ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠲᠠᠪᠤ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -5
169ᠬᠥᠭᠡᠷᠦᠬᠦᠢᠳᠡᠭᠰᠡᠨ ᠬᠥᠮᠦᠰ
ᠳᠣᠷᠵᠢ᠂ ᠬᠦᠷᠡᠯ ᠦ᠋ᠨ ᠭᠡᠷ ᠣᠷᠣᠨ᠂ ᠮᠥᠨ ᠠᠭᠤᠯᠠ ᠶ᠋ᠢᠨ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠭᠡᠷ ᠲᠡᠭᠡᠨ ᠬᠣᠨᠣᠭᠰᠠᠨ ᠤ᠋ ᠪᠠᠨ ᠮᠠᠷᠭᠠᠰᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠬᠤ ᠪᠠᠷ ᠮᠣᠷᠳᠠᠪᠠ᠃ ᠵᠠᠮ ᠵᠠᠭᠤᠷᠠ ᠪᠠᠨ ᠬᠦᠷᠡᠯ ᠦ᠋ᠨ ᠥᠩᠭᠡᠷᠡᠭᠰᠡᠨ ᠢ᠋ ᠶᠠᠮᠠᠷ ᠠᠷᠭᠠ ᠪᠠᠷ ᠶᠠᠭᠠᠬᠢᠵᠤ ᠮᠡᠳᠡᠭᠳᠡᠬᠦ ᠶ᠋ᠢ ᠡᠯᠳᠡᠪᠴᠢᠯᠡᠨ ᠪᠣᠳᠣᠪᠠᠴᠤ ᠶᠡᠷᠦ ᠣᠯᠢᠭᠲᠠᠢ ᠠᠷᠭᠠ ᠣᠯᠤᠭᠰᠠᠨ ᠦᠭᠡᠢ ᠭᠠᠳᠠᠭᠠ ᠨᠢ ᠢᠷᠡᠭᠡᠳ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠠᠮᠠ ᠪᠠᠨ ᠬᠠᠮᠬᠢᠨ ᠪᠣᠭᠣᠯᠠᠭᠤᠯᠤᠭᠰᠠᠨ ᠨᠣᠬᠠᠳ ᠢ᠋ ᠨᠢ ᠡᠯᠡᠭ ᠪᠠᠷᠢᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠭᠡᠷ ᠲᠦ᠋ᠨᠢ ᠣᠷᠣᠪᠠ᠃
ᠲᠠᠪᠤ ᠵᠢᠷᠭᠤᠭᠠᠨ ᠨᠢᠯᠬᠠ ᠪᠠᠭᠠᠴᠤᠳ ᠲᠤᠯᠭᠠ ᠲᠣᠭᠣᠷᠢᠨ ᠴᠢᠭᠴᠢᠯᠳᠦᠭᠰᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠡᠬᠡᠨᠡᠷ ᠳᠣᠯᠵᠢᠨ ᠰᠠᠭᠤᠵᠤ ᠪᠠᠢᠵᠠᠢ᠃ ᠶᠠᠳᠠᠷᠠᠨ ᠵᠦᠳᠡᠷᠡᠭᠰᠡᠨ ᠴᠢᠷᠠᠢ ᠪᠠᠷ ᠳᠣᠷᠵᠢ ᠶ᠋ᠢ ᠬᠠᠷᠠᠨ ᠰᠣᠴᠢᠪᠠ᠃《ᠳᠣᠷᠵᠢ》 ᠭᠡᠵᠦ ᠳᠠᠭᠤ ᠠᠯᠲᠠᠨ ᠪᠣᠰᠤᠨ ᠬᠠᠷᠠᠢᠵᠤ᠂
— ᠵᠠ ᠲᠡᠭᠡᠭᠡᠳ ᠲᠠ ᠨᠠᠷ ᠮᠢᠨᠢ ᠠᠱ᠌ᠢᠭᠦᠢ ᠮᠡᠨᠳᠦ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡᠦ? ᠭᠡᠵᠦ ᠪᠠᠶᠠᠷᠯᠠᠨ ᠴᠡᠴᠡᠷᠬᠢᠯᠡᠭᠰᠡᠨ ᠠᠪᠢᠶᠠ ᠪᠠᠷ ᠠᠰᠠᠭᠤᠪᠠ᠃
ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠬᠠᠷᠠᠩᠭᠤᠢᠯᠠᠨ᠂ ᠮᠠᠭᠤ ᠶᠠᠪᠤᠯᠠ! ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠪᠡ᠃
— ᠮᠠᠭᠤ ᠶᠠᠪᠤᠭᠰᠠᠨ ᠭᠡᠨᠡ ᠠ᠋? ᠭᠡᠵᠦ ᠳᠤᠯᠵᠢᠨ ᠥᠪᠡᠷ ᠲᠡᠭᠡᠨ ᠰᠢᠪᠡᠨᠡᠭᠡᠳ᠄
— ᠬᠦᠷᠡᠯ ᠬᠠᠮᠢᠭᠠ ᠪᠣᠢ? ᠭᠡᠵᠦ ᠡᠭᠦᠳᠡ ᠤᠷᠤᠭᠤ ᠬᠠᠷᠠᠪᠠ᠃ ᠳᠣᠷᠵᠢ᠄
— ᠲᠠ ᠣᠳᠣ ᠲᠡᠷᠡ ᠬᠥᠮᠦᠨ ᠢ᠋ ᠪᠢᠲᠡᠭᠡᠢ ᠰᠤᠷᠠᠭᠯᠠ ᠳᠠ ᠭᠡᠳ ᠳᠣᠷᠣᠭᠰᠢ ᠬᠠᠷᠠᠪᠠ᠃
ᠡᠨᠡ ᠳᠠᠷᠤᠢ ᠬᠥᠭᠡᠷᠦᠬᠦᠢ ᠡᠬᠡᠨᠡᠷ ᠦ᠋ᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠪᠦᠷᠬᠦᠵᠦ ᠴᠢᠷᠠᠢ ᠨᠢ ᠦᠨᠡᠰᠦᠨ ᠰᠠᠷᠠᠯ ᠪᠣᠯᠤᠨᠠ᠃
— ᠶᠠᠭᠠᠬᠢᠭᠠᠳ ᠭᠡᠵᠦ ᠠᠮᠢᠰᠬᠤᠭᠠᠳᠠᠪᠠ᠃
— ᠪᠤᠷᠬᠠᠨ ᠳ᠋ᠠᠭᠠᠨ ᠵᠤᠯᠠ ᠡᠷᠭᠦᠴᠢᠬᠡ ᠳᠡ! ᠭᠡᠬᠦ ᠳ᠋ᠦ᠍ ᠳᠣᠯᠵᠢᠨ ᠤᠴᠢᠷ ᠢ᠋ ᠣᠢᠯᠠᠭᠠᠵᠠᠢ᠃
ᠭᠡᠨᠡᠳᠲᠡ ᠶᠡᠬᠡ ᠬᠦᠴᠦ ᠭᠠᠷᠭᠠᠨ ᠤᠬᠢᠯᠠᠯᠠ᠃ ᠬᠡᠦᠬᠡᠳ ᠦ᠋ᠳ ᠨᠢ ᠡᠬᠡ ᠪᠡᠨ ᠨᠢᠭᠡ ᠬᠡᠰᠡᠭ ᠭᠠᠢᠬᠠᠨ ᠰᠢᠷᠳᠡᠪᠡ᠃ ᠳᠥᠷᠪᠡᠨ ᠨᠠᠰᠤᠲᠠᠢ ᠬᠠᠮᠤᠭ ᠤ᠋ᠨ ᠪᠠᠭᠠ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠢᠨᠬᠦ ᠳᠠᠭᠤ ᠴᠢᠮᠡᠭᠡ ᠠᠯᠳᠠᠭᠰᠠᠨ ᠳ᠋ᠤ᠌ ᠠᠶᠤᠪᠠ ᠪᠣᠯᠤᠯᠲᠠᠢ᠂ ᠭᠡᠨᠡᠳᠲᠡ ᠦᠰᠦᠷᠦᠨ ᠵᠠᠭᠤᠷᠠᠨ ᠠᠪᠴᠤ ᠴᠢᠷᠠᠯᠠᠪᠠ᠃ ᠳᠠᠷᠠᠭᠠ ᠳ᠋ᠤᠨᠢ ᠪᠤᠰᠤᠳ ᠨᠢ ᠳᠠᠭᠠᠯᠳᠤᠨ ᠮᠥᠨ ᠡᠬᠡ ᠪᠡᠨ ᠵᠠᠭᠤᠷᠠᠪᠠ᠃
ᠳᠣᠷᠵᠢ ᠤᠷᠢᠳ ᠡᠮᠦᠨᠡ ᠡᠢᠮᠦ ᠬᠡᠴᠡᠭᠦᠦ ᠶᠠᠭᠤᠮᠠ ᠲᠠᠢ ᠳᠠᠭᠠᠷᠢᠯᠳᠤᠵᠤ ᠦᠵᠡᠭᠡ ᠦᠭᠡᠢ ᠲᠤᠯᠠ ᠬᠡᠷᠬᠢᠬᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠦᠭᠡᠢ᠂ ᠨᠢᠭᠡ ᠦᠶᠡ ᠳᠣᠯᠵᠢᠨ ᠠᠪᠠᠭᠠᠢ ᠶ᠋ᠢ ᠲᠡᠪᠡᠷᠢᠨ ᠠᠪᠴᠤ ᠠᠷᠭᠠᠳᠠᠮᠠᠷ ᠰᠠᠨᠠᠭᠳᠠᠪᠠᠴᠤ ᠬᠠᠯᠳᠠᠨ ᠣᠴᠢᠵᠤ ᠡᠰᠡ ᠴᠢᠳᠠᠨᠠ᠃ ᠳᠡᠮᠡᠢ ᠪᠠᠴᠢᠮᠳᠠᠨ ᠵᠣᠪᠠᠭᠰᠠᠨ ᠳ᠋ᠠᠭᠠᠨ ᠲᠡᠳᠡᠨ ᠢ᠋ ᠳᠠᠭᠠᠨ ᠤᠬᠢᠯᠠᠪᠠ᠃ ᠭᠡᠪᠡᠴᠦ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠡᠰᠡ ᠭᠠᠷᠤᠨᠠ᠃
ᠨᠡᠯᠢᠶᠡᠳ ᠮᠥᠴᠡ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠳᠤᠯᠵᠢᠨ ᠭᠡᠨᠡᠳᠲᠡ ᠤᠬᠢᠯᠠᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠳᠤᠭᠤᠢ ᠪᠣᠯᠵᠤ ᠨᠢᠳᠦᠨ ᠦ᠌ ᠪᠡᠨ ᠨᠢᠯᠪᠤᠰᠤ ᠶ᠋ᠢ ᠠᠷᠴᠢᠭᠠᠳ ᠪᠤᠷᠬᠠᠨ ᠳ᠋ᠠᠭᠠᠨ ᠵᠤᠯᠠ ᠡᠷᠭᠦᠪᠡ᠃ ᠲᠡᠭᠡᠭᠡᠳ ᠨᠢᠭᠡ ᠴᠦ᠍ ᠦᠭᠡ ᠬᠡᠯᠡᠯᠭᠦᠢ ᠲᠣᠭᠣᠭᠠ ᠲᠠᠯᠪᠢᠨ ᠴᠠᠢ ᠴᠢᠨᠠᠪᠠ᠃ ᠳᠣᠷᠵᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠷᠢᠨ ᠬᠠᠲᠠᠭᠤᠵᠢᠵᠤ ᠪᠠᠢᠭᠠ ᠳ᠋ᠤᠨᠢ ᠪᠠᠶᠠᠷᠯᠠᠪᠠ᠃ ᠳᠣᠯᠵᠢᠨ ᠲᠣᠪ ᠳᠤᠭᠤᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠳᠡᠭᠡ ᠪᠤᠳᠠᠭᠠ ᠲᠠᠯᠪᠢᠨ ᠵᠣᠴᠢᠯᠠᠬᠤ ᠳ᠋ᠠᠭᠠᠨ᠄
— ᠳᠣᠷᠵᠢ ᠮᠢᠨᠢ ᠰᠡᠳᠬᠢᠯ ᠰᠠᠨᠠᠭᠠ ᠦᠢᠮᠡᠭᠡᠳ ᠶᠠᠭᠠᠬᠢᠬᠤ ᠴᠦ᠍ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠰᠡᠭᠦᠯᠡᠷ ᠨᠢᠭᠡ ᠲᠠᠪᠠᠲᠠᠢ ᠢᠷᠡᠵᠦ ᠲᠡᠭᠦᠨ ᠦ᠌ ᠮᠢᠨᠢ ᠲᠤᠬᠠᠢ ᠲᠣᠳᠣᠷᠬᠠᠢ ᠶᠠᠷᠢᠵᠤ ᠦᠵᠡᠭᠡᠷᠡᠢ! ᠭᠡᠪᠡ᠃
ᠳᠣᠷᠵᠢ ᠬᠠᠷᠢᠭᠤ ᠳ᠋ᠤᠨᠢ ᠵᠠ ᠭᠡᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃ ᠴᠠᠢ ᠤᠤᠭᠤᠬᠤ ᠵᠠᠭᠤᠷᠠ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠬᠤ ᠳ᠋ᠤ᠌ ᠲᠡᠳᠡ ᠲᠤᠩ ᠰᠠᠶᠢᠬᠠᠨ ᠤᠬᠢᠯᠠᠭᠠᠨ ᠤᠨᠵᠠᠭᠠᠨ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠷᠢᠨ ᠮᠠᠷᠲᠠᠵᠤ ᠢᠳᠡᠵᠦ᠂ ᠤᠤᠭᠤᠬᠤ ᠪᠠᠨ ᠪᠤᠯᠢᠶᠠᠯᠳᠤᠨ ᠱᠤᠤᠭᠢᠨᠠ᠃ ᠡᠬᠡ ᠨᠢ ᠲᠡᠳᠡᠨ ᠢ᠋ᠶ᠋ᠡᠨ ᠳᠠᠭᠠᠯᠳᠤᠨ《ᠬᠥᠶᠢ ᠴᠢ᠂ ᠦᠭᠡᠢ ᠴᠢ!》 ᠭᠡᠬᠦᠴᠢᠯᠡᠨ ᠳᠠᠭᠤ ᠠᠯᠲᠠᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠰᠤᠷᠭᠠᠮᠵᠢᠯᠠᠨᠠ᠃ ᠡᠭᠦᠪᠡᠷ ᠢ᠋ᠶ᠋ᠡᠨ ᠲᠡᠳᠡ ᠣᠢ ᠭᠠᠰᠢᠭᠤᠳᠠᠯ ᠢ᠋ᠶ᠋ᠠᠨ ᠲᠠᠢᠯᠤᠭᠰᠠᠨ ᠪᠥᠭᠡᠳ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠪᠠᠶᠠᠰᠬᠠᠨ ᠭᠡᠢᠭᠦᠯᠪᠡ᠃
ᠭᠡᠪᠡᠴᠦ ᠳᠣᠷᠵᠢ ᠶ᠋ᠢ ᠬᠣᠶᠠᠳᠠᠬᠢ ᠵᠦᠢᠯ ᠨᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠪᠢᠯᠡ᠃ ᠡᠨᠡ ᠪᠣᠯ ᠳ᠋ᠠᠨᠽᠠᠨ ᠤ᠋ ᠳ᠋ᠤ᠌ ᠣᠴᠢᠬᠤ ᠶᠠᠪᠤᠳᠠᠯ ᠪᠠᠢᠪᠠ᠃ ᠳ᠋ᠠᠨᠽᠠᠨ ᠤ᠋ ᠬᠢ ᠶᠠᠳᠠᠭᠤ᠃ ᠠᠷᠤ ᠭᠡᠷ ᠬᠣᠢᠰᠢ ᠪᠠᠨ ᠵᠢᠭᠤᠲᠠᠭᠰᠠᠨ ᠭᠠᠮᠢᠩ ᠤ᠋ᠨ ᠬᠥᠯ ᠡᠴᠡ ᠲᠡᠳᠦᠢ ᠯᠡ ᠬᠣᠯᠠ ᠦᠭᠡᠢ ᠭᠠᠵᠠᠷ ᠪᠠᠢᠭᠰᠠᠨ ᠠᠵᠢ᠃ ᠤᠯᠤᠰ ᠠᠮᠢᠲᠠᠨ ᠤ᠋ ᠠᠮᠢ ᠵᠤᠯᠪᠠᠨ ᠳᠦᠷᠪᠡᠬᠦ ᠳ᠋ᠦ᠍ ᠡᠬᠡ ᠶ᠋ᠢᠨ ᠬᠢᠨᠢ ᠪᠡᠶᠡ ᠡᠪᠡᠳᠴᠢᠲᠡᠢ ᠮᠠᠭᠤ ᠪᠠᠢᠭᠰᠠᠨ ᠠ᠋ᠴᠠ ᠬᠠᠷᠠ ᠪᠠᠭᠤᠳᠠᠯ ᠳᠡᠭᠡᠷᠡ ᠭᠠᠭᠴᠠᠭᠠᠷ ᠬᠣᠴᠣᠷᠤᠭᠰᠠᠨ ᠢ᠋ ᠳᠣᠷᠵᠢ ᠰᠠᠮᠪᠤᠤ ᠠ᠋ᠴᠠ ᠲᠣᠳᠣᠷᠬᠠᠢ ᠰᠣᠨᠣᠰᠤᠭᠰᠠᠨ ᠪᠠᠢᠯᠠ᠃ ᠡᠢᠮᠦ ᠳ᠋ᠦ᠍ ᠳᠣᠷᠵᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠶᠠᠭᠠᠷᠠᠨ ᠣᠴᠢᠬᠤ ᠶ᠋ᠢ ᠰᠢᠢᠳᠦᠭᠰᠡᠨ ᠦ᠌ ᠳᠡᠭᠡᠷᠡ ᠡᠴᠢᠭᠡ ᠨᠢ ᠪᠦᠷ ᠥᠨᠥᠳᠥᠷ ᠦ᠋ᠨ ᠳᠣᠲᠣᠷᠠ ᠭᠡᠵᠦ ᠱᠠᠭᠠᠷᠳᠠᠭᠰᠠᠨ ᠪᠠᠢᠪᠠ᠃
ᠦᠷᠭᠦᠯᠵᠢᠯᠡᠭᠰᠡᠨ ᠶᠡᠬᠡ ᠴᠠᠰᠤᠨ ᠳᠤᠮᠳᠠᠭᠤᠷ ᠳᠣᠷᠵᠢ ᠡᠴᠡᠩᠬᠡᠢ ᠮᠠᠭᠤ ᠤᠨᠤᠭᠠ ᠪᠠᠷ ᠴᠦᠯ ᠴᠦᠯ ᠱᠣᠭᠰᠢᠭᠤᠯᠤᠨ ᠥᠷᠲᠡᠭᠡ ᠭᠠᠷᠤᠢ ᠶᠠᠪᠤᠪᠠ᠃ ᠯᠠᠪᠰᠢᠷᠡᠭᠰᠡᠨ ᠴᠠᠭᠠᠨ ᠴᠠᠰᠤᠨ ᠳᠤᠮᠳᠠ ᠭᠠᠭᠴᠠ ᠭᠡᠷ ᠲᠣᠷᠣᠢᠨ ᠦᠵᠡᠭᠳᠡᠬᠦ ᠨᠢ ᠳ᠋ᠠᠨᠽᠠᠨ ᠤ᠋ ᠬᠢ ᠠᠵᠢ᠃ ᠳᠣᠷᠵᠢ ᠳ᠋ᠠᠨᠽᠠᠨ ᠤ᠋ ᠠᠮᠢ ᠪᠡᠶᠡ ᠶ᠋ᠢ ᠠᠯᠢ ᠬᠡᠳᠦᠢᠨ ᠦᠷᠡᠭᠳᠡᠭᠰᠡᠨ ᠳ᠋ᠦ᠍ ᠪᠣᠳᠣᠨᠠ᠃ ᠭᠡᠷ ᠣᠷᠣᠨ ᠤ᠋ ᠬᠢᠨ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ ᠤ᠋ ᠦᠷᠡᠭᠳᠡᠭᠰᠡᠨ ᠢ᠋ ᠮᠡᠳᠡᠭᠳᠡᠵᠦ ᠬᠣᠢᠰᠢᠳᠠ ᠶ᠋ᠢᠨ ᠬᠢᠨᠢ ᠶᠠᠪᠤᠳᠠᠯ ᠳ᠋ᠤ᠌ ᠳᠡᠮᠡᠢ ᠭᠣᠷᠢᠯᠠᠨ ᠬᠦᠯᠢᠶᠡᠯᠭᠡᠬᠦ ᠦᠭᠡᠢ ᠪᠣᠯᠭᠠᠬᠤ ᠶ᠋ᠢ ᠯᠡ ᠬᠦᠰᠡᠨᠡ᠃ ᠭᠡᠪᠡᠴᠦ ᠡᠨᠡ ᠮᠠᠭᠤᠬᠠᠢ ᠮᠡᠳᠡᠭᠡ ᠪᠡᠨ ᠪᠠᠰᠠ ᠯᠠ ᠶᠠᠭᠠᠬᠢᠵᠤ ᠶᠠᠮᠠᠷ ᠦᠭᠡ ᠪᠡᠷ ᠮᠡᠳᠡᠭᠳᠡᠬᠦ ᠪᠡᠨ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠪᠣᠳᠣᠭᠠᠳ ᠡᠴᠦᠰ ᠲᠦ᠋ᠨᠢ ᠠᠭᠤᠯᠵᠠᠭᠰᠠᠨ ᠴᠠᠭ ᠲᠤᠬᠠᠢ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠪᠣᠯᠬᠤ ᠪᠣᠢ! ᠭᠡᠵᠦ ᠨᠠᠢᠳᠠᠨᠠ᠃
ᠭᠡᠷ ᠦ᠋ᠨ ᠭᠠᠳᠠᠭᠠ ᠢᠷᠡᠬᠦ ᠳ᠋ᠦ᠍ ᠰᠢᠷᠦᠭᠦᠨ ᠭᠠᠯ ᠤ᠋ᠨ ᠢᠯᠴᠢ ᠲᠣᠭᠣᠨᠣ ᠪᠠᠷ ᠨᠢ ᠵᠢᠷᠪᠢᠭᠢᠨᠡᠨ᠂ ᠬᠠᠭᠤᠷᠠᠢ ᠮᠣᠳᠣᠨ ᠤ᠋ ᠣᠴᠢ ᠳᠡᠰ ᠨᠢᠰ ᠳᠤᠤᠭᠠᠷᠬᠤ ᠠ᠋ᠴᠠ ᠥᠭᠡᠷᠡ ᠠᠨᠢᠷ ᠴᠢᠮᠡᠭᠡ ᠥᠴᠦᠬᠡᠨ ᠴᠦ᠍ ᠦᠭᠡᠢ ᠪᠠᠢᠯᠠ᠃ ᠳᠣᠷᠵᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠡᠳᠡᠨ ᠦ᠌ ᠳ᠋ᠦ᠍ ᠨᠢᠭᠡ ᠠᠢᠬᠤᠪᠲᠤᠷ ᠵᠠᠭᠤᠳᠠᠭ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠪᠠᠢᠳᠠᠭ ᠢ᠋ ᠰᠠᠨᠠᠨ ᠲᠠᠢᠰᠢ ᠬᠠᠷᠠᠪᠠ᠃ ᠭᠡᠲᠡᠯᠡ ᠲᠡᠷᠡ ᠨᠢ ᠲᠡᠷᠭᠡᠨ ᠤᠷᠢᠳ ᠴᠠᠭᠠᠨ ᠴᠠᠰᠤᠨ ᠳᠡᠭᠡᠷᠡ ᠤᠯᠠᠭᠠᠨ ᠴᠢᠰᠤᠨ ᠵᠠᠮ ᠴᠤᠪᠤᠷᠠᠭᠤᠯᠤᠨ ᠦᠬᠦᠭᠰᠡᠨ ᠬᠡᠪᠲᠡᠨᠡ᠃ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠰᠡᠬᠦᠨ ᠣᠷᠣᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠤ᠋ ᠡᠭᠡᠴᠢ ᠰᠥᠷᠦᠮᠡ ᠳᠦᠷᠡᠯᠵᠡᠭᠰᠡᠨ ᠶᠡᠬᠡ ᠭᠠᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠰᠣᠴᠢᠨ ᠪᠣᠰᠤᠨ ᠬᠠᠷᠠᠢᠭᠰᠠᠨ ᠢ᠋ᠶ᠋ᠠᠨ ᠰᠣᠯᠢᠶᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠭᠥᠯᠢᠷᠡᠨᠡ᠃ ᠡᠨᠡ ᠳᠠᠷᠤᠢ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠲᠤᠩ ᠠᠶᠠᠭᠦᠢ ᠪᠣᠯᠪᠠ᠃
— ᠵᠠ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠮᠡᠨᠳᠦᠯᠡᠬᠦ ᠳ᠋ᠦ᠍ ᠰᠥᠷᠦᠮᠡ ᠨᠢᠳᠦ ᠭᠥᠯᠢᠷᠡᠭᠰᠡᠨ ᠢ᠋ᠶ᠋ᠡᠨ ᠡᠰᠡ ᠣᠷᠬᠢᠨ᠄
— ᠲᠠ ᠬᠡᠨ ᠪᠣᠢ? ᠶᠠᠭᠤ ᠭᠡᠵᠦ ᠢᠷᠡᠪᠡ? ᠭᠡᠵᠦ ᠳᠥᠩᠭᠡᠵᠦ ᠳᠤᠭᠤᠯᠳᠠᠬᠤᠢᠴᠠ ᠪᠠᠷ ᠥᠭᠦᠯᠡᠨ ᠬᠣᠢᠰᠢ ᠤᠬᠤᠷᠢᠪᠠ᠃
— ᠪᠢ ᠳᠣᠷᠵᠢ! ᠳᠡᠭᠦᠦ ᠲᠡᠢ ᠴᠢᠨᠢ ᠠᠶᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠰᠢᠦ ᠳᠡ! ᠴᠢ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠤᠤ? ᠭᠡᠬᠦ ᠳ᠋ᠦ᠍᠄
— ᠨᠡᠭᠡᠷᠡᠨ ᠲᠠ ᠴᠢᠨᠢ ᠳᠣᠷᠵᠢ ᠪᠠᠢᠨᠠ ᠰᠢᠦ ᠭᠡᠵᠦ ᠰᠥᠷᠦᠮᠡ ᠡᠭᠡᠳᠡᠷᠡᠭᠰᠡᠨ ᠬᠡᠯᠡ ᠪᠡᠷ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠦᠰᠦᠷᠦᠨ ᠳᠣᠷᠵᠢ ᠶ᠋ᠢ ᠵᠠᠭᠤᠷᠠᠨ ᠤᠨᠠᠪᠠ᠃
ᠳᠣᠷᠵᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠨᠢ ᠶᠡᠷᠦ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠠᠷᠭᠠᠳᠠᠨ ᠲᠠᠢᠪᠤᠰᠢᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠥᠨᠳᠡᠢᠯᠭᠡᠬᠦ ᠳ᠋ᠦ᠍ ᠰᠥᠷᠦᠮᠡ᠂ ᠤᠬᠢᠯᠠᠨ ᠤᠬᠢᠯᠠᠭᠰᠠᠭᠠᠷ ᠪᠦᠬᠦ ᠨᠢᠯᠪᠤᠰᠤ ᠪᠠᠨ ᠪᠠᠷᠠᠭᠰᠠᠨ ᠨᠢᠳᠦ ᠨᠢ ᠬᠣᠪ ᠬᠠᠭᠤᠷᠠᠢᠬᠠᠨ ᠪᠠᠢᠪᠠ᠃
ᠭᠡᠲᠡᠯᠡ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠡᠬᠡ ᠡᠮᠡᠭᠡᠨ ᠨᠢ ᠪᠣᠳᠣᠭᠳᠠᠵᠠᠢ᠃ ᠲᠡᠭᠦᠨ ᠢ᠋ ᠨᠢ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠡᠷᠭᠢᠨ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢ ᠨᠡᠩᠵᠢᠨ ᠬᠠᠷᠠᠬᠤ ᠳ᠋ᠤ᠌ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠭᠠᠵᠠᠷ ᠳᠡᠪᠢᠰᠦᠮᠡᠯ ᠣᠷᠣᠨ ᠤ᠋ ᠨᠡᠬᠡᠢ ᠬᠥᠨᠵᠢᠯᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠬᠦᠷᠦᠵᠦ ᠣᠯᠠᠨ ᠬᠣᠨᠣᠭᠰᠠᠨ ᠡᠮᠡᠭᠡᠨ ᠦ᠌ ᠵᠡᠪᠡᠭᠡᠷ ᠴᠠᠭᠠᠨ ᠮᠠᠩᠨᠠᠢ᠂ ᠪᠦᠯᠲᠡᠢᠨ ᠰᠢᠷᠲᠡᠭᠰᠡᠨ ᠨᠢᠳᠦᠨ ᠦ᠌ ᠪᠡᠨ ᠬᠠᠮᠲᠤ ᠴᠤᠬᠤᠢᠵᠤ ᠪᠠᠢᠭᠠ ᠨᠢ ᠦᠵᠡᠭᠳᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ