ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠬᠡᠯᠡ (ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠵᠢᠭᠠᠬᠤ ᠮᠠᠲ᠋ᠧᠷᠢᠶᠡᠯ)– ᠤᠳᠤᠷᠢᠳᠬᠠᠯ-2 Орчин цагийн монгол хэл（дээд сургуулийн заах материэл）- Удиртгал-2
179ᠤᠳᠤᠷᠢᠳᠬᠠᠯ
ᠬᠣᠶᠠᠷ ᠂ ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠬᠡᠯᠡ ᠬᠢᠭᠡᠳ ᠲᠡᠭᠦᠨ ᠦ ᠶᠠᠷᠢᠶᠠ᠂ ᠪᠢᠴᠢᠭ
ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡ ᠪᠣᠯ ᠨᠢᠭᠡᠨ ᠲᠡᠦᠬᠡᠨ ᠠᠢ ᠳ᠋ᠤ᠌ ᠬᠠᠷᠢᠶᠠᠯᠠᠭᠳᠠᠬᠤ ᠪᠥᠭᠡᠳ ᠲᠡᠷᠡ ᠨᠢ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠡᠦᠬᠡᠨ ᠬᠥᠭᠵᠢᠯ ᠦ᠋ᠨ ᠵᠠᠢᠯᠠᠰᠢ ᠦᠭᠡᠢ ᠦᠷᠡ ᠳ᠋ᠦᠩ ᠶᠦᠮ᠃
ᠲᠡᠷᠡ ᠨᠢ ᠣᠢᠷᠠ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠰᠡᠭᠦᠯᠴᠢ ᠶ᠋ᠢᠨ ᠱᠠᠲᠤ ᠪᠣᠯᠬᠤ ᠪᠥᠭᠡᠳ ᠪᠠᠷᠤᠭ19 ᠳ᠋ᠦ᠍ᠭᠡᠷ ᠵᠠᠭᠤᠨ ᠤ᠋ ᠭᠤᠴᠢ᠂ ᠳᠥᠴᠢᠭᠡᠳ ᠣᠨ ᠠ᠋ᠴᠠ ᠡᠬᠢᠯᠡᠨᠡ᠃ ᠡᠨᠡ ᠴᠠᠭ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠬᠡᠯᠡ ᠨᠢ ᠡᠮᠦᠨᠡᠬᠢ ᠣᠢᠷᠠ ᠦᠶᠡ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠨᠡᠯᠢᠶᠡᠳ ᠲᠠᠯᠠ ᠪᠠᠷ ᠢᠯᠭᠠᠭᠠ ᠲᠠᠢ ᠪᠣᠯᠤᠭᠰᠠᠨ ᠪᠠᠢᠭᠠ ᠶ᠋ᠢ ᠭᠠᠯᠰᠠᠩ ᠤ᠋ᠨ《ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠪᠦᠭᠦᠳᠡ ᠲᠠᠢᠯᠪᠤᠷᠢ ᠪᠢᠴᠢᠭ》 ᠵᠡᠷᠭᠡ ᠡᠴᠡ ᠦᠵᠡᠵᠦ ᠭᠠᠷᠴᠤ ᠪᠣᠯᠤᠨᠠ᠃ ᠲᠤᠬᠠᠢᠯᠠᠪᠠᠯ《ᠪᠥᠯᠥᠭᠡ᠂ ᠢᠨᠦ ᠠᠨᠤ᠁》 ᠭᠡᠬᠦ ᠮᠡᠲᠦ ᠶ᠋ᠢ ᠶᠠᠷᠢᠶᠠᠨ ᠳ᠋ᠤ᠌《ᠪᠢᠯᠡ᠂ ᠨᠢ᠁》 ᠭᠡᠬᠦ ᠮᠡᠲᠦᠴᠢᠯᠡᠨ ᠳᠠᠭᠤᠳᠠᠬᠤ ᠪᠣᠯᠵᠤ᠂《— ᠳ᠋ᠤᠷ~— ᠲᠤᠷ᠂— ᠵᠤᠬᠤᠢ\ — ᠵᠦᠬᠦᠢ᠂ — ᠊ᠮᠤᠢ᠂— ᠊ᠪᠠᠢ᠂— ᠯᠤᠭᠠ\ ᠊ᠯᠦᠭᠡ᠁》 ᠵᠡᠷᠭᠡ ᠣᠯᠠᠨ ᠨᠥᠬᠥᠴᠡᠯ ᠦ᠋ᠳ ᠢ᠋《— ᠳ᠋ᠦ᠍~— ᠳᠤ᠂— ᠊ᠵᠠᠢ᠂ — ᠊ᠨᠠ᠂ ᠊ᠪᠠ᠂ ᠊ᠯᠠ᠁》 ᠭᠡᠬᠦ ᠮᠡᠲᠦ ᠪᠡᠷ ᠶᠠᠷᠢᠵᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃《— ᠷᠤᠨ᠂ — ᠷ ᠠ》 ᠭᠡᠬᠦ ᠦᠢᠯᠡ ᠶ᠋ᠢᠨ ᠬᠡᠯᠪᠡᠷᠢ ᠴᠦ᠍ ᠡᠬᠢᠯᠡᠵᠦ ᠠᠷᠢᠯᠵᠤ ᠪᠠᠢᠨᠠ᠃
ᠦᠭᠡ ᠶ᠋ᠢᠨ ᠡᠴᠦᠰ ᠦ᠋ᠨ ᠪᠣᠭᠣᠨᠢ ᠡᠭᠡᠰᠢᠭ ᠪᠦᠬᠦᠢ ᠵᠠᠳᠠᠭᠠᠢ ᠦᠶᠡ ᠶ᠋ᠢᠨ ᠡᠭᠡᠰᠢᠭ ᠦ᠋ᠳ ᠡᠨᠡ ᠦᠶᠡ ᠡᠴᠡ ᠡᠬᠢᠯᠡᠨ ᠨᠡᠢᠳᠡᠮ ᠰᠤᠯᠠᠷᠠᠵᠤ ᠭᠡᠭᠡᠭᠳᠡᠵᠦ ᠶᠠᠷᠢᠭᠳᠠᠵᠤ ᠡᠬᠢᠯᠡᠭᠰᠡᠨ ᠨᠢ ᠮᠥᠨ ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠴᠢᠬᠤᠯᠠ ᠣᠨᠴᠠᠯᠢᠭ ᠪᠣᠯᠤᠭᠰᠠᠨ ᠶᠤᠮ᠃ ᠠᠪᠢᠶᠠᠨ ᠤ᠋ ᠵᠣᠬᠢᠴᠠᠯ ᠤ᠋ᠨ ᠬᠤᠪᠢ ᠳ᠋ᠤ᠌᠂ ᠤᠷᠤᠭᠤᠯ ᠶᠡᠬᠡ ᠲᠦᠭᠦᠷᠢᠭᠰᠢᠬᠦ ᠡᠭᠡᠰᠢᠭ ᠦ᠋ᠨ ᠵᠣᠬᠢᠴᠠᠯ ᠡᠨᠡ ᠦᠶᠡ ᠡᠴᠡ ᠡᠬᠢᠯᠡᠨ ᠰᠢᠰᠲ᠋ᠧᠮᠵᠢᠵᠡᠢ᠃
ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠡᠮᠦᠨᠡᠬᠢ ᠣᠢᠷᠠ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠬᠡᠯᠡᠨ ᠡᠴᠡ ᠢᠯᠭᠠᠷᠠᠬᠤ ᠳᠤᠷᠠᠳᠤᠭᠰᠠᠨ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠬᠡᠳᠦᠨ ᠣᠨᠴᠠᠯᠢᠭ ᠰᠢᠨᠵᠢ ᠰᠢᠨᠡ ᠪᠡᠷ ᠪᠣᠢ ᠪᠣᠯᠤᠭᠰᠠᠨ ᠪᠠ ᠨᠥᠭᠦᠭᠡ ᠲᠠᠯᠠ ᠪᠠᠷ ᠤᠷᠲᠤ ᠡᠭᠡᠰᠢᠭ ᠠᠪᠢᠶᠠᠯᠠᠪᠤᠷᠢ ᠪᠣᠯᠤᠭᠰᠠᠨ᠂ ᠦᠭᠡ ᠶ᠋ᠢᠨ ᠡᠬᠢᠨ ᠦ᠌ [h] ᠪᠠᠯᠠᠷᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠵᠡᠷᠭᠡ ᠣᠷᠴᠢᠨ ᠦᠶᠡ ᠶ᠋ᠢᠨ ᠣᠨᠴᠠᠯᠢᠭ ᠲᠠᠢ ᠪᠣᠯᠵᠤ ᠢᠷᠡᠭᠰᠡᠨ ᠪᠢᠯᠡ᠃ ᠡᠢᠮᠦ ᠡᠴᠡ ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡ ᠨᠢ ᠡᠷᠲᠡᠨ ᠦ᠌ ᠮᠣᠩᠭᠣᠯ ᠬᠡᠯᠡ ᠲᠡᠢ ᠣᠨᠴᠠᠯᠢᠭ ᠢᠯᠭᠠᠭᠠ ᠪᠠᠷ ᠢᠯᠡᠭᠦᠦ ᠪᠠᠢᠭᠰᠠᠨ᠂ ᠮᠥᠨ ᠡᠮᠦᠨᠡᠬᠢ ᠣᠢᠷᠠ ᠦᠶᠡ ᠡᠴᠡ ᠪᠡᠨ ᠴᠦ᠍ ᠡᠳᠦᠢ ᠲᠡᠳᠦᠢ ᠢᠯᠭᠠᠭᠠ ᠲᠠᠢ ᠪᠣᠯᠤᠭᠰᠠᠨ ᠶᠤᠮ᠃ ᠬᠠᠷᠢᠨ ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠣᠨᠴᠠᠯᠢᠭ ᠰᠢᠨᠵᠢ ᠪᠢᠴᠢᠭ ᠲᠦ᠍ ᠲᠤᠢᠯᠪᠤᠷᠢᠲᠠᠢ ᠲᠤᠰᠬᠠᠭᠳᠠᠭᠰᠠᠨ ᠶᠠᠪᠤᠳᠠᠯ ᠨᠢ ᠶᠡᠬᠡ ᠲᠥᠯᠥᠪ 20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠡᠬᠢᠨ ᠡᠴᠡ ᠡᠬᠢᠯᠡᠵᠦ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠶᠠᠷᠢᠶᠠᠴᠢᠯᠠᠭᠰᠠᠨ ᠪᠢᠴᠢᠭ ᠦ᠋ᠨ ᠬᠡᠯᠡ ᠪᠣᠢ ᠪᠣᠯᠤᠭᠰᠠᠨ ᠲᠤᠯᠠ ᠡᠨᠡ ᠬᠦ᠌ ᠴᠠᠭ ᠦᠶᠡ ᠶ᠋ᠢ ᠪᠢᠳᠡ ᠣᠳᠣ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠬᠡᠯᠡ ᠭᠡᠵᠦ ᠪᠣᠯᠤᠨᠠ᠃
ᠳᠡᠭᠡᠷᠡᠬᠢ ᠶᠠᠷᠢᠭᠰᠠᠨ ᠡᠳᠡᠭᠡᠷ ᠦᠵᠡᠭᠳᠡᠯ ᠣᠨᠴᠠᠯᠢᠭ ᠪᠣᠯ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠡᠢᠲᠡ ᠳᠤᠮᠳᠠ ᠶ᠋ᠢᠨ ᠠᠰᠠᠭᠤᠳᠠᠯ ᠪᠠᠢᠵᠤ ᠨᠡᠢᠲᠡ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠨᠳᠦᠰᠦᠨ ᠪᠠᠢᠳᠠᠯ ᠪᠣᠯᠤᠨᠠ᠃ ᠭᠡᠲᠡᠯᠡ ᠮᠣᠩᠭᠣᠯ ᠬᠡᠯᠡᠲᠡᠳ ᠦ᠋ᠨ ᠨᠡᠢᠭᠡᠮ᠂ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠪᠠᠢᠳᠠᠯ ᠬᠠᠷᠢᠯᠴᠠᠨ ᠵᠥᠷᠢᠶᠡ ᠢᠯᠭᠠᠭᠠ ᠲᠠᠢ ᠲᠤᠯᠠ ᠨᠡᠢᠲᠡ ᠮᠣᠩᠭᠣᠯ ᠬᠡᠯᠡ ᠨᠢ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠵᠢᠭᠳᠡ ᠦᠭᠡᠢ ᠬᠤᠪᠢᠯᠪᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠶᠤᠮ᠃ ᠡᠢᠮᠦ ᠬᠤᠪᠢᠯᠪᠤᠷᠢ ᠶ᠋ᠢ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠭᠡᠬᠦ ᠪᠥᠭᠡᠳ ᠬᠤᠪᠢᠯᠪᠤᠷᠢ ᠶ᠋ᠢᠨ ᠬᠢᠨᠢ ᠶᠡᠬᠡ ᠪᠠᠭᠠ ᠳᠡᠰ ᠢᠯᠭᠠᠭᠠ ᠪᠠᠷ ᠨᠢ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ᠂ ᠠᠮᠠᠨ ᠠᠶᠠᠯᠭᠤ᠂ ᠶᠠᠷᠢᠶᠠ ᠭᠡᠬᠦ ᠮᠡᠲᠦᠴᠢᠯᠡᠨ ᠠᠩᠭᠢᠯᠠᠨ ᠶᠠᠷᠢᠯᠴᠠᠵᠤ ᠪᠣᠯᠤᠨᠠ᠃
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠠᠶᠠᠯᠭᠤ ᠶᠠᠷᠢᠶᠠᠨ ᠤ᠋ ᠲᠤᠬᠠᠢ ᠡᠷᠳᠡᠮᠲᠡᠳ ᠦ᠋ᠨ ᠰᠠᠨᠠᠯ ᠮᠥᠨ ᠵᠥᠷᠢᠶᠡ ᠲᠡᠢ ᠪᠠᠢᠭᠰᠠᠭᠠᠷ᠃ ᠭᠡᠪᠡᠴᠦ ᠣᠯᠠᠩᠬᠢ ᠰᠤᠳᠤᠯᠭᠠᠨ ᠳ᠋ᠤ᠌ ᠳᠤᠰᠬᠠᠵᠤ ᠪᠠᠢᠭᠠ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠨᠢ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠳ᠋ᠤ᠌ ᠬᠠᠯᠬᠠ ᠠᠶᠠᠯᠭᠤ ᠭᠡᠵᠦ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠳ᠋ᠤ᠌ ᠳᠣᠣᠷᠠᠬᠢ ᠮᠡᠲᠦ ᠭᠤᠷᠪᠠᠨ ᠠᠶᠠᠯᠭᠤ ᠲᠠᠢ ᠪᠠᠢᠨᠠ᠃
ᠪᠠᠷᠠᠭᠤᠨ ᠠᠶᠠᠯᠭᠤ(ᠣᠢᠷᠠᠳ ᠠᠶᠠᠯᠭᠤ) ᠰᠢᠨᠵᠢᠶᠠᠩ ᠤ᠋ᠨ ᠤᠢᠭᠤᠷ ᠦᠨᠳᠦᠰᠦᠲᠡᠨ ᠦ᠌ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠪᠠ ᠬᠥᠬᠡᠨᠠᠭᠤᠷ᠂ ᠭᠠᠨᠰᠦ ᠮᠣᠵᠢ ᠶ᠋ᠢᠨ ᠮᠣᠩᠭᠣᠯᠴᠤᠳ ᠡᠨᠡ ᠠᠶᠠᠯᠭᠤ ᠪᠠᠷ ᠶᠠᠷᠢᠯᠴᠠᠨᠠ᠃ ᠪᠠᠷᠤᠭ20 ᠢᠯᠡᠭᠦᠦ ᠲᠦᠮᠡᠨ ᠬᠥᠮᠦᠨ ᠠᠮᠠ ᠪᠠᠢᠨᠠ᠃ ᠡᠨᠡ ᠠᠶᠠᠯᠭᠤ ᠶ᠋ᠢᠨ ᠣᠨᠴᠠᠯᠢᠭ ᠭᠡᠪᠡᠯ᠄ (1)[æ] [e] [Ø] [у] ᠵᠡᠷᠭᠡ ᠤᠷᠤᠭᠰᠢᠯᠠᠭᠰᠠᠨ ᠡᠭᠡᠰᠢᠭ ᠲᠡᠢ; (2) ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ ᠦᠭᠡ ᠶ᠋ᠢᠨ ᠡᠬᠢᠨ ᠦ᠌ i ᠡᠭᠡᠰᠢᠭ ᠦᠨᠳᠦᠰᠦᠨ ᠳ᠋ᠡᠭᠡᠨ ᠬᠤᠪᠢᠷᠠᠭᠰᠠᠨ ᠦᠭᠡᠢ; (3) ᠬᠣᠣᠰ ᠡᠭᠡᠰᠢᠭ ᠦ᠋ᠳ ᠨᠢᠭᠡᠨᠲᠡ ᠤᠷᠤᠭᠰᠢᠯᠠᠭᠰᠠᠨ ᠤᠷᠲᠤ ᠡᠭᠡᠰᠢᠭ ᠪᠣᠯᠤᠭᠰᠠᠨ ᠤᠴᠢᠷ ᠬᠣᠣᠰ ᠡᠭᠡᠰᠢᠭ ᠦᠭᠡᠢ ᠪᠣᠯᠵᠠᠢ; (4) ᠡᠭᠡᠰᠢᠭ ᠠᠪᠢᠶᠠᠨ ᠤ᠋ ᠵᠣᠬᠢᠴᠠᠯ ᠥᠪᠡᠷ ᠢ᠋ᠶ᠋ᠡᠨ ᠣᠨᠴᠠᠯᠢᠭ ᠲᠠᠢ᠂[ʊ] ᠡᠭᠡᠰᠢᠭ ᠦ᠋ᠨ ᠳᠠᠷᠠᠭᠠ ᠦᠶᠡ ᠨᠦ᠍ᠭᠦᠳ ᠲᠦ᠍[ʊ] ᠣᠷᠣᠵᠤ ᠪᠣᠯᠬᠤ ᠪᠠ[ɔ] ᠡᠭᠡᠰᠢᠭ ᠦ᠋ᠨ ᠳᠠᠷᠠᠭᠠ ᠦᠶᠡ ᠨᠦ᠍ᠭᠦᠳ ᠲᠦ᠍ [a] [ʊ] ᠡᠭᠡᠰᠢᠭ ᠣᠷᠣᠵᠤ ᠪᠣᠯᠤᠨᠠ; (5) ᠣᠯᠠᠩᠬᠢ ᠠᠶᠠᠯᠭᠤᠨ ᠤ᠋ ᠬᠥᠨᠳᠡᠢ ᠦᠭᠡ ᠶ᠋ᠢᠨ [x] ᠡᠭᠡᠰᠢᠭ ᠡᠨᠡ ᠠᠶᠠᠯᠭᠤᠨ ᠳ᠋ᠤ᠌ ᠡᠷᠲᠡᠨ ᠦ᠌ ᠮᠣᠩᠭᠣᠯ ᠬᠡᠯᠡᠨ ᠦ᠌[k'] ᠳᠠᠭᠤᠳᠠᠯᠭᠠ ᠪᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠨᠠ; (6)[–mʊ᠄t]/ –my᠄t] ᠭᠡᠬᠦ ᠣᠯᠠᠨ ᠲᠣᠭᠠᠨ ᠤ᠋ ᠨᠥᠬᠥᠴᠡᠯ ᠲᠡᠢ; (7) ᠣᠯᠠᠩᠬᠢ ᠨᠡᠷᠡ ᠦᠭᠡ ᠨᠢ ᠨᠡᠷᠡᠯᠡᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯᠲᠤ[—n] ᠭᠡᠬᠦ ᠭᠡᠢᠭᠦᠯᠦᠭᠴᠢ ᠲᠡᠭᠦᠰᠬᠡᠯ ᠪᠦᠬᠦᠢ ᠨᠥᠬᠥᠴᠡᠯ ᠲᠡᠢ; (8)[—a᠄~—æ᠄] ᠭᠡᠬᠦ ᠬᠣᠯᠪᠣᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ᠂[—ts'æ᠄] ᠭᠡᠬᠦ ᠨᠥᠬᠥᠴᠡᠯ ᠪᠦᠬᠦᠢ ᠬᠢᠷᠢ ᠬᠡᠮᠵᠢᠶᠡᠨ ᠦ᠌ ᠲᠡᠢᠨ ᠢᠯᠭᠠᠯ ᠲᠠᠢ; (9) ᠨᠡᠷᠡ ᠦᠭᠡ ᠳ᠋ᠦ᠍ ᠭᠤᠷᠪᠠᠨ ᠪᠡᠶᠡ ᠶ᠋ᠢᠨ ᠲᠤᠰ ᠲᠤᠰ ᠤ᠋ᠨ ᠨᠥᠬᠥᠴᠡᠯ ᠲᠡᠢ;(10) ᠦᠢᠯᠡ ᠳ᠋ᠦ᠍ ᠭᠠᠭᠴᠠ ᠣᠯᠠᠨ ᠲᠣᠭᠠᠨ ᠤ᠋ ᠪᠡᠶᠡ ᠶ᠋ᠢᠨ ᠬᠤᠪᠢᠷᠠᠯ ᠤ᠋ᠨ ᠨᠥᠬᠥᠴᠡᠯ ᠲᠡᠢ;(11) ᠦᠢᠯᠡ ᠶ᠋ᠢᠨ ᠵᠠᠬᠢᠷᠬᠤ ᠬᠦᠰᠡᠬᠦ ᠲᠥᠯᠥᠪ ᠲᠦ᠍ ᠨᠢᠭᠡᠳᠦᠭᠡᠷ ᠪᠡᠶᠡ ᠶ᠋ᠢᠨ[—sα᠄/—sæ᠄~—sʊ᠄/—sy᠄] ᠭᠡᠬᠦ ᠨᠥᠬᠥᠴᠡᠯ ᠲᠡᠢ; (12) ᠨᠥᠬᠥᠴᠡᠯ ᠦᠢᠯᠡ ᠶ᠋ᠢᠨ ᠪᠣᠯᠵᠣᠬᠤ ᠬᠡᠯᠪᠡᠷᠢ ᠳ᠋ᠦ᠍ ᠪᠠᠰᠠ[—xnα᠄/—xnæ᠄~—xlα᠄/—xlæ᠄] ᠭᠡᠬᠦ ᠨᠥᠬᠥᠴᠡᠯ ᠲᠡᠢ; (13) ᠦᠭᠡᠢᠰᠬᠡᠬᠦ ᠰᠤᠯᠠ ᠦᠭᠡ ᠶ᠋ᠢᠨes，Gɔ᠄，ʃi ᠭᠡᠬᠦ ᠮᠡᠲᠦ ᠶ᠋ᠢ ᠨᠡᠯᠢᠶᠡᠳ ᠢᠳᠡᠪᠬᠢᠲᠡᠢ ᠪᠥᠭᠡᠳ ᠥᠪᠡᠷᠮᠢᠴᠡ ᠬᠡᠷᠡᠭᠯᠡᠨᠡ᠃ ᠦᠭᠡ ᠶ᠋ᠢᠨ ᠰᠠᠩ ᠤ᠋ᠨ ᠲᠠᠯᠠ ᠪᠠᠷ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠦᠭᠡ ᠨᠡᠯᠢᠶᠡᠳ ᠶᠡᠬᠡ ᠬᠤᠪᠢ ᠶ᠋ᠢᠨ ᠵᠢᠩ ᠲᠡᠢ᠃ ᠬᠠᠷᠢᠴᠠᠩᠭᠤᠢ ᠪᠠᠷ ᠦᠵᠡᠪᠡᠯ᠂ ᠬᠥᠬᠡᠨᠠᠭᠤᠷ᠂ ᠭᠠᠨᠰᠦ ᠶ᠋ᠢᠨ ᠶᠠᠷᠢᠶᠠ ᠨᠢ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠪᠠᠭᠠ ᠪᠠᠢᠵᠤ ᠳᠤᠮᠳᠠᠳᠤ ᠠᠶᠠᠯᠭᠤ ᠲᠠᠢ ᠨᠡᠯᠢᠶᠡᠳ ᠲᠠᠯᠠ ᠪᠠᠷ ᠣᠢᠷᠠᠯᠴᠠᠭᠠ ᠪᠣᠯᠵᠤ ᠪᠠᠢᠨᠠ᠃
ᠳᠤᠮᠳᠠᠳᠤ ᠠᠶᠠᠯᠭᠤ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ᠋ ᠬᠥᠯᠥᠨ ᠪᠤᠢᠷ ᠠᠢᠮᠠᠭ ᠤ᠋ᠨ ᠰᠢᠨᠡ ᠬᠠᠭᠤᠴᠢᠨ ᠪᠠᠷᠭᠤ᠂ ᠡᠸᠡᠩᠬᠢ ᠬᠤᠰᠢᠭᠤᠨ ᠠ᠋ᠴᠠ ᠪᠤᠰᠤᠳ ᠣᠷᠣᠨ ᠤ᠋ ᠮᠣᠩᠭᠣᠯᠴᠤᠳ ᠪᠠ ᠯᠢᠶᠣᠤᠨᠢᠩ᠂ ᠬᠢᠷᠢᠨ᠂ ᠬᠠᠷᠠᠮᠦ᠋ᠷᠡᠨ ᠮᠣᠵᠢ ᠶ᠋ᠢᠨ ᠮᠣᠩᠭᠣᠯᠴᠤᠳ ᠡᠨᠡ ᠠᠶᠠᠯᠭᠤ ᠪᠠᠷ ᠶᠠᠷᠢᠯᠴᠠᠨᠠ᠃ ᠬᠥᠮᠦᠨ ᠠᠮᠠ ᠪᠠᠷᠤᠭ 420 ᠭᠠᠷᠤᠢ ᠲᠦᠮᠡ ᠪᠠᠢᠨᠠ᠃ ᠡᠨᠡ ᠠᠶᠠᠯᠭᠤ ᠪᠠᠷ ᠶᠠᠷᠢᠯᠴᠠᠭᠴᠢᠳ ᠤ᠋ᠨ ᠬᠥᠮᠦᠨ ᠠᠮᠠ ᠣᠯᠠᠨ᠂ ᠨᠤᠲᠤᠭ ᠳᠡᠪᠢᠰᠬᠡᠷ ᠥᠷᠭᠡᠨ ᠠᠭᠤᠳᠠᠮ ᠪᠠᠢᠳᠠᠭ᠃ ᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠠᠮᠠᠨ ᠠᠶᠠᠯᠭᠤ ᠶ᠋ᠢᠨ ᠲᠥᠷᠥᠯ ᠵᠦᠢᠯ ᠨᠡᠯᠢᠶᠡᠳ ᠣᠯᠠᠨ᠂ ᠵᠥᠷᠢᠶᠡ ᠨᠢ ᠴᠦ᠍ ᠪᠤᠳᠤᠯᠢᠶᠠᠨ ᠲᠠᠢ ᠶᠤᠮ᠃ ᠡᠭᠦᠨ ᠳ᠋ᠦ᠍ ᠬᠣᠷᠴᠢᠨ ᠠᠮᠠᠨ ᠠᠶᠠᠯᠭᠤ ᠳ᠋ᠤ᠌ ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠬᠦᠷᠢᠶᠡ᠂ ᠨᠠᠢ᠍ᠮᠠᠨ ᠠ᠋ᠴᠠ ᠪᠤᠰᠤᠳ ᠣᠯᠠᠨ ᠬᠣᠰᠢᠭᠤᠳ᠂ ᠬᠢᠩᠭᠠᠨ ᠠᠢᠮᠠᠭ ᠤ᠋ᠨ ᠣᠯᠠᠨ ᠬᠣᠰᠢᠭᠤᠳ᠂ ᠬᠠᠷᠠᠮᠦ᠋ᠷᠡᠨ ᠮᠣᠵᠢ ᠶ᠋ᠢᠨ ᠳᠥᠷᠪᠡᠳ ᠪᠠ ᠬᠢᠷᠢᠨ ᠮᠣᠵᠢ ᠶ᠋ᠢᠨ ᠭᠣᠷᠯᠣᠰ ᠤ᠋ᠨ ᠮᠣᠩᠭᠣᠯᠴᠤᠳ ᠤ᠋ᠨ ᠶᠠᠷᠢᠶᠠ ᠪᠠᠭᠲᠠᠨᠠ᠃ ᠬᠠᠷᠠᠴᠢᠨ ᠲᠦᠮᠡᠳ ᠠᠮᠠᠨ ᠠᠶᠠᠯᠭᠤ ᠳ᠋ᠤ᠌ ᠤᠯᠠᠭᠠᠨᠬᠠᠳᠠ ᠬᠣᠲᠠ ᠶ᠋ᠢᠨ ᠬᠠᠷᠠᠴᠢᠨ ᠬᠣᠰᠢᠭᠤ᠂ ᠨᠢᠩᠴᠧᠩ ᠰᠢᠶᠠᠨ᠂ ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠬᠦᠷᠢᠶᠡ ᠬᠣᠰᠢᠭᠤ᠂ ᠯᠢᠶᠣᠤᠨᠢᠩ ᠮᠣᠵᠢ ᠶ᠋ᠢᠨ ᠪᠧᠢ ᠫᠢᠶᠣᠣ᠂ ᠹᠦᠰᠢᠨ ᠬᠣᠲᠠ ᠶ᠋ᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠶᠠᠷᠢᠶᠠ ᠪᠠᠭᠲᠠᠨᠠ᠃ ᠪᠠᠭᠠᠷᠢᠨ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠤᠯᠠᠭᠠᠨᠬᠠᠳᠠ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠪᠠᠷᠠᠭᠤᠨ ᠪᠠᠭᠠᠷᠢᠨ᠂ ᠠᠷᠤ ᠬᠣᠷᠴᠢᠨ᠂ ᠣᠩᠨᠢᠭᠤᠳ᠂ ᠠᠤᠬᠠᠨ ᠬᠣᠰᠢᠭᠤ ᠪᠠ ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠶᠠᠷᠢᠶᠠ ᠪᠠᠭᠲᠠᠨᠠ᠃ ᠴᠠᠬᠠᠷ᠂ ᠰᠢᠯᠢ ᠶ᠋ᠢᠨ ᠭᠣᠣᠯ᠂ ᠤᠯᠠᠭᠠᠨᠴᠠᠪ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠰᠢᠯᠢ ᠶ᠋ᠢᠨ ᠭᠣᠣᠯ᠂ ᠤᠯᠠᠭᠠᠨᠴᠠᠪ ᠠᠢᠮᠠᠭ ᠤ᠋ᠨ ᠣᠯᠠᠨ ᠬᠣᠰᠢᠭᠤᠳ ᠪᠠ ᠤᠯᠠᠭᠠᠬᠠᠳᠠ ᠬᠣᠲᠠ ᠶ᠋ᠢᠨ ᠬᠡᠰᠢᠭᠲᠡᠨ ᠬᠣᠰᠢᠭᠤ᠂ ᠪᠤᠭᠤᠲᠤ ᠬᠣᠲᠠ ᠶ᠋ᠢᠨ ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠶᠠᠷᠢᠶᠠ ᠪᠠᠭᠲᠠᠨᠠ᠃ ᠣᠷᠳᠣᠰ ᠠᠮᠠᠨ ᠠᠶᠠᠯᠭᠤ ᠪᠠᠷ ᠣᠷᠳᠣᠰ ᠬᠣᠲᠠ ᠶ᠋ᠢᠨ ᠮᠣᠩᠭᠣᠯᠴᠤᠳ ᠶᠠᠷᠢᠯᠴᠠᠨᠠ᠃ ᠤᠷᠠᠳ ᠤ᠋ᠨ ᠠᠮᠠᠨ ᠠᠶᠠᠯᠭᠤ ᠪᠠᠷ ᠪᠠᠶᠠᠨᠨᠠᠭᠤᠷ ᠠᠢᠮᠠᠭ ᠤ᠋ᠨ ᠮᠣᠩᠭᠣᠯᠴᠤᠳ ᠶᠠᠷᠢᠯᠴᠠᠨᠠ᠃ ᠠᠯᠠᠱᠠ ᠡᠵᠡᠨᠡ ᠠᠮᠠᠨ ᠠᠶᠠᠯᠭᠤ ᠪᠠᠷ ᠠᠯᠠᠱᠠ ᠠᠢᠮᠠᠭ ᠤ᠋ᠨ ᠭᠤᠷᠪᠠᠨ ᠬᠤᠰᠢᠭᠤᠨ ᠤ᠋ ᠮᠣᠩᠭᠣᠯᠴᠤᠳ ᠲᠤᠰ ᠲᠤᠰ ᠶᠠᠷᠢᠯᠴᠠᠨᠠ᠃ ᠳᠤᠮᠳᠠᠳᠤ ᠠᠶᠠᠯᠭᠤᠨ ᠳ᠋ᠤ᠌ ᠬᠡᠳᠦᠢᠪᠡᠷ ᠳᠡᠭᠡᠷᠡᠬᠢ ᠮᠡᠲᠦ ᠣᠯᠠᠨ ᠠᠮᠠᠨ ᠠᠶᠠᠯᠭᠤ ᠪᠠᠢᠳᠠᠭ ᠪᠣᠯᠪᠠᠴᠤ ᠠᠶᠠᠯᠭᠤ ᠶ᠋ᠢᠨ ᠲᠠᠯᠠ ᠪᠠᠷ ᠵᠠᠷᠢᠮ ᠨᠢ ᠪᠠᠰᠠ ᠬᠠᠷᠢᠯᠴᠠᠨ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠲᠠᠢ ᠪᠠᠢᠨᠠ᠃ ᠲᠤᠬᠠᠢᠯᠠᠪᠠᠯ᠂ ᠴᠠᠬᠠᠷ ᠶᠠᠷᠢᠶᠠᠨ ᠳ᠋ᠠᠬᠢ ᠦᠭᠡ ᠶ᠋ᠢᠨ ᠡᠬᠢᠨ ᠳ᠋ᠦ᠍ [x] [t'] [tʃ'] ᠵᠡᠷᠭᠡ ᠭᠡᠢᠭᠦᠯᠦᠭᠴᠢ ᠳᠠᠷᠠᠭᠠᠴᠢ ᠶᠢᠨ ᠦᠶᠡ ᠳ᠋ᠡᠭᠡᠨ ᠲᠦᠷᠢᠯᠲᠡ ᠲᠠᠢ ᠭᠡᠢᠭᠦᠯᠦᠭᠴᠢ ᠲᠣᠬᠢᠶᠠᠯᠳᠤᠬᠤ ᠪᠠᠢᠳᠠᠯ ᠳᠤ ᠲᠣᠰ ᠲᠣᠰ [k] [t] [tʃ] ᠭᠡᠬᠦ ᠭᠡᠢᠭᠦᠯᠦᠭᠴᠢ ᠪᠣᠯᠵᠤ ᠠᠪᠢᠶᠠᠯᠠᠭᠳᠠᠬᠤ ᠦᠵᠡᠭᠳᠡᠯ ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠢᠮᠠᠭ ᠤ᠋ᠨ ᠰᠢᠯᠤᠭᠤᠨ ᠬᠥᠬᠡ᠂ ᠰᠢᠯᠤᠭᠤᠨ ᠴᠠᠭᠠᠨ᠂ ᠬᠥᠪᠡᠭᠡᠲᠦ ᠰᠢᠷᠠ᠂ ᠲᠠᠢᠹᠤᠰᠧ ᠬᠣᠰᠢᠭᠤ ᠪᠠ ᠤᠯᠠᠭᠠᠬᠠᠳᠠ ᠶ᠋ᠢᠨ ᠬᠡᠰᠢᠭᠲᠡᠨ ᠬᠣᠰᠢᠭᠤ᠂ ᠤᠯᠠᠭᠠᠨᠴᠠᠪ ᠤ᠋ᠨ ᠴᠠᠬᠠᠷ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠣᠢᠲᠤ ᠬᠣᠰᠢᠭᠤ ᠵᠡᠷᠭᠡ ᠳ᠋ᠦ᠍ ᠪᠠᠢᠲᠠᠯᠠ ᠰᠢᠯᠢ ᠶᠢᠨ ᠭᠣᠣᠯ᠂ ᠤᠯᠠᠭᠠᠨᠴᠠᠪ ᠠᠢᠮᠠᠭ ᠪᠠ ᠪᠤᠭᠤᠲᠤ ᠬᠣᠲᠠ ᠶ᠋ᠢᠨ ᠪᠤᠰᠤᠳ ᠬᠣᠰᠢᠭᠤᠳ ᠢ᠋ᠶ᠋ᠠᠷ ᠪᠠᠢᠬᠤ ᠦᠭᠡᠢ ᠪᠠᠢᠨᠠ᠂ ᠬᠠᠷᠢᠨ ᠪᠠᠭᠠᠷᠢᠨ ᠠᠮᠠᠨ ᠠᠶᠠᠯᠭᠤᠨ ᠤ᠋ ᠨᠠᠢ᠍ᠮᠠᠨ᠂ ᠠᠤᠬᠠᠨ ᠬᠣᠰᠢᠭᠤ ᠪᠠ ᠣᠩᠨᠢᠭᠤᠳ ᠬᠤᠰᠢᠭᠤᠨ ᠤ᠋ ᠬᠡᠰᠡᠭ ᠣᠷᠣᠨ ᠳ᠋ᠠᠬᠢ ᠮᠣᠩᠭᠣᠯᠴᠤᠳ᠂ ᠣᠷᠳᠣᠰ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠳᠤᠷᠠᠳᠤᠭᠰᠠᠨ ᠭᠡᠢᠭᠦᠯᠦᠭᠴᠢ ᠠᠪᠢᠶᠠᠨ ᠤ᠋ ᠬᠤᠪᠢᠷᠠᠯ ᠣᠷᠣᠰᠢᠵᠤ ᠪᠠᠢᠨᠠ᠃ ᠲᠡᠦᠬᠡᠨ ᠦᠯᠡᠳᠡᠭᠳᠡᠯ ᠦ᠋ᠨ ᠪᠠᠢᠳᠠᠯ ᠠ᠋ᠴᠠ ᠦᠵᠡᠪᠡᠯ ᠤᠤᠯ ᠤ᠋ᠨ ᠵᠡᠭᠦᠨ ᠲᠦᠮᠡᠳ᠂ ᠬᠠᠷᠠᠴᠢᠨ ᠤ᠋ ᠬᠡᠰᠡᠭ ᠣᠷᠣᠨ ᠪᠠ ᠪᠤᠭᠤᠲᠤ᠂ ᠬᠥᠬᠡᠬᠣᠲᠠ ᠶ᠋ᠢᠨ ᠲᠦᠮᠡᠳ ᠦ᠋ᠨ ᠮᠣᠩᠭᠣᠯᠴᠤᠳ ᠮᠥᠨ ᠡᠢᠮᠦ ᠬᠤᠪᠢᠷᠠᠯ ᠲᠠᠢ ᠪᠠᠷ ᠠᠪᠢᠶᠠᠯᠠᠵᠤ ᠪᠠᠢᠭᠰᠠᠨ ᠪᠠᠢᠨᠠ᠃ ᠬᠠᠷᠠᠴᠢᠨ ᠲᠦᠮᠡᠳ ᠦ᠋ᠨ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠦᠭᠡ ᠶ᠋ᠢ ᠡᠬᠢᠨ ᠦ᠌[ ʊ ] ᠡᠭᠡᠰᠢᠭ ᠢ᠋[ ʊa] ᠭᠡᠵᠦ ᠬᠣᠣᠰ ᠢ᠋ᠶ᠋ᠠᠷ ᠶᠠᠷᠢᠬᠤ ᠦᠵᠡᠭᠳᠡᠯ ᠪᠠᠭᠠᠷᠢᠨ ᠶᠠᠷᠢᠶᠠᠨ ᠤ᠋ ᠠᠤᠬᠠᠨ᠂ ᠨᠠᠢ᠍ᠮᠠᠨ ᠪᠠ ᠣᠩᠨᠢᠭᠤᠳ ᠤ᠋ᠨ ᠬᠡᠰᠡᠭ ᠣᠷᠣᠨ ᠳ᠋ᠤ᠌ ᠮᠥᠨ ᠠᠳᠠᠯᠢ ᠪᠤᠰᠤ ᠬᠡᠮᠵᠢᠶᠡ ᠪᠡᠷ ᠣᠷᠣᠰᠢᠵᠤ ᠪᠠᠢᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠠᠳᠠᠯᠢ ᠪᠤᠰᠤ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠳ᠋ᠤ᠌ ᠴᠦ᠍ ᠠᠳᠠᠯᠢ ᠰᠢᠨᠵᠢ ᠲᠡᠢ ᠣᠨᠴᠠᠯᠢᠭ ᠣᠷᠣᠰᠢᠵᠤ ᠪᠠᠢᠨᠠ᠃ ᠲᠤᠬᠠᠢᠯᠠᠪᠠᠯ᠂ ᠬᠥᠨᠳᠡᠢ ᠦᠭᠡᠨ ᠳ᠋ᠦ᠍[ k'] ᠭᠡᠬᠦ ᠪᠠᠭᠠᠷᠢᠨ ᠠᠶᠠᠯᠭᠤᠨ ᠤ᠋ ᠭᠡᠢᠭᠦᠯᠦᠭᠴᠢ ᠳᠤᠮᠳᠠᠳᠤ ᠠᠶᠠᠯᠭᠤ ᠳ᠋ᠤ᠌ ᠣᠯᠠᠩᠬᠢ ᠳ᠋ᠠᠭᠠᠨ[x] ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠪᠠᠢᠲᠠᠯᠠ ᠠᠯᠠᠱᠠ᠂ ᠡᠵᠡᠨᠡ ᠠᠮᠠᠨ ᠠᠶᠠᠯᠭᠤ ᠪᠠ ᠣᠷᠳᠣᠰ ᠠᠮᠠᠨ ᠠᠶᠠᠯᠭᠤ ᠳ᠋ᠤ᠌ ᠮᠥᠨ[k' ] ᠭᠡᠵᠦ ᠠᠪᠢᠶᠠᠯᠠᠵᠤ ᠪᠠᠢᠨᠠ᠃ ᠬᠣᠷᠴᠢᠨ ᠠᠮᠠᠨ ᠠᠶᠠᠯᠭᠤᠨ ᠳ᠋ᠠᠬᠢ ᠲᠦᠩᠯᠢᠶᠣᠣ ᠶ᠋ᠢᠨ ᠵᠠᠷᠢᠮ ᠬᠣᠰᠢᠭᠤᠳ ᠤ᠋ᠨ ᠶᠠᠷᠢᠶᠠᠨ ᠳ᠋ᠤ᠌ ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌《ᠴ》 ᠪᠤᠶᠤ ᠣᠯᠠᠩᠬᠢ ᠠᠮᠠᠨ ᠠᠶᠠᠯᠭᠤᠨ ᠤ᠋[ tʃ'] ᠶ᠋ᠢ[ ʃ] ᠪᠡᠷ ᠠᠪᠢᠶᠠᠯᠠᠬᠤ ᠨᠢ ᠬᠠᠷᠢᠨ ᠪᠠᠷᠭᠤ ᠪᠤᠷᠢᠶᠠᠳ ᠠᠶᠠᠯᠭᠤᠨ ᠳ᠋ᠠᠬᠢ ᠪᠠᠢᠳᠠᠯ ᠲᠠᠢ ᠨᠡᠯᠢᠶᠡᠳ ᠲᠥᠰᠦᠭᠡᠲᠡᠢ ᠪᠠᠢᠨᠠ᠃
ᠵᠡᠭᠦᠨ ᠬᠣᠢᠲᠤ ᠠᠶᠠᠯᠭᠤ(ᠪᠠᠷᠭᠤ ᠪᠤᠷᠢᠶᠠᠳ ᠠᠶᠠᠯᠭᠤ) ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ᠋ ᠬᠥᠯᠥᠨ ᠪᠤᠢᠷ ᠬᠣᠲᠠ ᠶ᠋ᠢᠨ ᠰᠢᠨᠡ ᠪᠠᠷᠭᠤ ᠵᠡᠭᠦᠨ᠂ ᠪᠠᠷᠠᠭᠤᠨ ᠬᠣᠰᠢᠭᠤ᠂ ᠬᠠᠭᠤᠴᠢᠨ ᠪᠠᠷᠭᠤ ᠬᠣᠰᠢᠭᠤ᠂ ᠡᠸᠡᠩᠬᠢ ᠦᠨᠳᠦᠰᠦᠲᠡᠨ ᠦ᠌ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠬᠣᠰᠢᠭᠤ᠂ ᠬᠠᠢᠯᠠᠷ᠂ ᠮᠠᠨᠵᠤᠤᠷ ᠬᠣᠲᠠ ᠶ᠋ᠢᠨ ᠮᠣᠩᠭᠣᠯᠴᠤᠳ ᠡᠨᠡ ᠠᠶᠠᠯᠭᠤ ᠪᠠᠷ ᠶᠠᠷᠢᠯᠴᠠᠨᠠ᠃ ᠬᠥᠮᠦᠨ ᠠᠮᠠ ᠨᠢ ᠪᠠᠷᠤᠭ7 ᠲᠦᠮᠡ ᠢᠯᠡᠭᠦᠦ* ᠪᠠᠢᠨᠠ᠃ ᠡᠨᠡ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤᠨ ᠳ᠋ᠤ᠌ ᠬᠠᠭᠤᠴᠢᠨ ᠪᠠᠷᠭᠤ᠂ ᠰᠢᠨᠡ ᠪᠠᠷᠭᠤ ᠪᠠ ᠪᠤᠷᠢᠶᠠᠳ ᠭᠡᠬᠦ ᠭᠤᠷᠪᠠᠨ ᠠᠮᠠᠨ ᠠᠶᠠᠯᠭᠤ ᠲᠠᠢ ᠪᠠᠢᠵᠤ ᠰᠢᠨᠡ ᠬᠠᠭᠤᠴᠢᠨ ᠪᠠᠷᠭᠤ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠵᠥᠷᠢᠶᠡ ᠨᠢ ᠬᠠᠷᠢᠴᠠᠩᠭᠤᠢ ᠪᠠᠭᠠ ᠰᠢᠭ᠋᠃ ᠵᠡᠭᠦᠨ ᠬᠣᠢᠲᠤ ᠠᠶᠠᠯᠭᠤ ᠶ᠋ᠢᠨ ᠣᠨᠴᠠᠯᠢᠭ ᠭᠡᠪᠡᠯ᠄ (1) ᠪᠣᠭᠣᠨᠢ ᠡᠭᠡᠰᠢᠭ ᠲᠦ᠍[ө] ᠪᠠᠢᠬᠤ ᠦᠭᠡᠢ᠂ ᠡᠭᠦᠨ ᠲᠡᠢ ᠲᠣᠬᠢᠷᠠᠯᠴᠠᠬᠤ ᠡᠭᠡᠰᠢᠭ ᠢ᠋ ᠴᠥᠮ[Ʉ] ᠪᠠᠷ ᠶᠠᠷᠢᠨᠠ; (2) [ai] [ǝi] [ɔi] [ʊi] [Ʉi] ᠵᠡᠷᠭᠡ ᠤᠷᠤᠭᠤᠳᠠᠬᠤ ᠬᠣᠣᠰ ᠡᠭᠡᠰᠢᠭ ᠨᠡᠯᠢᠶᠡᠳ ᠲᠣᠳᠣᠷᠬᠠᠢ ᠠᠪᠢᠶᠠᠯᠠᠭᠳᠠᠵᠤ ᠲᠤᠰ ᠲᠤᠰ ᠮᠣᠩᠭᠣᠯ ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ ᠬᠣᠣᠰ ᠡᠭᠡᠰᠢᠭ ᠦ᠋ᠳ ᠲᠡᠢ ᠵᠣᠬᠢᠬᠤ ᠲᠣᠬᠢᠷᠠᠯᠴᠠᠭᠠ ᠲᠠᠢ; (3) ᠤᠷᠤᠭᠰᠢᠯᠠᠭᠰᠠᠨ ᠡᠭᠡᠰᠢᠭ ᠦᠭᠡᠢ᠂ ᠬᠠᠷᠢᠨ ᠵᠥᠭᠡᠯᠡᠷᠡᠭᠰᠡᠨ ᠭᠡᠢᠭᠦᠯᠦᠭᠴᠢᠳ ᠲᠡᠢ ; (4) ᠡᠭᠡᠰᠢᠭ ᠠᠪᠢᠶᠠᠨ ᠤ᠋ ᠵᠣᠬᠢᠴᠠᠯ ᠨᠡᠯᠢᠶᠡᠳ ᠴᠢᠩᠭᠠ ᠪᠥᠭᠡᠳ ᠡᠬᠢᠨ ᠦ᠌ ᠦᠶᠡᠡ ᠡᠴᠡ ᠬᠣᠢᠰᠢᠬᠢ ᠡᠭᠡᠰᠢᠭ ᠣᠨ ᠣᠯᠠᠩᠬᠢ ᠨᠢ ᠨᠡᠯᠢᠶᠡᠳ ᠲᠣᠳᠣ ᠰᠣᠨᠣᠰᠤᠭᠳᠠᠨᠠ ; (5) ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ 《ᠰ》 ᠭᠡᠢᠭᠦᠯᠦᠭᠴᠢ ᠶ᠋ᠢ ᠰᠢᠨᠡ ᠪᠠᠷᠭᠤ ᠪᠠ ᠪᠤᠷᠢᠶᠠᠳ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ [ h ] ᠢᠶᠠᠷ ᠠᠪᠢᠶᠠᠯᠠᠵᠤ᠂ ᠬᠠᠭᠤᠴᠢᠨ ᠪᠠᠷᠭᠤ ᠳ᠋ᠤ᠌ [ k ] ᠢᠶᠠᠷ ᠠᠪᠢᠶᠠᠯᠠᠨᠠ ; (6) ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ 《ᠵ ᠂ ᠴ 》᠂ ᠪᠠᠷᠭᠤ ᠳ᠋ᠤ᠌ ᠲᠤᠰ ᠲᠤᠰ ᠰᠠᠯᠪᠤᠷᠢᠯᠠᠵᠤ [ tʃ ] [ ts ] [ s ] ᠪᠣᠯᠤᠭᠰᠠᠨ ᠪᠠ ᠪᠤᠷᠢᠶᠠᠳ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ [ z ] [ з ] ᠬᠢᠭᠡᠳ [s] [ ʃ ] ᠪᠣᠯᠵᠠᠢ ; (7) ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌《 ᠨ (n)᠂ ᠩ 》 ᠢ᠋ ᠢᠯᠭᠠᠳᠠᠭ ᠦᠭᠡᠢ ᠴᠥᠮ [ ŋ ] ᠢᠶᠡᠷ ᠠᠪᠢᠶᠠᠯᠠᠨᠠ ; (8) ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ ᠣᠯᠠᠨ ᠲᠣᠭᠠᠨ ᠤ᠋ ᠨᠥᠬᠥᠴᠡᠯ (-s ] ᠢ [-t ] ᠢᠶᠠᠷ ᠠᠪᠢᠶᠠᠯᠠᠬᠤ ᠪᠠ ᠵᠠᠷᠢᠮ ᠦᠭᠡ ᠶ᠋ᠢᠨ ᠳᠡᠪᠢᠰᠬᠡᠷᠯᠡᠬᠦ [s ] ᠭᠡᠢᠭᠦᠯᠦᠭᠴᠢ ᠶ᠋ᠢ [ t ] ᠢᠶᠠᠷ ᠠᠪᠢᠶᠠᠯᠠᠨᠠ ; (9)ᠬᠢᠷᠢ ᠬᠡᠮᠵᠢᠶᠡᠨ ᠣ ᠳᠠᠢᠨ ᠢᠯᠭᠠᠯ ᠤ᠋ᠨ ᠨᠥᠬᠥᠴᠡᠯ [ -sa:/-sǝ: ~ -sɔ:/-ө: ) ᠲᠠᠢ ; (10)ᠰᠢᠨᠡ ᠪᠠᠷᠭᠤ ᠪᠠ ᠪᠤᠷᠢᠶᠠᠳ ᠠᠮᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠭᠠᠷᠬᠤ ᠶ᠋ᠢᠨ ᠳᠠᠢᠨ ᠢᠯᠭᠠᠯ ᠨᠢ [-ha:/ -hǝ:~ -hɔ:/ -hө; ] ᠪᠣᠯᠵᠤ ᠠᠪᠢᠶᠠᠯᠠᠭᠳᠠᠨᠠ ; (11) ᠦᠢᠯᠡ ᠶ᠋ᠢᠨ ᠥᠩᠭᠡᠷᠡᠭᠰᠡᠨ ᠴᠠᠭ ᠢ᠋ ᠢᠯᠡᠳᠬᠡᠬᠦ [-a:/-ǝ:~ ɔ:/-ө: ] ᠭᠡᠬᠦ ᠨᠥᠬᠥᠴᠡᠯ ᠲᠡᠢ ; (12) ᠲᠡᠭᠦᠰ ᠥᠭᠦᠯᠡᠬᠦᠨ ᠳ᠋ᠦ᠍ᠨᠢ ᠨᠢᠭᠡ᠂ ᠬᠣᠶᠠᠳᠤᠭᠠᠷ ᠪᠡᠶᠡ ᠶ᠋ᠢᠨ ᠭᠠᠭᠴᠠ ᠣᠯᠠᠨ ᠲᠣᠭᠠᠨ ᠤ᠋ [ - b ~ - w ] [ - ʃ~ -ʃi ] [ -t~ - ta ] ᠭᠡᠬᠦ ᠮᠡᠲᠦ ᠶ᠋ᠢᠨ ᠨᠥᠬᠥᠴᠡᠯ ᠲᠡᠢ᠃ ᠦᠭᠡ ᠶ᠋ᠢᠨ ᠰᠠᠩ ᠤ᠋ᠨ ᠲᠠᠯᠠ ᠪᠠᠷ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠦᠭᠡ ᠵᠣᠬᠢᠬᠤ ᠬᠤᠪᠢ ᠶ᠋ᠢᠨ ᠵᠢᠩ ᠲᠡᠢ᠃ ᠮᠥᠨ ᠪᠠᠰᠠ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠯᠡ ᠶᠠᠷᠢᠶᠠ ᠶ᠋ᠢ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠠᠯᠬᠠ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠭᠡᠳᠡᠭ᠃ ᠲᠣᠪᠴᠢᠯᠠᠭᠠᠳ ᠬᠠᠯᠬᠠ ᠠᠶᠠᠯᠭᠤ ᠭᠡᠨᠡ᠃
ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠨᠤᠭᠤᠳ ᠪᠣᠯ ᠮᠠᠨᠵᠤ ᠴᠢᠩ ᠦ᠋ᠨ ᠦᠶᠡ ᠳ᠋ᠡᠬᠢ ᠮᠣᠩᠭᠣᠯᠴᠤᠳ ᠢ᠋ ᠬᠡᠰᠡᠭᠯᠡᠨ ᠵᠠᠬᠢᠷᠤᠭᠰᠠᠨ ᠨᠣᠶᠠᠷᠬᠠᠯ ᠤ᠋ᠨ ᠦᠷᠡ ᠳ᠋ᠦᠩ ᠪᠠ ᠮᠥᠨ ᠮᠣᠩᠭᠣᠯᠴᠤᠳ ᠤ᠋ᠨ ᠥᠪᠡᠷᠮᠢᠴᠡ ᠠᠵᠤ ᠠᠬᠤᠢᠯᠠᠯᠯ᠂ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠣᠨᠴᠠᠯᠢᠭ ᠠ᠋ᠴᠠ ᠪᠣᠢ ᠪᠣᠯᠤᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠣᠯᠠᠩᠬᠢ ᠣᠷᠣᠨ ᠨᠤᠲᠤᠭ ᠲᠤ᠌ ᠦᠨᠳᠦᠰᠦᠨ ᠨᠢᠭᠡ ᠪᠢᠴᠢᠭ ᠦ᠋ᠨ ᠬᠡᠯᠡ ᠲᠡᠢ ᠪᠠᠢᠭᠰᠠᠨ ᠤᠴᠢᠷ᠂ ᠲᠡᠳᠡᠭᠡᠷ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠪᠠ ᠠᠮᠠᠨ ᠠᠶᠠᠯᠭᠤ ᠶ᠋ᠢᠨ ᠵᠥᠷᠢᠶᠡ ᠣᠨᠴᠠᠯᠢᠭ ᠢ᠋ ᠦᠨᠳᠦᠰᠦᠨ ᠨᠢᠭᠡ ᠨᠡᠢᠲᠡ ᠶ᠋ᠢᠨ ᠬᠡᠯᠡᠨ ᠦ᠌ ᠳᠣᠲᠣᠷᠠᠬᠢ ᠠᠶᠠᠯᠭᠤ ᠶᠠᠷᠢᠶᠠᠨ ᠤ᠋ ᠢᠯᠭᠠᠭᠠ᠂ ᠢᠯᠠᠩᠭᠤᠶᠠ ᠠᠪᠢᠶᠠᠨ ᠤ᠋ ᠲᠠᠯᠠ ᠪᠠᠷ ᠬᠢ ᠵᠥᠷᠢᠶᠡ ᠶᠡᠬᠡᠲᠡᠢ ᠬᠡᠯᠡ ᠪᠣᠯᠭᠠᠨ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠶᠦᠮ᠃ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠦ᠌ ᠳᠠᠷᠠᠭᠠᠬᠢ ᠲᠠᠪᠢ ᠭᠠᠷᠤᠢ ᠵᠢᠯ ᠦ᠋ᠨ ᠲᠤᠷᠰᠢ᠂ ᠨᠠᠮ ᠤ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠰᠢᠨᠡ ᠣᠷᠴᠢᠨ ᠳ᠋ᠤ᠌᠂ ᠮᠣᠩᠭᠣᠯᠴᠤᠳ ᠤ᠋ᠨ ᠰᠣᠶᠣᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠣᠯᠠᠨ ᠲᠠᠯᠠ ᠶ᠋ᠢᠨ ᠬᠠᠷᠢᠯᠴᠠᠭᠠ ᠤᠯᠠᠮ ᠢᠶᠡᠷ ᠥᠷᠭᠡᠵᠢᠨ ᠨᠢᠭᠲᠠᠷᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠳ᠋ᠤ᠌ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ᠂ ᠠᠮᠠᠨ ᠠᠶᠠᠯᠭᠤ ᠶ᠋ᠢᠨ ᠵᠥᠷᠢᠶᠡ ᠴᠦ᠍ ᠤᠯᠠᠮ ᠢ᠋ᠶ᠋ᠠᠷ ᠪᠠᠭᠠᠰᠴᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠥᠭᠵᠢᠯ ᠦ᠋ᠨ ᠲᠡᠦᠬᠡᠨ ᠦ᠌ ᠣᠨᠴᠠᠭᠠᠢ ᠰᠢᠨᠵᠢ ᠡᠴᠡ ᠪᠣᠯᠵᠤ᠂ ᠣᠷᠴᠢᠨ ᠴᠠᠭ ᠤ᠋ᠨ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ ᠠᠮᠠᠨ ᠠᠶᠠᠯᠭᠤ ᠶ᠋ᠢᠨ ᠵᠥᠷᠢᠶᠡ ᠪᠠᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠮᠣᠩᠭᠣᠯ ᠬᠡᠯᠡᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠬᠦ ᠦᠰᠦᠭ ᠪᠢᠴᠢᠭ ᠳᠡᠭᠡᠷᠡ ᠴᠦ᠍ ᠨᠢᠭᠡᠳᠦᠯ ᠦᠭᠡᠢ ᠪᠠᠢᠳᠠᠯ ᠣᠷᠣᠰᠢᠵᠤ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠥᠪᠥᠷ ᠮᠣᠩᠭᠣᠯ ᠪᠠ ᠬᠥᠬᠡᠨᠠᠭᠤᠷ᠂ ᠭᠠᠨᠰᠦ᠂ ᠬᠠᠷᠠᠮᠦ᠋ᠷᠡᠨ᠂ ᠬᠢᠷᠢᠨ᠂ ᠯᠢᠶᠣᠤᠨᠢᠩ ᠤ᠋ᠨ ᠮᠣᠩᠭᠣᠯᠴᠤᠳ ᠴᠥᠮ ᠤᠢᠭᠤᠷᠵᠢᠨ ᠦᠰᠦᠭ ᠦ᠋ᠨ ᠭᠠᠷᠤᠯ ᠢᠷᠡᠯ ᠲᠡᠢ ᠣᠳᠣᠬᠢ ᠮᠣᠩᠭᠣᠯ ᠦᠰᠦᠭ ᠢ᠋ ᠠᠪᠴᠤ ᠬᠡᠷᠡᠭᠯᠡᠵᠦ ᠪᠠᠢᠬᠤ ᠪᠠᠢᠲᠠᠯᠠ ᠰᠢᠨᠵᠢᠶᠠᠩ ᠤ᠋ᠨ ᠤᠢᠭᠤᠷ ᠦᠨᠳᠦᠰᠦᠲᠡᠨ ᠦ᠌ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ᠋ ᠮᠣᠩᠭᠣᠯᠴᠤᠳ ᠲᠣᠳᠣ ᠦᠰᠦᠭ ᠭᠡᠭᠴᠢ ᠤᠢᠭᠤᠷᠵᠢᠨ ᠦᠰᠦᠭ ᠦ᠋ᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠵᠠᠰᠠᠨ ᠥᠭᠡᠷᠡᠴᠢᠯᠡᠭᠰᠡᠨ ᠦᠰᠦᠭ ᠪᠢᠴᠢᠭ ᠢ᠋ ᠠᠪᠴᠤ ᠬᠡᠷᠡᠭᠯᠡᠵᠦ ᠪᠠᠢᠯᠠ᠃ 20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠨᠠᠶᠠᠭᠠᠳ ᠣᠨ ᠠ᠋ᠴᠠ ᠡᠬᠢᠯᠡᠨ ᠰᠢᠨᠵᠢᠶᠠᠩ ᠣᠷᠣᠨ ᠳ᠋ᠤ᠌ ᠤᠢᠭᠤᠷᠵᠢᠨ ᠦᠰᠦᠭ (ᠬᠤᠳᠤᠮ ᠮᠣᠩᠭᠣᠯ ᠦᠰᠦᠭ) ᠢ᠋ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠳᠡᠯᠭᠡᠷᠡᠭᠦᠯᠦᠨ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠡᠴᠡ ᠣᠳᠣ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠳ᠋ᠤ᠌ ᠦᠨᠳᠦᠰᠦᠨ ᠳ᠋ᠡᠭᠡᠨ ᠨᠢᠭᠡ ᠵᠦᠢᠯ ᠦ᠋ᠨ ᠦᠰᠦᠭ ᠪᠢᠴᠢᠭ ᠬᠡᠷᠡᠭᠯᠡᠬᠦ ᠪᠤᠶᠠᠨ ᠲᠠᠢ ᠰᠠᠢᠬᠠᠨ ᠦᠢᠯᠡᠰ ᠨᠢᠭᠡᠨᠲᠡ ᠡᠬᠢᠯᠡᠭᠰᠡᠨ ᠭᠡᠵᠦ ᠪᠣᠯᠤᠨᠠ᠃ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠮᠣᠩᠭᠣᠯᠴᠤᠳ ᠰᠯᠠᠸᠵᠢᠨ ᠦᠰᠦᠭ ᠢ᠋ᠶ᠋ᠡᠷ ᠰᠠᠭᠤᠷᠢ ᠪᠣᠯᠭᠠᠭᠰᠠᠨ ᠬᠠᠯᠬᠠ ᠠᠶᠠᠯᠭᠤᠨ ᠳ᠋ᠤ᠌ ᠵᠣᠬᠢᠴᠠᠭᠤᠯᠤᠨ ᠵᠣᠬᠢᠶᠠᠭᠰᠠᠨ ᠦᠰᠦᠭ ᠪᠢᠴᠢᠭ ᠦ᠋ᠨ ᠰᠢᠰᠲ᠋ᠸᠮ ᠢ᠋1946 ᠣᠨ ᠠ᠋ᠴᠠ ᠡᠬᠢᠯᠡᠨ ᠳᠡᠯᠭᠡᠷᠡᠭᠦᠯᠦᠨ ᠬᠡᠷᠡᠭᠯᠡᠭᠰᠡᠨ ᠪᠠᠢᠨᠠ᠃
— — — —
* ᠪᠣᠣᠰᠢᠶᠠᠩ· ᠪᠣ· ᠵᠢᠷᠠᠨᠨᠢᠭᠡ ᠶ᠋ᠢᠨ《ᠪᠠᠷᠭᠤ ᠠᠮᠠᠨ ᠠᠶᠠᠯᠭᠤ》
(ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂1995 ᠣᠨ) ᠤ᠋ ᠤᠳᠤᠷᠢᠳᠬᠠᠯ ᠳ᠋ᠤ᠌ ᠦᠵᠡ᠃