ᠲᠣᠬᠣᠢ ᠳ᠋ᠤ᠌ ᠪᠠᠭᠤᠳᠠᠯᠯᠠᠭᠰᠠᠨ ᠠᠵᠢ᠃ ᠡᠯᠡ ᠲᠣᠬᠣᠢ ᠶ᠋ᠢᠨ ᠬᠠᠮᠢᠭᠠ ᠠ᠋ᠴᠠ ᠴᠤ᠌᠂ ᠬᠡᠨ ᠴᠦ᠍ ᠢᠷᠡᠭᠰᠡᠨ ᠬᠠᠭᠠᠰ ᠡᠳᠤᠷᠴᠢ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠪᠠᠷᠠ ᠨᠢ ᠦᠵᠡᠭᠳᠡᠬᠦ ᠪᠢᠯᠡ᠃ ᠶᠢᠰᠦᠭᠡᠢ ᠮᠥᠨᠥᠬᠢ ᠵᠡᠭᠦᠦ ᠶ᠋ᠢᠨ ᠰᠦᠪᠡᠭᠴᠢ ᠶ᠋ᠢᠨ ᠲᠡᠳᠦᠢ ᠪᠠᠷᠠ ᠶ᠋ᠢ ᠬᠣᠷᠣᠮ ᠬᠢᠷᠢ ᠲᠣᠭᠲᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠮᠣᠷᠢᠲᠠᠨ ᠠᠢᠰᠤᠢ ᠭᠡᠪᠡᠯ ᠲᠣᠳᠣᠢᠨ ᠠᠪᠠᠭᠠ ᠨᠢ᠂
— ᠤᠨᠤᠪᠠᠯ ᠬᠠᠷᠪᠤ᠂ ᠬᠠᠷᠪᠤ ᠭᠡᠳ ᠬᠥᠭᠵᠢᠯᠲᠡᠢ ᠢᠨᠢᠶᠡᠯᠳᠦᠪᠡ᠃ ᠲᠡᠳᠡ ᠵᠢᠷᠠᠨ ᠨᠤᠮᠤ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠰᠠᠷᠠ ᠫᠠᠢ ᠬᠠᠷᠪᠤᠵᠤ ᠪᠠᠢᠪᠠ᠃ ᠶᠢᠰᠦᠭᠡᠢ ᠡᠨᠡ ᠵᠢᠯ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤ ᠳᠥᠷᠥᠭᠡᠯᠡᠵᠦ ᠲᠠᠷᠴᠢᠭ ᠪᠠᠭᠠᠴᠤᠳ ᠤ᠋ᠨ ᠬᠠᠷᠪᠤᠳᠠᠭ ᠲᠠᠪᠢᠨ ᠨᠤᠮᠤ ᠶ᠋ᠢᠨ ᠭᠠᠵᠠᠷ ᠢ᠋ ᠣᠷᠬᠢᠨ ᠵᠠᠯᠠᠭᠤ ᠬᠥᠪᠡᠭᠦᠳ ᠦ᠋ᠨ ᠬᠠᠷᠪᠤᠬᠤ ᠵᠢᠷᠠᠨ ᠨᠤᠮᠤ ᠶ᠋ᠢᠨ ᠫᠠᠢ ᠳ᠋ᠤ᠌ ᠡᠯᠰᠡᠵᠦ ᠪᠢᠯᠡ᠂ ᠡᠢᠨ ᠠᠩᠬᠠᠨ ᠰᠤᠮᠤ ᠲᠠᠯᠪᠢᠬᠤ ᠳ᠋ᠤ᠌ ᠡᠷᠡ ᠦᠬᠡᠷ ᠦ᠋ᠨ ᠰᠢᠷᠢ ᠳᠡᠯᠭᠡᠵᠦ ᠬᠠᠲᠠᠭᠰᠠᠨ ᠫᠠᠢ ᠶ᠋ᠢᠨ ᠲᠡᠷᠲᠡᠭᠡ ᠡᠴᠡ ᠤᠤᠬᠠᠢ ᠶ᠋ᠢᠨ ᠲᠦᠷᠢᠯᠭᠡ ᠰᠣᠨᠣᠰᠳᠠᠵᠤ ᠳᠠᠷᠢᠲᠠᠢ ᠣᠳᠴᠢᠬᠢᠨ ᠤ᠋᠂
— ᠶᠢᠰᠦᠭᠡᠢ ᠠᠬᠠ ᠣᠨᠣᠯᠠ! ᠭᠡᠬᠦ ᠰᠢᠩᠭᠡᠨ ᠳᠠᠭᠤ ᠬᠠᠲᠠᠵᠤ ᠠᠪᠠᠢ᠃ ᠲᠣᠮᠣ ᠠᠬᠠ ᠮᠡᠩᠭᠢᠲᠦ ᠳᠠᠯᠤ ᠮᠥᠷᠥ ᠠᠯᠠᠭᠠᠳᠠᠨ᠂
— ᠶᠢᠰᠦᠭᠡᠢ ᠳᠡᠭᠦᠦ ᠴᠦ᠍ ᠡᠷᠡ ᠪᠣᠯᠵᠠᠢ ᠭᠡᠪᠡᠯ ᠠᠬᠠ ᠨᠡᠭᠦᠨ᠂
— ᠪᠠᠷᠠᠳᠠᠨᠪᠠᠭᠠᠲᠤᠷ ᠤ᠋ᠨ ᠦᠷᠡ ᠪᠠᠷᠳᠠᠮ ᠮᠡᠷᠭᠡᠨ ᠶᠠᠪᠤᠬᠤ ᠤᠴᠢᠷᠲᠠᠢ ᠭᠡᠵᠦ ᠲᠦᠬᠦᠭᠡᠪᠡ᠃ ᠡᠨᠡ ᠬᠢᠷᠢ ᠬᠠᠭᠠᠨ ᠬᠦᠷᠢᠶᠡᠨ ᠡᠴᠡ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠠᠲᠠᠭᠠᠨ᠂ ᠲᠡᠭᠦᠨ ᠢ᠋ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠵᠤ ᠳᠡᠪᠢᠭᠴᠢ ᠮᠡᠷᠭᠢᠳ ᠦ᠋ᠨ ᠳᠣᠲᠣᠷ ᠪᠢᠯᠭᠡ ᠴᠢᠬᠢᠨ ᠬᠦᠦ ᠳᠣᠭᠲᠤᠭᠠ ᠶ᠋ᠢ ᠴᠤᠯᠪᠤᠭᠤᠷᠳᠠᠨ ᠬᠥᠲᠥᠯᠵᠦ ᠢᠷᠡᠵᠡᠢ᠃
— ᠮᠡᠷᠭᠡᠨ ᠬᠦᠦ ᠲᠥᠷᠥᠭ ᠭᠡᠵᠦ ᠬᠡᠵᠢᠶᠡᠨ ᠦ᠌ ᠳᠠᠭᠤ ᠴᠢᠩᠭᠠ᠂ ᠰᠡᠳᠬᠢᠯ ᠬᠥᠭᠵᠢᠭᠦᠨ ᠨᠡᠭᠦᠨ ᠲᠠᠢᠵᠢ ᠬᠠᠰᠬᠢᠷᠬᠤ ᠳ᠋ᠤ᠌᠂
— ᠮᠥᠷᠥ ᠵᠣᠬᠢ! ᠮᠥᠳᠳᠥᠬᠡᠨ ᠮᠥᠩᠭᠥᠨ ᠵᠡᠭᠦᠦ ᠶ᠋ᠢᠨ ᠰᠦᠪᠡᠭᠴᠢ ᠪᠡᠷ ᠭᠠᠷᠭᠠᠨ ᠠᠯᠲᠠᠨ ᠵᠡᠭᠦᠦ ᠳ᠋ᠦ᠍ ᠰᠤᠮᠤ ᠰᠦᠪᠡᠯᠡᠬᠦ ᠬᠦᠦ ᠭᠠᠷᠤᠨᠠ ᠳᠠ᠁ ᠭᠡᠳ ᠳᠣᠭᠲᠤᠭᠠ ᠬᠦᠦ ᠶ᠋ᠢ ᠪᠠᠭᠤᠯᠭᠠᠵᠤ ᠬᠡᠪᠯᠡᠭᠦᠦ ᠤᠷᠠᠯᠠᠭᠰᠠᠨ ᠬᠠᠪᠴᠢᠶᠠᠬᠠᠢ ᠨᠤᠮᠤ ᠶ᠋ᠢ ᠨᠢ ᠠᠳᠬᠤᠭᠤᠯᠤᠨ᠂
— ᠶᠠᠪᠤ ᠮᠢᠨᠦ ᠬᠦᠦ᠂ ᠭᠤᠴᠢᠨ ᠨᠤᠮᠤ ᠶ᠋ᠢᠨ ᠬᠢᠨ ᠭᠣᠷᠣᠬᠠᠨ ᠤ᠋ ᠴᠠᠭᠠᠨᠠ ᠪᠠᠢᠨᠠ ᠭᠡᠯᠡ᠃ ᠨᠠᠮᠤᠷ ᠣᠷᠣᠢ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠰᠠᠨᠠᠭᠠ ᠠᠯᠳᠠᠬᠤ ᠮᠡᠲᠦ ᠬᠠᠯᠢᠭᠤᠷᠠᠬᠤ ᠶᠡᠬᠡ ᠡᠪᠡᠰᠦᠨ ᠳᠤᠮᠳᠠ ᠮᠡᠩᠭᠢᠲᠦ ᠶ᠋ᠢᠨ ᠬᠣᠶᠠᠷ ᠬᠦᠦ᠂ ᠨᠡᠭᠦᠨ ᠦ᠌ ᠬᠥᠪᠡᠭᠦᠨ᠂ ᠬᠣᠲᠣᠯᠠ ᠠᠪᠠᠭᠠ ᠶ᠋ᠢᠨ ᠬᠢᠷᠮᠡᠦ᠂ ᠠᠯᠲᠠᠨ ᠲᠡᠷᠢᠭᠦᠲᠦ《ᠰᠠᠢᠨ ᠡᠷᠡᠰ》 ᠬᠠᠪᠴᠢᠶᠠᠬᠠᠢ ᠨᠤᠮᠤ ᠡᠪᠰᠢᠶᠡᠯᠭᠡᠵᠦ ᠱᠤᠤᠭᠢᠯᠳᠤᠨ ᠠᠵᠢ᠃ ᠬᠠᠲᠠᠭᠠᠨ ᠲᠠᠢᠵᠢ ᠶ᠋ᠢ ᠪᠠᠷᠠᠳᠠᠵᠤ ᠢᠷᠡᠭᠰᠡᠨ ᠲᠠᠢᠴᠢᠭᠤᠳ ᠤ᠋ᠨ ᠲᠠᠷᠭᠤᠲᠠᠢ ᠬᠢᠷᠢᠯᠳᠤᠭ ᠬᠦᠷᠲᠡᠯᠡ ᠮᠡᠷᠭᠡ ᠰᠣᠷᠢᠨ ᠠᠪᠠᠢ᠃ ᠲᠡᠷᠡ ᠪᠦᠭᠦᠳᠡ ᠶ᠋ᠢᠨ ᠳᠤᠮᠳᠠ ᠲᠡᠮᠡᠭᠡ ᠮᠡᠲᠦ᠃ ᠥᠨᠳᠥᠷ ᠡᠪ ᠬᠠᠪᠤ ᠦᠭᠡᠢ ᠨᠢᠭᠡᠨ ᠬᠦᠦ ᠪᠣᠢ ᠨᠢ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠬᠥᠪᠡᠭᠦᠨ ᠪᠦᠷᠢ ᠶᠦᠮ᠃ ᠪᠡᠶᠡ ᠥᠰᠬᠡᠯᠡᠭᠦᠨ ᠬᠦᠦ ᠭᠤᠴᠢᠨ ᠨᠤᠮᠤ ᠶ᠋ᠢᠨ ᠭᠠᠵᠠᠷ ᠢ᠋ ᠳᠠᠪᠠᠭᠤᠯᠵᠤ ᠬᠠᠷᠪᠤᠬᠤ ᠨᠢ ᠣᠯᠠᠨ ᠴᠤ᠌ ᠤᠨᠤᠬᠤ ᠨᠢ ᠴᠥᠭᠡᠨ ᠲᠤᠯᠠ ᠬᠥᠭᠡᠷᠦᠯᠳᠦᠨ ᠢᠨᠢᠶᠡᠯᠳᠦᠵᠦ ᠰᠣᠨᠣᠰᠳᠠᠨᠠ᠃ ᠲᠣᠭᠲᠤᠭᠠ ᠬᠦᠦ ᠭᠦᠶᠦᠵᠦ ᠣᠳᠤᠯᠠ᠃
ᠡᠨᠡ ᠦᠶᠡᠰ ᠬᠦᠷᠢᠶᠡ ᠪᠠᠭᠤᠷᠴᠢ ᠶ᠋ᠢᠨ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠬᠠᠯᠠᠭᠤᠨ ᠬᠣᠭᠣᠯᠠᠨ ᠤ᠋ ᠠᠭᠤᠷ ᠰᠠᠪᠰᠠᠨ᠂ ᠴᠢᠨᠠᠭᠰᠠᠨ ᠮᠢᠬᠠᠨ ᠤ᠋ ᠰᠣᠳᠣᠨ ᠦᠨᠦᠷ ᠰᠠᠯᠬᠢ ᠪᠠᠷ ᠰᠡᠪᠡᠯᠵᠡᠨ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠲᠦ᠍ ᠬᠠᠩᠬᠤᠯᠬᠤ ᠳ᠋ᠤ᠌ ᠤᠳᠬᠤᠨ ᠭᠡᠮᠡᠨ ᠡᠷᠬᠡᠯᠡᠵᠦ᠂ ᠬᠠᠷᠯᠢ ᠺᠤ ᠢᠵᠢᠢ ᠶ᠋ᠢᠨ ᠠᠶᠠᠭᠠ ᠬᠠᠭᠤᠷᠠᠢᠯᠠᠵᠤ ᠠᠮᠲᠠᠰᠢᠭᠰᠠᠨ ᠤᠳᠴᠢᠬᠢᠨ᠂
— ᠦᠳᠡ ᠶ᠋ᠢᠨ ᠵᠣᠭᠣᠭ ᠢᠷᠡᠪᠡ ᠬᠡᠮᠡᠪᠡ᠃ ᠢᠳᠡᠷ ᠪᠠᠷᠰ ᠰᠢᠭ᠋ ᠰᠠᠢᠬᠠᠨ ᠡᠷᠡᠰ ᠡᠪᠡᠷ ᠨᠤᠮᠤ ᠪᠠᠨ ᠪᠡᠶᠡ ᠪᠡᠶᠡ ᠶ᠋ᠢ ᠨᠢ ᠳᠡᠷᠡᠯᠡᠭᠦᠯᠦᠨ ᠲᠠᠯᠪᠢᠵᠤ᠂ ᠬᠣᠷᠣᠮᠰᠠᠭᠠ ᠪᠠᠨ ᠲᠦᠰᠢᠭᠦᠯᠵᠦ ᠣᠷᠬᠢᠭᠠᠳ ᠡᠪᠡᠰᠦᠨ ᠳᠡᠭᠡᠷᠡ ᠲᠣᠭᠣᠷᠢᠭ ᠡᠭᠦᠰᠬᠡᠵᠦ ᠵᠠᠪᠢᠯᠠᠨ ᠰᠠᠭᠤᠯᠠ᠃ ᠴᠢᠩᠭᠢᠲᠡᠯᠡ ᠨᠠᠮᠤᠷ ᠤ᠋ᠨ ᠰᠦᠮᠡᠨ ᠡᠪᠡᠰᠦ ᠮᠡᠲᠦ ᠨᠡᠮᠡᠰ ᠨᠡᠮᠡᠰ ᠠᠯᠬᠤᠬᠤ ᠬᠥᠯ ᠨᠢᠴᠦᠭᠦᠨ ᠥᠬᠢᠳ ᠮᠣᠳᠣᠨ ᠲᠠᠪᠰᠢ ᠲᠠᠢ ᠮᠢᠬᠠ᠂ ᠠᠭᠠᠷᠤ ᠬᠤᠪᠢᠩ ᠲᠠᠢ ᠡᠰᠦᠭ ᠳᠠᠮᠵᠢᠯᠠᠨ ᠢᠷᠡᠵᠦ ᠳᠤᠮᠳᠠ ᠨᠢ ᠲᠠᠯᠪᠢᠪᠠ᠃ ᠲᠡᠷᠡ ᠬᠦ᠌ ᠥᠬᠢᠳ ᠦ᠋ᠨ ᠨᠣᠭᠣᠭᠠᠨ ᠤ᠋ ᠰᠢᠭᠦᠳᠡᠷᠢ ᠳ᠋ᠦ᠍ ᠪᠣᠯᠴᠠᠢᠲᠠᠯᠠ ᠤᠬᠢᠶᠠᠭᠳᠠᠭᠰᠠᠨ ᠨᠢᠴᠦᠭᠦᠨ ᠪᠣᠷᠣ ᠬᠥᠯ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠡᠩᠬᠦᠷᠡᠢ ᠬᠠᠷᠠᠭᠳᠠᠵᠤ ᠨᠢᠳᠦ ᠰᠠᠯᠭᠠᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠣᠢ ᠶ᠋ᠢ ᠱᠣᠣᠴᠢ ᠨᠡᠭᠦᠨ ᠬᠡᠳᠦᠢᠨ ᠬᠠᠷᠠᠵᠤ᠂ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠰᠠᠨ ᠮᠡᠩᠭᠢᠲᠦ ᠶ᠋ᠢ ᠨᠢᠳᠤᠷᠤᠨ᠂
— ᠶᠢᠰᠦᠢ ᠳᠡᠭᠦᠦ ᠳ᠋ᠦ᠍ ᠢᠷᠦᠭᠡᠯ ᠦ᠋ᠨ ᠪᠡᠯᠡᠭ ᠵᠡᠬᠡᠬᠦ ᠪᠣᠯᠵᠠᠢ ᠭᠡᠬᠦ ᠳ᠋ᠦ᠍ ᠬᠥᠪᠡᠭᠦᠨ ᠴᠢᠬᠢ ᠪᠡᠨ ᠬᠦᠷᠲᠡᠯᠡ ᠤᠯᠠᠢᠵᠤ᠂ ᠳᠡᠮᠡᠢ ᠯᠡ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠮᠢᠬᠠ ᠤᠷᠤᠭᠤ ᠳᠠᠭᠠᠷᠢᠵᠤ ᠠᠪᠠᠢ᠃ ᠲᠡᠢᠨ ᠭᠠᠷ ᠲᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠡᠪᠴᠢᠭᠦᠨ ᠦ᠌ ᠪᠦᠳᠦᠷᠬᠡᠢ ᠣᠭᠲᠣᠯᠤᠨ᠂ ᠬᠤᠢᠬᠠ ᠲᠠᠢ ᠬᠡᠷᠰᠡᠩ ᠰᠢᠷᠵᠢᠭᠢᠨᠡᠲᠡᠯᠡ ᠵᠠᠵᠢᠯᠤᠨ ᠠᠮᠠ ᠳᠦᠭᠦᠷᠡᠩ ᠲᠣᠰᠣ ᠵᠠᠯᠭᠢᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠢ᠋ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠤᠷᠠᠰᠪᠠ᠃ ᠲᠡᠭᠦᠨ ᠦ᠌ ᠲᠡᠯᠡᠮᠡᠬᠡᠷ ᠠᠯᠠᠭ ᠨᠢᠳᠦ ᠨᠠᠮᠤᠷ ᠤ᠋ᠨ ᠪᠤᠳᠠᠩ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠨᠡᠪᠲᠡ ᠰᠢᠷᠲᠡᠨ ᠪᠠᠢᠬᠤ ᠰᠢᠭ᠋ ᠪᠣᠳᠣᠭᠳᠠᠬᠤ ᠨᠢ ᠪᠣᠢ᠃ ᠬᠣᠲᠣᠯᠠ ᠠᠪᠠᠭᠠ ᠲᠠᠲᠠᠪᠤᠷᠢ ᠬᠠᠲᠤᠨ ᠪᠣᠯᠭᠠᠨ ᠬᠠᠶᠠᠭᠠᠨ ᠳ᠋ᠠᠭᠠᠨ ᠪᠠᠭᠤᠯᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠣᠣᠵᠢᠯᠠᠵᠤ᠂ ᠬᠠᠢᠷᠠ ᠪᠠᠨ ᠲᠦᠭᠵᠢᠬᠦ ᠭᠡᠵᠦ ᠵᠣᠪᠠᠭᠰᠠᠨ ᠶᠤᠮ᠃ ᠡᠢᠨ ᠡᠷᠬᠡᠪᠰᠢ ᠬᠣᠨᠣᠭ ᠤ᠋ᠨ ᠣᠯᠠᠨ᠂ ᠬᠣᠯᠠ ᠨᠤᠲᠤᠭ ᠤ᠋ᠨ ᠡᠷᠬᠡᠨ ᠳ᠋ᠦ᠍ ᠮᠠᠷᠲᠠᠩᠨᠠᠵᠤ ᠪᠠᠢᠲᠠᠯᠠ ᠨᠡᠭᠦᠨ ᠰᠠᠨᠠᠭᠤᠯᠬᠤ ᠨᠢ ᠡᠨᠡ ᠠᠵᠢ᠃ ᠰᠡᠳᠬᠢᠯ ᠳ᠋ᠡᠭᠡᠨ ᠬᠠᠷᠠᠳᠠᠭ ᠡᠩᠬᠦᠷᠡᠢ ᠪᠦᠰᠡᠭᠦᠢ ᠶ᠋ᠢᠨ ᠲᠥᠷᠬᠦ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠴᠢᠬᠠᠬᠤ ᠶᠤᠮ ᠰᠢᠭ᠋ ᠪᠤᠷᠤᠭᠤ ᠬᠠᠷᠠᠲᠠᠯᠠ ᠮᠥᠨᠥᠬᠢ ᠮᠣᠷᠢᠲᠠᠨ ᠳᠡᠷᠭᠡᠭᠦᠯᠵᠦ ᠠᠢᠰᠤᠢ ᠶ᠋ᠢ ᠦᠵᠡᠪᠡ᠃ ᠬᠠᠭᠠᠨ ᠬᠦᠷᠢᠶᠡᠨ ᠦ᠌ ᠨᠠᠮᠤᠷᠵᠢᠶᠠᠨ ᠳ᠋ᠤ᠌ ᠣᠢᠷᠠ ᠬᠡᠷᠦᠯᠦᠨ ᠲᠣᠭᠣᠨᠣ ᠶ᠋ᠢᠨ ᠰᠠᠭᠤᠷᠢᠨ ᠬᠠᠷᠠᠭᠤᠯ ᠤ᠋ᠨ ᠠᠬᠠᠯᠠᠬᠤ ᠴᠢᠩᠭᠦᠮ ᠳᠠᠭᠠᠯᠳᠤᠨ ᠳᠠᠪᠬᠢᠬᠤ ᠶ᠋ᠢ ᠡᠮᠡᠭᠡᠯ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠰᠠᠭᠤᠳᠠᠯ ᠢ᠋ᠶ᠋ᠠᠷ ᠨᠢ ᠲᠠᠨᠢᠵᠤ᠂
— ᠨᠣᠶᠠᠳ ᠠ᠋᠂ ᠡᠯᠴᠢ ᠶᠠᠭᠠᠷᠠᠨ ᠢᠷᠡᠬᠦ ᠨᠢ ᠶᠠᠭᠤᠨ ᠤ᠋ ᠲᠡᠮᠳᠡᠭ ᠪᠣᠯ ᠭᠡᠪᠡ᠃ ᠲᠠᠯᠠ ᠶ᠋ᠢᠨ ᠰᠣᠷᠭᠣᠭ ᠡᠷᠡᠰ ᠰᠡᠷᠲᠡᠰᠬᠢᠨ ᠮᠥᠨᠥᠬᠢ ᠵᠦᠭ ᠬᠠᠷᠠᠬᠤ ᠳ᠋ᠤ᠌ ᠴᠢᠩᠭᠦᠮ ᠦ᠋ᠨ ᠮᠣᠷᠢᠨ ᠤ᠋ ᠬᠠᠷᠠᠢᠯᠲᠠ ᠰᠤᠩᠭᠠᠭᠤ ᠠᠭᠠᠳ ᠪᠢᠳᠯᠢᠭ ᠠᠲᠠᠯᠠ ᠡᠯᠴᠢ ᠶ᠋ᠢᠨ ᠤᠨᠤᠭᠠ ᠶᠡᠬᠡ ᠯᠡ ᠰᠤᠯᠠᠳᠠᠵᠤ᠂ ᠶᠠᠳᠠᠷᠠᠭᠰᠠᠨ ᠶᠠᠩᠵᠤ ᠢᠯᠡ ᠠᠵᠢ᠃
— ᠶᠡᠬᠡ ᠯᠡ ᠬᠣᠯᠠ ᠠ᠋ᠴᠠ ᠮᠣᠷᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ᠃
— ᠲᠦᠳᠡᠭ ᠢ᠋ᠶ᠋ᠡᠷ ᠳᠣᠬᠢᠶᠠᠯᠠᠭᠠ ᠦᠭᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠮᠠᠨ ᠤ᠋ ᠡᠯᠴᠢ ᠪᠢᠵᠡ᠃
— ᠶᠠᠭᠤᠨ ᠤ᠋ ᠳᠣᠬᠢᠶᠠ ᠪᠣᠯ᠁ ᠳᠣᠣᠷᠠ ᠳᠣᠣᠷᠠ ᠪᠠᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠣᠰᠣ ᠶ᠋ᠢ ᠨᠣᠭᠣᠭᠠᠨ ᠳ᠋ᠤ᠌ ᠠᠷᠴᠢᠭᠠᠳ ᠬᠢᠲᠤᠭᠠ ᠪᠠᠨ ᠬᠤᠢᠯᠠᠨ ᠪᠣᠰᠴᠠᠭᠠᠵᠤ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠦ᠌ ᠵᠦᠭ ᠮᠣᠷᠳᠠᠪᠠ᠃ ᠡᠨᠡ ᠬᠢᠷᠢ ᠵᠤᠨ ᠤ᠋ ᠤᠯᠠᠷᠢᠯ ᠳ᠋ᠤ᠌ ᠴᠠᠭᠠᠨ ᠢᠳᠡᠭᠡ ᠭᠣᠣᠯᠯᠠᠬᠤ ᠲᠤᠯᠠ ᠮᠢᠬᠠᠰᠠᠵᠤ ᠭᠦᠢᠴᠡᠭᠰᠡᠨ ᠵᠢᠭᠠᠯ ᠤ᠋ᠳ ᠰᠡᠩᠬᠦᠷ ᠭᠣᠷᠣᠬᠠᠨ ᠤ᠋ ᠬᠦᠢᠲᠡᠨ ᠤᠰᠤ ᠶ᠋ᠢ ᠱᠠᠯᠴᠢᠭ ᠫᠠᠯᠴᠢᠭ ᠦᠰᠦᠴᠢᠭᠦᠯᠦᠨ ᠭᠦᠶᠦᠯᠳᠦᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠠᠪᠰᠢ ᠲᠠᠢ ᠮᠢᠬᠠᠨ ᠳᠡᠭᠡᠷᠡ ᠨᠠᠢᠷᠯᠠᠵᠤ ᠡᠬᠢᠯᠡᠵᠡᠢ᠃
ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠡᠯᠴᠢ ᠢᠷᠡᠪᠡ᠃ ᠬᠥᠷᠵᠡᠢᠨ ᠪᠠᠷᠤᠢᠵᠤ ᠬᠥᠮᠥᠰᠬᠡ ᠵᠠᠩᠭᠢᠳᠤᠭᠰᠠᠨ ᠬᠠᠪᠤᠯ ᠬᠠᠭᠠᠨ ᠡᠬᠢᠨ ᠴᠠᠰᠤᠨ ᠤ᠋ ᠠᠩ ᠬᠣᠮᠣᠷᠭᠠᠨ ᠳ᠋ᠤ᠌ ᠣᠷᠣᠬᠤ ᠪᠠᠷ ᠴᠤᠭᠯᠠᠵᠤ ᠢᠷᠡᠭᠰᠡᠨ ᠬᠠᠨ ᠬᠥᠪᠡᠭᠦᠳ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠮᠠᠷᠭᠠᠰᠢ ᠶ᠋ᠢᠨ ᠮᠣᠷᠢᠨ ᠴᠠᠭ ᠲᠤ᠌ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠴᠤᠭᠯᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠴᠢᠩᠭᠢᠭᠡᠳ ᠬᠥᠷᠯᠡᠬᠦ ᠳ᠋ᠦ᠍ ᠬᠤᠸᠠᠷᠠᠩᠨᠠᠭᠰᠠᠨ ᠥᠬᠢᠨᠪᠠᠷᠬᠠᠭ ᠤ᠋ᠨ ᠬᠦᠷᠢᠶᠡ ᠤᠷᠤᠭᠤ ᠡᠯᠴᠢ ᠢᠯᠡᠭᠡᠪᠡ᠃ ᠲᠡᠨᠳᠡ ᠬᠤᠲᠤᠭᠲᠤ ᠮᠣᠩᠬᠣᠷ᠂ ᠬᠤᠯᠠᠨ ᠲᠡᠷᠢᠭᠦᠲᠡᠨ ᠨᠡᠢᠯᠡᠵᠦ ᠠᠪᠠ ᠬᠣᠮᠣᠷᠭᠠ ᠶ᠋ᠢᠨ ᠨᠤᠮᠤ ᠰᠡᠯᠪᠢᠵᠦ᠂ ᠰᠤᠮᠤ ᠵᠠᠰᠠᠵᠤ ᠪᠣᠢ ᠪᠥᠯᠥᠭᠡ᠃ ᠳᠠᠷᠠᠭᠠ ᠨᠢ ᠠᠳᠤᠭᠤᠨ ᠤ᠋ ᠪᠡᠯᠴᠢᠭᠡᠷ ᠳᠠᠭᠠᠵᠤ ᠵᠠᠳᠠᠭᠠᠢ ᠲᠠᠯᠠ ᠤᠷᠤᠭᠤ ᠨᠡᠭᠦᠳᠡᠯᠯᠡᠭᠰᠡᠨ ᠪᠠᠷᠳᠠᠨᠪᠠᠭᠠᠲᠤᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠡᠯᠡ ᠬᠦᠷᠭᠡᠬᠦ ᠡᠯᠴᠢ ᠢᠯᠡᠭᠡᠯᠡ᠃ ᠨᠠᠮᠤᠷ ᠤ᠋ᠨ ᠭᠢᠯᠭᠠᠨᠠ ᠵᠠᠯᠪᠠᠷᠢᠭᠰᠠᠨ ᠨᠢᠴᠦᠭᠦᠨ ᠲᠠᠯᠠ ᠶ᠋ᠢᠨ ᠲᠡᠷᠲᠡᠭᠡᠬᠢ ᠬᠦᠷᠢᠶᠡᠨ ᠳ᠋ᠦ᠍ ᠬᠣᠲᠣᠯᠠ ᠨᠣᠶᠠᠨ᠂ ᠲᠣᠳᠣᠢᠨ ᠣᠳᠴᠢᠭᠢᠨ ᠲᠡᠷᠢᠭᠦᠲᠡᠨ ᠪᠣᠢ ᠶᠤᠮ᠃
ᠡᠢᠨ ᠬᠠᠵᠠᠭᠤᠯᠠᠭᠰᠠᠨ ᠡᠪᠦᠭᠡᠨ ᠬᠠᠭᠠᠨ ᠤ᠋ ᠨᠣᠢᠷ ᠬᠤᠯᠵᠢᠵᠤ᠂ ᠡᠷᠭᠢᠨ ᠬᠥᠷᠪᠡᠨ ᠬᠠᠷᠠ ᠨᠢᠳᠦ ᠬᠠᠮᠬᠢᠯ ᠦᠭᠡᠢ ᠦᠷ ᠦ᠋ᠨ ᠵᠢᠩ ᠲᠡᠢ ᠵᠣᠯᠭᠠᠵᠠᠢ᠃ ᠲᠡᠷᠡ ᠵᠣᠪᠠᠯᠠᠩ ᠢ᠋ ᠦᠯᠦ ᠮᠡᠳᠡᠬᠦ ᠲᠠᠯᠠᠮᠠᠨ ᠭᠤᠸᠠ ᠬᠠᠲᠤᠨ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠪᠥᠬᠡ ᠨᠣᠢᠷᠣᠨ ᠳ᠋ᠤ᠌ ᠭᠦᠨ ᠠᠪᠲᠠᠵᠤ ᠡᠩᠬᠦᠷᠡᠢ ᠵᠢᠭᠲᠡᠢᠬᠡᠨ ᠢ᠋ᠶ᠋ᠡᠷ ᠠᠮᠢᠰᠬᠤᠯᠯᠠᠵᠤ᠂ ᠲᠡᠷᠡ ᠭᠡᠮ ᠢ᠋ᠶ᠋ᠡᠷ ᠢᠰᠢᠭᠡᠨ ᠵᠢᠭᠠᠬᠠᠨ ᠴᠡᠭᠡᠵᠢ ᠨᠢ ᠣᠪᠣᠯᠵᠠᠨ ᠪᠠᠢᠪᠠ᠃ ᠶᠡᠷᠦ ᠴᠡᠭᠡᠵᠢ ᠵᠢᠵᠢᠭ᠂ ᠪᠡᠯᠬᠡᠭᠦᠰᠦ ᠨᠠᠷᠢᠨ᠂ ᠥᠭᠡᠵᠡᠭ ᠮᠢᠬᠠᠯᠢᠭ᠂ ᠲᠡᠰᠢᠶᠡ ᠠᠭᠤᠵᠢᠮ ᠬᠢᠲᠠᠳ ᠸᠠᠭᠠᠷ ᠰᠢᠭ᠋ ᠠᠮᠢᠲᠠᠨ ᠶᠤᠮ᠃ ᠬᠠᠪᠤᠯ ᠦᠷ ᠦ᠋ᠨ ᠬᠢᠷᠭᠠᠨ ᠢ᠋ᠶ᠋ᠠᠷ ᠳᠡᠭᠡᠭᠰᠢᠯᠡᠵᠦ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠮᠣᠷᠢᠯᠠᠪᠠᠯ ᠲᠤᠯᠭᠠ ᠳᠦᠭᠦᠷᠡᠩ ᠭᠠᠯ ᠪᠠᠳᠮᠠᠯᠠᠵᠤ᠂ ᠭᠡᠷ ᠳᠦᠭᠦᠷᠡᠩ ᠢᠯᠴᠢ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠲᠠᠶᠠ ᠨᠢᠭᠤᠷ ᠲᠥᠭᠡᠨᠡᠵᠦ ᠤᠭᠲᠤᠯᠠ᠃ ᠬᠠᠷᠯᠢ ᠬᠠᠲᠤᠨ ᠣᠯᠠᠨ ᠵᠠᠯᠠᠭᠤ ᠰᠢᠪᠡᠭᠴᠢᠨ ᠡᠮᠡᠰ ᠦ᠋ᠨ ᠳᠤᠮᠳᠠ ᠲᠣᠭᠣᠰ ᠮᠡᠲᠦ ᠲᠣᠳᠣᠷᠬᠠᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠲᠤᠶᠠᠭᠠᠷᠠᠵᠤ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠨᠠᠷᠠ ᠵᠥᠪ ᠲᠣᠭᠣᠷᠢᠭᠤᠯᠤᠨ ᠢᠳᠡᠭᠡ ᠪᠤᠳᠠᠭᠠ᠂ ᠰᠢᠭᠦᠰᠦ ᠵᠣᠭᠣᠭ ᠵᠠᠰᠠᠵᠤ ᠪᠠᠢᠵᠠᠢ᠃ ᠶᠡᠷᠦ ᠠᠯᠢ ᠴᠤ᠌ ᠠᠢᠮᠠᠭ ᠤ᠋ᠨ ᠬᠠᠨ ᠢᠷᠡᠭᠰᠡᠨ᠂ ᠶᠠᠮᠠᠷ ᠴᠤ᠌ ᠤᠯᠤᠰ ᠤ᠋ᠨ ᠡᠯᠴᠢ ᠢᠷᠡᠭᠰᠡᠨ ᠲᠠᠪᠠᠭ ᠤ᠋ᠨ ᠢᠳᠡᠭᠡ᠂ ᠭᠡᠷ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠬᠠᠪᠤᠯ ᠬᠠᠭᠠᠨ ᠨᠢᠭᠤᠷ ᠤᠯᠠᠢᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠲᠥᠷᠥ ᠶ᠋ᠢᠨ ᠬᠠᠲᠤᠨ ᠬᠠᠷᠯᠢ ᠺᠤ ᠶ᠋ᠢᠨ ᠪᠤᠶᠠᠨ ᠪᠠᠢᠵᠠᠢ ᠪᠢᠯᠡ᠃ ᠬᠠᠭᠠᠨ ᠰᠡᠨᠳᠡᠢ ᠳ᠋ᠡᠭᠡᠨ ᠵᠠᠯᠠᠷᠠᠭᠰᠠᠨ ᠦᠭᠡᠢ᠂ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠪᠠᠷᠠᠭᠤᠨ ᠬᠣᠢᠮᠣᠷ ᠲᠤ᠌ ᠲᠠᠯᠪᠢᠭᠰᠠᠨ ᠠᠷᠰᠯᠠᠨ ᠬᠥᠯ ᠲᠡᠢ ᠶᠠᠪᠠᠭᠠᠨ ᠰᠢᠷᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠵᠠᠪᠢᠯᠠᠬᠤ ᠳ᠋ᠤ᠌ ᠠᠶᠠᠭᠠᠴᠢ ᠥᠬᠢᠨ ᠲᠣᠭᠣᠭᠠᠨ ᠴᠢᠨᠡᠭᠡ ᠮᠥᠩᠭᠥᠨ ᠠᠶᠠᠭᠠ ᠣᠪᠣᠭᠠᠯᠠᠨ ᠬᠥᠰᠬᠥᠯᠡᠭᠰᠡᠨ ᠦᠬᠡᠷ ᠦ᠋ᠨ ᠠᠯᠠᠭ ᠮᠢᠬᠠᠨᠠ ᠠᠭᠠᠭ ᠬᠠᠩᠬᠤᠯᠵᠤ ᠰᠦ ᠪᠣᠯᠤᠭᠰᠠᠨ ᠴᠠᠢ ᠬᠢᠵᠦ ᠥᠭᠪᠡ᠃ ᠬᠠᠪᠤᠯ ᠲᠣᠰᠣᠨ ᠠᠪᠴᠤ ᠠᠮᠲᠠᠷᠬᠠᠨ ᠰᠤᠷᠤᠭᠠᠳ᠂
— ᠡᠯᠴᠢ ᠬᠦᠦ ᠬᠠᠮᠢᠭᠠ ᠪᠠᠢᠨᠠ? ᠭᠡᠪᠡᠯ ᠬᠠᠷᠯᠢ ᠺᠤ ᠬᠠᠲᠤᠨ᠂
— ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠲᠡᠷᠭᠡᠨ ᠦ᠌ ᠮᠥᠭᠡᠷ ᠡᠴᠡ ᠬᠦᠯᠢᠭᠡᠳ ᠬᠠᠶᠠᠴᠢᠬᠠᠭᠰᠠᠨ᠂ ᠳᠡᠷᠭᠡᠳᠡ ᠨᠢ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠵᠣᠭᠰᠣᠵᠤ ᠪᠠᠢᠨᠠ ᠪᠢᠯᠡ ᠭᠡᠬᠦ ᠳ᠋ᠦ᠍᠂
— ᠠᠪᠴᠢᠷᠠᠭᠤᠯ ᠭᠡᠯᠡ᠃ ᠬᠠᠷᠯᠢ ᠺᠤ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠡᠮᠡᠰ ᠦ᠋ᠨ ᠴᠢᠬᠢ ᠢᠯᠡᠭᠦᠦ ᠶ᠋ᠢ ᠮᠡᠳᠡᠬᠦ ᠲᠤᠯᠠ ᠨᠢᠭᠡᠨᠲᠡ ᠰᠢᠷᠪᠢ ᠲᠠᠲᠠᠬᠤ ᠳ᠋ᠤ᠌ ᠰᠢᠪᠡᠭᠴᠢᠨ ᠥᠬᠢᠳ ᠳᠣᠣᠷᠠ ᠳᠣᠣᠷᠠ ᠶ᠋ᠢᠨ ᠠᠵᠢᠯ ᠢ᠋ ᠣᠷᠬᠢᠭᠠᠳ ᠰᠠᠯᠬᠢ ᠮᠡᠲᠦ ᠴᠢᠮᠡᠭᠡ ᠦᠭᠡᠢ ᠭᠠᠷᠴᠤ ᠣᠳᠴᠠᠭᠠᠪᠠ᠃ ᠬᠠᠷᠯᠢ ᠺᠤ ᠬᠠᠭᠠᠨ ᠢ᠋ᠶ᠋ᠠᠨ ᠬᠠᠷᠠᠵᠤ ᠬᠠᠷᠠᠵᠤ ᠮᠡᠬᠦᠰᠬᠢᠨ ᠭᠠᠷᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠡᠭᠦᠳᠡᠨ ᠲᠤᠰ ᠭᠠᠵᠠᠷ ᠣᠴᠢᠵᠤ ᠵᠣᠭ ᠲᠣᠰᠣᠨ᠂
— ᠡᠷᠬᠢᠮ ᠳᠡᠭᠡᠳᠦᠰ ᠮᠢᠨᠢ! ᠮᠡᠯᠲᠡᠭ ᠪᠠᠭᠠᠲᠤᠷ ᠤ᠋ᠨ ᠳᠠᠭᠠᠭᠤᠯᠵᠤ ᠮᠣᠷᠳᠠᠭᠰᠠᠨ ᠡᠨᠡ ᠬᠦᠦ ᠬᠣᠲᠣᠯᠠ ᠨᠣᠶᠠᠨ ᠤ᠋ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠳᠠᠭᠠᠪᠤᠷᠢ ᠭᠡᠳᠡᠭ ᠢ᠋ ᠬᠠᠭᠠᠨ ᠲᠠ ᠪᠣᠯᠭᠣᠭᠠᠵᠤ ᠪᠣᠢ ᠪᠢᠵᠡ ᠠ᠋ ᠬᠡᠮᠡᠪᠡ᠃ ᠡᠬᠡ ᠬᠥᠮᠦᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠦᠷᠡ ᠶ᠋ᠢᠨ ᠲᠥᠯᠥᠭᠡ ᠯᠡ ᠡᠮᠲᠡᠷᠡᠵᠦ ᠶᠠᠪᠤᠭᠠ ᠨᠢ ᠡᠨᠡ ᠰᠠᠨᠵᠠᠢ᠃
~ ᠦᠷᠭᠦᠯᠵᠢᠯᠡᠯ ᠪᠣᠢ ~