ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ < ᠭᠤᠲᠠᠭᠠᠷ ᠪᠦᠯᠦᠭ 1–3> Бүлжхэн хатан– [монгол] Дамбын Төрбат <гутгар бүлэг 1–3>
124ᠪᠦᠯᠵᠢᠬᠢᠨ ᠬᠠᠲᠤᠨ– < ᠭᠤᠲᠠᠭᠠᠷ ᠪᠦᠯᠦᠭ 1–3>
《ᠠᠯᠲᠠᠨ ᠤᠯᠤᠰ ᠠᠷᠭᠠᠳᠠᠬᠤ ᠭᠡᠵᠦ ᠠᠷᠭᠠ ᠪᠠᠨ ᠪᠠᠷᠠᠪᠠ》
ᠳᠤᠯ ᠵᠢᠭᠠᠰᠤ ᠮᠡᠲᠦ ᠶᠠᠭᠤᠨ ᠳ᠋ᠤ᠌
ᠲᠤᠯᠪᠠᠷᠠᠨ ᠭᠠᠰᠠᠯᠤᠨᠠ ᠴᠢ
ᠲᠤᠭᠤᠷᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠪᠡᠬᠢᠯᠡᠶᠡ ᠭᠡᠵᠦ
ᠲᠤᠢᠯᠲᠠᠢ ᠦᠭᠡ ᠪᠡᠨ ᠬᠡᠯᠡᠯᠴᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ
ᠤᠰᠤᠨ ᠤ᠋ ᠵᠢᠭᠠᠰᠤ ᠮᠡᠲᠦ ᠶᠠᠭᠤᠨ ᠳ᠋ᠤ᠌
ᠤᠶᠠᠷᠠᠨ ᠭᠠᠰᠠᠯᠤᠨᠠ ᠴᠢ
ᠤᠯᠤᠰ ᠲᠥᠷᠥ ᠪᠡᠨ ᠪᠠᠢᠭᠤᠯᠤᠶᠠ ᠭᠡᠵᠦ
ᠤᠴᠢᠷᠲᠠᠢ ᠦᠭᠡ ᠪᠡᠨ ᠬᠡᠯᠡᠯᠴᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ᠃
《ᠠᠯᠲᠠᠨ ᠲᠣᠪᠴᠢ》
1
ᠬᠠᠮᠤᠭ ᠮᠣᠩᠭᠣᠯ ᠲᠠᠢ ᠬᠠᠶᠠᠭᠠ ᠨᠡᠢᠯᠡᠭᠰᠡᠨ ᠲᠡᠦᠬᠡᠨ ᠳ᠋ᠦ᠍ ᠠᠯᠲᠠᠨ ᠤᠯᠤᠰ ᠡᠢᠨ ᠬᠦᠨᠳᠦᠯᠡᠯ ᠦᠵᠡᠭᠦᠯᠵᠦ ᠪᠠᠢᠭᠰᠠᠨ ᠲᠡᠦᠬᠡ ᠦᠭᠡᠢ ᠶᠦᠮ᠃ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠲᠦᠮᠡᠨ ᠲᠦᠰᠢᠮᠡᠯ ᠦ᠋ᠨ ᠲᠡᠷᠢᠭᠦᠨ ᠨᠣᠶᠠᠳ ᠴᠠᠴᠠᠷ ᠪᠠᠷᠢᠨ ᠵᠠᠮ ᠲᠣᠰᠴᠤ᠂ ᠲᠠᠲᠠᠷ ᠪᠠᠷᠢᠭᠰᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠪᠬᠤᠷ ᠬᠠᠮᠠᠭᠠᠯᠠᠨ ᠶᠡᠬᠡ ᠬᠣᠲᠠᠨ ᠤ᠋ ᠪᠠᠨ ᠪᠣᠱᠣᠭᠠ ᠠᠯᠬᠤᠭᠤᠯᠵᠠᠢ᠃ ᠦᠵᠢᠮᠡᠢ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠤᠳ ᠬᠢᠭᠡᠳ ᠭᠦᠩᠵᠦ᠂ ᠬᠣᠩ ᠲᠠᠢᠵᠢ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠠᠯᠲᠠ ᠮᠥᠩᠭᠥ᠂ ᠬᠣᠷᠭᠣᠢ ᠲᠣᠷᠭᠠ ᠪᠣᠯᠤᠭᠰᠠᠭᠠᠷ ᠤᠭᠲᠤᠵᠤ᠂
— ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠪᠠᠭᠠᠲᠤᠷ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠨᠢ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠢᠨᠦ ᠠᠯᠪᠠᠲᠤ ᠣᠯᠠᠨ ᠳ᠋ᠤ᠌ ᠦᠯᠢᠭᠡᠷ ᠪᠣᠯᠤᠨ ᠶᠠᠷᠢᠭᠳᠠᠬᠤ ᠪᠢᠵᠡ ᠠ᠋᠁ ᠭᠡᠵᠦ ᠠᠮᠠᠨ ᠤ᠋ ᠪᠡᠯᠭᠡ ᠲᠡᠢ ᠦᠭᠡ ᠬᠡᠯᠡᠵᠦ᠂ ᠨᠢᠭᠤᠷ ᠳᠦᠭᠦᠷᠡᠩ ᠮᠢᠰᠢᠯᠵᠡᠨ ᠠᠭᠤᠯᠵᠠᠵᠤ ᠠᠪᠠᠢ᠃
ᠲᠡᠢᠨ ᠡᠬᠢᠯᠡᠭᠰᠡᠨ ᠶᠠᠷᠢᠶᠠ ᠬᠥᠭᠡᠷᠦᠭᠡ᠂ ᠨᠠᠷᠭᠢᠶᠠᠨ ᠨᠠᠭᠠᠳᠤᠮ ᠬᠢᠭᠡᠳ ᠨᠠᠢᠷ ᠬᠤᠷᠢᠮ ᠤ᠋ᠨ ᠴᠢᠮᠡᠭ ᠲᠡᠢ ᠪᠡᠷ ᠰᠠᠷᠠ ᠭᠠᠷᠤᠢ ᠦᠷᠭᠦᠯᠵᠢᠯᠡᠬᠦ ᠳ᠋ᠦ᠍ ᠶᠠᠭᠤ ᠲᠠᠢ ᠴᠤ᠌ ᠬᠠᠮᠤᠭ ᠮᠣᠩᠭᠣᠯᠴᠤᠳ ᠠᠯᠳᠠᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠴᠡᠭᠡᠵᠢᠨ ᠦ᠌ ᠰᠤᠸᠠᠮᠫᠠᠨ ᠭᠦᠶᠦᠯᠭᠡᠵᠦ ᠦᠵᠡᠪᠡᠯ ᠰᠢᠫᠢᠩ ᠭᠣᠣᠯ ᠠ᠋ᠴᠠ ᠬᠣᠢᠰᠢᠬᠢ ᠬᠣᠷᠢᠨ ᠳᠣᠯᠣᠭᠠᠨ ᠴᠠᠢᠵᠠ ᠶ᠋ᠢ ᠮᠣᠩᠭᠣᠯ ᠳ᠋ᠤ᠌ ᠮᠡᠳᠡᠭᠦᠯᠵᠦ ᠦᠭᠭᠦᠭᠰᠡᠨ ᠪᠠᠢᠪᠠ᠃ ᠮᠣᠷᠢᠲᠠᠨ ᠡᠷᠡᠰ ᠡᠴᠡ ᠬᠠᠮᠠᠭᠠᠯᠠᠵᠤ᠂ ᠶᠠᠯᠠᠲᠠᠨ ᠬᠢᠲᠠᠳ ᠢ᠋ᠶ᠋ᠠᠷ ᠪᠠᠷᠢᠭᠤᠯᠤᠭᠰᠠᠨ ᠡᠨᠡ ᠣᠯᠠᠨ ᠴᠠᠢᠵᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠥᠷᠥᠩᠭᠡ ᠮᠥᠨ ᠲᠡᠳᠦᠢ ᠴᠦ᠍ ᠣᠨᠢᠰᠣᠭᠠ ᠮᠡᠲᠦ ᠵᠠᠩᠨᠠᠵᠤ ᠨᠠᠢᠷ ᠲᠠᠯᠪᠢᠨ ᠦᠭᠭᠦᠭᠰᠡᠨ ᠪᠣᠯᠠᠢ᠃
— ᠪᠡᠯᠡᠭ ᠥᠭᠴᠦ ᠪᠠᠢᠬᠤ ᠳ᠋ᠤ᠌ ᠡᠯᠢᠭᠡ ᠪᠤᠷᠤᠭᠤᠯᠠᠵᠤ ᠶᠠᠭᠤᠨᠠ ᠭᠠᠷ ᠲᠠᠲᠠᠬᠤ ᠪᠢᠯᠡ᠂ ᠥᠭᠭᠦᠭᠰᠡᠨ ᠢ᠋ ᠠᠪᠤᠶᠠ ᠭᠡᠳ ᠬᠠᠪᠤᠯ ᠬᠠᠭᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ ᠮᠥᠨᠥᠬᠡᠨ ᠲᠡᠷᠢᠭᠦᠯᠡᠵᠦ ᠣᠴᠢᠭᠰᠠᠨ ᠰᠢᠶᠣᠤ ᠪᠢᠶᠣᠤ ᠱᠣ᠌ᠥ᠋ ᠨᠦ ᠰᠠᠢᠳ ᠴᠡᠪᠡᠷᠬᠡᠨ ᠮᠣᠩᠭᠣᠯ ᠬᠡᠯᠡ ᠪᠡᠷ᠂
— ᠣᠷᠣ ᠭᠡᠬᠦ ᠳ᠋ᠦ᠍ ᠱᠠᠭᠠᠢᠪᠠ᠂ ᠦᠢᠴᠢ ᠭᠡᠬᠦ ᠳ᠋ᠦ᠍ ᠭᠡᠳᠡᠢᠪᠡ ᠭᠡᠳᠡᠭ ᠪᠢᠯᠡ ᠤᠤ ᠭᠡᠳ ᠶᠡᠬᠡ ᠳᠠᠭᠤ ᠪᠠᠷ ᠳᠡᠰ ᠳᠡᠰ ᠬᠥᠬᠥᠷᠡᠵᠦ ᠪᠢᠯᠡ᠃ ᠶᠡᠷᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢᠳᠠᠷ ᠶᠡᠬᠡᠰ ᠡᠢᠮᠦ ᠯᠡ ᠳᠠᠪᠬᠤᠷ ᠪᠣᠳᠣᠯ ᠲᠠᠢ ᠤᠯᠤᠰ᠃ ᠬᠠᠪᠤᠯ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠰᠢᠷᠢᠳᠡᠭ ᠳᠣᠯᠢᠶᠠᠴᠢᠬᠠᠬᠤ ᠭᠡᠳ ᠪᠠᠢᠭᠰᠠᠨ ᠨᠠᠬᠢᠯᠵᠠᠭᠤᠷ ᠵᠠᠩ ᠣᠷᠣ ᠠᠷᠢᠯᠵᠤ᠂ ᠳᠡᠷᠭᠡᠳᠡ ᠶ᠋ᠢᠨ ᠪᠠᠷᠠ ᠪᠣᠯᠤᠭᠴᠢᠳ ᠢ᠋ᠶ᠋ᠠᠨ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠲᠠᠰᠢᠭᠤᠷᠳᠠᠵᠤ᠂ ᠦᠭᠡ ᠪᠡᠷ ᠢ᠋ᠶ᠋ᠡᠨ ᠴᠠᠭᠠᠵᠠᠯᠠᠬᠤ ᠡᠷᠬᠡᠲᠦ ᠨᠢᠭᠡᠨ ᠪᠣᠯᠵᠠᠢ᠃ ᠦᠵᠢᠮᠡᠢ ᠬᠠᠭᠠᠨ ᠰᠢᠳᠠᠷ ᠢ᠋ᠶ᠋ᠠᠨ ᠰᠠᠢᠰᠢᠶᠠᠨ ᠬᠤᠨᠳᠠᠭᠠ ᠱᠠᠩᠨᠠᠵᠤ᠂
一 ᠲᠦᠮᠡᠨ ᠭᠠᠵᠠᠷ ᠤ᠋ᠨ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠴᠢᠨᠠᠳᠤ ᠨᠤᠲᠤᠭ ᠢ᠋ ᠲᠦᠪᠰᠢᠳᠬᠡᠬᠦ ᠳ᠋ᠦ᠍ ᠰᠢᠶᠣᠤ ᠣᠪᠣᠭᠲᠠᠨ ᠤ᠋ ᠣᠷᠣᠭᠤᠯᠤᠭᠰᠠᠨ ᠨᠡᠮᠡᠷᠢ ᠦᠯᠡᠮᠵᠢᠬᠡᠨ ᠶᠦᠮ᠃ ᠬᠠᠷᠠᠮᠰᠠᠯ ᠲᠠᠢ ᠨᠢ ᠬᠠᠪᠤᠯ ᠪᠠᠭᠠᠲᠤᠷ ᠲᠠ ᠸᠠᠩ ᠬᠡᠷᠬᠡᠮ ᠢ᠋ ᠮᠢᠨᠢ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ ᠭᠠᠷᠭᠠᠵᠤ ᠡᠭᠡᠭᠦᠯᠵᠦ ᠢᠯᠡᠭᠡᠭᠰᠡᠨ ᠪᠢᠯᠡ᠃ ᠶᠡᠬᠡ ᠬᠡᠷᠡᠭ ᠪᠦᠲᠦᠭᠡᠵᠦ ᠢᠷᠡᠭᠰᠡᠨ ᠰᠢᠶᠣᠤ ᠣᠪᠣᠭᠲᠠᠨ ᠳ᠋ᠤ᠌ ᠸᠠᠩ ᠬᠡᠷᠬᠡᠮ ᠱᠠᠩᠨᠠᠭᠰᠠᠨ᠂ ᠲᠡᠢᠮᠦ ᠶ᠋ᠢᠨ ᠤᠴᠢᠷ ᠮᠢᠨᠦ ᠣᠷᠳᠣᠨ ᠤ᠋ ᠲᠣᠯᠣᠭᠠᠢ ᠲᠠᠢ ᠪᠦᠭᠦᠳᠡ ᠰᠥᠬᠥᠷᠡᠵᠦ ᠪᠠᠢᠳᠠᠭ ᠶᠤᠮ ᠬᠡᠮᠡᠬᠦ ᠳ᠋ᠦ᠍᠂
一 ᠵᠠ ᠲᠡᠢᠮᠦ ᠪᠢᠯᠡ ᠭᠡᠵᠦ ᠰᠢᠶᠣᠤ ᠣᠪᠣᠭᠲᠤ ᠰᠠᠢᠪᠤᠷᠯᠠᠨ ᠭᠦᠶᠦᠬᠦ ᠠᠵᠢ᠃ ᠳᠠᠯᠳᠠ ᠰᠠᠨᠠᠭᠠ᠂ ᠳᠠᠪᠬᠤᠷ ᠨᠡᠭᠦᠳᠡᠯ ᠢ᠋ ᠨᠢ ᠬᠠᠪᠤᠯ ᠬᠠᠭᠠᠨ ᠠᠯᠠᠭᠠᠨ ᠤ᠋ ᠪᠠᠨ ᠬᠡ ᠰᠢᠭ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠬᠠᠷᠠᠵᠤ ᠰᠠᠭᠤᠪᠠ᠃ ᠴᠢᠩᠭᠢᠲᠡᠯᠡ ᠭᠤᠨᠢᠭ ᠲᠤ᠌ ᠠᠪᠲᠠᠭᠰᠠᠨ ᠨᠢᠭᠡᠨ ᠬᠠᠷᠠᠴᠠ ᠭᠠᠵᠠᠷ ᠱᠠᠭᠠᠢᠵᠤ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠠᠩᠰᠤᠭ ᠰᠢᠷᠡᠭᠡᠨ ᠦ᠌ ᠴᠠᠮᠢᠨ ᠵᠢᠮᠢᠰ ᠳᠠᠪᠠᠭᠤᠯᠵᠤ ᠥᠪᠡᠷ ᠳᠡᠭᠡᠷᠡ ᠨᠢ ᠲᠤᠰᠬᠤ ᠶ᠋ᠢ ᠬᠠᠭᠠᠨ ᠮᠡᠳᠡᠷᠡᠵᠡᠢ᠃ ᠶᠡᠷᠦ ᠨᠢ ᠬᠡᠨ ᠪᠠᠢᠵᠤ ᠪᠣᠯᠬᠤ ᠪᠢᠯᠡ᠃ ᠲᠡᠷᠡ ᠪᠡᠷ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠠᠯᠲᠠᠨ ᠰᠡᠷᠡᠭᠡ᠂ ᠮᠥᠩᠭᠥᠨ ᠲᠠᠢᠵᠠ(ᠳ᠋ᠡᠶᠧᠽᠢ)᠂ ᠬᠠᠰ ᠵᠦᠩᠵᠡ ᠪᠠᠷᠢᠨ ᠭᠦᠶᠦᠯᠳᠦᠬᠦ ᠠᠶᠠᠭᠠᠴᠢ᠂ ᠬᠤᠨᠳᠠᠭᠠᠴᠢ ᠨᠠᠷ ᠤ᠋ᠨ ᠵᠠᠪᠰᠠᠷ ᠵᠠᠭᠠᠯᠢᠬᠠᠢ ᠪᠠᠷ ᠬᠠᠷᠠᠪᠠᠯ ᠠᠴᠢ ᠨᠠᠷ ᠲᠠᠢ ᠨᠢ ᠰᠠᠴᠠᠭᠤ ᠪᠠᠢᠯᠲᠠᠢ ᠵᠢᠭᠠᠯ ᠬᠦᠦ ᠠᠮᠠ ᠳᠦᠭᠦᠷᠡᠩ ᠰᠢᠭᠦᠰᠦ ᠲᠡᠢ ᠵᠢᠮᠢᠰ ᠢ᠋ ᠤᠷᠮᠠ ᠦᠭᠡᠢ ᠵᠠᠵᠢᠯᠵᠤ᠂ ᠡᠵᠢ ᠨᠢ ᠪᠣᠯᠤᠯᠲᠠᠢ ᠭᠤᠸᠠ ᠵᠠᠯᠠᠭᠤ ᠬᠠᠲᠤᠨ ᠬᠦᠦ ᠶ᠋ᠢ ᠠᠷᠭᠠᠳᠠᠵᠤ ᠶᠠᠮᠠᠷ ᠨᠢᠭᠡ ᠶ᠋ᠢ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠨ ᠬᠥᠮᠦᠰ ᠦ᠋ᠨ ᠨᠢᠳᠦ ᠬᠠᠷᠢᠭᠤᠯᠤᠨ᠂ ᠬᠠᠭᠠᠨ ᠢ᠋ ᠰᠡᠮᠬᠡᠨ ᠠᠵᠢᠪᠠ᠃ ᠶᠠᠷᠢᠶᠠᠨ ᠦᠭᠡᠢ ᠲᠠᠨᠢᠳᠠᠭ ᠴᠢᠷᠠᠢ ᠮᠥᠨ᠃ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠤ᠋ᠨ ᠴᠢᠭᠤᠯᠭᠠᠨ ᠳ᠋ᠤ᠌ ᠬᠠᠷᠠᠭᠰᠠᠨ ᠪᠢᠯᠡ ᠤᠤ᠂ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠤ᠋ᠨ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠦᠵᠡᠭᠰᠡᠨ ᠪᠢᠯᠡ ᠤᠤ᠁ ᠡᠢᠮᠦ ᠨᠢᠳᠦ ᠶ᠋ᠢ ᠬᠠᠷᠠᠭᠰᠠᠨ ᠡᠷᠡ ᠮᠠᠷᠲᠠᠬᠤ ᠯᠠ ᠤᠴᠢᠷ ᠦᠭᠡᠢ ᠬᠠᠷᠠᠴᠠ ᠪᠠᠢᠪᠠ᠃
ᠡᠨᠡ ᠮᠡᠲᠦ ᠶ᠋ᠢ ᠬᠠᠷᠠᠬᠤ᠂ ᠪᠣᠳᠣᠬᠤ ᠬᠤᠭᠤᠴᠠᠭᠠ ᠥᠭᠴᠦ ᠠᠯᠲᠠᠨ ᠲᠠᠢᠵᠠᠨᠠ ᠣᠪᠣᠭᠠᠯᠠᠭᠰᠠᠨ ᠤᠰᠤᠨ ᠦᠵᠦᠮ ᠡᠴᠡ ᠰᠢᠷᠬᠡᠭ ᠲᠡᠳᠦᠢ ᠶ᠋ᠢ ᠡᠮᠬᠦᠵᠦ ᠤᠳᠠᠭᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠵᠢᠮᠡᠢ᠂
— ᠠᠢᠯ ᠬᠦᠷᠰᠢ ᠤᠯᠤᠰ ᠪᠣᠯᠬᠣᠷ ᠲᠠᠨᠢᠳᠠᠭ ᠮᠡᠳᠡᠳᠡᠭ ᠴᠢᠷᠠᠢ ᠲᠠᠭᠠᠷᠠᠵᠤ ᠤᠴᠠᠷᠠᠵᠤ ᠴᠤ᠌ ᠪᠣᠯᠬᠤ ᠶᠤᠮ ᠳᠠ ᠭᠡᠵᠦ ᠪᠢᠲᠡᠭᠦᠦ ᠤᠳᠬᠠ ᠲᠠᠢ ᠦᠭᠡ ᠪᠡᠷ ᠲᠦᠩᠰᠢᠭᠰᠡᠨ ᠢ᠋ᠶ᠋ᠡᠨ᠂
— ᠠᠳᠤᠭᠤᠨ ᠤ᠋ ᠪᠠᠨ ᠬᠢᠷᠢ ᠪᠡᠷ ᠢᠰᠬᠡᠷ ᠭᠡᠳᠡᠭ ᠪᠢᠯᠡ ᠤᠤ! ᠭᠡᠵᠦ ᠠᠰᠠᠭᠤᠪᠠ᠃ ᠬᠠᠪᠤᠯ ᠬᠠᠭᠠᠨ ᠮᠥᠨᠥᠬᠢ ᠭᠤᠨᠢᠭ ᠲᠤ᠌ ᠠᠪᠲᠠᠭᠰᠠᠨ ᠬᠦᠦ ᠡᠴᠡ ᠬᠠᠷᠠᠴᠠ ᠰᠠᠯᠭᠠᠵᠤ᠂
— ᠲᠠᠨ ᠤ᠋ ᠨᠣᠶᠠᠳ ᠲᠤ᠌ ᠬᠡᠯᠡᠬᠦ ᠭᠡᠵᠦ ᠮᠠᠨ ᠤ᠋ ᠠᠯᠪᠠᠲᠤ ᠨᠠᠷ ᠤ᠋ᠨ ᠵᠣᠬᠢᠶᠠᠭᠰᠠᠨ ᠦᠭᠡ ᠶᠦᠮ ᠭᠡᠨᠡ ᠯᠠᠢ ᠭᠡᠬᠦ ᠳ᠋ᠦ᠍ ᠦᠵᠢᠮᠡᠢ ᠳᠡᠰ ᠳᠡᠰ ᠢᠨᠢᠶᠡᠨ᠂
— ᠴᠡᠴᠡᠨ ᠠᠯᠪᠠᠲᠤ ᠲᠠᠢ ᠬᠥᠮᠦᠨ ᠶᠦᠮ ᠭᠡᠪᠡ᠃ ᠬᠠᠪᠤᠯ ᠬᠠᠭᠠᠨ᠂
— ᠮᠡᠷᠭᠡᠨ ᠢ᠋ ᠨᠢ ᠪᠠᠰᠠ ᠮᠠᠷᠲᠠᠭᠤᠵᠠᠢ ᠭᠡᠬᠦ ᠳ᠋ᠦ᠍ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠴᠢᠷᠠᠢ ᠲᠥᠪ ᠪᠣᠯᠵᠤ᠂
— ᠬᠠᠪᠤᠯ ᠪᠠᠭᠠᠲᠤᠷ ᠲᠠ ᠨᠡᠬᠡᠯ ᠬᠠᠲᠠᠭᠤ ᠬᠥᠮᠦᠨ ᠶᠦᠮ ᠭᠡᠳ ᠰᠠᠨᠠᠭᠠ ᠠᠯᠳᠠᠵᠤ᠂
— ᠡᠪᠦᠭᠡᠨ ᠬᠠᠭᠠᠨ ᠪᠢ ᠵᠢᠯ ᠪᠦᠷᠢ ᠲᠠᠨ ᠳ᠋ᠤ᠌ ᠠᠮᠤᠨ ᠤ᠋ ᠠᠯᠪᠠ ᠡᠷᠭᠦᠵᠦ ᠪᠠᠢᠶᠠ ᠠ᠋᠁ ᠭᠡᠬᠦ ᠳ᠋ᠦ᠍ ᠬᠠᠪᠤᠯ᠂
— ᠦᠬᠡᠷ ᠰᠦᠷᠦᠭ ᠴᠢᠨᠢ ᠡᠭᠦᠳᠡ ᠪᠡᠷ ᠱᠠᠭᠠᠢᠬᠤ ᠠᠯᠳᠠᠮᠠ ᠣᠯᠠᠨ᠂ ᠬᠣᠨᠢᠨ ᠰᠦᠷᠦᠭ ᠴᠢᠨᠢ ᠬᠣᠲᠠ ᠳᠦᠭᠦᠷᠡᠩ ᠨᠠᠯᠠᠢᠵᠤ ᠪᠠᠢᠨᠠ ᠭᠡᠵᠦ ᠳᠤᠭᠤᠯᠳᠠᠭᠰᠠᠨ ᠬᠡᠮᠡᠵᠡᠢ᠃
ᠠᠯᠲᠠᠨ ᠤᠯᠤᠰ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠦᠬᠡᠷ᠂ ᠬᠣᠨᠢ᠂ ᠠᠮᠤᠨ ᠤ᠋ ᠠᠯᠪᠠ ᠡᠷᠭᠦᠵᠦ ᠪᠠᠢᠬᠤ ᠪᠠᠷ ᠡᠢᠨ ᠲᠣᠬᠢᠷᠠᠭᠰᠠᠨ ᠨᠢ ᠶᠡᠬᠡ ᠪᠠᠭᠤᠯᠲᠠ ᠪᠠᠢᠪᠠ᠃ ᠶᠡᠷᠦ ᠬᠠᠮᠤᠭ ᠮᠣᠩᠭᠣᠯ ᠠᠯᠪᠠ ᠲᠠᠲᠠᠪᠤᠷᠢ ᠥᠭᠴᠦ ᠶᠠᠪᠤᠭᠰᠠᠨ ᠠ᠋ᠴᠠ ᠠᠪᠴᠤ ᠶᠠᠪᠤᠭᠰᠠᠨ ᠲᠡᠦᠬᠡ ᠬᠣᠪᠣᠷ ᠶᠤᠮ᠃ ᠲᠡᠢᠨ ᠬᠥᠯ ᠪᠣᠯᠤᠭᠰᠠᠨ ᠨᠠᠢᠷ ᠨᠠᠭᠠᠳᠤᠮ᠂ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠬᠠᠪᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠳ᠋ᠤ᠌ ᠡᠬᠢᠯᠡᠵᠦ᠂ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠰᠢᠪᠲᠤᠷᠠᠭᠠ ᠪᠠᠷ ᠬᠣᠲᠠ ᠳᠠᠶᠠᠭᠠᠷ ᠢ᠋ ᠬᠠᠮᠤᠷᠤᠭᠰᠠᠨ ᠶᠡᠬᠡ ᠪᠤᠳᠠᠭᠠᠯᠠᠭᠠ ᠪᠠᠷ ᠥᠨᠳᠥᠷᠯᠡᠵᠦ ᠪᠢᠯᠡ᠃
ᠬᠠᠪᠤᠯ ᠬᠠᠭᠠᠨ ᠢ᠋ ᠲᠥᠷᠥ ᠶ᠋ᠢᠨ ᠡᠵᠡᠨ ᠦᠵᠢᠮᠡᠢ ᠲᠥᠭᠡ ᠴᠦ᠍ ᠳᠡᠷᠭᠡᠳᠡ ᠡᠴᠡ ᠪᠡᠨ ᠬᠣᠯᠠᠳᠤᠭᠤᠯᠤᠭᠰᠠᠨ ᠦᠭᠡᠢ ᠪᠣᠯᠠᠢ᠃ ᠲᠡᠷᠡ ᠪᠡᠷ ᠲᠠᠯᠠ ᠶ᠋ᠢᠨ ᠪᠠᠭᠠᠲᠤᠷ ᠡᠷᠡ ᠡᠴᠡ ᠦᠶᠡ ᠮᠤᠯᠲᠤᠷᠠᠭᠰᠠᠨ ᠠᠬᠠ ᠬᠡᠳᠦᠢ ᠴᠦ᠍ ᠬᠠᠭᠠᠨ ᠬᠡᠷᠡᠮ ᠦ᠋ᠨ ᠳᠣᠲᠣᠷᠠ ᠥᠪᠡᠷ ᠥᠪᠡᠷ ᠦ᠋ᠨ ᠣᠷᠳᠣᠨ ᠪᠦᠬᠦᠢ ᠭᠤᠴᠢᠨ ᠳᠣᠯᠣᠭᠠᠨ ᠡᠷᠬᠡ ᠬᠠᠲᠤᠨ ᠲᠠᠢ ᠠᠭᠠᠳ ᠲᠠᠢᠭᠠᠨ ᠡᠷᠡᠰ ᠢ᠋ᠶ᠋ᠡᠷ ᠪᠣᠱᠣᠭᠠ ᠶ᠋ᠢ ᠨᠢ ᠰᠠᠬᠢᠭᠤᠯᠤᠭᠰᠠᠨ ᠮᠢᠩᠭᠠ ᠭᠠᠷᠤᠢ ᠲᠠᠲᠠᠪᠤᠷᠢ ᠡᠮᠡᠰ ᠲᠡᠢ ᠠᠵᠢ᠃ ᠤᠯᠤᠰ᠂ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠵᠠᠶᠠᠭᠠ ᠶ᠋ᠢ ᠥᠮᠥᠭᠡᠷᠡᠵᠦ ᠠᠮᠠ ᠮᠤᠷᠤᠢᠬᠤ ᠴᠠᠭ ᠪᠠᠢᠳᠠᠭ ᠴᠤ᠌ ᠨᠠᠢᠷ ᠤ᠋ᠨ ᠴᠢᠯᠥᠭᠡ᠂ ᠨᠠᠭᠠᠳᠤᠮ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠪᠠᠰᠠ ᠬᠦ᠌ ᠡᠷᠡ ᠬᠥᠮᠦᠨ ᠰᠢᠭ ᠵᠠᠩᠨᠠᠵᠤ ᠬᠤᠨᠳᠠᠭᠠ ᠳᠠᠷᠠᠰᠤ ᠬᠤᠪᠢᠶᠠᠨ ᠪᠠᠯᠭᠤᠵᠤ ᠬᠠᠭᠠᠨ ᠬᠥᠮᠦᠨ ᠦ᠌ ᠵᠢᠷᠭᠠᠯ᠂ ᠵᠣᠪᠠᠯᠠᠩ ᠢ᠋ ᠬᠦᠦᠷᠨᠢᠬᠦ ᠨᠢ ᠪᠠᠰᠠ ᠪᠣᠢ᠃ ᠡᠢᠨ ᠬᠠᠭᠠᠨ ᠬᠡᠷᠡᠮᠦᠨ ᠳ᠋ᠦ᠍ ᠡᠪᠦᠯ ᠦ᠋ᠨ ᠴᠠᠰᠤ ᠬᠠᠢᠯᠵᠤ᠂ ᠬᠠᠪᠤᠷ ᠤ᠋ᠨ ᠤᠷᠢ ᠢᠷᠡᠵᠦ ᠪᠠᠢᠬᠤ ᠳ᠋ᠤ᠌ ᠬᠥᠬᠡ ᠵᠦᠩ ᠥᠷᠥᠵᠦ ᠲᠠᠯᠪᠢᠭᠰᠠᠨ ᠶᠠᠪᠠᠭᠠᠨ ᠵᠠᠮ ᠢ᠋ᠶ᠋ᠠᠷ ᠠᠢᠰᠤᠢ ᠴᠡᠴᠡᠭ ᠦ᠋ᠨ ᠦᠨᠦᠷ ᠪᠠᠶᠠᠰᠤᠯ ᠬᠦᠦᠷᠨᠢᠵᠦ ᠰᠠᠯᠬᠢᠯᠠᠳᠠᠭ ᠠᠪᠠᠢ᠃ ᠨᠢᠭᠡ ᠤᠳᠠᠭᠠ ᠬᠠᠪᠤᠯ ᠪᠤᠢᠯᠠᠰᠤ ᠴᠡᠴᠡᠭᠯᠡᠭᠰᠡᠨ ᠪᠤᠲᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠮᠥᠨᠥᠬᠡᠨ ᠭᠤᠨᠢᠭᠲᠤ ᠬᠦᠦ ᠶ᠋ᠢᠨ ᠨᠢᠳᠦ ᠰᠢᠷᠲᠡᠨ ᠪᠠᠢᠬᠤ ᠶ᠋ᠢ ᠵᠦᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠦ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠦᠵᠢᠮᠡᠢ ᠬᠠᠭᠠᠨ ᠰᠢᠪᠢᠩ ᠭᠣᠣᠯ ᠢ᠋ᠶ᠋ᠠᠷ ᠵᠠᠯᠭᠠᠳᠠᠭ ᠬᠢᠯᠢ ᠶ᠋ᠢᠨ ᠲᠤᠬᠠᠢ ᠪᠣᠳᠣᠯ ᠳ᠋ᠠᠭᠠᠨ ᠠᠪᠲᠠᠵᠤ᠂
— ᠬᠣᠶᠠᠷ ᠪᠢᠰᠢ᠂ ᠭᠤᠷᠪᠠ ᠪᠢᠰᠢ᠂ ᠬᠣᠷᠢᠨ ᠳᠣᠯᠣᠭᠠᠨ ᠴᠠᠢᠵᠠ ᠰᠢᠦ ᠭᠡᠳ ᠬᠠᠪᠤᠯ ᠬᠠᠭᠠᠨ ᠢ᠋ ᠠᠵᠢᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠᠭᠠ᠂ ᠰᠠᠨᠠᠭᠠ ᠬᠣᠶᠠᠷ ᠨᠢ ᠣᠭᠲᠣ ᠥᠭᠡᠷᠡ ᠵᠦᠭ ᠲᠦ᠍ ᠬᠠᠨᠳᠤᠭᠰᠠᠨ ᠢ᠋ ᠭᠠᠢᠬᠠᠨ ᠠᠩᠵᠠᠭᠠᠷᠠᠵᠤ ᠮᠥᠷᠥ ᠶ᠋ᠢ ᠨᠢ ᠳᠠᠪᠠᠭᠤᠯᠤᠨ ᠪᠣᠢᠯᠠᠰᠤᠨ ᠪᠤᠲᠠ ᠤᠷᠤᠭᠤ ᠬᠠᠷᠠᠨ᠂
— ᠲᠤᠭᠤᠷᠢᠯ᠂ ᠴᠢ ᠨᠠᠭᠠᠰᠢ ᠢᠷᠡ! ᠭᠡᠯᠡ᠃
ᠬᠠᠪᠤᠯ ᠰᠠᠶᠢ ᠰᠠᠨᠠᠪᠠ᠃ ᠮᠥᠨᠥᠬᠡᠨ ᠬᠠᠭᠠᠨ ᠰᠣᠶᠣᠷᠬᠠᠯ ᠤ᠋ᠨ ᠶᠡᠬᠡ ᠨᠠᠢᠷ ᠲᠤ᠌ ᠲᠠᠩᠰᠤᠭ ᠰᠢᠷᠡᠭᠡᠨ ᠦ᠌ ᠳᠠᠷᠴᠤᠭ ᠪᠤᠯᠤᠩ ᠳ᠋ᠤ᠌ ᠪᠦᠯᠲᠡᠭᠡᠨᠡᠵᠦ ᠰᠠᠭᠤᠭᠰᠠᠨ ᠵᠢᠭᠠᠯ ᠬᠦᠦ ᠳᠣᠮᠣᠭᠲᠤ ᠬᠡᠷᠡᠢᠳ ᠦ᠋ᠨ ᠳᠣᠯᠣᠭᠠᠨ ᠦᠶᠡ ᠵᠠᠯᠭᠠᠭᠰᠠᠨ ᠲᠣᠭᠰᠢᠨ ᠮᠠᠷᠬᠤᠰ ᠤ᠋ᠨ ᠠᠴᠢ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠠᠵᠢ᠃ ᠪᠢᠰᠢᠭᠦᠢ ᠯᠡ ᠠᠭᠤᠯᠵᠠᠨ ᠤᠴᠠᠷᠠᠵᠤ ᠶᠠᠪᠤᠭᠰᠠᠨ ᠠᠲᠠᠯᠠ ᠲᠠᠨᠢᠭᠰᠠᠨ ᠦᠭᠡᠢ᠃ ᠪᠢ ᠥᠲᠡᠯᠵᠦ ᠪᠠᠢᠨᠠ ᠳᠠ ᠭᠡᠵᠦ ᠬᠠᠪᠤᠯ ᠭᠤᠨᠢᠭᠯᠠᠩᠭᠤᠢ ᠪᠣᠳᠣᠪᠠ᠃ ᠪᠤᠯᠠᠭᠠᠨ ᠵᠠᠬᠠ ᠲᠠᠢ ᠬᠣᠷᠭᠣᠢ ᠡᠯᠢᠭᠡᠪᠴᠢ ᠡᠮᠦᠰᠴᠦ᠂ ᠠᠯᠲᠠᠨ ᠲᠣᠨᠣᠭ ᠲᠠᠢ ᠰᠣᠷᠣᠨ ᠪᠦᠰᠡ ᠪᠦᠰᠡᠯᠡᠭᠰᠡᠨ ᠲᠣᠭᠣᠷᠢᠯ ᠭᠦᠶᠦᠨ ᠢᠷᠡᠵᠦ ᠰᠥᠭᠥᠳᠬᠦ ᠳ᠋ᠦ᠍ ᠴᠢᠷᠠᠢ ᠨᠢ ᠴᠣᠩᠬᠢᠢᠵᠤ᠂ ᠨᠢᠳᠦ ᠨᠢ ᠬᠥᠩᠬᠥᠢᠭᠰᠡᠨ ᠬᠠᠷᠠᠭᠳᠠᠨᠠ᠃ ᠨᠤᠲᠤᠭ ᠤᠰᠤ ᠪᠠᠨ᠂ ᠡᠴᠢᠭᠡ ᠪᠣᠶᠣᠷᠣᠭ ᠢ᠋ᠶ᠋ᠠᠨ ᠰᠠᠨᠠᠳᠠᠭ ᠪᠢᠵᠡ ᠳᠡ᠃
— ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠪᠠᠭᠠᠲᠤᠷ ᠢᠷᠡᠭᠰᠡᠨ᠁
— ᠪᠢ ᠮᠡᠳᠡᠭᠰᠡᠨ ᠪᠢᠯᠡ᠂ ᠬᠠᠭᠠᠨᠲᠠᠨ ᠠ᠋᠃
— ᠠᠢᠯ ᠠᠢᠮᠠᠭ ᠤ᠋ᠨ ᠤᠯᠤᠰ ᠪᠠᠢᠨᠠ᠃ ᠠᠪᠤ ᠨᠣᠶᠠᠨ ᠳ᠋ᠠᠭᠠᠨ ᠳᠠᠢᠬᠤ ᠦᠭᠡ ᠪᠣᠢ ᠪᠢᠯᠡ ᠤᠤ ᠭᠡᠬᠦ ᠳ᠋ᠦ᠍ ᠲᠣᠭᠣᠷᠢᠯ ᠬᠥᠪᠡᠭᠦᠨ ᠦᠨᠡᠨ ᠬᠡᠯᠡᠪᠡ ᠤᠤ ᠭᠡᠬᠦ ᠰᠢᠭ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠨᠢᠳᠦ ᠤᠷᠤᠭᠤ ᠴᠣᠴᠢᠮᠠᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠠᠭᠠᠰᠢᠯᠠᠭᠤᠯᠵᠤ ᠲᠣᠭᠯᠠᠭᠠ ᠦᠭᠡᠢ ᠭᠡᠳᠡᠭ ᠲᠦ᠍ ᠢᠳᠡᠭᠡᠨ᠂
— ᠲᠤᠤᠯᠠ ᠶ᠋ᠢᠨ ᠮᠥᠰᠥᠨ ᠳᠡᠭᠡᠷᠡ ᠬᠠᠷᠪᠤᠵᠤ ᠲᠣᠭᠯᠠᠳᠠᠭ᠂ ᠲᠣᠭᠣᠯᠭᠠᠨ ᠬᠣᠶᠠᠷ ᠱᠠᠬᠠᠢ ᠲᠠᠢ ᠶᠤᠮ ᠰᠠᠨ᠃ ᠮᠥᠰᠥ ᠨᠢ ᠴᠥᠮᠥᠷᠡᠵᠦ ᠵᠢᠪᠦᠭᠡ ᠦᠭᠡᠢ ᠪᠣᠯ᠂ ᠮᠥᠷᠡᠨ ᠨᠢ ᠬᠠᠲᠠᠵᠤ ᠰᠢᠷᠭᠢᠭᠡ ᠦᠭᠡᠢ ᠪᠣᠯ ᠬᠦᠷᠭᠡᠭᠦᠯ ᠭᠡᠵᠦ ᠪᠠᠢᠨᠠ ᠭᠡᠭᠡᠷᠡᠢ ᠭᠡᠳ ᠮᠡᠬᠦᠢᠪᠡ᠃ ᠬᠠᠪᠤᠯ《 ᠴᠣᠪᠣᠭᠣ ᠬᠦᠦ ᠶᠦᠮ》 ᠭᠡᠮᠡᠨ ᠶᠡᠬᠡ ᠯᠡ ᠲᠣᠭᠣᠵᠤ ᠵᠣᠭᠰᠣᠲᠠᠯᠠ ᠴᠡᠴᠡᠷᠯᠢᠭ ᠦ᠋ᠨ ᠭᠦᠨ ᠡᠴᠡ᠂
— ᠲᠣᠭᠣᠷᠢᠯ᠁ ᠲᠣᠭᠣᠷᠢᠯ ᠠ᠋᠁ ᠮᠢᠨᠦ ᠬᠦᠦ! ᠭᠡᠬᠦ ᠴᠡᠭᠡᠯᠬᠡᠨ ᠳᠠᠭᠤ ᠬᠠᠲᠠᠵᠤ ᠲᠦᠳᠡᠬᠡᠨ ᠵᠠᠯᠠᠭᠤ ᠬᠠᠲᠤᠨ ᠵᠦᠷ ᠭᠣᠷ ᠰᠢᠭ᠋ ᠳᠡᠭᠳᠡᠨ ᠭᠠᠷᠴᠤ ᠢᠷᠡᠪᠡ᠃ ᠲᠡᠷᠡ ᠪᠡᠷ ᠶᠡᠬᠡ ᠬᠠᠭᠠᠳ ᠠ᠋ᠴᠠ ᠰᠦᠷᠳᠡᠨ ᠬᠣᠷᠣᠮ ᠬᠢᠷᠢ ᠮᠡᠭᠳᠡᠭᠰᠡᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠬᠤᠮᠢᠨ ᠰᠥᠭᠥᠳᠴᠦ᠂
— ᠬᠠᠭᠠᠳ ᠠᠮᠤᠭᠤᠯᠠᠩ ᠤᠤ ᠭᠡᠯᠡ᠃ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠤ᠋ᠨ ᠠᠪᠠᠯᠢ ᠬᠠᠲᠤᠨ ᠢᠯᠮᠠ ᠮᠥᠨ ᠠᠵᠤᠭᠤ᠃ ᠬᠠᠪᠤᠯ ᠬᠠᠭᠠᠨ ᠥᠲᠥᠨ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠳᠣᠨᠵᠢᠲᠠᠢ ᠰᠢᠪᠲᠤᠷᠠᠵᠤ᠂
— ᠠᠮᠤᠭᠤᠯᠠᠩ ᠭᠡᠳ ᠭᠤᠸᠠ ᠬᠠᠲᠤᠨ ᠢ᠋ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠬᠠᠷᠠᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠤᠷᠲᠤ ᠰᠣᠷᠮᠤᠤᠰᠤᠨ ᠤ᠋ ᠰᠡᠭᠦᠳᠡᠷ ᠤᠨᠠᠭᠠᠨ ᠭᠣᠳᠣᠢᠪᠠ᠃ ᠴᠡᠴᠡᠷᠯᠢᠭ ᠲᠦ᠍ ᠨᠠᠮ ᠭᠦᠮ ᠪᠣᠯᠤᠯᠠ᠃ ᠡᠨᠡ ᠦᠶᠡᠰ ᠵᠢᠮᠢᠰᠦᠨ ᠦ᠌ ᠪᠤᠲᠠ ᠳᠦᠭᠦᠷᠡᠩ ᠴᠡᠴᠡᠷᠯᠢᠭ ᠦ᠋ᠨ ᠬᠠᠮᠢᠭᠠ ᠨᠢᠭᠡᠲᠡᠭᠡ ᠲᠠᠢᠭᠠᠨ ᠡᠷᠡᠰ ᠦ᠋ᠨ ᠠᠯᠬᠤᠭᠠ ᠶ᠋ᠢ ᠪᠣᠳᠣᠪᠠᠯ ᠪᠠᠲᠤ ᠴᠢᠬᠢᠷᠡᠭ ᠬᠥᠯ ᠦ᠋ᠨ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ ᠪᠡᠶᠡᠷᠬᠡᠦ ᠪᠤᠭᠤᠷᠤᠯ ᠬᠥᠮᠦᠨ ᠲᠦᠷᠭᠡᠨ ᠲᠦᠷᠭᠡᠨ ᠠᠯᠬᠤᠯᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠬᠠᠭᠠᠳ ᠠᠮᠤᠭᠤᠯᠠᠩ ᠤᠤ ᠭᠡᠮᠡᠨ ᠮᠡᠬᠦᠰᠬᠢᠬᠦ ᠳ᠋ᠦ᠍ ᠦᠵᠢᠮᠡᠢ ᠬᠠᠭᠠᠨ ᠲᠥᠪ ᠠᠮᠤᠭᠤᠯᠠᠩ ᠳᠠᠭᠤ ᠪᠠᠷ᠂
— ᠡᠯᠵᠢᠭᠡᠳᠡᠢ ᠨᠣᠶᠠᠨ᠃ ᠢᠯᠮᠠ ᠬᠠᠲᠤᠨ ᠡᠨᠡ ᠬᠥᠮᠦᠨ ᠦ᠌ ᠠᠰᠠᠷᠠᠮᠵᠢᠨ ᠳ᠋ᠤ᠌ ᠪᠠᠢᠭᠠ ᠶᠤᠮ ᠭᠡᠪᠡ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠬᠠᠪᠤᠯ ᠬᠠᠭᠠᠨ ᠳ᠋ᠤ᠌ ᠶᠣᠰᠣ ᠲᠡᠳᠦᠢ ᠲᠣᠯᠣᠭᠠᠢ ᠳᠣᠬᠢᠭᠠᠳ᠂
— ᠬᠠᠲᠤᠨ ᠲᠠ ᠲᠣᠭᠣᠰ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠣᠴᠢᠶᠠ ᠭᠡᠰᠡᠨ ᠪᠢᠯᠡ ᠬᠡᠮᠡᠬᠦ ᠳᠠᠭᠤᠨ ᠤ᠋ ᠬᠢᠨᠢ ᠥᠩᠭᠡ ᠠᠷᠭᠠᠳᠠᠩᠭᠤᠢ ᠪᠠᠰᠠ ᠬᠠᠷᠠᠮᠨᠠᠩᠭᠤᠢ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠬᠠᠪᠤᠯ᠂
— ᠢᠯᠮᠠ ᠬᠠᠲᠤᠨ ᠲᠠ ᠲᠣᠭᠣᠰᠬᠠᠨ ᠬᠡᠷᠡᠮ ᠳ᠋ᠦ᠍ ᠲᠣᠯᠣᠭᠠᠢ ᠬᠣᠷᠭᠣᠳᠠᠵᠤ᠂ ᠲᠣᠭᠣᠰ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠡᠳᠦᠷ ᠥᠩᠭᠡᠷᠡᠭᠡᠳᠡᠭ ᠪᠣᠯᠤᠭᠰᠠᠭᠠᠷ ᠤᠳᠠᠵᠤ ᠪᠠᠢᠨᠠ ᠤᠤ? ᠬᠡᠮᠡᠵᠡᠢ᠃
— ᠵᠠ ᠪᠢ ᠺᠢᠳᠠᠨ ᠨᠣᠶᠠᠨ ᠮᠣᠷᠢᠯᠠᠭᠰᠠᠨ ᠤ᠋ ᠬᠣᠢᠲᠤᠨ ᠬᠠᠪᠤᠷ ᠣᠯᠵᠠᠯᠠᠭᠳᠠᠵᠤ ᠢᠷᠡᠭᠰᠡᠨ᠁ ᠭᠡᠵᠦ ᠢᠯᠮᠠ ᠬᠠᠲᠤᠨ ᠴᠡᠭᠡᠵᠢᠨ ᠦ᠌ ᠭᠦᠨ ᠡᠴᠡ ᠭᠠᠷᠬᠤ ᠨᠠᠮᠳᠠᠭᠤ ᠳᠠᠭᠤ ᠪᠠᠷ ᠥᠭᠦᠯᠡᠪᠡ᠃ ᠦᠵᠢᠮᠡᠢ ᠬᠠᠭᠠᠨ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠵᠤ᠂
— ᠡᠬᠢᠯᠡᠵᠦ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠪᠢ ᠲᠠᠨ ᠳ᠋ᠤ᠌ ᠠᠳᠤᠭᠤᠨ ᠤ᠋ ᠪᠠᠨ ᠬᠢᠷᠢ ᠪᠡᠷ ᠢᠰᠬᠡᠷᠳᠡᠭ ᠭᠡᠵᠦ ᠵᠦᠭᠡᠷ ᠬᠡᠯᠡᠭᠡ ᠦᠭᠡᠢ ᠶᠦᠮ᠃ ᠬᠤᠷᠵᠠᠬᠤᠰ ᠪᠣᠶᠤᠷᠤᠭ ᠮᠠᠨ ᠤ᠋ ᠬᠢᠯᠢ ᠤᠷᠤᠭᠤ ᠵᠡᠪᠰᠡᠭᠯᠡᠨ ᠳᠠᠭᠠᠷᠢᠵᠤ᠂ ᠡᠯᠳᠡᠪᠯᠡᠨ ᠨᠣᠮᠣᠬᠠᠴᠢᠯᠠᠬᠤ ᠶ᠋ᠢ ᠵᠠᠪᠳᠤᠭᠰᠠᠨ ᠲᠤᠯᠠ ᠪᠢ ᠬᠠᠷᠢᠭᠤ ᠪᠠᠷᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ᠃ ᠲᠡᠢᠮᠦ ᠪᠢᠵᠡ᠂ ᠡᠯᠵᠢᠭᠡᠳᠡᠢ? ᠭᠡᠪᠡᠯ ᠡᠵᠡᠨ ᠦ᠌ ᠪᠡᠨ ᠬᠠᠶᠠᠵᠤ ᠥᠭᠭᠦᠭᠰᠡᠨ ᠮᠢᠬᠠ ᠶ᠋ᠢ ᠬᠠᠪ ᠬᠢᠨ ᠡᠮᠬᠦᠬᠦ ᠬᠠᠪᠠ ᠮᠡᠲᠦ ᠦᠭᠡ ᠶ᠋ᠢ ᠨᠢ ᠤᠬᠤᠰᠬᠢᠨ ᠡᠯᠭᠦᠵᠦ᠂
— ᠡᠵᠡᠨ ᠦ᠌ ᠬᠡᠯᠡᠳᠡᠭ ᠲᠦᠮᠡᠨ ᠦᠨᠡᠨ! ᠭᠡᠳ ᠢᠯᠮᠠ ᠬᠠᠲᠤᠨ ᠤᠷᠤᠭᠤ ᠰᠦ ᠳᠣᠯᠢᠶᠠᠭᠰᠠᠨ ᠭᠥᠯᠥᠭᠡ ᠰᠢᠭ ᠳᠠᠯᠵᠢᠢᠨ ᠰᠢᠷᠲᠡᠯᠡ᠃ ᠶᠡᠷᠦ ᠰᠢᠷᠪᠠᠬᠤ ᠰᠡᠭᠦᠯ ᠯᠡ ᠳᠤᠲᠠᠭᠤ ᠠᠵᠤᠭᠤ᠃ ᠦᠵᠢᠮᠡᠢ ᠬᠠᠭᠠᠨ ᠲᠠᠭᠠᠰᠢᠶᠠᠯ ᠲᠡᠭᠦᠰ ᠮᠢᠰᠢᠯᠵᠡᠨ᠂
— ᠰᠠᠢᠬᠠᠨ ᠬᠠᠲᠤᠨ ᠰᠠᠢᠨ ᠬᠥᠮᠦᠨ ᠦ᠌ ᠠᠰᠠᠷᠠᠮᠵᠢᠨ ᠳ᠋ᠤ᠌ ᠪᠠᠢᠭᠠ ᠪᠢᠯᠡ᠃ ᠲᠡᠭᠡᠭᠡᠳ ᠴᠦ᠍ ᠬᠣᠷᠵᠠᠬᠤᠰ ᠪᠣᠶᠤᠷᠤᠭ ᠳᠥᠴᠢᠨ ᠬᠠᠲᠤᠨ ᠲᠠᠢ ᠶᠤᠮ ᠬᠡ ᠪᠢᠵᠡ ᠳᠡ᠁ ᠭᠡᠪᠡᠯ ᠲᠤᠭᠤᠷᠢᠯ ᠤ᠋ᠨ ᠵᠣᠪᠬᠢ ᠴᠢᠬᠢᠭᠳᠡᠵᠦ᠂
— ᠬᠠᠲᠤᠨ ᠢᠵᠢᠢ ᠠ᠋᠂ ᠲᠣᠭᠣᠰ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠣᠴᠢᠶᠠ᠃ ᠲᠡᠨᠳᠡ ᠦᠯᠢᠭᠡᠷ ᠦ᠋ᠨ ᠰᠡᠭᠦᠳᠡᠷᠦᠪᠴᠢ ᠪᠠᠢᠳᠠᠭ ᠪᠢᠯᠡ᠂ ᠥᠵᠢᠨ ᠢᠵᠢᠢ! ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤ᠋ ᠨᠠᠷᠠ ᠭᠠᠷᠴᠤ ᠢᠨᠢᠶᠡᠳᠦ ᠠᠯᠲᠠᠨ᠂
— ᠬᠠᠭᠠᠳ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ ᠭᠡᠳ ᠰᠤᠭᠤ ᠪᠠᠷᠠᠳᠠᠭᠰᠠᠨ ᠬᠥᠭᠰᠢᠨ ᠪᠤᠭᠤ ᠰᠢᠭ᠋ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠣᠳᠴᠤ ᠪᠢᠯᠡ᠃ ᠬᠥᠪᠡᠭᠦᠨ ᠶᠡᠬᠡ ᠯᠡ ᠪᠠᠶᠠᠷ ᠬᠥᠷ ᠪᠣᠯᠤᠨ ᠳᠡᠭᠳᠡᠵᠦ᠂ ᠬᠥᠭᠰᠢᠨ ᠵᠠᠯᠠᠭᠤ ᠬᠣᠶᠠᠷ ᠤ᠋ᠨ ᠵᠠᠮ ᠭᠡᠷᠦᠨ ᠪᠠᠢᠯᠠ᠃ ᠬᠠᠪᠤᠯ ᠳᠣᠲᠣᠷᠠ ᠪᠠᠨ ᠰᠡᠮᠬᠡᠨ ᠭᠠᠢᠬᠠᠵᠤ《᠁ ᠲᠣᠭᠯᠠᠬᠤ ᠲᠡᠳᠦᠢ ᠳ᠋ᠦ᠍ ᠪᠡᠶᠡᠰᠦᠨ ᠳᠡᠪᠡᠯᠵᠡᠬᠦ ᠬᠦᠦ ᠴᠦ᠍ ᠪᠢᠰᠢ ᠳᠡ᠃ ᠲᠣᠭᠣᠰ ᠤ᠋ᠨ ᠴᠡᠴᠡᠷᠯᠢᠭ ᠳᠠᠬᠢ ᠦᠯᠢᠭᠡᠷ ᠦ᠋ᠨ ᠴᠡᠴᠡᠷᠯᠢᠭ ᠭᠡᠨᠡ ᠠ᠋》 ᠭᠡᠮᠡᠨ ᠪᠣᠳᠣᠭᠠᠳ ᠯᠠ ᠥᠩᠭᠡᠷᠡᠵᠦ ᠠᠪᠠᠢ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠢᠯᠮᠠ ᠬᠠᠲᠤᠨ ᠤ᠋ ᠪᠠᠷᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠬᠠᠶᠠ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠬᠠᠭᠠᠨ ᠴᠡᠴᠡᠷᠯᠢᠭ ᠲᠦ᠍ ᠲᠣᠭᠯᠠᠵᠤ ᠶᠠᠪᠤᠭᠠ ᠬᠠᠷᠠᠭᠳᠠᠬᠤ ᠪᠣᠯᠪᠠᠴᠤ ᠬᠣᠶᠠᠷ ᠲᠠᠢᠭᠠᠨ ᠳᠡᠷᠭᠡᠳᠡ ᠡᠴᠡ ᠨᠢ ᠦᠯᠦ ᠬᠣᠯᠠᠳᠬᠤ ᠲᠤᠯᠠ ᠬᠡᠯᠡ ᠠᠪᠤᠯᠴᠠᠨ ᠡᠰᠡ ᠴᠢᠳᠠᠵᠠᠢ᠃ ᠡᠢᠨ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠶ᠋ᠢ ᠨᠤᠲᠤᠭ ᠤ᠋ᠨ ᠵᠦᠭ ᠵᠠᠯᠠᠬᠤ ᠪᠣᠯᠪᠠ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠮᠢᠳᠤ ᠪᠤᠷᠬᠠᠨ ᠦᠵᠢᠮᠡᠢ ᠰᠡᠴᠡᠨ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠵᠢᠶᠤᠤᠰᠠ ᠬᠥᠯᠯᠡᠨ ᠮᠣᠷᠳᠠᠵᠤ ᠭᠤᠷᠪᠠᠨ ᠭᠤᠷᠪᠠ ᠶᠢᠰᠦᠨ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠦᠳᠡᠭᠡᠳ ᠰᠢᠳᠠᠷ ᠰᠠᠢᠳ᠂ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠬᠢᠭᠡᠳ ᠬᠡᠰᠢᠭᠲᠡᠨ ᠴᠡᠷᠢᠭ ᠲᠦ᠍ ᠬᠦᠷᠲᠡᠯᠡ ᠭᠠᠷ ᠤ᠋ᠨ ᠪᠡᠯᠡᠭ ᠬᠦᠷᠲᠡᠭᠡᠪᠡ᠃ ᠡᠢᠨ ᠬᠠᠭᠠᠴᠠᠨ ᠰᠠᠯᠬᠤ ᠲᠣᠷᠭᠠᠨ ᠠᠭᠱᠠᠨ ᠳ᠋ᠤ᠌ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠵᠣᠪᠬᠢ ᠴᠢᠬᠢᠭᠲᠦᠨ᠂ ᠳᠠᠭᠤ ᠡᠷᠢᠶᠡᠨᠲᠦᠵᠦ᠂
— ᠬᠠᠭᠠᠨ ᠨᠢ ᠶᠠᠭᠠᠬᠢᠬᠤ ᠪᠣᠢ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠡᠷᠡ ᠰᠢᠭ ᠡᠷᠡ ᠲᠡᠢ ᠰᠠᠷᠠ ᠭᠠᠷᠤᠢ ᠦᠭᠡ ᠬᠥᠭᠡᠷᠦᠯᠳᠦᠪᠡ᠃ ᠡᠨᠡ ᠳᠥᠴᠢ ᠬᠣᠨᠣᠭ ᠮᠢᠨᠦ ᠳᠠᠯᠠᠨ ᠨᠠᠰᠤᠨ ᠤ᠋ ᠵᠣᠪᠠᠯᠠᠩ ᠢ᠋ ᠨᠢᠮᠭᠡᠯᠡᠭᠰᠡᠨ ᠳ᠋ᠦ᠍ ᠭᠢᠯᠠᠢᠯᠠ᠁ ᠭᠡᠰᠡᠨ ᠢ᠋ᠶ᠋ᠡᠨ ᠴᠢᠷᠠᠢ ᠨᠢ ᠲᠥᠪ᠂ ᠰᠠᠨᠠᠭᠠ ᠨᠢ ᠲᠥᠷᠥ ᠪᠣᠯᠵᠤ ᠠᠯᠠᠭᠠ ᠪᠠᠨ ᠭᠤᠷᠪᠠᠨᠲᠠ ᠲᠠᠰᠢᠬᠤ ᠳ᠋ᠤ᠌ ᠦᠳᠡᠯᠲᠡ ᠶ᠋ᠢᠨ ᠶᠡᠬᠡ ᠴᠣᠪᠤᠭᠠᠨ ᠤ᠋ ᠲᠡᠷᠢᠭᠦᠨᠡ ᠪᠢᠨᠳᠠᠷᠢᠯᠠᠨ ᠵᠠᠯᠠᠵᠤ ᠶᠠᠪᠤᠭᠰᠠᠨ ᠮᠥᠩᠭᠥᠨ ᠲᠣᠨᠣᠭᠲᠤ᠂ ᠽᠠᠨᠳᠠᠨ ᠵᠢᠶᠣᠣᠰᠠ ᠨᠠᠮᠢᠯᠵᠠᠨ ᠨᠠᠭᠠᠰᠢᠯᠠᠵᠠᠢ᠃ ᠶᠡᠬᠡ ᠬᠥᠯ ᠬᠥᠭᠵᠢᠶᠡᠨ ᠨᠠᠮ ᠭᠦᠮ ᠪᠣᠯᠵᠤ᠂ ᠪᠦᠭᠦᠳᠡ ᠶ᠋ᠢᠨ ᠬᠠᠷᠠᠴᠠ ᠠᠷᠢᠭᠤᠨ ᠦᠨᠦᠷᠲᠦ ᠽᠠᠨᠳᠠᠨ ᠵᠢᠶᠣᠣᠰᠠ ᠶ᠋ᠢᠨ ᠲᠣᠷᠭᠠᠨ ᠬᠥᠰᠢᠭᠡᠨ ᠳᠡᠭᠡᠷᠡ ᠣᠪᠣᠭᠠᠷᠠᠵᠠᠢ᠃ ᠬᠢᠶᠡ ᠴᠡᠷᠢᠭ ᠴᠠᠴᠤᠭᠲᠤ ᠡᠭᠦᠳᠡ ᠶ᠋ᠢ ᠵᠥᠭᠡᠯᠡᠬᠡᠨ ᠨᠡᠭᠡᠭᠡᠬᠦ ᠳ᠋ᠦ᠍ ᠮᠢᠬᠠ ᠮᠠᠷᠢᠶᠠ ᠲᠡᠭᠰᠢ᠂ ᠨᠢᠳᠦ ᠬᠥᠮᠥᠰᠬᠡ ᠵᠣᠬᠢᠰᠲᠤ ᠵᠠᠯᠠᠭᠤᠬᠠᠨ ᠭᠦᠩᠵᠦ ᠲᠣᠷᠮᠣᠯᠵᠠᠨ ᠮᠢᠰᠢᠶᠡᠬᠦᠢ ᠳ᠋ᠦ᠍ ᠶᠡᠬᠡᠰ ᠨᠣᠶᠠᠳ᠂ ᠡᠭᠡᠯ ᠳᠠᠢᠴᠢᠳ ᠠᠶᠠᠷᠬᠠᠨ ᠳᠠᠭᠤ ᠠᠯᠳᠠᠪᠠᠢ᠃ ᠦᠵᠢᠮᠡᠢ ᠬᠠᠭᠠᠨ ᠠᠬᠠ ᠬᠥᠮᠦᠨ ᠦ᠌ ᠲᠤᠨᠵᠢ ᠲᠠᠢ ᠬᠠᠷᠠᠴᠠ ᠪᠠᠷ ᠬᠠᠪᠤᠯ ᠢ᠋ ᠬᠠᠳᠬᠤᠨ ᠪᠠᠢᠵᠤ᠂
— ᠦᠰᠦ ᠶ᠋ᠢ ᠴᠢᠨᠢ ᠦᠯᠦ ᠴᠠᠢᠯᠭᠠᠬᠤ ᠠᠮᠢᠳᠤ ᠪᠤᠯᠠᠭ᠂ ᠦᠭᠡ ᠶ᠋ᠢ ᠮᠢᠨᠢ ᠦᠯᠦ ᠮᠠᠷᠲᠠᠭᠤᠯᠬᠤ ᠠᠮᠢᠳᠤ ᠵᠢᠷᠤᠭ ᠴᠢᠮᠠ ᠳ᠋ᠤ᠌ ᠪᠡᠯᠡᠭᠯᠡᠰᠦ! ᠬᠡᠮᠡᠪᠡ᠃ ᠬᠠᠪᠤᠯ ᠬᠠᠭᠠᠨ ᠴᠠᠭᠠᠨ ᠪᠦᠷᠭᠦᠳ ᠦ᠋ᠨ ᠳᠡᠯᠢ ᠰᠢᠭ ᠬᠥᠮᠥᠰᠬᠡ ᠡᠷᠭᠦᠨ ᠮᠢᠰᠢᠯᠵᠡᠵᠦ᠂
— ᠪᠡᠶᠡ ᠶ᠋ᠢ ᠪᠡᠯᠡᠭᠯᠡᠵᠦ ᠪᠣᠯᠬᠤ ᠴᠤ᠌
ᠪᠢᠯᠢᠭ ᠢ᠋ ᠪᠡᠯᠡᠭᠯᠡᠵᠦ ᠦᠯᠦ ᠪᠣᠯᠬᠤ
ᠰᠠᠢᠬᠠᠨ ᠢ᠋ ᠪᠡᠯᠡᠭᠯᠡᠵᠦ ᠪᠣᠯᠬᠤ ᠴᠤ᠌
ᠰᠠᠨᠠᠭᠠ ᠶ᠋ᠢ ᠪᠡᠯᠡᠭᠯᠡᠵᠦ ᠦᠯᠦ ᠪᠣᠯᠬᠤ ᠠᠵᠢ ᠭᠡᠳ ᠴᠤᠯᠪᠤᠭᠤᠷ ᠬᠤᠮᠢᠨ ᠮᠣᠷᠳᠠᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠠᠩᠭᠠᠯ ᠬᠦᠯᠦᠭ ᠦ᠋ᠨ ᠡᠷᠭᠢᠴᠡᠬᠡᠨ ᠳᠤᠮᠳᠠ
一 ᠤᠬᠠᠭᠠᠨ ᠦᠭᠡᠢ ᠠᠳᠤᠭᠤᠰᠤ ᠭᠡᠵᠦ ᠮᠣᠷᠢ ᠪᠠᠨ
ᠤᠭᠠᠯᠵᠠ ᠦᠭᠡᠢ ᠡᠳ᠋ᠯᠡᠯ ᠰᠢᠭ ᠢᠯᠳᠦ ᠪᠡᠨ ᠪᠡᠯᠡᠭᠯᠡᠳᠡᠭ ᠪᠢᠯᠡ᠂ ᠪᠢᠳᠡ
ᠵᠠᠶᠠᠭᠠ ᠲᠠᠢ ᠭᠦᠩᠵᠦ ᠶ᠋ᠢ᠂
ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠢ᠋ ᠪᠡᠯᠡᠭ ᠲᠦ᠍ ᠡᠰᠡ ᠥᠭᠬᠦ᠂
ᠪᠡᠯᠡᠭ ᠲᠦ᠍ ᠡᠰᠡ ᠠᠪᠬᠤ ᠪᠢᠯᠡ ᠭᠡᠪᠡ᠃ ᠡᠢᠨ ᠥᠭᠦᠯᠡᠭᠡᠳ ᠬᠤᠢ ᠰᠠᠯᠬᠢ ᠮᠡᠲᠦ ᠳᠣᠪᠲᠣᠯᠭᠠᠨ ᠣᠳᠬᠤ ᠳ᠋ᠤ᠌ ᠴᠢᠬᠢᠨᠡ ᠬᠤᠨ ᠬᠤᠭᠤᠷ ᠤ᠋ᠨ ᠠᠶᠠᠯᠭᠤ ᠠᠮᠢᠯᠠᠵᠤ᠂
一 ᠵᠤᠯᠵᠠᠭᠠᠨ ᠤᠬᠠᠭᠠᠨ ᠢ᠋ ᠨᠢ ᠲᠦᠰᠢᠵᠦ ᠥᠰᠬᠡᠭᠰᠡᠨ
ᠵᠤᠢᠷᠭᠠᠨ ᠦᠭᠡ ᠦᠭᠡᠢ ᠮᠡᠷᠭᠡᠨ ᠲᠦᠰᠢᠮᠡᠯ
《ᠬᠠᠭᠠᠨ ᠣᠷᠳᠣᠨ ᠳ᠋ᠤ᠌ ᠡᠢᠮᠦ ᠥᠬᠢᠨ
ᠬᠠᠮᠢᠭᠠ ᠠ᠋ᠴᠠ ᠵᠠᠶᠠᠭᠠᠬᠤ ᠪᠣᠢ ᠳᠠ 》 ᠭᠡᠪᠡ ᠭᠡᠨᠡ ᠭᠡᠮᠡᠨ ᠬᠥᠩᠬᠥᠷ ᠬᠣᠷᠴᠢ ᠥᠭᠦᠯᠡᠬᠦ ᠰᠢᠭ ᠪᠣᠯᠪᠠᠢ᠃ ᠡᠯᠡ ᠳᠠᠭᠤᠨ ᠠ᠋ᠴᠠ ᠥᠪᠡᠷ ᠦ᠋ᠨ ᠵᠥᠪ ᠢ᠋ ᠣᠯᠤᠭᠰᠠᠨ ᠬᠠᠭᠠᠨᠲᠠᠨ ᠡᠷᠭᠢᠨ ᠬᠠᠷᠠᠪᠠᠯ ᠪᠢᠲᠡᠭᠦᠦ ᠲᠠᠷᠢᠶᠠᠨ ᠱᠠᠩ ᠲᠠᠲᠠᠭᠰᠠᠨ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠭᠠᠭᠴᠠ ᠪᠦᠲᠦᠨ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠠᠰᠠᠷ ᠳᠣᠣᠷᠠ ᠦᠵᠢᠮᠡᠢ ᠬᠠᠭᠠᠨ ᠲᠣᠷᠣᠢᠨ ᠦᠯᠡᠳᠡᠭᠰᠡᠨ ᠠᠪᠠᠢ᠃ ᠲᠡᠷᠡ ᠶᠡᠷᠦ ᠮᠠᠭᠤ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠲᠥᠷᠥ ᠵᠠᠷᠢᠮ ᠳ᠋ᠠᠭᠠᠨ ᠰᠠᠢᠨ ᠬᠥᠮᠦᠨ ᠢ᠋ ᠴᠦ᠍ ᠮᠠᠭᠤ ᠦᠢᠯᠡ ᠬᠢᠬᠦ ᠳ᠋ᠦ᠍ ᠬᠦᠷᠭᠡᠬᠦ ᠨᠢ ᠪᠣᠢ᠃
ᠬᠥᠬᠡ ᠨᠣᠭᠣᠭᠠᠨ ᠤ᠋ ᠭᠡᠭᠡᠨ ᠤᠨᠢᠶᠠᠷ ᠲᠠᠯᠠ ᠪᠠᠷ ᠳᠦᠭᠦᠷᠡᠩ ᠴᠡᠩᠬᠡᠷᠲᠦᠭᠰᠡᠨ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠤᠷᠤᠭᠤ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠴᠢ ᠬᠠᠷᠠ ᠲᠠᠷᠯᠠᠨᠲᠤᠨ ᠣᠷᠣᠵᠤ ᠢᠷᠡᠯᠡ᠃ ᠲᠡᠢᠨ ᠳᠣᠯᠣᠭᠠᠨ ᠳ᠋ᠤ᠌ ᠣᠯᠠᠨ ᠰᠠᠷᠠ᠂ ᠪᠦᠲᠦᠨ ᠵᠢᠯ ᠢ᠋ᠶ᠋ᠡᠷ ᠮᠣᠷᠳᠠᠬᠤ ᠳ᠋ᠠᠭᠠᠨ ᠴᠤᠴᠠᠵᠤ ᠶᠠᠳᠠᠷᠠᠳᠠᠭ ᠦᠭᠡᠢ ᠴᠡᠷᠢᠭ ᠡᠷᠡᠰ ᠡᠨᠡ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠠᠶᠠᠨᠰᠢᠵᠤ ᠶᠠᠳᠠᠷᠠᠭᠰᠠᠨ ᠨᠢ ᠲᠣᠢᠮᠣ ᠦᠭᠡᠢ ᠰᠠᠨᠵᠠᠢ᠃ ᠬᠠᠪᠤᠯ ᠬᠠᠭᠠᠨ ᠤ᠋ ᠪᠡᠶᠡ ᠬᠠᠮᠠᠭᠠᠯᠠᠵᠤ ᠮᠣᠷᠳᠠᠭᠰᠠᠨ ᠬᠡᠰᠢᠭᠲᠡᠨ ᠮᠢᠩᠭᠠᠲᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠢᠪᠠᠷ ᠬᠡᠷᠡᠮᠲᠦ ᠬᠣᠲᠠᠨᠠ ᠬᠦᠷᠦᠯᠴᠡᠨ ᠣᠴᠢᠵᠤ᠂ ᠰᠢᠪᠠᠭᠠᠷᠠᠯᠳᠤᠨ ᠰᠠᠭᠤᠭᠴᠢ ᠲᠦᠮᠡ ᠪᠤᠮᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠬᠤᠸᠠᠷᠠᠩᠨᠠᠨ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠲᠠᠩᠰᠤᠭ ᠬᠣᠭᠣᠯᠠ᠂ ᠴᠠᠮᠢᠨ ᠵᠢᠮᠢᠰ ᠢ᠋ᠶ᠋ᠡᠷ ᠲᠠᠢᠯᠠᠭᠤᠯᠤᠨ ᠲᠤᠬᠠᠯᠠᠭᠰᠠᠨ ᠨᠢ ᠪᠡᠶᠡ ᠨᠢᠯᠬᠠᠷᠠᠭᠤᠯᠵᠤ᠂ ᠬᠥᠯ ᠬᠦᠨᠳᠦᠷᠡᠭᠦᠯᠵᠦ ᠣᠷᠬᠢᠭᠰᠠᠨ ᠠᠪᠠᠢ᠃ ᠴᠢᠩᠭᠢᠭᠡᠳ ᠵᠣᠭᠰᠣᠬᠤ ᠦᠭᠡᠢ ᠴᠡᠷᠢᠭ ᠪᠦᠷᠢ ᠶ᠋ᠢᠨ ᠭᠠᠨᠵᠤᠭᠠ ᠬᠣᠭᠣᠰᠣᠨ ᠦᠭᠡᠢ ᠠᠭᠠᠳ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠥᠭᠯᠢᠭᠡᠴᠢ ᠭᠥᠩᠵᠦᠰ ᠦ᠋ᠨ ᠭᠠᠷ ᠴᠠᠢᠯᠭᠠᠭᠰᠠᠨ ᠳᠡᠪᠡᠯ ᠦ᠋ᠨ ᠳᠠᠪᠤᠤ᠂ ᠪᠥᠰᠡᠨ ᠦ᠌ ᠳᠤᠷᠳᠤᠩ ᠪᠣᠢ ᠶ᠋ᠢᠨ ᠭᠠᠳᠠᠨᠠ ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠪᠡᠯᠡ ᠪᠠᠨᠴᠢᠩ ᠤ᠋ᠨ ᠬᠢᠷᠢ ᠪᠡᠷ ᠭᠠᠭᠴᠠ ᠨᠢᠭᠡ ᠲᠣᠭᠣᠭᠠ ᠪᠤᠳᠠᠭᠠ᠂ ᠬᠡᠦᠬᠡᠳ ᠦ᠋ᠨ ᠨᠢᠳᠦ ᠬᠠᠭᠤᠷᠬᠤ ᠪᠤᠷᠠᠮ᠂ ᠵᠢᠮᠢᠰᠬᠡᠨ ᠠᠪᠤᠭᠰᠠᠨ ᠨᠢ ᠪᠣᠢ᠃ ᠭᠠᠭᠴᠠ ᠤᠳᠠᠭᠠ ᠰᠡᠯᠡᠮᠡ ᠭᠠᠩ ᠬᠢᠯᠭᠡᠵᠦ᠂ ᠭᠠᠷ ᠤ᠋ᠨ ᠴᠢᠯᠡᠭᠡ ᠭᠠᠷᠭᠠᠭᠠ ᠦᠭᠡᠢ ᠠᠲᠠᠯᠠ ᠣᠯᠵᠠ ᠣᠮᠣᠭ ᠲᠡᠭᠦᠰ ᠶᠠᠪᠤᠭᠠ ᠳ᠋ᠠᠭᠠᠨ ᠪᠠᠶᠠᠰᠪᠠᠴᠤ ᠪᠡᠶᠡ ᠯᠠᠭᠯᠠᠢᠨ᠂ ᠬᠦᠵᠦᠭᠦᠦ ᠬᠥᠰᠢᠨ᠂ ᠨᠢᠳᠦ ᠠᠷᠭᠠᠭᠠᠳ ᠢᠷᠡᠬᠦ ᠳ᠋ᠦ᠍᠂
— ᠵᠣᠪᠠᠯᠠᠩ ᠳ᠋ᠠᠭᠠᠨ ᠳᠤᠷᠠᠲᠠᠢ ᠵᠣᠪᠠᠯᠭᠠ ᠶᠤᠮ ᠠ᠋᠁ ᠭᠡᠮᠡᠨ ᠢᠨᠢᠶᠡᠯᠳᠦᠵᠦ ᠶᠠᠪᠤᠯᠠ᠃ ᠶᠡᠷᠦ ᠴᠢᠰᠤ ᠠᠰᠬᠠᠵᠤ ᠲᠥᠷᠥ ᠳᠣᠩᠰᠣᠯᠣᠯ ᠦᠭᠡᠢ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠠᠢᠯᠴᠢᠨ ᠪᠣᠯᠤᠨ ᠣᠴᠢᠵᠤ᠂ ᠡᠨᠡ ᠮᠡᠲᠦ ᠳᠠᠢᠯᠠᠭᠤᠯᠤᠨ ᠠᠮᠤᠷ ᠵᠢᠮᠦᠷ ᠪᠤᠴᠠᠳᠠᠭ ᠪᠣᠯ ᠶᠠᠭᠤ ᠲᠠᠢ ᠵᠢᠷᠭᠠᠯᠠᠩ ᠰᠠᠨᠵᠠᠢ᠃ ᠴᠢᠩᠭᠢᠵᠦ ᠭᠡᠮᠡᠨ ᠨᠢ ᠬᠦ ᠬᠤᠶᠠᠭᠲᠠᠨ ᠡᠷᠡᠰ ᠨᠤᠮᠤ ᠪᠠᠨ ᠤᠨᠢᠨ ᠳ᠋ᠤ᠌ ᠬᠠᠪᠴᠢᠭᠤᠯᠵᠤ᠂ ᠰᠤᠮᠤ ᠪᠠᠨ ᠬᠠᠨᠠᠨ ᠳ᠋ᠤ᠌ ᠡᠯᠭᠦᠵᠦ ᠠᠩ ᠠᠪᠠ ᠠ᠋ᠴᠠ ᠪᠤᠰᠤᠳ ᠴᠠᠭ ᠲᠤ᠌ ᠡᠪᠰᠢᠶᠡᠯᠭᠡᠵᠦ ᠲᠠᠲᠠᠬᠤ ᠦᠭᠡᠢ ᠡᠪ ᠨᠠᠢᠷ ᠲᠠᠢ ᠰᠠᠭᠤᠬᠤ ᠪᠥᠯᠥᠭᠡ᠃ ᠬᠠᠪᠤᠯ ᠬᠠᠭᠠᠨ ᠴᠤ᠌ ᠳᠣᠲᠣᠷᠠ ᠴᠡᠯᠮᠡᠵᠦ᠂ ᠰᠡᠳᠬᠢᠯ ᠣᠩᠭᠣᠢᠨ ᠡᠭᠦᠯᠡᠨ ᠪᠣᠷᠣ ᠮᠣᠷᠢᠨ ᠤ᠋ ᠪᠠᠨ ᠰᠤᠯᠠ ᠳ᠋ᠠᠭᠠᠨ ᠪᠥᠮᠪᠥᠷᠢᠬᠦ ᠠᠯᠬᠤᠭᠠᠨ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠳᠡᠯᠭᠡᠭᠦᠯᠵᠦ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠦᠵᠢᠮᠡᠢ ᠶ᠋ᠢ ᠨᠢᠭᠡ ᠪᠡᠶᠡᠰᠴᠦ᠂ ᠨᠥᠭᠦᠭᠡ ᠭᠠᠢᠬᠠᠵᠤ᠂ ᠪᠠᠰᠠ ᠰᠡᠵᠢᠭᠯᠡᠵᠦ ᠶᠠᠪᠤᠯᠠ᠃ ᠶᠠᠭᠤ ᠲᠠᠢ ᠴᠤ᠌ ᠡᠨᠡ ᠤᠳᠠᠭᠠ ᠦᠭᠡ ᠵᠥᠷᠢᠭᠰᠡᠨ ᠴᠦ᠍ ᠢᠯᠳᠦ ᠵᠥᠷᠢᠭᠰᠡᠨ ᠦᠭᠡᠢ᠂ ᠬᠠᠷᠠᠴᠠ ᠪᠠᠷ ᠪᠠᠢᠯᠳᠤᠭᠰᠠᠨ ᠴᠤ᠌ ᠵᠢᠳᠠ ᠪᠠᠷ ᠬᠠᠳᠬᠤᠯᠳᠤᠭᠰᠠᠨ ᠦᠭᠡᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠠᠩᠰᠠᠯᠠᠨ᠂ ᠤᠷᠪᠠᠭᠤᠯᠵᠤ ᠨᠢᠭᠡ ᠪᠣᠳᠣᠨ ᠤᠷᠭᠤᠭᠤᠯᠵᠤ ᠨᠢᠭᠡ ᠰᠠᠨᠠᠨ ᠶᠠᠪᠤᠯᠠ᠃ ᠴᠢᠩᠭᠢᠲᠡᠯᠡ ᠲᠦᠷᠦᠭᠦᠴᠢ ᠪᠠᠭ ᠤ᠋ᠨ ᠨᠢᠭᠡᠨ ᠳᠠᠢᠴᠢᠨ ᠳᠣᠪᠲᠣᠯᠭᠠᠨ ᠢᠷᠡᠵᠦ᠂
— ᠬᠠᠭᠠᠨ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠶᠠ᠃ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠲᠤ᠌ ᠲᠠᠨ ᠤ᠋ ᠵᠢᠷᠭᠤᠭᠠᠨ ᠬᠥᠪᠡᠭᠦᠨ ᠲᠠᠷᠭᠤᠨ ᠢᠷᠭᠡ ᠶ᠋ᠢᠨ ᠤᠭᠤᠴᠠ ᠲᠠᠯᠪᠢᠵᠤ᠂ ᠲᠡᠷᠯᠡᠨ ᠦᠬᠡᠷ ᠦ᠋ᠨ ᠮᠢᠬᠠ ᠴᠢᠨᠠᠵᠤ᠂ ᠡᠰᠦᠭ ᠰᠥᠩᠨᠡᠨ ᠠᠶᠠᠭᠠᠯᠠᠵᠤ᠂ ᠢᠳᠡᠭᠡ ᠪᠡᠨ ᠲᠠᠪᠠᠭᠯᠠᠨ ᠤᠭᠲᠤᠵᠤ ᠪᠠᠢᠨᠠ᠃ ᠬᠠᠭᠠᠨ ᠲᠠ ᠳᠥᠷᠥᠭᠡ ᠮᠤᠯᠲᠤᠯᠤᠨ ᠦᠳᠡᠯᠡᠬᠦ ᠪᠤᠶᠤ ᠭᠡᠬᠦ ᠳ᠋ᠦ᠍ ᠬᠠᠪᠤᠯ ᠬᠠᠭᠠᠨ ᠵᠠᠮ ᠤ᠋ᠨ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ᠂ ᠬᠠᠪᠤᠷ ᠤ᠋ᠨ ᠨᠠᠷᠠᠨ ᠳ᠋ᠤ᠌ ᠬᠠᠷᠰᠢᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠬᠠᠷᠠᠵᠤ ᠬᠠᠷᠠᠵᠤ ᠴᠢᠮᠡᠭᠡ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠯᠠ᠃
ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠲᠤ᠌ ᠭᠠᠵᠠᠷ ᠭᠠᠵᠠᠷ ᠠ᠋ᠴᠠ ᠲᠥᠷᠥᠭᠦᠯᠵᠦ ᠵᠤᠨ ᠠᠢᠯᠴᠢᠯᠠᠬᠤ ᠪᠢᠯᠡ᠃ ᠲᠠᠯᠠ ᠬᠡᠭᠡᠷᠡ ᠶ᠋ᠢᠨ ᠬᠥᠬᠡ ᠴᠠᠢᠳᠠᠮ ᠳ᠋ᠤ᠌ ᠰᠤᠷᠠᠭ ᠴᠤ᠌ ᠦᠭᠡᠢ ᠠᠭᠰᠠᠨ ᠴᠡᠴᠡᠭ ᠠᠯᠠᠭᠯᠠᠵᠤ᠂ ᠡᠪᠡᠰᠦ ᠨᠣᠭᠣᠭᠠ ᠤᠨᠤᠭᠠ ᠮᠣᠷᠢᠳ ᠤ᠋ᠨ ᠰᠠᠭᠠᠭ ᠱᠦᠷᠭᠦᠨ ᠬᠠᠯᠢᠭᠤᠷᠠᠵᠤ ᠪᠠᠢᠪᠠ᠃ ᠴᠡᠴᠡᠭ ᠢ᠋ᠶ᠋ᠡᠷ ᠡᠮᠵᠢᠭᠰᠡᠨ ᠨᠠᠭᠤᠷ ᠤ᠋ᠨ ᠰᠠᠯᠬᠢᠨ ᠳᠡᠭᠡᠷᠡ ᠠᠰᠠᠷ᠂ ᠮᠠᠢᠬᠠᠨ ᠠᠯᠠᠭᠯᠠᠵᠤ ᠬᠠᠷᠠᠭᠳᠠᠬᠤ ᠠᠭᠠᠳ ᠭᠡᠷ ᠲᠡᠷᠭᠡ᠂ ᠵᠢᠵᠢᠭ ᠴᠠᠴᠠᠷ ᠲᠡᠷᠢᠭᠦᠲᠡᠨ ᠬᠦᠷᠢᠶᠡᠯᠡᠨ ᠪᠠᠭᠤᠵᠠᠢ᠃ ᠠᠭᠤᠯᠠ ᠰᠢᠭ᠋ ᠬᠠᠩᠬᠠᠷ ᠬᠦᠦ ᠨᠦ᠍ᠭᠦᠳ ᠨᠢ ᠬᠣᠯᠠ ᠰᠠᠭᠠᠬᠠᠯᠲᠠ ᠶ᠋ᠢᠨ ᠭᠠᠵᠠᠷ ᠲᠣᠰᠣᠨ ᠢᠷᠡᠵᠦ᠂ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢ ᠠᠩᠬᠢᠯᠤᠭᠰᠠᠨ ᠬᠠᠴᠠᠷ ᠢ᠋ᠶ᠋ᠠᠨ ᠠᠪᠤ ᠳ᠋ᠠᠭᠠᠨ ᠦᠨᠦᠷᠯᠡᠭᠦᠯᠬᠦ ᠳ᠋ᠦ᠍ ᠬᠠᠪᠤᠯ ᠤ᠋ᠨ ᠬᠠᠲᠠᠭᠤ ᠰᠡᠳᠬᠢᠯ ᠡᠷᠬᠡ ᠦᠭᠡᠢ ᠤᠶᠠᠷᠠᠵᠤ᠂
— ᠬᠠᠲᠤᠨ ᠢᠵᠢᠢ ᠨᠢ ᠠᠮᠤᠭᠤᠯᠠᠩ ᠤᠤ ᠭᠡᠬᠦ ᠳ᠋ᠦ᠍ ᠲᠥᠷᠥ ᠳᠠᠭᠠᠭᠠᠵᠤ ᠦᠯᠡᠳᠡᠭᠰᠡᠨ ᠥᠬᠢᠨᠪᠠᠷᠬᠠᠭ᠂ ᠭᠡᠷ ᠳᠠᠭᠠᠭᠠᠵᠤ ᠬᠣᠴᠣᠷᠤᠭᠰᠠᠨ ᠬᠣᠲᠣᠯᠠ ᠨᠣᠶᠠᠨ ᠤᠷᠤᠭᠤ ᠬᠠᠷᠠᠪᠠ᠃ ᠬᠣᠲᠣᠯᠠ ᠡᠯᠡ ᠬᠠᠷᠠᠴᠠ ᠶ᠋ᠢ ᠦᠯᠦ ᠮᠡᠳᠡᠷᠡᠭᠴᠢ ᠪᠣᠯᠵᠤ᠂
— ᠢᠵᠢᠢ ᠶ᠋ᠢᠨ ᠪᠡᠶᠡ ᠰᠠᠢᠨ ᠭᠡᠯᠡ᠃ ᠡᠢᠨ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠰᠣᠨᠢᠨ ᠬᠠᠴᠢᠨ ᠢ᠋ ᠭᠠᠩᠭᠠᠷ ᠭᠤᠩᠭᠠᠷ ᠭᠡᠭᠰᠡᠭᠡᠷ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠪᠡᠯ ᠬᠠᠷᠯᠢ ᠺᠤ ᠬᠠᠲᠤᠨ ᠲᠡᠷᠢᠭᠦᠯᠡᠵᠦ ᠬᠠᠭᠠᠨ ᠡᠵᠡᠨ ᠢ᠋ᠶ᠋ᠡᠨ ᠲᠣᠰᠪᠠᠢ᠃ ᠠᠯᠤᠰ ᠤ᠋ᠨ ᠠᠶᠠᠨ ᠠ᠋ᠴᠠ ᠬᠠᠨᠢ ᠢᠵᠢᠯᠢ ᠪᠡᠨ ᠲᠤᠰᠤᠭᠰᠠᠨ ᠡᠮᠡᠰ ᠦ᠋ᠨ ᠰᠡᠮᠬᠡᠨ ᠢᠨᠢᠶᠡᠯᠳᠦᠬᠦ᠂ ᠠᠬᠠ ᠪᠠᠨ ᠤᠭᠲᠤᠭᠰᠠᠨ ᠳᠡᠭᠦᠦ ᠶ᠋ᠢᠨ ᠬᠥᠭᠡᠷᠦᠬᠦᠨ ᠳᠠᠭᠤ ᠠᠯᠳᠠᠬᠤ᠂ ᠠᠪᠤ ᠳ᠋ᠠᠭᠠᠨ ᠲᠡᠪᠡᠷᠢᠭᠦᠯᠦᠭᠰᠡᠨ ᠵᠢᠭᠠᠬᠠᠨ ᠦᠷᠡ ᠶ᠋ᠢᠨ ᠪᠡᠶᠡᠰᠦᠨ ᠬᠠᠰᠬᠢᠷᠬᠤ ᠴᠣᠪᠣᠭᠣ ᠴᠣᠯᠭᠢᠭᠤᠨ ᠳᠠᠭᠤᠨ ᠣᠳᠣᠲᠤ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠰᠥᠨᠢᠵᠢᠨ ᠰᠣᠨᠣᠰᠳᠠᠵᠤ ᠪᠢᠯᠡ᠃ ᠠᠯᠢᠪᠠ ᠠᠶᠠᠨ ᠲᠡᠢᠨ ᠡᠴᠡ ᠪᠤᠴᠠᠵᠤ ᠢᠷᠡᠬᠦ ᠪᠦᠷᠢ ᠡᠢᠨ ᠤᠴᠠᠷᠠᠯᠳᠤᠳᠠᠭ ᠵᠠᠶᠢᠭ ᠲᠠᠢ ᠬᠡᠳᠦᠢ ᠴᠦ᠍ ᠡᠨᠡ ᠤᠳᠠᠭᠠ ᠠᠯᠢ ᠴᠤ᠌ ᠠᠰᠠᠷ ᠲᠤ᠌᠂ ᠠᠯᠢ ᠴᠤ᠌ ᠮᠠᠢᠬᠠᠨ ᠳ᠋ᠤ᠌ ᠬᠡᠨ ᠴᠦ᠍ ᠤᠬᠢᠯᠠᠭᠰᠠᠨ ᠦᠭᠡᠢ ᠠᠵᠢ᠃ ᠶᠡᠷᠦ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ ᠬᠠᠭᠠᠴᠠᠯ ᠦᠭᠡᠢ ᠠᠶᠠᠨ ᠡᠨᠡ ᠪᠣᠯᠪᠠ᠃ ᠣᠳᠣᠲᠤ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠰᠥᠨᠢᠵᠢᠨ ᠡᠰᠦᠭ ᠵᠠᠯᠭᠢᠯᠠᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠮᠲᠠᠲᠤ ᠳᠠᠷᠠᠰᠤ ᠬᠦᠷᠲᠡᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢ ᠤᠶᠠᠩᠭᠠᠯᠠᠭᠤᠯᠤᠨ ᠠᠶᠠᠯᠵᠤ ᠠᠪᠠᠢ᠃ ᠡᠯᠡ ᠨᠢᠯᠪᠤᠰᠤ ᠦᠭᠡᠢ ᠪᠠᠶᠠᠷ ᠲᠤ᠌ ᠰᠡᠳᠬᠢᠯ ᠳᠠᠯᠪᠢᠷᠠᠵᠤ᠂ ᠰᠠᠨᠠᠭᠠ ᠠᠮᠤᠷ ᠨᠣᠢᠷᠰᠤᠭᠰᠠᠨ ᠴᠤ᠌ ᠪᠠᠶᠠᠷᠲᠤ ᠬᠦᠷᠢᠶᠡ ᠦᠷ ᠦ᠋ᠨ ᠲᠠᠪᠤᠨ ᠵᠢᠩ ᠢ᠋ᠶ᠋ᠡᠷ ᠰᠡᠷᠡᠳᠡᠭ ᠴᠠᠭ ᠲᠠᠭᠠᠨ ᠯᠠ ᠳᠡᠭᠡᠭᠰᠢᠯᠡᠵᠦ ᠪᠢᠯᠡ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠠᠯᠲᠠᠨ ᠲᠠᠷᠮᠠᠨ ᠤ᠋ ᠵᠡᠭᠦᠨᠡ ᠭᠠᠯ ᠪᠠᠳᠠᠷᠠᠭᠠᠨ ᠰᠠᠭᠤᠬᠤ ᠳ᠋ᠤ᠌ ᠬᠥᠪᠡᠭᠦᠳ ᠨᠢ ᠬᠥᠬᠥᠵᠦ ᠥᠰᠦᠭᠰᠡᠨ ᠴᠦ᠍ ᠬᠡᠪ ᠨᠢ ᠠᠯᠳᠠᠷᠠᠭᠠ ᠦᠭᠡᠢ ᠰᠡᠷᠡᠭᠡᠷ ᠬᠥᠬᠥ ᠤᠷᠤᠭᠤ ᠭᠠᠯ ᠤ᠋ᠨ ᠲᠤᠶᠠᠭᠠ ᠡᠷᠬᠡᠯᠡᠨ ᠴᠣᠷᠣᠢᠯᠠᠨ ᠪᠠᠢᠬᠤ ᠠᠵᠢ᠃ ᠶᠡᠷᠦ ᠰᠠᠢᠬᠠᠨ ᠬᠠᠲᠤᠨ ᠶᠤᠮ᠃ ᠶᠡᠬᠡ ᠬᠠᠲᠤᠨ ᠬᠠᠭᠠᠨ ᠡᠵᠡᠨ ᠦ᠌ ᠪᠡᠨ ᠲᠣᠮᠣ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠦᠬᠡᠷ ᠦ᠋ᠨ ᠴᠠᠷᠴᠠᠭᠤ ᠬᠠᠪᠢᠷᠭᠠ ᠠᠯᠠᠭᠯᠠᠭᠤᠯᠤᠨ ᠬᠥᠰᠬᠥᠯᠡᠭᠡᠳ᠂ ᠰᠦ ᠪᠣᠯᠤᠭᠰᠠᠨ ᠰᠢᠷᠭᠠᠯ ᠴᠠᠢ ᠬᠢᠵᠦ ᠪᠠᠢᠯᠠ᠃ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠲᠦᠰᠢᠭ ᠪᠣᠯᠤᠭᠰᠠᠨ᠂ ᠣᠯᠠᠨ ᠵᠢᠯ ᠳ᠋ᠦ᠍ ᠵᠠᠩᠰᠢᠯ ᠪᠣᠯᠤᠭᠰᠠᠨ ᠨᠢᠭᠡᠨ ᠶᠣᠰᠣᠨ ᠡᠨᠡ ᠠᠪᠠᠢ᠃ ᠠᠶᠠᠨ ᠲᠡᠢᠨ ᠳ᠋ᠡᠭᠡᠨ ᠮᠣᠷᠳᠠᠭᠰᠠᠨ ᠭᠡᠷ ᠦ᠋ᠨ ᠡᠵᠡᠨ ᠢᠯᠠᠭᠠᠳ ᠴᠣ ᠢᠷᠡᠵᠦ ᠪᠣᠯᠤᠨᠠ᠂ ᠢᠯᠠᠭᠳᠠᠭᠠᠳ ᠢᠷᠡᠵᠦ ᠴᠦ᠍ ᠪᠠᠰᠠ ᠪᠣᠯᠤᠨᠠ᠃ ᠲᠡᠷᠡ ᠪᠣᠯᠭᠠᠨ ᠳ᠋ᠤ᠌ ᠭᠡᠷ ᠲᠡᠭᠡᠨ ᠢᠷᠡᠵᠦ ᠬᠣᠨᠣᠭᠰᠠᠨ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠡᠷᠦᠬᠡ ᠪᠡᠨ ᠲᠠᠲᠠᠵᠤ᠂ ᠭᠠᠯ ᠢ᠋ᠶ᠋ᠠᠨ ᠪᠠᠳᠠᠷᠠᠭᠠᠵᠤ᠂ ᠴᠠᠢ ᠪᠠᠨ ᠴᠢᠨᠠᠭᠠᠳ ᠳᠡᠭᠡᠵᠢ ᠶ᠋ᠢ ᠨᠢ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠬᠠᠭᠠᠨ ᠳ᠋ᠠᠭᠠᠨ ᠪᠠᠷᠢᠳᠠᠭ ᠪᠢᠯᠡ᠃ ᠬᠠᠪᠤᠯ ᠴᠤ᠌ ᠡᠨᠡ ᠶᠣᠰᠣᠨ ᠳ᠋ᠤ᠌ ᠲᠡᠰᠴᠦ᠂ ᠢᠯᠠᠵᠤ ᠭᠠᠷᠤᠭᠰᠠᠨ ᠲᠡᠢᠨ ᠡᠴᠡ ᠣᠯᠵᠤ ᠢᠷᠡᠭᠰᠡᠨ ᠭᠤᠸᠠ ᠲᠠᠲᠠᠪᠤᠷᠢ ᠡᠮᠡᠰ ᠢᠨᠵᠠᠭᠠ ᠮᠡᠲᠦ ᠰᠠᠷᠲᠠᠢᠵᠤ᠂ ᠰᠤᠭᠤ ᠮᠡᠲᠦ ᠰᠣᠷᠲᠣᠢᠵᠤ ᠪᠠᠢᠪᠠᠴᠤ ᠳᠥᠷᠥᠭᠡ ᠮᠤᠯᠲᠤᠯᠤᠭᠰᠠᠨ ᠣᠷᠣᠢ ᠪᠠᠨ ᠶᠡᠬᠡ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠬᠣᠨᠣᠭᠯᠠᠬᠤ ᠠᠵᠢ᠃ ᠴᠢᠩᠭᠢᠭᠡᠳ ᠥᠷᠯᠥᠭᠡ ᠬᠠᠷᠯᠢ ᠺᠤ ᠶ᠋ᠢᠨ ᠬᠣᠢᠮᠣᠷ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠭᠡᠨ ᠨᠥᠮᠥᠷᠦᠨ ᠵᠠᠪᠢᠯᠠᠵᠤ ᠰᠠᠭᠤᠭᠠᠳ ᠠᠶᠠᠭᠠ ᠳᠦᠭᠦᠷᠡᠩ ᠬᠢᠷᠤᠵᠤ ᠬᠥᠰᠬᠥᠯᠡᠭᠰᠡᠨ ᠠᠯᠠᠭ ᠮᠢᠬᠠ ᠠᠮᠠ ᠳᠦᠭᠦᠷᠡᠩ ᠵᠠᠵᠢᠯᠤᠨ ᠲᠠᠪᠠᠯᠠᠵᠤ ᠰᠤᠷᠤᠭᠰᠠᠨ ᠨᠢ ᠪᠣᠢ᠃ ᠡᠢᠨ ᠭᠠᠯ ᠢ᠋ᠶ᠋ᠠᠨ ᠰᠢᠷᠳᠡᠨ ᠠᠶᠠᠭᠠ ᠴᠠᠢ ᠪᠠᠨ ᠳᠥᠴᠢᠨ ᠵᠢᠯ ᠬᠤᠪᠢᠶᠠᠨ ᠨᠠᠰᠤ ᠶ᠋ᠢ ᠪᠠᠷᠠᠭᠰᠠᠨ ᠤᠯᠤᠰ ᠶᠠᠷᠢᠬᠤ ᠶᠠᠭᠤᠮᠠ ᠳᠠᠭᠤᠰᠪᠠᠯ ᠳᠠᠭᠤᠰᠴᠤ ᠪᠣᠯᠬᠤ ᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠠᠬᠠᠷ ᠰᠠᠬᠠᠷ ᠶᠠᠷᠢᠶᠠ ᠪᠠᠷ ᠴᠠᠢ ᠪᠠᠨ ᠳᠠᠪᠤᠰᠤᠯᠠᠵᠤ᠂ ᠢᠳᠡᠭᠡ ᠪᠡᠨ ᠠᠮᠲᠠᠯᠠᠬᠤ ᠨᠢ ᠪᠣᠢ᠃ ᠡᠨᠡ ᠤᠳᠠᠭᠠ ᠬᠠᠲᠤᠨ ᠲᠥᠯᠥᠵᠦ ᠲᠥᠯᠥᠵᠦ᠂
— ᠬᠠᠭᠠᠨ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠯ ᠦᠭᠡ ᠪᠠᠢᠨᠠ ᠰᠠᠨᠵᠠᠢ ᠭᠡᠯᠡ᠃ ᠲᠥᠷᠥ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠪᠤᠰᠤ ᠬᠡᠭᠡᠷᠡ ᠶ᠋ᠢᠨ ᠲᠠᠷᠮᠠᠨ ᠳ᠋ᠤ᠌᠂ ᠲᠠᠮᠠᠭᠠᠲᠤ ᠰᠡᠨᠳᠡᠢ ᠳ᠋ᠦ᠍ ᠪᠤᠰᠤ ᠶᠡᠬᠡ ᠬᠠᠲᠤᠨ ᠤ᠋ ᠭᠡᠷ ᠲᠦ᠍ ᠠᠲᠠᠯᠠ ᠢᠩᠭᠢᠵᠦ ᠶᠣᠰᠣᠷᠬᠠᠬᠤ ᠨᠢ ᠬᠠᠪᠤᠯ ᠳ᠋ᠤ᠌ ᠭᠠᠢᠬᠠᠯ ᠲᠥᠷᠥᠭᠦᠯᠵᠦ᠂
— ᠬᠠᠷᠯᠢ ᠺᠤ ᠲᠠ ᠶᠠᠭᠤ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠬᠡᠯᠡ! ᠬᠡᠮᠡᠬᠦ ᠳ᠋ᠦ᠍ ᠲᠣᠷᠭᠠᠨ ᠤᠤᠵᠢᠨ ᠤ᠋ ᠬᠢᠨᠢ ᠡᠩᠭᠡᠷ ᠥᠭᠡᠳᠡ ᠣᠴᠢ ᠦᠰᠦᠴᠢᠭᠡ ᠦᠭᠡᠢ ᠠᠲᠠᠯᠠ ᠬᠡᠢ ᠭᠦᠪᠢᠵᠦ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠢᠬᠦ ᠶᠠᠭᠤᠮᠠ ᠪᠠᠨ ᠣᠯᠵᠤ ᠶᠠᠳᠠᠭᠰᠠᠨ ᠮᠡᠲᠦ ᠰᠣᠪᠤᠳᠤᠨ ᠤᠨᠵᠢᠯᠭᠠ ᠪᠠᠨ ᠢᠮᠡᠷᠦᠨ ᠬᠣᠷᠣᠮ ᠬᠢᠷᠢ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
— ᠮᠠᠨ ᠤ᠋ ᠬᠢ ᠴᠢᠨᠢ ᠬᠥᠮᠦᠨ ᠨᠡᠮᠡᠭᠳᠡᠭᠡᠳ ᠪᠠᠢᠭᠠ ᠰᠢᠦ ᠳᠡ ᠭᠡᠪᠡ᠃ ᠬᠠᠪᠤᠯ ᠭᠠᠢᠬᠠᠨ ᠬᠠᠷᠠᠪᠠᠯ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠡᠮᠬᠡᠷᠢᠳᠦᠨ ᠪᠠᠢᠵᠤ᠂
— ᠡᠭᠦᠨ ᠡᠴᠡ ᠪᠣᠯᠵᠤ ᠥᠬᠢᠨᠪᠠᠷᠬᠠᠭ᠂ ᠬᠣᠲᠣᠯᠠ ᠬᠣᠶᠠᠷ ᠮᠠᠭᠤᠳᠠᠯᠴᠠᠭᠠᠳ ᠪᠠᠢᠭᠠ ᠁ ᠬᠡᠮᠡᠯᠡ᠃
— ᠬᠤᠯᠠᠨ ᠠᠪᠠᠯᠢ ᠡᠬᠡᠨᠡᠷ ᠪᠠᠭᠤᠯᠭᠠᠭᠠ ᠤᠤ?
— ᠦᠭᠡᠢ ᠪᠢᠯᠡ᠂ ᠬᠠᠭᠠᠨᠲᠠᠨ᠁
— ᠲᠣᠳᠣᠢᠨ ᠤᠤ? ᠠᠬᠠ ᠶ᠋ᠢ ᠪᠡᠨ ᠠᠪᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌᠁
— ᠦᠭᠡᠢ ᠳᠡ᠂ ᠡᠵᠡᠨᠲᠡᠨ ᠮᠢᠨᠢ᠃ ᠬᠣᠲᠣᠯᠠ ᠬᠦᠦ ᠬᠦᠷᠢᠶᠡᠨ ᠳ᠋ᠡᠭᠡᠨ ᠲᠠᠲᠠᠪᠤᠷᠢ ᠡᠮᠡ ᠲᠡᠢ ᠪᠣᠯᠤᠭᠰᠠᠨ᠁
— ᠲᠡᠷᠡ ᠡᠷᠡ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠁ ᠭᠡᠰᠡᠨ ᠢ᠋ᠶ᠋ᠡᠨ ᠬᠠᠪᠤᠯ ᠬᠠᠭᠠᠨ ᠰᠠᠬᠠᠯ ᠳᠣᠣᠷᠠ ᠪᠠᠨ ᠮᠤᠰᠢᠯᠵᠠᠨ《ᠡᠨᠡ ᠡᠮᠡᠰ ᠬᠡᠦᠬᠡᠨ ᠨᠦ᠍ᠭᠦᠳ ᠶᠠᠯᠢ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠲᠩᠷᠢ ᠳ᠋ᠦ᠍ ᠬᠠᠲᠠᠭᠠᠳᠠᠭ ᠤᠯᠤᠰ》 ᠭᠡᠰᠡᠨ ᠰᠢᠦ ᠶᠠᠭᠤᠮᠠ ᠪᠣᠳᠣᠵᠤ ᠰᠠᠭᠤᠲᠠᠯᠠ ᠬᠠᠷᠯᠢ ᠺᠤ᠂
— ᠬᠠᠭᠠᠨᠲᠠᠨ ᠠ᠋᠁ ᠲᠡᠷᠡ ᠲᠠᠲᠠᠪᠤᠷᠢ ᠡᠮᠡ ᠨᠢ 《ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠᠨ》 ᠲᠠᠢ ᠥᠨᠥ ᠲᠠᠲ᠋ᠠᠷ ᠬᠡᠦᠬᠡᠨ ᠰᠢᠦ ᠳᠡ ᠭᠡᠯᠡ᠃ ᠬᠠᠪᠤᠯ ᠬᠠᠭᠠᠨ ᠬᠡᠷᠡᠭ ᠦ᠋ᠨ ᠴᠠᠭᠠᠳᠤ ᠰᠡᠵᠢᠭᠦᠷ ᠢ᠋ ᠰᠠᠶᠢ ᠲᠣᠭᠣᠮᠰᠠᠷᠯᠠᠵᠤ᠂ ᠳᠤᠮᠳᠠᠭᠤᠷ ᠴᠠᠢ ᠲᠠᠢ ᠮᠥᠩᠭᠥᠨ ᠠᠶᠠᠭᠠ ᠪᠠᠨ ᠶᠠᠪᠠᠭᠠᠨ ᠰᠢᠷᠡᠭᠡᠨᠡ ᠵᠥᠭᠡᠯᠡᠬᠡᠨ ᠲᠠᠯᠪᠢᠪᠠ᠃ ᠡᠨᠡ ᠲᠣᠭᠯᠠᠭᠠᠮ ᠪᠢᠰᠢ ᠰᠠᠨᠵᠠᠢ᠃ ᠴᠢᠩᠭᠢᠲᠡᠯᠡ ᠭᠠᠳᠠᠨᠠ ᠠ᠋ᠴᠠ ᠬᠣᠲᠣᠯᠠ ᠨᠣᠶᠠᠨ ᠥᠪᠡᠷ ᠲᠤᠨᠢ ᠲᠡᠷᠡ ᠪᠣᠯᠭᠠᠨ ᠦᠯᠦ ᠠᠩᠵᠠᠭᠠᠷᠠᠭᠳᠠᠳᠠᠭ ᠨᠠᠮᠤᠭᠤᠨ ᠳᠦᠷᠢ ᠪᠡᠷ ᠵᠥᠭᠡᠯᠡᠨ ᠠᠯᠬᠤᠯᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠡᠵᠡᠨ ᠬᠠᠭᠠᠨ ᠰᠣᠶᠣᠷᠬᠠ᠃ ᠪᠢ《ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ》 ᠠᠪᠤᠭᠰᠠᠨ ᠶᠠᠩᠬᠠᠨ ᠢ᠋ ᠲᠠᠲᠠᠪᠤᠷᠢ ᠡᠮᠡ ᠪᠣᠯᠭᠠᠨ ᠬᠠᠶᠠᠭᠠᠨ ᠳ᠋ᠠᠭᠠᠨ ᠠᠪᠤᠭᠰᠠᠨ ᠪᠢᠯᠡ᠃ ᠲᠥᠷᠥ ᠶ᠋ᠢᠨ ᠶᠠᠯᠠ ᠶ᠋ᠢ ᠭᠡᠯᠳᠦᠷᠢᠭᠦᠯᠵᠦ ᠬᠠᠢᠷᠠᠯᠠ! ᠭᠡᠬᠦ ᠳ᠋ᠦ᠍᠂ ᠬᠠᠪᠤᠯ ᠬᠠᠭᠠᠨ ᠨᠥᠮᠥᠭᠡᠨ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠡᠩᠭᠡᠷ᠂ ᠵᠠᠭᠠᠮᠠᠨ ᠠ᠋ᠴᠠ ᠲᠡᠳᠡᠨ ᠠᠬᠢᠭᠤᠯᠵᠤ ᠨᠥᠮᠥᠷᠦᠭᠰᠡᠨ ᠢ᠋ᠶ᠋ᠡᠨ᠂
— ᠡᠨᠡ ᠶᠠᠯᠠ ᠶ᠋ᠢ ᠪᠢ ᠥᠭᠭᠦᠭᠡ ᠦᠭᠡᠢ᠃ ᠺᠢᠳᠠᠨ ᠨᠣᠶᠠᠨ ᠶᠸᠯᠢᠤᠢ ᠳᠠᠰᠢ ᠥᠭᠭᠦᠭᠰᠡᠨ ᠶᠦᠮ ᠭᠡᠯᠡ᠃
3
ᠢᠷᠭᠤᠢ ᠬᠠᠭᠳᠠᠷᠠᠵᠤ᠂ ᠴᠡᠴᠡᠭ ᠰᠣᠶᠣᠭᠠᠯᠠᠵᠤ ᠪᠣᠢ ᠠᠭᠤᠯᠠ ᠶ᠋ᠢᠨ ᠨᠣᠭᠣᠭᠠᠨ ᠦᠨᠦᠷ ᠢ᠋ ᠲᠡᠭᠡᠭᠡᠨ ᠢᠷᠡᠬᠦ ᠰᠠᠯᠬᠢᠨ ᠰᠡᠪᠰᠢᠶᠡᠨ ᠳ᠋ᠦ᠍ ᠬᠡ ᠲᠡᠢ ᠴᠡᠩᠬᠡᠷ ᠠᠰᠠᠷ ᠤ᠋ᠨ ᠬᠣᠷᠮᠣᠢ ᠳᠡᠷᠪᠡᠵᠦ᠂ ᠲᠦᠷᠦᠭᠦᠯᠡᠭᠡ ᠬᠠᠷᠠᠨ ᠬᠡᠪᠲᠡᠭᠰᠡᠨ ᠶᠢᠰᠦᠭᠡᠢ ᠶ᠋ᠢᠨ ᠨᠢᠴᠦᠭᠦᠨ ᠴᠡᠭᠡᠵᠢ ᠤᠷᠤᠭᠤ ᠰᠡᠷᠢᠭᠦᠦ ᠲᠠᠲᠠᠬᠤ ᠠᠵᠢ᠃ ᠲᠡᠷᠡ ᠪᠡᠷ ᠠᠯᠲᠠᠨ ᠲᠠᠷᠮᠠᠨ ᠠ᠋ᠴᠠ ᠬᠠᠷᠠᠴᠠ ᠦᠯᠦ ᠰᠠᠯᠭᠠᠨ ᠴᠢᠯᠡᠲᠡᠯᠡ ᠬᠡᠪᠲᠡᠭᠰᠡᠨ ᠨᠢ ᠡᠨᠡ ᠪᠢᠯᠡ᠃ ᠦᠷ ᠦ᠋ᠨ ᠬᠢᠷᠠᠭᠠᠨ ᠢ᠋ᠶ᠋ᠠᠷ ᠲᠠᠲᠠᠪᠤᠷᠢ ᠬᠠᠲᠤᠨ ᠤ᠋ ᠵᠢᠵᠢᠭ ᠰᠢᠷᠠ ᠴᠠᠴᠠᠷ ᠠ᠋ᠴᠠ ᠬᠥᠯ ᠦ᠋ᠨ ᠴᠢᠮᠡᠭᠡ ᠭᠠᠷᠴᠤ᠂ ᠬᠣᠲᠣᠯᠠ ᠨᠣᠶᠠᠨ ᠰᠥᠨᠢ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠶᠠᠩᠵᠤ ᠲᠠᠢ ᠬᠥᠷᠵᠡᠭᠡᠷᠳᠡᠭᠦᠦ ᠴᠢᠷᠠᠢᠯᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠡᠴᠢᠭᠡ ᠬᠠᠭᠠᠨ ᠤ᠋ ᠬᠢ ᠤᠷᠤᠭᠤ ᠰᠢᠢᠳᠦᠮᠡᠭ ᠠᠯᠬᠤᠵᠤ ᠠᠪᠠᠢ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠬᠤᠪᠢ ᠵᠠᠶᠠᠭᠠ ᠬᠢᠲᠤᠭᠠᠨ ᠤ᠋ ᠢᠷ ᠳᠡᠭᠡᠷᠡ ᠪᠣᠢ ᠶ᠋ᠢ ᠬᠥᠪᠡᠭᠦᠨ ᠭᠠᠳᠠᠷᠯᠠᠨᠠ᠃ ᠡᠴᠢᠭᠡ ᠶ᠋ᠢᠨ ᠡᠵᠡᠭᠦᠢ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠠᠶᠠᠭᠠᠨ ᠳ᠋ᠠᠭᠠᠨ ᠠᠪᠴᠤ ᠳᠡᠷᠡ ᠨᠢᠭᠡᠳᠦᠭᠰᠡᠨ ᠬᠣᠲᠣᠯᠠ ᠠᠪᠠᠭᠠ ᠡᠨᠡ ᠨᠢᠭᠦᠯ ᠢ᠋ᠶ᠋ᠡᠨ ᠬᠠᠭᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠤ᠂ ᠥᠷᠥᠰᠢᠶᠡᠯ ᠭᠤᠶᠤᠬᠤ ᠪᠠᠷ ᠪᠠᠷᠠᠯᠬᠠᠵᠤ ᠪᠣᠢ ᠶ᠋ᠢ ᠰᠡᠳᠬᠢᠯ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠡᠢ᠃ ᠬᠠᠷᠠᠴᠠ ᠮᠥᠷᠭᠥᠯᠳᠦᠬᠦ ᠪᠦᠷᠢ ᠡᠭᠦᠯᠡᠨ ᠳ᠋ᠦ᠍ ᠲᠥᠭᠡᠷᠢᠭᠰᠡᠨ ᠠᠩᠭᠢᠷ ᠤ᠋ᠨ ᠵᠤᠯᠵᠠᠭᠠ ᠮᠡᠲᠦ ᠠᠷᠠᠴᠢᠭᠠ ᠦᠭᠡᠢ ᠨᠠᠮᠤᠭᠤᠬᠠᠨ ᠢ᠋ᠶ᠋ᠠᠷ ᠨᠢᠳᠦ ᠪᠤᠷᠤᠭᠤᠯᠠᠵᠤ ᠡᠷᠡ ᠶ᠋ᠢᠨ ᠶᠠᠮᠠᠷ ᠴᠦ᠍ ᠠᠪᠤᠷᠢ ᠶ᠋ᠢ ᠳᠠᠰᠤᠨ ᠥᠩᠭᠡᠷᠡᠭᠡᠬᠦ ᠡᠮᠡ ᠰᠢᠳᠢ ᠶ᠋ᠢ ᠮᠡᠳᠡᠷᠡᠭᠦᠯᠦᠨ ᠪᠠᠢᠳᠠᠭ ᠪᠦᠯᠵᠢᠭᠡᠨ ᠥᠵᠢᠨ ᠦ᠌ ᠵᠠᠶᠠᠭᠠ ᠥᠪᠡᠷ ᠲᠤᠨᠢ ᠶᠠᠮᠠᠷ ᠨᠢᠭᠡᠨ ᠲᠠᠯᠠ ᠪᠠᠷ ᠬᠠᠮᠢᠶᠠ ᠲᠠᠢ ᠰᠠᠨᠠᠭᠳᠠᠬᠤ ᠨᠢ ᠪᠣᠢ᠃ ᠡᠢᠨ ᠬᠠᠷᠠᠵᠤ ᠬᠡᠪᠲᠡᠲᠡᠯᠡ ᠬᠣᠲᠣᠯᠠ ᠴᠢᠷᠠᠢ ᠪᠠᠷᠤᠭᠠᠷ ᠲᠣᠯᠣᠭᠠᠢ ᠭᠤᠳᠤᠭᠠᠷ ᠭᠠᠷᠴᠤ ᠢᠷᠡᠭᠡᠳ᠂ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠪᠦᠴᠢᠨ ᠪᠠᠭᠤᠭᠰᠠᠨ ᠬᠦᠷᠢᠶᠡ ᠶ᠋ᠢ ᠨᠢᠳᠦ ᠭᠦᠶᠦᠯᠭᠡᠵᠦ ᠤᠳᠠᠭᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠴᠡᠭᠡᠵᠢ ᠳᠦᠭᠦᠷᠡᠩ ᠠᠮᠢᠰᠬᠤᠭᠠ ᠠᠪᠤᠪᠠ᠃ ᠴᠢᠩᠭᠢᠭᠡᠳ ᠶᠡᠬᠡ ᠬᠠᠲᠤᠨ ᠤ᠋ ᠥᠷᠭᠥᠭᠡ ᠥᠭᠡᠳᠡ ᠱᠠᠯᠠᠮᠠᠭᠠᠢ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠬᠡᠨ ᠨᠢᠭᠡ ᠶ᠋ᠢ ᠳᠠᠭᠤᠳᠠᠵᠤ ᠬᠠᠷᠠᠭᠳᠠᠨᠠ᠃ ᠲᠦᠳᠡᠬᠡᠨ《ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠠᠭᠤᠬᠤ ᠶᠠᠯᠠᠲᠤ》ᠬᠠᠲᠤᠨ ᠤ᠋ ᠭᠠᠭᠴᠠ ᠬᠦᠦ ᠲᠡᠢ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠰᠠᠷᠠ ᠫᠠᠢ ᠬᠠᠷᠪᠤᠬᠤ ᠠᠭᠰᠠᠨ ᠮᠡᠯᠲᠡᠭ ᠬᠢᠶᠡ ᠫᠡᠷ ᠫᠡᠷ ᠭᠦᠶᠦᠨ ᠢᠷᠡᠵᠦ ᠦᠵᠡᠭᠳᠡᠨᠡ᠃ ᠲᠡᠳᠡ ᠤᠳᠠᠭᠠᠨ ᠶᠠᠷᠢᠯᠴᠠᠵᠤ ᠪᠣᠢ ᠶ᠋ᠢ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠰᠢᠷᠳᠡᠵᠦ ᠬᠡᠪᠲᠡᠲᠡᠯᠡ ᠠᠷᠤ ᠳ᠋ᠤᠨᠢ ᠨᠡᠭᠦᠨ ᠠᠬᠠ ᠶ᠋ᠢᠨ ᠳᠠᠭᠤ ᠭᠠᠷᠴᠤ᠂
— ᠮᠡᠯᠲᠡᠭ ᠬᠢᠶᠡ ᠡᠴᠡ ᠠᠰᠠᠭᠤᠪᠠᠯ ᠯᠠ ᠮᠡᠳᠡᠵᠦ ᠪᠣᠯᠬᠤ ᠶᠤᠮ ᠪᠠᠢᠨᠠ ᠭᠡᠯᠡ᠃ ᠶᠢᠰᠦᠭᠡᠢ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠴᠡᠭᠡᠵᠢᠨ ᠳᠣᠲᠣᠷᠠ ᠣᠷᠣᠭᠰᠠᠨ ᠶᠤᠮ ᠰᠢᠭ᠋ ᠡᠢᠨ ᠬᠡᠯᠡᠪᠡ᠃ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠬᠢᠵᠦ ᠶᠠᠪᠤᠳᠠᠭ ᠨᠢᠭᠡᠨ ᠲᠤᠯᠠ ᠪᠠᠰᠠ ᠴᠠᠭᠠᠰᠢᠯᠠᠭᠤᠯᠵᠤ ᠪᠠᠢᠵᠤ ᠮᠡᠳᠡᠨᠡ ᠭᠡᠮᠡᠨ ᠬᠠᠷᠠᠪᠠᠯ ᠦᠨᠡᠨ ᠰᠠᠨᠠᠭᠠᠨ ᠠ᠋ᠴᠠ ᠥᠭᠦᠯᠡᠭᠰᠡᠨ ᠠᠵᠢ᠃ ᠨᠡᠭᠦᠨ᠂
— ᠬᠠᠭᠠᠨ ᠡᠪᠦᠭᠡ ᠬᠣᠲᠣᠯᠠ ᠠᠪᠠᠭᠠ ᠳ᠋ᠤ᠌ ᠳᠠᠭᠠ ᠲᠠᠢ ᠦᠭᠡ ᠠᠢᠯᠠᠳᠤᠭᠰᠠᠨ ᠦᠭᠡᠢ ᠠᠵᠢ᠃ ᠨᠢᠭᠤᠷᠤᠨ ᠳᠡᠭᠡᠷᠡ ᠨᠢ ᠪᠢᠴᠢᠭᠡᠰᠦᠲᠡᠢ ᠪᠠᠢᠨᠠ ᠪᠢᠰᠢ ᠤᠤ᠃
— ᠵᠠᠶᠠᠭᠠ ᠮᠠᠭᠤ ᠲᠠᠢ ᠠᠮᠢᠲᠠᠨ ᠶᠤᠮ ᠳᠠ᠂ ᠬᠥᠭᠡᠷᠦᠬᠦᠢ᠃
— ᠣᠯᠵᠠᠨ ᠤ᠋ ᠡᠮᠡ ᠳ᠋ᠦ᠍ ᠨᠢᠳᠦ ᠪᠤᠤ ᠠᠯᠲᠠ᠂ ᠶᠢᠰᠦᠭᠡᠢ ᠳᠡᠭᠦᠦ᠃ ᠬᠠᠭᠠᠨ ᠬᠥᠮᠦᠨ ᠦ᠌ ᠦᠷᠡ ᠡᠮᠡᠭᠡᠯ ᠳᠤᠬᠤᠭᠠ ᠦᠭᠡᠢ ᠬᠦᠯᠦᠭ ᠤᠨᠤᠵᠤ᠂ ᠡᠷᠡ ᠶ᠋ᠢᠨ ᠠᠮᠢᠰᠬᠤᠭᠠ ᠬᠦᠷᠦᠭᠡ ᠦᠭᠡᠢ ᠡᠮᠡ ᠡᠪᠦᠷᠲᠦᠯᠡᠨᠡ ᠠ᠋᠃
— ᠠᠪᠠᠯᠢ ᠬᠠᠲᠤᠨ ᠪᠠᠭᠤᠯᠭᠠᠬᠤ ᠨᠢ ᠴᠦ᠍ ᠶᠠᠭᠤ ᠪᠣᠢ᠃ ᠠᠮᠢᠨ ᠳ᠋ᠠᠭᠠᠨ ᠳᠠᠮ ᠪᠣᠯᠤᠶᠠ ᠤᠤ ᠯᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃
— ᠶᠢᠰᠦᠭᠡᠢ ᠳᠡᠭᠦᠦ ᠳ᠋ᠦ᠍ ᠬᠠᠲᠤᠨ ᠣᠯᠵᠤ ᠥᠭᠭᠦᠨᠡ ᠠ᠋ ᠭᠡᠳ ᠨᠡᠭᠦᠨ ᠠᠭᠠᠳᠠᠭᠠᠨᠠᠨ ᠢᠨᠢᠶᠡᠬᠦ ᠳ᠋ᠦ᠍ ᠶᠢᠰᠦᠭᠡᠢ ᠤᠷᠤᠭᠤᠯ ᠢ᠋ ᠨᠢ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠪᠠᠷ ᠳᠠᠷᠤᠵᠤ᠂
— ᠴᠢᠮᠡᠭᠡ ᠦᠭᠡᠢ! ᠭᠡᠯᠡ᠃ ᠮᠠᠯᠲᠠᠭ ᠬᠢᠶᠡ ᠡᠪᠦᠭᠡ ᠬᠠᠭᠠᠨ ᠤ᠋ ᠥᠷᠭᠥᠭᠡ ᠤᠷᠤᠭᠤ ᠭᠦᠶᠦᠯᠡ᠃《ᠠᠮᠢᠨ ᠳ᠋ᠤ᠌ ᠲᠤᠯᠤᠭᠰᠠᠨ ᠠᠯᠪᠠ ᠳᠡᠭᠳᠡᠵᠡᠢ ᠳᠡ》ᠭᠡᠳ ᠨᠡᠭᠦᠨ ᠤᠬᠤᠰᠬᠢᠨ ᠪᠣᠰᠴᠤ ᠥᠷᠥᠭᠡᠯᠳᠡᠭᠰᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ᠂ ᠠᠰᠠᠷ ᠤ᠋ᠨ ᠪᠠᠭᠠᠨᠠ ᠠ᠋ᠴᠠ ᠪᠦᠰᠡ ᠪᠡᠨ ᠠᠪᠴᠤ ᠪᠦᠰᠡᠯᠡᠨ ᠶᠡᠦᠳᠡᠨ ᠮᠠᠯᠠᠭᠠᠢ ᠪᠠᠨ ᠬᠠᠰᠢ ᠶᠠᠰᠢᠬᠠᠨ ᠰᠢᠭ᠋ ᠬᠠᠶᠠᠪᠠ᠃ ᠶᠢᠰᠦᠭᠡᠢ ᠴᠦ᠍ ᠶᠠᠭᠠᠷᠠᠨ ᠬᠤᠪᠴᠠᠰᠤᠯᠠᠵᠤ ᠠᠮᠠ ᠲᠦᠷᠭᠡᠨ᠂ ᠶᠠᠪᠤᠳᠠᠯ ᠬᠡᠢᠰᠬᠡᠯᠡᠭᠦᠨ ᠴᠦ᠍ ᠬᠥᠭᠰᠢᠨ ᠵᠠᠯᠠᠭᠤ ᠬᠢᠭᠡᠳ ᠳᠡᠭᠡᠳᠦᠰ ᠳᠣᠣᠷᠠᠳᠤᠰ ᠬᠡᠨ ᠲᠡᠢ ᠴᠦ᠍ ᠪᠣᠯᠪᠠ ᠨᠢ ᠨᠣ ᠦᠭᠡᠢ ᠶᠠᠪᠤᠵᠤ ᠴᠢᠳᠠᠬᠤ ᠨᠡᠭᠦᠨ ᠠᠬᠠ ᠪᠠᠨ ᠳᠠᠭᠠᠵᠤ ᠭᠠᠷᠤᠯᠠ᠃ ᠡᠨᠡ ᠬᠢᠷᠢ ᠮᠡᠯᠲᠡᠩ ᠬᠢᠶᠡ ᠶᠡᠬᠡ ᠲᠠᠷᠮᠠᠨ ᠤ᠋ ᠬᠣᠷᠭᠣᠢ ᠡᠭᠦᠳᠡ ᠶ᠋ᠢ ᠭᠦᠨ ᠬᠦᠨᠳᠦᠳᠬᠡᠯ ᠲᠡᠢ ᠣᠷᠬᠢᠭᠠᠳ ᠪᠥᠭᠲᠦᠭ ᠪᠥᠭᠲᠦᠭ᠂ ᠮᠠᠢᠵᠢᠭᠢ ᠮᠠᠢᠵᠢᠭᠢ ᠬᠢᠨ ᠲᠤᠩ ᠶᠠᠭᠠᠷᠠᠤ ᠠᠯᠬᠤᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠡᠭᠦᠨ᠂
— ᠮᠡᠯᠲᠡᠩ! ᠭᠡᠪᠡᠯ ᠨᠠᠪᠲᠠᠰᠬᠢᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠬᠠᠨ ᠬᠥᠪᠡᠭᠦᠳ ᠢ᠋ ᠬᠠᠷᠠᠵᠤ ᠰᠡᠭᠰᠡᠭᠡᠨᠡᠨ ᠭᠦᠶᠦᠵᠦ ᠢᠷᠡᠭᠡᠳ᠂
— ᠡᠷᠬᠢᠮ ᠨᠡᠭᠦᠨ ᠶᠠᠭᠤ ᠠᠢᠯᠠᠳᠬᠤ ᠰᠠᠨ ᠪᠣᠯ? ᠭᠡᠯᠡ᠃ ᠨᠡᠭᠦᠨ ᠳᠡᠭᠡᠳᠦ ᠤᠷᠤᠭᠤᠯ ᠳᠡᠭᠡᠷᠡ ᠨᠢ ᠬᠠᠷᠠᠯᠠᠨ ᠲᠠᠷᠯᠠᠨᠲᠤᠵᠤ ᠬᠠᠷᠠᠭᠳᠠᠬᠤ ᠨᠢᠯᠬᠠ ᠵᠢᠪᠡᠷᠢ ᠪᠡᠨ ᠢᠯᠢᠭᠰᠡᠨ ᠢ᠋ᠶ᠋ᠡᠨ᠂
— ᠬᠠᠭᠠᠨ ᠡᠪᠦᠭᠡ ᠳᠣᠲᠣᠷᠠ ᠭᠠᠵᠠᠷ ᠤ᠋ᠨ ᠵᠢᠮᠢᠰ ᠥᠭᠪᠡ ᠤᠤ? ᠭᠡᠬᠦ ᠳ᠋ᠦ᠍ ᠮᠡᠯᠲᠡᠩ ᠬᠢᠶᠡ᠂
— ᠥᠭᠭᠦᠭᠰᠡᠨ ᠠ᠋᠂ ᠥᠭᠭᠦᠭᠰᠡᠨ᠁ ᠶᠡᠬᠡ ᠬᠠᠲᠤᠨ ᠬᠡᠰᠢᠭ ᠬᠦᠷᠲᠡᠭᠡᠭᠰᠡᠨ ᠭᠡᠵᠦ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠪᠠᠯ ᠶᠢᠰᠦᠭᠡᠢ·
— ᠡᠪᠦᠭᠡ ᠬᠠᠭᠠᠨ ᠥᠪᠡᠷ ᠢ᠋ ᠲᠠᠨᠢ ᠶᠠᠭᠤᠨ ᠳ᠋ᠤ᠌ ᠵᠠᠷᠤᠪᠠ ᠭᠡᠯᠡ᠃ ᠮᠡᠯᠲᠡᠩ ᠬᠢᠶᠡ ᠡᠪᠦᠷ ᠡᠴᠡ ᠪᠡᠨ ᠬᠡᠳᠦᠨ ᠴᠢᠪᠠᠭᠠ ᠭᠠᠷᠭᠠᠵᠤ ᠢᠷᠡᠭᠡᠳ ᠢᠮᠡᠷᠦᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠬᠠᠨ ᠨᠣᠶᠠᠳ ᠮᠢᠨᠢ ᠰᠦᠢᠳ ᠪᠣᠯᠵᠠᠢ᠂ ᠬᠡᠷᠡᠢᠳ ᠦ᠋ᠨ ᠪᠣᠶᠤᠷᠤᠭ ᠬᠣᠷᠵᠠᠬᠤᠰ ᠤ᠋ᠨ ᠬᠠᠲᠤᠨ ᠢᠯᠮᠠ᠂ ᠨᠤᠭᠤᠨ ᠬᠥᠪᠡᠭᠦᠨ ᠲᠣᠭᠣᠷᠢᠯ ᠬᠣᠶᠠᠷ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠠᠰᠷᠠᠮᠵᠢᠨ ᠳ᠋ᠤ᠌ ᠪᠠᠢᠨᠠ ᠭᠡᠨᠡ᠃ ᠡᠭᠦᠨ ᠢ᠋ ᠲᠤᠭᠤᠯᠭᠠ! ᠰᠤᠮᠤ ᠮᠡᠲᠦ ᠨᠢᠰ᠂ ᠰᠠᠯᠬᠢ ᠮᠡᠲᠦ ᠭᠦᠶᠦ ᠭᠡᠪᠡ ᠨᠠᠮᠠᠶ᠋ᠢ ᠭᠡᠳ ᠮᠥᠨ ᠯᠡ ᠮᠠᠢᠵᠢᠭᠢ ᠮᠠᠢᠵᠢᠭᠢ᠂ ᠶᠠᠢᠵᠢᠬᠢ ᠵᠠᠢᠵᠢᠭᠢ ᠭᠡᠮᠡᠨ ᠬᠣᠶᠠᠷ ᠳᠠᠰᠢ ᠪᠠᠨ ᠰᠠᠪᠠᠴᠢᠨ ᠭᠦᠶᠦᠵᠦ ᠣᠳᠬᠤ ᠳ᠋ᠤ᠌ ᠪᠠᠷᠢᠵᠤ ᠶᠠᠪᠤᠭᠠ ᠮᠥᠩᠭᠥᠨ ᠬᠠᠵᠠᠭᠠᠷ ᠤ᠋ᠨ ᠲᠣᠪᠣᠷᠤᠤ ᠬᠠᠩᠭᠢᠷ ᠵᠢᠩᠭᠢᠷ᠂ ᠬᠠᠩᠭᠢᠷ ᠵᠢᠩᠭᠢᠷ ᠠᠯᠤᠰᠯᠠᠵᠠᠢ᠃
— ᠶᠡᠷᠦ ᠮᠠᠯᠲᠠᠭ ᠬᠢᠶᠡ ᠳ᠋ᠦ᠍ ᠡᠨᠡ ᠮᠡᠲᠦ ᠴᠢᠬᠤᠯᠠ ᠠᠯᠪᠠ ᠣᠨᠣᠭᠳᠠᠵᠤ ᠪᠠᠢᠭᠰᠠᠨ ᠨᠢ ᠦᠭᠡᠢ ᠶᠦᠮ᠃ ᠶᠡᠬᠡ ᠬᠠᠭᠠᠨ ᠲᠡᠭᠦᠨ ᠢ᠋ ᠬᠥᠮᠦᠨ ᠭᠡᠮᠡᠨ ᠲᠣᠭᠣᠵᠤ᠂
— ᠮᠡᠯᠲᠡᠩ ᠮᠢᠨᠢ᠁ ᠭᠡᠵᠦ ᠳᠣᠲᠣᠨᠣᠴᠢᠯᠠᠨ᠂
— ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠵᠠᠶᠠᠭᠠ ᠭᠤᠳᠤᠢᠭᠰᠠᠨ ᠳᠡᠭᠡᠷᠡ ᠪᠡᠨ ᠭᠣᠳᠣᠢᠵᠤ ᠬᠣᠷᠵᠠᠬᠣᠰ ᠪᠣᠶᠤᠷᠤᠭ ᠤ᠋ᠨ ᠬᠠᠲᠤᠨ᠂ ᠬᠦᠦ ᠬᠣᠶᠠᠷ ᠤ᠋ᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠰᠠᠷᠠᠮᠵᠢᠨ ᠳ᠋ᠤ᠌ ᠪᠠᠢᠬᠤ ᠠᠵᠢ᠃ ᠬᠡᠦᠬᠡᠨ ᠬᠥᠮᠦᠨ ᠶᠠᠭᠠᠬᠢᠬᠤ ᠪᠣᠢ᠃ ᠦᠰᠦ ᠤᠷᠲᠤ ᠤᠬᠠᠭᠠᠨ ᠪᠣᠭᠣᠨᠢ ᠪᠢᠯᠡ᠃ ᠬᠦᠦ ᠶ᠋ᠢ ᠬᠠᠷᠢᠨ ᠪᠢ ᠶᠡᠬᠡ ᠲᠣᠭᠣᠪᠠ᠃ ᠲᠡᠷᠡ ᠴᠣᠪᠣᠭᠣ ᠬᠦᠦ ᠨᠠᠳᠠ《ᠲᠤᠤᠯᠠ ᠶ᠋ᠢᠨ ᠮᠥᠰᠥᠨ ᠳᠡᠭᠡᠷᠡ ᠬᠠᠷᠪᠤᠨ ᠲᠣᠭᠯᠠᠳᠠᠭ ᠲᠣᠭᠣᠯᠭᠠᠨ ᠬᠣᠶᠠᠷ ᠱᠠᠭᠠᠢ ᠲᠠᠢ ᠶᠤᠮ ᠰᠠᠨ᠃ ᠮᠥᠰᠥ ᠨᠢ ᠴᠥᠮᠥᠷᠡᠵᠦ ᠵᠢᠪᠦᠭᠡ ᠦᠭᠡᠢ ᠪᠣᠯ᠂ ᠮᠥᠷᠡᠨ ᠨᠢ ᠰᠢᠷᠭᠢᠵᠦ ᠬᠠᠲᠠᠭᠠ ᠦᠭᠡᠢ ᠪᠣᠯ ᠬᠦᠷᠭᠡᠭᠦᠯ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ᠃ ᠡᠨᠡ ᠦᠭᠡ ᠶ᠋ᠢ ᠪᠤᠶᠤᠷᠤᠭ ᠲᠤ᠌ ᠳᠠᠮᠵᠢᠭᠤᠯ᠃ ᠬᠠᠭᠠᠨ ᠮᠢᠨᠦ ᠦᠭᠡ ᠦᠨᠡᠨ ᠪᠣᠯᠬᠤ ᠶ᠋ᠢ ᠬᠠᠵᠠᠭᠠᠷ ᠮᠢᠨᠢ ᠭᠡᠷᠡᠴᠢᠯᠡᠨᠡ᠂ ᠮᠠᠢ᠁ ᠮᠣᠷᠢ ᠬᠠᠷᠠᠵᠤ᠂ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠬᠥᠮᠦᠨ ᠠᠪᠤᠭᠠᠷᠠᠢ ᠭᠡᠵᠡᠢ᠃
— ᠡᠢᠨ ᠨᠠᠰᠤ ᠠᠬᠢᠭᠰᠠᠨ ᠠᠯᠪᠠᠲᠤ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠳᠣᠲᠣᠨᠣᠴᠢᠯᠠᠭᠰᠠᠨ ᠳ᠋ᠤ᠌ ᠶᠡᠬᠡ ᠯᠡ ᠪᠡᠶᠡᠰᠴᠦ ᠥᠳᠥ ᠮᠡᠲᠦ ᠬᠥᠩᠭᠡᠨ ᠪᠣᠯᠤᠭᠰᠠᠨ ᠠᠪᠠᠢ᠃ ᠲᠡᠷᠡ ᠪᠡᠷ ᠦᠭᠡ ᠨᠣᠶᠠᠨ ᠳ᠋ᠤ᠌ ᠬᠠᠷᠪᠤᠭᠠ ᠵᠢᠭᠠᠵᠤ ᠥᠭᠴᠦ ᠪᠠᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠣᠴᠢᠭᠠᠳ·
— ᠬᠦᠦ ᠴᠢ ᠨᠠᠳᠠ ᠲᠠᠢ ᠶᠠᠪᠤᠬᠤ ᠤᠤ? ᠭᠡᠵᠦ ᠶᠡᠬᠡ ᠯᠡ ᠬᠥᠷ ᠪᠣᠯᠤᠨ ᠠᠰᠠᠭᠤᠪᠠᠯ᠂
— ᠬᠠᠮᠢᠭᠠᠰᠢ ᠪᠠᠨ? ᠭᠡᠳ ᠲᠡᠮᠦᠵᠢᠨ ᠦᠭᠡ ᠦᠷᠭᠦᠨ ᠨᠢᠰᠬᠦ ᠰᠢᠪᠠᠭᠤᠨ ᠵᠢᠭᠦᠷ ᠮᠡᠲᠦ ᠬᠥᠮᠥᠰᠬᠡ ᠡᠷᠭᠦᠨ ᠬᠠᠷᠠᠬᠤ ᠳ᠋ᠤ᠌᠂
— ᠪᠤᠷᠬᠠᠨ ᠬᠠᠯᠳᠤᠨ ᠢ᠋ ᠥᠪᠥᠷᠯᠡᠵᠦ᠂ ᠵᠢᠯᠡᠮᠡ ᠠᠭᠤᠯᠠ ᠶ᠋ᠢ ᠥᠷᠥᠯᠡᠵᠦ᠂ ᠥᠯᠥᠭᠡᠢ ᠪᠤᠯᠠᠭ ᠲᠤ᠌ ᠬᠣᠨᠣᠭᠯᠠᠵᠤ᠂ ᠭᠠᠴᠤᠷᠠᠲᠠᠢ᠂ ᠤᠯᠢᠶᠠᠰᠤᠲᠠᠢ ᠳᠠᠮᠵᠢᠨ ᠲᠤᠤᠯᠠ ᠶ᠋ᠢᠨ ᠬᠠᠷᠠ ᠰᠢᠭᠤᠢ ᠬᠦᠷᠦᠨᠡ ᠳᠡ ᠭᠡᠯᠡ᠃
— ᠬᠡᠷᠡᠢᠳ ᠦ᠋ᠨ ᠨᠤᠲᠤᠭ ᠤᠤ?
— ᠦᠭᠡ ᠨᠣᠶᠠᠨ᠂ ᠴᠢ ᠶᠡᠷᠦ ᠨᠢ ᠡᠨᠡ ᠵᠢᠵᠢᠭ ᠴᠡᠭᠡᠵᠢᠨ ᠳ᠋ᠦ᠍ ᠲᠣᠮᠣ ᠰᠠᠨᠠᠭᠠ ᠲᠡᠭᠡᠭᠡᠵᠦ ᠶᠠᠪᠤᠳᠠᠭ ᠬᠥᠮᠦᠨ ᠠ᠋᠃
— ᠪᠢ ᠲᠡᠢᠮᠦ ᠵᠢᠵᠢᠭ ᠴᠡᠭᠡᠵᠢ ᠲᠡᠢ ᠤᠤ? ᠮᠠᠯᠲᠠᠭ ᠬᠢᠶᠡ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠲᠡᠭᠦᠨ ᠢ᠋ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠰᠢᠷᠲᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠰᠠᠷᠠᠮᠵᠢᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠡᠳᠦᠨ ᠰᠠᠷᠠ ᠳ᠋ᠤ᠌ ᠴᠡᠭᠡᠵᠢ ᠨᠢ ᠲᠡᠪᠬᠡᠢᠵᠦ᠂ ᠣᠮᠣᠭᠯᠠᠩ ᠮᠣᠷᠢᠨ ᠤ᠋ ᠡᠷᠭᠢᠴᠡᠬᠡᠨ ᠳᠤᠮᠳᠠ ᠡᠮᠡᠭᠡᠯ ᠬᠠᠶᠠᠬᠤ ᠳ᠋ᠤ᠌ ᠳᠠᠯᠤ ᠨᠢᠷᠤᠭᠤᠨ ᠤ᠋ ᠬᠢᠨᠢ ᠪᠤᠯᠴᠢᠩ ᠵᠠᠩᠭᠢᠷᠠᠳᠠᠭ ᠪᠣᠯᠵᠠᠢ᠃ ᠮᠡᠯᠲᠡᠩ ᠣᠯᠣᠩ ᠢ᠋ᠶ᠋ᠠᠨ ᠰᠠᠢᠲᠤᠷ ᠴᠢᠩᠭᠠᠯᠠᠭᠰᠠᠨ ᠢ᠋ᠶ᠋ᠠᠨ᠂
— ᠴᠢ ᠤᠤ᠂ ᠲᠣᠮᠣ ᠴᠡᠭᠡᠵᠢ ᠲᠡᠢ᠁ ᠭᠡᠬᠦ ᠳ᠋ᠦ᠍ ᠦᠭᠡ ᠨᠣᠶᠠᠨ ᠥᠪᠡᠷ ᠦ᠋ᠨ ᠮᠣᠷᠢ ᠪᠠᠨ ᠬᠠᠵᠠᠭᠠᠷᠯᠠᠨ᠂
— ᠦᠨᠡᠨ ᠬᠡᠯᠡᠵᠦ ᠪᠠᠢ ᠭᠡᠳ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡᠨ ᠳ᠋ᠦ᠍ ᠵᠢᠯᠣᠭᠣ ᠪᠠᠨ ᠰᠣᠢᠨ᠂
— ᠪᠢ ᠶᠠᠪᠤᠨᠠ᠃ ᠬᠥᠲᠥᠴᠢ ᠪᠣᠯᠵᠤ ᠮᠣᠷᠢ ᠶ᠋ᠢ ᠲᠠᠨᠢ ᠬᠠᠷᠠᠶᠠ ᠭᠡᠵᠦ ᠰᠢᠢᠳᠦᠮᠡᠭ ᠬᠡᠯᠡᠯᠡ᠃ ᠡᠢᠨ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠡᠷᠡᠢᠳ ᠠᠢᠮᠠᠭ ᠲᠤ᠌ ᠢᠯᠡᠭᠡᠬᠦ ᠬᠣᠶᠠᠷ ᠡᠯᠴᠢ ᠮᠣᠷᠢᠨ ᠴᠠᠭ ᠲᠤ᠌ ᠪᠠᠭᠲᠠᠨ ᠮᠣᠷᠳᠠᠬᠤ ᠪᠣᠯᠪᠠ᠃ ᠦᠭᠡ ᠬᠦᠦ ᠬᠦᠷᠢᠶᠡ ᠲᠣᠭᠣᠷᠢᠭᠰᠠᠨ ᠬᠣᠷᠢᠭᠠ ᠬᠠᠷᠠᠭᠤᠯ ᠠ᠋ᠴᠠ ᠰᠠᠯᠵᠤ ᠡᠯᠡ ᠬᠡᠳᠦᠨ ᠰᠠᠷᠠ ᠳ᠋ᠤ᠌ ᠡᠯᠢᠭᠡᠮᠰᠡᠵᠦ ᠳᠣᠲᠣᠨᠣᠰᠤᠭᠰᠠᠨ ᠮᠡᠯᠲᠡᠭ ᠬᠢᠶᠡ ᠲᠡᠢ ᠡᠢᠨ ᠳᠥᠷᠥᠭᠡ ᠨᠡᠢᠯᠡᠬᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠥᠵᠢᠨ ᠢᠵᠢᠢ ᠳ᠋ᠦ᠍ ᠪᠠᠶᠠᠷ ᠲᠠᠢ ᠳᠣᠭᠣᠯᠭᠠᠵᠠᠢ᠃ ᠪᠢᠴᠢᠬᠠᠨ ᠴᠠᠴᠠᠷ ᠠ᠋ᠴᠠ ᠲᠣᠯᠣᠭᠠᠢ ᠴᠣ ᠦᠯᠦ ᠴᠤᠬᠤᠢᠯᠭᠠᠬᠤ ᠬᠠᠲᠤᠨ᠂ ᠬᠦᠦ ᠪᠡᠨ ᠳᠥᠯᠭᠡᠨ ᠨᠢᠳᠦ ᠪᠡᠷ ᠤᠳᠠᠭᠠᠨ ᠬᠠᠷᠠᠭᠠᠳ ᠰᠠᠯᠬᠢ ᠦᠨᠦᠷᠲᠦᠭᠰᠡᠨ ᠳᠤᠬᠤᠨ ᠳᠡᠭᠡᠷᠡ ᠨᠢ ᠦᠨᠦᠷᠯᠡᠵᠦ᠂
— ᠮᠢᠨᠦ ᠬᠦᠦ ᠲᠣᠮᠣ ᠪᠣᠯᠵᠠᠢ ᠭᠡᠳ ᠲᠣᠷᠭᠠᠨ ᠳᠡᠷᠡᠨ ᠳᠣᠣᠭᠤᠷ ᠭᠠᠷ ᠰᠢᠷᠭᠤᠭᠤᠯᠤᠨ ᠠᠳᠬᠤ ᠳᠦᠭᠦᠷᠡᠩ ᠠᠮᠲᠠᠲᠠᠨ ᠢ᠋ ᠡᠪᠦᠷ ᠲᠦ᠋ᠨᠢ ᠬᠢᠵᠦ ᠪᠢᠯᠡ᠃ ᠴᠢᠩᠭᠢᠭᠡᠳ ᠪᠠᠭᠤᠷᠴᠢ ᠴᠢᠷᠬᠠ ᠡᠪᠦᠭᠡᠨ ᠦ᠌᠂
— ᠡᠯᠴᠢ ᠶ᠋ᠢᠨ ᠬᠦᠨᠡᠰᠦ ᠭᠡᠮᠡᠨ ᠥᠭᠴᠢᠯᠭᠡᠭᠰᠡᠨ ᠪᠣᠭᠴᠣ ᠲᠠᠢ ᠶ᠋ᠢ ᠲᠣᠬᠣᠭᠠᠳ᠂ ᠬᠥᠲᠥᠯᠦᠭᠡ ᠮᠣᠷᠢᠲᠠᠢ ᠬᠣᠶᠠᠷ ᠡᠷᠡ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠨᠠᠷᠠ ᠲᠤᠰᠬᠠᠭᠤᠯᠵᠤ ᠲᠠᠯᠪᠢᠭᠰᠠᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠭᠠᠳᠠᠭᠠ ᠲᠦᠷ ᠰᠠᠭᠠᠲᠠᠭᠰᠠᠨ ᠨᠢ ᠮᠠᠯᠲᠠᠭ ᠬᠢᠶᠡ ᠶ᠋ᠢᠨ ᠬᠢ ᠠᠵᠢ᠃ ᠲᠡᠷᠭᠡᠨ ᠦ᠌ ᠳᠤᠭᠤᠢ ᠨᠠᠯᠠᠨ ᠮᠢᠬᠠᠯᠢᠭᠳᠠᠭᠤ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠵᠦ ᠰᠠᠭᠤᠭᠠᠳ ᠠᠯᠠᠭᠰᠠᠨ ᠰᠢᠪᠠᠭᠤᠨ ᠤ᠋ ᠪᠠᠨ ᠥᠳᠥ ᠶ᠋ᠢ ᠵᠤᠮᠠᠯᠤᠨ ᠰᠠᠭᠤᠭᠰᠠᠨ ᠬᠡᠵᠢᠶᠡᠯ ᠡᠬᠡᠨᠡᠷ ᠡᠷᠭᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠤᠬᠤᠰᠬᠢᠨ ᠪᠣᠰᠴᠤ᠂
— ᠬᠡ᠂ ᠬᠡᠯᠡ ᠴᠢᠮᠡᠭᠡ ᠴᠦ᠍ ᠦᠭᠡᠢ ᠶᠡᠬᠡᠰ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ ᠭᠡᠬᠦ ᠳ᠋ᠦ᠍ ᠮᠠᠯᠲᠠᠭ ᠪᠠᠳᠬᠠ ᠳᠦᠭᠦᠷᠡᠩ ᠨᠢᠭᠤᠷᠤᠨ ᠳ᠋ᠠᠭᠠᠨ ᠢᠨᠢᠶᠡᠳᠦ ᠲᠣᠳᠣᠷᠠᠭᠤᠯᠤᠨ᠂
— ᠶᠡᠬᠡᠰ ᠳᠡᠭᠡᠳᠦᠰ ᠪᠢᠰᠢ᠂ ᠢᠵᠢᠯᠢ ᠪᠣᠷᠣᠭ ᠡᠷᠡ᠁ ᠭᠡᠳ ᠡᠪᠦᠷ ᠢ᠋ᠶ᠋ᠡᠨ ᠤᠬᠤᠬᠤ ᠳ᠋ᠤ᠌ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠣᠢᠷᠠᠯᠴᠠᠭᠠ ᠭᠢᠯᠭᠠᠨᠠ ᠰᠦᠯᠵᠢᠨ ᠲᠣᠭᠯᠠᠵᠤ ᠠᠭᠰᠠᠨ ᠳᠥᠷᠪᠡ ᠲᠠᠪᠤᠨ ᠪᠠᠨᠳᠢ ᠭᠦᠶᠦᠯᠳᠦᠨ ᠰᠢᠪᠡᠪᠡ᠃ ᠮᠠᠯᠲᠠᠭ ᠡᠪᠦᠷ ᠡᠴᠡ ᠪᠡᠨ ᠴᠢᠪᠠᠭᠠ ᠭᠠᠷᠭᠠᠵᠤ ᠢᠷᠡᠨ ᠲᠣᠰᠣᠨ ᠰᠠᠷᠪᠠᠢᠬᠤ ᠠᠯᠠᠭᠠ ᠪᠦᠷᠢ ᠳᠡᠭᠡᠷᠡ ᠨᠢᠵᠡᠭᠡᠳ ᠢ᠋ ᠲᠠᠯᠪᠢᠭᠠᠳ ᠭᠠᠷ ᠲᠤ᠌ ᠦᠯᠡᠳᠡᠭᠰᠡᠨ ᠬᠣᠶᠠᠷ ᠢ᠋ ᠠᠪᠠᠭᠠᠢ ᠳ᠋ᠠᠭᠠᠨ ᠥᠭᠴᠦ᠂
— ᠡᠮᠬᠦᠴᠢᠬᠡ ᠭᠡᠯᠡ᠃ ᠲᠣᠰᠣ ᠳᠠᠭᠠᠭᠠᠭᠰᠠᠨ ᠪᠣᠷᠣ ᠠᠪᠠᠭᠠᠢ ᠪᠠᠨ ᠨᠢᠳᠦ ᠳᠦᠭᠦᠷᠡᠩ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠳ᠋ᠠᠭᠠᠨ ᠠᠯᠠᠪᠬᠢᠨ ᠮᠣᠷᠳᠠᠭᠠᠳ ᠬᠡᠷᠡᠢᠳ ᠨᠤᠲᠤᠭ ᠤ᠋ᠨ ᠵᠦᠭ ᠳᠡᠷᠭᠡᠭᠦᠯᠵᠡᠢ᠃
~ ᠦᠷᠭᠦᠯᠵᠢᠯᠡᠯ ᠪᠤᠢ ~