ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠳᠡᠳ᠋ ᠪᠦᠯᠦᠭ 4–7> Бүлжхэн хатан– [монгол] Дамбын Төрбат <дэд бүлэг 4–7>
140ᠪᠦᠯᠵᠢᠬᠢᠨ ᠬᠠᠲᠤᠨ– <ᠳᠡᠳ᠋ ᠪᠦᠯᠦᠭ 4–7>
ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠲᠠᠢ ᠪᠠᠢᠵᠤ ᠲᠥᠷᠥ ᠶ᠋ᠢᠨ ᠵᠢᠯᠣᠭᠣ ᠪᠠᠷᠢᠬᠤ ᠠᠪᠠᠢ᠃ ᠬᠠᠪᠤᠯ ᠬᠠᠭᠠᠨ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠳ᠋ᠠᠭᠠᠨ ᠲᠠᠢᠴᠢᠭᠤᠳ ᠤ᠋ᠨ ᠠᠮᠪᠠᠭᠠᠢ ᠬᠠᠭᠠᠨ᠂ ᠮᠡᠷᠭᠢᠳ ᠦ᠋ᠨ ᠳᠣᠲᠣᠷ ᠪᠢᠯᠭᠡ ᠴᠢᠬᠢᠨ᠂ ᠲᠡᠭᠦᠨ ᠡᠴᠡ ᠳᠣᠭᠣᠭᠰᠢ ᠵᠢᠷᠭᠤᠭᠠᠨ ᠬᠦᠦ ᠨᠤᠭᠦᠳ ᠢ᠋ᠶ᠋ᠡᠨ ᠡᠩᠨᠡᠭᠦᠯᠵᠦ᠂ ᠵᠡᠭᠦᠨ ᠭᠠᠷ ᠲᠠᠯᠠ ᠳ᠋ᠠᠭᠠᠨ ᠬᠤᠲᠤᠭᠲᠤ ᠵᠣᠷᠬᠢ᠂ ᠮᠡᠩᠭᠢᠲᠦ᠂ ᠶᠢᠰᠦᠭᠡᠢ ᠲᠡᠷᠢᠭᠦᠲᠦ ᠠᠴᠢ ᠨᠠᠷ ᠢ᠋ᠶ᠋ᠠᠨ ᠰᠠᠭᠤᠯᠭᠠᠵᠤ ᠡᠯᠴᠢ ᠶ᠋ᠢ ᠤᠭᠲᠤᠪᠠ᠃ ᠶᠡᠬᠡ ᠬᠦᠨᠳᠦᠳᠬᠡᠯ ᠪᠣᠯᠵᠤ ᠰᠢᠭᠦᠰᠦ᠂ ᠵᠣᠭᠣᠭ ᠪᠡᠯᠡᠳᠦᠭᠰᠡᠨ ᠦᠭᠡᠢ᠂ ᠶᠣᠰᠣ ᠶ᠋ᠢ ᠰᠠᠬᠢᠵᠤ ᠴᠠᠭᠠᠨ ᠢᠳᠡᠭᠡ ᠲᠠᠪᠠᠭᠯᠠᠨ᠂ ᠡᠰᠦᠭ ᠴᠡᠬᠡ ᠰᠥᠩᠨᠡᠭᠰᠡᠨ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠪᠣᠱᠣᠭᠠ ᠠᠯᠬᠤᠭᠠᠳ ᠯᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠥᠪᠡᠷ ᠦ᠋ᠨ ᠵᠡᠷᠭᠡ ᠳᠠᠪ ᠢ᠋ ᠮᠡᠳᠡᠷᠡᠬᠦ ᠤᠴᠢᠷ ᠲᠠᠢ ᠠᠵᠢ᠃ ᠨᠠᠮ ᠭᠦᠮ ᠦᠷᠭᠦᠭᠡᠨ ᠦ᠌ ᠶᠡᠬᠡ ᠰᠢᠷᠢᠮᠡᠯ ᠡᠭᠦᠳᠡ ᠠᠶᠠᠷᠬᠠᠨ ᠰᠡᠬᠦᠭᠳᠡᠵᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠷᠬᠢᠮᠰᠦᠭ ᠡᠯᠴᠢ ᠶ᠋ᠢᠨ ᠱᠠᠪᠢᠯᠬᠠᠨ ᠪᠡᠶᠡ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠪᠠ᠃ ᠮᠥᠨᠥᠬᠡᠨ ᠰᠣᠶᠣᠭᠠ ᠰᠠᠬᠠᠯᠲᠤ ᠲᠦᠰᠢᠮᠡᠯ ᠵᠣᠳᠣᠭᠤᠯᠤᠭᠰᠠ ᠭᠥᠯᠥᠭᠡ ᠮᠡᠲᠦ ᠰᠢᠷᠪᠠᠯᠵᠠ ᠳᠠᠭᠠᠵᠤ ᠭᠦᠶᠦᠬᠦ ᠠᠭᠠᠳ ᠠᠮᠠᠨ ᠳ᠋ᠤᠨᠢ ᠣᠷᠣᠴᠢᠬᠤ ᠰᠢᠬᠠᠨ ᠳᠣᠯᠳᠣᠭᠣᠨᠠᠵᠤ ᠬᠡᠯᠡᠮᠦᠷᠴᠢᠯᠡᠬᠦ ᠠᠪᠠᠢ᠃
ᠶᠡᠬᠡᠮᠰᠦᠭ ᠡᠯᠴᠢ ᠡᠬᠢᠯᠡᠭᠡᠳ ᠬᠠᠪᠤᠯ ᠬᠠᠭᠠᠨ ᠢ᠋ ᠬᠠᠷᠠᠵᠤ᠂ ᠳᠠᠷᠠᠭᠠ ᠨᠢ ᠰᠢᠷᠡᠭᠡᠨᠡ ᠵᠠᠰᠠᠭᠰᠠᠨ ᠢᠳᠡᠭᠡ ᠶ᠋ᠢ ᠬᠠᠯᠲᠤ ᠬᠠᠷᠠᠭᠠᠳ ᠢᠮᠠᠭᠠᠨ ᠰᠠᠬᠠᠯ ᠲᠠᠢ ᠵᠠᠪᠠᠵᠢ ᠨᠢ ᠳᠡᠳᠡᠪᠡᠰᠬᠢᠭᠰᠡᠨ ᠢ᠋ᠶ᠋ᠡᠨ ᠵᠠᠯᠢᠵᠢᠨ ᠮᠢᠰᠢᠶᠡᠯ ᠲᠣᠳᠣᠷᠠᠭᠤᠯᠵᠤ᠂
一 ᠲᠠᠯᠠ ᠶ᠋ᠢᠨ ᠶᠡᠬᠡ ᠪᠠᠭᠠᠲᠤᠷ ᠲᠠᠨ ᠤ᠋ ᠲᠦᠮᠡᠨ ᠠᠮᠤᠭᠤᠯᠠᠩ ᠢ᠋ ᠡᠷᠢᠵᠦ᠂ ᠡᠷᠲᠡᠨ ᠦ᠌ ᠲᠡᠦᠬᠡᠲᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠮᠡᠷᠭᠡᠨ ᠦᠵᠢᠮᠡᠢ ᠬᠠᠭᠠᠨ ᠮᠡᠨᠳᠦ ᠢᠯᠡᠭᠡᠪᠡ ᠭᠡᠳ ᠳᠣᠣᠷᠠ ᠮᠡᠬᠦᠢᠪᠡ᠃ ᠲᠡᠭᠦᠨ ᠦ᠌ ᠬᠠᠯᠵᠠᠨ ᠲᠣᠯᠣᠭᠠᠢ ᠰᠢᠷᠢᠮᠡᠯ ᠰᠢᠷᠢᠳᠡᠭ ᠱᠦᠷᠭᠦᠨ ᠠᠯᠳᠠᠪᠠᠴᠤ ᠥᠭᠦᠯᠡᠭᠰᠡᠨ ᠦᠭᠡ ᠶ᠋ᠢᠨ ᠬᠢᠨᠢ ᠰᠠᠯᠠᠭᠠ ᠤᠳᠬᠠ᠂ ᠰᠠᠨᠠᠭᠠ ᠪᠣᠳᠣᠯ ᠶᠡᠬᠡ ᠯᠡ ᠳᠡᠭᠡᠭᠦᠷ ᠰᠡᠪᠡᠬᠦ ᠠᠪᠠᠢ᠃《ᠪᠢ ᠪᠣᠯᠬᠣᠷ ᠲᠠᠯᠠ ᠶ᠋ᠢᠨ ᠪᠠᠭᠠᠲᠤᠷ᠂ ᠴᠢᠨᠦ ᠡᠵᠡᠨ ᠪᠣᠯᠬᠣᠷ ᠤᠯᠤᠰ ᠤ᠋ᠨ ᠬᠠᠭᠠᠨ ᠶᠤᠮ ᠭᠡᠨᠡ》 ᠭᠡᠵᠦ ᠬᠠᠪᠤᠯ ᠴᠡᠭᠡᠵᠢᠨ ᠳ᠋ᠡᠭᠡᠨ ᠡᠷᠢᠭᠡ ᠭᠦᠶᠦᠯᠭᠡᠪᠡᠴᠦ ᠬᠠᠷᠠ ᠴᠠᠭᠠᠨ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠴᠣᠭᠣ ᠰᠢᠷᠳᠡᠨ ᠠᠵᠢ᠃ ᠡᠯᠴᠢ ᠲᠠᠯᠠ ᠲᠠᠯᠠᠠ᠋ᠴᠠ ᠰᠢᠷᠳᠡᠬᠦ ᠬᠡᠭᠡᠷᠡ ᠶ᠋ᠢᠨ ᠨᠣᠶᠠᠳ ᠤ᠋ᠨ ᠰᠢᠷᠦᠭᠦᠨ ᠬᠠᠷᠠᠴᠠᠨ ᠳ᠋ᠤ᠌ ᠬᠠᠯᠠᠭᠤᠴᠠᠵᠤ᠂ ᠪᠠᠰᠠ ᠬᠦ᠌ ᠠᠵᠢᠨ ᠳᠥᠵᠢᠨ ᠣᠷᠴᠢᠨ ᠳ᠋ᠤ᠌ ᠭᠠᠭᠴᠠᠭᠠᠷᠳᠠᠨ ᠡᠪ ᠦᠭᠡᠢᠴᠡᠵᠦ ᠰᠣᠶᠣᠭᠠ ᠰᠠᠬᠠᠯᠲᠤ ᠬᠡᠯᠡᠮᠦᠷᠴᠢ ᠤᠷᠤᠭᠤ ᠪᠠᠨ ᠨᠢᠭᠡ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠱᠤᠯᠤᠭᠠᠨᠠᠪᠠ᠃ ᠮᠥᠨᠥᠬᠢ ᠰᠣᠶᠣᠭᠠ ᠰᠠᠬᠠᠯᠲᠤ ᠪᠤᠭᠤᠷᠤᠯ ᠬᠡᠯᠡᠮᠦᠷᠴᠢ ᠤᠳᠬᠠ ᠶ᠋ᠢᠨ ᠣᠷᠣᠭᠠ ᠬᠦᠯᠦᠭ ᠢ᠋ ᠤᠷᠭᠠ ᠶ᠋ᠢᠨ ᠰᠠᠢᠨ ᠮᠣᠷᠢ ᠮᠡᠲᠦ ᠳᠠᠭᠠᠵᠤ ᠨᠢᠭᠡ ᠴᠦ᠍ ᠦᠭᠡ ᠬᠡᠭᠡᠯ ᠦᠭᠡᠢ ᠬᠥᠷᠪᠡᠭᠦᠯᠬᠦ ᠪᠥᠯᠥᠭᠡ᠃
— ᠲᠩᠷᠢ ᠤᠳᠤᠮᠲᠤ ᠦᠵᠢᠮᠡᠢ ᠬᠠᠭᠠᠨ ᠲᠡᠷᠰᠬᠦᠳ ᠵᠠᠩᠨᠠᠭᠰᠠᠨ ᠤᠷᠢᠳ ᠤ᠋ᠨ ᠬᠡᠷᠡᠭ ᠢ᠋ ᠥᠷᠥᠰᠢᠶᠡᠨ ᠰᠣᠶᠣᠷᠬᠠᠵᠤ᠂ ᠠᠢᠯ ᠬᠥᠷᠰᠢ ᠶ᠋ᠢᠨ ᠠᠮᠢ ᠨᠢᠭᠡ ᠶ᠋ᠢ ᠰᠠᠨᠠᠨ ᠪᠣᠯᠭᠣᠭᠠᠵᠤ ᠲᠠᠯᠠ ᠶ᠋ᠢᠨ ᠪᠠᠭᠠᠲᠤᠷ ᠬᠠᠪᠤᠯ ᠲᠠᠨᠠ ᠶᠢᠰᠦᠨ ᠶᠢᠰᠦ ᠨᠠᠶᠠᠨ ᠨᠢᠭᠡᠨ ᠴᠠᠭᠠᠨ ᠲᠡᠮᠡᠭᠡ ᠠᠴᠢᠶᠠ ᠶ᠋ᠢ ᠨᠠᠢᠷᠠᠮᠳᠠᠬᠤ ᠶ᠋ᠢᠨ ᠪᠡᠯᠡᠭ ᠪᠣᠯᠭᠠᠨ ᠢᠯᠡᠭᠡᠭᠰᠡᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠴᠢᠩᠰᠠᠮ ᠭᠤᠸᠠ ᠬᠠᠲᠤᠨ ᠤ᠋ ᠨᠢᠳᠦ ᠭᠢᠯᠠᠯᠵᠠᠵᠤ ᠬᠠᠷᠯᠢ ᠺᠦ ᠶ᠋ᠢ ᠨᠢᠳᠤᠷᠤᠭᠠᠳ ᠠᠪᠤᠪᠠ᠃ ᠡᠯᠡ ᠡᠮᠡᠰ ᠦ᠋ᠨ ᠶᠠᠯᠢ ᠦᠭᠡᠢ ᠮᠠᠶᠢᠭᠯᠠᠯ ᠬᠣᠯᠠ ᠶ᠋ᠢᠨ ᠡᠯᠴᠢ ᠶ᠋ᠢᠨ ᠭᠢᠷᠠᠬᠠᠢ ᠬᠠᠷᠠᠴᠠᠨ ᠤ᠋ ᠭᠠᠳᠠᠭᠤᠷ ᠥᠩᠭᠡᠷᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠦᠭᠡᠨ ᠦ᠌ ᠪᠡᠨ ᠦᠨᠡ ᠴᠠᠨᠠ᠂ ᠪᠡᠯᠡᠭ ᠦ᠋ᠨ ᠢ᠋ᠶ᠋ᠡᠨ ᠵᠢᠩ ᠪᠠᠩ ᠢ᠋ ᠮᠡᠳᠡᠷᠡᠵᠦ ᠳᠠᠭᠤᠨ ᠤ᠋ ᠬᠢᠨᠢ ᠥᠩᠭᠡ ᠠᠷᠠᠢ ᠲᠣᠳᠣᠷᠠᠨ᠂
— ᠶᠡᠬᠡ ᠡᠵᠡᠨ ᠲᠠᠯᠠ ᠶ᠋ᠢᠨ ᠶᠡᠬᠡᠰ ᠲᠠ ᠪᠦᠭᠦᠳᠡ ᠪᠡᠨ ᠡᠷᠬᠢᠮᠯᠡᠨ ᠬᠠᠢᠷᠠᠯᠠᠵᠤ ᠪᠠᠢᠳᠠᠭ ᠤ᠋ᠨ ᠤᠴᠢᠷ ᠬᠠᠪᠤᠯ ᠪᠠᠭᠠᠲᠤᠷ ᠲᠠᠨ ᠢ᠋ ᠸᠠᠩ ᠬᠡᠷᠬᠡᠮ ᠢ᠋ᠶ᠋ᠡᠷ ᠱᠠᠩᠨᠠᠭᠰᠠᠨ ᠵᠠᠷᠯᠢᠭ ᠪᠠᠰᠠ ᠢᠯᠡᠭᠡᠭᠰᠡᠨ ᠪᠢᠯᠡ ᠭᠡᠳ ᠴᠠᠭᠠᠨ ᠬᠠᠲᠠᠭᠠᠨᠠ ᠪᠠᠳᠮᠠᠷᠠᠭᠠ ᠴᠢᠯᠠᠭᠤᠨ ᠵᠢᠩᠰᠡ ᠪᠦᠬᠦᠢ ᠲᠣᠭᠣᠰ ᠤ᠋ᠨ ᠥᠳᠥᠲᠦ ᠮᠠᠯᠠᠭᠠᠢ ᠲᠠᠯᠪᠢᠵᠤ ᠪᠠᠷᠢᠪᠠ᠃ ᠨᠢᠭᠡᠨ ᠠᠭᠱᠠᠨ ᠨᠠᠮ ᠭᠦᠮ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠥᠬᠢᠨᠪᠠᠷᠬᠠᠭ᠂
— ᠲᠡᠰᠦᠨᠡ᠂ ᠲᠡᠰᠦᠨᠡ ᠭᠡᠬᠦ ᠳ᠋ᠦ᠍ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠭᠠᠬᠢᠵᠤ ᠲᠡᠰᠬᠦ ᠪᠣᠢ᠃ ᠲᠡᠮᠡᠭᠡ ᠪᠡᠨ᠂ ᠠᠴᠢᠶᠠ ᠪᠠᠨ ᠠᠪᠤᠭᠠᠳ ᠠᠷᠢᠯᠵᠤ ᠦᠵᠡ! ᠭᠡᠮᠡᠨ ᠣᠮᠣᠭᠳᠠᠬᠤ ᠳ᠋ᠤ᠌ ᠪᠠᠷᠠᠳᠠᠨᠪᠠᠭᠠᠲᠤᠷ ᠤ᠋ᠨ ᠶᠡᠬᠡ ᠦᠰᠦ ᠪᠡᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠲᠠᠷᠯᠢᠭᠠᠷ ᠬᠦᠷᠡᠩ ᠴᠢᠷᠠᠢ ᠪᠦᠷ ᠬᠦᠷᠡᠯᠡᠢᠵᠦ᠂
— ᠮᠥᠨ ᠳᠡ᠂ ᠬᠠᠷᠠ ᠦᠷ ᠢ᠋ᠶ᠋ᠡᠷ ᠬᠠᠨᠲᠠᠭᠠᠵᠠ ᠨᠢ ᠢᠷᠡᠭᠰᠡᠨ᠂ ᠣᠳᠣ ᠲᠣᠯᠣᠭᠠᠢ ᠨᠢ ᠢᠷᠡᠵᠦ ᠪᠠᠢᠨᠠ ᠤᠤ! ᠭᠡᠵᠦ ᠳᠠᠪᠰᠢᠯᠠᠪᠠ᠃ ᠡᠯᠴᠢ ᠬᠡᠷᠡᠭ ᠪᠢᠰᠢᠳᠡᠭᠰᠡᠨ ᠢ᠋ ᠤᠬᠠᠭᠠᠷᠠᠵᠤ ᠴᠢᠷᠠᠢ ᠨᠢ ᠴᠡᠢᠨ᠂ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠵᠤ᠂
— ᠮᠢᠨᠦ ᠪᠡᠯᠡᠭ ᠪᠢᠰᠢ᠂ ᠮᠠᠨ ᠤ᠋ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠰᠢᠦ ᠭᠡᠰᠡᠨ ᠢ᠋ ᠰᠣᠶᠣᠭᠠ ᠰᠠᠬᠠᠯᠲᠤ ᠬᠦᠴᠦ ᠪᠡᠷ ᠢᠨᠢᠶᠡᠮᠰᠦᠭᠯᠡᠨ ᠪᠠᠢᠵᠤ ᠬᠡᠯᠡᠮᠦᠷᠴᠢᠯᠡᠬᠦ ᠳ᠋ᠦ᠍ ᠮᠥᠨᠥᠬᠡᠨ ᠶᠡᠬᠡ ᠨᠣᠶᠠᠨ ᠪᠠᠭᠠ ᠵᠡᠷᠭᠡ ᠵᠣᠷᠢᠭ ᠣᠷᠣᠵᠤ᠂
— ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠪᠠᠭᠠᠲᠤᠷ ᠲᠠᠨ ᠢ᠋ ᠠᠯᠲᠠᠨ ᠤᠯᠤᠰ ᠲᠤ᠌ ᠮᠣᠷᠢᠯᠠᠨ ᠢᠷᠡᠵᠦ ᠬᠡᠷᠡᠭ ᠬᠡᠯᠡᠯᠴᠡᠬᠦ ᠶ᠋ᠢ ᠵᠠᠯᠠᠵᠤ ᠪᠣᠢ ᠪᠢᠯᠡ ᠭᠡᠪᠡ᠃ ᠶᠡᠬᠡ ᠥᠷᠭᠥᠭᠡ ᠰᠢᠷᠭᠤᠯᠵᠢ ᠭᠦᠶᠦᠪᠡᠯ ᠳᠣᠭᠣᠯᠳᠠᠮᠠ ᠠᠨᠢᠷ ᠭᠦᠮ ᠳ᠋ᠦ᠍ ᠠᠪᠲᠠᠯᠠ᠃ ᠡᠨᠡ ᠦᠭᠡ ᠶ᠋ᠢ ᠬᠡᠯᠡᠬᠦ ᠭᠡᠵᠦ ᠡᠯᠴᠢ ᠴᠦ᠍ ᠶᠡᠬᠡ ᠲᠣᠭᠣᠷᠢᠭᠰᠠᠨ᠂ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠶᠡᠬᠡᠰ ᠴᠦ᠍ ᠶᠡᠬᠡ ᠴᠣᠴᠢᠷᠳᠠᠭᠰᠠᠨ ᠪᠥᠯᠥᠭᠡ᠃ ᠶᠢᠰᠦᠭᠡᠢ ᠶ᠋ᠢᠨ ᠵᠢᠷᠦᠬᠡᠨ ᠦ᠌ ᠤᠭ ᠤᠷᠤᠭᠤ ᠰᠤᠮᠤᠨ ᠤ᠋ ᠭᠣᠳᠣᠯᠢ ᠪᠠᠷ ᠬᠠᠳᠬᠤᠭᠠᠳ ᠠᠪᠬᠤ ᠰᠢᠭ᠋ ᠶᠣᠭᠬᠢᠵᠤ᠂ ᠡᠪᠦᠭᠡ ᠬᠠᠭᠠᠨ ᠢ᠋ᠶ᠋ᠠᠨ ᠦᠷᠦ ᠡᠪᠳᠦᠩᠭᠦᠢ ᠬᠠᠷᠠᠬᠤ ᠳ᠋ᠤ᠌ ᠲᠠᠢᠴᠢᠭᠤᠳ ᠤ᠋ᠨ ᠬᠠᠲᠠᠭᠠᠨ ᠡᠬᠢᠯᠡᠭᠡᠳ ᠠᠪᠤ ᠬᠠᠭᠠᠨ ᠢ᠋ᠶ᠋ᠠᠨ᠂ ᠳᠠᠷᠠᠭᠠ ᠨᠢ ᠠᠨᠳᠠ ᠳᠣᠲᠣᠷ ᠪᠢᠯᠭᠡ ᠪᠡᠨ ᠠᠰᠠᠭᠤᠭᠰᠠᠨ ᠬᠠᠷᠠᠴᠠ ᠪᠠᠷ ᠰᠢᠷᠳᠡᠪᠡ᠃ ᠥᠬᠢᠨᠪᠠᠷᠬᠠᠭ ᠤ᠋ᠨ ᠰᠠᠢᠬᠠᠨ ᠴᠠᠭᠠᠨ ᠴᠢᠷᠠᠢ ᠴᠢᠰ ᠤᠯᠠᠢᠵᠤ ᠠᠭᠤᠷ ᠬᠢᠯᠢᠩ ᠡᠴᠦᠰ ᠲᠡᠭᠡᠨ ᠬᠦᠷᠴᠦ᠂ ᠳᠡᠯᠪᠡ ᠲᠠᠲᠠᠬᠤ ᠮᠡᠲᠦ ᠡᠮᠦᠨᠡ ᠪᠡᠨ ᠲᠠᠯᠪᠢᠭᠰᠠᠨ ᠮᠠᠢᠭᠠ ᠰᠢᠷᠡᠭᠡᠨᠡ ᠵᠠᠩᠭᠢᠳᠤᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠳᠡᠰ ᠪᠠᠭᠤᠯᠭᠠᠵᠤ᠂
— ᠮᠠᠭᠤ ᠬᠠᠷᠠ ᠬᠢᠲᠠᠳ! ᠭᠡᠯᠡ᠃ ᠲᠡᠭᠦᠨ ᠳ᠋ᠦ᠍ ᠡᠭᠦᠨ ᠡᠴᠡ ᠢᠯᠡᠭᠦᠦ ᠮᠠᠭᠤ ᠦᠭᠡ᠂ ᠮᠠᠭᠤᠬᠠᠢ ᠬᠠᠷᠢᠶᠠᠯ ᠣᠯᠳᠠᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠃ ᠶᠠᠭᠤ ᠶᠠᠭᠤᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠬᠠᠲᠠᠭᠠᠨ ᠳᠡᠭᠦᠦ ᠶ᠋ᠢᠨ ᠬᠢᠨᠢ ᠬᠠᠷᠠ ᠦᠬᠦᠯ ᠰᠠᠨᠠᠭᠳᠠᠭᠰᠠᠨ ᠬᠡᠷᠡᠭ᠃ ᠲᠡᠷᠡ ᠪᠡᠷ ᠡᠮᠦᠨᠡ ᠶ᠋ᠢᠨ ᠴᠡᠩᠬᠡᠷ ᠭᠣᠪᠢ ᠤᠷᠤᠭᠤ ᠵᠡᠭᠡᠷᠡ ᠶ᠋ᠢᠨ ᠠᠩ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠠᠪᠠᠢ᠃ ᠠᠩ ᠤ᠋ᠨ ᠲᠩᠷᠢ ᠲᠡᠢ ᠵᠠᠯᠠᠭᠤ ᠡᠷᠡ ᠴᠠᠭᠠᠨ ᠵᠡᠭᠡᠷᠡ ᠶ᠋ᠢᠨ ᠰᠢᠷᠭᠠᠯ ᠲᠣᠭᠣᠰᠣᠨ ᠳᠤᠮᠳᠠ ᠠ᠋ᠴᠠ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠪᠢᠯᠡ᠃ ᠪᠠᠷᠠᠳᠠᠨᠪᠠᠭᠠᠲᠤᠷ ᠬᠠᠷᠠ ᠳᠡᠭᠡᠷᠡ ᠪᠡᠨ ᠬᠠᠷᠠ ᠪᠣᠯᠵᠤ᠂ ᠨᠢᠳᠦ ᠨᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠨ᠂
— ᠭᠤᠸᠠ ᠪᠣᠶᠣᠷᠣᠭ ᠮᠠᠷᠬᠤᠰ ᠢ᠋ ᠲᠠᠯᠠ ᠶ᠋ᠢᠨ ᠬᠢᠨ ᠮᠠᠷᠲᠠᠭᠠ ᠦᠭᠡᠢ᠃ ᠬᠠᠲᠠᠭᠠᠨ ᠳᠡᠭᠦᠦ ᠪᠡᠨ ᠪᠢᠳᠡ ᠮᠠᠷᠲᠠᠭᠠ ᠦᠭᠡᠢ᠃ ᠰᠠᠢᠨ ᠬᠥᠮᠦᠨ ᠦ᠌ ᠦᠷᠡ ᠶ᠋ᠢ ᠠᠯᠠᠵᠤ ᠶᠠᠭᠠᠬᠢᠨ ᠪᠣᠯᠬᠤ ᠪᠣᠢ! ᠭᠡᠳ ᠥᠨᠳᠡᠯᠵᠡᠬᠦ ᠡᠯᠴᠢ ᠱᠠᠯᠠ ᠳ᠋ᠠᠭᠠᠨ ᠪᠠᠭᠤᠵᠤ᠂
— ᠡᠷᠬᠢᠮ ᠪᠠᠭᠠᠲᠤᠷ ᠤ᠋ᠳ ᠲᠣᠭᠲᠠᠵᠤ ᠠᠢᠯᠠᠳ! ᠮᠠᠨ ᠤ᠋ ᠬᠠᠭᠠᠨ ᠤ᠋ ᠵᠠᠯᠠᠯᠭᠠ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠠᠯᠠᠯᠭᠠ ᠪᠢᠰᠢ ᠬᠡᠮᠡᠪᠡᠰᠦ ᠪᠦᠭᠦᠳᠡ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠤᠤᠭᠢᠯᠳᠤᠨ ᠳᠣᠣᠷᠠ ᠳᠣᠣᠷᠠ ᠪᠠᠨ ᠥᠨᠳᠡᠯᠵᠡᠬᠦ ᠳ᠋ᠦ᠍ ᠬᠠᠪᠤᠯ ᠬᠠᠭᠠᠨ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠵᠤ ᠰᠠᠭᠤᠵᠤ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠵᠤᠭᠤᠤᠬᠠᠨ ᠡᠷᠭᠦᠪᠡ᠃ ᠪᠦᠭᠦᠳᠡ ᠨᠠᠮ ᠭᠦᠮ ᠪᠣᠯᠤᠯᠠ᠃
— ᠪᠢ ᠣᠴᠢᠨᠠ᠃
ᠲᠡᠷᠡ ᠪᠡᠷ ᠡᠢᠮᠦ ᠦᠭᠡ ᠬᠡᠯᠡᠭᠡᠳ ᠪᠤᠳᠠᠩ ᠳᠤᠮᠳᠠ ᠬᠥᠭᠯᠡᠢᠨ ᠪᠠᠷᠠᠭᠠᠨᠳᠠᠭᠴᠢ ᠪᠤᠷᠬᠠᠨ ᠬᠠᠯᠳᠤᠨ ᠮᠡᠲᠦ ᠲᠠᠭ ᠴᠢᠭ ᠰᠠᠭᠤᠪᠠ᠃ ᠬᠡᠨ ᠴᠦ᠍ ᠶᠠᠭᠤ ᠴᠣ ᠡᠰᠡ ᠳᠤᠤᠭᠠᠷᠴᠤ ᠴᠢᠳᠠᠯᠠ᠃ ᠭᠣᠣᠯ ᠬᠡᠷᠡᠭ ᠢ᠋ᠶ᠋ᠡᠨ ᠡᠢᠨ ᠪᠦᠲᠦᠭᠡᠭᠰᠡᠨ ᠡᠯᠴᠢ ᠣᠳᠣ ᠬᠦᠷᠲᠡᠯᠡ ᠬᠠᠳᠠᠭ ᠤ᠋ᠨ ᠳᠡᠭᠡᠷᠡ ᠵᠠᠯᠠᠭᠠᠰᠤᠲᠠᠢ ᠸᠠᠩ ᠮᠠᠯᠠᠭᠠᠢ ᠶ᠋ᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠬᠡᠰᠡᠭ ᠡᠷᠡᠭᠡᠯᠵᠡᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠤᠬᠠᠭᠠᠨ ᠰᠡᠢᠯᠵᠦ᠂ —ᠶᠡᠬᠡ ᠪᠠᠭᠠᠲᠤᠷ ᠲᠠ ᠡᠵᠡᠨ ᠬᠠᠭᠠᠨ ᠤ᠋ ᠢᠯᠡᠭᠡᠭᠰᠡᠨ ᠨᠠᠶᠠᠨ ᠨᠢᠭᠡᠨ ᠴᠠᠭᠠᠨ ᠲᠡᠮᠡᠭᠡ ᠪᠡᠯᠡᠭ ᠢ᠋ ᠰᠣᠶᠣᠷᠬᠠᠨ ᠪᠣᠯᠭᠣᠭᠠᠨᠠ ᠤᠤ? ᠭᠡᠵᠦ ᠨᠠᠬᠢᠯᠵᠠᠬᠤ ᠳ᠋ᠤ᠌ ᠬᠠᠪᠤᠯ ᠲᠡᠭᠦᠨ ᠤᠷᠤᠭᠤ ᠬᠥᠮᠦᠨ ᠦ᠌ ᠤᠷᠮᠠᠨ ᠳ᠋ᠤ᠌ ᠬᠠᠷᠠᠭᠰᠠᠨ ᠦᠭᠡᠢ᠂
—ᠲᠠ ᠨᠠᠷ ᠪᠣᠯᠭᠣᠭᠠ! ᠭᠡᠵᠦ ᠬᠡᠨ ᠳ᠋ᠦ᠍ ᠴᠦ᠍ ᠬᠠᠨᠳᠤᠯ ᠦᠭᠡᠢ ᠴᠢᠭᠤᠯᠤᠭᠰᠠᠨ ᠪᠦᠭᠦᠳᠡ ᠶ᠋ᠢᠨ ᠳᠤᠮᠳᠠ ᠬᠡᠯᠡᠪᠡ᠃ ᠡᠯᠴᠢ ᠶᠠᠭᠤ ᠲᠠᠢ ᠴᠤ᠌ ᠬᠡᠷᠡᠭ ᠢ᠋ᠶ᠋ᠡᠨ ᠪᠦᠲᠦᠭᠡᠭᠰᠡᠨ ᠬᠥᠮᠦᠨ ᠦ᠌ ᠠᠮᠤᠭᠤᠯᠠᠩ ᠴᠢᠷᠠᠢ ᠭᠠᠷᠭᠠᠵᠤ᠂ ᠡᠵᠡᠨ ᠣᠯᠳᠠᠭᠠ ᠦᠭᠡᠢ ᠸᠠᠩ ᠮᠠᠯᠠᠭᠠᠢ ᠪᠠᠨ ᠪᠠᠷᠢᠭᠰᠠᠨ ᠴᠢᠭ ᠲᠡᠭᠡᠨ ᠤᠬᠤᠷᠢᠵᠤ ᠮᠡᠬᠦᠯᠵᠡᠭᠰᠡᠭᠡᠷ ᠨᠣᠶᠠᠳ ᠤ᠋ᠨ ᠬᠠᠷᠠᠴᠠ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠣᠳᠤᠯᠠ᠃ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠴᠢᠮᠡᠭᠡ ᠦᠭᠡᠢ ᠲᠦᠩᠰᠦᠢᠵᠦ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠰᠠᠭᠤᠲᠠᠯᠠ᠂
— ᠬᠠᠭᠠᠨ ᠲᠠ ᠶᠠᠪᠤᠬᠤ ᠬᠡᠷᠡᠭ ᠪᠠᠢᠨᠠ ᠤᠤ ᠳᠠ ᠭᠡᠵᠦ ᠬᠠᠵᠠᠭᠤ ᠳ᠋ᠤᠨᠢ ᠥᠭᠦᠯᠡᠬᠦ ᠳ᠋ᠦ᠍ ᠴᠣᠴᠢᠵᠤ ᠬᠠᠷᠠᠪᠠᠯ ᠬᠠᠷᠯᠢ ᠬᠦ ᠬᠠᠲᠤᠨ ᠰᠠᠨᠵᠠᠢ᠃ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠬᠠᠨᠢᠯᠠᠭᠰᠠᠨ ᠠᠮᠢᠲᠠᠨ ᠰᠡᠳᠬᠢᠯ ᠵᠣᠪᠠᠵᠤ ᠦᠯᠡᠳᠡᠭᠰᠡᠨ ᠨᠢ ᠡᠨᠡ ᠶᠦ᠍ᠮ᠃ ᠨᠠᠶᠠᠨ ᠨᠢᠭᠡᠨ ᠲᠡᠮᠡᠭᠡ ᠠᠴᠢᠶᠠᠨ ᠤ᠋ ᠰᠤᠷᠠᠭ ᠢ᠋ᠶ᠋ᠠᠷ ᠥᠨᠳᠡᠯᠵᠡᠵᠦ ᠠᠭᠰᠠᠨ ᠡᠮᠡ ᠵᠠᠩ ᠬᠡᠢᠰᠦᠨ ᠠᠷᠢᠯᠵᠤ᠂ ᠭᠠᠭᠴᠠ ᠴᠤ᠌ ᠦᠷᠴᠢᠯᠡᠭᠡ ᠦᠭᠡᠢ ᠲᠣᠯᠢᠭᠠᠷ ᠰᠠᠢᠬᠠᠨ ᠴᠢᠷᠠᠢ ᠳ᠋ᠤᠨᠢ ᠠᠶᠤᠳᠠᠰᠤ ᠶ᠋ᠢᠨ ᠰᠡᠭᠦᠳᠡᠷ ᠰᠡᠭᠦᠳᠡᠭᠡᠨᠡᠨ᠂ ᠲᠡᠯᠮᠡᠭᠡᠷ ᠠᠯᠠᠭ ᠨᠢᠳᠦ ᠨᠢ ᠬᠠᠭᠠᠨ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠠᠴᠠᠨ ᠠ᠋ᠴᠠ ᠦᠨᠡᠨ ᠢ᠋ ᠡᠷᠢᠵᠦ ᠣᠯᠬᠤ ᠭᠡᠵᠦ ᠪᠦᠯᠲᠡᠭᠡᠨᠡᠪᠡ᠃
— ᠶᠠᠪᠤᠨᠠ ᠠ᠋᠃
— ᠬᠠᠭᠠᠨᠲᠠᠨ ᠮᠢᠨᠢ᠂ ᠭᠤᠸᠠ ᠪᠤᠶᠤᠷᠣᠭ᠋ ᠮᠠᠷᠬᠤᠰ ᠮᠣᠳᠣᠨ ᠡᠯᠵᠢᠭᠡ ᠲᠡᠪᠡᠷᠢᠵᠦ ᠨᠥᠭᠴᠢᠭᠰᠡᠨ ᠢ᠋ ᠲᠠ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ᠃
— ᠦᠬᠡᠷ ᠬᠠᠳᠠᠭᠠᠰᠤ ᠪᠠᠷ ᠬᠠᠲᠠᠭᠰᠠᠨ ᠢ᠋ ᠴᠦ᠍ ᠮᠠᠷᠲᠠᠭᠠ ᠦᠭᠡᠢ ᠭᠡᠳ ᠳᠤᠯᠢᠶᠠ ᠲᠠᠢ ᠰᠠᠢᠬᠠᠨ ᠬᠠᠲᠤᠨ ᠢ᠋ᠶ᠋ᠠᠨ ᠰᠠᠶᠢ ᠦᠵᠡᠵᠦ ᠪᠣᠢ ᠮᠡᠲᠦ ᠤᠳᠠᠭᠠᠨ ᠬᠠᠷᠠᠪᠠ᠃ ᠬᠣᠩᠭᠢᠷᠠᠳ ᠠᠢᠮᠠᠭ ᠠ᠋ᠴᠠ ᠪᠡᠷᠢ ᠪᠠᠭᠤᠯᠭᠠᠵᠤ ᠬᠡᠲᠡ ᠴᠠᠬᠢᠬᠤ ᠳ᠋ᠤ᠌ ᠲᠣᠰᠣ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠮᠠ ᠦᠭᠡᠢ ᠴᠡᠪᠡᠷᠬᠡᠨ᠂ ᠲᠣᠷᠭᠠ ᠳᠤᠷᠳᠤᠩ ᠴᠤ᠌ ᠰᠢᠷᠦᠭᠦᠳᠡᠮᠡ ᠪᠤᠯᠪᠠᠷᠠᠢᠬᠠᠨ ᠠᠮᠢᠲᠠᠨ ᠪᠠᠢᠵᠤ ᠪᠢᠯᠡ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠯᠠᠯᠭᠠ ᠪᠠᠷ ᠮᠣᠷᠢᠯᠠᠬᠤ ᠳ᠋ᠤ᠌ ᠡᠷᠲᠡᠨ ᠦ᠌ ᠦᠰ ᠰᠠᠨᠠᠵᠤ ᠮᠣᠳᠣᠨ ᠡᠯᠵᠢᠭᠡᠨᠡ ᠮᠣᠷᠳᠠᠭᠤᠯᠤᠯᠠ ᠭᠡᠬᠦ ᠳ᠋ᠦ᠍ ᠡᠨᠡ ᠮᠢᠨᠢ ᠯᠡ ᠥᠨᠥᠴᠢᠷᠡᠨᠡ ᠳᠡ᠃ ᠥᠨᠥ ᠴᠠᠷᠺᠢᠯ ᠨᠣᠳᠣᠢ ᠶ᠋ᠢᠨ ᠭᠤᠸᠠ ᠬᠠᠲᠤᠨ ᠰᠢᠭ᠋ ᠯᠡ ᠥᠨᠥᠴᠢᠷᠡᠨᠡ ᠳᠡ ᠭᠡᠵᠦ ᠪᠣᠳᠣᠪᠠ᠃ ᠶᠡᠷᠦ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠣᠷᠣᠵᠤ ᠢᠷᠡᠭᠰᠡᠨ ᠡᠯᠡ ᠪᠣᠳᠣᠯ ᠠ᠋ᠴᠠ ᠤᠯᠪᠠᠭᠠᠯᠠᠨ《᠁ ᠨᠡᠭᠡᠷᠡᠨ᠂ ᠲᠡᠷᠡ ᠮᠠᠭᠤ ᠬᠠᠲᠤᠨ ᠬᠠᠮᠢᠭᠠ ᠪᠠᠨ ᠶᠠᠪᠤᠳᠠᠭ ᠪᠣᠯ᠃ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠᠨ ᠬᠦᠷᠲᠡᠭᠰᠡᠨ ᠪᠢᠯᠡ᠃ ᠵᠠᠯᠠᠭᠤ ᠬᠥᠮᠦᠨ ᠠᠮᠢᠳᠤ ᠯᠠ ᠪᠠᠢᠳᠠᠭ ᠪᠠᠢᠬᠠ ᠳᠠ᠃ ᠪᠠᠰᠠ ᠨᠢᠭᠡ ᠮᠠᠭᠤ ᠵᠤᠯᠳᠠᠷᠠᠢ ᠪᠣᠢ᠃ ᠲᠡᠭᠦᠨ ᠢ᠋ ᠪᠡᠨ ᠬᠥᠲᠥᠯᠦᠭᠡᠳ ᠯᠡ ᠬᠦᠷᠢᠶᠡ ᠬᠦᠷᠢᠶᠡ ᠬᠡᠰᠦᠵᠦ᠂ ᠠᠢᠯ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠶᠠᠪᠤᠭᠠ ᠪᠢᠵᠡ᠂ ᠬᠥᠭᠡᠷᠦᠬᠦᠢ᠃ ᠶᠸᠯᠢᠤᠢ ᠳᠠᠰᠢ ᠥᠷᠥᠨᠡ ᠵᠦᠭ ᠣᠲᠣᠭᠠᠳ ᠲᠠᠪᠤᠨ ᠨᠠᠮᠤᠷ ᠤ᠋ᠨ ᠨᠢᠭᠤᠷ ᠦᠵᠡᠯᠡ᠃ ᠵᠠᠷᠯᠢᠭ ᠢ᠋ᠶ᠋ᠠᠷ ᠥᠷᠥᠰᠢᠶᠡᠵᠦ ᠬᠡᠮᠡᠨᠡ ᠶᠠᠯᠠᠲᠤ ᠲᠠᠲ᠋ᠠᠷ ᠤ᠋ᠨ ᠬᠠᠲᠤᠨ ᠢ᠋ ᠢᠪᠡᠭᠡᠭᠡᠳ᠂ ᠠᠯᠲᠠᠨ ᠤᠯᠤᠰ ᠢ᠋ ᠠᠷᠭᠠᠳᠠᠵᠤ ᠣᠴᠢᠭᠰᠠᠨ ᠪᠣᠯᠬᠤ ᠶᠤᠮ ᠳᠠ》 ᠭᠡᠵᠦ ᠪᠣᠳᠣᠪᠠ᠃
— ᠡᠷᠡ ᠬᠥᠮᠦᠨ ᠢ᠋ ᠶᠠᠪᠤᠭᠤᠯᠤᠨ ᠪᠠᠢᠵᠤ ᠬᠡᠯᠡ ᠭᠡᠳᠡᠭ ᠪᠢᠯᠡ᠃ ᠦᠰᠦ ᠤᠷᠲᠤ᠂ ᠤᠬᠠᠭᠠᠨ ᠪᠣᠭᠣᠨᠢ ᠬᠠᠲᠤᠨ ᠪᠢ ᠬᠠᠭᠠᠨ ᠲᠠᠨ ᠳ᠋ᠤ᠌ ᠶᠠᠭᠤ ᠬᠡᠯᠡᠬᠦ ᠪᠣᠢ ᠳᠠ ᠭᠡᠮᠡᠨ ᠬᠠᠷᠯᠢ ᠬᠦ᠌ ᠭᠣᠮᠣᠳᠠᠩᠭᠤᠢ ᠥᠭᠦᠯᠡᠬᠦ ᠳ᠋ᠦ᠍ ᠬᠠᠪᠤᠯ ᠬᠠᠭᠠᠨ ᠭᠠᠳᠠᠨᠠ ᠪᠠᠨ ᠥᠬᠦᠭᠡᠷᠳᠡᠩᠭᠦᠢ ᠮᠤᠰᠢᠯᠵᠠᠪᠠᠴᠤ᠂ ᠳᠣᠲᠣᠷᠠ ᠪᠠᠨ ᠪᠣᠯ《᠁ ᠨᠠᠮᠠᠶ᠋ᠢ ᠦᠬᠦᠪᠡᠯ ᠡᠨᠡ ᠮᠢᠨᠢ ᠯᠡ ᠵᠣᠪᠠᠨᠠ ᠳᠠ᠃ ᠶᠠᠭ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠰᠢᠭ᠋ ᠯᠡ᠁》 ᠭᠡᠵᠦ ᠵᠢᠷᠦᠬᠡ ᠡᠮᠵᠡᠭᠯᠡᠨ ᠵᠣᠪᠠᠨᠢᠵᠤ ᠠᠪᠠᠢ᠃
5
ᠴᠠᠰᠤᠨ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠪᠢᠲᠡᠭᠦᠦ ᠰᠢᠭᠤᠢ ᠲᠠᠢ ᠬᠠᠶᠠᠭᠠ ᠵᠠᠯᠭᠠᠬᠤ ᠮᠡᠯᠡᠬᠡᠢ ᠴᠠᠭᠠᠨ ᠲᠠᠯᠠ ᠪᠠᠷ ᠶᠠᠪᠠᠭᠠᠨ ᠬᠤᠢ ᠳ᠋ᠤ᠌ ᠲᠠᠭᠤᠭᠳᠠᠬᠤ ᠥᠨᠥᠴᠢᠨ ᠬᠠᠮᠬᠤᠤᠯ ᠪᠤᠲᠠ ᠪᠤᠲᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠲᠠᠤᠯᠠᠢᠴᠢᠯᠠᠨ ᠬᠢᠷᠤᠪᠠᠴᠤ ᠲᠦᠳᠡᠬᠡᠨ ᠬᠡᠢᠰᠦᠨ ᠣᠳᠬᠤ ᠠᠵᠢ᠃ ᠶᠡᠷᠦ ᠵᠣᠪᠠᠯᠠᠩᠲᠤ ᠡᠬᠡ ᠬᠦᠦ ᠬᠣᠶᠠᠷ ᠤ᠋ᠨ ᠵᠠᠶᠠᠭᠠ ᠡᠨᠡ ᠮᠡᠲᠦ ᠪᠠᠢᠯᠠ᠃ ᠮᠥᠨᠥᠬᠡᠨ ᠢᠯᠭᠢᠨ ᠳᠡᠪᠡᠯ ᠨᠢ ᠪᠦᠷ ᠪᠠᠭᠠᠳᠠᠵᠤ ᠲᠣᠭᠳᠣᠢᠭᠰᠠᠨ ᠲᠡᠮᠦᠵᠢᠨ ᠦᠭᠡ᠂ ᠪᠦᠯᠵᠢᠭᠡᠨ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠨᠢᠷᠤᠭᠤ ᠠᠮᠠᠷᠠᠭᠠᠨ ᠣᠪᠣᠬᠠᠢ ᠪᠠᠨ ᠡᠭᠦᠷᠴᠦ ᠳᠠᠭᠠᠭᠠᠬᠤ ᠲᠠᠢ ᠪᠣᠯᠵᠠᠢ᠃ ᠡᠳᠦᠭᠡ ᠡᠷᠬᠡ ᠶ᠋ᠢ ᠰᠤᠷᠤᠭᠰᠠᠨ᠂ ᠨᠣᠶᠠᠨ ᠵᠠᠩ ᠪᠠᠭᠠ ᠪᠠᠭᠠ ᠪᠠᠷ ᠠᠷᠢᠯᠵᠤ᠂ ᠪᠡᠷᠬᠡ ᠶ᠋ᠢ ᠦᠵᠡᠭᠰᠡᠨ ᠡᠷᠡ ᠬᠥᠮᠦᠨ ᠦ᠌ ᠪᠢᠷᠠ ᠠᠮᠲᠠᠭᠳᠠᠨ᠂ ᠤᠬᠠᠭᠠᠨ ᠲᠡᠮᠲᠡᠷᠢᠭᠳᠡᠵᠦ ᠪᠣᠢ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤ ᠲᠤᠯᠠ ᠪᠠᠰᠠ ᠴᠣ ᠴᠠᠰᠤᠨ ᠰᠢᠭᠤᠷᠭᠠᠨ ᠠ᠋ᠴᠠ ᠥᠵᠢᠨ ᠢᠵᠢᠢ ᠪᠡᠨ ᠨᠥᠮᠥᠷᠢᠯᠡᠬᠦ ᠠᠶᠠᠳᠠᠨ ᠠᠯᠬᠤᠬᠤ ᠠᠵᠢ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠠᠢᠯ ᠪᠦᠷᠢ ᠶ᠋ᠢᠨ ᠲᠣᠭᠣᠭᠠ ᠥᠩᠭᠡᠢᠬᠦ ᠶᠠᠯᠠ ᠶᠠᠩᠬᠠᠨ ᠬᠠᠲᠠᠭᠤ ᠠᠭᠠᠳ ᠬᠡᠨ ᠦ᠌ ᠴᠦ᠍ ᠬᠠᠶᠠᠭᠠᠨ ᠳ᠋ᠤ᠌ ᠭᠣᠶᠣᠯᠭᠠ ᠭᠤᠶᠤᠵᠤ ᠭᠤᠷᠪᠠ ᠯᠠ ᠬᠣᠨᠣᠭᠰᠠᠨ ᠪᠣᠯ ᠴᠠᠰᠤᠨ ᠰᠢᠭᠤᠷᠭᠠ᠂ ᠤᠰᠤᠨ ᠪᠣᠷᠣᠭᠠ ᠦᠯᠦ ᠢᠯᠭᠠᠨ ᠬᠥᠭᠡᠭᠡᠭᠳᠡᠬᠦ ᠦᠢᠯᠡ ᠲᠡᠢ ᠪᠥᠯᠥᠭᠡ᠃ ᠡᠢᠨ ᠳᠠᠷᠠᠭᠠ ᠶ᠋ᠢᠨ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠬᠦ ᠪᠡᠷ ᠰᠠᠵᠢᠯᠠᠬᠤ ᠨᠢ ᠪᠣᠢ᠃ ᠲᠡᠭᠡᠭᠡᠳ ᠴᠦ᠍ ᠬᠠᠮᠤᠭ ᠮᠣᠩᠭᠣᠯ ᠬᠠᠨᠯᠢᠭ ᠤ᠋ᠨ ᠨᠣᠶᠠᠳ ᠪᠠᠶᠠᠳ ᠵᠤᠨ ᠤ᠋ ᠴᠠᠭ ᠲᠤ᠌ ᠪᠡᠯᠴᠢᠭᠡᠷ ᠬᠥᠭᠡᠭᠡᠵᠦ ᠳᠡᠷᠡᠨ ᠨᠤᠲᠤᠭᠯᠠᠭᠠᠳ᠂ ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠬᠦᠷᠢᠶᠡ ᠡᠭᠦᠰᠬᠡᠨ ᠪᠠᠭᠤᠵᠤ ᠬᠠᠪᠤᠷ ᠢ᠋ ᠬᠦᠯᠢᠶᠡᠬᠦ ᠲᠤᠯᠠ᠂ ᠨᠢᠭᠡᠨ ᠬᠦᠷᠢᠶᠡᠨ ᠡᠴᠡ ᠨᠥᠭᠦᠭᠡ ᠬᠦᠷᠢᠶᠡ ᠬᠦᠷᠲᠡᠯᠡ ᠯᠠᠪᠲᠠᠶᠠ ᠳᠠᠯᠠᠨ ᠳᠠᠭᠤᠨ ᠤ᠋ ᠭᠠᠵᠠᠷ ᠪᠠᠢᠬᠤ ᠨᠢ ᠶᠠᠪᠠᠭᠠᠨ ᠡᠬᠡ ᠬᠦᠦ ᠬᠣᠶᠠᠷ ᠲᠤ᠌ ᠤᠷᠲᠤ ᠵᠠᠮ ᠠᠵᠢ᠃ ᠨᠢᠳᠦ ᠦᠭᠡᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠬᠠᠷᠭᠤᠢ ᠠᠯᠲᠠᠨ ᠲᠥᠭᠡᠷᠢᠪᠡᠯ ᠣᠰᠤᠭᠤᠵᠤ ᠦᠬᠦᠵᠦ᠂ ᠬᠡᠭᠡᠷᠡ ᠶ᠋ᠢᠨ ᠨᠣᠬᠠᠢ ᠶ᠋ᠢᠨ ᠢᠳᠡᠰᠢ ᠪᠣᠯᠵᠤ ᠴᠤ᠌ ᠮᠡᠳᠡᠬᠦ ᠪᠢᠯᠡ᠃ ᠭᠡᠪᠡᠴᠦ ᠦᠬᠦᠵᠦ ᠪᠣᠯᠬᠤ ᠦᠭᠡᠢ᠃ ᠳᠣᠮᠣᠭᠲᠤ ᠴᠠᠷᠭᠢᠯ ᠨᠣᠳᠣᠢ ᠶ᠋ᠢᠨ ᠬᠠᠲᠤᠨ᠂ ᠠᠭᠡ ᠬᠣᠶᠠᠷ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠨ ᠶᠠᠪᠤᠭᠠᠳ ᠬᠥᠳᠡᠭᠡ ᠭᠠᠵᠠᠷ ᠬᠥᠯᠳᠡᠵᠦ ᠦᠬᠦᠵᠡᠢ ᠭᠡᠮᠡᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠱᠠᠰᠲᠢᠷ ᠲᠤ᠌ ᠪᠢᠴᠢᠬᠦ ᠪᠣᠯᠤᠨᠠ᠃ ᠡᠢᠮᠦ ᠭᠤᠨᠢᠭᠲᠤ ᠲᠡᠦᠬᠡ ᠦᠯᠡᠳᠡᠭᠡᠬᠦ ᠶ᠋ᠢ ᠬᠡᠨ ᠬᠡᠨ ᠨᠢ ᠦᠯᠦ ᠬᠦᠰᠡᠬᠦ ᠠᠪᠠᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠲᠥᠷᠥ ᠲᠡᠷᠢᠭᠦᠯᠡᠭᠰᠡᠨ ᠡᠷᠡ ᠪᠡᠨ ᠬᠦᠴᠦᠷᠬᠡᠭ ᠪᠠᠢᠬᠤ ᠳ᠋ᠤ᠌ ᠶᠡᠭᠦᠳᠬᠡᠯ ᠪᠦᠬᠦᠨ ᠦ᠌ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠪᠡ ᠭᠡᠮᠡᠨ ᠪᠤᠷᠤᠭᠤᠳᠬᠠᠵᠤ᠂ ᠳᠣᠲᠣᠷᠠ ᠪᠠᠨ ᠵᠥᠭᠡᠵᠦ ᠪᠠᠢᠭᠰᠠᠨ ᠨᠢ ᠪᠣᠢ᠃ ᠭᠡᠲᠡᠯᠡ ᠶᠸᠯᠢᠦᠢ ᠳᠠᠰᠢ ᠶ᠋ᠢᠨ ᠬᠦᠴᠦᠷᠬᠡᠭ ᠭᠠᠷ ᠶᠠᠭᠠᠬᠢᠵᠤ ᠡᠢᠬᠦ ᠶ᠋ᠢᠨ ᠵᠠᠭᠤᠷᠠ ᠦᠭᠡᠢ ᠲᠠᠲ᠋ᠠᠷ ᠣᠷᠣᠨ ᠢ᠋ ᠪᠠᠭᠠᠯᠵᠠᠭᠤᠷᠳᠠᠨ ᠠᠪᠴᠤ᠂ ᠭᠠᠯ ᠰᠢᠭᠤᠷᠭᠠ ᠮᠡᠲᠦ ᠪᠦᠭᠦᠳᠡ ᠶ᠋ᠢ ᠠᠷᠴᠢᠨ ᠥᠩᠭᠡᠷᠡᠭᠡᠳ᠂ ᠭᠡᠷ ᠦ᠋ᠨ ᠪᠠᠭᠤᠷᠢ ᠬᠠᠷᠠᠯᠠᠨ᠂ ᠲᠥᠷᠥ ᠶ᠋ᠢᠨ ᠰᠠᠭᠤᠷᠢ ᠭᠠᠩᠬᠤᠵᠤ ᠦᠯᠡᠳᠡᠭᠰᠡᠨ ᠡᠳᠦᠷ ᠡᠴᠡ ᠡᠬᠢᠯᠡᠵᠦ ᠬᠠᠭᠠᠨ ᠢ᠋ᠶ᠋ᠠᠨ ᠦᠷᠦ ᠡᠪᠡᠳᠦᠭᠰᠡᠨ ᠠᠪᠠᠢ᠃ ᠠᠯᠲᠠᠨ ᠲᠣᠨᠣᠭ ᠲᠠᠢ ᠪᠦᠰᠡ ᠪᠡᠨ ᠲᠠᠢᠯᠵᠤ᠂ ᠠᠷᠰᠯᠠᠨ ᠠᠷᠬᠢᠷᠠᠭᠰᠠᠨ ᠪᠠᠷᠢᠭᠤᠯ ᠲᠠᠢ ᠢᠯᠳᠦ ᠪᠡᠨ ᠳᠠᠢᠰᠤᠨ ᠤ᠋ ᠬᠥᠯ ᠳ᠋ᠦ᠍ ᠰᠢᠳᠡᠭᠡᠳ ᠨᠥᠮᠥᠭᠡᠨ ᠲᠠᠷᠮᠠᠨ ᠳᠡᠪᠡᠯ ᠲᠡᠢ ᠲᠠᠭᠤᠭᠳᠠᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠲᠡᠷᠡ ᠴᠠᠭ ᠠ᠋ᠴᠠ ᠯᠠ ᠬᠠᠢᠷᠠᠯᠠᠭᠠ ᠦᠭᠡᠢ ᠪᠡᠨ ᠬᠠᠢᠷᠠᠯᠠᠵᠤ᠂ ᠬᠠᠯᠠᠮᠵᠢᠯᠠᠭᠠ ᠦᠭᠡᠢ ᠪᠡᠨ ᠬᠠᠯᠠᠮᠵᠢᠯᠠᠵᠤ ᠪᠢᠯᠡ᠃ ᠵᠥᠪ ᠢ᠋ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠴᠦ᠍ ᠪᠤᠷᠤᠭᠤ ᠶ᠋ᠢ ᠥᠭᠴᠦ ᠵᠢᠷᠦᠬᠡᠯᠡᠬᠦ ᠦᠭᠡᠢ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠪᠡ᠃
— ᠬᠠᠲᠤᠨ ᠢᠵᠢ ᠠ᠋᠂ ᠮᠣᠷᠢᠲᠠᠨ ᠠᠢᠰᠤᠢ᠃
— ᠴᠡᠷᠢᠭ ᠦ᠋ᠳ ᠰᠢᠪ ᠳᠡ᠃
— ᠮᠠᠨ ᠤ᠋ ᠲᠠᠲ᠋ᠠᠷ ᠢᠷᠭᠡᠳ ᠢᠩᠭᠢᠭᠡᠳ ᠴᠡᠷᠢᠭᠯᠡᠭᠡᠳ ᠢᠷᠡᠳᠡᠭ ᠪᠣᠯᠤᠭᠠᠰᠠᠢ᠃
一 ᠠᠶᠠᠷ ᠭᠡᠮ! ᠭᠡᠳ ᠪᠦᠯᠵᠢᠭᠡᠨ ᠬᠠᠲᠤᠨ ᠲᠤᠯᠵᠤ ᠶᠠᠪᠤᠭᠰᠠᠨ ᠮᠥᠴᠢᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠳᠦᠰᠦᠨ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢᠨ ᠴᠠᠰᠤ ᠶ᠋ᠢ ᠭᠦᠪᠢᠵᠦ᠂ ᠦᠨᠡᠭᠡᠨ ᠮᠠᠯᠠᠭᠠᠢ ᠶ᠋ᠢᠨ ᠣᠷᠤᠮᠴᠤᠭ ᠳᠣᠣᠷᠠ ᠠ᠋ᠴᠠ ᠴᠤᠬᠤᠢᠬᠤ ᠰᠠᠢᠬᠠᠨ ᠬᠠᠷᠠ ᠱᠠᠩᠬᠤ ᠪᠠᠨ ᠢᠯᠢᠵᠦ᠂ ᠵᠢᠵᠢᠭᠬᠡᠨ ᠬᠥᠭᠡᠷᠦᠬᠦᠨ ᠴᠢᠬᠢᠨ ᠦ᠌ ᠪᠡᠨ ᠠᠷᠤ ᠪᠠᠷ ᠲᠤᠭ ᠦᠰᠦ ᠬᠠᠪᠴᠢᠭᠤᠯᠤᠨ ᠬᠦᠯᠢᠶᠡᠪᠡ᠃ ᠴᠢᠨᠳᠠᠭᠠᠨ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠳᠡᠭᠡᠭᠦᠷ ᠠᠷᠪᠠ ᠭᠠᠷᠤᠢ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠴᠢᠪᠬᠠᠨ ᠤ᠋ ᠴᠢᠯᠠᠭᠤ ᠰᠢᠭ᠋ ᠴᠢᠪᠬᠠᠳᠠᠨ ᠢᠷᠡᠬᠦ ᠶ᠋ᠢ ᠦᠵᠡᠪᠡᠯ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠪᠠᠷᠠ ᠪᠣᠯᠤᠭᠠᠴᠢᠳ ᠤ᠋ᠨ ᠬᠠᠮᠲᠤ ᠵᠠᠯᠠᠷᠠᠵᠤ ᠶᠠᠪᠤᠭᠠ ᠠᠵᠢ᠃ ᠶᠡᠬᠡ ᠳᠡᠯ ᠲᠡᠢ ᠬᠡᠭᠡᠷ ᠮᠣᠷᠢ ᠤᠨᠤᠵᠤ᠂ ᠡᠯᠪᠡᠭᠳᠡᠭᠦᠦ ᠪᠤᠯᠠᠭᠠᠨ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠪᠡᠶᠡᠷᠬᠡᠦ ᠬᠠᠭᠠᠨ ᠰᠦᠷ ᠵᠢᠪᠬᠤᠭᠠ ᠲᠡᠭᠦᠰ ᠬᠠᠷᠠᠭᠳᠠᠬᠤ ᠠᠭᠠᠳ ᠬᠠᠳᠠᠨ ᠳᠡᠭᠡᠷᠡ ᠡᠴᠡ ᠥᠩᠭᠡᠢᠬᠦ ᠴᠠᠭᠠᠨ ᠪᠦᠷᠭᠦᠳ ᠮᠡᠲᠦ ᠤᠷᠲᠤ ᠬᠥᠮᠥᠰᠬᠡ ᠳᠣᠣᠷᠠ ᠠ᠋ᠴᠠ ᠴᠣᠭᠯᠢᠭ ᠬᠠᠷᠠ ᠨᠢᠳᠦ ᠪᠡᠷ ᠴᠣᠭᠣ ᠰᠢᠷᠳᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠴᠠᠰᠤᠨ ᠲᠠᠯᠠ ᠳ᠋ᠤ᠌ ᠶᠠᠭᠬᠢᠨ ᠰᠥᠭᠥᠳᠪᠡ᠃ ᠣᠮᠣᠭᠯᠠᠩ ᠵᠠᠩ ᠲᠠᠢ ᠬᠦᠦ ᠳ᠋ᠡᠭᠡᠨ ᠪᠠᠰᠠ ᠰᠠᠨᠠᠭᠠ ᠵᠣᠪᠠᠵᠤ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠬᠠᠷᠠᠪᠠᠯ ᠡᠭᠦᠷᠴᠦ ᠶᠠᠪᠤᠭᠰᠠᠨ ᠪᠤᠷᠭᠠᠰᠤᠨ ᠣᠨᠢ᠂ ᠠᠳᠤᠭᠤᠨ ᠤ᠋ ᠠᠳᠠᠰᠬᠠ ᠰᠡᠯᠲᠡ ᠪᠡᠨ ᠬᠠᠷᠵᠢᠭᠢᠨᠠᠭᠤᠯᠤᠨ ᠪᠠᠭᠤᠯᠭᠠᠭᠰᠠᠨ ᠬᠣᠢᠨᠠ ᠪᠠᠨ ᠵᠣᠣᠭᠤᠬᠠᠨ ᠰᠥᠬᠥᠷᠡᠪᠡ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠢᠵᠢᠢ ᠪᠡᠨ ᠪᠣᠳᠣᠵᠤ ᠯᠠ ᠲᠡᠪᠴᠢᠶᠡᠷᠢ ᠵᠢᠭᠠᠵᠤ ᠪᠣᠢ ᠶᠠᠩᠵᠤ ᠢᠯᠡ ᠠᠪᠠᠢ᠃
一 ᠶᠡᠬᠡ ᠬᠠᠭᠠᠨ ᠲᠠ ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠤ ᠶᠠᠪᠤᠨᠠ ᠤᠤ ᠭᠡᠬᠦ ᠳ᠋ᠦ᠍ ᠲᠠᠭᠠᠷᠠᠭᠰᠠᠨ ᠳ᠋ᠠᠭᠠᠨ ᠴᠤ᠌ ᠶᠤᠮ ᠤᠤ᠂ ᠠᠶᠤᠭᠰᠠᠨ ᠴᠤ᠌ ᠪᠢᠯᠡ ᠤᠤ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠡᠵᠦ᠂ ᠴᠡᠭᠡᠯᠬᠡᠨ ᠳᠠᠭᠤ ᠨᠢ ᠰᠠᠭᠠᠷᠠᠯᠳᠤᠵᠤ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠵᠢᠭᠠᠯ ᠨᠣᠶᠠᠨ ᠵᠢᠭᠲᠡᠢ ᠮᠠᠭᠤᠬᠠᠢ ᠬᠠᠷᠠᠯᠠ᠃ ᠲᠡᠭᠦᠨ ᠦ᠌ ᠰᠢᠳᠦ ᠵᠠᠭᠤᠩᠭᠢ ᠠᠭᠠᠳ ᠳᠥᠭᠥᠰᠢ ᠨᠢ ᠣᠪᠣᠯᠵᠠᠨ ᠪᠠᠢᠪᠠ᠃ ᠳᠠᠢᠰᠤᠨ ᠳ᠋ᠤ᠌ ᠮᠠᠭᠤ ᠪᠠᠨ ᠦᠵᠡᠭᠦᠯᠪᠡ ᠭᠡᠮᠡᠨ ᠵᠢᠮᠡᠯᠡᠵᠦ ᠪᠣᠢ ᠨᠢ ᠲᠡᠷᠡ ᠠᠪᠠᠢ᠃
一 ᠠᠮᠤᠭᠤᠯᠠᠩ ᠠ᠋ ᠭᠡᠵᠦ ᠬᠠᠭᠠᠨ ᠪᠦᠳᠦᠭᠦᠨ ᠪᠠᠷᠭᠢᠯ ᠳᠠᠭᠤ ᠪᠠᠷ ᠲᠠᠢᠪᠤᠩ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠨ ᠲᠣᠭᠰᠢᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠬᠠᠷᠠᠵᠤ᠂
一 ᠬᠣᠲᠣᠯᠠ! ᠭᠡᠬᠦ ᠳ᠋ᠦ᠍ ᠪᠠᠷᠠ ᠪᠣᠯᠵᠤ ᠶᠠᠪᠤᠭᠰᠠᠨ ᠬᠦᠦ ᠨᠢ ᠬᠦ ᠬᠤᠶᠠᠭ ᠢ᠋ᠶ᠋ᠠᠨ ᠬᠠᠷᠰᠢᠭᠤᠯᠤᠨ᠂
一 ᠬᠠᠭᠠᠨ ᠡᠴᠢᠭᠡ ᠲᠠ ᠶᠠᠭᠤ ᠭᠡᠬᠦ ᠰᠠᠨ ᠪᠣᠯ? ᠬᠡᠮᠡᠪᠡᠯ ᠬᠠᠪᠤᠯ ᠬᠠᠭᠠᠨ᠂ ᠪᠦᠯᠵᠢᠭᠡᠨ ᠬᠦᠦ ᠬᠣᠶᠠᠷ ᠢ᠋ ᠬᠠᠷᠠᠭᠠᠳ ᠴᠡᠴᠡᠷᠡᠭᠦᠳᠡᠰᠦ ᠨᠢ ᠬᠦᠷᠪᠡ ᠪᠣᠯᠤᠯᠲᠠᠢ ᠪᠤᠯᠠᠭᠠᠨ ᠳᠠᠬᠤ ᠪᠠᠨ ᠠᠬᠢᠭᠤᠯᠵᠤ ᠨᠥᠮᠥᠷᠦᠭᠰᠡᠨ ᠢ᠋ᠶ᠋ᠡᠨ᠂
一 ᠡᠨᠡ ᠬᠣᠶᠠᠷ ᠲᠤ᠌ ᠨᠥᠮᠥᠷᠬᠦ ᠶᠠᠭᠤᠮᠠ ᠥᠭ ᠭᠡᠯᠡ᠃ ᠬᠠᠭᠠᠨ ᠡᠵᠡᠨ ᠦ᠌ ᠡᠨᠡ ᠦᠭᠡ ᠦᠵᠢᠨ ᠬᠠᠲᠤᠨ᠂ ᠦᠭᠡ ᠨᠣᠶᠠᠨ ᠬᠣᠶᠠᠷ ᠠ᠋ᠴᠠ ᠭᠠᠳᠠᠨᠠ ᠨᠢᠭᠡᠨ ᠬᠥᠮᠦᠨ ᠢ᠋ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠨᠢ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠪᠠᠢᠯᠠ᠃ ᠲᠡᠷᠡ ᠪᠡᠷ᠄《ᠬᠠᠭᠠᠨ ᠡᠪᠦᠭᠡ ᠡᠨᠡ ᠵᠠᠷᠯᠢᠭ ᠢ᠋ᠶ᠋ᠠᠨ ᠨᠠᠳᠠ ᠳ᠋ᠤ᠌ ᠥᠭᠬᠦ ᠦᠭᠡᠢ ᠳᠡ》 ᠭᠡᠮᠡᠨ ᠬᠠᠷᠠᠮᠰᠠᠵᠤ᠂ ᠪᠠᠶᠠᠰᠬᠤ ᠵᠡᠷᠭᠡᠴᠡᠨ ᠤᠷᠠᠩᠬᠠᠢ ᠬᠦᠳᠦᠰᠦᠨ ᠳᠡᠪᠡᠯ ᠦ᠋ᠨ ᠴᠠᠭᠠᠨᠠ ᠨᠢᠭᠤᠭᠳᠠᠨ ᠪᠣᠢ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠲᠠᠩᠬᠢ ᠴᠠᠭᠠᠨ ᠪᠡᠶᠡ ᠶ᠋ᠢ ᠰᠡᠳᠬᠢᠯ ᠳ᠋ᠡᠭᠡᠨ ᠲᠥᠰᠦᠭᠡᠯᠡᠵᠦ ᠨᠢᠨᠢᠶᠡᠮᠰᠦᠷᠡᠨ ᠪᠠᠢᠲᠠᠯᠠ ᠬᠣᠲᠣᠯᠠ ᠠᠪᠠᠭᠠ ᠶ᠋ᠢᠨ᠂
— ᠶᠢᠰᠦᠭᠡᠢ ᠳᠠᠬᠤ ᠪᠠᠨ ᠥᠭᠬᠦ ᠡᠴᠡ᠁ ᠭᠡᠬᠦ ᠰᠣᠨᠣᠰᠳᠠᠵᠤ ᠭᠢᠯᠠᠢᠪᠠ᠃ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠥᠲᠡᠯᠡ ᠶᠢᠰᠦ ᠶ᠋ᠢᠨ ᠵᠢᠪᠠᠷ ᠲᠤ᠌ ᠳᠠᠬᠤ ᠨᠥᠮᠥᠷᠴᠦ ᠦᠵᠡᠭᠡ ᠦᠭᠡᠢ ᠲᠤᠯᠠ ᠭᠠᠨᠵᠤᠭᠠᠯᠠᠵᠤ ᠶᠠᠪᠤᠭᠰᠠᠨ ᠢᠮᠠᠭᠠᠨ ᠳᠠᠬᠤ ᠪᠠᠨ ᠥᠭᠬᠦ ᠪᠡᠷ ᠮᠣᠷᠢ ᠪᠠᠨ ᠳᠠᠪᠢᠷᠠᠨ ᠳᠥᠭᠥᠵᠦ ᠣᠴᠢᠯᠠ᠃ ᠲᠡᠭᠦᠨ ᠳ᠋ᠦ᠍ ᠪᠠᠰᠠ ᠬᠦ᠌ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠥᠷᠲᠥᠬᠦ ᠨᠢᠭᠤᠴᠠᠬᠠᠨ ᠬᠦᠰᠡᠯ ᠪᠠᠢᠪᠠ᠃ ᠡᠨᠡ ᠬᠢᠷᠢ ᠬᠣᠲᠣᠯᠠ ᠥᠪᠡᠷ ᠦ᠋ᠨ ᠳᠠᠬᠤ ᠪᠠᠨ ᠲᠠᠢᠯᠤᠨ ᠣᠳᠣ ᠬᠦᠷᠲᠡᠯᠡ ᠰᠥᠬᠥᠷᠡᠵᠦ ᠰᠠᠭᠤᠭᠠ ᠬᠦᠦ ᠤᠷᠤᠭᠤ ᠰᠢᠳᠡᠬᠦ ᠳ᠋ᠦ᠍ ᠲᠠᠷᠭᠤᠨ ᠮᠣᠷᠢᠳ ᠦᠷᠭᠦᠨ ᠤᠬᠤᠰᠬᠢᠵᠦ᠂ ᠬᠠᠭᠠᠨ ᠡᠪᠦᠭᠡ ᠲᠡᠷᠡ ᠡᠷᠴᠢᠨ ᠳ᠋ᠡᠭᠡᠨ ᠶᠡᠬᠡ ᠬᠥᠰᠬᠡ ᠤᠷᠤᠭᠤ ᠪᠠᠨ ᠴᠠᠰᠤ ᠮᠠᠨᠠᠷᠠᠭᠠᠨ ᠳᠣᠪᠲᠣᠯᠵᠤ ᠣᠳᠤᠯᠠ᠃ ᠶᠢᠰᠦᠭᠡᠢ ᠦᠷᠭᠦᠵᠦ ᠬᠤᠤᠬᠢᠷᠠᠬᠤ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠡᠳᠡᠨ ᠠᠩᠭᠠᠯᠵᠠᠭᠤᠯᠵᠤ᠂
— ᠮᠠᠢ! ᠭᠡᠪᠡᠯ ᠪᠦᠯᠵᠢᠭᠡᠨ ᠬᠠᠲᠤᠨ ᠴᠠᠭᠠᠰᠢᠯᠠᠨ ᠣᠳᠬᠤ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠠ᠋ᠴᠠ ᠰᠠᠶᠢ ᠬᠠᠷᠠᠴᠠ ᠪᠠᠨ ᠰᠠᠯᠭᠠᠵᠤ ᠭᠠᠷ ᠰᠤᠩᠭᠠᠪᠠ᠃ ᠥᠵᠢᠨ ᠦ᠌ ᠨᠠᠷᠢᠨ ᠬᠤᠷᠤᠭᠤᠨ ᠤ᠋ ᠲᠣᠷᠭᠠᠨ ᠥᠨᠳᠡᠭᠡ ᠳᠠᠮᠵᠢᠨ ᠵᠢᠷᠦᠬᠡᠨ ᠦ᠌ ᠬᠢᠨᠢ ᠴᠣᠬᠢᠯᠲᠠ ᠶᠢᠰᠦᠭᠡᠢ ᠳ᠋ᠦ᠍ ᠮᠡᠳᠡᠷᠡᠭᠳᠡᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠪᠦᠯᠢᠶᠡᠨ ᠳᠤᠯᠠᠭᠠᠨ ᠦᠭᠡ ᠬᠡᠯᠡᠬᠦ ᠰᠠᠨ ᠭᠡᠵᠦ ᠤᠴᠢᠷ ᠦᠭᠡᠢ ᠬᠦᠰᠡᠵᠡᠢ᠃ ᠭᠡᠪᠡᠴᠦ ᠠᠮᠠ ᠨᠢ ᠡᠪᠯᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ᠃ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠤ᠋ ᠤᠷᠲᠤ ᠰᠣᠷᠮᠤᠤᠰᠤ ᠴᠠᠩᠲᠤᠵᠤ᠂ ᠥᠷᠯᠥᠭᠡᠨ ᠦ᠌ ᠬᠦᠢᠲᠡᠨ ᠵᠢᠪᠠᠷ ᠲᠤ᠌ ᠬᠣᠶᠠᠷ ᠬᠠᠴᠠᠷ ᠨᠢ ᠶᠠᠭᠠᠷᠠᠵᠤ ᠤᠯᠠᠮ ᠴᠤ᠌ ᠦᠵᠡᠰᠬᠦᠯᠡᠩ ᠲᠡᠭᠦᠰ ᠬᠠᠷᠠᠭᠳᠠᠨᠠ᠃
— ᠭᠢᠯᠠᠢᠯᠠ᠂ ᠲᠠᠨ ᠳ᠋ᠤ᠌! ᠭᠡᠵᠦ ᠤᠶᠠᠷᠠᠩᠭᠤᠢ ᠬᠡᠯᠡᠬᠦ ᠳ᠋ᠦ᠍ᠨᠢ᠂
— ᠬᠠᠲᠤᠨ ᠲᠠ ᠲᠠᠭᠠᠷᠠᠵᠤ ᠪᠠᠢᠭᠠ ᠪᠢᠵᠡ ᠳᠡ ᠭᠡᠯᠡ᠃ ᠶᠡᠷᠦ ᠮᠡᠳᠡᠭᠡᠵᠢ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠡᠢᠨ ᠠᠰᠠᠭᠤᠭᠰᠠᠨ ᠨᠢ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠲᠡᠨᠡᠭ ᠬᠡᠷᠡᠭ ᠮᠥᠨ ᠪᠣᠯᠪᠠᠴᠤ ᠬᠠᠷᠢᠭᠤ ᠰᠣᠨᠣᠰᠬᠤ ᠦᠭᠡ ᠣᠯᠵᠤ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠶᠢᠰᠦᠭᠡᠢ ᠥᠪᠡᠷ ᠢ᠋ ᠪᠡᠨ ᠥᠷᠥᠰᠢᠶᠡᠵᠦ ᠵᠣᠭᠰᠣᠭᠰᠠᠨ ᠠᠪᠠᠢ᠃
— ᠭᠠᠢᠭᠤᠢ ᠳᠠ᠃
— ᠬᠦᠢᠲᠡᠨ ᠪᠠᠢᠨᠠ ᠰᠢᠦ!
－ ᠡᠳᠦᠷ ᠲᠠᠢᠰᠢ ᠬᠥᠯᠭᠡᠷᠡᠳᠡᠭ ᠶᠦᠮ ᠠ᠋ ᠭᠡᠳ ᠪᠥᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ᠂ ᠰᠣᠷᠮᠤᠤᠰᠤᠨ ᠤ᠋ ᠴᠠᠩ ᠬᠠᠢᠯᠤᠮᠠ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠬᠠᠷᠠᠴᠠ ᠪᠠᠷ ᠱᠠᠩᠨᠠᠵᠤ ᠪᠢᠯᠡ᠃ ᠭᠡᠪᠡᠴᠦ ᠡᠨᠡ ᠨᠢᠳᠦᠨ ᠦ᠌ ᠭᠦᠨᠡ ᠬᠦᠦ ᠪᠡᠨ ᠬᠠᠷᠠᠳᠠᠭ ᠡᠬᠡ ᠶ᠋ᠢᠨ ᠬᠠᠢᠷᠠ ᠯᠠ ᠪᠠᠢᠪᠠ᠃ ᠶᠢᠰᠦᠭᠡᠢ ᠤᠭ ᠨᠢ ᠡᠭᠦᠨ ᠢ᠋ ᠬᠦᠰᠡᠭᠡ ᠦᠭᠡᠢ ᠪᠢᠯᠡ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠠᠭᠠᠨ ᠤᠳᠤᠮᠲᠤ ᠡᠯᠡ ᠬᠦᠦ ᠶ᠋ᠢᠨ ᠥᠪᠡᠷ ᠢ᠋ ᠨᠢ ᠲᠠᠰᠤᠴᠢᠨ ᠠᠯᠲᠠᠨ ᠰᠢᠷᠲᠡᠬᠦ ᠥᠯᠥᠨ ᠪᠠᠷᠰ ᠤ᠋ᠨ ᠬᠠᠷᠠᠴᠠ ᠶ᠋ᠢ ᠰᠠᠶᠢ ᠯᠠ ᠠᠩᠵᠠᠭᠠᠷᠠᠵᠤ ᠳᠠᠯᠳᠢᠷᠠᠨ ᠳᠣᠭᠣᠭᠰᠢ ᠬᠠᠷᠠᠵᠤ᠂ ᠳᠠᠷᠠᠭᠠ ᠨᠢ ᠠᠯᠠᠭᠠ ᠬᠠᠪᠰᠤᠷᠤᠨ ᠮᠡᠬᠦᠢᠪᠡ᠃ ᠡᠨᠡ ᠨᠢ《ᠶᠠᠪᠤ》 ᠭᠡᠰᠡᠨ ᠦᠭᠡ ᠪᠠᠢᠯᠠ᠃ ᠶᠢᠰᠦᠭᠡᠢ ᠭᠤᠸᠠ ᠬᠠᠲᠤᠨ ᠤ᠋ ᠬᠡᠳᠦᠨ ᠴᠠᠭᠠᠷᠢᠭ ᠦᠰᠦ ᠮᠣᠰᠬᠢᠷᠤᠯᠳᠤᠨ ᠲᠣᠭᠲᠠᠭᠰᠠᠨ ᠰᠢᠯᠢᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠢᠯᠢᠭᠰᠡᠨ ᠢ᠋ᠶ᠋ᠡᠷ ᠰᠡᠳᠬᠢᠯ ᠬᠠᠨᠵᠤ᠂ ᠴᠣᠴᠢᠭᠰᠠᠨ ᠶᠤᠮ ᠰᠢᠭ᠋ ᠮᠣᠷᠢ ᠪᠠᠨ ᠭᠤᠶᠠᠳᠠᠨ ᠳᠠᠪᠬᠢᠵᠤ ᠣᠳᠪᠠ ᠃
— ᠠᠯᠠᠭᠤᠷᠴᠢᠨ! ᠦᠭᠡ ᠨᠣᠶᠠᠨ ᠡᠢᠨ ᠥᠭᠦᠯᠡᠭᠡᠳ ᠴᠢᠨᠣᠠ ᠶ᠋ᠢᠨ ᠠᠷᠠᠰᠤᠨ ᠳᠠᠬᠤ ᠶ᠋ᠢ ᠨᠢ ᠴᠠᠰᠤ ᠤᠷᠤᠭᠤ ᠰᠢᠳᠡᠴᠢᠬᠡᠪᠡ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠦᠦ ᠪᠡᠨ ᠰᠠᠶᠢ ᠯᠠ ᠦᠵᠡᠵᠦ ᠪᠣᠢ ᠮᠡᠲᠦ ᠨᠢᠭᠡ ᠶᠡᠬᠡ ᠲᠣᠮᠣ ᠬᠠᠷᠠᠪᠠ᠃ ᠥᠭᠡᠷᠡ ᠴᠠᠭ ᠲᠤ᠌ ᠰᠠᠨ ᠪᠣᠯ᠂
— ᠴᠢᠨᠦ ᠠᠪᠤ ᠠᠯᠠᠭᠤᠷᠴᠢᠨ! ᠭᠡᠵᠦ ᠵᠠᠩᠨᠠᠬᠤ ᠪᠠᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠲᠩᠷᠢ ᠳ᠋ᠦ᠍ ᠣᠳᠤᠭᠰᠠᠨ ᠬᠠᠨᠢ ᠶ᠋ᠢᠨ ᠶᠠᠰᠤ ᠥᠨᠳᠡᠯᠵᠡᠭᠦᠯᠬᠦ ᠨᠢ ᠶᠠᠭᠠᠬᠢᠪᠠᠴᠤ ᠰᠠᠢᠨ ᠬᠥᠮᠦᠨ ᠦ᠌ ᠶᠣᠰᠣ ᠪᠢᠰᠢ ᠪᠣᠯᠠᠢ᠃ ᠲᠡᠷᠡ ᠪᠡᠷ ᠶᠢᠰᠦᠭᠡᠢ ᠶ᠋ᠢᠨ ᠦᠭᠭᠦᠭᠰᠡᠨ ᠢᠮᠠᠭᠠᠨ ᠳᠠᠬᠤ ᠶ᠋ᠢ ᠨᠥᠮᠥᠷᠦᠩᠭᠡᠨ᠂
—ᠣᠪᠣᠭᠠ ᠪᠣᠰᠬᠠᠭᠠ ᠦᠭᠡᠢ ᠪᠣᠯ ᠱᠠᠭᠠᠵᠠᠭᠠᠢ ᠬᠠᠮᠢᠭᠠ ᠠ᠋ᠴᠠ ᠰᠠᠭᠤᠨᠠ ᠪᠢᠯᠡ ᠭᠡᠮᠡᠨ ᠠᠷᠭᠠᠳᠠᠬᠤ᠂ ᠠᠭᠠᠰᠢᠯᠠᠬᠤ ᠶ᠋ᠢᠨ ᠵᠠᠪᠰᠠᠷ ᠥᠭᠦᠯᠡᠯᠡ᠃ ᠴᠢᠩᠭᠢᠭᠡᠳ ᠬᠦᠦ ᠪᠡᠨ ᠬᠠᠷᠠᠵᠤ ᠬᠠᠷᠠᠵᠤ᠂
— ᠬᠠᠲᠠᠭᠠᠨ ᠠᠪᠠᠭᠠ ᠶ᠋ᠢ ᠨᠢ ᠪᠢᠳᠡ ᠪᠠᠰᠠ ᠠᠯᠠᠴᠢᠬᠠᠭᠰᠠᠨ ᠶᠤᠮ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠦᠭᠡ ᠨᠣᠶᠠᠨ᠂ ᠬᠠᠲᠤᠨ ᠢᠵᠢᠢ ᠳᠠᠢᠰᠤᠨ ᠢ᠋ ᠥᠮᠥᠭᠡᠷᠡᠪᠡ ᠭᠡᠮᠡᠨ ᠳᠣᠲᠣᠷᠠ ᠪᠠᠨ ᠤᠴᠢᠷ ᠦᠭᠡᠢ ᠠᠭᠤᠷᠰᠠᠵᠠᠢ᠃
ᠬᠠᠷᠭᠠᠨᠠ᠂ ᠪᠤᠳᠤᠷᠭᠠᠨᠠ ᠶ᠋ᠢᠨ ᠨᠥᠮᠥᠷᠢ ᠳ᠋ᠦ᠍ ᠬᠤᠷᠠᠵᠤ ᠲᠣᠭᠲᠠᠭᠰᠠᠨ ᠪᠥᠵᠥᠩ ᠬᠤᠩᠭᠠᠷ ᠯᠠ ᠬᠠᠶᠠ ᠲᠠᠭᠠᠷᠠᠬᠤ ᠠ᠋ᠴᠠ ᠪᠤᠰᠤ ᠭᠣᠪᠢ ᠲᠠᠢᠰᠢ ᠪᠠᠨ ᠭᠠᠵᠠᠷ ᠪᠠᠷᠠᠭᠠᠨ᠂ ᠲᠩᠷᠢ ᠳᠤᠯᠠᠭᠠᠨ ᠲᠤᠯᠠ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠡᠰᠢᠭᠲᠡᠨ ᠮᠢᠩᠭᠠᠲᠤ ᠬᠥᠮᠦᠨ ᠮᠣᠷᠢ ᠦᠭᠡᠢ ᠪᠡᠶᠡ ᠲᠠᠯᠪᠢᠭᠤᠷᠠᠵᠤ ᠠᠯᠭᠤᠷᠬᠠᠨ ᠴᠤᠪᠤᠵᠤ ᠶᠠᠪᠤᠯᠠ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠢᠯᠢ ᠶ᠋ᠢᠨ ᠳᠡᠭᠡᠰᠦ ᠣᠢᠷᠠᠳᠬᠤ ᠲᠣᠰᠤᠮ ᠬᠠᠪᠤᠯ ᠤᠷᠢᠳ ᠡᠳᠦᠭᠡ ᠶ᠋ᠢ ᠳᠠᠩᠰᠠᠯᠠᠨ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠵᠤ ᠠᠪᠠᠢ᠃ ᠶᠡᠷᠦ ᠬᠠᠮᠤᠭ ᠮᠣᠩᠭᠣᠯ ᠬᠢᠭᠡᠳ ᠲᠠᠲ᠋ᠠᠷ ᠣᠪᠣᠭ ᠤ᠋ᠨ ᠲᠠᠩᠭᠠᠷᠢᠭ ᠲᠠᠰᠤᠷᠠᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ ᠬᠠᠪᠤᠯ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠪᠤᠷᠤᠭᠤ ᠲᠠᠢ ᠭᠡᠵᠦ ᠪᠣᠳᠣᠬᠤ ᠨᠢ ᠪᠣᠢ᠃
ᠬᠠᠭᠠᠨ ᠬᠥᠮᠦᠨ ᠠᠯᠳᠠᠪᠠᠯ ᠮᠢᠩᠭᠠᠨ ᠦᠶᠡ ᠳ᠋ᠡᠭᠡᠨ ᠭᠠᠢ ᠲᠠᠷᠢᠬᠤ᠂ ᠬᠠᠷᠠᠴᠤ ᠬᠥᠮᠦᠨ ᠠᠯᠳᠠᠪᠠᠯ ᠨᠢᠭᠡᠨ ᠦᠶᠡ ᠳ᠋ᠡᠭᠡᠨ ᠯᠠᠢ ᠬᠤᠷᠢᠶᠠᠬᠤ ᠭᠡᠳᠡᠭ ᠶᠡᠷᠦ ᠦᠨᠡᠨ ᠠᠪᠠᠢ᠃ ᠬᠠᠴᠠᠷ ᠭᠤᠸᠠ ᠥᠬᠢᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠳᠦᠢᠨ ᠡᠴᠡ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠬᠣᠩᠭᠢᠷᠠᠳ ᠠᠢᠮᠠᠭ ᠠ᠋ᠴᠠ ᠬᠠᠷᠯᠢ ᠺᠤ ᠶ᠋ᠢ ᠬᠠᠲᠤᠨ ᠪᠠᠭᠤᠯᠭᠠᠭᠠᠳ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠡᠯᠡ ᠬᠡᠷᠡᠭ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠳᠡᠷᠡ ᠨᠢᠭᠡᠳᠦᠭᠡᠳ ᠤᠳᠠᠭᠠ ᠦᠭᠡᠢ ᠠᠪᠠᠯᠢ ᠭᠡᠷᠭᠡᠢ ᠲᠥᠷᠥᠯ ᠦ᠋ᠨ ᠬᠥᠮᠦᠨ ᠡᠴᠡ ᠬᠡᠯᠡ ᠠᠪᠴᠤ ᠶᠡᠬᠡ ᠯᠡ ᠤᠷᠤᠭᠤ ᠳᠣᠷᠣᠢ ᠳᠠᠭᠤ ᠪᠠᠷ᠂
— ᠠᠬᠠ ᠶ᠋ᠢᠨ ᠪᠡᠶᠡ ᠮᠠᠭᠤᠳᠠᠵᠠᠢ ᠭᠡᠰᠡᠨ ᠠᠪᠠᠢ᠃ ᠵᠠᠯᠠᠭᠤ ᠬᠠᠭᠠᠨ ᠬᠡᠰᠢᠭᠲᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠵᠤ᠂ ᠭᠤᠸᠠ ᠬᠠᠲᠤᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ ᠬᠠᠳᠠᠮ ᠠᠬᠠ ᠶ᠋ᠢᠨ ᠳ᠋ᠦ᠍ ᠠᠢᠯᠴᠢᠯᠠᠨ ᠣᠴᠢᠪᠠᠯ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠲᠤᠷᠠᠵᠤ ᠡᠴᠡᠭᠡᠳ᠂ ᠴᠢᠷᠠᠢ ᠠᠯᠲᠠᠨ ᠱᠥᠪᠥᠢᠵᠦ᠂ ᠪᠡᠶᠡ ᠲᠤᠩ ᠳᠣᠣᠷᠠ ᠣᠷᠣᠭᠰᠠᠨ ᠪᠠᠢᠵᠤ ᠪᠢᠯᠡ᠃ ᠭᠡᠪᠡᠴᠦ ᠰᠡᠳᠬᠢᠯ ᠦ᠋ᠨ ᠳᠠᠮ ᠥᠭᠴᠦ᠂
— ᠰᠠᠨᠠᠭᠰᠠᠨ ᠢ᠋ ᠪᠣᠳᠣᠪᠠᠯ ᠴᠢᠷᠠᠢ ᠵᠢᠰᠦ ᠰᠠᠢᠬᠠᠨ ᠪᠠᠢᠨᠠ ᠰᠢᠦ ᠳᠡ ᠭᠡᠪᠡᠯ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠬᠠᠨᠠ ᠶ᠋ᠢᠨ ᠨᠢᠳᠦᠨ ᠡᠴᠡ ᠲᠡᠳᠡᠨ ᠥᠨᠳᠡᠢᠵᠦ᠂ ᠳᠡᠷᠡ ᠢᠪᠡᠨ ᠴᠡᠭᠡᠵᠢ ᠪᠡᠨ ᠥᠨᠳᠡᠢᠯᠭᠡᠭᠰᠡᠨ ᠢ᠋ᠶ᠋ᠡᠨ᠂
— ᠶᠠᠪᠤᠭᠤᠷᠢ ᠦᠭᠡᠢ ᠯᠡ ᠪᠠᠢᠨᠠ ᠭᠡᠳ ᠬᠡᠢ ᠬᠠᠨᠢᠶᠠᠯᠭᠠᠬᠤ ᠳ᠋ᠤ᠌ ᠲᠡᠷᠡ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠰᠦᠷ ᠦᠵᠡᠭᠦᠯᠦᠨ ᠳᠣᠪᠲᠣᠯᠭᠠᠵᠤ ᠢᠷᠡᠭᠰᠡᠨ ᠵᠠᠯᠠᠭᠤ ᠬᠠᠭᠠᠨ ᠪᠠᠬᠠᠨ ᠡᠪ ᠦᠭᠡᠢᠷᠡᠵᠦ ᠠᠪᠠᠢ᠃ ᠲᠠᠢᠴᠢᠭᠤᠳ ᠤ᠋ᠨ ᠰᠡᠩᠭᠦᠮ ᠪᠢᠯᠬᠡ ᠬᠠᠭᠠᠨ ᠲᠩᠷᠢ ᠪᠣᠯᠬᠤ ᠳ᠋ᠠᠭᠠᠨ᠂
— ᠬᠠᠮᠤᠭ ᠮᠣᠩᠭᠣᠯ ᠢ᠋ ᠬᠠᠪᠤᠯ ᠮᠡᠳᠡᠲᠦᠭᠡᠢ! ᠬᠡᠮᠡᠭᠰᠡᠨ ᠪᠢᠯᠡ᠃ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠠᠮᠪᠠᠭᠠᠢ ᠪᠠᠢᠭᠰᠠᠭᠠᠷ ᠠᠲᠠᠯᠠ᠂ ᠲᠠᠢᠴᠢᠭᠤᠳ ᠤ᠋ᠨ ᠤᠳᠤᠮᠲᠤ ᠨᠣᠶᠠᠳ ᠠᠮᠢᠳᠤ ᠠᠲᠠᠯᠠ ᠬᠢᠶᠠᠳ ᠪᠣᠷᠵᠢᠭᠢᠨ ᠣᠪᠣᠭ ᠲᠤ᠌ ᠬᠠᠭᠠᠨ ᠰᠡᠨᠳᠡᠢ ᠶ᠋ᠢ ᠰᠢᠯᠵᠢᠭᠦᠯᠵᠡᠢ᠃ ᠡᠢᠨ ᠲᠩᠷᠢ ᠡᠴᠡ ᠣᠳᠣ ᠰᠢᠭᠦᠷᠡᠭᠡᠳ ᠤᠳᠠᠭᠠ ᠦᠭᠡᠢ ᠪᠠᠢᠪᠠ᠃ ᠲᠡᠭᠡᠭᠡᠳ ᠴᠦ᠍ ᠴᠢᠰᠤ ᠪᠤᠴᠠᠯᠤᠭᠰᠠᠨ ᠵᠠᠯᠠᠭᠤ ᠨᠠᠰᠤᠨ ᠳ᠋ᠤ᠌ ᠪᠦᠭᠦᠳᠡ ᠶ᠋ᠢ ᠪᠦᠳᠦᠭᠡᠴᠢᠬᠦ ᠶᠦᠮ ᠰᠢᠭ ᠪᠣᠳᠣᠳᠠᠭ ᠬᠣᠢᠨᠠ᠃ ᠶᠡᠷᠦ ᠲᠡᠷᠡ ᠴᠠᠭ ᠦᠶᠡ ᠳ᠋ᠦ᠍ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠴᠢᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠨᠢᠭᠡᠬᠡᠨ ᠴᠦ᠍ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠴᠡᠴᠡᠭ ᠴᠥᠪᠥᠷᠢᠭᠦᠦ ᠰᠢᠭ ᠵᠠᠯᠠᠭᠤ ᠬᠠᠲᠤᠨ ᠬᠢᠭᠡᠳ ᠴᠡᠨᠡᠵᠦ ᠴᠡᠩᠨᠡᠵᠦ ᠰᠠᠭᠤᠭᠠ ᠬᠠᠳᠠᠮ ᠲᠠᠯᠠ ᠳ᠋ᠠᠭᠠᠨ ᠬᠠᠷᠠᠭᠤᠯᠬᠤ᠂ ᠦᠵᠡᠭᠦᠯᠬᠦ ᠬᠦᠰᠡᠯᠡᠩ ᠪᠠᠰᠠ ᠬᠦ᠌ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠦᠭᠰᠡᠨ ᠦᠭᠡᠢ᠃
— ᠶᠠᠭᠠᠬᠢᠳᠠᠭ ᠶᠤᠮ ᠪᠢᠯᠡ ᠳᠠ ᠭᠡᠮᠡᠨ ᠠᠶᠠ ᠶ᠋ᠢ ᠨᠢ ᠳᠠᠭᠠᠭᠤᠯᠵᠤ ᠠᠰᠠᠭᠤᠪᠠᠯ᠂ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠤ᠋ ᠶᠠᠳᠠᠷᠠᠭᠤ ᠨᠢᠳᠦᠨ ᠳ᠋ᠦ᠍ ᠣᠴᠢ ᠬᠡᠷᠡᠯᠳᠦᠵᠦ᠂
— ᠬᠠᠪᠤᠯ ᠮᠢᠨᠢ᠂ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠤᠲᠠᠢ ᠪᠥᠬᠡ ᠯᠡ ᠦᠬᠦᠭᠰᠡᠨ ᠢ᠋ ᠡᠷᠯᠢᠭ ᠲᠡᠢ ᠬᠡᠷᠡᠯᠳᠦᠵᠦ ᠪᠣᠰᠬᠠᠳᠠᠭ᠂ ᠦᠷᠡᠭᠳᠡᠭᠰᠡᠨ ᠢ᠋ ᠲᠩᠷᠢ ᠲᠡᠢ ᠵᠠᠷᠭᠤᠯᠳᠤᠵᠤ ᠲᠡᠳᠬᠦᠳᠡᠭ ᠭᠡᠨᠡ ᠳᠡ! ᠲᠡᠷᠡ ᠬᠥᠮᠦᠨ ᠢ᠋ ᠵᠠᠯᠠᠵᠤ ᠠᠪᠴᠢᠷᠠᠬᠤ ᠠᠷᠭᠠ ᠴᠢᠷᠭᠠ ᠶᠠᠭᠤ ᠪᠠᠢᠳᠠᠭ ᠪᠣᠯ᠁ ᠬᠡᠮᠡᠭᠰᠡᠨ ᠶᠦᠮ ᠰᠠᠨᠵᠠᠢ᠃ ᠵᠠᠯᠠᠭᠤ ᠬᠥᠮᠦᠨ ᠳ᠋ᠦ᠍ ᠲᠡᠭᠦᠨ ᠰᠢᠭ ᠠᠮᠠᠷ᠂ ᠬᠢᠯᠪᠠᠷ ᠵᠦᠢᠯ ᠦᠭᠡᠢ ᠰᠠᠨᠠᠭᠳᠠᠪᠠ᠃ ᠲᠣᠷᠭᠠᠨ ᠵᠠᠭᠤᠲᠤ ᠶ᠋ᠢᠨ ᠲᠡᠷᠢᠭᠦᠨ ᠢᠯᠳᠠᠷ ᠪᠠᠭᠠᠲᠤᠷ ᠲᠤ᠌ ᠭᠠᠷ ᠤ᠋ᠨ ᠪᠡᠯᠡᠭ ᠥᠭᠴᠦ ᠲᠥᠷᠥ ᠶ᠋ᠢᠨ ᠵᠠᠯᠠᠯᠭᠠ ᠴᠡᠭᠡᠵᠢᠯᠡᠭᠦᠯᠦᠨ ᠢᠯᠡᠭᠡᠪᠡᠯ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠲᠩᠷᠢ ᠶ᠋ᠢᠨ ᠤᠳᠤᠮᠲᠤ ᠬᠡᠮᠡᠬᠦ ᠤᠲᠠᠢ ᠪᠥᠬᠡ ᠲᠣᠷᠭᠠᠨ ᠵᠠᠭᠤᠲᠤ ᠪᠠᠷ ᠬᠠᠮᠠᠭᠠᠯᠠᠭᠤᠯᠵᠤ᠂ ᠪᠠᠭᠠᠬᠠᠨ ᠬᠦᠷᠢᠶᠡ ᠬᠣᠲᠠ ᠮᠡᠲᠦ ᠰᠦᠷ ᠪᠠᠷᠠ ᠲᠡᠭᠦᠰ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠬᠣᠷᠬᠤᠨᠤᠭ ᠵᠢᠪᠦᠷ ᠦ᠋ᠨ ᠬᠥᠨᠳᠡᠢ ᠳ᠋ᠦ᠍᠂ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠬᠠᠶᠠᠭᠠ ᠬᠠᠳᠬᠤᠨ ᠪᠠᠭᠤᠭᠰᠠᠨ ᠨᠢ ᠪᠣᠢ᠃ ᠬᠠᠪᠢ ᠣᠢᠷᠠ ᠶ᠋ᠢᠨ ᠨᠣᠶᠠᠳ ᠶᠡᠬᠡᠰ᠂ ᠠᠯᠪᠠᠲᠤ ᠢᠷᠭᠡᠳ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠨ ᠢᠷᠡᠪᠡ ᠭᠡᠮᠡᠨ ᠬᠣᠰᠢᠭᠤᠷᠠᠵᠤ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠤ᠋ ᠬᠢ ᠶ᠋ᠢ ᠲᠣᠭᠣᠷᠢᠨ ᠬᠦᠷᠢᠶᠡ ᠡᠭᠦᠰᠴᠦ ᠨᠠᠢᠷ ᠨᠠᠭᠠᠳᠤᠮ ᠮᠡᠲᠦ ᠬᠥᠯ ᠳᠠᠷᠤᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠵᠠᠯᠠᠭᠤ ᠬᠠᠪᠤᠯ ᠬᠠᠭᠠᠨ ᠪᠤᠶᠠᠨ ᠦᠢᠯᠡᠳᠪᠡ ᠭᠡᠮᠡᠨ ᠪᠣᠳᠣᠵᠤ᠂ ᠤᠲᠠᠢ ᠪᠥᠬᠡ ᠦᠳᠡᠰᠢ ᠪᠦᠬᠦᠨ ᠬᠠᠷᠤᠢ ᠪᠦᠷᠦᠢ ᠪᠡᠷ ᠬᠦᠷᠢᠶᠡᠨ ᠳᠤᠮᠳᠠ ᠲᠦᠳᠡᠭ ᠠᠰᠠᠭᠠᠨ ᠬᠡᠴᠡ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ᠂ ᠪᠥᠬᠡ ᠶ᠋ᠢᠨ ᠳᠠᠢᠯᠭᠠ ᠶᠢᠰᠦᠨ ᠡᠳᠦᠷ ᠲᠠᠰᠤᠷᠠᠯ ᠦᠭᠡᠢ ᠬᠠᠲᠠᠵᠤ ᠪᠢᠯᠡ᠃ ᠲᠩᠷᠢ ᠲᠡᠢ ᠬᠦᠦᠷᠨᠢᠵᠦ ᠦᠰᠦᠴᠢᠨ ᠳᠡᠭᠳᠡᠵᠦ ᠪᠠᠭᠤᠬᠤ ᠪᠥᠬᠡ ᠰᠢᠭ ᠢ᠋ᠶ᠋ᠡᠨ ᠳᠦᠷᠡᠯᠵᠡᠨ ᠴᠣᠷᠣᠯᠵᠠᠨ ᠠᠰᠠᠬᠤ ᠬᠢᠯᠢᠩᠲᠦ ᠲᠦᠳᠡᠭ ᠦ᠋ᠨ ᠴᠢᠰᠤᠨ ᠤᠯᠠᠭᠠᠨ ᠲᠤᠶᠠᠭᠠᠨ ᠳ᠋ᠤ᠌ ᠲᠣᠭᠣᠷᠢᠨ ᠴᠢᠭᠤᠯᠤᠭᠰᠠᠨ ᠶᠡᠬᠡᠰ ᠳᠡᠭᠡᠳᠦᠰ᠂ ᠬᠠᠷᠠᠴᠤᠰ ᠶᠠᠳᠠᠭᠤᠰ ᠤ᠋ᠨ ᠴᠢᠷᠠᠢ ᠨᠢᠭᠡ ᠬᠡᠷᠡᠯᠳᠦᠵᠦ᠂ ᠨᠢᠭᠡ ᠰᠡᠭᠦᠳᠡᠷᠲᠦᠨ ᠪᠠᠢᠭᠰᠠᠨ ᠰᠠᠨ᠃ ᠤᠲᠠᠢ ᠪᠥᠬᠡ ᠶ᠋ᠢᠨ ᠬᠢᠩᠭᠠᠨ ᠬᠠᠮᠠᠷ ᠳᠡᠭᠡᠷᠡ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠬᠥᠯᠥᠰᠥ ᠪᠣᠷᠵᠠᠢᠵᠤ᠂ ᠨᠥᠭᠦᠭᠡ ᠬᠠᠷᠠᠬᠤ ᠳ᠋ᠤ᠌ ᠴᠢᠰᠤ ᠪᠥᠩᠵᠢᠭᠡᠨᠡᠵᠦ ᠪᠠᠢᠬᠤ ᠰᠢᠭ᠋ ᠦᠵᠡᠭᠳᠡᠬᠦ ᠠᠭᠠᠳ ᠠᠷᠪᠠᠨ ᠭᠤᠷᠪᠠᠨ ᠣᠩᠭᠣ ᠰᠢᠲᠦᠭᠡᠨ ᠢ᠋ᠶ᠋ᠡᠨ ᠬᠠᠷᠠᠬᠤ ᠲᠣᠯᠢᠨ ᠳ᠋ᠤᠨᠢ ᠬᠦᠷᠲᠡᠯᠡ ᠭᠠᠯ ᠤ᠋ᠨ ᠳᠥᠯᠥ᠂ ᠲᠠᠯᠠ ᠶ᠋ᠢᠨ ᠨᠣᠶᠠᠳ᠂ ᠬᠣᠯᠠ ᠶ᠋ᠢᠨ ᠬᠠᠷᠠ ᠠᠭᠤᠯᠠᠰ᠂ ᠰᠡᠭᠦᠳᠡᠷᠲᠦᠨ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠡᠢᠨ ᠶᠡᠬᠡ ᠬᠥᠯ ᠪᠣᠯᠤᠭᠰᠠᠨ ᠴᠤ᠌ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠤ᠋ ᠪᠡᠶᠡ ᠢᠯᠠᠷᠢᠰᠢᠭᠰᠠᠨ ᠦᠭᠡᠢ᠃ ᠵᠤᠨ ᠤ᠋ ᠠᠳᠠᠭ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢᠳ ᠢ᠋ᠶ᠋ᠠᠷ ᠲᠠᠭᠠᠯᠠᠯ ᠪᠣᠯᠵᠠᠢ᠃ ᠡᠮᠡᠰ ᠥᠬᠢᠳ ᠨᠢ ᠦᠰᠦ ᠭᠡᠵᠢᠭᠡ ᠪᠡᠨ ᠤᠷᠠᠵᠤ ᠲᠠᠰᠤᠳᠠᠨ ᠤᠬᠢᠯᠠᠵᠤ ᠤᠨᠵᠢᠵᠤ᠂ ᠡᠷᠡᠰ ᠳᠠᠢᠴᠢᠳ ᠨᠢ ᠡᠮᠡᠭᠡᠯ ᠢ᠋ ᠨᠢ ᠳᠡᠷᠡᠯᠡᠭᠦᠯᠦᠨ ᠪᠤᠩᠬᠤᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠮᠥᠨᠥᠬᠡᠨ ᠬᠤᠷᠠᠵᠤ ᠴᠤᠭᠯᠠᠭᠰᠠᠨ ᠣᠯᠠᠨ ᠲᠠᠬᠤᠯ ᠭᠠᠷᠤᠭᠰᠠᠨ ᠮᠡᠲᠦ ᠨᠡᠭᠦᠨ ᠳᠠᠢᠵᠢᠵᠤ ᠣᠳᠪᠠᠢ᠃
ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠪᠦᠭᠦᠳᠡ ᠶ᠋ᠢ ᠵᠠᠯᠠᠨ ᠵᠠᠷᠯᠢᠭᠳᠠᠵᠤ ᠬᠣᠢᠯᠭᠠ ᠶ᠋ᠢᠨ ᠨᠠᠢᠷ ᠳᠠᠭᠤᠰᠬᠠᠭᠠᠳ ᠮᠣᠷᠳᠠᠬᠤ ᠶ᠋ᠢᠨ ᠥᠷᠯᠥᠭᠡ ᠤᠲᠠᠢ ᠵᠠᠢᠷᠠᠩ ᠢ᠋ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂
— ᠠᠯᠤᠰ ᠭᠠᠵᠠᠷ ᠠ᠋ᠴᠠ ᠰᠠᠨᠠᠭᠠ ᠲᠠᠯᠪᠢᠨ ᠢᠷᠡᠭᠰᠡᠨ ᠲᠩᠷᠢ ᠶ᠋ᠢᠨ ᠡᠯᠴᠢ ᠡᠷᠬᠢᠮ ᠵᠠᠢᠷᠠᠩ ᠲᠠᠨ ᠤ᠋ ᠵᠢᠳᠬᠦᠯ ᠢ᠋ ᠬᠦᠨᠳᠦᠯᠡᠵᠦ ᠪᠠᠢᠨᠠ ᠭᠡᠳ ᠥᠪᠡᠷ ᠦ᠋ᠨ ᠰᠠᠩ ᠠ᠋ᠴᠠ ᠪᠤᠯᠠᠭᠠ᠂ ᠰᠤᠤᠰᠠᠷ ᠤ᠋ᠨ ᠠᠷᠠᠰᠤ ᠰᠣᠭᠰᠣᠯᠵᠠᠭᠤᠯᠤᠨ ᠡᠷᠭᠦᠭᠰᠡᠨ ᠨᠢ ᠬᠣᠷᠢᠨ ᠲᠡᠮᠡᠭᠡ ᠠᠴᠢᠶᠠ ᠪᠣᠯᠤᠭᠰᠠᠨ ᠠᠭᠠᠳ ᠬᠠᠷᠯᠢ ᠺᠤ ᠬᠠᠲᠤᠨ ᠠᠬᠠ ᠶ᠋ᠢᠨ ᠲᠥᠯᠥᠭᠡ ᠶᠡᠬᠡ ᠶ᠋ᠢ ᠬᠢᠪᠡ ᠭᠡᠮᠡᠨ ᠰᠥᠰᠥᠯᠡᠨ ᠥᠪᠡᠷ ᠦ᠋ᠨ ᠭᠠᠷ ᠠ᠋ᠴᠠ ᠠᠷᠪᠠᠨ ᠯᠠᠩ ᠤ᠋ᠨ ᠠᠯᠲᠠᠨ ᠪᠠᠭᠤᠪᠴᠢ ᠬᠣᠶᠠᠷ ᠢ᠋ ᠨᠡᠮᠡᠷᠢᠯᠡᠵᠦ ᠬᠢᠯᠠᠢᠯᠭᠠᠪᠠ᠃ ᠡᠭᠦᠨ ᠳ᠋ᠦ᠍ ᠶᠡᠬᠡ ᠯᠡ ᠤᠶᠠᠷᠠᠭᠰᠠᠨ ᠤᠲᠠᠢ ᠵᠠᠢᠷᠠᠩ᠂
— ᠴᠠᠭ ᠨᠢ ᠢᠷᠡᠭᠰᠡᠨ ᠪᠣᠯ ᠮᠢᠩᠭᠠᠨ ᠲᠩᠷᠢ ᠲᠣᠭᠣᠷᠢᠭᠠᠳ ᠴᠤ᠌ ᠠᠪᠤᠷᠠᠵᠤ ᠦᠯᠦ ᠴᠢᠳᠠᠬᠤ ᠪᠢᠯᠡ᠃ ᠮᠢᠨᠦ ᠲᠩᠷᠢ ᠣᠩᠭᠣᠨ ᠬᠢᠭᠡᠳ ᠬᠠᠨ ᠬᠤᠷᠮᠤᠰᠲᠠ ᠡᠴᠢᠭᠡ ᠬᠠᠷᠢᠶᠠᠭᠠ ᠦᠭᠡᠢ ᠪᠢᠯᠡ ᠭᠡᠵᠦ ᠪᠥᠬᠥᠯᠵᠡᠭᠰᠡᠭᠡᠷ ᠭᠠᠷᠴᠤ ᠣᠳᠤᠭᠰᠠᠨ ᠠᠪᠠᠢ᠃ ᠡᠢᠨ ᠬᠠᠭᠠᠨ ᠬᠠᠪᠤᠯ᠂ ᠬᠠᠲᠤᠨ ᠬᠠᠷᠯᠢ ᠺᠤ ᠶ᠋ᠢᠨ ᠰᠣᠪᠤᠳᠤᠨ ᠨᠢᠯᠪᠤᠰᠤ ᠶ᠋ᠢ ᠰᠤᠷᠭᠠᠵᠤ ᠠᠷᠴᠢᠭᠰᠠᠭᠠᠷ᠂ ᠥᠨᠥᠴᠢᠨ ᠨᠢᠯᠪᠤᠰᠤ ᠶ᠋ᠢ ᠦᠷᠦ ᠡᠪᠡᠳᠴᠦ ᠠᠷᠴᠢᠭᠰᠠᠭᠠᠷ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠠᠭᠠᠨ ᠢᠷᠡᠵᠡᠢ᠃ ᠴᠢᠩᠭᠢᠭᠡᠳ ᠨᠠᠮ ᠭᠦᠮ ᠥᠩᠭᠡᠷᠡᠭᠰᠡᠨ ᠠᠪᠠᠰᠤ ᠥᠰᠢᠶᠡ ᠬᠣᠷᠣᠰᠤᠯ ᠤ᠋ᠨ ᠵᠠᠩᠭᠢᠯᠠᠭᠠ ᠡᠭᠦᠰᠬᠦ ᠦᠭᠡᠢ ᠠᠮᠤᠷ ᠵᠢᠮᠦᠷ ᠠᠮᠢᠳᠤᠷᠠᠵᠤ ᠪᠣᠯᠬᠤ ᠪᠠᠢᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠡᠷᠭᠢᠨ ᠲᠣᠭᠣᠷᠢᠨ ᠲᠦᠳᠡᠭ ᠦ᠋ᠨ ᠦᠨᠡᠰᠦ᠂ ᠭᠡᠷ ᠲᠡᠷᠭᠡᠨ ᠦ᠌ ᠮᠥᠷ᠂ ᠣᠷᠣᠴᠠ ᠣᠪᠣᠬᠠᠢ ᠶ᠋ᠢᠨ ᠦᠢ ᠲᠦᠮᠡᠨ ᠬᠠᠷᠠ ᠪᠠᠭᠤᠷᠢᠨ ᠳᠡᠭᠡᠷᠡ ᠥᠨᠥᠴᠢᠷᠡᠵᠦ ᠬᠣᠴᠣᠷᠤᠭᠰᠠᠨ ᠳ᠋ᠠᠭᠠᠨ ᠬᠣᠷᠣᠰᠤᠭᠰᠠᠨ ᠰᠠᠢᠨ ᠲᠢᠬᠢᠨ ᠨᠣᠶᠠᠨ ᠤ᠋ ᠠᠯᠪᠠᠲᠤ ᠨᠤᠭᠤᠳ ᠴᠡᠷᠢᠭᠯᠡᠨ ᠮᠣᠷᠳᠠᠵᠤ᠂ ᠲᠡᠷᠭᠡ ᠲᠡᠷᠭᠡ ᠪᠡᠯᠡᠭ ᠠᠴᠢᠨ ᠨᠤᠲᠤᠭ ᠪᠤᠴᠠᠵᠤ ᠶᠠᠪᠤᠭᠰᠠᠨ ᠤᠲᠠᠢ ᠪᠥᠬᠡ ᠶ᠋ᠢᠨ ᠬᠥᠰᠬᠡ ᠠᠴᠢᠶᠠ ᠶ᠋ᠢ ᠭᠦᠢᠴᠡᠨ ᠳᠣᠪᠲᠣᠯᠵᠤ ᠬᠦᠢᠰᠦ ᠲᠡᠮᠲᠡᠷᠢᠭᠡᠳ᠂ ᠲᠩᠷᠢ ᠶ᠋ᠢᠨ ᠡᠯᠴᠢ ᠵᠠᠢᠷᠠᠩ ᠢ᠋ ᠪᠠᠷᠢᠨ ᠠᠪᠴᠤ ᠬᠣᠣᠰ ᠠᠯᠲᠠᠨ ᠪᠠᠭᠤᠢᠪᠴᠢ ᠶ᠋ᠢ ᠨᠢ ᠬᠠᠢᠯᠤᠨ᠂
— ᠡᠩᠭᠡᠷ ᠲᠡᠭᠡᠨ ᠬᠡᠪᠲᠡᠳᠡᠭ ᠪᠡᠶᠡ ᠴᠢᠨᠢ ᠡᠨᠡ ᠤᠤ᠂ ᠲᠩᠷᠢ ᠲᠡᠢ ᠶᠠᠷᠢᠳᠠᠭ ᠠᠮᠠ ᠴᠢᠨᠢ ᠠᠯᠢ ᠪᠣᠢ ᠭᠡᠮᠡᠨ ᠬᠠᠯᠠᠭᠤᠨ ᠬᠠᠢᠯᠤᠮᠠᠭ ᠠᠯᠲᠠ ᠶ᠋ᠢ ᠠᠮᠠ ᠤᠷᠤᠭᠤ ᠨᠢ ᠴᠢᠳᠬᠤᠵᠤ ᠠᠯᠠᠭᠰᠠᠨ ᠭᠡᠳᠡᠭ ᠪᠥᠯᠥᠭᠡ᠃
ᠡᠭᠦᠨ ᠳ᠋ᠦ᠍ ᠬᠣᠷᠣᠰᠤᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠰᠡᠪ ᠯᠠ ᠬᠢᠪᠡᠯ ᠪᠣᠱᠣᠭᠠ ᠢᠰᠬᠦᠯᠵᠦ᠂ ᠲᠣᠲᠣᠭᠣ ᠮᠥᠷᠭᠥᠵᠦ᠂ ᠣᠯᠤᠭᠰᠠᠨ ᠣᠯᠵᠠ᠂ ᠪᠠᠷᠢᠭᠰᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠭᠠᠷ ᠳᠠᠮᠵᠢᠭᠤᠯᠤᠨ᠂ ᠲᠥᠷᠥ ᠳᠠᠮᠨᠠᠭᠤᠯᠤᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠢᠯᠡᠭᠡᠬᠦ ᠪᠣᠯᠵᠠᠢ᠃ ᠰᠡᠭᠦᠯᠴᠢ ᠶ᠋ᠢᠨ ᠬᠢᠨᠢ ᠬᠢᠶᠠᠳ ᠪᠣᠷᠵᠢᠭᠢᠨ ᠤ᠋ ᠬᠠᠲᠠᠭᠠᠨ ᠪᠠᠭᠠᠲᠤᠷ᠂ ᠬᠡᠷᠡᠢᠳ ᠦ᠋ᠨ ᠭᠤᠸᠠ ᠪᠣᠶᠤᠷᠤᠭ ᠮᠠᠷᠬᠤᠰ᠂ ᠲᠠᠢᠴᠢᠭᠤᠳ ᠤ᠋ᠨ ᠨᠨᠡᠮᠬᠡᠵᠢᠨ ᠲᠡᠢᠰᠢ ᠠᠪᠠᠢ᠃ ᠲᠡᠳᠡᠨ ᠢ᠋ ᠮᠣᠳᠣᠨ ᠡᠯᠵᠢᠭᠡᠨ ᠳ᠋ᠦ᠍ ᠦᠬᠡᠷ ᠬᠠᠳᠠᠭᠠᠰᠤ ᠪᠠᠷ ᠬᠠᠲᠠᠭᠰᠠᠨ ᠭᠡᠳᠡᠭ᠃ ᠣᠳᠣ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠬᠠᠪᠤᠯ ᠢ᠋ ᠶᠠᠭᠠᠬᠢᠵᠤ ᠤᠭᠲᠤᠵᠤ᠂ ᠶᠠᠭᠠᠬᠢᠵᠤ ᠠᠯᠠᠬᠤ ᠶ᠋ᠢ ᠬᠡᠨ ᠮᠡᠳᠡᠵᠡᠢ᠃ ᠦᠬᠦᠭᠰᠡᠨ ᠴᠦ᠍ ᠠᠯᠠᠭᠠ ᠳᠠᠷᠤᠮᠠ ᠭᠠᠵᠠᠷ ᠢᠯᠵᠢᠯᠬᠦ ᠠᠯᠲᠠ ᠪᠡᠶᠡ ᠪᠠᠢᠨᠠ᠂ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠃ ᠬᠠᠷᠢ ᠶ᠋ᠢ ᠲᠦᠷᠢᠮᠡᠬᠡᠢᠯᠡᠵᠦ ᠪᠢᠰᠢ᠂ ᠬᠠᠷᠠᠴᠤ ᠪᠠᠨ ᠳᠠᠷᠤᠩᠭᠤᠢᠯᠠᠵᠤ ᠭᠡᠮᠡᠨ ᠲᠥᠷᠥ ᠶ᠋ᠢ ᠲᠥᠪᠬᠢᠨᠡᠭᠦᠯᠬᠦ ᠭᠡᠵᠦ ᠶᠠᠪᠤᠭᠠᠳ ᠯᠠ ᠨᠥᠭᠴᠢᠭᠡ ᠪᠢᠵᠡ᠃ ᠬᠠᠭᠠᠨ ᠬᠥᠮᠦᠨ ᠦ᠌ ᠵᠠᠶᠠᠭᠠ ᠲᠡᠢᠮᠦ ᠶᠦᠮ᠃ ᠰᠡᠭᠡᠵᠦ ᠬᠡᠮᠡᠨᠡ ᠤᠷᠢᠳ ᠦᠢᠯᠡᠳᠦᠭᠰᠡᠨ ᠨᠢᠭᠦᠯ ᠢ᠋ᠶ᠋ᠡᠨ ᠭᠠᠷ ᠳᠠᠮᠵᠢᠭᠤᠯᠤᠨ ᠭᠠᠢ ᠣᠳᠣᠯ ᠦᠭᠡᠢ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠴᠠᠭᠠᠳᠬᠠᠭᠰᠠᠨ ᠪᠤᠶᠠᠨ ᠪᠣᠯᠤᠨᠠ ᠭᠡᠮᠡᠨ ᠪᠣᠳᠣᠭᠰᠠᠨ ᠶᠤᠮ᠃ ᠶᠡᠷᠦ ᠬᠠᠲᠠᠭᠤ ᠰᠢᠢᠳᠴᠡᠢ᠃ ᠬᠠᠷᠢᠨ ᠮᠢᠨᠦ ᠵᠢᠷᠭᠤᠭᠠᠨ ᠬᠦᠦ ᠡᠴᠡ ᠲᠥᠷᠥ ᠪᠠᠷᠢᠬᠤ ᠨᠢ ᠬᠡᠨ ᠪᠢᠯᠡ ᠭᠡᠵᠦ ᠡᠯᠴᠢ ᠢᠷᠡᠭᠰᠡᠨ ᠨᠠᠮᠤᠷ ᠠ᠋ᠴᠠ ᠡᠨᠡ ᠬᠠᠪᠤᠷ ᠬᠦᠷᠲᠡᠯᠡ ᠪᠣᠳᠣᠭᠰᠠᠨ ᠬᠡᠳᠦᠢ ᠴᠦ᠍ ᠣᠯᠵᠤ ᠣᠨᠣᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠤᠭ ᠨᠢ ᠬᠠᠲᠠᠭᠠᠨ ᠨᠣᠶᠠᠨ ᠢ᠋ ᠬᠠᠢᠷᠠᠯᠠᠵᠤ ᠥᠰᠬᠡᠭᠰᠡᠨ ᠪᠢᠯᠡ᠃ ᠳᠡᠭᠡᠳᠦᠰ ᠲᠦ᠍ ᠵᠢᠰᠤᠷ ᠦᠭᠡᠢ᠂ ᠳᠣᠣᠷᠠᠳᠤᠰ ᠲᠤ᠌ ᠲᠠᠰᠢᠭᠤᠷ ᠦᠭᠡᠢ ᠬᠥᠪᠡᠭᠦᠨ ᠶᠠᠪᠤᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠬᠠᠷᠠ ᠦᠬᠦᠯ ᠳ᠋ᠦ᠍ ᠴᠠᠭᠠᠨ ᠲᠠᠲ᠋ᠠᠷ ᠤ᠋ᠳ ᠪᠠᠷᠢᠭᠠᠳ ᠥᠭᠴᠡᠢ᠃ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠠᠮᠢᠳᠤ ᠨᠢ ᠪᠤᠷᠤᠭᠤ ᠦᠭᠡᠢ ᠴᠦ᠍ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠥᠪ ᠦᠭᠡᠢ ᠤᠯᠤᠰ᠃ ᠪᠠᠷᠠᠳᠠᠨᠪᠠᠭᠠᠲᠤᠷ ᠬᠢᠯᠢᠩ ᠲᠡᠢ᠂ ᠬᠤᠲᠤᠭᠲᠤ ᠮᠣᠩᠬᠣᠷ ᠬᠤᠯᠴᠢᠭᠠᠷ᠂ ᠬᠤᠯᠠᠨ᠂ ᠲᠣᠳᠣᠢ ᠣᠳᠴᠢᠬᠢᠨ ᠬᠣᠶᠠᠷ ᠪᠠᠯᠴᠢᠷ᠂ ᠬᠠᠷᠢᠨ ᠬᠣᠲᠣᠯᠠ ᠶᠠᠭᠤ ᠪᠣᠯ᠁ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠥᠨᠳᠡᠰᠬᠢᠵᠦ ᠮᠣᠷᠢᠨ ᠳ᠋ᠠᠭᠠᠨ ᠳᠠᠰᠢᠭᠤᠷ ᠥᠭ᠍ᠭᠦᠨ ᠲᠣᠪᠲᠣᠯᠭᠠᠪᠠ᠃ ᠬᠠᠪᠤᠯ ᠬᠠᠭᠠᠨ ᠤ ᠭᠡᠰᠢᠭᠲᠡᠨ ᠮᠢᠩᠭᠠᠲᠤ ᠬᠠᠶᠠᠭᠠ ᠬᠢᠷᠠᠬᠠᠭ ᠦᠭᠡᠢ ᠶᠡᠬᠡ ᠳᠣᠪᠣ ᠶᠢ ᠵᠦᠰᠦᠨ ᠬᠥᠬᠡ ᠲᠡᠭᠷᠢ ᠶᠢᠨ ᠴᠠᠭᠠᠨ ᠰᠠᠪᠰᠠᠯᠠᠭᠠᠨᠠ ᠠᠭᠤᠰᠪᠠ ᠡ᠃
7
ᠬᠠᠪᠤᠷ ᠤ᠋ᠨ ᠤᠷᠢᠨ ᠳ᠋ᠤ᠌ ᠵᠠᠬᠠ ᠠ᠋ᠴᠠ ᠪᠠᠨ ᠰᠡᠮᠡᠷᠡᠭᠰᠡᠨ ᠴᠠᠰᠤᠨ ᠤ᠋ ᠤᠰᠤ ᠦᠳᠡᠰᠢ ᠶ᠋ᠢᠨ ᠵᠢᠪᠠᠷ ᠲᠤ᠌ ᠬᠥᠯᠳᠡᠵᠦ᠂ ᠬᠣᠯᠠ ᠠ᠋ᠴᠠ ᠢᠷᠡᠬᠦ ᠬᠡᠨ ᠨᠢᠭᠡᠨ ᠦ᠌ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ ᠳᠡᠰ ᠨᠢᠰ ᠳᠤᠤᠭᠠᠷᠬᠤ ᠴᠢᠮᠡᠭᠡ ᠪᠡᠷ ᠦᠭᠡ ᠬᠥᠪᠡᠭᠦᠨ ᠰᠡᠷᠡᠵᠡᠢ ᠃ ᠳᠡᠷᠡᠨ ᠳᠣᠣᠷᠠᠬᠢ ᠭᠠᠵᠠᠷ ᠴᠢᠩᠨᠠᠪᠠᠯ ᠣᠯᠠᠨ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠪᠠᠢᠬᠤ ᠲᠤᠯᠠ᠂
— ᠬᠠᠲᠤᠨ ᠢᠵᠢᠢ ᠠ᠋! ᠬᠠᠲᠤᠨ ᠢᠵᠢᠢ ᠠ᠋ ᠭᠡᠪᠡᠯ ᠶᠢᠰᠦᠭᠡᠢ ᠶ᠋ᠢᠨ ᠥᠭᠭᠦᠭᠰᠡᠨ ᠳᠠᠬᠤᠨ ᠳ᠋ᠤ᠌ ᠤᠷᠠᠨ ᠬᠣᠰᠢᠭᠤ ᠪᠠᠨ ᠰᠢᠭᠢᠳᠬᠡᠵᠦ᠂ ᠠᠮᠢᠰᠬᠤᠭᠠᠨ ᠳ᠋ᠠᠭᠠᠨ ᠪᠦᠯᠢᠶᠡᠴᠡᠨ ᠤᠨᠲᠠᠭᠰᠠᠨ ᠥᠵᠢᠨ ᠪᠦᠯᠵᠢᠭᠡᠨ ᠢᠷᠠᠭᠯᠠᠨ᠂
— ᠶᠠᠭᠤ ᠪᠣᠯᠪᠠ᠂ ᠮᠢᠨᠦ ᠬᠦᠦ? ᠭᠡᠵᠦ ᠨᠣᠢᠷᠮᠤᠭ ᠴᠤ᠌ ᠭᠡᠯᠡ ᠡᠩᠬᠦᠷᠡᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃ ᠦᠭᠡ ᠨᠣᠶᠠᠨ ᠠᠬᠢᠨ ᠴᠢᠩᠨᠠᠭᠰᠠᠨ ᠢ᠋ᠶ᠋ᠠᠨ᠂
— ᠢᠵᠢᠢ ᠠ᠋᠂ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠳᠡᠷᠡᠨ ᠳᠣᠣᠷᠠ ᠰᠣᠨᠣᠰᠳᠠᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠬᠠᠲᠤᠨ᠂
— ᠲᠠᠲ᠋ᠠᠷ ᠤ᠋ᠳ ᠪᠢᠳᠡᠨ ᠬᠣᠶᠠᠷ ᠢ᠋ ᠡᠳᠦᠢ ᠳ᠋ᠦ᠍ ᠮᠠᠷᠲᠠᠭᠰᠠᠨ ᠠ᠋! ᠴᠢ ᠤᠨᠲᠠ ᠭᠡᠪᠡᠯ ᠬᠥᠪᠡᠭᠦᠨ ᠡᠰᠡ ᠢᠳᠡᠭᠡᠨ᠂ ᠭᠣᠷᠢᠳᠠᠯᠭᠠ ᠦᠯᠦ ᠲᠠᠰᠤᠷᠠᠨ᠂
— ᠬᠠᠲᠤᠨ ᠢᠵᠢᠢ ᠲᠠ ᠶᠠᠭᠤ ᠬᠡᠯᠡᠨᠡ᠃ ᠲᠠᠲ᠋ᠠᠷ ᠢᠷᠭᠡᠳ ᠦ᠋ᠨ ᠨᠡᠬᠡᠯ ᠬᠠᠲᠠᠭᠤ ᠪᠢᠯᠡ᠃ ᠤᠲᠠᠢ ᠠᠷᠭᠢᠯ ᠵᠠᠢᠷᠠᠩ ᠤ᠋ᠨ ᠤᠷᠤᠰᠤᠭᠰᠠᠨ ᠴᠢᠰᠤ ᠶ᠋ᠢ ᠴᠦ᠍ ᠡᠳᠡ ᠲᠥᠯᠥᠵᠦ ᠴᠢᠳᠠᠭᠠ ᠦᠭᠡᠢ ᠪᠠᠢᠭᠠ ᠭᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠤ᠋ ᠨᠢᠳᠦ ᠲᠣᠮᠣ ᠪᠣᠯᠵᠤ᠂
— ᠴᠢ ᠡᠨᠡ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠪᠡ᠂ ᠬᠡᠨ ᠡᠴᠡ ᠳᠤᠭᠤᠯᠪᠠ? ᠭᠡᠮᠡᠨ ᠥᠨᠳᠡᠢᠵᠦ ᠢᠷᠡᠪᠡᠯ ᠴᠢᠨᠣᠠ ᠶ᠋ᠢᠨ ᠠᠷᠠᠰᠤᠨ ᠳᠠᠬᠤᠨ ᠳᠣᠣᠷᠠᠬᠢ ᠬᠠᠰ ᠰᠡᠢᠯᠪᠦᠷᠢ ᠮᠡᠲᠦ ᠭᠤᠸᠠ ᠴᠡᠭᠡᠵᠢ ᠴᠤᠬᠤᠢᠵᠤ᠂ ᠬᠠᠷᠠᠩᠭᠤᠢ ᠣᠷᠣᠴᠠᠨ ᠳ᠋ᠤ᠌ ᠭᠡᠭᠡ ᠲᠠᠲᠠᠬᠤ ᠰᠢᠭ᠋ ᠪᠣᠯᠪᠠ᠃ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠴᠡᠭᠡᠵᠢ ᠶ᠋ᠢ ᠮᠥᠮᠥᠨ ᠡᠴᠡ ᠭᠠᠷᠤᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠠᠷᠠᠭᠠ ᠦᠭᠡᠢ ᠦᠭᠡ ᠨᠢᠳᠦ ᠤᠨᠠᠭᠠᠨ ᠠᠯᠮᠠᠢᠷᠠᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢ ᠴᠣᠴᠢᠨ ᠤᠬᠠᠭᠠᠷᠠᠵᠤ᠂
— ᠠᠪᠤ ᠠ᠋ᠴᠠ ᠭᠡᠯᠡ᠃ ᠡᠨᠡ ᠦᠶᠡᠰ ᠭᠠᠳᠠᠭᠠ ᠳᠥᠷᠥᠭᠡ ᠬᠠᠷᠰᠢᠵᠤ᠂ ᠶᠠᠳᠠᠭᠤ ᠮᠠᠭᠤ ᠣᠷᠣᠴᠠ ᠶ᠋ᠢ ᠶᠠᠢᠵᠢᠭᠠᠨᠠᠭᠤᠯᠤᠨ ᠡᠭᠦᠳᠡᠨ ᠭᠦᠮ ᠰᠡᠬᠦᠭᠰᠡᠨ ᠢ᠋ᠶ᠋ᠡᠨ᠂
— ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠨ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠ ᠲᠠᠢ ᠡᠮᠡ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠫᠣᠷᠬᠢᠶᠠ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠮᠦᠵᠢᠨ ᠦᠭᠡ ᠡᠷᠡ ᠶ᠋ᠢᠨ ᠰᠢᠭᠢᠷᠡ ᠵᠢᠭᠠᠨ᠂
— ᠶᠠᠮᠠᠷ ᠵᠠᠷᠯᠢᠭ ᠳᠠᠭᠠᠵᠤ ᠲᠠ ᠲᠣᠮᠣ ᠳᠤᠤᠭᠠᠷᠤᠨᠠ ᠪᠢᠯᠡ᠃ ᠶᠠᠯᠠ ᠶᠠᠩᠬᠠ ᠲᠠᠢ ᠴᠤ᠌ ᠭᠡᠰᠡᠨ ᠥᠪᠡᠷ ᠦ᠋ᠨ ᠣᠪᠣᠬᠠᠢ ᠳ᠋ᠤ᠌ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠮᠥᠨᠥᠬᠡᠨ ᠫᠣᠷᠭᠢᠶᠠ ᠳᠠᠭᠤᠲᠤ ᠳᠣᠭᠣᠭᠢ ᠲᠠᠢ ᠭᠦᠳ ᠭᠦᠳ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠂
— ᠣᠮᠣᠭ ᠲᠠᠢ ᠵᠤᠯᠪᠤᠰᠬᠠ ᠪᠠᠢᠬᠤ ᠨᠢ ᠭᠡᠳ ᠭᠠᠳᠠᠭᠠ ᠬᠢ ᠮᠣᠷᠢᠲᠠᠨ ᠡᠷᠡᠰ ᠡᠴᠡ ᠭᠠᠷ ᠳᠠᠮᠵᠢᠭᠤᠯᠤᠨ ᠥᠭᠭᠦᠭᠰᠡᠨ ᠪᠠᠮᠪᠠᠷ ᠤ᠋ᠨ ᠭᠠᠯ ᠣᠷᠣᠴᠠᠨ ᠳ᠋ᠤ᠌ ᠳᠦᠷᠡᠯᠵᠡᠭᠦᠯᠦᠨ ᠣᠷᠣᠭᠤᠯᠵᠤ ᠢᠷᠡᠪᠡ᠃ ᠴᠢᠩᠭᠢᠭᠡᠳ ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠪᠠᠷ ᠪᠢᠲᠡᠭᠦᠦ ᠣᠷᠢᠶᠠᠵᠤ ᠬᠡᠪᠲᠡᠭᠰᠡᠨ ᠡᠬᠡ ᠶ᠋ᠢᠨ ᠬᠢᠨᠢ ᠨᠣᠮᠣᠨ ᠬᠥᠮᠥᠰᠬᠡ ᠬᠤᠢᠬᠠᠯᠠᠨ ᠠᠯᠳᠠᠮᠠ ᠪᠠᠮᠪᠠᠷ ᠢ᠋ᠶ᠋ᠠᠷ ᠭᠡᠷᠡᠯᠲᠦᠭᠦᠯᠵᠦ᠂
— ᠬᠣᠲᠣᠯᠠ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠤ᠋ᠨ ᠡᠯᠴᠢ ᠶᠠᠪᠤᠵᠤ ᠪᠠᠢᠨᠠ᠃ ᠬᠤᠪᠴᠠᠰᠤᠯᠠ! ᠭᠡᠰᠡᠨ ᠢ᠋ᠶ᠋ᠡᠨ ᠲᠣᠷᠭᠠᠨ ᠸᠠᠳᠠᠩ ᠲᠠᠢ ᠶ᠋ᠢ ᠡᠪᠦᠷ ᠳᠡᠭᠡᠷᠡ ᠨᠢ ᠰᠢᠳᠡᠴᠢᠬᠡᠭᠡᠳ ᠪᠠᠮᠪᠠᠷ ᠢ᠋ᠶ᠋ᠠᠨ ᠦᠭᠡ ᠨᠣᠶᠠᠨ ᠳ᠋ᠤ᠌ ᠪᠠᠷᠢᠭᠤᠯᠤᠨ ᠭᠠᠷᠴᠤ ᠣᠳᠤᠯᠠ᠃ ᠭᠠᠳᠠᠭᠠ ᠮᠣᠷᠢᠳ ᠳᠣᠷᠭᠢᠯᠠᠬᠤ᠂ ᠠᠮᠠᠭᠠᠢ ᠲᠡᠩᠭᠡᠯᠢᠭ ᠬᠠᠩᠭᠢᠨᠠᠬᠤ ᠯᠠ ᠰᠣᠨᠣᠰᠳᠠᠬᠤ ᠪᠥᠯᠥᠭᠡ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠭᠠᠢᠬᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠡᠬᠢᠯᠡᠭᠡᠳ ᠬᠦᠦ ᠪᠡᠨ᠂ ᠳᠠᠷᠠᠭᠠ ᠨᠢ ᠡᠪᠦᠷ ᠳᠡᠭᠡᠷᠡᠬᠢ ᠸᠠᠳᠠᠩ ᠲᠠᠢ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠡᠴᠡᠷᠡᠭᠰᠡᠨ ᠭᠠᠷ ᠢ᠋ᠶ᠋ᠠᠷ ᠵᠠᠩᠭᠢᠯᠠᠭᠠ ᠶ᠋ᠢ ᠳᠡᠢᠯᠪᠡᠯ ᠲᠣᠷᠭᠠᠨ ᠤᠤᠵᠢ᠂ ᠳᠤᠷᠳᠤᠩ ᠳᠡᠪᠡᠯ᠂ ᠲᠥᠪ ᠬᠢᠴᠡ ᠲᠡᠢ ᠲᠣᠪᠢ ᠮᠠᠯᠠᠭᠠᠢ ᠭᠠᠷᠴᠤ ᠢᠷᠡᠯᠡ᠃ ᠪᠦᠬᠦ ᠤᠴᠢᠷ ᠢ᠋ ᠨᠢ ᠥᠵᠢᠨ ᠢᠵᠢᠢ ᠡᠴᠡ ᠪᠡᠨ ᠲᠦᠷᠦᠭᠦᠯᠡᠵᠦ ᠤᠬᠠᠭᠠᠷᠠᠭᠰᠠᠨ ᠲᠡᠮᠦᠵᠢᠨ ᠦᠭᠡ᠂
— ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠶ᠋ᠢ ᠨᠢ ᠸᠠᠳᠠᠩᠨᠠᠭᠠᠳ ᠪᠤᠴᠠᠭᠠᠴᠢᠬᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ ᠭᠡᠳ ᠥᠨᠳᠡᠯᠵᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠬᠠᠲᠤᠨ᠂
— ᠪᠢ ᠶᠠᠭᠠᠬᠢᠬᠤ ᠪᠣᠢ᠂ ᠲᠠᠨ ᠤ᠋ ᠠᠮᠢᠨ ᠳ᠋ᠤ᠌ ᠬᠠᠯᠠ ᠲᠠᠢ! ᠬᠠᠭᠠᠨ ᠠᠪᠤ ᠴᠢᠨᠢ《ᠴᠢ ᠬᠥᠮᠦᠨ ᠦ᠌ ᠳᠣᠣᠷᠠ ᠣᠷᠣᠬᠤ ᠨᠢ ᠶᠠᠭᠠᠬᠢᠬᠤ ᠪᠣᠢ᠃ ᠬᠦᠦ ᠬᠥᠮᠦᠨ ᠦ᠌ ᠳᠣᠣᠷᠠ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠃ ᠡᠮᠡ ᠬᠥᠮᠦᠨ ᠳ᠋ᠦ᠍ ᠭᠡᠷ ᠦ᠋ᠨ ᠰᠦᠯᠳᠡ᠂ ᠡᠷᠡ ᠬᠥᠮᠦᠨ ᠳ᠋ᠦ᠍ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠶᠠᠪᠤᠳᠠᠭ》 ᠭᠡᠵᠦ ᠵᠠᠬᠢᠭᠰᠠᠨ ᠶᠤᠮ᠃ ᠬᠣᠶᠠᠭᠤᠯᠠ ᠪᠠᠨ ᠣᠴᠢᠨᠠ ᠠ᠋ ᠭᠡᠵᠦ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠨ ᠠᠮᠢ ᠵᠢᠭᠤᠭᠰᠠᠨ ᠡᠨᠡ ᠣᠯᠠᠨ ᠵᠢᠯ ᠳ᠋ᠦ᠍ ᠠᠩᠬᠠ ᠤᠳᠠᠭᠠ ᠵᠣᠷᠢᠮᠠᠭ ᠥᠭᠦᠯᠡᠵᠦ ᠪᠢᠯᠡ᠃ ᠮᠠᠭᠠᠳ ᠦᠭᠡᠢ ᠬᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠲᠡᠭᠦᠨ ᠦ᠌ ᠬᠢᠵᠦ ᠴᠢᠳᠠᠬᠤ ᠭᠠᠭᠴᠠ ᠶᠠᠭᠤᠮᠠ ᠪᠣᠯ ᠡᠨᠡ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠶᠦᠮ᠃
ᠰᠠᠷᠠ ᠲᠠᠢ ᠰᠥᠨᠢ ᠣᠷᠣᠴᠠ ᠪᠠᠨ ᠣᠷᠬᠢᠨ᠂ ᠬᠦᠦ ᠪᠡᠨ ᠳᠠᠭᠠᠭᠤᠯᠵᠤ ᠵᠠᠩ ᠮᠡᠳᠡᠬᠦ ᠦᠭᠡᠢ ᠮᠣᠷᠢᠨ ᠳ᠋ᠤ᠌ ᠳᠥᠷᠥᠭᠡᠯᠡᠬᠦ ᠳ᠋ᠡᠭᠡᠨ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠠᠮᠢᠨ ᠠ᠋ᠴᠠ ᠲᠠᠰᠤᠷᠠᠭᠰᠠᠨ ᠠᠮᠢ᠂ ᠪᠠᠶᠠᠨ ᠠ᠋ᠴᠠ ᠲᠠᠰᠤᠷᠠᠭᠰᠠᠨ ᠪᠡᠶᠡ ᠭᠠᠭᠴᠠ ᠬᠦᠦ ᠪᠡᠨ ᠯᠡ ᠪᠣᠳᠣᠵᠤ ᠪᠢᠯᠡ᠃ ᠲᠠᠷᠯᠠᠨ ᠴᠠᠰᠤ ᠲᠠᠢ ᠨᠢᠴᠦᠭᠦᠨ ᠲᠠᠯᠠ ᠪᠠᠷ ᠰᠥᠨᠢᠵᠢᠨ ᠳᠣᠪᠲᠣᠯᠵᠤ᠂ ᠮᠡᠴᠢᠳ ᠭᠤᠳᠤᠢᠬᠤ ᠴᠠᠭ ᠢ᠋ᠶ᠋ᠠᠷ ᠶᠡᠬᠡ ᠰᠢᠭᠤᠢ ᠶ᠋ᠢᠨ ᠬᠠᠶᠠᠭᠠ ᠨᠥᠮᠥᠷᠢᠳᠡᠵᠦ ᠪᠠᠭᠤᠭᠰᠠᠨ ᠨᠣᠶᠠᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠴᠦ ᠠᠪᠠᠢ᠃ ᠤᠷᠲᠤ ᠵᠠᠮ ᠤ᠋ᠨ ᠲᠤᠷᠰᠢ ᠣᠭᠲᠣ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ ᠫᠠᠷᠭᠢᠶᠠ ᠳᠠᠭᠤᠲᠤ ᠵᠢᠵᠢᠭᠬᠡᠨ ᠬᠡᠳᠦᠢ ᠴᠦ᠍ ᠴᠡᠮᠴᠡᠭᠡᠷᠬᠡᠨ ᠬᠡᠯᠪᠡᠷᠢ ᠲᠡᠢ ᠭᠡᠷ ᠵᠢᠭᠠᠵᠤ᠂
— ᠲᠠᠨ ᠤ᠋ ᠥᠷᠥᠭᠡ ᠭᠡᠯᠡ᠃ ᠭᠤᠸᠠ ᠪᠦᠯᠵᠢᠭᠡᠨ ᠬᠠᠲᠤᠨ ᠮᠠᠩᠬᠠᠢᠨ ᠠᠢᠰᠤᠬᠤ ᠦᠷ ᠦ᠋ᠨ ᠪᠦᠳᠡᠭᠢ ᠪᠠᠳᠠᠭᠢᠬᠠᠨ ᠭᠡᠭᠡᠨ ᠳ᠋ᠦ᠍ ᠰᠠᠢᠨ ᠬᠠᠷᠠᠪᠠᠯ ᠪᠠᠲᠠᠭᠠᠨᠠ ᠶ᠋ᠢᠨ ᠨᠦᠬᠡ ᠣᠩᠭᠣᠢᠭᠰᠠᠨ ᠲᠠᠷᠠᠯᠠᠭᠠᠷ ᠬᠠᠷᠠ ᠨᠢᠭᠤᠷᠤᠨ ᠳ᠋ᠤ᠌ ᠱ᠌ᠢᠷᠦᠨ ᠤᠯᠠᠭᠠᠨ ᠬᠠᠮᠠᠷ ᠰᠢᠭᠢᠳᠬᠡᠴᠢᠬᠡᠭᠰᠡᠨ ᠮᠡᠲᠦ ᠨᠢᠭᠡᠨ ᠠᠵᠢ᠃ ᠮᠥᠨᠥᠬᠢ ᠡᠷᠡ ᠬᠠᠲᠤᠨ ᠢ᠋ ᠡᠢᠨ ᠬᠠᠷᠠᠭᠰᠠᠨ ᠳ᠋ᠤ᠌ ᠨᠡᠷᠡ ᠲᠤᠭᠤᠯᠬᠤ ᠶ᠋ᠢ ᠬᠦᠰᠡᠪᠡ ᠭᠡᠵᠦ ᠪᠣᠳᠣᠭᠰᠠᠨ ᠶᠠᠩᠵᠤ ᠲᠠᠢ᠂
— ᠨᠠᠮᠠᠶ᠋ᠢ ᠮᠠᠯᠲᠠᠭ ᠪᠠᠭᠠᠲᠤᠷ ᠭᠡᠳᠡᠭ᠃ ᠪᠢ ᠬᠣᠲᠣᠯᠠ ᠨᠣᠶᠠᠨ ᠤ᠋ ᠲᠣᠷᠭᠠᠨ ᠵᠠᠭᠤᠲᠤ ᠶ᠋ᠢᠨ ᠳᠠᠭᠠᠭᠠᠮᠠᠯ ᠭᠡᠳ ᠮᠡᠬᠦᠢᠰᠬᠢᠭᠰᠡᠨ ᠢ᠋ᠶ᠋ᠡᠨ ᠲᠡᠮᠦᠵᠢᠨ ᠦᠭᠡ ᠳ᠋ᠦ᠍ ᠬᠠᠨᠳᠤᠨ᠂
— ᠬᠦᠦ ᠴᠢ ᠨᠠᠭᠠᠰᠢ ᠢᠷᠡ ᠭᠡᠪᠡ᠃ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠰᠡᠳᠬᠢᠯ ᠤᠷᠠᠭᠳᠠᠨ᠂ ᠵᠢᠷᠦᠬᠡ ᠵᠦᠰᠦᠭᠳᠡᠵᠦ᠂
— ᠮᠡᠯᠲᠡᠭ ᠪᠠᠭᠠᠲᠤᠷ ᠲᠠ ᠶᠠᠭᠤ ᠠᠢᠯᠠᠳᠤᠨᠠ᠃ ᠬᠦᠦ ᠪᠢᠳᠡ ᠬᠣᠶᠠᠷ ᠨᠢᠭᠡᠨ ᠭᠡᠷ ᠲᠦ᠍ ᠲᠣᠯᠣᠭᠠᠢ ᠬᠣᠷᠭᠣᠳᠠᠵᠤ ᠡᠰᠡ ᠪᠣᠯᠬᠤ ᠠᠪᠠᠰᠤ ᠣᠪᠣᠬᠠᠢ ᠳ᠋ᠠᠭᠠᠨ ᠣᠴᠢᠶᠠ ᠪᠢ ᠭᠡᠪᠡᠯ ᠮᠡᠯᠲᠡᠭ ᠪᠠᠭᠠᠲᠤᠷ ᠮᠠᠷᠰᠠᠢᠲᠠᠯᠠ ᠢᠨᠢᠶᠡᠨ᠂
— ᠡᠨᠡ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠶᠡᠬᠡ ᠬᠣᠲᠣᠯᠠ ᠨᠣᠶᠠᠨ ᠮᠡᠳᠡᠨᠡ ᠬᠡᠮᠡᠪᠡ᠃
— ᠬᠠᠢᠷᠠᠲᠠᠢ ᠦᠭᠡ ᠶ᠋ᠢ ᠣᠷᠭᠢ! ᠪᠢ ᠥᠪᠡᠷ ᠢ᠋ᠶ᠋ᠡᠨ ᠠᠢᠯᠠᠳᠬᠠᠶᠠ ᠭᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠦᠭᠡ᠂
— ᠵᠣᠪᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠵᠣᠪᠠᠭᠰᠠᠨ ᠲᠠ
ᠵᠣ ᠨᠢᠷᠤᠭᠤ ᠪᠠᠨ ᠠᠮᠠᠷᠠᠭᠠᠬᠤ ᠪᠣᠯᠤᠭᠰᠠᠨ ᠲᠠ
ᠵᠦᠳᠡᠷᠡᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠵᠦᠳᠡᠷᠡᠭᠰᠡᠨ ᠲᠠ
ᠵᠢᠷᠦᠬᠡ ᠳᠣᠲᠣᠷ ᠢ᠋ᠶ᠋ᠠᠨ ᠠᠮᠠᠷᠠᠭᠠᠬᠤ ᠪᠣᠯᠤᠭᠰᠠᠨ ᠲᠠ ᠭᠡᠵᠦ ᠥᠭᠦᠯᠡᠭᠡᠳ ᠮᠠᠯᠲᠠᠭ ᠪᠠᠭᠠᠲᠤᠷ ᠢ᠋ ᠳᠠᠭᠠᠵᠤ ᠬᠡᠵᠢᠶᠡ ᠶᠡᠵᠢᠶᠡᠨ ᠦ᠌ ᠲᠠᠨᠢᠯ ᠬᠥᠮᠦᠰ ᠮᠡᠲᠦ ᠳᠦᠩᠭᠡᠷ ᠳᠦᠩᠭᠡᠷ ᠶᠠᠷᠢᠯᠴᠠᠨ ᠣᠳᠴᠠᠢ᠃ ᠬᠣᠲᠣᠯᠠ ᠨᠣᠶᠠᠨ ᠤ᠋ ᠶᠡᠬᠡ ᠥᠷᠭᠥᠭᠡ ᠶ᠋ᠢ ᠬᠣᠯᠠ ᠠᠢᠯ ᠤ᠋ᠨ ᠵᠠᠢ ᠳ᠋ᠤ᠌ ᠲᠣᠭᠣᠷᠢᠵᠤ ᠪᠠᠭᠤᠭᠰᠠᠨ ᠭᠡᠷ ᠲᠡᠷᠭᠡᠨ ᠳᠤᠮᠳᠠᠭᠤᠷ ᠬᠦᠦ ᠶ᠋ᠢᠨ ᠬᠢᠨᠢ ᠲᠣᠯᠣᠭᠠᠢ ᠱᠣᠪᠣᠯᠵᠠᠨ ᠱᠣᠪᠣᠯᠵᠠᠨ ᠳᠠᠯᠳᠠ ᠣᠷᠣᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠪᠦᠯᠵᠢᠭᠡᠨ ᠬᠠᠲᠤᠨ ᠭᠤᠨᠢᠭ ᠲᠠᠢ ᠰᠠᠨᠠᠭᠠ ᠠᠯᠳᠠᠭᠠᠳ ᠭᠡᠷ ᠲᠦ᠍ ᠣᠷᠣᠯᠠ᠃ ᠪᠢᠴᠢᠬᠠᠨ ᠭᠡᠷ ᠳᠣᠲᠣᠷᠠ ᠲᠣᠬᠢᠯᠢᠭ ᠠᠭᠠᠳ ᠳᠤᠯᠠᠭᠠᠨ᠂ ᠲᠠᠯᠪᠢᠯᠭᠠ ᠰᠡᠯᠲᠡ ᠴᠥᠭᠡᠬᠡᠨ ᠬᠡᠳᠦᠢ ᠴᠦ᠍ ᠴᠢᠨᠠᠷᠯᠢᠭ ᠠᠵᠢ᠃ ᠬᠦᠷᠡᠯ ᠲᠤᠯᠭᠠᠨ ᠳ᠋ᠤ᠌ ᠬᠠᠭᠤᠷᠠᠢ ᠮᠥᠴᠢᠷ ᠱᠠᠵᠢᠭᠢᠨᠠᠨ ᠠᠰᠠᠵᠤ ᠪᠣᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠠᠢᠰᠤᠢ ᠪᠠᠷᠠ ᠪᠠᠷ ᠰᠢᠪᠡᠭᠴᠢᠨ ᠢᠷᠡᠵᠦ ᠭᠠᠯ ᠲᠦᠯᠡᠵᠦ᠂ ᠴᠠᠢ ᠪᠤᠴᠠᠯᠭᠠᠭᠰᠠᠨ ᠬᠡᠷᠡᠭ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠰᠠᠭᠤᠳᠠᠯ ᠢ᠋ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠡᠵᠡᠭᠦᠢ ᠣᠷᠬᠢᠭᠠᠳ ᠭᠠᠯ ᠤ᠋ᠨ ᠪᠠᠷᠠᠭᠤᠨ ᠤᠷᠲᠤ ᠳᠣᠣᠷᠠᠬᠠᠨ ᠰᠢᠭ᠋ ᠬᠣᠷᠮᠣᠢ ᠳᠠᠪᠰᠢᠭᠤᠷᠭᠠᠳᠠᠨ ᠰᠠᠭᠤᠯᠠ᠃
ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠭᠰᠠᠨ ᠡᠨᠡ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠭᠡᠷ ᠦ᠋ᠨ ᠪᠣᠱᠣᠭᠠ ᠠᠯᠬᠤᠵᠤ᠂ ᠭᠠᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠰᠠᠭᠤᠭᠰᠠᠨ ᠨᠢ ᠦᠭᠡᠢ ᠶᠦᠮ᠃ ᠶᠡᠷᠦ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠳᠣᠷᠣᠮᠵᠢᠯᠠᠯ ᠠᠮᠰᠠᠵᠤ᠂ ᠨᠢᠭᠦᠯ ᠦ᠋ᠨ ᠵᠤᠭᠠ ᠪᠣᠯᠵᠤ ᠶᠠᠪᠤᠭᠰᠠᠨ ᠨᠢ ᠪᠣᠢ᠃ ᠡᠪᠡᠰᠦ ᠥᠨᠳᠡᠢᠵᠦ᠂ ᠵᠡᠷᠭᠡᠯᠭᠡ ᠰᠡᠷᠡᠵᠦ ᠪᠠᠢᠭᠰᠠᠨ ᠬᠠᠪᠤᠷ ᠴᠠᠭ ᠤ᠋ᠨ ᠲᠡᠷᠡ ᠨᠢᠭᠡᠨ ᠭᠤᠨᠢᠭ ᠥᠨᠥ ᠴᠦ᠍ ᠳᠠᠭᠤᠰᠬᠤ ᠦᠭᠡᠢ ᠨᠢᠯᠪᠤᠰᠤ ᠮᠡᠲᠦ ᠵᠢᠷᠦᠬᠡᠨ ᠳ᠋ᠦ᠍ᠨᠢ ᠪᠥᠩᠵᠢᠭᠡᠨᠡᠨ ᠪᠠᠢᠬᠤ ᠪᠢᠯᠡ᠃ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡᠨ ᠬᠦᠦ ᠪᠡᠨ ᠳᠠᠭᠠᠭᠤᠯᠵᠤ᠂ ᠲᠣᠭᠣᠨᠣᠨ ᠴᠢᠨᠡᠭᠡᠨ ᠣᠷᠣᠮᠵᠢ ᠪᠠᠨ ᠡᠭᠦᠷᠴᠦ ᠬᠥᠷᠯᠡᠬᠦ ᠥᠭᠰᠥᠨ᠂ ᠰᠡᠩᠬᠦᠷ ᠭᠣᠣᠯ ᠤ᠋ᠨ ᠪᠤᠷᠭᠠᠰᠤᠨ ᠲᠣᠬᠣᠢ ᠤᠷᠤᠭᠤ ᠣᠷᠣᠵᠤ ᠶᠠᠪᠤᠲᠠᠯᠠ ᠠᠷᠤ ᠰᠢᠯᠢᠨ ᠳᠡᠭᠡᠷᠡ ᠨᠢ ᠮᠣᠷᠢᠨ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠵᠠᠢ᠃《ᠲᠠᠲ᠋ᠠᠷ ᠤ᠋ᠳ ᠢᠷᠡᠪᠡ》 ᠭᠡᠮᠡᠨ ᠪᠠᠶᠠᠷᠯᠠᠳᠠᠭ ᠦᠭᠡ ᠨᠣᠶᠠᠨ ᠮᠠᠭᠤ ᠰᠣᠪᠢᠩ ᠳ᠋ᠤ᠌ ᠠᠪᠲᠠᠵᠤ ᠢᠵᠢᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠠ᠋ᠴᠠ ᠦᠬᠦᠨ ᠬᠠᠳᠠᠨ ᠵᠢᠭᠤᠷᠠᠯᠳᠤᠯᠠ᠃ ᠢᠷᠣᠠ ᠵᠦᠩ ᠳ᠋ᠦ᠍ ᠠᠪᠲᠠᠭᠰᠠᠨ ᠵᠠᠯᠠᠭᠤ ᠬᠠᠲᠤᠨ ᠡᠭᠦᠷᠭᠡ ᠪᠡᠨ ᠪᠠᠭᠤᠯᠭᠠᠵᠤ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠮ ᠤ᠋ᠨ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠦᠰᠦ ᠶ᠋ᠢ ᠳᠡᠮᠡᠢ ᠯᠡ ᠢᠯᠢᠵᠦ ᠵᠣᠭᠰᠣᠪᠠ᠃ ᠴᠢᠩᠭᠢᠲᠡᠯᠡ ᠬᠠᠪᠤᠷ ᠤ᠋ᠨ ᠥᠷᠯᠥᠭᠡᠨ ᠦ᠌ ᠲᠤᠩᠭᠠᠯᠠᠭ ᠠᠭᠠᠷ ᠲᠤ᠌ ᠭᠠᠯᠵᠠᠭᠤ ᠬᠠᠷᠠ ᠠᠷᠵᠠᠨ ᠤ᠋ ᠦᠨᠦᠷ ᠬᠠᠩ ᠬᠢᠵᠦ᠂ ᠰᠤᠮᠤᠨ ᠤ᠋ ᠥᠳᠥ ᠰᠡᠷᠡᠯᠵᠡᠭᠦᠯᠦᠭᠰᠡᠨ ᠭᠤᠷᠪᠠᠨ ᠬᠠᠯᠠᠮᠴᠠᠭᠤ ᠡᠷᠡᠰ ᠣᠮᠣᠭᠯᠠᠩ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠠᠮᠠ ᠶ᠋ᠢ ᠠᠩᠭᠠᠯᠵᠠᠲᠠᠯᠠ ᠲᠠᠲᠠᠵᠤ᠂ ᠰᠦᠮᠡᠭᠡᠷ ᠨᠢᠳᠦ ᠪᠡᠷ ᠪᠡᠯᠬᠡᠭᠦᠰᠦ ᠶ᠋ᠢ ᠪᠠᠵᠠᠵᠤ᠂ ᠬᠥᠬᠥ ᠶ᠋ᠢ ᠨᠢ ᠲᠡᠮᠲᠡᠷᠢᠬᠦ ᠮᠡᠲᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
一 ᠠᠩ ᠤ᠋ᠨ ᠲᠩᠷᠢ ᠬᠠᠶᠠᠭᠰᠠᠨ ᠦᠭᠡᠢ ᠠ᠋ ᠭᠡᠵᠦ ᠨᠢᠭᠡ ᠨᠢ ᠥᠭᠦᠯᠡᠬᠦ ᠳ᠋ᠦ᠍ ᠪᠦᠭᠦᠳᠡ ᠫᠡᠷ ᠬᠢᠨ ᠢᠨᠢᠶᠡᠯᠳᠦᠯᠡ᠃
一 ᠰᠤᠪᠠᠢ ᠰᠢᠷᠬᠠᠴᠢᠨ ᠳᠠᠭᠠᠷᠠᠳᠠᠭ ᠨᠢ᠃
一 ᠬᠤᠪᠢᠶᠠᠭᠠᠳ ᠬᠦᠷᠲᠡᠵᠦ ᠣᠷᠬᠢᠬᠤ ᠳ᠋ᠤ᠌ ᠴᠠᠳᠤᠨᠠ ᠳᠠ ᠭᠡᠮᠡᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠤᠤᠭᠢᠯᠳᠤᠵᠤ ᠭᠤᠷᠪᠠᠭᠤᠯᠠ ᠣᠷᠣᠯᠳᠣᠬᠤ ᠮᠡᠲᠦ ᠲᠠᠷ ᠬᠢᠨ ᠪᠠᠭᠤᠵᠤ ᠮᠠᠭᠤ ᠦᠢᠯᠡ ᠶ᠋ᠢ ᠵᠥᠩᠨᠡᠵᠦ᠂ ᠦᠷᠭᠦᠨ ᠬᠤᠢᠬᠢᠷᠬᠤ ᠮᠣᠷᠢᠳ ᠢ᠋ᠶ᠋ᠠᠨ ᠡᠪᠦᠭᠡᠨ ᠬᠠᠢᠯᠠᠰᠤᠨ ᠤ᠋ ᠮᠥᠴᠢᠷ ᠡᠴᠡ ᠲᠣᠷᠭᠣᠭᠠᠵᠤ ᠣᠷᠬᠢᠪᠠ᠃ ᠴᠢᠩᠭᠢᠭᠡᠳ ᠬᠤᠯᠤᠭᠠᠨᠠ ᠬᠠᠷᠠᠭᠰᠠᠨ ᠮᠤᠤᠷ ᠮᠢᠷᠢᠶᠠᠬᠤ ᠮᠡᠲᠦ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠨᠠᠭᠠᠰᠢᠯᠠᠬᠤ ᠳ᠋ᠤ᠌ ᠵᠢᠭᠠᠯ ᠨᠣᠶᠠᠨ᠂
一 ᠢᠵᠢᠢ ᠪᠡᠨ ᠥᠭᠬᠦ ᠦᠭᠡᠢ! ᠢᠵᠢᠢ ᠪᠡᠨ ᠥᠭᠬᠦ ᠦᠭᠡᠢ ᠭᠡᠮᠡᠨ ᠢᠰᠢᠭᠡᠨ ᠴᠡᠭᠡᠵᠢᠨ ᠦ᠌ ᠪᠡᠨ ᠠᠷᠤ ᠳ᠋ᠤ᠌ ᠨᠢᠭᠤᠵᠤ ᠰᠡᠩᠭᠦᠷ ᠭᠣᠷᠣᠬᠠᠨ ᠤ᠋ ᠰᠢᠭᠤᠢ ᠳᠦᠭᠦᠷᠡᠩ ᠣᠷᠢᠯᠠᠵᠤ ᠪᠢᠯᠡ᠃ ᠲᠡᠳᠡ ᠨᠣᠬᠠᠢ ᠬᠤᠴᠠᠬᠤ ᠶ᠋ᠢᠨ ᠴᠢᠨᠡᠭᠡ ᠲᠣᠭᠣᠭᠰᠠᠨ ᠦᠭᠡᠢ ᠢᠨᠢᠶᠡᠯᠳᠦᠭᠰᠡᠨ ᠢ᠋ᠶ᠋ᠡᠨ ᠨᠢᠭᠡ ᠨᠢ ᠬᠦᠦ ᠶ᠋ᠢ ᠰᠡᠪ ᠬᠢᠨ ᠡᠷᠭᠦᠵᠦ ᠠᠪᠤᠭᠠᠳ ᠭᠤᠷᠪᠠᠨ ᠬᠦᠯᠦᠭ ᠦ᠋ᠨ ᠳᠤᠮᠳᠠᠬᠢ ᠲᠣᠭᠰᠢᠨ ᠴᠠᠪᠢᠳᠠᠷ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠳᠡᠭᠡᠷᠡ ᠪᠤᠷᠤᠭᠤ ᠬᠠᠷᠠᠭᠤᠯᠤᠭᠠᠳ ᠲᠠᠯᠪᠢᠴᠢᠬᠠᠪᠠ᠃ ᠬᠦᠦ ᠶ᠋ᠢ ᠬᠥᠳᠡᠯᠬᠦ ᠪᠦᠷᠢ ᠴᠠᠪᠢᠳᠠᠷ ᠮᠣᠷᠢ ᠲᠠᠪᠲᠤᠷ ᠠᠯᠲᠠᠨ ᠲᠦᠭᠦᠭᠡᠯᠵᠡᠵᠦ᠂ ᠬᠠᠷᠠᠢᠨ ᠪᠠᠭᠤᠶᠠ ᠭᠡᠬᠦᠨᠡ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠣᠮᠣᠭᠯᠠᠩ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠭᠠᠵᠠᠷ ᠴᠠᠪᠴᠢᠯᠠᠨ ᠡᠷᠭᠢᠴᠡᠬᠦ ᠠᠵᠢ᠃ ᠲᠡᠮᠦᠵᠢᠨ ᠦᠭᠡ ᠳᠡᠮᠡᠢ ᠯᠡ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠳᠡᠰ ᠵᠠᠭᠤᠷᠠᠵᠤ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠵᠤ ᠴᠤ᠌ ᠦᠯᠦ ᠴᠢᠳᠠᠬᠤ ᠠᠪᠠᠢ᠃ ᠡᠨᠡ ᠬᠢᠷᠢ ᠮᠥᠨᠥᠬᠡᠨ ᠭᠤᠷᠪᠠᠨ ᠠᠩᠴᠢᠨ ᠰᠦᠨ ᠰᠢᠳᠦ ᠰᠢᠭ ᠪᠤᠯᠲᠠᠢᠬᠤ ᠨᠢᠯᠬᠠ ᠨᠣᠭᠣᠭᠠᠨ ᠳᠡᠭᠡᠭᠦᠷ ᠰᠤᠭᠤ ᠮᠡᠲᠦ ᠳᠡᠭᠳᠡᠨ ᠵᠢᠭᠤᠲᠠᠬᠤ ᠢᠵᠢᠢ ᠶ᠋ᠢ ᠨᠢ ᠴᠢᠨᠣᠠ ᠮᠡᠲᠦ ᠠᠩᠭᠠᠭᠠᠯᠠᠨ ᠬᠥᠭᠡᠭᠡᠭᠰᠡᠭᠡᠷ ᠪᠠᠷᠢᠵᠤ ᠠᠪᠴᠠᠢ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠠᠷᠠᠢ ᠪᠠᠳᠠᠷᠢᠭᠤᠨ ᠨᠢᠭᠡ ᠨᠢ ᠥᠷᠥᠯᠡᠬᠦ ᠬᠣᠨᠢ ᠪᠠᠨ ᠲᠩᠷᠢ ᠬᠠᠷᠠᠭᠤᠯᠬᠤ ᠮᠡᠲᠦ ᠳᠥᠷᠪᠡᠨ ᠮᠥᠴᠢ ᠶ᠋ᠢ ᠨᠢ ᠰᠠᠷᠪᠠᠯᠵᠠᠭᠤᠯᠤᠨ ᠳᠠᠷᠤᠵᠤ ᠤᠨᠠᠭᠰᠠᠨ ᠢ᠋ᠶ᠋ᠠᠨ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠯᠠ ᠠᠮᠢᠲᠠᠨ ᠠᠬᠠ ᠳᠡᠭᠦᠦ ᠴᠢᠷᠠᠢᠴᠢᠯᠠᠵᠤ ᠣᠯᠤᠭᠰᠠᠨ ᠬᠥᠳᠥᠰᠥᠨ ᠳᠡᠪᠡᠯ ᠦ᠋ᠨ ᠲᠠᠮᠲᠤᠭ ᠢ᠋ ᠨᠢ ᠬᠡᠦ ᠲᠠᠰᠤᠴᠢᠨ ᠬᠠᠶᠠᠬᠤ ᠳ᠋ᠤ᠌ ᠢᠵᠠᠭᠤᠷᠲᠤ ᠪᠦᠰᠡᠭᠦᠢ ᠶ᠋ᠢᠨ ᠪᠤᠯᠪᠠᠷᠠᠢ ᠴᠠᠭᠠᠨ ᠴᠡᠭᠡᠵᠢ ᠲᠤᠶᠠᠭᠠ ᠲᠡᠳᠡᠨ ᠴᠡᠪᠴᠡᠢᠵᠦ᠂ ᠥᠯᠥᠨ ᠴᠢᠨᠣᠠ ᠰᠢᠭ᠋ ᠡᠷᠡᠰ ᠦ᠋ᠨ ᠰᠢᠨᠤᠭ ᠬᠦᠰᠡᠯ ᠢ᠋ ᠤᠯᠠᠮ ᠪᠠᠳᠠᠷᠠᠭᠠᠵᠤ ᠪᠢᠯᠡ᠃ ᠴᠢᠩᠭᠢᠭᠡᠳ ᠭᠠᠰᠠᠯᠤᠨ ᠰᠣᠶᠣᠭᠠᠯᠠᠬᠤ ᠨᠣᠭᠣᠭᠠᠨ ᠳᠡᠭᠡᠷᠡ ᠴᠠᠭᠠᠨ ᠬᠥᠪᠥᠩ ᠵᠤᠯᠠᠬᠤ ᠮᠡᠲᠦ ᠳᠤᠷᠠ ᠪᠠᠷ ᠡᠳ᠋ᠯᠡᠵᠦ ᠬᠦᠰᠡᠯ ᠬᠠᠨᠤᠭᠰᠠᠨ ᠨᠢ ᠪᠣᠢ᠃ ᠮᠣᠷᠢᠨ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠨ ᠬᠣᠯᠠᠳᠬᠤ ᠳ᠋ᠤ᠌ ᠬᠦᠦ ᠡᠴᠡ ᠪᠡᠨ ᠵᠣᠪᠠᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠤᠷᠠᠩᠬᠠᠢ ᠬᠥᠳᠥᠰᠥ᠂ ᠬᠠᠨᠵᠠᠷᠠᠭᠰᠠᠨ ᠬᠠᠨᠴᠤᠢ ᠰᠡᠯᠲᠡ ᠪᠡᠨ ᠴᠤᠭᠯᠠᠭᠤᠯᠤᠨ ᠭᠤᠶᠠ ᠬᠠᠰᠠ ᠪᠠᠨ ᠳᠠᠯᠳᠠᠯᠠᠭᠴᠢ ᠪᠠᠨ ᠠᠶᠠᠳᠠᠵᠤ ᠪᠢᠯᠡ᠃ ᠡᠨᠡ ᠬᠡᠷᠡᠭ ᠶᠠᠪᠤᠳᠠᠯ ᠥᠪᠡᠷ ᠦ᠋ᠨ ᠬᠢᠨᠢ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠵᠦ ᠦᠯᠦ ᠪᠣᠯᠬᠤ ᠶ᠋ᠢ ᠮᠡᠳᠡᠷᠡᠭᠰᠡᠨ ᠵᠢᠭᠠᠯ ᠬᠦᠦ ᠡᠪᠦᠭᠡᠨ ᠤᠯᠢᠶᠠᠰᠤ ᠲᠦᠰᠢᠭᠡᠳ ᠲᠦᠭᠳᠦᠢᠲᠡᠯᠡ ᠤᠬᠢᠯᠠᠵᠤ ᠰᠠᠭᠤᠭᠰᠠᠨ ᠶᠤᠮ᠃ ᠡᠢᠨ ᠥᠷᠥᠭᠡᠯ ᠪᠤᠰᠤᠳ ᠤ᠋ᠨ ᠠᠮᠢᠳᠤ ᠲᠣᠭᠯᠠᠭᠠᠮ ᠪᠣᠯᠵᠤ᠂ ᠳᠠᠢᠴᠢᠳ ᠤ᠋ᠨ ᠴᠡᠭᠡᠵᠢᠨ ᠳᠣᠣᠷᠠ ᠲᠠᠷᠴᠢᠯᠠᠵᠤ ᠬᠡᠪᠲᠡᠭᠰᠡᠨ ᠨᠢ ᠴᠥᠭᠡᠨ ᠪᠢᠰᠢ ᠶ᠋ᠢ ᠬᠣᠲᠣᠯᠠ ᠨᠣᠶᠠᠨ ᠮᠠᠲᠠᠮᠠᠷ ᠰᠠᠨ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠵᠠᠯᠠᠭᠤ ᠨᠣᠶᠠᠳ ᠬᠣᠩᠭᠢᠷᠠᠳ ᠤ᠋ᠨ ᠥᠬᠢᠳ ᠭᠡᠮᠡᠨ ᠬᠣᠰᠢᠭᠤᠷᠠᠵᠤ᠂ ᠦᠶᠡ ᠳᠠᠮᠵᠢᠨ ᠲᠡᠨᠳᠡ ᠡᠴᠡ ᠬᠠᠲᠤᠨ ᠵᠠᠯᠠᠵᠤ ᠢᠷᠡᠬᠦ ᠪᠢᠯᠡ᠃ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠭᠤᠸᠠ ᠬᠠᠲᠤᠳ ᠢ᠋ᠶ᠋ᠠᠷ ᠳᠤᠲᠠᠭᠠ ᠦᠭᠡᠢ ᠨᠢ ᠯᠠᠪ ᠭᠡᠮᠡᠨ ᠲᠦᠮᠡᠨ ᠵᠦᠢᠯ ᠦ᠋ᠨ ᠪᠣᠳᠣᠯ ᠳ᠋ᠤ᠌ ᠣᠷᠢᠶᠠᠭᠳᠠᠨ ᠰᠠᠭᠤᠲᠠᠯᠠ ᠬᠠᠭᠠᠯᠭᠠ ᠰᠡᠪ ᠬᠢᠨ ᠣᠩᠭᠣᠢᠵᠤ ᠠᠪᠳᠠᠷᠠ ᠮᠡᠲᠦ ᠳᠥᠷᠪᠡᠯᠵᠢᠨ ᠴᠡᠭᠡᠵᠢ ᠲᠡᠢ᠂ ᠠᠷᠰᠯᠠᠨ ᠤ᠋ ᠵᠣᠭᠳᠣᠷ ᠮᠡᠲᠦ ᠨᠠᠮᠢᠷᠠᠭᠰᠠᠨ ᠬᠠᠷᠠ ᠦᠰᠦ ᠲᠡᠢ ᠵᠠᠯᠠᠭᠤ ᠨᠣᠶᠠᠨ ᠣᠷᠣᠵᠤ ᠢᠷᠡᠯᠡ᠃ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠤᠬᠤᠰᠬᠢᠨ ᠰᠥᠭᠥᠳᠴᠦ᠂
— ᠮᠢᠨᠦ ᠬᠦᠦ ᠶ᠋ᠢ᠁ ᠭᠡᠲᠡᠯᠡ ᠬᠣᠲᠣᠯᠠ ᠬᠣᠢᠮᠣᠷ ᠵᠠᠪᠢᠯᠠᠨ ᠰᠠᠭᠤᠵᠤ ᠶᠠᠪᠠᠭᠠᠨ ᠰᠢᠷᠡᠭᠡᠨᠡ ᠵᠠᠰᠠᠭᠰᠠᠨ ᠢᠳᠡᠭᠡᠨ ᠡᠴᠡ ᠨᠠᠩᠭᠢᠶᠠᠳ ᠴᠢᠪᠠᠭᠠ ᠠᠪᠴᠤ ᠵᠠᠵᠢᠯᠤᠭᠰᠠᠨ ᠢ᠋ᠶ᠋ᠠᠨ᠂
— ᠬᠦᠦ ᠴᠢᠨᠢ ᠮᠡᠯᠲᠡᠭ ᠪᠠᠭᠠᠲᠤᠷ ᠤ᠋ᠨ ᠠᠰᠠᠷᠠᠮᠵᠢ ᠳ᠋ᠤ᠌ ᠪᠣᠢ ᠭᠡᠳ ᠥᠵᠢᠨ ᠢ᠋ ᠴᠣᠭᠣ ᠰᠢᠷᠳᠡᠬᠦ ᠳ᠋ᠦ᠍ ᠡᠬᠢᠯᠡᠭᠡᠳ ᠬᠠᠴᠠᠷ ᠨᠢ ᠬᠠᠯᠠᠭᠤ ᠣᠷᠬᠢᠵᠤ᠂ ᠳᠠᠷᠠᠭᠠ ᠨᠢ ᠬᠤᠨ ᠲᠠᠩᠬᠢᠯ ᠬᠣᠶᠠᠷ ᠮᠥᠷᠥ᠂ ᠲᠡᠭᠡᠭᠡᠳ ᠬᠠᠰ ᠪᠣᠮᠪᠣ ᠰᠢᠭ᠋ ᠬᠣᠶᠠᠷ ᠬᠥᠬᠥ ᠶ᠋ᠢ ᠨᠢ ᠵᠠᠯᠠᠭᠤ ᠨᠣᠶᠠᠨ ᠪᠠᠵᠠᠯᠠᠵᠤ ᠲᠠᠯᠪᠢᠵᠤ᠂ ᠪᠠᠵᠠᠯᠠᠵᠤ ᠲᠠᠯᠪᠢᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨ ᠰᠠᠭᠤᠳᠠᠯ ᠵᠠᠢᠮᠴᠢᠪᠠ᠃ ᠬᠠᠭᠠᠨ ᠬᠥᠮᠦᠨ ᠦ᠌ ᠬᠠᠲᠤᠨ ᠶᠠᠪᠤᠭᠰᠠᠨ ᠲᠠᠩᠬᠢ ᠠᠮᠢᠲᠠᠨ ᠢ᠋ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠡᠢᠨ ᠪᠠᠷᠢᠴᠠ ᠠᠯᠳᠠᠭᠤᠯᠵᠤ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠵᠠᠯᠠᠭᠤ ᠨᠣᠶᠠᠨ ᠪᠡᠶᠡᠰᠴᠦ᠂
— ᠴᠢ ᠲᠠᠲᠠᠪᠤᠷᠢ ᠬᠠᠲᠤᠨ ᠪᠣᠯᠤᠨᠠ ᠭᠡᠯᠡ᠃ ᠬᠦᠦ ᠶ᠋ᠢᠨ ᠬᠢᠨᠢ ᠬᠦᠰᠡᠨ ᠬᠦᠯᠢᠶᠡᠳᠡᠭ ᠠᠭᠰᠠᠨ ᠲᠥᠷᠥᠯ ᠨᠢᠭᠡᠲᠦ ᠲᠠᠲ᠋ᠠᠷ ᠤ᠋ᠳ ᠨᠡᠬᠡᠵᠦ ᠢᠷᠡᠬᠦ ᠡᠴᠡ ᠪᠡᠨ ᠥᠩᠭᠡᠷᠡᠭᠰᠡᠨ᠂ ᠪᠡᠶᠡ ᠰᠡᠳᠬᠢᠯ ᠢ᠋ ᠨᠢ ᠳᠣᠷᠣᠮᠵᠢᠯᠠᠨ ᠬᠡᠷᠡᠭᠯᠡᠳᠡᠭ ᠲᠠᠯᠠ ᠶ᠋ᠢᠨ ᠵᠡᠷᠯᠢᠭ ᠡᠷᠡᠰ ᠦᠯᠦ ᠲᠠᠰᠤᠷᠠᠬᠤ ᠡᠨᠡ ᠴᠠᠭ ᠦᠶᠡ ᠳ᠋ᠦ᠍ ᠨᠢᠭᠡᠨ ᠶᠡᠬᠡ ᠬᠥᠮᠦᠨ ᠦ᠌ ᠨᠥᠮᠥᠷᠢ ᠨᠥᠭᠡᠯᠭᠡ ᠦᠭᠡᠢᠯᠡᠭᠳᠡᠵᠦ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠭᠡᠲᠡᠯᠡ ᠲᠩᠷᠢ ᠲᠡᠭᠦᠨ ᠳ᠋ᠦ᠍ ᠬᠣᠲᠣᠯᠠ ᠨᠣᠶᠠᠨ ᠢ᠋ ᠢᠯᠡᠭᠡᠵᠡᠢ᠃ ᠵᠠᠶᠠᠭᠠ ᠲᠠᠪᠤᠨ ᠲᠩᠷᠢ ᠬᠡᠭᠡᠷᠡ ᠬᠣᠨᠣᠭᠠ ᠦᠭᠡᠢ ᠶᠦᠮ ᠰᠠᠨᠵᠠᠢ᠃ ᠡᠢᠨ ᠪᠣᠳᠣᠬᠤ ᠠ᠋ᠴᠠ ᠰᠠᠮᠰᠠ ᠨᠢ ᠱᠠᠷᠬᠢᠷᠠᠵᠤ᠂ ᠬᠠᠮᠠᠷ ᠤ᠋ᠨ ᠬᠢᠨᠢ ᠤᠭᠠᠯᠵᠠ ᠰᠠᠷᠲᠠᠯᠵᠠᠨ᠂ ᠬᠡᠯᠪᠡᠷᠢ ᠲᠡᠭᠰᠢ ᠵᠢᠭᠠᠬᠠᠨ ᠴᠡᠭᠡᠵᠢ ᠨᠢ ᠲᠡᠷᠡᠭᠦᠬᠡᠨ ᠳ᠋ᠡᠭᠡᠨ ᠣᠪᠣᠯᠵᠠᠭᠰᠠᠨ ᠢ᠋ᠶ᠋ᠠᠨ᠂
— ᠨᠣᠶᠠᠨᠲᠠᠨ ᠠ᠋᠂ ᠵᠣᠷᠢᠭᠯᠠᠨ ᠠᠢᠯᠠᠳᠬᠤ ᠳ᠋ᠤ᠌ ᠵᠣᠪᠠᠯᠠᠩᠲᠤ ᠡᠮᠡ ᠪᠢ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠵᠤ ᠠᠷᠠᠯ ᠲᠠᠢ ᠡᠷᠡᠰ ᠲᠦ᠍ ᠴᠢᠨᠢ ᠠᠳᠠᠰᠬᠠ ᠰᠢᠭ᠋ ᠳᠡᠪᠢᠰᠦᠭᠦᠯᠦᠭᠰᠡᠨ᠂ ᠲᠡᠩᠬᠡᠭᠡ ᠲᠡᠢ ᠡᠷᠡᠰ ᠲᠦ᠍ ᠴᠢᠨᠢ ᠲᠡᠷᠭᠡ ᠰᠢᠭ ᠡᠳ᠋ᠯᠡᠭᠦᠯᠦᠭᠰᠡᠨ ᠠᠮᠢᠲᠠᠨ ᠪᠢᠯᠡ ᠭᠡᠳ ᠳᠣᠭᠣᠭᠰᠢ ᠲᠣᠩᠭᠣᠢᠬᠤ ᠳ᠋ᠤ᠌ ᠨᠢᠭᠡᠨ ᠳᠤᠰᠤᠯ ᠨᠢᠯᠪᠤᠰᠤ ᠳᠤᠷᠳᠤᠩ ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠨᠣᠷᠭᠠᠨ ᠤᠨᠠᠪᠠ ᠠ᠋᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠤᠤ ᠸᠧᠨ ᠬᠤᠸᠠ᠂ ᠪᠡᠶᠡᠨᠴᠡᠴᠡᠭ᠂ ᠡᠬᠦᠯᠡᠩᠬᠤᠸᠠᠷ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂
ᠪᠠᠢ·ᠰᠠᠷᠠᠨᠠ᠂ ᠨᠠᠷᠠᠨᠲᠤᠶᠠᠭᠠ᠂ ᠠᠯᠲᠠᠨᠴᠢᠮᠡᠭ᠂ ᠤᠷᠠᠨᠴᠢᠮᠡᠭ᠂
ᠭᠡᠷᠡᠯ᠂ ᠮᠥᠩᠭᠥᠨ᠂ ᠣᠶᠤᠨᠴᠢᠮᠡᠭ᠂ ᠠᠯᠲᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠤᠳᠬᠠᠨᠰᠣᠠ᠂ ᠨᠠᠷᠠᠨ᠂ ᠭᠠᠷᠮᠠ᠂ ᠪᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠡᠭᠦᠯᠡᠩᠬᠤᠸᠠᠷ