ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠳᠥᠷᠪᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -4
128ᠤᠤᠯ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠰᠡᠨ ᠬᠥᠮᠥᠨ
ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨᠡ ᠪᠠᠷᠤᠨ ᠤᠩᠺᠸᠷᠡᠨ ᠣᠷᠣᠰ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠰᠡᠯᠡᠮ ᠴᠣᠬᠢᠭᠤᠯᠤᠭᠰᠠᠨ ᠭᠠᠮᠢᠩ ᠤ᠋ᠨ ᠦᠯᠡᠳᠡᠭᠳᠡᠯ ᠦ᠋ᠳ ᠲᠦ᠍ ᠣᠷᠣᠬᠤ ᠣᠷᠣᠨ ᠣᠭᠣᠴᠢᠬᠤ ᠠᠶᠠᠭᠠ ᠨᠢ ᠵᠥᠪᠬᠡᠨ ᠬᠣᠢᠲᠤ ᠵᠦᠭ ᠦ᠋ᠨ ᠬᠢᠶᠠᠭᠲᠤ ᠬᠣᠲᠠ ᠪᠣᠯᠵᠤ᠂ ᠲᠡᠷᠡ ᠵᠦᠭ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠵᠠᠢ᠃ ᠲᠡᠳᠡᠨ ᠦ᠌ ᠠᠭᠤᠷ ᠬᠢᠯᠢᠩ ᠮᠠᠰᠢ ᠶᠡᠬᠡ᠂ ᠲᠤᠯᠤᠯᠳᠤᠪᠠᠯ ᠵᠣᠬᠢᠬᠤ ᠳᠠᠢᠰᠤᠨ ᠳ᠋ᠠᠭᠠᠨ ᠭᠠᠷᠭᠠᠭᠠ ᠦᠭᠡᠢ ᠶᠡᠬᠡ ᠪᠡᠶᠡ ᠪᠡᠨ ᠣᠷᠣᠨ ᠨᠤᠲᠤᠭ ᠤ᠋ᠨ ᠭᠠᠷ ᠬᠣᠭᠣᠰᠣᠨ ᠭᠡᠮ ᠵᠠᠮ ᠦᠭᠡᠢ ᠣᠯᠠᠨ ᠳ᠋ᠤ᠌ ᠭᠠᠷᠭᠠᠬᠤ ᠨᠢ ᠬᠡᠮᠵᠢᠶᠡ ᠦᠭᠡᠢ᠃ ᠤᠨᠤᠭᠠ ᠮᠣᠷᠢᠳ᠂ ᠲᠡᠷᠭᠡ᠂ ᠱᠠᠷ ᠬᠥᠲᠥᠯᠳᠡᠭ ᠪᠦᠬᠦᠨ ᠢ᠋ ᠪᠤᠯᠢᠶᠠᠬᠤ ᠠ᠋ᠴᠠ ᠡᠬᠢᠯᠡᠨ ᠠᠮᠢ ᠪᠡᠶᠡ ᠶ᠋ᠢ ᠨᠢ ᠪᠤᠰᠠᠨᠢᠭᠤᠯᠬᠤ᠂ ᠣᠷᠣᠨ ᠭᠡᠷ ᠢ᠋ ᠳᠡᠭᠡᠷᠡᠮᠳᠡᠨ ᠲᠦᠢᠮᠡᠷᠳᠡᠬᠦ᠂ ᠲᠡᠷᠡ ᠮᠥᠷᠲᠡᠭᠡᠨ ᠡᠮᠡᠰ ᠥᠬᠢᠳ ᠢ᠋ ᠪᠤᠵᠠᠷᠯᠠᠨ ᠬᠦᠴᠦᠷᠬᠡᠭᠯᠡᠨᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠤᠭ ᠠ᠋ᠴᠠ ᠥᠰᠢᠶᠡ ᠬᠣᠷᠣᠰᠤᠯ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠠᠭᠤᠷ ᠣᠮᠣᠭ ᠰᠢᠲᠠᠵᠤ ᠭᠠᠷᠤᠯᠠ᠃
《ᠠᠯᠠᠯᠴᠠᠶᠠ᠂ ᠦᠵᠡᠯᠴᠡᠶᠡ!》 ᠭᠡᠳᠡᠭ ᠶᠠᠷᠢᠶᠠ ᠪᠣᠯ ᠨᠢᠭᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠶᠠᠷᠢᠶᠠ ᠪᠢᠰᠢ ᠢᠳᠡᠷ ᠴᠡᠷᠢᠭ ᠡᠷᠡ ᠪᠦᠬᠦᠨ ᠦ᠌ ᠠᠮᠠᠨ ᠠ᠋ᠴᠠ ᠭᠠᠷᠤᠨᠠ᠃ ᠤᠷᠢᠳ ᠡᠮᠦᠨᠡ ᠠᠯᠠᠬᠤ ᠭᠡᠳᠡᠭ ᠦᠭᠡ ᠮᠠᠰᠢ ᠴᠡᠭᠡᠷᠲᠡᠢ᠂ ᠠᠯᠠᠬᠤ ᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠣᠷᠣᠭᠠᠬᠤ᠂ ᠰᠥᠨᠥᠭᠡᠬᠦ᠂ ᠴᠠᠭᠠᠰᠢ ᠬᠠᠷᠠᠭᠤᠯᠬᠤ᠂ ᠲᠣᠨᠢᠯᠭᠠᠬᠤ ᠭᠡᠬᠦᠴᠢᠯᠡᠯ ᠦ᠋ᠨ ᠮᠠᠰᠢ ᠣᠯᠠᠨ ᠦᠭᠡ ᠪᠠᠢᠳᠠᠭ ᠰᠠᠨ ᠪᠣᠯ ᠲᠡᠷᠡ ᠨᠢ ᠣᠳᠣ ᠪᠦᠷ ᠦᠭᠡᠢ ᠪᠣᠯᠵᠠᠢ᠃ ᠮᠥᠨ ᠤᠷᠢᠳᠤ ᠬᠥᠮᠦᠨ ᠬᠥᠮᠦᠨ ᠦ᠌ ᠪᠡᠨ ᠠᠮᠢᠨ ᠳ᠋ᠤ᠌ ᠬᠦᠷᠬᠦ ᠰᠢᠭ ᠶᠡᠬᠡ ᠨᠢᠭᠦᠯ ᠮᠠᠭᠤᠬᠠᠢ ᠶᠠᠭᠤᠮᠠ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ ᠴᠦ᠍ ᠦᠭᠡᠢ ᠪᠣᠯᠵᠠᠢ᠃ ᠬᠠᠷᠢᠨ ᠭᠠᠮᠢᠩ ᠢ᠋ ᠠᠯᠠᠪᠠᠯ ᠶᠡᠬᠡ ᠪᠤᠶᠠᠨ ᠭᠡᠵᠦ ᠪᠣᠳᠣᠬᠤ ᠪᠣᠯᠵᠠᠢ᠃ ᠡᠢᠨᠬᠦ ᠠᠭᠤᠷ ᠣᠮᠣᠭ ᠬᠡᠳᠦ ᠰᠢᠲᠠᠭᠰᠠᠨ ᠳ᠋ᠠᠭᠠᠨ ᠪᠠᠷᠢᠭᠰᠠᠨ ᠲᠠᠰᠢᠭᠤᠷ ᠪᠦᠳᠦᠭᠦᠨ ᠡᠴᠡ ᠪᠦᠳᠦᠭᠦᠨ᠂ ᠡᠩᠭᠡᠷ ᠵᠠᠭᠠᠮᠠ ᠵᠠᠳᠠᠭᠠᠢ᠂ ᠤᠨᠤᠭᠠ ᠮᠣᠷᠢᠳ ᠢ᠋ ᠬᠠᠢᠷᠠᠯᠠᠬᠤ ᠪᠠᠨ ᠪᠣᠯᠢᠭᠠᠳ ᠳᠡᠭᠡᠷᠡ ᠨᠢ ᠭᠠᠷᠤᠩᠭᠤᠲᠠ ᠤᠬᠤᠰᠬᠢᠭᠠᠳ᠂ ᠠᠭᠤᠷ ᠴᠠᠩ ᠲᠠᠲᠠᠭᠤᠯᠤᠨ ᠳᠠᠪᠬᠢᠵᠤ᠂ ᠭᠥᠯᠢᠭᠡᠷ ᠮᠥᠰᠥᠨ ᠳᠡᠭᠡᠭᠦᠷ ᠪᠣᠯᠪᠠᠴᠤ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠨᠢ ᠲᠠᠴᠢᠭᠢᠨᠠᠭᠤᠯᠤᠨᠠ᠃ ᠬᠠ ᠶᠠ ᠦᠭᠡᠢ ᠡᠢᠮᠦ ᠪᠣᠯᠤᠭᠰᠠᠨ ᠤᠴᠢᠷ ᠲᠤᠭᠤᠯᠬᠤ ᠦᠭᠡᠢ᠂ ᠮᠡᠳᠡᠬᠦ ᠦᠭᠡᠢ ᠶᠠᠭᠤᠮᠠ ᠴᠦ᠍ ᠦᠭᠡᠢ ᠪᠣᠯᠵᠠᠢ᠃
ᠬᠠᠮᠢᠭᠠ ᠨᠢᠭᠡᠲᠡᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠡᠳᠦᠷ ᠲᠡᠭᠡᠨ ᠬᠡᠳᠦᠨ ᠥᠷᠲᠡᠭᠡ ᠳᠠᠮᠵᠢᠨ ᠴᠤᠤᠷᠢᠶᠠᠳᠠᠵᠤ ᠠᠮᠢ ᠬᠤᠪᠢ ᠪᠠᠨ ᠪᠣᠳᠣᠭᠰᠠᠨ ᠳᠣᠷᠣᠢ ᠪᠠᠭᠤᠷᠠᠢ ᠡᠷᠡ ᠶ᠋ᠢ ᠪᠣᠯᠪᠠᠴᠤ ᠪᠣᠰᠤᠨ ᠬᠠᠷᠠᠢᠬᠤ ᠳ᠋ᠤ᠌ ᠬᠦᠷᠭᠡᠨᠡ᠃
ᠡᠯᠳᠡᠪ ᠱᠤᠤᠭᠢᠶᠠᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠶ᠋ᠢᠨ ᠳᠤᠮᠳᠠ ᠮᠠᠨᠳᠤᠯ ᠭᠡᠳᠡᠭ ᠭᠠᠵᠠᠷ ᠤ᠋ᠨ ᠣᠷᠣᠰ ᠠᠢᠯ ᠤ᠋ᠳ ᠢ᠋ ᠭᠠᠮᠢᠩ ᠳᠠᠯᠠᠨ ᠳᠡᠭᠡᠷᠡᠮᠳᠡᠵᠦ ᠣᠷᠣᠨ ᠪᠠᠢᠰᠢᠩ ᠢ᠋ ᠨᠢ ᠰᠢᠲᠠᠭᠠᠵᠤ ᠭᠡᠨᠡ! ᠺᠷᠡᠡᠺᠣᠸ ᠤ᠋ᠨ ᠳ᠋ᠤ᠌ ᠣᠷᠣᠰ ᠡᠬᠡᠨᠡᠷ ᠢ᠋ ᠮᠣᠳᠣ ᠰᠢᠭᠠᠨ ᠠᠯᠠᠵᠤ᠂ ᠪᠣᠱᠣᠭᠠᠨ ᠳᠡᠭᠡᠷᠡ ᠨᠢ ᠲᠡᠩᠨᠡᠭᠦᠯᠦᠨ ᠬᠠᠶᠠᠭᠰᠠᠨ ᠪᠠᠢᠨᠠ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠢ᠋ ᠨᠢ ᠪᠣᠯᠪᠠᠴᠤ ᠠᠯᠠᠭᠠᠳ ᠯᠠ ᠪᠠᠢᠨᠠ ᠭᠡᠨᠡ ᠭᠡᠳᠡᠭ ᠶᠠᠷᠢᠶᠠ ᠯᠠ ᠭᠠᠵᠠᠷ ᠰᠠᠢ ᠦᠭᠡᠢ ᠰᠣᠨᠣᠰᠳᠠᠨᠠ᠃
— ᠵᠠ ᠪᠠᠢᠵᠠ! ᠡᠨᠡ ᠮᠠᠭᠤᠰᠠᠢᠨ ᠭᠠᠮᠢᠩ ᠤ᠋ᠳ ᠶᠠᠭᠠᠬᠢᠭᠠᠳ ᠲᠡᠭᠡᠬᠦ ᠪᠣᠯᠪᠠ ᠠ᠋? ᠭᠡᠳᠡᠭ ᠠᠰᠠᠭᠤᠯᠲᠠ ᠨᠢᠭᠡ ᠬᠥᠮᠦᠨ ᠦ᠌ ᠠᠮᠠᠨ ᠠ᠋ᠴᠠ ᠭᠠᠷᠬᠤ ᠳ᠋ᠤ᠌ ᠲᠡᠨᠳᠡ ᠡᠴᠡ ᠨᠥᠭᠦᠭᠡ ᠨᠢᠭᠡ ᠨᠢ᠄
— ᠦᠭᠡᠢ᠂ ᠦᠭᠡᠢ ᠬᠠᠷᠢᠨ ᠴᠢᠨᠢ ᠤᠯᠠᠭᠠᠨ ᠣᠷᠣᠰ ᠤ᠋ᠳ ᠭᠡᠭᠴᠢ ᠳ᠋ᠦ᠍ ᠥᠰᠢᠨ ᠶᠠᠳᠠᠳᠠᠭ ᠶᠤᠮ ᠭᠡᠨᠡ ᠪᠢᠯᠡ ᠭᠡᠨᠡ᠃ ᠭᠡᠲᠡᠯᠡ ᠭᠤᠷᠪᠠᠳᠠᠬᠢ ᠨᠢ᠄
— ᠦᠭᠡᠢ᠂ ᠦᠭᠡᠢ ᠬᠠᠷᠢᠨ ᠴᠠᠭᠠᠨ ᠣᠷᠣᠰ ᠤ᠋ᠳ ᠭᠡᠳᠡᠭ ᠢ᠋ ᠨᠢ ᠥᠰᠳᠡᠭ ᠶᠦᠮ ᠭᠡᠨᠡ ᠪᠢᠯᠡ ᠭᠡᠨᠡ᠃ ᠭᠡᠲᠡᠯᠡ ᠨᠢᠭᠡ ᠨᠢ᠄ ᠦᠭᠡᠢ ᠪᠠᠢᠵᠠ! ᠤᠯᠠᠭᠠᠨ ᠣᠷᠣᠰ ᠭᠡᠳᠡᠭ ᠴᠢᠨᠢ ᠬᠠᠮᠢᠭᠠᠬᠢ ᠶ᠋ᠢᠨ ᠶᠠᠮᠠᠷ ᠣᠷᠣᠰ ᠪᠣᠢ? ᠭᠡᠳᠡᠭ ᠲᠦ᠍ ᠠᠰᠠᠭᠤᠯᠲᠠ ᠭᠠᠷᠭᠠᠵᠤ ᠢᠷᠡᠬᠦ ᠳ᠋ᠦ᠍᠄ ᠬᠠᠢ ᠬᠡᠨ ᠮᠡᠳᠡᠯᠡ᠂ ᠡᠴᠢᠭᠡ ᠶ᠋ᠢ ᠪᠡᠨ᠂ ᠶᠡᠬᠡ ᠬᠦᠴᠦᠷᠬᠡᠭ ᠶᠦᠮ ᠭᠡᠨᠡ ᠪᠢᠯᠡ ᠭᠡᠵᠦ ᠬᠠᠷᠢᠭᠤᠯᠤᠨᠠ᠃
— ᠵᠠ ᠲᠡᠭᠡᠪᠡᠯ ᠴᠠᠭᠠᠨ ᠣᠷᠣᠰ ᠣᠷᠣᠰ ᠭᠡᠳᠡᠭ ᠨᠢ ᠶᠠᠭᠤ ᠪᠣᠢ? ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠨᠥᠭᠦᠭᠡ ᠲᠡᠷᠡ ᠵᠢᠯ ᠦ᠋ᠨ ᠥᠷᠲᠡᠭᠡ ᠵᠠᠮ ᠢ᠋ᠶ᠋ᠠᠷ ᠺᠣᠨᠰᠣᠯ ᠨᠣᠶᠠᠨ ᠤ᠋ ᠴᠡᠷᠢᠭ ᠭᠡᠵᠦ ᠥᠷᠮᠥᠭ ᠳᠠᠩᠰᠠᠨ ᠳᠡᠪᠡᠯ ᠲᠡᠢ ᠪᠠᠬᠠᠨ ᠠᠮᠢᠲᠠᠳ ᠶᠠᠪᠤᠭᠰᠠᠨ ᠮᠠᠨᠢ ᠣᠳᠣ ᠴᠠᠭᠠᠨ ᠣᠷᠣᠰ ᠰᠢᠦ ᠳᠡ᠃
— ᠮᠡᠳᠡᠯᠡ᠂ ᠮᠡᠳᠡᠯᠡ᠃ ᠢᠩᠭᠢᠬᠦᠯᠡᠷ ᠣᠳᠣ ᠶ᠋ᠢᠨ ᠡᠨᠡ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨᠡ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠭᠠ ᠨᠢ ᠴᠣᠬᠣᠮ ᠠᠯᠢ ᠨᠢ ᠪᠠᠢᠨᠠ ᠳᠠ᠃
— ᠤᠯᠠᠭᠠᠨ ᠨᠢ ᠪᠠᠢᠨᠠ ᠭᠡᠵᠦ ᠨᠢᠭᠡ ᠨᠢ ᠳᠠᠭᠠᠪᠤᠷᠢᠯᠠᠨᠠ᠃
《ᠴᠠᠭᠠᠨ ᠨᠢ ᠭᠡᠨᠡ ᠪᠢᠯᠡ》 ᠭᠡᠵᠦ ᠨᠥᠭᠦᠭᠡ ᠨᠢ ᠴᠡᠴᠡᠷᠬᠡᠨᠡ᠃ ᠴᠣᠬᠣᠮ ᠠᠯᠢ ᠨᠢ ᠪᠣᠯᠬᠤ ᠶ᠋ᠢ ᠮᠠᠭᠠᠳᠯᠠᠵᠤ ᠡᠰᠡ ᠴᠢᠳᠠᠬᠤ ᠳ᠋ᠠᠭᠠᠨ《ᠵᠠ ᠠᠯᠢ ᠨᠢ ᠴᠦ᠍ ᠪᠠᠢᠭᠰᠠᠨ ᠶᠠᠭᠠᠬᠢᠬᠤᠪ》᠃ ᠨᠢᠭᠡ ᠳ᠋ᠦ᠍ ᠬᠦᠷᠢᠶᠡᠨ ᠡᠴᠡ ᠭᠠᠢᠮᠢᠩ ᠢ᠋ ᠬᠥᠭᠡᠭᠡᠪᠡ᠃ ᠬᠣᠶᠠᠷ ᠲᠤ ᠳᠡᠭᠡᠷᠡ ᠨᠢ ᠶᠠᠪᠤᠭᠠ ᠪᠠᠷᠣᠨ ᠵᠠᠩᠵᠤᠨ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠨᠡ ᠪᠢᠯᠡ᠃ ᠢᠩᠭᠢᠬᠦᠯᠡᠷ ᠮᠠᠨ ᠢ᠋ ᠠᠪᠤᠷᠠᠭᠴᠢ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ ᠭᠡᠳ ᠲᠦᠷᠦᠭᠦᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣᠰ ᠡᠬᠡᠨᠡᠷ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠲᠤᠬᠠᠢ ᠶᠠᠷᠢᠶᠠᠨ ᠳ᠋ᠤ᠌ ᠳᠠᠬᠢᠨ ᠣᠷᠣᠵᠤ ᠪᠠᠬᠠᠨ ᠱᠠᠭᠰᠢᠯᠳᠤᠭᠠᠳ᠄《ᠦᠭᠡᠢ ᠲᠠ ᠮᠢᠨᠢ ᠠᠯᠠᠶᠠ᠂ ᠬᠢᠳᠤᠶᠠ᠂ ᠲᠡᠷᠡ ᠮᠠᠭᠤᠰᠠᠢᠨ ᠭᠠᠮᠢᠩ ᠤ᠋ᠳ ᠢ᠋ ᠴᠢᠨᠢ》 ᠭᠡᠵᠦ ᠪᠡᠶᠡ ᠪᠡᠶᠡ ᠪᠡᠨ ᠤᠷᠢᠶᠠᠯᠠᠨ ᠳᠠᠭᠤᠳᠠᠵᠤ ᠲᠠᠯᠪᠢᠬᠤ ᠳ᠋ᠤ᠌ ᠤᠷᠪᠠᠭᠰᠠᠨ ᠴᠤᠪᠤᠷᠠᠭᠰᠠᠨ ᠭᠠᠮᠢᠩ ᠤ᠋ᠳ ᠢ᠋ ᠨᠢ ᠠᠩ ᠬᠦᠷᠦᠭᠡ ᠮᠡᠲᠦ ᠠᠪᠣᠯᠴᠠᠭᠠᠨᠠ᠃
ᠶᠠᠭ ᠡᠢᠮᠦ ᠦᠶᠡ ᠪᠡᠷ ᠳᠣᠷᠣᠢ᠂ ᠭᠠᠮᠢᠩ ᠤ᠋ᠳ ᠤ᠋ᠨ ᠵᠢᠭᠤᠲᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠢᠯᠡ᠃ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠪᠠᠷᠠᠭᠤᠨ ᠬᠣᠢᠰᠢ ᠰᠢᠵᠢᠷ ᠦ᠋ᠨ ᠳᠠᠪᠠᠭᠠ ᠭᠡᠭᠴᠢ ᠶ᠋ᠢ ᠬᠦᠷᠬᠦ ᠬᠦᠷᠲᠡᠯᠡ ᠭᠠᠮᠢᠩ ᠤ᠋ᠨ ᠬᠡᠭᠦᠷ ᠪᠠᠢᠨ ᠪᠠᠢᠨ ᠦᠵᠡᠭᠳᠡᠨᠡ᠃ ᠳᠠᠪᠠᠭᠠ ᠳᠠᠪᠠᠮᠠᠭᠴᠠ ᠭᠠᠵᠠᠷ ᠤ᠋ᠨ ᠬᠡᠪᠰᠢ ᠳ᠋ᠦ᠍ ᠣᠩᠬᠣᠯᠳᠠᠭᠰᠠᠨ᠂ ᠡᠪᠳᠡᠷᠡᠭᠰᠡᠨ᠂ ᠡᠪᠡᠰᠦ ᠠᠴᠢᠶᠠ ᠲᠠᠢ ᠦᠬᠡᠷ ᠲᠡᠷᠭᠡ ᠳᠠᠭᠠᠷᠢᠯᠳᠤᠪᠠ᠃ ᠴᠠᠭᠠᠰᠢ ᠬᠦᠢ ᠮᠠᠨᠳᠤᠯ ᠭᠡᠳᠡᠭ ᠭᠠᠵᠠᠷ ᠬᠦᠷᠴᠦ ᠣᠷᠣᠰ ᠤ᠋ᠳ ᠤ᠋ᠨ ᠳᠡᠭᠡᠷᠡᠮᠳᠡᠭᠳᠡᠨ ᠰᠦᠢᠷᠡᠭᠰᠡᠨ ᠪᠠᠢᠰᠢᠩ ᠳ᠋ᠤ᠌ ᠬᠣᠨᠣᠭᠯᠠᠪᠠ᠃ ᠲᠡᠨᠳᠡ ᠡᠴᠡ ᠴᠠᠭᠠᠰᠢ ᠭᠤᠷᠪᠠᠨ ᠬᠣᠨᠣᠭ ᠦᠷᠭᠦᠯᠵᠢᠯᠡᠨ ᠶᠠᠪᠤᠬᠤ ᠳ᠋ᠠᠭᠠᠨ ᠳᠥᠷᠪᠡᠨ ᠵᠢᠭᠤᠳᠠᠭᠰᠠ ᠠᠢᠯ ᠤ᠋ᠳ ᠤ᠋ᠨ ᠡᠪᠦᠯᠵᠢᠶᠡ ᠳᠡᠭᠡᠷᠡ ᠬᠡᠷᠢᠶᠡ ᠭᠤᠸᠠᠭᠯᠠᠨ ᠡᠷᠭᠢᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠶᠡᠷᠦ ᠦᠵᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠠᠢᠯ ᠤ᠋ᠳ ᠤ᠋ᠨ ᠡᠪᠦᠯᠵᠢᠶᠡᠨ ᠳᠡᠭᠡᠷᠡ ᠣᠴᠢᠪᠠᠯ ᠹᠸᠩᠵᠢᠨ ᠳ᠋ᠦ᠍ᠨᠢ ᠡᠪᠦᠯ ᠦ᠋ᠨ ᠢᠳᠡᠰᠢ ᠨᠥᠭᠡᠴᠡ ᠨᠢ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠪᠤᠶᠤ ᠲᠤᠩ ᠦᠭᠡᠢ ᠳ᠋ᠡᠭᠡᠨ ᠬᠠ᠂ ᠭᠤᠶᠠ᠂ ᠬᠥᠯ ᠮᠢᠬᠠ ᠭᠡᠭᠡᠨ ᠬᠠᠶᠠᠭᠰᠠᠨ ᠪᠠᠢᠬᠤ ᠲᠤᠯᠠ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠷ ᠶᠡᠷᠦ ᠲᠣᠭᠲᠠᠭᠰᠠᠨ ᠦᠭᠡᠢ᠃ ᠰᠡᠳᠬᠢᠯ ᠭᠡᠪᠡᠯ ᠮᠠᠰᠢ ᠲᠠᠢᠪᠤᠩ ᠬᠥᠮᠦᠨ ᠠᠮᠢᠲᠠᠨ ᠤᠯᠤᠰ ᠣᠷᠣᠨ᠂ ᠠᠮᠢ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠡᠯᠳᠡᠪ ᠢ᠋ ᠪᠣᠳᠣᠨ ᠦᠢᠮᠡᠨ ᠰᠠᠨᠳᠤᠷᠴᠤ ᠪᠠᠢᠬᠤ ᠳ᠋ᠤ᠌ ᠲᠡᠢᠮᠦ ᠶᠠᠭᠤᠮᠠ ᠠᠯᠠᠭᠠ᠃ ᠭᠠᠮᠢᠩ ᠳᠠᠭᠠᠷᠢᠯᠳᠤᠪᠠᠯ ᠶᠠᠭᠠᠬᠢᠬᠤ ᠪᠣᠢ? ᠠᠰᠢᠭᠦᠢ ᠲᠡᠷᠡ ᠭᠠᠢ ᠭᠠᠮᠰᠢᠭ ᠨᠢ ᠳᠠᠭᠠᠷᠢᠯᠳᠤᠭᠰᠠᠨ ᠦᠭᠡᠢ᠃ ᠣᠷᠣᠨ ᠭᠡᠷ ᠮᠢᠨᠢ ᠶᠠᠭᠤ ᠪᠣᠯᠤᠭᠰᠠᠨ ᠪᠠᠢᠭᠠ ᠪᠣᠯ? ᠲᠡᠷᠡ ᠴᠦ᠍ ᠠᠯᠠᠭᠠ᠃ ᠤᠭ ᠨᠢ ᠤᠨᠤᠭᠠ ᠬᠥᠰᠬᠡ᠂ ᠬᠠᠨᠢ ᠨᠥᠬᠥᠳ ᠶᠠᠭᠤᠮᠠ ᠪᠦᠬᠦᠨ ᠲᠡᠢ ᠭᠠᠷᠤᠭᠠᠳ ᠣᠳᠣ ᠭᠠᠪ ᠭᠠᠭᠴᠠᠭᠠᠷ ᠬᠤᠪᠠᠬᠠᠢ ᠮᠣᠳᠣ ᠪᠠᠷᠢᠨ ᠬᠠᠷᠢᠬᠤ ᠭᠡᠳᠡᠭ ᠶᠠᠮᠠᠷ ᠪᠣᠢ? ᠲᠡᠷᠡ ᠴᠦ᠍ ᠠᠯᠠᠭᠠ᠃ ᠦᠶᠡ ᠦᠶᠡ《ᠪᠢ ᠮᠥᠨ ᠡᠯᠳᠡᠪ ᠢ᠋ ᠦᠵᠡᠨ᠂ ᠣᠯᠠᠨ ᠢ᠋ ᠲᠤᠭᠤᠯᠠᠪᠠ ᠪᠠᠢᠨᠠ》 ᠭᠡᠵᠦ ᠪᠣᠳᠣᠨ《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ᠁ ᠢᠳᠡᠷ ᠵᠠᠯᠠᠭᠤ ᠨᠠᠰᠤᠨ ᠳ᠋ᠠᠭᠠᠨ ᠳᠠᠩᠴᠤ ᠠᠵᠢᠭ ᠦᠭᠡᠢ ᠶᠠᠪᠤᠯᠠ》 ᠭᠡᠵᠦ ᠳᠠᠭᠤᠯᠠᠬᠤ ᠪᠣᠯᠪᠠᠴᠤ ᠬᠣᠢᠰᠢᠳᠠ ᠪᠠᠨ ᠶᠠᠭᠠᠬᠢᠬᠤ᠂ ᠬᠡᠷᠬᠢᠨ ᠠᠵᠤ ᠲᠥᠷᠥᠵᠦ ᠠᠮᠢᠳᠤᠷᠠᠬᠤ ᠲᠤᠬᠠᠢ ᠪᠣᠳᠣᠬᠤ ᠴᠦ᠍ ᠶᠠᠭᠤᠮᠠ ᠠᠯᠠᠭᠠ᠃
ᠥᠰᠦᠭᠰᠡᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠴᠢᠨ ᠪᠣᠯᠤᠯᠠ᠃ ᠠᠭᠤᠯᠠ ᠨᠢᠷᠤᠭᠤ ᠨᠤᠭᠤᠳ ᠨᠢ ᠲᠦᠩᠬᠦᠢᠵᠦ᠂ ᠲᠠᠯᠠ ᠬᠥᠨᠳᠡᠢ ᠨᠢ ᠴᠠᠯᠠᠢᠵᠤ᠂ ᠬᠠᠷᠠ ᠪᠠᠭᠠ ᠠ᠋ᠴᠠ ᠬᠠᠮᠢᠭᠠ ᠨᠢ ᠬᠡᠨ ᠲᠡᠢ ᠬᠡᠷᠬᠢᠨ ᠲᠣᠭᠯᠠᠭᠰᠠᠨ᠂ ᠨᠠᠭᠠᠳᠤᠭᠰᠠᠨ᠂ ᠣᠷᠣᠯᠳᠣᠭᠰᠠᠨ᠂ ᠪᠠᠷᠢᠯᠳᠤᠭᠰᠠᠨ᠂ ᠵᠣᠳᠣᠯᠳᠤᠭᠰᠠᠨ ᠲᠡᠷᠡ ᠪᠦᠬᠦᠨ ᠴᠥᠮ ᠢ᠋ ᠰᠠᠨᠠᠭᠳᠠᠭᠤᠯᠤᠨ《ᠠ ᠣᠷᠣᠨ ᠨᠤᠲᠤᠭ ᠮᠢᠨᠢ》 ᠭᠡᠵᠦ ᠳᠠᠭᠤ ᠠᠯᠳᠠᠵᠠᠢ᠃ ᠡᠨᠡ ᠪᠦᠬᠦᠨ ᠦ᠌ ᠴᠠᠭᠠᠨᠠ ᠡᠴᠢᠭᠡ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠂ ᠡᠴᠢᠭᠡ ᠶ᠋ᠢᠨ《ᠡᠢᠮᠦ ᠠᠮᠢᠲᠠᠨ ᠢ᠋ ᠶᠠᠭᠠᠬᠢᠵᠤ ᠬᠥᠮᠦᠨ ᠪᠣᠯᠭᠠᠨᠠ ᠪᠣᠢ?》 ᠭᠡᠵᠦ ᠠᠭᠤᠷᠯᠠᠨ ᠡᠷᠡ ᠬᠠᠷᠠ ᠰᠤᠷ ᠠᠪᠤᠨ ᠪᠣᠰᠤᠨ ᠬᠠᠷᠠᠢᠵᠤ ᠣᠯᠠᠨ ᠳᠠᠬᠢᠨ ᠣᠷᠢᠶᠠᠯᠭᠠᠬᠤ ᠳ᠋ᠤᠨᠢ ᠬᠣᠷᠣᠨ ᠳ᠋ᠠᠭᠠᠨ《ᠪᠠᠢᠶᠠ》 ᠭᠡᠵᠦ ᠬᠡᠯᠡᠬᠦ ᠦᠭᠡᠢ ᠬᠢᠴᠢᠶᠡᠨ ᠰᠢᠳᠦ ᠵᠠᠭᠤᠨ ᠥᠩᠭᠡᠷᠡᠭᠦᠯᠦᠭᠡᠳ ᠳᠠᠷᠠᠭᠠ ᠨᠢ ᠮᠣᠷᠢᠨ ᠳᠡᠭᠡᠷᠡ ᠭᠠᠷᠪᠠᠯ ᠬᠥᠯ ᠢ᠋ ᠨᠢ ᠵᠣᠷᠢᠭᠤᠳᠠ ᠲᠤᠭᠤᠯᠤᠭᠤᠯᠬᠤ ᠪᠠᠷ ᠳᠠᠪᠬᠢᠬᠤ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠢ ᠵᠣᠷᠢᠭᠤᠳᠠ ᠵᠣᠳᠣᠯᠳᠤᠬᠤ᠂ ᠠᠢᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠦᠬᠦᠷ ᠢ᠋ ᠬᠢᠲᠤᠭᠠ ᠪᠠᠷ ᠴᠣᠭᠣ ᠬᠠᠳᠬᠤᠵᠤ ᠠᠯᠢ ᠪᠣᠯᠬᠤ ᠦᠭᠡᠢ ᠪᠦᠲᠦᠬᠦ ᠦᠭᠡᠢ ᠶᠠᠭᠤᠮᠠ ᠬᠢᠨ ᠳᠠᠬᠢᠨ ᠵᠣᠳᠣᠭᠤᠯᠵᠤ ᠶᠠᠪᠤᠭᠰᠠᠨ ᠲᠡᠷᠡ ᠪᠦᠬᠦᠨ ᠢ᠋ ᠰᠠᠨᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠡᠩᠬᠦᠷᠡᠢᠯᠡᠭᠰᠡᠨ᠂ ᠡᠷᠬᠡᠯᠡᠭᠦᠯᠦᠭᠰᠡᠨ᠂ ᠬᠠᠢᠷᠠᠯᠠᠭᠰᠠᠨ ᠠᠯᠢ ᠳᠥᠮᠥᠭ ᠰᠠᠢᠨ ᠢ᠋ᠶ᠋ᠠᠨ ᠤᠨᠤᠭᠤᠯᠤᠨ ᠥᠩᠭᠡ ᠲᠡᠢ ᠰᠠᠢᠬᠠᠨ ᠢ᠋ ᠡᠮᠦᠰᠦᠭᠰᠡᠨ ᠢ᠋ ᠯᠡ ᠪᠣᠳᠣᠵᠠᠢ᠃
ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠡᠪᠦᠯᠵᠢᠭᠰᠡᠭᠡᠷ ᠢᠷᠡᠭᠰᠡᠨ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠣᠢᠷᠠᠲᠤᠨ ᠢᠷᠡᠬᠦ ᠳ᠋ᠦ᠍ ᠬᠣᠭᠣᠰᠣᠨ ᠬᠠᠷᠠ ᠪᠠᠭᠤᠳᠠᠯ ᠨᠡᠭᠦᠭᠡᠯᠲᠦᠨ ᠬᠠᠷᠠᠭᠳᠠᠵᠤ᠂ ᠰᠡᠳᠬᠢᠯ ᠢ᠋ ᠶᠠᠭᠤᠲᠠᠢ ᠠᠶᠠ ᠦᠭᠡᠢ ᠪᠣᠯᠭᠠᠪᠠ᠃ ᠣᠴᠢᠪᠠᠯ ᠳᠥᠷᠪᠡᠨ ᠭᠡᠷ ᠦ᠋ᠨ ᠪᠠᠭᠤᠷᠠᠢ ᠨᠡᠭᠦᠭᠰᠡᠭᠡᠷ ᠲᠠᠩ ᠶᠡᠬᠡ ᠤᠳᠠᠭᠠ ᠦᠭᠡᠢ ᠪᠣᠯᠤᠯᠲᠠᠢ᠃ ᠫᠢᠩ ᠹᠸᠩᠵᠢᠨ ᠳ᠋ᠦ᠍ ᠬᠣᠭᠣᠯᠠ ᠬᠤᠰᠢ ᠶ᠋ᠢᠨ ᠵᠦᠢᠯᠡᠰ ᠦᠯᠡᠳᠡᠭᠡ ᠦᠭᠡᠢ ᠶ᠋ᠢ ᠨᠢ ᠦᠵᠡᠬᠦ ᠳ᠋ᠦ᠍ ᠨᠢᠭᠡ ᠶᠡᠬᠡ ᠠᠶᠤᠨ ᠰᠠᠨᠳᠤᠷᠬᠤ ᠳ᠋ᠤ᠌ ᠬᠦᠷᠦᠭᠡ ᠦᠭᠡᠢ ᠪᠣᠯᠪᠠ ᠤᠤ ᠭᠡᠯᠲᠡᠢ᠃ ᠭᠡᠪᠡᠴᠦ ᠬᠤᠪᠢᠩ᠂ ᠲᠦᠮᠫᠡᠨ᠂ ᠲᠣᠭᠣᠭᠠ᠂ ᠰᠢᠨᠠᠭᠠ ᠠᠷᠠᠰᠤ ᠨᠡᠬᠡᠢ ᠡᠯᠳᠡᠪ ᠶᠠᠭᠤᠮᠠᠰ ᠡᠨᠳᠡ ᠲᠡᠨᠳᠡ ᠦᠭᠡᠢ ᠬᠠᠶᠠᠭᠳᠠᠭᠰᠠᠨ ᠠ᠋ᠴᠠ ᠨᠢ ᠦᠵᠡᠬᠦ ᠳ᠋ᠦ᠍ ᠮᠥᠨ ᠯᠡ ᠠᠷᠭᠠ ᠦᠭᠡᠢ ᠳᠦᠷᠪᠡᠵᠡᠢ᠃ ᠬᠡᠬᠦ ᠳ᠋ᠡᠭᠡᠨ ᠴᠣᠬᠣᠮ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦᠭᠰᠡᠨ ᠨᠢ ᠲᠣᠳᠣᠷᠬᠠᠢ ᠦᠭᠡᠢ ᠲᠤᠯᠠ ᠳᠣᠷᠵᠢ ᠶᠣᠰᠣᠲᠠᠢ ᠲᠥᠭᠡᠷᠢᠭᠰᠡᠨ ᠠᠮᠢᠲᠠᠨ ᠤ᠋ ᠪᠠᠢᠳᠠᠯ ᠢ᠋ᠶ᠋ᠠᠷ ᠡᠷᠭᠢᠨ ᠲᠤᠭᠤᠷᠠᠨ ᠢ᠋ ᠠᠯᠮᠠᠢᠷᠠᠨ ᠰᠢᠷᠳᠡᠭᠡᠳ ᠳᠠᠷᠠᠭᠠ ᠨᠢ ᠴᠠᠰᠤᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠪᠢᠲᠡᠭᠦᠷᠡᠨ ᠡᠳᠡᠭᠡᠷᠡᠭᠰᠡᠨ ᠣᠷᠣ ᠮᠥᠷ ᠢ᠋ ᠣᠯᠤᠨ᠂ ᠬᠣᠢᠲᠤ ᠵᠦᠭ ᠢ᠋ ᠴᠢᠭᠯᠡᠪᠡ᠃ ᠶᠠᠪᠤᠬᠤ ᠳᠣᠳᠣᠮ ᠭᠠᠵᠠᠷ ᠥᠷᠭᠡᠳᠡᠨ ᠬᠥᠬᠥᠴᠢ ᠬᠠᠩᠭᠠᠢ ᠪᠣᠯᠵᠤ ᠴᠠᠰᠤᠨ ᠬᠣᠩᠬᠣᠷ ᠵᠤᠵᠠᠭᠠᠷᠠᠨᠠ᠃ ᠬᠥᠭᠡᠭᠡᠵᠦ ᠶᠠᠪᠤᠭᠠ ᠮᠥᠷ ᠵᠠᠷᠢᠮ ᠳ᠋ᠠᠭᠠᠨ ᠲᠡᠷᠭᠡ ᠴᠢᠷᠭᠠ ᠶᠠᠪᠤᠮᠠ ᠦᠭᠡᠢ ᠭᠠᠵᠠᠷ ᠣᠷᠣᠨ ᠠᠯᠳᠠᠭᠳᠠᠪᠴᠦ ᠬᠣᠨᠢ ᠮᠠᠯ ᠰᠢᠭᠢᠳᠦᠨ ᠬᠠᠶᠠᠭᠳᠠᠭᠰᠠᠨ ᠤᠨᠠᠭᠰᠠᠨ ᠭᠡᠭᠡᠭᠰᠡᠨ ᠶᠠᠭᠤᠮᠠᠰ ᠨᠢ ᠮᠥᠷ ᠪᠣᠯᠤᠨ ᠳᠠᠭᠠᠭᠤᠯᠤᠨᠠ᠃ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠳ᠋ᠦ᠍ ᠥᠨᠥᠬᠢ ᠮᠥᠷ ᠨᠦᠰᠡᠷ ᠶᠡᠬᠡ ᠰᠢᠭᠤᠢ ᠳ᠋ᠤ᠌ ᠣᠷᠣᠵᠤ ᠠᠯᠳᠠᠭᠳᠠᠨ ᠬᠠᠮᠢᠭᠠᠰᠢ ᠶᠠᠪᠤᠪᠠᠯ ᠵᠣᠬᠢᠬᠤ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃
ᠭᠡᠪᠡᠴᠦ ᠠᠯᠤᠰ ᠲᠤ ᠦᠬᠡᠷ ᠮᠥᠭᠡᠷᠡᠯᠳᠦᠬᠦ ᠰᠣᠨᠣᠰᠳᠠᠨᠠ᠃ ᠳᠣᠷᠵᠢ ᠲᠡᠷᠡ ᠵᠦᠭ ᠶᠠᠪᠤᠯᠠ᠃ ᠣᠢ ᠶ᠋ᠢᠨ ᠴᠣᠭᠣᠷᠬᠠᠢ ᠳ᠋ᠤ᠌ ᠭᠡᠨᠡᠳᠲᠡ ᠣᠷᠣᠵᠤ ᠢᠷᠡᠮᠡᠭᠴᠡ ᠦᠬᠡᠷ ᠦ᠋ᠨ ᠪᠠᠷᠠ ᠨᠢᠳᠦᠨ ᠳ᠋ᠦ᠍ ᠲᠣᠰᠴᠤ᠂ ᠲᠡᠷᠡ ᠳᠤᠮᠳᠠ ᠶ᠋ᠢᠨ ᠣᠪᠣᠬᠠᠢ ᠱᠣᠪᠣᠬᠠᠢ ᠴᠦ᠍ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠬᠡᠳᠦᠨ ᠨᠣᠬᠠᠳ ᠤᠴᠢᠷ ᠦᠭᠡᠢ ᠳᠠᠪᠬᠢᠵᠤ᠂ ᠰᠠᠭᠠᠬᠠᠯᠵᠠᠨ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠴᠥᠮ ᠠᠮᠠ ᠪᠣᠭᠣᠯᠲᠠ ᠲᠠᠢ᠂ ᠳᠡᠮᠡᠢ ᠬᠠᠮᠠᠷ ᠢ᠋ᠶ᠋ᠠᠨ ᠭᠤᠳᠤᠴᠢᠭᠤᠯᠤᠨ ᠲᠣᠭᠣᠷᠢᠨ ᠭᠦᠶᠦᠨᠡ᠃ ᠳᠣᠷᠵᠢ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠶ᠋ᠢ ᠲᠠᠨᠢᠨ ᠳᠠᠭᠠᠵᠤ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠬᠠᠩᠬᠠᠢ ᠣᠷᠣᠮ ᠢ᠋ ᠴᠢᠭᠯᠡᠪᠡ᠃ ᠡᠴᠢᠭᠡ ᠡᠬᠡᠨᠡᠷ᠂ ᠳᠡᠭᠦᠦ ᠬᠡᠦᠬᠡᠨ ᠭᠤᠷᠪᠠ ᠨᠢ ᠭᠠᠳᠠᠨᠠ ᠪᠠᠨ《ᠶᠠᠭᠤ ᠪᠣᠢ? ᠬᠡᠨ ᠶᠦᠮ ᠪᠣᠯ ᠠ᠋? ᠦᠭᠡᠢ ᠲᠠ ᠮᠢᠨᠢ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠬᠦ ᠨᠢ ᠶᠠᠭᠠᠬᠢᠬᠤ ᠪᠢᠯᠡ》 ᠭᠡᠵᠦ ᠰᠢᠪᠠᠷ ᠠᠪᠢᠷ ᠶᠠᠷᠢᠯᠴᠠᠵᠤ ᠪᠠᠢᠵᠠᠢ᠃
ᠳᠣᠷᠵᠢ᠂ ᠲᠡᠳᠡᠨ ᠳᠡᠭᠡᠷᠡ ᠣᠴᠢᠩᠭᠤᠲᠠ ᠪᠠᠨ᠄
— ᠵᠠ ᠰᠠᠢᠨ ᠰᠠᠭᠤᠵᠠᠭᠠᠵᠤ ᠪᠠᠢᠨᠠ ᠤᠤ ᠭᠡᠳ ᠲᠡᠳᠡᠨ ᠢ᠋ ᠪᠡᠨ ᠲᠠᠨᠢᠨ ᠣᠭᠲᠣ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠭᠡᠷ ᠤᠷᠤᠭᠤ ᠪᠠᠨ ᠣᠷᠣᠪᠠ᠃ ᠬᠠᠩᠬᠠᠢ ᠣᠷᠣᠮ ᠳ᠋ᠤ᠌ ᠪᠠᠭ ᠬᠠᠷᠠᠩᠭᠤᠢ᠂ ᠨᠥᠭᠥᠭᠡᠳᠦᠭᠦᠯᠡ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠣᠷᠣᠵᠤ ᠢᠷᠡᠭᠡᠳ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠰᠠᠢᠨ ᠰᠠᠭᠤᠵᠠᠭᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠳᠣᠷᠵᠢ ᠶ᠋ᠢᠨ ᠳᠠᠬᠢᠨ ᠬᠡᠯᠡᠬᠦ ᠳ᠋ᠦ᠍ ᠰᠠᠶᠢ ᠲᠠᠨᠢᠨ ᠬᠡᠨ ᠬᠥᠮᠦᠨ ᠦᠭᠡᠢ ᠳᠠᠭᠤ ᠠᠯᠳᠠᠵᠠᠭᠠᠪᠠ᠃
— ᠵᠠ ᠲᠡᠭᠡᠭᠡᠳ ᠴᠢ ᠮᠢᠨᠢ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡᠦ? ᠭᠡᠵᠦ ᠡᠴᠢᠭᠡ ᠭᠡᠯᠢᠭ ᠦ᠋ᠨ ᠠᠰᠠᠭᠤᠬᠤ ᠳ᠋ᠤ᠌᠄
— ᠵᠠ ᠶᠠᠭᠠᠬᠢᠬᠤᠪ ᠳᠠ᠂ ᠶᠡᠷᠦ ᠳ᠋ᠡᠭᠡᠨ ᠠᠮᠢ ᠪᠡᠶᠡ ᠬᠣᠶᠠᠷ ᠢ᠋ᠶ᠋ᠠᠨ ᠯᠠ ᠲᠡᠭᠡᠭᠡᠵᠦ ᠢᠷᠡᠯᠡ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠡᠨᠡ ᠳᠠᠷᠤᠢ ᠴᠥᠮ ᠳᠠᠭᠤ ᠬᠣᠷᠢᠶᠠᠨ ᠨᠢᠭᠡ ᠬᠡᠰᠡᠭ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠭᠡᠲᠡᠯᠡ ᠡᠴᠢᠭᠡ ᠨᠢ ᠠᠮᠠ ᠨᠡᠭᠡᠭᠡᠵᠦ᠄
— ᠵᠠ ᠶᠠᠮᠠᠷ ᠪᠣᠯᠪᠠᠴᠤ ᠠᠮᠢ ᠮᠡᠨᠳᠦ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠬᠠᠮᠤᠭ ᠬᠡᠷᠡᠭ ᠭᠦᠢᠴᠡᠬᠦ ᠨᠢ ᠲᠡᠷᠡ᠃ ᠪᠢᠳᠡ ᠴᠢᠨᠢ ᠴᠦ᠍ ᠶᠠᠭᠠᠬᠢᠬᠤᠪ᠂ ᠮᠥᠨ ᠲᠣᠭᠠ ᠲᠣᠯᠣᠭᠠᠢ ᠪᠦᠷᠢᠨ ᠳᠡ ᠭᠡᠳ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠳᠣᠷᠵᠢ ᠶ᠋ᠢᠨ ᠲᠤᠬᠠᠢ ᠶᠠᠭᠤ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠢ᠋ᠶ᠋ᠡᠨ ᠶᠠᠷᠢᠵᠤ ᠭᠠᠷᠪᠠ᠃ ᠵᠡᠭᠦᠳᠦᠨ ᠳ᠋ᠦ᠍ᠨᠢ ᠳᠣᠷᠵᠢ ᠦᠵᠡᠰᠢ ᠦᠭᠡᠢ ᠮᠠᠭᠤᠬᠠᠢ ᠬᠤᠪᠴᠠᠰᠤ ᠲᠠᠢ ᠣᠷᠣᠵᠤ ᠢᠷᠡᠨ《ᠠᠪᠤ ᠲᠠ᠂ ᠬᠣᠢᠲᠤᠬᠢ ᠶ᠋ᠢ ᠮᠢᠨᠢ ᠤᠩᠰᠢᠭᠤᠯᠵᠤ ᠠᠯᠢ! ᠰᠦᠨᠡᠰᠦ ᠮᠢᠨᠢ ᠰᠠᠢᠬᠠᠨ ᠣᠷᠣᠨ ᠳ᠋ᠤ᠌ ᠣᠴᠢᠵᠤ ᠲᠥᠷᠥᠬᠦ ᠭᠡᠲᠡᠯᠡ ᠠᠭᠤᠯᠠ ᠤᠰᠤ ᠬᠣᠶᠠᠷ ᠵᠠᠮ ᠬᠠᠭᠠᠵᠤ ᠪᠣᠭᠣᠭᠠᠳ ᠶᠠᠪᠤᠭᠤᠯᠬᠤ ᠪᠢᠰᠢ ᠭᠡᠵᠦ》 ᠭᠤᠶᠤᠬᠤ ᠶ᠋ᠢ ᠦᠵᠡᠭᠰᠡᠨ ᠭᠡᠨᠡ᠃ ᠲᠡᠭᠡᠭᠡᠳ ᠭᠡᠯᠢᠭ ᠡᠪᠦᠭᠡᠨ ᠨᠣᠢᠷ ᠠ᠋ᠴᠠ ᠰᠡᠷᠢᠬᠦ ᠲᠡᠢ ᠪᠡᠨ ᠵᠡᠷᠭᠡ ᠳᠣᠷᠵᠢ ᠶ᠋ᠢ ᠯᠠᠪ ᠥᠩᠭᠡᠷᠡᠵᠡᠢ ᠭᠡᠵᠦ ᠭᠣᠣᠯ ᠬᠠᠷᠠᠯᠠᠭᠠᠳ ᠬᠠᠢᠷᠠᠲᠤ ᠪᠡᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠪᠣᠳᠣᠨ ᠵᠣᠪᠠᠭᠰᠠᠨ ᠪᠠᠢᠪᠠ᠃ ᠢᠩᠭᠢᠵᠦ ᠶᠠᠷᠢᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠤᠭ ᠵᠡᠭᠦᠳᠦ ᠪᠡᠨ ᠲᠡᠢᠮᠦ ᠮᠠᠭᠤ ᠢᠷᠣᠠ ᠶ᠋ᠢᠨ ᠪᠢᠰᠢ ᠬᠠᠷᠢᠨ ᠢᠩᠭᠢᠵᠦ ᠠᠮᠢᠳᠤ ᠮᠡᠨᠳᠦ ᠠᠭᠤᠯᠵᠠᠬᠤ ᠶ᠋ᠢ ᠮᠠᠰᠢ ᠮᠡᠷᠭᠡᠨ ᠢ᠋ᠶ᠋ᠡᠷ ᠦᠵᠡᠭᠦᠯᠦᠭᠰᠡᠨ ᠪᠠᠢᠵᠤ ᠭᠡᠵᠦ ᠪᠠᠬᠠᠳᠤᠨ ᠪᠠᠶᠠᠷᠯᠠᠨᠠ᠃ ᠳᠠᠷᠠᠭᠠ ᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠬᠡᠷᠡᠭ ᠢ᠋ ᠮᠥᠨ ᠯᠡ ᠰᠠᠢᠨ ᠰᠠᠢᠬᠠᠨ ᠪᠣᠯᠤᠨᠠ ᠭᠡᠵᠦ ᠲᠠᠭᠠᠪᠤᠷᠢᠯᠠᠨ ᠶᠠᠷᠢᠵᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠥᠭᠵᠢᠭᠡᠪᠡ᠃
ᠭᠤᠷᠪᠠᠨ ᠲᠣᠮᠣ ᠴᠢᠯᠠᠭᠤ ᠲᠤᠯᠤᠭᠰᠠᠨ ᠭᠣᠯᠣᠮᠲᠠ ᠳ᠋ᠤ᠌ ᠭᠡᠰᠢᠭᠦᠦ ᠳᠡᠰ ᠨᠢᠰ ᠠᠪᠤᠯᠴᠠᠨ ᠣᠴᠢ ᠥᠰᠥᠷᠬᠡᠨ ᠳᠦᠷᠡᠯᠵᠡᠵᠦ ᠠᠮᠢ ᠮᠡᠨᠳᠦ ᠣᠷᠣᠭᠰᠠᠳ ᠤ᠋ᠨ ᠴᠢᠷᠠᠢ ᠶ᠋ᠢ ᠭᠡᠷᠡᠯᠲᠦᠭᠦᠯᠦᠨᠡ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠭᠠᠯ ᠲᠣᠭᠣᠭᠠ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠭᠠᠪᠰᠢᠭᠠᠢᠯᠠᠨ ᠬᠥᠳᠡᠯᠵᠦ ᠪᠠᠢᠭᠠ ᠪᠢᠴᠢᠬᠠᠨ ᠡᠬᠡᠨᠡᠷ ᠦᠰᠦᠲᠡᠢ ᠪᠠᠷᠠᠭᠠᠨ ᠬᠠᠴᠠᠷ ᠳᠡᠭᠡᠷᠡ ᠵᠣᠬᠢᠯ ᠪᠣᠯᠤᠭᠰᠠᠨ ᠪᠢᠴᠢᠬᠠᠨ ᠳᠤᠭᠤᠢ ᠬᠥᠬᠡ ᠮᠡᠩᠭᠡ ᠲᠡᠢ ᠮᠢᠬᠠᠯᠢᠭ ᠳᠥᠷᠪᠡᠯᠵᠢᠨ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠡᠮᠡᠭᠲᠡᠢ ᠶ᠋ᠢᠨ ᠴᠢᠷᠠᠢ ᠲᠤᠩ ᠬᠠᠴᠢᠨ᠂ ᠲᠡᠷᠡ ᠪᠡᠷ ᠳᠣᠷᠵᠢ ᠲᠠᠢ ᠵᠤᠯᠭᠠᠭᠠ ᠦᠭᠡᠢ᠂ ᠠᠮᠤᠷ ᠮᠡᠨᠳᠦ ᠶ᠋ᠢ ᠴᠦ᠍ ᠰᠣᠯᠢᠭᠠ ᠦᠭᠡᠢ᠃ ᠣᠳᠣ ᠴᠦ᠍ ᠭᠡᠰᠡᠨ ᠲᠠᠭ ᠳᠤᠭᠤᠢ ᠪᠠᠢᠭᠠ ᠪᠥᠭᠡᠳ ᠭᠡᠪᠡᠴᠦ ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠶᠠᠷ᠂ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠠᠩᠬᠠ ᠡᠳᠡᠨ ᠦ᠌ ᠳ᠋ᠦ᠍ ᠪᠡᠷᠢ ᠪᠣᠯᠤᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠢᠴᠢᠩᠭᠦ᠋ᠢᠷᠢᠨ ᠨᠢᠭᠤᠷ ᠤᠯᠠᠢᠨ ᠭᠥᠯᠢᠷᠡᠵᠡᠢ᠃ ᠡᠨᠡ ᠡᠬᠡᠨᠡᠷ ᠦ᠋ᠨ ᠨᠡᠷᠡ ᠬᠠᠨᠳᠠᠰᠦᠷᠦᠩ᠃ ᠳᠣᠷᠵᠢ ᠶ᠋ᠢ ᠠᠶᠠᠨ ᠳ᠋ᠤ᠌ ᠶᠠᠪᠤᠬᠤ ᠠ᠋ᠴᠠ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠢᠭᠡ ᠨᠢ ᠨᠡᠷᠡ ᠲᠥᠷᠥ ᠲᠡᠢ ᠪᠡᠷ ᠶᠣᠰᠣᠯᠠᠨ ᠠᠪᠴᠤ ᠰᠠᠭᠤᠯᠭᠠᠭᠰᠠᠨ ᠠᠵᠢ᠃ ᠭᠡᠲᠡᠯᠡ ᠳᠣᠷᠵᠢ ᠬᠠᠨᠳᠠᠰᠦᠷᠦᠩ ᠳ᠋ᠦ᠍ ᠤᠭ ᠰᠡᠳᠬᠢᠯ ᠡᠴᠡ ᠳᠤᠮᠳᠠᠭᠤᠷᠬᠠᠨ ᠪᠠᠢᠭᠰᠠᠨ ᠠ᠋ᠴᠠ ᠠᠶᠠᠲᠠᠢ ᠲᠠᠭᠠᠲᠠᠢ ᠵᠠᠩ ᠭᠠᠷᠭᠠᠨ ᠦᠭᠡ ᠬᠡᠯᠡ ᠰᠣᠯᠢᠯᠴᠠᠭᠰᠠᠨ ᠤᠳᠠᠭᠠ ᠦᠭᠡᠢ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠨ ᠭᠠᠷᠬᠤ ᠳ᠋ᠤ᠌ ᠬᠠᠨᠳᠠᠰᠦᠷᠦᠩ ᠡᠭᠦᠳᠡᠨ ᠦ᠌ ᠪᠡᠨ ᠡᠮᠦᠨᠡ ᠵᠣᠭᠰᠣᠨ᠂ ᠤᠷᠤᠰᠬᠤ ᠨᠢᠳᠦᠨ ᠦ᠌ ᠪᠡᠨ ᠨᠢᠯᠪᠤᠰᠤ ᠶ᠋ᠢ ᠪᠠᠢᠨ ᠪᠠᠢᠨ ᠪᠤᠷᠤᠭᠤ ᠬᠠᠷᠠᠨ ᠠᠷᠴᠢᠵᠤ ᠪᠠᠢᠬᠤ ᠳ᠋ᠤᠨᠢ ᠴᠦ᠍ ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠪᠡᠨ ᠵᠢᠭᠰᠢᠨ ᠳᠠᠯᠳᠠ ᠣᠷᠣᠬᠤ ᠶ᠋ᠢᠨ ᠮᠥᠷᠥᠭᠡᠳᠥᠰᠦ ᠪᠣᠯᠵᠤ ᠪᠠᠢᠵᠠᠢ᠃ ᠲᠡᠷᠡ ᠴᠠᠭ ᠠ᠋ᠴᠠ ᠡᠳᠦᠢ ᠬᠦᠷᠲᠡᠯᠡ ᠰᠡᠳᠬᠢᠯ ᠳ᠋ᠡᠭᠡᠨ ᠨᠢᠭᠡ ᠴᠦ᠍ ᠤᠳᠠᠭᠠ ᠬᠠᠨᠳᠠᠰᠦᠷᠦᠩ ᠢ᠋ ᠳᠤᠷᠠᠰᠤᠨ ᠰᠠᠨᠠᠭᠰᠠᠨ ᠦᠭᠡᠢ᠂ ᠭᠠᠭᠴᠠᠬᠠᠨ ᠣᠳᠣ ᠯᠠ ᠬᠠᠨᠳᠠᠰᠦᠷᠦᠩ ᠦ᠋ᠨ ᠨᠢᠭᠤᠷᠠᠨ ᠳ᠋ᠤ᠌ ᠪᠣᠭᠰᠢᠬᠰᠠᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ᠋ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠭᠯᠠᠨ ᠬᠠᠢᠷᠠᠯᠠᠨ ᠡᠩᠬᠦᠷᠡᠢᠯᠡᠬᠦ ᠰᠡᠳᠬᠢᠯ ᠲᠥᠷᠥᠪᠡ᠃
ᠠᠢᠯ ᠤ᠋ᠨ ᠬᠥᠮᠦᠰ ᠳᠣᠷᠵᠢ ᠶ᠋ᠢᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠨ ᠤᠪᠤᠨ ᠴᠤᠪᠤᠨ ᠣᠷᠣᠵᠤ ᠢᠷᠡᠨ ᠬᠠᠩᠬᠠᠢ ᠣᠷᠣᠮ ᠳ᠋ᠤ᠌ ᠴᠢᠬᠢᠯᠳᠦᠬᠦ ᠪᠣᠯᠪᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠳᠣᠷᠵᠢ ᠶ᠋ᠢᠨ ᠬᠠᠷᠠ ᠪᠠᠭᠠ ᠠ᠋ᠴᠠ ᠨᠠᠢᠵᠢ ᠰᠠᠮᠪᠤᠤ ᠭᠡᠭᠴᠢ ᠪᠠᠢᠪᠠ᠃ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠪᠦᠷᠢ ᠲᠡᠢ ᠠᠮᠤᠷ ᠮᠡᠨᠳᠦ ᠮᠡᠳᠡᠯᠴᠡᠬᠦ ᠳ᠋ᠦ᠍《ᠠᠮᠢ ᠮᠡᠨᠳᠦ ᠯᠠ ᠶᠠᠪᠤᠵᠤ ᠢᠷᠡᠯᠡ》 ᠭᠡᠵᠦ ᠬᠠᠷᠢᠭᠤᠯᠬᠤ ᠶ᠋ᠢ ᠲᠤᠰ ᠪᠦᠷᠢ ᠪᠡᠨ ᠳᠡᠭᠡᠳᠦ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠪᠣᠳᠣᠵᠤ ᠪᠠᠶᠠᠷ ᠪᠠᠬᠠᠳᠤᠯ ᠪᠣᠯᠤᠨᠠ᠃ ᠳᠣᠷᠵᠢ ᠶ᠋ᠢᠨ ᠬᠠᠮᠢᠭᠠ ᠭᠦᠷᠦᠨ ᠶᠠᠭᠤ ᠭᠡᠭᠴᠢ ᠶ᠋ᠢ ᠦᠵᠡᠨ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠡᠬᠢᠯᠡᠭᠡᠳ ᠪᠤᠷᠬᠠᠨ ᠭᠣᠨᠴᠣᠭᠰᠤᠮ ᠮᠢᠨᠢ ᠭᠡᠴᠡᠭᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠵᠠᠯᠪᠠᠷᠢᠨᠠ᠃ ᠭᠠᠭᠴᠠᠬᠠᠨ ᠰᠠᠮᠪᠤᠤ ᠲᠥᠷᠥᠯᠬᠢ ᠰᠡᠳᠬᠢᠯ ᠪᠣᠷᠭᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠶᠠ ᠨᠢᠭᠡ ᠱᠠᠭᠰᠢᠷᠠᠨ ᠴᠢᠬᠢ ᠲᠠᠯᠪᠢᠨᠠ᠃ ᠳᠣᠷᠵᠢ ᠶ᠋ᠢᠨ ᠶᠠᠷᠢᠶᠠ ᠬᠠᠷᠠ ᠪᠤᠤᠷᠠ ᠶ᠋ᠢ ᠬᠠᠶᠠᠭᠰᠠᠨ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠮᠣᠩᠭᠣᠯ ᠠᠶᠠᠨᠴᠢᠨ ᠲᠠᠢ ᠬᠡᠷᠬᠢᠨ ᠳᠠᠭᠠᠷᠢᠯᠳᠤᠭᠰᠠᠨ ᠢ᠋ ᠶᠠᠷᠢᠬᠤ ᠳ᠋ᠤ᠌ ᠬᠥᠮᠦᠰ᠂ ᠶᠣᠰᠣᠲᠠᠢ ᠯᠠ ᠪᠤᠷᠬᠠᠨ ᠭᠣᠨᠴᠣᠭᠰᠤᠮ ᠤ᠋ᠨ ᠠᠪᠤᠷᠠᠯ ᠢᠯᠡᠳᠲᠡ ᠪᠡᠷ ᠲᠡᠳᠬᠦᠵᠡᠢ ᠭᠡᠵᠦ ᠱᠤᠤᠭᠢᠯᠳᠤᠭᠠᠳ᠂ ᠡᠭᠦᠨᠴᠢᠯᠡᠨ ᠣᠳᠣ ᠮᠠᠨ ᠤ᠋ ᠤᠯᠤᠰ ᠢ᠋ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠪᠠᠷᠤᠨ ᠵᠠᠩᠵᠤᠨ ᠠᠪᠤᠷᠠᠵᠤ ᠪᠠᠢᠭᠠ ᠰᠢᠦ ᠭᠡᠵᠦ ᠪᠠᠬᠠᠳᠤᠯ ᠪᠣᠯᠭᠠᠨ ᠬᠡᠯᠡᠪᠡ᠃
ᠳᠣᠷᠵᠢ ᠪᠢ ᠮᠡᠳᠡᠨᠡ! ᠭᠡᠳ ᠬᠦᠷᠢᠶᠡ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍ ᠬᠥᠮᠦᠰ ᠦ᠋ᠨ ᠨᠢᠳᠦ ᠡᠷᠡᠰ ᠰᠡᠷᠭᠦᠨ᠄ ᠵᠠ ᠲᠡᠭᠡᠭᠡᠳ ᠬᠦᠷᠢᠶᠡ ᠪᠡᠷ ᠶᠠᠮᠠᠷ ᠰᠢᠦ ᠪᠠᠢᠨᠠ? ᠭᠡᠵᠦ ᠵᠦᠭ ᠪᠦᠷᠢ ᠡᠴᠡ ᠳᠥᠭᠥᠨ ᠰᠠᠭᠤᠵᠤ ᠠᠰᠠᠭᠤᠪᠠ᠃ ᠲᠡᠭᠡᠭᠡᠳ ᠳᠣᠷᠵᠢ ᠶ᠋ᠢᠨ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠬᠡᠯᠡᠬᠦ ᠳ᠋ᠦ᠍ ᠲᠡᠳᠡ ᠨᠢᠳᠦ ᠡᠷᠭᠢᠯᠳᠦᠭᠦᠯᠦᠨ ᠭᠠᠢᠬᠠᠨ᠂ ᠵᠠᠷᠢᠮ ᠨᠢ《ᠴᠢ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠭᠠ ᠪᠢᠰᠢ ᠪᠢᠵᠡ》 ᠬᠢᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌《ᠴᠢ ᠨᠡᠭᠡᠷᠡᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠯᠡ ᠭᠡᠵᠦ ᠤᠤ》 ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠯᠠᠪᠯᠠᠨᠠ᠃ ᠲᠡᠷᠡ ᠳᠤᠮᠳᠠ ᠡᠴᠢᠭᠡ ᠭᠡᠯᠢᠭ ᠦᠬᠦᠪᠡᠴᠦ ᠰᠡᠭᠡᠪᠡᠴᠦ ᠪᠠᠷᠤᠨ ᠤᠩᠺᠸᠷᠡᠨ ᠢ᠋ ᠵᠠᠯᠪᠠᠷᠢᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠮᠡᠲᠦ᠄
— ᠦᠭᠡᠢ ᠭᠡᠪᠡ!
ᠬᠣᠣᠷᠲᠠᠨ ᠢ᠋ ᠠᠷᠢᠯᠭᠠᠭᠴᠢ ᠪᠤᠷᠬᠠᠳ ᠨᠣᠮᠣᠬᠠᠨ ᠳᠦᠷᠢ ᠪᠡᠷ ᠦᠯᠦ ᠵᠠᠯᠠᠷᠠᠨᠠ ᠭᠡᠵᠦ ᠮᠠ ᠸᠠᠩ ᠤ᠋ᠨ ᠯᠦᠩᠲᠠᠩ ᠳ᠋ᠤ᠌ ᠠᠢᠯᠠᠳᠤᠭᠰᠠᠨ ᠪᠠᠢᠳᠠᠭ ᠭᠡᠳᠡᠭ ᠠ᠋᠃ ᠦᠢᠯᠡᠲᠦ ᠠᠮᠢᠲᠠᠨ ᠦᠢᠯᠡ ᠳ᠋ᠡᠭᠡᠨ ᠦᠷᠡᠭᠳᠡᠵᠦ ᠯᠡ ᠪᠠᠢᠭᠠ ᠪᠢᠵᠡ᠃ ᠲᠡᠷᠡ ᠶᠠᠭᠠᠬᠢᠬᠤᠪ᠂ ᠵᠦᠭᠡᠷ ᠤᠳᠠᠬᠤ ᠦᠭᠡᠢ ᠴᠠᠭ ᠲᠥᠷᠥ ᠲᠠᠢᠪᠤᠰᠢᠷᠠᠨ ᠠᠷᠠᠳ ᠪᠢᠳᠡᠨ ᠳ᠋ᠦ᠍ ᠠᠷᠪᠠ ᠲᠠᠪᠤ ᠪᠠᠨ ᠠᠮᠤᠷ ᠵᠢᠮᠦᠷ ᠬᠠᠷᠢᠭᠤᠯᠤᠨ ᠰᠠᠭᠤᠬᠤ ᠴᠠᠭ ᠢᠷᠡᠨᠡ ᠪᠣᠢ ᠭᠡᠪᠡ᠃
ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠰ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠯᠢᠭ ᠳᠣᠷᠵᠢ ᠳ᠋ᠤ᠌᠄ ᠣᠯᠠᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠠᠯᠳᠠᠭᠳᠠᠭᠤᠯᠬᠤ ᠡᠢᠮᠦ ᠦᠭᠡ ᠪᠤᠤ ᠶᠠᠷᠢ! ᠭᠡᠵᠦ ᠵᠠᠬᠢᠪᠠ᠃
— — — —
ᠣᠢ ᠦᠭᠡᠢ –
① ᠤᠢᠰᠴᠤ ᠮᠣᠬᠣᠮᠠᠷ ᠦᠭᠡᠢ᠂ ᠣᠢᠭᠠ ᠦᠭᠡᠢ᠃
② ᠮᠠᠰᠢ ᠵᠦᠷᠯᠡᠰᠢ ᠦᠭᠡᠢ᠂ ᠬᠣᠣᠰ ᠦᠭᠡᠢ ᠭᠡᠵᠦ·~ ᠰᠠᠢᠬᠠᠨ ᠡᠳ᠋᠃ /~ ᠣᠢ ᠬᠠᠢ ᠶᠡᠬᠡ ᠤᠢᠯᠠᠵᠤ ᠬᠠᠢᠯᠠᠬᠤ ᠶ᠋ᠢᠨ ᠴᠢᠮᠡᠭᠡ᠂ /~ ᠪᠠᠢᠳᠠᠯ᠄ ᠪᠦᠭᠦᠳᠡᠭᠡᠷ ᠤᠰᠤᠨ ᠨᠢᠳᠦᠯᠡᠵᠦ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ